\id PHP
\h Filipenses
\mt Yetsi‑ni udhelha Pabluha ge ka benne ria leke Jesucristuha seꞌeke lheꞌesi Filipos
\c 1
\p
\v 1 Neti Pablo lenia Timoteo‑ni ankatu benne rixúni Jesucristuha. Ridhelhatu yetsi‑ni ge iyá ttele, lebiꞌi ka benne seꞌele lheꞌesi Filipos‑na, delába lebiꞌi ka benne chi ankale ge Tata Do Yebáha de babale len Jesucristuha. Lhe anágaba ridhelhagabatu yetsi‑ni len lebiꞌi ka benne riseꞌele arlo adí ka benne chi ankake ge Tata Do Yebáha ki ruleꞌenle ke, lhe anágaba ridhelhatu yetsi‑ni len adíle ka benne rute nále lenke.
\v 2 Xxudiriꞌi do yebáha lhe Jesucristu benne anke Xxanariꞌiha, lake edá leke aka lenke le lhe useꞌeke le xen su lasi lhe.
\s Pabluha rugwebie Tata Do Yebáha ixkixaru lhe rinnabe // ge ka benne chi ria leke Jesucristuha
\p
\v 3 Kua rexxaba lasia le rugwea Tata Do Yebaa kiaha ixkixaru gele,
\v 4 lhe satíaba ttixka rilhapia tisa lenie yalhá itta redú lasia tti rinnabaa lenie ge iyá ttele,
\v 5 kumu lebiꞌi attili sisiꞌa tte biyieninle ka tisa tseha, delába ka tisa rigixxiꞌake ge Cristuha lhe axtaba nnanna sa ruteba nále len neti ki radhi ka tisa geeha.
\v 6 Neti xenba lasia deki Tata Do Yebaa benne uduloe runie sina tse lheꞌe lastole‑na, la benneha‑ba ulhuxa looe na ganna chi bisia sá esia Jesucristuha yiesi lo yu‑ni.
\v 7 Tseba nuní runia tti rulaba lasia ge iyá ttele aní, kumu satíaba yuꞌule lheꞌe lastoa, labí rixulhati le kumu redí baale len neti elha tse runna Tata Do Yebáha lenriꞌi, meskiba tea lisiyya lhe meskiba atti ririaya riso dua arlo ka uxtisi kini rekabia gekani, rigixxiꞌabaa deki ka tisa ge Cristuha ankake gwalí.
\v 8 Tata Do Yebáha yu xeabe attiba rakani Jesucristuha gele, aníha‑gaba neti yalhá rakati gele.
\v 9 Rinnabaa lenie ki aka chiettiruni ge luesile, lhe rinnabagabaa lenie ki utebie elha rieni gele lhe elha yuu gele lhe.
\v 10 Aníha ki tte denle gá tee nu anka tse kini ganna chi isia sá esia Cristuha, laꞌania nna chi seꞌele ruinle nu anka tagaꞌa tse nna abittu bi ge itisale.
\v 11 Laꞌaniagaba otso dule iyá nu tse benle, de ben Jesucristuha le ayuda. Aníha nuha ki ugwele lidhaka Tata Do Yebáha lhe kini inná xxeni lebie lhe.
\s Adírula radhi ka tisa ge Jesucristuha de tee Pabluha lisiyya
\p
\v 12 Xa betsi to, raka lasia unale deki iyába nu ratea‑ni rixúna kini radhi chiettiru ka tisa tse rigixxiꞌaya ge Cristuha,
\v 13 kumu iyába ka soldadu ka nu ruyúkana roꞌo guskadu ata do nu rinnabia‑ni, iyába ka nuní chi binakana de rekibaa rigixxiꞌaya ge Cristuha nna tea lisiyya, anágaba nna chigaba bina adíru ka benne.
\v 14 Ixe ka betsi to geriꞌi de ruyúke tea lisiyya‑ni, de nuha nna ruxxenrula leke ge benne anke Xxanariꞌiha, nna reyaxarukanie rigixxiꞌake ka tisa ge Tata Do Yebáha nna labí rasikanie.
\p
\v 15 Gwalí galá ttu chupakana, de ritisibakinna neti lhe de ruinbakana ichúkana loa nna rekikana rigixxiꞌakana ge Cristuha; ttaka attu chupake nna elha tsebakanie rekike rigixxiꞌake ge benneha.
\v 16 Ka benne‑ni elha tsebakanie rekike ugixxiꞌa, kumu de rakakanie kia lhe kumu yúbake deki Tata Do Yebáha‑ba bedhaꞌane neti lheꞌe lisiyya‑ni, kini odiláya ka tisa tse geeha ki abittu chu loke.
\v 17 Ttaka ka nu rutía di lekani neti, ka nuná labí ilaakinna rekikana ugixxiꞌa. Sunruba ruinkana aná kumu rakakinna de nu ruinkanaha nna uyúrua elha disa lheꞌe lisiyya‑ni.
\p
\v 18 Ttaka, ¿bí de ruinna? Gaxabasina, meskiba elha tsekinna lhe meskiba abittu lhe, nu rakarula doelha chadhi ka tisa ge Cristuha. De nuha nna du itta lasia nna si edúrula itta lasia,
\v 19 kumu yua de rinnabale kia len Tata Do Yebáha lhe de raka len Espíritu ge Jesucristuha neti, de nuha nna lhaaya lheꞌe lisiyya‑ni.
\v 20 Neti raka lasia lhe rulheda lasia abittu bixa ge dhia elhittu. Nu ruinlaa ruxxen tsitsirula lasia attiba satía chi labiti runia, anágaba nnanna len nu ratea‑ni uleꞌe Cristuha nu xxeni ra lebie, sila sa doa anka bania lhe sila chi uttia lhe.
\v 21 Kumu neti nnanna laka sa doa anka bania, Cristuha‑ba rudo lasia; ganna chi uttiaha nna tserula chi saríana neti.
\v 22 Ttaka ganna dhorua aka bania, ganna de dhorua aka bania, nuha gwaxúruna kini kwenia lo sina ge Tata Do Yebáha, laꞌanialigaba nna labí yua gá tee nu ukwea.
\v 23 Ttiba ttu nu du roꞌo belhaꞌa ankaa. Ladeꞌa tte, aní chi rakati neti gattia kini eyaꞌaya dhoa len Cristuha, kumu adírula tse nuha.
\v 24 Ttaka de lebiꞌi nna rakarula doelha eyaꞌanaa aka bania ki useꞌe tsitsirua le.
\v 25 Ge nuníba ruxxen lasia, de nuha nna yua deki gweyaꞌanrubaa dhoa len lebiꞌi kini tseꞌe tsitsirule lhe tseꞌe ittarule de ria lele Jesucristuha,
\v 26 kini ganna chi beriaya lisiyya‑ni nna esiaya len lebiꞌi attu libe, laꞌania nna adírula itta edú lele de ilenle nu tse ben Jesucristuha len neti.
\p
\v 27 Sun tte nu raka lasia: gwaltseꞌe gwaluni tti tte raxxína len ka tisa tse, delába ka tisa rigixxiꞌake ge Cristuha, kini anáchu sila itaa etelannia le o sila rea idittu, raka lasia iyienti gele deki gwa seꞌe tsitsibale lhe ttúba du lele lhe. Anágaba nna rakagaba lasia iyienti deki iyábale ttúba reguꞌelha lele ki rigixxiꞌale ka tisa ria leriꞌi ge Cristuha.
\v 28 Abittu gasinle arlo ka nu reseꞌe disakana lole, kumu nu ruin ka nuná runna liina deki tsiabakana ata tseꞌe lookana, lebiꞌi nna gwalábale, kumu Tata Do Yebáha‑ba unie ki lhaale.
\v 29 Kumu Tata Do Yebáha laa sunruga bedá lebie tsia lele ge Cristuha, anágaba nna bedágaba lebie kini lebiꞌi satele uyúle elha disa de ria lele gebie.
\v 30 Ratebale luesi nu chi bilenle gwatea ttuha lhe luesi nu runale ratea nnanna lhe.
\c 2
\s Abittu inná xxeni lele, gwaluinla tti ben Jesucristuha
\p
\v 1 Laxkala ganna lebiꞌi gwa re tsitsi lele de babale len Cristuha, lhe ganna gwa seꞌele xen su lasi de rakanie gele, lhe anágaba ganna gwa du lenle Espíritu ge Tata Do Yebáha, lhe ganna gwa raka siꞌin luesile, lhe anágaba ganna gwa ratua le luesile lhe,
\v 2 ganna aníha ruinle, laꞌania nna ittaru odúle lasia ganna ttixka ttúba udú lele, lhe ganna ttixka turoꞌoba akin ge luesile lhe, anágaba nna ganna turoꞌoba kweki lele, lhe ganna ttúba nu udo ikile uinle.
\v 3 Abittu uinle ttaba ttixka bixa ttu uinle, nigaba tsuꞌule nu rito rineruba. Lebiꞌi gwaluinla ge benne abí ra xxeni lebie; gwaluin deki dakarula adí ka benne tti lebiꞌi.
\v 4 Kua ttu ttule abittu suna nu saría tsebana le uinle; gwaluinla nu dika saría tsena iyále.
\p
\v 5 Gwaludola ikile tti bedo iki Jesucristuha.
\q
\v 6 Benneha, meskiba anke Diosi,
\q labí benie deki lee anke turoꞌo len Tata Do Yebáha.
\q
\v 7 Nu benlee: daka anála bedúe nu ra xxeni leeha
\q nna la kwinabe borexxa gaa lebie nna benie ttiba ttu benne toꞌo lo sina;
\q beyake attiba nuxaba benne.
\q
\v 8 Tti ugwekie yiesi lo yu‑niha, tti uke benne attiba ankariꞌi,
\q laꞌania la labe bedaa ikie benie nu ra Tata Do Yebáha nna uxielhe uttie.
\q Aná nna laa latsiruga uttie,
\q1 lo ya kurusi nuha uttie.
\q
\v 9 De nuha nna Tata Do Yebáha benie bie benne ra xxeniru lebie,
\q lhe begwegabe bie ttu ladie kini uke benne rinnabia xxeniru delo iyá tte ka nu rinnabia seꞌe yiesi lo yu‑ni.
\q
\v 10 Aníha kini de ra xxeni le Jesús‑ni nna
\q iyá tte ka benne seꞌe yebáha lhe ka benne seꞌe yiesi lo yu‑ni lhe ka benne seꞌe lhiꞌu yuha, udú xibike arloe,
\q
\v 11 lhe iyá rechake innáke deki Jesucristuha anke Xxanariꞌi.
\q Aníha kini inná xxeni le Tata Do Yebaa benne anke Xxudiriꞌiha.
\s Latsiru gwaluni kini akale ttiba ttu xiani ge ka benne // seꞌe yiesi lo yu‑ni
\p
\v 12 Lebiꞌi xa betsi to kia, attiba benle tti udoa len lebiꞌiha, satíaba bedole tisa kia, adírula nnanna doa idittu, gwaludorula tisa kia. Len elha rasi gwaltseꞌe gwaluin kini uleꞌe deki chi bodilaa Tata Do Yebáha le lo ka tulha gele‑na,
\v 13 kumu Tata Do Yebáha‑ba runie ki rokinni ikile rudole tisa gebie, lhe lagabe raka lenie le kini gwa ridaale ruinle nu rabie.
\p
\v 14 Bixaba uinle, abittu itú inne lhábale tti uinle nuha o itú itilha tisabale.
\v 15 Aníha kini abittu bi ge inittile, lhe abittu bi ge itisale lhe, sinuki tseꞌelale akale atti galába xiꞌin Tata Do Yebáha, ruinle tagaꞌa nu anka tse lagwi ge ka nu ruin satsa lhe ka nu a du itá lekani seꞌe yiesi lo yu‑ni lhe. Lagwi ge ka nuná ilá nu tse ruinle, akale attiba ka beli‑na riguꞌukana xiani yiesi lo yu‑ni.
\v 16 Seꞌele den tsitsile ka tisa ge Tata Do Yebáha ruinle nu ráke, delába ka tisa ruinke ki aka ben ka benne ttu dia lii, kini ganna chi bisia sá esia Cristuha, laꞌania nna inná xxeni lasia tti iláti deki labí kwentaba ugwekia betú besábati de beleꞌenia le.
\v 17 Kumu nu tse ruinle de ria lele Tata Do Yebáha, nuná ankana attiba ttu úna rutele lenie. Anágaba neti, meskila uttikana neti, elhutti kiaha akagabana attiba ttu úna utea lenie itupa len nu tse rutele‑na. De nuha nna ittaba redú lasia lhe redeaka tábati len lebiꞌi.
\v 18 Anágaba lebiꞌi gwalodú itta lele lhe gwaledeaka tenle len neti lhe.
\s Timoteo‑ni lhe Epafrodito‑ni lhe, ka benne‑ni nuní // redhelha Pabluha
\p
\v 19 Ruxxen lasia ge Jesús benne anke Xxanariꞌiha deki gwadhelha tte gaabaa Timoteo‑ni kini itana ata seꞌele‑na, ki anágaba neti eyaka xen lasia ganna chi binaa bixa ratele,
\v 20 kumu lanú attu benne doti runie tti ruin Timoteo‑ni, ttu benne gwalíga uchacha ikie gele tti ruchacha iki benne‑ni.
\v 21 Kumu adíkana suna nu anka gebakani ruchacha ikikani nna labí ruchacha ikikani nu anka ge Jesucristuha.
\v 22 Lebiꞌi chiba yule nu tse ruin Timoteo‑ni. Lana rixúna len neti ttiba ttu xiꞌini len ttu xxudi kini rigixxiꞌatu ka tisa ge Cristuha.
\v 23 Laxkala lana ruxxen lasia edhelhaa na ki etelannina le, sun tteba ganna chi uka xen lasia bixa satea, si eriaya lisiyya o abittu.
\v 24 Anágaba neti, ruxxengaba lasia ge Tata Xisiha gwita tte gaabaa etelannia le.
\p
\v 25 Ttaka nnanna rulaba lasia raka doelha edhelhaa betsi to kia‑ni ata seꞌele‑na, delába Epafrodito‑ni. Benne‑ni nuní riben lania lhe turoꞌoba rutto ruchíatu ratetu lo sina ge Tata Do Yebáha. Benne‑nigaba nuha udhelhale kini rixútie tti rikinati ttu bixa.
\v 26 Labie nuní edhelhaa kumu yalhá re lebie ilánie iyále lhe yalhá rudúne de binale deki unibe.
\v 27 Gwalí galá unibe, chi tteba gattie. Ttaka Tata Do Yebáha gwa gwatuaba lebie bie kini abittu uttie. Anna laa suna labie gwatua lebie, iyágaba neti gwatua lebie. Aníha ben Tata Do Yebáha kini abitturu dhu chietti siꞌi lasia.
\v 28 De nuha nna chi rudiuba lasia edhelhaa bie kini lebiꞌi edú itta lele tti ilenlee, kini anágaba neti abittu tteru uchacha ikia.
\v 29 Gwalodú itta lele gwalolabie tti esie. Gwalolabie atti galába rolabiriꞌi ttu benne chi babe len Tata Xisiha, lhe anágaba gwalugwe lidhaka ka benne ankake attiba labie,
\v 30 kumu delo sina ge Cristuha nna bexunnina gebie gattie. Bexunnina gebie gattie de bixúe len neti, benie sina nu labí aka gele uinle de seꞌele idittu.
\c 3
\s Rakarula doelha uinbiariꞌi Cristuha
\p
\v 1 Nnanna xa betsi to kia, gwaledeaka tenle de babale len Tata Xisiha. Neti labí ritisiti de rigixxiꞌania le satti balha nu runia lo yetsi‑ni, kumu ankaba nuní nu dika ixú len lebiꞌi.
\p
\v 2 Gwaluyú gele len ka nu ruin satsa reki naa, ka nu labí rigixxiꞌa tsekana ka tisa ge Tata Do Yebáha. Ka nuná rálakana deki ichúliba lo bela lati ka benne biyú‑na, laꞌanialiba nna gwakake ge Tata Do Yebáha.
\v 3 Ka nuná labí liikinna. Riꞌila nuní gwalíga ankariꞌi ge Tata Do Yebáha, kumu Espíritu geeha runie kini rudú xibiriꞌi arlo Tata Do Yebáha, lhe runie ki ridú itta leriꞌi de babariꞌi len Jesucristuha nna labí ruxxen leriꞌi ge nu anka lo bela latiriꞌi.
\v 4 Neti gwa tegaba roꞌa uxxen lasia ge nu anka lo bela latia. Ganna ttu benne ruxxen lebie ge nu anka lo bela latie, neti térula roꞌa uxxen lasia ge nuná,
\v 5 kumu neti xxunu ubisaruba chi ankati tti urú lo bela latia, lhe ankaa benne datiaya Israel‑ni, delába benne uka xuttoriꞌiha, lhe ankagabaa xiꞌin ka benne uka xxudike Benjamín‑ni, lhe anágaba ankagabaa nu hebreo xiꞌini ka benne hebreo, lhe ukagabaa benne biselaa ka fariseo‑ni, delába ka nu rudaxxu tsitsikana nu ra lo bia bennabi bodhaꞌan Moisés‑ni,
\v 6 lhe anágaba ukagabaa ttu benne bedo xxattana lasia, delába upa sunaa nu anka ge Tata Do Yebáha. De nuha nna betía di lasia ka benne ria leke Jesús‑ni nna gwanalhaa ke bedhaka disaa ke. Anágaba nna ge iyába nu ra lo bia bennabi bodhaꞌan Moisés‑ni, bedo tsitsibaa tisa geni; niruba latti a binittia.
\p
\v 7 Ttaka iyába nu begwea lidhakani laꞌania, nnanna labíru daka nuha len neti kumu de chi ria lasia Cristuha.
\v 8 Nnanna iyába nuha labíru rugwea lidhakani kumu dakarula len neti de chi ankabiati Jesucristu benne runie neti mandaduha. De rakati ge benneha nna bedhá ikia iyá nu begwea lidhakani laꞌania. Nnanna ttiba ttu nu abíru ixú chi anka nuha len neti. Nu ruinlaa isinaa ki uin kia Jesucristuha
\v 9 lhe kini akaa ttu benne dhua lenbie lhe. Labí de rudoa tisa ge nu ra lo bia bennabi bodhaꞌan Moisés‑ni nna ankaa benne ruin tse. ¡Koꞌo! Ankaa benne ruin tse de ria lasia Cristuha. Tata Do Yebáha runie neti benne tse de ria lasia bie.
\v 10 Aníha kini isinaa uinbia tsegaa Cristuha, lhe dhia nu tsitsi ra lebie de beyadhe lo elhuttiha, lhe anágaba satea uyúa elha disa luesi elha disa biyú benneha, lhe dhielhaa uttikana neti ttiba benneha uxielhe bettikane.
\v 11 Aníha kini ni kina gaa gweyaka benbaa ganna chi beyaka ben ka benne chi uttiha.
\s Pabluha rigixxiꞌabie gasina uin ka benne chi seꞌeke // lo neda ge Cristuha
\p
\v 12 Laa rigaa deki chi udaaya benbia tsea Cristuha, lhe nigaba laa chiga bisinaa akaa benne ruin tagaꞌa nu anka tse. ¡Koꞌo! Sinuki nu ruinlaa, runia doelha diaya, kini ni kina gaa gwadaabaa akaa nu raka le Jesucristuha akaa, kumu ki de nuha‑la uxie neti.
\v 13 Xa betsi to, neti labí ria deki chi udaaya ukaa nu raka le benneha akaa; ttaka ttu nu runia, ruxxulhala lasia ge nu benia ttuha nna diaya rudo ikia ge nu si daa.
\v 14 Neti yuꞌubaa neda diaya ttiba ttu benne dia riresu; ruttipaba lasia diaya ki isinaa ata chi gaꞌanna isinaa, kini dhia nu tse ralhaa dhia yebáha. Tata Do Yebáha uxie neti ki dhia nu tse de babaa len Jesucristuha.
\v 15 Laxkala iyábariꞌi ka benne chi seꞌe tsitsiriꞌi lo neda ge Jesucristuha, aní teeki ulaba leriꞌi. Ganna si lebiꞌi rulaba lele attu nu subi, Tata Do Yebáha gwagixxiꞌagabanie le deki labí tse anka nu rulaba leleha.
\v 16 Ttaka riꞌi teeki tseꞌeriꞌi uinriꞌi nu raxxína len nu beleꞌen Tata Do Yebáha riꞌi.
\p
\v 17 Betsi to, gwaluni tti runia‑ni lhe gwalulanni ge ka benne ruinke tti tteba chi beleꞌentu leha,
\v 18 kumu naa reki ixe ka nu riguꞌu niꞌakani nu gwate Cristuha lo ya kurusiha, delába ka nu chigaba utixxiꞌania le gekani ixe lidú, nnanna nna itú ribesibaa redegixxiꞌaya gekani attu libe.
\v 19 Ka nuná tsiabakana ata tseꞌe lookana, kumu nu satsa reta lekani ruinkana, ttiba ttu diosi gekani reyaka nuná, kumu suna nunába rudo lekani ruinkana, lhe anágaba nna nu dika ettukinna geniha, rapilakana de ruinkana nuha. Ka nuná suna ge nu raka yiesi lo yu‑niba do ikikani.
\v 20 Ttaka riꞌi ankariꞌi benne chi babariꞌi yebáha ata dedá benne odilábie riꞌiha, delába Jesucristu benne anke Xxanariꞌiha. Benneha nuha seꞌeriꞌi ubeda.
\v 21 Labie otseabie latiriꞌi, delába latiriꞌi nu riseꞌe loo reyakana yu, nna eyonie na atti anka latie nu ra xxeni leni. Nuní unie len nu ra tsitsi leeha, delába nu rixúnie kini iyá tte nu seꞌe yiesi lo yu‑ni rudokana tisa gebie.
\c 4
\s Latsiru gwaltseꞌe de chi babale len Tata Xisiha
\p
\v 1 Xa betsi to kia, lebiꞌi nuná raka xxattati gele lhe re xxatta lasia iláti le lhe. Lebiꞌi nuná ankale elha gwedeaka lasi kia, lhe ankale nu runi ki ra xxeni lasia lhe. Rulisaa le, tsitsi gwaltseꞌe de chi babale len Tata Xisiha.
\p
\v 2 Evodia‑na lhe Síntique‑na lhe, rinnabaa lenkana eseꞌe tse len luesikani, lhe ttúba ulaba lekani de chi babakana len Tata Xisiha.
\v 3 Anágaba lu xa Sísigo benne abittuba rudhanlu neti, rinnabaa lenlu aka lenlu ka nuila‑na kini eseꞌe tsekana, kumu lakana lenkana Clemente‑na lhe adíru ka benne ribenke len neti, lake nuná beguꞌelha leke ki ugwadhi ka tisa ge Cristuha. Ka benne‑na nuná chi dia láke lo yetsi ata dia lá ka benne aka benke ttu dia lii yebáha.
\p
\v 4 Satía gwaludú itta lele de chi babale len Tata Xisiha. Rulisaa le attu libe: gwalodú itta lele,
\v 5 lhe gwaluni kini iyá ka benne ilákanie deki lebiꞌi ankale benne re tse lele. Tata Xisiha chi tteba dabigana esie.
\p
\v 6 Abittu uchacha ikile ge ttu bixa. Nu uinlale, gwalutso dula iyá nu ruchacha ikile geni arlo Tata Do Yebáha, gwalinnaba lenie lhe gwalugwe bie ixkixaru lhe.
\v 7 Aníha nna Tata Do Yebáha unie kini tseꞌele xen su lasi. Ganna chi beseꞌebie le xen su lasi, laꞌania nna chi edú tse lele lhe ulaba tse lele de babale len Jesucristuha. Riꞌi labí rite denriꞌi gasina ruin Tata Do Yebáha ki riseꞌeriꞌi xen su lasi.
\s Gwalulaba lele ge nu rakaru doelha
\p
\v 8 Nnanna xa betsi to, gwaludo ikile ge iyá nu anka gwalí, lhe ge iyá nu dika tsia le ka benne geni lhe. Gwaludo ikile gwaluni iyá nu dika ixú, lhe iyá nu abittu anka satsa arlo Tata Do Yebáha lhe. Gwaludo ikile gwaluni iyá nu dika tsuꞌu le ka benne, lhe iyá nu dika ebanani ka benne geni lhe. Ge iyá nu anka tse, lhe ge iyá nu dika inne tse ka benne geni lhe, ge iyá nuná gwaludo ikile gwaluni.
\p
\v 9 Gwaluni iyá nu chi bedhetinia le lhe iyá nu chi bodhaꞌanaa uinle lhe. Anágaba gwaluingaba iyá nu chi biyieninle xpeya le lhe iyá nu chi bilenle runia lhe. Nuní gwaltseꞌe gwaluni nna Tata Do Yebaa benne runie ki riseꞌeriꞌi xen su lasiha, benneha gwadúbe len lebiꞌi.
\s Ka benne seꞌe lheꞌesi Filipos udhelhake nu biyasani Pabluha
\p
\v 10 Yalhá itta bedú lasia rugwea Tata Xisiha ixkixaru, kumu de nnannaliba bedulole ruchacha ikile kia attu libe. Neti yubaa gwa ruchachaba ikile kia, deba nna labí chi upale lo neda ki idhelhale nu riyasati.
\v 11 Bittu akinle rinnea aní de riyasati. ¡Koꞌo! Neti chiba detia gwa raka xenruba lasia ttixaruba tee kia.
\v 12 Chiba yu neti ttixa anka elha dii lhe chiba yu neti tti tee tama lhe. Ge iyába deti neti ttixaba ratea: sila yiela súti lhe sila rattia ubina lhe, sila tee tama kia lhe sila riyasa kia lhe.
\v 13 Lo iyába nu ratea, gwa ridaabaa ridúa loni de babaa len Cristuha. Benneha rudú tsitsie neti.
\v 14 Laa kiga de nuha nna lebiꞌi tseba benle udhelhale kia ki bodilále neti lo nu ratea.
\p
\v 15 Lebiꞌi gwa yúgabale xa benne ge Filipos, tti sisiꞌa tte utea utixxiꞌania le ka tisa ge Cristuha nna tti bedáya ata seꞌele‑na, delába daka Macedonia‑na, niruba ttu dhi ka benne ria leke Jesús‑ni a boteke ttu latti nu edenia ge neda kia de utixxiꞌania ke ka tisa geeha. Sunruba lebiꞌi gwa udhelhale kia laꞌania.
\v 16 Axtala tti rea lheꞌesi Tesalónica‑na gwa udhelharugabale attu chupa libe to kia kini bixúti.
\v 17 Laa rinnegaa aní de rakaru lasia utele nu riyasati. Nu rakala lasia, lebiꞌi gattaru elha tse gele arlo Tata Do Yebáha.
\v 18 Nnanna yalhá ttela chi uxía, tee tamala kia. Len nu udhelhale che Epafrodito‑ni rexxa tama kia. Nu udhelhale‑ni ankana attiba ttu úna rure ixixxi ruꞌu le Tata Do Yebáha lhe rulabie na tti risinna arloe.
\v 19 Tata Do Yebaa kiaha xxeni anka elha tse ge benneha tee. Gutebe len lebiꞌi iyá nu riyasinle de babale len Jesucristuha.
\v 20 Tata Do Yebaa benne anke Xxudiriꞌiha, benneha inná xxeni lebie ttu dia lii. Amén.
\s Pabluha ridhelhe ttu padiuxi ge ka benne // chi ankake ge Tata Do Yebáha
\p
\v 21 Gwalugwe ttu padiuxi kia iyá tte ka benne seꞌe naa, delába ka benne chi ankake ge Tata Do Yebáha de babake len Jesucristuha. Ka betsi to geriꞌi seꞌe len neti nii, ridhelhake ttu padiuxi gele.
\v 22 Anágaba iyába ka benne chi ankake ge Tata Do Yebáha seꞌe lheꞌesi‑ni, ridhelhagabake ttu padiuxi gele, lenke ka benne riben lheꞌe yoꞌo ge César nu rinnabia xeniha. Ka benne‑ni nuní ka benne ridhelharuke ttu padiuxi gele.
\p
\v 23 Jesucristu benne anke Xxanariꞌiha edá lebie aka lenie le. Amén.