\id COL
\h Colosenses
\mt Yetsi‑ni udhelha Pabluha ge ka benne ria leke Jesucristuha seꞌeke lheꞌesi Colosas
\c 1
\p
\v 1 Neti Pablo ankaa apóstol ge Jesucristuha. Tata Do Yebáha‑ba bedá lebie kini akaa apóstol. Neti lenia betsi to geriꞌi Timoteo‑ni
\v 2 ridhelhatu yetsi‑ni gele, lebiꞌi xa betsi to kia seꞌele lheꞌesi Colosas‑na. Lebiꞌi nuná chi ulesi Tata Do Yebáha le kini akale gebie lhe anágaba rudo tsitsibale tisa gebie de chi babale len Cristuha.
\p Xxudiriꞌi do yebáha lhe Jesucristu benne anke Xxanariꞌiha lhe, lake edá leke aka lenke le lhe useꞌeke le xen su lasi lhe.
\s Pabluha rugwebie Tata Do Yebáha ixkixaru
\p
\v 3 Tti rinnabatu gele len Tata Do Yebáha, delába Xxudi Jesucristu benne anke Xxanariꞌiha, satíaba rugwetue ixkixaru gele,
\v 4 kumu de binatu lebiꞌi chiba ria lele ge Jesucristuha, lhe anágaba binatu deki gwa rakabinle ge iyá ka benne chi ankake gebie.
\v 5 Ruinle aná kumu de chi xen lele dhile elha tse nu chi tua tse gele yebáha. Tti biyieninle ka tisa ka nu ankake nu gwalí, delába ka tisa tse rigixxiꞌa ge Jesucristuha, laꞌania nuha binale deki dhile elha tseha.
\v 6 Ka tisa‑ni nuní bisiake len lebiꞌi lhe anágaba chigaba radhike itúba yiesi lo yu‑ni lhe. Ka benne‑ni nuní rotseake elha ruin ge ka benne. Aníha‑gaba benke len lebiꞌi, nna debá tti biyieninle ka tisa‑ni nna ute denle deki gwalíga rakani Tata Do Yebáha gele.
\v 7 Ka tisa‑ni nuní beleꞌeni Epafras‑ni le. Benne‑ni rakintu gebie lhe rixúbie len riꞌitu lo sina ge Cristuha. Labie anke ttu benne rudo tsitsibe tisa ge Cristuha kini rute nábie len lebiꞌi.
\v 8 Lagabe utixxiꞌanie riꞌitu deki Espíritu ge Tata Do Yebáha‑ba runie kini lebiꞌi rakinle ge adí ka benne.
\p
\v 9 De nuha nna riꞌitu, debá la sá tti binatu geleha, labí rudú siitu a ilhapitu tisa len Tata Do Yebáha. Rinnabatu gele kini labie unie ki tte daa tsenle nu raka lebie uinle, lhe anágaba utebie len lebiꞌi iyá elha yuu lhe elha rieni ge Espíritu geeha lhe.
\v 10 Aníha kini tseꞌele uinle atti galába runi ka benne chi ankake ge Jesús benne anke Xxanariꞌiha, tseꞌele uinle iyá nu dika tsuꞌu lebie, delába uinle iyá nu anka tse lhe isinle uinbia tserule Tata Do Yebáha lhe.
\v 11 Benneha ra xxeni lebie nna unie, kini kweki tsitsi lele kini anáchu utto uchíale lo iyá nu ratele.
\v 12 Aníha nna len elha gwedeaka lasi ugwele Tataha ixkixaru, kumu lee chi benie kini akariꞌi benne dika dhiriꞌi nu chi gaꞌananie utebie lenriꞌi, delába riꞌi ka benne chi seꞌeriꞌi lheꞌe xiani geeha lhe ankariꞌi gebie lhe.
\v 13 Labie bebeabie riꞌi lheꞌe chulha nu ra tsitsi leniha nna bottebie riꞌi ata rinnabia Xiꞌinie Jesucristu benne rakanie geeha.
\v 14 Xiꞌinieha, de reni belalieha nna utixe geriꞌi. Aníha kini beseꞌe lhaariꞌi lhe bixú elha xen lasi ge ka tulha geriꞌi lhe.
\s De lo iyá tte nu seꞌe, Cristuha anke benne ra xxeniru lebie
\p
\v 15 Tata Do Yebáha labí rilenriꞌi benneha, ttaka tti benbiariꞌi Cristuha, Tata Do Yebáha nuha benbiariꞌi laꞌania, kumu Cristuha anke atti tteba anka benneha. Lee nuha chila doe attili lani kwe yiesi lo yu‑ni lhe anágaba ankagabe nu ra xxeniru leni delo iyá tte nu ben Tata Do Yebáha.
\v 16 Labie nuha bixúni Tata Do Yebáha kini benie iyá tte nu seꞌe yebáha lhe iyá tte nu seꞌe yiesi lo yu‑ni lhe, ka nu rilenriꞌi lhe ka nu abittu rilenriꞌi lhe. Gaxabasina ankakana, sila ankakana ka nu rinnabia lhe sila ankakana ka nu ra tsitsi lekani lhe, sila ankakana ka nu loni lhe o sila ankakana ka nu rapa lo neda lhe, iyába ka nu seꞌe, len Cristuha‑ba benie kana lhe anágaba ge Cristuha‑gaba ankakana lhe.
\v 17 Cristuha chila do benneha attili lani aka iyá tte nu seꞌe, lhe anágaba de labie nna iyá tteba nu seꞌe, seꞌebakana attiba ankaba geni.
\v 18 Lagabe nuha anke nu loni ge ka benne ria leke bie. Labie nuha anke attisidiba iki ka benneha; ka benneha nna ankake attisidiba latie. Lhe anágaba, lagabe nuha anke benne sisiꞌa tte beyadha benbie lo elhuttiha. Aníha kini delo iyá tte nu seꞌe, labie nuha ake nu ra xxeniru leni.
\v 19 Kumu Tata Do Yebáha uka lebie eyaꞌanna itú tte nu ankeha len Cristuha
\v 20 lhe Cristuha‑gaba nuha bixúni Tata Do Yebáha kini bedo tse lenie iyá tte nu seꞌe yiesi lo yu‑ni lhe nu seꞌe yebáha lhe. Bedo tse lenie ka nuha de reni belali Cristuha lo ya kurusiha.
\p
\v 21 Lebiꞌi itú ttuha, attiba nu dittu ukale len Tata Do Yebáha lhe labí uka uyúle benneha lhe. Laꞌania belababa lele nu satsa lhe benbale nu satsa rakaba lele lhe.
\v 22 Ttaka len elhutti gwate Cristuha tti bitee yiesi lo yu‑ni, len elhuttiha chi boseꞌe tsebie le len Tata Do Yebáha nnanna, kini anáchu utso dubie le arlo Tata Do Yebáha, chi ankale nari xú lhe abitturu tulha gele tee lhe anágaba abittugaba bixa ge itisale.
\v 23 Aní aka ganna lebiꞌi tsia tsitsi lele lhe tseꞌe tsitsile lo neda gebie lhe, anágaba uxxen lele ge nu ra ka tisa tse biyieninle ge Cristuha, abittu udhanle ke. Ka tisa‑ni nuní chi ugwadhi itúba yiesi lo yu‑ni nna neti Pablo ankaa benne rigixxiꞌaya ke.
\s Pabluha ruseꞌe tsitsie ka benne chi ria leke Cristuha
\p
\v 24 Nnanna du itta lasia kumu de lebiꞌi nna ratea ruyúa elha disa. Len elha disa ratea‑ni, len nuní rodhaꞌaya nu riyasa sate Cristuha kwenta ge ka benne chi ria leke bie, kumu lake nuha ankake ttiba latie.
\v 25 De ka benneha nna ankaa benne rixúa lo sina ge Tata Do Yebáha. Ruinbaa nu chiba bedhaꞌane unia, delába idaꞌaba kixxiꞌania le ka tisa geeha kini lebiꞌi saría tsena le.
\v 26 Ka tisa‑ni nuní tenie gatsi itú nu reha, ttaka nnanna chi beleꞌebie ka tisa‑ni len ka benne chi ankake gebie.
\v 27 Ka benne chi ankake geeha, ka benneha nuha uka lebie uleꞌenie ke deki lebiꞌi ka benne dittu abittu ankale nu Israel, ralhagabale edí baale ge elha tse nu tenie gatsi, delába nu tenie gatsiha ankana deki Cristuha nuha chi doe lheꞌe lastole. De nuha nna ruxxen lele dhile nu xxeni ra le Tata Do Yebáha.
\p
\v 28 Ge Cristuha nuha rekitu rigixxiꞌentu iyá xea ka benne, ratu ke gasina dika uinke lhe rugwegabatu ke elha rieni lhe. Aníha ruintu kini itá suba akake tti otso dutu iyáke arlo Tata Do Yebáha de babake len Cristuha.
\v 29 De nuha nna neti runia doelha rekia rigixxiꞌaya ge Cristuha, kumu lee nuha ribeki tsitsie lasia.
\c 2
\p
\v 1 Neti raka lasia unale, tsitsiba ratea rekia rigixxiꞌaya ka tisa‑ni de lebiꞌi lhe de ka benne seꞌe lheꞌesi Laodicea‑ni, lhe de iyá tte ka benne abittu chi ankabiakanie neti lhe.
\v 2 Ratea aní kini lebiꞌi dhu itta lele lhe tseꞌe tsitsile lhe. Aníha kini tseꞌe tutupale de rakin ge luesile axtaliba ganna chi bisinle tte da tsenle gasina anka nu teni Tata Do Yebáha gatsi ttuha, delába nu tenie gatsi ttuha ankana labí chi yu ka benne ge Cristuha.
\v 3 Len Cristuha nuha saxxakariꞌi iyá looba elha rieni lhe elha yuu lhe.
\v 4 Rigixxiꞌania le nuní, kini abittu tsia lele ge ka nu rotsiꞌinu lekani rinnekana nu anka gwen lasi, kini aníha nna dhi yiekana le.
\v 5 Neti, meskiba doa idittu, ttaka ttisidiba gwa dubaa len lebiꞌi kumu satíaba rexxa lasia le. Redeakati de riláti latsiruba ruinle lhe gwa ria tsitsiba lele ge Cristuha lhe.
\s Gwaluni attiba raka le Cristuha uinle
\p
\v 6 Laxkala attiba chi ria lele deki Jesucristuha nuha anke Xxanariꞌi, anágaba nna gwaltseꞌe gwaluni attiba rakaba lebie.
\v 7 Gwaludaxxu tsitsi neda gebie lhe gwaltsia tsitsi lele gebie lhe. Gwaluni atti tteba chi bidetile lhe anágaba satíagaba gwalugwe Tata Do Yebáha ixkixaru lhe.
\p
\v 8 Gwaluyú gele abittu tsia lele ge ka nu daa lenkana elha rieni nu abittu ixú lhe nu abittu daka lhe, kumu luesi elha rieni‑na ankaba nuná nu rotsiꞌinu le ka benne. Ankaba nuná ge yiesi lo yu‑ni, labí anka nuná elha rieni nu rute Cristuha.
\v 9 Kumu Cristuha, tti bitee yiesi lo yu‑ni, itúba nu anka Tata Do Yebáha nuha uke.
\v 10 Anágaba lebiꞌi chigaba ankale idaꞌa de babale len Cristu benne anke nu loni ge iyá tte ka espíritu ka nu rinnabia lhe ka nu ra xxeni lekani lhe.
\v 11 De Cristuha‑gaba nna lebiꞌi attisidiba rúba lo bela latile, aníha kini rulaꞌa deki gwalí ankale ge Tata Do Yebáha. Sun tteba nna labí gwalí ruu lo bela latile tti runi ka benne Israel‑ni, kumu ka benneha richú lo bela latike. Ttaka lebiꞌi de chi babale Cristuha, de nuha nna attisidiba chiba uchúbie lo bela latile tti utuabie nu satsa reta lele ruinleha.
\v 12 Atti udile indaha, laꞌania nuha attisidiba bigatsibale len Cristuha, lhe anágaba nna beyaka bengabale len benneha de ugía lele deki Tata Do Yebáha tsitsi ra lebie belhidhe benneha lo elhuttiha.
\v 13 Lebiꞌi laꞌania attiba ttu nu yatti ankale arlo Tata Do Yebáha de ka tulha ruinleha lhe de abittu ruu lo bela latile lhe, ttaka Tata Do Yebáha benie kini beyaka benle itupa lenle Cristuha tti uxíe elha xen lasi ge iyá ka tulha geleha.
\v 14 Laꞌania nuha utuabie yetsi ata dia bipaxa nu satsa benriꞌi. Yetsiha nuha rukina geriꞌi nna utuabie na tti utá Cristuha lo ya kurusiha.
\v 15 Lo ya kurusiha‑gaba utuabie nu tsitsi ra le ka espíritu satsa, delába ka espíritu ka nu rinnabia lhe ka espíritu ra xxeni lekani lhe. Tti chi udaabie lo ka espírituha, elhittu nuha begwebie kana arlo ka benne seꞌe yiesi lo yu‑ni.
\p
\v 16 Laxkala abittu dhielhale kua ka benne balaꞌana gele ge nu role lhe ge nu riꞌale lhe, nigaba kuakana balaꞌana gele de abittu retabinle ge ka sá tti raka ka laní‑na lhe tti redá ka beo kubi‑na lhe tti risia ka sá reyaka leriꞌi lhe,
\v 17 kumu iyá nuní sunruba ukana ttiba lixxína benne chi gaꞌanna isiaha. Ttaka benne chi gaꞌanna isiaha, benneha nuha gwalíga anke kwinaga Cristuha.
\v 18 De nuha nna ka nu runi deki yalhaba ria lekani Tata Do Yebáha rudú xibikani arlo ka anjeli geeha lhe anágaba ruinkana ttaba rákana deki rulaꞌakinna ttu bixa, ka nuná bittu dhielhale gekani tti rákana deki teeki uinle nu ruinkana, kumu ka nuná nu anka gebakani rinnekana.
\v 19 Ka nuná labí seꞌekana len Cristu benne anke nu loni ge ka benne ria leke bie. Ttiba ikiriꞌi‑ni yietina latiriꞌi lhe denna itúba ka bini latiriꞌi lhe, anágaba ka benne ria leke Cristuha yietigabake bie. Benneha runie kini riseꞌe tsitsike lo neda geeha attiba rakaba le Tata Do Yebáha.
\p
\v 20 Kumu lebiꞌi attisidiba chiba uttile len Cristuha. De nuha nna ttisidiba lanúrule seꞌe ki uinle nu rotsiꞌinu le ka nu seꞌe yiesi lo yu‑ni. Ganna aníha chi ankale nna, ¿beakala nna sa rudobale tisa ge ka nu rákana:
\v 21 “Bittu udaxxulu nuná, lhe bittu golu nuná lhe o bittu kanlu nuná lhe.”
\v 22 Kumu iyá nu ra ka nuná ankabana nu riria iki ka benne. Ankaba nuná nu kwa kwaba riseꞌe loona de rixuinriꞌi na.
\v 23 Gwalí galá, labí dika innáriꞌi deki labí anka nu rinne ka nuná nu dika ixú kumu gwa ruleꞌebakana gasina teeki udú xibiriꞌi arlo Tata Do Yebáha lhe gwa ruleꞌebakinna riꞌi abittu uinriꞌi ttaba lhe anágaba gwa ruleꞌegabakana gasina ugwe latiriꞌi elha disa, ttaka iyá nuná labí ixúna kini kuana nu satsa reta leriꞌi ruinriꞌi.
\c 3
\p
\v 1 Laxkala lebiꞌi ganna gwalíga chi beyaka benle len Cristuha, gwaludo lele nu anka ge yebáha ata do Cristuha, delába daka ná ben ge Tata Do Yebáha.
\v 2 Gwaludo ikile nu anka ge yebáha, abittu udo ikile nu anka ge yiesi lo yu‑ni,
\v 3 kumu lebiꞌi attisidiba chiba uttile, labíru seꞌele ki uinle nu satsa ruinle ttuha, ttaka nnanna de chi babale len Tata Do Yebáha, len Cristuha nuha chi tua tse elha nabani gele.
\v 4 Tti esia Cristu benne rutebie elha nabani geriꞌiha, tti esie dedábie yebáha, anágaba lebiꞌi laꞌania tseꞌegabale lenbie lheꞌe xiani geeha.
\s Abittu uinle nu anka satsa, gwaluinla nu anka tse
\p
\v 5 De nuha nna chinka gwalikua iyá nu satsa ruinle, delába bittu isále nu subi subi lhe bittu uinle iyá nu utsigana le arlo Tata Do Yebáha lhe. Anágaba bittu uinle iyá nu satsa rulaba lele lhe iyá nu reta lele ruinle lhe. Abittugaba udona lele gatta xxatta belhiu gele, kumu belhiu‑na attiba ttu diosi reyaka nuná gele.
\v 6 Kumu delo niꞌa ge nuná nna riseꞌiki Tata Do Yebáha nna rugwebie elha disa ka nu abittu rudokana tisa gebie.
\v 7 Lebiꞌi anágaba benle atti sa rekibale ruinle nu anka satsaha,
\v 8 ttaka nnanna chinka gwalikua iyá elha riseꞌiki gele lhe iyá nu satsa rulha lele lhe. Anágaba gwalikuagaba iyá nu rinne satsa ge luesile lhe iyá tisa satsa yuꞌu roꞌole lhe.
\v 9 Nu anka gwalí gwalinne, abittu la len luesibale uin lele, kumu lebiꞌi chiba bedhanle nu ankale ttuha, delába chiba bedhanle nu satsa benle ttuha,
\v 10 nnanna nna chiba beyakale benne kubi; ttu ttu sába diale axtaliba ki isinle akale atti ttega anka Tata Do Yebáha, delába benne benie leha. Aníha kini isinle uinbia tsegalee.
\v 11 Ganna chi beyakale benne kubiha, laꞌania nna labíru raka doelha si ankale benne Israel o abittu, lhe anágaba labíru raka doelha si gwa ruu lo bela latile o abittu, lhe nigaba si ankale benne yuu o abittu. Anágaba labíru raka doelha si ankale benne toꞌole lo sina o abittu, sinuki Cristuha‑la nuha rakaru doelha lhe lagabe nuha doe lheꞌe lasto iyá tteriꞌi lhe.
\p
\v 12 Laxkala de rakani Tata Do Yebáha gele lhe de chi bekwebie le kini akale gebie, de nuha nna gwaluin ge benne ratua lasi lhe ge benne re tse lebie lhe. Anágaba gwaluin ge benne abittu runi ttaba lhe ge benne abittu ruin disa lhe. Anágaba gwaluni ge benne re besi lebie lhe.
\v 13 Gwalutto gwaluchíaba ge nu rudhaka luesile lhe gwalidhíba elha xen lasi ge luesile ttixka nuxa ttúle bixa ruinle. Gwaluni attiba ben Cristuha, benneha gwa uxíbe elha xen lasi gele.
\v 14 Iki de iyá tte nuní nna nu rakarula doelha akin ge luesile. Kumu elha siꞌi lasi‑na nuná ruseꞌena riꞌi tutupa, ruseꞌena riꞌi attiba ankaba geni.
\v 15 Cristuha xen su lasiba udúbie lele, kumu de nuha‑la uxie le kini akale attisidiba ttúba benne lenie. Anágaba nna ugwegabalee ixkixaru.
\p
\v 16 Ka tisa ge Cristuha tsuꞌu tamake lheꞌe lastole. Len elha rieni rute Tata Do Yebáha gwaluleꞌen luesile lhe gwalodú itta le luesile lhe. Itú iki itú lele gwalugwe bie ixkixaru tti ulhale ka leꞌa gebie,
\v 17 lhe anágaba bixaba innele lhe bixaba uinle lhe, tti uinle aníha exxa lele Jesús benne anke Xxanariꞌiha. Kumu de benneha nna ugwele Xxudiriꞌi do yebáha ixkixaru.
\s ¿Gasina dika uin ka benne chi ria leke Cristuha?
\p
\v 18 Lebiꞌi ka benne nuila ata seꞌe latselale, gwaludo tisa ge ka benne biyú gele‑na, kumu aná dika uinle de chi ankale ge Jesús benne anke Xxanariꞌiha.
\v 19 Lebiꞌi nna ka benne biyú ata seꞌe latselale, akinle ge ka benne nuila gele‑na nna abittu uyú satsale ke.
\p
\v 20 Lebiꞌi nna ka nu kwiti, gwaludo tisa ge ka tata nan gele‑na ge iyába nu innáke kumu aná ruꞌu le Jesús benne anke Xxanariꞌiha.
\v 21 Lebiꞌi nna ka tata, abittu utseꞌenle ka xiꞌinle‑na kini abittu udú chupana lekani.
\p
\v 22 Lebiꞌi nna ka benne ata toꞌole lo sina, ge iyá tte gwaludo tisa ge ka benne ankake xxanale yiesi lo yu‑ni. Bittu suna attiruba du xxanaleha rulannina gele nna jeru tteba ribenle sina sunruba ki eyaꞌan tsele arloni, sinuki itú iki itú lele gwalikwen sina de tee elha rasi gele len Jesús benne anke Xxanariꞌiha.
\v 23 Bixaba sina uinle, gwaluin na itú iki itú lele. Bittu akinle deki sina ge ka benne seꞌe yiesi lo yu‑niba nuha ruinle, gwaluni attisidiba sina ge Jesús benne anke Xxanariꞌiha‑ba nuha ruinle.
\v 24 Lebiꞌi gwa yúbale deki Jesús‑ni gutebe nu ralhale dhile ge nu ruinle, kumu lo sina gebie nuha rixúle.
\v 25 Ttaka nu ruin satsaha dhiba nuha elha disa ge nu satsa ruinnaha, kumu Tata Do Yebáha rutebe nu tse len ka benne ruin latsiru lhe rutegabe elha disa ge ka nu ruin satsa lhe. Ruinba benneha elhuxtisi attiba ankaba geni.
\c 4
\p
\v 1 Lebiꞌi nna ata ankale xxana ka sina, latsiru gwaluin len ka benne riben lo sina gele‑na lhe gwaluyú ke attiba ankaba geni lhe. Gwaludhá lele deki anágaba lebiꞌi dogaba ttu Xxanale yebáha.
\s Gwalilhapi tisa len Tata Do Yebáha lhe latsiru gwaluni lhe
\p
\v 2 Gwaludo lele gwalilhapi tisa len Tata Do Yebáha. Bittu udú siile a innele lenie lhe gwalugwe bie ixkixaru lhe.
\v 3 Anágaba gwalinnabagaba getu lenie kini idhalie neda getu ki kixxiꞌatu nu tenie gatsi ttuha, delába kixxiꞌatu ge Cristuha. Kumu de rigixxiꞌiatu ge benneha, de nuha nna xigaa tea lisiyya.
\v 4 Gwalinnaba kia kini ganna chi kixxiꞌaya gebie, lhixxa rába kixxiꞌaya attiba ankaba geni.
\p
\v 5 Lebiꞌi gwaluin doelha ixuinle ka sá seꞌele‑na kini uinle latsiru len ka nu abittu chi ria lekani Cristuha.
\v 6 Tisa nu inneleha satía akana latsiru lhe nu dika tsuꞌu le ka benne lhe. Aníha kini yule gasina ekabile ge nuxaba benne innaba tise le.
\s Pabluha redhelhe padiuxi ge ka benne seꞌe lheꞌesi Colosas
\p
\v 7 Betsi to geriꞌi Tíquico‑ni, delába benne rakati gebie‑ni, benne‑ni anke ttu benne rudoe tisa rute nábie len neti lo sina ge Jesús benne anke Xxanariꞌiha. Labie kixxiꞌanie le bixa ratea.
\v 8 De nuha‑la nna ridhelhee ata seꞌele‑na kini kixxiꞌanie le bixa ratetu lhe anágaba kini odú itte lele lhe.
\v 9 Dedágaba Onésimo benne lheꞌesi gele‑na lenbie. Benne‑na ankagabe betsi to geriꞌi lhe rakinriꞌi gebie lhe ankagabe nu gwedo tisa lhe. Lake kixxiꞌakanie le iyá nu raka nii.
\p
\v 10 Aristarco benne tee lania lisiyya‑ni, benne‑ni ridhelhe ttu padiuxi gele lhe anágaba Marcos primu ge Bernabé‑ni ridhelhagabe ttu padiuxi gele. Ge Marcos‑ni chiba utixxiꞌania le, ria: “Ganna ite ata seꞌele‑na latsiru ulabilee.”
\v 11 Anágaba Jesús benne tegaba lábie Justo, ridhelhagabe ttu padiuxi gele. Delo iyá ka benne Israel chi ria leke Cristuha, sunruba tsunna ka benne‑ni ribenke len neti kini rigixxiꞌatu gasina rinnabia Tata Do Yebáha ka benne lhe anágaba rixúgabake kini rodú tseke lasia lhe.
\p
\v 12 Epafras‑ni ridhelhagabe ttu padiuxi gele. Benne‑ni ankagabe ttu ka benne gele, rixúbie lo sina ge Cristuha. Labie satíaba rinnabe gele tti rilhapie tisa len Tata Do Yebáha. Rinnabe kini lebiꞌi tseꞌe tsitsile lo neda ge Tata Do Yebáha lhe akale benne runi itá su, lhe anágaba kini tte da tsenle iyá nu raka lebie.
\v 13 Kumu neti yu xeabaa yalhá ruchacha ikie gele lhe ge ka benne seꞌe lheꞌesi Laodicea‑na lhe, anágaba ruchachagaba ikie ge ka benne seꞌe lheꞌesi Hierápoles‑na lhe.
\v 14 Lucas benne runie ramedi‑ni, delába benne rakagabinriꞌi gebie, benne‑ni ridhelhagabe ttu padiuxi gele. Anágaba Demas‑ni ridhelhagabe ttu padiuxi gele.
\p
\v 15 Ka betsi to geriꞌi seꞌe lheꞌesi Laodicea‑na, gwalugwe ke ttu padiuxi getu lhe anágaba Ninfas‑na lhe adíru ka benne chi ria leke Cristuha, delába ka benne ritupake lheꞌe lisie‑na, gwalugwegaba ka benne‑na ttu padiuxi getu.
\p
\v 16 Iki de chi bibaba yetsi ridhelhatu‑ni arlole, gwalidhelhagaba na lheꞌesi Laodicea‑na kini ibabagabana arlo ka benne chi ria leke Cristuha seꞌeke naa. Anágaba yetsi udhelhaa len ka benne seꞌe lheꞌesi Laodicea‑na, edhelagabake nuná kini lebiꞌi ulabagabale na.
\p
\v 17 Gwaligasi Arquipo‑na udo leni uinna sina nu chi bodhaꞌana Jesús benne anke Xxanariꞌiha lasi náni.
\p
\v 18 Padiuxi nu ridhelhaa gele‑ni, kwinaga neti Pablo runia nuní lo yetsi‑ni. Gwalodhú lele deki tea lisiyya. Tata Do Yebáha edá lebie aka lenie le. Amén.