\id 1TH
\h 1 Tesalonicenses
\mt Yetsi nu sisiꞌa tte udhelha Pabluha ge ka benne ria leke Jesucristuha seꞌeke lheꞌesi Tesalónica
\c 1
\p
\v 1 Neti Pablo, lenia Timoteo‑ni lhe Silvano‑ni lhe, ridhelhatu yetsi‑ni gele, lebiꞌi ka benne ritupale lheꞌesi Tesalónica‑na de chi ankale ge Xxudiriꞌi do yebáha lhe ge Jesucristu benne anke Xxanariꞌiha lhe. Lake edá leke aka lenke le lhe useꞌeke le xen su lasi lhe.
\s Pabluha rugwebie Tata Do Yebáha ixkixaru ge ka benne // seꞌeke lheꞌesi Tesalónica
\p
\v 2 Tti rilhapitu tisa len Tata Do Yebáha, satíaba rugwetue ixkixaru ge iyá ttele tti radú letu gele.
\v 3 Arlo Tata geriꞌi do yebáha satíagaba rexxa letu ge iyá tte nu ruinle de chi ria lele ge Jesucristuha. Rexxagaba letu ge nu tse ruinle de rakinle ge ka benne, lhe anágaba de labí rudhanle satíaba ruxxen lele ge Jesucristu benne anke Xxanariꞌiha.
\p
\v 4 Lebiꞌi xa betsi to rakin Tata Do Yebáha gele, riꞌitu yu xeabatu deki labe chi bekwebie le kini akale gebie.
\v 5 Kumu ka tisa tse utixxiꞌentu le ge Jesucristuha, laa sun tisaruga anka ka benneha, sinuki tsitsi ra le ka tisaha, kumu Espíritu ge Tata Do Yebáha‑ba benie kini ra tsitsi le ka tisaha, lhe anágaba benie kini lebiꞌi ugía tsitsi lele ka benneha. Anágaba lhe gwa yu xeagabale tseba uka elha ruin getu tti useꞌetu len lebiꞌiha. Aníha bentu kini lebiꞌi gwaria tsena le.
\v 6 Lebiꞌi nna bedaxxule elha ruin getuha lhe elha ruin ge Jesús benne anke Xxanariꞌiha lhe. Kumu meskiba gwatele biyúle elha disa tsitsi tti bedaxxule ka tisa geeha, ttaka Espíritu ge Tata Do Yebáha nna betelee elha gwedeaka lasi gele.
\v 7 Aníha uka nna elha gwedeaka lasi geleha bixúna kini bilani iyá ka benne seꞌe daka Macedonia‑ni lhe daka Acaya‑ni lhe, delába ka benne chi ria leke ge Jesús‑ni.
\v 8 Kumu de lebiꞌi nna udulo ugwadhi ka tisa ge Jesús benne anke Xxanariꞌiha. Anna laa suna daka Macedonia‑niga lhe laa suna daka Acaya‑niga ugwadhi ka tisaha, anágaba nna lheꞌe iyágaba ka yiesi‑na chi nuna ka benne deki lebiꞌi tseba ria lele ge Tata Do Yebáha. Laxkala riꞌitu labíru uka doelha kixxiꞌatu gele len ka benneha.
\v 9 Kumu kwinaba lake rigixxiꞌake ráke deki lebiꞌi tseba belabile riꞌitu tti bisiatu len lebiꞌiha, lhe rigixxiꞌagabake ráke gasina bedhanle abitturu ria lele ge ka nu labí gwalí ankakana diosi, lhe gasina udulole rudole tisa ge benne gwalíga anke Diosiha lhe gwalíga anke benne bani lhe.
\v 10 Anágaba nna seꞌegabale ubeda Xiꞌinieha, delába Jesús benne belhidha ben Tata Do Yebáha lo elhuttiha lhe dedábie yebáha kini odilábie riꞌi lo elha disa nu si daa; delába elha disa ute Tata Do Yebáha geriꞌi.
\c 2
\s Pabluha rigixxiꞌabie ge nu gwatebie lheꞌesi Tesalónica
\p
\v 1 Lebiꞌi gwa yu xeabale xa betsi to kia, gwa bixúba nu bentu, labí kwentaba bitatu ata seꞌele‑na.
\v 2 Gwa yúgabale attili lani isiatu ata seꞌele‑na, chila biyayatu lhe chila belisa xxattakana riꞌitu tti seꞌetu lheꞌesi Filipos‑ni, ttaka Tata Do Yebáha gwa uleki tsitsibe letu ki utixxiꞌentu le ka tisa tse betebie lentu, meskiba bika seꞌe ka nu reseꞌe disakana lotu lhe rusunakana lhe.
\v 3 Kumu ka tisa utixxiꞌentu leha, nu gwalíba anka ka benneha, labí bixa nu satsa rulha letu tti utixxiꞌatu ka tisaha lhe nigaba labí len gwen lasi uxí yietu le kini ugía lele,
\v 4 sinuki Tata Do Yebáha‑ba bexxen lebie riꞌitu deki gwankabatu nu dika kixxiꞌatu ka tisa tse betebie lentu. Laxkala nna aníha‑ba ruintu, labí ruintu ki tsuꞌu le ka benne seꞌe yiesi lo yu‑ni nu rinnetu, sinuki ruinlatu ki tsuꞌu le Tata Do Yebáha nu rinnetu, kumu benneha gwa yube ttixa anka lheꞌe lastotu.
\v 5 Lebiꞌi gwa yúbale riꞌitu labí bisiatu len elha roꞌo lheꞌe getu. Tata Do Yebáha gwa yu xeabe. Nigaba labí botsiꞌinu letu ttu bixa ki galhitu belhiu gele.
\v 6 Nigaba labí bentu ki inne tsele ge nu ruintu, nigaba ki inne tse adíru ka benne ge nu ruintu.
\v 7 Meskiba riꞌitu gwa upabatu lo neda laꞌania ki unnabatu lenle ki uinle nu raka letu de ankatu apóstol ge Cristuha, ttaka tti ugwekitu lagwi geleha ukalatu benne siꞌi lasi. Ttiba runi ttu ixná ruyú tsena ka xiꞌinniha, aníha‑ba biyútu le.
\v 8 Yalhá raka xxattintu gele. Laxkala laꞌania, laa sunruga ka tisa ge Tata Do Yebáha uka letu kixxiꞌentu le, sinuki tatisa riꞌitu axtala elha nabani getu betetu len lebiꞌi kumu de raka siꞌi xxattintu le.
\v 9 Lebiꞌi gwa rexxaba lele xa betsi to, atti utixxiꞌentu le ka tisa ge Tata Do Yebáha, tsitsiba urentu sina rela lhe resá lhe. Bentu aníha ki abittu betsetsintu le innabatu le nu riyasintu.
\p
\v 10 Lebiꞌi ka benne chi ria lele Jesús‑ni gwa yu xeabale lhe gwa yu xeagaba Tata Do Yebáha deki riꞌitu benne tseba ankatu lhe ankagabatu benne ruintu nu dika ixú lhe, anágaba, labí bixa balaꞌana getu bitua. Latsiruba biyútu le.
\v 11 Anágaba nna gwa yúgabale gasina biyútu le laꞌania; biyútu le attiba ruyú ttu xxudi ka xiꞌinniha.
\v 12 Aníha‑ba belisatu le lhe beseꞌe tsitsitu le lhe anágaba bedú ittatu lele kini tseꞌele uinle atti galába runi ka benne chi ankake ge Tata Do Yebáha, kumu labie chi uxie le kini akale benne edí baale elha tse tee ata rinnabieha.
\p
\v 13 De nuha nna satíaba rugwetu Tata Do Yebáha ixkixaru, kumu lebiꞌi ka benne chi ria lele gebie, tti biyieninle ka tisa rigixxiꞌatu geeha, labí ukinle deki ka tisa utixxiꞌentu leha, nu anka gebatu ka benneha rinnetu, sinuki bedaxxubale ke atti galába tisa ge Tata Do Yebáha, kumu de gwalíba ankake tisa gebie. Ka tisa geeha nuha rotseake elha ruin gele.
\v 14 Lebiꞌi xa betsi to, gwatebale attiba gwate ka benne chi ankake ge Tata Do Yebáha de ria leke Jesucristuha, delába ka benne seꞌe daka Judea. Ka benneha udú noo ka nu Israel‑ni ke. Aníha‑ba nuná gwatele udú noo ka nu lheꞌesi geleha le.
\v 15 Ka nu Israel‑ni bettibakana Jesús benne anke Xxanariꞌiha lhe ka profeta useꞌe itú nu reha lhe; riꞌitu nna uleabakana riꞌitu. Ka nu ben aníha niru latti a ruꞌu le Tata Do Yebáha nu benkana. Arlo iyába ka benne reseꞌe disakana.
\v 16 Rusunagabakana kixxiꞌentu ka benne abittu ankake nu Israel ka tisa ge Jesús‑ni, ruinkana kini abittu odilá Tata Do Yebáha ka benneha. Tti ruinkana aníha rudien chiettirula tulha gekani, ttaka Tata Do Yebáha ugwebe kana elha disa tsitsi.
\s Pabluha re lebie ilánie ka benne seꞌe lheꞌesi Tesalónica‑ni
\p
\v 17 Betsi to, isá to chi biriesi luesiriꞌi, labíru chi bilen luesiriꞌi, ttaka satíaba yuꞌule lheꞌe lastotu lhe anágaba yalhá re letu edelentu le attu libe.
\v 18 De nuha nna chi bentu itatu ata seꞌele‑na. Netiba Pablo ixe lidúru chi benia itaa, ttaka nu xxegwiha uttabana lo neda getu.
\v 19 Bentu itatu kumu, ¿laaba ganna lebiꞌi nuná utele elha gwedeaka lasi getu arlo Jesucristu benne anke Xxanariꞌiha, lhe lebiꞌi nuná ankale attiba ttu corona ebana letu kuꞌu ikitu‑na de ben tsetu? Anágaba lebiꞌi nuná ruxxen letu utso dutu le arlo Jesucristuha ganna chi besiabie yiesi lo yu‑ni attu libe.
\v 20 Gwalí galá, lebiꞌi nuná ankale elha gwedeaka lasi getu lhe anágaba lebiꞌi nuná ankale nu dika ebana letu gele lhe.
\c 3
\p
\v 1 De nuha nna de abitturu betto bechíatu abí unatu gele, aníha uka nna bokinni ikitu a suna a chupabatu beyaꞌantu lheꞌesi Atenas‑ni,
\v 2 nianna bedhelhatu betsi to geriꞌi Timoteo‑ni, delába benne rixúgabe lo sina ge Tata Do Yebáha lhe rutegaba nábie len riꞌitu kini radhiru ka tisa ge Cristuha. Bedhelhatue ki useꞌe tsitsie le lhe odú itte lele kini lebiꞌi tsia tsitsiru lele ge Cristuha.
\v 3 Aníha kini abittu udú chupana lele de ratele ruyúle elha disa. Lebiꞌi chiba yule deki tee kiba sateriꞌi uyúriꞌi elha disa,
\v 4 kumu attili sa seꞌetu len lebiꞌiha, chi ratu le deki teeki sateriꞌi uyúriꞌi elha disa. Nnanna nna attiba chi ratu leha, aníha‑ba chi raka.
\v 5 Laxkala neti labí uledarua, bedhelha ttebaa Timoteo‑ni kini unaa ganna gwa riaru lele ge Jesús‑ni, kumu ni kina chi uxí yie nu xxegwiha le, laꞌania nna abígaba ixú nu bentu tti useꞌetu len lebiꞌiha ganna ttixka.
\p
\v 6 Ttaka nnanna tti besia Timoteo‑ni ata seꞌetu‑ni, tseba rigixxiꞌana gele, rana deki gwa riaruba lele Jesús‑ni lhe anágaba gwa ankagabale benne siꞌi lasi lhe. Utixxiꞌagabana rana deki satíaba rexxa lele riꞌitu lhe anágaba yalhá ladeakale ilenle riꞌitu, attigaba riꞌitu yalhá ladeakatu ilentu le.
\v 7 Laxkala xa betsi to, meskiba rate xxattatu ruyútu elha disa, ttaka tti binatu gele deki gwa ria tsitsiba lele, nianna beyaka xen letu.
\v 8 Nnanna de chi yutu deki gwa seꞌe tsitsibale lo neda ge Jesús benne anke Xxanariꞌiha, de nuha nna bedú itta xxatta letu.
\v 9 Laxkala, de elha gwedeaka lasi xxeni tee getu arlo Tata Do Yebaa geriꞌiha, de nuha nna niba a reselintu tisa gaxasina ugwetue ixkixaru gele.
\v 10 Rela resába rinnabatu lenie kini ugwelhe ilentu le, aníha ki riꞌitu uleꞌe chiettintu le nu riyasaru kini tsia tsitsiru lele gebie.
\p
\v 11 Kwinaba Xxudiriꞌi do yebáha lhe Jesús benne anke Xxanariꞌiha eguꞌuke riꞌitu neda ki esiatu ata seꞌele‑na,
\v 12 lhe anágaba benne anke Xxanariꞌiha‑gaba unie ki akaruin ge luesile lhe akaruinle ge adíru ka benne lhe, ttiba riꞌitu rakintu gele.
\v 13 Aníha kini kweki tsitsi lele lhe akale gebie lhe, kini abittu bixa ge itisale arlo Xxudiriꞌi do yebáha ganna chi dedá Jesús benne anke Xxanariꞌiha len iyá ka benne chi ankake gebie.
\c 4
\s Gwaltseꞌe gwaluni tti raka le Tata Do Yebáha
\p
\v 1 Nnanna xa betsi to, rinnabatu len lebiꞌi lhe rulisatu le lhe, gwaluinchi lo niꞌa ge Jesús benne anke Xxanariꞌiha, tseꞌele uinle nu tsuꞌu le Tata Do Yebáha, uinle attiba chi beleꞌentu leha. Attigaba chi ruinle nnanna, anába sa tsiarule uinle.
\v 2 Lebiꞌi gwa yúbale nu chi utixxiꞌentu le uinle. Jesús benne anke Xxanariꞌiha‑ba betebie lo neda getu kini gatu le: “Nuní gwaluni.”
\v 3 Kumu Tata Do Yebáha raka lebie iriesile ki akale gebie. De nuha nna abittu isále nu subi subi.
\v 4 Kua ttu ttule dho len nuila gele latsiru, attiba ruꞌu le Tata Do Yebáha lhe anágaba tsiagaba lele kana lhe.
\v 5 Abittu ttebiale udhaka xiile kana, bittu uinle tti ruin ka nu abittu ankabiakinna Tata Do Yebáha.
\v 6 Bittu udhaka xiile ttu betsi to geriꞌi, abittu udaxxule nuila ge benneha. Chiba utixxiꞌentu le lhe chiba ratu le, Tata Do Yebáha ugwebie elha disa tsitsi ka nu uinkana aní.
\v 7 Kumu Tata Do Yebáha laa uxige riꞌi lo neda geeha kini uinriꞌi nu satsa, sinuki uxilee riꞌi kini akariꞌi nari xú arloe.
\v 8 Laxkala ttu benne ganna abíba udo nage ge ka tisa‑ni, laa ka benne seꞌe yiesi lo yu‑niga nuha kuꞌu niꞌe, Tata Do Yebaa benne betebie Espíritu geeha len riꞌi, benneha nuha kuꞌu niꞌe.
\p
\v 9 Lebiꞌi labí riyasinle upeya le akinle ge ka betsi to geriꞌi, kumu kwinaba Tata Do Yebáha chi bedhetinie le kini akin ge luesile.
\v 10 Kumu anába chi ruinle len iyába ka betsi to geriꞌi seꞌe itúba daka Macedonia‑ni, ttaka rinnabatu len lebiꞌi xa betsi to, aka chiettiruin ge luesile.
\v 11 Gwaluin doelha latsiru gwaltseꞌe len adí ka benne. Nu anka gele gwaludo lele, lhe len nu anka niꞌa nále gwalikwen sina ttiba chi ratu le.
\v 12 Aníha uinle kini ka nu abittu chi ria lekani Tata Do Yebáha tsia lekani le, lhe aníha kini abittu bi iyasa gele lhe.
\s Gasina aka ganna chi esia Jesucristuha yiesi lo yu‑ni
\p
\v 13 Anágaba xa betsi to, raka letu unale, gasina sate ka benne chi uttiha, kini lebiꞌi abittu udú siꞌina lele tti rudú siꞌina le ka nu abittu ruxxen lekani deki gweyaka benkana lo elhuttiha.
\v 14 Kumu riꞌi ria leriꞌi deki Jesús‑ni uttie nna beyaka benbe lo elhuttiha, anágaba uin Tata Do Yebáha len ka benne chi uttike ria leke ge Jesús‑ni, unie kini Jesús‑ni, itupa lenie ka benneha, esinke ata doeha.
\p
\v 15 De nuha nna riꞌitu rigixxiꞌentu le nu beleꞌe Jesús benne anke Xxanariꞌiha tti ree deki riꞌi ata sa seꞌeriꞌi anka benriꞌi atti chi esieha, labí riꞌila ladeꞌa tte eneruriꞌi tti ka benne chi uttiha.
\v 16 Kumu la kwinaba Jesús benne anke Xxanariꞌiha eyadie dedee yebáha, tsitsiba dedo tsiꞌibie runie mandadu, lhe iyiengaba tsiꞌi ttu ka anjeli ra xxeniru lekeha. Anágaba nna kwesigaba trompeta ge Tata Do Yebáha. Laꞌania nna ladeꞌaxa ka benne chi uttiha, eyaka benke, delába ka benne chi ugía leke Cristuha.
\v 17 Iki de chi uka aníha, laꞌanialiba nna riꞌi ata sa seꞌeriꞌi anka benriꞌi yiesi lo yu‑ni, itupa lenriꞌi ka benne chi uttiha, eyalhi Tata Do Yebáha riꞌi lo bea‑na kini etiꞌariꞌi benne anke Xxanariꞌiha lo be. Aníha kini esinriꞌi tseꞌeriꞌi lenie ttu dia lii.
\v 18 Laxkala lebiꞌi len ka tisa‑ni gwalodú itta le luesile.
\c 5
\p
\v 1 Ttaka la sá atti aka nuní xa betsi to, lebiꞌi labí riyasinle kixxiꞌania le.
\v 2 Kumu lebiꞌi gwa yu xeabale, benne anke Xxanariꞌiha, iyyaba lasi esiabie. Esiabe la sá attila labí ribedariꞌie, unie ttiba runi ttu ubana iyyaba lasi rachadina yoꞌoha ttu lo rela.
\v 3 Aníha‑ba sate ka benne. Ttila innáke: “Tseba seꞌeriꞌi, labí bixa aka”, laꞌaniala nna ttu nnelaba isia elha disa tsitsi geke, satebake attiba rate ttu nuila nuja xiꞌinni, ttu nnelaba chi retti lheꞌeni gali xiꞌinni. Aníha‑ba sate ka benne, ttu nnelaba isia elha disa geke nna labí lhaake lo nuha.
\v 4 Ttaka lebiꞌi xa betsi to, bittu tseꞌe xulhale. Aníha kini lebiꞌi abittu aka tenle tti isia sá aka nuha, kini abittu satele tti rate ttu benne ttixka iyyaba lebie riginni ttu ubana lisie.
\v 5 Kumu lebiꞌi iyábale chi ankale ge xiani lhe ge resá lhe; riꞌi labí ankariꞌi ge chulha, nigaba ge rela.
\v 6 Laxkala riꞌi abittu gaꞌadhiriꞌi tti runi adí ka benne; tseꞌe tennálariꞌi, delába tseꞌelariꞌi ubeda lhe abittu bitti uinriꞌi lhe.
\v 7 Kumu ka nu raꞌadhi‑na, relaba raꞌadhi ka nuná nna ka nu dusi‑na nna relagaba riꞌa ka nuná.
\v 8 Ttaka riꞌi ka nu chi ankariꞌi ge resá, abittu bitti uinriꞌi. Uinlariꞌi attiba runi ttu soldadu chi duna nuku xoni, xoni nu anka tagaꞌa ge iyya kini abittu aka gwe latini ganna chi itilhana. Aníha‑gaba riꞌi tsia tsitsi leriꞌi ge Tata Do Yebáha lhe akin ge luesiriꞌi kini abittu dhaa nu xxegwiha loriꞌi. Lhe anágaba uingabariꞌi attiba runi ttu soldadu chi duna yuꞌu tsitsi cascu ikini kini abittu aka gwe ikini ganna chi itilhana. Aníha‑gaba riꞌi uxxen tsitsi leriꞌi deki godilába Tata Do Yebáha riꞌi.
\v 9 Kumu Tata Do Yebáha laa uxige riꞌi lo neda geeha kini dhiriꞌi elha disa ge ka tulha ruinriꞌi; uxile riꞌi kini len nu gwate Jesús benne anke Xxanariꞌiha lo ya kurusiha, len nuha odilábie riꞌi.
\v 10 Benneha uttie utixe geriꞌi kini riꞌi, sila sa anka benriꞌi o chi uttiriꞌi ganna chi besieha, laꞌania nna turoꞌoba tseꞌe lenriꞌe.
\v 11 Laxkala attiba chi ruinle‑na, anába gwaltseꞌe gwaluni, gwalodú itta le luesile lhe gwaloseꞌe tsitsi luesile lhe.
\s Pabluha rabie: “Latsiru gwaluyú luesile”
\p
\v 12 Betsi to, rinnabatu len lebiꞌi, tsia lele ka benne rixúke lo sina ge Jesús benne anke Xxanariꞌiha, kumu ka benne‑na nuná riseꞌeke arlole lhe ruleꞌekanie le gasina tseꞌele.
\v 13 Anágaba ugwele lidhakake lhe akinle geke de ruinke sina ge Jesús‑ni. Anágaba lebiꞌi latsiru gwaltseꞌe len luesile.
\p
\v 14 Rinnabagabatu len lebiꞌi xa betsi to kia, ulisale ka nu abittu riben sina kini kwenkana sina, lhe anágaba kweki tsitsile le ka nu chi reyadi gaakana lo neda ge Tata Do Yebáha, lhe useꞌe tsitsile ka nu abittu chi seꞌe tsitsikana lo neda geeha lhe gwalikweki besi lele len iyába ka benne.
\p
\v 15 Gwaluyú gele bittu odekile ge ka nu udhakakana le ttu bixa. Nu uinlale, satía gwaluyú tse luesile lhe anágaba gwaluin len iyá ka benne lhe.
\p
\v 16 Satía gwaludú itta lele
\v 17 lhe bittu udú siile a ilhapile tisa len Tata Do Yebáha.
\v 18 Ge iyá tte gwalugwe bie ixkixaru kumu aná raka lebie uinle de chi babale len Jesucristuha.
\p
\v 19 Bittu a dhielhale uin Espíritu ge Tata Do Yebáha sina lheꞌe lastole
\v 20 lhe bittu kuꞌu niꞌale tisa ge ka benne rigixxiꞌake nu raka le Tata Do Yebáha unale.
\v 21 Nu uinlale, iyába nu iyieninle inneke, gwalokwe lheꞌeni nna suna ge nu dika ixúba gwaludo tisa
\v 22 lhe anágaba bittu uinle bixaba nu satsa.
\p
\v 23 Tata Do Yebaa benne runie ki riseꞌeriꞌi xen su lasi, kwinaba benneha ocharie le ki akale nari xú, kini anáchu itúbale lhe iyába nu ruinle lhe nu rulaba lele eyakana tse. Aníha kini abittu bi ge itisale ganna chi besia Jesucristu benne anke Xxanariꞌiha.
\v 24 Kumu Tata Do Yebaa benne uxie leha, benneha gwinbe iyá nu chi rabie, labí runnitti tisa ge benneha.
\p
\v 25 Betsi to, gwalinnabagaba getu len Tata Do Yebáha.
\p
\v 26 Gwalugwe iyá ka betsi to geriꞌi seꞌe naa ttu padiuxi getu lhe gwaligo ttu xxaga luesile lhe.
\p
\v 27 Gwaluinchi lo niꞌa ge Jesús benne anke Xxanariꞌiha gwalulaba yetsi‑ni arlo iyá ka betsi to geriꞌi‑na.
\p
\v 28 Jesucristu benne anke Xxanariꞌiha edá lebie aka lenie le. Amén.