\id 2TH
\h 2 Tesalonicenses
\mt Yetsi nu berupa udhelha Pabluha ge ka benne ria leke Jesucristuha seꞌeke lheꞌesi Tesalónica
\c 1
\p
\v 1 Neti Pablo, lenia Timoteo‑ni lhe Silvano‑ni lhe, ridhelhatu yetsi‑ni gele. Ridhelhatu na len lebiꞌi ka benne ritupale lheꞌesi Tesalónica‑na de ankale ge Xxudiriꞌi do yebáha lhe ge Jesucristu benne anke Xxanariꞌiha lhe.
\v 2 Lake edá leke aka lenke le lhe useꞌeke le xen su lasi lhe.
\s Pabluha rinnabe len Tata Do Yebáha ki aka lenie // ka benne seꞌe Tesalónica‑ni
\p
\v 3 Xa betsi to, riꞌitu satíaba daa lotu ugwetu Tata Do Yebáha ixkixaru gele, kumu aná dika uintu, kumu lebiꞌi chi diale ria tsitsiru lele ge Jesús‑ni, lhe anágaba nna kua ttu ttule chirugaba diale raka chiettiruin ge luesile.
\v 4 Laxkala riꞌitu rebanaba letu gele arlo adí ka benne chi ria leke Tata Do Yebáha, kumu de lebiꞌi chi ria tsitsi lele gebie lhe de rutto ruchíale meskiba bika ridú nookana le lhe meskiba bika ruyúle elha disa lhe.
\v 5 Nu ratele‑na runna liina deki Tata Do Yebáha ruinbe attiba ankaba geni. Rugwelhabe ratele aná kini anáchu nna akale nu dika innabia Tata Do Yebáha, kumu delo niꞌa ge nuná nna ratele aná.
\p
\v 6 Tata Do Yebáha, nu dika ixúba nuha unie atti ugwebie elha disa ka nu rudhaka xiikana le.
\v 7 Lebiꞌi ka nu rudhaka xiikana nna kuabe elha disa gele, attigaba unie len riꞌitu ganna chi uka xxe Jesús benne anke Xxanariꞌiha, dedábie yebáha lenbie ka anjeli geeha, delába ka anjeli ra tsitsi lekeha.
\v 8 Dedábie lheꞌe belha ge giha, kini ugwebie elha disa ka nu abittu ria lekani Tata Do Yebáha, lhe abittugaba bedokana tisa ge nu ra ka tisa ge Jesús benne anke Xxanariꞌiha lhe.
\v 9 Ka nuná ttu dia liiba tsiakana ata tseꞌe lookana, iruꞌunabakana idittu, labí esinkana arlo Jesús‑ni lhe labí esinkana lheꞌe xiani geeha lhe, delába xiani geeha nu ra tsitsi leniha.
\v 10 Iyá nuní aka la sá atti esieha, kini anáchu nna iyába ka benne chi ulesie ki akake gebie, delába ka benne chi ria leke gebie, ka benneha nuha uinke kini inná xxeni lebie lhe ebanakanie gebie lhe. Anágaba lebiꞌi selagabale len ka benneha, kumu de gwa ugíagaba lele ge nu chi utixxiꞌentu leha.
\p
\v 11 De nuha nna satíaba rinnabatu gele len Tata Do Yebáha, kumu labie uxie le lo neda geeha, kini de ra tsitsi lebie nna aka lenie le, kini anáchu dhaale uinle iyába nu tse raka lele de chi ria lele gebie.
\v 12 Aníha kini de lebiꞌi nna inná xxeni le Jesús benne anke Xxanariꞌiha, lhe anágaba lebiꞌi, de benneha nna inná xxeni lele, kumu aníha redá lebie runie, lhe aníha‑gaba redá le Tata Do Yebaa geriꞌiha runie lhe.
\c 2
\s Pabluha rigixxiꞌabie gasina uin nubiyú ruin satsaha // ganna chi bisiana
\p
\v 1 Nnanna xa betsi to, raka letu kixxiꞌentu le ge la sáha atti chi esia Jesucristu benne anke Xxanariꞌiha, delába atti etupariꞌi etiꞌariꞌe gwetsáha. Rinnabatu len lebiꞌi,
\v 2 bittu ttu nnelaba otsea elha rulaba le gele, lhe bittu gasinle ganna chi iyieninle innákana: “Aní ra Espíritu ge Tata Do Yebáha, chiba bisia sá esia benne anke Xxanariꞌiha” o sila innákana: “Aní chi biyienintu ra ka benne”, lhe o innákana: “Aní ra lo yetsi udhelha ka Pabluha.” Ka nu inná aníha, ukadiba innákana deki riꞌibatu udhelhatu yetsiha.
\v 3 Ka nuha, ttu tsa bittu tsia lele gekani, kumu benneha labí esiaxxie axtaliba ganna chi iria ka nu eseꞌe disakana lo Tata Do Yebáha, laꞌanialiba nna tti aka xxe nubiyú ruin satsaha, delába nu tsiana ata tseꞌe loonaha. Iki deliba nuha nna tti esia benne anke Xxanariꞌiha.
\v 4 Nubiyú ruin satsaha, edú disana lhe uinna deki lana ra xxeniru leni arlo iyába ka nu tee lákani diosi, lhe arlo iyába ka nu ruin ka benne leꞌa gekani lhe. Axtaba lheꞌe yotu ge Tata Do Yebáha gaꞌanna dhona nna uinna deki labana nuha ankana Tata Do Yebáha.
\p
\v 5 Lebiꞌi gwa rexxaba lele attili sa doa len lebiꞌiha, gwa utixxiꞌabania le ge iyá nuní.
\v 6 Nnanna chigaba yule bí nuha rukwedana nubiyú ruin satsaha kini abittu isiaxxina, kumu gannaliba chi gwadona la sá isianaha, laꞌanialiba nna isiana.
\v 7 Kumu nu satsaha, sigába chi udulo nuha rakana. Nnanna nna sun tteba riyasa itua nu rukwedana nubiyú ruin satsaha,
\v 8 iki deliba nuha nna tti aka xxena. Lana nuha utseꞌe loo Jesús benne anke Xxanariꞌiha na, sunruba len be iria roꞌeha, lhe anágaba sun tteruba len xiani geeha utseꞌe looe na ganna chi besieha.
\v 9 Nubiyú ruin satsaha isiana uleꞌena nu xxeni ra le nu xxegwiha, delo tisaba uinna ka milagru lhe adíru ka nu dika ebaninriꞌi geni lhe.
\v 10 Len iyá nu satsa uinnaha dhi yiena ka nu tsia nnittikana arlo Tata Do Yebáha. Lakana nuha labí begwekana lidhaka tisa nu anka gwalíha, labí benkana ki odilá Tata Do Yebáha kana.
\v 11 De nuha nna rugwelhabe kana kini rixú yiekana ria lekani ge gwen lasiha.
\v 12 Aníha kini ibixxi iginni iyába ka nu abittu ugía lekani ge nu anka gwalíha, sinuki uyuꞌurula lekani benkana nu satsaha.
\s Tsitsi gwaltseꞌe lo neda ge Tata Do Yebáha
\p
\v 13 Ttaka lebiꞌi xa betsi to, ka benne rakani Tata Do Yebáha gele, riꞌitu satíaba teeki ugwetue ixkixaru gele. Ugwetue ixkixaru, kumu ttili sisiꞌa tteha chi bekwebie le ki odilábie le, kumu Espíritu geeha ulesie le kini akale gebie lhe anágaba kumu de gwa ugíaba lele ge nu anka gwalí.
\v 14 Tata Do Yebáha nuha uxie le tti biyieninle ka tisa tse utixxiꞌentu leha, kini anáchu nna inná xxeni lele attiba ra xxeni le Jesucristu benne anke Xxanariꞌiha.
\v 15 Laxkala xa betsi to, gwaltseꞌe tsitsi lo neda gebie lhe bittu ixulhinle a udole tisa ge nu chi beleꞌentu leha, sila nu beleꞌentu le len tisa roꞌotu, lhe sila nu utixxiꞌentu le lo yetsi lhe.
\p
\v 16 Xxudiriꞌi do yebáha bedá lebie ukanie geriꞌi lhe ttu tsaba uleki tsitsie leriꞌi lhe, anágaba runie kini ruxxen leriꞌi deki gwadíbariꞌi nu tse utebie.
\v 17 Labie lhe kwinaba Jesucristu benne anke Xxanariꞌiha udú ittake lele, lhe anágaba useꞌe tsitsike le kini anáchu nna uinle lhe innele iyá nu anka tse lhe.
\c 3
\s Pabluha rinnabe len ka benne ki innabake gebie // len Tata Do Yebáha
\p
\v 1 Nnanna xa betsi to, rinnabaa len lebiꞌi, innabale getu len Tata Do Yebáha kini yuba chadhi ka tisa rigixxiꞌatu‑ni, delába ka tisa ge Jesucristu benne anke Xxanariꞌiha, lhe innabagabale lenie kini ka benne ugweke lidhaka ka tisa‑ni, attiba lebiꞌi chi begwele lidhakake.
\v 2 Innabagabale lenie kini odilábie riꞌitu lo ná ka nu re satsa lekani lhe lo ná ka nu ruin satsa lhe, kumu lebiꞌi gwa yu xeabale labí iyá ka benne chi ria leke ka tisa‑ni.
\v 3 Ttaka Jesús benne anke Xxanariꞌiha labí runnitti tisa gebie. Benneha guseꞌe tsitsibe le lhe godilábe le lo ná nu xxegwiha\f + \fr 3:3 \ft Lo yetsi‑ni ata dia ra: “godilábe le lo ná nu xxegwiha”, lo adí ka yetsi nna rá: “godilábe le lo nu satsa”.\f* lhe.
\v 4 Ruxxen letu gebie deki lebiꞌi, attiba chi diale rudole tisa ge nu chi bodhaꞌantu uinle, anába sa tsiale uinle.
\v 5 Benneha gwakaba lenie le ki akale benne siꞌi lasi attiba Tata Do Yebáha anke benne siꞌi lasi, lhe uingabe kini lebiꞌi utto uchíale attiba labie betto bechíabie lo nu gwateeha.
\s Pabluha rabie: “Teeki kwenriꞌi sina”
\p
\v 6 Betsi to kia, Jesucristu benne anke Xxanariꞌiha rutebie lo neda getu ki ratu le: “Gwalukwitta kweꞌe ka nu chi ria lekani Jesucristuha, delába ka nu ankakana nu lea, bittuba raka lekani bixa uinkana, lhe nigaba a ruinkana nu chi bedhetintu leha.”
\v 7 Lebiꞌi chiba yule gasina uinle ki taxxína tti tte ruintu, kumu riꞌitu tti useꞌetu len lebiꞌiha labí ukatu benne lea.
\v 8 Labí kwentaba utotu yetta gele, sinuki betú besába letu urentu sina rela lhe resá lhe. Aníha bentu kini abittu unnabatu lenle nu biyasintu.
\v 9 Laa innágariꞌi deki labí uka getu innabatu len lebiꞌi ki ugole riꞌitu. ¡Koꞌo! Gwa ukaba getu, deba nna labí uka letu innabatu lenle, kumu de raka letu uleꞌentu le gasina anka elha ruin getu, kini aníha‑gaba lebiꞌi nna uinle atti tte ruintu.
\v 10 Tti sa seꞌetu len lebiꞌiha bodhaꞌangabatu ratu le: “Ttu nu abittuba raka leni kwenna sina, abittugaba gona.”
\v 11 Ratu aní kumu chi binatu ge ttu chupale bittiba ruinle rekile, labí bixa sina ruinle, sun tteruba rekile rugaꞌa roꞌole ata labí ralhale innele.
\v 12 Jesucristu benne anke Xxanariꞌiha rutebie lo neda getu ki rulisatu le. Lebiꞌi ka nu ruinle aná gwalikwen sina ki aka gole nna abitturu utsetsinle adí ka benne.
\v 13 Adíle nna xa betsi to, abittu udhanle uinle nu anka tse.
\p
\v 14 Ganna nuxa benne abittu udoe tisa ge nu ratu lo yetsi‑ni, benneha gwaludo xubenále ge nu runie nna abitturu utsálee. Aníha kini ettunie.
\v 15 Deba nna bittu iseꞌenle lenie, latsiruba gwalulise, len tisa besiba gwalikise, gwalulise atti galába rulisariꞌi ttu betsi to geriꞌi.
\s Pabluha rulhuxe rinnebie
\p
\v 16 Jesucristu benne anke Xxanariꞌiha, benneha ruseꞌebie riꞌi latsiru. Kwinaba labie, meskiba bixa satele nna satíaba useꞌebie le xen su lasi, lhe akagaba lenie iyá ttele lhe.
\p
\v 17 Padiuxi ridhelhaa gele lo yetsi‑ni. Kwinaga neti Pablo runia nuní len letra kia, kumu aníba labiti runia xaniꞌa iyába ka yetsi ridhelhaa. Aníba runia letra kia.
\p
\v 18 Jesucristu benne anke Xxanariꞌiha edá lebie aka lenie iyá ttele. Amén.