\id 1TI
\h 1 Timoteo
\mt Yetsi nu sisiꞌa tte udhelha Pabluha ge Timoteo‑ni
\c 1
\p
\v 1 Neti Pablo ankaa apóstol ge Jesucristuha. Tata Do Yebaa benne rodilábie riꞌiha lhe Jesucristu benne ruxxen leriꞌi geeha lhe, lake bedhaꞌanke neti kini akaa apóstol.
\v 2 Ridhelhaa yetsi‑ni gelu xa Timoteo. Lu ankalu gwalíga ttiba xiꞌinia, kumu de beleꞌenia lu ria lelu ge Jesucristuha attiba neti ria lasia gebie.
\p Xxudiriꞌi do yebáha lhe Jesucristu benne anke Xxanariꞌiha lhe, lake edá leke aka lenke lu lhe satua leke lu, lhe anágaba uinke kini dholu xen su lasi lhe.
\s Pabluha bodhaꞌane Timoteo‑ni, kini usunana abittu uleꞌe ka nu reki niha attu tisa subi
\p
\v 3 Tti udáya daya daka Macedonia‑ni, laꞌania unnaba ditia lenlu ria, eyaꞌanlu lheꞌesi Éfeso‑na ki ulisalu ttu chupa ka nu seꞌe naa, kini abittu uleꞌekana attu nu subi, nu abittu raxxína len ka tisa ge Tata Do Yebáha.
\v 4 Ulisalu kana ki abittu tseꞌekana udo nagakani ge ka cuentu ka nu abittu dika ixú o tseꞌekana innekana ge nupaxa uka xuttokani itú nu reha. Ge nuná labí lhuxa loo innekana. Kumu luesi ka tisa‑na sun tteruba ruttilha ka nuná ka benne, attichula ixúkana ki useꞌe tsitsikana ka benne ruinke sina ge Tata Do Yebáha de chi ria leke gebie.
\v 5 De nuha nna bodhaꞌanaa lenlu kini uleꞌenlu ka benne akin ge luesike, kumu aná runi ttu benne rulaba lebie latsiru lhe yue deki runie nu anka tse, lhe ria lebie itú iki itú lebie ka tisa ka nu anka gwalí.
\v 6 Kumu ttu chupakana chi bedhankana abitturu ruinkana aní nna ge nu abí ixúla riseꞌekana rinnekana.
\v 7 Ka nuná raka lekani akakana ka nu ruleꞌe nu ra lo bia bennabi bodhaꞌan Tata Do Yebáha, ttaka nigaba lakana a rite dákinna ge nu rinnekana lhe ge nu rigixxiꞌa itú iki itú lekani lhe.
\p
\v 8 Ttaka riꞌi gwa yúbariꞌi deki tseba anka bia bennabi bodhaꞌan Tata Do Yebáha ganna ttixka riꞌi ixuinriꞌi na attiga anka geni
\v 9 lhe anágaba tegaba ki udhá leriꞌi deki bia bennabi‑na laa ukaga nuná ki ukinnina ka benne runi nu dika ixú. Koꞌo. Ukalana kini ukinnina ka nu riguꞌu niꞌakani ka tisa ge Tata Do Yebáha,
\q1 lhe ka nu abittu rudokana tisa gebie
\q1 lhe ka nu abittugaba ria lekanie lhe.
\q1 Anágaba nna ixúgabana kini ukinnina ka nu runi tulha
\q1 lhe ka nu abittu rudú xibikani arlo Tata Do Yebáha
\q1 lhe ka nu riguakana balaꞌana gebie lhe.
\q1 Anágaba ixúgaba bia bennabi‑na ki ukinnina ka nu ruttikana ka xxudi ixnákani
\q1 lhe ka nu runi elhutti lhe
\q1
\v 10 ka nu riguꞌu ixtúkani lhe.
\q1 Anágaba nna ixúgabana ki ukinnina ka nu ankakana xanna
\q1 lhe ka nu rudaxxukana ka benne nna ruttoꞌokana ke
\q1 lhe ka nu ankakana gwen lasi lhe.
\q1 Anágaba nna ixúgabana ki ukinnina ka nu rákana deki nu rinnekanaha ankabana nu gwalí, ttaka nna ruinba lekani
\q1 lhe ukinnigabana iyába ka nu ruinkana nu abittu raxxína len nu tse ruleꞌeriꞌi,
\q1
\v 11 delába ruleꞌeriꞌi nu tse dia lo ka tisa bodhaꞌan Tata Do Yebaa benne ra xxeni leha lhe anke leꞌa lhe.
\q1 Benneha nuha bodhaꞌane lasi náya kini kixxiꞌaya ka tisa‑ni.
\s Pabluha rugwebie ixkixaru Jesucristuha de gwatua lebie bie
\p
\v 12 Ixkixaru rugwea Jesucristu benne anke Xxanariꞌiha. Labie bedú tsitsie neti kumu de bexxen lebie neti ki akaa benne ixúnie lo sina gebie,
\v 13 meskiba ttuha ukaa benne unne satsaa gebie lhe anágaba udú nooa ka benne chi bedaxxuke neda gebie lhe bedhakaa ke attiba rakaba lasia. Ttaka Tata Do Yebáha gwa gwatuaba lebie neti kumu de labí chi ria lasia laꞌania, nigaba a yua bixa nuha runia.
\v 14 De nuha nna Tata Xisiha bedá lebie uka lenie neti ki ria lasia gebie lhe kini rakati ge ka benne de chi dua len Jesucristuha.
\p
\v 15 Tisa nu gwalíba nuní rinnea lhe tisa nu dika tsia le ka benne geni lhe, delába Jesucristuha bisiabie yiesi lo yu‑ni kini odilábie ka benne ruin tulha. Delo iyá ka benne ruin tulha, netiba nu ben satsaru.
\v 16 De nuha nna Tata Do Yebáha gwatua lebie neti kini Jesucristuha beleꞌebie nu re besi leeha len neti, kini anáchu nna iláni adíru ka nu ruin tulha nna tsia lekani gebie. Aníha kini de tsia lekanie nna aka benkana ttu dia lii.
\v 17 Laxkala satía uinriꞌi kini inná xxeni le Tata Do Yebaa benne rinnabie ttu dia liiha. Benneha labí rattie lhe nigaba labí rilenriꞌe lhe. Anágaba nna ankagabe ttu túbiru diosi, lhe yue iyá tte lhe. Amén.
\p
\v 18 Timoteo, xiꞌini to, nnanna rodhaꞌanaa lenlu ki uinlu doelha abittu gasinlu tti uinlu sina ge Tata Do Yebáha. Beni nu chi gaꞌananie uinlu, benba attiba chi utixxiꞌa ka betsi to geriꞌiha, delába nu ra Tata Do Yebáha uinlu.
\v 19 Ugía tsitsi lelu, beni nu rudhaka lelu deki anka tse, kumu seꞌe ttu chupa ka nu labí betabikinna ge nu anka tse, de nuha nna binittikana a ugíaru lekani.
\v 20 Aníha‑ba ben Himeneo‑ni lenna Alejandro‑ni. Lakana chi betea kana lasi ná nu xxegwiha. Aníha kini udhetikana abitturu kuakana balaꞌana ge Tata Do Yebáha.
\c 2
\s Pabluha rigixxiꞌabie gasina teeki uin ka benne tti ritupake // ata rulhake ge Tata Do Yebáha
\p
\v 1 Ladeꞌa tte rinnabaa lenlu, galu ka benne ria leke Jesucristuha ilhapike tisa len Tata Do Yebáha, innabake lenie ge iyá tte ka benne lhe ugweke bie ixkixaru lhe.
\v 2 Innabake ge ka nu rinnabia‑na lhe ge adíru ka nu nalha ladikinna lhe, kini anáchu tseꞌeriꞌi latsiru abittu tseꞌe tilhariꞌi, udola leriꞌi nu anka ge Tata Do Yebáha lhe tsia le luesiriꞌi lhe,
\v 3 kumu nuní ankana ttu nu tse lhe ankana ttu nu ruꞌu le Tata Do Yebaa benne rodilábie riꞌiha, kini abittu tsia nnittiriꞌi.
\v 4 Benneha raka lebie lhaa iyá ka benne seꞌe yiesi lo yu‑ni lhe isinke uinbiake nu anka gwalí lhe.
\v 5 Kumu ttúruba Tata Do Yebáha do lhe ttúrugaba benne do ki roseꞌe tsebie riꞌi len Tata Do Yebáha, delába Jesucristuha. Lee nuha uke benne attiba ankariꞌi.
\v 6 Benneha betebie elha nabani gebie, uttie ki utixe ge ka tulha ge iyábariꞌi. Labie bisie la sá atti chi gaꞌanani Tata Do Yebáha, kini len nu gwateeha beleꞌe Tata Do Yebáha nu raka lebie unie lenriꞌi.
\v 7 De lo niꞌa ge nuní nna biyaxia ki akaa apóstol, kini kixxiꞌaya ge Jesucristuha, lhe anágaba akagabaa benne uleꞌenia ka nu abittu ankakana nu Israel, kini tsia lekani ge Tata Do Yebáha lhe tsia lekani ge nu anka gwalí lhe. Gwalígati xa, labí ruin lasia.
\p
\v 8 Laxkala nu raka lasia uin ka benne biyú‑na, gaxaba seꞌeke inneke ulisake Tata Do Yebáha. Aná nna akake benne ruin latsiru lhe abittu elha riseꞌiki geke gatta, nigaba elha utilha lhe.
\v 9 Anágaba ka benne nuila‑na, latsiru tseꞌe xoke, ukuba xoke attiba ankaba geni; bittu uinke ttaba, nigaba ttebiake olhí ikike lhe abittugaba ixúkanie oru lhe perla lhe, nigaba ukuke ka xoke ka nu daka xxatta.
\v 10 Sinuki uinlake nu anka tse nu raxxína len nu ruin ka benne nuila rudo leke nu anka ge Tata Do Yebáha.
\v 11 Ka benne nuila‑na siiba akake, udoba nagake tti lo rigixxiꞌa ka benne ka tisa ge Tata Do Yebáha lhe bittugaba ekabike ge ka benneha lhe.
\v 12 Labí raka lasia ka benne nuila‑nala tseꞌeke uleꞌeke, nigaba innabiake ka benne biyú‑na, sinuki siiba akake,
\v 13 kumu Tata Do Yebáha benie Adán‑ni ladeꞌa tte, delola nna benie Eva‑ni.
\v 14 Nigaba laa Adán‑niga nuha uxí yie nu xxegwiha, sinuki nuilaha‑la nuha uxí yiena kini benna tulha.
\v 15 Ttaka nuilaha gwalábana de tseꞌe xiꞌinni, aná nna dhona tsia leni ge Jesús‑ni lhe akana ttu benne siꞌi lasi lhe. Anágaba nna dhona akana ttu benne nari xú arlo Tata Do Yebáha lhe uinna attiba ankaba geni lhe.
\c 3
\s Gasina teeki aka elha ruin ge ttu benne dhue arlo ka benne // chi ria leke ge Cristuha
\p
\v 1 Nu rinnea‑ni nu gwalíba anka nuní: ganna nuxa ttu benne raka lebie dhue arlo ka benne chi ria leke ge Cristuha ki uleꞌenie ke, tseba anka sina re le benneha unie.
\v 2 Ttaka tee ki
\q ake ttu benne abittu runie ttu nu dika itise geni,
\q lhe ake nu do leni ttúba nuila,
\q lhe anágaba ake nu du itá leni,
\q lhe ake ttu benne ladeꞌaxa ulaba lebie tti unie ttu bixa,
\q lhe anágaba nna ake ttu nu runi sipa,
\q lhe ake ttu benne jeru tte raxie ka benne lisie,
\q lhe ake benne gwaka gebie uleꞌenie adí ka benne,
\q
\v 3 lhe anágaba nna abittu ake ttu nu riꞌa,
\q lhe bittu ake nu rigila elha utilha lhe.
\q Anágaba nna abittu ake nu ruꞌu xxatta leni belhiu.
\q Nu uinlee, akalee ttu benne siꞌi lasi,
\q lhe ttu benne re besi lebie.
\m
\v 4 Lhe akagabe ttu benne rinnabia lheꞌe lisie latsiru, lhe anágaba ka xiꞌinieha akagabakana ka nu rudokana tisa gebie lhe tsia lekanie lhe.
\v 5 Kumu ttu benne ganna abíba raka gebie innabie lheꞌe lisie, ¿gasina aka ge benneha ulhenie ka benne chi ria leke Tata Do Yebáha?
\v 6 Anágaba nna abittu ake ttu nu si bedaxxube neda ge Tata Do Yebáha, kini ka ake ttu nu uin ttaba nna ibixxi iginnie attiba ubixxi biginni nu xxegwiha.
\v 7 Anágaba nna teeki aka benneha ttu nu ruin latsiru, kini anáchu, tti iláni ka nu abí ria lekani Cristuha nna abittu tee roꞌokani kuakana balaꞌana gebie nna iginnie lo yalhi ge nu xxegwiha.
\s Gasina teeki aka elha ruin ge ka benne ute náke // len ka benne chi ria leke ge Cristuha
\p
\v 8 Anágaba adí ka benne galha ladike ki ute náke len ka benne chi ria leke ge Cristuha, ka benneha tee ki
\q akake ka nu dika tsia le ka benne ke,
\q lhe akake ka nu abittu rigitta náke,
\q lhe anágaba teeki akake ka nu abittu riꞌiya xxatta,
\q lhe abittugaba akake ka nu rotsiꞌinu leke gaxasina uinke ki galhike belhiu ge ka benne.
\q
\v 9 Anágaba nna teeki akake ka benne abittu udhanke a tsia leke nu chi belaꞌani Tata Do Yebáha ke ge Cristuha, kumu lake yuke deki nu ruinkeha gwa ankabana tse, abittu rudheana loke.
\m
\v 10 Aná nna ladeꞌaxa tsuꞌuke prueba. Ganna si abittuba tee ttu bixa itisake geni, laꞌanialiba nna chi dhi ladike ki ute náke len ka benne chi ria leke Cristuha.
\v 11 Anágaba ka benne nuila‑na tee ki
\q akake ka nu dika tsia le ka benne ke,
\q lhe akagabake ka nu abittu rilhidha tisa a ixú,
\q lhe akake ka nu du itá leke lhe.
\q Anágaba nna akake ka nu gwa ruinbake iyá nu rákeha.
\m
\v 12 Ka benne biyú galha ladikeha tee ki
\q akake benne do len ttúba nuila,
\q lhe innabia tseke ka xiꞌinke lhe adíru ka benne seꞌe lheꞌe lisike lhe.
\m
\v 13 Kumu ka benne nalha ladike ki rute náke len ka benne chi ria leke Cristuha, ka benneha ganna ruin tseke nu daa loke uinke, laꞌania nna gweyyaba le ka benne ke lhe anágaba nna isinke tsia tsitsiru leke ge Jesucristuha.
\p
\v 14 Lu nna Timoteo, ruxxen lasia deki chi tteba itaa etelannia lu, ttaka runia nuní lo yetsi‑ni nna ridhelhaa na lenlu,
\v 15 kini ni kina isábaa abíba isia xxia, laꞌania nna chi yulu gasina teeki uinlu len ka xiꞌin Tata Do Yebáha, delába ka benne chi ria leke bie. Ka benneha ankake attiba ttu betubi seꞌe tsitsike, denke ka tisa ka nu gwalíga ankake ge Tata Do Yebaa benne anka baniha.
\v 16 Gwalí galá, itú ttuha xxeniba anka nu labí yu ka benne ge Cristuha, delába labí yuke deki benneha
\q bisiabie yiesi lo yu‑ni uke benne attiba ankariꞌi,
\q nna Espíritu ge Tata Do Yebáha beleꞌenie riꞌi deki benneha uke benne tse.
\q Anágaba nna bilágabin ka anjeli ge Tata Do Yebáha bie,
\q lhe biyiengabani ka nu abittu ankakana ka nu Israel ka tisa geeha,
\q lhe anágaba nna ugíagaba le ka benne seꞌe yiesi lo yu‑nie.
\q Iki deliba nuha nna tti bedí Tata Do Yebáha bie kini besine yebáha.
\c 4
\s Pabluha rigixxiꞌanie Timoteo‑ni gasina uinna lhe gasina uleꞌenna ka benne chi ria leke ge Cristuha
\p
\v 1 Espíritu ge Tata Do Yebáha lhixxa rába rigixxiꞌe ree, atti chi dabiga isia ka sá daluxaha, laꞌania ttu chupa ka nu chi ria lekani ge Cristuha, udhanlakana labíru tsia lekanie. Udola nagakani ge ka nu ruin lekani lhe udola nagakani ge ka nu ruleꞌekana nu ra ka espíritu xxegwiha.
\v 2 Ka nuha labíru raka tékinna ge nu ruinkanaha. Delo tisaba ruinkana deki tseba rigixxiꞌakana, ttaka ruinba lekani.
\v 3 Usunagabakana utsá ná ka benne lhe usunagabakana goriꞌi iyá nu chi gaꞌanani Tata Do Yebáha goriꞌi. Kumu labie chi benie nuha ki akana nu dika goriꞌi, kini anáchu nna ka benne ria leke Cristuha lhe ka benne chi yuke ka tisa ka nu anka gwalí, tti goke nu chi gaꞌananie goriꞌiha nna ugweke bie ixkixaru.
\v 4 Kumu tseba anka iyába nu ben Tata Do Yebáha. Laxkala labí dika udelha lattiriꞌi nu benieha, ladiba ganna ugweriꞌe ixkixaru tti goriꞌi benneha.
\v 5 Kumu len ka tisa ge Tata Do Yebáha lhe len ka tisa rinneriꞌi tti rinnabariꞌi lenie, len ka benneha rocharie benne roriꞌi.
\p
\v 6 Ganna iyá nuní uleꞌenlu ka betsi to geriꞌi‑na, laꞌanialigaba nna gwankalu ttu benne ruin tselu sina ge Jesucristuha, kumu de deti tsitsilu ka tisa ria leriꞌi‑na, ka nu chi belaꞌakanie lu, delába ka tisa ka nu rudogabalu tisa gekani.
\v 7 Abittu udo nagalu ge ka cuentu a ixú, ka nu bittu dika tsia leriꞌi gekani. Lu benla doelha bedo lelu nu anka ge Tata Do Yebáha.
\v 8 Kumu ttu nu rudhetina ruxunnina kini aka tsitsi latini, ttu sattiruba ixú nu ruinnaha lenna, ttaka riꞌi ka benne rudo leriꞌi nu anka ge Tata Do Yebáha, ge iyá tte ixú nu ruinriꞌiha: ixúna lenriꞌi nnanna seꞌeriꞌi anka benriꞌi yiesi lo yu‑ni lhe ixúgabana lenriꞌi ganna chi seꞌeriꞌi yebáha.
\v 9 Tisa rinnea‑ni ankabana nu gwalí lhe nu dika tsia le iyá ka benne lhe.
\v 10 De nuha nna rateriꞌi lhe ruinriꞌi doelha kumu ruxxen leriꞌi ge Tata Do Yebaa benne anka baniha. Benneha anke benne rodilábie iyá tte ka benne. Ka benne ria leke ge Cristuha, ka benneha nuha ladeꞌa tte rodilábie ke.
\p
\v 11 Ge iyá nu rigixxiꞌaya‑ni, beleꞌekin benne lhe usi ke udoke tisa geni lhe.
\v 12 Ben kini abittu kuꞌu niꞌake lu de ankalu nu kwiti. Ben latsiru kini ka benne ria leke ge Cristuha, tti ilákanie elha ruin gelu‑na, laꞌania nna aníha‑gaba uinke. Latsiru unne lhe latsiru beni. Anágaba nna akagabinlu ge ka benne lhe beni kini uleꞌe deki gwalínlu ria lelu Cristuha, lhe ben tagaꞌa nu anka tse lhe.
\v 13 Laka neti esiaya nna lu belaba ka tisa ge Tata Do Yebáha arlo ka benne lhe belisa ke lhe beleꞌe kanie gaxasina tseꞌeke.
\v 14 Abittu uxxulha lelu a ixuinlu elha tse rapalu‑na. Nuná bete Tata Do Yebáha lenlu tti uxxua ná ka benneola geriꞌiha ikilu nna utixxiꞌakanie lu nu ra Tata Do Yebáha deki uinlu.
\p
\v 15 Nuní bedo lelu lhe nuní beni lhe, kini anáchu iláni iyá ka benne deki gwa diabalu rakaru gelu.
\v 16 Biyú gelu, latsiru beni lhe latsiru beleꞌeni ka benne lhe. Nuná bedo lelu beni, kumu ganna aná uinlu, laꞌania nna gwalábalu abittu tsia nnittilu lhe gwalágaba ka benne udo nagake gelu lhe.
\c 5
\s Pabluha rigixxiꞌanie Timoteo‑ni gasina uinna len ka benne // chi ria leke ge Cristuha
\p
\v 1 Abittu ulisa disalu ttu benne biyú chi diarunie ida. Belisalee attiba rulisalu ttu xxudilu. Ka nu kwiti‑na nna belisa kana attiba ttu betsilu.
\v 2 Ka benne nuila chi diarukanie ida‑na nna belisa ke attiba rulisalu ttu ixnálu, nna ka nuila kwiti‑na nna belisa kana attiba ttu danlu, abittu bixa ulaba lelu gekani.
\p
\v 3 Ka benne nuila bidabi‑na aka lenlu ke ata anutturu nu banikanie.
\v 4 Ttaka ganna ttu benne nuila bidabi gwa seꞌeba xiꞌinie o xidhoe, ka nuha xa ladeꞌa udhetikana uyúkane. Aníha kini odekikana ge nu chi biyúe kanaha, kumu aníha anka tse lhe aníha ruꞌu le Tata Do Yebáha lhe.
\v 5 Benne nuila bidabi chi beyaꞌan ttu túbibeha, benneha nna ge Tata Do Yebáha‑ba ruxxen lebie nna labí rudú siie rilhapie tisa, rela resába rinnabe gebie len benneha.
\v 6 Ttaka ganna ttu nuila bidabi rekina ruinna nu rakaba leni, sa do benla nuha yiesi lo yu‑ni, chi ankana yatti arlo Tata Do Yebáha.
\v 7 Iyá nuní beleꞌekin benne kini abittu bi ge itisake.
\v 8 Kumu ttu nu abíba ruchacha ikini ge ka benne geni, nuha ganna abíba ladeꞌaxa uchacha ikini ge ka benne seꞌe lheꞌe lisini, nu runi aní chiba bedhan nuha a riaru leni Cristuha nna adírula satsa nuha chi ruin nuha attichula ttu benne abittu chi ria lebie.
\p
\v 9 Debá ka benne nuila bidabi chi ankakanie gayuna (60) ida, debá ka benne‑na nuná chi ralhake ibabake len ka nan to bidabi to‑na, ki ute nále lenke. Aná nna teeki ukake nuila udo len ttúba nubiyú,
\v 10 lhe daa tisa deki gwa ruinbake iyá nu anka tse lhe;
\q delába gwa biyú tseba xiꞌinke,
\q lhe karrila tte raxike ka benne lisike,
\q lhe gwankake ka benne rigíke niꞌa ka benne chi ankake ge Tata Do Yebáha,
\q lhe rute náke len ka benne ruyúke ttu bixa elha disa,
\q lhe gwa rudona leke ruinke iyá nu anka tse lhe.
\p
\v 11 Ttaka ka nuila bidabi ka nu ankaru kwiti‑na, labí chi ibaba ka nuná len ka nan to bidabi to‑na, delába ka benne chi ralhake ute nále lenke. Kumu ka nuná, tti reta le latikani bixa uinkana, laꞌania nna raka lekani otsá nákani nna labíru rudo lekani nu anka ge Cristuha.
\v 12 Tti ruinkana aníha, tulhaba nuha chi dákana, kumu labíru ruinkana nu chi rákana Tata Do Yebáha deki uinkana, delába ixúkana lo sina geeha.
\v 13 Anágaba nna ridetigabakana rakakana nu lea lhe rakakana nu dataa lhe reriakana ttu yoꞌo nna raditaꞌakana attu yoꞌo. Anna laa suna nu learuga reyakakana, anágaba nna rekigabakana gwette tisa a ixú lhe rugaꞌa roꞌokani ata labí ralhakana innekana lhe anágaba rinnegabakana nu labí dika innekana.
\v 14 Laxkala raka lasia, ka nuila bidabi kwiti‑na otsála nákani, lhe uyúlakana ka xiꞌinkani lhe ulhíla lekani lheꞌe lisikani lhe. Aníha uinkana kini ka nu abittu raka uyúkana kanaha, abittu tee roꞌokani bixa innekana gekani,
\v 15 kumu ttu chupa ka nuila‑na chi bekwittakana lo neda ge Tata Do Yebáha nna nu xxegwiha‑la chi danalhakana.
\p
\v 16 Ganna ttu benne nuila ria lebie Cristuha seꞌe ka nuila bidabi raka luesie, benneha teeki ute nee len ka nuila bidabi raka luesieha, kini adí ka benne ria leke Cristuha nna abittu uchacha ikike ge ka nuha, sinuki utela náke len ka nuila bidabi ka nu gwalíga anutturu nu banikanie.
\p
\v 17 Ka benneola ka benne rinnabiake le latsiru, ka benne‑na nuná ralhake uyú tsele ke lhe tsia lele ke lhe. Ttaka ka benneola ka benne rigixxiꞌake lhe ruleꞌeke ka tisa ge Tata Do Yebáha, ka benne‑na nuná rakarula doelha uyú tserule ke lhe tsia tsitsiru lele ke,
\v 18 kumu lo ka yetsi ge Tata Do Yebáha dia ra: “Abittu kuꞌulu yexxa roꞌo ka kuꞌuna rulea iki xuxtilaha.”\f + \fr 5:18 \ft Deuteronomio 25:4\f* Lhe anágaba diagaba ra: “Nu riben sinaha ralhaba nuha dhi lhiaxani.”\f + \fr 5:18 \ft Mateo 10:10; Lucas 10:7\f*
\p
\v 19 Ganna nuxa ukinnina ttu ka benneola ridú arlo ka benne chi ria leke Cristuha, abittu tsiaxxi lelu ge nu inná nu ukinnina benneha. Axtaliba ganna seꞌe chupa o tsunna ka benne bilákanie bixa ben benneha, laꞌanialiba nna tsia lelu ge nu rukinnina benneha.
\p
\v 20 Ka nu abittu rudhankana ruinkana tulha, ka nuná utisa kana arlo iyá ka benne, kini adíkana gasikinna nna abittu uinkana aná.
\p
\v 21 Arlo Tata Do Yebáha lhe arlo Jesucristuha lhe arlo ka anjeli chi ulesie ki akake gebie, arlo ka benne‑ni rodhaꞌanaa lenlu ki uinlu nu rinnea‑ni. Bittu tserula uinlu len ttu benne tti len adí ka benne; tu tulapaba uinlu len iyábake.
\v 22 Abittu iyubaxxinlu ixxua nálu iki ttu benne raka lebie ixúe lo sina ge Tata Do Yebáha. Kumu ganna benneha runie bixa ttu nu satsa, laꞌania nna iyágabalu tsia kweꞌelu nu ruin benneha. Lu udola, beni nu anka tse.
\p
\v 23 Lu Timoteo, de satti balhaba rulhabina gelu lhe ranilu lhe, abittu suna indaba iꞌiyalu, uꞌuyala latti vinu.
\p
\v 24 Seꞌe ka benne rilá loo tteba tulha ruinke atti lanila iso duke aka elhuxtisi geke. Ttaka seꞌe adíke nna deloliba rilá loo ge nu ruinkeha,
\v 25 nna ka benne ruin tseke, rilá tteba nu tse ruinkeha nna ka benne abíba rilá nu tse ruinkeha nna gwasiaba sá tti ilá nuha.
\c 6
\p
\v 1 Iyá ka benne selake len lebiꞌi, ka benne toꞌoke lo sina ge ka xxanake, teeki tsia leke ka xxanake‑na, abittu elhapi roꞌoke ka benne‑na, kini abittu itua balaꞌana ge Tata Do Yebáha lhe abittu itua balaꞌana ge ka tisa ruleꞌeriꞌi‑ni lhe.
\v 2 Ka benne seꞌe ka xxanake chi ria leke Cristuha, abittu de chi ria le ka benneha nna udhanke a tsiaru leke ke. Koꞌo. Nu uinlake kwen tserulake lo sina ge ka benneha, kumu de chi yuke ka benne ruteke sina gekeha chi ankake betsike lhe rakani Tata Do Yebáha geke lhe. Timoteo, nuní beleꞌeni ka benne lhe nuní usi ke udo leke lhe.
\s Timoteo, biyú gelu len ka nu rigixxiꞌakana ka tisa // ka nu abittu raxxína len ka tisa ge Cristuha
\p
\v 3 Ganna ttu benne ruleꞌebie attu tisa subi, nu abittu raxxína na len ka tisa tse beleꞌe Jesucristu benne anke Xxanariꞌiha, lhe nigaba a raxxína na len ka tisa ka nu ruleꞌekinna riꞌi gasina uinriꞌi nu dika tsuꞌu le Tata Do Yebáha,
\v 4 nu ruleꞌe aníha
\q ttababa nuha chi ruin nuha,
\q lhe nigaba labí raka geni lhe.
\q Chiba labin nuha ruttilha roꞌoni ge ka tisa a ixú.
\q Delo niꞌa ge nu ruinnaha nna ritisin luesi ka benne,
\q lhe ritilha len luesike lhe.
\q Anágaba nna riguagaba balaꞌana ge luesike,
\q lhe labíru ria le luesike lhe.
\q
\v 5 Satíaba ritilha tisake.
\m Ka nu ruleꞌekana aní chiba riganna iki ka nuná, labíru yani do ikikani ki tte dákinna ge nu anka gwalí. Lakana rakakinna de udo lekani nu anka ge Tata Do Yebáha, de uinkana aníha nna kweakana belhiu len ka benne. Ka nu ruin aná, lu Timoteo, bekwitta kweꞌe ka nuná.
\p
\v 6 Gwalí galá, riꞌi xxeniba anka elha tse tee geriꞌi de rudo leriꞌi nu anka ge Tata Do Yebáha, ladiba ganna gwa reyaka xenruba leriꞌi ttixaruba tee geriꞌi.
\v 7 Kumu tti bisiariꞌi yiesi lo yu‑ni labí bi cheriꞌi, anágaba ganna chi eyaꞌariꞌiha labí bi echeriꞌi.
\v 8 Laxkala ganna gwa teeba nu roriꞌi lhe gwa teeba nu rukuriꞌi lhe, ukareꞌaba len nuha eyaka xen leriꞌi.
\v 9 Kumu ka nu raka lekani gatta xxatta gekani, nnela rixú yie ka nuná ruinkana nu abittu dika ixú lhe ridá lekani ruinkana nu abittu anka tse lhe. Nu ruinkanaha, ttu tsaba runnitti nuha kana.
\v 10 Kumu ka nu ridá lekani belhiu, de ruinkana aníha nna raka xxe iyá looba nu satsa. Aní ria kumu seꞌe ttu chupa ka benne ria leke Cristuha nna chi bedhanke a riaru leke ge benneha, de ridá leke gatta belhiu geke. De lo niꞌa ge nuha nna ixeba nu rateke.
\s Pabluha bodhaꞌane bixa anka nu uin Timoteo‑ni
\p
\v 11 Ttaka lu xa Timoteo, lu ankalu benne rixúni Tata Do Yebáha. De nuha nna abittu uinlu tti ruin ka nuná.
\q Bedola lelu ben nu dika ixú arloe,
\q lhe bedola lelu nu anka gebie lhe.
\q Anágaba nna bedogaba lelu ki tsiaru lelu ge Cristuha,
\q lhe bedola lelu akinlu ge ka benne,
\q lhe bechía lo nu ratelu‑na lhe.
\q Anágaba nna akalu benne re tse lelu.
\m
\v 12 Kumu de ria lelu ge Cristuha, de nuha nna ben doelha ugía ben sina gebie. Beni kini gatta elha nabani gelu ttu dia lii, kumu de nuha‑la uxi Tata Do Yebáha lu lhe de nuha‑la latsiruba unnelu tti utixxiꞌalu arlo ixe ka benne ralu ke deki chi ria lelu ge Cristuha.
\v 13 Nnanna nna arlo Tata Do Yebaa benne rutebie elha nabani ge iyá tte nu benie, delába iyá nu seꞌe yiesi lo yu‑ni, lhe arlo Jesucristu benne unnebie nu anka gwalí tti biso due arlo Poncio Pilato‑ni, arlo ka benne‑ni rodhaꞌanaa lenlu
\v 14 udolu tisa ge iyá nu chi xpeya lu. Abittu utsealu nu chi ria‑ni. Aníha kini abittu bi ge itisalu ganna chi besia Jesucristu benne anke Xxanariꞌiha.
\v 15 Benneha esiabie la sá tti chi gaꞌanani Tata Do Yebáha esiabie. Tata Do Yebáha anke leꞌaha lhe sunruba labie ra xxeni lebie lhe. Labie anke Xxana ka nu ra xxeni lekani lhe anke Nu Loni ge iyá ka nu rinnabia lhe.
\v 16 Sunruba labie anke benne labí rattie, lhe sunruba labie doe lheꞌe xiani ata lanú nu aka geni isinna ata doeha, lhe ni ttu benne labí chi bilánie benneha, nigaba labí aka geriꞌi ilenriꞌe. Benneha nuha ralhe inná xxeni lebie lhe ralhe ake benne rinnabie ttu dia lii lhe. Amén.
\p
\v 17 Ka nu tee gekani seꞌe yiesi lo yu‑ni usi kana abittu uinkana ttaba, nigaba uxxen lekani ge elha tse tee gekani, kumu elha tse tee gekinna eyába nuná. Ge Tata Do Yebaa benne anka baniha‑la uxxen lekani. Benneha rutebie iyá tte nu riyasinriꞌi lhe rute tame geriꞌi kini riꞌi edí baariꞌi nu ruteeha.
\v 18 Usi kana uinkana latsiru, uinkana iyá nu anka tse, lhe edá lekani itú iki itú lekani utekana nu tee gekani len ka benne.
\v 19 Ganna aníha uinkana, laꞌania nna gudienrula elha tse gekani nu si daa, kini aníha‑chu nna esinkana aka benkana ttu dia lii.
\p
\v 20 Xa Timoteo, ben nu chi bodhaꞌan Tata Do Yebáha uinlu. Bittu udo nagalu ge ka tisa abittu ixú lhe ge ka tisa ka nu abittu daka lhe. Nigaba udo nagalu ge ka tisa nu ra ka benne deki rutekana elha yuu geriꞌi, ttaka labí lii deki rutekana elha yuu geriꞌi.
\v 21 Kumu ttu chupakana, ge ka tisa‑nala bedo nagakani nna biriesikana lo neda ge Tata Do Yebáha, labíru ria lekani attiga ankaga geni.
\p Tata Do Yebáha aka lenie lu xa Timoteo. Amén.