\id 2TI
\h 2 Timoteo
\mt Yetsi nu berupa udhelha Pabluha ge Timoteo‑ni
\c 1
\p
\v 1 Neti Pablo ankaa apóstol ge Jesucristuha. Tata Do Yebáha bedá lebie kini akaa apóstol kini kixxiꞌania ka benne nu chi rabie unie, delába unie ki aka benriꞌi ttu dia lii de babariꞌi len Jesucristuha.
\v 2 Ridhelhaa yetsi‑ni gelu xa Timoteo, xiꞌini to kia. Xxudi do yebaa geriꞌiha lhe Jesucristu benne anke Xxanariꞌiha edá leke aka lenke lu lhe satua leke lu lhe, anágaba uinke kini dholu xen su lasi lhe.
\s Pabluha rabie Timoteo‑ni: “Bedo lelu beni nu bodhaꞌan // Tata Do Yebáha lasi nálu”
\p
\v 3 Satíaba rugwea Tata Do Yebáha ixkixaru tti rexxa lasia lu. Rela lhe resá lhe rudettia lu tti rilhapia tisa lenie. Itú iki itú lasia runia sina gebie attiba ben ka benneola kiaha, kumu neti yu xeabaa labí runia ttu bixa nu udheana loa.
\v 4 Tti radú lasia gasina ribesiluha, laꞌania nuha yalhá raka lasia iláti lu kini edú itta lasia.
\v 5 lhe radúgaba lasia gasina ria lelu ge Cristuha itú iki itú lelu. Riaba lelu attiba ugía le nan xxen gelu Loida‑ni. Ladeꞌa tte benneha ugía lebie, delola nna tti ugía le nan gelu Eunice‑ni. Neti yu xeabaa anágaba lu riagaba lelu.
\v 6 De nuha nna rodhua lelu, bedulo bodo lelu elha tse bete Tata Do Yebáha gelu, delába elha tse betebie gelu atti uxxua náya ikiluha.
\v 7 Kumu Tata Do Yebáha laa benge riꞌi kini akariꞌi benne gasinriꞌi, sinuki benlee riꞌi kini akariꞌi nu kweki tsitsi leni lhe akariꞌi benne siꞌi lasi, lhe anágaba akariꞌi benne innabiariꞌi elha ruin geriꞌi lhe.
\p
\v 8 Laxkala abittu ettuinlu tti kixxiꞌalu ka tisa ge benne anke Xxanariꞌiha, nigaba ettuinlu kia de tea lisiyya de runia sina gebie. Nu uinlalu betto bechíala lo elha disa ratelu de rekilu ugixxiꞌa ka tisa ge Jesucristuha, ttiba neti gwa rutto ruchíabaa. Tata Do Yebaa benne ra tsitsi leeha, benneha unie ki dhaalu utto uchíalu lo nu ratelu‑na.
\v 9 Benneha bodilábie riꞌi kini abittu tsia nnittiriꞌi lhe anágaba uxie riꞌi kini akariꞌi gebie. Laa uxige riꞌi de ruin tse xxattariꞌi. ¡Koꞌo! Uxie riꞌi kumu aníha‑ba chi gaꞌananie unie lenriꞌi attili lani kwe yiesi lo yu‑ni. Laꞌaniali chi bedá lebie uxie riꞌi de chi babariꞌi len Jesucristuha.
\v 10 Ttaka nnanna chi ruleꞌe Tata Do Yebáha nu tse redá lebie unie lenriꞌi de chi bita Jesucristuha yiesi lo yu‑ni, delába Jesucristu benne rodilábie riꞌi. Benneha utuabie elhutti geriꞌi lhe anágaba beleꞌenie riꞌi, ganna tsia leriꞌi ka tisa tse, delába ka tisa rigixxiꞌa geeha, laꞌania nna gwaka benbariꞌi ttu dia lii, labí gattiriꞌi arloe.
\p
\v 11 Tata Do Yebáha bedhaꞌane ka tisa‑ni len neti ki akaa benne ichea ke lhe kixxiꞌaya ke lhe uleꞌa ke\f + \fr 1:11 \ft Lo yetsi‑ni ata dia ra: “uleꞌake lhe”, lo adí ka yetsi nna ra: “Ulaꞌania ka benne abittu ankake nu Israel.”\f* lhe.
\v 12 De rigixxiꞌaya ka tisa‑ni nna ratea iyá nu ratea‑ni, ttaka labí rettuti, kumu gwa yubaa nú ge ria lasia lhe yu xeabaa deki benne ria lasiaha, tsitsi ra le benneha nna guyúbe iyá nu bodhaꞌane lasi náya axtaliba ganna chi bisia sá esia Jesucristuha.
\p
\v 13 Beni nu ra ka tisa tse utixxiꞌania luha. Beleꞌe deki gwa ria lelu Jesucristuha lhe beleꞌe deki gwa rakinlu ge ka benne de babalu len benneha.
\v 14 Espíritu ge Tata Do Yebaa benne doe lheꞌe lastoriꞌi, benneha unie kini kixxiꞌalu tti ttega ra ka tisa bodhaꞌan Tata Do Yebáha lasi nálu.
\p
\v 15 Lu chiba yulu, iyába ka nu ria lekani Cristuha ka nu seꞌe daka Asia‑na bedhába ikikani neti, lenkana Figelo‑ni lhe Hermógenes‑ni lhe.
\v 16 Ka benne seꞌe lisi Onesíforo‑ni nna satuachi le Tata Do Yebáha ke, kumu Onesíforo‑ni labí bettuinna kia de yayaa lisiyya. Ixe lidú bitana betedú ittana lasia.
\v 17 Tti bisiana Roma‑ni ugweki ttebana begilana neti nna betexxakalibana neti nna beyaka xen leni.
\v 18 Tata Xisiha satuachi lebie na ganna chi bisia sá eso duriꞌi arloe. Lu gwa yu xeabalu yalhá bixúna len neti tti udoa lheꞌesi Éfeso‑na.
\c 2
\s Pabluha rabie Timoteo‑ni: “Betto bechía lo nu ratelu‑na // de ruinlu sina ge Tata Do Yebáha”
\p
\v 1 Lu xa Timoteo, xiꞌini to kia, tsitsi udú lo neda ge Tata Do Yebáha kumu lee redá lebie raka lenie lu de babalu len Jesucristuha.
\v 2 Nu chi biyieninlu unnea arlo ixe ka benne, nuha belaꞌani ka nubiyú ka nu dika uxxen leriꞌi gekani lhe anágaba gwaka gekani uleꞌekinna adí ka benne lhe.
\p
\v 3 Lu Timoteo, attiba ruin ttu soldadu rutto ruchíana lo nu ratenaha, aníha‑ba lu betto bechía lo nu ratelu‑na de babalu len Jesucristuha.
\v 4 Kumu ttu benne biyaxie kini ake soldadu, labí dika attu sina subila unie. ¿Laaba ganna teeki unie nu ruꞌu le nu uxineha kini ake soldadu?
\v 5 Anágaba ganna ttu nubiyú selana gwitta, ganna nuha abíba udona tisa ge iyá nu gaꞌanna uinna tti diana ruxunninaha, laꞌania nna labí dhi nuha nu ralhana dhina
\v 6 lhe anágaba ganna ttu nubiyú reguꞌelha leni ribenna sina lo ka yuha, lana nuha ladeꞌa tte edína lena exú lo ka nuha.
\v 7 Belaba lelu ge nu xpeya lu‑ni, nna Tata Xisiha gutebe elha rieni gelu ki tte denlu iyá tte.
\p
\v 8 Bodhú lelu ge Jesucristu benne datiabie David‑ni. Benneha beyaka benbe lo elhuttiha ttiba ra ka tisa tse, delába ka tisa rigixxiꞌaya gebie.
\v 9 De ka tisa‑ni nna rate xxattaa tea lisiyya‑ni, axtaba xigaa cadena ttiba ttu nu ben elhutti; ttaka ka tisa ge Tata Do Yebáha gwakaba ge ka benne kixxiꞌake ka benneha, kumu labí xika ka tisaha.
\v 10 Neti lo iyába nu ratea‑ni rutto ruchíaya; runia kini ka benne chi bekwe Tata Do Yebáha saría tsena ke, kini anágaba ka benneha nna gwaláke de babake len Jesucristuha lhe edí baake nu tse tee ttu dia lii yebáha lhe.
\p
\v 11 Tisa nu gwalíba nuní rinnea.
\q Kumu ganna riꞌi chi uttiriꞌi len Cristuha, laꞌania nna gwesingabariꞌi tseꞌe lenriꞌe,
\q
\v 12 lhe ganna uchíariꞌi lo elha disa rateriꞌi, laꞌania nna gwannabiagabariꞌi lenie,
\q lhe ganna riꞌi abíba dhi roꞌoriꞌi deki ankabienriꞌe, anágaba lee nna innágabe labí ankabianie riꞌi,
\q
\v 13 lhe ganna ttixka riꞌi abíba ruinriꞌi nu chi rariꞌi deki uinriꞌi, ttaka benneha nna gwa ruinbe nu chi rabie unie,
\q1 kumu benneha ttu tsa labí runnitti tisa gebie.
\s Pabluha rigixxiꞌanie Timoteo‑ni gasina dika uinna // sina ge Tata Do Yebáha
\p
\v 14 Nuní usi ka betsi to geriꞌi‑na udhá leke geni, lhe anágaba arlo Tata Do Yebáha bodhaꞌan tsitsi usi ke abitturu tsuꞌuke itilhake ulisa luesike delo niꞌa ge ka tisa ka nu abí dika ixú, kumu nu ruinke‑na labí ixú nuná. Sun tteruba rixú nuná kini runnittina adí ka benne, delába ka benne riyienkanie nu ra ka benne ritilha‑na.
\v 15 Ben doelha beni nu tsuꞌu le Tata Do Yebáha. Beni atti galába runi ttu benne riben tsebie sina nna abittu bi ge ettunie, kumu gwa rulaꞌa tsebe ka tisa ka nu rigixxiꞌakana ge nu anka gwalí.
\v 16 Abittu udo nagalu ge ka tisa satsa lhe ge ka tisa abí ixú lhe, kumu ka nuná sun tteruba rixúkana ki rusigakana ka benne kini ruin chiettiruke nu labí ruꞌu le Tata Do Yebáha.
\v 17 Ka tisa luesi nuní diabakana rutseꞌe lookana ka benne, ruinbakana attiba ruin ttu gwe diana rudusuna lati ttu benne. Himeneo‑na lhe Fileto‑na lhe, lakana selakana len ka nu rinne luesi ka tisa‑ni.
\v 18 Lakana chiba binittikana, labíru rigixxiꞌakana ge nu anka gwalí. Rálakana deki ka benne chi uttiha chiba beyaka ben ka benneha, ttaka de nuha nna ruchixxikana iki ttu chupa ka benne, nigaba a yúruke gasina dika tsia leke Cristuha.
\v 19 Ttaka Tata Do Yebáha chi bodhaꞌane ka tisa ka nu rigixxiꞌakana ge nu anka gwalí. Ka nuní ruseꞌe tsitsikana riꞌi. Ka tisa ka nu bodhaꞌaneha, rákana: “Tata Xisiha gwankabiabanie ka benne chi ankake gebie”; lhe anágaba rágaba ka tisaha: “Iyába ka benne ráke: Riꞌitu chi ankatu ge Tata Xisiha, ka benne ra aníha abitturu uinke nu satsa.”
\p
\v 20 Ttibanka lheꞌe ttu yoꞌo yala, laa sunruga ka yeꞌena ka nu ankakana ge oru lhe ge plata lhe seꞌe lheꞌe nuha, seꞌegaba ka nu ankakana ge yaga lhe ge yuna lhe. Ka nu ankakana ge oru lhe ge plata lhe, ka nuha rixúkana ki ritaꞌa elho lheꞌekani atti raka ka laní‑na nna ka nu ankakana ge yaga lhe ge yuna lhe, ka nuha nna rixúkana adí ka sá.
\v 21 Laxkala ganna ttixka ttu benne abitturu runie nu satsa, benneha chi anke attiba ttu yeꞌena ge oru lhe ge plata lhe. Chi biriesie ki ixúe len Tata Do Yebáha lhe chi du tsebie kini unie iyá nu anka tse lhe.
\p
\v 22 De nuha nna lu bexunni lo nu satsa reta le ka nu kwiti‑na ruinkana. Lu bedola lelu ben nu dika ixú arlo Tata Do Yebáha lhe bedola lelu ugía lelu ge Cristuha lhe anágaba bedola lelu akinlu ge ka benne lhe latsiru udo lenke lhe. Aní dika uinlu itupa lenlu ka benne chi rulisake Tata Xisiha, delába ka benne chi ankake nari xú arloe.
\v 23 Bekwitta abittu utsá tsiꞌilu len ka nu rinne ka tisa ka nu abittu dika ixú. Chiba yulu ka tisa luesi nuná sunruba ruttilha ka nuná riꞌi.
\v 24 Kumu ttu benne ganna rixúe lo sina ge Tata Xisiha, labí dika aka benneha ttu nu gwettilha roꞌo. Nu uinlee akalee ttu benne tse len iyá ka benne lhe ake benne chi du tsebie ki uleꞌenie ka benne, lhe anágaba akalee benne kweki besi lebie,
\v 25 lhe anágaba len tisa besiba ulise ka nu reseꞌe disakana loe, kini ni kina gaa gokinniba Tata Do Yebáha ikikani ki odúna kana nna tte dákinna nu anka gwalí.
\v 26 Aníha kini otte dákana ge nu ruinkanaha nna eriakana lo ná nu xxegwiha, kumu nu xxegwiha‑ba denna kana kini ruinkana nu rábana.
\c 3
\s Gasina dika uin ka benne ganna chi dabiga // isia ka sá esia Jesucristuha
\p
\v 1 Timoteo, tegaba ki unalu nu kixxiꞌaya‑ni: ganna chi dabiga isia ka sá daluxaha, laꞌania yalhá tsitsi sate ka benne,
\v 2 kumu laꞌania tseꞌe ka nu sun tteruba gekani uchacha ikikani,
\q lhe tsuꞌu xxatta lekani belhiu lhe.
\q Anágaba uinkana ttaba
\q lhe uinkana deki ankakana ka nu ra xxeni lekani lhe.
\q Anágaba akakana ka nu kuakana balaꞌana ge ka benne,
\q lhe labíru udokana tisa ge ka xxudikani lhe.
\q Nigaba ixkixaru a ugwekana ka benne,
\q lhe anágaba akagabakana ka nu abittu tsia lekani Tata Do Yebáha,
\q
\v 3 lhe labí aka siꞌikinna ka benne lhe,
\q nigaba a satua lekani ke lhe.
\q Anágaba akagabakana ka nu ujuakinna ka benne ka tisa a ixú,
\q lhe ttixka uinkana ttu bixa, ttebia ttelakana tti uinkana nuha.
\q Lhe anágaba akakana ka nu utía xxatta,
\q lhe akagabakana ka nu labí tsuꞌu lekani bixaba nu tse ruin ka benne,
\q
\v 4 lhe utekana ka benne seꞌe tse lenkana lasi ná ka nu udhaka xiikana ke.
\q Lhe anágaba akakana ka nu nnelaba uinkana ttu bixa, labí ladeꞌaxa ulaba lekani tti uinkana nuha,
\q lhe akakana ka nu tsapi xxattakana ge nu uinkana.
\q Lhe anágaba tsuꞌurula lekani uinkana nu raka yiesi lo yu‑ni attichula akakinna ge Tata Do Yebáha.
\q
\v 5 Uleꞌekana deki rudo lekani nu anka ge Tata Do Yebáha, ttaka len elha ruin gekani rulaꞌa deki labí liikinna ria lekanie.
\m Lu bekwitta kweꞌe ka nu ruin aná.
\p
\v 6 Kumu luesi ka nu ruin aná, ka nuná rattaꞌakana lheꞌe ka yoꞌo nna ridí yiekana ka nuila ka nu nnelaba ridielhakana ruinkana nu abittu anka tse. Ka luesi nuila ruin aná ruinbakana iyá looba nu satsa rakaba lekani
\v 7 nna satíaba raka lekani udo nagakani ge ka tisa kubi, ttaka ni tsa labí isinkana tte dákinna nu anka gwalí.
\v 8 Ttiba Janes‑ni lhe Jambres‑ni lhe uluꞌu niꞌakani nu ra Moisés‑ni, aníha‑gaba ka nu ridí yiekana ka nuila‑na, riguꞌugaba niꞌakani nu anka gwalí. Ka nuná labí rulaba lekani nu anka tse, chiba binitti ka nuná, labíru ria lekani Tata Do Yebáha attiba ankaba geni.
\v 9 Ka nuná labí isá lenkana nu ruinkana‑na, kumu isiaba sá ilá looba deki ankakana ka nu abittu yuu, attiba bilá loo ge ka nu uluꞌu niꞌakani nu ra Moisés‑ni.
\s Pabluha rabie Timoteo‑ni: “Ben iyá nu bodhaꞌan // Tata Do Yebáha uinlu”
\p
\v 10 Ttaka lu chiba yulu gasina ruleꞌa ka tisa ge Cristuha
\q1 lhe gasina re lasia lhe.
\q1 Anágaba chigaba yulu bixa raka lasia unia
\q1 lhe chigaba yulu gasina ria lasia ge Cristuha,
\q1 lhe gwa yúgabalu deki neti ankaa ttu benne re besi lasia
\q1 lhe ankaa benne siꞌi lasi lhe.
\q1 Anágaba nna gwa yúgabalu gasina rutto ruchíaya lo iyá nu ratea,
\q1
\v 11 lhe gasina ridú nookana neti lhe.
\m Anágaba nna gwa yúgabalu gasina ratea tti ruyúa elha disa, attiba luesi ka elha disa gwatea lheꞌesi Antioquía‑ni lhe lheꞌesi Iconio‑ni lhe lheꞌesi Listra‑ni lhe. Iyába lo ka elha disa‑ni bodilaa Tata Xisiha neti.
\v 12 Anágaba iyába ka benne raka leke udo leke nu anka ge Tata Do Yebáha de babake len Jesucristuha, ka benneha anágaba sateke, dhu noogabakana ke.
\v 13 Ttaka ka nu ruin satsa lhe ka nu ruin lekani lhe, adírula satsa uinkana. Uin lekani len ka benne, anágaba ka benneha aníha‑gaba uinke lenkana.
\p
\v 14 Ttaka lu udola ben nu chi detilu lhe nu chi xen tsitsi lelu geni lhe, kumu lu gwa yúbalu nú bedhetinna lu ki ria lelu ge Cristuha,
\v 15 lhe anágaba ttili ankalu nubiyú toha chi yulu ka tisa dia lo ka yetsi ge Tata Do Yebáha. Ka tisa dia lo ka yetsiha nuha ulaꞌakanie lu, kini yulu gasina odilá Tata Do Yebáha lu de ria lelu ge Jesucristuha.
\v 16 Iyába ka tisa dia lo ka yetsi ge Tata Do Yebáha ankake ka tisa biria ikie, lhe ankagabake ka tisa ka nu ixú ki ulaꞌakanie riꞌi lhe ki kisake riꞌi tti rinittiriꞌi lhe. Anágaba odú lhixxake riꞌi tti chi rikwadhariꞌi lo neda gebie lhe udhetigabakanie riꞌi kini uinriꞌi nu dika ixú,
\v 17 kini anáchu ttu benne ganna chi anke ge Tata Do Yebáha, benneha chi du sipe lhe chi du tsebie kini unie iyába nu anka tse.
\c 4
\p
\v 1 Jesucristu benne esiabie innabie lhe unie elhuxtisi ge ka benne chi uttiha lhe ge ka benne anka bani lhe, arlo benneha lhe arlo Tata Do Yebáha rinnabaa lenlu
\v 2 kixxiꞌalu ka tisa ge Cristuha. Kixxiꞌalu ke sea siba udo naga ka benne lhe sea siba abittu udo nagake lhe. Besiba kweki lelu tti uleꞌenlu ke, lhe len tisa besiba kisalu ke lhe uinlu ki eseꞌe tsitsike tti rinittike,
\v 3 kumu isia sá labíru aka le ka benne udo nagake ge ka tisa tse ka nu ruleꞌeriꞌi ge Cristuha, sinuki sattupalake ka nu ulaꞌakinna ke nu ruꞌu leke iyienkanie.
\v 4 Labíru udo nagake ge nu anka gwalí. Ge ka cuentu ka nu abittu ixú, ge ka nuha‑la udo nagake.
\v 5 Ttaka lu satía bedú itá lelu, abittu bitti uinlu, betto bechíala lo nu ratelu‑na, bedo lelu utixxiꞌa ka tisa tse‑na. Ben iyá nu bodhaꞌan Tata Do Yebáha uinlu.
\p
\v 6 Neti chiba dabiga uttikana neti nna elhutti kiaha ixúna ki akana attiba ttu úna dhi Tata Do Yebáha.
\v 7 Neti chiba benia doelha benia sina ge Tata Do Yebáha. Chiba uluxati sina nu chi gaꞌanna unia, labí bedhanaa a ugía lasia ge Cristuha.
\v 8 De nuha nna chiba tua tse nu tse ralhaa dhia de benia nu dika ixú arlo Tata Do Yebáha. Jesucristu benne runie elhuxtisi attiba ankaba geniha, benneha utebie nuha kia ganna chi bisia sá esiabie. Anna laa sun tteruga neti dhia nuha, dhígaba iyá ka benne itú iki itú leke chi seꞌeke ubede ganna chi esieha.
\s Pabluha rulhuxe rulise Timoteo‑ni
\p
\v 9 Uinlu doelha etelanni tte gaabalu neti,
\v 10 kumu Demas‑ni bedhába ikini neti de rudorula leni nu tee yiesi lo yu‑ni nna lheꞌesi Tesalónica‑nila chi deyyana. Crescente‑ni nna deyyana daka Galacia. Tito‑ni nna deyyana daka Dalmacia.
\v 11 A sunruba Lucas‑ni gwa doruna len neti. Lu nna uche Marcos‑na utá lenna nii, kumu lana gwankana nu dika ixúti na ki uinna sina ge Tata Do Yebáha.
\v 12 Tíquico‑ni nna bedhelhabaa na dedána lheꞌesi Éfeso‑na.
\v 13 Ganna chi dalu nii, ttelu lheꞌesi Troas‑na ichelu jabana kia nu bodhaꞌanaa lisi Carpo‑na. Ichegabalu ka yetsi dia ka tisa ge Tata Do Yebáha lokani. Ka yieti ka nu dia ka tisa geeha lokani, ka nuha rakaru doelha ichelu.
\p
\v 14 Alejandro nu ruinna ka lo irsinariꞌi ka nu ankakana ge iyya, lana yalhá chi betsetsinna neti. Tata Xisiha ugwebie na nu ralhana dhina de rudhakana neti aní.
\v 15 Anágaba lu biyú gelu lenna, kumu nuná yalhá chi bedú disana lo ka tisa rigixxiꞌariꞌi‑ni.
\p
\v 16 Tti sisiꞌa biso dua ki uka elhuxtisi kia, niruba ttu benne a udúe len neti, iyábake bedhá ikike neti. Tata Do Yebáha bittu gape kwenta ge nu bedhakake neti.
\v 17 Ttaka benneha gwa udúbe len neti lhe gwa bedú tsitsibe neti ki utixxiꞌaya ka tisa ge Cristuha, kini biyienin iyá ka benne abittu ankake ka nu Israel. Aníha benie ki bodilábie neti lo elhuttiha kini abittu bettikana neti.
\v 18 Tata Xisiha godilábe neti lo iyá nu satsa satea nna gwechebe neti yebáha ata rinnabieha. Benneha inná xxeni lebie ttu dia lii. Amén.
\s Pabluha ridhelhe padiuxi ge ka benne
\p
\v 19 Begwe Priscila‑na lhe Aquila‑na ttu padiuxi kia, anágaba ka benne seꞌe lisi Onesíforo‑na lhe.
\v 20 Erasto‑ni nna beyaꞌanba nuha lheꞌesi Corinto‑ni, Trófimo‑ni nna raniba nuha tti bodhaꞌanaa na lheꞌesi Mileto‑ni.
\v 21 Lu nna ugwe gaaba lelu italu atti lanila etaꞌa idilhaha. Eubulo‑ni lhe Pudente‑ni lhe Lino‑ni lhe anágaba Claudia‑ni lhe adíru ka benne ria leke ge Cristuha seꞌe nii redhelhagabake ttu padiuxi gelu.
\p
\v 22 Jesucristu benne anke Xxanariꞌiha dhue len lebiꞌi lhe Tata Do Yebáha edá lebie aka lenie le. Amén.