\id TIT
\h Tito
\mt Yetsi‑ni udhelha Pabluha // ge Tito‑ni
\c 1
\p
\v 1 Neti Pablo ankaa benne rixúni Tata Do Yebáha lhe ankaa apóstol ge Jesucristuha lhe. Tata Do Yebáha udhelhe neti kini ka benne chi bekwebieha uleꞌenia ke kini tsia leke gebie lhe tte dákanie nu anka gwalí lhe. Nu anka gwalíha ixúna ki uleꞌenna riꞌi gasina uinriꞌi nu dika tsuꞌu le Tata Do Yebáha.
\v 2 Riꞌi ruxxen leriꞌi deki gwaka benbariꞌi ttu dia lii, kumu attili lani kwe yiesi lo yu‑niha Tata Do Yebaa benne labí ruin leeha, chila rabie utebie elha nabani geriꞌi ttu dia lii.
\v 3 Benneha beleꞌenie riꞌi ka tisa geeha la sá atti chi gaꞌanie uleꞌenie riꞌi ka benneha nna neti Pablo bedhaꞌane lasi náya kini kixxiꞌaya ka tisa‑ni, delába ka tisa ge Tata Do Yebaa benne rodilábie riꞌiha.
\p
\v 4 Len lu ridhelhaa yetsi‑ni xa Tito. Lu nuná gwalíga ankalu ttiba ttu xiꞌinia, kumu de beleꞌenia lu ria lelu ge Cristuha attiba neti ria lasia gebie.
\p Xxudi do yebaa ge riꞌiha lhe Jesucristu benne rodilábie riꞌiha, lake edá leke aka lenke lu lhe satua leke lu lhe anágaba uinke kini dholu xen su lasi lhe.
\s Sina nu daa lo Tito‑ni uinna daka Creta
\p
\v 5 Bodhaꞌanaa lu daka Creta‑na kini ulhuxalu sina nu riyasa aka naa, lhe lheꞌe ttu ttu ka yiesi‑na oseꞌelu ka benneola galha ladike, kini tseꞌeke arlo ka benne ria leke Cristuha. Benba attiba chi utixxiꞌania lu uinlu.
\v 6 Ttu benneola ganna galha ladie teeki ake ttu benne abittu bi ge itise lhe ttu benne do len ttúba nuila lhe. Anágaba nna ka xiꞌinieha teeki akakana ka nu ria lekani Cristuha lhe abittu daa tisa gekani deki ankakana ka nu ruin satsa lhe abittu rudo tisa lhe.
\v 7 Kumu ttu benne ganna ake nu dhu arlo ka benne chi ria leke ge Cristuha, kini uleꞌenie ke, benneha de ixúbie lo sina ge Tata Do Yebáha, de nuha nna teeki aka benneha ttu benne abittu bi ge itise,
\q lhe abittu unie ttaba
\q1 lhe abittu ake nu iki risaꞌa,
\q lhe abittu ake nu dusi
\q1 lhe anágaba abittu ake nu rigila elha utilha lhe,
\q nigaba ake nu rotsiꞌinu lebie gasina unie ki galhie belhiu len ka benne.
\q
\v 8 Benneha akalee ttu benne jeru tte gaxie ka benne lisie,
\q lhe ake ttu benne ruꞌu lebie runie nu anka tse lhe.
\q Anágaba akagabe nu re itá leni,
\q1 lhe nu runi attiba ankaba geni,
\q lhe ake ttu benne chi biriesie ki ake ge Tata Do Yebáha,
\q lhe anágaba akagabe ttu benne la labe innabia latie,
\q
\v 9 lhe ake ttu benne ria tsitsi lebie ka tisa ka nu anka gwalí, delába ka tisa ka nu chi bidetie,
\q kini aníha‑chu aka gebie uleꞌenie adí ka benne lhe okinnie iki ka nu riguꞌu niꞌakani ka tisa tse rigixxiꞌariꞌi.
\p
\v 10 Kumu seꞌe ixe ka nu labí rudokana tisa lhe rinnekana ka tisa a ixú lhe, anágaba ruin lekani lhe. Ka nu Israel ka nu chi bedaxxukana neda ge Cristuha, ka nunonna ka nu ruinrukana aná.
\v 11 Ka nuná raka doelha udheariꞌi roꞌokani kini re yoꞌoba ka benne chi ruchixxikana ikike de ruleꞌekinna ke nu abittu ixú. Ruinkana aná ki ralhikana belhiu len ka benne.
\v 12 Gwalíbani ttu profeta gekani nu udo daka Creta‑na, nuha unnena rana: “Ka nu seꞌe Creta‑ni, satíaba ankakana ka nu gwen lasi lhe ruinkana satsa, lhe anágaba ankakana ka nu ro xxatta lhe ka nu lea lhe.”
\v 13 Gwalíbin nuha. Laxkala lu Tito, gwadilo utisa kana, kini latsiru tsia lekani ge Cristuha,
\v 14 lhe abittu udo nagakani ge ka cuentu a ixú ka nu ria le ka nu Israel‑na, nigaba udokana tisa ge nu ra ka nu riguꞌu niꞌakani nu anka gwalí.
\p
\v 15 Len ka benne ankake nari xú arlo Tata Do Yebáha, len ka benneha iyába anka tse. Ttaka len ka nu labí ria lekanie lhe ka nu ruin satsa lhe, len ka nuná iyába labí anka tse, kumu axtaba nu rulaba lekani labí anka tse lhe labíru raka tékinna tti ruinkana nu anka satsa.
\v 16 Rákana deki gwankabiabakinna Tata Do Yebáha, ttaka len elha ruin gekani ruleꞌe loo deki labí gwalíkinna ria lekanie, kumu lakana labí rudokana tisa gebie lhe labí gwakakana uinkana nu anka tse, de nuha nna ritisibanie kana.
\c 2
\s Pabluha rabie Tito‑ni: “Latsiru uleꞌenlu ka benne”
\p
\v 1 Lu xa Tito, latsiru beleꞌeni ka benne, beleꞌe kanie atti ttega ra ka tisa tse ruleꞌeriꞌi ge Cristuha.
\v 2 Ka tatuxtoo to‑na usi ke
\q kweki itá leke, abittu bitti uinke,
\q lhe akake ka benne dika tsia leriꞌi ke,
\q lhe anágaba akake ka benne ladeꞌaxa ulaba leke tti uinke ttu bixa,
\q lhe tsia leke ge Cristuha attiba ankaba geni,
\q lhe anágaba akakanie ge ka benne,
\q lhe akake ka benne kweki besi leke lhe.
\p
\v 3 Ka nan to to‑na nna usi ke,
\q uinke attiba dika ruin ttu benne chi anke ge Tata Do Yebáha,
\q lhe abittu tsekike gwelhidha tisa a ixú,
\q lhe abittu akake ka nu dusi lhe.
\q Nu uinlake, uleꞌeke nu dika anka tse,
\q
\v 4 kini udhetikanie ka nuila kwiti‑na akakinna ge ka nubiyú gekani lhe akakinna ge ka xiꞌinkani lhe.
\q
\v 5 Anágaba akake ka benne ladeꞌaxa ulaba leke tti uinke ttu bixa,
\q lhe akagabake ka benne uin tagaꞌa nu anka tse,
\q lhe anágaba akake ka benne udo leke lheꞌe lisike,
\q lhe akake ka benne kwe tse leke lhe.
\q Anágaba akagabake ka benne udo nagake ge ka benne biyú geke‑na uinke nu inná ka benne‑na.
\m Aníha uinke kini abittu itua balaꞌana ge ka tisa ge Tata Do Yebáha.
\p
\v 6 Anágaba ka nu kwiti‑na beleꞌe kinna akakana ka nu ladeꞌaxa ulaba lekani tti uinkana ttu bixa.
\v 7 Lu nuná dhulu ugwelu xilattini, kini ilákin benne nu tse ruinlu. Tti uleꞌelu ka tisa ge Tata Do Yebáha bittu bixa udhea lelu lhe nu inneluha akana nu dika tsia le ka benne.
\v 8 Tisa nu dika ixú unne, kini anáchu nna nu riguꞌu niꞌani nu ruleꞌeriꞌiha, ettuinna de abíru eselinna bixa innena geriꞌi.
\p
\v 9 Usi ka nu toꞌo lo sina ge ka xxanakinna, uinkana nu inná ka nuná, uinkana iyá nu dika tsuꞌu le ka xxanakinna lhe bittu elhapi roꞌokani ka nuná lhe.
\v 10 Abittu udaxxu sigákana nu tee ge ka nuná. Uleꞌe loola kana deki gwa ankakana benne nu dika uxxen leriꞌi gekani. Aníha kini len elha ruin gekaniha uleꞌe lookana nu tse ruin ka tisa ruleꞌeriꞌi ge Tata Do Yebaa benne rodilábie riꞌiha.
\p
\v 11 Kumu Tata Do Yebáha chi beleꞌebie elha tse geeha lenriꞌi, delába chi benie kini iyába ka benne seꞌe yiesi lo yu‑ni gwalábake kini abittu tsia nnittike,
\v 12 lhe anágaba ruleꞌenie riꞌi kini udhanriꞌi nu abittu ruꞌu le Tata Do Yebáha, lhe kini udhanriꞌi nu satsa reta leriꞌi ruinriꞌi yiesi lo yu‑ni lhe. Aníha kini tseꞌeriꞌi kweki itá leriꞌi nnanna lhe uinriꞌi attiba ankaba geni lhe, anágaba udo leriꞌi nu anka ge Tata Do Yebáha,
\v 13 lhe len elha gwedeaka lasi tseꞌeriꞌi kwedariꞌi la sá tti esia Jesucristuha dedábie lheꞌe xiani geeha. Labie anke Diosi geriꞌi ra xxeni lebie lhe anke benne rodilábie riꞌi lhe.
\v 14 Labie betebie elha nabani gebie ki uttie utixe geriꞌi, kini odilábie riꞌi lo iyá nu satsa ruinriꞌi lhe kini ocharie riꞌi ki akariꞌi gebie. Aníha kini udo leriꞌi uinriꞌi iyá nu anka tse.
\p
\v 15 Nuní beleꞌe kanie lhe usi ke uinke lhe. Tti bixa uinke nna utisa ke kumu lu gwa rapalu lo neda ki uinlu nuní, laxkala abittu dhielhalu nuxa kuꞌu niꞌani lu.
\c 3
\s Pabluha rabie Tito‑ni odhúna le ka benne // chi ria leke Cristuha ki uinke latsiru
\p
\v 1 Ka betsi to geriꞌi‑na, bodhú leke ki udoke tisa ge ka nu rinnabia seꞌe yiesi lo yu‑ni lhe ge adíru ka uxtisi lhe, uinke nu inná ka nuná lhe tseꞌe tsegabake ki uinke iyá nu anka tse,
\v 2 lhe bittu inneke ge benne lhe nigaba uttilha roꞌoke. Akalake benne re tse leke lhe uinke latsiru len iyá ka benne lhe.
\v 3 Kumu riꞌi itú ttuha ukagabariꞌi benne abittu ute denriꞌi,
\q lhe abittuba bedoriꞌi tisa lhe.
\q Labí ugwekiriꞌi lo neda ge Tata Do Yebáha.
\q Laꞌania bixikabariꞌi lo iyába nu satsa raka yiesi lo yu‑ni,
\q lhe useꞌebariꞌi benriꞌi nu abittu anka tse lhe bitisibin luesiriꞌi,
\q lhe betía diba le luesiriꞌi lhe, anágaba betía dígaba leriꞌi adí ka benne lhe.
\p
\v 4 Ttaka bisia sá, Tata Do Yebaa benne rodilábie riꞌiha beleꞌenie riꞌi elha tse geeha lhe ukanie geriꞌi lhe.
\v 5 Labie bodilábie riꞌi, labí de benriꞌi ttu bixa nu anka tse. ¡Koꞌo! Bodilábie riꞌi de gwatua lebie riꞌi nna bocharie riꞌi ki beyakariꞌi nari xú arloe; beyakariꞌi attisidiba ttu nu beyali attu libe nna Espíritu geeha beyonie riꞌi benne kubi.
\v 6 De ugía leriꞌi Jesucristu benne rodilábie riꞌiha, de nuha nna Tata Do Yebáha bete tame Espíritu geeha lenriꞌi,
\v 7 kini iki de chi bedá lebie utuabie kweꞌeriꞌi yua ge ka tulha ruinriꞌi, laꞌania nna chiba dika uxxen leriꞌi deki gwa ralhabariꞌi aka benriꞌi ttu dia lii arloe.
\v 8 Tisa nu anka gwalíba nuní rinnea. Tisa‑ni nuní raka lasia satti balha uleꞌenlu ka benne chi ria leke ge Tata Do Yebáha kini anáchu udhá leke uinke nu anka tse, kumu nu ra ka tisa‑ni ankana nu dika ixú len iyá ka benne lhe ankana nu tse lhe.
\p
\v 9 Ttaka abittu udo nagalu ge ka tisa a ixú, lhe ge ka nu rigixxiꞌakana nupaxa uka xuttokani itú nu reha, lhe abittu udo nagalu ge ka nu ruttilha roꞌokani ge nu ra lo bia bennabi bodhaꞌan Moisés‑ni, kumu iyá nuná labí ixúna lhe labí ankana nu raka doelha lhe.
\v 10 Ganna ttu benne unie ilhaꞌabie lheꞌe luesi ka benne ria leke ge Cristuha, latsiruba unne len benneha ttu libe lhe attu libe lhe. Ganna si abíba iyieninie, laꞌania nna daka naa bedelha benneha.
\v 11 Lu gwa yúbalu, benne uni aníha chiba biriesi benneha lo neda ge Tata Do Yebáha nna tulhaba nuha chi runie. Laꞌania nna la tulha runieha‑ba urixxi ukinnine arlo Tata Do Yebáha.
\s Pabluha rulhuxe rulise Tito‑ni
\p
\v 12 Ganna chi bedhelhaa Artemas‑ni o Tíquico‑ni ata relu‑na, laꞌania nna ugwe lelu italu ata kwea lheꞌesi Nicópolis, kumu niha chi belaba lasia dhoa atti chi etaꞌa idilhaha.
\v 13 Zenas benne rite danie nu dia lo ka bia bennabi ge ka uxtisi‑na lhe Apolos‑na lhe, ka benne‑na jeru tte begwe ke nu riyasakanie ge neda geke.
\v 14 Anágaba ka betsi to geriꞌi seꞌe‑na, udhetinlu ke ki edá leke uinke ttu nu tse, delába uteke tti riyasani ka benne, kini anáchu akake nu dika ixú.
\p
\v 15 Iyába ka benne seꞌe nii len neti, redhelhake ttu padiuxi gelu xa Tito. Begwegaba ka benne seꞌe naa ttu padiuxi kia, delába ka benne rakakanie geriꞌi lhe ria leke Cristuha lhe.
\p Tata Do Yebáha aka lenie iyá ttele. Amén.