\id PHM
\h Filemón
\mt Yetsi‑ni udhelha Pabluha // ge Filemón‑ni
\c 1
\p
\v 1 Neti Pablo, tea lisiyya de rekia ugixxiꞌa ka tisa ge Jesucristuha. Neti lenia betsi to geriꞌi Timoteo‑ni ridhelhatu yetsi‑ni gelu xa Filemón. Lu rakati gelu lhe ankalu benne rute nálu len riꞌitu lo sina ge Tata Do Yebáha lhe.
\v 2 Ridhelhagabatu yetsi‑ni ge adí ka benne chi ria leke Cristuha; delába ka benne ritupake lheꞌe yoꞌo gelu‑na lhe anágaba ridhelhagabatu yetsi‑ni ge nan Apia‑na. Labie anke attiba ttu danriꞌi. Anágaba ridhelhagabatu yetsi‑ni ge Arquipo‑na. Arquipo‑na rategabana attigaba ratetu de rekitu ugixxiꞌa ka tisa ge Cristuha.
\p
\v 3 Xxudiriꞌi do yebáha lhe Jesucristu benne anke Xxanariꞌiha lhe, lake edá leke aka lenke le lhe useꞌeke le xen su lasi lhe.
\p
\v 4 Tti rilhapia tisa len Tata Do Yebaa kiaha, satíaba rugwea bie ixkixaru gelu xa Filemón, tti rexxa lasia lu,
\v 5 kumu chi binaa deki tsitsiba ria lelu lhe yalhá rakinlu ge Jesús benne anke Xxanariꞌiha lhe anágaba rakagabinlu ge iyába ka benne chi ulesi Tata Do Yebáha ke ki akake gebie.
\v 6 Rinnabaa len Tata Do Yebáha gelu, kini lu de ria lelu attiba ria letu, nuha ixúna kini tte denlu gasina anka nu tse redí baariꞌi de babariꞌi len Jesucristuha.
\v 7 Yalhá itta du lasia lhe yalhá elha xen lasi redía gelu kumu de ankalu benne siꞌi lasi. Kumu de nu ruinlu‑na xa betsi to kia, de nuná nna gwa rodú tselu le ka benne ankake ge Tata Do Yebáha.
\p
\v 8 Lu de ankalu benne siꞌi lasi, de nuha nna neti, meskiba gwa rute Cristuha lo neda kia ki innabaa uinlu nu rakaba lasia,
\v 9 ttaka de rakati gelu, de nuha nna rakati latsirula innabaa lenlu ki uinlu nu raka lasia. Neti Pablo, chi ankaa tatuxtoo to. Anágaba nna tea lisiyya nnanna de rekia ugixxiꞌa ka tisa ge Jesucristuha,
\v 10 rinnabaa lenlu xa Filemón, olabichilu Onésimo‑ni, kumu nnanna tea lisiyya‑ni utixxiꞌania na ka tisa ge Jesucristuha nna gwa ugíaba leni. De nuha nna ttiba ttu xiꞌinia rakati na.
\v 11 Itú ttuha ukana ttu nu labí bixúna lenlu, ttaka nnanna ankana ttu nu dika ixúna len lu lhe ixúna len neti lhe.
\v 12 Nnanna nna redhelhaa na len lu, bolabichi na, ben attisidiba netiba nuná rolabilu.
\v 13 Neti aní rakati ukwedarua na ki eyaꞌanna len neti kini ixúti na nnanna tea lisiyya delo niꞌa ge ka tisa ge Jesucristuha, delába ixúti na uinna sina nu labí aka gelu uinlu de relu idittu.
\v 14 Ttaka labí raka lasia uni nu yuꞌu ikia kumu teeki nu innálu aka, kumu labí raka lasia udo doelhaa lu kini eyaꞌanna len neti, sinuki luba edá lelu ganna okaꞌanlu na.
\p
\v 15 Kumu ni kina gaa ttu sattiba bekwittana lenlu, kini ganna chi besiana nna ttu tsaba esiana lenlu.
\v 16 Ganna chi esiana len luha, bitturu udhakalu na attiba ttu nu toꞌo lo sina gelu, sinuki ugwerulalu lidhakani, biyú na atti galába ttu betsilu rakinlu geni. Neti yalhá rakati geni, ttaka lu akarulinlu geni de ankana benne rixú lo sina gelu lhe de chi babana len Jesús benne anke Xxanariꞌiha lhe.
\p
\v 17 Laxkala ganna si lu gwa du len lu neti, olabichilu na tti esianaha. Tti olabilu naha, ben ttisidiba netiba nuha rolabilu.
\v 18 Ganna si lana bixa benna gelu o bixa daana gelu, kweꞌa bedelha nu bennaha.
\v 19 Neti Pablo, kwinaga neti len letra kia runia lo yetsi‑ni rinnea ria: “Neti gwagixabaa gelu.” Ria aní, kini abittu upeya lu deki lu dágabalu kia de uluꞌa lu lo neda ki ugía lele ge Cristuha.
\v 20 Gwalígati xa betsi to kia, benchi nu rinnabaa lenlu. De babariꞌi len Jesús benne anke Xxanariꞌiha, de nuha nna rulisaa lu, ben ttu nu dika edeakati geni. Bodú tse lasia de seꞌe lenriꞌi benneha.
\p
\v 21 Runia yetsi‑ni kumu ruxxen lasia deki gudobalu tisa kia lhe kumu yu xeabaa laa sunruga nu rinnabaa len lu‑ni uinlu, sinuki tserula uinlu.
\v 22 Rinnabagabaa len lu uin lheakalu ata eyaꞌanaa kumu neti ruxxen lasia, de rinnabale kia len Tata Do Yebáha, de nuha nna aka lenie neti ki lhaaya lheꞌe lisiyya‑ni nna esiaya len lebiꞌi.
\s Pabluha rulhuxe rulise Filemón‑ni
\p
\v 23 Epafras‑ni ridhelhe ttu padiuxi gelu. Benne‑ni tebie len neti lisiyya de rekitu ugixxiꞌa ka tisa ge Jesucristuha.
\v 24 Anágaba Marcos‑ni lhe Aristarco‑ni lhe anágaba Demas‑ni lhe Lucas‑ni lhe, ka benne‑ni rute náke len neti lo sina ge Jesucristuha, nna redhelhagabake ttu padiuxi gelu.
\p
\v 25 Jesucristu benne anke Xxanariꞌiha edá lebie aka lenie le. Amén.