\id 1PE
\h 1 Pedro
\mt Yetsi nu sisiꞌa tte ben Pedruha
\c 1
\p
\v 1 Neti Pedro ankaa apóstol ge Jesucristuha. Ridhelhaa yetsi‑ni gele, lebiꞌi ka benne biriale nna chi seꞌele lheꞌe ka yiesi dittu‑na; delába seꞌele itúba daka Ponto lhe daka Galacia lhe daka Capadocia lhe daka Asia lhe daka Bitinia lhe.
\v 2 Lebiꞌi ttuha‑li chi gaꞌanani Xxudiriꞌi do yebáha gaxie le lhe chi bekwebie le kini akale gebie. Bixúnie Espíritu geeha kini ulesie le ki udole tisa gebie lhe anágaba kini eyarile len reni ge Jesucristuha. Lake edá leke aka lenke le lhe useꞌeruke le xen su lasi lhe.
\s Riꞌi uxxen leriꞌi deki godilába Tata Do Yebáha riꞌi
\p
\v 3 ¡Xxeniba ra le Tata Do Yebáha Xxudi Jesucristu benne anke Xxanariꞌiha! Kumu de ratua xxatta lebie riꞌi, de nuha nna beyonie riꞌi benne kubi tti belhidha benbie Jesucristuha lo elhuttiha. Aníha benie kini riꞌi gwalíga uxxen leriꞌi deki
\v 4 gwadíriꞌi nu abittu tseꞌe loo lhe abittu ankana tsiga lhe abittu ratti ikini lhe. Nuní chi tua tse gele yebáha kini dhile.
\v 5 Lebiꞌi de chi ria lele ge Tata Do Yebáha, de nuha nna len nu ra tsitsi leeha, len nuha ruyú tsitsie le kini odilábie le attiba chi gaꞌananie aka ganna chi bisia sá daluxaha.
\p
\v 6 De nuha nna gwaludú itta lele, meskila nnanna laka seꞌele yiesi lo yu‑ni, ixeba elha disa teeki satele ttu satti.
\v 7 Kumu ttiba ttu oru, meskiba ankana nu riseꞌe loo, teeki tte nuha lo giha kini ulaꞌa ganna gwalí ankana tagaꞌa oru, aníha‑gaba nuná lebiꞌi, de elha disa ruyúleha, len nuha ulaꞌa ganna gwa ria tsitsi lele ge Tata Do Yebáha. De nuha nna lebiꞌi dakarula de chi ria lele gebie attichula ttu oru. Laxkala ganna chi esia Jesucristuha, laꞌania dhi lidhakale lhe inná xxeni lele lhe ebana lele ge nu ankale lhe.
\v 8 Benneha, meskiba abittu chi bilenlee, ttaka nna gwa rakabinle gebie lhe anágaba nnanna meskiba abittu rilenlee nna gwa riaba lele gebie. De nuha nna tee ttu elha gwedeaka lasi xeni gele, ttu elha gwedeaka lasi nu labí yule kixxiꞌale gasina ankana.
\v 9 Tee elha gwedeaka lasi gele kumu chi diale eꞌeyule kini dhile nu ruxxen lele geniha, delába ruxxen lele deki gwalíba odilá Tata Do Yebáha le.
\p
\v 10 Ka profeta useꞌe itú nu reha, tsitsiba benke kini bebea niꞌake kini yuke gasina edá le Tata Do Yebáha odilábie le, nianna tti ugwekike utixxiꞌake ge nu chi bebea niꞌakeha.
\v 11 Bebea niꞌake kumu de raka leke unake bí aka lhe nuka aka nu ra Espíritu ge Cristuha, delába Espíritu do lheꞌe lastokeha. Espírituha chila utixxiꞌe bipaxa elha disa sate Cristuha lhe anágaba utixxiꞌagabe bí nu tse aka iki de chi gwate benneha aníha.
\v 12 Utixxiꞌanie ke deki iyába nu sate Cristuha lhe iyába nu tse aka iki de chi gwate benneha aníha, nuha labí akana tti sa seꞌeke anka benke, sinuki len lebiꞌila ixú nu unnekeha. Ka benne rekike rigixxiꞌake ka tisa ge Cristuha nnanna, ka benneha nuha chi utixxiꞌakanie le nu ra ka profetaha. Espíritu daa yebáha, labie benie kini utixxiꞌa ka benneha nu ra ka profetaha. ¿Laaba ganna axtala ka anjeli ge Tata Do Yebáha raka leke ilákanie nu si akaha?
\s Latsiru uinle de chi ankale ge Tata Do Yebáha
\p
\v 13 De nuha nna gwalulaba tse lele lhe abittu bitti uinle lhe. Anágaba lhe, tsa gwaluxxen lele deki gwadíbale nu tse redá le Tata Do Yebáha utebie gele ganna chi besia Jesucristuha attu libe.
\v 14 Gwaluni atti galába ruin ttu xiꞌini rudona tisa ge xxudiniha, abitturu uinle luesi nu satsa rulaba lele ttuha atti labí chi yule ge Tata Do Yebáha.
\v 15 Lebiꞌi gwaltseꞌela gwaluin latsiru, abittu bi nu satsa uinle, ttiba Tata Do Yebaa benne uxie leha. Benneha anke benne abittu nu satsa runie.
\v 16 Kumu lo ka yetsi geeha ree: “Latsiru gwaluni, abittu bi nu satsa uinle, kumu neti ankaa benne abittu nu satsa runia.”\f + \fr 1:16 \ft Levítico 11:44‑45; 19:2\f*
\p
\v 17 Tata Do Yebáha ttúba ruin benneha len iyábariꞌi. Ruinbe elhuxtisi geriꞌi kua nu ruinba ttu tturiꞌi. Laxkala ganna lebiꞌi rale Tata Do Yebáha anke Tata gele, laka seꞌele yiesi lo yu‑ni gatta elha rasi gele lenbie ganna xa.
\v 18 Lebiꞌi gwa yúbale, labie nuha bebeabie le lo nu abittu dika ixú ruinle ttuha, delába nu abittu dika ixú bedaxxule ge ka xxudileha. Labí len oru lhe labí len plata nu riseꞌe loo yiesi lo yu‑ni, labí len nuha uxa gele kini bebea Tata Do Yebáha le lo nu abittu dika ixú ruinleha,
\v 19 sinuki len reni ge Cristuha‑la uxa gele kini bodilaa Tata Do Yebáha le. Nu gwate Cristuha lo ya kurusiha nuha nu daka. Benneha uke attiba ttu neru to nu rutekana úna lo bekú ge Tata Do Yebáha. Neru toha labí tsiga ankana lhe labí bixa ankinna lhe. Aníha‑ba nuha uka Cristuha tti uttie utixe geriꞌi.
\v 20 Benneha, attili lani kwe yiesi lo yu‑ni, chila gaꞌanani Tata Do Yebáha bie kini odilábie le, ttaka nnanna lheꞌe ka sá seꞌeriꞌi‑niliba chi bisiabie kini lebiꞌi saría tsena le.
\v 21 De Cristuha nna lebiꞌi chi ria lele Tata Do Yebáha. Benneha nuha bechidha Tata Do Yebáha lo elhuttiha lhe anágaba bengabe kini inná xxeni le Cristuha, kini anáchu lebiꞌi uxxen lele ge Tata Do Yebáha lhe tseꞌele kwedale nu chi rabie unie.
\p
\v 22 Lebiꞌi, de rudole tisa ge nu ra ka tisa ka nu anka gwalí, de nuha nna chi bochari Espíritu ge Tata Do Yebáha le. Aníha kini gwalíga isinle akinle ge adí ka betsi to gele. De nuha nna itú iki itú lele akin ge luesile.
\v 23 Nnanna chi beyakale benne kubi, attiba ttu nu beyali attu libe, aníha‑ba chi ankale. Labí beyalile lheꞌe ka tata nan gele, delába ka benne ankake ge yiesi lo yu‑ni lhe ankake ka benne rattibake lhe, sinuki lebiꞌi beyalile attu libe de chi ria lele ka tisa ge Tata Do Yebáha. De nuha nna chi beyakale benne kubi, kumu ka tisa geeha ankake bani lhe ruchíake ttu dia lii lhe.
\v 24 Kumu:
\q Iyába ka benne seꞌe yiesi lo yu‑ni ankabake attiba ttu ixxi,
\q nu ra xxeni lekeha ankabana attiba ttu iyya to daa lheꞌexxi.
\q Ixxiha ribisibana nna iyya toha nna rigudhibana,
\q
\v 25 ttaka ka tisa ge Tata Xisiha ttu dia liiba ruchía ka benneha.\f + \fr 1:24‑25 \ft Isaías 40:6‑9\f*
\m Ka benneha nuha ka tisa tse utixxiꞌentu le.
\c 2
\p
\v 1 De nuha nna lebiꞌi chinka gwalikua iyá nu satsa ruinle lhe iyá gwen lasi rinnele lhe. Anágaba chinka gwalikua iyá nu delo tisaba ruinle deki ankale benne tse lhe anágaba gwalikuagaba nu risin luesile lhe iyá nu rinne ge luesile lhe.
\v 2 Gwaluni attiba runi ttu nuto si uli. Nutoha raka leni gasina xisi. Aníha‑gaba lebiꞌi gwaludo lele ka tisa ge Tata Do Yebáha. Ka tisaha nuha ankake tagaꞌa. Ka benneha uinke kini lebiꞌi tsiale tseꞌe tsitsirule lo neda ge Tata Do Yebáha, kini aníha nna ulhuxa loe odilábie le,
\v 3 kumu lebiꞌi chiba ute denle deki Cristu benne anke Xxanariꞌiha, benneha anke benne tse.
\s Lebiꞌi chi ankale ka benne chi bekwe Tata Do Yebáha
\p
\v 4 Gwalibiga kweꞌe Cristu benne anke attiba ttu íyya bani. Benneha nuha uluꞌu niꞌa ka benne, ttaka len Tata Do Yebáha anke benne daka xxatta lhe bekwegabe bie lhe.
\v 5 Anágaba lebiꞌi ankagabale ttiba ka íyya, diale rikuale rakale attiba ttu yotu ata dho Espíritu ge Tata Do Yebáha lhe anágaba ankagabale attiba ttu bixxudi chi ulesie kini utele úna nu dika tsuꞌu le Tata Do Yebáha, delába uinle nu dika tsuꞌu lebie de chi ria lele Jesucristuha.
\v 6 Ge Cristuha nuha rinne Tata Do Yebáha lo ka yetsi geeha, tti rabie:
\q Neti udoa ttu íyya lheꞌesi Sión‑ni
\q nu ugwena xilatti yoꞌoha.
\q Benne anke íyyaha, benneha nuha chi bekwea lhe anke ttu íyya daka xxatta lhe.
\q Benne uxxen lebie ge benneha, labí ettunie gebie.\f + \fr 2:6 \ft Isaías 28:16\f*
\m
\v 7 Lebiꞌi ka benne chi ria lele Tata Do Yebáha, len lebiꞌi benne anke íyyaha benneha tee lidhake, ttaka len ka nu abittu ria lekanie, len ka nuha nna reyakabe nu riguꞌu niꞌakani, attiba ra lo ka yetsi ge Tata Do Yebáha ata dia ra:
\q Íyya uluꞌu niꞌa ka nu rukuakana yoꞌoha,
\q nuha‑la bisinna ukana íyya nu begwena xilatti yoꞌoha.\f + \fr 2:7 \ft Salmo 118:22\f*
\m
\v 8 Lhe anágaba:
\q Ankagabana ttu íyya richeku ka benne ikini nna ribixxike.\f + \fr 2:8 \ft Isaías 8:14‑15\f*
\m Richekuke ikini de labí bedoke tisa ge nu ra Tata Do Yebáha, kumu aníha‑ba chi gaꞌana sateke.
\p
\v 9 Ttaka lebiꞌi ankale ka nu chi bekwe Tata Do Yebáha lhe ankagabale bixxudi gebie de rinnabie le. Lebiꞌi nuná chi ulesie le kini akale gebie kini anáchu kixxiꞌale ge nu rebaninriꞌi runie. Labie uxie le kini beriale lheꞌe chulhaha nna betaꞌale lheꞌe xiani geeha, delába xiani nu rapi edha linníha.
\v 10 Lebiꞌi itú ttuha labí chi ankale ge Tata Do Yebáha, ttaka nnanna chi ankale gebie. Itú ttuha labí gwatua lebie le, ttaka nnanna chi ratua lebie le.
\s Lebiꞌi uinle tti raka le Tata Do Yebáha
\p
\v 11 Betsi to kia, ttiba ttu benne dittu lhe ttiba ttu benne yuꞌu neda, aníha‑ba ankariꞌi yiesi lo yu‑ni. De nuha nna rinnabaa len lebiꞌi abittu uinle nu satsa retaba lele uinle, kumu nu satsa‑na runnittiba nuná riꞌi.
\v 12 Latsiru gwaluni lagwi ge ka nu abittu chi ankabiakinna Tata Do Yebáha, kini meskiba rinnekana gele rákana deki ankale nu ruin satsa, nna tti ilákinna deki tseba ruinle, laꞌania nna innákana deki xxeniba ra le Tata Do Yebáha ganna chi isia sá unie elhuxtisi ge ka benne.
\p
\v 13 Lebiꞌi de abittu itua balaꞌana ge Tata Xisiha, de nuha nna gwaludo tisa ge iyá ka nu rinnabia seꞌe yiesi lo yu‑ni, sila nu rinnabia xeniha kumu de ankana nu ra xxeni leni
\v 14 o sila ka nu rinnabia gwexxaru kumu de roseꞌe nu rinnabia xeniha kana kini ugwekana ka nu ruin satsa‑na elha disa. Anágaba nna ugwegabakana lidhaka ka benne ruin latsiru.
\v 15 Kumu Tata Do Yebáha raka lebie uinle latsiru. Aníha kini udheale roꞌo ka nu akaa elha rieni ikikani kini abitturu innekana gele.
\p
\v 16 Gwaluni atti galába benne chi beseꞌe lhaa, deba nna abittu akinle de chi beseꞌe lhaale nna uinbale nu satsa rakaba lele, sinuki gwaluinla atti galába benne rixúe lo sina ge Tata Do Yebáha.
\v 17 Gwaltsia lele iyá ka benne lhe akinle ge ka betsi to geriꞌi lhe, anágaba gattagaba elha rasi gele len Tata Do Yebáha lhe gwaltsia lele nu rinnabia xxeni do Roma‑ni lhe.
\p
\v 18 Lebiꞌi ka benne toꞌole lo sina, latsiru gwaludo tisa ge ka xxanale‑na, gwaltsia lele kana. Abittu suna ka nu re tse lekinnaba o ka nu re besi lekinnaba tsia lele, sinuki gwaltsiagaba lele ka nu re satsa lekinna lhe,
\v 19 kumu tserula anka ganna ttixka ttu benne, de rudobie tisa ge Tata Do Yebáha nna gwa ruchíabie lo elha disa ruyúbie, meskiba abittu bixa nu satsa runie.
\v 20 Kumu ganna ttixka lebiꞌi ridí gele de rutsetsile, meskiba gwa ruchíale lo elha disa rateleha, labí ixú nuha kumu ralhabale dhile elha disaha. Ttaka ganna gwa ruchíabale lo nu rateleha de ruin tsele, laꞌania nna nuha gwa ruꞌu le Tata Do Yebáha.
\v 21 Kumu dela nuha uxie le lo neda geeha, kumu anágaba Cristuha, de lebiꞌi nna gwatebie biyúe elha disa. Nu gwate benneha ixúna kini ulannile nna anágaba lebiꞌi uchíagabale lo nu rateleha.
\v 22 Benneha labí nu satsa benie lhe labí gwen lasi unnebie lhe.
\v 23 Atti belisa xxattakaneha, labie labí bekabi satse gekani lhe atti rudhaka xiikaneha, labí benie edú dise lokani, sinuki bedhaꞌanlee nu rudhakakaneha lasi ná Tata Do Yebaa benne runie elhuxtisi attiba ankaba geniha.
\v 24 Kwinaba Cristuha bedelha kweꞌebie yua ge ka tulha geriꞌiha tti uttie lo ya kurusiha kini riꞌi attisidiba chiba uttiriꞌi, lanúruriꞌi seꞌe kini uinriꞌi tulha. Aníha kini tseꞌeriꞌi uinriꞌi nu dika ixú, kumu de ka gwe uka latieha, de nuha nna lebiꞌi chi beseꞌe tsele arlo Tata Do Yebáha.
\v 25 Kumu lebiꞌi ttuha, attiba ttu neru biganna ukale, ttaka nnanna chi beyekile len Cristuha. Benneha ruyúbie le attiba ttu nu ruyú ka neru to.
\c 3
\s Lebiꞌi ka nu seꞌe latselale, latsiru gwaltseꞌe len luesile
\p
\v 1 Lebiꞌi ka nuila, gwaludo tisa ge ka nubiyú gele‑na kini ganna seꞌe ka nubiyú gele ka nu abittu chi ria lekani ka tisa ge Tata Do Yebáha, ganna rudole tisa gekani, laꞌania nna labí raka doelha kixxiꞌenle kana, ukareꞌaba ilákinna elha ruin gele nna chi tsia lekani
\v 2 tti ilákinna deki gwa riaba lele kana lhe gwa ruinbale latsiru lhe.
\v 3 Abittu akinle de eseꞌe tse xxattabale, delába bittu akinle de eyoin tse xxatta ikile lhe de kuꞌu nále lhe kuꞌu yienle ka oru o lhe de ukule ka xalho ka nu daka xxatta lhe, abittu akinle de uinle aníha nna dakarule arlo Tata Do Yebáha.
\v 4 ¡Koꞌo! Sinuki lhiꞌu lheꞌe lastolale nuná uinle kini akale benne tse lhe benne re besi lele lhe, kumu nunonna abittu riseꞌe loo lhe nunonna nu dakaru arlo Tata Do Yebáha lhe.
\v 5 Kumu ka benne nuila useꞌe itú ttuha, ka benne ukake ge Tata Do Yebáha, ka benneha aní benke. Ge benneha‑ba bexxen leke nna gwa bedobake tisa ge ka nubiyú gekeha
\v 6 ttiba ben Sara‑ni bedoe tisa ge Abraham‑ni, axtala ree benneha: “Tata xisi to kia.” Anágaba lebiꞌi gwasingabale akale xiꞌiniunná Sara‑ni, ganna uinle latsiru lhe abittu bi ge gasinle lhe.
\p
\v 7 Anágaba lebiꞌi ka nubiyú, latsiru gwaluyú ka nuila gele‑na. Lebiꞌi gwa yúbale lakana labí tte tsitsi ankakana. Gwalugwe lidhakakani atti galába ka benne chi selake len lebiꞌi kumu de turoꞌoba dhile elha nabani redá le Tata Do Yebáha rutebie len iyáriꞌi. Aníha kini lebiꞌi atti innabale len Tata Do Yebáha, labie nna gudoba nage gele.
\s Latsiru uinle meskila uyúle elha disa
\p
\v 8 Nnanna nna latsiru gwaltseꞌe, turoꞌo gwaludú lele lhe turoꞌo uchacha iki ge luesile lhe. Anágaba lhe akin ge luesile attiba rakinle ge ttu betsi to gele lhe akale benne ratua lasi lhe abittu uinle ttaba lhe.
\v 9 Ganna nuxa udhakana le ttu bixa, abittu aníha‑gaba udhakale na lhe ganna nuxa usia leni le, abittu aníha‑gaba ekabile geni. Nu uinlale, gwalinnabala len Tata Do Yebáha kini aka lenie na, kumu labie uxie le kini aka lenie le.
\v 10 Kumu:
\q Ttu nu gwalíga ruꞌu leni dhona yiesi lo yu‑ni
\q lhe raka leni saría tsena na,
\q teeki udá sii lhusani abittu inne satsana
\q lhe abittu uin leni lhe.
\q
\v 11 Anágaba nna udhangabana nu satsa ruinnaha nna uinna latsiru
\q lhe uinna doelha dho tsena len adí ka benne lhe.
\q
\v 12 Kumu Tata Xisiha gwa ruyúbe ka benne ruin tse
\q lhe gwa rudoba nage ge ka tisa rilhapike lenie lhe,
\q ttaka ka nu ruin satsa‑na, labie gwa redúbe lo ka nuná.\f + \fr 3:10‑12 \ft Salmo 34:12‑16\f*
\p
\v 13 Laxkala lebiꞌi, lanú dhana bixa udhakana le ganna gwa ruinbale doelha ruinle latsiru.
\v 14 Ttaka ganna ratele ttu bixa de ruinle latsiru, karubárule kumu adírula tse anka gele. De nuha nna abittu gasinle lhe abittu udúna le lhe.
\v 15 Nu uinlale, itú iki itú lele gwalinná: “Xxeniba ra le Cristu benne anke Xxanariꞌiha” lhe anágaba satía gwaltseꞌe tsitsi kini ekabile ge iyá ka benne innaba tisake le ge nu ruxxen lele ge Cristuha.
\v 16 Deba nna latsiru innele lhe anágaba len tisa besiba ekabile gekani. Latsiru gwaluni kini abittu tsaya lole kini anáchu nna ka nu rinnekana geleha, ettukinna tti ilákinna tseba ruinle de chi babale len Cristuha.
\p
\v 17 Kumu ganna Tata Do Yebáha aka lebie uyúle elha disa, laꞌania nna adírula lheꞌe nuha ganna uyúle elha disa de ruinle latsiru, a laa kila satele de ruinle nu anka satsa.
\v 18 Kumu anágaba gwate Cristuha. Benneha suna ttu lidúba uttie utixe ge ka tulha geriꞌi. Labie nuha anke nu ruin tse nna uttie utixe ge ka nu ruin satsa. Aníha benie kini echebie riꞌi kweꞌe Tata Do Yebáha. Uttie len bela latieha nna atti beyaka banieha nna espírituba beyake.
\v 19 Tti anke espírituha nna ugíabie gwattixxiꞌanie ka espíritu yaya lisiyyaha,
\v 20 delába ka espíritu labí bedokana tisa ttuha tti udo Noé‑ni, tti bisá inda yiesi lo yu‑niha. Laꞌania labí besáni Tata Do Yebáha gwa uledabe kana laka ruin Noé‑ni barcuha. Ttaka ttu chuparuba ka benne uláke abittu uttike, delába xxunurubake uláke lo inda bisá yiesi lo yu‑niha.
\v 21 Nu ben inda bisá yiesi lo yu‑niha raxxína na len nu runi inda radiriꞌi nnanna; indaha rodilána riꞌi de beyaka ben Jesucristuha lo elhuttiha. Tti radiriꞌi inda, labí nu tsiga anka latiriꞌi nuha rocharina, sinuki rixúlana ki rinnabariꞌi len Tata Do Yebáha kini ocharie lheꞌe lastoriꞌi.
\v 22 Benneha beyapie yebáha nna doe daka ná ben ge Tata Do Yebáha rinnabie, nna ka anjeli geeha lhe adíru ka espíritu rapakana lo neda kini innabiakana lhe anágaba ka nu ra tsitsi lekani lhe, iyábakana gwa rudobakana tisa gebie.
\c 4
\s Lebiꞌi gwaltseꞌe gwaluni tti raka le Tata Do Yebáha uinle
\p
\v 1 Laxkala attiba gwate Cristuha len bela latieha biyúe elha disa tti uxí gebie, anágaba lebiꞌi, gwaludogaba ikile deki aníha‑gaba satele, kumu ttibanka ttu benne chi gwatebie biyúbie ttu bixa elha disa, benneha chiba bedhane abitturu runie tulha,
\v 2 kini nnanna laka sa dhorue aka banie yiesi lo yu‑ni, abitturu dhoe unie nu satsa retaba lebie runie, sinuki uinlee nu ruꞌu le Tata Do Yebáha.
\v 3 Anágaba lebiꞌi, ukareꞌaba nu chi benle ttuha, delába benbale attiba ruin ka nu abittu ria lekani ge Tata Do Yebáha. Utebiabale benle nu ukaba lele lhe bixaba nu satsa betá lele benle lhe. Anágaba nna ukagabale nu dusi lhe ttixka ritupale ttu gaxa, ritebiabale role lhe riꞌiyale lhe. Anágaba bedúgaba xibile arlo ka nu labí gwalí ankakana diosi, ka nu tuttíru labí raka uyú Tata Do Yebáha kana.
\v 4 Nnanna ka nu abittu ria lekani Tata Do Yebáha rulanni yaꞌabakana tti rilákinna labíru tulapa riale kana ki uinle nu satsa ritebiakana ruinkana. De nuha nna risaꞌakinna rinnekana gele.
\v 5 Ttaka ka nuná teeki otso dúkana nu ruinkana arlo Tata Do Yebáha. Benneha chi do tsebie kini unie elhuxtisi ge ka nu chi uttiha lhe unie elhuxtisi ge ka nu sa seꞌe bani lhe.
\v 6 De nuha‑la nna ka nu yattiha biyienbakinna ka tisa ge Cristuha, kumu meskiba chi uttikana len bela latikaniha, delába uttibakana attiba rattiba iyába ka benne, ttaka len espíritu gekaniha nna gwaka benbakana arlo Tata Do Yebáha.
\p
\v 7 Chiba dabiga lhuxa iyá tte nu seꞌe yiesi lo yu‑ni. De nuha nna abittu bitti uinle, gwaludola lele gwalilhapi tisa len Tata Do Yebáha.
\v 8 Nu rakarula doelha itú iki itú lele akin ge luesile, kumu ganna ttixka riꞌi rakin ge luesiriꞌi, laꞌania nna ixeba tulha ridíriꞌi elha xen lasi geni ganna ttixka.
\v 9 Itú iki itú lele gwaligaxi luesile lheꞌe lisile, abittu usuna lisile.
\v 10 Kua ttu ttule ixuinle elha tse rutebie gele kini ute nále len adíru ka benne kumu Tata Do Yebáha ixe looba elha tse redá lebie rutebie geriꞌi. Ganna aníha uinle, laꞌania nna gwa rixú tsebinle nu betebie gele.
\v 11 Ganna nuxa ttúle betebie elha tse gele kini kixxiꞌale ka tisa geeha, gwalinneba ka tisa ka nu rutebe len lebiꞌi nna ganna nuxa ttúle edá lele ute nále len adí ka benne, nu edá lele uinleha, gwaluin na len nu tsitsi ra le Tata Do Yebáha kini anáchu de Jesucristuha nna iyába nu uinleha, nuha uinna kini inná xxeni le Tata Do Yebáha. Benneha ra tsitsi lebie lhe rinnabie ttu dia lii lhe. Amén.
\s Lebiꞌi ruyúle elha disa de chi ria lele Cristuha
\p
\v 12 Betsi to kia, tti ratele ruyúle ttu bixa elha disa kini uleꞌe ganna gwaseꞌe tsitsile lo neda ge Tata Do Yebáha, tti ratele aníha abittu aka tenle akinle: “¿Beaka ratetu aní?”
\v 13 Lebiꞌi, gwaludúla itta lele de ratele attiba gwate Cristuha, kini anágaba edeaka tenle ganna chi ilenle dedábie lheꞌe xiani geeha.
\v 14 Karubárule ganna rinnekana gele de ria lele gebie kumu Espíritu ge Tata Do Yebáha gwa duba benneha len lebiꞌi. Benneha xxeni ra lebie. [Gwalí galá ka nu rinnekana gele rigela ka nuná iki Espírituha, ttaka lebiꞌi nna ruinlale kini ra xxeni lebie.]
\v 15 Ttaka ganna ttixka ankale nu runi elhutti o ankale ubana o ruinle satsa, anágaba ganna de ratsela gele ata labí dika utsela gele, laꞌania nna meskiba ruyúle elha disa kumu ralhabale nuha.
\v 16 Ttaka ganna si nuxa ttúle ratele de ria lele ge Cristuha, abittu ettuinle; gwalugwela Tata Do Yebáha ixkixaru de ria lele gebie.
\v 17 Kumu chiba bisia sá dhulo aka elhuxtisi geriꞌi, dhulona lenriꞌi ka benne chi ankariꞌi ge Tata Do Yebáha, nna ganna ladeꞌaxa dhulona lenriꞌi, ¿laaba ganna adírula sate ka nu riguꞌu niꞌakani ka tisa ge Tata Do Yebáha?
\q1
\v 18 Ki nu runi nu dika ixúha‑la chiluka lhaa nuha lo elha disaha,
\q1 ¿titiala sate nu abittu ria leniha lhe nu runi tulhaha lhe?\f + \fr 4:18 \ft Proverbios 11:31 \f*
\m
\v 19 Laxkala ganna Tata Do Yebaa benne benie leha, ganna benneha raka lebie uyúle elha disa, lasi nábie gwalodhaꞌan elha nabani gele, lhe anágaba nna abittu udhanle a uinle latsiru, kumu benneha gwakaba lenie le; labí runnitti tisa gebie, gwa ruinbe nu chi rabie unie.
\c 5
\s Pedruha rulise ka benne chi ankake benneola lhe rulisagabe // ka nu kwiti lhe
\p
\v 1 Rulisaa le ka benneola, lebiꞌi ka benne riseꞌele arlo ka benne chi ria leke Cristuha. Neti attigaba lebiꞌi, ankagabaa nu ridúa arlo ka benne chi ria leke benneha lhe biyúgaba loa nu gwatebie lo ya kurusiha, lhe anágaba ganna chi besieha, iselagabaa edí baaya nu xxeni ra leeha.
\v 2 Rinnabaa len lebiꞌi, uinle attiba runi ttu nu reki lo ka neru to. Aníha‑ba uyú tsitsile ka benne chi bodhaꞌan Tata Do Yebáha lasi nále. Itú iki itú lele gwaluyú ke. Gwaluyú ke attiba raka le Tata Do Yebáha. Abittu uyúle ke de rido doelhabale, sinuki gwaluyúla ke kumu de redá lele ruyúle ke. Abittugaba uinle na de rulha lele dhile belhiu, sinuki gwaluinla na de ruꞌu lele uyúle ke.
\v 3 Ka benne ruyúle‑na, abittu innabiale ke attiba rakaba lele, sinuki gwaluinla latsiru kini ilákanie elha ruin gele nna aníha‑gaba uinke.
\v 4 Aníha kini lebiꞌi, ka benne ankale attiba ka nu reki lo ka neru to, tti esia benne anke Xxanariꞌiha, laꞌania edí baale nu xxeni ra leeha de dhile ttu nu tse, delába nu abittu riseꞌe loona.
\p
\v 5 Anágaba rulisagabaa le, lebiꞌi ka benne kwiti. Gwaludo tisa ge ka benneola‑na lhe iyá ttele jeru ute ná len luesile, abittu uinle ttaba, kumu:
\q Tata Do Yebáha redúbe lo ka nu ruin ttaba‑na,
\q ttaka ka nu abittu ruinkana ttaba, gwa rakaba lenie kana.\f + \fr 5:5 \ft Proverbios 3:34\f*
\m
\v 6 Laxkala gwalorexxa gaa lele arlo Tata Do Yebaa benne ra xxeni leeha, kini ganna chi bisia sá gaꞌananieha, laꞌania unie kini lebiꞌi ebana lele.
\v 7 Gwalodhaꞌan iyá elhaxchacha iki gele lasi nábie, kumu benneha guyúbe le.
\p
\v 8 Abittu bitti uinle lhe gwaltseꞌe ubeda lhe, kumu nu abittu raka uyúna leha, delába nu xxegwiha, nuha ruinbana attiba runi ttu beesi rekina ruttuxxuna rigilana nu gona.
\v 9 Tsitsi gwaledú loni lhe gwaluxxen tsitsi lele ge Tata Do Yebáha. Lebiꞌi gwa yúbale, luesi elha disa ratele‑nagaba rate ka betsi to geriꞌi seꞌe itúba yiesi lo yu‑ni.
\v 10 Ttaka iki de chi gwatele biyúle elha disa ttu satti, laꞌania nna Tata Do Yebaa benne redá lebie rutebie iyá nu tse lenriꞌi, benneha unie kini lebiꞌi eseꞌe tsele lo neda gebie lhe oseꞌe tsitsie le lhe. Anágaba uingabe kini lebiꞌi ttu tsaba tseꞌele lo neda geeha, abittu eyadi gaale. Lagabe nuha uxie le kini edí baale nu xxeni ra leeha, delába nu xxeni tee ttu dia liiha. Edí baale nuha de chi babale len Cristuha.
\v 11 Benneha ra xxeni lebie lhe rinnabiagabe ttu dia lii lhe. Amén.
\s Pedruha rulhuxe rinnebie
\p
\v 12 Betsi to geriꞌi Silvano‑ni, benne‑ni du tsitsie lo neda ge Tata Do Yebáha. Labie benie yetsi ridhelhaa‑ni. Lo nuní rinnea ttu chupa rulisaa le lhe rigixxiꞌania le deki meskiba bixa ratele, Tata Do Yebáha gwa redába lebie raka lenie le. De nuha nna gwaltseꞌe tsitsi.
\v 13 Ka benne ria leke Jesús‑ni seꞌe Babilonia‑ni, delába ka benne chi bekwe Tata Do Yebáha attigaba bekwebie lebiꞌi, ka benne‑ni ridhelhake ttu padiuxi gele, lhe anágaba xiꞌinia Marcos‑ni ridhelhagabe ttu padiuxi gele.
\v 14 Gwalugwe luesile ttu padiuxi lhe gwaligo ttu xxaga luesile lhe.
\p Anágaba xen su lasiba tseꞌe iyá ttele de babale len Jesucristuha.