\id 2PE
\h 2 Pedro
\mt Yetsi nu berupa ben Pedruha
\c 1
\p
\v 1 Neti Simón Pedro, ankaa benne rixúni Jesucristuha lhe ankagabaa apóstol gebie lhe. Naa ridhelhaa yetsi‑ni gele, lebiꞌi ka benne chi ria lele attiba riꞌitu. Ria leriꞌi kumu Jesucristu benne rodilábie riꞌiha lhe anke Diosi geriꞌi lhe, benneha runie nu dika ixú.
\p
\v 2 Tata Do Yebáha lhe Jesucristu benne anke Xxanariꞌiha, lake de chi ankabienle ke, de nuha nna edáru leke aka lenke le lhe useꞌeke le xen su lasi lhe.
\s Lebiꞌi tseꞌele uinle tti raka le Tata Do Yebáha
\p
\v 3 Tata Do Yebáha, len nu ra tsitsi leeha chi betebie iyá nu riyasinriꞌi kini tseꞌeriꞌi uinriꞌi nu ruꞌu lebie. Iyá nu beteeha uxíriꞌi na de chi ankabienriꞌi Jesucristuha. Benneha uxie riꞌi lo neda geeha kumu de ra xxeni lebie lhe de re tse lebie lhe.
\v 4 De nuha nna yalhá xxeni anka nu chi rabie utebie geriꞌi lhe yalhá lheꞌe ankana lhe. Aníha unie kini lebiꞌi udhanle nu satsa reta lele ruinle yiesi lo yu‑ni, kini abitturu unnittina le, nna ganna chi bedhanle nu satsaha, laꞌania nna isinle akale benne runi nu anka tse attiba Tata Do Yebáha anke benne runi nu anka tse.
\p
\v 5 De nuha nna uinle doelha uxxenru lele ge Tata Do Yebáha. Kumu ganna chi uxxenru lele ge benneha, laꞌania nna nu uxxenru leleha, nuha uinna kini isinle akale nu runi nu anka tse, nna iki de chi ruinle nu anka tseha nna nuha uinna kini lebiꞌi isinle akale benne gwa rite dani,
\v 6 nna ganna chi rite denleha, laꞌania nna nuha uinna kini lebiꞌi dhaale innabiale elha ruin gele, nna ganna chi dhaale innabiale elha ruin geleha, laꞌania nna nuha uinna kini isinle akale benne kweki besi lele, nna ganna chi re besi leleha, laꞌania nna nuha uinna kini udo lele Tata Do Yebáha,
\v 7 nna iki de chi rudo lele benneha, laꞌania nna nuha uinna kini isinle aka siꞌin luesile attiba raka siꞌinle ttu betsi to gele, nna iki de chi raka siꞌin luesileha, laꞌania nna nuha uinna kini isinle akin ge luesile.
\v 8 Kumu ganna lebiꞌi uinle aní, lhe ganna udoruna lele uinle na, laꞌania nna gwakabale benne dika ixú, lhe anágaba nna labí kwentaba benbiale Jesucristu benne anke Xxanariꞌiha.
\v 9 Ttaka nu abittu uinna nu ria‑ni, nuha ttiba ttu nu lo xua ankana o ttiba ttu nu abittu rilá tseni, aníha‑ba ankana, kumu chiba bixulhinna deki Tata Do Yebáha chi bocharie ka tulha benna ttuha.
\v 10 De nuha nna xa betsi to, lebiꞌi gwaluin doelha kini uleꞌe deki chiba ankale benne chi bekwebie lhe chi ankale benne chi uxie lo neda geeha lhe. Kumu ganna aníha uinle, laꞌania nna niruba latti a ukwittale lo neda geeha.
\v 11 Aníha nna yali tá lo neda gele gaꞌale ata rinnabia Jesucristuha ttu dia lii. Benneha anke Xxanariꞌi lhe rodilábie riꞌi lhe.
\p
\v 12 De nuha nna neti labí udú siia a kixxiꞌania le ge nu nuní, satíaba odhúa lele geni, meskiba chi yule lhe meskiba chi bedaxxu tsitsile ka tisa ka nu ankakana nu gwalíga.
\v 13 Neti rakati, nnanna laka doa anka bania, tseba anka ganna odhúa lele ge nuní kini uinle na,
\v 14 kumu Jesucristu benne anke Xxanariꞌiha chila rabie neti deki chi tteba dabigana gattia.
\v 15 De nuha nna runia doelha rigixxiꞌania le kini ganna chi uttiaha, laꞌania nna satíaba odhú lele ge nu rinnea‑ni.
\s Ka apóstoal bilákanie nu xxeni ra le Cristuha
\p
\v 16 Kumu riꞌitu tti utixxiꞌatu ratu le deki tsitsiba ra le Jesucristu benne anke Xxanariꞌiha lhe ratu le deki esiabie yiesi lo yu‑ni attu libe lhe, tti utixxiꞌentu le nuní, labí tisa botsiꞌinu letu nuha utixxiꞌatu o tisa bexxe letu, sinuki kwinaga riꞌitu biyú lotu xxeniba ra lebie.
\v 17-18 Kumu riꞌitu seꞌetu len Jesucristuha iki iꞌiya leꞌaha tti begwe Xxudiriꞌi do yebáha lidhake lhe benie kini uná xxeni lebie lhe. Laꞌaniagaba nuha biyienintu tsiꞌi Xxudiriꞌi do yebáha benne rapi edha linníha, unnebie ree: “Benne‑ni anke Xiꞌinia lhe rakati gebie lhe. Benne‑ni runie nu ruꞌu lasia.”\f + \fr 1:17‑18 \ft Mateo 17:5; Marcos 9:7; Lucas 9:35\f*
\p
\v 19 De nu uka iki iꞌiyaha, de nuha nna uxxen tsitsiru leriꞌi ge ka tisa utixxiꞌa ka profeta ge Tata Do Yebáha itú nu reha. Laxkala tseba anka ganna lebiꞌi etabinle ge nu ra ka tisa‑ni, kumu ka benne‑ni ankake attiba ttu xiani rudenke ata anka chulha axtaliba ganna chi bisia sá esia Jesucristu benne anke ttiba beli riria ka dila‑na kini rudanie lheꞌe lastole.
\v 20 Deba nna ladeꞌaxa tte denle deki ni ttú ka tisa unne Tata Do Yebáha, delába ka tisa dia lo ka yetsi geeha, ni ttú ka benneha labí ankake tisa nu kixxiꞌariꞌi attiba rakaba leriꞌi,
\v 21 kumu ka profetaha utixxiꞌabake nu raba Tata Do Yebáha, labí nu anka geke nuha utixxiꞌake, sinuki utixxiꞌabake nu raba Espíritu geeha.
\c 2
\s Abittu tsia lele ge ka nu labí liikinna ruleꞌekana // ka tisa ge Tata Do Yebáha
\p
\v 1 Ttaka ttuha lagwi ge ka benne Israel‑ni useꞌegaba ka nu labí gwalí ukakana profeta ge Tata Do Yebáha. Anágaba nnanna lagwi gele tseꞌegaba ka nu labí gwalí akakana ka nu uleꞌekana ka tisa geeha. Lebiꞌi labí tte denle ganna chi uleꞌekinna le ka tisa ka nu unnittikana le. Axtala kuꞌu niꞌakani Benne bodilábie kanaha, delába Benne anke Xxanariꞌiha. Tti uinkana aníha, ttu nnelaba nnittikana arlo Tata Do Yebáha.
\v 2 Ixeba ka benne sanalhake kana uinke nu satsa ruinkanaha nna delo niꞌa gekani nna itua balaꞌana ge ka benne chi diake lo neda ge Tata Do Yebáha, delába neda nu anka gwalíha.
\v 3 Lakana de raka xxatta lekani gatta gekani, de nuha nna otsiꞌinu lekani innekana nu abittu ankana nu gwalí. Aníha uinkana kini galhikana belhiu len lebiꞌi. Ka nu ruin aní, ttuha‑li chi gaꞌanani Tata Do Yebáha ukinnie kana, laxkala teeba ki tseꞌe lookana, de ttena abittu ttena.
\p
\v 4 Kumu ki ka anjeli, ka nu binittikana abittu ben tsekanaha, ki ka nuha abittu uxíe elha xen lasi gekani, sinuki udhelhalee kana ata re giha nna bedheabie kana ata anka chulhaha. Niha chi tua tsekana axtaliba ganna chi isia sá unie elhuxtisi gekani.
\v 5 Anágaba abittugaba uxíe elha xen lasi ge ka nu useꞌe itú ttuha ka nu abittu ugía lekanieha, delába ka nu seꞌe tti benie kini bisá inda yiesi lo yu‑ni. Sunruba Noé benne utixxiꞌanie kana deki teeki uin tsekana, sunruba benneha lenie a gasi ka benne gwa uláke abittu uttike.
\v 6 Aníha‑gaba ben Tata Do Yebáha betseꞌe loogabe ka yiesi Sodoma lhe Gomorra lhe. Bettebie kana len gi, tuttíruba tee beyonie kana. Aníha bedhake kana kini adí ka nu ruin satsa ilákinna deki aníha‑gaba satekana.
\v 7 Ttaka Lot benne runi latsiru attiba ankaba geniha, gwa bodilábe benneha. Benneha udoe biyúe elha disa tti rilánie nu abittu ixú ruin ka nu ruin satsaha.
\v 8 Kumu de anke benne ruin latsiru, de nuha nna tti udoe lagwi gekani, ttu ttu sába biyúe elha disa de riyieninie lhe de rilánie nu satsa ruinkanaha.
\p
\v 9 De nuha nna Tata Do Yebáha, ka benne gwa rudoruke tisa gebie, ka benneha gwa yube gasina odilábie ke lo nu ratekeha nna ka nu runi satsaha nna odhaꞌanbe kana kini dhíkana elha disa ganna chi bisia sá unie elhuxtisi ge ka benne seꞌe yiesi lo yu‑ni.
\v 10 Ladeꞌa tte ugwebie elha disa ka nu ruinkana nu satsa retaba le latikani lhe riguꞌu niꞌakani nu xxeni ra le Tata Xisiha lhe. Anágaba nna ruingabakana ttaba lhe ruingabakana yieti lhe. Labí rasikinna tti rinnekana ge ka nu ra xxeni lekani seꞌe yebáha,
\v 11 ki ka anjeli ge Tata Do Yebáha, meskila tsitsiru ra leke, arlo Tata Do Yebáha labí reyaxakanie inne gweke ge ka nu ra xxeni lekaniha.
\p
\v 12 Ttaka ka nu labí gwalí ruleꞌekana ka tisa ge Tata Do Yebáha, ka nuná ladiba rinnekana riguakana balaꞌana ge nu labí yúkana. Ttiba ttu nimala akaa elha rieni ikini, labí yuna bixa ruinna, aníha‑ba anka ka nuná lhe anágaba attigaba ka nimala‑na, ka nuná ralibakana yiesi lo yu‑ni kini ttu sá nna iyaxxukana gattikana. Aníha‑ba sate ka nu labí gwalí ruleꞌekana ka tisa ge Tata Do Yebáha, tseꞌe looba ka nuná.
\v 13 Dhiba ka nuná elha disa ge nu satsa ruinkana, kumu de ruꞌu lekani lo resába ruinkana bixaba nu satsa retaba lekani ruinkana. Ka nuná elhittula rutekana, kumu axtaba tti riseꞌekana go yetta len lebiꞌi, ittaba du lekani tti ruinkana nu satsa.
\v 14 Ka nuná nuxaba nuila rilákinna nna ridá lekani. Bittuba rudú siikana a ruinkana nu satsa lhe anágaba ridí yiegabakana ka nu labí chi seꞌe tsitsikana lo neda ge Tata Do Yebáha lhe anágaba chigaba labikinna gasina uinkana kini gatta gekani. ¡Ka nuná urixxi ukinniba Tata Do Yebáha kana!
\v 15 Chiba bedhan ka nuná neda tseha nna bedaxxukana neda nu bedaxxu Balaam nu uka xiꞌin biyú Besor‑ni. Balaam‑ni uyuꞌu xxatta leni dhina belhiu, de nuha nna benna nu satsa.
\v 16 Ttaka bitisabana ge nu satsa bennaha kumu burruha utisana na. Ka burru‑na meskiba abittu rinnekana, ttaka laꞌania nna unne burruha attiba rinne ttu benne nna utisana na. Aníha uka kini abittu ben Balaam‑ni nu abittu ixú rulaba leniha.
\p
\v 17 Ka nu labí gwalí ruleꞌekana ka tisa ge Tata Do Yebáha, ttiba ttu yiela abittu inda taꞌa lheꞌeni, aníha‑ba ankakana lhe ttiba ttu bea rurio lá be richena na attu ta subi, aníha‑ba ankakana. Chiba gaꞌanna esinkana ttu dia lii ata anka chulha raha.
\v 18 Lakana riseꞌekana reguꞌukana gu, kwentaba rinnekana. Labí rixú nu rinnekanaha. Ridí yiekana ka benne si udulorubake rukwittake ki abitturu rutsáke ka nu ruin satsa seꞌe yiesi lo yu‑ni. Rudo doelhakana ke kini eyekike uinke luesi nu satsa reta le latikani ruinkana.
\v 19 Rákana ke deki gwalábake, ttaka ki nigaba lakana a ridaakana udhankana nu satsa ruinkanaha. Kumu ttu nu abittu ridaana udhanna nu satsa ruinnaha, eyakaba nuha ttu nu labí aka geni eriana lo nu satsa ruinnaha.
\v 20 Kumu lakana, ganna iki de chi bedhankana nu satsa raka yiesi lo yu‑ni de chi benbiakana Jesucristu benne rodilábie riꞌi lhe anke Xxanariꞌi lhe, ganna iki de chi benbiakana benneha nna saditaꞌakana lo nu satsaha nna odaxxu tsitsikana nuha attu libe, laꞌania nna adírula satsa chi uinkana attichula tti benkana sisiꞌa tteha.
\v 21 Tserula anka ganna ttixka abittu benbiakana neda tseha, a laa kila benbiakana nedaha, delo nna bedhankana abitturu rudokana tisa ge nu bodhaꞌan Tata Do Yebáha uinkana.
\v 22 Benbakana attiba ra ttu tisa tee nu rinne ka benne ráke: “Beku reyabiha reyeki adakabana reyona nu chi beyabinaha lhe anágaba kuchi nu chi udiha retulhu adakabana lo yunaha.”
\c 3
\s Gasina aka ganna chi esia Jesús benne anke Xxanariꞌiha
\p
\v 1 Betsi to kia, nuní nu berupa yetsi ridhelhaa gele. Lo ixpaba ka yetsi‑ni rodhua lele ge nu chi yule, kini anáchu lebiꞌi ulaba lele latsiru.
\v 2 Raka lasia odhú lele ge nu ra ka profeta ge Tata Do Yebáha itú nu reha lhe anágaba odhúgaba lele ge nu ra ka apóstol‑ni uinriꞌi, delába udoriꞌi tisa ge nu ra Jesús benne rodilábie riꞌi lhe anke Xxanariꞌi lhe.
\v 3 Deba nna ladeꞌaxa unale, ganna chi isia ka sá daluxaha, laꞌania tseki ka nu uinkana nu satsa retaba lekani lhe uxisilakana
\v 4 innákana: “Cristu nu rana deki esianaha, ¿nálana ganna? Chiba utti ka benneola geriꞌiha nna yiesi lo yu‑ni nna labí chi biseana, sa ankabana atti tteba ankana atti urena sisiꞌa tteha.”
\v 5 Ka nu ra aní ruinnibakana kini ixulhakinna deki yebáha lhe yiesi lo yu‑ni lhe, nu reha‑li ukakana. Ukabakana len tisa unne Tata Do Yebáha. Yiesi lo yu‑ni lheꞌe indaha‑ba biriana lhe lagwi indaha‑ba rena lhe.
\v 6 Anágaba nna de indaha‑gaba bisá yiesi lo yu‑ni nna useꞌe loo ka benne useꞌe laꞌania.
\v 7 Ttaka yebáha lhe yiesi lo yu nu re nnanna, la len tisa unne Tata Do Yebáha, la len tisaha‑gaba chi tua tsekana kini tsiakana lo giha ganna chi isia sá tti unie elhuxtisiha, lhe anágaba ka nu abittuba ria lekanie, utseꞌe loogabe kana.
\p
\v 8-9 Ttaka lebiꞌi xa betsi to kia, bittu ixulhinle deki Tata Do Yebáha labíru isá riyasa unie nu chi rabie unie, labí tti ra ttu chupakana deki isáruba tti unie nuha. Kumu len benneha ttu sá ankana attiba ttu mili ida, nna ttu mili ida nna ankana ttiba ttu sá. De nuha nna ribedabe kumu de ratua lebie le lhe de rakaba lebie odúna iyá tte ka benne nna odaxxuke neda gebie kini abittu tsia nnittike.
\p
\v 10 La sá atti chi esia Jesús benne anke Xxanariꞌiha yiesi lo yu‑ni, labí yuriꞌi bí sá aka nuha. Uinbe attiba runi ttu ubana iyyaba lasi rachadina ttu yoꞌo. Aníha‑ba aka atti isia sá esia benneha. Laꞌania nna yebáha tsapaba tsuꞌu be tti enitti loona nna ka beli‑na lhe adíru ka nu sia gwetsáha lhe, giha‑ba utseꞌe loona kana. Anágaba yiesi lo yu‑ni lhe iyába ka nu seꞌe loni lhe itegabakana.
\p
\v 11 Kumu iyába nu seꞌe, tseꞌe loobakana. De nuha nna, ¿laaba ganna tserula saríana le ganna udo lele Tata Do Yebáha lhe uinle nu ruꞌu lebie lhe?
\v 12 Anágaba saría tsegabana le ganna itú iki itú lele kwedale la sá chi gaꞌananie unie nu chi reeha. Laꞌania nna yebáha utseꞌe looba giha nuha nna ka beli lhe adíru ka nu sia gwetsáha nna enunnibakana tti itekana.
\v 13 Ttaka riꞌi ribedariꞌi attu yiesi lo yu kubi lhe attu yebaa kubi lhe, delába nu chi ra Tata Do Yebáha utebie geriꞌi. Yebáha lhe yiesi lo yu kubiha lhe, niha iyába aka latsiru lhe iyába aka attiba ankaba geni lhe.
\p
\v 14 De nuha nna xa betsi to kia, laka seꞌele ribedale aka nuní, gwaluin doelha kini atti chi esieha, laꞌania nna etexxake le seꞌele xen su lasi lhe anágaba seꞌele ankale nari xú lhe abittu bi ge itisale lhe.
\v 15 Gwalodhú lele deki Tata Do Yebaa geriꞌiha gwa ribedaba benneha abittu ruinxxie ttu bixa. Aníha runie kini riꞌi lhaariꞌi abittu tsia nnittiriꞌi, attiba raba betsi to geriꞌi Pabluha lo yetsi udhelhe geleha. Benneha, Tata Do Yebáha‑ba betebie elha rieni gebie kini unnebie aní lo yetsi udhelheha.
\v 16 Lo iyába ka yetsi runieha rinnebie ge nuní. Lo ka yetsiha rinnebie ge adíru nu abittu rite dáxxinriꞌi. De nuha nna ka nu abittu yuu lhe ka nu labí chi seꞌe tsitsikana lo neda ge Tata Do Yebáha, rudaxxu niꞌakani nu rabie lo ka yetsiha nna rotseakana nu ra ka tisaha. Anágaba ruinkana len adíru ka tisa dia lo ka yetsi ge Tata Do Yebáha. Ka nu ruin aní, la labakana rigila gekani kini tsiakana ata tseꞌe lookana.
\p
\v 17 De nuha nna xa betsi to, lebiꞌi chiba yule ge nu rigixxiꞌaya‑ni. Laxkala gwaluyú gele ge ka nu ruin satsa‑na kini ka dhi yiekana le nna abitturu tseꞌe tsitsile nna ikwadhale lo neda ge Tata Do Yebáha.
\v 18 Lebiꞌi nu uinlale, gwaltseꞌe tsitsirula lo neda geeha, abittu udhanle nu tse redá lebie rutebie gele lhe anágaba gwaluinbia chiettiru Jesucristu benne anke Xxanariꞌiha lhe anke benne rodilábie riꞌi lhe. Benneha uinriꞌi kini inná xxeni lebie ttu dia lii. Amén.