\id 1JN
\h 1 Juan
\mt Yetsi nu sisiꞌa tte udhelha Juan‑ni ge ka benne ria leke Jesús‑ni
\c 1
\p
\v 1 Lo yetsi‑ni rigixxiꞌaya ge benne chi doe sisiꞌa tteha attili lani kwe yiesi lo yu‑niha; delába kixxiꞌaya ge benne biyienintu unnebie lhe bilen kwinaga riꞌitue lhe. Anágaba benbiatue lhe bedaxxutu nábie lhe. Benneha nuha anke tisa, delába tisa nu runi ki aka benriꞌi ttu dia lii.
\v 2 Benne runie ki aka benriꞌi ttu dia liiha, benneha nuha bisiabie yiesi lo yu‑ni nna uke benne attiba ankariꞌi. Riꞌitu bilentue nna rigixxiꞌatu deki ttu dia liiba doe. Ata do Tataha‑ba udoe, delola nna bisiabie yiesi lo yu‑ni nna bilentue.
\v 3 Riꞌitu rigixxiꞌabatu ge nu biyienibintu lhe ge nu bilábintu lhe, kini anágaba lebiꞌi iselagabale len riꞌitu kini tseꞌe ttu tsapa len luesiriꞌi attiba riꞌitu len Tataha seꞌe ttu tsapatu lenie lhe len Xiꞌinie Jesucristuha lhe.
\v 4 Nuní rigixxiꞌentu le lo yetsi‑ni kini lebiꞌi nna itta suba edú lele.
\s Teeki tsekiriꞌi lheꞌe xiani
\p
\v 5 Tata Do Yebáha anke xiani. Niruba latti a raxxína chulhaha len benneha. Ka tisa‑ni nuní biyienintu unne Jesucristuha nna rigixxiꞌentu le kana.
\v 6 Ttibanka ganna innáriꞌi deki gwa seꞌebariꞌi len Tata Do Yebáha, delo nna sa rekibariꞌi lheꞌe chulhaha, laꞌania nna ruinba leriꞌi; labí ruinriꞌi nu raxxína len nu anka gwalí.
\v 7 Ttaka ganna riꞌi gwa rekibariꞌi lheꞌe xianiha attiba labie doe lheꞌe xianiha, laꞌania nna gwa seꞌeba ttu tsapa len luesiriꞌi, nna reni nu belali Xiꞌinie Jesucristuha tti uttieha, reniha nuha rocharina iyá tte ka tulha ruinriꞌi.
\p
\v 8 Ganna riꞌi innáriꞌi labí tulha ruinriꞌi, laꞌania nna la len riꞌiba nuha ruin leriꞌi nna labí ruinriꞌi nu raxxína len nu anka gwalí.
\v 9 Ttaka ganna gwa ridíba roꞌoriꞌi arlo Tata Do Yebáha deki gwalíba ankariꞌi nu ruin tulha, benneha nna gwadíbe elha xen lasi ge ka tulha ruinriꞌi lhe gocharibe riꞌi ge iyá nu satsa ruinriꞌi lhe, kumu labie anke benne labí runnitti tisa gebie lhe anke benne runi attiba ankaba geni lhe.
\v 10 Ganna innáriꞌi: “Neti ttu tsaba labí tulha chi benia”, laꞌania nna ruinbariꞌi deki Tata Do Yebáha nu gwen lasiba anka benneha nna labí gwalíginriꞌi chi rulabiriꞌi ka tisa geeha.
\c 2
\p
\v 1 Xa xiꞌini to kia, runia nuní lo yetsi‑ni kini lebiꞌi bittu uinle tulha. Ganna nuxa ttúle uinle tulha, gwa doba benne edíbie riꞌi arlo Tataha, delába Jesucristu benne runi attiba ankaba geni.
\v 2 Lee nuha bedá lebie uttie kini de uttieha nna borexxa gaabie elha riseꞌiki ge Tata Do Yebáha. Aníha kini benneha nna aka gebie dhie elha xen lasi ge ka tulha ruinriꞌi nna laa sunruga ka tulha ruinriꞌi aka gebie dhie elha xen lasi gekani, anágaba gwakagaba gebie die elha xen lasi ge ka tulha ruin iyába ka benne seꞌe yiesi lo yu‑ni.
\s Benne chi reki lheꞌe xianiha teeki akanie ge ka benne
\p
\v 3 Ganna gwa rudobariꞌi tisa ge nu bodhaꞌan Tata Do Yebáha uinriꞌi, laꞌania nna gwalínriꞌi deki chi ankabienriꞌe.
\v 4 Nu rana: “Neti gwa ankabiabati Tata Do Yebáha”, ttaka ganna abígaba rudona tisa ge nu chi rabie na uinnaha, nuha ttu nu gwen lasiba ankana, nna labí ruinna nu raxxína len nu anka gwalí.
\v 5 Ttaka benne gudobie tisa ge nu ra Tata Do Yebáha, benneha‑ligaba nna gwalínie rakanie ge Tata Do Yebáha. Ganna aníha uinriꞌi, laꞌania nna chi yuriꞌi deki gwa duba lenriꞌe.
\v 6 Benne ra deki gwa dube len Tata Do Yebáha teeki unie tti uka elha ruin ge Jesucristuha tti ugwekie yiesi lo yu‑ni.
\p
\v 7 Lebiꞌi xa betsi to kia, nu runia lo yetsi‑ni labí anka nuní ttu tisa kubi rodhaꞌanaa ki uinle, sinuki chiba tee tisa‑ni len lebiꞌi axtali ttuha. La tisa‑niba nuha chi biyieninle sisiꞌa tteha.
\v 8 Ttaka laa kiga de chi tee tisa‑ni axtali ttuha, nnanna nna reyonia na attiba ttu mandadu kubi. Jesucristuha len elha ruin geeha gwalíga beyonie tisa‑ni ttu mandadu kubi, nnanna nna lebiꞌi chigaba ruleꞌe loole nu beyaka mandadu kubiha len elha ruin gele. Kumu nu anka chulhaha chiba dia nuha ritena nna nu anka gwalíga xianiha nna chi rudenna lheꞌe lastole nnanna.
\p
\v 9 Nu rana deki gwa dúbana lheꞌe xianiha, ttaka nna sa ritisibinna attu betsi to geriꞌi, nu ruin aníha sa rekiba nuha lo neda chulhaha.
\v 10 Benne gwa rakanie ge betsi to geriꞌiha, benneha nuha gwa due lheꞌe xianiha nna labí tee ttu bixa nu uinna ki ichekue nna unie tulha.
\v 11 Ttaka nu ritisinna ttu betsi to geriꞌi, lheꞌe chulhaba du nuha nna lheꞌe chulhaha‑ba rekina. Labí yuna gaxa diana kumu chulhaha rudheabana loni.
\s Lebiꞌi bittu uinle nu satsa raka yiesi lo yu‑ni
\p
\v 12 Lebiꞌi xa xiꞌini to, gele nuní runia lo yetsi‑ni, kumu de nu ben Jesucristuha nna chiba bixú elha xen lasi ge ka tulha gele‑na.
\v 13 Lebiꞌi ka xxudi, len lebiꞌi ridhelhaa yetsi‑ni, kumu lebiꞌi chi ankabienle benne chi do sisiꞌa tteha attili lani kwe yiesi lo yu‑niha. Ridhelhagabaa yetsi‑ni len lebiꞌi nu kwiti, kumu lebiꞌi chi udaale lo nu xxegwiha abittu ruinle nu satsa raka leni, lhe anágaba ridhelhaa yetsi‑ni len lebiꞌi xa xiꞌini to, kumu lebiꞌi nuná chi ankabienle Tataha.
\v 14 Ridhelhaa yetsi‑ni len lebiꞌi ka xxudi, kumu lebiꞌi chi ankabienle benne chi do sisiꞌa tteha attili lani kwe yiesi lo yu‑niha. Ridhelhagabaa yetsi‑ni len lebiꞌi ka nu kwiti, kumu lebiꞌi re tsitsi lele lhe gwa rudhába lele ruinle nu ra Tata Do Yebáha, lhe anágaba kumu de chi udaale lo nu xxegwiha abittu ruinle nu satsa raka leni.
\p
\v 15 Abittu akinle ge yiesi lo yu‑ni, nigaba akinle ge nu satsa raka loni. Nuxaba benne ganna rakanie ge yiesi lo yu‑ni, benneha labí rakanie ge Tataha.
\v 16 Kumu iyába nu anka ge yiesi lo yu‑ni, delába nu reta le latiriꞌi ruinna lhe nu ridá le ka iyya loriꞌi‑ni rulannikana lhe, anágaba nu ruinna kini ruinriꞌi ttaba de tee geriꞌi, iyá nuní labí ankana ge Tataha; ge benne seꞌe yiesi lo yu‑niba ankana.
\v 17 Nu anka ge yiesi lo yu‑ni lhe iyába nu satsa raka loni lhe, diaba nuní tseꞌe loona; ttaka benne runie nu ruꞌu le Tata Do Yebáha gwaka benba benneha ttu dia lii.
\s Gwaluyú gele len ka nu abittu raka uyúkana Cristuha
\p
\v 18 Xa xiꞌini to, sá bedúba nuní chi seꞌeriꞌi. Lebiꞌi chiba biyieninle deki isia sá isia nu abittu aka uyúna Cristuha, nnanna ixeba ka nu a raka uyúkana Cristuha chi reki. De nuha nna chi yuriꞌi deki sá bedúba nuní chi seꞌeriꞌi.
\v 19 Lagwi gebariꞌi biriakana, ttaka labí gwalí ukakana geriꞌi. Kumu gannala ukakana geriꞌi, laꞌania nna gwa beyaꞌanlakana lenriꞌi. Ttaka aná benkana kini beleꞌe deki labí iyá ka nu selakana riꞌiha ukakana geriꞌi.
\p
\v 20 Ttaka lebiꞌi chiba uxíle Espíritu ge Tata Do Yebaa benne bete Cristuha len lebiꞌi. De nuha nna iyábale chi yule nu anka gwalí.
\v 21 Bittu akinle deki runia nuní lo yetsi‑ni de abittu yule nu anka gwalí. ¡Koꞌo! Runia nuní lo yetsi‑ni kumu de chila yule lhe anágaba chigaba yule ni ttu tisa gwen lasi labí riria lheꞌe nu anka gwalíha.
\v 22 Nianna, ¿núla nuha anka nu ruin leni ganna? ¿Laaba ganna nu rana deki Jesús‑ni labí lii anke Cristu? Lana nuha ankana nu labí raka uyúna Cristuha, kumu riguꞌuba niꞌani Tataha lhe riguꞌugaba niꞌani Xiꞌinieha lhe.
\v 23 Nu riguꞌu niꞌani Xiꞌin Tataha, labí du nuha len Tataha nna nu rana deki gwa riaba leni ge Xiꞌinieha, nuha gwa dúbana len Tataha.
\v 24 Lebiꞌi satía gwaludhá lele ge nu chi biyieninle sisiꞌa tteha. Ganna gwa rudhába lele ge nu biyieninleha, laꞌania nna gwa seꞌebale len Tataha lhe len Xiꞌinieha lhe.
\v 25 Nuní tisa chi begwe Cristuha len riꞌi, delába unie kini satíaba aka benriꞌi.
\p
\v 26 Runia nuní lo yetsi‑ni kini rigixxiꞌania le ge ka nu ruin lekani reki naa, kini abittu dhi yiekana le.
\v 27 Ttaka lebiꞌi gwa doba Espíritu bete Jesucristuha lheꞌe lastole. De nuha nna labí riyasinle nuxa uleꞌenna le, kumu kwinaba Espírituha ruleꞌenie le iyá tte. Benneha rigixxiꞌe nu ankaba gwalí, labí ruin lebie. Laxkala ttiba chi beleꞌenie leha, aníha‑ba gwaltseꞌe len Cristuha, bittu udhanle benneha.
\p
\v 28 Laxkala nnanna xa xiꞌini to, gwaltseꞌe len Cristuha, kini ganna chi besieha, laꞌania nna xen su lasiba tseꞌeriꞌi abittu ettuinriꞌi arloe.
\v 29 Ganna lebiꞌi chi yule deki benneha anke benne runi attiba ankaba geni, laꞌania nna gwa yúgabale deki nuxaba benne unie attiba ankaba geni, benne unie aníha, benneha nuha gwalíga chi anke xiꞌin Tata Do Yebáha.
\c 3
\s Riꞌi chi ankariꞌi xiꞌin Tata Do Yebáha
\p
\v 1 ¡Gwaluyúruga! ¡Kattiparuba rakani Tata Do Yebáha geriꞌi, axtaba xiꞌinie chi tee láriꞌi! Aná nna laa suna teega láriꞌi xiꞌinie, sinuki gwalíga ankariꞌi xiꞌinie. Ttaka ka nu abí ria lekani seꞌe yiesi lo yu‑ni labí yúkana nuxa ankariꞌi, kumu anágaba Tata Do Yebáha labígaba ankabiakinna benneha.
\v 2 Betsi to kia, nnanna riꞌi chi ankariꞌi xiꞌin Tata Do Yebáha, ttaka labí chi beleꞌena gaxattiga siná eyakariꞌi. Ttaka chiba yuriꞌi ganna chi esia Cristuha, laꞌania nna eyakariꞌi ttiba ankeha, kumu laꞌania ilenriꞌe gasinattiga anke.
\v 3 Laxkala iyába ka benne ruxxen leke gebie, ka benneha nuha gwa reguꞌelha leke akake benne nari xú arloe attiba labie anke nari xú.
\p
\v 4 Iyába ka nu ruin tulha, riguꞌuba niꞌa ka nuná ka tisa bodhaꞌan Tata Do Yebáha uinriꞌi, kumu tti riguꞌu niꞌariꞌi nu bodhaꞌan Tata Do Yebáha, tulhaba nuha chi ruinriꞌi.
\v 5 Ttaka lebiꞌi chiba yule deki Jesús‑ni bite yiesi lo yu‑ni kini boxíbie ka tulha geriꞌi. Benneha labí tulha runie.
\v 6 Laxkala iyába ka benne gwa seꞌeke len Cristuha labíru rudona le ka benneha uinke tulha. Ttaka iyába ka nu ruin tulha labí rite dákinna nuxa anka benneha lhe nigaba a ankabiakinne lhe.
\v 7 Xiꞌini to kia, abittu dhielhale tsia lele ge ka nu ruin lekani reki naa, kumu gwa yúbariꞌi ganna ttu benne runie nu dika ixú, benneha ruinbe attiba ankaba geni attiba Cristuha ruinbe attiba ankaba geni.
\v 8 Ttaka nu ruin tulhaha, ge nu xxegwiha‑ba anka nuha, kumu nu xxegwiha attili sisiꞌa tteha udulona ruinna tulha. De nuha nna bisia Xiꞌin Tata Do Yebáha yiesi lo yu‑ni kini betseꞌe loobie nu ruinnaha.
\p
\v 9 Ka benne chi anka xiꞌin Tata Do Yebáha labíru rudona le ka benneha uinke tulha, kumu elha nabani rute Tata Do Yebáha, gwa doba benneha lheꞌe lastoke nna labíru aka uinke tulha, kumu Tata Do Yebáha anke tata geke.
\v 10 Laxkala iyába ka nu abittu ruinkana attiba ankaba geni lhe abittu rakakinna ge attu betsi to geriꞌi lhe, ka nuná labí ankakana ge Tata Do Yebáha. Aní nna ruleꞌe gá seꞌe ka nu ankakana xiꞌin nu xxegwiha lhe gá seꞌe ka nu gwalíga ankakana xiꞌin Tata Do Yebáha lhe.
\s Betsi to kia, akin ge luesiriꞌi
\p
\v 11 Tisa nu ra: “Akin ge luesi ttu tturiꞌi”, tisa‑ni nuha chi biyieninle sisiꞌa tteha.
\v 12 Bittu uinle tti ben nubiyú utta láni Caín. Nuha‑ruga ukana ge nu xxegwiha nna bettina betsiniha. Nianna, ¿bí lo niꞌa ge bettina nuha ganna? Bettina nuha kumu lana satsaba anka nu ruinna; betsiniha nna ruinba nuha attiba ankaba geni. De nuha nna bettina betsiniha.
\p
\v 13 Betsi to kia, bittu aka tenle ttixka ka benne seꞌe yiesi lo yu‑ni itisikanie le.
\v 14 Riꞌi chi yuriꞌi deki chiba uláriꞌi lo elhutti nu tee arlo Tata Do Yebáha nna chi bisinriꞌi aka benriꞌi ttu dia lii arloe. Chi yuriꞌi nuní kumu de rakinriꞌi ge ka betsi to geriꞌi. Iyába ka nu labí rakakinna ge attu betsi to geriꞌi, ka nuha ttisidiba sa seꞌebakana lo elhuttiha.
\v 15 Iyába ka nu ritisikinna attu betsi to geriꞌi, attisidiba nu runi elhuttiba anka ka nuha. Lebiꞌi gwa yu xeabale ni ttu nu runi elhutti gwaka benna ttu dia lii arlo Tata Do Yebáha.
\v 16 Jesucristuha betebie elha nabani geeha kini uttie kwenta geriꞌi. Aníha nuha nna chi yuriꞌi gasina dika akin ge luesiriꞌi. Anágaba riꞌi teeki edí edenriꞌi ka betsi to geriꞌi, meskila gattiriꞌi kwenta geke ganna ttixka.
\v 17 Ganna nuxa ttu benne tee gebie nna riláxanie attu betsi to geriꞌi risá lo xxatte, benne tee geeha nna labí ratua lebie benneha kini utebie nu riyasanie, benne runi aníha labí do elha siꞌi lasi ge Tata Do Yebáha lheꞌe lasto benneha.
\p
\v 18 Xiꞌini to kia, bittu suna len tisaba innáriꞌi deki gwa rakabin ge luesiriꞌi. ¡Koꞌo! Sinuki len elha ruin geriꞌi uleꞌe looriꞌi deki gwalíga rakin ge luesiriꞌi.
\v 19 Ganna aníha rakin ge luesiriꞌi, laꞌania nna chi yuriꞌi deki chiba selariꞌi lheꞌe nu anka gwalí nna xen su lasiba dhu leriꞌi arlo Tata Do Yebáha;
\v 20 meskiba ganna riꞌi rakinriꞌi deki labí ruin tseriꞌi len ka benne, Tata Do Yebáha xxenirula ra le benneha attichula nu rulaba leriꞌi, kumu benneha iyába yue.
\v 21 Betsi to kia, ganna riꞌi rakinriꞌi abittuba rinittiriꞌi, laꞌania nna xen su lasiba dhu leriꞌi arlo Tata Do Yebáha
\v 22 nna bixaba innabariꞌi lenie, benneha nna gutebe nuha len riꞌi kumu de gwa rudobariꞌi tisa ge nu chi bodhaꞌane uinriꞌi lhe kumu de gwa ruinbariꞌi nu ruꞌu lebie lhe.
\v 23 Tisa nu chi bodhaꞌane uinriꞌi, delába tsia leriꞌi ge Jesucristu benne anke Xiꞌinieha lhe akin ge luesi ttu tturiꞌi lhe, nuní tisa bodhaꞌane uinriꞌi. Uinbariꞌi atti tteba chi rabie uinriꞌi.
\v 24 Ganna gwa rudobariꞌi tisa ge nu bodhaꞌane uinriꞌiha, laꞌania nna gwa seꞌebariꞌi lenie, lee nna gwa dúgabe lenriꞌi. Aníha nuha nna chi yuriꞌi deki gwa dube len riꞌi kumu de do Espíritu chi beteeha lheꞌe lastoriꞌi.
\c 4
\s Bittu tsia lele ge ka nu ruin lekani reki yiesi lo yu‑ni
\p
\v 1 Betsi to kia, bittu tsia lele ge iyá ka nu rigixxiꞌakana ka tisa ge Tata Do Yebáha. Gwalikuꞌuxa kana prueba ttixa rinnekana, kini aníha nna yule ganna gwalí gwankakana ge Tata Do Yebáha, kumu ixeba ka nu ruin lekani chi reki yiesi lo yu‑ni rákana deki ankakana ka nu rigixxiꞌakana ka tisa chi begwe Tata Do Yebáha kana.
\v 2 Lebiꞌi kini utte dale gá seꞌe ka nu gwankakana ge Tata Do Yebáha: ka nu gwankakana ge Tata Do Yebáha, aní teeki inná ka nuha, innákana deki gwa riaba lekani bisia Jesucristuha yiesi lo yu‑ni nna uke benne attibariꞌi. Ka nu inná aníha, lakana nuha gwalíga ankakana ge Tata Do Yebáha
\v 3 nna iyába ka nu innákana deki labí lii bisia Jesucristuha yiesi lo yu‑ni uke benne attiba ankariꞌi, ka nu inná aníha labí anka ka nuha ge Tata Do Yebáha, ankalakana ge nu abittu raka uyúna Cristuha, delába nu chi biyieninle deki isiana, nnanna nna chiba reki nuha yiesi lo yu‑ni.
\p
\v 4 Lebiꞌi xa xiꞌini to, chiba ankale ge Tata Do Yebáha nna chiba udaale bedúle lo ka nu ruin lekani reki naa, kumu benne do lheꞌe lastole‑na xxenirula ra le benne‑na tti nu xxegwi reki yiesi lo yu‑ni.
\v 5 Ka nu ruin lekani reki naa ankabakana ge yiesi lo yu‑ni, laxkala rinnebakana attiba ankaba elha rulaba le ge ka benne seꞌe yiesi lo yu‑ni. Ka benne seꞌe yiesi lo yu‑ni nna gwa rudoba nagake gekani.
\v 6 Riꞌi ankariꞌi ge Tata Do Yebáha nna iyába ka nu ankabiakinna Tata Do Yebáha gwa rudoba nagakani geriꞌi nna ka nu abittu ankakana ge Tata Do Yebáha labí rudo naga ka nuha geriꞌi. Aníha kini yuriꞌi gá seꞌe ka nu rinnekana nu anka gwalí lhe gá seꞌe ka nu rinnekana gwen lasi lhe.
\s Tata Do Yebáha rakanie geriꞌi, // anágaba riꞌi teeki akin ge luesiriꞌi
\p
\v 7 Betsi to kia, akin ge luesi ttu tturiꞌi, kumu Tata Do Yebáha runie kini rakin ge luesiriꞌi nna iyába ka nu gwa rakakinna ge ka benne, lakana nuha gwankakana xiꞌinie lhe gwankabiagabakinne lhe.
\v 8 Ka nu abí rakakinna ge nuxaba benne, ka nuha labí liikinna deki gwankabiakinna Tata Do Yebáha, kumu Tata Do Yebáha anke benne siꞌi lasi.
\v 9 Labie udhelhe Xiꞌin ttu túbiru geeha yiesi lo yu‑ni. Xiꞌinieha uttie kini riꞌi, de utti benneha nna gwaka benriꞌi ttu dia lii. Aníha ben Tata Do Yebáha kini beleꞌe looe deki rakanie geriꞌi.
\v 10 Labí de riꞌi uduloriꞌi rakinriꞌi ge Tata Do Yebáha. ¡Koꞌo! Lalee ladeꞌa tte ukanie geriꞌi. De nuha nna udhelhe Xiꞌinieha yiesi lo yu‑ni kini uttie. Nu gwate Xiꞌinieha bixúna kini borexxa gaana elha riseꞌiki ge Tata Do Yebáha kini aníha nna uxíbie elha xen lasi ge ka tulha geriꞌi. Aníha nuha nna rulaꞌa deki gwa rakanie geriꞌi.
\p
\v 11 Betsi to kia, ki Tata Do Yebáha aníha‑li ukanie geriꞌi, anágaba riꞌi teeki akin ge luesiriꞌi.
\v 12 Tata Do Yebáha, ni tsa lanú chi bilenna benneha. Ttaka ganna riꞌi rakin ge luesi ttu tturiꞌi, nu rakin ge luesiriꞌiha runna liina deki lee nuha doe lenriꞌi nna elha siꞌi lasi geeha nuha, gwalíga chi dona lheꞌe lastoriꞌi.
\p
\v 13 Labie de chi betebie Espíritu geeha lenriꞌi, de nuha nna chi yuriꞌi deki gwa duba lenriꞌe nna labie nna gwa dúgabe lenriꞌi.
\v 14 Riꞌitu biyú lotu lhe rigixxiꞌatu deki Tataha udhelhe Xiꞌinieha kini odilábie ka benne seꞌe yiesi lo yu‑ni.
\v 15 Nuxaba benne ganna okinni ikie deki Jesús‑ni anke Xiꞌin Tata Do Yebáha, benneha nuha gwa due len Tata Do Yebáha, Tata Do Yebáha nna gwa dúgabe lenie.
\p
\v 16 Riꞌi chi yuriꞌi lhe ria leriꞌi deki Tata Do Yebáha rakanie geriꞌi. Benneha anke benne siꞌi lasi, laxkala benne gwa rakanie ge adí ka benne, benneha nuha gwa du lenie Tata Do Yebáha nna Tata Do Yebáha nna gwa dúgabe lenie.
\v 17 Aníha nuha nna ruleꞌe deki gwalíga chi bisinriꞌi rakinriꞌi ge ka benne, kini anáchu nna xen su lasiba dhu leriꞌi, abittu gasinriꞌi ganna chi bisia sá eso duriꞌi arlo Tata Do Yebáha ki aka elhuxtisi geriꞌi, kumu riꞌi seꞌeriꞌi yiesi lo yu‑ni ruinriꞌi tti tteba ben Cristuha.
\v 18 Ttu benne ganna anke benne siꞌi lasi, benneha labí elha rasi tee gebie, kumu ttu benne gwalíga chi bisine anke benne siꞌi lasi, elha siꞌi lasi rapeha riguabana elha rasi gebie. Kumu ttu benne ganna rape elha rasi, rasibanie kumu yube elha disaba ralhe dhie ge nu runieha. Laxkala ganna ttu benne tee elha rasi gebie, benneha labí gwalíga chi bisine ki ake benne siꞌi lasi.
\p
\v 19 Riꞌi rakinriꞌi ge Tata Do Yebáha kumu lee ukanie geriꞌi ladeꞌa tte.
\v 20 Ganna nuxa ttu benne innábie: “Neti gwa rakabati ge Tata Do Yebáha”, ttaka ganna sa ritisibanie attu benne, laꞌania nna ruinba le benneha. Kumu, ¿gasina akanie ge Tata Do Yebaa benne abí rilánieha, ki benne du kweꞌeha gwa rilálanie benneha nna a rakanie gebie?
\v 21 Kumu Cristuha ree: “Benne akanie ge Tata Do Yebáha, akagabanie ge attu betsi to geriꞌi.” Nuní tisa bodhaꞌane lenriꞌi kini uinriꞌi nu rana.
\c 5
\s Uxxen leriꞌi ge Jesucristuha kini abittu uinriꞌi nu satsa
\p
\v 1 Iyába ka benne ganna ria leke deki Jesús‑ni anke Cristu, ka benneha nuha gwankake xiꞌin Tata Do Yebáha nna iyába ka benne rakakanie ge Tataha, rakagabakanie ge ka benne chi ankake xiꞌin Tataha.
\v 2 Ganna rakinriꞌi ge Tata Do Yebáha lhe ganna gwa rudobariꞌi tisa ge nu chi bodhaꞌane uinriꞌi, laꞌania nna chi yuriꞌi deki gwa rakagabinriꞌi ge ka xiꞌinieha.
\v 3 Kumu ganna gwa rudobariꞌi tisa ge nu benie mandadu uinriꞌiha, ganna gwa ruinbariꞌi nuha, laꞌania nna nuha runna liina deki gwa rakabinriꞌi gebie nna nu rabie uinriꞌiha, labí disa uleꞌenriꞌi ganna chi uinriꞌi nuha.
\v 4 Kumu iyába ka benne chi anka xiꞌin Tata Do Yebáha chiba udaa ka benneha useꞌe tsitsike, abittu rixú yieke uinke nu satsa raka yiesi lo yu‑ni. Kumu riꞌi, de ruxxen leriꞌi ge Cristuha, de nuha nna gwa ridaabariꞌi abittu ruinriꞌi nu satsa raka yiesi lo yu‑ni.
\v 5 Nianna, ¿núla nuha gwa ridaana abittu ruinna nu satsa raka yiesi lo yu‑ni ganna? ¿Laaba ganna benne ria lebie deki Jesús‑ni anke Xiꞌin Tata Do Yebáha? Benneha nuha gwa ridaabie abittu runie nu satsa.
\s Espíritu ge Tata Do Yebáha rigixxiꞌabie nuxa anka Jesús‑ni
\p
\v 6 Jesucristuha nuha bisiabie yiesi lo yu‑ni nna len inda udieha lhe len reni belalie tti uttieha, len nuha beleꞌe nuxa anke. Labí suna len inda udieha, sinuki len indaha lhe len reniha beleꞌe nuxa anke. Espíritu ge Tata Do Yebáha rigixxiꞌe nuní, kumu benneha rinnebie nu anka gwalí.
\v 7 Tsunna loo ka benne runna liike nuxa anka Cristuha,\f + \fr 5:7 \ft Lo yetsi‑ni dia ra: “Tsunna loo ka benne runna liike nuxa anka Cristuha”, lo attu yetsi nna ra: “Tsunna ka benne seꞌe yebáha rigixxiꞌake nuxa anka Cristuha; delába Tataha lhe Tisaha lhe Espírituha lhe”. \f*
\v 8 delába Espírituha lhe indaha lhe reniha lhe. Iyunnaba ka benne‑ni ttúba rigixxiꞌake ge Cristuha.\f + \fr 5:8 \ft Lo yetsi‑ni dia ra: “Delába Espírituha lhe indaha lhe reniha lhe. Iyunnaba ka benne‑ni ttuba rigixxiꞌake ge Cristuha”, lo attu yetsi nna ra: “Tsunna ka benne seꞌe yebáha rigixxiꞌake nuxa anka Cristuha, delába Espírituha lhe indaha lhe reniha lhe. Iyunnabake ttúba rigixxiꞌake gebie”.\f*
\v 9 Gwalinnáruga, ki nu rigixxiꞌa ka benne seꞌe yiesi lo yu‑ni gwa rudo nagariꞌi geni, adírula nu utixxiꞌa Tata Do Yebáha dakarula nuha kumu utixxiꞌe ge Xiꞌinieha.
\v 10 Laxkala benne gwa ria lebie ge Xiꞌinieha, benneha gwa yue deki nu utixxiꞌa Tata Do Yebáha ge Xiꞌinieha nu gwalíba anka nuha nna nu abíba ria leni ge nu ra Tata Do Yebáha, nuha nna rálana deki Tata Do Yebáha ruinba le benneha kumu de labí ria leni ge nu utixxiꞌe ge Xiꞌinieha.
\v 11 Tisa‑ni nuní utixxiꞌe, delába utixxiꞌe unie ki aka benriꞌi ttu dia lii nna elha nabani gatta geriꞌiha, Xiꞌinieha‑ba utebie nuha geriꞌi.
\v 12 Ganna riꞌi du lenriꞌi Xiꞌin Tata Do Yebáha, laꞌania nna gwa teeba elha nabani geriꞌi ttu dia lii nna ganna riꞌi abíba du lenriꞌi Xiꞌin Tata Do Yebáha, laꞌania nna labí gatta elha nabani geriꞌi ttu dia lii.
\s Ka nuní ankakana ka tisa daluxa rinne Juan‑ni
\p
\v 13 Iyá nuní benia lo yetsi‑ni nna ridhelhaa na gele, lebiꞌi ka benne chi ria lele ge Xiꞌin Tata Do Yebáha, kini anáchu nna yule deki gwa tee elha nabani gele ttu dia lii.
\v 14 Riꞌi ruxxen leriꞌi ge Tata Do Yebáha, kumu gwa yúbariꞌi ttixka rinnabariꞌi lenie atti ttega ruꞌu lebie, labie nna gwa riyienbanie geriꞌi.
\v 15 Kumu de chi yuriꞌi deki gwa rudoba nage geriꞌi ttixka bixa rinnabariꞌi lenie, anágaba nna chigaba yuriꞌi deki nu unnabariꞌiha chiba anka nuha geriꞌi.
\p
\v 16 Ganna ttu benne rilánie ttu betsi to geriꞌi rekina ruinna ttu bixa tulha, ganna ruinna tulha nu abittu kilana elhutti geni arlo Tata Do Yebáha, benne ilánie tulha ruinnaha, benneha teeki innabe geni len Tata Do Yebáha. Tata Do Yebáha nna gwinbe ki aka benna ttu dia lii. Rinnea ge ka nu ruinkana tulha, delába tulha nu abittu rigilana elhutti ge ka benne, kumu seꞌe ka tulha ka nu rigilakana elhutti ge ka benne. Labí ria deki ge ka nu ruinkana luesi tulha‑ni innabale len Tata Do Yebáha.
\v 17 Iyába nu satsa ruinriꞌi, tulhaba anka nuha, ttaka seꞌe ka tulha ka nu labí rigilakana elhutti geriꞌi.
\p
\v 18 Gwa yúbariꞌi deki iyába ka benne, delába ka benne chi ankake xiꞌin Tata Do Yebáha, labíru rudona leke uinke tulha, kumu Jesús benne anka Xiꞌin Tata Do Yebáha, labie ruyú tsitsie ke kini abittu ridí yie nu xxegwiha ke.
\v 19 Anágaba chigaba yuriꞌi deki riꞌi chi ankariꞌi ge Tata Do Yebáha nna iyába ka benne seꞌe yiesi lo yu‑ni ka nu labí chi ankakana gebie, nu ra nu xxegwiha‑ba ruinkana,
\v 20 lhe gwa yúgabariꞌi deki Xiꞌin Tata Do Yebáha bisiabie yiesi lo yu‑ni nna udhalie ikiriꞌi kini uinbiariꞌi benne gwalíga anka Diosiha. Nnanna chi seꞌeriꞌi len benneha de du lenriꞌi Xiꞌinie Jesucristuha. Tata Do Yebáha nuha anke gwalíga Diosi lhe anke benne rutebie elha nabani geriꞌi ttu dia lii lhe.
\p
\v 21 Xiꞌini to kia, gwaluyú gele, bittu tsia lele ge ka nu labí gwalíga ankakana diosi.