\id JUD
\h Judas
\mt Yetsi‑ni ben Judas
\c 1
\p
\v 1 Neti Judas betsi Jacobo, neti ankaa benne rixúni Jesucristuha. Ridhelhaa yetsi‑ni gele, lebiꞌi ka benne chi uxi Xxudiriꞌi do yebáha le lo neda geeha lhe rakanie gele lhe. Anágaba Jesucristuha ruyúgabe le lhe.
\v 2 Lake satuaru leke le lhe akarukanie gele lhe anágaba useꞌeruke le xen su lasi lhe.
\s Bittu tsia lele ge ka nu utaꞌakana lagwi gele
\p
\v 3 Betsi to kia, neti yalhá re lasia unia ttu yetsi ata kixxiꞌania le gasina bodilaa Tata Do Yebáha iyá tteriꞌi. Ttaka nnanna rido doelhaa ridhelhaa yetsi‑ni rulisaa le ria: “Gwaluin doelha kini abittu nnitti ka tisa ka nu chi ria leriꞌi, delába ka tisa ka nu riguꞌu niꞌakani. Ka tisaha nuní ttu tsaba chi bodhaꞌan Tata Do Yebáha ke lenriꞌi, delába riꞌi ka benne chi ankariꞌi gebie.”
\v 4 Ria aní kumu lagwi gele sii siiba chi utaꞌa ttu chupa ka nu labí rugwekana lidhaka Tata Do Yebáha. Ka nuná nu reha‑li chi gaꞌanna deki ibixxi iginnibakana kumu de ruinkana nu satsa rakaba lekani ruinkana. Rigittabakana len nu tse redá le Tata Do Yebáha runie lhe anágaba riguꞌugaba niꞌakani Jesucristu benne anke ttu túbiru Xxanariꞌiha.
\p
\v 5 Neti raka lasia odhúa lele, meskiba lebiꞌi chi yule deki Tata Do Yebáha, iki de chi bebeabie ka nu Israel‑ni lo yu ge Egipto‑ni, nianna tti betseꞌe loobie ka nu abittu ugía lekani gebie laꞌania.
\v 6 Aníha‑gaba gwate ka anjeli ka nu abittu begwekana lidhaka ladikani nu begwe Tata Do Yebáha kana, bedhála ikikani ata seꞌekanaha. De nuha nna bedheabie kana ttu dia lii lheꞌe lisiyya ata anka chulhaha. Niha‑ba tua tsekana axtaliba ganna chi bisia sá aka elhuxtisi ge ka benne seꞌe yiesi lo yu‑ni.
\v 7 Aníha‑gaba nuha gwate ka benne useꞌe lheꞌe ka yiesi Sodoma lhe Gomorra lhe, anágaba lheꞌe adíru ka yiesi seꞌe gaxxaba ka niha lhe. Ka benneha uduloke bisáke nu subi subi lhe benke adíru nu satsa nu abittu dika uin ka benne. De nuha nna biyúke elha disa ugíake lo gi, delába nu satíaba rite loniha. Nu gwate ka benneha bixúna kini ilenriꞌi nna abittu uinriꞌi luesi nu ben ka benneha.
\p
\v 8 Anágaba ruin ka nu utaꞌakana sii siiba lagwi geleha. Bitti bittiba rákana, ttiba ttu nu ritsiani ela, aníha‑ba ankakana. Runnittiba latikani len nu satsa ruinkanaha lhe labí ridielhakana innabia Tata Do Yebáha kana lhe anágaba rigegabakana iki ka nu ra xxeni lekani seꞌe yebáha lhe.
\v 9 Kinila Miguel benne anke nu loni ge adí ka anjeli seꞌe yebáha, kinila benneha, tti bitilha lenie nu xxegwiha kini nuxake eyaꞌan lenke bela lati Moisés‑ni, nila benneha labí beyaxanie kebie iki nu xxegwiha; sunruba rabie na: “Tata Do Yebáha kise lu.”
\v 10 Ttaka ka nu utaꞌa sii siibaha, ge iyába nu abittu rite dákinna rinne satsakana geni. Ttaka nu ttu latti chi rite dákinnaha, sunruba rixú nuha kini runnittina kana. Ruinbakana ttiba ruin ttu nimala nu akaa elha rieni ikini. Nuha suna nu rannibin latini ruinna.
\p
\v 11 ¡Karusiꞌirukana! Ruinbakana attiba ben Caín‑ni lhe anágaba kumu de raka lekani dhíkana belhiu, de nuha nna ruinkana nu abittu anka tse ttiba ben Balaam‑ni, lhe anágaba kumu de reseꞌe disakana, de nuha nna gattibakana ttiba gwate Coré‑ni. Nuha‑ruga useꞌe loobana de bedú disana lo Tata Do Yebáha.
\p
\v 12 Ka nuná elhittula rutekana ata ritupale ttixka tee ttu elha go gele; robakana attiba rakaba lekani. Ka nuná sun gebakani ruchacha ikikani. Ankabakana ttiba ttu bea abittu iyya chena, naa lhe niiba riche beha na, lhe anágaba ankagabakana ttiba ttu yaga nu abittu rute nu xixxi attiga anka geni. Yagaha lanila ituana itupa lhu‑ni chila ubisina.
\v 13 Anágaba lhe ankagabakana attiba kuchina tsiga nu retelhekina roꞌo indatooha tti radha loni, aníha‑ba anka nu satsa ruinkana, lhe anágaba ttiba ka beli ka nu ridá, ka nu labí siakana ttu sadeꞌe, aníha‑ba anka ka nuná. Naa lhe niiba rekikana, ttu dia liiba rekikana ata anka chulha.
\p
\v 14 Ge ka nunígaba nuha ugwettini Enoc‑ni unnebie, delába Enoc benne uli gasi libixxi iki de Adán‑ni. Benneha unnebie ree: “Gwalulanniruga, nii chi daa Tata Xisiha len ixe miliru ka anjeli gebie,
\v 15 kini unie elhuxtisi ge iyába ka benne nna ukinnie ka nu labí rugwekana lidhake, ugwebie kana elha disa ge iyába nu satsa benkana lhe ge iyába nu unnekana tti utuakana balaꞌana geeha lhe.”
\v 16 Aníha‑ba ka nuná rinne lhákana lhe riguakana balaꞌana ge ka benne lhe, ruinbakana nu rakaba lekani lhe rinnegabakana rákana deki yalhaba raka gekani, lhe anágaba ankagabakana ka nu roꞌo lheꞌe, ukadiba rinne tsekana ge ka benne. Aní ruinkana kini dhíkana nu rulha lekani dhíkana.
\s Bittu udhanle a tsia lele ge Tata Do Yebáha
\p
\v 17 Ttaka lebiꞌi xa betsi to kia, gwalodhú lele ge nu chi utixxiꞌa ka apóstol ge Jesucristu benne anke Xxanariꞌiha.
\v 18 Ka benneha ráke: “Ganna chi isia sá daluxaha, laꞌania tseꞌe ka nu uxisilakana ge Tata Do Yebáha lhe ge ka benne chi ria leke bie lhe, uingabakana nu satsa retaba lekani lhe.”
\v 19 Ka nuha uttilhabakana ka benne lhe ilhaꞌabakana lheꞌe luesike lhe. Suna nu anka ge yiesi lo yu‑niba udo ikikani, kumu de labí do Espíritu ge Tata Do Yebáha lheꞌe lastokani.
\p
\v 20 Ttaka lebiꞌi xa betsi to, gwaltsia tsitsiru lele ge nu chi ria lele ge Tata Do Yebáha. Tti innele lenie, Espíritu geeha kixxiꞌanie le bixa dika innále.
\v 21 Satía gwaluxxen lele deki gwa rakabin Tata Do Yebáha gele lhe gwaltseꞌe ubeda ganna chi isia sá ute Jesucristu benne anke Xxanariꞌiha elha nabani ttu dia lii gele; utebie na gele de ratua lebie le.
\p
\v 22 Gwalikweki tsitsi le ka nu rudú chupana lekani,
\v 23 adíkana nna gwalodilaa kana kini abittu tsiakana lo giha, adíkana nna satua lele kana, sun tteba nna gwaluyú gele niru latti abittu uinle nu satsa ruinkana, gannala gwaxka axtala ka xokani ka nu rukukana abittu kanle.
\s Xxeniba ra le Tata Do Yebáha
\p
\v 24 Tata Do Yebaa benne ra tsitsi leha, benneha uyúbie le kini abittu iginnile uinle tulha nna ittaba du lele tti otso dubie le arloe abittu tsiga ankale.
\v 25 Labie anke ttu túbiru Diosi lhe bodilábie riꞌi de nu ben Jesucristu benne anke Xxanariꞌiha. Lee ra xxeni lebie lhe rinnabie attili lani kwe yiesi lo yu‑ni, lhe anágaba rinnabiagabe nnanna lhe innabiagabe ttu dia lii lhe. Amén.