\id REV
\h Apocalipsis
\mt Ka tisa‑ni rigixxiꞌakana ge nu chi tte dabigana aka
\c 1
\p
\v 1 Lo yetsi‑ni dia nu ben Tata Do Yebáha kini Jesucristuha belaꞌanie nu chi tte dabiga aka. Jesucristuha nna bedonie kini ka benne rixúke lo sina geeha bodolaꞌagabakanie nu chi dabiga akaha nna udhelhe anjeli geeha len neti Juan benne rixúa lo sina geeha kini anjeliha nna benie kini belaꞌati iyá nuní.
\v 2 Neti nna rigixxiꞌabaa ge iyába nu belaꞌati; delába nu utixxiꞌen Jesucristuha neti lhe nu unne Tata Do Yebáha lhe.
\p
\v 3 Karubáru ka benne ulabake ka tisa dia lo yetsi‑ni, delába ka tisa ka nu chila rigixxiꞌakana ge nu chi dabiga aka lhe karubáru ka benne gudo nagake ge ka tisa‑ni lhe uinke nu rákana lhe, kumu chi tteba dabigana aka nu ra ka tisa‑ni.
\s Juan‑ni ridhelhe yetsi‑ni len gasi dhi ka benne // chi ria leke Jesucristuha
\p
\v 4-5 Neti Juan ridhelhaa yetsi‑ni len lebiꞌi, ka benne ankale gasi dhi seꞌele daka Asia‑na. Lebiꞌi nuná chi ria lele Jesucristuha.
\p Tata Do Yebáha doe ttuha‑li lhe doe nnanna lhe dhoe nu si daa lhe. Benneha lenie gasi ka espíritu, ka benne seꞌeke arlo ata du xxila doe rinnabieha lhe anágaba Jesucristuha lhe, ka benne‑ni nuní edá leke aka lenke le lhe useꞌeke le xen su lasi lhe. Jesucristuha anke benne rigixxiꞌe nu dika tsia leriꞌi lhe anke benne sisiꞌa tte beyadhe lagwi ge ka benne chi uttiha, lhe anágaba anke xxeniru arlo ka nu rinnabia seꞌe yiesi lo yu‑ni. Benneha rakanie geriꞌi lhe len reni geeha bodilábie riꞌi lo ka tulha ruinriꞌi.
\v 6 Jesucristuha benie kini akariꞌi ka nu innabia, lhe anágaba ki akariꞌi ka bixxudi kini ixúriꞌi len Tata Do Yebáha, delába benne anke Tata geeha. Benneha inná xxeni lebie lhe inná tsitsi lebie ttu dia lii. Amén.
\q
\v 7 ¡Cristuha dedábie lheꞌe beaha!
\q Iyá xeaba ka benne ilákanie bie.
\q Anágaba ka nu bettikaneha ilágabakinne
\q nna iyába ka benne seꞌe yiesi lo yu‑ni
\q kwesike de elenkanie gebie.
\q Aníha teeki aka. Amén.
\p
\v 8 Tata Do Yebaa benne anke Xxanariꞌiha lhe ra tsitsi xxatta lebie lhe, benneha ree: “Neti ankaa benne riduloa lhe ankaa benne rulhuxa looa lhe. Neti doa ttuha‑li lhe doa nnanna lhe dhoa nu si daa lhe.”
\s Juan‑ni belaꞌanie Cristuha, belaꞌanie benneha // lheꞌe ttiba ttu ela
\p
\v 9 Neti Juan, ankaa betsi to gele. Neti de ria lasia Jesús‑ni, de nuha nna neti lhe lebiꞌi lhe turoꞌoba rutto ruchíariꞌi elha disa lhe anágaba turoꞌogaba ribedariꞌi isia sá tti innabia Tata Do Yebáha. Neti doa lo yu tee láni Patmos, nuní rena lagwi indatoo‑ni. Niba doa uleakana neti de rekia ugixxiꞌa ka tisa ge Tata Do Yebáha lhe de rigixxiꞌaya ge nu ben Jesucristuha lhe.
\v 10 Tti bedú niꞌa xumanuha, tti anka sá ge Tata Xisiha, laꞌania bisia Espíritu ge Tata Do Yebáha latia. Tti chi yuꞌu benneha latia nna biyienti tsiꞌi ttu benne daka kweꞌa unnebie idisa ttiba riyieni idisa ge ttu trompeta.
\v 11 Benne unneeha, ree:
\p ―[Neti ankaa benne riduloa lhe ankaa benne rulhuxa looa lhe.] Nnanna ben lo yetsi iyá nu rilenlu‑ni nna udhelha na len gasi dhi ka benne chi ria leke Jesucristuha seꞌe lheꞌe ka yiesi seꞌe daka Asia‑na, delába ka benne seꞌe lheꞌesi Éfeso lhe ka benne seꞌe lheꞌesi Esmirna lhe anágaba ka benne seꞌe lheꞌesi Pérgamo lhe Tiatira lhe Sardis lhe anágaba ka benne seꞌe lheꞌesi Filadelfia lhe Laodicea lhe.
\p
\v 12 Neti tti bodeki loa kini iláti nú benne nuha rinnebie len neti, nianna tti belaꞌati gasi ka candeleru ge oru ralha gi lokani.
\v 13 Lagwi ge ka candeleruha belaꞌati ttu benne ruleꞌebie attiba rulaꞌa benne daa yebáha, nukue ttu xalho risinna axtaba yien niꞌe nna xika roꞌo lastoe ttu yieti ankana ge oru.
\v 14 Itsa ikieha nna sitsi túba ankana, ankana ttiba itsa xo ttu neru sitsi lhe ankana sitsi ttiba begi. Ka iyya loeha nna xiná túba ankakana ttiba anka belha ge gi.
\v 15 Ka niꞌeha nna raka lhalhabakana attiba raka lhalha iyya nu tee láni bronce tti reriana lheꞌe ornu. Tsiꞌibie nna riyienna attiba riyieni tti riginni idila inda lo ttu benunni.
\v 16 Daka ná benbie nna denie gasi ka beli, roꞌobie nna riria ttu espada tutsa gwi nna lo kweꞌeba espadaha ria. Lobie nna raka lhalhaba attiba raka lo tatubisa‑na tti do dia lobie.
\p
\v 17 Atti belaꞌati benneha, bere tteba loa arloe, ttiba ttu nu yatti ukaa. Labie nna uxxua ná banie ikia nna ree:
\p ―Bittu gasinlu, kumu neti ankaa benne doa sisiꞌa tteha lhe ankaa benne doa ttu dia lii lhe,
\v 18 anka bania nnanna lhe. Uttibaa, ttaka nnanna ttu dia liiba doa anka bania. Netiba denia yagwi ge elhuttiha lhe yagwi ge belhaꞌa chulhaha lhe.
\v 19 Ben lo yetsi‑na nu chi bilenlu uka lhe nu rilenlu raka nnanna lhe nu si ilenlu aka nu si daa lhe.
\v 20 Aní diani gasi ka beli den ná bania‑ni lhe aní diani gasi ka candeleru ge oru‑ni lhe. Gasi ka beli‑ni ankakana gasi ka anjeli ruyúkana gasi dhi ka benne ria leke neti nna gasi ka candeleru ge oru‑ni nna ankakana ka benne chi ria leke neti selake lheꞌe gasi dhi ka benneha.
\c 2
\s Yetsi‑ni udhelha Juan‑ni len ka benne chi ria leke Jesús‑ni seꞌeke lheꞌesi Éfeso
\p
\v 1 ’Ben yetsi‑ni nna udhelha na ge anjeli ruyúe ka benne chi ria leke neti seꞌeke lheꞌesi Éfeso. Usi ke: “Aní ra Jesús benne den ná banie gasi ka beliha lhe rekie lagwi ge gasi ka candeleru ge oruha:
\v 2 Neti chiba yua iyá nu ruinle lhe yúgabaa yalhá tsitsi ribenle lo sina ge Tata Do Yebáha lhe anágaba gwa ruchíagabale lo nu ratele. Yúgabaa labí raka uyúle ka nu ruin satsa lhe anágaba nna chigaba uluꞌule prueba ka nu rákana deki ankakana apóstol ge Tata Do Yebáha, ttaka delola nna tti ute denle deki labí liikinna, ruinba lekani.
\v 3 Lebiꞌi yalhá chi bechíale lhe yalhá chi gwatele de ria lele neti, labí bedhanle a ugía lele neti.
\v 4 Ttaka ttu nu labí ruꞌu lasia ruinle: labíru rakinle kia atti ukinle kia sisiꞌa tte tti udulole ugía lele kiaha.
\v 5 Gwalodhúruga lele gáli seꞌele ttuha, nnanna nna naali nuná chi ubinnile de labíru rakinle kia tti ukinle kia laꞌania. Gwalodúna le ge nu ruinle‑na nna gwaleyoin tti benle sisiꞌa tteha, kini ka itaa etettuaya candeleru gele‑na ata dona‑na, ganna lebiꞌi abíba odúna le.
\v 6 Ttaka ttu nu gwa ruꞌu lasia ruinle: lebiꞌi labí ruꞌu lele nu ruin ka nu tee lákani nicolaita. Neti labígaba ruꞌu lasia nu ruin ka nuná.
\v 7 Nu gwa sia nagani, udo nagani ge nu rigixxiꞌani Espírituha ka benne ria leke neti nna benne dhaabie dhu tsitsie lo neda kia, benneha nuha gugoa bie nu xixxi ge yaga nu rute elha nabani ge ka benne ttu dia lii; delába yaga nu du ata chi gaꞌanani Tata Do Yebáha tseꞌe tse ka benne.”
\s Yetsi‑ni udhelha Juan‑ni len ka benne chi ria leke Jesús‑ni seꞌeke lheꞌesi Esmirna
\p
\v 8 ’Bengaba yetsi‑ni nna udhelha na ge anjeli ruyúe ka benne chi ria leke neti seꞌeke lheꞌesi Esmirna. Usi ke: “Aní ra Jesús benne do sisiꞌa tteha lhe benne do ttu dia liiha lhe; delába benne uttieha, nianna beyaka benbe attu libe:
\v 9 Neti gwa yubaa elha disa ratele‑na lhe gwa yúgabaa deki ankale benne dii, ttaka arlo Tata Do Yebáha ankalale benne tee gele. Lhe gwa yúgabaa deki ka nu rákana: Ankatu nu Israel, ka nuná yalhá satsa rinnekana gele. Lakana rákana deki ankakana ka nu chi bekwe Tata Do Yebáha, ttaka labí liikinna. Ka nuná ankalakana ge nu xxegwiha, delába nu tee láni Satanás.
\v 10 Bittu gasinle ge nu satele, kumu nu xxegwiha ugaꞌabana ttu chupale lisiyya kini kuꞌuna le prueba nna teeki satele elha disa delo tsii ubisa. Tsitsi gwaltseꞌe meskiba uttikana le, neti nna gwinbaa ki aka benle ttu dia lii. Elha nabani utea geleha ankana attiba ttu corona dhile.
\v 11 Nu gwa sia nagani, udo nagani ge nu rigixxiꞌani Espírituha ka benne chi ria leke neti. Benne dhaabie dhu tsitsie lo neda kia, benneha labí uyúe elhutti nu berupaha.”
\s Yetsi‑ni udhelha Juan‑ni len ka benne chi ria leke Jesús‑ni seꞌeke lheꞌesi Pérgamo
\p
\v 12 ’Bengaba yetsi‑ni nna udhelha na ge anjeli ruyúe ka benne chi ria leke neti seꞌeke lheꞌesi Pérgamo. Usi ke: “Aní ra Jesús benne denie espada tutsa gwiha, espada nu ria lo kweꞌeniha:
\v 13 Neti gwa yubaa gaxa nuná seꞌele. Lebiꞌi seꞌele ata du xxila rido nu xxegwiha rinnabiana, delába nu tee láni Satanás. Ttaka meskiba seꞌele naa, lebiꞌi gwa seꞌebale len neti. Labí rudhanle a ria lele neti, meskiba bettikana Antipas‑ni lagwi gele, delába bettikana na ata rinnabia nu xxegwiha. Antipas‑ni nuha bedona lebie utixxiꞌabie kia.
\v 14 Ttaka seꞌe ttu chupa nu abittu ruꞌu lasia ruinle. Lebiꞌi sa rugwelhabale sela lenle ttu chupa ka nu rudokana tisa ge nu beleꞌe Balaam‑ni. Balaam‑ni uluꞌu tisana Balac‑ni. Balac‑ni nna benna kini ka nu Israel‑ni binittikana benkana tulha de utokana bela ge ka nimala ruttikana ki rutekana úna lo bekú ge ka nu labí gwalíga ankakana diosi lhe anágaba uxí yiena kana kini bisákana nu subi subi.
\v 15 Anágaba ka nu ria lekani ge nu rulaꞌa ka nu tee lákani nicolaita, lebiꞌi rugwelhagabale selakana len lebiꞌi.
\v 16 De nuha nna gwalodúna le ge nu ruinle‑na nna gwaleyeki len Tata Do Yebáha. Ganna abíba eyekile len benneha, laꞌania nna neti ita ttebaa ata seꞌele‑na ki ttilha lania ka nicolaita‑na len espada riria roꞌa‑ni.
\v 17 Nu gwa sia nagani, udo nagani ge nu rigixxiꞌani Espírituha ka benne ria leke neti nna benne dhaabie dhu tsitsie lo neda kia, neti nna gugobaa benneha elho nu tee láni maná, delába nu teeti gatsiha lhe ugwegabe ttu íyya sitsi nu dia ttu lá kubi loni. Lanú nu yuna bixa dia lo íyyaha, sunruba benne dhie nuha gwa yubie bixa dia loni.”
\s Yetsi‑ni udhelha Juan‑ni len ka benne chi ria leke Jesús‑ni seꞌeke lheꞌesi Tiatira
\p
\v 18 ’Bengaba yetsi‑ni nna udhelha na ge anjeli ruyúe ka benne chi ria leke neti seꞌeke lheꞌesi Tiatira. Usi ke: “Aní ra Xiꞌin Tata Do Yebaa benne anka ka iyya loeha xiná tú attiba belha ge gi, ka niꞌeha nna raka lhalhabakana attiba raka lhalha iyya nu tee láni bronce:
\v 19 Neti gwa yubaa iyá nu ruinle lhe gwa yúgabaa deki ankale benne siꞌi lasi lhe gwa ankabale benne gwa ria tsitsi lele neti lhe anágaba gwa ruteba nále len ka benne lhe gwa ruchíabale lo nu ratele lhe. Yúgabaa deki tseru ruinle nnanna atti sisiꞌa tteha.
\v 20 Ttaka ttu nu labí ruꞌu lasia ruinle: lebiꞌi rugwelhabale sela lenle nuila nu tee láni Jezabel nu rana deki ankana profeta ge Tata Do Yebáha. Ttaka len nu ruleꞌenaha runnittilana ka benne rixúke lo sina kia, ridí yiena ke ki risáke nu subi subi lhe ridí yiegabana ke ki roke bela ge ka nimala rutti ka benne ruteke úna lo bekú ge ka nu labí gwalíga ankakana diosi.
\v 21 Neti chiba begwea na lo neda kini odúna na ge nu ruinna‑na nna odaxxuna neda ge Tata Do Yebáha, ttaka lana nna labí uka leni udhanna nu risána nu subi subi.
\v 22 De nuha nna neti unia kini tsuꞌuna lo taꞌa nna ka nu bisá naha nna ugwegabaa kana ttu elha disa tsitsi ganna abíba udhankana nu ruinkanaha.
\v 23 Ka xiꞌin Jezabel‑ni, delába ka nu rudokana tisa geni, ka nuná uttibaa kana. Aníha kini iyá ka benne chi ria leke neti tte dákanie deki neti ankaa ttu benne rite dati gasina rulaba le ka benne lhe bí ruꞌu leke lhe. Lebiꞌi nna kua ttu ttule utea nu ralhale dhile ge nu benle.
\v 24 Adíle ka benne seꞌele lheꞌesi Tiatira, lebiꞌi ka nu abittu rudole tisa ge nu ruleꞌe Jezabel‑ni, delába nu rákana deki ankana elha rieni ge nu xxegwiha, lebiꞌi labí bixa rinnabaa uinle:
\v 25 sun tteba nna gwaltseꞌe tsitsi lo neda kia attiba diale ruinle‑na, anágaba gwaluni axtaliba ganna chi besiayaha.
\v 26 Nu dhaana dhu tsitsina lo neda kia lhe udona tisa kia axtaliba ganna chi uluxaha, nuha gugwebaa na lo neda ki innabiana iyá ka benne seꞌe lheꞌe ka yiesi seꞌe yiesi lo yu‑ni,
\v 27 innabia tsitsina ke nna uduyana ke attiba riyuya ka yedhu yu.
\v 28 Ugwea na lo neda ki innabiana attigaba neti bete Tata kia lo neda len neti ki innabiaya lhe anágaba nna ugwegabaa na beli riria chi daa tsanina.
\v 29 Nu gwa sia nagani, udo nagani ge nu rigixxiꞌani Espírituha ka benne ria leke neti.”
\c 3
\s Yetsi‑ni udhelha Juan‑ni len ka benne chi ria leke Jesús‑ni seꞌeke lheꞌesi Sardis
\p
\v 1 ’Bengaba yetsi‑ni nna udhelha na ge anjeli ruyúe ka benne chi ria leke neti seꞌeke lheꞌesi Sardis. Usi ke: “Aní ra Jesús benne denie gasi ka beliha lhe bananie gasi ka espíritu rixú lo sina ge Tata Do Yebáha lhe, benneha ree: Neti gwa yubaa nu ruinle. Ka benne ráke deki lebiꞌi anka benbale, ttaka len neti ttiba ttu nu yatti ankale.
\v 2 Gwalebani nna gwaleseꞌe tsitsi. Nu tse ruinleha nu chi diale rudhanleha, gweledulo gwaleyoin na latsiru, kumu neti chiba biláti nu ruinle, labí ruinle atti ttega ruꞌu le Tata Do Yebáha.
\v 3 Gwalodhú lele ge nu chi biyieninle lhe ge nu chi ugía lele lhe. Gwalodo tisa ge ka nuní lhe gwalodúna le ge nu ruinle‑na nna gwaleyeki lo neda ge Tata Do Yebáha. Ganna abíba seꞌe tennále, laꞌania nna iyyaba lele isiaya gele attiba ttu ubana labí yule nukaxa isiana.
\v 4 Ttaka lheꞌesi Sardis‑na gwa seꞌeruba attu chupa ka benne labí chi bitsigake uinke nu satsa. Ka benne‑na nuná gwetenalhake neti ukuke xo sitsi, kumu lake nuná gwa ralhake tsekike len neti.
\v 5 Ka nu dhaakana tseꞌe tsitsikana lo neda kia, ka nuha gugukugabaa kana xo sitsi nna labí oxía lákani lo libru ata dia lá ka benne aka benke ttu dia lii arlo Tata kiaha. Anágaba neti, arlo Tata kiaha lhe arlo ka anjeli geeha lhe gwadígaba roꞌa deki gwa ankabiabati kana.
\v 6 Nu gwa sia nagani, udo nagani ge nu rigixxiꞌani Espírituha ka benne ria leke neti.”
\s Yetsi‑ni udhelha Juan‑ni len ka benne chi ria leke Jesús‑ni seꞌeke lheꞌesi Filadelfia
\p
\v 7 ’Bengaba yetsi‑ni nna udhelha na ge anjeli ruyúe ka benne chi ria leke neti seꞌeke lheꞌesi Filadelfia. Usi ke: “Aní ra Jesús benne gwalíga anke Cristuha lhe benne chi riesini Tata Do Yebáha kini ake gebie. Benneha denie yagwi ge David benne unnabiaha. Benneha tti ridhalie, lanú nu aka geni ottona, tti rodheabie nna lanú nu aka geni idhalina.
\v 8 Neti gwa yubaa iyá nu ruinle. Gwaluyúruga. Neti chi udhalia neda gele, lanú nu aka geni ichúna lole. Meskiba labí ixele raka, ttaka gwa bedobale tisa ge nu xpeya le lhe labí chi bedhanle a ria lele neti lhe.
\v 9 De nuha nna ka nu ankakana ge Satanás; delába nu xxegwiha, ka nuha rákana: ‘Riꞌitu ankatu nu Israel’, ttaka labí liikinna deki chi ankakana benne chi bekwe Tata Do Yebáha, ruinba lekani, ka nuná neti unia ki itakana udú xibikani arlole. Aníha kini tte dákinna deki gwa rakabati gele.
\v 10 Kumu gwa bedobale tisa kia tti xpeya le: Gwalutto gwaluchía, bittu udhanle neti, de nuha nna neti guyúbaa le tti isia sá uyú iyá ka benne seꞌe yiesi lo yu‑ni elha disa ganna chi kuꞌa ke prueba.
\v 11 Neti chi tte esiaya. Gwaltseꞌe tsitsi lo neda kia kini anuttu nu kuana nu ralhale dhile.
\v 12 Nu dhaana dhu tsitsina lo neda kia, neti nna gwinbaa kini akana ttiba ttu betubi ge yotu ge Tata Do Yebaa benne anke Diosi kiaha. Ttu tsaba labíru eriana lheꞌe yotuha lhe anágaba udelhagabaa lá Tata Diosi kiaha lheꞌe lastoni lhe lá yiesi geeha lhe, delába Jerusalén kubiha, yiesi nu iriana dana yebáha lhe anágaba neti udelhagabaa lá kubi kia lheꞌe lastoni.
\v 13 Nu gwa sia nagani, udo nagani ge nu rigixxiꞌani Espírituha ka benne ria leke neti.”
\s Yetsi‑ni udhelha Juan‑ni len ka benne chi ria leke Jesús‑ni seꞌeke lheꞌesi Laodicea
\p
\v 14 ’Bengaba yetsi‑ni nna udhelha na ge anjeli ruyúe ka benne chi ria leke neti seꞌeke lheꞌesi Laodicea. Usi ke: “Aní ra Jesús benne tee lábie Amén, benne rigixxiꞌabie ge Tata Do Yebáha attiba ankaba geni lhe rinnebie nu ankaba gwalí lhe, benne bengabe len Tata Do Yebáha iyá tte nu seꞌe yiesi lo yu‑ni lhe iyá tte ka nu sia yebáha lhe,
\v 15 benneha ree: Neti gwa yubaa nu ruinle. Yubaa labí ankale idilha, nigaba saꞌa tú, labí tuttíru chi bedhanle a ria lele neti lhe nigaba a riaru lele neti itú iki itú lele. ¡Kwadila tuttíru udhanle a tsiaru lele neti o kwadila itú iki itú lele tsia lele neti!
\v 16 Ttaka kumu yuꞌu ttu akába lele ria lele neti, de nuha nna ebeaba roꞌa le nna kuꞌunabaa le.
\v 17 Lebiꞌi rale: ‘Riꞌitu ankatu nu tee getu. Yalhá lheꞌe rariana riꞌitu; labí bi riyasintu’. Ttaka labí rite denle deki arlo Tata Do Yebáha ankabale benne dii lhe benne lo xua lhe benne tuntu lhe labí elha gwedeaka lasi gele tee. Tti ilákin benne le, laꞌania nna innáke: ‘Karusiꞌile.’
\v 18 Laxkala rigixxiꞌania le, len neti gwaltá gwaligoꞌo oru tagaꞌa nu chi beyarina de chi beriana lo gi. Aníha kini akale nu gwalíga tee gele. Lhe anágaba len neti gwaltá gwaligoꞌo xo sitsi ki ukule. Aníha ki udheana lo elhittu gele de tuntule. Lhe len neti gwaltá gwaligoꞌo ramedi ki kaꞌa lole ki ilenle.
\v 19 Iyába ka nu rakati gekani rigisaa kana lhe rulisaa kana kini uinkana latsiru. De nuha nna lebiꞌi gwaleyeki gwalodo lele Tata Do Yebáha lhe gwalodúna le ge nu ruinle lhe.
\v 20 Gwaluyúruga. Ne neti dua roꞌo puerta‑ni rinnea. Ganna nuxa iyieninna kia nna idhalina, neti nna gaꞌaya ata donaha ki go irse lenia na.
\v 21 Nu dhaana dhu tsitsina lo neda kia, nuha gugwebaa na lo neda ki dhona len neti lo xxila ata rinnabiayaha ttiba neti chi udáya nna chi doa len Tata kiaha lo xxila ata rinnabieha.
\v 22 Nu gwa sia nagani, udo nagani ge nu rigixxiꞌani Espírituha ka benne ria leke neti.”
\c 4
\s Juan‑ni belaꞌanie yebáha nna bilánie ka benne // rudú xibike arlo Tata Do Yebáha
\p
\v 1 Iki de nuha nna tti belaꞌati ttu puerta yebáha du yali‑na lhe biyienti tsiꞌi benne unnebie len neti sisiꞌa tteha. Idisaba biyienti tsiꞌe attiba riyieni ge ttu trompeta, benneha rabie neti:
\p ―Ugwapi nii kini neti nna uleꞌenia lu iyá nu chi dabiga aka.
\p
\v 2 Looraha tteba nna bisia Espíritu ge Tata Do Yebáha latia. Tti yuꞌu Espírituha latia nna belaꞌati xxila du yebáha do ttu benne rinnabie loni.
\v 3 Benne dobie lo xxilaha raka galhabe ttiba raka íyya ragalha nu tee láni jaspe o nu tee láni cornalina, nna abiꞌiba ata doeha yeki ttu yetti lhaa raka galhabana ttiba íyya nu tee láni esmeralda.
\v 4 Abiꞌiba ata do benne rinnabiaha seꞌe a ttaperua (24) ka xxila. Lo ka xxilaha nna sia ttaperua (24) ka benne benneola rinnabiagabake. Ka benneha nukuke xo sitsi nna yuꞌu ikike ka corona ge oru.
\v 5 Ata du xxila do benne rinnabiaha, rapi edha lhe ruꞌu be lhe ratsa lhe. Arlo xxila ata doeha nna ralha iki gasi ka ya nalha gi. Ka ya nalha giha ankakana gasi ka espíritu rixúke lo sina ge Tata Do Yebáha.
\v 6 Arlo ata doeha re ttiba ttu indatoo, iyya gwanaba raka loni de anka xxattana yaa.
\p Chubaa ata du xxila do benne rinnabiaha, abiꞌiba kweꞌe xxilaha seꞌe ttapa ka nu anka bani. Lo kweꞌebakani sia xxatta iyya lokani.
\v 7 Nu du sisiꞌa tteha ankana ttiba ttu beesi, nu berupaha nna ankana ttiba ttu gwirri, nu beyonnaha nna anka loni ttiba lo ttu benne, nu betapaha nna ankana attiba ttu bedhía diana lo be.
\v 8 Iyába ttapa ka nuha, ttu ttukana sia xxupa xxupa xxilakani. Lo kweꞌeba ka xxilakaniha sia xxatta iyya lokani nna bittuba rudú siikana, rela resába rinnekana rákana:
\q Tata Do Yebaa benne ankalu Xxanatu lhe benne ra tsitsi xxatta lelu lhe,
\q lu ankalu benne leꞌa lhe benne nari xú, labí tulha ruinlu lhe ankalu benne chi riesi lhe.
\q Lu ankalu benne dolu ttuha‑li lhe benne dolu nnanna lhe.
\q Anágaba ankagabalu benne dholu nu si daa lhe.
\p
\v 9 Ka nu anka bani ka nu rulaꞌa ttiba ruleꞌe ka nimalaha nna rugwekana ixkixaru benne doe lo xxila ata rinnabieha, delába benne dobie ttu dia liiha, nianna rákane: “¡Xxeniba ra lelu!”
\v 10 Kua rábakana aníha, ttaperua (24) ka benneolaha nna riyetta ttebake rudú xibike arlo benne do ttu dia liiha nna rutsá loke bie. Nianna tti ribeake ka corona gekeha nna rudelhake ka nuha arlo benneha nna ráke bie:
\q
\v 11 Tata, benne ankalu Xxanatu lhe ankalu Xxudi do yebáha getu lhe,
\q lu ralhalu inná xxeni lelu,
\q lhe udú xibi ka benne arlolu lhe.
\q Anágaba ralhalu akalu benne inná tsitsi lelu lhe,
\q kumu kwinalu benlu iyá tte nu seꞌe,
\q lhe kwinalu uka lelu kini seꞌekana lhe uka xxekana lhe.
\c 5
\s Benne anke Neru toha, benneha ralhe idhalie lo yetsiha
\p
\v 1 Nianna tti belaꞌati benne doe lo xxila ata rinnabieha, daka ná benbie denie ttu yetsi tubi‑na. Lo kweꞌeba yetsiha dia letra. Roꞌo yetsiha ata riluxa retubinaha, niha taa gasi ka sellu kini abittu rugwelhakana iyali loni.
\v 2 Belaꞌagabati ttu anjeli ra xxeni lebie, unnebie idisa, ree:
\p ―¿Nú benne ralhe kuabie ka sellu taa roꞌo yetsi‑ni lhe idhalie loni lhe?
\p
\v 3 Ttaka ni yebáha lhe ni yiesi lo yu‑ni lhe nigaba lhiꞌu yuha, labí bisela ttu benne dika idhalie lo yetsiha lhe nigaba ulabe nu dia loni lhe.
\v 4 Neti nna yalhá ribesia dua kumu benne dika ralhe idhalie lo yetsiha lhe ulabe nu dia loni lhe, lanú bisela.
\v 5 Ttaka ttu ka benneola sela lheꞌe ka benne ttaperuaha, (24) rabie neti:
\p ―Bittu kwesilu. Biyúruga, benne rákana Beesi, delába benne anke xiꞌin ttu ka benne datiake Judá lhe datiagabe David‑ni lhe, benneha chi udaabie lo ka nu a raka uyúkane nna labie ralhe kuabie gasi ka sellu taa roꞌo yetsi‑na lhe idhalie loni lhe.
\p
\v 6 Nianna tti belaꞌati lagwi ata du xxila do benne rinnabieha lhe lagwi ge ttapa ka nu anka baniha, delába ka nu rulaꞌa attiba ruleꞌe ka nimala lhe lagwi ge ka benneolaha, niha du ttu Neru to. Neru toha ruleꞌena attiba ttu neru chi bettikana nna sia gasi sitta ikini lhe sia gasi ka iyya loni lhe. Ka nuní ankakana gasi ka espíritu rixú lo sina ge Tata Do Yebáha. Ka espíritu‑ni nuha udhelhe itú tte yiesi lo yu‑ni.
\v 7 Nianna tti ubiga benne anke Neru toha bedaxxue yetsi den ná ben benne doe lo xxila ata rinnabieha.
\v 8 Tti bedaxxue yetsiha, itapaba ka nu anka baniha lhe iyába ttaperua (24) ka benneolaha, biyettake bedú xibike arlo benne anka Neru toha. Ka benneha denke ttu ttu ka arpa rudhesike lokani lhe denke ka copa ankakana ge oru, saa tíba lheꞌekani yala. Yala denkeha nuha riguꞌinna ka tisa rilhapi ka benne chi ankake ge Tata Do Yebáha,
\v 9 nna rulhake ttu leꞌa kubi, ráke:
\q Benne ankalu Neru to, lu ralhalu udaxxulu yetsi‑ni
\q nna itsúlu ka sellu taa roꞌin‑ni,
\q kumu lu bettikana lu nna len reni gelu‑na chi uyoꞌolu
\q iyá looba ka benne seꞌe lheꞌe iyába ka yiesi seꞌe yiesi lo yuha,
\q lhe ka benne rinne iyá looba tisa, kini akake ge Tata Do Yebáha.
\q
\v 10 Lu benlu ki akake ka nu rinnabia lhe akake ka bixxudi lhe,
\q kini ixúke len Tata Do Yebaa geriꞌiha,
\q lhe innabiake yiesi lo yuha lhe.
\p
\v 11 Nianna tti belaꞌati nna biyienti tsiꞌi ixe juisiru ka anjeli seꞌeke abiꞌiba kweꞌe xxila ata do benne rinnabiaha lhe kweꞌe ttapa ka nu anka baniha lhe kweꞌe ka benneolaha lhe,
\v 12 rinneke idisa ráke:
\q ¡Neru to bettikanaha,
\q benneha ralhe inná tsitsi lebie
\q lhe dhie elha tse rute Tata Do Yebáha
\q lhe anágaba ralhe ake benne yuu
\q lhe ake benne ruin tsitsi
\q lhe ake benne udú xibiriꞌi arloe
\q lhe anágaba ralhe inná xxeni lebie
\q lhe ilhapiriꞌi tisa lenbie lhe!
\p
\v 13 Nianna tti biyienti rinne iyá xea ka nu ben Tata Do Yebáha seꞌe yiesi lo yu‑ni lhe ka nu seꞌe lhiꞌu yuha lhe ka nu reki lhiꞌu lheꞌe indatooha lhe anágaba ka nu seꞌe yebáha lhe, iyába ka nuní rákana:
\q Benne doe lo xxila ata rinnabie‑na lhe benne anke Neru to‑na lhe,
\q ka benne‑na nuná ralhake inne tseriꞌi geke
\q lhe udú xibiriꞌi arloke.
\q Lhe anágaba lake nuná akake ka benne dika inná xxeni leke
\q lhe inná tsitsi leke ttu dia lii lhe.
\p
\v 14 Ttapa ka nu anka baniha, delába ka nu rulaꞌa ttiba ruleꞌe ka nimalaha nna rákana:
\p ―Amén.
\p Ka benneolaha nna bedú xibike nna rutsá loke benne anke Neru toha lhe benne doe lo xxilaha lhe.
\c 6
\s Benne anke Neru toha utsúe xxupa ka sellu taa roꞌo yetsiha
\p
\v 1 Nianna belaꞌati utsú benne anke Neru toha ttu ka sellu taa roꞌo yetsiha. Nianna tti biyienti unne ttu ka nu ttapa anka baniha; delába ka nu rulaꞌa ttiba ruleꞌe ka nimalaha, nuha rana:
\p ―Utá belanni.
\p Tti unne nuha, tuttíruba uyuꞌu be.\fig 4 horsemen|67AP_4Horsemen.tif|col|||(Apocalipsis 6:1-8)|6.1\fig*
\p
\v 2 Nianna tti belaꞌati ttu kwayu sitsi. Nu dona kweꞌe nuha denna ttu badi nna begwekana na ttu corona nna rigitta rebaaba leni biriana diana ki dhaana lo ka nu itilha lennaha.
\p
\v 3 Tti utsú benne anka Neru toha sellu nu berupa taa roꞌo yetsiha, nianna biyienti unne attu ka nu anka baniha, unne nu berupaha, rana:
\p ―Utá, belanni.
\p
\v 4 Nianna tti belaꞌati biria ttu kwayu xiná tú. Nu dona kweꞌe nuha nna begwekana na ttu espada xeni lhe begwegabakana na lo neda kini lana uinna kini abittu aka uyú luesi ka benne seꞌe yiesi lo yu‑ni lhe uinna ki utti luesike lhe.
\p
\v 5 Tti utsú benne anke Neru toha sellu nu beyonna taa roꞌo yetsiha, nianna biyienti unne ttu ka nu anka baniha, unne nu beyonnaha, rana:
\p ―Utá, belanni.
\p Nianna tti belaꞌati ttu kwayu yadhi. Nu dona kweꞌe nuha denna ttu xia libra.
\v 6 Lagwi ge ttapa ka nu anka baniha nna biyieni tsiꞌi ttu benne rabie nu do kweꞌe kwayuha:
\p ―Ttu kiluruba xuxtila o tsunna kiluruba xua cebada dhi ka benne ge ttu sá sina, ttaka seti‑na lhe vinu‑na lhe bittu ugalhalu ka nuná.
\p
\v 7 Tti utsú benne anke Neru toha sellu nu betapa taa roꞌo yetsiha, nianna biyienti tsiꞌi ttu ka nu anka baniha, unne nu betapaha, rana:
\p ―Utá, belanni.
\p
\v 8 Nianna tti belaꞌati ttu kwayu kuchuchi. Nu dona kweꞌe nuha tee láni Elhutti. Kweꞌe Elhuttiha nna danalha tteba nu tee láni Belhaꞌa Chulha. Ka nuní uxíkana lo neda kini uttikana ttu lisia ka benne seꞌe yiesi lo yu‑ni len espada lhe uinkana kini gattike ubina lhe anágaba uttikana ke len isagwe lhe len ka nimala ruin satsa reki yiesi lo yu‑ni lhe.
\p
\v 9 Tti utsú benne anke Neru toha sellu nu gayu taa roꞌo yetsiha, nianna tti belaꞌati daa ttu bekú yebáha. Xaniꞌa bekúha nna belaꞌati duꞌuya ka benne bettikana ke de rekike ugixxiꞌa ka tisa ge Tata Do Yebáha lhe de labí bedhanke utixxiꞌake ge Jesucristuha.
\v 10 Ka benneha rinneke idisa ráke:
\p ―Tata Xisi to, lu ankalu benne leꞌa lhe benne ruinlu nu anka gwalí lhe. ¿Nukala uinlu elha uxtisi ge ka nu seꞌe yiesi lo yuha kini okixalu kana ge elhutti getu‑ni?
\p
\v 11 Nianna begwe Tata Do Yebáha ttu ttu ka benneha xo sitsi geke ki ukuke, nianna tti ree ke:
\p ―Kwedale attu satti to axtaliba ganna chi bedaꞌa ka betsi to geleha gattike attiba bettikana le. Ka benneha ankagabake ka benne rixúke lo sina kia attigaba lebiꞌi.
\p
\v 12 Tti utsú benne anke Neru toha sellu nu xxupa taa roꞌo yetsiha, nianna tti belaꞌati bixú idí. Tatubisa‑na nna yadhi teaba beyake ttiba ttu lari yadhi eruloo. Nanto beo‑na nna xiná reniba beyake.
\v 13 Ka beli sia yebáha nna ubinnikana lo yu ttiba riginni ka higu sia lo ttu yaga tti rukubi ttu be idí yagaha.
\v 14 Yebáha nna betesina attiba retesi ttu yieti, aníha‑ba betesina nna iyába ka iꞌiya lhe ka yu seꞌe lagwi indatooha beseabakana ata siakanaha.
\v 15 Ka nu rinnabia seꞌe yiesi lo yu‑ni nna bekatsiba lokani lheꞌe ka belea lhe lheꞌe ka íyya sia iki ka iꞌiya‑na, itupa lenkana ka nu ra xxeni lekani lhe anágaba ka nu loni ge ka soldaduha lhe iyágaba ka nu tee xxatta gekani, lhe anágaba ka nu ra tsitsi lekani lhe iyá ka nu toꞌokana lo sina ge ka xxanakani lhe anágaba ka nu abittu toꞌokana lo xxanakani lhe. Iyába ka nuní bekatsi lokani.
\v 16 Nianna rinnekana rulisakana ka iꞌiya‑na lhe ka íyya‑na lhe, rákana ka nuha:
\p ―¡Gwaliginni ikitu! ¡Gwalukatsi riꞌitu kini abittu ilen benne doe lo xxila ata rinnabieha riꞌitu lhe kini lhaatu lo elha disa tsitsi ute benne anke Neru toha de risaꞌa xxattanie!
\v 17 Kumu chiba bisia sá ute benneha elha disa ge ka benne de risaꞌa xxattanie nna lanú nu dhaana uchíana lo elha disaha.
\c 7
\s Ttu gayua chua bixxi ttapa mili (144,000) ka benne Israel // uren sellu lo xeake
\p
\v 1 Iki de nuha nna belaꞌati ttapa ka anjeli seꞌeke itapa laduba ge yiesi lo yu‑ni. Seꞌeke ki udheake be daa itapa laduba geni kini abittu uxunni be yiesi lo yu‑ni lhe kini abittu uxunni be lo indatooha lhe. Anágaba lo ka yaga‑na, bittugaba uxunni be lokani.
\v 2 Nianna belaꞌagabati attu anjeli ugwapie daka ata riria tatubisa‑na denie sellu ge Tata Do Yebaa benne anka baniha nna uresiꞌanie idisa adí ka anjeliha, delába ka benne ttapaha, ka benne chi uxíke lo neda kini uinke leeni yiesi lo yu‑ni lhe uinke leeni lo indatooha lhe. Nianna rabie ka benneha:
\p
\v 3 ―Bittu bi udhakaxxile indatoo‑na lhe yiesi lo yu‑na lhe ka yaga daa loin‑na lhe axtaliba ganna chi ulekiriꞌi sellu lo xea ka benne rixúke lo sina ge Tata Do Yebaa geriꞌiha.
\p
\v 4 Nianna tti biyienti balhaxa ka benneha uren sellu lo xeake: ttu gayua chua bixxi ttapa mili (144,000) ka benneha uren sellu lo xeake. Iyába tsiꞌinu (12) kwe ka benne datiake benne tee lábie Israel, iyába ka benneha nuha uren sellu lo xeake,
\q
\v 5 delába tsiꞌinu (12) mili ka benne datiake Judá,
\q nna tsiꞌinu mili ka benne datiake Rubén,
\q nna tsiꞌinu mili ka benne datiake Gad.
\q
\v 6 Anágaba tsiꞌinu mili ka benne datiake Aser,
\q nna tsiꞌinu mili ka benne datiake Neftalí,
\q nna tsiꞌinu mili ka benne datiake Manasés,
\q
\v 7 nna tsiꞌinu mili ka benne datiake Simeón.
\q Anágaba tsiꞌinu mili ka benne datiake Leví,
\q nna tsiꞌinu mili ka benne datiake Isacar,
\q
\v 8 nna tsiꞌinu mili ka benne datiake Zabulón,
\q nna tsiꞌinu mili ka benne datiake José.
\q Anágaba tsiꞌinu mili ka benne datiake Benjamín.
\s Ixe juisiru ka benne seꞌeke arlo Tata Do Yebáha
\p
\v 9 Iki de nuha nna tti belaꞌati ixe juisiru ka benne. Ka benneha labí dhaariꞌi ibabinriꞌi ke. Ankake iyá loo lhe dáke lheꞌe iyába ka yiesi seꞌe yiesi lo yu‑ni, lhe rinneke iyá looba tisa lhe. Ka benneha seꞌeke arlo xxila ata do Tata Do Yebáha rinnabie lhe arlo benne anke Neru toha lhe. Nukuke xo sitsi nna seꞌeke denke dina
\v 10 nna rinneke idisa ráke:
\q ¡Tata Do Yebaa getu, benne dolu lo xxila ata rinnabialu‑na,
\q lhe lu benne ankalu Neru to lhe,
\q lebiꞌi nuná bodilále riꞌitu lo elha disa gwatetuha!
\m
\v 11 Iyába ka anjeli seꞌe abiꞌiba ata du xxila do benne rinnabiaha lhe abiꞌiba kweꞌe ka benneolaha lhe abiꞌiba kweꞌe ttapa ka nu anka baniha lhe, delába ka nu rulaꞌa ttiba ruleꞌe ka nimalaha, ka benneha bettudhi loke axtaba lo yu arlo xxila ata do Tata Do Yebáha rinnabie, nianna betsá loke bie.
\v 12 Nianna tti ráke:
\q ¡Amén! Tata Do Yebaa getu,
\q kwinalu nuná ralhalu inne tsetu gelu
\q lhe ra xxeni lelu
\q lhe kwinalu ankalu benne yuu
\q lhe ankalu benne dika ugwetu lu ixkixaru
\q lhe anágaba kwinalu nuná ralhalu udú xibitu arlolu
\q lhe lu ankalu benne ra tsitsi lelu
\q lhe ruin tsitsilu lhe.
\q Ttu dia liiba ankalu aná xa Tata Do Yebaa getu.
\q Amén.
\p
\v 13 Ttu ka benneolaha nna unnaba tise neti, ree:
\p ―Ka benne nukuke xo sitsi seꞌe nii, ¿nú benne ka benne‑ni lhe gá dáke lhe?
\p
\v 14 Neti nna bekabia gebie, xpeye:
\p ―Lu gwa yúbalu xa tata.
\p Benneha nna bekabie kia ree:
\p ―Ka benne‑ni nuní chi uláke lo elha disa tsitsiha nna chi utí xoke, botsitsike kana len reni ge benne anke Neru to‑ni.
\v 15 De nuha nna seꞌeke arlo xxila ata do Tata Do Yebaa‑ni rinnabie nna rela resába rixúnie ke lheꞌe yotu gebie‑ni. Tata Do Yebaa‑ni, benne doe lo xxila ata rinnabie‑ni, benne‑ni doe lenke ruyúe ke.
\v 16 Labíru ituin ka benne‑ni, nigaba ebisike inda, lhe nigaba goru ubisa latike, lhe nigaba akarukanie ubisa lhe.
\v 17 Kumu benne anke Neru to du lagwi ata du xxila do benne rinnabia‑ni, labie nuní tsekie loke uyúe ke ttiba ka neru to‑na. Labie ichebie ke ata sia inda nu utena elha nabani geke ttu dia lii nna Tata Do Yebaa‑ni unie kini abitturu kwesike.
\c 8
\s Benne anka Neru toha utsúe nu gasi sellu taa roꞌo yetsiha
\p
\v 1 Tti utsú benne anke Neru toha sellu nu gasi taa roꞌo yetsiha, siiba beyaka yebáha ttiba ttu medi ura.
\v 2 Nianna tti belaꞌati gasi ka anjeli seꞌeke arlo Tata Do Yebáha nna begwekana ke gasi ka trompeta.
\v 3 Iki de nuha nna bisia attu anjeli nna udúe ata daa bekú ge oruha. Bekúha daana arlo xxila ata do Tata Do Yebáha rinnabie. Anjeliha denie ttu besí ankana ge oru nna begwekane ixeniru yala ki kuꞌubie lo bekúha. Aníha kini isela yalaha ka tisa rilhapi iyá ka benne chi ankake ge Tata Do Yebáha.
\v 4 Anjeliha denie besíha nna riria seni ge yalaha lheꞌeni nna rapi seniha risinna arlo Tata Do Yebáha itupa len ka tisa rilhapi ka benne chi ankake gebie.
\v 5 Nianna tti bedaxxu anjeliha besíha nna uluꞌe bexura gi sia lo bekúha lheꞌeni nna bedelhe na yiesi lo yu‑ni. Nianna udulo tteba utsa yiesi lo yu‑ni lhe uyuꞌu be lhe ugwapi edha lhe bixú lhe.
\s Ka anjeliha bekwesike ttapa ka trompetaha
\p
\v 6 Gasi ka anjeliha, delába ka benne denke gasi ka trompetaha, ka benneha beseꞌe tse ttebake kini ukwesike ka nuha.
\p
\v 7 Anjeli du sisiꞌa tteha bekwesie trompeta geeha, nianna biginni tteba gi yiesi lo yu‑ni lhe ure iyya lhe. Ka nuha chixxikana reni. Nianna tti bite yiesi lo yu‑ni, a lattiba a uka salhena bite, itupa ka yaga lhe ka ixxi lhe iyá ka nu yaꞌa daa loni lhe.
\p
\v 8 Anjeli berupaha nna bekwesie trompeta geeha. Nianna lheꞌe indatooha biginni ttiba ttu iꞌiya barto ritena ralha lhalhabana nna a lattiba a uka salhe indatooha beyaka reni
\v 9 lhe a lattiba a uka salhe ka nu reki lheꞌe indatooha uttikana lhe a lattigaba a uka salhe ka barcu reki lo indatooha biseꞌe lookana.
\p
\v 10 Anjeli beyonnaha nna bekwesie trompeta geeha. Nianna yebáha‑li biria ttu beli xeni biginnina yiesi lo yu‑ni ritena nna ralhana ttiba ralha iki ttu ya nalha gi. Ubinnina lo ka yoo lhe lo ka dina lhe, a lattiba a uka salhe ka nuha ubinni beliha lokani.
\v 11 Beliha tee láni Nu Anka Ilhá nna a lattiba a uka salhe ka indaha beyakakana ilhá. De beyaka ka indaha ilhá nna ixeba ka benne uttike de uꞌuyake nuha.
\p
\v 12 Anjeli betapaha nna bekwesie trompeta geeha. Nianna tatubisa‑na lhe nanto beo‑na lhe ka beli‑na lhe, a lattiba a uka salheke uxí xueke. De nuha nna a lattiba a uka sa salhaꞌa loke bechulha. Laxkala resáha a lattiba a uka salhena beyaka chulha lhe aníha‑gaba beyaka relaha lhe.
\p
\v 13 Nianna tti belaꞌati ttu bedhía diana ridúna gwetsáli nna biyienti idisaru rinnena, rana:
\p ―¡Gwalíchiru le ka benne seꞌe yiesi lo yu‑na! ¡Karusiꞌiruke! ¿Bí sateke ganna chi uresiꞌa ka trompeta riyasa ukwesi a tsunna ka anjeliha?
\c 9
\s Anjeliha bekwesie trompeta nu gayuha
\p
\v 1 Anjeli gayuha bekwesie trompeta geeha. Nianna tti belaꞌati ttu beli do yebáha ubinnina yiesi lo yu‑ni nna uxína yagwi ki idhalina roꞌo belhaꞌa chulhaha.
\v 2 Tti udhalina roꞌo belhaꞌa chulhaha, roꞌo nuha biria seni ttiba seni riria iki ttu ornu barto. Tatubisa‑na nna tuttíruba bechulha loe lhe tuttíruba bechulha lo bea‑na de ure xxatta seni riria lheꞌe belhaꞌaha.
\v 3 Lheꞌe seniha nna chixxi ttiba ka uxxaru. Ka nuha ugwadhikana yiesi lo yu‑ni nna uxíkana lo neda kini kisiꞌakana ttiba rigisiꞌa ka roꞌo chupa‑na tti rugwekana ttu benne.
\v 4 Ka uxxaruha ukakana mandadu kini abittu bi udhakakana ka ixxi binni lhe ka yaga lhe iyá nu yaꞌa tee yiesi lo yu‑ni lhe, sinuki suna ka benne abittuba chi reni sellu ge Tata Do Yebáha lo xeake, suna ka benneha‑ba kisiꞌakana.
\v 5 Labí uxíkana lo neda kini tuttíru uttikana ka benneha, suna ugwebakana ke elha disa tsitsi delo gayu beo, nna elha disa uyúke ge ka nuha, akana attiba elha disa ruyú ttu benne ttixka rugwe ttu roꞌo chupa bie.
\v 6 Laꞌania nna ka benne kisiꞌa ka uxxaruha ke, yalhá uinke egila leke ki gaxasina gattike, ttaka labí aka gattike, lhe yalhá aka leke gattike, ttaka labí isia elhutti geke.\fig Locusts--people running|68AP_Afraid.tif|col|||(Apocalipsis 9:1-12)|9.6\fig*
\p
\v 7 Ka uxxaruha ruleꞌekana ttiba ruleꞌe ka kwayu chi seꞌe tsekana kini tsiakana utilha. Iki ka uxxaruha yuꞌu ttiba ka corona ge oru. Lokani nna anka ttiba lo ka benne.
\v 8 Itsa ikikani nna ankana ttunna ttiba itsa iki ka nuila‑na, nna ka layakani nna ankakana tutsa ttiba laya ka beesi‑na.
\v 9 Roꞌo lastokani nna taa ttiba ttu iyya bata ankana tsitsi. Lheꞌe xxilakani nna ruꞌu be ttiba ruꞌu be ge ka carreta naꞌaya ixe ka kwayu dia utilha.
\v 10 Sia xubankani lhe sia lhiatsakani ttiba sia lhiatsa ka roꞌo chupa‑na. Lo xubankaniha do gwetía gekani nna len ka nuha ugwekana ka benne elha disa tsitsi delo gayu beo
\v 11 nna do ttu nu rinnabiana kana, delába nu anka xxana belhaꞌa chulhaha. Len tisa hebreo tee láni Abadón nna len tisa griegu nna tee láni Apolión. Tisa‑ni dienna innána nu rutseꞌe loo.
\p
\v 12 Chiba ute elha disa nu sisiꞌa tteha, ttaka si dala a chupa ka elha disa.
\s Anjeliha bekwesie trompeta nu xxupaha
\p
\v 13 Anjeli xxupaha bekwesie trompeta geeha. Nianna biyienti tsiꞌi ttu benne biriana itapaba ka isquina ge bekú ge oruha, delába bekú nu daa arlo Tata Do Yebáha.
\v 14 Tsiꞌi benne unneeha ree anjeli den trompetaha:
\p ―Udhasi itapa ka anjeli xika roꞌo yoo xeni nu tee láni Eufrates.
\p
\v 15 Nianna tti bedhasi benneha itapaba ka anjeliha kini ka anjeliha nna uttike ka benne seꞌe yiesi lo yu‑ni, a lattiba a uka salhe ka benneha uttike. Kumu ka anjeliha chi seꞌe tseke kini uinke nuní ganna chi bisia ura lhe ganna chi bisia sá lhe ganna chi bisia beo lhe ida lhe.
\v 16 Chupa gayua millón ka soldaduha biyienti raka. Ka nuha siakana kweꞌe ka kwayu.
\p
\v 17 Belaꞌati ka kwayu lhe belaꞌati ka soldadu sia kweꞌe ka nuha. Ka soldaduha taa roꞌo lastokani ka iyya bata ankakana xiná tú ttiba belha ge gi lhe ankakana azul ttiba íyya nu tee láni jacinto lhe ankakana yatsi ttiba azufre. Iki ka kwayuha nna anka ttiba iki ka beesi nna roꞌokani nna riria gi lhe seni lhe azufre lhe.
\v 18 Nu riria roꞌo ka nuha, delába giha lhe seniha lhe azufreha lhe, ka nuha ankakana ka elha disa nu uyú ka benne seꞌe yiesi lo yu‑ni. A lattiba a uka salhe ka benneha betseꞌe loo ka nuha,
\v 19 kumu gwetía ge ka kwayuha dona daka roꞌokani lhe anágaba dona daka lo xubankani lhe. Kumu ka xubankaniha ankakana ttiba ka belha‑na nna len ikikaniha rigisiꞌakana ka benne.
\p
\v 20 Ka benne bexxaha, ka benne labí uttike len ka elha disa chi uteha, ka benneha labí bedhanke, sa ruinbake nu abittu anka tse lhe labí bedhanke, sa rudúba xibike arlo ka espíritu xxegwiha lhe arlo ka nu labí gwalíga ankakana diosi lhe, delába ka nu ankakana ge oru lhe ge plata lhe ge bronce lhe ge íyya lhe ge yaga lhe. Ka diosiha labí rilákinna, nigaba a riyienkinna, nigaba a ridákana.
\v 21 Ka benne bexxaha bittugaba bedhanke ruinke elhutti, nigaba a bedhanke ruinke elha gwesá, anágaba nigaba a bedhanke risáke nu subi subi, lhe nigaba a bedhanke rilanake lhe.
\c 10
\s Anjeli den yetsi toha
\p
\v 1 Nianna belaꞌati attu anjeli ra xxeni lebie ugwadie dabie yebáha. Abiꞌibe rilhi bea nna daa ttu yetti lhaa ikie. Lobie nna raka galhaba ttiba raka lo tatubisa‑na nna ka niꞌabie nna ankakana ttiba belha ge gi.
\v 2 Den nábie ttu yetsi chikaꞌa to du yali loni. Benneha bedú niꞌa benbie lo indatooha nna niꞌa yattie nna bedúe na lo yu bisiha.
\v 3 Nianna tti uresiꞌabie idisa, betuxxue ttiba rutuxxu ttu beesi. Tti uresiꞌeha nna biyieni utsa gasi libe.
\v 4 Iki de chi beyaka utsa gasi libeha, neti nna chi bedo tsea kini unia lo yetsi nu ra nu uyuꞌu beha. Nianna biyienti tsiꞌi ttu benne yebáha, ree:
\p ―Uluꞌuba lelu nu biyieninlu‑na, bittu udolu na lo yetsi.
\p
\v 5 Anjeli benne belaꞌati du ttu lhaꞌa niꞌabie lo yuha lhe lo indatooha lhe, benneha ulhidha ná benbie yebáha
\v 6 nna bedettie lá benne do ttu dia liiha, delába benne benie yiesi lo yu‑ni lhe yebáha lhe indatooha lhe iyá tte nu seꞌe lokani lhe. Benne do ttu dia liiha nuha bedetti anjeliha, tti ree:
\p ―Eru Tata Do Yebáha, labíru isá riyasa chi tte aka nu teeki aka.
\v 7 Ganna chi bisia sá iyieni tsiꞌi trompeta ukwesi anjeli benne gasiha, laꞌania nna uin Tata Do Yebáha nu chi gaꞌananie aka nu labí yu ka benne. Uinbe ttiba chi utixxiꞌanie ka benne bixúke lo sina geeha, delába ka profetaha.
\p
\v 8 Nianna tti bedeyienti tsiꞌi benne unne yebáha attu libe, rabie neti:
\p ―Ugía nna bedaxxu yetsi yali loni nu den anjeli du niꞌe lo indatooha lhe lo yu bisiha lhe.
\p
\v 9 Neti nna ugía ttebaa ata du anjeliha nna xpeye:
\p ―Bete yetsi to‑na len neti.
\p Benneha nna rabie:
\p ―Bedaxxu na nna uto na. Lheꞌe tuꞌelu‑na tsanninlu sachena ilhá, ttaka roꞌolu nna eyoꞌona ixixxi tú ttiba nu xixxi ge biasera.
\p
\v 10 Nianna bedaxxua yetsi to yuꞌu lasi ná anjeliha nna tti utoa na, ixixxi túba beyoꞌona roꞌa ttiba nu xixxi ge biasera, ttaka iki de chi utoa nuha, ilhá túba gwachena lheꞌe tuꞌea.
\v 11 Nianna rabie neti:
\p ―Teeki kixxiꞌalu attu libe nu chi gaꞌanna sate ixe ka benne, delába nu sate iyá loo ka benne seꞌe lheꞌe iyába ka yiesi seꞌe yiesi lo yu‑ni lhe ka benne rinneke iyá looba tisa lhe ka nu rinnabia ge yiesi lo yu‑ni lhe.
\c 11
\s Tata Do Yebáha ridhelhe chupa ka benne // kini kixxiꞌake ka tisa geeha
\p
\v 1 Iki de nuha nna betekana ttu iyyaxtila len neti. Iyyaxtilaha rixúna kini rurixxibiariꞌi lenna. Nianna tti ra Tata Do Yebáha neti:
\p ―Ugía gwarixxibia yotu kiaha lhe berixxibia bekúha lhe. Belabagaba balhaxa ka benne yuꞌuke rudú xibike lheꞌe yotuha lhe.
\v 2 Laliꞌa yotuha labí urixxibialu kumu chiba betea nuha len ka nu abittu ria lekani kia. Ka nuha tsekikana niha nna udhakabakana yiesi leꞌa kiaha attiba rakaba lekani delo chua bixxi chupa (42) beo.
\v 3 Neti nna idhelhagabaa chupa ka benne kini kixxiꞌake ka tisa kiaha delo ttu mili chupa gayua bixxi gayuna (1260) ubisa, delába chua bixxi chupa (42) beo. Ka benneha nna ukuke xo ttipa geke nu unna liina deki du siꞌi leke.
\p
\v 4 Ka benne chupa kixxiꞌake ka tisa ge Tata Do Yebáha, ka benneha nuha raxxína ke len chupa ka ya olivu lhe chupa ka candeleru ka nu sia arlo Tata Do Yebaa benne anke Xxana yiesi lo yu‑ni.
\v 5 Ganna nuxa bixa udhakana ka benne chupaha, ka benneha nna kwea tteba roꞌoke belha ge gi kini belha ge giha uttena ka nu abittu raka uyúkana ke, kumu aní teeki gatti nuxa bixa udhakana ka benneha.
\v 6 Ka benne chupaha gwa teeba lo neda geke udheake yebáha kini abitturu iyya aka, laka rekike ugixxiꞌa nu raka le Tata Do Yebáha una ka benne lhe gwa tegaba lo neda geke ki eyoinke iyá ka indaha reni lhe gwa tegaba lo neda geke ki ugweke iyába nu seꞌe yiesi lo yu‑ni bixaba elha disa lhe balhaxaba lidú aka leke lhe.
\p
\v 7 Ganna chi uluxakanie utixxiꞌake ka tisaha, laꞌania nna nimala bartoha nu iria lheꞌe belhaꞌa chulhaha, itilha lenna ke nna dhaaba nuha loke, nianna tti uttina ke.
\v 8 Tsunna ubisa nalha dhuꞌuya ka benne yattiha lagwi ge yiesi ra xxeni leniha, yiesi ata betákana Jesús benne anke Xxanakeha lo ya kurusiha. Yiesiha raxxína na len Sodoma o Egipto
\v 9 nna ka benne anka iyá looba seꞌe lheꞌe iyába ka yiesi seꞌe yiesi lo yu‑ni lhe ka benne rinneke iyá looba tisa lhe, ka benneha ilákanie ka benne yattiha dhuꞌuyake niha, nna labí dhielhake igatsi ka benneha.
\v 10 Ka nu seꞌe yiesi lo yu‑ni nna edeakalakinna de chi utti ka benne chupaha. De elha gwedeaka lasi nna kwentaba ugwe luesikani bixaba nu tse, kumu de chi utti ka benne betsetsi xxattakanie lekaniha.
\p
\v 11 Ttaka iki de chi gwa dona tsunna ubisa nalhaha, Tata Do Yebáha nna belhidha benbe ka benne chupaha nna beyaka benbake attu libe. Iyába ka nu useꞌekana begíakana ka benneha usi xxattakinna.
\v 12 Nianna tti biyienkin benne chupaha tsiꞌi ttu benne unne idisa yebáha, ree:
\p ―Gwaltsapi nii.
\p Ka benneha nna beyapi ttebake deyyake yebáha lheꞌe ttu bea. Ka nu ritisikinna keha nna seꞌebakana gwelanni.
\v 13 Looraha nna bixú idí nna biseꞌe looba ttu latti yiesiha, delába delo ttu ttu gayua (100) ka yoꞌoha, tsii tsiikana biseꞌe lo. Gasi mili ka benne uttike loora rixúha, ka benne bexxaha nna usi xxattakanie de elha rasiha nna ráke:
\p ―¡Xxeniba ra lelu, xa Tata Diosi benne dolu yebáha!
\p
\v 14 Elha disa nu berupaha chiba ute nuha. Nnanna nna chi tteba dabiga elha disa nu beyonnaha.
\s Anjeliha bekwesie trompeta nu gasiha
\p
\v 15 Anjeli gasiha nna bekwesie trompeta geeha. Nianna tti biyieni tsiꞌi ka benne yebáha rinneke idisa, ráke:
\q Yiesi lo yuha chiba aka nuha yiesi innabia Tata Do Yebaa benne anke Xxanariꞌiha
\q lhe ankana yiesi innabia Cristu benne chi gaꞌanani Tata Do Yebáha kini odilábie ka benne.
\q Lee innabie ttu dia lii.
\p
\v 16 Ttaperua (24) ka benneola seꞌe arlo Tata Do Yebáha, ka benne siake lo ka xxila ata rinnabiakeha, ka benneha bettudhi loke lo yu nna betsá loke bie
\v 17 nna ráke:
\q Ixkixaru rugwetu lu xa Tata Do Yebáha getu,
\q benne ankalu Xxanatu lhe lu ra tsitsi xxatta lelu lhe.
\q Lu dolu nnanna lhe dolu ttuha lii lhe.
\q Rugwetu lu ixkixaru kumu nnanna chi ruleꞌelu nu ra xxeni lelu‑na
\q nna chi udulolu rinnabialu.
\q
\v 18 Ka nu abí ria lekani luha bisaꞌabakinna lenlu,
\q ttaka nnanna chi bisia sá uleꞌelu elha riseꞌiki gelu‑na lenkana,
\q chiba bisia sá uinlu elhuxtisi ge ka nu yattiha
\q nna ka profeta bixuinlu ki utixxiꞌake ka tisa gelu‑na
\q lhe ka benne chi riesinlu ki akake gelu
\q lhe iyába ka nu tee elha rasi gekani lenlu
\q ugwebalu kana nu tse ralhakana dhíkana,
\q meskiba ankakana nuxkaꞌa lhe meskiba ankakana nu ra xxeni lekani lhe.
\q Anágaba utseꞌe lolu ka nu rutseꞌe lookana ka benne seꞌe yiesi lo yuha.
\p
\v 19 Nianna tti biyali yotu ge Tata Do Yebáha, delába nu do yebáha. Lheꞌe yotuha bilá xua iꞌina ata yuꞌu ka tisa bodhaꞌan tsitsie len ka nu Israel‑ni. Nianna ugwapigaba edha lhe uyuꞌu be lhe bixú lhe ure xxatta iyya lhe.
\c 12
\s Nimala xxegwiha danalhana nuila nuja xiꞌinniha
\p
\v 1 Nianna tti belaꞌati uka xxe ttu seña xxeni yebáha. Lheꞌe nu belaꞌatiha biria ttu nuila, abiꞌiba kweꞌeni rilhi tatubisa‑na, xaniꞌani nna do nanto beo‑na, ikini nna yuꞌu ttu corona sia tsiꞌinu (12) ka beli iki coronaha.
\v 2 Nuilaha nuja xiꞌinni nna ribesiꞌabana de rutía lheꞌeni, ruyúna elha disa tsitsi de chi gali xiꞌinni.
\v 3 Uka xxegaba attu seña xxeni yebáha. Niha biria ttu nimala xxegwi, ttu nu barto. Ankana xiná. Sia gasi ikini nna tsii ka sitta ikini. Kua ttu ttu ka ikiniha, tudhi ttu ttu ka corona.
\v 4 Len xubanniha bekudhina ka beli sia yebáha, a lattiba a uka salhe ka nuha bekinnina lo yu. Nimala xxegwiha nna bisiana udúna arlo nuila chi gali xiꞌinniha. Chi du tsitsina kini sun tteba ganna chi uli bintoha nna gabi ttebana bi.
\v 5 Nuilaha uliba xiꞌinni nna nubiyú to anka nutoha. Nubiyú toha tsitsiba innabiabi ka benne seꞌe lheꞌe iyába ka yiesi seꞌe yiesi lo yu‑ni, ttaka sun tteba ulibi nna beyalhi tteba Tata Do Yebáha bi kini besinbi arlo xxila ata doe rinnabieha.
\v 6 Nuilaha nna bexunni ttebana diana lo yu bisi ata chi gaꞌanani Tata Do Yebáha isinna. Ata isinnaha, niha uyúke na lhe ugoke na delo tsunna ida nalha, delába ttu mili chupa gayua bixxi gayuna (1260) ubisa.
\p
\v 7 Nianna tti udulo ttu elha utilha xxeni yebáha. Miguel benne anke anjeli ge Tata Do Yebáha, benneha lenie ka anjeli geeha bitilhake len nimala xxegwiha itupa lenna ka anjeli geniha.
\v 8 Ttaka labí udaakana loke nna bennittibakana. Debá laꞌania nna labíru uka tseꞌekana yebáha.
\v 9 Biruꞌunaba nimala xxegwiha lo yu‑ni. Lana nuha ukana belha ugweki ttuha, nu tee láni Satanás lhe nu tegaba láni nu xxegwi lhe; delába nu reki ridí yiena iyá ka benne seꞌe yiesi lo yu‑ni. Lana lhe ka anjeli geniha biriakana yebáha nna biruꞌunakana yiesi lo yu‑ni.
\p
\v 10 Nianna tti biyienti tsiꞌi ttu benne unnebie idisa yebáha, ree:
\q Nnanna chiba bisia sá odilá Tata Do Yebaa geriꞌiha ka benne
\q lhe chigaba bisia sá inná xxeni lebie lhe innabie lhe.
\q Anágaba Cristu benne chi gaꞌananie idhelheha
\q chigaba bisia sá gapa benneha lo neda kini nu innábe aka
\q kumu nimala xxegwi nu rukinnina ka betsi to geriꞌiha, rela resába rukinnina ke arlo Tata Do Yebaa geriꞌiha,
\q nuha chiba biruꞌunana yiesi lo yuha.
\q
\v 11 Ka betsi to geriꞌiha chiba udaake loni kumu de bixúkanie reni belali benne anke Neru toha
\q lhe de utixxiꞌake ka tisa geeha lhe.
\q Labí gwatua leke latike,
\q beria iki beria leke utixxiꞌake gebie, meskila uttike.
\q
\v 12 Laxkala lebiꞌi ata seꞌele yebaa‑ni, gwalodú itta lele.
\q Ttaka lebiꞌi ata seꞌele yiesi lo yuha
\q lhe ata seꞌele lheꞌe indatooha lhe, gwalíchiru lele,
\q kumu nu xxegwiha yúbana labíru isá tsekina,
\q de nuha nna yalhá riseꞌenna ugwadina bisiana ata seꞌele‑na.
\p
\v 13 Tti chi ute den nimala xxegwiha deki chi ubinnina yiesi lo yu‑ni, nianna gwanalha ttebana nuila bija nubiyú toha.
\v 14 Ttaka nuilaha begwe ttebakana na chupa ka xxilani ttiba ka xxila bedhía xeni. Aníha ki uka geni udúna lo be kini bexunnina lo nimala xxegwiha nna diana lo yu bisi ata chi gaꞌanna dhona. Niha uyúke na lhe ugoke na delo tsunna ida nalha.
\v 15 Nimalaha nna ulea roꞌoni idila inda, ttu yoo xeni uka inda ulea roꞌoniha kini indaha nna gaꞌayana nuilaha.
\v 16 Ttaka yiesi lo yu‑ni bodilábana nuilaha, kumu uꞌuyaba yuha inda biria roꞌo nimala xxegwiha.
\v 17 Iki de nuha nna bisaꞌa xxattin nimala xxegwiha len nuilaha. Nianna tti ugíana bitilha lenna adí ka benne datiake nuilaha, delába ka benne gwa rudoke tisa ge nu ra Tata Do Yebáha lhe gwa rudaxxu tsitsike tisa nu unne Jesús‑ni lhe.
\c 13
\s Nimala barto biria lheꞌe indatooha
\p
\v 1 Nianna tti bodolaꞌati ttu nimala barto biriana lheꞌe indatooha, sia gasi ikini lhe tsii ka sitta ikini lhe. Lo ttu ttu ka sitta ikiniha tudhi ttu ttu ka corona nna ka lo xeaniha nna dia ka tisa rinne satsakana ge Tata Do Yebáha.
\v 2 Nimala barto belaꞌatiha ankana ttiba ttu beesi bintu nna ka niꞌa náni nna ankakana ttiba ka niꞌa ná osu. Roꞌoni nna ankana ttiba roꞌo beesi. Nimala xxegwi nu biria yebáha begwena nimala biria lheꞌe indatooha nu ra tsitsi leniha lhe begwena nuha xxila ata ridona rinnabianaha. Anágaba begwe xxattana nuha lo neda kini iyába nu inná nuha aka.
\v 3 Ttu ka iki nimala biria lheꞌe indatooha ruleꞌe uka ttu gwe xeni. Laxkala ruxunnibana geni gattina. Ttaka gwa beyakaba gwe geniha nna iyába ka benne seꞌe yiesi lo yu‑ni bebanabakanie ge nu ukaha. De nuha nna gwanalhake na.
\v 4 Nianna tti bedú xibike arlo nimala xxegwi biria yebáha, kumu de begwena nimala biria lheꞌe indatooha lo neda kini nu innaba nuha aka; bedúgaba xibike arlo nimala biria lheꞌe indatooha nna ráke:
\p ―Ni ttu benne do ra xxeni lebie tti ra xxeni le nimala biria lheꞌe indatoo‑ni lhe nigaba lanú ttu benne do eyaxanie ttilha lenie benne‑ni lhe.
\p
\v 5 Begwelhaba Tata Do Yebáha nimala biria lheꞌe indatooha kini benna ttaba lhe unne satsana gebie lhe, anágaba uxígabana lo neda ki uinna bixaba raka leni delo chua bixxi chupa (42) beo.
\v 6 Aníha‑ba benna, unne satsana ge Tata Do Yebáha, utuana balaꞌana gee lhe ge ata doeha lhe. Ge iyába ka nu seꞌe yebáha, utuagabana balaꞌana.
\v 7 Anágaba nna uxígabana lo neda kini itilha lenna ka benne chi ankake ge Tata Do Yebáha nna gwa udaabana loke lhe anágaba uxígabana lo neda kini innabiana iyá loo ka benne seꞌe lheꞌe iyába ka yiesi seꞌe yiesi lo yu‑ni lhe ka benne rinneke iyá looba tisa lhe.
\v 8 Iyába ka benneha udú xibike arlo nimala biria lheꞌe indatooha, delába ka benne attili ure yiesi lo yu‑niha labí dia láke lo libru ata dia lá ka benne aka benke ttu dia lii arlo Tata Do Yebáha. Libruha ankana ge benne anke Neru to bettikanaha.
\p
\v 9 Nu gwa sia nagani udo nagani ganna gwankana nu dika iyienini.
\q
\v 10 Nu gaꞌanna tsiana lisiyya, lisiyyaba tsia nuha
\q nna nu gaꞌanna uttikana na, gattiba nuha.
\m Laxkala ka benne chi ankake ge Tata Do Yebáha teeki tseꞌe tsitsike lhe abittu udhanke a tsia leke gebie lhe.
\s Nimala barto biria lhiꞌu yuha
\p
\v 11 Iki de nuha nna tti belaꞌati attu nimala barto biriana lhiꞌu yuha. Sia chupa sitta ikini ttiba sitta iki ttu neru to, ttaka rinnena ttiba rinne ttu nimala xxegwi.
\v 12 Nimala barto biria lheꞌe indatooha begwena nimala biria lhiꞌu yuha lo neda kini nuha nna uinna ki yiesi lo yu‑ni lhe iyába ka benne seꞌe loni udú xibike arlo nimala biria lheꞌe indatooha, delába nimala nu beyaka gwe xxeni geniha.
\v 13 Ruingaba nimala biria lhiꞌu yuha ka milagru xxeni arlo ka benne, axtaba ruinna kini iginni gi yiesi lo yu‑ni.
\v 14 Len ka milagru ruin nimala biria lhiꞌu yuha; delába ka milagru ka nu rugwelha nimala biria lheꞌe indatooha kini ruinna, len ka nuha ridí yiena ka benne seꞌe yiesi lo yu‑ni ki ria leke geni. Bengabana mandadu udoke ttu mentu ge nimala biria lheꞌe indatooha, delába nimala nu chi ukana gwe len espadaha nna gwa beyaka benbana.
\v 15 Uxígabana lo neda ki uinna kini aka ben mentu ge nimala biria lheꞌe indatooha lhe uinna ki inne nuha lhe. Anágaba nna bengabana kini ka benne abí udú xibike arlo mentuha, ka benneha gattibake.
\v 16 Bengabana mandadu ki kuꞌukana seña daka ná ben iyába ka benne seꞌe yiesi lo yu‑ni o si lo xeake lhe, sila ka benne abittu ra xxeni leke lhe sila ka benne ra xxeni leke lhe, anágaba sila ka benne tee geke lhe sila ka benne dii lhe, sila ka benne reki lhaake lhe sila ka benne toꞌoke lo sina ge xxanakeha lhe.
\v 17 Aníha benna kini ni ttu benne labí aka gebie goꞌe, nigaba uttoꞌe. Sunruba benne yuꞌu seña ata dia lá nimala biria lheꞌe indatooha o si númeru ge lániha, benneha‑ruba gwaka gebie goꞌe lhe uttoꞌobie lhe.
\p
\v 18 Nii riyasa elha yuu. Nu tee elha rieni geni teeki ebea liina númeru ge nimala biria lheꞌe indatooha, kumu númeru ge nimalaha raxxína na len númeru ge ttu benne. Nuní anka númeru geni, delába xxupa gayua gayuna bixxi xxupa (666).
\c 14
\s Benne anke Neru toha du lenie ttu gayua chua bixxi ttapa (144,000) mili ka benne
\p
\v 1 Nianna tti belaꞌati benne anke Neru toha due iki iꞌiya nu tee láni Sión. Du lenie ttu gayua chua bixxi ttapa mili ka benne, delába ka benne dia lábie lo xeake lhe dia lá Tata geeha lhe.
\v 2 Nianna tti biyienti tsiꞌi ttu benne unnebie yebáha, riyien tsiꞌe ttiba riyieni tti riginni idila inda lo ttu benunni lhe ttiba riyieni ata ruꞌu be tti ratsa idisa. Tsiꞌi biyientiha ankana ttiba riyien tsiꞌi ka arpa tti rudhesi ka benne loni.
\v 3 Ka benneha rulhake ttu leꞌa kubi arlo xxila ata do benne rinnabieha lhe arlo ttapa ka nu anka baniha, delába ka nu rulaꞌa ttiba ruleꞌe ka nimalaha lhe arlo ka benneolaha lhe. Leꞌa rulhakeha, ni ttú benne labí aka gebie udhetie ulhe nuha, sunruba ka benne ttu gayua chua bixxi ttapa miliha (144,000), sunruba ka benneha gwaka geke ulhake leꞌaha, delába ka benne chi bodilaa Tata Do Yebáha lagwi ge ka benne seꞌe yiesi lo yu‑ni.
\v 4 Ka benneha nuha lanú nuila useꞌe lenke. De nuha nna ankake nari xú. Lake nuha danalhake benne anke Neru toha gaxaba die. Ka benne‑ni nuha chi uláke lagwi ge ka benne seꞌe yiesi lo yu‑ni. Lake ankake attiba ttu úna sisiꞌa tte uxí Tata Do Yebáha lhe uxí benne anke Neru toha lhe.
\v 5 Labí gwen lasi unneke lhe labí tulha dáke arlo Tata Do Yebáha lhe.
\s Nuní rigixxiꞌa tsunna ka anjeliha
\p
\v 6 Nianna tti belaꞌati attu anjeli diabie ridúe gwetsáli, chebie ka tisa tse, delába ka tisa ka nu ttu dia liiba ixú nu ráke. Chebie ka tisaha kini kixxiꞌanie iyá looba ka benne seꞌe lheꞌe iyába ka yiesi seꞌe yiesi lo yu‑ni lhe ka benne rinneke iyá looba tisa lhe.
\v 7 Anjeliha rinnebie idisa, ree:
\p ―Gwaltsia lele Tata Do Yebáha lhe gwaluni kini inná xxeni lebie kumu nnanna chiba bisia sá unie elhuxtisi. Gwaludú xibile arloe. Benneha benie yebáha lhe yiesi lo yu‑ni lhe, bengabe indatooha lhe ka dina ata sia ka inda‑na lhe.
\p
\v 8 Nianna danalha anjeli berupaha nna ree:
\p ―Chiba useꞌe loo Babilonia nu ra xxeni leniha, kumu lana nuha beketina nu satsa ruinnaha ka benne seꞌe lheꞌe iyába ka yiesi seꞌe yiesi lo yu‑ni, delába beleꞌenna ke bedhá ikike Tata Do Yebáha nna bedú xibike arlo ka diosi, ka nu subi subi.
\p
\v 9 Nianna danalha anjeli beyonnaha nna unnebie idisa, ree:
\p ―Ganna nuxa udú xibini arlo nimala biria lheꞌe indatooha lhe arlo mentu geniha lhe, anágaba nna ganna dhielhana tsuꞌu seña ge nuha lo xeani o si náni,
\v 10 nuha dhígabana elha disa tsitsi ugwe Tata Do Yebáha na kumu de risaꞌa xxattanie, delába sate xxattana xxuana lo giha lhe xxuana lo azufreha itena arlo ka anjeli banani Tata Do Yebáha lhe arlo benne anke Neru toha lhe.
\v 11 Ka nu udú xibikani arlo nimalaha lhe arlo mentu geniha lhe iyába ka nu tsuꞌu seña ge lániha latikani, ka nuha ttu dia liiba tsapi seni gekani de ritekana. Labí edí lekani, rela resába uyúkana elha disa tsitsi.
\p
\v 12 Laxkala ka benne chi ankake ge Tata Do Yebáha; delába ka benne rudoke tisa ge nu rabie ke uinke lhe abittu rudhanke ria leke Jesús‑ni lhe, ka benneha teeki tseꞌe tsitsike lo neda geeha.
\p
\v 13 Nianna tti biyienti tsiꞌi ttu benne unnebie yebáha, ree:
\p ―Ben lo yetsi‑na: “Debá nnanna lhe nu si daa lhe, karubáru ka benne seꞌe lenke Jesucristuha ganna chi uttikeha.”
\p Espíritu ge Tata Do Yebáha nna bekabie ree:
\p ―Gwalí galá karubáruke, kini eyaka leke ge sina chi benke kumu nu tse benkeha nuha runna liina gasina uka elha ruin geke.
\s Chupa ka benne redíke lena tee yiesi lo yu‑ni
\p
\v 14 Nianna tti belaꞌati ttu bea sitsi túba ankana. Iki beaha nna do ttu benne ruleꞌebie ttiba ruleꞌe benne daa yebáha, yuꞌu ttu corona ge oru ikie lhe denie ttu iyyarsela ria tutsa roꞌoni.
\v 15 Lheꞌe yotu do yebáha nna biria ttu anjeli unnebie idisa ree benne do iki beaha:
\p ―Bedaxxu iyyarsela gelu‑na nna utaꞌa gwetsela kumu chiba bisia ura eyatsa xuaha, kumu lena tee yiesi lo yuha chiba anka ge benneha exúe.
\p
\v 16 Benne dobie iki beaha nna begaꞌabie iyyarsela geeha yiesi lo yuha nna bedíbie lena tee loni.
\p
\v 17 Nianna tti bederia attu anjeli lheꞌe yotu do yebáha, dengabe ttu iyyarsela ria tutsa roꞌoni
\v 18 nna biriagaba attu anjeli lo bekúha, delába benne bananie gi re lo bekuha. Benneha unnebie idisa ree benne den iyyarsela roꞌo tutsaha:
\p ―Bedaxxu iyyarsela tutsa gelu‑na nna uchú nu xixxi ge ka ya uva daa yiesi lo yuha kumu ka uvaha chiba raa ka nuha.
\p
\v 19 Nianna begaꞌa anjeliha iyyarsela geeha yiesi lo yu‑ni nna uchúbie nu xixxi ge ka ya uva daa loniha. Nianna tti bedelhe ka nuha lheꞌe ttu xieru xeni ata idí ka uvaha. Nu benieha raxxína na len elha disa tsitsi ugwe Tata Do Yebáha ka benne ben satsa.
\v 20 Ka uvaha bidíkana roꞌo yiesiha nna lheꞌe xieru ata bidíkanaha nna biria reni axtaba ttu yoo xeni ukana. Debá ata ruꞌu frenu roꞌo ka kwayu‑na risia reni ge yooha nna de biria idila reniha nna axtaba tsunna gayua (300) kilómetru bexunnina.
\c 15
\s Ka anjeliha denke gasi loo ka elha disa ka nu uyú ka benne
\p
\v 1 Nianna tti belaꞌati attu seña xxeni yebáha, ttu seña nu rebanabinriꞌi tti rilenriꞌi na. Lheꞌe señaha belaꞌati biria gasi ka anjeli denke gasi loo ka elha disa. Ka nuní ankakana elha disa ka nu chi daluxa ugwe Tata Do Yebáha ka benne, kumu len ka nuní chi ulhuxa loe elha riseꞌiki geeha.
\p
\v 2 Anágaba nna belaꞌati ttiba ttu indatoo, iyya gwanaba raka loni chixxina gi nna belaꞌagabati ka benne udaake beseꞌeke lo nimala biria lheꞌe indatooha lhe lo mentu geniha lhe. Ka benneha nuha abittu uxielhake tsia númeru ge lániha latike. Ka benneha seꞌeke roꞌo indatooha denke ka arpa begwe Tata Do Yebáha ke
\v 3 nna rulhake leꞌa bilha Moisés benne bixúe lo sina ge Tata Do Yebáha lhe rulhake leꞌa bilha benne anke Neru toha lhe, rulhake ráke:
\q ¡Xxeniba anka ka nu ruinlu, lhe rebanabintu tti rilentu kana
\q xa Tata Do Yebaa benne ankalu Xxanatu!
\q ¡Lu ankalu benne ra tsitsi xxatta lelu!
\q Nu dika ixúba ruinlu lhe ruinbalu nu ankaba gwalí lhe.
\q Lu ankalu benne rinnabialu ka yiesi seꞌe yiesi lo yu‑ni.
\q
\v 4 Iyá xeaba ka benne gatta elha rasi geke len lu xa Tata
\q lhe iyábake innáke: “Xxeniba ra lelu.”
\q Kumu sunruba lu ankalu benne nari xú, labí tulha ruinlu.
\q Ka benne seꞌe lheꞌe iyába ka yiesi seꞌe yiesi lo yu‑ni,
\q itake nna udú xibike arlolu,
\q kumu chiba bilákanie ruinbalu attiba ankaba geni.
\p
\v 5 Iki de nuha nna belaꞌati biyali yotu do yebáha, delába ata xua iꞌina yuꞌu ka tisa bodhaꞌan Tata Do Yebáha len ka benne Israel‑ni.
\v 6 Lheꞌe yotuha biria gasi ka anjeli denke gasi loo ka elha disa, delába ka elha disa uyú ka benne. Ka anjeliha nna nukuke ka lari sibi ankakana nari xú lhe raka lhalhaba lokani lhe. Roꞌo lastoke nna di ka yieti ankakana tagaꞌa ge oru.
\v 7 Ttu ka nu ttapa anka baniha, delába ka nu rulaꞌa ttiba ruleꞌe ka nimalaha, ttu ka nuha begwena ka anjeliha ttu ttu ka copa ge oru saa tíbakana elha riseꞌiki ge Tata Do Yebaa benne anka banie ttu dia liiha.
\v 8 Lheꞌe yotuha bisá tí seni ge nu xxeni ra le Tata Do Yebáha lhe nu tsitsi ra leeha lhe. Laxkala lanú aka geni gaꞌana lheꞌe yotuha axtaliba ganna chi gwate ka benne iyába gasi loo ka elha disa ka nu ugwe gasi ka anjeliha ke.
\c 16
\s Ka anjeliha denke gasi ka copa taꞌa elha riseꞌiki // ge Tata Do Yebáha lheꞌekani
\p
\v 1 Nianna tti biyienti tsiꞌi ttu benne unnebie idisa lheꞌe yotuha, ree gasi ka anjeliha:
\p ―Gwaltsia nna gwasalali elha riseꞌiki ge Tata Do Yebáha, ka nu taꞌa lheꞌe gasi ka copa denle‑na, yiesi lo yuha.\fig Seven Bowls of Wrath|69AP_Angels7bowls.tif|col|||(Apocalipsis 16:1-21)|16.1\fig*
\p
\v 2 Anjeli du sisiꞌa tteha nna birie belalie elha riseꞌiki taꞌa lheꞌe copa denieha yiesi lo yuha. Nianna tti biria tteba yiesu satsa lati ka benne. Ka yiesuha raka xxattakana. Ka nuha biriakana lati ka benne yuꞌu seña ge nimala biria lheꞌe indatooha lhe lati ka benne rudú xibike arlo mentu geniha lhe.
\p
\v 3 Anjeli berupaha nna belalie elha riseꞌiki taꞌa lheꞌe copa denieha lo indatooha. Indatooha nna beyakana ttiba reni ge ttu benne tti ruttikane nna iyába ka nu bani reki lheꞌe indatooha uttikana.
\p
\v 4 Anjeli beyonnaha nna belalie elha riseꞌiki taꞌa lheꞌe copa denieha lo ka yoo‑na lhe ata sia ka dina‑na lhe. Ka indaha nna beyakakana reni.
\v 5 Nianna tti biyienti unne anjeli bananie ka indaha, ree Tata Do Yebáha:
\p ―Kwinalu tti ridhelhalu elha disa‑ni, ruinbalu attiba ankaba geni xa Tata. Lu ankalu nari xú labí tulha ruinlu. Lu ankalu benne dolu nnanna lhe benne dolu ttuha‑li lhe.
\v 6 Kumu ka nu ruin satsaha belalikana reni, delába bettikana ka benne chi ankake gelu lhe bettikana ka profeta geluha lhe. De nuha nna nnanna lu rugiꞌalu kana reni ge nu benkanaha, kumu nunába ralhakana.
\p
\v 7 Nianna biyiengabati tsiꞌi ttu benne unnebie lo bekúha, ree:
\p ―Gwalí galá xa Tata Do Yebaa getu, benne ankalu Xxanatu lhe ra tsitsi xxatta lelu lhe, elha disa nu rugwelu ka benne, ankaba nuná nu gwalíba ralhake dhike lhe tti rugwelu ke elha disa‑na, ruinbalu attiba ankaba geni.
\p
\v 8 Anjeli betapaha nna belalie elha riseꞌiki taꞌa lheꞌe copa denieha lo tatubisa‑na nna Tata Do Yebáha begwelhe kini tatubisa‑na bettebie ka benne.
\v 9 Ka benneha biteke len gi lha ge tatubisa‑na, nianna tti uduloke rigeke iki Tata Do Yebaa benne udhelhe ka elha disaha. Ttaka lake nna labí bodúna ke lhe nigaba a unáke deki xxeniba ra le Tata Do Yebáha.
\p
\v 10 Anjeli gayuha nna belalie elha riseꞌiki taꞌa lheꞌe copa denieha lo xxila ata rido nimala rinnabiaha, delába nimala biria lheꞌe indatooha. Nianna bechulha tteba ata rinnabianaha. Ka benne seꞌe yiesi lo yu‑ni nna ro yaꞌaniba lhusake de ruyú xxattake elha disa.
\v 11 Nianna tti uteke iki Tata Diosi benne do yebáha, de rilá latike lhe de rakake yiesuha lhe. Ttaka lake nna labí bodúna ke ge nu ruinkeha.
\p
\v 12 Anjeli xxupaha nna belalie elha riseꞌiki taꞌa lheꞌe copa denieha lo yoo xeni nu tee láni yoo Eufrates. Inda tee lheꞌe yooha bebisiꞌana kini ka nu rinnabia seꞌe daka ata riria ubisa‑na iyali neda gekani kini ttekana.
\p
\v 13 Nianna tti belaꞌati tsunna ka espíritu satsa, belaꞌati kana attiba ruleꞌe ka bexxaꞌagwa‑na, beriakana roꞌo nimala xxegwiha lhe roꞌo nimala biria lheꞌe indatooha, lhe roꞌo attu nimala biria lhiꞌu yuha nu labí liina deki ankana profeta ge Tata Do Yebáha.
\v 14 Kumu lakana ankakana ka espíritu xxegwi ruinkana ka milagru lhe riakana ata seꞌe ka nu rinnabia ge iyába ka yiesi seꞌe itúba yiesi lo yu‑ni kini ottupakana ka nuha kini itilhakana ganna chi bisia sá tti uin Tata Do Yebaa benne ra tsitsi xxatta leha elhuxtisi ge ka benne.
\p
\v 15 Cristuha ree: “Gwaluyú gele, kumu neti esiaya attiba ttu ubana iyyaba lasi risiana. Karubáru ka benne seꞌeke ubeda neti ki abittu iyaxxu yaꞌake. Seꞌeke ttiba ttu nu seꞌe tenná gwa nukuba xoke, kini abittu tuntuke nna ettukanie.”
\p
\v 16 Ka espíritu satsaha nna bottupa ttebakana ka nu rinnabiaha, bottupakana ka nuha daka lo yu tee láni Armagedón. Armagedón ankana tisa hebreo.
\p
\v 17 Anjeli gasiha nna belalie elha riseꞌiki taꞌa lheꞌe copa denieha, bedelhe nuha lo be. Nianna tti biyieni tsiꞌi ttu benne unnebie idisa lheꞌe yotu do yebáha ata do Benne rinnabiaha, ree: “Chiba uluxa cha.”
\v 18 Nianna ugwapi tteba edha lhe utsa lhe uyuꞌu be lhe bixú xxatta idí lhe. Itúba seꞌe ka benne yiesi lo yu‑ni labí chi bixú tti bixú aníha.
\v 19 Babilonia yiesi nu ra xxeni leniha tsunna lhaꞌala uka nuha de bilaꞌa lheꞌeni lhe adí ka yiesi seꞌe yiesi lo yu‑ni nna ure tinnibakana. Tata Do Yebáha labí bixulhanie Babilonia yiesi ra xxeni leniha, sinuki begwebe na elha disa tsitsi de risaꞌa xxattanie.
\v 20 Nianna tti benitti loo ka yu seꞌe lagwi indatooha lhe benitti loogaba ka iꞌiya‑na lhe.
\v 21 Anágaba ure xxattagaba iyya biginnina iki ka benne. Ka iyya ureha ttu ttukana ankakana idiꞌi attiba chua (40) kilu. Ka benne biginni nuha ikike nna uteke iki Tata Do Yebáha de ure xxatta iyyaha, kumu ttu elha disa xxeni nuha biyúke.
\c 17
\s Nuila nu ruttoꞌo latiniha dona kweꞌe ttu nimala xiná
\p
\v 1 Ttu ka anjeliha, delába ttu ka benne gasi denke ka copaha, bisiabie ata duaha nna rabie neti:
\p ―Utá, kini uleꞌenia lu elha disa dhi nuila ruttoꞌo latiniha, delába nu anka yiesi ra xxeni leniha, nu re ata tee idila indaha.
\v 2 Lana nuha bisá ka nu rinnabia seꞌe yiesi lo yu‑ni nna ka benne seꞌe yiesi lo yu‑ni nna biyietike luesi nu satsa ruinnaha, delába bedhá ikike Tata Do Yebáha nna bedú xibike arlo ka diosi, ka nu subi subi.
\p
\v 3 Nianna tti bisia Espíritu ge Tata Do Yebáha latia nna belaꞌati deche anjeliha neti daka lo yu bisiha. Niha biláti ttu nuila dona kweꞌe ttu nimala xiná, sia gasi ikini nna sia tsii ka sitta ikini nna itúba latini dia ka tisa, ka tisa ka nu riguakana balaꞌana ge Tata Do Yebáha.
\v 4 Nuilaha nukuna ttu xo xiná chulha lhe ttu xo xiná tú lhe. Lati nuilaha raka galhaba ka oru lhe ka íyya ragalha to lhe ka perla lhe. Ka nuní daka xxattakana. Anágaba denna ttu copa ge oru saa tíba lheꞌe nuha nu satsa nu abittu raka uyú ka benne lhe saa tíba nuha nu satsa ruinna de risána nu subi subi.
\v 5 Lo xeani nna dia ttu láni, ttu lá nu labí yu ka benne bixa dienna innána. Aní ra nu dia lo xeaniha: “Babilonia nuila ra xxeni leni, lana nuní ankana ixná ka nuila ruttoꞌo latikani lhe len lana nuní udulo iyá nu satsa raka yiesi lo yu‑ni.”
\v 6 Belaꞌati nuilaha dusinna de uꞌuyana reni ge ka benne chi ankake ge Tata Do Yebáha lhe ge ka benne bettikana de utixxiꞌake ka tisa ge Jesús‑ni lhe. Tti belaꞌati nu rakaha, yalhá bebanati.
\v 7 Nianna tti ra anjeliha neti:
\p ―¿Beaka bebana xxattinlu? Neti kixxiꞌania lu bixa diani nu labí yu ka benne ge nuila‑na lhe ge nimala do nuila‑na kweꞌen‑na lhe, delába nimala nu sia gasi ikin‑na lhe sia tsii ka sitta ikin‑na lhe.
\v 8 Nimala beleꞌenlu‑na, lana nuná udona ttuha, ttaka nnanna lanúruna do; chi tte duna eriana lheꞌe belhaꞌa chulhaha kini tsiana ata tseꞌe loona. Ka benne seꞌe yiesi lo yu‑ni, delába ka benne attili ure yiesi lo yu‑niha labí dia láke lo libru ata dia lá ka benne aka benke ttu dia lii arlo Tata Do Yebáha, ka benneha ebanabakanie tti ilákanie nimalaha ganna chi edeaka xxena attu libe, delába nimala nu udo ttuha, ttaka nnanna nna lanúruna do.
\p
\v 9 ’Nii riyasa elha rieni kini tte denriꞌi nuní. Gasi ka bega iki nimalaha ankakana gasi ka iꞌiya. Iki ka nuha do nuilaha.
\v 10 Anágaba nna ankagabakana gasi ka nu rinnabia. Gayu ka nuha labíru rinnabiakana nnanna. Nu xxupaha nuha rinnabiana nnanna. Attu nuha nna si isialana innabiana, ttaka ganna chi bisia nuha, ttu sattitoruba innabiana.
\v 11 Nimala nu udo ttuha, nnanna nna lanúruna do, nuha akana nu xxunu innabia. Lana selana len ka nu gasiha. Iki de chi unnabianaha nna tsiana ata tseꞌe loona.
\p
\v 12 ’Tsii ka sitta iki nimala bilenlu‑na, ka nuná ankakana tsii ka nu innabia, ka nu labí chi udulokana innabiakana, ttaka ttu sattitoruba dhíkana lo neda ki innabiakana len nimalaha.
\v 13 Tsii ka nu innabiaha chi bokinni ikikani utekana len nimalaha lo neda rapakanaha lhe nu tsitsi ra lekaniha lhe.
\v 14 Ttilha lenkana benne anke Neru toha, ttaka benne anke Neru toha dhaabe lokani kumu anke Xxana ka nu ra xxeni lekani lhe anke Nu Loni ge iyá ka nu rinnabia lhe. Dhaabe lokani itupa lenie ka benne gebie, delába ka benne chi biyaxike lhe chi biriesike lhe labí rudhanke a ria leke benne anke Neru toha.
\p
\v 15 Nianna raru anjeliha neti:
\p ―Inda bilenlu‑na, delába inda nu do nuila ruttoꞌo latin‑na loin‑na, nuná ankana ka benne seꞌe yiesi lo yu‑ni, delába iyá loo ka benne seꞌe lheꞌe iyába ka yiesi seꞌe yiesi lo yu‑ni lhe ka benne rinneke iyá looba tisa lhe.
\v 16 Tsii ka sitta iki bilenlu‑na lhe nimala‑na lhe, labí aka uyúkana nuila ruttoꞌo latin‑na, sun labana udúkana, uttuntubakana na nna gobakana bela geni lhe uttebakana na lo gi lhe.
\v 17 Tata Do Yebáha‑ba chi benie ki uinkana nu rabie, benie ki bokinni ikikani nna utekana lo neda rapakanaha len nimalaha ki innabiana axtaliba ganna chi gwado tisa ge nu ra Tata Do Yebáha.
\v 18 Nuila bilenlu‑na nna ankana yiesi nu ra xxeni leni, delába ankana yiesi nu rinnabiana ka nu rinnabia seꞌe lheꞌe adí ka yiesi seꞌe yiesi lo yu‑ni.
\c 18
\s Biseꞌe looba yiesi Babiloniaha
\p
\v 1 Iki de nuha nna tti belaꞌati attu anjeli re tsitsi lebie ugwadie yebáha dabie nna xien charába beleꞌe bedani nu xxeni ra leeha yiesi lo yu‑ni
\v 2 nna unnebie idisa, ree:
\p ―¡Chiba biginni Babiloniaha, delába yiesi nu ra xxeni leniha! Nnanna nna chiba beyakana lisi ka nu xxegwiha lhe chiba beyakana ata retaꞌa ka espíritu satsaha lhe ata retaꞌa iyába ka nu sia xxilakani, delába ka nu ankakana tsiga arlo Tata Do Yebáha lhe anágaba rixxini ka benne kana.
\v 3 Kumu ka benne seꞌe lheꞌe iyába ka yiesi seꞌe yiesi lo yu‑ni, chiba biyietike ruinke nu satsa ruin yiesi ra xxeni leniha, delába chi bedhá ikike Tata Do Yebáha nna bedú xibike arlo ka diosi ka nu subi subi. Lhe anágaba ka nu rinnabia seꞌe yiesi lo yu‑ni bengabakana nu satsa len yiesiha nna ka nu reki gwettoꞌoha nna chi utta xxatta gekani de ruttoꞌokana len yiesi Babiloniaha iyába nu raka leni.
\p
\v 4 Delola nna biyienti tsiꞌi attu benne yebáha unnebie, ree:
\p ―Gwaliria lheꞌe yiesi‑na, lebiꞌi ka benne chi ankale kia, kini abittu iselale uinle nu satsa ruin yiesi‑na nna satele ka elha disa ka nu satena‑na.
\v 5 Kumu chiba ugwani xxatta tulha ruin yiesi‑na nna nu ruinnaha chiba bisinna axta yebáha. Tata Do Yebáha nna chi bebeki lebie ugwebie na elha disa ge nu satsa ruinnaha.
\v 6 Gwalodeki geni, gwaludhaka na attiba bedhakana leha. Chupa‑la luesi nuha, gwalodeki geni. Nu ilhá utaꞌana begiꞌana leha, adírula ilhá gwaleyoin nuha gwalogiꞌa na.
\v 7 Ttiba benna ttaba lhe utitta tábana nu tee geniha, aníha‑gaba gwalugwe na elha disa tsitsi lhe gwaluni kini eleni xxattinna. Kumu yiesiha lhiꞌu leni rulaba leni rakinna: “Neti ttiba ttu nuila rinnabia ankaa doa. Labí ankaa nuila bidabi lhe nigaba kwesia de elenti.”
\v 8 De nuha nna sun lheꞌe ttu sába isia elha disa ge yiesiha: isia elhutti geni lhe eleninna lhe gattina ubina lhe itena lo giha lhe, kumu Tata Do Yebaa benne anke Xxanariꞌiha unie elhuxtisi geni kumu tsitsi ra le benneha.
\p
\v 9 Ka nu rinnabia seꞌe yiesi lo yu‑ni, ka nu bisákana naha lhe bedí baakana lenna iyába nu uka lekani, ka nuha kwesikana lhe elenkinna tti ilákinna seni geni itena lo giha.
\v 10 Idittuliba tseꞌekana de elha rasi ge nu sate yiesiha, nianna tti innákana:
\p ―¡Gwalíchiru lelu xa Babilonia nu ra xxeni lelu, lhe ra tsitsi lelu lhe! ¡Karusiꞌirulu! Ttu nnelaba bisia elha disa tsitsi gelu.
\p
\v 11 Ka nu reki gwerixxi seꞌe yiesi lo yu‑ni nna kwesigabakana lhe elenigabakinna ge yiesiha kumu lanúru goꞌona nu ruttoꞌokanaha.
\v 12 Ruttoꞌokana oru lhe plata lhe ka íyya ragalha ka nu daka xxatta lhe ka perla lhe. Anágaba ruttoꞌogabakana ka lari tse ka nu tee lákani lino lhe seda lhe ka lari xiná chulha lhe ka nu xiná tú lhe. Ruttoꞌogabakana iyá looba ka yaga rure ixixxi lhe iyába nu anka ge marfíl lhe nu anka ge yaga lhe nu anka ge bronce lhe mármol lhe.
\v 13 Anágaba nna ruttoꞌogabakana canela lhe yala lhe iyá looba nu rure ixixxi lhe vinu lhe seti lhe yiedi lhe xua lhe ka kuꞌuna lhe ka neru lhe ka kwayu lhe ka carreta, lhe anágaba axtala ka benne ruttoꞌokana.
\p
\v 14 Nianna tti gákana yiesiha:
\p ―¡Iyába nu tse ridá leluha, garua daa nuha! ¡Ttu tsaba chi bennittilu ka nuha lhe iyába ka nu daka xxatta ruꞌu leluha, ttu tsaba labíru dhilu ka nuha!
\p
\v 15 Ka nu ruttoꞌoha, ka nu chi tee xxatta gekaniha de ruttoꞌokana lhe de roꞌokana len yiesiha, idittuliba tseꞌekana de gasikinna ge elha disa tsitsi sate yiesiha nna kwesikana lhe elenkinna lhe.
\v 16 Nianna tti innákana:
\p ―¡Gwalíchiru le yiesi ra xxeni len‑na, yiesi nu rukuna ka lari tse, lhe ka lari xiná chulha lhe ka lari xiná tú lhe! ¡Lana raka galhaba latini ka oru, ka íyya ragalha ka nu daka xxatta lhe ka perla lhe! ¡Karusiꞌiruna!
\v 17 ¡Ttu nnelaba biseꞌe lo iyá elha tse tee geniha!
\p Ka nu rinnabia lheꞌe ka barcuha lhe ka nu riben sina lheꞌe ka nuha lhe, anágaba ka nu redá lheꞌe ka barcuha lhe iyába ka nu riben sina lo indatooha lhe, iyába ka nuha idittuliba tseꞌekana
\v 18 ilákinna tsapi seni ge yiesiha ritena. Nianna innekana idisa, innákana:
\p ―¡Lanúru attu yiesi xxeni luesi nuná re!
\p
\v 19 Nianna tti begadi tee ikikani nna ribesikana idisa lhe relenkinna, rákana:
\p ―¡Gwalíchiru le yiesi ra xxeni len‑na! ¡Karusiꞌiruna! De tee geni nna iyába ka nu seꞌe barcu gekinna, utta gekani de ugwekikana gwerixxi lenna. Nnanna nna ttu nnelaba chi biseꞌe loona.
\p
\v 20 ’Gwaledeakinle geni, lebiꞌi ka nu seꞌele yebáha, lhe gwaladeakinle, lebiꞌi ka nu chi ankale ge Tata Do Yebáha, lhe anágaba lebiꞌi ka apóstol lhe ka profeta lhe gwaledeakinle kumu gele nuná chi bokixa Tata Do Yebáha yiesi‑na tti begwebie na elha disa‑na.
\p
\v 21 Nianna ttu anjeli ra xxeni lebie bedaxxue ttu íyya. Ankana ttiba ttu íyya xxeni ge mulinu nna bekinnie nuha lheꞌe indatooha nna rabie:
\p ―Aníba iginni Babilonia yiesi nu ra xxeni leniha, nna ttu tsaba tseꞌe loona labíru eselana.
\v 22 Xa Babilonia, lo ka neda gelu‑na labíru iyieni ulha ka benne lhe nigaba udhesike lo ka arpa, nigaba ukwesike ka flauta lhe nigaba ka trompeta lhe. Lanúrugaba ka nu runi iyá looba sina tseꞌeru, lhe nigaba iyieniru tsiꞌi ka mulinu kwenkana gwesiꞌi xuxtila lhe.
\v 23 Ka rela‑na labíru uden xiani ge ka gi lo ka neda gelu‑na, lhe nigaba iyienru elha gwedeaka lasi ge ka dhaꞌa raka lagwi gelu‑na. Aníha aka kumu ka nu lheꞌesi geluha ka nu reki gwettoꞌoha, ka nuha ukakana nu uná xxeni lekani yiesi lo yu‑ni nna bixúkinna elha gwesá gelu‑na ki uxí yiekana ka benne seꞌe lheꞌe iyába ka yiesi seꞌe yiesi lo yu‑ni.
\v 24 Lo ka neda gelu‑na bitabi reni ge ka profeta ge Tata Do Yebáha lhe bitabi reni ge ka benne chi ankake gebie lhe anágaba bitabigaba reni ge iyába ka benne chi bettikana yiesi lo yu‑ni.
\c 19
\s Ka benne seꞌe yebáha rulhake ge Tata Do Yebáha
\p
\v 1 Iki de nuha nna tti biyienti tsiꞌi ixe juisiru ka benne seꞌeke yebáha, rinneke idisa, ráke:
\q ¡Aleluya!
\q Tata Do Yebaa getu, kwinalu rodilálu riꞌitu lhe ra xxeni lelu lhe,
\q anágaba ankalu benne ra tsitsi lelu lhe.
\q
\v 2 Lu ruinlu elhuxtisi ttiba ankaba geni lhe nu ankaba gwalí lhe,
\q kumu chiba berixxi bekinnilu nuila ra xxeni leni nu ruttoꞌo latiniha, delába yiesi Babiloniaha.
\q Lana len nu satsa bennaha bennittina ka benne seꞌe yiesi lo yuha, delába beleꞌenna ke ki bedhá ikike lu nna bedú xibike arlo ka diosi ka nu subi subi,
\q lhe chigaba bokixalu na reni ge ka benne bixúke lo sina geluha, delába ka benne bettinaha.
\p
\v 3 Nianna tti bedennee ka benne seꞌe yebáha attu libe, ráke:
\p ―¡Aleluya! Yiesiha ttu dia liiba dho seni geni itena.
\p
\v 4 Ttaperua ka benneolaha lhe ttapa ka nu anka baniha, delába ka nu rulaꞌa ttiba ruleꞌe ka nimalaha, ka benneha lhe ka nuha lhe bettudhi loke lo yu nna betsá loke arlo Tata Do Yebaa benne dobie lo xxila ata rinnabieha, nianna ráke:
\p ―¡Amén! ¡Aleluya!
\p
\v 5 Nianna ata du xxila rido Tata Do Yebáha rinnabie, niha biria tsiꞌi ttu benne rinnebie ree:
\q Iyále ka benne rixúle lo sina ge Tata Do Yebaa geriꞌi‑ni,
\q lhe iyále ka nu tee elha rasi gele lenie lhe,
\q sila ankale nu ra xxeni leni lhe sila ankale nu abittu ra xxeni leni lhe,
\q gwalinne gwalinná: ¡Xxeni ra le Tata Do Yebaa geriꞌi‑ni!
\p
\v 6 Biyiengabati tsiꞌi attu benne unnebie. Riyien tsiꞌibie attiba riyieni tti rinne ixe juisiru ka benne lhe ttiba riyieni tti riginni idila inda lo ttu benunni lhe. Anágaba riyiengaba tsiꞌe ttiba riyieni tti ruꞌu be tti ratsa xxatta. Benne unneeha, ree:
\q ¡Aleluya!
\q Kumu Tata Do Yebaa geriꞌi‑ni, benne‑ni ra tsitsi xxatta lebie lhe benne‑ni anke Xxanariꞌi lhe,
\q benne‑ni chi rinnabie.
\q
\v 7 Odú itta leriꞌi lhe edeakinriꞌi lhe, anágaba innágabariꞌi: “Xxeni ra le Tata Do Yebaa geriꞌi‑ni”,
\q kumu chiba bisia sá utsá ná benne anke Neru to‑ni.
\q Nuila dhieha chiba du tse nuha.
\q
\v 8 Chiba uxí nuha lo neda kini ukuna ttu xo tseru,
\q lhe ttu nu raka galha loni lhe ttu nu nari xú lhe.
\q Xo sibi uku nuilaha raxxína na len nu tse ruin ka benne chi ankake ge Tata Do Yebaa geriꞌi‑ni.
\p
\v 9 Nianna tti ra anjeliha neti:
\p ―Ben lo yetsi uná: “Karubáru ka benne biyaxike ki goke elho tse tee lo dhaꞌa ge benne anke Neru to‑ni.”
\p Nianna raru anjeliha neti:
\p ―Ka tisa rigixxiꞌiaya‑ni gwalíga ankake ge Tata Do Yebáha.
\p
\v 10 Nianna tti bedú xibia arloe ki utsá loa bie, ttaka benneha nna ree neti:
\p ―¡Bittu uinlu aná! Arlo Tata Do Yebáha‑la bedú xibilu, kumu neti ankagabaa benne rixúa lo sina ge Tata Do Yebáha ttiba lu lhe ttiba adíru ka benne raka betsi to geluha lhe, delába ka benne rudaxxu tsitsike nu utixxiꞌa Jesús‑ni. Kumu ka tisa utixxiꞌa Jesús‑ni, ka benneha nuha rudaxxu niꞌa ka benne kini rigixxiꞌake nu ra Tata Do Yebáha.
\s Benne doe kweꞌe kwayu sitsiha
\p
\v 11 Nianna tti biláti du yali yebáha nna belaꞌati uka xxe du ttu kwayu sitsi. Benne doe kweꞌe nuha tee lábie Benne Abittu Runnitti Tisa Gebie lhe Benne Runi Nu Anka Gwalí lhe. Benneha ritilhe attiba ankaba geni lhe runie elhuxtisi attiba ankaba geni lhe.
\v 12 Ka iyya loeha ankakana ttiba belha ge gi nna ikie nna yuꞌu ixe ka corona. Lo xeabie nna dia lá ttu benne, ttu lá nu lanú nu yuna bixa dien nuha innána, sunruba labie gwa yue.
\v 13 Ka xo nuku benneha anka xxattakana reni nna tee lábie Tisa Ge Tata Do Yebáha.
\v 14 Ka benne seꞌe yebáha nna danalhake benneha siake kweꞌe ka kwayu sitsi, diake ttiba ka nu dia utilha. Ka lari nuku ka benneha ankakana tseru lhe sitsi tú lhe nari xú lhe.
\v 15 Roꞌo benne do kweꞌe kwayuha riria ttu espada ria tutsa roꞌoni, kini len nuha unie gwe ka benne seꞌe lheꞌe ka yiesi seꞌe itúba yiesi lo yu‑ni nna tsitsiba innabie kana. Benneha udhake kana attiba ttu nu ridhí uva lheꞌe xieru ata ridí ka uva, delába ugwebie kana elha disa tsitsi. Elha disa ugwebie kanaha ankana elha riseꞌiki ge Tata Do Yebaa benne ra tsitsi xxatta leha.
\v 16 Lo lari nukueha nna daka lo xiche dia ra: “Nu Loni Ge Iyá Ka Nu Rinnabia lhe Xxana Ka Nu Ra Xxeni Lekani lhe.” Ka tisa‑ni nuní anka lábie.
\p
\v 17 Nianna tti belaꞌati ttu anjeli dubie lo tatubisa‑na nna unnebie idisa uxie iyába ka nu sia xxilakani reki gwetsá ka nu rokana bela. Ree ka nuha:
\p ―¡Gwaltá, gwalitupa ki gole elho tse rute Tata Do Yebáha!
\v 18 Gwaltá kini gole bela ge ka nu rinnabia‑na lhe bela ge ka nu rineru arlo adí ka soldadu‑na lhe. Gwaltá ki gole bela ge ka nu ra tsitsi lekinna lhe bela ge ka kwayu‑na lhe anágaba bela ge ka nu ribiakana kweꞌe ka nuná lhe. Gwaltá kini gole bela ge iyába ka benne: sila ka benne toꞌoke lo sina ge ka xxanake o sila ankake benne reki lhaa lhe sila ankake ka nu abittu ra xxeni lekani lhe sila ankake ka nu ra xxeni lekani lhe.
\p
\v 19 Nianna tti belaꞌati nimala biria lheꞌe indatooha lhe ka nu rinnabia seꞌe yiesi lo yu‑ni seꞌekana len ka soldadu gekaniha. Ka nuha chi tupakana ki itilha lenkana benne doe kweꞌe kwayuha lhe ka benne geeha lhe.
\v 20 Ttaka nimala biria lheꞌe indatooha biyaxxubana itupa lenna nimala biria lhiꞌu yuha, delába nimala nu labí liinna ankana profeta ge Tata Do Yebáha, nu bengabana ixe loo ka milagru arlo nimala biria lheꞌe indatooha. Len ka milagru ben nimala biria lhiꞌu yuha uxí yiena ka benne ki uxielhake uyuꞌu lo xeake seña ge nimala biria lheꞌe indatooha lhe uxí yiena ke kini bedú xibike arlo mentu ge nimala biria lheꞌe indatooha lhe. Ixpaba ka nimalaha anka benbakana biruꞌunakana lo gi bartoha ata rite azufreha.
\v 21 Adí ka benne danalhake nimala biria lheꞌe indatooha uttibake len espada riria roꞌo benne doe kweꞌe kwayuha nna ka nu sia xxilakani reki gwetsáha nna beyiela súbakinna utokana bela ge ka benne betti benneha len espada geeha.
\c 20
\s Nu sate ka benne delo ttu mili ida
\p
\v 1 Nianna tti belaꞌati ttu anjeli ugwadie dabie yebáha denie yagwi ge belhaꞌa chulhaha lhe denie ttu cadena xeni.
\v 2 Bedaxxue nimala xxegwiha, delába belha ugweki ttuha nu tee láni Satanás lhe nu tee láni nu xxegwi lhe, nianna bexxike na ttu mili ida.
\v 3 Bedelhe na lheꞌe belhaꞌa chulhaha nna bedheabie roꞌo nuha, nianna tti bedeki tsitsie nuha kini abitturu tseki nimalaha dhi yiena ka benne seꞌe lheꞌe ka yiesi seꞌe yiesi lo yu‑ni. Axtaliba ganna chi gwadona ttu mili idaha, laꞌanialiba nna teeki eriana eyeki lhaana attu satti to.\fig Dragon into Abyss|70AP_Angel.dragon.tif|col|||(Apocalipsis 20:1-3)|20.3\fig*
\p
\v 4 Nianna tti belaꞌati ka xxila ata riseꞌe ka benne rinnabiake. Lo ka nuha seꞌe ka benne chi uxíke lo neda kini uinke elhuxtisi. Bilágabati ka benne urú bega ikike de utixxiꞌake ge Jesús‑ni lhe de utixxiꞌake ka tisa ge Tata Do Yebáha lhe. Ka benneha nuha labí bedú xibike arlo nimala biria lheꞌe indatooha lhe nigaba arlo mentu geniha lhe, nigaba a uxielhake tsuꞌu seña ge nuha lo xeake lhe nigaba náke lhe. Ka benneha nuha belaꞌati beyaka benke nna unnabiake len Cristuha lo ttu mili ida.
\v 5 Lake nuha beyaka benke sisiꞌa tte lo elhuttiha. Adí ka benne chi uttiha nna labí beyaka ben tteke. Gwadolibana ttu mili idaha nna tti beyaka benke.
\v 6 Karubáru ka benne eyadha benke sisiꞌa tte lo elhuttiha, kumu lake nuha ankake ka benne chi riesini Tata Do Yebáha ki akake gebie. Ka benneha labíru gattike nu berupa libeha, sinuki akalake bixxudi kini ixúke arlo Tata Do Yebáha lhe arlo Cristuha lhe. Anágaba innabiagabake len Cristuha ttu mili ida.
\s Nu xxegwiha biruꞌunana lo giha
\p
\v 7 Ganna chi gwadona ttu mili idaha, nu xxegwiha eyeki lhaana nna eriana lheꞌe belhaꞌa ata yayanaha,
\v 8 nianna tsekina dhi yiena ka benne seꞌe lheꞌe ka yiesi seꞌe itúba yiesi lo yu‑ni. Iyába ka yiesiha tee lákani Gog lhe Magog lhe. Lana ottupana ka benne ge ka yiesiha ki itilhake. Ixe juisiru ka benneha raka. Rakake ixe attiba yuxi re roꞌo indatoo, labí aka geriꞌi ibabinriꞌi ke.
\v 9 Ka benneha biriake itúba yiesi lo yu‑ni nna bebiꞌike abiꞌiba kweꞌe ata seꞌe ka benne chi ankake ge Tata Do Yebáha lhe bebiꞌike kweꞌe yiesi nu rakanie geniha lhe. Ttaka tti ugwadi gi daa yebáha nna bettebana ka benneha.
\v 10 Nianna nu xxegwiha, delába nu uxí yiena ka benneha len gwen lasi geniha, biruꞌunabana lo gi bartoha ata rite azufreha, atagaba biruꞌuna nimala biria lheꞌe indatooha lhe nimala biria lhiꞌu yuha, delába nimala nu labí liinna ankana profeta ge Tata Do Yebáha. Niha satíaba uyúkana elha disa tsitsi rela lhe resá lhe.
\s Ka benne chi uttiha beso duke arlo Tata Do Yebáha
\p
\v 11 Iki de nuha nna belaꞌati ttu xxila sitsi xeni. Lo nuha do ttu benne rinnabie. Yiesi lo yu‑ni lhe yebáha lhe lanúrukana bilá, benitti loobakana arloe.
\v 12 Bilágabati ka benne chi uttiha, ka benne ra xxeni leke lhe ka benne abittu ra xxeni leke lhe, seꞌeke arlo xxila ata do Tata Do Yebáha rinnabie. Nianna tti biyali lo ka libru seꞌe ata doeha nna biyaligaba lo attu libru, delába libru ata dia lá ka benne aka benke ttu dia lii arlo Tata Do Yebáha. Ka benne yattiha nna ukaba elhuxtisi geke attiba raba lo ka libruha kua nu benba ttu ttuke.
\v 13 Indatooha botebana ka benne yatti utti lheꞌeniha. Elhuttiha lhe belhaꞌa chulhaha lhe botegabakana ka benne yatti gekaniha nna ttu ttu ka benne yattiha ukaba elhuxtisi geke kua nu benbake.
\v 14 Nianna elhuttiha lhe belhaꞌa chulhaha lhe biruꞌunabakana diakana lo gi bartoha. Elha disa nu uyúkana lo giha, nuha ankana elhutti berupa.
\v 15 Iyába ka benne ata abittu besela láke lo libru ata dia lá ka benne aka benke ttu dia lii arlo Tata Do Yebáha, ka benneha biruꞌunagabake diake lo gi bartoha.
\c 21
\s Jerusalén kubi nu daa yebáha
\p
\v 1 Iki de nuha nna tti belaꞌati attu yebaa kubi lhe attu yiesi lo yu kubi lhe. Kumu yebaa nu ure sisiꞌa tteha lhe yiesi lo yu nu ure sisiꞌa tteha lhe, chiba benitti loo ka nuha lhe anágaba indatooha, labíru nuha re.
\v 2 Bilágabati Jerusalén kubiha, delába yiesi leꞌa ge Tata Do Yebáha, biriana yebáha ata doeha nna ugwadina dana. Yiesiha chi bedú tsena ttiba ttu nuila chi bedú tsena kini dhina nubiyú.
\v 3 Nianna tti biyienti biria tsiꞌi ttu benne ata du xxila ata rido benne rinnabiaha. Benne biyien tsiꞌeha, unnebie idisa, ree:
\p ―Gwalulanniruga. Ne Tata Do Yebáha doe lagwi ge ka benne. Labie dhoe lenke nna lake nna akake gebie nna kwinaba labie dhue lenke ake Diosi geke.
\v 4 Labie unie ki abitturu kwesike lhe abitturu gattike lhe, nigaba elenkanie lhe nigaba uyúruke elha disa ge nu ratekeha. Kumu nu gwateke ttuha chiba ute nuha.
\p
\v 5 Benne doe lo xxila ata rinnabieha nna ree:
\p ―Neti kubiba chi reyonia iyá tte nu seꞌe.
\p Lhe rágabe:
\p ―Ben lo yetsi nu rinnea‑ni, kumu ka tisa‑ni ankakana nu gwa dika uxxen le ka benne ge nu rákana lhe ankakana ka tisa rinne nu anka gwalí lhe.
\p
\v 6 Iki de nuha nna rabie neti:
\p ―Chiba uluxa chá. Neti ankaa benne riduloa lhe ankaa benne rulhuxa looa lhe. Nu ebisina inda, neti kwentaba ugwea na inda iꞌiyana. Inda nu ugwea na iꞌiyanaha, nuha uinna kini aka benna ttu dia lii.
\v 7 Nu dhaana dhu tsitsina lo neda kia, nuha ralhana edí baana iyá nu tse. Neti nna akaa Diosi geni, lana nna akana xiꞌinia.
\v 8 Ttaka ka nu reyadi gaa a reyaxakinna lhe ka nu labí ria lekani neti, lhe anágaba ka nu ruin xxatta satsa lhe ka nu ruin elhutti lhe, anágaba ka nu risákana nu subi subi lhe ka nu ruin elha gwesá lhe, anágaba ka nu rudú xibikani arlo ka nu labí gwalí ankakana diosi lhe iyá ka nu gwen lasi lhe, iyá ka nuní ralhakana tsiakana lo gi bartoha ata rite azufreha. Elha disa uyúkanaha ankana elhutti berupa.
\p
\v 9 Nianna tti ubiga ttu ka anjeliha, delába ttu ka benne gasiha, ttu ka benne denke gasi ka copa taꞌa gasi ka elha disa lheꞌekani. Ka elha disa denkeha, ankakana ka elha disa chi daluxa ugweke ka benne. Anjeliha bisiabie ata dua nna rabie neti:
\p ―Utá ki uleꞌenia lu nuila utsá nániha, nuila ge benne anke Neru toha.
\p
\v 10 Nianna tti bisia Espíritu ge Tata Do Yebáha latia nna belaꞌati dechebie neti iki ttu iꞌiya xeni. Niha beleꞌenie neti yiesi leꞌa ge Tata Do Yebáha, delába Jerusalén nu biria yebáha ata do Tata Do Yebáha nna ugwadina dana.
\v 11 Yiesiha raka galhabana chena nu xxeni ra le Tata Do Yebáha. Raka galhabana ttiba ttu íyya daka xxatta. Rilá saaba lheꞌeni ttiba rilá lheꞌe íyya ragalha nu tee láni jaspe.
\v 12 Yiesiha abiꞌiba kweꞌeni rilhi ttu deꞌe xeni, ttu deꞌe yadha xxatta. Deꞌeha sia tsiꞌinu (12) ka puerta geni. Roꞌo ttu ttu ka puertaha seꞌe ttu ttu ka anjeli. Lo ttu ttu ka puertaha dia lá ttu ttu kwe ka benne datiake benne tee lábie Israel.
\v 13 Daka ata riria ubisa‑na seꞌe tsunna ka puertaha, daka lia nna seꞌe a tsunnakana, daka rre nna dedeseꞌe a tsunnakana, daka ata radi ubisa‑na nna dedeseꞌe a tsunnakana.
\v 14 Xan deꞌe yeki abiꞌiba kweꞌe yiesiha yuꞌu tsiꞌinu (12) ka íyya cimientu. Lo ttu ttu ka íyyaha dia lá ttu ttu ka benne tsiꞌinu ukake apóstol, delába ka benne utixxiꞌake ka tisa ge benne anke Neru toha.
\p
\v 15 Anjeli rinne len netiha denie ttu yaga nu rixúnie ki rurixxibie. Yagaha ankana ge oru. Nuha ixúnie ki urixxibiabie yiesiha lhe ka puerta geniha lhe urixxibiagabe deꞌe rilhi kweꞌeniha lhe.
\v 16 Yiesiha ankana cuadradu tí, turoꞌoba ankana de littuni lhe turoꞌoba ankana de lilhaga lhe. Anjeliha berixxibiabie yiesiha len yaga denieha. Yiesiha yuꞌuna chupa mili bixxi chupa gayua (2200) kilómetru, ttúba re nuha de littuni lhe de lilhaga lhe de lidhú‑ni lhe.
\v 17 Delola nna tti berixxibiabie ttixa yadha deꞌe rilhi kweꞌe yiesiha. Nuha nna yadhana ttiba gayuna bixxi gayu (65) metru. Medida nu rixúni ka benne seꞌe yiesi lo yu‑niba bixúni anjeliha kini berixxibiabie deꞌeha.
\p
\v 18 Deꞌe rilhi kweꞌe yiesiha ankana ge íyya ragalha nu tee láni jaspe. Yiesiha nna ankana tagaꞌa ge oru, rilá saaba lheꞌeni ttiba rilá lheꞌe ttu iyya gwana.
\v 19 Ka íyya yuꞌu xan deꞌe rilhi kweꞌe yiesiha iyá looba ankakana:
\q Íyya nu yuꞌu sisiꞌa tteha ankana íyya ragalha yadi xiná lheꞌeni nna tee láni jaspe.
\q Nu berupaha nna ankana azul ragalha tú nna tee láni zafiro.
\q Nu beyonnaha nna ankana ttu íyya kuchuchi nna tee láni ágata.
\q Nu betapaha nna ankana ttu íyya yaꞌa nu tee láni esmeralda.
\q
\v 20 Íyya nu gayuha nna ankana ttu íyya yatsi tee yadhi latini nna tee láni ónice.
\q Nu xxupaha nna ankakana ttu íyya xiná lii nna tee láni cornalina.
\q Nu gasiha nna ankana íyya yatsi selana yaꞌa nna tee láni crisólito.
\q Nu xxunuha nna ankana íyya yaꞌa chulha nna tee láni berilo.
\q Nu jaaha nna tee láni topacio nna ankakana ttu íyya ragalha bede.
\q Nu tsiiha nna ankana ttu íyya yaꞌa sitsi tá nna tee láni crisópaso.
\q Nu sineaha (11) nna ankana ttu íyya bede xiná nna tee láni jacinto.
\q Nu tsiꞌinuha (12) nna ankana muradu nna tee láni amatista.
\m
\v 21 Iyába tsiꞌinu (12) ka puertaha ankakana tsiꞌinu ka perla. Kua ttu ttu ka puertaha ankakana ttu ttu perla nna neda tee lheꞌe yiesiha nna ankana tagaꞌa ge oru, ttiba ttu iyya gwana rilá saaba lheꞌeni.
\p
\v 22 Niru ttu yotu labí belaꞌati lheꞌe yiesiha kumu Tata Do Yebaa benne anke Xxanariꞌiha lhe ra tsitsi xxatta lebie lhe, labe lhe benne anke Neru toha lhe labake ankake yotu ge yiesiha.
\v 23 Yiesiha labí riyasinna xiani ge tatubisa‑na, nigaba ge nanto beo‑na, kumu nu xxeni ra le Tata Do Yebáha, nuha‑ba rudenna ge yiesiha. Anágaba benne anke Neru toha, labe anke xiani geni.
\v 24 Ka benne seꞌe lheꞌe ka yiesi seꞌe yiesi lo yu‑ni tsekike lheꞌe xiani ruꞌu lheꞌe yiesiha nna ka nu rinnabia seꞌe yiesi lo yu‑ni sadhaꞌankana nu xxeni ra lekaniha len yiesiha.
\v 25 Ka puerta ge yiesiha labíru tsaya ka nuha resá, kumu niha labíru rela aka
\v 26 nna ka benne seꞌe lheꞌe ka yiesi seꞌe yiesi lo yu‑ni sadhaꞌanke nu tse tee gekeha lhe sadhaꞌanke iyába nu daka tee gekeha len yiesiha.
\v 27 Lheꞌe yiesiha labí aka gaꞌa nu anka tsiga, nigaba aka gaꞌa ka nu ruin xxattakana satsa lhe nigaba aka gaꞌa ka nu ruin lekani lhe, sinuki sunruba ka benne dia láke lo libru ge benne anke Neru toha, delába ata dia lá ka benne aka benke ttu dia lii arloe, ka benneha‑ruba gwaka gaꞌake lheꞌe yiesiha.
\c 22
\p
\v 1 Nianna tti beleꞌen anjeliha neti ttu yoo ridá inda lheꞌeni. Inda ridá lheꞌe yooha ruinna kini aka ben ka benne ttu dia lii. Iyya gwanaba raka loni de ankana yaa xú. Ririana ata du xxila ata do Tata Do Yebáha rinnabie lhe ata do benne anke Neru toha lhe.
\v 2 Yooha tena lagwi neda xeni tee lheꞌe yiesiha nna abiꞌiba roꞌo yooha daa ka yaga ka nu rutekana elha nabani ge ka benne ttu dia lii. Tsiꞌinu (12) lidú runna ka yagaha nu xixxi lheꞌe ttu ida, daa beoba ribia gekani. Lhaga ge ka yagaha ixúna kini aka ramedi ka benne seꞌe lheꞌe ka yiesi seꞌe yiesi lo yu‑ni.
\v 3 Lheꞌe yiesiha labíru aka nu satsa nu abittu ruꞌu le Tata Do Yebáha, kumu niha du xxila ata do Tata Do Yebáha rinnabie lhe niha do benne anke Neru toha lhe, nna ka benne rixúke lo sina ge Tata Do Yebáha, ka benneha‑ba udú xibike arloe.
\v 4 Niha ilákanie kwinaga Tata Do Yebáha nna tsia lábie lo xeake.
\v 5 Niha labíru aka rela lhe labíru iyasa gi lhe, nigaba xiani ge tatubisa‑na, kumu Tata Do Yebaa benne anke Xxanariꞌiha, labe udenie geke. Ka benne udenie gekeha, ka benneha nuha innabiake ttu dia lii.
\s Jesús‑ni rabie: “Chi tte esiaya”
\p
\v 6 Nianna tti ra anjeliha neti:
\p ―Ka tisa‑ni ankake nu gwalí lhe ankake nu dika uxxen leriꞌi geke lhe. Tata Do Yebaa benne anke Xxanariꞌiha, delába benne runie ki rinne ka profeta geeha nu raka lebie una ka benne. Neti benne ankaa anjeli geeha udhelhe neti kini uleꞌenia ka benne rixúke lo sina geeha nu chi tte dabiga aka.
\p
\v 7 Jesús‑ni ree:
\p ―¡Chi tte esiaya! Karubáru ka benne udoke tisa ge nu dia lo yetsi‑ni, delába ka tisa chi rigixxiꞌake ge nu si aka.
\p
\v 8 Neti Juan, ankaa benne biyienti lhe belaꞌati iyá nuní nna tti belaꞌati lhe tti biyienti iyá nuní, nianna bedú tteba xibia arlo anjeliha, runia utsá loa bie.
\v 9 Ttaka benneha nna ree neti:
\p ―¡Bittu uinlu aná! Kumu neti ankagabaa benne rixúni Tata Do Yebáha ttiba lu lhe ttiba ka betsi to geluha lhe, delába ka benne ankake profeta geeha lhe anágaba neti ankagabaa ttiba ka benne rudoke tisa ge nu dia lo yetsi‑ni. Lu arlo Tata Do Yebáha‑la bedú xibilu nna betsá lolue.
\p
\v 10 Nianna tti rabie neti:
\p ―Bittu ukatsilu ka tisa dia lo yetsi‑ni, delába ka tisa rigixxiꞌakana ge nu si aka, kumu chi tteba aka nu ra ka tisa‑ni.
\v 11 Begwelha nu ruin tulhaha, uinruna tulha nna nu ruin nu satsaha, uinruna nu satsa lhe begwelha nu ruin nu dika ixúha, uinruna nu dika ixú nna nu chi biriesina ki akana ge Tata Do Yebáha, aníha‑bala riesina ki satíaba akana gebie.
\p
\v 12 Jesús‑ni ree:
\p ―Chi tte esiaya. Neti dechea nu ralha ttu ttule dhile kua nu benbale.
\v 13 Neti ankaa benne riduloa lhe ankaa benne rulhuxa looa lhe.
\p
\v 14 Karubáru ka benne rigí xoke ki akake nari xú arlo Tata Do Yebáha kini tee lo neda geke esinke goke nu xixxi ge yagaha, delába yaga nu rutena elha nabani geke ttu dia lii lhe kini aka etaꞌake roꞌo ka puerta ge yiesiha lhe.
\v 15 Ttaka ka nu ruinkana nu anka tsiga lhe ka nu ruin elha gwesá lhe ka nu risákana nu subi subi lhe anágaba ka nu runi elhutti lhe ka nu rudú xibikani arlo ka nu labí gwalí ankakana diosi lhe anágaba ka nu ruꞌu lekani rinnekana gwen lasi lhe, iyá ka nuná labí etaꞌakana lheꞌe yiesiha.
\p
\v 16 ―Neti Jesús, udhelhaa anjeli kia‑ni kini kixxiꞌanie le nuní, lebiꞌi ka benne chi ria lele neti. Neti ankaa benne datiaya David lhe ankaa beli riria ka dila‑na lhe.
\p
\v 17 Espíritu ge Tata Do Yebáha lhe nuila ge benne anke Neru toha, ráke bie:
\p ―¡Utá!
\p Anágaba ka benne iyienkanie nu ra ka benne‑ni, innágabake:
\p ―¡Utá!
\p Nna iyába ka benne ebisike inda lhe aka leke iꞌiyake indaha lhe, itake nna kwentaba iꞌiyake indaha, delába inda nu uinna kini aka benke ttu dia lii.
\p
\v 18 Iyábale ka benne riyieninle ka tisa dia lo yetsi‑ni, delába ka tisa rigixxiꞌakana ge nu si aka, neti upeya le: ganna nuxa ttúle udienle iki ka tisa‑ni, Tata Do Yebáha ugwebie le ka elha disa ka nu dia lo yetsi‑ni
\v 19 nna ganna nuxa ttúle kuale iki ka tisa dia lo yetsi‑ni, anágaba Tata Do Yebáha labí ugwelhe le gole nu xixxi ralhale gole ge yaga nu utena elha nabani gele ttu dia lii lhe labí ugwelhe le etaꞌale lheꞌe yiesi leꞌa geeha lhe. Lo yetsi‑ni rigixxiꞌa iyá nuní.
\p
\v 20 Jesús benne rigixxiꞌe nuní rabie:
\p ―¡Netiru ria, chi tte esiaya!
\p Amén. ¡Betá, tata Jesús benne ankalu Xxanatu!
\p
\v 21 Jesús benne anke Xxanariꞌiha edá lebie aka lenie iyá ttele. Amén.