\id MAT
\ide UTF8
\h SAN MATEO
\toc1 SAN MATEO
\mt Diꞌs Ndac Cheꞌn Diox Coꞌ Mqueꞌ Mate Yeꞌs
\c 1
\s Trèꞌ ndluꞌ cón cheꞌn rye bin mèn coꞌ ngòc xudgool Jesucrist axta coꞌseꞌ ngóol Tad Jesucrist.
\r (Lc. 3.23–38)
\p
\v 1 Loo libr ndxèꞌ ndaꞌ cuent cón cheꞌn rye mèn coꞌ ngòc xudgool cheꞌn Jesucrist coꞌ nde bin David coꞌ ngòc rey póla. No ndaꞌ loo libr ndxèꞌ cuent leꞌ Jesucrist nac bin cheꞌn tedib mbiꞌ coꞌ ngo ban más pólleꞌa. Mbiꞌa ngroꞌ lèe Abraham.
\p
\v 2 Abraham ngòc xud thìb mbyòo coꞌ ngroꞌ lèe Isaac. Ngoloa, ngòc Isaac xud thìb mbyòo coꞌ ngroꞌ lèe Cob. Leꞌ Cob na, ngòc xud thìb mbyòo coꞌ ngroꞌ lèe Judá con taamas hues Judá.
\v 3 Leꞌ Judá na, mblo xinꞌ thìb xaꞌgot coꞌ ngroꞌ lèe Tamar, xaꞌgot Judá. Mxan Tamar Far no Zar. Ngòc Judá no Tamar xud no xnaꞌ Far no Zar. Leꞌ Far na, ngòc xud thìb mbyòo coꞌ ngroꞌ lèe Esrom. Esrom na, ngòc xud thìb mbyòo coꞌ ngroꞌ lèe Aram.
\v 4 Aram na, ngòc xud Aminadab. Aminadab na, ngòc xud Naasón. Naasón na, ngòc xud Salmón.
\v 5 Leꞌ Salmón na, mblo xinꞌ Rahab, xaꞌgot Salmón. Ngóol thìb mbyòo coꞌ ngroꞌ lèe Booz. Booz na, mblo xinꞌ Rut, xaꞌgot Booz. Sya, ngóol thìb mbyòo coꞌ ngroꞌ lèe Obed. Obed na, ngòc xud thìb mbyòo coꞌ ngroꞌ lèe Isaí.
\v 6 Isaia na, ngòc xud thìb mbyòo coꞌ ngroꞌ lèe David coꞌ ngòc rey póla. David coꞌ ngòc reya mque noqueꞌ thìb xaꞌgot coꞌ ngòc saꞌl thìb mbiꞌ coꞌ ngroꞌ lèe Uri. Ale mxan xaꞌgota thìb xganꞌ David. Xganꞌ Davida ngroꞌ lèe Salomón. Ale ngòc David con xaꞌgota xud no xnaꞌ Salomón.
\p
\v 7 Salomón na, ngòc xud thìb mbyòo coꞌ ngroꞌ lèe Roboam. Roboam na, ngòc xud thìb mbyòo coꞌ ngroꞌ lèe Abi. Abi na, ngòc xud thìb mbyòo coꞌ ngroꞌ lèe As.
\v 8 As na, ngòc xud thìb mbyòo coꞌ ngroꞌ lèe Josafat. Josafat na, ngòc xud thìb mbyòo coꞌ ngroꞌ lèe Joram. Joram na, ngòc xud thìb mbyòo coꞌ ngroꞌ lèe Usi.
\v 9 Usi na, ngòc xud thìb mbyòo coꞌ ngroꞌ lèe Jotam. Jotam na, ngòc xud thìb mbyòo coꞌ ngroꞌ lèe Acaz. Acaz na, ngòc xud thìb mbyòo coꞌ ngroꞌ lèe Ezequi.
\v 10 Ezequi na, ngòc xud thìb mbyòo coꞌ ngroꞌ lèe Manasés. Manasés na, ngòc xud thìb mbyòo coꞌ ngroꞌ lèe Amón. Amón na, ngòc xud thìb mbyòo coꞌ ngroꞌ lèe Josi.
\v 11 Josi na, ngòc xud thìb mbyòo coꞌ ngroꞌ lèe Jeconi, no xud taamas hues Jeconi, coꞌseꞌ ngòc tiemp coꞌseꞌ ngòc mèn nación Israel xal moz loo mèn nación Babiloñ.
\p
\v 12 Ngolo nguriꞌth tiemp coꞌseꞌ ngòc mèn nación Israel xal moz loo mèn nación Babiloñ, Jeconi ngòc xud thìb mbyòo coꞌ ngroꞌ lèe Salatiel. Salatiel na, ngòc xud thìb mbyòo coꞌ ngroꞌ lèe Zorobabel.
\v 13 Zorobabel na, ngòc xud thìb mbyòo coꞌ ngroꞌ lèe Abiud. Abiud na, ngòc xud thìb mbyòo coꞌ ngroꞌ lèe Eliaquim. Eliaquim na, ngòc xud thìb mbyòo coꞌ ngroꞌ lèe Azor.
\v 14 Azor na, ngòc xud thìb mbyòo coꞌ ngroꞌ lèe Sadoc. Sadoc na, ngòc xud thìb mbyòo coꞌ ngroꞌ lèe Aquim. Aquim na, ngòc xud thìb mbyòo coꞌ ngroꞌ lèe Eliud.
\v 15 Eliud na, ngòc xud thìb mbyòo coꞌ ngroꞌ lèe Eleazar. Eleazar na, ngòc xud thìb mbyòo coꞌ ngroꞌ lèe Matán. Matán na, ngòc xud thìb mbyòo coꞌ ngroꞌ lèe Cob.
\v 16 Cob na, ngòc xud thìb mbyòo coꞌ ngroꞌ lèe Chè. Leꞌ Chè na, ndooleꞌ ngòc saꞌl Mari. Mari na, mxan Jesús coꞌ neꞌ tedib lèe coꞌ nac Crist.
\p
\v 17 Loo ryete bin ndxèꞌ, tiemp coꞌ mbriꞌth desde coꞌseꞌ ngo ban mbiꞌ coꞌ ngroꞌ lèe Abraham axta coꞌseꞌ ngo ban mbiꞌ coꞌ ngroꞌ lèe David coꞌ ngòc rey póla mdyaa sida bin. Lomisqueꞌ ne, tiemp coꞌ mbriꞌth coꞌseꞌ ngo ban Davida ngòc taasida bin axta coꞌseꞌ ngòc mèn nación Israel moz yèe loo mèn nación Babiloñ. Lomisqueꞌ ne, tiemp coꞌ mbriꞌth coꞌseꞌ mtlo ngòc mèn nación Israel moz yèe loo mèn nación Babiloñ ngòc taasida bin axta coꞌseꞌ ngóol Crist.
\s Trèꞌ ndluꞌ xá mod ngóol Jesucrist.
\r (Lc. 2.1–7)
\p
\v 18 Taandxèꞌ mod ngòc conꞌ coꞌseꞌ ngóol Jesucrist. Thìb mzaꞌ yòn coꞌ ngroꞌ lèe Mari ngòp trat con thìb mbyòo coꞌ ngroꞌ lèe Chè. Ngòc mzaꞌ coꞌ lèe Maria xnaꞌ Jesucrist. Chè mdoodiꞌs no Mari par selyaꞌ Chè con Mari. Per ndooreꞌ selyaꞌ Chè con Mari no tyub no Chè Mari, ale gunèe Chè mbeꞌ xinꞌleꞌ Mari. Per neꞌndaꞌde Chè cuent xá mod mbeꞌ xinꞌ Mari. Mari mquée loo xinꞌ por conꞌ roo no conꞌ xèn cheꞌn Diox coꞌ ngòc loo Mari por cón cheꞌn Xpii Natúꞌ.
\v 19 Chè coꞌ ngòcqueꞌ xinꞌ saꞌl Mari, Chè ngòc thìb mbiꞌ nalì no thìb mbiꞌ nambìi loo Diox. Coꞌseꞌ gunèe Chè mbeꞌ xinꞌleꞌ Mari, indlyaꞌste Chè yecloo Chè loo Mari no quexùꞌ Chè Mari loo xnaa. Ale mbli Chè xtùuz xexte láꞌ Chè Mari par neꞌtaꞌde mèn cuent leꞌ Chè xexte mbláꞌ Mari.
\v 20 Per láth ngue li Chè xtùuz conꞌa, chàa, ngroꞌ too thìb angl coꞌ mtelꞌ Tad Diox loo Chè làth mcalꞌ. Ndxab angl loo Chèꞌ:
\p ―Chè, lùu coꞌ nde bin David coꞌ ngòc rey póla, neꞌzyebtel no neꞌyecloodel no neꞌthyontel càayaꞌqueꞌ Mari par tyub nol Mari xal xinꞌ saꞌlpeꞌl. Tac thìb mbedbiꞌ coꞌ tyan Mari coꞌ yiꞌth yáal yiloa, mbedbiꞌa mquée loo loo Mari por cón cheꞌn Xpii Natúꞌ.
\v 21 Tyan Mari thìb mbed. Yiloa, lùu tub lèe mbed Jesús. Tataa ryoꞌ lèe mbed tac mbed tíꞌ no làa mbed mèn coꞌ nac mèn nación mbed loo xquin mèn no loo xtol mèn.
\p
\v 22 Tataa ngòc ryete conꞌa par mdyaaqueꞌ no ngòcqueꞌ no ndubqueꞌ diꞌs coꞌ gunii Diox por cón cheꞌn thìb mbiꞌ coꞌ mdeꞌth diꞌs coꞌ ndxab Diox. Ndxab mbiꞌa:
\pi1
\v 23 Leꞌ thìb mzaꞌ yòn quée looqueꞌ xinꞌ. Mzaꞌa tyan thìb xganꞌ mzaꞌ no ryoꞌ lèe mbeda Emanuel.
\m Diꞌs coꞌ nac diꞌs Emanuel nee diꞌs: Nzoleꞌ Diox làth naꞌ.
\p
\v 24 Coꞌseꞌ ngroꞌ mcalꞌ loo Chè, mbli Chè xal mnibeꞌ angl coꞌ mtelꞌ Tad Diox loo Chè. Mqueltàa no Chè Mari. No mdub no Chè Mari xal xinꞌ saꞌlpeꞌ Mari.
\v 25 Per mastaleꞌ mqueltàa no Chè Mari no mdub no Chè Mari leꞌn rye huiz coꞌ mdoo nac xinꞌ Mari, neꞌngàalte Chè Mari axta ngóol ner mbed coꞌ ngòc mbed ndlyo loo Mari. Axta syareꞌ ngòc Mari xaꞌgotpeꞌ Chè. Ngoloa, mdub lèe Chè mbeda Jesús.
\c 2
\s Mèn coꞌ anzeꞌf ndxác ngroꞌ liz no làaz par mbiꞌth too naa mèna Jesucrist coꞌteꞌ ngóol Jesucrist.
\p
\v 1 Coꞌseꞌ ngolo nguriꞌth plá huiz ngóol Jesús leꞌn thìb yèez coꞌ lèe Belén, yèez coꞌ nac thìb yèezyaꞌ cheꞌn làaz mèn jude, leꞌxqueꞌ leꞌn tiempa ngòc thìb mbiꞌ coꞌ ngroꞌ lèe Herod rey loo mèn leꞌn nación Israel. Làth xtauꞌa, mzin plá mèn coꞌ anzeꞌf ndxác leꞌn ciuda Jerusalén. Mèna nde par ned ndlyen huiz.
\v 2 Mnibdiꞌs mèna loo mèn ciuda Jerusalén. Ndxab mèna:
\p ―¿Máa mbetoꞌ coꞌ ngóolleꞌa, àꞌ, mbed coꞌ gàc rey loo mèn nación Israel? Nuꞌ gunèeleꞌ mbèelhuiꞌ coꞌ mbluꞌ leꞌ mbed ngóolleꞌ. Mbèelhuiꞌa mbyúꞌ loo loo nuꞌ par ned ndlyen huiz. Cona, nde nuꞌ axta trèꞌ par tyub xib nuꞌ loo mbed no par còoꞌ nuꞌ yéc nuꞌ loo mbed coꞌ gàc reya.
\p
\v 3 Coꞌseꞌ mbìn Herod con ryete mèn ciuda Jerusalén leꞌ mèna mnibdiꞌs máa mbed, neꞌñeede rey Herod cón li rey Herod. Ale mbyàa mbyeꞌth xtùuz rey Herod. Neꞌmbe see teede lezoꞌ rey Herod con ryete mèn cheꞌn ciuda Jerusalén.
\v 4 Sya, mbli Herod mandad. Ndyeꞌth ryete mèn coꞌ ngòc jef coꞌ más mnibeꞌ loo nguleyꞌ no mèn coꞌ ngòc maistr coꞌ ndluꞌ cón cheꞌn ley coꞌ mxoꞌf Moisés loo mèn nación Israel tiempa. Mnibdiꞌs Herod loo mèna. Ndxab Herod:
\p ―¿Chéꞌ non guꞌ pá gàc coꞌteꞌ gáal Crist, àꞌ?
\p
\v 5 Mèna mcàb loo Herod. Ndxab mèna:
\p ―Crist gáal leꞌn yèez Belén coꞌ nac thìb yèezyaꞌ cheꞌn làaz mèn jude tac tataa ndub diꞌs loo libr coꞌ mqueꞌ mèn coꞌ mdeꞌth diꞌs coꞌ ndxab Diox yeꞌs coꞌ ndxab:
\pi1
\v 6 Guꞌ coꞌ nac mèn yèez Belén coꞌ nac thìb yèezyaꞌ cheꞌn làaz mèn jude, mastaleꞌ iñaade guꞌ xal mèn roo no mèn xèn làth mèn coꞌ ñibeꞌ rye yèezyaꞌ, per làth guꞌ gáal thìb mbiꞌ coꞌ gàc jef loo guꞌ coꞌ ñibeꞌ, no coꞌ tyoo ner, no coꞌ quenap mèn coꞌ nac mèn nación Israel coꞌ nac mèn nacionpeꞌ daa.
\p
\v 7 Sya, xexte ngurez rey Herod mèn coꞌ ndxáca par huen huen ñibdiꞌs Herod loo mèna par taꞌ mèna cuent loo Herod pól mtlo ngòc gunèe mèna mbyúꞌ loo mbèelhuiꞌ loo mèna.
\v 8 Ngoloa, mtelꞌ rey Herod mèna par ya mèna par ned leꞌn yèez Belén. Ndxab rey loo mèna:
\p ―Huàa que tee guꞌ leꞌn yèeza. Huen huen ñibdiꞌs guꞌ cón cheꞌn mbeda loo mèn yèeza. No coꞌseꞌ yilo zyal guꞌ mbeda, yiꞌth taꞌ guꞌ cuenta loon par ga too naan mbed, par tyub xiben no còoꞌen yéquen loo mbed, ne.
\p
\v 9–10 Coꞌseꞌ ngolo mbìn mèna diꞌs coꞌ ndxab rey, mxen mèna ned, nda mèna. Láth ndoo mèna ned, nda mèna par yèez Belén, mbere mbèelhuiꞌ, mbyúꞌ loo mbèelhuiꞌ loo mèna tedib vez, leque mbèelhuiꞌ coꞌ mbyúꞌ loo loo mèna coꞌseꞌ mdoo mèna ned ndooreꞌ, nde mèna par ned ndlyen huiz. Coꞌseꞌ gunèe mèn coꞌ ndxáca mbèelhuiꞌa, anzeꞌf mdyac tínꞌ lezoꞌ mèna axta plóthe. Leꞌ mbèelhuiꞌa na, xèegà xèegà nda nerte loo mèna tedib vez axtaqueꞌ mbluꞌ mbèelhuiꞌ loo mèna coꞌteꞌ ngo mbed. Sya, xèe ngo too mbèelhuiꞌa gáp yéc yòo coꞌteꞌ ngo mbed, xganꞌ Mari.
\v 11 Sya, ngòo mèna loo lueꞌ coꞌteꞌ ngòc liz mèn coꞌteꞌ ngo xnaꞌ mbed con mbed. Texal gunèe mèna mbed con xnaꞌ mbed coꞌ ngroꞌ lèe Mari, ale mdub xib mèna loo mbed no mcòoꞌ mèna yéc mèna loo mbed no ndxab mèna loo Diox:
\p ―¡Ay, Dioꞌs! Mbiꞌ roo no mbiꞌ xèn gàc mbed ndxèꞌ.
\p Ngoloa, mxalꞌ mèna caj mèna coꞌteꞌ ndxosuaꞌ tesor. Angmdaꞌlaꞌs mèna tesor càa xnaꞌ mbed, coꞌ gàc cheꞌnpeꞌ mbed yiloa. Tesora nac or, no thìb xlaꞌ coꞌ ndlyaꞌ xal zen yalꞌ, no thìb xlaꞌ coꞌ ndlyaꞌ xal perfum coꞌ lèe mirr.
\v 12 Ngolo mbli mèna conꞌa, mdaꞌ Diox cuent loo mèn coꞌ ndxáca làth mcalꞌ leꞌn huiza neꞌberede mèna leque ned nde mèna par neꞌriꞌthte mèna coꞌteꞌ nac liz rey Herod. Sya, mxen mèna tedib ned, ndyàa mèna par làaz mèna.
\s Chè no Mari mxonꞌ no mbetoꞌ coꞌ ngroꞌ lèe Jesús par ned leꞌn nación mèn egipt.
\p
\v 13 Coꞌseꞌ ngolo mxen mèn coꞌ ndxáca ned ndyàa mèna, thìb angl cheꞌn Tad Diox mxoꞌf loo loo Chè làth mcalꞌ. Ndxab angl loo Chè:
\p ―Chè, jer goo che. Leque nal yálꞌ fxen ned. Beꞌ mbed con xnaꞌ mbed. Huàa xonꞌ par ned leꞌn nación mèn egipt. Gòo guꞌ tya axtaqueꞌ lin avis loo guꞌ. Tac rey Herod ndlyaꞌs cuaꞌn mbed par guthxùꞌ Herod mbed.
\p
\v 14 Sya, ngroꞌ mcalꞌ loo Chè. Ngo che Chè. Ndxab Chè loo Mari:
\p ―Mari, jer goo che. Nda no naꞌ mbed par ned leꞌn nación mèn egipt nalleꞌ. Mbeꞌ Chè mbed no xnaꞌ mbed yálꞌa. Mxonꞌ no Chè ryop Mari par ned leꞌn nación mèn egipt.
\v 15 Ngo ban Chè ryop Mari, coꞌ ngòc xinꞌ saꞌl Chè, con mbed leꞌn nación mèn egipt axta mzin huiz nguth Herod. Ngòc conꞌ ndxèꞌ loo Chè no loo mbed par ngòcqueꞌ, no par mdyaaqueꞌ, no par mdubqueꞌ diꞌs coꞌ gunii Tad Diox por cón cheꞌn mèn coꞌ mdeꞌth diꞌs coꞌ ndxab Diox xal nac diꞌs coꞌ ndxab Diox:
\pi1 ―Par ned leꞌn nación cheꞌn làaz mèn egipt ngo casloo xganꞌen. No coꞌteꞌ ngo casloo xganꞌen, mblin par mbere xganꞌen, ndyeꞌth xganꞌen par ned liz no làaz xganꞌen tedib vez.
\s Herod mnibeꞌ ngua yuth solndad myenꞌbiꞌ bix leꞌn yèez Belén.
\p
\v 16 Coꞌseꞌ mdenꞌ rey Herod ya neꞌngriꞌthte mèn coꞌ ndxáca liz rey Herod tedib vez, syareꞌ mdaꞌ rey Herod cuent cón cheꞌn mbed no cón cheꞌn mèna leꞌ mèn coꞌ ndxáca mxìis no Herod. Sya, ngocloo tínꞌ Herod. Ale de xyàn mnibeꞌ Herod loo solndad par ya yuth solndad ryete myenꞌ bix coꞌ nac ante myenꞌbiꞌ coꞌ nzo ban leꞌn yèez Belén no leꞌn rye yèezyaꞌ coꞌ ñibeꞌ yèez Belén, myenꞌ bix coꞌ nzo chop linꞌ par xànꞌ, coꞌ nee diꞌs, xal nda tee tiemp coꞌ mdaꞌ mèn coꞌ ndxáca cuent loo Herod par belꞌqueꞌ yigaa mbed xinꞌ Mari loo solndad làtha.
\v 17 Axta syareꞌ mdyaa diꞌs no mdubqueꞌ diꞌs coꞌ ndxab Jeremi coꞌ mdeꞌth diꞌs coꞌ ndxab Diox, coꞌ mqueꞌ Jeremi yeꞌs loo libr coꞌ nac xtiꞌs Diox coꞌ mbez:
\pi1
\v 18 Anzeꞌf thìb ruid mbyèn leꞌn yèez Ramá. Tant thìb mèngoꞌr mdub yen mèn no lezoꞌ mèn no tant mbínꞌ mèn no ngrozèe yath mèn. Neꞌ tíꞌ yéc no neꞌ tíꞌ lezoꞌ rye mèngot coꞌ nac mèn nación Israel por mbínꞌ mèngota por cón cheꞌn xganꞌ bix mèngota. Indlyaꞌste mèngota tegán mèngota lezoꞌ mèngota no yende mod tegán taamas mèn lezoꞌ mèngota tac ryete myenꞌbiꞌ bix xganꞌ mèngota nguth.
\p
\v 19 Coꞌseꞌ mzin huiz nguth rey Herod, thìb angl coꞌ mtelꞌ Tad Diox mbere mxoꞌf loo angl loo Chè làth mcalꞌ leꞌn nación mèn egipt. Ndxab angl loo Chè:
\p
\v 20 ―Chè, Diox mtelꞌ daa par gal lin avis lool: Fthop taa rye conꞌ ngue nol. Tac guꞌ bii no mbed par ned leꞌn yèezyaꞌ cheꞌn làaz mèn nación Israel. Tac mèn coꞌ mbli purad par guth mèn mbed, mèna nguthleꞌ.
\p
\v 21 Sya, coꞌseꞌ ngo nìi izlyoꞌ tedib huiz coꞌ nde nquea, mthop mtaa Chè rye conꞌ coꞌ ngòc cheꞌn Chè. Sya, ndxab Chè loo Mari:
\p ―Ndyàa no naꞌ mbed par ned leꞌn yèezyaꞌ cheꞌn làaz mèn nación Israel.
\p
\v 22 Láth ndoo Chè ned con Mari no mbed, nda zin Chè leꞌn yèezyaꞌ cheꞌn làaz mèn nación Israel, mbìn Chè leꞌ Arquela, xganꞌ rey Herod, nacleꞌ gobernador loo mèn gulàaz Jude lugar cheꞌn Herod, xud Arquela. Sya, mzyeb Chè bii Chè par ned leꞌn yèezyaꞌ coꞌ nac làaz mèn jude. Tya, mbere Diox, mdoodiꞌs no Diox Chè làth mcalꞌ xá mod li Chè. Ngoloa, mxen Chè ned con Mari coꞌ nac xaꞌgot Chè no con mbed coꞌ nac Jesús. Ndyàa Chè leꞌn thìb yèez chuꞌth coꞌ nac yèezyaꞌ cheꞌn làaz mèn galile.
\v 23 Per ya que mzinleꞌ Chè con Mari no mbed, ngòo ban Chè con Mari no mbed leꞌn thìb yèez coꞌ lèe Nazaret. Tataa ngòca loo Chè no loo Mari par ngòcqueꞌ diꞌs, no mdyaaqueꞌ diꞌs, no mdubqueꞌ diꞌs coꞌ gunii mèn coꞌ mdeꞌth diꞌs coꞌ ndxab Diox leꞌ mbed coꞌ hueꞌ lèe Jesús hueꞌ tedib lèe coꞌ lèe Jesús nazaren.
\c 3
\s Juàn Bautist mblo yalbàn loo mèn coꞌteꞌ nagán tiempa.
\r (Mr. 1.1–8; Lc. 3.1–9, 15–17; Jn. 1.19–28)
\p
\v 1 Leꞌn tiemp coꞌ ngo ban Jesús leꞌn yèez Nazaret, leꞌn tiempa mblo Juàn Bautist yalbàn loo mèn coꞌteꞌ nagán, coꞌteꞌ nac yèezyaꞌ cheꞌn làaz mèn jude. Mblo Juàn Bautist yalbàn loo mèn.
\v 2 Mbez Juàn Bautist coꞌseꞌ ngo Juàn yalbàn loo mèn:
\p ―Blàa guꞌ yéc guꞌ no blàa guꞌ lezoꞌ guꞌ. No fseꞌ guꞌ xtùuz guꞌ no mod coꞌ ndxàp guꞌ loo Diox. Tac tiemp coꞌ mblyaꞌs Diox ñibeꞌ Diox loo guꞌ loo cón cheꞌn Diox nde zinꞌ gaxleꞌ.
\p
\v 3 Cón cheꞌn Juàna ngòc diꞌs coꞌ mqueꞌ Sayi yeꞌs, diꞌs coꞌ ndxab Diox loo Sayi. Taandxèꞌ mbez diꞌs loo yeꞌs:
\pi1 Ndxèn thìb diꞌs cheꞌn thìb mbiꞌ coꞌ mbez yèe cabii coꞌteꞌ nagán coꞌseꞌ ngo mbiꞌ yalbàn. Mbez mbiꞌ: Bli nab guꞌ guꞌ loo cón cheꞌn conꞌ ndac. Fseꞌ guꞌ ryethe mod yeꞌrsinꞌ coꞌ ndxàp guꞌ loo Diox par gàc nab guꞌ coꞌseꞌ yiꞌth ñibeꞌ Tad Diox guꞌ loo guꞌ.
\p
\v 4 Xab Juàn coꞌ mdoc Juàn nayàꞌ con yis yid camell. Lomisqueꞌ, cinch coꞌ ngo leꞌn Juàn natoxcuaꞌ con yid máꞌ. Luaꞌ Juàn no xít Juàn ngòc mbiistoo no mzin huan.
\v 5 Coꞌseꞌ mtlo Juàn mblo Juàn yalbàn, sya, ndxiꞌth mèn ciuda Jerusalén, no ryete mèn yèezyaꞌ coꞌ nac làaz mèn jude, no ryete mèn coꞌ nac mèn yèezyaꞌ coꞌ nziriꞌ gax ro yóꞌbeꞌ Jordán, loo Juàn par gòn mèna diꞌs coꞌ mbez Juàn no coꞌ ndeꞌth Juàn.
\v 6 Leꞌ sya, texal ndxelo mxoꞌf dol mèna no ngo ro mèna cón cheꞌn xquin mèna no cón cheꞌn xtol mèna loo Juàn, ndli Juàn bautizar mèna leꞌn yóꞌbeꞌ Jordán.
\p
\v 7 Látha, ñèe Juàn nde huax mèn coꞌ nac mèn xleyꞌ farise no coꞌ nac mèn xleyꞌ saduce loo Juàn. Mèna nde loo Juàn par li Juàn bautizar mèna. Sya, ndxab Juàn loo mèna:
\p ―¡Aa mèn xleyꞌ farise, no mèn xleyꞌ saduce, mèn coꞌ nayiꞌ coꞌ nac xal mbelꞌ coꞌ lèe huid! Leque guꞌ ndluꞌ loo xtàa guꞌ nadoꞌ nac guꞌ. Per par leꞌn lezoꞌ guꞌ nzo conꞌ yeꞌrsinꞌ. ¿Chó mbluꞌ loo guꞌ par lyáꞌ guꞌ loo conꞌ yeꞌrsinꞌ coꞌ gàc loo guꞌ coꞌseꞌ gàc tiemp coꞌseꞌ yecloo Diox loo guꞌ axta plóthe, àꞌ?
\v 8 Nabeꞌste fque tee ban guꞌ loo mèn no nabeꞌste gòp guꞌ mod loo mèn par luꞌ guꞌ loo mèn leꞌ guꞌ, lìcqueꞌ, ngulàaleꞌ yéc no ngulàaleꞌ lezoꞌ guꞌ loo Diox cón cheꞌn conꞌ yeꞌrsinꞌ coꞌ ndli guꞌ.
\v 9 Neꞌ neꞌ li guꞌ xtùuz leꞌn lezoꞌ guꞌ no neꞌ neꞌ gab guꞌ loo lezoꞌ guꞌ anzeꞌf ntac naca loo Diox leꞌ Abraham nac xudgool guꞌ. Tac daa ngue nii loo guꞌ: Diox, lìcqueꞌ, gác li par bix loo quèe ndxèꞌ no gàc quèe ndxè mèn coꞌ naban coꞌ nac binpeꞌ cheꞌn Abraham.
\v 10 Nde niin thìb conꞌ loo guꞌ, ne: Leꞌi ndxàcleꞌ loo guꞌ nalleꞌ nde zinꞌ gaxleꞌ coꞌ xàꞌ Diox guꞌ par cobii Diox guꞌ leꞌn yeꞌrbìil thidtene xal coꞌseꞌ nchoꞌ mèn thìb xanꞌ yaa xlè coꞌ indaꞌde xlè ndac par co mèn yaa xlèa loo quìi.
\v 11 Lìcpeꞌ baꞌi, na ndli bautizar guꞌ con nít par ndxàca thìb muestr loo mèn coꞌ ndluꞌ loo mèn leꞌ guꞌ ngulàaleꞌ yéc no ngulàaleꞌ lezoꞌ guꞌ no mseꞌleꞌ guꞌ mod coꞌ ngòp guꞌ loo Diox. Per nalleꞌ ndeleꞌ thìb mbiꞌ coꞌ yiꞌth loo guꞌ yilo lin bautizar mèn. Mbiꞌa li bautizar guꞌ coꞌseꞌ lyàa Xpii Natúꞌ loo guꞌ coꞌ gàc xal thìb quìi no thìb bèel. Mbiꞌa ndxàp más conꞌ laꞌs nii mbiꞌ no laꞌs yaꞌ mbiꞌ leque daa. No neꞌ por chuꞌth neꞌtaꞌden par mbiꞌa. No axta neꞌ libid coꞌ ngue nii mbiꞌ, indxàalte daa par làan libid nii mbiꞌ.
\v 12 Li mbiꞌ thìb conꞌ loo mèn, ne, xal coꞌseꞌ nzoleꞌ pal yaꞌ thìb mbiꞌ par toocuaꞌ mbiꞌ nzob triu par quis mbiꞌ nzob triu mbiꞌ. Yiloa coꞌ xàꞌ mbiꞌ nzob triu loo yix nzob triu. Yiloa na, cosuaꞌ mbiꞌ nzob triu. Leꞌ yix coꞌ yende chó juisa na, tec mbiꞌ loo quìi coꞌ neꞌyuꞌde thidtene. Tataa li mbiꞌ, coꞌ yiꞌth loo guꞌ yiloa, loo mèn coꞌ tyal yilaꞌs loo mbiꞌa par ryo xàꞌ mèna loo mèn coꞌ neꞌtyalte yilaꞌs loo mbiꞌa.
\s Juàn mbli bautizar Jesús.
\r (Mr. 1.9–11; Lc. 3.21–22)
\p
\v 13 Leꞌn huiz coꞌ ngue go Juàn yalbàn, Jesús ngroꞌ par ned leꞌn yèezyaꞌ cheꞌn làaz mèn galile. Ngua Jesús par ned ro yóꞌbeꞌ Jordán coꞌteꞌ ngo Juàn par mbli Juàn bautizar Jesús leꞌn yóꞌbeꞌ Jordán.
\v 14 Ndxab Jesús loo Juàn li Juàn bautizar Jesús. Per coꞌseꞌ mbìn Juàn li Juàn bautizar Jesús, neꞌndalte Juàn li Juàn bautizar Jesús. Ndxab Juàn loo Jesús:
\p ―Uꞌ ndxàal li bautizar daa, Tad. ¿Xá mod ndlyaꞌs Uꞌ ale daa li bautizar Uꞌ, yey?
\p
\v 15 Ndxab Jesús loo Juàn:
\p ―Lìcqueꞌ nac diꞌs coꞌ ngolo guneel baꞌ. Yende cón niin lool. Per mastaleꞌ ndenꞌl ndxàal lin bautizar lùu, bli coꞌ ñibeꞌen lool. Bli bautizar daa tac taandxèꞌqueꞌ ndxàal li naꞌ par tyaaqueꞌ, no gàcqueꞌ, no tyubqueꞌ diꞌs xal mnibeꞌ Diox par gàca.
\p Syareꞌ, mdyal Juàn. Mbli Juàn bautizar Jesús.
\v 16 Per texal ngulàa Jesús leꞌn nít par ngòc bautizar Jesús leꞌn nít, no ngroꞌ Jesús leꞌn nít, chàa, mxyalꞌ loo béꞌ. Látha, gunèe Jesús Xpii Natúꞌ cheꞌn Diox coꞌ ñaa xal thìb palomxtilꞌ hora coꞌ nde làa loo béꞌ loo Jesús. Sangmbyanꞌ Xpii Natúꞌ loo Jesús. No ngo no Xpii Natúꞌ Jesús thidtene.
\v 17 Leque hora, mbyèn thìb diꞌs loo béꞌ coꞌ ndxab:
\p ―Mbiꞌ baꞌ nac xganꞌ daa coꞌ anzeꞌf ngudloon no lezon. Por cón cheꞌn mbiꞌ baꞌ anzeꞌf ndyac tínꞌ lezon.
\c 4
\s Mebizya mblyaꞌs andoo Jesús cuaꞌn Jesús xquin Jesús no xtol Jesús.
\r (Mr. 1.12–13; Lc. 4.1–13)
\p
\v 1 Ngoloa, mbli Xpii Natúꞌ cheꞌn Diox mxen Jesús ned. Nda Jesús thìb lugar coꞌteꞌ nagán par cobyaꞌ Mebizya Jesús no li Mebizya preb thìb conꞌ loo Jesús par ñee Mebizya ñeeneꞌ chéꞌ tli Jesús coꞌ gab Mebizya loo Jesús. Mebizya mblyaꞌs andoo Jesús cuaꞌn Jesús xquin Jesús no xtol Jesús.
\p
\v 2 Leꞌn rye huiza, xlat Jesús. Neꞌnghuade Jesús leꞌn choꞌ huiz no leꞌn choꞌ yálꞌ. Ngoloa, anzeꞌf mblyanꞌ Jesús.
\v 3 Látha, ngua Mebizya loo Jesús par ñee Mebizya ñeeneꞌ chéꞌ tli Jesús coꞌ gab Mebizya loo Jesús tac Mebizya nanee leꞌ Jesús ndlyanꞌ. Ndxab Mebizya loo Jesús:
\p ―Cheleꞌ lùu, lìcqueꞌ, nac xganꞌpeꞌ Diox, bnibeꞌ loo quèe ndxèꞌ gàc quèe ndxèꞌ pan par hual.
\p
\v 4 Jesús mcàb loo Mebizya. Ndxab Jesús:
\p ―Loo libr coꞌ nac xtiꞌs Diox ndub diꞌs coꞌ mbez: Iante con pan cue ban mèn loo izlyoꞌ. Ndxeꞌlequeꞌ, mèn cue ban loo izlyoꞌ ndxèꞌ por cón cheꞌn ryete diꞌs coꞌ gunii Diox loo mèn.
\p
\v 5 Ngoloa, mbeꞌ Mebizya Jesús leꞌn ciuda Jerusalén coꞌ nac ciuda natúꞌ cheꞌn Diox. Mbli Mebizya par mquée Jesús yéc templ coꞌteꞌ nac más gáp.
\v 6 Tya, ndxab Mebizya loo Jesús:
\p ―Cheleꞌ lùu nacqueꞌ xganꞌpeꞌ Diox, lyazen queꞌl thìb brinc trèꞌ axta loo yòo. Tac loo libr coꞌ nac xtiꞌs Diox ndub diꞌs coꞌ mbez:
\pi1 Yub Diox ñibeꞌ loo angl cheꞌn Diox par quenap angl lùu. Angl teꞌf yaꞌ angl par lyàal yaꞌ angl par neꞌlyàadel loo quèe no neꞌhuíꞌde ladl loo quèe.
\p
\v 7 Jesús mcàb loo Mebizya. Ndxab Jesús:
\p ―Loo libr coꞌ nac xtiꞌs Diox ndub diꞌs coꞌ mbez: Neꞌlidel preb no neꞌcobyaꞌdel Tad coꞌ nac Tad Diox lùu par ñeel ñeeneꞌ chéꞌ tetìi Tad Diox lùu por cón cheꞌn conꞌ yeꞌrsinꞌ coꞌ ngue lil.
\p
\v 8 Ngoloa, mbeꞌ Mebizya Jesús loo thìb yii roo. Mbluꞌ Mebizya ryete nación coꞌ nziriꞌ dib athu loo izlyoꞌ loo Jesús. Mbluꞌ Mebizya ryethe conꞌ coꞌ nac conꞌ roo no conꞌ xèn cheꞌn rye nación coꞌ nziriꞌ dib athu loo izlyoꞌ loo Jesús, ne.
\v 9 Ndxab Mebizya loo Jesús:
\p ―Ryete conꞌ baꞌ tan càal par gàca cheꞌnpeꞌl cheleꞌ lùu tyub xib loon no còoꞌl yécl loon.
\p
\v 10 Leꞌ sya, ndxab Jesús loo Mebizya:
\p ―Biiche thìb lad loon, Mebizya. Byàa. Tac ndub diꞌs loo libr coꞌ nac xtiꞌs Diox coꞌ mbez: Ante loo Dioxpeꞌ lùu tyub xibl no còoꞌl yécl no ante loo Dioxpeꞌ lùu lil sirv.
\p
\v 11 Sya, xexte mxen Mebizya ned. Ndyàa Mebizya. Mbláꞌ Mebizya Jesús. Ngoloa, mzin angl cheꞌn Diox loo Jesús. Mbli angl mandad loo Jesús.
\s Jesús mtlo mxoꞌf zinꞌ zinꞌ coꞌ nde xoꞌf zinꞌ Jesús leꞌn yèezyaꞌ coꞌ nac gulàaz mèn galile.
\r (Mr. 1.14–15; Lc. 4.14–15)
\p
\v 12 Leque leꞌn huiza, mbìn Jesús leꞌ Juàn Bautist ngue leziꞌf. Mbere Jesús, ndyàa Jesús par ned leꞌn yèezyaꞌ cheꞌn làaz mèn galile.
\v 13 Tya, sangnguriꞌth Jesús yèez Nazaret. Neꞌmbedte Jesús leꞌn yèez Nazaret. Ndxeꞌlequeꞌ, ngua ban Jesús leꞌn yèez coꞌ lèe Capernaum coꞌ nac thìb yèez coꞌ nziriꞌ gax ro lagun, lagun coꞌ nziriꞌ loo xyòn mèn galile coꞌteꞌ nazalꞌ xyòn mèn cheꞌn làaz mèn zabulón, no coꞌteꞌ nazalꞌ xyòn mèn cheꞌn làaz mèn neftalí.
\v 14 Tataa ngòc conꞌa loo Jesús par ngòcqueꞌ, no mdyaaqueꞌ, no mdubqueꞌ diꞌs coꞌ mqueꞌ Sayi yeꞌs, Sayi coꞌ mdeꞌth diꞌs cheꞌn Diox. Sayi ndxab:
\pi1
\v 15 Coꞌseꞌ yiꞌth Crist, Crist ya que tee par ned leꞌn yèezyaꞌ cheꞌn làaz mèn zabulón, no par ned leꞌn yèezyaꞌ cheꞌn làaz mèn neftalí, no par ned coꞌ nsyo ro níttóꞌ coꞌ nda tedib lad ro yóꞌbeꞌ Jordán. No ya que tee Crist par ned leꞌn yèezyaꞌ cheꞌn làaz mèn galile coꞌteꞌ nzo ban huax mèn coꞌ inacte mèn nación Israel.
\pi1
\v 16 Mèn coꞌ nzo ban par neda, mèna ngure li conꞌ coꞌ mcàb loo mèna loo cón cheꞌn Diox xal mèn coꞌ ngure loo yálꞌcuau. Diox mbli par mdyub xnìi yéc mèna no par mdyub xnìi lezoꞌ mèna por cón cheꞌn Crist. No ryethe mèn coꞌ alithe nzi ban loo conꞌ coꞌ ncàb yalguth loo mèna, Diox ntenìi yéc mèna no ntenìi Diox lezoꞌ mèna por cón cheꞌn Crist.
\p
\v 17 Axta syareꞌ mtlo Jesús, mblo Jesús yalbàn loo mèna tya. Mbez Jesús loo mèn par neda:
\p ―Gulàa yéc guꞌ no gulàa lezoꞌ guꞌ. Fseꞌ guꞌ xtùuz guꞌ no mod coꞌ ndxàp guꞌ loo Diox. Tac tiemp coꞌ ndlyaꞌs Diox ñibeꞌ Diox loo guꞌ, tiempa mzinleꞌ loo guꞌ.
\s Jesús ndxab loo thap mbiꞌ coꞌ ndyen mbèel: Ftoo nque guꞌ xísen. Yaꞌ guꞌ nda naꞌ.
\r (Mr. 1.16–20; Lc. 5.1–11)
\p
\v 18 Láth nda riid Jesús ro lagun coꞌ nziriꞌ loo xyòn cheꞌn mèn galile, gunèe Jesús chop mbiꞌ coꞌ ndxàc hues. Thìb mbiꞌ ngroꞌ lèe Mon Pedr. Leꞌ tedib mbiꞌa na, ngroꞌ lèe Ndech. Nzi gobii ryop hues mbiꞌ yex leꞌn nít loo lagun par yigaa mbèel loo ryop hues mbiꞌ tac ryop hues mbiꞌ ndyen mbèel.
\v 19 Sya, ndxab Jesús loo Pedr no loo Ndech:
\p ―Yaꞌ guꞌ nda naꞌ. Ftoo nque guꞌ xísen. Daa li leꞌ ryop guꞌ gàc mbiꞌ coꞌ luꞌ loo mèn cón cheꞌn Diox par yòo mèn loo cón cheꞌn Diox xal ndxàc coꞌseꞌ ndyen guꞌ mbèel con yex guꞌ.
\p
\v 20 Coꞌseꞌ mbìn ryop hues mbiꞌ tataa ndxab Jesús, mbláꞌ ryop hues mbiꞌ yex. Nda nque ryop hues mbiꞌ xís Jesús.
\p
\v 21 Gundee Jesús taandxepte más delant, gunèe Jesús taachop mbiꞌ coꞌ ndxàcguèꞌ hues. Thìb mbiꞌ ngroꞌ lèe Cob. Tedib mbiꞌ ngroꞌ lèe Juàn. Ryop hues mbiꞌa ndxàc xganꞌ thìb mbiꞌ coꞌ ngroꞌ lèe Zebede. Nzo ryop hues mbiꞌ leꞌn thìb yòoyaa con xud mbiꞌ. Ngue go bdèꞌ ryop hues mbiꞌ yex leꞌn yòoyaa con xud mbiꞌ. Jesús ngurez ryop hues mbiꞌa. Ndxab Jesús:
\p ―Ftoo nque guꞌ xísen. Yaꞌ guꞌ nda naꞌ, ey.
\p
\v 22 Leque hora mbláꞌ myenꞌ yòoyaa con xud myenꞌ. Nda nque myenꞌ xís Jesús.
\s Jesús ngue luꞌ huax mèn.
\r (Lc. 6.17–19)
\p
\v 23 Beꞌ taa beꞌ taa nda tee luꞌ Jesús mèn leꞌn rye yèezyaꞌ cheꞌn làaz mèn galile. Ngue luꞌ Jesús mèn leꞌn sinagog mèn coꞌ nziriꞌ rye lugar coꞌteꞌ mque tee Jesús. Ngo Jesús yalbàn. Mbez Jesús loo mèn cón cheꞌn diꞌs ndac cón cheꞌn xá mod ndlyaꞌs Diox ñibeꞌpeꞌ Diox loo mèn. No mteyac Jesús mèn, mèn coꞌ mque no chol yíiz leꞌn rye yèezyaꞌ ned mque tee Jesús.
\v 24 Láth mque tee Jesús par neda, anzeꞌf thìb mèn yèezyaꞌ cheꞌn làaz mèn sir mbìn cón cheꞌn Jesús. Mbiꞌth no mèna ryete mèn yíiz coꞌ nzo par neda, mèn coꞌ ndyac len chol yíiz, no mèn coꞌ mdenꞌ chol yalnè, no rye mèn coꞌ mque no chol mbii cheꞌn xpii meexùꞌ, no mèn coꞌ mque no yíiz enferesi, no mèn coꞌ mque no yíiz mbii coꞌ nac yíiz bech. Mteyac Jesús ryete mèn yíiza.
\v 25 Mdoo nque huax mèn yèezyaꞌ cheꞌn làaz mèn galile, no mèn yèezyaꞌ cheꞌn làaz mèn decápolis, no mèn cheꞌn ciuda Jerusalén, no mèn yèezyaꞌ cheꞌn làaz mèn jude, no mèn rye yèezyaꞌ coꞌ nziriꞌ par ned ndlyen huiz, ned nziriꞌ yóꞌbeꞌ Jordán, xís Jesús.
\c 5
\s Jesús mdub loo thìb yii par mblo Jesús yalbàn loo mèn.
\p
\v 1 Coꞌseꞌ gunèe Jesús anzeꞌf thìb mènléyꞌ nziriꞌ con Jesús, Jesús mquée loo thìb yii coꞌ ndub tya. Mdub Jesús loo yiia. Leꞌ myenꞌ xinꞌ mtéꞌth Jesús na, thidte mqueltàa, ngure myenꞌ dib vuelt loo Jesús.
\v 2 Mtlo Jesús, mbluꞌ Jesús myenꞌ xinꞌ mtéꞌth Jesús. Ndxab Jesús loo myenꞌ taandxèꞌ:
\s Jesús ngue luꞌ cón cheꞌn chop ned mèn.
\r (Lc. 6.20–23)
\p
\v 3 ―Huen nda mèn, mèn, coꞌ ndenꞌ leꞌn lezoꞌ nac mèna mèn beꞌthe loo Diox no coꞌ ndenꞌ leꞌn lezoꞌ yende mod li mèna conꞌ ndac coꞌ ndxòo lezoꞌ Diox. Tac Diox coꞌ ñibeꞌpeꞌ loo mèna ndli par ndxàc conꞌ ndac loo mèna.
\p
\v 4 Huen nda mèn coꞌ nzi xi yéc no coꞌ nzi xi lezoꞌ tac Diox tegánqueꞌ lezoꞌ mèna.
\p
\v 5 Huen nda mèn nadoꞌ coꞌ inacte mèn nateꞌs no coꞌ inacte mèn naxalꞌ, mèn coꞌ ndoo xalꞌ lezoꞌ, tac gàc cheꞌnpeꞌ mèna loo izlyoꞌ coꞌ ngòc conꞌ coꞌ mcàbgòn Diox càa mèna.
\p
\v 6 Huen nda mèn coꞌ ndyub yoꞌf lezoꞌ no coꞌ anzeꞌf ndlyaꞌs que tee nalì mèna loo Diox xal mèn coꞌ ndlyanꞌ no coꞌ ndxec lezoꞌ tac Diox lyath no mèna que tee nalì mèna loo xtàa mèna no que tee nalì mèna loo Diox.
\p
\v 7 Huen nda mèn coꞌ ndlyat lezoꞌ ñèe hues xtàa tac Diox lyatqueꞌ lezoꞌ ñèe Diox mèna.
\p
\v 8 Huen nda mèn coꞌ ndxàp mod par li mèn sirv loo Diox thìb lì yéc mèn no thìb lì lezoꞌ mèn tac mèna huiꞌqueꞌ loo Diox.
\p
\v 9 Huen nda mèn coꞌ ndli mbe nagàl lezoꞌ hues xtàa mèn no ndli mèna ndxuꞌ ndxàl lezoꞌ hues xtàa mèn coꞌ nziriꞌ con nadoꞌ diꞌs nadoꞌ cuent tac Diox mbez no ngòoqueꞌ Diox cuent leꞌ mèna nacqueꞌ xinꞌ Diox.
\p
\v 10 Huen nda mèn coꞌ ndyub nguꞌs mèn por mod coꞌ nac mod ndac coꞌ nzi tee ban mèna tac loo mèna tyalqueꞌ Diox no taꞌ Diox lugar yòo mèna loo cón cheꞌn Diox par ñibeꞌpeꞌ Diox loo mèna.
\p
\v 11 Huen nda guꞌ, myenꞌ, coꞌseꞌ aseli mèn taꞌ mèn xyàn lezoꞌ guꞌ, no li mèn ngòc nguàal conꞌ loo guꞌ, no ñee mèn chol diꞌs yeꞌrsinꞌ loo guꞌ por cón chenen no maste.
\v 12 Fxoꞌf ndeꞌ fxoꞌf ndlaꞌ lezoꞌ guꞌ no gure guꞌ guyith guxìis tac conꞌ roo no conꞌ xèn gàc coꞌ taꞌ Diox càa guꞌ loo béꞌ yiloa. Cona, ngue niin loo guꞌ: Fxec guꞌ loo conꞌ ndxàc loo guꞌ tac tatuaꞌqueꞌ mque tee mdub nguꞌs mèn prob mèn coꞌ mdeꞌth diꞌs coꞌ ndxab Diox, mèn coꞌ mque tee ban póla ndooreꞌ coꞌseꞌ gáal guꞌ.
\s Jesús ndxab loo myenꞌ xinꞌ mtéꞌth Jesús: Guꞌ nac xal ted. No nac guꞌ xal xnìi loo mèn loo izlyoꞌ.
\r (Mr. 9.50; Lc. 14.34–35)
\p
\v 13 Tolo ndxab Jesús loo myenꞌ xinꞌ mtéꞌth Jesús: Nde niin thìb conꞌ loo guꞌ: Neequeꞌ guꞌ leꞌ ted ndli par neꞌyizaꞌde chol nít yèth o bélꞌ coꞌ ngo mèn ted loo, ¿léꞌ? Cheleꞌ teda alithe nzoꞌf diꞌs nac ted coꞌ inaziide par neꞌyizaꞌde conꞌ coꞌ ngo mèn ted, sya, ya yende cón ntac ted. No cobii mèn ted par loo tub mèn loo ted. Tataa mod, ne, guꞌ nzo làth mèn coꞌ alithe nque tee ban loo chol conꞌ yeꞌrsinꞌ par càba loo mèna leꞌ mèna neꞌtolode cuaꞌn mod gàc mèna mèn yeꞌrsinꞌ axta plóthe. Per cheleꞌ guꞌ neꞌque tee ban ndacte loo mèn yeꞌrsinꞌa, càba leꞌ mèna tolo li conꞌ yeꞌrsinꞌ axta plóthe no yende cón ntac guꞌ loo Diox. Sya, gàca loo guꞌ coꞌ xàꞌ Diox guꞌ loo zinꞌ cheꞌn Diox xal coꞌseꞌ mblobii mèn teda.
\p
\v 14 Lomisqueꞌ ne, guꞌ nac xal xnìi loo mèn yeꞌrsinꞌ loo izlyoꞌ. Neequeꞌ guꞌ no ndaꞌqueꞌ guꞌ cuent leꞌ thìb ciuda coꞌ nziriꞌ gáp loo thìb yii yende mod gaꞌs loo mèn. Thidtenequeꞌ ndxúꞌ ciudaa loo mèn.
\v 15 Neꞌ neꞌ co mèn xnìi thìb lampr no yiloa tauꞌ mèn loo lampr con thìb cajón. Ndxeꞌlequeꞌ, quetal mèn lampr gáp par tenìi lampr loo mèn coꞌ nzo leꞌn nyòo liz mèn.
\v 16 Cona, ngue niin loo guꞌ: Tataaqueꞌ bli guꞌ no fque tee ban ndac guꞌ loo mèn, guꞌ coꞌ, lìcqueꞌ, nac xal xnìi loo mèn yeꞌrsinꞌ loo izlyoꞌ par huiꞌ mèn no taꞌ mèn cuent loo ryethe conꞌ ndac coꞌ ndli guꞌ. Coꞌseꞌ ñèe mèn leꞌ guꞌ ndliqueꞌ conꞌ ndac, leꞌ sya, mèna tolo li gàc conꞌ guryath no conꞌ guryèn loo Diox xud guꞌ por cón cheꞌn guꞌ làth mèn.
\s Jesús ngue luꞌ loo mèn cón cheꞌn ley coꞌ mxoꞌf Moisés loo mèn.
\p
\v 17 Neꞌlide guꞌ xtùuz no neꞌ neꞌ yilaꞌs guꞌ leꞌ daa ndal par techeen no tonꞌen ley coꞌ mxoꞌf Moisés loo mèn. Neꞌngalten par tonꞌen ley coꞌ mxoꞌf Moisés loo mèn. Neꞌ neꞌ ngalen par techeen diꞌs coꞌ gunii mèn coꞌ mdeꞌth diꞌs coꞌ ndxab Diox póla. Neꞌngalten par techeen no tonꞌen cón cheꞌn leya no cón cheꞌn diꞌsa. Ndxeꞌlequeꞌ, ndalen par lipeꞌen ryethe conꞌ cón nee diꞌspeꞌ cón cheꞌn ley no diꞌs coꞌ mdeꞌth mèn coꞌ ndxab Diox póla.
\v 18 Tac, lìcpeꞌ baꞌi, na ngue nii lo guꞌ: Láth beꞌ nziriꞌ béꞌ coꞌ nac loo béꞌ no izlyoꞌ, neꞌbiichede nec thìb letr no nec thìb yalnibeꞌ neꞌzyeꞌde no neꞌ neꞌ bix loo coꞌ nac cón cheꞌn ley coꞌ mxoꞌf Moisés loo mèn axtaqueꞌ gàcqueꞌ, no tyaaqueꞌ, no tyubqueꞌ diꞌs ryete conꞌ coꞌ mdoo lezoꞌ Diox gàc por cón cheꞌn ley coꞌ mxoꞌf Moisés loo mèn.
\v 19 Cona, ngue niin loo guꞌ: Leꞌ mèn coꞌ tèꞌb no neꞌlide mèn cas diꞌs coꞌ ñibeꞌ ley coꞌ mxoꞌf Moisés ndxèꞌ, coꞌ nac yalñibeꞌ coꞌ nac más beꞌthe, no cheleꞌ mèna ndluꞌ loo taamas mèn leque conꞌ ndli mèna, Diox co cuent leꞌ mèna nac más mèn beꞌthe loo rye mèn coꞌ ñibeꞌ Diox. Per mèn coꞌ ndyubdiꞌs loo ryethe diꞌs coꞌ ñibeꞌ ley coꞌ mxoꞌf Moisés loo mèn, no ndluꞌ mèna loo xtàa mèna li xtàa mèna xalqueꞌ ndli mèna, leꞌ sya, co Diox cuent gàc mèna mèn roo no mèn xèn loo taamas mèn loo cón cheꞌn coꞌteꞌ ñibeꞌ Diox loo mèn.
\v 20 Daa ngue nii loo guꞌ: Cheleꞌ guꞌ neꞌque tee ban ndacte thìb yalnaban coꞌ nac thìb yalnaban más ndac leque mod coꞌ nzi tee ban mèn coꞌ ndluꞌ cón cheꞌn ley coꞌ mxoꞌf Moisés loo mèn nación Israel, no mod coꞌ nzi tee ban mèn coꞌ nac mèn xleyꞌ farise, leꞌ sya, thidtenequeꞌ neꞌgàcte loo guꞌ yòo guꞌ coꞌteꞌ ñibeꞌ Diox par ñibeꞌ Diox loo guꞌ.
\s Jesús ngue luꞌ loo mèn cón cheꞌn mèn coꞌ ndxecloo ñèe xtàa.
\r (Lc. 12.57–59)
\p
\v 21 Guꞌ nanee no nonqueꞌ guꞌ no ndaꞌqueꞌ guꞌ cuent xal ngòc diꞌs coꞌ mbluꞌ mèn mod cheꞌn mèn loo xtàa mèn làth diꞌs coꞌ ndub loo ley coꞌ mxoꞌf Moisés loo mèn pólleꞌa: Neꞌguthte guꞌ xtàa guꞌ. Tac cheleꞌ chol mèn guth chol hues xtàa mèn, cón cheꞌn mèna tub rez thìb juez.
\v 22 Per daa ngue nii loo guꞌ: Chol mèn coꞌ angnziriꞌ ndxàc nayiꞌ no ndxòo xyàn lezoꞌ mèna ñèe mèna hues xtàa mèna, cón cheꞌn mèna ndxàal tub rez thìb juez. Lomisqueꞌ ne, chol mèn coꞌ nque diꞌs con xtàa mèn, sya, cón cheꞌn mèna ndxàal tyub rez loo mèn coꞌ ndyoo ner, no coꞌ ndyoo naa, no coꞌ ñibeꞌ, loo mèn nación Israel. No chol mèn coꞌ gab loo hues xtàa mèna leꞌ mèna nac mèn naxèn no mèn nasan no mèn yéc brel, mèna nzo ryes yòo yeꞌrbìil coꞌteꞌ ndxetoo bèel no quìi.
\p
\v 23 Más de cona, ngue niin conꞌ ndxèꞌ loo guꞌ: Cheleꞌ chó guꞌ nzi yoo làth guꞌ, no láth nzi yoo guꞌa, hueꞌ guꞌ gòn guꞌ no ofrend guꞌ par taꞌ guꞌi loo cón cheꞌn Diox no cuec guꞌ ofrend guꞌ coꞌ nac gòn loo mes, no axta syareꞌ teꞌ lezoꞌ guꞌ leꞌ hues guꞌ no xtàa guꞌ ndxecloo ñèe guꞌ,
\v 24 sya, láꞌ guꞌ ofrend guꞌa loo mes par ner ya guꞌ, ya tàl guꞌ loo diꞌs no loo cuent loo chol hues guꞌ no loo chol xtàa guꞌ coꞌ ndxàc conꞌ yeꞌrsinꞌ loo. Sya, bere guꞌ, yeꞌth guꞌ coꞌteꞌ ndoo mes. No gab guꞌ loo Diox: Ofrend nuꞌ ndxèꞌ, Tad Diox.
\p
\v 25 Tolo ngue niin loo guꞌ, ne: Cheleꞌ chol mèn coꞌ ngyoo no guꞌ ya taꞌ part cón cheꞌn guꞌ loo juez, bli guꞌ par tyoodiꞌs ryop guꞌ mèna ned nda guꞌ ñeeneꞌ xá mod li guꞌ no xá mod gàc cón cheꞌn guꞌ par neꞌquexùꞌde mèna guꞌ loo juez ó loo xcal. Yiloa na, taꞌ juez o xcal guꞌ loo xaꞌ coꞌ nac tinient o mayor. Leꞌ tinient o mayor na, co guꞌ leziꞌf.
\v 26 Lìcpeꞌ baꞌi, daa nii loo guꞌ: Tya nzo guꞌ. Neꞌryoꞌde guꞌ leziꞌf axtaqueꞌ zib guꞌ tmi coꞌ nac mult guꞌ. Sya, coꞌ juez o xcal guꞌ leziꞌf.
\s Jesús ngue luꞌ loo mèn cón cheꞌn mèn coꞌ ndli yalburrid.
\p
\v 27 Lomisqueꞌ ne, nonqueꞌ guꞌ no ndaꞌqueꞌ guꞌ cuent xal ngòc diꞌs no cuent coꞌ mbluꞌ mèn mod cheꞌn mèn loo xtàa mèn làth diꞌs coꞌ ndub loo ley coꞌ mxoꞌf Moisés loo mèn póla coꞌ mbez: Neꞌlide guꞌ yalburrid.
\v 28 Per daa ngue nii loo guꞌ: Chol mèn coꞌ ndyub yoꞌf lezoꞌ ngüiꞌ mèna loo thìb xaꞌgot par gàal mèna xaꞌgota, mblileꞌ mèna yalburrid leꞌn lezoꞌ mèna con xaꞌgota.
\p
\v 29 Lomisqueꞌ ne, angab naꞌi: Cheleꞌ guꞌ ndli cuent no ndenꞌ guꞌ leꞌ ngudloo guꞌ coꞌ nac ladli, lìcqueꞌ, nac coꞌ ndli par cuaꞌn guꞌ xquin guꞌ no xtol guꞌ, más huen bloꞌ guꞌ ngudloo guꞌ thìb lad loo guꞌ. Tac más huen gàca loo guꞌ yende sa ngudloo guꞌ leque tyactìi dib lad guꞌ loo quìi no loo bèel leꞌn yeꞌrbiil.
\v 30 No cheleꞌ guꞌ ndli cuent leꞌ yaꞌ guꞌ, lìcqueꞌ, nac coꞌ ndli par cuaꞌn guꞌ xquin guꞌ, más huen fchoꞌ guꞌ yaꞌ guꞌ no blobii guꞌ yaꞌ guꞌ thìb lad loo guꞌ. Leꞌ sya, más huen gàca loo guꞌ yende sa yaꞌ guꞌ coꞌ nac thìb part cheꞌn lad guꞌ leque lyàa dib lad guꞌ leꞌn yeꞌrbìil. Por cona, thidtene neꞌcuaꞌnte guꞌ xquin guꞌ no xtol guꞌ par neꞌyòode guꞌ leꞌn yeꞌrbìil.
\s Jesús ngue luꞌ loo mèn cón cheꞌn mèn coꞌ ndláꞌ xinꞌ saꞌl.
\r (Mt. 19.9; Mr. 10.11–12; Lc. 16.18)
\p
\v 31 Tolo ndxab Jesús loo mèna:
\p ―Nonqueꞌ guꞌ no naneequeꞌ guꞌ xal nac diꞌs coꞌ ndub loo ley coꞌ mxoꞌf Moisés loo mèn póla leꞌ chol mèn coꞌ mbez láꞌxùꞌ mèna xinꞌ saꞌl leque mèna, taꞌ mèna yeꞌs coꞌ lèe act coꞌ taꞌ cuent no coꞌ luꞌ leꞌ mèna mbláꞌxùꞌ xinꞌ saꞌl.
\v 32 Per daa ngue nii loo guꞌ: Cheleꞌ thìb mbiꞌ láꞌxùꞌ xinꞌ saꞌlpeꞌ mbiꞌ no ingue lide xinꞌ saꞌl mbiꞌ yalburiid, leꞌ sya, leque mbiꞌ ngue li par mbez mèn leꞌ xinꞌ saꞌl mbiꞌ ngue li yalburrid mastaleꞌ ingue lide xaꞌi. No mèn coꞌ selyaꞌ con xaꞌgot coꞌ mbláꞌxùꞌ saꞌla ndooreꞌ, xaꞌbiꞌa ngue li yalburrid con xaꞌgota, ne.
\s Jesús ngue luꞌ loo mèn neꞌteꞌthte mèn lèe Diox anxleꞌ.
\p
\v 33 Más de cona, nonqueꞌ guꞌ no ndaꞌqueꞌ guꞌ cuent xal mbez diꞌs coꞌ ndub loo libr coꞌ ngòc ley coꞌ mxoꞌf Moisés loo mèn póla coꞌ mbez: Neꞌláꞌde guꞌ no neꞌyathlaꞌste guꞌ li guꞌ coꞌ mcàbgòn guꞌ li guꞌ coꞌseꞌ mdeꞌth guꞌ lèe Diox loo mèn par li guꞌ chol conꞌ.
\v 34 Per daa ngue nii loo guꞌ: Nec thìb mod no nec tedib mod neꞌteꞌthte guꞌ lèe Diox. Nec thìb mod no nec tedib mod neꞌteꞌthte guꞌ, coꞌ nee diꞌs, nac lèe béꞌ, xal ndli taamas mèn tac loo béꞌ nac coꞌteꞌ nzo Diox.
\v 35 Neꞌ neꞌ teꞌth guꞌ, coꞌ nee diꞌs, nac lèe izlyoꞌ xal ndli taamas mèn. Tac izlyoꞌ nac loo Diox xal coꞌseꞌ ndli nii mèn descans loo thìb banc. Neꞌ neꞌ teꞌth guꞌ, coꞌ nee diꞌs, nac lèe ciuda Jerusalén xal ndli taamas mèn. Tac ciuda Jerusalén nac lizpeꞌ no làazpeꞌ cheꞌn rey roo no cheꞌn rey xèn coꞌ nac yub daa coꞌ nac Crist.
\v 36 Neꞌ neꞌ teꞌth guꞌ, coꞌ nee diꞌs, nac lèe yéc guꞌ xal ndli taamas mèn. Tac guꞌ neꞌgácte toxcuaꞌ nec thìb yis yéc guꞌ, coꞌ nac yis guch no coꞌ nac yis nagat par yanꞌa thidtene tataa.
\v 37 Más huen guuz guꞌ: Neeca, o guuz guꞌ: Tyèꞌ. Tac ryete diꞌs coꞌ mbez mèn coꞌ nac masreꞌ diꞌs loo conꞌ mbezen ndxèꞌ, ale ndli mèn conꞌa por cón cheꞌn Mebizya.
\s Jesús ngue luꞌ loo mèn cón cheꞌn mèn coꞌ ngo xtàa cón ndli no xtàa mèn mèn.
\r (Lc. 6.29–30)
\p
\v 38 Más de cona, nonqueꞌ guꞌ no ndaꞌqueꞌ guꞌ cuent xal mbez diꞌs coꞌ ndub loo libr coꞌ nac ley coꞌ mxoꞌf Moisés loo mèn póla: Cheleꞌ chó mèn cue yoo no tezaꞌ thìb mbiꞌ thìb ngudloo xtàa mbiꞌ, mèn tezaꞌ thìb ngudloo mbiꞌ coꞌ mtezaꞌ ngudloo xtàa mbiꞌa, ne. Lomisqueꞌ ne, cheleꞌ chó mèn cue yoo no coꞌ yèe thìb mbiꞌ thìb quele xtàa mbiꞌ, lomisqueꞌ mod, coꞌ mèn thìb quele mbiꞌ coꞌ mbloꞌ quele xtàa mbiꞌa.
\v 39 Per daa ngue nii loo guꞌ: Fxec guꞌ loo chol conꞌ yeꞌrsinꞌ coꞌ li no mèn hues xtàa guꞌ guꞌ. Cheleꞌ chol mèn coꞌ lyaꞌs quis thìb lad rloo guꞌ, fteꞌb guꞌ tedib lad rloo guꞌ loo mèna par quis mèna tedib lad rloo guꞌ, ne.
\v 40 No cheleꞌ chol mèn ndlyaꞌs li de mandar guꞌ no ale ndlyaꞌs mèna teche mèna camis guꞌ, ftaꞌ guꞌ chamar guꞌ hueꞌ mèna, ne.
\v 41 Lomisqueꞌ ne, cheleꞌ chol mèn ndlyaꞌs ñibeꞌxùꞌ mèna loo guꞌ par hueꞌ guꞌ yóꞌ coꞌ nac cheꞌnpeꞌ mèn xís guꞌ casqueꞌ son kilometr, beꞌ guꞌi xís guꞌ taason kilometr.
\v 42 No chol mèn coꞌ ñaꞌb ro chol conꞌ loo guꞌ, ftaꞌ guꞌ conꞌ càa mèna. No chol mèn coꞌ lyaꞌs teche guꞌ conꞌ loo mèn, fteche guꞌi loo mèna no neꞌcàꞌde guꞌi loo mèna.
\s Jesús ngue luꞌ xá mod más huen queꞌ lezoꞌ mèn ñèe mèn xtàa mèn coꞌ nac ngolo ngolaꞌs cheꞌn mèn.
\r (Lc. 6.27–28, 32–36)
\p
\v 43 Más de cona, nonqueꞌ guꞌ no ndaꞌqueꞌ guꞌ cuent xal ngòc diꞌs coꞌ mbluꞌ mèn loo xtàa mèn xal mbez diꞌs coꞌ ndub loo ley coꞌ mxoꞌf Moisés loo mèn póla: Fqueꞌ lezoꞌ guꞌ gunèe guꞌ mèn coꞌ ndxàc amiu guꞌ. Leꞌ mèn coꞌ nac ngolo ngolaꞌs cheꞌn guꞌ na, gocloo guꞌ gunèe guꞌ mèna.
\v 44 Per daa ngue nii loo guꞌ: Fqueꞌ lezoꞌ guꞌ gunèe guꞌ mèn coꞌ nac ngolo ngolaꞌs cheꞌn guꞌ. Nadoꞌ diꞌs nadoꞌ cuent tyoodiꞌs no guꞌ mèn coꞌ ñii yèe ñii tìi cón cheꞌn guꞌ. Bli guꞌ conꞌ ndac loo mèn coꞌ ndxòo xyàn lezoꞌ ñèe guꞌ. Gurez guꞌ Diox cón cheꞌn mèn coꞌ angnziriꞌ ndli ngòc nguàal conꞌ loo guꞌ no ndub nguꞌs mèn guꞌ, ne.
\v 45 Cheleꞌ guꞌ li tataa, lìcpeꞌ baꞌi, gàc guꞌ xinꞌ xud guꞌ Diox coꞌ nzo loo béꞌ. Tac Diox xud guꞌa ndli leꞌ huiz ntenìi loo mèn yeꞌrsinꞌ no loo mèn ndac. No ndli xud guꞌ Diox ndlyàa yuu loo mèn coꞌ nac mèn nalì no mèn nambìi loo Diox no loo mèn yeꞌrsinꞌ.
\v 46 Tac cheleꞌ guꞌ ante nqueꞌ lezoꞌ ñèe guꞌ mèn coꞌ nqueꞌ lezoꞌ ñèe guꞌ, ¿chéꞌ ndyac guꞌ ngue li guꞌ conꞌ ndac loo Diox sya, càꞌ? Ingue lide guꞌ conꞌ ndac loo Diox, ey. Tac axta mèn coꞌ ndli cobrar tmi cón cheꞌn contribución ndli tataa. Ante nqueꞌ lezoꞌ mèna ñèe mèna mèn coꞌ nqueꞌ lezoꞌ ñèe leque mèna.
\v 47 No cheleꞌ guꞌ nii Diox ante loo mèn gulàazpeꞌ guꞌ, ¿chó conꞌ ndac ndli guꞌ loo Diox coꞌseꞌ ndli guꞌ tataa, sya? Yende chó conꞌ ndac ndli guꞌ loo Diox cheleꞌ guꞌ ngue li tataa, ey. Tac leque conꞌa ndli mèn coꞌ inacte mèn nación Israel. ¡Aa, guꞌ mèn izlyoꞌ!
\v 48 Gòc guꞌ mèn nalì no gòc guꞌ mèn nambìi coꞌ, lìcqueꞌ, nqueꞌ lezoꞌ ñèe hues xtàa xal nac xud guꞌ Diox coꞌ nzo loo béꞌ, Diox coꞌ nac Diox nalì no Diox nambìi. Tac xud guꞌ Diox nqueꞌqueꞌ lezoꞌ ñèe alux mèn.
\c 6
\s Jesús ndluꞌ loo mèn xá mod li mèn conꞌ ndac loo xtàa mèn.
\p
\v 1 Tolo mbluꞌ Jesús loo mèn. Mbez Jesús:
\p ―Nabeꞌste fque tee ban ndac guꞌ loo Diox. Neꞌgàcte guꞌ arid mèn nateꞌs par huiꞌ chol mèn coꞌ ndxàc hues xtàa guꞌ loo conꞌ ndli guꞌ. Tac cheleꞌ guꞌ li tataa, sya, tataa mod ndyeꞌs guꞌ. Leꞌ sya, xud guꞌ coꞌ nzo loo béꞌ neꞌlide par gàp guꞌ cón cheꞌn guꞌ loo xud guꞌ Diox.
\v 2 Ngue niin loo guꞌ, ne: Neꞌtubte guꞌ arid ruid loo mèn par cuez mèn trompet loo mèn xal ndli mèn coꞌ anzeꞌf ntembìi ro no coꞌ anzeꞌf ntembìi xtiꞌs leꞌn sinagog no leꞌn yèez par ned ndxèꞌ par ned baꞌ. Ale tataa ndli mèna par gab chol mèn: Susqueꞌ huen nac mèn baꞌ, yoo. Lìcpeꞌ baꞌi, daa ngue nii loo guꞌ: Por gust coꞌ ndaꞌ mèna lezoꞌ mèna, ale leque mèna ndli par guneei loo mèna. No yende chó conꞌ coꞌ gàc cheꞌn mèna gàp mèna loo Diox.
\v 3 Per coꞌseꞌ taꞌ guꞌ gòn càa mèn prob, bli guꞌ par neꞌ mèn coꞌ ndxàc amiu guꞌ neꞌtaꞌde cuent pló cón nac coꞌ ndaꞌ guꞌ gòn.
\v 4 Más huen xexte ftaꞌ guꞌ gòn càa prob mèna. Leꞌ sya, xud guꞌ Diox coꞌ nzo loo béꞌ, coꞌ ngue huiꞌ loo guꞌa, li par tolo anggàc conꞌ ndac loo guꞌ.
\s Jesús ngue luꞌ xá mod cuez mèn Diox.
\r (Lc. 11.2–4)
\p
\v 5 Tolo mbluꞌ Jesús mèn. Ndxab Jesús:
\p ―Coꞌseꞌ cuez guꞌ Diox, neꞌgàcte guꞌ xal mèn coꞌ ntembìi ro no xal mèn coꞌ ntembìi xtiꞌs. Mèna anzeꞌf ndyublaꞌs cuez Diox, ndoo gaꞌ mèn leꞌn sinagog. Mèna ndyublaꞌs ndyoo gaꞌ pál squin ned, ne, par cuez mèna Diox par huiꞌ no ñaa hues xtàa mèna loo mèna. Lìcpeꞌ baꞌi, daa ngue nii loo guꞌ: Con mod coꞌ ndxàp mèna, leque mèna mbli guneei loo mèna. No tataa mod yende chó conꞌ coꞌ gàc cheꞌn mèna gàp mèna loo Diox.
\v 6 Per coꞌseꞌ cuez guꞌ Diox, gòo guꞌ leꞌn nyòo coꞌteꞌ ndxàt guꞌ no ftauꞌ guꞌ ro ryoꞌ. Gurez guꞌ Diox xud guꞌ coꞌ nzo loo guꞌ leꞌn cuart coꞌteꞌ ndxàt guꞌ. Xud guꞌ Diox coꞌ ngue huiꞌ xexte loo guꞌ, xud guꞌ Diox li par gàc conꞌ ndac loo guꞌ loo xnaa.
\p
\v 7 Coꞌseꞌ cuez guꞌ Diox, neꞌcuezte guꞌ lèe Diox goze goze con leque diꞌs coꞌ mbez guꞌ coꞌ intacte xal ndli mèn coꞌ inacte mèn nación Israel. Tac ndli mèna xtùuz por diꞌs coꞌ mbez mèna goze goze no maste tataa mod más ndxòn Diox ro mèna coꞌseꞌ tataa mbez mèna loo Diox. Per ilìcte conꞌa.
\v 8 Neꞌgàcte guꞌ lalqueꞌ xal mèna, tá, tac xud guꞌ Diox naneequeꞌ no nonqueꞌ cópeꞌ nquin guꞌ ndooreꞌ coꞌseꞌ ñaꞌb guꞌ conꞌa loo xud guꞌ Diox.
\v 9 Cona, ngue niin loo guꞌ taandxèꞌ mod cuez guꞌ Diox:
\pi1 Diox xud nuꞌ, coꞌ nzo loo béꞌ, ndlyaꞌs nuꞌ no ñaꞌb nuꞌ loo Uꞌ leꞌ mèn taꞌ cuent no tenꞌ mèn thidte Uꞌ nac Diox natúꞌpeꞌ.
\v 10 Nuꞌ mbez loo Uꞌ no ñaꞌb nuꞌ loo Uꞌ leꞌ Uꞌ ñibeꞌpeꞌ loo mèn dib athu loo izlyoꞌ. No gàca xal nee lezoꞌ Uꞌ loo izlyoꞌ ndxèꞌ xalqueꞌ ndxàc coꞌ nee lezoꞌ Uꞌ loo béꞌ.
\v 11 Ftaꞌ Uꞌ luaꞌ nuꞌ no xít nuꞌ coꞌ hua nuꞌ nalze no taamas conꞌ coꞌ naquinqueꞌ nuꞌ atate huiz.
\v 12 Ftonꞌ Uꞌ xquin nuꞌ no xtol nuꞌ xal nteriꞌth ntecanꞌ nuꞌ xèn xyàn coꞌ ndli hues xtàa nuꞌ loo nuꞌ.
\v 13 Neꞌláꞌyaꞌde Uꞌ nuꞌ par aseli nuꞌ cuaꞌn nuꞌ xquin nuꞌ no xtol nuꞌ loo Uꞌ. Ndxeꞌlequeꞌ, blàa Uꞌ nuꞌ loo ryethe conꞌ yeꞌrsinꞌ. Tac Uꞌ ñibeꞌ loo ryethe conꞌ. No ndxàp Uꞌ ryethe conꞌ roo no ryethe conꞌ xèn laꞌs nii Uꞌ no laꞌs yaꞌ Uꞌ. No cheꞌnpeꞌ Uꞌ nac ryethe conꞌ roo no conꞌ xèn leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node thidtene. Taandxèꞌ gàca.
\p
\v 14 Tac cheleꞌ guꞌ nteriꞌth no ntecanꞌ chol xen no xyàn coꞌ ndli chol mèn hues xtàa guꞌ loo guꞌ, leꞌ sya, xud guꞌ Diox coꞌ nzo loo béꞌ tonꞌqueꞌ xquin guꞌ no xtol guꞌ coꞌ ncuaꞌn guꞌ.
\v 15 Per cheleꞌ guꞌ neꞌteriꞌthte no neꞌtecanꞌte chol xen no xyàn coꞌ ndli hues xtàa guꞌ loo guꞌ, neꞌ xud guꞌ coꞌ nzo loo béꞌ neꞌtonꞌte xtol guꞌ no xquin guꞌ coꞌ ncuaꞌn guꞌ.
\s Jesús ngue luꞌ loo mèn xá mod li mèn coꞌseꞌ cue xlat mèn.
\p
\v 16 Coꞌseꞌ lyaꞌs guꞌ cue xlat guꞌ por ndxep tiemp, neꞌluꞌde guꞌ loo mèn leꞌ guꞌ nzi xi lezoꞌ xal ndli mèn coꞌ ntembìi ro no mèn coꞌ ntembìi xtiꞌs. Tac mèna asendli ndluꞌ mèna loo mèn leꞌ mèna nxi lezoꞌ. No nseꞌ mèna rloo mèna par huiꞌ taamas mèn leꞌ mèna nzi xlat. Lìcpeꞌ baꞌi, daa ngue nii loo guꞌ: Gust coꞌ ndaꞌ mèna lezoꞌ mèna, conꞌa ndli tyathe guneei loo mèna loo Diox. No yende chó cón coꞌ gàc cheꞌn mèna gàp mèna loo Diox.
\v 17 Per guꞌ, coꞌseꞌ cue xlat guꞌ, blo guꞌ chuꞌth aceit yéc guꞌ no ftee guꞌ bèu yéc guꞌ. No ftech guꞌ rloo guꞌ par neꞌluꞌde guꞌ guꞌ loo mèn nzi xlat guꞌ xal ndli mèn coꞌ ntembìi ro no coꞌ ntembìi xtiꞌs
\v 18 par tataa mod neꞌtenꞌte lezoꞌ mèn leꞌ guꞌ nzi xlat. Ndxeꞌlequeꞌ, ante xud guꞌ Diox coꞌ nzo no guꞌ non no nanee cón cheꞌn guꞌ. Sya, xud guꞌ Diox li anggàc conꞌ ndac loo guꞌ.
\s Jesús ngue bez loo mèn más huen gàp mèn conꞌ ndac loo béꞌ.
\r (Lc. 12.33–34)
\p
\v 19 Lomisqueꞌ, ngue niin loo guꞌ, ne: Neꞌgath lyuxte guꞌ par que no guꞌ yalgonꞌ guꞌ loo izlyoꞌ ndxèꞌ, coꞌteꞌ ndxezaꞌ yalgonꞌ, no coꞌteꞌ ndlyux yalgonꞌ, no coꞌteꞌ nquée mxìl yalgonꞌ, no coꞌteꞌ mquée mbèd yalgonꞌ, no coꞌteꞌ ndli huanꞌ huanꞌ yalgonꞌ.
\v 20 Más huen, fcuaꞌn guꞌ mod no bli guꞌ par gàp guꞌ yalgonꞌ loo béꞌ coꞌteꞌ neꞌquéede mxìl yalgonꞌ, no neꞌhuade mbèd yalgonꞌ, no coꞌteꞌ yende cón li par yizaꞌ yalgonꞌ, no coꞌteꞌ neꞌli huanꞌte huanꞌ yalgonꞌ.
\v 21 Tac cheleꞌ guꞌ anzeꞌf nqueꞌ lezoꞌ ñèe yalgonꞌ, sya, li guꞌ cuent yalgonꞌa nac lezoꞌ guꞌ no ngudloo guꞌ por anzeꞌf ndyac guꞌ ñèe guꞌ yalgonꞌa. Leꞌ conꞌ coꞌ más nac cón cheꞌn Diox na, thìb lad nqueꞌ guꞌ conꞌ coꞌ nac cón cheꞌn Diox.
\s Con ngudloo mèn ngüiꞌ mèn ned ndyee mèn par neꞌyiziꞌfte mèn no par neꞌyigaꞌste mèn ned ndyee mèn.
\r (Lc. 11.34–36)
\p
\v 22 Con ngudloo mèn ngüiꞌ mèn chol conꞌ, ¿léꞌ? Per cheleꞌ mèn indyubte yoꞌf lezoꞌ loo conꞌ ngüiꞌ mèn, mastaleꞌ ngüiꞌ mèn loo chol conꞌ ngüiꞌ mèn, no cheleꞌ mèn indaꞌde lugar li mèn conꞌ yeꞌrsinꞌ por cón cheꞌn conꞌ coꞌ ngüiꞌ mèn, sya, nambìiqueꞌ ndoo mèn no huen nque tee mèn loo Diox. Sya, neꞌ neꞌ inac ngudloo mèn coꞌ ncuaꞌn xquin mèn loo mèn.
\v 23 Per ndxeꞌlequeꞌ, cheleꞌ mèn thìb lìte ndli xtùuz no ndenꞌ mèn leꞌn lezoꞌ mèn ante li mèn conꞌ yeꞌrsinꞌ por ngüiꞌ mèn loo conꞌ con ngudloo mèn par gàc cheꞌn mèna cón cheꞌn yalgonꞌ cheꞌn izlyoꞌ ndxèꞌ, mèna thidtene ncuau yéc no ncuau loo par neꞌñeede mèna chó ro yilaꞌs mèn coꞌseꞌ tyoodiꞌs mèn. Neꞌñeede lezoꞌ mèna cón cheꞌn xá mod ndxàal que tee ban ndac mèna. No thidtene nanguib mèna.
\s Yende mod yòo mèn loo cón cheꞌn Diox coꞌseꞌ más ndxath ndlyux mèn ñèe mèn tmi.
\r (Lc. 16.13)
\p
\v 24 Cona, ngue niin loo guꞌ tedib vez: Yende chó moz nzo coꞌ li zinꞌ loo chop patrón. Tac cheleꞌ moz li preb li moz zinꞌ loo chop patrón, sya, yòo xyàn lezoꞌ moz ñèe moz thìb patrón. Leꞌ tedib patrón na, más huen tyac lezoꞌ moz ñèe moz patrona. O bien, más altant tyoo moz loo thìb patrón. Leꞌ loo tedib patrón na, yecloo moz. Cona, ngue niin loo guꞌ: Yende mod li mèn sirv loo Diox cheleꞌ mèn más ndxath ndlyux loo cón cheꞌn yalgonꞌ cheꞌn izlyoꞌ ndxèꞌ.
\s Diox nquenap mèn coꞌ nac xinꞌ Diox. No ndli Diox par que no mèn conꞌ naquin mèn thìb huiz tedib huiz.
\r (Lc. 12.22–31)
\p
\v 25 Niin loo guꞌ, ne, ey: Neꞌtyóode guꞌ no neꞌgath lyuxte guꞌ par gab guꞌ loo lezoꞌ guꞌ pá ned ya guꞌ zinꞌ par que no guꞌ cón hua guꞌ no cón gu guꞌ. Neꞌ neꞌ tyóo guꞌ par gab guꞌ loo lezoꞌ guꞌ pá ned tyee centav par tyuꞌ xab guꞌ coꞌ goc guꞌ. ¿Chéꞌ ndli guꞌ cuent ante par hua mèn nzi ban mèn loo izlyoꞌ ndxèꞌ, càꞌ? No ¿chéꞌ ndli guꞌ cuent más ntac xab mèn leque ladpeꞌ mèn, càꞌ? Yende xàa.
\v 26 Huiꞌ guꞌ loo mbin béꞌ coꞌ nxobii loo mbii. No bli guꞌ xtùuz cón cheꞌn mbin. Mbin ingode bin. Neꞌ neꞌ inthop mbin cosech. Neꞌ neꞌ ingosuaꞌ mbin cosech. Mastaleꞌ tataa ndxàca loo mbin, xud guꞌ Diox coꞌ nzo loo béꞌ neequeꞌ xá mod huaa xud guꞌ Diox mbin. Aleꞌqueꞌ guꞌ más ntac leque mbin. ¡Pà neꞌ huaa Diox guꞌ xal nguaa Diox mbin!
\v 27 ¿Chó thìb guꞌ coꞌ nziriꞌ trèꞌ coꞌ más ndxath ndlyux gác guꞌ zib guꞌ mase taarol metr loo guꞌ par yolꞌ guꞌ taachuꞌtha? Yende xàa, ¿léꞌ?
\p
\v 28 ¿Chonon susqueꞌ ndyóo guꞌ cón cheꞌn xab guꞌ coꞌ nquin guꞌ, àꞌ? Huiꞌ guꞌ loo yeꞌ madalen coꞌ nzoꞌf yii den xal ndryoo yeꞌ madalen. Neꞌ neꞌ indli yeꞌ madalen zinꞌ. Neꞌ neꞌ inzìi yeꞌ madalen dó.
\v 29 Per na ngue nii loo guꞌ: Neꞌ Salomón coꞌ ngòc rey póla neꞌngoc xabte xal yeꞌ madalen, mastaleꞌ mque no Salomón huax xab Salomón coꞌ nabeꞌs natoxcuaꞌ.
\v 30 Cheleꞌ Diox tataa ndli mdoc xab yii den no yéꞌ huizeꞌ tec mèn huana leꞌn rdii liz mèn, aleꞌqueꞌ loo guꞌ neꞌ li Diox más coꞌ ndac xal huana. ¡Aa mèn izlyoꞌ coꞌ pente ndxelaꞌs loon!
\v 31 Por cona, ngue niin loo guꞌ: Neꞌtyóode guꞌ no neꞌgath lyuxte guꞌ par gab guꞌ: ¿Pá ned tyee coꞌ hua naꞌ? ¿Pá ned tyee coꞌ gu naꞌ yéꞌ huizeꞌ, yoo? No ¿pá ned tyee centav par tyuꞌ xab naꞌ yéꞌ huizeꞌ, ne?
\v 32 Neꞌlide guꞌ tataa tac mèn coꞌ nziriꞌ dib athu loo izlyoꞌ coꞌ inacte mèn nación Israel, mèna ncuaꞌn no ndyóo mèna cón cheꞌn ryethe conꞌa. Per xud guꞌ Diox coꞌ nzo loo béꞌ nonqueꞌ no naneequeꞌ leꞌ guꞌ naquinqueꞌ ryete conꞌa.
\v 33 Conꞌ coꞌ ngue niin loo guꞌ ndxèꞌ nac nerlequeꞌ conꞌ ndxàal li guꞌ: Ftaꞌ guꞌ lugar ñibeꞌpeꞌ Diox loo guꞌ. No fcuaꞌn guꞌ mod que tee ban lì guꞌ xal ndxòo lezoꞌ Diox li guꞌ. Cheleꞌ guꞌ tataa li, sya, Diox li par que no guꞌ ryethe taamas conꞌ coꞌ nquin guꞌ.
\v 34 Por cona, ngue niin loo guꞌ, ne: Neꞌtyóode guꞌ no neꞌgath lyuxte guꞌ nalleꞌ cón cheꞌn conꞌ coꞌ hua guꞌ no conꞌ coꞌ gu guꞌ no conꞌ coꞌ nquin guꞌ yéꞌ huizeꞌ. Neꞌgabte guꞌ loo xtàa guꞌ: Huen ngua naꞌ nalze. Mzyal thìb leꞌ rol luaꞌ naꞌ par nduhua naꞌ no xít naꞌ coꞌ gu naꞌ. Per ¿yéꞌ, àꞌ? ¿Cón hua naꞌ no cón gu naꞌ? Anxleꞌ mbez guꞌ tataa. ¿Chonon anzeꞌf ndyóo guꞌ cón cheꞌn conꞌ coꞌ gàc loo guꞌ yéꞌ huizeꞌ, àꞌ? Nzoqueꞌ huax conꞌ coꞌ nac cón cheꞌn conꞌ coꞌ ndxàc loo guꞌ nalleꞌ par tyóo guꞌ no par gath lyux guꞌ nalleꞌ, ey.
\c 7
\s Jesús ngue luꞌ: Neꞌhuiꞌde mèn no neꞌñaade mèn loo cón cheꞌn cón ndli xtàa mèn.
\r (Lc. 6.37–38, 41–42)
\p
\v 1 Neꞌhuiꞌde guꞌ no neꞌñaade guꞌ loo conꞌ ndli taamas mèn par quexùꞌ guꞌ mèna. Tac cheleꞌ guꞌ tataa tolo li, leꞌ sya, Diox tub rez cón cheꞌn guꞌ par quexùꞌ Diox guꞌ yéꞌ huizeꞌ, ne.
\v 2 Tac Diox tub rez cón cheꞌn guꞌ coꞌseꞌ gàc huiza par tetìi Diox guꞌ xalqueꞌ ngüiꞌ guꞌ no ñaa guꞌ loo taamas mèn par quexùꞌ guꞌ mèna. Xalqueꞌ nac mod coꞌ ndxàp guꞌ con taamas mèn, tataaqueꞌ li no Diox guꞌ coꞌseꞌ tub rez Diox cón cheꞌn guꞌ.
\v 3 ¿Xá mod más ngüiꞌ guꞌ loo thìb leꞌ chuꞌth yix coꞌ nzo ngudloo hues xtàa guꞌ leque huiꞌ guꞌ loo yix coꞌ más naroo coꞌ nzo ngudloo guꞌ, coꞌ nee diꞌs, ale más ngüiꞌ guꞌ loo ndxepte conꞌ yeꞌrsinꞌ coꞌ ndli hues xtàa guꞌ no ingüiꞌde guꞌ loo huax conꞌ yeꞌrsinꞌ coꞌ ndlipeꞌ guꞌ, àꞌ?
\v 4 No ¿xá mod ale ndli guꞌ ryes mbez guꞌ loo hues xtàa guꞌ: Hues, led cuante. Blaꞌ goꞌen thìb leꞌ yix chuꞌth coꞌ nzo ngudlool baꞌ. No indaꞌde guꞌ cuent cón cheꞌn yix coꞌ nac más naroo coꞌ nzo ngudloo guꞌ baꞌ, àꞌ?
\v 5 Aa, que ndxác guꞌ ntembìi guꞌ ro guꞌ no ntembìi guꞌ xtiꞌs guꞌ, ndee guꞌ. Ner bloꞌ guꞌ yix coꞌ nac más naroo coꞌ nzo ngudloo guꞌ baꞌ. Leꞌ yiloa na, guꞌ nee xá mod coꞌ guꞌ yix chuꞌth coꞌ nzo ngudloo hues xtàa guꞌ baꞌ, coꞌ nee diꞌs, bláꞌ guꞌ. Ya neꞌtolode li guꞌ huax conꞌ yeꞌrsinꞌ coꞌ ndli guꞌ. Sya, tataa mod gàp guꞌ razon coꞌx guꞌ loo xtàa guꞌ cón cheꞌn ndxepte conꞌ yeꞌrsinꞌ coꞌ ngue li hues xtàa guꞌ.
\p
\v 6 Neꞌtolode taꞌ guꞌ cuent no teꞌth guꞌ cón cheꞌn diꞌs ndac cheꞌn Diox loo mèn coꞌ nac mèn nayiꞌ no loo mèn yeꞌrsinꞌ tac neꞌstolqueꞌ, chàa, gàc nayiꞌ mèna loo guꞌ xal mbac nayiꞌ. No neꞌstolqueꞌ xìis no mèna cón cheꞌn diꞌs ndaca xal ndli nguch coꞌseꞌ ndlaꞌs xi nguch conꞌ ndxuhua nguch. No ndlo ndub nguch loo conꞌ ndxuhua nguch.
\s Jesús mbez: Bnaꞌb guꞌ conꞌ loo Diox. Bli guꞌ xal mèn coꞌ ngue cuaꞌn thìb conꞌ nquin mèn. Bli guꞌ xal mèn coꞌ nteꞌs puert par xalꞌ mèn puert par yòo mèn coꞌseꞌ cuez guꞌ Diox no coꞌseꞌ ñaꞌb guꞌ conꞌ loo Diox.
\r (Lc. 11.9–13; 6.31)
\p
\v 7 Cona, ngue niin loo guꞌ: Coꞌseꞌ cuez guꞌ Diox, gurez guꞌ Diox taandxèꞌ mod xal ndli mèn coꞌ ñaꞌb conꞌ loo xtàa mèn. Leꞌ sya, Diox li par que no guꞌ conꞌ coꞌ ñaꞌb guꞌa. No coꞌseꞌ cuez guꞌ Diox, bli guꞌ loo Diox xal ndli mèn coꞌseꞌ mtuhuan mèn thìb conꞌ ntac. Yiloa, noo noo ncuaꞌn mèn conꞌ mdyuhuana axta zyal conꞌa loo mèn. Leꞌ sya, tataa mod li Diox par taꞌ Diox conꞌ ñaꞌb guꞌ loo Diox càa guꞌ. No coꞌseꞌ cuez guꞌ Diox, bli guꞌ xal mèn coꞌ nteꞌs ryoꞌ liz mèn axtaqueꞌ xalꞌ mèn ryoꞌ par yòo guꞌ. Tataa mod, li Diox que no guꞌ conꞌ coꞌ ñaꞌb guꞌ loo Diox.
\v 8 Tac mèn coꞌ tolo mbez Diox, dib nzo yéc mèn no dib nzo lezoꞌ mèn, Diox li cas mèna. Lyath no Diox mèna no xalꞌ Diox ned no xalꞌ Diox yóꞌ loo mèna par que no mèna conꞌ coꞌ tolo ñaꞌb mèna loo Diox.
\p
\v 9 ¿Chéꞌ nzo chó guꞌ coꞌ nac gundan loo xinꞌ guꞌ, angab naꞌi, cheleꞌ xinꞌ guꞌ ñaꞌb conꞌ hua xinꞌ guꞌ loo guꞌ, chéꞌ tòo valor loo guꞌ no chéꞌ tli guꞌ ryes taꞌ guꞌ thìb leꞌ quèe càa xinꞌ guꞌ lugar de taꞌ guꞌ pan càa xinꞌ guꞌ coꞌseꞌ ñaꞌb xinꞌ guꞌ pan loo guꞌ par hua xinꞌ guꞌ, àꞌ?
\v 10 Lomisqueꞌ ne, ¿chéꞌ tòo valor loo guꞌ no chéꞌ tli guꞌ ryes taꞌ guꞌ thìb mbelꞌ càa xìnꞌ guꞌ coꞌseꞌ ndlyaꞌs xinꞌ guꞌ hua xinꞌ guꞌ thìb mbèel, càꞌ? Neꞌlide guꞌ ryes li guꞌ tataa, ¿léꞌ?
\v 11 Mastaleꞌ nac guꞌ gundan más naxin no gundan yeꞌrsinꞌ loo xinꞌ guꞌ, per guꞌ lyatqueꞌ lezoꞌ ñèe guꞌ xinꞌ guꞌ. No taꞌ guꞌ conꞌ ndac coꞌ ñaꞌb xinꞌ guꞌ loo guꞌ, ¿léꞌ? Aleꞌqueꞌ xud guꞌ Diox coꞌ nzo loo béꞌ neꞌ taꞌ conꞌ ndac loo mèn coꞌ ñaꞌba loo xud guꞌ Diox, coꞌ nee diꞌs, loo mèn coꞌ, lìcqueꞌ, ndxelaꞌs loo Diox.
\p
\v 12 Guꞌ ndlyaꞌs leꞌ chol mèn gàp mod loo guꞌ loo ryethe conꞌ, ¿léꞌ? Lomisqueꞌ, ngue niin loo guꞌ: Gòp guꞌ mod loo chol mèn thidtene, que naca ndxàp mèn mod loo guꞌ, que naca indxàpte mèn mod loo guꞌ. Conꞌ ndxèꞌ nac diꞌs coꞌ ñibeꞌ ley coꞌ mxoꞌf Moisés loo mèn póla. No naca leque diꞌs coꞌ mqueꞌ mèn coꞌ mdeꞌth cón cheꞌn coꞌ ndxab Diox yeꞌs loo libr póla.
\s Mèn coꞌ ndxòo loo cón cheꞌn Diox, mèna ndli xal coꞌseꞌ ndxòo mèn ro thìb puert naya.
\r (Lc. 13.24)
\p
\v 13–14 Non guꞌ no naneequeꞌ guꞌ nzo puert naya no nzo ned naya. Nagàn naca yòo mèn ro puerta no nagàn naca tyee mèn neda, ¿léꞌ? Lomisqueꞌ ne, nzo puert naxèn no nzo huax ned naxèn. Inagànte yòo mèn ro puerta no inagànte tyee mèn neda, ¿léꞌ? Mod coꞌ ndxàp mèn loo Diox coꞌ ndli leꞌ mèna ndryo xàꞌ loo Diox thidtene coꞌseꞌ gath mèna, moda nac xal coꞌseꞌ ndxòo mèn ro puert naxèn no xal coꞌseꞌ ndyee mèn ned naxèn. Huax mèn ndli tataa. Inagànte li mèn tataa. Per mod coꞌ ndxàp mèn par nalìte yòo mèna loo Diox loo béꞌ coꞌseꞌ gath mèna, moda nac xal coꞌseꞌ ndxòo mèn ro puert naya no xal coꞌseꞌ ndyee mèn ned naya. Añenti gác mèn li mèn conꞌa. Ndxepte mèn ndxàp moda par yòo mèna loo Diox loo béꞌ. No nagàn tínꞌ naca par li mèn tataa.
\s Mèn ndac no mèn yeꞌrsinꞌ, mèna ndxàc beꞌ xal yaa xlè coꞌ ndaꞌ xlè ndac no xal yaa xlè coꞌ ndaꞌ xlè yeꞌrsinꞌ.
\r (Lc. 6.43–44)
\p
\v 15 Anderhuen guꞌ. Leque guꞌ quenap guꞌ loo mèn coꞌ mbez ndyoodiꞌs mèna cón cheꞌn Diox per yalgutyèꞌi. Mèna yiꞌth loo guꞌ. No gàp mèna mod nadoꞌ. Ndxàc mèna loo guꞌ xal mbacxilꞌ. Per leꞌn lezoꞌ mèna nzo conꞌ yeꞌrsinꞌ. No li mèna xtùuz yeꞌrsin. Gàc mèna mèn nayiꞌ xal mquèꞌth.
\v 16 Guꞌ taꞌ cuent còn cheꞌn mèna por conꞌ coꞌ li mèna. Tarte gòn mèn làa mèn ngud uv loo chol yaa yis, ¿léꞌ? Neꞌ neꞌ tar gòn mèn làa mèn ngudyuug loo yaa yis cordonsant, ¿léꞌ?
\v 17 Tataa nac mod coꞌ ndxàp mèn xal yaa xlè. Ryete yaa huen ndaꞌ xlè huen. Leꞌ yaa xlè coꞌ nac yaa xlè yeꞌrsinꞌ na, ndaꞌ xlè yeꞌrsinꞌ.
\v 18 Yende mod taꞌ yaa xlè, coꞌ nac yaa xlè ndac, xlè yeꞌrsinꞌ. Neꞌ neꞌ yen mod taꞌ yaa xlè, coꞌ nac yaa xlè yeꞌrsinꞌ, xlè ndac.
\v 19 Ryete yaa xlè coꞌ indaꞌde xlè ndac, choꞌ mèn yaa xlèa no co mèn yaa xlè yeꞌrsinꞌa rdìi.
\v 20 Por cona, por mod coꞌ ndxàp mèn, libeꞌ guꞌ mèn. No taꞌ guꞌ cuent xá nac mèn.
\s Iryede mèn izlyoꞌ yòo loo cón cheꞌn Diox par ñibeꞌpeꞌ Diox loo mèna.
\r (Lc. 13.25–27)
\p
\v 21 Iryede mèn coꞌ mbez: Tad, loon, tyal mèna taꞌ mèna lugar ñibeꞌpeꞌ xuden Diox loo mèna. Ndxeꞌlequeꞌ, mèn coꞌ ndli xal neepeꞌ lezoꞌ xuden Diox coꞌ nzo loo béꞌ, mèna tyalqueꞌ ñibeꞌpeꞌ xuden Diox loo mèna.
\v 22 Huax mèn ñee loon, coꞌseꞌ gàc huiz coꞌseꞌ tub rez Diox cón cheꞌn mèna: Tad, ¿chéꞌ neꞌndeꞌthte nuꞌ diꞌs por cón cheꞌn lèe Uꞌ? No ¿chéꞌ impor lèede Uꞌ mbloꞌ nuꞌ meexùꞌ? No ¿chéꞌ impor lèede Uꞌ mbli nuꞌ huax yalguzyeꞌ, àꞌ? Neequeꞌ Uꞌ no nonqueꞌ Uꞌ mbli nuꞌi, Tad.
\p
\v 23 Per ndxeꞌlequeꞌ, huiza càben loo mèna: Thidtenequeꞌ neꞌneeden guꞌ no indlibeden guꞌ. Biiche xàꞌ guꞌ loon. Huàa guꞌ thìb lad, guꞌ coꞌ más ngòo lezoꞌ mbli guꞌ conꞌ yeꞌrsinꞌ.
\s Trèꞌ ndluꞌ cón cheꞌn chop loo liz mèn coꞌ mdyoxcuaꞌ.
\r (Lc. 6.47–49; Mr. 1.22)
\p
\v 24 Chol mèn coꞌ ndxònqueꞌ diꞌs coꞌ mbezen no ndli mèna xal ñibeꞌen loo mèna, daa tetac cón cheꞌn mèna xal thìb mbiꞌ coꞌ altant ndyoo naa loo rsinꞌpeꞌ mbiꞌ. Mbiꞌa mxít teꞌf liz mbiꞌ loo quèe coꞌteꞌ maciz nac loo yòo.
\v 25 Ngoloa, ngulàa yùu. Ngroꞌ nít yòo. No mxyoꞌf mbii. No ngo ziꞌf nít yòo loo yòo cal coꞌ nac liz mbiꞌa. Per neꞌngobiide yóꞌbeꞌ yòo cala tac ndub yòo cala loo quèe coꞌteꞌ maciz loo yòo. Thìba conꞌ ndxèꞌ.
\p
\v 26 Leꞌ tediba na, chol mèn coꞌ ndxòn diꞌs coꞌ ndyoodizen, no indlide mèn xal ñibeꞌen, mèna lalqueꞌ nac xal thìb mbiꞌ naad no thìb mbiꞌ tont coꞌ mxít teꞌf yòo cal liz mbiꞌ loo yuux.
\v 27 Ngoloa, ngulàa yùu. No ngroꞌ nít yòo. No mxyoꞌf mbii. No ngo ziꞌf nít yòo yóꞌbeꞌa loo yòo cal. No mblyau yòo cala. Por lult, thidtene mblyux yòo cala.
\p
\v 28 Coꞌseꞌ ngolo mdoodiꞌs Jesús diꞌsa, ryete mèn coꞌ nzi yòn diꞌsa, ante mbuiꞌ mèna no ante gunaa mèna cón cheꞌn diꞌs coꞌ ngue luꞌ Jesús loo mèn.
\v 29 Tac ndluꞌ Jesús mèna xal thìb mbiꞌ coꞌ ndxàp conꞌ roo no conꞌ xèn laꞌs nii mbiꞌ no laꞌs yaꞌ mbiꞌ. No indluꞌde Jesús loo mèna xal ndluꞌ mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn nación Israel.
\c 8
\s Jesús mteyac thìb mbiꞌ coꞌ mque no yíiz ndxaꞌs coꞌ nac thìb yíiz coꞌ ntegaꞌs no coꞌ nteyèe yid lad mèn.
\r (Mr. 1.40–45; Lc. 5.12–16)
\p
\v 1 Coꞌseꞌ nde làa tùub Jesús loo yii coꞌteꞌ ngua tub Jesús, anzeꞌf thìb mèn ndoo nque xís Jesús.
\v 2 Làth mèna ngo thìb mbiꞌ coꞌ ndyac thìb yíiz ndxaꞌs, yíiz coꞌ nteyèe yid lad mbiꞌ. Mbii gax mbiꞌ loo Jesús. Mdub xib mbiꞌ loo Jesús. No mcòoꞌ mbiꞌ yéc mbiꞌ loo Jesús. Ndxab mbiꞌ loo Jesús:
\p ―Tad, cheleꞌ Uꞌ lyat lezoꞌ ñèe Uꞌ daa, nzoqueꞌ mod teyac Uꞌ daa. Fteyac Uꞌ daa. No ftembìi Uꞌ laden, Tad.
\p
\v 3 Sya, mbuàal Jesús lad mbiꞌ. Ndxab Jesús:
\p ―Ndlyat lezon ñèenl. Teyaquenl no tembìin ladl.
\p Ngolo ndxab Jesús diꞌsa, ale chàa, ngro xbiiz lad mbiꞌ. No mbembìi mbiꞌ loo yíiza.
\v 4 Leꞌ sya, ndxab Jesús loo mbiꞌa:
\p ―Huiꞌ nexa. Yende chó loo gabtel cón cheꞌn conꞌ coꞌ mbli nonl baꞌ, ndee. Ante ndlyazen huàa luꞌl loo nguleyꞌ. No huàa taꞌl ofrend coꞌ mnibeꞌ Moisés taꞌ mèn coꞌ mbyac loo yíiz baꞌ par taꞌ mèn cuent no non mèn leꞌ lùu mbyacleꞌ loo yíiz baꞌ.
\s Jesús mteyac thìb mbyòo coꞌ ngòc xganꞌ thìb mbiꞌ coꞌ ngòc capitán cheꞌn gobiern coꞌ ndub ciuda Rom.
\r (Lc. 7.1–10)
\p
\v 5 Texal ngòo Jesús yèez Capernaum, mbiꞌth thìb capitán coꞌ ñibeꞌ thìb ayo solndad loo Jesús. Nalyat gunii capitán diꞌs loo Jesús.
\v 6 Taandxèꞌ ndxab capitán loo Jesús:
\p ―Tad, moz daa nax. Ngue tequech mbii moz daa. No ya neꞌxecte moz tant thìb yalnè ndenꞌ moz por mbiia axta nax tinleꞌ liz moz daa.
\p
\v 7 Ndxab Jesús loo mbiꞌa:
\p ―Neeca, nal gan par teyaquen mbíiz.
\p
\v 8 Sya, mcàb capitán loo Jesús. Ndxab capitán:
\p ―Tad, indxàalte daa par yòo Uꞌ leꞌn nyòo lizen. Más huen, ante ñibeꞌ Uꞌ loo yíiz. Daa ndxelasqueꞌ biiche yíiz loo moz daa.
\v 9 Tac leque daa nda cuent naquin tyubdizen loo tamas mèn coꞌ ñibeꞌ loon xal ñibeꞌ mèna loon. No lomisqueꞌ nde nxonꞌ, ngue non solndad coꞌ ñibeꞌen loo. Coꞌseꞌ ñibeꞌen loo thìb solndad par ya solndad thìb mandad, solndad ya. No coꞌseꞌ ñibeꞌen loo tedib solndad par yiꞌth solndad loon, solndad yiꞌth loon. No coꞌseꞌ ñibeꞌen loo thìb moz daa par ya li moz daa thìb zinꞌ loon, moz ya lii.
\p
\v 10 Coꞌseꞌ mbìn Jesús diꞌsa, ante mbuiꞌ Jesús no ante gunaa Jesús. Ndxab Jesús loo mèn coꞌ ngure no Jesús:
\p ―Lìca, na nii loo guꞌ: Neꞌ làth rye mèn nación Israel tarte zyálꞌ daa nec thìb mèn no tarte nèen nec thìb mbiꞌ coꞌ anzeꞌf ndxelaꞌs loon xal mbiꞌ baꞌ.
\v 11 Daa ngue nii loo guꞌ: Huax mèn coꞌ inacte mèn nación Israel, mèna ryoꞌ par ned ndlyen huiz no par ned mbix huiz par yiꞌth queltàa no mèna Abraham no Isaac no Cob loo cón cheꞌn Diox coꞌteꞌ ñibeꞌpeꞌ Diox loo mèn par tyac lezoꞌ mèna axta plóthe.
\v 12 Per cón cheꞌn mèn nación Israel coꞌ ndxab Diox no coꞌ gunii Diox leꞌ mèna yòo coꞌteꞌ ñibeꞌpeꞌ Diox par ñibeꞌpeꞌ Diox loo mèn, ale ndxeꞌlequeꞌ, coꞌ xàꞌ Diox mèna thìb lad loo Diox coꞌteꞌ nac yálꞌcuau coꞌteꞌ nzyalqueꞌ mèna tith cue mèna loo Diox. Tya, gónꞌ mèna axta plóthe no hua le mèna axta plóthe.
\p
\v 13 Sya, mbere Jesús, ndxab Jesús loo capitana:
\p ―Byàa, ey. Texalqueꞌ nac coꞌ ndxelaꞌsl no coꞌ ndaꞌl cuent loon nacl, tataaqueꞌ gàca lool.
\p No ale leque hora mbyac moz capitana.
\s Jesús mteyac xnaꞌzap Pedr coꞌ nax loo xléꞌ.
\r (Mr. 1.29–31; Lc. 4.38–39)
\p
\v 14 Ngoloa, ngua Jesús liz Pedr. Gunèe Jesús nax xnaꞌzap Pedr loo xléꞌ.
\v 15 Per ale ante mxoꞌf Jesús yaꞌ Jesús lad xnaꞌzap Pedr, ngro xléꞌ xnaꞌzap Pedr. Sya, ngo che xnaꞌzap Pedr. Mbli xnaꞌzap Pedr mandad loo mèna. No mbli xnaꞌzap Pedr cas mèna.
\s Jesús mteyac huax mèn yíiz.
\r (Mr. 1.32–34; Lc. 4.40–41)
\p
\v 16 Coꞌseꞌ mzyèleꞌ izlyoꞌ huiza, mbiꞌth no mèn huax mèn yíiz coꞌ mque no mbii cheꞌn xpii yeꞌrsinꞌ loo Jesús. Ante gunii Jesús loo xpii yeꞌrsinꞌa, ngro xpii yeꞌrsinꞌa loo rye mèn yíiza. No mteyac Jesús ryete mèn yíiz coꞌ mque no chol yíiz.
\v 17 Tataa mbli Jesús par ngòcqueꞌ, no mdyaaqueꞌ, no mdubqueꞌ diꞌs coꞌ gunii Sayi coꞌ mdeꞌth diꞌs coꞌ ndxab Diox. Sayi ndxab:
\pi1 Yub xaꞌ mteche ryethe yíiz naꞌ coꞌ mdenꞌ naꞌ no coꞌ mque no naꞌ. No mdenꞌ xaꞌ ryethe yalnè cón cheꞌn naꞌ lad xaꞌ.
\s Trèꞌ ndluꞌ cón cheꞌn mèn coꞌ mblyaꞌs tyoo nque xís Jesús.
\r (Lc. 9.57–62)
\p
\v 18 Látha, coꞌseꞌ gunèe Jesús anzeꞌf thìb mènléyꞌ nziriꞌ dib vuelt loo Jesús, mnibeꞌ Jesús loo myenꞌ xinꞌ mtéꞌth Jesús par ya riid no Jesús myenꞌ xinꞌ mtéꞌth Jesús loo yòoyaa tedib lad ro lagun.
\v 19 Láth ndooreꞌ tyee Jesús, mzin thìb mbiꞌ coꞌ ngòc maistr coꞌ ndluꞌ cón cheꞌn ley coꞌ mxoꞌf Moisés loo mèn nación Israel loo Jesús. Ndxab mbiꞌa loo Jesús:
\p ―Maistr, no daa ndlyaz ga non Uꞌ pál coꞌteꞌ ya Uꞌ.
\p
\v 20 Mcàb Jesús loo mbiꞌ. Ndxab Jesús:
\p ―Huiꞌ nexa. Mbeꞌth ngue no quèe lyoꞌ coꞌteꞌ ndxàt mbeꞌth. Leꞌ mbin béꞌ na, ngue no xyòn mbin coꞌteꞌ ndxàt mbin, ne. Per daa, coꞌ mbal yáal loo izlyoꞌ xalqueꞌ ndxáal chol mèn, ingue noden thìb lugar coꞌ nac cheꞌnpeꞌen coꞌteꞌ guixen chuꞌth yéquen par ryo xcuen chuꞌth laden, coꞌ nee diꞌs, tegaan chuꞌth xísen par lin descans.
\p
\v 21 Látha, tedib myenꞌ xinꞌ mtéꞌth Jesús ndxab loo Jesús:
\p ―Tad, daa lyaz ner taꞌ Uꞌ permis loon par ga casen thebol xuden. Yiloa, sya, nda naꞌ.
\p
\v 22 Jesús mcàb. Ndxab Jesús loo mbiꞌ xinꞌ mtéꞌth Jesús:
\p ―Mèn coꞌ neꞌtyalte yilaꞌs loo cón chenen, mèna nac xal mèn nguth loon. Laꞌa caꞌs mèna thebol xud lùu baꞌ. Leꞌ lùu na, ftoo nque xísen. Yaꞌ nda naꞌ.
\s Jesús mbli nguled mbii. No mbli Jesús xèe ngure ol níttóꞌ.
\r (Mr. 4.35–41; Lc. 8.22–25)
\p
\v 23 Ngoloa, ngòo Jesús loo thìb yòoyaa con myenꞌ xinꞌ mtéꞌth Jesús.
\v 24 Láth ngue tetee myenꞌ yòoyaa loo lagun, ngroꞌ thìb mbiidóꞌ loo lagun axta mxít too mbii nít loo lagun. No mblo mbii nít leꞌn yòoyaa. Per ndxeꞌlequeꞌ, láth ndxàc conꞌa, ante mde mcalꞌ Jesús. Nax yàt Jesús leꞌn yòoyaa.
\v 25 Sya, yende izlyoꞌ ngua myenꞌ xinꞌ mtéꞌth Jesús coꞌteꞌ nax Jesús. Mbloꞌ myenꞌ mcalꞌ loo Jesús. Ndxab myenꞌ loo Jesús:
\p ―Tad, jer goo che Uꞌ. Bloꞌ Uꞌ mcalꞌ loo Uꞌ. Huiꞌ Uꞌ ñeeneꞌ xá mod li Uꞌ par lyáꞌ naꞌ loo conꞌ ryes. Yòoyaa naꞌ ngue dep leꞌn nít.
\p
\v 26 Mcàb Jesús. Ndxab Jesús loo myenꞌ:
\p ―¡Aa, mèn izlyoꞌ! Susqueꞌ nzyeb guꞌ, yey. Ndxepte ndxelaꞌs guꞌ. No ndxepte ndxàp guꞌ yalxlaꞌs loo Diox, ¿léꞌ?
\p Sya, ngo che Jesús. Ale ante gunii Jesús loo mbiidóꞌa no ante gunii Jesús loo nít. Xèegà nguled mxyoꞌf mbiidóꞌa. No xèegà nguled ndxetoo nít cheꞌn níttóꞌ loo lagun.
\v 27 Sya, ryete mèn coꞌ ngua no Jesús, ante mbuiꞌ no ante gunaa mèna loo conꞌ ngòc. Ndxab mèna:
\p ―¿Chó mbiꞌ nac mbiꞌ baꞌ? ¿Chonon tuaꞌte ndxab mbiꞌ? No ale xèegà nguled nxyoꞌf mbii. No xèegà nguled ndxetoo nít loo lagun.
\s Trèꞌ ndluꞌ cón cheꞌn chop mbiꞌ yíiz cheꞌn làaz mèn gadar coꞌ mquée mbii yeꞌrsinꞌ coꞌ ngòc mbii cheꞌn xpii meexùꞌ.
\r (Mr. 5.1–20; Lc. 8.26–39)
\p
\v 28 Coꞌseꞌ ngolo mzin Jesús tedib lad ro lagun coꞌ nac cheꞌn làaz mèn gadar, ngroꞌ chop xaꞌbiꞌ leꞌn panteón loo Jesús. Ryop xaꞌbiꞌa mque no mbii cheꞌn xpii yeꞌrsinꞌ. No anzeꞌf nayiꞌ tínꞌ ngòc ryop xaꞌbiꞌa. Axta neꞌ neꞌ yen mod riid chol mèn par neda.
\v 29 Cabii ngure bez ryop xaꞌbiꞌa loo Jesús. Ndxab xaꞌbiꞌa loo Jesús:
\p ―¿Chonon nde Uꞌ coꞌteꞌ nzo nuꞌ, àꞌ, Jesús, xganꞌpeꞌ Diox? ¿Chéꞌ nde Uꞌ par tetìi Uꞌ nuꞌ ndooreꞌ gàc tiemp coꞌseꞌ tetìi Diox nuꞌ, càꞌ?
\p
\v 30 Leque hora, gaxte tya nzi tee yuhua thìb partid nguch.
\v 31 Sya, mbii cheꞌn xpii yeꞌrsinꞌa mbli par nalyat ndxab ryop mbiꞌa loo Jesús:
\p ―Cheleꞌ Uꞌ coꞌ nuꞌ trèꞌ, blaꞌ Uꞌ yòo nuꞌ loo partid nguch coꞌ nzi tee goꞌ.
\p
\v 32 Sya, ndxab Jesús loo xpii yeꞌrsinꞌa:
\p ―Groꞌ guꞌ. Huàa yòo guꞌ loo nguch, tá.
\p Hora ngro xpii yeꞌrsinꞌa loo ryop xaꞌbiꞌa. Ngua yòo xpii yeꞌrsinꞌa loo partid nguch. Ngoloa ale ryete ngucha mquée mbii. Ale mbyùub nguch lad yii coꞌteꞌ nzi tee yuhua nguch. Ngulàa ryete ngucha axta leꞌn lagun. Nguap nguch nít. Ale nguth ryete nguch.
\p
\v 33 Leꞌ mèn coꞌ ngue quenap ngucha na, ale mqueꞌ mèna carre. Ngua taꞌ mèna cuent loo mèn làth yèez ryete conꞌ coꞌ ngòca, tant mzyeb mèna. No mdaꞌ mèna cuent conꞌ ngòc loo ryop xaꞌbiꞌ coꞌ mquée mbii cheꞌn xpii yeꞌrsinꞌa loo mèn làth yèez.
\v 34 Sya, ryete mèn yèeza ngroꞌ. Mbiꞌth mèna coꞌteꞌ nzo Jesús. Texal gunèe mèna Jesús, ale mnaꞌb mèna diꞌs loo Jesús. Ndxab mèna:
\p ―Más huen groꞌ trèꞌ. Byàa ned, ndeel.
\c 9
\s Jesús mteyac thìb mbiꞌ coꞌ mque no yíiz bech.
\r (Mr. 2.1–12; Lc. 5.17–26)
\p
\v 1 Sya, ngòo Jesús loo thìb yòoyaa. Mdoo Jesús loo nít loo lagun. Mbii Jesús tya axta ngro xoꞌf Jesús tedib lad ro lagun. Mzin Jesús yèez coꞌteꞌ nac làazpeꞌ Jesús.
\v 2 Láth nzo Jesús tya, mzin no mèn thìb mbiꞌ coꞌ mtequech mbii loo Jesús. Nzoꞌf mbiꞌ loo thìb cami nde no mèn mbiꞌ loo Jesús. Coꞌseꞌ gunèe Jesús leꞌ mèna, lìcqueꞌ, ndxelaꞌs loo Jesús no ngòp mèna yalxlaꞌs loo Jesús, ndxab Jesús loo mbiꞌ yíiza:
\p ―Huen blo lezoꞌl, ndee, xganꞌ. No gòp yalxlaꞌs loon. Xquin lùu no xtol lùu mdyonꞌleꞌ.
\p
\v 3 Per làth mèn coꞌ nziriꞌ loo Jesús, ngo ndxep mèn coꞌ ngòc maistr coꞌ mbluꞌ cón cheꞌn ley coꞌ mxoꞌf Moisés loo mèn nación Israel. Mèna ndxab loo lezoꞌ mèna: Lìcpeꞌ baꞌi, mbiꞌ baꞌ ñii yèe ñii tìi cón cheꞌn Diox no ngue nii mbiꞌ baꞌ ngòc nguàal conꞌ cón cheꞌn Diox, cara.
\v 4 Per Jesús nonqueꞌ no naneequeꞌ Jesús conꞌ coꞌ nzi li mèna xtùuz leꞌn lezoꞌ mèna. Ndxab Jesús loo mèna:
\p ―¿Chonon susqueꞌ nazab ngue li guꞌ xtùuz, àꞌ?
\v 5 ¿Xá nee guꞌ? ¿Cón más inagànte nac, ndyac guꞌ, par gaben loo mbiꞌ baꞌ? ¿Chéꞌ más inagànte gaben: Xquin lùu no xtol lùu mdyonꞌleꞌ o chéꞌ más inagànte gaben: Goo che. Fxen ned. Byàa, càꞌ?
\v 6 Per huiꞌ guꞌ nexa. Daa luꞌ loo guꞌ leꞌ daa, coꞌ mbal yáal loo izlyoꞌ xalqueꞌ ndxáal chol mèn, daa ndxàp conꞌ roo no conꞌ xèn laꞌs niin no laꞌs yan loo izlyoꞌ par tonꞌen xquin mèn no xtol mèn loo izlyoꞌ.
\p Sya, mbere Jesús ndxab Jesús loo mbiꞌ coꞌ mtequech mbii:
\p ―Goo che. Fthùuz dáa coꞌ ngoꞌthl. Byeꞌ dáa. No tee càal ned. Byàa par lizl.
\p
\v 7 Sya, ale ngo too mbiꞌ coꞌ mtequech mbiia. Mxen mbiꞌ ned. Ndyàa mbiꞌ par liz mbiꞌ.
\v 8 Coꞌseꞌ gunèe mèn coꞌ nziriꞌ no Jesús mbli Jesús conꞌa, mzyeb tínꞌ mèn. Ngurez mèna Diox. Ndxab mèna:
\p ¡Ay, Dioꞌs! Uꞌ ndli ndxàp mbiꞌ baꞌ conꞌ roo conꞌ xèn laꞌs nii mbiꞌ no laꞌs yaꞌ mbiꞌ par ndli mbiꞌ conꞌ roo no conꞌ xèn loo mèn loo izlyoꞌ.
\s Jesús ndxab loo thìb mbiꞌ coꞌ lèe Mate, coꞌ nac daa coꞌ ngue queꞌ yeꞌs ndxèꞌ: Ftoo nque xísen. Yaꞌ nda naꞌ.
\r (Mr. 2.13–17; Lc. 5.27–32)
\p
\v 9 Coꞌseꞌ mbere Jesús, ngroꞌ Jesús yèez coꞌteꞌ nac làazpeꞌ Jesús, láth nda riid Jesús par neda, gunèe Jesús ndub thìb mbiꞌ, coꞌ lèe Mate, loo mes coꞌteꞌ ndyee thix mèn tmi cón cheꞌn contribución. Ndxab Jesús loo mbiꞌa:
\p ―Goo too. Yaꞌ nda naꞌ.
\p Mate ngo too. Nda no Mate Jesús.
\p
\v 10 Ngòc thìb conꞌ thìb vez. Ngua thuhua Jesús liz Mate. Láth ndub yuhua Jesús loo mes, mzin huax mèn coꞌ ndli cobrar cón cheꞌn contribución no plá mèn coꞌ ngòc mèn yeꞌrsinꞌ. Thidte mdub mèn loo mes con Jesús no con myenꞌ xinꞌ mtéꞌth Jesús.
\v 11 Coꞌseꞌ ñèe mèn coꞌ nac mèn xleyꞌ farise conꞌa, ndxab mèna loo myenꞌ xinꞌ mtéꞌth Jesús:
\p ―¿Chonon nzi yuhua no maistr guꞌ mèn coꞌ ndli cobrar cón cheꞌn contribución no mèn coꞌ ncuaꞌn xquin no coꞌ ndxàp xtol baꞌ, àꞌ?
\p
\v 12 Coꞌseꞌ mbìn Jesús diꞌsa, Jesús ndxab loo mèn xleyꞌ farise:
\p ―Mèn coꞌ ndenꞌ yende chó yíiz ndyac mèn no mèn coꞌ ndenꞌ huen nzo lezoꞌ mèn, mèna ndyac inquinte mèna doctor. Per ndxeꞌlequeꞌ, mèn coꞌ ndenꞌ ndyac len mèna, mèna nonqueꞌ naquinqueꞌ mèna doctor.
\v 13 Byàa guꞌ. No huen huen téꞌth guꞌ ñeeneꞌ cón nee diꞌs diꞌs coꞌ ndub loo libr coꞌ nac xtiꞌs Diox coꞌ ngue niin loo guꞌ ndxèꞌ coꞌ mbez:
\pi1 Ndlyazen leꞌ guꞌ lyat lezoꞌ ñèe guꞌ hues xtàa guꞌ. No indlyasten guth guꞌ máꞌ no xo guꞌ ren máꞌ loon par teriꞌthen no tecanꞌen cón cheꞌn xquin guꞌ no cón cheꞌn xtol guꞌ.
\p Tac neꞌngalten par gòn mèn ron no par yilaꞌs mèn loon, mèn coꞌ ndenꞌ nac mèna mèn nalì par lyàa yéc mèna no lyàa lezoꞌ mèna. Ndxeꞌlequeꞌ, ndalen par gòn mèn ron no par yilaꞌs mèn loon, mèn coꞌ non no mèn coꞌ ndaꞌ cuent nac mèna mèn coꞌ ncuaꞌn xtol no mèn coꞌ ncuaꞌn xquin, par lyàa yéc mèna no lyàa lezoꞌ mèna par zyeꞌ mod coꞌ ndxàp mèna.
\s Trèꞌ ndluꞌ leꞌ myenꞌ xinꞌ mtéꞌth Juàn Bautist mnibdiꞌs loo Jesús chonon imbe xlatte myenꞌ xinꞌ mtéꞌth Jesús.
\r (Mr. 2.18–22; Lc. 5.33–39)
\p
\v 14 Látha, note myenꞌ xinꞌ mtéꞌth Juàn Bautist, ngroꞌ nxonꞌ, mbiꞌth myenꞌ loo Jesús. Ndxab myenꞌ loo Jesús:
\p ―¿Chonon nuꞌ, no mèn xleyꞌ farise, mbe xlat huax vez per myenꞌ xinꞌ mtéꞌth Uꞌ baꞌ imbe xlatte, àꞌ, Tad?
\p
\v 15 Ndxab Jesús loo myenꞌa:
\p ―Nde niin thìb conꞌ loo guꞌ: ¿Chéꞌ xec mèn coꞌ ndxàc convid, mèn coꞌ nda lyath no thìb mbyòo coꞌ selyaꞌ, par cue xi lezoꞌ mèna par neꞌhuade mèna coꞌseꞌ ñèe mèna nzo mbyòo coꞌ selyaꞌ no nzo conꞌ coꞌ hua mèn, càꞌ? Yende mod cue xi lezoꞌ mèna par cue xlat mèna tataa, ¿léꞌ? Huiꞌ guꞌ nexa. Mèna cue xi lezoꞌ par cue xlat mèna coꞌseꞌ nguriꞌthleꞌ yalhua liz mbyòo no ndyàa mbyòo coꞌ mselyaꞌ.
\p
\v 16 Neꞌ neꞌ yen chó mèngot nzo coꞌ co bdèꞌ thìb leꞌ larꞌ cub loo thìb larꞌcanꞌ gox tac larꞌ cub coꞌ yo bdèꞌ larꞌcanꞌ goxa bech. Leꞌ sya, larꞌ cub, coꞌ ngo bdèꞌ larꞌcanꞌ goxa, li par ryed yèe larꞌcanꞌ goxa. No yiloa más nazab ñaa larꞌcanꞌ gox cheleꞌi naroo ryed.
\p
\v 17 Tolo ndxab Jesús loo mèna:
\p Yende chó mèn nzo coꞌ co mezcal coꞌ diz ngroꞌ palenc leꞌn thìb garrafón gox coꞌ naléꞌleꞌ, ne, ¿léꞌ? Tac cheleꞌ mèn co mezcal coꞌ diz ngroꞌ palenc leꞌn thìb garrafón gox coꞌ naléꞌleꞌ, leꞌ sya, leꞌleꞌ lyéꞌ garrafón goxa no xyo mezcala. Ngòc perdid ryop conꞌa. Por cona, más huen co mèn mezcal coꞌ diz ngroꞌ palenc leꞌn thìb garrafón cub. Sya, tataa mod nabeꞌste quenap mèn ryop conꞌa.
\s Trèꞌ ndluꞌ cón cheꞌn thìb mzaꞌ, rsap thìb mbiꞌ coꞌ lèe Jair, no cón cheꞌn thìb xaꞌgot coꞌ mbuàal xab Jesús.
\r (Mr. 5.21–43; Lc. 8.40–56)
\p
\v 18 Láth beꞌ ngue toodiꞌs no Jesús mèn, mbii gax thìb mbiꞌ coꞌ nac jef cheꞌn mèn nación Israel loo Jesús. Mdub xib mbiꞌ loo Jesús. No mcòoꞌ mbiꞌ yéc mbiꞌ loo Jesús. Ndxab mbiꞌ loo Jesús:
\p ―Tad, rsap daa ngololeꞌ nguth. ¿Chéꞌ tli Uꞌ favor ya Uꞌ lizen? Lyazen ante xoꞌf Uꞌ yaꞌ Uꞌ lad mzaꞌ. Mzaꞌ ryo xbanqueꞌ.
\p
\v 19 Sya, mxen Jesús ned con myenꞌ xinꞌ mtéꞌth Jesús. Nda no Jesús mbiꞌ coꞌ nac jefa par liz mbiꞌ.
\v 20 Per láth ndoo Jesús ned, nda no Jesús mbiꞌa con taamas mèn, xiꞌth mèna ngo thìb xaꞌgot. Xaꞌgota ndxàcleꞌ siꞌ fchop línꞌ ndyac xaꞌ yíiz ndlyath ren. Mbii gax xaꞌgota par ned xís Jesús par gàal xaꞌgota ro xab Jesús.
\v 21 Tac xaꞌgota mbli xtùuz leꞌn lezoꞌ xaꞌgota. Ndxab xaꞌgota loo lezoꞌ xaꞌgota: Cheleꞌ daa ante gàal ro xab Jesús, yac daa. Tataa mbli xaꞌgota. No, chàa, mbyac xaꞌgota loo yíiz xaꞌ.
\v 22 Coꞌbeꞌxqueꞌ ngòc conꞌa loo xaꞌgota, Jesús mbere par ned xís Jesús. Gunèe Jesús xaꞌgota. Ndxab Jesús loo xaꞌgota:
\p ―Rsap, huen blo lezoꞌl no ftac lezoꞌl, ndee. Lùu mbyacleꞌ tac ngolaꞌsqueꞌl loo cón chenen.
\p Leque hora, sandante mbyac xaꞌgota.
\p
\v 23 Coꞌseꞌ mzin Jesús liz mbiꞌ coꞌ nac jefa, ndxòn Jesús leꞌ musc ndxolꞌ bàanleꞌ par ryo bàan mzaꞌ coꞌ ngutha liz mzaꞌ par ya caꞌs mèn mzaꞌ. No ñèe Jesús ndxòo ndryoꞌ mèn leꞌn nyòo par ndlas yálꞌ mèn mzaꞌ no ndyoodiꞌs no mèn mzaꞌ.
\v 24 Ndxab Jesús loo mèn coꞌ nzo leꞌn nyòoa:
\p ―Bli guꞌ favor, bláꞌ guꞌ mzaꞌ. No biiche guꞌ thìb lad loo mzaꞌ. Part cón chenen, mzaꞌ neꞌngathte. Na ngüiꞌ loo mzaꞌ xal thìb mzaꞌ coꞌ nax yàt.
\p Leꞌ sya, ale leꞌleꞌ mxìis no rye mèn coꞌ nzo liz mzaꞌ coꞌ ngutha Jesús tac non mèna nguthqueꞌ mzaꞌ.
\v 25 Texal ngolo ngroꞌ ryete mèna par fuer, Jesús ngòo leꞌn nyòo coꞌteꞌ nzoꞌf mzaꞌ. Mxen Jesús yaꞌ mzaꞌ. No mbli Jesús ngo che mzaꞌ.
\v 26 Syase, por derech, mxyoꞌf lèe mxyoꞌf xtiꞌs Jesús por cón cheꞌn conꞌ coꞌ mbli Jesús loo mzaꞌa leꞌn ryete yèezyaꞌ coꞌ nziriꞌ par neda.
\s Jesús mdub xnìi ngudloo chop mbiꞌ coꞌ ngòc mbiꞌ sieu.
\p
\v 27 Texal ngroꞌ Jesús liz mbiꞌ coꞌ ngòc jefa, mdoo nque chop xaꞌbiꞌ sieu xís Jesús. Cabii mbez ryop xaꞌbiꞌ sieua loo Jesús:
\p ―Gulat lezoꞌ Uꞌ gunèe Uꞌ nuꞌ, Uꞌ coꞌ nde bin David coꞌ ngòc rey póla.
\p Per Jesús neꞌnglide cas ryop xaꞌbiꞌ sieua. Xaꞌbiꞌ sieua tolo mdoo nque xís Jesús.
\p
\v 28 Coꞌseꞌ ngòo Jesús liz mèn coꞌteꞌ nguled Jesús yèez Capernaum, ryop xaꞌbiꞌ sieua mbii gax loo Jesús. Jesús mnibdiꞌs loo ryop xaꞌbiꞌ sieua:
\p ―¿Chéꞌ ndxelaꞌs guꞌ leꞌ daa gác li par huiꞌ guꞌ, càꞌ?
\p Ryop xaꞌbiꞌ sieu mcàb:
\p ―Aa, Tad. Ndxelaꞌsqueꞌ nuꞌi.
\p
\v 29 Leꞌ sya, ante mbuàal Jesús ngudloo ryop xaꞌbiꞌ sieua. No ndxab Jesús loo ryop xaꞌbiꞌ sieua:
\p ―Gàca loo guꞌ xalqueꞌ ndxelaꞌs guꞌ loon, ndee guꞌ.
\p
\v 30 Sya, chàa, ndxeꞌslequeꞌ mbuiꞌ ryop xaꞌbiꞌ sieua. Ngoloa, negadiꞌs mnibeꞌ Jesús loo ryop xaꞌbiꞌ sieua. Ndxab Jesús:
\p ―Yende chó loo gabte guꞌ cón cheꞌn conꞌ mbli non guꞌ.
\p
\v 31 Per ndxeꞌlequeꞌ, pente mbii ryop xaꞌbiꞌ sieua, cón cheꞌn conꞌ mbli Jesús loo ryop xaꞌbiꞌ coꞌ ngòc sieua loo mèn coꞌ nac mèn ryete yèezyaꞌ coꞌ nziriꞌ par neda.
\s Jesús mbli mdoodiꞌs thìb mbiꞌ mud.
\p
\v 32 Sete ngolo mbii ryop xaꞌbiꞌ sieua, mbiꞌth no taandxep mèn thìb mbiꞌ mud coꞌ mque no thìb xpii yeꞌrsinꞌ loo Jesús.
\v 33 Texal ngolo xec mbli Jesús par ngro xpii yeꞌrsinꞌ loo mbiꞌ muda, ndxeꞌslequeꞌ mdoodiꞌs mbiꞌ. Leꞌ mèn coꞌ nziriꞌ no Jesús na, ante mbuiꞌ mèna no ante gunaa mèna loo mbiꞌ muda. Ndxab mèna:
\p ―Dib tiemp coꞌ nziriꞌ mèn nación Israel tarte ñee mèn gàc conꞌ coꞌ ngòc loo mbiꞌ mud baꞌ, cara.
\p
\v 34 Per mèn cheꞌn xleyꞌ farise ale mbez:
\p ―Por cón cheꞌn leque xaꞌ coꞌ nac jef cheꞌn xpii meexùꞌ ngoꞌ Jesús xpii meexùꞌ loo mèn.
\s Jesús mblyat lezoꞌ ñèe Jesús mèn.
\p
\v 35 Ngolo nguriꞌth conꞌa, mque tee Jesús leꞌn rye yèezyaꞌ no rye ranch par neda. Mque tee luꞌ Jesús mèn rye lugar coꞌteꞌ nqueltàa mèn coꞌteꞌ ndub sinagog mèn par neda. Mblo Jesús yalbàn no mdeꞌth Jesús cón cheꞌn diꞌs ndac xá mod ndlyaꞌs Diox ñibeꞌpe Diox loo mèn. Làth xtauꞌa, mteyac Jesús mèn coꞌ mque no chol yilíiz no ryete mèn nayíiz leꞌn rye yèezyaꞌa.
\v 36 Coꞌseꞌ gunèe Jesús prob mèna, anzeꞌf mblyat lezoꞌ Jesús gunèe Jesús mèna tac anzeꞌf nzi xi lezoꞌ mèna. No yende chó gust nziriꞌ mèna. No más de cona, alithe nzi ban mèna. Ngòc mèna xal mbacxilꞌ coꞌ ingue node pastor.
\v 37 Sya, ndxab Jesús loo myenꞌ xinꞌ mtéꞌth Jesús:
\p ―Lìcpeꞌ baꞌi, anzeꞌf huax mèn nzo coꞌ ndxàal gòn cón cheꞌn diꞌs ndac par lyáꞌ mèn loo ryethe coꞌ nac conꞌ ryes xal coꞌseꞌ ndláp mèn cosech par neꞌyizaꞌde cosech no par neꞌtyuhuante cosech. Per yende huax mèn coꞌ ya teꞌth no coꞌ ya lo yalbàn cón cheꞌn diꞌs ndac loo mèn.
\v 38 Cona, ngue niin loo guꞌ: Gurez guꞌ Tad Diox no guuz guꞌ loo Tad Diox telꞌ Tad Diox mèn par ya teꞌth mèn no par ya lo mèn yalbàn cón cheꞌn diꞌs ndac loo mèn xal coꞌseꞌ telꞌ thìb patrón moz par ya láp moz cosech patrón tac Tad Diox nac patrón loo mèn.
\c 10
\s Jesús mcui siꞌ fchop myenꞌ coꞌ ya no Jesús.
\r (Mr. 3.13–19; Lc. 6.12–16)
\p
\v 1 Ngolo tataa mdoodiꞌs Jesús loo mèn, ngurez Jesús ryete siꞌ fchop myenꞌ xinꞌ mtéꞌth Jesús. Ndxab Jesús loo myenꞌ xinꞌ mtéꞌth Jesús:
\p ―Nalleꞌ lin loo guꞌ par gác guꞌ coꞌ guꞌ xpii yeꞌrsinꞌ loo mèn, no par teyac guꞌ mèn coꞌ ngue no chol yilíiz, no par teyac guꞌ ryete mèn yíiz ned ya que tee guꞌ.
\p
\v 2 Taandxèꞌ lèe ryete siꞌ fchop myenꞌ xinꞌ mtéꞌth Jesús, myenꞌ coꞌ mtelꞌ Jesús coꞌ mbeꞌ diꞌs cheꞌn Jesús loo mèn no coꞌ mdeꞌth diꞌs cheꞌn Jesús loo mèn. Nerlequeꞌ myenꞌ coꞌ mcui Jesús ngòc Mon coꞌ neꞌ tedib lèe Pedr. Mcui Jesús Ndech, ne, coꞌ nac huespeꞌ Pedr. Xísa nde nque Cob no Juàn, huespeꞌ Cob. Ryop hues mbiꞌa ngòc xganꞌ thìb mbiꞌ coꞌ ngroꞌ lèe Zebede.
\v 3 Xísa nde nque Lip. Nde nque Bartol. Nde nque Max. No nde nque Mate coꞌ mbli cobrar cón cheꞌn contribución, coꞌ nac daa. Xísa nde nque tedib mbiꞌ coꞌ lèe Cob, ne. Mbiꞌa ngòc xganꞌ thìb mbiꞌ coꞌ ngroꞌ lèe Alfe. Xísa nde nque Lebe coꞌ neꞌ tedib lèe Tade.
\v 4 Xísa nde nque tedib mbiꞌ coꞌ lèe Mon. Mona nac thìb mbiꞌ coꞌ mqueltàa no thìb ned mèn, mèn coꞌ ngroꞌ lèe partid cananist. Xísa nde nque Jud Iscariot coꞌ mcuaꞌn mod mdaꞌxùꞌ Jesús loo mèn yeꞌrsinꞌ yiloa.
\s Jesús ngue telꞌ myenꞌ xinꞌ mtéꞌth Jesús par ya teꞌth myenꞌ no ya lo myenꞌ yalbàn loo mèn.
\r (Mr. 6.7–13; Lc. 9.1–6)
\p
\v 5 Jesús mtelꞌ ryete siꞌ fchop myenꞌa. Mnibeꞌ Jesús loo myenꞌa. Ndxab Jesús:
\p ―Neꞌyade guꞌ làaz mèn coꞌ inacte mèn nación Israel. Neꞌ neꞌ yòo guꞌ coꞌteꞌ nac làaz mèn nación Samari.
\v 6 Más huen huàa guꞌ loo mèn coꞌ nac mèn nación Israel tac mèna nziriꞌ xal mbacxilꞌ coꞌ nzi tee tuhuan.
\v 7 Huàa teꞌth guꞌ no blo guꞌ yalbàn no gab guꞌ loo mèna leꞌ tiemp coꞌ tlo ñibeꞌpeꞌ Diox loo mèn ndxàcleꞌ loo mèna.
\v 8 Fteyac guꞌ mèn coꞌ ndyac yíiz ndxaꞌs coꞌ nteyèe yid lad no mèn coꞌ ndyac chol yilíiz. Blo xban guꞌ mèn nguth. Lomisqueꞌ, bloꞌ guꞌ rye xpii yeꞌrsinꞌ loo rye mèn coꞌ ngue no xpii yeꞌrsinꞌ. Neꞌnguixte guꞌ nec thìb centav loon por mdan lugar gác guꞌ li guꞌ conꞌ coꞌ ngue ñibeꞌen loo guꞌ ndxèꞌ. Por cona, coꞌseꞌ yilo li guꞌ ryete conꞌ coꞌ ngue ñibeꞌen loo guꞌ ndxèꞌ loo mèn, neꞌlide guꞌ cobrar nec thìb centav loo mèna.
\p
\v 9 Coꞌseꞌ yòo guꞌ ned ya guꞌ, tuaꞌte guꞌ ya guꞌ. Neꞌhueꞌde guꞌ pes or. Neꞌ neꞌ hueꞌ guꞌ pes plat. Neꞌ neꞌ hueꞌ guꞌ centav cobr.
\v 10 Neꞌ neꞌ hueꞌ guꞌ morral guꞌ coꞌteꞌ co guꞌ cheꞌn guꞌ. Neꞌ neꞌ hueꞌ guꞌ chop ned xab guꞌ par goc guꞌ. Neꞌ neꞌ hueꞌ guꞌ chop ned yilid. Neꞌ neꞌ co guꞌ mached yaꞌ guꞌ coꞌseꞌ tyee guꞌ. Tac liz mèn coꞌteꞌ zin guꞌ coꞌteꞌ co guꞌ yalbàn cón cheꞌn diꞌs ndac loo mèn, mèna taꞌ conꞌ nquin guꞌ. Gàc conꞌ ndxèꞌ loo guꞌ xal ndxàca loo mèn coꞌ ndyee zinꞌ par li mèna gan conꞌ nquin mèna.
\p
\v 11 Coꞌseꞌ zin guꞌ leꞌn chol ciuda o leꞌn chol yèez bix coꞌteꞌ yòo guꞌ, ner cuaꞌn guꞌ mèn coꞌ gàp confians con guꞌ. Yanꞌ guꞌ liz mèna axtaqueꞌ ryoꞌ guꞌ, bii guꞌ leꞌn yèeza no ciudaa.
\v 12 Texal yòo guꞌ liz mèna, gunii guꞌ Diox loo mèn guliza. No gab guꞌ loo mèna: Nagàl blo guꞌ lezoꞌ guꞌ loo alux conꞌ.
\v 13 Cheleꞌ mèn guliza nac mèn ndac coꞌ ndli cuent ndxàalqueꞌ yòo guꞌ làth mèna, tolo cue rye nda mèna no rye ndyeꞌth mèna por cón cheꞌn guꞌ. Nacqueꞌleꞌ mèn guliza nac mèn coꞌ ndli xtùuz indxàalte yòo guꞌ liz mèna, sya, gab guꞌ loo mèna: Huena, amiu, yanꞌ cón cheꞌn guꞌ coꞌ ndli guꞌ baꞌ loo Diox coꞌseꞌ tub rez Diox cón cheꞌn guꞌ.
\v 14 No chol mèn coꞌ neꞌtaꞌde lugar yòo guꞌ liz mèn no làaz mèn par cued guꞌ làaz mèn plá huiz no neꞌ neꞌ taꞌ mèn lugar gòn mèn diꞌs coꞌ co guꞌ yalbàn, groꞌ guꞌ liz mèna no làaz mèna. No bzib guꞌ yòoyaꞌs coꞌ ndoo nii guꞌ, coꞌ nee diꞌs, yanꞌ cón cheꞌn conꞌ mbli no mèna guꞌ loo Diox.
\v 15 No tolo tyub quìi tyub bèel lezoꞌ mèn ciudaa no mèn yèeza axta coꞌseꞌ gàc huiz coꞌseꞌ tub rez Diox cón cheꞌn mèna. Lìcpeꞌ baꞌi, na nii loo guꞌ: Coꞌseꞌ gàc huiz coꞌseꞌ tub rez Diox cón cheꞌn mèna, más nè gàc yaltìi coꞌ gàc loo mèna huiza leque yaltìi coꞌ gàc loo mèn ciuda Sodom no loo mèn ciuda Gomor.
\s Jesús ngue toodiꞌs no myenꞌ leꞌ mèn tub nguꞌs myenꞌ. No li mèn ngòc nguàal conꞌ loo myenꞌ.
\p
\v 16 Huiꞌ guꞌ nexa. Na ngue telꞌ guꞌ loo mèn nayiꞌ. Ya guꞌ loo mèna xal mbacxilꞌ coꞌ yub mbii loo mbée loo mèna. Nalas gure guꞌ loo mèn yèez no loo mèn ciuda coꞌteꞌ yòo guꞌ xal nalas mbelꞌ coꞌseꞌ ñee mbelꞌ mèn par xyonꞌ mbelꞌ. No gòc nadoꞌ guꞌ loo mèna xal palomxtilꞌ.
\v 17 Anderhuen guꞌ. Chó Diox chó nee guꞌ. Nee guꞌ xá nda guꞌ. Tac loo mèn coꞌteꞌ ya guꞌa, mèna taꞌxùꞌ gu loo mèn coꞌ nxoꞌf zinꞌ loo cón cheꞌn sinagog mèn. No hueꞌ mèna guꞌ par tin mèna guꞌ coꞌteꞌ nac sinagog cheꞌn mèna.
\v 18 No axta hueꞌ mèna guꞌ loo mèn coꞌ nac gobernador no loo mèn coꞌ nac rey ante por cón chenen no maste. No coꞌseꞌ tataa mod gàc conꞌa loo guꞌ, más dibaxlaꞌs tyoodiꞌs guꞌ no taꞌ guꞌ cuent cón chenen loo mèna no loo mèn dib athu loo izlyoꞌ, mèn coꞌ inacte mèn nación Israel.
\v 19 Coꞌseꞌ taꞌxùꞌ mèna guꞌ loo mèna, neꞌtyóode guꞌ arid cón gab guꞌ no cón tyoodiꞌs guꞌ hora. Tac leque hora Diox li yub diꞌs yeꞌth yéc guꞌ par gác guꞌ càb guꞌ loo mèna.
\v 20 Tac inacte guꞌ coꞌ ñii hora no coꞌ tyoodiꞌs hora. Ndxeꞌlequeꞌ, Diox xud guꞌ li, por cón cheꞌn Xpii Natúꞌ cheꞌn Diox, par gác guꞌ càb guꞌ loo mèna hora.
\p
\v 21 Huiza, leque myenꞌ coꞌ ndxàc hues taꞌxùꞌ hues myenꞌ loo mèn par guth mèna hues myenꞌ. Lomisqueꞌ ne, leque mèn coꞌ nac gundan taꞌxùꞌ xganꞌ loo mèna par guth mèna myenꞌ coꞌ nac xganꞌ gundana. Lomisqueꞌ ne, myenꞌ coꞌ nacleꞌ xganꞌ gundan bixyath contra gundan coꞌ nac gundan loo myenꞌ. No axta guthxùꞌ myenꞌ gundan coꞌ nac xud myenꞌ.
\v 22 No ale yòo xyàn lezoꞌ ryete mèn dib athu loo izlyoꞌ ñèe mèn guꞌ ante por cón chenen no maste. Per mèn coꞌ thidtenequeꞌ mbli nèe no nxec yèe mèna axta gath mèna, mèna lyáꞌqueꞌ thidtene loo conꞌ ryes.
\v 23 Coꞌseꞌ tlo mèn, tyoo nque mèn xís guꞌ par tub nguꞌs mèn guꞌ leꞌn thìb ciuda, fxonꞌ guꞌ leꞌn tedib ciuda. Tac, lìcpeꞌ baꞌi, na ngue nii loo guꞌ: Leꞌ daa, coꞌ mbal yáal loo izlyoꞌ ndxèꞌ xal ndxáal chol mèn, daa gal nque xís guꞌ ndooreꞌ yilo que tee guꞌ leꞌn dib nación cheꞌn mèn nación Israel.
\p
\v 24 Fteꞌ lezoꞌ guꞌ conꞌ ndxè: Nec thìb myenꞌ coꞌ nac myenꞌ xinꞌ mtéꞌth thìb maistr, neꞌtaꞌde myenꞌa con xtùuz coꞌ ndli maistr no xtùuz coꞌ ndli myenꞌ. Lomisqueꞌ ne, nec thìb moz coꞌ ndli zinꞌ con patrón, neꞌtaꞌde moza con xtùuz coꞌ ndli patrón moz con xtùuz coꞌ ndli moz.
\v 25 Más huen blec lezoꞌ guꞌ gàc guꞌ mèn coꞌ gàc xinꞌ mtéꞌth daa. No gàc guꞌ xal daa coꞌ nac maistr guꞌ no li guꞌ xal ndlin. Lomisqueꞌ ne, blec lezoꞌ guꞌ gàc guꞌ xal thìb moz coꞌ lalqueꞌ nac xal patrón moz, coꞌ nee diꞌs, nac yub daa. Lomisqueꞌ ne, cheleꞌ mèn mbez loon leꞌ daa coꞌ nac xal thìb gundan coꞌ ñibeꞌ liz gundan, leꞌ daa lèe Beelzebú coꞌ nac jef cheꞌn meexùꞌ, aleꞌqueꞌ loo guꞌ coꞌ nac xal xinꞌ mbiꞌa neꞌ gab mèn masreꞌ conꞌ axta plóthe, ¿léꞌ?
\s Jesús mnibdiꞌs chó loo más ndxàal zyeb mèn.
\r (Lc. 12.2–9)
\p
\v 26 Por cona, ngue niin loo guꞌ: Neꞌzyebte guꞌ ñèe guꞌ mèn coꞌ tataa li no guꞌ. Tac yende nec thìb conꞌ coꞌ nzo casloo coꞌ neꞌryo xoꞌfte. No yende nec thìb conꞌ coꞌ xexte ndxàc loo yálꞌcuau coꞌ neꞌyathte no coꞌ neꞌyènte.
\v 27 Ryete conꞌ coꞌ ngue tan cuent loo guꞌ xexte ndxèꞌ, guuz guꞌi loo mèn alanlequeꞌ loo xnaa. No diꞌs coꞌ ngue niin loo guꞌ xexte ndxèꞌ, cabii fteꞌth guꞌ diꞌs ndxèꞌ no negadiꞌs blo guꞌ yalbàn cón cheꞌn diꞌs ndxèꞌ par gòn ryete mèna diꞌs ndxèꞌ.
\v 28 Neꞌzyebte guꞌ ñèe guꞌ mèn coꞌ ndxuth bélꞌyòo lad mèn. Mèna neꞌlide gan guth alm no xpii xtàa mèn. Ndxeꞌlequeꞌ, bzeb guꞌ gunèe guꞌ Diox coꞌ ndxác cobii alm mèn no xpii mèn leꞌn yeꞌrbìil coꞌ nac loo bèel no loo quìi ngolo nguth mèn.
\p
\v 29 ¿Chéꞌ inthoꞌde mèn chop mbin bix coꞌ lèe mbyéꞌ por siꞌ centav, càꞌ? Nthoꞌ mèn mbin tataa, ¿léꞌ? Mastaleꞌ ndli mèn cuent yende cón ntac mbin coꞌ lèe mbyéꞌ loo mèn, per neꞌ neꞌ gath mbina cheleꞌ Diox neꞌláꞌyaꞌde mbina gath mbina.
\v 30 No axta yis coꞌ ndoo yéc guꞌ, Diox naneequeꞌ no nonqueꞌ Diox plá yis ndoo yéc guꞌ.
\v 31 Por cona, ngue niin loo guꞌ, ey: Neꞌzyebte guꞌ ñèe guꞌ mèna. Leꞌ guꞌ masqueꞌ ntac leque ryethe mbin coꞌ lèe mbyéꞌ.
\s Trèꞌ ndluꞌ cón cheꞌn mèn coꞌ mdaꞌ cuent cón cheꞌn Jesucrist loo xtàa mèn.
\r (Lc. 12.8–9)
\p
\v 32 Chol mèn coꞌ co ro cón chenen no co xoꞌf mèn cón chenen loo xtàa mèn coꞌ nziriꞌ loo izlyoꞌ, daa, ne, go xoꞌf no go ron cón cheꞌn mèna loo xuden Diox coꞌ nzo loo béꞌ.
\v 33 No chol mèn coꞌ cà diꞌs cón chenen loo xtàa mèn coꞌ nziriꞌ loo izlyoꞌ, daa, ne, cà diꞌs cón cheꞌn mèna loo xuden Diox coꞌ nzo loo béꞌ.
\s Por cón cheꞌn Jesús ndxàc chop ned mèn.
\r (Lc. 12.51–53; 14.26–27)
\p
\v 34 Neꞌlide guꞌ xtùuz leꞌ daa ndal par lin cue mèn rye nda mèn no rye ndyeꞌth mèn làth xtàa mèn loo izlyoꞌ. ¡Tyèꞌ! Ndxeꞌlequeꞌ, ndalen par lin yitoo diꞌs làth mèn por cón chenen.
\v 35 Tac daa ndal par lin yitoo diꞌs loo mèn con xud mèn liz mèn. No lin par yitoo diꞌs loo thìb mzaꞌ con xnaꞌ mzaꞌ liz mèn. No lin par yitoo diꞌs loo thìb guxiix con xnaꞌzap guxiix coꞌteꞌ ya mzaꞌ guxiix liz mèn por cón chenen no maste.
\v 36 No ale tataa mod leque mèn guliza gàc ngolo ngolaꞌs loo xtàa mèn guliza.
\p
\v 37 Más de cona, ngue niin conꞌ ndxèꞌ loo guꞌ: Leꞌ mèn coꞌ más nqueꞌ lezoꞌ ñèe xud no mèn coꞌ más nqueꞌ lezoꞌ ñèe xnaꞌ leque queꞌ lezoꞌ mèna ñèe mèna daa, indxàalte mèna yòo mèna loo cón chenen. Lomisqueꞌ, mèn coꞌ más nqueꞌ lezoꞌ ñèe xganꞌ no rsap leque queꞌ lezoꞌ mèna ñèe mèna daa, indxàalte mèna yòo mèna loo cón chenen.
\v 38 Cheleꞌ chó guꞌ lyaꞌs que tee noqueꞌ daa ned ngue teeꞌen, atate huiz bli guꞌ xtùuz coꞌ huenlequeꞌ ñeeneꞌ chéꞌ txec guꞌ par tyoo nque guꞌ xísen coꞌseꞌ li mèn ngòc nguàal conꞌ loo guꞌ por cón chenen. Tac mèn coꞌ yòo loo cón chenen, mèn yeꞌrsinꞌ tethonqueꞌ mèna xalqueꞌ ntethon solndad cheꞌn ciuda Rom mèn coꞌseꞌ ñibeꞌ yèe solndad loo mèn hueꞌ mèn cruzpeꞌ mèn ndooreꞌ queꞌ solndad mèna loo cruz par guth solndad mèna.
\v 39 Tac mèn coꞌ ante ndoo lezoꞌ ndxath ndxeyꞌ no ndxath ndlyux mèn par que no mèn cheꞌnpeꞌ mèn loo izlyoꞌ ndxèꞌ, loo mèna neꞌtaꞌde Diox lugar yòo ban no mèna Diox thidtene. Per mèn coꞌ láꞌ ryethe conꞌ coꞌ nac yalndac cheꞌnpeꞌ mèn coꞌ gác li mèn gan loo izlyoꞌ ndxèꞌ por cón chenen, loo mèna taꞌ Diox lugar par yòo ban no mèna Diox thidtene.
\s Jesús ndxab loo mèn: Mèn coꞌ li conꞌ ndac loo guꞌ, ngue cón cheꞌn mèna loo Diox.
\r (Mr. 9.41)
\p
\v 40 Mèn coꞌ taꞌ lugar yòo no guꞌ mèn liz mèn no làaz mèn, mèna taꞌ lugar yòo non mèna. Leꞌ mèn coꞌ taꞌ lugar no tyal mèn yòo non mèn, mèna taꞌ lugar no tyal mèna yòo no mèna xuden Diox coꞌ mtelꞌ daa.
\v 41 Mèn coꞌ taꞌ lugar yòo mèn coꞌ ndeꞌth diꞌs coꞌ ndxab Diox liz mèn no làaz mèn por nac mèna mèn coꞌ mdeꞌth diꞌs coꞌ ndxab Diox, loo mèna li Diox leque conꞌ ndac coꞌ li Diox loo mèn coꞌ mdeꞌth diꞌs coꞌ ndxab Diox, ne. Lomisqueꞌ ne, mèn coꞌ taꞌ lugar yòo thìb mbiꞌ nalì no thìb mbiꞌ nambìi liz mèn no làaz mèn tac non mèn nac mbiꞌ mbiꞌ nalì no mbiꞌ nambìi, loo mèna li Diox leque conꞌ ndac coꞌ li mèn loo mèn coꞌ nac mèn nalì no mèn nambìi.
\v 42 Lomisqueꞌ ne, chol mèn coꞌ taꞌ thìb xii nítdòp loo chol mèn prob par gu mèn proba por nac mèn proba mèn coꞌ nac xinꞌ mtéꞌth daa, no por ndyoo nque mèn proba xísen, lìcpeꞌ baꞌi, na nii loo guꞌ: Loo mèna li Diox anggàc huax conꞌ ndac xalqueꞌ ndli Diox loo mèn coꞌ nac xinꞌ mtéꞌth daa.
\c 11
\s Juàn Bautist mtelꞌ chop myenꞌ xinꞌ mtéꞌth Juàn par mnibdiꞌs myenꞌ thìb conꞌ loo Jesús.
\r (Lc. 7.18–35)
\p
\v 1 Coꞌseꞌ ngolo mnibeꞌ Jesús loo myenꞌ no mdoodiꞌs no Jesús ryete siꞌ fchop myenꞌ xinꞌ mtéꞌth Jesús, mxen Jesús ned. Nda Jesús par ned làaz myenꞌ par luꞌ Jesús no co Jesús yalbàn cón cheꞌn diꞌs ndac loo mèn par ned nda myenꞌ.
\p
\v 2 Nde nxonꞌ, leꞌpeꞌ ngue Juàn Bautist leziꞌf leꞌn huiza, mbìn Juàn cón cheꞌn coꞌ ngue tee li Jesús. Sya, mtelꞌ Juàn chop myenꞌ xinꞌ mtéꞌth Juàn loo Jesús
\v 3 par ya nibdiꞌs myenꞌ loo Jesús. Ndxab myenꞌ loo Jesús:
\p ―¿Chéꞌ Uꞌ nac Crist coꞌ ndxath yiꞌtha o chéꞌ más huen cued nuꞌ yiꞌth tedib xaꞌ coꞌ nacpeꞌ Crist, càꞌ?
\p
\v 4 Jesús mcàb. Ndxab Jesús loo myenꞌ:
\p ―Byàa guꞌ. No ftaꞌ guꞌ cuent loo Juàn cón cheꞌn conꞌ coꞌ gunèeleꞌ guꞌ no cón cheꞌn conꞌ coꞌ mbìnleꞌ guꞌ.
\v 5 Guuz guꞌ loo Juàn: Mèn sieu ngüiꞌ. Mèn coj mdyoxcuaꞌ nii. No ndyee mèn coj. Mèn coꞌ ndyac yíiz ndxaꞌs lad, coꞌ ndxèe yid lad, ndxac no ndxembìi mèna. Mèn cuéꞌ ndxòn diꞌs. Mèn nguth, ale, ndryo xban. Leꞌ loo chol mèn prob no loo mèn naxèn coꞌ ndyac yaltìi na, ndxàthleꞌ no ndxènleꞌ cón cheꞌn diꞌs ndac coꞌ ndluꞌ cón cheꞌn Diox.
\v 6 Huen nda mèn coꞌ neꞌtyoo xàꞌde lezoꞌ no mèn coꞌ neꞌtenꞌte arid ngòc nguàal conꞌ por cón chenen.
\p
\v 7 Coꞌseꞌ mbii myenꞌ xinꞌ mtéꞌth Juàn Bautist loo Jesús, mtlo Jesús, mdoodiꞌs Jesús cón cheꞌn Juàn Bautist loo mèn coꞌ nziriꞌ. Ndxab Jesús loo mèna:
\p ―Coꞌseꞌ ngua tee huiꞌ guꞌ Juàn coꞌteꞌ nagána, ¿chéꞌ ngua tee huiꞌ guꞌ thìb xanꞌ nixxtilꞌ coꞌ ngolꞌ mbii, càꞌ? Yende xàa.
\v 8 Lomisqueꞌ ne, niin loo guꞌ: ¿Chó loo ngua tee huiꞌ guꞌ? ¿Chéꞌ ngua tee huiꞌ guꞌ thìb mbiꞌ coꞌ noc thìb ned larꞌ huen, càꞌ? Guꞌ nonqueꞌ no naneequeꞌ guꞌ leꞌ mèn coꞌ ndxoc anabte larꞌ huen, mèna mbe liz rey, ¿léꞌ?
\v 9 ¿Xá nee guꞌ? ¿Chó loo ngua tee huiꞌ guꞌ, sya? ¿Chéꞌ ngua tee huiꞌ guꞌ thìb mbiꞌ coꞌ ndeꞌth diꞌs coꞌ ndxab Diox, sya, càꞌ? Aa, lìcpeꞌ baꞌi. Guꞌ ngua tee huiꞌ thìb mbiꞌ coꞌ más ñaareꞌ loo mèn coꞌ mdeꞌth diꞌs coꞌ ndxab Diox.
\v 10 Cón cheꞌn Juàn Bautist nac diꞌs coꞌ ndub loo libr coꞌ nac xtiꞌsdiox coꞌ ndxab:
\pi1 Na telꞌ ner thìb mbiꞌ coꞌ ya teꞌth ner diꞌs ndac ndxèꞌ lool. No luꞌ mbiꞌ cón cheꞌn lùu loo mèn par li mèn xtùuz no par tyoodiꞌs no mèn lezoꞌ mèn ndooreꞌ coꞌseꞌ galen loo mèn.
\m
\v 11 Na nii loo guꞌ: Làth rye mèn coꞌ ngóol xànꞌ nii xnaꞌ mèn no xànꞌ nii xud mèn, tarte gáal thìb mbiꞌ coꞌ ndeꞌth diꞌs coꞌ ndxab Diox coꞌ más ñaareꞌ leque Juàn Bautist. Mastaleꞌ tataa naca, desde nalleꞌ par delant, mèn coꞌ nac más beꞌthe coꞌ ngue taꞌ lugar ñibeꞌpeꞌ Diox loo mèn, más huen nda mèna loo Diox leque Juàn Bautist. Tac Diox co xoꞌf más conꞌ ndac cón cheꞌn Diox loo mèna leque conꞌ coꞌ mblo xoꞌf Diox loo Juàn Bautist cón cheꞌn Diox.
\p
\v 12 Tac axta coꞌseꞌ ngòc tiemp coꞌseꞌ mtlo Juàn Bautist, mdeꞌth Juàn Bautist no mblo Juàn Bautist yalbàn cón cheꞌn diꞌs ndac, no axta huiz nalze mbyath mbyèn cón cheꞌn diꞌs ndac coꞌ ndluꞌ xá mod ndlyaꞌs Diox ñibeꞌpeꞌ Diox loo mèn. No ryete mèn coꞌ mbìn diꞌsa nguátbèe par mbli mèna coꞌ nzote mod li mèna par yòo mèna loo cón cheꞌn Diox par ñibeꞌpeꞌ Diox loo mèna.
\v 13 Tac ryete mèn coꞌ mdeꞌth diꞌs coꞌ ndxab Diox coꞌ mqueꞌ yeꞌs coꞌ nac xtiꞌs Diox, no loo libr coꞌ ngòc ley coꞌ mnibeꞌ Diox coꞌ mxoꞌf Moisés loo mèn ndyoodiꞌs no ndaꞌ cuent cón cheꞌn xá mod ndlyaꞌs Diox ñibeꞌpeꞌ Diox loo mèn ndooreꞌ gàc tiemp coꞌseꞌ yiꞌth Juàn Bautist.
\v 14 Cheleꞌ guꞌ yilaꞌs diꞌs coꞌ ngue niin loo guꞌ ndxèꞌ, golaꞌs guꞌ leꞌ Juàn Bautist nac Lii coꞌ mbyath yiꞌth, Lii coꞌ mdeꞌth diꞌs coꞌ ndxab Diox póla.
\v 15 Cheleꞌ guꞌ ndenꞌ cón nee diꞌs coꞌ ngue niin loo guꞌ ndxèꞌ, ftaꞌ guꞌ lugar yaaꞌd diꞌs ndxèꞌ leꞌn lezoꞌ guꞌ. No golaꞌs guꞌ diꞌsa.
\p
\v 16 ¿Xá nee guꞌ? ¿Con chó conꞌ tetaquen mèn coꞌ nzi ban tiemp ndxèꞌ, àꞌ? Ndyaquen leꞌ mèn coꞌ nzi ban tiemp ndxèꞌ nac xal myenꞌ bix coꞌ mbe nguith loo xbiꞌ. No mbez yèe myenꞌ bixa loo xtàa myenꞌ. Mbez myenꞌ:
\v 17 Nuꞌ mbilꞌ dii loo flaut no ale neꞌngolꞌ niide guꞌ. Mbilꞌ ro bàan nuꞌ no ale neꞌngónꞌte guꞌ con nuꞌ. Tataaqueꞌ nac mèna.
\v 18 Per na nii loo guꞌ: Coꞌseꞌ mbiꞌth Juàn Bautist, neꞌngàcte tataa loo Juàn. Tac Juàn neꞌnghuade no neꞌngude Juàn axta plóthe mblyaꞌs Juàn xal nac mod coꞌ ndxuhua chol mèn. No ale mbez guꞌ cón cheꞌn Juàn: Xpii meexùꞌ ngue tee no Juàn.
\v 19 Ngoloa, ndalen, daa coꞌ mbal yáal loo izlyoꞌ ndxèꞌ xal ndxáal chol mèn. Daa ndxuhua. Daa ndxu. Per coꞌseꞌ ñèe guꞌ tataa ndxuhuan no tataa ndxun, ale mbez guꞌ: Susqueꞌ ndxuhuachoꞌ mbiꞌ baꞌ, yoo. No ale mbez guꞌ: Susqueꞌ ndxòo lezoꞌ mbiꞌ ndxu mbiꞌ vin. No ale mbez guꞌ: Ndxàc amiu mbiꞌ con mèn coꞌ ndli cobrar cón cheꞌn contribución no con mèn coꞌ ndxàp xtol. Mastaleꞌ tataa mbez guꞌ nac daa, daa nii loo guꞌ: Yende chó mport nzo lezon cón cheꞌn conꞌ ndli guꞌ xtùuz cón cheꞌn Juàn no cón chenen tac mèn coꞌ ndxácpeꞌ, mèna nonqueꞌ no naneequeꞌ mèna leꞌ conꞌ coꞌ ngue li Diox por cón cheꞌn Juàn no por cón chenen nac conꞌ ndac coꞌ ncàb loo coꞌ ndxác ryop nuꞌ Juàn.
\s Trèꞌ ndluꞌ cón cheꞌn mèn rye yèez coꞌ neꞌndalte ngòn cón cheꞌn Jesús.
\r (Lc. 10.13–15)
\p
\v 20 Sya, mtlo Jesús, mbyoo Jesús rye mèn coꞌ nac cheꞌn rye yèez coꞌteꞌ mblileꞌ Jesús huax yalguzyeꞌ tac neꞌnglàade yéc mèna no neꞌnglàade lezoꞌ mèna. Ndxab Jesús loo mèna:
\p
\v 21 ―Ay, prob guꞌ izlyoꞌ, mèn yèez Corazín. Ay, prob guꞌ izlyoꞌ, mèn yèez Betsaid. Tac cheleꞌ leꞌn yèez Tir no leꞌn yèez Sidón ngàc ryethe yalguzyeꞌ ndxèꞌ xal ndxàca loo guꞌ nalleꞌ, mèna nglàa yéc no nglàa lezoꞌ mèna, no ngoc mèna larꞌ lut por cón cheꞌn yalnaxi coꞌ ngòc loo mèna.
\v 22 Por cona, daa ngue nii loo guꞌ, mèn yèez Corazín no mèn yèez Betsaid: Leꞌ loo mèn yèez Tir no loo mèn yèez Sidón más xhuite gàc yaltìi leꞌn huiz coꞌseꞌ tub rez Diox cón cheꞌn mèna leque coꞌseꞌ tub rez Diox cón cheꞌn guꞌ.
\v 23 No guꞌ, mèn yèez Capernaum coꞌ nac mèn nateꞌs no mèn naxalꞌ, ¿chéꞌ ngue li guꞌ cuent no chéꞌ ndenꞌ guꞌ leꞌn lezoꞌ guꞌ leꞌ guꞌ ndoo lìte yòo loo béꞌ, càꞌ? Yende xàa. Ndxeꞌlequeꞌ, guꞌ ndoo lìte lyàa loo quìi no loo bèel coꞌteꞌ lyàa mèn coꞌ ndryo xàꞌ loo cón cheꞌn Diox. Tac cheleꞌ loo mèn yèeza ngàc rye loothe yalguzyeꞌ coꞌ ngòc loo guꞌa, mèn yèeza ngyanꞌqueꞌ axta huiza no axta huiz nalze.
\v 24 Por cona, daa ngue nii loo guꞌ, mèn yèez Capernaum: Coꞌseꞌ gàc huiz coꞌseꞌ tub rez Diox cón cheꞌn mèn, más nè gàc yaltìi loo guꞌ leque loo mèn coꞌ ngure ban ned nziriꞌ yèez Sodom.
\s Jesús mbez loo mèn: Gòo guꞌ loo cón chenen no daa li yo nagàl lezoꞌ guꞌ no tíꞌ lezoꞌ guꞌ.
\r (Lc. 10.21–22)
\p
\v 25 Leꞌn huiza ndxab Jesús loo Diox:
\p ―Diox quix Uꞌ, Pay, Uꞌ coꞌ ñibeꞌpeꞌ loo alux conꞌ loo béꞌ no loo izlyoꞌ. Uꞌ mtauꞌ yéc mèn no lezoꞌ mèn, mèn coꞌ mbez anzeꞌf ndxác no mèn coꞌ mbez ndenꞌ diꞌs par neꞌtenꞌte mèna diꞌs no par neꞌtaꞌde mèna cuent cón cheꞌn ryop naꞌ. Ndxeꞌlequeꞌ, Uꞌ mblo xoꞌf cón cheꞌn naꞌ loo mèn coꞌ nauꞌ loo nauꞌ yéc xal loo myenꞌ bix.
\v 26 Tataaqueꞌ mbli Uꞌ, Pay, tac tataa mblyaꞌs Uꞌ li Uꞌi.
\p
\v 27 Mbere Jesús, ndxab Jesús loo mèna tedib vez:
\p ―Ngue niin conꞌ ndxèꞌ loo guꞌ, ne: Mdaꞌleꞌ xuden ryethe conꞌ ndxàp xuden laꞌs nii xuden no laꞌs yaꞌ xuden loon thidte vez. Lìcpeꞌ baꞌi, yende chó mèn tarte libeꞌ daa. No tarte taꞌ mèn cuent cón chenen, daa coꞌ nac xganꞌ xuden Diox. Ante Diox coꞌ nac xuden ndlibeꞌqueꞌ daa. No, lìcpeꞌ baꞌi, yende chó mèn nzo coꞌ ndlibeꞌqueꞌ xuden Diox. Ante daa, coꞌ nac xganꞌ xuden Diox, ndliben xuden Diox. No loo mèn coꞌ ndlyazen go xoꞌfqueꞌen cón cheꞌn xuden Diox, mèna mtéꞌthqueꞌ no ndaꞌqueꞌ mèna cuent cón cheꞌn xuden Diox.
\p
\v 28 Ndxab Jesús loo mèna, ne:
\p ―Gòo guꞌ loo cón chenen no golaꞌs guꞌ loon, guꞌ coꞌ anzeꞌf nxi lezoꞌ por chol yaltìi coꞌ ndxàc loo guꞌ. Daa li par cue see tee lezoꞌ guꞌ no par tíꞌ lezoꞌ guꞌ loo ryethe conꞌ.
\v 29 Tac daa nac mbiꞌ nadoꞌ. No indyeꞌste daa. Neꞌ neꞌ inxalꞌ daa. Por cona, ngue niin loo guꞌ: Ftubdiꞌs guꞌ loon no bìn guꞌ diꞌs coꞌ ngue niin loo guꞌ ndxèꞌ. No bli guꞌi xal ngue ñibeꞌena loo guꞌ xal ndxàca loo thìb ned ngon coꞌseꞌ nxoꞌf xuanꞌ ngon yuug xís yen ngon. Ftéꞌth guꞌ coꞌ nac cón chenen. Cheleꞌ guꞌ yòo loo cón chenen no yilaꞌs guꞌ loon xal ngue niina loo guꞌ ndxèꞌ, por derech, cue see tee lezoꞌ guꞌ loo ryethe conꞌ.
\v 30 Tac conꞌ coꞌ ñibeꞌen loo mèn coꞌ ndxòo loo cón chenen par li mèna, inacte conꞌa arid nagàn par li mèna. Neꞌ ne inaca xal thìb yóꞌ coꞌ anzeꞌf néꞌ par hueꞌ mèn yóꞌa xís mèn. Ndxeꞌlequeꞌ, naca thìb conꞌ par tíꞌ lezoꞌ mèn no yo nagàl lezoꞌ mèn.
\c 12
\s Myenꞌ xinꞌ mtéꞌth Jesús mchoꞌ bacdò cheꞌn nzob triu huiz coꞌ ngòc huiz descans tiempa.
\r (Mr. 2.23–28; Lc. 6.1–5)
\p
\v 1 Leque leꞌn huiza, thìb huiz sabd coꞌ ngòc huiz descans tiempa, Jesús nda riid con myenꞌ xinꞌ mtéꞌth Jesús coꞌteꞌ nax thìb leꞌ yòo coꞌteꞌ nzoꞌf ñaꞌ triu. Leꞌ myenꞌ xinꞌ mtéꞌth Jesús na, mblyanꞌ. Ale mtlo myenꞌ, mchoꞌ myenꞌ triu. No mblobyaꞌ myenꞌ triu laꞌs yaꞌ myenꞌ par ngroꞌ nzob triu par hua myenꞌ.
\v 2 Làth mèn coꞌ ndoo nque xís Jesús ngo ndxep mèn xleyꞌ farise. Coꞌseꞌ ñèe mèn xleyꞌ farise ndli myenꞌ conꞌa, ndxab mèn xleyꞌ farisea loo Jesús:
\p ―Huiꞌ nexa, mbiꞌ. Myenꞌ xinꞌ mtéꞌth lùu ngue li zinꞌ coꞌ indxàalte li myenꞌ huiz sabd coꞌ nac huiz descans, cara.
\p
\v 3 Jesús ndxab loo mèn xleyꞌ farise:
\p ―Aa, ¿chéꞌ tarte lab guꞌ loo libr no chéꞌ tarte taꞌ guꞌ cuent cón cheꞌn conꞌ coꞌ mbli David coꞌ ngòc rey póla thìb vez coꞌseꞌ mblyanꞌ David con mèn coꞌ ngure no David tiempa, càꞌ?
\v 4 David ngòo leꞌn templ. No ale mxen David pan coꞌ ngòc pan natúꞌ loo Diox coꞌ mbec mèn loo mes. Indxàalte David nghua David pana con mèna. Tac pana, ante nguleyꞌ, coꞌ ndxòo leꞌn templ cheꞌn Diox, ndxàp permis ndxuhua pana tiempa.
\v 5 ¿Chéꞌ tarte lab guꞌ loo libr, coꞌ ngòc ley coꞌ mnibeꞌ Diox mxoꞌf Moisés loo mèn, leꞌ rye nguleyꞌ coꞌ ndxòo templ indlide descans huiz descans no mxoꞌf zinꞌ nguleyꞌ leꞌn templ huiz descans, càꞌ? No non guꞌ leꞌ conꞌ coꞌ ndli nguleyꞌa incàbte conꞌa xquin nguleyꞌ no xtol nguleyꞌ, ¿léꞌ?
\v 6 Ngue niin loo guꞌ: Trèꞌ nzo thìb mbiꞌ coꞌ nac más mbiꞌ roo mbiꞌ xèn leque templ, coꞌ nee diꞌs, mbiꞌa nac yub daa. No conꞌ ndlin inacte coꞌ ngue cuanen xquin daa no xtol daa xal ndli guꞌ cuent.
\v 7 Guꞌ tarte tenꞌ no tarte yaaꞌd diꞌs loo guꞌ cón nee diꞌs coꞌ ngue niin loo guꞌ ndxèꞌ:
\pi1 Daa ndlyaz leꞌ guꞌ lyat lezoꞌ ñèe guꞌ hues xtàa guꞌ. No indlyasten leꞌ guꞌ tolo guth máꞌ par quix guꞌ cón cheꞌn xtol guꞌ loo Diox por ren máꞌ coꞌ nxo guꞌ loo izlyoꞌ.
\m Leꞌ sya, cheleꞌ guꞌ non no taꞌ guꞌ cuent cón nee diꞌs coꞌ ngue niin loo guꞌ ndxèꞌ, axta neꞌ neꞌ quexùꞌ guꞌ daa, daa coꞌ ingue cuaꞌnte xquin no xtol.
\v 8 Daa coꞌ mbal yáal loo izlyoꞌ xalqueꞌ ndxáal chol mèn loo izlyoꞌ, daa ñibeꞌ loo mèn no niin loo mèn cón li mèn huiz sabd. Tac Diox mbli ndxàpen conꞌ laꞌs niin no laꞌs yan par ñibeꞌen loo mèn cón li mèn huiz sabd.
\s Trèꞌ ndluꞌ cón cheꞌn thìb mbiꞌ coꞌ mque no sa yaꞌ biiz.
\r (Mr. 3.1–6; Lc. 6.6–11)
\p
\v 9 Ngoloa, mbii Jesús tya. Ngòo Jesús leꞌn thìb sinagog cheꞌn mèna.
\v 10 Làth mèna ngo thìb mbiꞌ coꞌ nayíiz sa yaꞌ. Yaꞌ mbiꞌa yende mod huin. No yende mod gaꞌ. Sya, asembli mèna, mnibdiꞌs mèna loo Jesús cón cheꞌn mbiꞌa par cuaꞌn mèna mod quexùꞌ mèna Jesús. Ndxab mèna loo Jesús:
\p ―Mbiꞌ, ¿chéꞌ nzo mod teyac mèn thìb mèn yíiz nalze coꞌ nac huiz descans, àꞌ?
\p
\v 11 Mcàb Jesús loo mèna. Ndxab Jesús:
\p ―¿Chéꞌ nzo chó thìb guꞌ coꞌ nzo làth guꞌ ndxèꞌ, angab naꞌi, cheleꞌ guꞌ ngue no thìb mbacxilꞌ no ngob che mbacxilꞌa leꞌn thìb tóꞌ leꞌxqueꞌ huiz sabd coꞌ nac huiz descans, chéꞌ neꞌcoꞌde guꞌ mbacxilꞌa leꞌn tóꞌ, sya, càꞌ?
\v 12 Aleꞌqueꞌ thìb mbiꞌ neꞌ intac más leque thìb mbacxilꞌ. Cona, ngue niin loo guꞌ: Ndxàalqueꞌ li mèn conꞌ ndac loo mèn huiz sabd coꞌ nac huiz descans.
\p
\v 13 Ngolo ndxab Jesús diꞌsa loo mèna, ndxab Jesús loo mbiꞌ yíiza:
\p ―Ftegaꞌ yaꞌl, ey.
\p Coꞌseꞌ mtegaꞌ mbiꞌ yaꞌ mbiꞌ, mbyac yaꞌ mbiꞌ xalqueꞌ taasa lad yaꞌ mbiꞌ coꞌ nac yaꞌ huen mbiꞌ.
\v 14 Sya, ngroꞌ mèn xleyꞌ farise. Mdoodiꞌs mèna con xtàa mèna xá mod guthxùꞌ mèna Jesús.
\s Diꞌs coꞌ mdeꞌth Sayi coꞌ mdeꞌth diꞌs coꞌ ndxab Diox cón cheꞌn Jesús.
\p
\v 15 Coꞌseꞌ mdenꞌ lezoꞌ Jesús conꞌ ndlyaꞌs mèna li no mèna Jesús, mbii Jesús tya. No anzeꞌf thìb mèn mdoo nque xís Jesús. Làth xtauꞌa, mteyac Jesús mèn yíiz coꞌ nde làth mèna.
\v 16 Mnibeꞌ Jesús loo mèna yende chó loo gabte mèna chó nac Jesús.
\v 17 Tataa mnibeꞌ Jesús loo mèna par ngòcqueꞌ, no mdyaaqueꞌ, no mdubqueꞌ diꞌs coꞌ mdeꞌth Sayi coꞌ mdeꞌth diꞌs coꞌ ndxab Diox. Sayi ndxab:
\pi1
\v 18 Mbiꞌ ndxèꞌ nac mbiꞌ coꞌ nxoꞌf zinꞌ zinꞌ cón chenen. Daa mcui mbiꞌ ndxèꞌ. Mbiꞌ ndxèꞌ anzeꞌf lezon ngudloon. No cón cheꞌn conꞌ ndli mbiꞌ ndxèꞌ anzeꞌf ndyac tínꞌ lezon. Daa làa Xpii Natúꞌ coꞌ nac Xpiipeꞌ daa loo mbiꞌ coꞌ nxoꞌf zinꞌ zinꞌ cón chenen. Teꞌth mbiꞌ no luꞌ mbiꞌ loo mèn dib athu loo izlyoꞌ leꞌ daa nalì no nambìi tub rezen cón cheꞌn rye mèn.
\v 19 Neꞌyoo diꞌste mbiꞌ con nec thìb mèn. Neꞌ neꞌ teꞌth mbiꞌ cón cheꞌn mbiꞌ ayen diꞌs ayen cuent loo mèn. Neꞌ neꞌ yo mèn coꞌ gòn diꞌs coꞌ gab mbiꞌ ayen diꞌs ayen cuent ned riid mbiꞌ.
\v 20 Neꞌ neꞌ quiꞌs mbiꞌ coꞌ nxoꞌf zinꞌ zinꞌ cón chenen thìb xanꞌ nixxtilꞌ coꞌ ndoo gonꞌ no coꞌ ndoo rec par gas nixxtilꞌa. Neꞌ neꞌ teche mbiꞌa bxec loo mech cheꞌn lintern coꞌ pente ndoo yol axta coꞌseꞌ gàc huiz coꞌseꞌ thìb lìte ñibeꞌ mbiꞌ coꞌ nxoꞌf zinꞌ zinꞌ cón chenen loo mèn dib athu loo izlyoꞌ. Neꞌlide mbiꞌa conꞌa tant nadoꞌ mbiꞌa.
\v 21 No loo mbiꞌ coꞌ nxoꞌf zinꞌ zinꞌ cón chenen cue quee lezoꞌ mèn coꞌ nac mèn dib athu loo izlyoꞌ, mèn coꞌ inacte mèn nación Israel.
\s Mèn xleyꞌ farise mquexùꞌ mqueꞌ fals Jesús leꞌ Jesús ndxàp conꞌ laꞌs nii Jesús no conꞌ laꞌs yaꞌ Jesús coꞌ nac cheꞌn meexùꞌ.
\r (Mr. 3.19–30; Lc. 11.14–23; 12.10)
\p
\v 22 Ngolo mdoodiꞌs Jesús diꞌsa, mbiꞌth no mèn thìb mbiꞌ sieu coꞌ mque no thìb mbii yeꞌrsinꞌ cheꞌn meexùꞌ. Nde nxonꞌ, mud mbiꞌ, ne. Jesús mteyac mbiꞌ. Ngoloa, ndxeꞌslequeꞌ mdoodiꞌs mbiꞌ no mbuiꞌ mbiꞌ.
\v 23 Coꞌseꞌ ñèe mèn coꞌ nziriꞌ loo Jesús leꞌ Jesús mbli conꞌa, ante mbuiꞌ mèna no ante gunaa mèna. Mbez mèna:
\p ―¿Chéꞌ mbiꞌ baꞌ coꞌ mbez mèn nac xganꞌ David coꞌ ngòc rey póla, càꞌ?
\p
\v 24 Coꞌseꞌ mbìn mèn xleyꞌ farise tataa gunii mèna no mdoodiꞌs mèna cón cheꞌn Jesús, ndxab mèn xleyꞌ farise loo mèna:
\p ―Mbiꞌ baꞌ ngoꞌ xpii yeꞌrsinꞌ ante por ryethe conꞌ roo no conꞌ xèn coꞌ nzo laꞌs nii no coꞌ nzo laꞌs yaꞌ cheꞌn xaꞌ coꞌ lèe Beelzebú coꞌ nac jef cheꞌn rye xpii yeꞌrsinꞌ.
\p
\v 25 Per Jesús mdaꞌ cuent no mdenꞌ lezoꞌ Jesús xal nac xtùuz mèna. Ndxab Jesús loo mèna:
\p ―Nde niin thìb conꞌ loo guꞌ, mèn xleyꞌ farise: Ryete mèn coꞌ nxoꞌf zinꞌ no gobiern loo cón cheꞌn gobiern, cheleꞌ mèna ndxàc chop ned mèn no leque mèna bixyath contra xtàa mèn, leque mèn guth xtàa axta telux mèna xtàa mèn. Leꞌ sya, tataa mod gobierna lyux. Lomisqueꞌ ne, cheleꞌ mèn cheꞌn thìb yèez o thìb ned mèn guliz coꞌ ndxàc famil ndxàc chop ned no bixyath mèna contra xtàa mèna, no bixyath mèn guliz coꞌ ndxàc famila contra mèn guliz por mbe yoo mèna, pues mèna neꞌxecte loo conꞌa axta lyux mèn yèeza no axta lyux mèn coꞌ ndxàc mèn guliza, ne.
\v 26 Cona, ngue niin loo guꞌ: Lomisqueꞌ mod ndxàca loo Mebizya, ne. Tac cheleꞌ Mebizya tlo li par gàc mèn mèn nadoꞌ loo izlyoꞌ, ¿xá mod ryoꞌ loo coꞌ ndlyaꞌs Mebizya li mèn, sya? Yende moda, ¿léꞌ?
\v 27 Guꞌ mbez leꞌ daa ngoꞌ xpii yeꞌrsinꞌ loo mèn por cón cheꞌn conꞌ roo no conꞌ xèn coꞌ nzo laꞌs nii no coꞌ nzo laꞌs yaꞌ cheꞌn xaꞌ coꞌ lèe Beelzebú, ¿léꞌ? Cheleꞌ daa tataa ndli, ¿chó ndaꞌ yalnibeꞌ loo mèn coꞌ ndxòo lad cheꞌn guꞌ par ngoꞌ mèna xpii yeꞌrsinꞌ loo mèn coꞌ mque no xpii yeꞌrsinꞌ, sya? Cona, ngue niin loo guꞌ: Leque mèn coꞌ ndyoo nque xís guꞌa ndaꞌ cuent no ngo xoꞌf mèna cón cheꞌn guꞌ, ale nquée mbii yéc guꞌ, no ndxos xtùuz guꞌ, no neꞌ neꞌ indaꞌ guꞌ cuent cón mbez guꞌ coꞌseꞌ ndli guꞌ xtùuz cón chenen.
\v 28 Ndxeꞌlequeꞌ, daa ngoꞌ xpii yeꞌrsinꞌ loo mèn por cón cheꞌn Xpii Natúꞌ cheꞌn Diox. No conꞌ ndlin loo mèna ndluꞌ loo mèn par taꞌ mèn cuent no non mèn mzinleꞌ tiemp coꞌ ngue ñibeꞌpeꞌ Diox loo mèn làth guꞌ.
\p
\v 29 Gunee guꞌ loon: ¿Xá mod gàc yòo chol mèn liz thìb mbiꞌ tínꞌ coꞌ anzeꞌf nayiꞌ par li huanꞌ mèna conꞌ coꞌ nac cheꞌn mbiꞌa cheleꞌ mèn neꞌtyente mbiꞌ par ner quedóꞌ mèn mbiꞌ? Cheleꞌ mèn ante tataa gác li loo mbiꞌ, leꞌ sya, nzoqueꞌ mod li huanꞌ mèna cheꞌn mbiꞌ coꞌ ndxàp mbiꞌ.
\p
\v 30 Mèn coꞌ indaꞌde lad chenen, mèna nac ngolo ngolaꞌs loon. Lomisqueꞌ ne, mèn coꞌ inqueltàa node daa par lyath no mèn daa par gon taamas mèn loo cón cheꞌn Diox, ale ndxeꞌlequeꞌ, leꞌleꞌ ndli mèna ndryo xàꞌ taamas mèn loo cón cheꞌn Diox.
\p
\v 31 Cona, ngue niin loo guꞌ: Nzoqueꞌ mod tyonꞌ rye xtol mèn no xquin mèn coꞌ mcuaꞌn mèn. No nzoqueꞌ mod tyonꞌ rye diꞌs coꞌ ñii yèe ñii tìi mèn cón cheꞌn Diox. Per cheleꞌ chol mèn ñii yèe ñii tìi cón cheꞌn Xpii Natúꞌ, mèna, por derech, thidtenequeꞌ neꞌtyonꞌte xtol no xquin.
\v 32 Chol mèn coꞌ ñii yèe ñii tìi cón chenen, daa coꞌ mbal yáal loo izlyoꞌ xalqueꞌ ndxáal chol mèn, nzoqueꞌ mod tyonꞌ xtol no xquin mèna cheleꞌ mèna ñaꞌba loo Diox tonꞌ Diox xtol mèna. Per cheleꞌ chol mèn ñii yèe ñii tìi cón cheꞌn Xpii Natúꞌ, mèna, por derech, thidtenequeꞌ neꞌtyonꞌte xtol no xquin mèn, que naca naban mèn loo izlyoꞌ ndxèꞌ, que naca yòo ban mèn tedib izlyoꞌ coꞌ cue yiloa.
\s Trèꞌ ndluꞌ cón cheꞌn chop ned mèn. Mèna nac xal thìb yaa xlè ndac coꞌ ndaꞌ xlè huen no xal thìb yaa xlè yeꞌrsinꞌ coꞌ ndaꞌ xlè yeꞌrsinꞌ.
\r (Lc. 6.43–45)
\p
\v 33 Angab naꞌi, cheleꞌ guꞌ too thìb xanꞌ yaa xlè coꞌ taꞌ xlè ndac, yaa xlèa taꞌ xlè ndac. No cheleꞌ guꞌ too thìb xanꞌ yaa xlè yeꞌrsinꞌ, yaa xlèa taꞌ xlè yeꞌrsinꞌ. Sya, mèn libeꞌ no taꞌ mèn cuent cón cheꞌn yaa xlèa por thìb loo thìb loo xlè coꞌ ndaꞌ yaa xlèa. Tataa ndxàc beꞌ mèn, ne.
\v 34 ¡Aa mèn yeꞌrsinꞌ coꞌ nac xal mbelꞌ coꞌ lèe huid! ¿Xá mod gác guꞌ tyoodiꞌs guꞌ conꞌ ndac coꞌseꞌ angcual nac guꞌ mèn yeꞌrsinꞌ, àꞌ? Yende mod tyoodiꞌs guꞌ conꞌ ndac. Tac diꞌs coꞌ alithe ndyoodiꞌs chol mèn, diꞌsa nac diꞌs coꞌ alithe ndyeꞌth xtùuz mèn coꞌ ndyroꞌ ndlyenꞌ lezoꞌ mèn par tyoodiꞌs mèn.
\p
\v 35 Tolo ndxab Jesús loo mèna:
\p ―Nde niin tedib conꞌ loo guꞌ: Mèn coꞌ nac mèn ndac, mèna ndxòo lezoꞌ ndyoodiꞌs conꞌ ndac. Tac conꞌ ndac coꞌ ndyoodiꞌs mèna nac diꞌs coꞌ ndryoꞌ leꞌn lezoꞌ mèna. Leꞌ mèn coꞌ nac mèn yeꞌrsinꞌ na, mèna ndxòo lezoꞌ ndyoodiꞌs conꞌ yeꞌrsinꞌ. Tac conꞌ yeꞌrsinꞌ coꞌ ndyoodiꞌs mèna, lomisqueꞌ, ndryoꞌ leꞌn lezoꞌ mèna.
\v 36 Más de cona, niin loo guꞌ: Ryete diꞌs coꞌ alithe ndyoodiꞌs mèn, cón cheꞌn leque diꞌsa taꞌ mèn cuent loo Diox coꞌseꞌ gàc huiz coꞌ tub rez Diox cón cheꞌn mèn loo mèn.
\v 37 Tac leque diꞌs coꞌ tyoodiꞌs guꞌ no coꞌ taꞌ guꞌ cuent huiza, leque diꞌsa co xoꞌf guꞌ par ñeeneꞌ chó mèn nac guꞌ, ¿chéꞌ nac guꞌ mèn ndac no mèn nalì o chéꞌ nac guꞌ mèn coꞌ ncuaꞌn xquin no xtol par thidtene quexùꞌ Diox guꞌ no tetìi Diox guꞌ?
\s Mèn yeꞌrsinꞌ ñaꞌb loo Jesús li Jesús thìb señ coꞌ huiꞌ mèn loo coꞌ gàc thìb yalguzyeꞌ.
\r (Mr.8.12; Lc. 11.29–32)
\p
\v 38 Sya, plá mèn xleyꞌ farise no plá mèn coꞌ ndluꞌ cón cheꞌn ley coꞌ mxoꞌf Moisés loo mèn, ndxab mèna loo Jesús:
\p ―Maistr, nuꞌ ndlyaꞌs ñèe leꞌ lùu li thìb conꞌ coꞌ gàc thìb yalguzyeꞌ loo nuꞌ.
\p
\v 39 Jesús mcàb loo mèna. Ndxab Jesús:
\p ―¿Mèn coꞌ ngolo ngolux ñibeꞌ loon par lin thìb conꞌ coꞌ nac yalguzyeꞌ, càꞌ? Yende xàa. Ya yende chó más yalguzyeꞌ gàc loo mèn baꞌ. Ndxeꞌlequeꞌ, thìb señ coꞌ huiꞌ mèn baꞌ gàc loo mèn xal señ coꞌ ngòc loo Jonás coꞌ mdeꞌth diꞌs coꞌ ndxab Diox póla.
\v 40 Tac texal ngo Jonás leꞌn xtiꞌ thìb mbèel roo, coꞌ mtoxcuaꞌ Diox, leꞌn son huiz no leꞌn son yálꞌ, tataa daa ne, daa coꞌ mbal yáal loo izlyoꞌ xalqueꞌ ndxáal chol mèn, daa go leꞌn báꞌ leꞌn son huiz no leꞌn son yálꞌ.
\v 41 Tolo niin loo guꞌ: Mèn ciuda Nínive coꞌ ngure ban póla ryoꞌ too loo mèn, coꞌseꞌ gàc huiz coꞌ tub rez Diox cón cheꞌn ryethe mèn coꞌ nzi ban tiemp ndxèꞌ, par quexùꞌ mèn ciuda Nínive mèn coꞌ nzi ban tiemp ndxèꞌ. Tac mèn ciuda Nínive ngulàa yéc no ngulàa lezoꞌ loo xtol mèn no loo xquin mèn no mzyeꞌ mod coꞌ ngòp mèna coꞌseꞌ mdeꞌth Jonás no mblo Jonás yalbàn cón cheꞌn diꞌs ndac cheꞌnpeꞌ Diox loo mèna. No nalleꞌ na nii loo guꞌ: Trèꞌ nzo thìb mbiꞌ loo guꞌ, coꞌ nac daa, coꞌ nac más mbiꞌ roo mbiꞌ xèn leque Jonás.
\v 42 Lomisqueꞌ ne, thìb xaꞌgot coꞌ ngòc rein loo nación coꞌ ngure par ned sur tiempa, xaꞌgota, ne, ryoꞌ too loo mèn coꞌseꞌ gàc huiz coꞌ tub rez Diox cón cheꞌn mèn coꞌ nziriꞌ tiemp ndxèꞌ par tolo quexùꞌ xaꞌgota mèn coꞌ nziriꞌ tiemp ndxèꞌ loo Diox. Tac xaꞌgota ngroꞌ làaz xaꞌ coꞌ ngureriꞌ tedib lad ro izlyoꞌ coꞌteꞌ ngòc más tith tiempa par mbiꞌth yòn xaꞌgota diꞌs coꞌ ngòc diꞌs coꞌ ngóc Salomón coꞌ ngòc rey tiempa. No nalleꞌ na nii loo guꞌ: Trèꞌ nzo thìb mbiꞌ, coꞌ nac daa, coꞌ nac más mbiꞌ roo mbiꞌ xèn leque Salomón.
\s Trèꞌ ndluꞌ cón cheꞌn thìb xpii yeꞌrsinꞌ coꞌ mbere, mzin loo mbiꞌ coꞌteꞌ ngro xpii yeꞌrsinꞌ.
\r (Lc. 11.24–26)
\p
\v 43 Niin tedib conꞌ loo guꞌ, ne: Coꞌseꞌ ndryoꞌ thìb xpii yeꞌrsinꞌ loo thìb mèn, xpiia ngroꞌ. No nda que tee xpiia coꞌteꞌ nagán par cuaꞌn xpii coꞌteꞌ yòo xpii par li xpii descans. Per coꞌseꞌ ñee xpii yende pá yòo xpii, ndli xpii xtùuz.
\v 44 No mbez xpii loo lezoꞌ xpii: ¿Cón lin? Capas daa, beren, ndyàan loo mbiꞌ coꞌteꞌ ngroꞌena. Per coꞌseꞌ mbere xpiia, ndyeꞌth xpii loo mbiꞌ, ñèe xpii mbiꞌa xal thìb liz mèn coꞌ nítlequeꞌ mblyoꞌf no coꞌ mblyath no coꞌ nabeꞌste ñaa.
\v 45 Sya, bere xpiia, ya xpiia, ya xi xpii taagaz xpii coꞌ nac más xpii yeꞌrsinꞌ leque xpiia. Sya, yòo rye xpiia loo prob mbiꞌa. Leꞌ sya, por lult más nazab tyen mbii mbiꞌa no quée mbii loo mbiꞌa leque coꞌseꞌ ner vez ngòo xpii loo mbiꞌa. Tataa gàca loo mèn coꞌ nac bin yeꞌrsinꞌ coꞌ nziriꞌ tiemp ndxèꞌ.
\s Xnaꞌ Jesús, no myenꞌ huespeꞌ Jesús, ngua toodiꞌs no Jesús.
\r (Mr. 3.31–35; Lc. 8.19–21)
\p
\v 46 Jesús tatabeꞌ ndoo toodiꞌs loo mèn coꞌ nziriꞌ loo Jesús coꞌseꞌ mzin xnaꞌ Jesús no myenꞌ huespeꞌ Jesús gax coꞌteꞌ ngo Jesús. Neꞌngòode xaꞌ. Par fuer no maste ngure xaꞌ. Mblyaꞌs xaꞌ toodiꞌs no xaꞌ Jesús.
\v 47 Sya, thìb xaꞌ coꞌ ndoo xìꞌtha xexte ndxab loo Jesús:
\p ―Xnaꞌ Uꞌ no myenꞌ huespeꞌ Uꞌ nzi fuer baꞌ. No ndlyaꞌs xaꞌ tyoodiꞌs no xaꞌ Uꞌ, Tad.
\p
\v 48 Per ndxeꞌlequeꞌ, Jesús mcàb loo xaꞌ coꞌ mbli avis loo Jesús. Ndxab Jesús:
\p ―¿Chéꞌ ndlyaꞌsl niin lool chó mèn, lìcqueꞌ, nac xal xnan no chó mèn, lìcqueꞌ, nac xal huesen, càꞌ? Na nii lool chó nac xal xnan no chó nac xal huesen.
\p
\v 49 Sya, mbluꞌ Jesús myenꞌ xinꞌ mtéꞌth Jesús loo xaꞌa no loo mèn coꞌ nziriꞌa. Ndxab Jesús:
\p ―Myenꞌ baꞌ nac xal xnan no myenꞌ baꞌ nac xal huespeꞌen, ne, ey.
\v 50 Tac chol mèn coꞌ ndli xal nee lezoꞌ xuden Diox coꞌ nzo loo béꞌ no xal ndlyaꞌs xuden Diox, mèna nac xal huesen. Mèna nac xal ftanen. No nac mèna xal xnan.
\c 13
\s Jesús mtetac diꞌs loo mèn xal ndxàca loo thìb mbiꞌ coꞌseꞌ ngo mbiꞌ bin.
\r (Mr. 4.1–9; Lc. 8.4–8)
\p
\v 1 Leque huiza ngroꞌ Jesús liz thìb mbiꞌ coꞌteꞌ ngo Jesús. Ngua tub Jesús ro thìb lagun coꞌ nziriꞌ tya.
\v 2 Huiza, anzeꞌf thìb mèn mqueltàa coꞌteꞌ mdub Jesús. Sya, ngo too Jesús. Ngua tub Jesús leꞌn thìb yòoyaa loo lagun. Leꞌ mèna na, ngure loo yux ro lagun loo Jesús.
\v 3 Sya, mtlo Jesús. Alithe mtetac Jesús huax conꞌ loo mèna. Ndxab Jesús loo mèna:
\p ―Nde niin thìb conꞌ loo guꞌ: Ngo thìb mbiꞌ coꞌ ngo bin.
\v 4 Mbiꞌ ngroꞌ, ngua lo mbiꞌ bin. Láth nge go mbiꞌ bina, ngulàa ndxep bin ro ned. Ngoloa, mbiꞌth mbin béꞌ. Mbloꞌ mbin biz bina loo yòo. Nduhua mbin biz bina.
\v 5 Leꞌ taandxep biz bina na, ngulàa loo yòo quèe coꞌteꞌ xite yòo nziꞌf loo quèe. Setilte ngulen biz bina tac inachaꞌde nziꞌf yòo loo quèea.
\v 6 Per coꞌseꞌ mtlo mdín bée biz bina, ale mtec msoꞌ bée biz bina tac yende arid xcop loo yòo coꞌteꞌ ngulen biz bina tac yende pá ned xonꞌ no lyàa lox biz bina. Ale mbiiz bina.
\v 7 Leꞌ taandxep biz bina na, ngulàa leꞌn huan. No más mbryoo mxyèn huan leque biz bina. Ale mblyus biz bina nzo biz bina leꞌn huan.
\v 8 Leꞌ taandxep biz bina na, ngulàa loo yòo beꞌf. Biz bina mdaꞌ thìb cosech ndac. Chó biz bina mdaꞌ thìb ayo nzob. Chó biz bina mdaꞌ ayon nzob. Chó biz bina mdaꞌ gal psiꞌ nzob tac huenqueꞌ ngòc cosech cheꞌn biz bina loo yòoa.
\v 9 Cheleꞌ guꞌ ndenꞌ cón nee diꞌs ndxèꞌ, ftaꞌ guꞌ lugar yaaꞌd diꞌs ndxèꞌ leꞌn lezoꞌ guꞌ. No ftaꞌ guꞌ cuent cón nee diꞌs diꞌs coꞌ ngue niin loo guꞌ ndxèꞌ.
\s Trèꞌ ndluꞌ cón mbli mtetac Jesús diꞌs loo mèn.
\r (Mr. 4.10–12; Lc. 8.9–10)
\p
\v 10 Sya, mbii gax myenꞌ xinꞌ mtéꞌth Jesús loo Jesús. Ndxab myenꞌ loo Jesús:
\p ―Tad, ¿chonon tatuaꞌ ndyoodiꞌs Uꞌ loo mèn baꞌ con diꞌs coꞌ alithe mtetac Uꞌ baꞌ, àꞌ?
\p
\v 11 Jesús mcàb loo myenꞌ xinꞌ mtéꞌth Jesús. Ndxab Jesús loo myenꞌ:
\p ―Loo mèna, tataa mdyoodizen tac mèna indxaaꞌdte diꞌs. Neꞌ neꞌ gác mèna taꞌ mèna cuent cón cheꞌn diꞌs coꞌ ndluꞌen loo mèn. Per part cón cheꞌn guꞌ, Diox ngue li leꞌ guꞌ ndaꞌ cuent cón cheꞌn mod coꞌ beꞌ nacasloo xá mod ndlyaꞌs Diox ñibeꞌpeꞌ Diox loo mèn, Diox coꞌ ndub loo béꞌ.
\v 12 Lomisqueꞌ ne, mèn coꞌ ngue no conꞌ, tolo que no mèna más conꞌ axtaqueꞌ que no mèna huax conꞌ. Per ndxeꞌlequeꞌ, mèn coꞌ ingue node conꞌ, ale tyuhuan mèna ndxepte conꞌ ngue no mèna. Conꞌa nee diꞌs, tolo gòn mèn no tolo taꞌ mèna cuent cón cheꞌn conꞌ coꞌ nac cón cheꞌn Diox. Per mèn coꞌ indxaaꞌdte diꞌs no coꞌ indaꞌde cuent cón cheꞌn Diox no mèn coꞌ indyalte tolo gòn cón cheꞌn Diox, loo mèna Diox li tolo yauꞌ xtùuz mèna no tolo yauꞌ lezoꞌ mèna loo cón cheꞌn Diox.
\v 13 Cona, ndyoodizen loo mèna con diꞌs coꞌ alithe ntetaquen tac mèna ngue li cuent ngue huiꞌ ndac mèna no ndxòn ndac mèna loo cón chenen. No ndli mèna cuent ndxòn ndac mèna diꞌs coꞌ ndluꞌ cón chenen. Per ndxeꞌlequeꞌ, nac mèna xal mèn coꞌ neꞌñeede cón ngue huiꞌ mèna loo cón chenen. Lomisqueꞌ, nac mèna xal mèn coꞌ indaꞌ ndacte cuent cón chenen. Ndxàca tataa loo mèna tac indxaaꞌdte diꞌs coꞌ ndyoodizen yéc mèn. Neꞌ neꞌ indaꞌ mèna cuent cón ngue lin.
\v 14 No nalleꞌ ndxàcqueꞌ conꞌ loo mèna xal nac diꞌs coꞌ ndxab Sayi coꞌ mdeꞌth diꞌs coꞌ ndxab Diox. Ndxab Sayi:
\pi1 Lìcpeꞌ baꞌi, mèn gòn diꞌs coꞌ tyoodizen. Per neꞌyaaꞌdte mèna diꞌsa. Lìcpeꞌ baꞌi, mèn huiꞌ loo conꞌ lin. Per neꞌtaꞌde mèn cuent cón ngue lin.
\v 15 Tac lezoꞌ mèna no xtùuz mèna ngòc naad no ngòc nguud. Anzeꞌf nazab ndxòn mèna diꞌs no ndenꞌ mèna diꞌs coꞌ ndyoodizen. Loo cón cheꞌn Diox nac mèna xal mèn sieu. No nac mèna xal mèn coꞌ nathath ngüiꞌ loo cón cheꞌn Diox. Ale ryethe conꞌa ndxàc loo mèna par neꞌtaꞌde mèna cuent no par neꞌgònte mèna cón cheꞌn Diox neꞌ neꞌ yaaꞌd diꞌsa leꞌn xtùuz mèna no leꞌn lezoꞌ mèna. Rye conꞌa ncàb loo mèna par neꞌtyalte mèna lyàa yéc mèna no lyàa lezoꞌ mèna. Neꞌ neꞌ tyal mèna par zyeꞌ mod coꞌ ndxàp mèna par teláꞌen mèna loo conꞌ ryes.
\m Cona, tataa ndxàca loo mèna xal gunii Sayi cón cheꞌn mèna póla.
\p
\v 16 Huen nda guꞌ, ey, tac guꞌ ngüiꞌqueꞌ no ndxònqueꞌ guꞌ coꞌ huen huen cón cheꞌn Diox. No ndxaaꞌdqueꞌ guꞌ diꞌs coꞌ ngue niin loo guꞌ leꞌn xtùuz guꞌ no leꞌn lezoꞌ guꞌ.
\v 17 Lìcpeꞌ baꞌi, na nii loo guꞌ:
\p ―Huax mèn coꞌ ngo póla, mèn coꞌ ngòc mèn coꞌ mdeꞌth diꞌs coꞌ ndxab Diox no taamas mèn coꞌ ngòc mèn ndac, anzeꞌf mblyaꞌs mèna ngüiꞌ mèna loo conꞌ coꞌ ngüiꞌ guꞌ nalleꞌ. Per neꞌngàcte gan ngüiꞌ mèna conꞌ ndxèꞌ. Lomisqueꞌ ne, mblyaꞌs mèna ngòn mèna cón cheꞌn conꞌ coꞌ ndxòn guꞌ nalleꞌ. Per neꞌngàcte gan ngòn mèna cón cheꞌn conꞌ coꞌ ndxòn guꞌ nalleꞌ.
\s Jesús ngue go xoꞌf loo mèn cón nee diꞌs coꞌ mtetac Jesús loo mèn.
\r (Mr. 4.13–20; Lc. 8.11–15)
\p
\v 18 Bìn guꞌ diꞌs coꞌ tan cuent loo guꞌ nalleꞌ coꞌ alithe mtetaquen loo guꞌa, coꞌ nee diꞌs, cón cheꞌn thìb mbiꞌ coꞌ mblo biz bina.
\v 19 Diꞌs coꞌ guniin loo guꞌa nac conꞌ ndxèꞌ: Mèn coꞌ ndxòn diꞌs coꞌ nac diꞌs ndac cheꞌn Diox coꞌ ndluꞌ xá mod ndlyaꞌs Diox ñibeꞌpeꞌ Diox loo mèn, no indxaaꞌdte diꞌsa leꞌn lezoꞌ mèna, neꞌ neꞌ indaꞌ mèn cuent cón cheꞌn diꞌsa, mèna nac xal biz bin coꞌ ngulàa ro ned. Tac coꞌseꞌ ndxiꞌth Mebizya loo mèna, ndli Mebizya loo mèna par neꞌtenꞌte mèna no par setilte yathlaꞌs mèna cón cheꞌn diꞌs ndac coꞌ mbìn mèna no coꞌ ngulàa leꞌn xtùuz mèna no coꞌ ngulàa leꞌn lezoꞌ mèna.
\v 20 Leꞌ biz bin coꞌ ngulàa loo yòo quèea na, nac xal mèn coꞌ ndxòn cón cheꞌn diꞌs ndaca. No coꞌseꞌ ndxòn mèna cón cheꞌn diꞌs ndaca, ndyac tínꞌ lezoꞌ mèn ndxòn mèn cón cheꞌn diꞌsa.
\v 21 Per yiloa pláte huiz ndxàc ndxòn mèna cón cheꞌn diꞌs ndaca, ndxàca loo mèn xal biz bin coꞌ ngulàa loo yòo quèea. Biz bina neꞌngxecte por yende coꞌteꞌ lyàa lox biz bina no yende pá xonꞌ lox biz bina. Tac coꞌseꞌ ndxàc ngòc nguàal conꞌ loo mèna no coꞌseꞌ ndyub nguꞌs mèn prob mèna por cón cheꞌn diꞌs ndac, leꞌ sya, xexte ndláꞌ mèna. Ya indlyaꞌste mèna tolo gòn mèna cón cheꞌn diꞌs ndac cheꞌn Diox tac ngo tac lezoꞌ mèna loo conꞌa.
\v 22 Leꞌ biz bin coꞌ ngulàa leꞌn huana na, ndluꞌ loo naꞌ cón cheꞌn mèn coꞌ ndxòn cón cheꞌn diꞌs ndac. Per mèna más nde yath ñèe yalgonꞌ coꞌ nthop mèn loo izlyoꞌ ndxèꞌ. Leꞌ sya, yalgonꞌ coꞌ ndxàp mèn loo izlyoꞌ ndxèꞌ, por yalgonꞌa leque mèna nquedìi mèna par ndxauꞌ yéc mèn no ndxauꞌ lezoꞌ mèn loo cón cheꞌn Diox. Por cona, incàb ndacte nec thìb conꞌ ndac loo mèna loo cón cheꞌn Diox.
\v 23 Leꞌ biz bin coꞌ ngulàa loo yòo beꞌfa na, ndluꞌ loo naꞌ cón cheꞌn mèn coꞌ ndxaaꞌd cón cheꞌn diꞌs ndac coꞌ ngulàa leꞌn xtùuz mèn no leꞌn lezoꞌ mèn. Leꞌ sya, mèna ndli par ndxòn taamas mèn cón cheꞌn diꞌs ndac no par yòo taamas mèn loo cón cheꞌn Diox. Tataa mod nac mèna xal biz bin coꞌ ndaꞌ thìb cosech ndac, coꞌ nee diꞌs, chó biz bin ndaꞌ thìb ayo xlè. Chó biz bin ndaꞌ ayon xlè. Chó biz bin ndaꞌ gal psiꞌ xlè.
\s Jesús ngue tetac cón cheꞌn ñaꞌ triu huan coꞌ ngulen leꞌn ñaꞌ triu.
\p
\v 24 Jesús ndxab loo mèna:
\p ―Nde tetaquen tedib conꞌ loo guꞌ: Conꞌ coꞌ ndxàc par ñibeꞌpeꞌ Diox loo mèn nac xal nac diꞌs coꞌ nde niin loo guꞌ ndxèꞌ. Thìb mbiꞌ ngroꞌ, ngua lo mbiꞌ biz bin coꞌ nac nzob bin triu ndac loo xyòn mbiꞌ.
\v 25 Per coꞌseꞌ ryete mèn guliz mbiꞌ coꞌ ngòc xuanꞌ yòoa mxen mcalꞌ, ngòo tedib mbiꞌ coꞌ ngòc ngolo ngolaꞌs mbiꞌa loo xyòn mbiꞌa. Ngua lobii mbiꞌ biz nzob bin triu huan coꞌ ñaa xalqueꞌ ñaa nzob bin triua loo xyòn mbiꞌ. Ngoloa, ndyàa mbiꞌ coꞌ ngòc ngolo ngolaꞌs mbiꞌa.
\v 26 Per coꞌseꞌ ngulen nzob bin triua, no mbryoo mxyèna, no mtlo ngos bacdò ñaꞌ triua, axta syareꞌ, thidte gunaa ñaꞌ triua con biz huan coꞌ ngua lobii mbiꞌa loo xyòn tedib mbiꞌa.
\v 27 Sya, ngua nee moza loo mbiꞌ coꞌ ngòc patrón moz. Ndxab moz loo mbiꞌ:
\p ―Tad, cheleꞌ Uꞌ ngua lo ante nzob bin triu ndac loo xyòn Uꞌ, ¿pá ned ngroꞌ biz huan coꞌ ñaa xal ñaa triu leꞌn ñaꞌ sya, Tad? ¿Xá mod ngulen biz bina leꞌn ñaꞌ, ne, Tad?
\v 28 Patrón mcàb loo moz. Ndxab patrón:
\p ―Nzo chó mbiꞌ coꞌ ndxecloo ñèe daa ngua li conꞌa loo xyònen.
\p Sya, mnibdiꞌs moz loo patrón. Ndxab moz:
\p ―¿Chéꞌ ndlyaꞌs Uꞌ ya quib nuꞌ huan coꞌ ñaa xal ñaa ñaꞌ, càꞌ?
\p
\v 29 Per patrón ndxab loo moza:
\p ―Aaꞌa. Laꞌ tee nzoꞌfa. Neꞌya quibtel huana leꞌn ñaꞌ. Tac cheleꞌ lùu quib huana, nzo ryes quib lùu ñaꞌ, ne.
\v 30 Laꞌa thidte ryoo triu huana con ñaꞌ triu más huen axta coꞌseꞌ gàc tiemp lyáp ñaꞌ. Sya, por derech, telꞌen moz coꞌ ya li zinꞌ par quib moz huan yeꞌrsinꞌa no, yiloa, tedóꞌ moz huana por manoj par tec moz huana loo quìi. Leꞌ nzob triu ndaca na, cosuaꞌ moz leꞌn sac coꞌseꞌ yilo láp moz triu ndaca.
\s Jesús ngue tetac loo mèn cón cheꞌn xal nac biz mostaz.
\r (Mr. 4.30–32; Lc. 13.18–19)
\p
\v 31 Mtetac Jesús tedib diꞌs loo mèn. Ndxab Jesús:
\p ―Nde niin tedib conꞌ loo guꞌ: Mod coꞌ tlo queltàa mèn coꞌ tyal par tlo Diox, ñibeꞌpeꞌ Diox loo mèn nac xal thìb biz bin bix cheꞌn mostaz coꞌ mblo thìb mbiꞌ bin loo xyòn mbiꞌ.
\v 32 No, lìcpeꞌ baꞌi, biz bin mostaza nac thìb biz bin más bix loo rye loothe biz bin coꞌ nzo. Per coꞌseꞌ ndlyen biz bin mostaza no ndryooi, ndxàca thìb xanꞌ huan coꞌ más ndryoo no nxyèn leꞌn ñaꞌ mèn. No ndxàca casqueꞌ xal thìb xanꞌ yaa coꞌteꞌ ndlyàa mbin béꞌ par ntoxcuaꞌ mbin xyòn mbin loo ram yaaa.
\s Jesús ngue tetac loo mèn cón cheꞌn xá mod nac dii levadur.
\r (Lr. 13.20–21)
\p
\v 33 Diox coꞌ ngue tlo ñibeꞌ loo mèn, nerlequeꞌ mtlo Diox, ñibeꞌ Diox loo nagabte mèn no más. No xèegà xèegà tolo yarꞌ mèn coꞌ ngue ñibeꞌ Diox loo axta nzoqueꞌ mèn dib athu loo izlyoꞌ, mèn coꞌ ñibeꞌ Diox loo. Cón cheꞌn mèna nac xal ndxep dii levadur coꞌ ndyen thìb xaꞌgot par ncos xaꞌ diia con son kil harin. No con leꞌ laate diia tyub bes son kil harina.
\s Jesús ndyoodiꞌs loo mèn coꞌ nac antub diꞌs coꞌ mtetac Jesús loo mèn.
\r (Mr. 4.33–34)
\p
\v 34 Ryete conꞌa mdoodiꞌs no Jesús mèn coꞌ mqueltàa loo Jesús coꞌ ngòc diꞌs coꞌ mtetac Jesús loo mèn. Asembli Jesús ante mtetac Jesús diꞌs loo mèn.
\v 35 Tataa ngòc coꞌ mbli Jesús par ngòcqueꞌ, no mdyaaqueꞌ, no mdubqueꞌ diꞌs coꞌ gunii thìb mbiꞌ coꞌ mdeꞌth diꞌs coꞌ ndxab Diox, coꞌseꞌ mqueꞌ mbiꞌa yeꞌs loo thìb libr, diꞌs coꞌ mbez:
\pi1 Daa tyoodiz con mèn ante con diꞌs coꞌ tetaquen loo mèn. Daa tyoodiz no mèn no tan cuent loo mèn cón cheꞌn conꞌ coꞌ nacasloo axta coꞌseꞌ mbli Diox ngure izlyoꞌ no mblec Diox izlyoꞌ no axta nalleꞌ.
\s Jesús ngue go xoꞌf no ngue taꞌ Jesús cuent cón cheꞌn triu huan coꞌ ngulen làth nzob triu.
\p
\v 36 Ngolo gunii Jesús Diox loo mèn coꞌ mqueltàa loo Jesús ro laguna, mbii Jesús tya. Ngòo Jesús liz thìb mbiꞌ coꞌ ndub gaxte tya. Liz mbiꞌa mqueltàa ryete myenꞌ xinꞌ mtéꞌth Jesús loo Jesús. Ndxab myenꞌ loo Jesús:
\p ―Tad, blo xoꞌf Uꞌ diꞌs coꞌ mtetac Uꞌ cón cheꞌn huan yeꞌrsinꞌ coꞌ ñaa xal ñaa triu loo nuꞌ coꞌ ngo no coꞌ ngulen loo xyòn mbiꞌa.
\p
\v 37 Jesús mcàb loo myenꞌ xinꞌ mtéꞌth Jesús. Ndxab Jesús loo myenꞌa:
\p ―Xaꞌ coꞌ ngo nzob bin ndac coꞌ nac triu, xaꞌa nac daa, daa coꞌ mbal yáal loo izlyoꞌ xalqueꞌ ndxáal chol mèn.
\v 38 No conꞌ coꞌ nee diꞌs coꞌteꞌ nac xyòn mbiꞌa coꞌteꞌ ngo bina, conꞌa ndluꞌ loo naꞌ nac izlyoꞌ ndxèꞌ. Leꞌ nzob bina na, ndluꞌ loo naꞌ nac mèn coꞌ Diox, lìcqueꞌ, ñibeꞌpeꞌ loo. Leꞌ triu huan yeꞌrsinꞌ coꞌ ngulen leꞌn ñaꞌ triua na, ndluꞌ loo naꞌ nac mèn coꞌ nac cheꞌnpeꞌ Mebizya.
\v 39 Leꞌ xaꞌ coꞌ nac ngolo ngolaꞌs coꞌ mblo bin yeꞌrsinꞌa na, ndluꞌ loo naꞌ nac yub Mebizya. Leꞌ coꞌseꞌ ngolo ngòc cosecha na, conꞌa ndluꞌ coꞌseꞌ lyux no coꞌseꞌ lith no izlyoꞌ ndxèꞌ. Leꞌ mèn coꞌ thop cosecha na, ndluꞌ loo naꞌ nac angl coꞌ yiꞌth thop mèn huen no mèn yeꞌrsinꞌ coꞌseꞌ lith no no lyux izlyoꞌ.
\v 40 Xalqueꞌ mthop moz triu huan yeꞌrsinꞌ coꞌ ñaa xal ñaa ñaꞌa par tec moz huana loo quìi, tataa gàca loo mèn, ne, coꞌseꞌ lith no no lyux izlyoꞌ ndxèꞌ.
\v 41 Daa coꞌ mbal yáal loo izlyoꞌ ndxèꞌ xalqueꞌ ndxáal chol mèn, daa telꞌ angl daa coꞌseꞌ gàc tiempa par yiꞌth thop angl rye mèn yeꞌrsinꞌ coꞌ ndli par ncuaꞌn taamas mèn xtol mèn no chol mèn coꞌ ncuaꞌn xquin no xtol, ne.
\v 42 Co angl rye mèn yeꞌrsinꞌa leꞌn yeꞌrbìil coꞌteꞌ nzo quìi no bèel. Tya, gónꞌ mèna no hua le mèna.
\v 43 Sya, mèn coꞌ mdyal, mèn coꞌ mbli coꞌ mnibeꞌpeꞌ Diox loo mèn, loo mèna quée xnìi xal coꞌseꞌ ndxaꞌx xnìi huiz coꞌseꞌ gàc tiemp coꞌ ñibeꞌpeꞌ Diox xud guꞌ loo ryethe conꞌ. Guꞌ coꞌ ndenꞌ coꞌ nee diꞌs coꞌ ngue niin loo guꞌ ndxèꞌ, ftaꞌ guꞌ lugar yaaꞌd diꞌs ndxèꞌ leꞌn lezoꞌ guꞌ. No golaꞌs guꞌ loo diꞌs coꞌ ngue niin loo guꞌ ndxèꞌ.
\s Jesús ngue tetac loo mèn cón cheꞌn tmi coꞌ nzo yòo.
\p
\v 44 Tolo ndxab Jesús loo mèna: Nde tetaquen tedib conꞌ loo guꞌ: Conꞌ coꞌ ndenꞌ mèn no ndyac lezoꞌ mèn cón cheꞌn Diox, mèn coꞌ tlo yilaꞌs loo Diox tac Diox mdyal yòo mèn loo cón cheꞌn Diox, nac thìb conꞌ ndac tínꞌ xal coꞌseꞌ mzyal thìb mbiꞌ tmi coꞌ nzo casloo loo xyòn thìb xtàa mbiꞌ. Per coꞌseꞌ mzyal mbiꞌ tmi coꞌ nzo casloo loo xyòn xtàa mbiꞌa, ale mbere mbiꞌ, mtauꞌ mbiꞌ loo tmia tya tedib vez. No de tant ndyac lezoꞌ mbiꞌ coꞌseꞌ mzyal mbiꞌ tmi loo xyòn tedib mbiꞌ, ale mbere mbiꞌ, ndyeꞌth mbiꞌ, mthoꞌ mbiꞌ rye conꞌ ndxàp mbiꞌ par tiꞌ mbiꞌ xyòn mèna loo mèn coꞌ nac cheꞌn yòoa.
\s Jesús ngue tetac loo mèn cón cheꞌn perl coꞌ anzeꞌf ntac.
\p
\v 45 Mèn coꞌ ñibeꞌpeꞌ Diox loo nac xal thìb mbiꞌ coꞌ ndyee viaj coꞌ ngue tee cuaꞌn perl coꞌ anzeꞌf náp ntac.
\v 46 Coꞌseꞌ mzyal mbiꞌ perl coꞌ anzeꞌf náp ntac, mbere mbiꞌ, ndyeꞌth mbiꞌ par liz mbiꞌ par thoꞌ mbiꞌ rye conꞌ ndxàp mbiꞌ par ryoꞌ tmi loo conꞌ ndxàp mbiꞌ. Sya, bere mbiꞌ, ya mbiꞌ par tiꞌ mbiꞌ perl coꞌ anzeꞌf ntac. Tataa mod ndenꞌ mèn coꞌ ndyal ñibeꞌpeꞌ Diox loo mèn tac anzeꞌf thìb conꞌ ndac no conꞌ huen ndli Diox loo mèna tataa.
\s Jesús ngue tetac loo mèn xal coꞌseꞌ ndxegaa chop loo mbèel leꞌn yex.
\p
\v 47 Mèn ndeꞌth no ngo mèn yalbàn cón cheꞌn diꞌs ndac xá mod ndlyaꞌs Diox ñibeꞌpeꞌ Diox loo mèn. Huax mèn nqueltàa no mèn coꞌ ngòo loo cón cheꞌn Diox xal ndxàca coꞌseꞌ ngobii mèn thìb yex leꞌn níttóꞌ. No coꞌseꞌ ndlyàa yexa leꞌn níttóꞌ, ndxegaa huax loo mbèel leꞌn yex.
\v 48 No coꞌseꞌ ndxegaa huax loo mbèel leꞌn yex, leꞌ sya, mèn coꞌ ndyen mbèel ngoꞌ yex par ro play. Tya, ndyub mèna par noo noo coꞌ mèna mbèel yeꞌrsinꞌ. No ngobii mèn mbèel yeꞌrsinꞌa thìb lad. Leꞌ mbèel coꞌ nac mbèel huena na, mbèela ngòo mèn leꞌn thìb cardor.
\v 49 Tataaqueꞌ gàca coꞌseꞌ zin huiz no zin ze coꞌseꞌ ñibeꞌ Diox lyux izlyoꞌ no lith no izlyoꞌ. Sya, ryoꞌ angl. No coꞌ xàꞌ angl mèn yeꞌrsinꞌ làth mèn nalì no làth mèn nambìi.
\v 50 Co angl mèn yeꞌrsinꞌa leꞌn yeꞌrbìil coꞌteꞌ ndxetoo bèel no quìi. Tya, gónꞌ mèna no hua le mèna tant nè naca, ndyac mèna.
\s Trèꞌ ndluꞌ Jesús cón cheꞌn thìb mbiꞌ coꞌ mcui conꞌ cub làth conꞌ gox.
\p
\v 51 Sya, mnibdiꞌs Jesús loo myenꞌ xinꞌ mtéꞌth Jesús. Ndxab Jesús loo myenꞌ:
\p ―¿Chéꞌ ndxaaꞌd ryethe diꞌs ndxèꞌ leꞌn quèe yéc guꞌ no leꞌn lezoꞌ guꞌ, àꞌ?
\p Myenꞌ xinꞌ mtéꞌth Jesús ndxab:
\p ―Aa, Tad. Ndxaaꞌdqueꞌ diꞌs baꞌ leꞌn quèe yéc nuꞌ no leꞌn lezoꞌ nuꞌ.
\p
\v 52 Sya, ndxab Jesús loo myenꞌ xinꞌ mtéꞌth Jesús:
\p ―Coꞌseꞌ huen huen mtéꞌth thìb mbiꞌ cón cheꞌn ley coꞌ mxoꞌf Moisés loo mèn no yiloa mtlo mbiꞌ, huen huen mtéth mbiꞌa cón cheꞌn xá mod ñibeꞌpeꞌ Diox loo mèn nalleꞌ, ndxàc loo mbiꞌa xal loo thìb patrón coꞌ ngoꞌ conꞌ cub no conꞌ gox leꞌn cuart coꞌteꞌ ngocsuaꞌ patrona rye conꞌ ndac cheꞌn patrón.
\s Jesús ngòo yèez Nazaret coꞌ nac làaz Jesús.
\r (Mr. 6.1–6; Lc. 4.16–30)
\p
\v 53 Coꞌseꞌ ngolo mdaꞌ Jesús cuent cón nee diꞌs diꞌs coꞌ angmtetac Jesús loo mèn, mbii Jesús tya. Ndyàa Jesús par làaz Jesús.
\v 54 Coꞌseꞌ mzin Jesús làaz Jesús, tya mtlo Jesús, mbluꞌ Jesús mèn coꞌteꞌ ndub sinagog cheꞌn mèn gulàaz Jesús. Leꞌ rye mèn coꞌ mqueltàa leꞌn sinagoga na, ante ngüiꞌ mèna no ante ñaa mèna loo Jesús. No mbez mèna loo xtàa mèna:
\p ―¿Pá ngua téꞌth mbiꞌ baꞌ rye conꞌ coꞌ ndxác mbiꞌ no xá mod susqueꞌ ndxác mbiꞌ baꞌ ndli mbiꞌ yalguzyeꞌ coꞌ ndli mbiꞌ baꞌ, ne?
\v 55 Naꞌ nanee leꞌ mbiꞌ baꞌ nac xganꞌ Chè carpinter. No nac mbiꞌ xganꞌ Mari. Nanee naꞌ leꞌ mbiꞌ baꞌ ndxàc hues Cob, hues Chè, hues Mon, no hues Jud.
\v 56 No myenꞌgot coꞌ nac ftaꞌn mbiꞌ baꞌ nzo ban làth naꞌ trèꞌ. ¿Xá mod susqueꞌ ndxác mbiꞌ baꞌ ndli mbiꞌ ryete yalguzyeꞌ coꞌ ndli mbiꞌ baꞌ? No sate ndluꞌreꞌ mbiꞌ taamas conꞌ ndli mbiꞌ loo mèn, yey.
\v 57 Por xtùuz coꞌ mbli mèna cón cheꞌn Jesús no cón cheꞌn mèn guliz Jesús, ale tataa mod leque mèna mbli par ngo tac lezoꞌ mèna con Jesús. No mdenꞌ mèna ngòc nguàal diꞌs cón cheꞌn Jesús. Sya, ndxab Jesús loo mèna:
\p ―Huax mèn ndli ndyuꞌ thìb mbiꞌ coꞌ ndeꞌth diꞌs coꞌ ndxab Diox. No ndli mèn cas mbiꞌa. Per mèn coꞌ nac mèn gulizpeꞌ mbiꞌa no mèn coꞌ nac mèn gulàazpeꞌ mbiꞌa, ¡pà li mèna cas mbiꞌa!
\p
\v 58 Conꞌa mbli ya neꞌntolode ngli Jesús huax yalguzyeꞌ tya tac mèna neꞌndalte ngalaꞌs cón cheꞌn conꞌ ndli Jesús.
\c 14
\s Trèꞌ ndluꞌ cón cheꞌn xá mod mbeth mèn Juàn Bautist.
\r (Mr. 6.14–29; Lc. 9.7–9)
\p
\v 1 Leque leꞌn huiza mbìn thìb mbiꞌ coꞌ ngroꞌ lèe Herod, coꞌ mnibeꞌ loo mèn coꞌ nac mèn gulàaz cheꞌn mèn galile tiempa, cón cheꞌn Jesús.
\v 2 Sya, ndxab Herod loo mèn coꞌ ngòc moz Herod coꞌ ngo no Herod:
\p ―Peser Juàn Bautist nac mbiꞌa. Thìb descuid pá ngro xban Juàn làth mèn nguth cona ndxàp mbiꞌa conꞌ laꞌs nii mbiꞌ no laꞌs yaꞌ mbiꞌ par ndli mbiꞌ chol yalguzyeꞌ.
\p
\v 3 Tataa ndxab Herod loo mèn coꞌ nqueltàa no Herod. Tac Herod neequeꞌ leꞌ Herod mnibeꞌ loo solndad ya tedóꞌ solndad nii Juàn Bautist con thìb caden leꞌn leziꞌf ante por cón cheꞌn thìb xaꞌgot coꞌ ngroꞌ lèe Herodi coꞌ ngòc saꞌl Lip, hues Herod.
\v 4 Tataa mnibeꞌ Herod ngòc loo Juàn Bautist tac de yalquìite ndxab Juàn loo Herod indxàalte que no Herod xaꞌgot Lip xal xaꞌgotpeꞌ Herod.
\p
\v 5 Leque hora ngulàa xyàn lezoꞌ Herod. Mblyaꞌs Herod ngnibeꞌ Herod loo solndad par ya yuth solndad Juàn. Per Herod mzyeb gunèe Herod mèn coꞌ nziriꞌ huiza. Tac ryete mèna mbli xtùuz cón cheꞌn Juàn no mbez mèna loo xtàa mèn leꞌ Juàn ante ndyoodiꞌs cón cheꞌn Diox.
\v 6 Per huiz coꞌseꞌ mbli Herod thìb lni coꞌ ngòc huiz coꞌ ngóol lèe Herod, sya, thìb mzaꞌ coꞌ nac rsap Herodia, asembli mzaꞌ. Ngroꞌ mzaꞌ. Mbilꞌ nii mzaꞌ loo Herod no loo mèn coꞌ nziriꞌ no Herod, mèn coꞌ mbli Herod convid. No anzeꞌf thìb gust mdaꞌ lezoꞌ Herod gunèe Herod mod coꞌ mbilꞌ nii mzaꞌ.
\v 7 Ale mdeꞌth Herod Diox loo mzaꞌ no loo rye mèn coꞌ nziriꞌ no Herod. Ndxab Herod loo mzaꞌ leꞌ Herod li ryethe conꞌ ndlyaꞌs mzaꞌ o taꞌ Herod ryethe conꞌ ndlyaꞌs mzaꞌ par càa mzaꞌ.
\v 8 Leꞌ xnaꞌ mzaꞌ na, ndooleꞌ mquilꞌ mzaꞌ. Ndxab xnaꞌ mzaꞌ loo mzaꞌ:
\p ―Guuz loo rey Herod taꞌ rey yéc Juàn Bautist càal loo thìb plat.
\p Leꞌ sya, coꞌseꞌ mbere mzaꞌ, ndyeꞌth mzaꞌ, ndxab mzaꞌ loo rey Herod:
\p ―Rey, daa ndlyaz taꞌ Uꞌ yéc Juàn Bautist càan loo thìb plat nalleꞌ.
\p
\v 9 Coꞌseꞌ mbìn Herod tataa ndxab mzaꞌ loo Herod, anzeꞌf mxi lezoꞌ Herod por conꞌ li Herod. Per com leꞌ Herod mdeꞌth lèe Diox, ¿léꞌ?, no ngroꞌleꞌ diꞌs ro Herod loo ryete mèn coꞌ nziriꞌ con Herod, mèn coꞌ mbli Herod convid, leꞌ Herod li conꞌ ndlyaꞌs mzaꞌ, ¿léꞌ?, mnibeꞌ Herod ya xi solndad yéc Juàn Bautist loo thìb plat par càa mzaꞌ.
\v 10 Sya, que nzo neꞌ ñee lezoꞌ Herod, mtelꞌ Herod solndad par ngua choꞌ solndad yéc Juàn leꞌn leziꞌf.
\v 11 Ngoloa, ndyeꞌth no solndad yéc prob Juàn loo thìb plat. Mdaꞌ solndad yéc Juàn loo thìb plat mcàa mzaꞌ. Leꞌ mzaꞌ na, xexte ngroꞌ. Ngua taꞌ mzaꞌ plat con yéc Juàn loo xnaꞌ mzaꞌ.
\p
\v 12 Ngolo mbeth solndad Juàn, mzin myenꞌ xinꞌ mtéꞌth thebol Juàn Bautist. Ngua loꞌ myenꞌ thebol Juàn leziꞌf. Ngua caꞌs myenꞌ thebol Juàn. Ngoloa, ngua taꞌ myenꞌ cuent loo Jesús cón ngòc loo Juàn Bautist.
\s Jesús mbli par nduhua gaꞌy mil ante mènbiꞌ.
\r (Mr. 6.30–44; Lc. 9.10–17; Jn. 6.1–14)
\p
\v 13 Coꞌseꞌ mbìn Jesús conꞌ ngòc loo Juàn, mbii Jesús tya. Ngòo thidte Jesús leꞌn thìb yòoyaa con myenꞌ xinꞌ mtéꞌth Jesús par ya Jesús xàꞌleꞌ tedib lugar. Per mèn coꞌ ngure no Jesús tya mbìn leꞌ Jesús ndaleꞌ loo nít loo lagun. Sya, ngroꞌ tee rye mèn coꞌ nzo ban par neda angnzo ro lagun. Nda nque mèna xís Jesús.
\v 14 Texal ngroꞌ Jesús leꞌn yòoyaa, ñèe Jesús nziriꞌleꞌ huax mèn loo Jesús. Nalyat ngòc lezoꞌ Jesús gunèe Jesús mèna. Mblyat lezoꞌ Jesús gunèe Jesús mèna. Mteyac Jesús rye mèn yíiz coꞌ nde no mèna loo Jesús.
\v 15 Coꞌseꞌ ñèe myenꞌ xinꞌ mtéꞌth Jesús nde zèleꞌ izlyoꞌ huiza, ngua myenꞌ loo Jesús. Ndxab myenꞌ loo Jesús:
\p ―Mzyèleꞌ izlyoꞌ, Tad. Neequeꞌ Uꞌ coꞌteꞌ nziriꞌ naꞌ ndxèꞌ nac thìb lugar nagán. No yende chó mèn nzo coꞌ thoꞌ coꞌ hua mèn trèꞌ. Más huen gunii Uꞌ Diox loo mèn baꞌ par bii mèn par ya cuaꞌn mèn conꞌ hua mèn leꞌn yèez baꞌ no leꞌn ranch coꞌ nziriꞌ leꞌn yii baꞌ.
\p
\v 16 Sya, mcàb Jesús loo myenꞌ. Ndxab Jesús:
\p ―Inquinte bii mèn, yey. ¿Máa yob yéc guꞌ, na? Ftaꞌ guꞌ conꞌ hua mèn.
\p
\v 17 Myenꞌ ndxab loo Jesús:
\p ―Yende cón ngue no nuꞌ arid trèꞌ, yey. Pente ngue no nuꞌ gaꞌy pan no chop mbèel no maste.
\p
\v 18 Jesús ndxab loo myenꞌ:
\p ―Que de no guꞌ conꞌ ngue no guꞌa trèꞌ. Ñeeneꞌ.
\p
\v 19 Sya, gunii Jesús loo mèna. Ndxab Jesús: Nabeꞌste gure tub guꞌ loo huan baꞌ, ey.
\p Ngoloa, mxen Jesús gaꞌy pana no chop mbèela. Mbuiꞌ Jesús loo béꞌ. Ndxab Jesús: Ay, Dioꞌs. Diox quix Uꞌ, Diox, por pan ndxèꞌ no por mbèel ndxèꞌ. Sya, mchìꞌx Jesús pana no mbèela. No mbli Jesús par mbyarꞌ pana no mbèela. Mdaꞌ Jesús pana no mbèela loo myenꞌ xinꞌ mtéꞌth Jesús. Leꞌ myenꞌ xinꞌ mtéꞌth Jesús na, mbliꞌtha loo mèna.
\v 20 Ryete mèna nduhua rsè axta plóthe mblyaꞌs mèna. Ngolo nduhua rsè mèna, msè myenꞌ xinꞌ mtéꞌth Jesús siꞌ fchop cardor pan no mbèel coꞌ mbyanꞌ xoꞌf.
\v 21 Mèn coꞌ nduhua rsèa ngòc gaꞌy mil mèn, ante mènbiꞌ. Xàꞌqueꞌ mèngot no xàꞌqueꞌ myenꞌ bix. Indxòode cuent mèngot no myenꞌ bix coꞌ nduhua.
\s Jesús mdee nii loo nít loo lagun.
\r (Mr. 6.45–52; Jn. 6.16–21)
\p
\v 22 Ngoloa, mnibeꞌ Jesús loo myenꞌ xinꞌ mtéꞌth Jesús. Ndxab Jesús loo myenꞌ:
\p ―Gòo guꞌ leꞌn yòoyaa baꞌ. Ftlo guꞌ, fteteeguꞌ yòoyaa. Ya ner guꞌ par zin guꞌ tedib lad ro lagun. Yiloa, ndal queꞌen baꞌ.
\p Láth nda myenꞌa, Jesús gunii Diox loo mènléyꞌ coꞌ nziriꞌa.
\v 23 Ngolo gunii Jesús Diox loo mènléyꞌa, mxen Jesús ned. Nda Jesús loo thìb yii coꞌ ndub gaxte tya par cuez thidte Jesús Diox. Coꞌseꞌ ngulàa yálꞌ izlyoꞌ huiza, thidte Jesús mbyanꞌ loo yiia.
\v 24 Leꞌ myenꞌ xinꞌ mtéꞌth Jesús na, láth coꞌseꞌ nda tetee myenꞌ yòoyaa grolthe loo lagun, ngroꞌ thìb mbiidóꞌ coꞌ mtauꞌ ned nda yòoyaa. Nde nxonꞌ, mxít too mbii nít. Ngo mbii nít leꞌn yòoyaa. No ngüin mbii nít cho yòoyaa.
\v 25 Xtilꞌa, cuar ngroꞌ too gax Jesús loo myenꞌ. Nde tee nii Jesús loo nít loo lagun loo myenꞌ.
\v 26 Coꞌseꞌ ñèe myenꞌ xinꞌ mtéꞌth Jesús nde tee Jesús loo nít loo myenꞌ, anzeꞌf mzyeb myenꞌ no ngo no lezoꞌ myenꞌ. Ngrozèe zeb myenꞌ. Ndxab myenꞌ:
\p ―¡Ay, conꞌ mal nde goꞌ, cara! ¡Conꞌ mal nde goꞌ, cara!
\p
\v 27 Per Jesús gunii loo myenꞌ. Ndxab Jesús loo myenꞌ:
\p ―Neꞌzyebte guꞌ, ey. Blo guꞌ valor loo guꞌ. Daa na.
\p
\v 28 Sya, ndxab Pedr loo Jesús:
\p ―Tad, cheleꞌi Uꞌ, bli Uꞌ par teniin loo nít par galen loo Uꞌ axta coꞌteꞌ ndoo Uꞌ baꞌ.
\p
\v 29 Sya, ndxab Jesús loo Pedr:
\p ―Neeca. Que de, tá.
\p Sya, ngulàa Pedr loo yòoyaa. Mtlo Pedr, mdee nii Pedr loo nít par ya Pedr coꞌteꞌ ndoo Jesús.
\v 30 Per coꞌseꞌ mdaꞌ Pedr cuent anzeꞌf thìb mbii nzoꞌf loo lagun, mzyeb Pedr. No coꞌseꞌ mdenꞌ Pedr mtloleꞌ ngue dep Pedr leꞌn nít, mtlo Pedr, ngrozèe Pedr. Mbez Pedr:
\p ―Tad, Tad, jer que de. Guree Uꞌ daa par lyáꞌ daa trèꞌ.
\p
\v 31 Texal mzin Jesús loo Pedr, chàa, nguree Jesús yaꞌ Pedr. No ndxab Jesús loo Pedr:
\p ―¡Jaa, Pedr! Pente ndxelaꞌsl, ¿léꞌ? ¿Chonon neꞌngàptel yalxlaꞌs loon par neꞌdyeptel leꞌn nít, àꞌ?
\p
\v 32 Coꞌseꞌ mquée Jesús loo yòoyaa con Pedr, xèegà nguled mxyoꞌf mbii loo nít loo lagun.
\v 33 Leꞌ sya, coꞌseꞌ gunèe ryete myenꞌ coꞌ nzo leꞌn yòoyaa conꞌ coꞌ ngòca, mdub xib myenꞌ loo Jesús. Mcòoꞌ myenꞌ yéc myenꞌ loo Jesús. No ndxab myenꞌ loo Jesús:
\p ―Lìcpeꞌ baꞌi, Tad, Uꞌ nac xganꞌpeꞌ Diox.
\s Jesús mteyac huax mèn leꞌn yèez Genesaret.
\r (Mr. 6.53–56)
\p
\v 34 Ngoloa, tolo mtetee myenꞌ yòoyaa loo nít loo lagun axta mzin myenꞌ tedib lad ro lagun con Jesús coꞌteꞌ nac loo xyòn mèn cheꞌn làaz mèn genesaret.
\v 35 Coꞌseꞌ mblibeꞌ mèn yèezyaꞌ cheꞌn làaz mèn genesareta Jesús na, mdeꞌth mèna diꞌs loo rye mèn yèez gaxa. Coꞌseꞌ mbìn mèna leꞌ Jesús nzo tya, mbiꞌth no mèna huax mèn yíiz loo Jesús coꞌteꞌ ngo Jesús.
\v 36 Nalyat mnaꞌb mèna diꞌs loo Jesús par taꞌ Jesús lugar ante gàal mèna ro xab Jesús yac mèna loo yíiz coꞌ ndyac mèna. Tataa mod ryete mèn coꞌ ante mbuàal ro xab Jesús mbyacqueꞌ.
\c 15
\s Conꞌ coꞌ ndli no conꞌ coꞌ ndxàc loo mèn par ndli mèn conꞌ yeꞌrsinꞌ.
\r (Mr. 7.1–23)
\p
\v 1 Sya, mbii gax plá mèn xleyꞌ farise no plá mèn coꞌ ngòc maistr coꞌ ndluꞌ cón cheꞌn ley coꞌ mxoꞌf Moisés loo mèn loo Jesús. Mèna nde par ned ciuda Jerusalén par asembli mèna mnibdiꞌs mèna diꞌs loo Jesús. Ndxab mèna loo Jesús:
\p
\v 2 ―¿Chonon indubdiꞌste myenꞌ xinꞌ mtéꞌth lùu baꞌ cón cheꞌn costumbr cheꞌn xudgool naꞌ, àꞌ? Ale ndxeꞌlequeꞌ, intechte myenꞌ yaꞌ myenꞌ ndooreꞌ tyub myenꞌ par hua myenꞌ xalqueꞌ nac costumbr coꞌ ngue no naꞌ no coꞌ mbed no naꞌ.
\p
\v 3 Jesús mnibdiꞌs loo mèna. Ndxab Jesús:
\p ―Nde niin thìb conꞌ loo guꞌ, ne, por cón cheꞌn conꞌ coꞌ mnibdiꞌs guꞌ loon: ¿Chonon indyubdiꞌste guꞌ loo Diox par li guꞌ xal nac coꞌ ñibeꞌ Diox loo guꞌ li guꞌ, àꞌ? Ale más ndli guꞌ xal nac costumbr coꞌ ngue no guꞌ no coꞌ mbed no guꞌ leque li guꞌ xal ñibeꞌ Diox loo guꞌ par li guꞌ, ¿léꞌ?
\v 4 ¿Chéꞌ indaꞌde guꞌ cuent leꞌ Diox ndxab loo diꞌs coꞌ mnibeꞌ Diox coꞌseꞌ ndxab Diox:
\pi1 Gòp guꞌ mod gunèe guꞌ xud guꞌ no gòp guꞌ mod gunèe guꞌ xnaꞌ guꞌ. Per ndxeꞌlequeꞌ, mèn coꞌ ñii yèe ñii tìi cón cheꞌn xud mèn no cón cheꞌn xnaꞌ mèn, mèn li mandad guth mèn mèna.
\m
\v 5 Per ndxeꞌlequeꞌ, guꞌ mbez nzoqueꞌ mod gab thìb mbiꞌ loo xud mbiꞌ no loo xnaꞌ mbiꞌ: Yende mod lyath non guꞌ, Pay, May, con conꞌ ndxàpen tac ryete conꞌ coꞌ ndxàpen, na mdeth lèe Diox leꞌ conꞌ coꞌ ndxàpen nac cheꞌnpeꞌ Diox. Tataa mbez guꞌ mastaleꞌ indaꞌde guꞌ conꞌa càa Diox.
\v 6 No tolo mbez guꞌ: Leꞌ chol mèn coꞌ mbez tataa loo xud mèn no loo xnaꞌ mèn, ya inquinte tolo lyath no mèna xud mèna no xnaꞌ mèna. Tataa mod ndláꞌ guꞌ coꞌ mnibeꞌ Diox loo guꞌ li guꞌ par más li guꞌ conꞌ coꞌ nac costumbr coꞌ mbed no guꞌ no mod coꞌ ndxàp guꞌ.
\v 7 Aa, mèn xleyꞌ farise. Aa, mèn coꞌ nac maistr cheꞌn ley coꞌ mxoꞌf Moisés loo mèn. Aa, que ndxác guꞌ ntembìi guꞌ ro guꞌ no ntembìi guꞌ xtiꞌs guꞌ loon, ¿léꞌ? Bien lal ro Sayi coꞌ mdeꞌth diꞌs coꞌ ndxab Diox coꞌseꞌ mqueꞌ Sayi yeꞌs cón cheꞌn guꞌ. Sayi ndxab:
\pi1
\v 8 Mèn nación Israel ndxèꞌ alithe ndyoodiꞌs diꞌs par li mèn conꞌ guryath loon no par li mèn conꞌ guryèn loon. Per mod coꞌ ndxàp mèn nación Israel coꞌ ndluꞌ mèn nación Israel cón chenen, ingue luꞌde mèna loon dib nzo yéc mèn no dib nzo lezoꞌ mèn leꞌ mèna ndubdiꞌs ndac loon.
\pi1
\v 9 Anxleꞌ ncòoꞌ mèn nación Israel yéc mèn nación Israel loon, ne. No anxleꞌ mbez mèna lèen coꞌseꞌ ndluꞌ mèna cón cheꞌn xleyꞌ leque mèna loo xtàa mèn. Per ndxeꞌlequeꞌ, xleyꞌ coꞌ ndluꞌ mèna nac leque xleyꞌ cheꞌn mèn izlyoꞌ ndxèꞌ.
\p
\v 10 Sya, ngurez Jesús rye mèn coꞌ mqueltàa loo Jesús, coꞌ nziriꞌ loo Jesús. Ndxab Jesús loo mèna:
\p ―Ndlyazen gòn guꞌ diꞌs ndxèꞌ. No ndlyazen taꞌ guꞌ cuent cón cheꞌn diꞌs ndxèꞌ. No ndlyazen taꞌ guꞌ lugar yaaꞌd diꞌs ndxèꞌ leꞌn xtùuz guꞌ no leꞌn lezoꞌ guꞌ.
\v 11 Inacte por intechte mèn yaꞌ mèn no inacte por conꞌ coꞌ ndxuhua mèn ndxàc conꞌ yeꞌrsinꞌ loo mèn no ndli mèn conꞌ yeꞌrsinꞌ. Ndxeꞌlequeꞌ, diꞌs coꞌ ndyoodiꞌs mèn coꞌ ndryoꞌ ndlyenꞌ leꞌn xtùuz mèn no leꞌn lezoꞌ mèn, conꞌa nac coꞌ ndli par ndxàc mèn mèn zab no mèn yeꞌrsinꞌ loo Diox.
\p
\v 12 Sya, mbii gax myenꞌ xinꞌ mtéꞌth Jesús loo Jesús. Ndxab myenꞌ loo Jesús:
\p ―Tad, ¿chéꞌ neꞌndaꞌde Uꞌ cuent leꞌ mèn xleyꞌ farise no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn, nazab ndenꞌ mèna diꞌs coꞌseꞌ mbìn mèna diꞌs coꞌ ndxab Uꞌ? Mbli mèna cuent leꞌ diꞌsa ngòc diꞌs coꞌ guñii yèe Uꞌ no coꞌ guñii tìi Uꞌ cón cheꞌn mèna. No mbli mèna cuent leꞌ diꞌsa ngòc ngòc nguàal diꞌs coꞌ gunii Uꞌ cón cheꞌn mèna.
\p
\v 13 Per Jesús ndxab loo myenꞌ xinꞌ mtéꞌth Jesús:
\p ―Nde niin thìb conꞌ loo guꞌ: Mèna nac xal thìb xanꞌ yaa coꞌ mxenleꞌ lox. Per chol xanꞌ yaa coꞌ tarte too xuden Diox coꞌ nzo loo béꞌ, mèn quib alox xanꞌ yaaa, coꞌ nee diꞌs, nac mèna.
\v 14 Blaꞌ guꞌ tee nziriꞌ mèna, ey. Mèna nac xal mèn sieu coꞌ ndyen yaꞌ tedib mèn sieu par tetee mèn sieu xtàa mèn sieu. No cheleꞌ thìb mèn sieu ndyen yaꞌ tedib mèn sieu, coꞌ nee diꞌs, par tetee sieu xtàa sieu, ¿chéꞌ ngue li guꞌ xtùuz neꞌyiziꞌfte ryop mèn sieua leꞌn thìb yeꞌr, cà? Taziꞌf ryop mèn sieu leꞌn thìb yeꞌr, ¿léꞌ? Tataa nac mèna.
\p
\v 15 Sya, mcàb Pedr. Ndxab Pedr loo Jesús:
\p ―Tad, ftaꞌ Uꞌ cuent loo nuꞌ cón cheꞌn diꞌs coꞌ mtetac Uꞌ loo mèna.
\p
\v 16 Jesús ndxab loo myenꞌ xinꞌ mtéꞌth Jesús:
\p ―¿Chéꞌ no guꞌ indaꞌde cuent cón cheꞌn diꞌs coꞌ mtetaquen loo mèna, càꞌ?
\v 17 ¿Chéꞌ inonte guꞌ no chéꞌ indaꞌde guꞌ cuent leꞌ ryete conꞌ ndxuhua mèn thìb lì ndxòoi leꞌn xtiꞌ mèn no ndxeloa ndriꞌtha loo mèna coꞌseꞌ nda mèn mandad mèn, càꞌ?
\v 18 Per diꞌs coꞌ ñii mèn no coꞌ ndyoodiꞌs mèn na, diꞌsa nac coꞌ más nabeꞌs ndryoꞌ ro mèn no lezoꞌ mèn tac diꞌsa más ndryoꞌ ndlyenꞌ leꞌn lezoꞌ mèn par ndyoodiꞌs mèn. No leque diꞌsa ndli ntezab mèn no ndluꞌ mod coꞌ nac mèn par ndxàc mèn mèn yeꞌrsinꞌ loo Diox.
\v 19 Tac leque leꞌn quèe yéc mèn no leꞌn lezoꞌ mèn ndryoꞌ xtùuz yeꞌrsinꞌ coꞌ ndli mèn xtùuz. Angab naꞌi, xal xtùuz coꞌ ndli mèn coꞌ ndli chol xtùuz yeꞌrsinꞌ par guth mèn xtaa mèn; xal xtùuz coꞌ ndli mèn coꞌ ndli xtùuz par cuaꞌn mèna xinꞌ huan mèna, no li mèna yalburrid; xal xtùuz coꞌ ndli mèn coꞌ ndli xtùuz par li huanꞌ mèn; xal xtùuz coꞌ ndli mèn coꞌ ndli xtùuz par toxcuaꞌ mèn yalgutyèꞌ; no xal xtùuz coꞌ ndli mèn par ndxòo lezoꞌ mèn cón cheꞌn cuent yix.
\v 20 Ryete conꞌ coꞌ ndli mèn xtùuza, ntezab xtùuz mèn no lezoꞌ mèn par ndxàc mèn mèn yeꞌrsinꞌ loo Diox. Per mèn coꞌ tyub par hua mèn luaꞌ mèn no xít mèn, coꞌseꞌ intechte mèn yaꞌ mèn, xal nac costumbr coꞌ ndxàp mèn coꞌ mbed no mèn, intezabte conꞌa xtùuz mèn no lezoꞌ mèn par gàc mèna mèn yeꞌrsinꞌ loo Diox.
\s Thìb xaꞌgot tith ngolaꞌs loo Jesús.
\r (Mr. 7.24–30)
\p
\v 21 Ngoloa, ngroꞌ Jesús tya. Mxen Jesús ned. Nda Jesús par ned leꞌn rye yèezyaꞌ cheꞌn làaz mèn ciuda Tir no leꞌn rye yèezyaꞌ cheꞌn làaz mèn ciuda Sidón.
\v 22 Láth nda zin Jesús ned nda Jesús par neda, mbiꞌth thìb xaꞌgot coꞌ ngòc mèntèe cheꞌn thìb diꞌstèe coꞌ lèe canane, coꞌ naban par neda, loo Jesús. Cabii mbez xaꞌgota loo Jesús:
\p ―Tad, naneequen leꞌ Uꞌ nac bin David coꞌ ngòc rey póla. Por cona, gulat lezoꞌ Uꞌ gunèe Uꞌ daa. ¿Xá nee Uꞌ? Mzaꞌ coꞌ nac rsapen ndxèꞌ nquée mbii cheꞌn xpii yeꞌrsinꞌ no anzeꞌf nè nquée mbii rsap daa, Tad.
\p
\v 23 Per Jesús yende chó diꞌs mcàb loo xaꞌgota. Sya, mbiꞌth myenꞌ xinꞌ mtéꞌth Jesús loo Jesús. Mnaꞌb myenꞌ diꞌs loo Jesús. Ndxab myenꞌ loo Jesús:
\p ―Tad, guuz Uꞌ loo xaꞌgot baꞌ bii xaꞌ tac anzeꞌf nazab mbez yèe xaꞌ ned xís naꞌ.
\p
\v 24 Jesús ndxab loo myenꞌ xinꞌ mtéꞌth Jesús:
\p ―Aaꞌa. Yende cón gaben loo xaꞌgot baꞌ. Diox mtelꞌ daa par mbalen ante loo mèn nación Israel, mèn coꞌ nac xal mbacxilꞌ coꞌ nzi tee huan.
\p
\v 25 Látha, negadiꞌs mbii gax xaꞌgota loo Jesús. No mdub xib xaꞌgota loo Jesús. Ndxab xaꞌgota loo Jesús:
\p ―Tad, bli Uꞌ favor bloꞌ Uꞌ xpii yeꞌrsinꞌ loo rsap daa.
\p
\v 26 Per Jesús asembli par mtetac Jesús thìb diꞌs loo xaꞌgota. Ndxab Jesús loo xaꞌgota:
\p ―Ihuente nac coꞌ li mèn cheleꞌ mèn teche pan loo xinꞌ mèn no taꞌ mèn pana par hua mbac, ¿léꞌ?
\p
\v 27 Chàa, mcàb xaꞌgota loo Jesús. Ndxab xaꞌgota:
\p ―Aa, Tad. Lìcqueꞌ nac coꞌ ngolo gunee Uꞌ loon baꞌ. Yende cón niin loo Uꞌ. Per huiꞌ Uꞌ nexa. Mbac nthopqueꞌ pan byòo bix coꞌ ndxàb ro mes coꞌseꞌ ndxuhua mèn par hua mbac.
\p
\v 28 Sya, ndxab Jesús loo xaꞌgota:
\p ―Ngot, nase ngolo guneen, lìcqueꞌ, ndxelaꞌsqueꞌl loo cón chenen, ndee. Liquen conꞌ ndlyaꞌsl, ndee, ey.
\p Texal ngolo ndxab Jesús diꞌsa loo xaꞌgota, leque hora mbyac rsap xaꞌgota. No mbiiche mbii coꞌ mzib yéc rsap xaꞌgota. No mdyub xnìi yéc rsap xaꞌgota no mdyub xnìi lezoꞌ rsap xaꞌgota loo mbii coꞌ mquée yéc rsap xaꞌgota.
\s Jesús mteyac huax mèn yíiz.
\p
\v 29 Mbii Jesús tya. Mdee nii Jesús dib vuelt ro lagun coꞌ neꞌ lèe lagun cheꞌn làaz mèn galile axta mzin Jesús tedib lad ro laguna. Ngoloa, mquée Jesús loo thìb yii par tyub Jesús tya.
\v 30 Látha, mzin huax mèn loo Jesús coꞌteꞌ ndub Jesús. Nde no mèna mèn coj, mèn sieu, mèn mud, mèn coꞌ yende nii, no mèn coꞌ yende yaꞌ, no taamas mèn nayíiz coꞌ ndyac chol yíiz par teyac Jesús rye mèna. Mteyacqueꞌ Jesús rye mèna.
\v 31 Coꞌseꞌ ngolo gunèe rye mèn coꞌ ngureriꞌa ngòc conꞌa, ante mbuiꞌ mèna no ante gunaa mèna coꞌseꞌ gunèe mèna leꞌ mèn coꞌ ngòc muda ndyoodiꞌs; coꞌseꞌ gunèe mèna leꞌ mèn coꞌ yende nii no mèn coꞌ yende sa yaꞌ mdyoxcuaꞌ, ngòc mèna xal mèn huen; coꞌseꞌ gunèe mèna leꞌ mèn renc mdee; no coꞌseꞌ gunèe mèna leꞌ mèn sieu ngüiꞌ. Mèna mtlo ngurez Diox, Diox coꞌ nac Dioxpeꞌ mèn nación Israel. Mbez mèn diꞌs roo no diꞌs xèn no diꞌs natúꞌ loo Diox.
\s Jesús mbli par nduhua thap mil mèn.
\r (Mr. 8.1–10)
\p
\v 32 Sya, ngurez Jesús myenꞌ xinꞌ mtéꞌth Jesús. Ndxab Jesús loo myenꞌ:
\p ―Anzeꞌf ndlyatꞌ lezon ñèen prob mèn baꞌ. Tac ndxàcleꞌ son huiz nzo mèn baꞌ trèꞌ con daa. No yende cón nde no mèn par hua mèn. Indlyasten telꞌen mèn par bii mèn liz mèn no làaz mèn tac daa nanee leꞌ mèn baꞌ nzi lanꞌ. No nzo ryes guuꞌs mèn no lyàa fuerz mèn ned bii mèn.
\p
\v 33 Per myenꞌ xinꞌ mtéꞌth Jesús ndxab loo Jesús:
\p ―Tad, ¿xá mod li naꞌ par que no naꞌ conꞌ hua ryethe mèn baꞌ? Tac Uꞌ nanee leꞌ coꞌteꞌ nzo naꞌ ndxèꞌ nac lugar nagán. No yende chó mèn nzo coꞌ naban par nedrèꞌ par thoꞌ mèn coꞌ hua rye mèn baꞌ.
\p
\v 34 Sya, mnibdiꞌs Jesús loo myenꞌ:
\p ―¿Plá pan ngue no guꞌ, àꞌ?
\p Myenꞌ mcàb. Ndxab myenꞌ:
\p ―Pente ngue no nuꞌ gaz pan no ndxepte mbèel bix no maste.
\p
\v 35 Sya, ndxab Jesús loo mèna nabeꞌste tyub mèna loo yòo coꞌteꞌ nziriꞌte mèna.
\v 36 Sya, mxen Jesús gaz pana no ndxep mbèel bixa. Ndxab Jesús loo Diox: Ay, Dioꞌs, Diox quix Uꞌ, Diox, por pan ndxèꞌ no por mbèel ndxèꞌ. Ngoloa, mchìꞌx Jesús pana no mbèela par mbyarꞌ pana no mbèela. Ngoloa, mdaꞌ Jesús pana no mbèela loo myenꞌ xinꞌ mtéꞌth Jesús. Leꞌ myenꞌ na, mbliꞌth pan no mbèel loo rye mèn coꞌ nziriꞌa.
\v 37 Ryete mèna nduhuaqueꞌ axta plóthe mblyaꞌs mèna. Ngolo nduhua mèna, mthop myenꞌ rye leꞌ pan no mbèel coꞌ mbyanꞌ xoꞌfa. Msè myenꞌ gaz cardor pan no mbèel coꞌ mbyanꞌ xoꞌf coꞌ nduhua rye mèna.
\v 38 Mèn coꞌ nduhua axta plóthea, mèna ngòc thap mil mèn coꞌ ngòc ante mènbiꞌ. Xàꞌ mèngot. No xàꞌ myenꞌ bix. Indxòode cuent mengot no indxòode cuent myenꞌ bix coꞌ nduhua axta plóthe.
\v 39 Ngolo nduhua mèna, gunii Jesús Diox loo mèna. Ngòo Jesús leꞌn thìb yòoyaa coꞌ ndub ro laguna con myenꞌ xinꞌ mtéꞌth Jesús. Nguriꞌth Jesús par ned coꞌteꞌ nzi thìb yèez coꞌ lèe Magdala.
\c 16
\s Mèn xleyꞌ farise no mèn xleyꞌ saduce mnaꞌb loo Jesús li Jesús thìb yalguzyeꞌ coꞌ gàc xal thìb señ loo mèn.
\r (Mr. 8.11–13; Lc. 12.54–56)
\p
\v 1 Láth nda riid Jesús par neda, ngua sálꞌ ndxep mèn coꞌ ngòc mèn xleyꞌ farise no mèn coꞌ ngòc mèn xleyꞌ saduce Jesús par mcuaꞌn mèna mod ñeeneꞌ chéꞌ tli mèna gan gàal diꞌs mèna Jesús par yigaa Jesús loo mèna. Ndxab mèna loo Jesús:
\p ―Tad, ¿xá neel? Nuꞌ ndlyaꞌs lil thìb yalguzyeꞌpeꞌ loo nuꞌ par huiꞌ nuꞌ chó yalguzyeꞌ lil coꞌ yúꞌ xal thìb señ loo béꞌ loo nuꞌ.
\p
\v 2 Per Jesús mcàb. Ndxab Jesús loo mèna:
\p ―Nde niin thìb conꞌ loo guꞌ coꞌ taꞌ cuent xá nac guꞌ. Coꞌseꞌ mzyèleꞌ izlyoꞌ, xèe ngüiꞌ guꞌ loo béꞌ. No coꞌseꞌ ñèe guꞌ nquée xcuau nane loo béꞌ, mbez guꞌ loo xtàa guꞌ: Nde zinꞌleꞌ tiemp lyàa yìꞌ, cara.
\v 3 Leꞌ coꞌseꞌ ñèe guꞌ bléꞌ bléꞌ nac xcuau coꞌ nquée loo béꞌ ndxáal xtilꞌ na, mbez guꞌ loo xtàa guꞌ: Nalleꞌ huin xòo o lyàa yùu quèe. ¡Aa, mèn xleyꞌ farise no mèn xleyꞌ saduce! Susqueꞌ ndxác guꞌ ntembìi guꞌ ro guꞌ no ntembìi guꞌ xtiꞌs guꞌ loon. Ale ngoꞌ guꞌ cuent cón cheꞌn señ coꞌ ndxúꞌ loo béꞌ. Per ingoꞌde guꞌ cuent no neꞌ neꞌ indli guꞌ cuent cón cheꞌn señ coꞌ ntloleꞌ ndxàc tiemp ndxèꞌ coꞌ luꞌ leꞌ Diox mtelꞌ daa par ndxàpen conꞌ roo conꞌ xèn laꞌs niin no laꞌs yan.
\p
\v 4 Tolo ndxab Jesús loo mèna:
\p ―¿Guꞌ coꞌ nac mèn yeꞌrsinꞌ, guꞌ ñibeꞌ loon par lin thìb yalguzyeꞌ coꞌ ndlyaꞌs guꞌ huiꞌ guꞌ, càꞌ? Yende xàa. Ya yende chó más yalguzyeꞌ lin loo guꞌ par huiꞌ guꞌ. Ndxeꞌlequeꞌ, conꞌ ndxèꞌ no maste niin loo guꞌ: Conꞌ coꞌ ngòc loo Jonás póla nac coꞌ taꞌ cuent loo guꞌ cón cheꞌn conꞌ coꞌ gàc loon yiloa.
\p Ngolo mdoodiꞌs Jesús diꞌsa, taate mbyanꞌ mèna tya. Neꞌncàbte mèna loo Jesús. Leꞌ Jesús na, mxen ned. Ndyàa Jesús.
\s Jesús mtetac thìb diꞌs loo myenꞌ xinꞌ mtéꞌth Jesús leꞌ xleyꞌ mèn farise nac xal dii levadur.
\r (Mr. 8.14–21)
\p
\v 5 Coꞌseꞌ mzin Jesús con myenꞌ xinꞌ mtéꞌth Jesús tedib lad ro lagun tedib vez, neꞌnteꞌde lezoꞌ myenꞌ xinꞌ mtéꞌth Jesús ndiꞌ myenꞌ pan par nque no myenꞌ pan.
\v 6 Sya, ndxab Jesús loo myenꞌ xinꞌ mtéꞌth Jesús:
\p ―Chó Diox chó nee guꞌ no anderhuen guꞌ. Leque guꞌ fquenap guꞌ loo cón cheꞌn dii levadur coꞌ nac cón cheꞌn xleyꞌ mèn farise no coꞌ nac cón cheꞌn xleyꞌ mèn saduce.
\p
\v 7 Per myenꞌ xinꞌ mtéꞌth Jesús, mtlo myenꞌ, ndxab myenꞌ loo xtàa myenꞌ:
\p ―Tatuaꞌ gunee Tad loo naꞌ, cara, tac neꞌnteꞌde lezoꞌ naꞌ ndiꞌ naꞌ pan par que no naꞌ pan.
\p
\v 8 Jesús mdenꞌ lezoꞌ no mdaꞌ Jesús cuent conꞌ coꞌ mbli myenꞌ xtùuz. Ndxab Jesús loo myenꞌ:
\p ―¿Chonon mbez guꞌ loo xtàa guꞌ: Tatuaꞌ mbez Tad loo naꞌ tac ingue node naꞌ pan? Susqueꞌ pente ndxàp guꞌ yalxlaꞌs loon, yey.
\v 9 ¿Chéꞌ tarte taꞌ guꞌ cuent coꞌ huenlequeꞌ no chéꞌ neꞌtyede lezoꞌ guꞌ cón cheꞌn conꞌ mblin con gaz pan coꞌ mblin mandad coꞌ mbliꞌth guꞌ loo gaꞌy mil mèn, càꞌ? ¿Plá cardor pan coꞌ mchìxena mbyanꞌ xoꞌf coꞌ mthop guꞌ, àꞌ?
\v 10 ¿Chéꞌ neꞌtyede lezoꞌ guꞌ coꞌ mblin con gaz pan coꞌ mblin mandad mbliꞌth guꞌ loo thap mil mèn, ne? No ¿plá cardor pan coꞌ mbyanꞌ xoꞌf mthop guꞌa, àꞌ? ¿Chéꞌ, ndyac guꞌ, neꞌgácte daa toxcuan sa pan hua naꞌ, càꞌ?
\v 11 ¿Chonon neꞌndaꞌde guꞌ cuent no neꞌnglide guꞌ xtùuz leꞌ daa neꞌndoodiꞌste cón cheꞌn panpeꞌ loo guꞌ coꞌseꞌ guniin loo guꞌ anderhuen guꞌ no chó Diox chó nee guꞌ, fquenap guꞌ guꞌ loo dii levadur coꞌ nac còn cheꞌn xleyꞌ mèn farise no loo dii levadur coꞌ nac còn cheꞌn xleyꞌ mèn saduce, àꞌ?
\p
\v 12 Ale axta syareꞌ mdaꞌ myenꞌ cuent leꞌ Jesús ingue bezte loo myenꞌ leꞌ myenꞌ quenap myenꞌ loo cón cheꞌn dii levadur coꞌ ndli ndyoo bes pan. Ndxeꞌlequeꞌ, myenꞌ mdenꞌ no mdaꞌ myenꞌ cuent leꞌ Jesús ngue luꞌ loo myenꞌ leque myenꞌ quenap myenꞌ loo cón cheꞌn xleyꞌ cheꞌn mèn xleyꞌ farise no loo cón cheꞌn xleyꞌ cheꞌn mèn xleyꞌ saduce.
\s Pedr ndoo lìte ndxab loo Jesús leꞌ Jesús nac merpeꞌ Crist.
\r (Mr. 8.27–30; Lc. 9.18–21)
\p
\v 13 Coꞌseꞌ mzin Jesús leꞌn yèezyaꞌ cheꞌn làaz mèn ciuda Cesar coꞌ mblec thìb mbiꞌ coꞌ lèe Lip Tetrarc, Jesús mnibdiꞌs loo myenꞌ xinꞌ mtéꞌth Jesús. Ndxab Jesús:
\p ―¿Chó mèn mbez mèn nac daa, daa coꞌ mbal yáal loo izlyoꞌ xalqueꞌ ndxáal chol mèn loo izlyoꞌ ndxèꞌ, àꞌ?
\p
\v 14 Myenꞌ xinꞌ mtéꞌth Jesús mcàb. Ndxab myenꞌ loo Jesús:
\p ―Ndxep mèn mbez leꞌ Uꞌ nac Juàn Bautist. Taandxep mèn mbez leꞌ Uꞌ nac Lii. No nzoreꞌ mèn coꞌ mbez leꞌ Uꞌ nac Jeremi. Mbez mèna, ne, nzo chó mèn coꞌ ndeꞌth diꞌs coꞌ ndxab Diox nac Uꞌ.
\p
\v 15 Sya, ndxab Jesús loo myenꞌ xinꞌ mtéꞌth Jesús:
\p ―¿Guꞌ, àꞌ? ¿Chó mèn mbez guꞌ nac daa?
\p
\v 16 Sya, ngroꞌ nxonꞌ Mon Pedr. Ndxab Mon Pedr loo Jesús:
\p ―Uꞌ nac yubpeꞌ Crist. Nac Uꞌ xganꞌpeꞌ Diox coꞌ nabanpeꞌ.
\p
\v 17 Jesús mcàb loo Pedr. Ndxab Jesús:
\p ―Anzeꞌf huen ndal, Mon, xganꞌ Jonás. Tac nec thìb mèn cheꞌn izlyoꞌ ndxèꞌ tarte luꞌ cón cheꞌn conꞌ coꞌ ngolo guneel loon baꞌ lool. Ndxeꞌlequeꞌ, yub xuden Diox mbli par non lùui par guneela loon.
\v 18 No nalleꞌ daa nii lool: Lùu hueꞌ tedib lèe coꞌ nac Pedr, coꞌ nee diꞌs, nac quèe. No loo diꞌs coꞌ ngolo guneel loon baꞌ coꞌ nac xal thìb quèe roo xal thìb quèe rhueꞌ no xal thìb quèe coꞌ ngóol loo izlyoꞌ, loo cón cheꞌn diꞌsa daa li par dyop mèn no queltàa mèn loo cón chenen par gàc mèna cheꞌnpeꞌ daa. No neꞌ neꞌ gác Mebizya li Mebizya gan coꞌ xàꞌ Mebizya mèna loon no loo cón chenen coꞌseꞌ gath mèna.
\v 19 Pedr, daa ñibeꞌ lool leꞌ lùu ñibeꞌ loo mèn coꞌ Diox ñibeꞌ loo. Gàcl xal mèn coꞌ altant ndyoo ner no ndyoo naa loo mèna. Conꞌ coꞌ ñibeꞌl loo mèn yende mod li mèn, conꞌa gàc conꞌ coꞌ mnibeꞌ lezon loo béꞌ gàc conꞌ coꞌ yende mod li mèn, mèn coꞌ nzo loo cón chenen. No conꞌ coꞌ ñibeꞌl loo mèn par li mèn, conꞌa gàc conꞌ coꞌ mnibeꞌ lezon loo béꞌ gàc loo mèn no conꞌ co li mèn, mèn coꞌ nqueltàa loo cón chenen.
\p
\v 20 Ngoloa, sya, mnibeꞌ Jesús loo myenꞌ xinꞌ mtéꞌth Jesús. Ndxab Jesús loo myenꞌ yende chó loo gabte myenꞌ leꞌ Jesús nac Crist.
\s Jesús ngue taꞌ cuent loo myenꞌ xinꞌ mtéꞌth Jesús leꞌ Jesús gath.
\r (Mr. 8.31—9.1; Lc. 9.22–27)
\p
\v 21 Desde huiza par delant Jesús mtlo mdaꞌ cuent loo myenꞌ xinꞌ mtéꞌth Jesús leꞌ Jesús naquinqueꞌ ya ciuda Jerusalén. Ndxab Jesús loo myenꞌ, ne, leꞌ mèngool, no mèn coꞌ nac jef coꞌ más ñibeꞌ loo rye nguleyꞌ, no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn nación Israel, ryete mèna yátbèe par tetìi mèna Jesús axta plóthe lyaꞌs mèna. Ndxab Jesús loo myenꞌ, ne, leꞌ mèna li par guthxùꞌ mèn Jesús. Per coꞌseꞌ yilo son huiz nguth Jesús, Jesús ryo xban làth mèn nguth.
\v 22 Sya, xexte mbloꞌ Pedr Jesús. Mbeꞌ Pedr Jesús thìb lad loo myenꞌ coꞌ ndxàc xtàa Pedr. Ale mtlo Pedr, mcoꞌx Pedr Jesús. Ndxab Pedr loo Jesús:
\p ―Neꞌñeede Diox conax, Tad, par ale tataa gàca loo Uꞌ. Thidtene neꞌtaꞌde Uꞌ lugar li mèn conꞌa loo Uꞌ.
\p
\v 23 Per Jesús mbere loo loo Pedr. Ndxab Jesús loo Pedr:
\p ―Biiche loon, Pedr. Teꞌ nac Mebizya nacl loon. Susqueꞌ ndaꞌl xyàn lezon. Lùu indyeꞌthte xtùuz yéc xal ndli Diox xtùuz cón chenen. Lùu, ndxeꞌlequeꞌ, ndli xtùuz cón chenen xalqueꞌ ndli mèn izlyoꞌ xtùuz cón chenen.
\p
\v 24 Sya, ndxab Jesús loo myenꞌ xinꞌ mtéꞌth Jesús:
\p ―Cheleꞌ chol guꞌ ndlyaꞌs tyoo nque xísen ned ndan, leque guꞌ bli par neꞌlide guꞌ coꞌ ndyub yoꞌf lezoꞌ guꞌ par li guꞌi. Ndxeꞌlequeꞌ, gàp guꞌ lezoꞌ guꞌ no ñibeꞌ guꞌ loo lezoꞌ guꞌ par neꞌlide guꞌ conꞌ coꞌ ndyub yoꞌf lezoꞌ guꞌ li guꞌ. Blec lezoꞌ guꞌ par xec guꞌ tyactìi guꞌ coꞌseꞌ tyub nguꞌs mèn guꞌ no li mèn preb tethon mèn guꞌ por cón chenen ned nda naꞌ. Leꞌ sya, yaꞌ guꞌ too nque guꞌ xísen. Nda naꞌ.
\v 25 Tac mèn coꞌ ante ndoo lezoꞌ ndxath ndxeyꞌ no ndxath ndlyux mèn par que no mèn cheꞌnpeꞌ mèn, mèna ante ndoo lezoꞌ que no mèn cón cheꞌnpeꞌ izlyoꞌ ndxèꞌ. Loo mèna neꞌtaꞌde Diox lugar neꞌ neꞌ tyal Diox yòo ban no mèn Diox thidtene yiloa. Per mèn coꞌ láꞌ ryethe conꞌ coꞌ nac yalndac cheꞌnpeꞌ mèn coꞌ gác li mèn gan loo izlyoꞌ ndxèꞌ por cón chenen, loo mèna taꞌ Diox lugar no tyal Diox par yòo ban no mèna Diox thidtene yiloa.
\v 26 Lomisqueꞌ ne, ¿cón coꞌ thìb mbiꞌ no chó yalndac gác li mbiꞌ gan coꞌseꞌ gàc cheꞌnpeꞌ mbiꞌ dib athu loo izlyoꞌ tac cheleꞌ mbiꞌ tataa mod li, gab Diox loo mbiꞌ yende mod yòo ban no mbiꞌ Diox thidtene yiloa? Yende cón li mbiꞌ gan cheleꞌ mbiꞌ li tataa, ¿léꞌ? ¿Xá nee guꞌ, ne? ¿Plál quix thìb mbiꞌ loo Diox par yòo ban no mbiꞌ Diox coꞌseꞌ ngolo gunii Diox loo mbiꞌ neꞌtyalte Diox yòo ban no mbiꞌ Diox, àꞌ? Yende mod li thìb mbiꞌ gan li mbiꞌ tataa, ¿léꞌ?
\v 27 Tac coꞌseꞌ gàc huiz galen loo izlyoꞌ ndxèꞌ tedib vez, daa coꞌ mbal yáal loo izlyoꞌ xalqueꞌ ndxáal chol mèn loo izlyoꞌ, daa gal xalqueꞌ nac ryethe conꞌ roo conꞌ xèn coꞌ nac xuden Diox. No galen con angl coꞌ nzo loo xuden Diox. Axta syareꞌ quix thìb thìb mèn cón cheꞌn mèn loo Diox xalqueꞌ ngòc mod coꞌ ngòp mèn láth nziriꞌ mèn loo izlyoꞌ ndxèꞌ, que naca mbli mèn conꞌ huen, que naca mbli mèn conꞌ yeꞌrsinꞌ.
\v 28 Lìcpeꞌ baꞌi, na ngue nii loo guꞌ: Nzo ndxep mèn coꞌ nziriꞌ loon trèꞌ coꞌ neꞌgathte axta coꞌseꞌ gàc huiz huiꞌ mèna loon, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn, coꞌseꞌ gàc tiemp coꞌ gal ñibeꞌpeꞌen loo mèn.
\c 17
\s Jesús mzyeꞌ loo loo son myenꞌ xinꞌ mtéꞌth Jesús
\r (Mr. 9.2–13; Lc. 9.28–36)
\p
\v 1 Ngolo xop huiz ngòc conꞌa, mbeꞌ Jesús Pedr no mbeꞌ Jesús Cob no mbeꞌ Jesús Juàn, hues Cob. Mbeꞌ Jesús yon myenꞌa loo thìb yii roo.
\v 2 Láth ngo no Jesús myenꞌ loo yiia, chàa, mzyeꞌ loo loo Jesús loo myenꞌ. Gunaa loo Jesús xal loo huiz coꞌseꞌ nguin bée rol huiz. Nde nxonꞌ, xab Jesús coꞌ noc Jesús ante nagus bèellequeꞌ gunaa xalqueꞌ thìb conꞌ coꞌ nquée xnìi.
\v 3 Láth nzi li myenꞌ xinꞌ mtéꞌth Jesús xtùuz cón ndxàc loo Jesús, chàa, ngroꞌ too Moisés no Lii coꞌ mdeꞌth diꞌs coꞌ ndxab Diox póla. Ngure toodiꞌs no Moisés no Lii Jesús.
\v 4 Sya, ndxab Pedr loo Jesús:
\p ―Tad, susqueꞌ huen naca nzo naꞌ trèꞌ, cara. ¿Chéꞌ ndlyaꞌs Uꞌ toxcuaꞌ nuꞌ son ramad par yòo guꞌ? Thìba par yòo Uꞌ. Tediba par yòo Moisés. Leꞌ tediba na, par yòo Lii.
\p
\v 5 Tatabeꞌ ndoo toodiꞌs Pedr con Jesús, chàa, ngulàa beu. Mtauꞌ beu loo ryete xaꞌ. Látha, chàa, mbyèn thìb diꞌs leꞌn beu coꞌ ndxab:
\p ―Mbiꞌ ndxèꞌ nac xganꞌen. Anzeꞌf ngudloon no lezon mbiꞌ ndxèꞌ. Bìn guꞌ diꞌs coꞌ ndyoodiꞌs mbiꞌ loo guꞌ, ndee guꞌ.
\p
\v 6 Texal mbìn myenꞌ xinꞌ mtéꞌth Jesús diꞌs coꞌ mbyèna, ale mcuau myenꞌ. Ale, ngulàa cotloo myenꞌ loo yòo, tant mzyeb myenꞌ.
\v 7 Sya, mbii gax Jesús coꞌteꞌ nzi myenꞌ, coꞌteꞌ ngulàa cotloo myenꞌ. Mxoꞌf Jesús yaꞌ Jesús lad myenꞌ. Ndxab Jesús loo myenꞌ:
\p ―Goo che guꞌ, ey. Neꞌzyebte guꞌ.
\p
\v 8 Coꞌseꞌ ngo che myenꞌ, ngüiꞌ ndxèꞌ myenꞌ. Ngüiꞌ baꞌ myenꞌ. ¿Máa Moisés ryop Lii? Per ñèe myenꞌ yende Moisés. No yende Lii. Ante Jesús no maste ñèe myenꞌ ndoo.
\p
\v 9 Sya, mbii Jesús con myenꞌ loo yiia. Láth nde làa tùub Jesús con myenꞌ leꞌn yiia, Jesús mnibeꞌ loo myenꞌ. Ndxab Jesús loo myenꞌ:
\p ―Yende chó loo gabte guꞌ leꞌ guꞌ gunèe conꞌ coꞌ mxyoꞌf loo loo guꞌ, ndee. Neꞌtaꞌde guꞌ cuent cón cheꞌn coꞌ gunèe guꞌa loo mèn axta coꞌseꞌ gàc huiz ryo xban daa làth mèn nguth, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ. Axta syareꞌ, taꞌ guꞌ cuent loo mèn.
\p
\v 10 Sya, mnibdiꞌs myenꞌ xinꞌ mtéꞌth Jesús loo Jesús cón cheꞌn coꞌ mbez maistr coꞌ ndluꞌ cón cheꞌn ley coꞌ mxoꞌf Moisés loo mèn leꞌ Lii yiꞌth. Ndxab myenꞌ loo Jesús:
\p ―Tad, ftaꞌ Uꞌ cuent loo nuꞌ ¿xá mod chonon mbez maistra loo mèn leꞌ ner Lii yiꞌth, àꞌ?
\p
\v 11 Jesús mcàb loo myenꞌ. Ndxab Jesús loo myenꞌ:
\p ―Lìcqueꞌ nac xal mbez mèn leꞌ Lii yiꞌth. Lìca, ngoleꞌ Lii làth mèn leꞌn tiemp ndxèꞌ. Lii mbli par lyàa yéc mèn no lyàa lezoꞌ mèn no zyeꞌ mod coꞌ ndxàp mèn par thìb lìte yòo mèn loo cón cheꞌn Diox tedib vez.
\v 12 Per daa ngue nii loo guꞌ tedib vez: Lii mbiꞌthleꞌ. No neꞌndaꞌde mèn cuent leꞌ Lii nac mbiꞌ coꞌ mbiꞌthleꞌ. Ndxeꞌlequeꞌ, mbli mèn ngòc nguàal conꞌ xal mblyaꞌs mèn con mbiꞌ coꞌ ngòc Lii. Lomisqueꞌ mod ne, tataa tetìi mèn daa xal lyaꞌs mèn, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn.
\p
\v 13 Axta syareꞌ, mdaꞌ myenꞌ xinꞌ mtéꞌth Jesús cuent leꞌ Jesús ngue taꞌ cuent loo myenꞌ cón cheꞌn Juàn Bautist.
\s Jesús mbli mbyac thìb mbyòo coꞌ mque no yíiz enferesi.
\r (Mr. 9.14–29; Lc. 9.37–43)
\p
\v 14 Texal mzin Jesús con myenꞌ xinꞌ mtéꞌth Jesús loo mèn coꞌ mqueltàaleꞌ coꞌ nzi bed, ngroꞌ thìb mbiꞌ xiꞌth mèna. Mbii gax mbiꞌa loo Jesús. Mdub xib mbiꞌ loo Jesús. Ndxab mbiꞌ loo Jesús:
\p
\v 15 ―Tad, gulat lezoꞌ Uꞌ gunèe Uꞌ mbyòo daa ndxèꞌ. Nde teeleꞌ ndyac mbyòo daa ndxèꞌ yíiz mbii. Cadqueꞌ coꞌseꞌ nquée mbii cheꞌn yíiz ndxèꞌ loo mbyòo, anzeꞌf nè nquée mbii mbyòo. No nde teeleꞌ ngobii mbii mbyòo loo quìi. No ngobii mbii mbyòo leꞌn nít.
\v 16 No nalleꞌ ndal non mbyòo loo myenꞌ xinꞌ mtéꞌth Uꞌ trèꞌ par belꞌqueꞌ li myenꞌ gan teyac myenꞌ mbyòo. Per axta nalleꞌ tarte li myenꞌ gan teyac myenꞌ mbyòo.
\p
\v 17 Sya, cabii ndxab Jesús loo mbii. Ndxab Jesús:
\p ―¡Aa, mèn coꞌ nziriꞌ loo izlyoꞌ tiemp ndxèꞌ! ¡Susqueꞌ thidtene indxelaꞌste guꞌ loon no indxelaꞌste guꞌ conꞌ mbezen loo guꞌ! ¡Susqueꞌ nalaꞌs guꞌ no naad guꞌ no nguud guꞌ! ¡Axta pól tolo go non guꞌ par lin gan gàc nadoꞌ guꞌ loon! No ¡axta pól tolo nquin xequen con guꞌ tuaꞌthe nalaꞌs guꞌ no tuaꞌthe naad guꞌ no nguud guꞌ! Huàa xi mbyòo. Yiꞌth mbyòo ndxèꞌ. Ñeeneꞌ.
\p
\v 18 Sya, mbyoo Jesús xpii yeꞌrsinꞌa. Ante gunii Jesús loo xpii yeꞌrsinꞌa, ngro xpii yeꞌrsinꞌa loo mbyòo. Ale leque hora mbyac mbyòo.
\p
\v 19 Ngolo mbli Jesús ngòc conꞌa loo mbyòo, sya, xexte mdoodiꞌs myenꞌ xinꞌ mtéꞌth Jesús thìb lad con Jesús. Mnibdiꞌs myenꞌ loo Jesús. Ndxab myenꞌ:
\p ―Tad, ¿chonon neꞌngácte nuꞌ ngoꞌ nuꞌ xpii yeꞌrsinꞌa loo mbyòo, àꞌ?
\p
\v 20 Jesús ndxab loo myenꞌ:
\p ―Neꞌngácte guꞌ ngoꞌ guꞌ xpiia loo mbyòoa tac guꞌ pente ndxelaꞌs loon. Lìcpeꞌ baꞌi, na nii loo guꞌ: Cheleꞌ guꞌ ndxelaꞌs ndxepte loon xalte nac thìb biz mostaz, guꞌ gác gab guꞌ loo yii coꞌ ndub goꞌ: Biiche trèꞌ, yii. Huàa tub tedib lugar baꞌ. Yiia biiche. Yende chó conꞌ neꞌgácte guꞌ li guꞌ coꞌ gàc cón chenen cheleꞌ guꞌ, lìcqueꞌ, yilaꞌspeꞌ loon no yilaꞌspeꞌ guꞌ loo conꞌ lin.
\v 21 Per thìb loo xpii yeꞌrsinꞌ xal xpii yeꞌrsinꞌ coꞌ ngòo loo mbyòoa, neꞌryoꞌde tuaꞌte. Ndxeꞌlequeꞌ, xpii yeꞌrsinꞌa ryoꞌ ante coꞌseꞌ cuez mèn Diox coꞌseꞌ cue xlat mèn.
\s Jesús mbere, ngue taꞌ cuent loo myenꞌ xinꞌ mtéꞌth Jesús leꞌ Jesús gath.
\r (Mr. 9.30–32; Lc. 9.43–45)
\p
\v 22 Láth thidte mque tee no Jesús myenꞌ xinꞌ mtéꞌth Jesús par ned leꞌn yèezyaꞌ cheꞌn làaz mèn galile, Jesús ndxab loo myenꞌ xinꞌ mtéꞌth Jesús:
\p ―Daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ, thìb ned mèn tyenxùꞌ daa par taꞌ mèna daa loo tedib ned mèn coꞌ tetìi daa.
\v 23 No guth mèna daa. Per coꞌseꞌ yilo son huiz nguth daa, daa ryo xbanqueꞌ.
\p Coꞌseꞌ mbìn myenꞌ xinꞌ mtéꞌth Jesús tataa mdeꞌth Jesús diꞌs loo myenꞌ, anzeꞌf mxi lezoꞌ myenꞌ.
\s Jesús mdaꞌ tmi coꞌ nac ayud coꞌ mdub mèn par tyoxcuaꞌ templ tiempa.
\p
\v 24 Coꞌseꞌ mzin Jesús con myenꞌ xinꞌ mtéꞌth Jesús leꞌn yèez Capernaum, leꞌpeꞌ nzi tee mèn coꞌ nthop tmi coꞌ nquin mèn par tyoxcuaꞌ templ. Ngua mèna loo Pedr. Mnibdiꞌs mèna loo Pedr:
\p ―Pedr, ¿chéꞌ neꞌtaꞌde maistr guꞌ plá pes par ayud cheꞌn templ, càꞌ?
\p
\v 25 Pedr mcàb loo mèna. Ndxab Pedr loo mèna:
\p ―Peser taꞌ maistra.
\p Leꞌ sya, texal ngòo Pedr leꞌn nyòo coꞌteꞌ nzo Jesús, ale ner Jesús gunii loo Pedr. Ndxab Jesús loo Pedr:
\p ―¿Xá neel, Mon? ¿Chó loo mèn ndli mèn coꞌ ñibeꞌ loo izlyoꞌ ndxèꞌ cuent ñaꞌb mèna tmi par taꞌ mèn ayud cheꞌn contribución, àꞌ? ¿Chéꞌ ndli mèna cuent ngue naꞌb mèna ayuda loo mèn gulàazpeꞌ mèn o chéꞌ ndli mèna cuent ñaꞌb mèn ayud loo mèn tith coꞌ nde làazpeꞌ mèn coꞌ nac trèꞌ, càꞌ?
\p
\v 26 Pedr mcàb loo Jesús. Ndxab Pedr:
\p ―Mèna ñaꞌb ayud loo mèn tith.
\p Sya, ndxab Jesús loo Pedr:
\p ―Cheleꞌi tataa nac, leꞌ sya, mèn gulàaz cheꞌn mèn coꞌ ñibeꞌ inquinte quix tmi cheꞌn contribución sya, xàa.
\v 27 Per par neꞌtaꞌde naꞌ xyàn lezoꞌ mèn baꞌ, huàa loo lagun coꞌ nzi goꞌ. Huàa lobii lansuel leꞌn lagun. Leꞌ sya, ner mbèel coꞌ yigaa loo lansuel, tyenl mbèela. No xalꞌ ro mbèela. Leꞌn ro mbèela ryoꞌ thìb pes fchòo plat, coꞌ nee diꞌs, thìb pes. Con sobr thìb pesa taꞌl ayud loo mèna cón cheꞌnl no taꞌl ayud cón chenen coꞌ nac impuest coꞌ ñaꞌb mèna loo naꞌ, ndee.
\c 18
\s Trèꞌ ndluꞌ leꞌ myenꞌ xinꞌ mtéꞌth Jesús mnibdiꞌs loo Jesús chó myenꞌ gàc myenꞌ coꞌ más ñibeꞌ loo mèn.
\r (Mr. 9.33–37; Lc. 9.46–48)
\p
\v 1 Leque leꞌn huiza myenꞌ xinꞌ mtéꞌth Jesús thidte mqueltàa loo Jesús. Mnibdiꞌs myenꞌ loo Jesús. Ndxab myenꞌ:
\b
\p ―Tad, ¿chó mèn nac más mèn roo no mèn xèn coꞌteꞌ ñibeꞌpeꞌ Diox loo béꞌ nalleꞌ, àꞌ?
\b
\p
\v 2 Sya, ngurez Jesús thìb mbedbiꞌ chuꞌth. Mdoo Jesús mbedbiꞌ chuꞌtha loo myenꞌ.
\v 3 Ndxab Jesús loo myenꞌ:
\b
\p ―Lìcqueꞌ nac coꞌ nde niin loo guꞌ ndxèꞌ: Cheleꞌ guꞌ neꞌtyalte lyàa yéc guꞌ no lyàa lezoꞌ guꞌ no zyeꞌ mod coꞌ ndxàp guꞌ par gàp guꞌ mod xal ndxàp mbedbiꞌ chuꞌth ndxèꞌ mod, cheleꞌ guꞌ neꞌtaade li, neꞌtyalte Diox taꞌ Diox lugar loo guꞌ yòo guꞌ loo cón cheꞌn Diox par ñibeꞌpeꞌ Diox loo guꞌ.
\v 4 Cona, ngue niin loo guꞌ: Mèn coꞌ gàc más mèn roo no mèn xèn coꞌ ñibeꞌpeꞌ Diox loo, mèna nac mèn coꞌ indyeꞌste no coꞌ inxyalꞌte. No ndxàc mèna mèn nadoꞌ coꞌ ndxàp mod xal mbedbiꞌ chuꞌth ndxèꞌ.
\v 5 Leꞌ chol mèn coꞌ tyal taꞌ lugar yòo mèn coꞌ ndxelaꞌs loon làth mèna tac ndxelaꞌs mèna loon, mastaleꞌ nac mèna mèn nadoꞌ xal mbedbiꞌ chuꞌth ndxèꞌ, ndxàca loo mèna ndyalqueꞌ mèna no ndaꞌ mèna lugar ndxòon làth mèna.
\s Trèꞌ ndluꞌ Jesús loo mèn cón cheꞌn mèn coꞌ asendli par cuaꞌn mèn coꞌ pente mtlo ndxelaꞌs loo cón cheꞌn Jesús xtol mèn.
\r (Mr. 9.42–48; Lc. 17.1–2)
\p
\v 6 Chol guꞌ coꞌ asendli par cuaꞌn mèn coꞌ ndxelaꞌs loon, coꞌ nac mèn nadoꞌ coꞌ indyeꞌste no coꞌ inxyalꞌte, xquin mèn no xtol mèn, más huen gàca loo guꞌ quedóꞌ mèn thìb quèe yees yen guꞌ no yiloa cobii mèn guꞌ loo níttóꞌ par tataa mod dyep guꞌ leꞌn níttóꞌ.
\v 7 Susqueꞌ nazab ndxàca loo mèn loo izlyoꞌ ndxèꞌ tac anzeꞌf thìb conꞌ nzo coꞌ ndli par cuaꞌn mèn xtol mèn no xquin mèn. De tods mod nzoqueꞌ conꞌ coꞌ ndli ncuaꞌn mèn xquin mèn no xtol mèn loo izlyoꞌ. Per más nalyat gàca loo mèn no más nè gàca loo mèn coꞌ ndli ncuaꞌn taamas mèn xquin mèn no xtol mèn loo izlyoꞌ ndxèꞌ.
\p
\v 8 Cona, ngue niin loo guꞌ: Cheleꞌ guꞌ ndli cuent leꞌ nii guꞌ o yaꞌ guꞌ, lìcqueꞌ, ndli par ncuaꞌn guꞌ xtol guꞌ no xquin guꞌ por mdyub yoꞌf lezoꞌ guꞌ loo conꞌ coꞌ mque no guꞌ no conꞌ coꞌteꞌ ngua guꞌ, más huen choꞌ guꞌ nii guꞌ no yaꞌ guꞌ no tith blobii guꞌ nii guꞌ no yaꞌ guꞌ loo guꞌ. Tac más huen gàca loo guꞌ yòo ban no guꞌ Diox thidtene, yende yaꞌ guꞌ o yende nii guꞌ, leque lyàa guꞌ leꞌn yeꞌrbìil coꞌteꞌ nzo quìi no bèel coꞌ neꞌyuꞌde thidtene con ryop nii guꞌ no con ryop yaꞌ guꞌ.
\v 9 No cheleꞌ guꞌ ndli cuent leꞌ ngudloo guꞌ, lìcqueꞌ, nac coꞌ ndli ncuaꞌn guꞌ xquin guꞌ par tyub yoꞌf yeꞌrsinꞌ lezoꞌ guꞌ loo conꞌ ngüiꞌ guꞌ, más huen bloꞌ guꞌ ngudloo guꞌ no blobii guꞌi tith loo guꞌ. Tac más huen gàca loo guꞌ cheleꞌ guꞌ yòo coꞌteꞌ yòo ban no guꞌ Diox thidtene con sate ngudloo guꞌ leque yòo guꞌ yeꞌrbìil coꞌteꞌ ndxetoo quìi no bèel coꞌ neꞌyuꞌde thidtene con ryop ngudloo guꞌ. Por cona, thidtene neꞌcuaꞌnte guꞌ xquin guꞌ par neꞌyòode guꞌ leꞌn yeꞌrbìil.
\s Jesús ngue tetac loo mèn xal coꞌseꞌ mdyuhuan thìb mbacxilꞌ no mbere pastor, mzyal pastor mbacxilꞌ tedib vez.
\r (Lc. 15.3–7)
\p
\v 10 Nde niin tedib conꞌ loo guꞌ, ne, ey: Neꞌcoꞌ toode guꞌ myenꞌ bix coꞌ nac xal myenꞌ bix ndxèꞌ thìb lad loon, ndee guꞌ. Tac angl coꞌ nac angl cheꞌn myenꞌ bix thidtene nzo loo xuden Diox coꞌ nzo loo béꞌ.
\v 11 Tac daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ, daa ndal par teláꞌen mèn loo conꞌ ryes, mèn coꞌ nzi tee huan loo Diox por conꞌ yeꞌrsinꞌ coꞌ ndli mèn.
\p
\v 12 ¿Xá nee guꞌ? Cheleꞌ thìb mbiꞌ ngue no thìb ayo mbacxilꞌ no mtuhuan mbiꞌ thìb mbacxilꞌ, ¿chéꞌ neꞌqueltàade mbiꞌ ryete thap gal nzo siꞌn thap mbacxilꞌa thidte lugar par ya cuaꞌn mbiꞌ thìz mbacxilꞌ coꞌ mdyuhuana, càꞌ? Queltàaqueꞌ mbiꞌ rye mbacxilꞌ thidte lugar, ¿léꞌ? Tataaqueꞌ li mbiꞌ.
\v 13 No cheleꞌ mbiꞌ mbli gan mzyal mbacxilꞌ coꞌ mdyuhuana, daa ngobeꞌ más tyac lezoꞌ mbiꞌ coꞌseꞌ ngolo mzyal mbiꞌ mbacxilꞌa leque tyóo mbiꞌ cón cheꞌn rye thap gal nzo siꞌn thap mbacxilꞌ coꞌ mtanꞌ mbiꞌa coꞌ neꞌnduhuanta, ¿léꞌ?
\v 14 Cona, ngue niin loo guꞌ: Lomisqueꞌ mod ne, xud guꞌ coꞌ nzo loo béꞌ indlyaꞌste tyuhuan nec thìb mèn coꞌ nac mèn prob no mèn ladyox coꞌ ñaa xal ñaa mbedbiꞌ chuꞌth ndxèꞌ.
\s Jesús ngue bez loo mèn: Fcuaꞌn guꞌ mod teriꞌth tecanꞌ guꞌ conꞌ yeꞌrsinꞌ coꞌ ngue li hues xtàa guꞌ loo guꞌ.
\r (Lc. 17.3)
\p
\v 15 Cheleꞌ thìb mèn coꞌ nac hues xtàa guꞌ li conꞌ yeꞌrsinꞌ loo guꞌ, xexte bloꞌ guꞌ xaꞌ thìb lad par tyoodiꞌs no guꞌ xaꞌ cón cheꞌn conꞌ mbli no xaꞌ guꞌ. Bli guꞌ par taꞌ xaꞌa cuent cón cheꞌn xquin xaꞌ no xtol xaꞌ loo guꞌ. Cheleꞌ xaꞌa li cas loo diꞌs coꞌ tyoodiꞌs guꞌa, leꞌ sya, mbli guꞌ gan mbyuꞌ mbyàl loo diꞌsa no loo cuenta cón cheꞌn ryop guꞌ xaꞌ.
\v 16 Per cheleꞌ hues xtàa guꞌa neꞌlide cas xal nac diꞌs coꞌ ndyoodiꞌs no guꞌ hues xtàa guꞌ, sya, gurez guꞌ chop o son mèn par queltàa no guꞌ mèna par non mèna no taꞌ mèna cuent xá nac diꞌs coꞌ tyoodiꞌs guꞌ con hues xtàa guꞌ. Leꞌ sya, chop o son mèna nac testiu coꞌ taꞌ cuent xal nac diꞌs coꞌ mdoodiꞌs guꞌ con hues xtàa guꞌ.
\v 17 Lomisqueꞌ ne, cheleꞌ xaꞌa neꞌlide cas loo chop o son guꞌ coꞌ queltàa con xaꞌa, guuz guꞌi no ftaꞌ guꞌ cuent loo mèn coꞌ nqueltàa loo cón chenen. Cheleꞌ xaꞌa neꞌlide cas loo mèn coꞌ nqueltàa loo cón chenen, sya, bli guꞌ cuent leꞌ xaꞌa nac xal mèn coꞌ indxelaꞌste loo Diox o nac xaꞌa xal thìb mèn coꞌ ndlixùꞌ cobrar tmi coꞌ nac cheꞌn nación naꞌ par taꞌxùꞌ mèna tmi loo gobiern coꞌ ndub ciuda Rom.
\p
\v 18 Lìcpeꞌ baꞌi, na ngue nii loo guꞌ: Conꞌ coꞌ ñibeꞌ guꞌ loo mèn yende mod li mèn, conꞌa gàc conꞌ coꞌ mnibeꞌ lezon loo béꞌ gàc conꞌ coꞌ yende mod li mèn, mèn coꞌ nzo loo cón chenen. No conꞌ coꞌ ñibeꞌ guꞌ loo mèn par li mèn, conꞌa gàc conꞌ coꞌ mnibeꞌ lezon loo béꞌ gàc loo mèn no conꞌ coꞌ li mèn, mèn coꞌ nqueltàa loo cón chenen.
\p
\v 19 Niin loo guꞌ, ne: Cheleꞌ chop guꞌ thidte gàc xtùuz no thidte gàc lezoꞌ guꞌ loo conꞌ lyaꞌs guꞌ ñaꞌb guꞌ loo Diox loo izlyoꞌ ndxèꞌ coꞌseꞌ cuez guꞌ Diox, leꞌ sya, xuden Diox coꞌ nzo loo béꞌ li par que no guꞌ conꞌ ñaꞌb guꞌ. No li xuden Diox gàcqueꞌ conꞌ coꞌ ñaꞌb guꞌ loo xuden Diox.
\v 20 Tac coꞌteꞌ nzo chop o son mèn coꞌ nqueltàa loo cón chenen por lèen, làth mèna nzoquen.
\p
\v 21 Sya, mbii gax Pedr loo Jesús. Mnibdiꞌs Pedr loo Jesús. Ndxab Pedr:
\p ―Tad, cheleꞌ thìb huesen cuaꞌn xtol no xquin huesen huax vez loon, ¿plá vez teriꞌth tecanen conꞌ coꞌ ndli huesen loon, àꞌ? ¿Chéꞌ teriꞌth tecanen conꞌ yeꞌrsinꞌ coꞌ ndli huesen loona gaz vez, càꞌ?
\p
\v 22 Jesús mcàb loo Pedr. Ndxab Jesús:
\p ―Iniiden lool: Teriꞌthl no tecanꞌl xèn xyàn coꞌ ndli huesla lool gazte vez, Pedr. Ndxeꞌlequeꞌ, ngue niin lool: Fteriꞌth ftecanꞌ xèn xyàn coꞌ ndli huesl loola thap ayo nzo thap gal nzo siꞌ vez loo huesl.
\s Jesús ngue tetac loo mèn cón cheꞌn moz coꞌ neꞌnteriꞌthte yalguteꞌf cheꞌn xtàa moz loo moz.
\p
\v 23 Nde niin tedib conꞌ loo guꞌ, ey: Leꞌ mod coꞌ ñibeꞌpeꞌ Diox loo mèn no mod coꞌ ndlyaꞌs Diox gàp mèn làth xtàa mèn nac taandxèꞌ: Mèn coꞌ ñibeꞌpeꞌ Diox loo nac xal nde niin loo guꞌ ndxèꞌ xal thìb rey coꞌ mblyaꞌs coꞌ cuent cón cheꞌn yalguteꞌf coꞌ ndeb rye moz loo rey.
\v 24 Leꞌpeꞌ mtlo rey, ngue goꞌ rey cuent plál ndeb moz loo rey, nde no mèn thìb mbiꞌ coꞌ ngroꞌ teꞌf huax millón pes loo rey.
\v 25 Per com leꞌ moz ndyac ingue node moz tmi par quix moz tmi coꞌ ndeb moz loo reya, ¿léꞌ?, rey mnibeꞌ loo taamas moz rey ya thoꞌ moz mbiꞌa nazalꞌ rye mèn famil mbiꞌ con rye coꞌ ndxàp mbiꞌ liz mbiꞌ par tataa mod yax mase ndxep yalguteꞌf coꞌ ndeb mbiꞌ loo rey.
\p
\v 26 Sya, yende izlyoꞌ, mdub xib mbiꞌ loo rey coꞌ ngòc patrón mbiꞌ. Nalyat ndxab mbiꞌ loo rey: Tad, ftedóꞌ Uꞌ thìb leꞌ larꞌ yéc Uꞌ loo cuent ndxèꞌ. Fchaꞌlaꞌs Uꞌ taandxep con daa. Sauꞌ sauꞌ quixen ryete yalguteꞌf coꞌ ndeben loo Uꞌ, ndee Uꞌ.
\v 27 Leꞌ sya, rey coꞌ ngòc patrón moza, ale leꞌleꞌ mblyat lezoꞌ patrón gunèe patrón moza. Mtonꞌ rey coꞌ ngòc patrón moza rye yalguteꞌf coꞌ ngroꞌ teꞌf moz loo rey, coꞌ nee diꞌs, yende cón ndeb moz loo reya. Ngoloa, mblaꞌ rey moz, ndyàa moz par liz moz.
\v 28 Per pente ngroꞌ moza. Ndyàa moz. Mzyálꞌ moz tedib xtàa moz ned ndyàa moz coꞌ ndeb pláte pes loo moz. Leꞌ sya, moz coꞌ más ngroꞌ teꞌfa mxen tedib moza. Ale mdèe moz coꞌ más ngroꞌ teꞌfa yen tedib moza. No mtlo ngòc nayiꞌ moza loo xtàa moz. Mdiꞌ moza yen xtàa moza. Ndxab moz: ¡Máa yob yécl, sin vergüenz! ¿Pól quixl tmi coꞌ ndebl loon? Inthyontel. Ale nduhuaxùꞌl tmi daa.
\p
\v 29 Sya, moz coꞌ nac xtàa mbiꞌa mdub xib loo mbiꞌ. No nalyat mdeꞌf ro moz. Ndxab moz loo mbiꞌ: Amiu, Compañer, ftedóꞌ thìb leꞌ larꞌ yécl loo cuent ndxèꞌ, yey. Fchaꞌlaꞌs taandxep con daa. Sauꞌ sauꞌ quixen ryethe yalguteꞌf coꞌ ndeben lool, ndee.
\v 30 Per mbiꞌ coꞌ ngòc ner moza neꞌndalte nchaꞌlaꞌs loo mbiꞌ por yalguteꞌf chuꞌth cheꞌn moz coꞌ ngòc xtàa mbiꞌa. Ndxeꞌlequeꞌ, ngua taꞌ mbiꞌ coꞌ ngòc ner moza part loo mèn nac zinꞌ. Leꞌ mèn nac zinꞌ na, mbli mandad mque moza leziꞌf axta quix moza no zib moza tmi coꞌ ndeb moz loo tedib mbiꞌ coꞌ nac xtàa moz.
\v 31 Coꞌseꞌ gunèe taamas xtàa moz moz ndxàc conꞌa, anzeꞌf mdenꞌ moza no mxi lezoꞌ moz ngòc conꞌa. Sya, mxen taamas moza ned. Ngua nee moza loo rey coꞌ ngòc patrón moza ryete conꞌ ngòc loo prob tedib moza.
\p
\v 32 Sya, mbli rey coꞌ ngòc patrón moza mandad par yeꞌth mbiꞌ coꞌ ngòc ner moza loo rey. Sya, ndyeꞌth no mèn mbiꞌ coꞌ ngòc ner moza loo rey. Rey ndxab loo moz: Susqueꞌ mèn yeꞌrsinꞌl, moz. No mozdèe lùu. Na mtonꞌ ryethe yalguteꞌf coꞌ ngroꞌ teꞌf lùu loon tac nalyat mdeꞌf rol mdoodiꞌsl loon, ¿léꞌ?
\v 33 Lùu, ne, ndxàal nglat lezoꞌl ngnèel xtàa mozl xalqueꞌ ngulat lezon gunèenl.
\v 34 Sya, mbiꞌ coꞌ ngòc reya anzeꞌf ngocloo tínꞌ gunèe mbiꞌ coꞌ ngòc ner moza. Mbli rey mandad ya tin mèn mbiꞌ coꞌ ngòc ner moza axtaqueꞌ quix mbiꞌ ryethe yalguteꞌf coꞌ ndeb mbiꞌ loo rey.
\p
\v 35 Coꞌseꞌ ngolo mdoodiꞌs Jesús rye diꞌsa, ndxab Jesús loo myenꞌ xinꞌ mtéꞌth Jesús:
\p ―Tataa li xuden Diox coꞌ nzo loo béꞌ con guꞌ cheleꞌ guꞌ neꞌteriꞌthte no neꞌtecanꞌte, dib nzo yéc guꞌ no dib nzo lezoꞌ guꞌ, cón cheꞌn xèn xyàn coꞌ ndli hues xtàa guꞌ loo guꞌ.
\c 19
\s Jesús ngue luꞌ xá mod indxàalte láꞌ mèn saꞌl mèn.
\r (Mr. 10.1–12; Lc. 16–18)
\p
\v 1 Ngolo mdoodiꞌs Jesús ryete diꞌsa loo mèn, ngroꞌ Jesús leꞌn yèezyaꞌ cheꞌn làaz mèn galile. Mxen Jesús ned. Ndyàa Jesús par ned leꞌn yèezyaꞌ cheꞌn làaz mèn jude coꞌ nziriꞌ par ned ndlyen huiz coꞌ nac tedib lad ro yóꞌbeꞌ Jordán.
\v 2 Anzeꞌf thìb mènléyꞌ mdoo nque xís Jesús. No mteyac Jesús huax mèn yíiz par ned ngua que tee Jesús.
\p
\v 3 Sya, ngua plá mèn xleyꞌ farise loo Jesús par ñee mèna ñeeneꞌ chéꞌ tli mèna gan gàal diꞌs mèna Jesús par tataa mod quexùꞌ queꞌ fals mèna Jesús yiloa. Asembli mèna, mnibdiꞌs mèna loo Jesús. Ndxab mèna:
\p ―¿Chéꞌ nzo mod láꞌ thìb mbiꞌ thìb xaꞌgot coꞌ nac saꞌlpeꞌ mbiꞌ por chol conꞌ bix coꞌ mbli xaꞌgota no maste, àꞌ?
\p
\v 4 Jesús mcàb loo mèna. Ndxab Jesús:
\p ―¿Chéꞌ tarte lab guꞌ diꞌs coꞌ ndub loo libr coꞌ nac xtiꞌs Diox, càꞌ? No ¿chéꞌ tarte taꞌ guꞌ cuent cón nee diꞌs diꞌsa? Coꞌseꞌ mblec Diox no mtoxcuaꞌ Diox izlyoꞌ, Diox mbli thìb conꞌ. Mblec Diox mènbiꞌ no mèngot loo izlyoꞌ.
\v 5 Lomisqueꞌ, ndub diꞌs loo libr coꞌ nac xtiꞌs Diox coꞌ mbez taandxèꞌ: Mèn coꞌ nac mènbiꞌ, láꞌ mèn xud mèn no láꞌ mèn xnaꞌ mèn par thidte queltàa mèna con xaꞌgot coꞌ gàc xinꞌ saꞌl mèna. Coꞌseꞌ tataa ndxàca loo ryop saꞌl mèna, ndxàca loo ryop saꞌl mèna leꞌ ryop saꞌl mèna ndxàc thidte bélꞌ no thidte zith loo Diox.
\v 6 Por cona, ngue niin loo guꞌ: Coꞌseꞌ nqueltàa thìb mènbiꞌ con thìb mèngot par selyaꞌ mènbiꞌ con mèngot, ya inacte ryop mèna chop. Ndxeꞌlequeꞌ, ryop mèna ngòc thidte bélꞌ no thidte zith loo Diox. Por cona, yende chó derech ngue no chol mèn par li mèn láꞌ thìb xaꞌbiꞌ thìb xaꞌgot coꞌ nac xinꞌ saꞌl xaꞌbiꞌ.
\p
\v 7 Sya, asembli mèn xleyꞌ farise. Mnibdiꞌs mèn xleyꞌ farise loo Jesús. Ndxab mèna:
\p ―¿Chonon mnibeꞌ Moisés taꞌ thìb mènbiꞌ, coꞌ nac saꞌl thìb xaꞌgot, yeꞌs coꞌ lèe act loo mèngot, sya ndli mènbiꞌ par tataa mod láꞌ mènbiꞌ xaꞌgot coꞌ nac saꞌl mènbiꞌ, sya?
\p
\v 8 Jesús ndxab loo mèna:
\p ―Aa, tataa mbli Moisés loo guꞌ tac Moisés non no nanee Moisés leꞌ guꞌ anzeꞌf naad no nguud guꞌ. Cona, mdaꞌ Moisés lugar taꞌ guꞌ yeꞌs coꞌ lèe act loo xaꞌgot par láꞌ guꞌ xaꞌgot coꞌ nac xinꞌ saꞌl guꞌ. Per neꞌndaꞌde Diox lugar ngàca tataa làth mèn ndooreꞌ gàc tiemp coꞌseꞌ yo ban Moisés.
\v 9 Na ngue nii loo guꞌ, ne: Leꞌ thìb xaꞌbiꞌ coꞌ láꞌ saꞌlpeꞌ no ingue lide saꞌlpeꞌ xaꞌbiꞌa yalburrid, no selyaꞌ xaꞌbiꞌa con tedib xaꞌgot, leꞌ sya, xaꞌbiꞌa ngue li yalburrid con tedib xaꞌgota. Lomisqueꞌ ne, cheleꞌ thìb xaꞌbiꞌ selyaꞌ con thìb xaꞌgot coꞌ mbláꞌ saꞌl, xaꞌbiꞌa ngue li yalburrid con xaꞌgota, ne.
\p
\v 10 Sya, myenꞌ xinꞌ mtéꞌth Jesús ndxab loo Jesús:
\p ―Cheleꞌi tataa ndxàc loo mènbiꞌ con xaꞌgot coꞌ nac saꞌl mènbiꞌ, indxàalte selyaꞌ mèn sya xàa, ndyac nuꞌ.
\p
\v 11 Jesús ndxab loo myenꞌ xinꞌ mtéꞌth Jesús:
\p ―Iryede mèn ndenꞌ cón cheꞌn diꞌs ndxèꞌ par tyubdiꞌs mèn loo diꞌs ndxèꞌ. Inacte diꞌs ndxèꞌ par tenꞌ rye mèn cón cheꞌn diꞌs ndxèꞌ. Ndxeꞌlequeꞌ, mèn coꞌ ndenꞌ no ndaꞌ mèn cuent nac mèna mèn coꞌ Diox ndli par tenꞌ mèn diꞌs no taꞌ mèn cuent cón cheꞌn diꞌs ndxèꞌ par tyubdiꞌs mèna loo diꞌs ndxèꞌ.
\v 12 Nzo huax mènbiꞌ coꞌ inselyaꞌde con mèngot. Nzo ndxep mènbiꞌ coꞌ ancual ngóol coꞌ inselyaꞌde con mèngot. No nzo taamás mènbiꞌ coꞌ inselyaꞌde con mèngot tac ngo mèn coꞌ mbli capón mèna. No nzo taamas mènbiꞌ taate mbyanꞌ. Inselyaꞌde mèna tac mèna mnibeꞌ loo lezoꞌ mèna ante li mèna sirv loo Diox no maste. Cona, ngue niin conꞌ ndxèꞌ loo guꞌ, guꞌ coꞌ ndenꞌ no coꞌ ndxòn diꞌs coꞌ ngue niin loo guꞌ ndxèꞌ par tyubdiꞌs guꞌ loon: Bìn guꞌ diꞌs no ftaꞌ guꞌ cuent cón nee diꞌs ndxèꞌ. No ftaꞌ guꞌ lugar yaaꞌd diꞌs ndxèꞌ leꞌn lezoꞌ guꞌ.
\s Jesús mdeꞌs mcàa myenꞌ bix par ndyac lezoꞌ myenꞌ con Jesús.
\r (Mr. 10.13–16; Lc. 18.15–17)
\p
\v 13 Làth xtauꞌa, mbiꞌth no mèn coꞌ nac xnaꞌ myenꞌ bix myenꞌ bix loo Jesús par xoꞌf Jesús yaꞌ Jesús lad myenꞌ no par cuez Jesús Diox cón cheꞌn myenꞌ. Per ndxeꞌlequeꞌ, myenꞌ xinꞌ mtéꞌth Jesús mtlo ngocloo. No mbyoo myenꞌ xinꞌ mtéꞌth Jesús xnaꞌ myenꞌ bix o mèn coꞌ nde no myenꞌ bixa.
\v 14 Sya, ndxab Jesús loo myenꞌ xinꞌ mtéꞌth Jesús:
\p ―Laꞌ guꞌ tetee myenꞌ bix baꞌ loon cheleꞌ myenꞌ bix baꞌ nde loon. Neꞌtauꞌte guꞌ loo mèn coꞌ nde no myenꞌ bix baꞌ. Tac mèn coꞌ ndyal no ndaꞌ mèna lugar ñibeꞌpeꞌ Diox loo mèna, ndxàca loo mèna ndxàc mèna xal myenꞌ bix baꞌ.
\p
\v 15 Ngolo mxoꞌf Jesús yaꞌ Jesús lad myenꞌ bixa, no ngolo ngurez Jesús Diox por cón cheꞌn myenꞌ bixa, mbii Jesús tya.
\s Thìb mbyòo coꞌ ngòc mbyòo ric mdoodiꞌs no Jesús.
\r (Mr. 10.17–31; Lc. 18.18–30)
\p
\v 16 Látha, mzin thìb mbyòo loo Jesús. Ndxab mbyòo loo Jesús:
\p ―Maistr Ndac, ¿chó conꞌ ndac tolo lin par thìb lìte yòo ban non Diox thidtene, àꞌ?
\p
\v 17 Jesús mcàb loo mbyòo. Ndxab Jesús loo mbyòo:
\p ―¿Chonon mbez lùu loon leꞌ daa nac thìb maistr ndac, àꞌ? Yende chó mèn coꞌ, lìcqueꞌ, nac mèn ndac. Angoluxte Diox nac xaꞌ ndac. Cheleꞌ lùu indlide cuent no indenꞌte lezoꞌl nac daa Diox, axta neꞌ neꞌ ñeel loon nac daa maistr ndac. Per cheleꞌ lùu, lìcqueꞌ, lyaꞌs yòo ban nol Diox thidtene, ftubdiꞌs xal nac diꞌs coꞌ ñibeꞌ ley coꞌ mxoꞌf Moisés loo mèn.
\p
\v 18 Mbyòo mcàb. Ndxab mbyòo loo Jesús:
\p ―¿Chópeꞌ yalñibeꞌ nac coꞌ más ñibeꞌ ley coꞌ mxoꞌf Moisés loo mèn par lina, àꞌ, Tad?
\p Jesús ndxab loo mbyòo:
\p ―Yalñibeꞌa nac diꞌs ndxèꞌ: Neꞌguthtel mèn; neꞌque tee lidel yalburrid; neꞌli huanꞌtel; neꞌtoxcuaꞌdel yalgutyèꞌ cón cheꞌn nec thìb mèn.
\v 19 Gòp mod gunèe xudl no xnaꞌl. Fqueꞌ lezoꞌ gunèe huesl no xtàal xalqueꞌ ngue lezoꞌl ñèel leque lùu.
\p
\v 20 Mbyòo ndxab loo Jesús:
\p ―Aa, Tad, ryete conꞌ coꞌ ñibeꞌ diꞌsa loo mèn par li mèn ndliquen desde ndoo roon no desde ndoo xènen. ¿Chéꞌ nzo chóreꞌ conꞌ ndxàc falt ndyac Uꞌ tolo lin, àꞌ, Tad?
\p
\v 21 Jesús ndxab loo mbyòo:
\p ―Cheleꞌ lùu, lìcqueꞌ, lyaꞌs gàc mèn nambìi no mèn nalì loo Diox, huàa thoꞌ ryethe conꞌ ndxàpl par ryoꞌ tmi looi. Yiloa quiꞌthl tmia loo mèn coꞌ ndyac yaltìi. Leꞌ sya, tataa mod tolo gàpl yalgonꞌ no yalndac loo béꞌ. Yiloa ndyeꞌthl. Tyoo nquel xísen. Nda naꞌ.
\p
\v 22 Per coꞌseꞌ mbìn mbyòo diꞌs coꞌ ndxab Jesús, nalyat mdeb ro mbyòo, ndyàa mbyòo, por tant ndxàp mbyòo cheꞌn mbyòo no nèe laꞌs mbyòo.
\p
\v 23 Sya, ndxab Jesús loo myenꞌ xinꞌ mtéꞌth Jesús:
\p ―¡Lìcqueꞌ nac coꞌ ngue niin loo guꞌ ndxèꞌ, cara! Axta arid nagàn naca par tyal mèn ric no taꞌ mèn ric lugar loo Diox par ñibeꞌpeꞌ Diox loo mèn ric.
\v 24 Beren, niin conꞌ ndxèꞌ loo guꞌ tedib vez: Más inagànte naca riid thìb máꞌ coꞌ lèe camell leꞌn yeꞌr coꞌ nac ngudloo thìb aguj leque tyal mèn ric no taꞌ mèn ric lugar loo Diox ñibeꞌpeꞌ Diox loo mèn ric.
\p
\v 25 Coꞌseꞌ mbìn myenꞌ xinꞌ mtéꞌth Jesús diꞌs coꞌ ndxab Jesús loo myenꞌ, ante mbuiꞌ myenꞌ no ante gunaa myenꞌ loo xtàa myenꞌ. Mnibdiꞌs myenꞌ loo xtàa myenꞌ. Ndxab myenꞌ:
\p ―Cheleꞌi tataa nac, ¿chó mèn gác lyáꞌ loo conꞌ ryes, sya?
\p
\v 26 Jesús xèe mbuiꞌ loo myenꞌ. No ndxab Jesús loo myenꞌ:
\p ―Yende mod li chol mèn gan li mèn conꞌ par lyáꞌ mèn loo conꞌ ryes. Per Diox ndxácqueꞌ li Diox chol conꞌ xal ndlyaꞌs Diox li Diox loo mèn. Yende chó mèn gác cuee càꞌ Diox loo chol conꞌ.
\p
\v 27 Sya, ndxab Pedr loo Jesús:
\p ―Tad, nuꞌ mbláꞌyaꞌ ryete conꞌ mque no nuꞌ no conꞌ ngòp nuꞌ. No ngue tee nquequeꞌ nuꞌ xís Uꞌ ned ngue tee Uꞌ. ¿Cón gàp nuꞌ no cón que no nuꞌ yiloa, sya?
\p
\v 28 Jesús mcàb loo myenꞌ. Ndxab Jesús:
\p ―Lìcpeꞌ baꞌi, na ngue nii loo guꞌ: Coꞌseꞌ gàc tiemp no coꞌseꞌ gàc cub ryethe conꞌ, no lomisqueꞌ, coꞌseꞌ tub ñibeꞌen, daa coꞌ mbal yáal loo izlyoꞌ xalqueꞌ ndxáal chol mèn, loo thìb asient coꞌteꞌ gàc thìb lugar coꞌteꞌ ñibeꞌpeꞌen por cón cheꞌn ryethe conꞌ roo conꞌ xèn coꞌ gàpen laꞌs niin no laꞌs yan huiza, leꞌ sya, guꞌ coꞌ ndoo nque xísen nalleꞌ, guꞌ coꞌ neꞌngláꞌde daa, ryete siꞌ fchop guꞌ tyub loo siꞌ fchop asient par tub rez guꞌ cón cheꞌn mèn nación Israel huiza, mèn coꞌ nac siꞌ fchop ned coꞌ mblec biz no bin.
\v 29 No ryete mèn coꞌ mbláꞌyaꞌ liz no coꞌ mbláꞌyaꞌ hues, no ftaꞌn, no bél, no xud, no xnaꞌ, no saꞌl, no xinꞌ, no xyòn ante por cón chenen no maste, mèna gàc cheꞌn no càayaꞌ mèna masreꞌ thìb ayo tant conꞌ loo coꞌ nac cheꞌn mèn coꞌ mbláꞌyaꞌ mèn. No más de cona, mèna yòo ban no Diox thidtene.
\v 30 Per nalleꞌ loo izlyoꞌ ndxèꞌ nzo huax guꞌ coꞌ nac mèn nación Israel. Guꞌ nzi li xtùuz anzeꞌf ntac guꞌ loo Diox no anzeꞌf mèn roo no mèn xèn nac guꞌ loo Diox por nac guꞌ mèn nación Israel. Per ndxeꞌlequeꞌ, Diox li leꞌ guꞌ gàc mèn beꞌthe loo Diox tac Diox ndxecloo ñèe guꞌ. Per part cón cheꞌn Diox, mèn coꞌ ingode guꞌ cuent anzeꞌf ntac mèn loo Diox, mèn coꞌ inacte mèn nación Israel, Diox li gàc huax mèna mèn coꞌ más ntac loo Diox leque guꞌ. No gàc mèna mèn coꞌ más ndyac lezoꞌ Diox ñèe Diox por mbli mèna cas loo cón cheꞌn Diox.
\c 20
\s Jesús ngue tetac loo mèn cón cheꞌn moz coꞌ mque zinꞌ loo rsinꞌ thìb patrón.
\p
\v 1 Nde niin thìb conꞌ loo guꞌ, myenꞌ, cón cheꞌn xá mod ncàba loo mèn, mèn coꞌ ndyal no mèn coꞌ ndaꞌ lugar ñibeꞌpeꞌ Diox loo mèn: Moda nee diꞌs nac xal thìb mbiꞌ coꞌ mque no thìb ranch. Mbiꞌa ngo chegà thìb xtilꞌ par nda cuaꞌn mbiꞌ moz coꞌ que zinꞌ par làa moz uv loo lus uv loo xyòn mbiꞌ. Mzyalqueꞌ mbiꞌ moz xtilꞌa.
\v 2 Sya, ndxab mbiꞌ coꞌ ngòc xuanꞌ yòo lus uva loo moz leꞌ mbiꞌ quix xop pes càa moz huiz par làa moz uv. Moz mdyalqueꞌ que moz zinꞌ no yax càa moz xop pes huiz. Ngolo mbli laꞌs mbiꞌ con moz leꞌ mbiꞌ tataa quix huiz moz, mtelꞌ mbiꞌ moz loo xyòn mbiꞌ par tlo moz, làa moz uv loo xyòn mbiꞌ.
\v 3 Ngoloa, ngroꞌ mbiꞌ como hor nquée guyèꞌ xtilꞌ tedib vez legue huiza. Gunèe mbiꞌ nziriꞌ ndxep moz coꞌ nalath loo xbiꞌ.
\v 4 Ndxab mbiꞌ loo moza: Daa ndlyaz ya guꞌ zinꞌ loo xyònen par ya làa guꞌ uv loo lus uv loo xyònen. No ndoo lìte gon ray guꞌ. Ngoloa, mxen moza ned. Nda moz zinꞌ loo xyòn mbiꞌ.
\v 5 Casqueꞌ rol huiz mbere mbiꞌ, ngroꞌ mbiꞌ, ngua cuaꞌn mbiꞌ moz tedib vez. No casqueꞌ hor mquée guyon bzyè mbere mbiꞌ, ngroꞌ mbiꞌ tedib vez par ngua li mbiꞌ lomisqueꞌ conꞌ loo taamas moz.
\v 6 Coꞌseꞌ ngóol hor mquée yugaꞌy bzyè, mbere mbiꞌ, ngroꞌ mbiꞌ tedib vez. Nda mbiꞌ loo xbiꞌ. Mzyálꞌ mbiꞌ taandxep moz coꞌ nalath coꞌ nziriꞌ par neda. Ndxab mbiꞌ loo moza: ¿Chonon nziriꞌ guꞌ trèꞌ dib huiz nalze no neꞌnquede guꞌ zinꞌ, yey?
\v 7 Moz ndxab loo mbiꞌ: Angngureꞌ nuꞌ trèꞌ nalze tac yende chó mèn coꞌ nac patrón ngzálꞌ nuꞌ par ngnaꞌb nuꞌ zinꞌ nque nuꞌ loo patrón. Sya, ndxab mbiꞌ loo moza: Huàa guꞌ zinꞌ loo xyònen, yey. Na ndoo lìte go ray guꞌ yilo huiz.
\v 8 Coꞌseꞌ mzyèleꞌ izlyoꞌ huiza, mbiꞌ coꞌ ngòc patrona ngurez mandador coꞌ ndyoo naa no coꞌ ndyoo ner loo zinꞌ. Ndxab mbiꞌ loo mandador: Mandador, gurez rye moz coꞌ ngue zinꞌ no blo ray moz. Ftlo blo ray moz coꞌ ngòo bluz loo zinꞌ. No yiloa, col ray moz coꞌ ngòo ner loo zinꞌ.
\v 9 Sya, ndyeꞌth moz coꞌ ngòo loo zinꞌ coꞌseꞌ ngòc hor nquée yugaꞌy bzyè. Mblo mandador ray moza xop pes coꞌ ngòc ray cheꞌn thìb huiz zinꞌ.
\v 10 Ngoloa, ndyeꞌth moz coꞌ más ngòogà loo zinꞌ. Mbli moza xtùuz masreꞌ yòo ray moz por más ngòogà moz loo zinꞌ huiza. Per ndxeꞌlequeꞌ, thìb thìb moz ngòo ray xop pes coꞌ ngòc ray cheꞌn thìb huiz zinꞌ.
\v 11 Coꞌseꞌ ngolo ngòo ray moz coꞌ mtlogà zinꞌa, ngua nee moza loo patrón: ¿Chonon le laate ngo Uꞌ ray ryete moz no taamas moz ndaleꞌ huiz ngòo loo zinꞌ? No lomisqueꞌ, ngo ray moz con moz coꞌ ngòogà loo zinꞌ.
\v 12 Tolo ndxab moz loo patrón: Moz coꞌ más bluz ngòo loo zinꞌ baꞌ, moz baꞌ pente mbli zinꞌ thìb hor no maste. No ale lalqueꞌ mblo Uꞌ ray moz baꞌ conꞌ coꞌ mblo Uꞌ ray nuꞌ. Nuꞌ mque zinꞌ dib huiz. No mxec nuꞌ mtec msoꞌ bée lad nuꞌ.
\v 13 Per mbiꞌ coꞌ ngòc patrona mcàb loo thìb moz. Ndxab mbiꞌ loo moza: Amiu, nec thìb mod no nec tedib mod ingue tetìiden guꞌ. Daa ngue liqueꞌ conꞌ coꞌ nac nalì loo guꞌ. ¿Chéꞌ neꞌngyanꞌte ryop naꞌ diꞌs leꞌ daa guix xop pes càa guꞌ thìb huiz zinꞌ, càꞌ?
\v 14 Byeꞌ xop pes baꞌ. Byàa. Na ndlyas go ray moz coꞌ ngòo más bluz loo zinꞌ lomisqueꞌ xal mblon ray lùu baꞌ.
\v 15 ¿Chéꞌ ngue lil cuent yende mod lin xal ndlyazen con tmi daa, càꞌ? ¿Chéꞌ ndxan lezoꞌl ñèel daa tac huen nac daa con chol mèn, càꞌ?
\p
\v 16 Sya, tolo ndxab Jesús loo mèna: Na nii conꞌ ndxèꞌ loo guꞌ: Guꞌ ndli xtùuz por nac guꞌ mèn nación Israel anzeꞌf ntac guꞌ loo Diox, ¿léꞌ? Per Diox luꞌ loo guꞌ leꞌ Diox indyacte lezoꞌ ñèe Diox guꞌ. Ndxeꞌlequeꞌ, ndxecloo Diox ñèe Diox guꞌ. Leꞌ tedib cuaꞌ mèn coꞌ inacte mèn nación Israel, mèn coꞌ nzi li guꞌ xtùuz ndxecloo Diox ñèe Diox mèna, per ndxeꞌlequeꞌ, Diox luꞌ loo guꞌ leꞌ làth mèna nzo huax mèn coꞌ ndyac lezoꞌ Diox ñèe Diox. Diox mbli thìb conꞌ. Ngurez Diox huax mèn par yilaꞌs mèna loo Diox no loo cón cheꞌn Diox. Per ndxepte mèn nzo coꞌ mdyal mbìn cón cheꞌn Diox no coꞌ mdyal mdubdiꞌs loo Diox. Diox mcui mèn coꞌ ngolaꞌsqueꞌ loo Diox par nac mèna xinꞌ Diox nalleꞌ.
\s Jesús mbere ngue taꞌ cuent loo myenꞌ xinꞌ mtéꞌth Jesús leꞌ Jesús gathqueꞌ.
\r (Mr. 10.32–34; Lc. 18.31–34)
\p
\v 17 Láth ndoo Jesús ned nda Jesús par ciuda Jerusalén con myenꞌ xinꞌ mtéꞌth Jesús no taamas mèn coꞌ nda no Jesús, mbeꞌ Jesús ryete siꞌ fchop myenꞌ xinꞌ mtéꞌth Jesús thìb lad loo mèn. Ndxab Jesús loo myenꞌ:
\p
\v 18 ―Huiꞌ guꞌ nexa. Nase ñee guꞌ no ndaꞌ guꞌ cuent leꞌ naꞌ ndooleꞌ ned. Nda quée naꞌ par ciuda Jerusalén. No gàca loon leꞌ thìb mbiꞌ taꞌxùꞌ daa loo mèn, mèn coꞌ nac jef coꞌ más ñibeꞌ loo rye nguleyꞌ no loo mèn coꞌ nac maistr cheꞌn ley coꞌ mxoꞌf Moisés loo mèn. No axta quexùꞌ queꞌ fals mèna daa par guthxùꞌ mèna daa, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn.
\v 19 No taꞌxùꞌ mèna daa, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn, loo mèn tith coꞌ inacte mèn nación Israel par xìis no mèna daa. No taꞌ mèna chenen axtaqueꞌ queꞌ mèna daa loo thìb cruz. Per coꞌseꞌ ngolo son huiz nguth daa, daa ryo xban làth mèn nguth.
\s Xnaꞌ Cob ryop Juàn mnaꞌb loo Jesús li Jesús thìb favor loo ryop myenꞌ.
\r (Mr. 10.35–45)
\p
\v 20 Sya, mbii gax xaꞌgot coꞌ nac saꞌl Zebede, xaꞌgot coꞌ nac xnaꞌ Cob no Juàn, loo Jesús con Cob no Juàn. Mdub xib xnaꞌ myenꞌ loo Jesús. Mnaꞌb xnaꞌ myenꞌ loo Jesús. Ndxab xnaꞌ myenꞌ:
\p ―Tad, bli Uꞌ favor loon.
\p
\v 21 Jesús mnibdiꞌs loo xnaꞌ myenꞌ. Ndxab Jesús:
\p ―¿Cón ndlyaꞌsl li na, ey?
\p Xnaꞌ myenꞌ ndxab loo Jesús:
\p ―Coꞌseꞌ ñibeꞌpeꞌ Uꞌ loo nuꞌ loo izlyoꞌ ndxèꞌ, taꞌ Uꞌ lugar gàc thìb xganꞌ daa síndico no gàc tedib xganꞌ daa juez coꞌ lyath no Uꞌ hora. Conꞌate no más ndlyazen, Tad.
\p
\v 22 Per Jesús mcàb loo xnaꞌ myenꞌ no loo myenꞌ. Ndxab Jesús:
\p ―Axta neꞌ neꞌ ñee guꞌ cón ngue naꞌb guꞌ loon. Nibdizen thìb conꞌ loo guꞌ: ¿Xá nee guꞌ? ¿Chéꞌ tác guꞌ no chéꞌ xec guꞌ tyactìi guꞌ xalqueꞌ gàc yaltìi coꞌ xec daa gàc loon leꞌn huiz ndxèꞌ coꞌ nac xalqueꞌ coꞌseꞌ gu mèn thìb taz nít cuanꞌ huan nalà, càꞌ? No ¿chéꞌ tli guꞌ ryes gath guꞌ xalqueꞌ gàca loon yéꞌ huizeꞌ, càꞌ?
\p Myenꞌ mcàb loo Jesús. Ndxab myenꞌ:
\p ―Xec nuꞌ, pues.
\p
\v 23 Jesús mcàb loo myenꞌ. Ndxab Jesús:
\p ―Lìcpeꞌ baꞌi, leꞌi gàc loo guꞌ leꞌ guꞌ tyactìi tínꞌ xalqueꞌ gàc yaltìi tínꞌ loon yéꞌ huizeꞌ axtaqueꞌ gath guꞌ xalqueꞌ gath daa. Per conꞌ coꞌ ndlyaꞌs guꞌ gàc guꞌ xal thìb síndico no xal thìb juez par ñibeꞌ no guꞌ daa, inacte conꞌa cón chenen par tan lugar loo guꞌ gàca tataa loo guꞌ. Ndxeꞌlequeꞌ, mèn coꞌ gàc xal juez no xal síndico coꞌ ñibeꞌ no daa, mèna nac mèn coꞌ gunee lezoꞌ xuden Diox, no mèn coꞌ mdoo lezoꞌ xuden Diox gàc mèna xal síndico no xal juez coꞌ lyath no daa coꞌseꞌ ñibeꞌen loo mèn nación Israel.
\p
\v 24 Coꞌseꞌ mbìn taasiꞌ myenꞌ xinꞌ mtéꞌth Jesús conꞌ ndxab Cob no Juàn no xnaꞌ Cob no Juàn loo Jesús, ngocloo tínꞌ myenꞌ loo ryop hues Cob Juàn.
\v 25 Coꞌseꞌ gunee Jesús ndxecloo myenꞌ loo Juàn no loo Cob, ngurez Jesús ryete myenꞌ. Ndxab Jesús loo myenꞌ:
\p ―Com leꞌ guꞌ ndaꞌleꞌ cuent no nonqueꞌ guꞌ leꞌ mèn coꞌ ñibeꞌ loo chol nación loo izlyoꞌ ndxèꞌ, mèna ñibeꞌ yèe loo mèn coꞌ nac cheꞌn nación par yende chó ñii loo mèn coꞌ ñibeꞌ. Leꞌ rye mèn coꞌ nac más mèn roo mèn xèn làth rye nación loo izlyoꞌ ndxèꞌ, lomisqueꞌ, ñibeꞌ yèe mèna loo mèn cheꞌn nación.
\v 26 Per part cón cheꞌn guꞌ, neꞌlide guꞌ tataa làth guꞌ. Ndxeꞌlequeꞌ, guꞌ coꞌ ndlyaꞌs ñibeꞌ loo xtàa guꞌ no guꞌ coꞌ ndlyaꞌs gàc mèn roo no mèn xèn làth xtàa guꞌ, guꞌa gàc mèn coꞌ li sirv loo xtàa guꞌ.
\v 27 No chol guꞌ coꞌ ndlyaꞌs ñibeꞌ loo xtàa guꞌ, no coꞌ ndlyaꞌs tyoo ner no tyoo naa loo xtàa guꞌ, guꞌa gàc xal thìb moz loo xtàa guꞌ.
\v 28 Guꞌa ndxàal li xalqueꞌ ndlin. Tac daa neꞌngal yáalte loo izlyoꞌ ndxèꞌ par li mèn sirv loon. Ndxeꞌlequeꞌ, daa mbal yáal loo izlyoꞌ ndxèꞌ par lin sirv loo mèn no par leꞌleꞌ daa taꞌ yalnaban daa loo yalguth xal mèn coꞌ nguix cón cheꞌn thìb conꞌ co anzeꞌf ntac. Tataa lin par lyáꞌ huax mèn loo conꞌ ryes por cón chenen.
\s Jesús mteyac chop xaꞌbiꞌ coꞌ ngòc mèn sieu.
\r (Mr. 10.46–52; Lc. 18.35–43)
\p
\v 29 Coꞌseꞌ nda roꞌ Jesús con myenꞌ xinꞌ mtéꞌth Jesús ro ciuda Jericó par quée Jesús ned ciuda Jerusalén, anzeꞌf thìb mèn nda nque xís Jesús.
\p
\v 30 Ned nda Jesús, ndub chop mèn sieu ro ned. Coꞌseꞌ mbìn mèna leꞌ Jesús nde riid, cabii ngurez mèna. Ndxab mèna:
\p ―Tad, Uꞌ coꞌ nde bin David coꞌ ngòc rey póla, gulat lezoꞌ Uꞌ gunèe Uꞌ nuꞌ.
\p
\v 31 Coꞌseꞌ ñee mèn coꞌ nda nque xís Jesús mbez yèe ryop mbiꞌ sieua, mèna mbyoo ryop mbiꞌ sieu par cued, ya neꞌcozèede ryop mbiꞌa más. Per ndxeꞌlequeꞌ, ryop xaꞌbiꞌ sieua sate más cabii mbez yèe. Mbez ryop xaꞌbiꞌ sieua:
\p ―Tad, Uꞌ coꞌ nde bin David coꞌ ngòc rey póla, gulat lezoꞌ Uꞌ gunèe Uꞌ nuꞌ.
\p
\v 32 Sya, nguled Jesús ned. Ngurez Jesús ryop xaꞌbiꞌ sieua. Mnibdiꞌs Jesús loo xaꞌ. Ndxab Jesús:
\p ―¿Cón ndlyaꞌs guꞌ li non guꞌ, àꞌ, ey?
\p
\v 33 Ryop xaꞌbiꞌ sieua mcàb. Ndxab xaꞌ loo Jesús:
\p ―Nuꞌ ndlyaꞌs gác nuꞌ huiꞌ nuꞌ, Tad.
\p
\v 34 Sya, mblyat lezoꞌ Jesús gunèe Jesús ryop xaꞌbiꞌ sieua. Ante mbuàal Jesús ngudloo ryop xaꞌ. Chàa, mdub xnìi ngudloo ryop xaꞌ. No ndxeꞌslequeꞌ mbuiꞌ ryop xaꞌ. Ngoloa, mxen ryop xaꞌbiꞌ coꞌ ngòc sieu ned. Nda nque xaꞌ xís Jesús.
\c 21
\s Jesús nzoleꞌ ned nda par ciuda Jerusalén.
\r (Mr. 11.1–11; Lc. 19.28–40; Jn. 12.12–19)
\p
\v 1 Coꞌseꞌ yamerleꞌ nde zin gax Jesús con mèn coꞌ nda nque xís Jesús ro ciuda Jerusalén, mzin Jesús con mèna yèez Betfagé coꞌ nziriꞌ gaxte coꞌteꞌ ndub thìb yii coꞌ lee yii cheꞌn yaa oliv. Tya, mtelꞌ Jesús chop myenꞌ xinꞌ mtéꞌth Jesús par ya myenꞌ thìb mandad leꞌn yèez Betfagé.
\v 2 Ndxab Jesús loo ryop myenꞌ:
\p ―Huàa guꞌ leꞌn yèez chuꞌth coꞌ nziriꞌ goꞌ. Tuaꞌ zyal guꞌ thìb burrgol con xinꞌ burrgol coꞌ ndoo quedóꞌ. Fxac guꞌ burrgola. No yeꞌth no guꞌ burrgol con xinꞌ burrgol trèꞌ.
\v 3 Cheleꞌ chol mèn ñee loo guꞌ: ¿Chonon ngue xac guꞌ burrgol baꞌ?, gab guꞌ loo mèna: Tad naꞌ nquin máꞌ. Sya, mèna laꞌ yeꞌth no guꞌ máꞌ loon.
\p
\v 4 Ngòc conꞌa loo Jesús par ngòcqueꞌ, no mdyaaqueꞌ, no mdubqueꞌ diꞌs coꞌ gunii thìb xaꞌ coꞌ mdeꞌth diꞌs coꞌ ndxab Diox coꞌseꞌ mqueꞌ xaꞌa yeꞌs loo libr coꞌ nac xtiꞌs Diox, diꞌs coꞌ mbez:
\pi1
\v 5 Guuz guꞌ loo mèn ciuda Jerusalén: Huiꞌ guꞌ nexa. Mbiꞌ coꞌ nac rey guꞌ nde loo guꞌ. Anzeꞌf nadoꞌ nac mbiꞌ. No ndub mbiꞌ thìb burr yènꞌ coꞌ nac xinꞌ thìb burrgol coꞌ ndxeꞌ yóꞌ.
\p
\v 6 Sya, mxen ryop myenꞌ xinꞌ mtéꞌth Jesús ned. Nda li myenꞌ xal mnibeꞌ Jesús loo myenꞌ li myenꞌ.
\v 7 Ndyeꞌth no myenꞌ burrgol con burr yènꞌ. No nabeꞌste mtoxcuaꞌ myenꞌ coꞌteꞌ tyub Jesús con xab myenꞌ. Ngoloa, mquée Jesús burr yènꞌa.
\v 8 Leꞌ rye mèn coꞌ nde nque xís Jesús na, msilꞌ mèna xab mèna xtauꞌ ned par riid Jesús loo xab mèna tant mdyac lezoꞌ mèna ñèe mèna Jesús. Leꞌ taamas mèna na, mchoꞌ laa yaa yin. No mdoo mèna laa yaa yina ro ned coꞌteꞌ riid Jesús tant ndyac lezoꞌ mèna ñèe mèna Jesús.
\v 9 Sya, rye mèn coꞌ nda no Jesús, mtlo mèna, mbez yèe mèna. Leꞌleꞌ mbez yèe mèn coꞌ ndoo ner loo Jesús. No leꞌleꞌ mbez yèe mèn coꞌ ndoo nque ned xís Jesús. Mbez mèna:
\p ―Mbiꞌ roo mbiꞌ xèn nac mbiꞌ coꞌ nac bin David coꞌ ngòc rey póla. Toloqueꞌ gab naꞌ diꞌs natúꞌ no diꞌs roo diꞌs xèn cón cheꞌn mbiꞌ coꞌ mtelꞌ Diox: ¡Ay, Dioꞌs! Anzeꞌf Diox roo no Diox xèn nac Tad Diox.
\p
\v 10 Coꞌseꞌ ngòo no Jesús rye mèn coꞌ nda no Jesús ro ciuda Jerusalén, rye mèn ciuda Jerusalén ngroꞌ che liz mèn. No mbyàa mbyeꞌth lezoꞌ mèn. Mbez mèn loo xtàa mèn:
\p ―¿Chó mbiꞌ nac mbiꞌ coꞌ nde goꞌ, yoo?
\p
\v 11 Leꞌ mèn coꞌ nde no Jesús na, mcàb. Ndxab mèna loo mèn ciuda Jerusalén:
\p ―Jesús coꞌ ndeꞌth diꞌs coꞌ ndxab Diox coꞌ nac mbiꞌ cheꞌn yèez Nazaret cheꞌn làaz mèn galile na.
\s Jesús mbloꞌ che mèn no máꞌ leꞌn templ par mbembìi templ.
\r (Mr. 11.15–19; Lc. 19.45–48; Jn. 2.13–22)
\p
\v 12 Ngoloa, ngòo Jesús leꞌn templ cheꞌn Diox. Mbloꞌ Jesús rye mèn coꞌ nthoꞌ leꞌn templ no rye mèn coꞌ ndiꞌ leꞌn templ. No mtexyath Jesús rye mes cheꞌn mèn coꞌ nsil tmi. No mtexyath Jesús asient coꞌteꞌ ndyub mèn coꞌ nthoꞌ palomxtilꞌ.
\v 13 Ndxab Jesús loo mèna: Loo libr coꞌ nac xtiꞌs Diox ndub diꞌs coꞌ mbez:
\pi1 Lizen o templ daa ngroꞌ lèe coꞌteꞌ cuez mèn daa.
\p Per guꞌ coꞌ nthoꞌ trèꞌ no guꞌ coꞌ ndiꞌ trèꞌ, ale mbli guꞌ leꞌ templ daa ngòc xal thìb lyoꞌ cheꞌn huanꞌ.
\p
\v 14 Láth ndxàc conꞌa loo mèn leꞌn templ, mbii gax plá mèn sieu loo Jesús no mbii gax plá mèn renc loo Jesús par teyac Jesús mèna. Jesús mteyacqueꞌ mèna.
\v 15 Coꞌseꞌ gunèe mèn coꞌ ngòc jef coꞌ más ñibeꞌ loo rye nguleyꞌ no mèn coꞌ ngòc maistr coꞌ mbluꞌ cón cheꞌn ley coꞌ mxoꞌf Moisés loo mèn tiempa yalguzyeꞌ coꞌ mbli Jesús, no coꞌseꞌ ndxòn mèna leꞌ myenꞌ bix mbez yèe, mbez myenꞌ bixa: Mbiꞌ roo no mbiꞌ xèn nac mbiꞌ coꞌ nac bin cheꞌn David coꞌ ngòc rey póla, anzeꞌf ngòcloo tínꞌ mèna gunèe mèna Jesús.
\v 16 Ndxab mèna loo Jesús:
\p ―¿Chéꞌ ndxònl conꞌ mbez myenꞌ bix baꞌ, àꞌ?
\p Jesús mcàb loo mèna. Ndxab Jesús:
\p ―Aa. Ndxònquena. ¿Chéꞌ tarte lab guꞌ loo libr coꞌ nac xtiꞌs Diox coꞌ ndaꞌ cuent xal nac diꞌs coꞌ mbez myenꞌ baꞌ, cà? Loo libr ndub diꞌs coꞌ mbez taandxèꞌ:
\pi1 Lùu mbli leꞌ myenꞌ bix no rye mbetoꞌ coꞌ beꞌ ndxàaz ndxolꞌ ro labans coꞌ nac diꞌs roo diꞌs xèn coꞌ ngue teꞌth myenꞌ cón chenen.
\p
\v 17 Ngoloa, mxen Jesús ned. Mbii Jesús ciuda Jerusalén con myenꞌ xinꞌ mtéꞌth Jesús. Ndyàa Jesús leꞌn yèez Betañ. Leꞌn yèeza mdàt Jesús yálꞌa.
\s Jesús ndxab: Loo yaa ngudyuug coꞌ yende xlè loo, thidtene ya neꞌtolode taꞌ yaa ngudyuug xlè.
\r (Mr. 11.12–14, 20–26)
\p
\v 18 Coꞌseꞌ ngo nìi izlyoꞌ tedib huiz coꞌ nde nquea, mxen Jesús ned. Nda Jesús par ned ciuda Jerusalén tedib vez. Láth ndoo Jesús ned nda Jesús, mblyanꞌ Jesús.
\v 19 Leꞌpeꞌ nda riid Jesús tya, gunèe Jesús thìb xanꞌ yaa ngudyuug coꞌ ndoo gax ro ned. Sya, ngua tee huiꞌ Jesús loo yaa ngudyuuga, belꞌqueꞌ pá ndoo ngudyuug loo yaa par hua Jesús ngudyuug. Per coꞌseꞌ ngua tee huiꞌ Jesús loo yaa, ante laa ndoo loo yaaa. Sya, ndxab Jesús loo yaa ngudyuuga:
\p ―Desde nalleꞌ par delant ya neꞌtaꞌdel xlè thidtene, ndee.
\p Texal ngolo ndxab Jesús diꞌsa loo yaa ngudyuug, ale beꞌ nzi huiꞌ myenꞌ xinꞌ mtéꞌth Jesús, setilte mbiiz yaa ngudyuug.
\v 20 Coꞌseꞌ ngolo gunèe myenꞌ xinꞌ mtéꞌth Jesús tataa ngòc conꞌ mbli Jesús, ante mbuiꞌ myenꞌ no ante gunàa myenꞌ. Sya, mnibdiꞌs myenꞌ loo Jesús. Ndxab myenꞌ:
\p ―Tad, ¿xá mod chonon ale setilte mbiiz yaa ngudyuug baꞌ, àꞌ?
\p
\v 21 Jesús mcàb loo myenꞌ. Ndxab Jesús loo myenꞌ:
\p ―Lìcpeꞌ baꞌi, na nii loo guꞌ: Cheleꞌ guꞌ yilaꞌs loon no neꞌgàc chopte lezoꞌ guꞌ loo cón chenen, leꞌ sya, iante gác guꞌ li guꞌ xal mblin loo yaa ngudyuug baꞌ. Ndxeꞌlequeꞌ, guꞌ gab loo yii coꞌ ndub goꞌ: Yii, biiche tuaꞌ. Huàa tyub leꞌn níttóꞌ. Tataaqueꞌ gàca loo guꞌ.
\v 22 No ryete conꞌ coꞌ ñaꞌb guꞌ coꞌseꞌ cuez guꞌ Diox, cheleꞌ guꞌ, lìcqueꞌ, ndxelaꞌs loon no ndxàp guꞌ yalxlaꞌs loon, leꞌ sya, Diox liqueꞌ leꞌ guꞌ que no ryete conꞌ ñaꞌb guꞌ loo Diox.
\s Trèꞌ ndluꞌ leꞌ Jesús nac xaꞌ coꞌ ñibeꞌpeꞌ.
\r (Mr. 11.27–33; Lc. 20.1–8)
\p
\v 23 Sya, ngòo Jesús leꞌn templ. Láth ngue luꞌ Jesús mèn coꞌ nac cón cheꞌn xtiꞌs Jesús no coꞌ nac cón cheꞌn xleyꞌ Jesús, ngua gax mèn coꞌ ngòc jef coꞌ más ñibeꞌ loo rye nguleyꞌ, no mèngool coꞌ ñibeꞌ, no coꞌ ndyoo ner, no coꞌ ndyoo naa, loo mèn nación Israel loo Jesús. Mnibdiꞌs mèna loo Jesús. Ndxab mèna:
\p ―¿Chó mnibeꞌ lool mblil conꞌ mblil náꞌa no pá ngua téꞌthl par ngóc mblil conꞌa, ne, àꞌ?
\p
\v 24 Jesús mcàb loo mèna. Ndxab Jesús:
\p ―Daa, ne, nibdiz thìb conꞌ loo guꞌ ñeeneꞌ chéꞌ tác guꞌ càb guꞌ loon. Cheleꞌ guꞌ gác càb guꞌ loon, sya, daa, ne, nii loo guꞌ chó mnibeꞌ loon mblin conꞌa náꞌa.
\v 25 Coꞌseꞌ mbiꞌth li Juàn Bautist bautizar mèn, ¿chó mnibeꞌ loo Juàn Bautist mbiꞌth li Juàn Bautist bautizar mèn, àꞌ? ¿Chéꞌ Diox mnibeꞌ loo Juàn mbiꞌth Juàn o chéꞌ nzo chó mèn coꞌ nziriꞌ loo izlyoꞌ mnibeꞌ loo Juàn, càꞌ? ¿Xá nee guꞌ? Fcàb guꞌ loon.
\p Coꞌseꞌ mbìn mèna tataa mnibdiꞌs Jesús loo mèna, mtlo mèna, mdoodiꞌs no mèna xtàa mèna. Ndxab mèna loo xtàa mèna:
\p ―Cheleꞌ naꞌ gab: Diox mnibeꞌ loo Juàn, sya, ñee Jesús loo naꞌ: Cheleꞌ Diox mnibeꞌ loo Juàn, ¿chonon neꞌngalaꞌste guꞌ loo conꞌ mbli Juàn, sya? Aa, que tont guꞌ se.
\v 26 No cheleꞌ naꞌ gab loo Jesús nzo chó mèn mtelꞌ Juàn, sya, que nzo neꞌñee lezoꞌ naꞌ, naꞌ zyebqueꞌ por mèn coꞌ nziriꞌ baꞌ. Tac ryete mèn baꞌ ngolaꞌs leꞌ Juàn Bautist guniiqueꞌ cón cheꞌn Diox no mdeꞌthqueꞌ Juàn cón cheꞌn Diox.
\p
\v 27 Conꞌa, mcàb mèna loo Jesús. Ndxab mèna:
\p ―Neꞌneede nuꞌ chó mtelꞌ Juàn.
\p Sya, ndxab Jesús loo mèna:
\p ―Neꞌ daa neꞌniide loo guꞌ chó mnibeꞌ loon mblin conꞌ mblin náꞌa, no conꞌ ndlin loo mèn, no chol conꞌ ndluꞌen loo mèn.
\s Jesús ngue tetac diꞌs loo mèn cón cheꞌn ryop myenꞌ coꞌ mnibeꞌ xud loo.
\p
\v 28 Jesús ndxab loo mèna:
\p ―Nde niin thìb conꞌ loo guꞌ ñeeneꞌ cón ñee guꞌ cón cheꞌn diꞌs coꞌ nde niin loo guꞌ ndxèꞌ: Ngo thìb mbiꞌ coꞌ ngòp chop xganꞌ. Ndxab mbiꞌ loo thìb xganꞌ mbiꞌ: Xganꞌ, huàa li zinꞌ loo lus uv naꞌ nalze. Huàa làa uv loo lus uv.
\v 29 Xganꞌ mbiꞌ mcàb loo mbiꞌ. Ndxab xganꞌ mbiꞌ loo mbiꞌ: Indlyasten gan. Per ngoloa, mseꞌ mbyòo xtùuz mbyòo. Ngua que mbyòo zinꞌ loo lus uv.
\p
\v 30 Ngoloa, ngua ñibeꞌ mbiꞌ loo tedib xganꞌ mbiꞌ par ya xganꞌ mbiꞌ zinꞌ. Lomisqueꞌ, mcàb xganꞌ mbiꞌ loo mbiꞌ. Ndxab xganꞌ mbiꞌ: Neeca, Tad, nal gan. Per mbyòo nguriꞌth nza diꞌsa. Neꞌngade mbyòo zinꞌ.
\p
\v 31 Látha, chàa, ndxab Jesús loo mèna:
\p ―Gunee guꞌ loon. De loo ryop hues mbyòo, ¿chó mbyòo, lìcqueꞌ, mbli conꞌ mblyaꞌs xud mbyòo, àꞌ?
\p Mèna mcàb loo Jesús:
\p ―Mbyòo nera mbli conꞌ mblyaꞌs xud mbyòo.
\p Sya, ndxab Jesús loo mèna:
\p ―Aa. Lìcqueꞌ nac conꞌ coꞌ nee guꞌ baꞌ. Yende cón niin loo guꞌ. No, lìcpeꞌ baꞌi, na nii loo guꞌ: Leꞌ mèn coꞌ ndli cobrar cón cheꞌn contribución, no mèngot coꞌ mbli yalburrid, mèna, ndxeꞌlequeꞌ, yòo loo cón cheꞌn Diox par ñibeꞌpeꞌ Diox loo mèna ndooreꞌ tyal guꞌ no taꞌ guꞌ lugar par ñibeꞌpeꞌ Diox loo guꞌ loo cón cheꞌn Diox.
\v 32 Tac Juàn Bautist mbiꞌth luꞌleꞌ loo guꞌ xá mod ndxàal que tee ban ndac guꞌ. Neꞌngalaꞌste guꞌ diꞌs coꞌ mbluꞌ Juàn loo guꞌ. Per ndxeꞌlequeꞌ, mèn coꞌ ndli cobrar cón cheꞌn contribución no mèngot coꞌ mbli yalburrid ngolaꞌs loo diꞌs coꞌ mbluꞌ no coꞌ mdeꞌth Juàn. Per part cón cheꞌn guꞌ, mastaleꞌ gunèe guꞌ ryete conꞌ coꞌ ngòc leꞌn tiemp ndxèꞌ, neꞌnglàade yéc guꞌ no neꞌnglàade lezoꞌ guꞌ loo ryethe xquin guꞌ no xtol guꞌ par nseꞌ guꞌ mod coꞌ ndxàp guꞌ par, belꞌqueꞌ, ngalaꞌs guꞌ loo Juàn no ngalaꞌs guꞌ loon.
\s Jesús ngue tetac diꞌs loo mèn cón cheꞌn moz coꞌ ngòc moz yeꞌrsinꞌ.
\r (Mr. 12.1–12; Lc. 20.9–19)
\p
\v 33 Bìn guꞌ cón cheꞌn tedib diꞌs coꞌ nde tetaquen loo guꞌ ndxèꞌ, ne: Ngo thìb mbiꞌ coꞌ mque no thìb ranch coꞌteꞌ mxenꞌ mbiꞌ lus uv loo xyòn mbiꞌ. Ngoloa, mblo mbiꞌ yaaloo dib vuelt ro xyòn mbiꞌ. Mtoxcuaꞌ mbiꞌ thìb tanc par yòo nít uv coꞌseꞌ coꞌ mbiꞌ nít uv. Mtoxcuaꞌ mbiꞌ thìb yòobéꞌ par quée mèn par laꞌs mèn loo xyòn mbiꞌ.
\p Ngoloa, mdaꞌ mbiꞌ xyòn mbiꞌ cuent rol loo thìb ned mèn, mèn coꞌ ndli zinꞌ loo lus uv. Ngoloa, mxen mbiꞌ ned. Mdee mbiꞌ. Nda mbiꞌ.
\v 34 Coꞌseꞌ mzin tiemp coꞌ gàc rol cosech cheꞌn uv cheꞌn mbiꞌ, mbiꞌa mtelꞌ moz mbiꞌ par ñaꞌb moz no càayaꞌ moz uv coꞌ gàc cuent rol coꞌ gàc cheꞌn mbiꞌa.
\v 35 Per ndxeꞌlequeꞌ, mèn coꞌ mbli zinꞌ loo lus uva mxen moz mbiꞌ. No mtin mèna moz mbiꞌ. No mbeth mèna ndxep moz mbiꞌ. No mbuaaꞌd quèe mèna taandxep moz mbiꞌ.
\v 36 Mbiꞌ coꞌ nac xuanꞌ lus uva mbere, mtelꞌ taamasreꞌ moz loo moz coꞌ ngua nera. Per mèn coꞌ mbli zinꞌ loo lus uva lomisqueꞌ mbli loo mbryop ned moza.
\p
\v 37 Por lult, mtelꞌ mbiꞌ coꞌ nac cheꞌn lus uva xganꞌpeꞌ mbiꞌ. Mbli mbiꞌ xtùuz: Yende cón li no mèna xganꞌ daa. Ndxab mbiꞌ loo lezoꞌ mbiꞌ: Peser gàp mèna mod ñèe mèna xganꞌ daa.
\v 38 Per coꞌseꞌ ñèe mèna nde xganꞌ mbiꞌ coꞌ nac cheꞌn lus uva, leꞌ sya, mèn coꞌ ndli zinꞌ loo lus uva, mèna ndxab loo xtàa mèn:
\p ―Huiꞌ guꞌ nexa. Mbiꞌ baꞌ nac mbiꞌ coꞌ yanꞌ no yòo coꞌ nac cheꞌn lus uv ndxèꞌ. Yaꞌ guꞌ nda yuth naꞌ mbiꞌ par gàc cheꞌn naꞌ yòo lus uv ndxèꞌ.
\v 39 Por lult, mxen mèn coꞌ mbli zinꞌ loo lus uva mbyòo coꞌ ngòc xganꞌ mbiꞌa. Mbloꞌ mèna mbyòo thìb lad ro yòo lus uv. No mbeth mèna mbyòo, tya.
\p
\v 40 Ngolo mdoodiꞌs Jesús loo mèna tataa, mnibdiꞌs Jesús loo mèn coꞌ ngòc jef coꞌ más ñibeꞌ loo rye nguleyꞌ, no loo mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel. Ndxab Jesús loo mèna:
\p ―Coꞌseꞌ yiꞌth mbiꞌ coꞌ nac xuanꞌ yòo lus uva, ¿xá nee guꞌ? ¿Cón li no mbiꞌ mèn coꞌ mbli zinꞌ loo yòo lus uva, sya, àꞌ?
\p
\v 41 Mèna mcàb loo Jesús. Ndxab mèna:
\p ―Mbiꞌ coꞌ nac cheꞌn lus uva guth mèna. Neꞌlyatte lezoꞌ mbiꞌ ñèe mbiꞌ mèna. No yilo guth mbiꞌ mèn yeꞌrsinꞌa, taꞌ mbiꞌ xyòn mbiꞌ loo tedib ned mèn coꞌ li zinꞌ loo xyòn mbiꞌ. Mèna gàc mèn coꞌ, lìcqueꞌ, li rol uv coꞌ gàc cheꞌn mbiꞌ coꞌseꞌ gáal tiemp làa mèn uv.
\p
\v 42 Jesús mcàb loo mèna. Ndxab Jesús:
\p ―¿Chéꞌ thidtene tarte lab guꞌ diꞌs coꞌ ndub loo libr coꞌ nac xtiꞌs Diox cà? Huiꞌ guꞌ nexa. Diꞌs mbez taandxèꞌ:
\pi1 Quèe coꞌ mblobii albañil thìb lad, leque quèea mbli sirv par ngòc quèea quèe scuadr coꞌ mdub squin yòo. Yub Tad Diox mbli conꞌa. No por cona, ante ngüiꞌ naꞌ no ante ñaa naꞌ xal mbez diꞌs ndxèꞌ loo conꞌ coꞌ ngòca.
\b
\m
\v 43 Cona, ngue niin loo gu: Prob guꞌ izlyoꞌ. Ngòc cheꞌnpeꞌ guꞌ par yòo guꞌ loo cón cheꞌn Diox par ñibeꞌpeꞌ Diox loo guꞌ. Per nalleꞌ Diox neꞌtolode tyal no neꞌtolode taꞌ Diox lugar loo guꞌ yòo guꞌ loo cón cheꞌn Diox par ñibeꞌpeꞌ Diox loo guꞌ. Ndxeꞌlequeꞌ, Diox tyal no taꞌ Diox lugar loo mèn par yòo mèn loo cón cheꞌn Diox par ñibeꞌpeꞌ Diox loo mèn, mèn coꞌ li coꞌ ñibeꞌpeꞌ Diox loo mèna xalqueꞌ mbli mèn coꞌ mbli rolpeꞌ uv cheꞌn mbiꞌ coꞌ ngòc cheꞌn xyòn lus uva.
\v 44 Leꞌ cón cheꞌn quèe, coꞌ nee diꞌs nacpeꞌ daa na, mèn coꞌ yixud loo quèea, coꞌ nee diꞌs, ndenꞌ mèna ngòc nguàal conꞌ cón chenen, mèna lyux xal thìb yèt coꞌ ayèꞌthax ndxàc coꞌseꞌ ndlyéꞌ yèt. Leꞌ loo mèn coꞌ lyàa quèea na, coꞌ nee diꞌs nac daa, daa telux mèna xal coꞌseꞌ ndléꞌ ndoo quèe thìb conꞌ.
\b
\p
\v 45 Coꞌseꞌ mbìn mèn coꞌ ngòc jef coꞌ más mnibeꞌ loo rye nguleyꞌ no mèn coꞌ ngòc mèn xleyꞌ farise diꞌs coꞌ mtetac Jesús loo mèna, nazab ngulàa diꞌsa leꞌn lezoꞌ mèna. Mdenꞌ mèna no mdaꞌ mèna cuent leꞌ Jesús mtetac diꞌs cón cheꞌn mèna.
\v 46 Coꞌseꞌ mbìn mèna diꞌsa, capas mèna tyenxùꞌ mèna Jesús. Per nzyeb mèna ñèe mèna mèn coꞌ nziriꞌ no Jesús. Tac mèn coꞌ nziriꞌ no Jesús ante ndli xtùuz cón cheꞌn Jesús leꞌ Jesús ante ndyoodiꞌs diꞌs coꞌ mnibeꞌ Diox loo Jesús par tyoodiꞌs Jesús diꞌsa.
\c 22
\s Jesús ngue tetac diꞌs loo mèn xal coꞌseꞌ nselyaꞌ thìb ned myenꞌ.
\p
\v 1 Mbere Jesús, mtetac Jesús diꞌs loo mèn tedib vez. Ndxab Jesús loo mèn coꞌ nziriꞌ loo Jesús:
\p ―Nde niin thìb conꞌ loo guꞌ:
\v 2 Diox coꞌ ñibeꞌ loo mèn nac xal thìb rey coꞌ mbli thìb fandang cheꞌn thìb xganꞌ rey coꞌ mselyaꞌ.
\v 3 Mtelꞌ rey moz rey par ngua li moz convid mèn no par li moz avis loo mèn coꞌ ngòc convid par yiꞌth lyath no mèn mbiꞌ loo fandang cheꞌn mbyòo coꞌ mselyaꞌa. Per mèn coꞌ ngòc convida neꞌndalte nguiꞌth.
\v 4 Mbere rey coꞌ mbli nab fandanga, mtelꞌ rey tedib cuaꞌ moz. Ndxab rey loo moz: Huàa guꞌ no guuz guꞌ loo mèn coꞌ ngòc convida yiꞌth mèna fandang, leꞌ rey ngololeꞌ mbli nab conꞌ hua mèn. Leꞌ rey mbli mandad mbeth mèn ngon no taamas máꞌ nachaꞌ. No ryete conꞌ hua mèna ya ngololeꞌ ngòc nableꞌ. Guuz guꞌ loo mèna li mèna purad yiꞌth mèna fandang coꞌ nac yalhua.
\v 5 Per mèn coꞌ ngua li moz convida, coꞌ ngua lileꞌ moz avis looa, neꞌndalte mèna nguiꞌth mèna. Neꞌ neꞌ ngli mèna cas diꞌs coꞌ ndxab moz. Chó mèna nda taꞌ vuelt loo xyòn mèna. Chó mèna nda loo rsinꞌ mèna.
\v 6 Leꞌ taamas mèn coꞌ neꞌndalte nga fandang cheꞌn mbyòo coꞌ mselyaꞌa na, mèna mxen moz rey. Ale mbli mèna ngòc nguàal conꞌ con moz rey axta mbeth mèna moz rey.
\v 7 Coꞌseꞌ gunèe rey tataa ngòc conꞌa, anzeꞌf ngocloo tínꞌ rey axta mtelꞌ rey solndad rey par ngua yuth solndad mèn coꞌ mbeth moz rey. Mtec solndad liz mèna no làaz mèna, ne.
\v 8 Ngoloa, ndxab mbiꞌ coꞌ nac reya loo tedib cuaꞌ moz: Ryete conꞌ ngolo ngòc nab coꞌ nac cheꞌn fandang par selyaꞌ mbyòo daa ndxèꞌ. Huenqueꞌ mbli mèn coꞌ ngòc convida neꞌnguiꞌthte mèn. Tac inzyalte mèna no indxàalte mèna nguiꞌth mèna loo fandang naꞌ ndxèꞌ.
\v 9 Más huen huàa guꞌ. Huàa tauꞌ guꞌ loo rye mèn coꞌ ñèe guꞌ riid rye ned. No guuz guꞌ loo mèna yiꞌth mèna loo fandang naꞌ ndxèꞌ.
\v 10 Sya, ngroꞌ moz. Ngua thop moz ryete mèn coꞌ mzyálꞌ moz, mèn coꞌ ngòc mèn ndac no mèn coꞌ ngòc mèn yeꞌrsinꞌ, par yiꞌth mèna fandang cheꞌn mbyòo coꞌ mselyaꞌa. Mbiꞌthqueꞌ mèna axta mzyè leꞌn nyòo liz mbiꞌ, tant thìb mèn mbiꞌth.
\p
\v 11 Sya, ngòo rey leꞌn nyòo. Xèe mbuiꞌ rey loo rye mèn coꞌ mbiꞌth, mèn coꞌ ngòc convida. Gunèe rey ndub thìb mbiꞌ xiꞌth rye mèna. Per rey gunèe inocte mbiꞌ xab mbiꞌ coꞌ ndxàal goc mèn coꞌseꞌ ya mèn thìb fandang cheꞌn thìb ned myenꞌ coꞌ nselyaꞌ.
\v 12 Ndxab rey loo mbiꞌa: Amiu, ¿xá mod mblil ngòol trèꞌ no inoctel xabl coꞌ ndxàal ngocl par nguiꞌthl loo fandang cheꞌn myenꞌ coꞌ nselyaꞌ, àꞌ? Per más quee lezoꞌ mbiꞌa xèe mdub mbiꞌ. Neꞌncàbte mbiꞌ loo rey.
\v 13 Sya, ndxab mbiꞌ coꞌ ngòc reya loo moz mbiꞌ coꞌ ngue li mandad loo mes: Quedóꞌ guꞌ yaꞌ mbiꞌ baꞌ no quedóꞌ guꞌ nii mbiꞌ baꞌ. No càa mbiꞌ baꞌ. Bloꞌ guꞌ par fuer loo yálꞌcuau. Tya gónꞌ mbiꞌ no hua le mbiꞌ.
\v 14 Tataa mod ndli Diox, ne, par ndxòn huax mèn cón cheꞌn Diox par yòo mèn loo cón cheꞌn Diox par ñibeꞌpeꞌ Diox loo mèn. Per ale ndxeꞌlequeꞌ, ndxepte mèn nzo coꞌ mdyal ngòo loo cón cheꞌn Diox. Mèna ngòc mèn coꞌ mcuipeꞌ Diox par ñibeꞌpeꞌ Diox loo mèna.
\s Mèn xleyꞌ farise mnibdiꞌs cón cheꞌn impuest loo Jesús.
\r (Mr. 12.13–17; Lc. 20.20–26)
\p
\v 15 Ngolo mbìn mèn xleyꞌ farise diꞌs coꞌ ndxab Jesús, mxen mèna ned. Ndyàa mèna. Sya, thidte ngòc mèna. Mdoodiꞌs no mèna xtàa mèna par gab mèna chol diꞌs loo Jesús par belꞌqueꞌ tataa mod li mèna par gàal diꞌs mèn Jesús no tataa mod li mèna gan par quexùꞌ queꞌ fals mèna Jesús.
\v 16 Por lult, mtelꞌ mèna ndxep mèn coꞌ nqueltàa loo cón cheꞌn xleyꞌ mèna con taandxep mèn coꞌ ngòc thìb ned mèn coꞌ ngroꞌ lèe partid herodist loo Jesús par tyoodiꞌs no mèna Jesús. Sya, ndxab mèna loo Jesús:
\p ―Maistr, nuꞌ non no naneequeꞌ nuꞌ leꞌ Uꞌ, lìcque, ndyoodiꞌs coꞌ nac diꞌs lìcpeꞌ. No lìcqueꞌ nac ned coꞌ ndluꞌ Uꞌ par yòo mèn loo cón cheꞌn Diox. Más de cona, nonqueꞌ nuꞌ no naneeque nuꞌ yende chó mport nzo lezoꞌ Uꞌ conꞌ coꞌ mbez mèn loo Uꞌ. Neꞌ neꞌ indlaꞌs Uꞌ mèn par ñèe Uꞌ xal nac mod coꞌ ndxàp mèn. Neꞌ neꞌ indlaꞌs Uꞌ xal ñaa mèn.
\v 17 Per nalleꞌ gunee Uꞌ loo nuꞌ ¿chéꞌ tli huen taꞌ nuꞌ tmi o quix nuꞌ tmi cón cheꞌn contribución loo mbiꞌ coꞌ nac gobiern coꞌ ndub leꞌn ciuda Rom o chéꞌ indxàalte quix nuꞌi? ¿Xáa nee Uꞌ?
\p
\v 18 Per Jesús mdenꞌ lezoꞌ no mdaꞌ Jesús cuent leꞌ mèna asembli mcuaꞌn mèna mod par gàal diꞌs mèna Jesús par yigaa Jesús loo mèna. Sya, ndxab Jesús loo mèna:
\p ―Aa mèn xleyꞌ farise, susqueꞌ ndxác guꞌ ntembìi guꞌ ro guꞌ no ntembìi guꞌ xtiꞌs guꞌ loon. ¿Chonon asendli guꞌ ncuaꞌn guꞌ mod par gàal diꞌs guꞌ daa par yigaa daa loo guꞌ, àꞌ?
\v 19 Bluꞌ guꞌ thìb pes coꞌ nguix guꞌ cón cheꞌn contribución loon. Neeneꞌ.
\p Sya, ngua xi mèna thìb pes par mbluꞌ mèn pesa loo Jesús.
\v 20 Coꞌseꞌ gunèe Jesús pesa, mnibdiꞌs Jesús loo mèna. Ndxab Jesús:
\p ―¿Chó cheꞌn gunab coꞌ ngue loo pes ndxèꞌ no chó cheꞌn lèe coꞌ ngue loo pes ndxèꞌ, àꞌ?
\p
\v 21 Mèna mcàb loo Jesús. Ndxab mèna:
\p ―Gunab baꞌ no lèe baꞌ nac cheꞌn gobiern coꞌ ñibeꞌ yèe loo naꞌ.
\p Jesús ndxab loo mèna:
\p ―Aa. Pues, ftaꞌ guꞌ conꞌ coꞌ nac cheꞌnpeꞌ gobiern coꞌ ñibeꞌ loo guꞌ par càa gobiern cheꞌn gobiern. No ftaꞌ guꞌ conꞌ coꞌ nac cheꞌnpeꞌ Diox par càa Diox.
\p
\v 22 Coꞌseꞌ mbìn mèna tataa ndxab Jesús loo mèn, ante mbuiꞌ mèna no ante gunaa mèna cón cheꞌn Jesús. Xexte mxen mèna ned. Ndyàa mèna. Taate mbláꞌ mèna Jesús tya.
\s Mèn xleyꞌ saduce mnibdiꞌs loo Jesús: ¿Chéꞌ, lìcqueꞌ, ryo xban mèn?
\r (Mr. 12.18–27; Lc. 20.27–40)
\p
\v 23 Leque huiza ngua plá mèn coꞌ ngòc mèn xleyꞌ saduce loo Jesús coꞌteꞌ nzo Jesús par laꞌs mèn cón ngue li Jesús. Mèna ngolaꞌs no mbez mèna: Pà ryo xban mèn. Yende chó mèn ryo xban. Tataa mod mdub nii mèna par aseli mèna ndxab mèna thìb conꞌ loo Jesús par gàal diꞌs mèna Jesús. Ndxab mèna:
\p
\v 24 ―Maistr, Moisés mtanꞌ diꞌs loo nuꞌ cheleꞌ thìb mbiꞌ coꞌ mselyaꞌ nguth no neꞌndante xaꞌgot mbiꞌ xinꞌ mbiꞌ, leꞌ sya, hues mbiꞌ selyaꞌ con xaꞌgot viuda par que no xaꞌgota xinꞌ mbiꞌ. Sya, yòo cuent xinꞌ mbiꞌ nac mbed coꞌ tyan xaꞌgot viuda con hues ndlyo mbiꞌ.
\v 25 Pues làth nuꞌ ngo gaz mbiꞌ coꞌ ngòc hues. Mbiꞌ ndlyoa mselyaꞌ. Làth xtauꞌa, tee yath mbiꞌ. Per mbiꞌ neꞌndante xinꞌ con xaꞌgot coꞌ ngòc saꞌl mbiꞌ, ¿léꞌ? Mbyanꞌ xaꞌgota viud. Ndooleꞌ hues mbiꞌ coꞌ nde nque xís mbiꞌ mcàayaꞌ xaꞌgot viuda.
\v 26 Lomisqueꞌ, nguth mbiꞌa. Ngoloa, mbyanꞌ xaꞌgota viud tedib vez. Ndooleꞌ tedib hues mbiꞌ coꞌ nde nquea tee càayaꞌ xaꞌgota. Lomisqueꞌ, nguthguèꞌ mbiꞌa, ne. Lomisqueꞌ, ngòca loo taamas myenꞌ axta nguth rye gaz hues myenꞌa.
\v 27 Ngolo nguth rye gaz hues myenꞌa, tee yath xaꞌgota, ne.
\v 28 Nalleꞌ gunee loo nuꞌ, coꞌseꞌ ryo xban rye hues myenꞌ coꞌ ngutha, ¿chó myenꞌ gàc saꞌlpeꞌ xaꞌgota por mque no xaꞌgota rye gaz hues myenꞌ, àꞌ?
\p
\v 29 Jesús mcàb loo mèna. Ndxab Jesús:
\p ―Aa, que tont guꞌse. Thidtene ncuau lezoꞌ guꞌ, ndee. Nazab ndli guꞌ xtùuz. No inalìde ngue li guꞌ xtùuz. Tatuaꞌ ndli guꞌ xtùuz tac indaꞌde guꞌ cuent coꞌ huenlequeꞌ diꞌs coꞌ ndub loo libr coꞌ nac xtiꞌs Diox. Neꞌ neꞌ indaꞌ guꞌ cuent coꞌ nac conꞌ roo no conꞌ xèn coꞌ ndxàp Diox laꞌs nii Diox no laꞌs yaꞌ Diox.
\v 30 Tac coꞌseꞌ gàc huiz coꞌ ryo xban mèn nguth, mèn coꞌ ngòo loo cón cheꞌn Diox, huiza ya neꞌberede mèna, selyaꞌ mèna tedib vez. Huiza no tiempa gàc mèna xal angl cheꞌn Diox.
\v 31 Per cón cheꞌn xal ndli guꞌ xtùuz no xal mbez guꞌ leꞌ mèn coꞌ nguth neꞌryo xbante, ¿chéꞌ tarte lab guꞌ diꞌs coꞌ ndub loo libr coꞌ nac xtiꞌs Diox coꞌ gunii yub Diox loo mèn póla, càꞌ? Diox ndxab taandxèꞌ:
\p
\v 32 ―Daa nac Diox cheꞌn xudgool guꞌ Abraham, Isaac, no Cob.
\p Huiꞌ guꞌ nexa. Yende mod gàc Diox Diox cheꞌn mèn coꞌ ndxelo ndxelux coꞌseꞌ ñeei loo mèn. Por cona, non naꞌ leꞌ Abraham no Isaac no Cob naban coꞌteꞌ ndyàa xaꞌ tac Diox mbez nac Diox Diox cheꞌn xaꞌa.
\p
\v 33 Coꞌseꞌ ngolo mbìn mèn coꞌ ngureriꞌ tataa ndxab Jesús, ryete mèn ante mbuiꞌ no ante gunaa xal ngòc diꞌs coꞌ mbluꞌ Jesús loo mèn.
\s Mèn xleyꞌ saduce mnibdiꞌs loo Jesús cón más ndli precis ndlyaꞌs Diox li mèn, coꞌ nac coꞌ mnibeꞌ Diox loo mèn.
\r (Mr. 12.28–34)
\p
\v 34 Coꞌseꞌ mbìn mèn xleyꞌ farise leꞌ Jesús mbli gan par ya neꞌtolode ndoodiꞌs mèn xleyꞌ saduce con Jesús, mbere mèn xleyꞌ farise, mqueltàa mèn xleyꞌ farise tedib vez loo Jesús.
\v 35 Sya, thìb mbiꞌ coꞌ ngòc mèn xleyꞌ farise coꞌ ngòc maistr coꞌ ndluꞌ cón cheꞌn ley coꞌ mxoꞌf Moisés loo mèn tiempa nzo xiꞌth mèna. Mbiꞌ mblyaꞌs ngàal diꞌs mbiꞌ Jesús par ñee mbiꞌ ñeeneꞌ chéꞌ tagaa Jesús loo mbiꞌ con diꞌs coꞌ càb Jesús. Mnibdiꞌs mbiꞌ loo Jesús. Ndxab mbiꞌ:
\p
\v 36 ―Maistr, ¿chó diꞌs nac diꞌs coꞌ más ntac coꞌ ñibeꞌ loo ley coꞌ mxoꞌf Moisés loo mèn, àꞌ?
\p
\v 37 Jesús ndxab loo mbiꞌ coꞌ ngòc maistra:
\p ―Diꞌsa nac diꞌs coꞌ mbez: Fqueꞌ lezoꞌ guꞌ Tad Diox guꞌ dib nzo yéc guꞌ, no dib nzo lezoꞌ guꞌ, no dib nzo xtùuz guꞌ.
\v 38 Diꞌsa nac ner diꞌs coꞌ mtanꞌ Diox loo mèn loo ley coꞌ mxoꞌf Moisés loo mèn. No nac diꞌsa diꞌs coꞌ más ntac no coꞌ más ñibeꞌ loo mèn.
\v 39 Leꞌ diꞌs coꞌ nac mbryop diꞌs coꞌ nde nque loo ner diꞌsa na, lalqueꞌ nac xal ner diꞌsa. No mbez diꞌs ndxèꞌ loo mèn: Fqueꞌ lezoꞌ guꞌ gunèe guꞌ hues xtàa guꞌ xalqueꞌ coꞌseꞌ leque guꞌ ngue lezoꞌ ñèe guꞌ guꞌ.
\v 40 Ryop diꞌs coꞌ taandxèꞌ mbez no coꞌ ndluꞌ loo mèn, ryop diꞌs ndxèꞌ nac diꞌs coꞌ mnibeꞌ Diox loo Moisés par mbyanꞌ diꞌs ndxèꞌ loo ley coꞌ mxoꞌf Moisés loo mèn. Lomisqueꞌ nac diꞌs ndxèꞌ con diꞌs coꞌ gunii Diox loo mèn coꞌ mdeꞌth diꞌs coꞌ ndxab Diox.
\s Jesús mnibdiꞌs loo mèn xleyꞌ farise. Ndxab Jesús: ¿Chó xin nac Crist ndli guꞌ cuent, àꞌ?
\r (Mr. 12.35–37; Lc. 20.41–44)
\p
\v 41 Láth beꞌ nziriꞌ mèn coꞌ nac xleyꞌ farise loo Jesús,
\v 42 Jesús mnibdiꞌs loo mèna. Ndxab Jesús:
\p ―¿Xá nee guꞌ? ¿Cón ndli guꞌ xtùuz cón cheꞌn Crist? ¿Chó xin nac Crist, àꞌ?
\p Mèna mcàb. Ndxab mèna loo Jesús:
\p ―Crist nac xganꞌ David coꞌ ngòc rey póla.
\p
\v 43 Sya, ndxab Jesús loo mèna:
\p ―Cheleꞌ Crist nac xganꞌ David, ¿chonon ndxab David por cón cheꞌn Xpii Natúꞌ cheꞌn Diox leꞌ Crist nac yub Tad cheꞌn David, sya? Tac David ndxab:
\pi1
\v 44 Tad Diox ndxab loo Tad daa: Ftub cuaten axtaqueꞌ lin leꞌ ryete mèn coꞌ nac mèn ngolo ngolaꞌs cheꞌnl gàc nadoꞌ lool.
\m
\v 45 ¿Xá mod ndli guꞌ cuent nac Crist xganꞌ David coꞌseꞌ leque yub David mbez: Tad daa, loo Crist, sya? ¿Máa yob yéc guꞌ, na?
\p
\v 46 Yende chó mèna ngác ncàb nec thìb diꞌs loo Jesús. No desde huiza par delant nec thìb mèna neꞌtolode ngli ryes ñibdiꞌs mèna taamas conꞌ loo Jesús.
\c 23
\s Jesús ngue zib quìi mèn xleyꞌ farise. No ngue zib quìi Jesús mèn coꞌ ngòc maistr coꞌ ndluꞌ cón cheꞌn ley coꞌ mxoꞌf Moisés loo mèn.
\r (Mr. 12.38–40; Lc. 11.37–54; 20.45–47)
\p
\v 1 Sya, ndxab Jesús loo mèn coꞌ ngureriꞌ loo Jesús no loo myenꞌ xinꞌ mtéꞌth Jesús:
\p
\v 2 ―Leꞌ maistr coꞌ ndluꞌ cón cheꞌn ley coꞌ mxoꞌf Moisés loo mèn nación Israel no mèn xleyꞌ farise, anzeꞌf ndli ryop ned mèn baꞌ cuent leꞌ mèna ngue no zinꞌ coꞌ nac zinꞌ coꞌ ndluꞌ mèn cón cheꞌn ley coꞌ mxoꞌf Moisés loo mèn.
\v 3 Cona, ngue niin loo guꞌ: Ftubdiꞌs guꞌ loo diꞌs coꞌ mbez mèn baꞌ. No bli guꞌ coꞌ ñibeꞌ mèna. Per neꞌque tee lide guꞌ xal nac mod coꞌ ndxàp mèn baꞌ. Tac mèna ñibeꞌ loo mèn li mèn thìb conꞌ. No leque mèna indlide conꞌ xal ñibeꞌ mèna li taamas mèn.
\v 4 Nde niin tedib conꞌ loo guꞌ: Coꞌseꞌ ndli mèn baꞌ tataa, ndli mèna xal coꞌseꞌ ntecue mèn thìb yóꞌ xís xtàa mèn, yóꞌ coꞌ neꞌxecte mèn hueꞌ mèn. No ñibeꞌ yèe mèna loo prob xtàa mèn par hueꞌ mèna yóꞌ. Per mèn baꞌ, nec thìb mod no nec tedib mod neꞌtyalte mèn no neꞌ neꞌ li mèn xtùuz teche mèn nec thìb yalnibeꞌ bix coꞌ indubte loo ley coꞌ ngue no mèn loo xtàa mèn coꞌ nac ley coꞌ mnibeꞌ Diox mxoꞌf Moisés loo mèn nación Israel.
\v 5 Asendli mèn baꞌ ryete conꞌ coꞌ nac mod coꞌ ndxàp mèn baꞌ par huiꞌ mèn no ñaa mèn loo mèn baꞌ. Anzeꞌf ndyublaꞌs mèn farise baꞌ, no mèn coꞌ ndluꞌ cón cheꞌn ley coꞌ mxoꞌf Moisés loo mèn, hueꞌ mèn diꞌs coꞌ nac ndxep diꞌs cheꞌn xtiꞌs Diox loo thìb leꞌ yeꞌs lechuz mèn no coꞌteꞌ nac bélꞌchaꞌ yaꞌ mèn. No anzeꞌf ndyublaꞌs mèn baꞌ goc mèn baꞌ xab mèn coꞌ nac larꞌ coꞌ ndoo flec coꞌ nac xab mèn más nolꞌ no flec más nolꞌ leque coꞌ ndli taamas mèn us.
\v 6 Ale ndublaꞌs yèe mèn baꞌ tyub mèn baꞌ coꞌteꞌ más huen par tyuꞌ mèn baꞌ coꞌteꞌ ndxàc chol yalhua. No ndublaꞌs yèe mèn baꞌ tyub mèn baꞌ coꞌteꞌ gàc gab chol mèn cón cheꞌn mèn baꞌ: Susqueꞌ mèn guryath no mèn guryèn nac mèn baꞌ leꞌn sinagog.
\v 7 No anzeꞌf ndublaꞌs yèe mèn baꞌ ñii chol mèn Diox loo mèn baꞌ pál coꞌteꞌ nzyálꞌ mèn mèn baꞌ no por fuerz gàp mèn mod ñèe mèn mèn baꞌ coꞌseꞌ zyálꞌ mèn mèn baꞌ. No anzeꞌf ndublaꞌs yèe mèn baꞌ gab chol mèn: San, Maistr, loo mèn baꞌ pál coꞌteꞌ nzyálꞌ mèn baꞌ chol mèn.
\p
\v 8 Per ndxeꞌlequeꞌ, part cón cheꞌn guꞌ, neꞌtaꞌde guꞌ lugar ñee chol mèn Maistr loo guꞌ. Tac thidte mbiꞌ coꞌ nac merpeꞌ Maistr nzo. Mbiꞌa nac Crist, coꞌ nee diꞌs, nac yub daa. Leꞌ rye guꞌ na, ndxàc hues por cón cheꞌn Maistr guꞌ.
\v 9 Neꞌ neꞌ gab guꞌ: Pay, loo nec thìb mèn coꞌ nziriꞌ loo izlyoꞌ. Tac ante thidte Xud guꞌ ngue no guꞌ. Xud guꞌa nzo loo béꞌ.
\v 10 Neꞌ neꞌ taꞌ guꞌ lugar ñee chol mèn loo guꞌ leꞌ guꞌ nac jef. Tac angoluxte Crist nac jef cheꞌnpeꞌ guꞌ.
\v 11 Leꞌ guꞌ coꞌ ndli mandad loo hues xtàa guꞌ na, guꞌa nac más xaꞌ roo no xàꞌ xèn làth xtàa guꞌ.
\v 12 Tac guꞌ coꞌ ndli cuent no ndluꞌ guꞌ loo xtàa guꞌ leꞌ guꞌ nac más mèn roo no mèn xèn làth xtàa guꞌ, loo guꞌa Diox li gàc guꞌ mèn beꞌthe yiloa. Leꞌ guꞌ coꞌ nac mèn nadoꞌ no mèn beꞌthe làth xtàa guꞌ, loo guꞌa Diox li par gàc guꞌ mèn roo no mèn xèn làth xtàa guꞌ.
\p
\v 13 Mbere Jesús, ndxab Jesús loo mèn coꞌ ndluꞌ cón cheꞌn ley coꞌ mxoꞌf Moisés loo mèn no loo mèn xleyꞌ farise:
\p ―Ay, prob guꞌ izlyoꞌ, guꞌ coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn. Lomisqueꞌ ne, guꞌ, mèn xleyꞌ farise. Ay, prob guꞌ izlyoꞌ. Aa que ndxác guꞌ ntembìi guꞌ ro guꞌ no ntembìi guꞌ xtiꞌs guꞌ loon. Tac guꞌ ncà no ncaꞌ guꞌ loo mèn par neꞌyòode mèn loo cón cheꞌn Diox par ñibeꞌpeꞌ Diox loo mèn. Neꞌ neꞌ tyal guꞌ no neꞌ neꞌ taꞌ guꞌ lugar par ñibeꞌpeꞌ Diox loo guꞌ. Neꞌ neꞌ ndlaꞌ guꞌ yòo mèn coꞌ ndyal yòo loo cón cheꞌn Diox par ñibeꞌpeꞌ Diox loo mèna.
\p
\v 14 Ay, prob guꞌ izlyoꞌ, guꞌ coꞌ ndluꞌ cón cheꞌn ley coꞌ mxoꞌf Moisés loo mèn. Lomisqueꞌ guꞌ ne, mèn xleyꞌ farise. Prob guꞌ izlyoꞌ. Aa que ndxác guꞌ ntembìi guꞌ ro guꞌ no ntembìi guꞌ xtiꞌs guꞌ loon. Ale ndyac guꞌ conꞌ huen coꞌ ngue li guꞌ. Tac por thìb conꞌ coꞌ iñaade ndyenxùꞌ guꞌ no ndxàc cheꞌn guꞌ liz prob mèngot viud. No par ndli guꞌ xal mèn coꞌ neꞌñeede no mèn coꞌ indaꞌde cuent cón li mèn, ale asendli guꞌ ngolꞌ guꞌ xleyꞌ guꞌ coꞌseꞌ mbez guꞌ Diox. Por conꞌ coꞌ ndli guꞌa, más nayiꞌ tínꞌ gàc Diox loo guꞌ par tetìi Diox guꞌ yiloa.
\p
\v 15 Tedib vez niin loo guꞌ: Ay, prob guꞌ izlyoꞌ, guꞌ coꞌ ndluꞌ cón cheꞌn ley coꞌ mxoꞌf Moisés loo mèn. Lomisqueꞌ guꞌ ne, mèn xleyꞌ farise: Ay, prob guꞌ izlyoꞌ. Aa que ndxác guꞌ ntembìi guꞌ ro guꞌ no ntembìi guꞌ xtiꞌs guꞌ loon. Ale ndyac guꞌ conꞌ huen nac coꞌ ngue li guꞌ. Guꞌ nque tee cuaꞌn mèn loo izlyoꞌ no loo níttóꞌ par mbli guꞌ mseꞌ mèna mod coꞌ ngòp mèn par yilaꞌs mèna loo xleyꞌ guꞌ xalqueꞌ ndxelaꞌs guꞌ loo xleyꞌ guꞌ par gàc mèna thidte mèn con guꞌ. No coꞌseꞌ ngolo mbli guꞌ gan par gàc mèna thidte mèn con guꞌ no ngòo mèna loo xleyꞌ guꞌ, ndli guꞌ par ndxàc loo mèna chop cuaꞌ conꞌ yeꞌrsinꞌtúb leque loo guꞌ par thìb lìte yòo prob mèna leꞌn yeꞌrbìil coꞌteꞌ nac loo quìi no loo bèel.
\p
\v 16 Ay, prob guꞌ izlyoꞌ, guꞌ coꞌ nac xal mèn sieu coꞌ ndyoo ner loo mèn. Guꞌ mbez: Cheleꞌ chol mèn càbgòn thìb conꞌ, lugar de teꞌth mèn lèe Diox mbez mèn: Por lèe templ baꞌ lina. Sya, mbez guꞌ: Indlide arid precis li lùu coꞌ ndxab lùu li lùu por mdeth lùu lèe templ baꞌ. Per ndxeꞌlequeꞌ, mbez guꞌ: Cheleꞌ mèn gab: Lina o gàca loon por mdeꞌth mèn or coꞌ nacsuaꞌ templ baꞌ, sya, mbez guꞌ: Syase, ndliqueꞌ precis li guꞌ conꞌ coꞌ ndxab guꞌ li guꞌ loo mèn.
\v 17 Susqueꞌ tont guꞌ. No susqueꞌ nac guꞌ xal mèn sieu coꞌ nauꞌ loo no coꞌ nauꞌ yéc. ¿Cón ndli guꞌ cuent nac conꞌ más ntac, àꞌ? ¿Chéꞌ ndli guꞌ cuent más ntac or o más ntac templ coꞌ ndli ndxàc natúꞌ ora, càꞌ? Yende xàa. Más ntac templ, ¿léꞌ?
\v 18 Lomisqueꞌ, mbez guꞌ loo mèn, ne: Cheleꞌ chol mèn càbgòn li mèn thìb conꞌ o gàc thìb conꞌ loo mèn, cheleꞌ mèna gab: Gàca o lina xalqueꞌ nac loo còoꞌ leꞌn templ baꞌ, leꞌ sya, guꞌ mbez: Inquinte arid li guꞌ coꞌ mdeꞌth guꞌ xal nac loo còoꞌ leꞌn templ baꞌ. Lomisqueꞌ, más mbez guꞌ: Cheleꞌ mèn teꞌth li mèn thìb conꞌ o gàc thìb conꞌ loo mèn, no teꞌth mèn por cón cheꞌn gòn coꞌ mbec mèn loo còoꞌ leꞌn templ, sya, mbez guꞌ: Syase, por fuerz gàcqueꞌ o li guꞌ conꞌ coꞌ mcàbgòn guꞌ loo mèn li guꞌ.
\v 19 Susqueꞌ tont guꞌse. No susqueꞌ nac guꞌ xal mèn sieu coꞌ nauꞌ loo nauꞌ yéc. ¿Cón ndli guꞌ cuent más ntac, àꞌ? ¿Chéꞌ ndli guꞌ cuent más ntac gòn coꞌ mbec guꞌ loo mes coꞌ mbez guꞌ nac loo còoꞌ o chéꞌ ndli guꞌ cuent más ntac conꞌ coꞌ nziꞌf guꞌ loo còoꞌ leque más natúꞌ nac còoꞌ coꞌ ndli ndxàc natúꞌ conꞌ loo Diox, càꞌ? Yende xàa. Más ntac loo còoꞌ, ¿léꞌ?
\v 20 Tac mèn coꞌ ndeꞌth diꞌs coꞌ nac cón cheꞌn loo còoꞌ, ingue teꞌthte mèna diꞌs ante coꞌ nac cón cheꞌn loo còoꞌ. Ndxeꞌlequeꞌ, mèna ngue teꞌth diꞌs coꞌ nac lèe ryethe conꞌ coꞌ nziꞌf loo còoꞌ, ne.
\v 21 Leꞌ mèn coꞌ ndeꞌth diꞌs coꞌ nac lèe templ na, ingue teꞌthte mèna ante lèe templ. Ndxeꞌlequeꞌ, ngue teꞌth mèna diꞌs coꞌ nac lèe Diox tac Diox nzo leꞌn templ, ne.
\v 22 Lomisqueꞌ, mèn coꞌ ndeꞌth diꞌs coꞌ nac lèe béꞌ, mèna ngue teꞌth diꞌs coꞌ nac lèe coꞌteꞌ nzo Diox. No ngue teꞌth mèn lèe merpeꞌ Diox.
\p
\v 23 Lomisqueꞌ, ndxab Jesús loo mèna:
\p ―Ay, guꞌ coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn no guꞌ coꞌ nac mèn xleyꞌ farise. ¡Prob guꞌ izlyoꞌ! Susqueꞌ ndxác guꞌ ntembìi guꞌ ro guꞌ no ntembìi guꞌ xtiꞌs guꞌ. Ale, ngoꞌ guꞌ siꞌ siꞌ centav loo thìb thìb pes coꞌ nac cheꞌn conꞌ nayèe coꞌ nthoꞌ guꞌ coꞌ nac fthyoxtil, no anís, no comin. Per ale ndxeꞌlequeꞌ, indlide guꞌ cas cón cheꞌn diꞌs coꞌ nac diꞌs coꞌ ñibeꞌ loo ley coꞌ mxoꞌf Moisés loo mèn, coꞌ nee diꞌs, gàc guꞌ mèn nalì no mèn nambìi loo Diox no gàc guꞌ mèn coꞌ ndlyat lezoꞌ ñèe xtàa no gàc guꞌ mèn coꞌ, lìcqueꞌ, ndxàp yalxlaꞌs no coꞌ, lìcqueꞌ, ndxelaꞌs loo Diox. Lìcque, ndxàalqueꞌ taꞌ guꞌ diezm loo conꞌ ndli guꞌ gan coꞌseꞌ nthoꞌ guꞌ conꞌ. Per más ndxàal li guꞌ par gàc guꞌ mèn nalì no mèn nambìi loo Diox, no gàc guꞌ mèn coꞌ ndlyat lezoꞌ ñèe xtàa, no gàc guꞌ mèn coꞌ ndxelaꞌs loo Diox no coꞌ ndxàp yalxlaꞌs loo Diox. Per guꞌ indlide conꞌa, ¿léꞌ?
\v 24 Ay, prob guꞌ izlyoꞌ, guꞌ coꞌ ndyoo ner loo taamas mèn loo cón cheꞌn Diox, guꞌ, coꞌ nee diꞌs, nac xal mèn sieu coꞌ ndyoo ner loo taamas mèn coꞌ nac xal mèn sieu. Loo cón cheꞌn Diox ndli guꞌ cuent anzeꞌf mèn nambìi nac guꞌ no mèn nalì nac guꞌ loo Diox. Per ale ndxeꞌlequeꞌ, loo cón cheꞌn Diox nac guꞌ xal mèn coꞌ nzib thìb taz café coꞌseꞌ ndlyàa thìb ngruꞌs chuꞌth leꞌn café par gu guꞌ café. Per neꞌtaꞌde guꞌ cuent leꞌ loo cón cheꞌn Diox nac guꞌ xal mèn coꞌ ngueb thìb camell, coꞌ nee diꞌs, nzo leꞌn taz café coꞌ ngue yu guꞌ. Per conꞌ coꞌ ndli guꞌ baꞌ nee diꞌs ale más ndxòo yéc guꞌ ndli guꞌ conꞌ coꞌ intacte arid loo Diox. Ale ndxeꞌlequeꞌ, indlide guꞌ cas no ingüinte guꞌ arid par li guꞌ conꞌ coꞌ más ntac loo Diox.
\p
\v 25 Ay, prob guꞌ izlyoꞌ, guꞌ coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn no guꞌ coꞌ nac mèn xleyꞌ farise. Susqueꞌ ndxác guꞌ ntembìi guꞌ ro guꞌ no ntembìi guꞌ xtiꞌs guꞌ. Loo cón cheꞌn Diox, ndluꞌ guꞌ guꞌ loo mèn leꞌ guꞌ nac mèn nambìi no mèn nalì loo Diox. Per leꞌn lezoꞌ guꞌ no leꞌn xtùuz guꞌ nzo huax conꞌ yeꞌrsinꞌtúb por mod coꞌ ndxàp guꞌ tac guꞌ ndli huanꞌ mèn. No nqueliꞌth guꞌ cón cheꞌn taamas mèn. No ndxan lezoꞌ guꞌ ñèe guꞌ cón cheꞌn taamas mèn. Cona, ngue niin loo guꞌ: Nac guꞌ xal plat no taz coꞌ ante ntech mèn par xís. Per par leꞌna taate nazab ñaa.
\v 26 Aa, mèn xleyꞌ farise. Susqueꞌ nauꞌ loo nauꞌ yéc guꞌ loo cón cheꞌn Diox. Más huen blo yéc guꞌ no blo lezoꞌ guꞌ par tembìi guꞌ xtùuz guꞌ no teche guꞌ ryethe mod yeꞌrsinꞌ coꞌ ndxàp guꞌ leꞌn xtùuz guꞌ no leꞌn lezoꞌ guꞌ no mod yeꞌrsinꞌ coꞌ ndxàp guꞌ loo mèn. Leꞌ sya, tataa mod seꞌ guꞌ mod coꞌ ndxàp guꞌ par, lìcqueꞌ, gàc guꞌ mèn nalì no mèn nambìi loo Diox xal coꞌseꞌ tech mèn par leꞌn taz no plat par nambìi gàca.
\p
\v 27 Ay, prob guꞌ izlyoꞌ, guꞌ coꞌ nac maistr coꞌ ndluꞌ cón cheꞌn ley loo mèn no guꞌ coꞌ nac mèn xleyꞌ farise. Susqueꞌ ndxác guꞌ ntembìi guꞌ ro guꞌ no ntembìi guꞌ xtiꞌs guꞌ. Guꞌ lalqueꞌ nac xal báꞌ cheꞌn thìb mèn nguth, coꞌ ante nabeꞌs natoxcuaꞌ, coꞌ ante nagus bèelequeꞌ ñaa par xís. Per par ned leꞌn báꞌ anzeꞌf nazab ndlyaꞌ no anzeꞌf thìb zith cheꞌn mèn nguth nzo.
\v 28 Tataaqueꞌ nac guꞌ, mèn xleyꞌ farise tac guꞌ ndluꞌ guꞌ loo mèn anzeꞌf mèn ndac nac guꞌ. Tataa ndli guꞌ par ndxác guꞌ ntembìi guꞌ ro guꞌ no ntembìi guꞌ xtiꞌs guꞌ loo mèn par indluꞌde guꞌ ndli guꞌ chó conꞌ yeꞌrsinꞌ coꞌ ndli guꞌ loo mèn.
\p
\v 29 Ay, prob guꞌ izlyoꞌ, guꞌ coꞌ nac maistr loo mèn, guꞌ coꞌ ndluꞌ diꞌs coꞌ nac ley coꞌ mxoꞌf Moisés loo mèn. Ay, prob guꞌ izlyoꞌ, mèn xleyꞌ farise. Susqueꞌ ndxác guꞌ ntembìi guꞌ ro guꞌ no ntembìi guꞌ xtiꞌs guꞌ. Tac guꞌ mbli mandad mtoxcuaꞌ mèn armit cheꞌn mèn coꞌ mdeꞌth diꞌs coꞌ ndxab Diox, coꞌ nguth póla. No nabeꞌs mtoxcuaꞌ guꞌ coꞌteꞌ ndoo gunab coꞌ nac monument coꞌ nac xin no xnaa cheꞌn mèn coꞌ mbez guꞌ ngòc mèn ndac.
\v 30 No nabeꞌste ntoxcuaꞌ guꞌ yalgutyèꞌ. Mbez guꞌ: Cheleꞌ naꞌ ngo ban leꞌn tiemp coꞌ mban xudgool naꞌ, neꞌnqueltàa node naꞌ xudgool naꞌ par nguth naꞌ mèn coꞌ mdeꞌth diꞌs coꞌ ndxab Diox con xudgool naꞌ, ¿léꞌ?
\v 31 Por diꞌs coꞌ mbez guꞌ no por diꞌs coꞌ ndyoodiꞌs guꞌ, leque guꞌ ngue go xoꞌf coꞌ mbli guꞌ no ndaꞌ guꞌ cuent nac guꞌ bin mèn coꞌ mbeth mèn coꞌ mdeꞌth diꞌs coꞌ ndxab Diox. Cona, ngue niin loo guꞌ: Leque coꞌteꞌ mdoo nii xud guꞌ no leque coꞌteꞌ mdoo yaꞌ xud guꞌ, leque tya tyoo nii guꞌ no leque tya tyoo yaꞌ guꞌ, ne. ¿Cón más ndlyaꞌs guꞌ ñee guꞌ loon?
\v 32 Cona, ngue niin loo guꞌ: Ftolo bli guꞌ conꞌ xal mbli xudgool guꞌ póla. Ftolo guth guꞌ taamas mèn coꞌ ndeꞌth diꞌs coꞌ ndxab Diox. Yiloa nee guꞌ cón cheꞌn guꞌ coꞌseꞌ tub rez Diox cón cheꞌn guꞌ.
\p
\v 33 Aa, mèn coꞌ nac xal mbelꞌ coꞌ lèe huid. ¿Xá mod gác guꞌ lyáꞌ guꞌ loo yaltìi tínꞌ coꞌ gàc loo guꞌ coꞌseꞌ tetìi Diox guꞌ leꞌn yeꞌrbìil coꞌteꞌ nzo quìi no bèel? ¡Pà lyáꞌ guꞌ!
\v 34 Por cona, na ngue nii loo guꞌ: Na telꞌ huax mèn làth guꞌ. Ndxep mèna gàc mèn coꞌ teꞌth diꞌs coꞌ ndxab Diox loo guꞌ. Taandxep mèn gàc mèn coꞌ ndxác cón cheꞌn Diox. Taandxep mèn gàc mèn coꞌ lyaꞌs luꞌ loo guꞌ cón cheꞌn Diox coꞌ nac conꞌ lìcpeꞌ par taꞌ guꞌ cuent cón cheꞌn Diox. Per ale ndxeꞌlequeꞌ, guth guꞌ ndxep mèna. Taandxep mèna queꞌ guꞌ loo thìb cruz. No taꞌ guꞌ cheꞌn taandxep mèna leꞌn sinagog guꞌ. No tyoo nque guꞌ xís taandxep mèna leꞌn thìb yèez no leꞌn tedib yèez axtaqueꞌ li guꞌ conꞌ ndlyaꞌs guꞌ con mèna.
\v 35 Por cona, conꞌ yeꞌrsinꞌ coꞌ nde teeleꞌ ndli guꞌ con rye mèn coꞌ telꞌen loo guꞌ li par yanꞌ cón cheꞌn guꞌ loo Diox por cón cheꞌn rye mèn coꞌ ngòc mèn ndac coꞌ mbethxùꞌ xudgool guꞌ póla no coꞌ mbethxùꞌ guꞌ leꞌn tiemp ndxèꞌ. Tac anon coꞌseꞌ mbethxùꞌ thìb mbiꞌ coꞌ ngòc xudgool guꞌ Abel coꞌ ngòc thìb mbiꞌ nambìi no thìb mbiꞌ nalì loo Diox, mtlo mbethxùꞌ xudgool guꞌ taamas mèn desde huiza no axta tiemp coꞌseꞌ mbethxùꞌ xudgool guꞌ Zacari, xganꞌ Berequi, coꞌ mbeth xudgool guꞌ leꞌn templ coꞌteꞌ ndoo mes coꞌteꞌ mbec mèn gòn o ofrend loo Diox.
\v 36 Lìcqueꞌ nac diꞌs coꞌ ngue niin loo guꞌ ndxèꞌ: Dol no yalnquexùꞌ coꞌ ngòc cón cheꞌn rye mèn coꞌ mbethxùꞌ prob mèna yiziꞌf no yigaꞌs loo guꞌ coꞌ naban tiemp ndxèꞌ par tetìi tínꞌ Diox guꞌ axta plóthe yiloa.
\s Jesús mbínꞌ por cón cheꞌn mèn ciuda Jerusalén.
\r (Lc. 13.34–35)
\p
\v 37 Ay, prob guꞌ izlyoꞌ, mèn ciuda Jerusalén, guꞌ coꞌ mbeth mèn coꞌ mdeꞌth diꞌs coꞌ ndxab Diox, guꞌ coꞌ mbuaaꞌd quèe mèn coꞌ mtelꞌ Diox coꞌ mbiꞌth lo yalbàn loo guꞌ. Anzeꞌf mblyazen nqueltàan guꞌ loon xal ndli nguiiddol colec con nguiid yènꞌ coꞌseꞌ ngueꞌs nguiiddol colec nguiid yènꞌ xanꞌ xílꞌ nguiiddol colec. Per guꞌ neꞌndalte thidtene no neꞌndaꞌde guꞌ lugar par ngàca tataa loo guꞌ.
\v 38 Per nalleꞌ huiꞌ guꞌ nexa. Nase thidtene mbláꞌyaꞌ Diox guꞌ liz guꞌ no làaz guꞌ. Nee guꞌ cón cheꞌn guꞌ nalleꞌ.
\v 39 Tac daa ngue nii loo guꞌ: Guꞌ ya neꞌberede huiꞌ loon leꞌn tiemp ndxèꞌ. Guꞌ berequeꞌ huiꞌ loon per axta coꞌseꞌ gàc tiemp coꞌseꞌ ñeepeꞌ guꞌ no coꞌseꞌ gab guꞌ loo Diox: Anzeꞌf mbiꞌ huen no anzeꞌf mbiꞌ ndac nac mbiꞌ coꞌ nde baꞌ tedib vez, Tad Diox. Uꞌ mtelꞌ mbiꞌ. Nde mbiꞌ. Axta syareꞌ, huiꞌ guꞌ loon tedib vez.
\c 24
\s Jesús mdaꞌ cuent leꞌ mèn sil templ no yende cón tanꞌ mèn coꞌ nac cón cheꞌn templ.
\r (Mr. 13.1–2; Lc. 21.5–6)
\p
\v 1 Ngolo mdoodiꞌs Jesús rye diꞌsa loo mèn ciuda Jerusalén, ngroꞌ Jesús leꞌn templ. Leꞌpeꞌ tyen Jesús ned bii Jesús, mbii gax myenꞌ xinꞌ mtéꞌth Jesús loo Jesús. Látha, nzi tee yot myenꞌ. Xèe ngüiꞌ myenꞌ loo templ. Mbez myenꞌ loo Jesús: Tad, susqueꞌ nabeꞌs ñaa templ ndxèꞌ no susqueꞌ naroo templ ndxèꞌ, cara.
\v 2 Per ale leꞌleꞌ mcàb Jesús. Ndxab Jesús loo myenꞌ:
\p ―¿Chéꞌ nzi tee yot guꞌ, ngüiꞌ guꞌ loo templ ndxèꞌ no ndli guꞌ xtùuz cón cheꞌn templ ndxèꞌ, ne, càꞌ? Per huiꞌ guꞌ nexa. Lìcqueꞌ nac diꞌs coꞌ nde niin loo guꞌ ndxèꞌ: Desde nalleꞌ par delant, nde zinꞌ gaxleꞌ leꞌ mèn sil templ ndxèꞌ. No ya neꞌhuiꞌde guꞌ nec thìb quèe loo ftoo ndxèꞌ. Thidtene telux mèn templ ndxèꞌ.
\s Jesús ngue taꞌ cuent cón cheꞌn conꞌ coꞌ tlo gàc ndooreꞌ lith no izlyoꞌ.
\r (Mr. 13.3–23; Lc. 21.7–24; 17.22–24)
\p
\v 3 Ngoloa, mxen Jesús ned. Nda no Jesús myenꞌ xinꞌ mtéꞌth Jesús loo thìb yii coꞌ lèe yii cheꞌn yaa oliv. Coꞌseꞌ ñee myenꞌ ndub Jesús tya, mbii gax myenꞌ xinꞌ mtéꞌth Jesús loo Jesús. Xexte ndxab myenꞌ loo Jesús:
\p ―Tad, nuꞌ ndlyaꞌs ñee Uꞌ loo nuꞌ ¿pól gàc coꞌ nee Uꞌ loo nuꞌ gozea cón cheꞌn templ baꞌ no chó señ yúꞌ loo mèn coꞌseꞌ gàc huiz coꞌseꞌ bere Uꞌ, yiꞌth Uꞌ loo izlyoꞌ ndxèꞌ tedib vez no coꞌseꞌ gàc huiz lyux no lith no izlyoꞌ, àꞌ?
\p
\v 4 Sya, ndxab Jesús loo myenꞌ:
\p ―Chó Diox chó nee guꞌ. Neꞌtaꞌde guꞌ lugar quedìi chol mèn guꞌ cón cheꞌn conꞌ niin loo guꞌ nalleꞌ, ndee guꞌ.
\v 5 Tac anzeꞌf huax mèn nareꞌ gáal loo izlyoꞌ no que tee teꞌth mèna cón cheꞌn lèen. No gab mèn no que tee teꞌth mèna loo mèn: Daa nac Crist. Leꞌ sya, tataa mod anzeꞌf huax mèn quedìi mèna.
\v 6 Huiza gòn guꞌ tyoodiꞌs mèn cón cheꞌn xóꞌ. No tyoodiꞌs mèn cón cheꞌn conꞌ ryes coꞌ ndxàc cón cheꞌn xóꞌ. Per nalleꞌ niin loo guꞌ: Thidtene neꞌzyebte guꞌ coꞌseꞌ gàc huiz no tiemp coꞌseꞌ gòn guꞌ diꞌs coꞌ tataa taꞌ mèn cuent loo guꞌ. Tac naquinqueꞌ tataa gàca. Per mastaleꞌ tataaqueꞌ gàca leꞌn huiza, tarte gàc tiemp coꞌseꞌ lyux no lith no izlyoꞌ.
\v 7 Sya, gàc huiz telꞌ mèn cheꞌn thìb nación solndad cheꞌn mèn nación par yoo mèna con mèn coꞌ nac tedib nación. Lomisqueꞌ ne, li mèn thìb nación xóꞌ con mèn coꞌ nac tedib nación. Huiza o tiempa, por derech, lyàa huin loo izlyoꞌ. Lyàa yilíiz. Huin xòo huax lugar loo izlyoꞌ, ne.
\v 8 Per pente tlo gàc rye conꞌa par tenꞌ mèn no taꞌ mèn cuent leꞌ mèn tolo tyactìi par delant coꞌ nac más conꞌ tínꞌ coꞌ nde nque coꞌ gàc loo coꞌ ngue niin loo guꞌ ndxèꞌ.
\p
\v 9 Láth ndxàc rye conꞌa leꞌn tiempa, mèn tyenxùꞌ guꞌ no taꞌ mèn guꞌ loo xtàa mèn par li no mèn guꞌ chol conꞌ yeꞌrsinꞌ xal ndlyaꞌs mèna axta guth mèna guꞌ. Tiempa, mèn dib athu loo izlyoꞌ yòo xyàn lezoꞌ ñèe mèna guꞌ ante por cón chenen no maste.
\v 10 Leꞌn huiza no leꞌn tiempa, anzeꞌf thìb mèn ryo xàꞌ loo cón chenen. Ya neꞌtolode yilaꞌs mèna loon. Leꞌ sya, leque mèn coꞌ ngro xàꞌ loo cón chenen, leque mèna taꞌxùꞌ mèn coꞌ ndxelaꞌs loon loo mèn coꞌ nac mèn yeꞌrsinꞌ.
\v 11 Leꞌn huiza anzeꞌf huax mèn gutyèꞌ ryo xoꞌf loo mèn. Taꞌ mèna cuent no teꞌth mèna loo chol mèn leꞌ mèna ngroꞌ tee par tyoodiꞌs mèna cón cheꞌn Diox loo mèn. Tataa mod anzeꞌf huax mèn quedìi mèna, ne.
\v 12 Láth ndxàc conꞌa, anzeꞌf huax conꞌ yeꞌrsinꞌ gàc loo mèn. Anzeꞌf huax mèn ya neꞌqueꞌde lezoꞌ mèn ñèe mèn xtàa mèn. Ndxeꞌlequeꞌ, yòo xyàn lezoꞌ mèn ñèe mèn xtàa mèn.
\v 13 Per mèn coꞌ thidtene mbli nèe lezoꞌ no mbli nèe yéc par tolo queltàa mèna loo cón chenen axta gath mèna, mèna mblyáꞌqueꞌ loo conꞌ ryes.
\v 14 Leꞌ cón cheꞌn diꞌs ndac coꞌ ndluꞌ xá mod ndlyaꞌs Diox ñibeꞌpeꞌ Diox loo mèn na, yath yèn no co mèn yalbàn cón cheꞌn diꞌs ndac loo mèn rye nación coꞌ nziriꞌ dib athu loo izlyoꞌ par de que ryete mèn naciona gòn cón cheꞌn diꞌs ndac no taꞌ mèna cuent cón cheꞌn diꞌs ndaca. Yiloa, syase lyux no lith no izlyoꞌ.
\p
\v 15 Guꞌ coꞌ ndlab yeꞌs, bìn guꞌ diꞌs coꞌ ngue niin loo guꞌ ndxèꞌ no ftaꞌ guꞌ cuent cón nee diꞌs ndxèꞌ no ftenꞌ guꞌ cón nee diꞌs ndxèꞌ. Mbiꞌ coꞌ ngroꞌ lèe Daniel coꞌ mdeꞌth diꞌs coꞌ ndxab Diox, Daniel mqueꞌ yeꞌs loo libr coꞌ nac xtiꞌs Diox cón cheꞌn thìb mbiꞌ zab thìb mbiꞌ cap. Mbiꞌa aseli tezaꞌ mbiꞌ cón cheꞌn chol conꞌ coꞌ nac cón cheꞌn Diox. Coꞌseꞌ ñèe guꞌ ndxàc conꞌ ndxèꞌ leꞌn templ cheꞌn Diox, non guꞌ no nanee guꞌ ndxàcla xal mqueꞌ Daniel yeꞌs.
\v 16 Sya, huen gàca loo mèn cheleꞌ mèn coꞌ nzo leꞌn yèezyaꞌ coꞌ nac làaz mèn jude xyonꞌ par coꞌteꞌ ndub yii par neꞌgàcte yaltìi coꞌ gàcqueꞌ loo guꞌ, guꞌ coꞌ nac mèn nación Israel.
\v 17 Huen gàc loo mèn coꞌ nzi yéc zote liz mèn cheleꞌ mèna, texal bilàa mèna yéc zotea, sangxyonꞌ mèn no yende chó mport nzo lezoꞌ mèn rye cheꞌn mèn coꞌ ndxàp mèn leꞌn nyòo par neꞌyigaade mèna loo yaltìi coꞌ gàcqueꞌ loo guꞌ, mèn nación Israel.
\v 18 Lomisqueꞌ ne, mèn coꞌ ngue zinꞌ huan huiza, huen gàca loo mèna cheleꞌ mèna neꞌyeꞌthte liz mèn huiza par coꞌ mèn rye cheꞌn mèn coꞌ ndxàp mèn par neꞌyigaade mèna loo yaltìi coꞌ gàcqueꞌ loo guꞌ, mèn nación Israel.
\v 19 Ay, prob rye mèngot izlyoꞌ, mèngot coꞌ nzi nac xinꞌ huiza. No ay, prob rye mèngot izlyoꞌ, mèngot coꞌ nzi xènꞌ xinꞌ huiza por cón cheꞌn yaltìi coꞌ gàc loo guꞌ, mèn nación Israel.
\v 20 Gurez guꞌ Diox no bnaꞌb guꞌ loo Diox leꞌ tiemp coꞌ xyonꞌ mèn loo conꞌ ryes no loo yaltìi coꞌ gàc huiza par neꞌgàcte tiempa tiemp xìlꞌ no neꞌ neꞌ gàc huiz coꞌ xyonꞌ mèn huiz descans.
\v 21 Tac coꞌseꞌ gàc ryethe conꞌa, huiza anzeꞌf thìb yaltìi tínꞌ gàc leꞌn huiza loo mèn nación Israel. Yaltìi coꞌ gàc loo mèna tarte gàc dib lal mblec Diox izlyoꞌ no mxènꞌ Diox izlyoꞌ. No yiloa, thidtene ya neꞌberede yaltìi tínꞌa gàc yaltìi tínꞌa tedib vez xal gàc yaltìi tínꞌa huiza loo mèn nación Israel.
\v 22 No cheleꞌ Diox neꞌtedópte huiz tiempa, yende mod lyáꞌ nec thìb mèn. Per ndxeꞌlequeꞌ, Diox tedóp huiz tiempa por nqueꞌ lezoꞌ Diox ñèe Diox mèn, mèn coꞌ Diox mcui, mèn coꞌ Diox mblo xàꞌ par ngòo mèna loo cón cheꞌn Diox.
\p
\v 23 Leꞌ sya, cheleꞌ chol mèn ñee loo guꞌ: Huiꞌ guꞌ nexa. Trèꞌ nzo Crist; o cheleꞌ mèn ñee loo guꞌ: Tuaꞌ nzo Crist, neꞌyilaꞌste guꞌi, ndee guꞌ.
\v 24 Tac coꞌseꞌ gàc huiza, anzeꞌf huax mèn gutyèꞌ ryoꞌ no ryo xoꞌf mèna loo mèn. Nee mèna loo mèn leꞌ mèna nac Crist. No ñee mèna loo mèn leꞌ mèna ndeꞌth diꞌs coꞌ gunii Diox. No li mèna huax yalguyzeꞌ roo no yalguzyeꞌ xèn coꞌ nac señ coꞌ huiꞌ mèn no coꞌ ñaa mèn. Per ryethe conꞌ coꞌ ñee mèna no coꞌ li mèna nac yalgutyèꞌtúb. No axta quedìi mèna mèn coꞌ ndxelaꞌs cheleꞌ mèna gác li mèna gan quedìi mèna mèn.
\v 25 Huiꞌ guꞌ nexa. Fteꞌ lezoꞌ guꞌ leꞌ daa guniileꞌ conꞌ ndxèꞌ loo guꞌ ndooreꞌ gàca loo guꞌ, ndee guꞌ.
\v 26 Cona, beren, ngue niina loo guꞌ: Cheleꞌ mèna ñee loo guꞌ: Huiꞌ guꞌ nexa. Crist nzo coꞌteꞌ nagán, neꞌyade guꞌ tya. No cheleꞌ mèna ñee loo guꞌ: Huiꞌ guꞌ nexa. Crist nzo leꞌn cuart ndxèꞌ, neꞌyilaꞌste guꞌ conꞌ coꞌ ñee mèna loo guꞌ.
\v 27 Tac coꞌseꞌ gàc huiz coꞌ galen, daa coꞌ mbal yáal loo izlyoꞌ ndxèꞌ xal ndxáal chol mèn, setilte gàca xal coꞌseꞌ ndlyàa bèel gundi coꞌseꞌ ndxúꞌ izlyoꞌ par ned ndlyen huiz no par ned mbix huiz.
\v 28 Cón cheꞌn mèn gutyèꞌ coꞌ ngue tan cuent loo guꞌ nalleꞌ nac xal coꞌteꞌ nax thìb máꞌ yaꞌs coꞌteꞌ ndlyàa ngool loo máꞌ yaꞌs par hua ngool bélꞌ máꞌ yaꞌsa.
\s Jesús ngue taꞌ cuent cón gàc coꞌseꞌ yiꞌth Jesús.
\r (Mr. 13.24–37; Lc. 21.25–33; 17.26–30, 34–36)
\p
\v 29 Coꞌseꞌ yilo riid rye huiz coꞌ gàc rye yalnaxia loo mèn, tlo cuau loo huiz. Neꞌtenìide huiz loo izlyoꞌ. Lomisqueꞌ ne, neꞌtenìide mbeꞌ loo izlyoꞌ. Leꞌ mbyáaz coꞌ nziꞌf loo béꞌ na, tlo huin loo béꞌ axta tlo gàb che mbyáaz loo béꞌ. No ryethe conꞌ coꞌ nac conꞌ roo no conꞌ xèn loo béꞌ tlo huin no xiꞌth loo béꞌ.
\v 30 Yiloa, axta syareꞌ huiꞌ guꞌ no yúꞌ thìb señ coꞌ gàc cón chenen, daa coꞌ mbal yáal loo izlyoꞌ xalqueꞌ ndxáal chol mèn loo izlyoꞌ. Leꞌ mèn coꞌ naban dib athu loo izlyoꞌ na, mèna gónꞌ coꞌseꞌ huiꞌ mèna loon, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ. Conꞌa gàc loo mèn coꞌseꞌ galen leꞌn xcuau coꞌseꞌ gàpen rye loothe conꞌ roo no conꞌ xèn laꞌs niin no laꞌs yan. No huiꞌ mèna coꞌseꞌ gàc conꞌ roo conꞌ xèn loon.
\v 31 Nibeꞌen loo angl huiza par cabii cuez angl trompet par thop angl rye mèn coꞌ naban dyap lad loo izlyoꞌ, coꞌ nee diꞌs, nac thìb lad ro izlyoꞌ axta tedib lad ro izlyoꞌ.
\p
\v 32 Bli guꞌ xtùuz cón cheꞌn thìb diꞌs coꞌ nde niin loo guꞌ coꞌ ndluꞌ cón cheꞌn yaa ngudyuug: Huiꞌ guꞌ nexa. Coꞌseꞌ ngololeꞌ ngòb laa loo yaa ngudyuug no nde xiisleꞌ laa yenꞌ loo yaa ngudyuug, guꞌ nonqueꞌ no ndaꞌqueꞌ guꞌ cuent nde zinꞌ gaxleꞌ tiemp coꞌ nac tiemp bée coꞌseꞌ más ndxàc neyꞌ loo izlyoꞌ.
\v 33 Lomisqueꞌ nac conꞌ coꞌ ngue niin loo guꞌ: Coꞌseꞌ ñèe guꞌ ndxàc ryete conꞌa, guꞌ nonqueꞌ no naneequeꞌ guꞌ nde zinꞌ gaxleꞌ tiemp coꞌ lyux izlyoꞌ no lith no izlyoꞌ. Setilte gàc conꞌa xal thìb mbiꞌ coꞌ ndoo ro ryoꞌ liz mbiꞌ par yòo mbiꞌ liz mbiꞌ.
\v 34 Lìcpeꞌ baꞌi, na nii loo guꞌ: Ryete conꞌa gàcqueꞌ ndooreꞌ lyux mèn nación Israel.
\v 35 Ryethe conꞌ coꞌ nac cón cheꞌn béꞌ no ryethe coꞌ nac cón cheꞌn izlyoꞌ, leꞌi lyuxqueꞌ no lith noi. Ya neꞌtolode cue ryethe conꞌa. Per diꞌs coꞌ ngue niin loo guꞌ ndxèꞌ, diꞌs ndxèꞌ tyaaqueꞌ, no gàcqueꞌ, no tyubqueꞌ diꞌs cón cheꞌn diꞌs coꞌ ngue niin loo guꞌ ndxèꞌ.
\p
\v 36 Per coꞌseꞌ gàc huiza no coꞌseꞌ gàcpeꞌ hora, yende chó mèn izlyoꞌ non chó huiz gàca no coyor gàca. Neꞌ neꞌ yub angl coꞌ nzo loo béꞌ, neꞌ neꞌ yub daa coꞌ nac xganꞌpeꞌ Diox, nanee coyor gàc conꞌa. Angoluxte Diox coꞌ nac xuden nanee coyor gàc conꞌa.
\p
\v 37 Gàcqueꞌ conꞌa xalqueꞌ ngòca coꞌseꞌ ngulàa yuuloo tiemp coꞌseꞌ ngo ban thìb mbiꞌ coꞌ ngroꞌ lèe Noé. Tataa gàca coꞌseꞌ galen, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn.
\v 38 Leꞌn tiemp coꞌ ngo ban Noea no ndooreꞌ lyàa yuuloo coꞌ ngulàa, leꞌn tiempa mèn alithe ndxuhua no alithe ndxu mèn loo izlyoꞌ. Ngure selyaꞌ mèn. Ndaꞌ mèn rsap mèn par nselyaꞌ rsap mèn leꞌn rye tiempa axta ngòo Noé leꞌn yòoyaa.
\v 39 No axta neꞌ neꞌ inon mèn no neꞌ neꞌ indaꞌ mèn cuent leꞌ yuuloo lyàaqueꞌ. Ante coꞌseꞌ mbyàꞌx xnìi lezoꞌ mèn leꞌ yuuloo mtloleꞌ ndoo làa. Axta syareꞌ, neꞌ neꞌ ñee mèn cón li mèn. Ale mbeth yuuloo rye mèn.
\v 40 Leꞌpeꞌ coꞌseꞌ gàc huiz coꞌ galena na, chop xaꞌbiꞌ que zinꞌ loo rsinꞌ xaꞌ huan. Thìb xaꞌ li Diox par yáp xaꞌ loo béꞌ. Leꞌ tedib xaꞌ na, taate yanꞌ.
\v 41 Lomisqueꞌ ne, coꞌseꞌ gàc huiza, chop xaꞌgot cue yuꞌ loo yees. Thìb xaꞌ, chàa, li Diox yáp xaꞌ loo béꞌ. Leꞌ tedib xaꞌ na, taate yanꞌ.
\p
\v 42 Nalas gure guꞌ no gunee guꞌ xal nziriꞌ guꞌ loo cón cheꞌn Diox coꞌ ndxelaꞌs guꞌ. Tac gu neꞌñeede no inonte guꞌ, ne, coyor yiꞌth Tad Diox guꞌ.
\v 43 Huiꞌ guꞌ nexa, ey. Nde niin thìb conꞌ loo guꞌ: Cheleꞌ thìb mbiꞌ coꞌ nac gundan cheꞌn thìb yòo nanee coyor yálꞌ lyàa huanꞌ par li huanꞌ huanꞌ liz mbiꞌ, mbiꞌ neꞌgàtte. Ndxeꞌlequeꞌ, tyub naa mbiꞌ. No tataa mod neꞌlaꞌde mbiꞌ yòo huanꞌ liz mbiꞌ par li huanꞌ huanꞌ cheꞌn mbiꞌ liz mbiꞌ.
\v 44 Cona, ngue niin loo guꞌ: Nalas gure guꞌ no gunee guꞌ xal nziriꞌ guꞌ. No bli nab guꞌ guꞌ loo cón cheꞌn Diox. Tac thìb huiz coꞌseꞌ ingue lide guꞌ xtùuz cón cheꞌn Diox pól galen, chàa, ñèe guꞌ no taꞌ guꞌ cuent leꞌ daa ndaleꞌ loo mbii loo béꞌ loo guꞌ, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn.
\s Jesús ngue taꞌ cuent loo mèn cón cheꞌn chop moz: Thìb moz altant mdoo loo zinꞌ. Leꞌ tedib moz na, ngòc moz zaꞌf, moz yeꞌrsinꞌ.
\r (Lc. 12.41–48)
\p
\v 45 Nde niin tedib diꞌs loo guꞌ, ne: Cón cheꞌn conꞌ coꞌ gàc loo mèn coꞌseꞌ galen loo izlyoꞌ ndxèꞌ tedib vez nac xal ndxàc loo moz coꞌ ngue no thìb patrón.
\v 46 Huen nda moz coꞌ mtanꞌ no patrón liz patrón cheleꞌ moz huenqueꞌ ngue li zinꞌ coꞌ ndxàalqueꞌ li moz coꞌseꞌ zin patrón liz patrón.
\v 47 Lìcpeꞌ baꞌi, na nii loo guꞌ: Leꞌ patrón ñibeꞌ loo moz par gàc moz thìb mandador par tyoo naa moz loo zinꞌ no quenap moz ryethe conꞌ coꞌ ndxàp patrón liz patrón.
\v 48 Per cheleꞌ moza nac thìb moz yeꞌrsinꞌ no gab moz leꞌn lezoꞌ moz: Aaꞌa. Patrón daa lyenꞌ. Neꞌyeꞌthgàade patrón daa.
\v 49 Leꞌ sya, por neꞌyeꞌthgàade patrón moz, tlo moza, tetìi moza xtàa moz. No que tee no moz mènguy. Que tee yuhua moz. Que tee yu moz con mènguya.
\v 50 Leꞌ sya, láth tataa ngue tee moz, chàa, mzin patrón moz thìb huiz coꞌ indlide moz xtùuz leꞌ patrón zin no zin patrón thìb hor coꞌ indlide moz xtùuz zin patrón no coꞌ inonte moz.
\v 51 ¿Xá nee guꞌ? ¿Cón li patrón con moza, sya? Tetìi patrón moza axta plóthe no coꞌ patrón moza loo rsinꞌ patrón, ¿léꞌ? Por cona, thìb lìte telꞌ patrón moz par bii moz yeꞌrbìil coꞌteꞌ ndxetoo bèel no ndxetoo quìi par yòo no moz mèn coꞌ ntembìi ro no coꞌ ntembìi xtiꞌs tya.
\c 25
\s Jesús ngue taꞌ cuent loo mèn cón cheꞌn siꞌ myenꞌgot yènꞌ no thìb mbyòo coꞌ selyaꞌ.
\p
\v 1 Cón cheꞌn xá mod altant ndxàal cue mèn loo mod coꞌ ndlyaꞌs Diox ñibeꞌpeꞌ Diox loo mèn, mèna nac xal siꞌ myenꞌgot yènꞌ coꞌ nde tan cuent loo guꞌ ndxèꞌ. Ngòc thìb conꞌ loo rye siꞌ myenꞌgota. Ngroꞌ myenꞌ. No mbeꞌ myenꞌ candil aceit myenꞌ par ngua myenꞌ liz thìb mbyòo par lyath no myenꞌ mbyòo coꞌ mselyaꞌ liz mbyòo.
\v 2 Gaꞌy myenꞌgota ngòc lijer. Leꞌ taagaꞌy myenꞌgota na, ale msyen.
\v 3 Coꞌseꞌ ngroꞌ myenꞌgot coꞌ msyena, neꞌnghueꞌde myenꞌgot aceit par sè myenꞌgota candil myenꞌgota coꞌseꞌ nquin myenꞌa aceit.
\v 4 Leꞌ taagaꞌy myenꞌgot coꞌ ngòc lijera na, mteꞌqueꞌ lezoꞌ myenꞌ mbeꞌ myenꞌ bote cheꞌn aceit par tolo sè myenꞌ candil myenꞌ coꞌseꞌ gáal hor naquin myenꞌ candil myenꞌ.
\v 5 Nde nxonꞌ, mbyòo coꞌ mselyaꞌa mblyenꞌ. Neꞌnzinꞌgàade mbyòo liz mbyòo yálꞌa. Leꞌ myenꞌgota na, láth nzi bed myenꞌ yálꞌa par zin mbyòo coꞌ mselyaꞌa, ale mxen mcalꞌ myenꞌ. Taate mbláꞌ myenꞌ candil myenꞌ con xnìi. Neꞌntuꞌde myenꞌ candil myenꞌ.
\v 6 Per casqueꞌ coꞌseꞌ nde yálꞌ gulal yálꞌ cabii ngrozèe thìb mèn coꞌ mbez: Ndyeꞌthleꞌ mbyòo coꞌ mselyaꞌa, ey. Groꞌ guꞌ par ya càa ned guꞌ mbyòo.
\v 7 Sya, ngo che ryete myenꞌgota. No mbli nab myenꞌ candil myenꞌ.
\v 8 Per gaꞌy myenꞌgot coꞌ ngòc myenꞌgot nasana ndxab loo taagaꞌy myenꞌgot coꞌ ngòc más lijera: Cara, techè guꞌ chuꞌth aceit guꞌ loo nuꞌ par co nuꞌ aceit candil nuꞌ. Tac candil nuꞌ ngue yuꞌleꞌ xnìi.
\v 9 Leꞌ sya, gaꞌy myenꞌgot coꞌ ngòc lijera mcàb loo taagaꞌya myenꞌgot coꞌ ngòc myenꞌgot nasana. Ndxab myenꞌgota: Neꞌtechède nuꞌ aceit nuꞌ loo guꞌ, cara, tac yiloa neꞌgàalta par nuꞌ no neꞌgàalta par guꞌ, ne. Más huen huàa guꞌ coꞌteꞌ nthoꞌ mèn aceit. Fxiꞌ guꞌ aceit coꞌ nquin guꞌ tya.
\v 10 Per láth nda tiꞌ myenꞌgot coꞌ msyena aceit myenꞌ, mzin mbyòo coꞌ mselyaꞌa. Leꞌ taagaꞌy myenꞌgot co ngòc lijera na, altantlequeꞌ nziriꞌ myenꞌ tac mbli nabqueꞌ myenꞌ candil myenꞌ. Sangngòo no myenꞌ mbyòo leꞌn nyòo loo yalhua coꞌ ndxàc por mselyaꞌ mbyòo. Sya, mbli mbyòo mandad mbyauꞌ ro ryoꞌ.
\v 11 Ngoloa, mzin taagaꞌy myenꞌgot coꞌ ngòc myenꞌgot nasana. Ndxab myenꞌ loo mbyòo coꞌ mselyaꞌa: Tad, fxalꞌ Uꞌ puert par yòo nuꞌ.
\v 12 Mbyòo mcàb loo myenꞌa. Ndxab mbyòo: Lìcpeꞌ baꞌi, daa indlibede guꞌ.
\p
\v 13 Ngoloa, sya, ndxab Jesús loo myenꞌ xinꞌ mtéꞌth Jesús:
\p ―Nalas gure guꞌ, ey. Leque guꞌ ñee xal nziriꞌ guꞌ loo cón cheꞌn Diox. Gòc guꞌ xal mèn coꞌ nzi naa tac guꞌ inonte. Neꞌ neꞌ indaꞌ guꞌ cuent chó huiz galen no coyor galen, daa coꞌ mbal yáal loo izlyoꞌ ndxèꞌ xal ndxáal chol mèn loo izlyoꞌ.
\s Jesús ntetac diꞌs cón cheꞌn thìb loo tmi coꞌ lèe talent loo mèn.
\p
\v 14 Nde niin tedib conꞌ loo guꞌ, ne: Cón cheꞌn mèn coꞌ ndyubdiꞌs ndac no cón cheꞌn mèn coꞌ indyubdiꞌs ndacte coꞌseꞌ ñibeꞌpeꞌ Diox loo mèn, mèna nac xal moz con thìb mbiꞌ coꞌ nac patrón. Pues coꞌseꞌ nda roꞌ mbiꞌ liz mbiꞌ no làaz mbiꞌ par ya mbiꞌ tedib nación coꞌ nziriꞌ tith, coꞌseꞌ yamerleꞌ ryoꞌ mbiꞌ, ngurez mbiꞌ moz mbiꞌ par càayaꞌ moz mbiꞌ tmi par li moz zinꞌ con tmi coꞌ tanꞌ no mbiꞌ moz.
\p
\v 15 Loo thìb moz mbiꞌ mdaꞌ mbiꞌ casqueꞌ gaꞌy mil pes. Leꞌ loo tedib moz mbiꞌ na, mdaꞌ mbiꞌ casqueꞌ chop mil pes. Leꞌ loo tedib moz na, mdaꞌ mbiꞌ casqueꞌ thìb mil pes. Ngolo mtanꞌ no mbiꞌ moz tmi, xalqueꞌ ndaꞌ mbiꞌ cuent no ñee mbiꞌ xal ndli moz zinꞌ no xal nzo moz, mxen mbiꞌ ned. Nda mbiꞌ tedib nación.
\v 16 Leꞌ sya, moz coꞌ mbyanꞌ no gaꞌy mil pes, mtlo moz, mbli moz zinꞌ con gaꞌy mil pesa. Ale mbli moza gan taagaꞌy mil pes.
\v 17 Lomisqueꞌ ne, loo tedib moz coꞌ mtanꞌ no mbiꞌ taachop mil pes, moza, ne, mbli gan taachop mil pes loo chop mil pes coꞌ mtanꞌ no mbiꞌ moz.
\v 18 Per loo moz coꞌ mtanꞌ no mbiꞌ thìb mil pesa, moza quej quej mblosuaꞌ thìb mil pes cheꞌn mbiꞌ leꞌn thìb yeꞌr coꞌ mdenꞌ moz loo yòo.
\p
\v 19 Pues ngolo nguriꞌth huax tiemp. Yende mbiꞌ coꞌ nac patrón moza. Per mzin thìb huiz mzin mbiꞌ loo moz tedib vez. Sya, mbli mbiꞌ cuent con moz mbiꞌ par ñee mbiꞌ ñeeneꞌ plá pes mbli thìb thìb moz gan loo tmi coꞌ mtanꞌ no mbiꞌ moz.
\v 20 Mzin ner moz coꞌ mbyanꞌ no gaꞌy mil pes loo mbiꞌ. Ndxab moz loo mbiꞌ: Tad, aa Uꞌ gaꞌy mil pes coꞌ mtanꞌ no Uꞌ daa thìb cuaꞌa coꞌseꞌ mdee Uꞌa. No aa Uꞌ taagaꞌy mil pes coꞌ mblin gan con gaꞌy mil pes coꞌ mdaꞌ Uꞌ loon, ne.
\v 21 Ndxab mbiꞌ loo moz: Huen zyax. Huenqueꞌ mblil, ey. Lùu nac thìb moz ndac. Anzeꞌf altant mdool loo zinꞌ coꞌ mblil. Pues ya que altantlequeꞌ mdool loo zinꞌ coꞌ mblil con ndxepte tmi coꞌ mtanꞌen lool, tan lugar ñibeꞌl loo huax conꞌ. Que de par yòo nol daa no tyac lezoꞌl con daa.
\v 22 Ngoloa, mzin moz coꞌ mtanꞌ no mbiꞌ taachop mil pes loo mbiꞌ. Ndxab moza loo mbiꞌ: Tad, aa Uꞌ chop mil pes Uꞌ ndxèꞌ. No aa Uꞌ taachop mil pes coꞌ mblin gan loo chop mil pes coꞌ mtanꞌ no Uꞌ daa.
\v 23 Mbiꞌ ndxab loo moz: Huen zyax. Huenqueꞌ mblil, ey. Lùu nac thìb moz ndac. No anzeꞌf altant mdool loo zinꞌ coꞌ mblil. Pues ya que altantlequeꞌ mdool loo zinꞌ coꞌ mblil con ndxepte tmi coꞌ mtanꞌen lool, tan lugar ñibeꞌl loo huax conꞌ. Que de par yòo nol daa no tyac lezoꞌl con daa.
\v 24 Per coꞌseꞌ mzin moz coꞌ mtanꞌ no mbiꞌ thìb mil pes, moza ndxab loo mbiꞌ: Tad, daa nanee leꞌ Uꞌ nac thìb patrón nalaꞌs no nac Uꞌ thìb patrón nayiꞌ. No nthop Uꞌ cosech coꞌteꞌ ingode Uꞌ bin. No ndláp Uꞌ coꞌteꞌ tarte co Uꞌ nec thìb quèe bin.
\v 25 Por cona, mzyeb daa ñèen Uꞌ. Ale ngua teyòoen tmi Uꞌ. Aa Uꞌ tmi Uꞌ ndxèꞌ.
\v 26 Mbiꞌ mcàb loo moza. Ndxab mbiꞌ: Aa, moz yeꞌrsinꞌ, moz zaꞌf. Cheleꞌ lùu ndaꞌ cuent no naneel leꞌ daa nthop cosech coꞌteꞌ ingoden bin no ndlápen coꞌteꞌ tarte gon nec thìb quèe bin,
\v 27 cheleꞌ lùu nanee tataa nac daa, más quee lezoꞌl nga laꞌl tmi daa loo banc. Leꞌ sya, coꞌseꞌ beren galen, nga loꞌen tmi daa loo banc nazalꞌ xinꞌ tmi daa coꞌ mbli tmi daa gan.
\v 28 Sya, ndxab mbiꞌ loo taamas moz coꞌ nzi tya: Fteche guꞌ thìb mil pes coꞌ ngue no moz baꞌ. Ftaꞌ guꞌi càa moz coꞌ ngue no siꞌ mil pes.
\v 29 Mèn coꞌ ngue no ndxep tmi no huen ndli mèna zinꞌ con tmii par tataa mod li mèna gan más tmi, mèna que no más tmi. Per mèn coꞌ ngue no ndxepte tmi no ihuente ndli mèna zinꞌ con tmia, mèna tuhuan tmi coꞌ mque no mèna. No yiloa yanꞌ mèna nagueꞌs nii mèna no nagueꞌs yaꞌ mèna.
\p Cona nee diꞌs, mèn co huen huen nxoꞌf zinꞌ cón cheꞌn zinꞌ coꞌ mxoꞌf zinꞌ Diox loo mèn xalqueꞌ mbli Diox par ndxác mèna, mèna nzi tee ndacqueꞌ loo cón cheꞌn Diox. Per mèn coꞌ inxoꞌf zinꞌ ndacte loo cón cheꞌn Diox, xal ndlyath no Diox mèn par li mèna zinꞌ coꞌ mxoꞌf zinꞌ Diox loo mèna, Diox li par neꞌgácte mèna xoꞌf zinꞌ ndac mèna cón cheꞌn Diox thidtene. No yiloa tetìi Diox mèna axta plóthe.
\p
\v 30 Leꞌ mbiꞌ coꞌ nac patrona na, tolo ndxab loo moz: Fxen guꞌ moz coꞌ yende chó juis baꞌ. Beꞌ guꞌ moz zaꞌf baꞌ. Càa moz baꞌ. Bloꞌ guꞌ par fuer. Huàa tyee guꞌ moz baꞌ thìb lad loon coꞌteꞌ nacuau thidtene coꞌteꞌ gón moz no coꞌteꞌ hua le moz thidtene tac axta arid nè tenꞌ moz gàc yaltìi loo moz tya.
\p Tolo ndxab Jesús: Tataaqueꞌ gàca loo guꞌ, ne, coꞌseꞌ galen loo izlyoꞌ ndxèꞌ tedib vez.
\s Jesús tub rez cón cheꞌn mèn ryethe nación coꞌseꞌ gàc huiza.
\p
\v 31 Sya, ndxab Jesús:
\p ―Coꞌseꞌ galen loo izlyoꞌ ndxèꞌ tedib vez, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn, par gal ñibeꞌen loo mèn, galen làth thìb baan angl. Yiloa tuꞌben par ñibeꞌen loo ryethe conꞌ par xyoꞌf lèe xyoꞌf xtiꞌs daa no gàc conꞌ roo no conꞌ xèn loon thidtene.
\v 32 Huiza hidte queltàan mèn coꞌ nac mèn rye nación coꞌ nziriꞌ dib athu loo izlyoꞌ loon par coꞌ xàꞌen thìb ned mèn loo tedib ned mèn xal ndli pastor coꞌseꞌ ngoꞌ xàꞌ pastor mbacxilꞌ làth chiv.
\v 33 Huiza cuequen mèn coꞌ nac xal mbacxilꞌ loon cuaten coꞌ nac ladlì. Leꞌ mèn coꞌ nac xal chiv loon na, cuequen mèna cuaten coꞌ nac lad rebes.
\v 34 Sya gaben, daa coꞌ nac rey tiempa, loo mèn coꞌ nziriꞌ cuaten coꞌ nac ladlì: Que de guꞌ loon, ey, guꞌ coꞌ mbloleꞌ Diox xuden cuent nac guꞌ mèn ndac no cón cheꞌn guꞌ Diox gunii diꞌs ndac. Guꞌ tlo ñibeꞌ no Diox loo cón cheꞌn Diox coꞌ mbli nab Diox par ñibeꞌ no guꞌ Diox. Ndooreꞌ cobeꞌ Diox no toxcuaꞌ Diox loo izlyoꞌ, Diox mnibeꞌ lezoꞌ no mdoo lezoꞌ Diox ñibeꞌ no guꞌ Diox loo ryethe conꞌ yiloa.
\v 35 Tataa mnibeꞌ Diox loo lezoꞌ Diox li Diox tac coꞌseꞌ mque tee lanꞌen, mdaꞌ guꞌ thìb leꞌ rol luan nduhuan. Coꞌseꞌ mque tee yec lezon, mdaꞌ guꞌ chuꞌth nít gun. Coꞌseꞌ mque teeꞌen xal mèn tith làaz guꞌ no loo guꞌ, guꞌ mdaꞌ liz guꞌ nguleden.
\v 36 Coꞌseꞌ mque teeꞌen ngox mdyal xaben, guꞌ mdaꞌ xaben par mdoquen. Coꞌseꞌ mxac lenen, guꞌ mbiꞌth too naa daa coꞌteꞌ naxen. Coꞌseꞌ mqueꞌen leziꞌf, mbiꞌth toodiꞌs no guꞌ daa ro leziꞌf.
\v 37 Huiza ñee mèn coꞌ daa mdyal no coꞌ daa mdaꞌ lugar par ngòo mèn loo cón chenen: Tad, ¿pól gunèe nuꞌ Uꞌ leꞌ Uꞌ mque tee lanꞌ no mdaꞌ nuꞌ thìb leꞌ rol yèth par nduhua Uꞌ, àꞌ? No ¿pól gunèe nuꞌ Uꞌ leꞌ Uꞌ mque tee yec lezoꞌ no mdaꞌ nuꞌ chuꞌth nít nguꞌ Uꞌ, àꞌ?
\v 38 ¿Pól gunèe nuꞌ Uꞌ, mque tee Uꞌ xal mèn tith no mdaꞌ nuꞌ liz nuꞌ nguled Uꞌ, àꞌ? ¿Pól gunèe nuꞌ mque tee Uꞌ ngox mdyal tab Uꞌ no mdaꞌ nuꞌ xab Uꞌ, ne, àꞌ?
\v 39 No ¿pól gunèe nuꞌ Uꞌ mxac len Uꞌ no pól gunèe nuꞌ Uꞌ mque Uꞌ leziꞌf no ngua toodiꞌs no nuꞌ Uꞌ ro leziꞌf, àꞌ?
\v 40 Leꞌ sya, daa coꞌ nac rey tiempa, daa càb loo mèna: Licpe baꞌi, guꞌ neꞌnglide rye conꞌa loon. Per cheleꞌ guꞌ mbli rye conꞌa loo chol mèn coꞌ ndxàc hues xtàan por ndxelaꞌs mèna loon, daa ngo cuent loopeꞌen mbli guꞌ rye conꞌa.
\p
\v 41 Sya, daa coꞌ nac rey tiempa, daa càb loo mèn coꞌ cue cuaten lad rebes: Biiche guꞌ loon, guꞌ coꞌ nac mèndèe too ze too yálꞌ. Guꞌ lyàa loo quìi coꞌteꞌ neꞌyuꞌde bèel no quìi coꞌteꞌ ngòc nab par lyàa Mebizya no meexùꞌ coꞌ nac cheꞌnpeꞌ Mebizya.
\v 42 Tac coꞌseꞌ mblyanꞌ daa, neꞌndaꞌde guꞌ thìb leꞌ rol yèth nghuan. Coꞌseꞌ mque tee yec lezon, neꞌndaꞌde guꞌ neꞌ chuꞌth nít ngun.
\v 43 Ngòc daa xal mèn tith loo guꞌ. No neꞌndaꞌde guꞌ liz guꞌ par mbeden. Ngòc falt xaben loon. Guꞌ neꞌnglatte lezoꞌ ngnèe guꞌ daa. Neꞌndaꞌde guꞌ thìb ned xab guꞌ par ngoquen. Mxac lenen. Neꞌnguiꞌth too naade guꞌ daa. Mqueꞌen leziꞌf. Neꞌnguiꞌthte guꞌ par ngtoodiꞌs no guꞌ daa ro leziꞌf.
\v 44 Leꞌ sya, mèna ñee loon, daa coꞌ nac rey tiempa: Tad, ¿pól gunèe nuꞌ leꞌ Uꞌ mque tee lanꞌ, no mque tee yec lezoꞌ Uꞌ, no ngòc Uꞌ xal mèn tith, no mque tee Uꞌ yende xab Uꞌ, no mxac len Uꞌ, no mqueꞌ Uꞌ leziꞌf no neꞌnglyath node nuꞌ Uꞌ, àꞌ?
\v 45 Leꞌ sya, daa coꞌ nac rey tiempa, daa càb loo mèna. Gaben: Lìcpeꞌ baꞌi, na ngue nii loo guꞌ: Cheleꞌ guꞌ neꞌnglide chol conꞌ coꞌ nac coꞌ ngue niin loo guꞌ ndxèꞌ loo mèn prob coꞌ ndxàc hues daa no coꞌ ndxàc xtàa daa, daa ngo cuent neꞌnglide guꞌ conꞌa loon.
\v 46 Mèn yeꞌrsinꞌa yòo coꞌteꞌ tyactìi mèna thidtene. Leꞌ mèn coꞌ daa mdyal no coꞌ daa mdaꞌ lugar yòo mèna loo cón chenen na, mèna yòo ban no daa thidtene.
\c 26
\s Mèn ngue toxcuaꞌ no ngue go beꞌ mèn no ngue li mèn xtùuz xá mod tyenxùꞌ mèn Jesús.
\r (Mr. 14.1–2; Lc. 22.1–2; Jn. 11.45–53)
\p
\v 1 Coꞌseꞌ ngolo mdoodiꞌs Jesús rye diꞌsa loo mèn coꞌ nziriꞌ loo Jesús, Jesús ndxab loo myenꞌ xinꞌ mtéꞌth Jesús:
\p
\v 2 ―Guꞌ neequeꞌ no nonqueꞌ guꞌ taachopte huiz no maste ndxàc falt gàc lni pasc. Leꞌn huiz lnia tyenxùꞌ mèn daa, daa coꞌ mbal yáal loo izlyoꞌ xal ndxáal chol mèn, par queꞌ mèna daa loo thìb cruz.
\p
\v 3 Leꞌ sya, mèn coꞌ nac jef coꞌ más mnibeꞌ loo nguleyꞌ, no mèn coꞌ na maistr coꞌ ndluꞌ ón cheꞌn ley coꞌ mxoꞌf Moisés loo mèn, no mèngool coꞌ ñibeꞌ, no mèn coꞌ ndyoo ner, no coꞌ ndyoo naa, loo mèn nación Israel, rye mèna thidte mqueltàa loo lueꞌ cheꞌn palas coꞌ nac liz Caifás coꞌ nac jef coꞌ más ñibeꞌ loo rye nguleyꞌ tiempa.
\v 4 Liz mbiꞌ coꞌ lèe Caifasa, tya mdoodiꞌs rye mèna no mblo xnee mèna xá mod yigaaxùꞌ Jesús loo mèna con purte yalgutyèꞌ par guth mèna Jesús.
\v 5 Per mbez mèna loo xtàa mèna:
\p ―Más huen neꞌguthte naꞌ mbiꞌ leꞌn huiz lni par neꞌtezebte naꞌ mèn coꞌ yiꞌth lni par neꞌtyub bènte lezoꞌ mèna no yiloa yecloo mèna loo naꞌ.
\s Trèꞌ ndluꞌ cón cheꞌn thìb xaꞌgot coꞌ mblath aceit coꞌ anzeꞌf nix ndlyaꞌ yéc Jesús.
\r (Mr. 14.3–9; Jn. 12.1–8)
\p
\v 6 Láth ndyoodiꞌs mèna, Jesús ngo yèez Betañ liz thìb mbiꞌ coꞌ lèe Mon coꞌ mxac thìb yíiz coꞌ nac yíiz ndxaꞌs coꞌ nteyaꞌs no coꞌ nteyèe yid lad mèn.
\v 7 Tya mbii gax thìb xaꞌgot loo Jesús. Xaꞌgota nde no thìb frasc coꞌ natoxcuaꞌ con thìb loo quèe huen coꞌ lèe alabastr. Leꞌn frasca nzo thìb loo aceit coꞌ anzeꞌf naziꞌ ndlyaꞌ. No anzeꞌf náp ntac aceita. Láth coꞌseꞌ ndub Jesús loo mes, xaꞌgota mbii gax loo Jesús. Mblath xaꞌgota aceit coꞌ nzo leꞌn frasca yéc Jesús.
\v 8 Per coꞌseꞌ ñèe myenꞌ xinꞌ mtéꞌth Jesús ngue li xaꞌgota conꞌa loo Jesús, ale ngocloo myenꞌ. No mtlo myenꞌ. Mbez myenꞌ loo xtàa myenꞌ:
\p ―¿Chonon ale ngue tezaꞌxùꞌ xaꞌgota aceit baꞌ, yoo?
\v 9 Nzoqueꞌ mod nthoꞌ xaꞌgota aceit baꞌ par ryoꞌ tmi loo aceit. Leꞌ sya, que no xaꞌgot huax tmi par taꞌ xaꞌ tmi loo mèn prob coꞌ naquin tmi.
\p
\v 10 Jesús mbìn diꞌs coꞌ mdoodiꞌs myenꞌa. Sya, ndxab Jesús loo myenꞌ:
\p ―¿Chonon ngue li xol guꞌ xaꞌgot ndxèꞌ no ngue tethon guꞌ xaꞌ, àꞌ? Conꞌ coꞌ ngue li xaꞌgot ndxèꞌ loon nac thìb conꞌ ndac.
\v 11 Por part cón cheꞌn guꞌ, guꞌ thidtenequeꞌ yo ban no mèn coꞌ ndxàc hues guꞌ no mèn coꞌ ndxàc xtàa guꞌ coꞌ nac mèn prob. Per part cón chenen, guꞌ ya neꞌtolode yo no daa nen tiemp loo izlyoꞌ ndxèꞌ.
\v 12 Tac conꞌ coꞌ ngue li xaꞌgot ndxèꞌ loon, xaꞌ mblath aceit coꞌ anzeꞌf naziꞌ ndlyaꞌ baꞌ laden. Xaꞌ mblath aceit laden par neꞌyitoode xlaꞌ laden coꞌseꞌ ya caꞌs mèn daa.
\v 13 Lìcpeꞌ baꞌi, na ngue nii loo guꞌ, ey: Pál coꞌteꞌ co mèn yalbàn cón cheꞌn diꞌs ndac no teꞌth mèn cón cheꞌn diꞌs ndac par non mèn xá mod lyáꞌ mèn loo conꞌ ryes loo mèn coꞌ nziriꞌ dib athu loo izlyoꞌ, gòn mèn conꞌ coꞌ mbli xaꞌgot ndxèꞌ loon par teꞌ lezoꞌ mèn no taꞌ mèn cuent cón cheꞌn conꞌ mbli xaꞌgot ndxèꞌ loon.
\s Trèꞌ ndluꞌ leꞌ Jud mcuaꞌn mód par mdaꞌxùꞌ Jud Jesús loo mèn coꞌ ngòc ngolo ngolaꞌs cheꞌn Jesús.
\r (Mr. 14.10–11; Lc. 22.3–6)
\p
\v 14 Látha, xexte ngroꞌ thìb mbiꞌ coꞌ ndxàc xinꞌ mtéꞌth Jesús coꞌ ngroꞌ lèe Jud Iscariot. Ngua toodiꞌs no Jud mèn coꞌ ngòc jef cheꞌn nguleyꞌ tiempa.
\v 15 Ndxab Jud loo mèn coꞌ ngòc jef cheꞌn rye nguleyꞌ:
\p ―¿Plál quix guꞌ càan cheleꞌ daa luꞌ Jesús loo guꞌ no cuanen mod taxùꞌen Jesús loo guꞌ, àꞌ?
\p Sya, mèna mdix gal psiꞌ pes plat loo Jud par li Jud conꞌ yeꞌrsinꞌa.
\v 16 Desde hora, mcuaꞌn Jud mod ñeeneꞌ xá mod li Jud par taꞌi thìb lugar loo Jud par taꞌxùꞌ Jud Jesús loo mèna.
\s Trèꞌ ndluꞌ leꞌ Jesús nduhua rsè no myenꞌ xinꞌ mtéꞌth Jesús.
\r (Mr. 14.12–25; Lc. 22.7–23; Jn. 13.21–30; 1 Co. 11.23–26)
\p
\v 17 Coꞌseꞌ ngòc ner huiz coꞌ nac huiz lni, coꞌ nee diꞌs, huiz vispr coꞌ ngòc huiz coꞌ ndxuhua mèn nación Israel pan coꞌ ingode mèn dii levadur, huiza mnibdiꞌs myenꞌ xinꞌ mtéꞌth Jesús loo Jesús. Ndxab myenꞌ:
\p ―Tad, ¿pá ndlyaꞌs Uꞌ ya li nab nuꞌ no ya toxcuaꞌ nuꞌ conꞌ hua rsè naꞌ coꞌ nac xít mèn no luaꞌ mèn coꞌ ndxuhua mèn coꞌseꞌ ndxáal lni pasc, àꞌ?
\p
\v 18 Jesús ndxab loo myenꞌ:
\p ―Huàa guꞌ leꞌn ciuda Jerusalén baꞌ. No yòo guꞌ liz thìb mbiꞌ. Gab guꞌ loo mbiꞌa: Maistr gunee loo nuꞌ par gab nuꞌ lool no taꞌ nuꞌ cuent cón cheꞌn diꞌs ndxèꞌ lool. Maistr gunee: Nde zinꞌ gaxleꞌ hor coꞌseꞌ tyactìin. No nalleꞌ ndlyazen taꞌl lizl par gàc nab xít mèn no luaꞌ mèn par hua rsèꞌen coꞌ nac cón cheꞌn lni pasc con myenꞌ xinꞌ mtéꞌth daa.
\p
\v 19 Sya, ngua li myenꞌ xinꞌ mtéꞌth Jesús xalque mnibeꞌ Jesús loo myenꞌ li myenꞌ. Sya, mtoxcuaꞌ myenꞌ rsè coꞌ hua rsè no myenꞌ Jesús coꞌ nac cón cheꞌn lni pasc.
\p
\v 20 Coꞌseꞌ ngulàa yálꞌ izlyoꞌ huiza, Jesús mdub no ryete siꞌ fchop myenꞌ xinꞌ mtéꞌth Jesús loo mes.
\v 21 Láth nzi yuhua rsè no Jesús myenꞌ, ndxab Jesús loo myenꞌ:
\p ―Lìcpeꞌ baꞌi, na ngue nii loo guꞌ: Thìb guꞌ coꞌ nzo làth naꞌ ndxèꞌ cuaꞌn mod xexte taꞌxùꞌ guꞌ daa loo mèn coꞌ nac ngolo ngolaꞌs chenen.
\p
\v 22 Sya, ryete myenꞌ xinꞌ mtéꞌth Jesús anzeꞌf ngure xi lezoꞌ. Mtlo myenꞌ, mnibdiꞌs thìb thìb myenꞌ loo Jesús. Mbez myenꞌ:
\p ―Tad, ¿chéꞌ neꞌstolqueꞌ daai, càꞌ? ¿Chéꞌ neꞌstolqueꞌ daai, càꞌ?
\p
\v 23 Jesús mcàb. Ndxab Jesús loo myenꞌ:
\p ―Thìb guꞌ coꞌ ngue yuhua no daa thidte yenꞌ, guꞌa taꞌxùꞌ daa loo mèna.
\v 24 Daa coꞌ mbal yáal loo izlyoꞌ xalqueꞌ ndxáal chol mèn, loon gàcqueꞌ ryethe conꞌ ryes xalqueꞌ mbez diꞌs coꞌ ndub loo libr coꞌ nac xtiꞌs Diox. Per ay, prob mbiꞌ izlyoꞌ. Mandit mbiꞌ too ze too yálꞌ, mbiꞌ coꞌ taꞌxùꞌ daa loo mèn coꞌ nac ngolo ngolaꞌs chenen. Más huen ngàca loo mbiꞌ thidtene neꞌngáalte mbiꞌ loo izlyoꞌ ndxèꞌ leque taꞌxùꞌ mbiꞌ daa loo mèna.
\p
\v 25 Sya, Jud coꞌ mdaꞌxùꞌ Jesús loo mèna ndxab loo Jesús:
\p ―Maistr, neꞌstolqueꞌ ngue lil cuent daa taxùꞌ lùu loo mèn, càꞌ?
\p Jesús mcàb loo Jud. Ndxab Jesús:
\p ―Aa. Lùui, pues.
\p
\v 26 Láth nzi yuhua myenꞌ xinꞌ mtéꞌth Jesús con Jesús, Jesús mxen pan. Ndxab Jesús loo Diox: Diox quix Uꞌ, Diox. Ngoloa, mbli rol Jesús pan. Mdaꞌ Jesús pan loo myenꞌ. Ndxab Jesús loo myenꞌ:
\p ―Dhua guꞌ pan ndxèꞌ, ndee. Pan ndxèꞌ nac cón cheꞌn bélꞌyòo laden coꞌ gath por cón cheꞌn rye mèn.
\p
\v 27 Ngoloa, mxen Jesús thìb vas vin. Ndxab Jesús:
\p ―Diox quix Uꞌ, Diox, loo Diox.
\p Ngoloa, mteriꞌth Jesús vas vin loo myenꞌ xinꞌ mtéꞌth Jesús. Ndxab Jesús:
\p ―Gu ryete guꞌ thìb ro thìb ro vin coꞌ nzo leꞌn vas ndxèꞌ.
\v 28 Tac vin ndxèꞌ nac cón cheꞌn ren laden coꞌ xyo loo izlyoꞌ par li nèen tedib conveñ coꞌ gàc thìb conveñ cub yiloa. Xyo ren laden loo izlyoꞌ por cón cheꞌn huax mèn par tataa mod, mèn coꞌ yilaꞌs cón chenen, mèna tyonꞌ xquin no tyonꞌ xtol mèna.
\v 29 Per daa ngue nii loo guꞌ: Desde nalleꞌ, ya neꞌbereden gun nít uv coꞌ ndaꞌ lus uv loo izlyoꞌ ndxèꞌ. Na bere gu nít uv coꞌ ndaꞌ lus uv con guꞌ coꞌseꞌ ñibeꞌpeꞌ xuden Diox loo mèn coꞌ ngòoleꞌ loo cón cheꞌn Diox por cón chenen.
\s Jesús ngue taꞌ cuent loo Pedr leꞌ Pedr cà diꞌs Jesús.
\r (Mr. 14.26–31; Lc. 22.31–34; Jn. 13.36–38)
\p
\v 30 Leꞌ sya, ngolo mbilꞌro myenꞌ xinꞌ mtéꞌth Jesús thìb himn con Jesús, nda no Jesús myenꞌ loo thìb yii coꞌ lèe yii cheꞌn yaa oliv.
\v 31 Tya, ndxab Jesús loo myenꞌ xinꞌ mtéꞌth Jesús:
\p ―Ryete guꞌ anzeꞌf xi lezoꞌ yálꞌ ndxèꞌ, no tyoo xàꞌ lezoꞌ guꞌ no ya yeꞌth lezoꞌ guꞌ por cón chenen yálꞌ ndxèꞌ. Gàca loo guꞌ tataa tac loo libr coꞌ nac xtiꞌs Diox ndub diꞌs coꞌ ndxab:
\pi1 Daa guth pastor. Leꞌ partid mbacxilꞌ coꞌ ngue tee no pastor na, ryeꞌs pál.
\m
\v 32 Per coꞌseꞌ yilo ryo xban daa, daa ga ner loo guꞌ leꞌn thìb yèez coꞌ nac yèezyaꞌ cheꞌn làaz mèn galile par zyálꞌ naꞌ tya.
\p
\v 33 Sya, mcàb Pedr loo Jesús. Ndxab Pedr:
\p ―Mastaleꞌ ryete myenꞌ xi lezoꞌ no tyoo xàꞌ lezoꞌ myenꞌ nal yálꞌ por cón cheꞌn conꞌ ryes coꞌ gàc loo Uꞌ, na neꞌxide lezoꞌ no neꞌ neꞌ tyoo xàꞌ lezon coꞌseꞌ gàc cón gàc loo Uꞌ, Tad.
\p
\v 34 Per Jesús ndxab loo Pedr:
\p ―Pedr, lìcpeꞌ baꞌi, na ngue nii lool: Ndooreꞌ léꞌ nguiidtee yálꞌ nal yálꞌ, lùu cà diꞌs daa son vez loo mèn.
\p
\v 35 Pedr mcàb. Ndxab Pedr loo Jesús:
\p ―Mastaleꞌ no daa gath con Uꞌ, per par cà dizen Uꞌ, daa neꞌcà diꞌste Uꞌ loo mèn.
\p No ale ryete myenꞌ xinꞌ mtéꞌth Jesús, leque diꞌsa ndxab myenꞌ loo Jesús.
\s Trèꞌ ndluꞌ leꞌ Jesús ngurez Diox coꞌteꞌ nac thìb huert coꞌ lèe Getsemaní.
\r (Mr. 14.32–42; Lc. 22.39–46)
\p
\v 36 Ngoloa, ngua no Jesús myenꞌ xinꞌ mtéꞌth Jesús thìb lugar coꞌ lèe Getsemaní. Ndxab Jesús loo myenꞌ xinꞌ mtéꞌth Jesús:
\p ―Trèꞌ gaate ftub guꞌ láth nda bezen Diox tuaꞌ.
\p
\v 37 Ante mbeꞌ Jesús Pedr no ryop hues myenꞌ coꞌ nac xganꞌ thìb mbiꞌ coꞌ lèe Zebede ndxepte más delant coꞌteꞌ ngurez Jesús Diox. Tya, mtlo Jesús, mxi lezoꞌ Jesús. No naxut naxut mtlo gunaa loo Jesús.
\v 38 Sya, ndxab Jesús loo Pedr no loo ryop hues myenꞌ xganꞌ Zebede:
\p ―Nase nxyonꞌ lezon. No ndenꞌen leꞌ daa gath por neꞌxecte daa nal yálꞌ, ndyaquen, ey. Trèꞌ gaate byanꞌ guꞌ no gure naa guꞌ con daa. Neꞌgàtte guꞌ.
\p
\v 39 Ngoloa, ngua Jesús taachuꞌthte más delant loo myenꞌ. Tya, mdub xib Jesús. No mcotloo Jesús loo yòo. Ngurez Jesús Diox. Ndxab Jesús:
\p ―Diox, Uꞌ coꞌ nac xuden, cheleꞌi nzo mod, bli Uꞌ neꞌgàcte arid nè yaltìi coꞌ gàc xal thìb preb loon leꞌn huiz ndxèꞌ. Indlyasten gàca loon xal neete lezon. Ndxeꞌlequeꞌ, ante gàca loon xal neepeꞌ lezoꞌ Uꞌ.
\p
\v 40 Coꞌseꞌ mbyeꞌth tee huiꞌ Jesús máa Pedr con ryop hues myenꞌ coꞌ nac xganꞌ mbiꞌ coꞌ lèe Zebede coꞌteꞌ mtanꞌ Jesús Pedr con myenꞌ, ale leꞌleꞌ nzi yàt myenꞌ. Sya, ndxab Jesús loo Pedr:
\p ―Pedr, ¿chéꞌ neꞌnglide guꞌ gan mbe naa guꞌ con daa nec thìb hor, càꞌ?
\v 41 Gure naa guꞌ, yey. No gurez guꞌ Diox par neꞌtaꞌde Diox lugar loo guꞌ neꞌaselide guꞌ cuaꞌn guꞌ xquin guꞌ. Lìcpeꞌ baꞌi, xtùuz guꞌ no lezoꞌ guꞌ anzeꞌf ndlyaꞌs leꞌ guꞌ cuez Diox. Per bélꞌyòo lad guꞌ baꞌ ndli ndenꞌ guꞌ ngo zan guꞌ. No ngulàa fuerz guꞌ. Por conꞌa, ale mbuuꞌs guꞌ nzi guꞌ.
\p
\v 42 Mbryop vez mbere Jesús. Nda Jesús leque tya. Ngurez Jesús Diox taandxèꞌ:
\p ―Diox, Uꞌ coꞌ nac xuden, cheleꞌ yaltìi coꞌ gàc loon yende mod riid tuaꞌte, gàca loon xal neepeꞌ lezoꞌ Uꞌ.
\p
\v 43 Mbere Jesús. Ndyeꞌth Jesús tedib vez coꞌteꞌ mtanꞌ Jesús Pedr con taachop myenꞌa. Lomisqueꞌ, ñèe Jesús nzi yàt myenꞌ tac ngudloo myenꞌ ya neꞌxecte tant thìb mcalꞌ nzo loo myenꞌ.
\v 44 Taate mbláꞌ Jesús myenꞌ. Mbyon vez mbere Jesús, nda Jesús par ngurez Jesús Diox tedib vez. Leque diꞌs coꞌ ndxab Jesús ndooreꞌ ndxab Jesús tedib vez loo Diox.
\p
\v 45 Ngoloa, mbere Jesús, ndyeꞌth Jesús tedib vez loo myenꞌ xinꞌ mtéꞌth Jesús. Ndxab Jesús loo myenꞌ:
\p ―Nase bli guꞌ descans no bdàt guꞌ. Ya mzinleꞌ hor coꞌ taꞌxùꞌ thìb mbiꞌ daa loo mèn coꞌ ncuaꞌn xquin no xtol, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn.
\v 46 Jer goo too guꞌ. Yaꞌ guꞌ ndyàa naꞌ. Mbiꞌ coꞌ taꞌxùꞌ daa loo mèna, mbiꞌ nzoleꞌ ned, nde mbiꞌ.
\s Trèꞌ ndluꞌ leꞌ mèn yeꞌrsinꞌ mxenxùꞌ Jesús xal thìb pres.
\r (Mr. 14.43–50; Lc. 22.47–53; Jn. 18.2–11)
\p
\v 47 Tatabeꞌ ngue toodiꞌs Jesús coꞌseꞌ gunèe Jesús leꞌ Jud coꞌ ndxòo cuent nac siꞌ fchop myenꞌ xinꞌ mtéꞌth Jesús ngro ziꞌfleꞌ nde con huax mèn. Ale nzo spad no nzo yaa yaꞌ mèn. Nde mèn con Jud. Rye mèna nde por mnibeꞌ mèn coꞌ nac jef cheꞌn nguleyꞌ no por mnibeꞌ rye mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel.
\v 48 Leꞌ Jud coꞌ mbluꞌxùꞌ Jesús no coꞌ mdaꞌxùꞌ Jesús loo mèna na, Jud mbli thìb conꞌ con mèna ndooreꞌ. Ndxab Jud loo mèna:
\p ―Mbiꞌ coꞌ seron cuat, mbiꞌa nac Jesús. Luega tyen guꞌ mbiꞌ no bli guꞌ segur mbiꞌ coꞌ huen huen.
\p
\v 49 Sya, mbii gax Jud loo Jesús. Mdeꞌs Jud yen Jesús. No msero Jud cuat Jesús. Ndxab Jud:
\p ―San, Maistr.
\p
\v 50 Jesús mcàb loo Jud. Ndxab Jesús:
\p ―Amiu, ¿chó zinꞌ ndel, àꞌ?
\p Sya, mbii gax mèna loo Jesús. Mxen mèna Jesús. Mbeꞌ mèna Jesús xal ndxeꞌ mèn thìb pres.
\p
\v 51 Láth ndxàc conꞌa, thìb mbiꞌ coꞌ nac xinꞌ mtéꞌth Jesús ngua yaꞌ rlanꞌ. Mdoꞌf mbiꞌ spad leꞌn cubiert. Chàa, mblàa mbiꞌ thìb yaꞌ spad nza thìb moz coꞌ nac moz cheꞌn nguleyꞌ. Ale mchoꞌ mbiꞌ nza moz.
\v 52 Sya, ndxab Jesús loo mbiꞌ coꞌ ngòc xinꞌ mtéꞌth Jesús:
\b
\p ―Blosuaꞌ spadl leꞌn cubiert. Tac ryete mèn coꞌ ndxuth xtàa con spad, leque loo spad ya mèn looi, ne.
\v 53 ¿Chéꞌ inontel no chéꞌ tarte taꞌl cuent leꞌ daa nzoqueꞌ mod bez Diox coꞌ nac xuden no nzoqueꞌ mod ñaꞌben loo Diox coꞌ nac xuden telꞌ Diox masreꞌ thap gal mil solndad coꞌ nac angl par tíꞌ no làa angla daa laꞌs yaꞌ mèn ndxèꞌ, càꞌ?
\v 54 Per cheleꞌ daa tataa li, ¿xá mod gàcqueꞌ no xá mod tyaaqueꞌ diꞌs coꞌ ndub loo libr coꞌ nac xtiꞌs Diox coꞌ mbez no coꞌ ndluꞌ taandxèꞌqueꞌ ndxàal gàca loon, sya?
\b
\p
\v 55 Ngoloa, ndxab Jesús loo mèna:
\p ―¿Chéꞌ, lìcqueꞌ, coꞌseꞌ ngroꞌ guꞌ mxen guꞌ spad no mxen guꞌ yaa par tyen guꞌ daa xal thìb mbiꞌ coꞌ nac xal thìb huanꞌ, càꞌ? Guꞌ ndaꞌqueꞌ cuent no ndlibeꞌqueꞌ guꞌ daa leꞌ daa mdubqueꞌ làth guꞌ leꞌn templ atate huiz par mbluꞌen guꞌ. No neꞌnglide guꞌ ryes nden guꞌ daa xal ndyen mèn thìb huanꞌ xal ngue ten guꞌ daa nalleꞌ, ¿léꞌ?
\v 56 Per ndxàc ryete conꞌ ndxèꞌ loon nalleꞌ par gàcqueꞌ no tyaaqueꞌ xalqueꞌ mbez diꞌs coꞌ ndub loo libr coꞌ nac xtiꞌs Diox coꞌ mqueꞌ mèn coꞌ mdeꞌth diꞌs coꞌ ndxab Diox yeꞌs cón chenen.
\p Látha, rye myenꞌ xinꞌ mtéꞌth Jesús mxonꞌ. Mbláꞌ myenꞌ thidte Jesús.
\s Trèꞌ ndluꞌ leꞌ Jesús mdoo loo rye mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel.
\r (Mr. 14.53–65; Lc. 22.54–55, 63–71; Jn. 18.12–14, 19–24)
\p
\v 57 Leꞌ sya, mèn coꞌ mxenxùꞌ Jesús mbeꞌ Jesús loo Caifás coꞌ nac jef coꞌ más ñibeꞌ loo rye nguleyꞌ tiempa tac liz Caifás mqueltàa ryete mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn, no rye mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel.
\v 58 Leꞌ Pedr na, tith tith mdoo mque xís Jesús axta mzin Pedr loo lueꞌ liz mbiꞌ coꞌ lèe Caifás coꞌ nac jef coꞌ más ñibeꞌ loo rye nguleyꞌ. Pedr ngòo. No ndub Pedr làth rye mèn coꞌ mqueltàa tya, mèn coꞌ nquenap conꞌ coꞌ nac cheꞌn templ no coꞌ nque zinꞌ leꞌn templ par ñee Pedr ñeeneꞌ xá mod tolo quexùꞌ queꞌ fals mèna Jesús no tolo li laꞌs mèna cón cheꞌn Jesús.
\p
\v 59 Nde nxonꞌ, mèn coꞌ nac jef cheꞌn rye nguleyꞌ, no rye mèngool, no rye mèn coꞌ nxoꞌf zinꞌ zinꞌ cheꞌn templ, no mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel, sate más mcuaꞌn mèna mod xá mod tolo quexùꞌ queꞌ fals mèna Jesús axtaqueꞌ li mèna gan gàp mèna razon guth mèna Jesús.
\v 60 Per yende mod li mèna gan tolo ntec mèna Jesús mastaleꞌ huax mèna mqueltàa loo Jesús no mastaleꞌ antub yalgutyèꞌtúb ngòc diꞌs coꞌ ngue zib quìi mèna Jesús. Por lult, mbiꞌth chop mèn coꞌ mbiꞌth taꞌ cuent cón cheꞌn Jesús coꞌ nac diꞌs yalgutyèꞌtúb.
\v 61 Mèna ndxab:
\p ―Nuꞌ mbìn leꞌ mbiꞌ baꞌ gunii pezea, ndxab mbiꞌ leꞌ mbiꞌ cobii templ cheꞌn Diox. No bere mbiꞌ, xít teꞌf mbiꞌ templ leꞌn son huiz no maste. ¿Xá nee guꞌ? ¿Chéꞌ, lìcqueꞌ, li mbiꞌ conꞌa?
\p
\v 62 Sya, ngo too ndeꞌf mbiꞌ coꞌ nac jef coꞌ más ñibeꞌ loo rye nguleyꞌ. Ndxab mbiꞌ loo Jesús:
\p ―¿Chéꞌ yende mod càbl loo ryop mbiꞌ baꞌ, càꞌ? ¿Xá mod chonon tatuaꞌ nac rye diꞌs coꞌ mbez ryop mbiꞌ cón cheꞌnl, àꞌ? ¡Fcàb!
\p
\v 63 Per Jesús yende chó diꞌs mcàb. Sya, ndxab mbiꞌ coꞌ nac jef loo rye nguleyꞌ loo Jesús:
\p ―Por lèe Diox coꞌ naban, daa ngue teꞌth Diox lool: Nuꞌ ndlyaꞌs ñeel loo nu: ¿Chéꞌ, lìcqueꞌ, lùu nac Crist, xganꞌ Diox o chéꞌ inacte lùu Crist, càꞌ?
\p
\v 64 Jesús ndxab loo jef:
\p ―Aa. Nacqueꞌ daa xganꞌpeꞌ Diox, pues, xalqueꞌ ngue bezl baꞌ. No thidte vez ngue niin loo ryete guꞌ leꞌ guꞌ huiꞌ loon, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ, coꞌseꞌ tuben cuat Diox, Diox coꞌ ndxàppeꞌ ryethe conꞌ laꞌs yaꞌ Diox no laꞌs nii Diox. No huiꞌ guꞌ loon coꞌseꞌ gàc huiz coꞌ roꞌen loo béꞌ par galen leꞌn xcuau loo izlyoꞌ ndxèꞌ tedib vez.
\p
\v 65 Sya, jef coꞌ más ñibeꞌ loo nguleyꞌ ngo too ndeꞌf. Mched jef xab jef. No ndxab jef:
\p ―Mbiꞌ ndxèꞌ thidtenequeꞌ ñii yèe ñii tìi cón cheꞌn Diox con diꞌs coꞌ ndyoodiꞌs mbiꞌ. ¿Cón li taamas mèn coꞌ taꞌ cuent cón cheꞌn mbiꞌ baꞌ loo naꞌ? Ya inquinte naꞌ taamas mèn, ¿léꞌ? Guꞌ nde teeleꞌ ndxòn diꞌs coꞌ ndyoodiꞌs mbiꞌ coꞌ ñii yèe ñii tìi mbiꞌ cón cheꞌn Diox.
\v 66 ¿Xá nee guꞌ? ¿Xá gàc mbiꞌ? ¿Cón li no naꞌ mbiꞌ?
\p Mèna mcàb:
\p ―Ndxàalqueꞌ gath mbiꞌ tac mbiꞌ ndxàp dol.
\p
\v 67 Sya, ale msuc mèna rloo Jesús. No mdaꞌ mèna golp Jesús. Leꞌ taandxep mèna mdis rloo Jesús.
\v 68 No mbez mèna loo Jesús:
\p ―Com leꞌ lùu mbez lùu nac Crist, ¿léꞌ?, bli divin ¿chó nuꞌ mdaꞌ cheꞌnl?
\s Trèꞌ ndluꞌ leꞌ Pedr mcà diꞌs Jesús loo mèn leꞌ Pedr indlibeꞌde Jesús.
\r (Mr. 14.66–72; Lc. 22.56–62; Jn. 18.15–18, 25–27)
\p
\v 69 Láth ngue tetìi mèna Jesús no nzi li mèna xal ndlyaꞌs mèna con Jesús, Pedr ndub par fuer ro ned loo lueꞌ. Sya, mbii gax thìb mozgot loo Pedr. Mozgota ndxab loo Pedr:
\p ―Pedr, lùu, ne, mque tee noqueꞌ Jesús coꞌ nac mèn gulàaz cheꞌn mèn galile, ¿léꞌ?
\p
\v 70 Pedr mcà diꞌs Jesús loo mozgota loo rye mèn coꞌ nziriꞌ tya. Ndxab Pedr loo mozgota:
\p ―Aaꞌa. Neꞌneeden chó cuent ngue taꞌl.
\p
\v 71 Leꞌpeꞌ nda ro Pedr ro puert coꞌseꞌ gunèe tedib mozgot Pedr. Sya, ndxab mozgota loo mèn coꞌ nziriꞌ tya:
\p ―Mbiꞌ baꞌ, ne, mque tee noqueꞌ Jesús coꞌ nac mèn yèez Nazaret.
\p
\v 72 Mbere Pedr, mcà diꞌs Pedr Jesús tedib vez. Ndxab Pedr:
\p ―¡Tyoxca lìca, cara! Neꞌlibeden mbiꞌa.
\p
\v 73 Pente ndxàc mcà diꞌs Pedr cón cheꞌn Jesús, mbere mèn coꞌ nziriꞌ tya, ngua bii gax mèna loo Pedr. Ndxab mèna loo Pedr:
\p ―Lìcpeꞌ baꞌi, cara, lùu, ne, nac thìb mbiꞌ coꞌ mque tee noqueꞌ Jesús tac ndxàc beꞌl axta por mod coꞌ ndyoodiꞌs lùu.
\p
\v 74 Sya, leque Pedr, nazab gunii yèe gunii tìi Pedr cón cheꞌn Jesús. No mdeꞌth Pedr Diox. Ndxab Pedr:
\p ―¡Tyoxca lìca, cara! Neꞌlibeden mbiꞌa.
\p Leque hor coꞌseꞌ ndxab Pedr diꞌsa, chàa, ngrozèe nguiidtee mbléꞌ nguiidtee yálꞌ.
\p
\v 75 Sya, chàa, mteꞌ lezoꞌ Pedr diꞌs coꞌ ndxab Jesús loo Pedr coꞌseꞌ ndxab Jesús loo Pedr: Ndooreꞌ cozèe nguiidtee léꞌ nguiidtee yálꞌ, lùu cà diꞌs daa son vez. Sya, mbii Pedr tya. No neꞌtíꞌ neꞌ ñee lezoꞌ Pedr, mbínꞌ Pedr tant mxi lezoꞌ Pedr no mthyon Pedr por mcà diꞌs Pedr Jesús loo mèna.
\c 27
\s Trèꞌ ndluꞌ leꞌ mèn mbeꞌ Jesús, natub dóꞌ Jesús, loo thìb mbiꞌ coꞌ lèe Pilat.
\r (Mr. 15.1; Lc. 23.1–2; Jn. 18.28–32)
\p
\v 1 Coꞌseꞌ ngo nìi izlyoꞌ tedib huiz coꞌ nde nquea, ryete mèn coꞌ nac jef loo rye nguleyꞌ coꞌ más ñibeꞌ loo rye nguleyꞌ, no ryete mèngool coꞌ ñibeꞌ loo mèn nación Israel, thidte gunii rye mèna no thidte mdoodiꞌs rye mèna par mblo xnee mèna leꞌ mèna guthqueꞌ Jesús.
\v 2 Sya, mbeꞌ mèna Jesús, natub dóꞌ yaꞌ Jesús, loo tedib mbiꞌ coꞌ ngroꞌ lèe Pons Pilat coꞌ nac gobernador leꞌn ciuda Jerusalén tiempa.
\s Trèꞌ ndluꞌ leque Jud mbeth Jud.
\p
\v 3 Coꞌseꞌ gunee Jud coꞌ mdaꞌxùꞌ Jesús loo mèna leꞌ mèna mquexùꞌ mqueꞌ fals Jesús par guth mèna Jesús, axta syareꞌ ngulàa yéc Jud no ngulàa lezoꞌ Jud. Ale ngua sere Jud gal psiꞌ pes plat coꞌ mdix mèn loo Jud loo mèn coꞌ nac jef cheꞌn nguleyꞌ coꞌ más ñibeꞌ loo nguleyꞌ no loo mèngool coꞌ ndyoo ner no coꞌ ndyoo naa loo mèn nación Israel.
\v 4 Ndxab Jud loo mèna:
\p ―Daa mcuan xquin daa no xtol daa loo Diox por mdaxùꞌlen thìb mbiꞌ loo guꞌ coꞌ yende chó xquin ndxàp no coꞌ yende chó xtol ndxàp par guth guꞌ mbiꞌ.
\p Per mèna mcàb loo Jud. Ndxab mèna:
\p ―Yende chó mport nzo lezoꞌ nuꞌ conꞌ mblil. Lùu nee cón lil. Conꞌa ya nacleꞌ cón cheꞌnl.
\p
\v 5 Sya, ndxeclequeꞌ tmia mblobii Jud rloo mèna leꞌn templ. Ngoloa, ndyàa Jud. Ngua lo Jud dóꞌ yen Jud. Ale leque Jud setilte mbeth Jud.
\p
\v 6 Sya, mèn coꞌ nac jef cheꞌn nguleyꞌ coꞌ más ñibeꞌ loo nguleyꞌ mthop tmi coꞌ mblobii Juda. Ndxab mèna loo xtàa mèna:
\p ―Yende mod co naꞌ tmi ndxèꞌ leꞌn caj coꞌteꞌ ndxòo tmi coꞌ ndyop gòn o ofrend. Tmi ndxèꞌ nac tmi, coꞌ nee diꞌs, mxi naꞌ mbiꞌ baꞌ par guth naꞌ mbiꞌ.
\p
\v 7 Ngoloa, luega mdoodiꞌs mèna con xtàa mèna. Ndxab mèna:
\p ―Más huen tyen naꞌ tmi baꞌ par tiꞌ naꞌ thìb leꞌ yòo bteꞌf coꞌ nac yòo coꞌteꞌ ntoxcuaꞌ mèn plat no taz no taamas conꞌ par gàc yòoa thìb lugar coꞌteꞌ cuec mèna thìb panteón par caꞌs mèna mèn coꞌ nac mèn tedib nación coꞌ nzo ban ciuda ndxèꞌ.
\p
\v 8 Por cona, axta huiza no axta huiz nalze lèe lugar coꞌ ngòc yòo bteꞌfa yòo bteꞌf coꞌ mdyuꞌ con tmi coꞌ ngòc tmi coꞌ mxi mèn thìb mbiꞌ coꞌ mbethxùꞌ mèn par mxyo ren mbiꞌ loo izlyoꞌ.
\v 9 Tataa mod ngòcqueꞌ no mdyaaqueꞌ cón cheꞌn diꞌs coꞌ gunii Jeremi coꞌ mdeꞌth diꞌs coꞌ ndxab Diox coꞌseꞌ ndxab Jeremi:
\pi1 Mxen mèn gal psiꞌ pes plat coꞌ ngòc tmi coꞌ ndxab mèn ntac mbiꞌa.
\pi1
\v 10 No con tmia mxi mèna thìb leꞌ yòo bteꞌf coꞌteꞌ ndli mèn zinꞌ, mèn coꞌ ntoxcuaꞌ plat no taz no taamas conꞌ. Mbliqueꞌ mèn conꞌa xalqueꞌ mnibeꞌ Tad Diox loon par mdethen diꞌs ndxèꞌ coꞌ ngòc diꞌs coꞌ gunee Tad Diox loon.
\s Trèꞌ ndluꞌ leꞌ Jesús mdooxùꞌ loo Pilat.
\r (Mr. 15.2–5; Lc. 23.3–5; Jn. 18.33–38)
\p
\v 11 Ngoloa, mbeꞌ mèna Jesús loo gobernador coꞌ ngroꞌ lèe Pilat. Sya, mnibdiꞌs gobernador loo Jesús. Ndxab gobernador loo Jesús:
\p ―¿Chéꞌ, lìcqueꞌ, lùu nac rey cheꞌn mèn nación Israel, càꞌ?
\p Jesús ndxab loo gobernador:
\p ―Aa. Nac daa rey cheꞌn mèn nación Israel, pues, xalqueꞌ ngue bezla baꞌ.
\p
\v 12 Per coꞌseꞌ ngue quexùꞌ ngue queꞌ fals mèn coꞌ nac jef coꞌ más ñibeꞌ loo nguleyꞌ no mèngool Jesús, nec thìb diꞌs neꞌncàbte Jesús loo mèna.
\v 13 Sya, ndxab Pilat loo Jesús:
\p ―¿Chéꞌ indxònte lùu no chéꞌ indenꞌte lùu rye diꞌs coꞌ mbez mèn baꞌ cón cheꞌn lùu, càꞌ?
\p
\v 14 Per Jesús nec thìb diꞌs neꞌncàbte loo gobernador. Ante mbuiꞌ no ante gunaa gobernador loo Jesús axta neꞌ neꞌ ñee gobernador cón li gobernador xtùuz.
\s Trèꞌ ndluꞌ leꞌ Jesús nzoleꞌ laꞌs yaꞌ mèn par guth mèn Jesús.
\r (Mr. 15.6–20; Lc. 23.13–25; Jn. 18.38—19.16)
\p
\v 15 Nde nxonꞌ, mque no mèn coꞌ ndxàc gobernador thìb costumbr ngoꞌ mèn coꞌ ndxàc gobernador thìb pres coꞌ mbez mèn loo gobernador ryoꞌ cad línꞌ coꞌseꞌ ndxáal lni pasc.
\v 16 Leꞌpeꞌ línꞌa, ngo thìb mbiꞌ coꞌ anzeꞌf mxyoꞌf lèe no coꞌ anzeꞌf mxyoꞌf xtiꞌs coꞌ ngòc thìb mbiꞌguth mèn. Mbiꞌa ngroꞌ lèe Barrabás.
\v 17 Láth coꞌseꞌ mqueltàa rye mèna loo Pilat coꞌ nac gobernador, Pilat mnibdiꞌs loo mèna. Ndxab Pilat:
\p ―De loo ryop mbiꞌ, Barrabás coꞌ ngue leziꞌf no Jesús coꞌ nda guꞌ cuent loon, ¿chó mbiꞌ ndlyaꞌs guꞌ teláꞌen par bii mbiꞌ, àꞌ? ¿Chéꞌ ndlyaꞌs guꞌ teláꞌen Barrabás o chéꞌ ndlyaꞌs guꞌ laꞌen bii Jesús coꞌ neꞌ tedib lèe Crist, càꞌ?
\p
\v 18 Tac Pilat nonqueꞌ no ndaꞌqueꞌ Pilat cuent por ndxecloo mèna ñèe mèna Jesús no por ndxàn lezoꞌ mèna ñèe mèna Jesús, por cona asembli mèna mdaꞌxùꞌ mèna Jesús loo Pilat.
\p
\v 19 Láth ndub Pilat coꞌteꞌ ndub rez Pilat diꞌs cón cheꞌn mèn, xaꞌgot coꞌ nac saꞌl Pilat mtelꞌ mandad par ndxab saꞌl Pilat loo Pilat: Anderhuenl, Pilat. Neꞌtetìidel mbiꞌ baꞌ. No yende cón li nol mbiꞌ coꞌ nac mbiꞌ nalì no mbiꞌ nambìi baꞌ. Tac daa msaꞌ lezoꞌ thìb mcalꞌ fier no anzeꞌf mzeb mcalꞌ daa por cón cheꞌn mbiꞌ baꞌ náꞌ xhuina.
\p
\v 20 Per mèn coꞌ nac jef coꞌ más ñibeꞌ loo rye nguleyꞌ no mèngool coꞌ ñibeꞌ loo mèn nación Israel, thidte ngòc ryop ned mèna. Thidte ndxab rye mèna loo Pilat más huen ryoꞌ no lyáꞌ Barrabás. Leꞌ Jesús baꞌ na, gath.
\v 21 Mbere Pilat coꞌ nac gobernador, ndxab Pilat loo mèna. No mnibdiꞌs Pilat loo mèna tedib vez:
\p ―De loo ryop mbiꞌ, ¿chó mbiꞌ ndlyaꞌs guꞌ teláꞌen, àꞌ?
\p Mèna ndxab:
\p ―Bloꞌ Barrabás leziꞌf. No blaꞌ bii Barrabás.
\p
\v 22 Pilat mnibdiꞌs tedib vez loo mèna. Ndxab Pilat:
\p ―Leꞌ loo Jesús coꞌ mbez mèn nac Crist, ¿cón ndlyaꞌs guꞌ li non Jesús, àꞌ?
\p Ryete mèna mcàb:
\p ―Fcàa Jesús. Fqueꞌ loo cruz.
\p
\v 23 Mbere Pilat, ndxab Pilat loo mèna:
\p ―Per ¿chó conꞌ yeꞌrsinꞌ mbli mbiꞌ ndxèꞌ, yey?
\p Per ale leꞌleꞌ mcàb rye mèna. Ndxab rye mèna loo Pilat:
\p ―Pues, nuꞌ ngue bez lool: Fcàa mbiꞌ baꞌ. Fqueꞌ loo cruz.
\p
\v 24 Coꞌseꞌ ñee Pilat ya yende mod li Pilat gan no, ndxeꞌlequeꞌ, sate más ndxátbèe mèna no ndxecloo mèn ñèe mèn Jesús, mbli Pilat mandad. Ngua xi mèn nít par mtech Pilat yaꞌ Pilat loo mèna. Láth ngue tech Pilat yaꞌ Pilat, ndxab Pilat loo mèna:
\p ―Yende chó cón chenen par laꞌs ron cón cheꞌn mbiꞌ baꞌ par niin guthen mbiꞌ. Neꞌ neꞌ laꞌs ron cón cheꞌn mbiꞌ baꞌ par niin loo guꞌ guth guꞌ mbiꞌ baꞌ. Mbiꞌ indxàpte nec thìb xquin no xtol par guthen mbiꞌ. Conꞌ coꞌ ndlyaꞌs guꞌ li guꞌ baꞌ ya nacleꞌ cón cheꞌn guꞌ. Guꞌ nee cón li no guꞌ mbiꞌ. Yende chó cón chenen par xon ren mbiꞌ. Nambìi ndoon loo guꞌ.
\p
\v 25 Sya, ryete mèna mcàb loo Pilat. Ndxab mèna:
\p ―Yanꞌ cón cheꞌn mbiꞌ coꞌ gath baꞌ cón cheꞌn nuꞌ no cón cheꞌn xinꞌ nuꞌ, xàa. Mbiꞌ gath. Ngolo cuent.
\p
\v 26 Sya, mbloꞌ Pilat Barrabás leziꞌf. No mteláꞌ Pilat Barrabás. Leꞌ Jesús na, mbli Pilat mandad ngua taꞌ mèn cheꞌn Jesús. Ngoloa, mdaꞌ Pilat Jesús loo mèna par ya queꞌ mèna Jesús loo cruz.
\p
\v 27 Ngoloa, mbeꞌ solndad coꞌ nac solndad Pilat, coꞌ nac gobernador, Jesús coꞌteꞌ nac palas cheꞌn Pilat. Tya mqueltàa rye solndad dib vuelt loo Jesús.
\v 28 Mteche solndad xab Jesús coꞌ noc Jesús. Ngoloa, mtegoc solndad Jesús thìb ned xab Jesús coꞌ ngòc larꞌ nanee.
\v 29 Ale mtoxcuaꞌ solndad thìb coron yis. Ngoloa, mdub solndad coron yisa yéc Jesús. No mblo solndad thìb leꞌ yaa yaꞌ Jesús coꞌ nac ladlì. Sya, asembli solndad, mdyub xib solndad loo Jesús. No mxìis no solndad Jesús. No ale ndxáp nxyánꞌ solndad ñèe solndad Jesús. Mbez solndad loo Jesús:
\p ―San, Rey, lùu coꞌ mbez nac lùu rey cheꞌn mèn nación Israel.
\p
\v 30 Ale msuc solndad rloo Jesús. No leque yaa coꞌ mblo solndad yaꞌ Jesús, mxen solndad par mblàa solndad yaaa yéc Jesús.
\v 31 Ngoloa tataa mxìis no solndad Jesús no mbli solndad ngòc nguàal conꞌ con Jesús, mteche solndad cap coꞌ noc Jesús. Mbere solndad, mtegoc solndad xab Jesús. Ngoloa, mbeꞌ solndad Jesús par ya queꞌ solndad Jesús loo cruz.
\s Trèꞌ ndluꞌ leꞌ mèn mqueꞌ Jesús loo thìb cruz.
\r (Mr. 15.21–32; Lc. 23.26–43; Jn. 19.17–27)
\p
\v 32 Láth nda roꞌ solndad ro ciuda Jerusalén con Jesús, asalꞌ too solndad con mèna thìb mbiꞌ coꞌ nac mbiꞌ gulàaz cheꞌn làaz mèn siren. Mbiꞌa ngroꞌ lèe Mon. Ale mtauꞌ solndad loo mbiꞌ. No mnibeꞌ yèe solndad loo mbiꞌa par mbeꞌ mbiꞌ cruz Jesús.
\p
\v 33 Coꞌseꞌ ngolo mzin no solndad Jesús con mèn coꞌteꞌ lèe Gólgota, coꞌ nee diꞌs, thìb den coꞌ ñaa xal thìb calaver yéc mèn,
\v 34 tya, mcos solndad vin con thìb loo cuanꞌ coꞌ anzeꞌf nala par taꞌ solndad vina gu Jesús. Per coꞌseꞌ ngolo mbli Jesús preb vin coꞌ nos cuanꞌ nalaa, neꞌcàbte Jesús gu Jesús vina.
\p
\v 35 Coꞌseꞌ ngololeꞌ mqueꞌ solndad Jesús loo cruz, mblo solndad xab Jesús rif. No mdith no solndad dad loo xab Jesús par ñee solndad ñeeneꞌ chó solndad gàc cheꞌn xab Jesús. Tataa ngòc conꞌa par ngòcqueꞌ, no mdyaaqueꞌ, no mdubqueꞌ diꞌs coꞌ gunii thìb mbiꞌ coꞌ mdeꞌth diꞌs coꞌ ndxab Diox coꞌ ndxab:
\pi1 Mblo mèn xaben rif no mdith no mèn dad loo xaben par ñee mèna ñeeneꞌ chó mèn gàc cheꞌn xaben.
\m
\v 36 Ngolo mdith no solndad dad loo xab Jesús, tya gaate ngure solndad par mquenap solndad Jesús bzyèa.
\v 37 Nde nxonꞌ, mnibeꞌ Pilat loo solndad mqueꞌ solndad plá diꞌs coꞌ mbez no coꞌ ndluꞌ loo thìb yeꞌs yéc cruz Jesús xá mod mquexùꞌ mqueꞌ fals mèn Jesús. Diꞌsa mbez: Mbiꞌ ndxèꞌ nac Jesús coꞌ nac rey cheꞌn mèn nación Israel.
\p
\v 38 Mqueꞌ solndad chop huanꞌ ryop lad cuat Jesús loo cruz leque huiza, ne. Thìb mbiꞌ mquée cuat Jesús ladlì. Tedib mbiꞌ mquée cuat Jesús lad rebes.
\v 39 Látha, asembli mèn mbriꞌth mèn coꞌteꞌ ngue Jesús loo cruz. No beꞌ taa mcuin mèn yéc mèn. Mbez mèn loo Jesús: Mzyalqueꞌla, ndee. No sate más mxìis no mèn Jesús no ndxáp nxyánꞌ mèn ñèe mèn Jesús.
\v 40 No mbez mèna loo Jesús:
\p ―Lùu coꞌ gunee loo nuꞌ leꞌ lùu cobii templ loo yòo no leꞌn sonte huiz berel xít teꞌfl templ tedib vez, nalleꞌ leque lùu bli par lyáꞌl. Cheleꞌ lùu, lìcqueꞌ, nac xganꞌpeꞌ Diox, bilàa loo cruz coꞌteꞌ nguel baꞌ.
\p
\v 41 Lomisqueꞌ ne, mxìis no ryete mèn ndxèꞌ Jesús, mèn coꞌ nac jef coꞌ más ñibeꞌ loo rye nguleyꞌ, no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn, no mèn coꞌ nac mèn xleyꞌ farise, no mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel. Mbez mèna loo xtàa mèna, ne:
\p
\v 42 ―¿Xá ngóc mbiꞌ baꞌ mteláꞌ mbiꞌ chol mèn loo chol yaltìi no nalleꞌ ale neꞌngácte mbiꞌ li mbiꞌ par lyàa mbiꞌ loo cruz coꞌteꞌ ngue mbiꞌ baꞌ? Cheleꞌ mbiꞌ nacqueꞌ rey cheꞌn mèn nación Israel, leque mbiꞌ li par lyàa mbiꞌ loo cruz coꞌteꞌ ngue mbiꞌ baꞌ par yilaꞌs naꞌ no li laꞌs naꞌ lìcqueꞌ nac conꞌ coꞌ mbez mbiꞌ nac mbiꞌ.
\v 43 Anzeꞌf ngòp mbiꞌ yalxlaꞌs loo Diox. Nee Diox xá mod teláꞌ Diox mbiꞌ loo cruz coꞌteꞌ ngue mbiꞌ baꞌ cheleꞌ mbiꞌ nac anzeꞌf ngudloo Diox no lezoꞌ Diox. Más de cona, mbiꞌ guneequeꞌ loo naꞌ leꞌ mbiꞌ nac xganꞌ Diox. Nal ñee naꞌi ñeeneꞌ ¿chéꞌ, lìca?
\p
\v 44 Axta ryop huanꞌ coꞌ mquée loo cruz con Jesús mbez ngòc nguàal conꞌ loo Jesús, ne.
\s Jesús nguth yub loo cruz.
\r (Mr. 15.33–41; Lc. 23.44–49; Jn. 19.28–30)
\p
\v 45 No dib lal ngue tetìi mèna Jesús, ngóol rol huiz. Desde hora axta hor mquée guyon bzyè, dib lal hora mcuau loo izlyoꞌ. Ale mbyauꞌ loo huiz. Syareꞌ, mtenìi huiz loo izlyoꞌ tedib vez.
\v 46 No leque hor mquée guyon bzyèa cabii ngrozèe yii ngrozèe den Jesús. Ndxab Jesús:
\p ―Eli, Eli, ¿lama sabactani? Diꞌsa nee diꞌs ndxab Jesús loo Diox: Ay, Diox, Ay, Diox, ¿chonon mbláꞌyaꞌ Uꞌ daa, àꞌ?
\p
\v 47 Ndxep mèn coꞌ nziriꞌ tya mbìn diꞌs coꞌ ndxab Jesús. Sya, ndxab mèna loo xtàa mèna:
\p ―Mbiꞌ baꞌ ngue bez Lii. Guꞌ neequeꞌ no nonqueꞌ guꞌ leꞌ Lii ngòc thìb mbiꞌ coꞌ mdeꞌth diꞌs coꞌ ndxab Diox póla, ¿léꞌ?
\p
\v 48 Leque hora mqueꞌ thìb mbiꞌ coꞌ nzo làth mèn carre. Ngua xi mbiꞌ thìb sponj. Mtegaz mbiꞌ sponj con vin coꞌ nos con cuanꞌ nala. Mdub mbiꞌ sponja loo thìb punt bar. Ale mzi mchep mbiꞌ sponja ro Jesús par gu Jesús vin coꞌ nos cuanꞌ nala.
\v 49 Per taamas mèna ndxab loo mbiꞌa:
\p ―Láꞌa. Tee quée mbiꞌ tuaꞌ par ñee naꞌ ñeeneꞌ chéꞌ tiꞌth Lii par teláꞌ Lii mbiꞌ no làa Lii mbiꞌ coꞌteꞌ ngue mbiꞌ baꞌ.
\p
\v 50 Mbere Jesús, ngrozèe yii no ngrozèe den Jesús. Ngoloa, site nguth Jesús.
\v 51 Leque hor coꞌseꞌ nguth Jesús, mbli Diox leꞌ cortin coꞌ ngue leꞌn templ mbryed grolthe axta gáp no axta xànꞌ. Ale chop leꞌ ngòc cortin. Látha, mbuin thìb xòo brut. No ngulàa bes huax quèe rhueꞌ no ngulàa bes huax quèe coꞌ ngóol yub loo izlyoꞌ.
\v 52 No mxyalꞌ ro báꞌ coꞌteꞌ mbuaꞌs huax thebol coꞌ ngolaꞌs loo Diox. Rye mèna ngro xban hora.
\v 53 Ngolo ngro xban mèna, ngroꞌ mèna leꞌn panteón coꞌteꞌ mbuaꞌs mèna. Ndyàa mèna par ciuda Jerusalén coꞌ nac ciuda natúꞌ cheꞌn mèn nación Israel. Huax mèn ciuda Jerusalén gunèe mèn coꞌ ngro xbana, ne.
\p
\v 54 Leꞌ sya, coꞌseꞌ ñèe capitán con solndad coꞌ nzi quenap Jesús mbuin xòo no tolo ngòc taamas conꞌ nazeꞌf, anzeꞌf mzyeb capitán con taamas solndada. Ale ndxab capitán no mèn coꞌ nziriꞌ no capitana:
\p ―Lìcpeꞌ baꞌi, ndee guꞌ. Mbiꞌ baꞌ, lìcqueꞌ, ngòc xganꞌ Diox.
\p
\v 55 Ngure huax mèngot tya, mèngot coꞌ ngure huiꞌ xal ngòc conꞌ loo Jesús. Mèngota mdoo nque xís Jesús axta coꞌseꞌ ngroꞌ Jesús leꞌn yèezyaꞌ cheꞌn làaz mèn galile. Mblyath no mèngota Jesús.
\v 56 Láth rye mèngota ngo son xaꞌgot. Thìb xaꞌgot lèe Mari. Xaꞌgota ngòc mèn yèez Magdala. Mbryop xaꞌgota ngòc Mari coꞌ ngòc xnaꞌ ryop hues myenꞌ coꞌ ngroꞌ lèe Cob no Chè. Mbyon xaꞌgota ngòc xinꞌ saꞌl thìb mbiꞌ coꞌ lèe Zebede, Zebede coꞌ ngòc xud myenꞌ coꞌ lèe Juàn no Cob.
\s Trèꞌ ndluꞌ leꞌ thìb mbiꞌ ngua lo thebol Jesús leꞌn thìb yeꞌr quèe.
\r (Mr. 15.42–47; Lc. 23.50–56; Jn. 19.38–42)
\p
\v 57 Coꞌseꞌ nde làaleꞌ yálꞌ izlyoꞌ huiza, mbiꞌth thìb mbiꞌ ric coꞌ lèe Chè. Mbiꞌa ngòc mbiꞌ yèez coꞌ lèe yèez Arimate. Ngòc mbiꞌa xinꞌ mtéꞌth Jesús, ne.
\v 58 Ngua nee Chè loo Pilat taꞌ Pilat lugar par hueꞌ Chè thebol Jesús. Sya, mnibeꞌ Pilat loo mèn. Ngua taꞌ mèn thebol Jesús mcàa Chè.
\v 59 Sya, mbeꞌ Chè thebol Jesús. Mchìꞌx Chè thìb sab coꞌ ante nagus bèelequeꞌ ñaa lad thebol Jesús.
\v 60 Ngoloa, ngua lo Chè thebol Jesús leꞌn thìb yeꞌr quèe coꞌ mbli Chè mandad mdenꞌ mèn par gaꞌs Chè yiloa. Per ndxeꞌlequeꞌ, leꞌn yeꞌr quèe coꞌteꞌ ya lo mèn Chèa, mblo Chè thebol Jesús. Ngolo mblo Chè thebol Jesús tya, mtauꞌ Chè ro yeꞌr quèea con tedib quèe roo. Ngoloa, ndyàa Chè.
\v 61 Leꞌ Mari coꞌ nac mèn yèez Magdala no tedib Mari coꞌ mqueltàa no Maria, nguled ryop Maria ro yeꞌr quèea axta ngolo mblo Chè thebol Jesús leꞌn yeꞌr quèea.
\s Trèꞌ ndluꞌ leꞌ solndad mquenap yeꞌr quèe coꞌteꞌ mblo Chè thebol Jesús.
\p
\v 62 Coꞌseꞌ ngo nìi izlyoꞌ tedib huiz coꞌ nde nquea, coꞌ nee diꞌs, ngolo nguriꞌth huiz coꞌ ngòc nab mèn par huiz lni coꞌ nac huiz yub lni, mqueltàa mèn coꞌ ngòc jef coꞌ más mnibeꞌ loo rye nguleyꞌ no mèn xleyꞌ farise yòolau coꞌteꞌ nzo Pilat.
\v 63 Ndxab mèna loo Pilat:
\p ―Tad, nuꞌ nteꞌ lezoꞌ cón cheꞌn mbiꞌ gutyèꞌa coꞌseꞌ beꞌ naban mbiꞌ, mbiꞌ gunee loo nuꞌ coꞌseꞌ yilo son huiz nguth mbiꞌ, mbiꞌ ryo xban làth mèn nguth.
\v 64 Cona, nde nee nuꞌ loo Uꞌ, leꞌ Uꞌ ñibeꞌ ya quenap solndad ro yeꞌr quèe axta yilo son huiz par tataa mod neꞌyade myenꞌ xinꞌ mtéꞌth mbiꞌ yálꞌ no ya loꞌ myenꞌ mbiꞌ coꞌ ngòc thebola leꞌn yeꞌr quèe. Leꞌ sya, gab myenꞌ no teꞌth myenꞌ loo mèn leꞌ mbiꞌ ngro xbanleꞌ làth mèn nguth. Leꞌ sya, tataa mod más ndoo lìte toxcuaꞌ myenꞌ yalgutyèꞌ leque yalgutyèꞌ coꞌ ngòc diꞌs coꞌ gunii Jesús ndooreꞌ láth coꞌseꞌ beꞌ naban Jesús.
\p
\v 65 Pilat ndxab loo mèna:
\p ―Guꞌ ngue no thìb tant solndad laꞌs yaꞌ guꞌ coꞌ ngue li sirv loo guꞌ. Más huen leque guꞌ nibeꞌ par ya quenap solndad ro yeꞌr quèe thìb mod coꞌ más gác solndad quenap solndad yeꞌr quèe coꞌ nac báꞌ.
\p
\v 66 Sya, mxen mèna ned. Nda mèna ro yeꞌr quèe coꞌteꞌ mblo Chè thebol Jesús. Mqueꞌ mèna thìb leꞌ yeꞌs loo quèe coꞌ ngue diꞌsbèꞌ coꞌ ñibeꞌ yende chó mèn cuin quèe coꞌ ndoo nauꞌ ro yeꞌr quèe coꞌteꞌ mblo mèn thebol Jesús. Ngoloa, mtanꞌ mèna solndad coꞌ mbyanꞌ quenap ro yeꞌr quèea par ñee solndad ñeeneꞌ cón gàc leꞌn yon huiza.
\c 28
\s Trèꞌ ndluꞌ leꞌ thebol Jesús ngro xbanleꞌ.
\r (Mr. 16.1–8; Lc. 24.1–12; Jn. 20.1–10)
\p
\v 1 Coꞌseꞌ ngolo nguriꞌth huiz sabd coꞌ ngòc huiz descans tiempa no nde yinìileꞌ izlyoꞌ huiz doming coꞌ nac ner huiz cheꞌn sman, Mari coꞌ nac mèn yèez Magdala no tedib Mari ngua tee huiꞌ ryop Mari ro yeꞌr quèe coꞌteꞌ mblo Chè thebol Jesús.
\v 2 Leque hora, chàa, mbuin thìb xòo brut. Láth ngüin xòoa, ngulàa thìb angl cheꞌn Tad Diox loo béꞌ. Coꞌseꞌ mzin angl ro yeꞌr quèe coꞌteꞌ mblo Chè thebol Jesús, mteche angl quèe coꞌ ndoo nauꞌ ro yeꞌr quèea. Ngoloa, mdub angl loo quèe coꞌ mteche angla.
\v 3 Látha, ante nquée xnìi angla xal coꞌseꞌ ndxàꞌx bèel gundi. Leꞌ xab angla na, ante nagus bèelequeꞌ ñaa xal ñaa xilꞌ.
\v 4 Coꞌseꞌ gunèe solndad angl, ale mxiꞌth solndad tant mzyeb solndad. Ngob solndad loo yòo. Ale mcuau solndad. Ngòca loo solndad xal mèn coꞌ nguth.
\v 5 Sya, ndxab angl loo mèngota:
\p ―Neꞌzyebte guꞌ, ey. Na nanee no ndaquen cuent leꞌ guꞌ nde cuaꞌn Jesús coꞌ mqueꞌ mèn loo cruz.
\v 6 Ya yende Jesús leꞌn yeꞌr quèe baꞌ. Jesús ngro xbanleꞌ. Ngòcleꞌ conꞌ loo Jesús xalqueꞌ mdeꞌth Jesús loo guꞌ leꞌ Jesús ryo xban. Que de guꞌ ndxèꞌ par huiꞌ guꞌ coꞌteꞌ mdiꞌx Chè thebol Jesús par yilaꞌs guꞌ leꞌ thebol Jesús yende trèꞌ.
\v 7 Lijer byàa guꞌ. No ftaꞌ guꞌ cuent ndxèꞌ loo myenꞌ xinꞌ mtéꞌth Jesús leꞌ Jesús ngro xbanleꞌ làth mèn nguth. Ftaꞌ guꞌ cuent loo myenꞌ no guuz guꞌ loo myenꞌ leꞌ Jesús ya ner loo guꞌ leꞌn thìb yèez cheꞌn làaz mèn galile. Tya, huiꞌpeꞌ guꞌ loo Jesús. Diox mtelꞌ daa par tan cuent cón cheꞌn diꞌs ndxèꞌ loo guꞌ.
\p
\v 8 Sya, sirs sirs mxen mèngota ned. Mbii mèngota ro yeꞌr quèea. Thìb part mzyeb mèngota. Tedib part na, más ndyac lezoꞌ mèngota. Ale tolo mqueꞌ mèngota carre par ya taꞌ mèngota cuent loo myenꞌ xinꞌ mtéꞌth Jesús.
\v 9 Látha, chàa, ngroꞌ too Jesús loo mèngota. No gunii Jesús Diox loo mèngota. Sya, mbii gax mèngota loo Jesús. No mdub xib mèngota loo Jesús. No thidte ngua mèngota. Mdeꞌs mèngota nii Jesús.
\v 10 Sya, ndxab Jesús loo mèngota:
\p ―Neꞌzyebte guꞌ, ey. Huàa taꞌ guꞌ cuent ndxèꞌ loo myenꞌ huesen. Guuz guꞌ loo myenꞌ ya bed myenꞌ daa leꞌn thìb yèez cheꞌn làaz mèn galile. Tya, huiꞌ myenꞌ loon.
\s Trèꞌ ndluꞌ cón cheꞌn cuent coꞌ mdaꞌ solndad loo mèn.
\p
\v 11 Láth ndoo mèngota ned, ndyàa mèngota, mxen plá solndad coꞌ mquenap yeꞌr quèe coꞌteꞌ mblo Chè thebol Jesús ned. Nda taꞌ solndad cuenta loo mèn leꞌn ciudad Jerusalén loo mèn coꞌ ngòc jef coꞌ más ñibeꞌ loo rye nguleyꞌ cón cheꞌn ryete conꞌ coꞌ ngòca.
\v 12 Leꞌ sya, mèn coꞌ nac jef coꞌ más ñibeꞌa ngua toodiꞌs no mèngool coꞌ ñibeꞌ loo mèn nación Israel par thidte gàc mèna no thidte tyoodiꞌs mèna par li nèe mèna cón cheꞌn diꞌs coꞌ mdaꞌ solndad cuenta. Ngoloa, mdaꞌ mèna huax tmi par mcàa solndad.
\v 13 No ndxab mèna loo solndad:
\p ―Taandxèꞌ gab guꞌ loo mèn cheꞌn ciuda Jerusalén. Gab guꞌ: Láth nzi yàt nuꞌ xhuina, neꞌndenꞌte nuꞌ no neꞌndaꞌde nuꞌ cuent xal mbiꞌth li huanꞌ myenꞌ xinꞌ mtéꞌth thebol Jesús thebol Jesús leꞌn yeꞌr quèe.
\v 14 No cheleꞌ gobernador taꞌ nza gobernador par gòn gobernador cón cheꞌn diꞌs coꞌ ngolo mdoodiꞌs naꞌ ndxèꞌ, nuꞌ tolo li nèe par yilaꞌs gobernador diꞌs ndxèꞌ. Tataa mod li nuꞌ par neꞌgàcte conꞌ ryes loo guꞌ no neꞌtub rezte gobernador cón cheꞌn guꞌ loo guꞌ.
\p
\v 15 Leꞌ sya, ndoo lìte mxèn solndad tmia. Ngua li solndad xal ndxab mèna. Diꞌsa beꞌ nac diꞌs coꞌ mbez mèn nación Israel axta huiza no axta huiz nalze.
\s Jesús mnibeꞌ loo myenꞌ xinꞌ mtéꞌth Jesús par taꞌ myenꞌ cuent cón cheꞌn Jesús no co myenꞌ yalbàn cón cheꞌn diꞌs ndac loo mèn.
\r (Mr. 16.14–18; Lc. 24.36–49; Jn. 20.19–23)
\p
\v 16 Leꞌ sya, rye siꞌ fthìb myenꞌ xinꞌ mtéꞌth Jesús na, myenꞌ mxen ned. Nda myenꞌ par leꞌn thìb yèez cheꞌn làaz mèn galile coꞌteꞌ ndub thìb yii coꞌ ndxab Jesús loo myenꞌ cued myenꞌ.
\v 17 Coꞌseꞌ gunèe myenꞌ Jesús, mdub xib myenꞌ loo Jesús no mcòoꞌ myenꞌ yéc myenꞌ loo Jesús mastaleꞌ beꞌ ngan lezoꞌ myenꞌ no mastaleꞌ beꞌ ndxàc chop lezoꞌ myenꞌ chéꞌ, lìcqueꞌ, nac mbiꞌa Jesús.
\v 18 Sya, mbii gax Jesús loo myenꞌ xinꞌ mtéꞌth Jesús. Ndxab Jesús loo myenꞌ:
\p ―Huiꞌ guꞌ nexa, ey. Diox mbli par ndxàpen rye loothe conꞌ roo conꞌ xèn laꞌs niin no laꞌs yan par ñibeꞌen loo ryethe conꞌ, que naca conꞌ coꞌ nziriꞌ loo izlyoꞌ ndxèꞌ, que naca conꞌ coꞌ nzo loo béꞌ.
\v 19 Nalleꞌ daa ngue ñibeꞌ loo guꞌ: Huàa guꞌ loo rye mèn leꞌn rye nación coꞌ nziriꞌ dib athu loo izlyoꞌ. Huàa luꞌ guꞌ loo mèna coꞌ nac cón chenen no bli guꞌ leꞌ mèna gàc xinꞌ mtéꞌthpeꞌ daa. No bli guꞌ bautizar mèna por lèe xuden Diox no por lèen, daa coꞌ nac xganꞌ Diox, no por lèe Xpii Natúꞌ cheꞌn Diox.
\v 20 Bluꞌ guꞌ loo mèna tyubdiꞌs mèna loo rye diꞌs coꞌ nac diꞌs coꞌ ñibeꞌen loo guꞌ luꞌ guꞌ loo mèna. No fteꞌ lezoꞌ guꞌ leꞌ daa nzo noqueꞌ guꞌ thidtene no neꞌláꞌyaꞌden guꞌ ryethe huiz desde huiz nalze no axta coꞌseꞌ gàc huiz coꞌ lith no izlyoꞌ. Taandxèꞌ gàca loo guꞌ, ey.