\id MRK
\ide UTF8
\h SAN MARCOS
\toc1 SAN MARCOS
\mt Diꞌs Ndac Cheꞌn Diox Coꞌ Mqueꞌ Marc Yeꞌs
\c 1
\s Juàn Bautist ngo yalbàn coꞌteꞌ nagán.
\r (Mt. 3.1–12; Lc. 3.1–9, 15–17; Jn. 1.19–28)
\p
\v 1 Taandxèꞌ mod mtlo mbyath no mbyèn cón cheꞌn diꞌs ndac cheꞌn Diox coꞌ ndluꞌ cón cheꞌn Jesucrist coꞌ nac xganꞌpeꞌ Diox.
\p
\v 2 Thìb mbiꞌ coꞌ ngroꞌ lèe Sayi coꞌ mdeꞌth diꞌs coꞌ ndxab Diox, mbiꞌa mqueꞌ yeꞌs loo libr coꞌ nac xtiꞌs Diox coꞌ mbez taandxèꞌ:
\pi1 Daa telꞌ ner thìb mbiꞌ coꞌ xoꞌf zinꞌ zinꞌ coꞌ gàc rsinen. Mbiꞌ yiꞌth ner lool par teꞌth mbiꞌ diꞌs no co mbiꞌ yalbàn cón cheꞌnl no par li mbiꞌ leꞌ mèn tlo gòn diꞌs cón cheꞌnl, ne, par li nab mèn mèn loo cón cheꞌn Diox ndooreꞌ coꞌseꞌ yiꞌth luꞌl loo mèn.
\pi1
\v 3 Mbyèn thìb diꞌs cheꞌn thìb mbiꞌ coꞌ mblo yalbàn cabii coꞌteꞌ nagán. Mbez mbiꞌ: Ftub xnìi yéc guꞌ no ftub xnìi lezoꞌ guꞌ loo cón cheꞌn Tad Diox. Fxalꞌ guꞌ xtùuz guꞌ no fxalꞌ guꞌ lezoꞌ guꞌ par ñee guꞌ no taꞌ guꞌ cuent cón cheꞌn Tad Diox. Tataa mod gàc nab guꞌ ndooreꞌ yiꞌth Tad Diox guꞌ loo guꞌ.
\m
\v 4 Cona, ngro xoꞌf Juàn Bautist no ngroꞌ too Juàn loo mèn coꞌteꞌ nagán par li Juàn bautizar mèn. Mbez Juàn loo mèn coꞌ ndxiꞌth loo Juàn naquinqueꞌ gàc bautizar mèn par tataa mod luꞌ mèn leꞌ mèn, lìcque, ngulàa yéc no ngulàa lezoꞌ no mzyeꞌ ryethe mod yeꞌrsinꞌ coꞌ ngòp mèn par càba loo mèn tonꞌ Diox xquin mèn no xtol mèn coꞌ ndxàp mèn no coꞌ ncuaꞌn mèn.
\v 5 Látha, mbiꞌth mèn gulàaz cheꞌn làaz mèn jude no mèn ciudapeꞌ Jerusalén par gòn mèn diꞌs coꞌ mbez Juàn. Coꞌseꞌ ndxelo nxoꞌf dol mèn xtol mèn loo Juàn no ngo ro mèn cón cheꞌn xtol mèn loo Juàn, ndli Juàn bautizar mèn leꞌn nít leꞌn yóꞌbeꞌ Jordán.
\p
\v 6 Xab Juàn coꞌ mdoc Juàn ngòc larꞌ coꞌ mbuàb mèn con yis lad máꞌ coꞌ lèe camell. Cinch coꞌ ngòo leꞌn Juàn ngòc cinch cheꞌn yid máꞌ, ne. Luaꞌ Juàn no xít Juàn ngòc mbiistoo no mzin huan.
\v 7 Coꞌseꞌ ngo Juàn yalbàn loo mèn cón cheꞌn diꞌs ndac, taandxèꞌ mod mbez Juàn:
\p ―Nareꞌ yiꞌth thìb mbiꞌ coꞌ más ndxàp conꞌ roo conꞌ xèn laꞌs nii mbiꞌ no laꞌs yaꞌ mbiꞌ leque daa. Por conꞌ roo conꞌ xèn coꞌ ndxàp mbiꞌ laꞌs nii mbiꞌ no laꞌs yaꞌ mbiꞌ, pà tan con mbiꞌ con coꞌ ndxác mbiꞌ. Axta neꞌ neꞌ lin ryes còoꞌen loo mbiꞌ par xaquen bòo coꞌ natedóꞌ yilid coꞌ ngue nii mbi.
\p
\v 8 Mbez Juàn, ne:
\p ―Daa ndli bautizar guꞌ leꞌn nít. Per mbiꞌa li par yòo guꞌ loo cón cheꞌn Diox por cón cheꞌn Xpii Natúꞌ xalqueꞌ ndxàc bautizar mèn leꞌn nít.
\s Juàn Bautist mbli bautizar Jesús.
\r (Mt. 3.13–17; Lc. 3.21–22)
\p
\v 9 Leque leꞌn huiza, Jesús ngroꞌ leꞌn yèez Nazaret coꞌ nac thìb yèez cheꞌn làaz mèn galile. Mbiꞌth Jesús coꞌteꞌ ngo Juàn par li Juàn bautizar Jesús leꞌn yóꞌbeꞌ Jordán.
\v 10 Texal ngolo ngroꞌ Jesús leꞌn nít, ngolo ngòc bautizar Jesús, gunèe Jesús mxyalꞌ loo béꞌ no gunèe Jesús nde làa Xpii Natúꞌ loo béꞌ loo Jesús. Gunaa Xpii Natúꞌa xal ñaa thìb palomxtilꞌ hora.
\v 11 No leque hora mbyèn thìb diꞌs loo béꞌ coꞌ ndxab loo Jesús:
\p ―Lùu nac xganꞌpeꞌ daa coꞌ anzeꞌf ngudloon no lezon. No por cón cheꞌnl, anzeꞌf ndyac lezon.
\s Mebizya mbli preb Jesús.
\r (Mt. 4.1–11; Lc. 4.1–13)
\p
\v 12 Ngolo ngòc conꞌa, Xpii Natúꞌ mbli par mxen Jesús ned. Nda Jesús coꞌteꞌ nagán.
\v 13 Ngo ban Jesús coꞌteꞌ nagána choꞌ huiz làth máꞌ huan. Làth xtauꞌa, mbiꞌth Mebizya loo Jesús par li Mebizya preb loo Jesús no par cobyaꞌ Mebizya Jesús par ñee Mebizya ñeeneꞌ chéꞌ tli Jesús cón ndlyaꞌs Mebizya. Per Jesús neꞌnglide cas Mebizya. Ngoloa, mzin angl cheꞌn Diox loo Jesús par mbli angl mandad loo Jesús.
\s Jesús mtlo mxoꞌf zinꞌ cón cheꞌn diꞌs ndac leꞌn huax yèez no ranch par ned leꞌn làaz mèn galile.
\r (Mt. 4.12–17; Lc. 4.14–15)
\p
\v 14 Per pente ndxàc plá huiz nguriꞌth conꞌa, mxen mèn Juàn Bautist. No mqueꞌ mèn Juàn Bautist leziꞌf. Leꞌ Jesús na, ngua leꞌn huax yèezyaꞌ cheꞌn làaz mèn galile par ngua lo Jesús yalbàn. No ngua teꞌth Jesús cón cheꞌn diꞌs ndac coꞌ ndluꞌ loo mèn xá mod ndlyaꞌs Diox yòo mèn loo cón cheꞌn Diox par ñibeꞌpeꞌ Diox loo mèn.
\v 15 Mbez Jesús loo mèn par neda:
\p ―Nase mzinleꞌ tiemp coꞌseꞌ ndlyaꞌs Diox yòo guꞌ loo cón cheꞌn Diox par ñibeꞌpeꞌ Diox loo gu. Blàa yéc guꞌ no blàa lezoꞌ guꞌ no fseꞌ guꞌ mod coꞌ ndxàp guꞌ loo Diox. No golaꞌs guꞌ diꞌs coꞌ mbezen loo guꞌ coꞌ ndluꞌ xá mod lyáꞌ mèn loo ryethe coꞌ nac conꞌ ryes.
\s Jesús ndxab loo thap myenꞌ coꞌ ndyen mbèel: Yaꞌ guꞌ nda naꞌ. Ftoo nque guꞌ xísen.
\r (Mt. 4.18–22; Lc. 5.1–11)
\p
\v 16 Láth coꞌseꞌ nda riid Jesús ro lagun coꞌ nziriꞌ loo xyòn cheꞌn làaz mèn galile, gunèe Jesús chop hues myenꞌ coꞌ lèe Mon no Ndech. Ryop hues Ndech Mon ngòc mèn coꞌ ndyen mbèel. Nzi go ryop hues Ndech Mon yex leꞌn nít par yigaa mbèel leꞌn yex.
\v 17 Ndxab Jesús loo ryop hues Ndech Mon:
\p ―Yaꞌ guꞌ nda naꞌ, ey. Ftoo nque guꞌ xísen. Na li leꞌ guꞌ gàc mèn coꞌ luꞌ loo mèn cón cheꞌn Diox par yòo mèn loo cón cheꞌn Diox xal ndxòo mbèel leꞌn yex coꞌseꞌ ndyee ten guꞌ mbèel.
\p
\v 18 Leque hora, mbláꞌ Mon ryop Ndech yex. Nda nque Mon ryop Ndech xís Jesús.
\p
\v 19 Ngoloa, tolo mdoo Jesús ned, nda Jesús. Per ndxepte más gundee Jesús delant, gunèe Jesús thìb mbiꞌ coꞌ lèe Cob coꞌ ngòc xganꞌ thìb mbiꞌ coꞌ ngroꞌ lèe Zebede. Gunèe Jesús Juàn hues Cob, ne. Nzi yon xganꞌ Zebede leꞌn yòoyaa. Nzi go bdèꞌ Zebede yex con Cob no con Juàn.
\v 20 Ngurez Jesús Cob no Juàn. Ndxab Jesús loo myen:
\p ―Yaꞌ guꞌ nda naꞌ. Ftoo nque guꞌ xísen.
\p Sya, nda no myenꞌ Jesús. Taate mtanꞌ myenꞌ xud myenꞌ, Zebede, leꞌn yòoyaa con moz.
\s Trèꞌ ndluꞌ cón cheꞌn thìb mbiꞌ coꞌ mque no thìb xpii yeꞌrsinꞌ.
\r (Lc. 4.31–37)
\p
\v 21 Tolo mdoo Jesús ned con dyap myenꞌ axta mzin Jesús thìb yèez coꞌ lèe Capernaum. Coꞌseꞌ ngòc huiz sabd coꞌ ngòc huiz descans tiempa na, ngòo Jesús leꞌn sinagog mèna par luꞌ Jesús mèn cón cheꞌn diꞌs ndac cheꞌn Diox.
\v 22 Leꞌ sya, ryete mèn coꞌ ndxòn diꞌs coꞌ nac diꞌs ndac cheꞌn Diox coꞌ ngo Jesús yalbàn, ante ngüiꞌ mèna no ante ñaa mèna loo Jesús. Tac Jesús ngue luꞌ loo mèna xal thìb mèn coꞌ ndxàp conꞌ roo no conꞌ xèn laꞌs nii mèn no laꞌs yaꞌ mèn par ñibeꞌpeꞌ Jesús loo mèn. Mèna mdenꞌ no mdaꞌ mèna cuent ingue luꞌde Jesús loo mèn xal nac mod coꞌ ndluꞌ thìb maistr coꞌ ndluꞌ cón cheꞌn ley coꞌ mxoꞌf Moisés loo mèn.
\v 23 Hora ngo thìb mbiꞌ coꞌ nac mèn gulàaz cheꞌn yèeza làth mèn leꞌn sinagog. Mbiꞌa mque no thìb xpii yeꞌrsinꞌ. Xpii yeꞌrsinꞌa mbli ale ngrozèe mbiꞌ. No mbli xpii yeꞌrsinꞌ ndxab mbiꞌ loo Jesús:
\p
\v 24 ―¿Chonon ndxòo Uꞌ làth nuꞌ, àꞌ, Jesús, Uꞌ coꞌ nac mèn yèez Nazaret? ¿Chéꞌ nde Uꞌ trèꞌ par telux Uꞌ nuꞌ, cà? Na ndlibequeꞌ Uꞌ leꞌ Uꞌ nac mbiꞌ natúꞌ cheꞌn Diox. Uꞌ ngroꞌ loo Diox. No mtelꞌ Diox Uꞌ nde Uꞌ loo izlyoꞌ.
\p
\v 25 Sya, mbyoo Jesús xpii yeꞌrsinꞌ coꞌ mque no mbiꞌ. Ndxab Jesús loo xpii yeꞌrsinꞌa:
\p ―¡Quex! Ftauꞌ rol. No groꞌ loo mbiꞌ ndxèꞌ.
\p
\v 26 Per xpii yeꞌrsinꞌa mbli mquée mbii mbiꞌ. No mblobii mbii mbiꞌ loo yòo. No mbli mbii cabii ngrozèe mbiꞌ. Ngoloa, chàa, ngro xpii yeꞌrsinꞌa loo mbiꞌ.
\v 27 Leꞌ sya, ryete mèn coꞌ ñèe ndxàc conꞌa loo mbiꞌ, anzeꞌf mzyeb mèn no mnibdiꞌs mèn loo xtàa mèn. Ndxab mèn:
\p ―¿Chó conꞌ coꞌ ndxàc baꞌ, yoo? ¿Chó diꞌs cub no cón nac coꞌ ndluꞌ mbiꞌ baꞌ? Mbiꞌ baꞌ ndxàp conꞌ roo no conꞌ xèn laꞌs nii mbiꞌ no laꞌs yaꞌ mbiꞌ, cona, axta xpii yeꞌrsinꞌ ndxòn ro mbiꞌ no ndenꞌ xpii yeꞌrsinꞌ diꞌs coꞌ mbez mbiꞌ loo xpii yeꞌrsinꞌ.
\p
\v 28 No ale huizte huizte mbìn rye mèn gulàaz cheꞌn làaz mèn galile cón cheꞌn ryethe conꞌ coꞌ ndli Jesús no coꞌ ndluꞌ Jesús loo mèn.
\s Jesús mteyac xnaꞌzap Mon Pedr.
\r (Mt. 8.14–15; Lc. 4.38–39)
\p
\v 29 Coꞌseꞌ ngolo ngroꞌ Jesús con myenꞌ no mèn leꞌn sinagog, Jesús nda no Cob no Juàn. Ngua Jesús liz Mon no liz Ndech.
\v 30 Leꞌpeꞌ huiza nax xnaꞌzap Mon loo xléꞌ. Ndxab mèn guliz Mon loo Jesús leꞌ xnaꞌzap Mon ndyac len.
\v 31 Sya, ngòo Jesús coꞌteꞌ nax xnaꞌzap Mon. Mxít che Jesús xnaꞌzap Mon. Mteyac Jesús xnaꞌzap Mon. Leque hora, ngro xléꞌ xnaꞌzap Mon. Sya, mtlo xnaꞌzap Mon, mbli znaꞌzap Mon cas mèna con Jesús.
\s Jesús mteyac huax mèn yíiz.
\r (Mt. 8.16–17; Lc. 4.40–41)
\p
\v 32 Coꞌseꞌ mzyèleꞌ izlyoꞌ huiza no ngulàaleꞌ yálꞌ izlyoꞌ huiza, mzin no mèn huax mèn yíiz no huax mèn co mque no chol xpii yeꞌrsinꞌ loo Jesús.
\v 33 Leque hora, ryete mèn yèez Capernaum mqueltàa ro ryoꞌ liz Pedr loo Jesús.
\v 34 Sya, mteyac Jesús huax mèn coꞌ mque no chol yíiz. No mbloꞌ Jesús xpii yeꞌrsinꞌ loo huax mèn coꞌ mque no xpii yeꞌrsinꞌ. Ndxeꞌslequeꞌ ndxàc mèna. No indaꞌde Jesús lugar loo xpii yeꞌrsinꞌa par angli xpii tyoodiꞌs mèn coꞌ nquée mbii yéca cón cheꞌn Jesús tac xpii yeꞌrsinꞌa huen huen nanee chó mbiꞌ nac Jesús.
\s Jesús ngo yalbàn leꞌn yèezyaꞌ cheꞌn làaz mèn galile.
\r (Lc. 4.42–44)
\p
\v 35 Coꞌseꞌ ndooreꞌ yinìi izlyoꞌ tedib huiz coꞌ nde nquea, cuar ngo che Jesús. Ngroꞌ Jesús thìb lad ro yèez Capernaum par cuez Jesús Diox tya.
\v 36 Látha, neꞌndaꞌde Mon cuent con myenꞌ coꞌ ndxàc xtàa Mon máa Jesús. Mon ngua cuaꞌn Jesús con myenꞌ coꞌ ndxàc xtàa Mon pá ned nda Jesús.
\v 37 Coꞌseꞌ mzyal Mon con myenꞌ coꞌ naqueltàa Mon Jesús, Mon no myenꞌa ndxab loo Jesús:
\p ―Ryete mèn ngue tee cuaꞌn Uꞌ, Tad.
\p
\v 38 Per Jesús ndxab loo Mon no loo myenꞌ coꞌ ngue tee no Mon:
\p ―Nda naꞌ leꞌn taamas yèez coꞌ nziriꞌ gax loo naꞌ baꞌ par tan cuent no gon yalbàn cón cheꞌn diꞌs ndac cheꞌn Diox loo mèn par ned baꞌ, ne. Tac por cona ngroꞌen loo Diox par ndalen loo izlyoꞌ ndxèꞌ.
\p
\v 39 Sya, mxen Jesús ned. Nda lo Jesús yalbàn loo mèn leꞌn sinagog mèn leꞌn rye yèez coꞌteꞌ ngue no mèn sinagog mèn. No mbloꞌ Jesús xpii yeꞌrsinꞌ loo rye mèn coꞌ mquée mbii cheꞌn xpii yeꞌrsinꞌ loo mèn gulàaz cheꞌn làaz mèn galile.
\s Jesús mteyac no mtembìi Jesús thìb mbiꞌ coꞌ mque no yíiz coꞌ nac yíiz ndxaꞌs coꞌ nteyaꞌs yid lad mèn no coꞌ nteyèe yid lad mèn.
\r (Mt. 8.1–4; Lc. 5.12–16)
\p
\v 40 Ned nque tee Jesús, ngo thìb mbiꞌ làth mèn. Mbiꞌa mque no thìb yíiz ndxaꞌs coꞌ nteyaꞌs no coꞌ nteyèe yid lad mèn. Mbii gax mbiꞌa loo Jesús. No mdub xib mbiꞌ loo Jesús. Ndxab mbiꞌ loo Jesús:
\p ―Tad, Uꞌ anzeꞌf ndxác nteyac chol yíiz coꞌ ndxàp mèn. ¡Oj li Uꞌ favor tembìi Uꞌ daa no teyac Uꞌ daa loo yíiz ndxaꞌs ndxèꞌ, huen!
\p
\v 41 Sya, mblyat lezoꞌ Jesús gunèe Jesús mbiꞌ. Ante mbuàal Jesús lad mbiꞌ. No ndxab Jesús loo mbiꞌ:
\p ―Ndlyazen leꞌ lùu yac, ey.
\p Sya, mteyac Jesús mbiꞌ.
\p
\v 42 No texal ngolo ndxab Jesús diꞌs, mbembìi yid lad mbiꞌ coꞌ mque no yíiz ndxaꞌsa. Ale, lueg mbyac mbiꞌ.
\v 43 Mnibeꞌ yèe Jesús loo mbiꞌ. Ndxab Jesús loo mbiꞌ:
\p
\v 44 ―Huiꞌ nexa. Yende chó loo gabtel coꞌ ngolo mbli nonl baꞌ, ndee. Ante ndlyazen yal loo nguleyꞌ par ñèe nguleyꞌ lùu. No sangya láꞌl ofrend coꞌ nac gòn loo Diox por cón cheꞌn conꞌ coꞌ mtembìin ladl, ofrend coꞌ nac gòn coꞌ mnibeꞌ Moisés taꞌ mèn par tataa mod ñèe mèn no yilaꞌs mèn leꞌ lùu mbyacleꞌ loo yíiz ndxaꞌs coꞌ mque nol ladl.
\p Ngolo gunii Jesús Diox loo mbiꞌ, mtelꞌ Jesús mbiꞌ, bii mbiꞌ par liz mbiꞌ.
\p
\v 45 Per coꞌseꞌ ndyàa mbiꞌ par liz mbiꞌ, ale leꞌleꞌ mtlo mbiꞌ, mdaꞌ mbiꞌ cuent loo rye mèn coꞌ mzyálꞌ mbiꞌ ned xá mod mbyac mbiꞌ. No conꞌa mbli ya yende mod ngòo Jesús alanlequeꞌ leꞌn nec thìb yèez cheꞌn làaz mèn galile. Más quee lezoꞌ Jesús mque tee Jesús thìb lad ro yèez coꞌteꞌ ihuaxte mèn nzo. Per mastaleꞌ thìb lad mque tee Jesús, rye mèn coꞌ naban par neda nda nquequeꞌ xís Jesús par huiꞌ mèn loo Jesús no par libeꞌ mèn Jesús no par ñèe mèna yalguzyeꞌ coꞌ ndli Jesús.
\c 2
\s Jesús mteyac thìb mbiꞌ coꞌ mque no thìb mbii cheꞌn yíiz bech.
\r (Mt. 9.1–8; Lc. 5.17–26)
\p
\v 1 Ngolo nguriꞌth plá huiz, mbere Jesús. Ngòo Jesús leꞌn yèez Capernaum tedib vez. Mbyath diꞌs leꞌ Jesús nzo liz thìb mbiꞌ.
\v 2 Sya, setilte mqueltàa huax mèn liz mbiꞌa loo Jesús axta neꞌ neꞌ gàal ro ryoꞌ yòo mèn, tant huax mèn mqueltàa. Leꞌ Jesús na, mtlo ngo yalbàn cón cheꞌn diꞌs ndac cheꞌn Diox loo mèn par yòo mèn loo cón cheꞌn Diox par ñibeꞌpeꞌ Diox loo mèn.
\v 3 Látha, mzin thap xaꞌbiꞌ coꞌ neꞌ thìb mbiꞌ loo thìb cami loo Jesús. Mbiꞌa mque no thìb mbii cheꞌn thìb yíiz coꞌ ntequech lad mèn.
\v 4 Coꞌseꞌ ñèe mèna yende mod yòo mèna ro ryoꞌ, tant huax mèn par yòo no mèna mbiꞌ loo Jesús, sya, añenti mtequée mèna mbiꞌ par yéc yòo no mblit mèna tej yéc yòo par làa mèna mbiꞌ nazalꞌ cami mbiꞌ loo Jesús par leꞌn nyòo.
\v 5 Coꞌseꞌ ñèe Jesús leꞌ mèna ndxelaꞌspeꞌ leꞌ Jesús ndxác teyac mèn, ndxab Jesús loo mbiꞌ yíiza:
\p ―Xganꞌ, xtol lùu no xquin lùu mdyonꞌleꞌ.
\p
\v 6 Per plá mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn coꞌ ndub làtha, mèna mbli xtùuz leꞌn lezoꞌ mèn:
\v 7 ¿Chonon tatuaꞌ ndyoodiꞌs mbiꞌ baꞌ? Mbiꞌ baꞌ ñii ngòc nguàal diꞌs cón cheꞌn Diox. Ngue taꞌ mbiꞌ xyàn lezoꞌ Diox tac yende chó mèn gác tonꞌ xtol mèn coꞌ ndxàp xtol. Ante Diox ndxác ntonꞌ xtol mèn.
\v 8 Per yub Jesús non no nanee Jesús cón ngue li mèna xtùuz. Ndxab Jesús loo mèna:
\p ―¿Chonon tatuaꞌ nzi li guꞌ xtùuz, àꞌ?
\v 9 ¿Xá nee guꞌ? ¿Chó diꞌs nac coꞌ más inagànte, ndyac guꞌ, par gaben loo mbiꞌ yíiz ndxèꞌ, àꞌ? ¿Chéꞌ más inagànte naca, ndyac guꞌ, gaben loo mbiꞌ: Xtol lùu mtonꞌlen o chéꞌ más inagànte gaben: Goo too. Byeꞌ camil baꞌ. Byàa par lizl, càꞌ?
\v 10 Pues daa ndxab diꞌs loo mbiꞌ yíiz baꞌ no nalleꞌ luꞌen loo guꞌ leꞌ daa coꞌ mbal yáal loo izlyoꞌ ndxèꞌ xalqueꞌ ndxáal chol mèn, daa ndxàp conꞌ roo no conꞌ xèn laꞌs niin no laꞌs yan par tonꞌen xtol chol mèn loo izlyoꞌ ndxèꞌ.
\p Sya, mbere Jesús. Ndxab Jesús loo mbiꞌ coꞌ mque no yíiz becha:
\p
\v 11 ―Na ñibeꞌ lool. Goo too. Fthùuz dáa coꞌ ngoꞌthl. Byeꞌ dáa. No tee càa ned, byàa par lizl.
\p
\v 12 Leque hora, ngo too mbiꞌ coꞌ mque no yíiz bech. Mxen mbiꞌ ned. Ngroꞌ mbiꞌ loo ryete mèn coꞌ nziriꞌ tya. Ndyàa mbiꞌ par liz mbiꞌ. Por cona, ryete mèna ante mbuiꞌ no ante gunaa. No ngurez mèna Diox. Ndxab mèna:
\p ―¡Ay, Dioꞌs! Dib lal nzi nuꞌ loo izlyoꞌ tarte huiꞌ nuꞌ conꞌ coꞌ tatuaꞌ ndxàc baꞌ.
\s Jesús ndxab loo thìb mbiꞌ coꞌ ngroꞌ lèe Leví: Ftoo nque xísen. Yaꞌ nda naꞌ.
\r (Mt. 9.9–13; Lc. 5.27–32)
\p
\v 13 Ngoloa, ngua Jesús ro lagun coꞌ nziriꞌ ro xyòn mèn cheꞌn làaz mèn galile tedib vez. Tya mqueltàa huax mèn loo Jesús. Leꞌ Jesús na, mbluꞌ cón cheꞌn diꞌs ndac cheꞌn Diox loo mèn.
\v 14 Láth nda riid Jesús par neda, gunèe Jesús ndub thìb mbiꞌ coꞌ lèe Leví coꞌ nac xganꞌ thìb mbiꞌ coꞌ lèe Alfe. Leví ndub coꞌteꞌ ndyee thix mèn tmi cón cheꞌn contribución. Jesús ndxab loo Leví:
\p ―Leví, goo too. Ftoo nque xísen. Yaꞌ nda naꞌ.
\p Sya, ngo too Leví. Mbláꞌ Leví zinꞌ Leví. Nda no Leví Jesús.
\p
\v 15 Nde nxonꞌ, ngòc thìb conꞌ loo Jesús. Láth ngue yuhua Jesús sa yèth liz Leví, anzeꞌf thìb mèn coꞌ ndli cobrar cón cheꞌn contribución mqueltàa, no huax mèn coꞌ ngòp xtol, loo Jesús. No thidte mdub mèna loo mès con Jesús no con myenꞌ xinꞌ mtéꞌth Jesús. Leꞌpeꞌ leꞌn huiza, anzeꞌf huax mèn mqueltàa loo Jesús. Mdoo nque mèna xís Jesús.
\v 16 Coꞌseꞌ ñèe mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn no mèn cheꞌn xleyꞌ farise leꞌ Jesús thidte ndub yuhua no rye mèna loo mes, ndxab mèna loo myenꞌ xinꞌ mtéꞌth Jesús:
\p ―¿Xá mod ale thidte ngue yuhua maistr guꞌ no ale thidte ngue yu no maistr guꞌ mèn coꞌ ndli cobrar cón cheꞌn contribución no con mèn yeꞌrsinꞌ coꞌ anzeꞌf thìb xtol ndxàp baꞌ, àꞌ?
\p
\v 17 Coꞌseꞌ mbìn Jesús tataa ndxàb mèna loo myenꞌ xinꞌ mtéꞌth Jesús, yub Jesús ndxab loo mèna:
\p ―Mèn coꞌ ndyac huen nzo lezoꞌ mèn no ndyac mèn yende chó yíiz ndenꞌ mèn, mèna ndyac inquinte mèna doctor par teyac doctor mèna. Ndxeꞌlequeꞌ, mèn coꞌ ndenꞌ yíiz, mèna ndenꞌ naquinqueꞌ mèna doctor par teyac doctor mèna. Huiꞌ guꞌ nexa. Na neꞌngalte loo izlyoꞌ ndxèꞌ par bezen no cuin mèn coꞌ ndenꞌ nac mèn mèn huen. Ndxeꞌlequeꞌ, daa ndal loo izlyoꞌ ndxèꞌ par bezen no cuin mèn coꞌ ndenꞌ nac mèna mèn yeꞌrsinꞌ no mèn coꞌ ndenꞌ nac mèna mèn coꞌ ndxàp xtol loo Diox.
\s Ndxep mèn mnibdiꞌs loo Jesús chonon imbe xlatte Jesús con myenꞌ xinꞌ mtéꞌth Jesús.
\r (Mt. 9.14–17; Lc. 5.33–39)
\p
\v 18 Thìb vez ngòc thìb conꞌ. Coꞌseꞌ ngure xlat myenꞌ xinꞌ mtéꞌth Juàn Bautist no myenꞌ xinꞌ mtéꞌth mèn xleyꞌ farise, mbiꞌth plá mèn loo Jesús. Mnibdiꞌs mèna loo Jesús:
\p ―¿Chonon mbe xlat myenꞌ xinꞌ mtéꞌth Juàn Bautist no myenꞌ xinꞌ mtéꞌth mèn xleyꞌ farise per myenꞌ xinꞌ mtéꞌth lùu imbe xlatte, àꞌ?
\p
\v 19 Jesús mcàb loo mèna. Ndxab Jesús:
\p ―¿Chéꞌ ngue li guꞌ xtùuz nzo mod cue xlat mèn coꞌ ngòc convid par ya thuhua mèn coꞌteꞌ mselyaꞌ thìb ned myenꞌ coꞌ mselyaꞌ láth nzi mèna liz myenꞌ con myenꞌ coꞌ mselyaꞌa, càꞌ? Yende xàa. Cheleꞌ myenꞌ coꞌ mselyaꞌa nziriꞌ con mèn coꞌ ngòc convida, yende mod cue xlat mèna, ey.
\v 20 Per coꞌseꞌ zin hor bii myenꞌ coꞌ mselyaꞌa, sya, cue xlat mèn coꞌ ngòc convida.
\p
\v 21 Nde niin thìb conꞌ loo guꞌ: Yende chó mèngot nzo coꞌ co bdèꞌ thìb leꞌ larꞌ cub loo thìb larꞌcanꞌ gox. Tac cheleꞌ larꞌcanꞌ goxa yo bdèꞌ larꞌ cub, leꞌ sya, coꞌseꞌ yech larꞌcanꞌ goxa, larꞌ cub coꞌ nzo bdèꞌ larꞌcanꞌ goxa ched yèe larꞌcanꞌa. Leꞌ sya, larꞌcanꞌa más naroo ryed.
\v 22 No neꞌ neꞌ co mèn mezcal coꞌ diz ngroꞌ palenc leꞌn thìb garrafón gox coꞌ naléꞌleꞌ. Tac thìb descuid mezcal li par tolo lyéꞌ garrafón gox coꞌ naléꞌ. Leꞌ sya, tataa mod gàc perdid mezcal no gàc perdid garrafón, ne. Cona, ngue niin loo guꞌ: Más huen gàca co mèn mezcal coꞌ diz ngroꞌ palenc leꞌn garrafón cub par neꞌgàcte perdid mezcal no par neꞌlyéꞌde garrafón, ne.
\s Myenꞌ xinꞌ mtéꞌth Jesús mchoꞌ bacdò cheꞌn triu thìb huiz sabd.
\r (Mt. 12.1–8; Lc. 6.1–5)
\p
\v 23 Thìb huiz sabd coꞌ ngòc huiz descans tiempa, Jesús nda riid coꞌteꞌ nax thìb leꞌ yòo coꞌteꞌ nzoꞌf ñaꞌ triu con myenꞌ xinꞌ mtéꞌth Jesús. Leꞌ myenꞌ xinꞌ mtéꞌth Jesús na, mtlo mchoꞌ bacdò triu. No ngobyaꞌ myenꞌ bacdò triu. No mblaꞌ myenꞌ mbii loo nzob triu par ryo yix loo nzob triu par hua myenꞌ nzob triu.
\v 24 Leꞌ sya, mèn xleyꞌ farise coꞌ nzo làth mèn coꞌ nda nque xís Jesús ndxab loo Jesús:
\p ―Jesús, huiꞌ nexa. ¿Chonon ndli myenꞌ xinꞌ mtéꞌth lùu zinꞌ coꞌ indxàalte li mèn huiz descans, àꞌ?
\p
\v 25 Sya, mcàb Jesús. Ndxab Jesús loo mèn xleyꞌ farisea:
\p ―Aa, ¿chéꞌ nec thìb vez tarte lab guꞌ loo libr coꞌ nac xtiꞌs Diox, coꞌteꞌ ndaꞌ cuent cón cheꞌn David coꞌ ngòc rey póla, conꞌ coꞌ mbli David thìb vez coꞌseꞌ mblyanꞌ David con mèn coꞌ mblyath no David ned mque tee David, càꞌ? David mblyanꞌ no mquinqueꞌ hua David con mèna.
\v 26 David ngòo leꞌn templ leꞌn tiemp coꞌseꞌ ngòc Abiatar jef cheꞌn nguleyꞌ coꞌ más mnibeꞌ loo rye nguleyꞌ. Ale mxen David pan coꞌ ngòc pan coꞌ mbec mèn loo mes leꞌn templ, coꞌ nee diꞌs, mbec mèn pan loo Diox. Pana ante nguleyꞌ ndxàp permis par hua nguleyꞌ pana tiempa. Mdaꞌ David pana nduhua mèn coꞌ ngure no David, ne.
\p
\v 27 Ndxab Jesús loo mèna, ne:
\p ―Diox mtanꞌ thìb huiz coꞌ nac huiz sabd par neꞌlide mèn zinꞌ coꞌ mbyanꞌ tub coꞌ neꞌngácte ntelo mèn leꞌn sman, no par gàc conꞌ ndac loo Diox, no par li mèn descans. Per neꞌntanꞌte Diox huiz sabd par ñibeꞌ yèe mèn loo xtàa mèn loo coꞌ nac costumbr coꞌ nzi no mèn no coꞌ mbed no mèn.
\v 28 Por cona, daa coꞌ mbal yáal loo izlyoꞌ xalqueꞌ ndxáal chol mèn loo izlyoꞌ, daa ndxàp conꞌ laꞌs niin no laꞌs yan par ñibeꞌen loo mèn cón ndxàal li mèn huiz sabd coꞌ nac huiz descans.
\c 3
\s Jesús mteyac thìb mbiꞌ coꞌ mque no sa yaꞌ biiz.
\r (Mt. 12.9–14; Lc. 6.6–11)
\p
\v 1 Mbere Jesús, ngòo Jesús leꞌn thìb sinagog coꞌ ndub leꞌn thìb yèez par neda. Làth mèn coꞌ ngo leꞌn sinagoga, ngo thìb mbiꞌ coꞌ nayíiz sa yaꞌ. Yaꞌ mbiꞌa yende mod huin. No yende mod gaꞌ.
\v 2 Látha, xèe nzi laꞌs mèn loo Jesús par ñèe mèna ñeeneꞌ chéꞌ teyac Jesús yaꞌ mbiꞌa huiz sabd coꞌ nac huiz descans par tataa mod cuaꞌn mèna mod xá mod quexùꞌ queꞌ fals mèna Jesús.
\v 3 Sya, Jesús ndxab loo mbiꞌ coꞌ nayíiz yaꞌa:
\p ―Goo too coꞌteꞌ ndubl baꞌ.
\p
\v 4 Sya, ndxab Jesús loo mèn coꞌ xèe nzi laꞌs loo Jesús:
\p ―¿Xá nee guꞌ? ¿Chéꞌ ndaꞌ ley coꞌ mxoꞌf Moisés loo mèn lugar li mèn conꞌ ndac o li mèn conꞌ yeꞌrsinꞌ leꞌn huiz coꞌ nac huiz descans coꞌ nac huiz sabd no chéꞌ ndaꞌ ley lugar loo mèn teláꞌ mèn thìb mèn loo conꞌ ryes o chéꞌ ndaꞌ ley lugar guth mèn thìb mèn leꞌn huiz descans coꞌ nac huiz sabd, càꞌ? Fcàb guꞌ loon, ey.
\p Per ndxeꞌlequeꞌ, mèna neꞌngácte ncàb loo Jesús. Ale mbyauꞌ ro rye mèna.
\v 5 Sya, ngocloo Jesús mbuiꞌ Jesús loo mèna. No mxi lezoꞌ Jesús con mèna tac neꞌnglàa huente diꞌs coꞌ ndxab Jesús leꞌn lezoꞌ mèna. No neꞌngaaꞌdte mèna diꞌs coꞌ mbez Jesús loo mèna. Sya, ndxab Jesús loo mbiꞌ yíiza:
\p ―Ftegaꞌ yaꞌl, ey.
\p Sya, mtegaꞌ mbiꞌ yaꞌ mbiꞌ. Ngoloa, ale chàa, mbyac yaꞌ mbiꞌ.
\v 6 Ngoloa, ngroꞌ mèn coꞌ nac mèn xleyꞌ farise. Mtlo mèna, mdoodiꞌs mèna con mèn coꞌ nac partid cheꞌn mèn herodist par cuaꞌn ryop ned mèna mod xá mod guth mèna Jesús.
\s Trèꞌ ndluꞌ cón cheꞌn xá mod anzeꞌf huax mèn mqueltàa loo Jesús ro lagun.
\p
\v 7 Jesús nda coꞌteꞌ nziriꞌ lagun gaxte coꞌteꞌ nziriꞌ yèez coꞌ lèe Capernaum con myenꞌ xinꞌ mtéꞌth Jesús. No anzeꞌf thìb mèn gulàaz cheꞌn làaz mèn galile nda nque xís Jesús.
\v 8 Coꞌseꞌ mbìn mèn leꞌ Jesús ndli yalguzyeꞌ roo no yalguzyeꞌ xèn loo chol mèn, anzeꞌf thìb mèn gulàaz cheꞌn làaz mèn jude, no mèn ciudapeꞌ Jerusalén, no mèn gulàaz cheꞌn làaz mèn idume, no mèn yèezyaꞌ coꞌ nziriꞌ par ned ndlyen huiz par ned ndriꞌth yóꞌbeꞌ Jordán, no mèn gulàaz cheꞌn làaz mèn ciuda Tir, no mèn gulàaz cheꞌn làaz mèn ciuda Sidón, mbiꞌth rye mèna loo Jesús par huiꞌ mèna no ñèe mèna cón ndli Jesús.
\v 9 Por cona, coꞌseꞌ mqueltàa huax mèn loo Jesús, ndxab Jesús loo myenꞌ xinꞌ mtéꞌth Jesús ya cuaꞌn myenꞌ thìb yòoyaa par yòo thidte Jesús leꞌn yòoyaa par neꞌtíꞌde mèn arid Jesús.
\v 10 Tac Jesús mteyacleꞌ huax mèn yíiz. Cona, ryete mèn coꞌ ndyac yíiz ndxeziꞌf no ndxegaꞌs Jesús no nzi mchep mèn xtàa mèn par ante gàal mèna Jesús, sya, yac mèna.
\v 11 Coꞌseꞌ ñèe mèn coꞌ mque no xpii yeꞌrsinꞌa Jesús, xpii yeꞌrsinꞌ coꞌ nzo loo mèna mbli par mdub xib mèna loo Jesús. No cabii mbez yèe mèna loo Jesús. Mbez mèna:
\p ―Uꞌ nacpeꞌ xganꞌ Diox.
\p
\v 12 Per Jesús mnibeꞌ yèe loo xpii yeꞌrsinꞌ coꞌ ngo loo mèna. Ndxab Jesús loo xpii yeꞌrsinꞌa:
\p ―Ñibeꞌen loo guꞌ yende chó loo gabte guꞌ chó nac daa.
\s Jesús ngue goꞌ xàꞌ siꞌ fchop myenꞌ làth mèna par hueꞌ myenꞌ diꞌs cón cheꞌn Jesús.
\r (Mt. 10.1–4; Lc. 6.12–16)
\p
\v 13 Ngoloa, ngua quée Jesús loo thìb yii coꞌ ndub gaxte tya. Ngurez Jesús mèn coꞌ mblyaꞌs Jesús mcui Jesús. Sya, ngua gax mèna coꞌteꞌ ndub Jesús.
\v 14 Ngoloa, mblec Jesús siꞌ fchop myenꞌ no mbloꞌ xàꞌ Jesús siꞌ fchop myenꞌ par mque tee no myenꞌa Jesús no par telꞌ Jesús myenꞌa par teꞌth myenꞌa no par co myenꞌa yalbàn cón cheꞌn diꞌs ndac cheꞌn Diox loo mèn.
\v 15 Jesús mbli par mque no myenꞌ conꞌ laꞌs nii myenꞌ no conꞌ laꞌs yaꞌ myenꞌ par ante ñii myenꞌ loo xpii yeꞌrsinꞌ, ryo xpii yeꞌrsinꞌ loo mèn.
\v 16 Ryete siꞌ fchop myenꞌ coꞌ ngòc nerlequeꞌ myenꞌ coꞌ mcui Jesús, myenꞌa lèe taandxèꞌ: Ner mbiꞌ coꞌ Jesús mcui lèe Mon. Loo Mon mdaꞌ Jesús tedib lèe coꞌ lèe Pedr.
\v 17 No ngurez Jesús Cob no Juàn coꞌ ndxàc ryop hues xganꞌ thìb mbiꞌ coꞌ lèe Zebede. Jesús mdub lèe ryop hues myenꞌ na, Boanerg, coꞌ nee diꞌs, anzeꞌf nayez yéc myenꞌ coꞌseꞌ ndyoodiꞌs myenꞌ.
\v 18 Xísa ngurez Jesús Ndech, Lip, Bartol, Mate, Max, Cob coꞌ ngòc xganꞌ tedib mbiꞌ coꞌ lèe Alfe. No ngurez Jesús Tade, no tedib mbiꞌ coꞌ lèe Mon coꞌ ngòo loo thìb ned mèn coꞌ ngroꞌ lèe partid cananist.
\v 19 No lult ngurez Jesús Jud Iscariot. Jud ngòc leque thìb myenꞌ xinꞌ mtéꞌth Jesús coꞌ mdaꞌxùꞌ Jesús loo mèn yeꞌrsinꞌ yiloa.
\s Mèn ngue quexùꞌ ngue queꞌ fals Jesús leꞌ Jesús ndxàp conꞌ laꞌs nii Jesús no laꞌs yaꞌ Jesús por cón cheꞌn Beelzebú.
\r (Mt. 12.22–32; Lc. 11.14–23; 12.10)
\p Ngoloa, ngòo Jesús liz thìb mbiꞌ con myenꞌ xinꞌ mtéꞌth Jesús.
\v 20 Leꞌ mèn coꞌ mbìn cón cheꞌn Jesús na, mqueltàa mèna loo Jesús axta neꞌ neꞌ ngác nghua no Jesús myenꞌ xinꞌ mtéꞌth Jesús tant thìb mèn mqueltàa.
\v 21 Coꞌseꞌ mbìn mèn guliz Jesús cón ngue li Jesús no conꞌ coꞌ ndxàc loo Jesús, mbiꞌth mèna loo Jesús par hueꞌ yèe mèna Jesús tac mbez mèna no ndyoodiꞌs mèna leꞌ Jesús nquée mbii yéc.
\p
\v 22 Lomisqueꞌ ne, mèn coꞌ ngòc maistr coꞌ ndluꞌ cón cheꞌn ley coꞌ mxoꞌf Moisés loo mèn, coꞌ nde par ned ciuda Jerusalén no coꞌ nac mèn coꞌ nzo làth mèn coꞌ nde nque xís Jesús, mbez mèna loo mèn coꞌ mqueltàa loo Jesús:
\p ―Beelzebú coꞌ nac jef cheꞌn rye xpii yeꞌrsinꞌ ngue tee no mbiꞌ ndxèꞌ. No por cón cheꞌn conꞌ roo no conꞌ xèn coꞌ ndxàp Beelzebú laꞌs nii Beelzebú no laꞌs yaꞌ Beelzebú ngoꞌ mbiꞌ xpii yeꞌrsinꞌ loo mèn.
\p
\v 23 Sya, ngurez Jesús mèn coꞌ ndluꞌ cón cheꞌn ley coꞌ mxoꞌf Moisés loo mèn. Mtetac Jesús thìb diꞌs loo mèna. Ndxab Jesús:
\p ―¿Xá mod leque Mebizya coꞌpeꞌ Mebizya loo mèn, àꞌ? ¡Máa yob yéc guꞌ, na!
\v 24 Anggab naꞌi, cheleꞌ mèn coꞌ ñibeꞌ loo thìb gobiern, gàc mèna chop partid no cue yoo ryop partid mèna, leꞌ sya, gobierna yende mod tolo xec no yende mod tolo yo gobiern, ¿léꞌ?
\v 25 Lomisqueꞌ ne, cheleꞌ thìb ned mèn guliz coꞌ nzo ban thìb yòo, tlo gàc mèn guliza chop ned mèn por nzi yoo mèn guliza, yende mod tolo xec mèn guliza par yo ban mèn guliza thidte yòo par tolo gàc mèna thìb nedte mèn, ¿léꞌ?
\v 26 Lomisqueꞌ ne, cheleꞌ Mebizya bix yath loo cón cheꞌn Mebizya, yende mod tolo cue no yo Mebizya. Ale ndxeꞌlequeꞌ, lyux Mebizya thidtene.
\p
\v 27 Lomisqueꞌ ne, yende chó mèn gác yòo liz thìb mbiꞌ coꞌ nac mbiꞌ tínꞌ par li huanꞌ mèn cón cheꞌn mbiꞌ liz mbiꞌ cheleꞌ mèn neꞌquedóꞌde mbiꞌ tínꞌa ner. Per cheleꞌ mèn ner quedóꞌ nii mbiꞌ no yaꞌ mbiꞌ, leꞌ sya, tataa mod liqueꞌ mèn gan li huanꞌ mèn cheꞌn mbiꞌ liz mbiꞌ.
\p
\v 28 Na ngue nii tedib conꞌ coꞌ nac conꞌ lìcpeꞌ loo guꞌ, ne: Nzoqueꞌ mod tyonꞌ rye xquin mèn no xtol mèn no ryethe diꞌs coꞌ nac diꞌs yeꞌrsinꞌ coꞌ ndyoodiꞌs mèn loo xtàa mèn.
\v 29 Per mèn coꞌ ñii ngòc nguàal conꞌ cón cheꞌn Xpii Natúꞌ, yende mod tyonꞌ xtol mèna thidtene. Ndxeꞌlequeꞌ, ndxàp mèna dol thidtene par tetìi Diox mèna yiloa.
\p
\v 30 Tataa mtetac Jesús rye diꞌsa loo mèn tac mèna mbez nzo thìb xpii yeꞌrsinꞌ loo Jesús.
\s Xnaꞌ Jesús no myenꞌ huespeꞌ Jesús ngua cuaꞌn Jesús.
\r (Mt. 12.46–50; Lc. 8.19–21)
\p
\v 31 Ngoloa, mzin xnaꞌ Jesús no myenꞌ huespeꞌ Jesús loo Jesús coꞌteꞌ nzo Jesús. Per neꞌngòode xaꞌ par leꞌn nyòo. Par fuer no maste ngure xaꞌ. Ndxab xaꞌ loo mèn coꞌ nziriꞌ tya:
\p ―Guuz guꞌ loo Jesús yiꞌth Jesús ndxèꞌ.
\p
\v 32 Mèna mteriꞌth diꞌs par leꞌn nyòo. Leꞌ sya, plá mèn coꞌ nzi dib vuelt loo Jesús ndxab loo Jesús:
\p ―Tad, xnaꞌ Uꞌ no myenꞌ huespeꞌ Uꞌ nziriꞌ fuer. Ngue bez xaꞌ Uꞌ par tyoodiꞌs no xaꞌ Uꞌ.
\p
\v 33 Per Jesús ndxab loo mèna:
\p ―¿Chéꞌ ndlyaꞌs guꞌ niin loo guꞌ chó mèn, lìcqueꞌ, nac xal xnan no myenꞌ huesen?
\p
\v 34 Ngoloa, mbuiꞌ Jesús loo mèn coꞌ nziriꞌ dib vuelt loo Jesús. Ndxab Jesús loo mèna:
\p ―Niin loo guꞌ chó mèn nac xal xnan no xal myenꞌ huespeꞌen. Ryete guꞌ coꞌ nziriꞌ loon ndxèꞌ lalqueꞌ nac xal xnan no nac guꞌ xal huesen.
\v 35 Tac chol mèn coꞌ ndli xal nee lezoꞌ Diox, mèna nac xal huesen. Mèna nac xal ftanen. No nac mèna xal xnan.
\c 4
\s Jesús ngue tetac loo mèn xá mod ngo thìb mbiꞌ bin.
\r (Mt. 13.1–9; Lc. 8.4–8)
\p
\v 1 Mbere Jesús. Mtlo Jesús, mbluꞌ Jesús mèn ro lagun coꞌ nziriꞌ tya. Anzeꞌf thìb mèn mqueltàa coꞌteꞌ ngo Jesús. No de tant huax mèn mqueltàa, más quee lezoꞌ Jesús ngua tub Jesús leꞌn thìb yòoyaa coꞌ ndub loo lagun gaxte ro lagun. Le mèna na, ngure loo yux ro lagun.
\v 2 Sya, mtetac Jesús diꞌs loo mèn par tataa mod luꞌ Jesús huax conꞌ loo mèn no taꞌ Jesús cuent cón cheꞌn diꞌs coꞌ ngue tetac Jesús loo mèn. Mbez Jesús loo mèn:
\p
\v 3 ―Bìn guꞌ diꞌs coꞌ tyoodizen loo guꞌ ndxèꞌ. Thìb mbiꞌ coꞌ ngo bin, mbiꞌ ngroꞌ. Nda lo mbiꞌ bin.
\v 4 Láth ngue go mbiꞌ bin, ngulàa ndxep biz bin ro ned. Ngoloa, mbiꞌth mbin. Mbloꞌ mbin biz bina. Nduhua mbin biz bina.
\v 5 Leꞌ tedib lugar na, láth ngue go mbiꞌ biz bin, ngulàa ndxep biz bin loo yòo quèe coꞌteꞌ xhuite yòo nziꞌf loo quèe. Luega ngulen biz bina tac inachaꞌde nziꞌf yòo loo quèe.
\v 6 Per coꞌseꞌ mtlo mdín bée roꞌtha, ale mbiiz roꞌtha tac yende mod ngroo ngxèn lox roꞌtha loo yòo quèea.
\v 7 Tedib lugar na, láth ngue go mbiꞌ biz bin, ngulàa ndxep biz bin leꞌn huan. Per coꞌseꞌ ngulen roꞌtha, mtlo mblyus roꞌth leꞌn huan tac mdín huan roꞌth. Por lult neꞌndaꞌde roꞌth cosech tac mdín huan roꞌth.
\v 8 Leꞌ tedib lugar na, mblo mbiꞌ biz bin antub loo yòo beꞌf. Tyase huen ngulen roꞌth. No mbryoo mxyèn roꞌth. No mdaꞌ biz bina thìb huen cosech. Thìb nzob bin mdaꞌ gal psiꞌ quèe nzob. Tedib nzob bin mdaꞌ ayon quèe nzob. Tedib nzob bin mdaꞌ thìb ayo quèe nzob.
\p
\v 9 Tolo ndxab Jesús loo mèna:
\p ―Guꞌ coꞌ ndxác taꞌ guꞌ cuent coꞌ huenlequeꞌ cón nee diꞌs diꞌs coꞌ ngue toodizen loo guꞌ ndxèꞌ, no cheleꞌ guꞌ tenꞌ cón nee diꞌs diꞌs ndxèꞌ, bìn guꞌ diꞌs coꞌ ngue niin loo guꞌ ndxèꞌ no ftaꞌ guꞌ lugar yaaꞌd diꞌs ndxèꞌ leꞌn lezoꞌ guꞌ.
\s Trèꞌ ndluꞌ cón mbli mtetac Jesús diꞌs loo mèn.
\r (Mt. 13.10–17; Lc. 8.9–10)
\p
\v 10 Per coꞌseꞌ ngolo mbii rye mèn, taate mbyanꞌ Jesús con taandxep mèn coꞌ beꞌ mbyanꞌ con ryete siꞌ fchop myenꞌ xinꞌ mtéꞌth Jesús. Mnibdiꞌs mèna no myenꞌ xinꞌ mtéꞌth Jesús loo Jesús cón nee diꞌs diꞌs coꞌ mdoodiꞌs Jesús coꞌ mtetac Jesús loo mèna.
\v 11 Sya, ndxab Jesús loo mèna no loo myenꞌ xinꞌ mtéꞌth Jesús:
\p ―Por part cón cheꞌn guꞌ, ey, Diox angndli loo guꞌ par taꞌ guꞌ cuent no non guꞌ xá mod ndlyaꞌs Diox ñibeꞌpeꞌ Diox loo mèn. Cón cheꞌn conꞌa beꞌ nzo casloo loo taamas mèn. Cona, ndxeꞌlequeꞌ, loo mèn coꞌ tarte tyal yilaꞌs par taꞌ mèn lugar ñibeꞌpeꞌ Diox loo mèn, na ntetac diꞌs loo mèna par tataa mod ndyoodiz non mèna.
\v 12 Tataa ndlin par gàca coꞌseꞌ huiꞌ mèna loo cón chenen, conꞌa ndli gàc mèna xal mèn coꞌ ingüiꞌde. No coꞌseꞌ gòn mèn diꞌs coꞌ mbezen, gàc mèna xal mèn coꞌ neꞌtaꞌde cuent cón cheꞌn diꞌs coꞌ mbezen par tataa mod neꞌlyàade yéc mèna no neꞌlyàade lezoꞌ mèna no neꞌseꞌde mèna mod coꞌ ndxàp mèna par neꞌtyonꞌte xtol mèna.
\s Jesús ngue taꞌ cuent cón nee diꞌs cón cheꞌn biz bin coꞌ ngue go mbiꞌ.
\r (Mt. 13.18–23; Lc. 8.11–15)
\p
\v 13 Tolo ndxab Jesús loo mèna no loo myenꞌ xinꞌ mtéꞌth Jesús:
\p ―¿Chéꞌ no guꞌ neꞌndaꞌde cuent cón cheꞌn diꞌs coꞌ mtetaquen loo guꞌ, càꞌ? Cheleꞌ guꞌ neꞌndaꞌde cuent cón nee diꞌs coꞌ ngolo guniin loo guꞌa, ¿xá mod taꞌ guꞌ cuent no tenꞌ guꞌ cón cheꞌn taamas diꞌs coꞌ tolo tetaquen loo mèn, sya?
\v 14 Diꞌs coꞌ ngolo mtetaquen loo mèna nee diꞌs ndxèꞌ: Mbiꞌ coꞌ ngo biz bin nee diꞌs nac xal mèn coꞌ ndeꞌth diꞌs no coꞌ ngo yalbàn cón cheꞌn diꞌs ndac cheꞌn Diox.
\v 15 Nzo ndxep mèn coꞌ nac xal nzob bin coꞌ ngulàa ro ned. Mèna nee diꞌs ndaꞌ mèna lugar ndxòn mèna diꞌs cón cheꞌn diꞌs ndac cheꞌn Diox. Per coꞌseꞌ ndxàcleꞌ ndxep huiz mbìn mèna diꞌs, no queltàa yende chó mèn tolo luꞌ loo mèna xal tolo nda diꞌs no xal tolo ndyee diꞌs, látha xaste ndli Mebizya par ndxathlaꞌs mèn cón cheꞌn diꞌs coꞌ mbìn mèn coꞌ mbli mdenꞌ mèn leꞌn lezoꞌ mèn xá nac coꞌ ndlyaꞌs Diox li mèn.
\v 16 Nzo taamas mèn coꞌ nac xal biz bin coꞌ ngulàa loo yòo quèe, coꞌ nee diꞌs, coꞌseꞌ mbìn mèn diꞌs ndac cheꞌn Diox, mbìn mèn diꞌs ndac cheꞌn Diox dib nzo yéc mèn no dib nzo lezoꞌ mèn.
\v 17 Mèna nac xal roꞌth coꞌ ngulengà. Yende fuers lox roꞌtha no neꞌnxecte roꞌtha arid nen tac yende pá xonꞌ lox roꞌth. Leꞌ sya, coꞌseꞌ ndxàc ngòc nguàal conꞌ loo mèna no ndxàc yalndyub nguꞌs loo mèna por cón cheꞌn diꞌs ndac cheꞌn Diox, sya, ntlo mèna, ndyoo xàꞌ lezoꞌ mèna loo cón cheꞌn diꞌs ndaca.
\v 18 Nzo taamas mèn coꞌ nac xal biz bin coꞌ ngulàa leꞌn huan. Mèna ndxòn diꞌs coꞌ nac diꞌs ndac cheꞌn Diox.
\v 19 Per látha, más ndxath ndlyux mèn loo yalgonꞌ cheꞌn izlyoꞌ ndxèꞌ. No leque mèn ndli par leque mèn nquedìi mèn loo yalgonꞌ mèn. No sate más ndlyaꞌs mèn no ndxòo yéc mèn que no mèn chol conꞌ. Leꞌ sya, ryete xtùuz coꞌ más ndli mèn cón cheꞌn conꞌa ndli ndxathlaꞌs mèn cón cheꞌn diꞌs ndac cheꞌn Diox par tataa mod neꞌgàcte mèn xal biz bin coꞌ taꞌ huax cosech.
\v 20 Per nzo ndxep mèn coꞌ ndxòn cón cheꞌn diꞌs ndac cheꞌn Diox, no ndyubdiꞌs mèn coꞌ mbez diꞌs ndac. Mèna nac xal biz bin coꞌ ngulàa loo yòo beꞌf. Nzo ndxep mèn coꞌ nac xal thìb quèe nzob coꞌ mdaꞌ gal psiꞌ quèe nzob. No nzo taamas mèn coꞌ nac xal biz bin coꞌ mdaꞌ ayon quèe nzob. No nzo taamas mèn coꞌ nac xal bin coꞌ mdaꞌ thìb ayo quèe nzob, coꞌ nee diꞌs, nac nzob bina bin coꞌ mdaꞌ más huax cosech.
\s Jesús mtetac loo mèn xal nac thìb lampr coꞌ ndxòo xnìi.
\r (Lc. 8.16–18)
\p
\v 21 Ndxab Jesús loo mèn, ne:
\p ―¿Chéꞌ nzo mod tub mèn thìb lampr coꞌ nzo xnìi leꞌn thìb cajón o tub mèn lampr xànꞌ thìb lunꞌ, càꞌ? Yende xàa. Ndxeꞌlequeꞌ, mèn quetal lampr gáp par tenìi lampr loo mèn.
\v 22 Na nii loo guꞌ, ne: Yende nec thìb conꞌ coꞌ nzo casloo coꞌ neꞌryo xoꞌfte loo xnaa. No yende nec thìb conꞌ coꞌ xexte ndxàc coꞌ neꞌyathte no coꞌ neꞌyènte loo mèn.
\v 23 Guꞌ coꞌ ndxaaꞌd diꞌs nza par taꞌ guꞌ cuent coꞌ huenlequeꞌ cón nee diꞌs coꞌ ngue niin loo guꞌ ndxèꞌ, bìn guꞌ diꞌs coꞌ ngue niin loo guꞌ ndxèꞌ no ftaꞌ guꞌ lugar yaaꞌd diꞌs ndxèꞌ leꞌn lezoꞌ guꞌ.
\p
\v 24 Ndxab Jesús loo mèn, ne:
\p ―Huen huen bli guꞌ xtùuz cón cheꞌn diꞌs coꞌ nzi yòn guꞌ nalleꞌqueꞌ. Tac leque mod coꞌ ndxàp guꞌ no coꞌ ndli guꞌ loo hues xtàa guꞌ, leque moda gàp Diox con guꞌ no li Diox loo guꞌ. No masreꞌ tolo zib Diox loo guꞌ xalqueꞌ nac coꞌ ndli guꞌ loo hues xtàa guꞌ, guꞌ coꞌ nzi yon diꞌs ndxèꞌ, que naca li guꞌ conꞌ yeꞌrsinꞌ, que naca li guꞌ conꞌ ndac. Diox liqueꞌ gàca loo mèn xalqueꞌ nac conꞌ mbli mèn loo xtàa mèn.
\v 25 Tac loo mèn coꞌ ndaꞌ lugar ndxòn ndac mèn cón cheꞌn diꞌs ndac cheꞌn Diox, loo mèna Diox tolo li más gòn ndac mèna cón cheꞌn diꞌs ndac cheꞌn Diox yiloa. Per ndxeꞌlequeꞌ, mèn coꞌ indyalte no mèn coꞌ indub nzade par tolo gòn mèn cón cheꞌn diꞌs ndac cheꞌn Diox, loo mèna Diox sate li par yauꞌ xtùuz mèn no yauꞌ lezoꞌ mèn par gàca loo mèn, por derech, yathlaꞌs mèn cón cheꞌn diꞌs ndac coꞌ mbìn mèn no coꞌ mdeꞌth mèn coꞌ ngo yalbàn cón cheꞌn Diox loo mèn.
\s Jesús ngue tetac cón cheꞌn biz bin coꞌ ndryoo nxyèn.
\p
\v 26 Ndxab Jesús loo mèn, ne:
\p ―Mod coꞌ ndxarꞌ mèn no mod coꞌ nqueltàa mèn, mèn coꞌ ndyal yòo mèn loo cón cheꞌn Diox par ñibeꞌpeꞌ Diox loo mèn, nac xal coꞌseꞌ ngo thìb mbiꞌ biz bin loo yòo.
\v 27 Coꞌseꞌ ngolo mblo mbiꞌ biz bin loo yòo, nda li mbiꞌ descans no ndxàt mbiꞌ no ndxeche mbiꞌ xal nac mod cheꞌn mbiꞌ. Látha, ndriꞌth thìb huiz no ndriꞌth tedib huiz coꞌseꞌ ñee mbiꞌ leꞌ biz bin ngulenleꞌ, no nzi rooleꞌ bin, no nzi xènleꞌ biz bin. Per neꞌtaꞌde mbiꞌ cuent xá mod nzi roo biz bin no xá mod nzi xèn biz bin.
\v 28 Per yòo coꞌ mblo mbiꞌ biz bina, ancualqueꞌ ndxàc ñaꞌ. Ner ndlyen ñaꞌ. Ndxeloa, ndxas bacdò ñaꞌ. Yiloa, ndryo yas lad ñaꞌ.
\v 29 No coꞌseꞌ mzinleꞌ tiemp ntlo nguus ñaꞌ, ntlo moz ngroꞌ moz par ya thop moz cosech tac mzinleꞌ huiz dyop cosech.
\s Jesús ngue tetac cón cheꞌn biz bin mostaz loo mèn.
\r (Mt. 13.31–32; Lc. 13.18–19)
\p
\v 30 Ndxab Jesús loo mèna, ne:
\p ―Nde niin tedib conꞌ loo guꞌ: ¿Xá nee guꞌ no xá ndenꞌ guꞌ xal nac mod coꞌ tlo queltàa mèn par tyal mèn ñibeꞌpeꞌ Diox loo mèna, àꞌ? No ¿xá nee guꞌ? ¿Chó tedib conꞌ tetaquen mod coꞌ yòo mèn loo cón cheꞌn Diox par ñibeꞌpeꞌ Diox loo mèna, àꞌ?
\v 31 Pues mod coꞌ tlopeꞌ Diox, ñibeꞌpeꞌ Diox loo mèn gàc nagabte mèn coꞌ tlo yòo loo cón cheꞌn Diox. No con mènate no más li yilaꞌs huax mèn loo cón cheꞌn Diox no tyal huax mèn ñibeꞌpeꞌ Diox loo mèn coꞌ nac cheꞌnpeꞌ Diox xal thìb biz bin mostaz coꞌ iñaade naroo coꞌ ngo mèn loo yòo. Guꞌ ñee leꞌ biz mostaz nac thìb biz más bix coꞌ nzo loo rye biz bin, ¿léꞌ?
\v 32 Tac coꞌseꞌ ngo mèn biz huan mostaz loo yòo, ndlyen huan mostaz. No más ndryoo nxyèn huan mostaz leque taamas huan no loo conꞌ nayèe coꞌ ngo mèn bin. Leꞌ sya, axta mbin béꞌ nde càl loo huan mostaza.
\s Jesús mtetac cón cheꞌn diꞌs ndac cheꞌn Diox loo mèn thìb mod tedib mod.
\r (Mt. 13.34–35)
\p
\v 33 Tataa mod mbluꞌ Jesús mèn cón cheꞌn diꞌs ndac cheꞌn Diox con huax diꞌs coꞌ mtetac Jesús loo mèn par gòn ndac mèn diꞌs coꞌ nzote mod gòn mèn no coꞌ nzote mod más taꞌ mèn cuent cón cheꞌn diꞌs ndaca.
\v 34 Nec thìb diꞌs neꞌndoodiꞌste Jesús loo mèn cheleꞌ Jesús intetacte diꞌs loo mèn. Per ndxeꞌlequeꞌ, loo myenꞌ xinꞌ mtéꞌth Jesús más ndoo lìte mdaꞌ Jesús cuent loo myenꞌ no nambìite ngo xoꞌf Jesús cón cheꞌn diꞌsa loo myenꞌ.
\s Ante gunii Jesús no mdeꞌf Jesús yaꞌ Jesús loo mbii no loo ol cheꞌn nít loo lagun, xèegà nguled mbii no nguled ndxetoo ol loo nít loo lagun.
\r (Mt. 8.23–27; Lc. 8.22–25)
\p
\v 35 Leque huiza coꞌseꞌ ngulàa yálꞌ izlyoꞌ, Jesús ndxab loo myenꞌ xinꞌ mtéꞌth Jesús:
\p ―Yaꞌ guꞌ nda naꞌ tedib lad ro lagun baꞌ, ey.
\p
\v 36 Sya, taate mbláꞌ myenꞌ xinꞌ mtéꞌth Jesús mèna tya. Mbeꞌ myenꞌ Jesús leꞌn thìb yòoyaa coꞌ ndub loo lagun tya. No mdoo nque taamas mèn, coꞌ mque no yòoyaa tya, xís Jesús par thidte nda no mèna Jesús.
\v 37 Per láth ngue tetee myenꞌ yòoyaa loo lagun, mtlo mxyoꞌf thìb mbiidoꞌ loo lagun no ale ngo too ol nít loo lagun. No ndoo yòoleꞌ nít leꞌn yòoyaa axta ndoo zèleꞌ nít leꞌn yòoyaa.
\v 38 Láth ndxàc conꞌa, ale leꞌleꞌ mde mcalꞌ Jesús. Nax yàt Jesús par xís barc loo thìb almad. Sya, yende izlyoꞌ, mbloꞌ myenꞌ mcalꞌ loo Jesús. Ndxab myenꞌ:
\p ―Maistr, ¿chéꞌ indyóode Uꞌ yòoyaa naꞌ ngue dep leꞌn nít, cara?
\p
\v 39 Sya, ngo che Jesús. Gunii Jesús loo mbii no loo nít coꞌ ndxe too loo lagun. Ndxab Jesús:
\p ―Xèe gure guꞌ.
\p Sya, por derech, xèe ngure nít loo lagun. No xèe ngure mbii.
\v 40 Ngoloa, ndxab Jesús loo myenꞌ xinꞌ mtéꞌth Jesús:
\p ―¿Chonon susqueꞌ anzeꞌf nzyeb guꞌ, àꞌ, ey? ¿Xá mod susqueꞌ indxàpte guꞌ yalxlaꞌs con daa, yey?
\p
\v 41 Per myenꞌ xinꞌ mtéꞌth Jesús sate más mzyeb. No mbez myenꞌ loo xtàa myenꞌ:
\p ―¿Chó mbiꞌ nac mbiꞌ baꞌ, cara? ¿Xá mod ale axta mbii no nít ndxòn ro mbiꞌ baꞌ no ndubdiꞌs mbii no nít ro mbiꞌ baꞌ?
\c 5
\s Trèꞌ ndluꞌ cón cheꞌn thìb mbiꞌ cheꞌn yèez Gadar coꞌ mque no huax xpii yeꞌrsinꞌ.
\r (Mt. 8.28–34; Lc. 8.26–39)
\p
\v 1 Pues mzin Jesús tedib lad ro lagun coꞌ nziriꞌ loo xyòn mèn cheꞌn làaz mèn gadar con myenꞌ xinꞌ mtéꞌth Jesús.
\v 2 Per texal ngroꞌ Jesús leꞌn yòoyaa, ngroꞌ thìb mbiꞌ coꞌ nzo casloo leꞌn armit panteón loo Jesús. Loo mbiꞌa ngo huax xpii yeꞌrsinꞌ.
\v 3 Mbiꞌa ngo ban leꞌn armit panteón. No yende chó mèn ngli gan tyen mbiꞌ par tub dóꞌ mèn mbiꞌ. No neꞌ neꞌ yen chó mèn ngác quedóꞌ mèn mbiꞌ con caden.
\v 4 Huax vez mquedóꞌ mèn yaꞌ mbiꞌ no nii mbiꞌ con caden per ale ndli mbiꞌ gan nchoꞌ mbiꞌ caden. Ale thìb leꞌ thìb leꞌ ndli mbiꞌ caden. No yende chó mèn ngác li gan par gàc nadoꞌ mbiꞌ.
\v 5 Nque tee bez yèe mbiꞌ ze no yálꞌ leꞌn yiꞌx no leꞌn huan no leꞌn armit thebol leꞌn panteón. No ale leque mbiꞌ nguin quèe lad mbiꞌ coꞌseꞌ nquée mbii cheꞌn xpii yeꞌrsinꞌa mbiꞌ.
\v 6 Per coꞌseꞌ gunèe mbiꞌ tithreꞌ nde Jesús, mqueꞌ mbiꞌ carre. Mdub xib mbiꞌ loo Jesús. No mcòoꞌ mbiꞌ yéc mbiꞌ loo Jesús.
\v 7 Sya, mbli xpii yeꞌrsinꞌ ngrozèe mbiꞌ cabii. No mbli xpii yeꞌrsinꞌ ndxab mbiꞌ loo Jesús:
\p ―Jesús, xganꞌ Diox roo Diox xèn coꞌ ñibeꞌ loo ryethe conꞌ, ¿chonon nde Uꞌ coꞌteꞌ nzo nuꞌ ndxèꞌ, àꞌ? Naꞌb nuꞌ loo Uꞌ, por lèe cheꞌn Diox, neꞌtetìide Uꞌ nuꞌ, ndee Uꞌ.
\p
\v 8 Tataa mbli xpii yeꞌrsinꞌ ndxab mbiꞌ loo Jesús tac Jesús ngue bezleꞌ no ngue ñibeꞌleꞌ loo xpii yeꞌrsinꞌ par ryo xpii yeꞌrsinꞌ loo mbiꞌ.
\p
\v 9 Sya, mnibdiꞌs Jesús loo mbiꞌ. Ndxab Jesús loo mbiꞌ:
\p ―¿Chó lèel, àꞌ?
\p Leꞌ sya, xpii yeꞌrsinꞌ coꞌ nzo loo mbiꞌa mbli ndxab mbiꞌ:
\p ―Nuꞌ lèe Legión tac anzeꞌf huax nac nuꞌ.
\p
\v 10 Sya, xpii coꞌ nzo loo mbiꞌa mbli nalyat ndxab mbiꞌ loo Jesús par neꞌtelꞌte Jesús xpii yeꞌrsinꞌa tedib ned tedib lad leꞌn yèezyaꞌ coꞌ nac làaz mèn gadar.
\v 11 Leꞌxqueꞌ tya ndub thìb yii coꞌteꞌ ngue tee yuhua thìb partid nguch.
\v 12 Rye xpii yeꞌrsinꞌ coꞌ ngo loo mbiꞌ mbli ndxab mbiꞌ loo Jesús:
\p ―Ftelꞌ Uꞌ nuꞌ loo nguch coꞌ nzi tee goꞌ par yòo nuꞌ loo nguch.
\p
\v 13 Sya, mdaꞌ Jesús lugar loo xpii yeꞌrsinꞌa. Ngro xpii yeꞌrsinꞌa loo mbiꞌ. Ngòo xpii yeꞌrsinꞌa loo partid nguch. No por loo rye nguch neꞌqueꞌ chop mil nguch coꞌ nzi tee yuhua tya. Per coꞌseꞌ ngòo xpii loo partid ngucha, ryete ngucha mbyùb lad yiia. No ale ngulàa ryete ngucha leꞌn lagun. Tya nguáp rye nguch nít. No nguth rye chop mil ngucha.
\p
\v 14 Leꞌ sya, mèn coꞌ ngue queno ngucha mxonꞌ tant mzyeb mèna. Ngua taꞌ mèna cuenta loo mèn làth yèez no loo mèn coꞌ ngue zinꞌ huan. Sya, mbiꞌth tee huiꞌ rye mèna conꞌ coꞌ ngòc.
\v 15 Coꞌseꞌ mzin mèn coꞌteꞌ nzo Jesús, gunèe mèn ndxeꞌslequeꞌ ndub mbiꞌ coꞌ mque no mbii cheꞌn rye xpii yeꞌrsinꞌa. Noc xableꞌ mbiꞌ ndub mbiꞌ. Sya, sate más mzyeb mèna.
\v 16 Mèn coꞌ gunèe mbiꞌ ndooreꞌ teyac Jesús mbiꞌ, mèna mdaꞌ cuent conꞌ ngòc loo mbiꞌ, mbiꞌ coꞌ mquée mbii cheꞌn xpii yeꞌrsinꞌ. No mdaꞌ mèna cuent xalqueꞌ ngòca loo nguch.
\v 17 Leꞌ sya, mèna mtlo ndxab loo Jesús li Jesús favor ryoꞌ Jesús, bii Jesús làaz mèna par ned nde Jesús.
\p
\v 18 Coꞌseꞌ gunèe mbiꞌ coꞌ mque no xpii yeꞌrsinꞌa ngòo Jesús leꞌn yòoyaa par bii Jesús tya, nalyat mnaꞌb mbiꞌ diꞌs loo Jesús par taꞌ Jesús lugar tyoo nque mbiꞌ xís Jesús par tyee no mbiꞌ Jesús.
\v 19 Per ndxeꞌlequeꞌ, Jesús neꞌndalte no neꞌndaꞌde Jesús lugar nga nque mbiꞌ xís Jesús. Ale leꞌleꞌ ndxab Jesús loo mbiꞌ:
\p ―Byàa par lizl con mèn coꞌ nac mèn gulizl baꞌ. No ftaꞌ cuent loo mèna ryete conꞌ coꞌ mbli noleꞌ Tad Diox lùu. No ftaꞌ cuent xá mod mblyat lezoꞌ Tad Diox gunèe Tad Diox lùu, ndee.
\p
\v 20 Sya, mxen mbiꞌ ned. Ndyàa mbiꞌ. Mtlo mbiꞌ, mdaꞌ mbiꞌ cuenta loo mèn coꞌ nac cheꞌn rye yèezyaꞌ cheꞌn làaz mèn decápolis ryete conꞌ xal mbli Jesús loo mbiꞌ. Leꞌ ryete mèn yèez coꞌ mbìn diꞌs coꞌ mdaꞌ mbiꞌ cuenta na, ante mbuiꞌ rye mèna no ante gunaa rye mèna loo mbiꞌ.
\s Trèꞌ ndluꞌ cón cheꞌn conꞌ coꞌ ngòc loo rsap Jair no cón cheꞌn thìb xaꞌgot coꞌ mbuàal xab Jesús.
\r (Mt. 9.18–26; Lc. 8.40–56)
\p
\v 21 Coꞌseꞌ mbere Jesús, ndyeꞌth Jesús, ngua Jesús par ned leꞌn yèezyaꞌ cheꞌn làaz mèn gadar, ndyeꞌth Jesús loo yòoyaa tedib lad ro lagun coꞌ neꞌ lèe lagun cheꞌn mèn làaz mèn galile. Tya, mqueltàa huax mèn loo Jesús. No por mqueltàa mèn loo Jesús tya, tyate mbyanꞌ Jesús con mèna.
\v 22 Látha, mzin thìb mbiꞌ coꞌ ngòc jef cheꞌn thìb sinagog coꞌ ndub leꞌn thìb yèez coꞌ nziriꞌ gaxte coꞌteꞌ ngo Jesús. Mbiꞌa ngroꞌ lèe Jair. Coꞌseꞌ gunèe mbiꞌ Jesús, mbii gax mbiꞌ loo Jesús. Mdub xib mbiꞌ loo Jesús.
\v 23 No anzeꞌf nalyat mnaꞌb mbiꞌ diꞌs loo Jesús. Ndxab mbiꞌ:
\p ―Tad, rsap daa nax tin liz. Na ndal naꞌb thìb favor loo Uꞌ. Tyee Uꞌ. Nda naꞌ lizen. Daa ndlyaz ante xoꞌf Uꞌ yaꞌ Uꞌ lad mzaꞌ daa. Yac mzaꞌ daa. No ryo xban mzaꞌ daa.
\p
\v 24 Sya, mxen Jesús ned. Nda no Jesús Jair par liz Jair. Leꞌ rye mèn coꞌ nzi no Jesús na, nda nque xís Jesús axta mdíꞌ mèna Jesús tant thìb mèn nda no Jesús.
\v 25 Láth rye mèna ngo thìb xaꞌgot coꞌ mque no yíiz coꞌ nac yíiz ndlyath ren. Leꞌn rye tiemp coꞌ ndxàc mque no xaꞌgota yíiza ndxàcleꞌ siꞌ fchop linꞌ.
\v 26 Leꞌn rye tiempa, anzeꞌf thìb yalnè mdenꞌ xaꞌgota por mbli huax doctor remed xaꞌ. No anzeꞌf thìb tmi mbli xaꞌ gast axta mthoꞌ xaꞌgota rye conꞌ mque no xaꞌ. Per neꞌ por chuꞌth neꞌngyath ndacte xaꞌ con remeda. Ndxeꞌlequeꞌ, sate más mxyo yíiza loo xaꞌgota.
\v 27 Coꞌseꞌ mbìn xaꞌgota ndeꞌth mèn leꞌ Jesús nde par neda, ngo xaꞌgota làth rye mèna par ngua gax xaꞌ coꞌteꞌ nzo Jesús, par ned xís Jesús làth mèna. Látha, xexte mbuàal xaꞌgota xab Jesús.
\v 28 Tataa mbli xaꞌgota tac ndooreꞌ ndxab xaꞌgota loo lezoꞌ xaꞌ: Cheleꞌ daa ante gàal xab Jesús, ngobeꞌen yac daa.
\v 29 Texal ngolo mbuàal xaꞌgota xab Jesús, mbyauꞌ loo ren coꞌ ndoo lath xaꞌ. No luega mdenꞌ xaꞌ mbyac xaꞌ loo yíiz coꞌ mque no xaꞌ.
\v 30 Lomisqueꞌ, mdenꞌ Jesús leꞌn lezoꞌ Jesús leꞌ Diox mteyac thìb mèn yíiz por cón cheꞌn conꞌ roo conꞌ xèn coꞌ ndxàp Jesús laꞌs nii Jesús no laꞌs yaꞌ Jesús. Sya, chàa, mbere Jesús, mbuiꞌ Jesús par ned xís Jesús. No mnibdiꞌs Jesús loo mèna. Ndxab Jesús loo mèna:
\p ―¿Chó guꞌ mbuàal xaben par ned xísen, àꞌ?
\p
\v 31 Sya, myenꞌ xinꞌ mtéꞌth Jesús ndxab loo Jesús:
\p ―Tad, con que Uꞌ ñee leꞌ mèn ngue tíꞌ Uꞌ no mbez Uꞌ ¿chó mèn mbuàal daa par xísen, àꞌ?
\p
\v 32 Per Jesús mbuiꞌ ndxèꞌ mbuiꞌ baꞌ loo mèna par ñèe Jesús ñeeneꞌ chó mèn mbuàal xab Jesús par mbyac mèna.
\v 33 Látha, xaꞌgota ante nxiꞌth ndoo tant mzyeb xaꞌgota. No nanee xaꞌgota cón ngòc loo xaꞌ. Sya, xex xex mbii gax xaꞌ loo Jesús. Mdub xib xaꞌ loo Jesús. No mdaꞌ xaꞌ cuent rye conꞌ coꞌ, lìcqueꞌ, ngòc loo xaꞌ loo Jesús.
\v 34 Jesús ndxab loo xaꞌgota:
\p ―Rsapa, lùu mbyacleꞌ, ndee, tac ngolaꞌsqueꞌl loon. Byàa. Neꞌtyóodel. No huen blo lezoꞌl. Lùu ya neꞌtolode tyac len.
\p
\v 35 Tatabeꞌ ngue toodiꞌs Jesús con xaꞌgota coꞌseꞌ mzin plá mèn guliz mbiꞌ coꞌ nac jef cheꞌn sinagog coꞌ ndub gaxte tya. Ndxab mèn guliza loo mbiꞌ coꞌ nac xud mzaꞌ:
\p ―Láꞌa. Ya neꞌtolode li xol maistr. Loo rsap lùu ngololeꞌ guneei.
\p
\v 36 Per Jesús neꞌnglide cas diꞌs coꞌ ndxab mèn guliz mbiꞌa loo mbiꞌ. Ndxab Jesús loo mbiꞌ:
\p ―Neꞌzyebtel por rsapl, ndee. Golaꞌs loon no maste.
\p
\v 37 Neꞌndaꞌde Jesús lugar loo rye mèna par ya nque mèna xís Jesús par ned liz mbiꞌ. No maste mbeꞌ Jesús Pedr, no Cob, no Juàn coꞌ nac hues Cob par ya no myenꞌa Jesús.
\v 38 Coꞌseꞌ mzin Jesús con myenꞌ liz mbiꞌ coꞌ ngòc jef cheꞌn singoga, ñèe Jesús ndxàc thìb conꞌ. No ñèe Jesús ndxónꞌ mèn no mbez yèe mèn.
\v 39 Jesús ngòo liz mbiꞌ. No asembli Jesús, ndxab Jesús loo mèna:
\p ―¡Susqueꞌ thìb ruid ndli guꞌ no ndxónꞌ guꞌ, yoo! Por part cón chenen, mzaꞌ baꞌ inacte mzaꞌ coꞌ nguth. Ndxeꞌlequeꞌ, part cón chenen, mzaꞌ nax yàt thìb mcalꞌguth.
\p
\v 40 Per coꞌseꞌ mbìn mèna tataa ndxab Jesús loo mèna, ale mxìis no mèna Jesús.
\p Sya, ndxab Jesús loo mèna:
\p ―Bli guꞌ favor, groꞌ guꞌ par fuer.
\p Sya, ngòo no Jesús xud mzaꞌ, no xnaꞌ mzaꞌ, no yon myenꞌ xinꞌ mtéꞌth Jesús coꞌ ngua no Jesús par leꞌn nyòo coꞌteꞌ nzoꞌf mzaꞌ loo mes.
\v 41 Sya, mxen Jesús yaꞌ mzaꞌ coꞌ nguth coꞌ nzoꞌf loo mes. Ndxab Jesús loo mzaꞌ:
\p ―Talita cumi. Diꞌs ndxèꞌ nee diꞌs: Mzaꞌ, na ngue nii lool: Goo che. Goo too.
\p
\v 42 No texal ngolo tataa ndxab Jesús loo mzaꞌ, ngo che mzaꞌ. No luega mdee mzaꞌ. No pente nzo mzaꞌ siꞌ fchop linꞌ coꞌseꞌ ngòc conꞌa loo mzaꞌ. Leꞌ mèn coꞌ ngureriꞌa na, ante mbuiꞌ mèna no ante gunaa mèna no ante mzyeb mèna coꞌseꞌ gunèe mèna leꞌ mzaꞌ ngro xban.
\v 43 Per Jesús mnibeꞌ yèe loo rye mèn coꞌ ngureriꞌa par neꞌtaꞌde mèna nec thìb cuent loo nec thìb mèn cón cheꞌn conꞌ coꞌ ngòc loo mzaꞌa. Ngoloa, mnibeꞌ Jesús loo xnaꞌ mzaꞌ taꞌ xnaꞌ mzaꞌ conꞌ hua mzaꞌ.
\c 6
\s Jesús ngo plá huiz leꞌn yèez Nazaret.
\r (Mt. 13.53–58; Lc. 4.16–30)
\p
\v 1 Jesús mbii liz Jair. Mbere Jesús, ndyàa Jesús coꞌteꞌ nac yèez coꞌ nac làazpeꞌ Jesús. Ngua no myenꞌ xinꞌ mtéꞌthpeꞌ Jesús Jesús, ne.
\v 2 Coꞌseꞌ ngòc huiz sabd coꞌ ngòc huiz descans tiempa, Jesús mtlo mbluꞌ mèn leꞌn sinagog mèn. Leꞌ mèn coꞌ mbìn diꞌs coꞌ mbluꞌ Jesús na, ante ngüiꞌ mèna no ante ñaa mèna loo Jesús. No mbez mèna loo xtàa mèna:
\p ―¿Pá ngua téꞌth mbiꞌ baꞌ rye diꞌs coꞌ ndyoodiꞌs mbiꞌ? No ¿pá ned ngroꞌ coꞌ ndxác mbiꞌ baꞌ no yalguzyeꞌ coꞌ ndli mbiꞌ, cara?
\v 3 Naꞌ nanee leꞌ mbiꞌ baꞌ nac xganꞌ Mari. No nac mbiꞌ carpinter. Mbiꞌ baꞌ ndxàc hues Cob. No ndxàc hues mbiꞌ Chè no ndxàc hues mbiꞌ Jud no Mon. No myenꞌgot coꞌ ndxàc ftaꞌn mbiꞌ nzo ban làth naꞌ trèꞌ.
\p Ale leque mèn gulàaz Jesús ndlyàa xyàn lezoꞌ ñèe Jesús. No ndenꞌ mèna iléꞌde nac conꞌ coꞌ ndli Jesús.
\v 4 Sya, ndxab Jesús loo mèna:
\p ―Nzo huax mèn coꞌ ndli cas no intèꞌbte mèna mèn coꞌ ndeꞌth diꞌs coꞌ ndxab Diox por nac mèna mèn tith. Per cheleꞌ mèn coꞌ ndeꞌth diꞌs coꞌ ndxab Diox nac mèn gulàazpeꞌ mèn, pà li mèn cas mèn coꞌ ndeꞌth diꞌs no pà li mèn guliz mèn coꞌ ndeꞌth diꞌs cas mèn coꞌ ndeꞌth diꞌs xal ndxàca loon con mèn coꞌ nac mèn gulàazpeꞌ dàa.
\p
\v 5 No neꞌngácte Jesús ngli Jesús nec thìb yalguzyeꞌ loo mèn gulàaz Jesús. Ante mxoꞌf Jesús yaꞌ Jesús lad ndxep mèn yíiz par mteyac Jesús ndxep mèn no maste.
\v 6 Látha, ante ngüiꞌ Jesús no ante ñaa Jesús loo mèn gulàaz Jesus tac thidtene indlyaꞌste mèna yilaꞌs mèna loo Jesús. No indxàpte mèna yalxlaꞌs loo Jesús. Ngoloa, mque tee luꞌ Jesús rye mèn yèezyaꞌ coꞌ nziriꞌ gax loo yèez coꞌ nac làaz Jesús.
\s Jesús mtelꞌ myenꞌ xinꞌ mtéꞌth Jesús par ngua lo myenꞌ yalbàn cón cheꞌn diꞌs ndac cheꞌn Diox loo mèn.
\r (Mt. 10.5–15; Lc. 9.1–6)
\p
\v 7 Ngoloa, ngurez Jesús ryete siꞌ fchop myenꞌ xinꞌ mtéꞌth Jesús coꞌ mcui Jesus. Mtlo Jesús, mtelꞌ Jesús chop chop myenꞌ par ya lo myenꞌ yalbàn loo mèn. No mbli Jesús par ngòp myenꞌ conꞌ laꞌs nii myenꞌ no laꞌs yaꞌ myenꞌ par coꞌ myenꞌ xpii yeꞌrsinꞌ loo mèn.
\v 8 No mnibeꞌ Jesús loo myenꞌ yende cón hueꞌ myenꞌ coꞌseꞌ tyen myenꞌ ned ya myenꞌ. No maste co myenꞌ thìb bro yaa yaꞌ myenꞌ. Neꞌhueꞌde myenꞌ yex luaꞌ myenꞌ. Neꞌ neꞌ hueꞌ myenꞌ tmi.
\v 9 No mnibeꞌ Jesús loo myenꞌ queꞌ myenꞌ yilid coꞌ ngòcte ñaa nii myenꞌ. No hueꞌ myenꞌ ante xab myenꞌ coꞌ nocte myenꞌ. Neꞌhueꞌde myenꞌ chop ned xab myenꞌ.
\v 10 Ndxab Jesús loo myenꞌ, ne:
\p ―Coꞌseꞌ yòo guꞌ liz mèn coꞌteꞌ zin guꞌ, cued guꞌ liz mèna axtaqueꞌ bii guꞌ leꞌn rye yèezyaꞌ ned ya guꞌ no axtaqueꞌ ryoꞌ guꞌ leꞌn rye yèezyaꞌ ned ya guꞌ.
\v 11 No cheleꞌ chó làaz mèn no liz mèn neꞌtyalte mèn taꞌ mèn lugar yòo guꞌ no neꞌtyalte mèn gòn mèn diꞌs coꞌ gab guꞌ loo mèn, groꞌ guꞌ liz mèna no làaz mèna. Bzib guꞌ yòoyaꞌs coꞌ ndoo nii guꞌ loo mèna. Conꞌa nee diꞌs tolo tyub quìi tyub bèel lezoꞌ mèna por conꞌ coꞌ mbli no mèna guꞌ. Yanꞌ cón cheꞌn mèna loo Diox. Leꞌ Diox tub rez cón cheꞌn mèna coꞌseꞌ gàc huiza, ne. No coꞌseꞌ gàc huiz coꞌ tub rez Diox cón cheꞌn mèna, lìcpeꞌ baꞌi, na nii loo guꞌ: Más beꞌte tetìi Diox mèn ciuda Sodom no mèn ciuda Gomor leque loo mèn yèez coꞌ neꞌtyalte taꞌ lugar yòo guꞌ liz mèna no làaz mèna.
\p
\v 12 Sya, mxen myenꞌ ned. Ndyàa myenꞌ. Nda lo myenꞌ yalbàn no nda teꞌth myenꞌ cón cheꞌn diꞌs ndac cheꞌn Diox loo mèn leꞌ mèn na, ndxàal lyàa yéc no ndxàal lyàa lezoꞌ mèn no seꞌ mèn mod coꞌ ndxàp mèn par lyáꞌ mèn loo conꞌ ryes.
\v 13 Mbloꞌ myenꞌ xinꞌ mtéꞌth Jesús huax xpii yeꞌrsinꞌ loo mèn, ne. No mtà myenꞌ aceit lad huax mèn. Mteyac myenꞌ mèn yíiz coꞌ mdenꞌ chol yíiz, ne.
\s Trèꞌ ndluꞌ xá mod mbeth mèn Juàn Bautist.
\r (Mt. 14.1–12; Lc. 9.7–9)
\p
\v 14 Nde nxonꞌ, mbìn Herod coꞌ ngòc rey conꞌa. Per máa rye mèn nonleꞌ cón cheꞌn coꞌ ngue tee li Jesús. Sya, ndxab Herod loo mèn coꞌ ndxàc xtàa Herod coꞌ nqueltàa no Herod:
\p ―Peser Juàn Bautist ngro xban làth mèn nguth. Cona, ndli Juàn conꞌ roo conꞌ xèn loo mèn xalte nac conꞌ coꞌ nzo laꞌs nii Juàn no laꞌs yaꞌ Juàn.
\p
\v 15 Taamas mèn mbez:
\p ―Lii, coꞌ mdeꞌth diꞌs coꞌ ndxab Diox, na.
\p Taamas mèn mbez:
\p ―Nzo chó xaꞌgool coꞌ mdeꞌth diꞌs coꞌ ndxab Diox póla ngro xban.
\p
\v 16 Coꞌseꞌ mbìn Herod tataa mbez mèn, Herod ndxab loo mèn:
\p ―Mbiꞌa nac Juàn Bautist coꞌ mnibeꞌen ngua choꞌ solndad yéc, ndyaquen. No nalleꞌ ngro xban Juàn làth mèn nguth, ngobeꞌen.
\p
\v 17 Tataa ndxab Herod loo mèn tac ndooreꞌ Herod mnibeꞌ loo solndad ngua queꞌ solndad Juàn leziꞌf. No mtedóꞌ solndad Juàn con caden ante por cón cheꞌn Herodi. Herodia ngòc saꞌl Lip, hues Herod ndooreꞌ. Ale mbli Herod ngòc Herodi xal xaꞌgotpeꞌ Herod. Mque no Herod Herodia xal xaꞌgotpeꞌ Herod.
\v 18 Tac yalquìite ndxab Juàn Bautist loo Herod:
\p ―Herod, indxàalte que no Uꞌ xaꞌgot hues Uꞌ neꞌ neꞌ gàal Uꞌ xaꞌ xal xaꞌgotpeꞌ Uꞌ.
\p
\v 19 Per Herodi axta ngòc loc tant ngulàa xyàn lezoꞌ Herodi gunèe Herodi Juàn Bautist. Axta mblyaꞌs Herodi leque hora nguth Herodi Juàn por conate no más. Per yende mod ngli Herodi gan nguth Herodi Juàn.
\v 20 Herod mquenap Juàn tac Herod huen huen nanee leꞌ Juàn ngòc thìb mbiꞌ ndac no thìb mbiꞌ nalì no thìb mbiꞌ natúꞌ. Por cona, nzyeb Herod ñèe Herod Juàn. No neꞌnglaꞌde Herod ngli Herodi yalquìi loo Juàn. Más de cona, mastaleꞌ indenꞌte Herod no indxaaꞌdte Herod diꞌs cón cheꞌn conꞌ coꞌ ngue luꞌ Juàn loo Herod cón cheꞌn Diox, ndyac lezoꞌ Herod nque nza Herod diꞌs coꞌ ndyoodiꞌs Juàn loo Herod con huen diꞌs no con huen cuent.
\v 21 Per Herodi huen ngua tac leꞌpeꞌ mzyal thìb mod loo Herodi par guth yèe Herodi Juàn. Tac coꞌseꞌ ngóol lni coꞌ ngòc huiz coꞌ ngóol Herod, huiza mbli Herod thìb yalhua par hua mèn coꞌ ngòc jef loo Herod, no mèn coꞌ ngòc commandant loo Herod, no taamas mèn coꞌ mbli Herod cuent anzeꞌf ntac mèn loo Herod, mèn coꞌ nac mèn coꞌ ñibeꞌ loo mèn gulàaz Galile.
\v 22 Leꞌpeꞌ láth nzi yuhua rye mèna, ngòo mzaꞌ coꞌ nac rsap Herodi loo mèn coꞌ nzi yuhuaa. Nde yolꞌ nii mzaꞌ. Nde nxonꞌ, anzeꞌf ndyac lezoꞌ Herod con mèn coꞌ nzi yuhua rsèa coꞌseꞌ ñèe Herod no mèna nabeꞌste nde yolꞌ nii mzaꞌ ngo mzaꞌ. Ale con gust ndxab Herod loo mzaꞌ:
\p ―Mzaꞌ, bnaꞌb conꞌ ndlyaꞌsl loon. Na tai càal.
\p
\v 23 No mdeꞌth Herod Diox loo mzaꞌ no mcàbgòn Herod diꞌs loo mzaꞌ leꞌ Herod taꞌ rye conꞌ lyaꞌs mzaꞌ càa mzaꞌ. Ndxab Herod loo mzaꞌ axta rol làaz mèn coꞌ ñibeꞌ Herod taꞌ Herod càa mzaꞌ cheleꞌ mzaꞌ lyaꞌs càai por nabeꞌs ndxolꞌ nii mzaꞌ loo mèn coꞌ mqueltàa.
\v 24 Sya, yende izlyoꞌ, ngroꞌ mzaꞌ loo rye mèna. Ngua mzaꞌ loo xnaꞌ mzaꞌ. Ndxab mzaꞌ:
\p ―May, ¿cón ndlyaꞌs Uꞌ ñaꞌben loo Herod, àꞌ?
\p Xnaꞌ mzaꞌ ndxab loo mzaꞌ:
\p ―Bnaꞌb yéc Juàn Bautist loo Herod càal.
\p
\v 25 Sya, yende izlyoꞌ, ndyeꞌth mzaꞌ loo Herod tedib vez coꞌteꞌ ndub Herod. Ndxab mzaꞌ loo Herod:
\p ―Rey Herod, daa ndlyaz taꞌ Uꞌ yéc Juàn Bautist càan loo thìb plat nalleꞌqueꞌ.
\p
\v 26 Per coꞌseꞌ mbìn Herod tataa ndxab mzaꞌ loo Herod, anzeꞌf mxi lezoꞌ Herod. Per máa leꞌ Herod mdeꞌthleꞌ Diox loo mzaꞌ, ¿léꞌ?, no mbìn rye mèn coꞌ nziriꞌ no Herod diꞌs coꞌ ndxab Herod loo mzaꞌ, ¿léꞌ?, que nzo neꞌ ñee lezoꞌ Herod, mbli Herod coꞌ mblyaꞌs mzaꞌ, xàa.
\v 27 Lueg lueg mtelꞌ Herod thìb solndad. No mnibeꞌ Herod loo solndad ya choꞌ solndad yen Juàn par yeꞌth no solndad yéc Juàn loo Herod.
\v 28 Nda solndad. Ngòo solndad leꞌn leziꞌf. Mblo ndeꞌf solndad yen Juàn. No nabeꞌste mdub solndad yéc Juàn loo thìb plat. Ndyeꞌth no solndad yéc Juàn loo Herod. Leꞌ Herod na, mdaꞌ yéc Juàn loo mzaꞌ. Leꞌ mzaꞌ na, ndooleꞌ ngua laꞌ yéc Juàn par mcàa xnaꞌ mzaꞌ.
\p
\v 29 Coꞌseꞌ mbìn myenꞌ xinꞌ mtéꞌth Juàn leꞌ Juàn nguthleꞌ, leꞌ Herod mnibeꞌ loo solndad ngua yuth solndad Juàn, ngua lit myenꞌ thebol Juàn par ngua caꞌs myenꞌ thebol Juàn.
\s Jesús mbuaa gaꞌy mil ante mènbiꞌ.
\r (Mt. 14.13–21; Lc. 9.10–17; Jn. 6.1–14)
\p
\v 30 Ngoloa, ndyeꞌth ryete siꞌ fchop myenꞌ xinꞌ mtéꞌth Jesús coꞌ ngua luꞌ diꞌs cón cheꞌn Jesús loo mèn. Mqueltàa no myenꞌ Jesús tedib vez. Látha, mdaꞌ myenꞌ cuent ryete conꞌ xal mque tee li myenꞌ no mque tee luꞌ myenꞌ loo mèn ned ngua myenꞌ.
\v 31 Jesús ndxab loo myenꞌ:
\p ―Yaꞌ guꞌ nda li naꞌ chuꞌth descans thìb lugar coꞌteꞌ neꞌñeede mèn naꞌ.
\p Tataa ndxab Jesús tac anzeꞌf thìb mèn, chó mèn ndyàa no chó mèn nde loo Jesús, axta neꞌ neꞌ yen mod hua Jesús con myenꞌ xinꞌ mtéꞌth Jesús mase thìb leꞌ yèth.
\v 32 Sya, ante myenꞌ xinꞌ mtéꞌth Jesús, no Jesús, ngòo leꞌn thìb yòoyaa. Ngua Jesús tedib lugar xàꞌ con myenꞌ xinꞌ mtéꞌth Jesús.
\v 33 Per huax mèn gunèe nda Jesús par neda. Mblibeꞌ mèna Jesús. Ale mqueꞌ mèna carre. Nda tauꞌ mèna loo Jesús coꞌteꞌ zin Jesús. No ner mèna mzin leque Jesús con myenꞌ xinꞌ mtéꞌth Jesús.
\v 34 Coꞌseꞌ ngroꞌ Jesús leꞌn yòoyaa, anzeꞌf thìb mèn gunèe Jesús nziriꞌ. Mblyat lezoꞌ Jesús gunèe Jesús mèna tac nziriꞌ prob mèna xal mbacxilꞌ coꞌ yende pastor coꞌ nqueno mbacxilꞌ. Sya, mtlo Jesús, mbluꞌ Jesús mèna huax conꞌ.
\v 35 Per coꞌseꞌ mzyèleꞌ izlyoꞌ huiza, myenꞌ xinꞌ mtéꞌth Jesús ngua nee loo Jesús. Ndxab myenꞌ loo Jesús:
\p ―Tad, mzyèleꞌ izlyoꞌ no yende chó mèn nzo ban trèꞌ par ya tiꞌ mèn conꞌ hua mèn.
\v 36 Gunii Uꞌ Diox loo mèn baꞌ. No yiloa, guuz Uꞌ loo mèn ya tiꞌ mèn conꞌ hua mèn leꞌn rye ranch coꞌ nzo leꞌn huan no leꞌn rye yèez coꞌ nziriꞌ gax tac yende cón ngue no mèn par hua mèn.
\p
\v 37 Per Jesús, ndxeꞌleque,ꞌ mcàb. Ndxab Jesús loo myenꞌ:
\p ―Guꞌ nee, xàa. Ftaꞌ guꞌ conꞌ hua mèn baꞌ.
\p Myenꞌ mcàb loo Jesús. Ndxab myenꞌ loo Jesús:
\p ―Tad, ¿xá nee Uꞌ? ¿Chéꞌ tàal thìb mil chop ayo pes pan par hua mèn baꞌ cheleꞌ nuꞌ ya tiꞌ pan par hua mèn baꞌ, àꞌ?
\p
\v 38 Jesús ndxab loo myenꞌ:
\p ―¿Plá pan ngue no guꞌ, àꞌ? Huaa tee huiꞌ guꞌ, ñeeneꞌ.
\p Coꞌseꞌ ngua tee huiꞌ myenꞌ, ndyeꞌth myenꞌ. Ndxab myenꞌ loo Jesús:
\p ―Pente nzo gaꞌy pan no chop mbèel no maste.
\p
\v 39 Sya, mnibeꞌ Jesús loo mèna tyub thìb tant thìb tant mèn ndxèꞌ baꞌ ndxèꞌ baꞌ loo yiixii coꞌ nzoꞌf tya.
\v 40 No mdub thìb tant mèn, coꞌ nee diꞌs, thìb ayo mèn no tedib tant mèn, coꞌ nee diꞌs, choꞌ psiꞌ mèn. No tataa tolo mdub mèn ndxèꞌ baꞌ ndxèꞌ baꞌ.
\v 41 Sya, mxen Jesús rye gaꞌy pana no ryop mbèela. Látha, mbuiꞌ Jesús loo béꞌ. Ndxab Jesús loo Diox:
\p ―Diox quix Uꞌ, Diox par pan ndxèꞌ no mbèel ndxèꞌ coꞌ hua nuꞌ.
\p Sya, mchìꞌx Jesús pana. Thìb leꞌ thìb leꞌ mbli Jesús pana. Ngoloa, mbli Jesús mbyarꞌ pana. No mdaꞌ Jesús pana loo myenꞌ xinꞌ mtéꞌth Jesús par quiꞌth myenꞌ pana loo mèna. No mbliꞌth myenꞌ ryop mbèel coꞌ mbli Jesús ngòc thìb leꞌ thìb leꞌ coꞌ mbyarꞌ loo mèna, ne.
\v 42 Nduhua ryete mèna axta plóthe.
\v 43 No coꞌseꞌ ngolo nduhua mèna, msè myenꞌ xinꞌ mtéꞌth Jesús siꞌ fchop cardor pan no mbèel coꞌ mbyanꞌ xoꞌf coꞌ mbli Jesús mbyarꞌ no coꞌ mbli Jesús ngòc thìb leꞌ thìb leꞌ.
\v 44 No loo rye mèn coꞌ nduhua pana no mbèela ngòcqueꞌ gaꞌy mil mèn, ante mènbiꞌ. Xàꞌqueꞌ nduhua mèngot no xàꞌqueꞌ nduhua myenꞌ bix.
\s Jesús nde nii loo nít loo lagun.
\r (Mt. 14.22–27; Jn. 6.16–21)
\p
\v 45 Sya, láth ngue nii Jesús Diox loo mèn, Jesús mtelꞌ ner myenꞌ xinꞌ mtéꞌth Jesús loo yòoyaa par zin myenꞌ yèez Betsaid ndooreꞌ zin Jesús.
\v 46 Coꞌseꞌ ngolo gunii Jesús Diox loo mèna, mxen Jesús ned. Nda Jesús loo thìb yii coꞌ ndub gaxte tya par cuez Jesús Diox.
\v 47 Coꞌseꞌ ngulàa yálꞌ izlyoꞌ huiza, pente nda tee myenꞌ grolthe loo lagun. Leꞌ Jesús na, thidte mbyanꞌ loo yòo biiz.
\v 48 Látha, ñee Jesús xá ndxàc myenꞌ. Ya neꞌñeede myenꞌ xá mod li myenꞌ par tetee myenꞌ yòoyaa tac ngue chep mbii yòoyaa myenꞌ rye lad. Per coꞌseꞌ ngóol coyor cuar xex xex mzin Jesús loo myenꞌ. Nde tee nii Jesús loo nít loo lagun. Mblyaꞌs Jesús sangnguriꞌth Jesús loo myenꞌ coꞌteꞌ ndub caꞌ yòoyaa myenꞌ loo lagun.
\v 49 Coꞌseꞌ gunèe myenꞌ xinꞌ mtéꞌth Jesús nde tee nii Jesús loo nít loo lagun, mbli myenꞌ xtùuz conꞌ mal ñèe myenꞌ. Sya, mtlo myenꞌ, mbez yèe myenꞌ
\v 50 tac ryete myenꞌ gunèe nde tee Jesús loo nít loo lagun. Per ale neꞌñeede myenꞌ cóna. Cona, mzyeb myenꞌ. Per Jesús gunii loo myenꞌ. Ndxab Jesús loo myenꞌ:
\p ―Neꞌzyebte guꞌ, ey. Blo guꞌ valor loo guꞌ. Daa na. Susqueꞌ nazeꞌf guꞌ, yey.
\p
\v 51 Sya, ngòo Jesús loo yòoyaa coꞌteꞌ nzo myenꞌ. Ngoloa, xèegà nguled mxyoꞌf mbii. Leꞌ myenꞌ na, sate más mzyeb no ante mbuiꞌ myenꞌ no ante gunaa myenꞌ cón ngòc loo myenꞌ xal ndee tee nii Jesús loo nít loo lagun.
\v 52 Tataa ngòca loo myenꞌ tac myenꞌ tarte taꞌ cuent coꞌ huenlequeꞌ cón cheꞌn yalguzyeꞌ coꞌ mbli Jesús ngòc loo pana por tatabeꞌ naad myenꞌ no tatabeꞌ nguud myenꞌ.
\s Jesús ngue teyac mèn yíiz leꞌn yèezyaꞌ cheꞌn làaz mèn genesaret.
\r (Mt. 14.34–36)
\p
\v 53 Ngoloa, tolo mtetee myenꞌ barc. Tolo nda tee myenꞌ axta mzin myenꞌ tedib lad ro lagun con Jesús loo xyòn mèn coꞌ nac làaz mèn genesaret. Ro laguna mtedóꞌ myenꞌ yòoyaa lad thìb quèe.
\v 54 Per texal ngroꞌ no Jesús myenꞌ leꞌn yòoyaa, mèn coꞌ nzo tya lueg mblibeꞌ Jesús.
\v 55 Sya, mqueꞌ mèna carre. Ngua mèna rye yèezyaꞌ coꞌteꞌ nac làaz mèn. No mtlo mèna, nde no mèna rye mèn yíiz loo cami axta coꞌteꞌ non mèn nzo Jesús.
\v 56 No nde no mèn mèn yíiz pál coꞌteꞌ ndxòo Jesús no coꞌteꞌ ndriꞌth Jesús, que naca ranch, que naca leꞌn yèez, que naca ned huan. Nguix mèn rye mèn yíiz ro ned coꞌteꞌ ndriꞌth Jesús. No nalyat mbez mèn loo Jesús laꞌ Jesús gàal mèn ante xab Jesús. Leꞌ sya, ryete mèn coꞌ ante mbuàal xab Jesús, ale mbyac mèna loo yíiz.
\c 7
\s Trèꞌ ndluꞌ chó conꞌ ntezab loo mèn par ndxàc mèn mèn zab loo Diox.
\r (Mt. 15.20)
\p
\v 1 Látha, mbii gax plá mèn coꞌ nac mèn xleyꞌ farise no ndxep mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn loo Jesús. Mèna nac mèn ciuda Jerusalén. Nde mèna par ned ciuda Jerusalén loo Jesús.
\v 2 Mèna gunèe leꞌ ndxep myenꞌ xinꞌ mtéꞌth Jesús neꞌntechte myenꞌ yaꞌ myenꞌ par tyub myenꞌ hua myenꞌ. Nzi yuhua myenꞌ con yaꞌ myenꞌ coꞌ neꞌntechte myenꞌ, coꞌ nee diꞌs, taate yaꞌ myenꞌ nzi yuhua myenꞌ pan. Neꞌntechte myenꞌ yaꞌ myenꞌ xal nac costumbr coꞌ ngue no mèn xleyꞌ farise ntech mèn yaꞌ mèn ndooreꞌ hua mèn. No por conate mquexùꞌ mqueꞌ fals mèna myenꞌ loo Jesús.
\v 3 Tac mèn coꞌ nac mèn xleyꞌ farise no ryete mèn nación Israel nzi no costumbr no mbed no mèna costumbr cheꞌn mèngool. Tac cheleꞌ mèna neꞌtechte yaꞌ mèn lillequeꞌ ndooreꞌ tyub mèna par hua mèna, más quee lezoꞌ mèna neꞌhuade mèna.
\v 4 No coꞌseꞌ mbere mèna, ndyeꞌth mèna, ngua tiꞌ mèna loo xbiꞌ, neꞌhuade mèna cheleꞌ mèna neꞌlide xal nac mod cheꞌn costumbr coꞌ ndxàp mèna coꞌ ntech mèna yaꞌ mèna. No nzoreꞌ más mod cheꞌn costumbr coꞌ mbed no mèna coꞌ nac ntech mèna taz, plat, camplor, no taamas yèt coꞌ ndli zinꞌ mèna cosin. No masreꞌ conꞌ ndli mèna. Ale axta lunꞌ coꞌteꞌ ndxàa mèna, ntech mèna.
\v 5 Sya, mèn coꞌ nac mèn xleyꞌ farise no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn, mnibdiꞌs mèna loo Jesús. Ndxab mèna loo Jesús:
\p ―¿Chonon indlide myenꞌ xinꞌ mtéꞌth lùu cas costumbr coꞌ mtanꞌ mèngool loo naꞌ, àꞌ? Ale tuaꞌte yaꞌ myenꞌ ndxuhua myenꞌ xít myenꞌ no luaꞌ myenꞌ. Intechte myenꞌ yaꞌ myenꞌ.
\p
\v 6 Jesús mcàb loo mèna. Ndxab Jesús:
\p ―Aa. Yende conꞌ niin loo guꞌ. Bien lal ro Sayi coꞌseꞌ ndxab Sayi no ngroꞌ diꞌs ro Sayi coꞌ mdeꞌth diꞌs coꞌ ndxab Diox leꞌ guꞌ anzeꞌf ndxác ntembìi guꞌ ro guꞌ no ntembìi guꞌ xtiꞌs guꞌ loo Diox coꞌseꞌ mqueꞌ Sayi yeꞌs cón cheꞌn guꞌ loo libr coꞌ nac xtiꞌs Diox coꞌ mbez taandxèꞌ:
\pi1 Mèn baꞌ mbez diꞌs guryath no diꞌs guryèn loon con diꞌs coꞌ ndryoꞌ ro mèn. Per conꞌ coꞌ nzo leꞌn lezoꞌ mèn no conꞌ coꞌ ndli mèn xtùuz ndluꞌ loon pà li mèn conꞌ guryath no conꞌ guryèn loon. No pà li mèn cas loo cón chenen.
\pi1
\v 7 Yende cón ntac coꞌ ndli mèn coꞌseꞌ ncòoꞌ mèn yéc mèn loon no coꞌseꞌ mbez mèn lèen, ne, tac ley coꞌ ndluꞌ mèn no yalñibeꞌ coꞌ ndxàp mèn nac xleyꞌ no yalñibeꞌ cheꞌn mèn izlyoꞌpeꞌ ndxèꞌ.
\m
\v 8 Guniin diꞌs ndxèꞌ loo guꞌ tac guꞌ ndláꞌ conꞌ coꞌ nac yalñibeꞌ cheꞌn Diox par neꞌlide guꞌ cas coꞌ ñibeꞌ Diox loo guꞌ par li guꞌ. Más ndli guꞌ par ndli guꞌ costumbr cheꞌn mèngool coꞌ mbed no guꞌ coꞌ nac coꞌ ntech mèn camplor no taz no plat. No ndli guꞌ taamasreꞌ conꞌ coꞌ nac leque xal conꞌ ndli guꞌ.
\p
\v 9 Tataa ndxab Jesús loo mèna:
\p ―Cona, ngue niin loo guꞌ: Más ndláꞌ guꞌ coꞌ nac yalñibeꞌ cheꞌn Diox thìb lad loo guꞌ par tolo ndli guꞌ ryethe conꞌ coꞌ nac costumbr coꞌ mtanꞌ xudgool guꞌ loo guꞌ.
\v 10 Moisés mnibeꞌ loo mèn nación Israel tiempa coꞌseꞌ ndxab Moisés taandxèꞌ:
\pi1 Gòp guꞌ mod gunèe guꞌ xud guꞌ. No gòp guꞌ mod gunèe guꞌ xnaꞌ guꞌ. Leꞌ mèn coꞌ ñii yèe ñii tìi cón cheꞌn xud no cón cheꞌn xnaꞌ na, Moisés mnibeꞌ loo mèn guth mèn mèna.
\m
\v 11 Leꞌ guꞌ na, ale mbez nzoqueꞌ mod gab thìb mbiꞌ loo xud mbiꞌ no loo xnaꞌ mbiꞌ taandxèꞌ mod: Pay, May, yende mod lyath non guꞌ tac ryete conꞌ coꞌ nac conꞌ ngue non coꞌ ndxàpen nac coꞌ mcàbgònen loo Diox, coꞌ nee diꞌs, naca cheꞌn Diox.
\v 12 Tataa mbez guꞌ loo mèn mastaleꞌ huax vez neꞌndaꞌde mèn conꞌa loo Diox par ngàc conꞌa cheꞌn Diox. No cheleꞌ thìb mbiꞌ gab tataa loo xud mbiꞌ no loo xnaꞌ mbiꞌ, guꞌ ndooleꞌ par gab guꞌ loo mbiꞌ: Ya inquinte lyath nol xudl no lyath nol xnaꞌl, ndee.
\v 13 Leꞌ sya, con conꞌ ndli guꞌa, ndluꞌ guꞌ yende cón ntac conꞌ coꞌ nac yalnibeꞌ cheꞌn Diox loo guꞌ por cón cheꞌn costumbr coꞌ mbed no guꞌ coꞌ ndli thìb ned guꞌ no coꞌ ndli tedib ned guꞌ. No anzeꞌf thìb conꞌ ndli guꞌ coꞌ lalqueꞌ nac xal conꞌ coꞌ ndli guꞌa.
\p
\v 14 Jesús ngurez mèn tedib vez. Ndxab Jesús loo mèn:
\p ―Bìn guꞌ coꞌ ngue toodizen loo guꞌ ndxèꞌ. No ndlyazen taꞌ guꞌ lugar yaaꞌd diꞌs ndxèꞌ leꞌn lezoꞌ guꞌ par taꞌ guꞌ cuent cón nee diꞌs ndxèꞌ.
\v 15 Nde niin thìb conꞌ loo guꞌ: Nec thìb conꞌ coꞌ nac conꞌ ndxuhua mèn indli malte no indlide conꞌ zab loo mèn. Ndxeꞌlequeꞌ, rye conꞌ coꞌ ndryoꞌ leꞌn lezoꞌ mèn no conꞌ coꞌ ndli mèn xtùuz, conꞌa ndli ntezab mèn no ndli ndxàc mèn mèn yeꞌrsinꞌ no mèn zab loo Diox.
\v 16 Guꞌ coꞌ nzi yòn diꞌs ndxèꞌ no guꞌ coꞌ ndxaaꞌd diꞌs leꞌn lezoꞌ, ftenꞌ guꞌ diꞌs ndxèꞌ leꞌn lezoꞌ guꞌ no ftaꞌ guꞌ cuent coꞌ huenlequeꞌ cón nee diꞌs diꞌs ndxèꞌ.
\p
\v 17 Coꞌseꞌ mbláꞌ Jesús mèna no ngòo Jesús liz thìb mbiꞌ, myenꞌ xinꞌ mtéꞌth Jesús mnibdiꞌs loo Jesús cón cheꞌn diꞌs coꞌ mtetac Jesús loo mèn.
\v 18 Jesús ndxab loo myenꞌ:
\p ―¿Chéꞌ no guꞌ indaꞌde cuent cón nee diꞌs coꞌ mtetaquen loo mèna, càꞌ? ¿Chéꞌ iñeede guꞌ no chéꞌ indaꞌde guꞌ cuent leꞌ ryete conꞌ coꞌ nac xít mèn no luaꞌ mèn coꞌ ndxuhua mèn ndxòo leꞌn xtiꞌ mèn? No indlide conꞌa conꞌ yeꞌrsinꞌ loo mèn par li mèn conꞌ yeꞌrsinꞌ loo Diox.
\v 19 Tac conꞌ coꞌ ndxuhua mèn indxòode leꞌn lezoꞌ mèn no leꞌn xtùuz mèn. Ndxeꞌlequeꞌ, leꞌi ndxòo leꞌn xtiꞌ mèn no leꞌn pans mèn. Ndxeloa, ndriꞌtha loo mèna coꞌseꞌ nda mèn mandad mèn.
\p Tataa ndxab Jesús loo myenꞌ par mbluꞌ Jesús cón cheꞌn diꞌsa loo myenꞌ leꞌ ryete conꞌ ndxuhua mèn nambìiqueꞌ nac.
\v 20 Jesús ndxab loo myenꞌ xinꞌ mtéꞌth Jesús, ne:
\p ―Conꞌ coꞌ ndryoꞌ leꞌn lezoꞌ mèn no conꞌ coꞌ ndli mèn xtùuz, conꞌa ndli leque mèn ndli conꞌ yeꞌrsinꞌ loo Diox no ndxàc mèn mèn yeꞌrsinꞌ loo Diox.
\v 21 Tac leꞌn lezoꞌ mèn ndryoꞌ chol xtùuz yeꞌrsinꞌ coꞌ ndli mèn xtùuz, anggab naꞌi, xtùuz coꞌ ndli mèn coꞌseꞌ ndlyaꞌs mèn li mèn yalburrid; no xtùuz coꞌ ndli mèn coꞌseꞌ ndlyaꞌs mèn cuaꞌn mèn xinꞌ huan mèn; no xtùuz coꞌ ndli mèn coꞌseꞌ ndlyaꞌs mèn guthxùꞌ mèn xtàa mèn;
\v 22 no xtùuz coꞌ ndli mèn coꞌseꞌ ndlyaꞌs mèn li huanꞌ mèn; no xtùuz coꞌ ndli mèn coꞌseꞌ ndlyaꞌs mèn nqueliꞌth mèn cón cheꞌn xtàa mèn; no xtùuz coꞌ ndli mèn coꞌseꞌ ndlyaꞌs mèn li mèn chol conꞌ yeꞌrsin; no xtùuz coꞌ ndli mèn coꞌseꞌ ndlyaꞌs mèn quedìi mèn xtàa mèn; no xtùuz coꞌ ndli mèn coꞌseꞌ indlyaꞌste mèn thyon mèn loo conꞌ yeꞌrsinꞌ coꞌ ngue li mèn; no xtùuz coꞌ ndli mèn coꞌseꞌ ndxàn lezoꞌ mèn ñèe mèn xtàa mèn; no xtùuz coꞌ ndli mèn coꞌseꞌ ndxòn mèn cuent yix no nteriꞌth mèn cuent yix loo xtàa mèn; no xtùuz coꞌ ndli mèn coꞌseꞌ ndyeꞌs mèn loo xtàa mèn no nxyalꞌ mèn loo xtàa mèn; no xtùuz coꞌ ndli mèn par li mèn conꞌ coꞌ indaꞌde taamas mèn cuent cón ngue li mèn.
\v 23 Ryete conꞌ yeꞌrsinꞌa ndryoꞌ ndlyenꞌ leꞌn lezoꞌ mèn par tyub yoꞌf lezoꞌ mèn par li mèn conꞌ coꞌ ndli mèn xtùuz. No ntezab ryete conꞌa xtùuz mèn no lezoꞌ mèn par ndxàc mèn mèn zab no mèn yeꞌrsinꞌ loo Diox.
\s Thìb xaꞌgot tith ngolaꞌs loo Jesús no loo cón cheꞌn Jesús.
\r (Mt. 15.21–28)
\p
\v 24 Ngoloa, mbii Jesús tya. Nda Jesús leꞌn rye yèezyaꞌ coꞌ nac yèezyaꞌ cheꞌn làaz mèn ciuda Tir no coꞌ nac yèezyaꞌ cheꞌn làaz mèn ciuda Sidón. Jesús ngòo liz thìb mbiꞌ. No mblyaꞌs Jesús yende chó mèn non nzo Jesús liz mbiꞌa. Per neꞌngácte Jesús ngàca tataa loo Jesús. No yende mod ngaꞌs Jesús loo mèna.
\v 25 Setilte mbìn thìb xaꞌgot coꞌ ngòc xnaꞌ thìb mzaꞌ coꞌ mque no mbii cheꞌn xpii yeꞌrsinꞌ leꞌ Jesús nzo liz mbiꞌa. Mbiꞌth xnaꞌ mzaꞌ loo Jesús. No mdub xib xnaꞌ mzaꞌ loo Jesús.
\v 26 Xaꞌgota ngòc thìb xaꞌgot tith. Ngòc xaꞌgota mèn nación Sirofenis. Mbiꞌth xaꞌgot loo Jesús. Nalyat mdeꞌb ro xaꞌgota. Mnaꞌb xaꞌgot diꞌs loo Jesús par ante nii Jesús ryo xpii yeꞌrsinꞌa loo mzaꞌ, rsap xaꞌgot.
\v 27 Per Jesús asembli, mtetac Jesús thìb diꞌs loo xaꞌgot. Ndxab Jesús loo xaꞌgot:
\p ―Laꞌa hua myenꞌ ner. Tac ihuente naca teche mèn pan loo myenꞌ par taꞌ mèn pana hua mbac.
\p
\v 28 Per máa xaꞌgot lueg mcàb loo Jesús. Ndxab xaꞌgot:
\p ―Aa, Tad, lìcqueꞌ coꞌ nee Uꞌ baꞌ. Yende cón niin loo Uꞌ. Per neequeꞌ Uꞌ, Tad, axta rye mbac coꞌ nzi tee ned baꞌ nde xànꞌ mes par nthop mbac rye pedaz pan coꞌ ngobii myenꞌ xànꞌ mes par hua mbac. Nthop mbac. Ndxuhua mbac.
\p
\v 29 Sya, ndxab Jesús loo gunaꞌ:
\p ―Aa, huenqueꞌ mcàbl loon xal nac diꞌs coꞌ mtetaquen lool. No mdaꞌl cuent cón nee diꞌs diꞌsa. Nzoqueꞌ mod biil. Ngroꞌleꞌ xpii yeꞌrsinꞌ coꞌ ngòo loo rsapl, ndee.
\p
\v 30 Coꞌseꞌ mzin xaꞌgot liz xaꞌgot, gunèe xaꞌgot leꞌ mzaꞌ naxleꞌ loo lunꞌ. Leꞌ xpii yeꞌrsinꞌa na, ngroꞌleꞌ loo mzaꞌ.
\s Jesús mteyac thìb mbiꞌ mud coꞌ mque no yíiz cueꞌ.
\p
\v 31 Mbere Jesús, ngroꞌ Jesús leꞌn rye yèezyaꞌ coꞌ nac yèezyaꞌ cheꞌn làaz mèn ciuda Tir. Ngua riid Jesús leꞌn rye yèezyaꞌ cheꞌn làaz mèn ciuda Sidón no leꞌn rye yèezyaꞌ cheꞌn làaz mèn decápolis axta mzin Jesús ro lagun coꞌ nziriꞌ loo xyòn mèn coꞌ nac cheꞌn làaz mèn galile tedib vez.
\v 32 Tya, ngua no mèn thìb mbiꞌ mud loo Jesús. Nde nxonꞌ, ncueꞌ nza mbiꞌ. Nalyat mdeꞌb ro mèn. Mnaꞌb mèn diꞌs loo Jesús xoꞌf Jesús yaꞌ Jesús lad mbiꞌ par teyac Jesús ryop yíiz coꞌ ngue no mbiꞌ.
\v 33 Mbeꞌ Jesús mbiꞌa thìb lad loo mèn par mdyee Jesús cuen yaꞌ Jesús leꞌn nza mbiꞌ. Ngoloa, mxuc Jesús loo thìb cuen yaꞌ Jesús no mbuàal Jesús looz mbiꞌ con cuen yaꞌ Jesús.
\v 34 Ngoloa, chàa, mbuiꞌ Jesús loo béꞌ. Mdiꞌ lezoꞌ Jesús. Láth ngue huiꞌ Jesús loo béꞌ, ndxab Jesús:
\p ―Efata, coꞌ nee diꞌs, Fxalꞌ.
\p
\v 35 Látha, chàa, mxyalꞌ nza mbiꞌ muda. No mbìn mbiꞌ ruid. No luega, ndxeꞌslequeꞌ mdoodiꞌs mbiꞌ tac Jesús mbli ngro xban looz mbiꞌ.
\v 36 Ngoloa, mnibeꞌ yèe Jesús loo mèn yende chó loo mèn taꞌ mèna cuent conꞌ coꞌ mbli Jesús. Per lugar de gòn mèna diꞌs, yende chó loo mèn ndaꞌ mèn cuent, ale sate más coꞌ mbli mèna. Mdaꞌ mèna cuent conꞌ mbli Jesús.
\v 37 Leꞌ rye mèn coꞌ nziriꞌ tya na, ante ngüiꞌ mèna no ante ñaa mèna loo conꞌ mbli Jesús. Mbez mèna:
\p ―Ryete conꞌ huenqueꞌ mbli Jesús. Ale axta ndli Jesús leꞌ mèn coꞌ ncueꞌ ndxòn diꞌs no ndli Jesús leꞌ mèn mud ndyoodiꞌs.
\c 8
\s Jesús mbli par nduhua thap mil mèn.
\r (Mt. 15.32–39)
\p
\v 1 Leꞌxqueꞌ leꞌn huiza, anzeꞌf thìb mèn mqueltàa loo Jesús. Nde nxonꞌ, yende cón ngue no mèna par hua mèna. Sya, ngurez Jesús myenꞌ xinꞌ mtéꞌth Jesús. Ndxab Jesús loo myenꞌ:
\p
\v 2 ―Anzeꞌf ndlyat lezon ñèen prob mèn coꞌ nziriꞌ baꞌ, cara. Más de cona, ndxàcleꞌ son huiz nziriꞌ mèn baꞌ con daa no yende cón ngue no mèn par hua mèn.
\v 3 Cheleꞌ daa telꞌ mèn par bii mèn no tarte hua mèn, tguuꞌs mèn ned bii mèn. Tac nzo ndxep mèn baꞌ anzeꞌf tith ngroꞌ par nde mèn loon.
\p
\v 4 Myenꞌ xinꞌ mtéꞌth Jesús mcàb. Ndxab myenꞌ loo Jesús:
\p ―¿Per xá mod ndlyaꞌs Uꞌ gàc hua mèn trèꞌ coꞌteꞌ yende chó mèn nac par tiꞌ mèn conꞌ hua mèn, Tad?
\p
\v 5 Jesús mnibdiꞌs loo myenꞌ. Ndxab Jesús:
\p ―¿Plá pan ngue no guꞌ, àꞌ?
\p Myenꞌ mcàb. Ndxab myenꞌ:
\p ―Gaz pan no maste ngue no nuꞌ.
\p
\v 6 Sya, mnibeꞌ Jesús loo mèn tyub mèn loo yòo. Làth xtauꞌa, mxen Jesús rye gaz pana. No ndxab Jesús loo Diox:
\p ―Diox quix Uꞌ, Diox, por pan ndxèꞌ.
\p Ngoloa, mchìꞌx Jesús gaz pana. Mdaꞌ Jesús pana loo myenꞌ xinꞌ mtéꞌth Jesús. Leꞌ myenꞌ na, mbliꞌth pana loo mèna.
\v 7 Mque no myenꞌ xinꞌ mtéꞌth Jesús plá mbèelli bix, ne. Jesús mbli léyꞌ mbèelli bixa no mnibeꞌ Jesús loo myenꞌ liꞌth myenꞌ mbèelli bixa loo mèn, ne.
\v 8 Sya, ryete mèna nduhua pan no mbèelli bixa axta plóthe mblyaꞌs mèn. Ngolo nduhua mèna, mthop myenꞌ gaz cardor leꞌ pan coꞌ mbyanꞌ xoꞌf loo gaz pan no loo mbèelli bix coꞌ mbli Jesús mbyarꞌ.
\v 9 Ryete mèn coꞌ nduhuaa, neꞌqueꞌ thap mil mèn. Ngoloa, gunii Jesús Diox loo mèna. Ndyàa Jesús con myenꞌ xinꞌ mtéꞌth Jesús.
\v 10 Ngòo Jesús leꞌn thìb yòoyaa con myenꞌ xinꞌ mtéꞌth Jesús. Nda Jesús par leꞌn rye yèezyaꞌ coꞌ nac làaz mèn dalmanut con myenꞌ xinꞌ mtéꞌth Jesús.
\s Mèn xleyꞌ farise ngue naꞌb loo Jesús li Jesús thìb señ coꞌ nac yalguzyeꞌ loo mèn.
\r (Mt. 16.1–4; Lc. 12.54–56)
\p
\v 11 Látha, mzin mèn xleyꞌ farise loo Jesús. Mtlo mèna, mdoodiꞌs no mèna Jesús. Par gàal diꞌs mèna Jesús, mbli mèna thìb conꞌ par ñee mèna ñeeneꞌ chéꞌ tli Jesús conꞌ ndlyaꞌs mèna li Jesús. Mnaꞌb mèna loo Jesús li Jesús par gàc thìb conꞌ loo béꞌ xal thìb conꞌ coꞌ nac yalguzyeꞌ loo mèna.
\v 12 Sya, axta leꞌn lezoꞌ Jesús mdiꞌ lezoꞌ Jesús. Ndxab Jesús loo mèn coꞌ nziriꞌ loo Jesús:
\p ―¿Chonon ñaꞌb mèn xleyꞌ farise coꞌ nziriꞌ goꞌ loon par lin gàc thìb conꞌ xal thìb señ loo béꞌ coꞌ nac thìb yalguzyeꞌ loo mèn baꞌ, yey? Lìcpeꞌ baꞌi, na nii loo guꞌ: Nec thìb señ neꞌgàcte loo mèn baꞌ thidtene.
\p
\v 13 Ngoloa, ngòo Jesús leꞌn yòoyaa. Ndyàa Jesús tedib lad ro lagun tedib vez. Leꞌ mèn coꞌ ngure no Jesús tya na, tyate mbláꞌ Jesús mèna. Gunee mèna cón cheꞌn mèna.
\s Trèꞌ ndluꞌ cón cheꞌn mod, coꞌ ngòp mèn xleyꞌ farise, coꞌ mtetac Jesús leꞌ moda nac xal dii levadur.
\r (Mt. 16.5–12)
\p
\v 14 Nde nxonꞌ, neꞌnteꞌde lezoꞌ myenꞌ xinꞌ mtéꞌth Jesús nghueꞌ myenꞌ pan. Ante sa pan no maste mque no myenꞌ leꞌn yòoyaa.
\v 15 Sya, asembli Jesús. Ndxab Jesús loo myenꞌ:
\p ―Anderhuen guꞌ, myenꞌ, leque guꞌ quenap guꞌ guꞌ loo dii levadur cheꞌn mèn xleyꞌ farise no loo dii levadur cheꞌn Herod coꞌ nac rey.
\p
\v 16 Leꞌ myenꞌ xinꞌ mtéꞌth Jesús na, mtlo myenꞌ, ndxab myenꞌ loo thìb xtàa myenꞌ no loo tedib xtàa myenꞌ:
\p ―¿Chéꞌ por neꞌnteꞌde lezoꞌ naꞌ ndiꞌ naꞌ pan, cona tataa gunee Jesús loo naꞌ, càꞌ? Thìb descuid conai, ¿léꞌ?
\p
\v 17 Per Jesús mdaꞌ cuent no mdenꞌ lezoꞌ Jesús cón cheꞌn diꞌs coꞌ gunii myenꞌ. Ndxab Jesús loo myenꞌ:
\p ―¿Chonon mbez guꞌ leꞌ guꞌ ingue node pan, àꞌ? ¿Chéꞌ axta nalleꞌ tarte taꞌ guꞌ cuent coꞌ mbezen loo guꞌ coꞌ huenlequeꞌ, càꞌ? ¿Chonon susqueꞌ naad guꞌ no nguud guꞌ, yoo?
\v 18 Ingüiꞌde guꞌ con ngudloo guꞌ, ndee. No neꞌ neꞌ indxòn guꞌ conꞌ con nza guꞌ. ¿Chéꞌ neꞌtyede lezoꞌ guꞌ huax conꞌ coꞌ nde teeleꞌ ndlin, càꞌ?
\v 19 ¿Chéꞌ, lìcqueꞌ, neꞌtyede lezoꞌ guꞌ coꞌseꞌ mchìꞌxen gaꞌy pan coꞌ nduhua gaꞌy mil ante mènbiꞌ no xàꞌqueꞌ nduhua mèngot no myenꞌ bix, càꞌ? Tiempa, ¿plá cardor leꞌ pan coꞌ beꞌ mbyanꞌ xoꞌf coꞌ mblin mbyarꞌ mthop guꞌ, àꞌ?
\p Myenꞌ ndxab:
\p ―Lìca, Tad, mthop nuꞌ siꞌ fchop cardor leꞌ pan coꞌ beꞌ mbyanꞌ xoꞌf.
\p
\v 20 Tolo ndxab Jesús loo myenꞌ, ne:
\p ―¿Chéꞌ neꞌtyede lezoꞌ guꞌ, ne, coꞌseꞌ mchìꞌxen gaz pan par nduhua thap mil mèn, plá cardor leꞌ pan coꞌ beꞌ mbyanꞌ xoꞌf loo gaz pan coꞌ mblin mbyarꞌ mthop guꞌ, àꞌ?
\p Myenꞌ mcàb loo Jesús tedib vez. Ndxab myenꞌ:
\p ―Lìca, Tad, mthop nuꞌ gaz cardora tiempa, ne.
\p
\v 21 Sya, ndxab Jesús loo myenꞌ:
\p ―Ngolo gunee guꞌi, xàa. No axta nalleꞌ, ¿tarte taꞌ guꞌ cuent coꞌ huenlequeꞌ, cà? ¿Máa yob yéc guꞌ, na?
\s Jesús mteyac thìb mbiꞌ sieu leꞌn thìb yèez coꞌ lèe Betsaid.
\p
\v 22 Ngoloa, mzin no Jesús myenꞌ xinꞌ mtéꞌth Jesús leꞌn thìb yèez coꞌ lèe Betsaid. Tya, mbiꞌth no mèn thìb mbiꞌ sieu loo Jesús. Nalyat mdeꞌb ro mèna. Mnaꞌb mèna favor loo Jesús par gàal Jesús ngudloo mbiꞌ sieu par tyub xnìi ngudloo mbiꞌ. Huiꞌ mbiꞌ.
\v 23 Sya, mxen Jesús yaꞌ mbiꞌ sieu. Mbeꞌ Jesús mbiꞌ thìb lad ro yèez. Tya, mtà Jesús rsuc Jesús ngudloo mbiꞌ. No mxoꞌf Jesús yaꞌ Jesús lad mbiꞌ. Ngoloa, mnibdiꞌs Jesús loo mbiꞌ. Ndxab Jesús:
\p ―Mbi, ¿chéꞌ ngue huiꞌl mase ndxep?
\p
\v 24 Mbiꞌ coꞌ ngòc sieua mbuiꞌ ndxèꞌ no mbuiꞌ baꞌ. Ndxab mbiꞌ loo Jesús:
\p ―Aa. Daa ngue huiꞌ loo mèn coꞌ nziriꞌ goꞌ. Per ngüiꞌen mèn xal yaa xcàl. No ngüiꞌen ndyee mèn.
\p
\v 25 Mbere Jesús. Mbuàal Jesús ngudloo mbiꞌ con yaꞌ Jesús tedib vez. Sya, por derech, ndxeꞌslequeꞌ mbuiꞌ mbiꞌ loo ryete conꞌ no ale sandante mbuiꞌ mbiꞌ.
\v 26 No ndxab Jesús loo mbiꞌ:
\p ―Neꞌyòodel leꞌn yèez Betsaid luega. Neꞌ neꞌ gabl loo mèn yèez conꞌ mbli nonl. Sya, mtelꞌ Jesús mbiꞌ. Ndyàa mbiꞌ par liz mbiꞌ.
\s Pedr mblo ro leꞌ Jesús nac Cristpeꞌ.
\r (Mt. 16.13–20; Lc. 9.18–21)
\p
\v 27 Ngoloa, ngua Jesús con myenꞌ xinꞌ mtéꞌth Jesús leꞌn rye yèezyaꞌ cheꞌn làaz mèn ciuda Cesar coꞌ mnibeꞌ thìb mbiꞌ coꞌ lèe Lip. Coꞌseꞌ ndoo Jesús ned nda Jesús con myenꞌ xinꞌ mtéꞌth Jesús, mnibdiꞌs Jesús loo myenꞌ xinꞌ mtéꞌth Jesús. Ndxab Jesús:
\p ―¿Xá nee guꞌ? ¿Chó mbez mèn nac daa, àꞌ?
\p
\v 28 Myenꞌ mcàb. Ndxab myenꞌ loo Jesús:
\p ―Ndxep mèn mbez leꞌ Uꞌ nac Juàn Bautist. Taandxep mèn mbez leꞌ Uꞌ nac Lii coꞌ mdeꞌth diꞌs coꞌ ndxab Diox. No nzoreꞌ taandxep mèn coꞌ mbez: Nzo chó mèngool coꞌ mdeꞌth diꞌs coꞌ ndxab Diox póla nac mbiꞌ baꞌ.
\p
\v 29 Sya, mnibdiꞌs Jesús loo myenꞌ xinꞌ mtéꞌth Jesús. Ndxab Jesús loo myenꞌ:
\p ―¿Guꞌ àꞌ? ¿Chó mèn mbez guꞌ nac daa?
\p Sya, chàa, ngroꞌ nxonꞌ Pedr loo Jesús. Ndxab Pedr:
\p Uꞌ nac yub Cristpeꞌ, Tad.
\p
\v 30 Per Jesús ndxab loo myenꞌ xinꞌ mtéꞌth Jesús yende chó loo gabte myenꞌ leꞌ Jesús nac yub Cristpeꞌ.
\s Jesús ngue taꞌ cuent loo myenꞌ xinꞌ mtéꞌth Jesús xá mod gath Jesús.
\r (Mt. 16.21–28; Lc. 9.22–27)
\p
\v 31 Sya, mtlo Jesús, noo noo mdaꞌ Jesús cuent loo myenꞌ xinꞌ mtéꞌth Jesús. Ndxab Jesús:
\p ―Daa, coꞌ mbal yáal loo izlyoꞌ xalqueꞌ ndxáal chol mèn loo izlyoꞌ, daa tyactìiqueꞌ. No tèꞌb rye mèngool, no mèn coꞌ nac jef loo rye nguleyꞌ, no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn daa.
\p No ndxab Jesús loo myenꞌ leꞌ rye mèna guth Jesús no coꞌseꞌ yilo son huiz nguth Jesús, Jesús ryo xban.
\v 32 Nalì mdaꞌ Jesús cuent ndxèꞌ loo myenꞌ xinꞌ mtéꞌth Jesús. Ngoloa, mbeꞌ xàꞌ Pedr Jesús thìb lad. Ale mtlo Pedr, mbyoo Pedr no mcoꞌx Pedr Jesús por ndxab Jesús diꞌsa loo myenꞌ.
\v 33 Per Jesús, chàa, mbere, xèe mbuiꞌ Jesús loo myenꞌ xinꞌ mtéꞌth Jesús. Sya, ndxab Jesús loo Pedr:
\p ―Biiche loon, Pedr. Teꞌ nac Mebizya nacl loon. Lùu ndluꞌ loon ndxàpl mod xal nac mod coꞌ ndxàp Mebizya. Tac lùu indyóode no indlidel xtùuz xal ndli Diox xtùuz. Ndxeꞌlequeꞌ, lùu ndli xtùuz xalqueꞌ ndli chol mèn izlyoꞌ xtùuz cón chenen.
\p
\v 34 Sya, ngurez Jesús myenꞌ xinꞌ mtéꞌth Jesús. No ngurez Jesús mèn coꞌ nziriꞌ no Jesús. Ndxab Jesús loo myenꞌ no loo rye mèna:
\p ―Cheleꞌ chó guꞌ ndlyaꞌs, lìcqueꞌ, tyoo nque guꞌ xísen, leque guꞌ bli par neꞌlide guꞌ conꞌ coꞌ ndyub yoꞌf lezoꞌ guꞌ par li guꞌi. Ndxeꞌlequeꞌ, gòp guꞌ lezoꞌ guꞌ no ñibeꞌ guꞌ loo lezoꞌ guꞌ par neꞌlide guꞌ conꞌ coꞌ ndyub yoꞌf lezoꞌ guꞌ. No blec lezoꞌ guꞌ par xec guꞌ tyactìi guꞌ coꞌseꞌ tub nguꞌs mèn guꞌ por cón cheꞌn daa ned nda naꞌ. Leꞌ sya, yaꞌ guꞌ too nque guꞌ xísen. Nda naꞌ.
\v 35 Tac mèn coꞌ ante ndoo lezoꞌ ndxath ndxeyꞌ no ndxath ndlyux mèn par que no mèn cheꞌnpeꞌ mèn ante loo izlyoꞌ ndxèꞌ, loo mèna neꞌtaꞌde Diox lugar ban mèn thidtene loo Diox. Per mèn coꞌ láꞌ ryethe conꞌ coꞌ nac yalndac no coꞌ nac yalgonꞌ cheꞌnpeꞌ mèn coꞌ gác li mèn gan loo izlyoꞌ ndxèꞌ por cón chenen no por cón cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes, loo mèna taꞌ Diox lugar par ban mèna thidtene loo Diox.
\v 36 Lomisqueꞌ ne, ¿cón coꞌ thìb mbiꞌ no chó yalndac gác li thìb mbiꞌ gan coꞌseꞌ gàc cheꞌnpeꞌ mbiꞌ dib athu loo izlyoꞌ tac cheleꞌ mbiꞌ tataa mod li, gab Diox loo mbiꞌa yende mod yòo ban no mbiꞌ Diox thidtene yiloa? Yende cón li mbiꞌ gan cheleꞌ mbiꞌ li tataa, ¿léꞌ?
\v 37 No ndlyazen ñee guꞌ loon. ¿Plál quix thìb mbiꞌ loo Diox par yòo ban no mbiꞌ Diox coꞌseꞌ ngolo gunii Diox loo mbiꞌ neꞌtyalte Diox yòo ban no mbiꞌ Diox, àꞌ? Yende mod li mbiꞌ gan li mbiꞌ tataa, ¿léꞌ?
\v 38 Tac cheleꞌ chó mèn coꞌ ndxelaꞌsleꞌ loon thyon loo cón chenen no thyon mèna taꞌ mèna cuent cón chenen loo mèn coꞌ nac mèn coꞌ thidtene indyubdiꞌste loon, mèn coꞌ ncuaꞌn xquin no xtol, daa ne, coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ, daa thyon loo Diox por cón cheꞌn mèna coꞌseꞌ galen loo izlyoꞌ ndxèꞌ con angl coꞌ nac angl natúꞌ no con ryethe conꞌ roo no conꞌ xèn coꞌ ndxàp xuden Diox.
\c 9
\p
\v 1 Tolo ndxab Jesús loo mèn, ne:
\p ―Lìcpeꞌ baꞌi, na nii loo guꞌ: Leꞌ ndxep guꞌ coꞌ nziriꞌ loon nalleꞌ, neꞌgathte guꞌ axtaqueꞌ ñèe guꞌ coꞌseꞌ gàc huiz coꞌ tlo ñibeꞌpeꞌ Diox loo mèn loo izlyoꞌ xal nac ryethe conꞌ roo no conꞌ xèn coꞌ nzo laꞌs nii Diox no coꞌ nzo laꞌs yaꞌ Diox.
\s Jesús mzyeꞌ loo loo son myenꞌ xinꞌ mtéꞌth Jesús.
\r (Mt. 17.1–13; Lc. 9.28–36)
\p
\v 2 Pente ndxàc xop huiz ndxab Jesús tataa loo mèn, mbeꞌ Jesús Pedr no Cob no Juàn. Nda tyonte Jesús con myenꞌ loo thìb yii roo. Tya, ale nzi huite myenꞌ, chàa, mzyeꞌ loo Jesús loo myenꞌ.
\v 3 Nde nxonꞌ, xab Jesús coꞌ noc Jesús ante mquée xnìi no ante nagus bèellequeꞌ gunaa. Gunaa xab Jesús xal xilꞌ, coꞌ nee diꞌs, nec thìb xaꞌgot coꞌ nzo loo izlyoꞌ neꞌgácte tech larꞌ ante nagus xal gunaa xab Jesús.
\v 4 Látha, gunèe yon myenꞌa Lii no Moisés. Ndyoodiꞌs no Lii ryop Moisés Jesús.
\v 5 Sya, ndxab Pedr loo Jesús:
\p ―Maistr, anzeꞌf huen naca nzo naꞌ trèꞌ. ¿Xá nee Uꞌ? ¿Chéꞌ toxcuaꞌ nuꞌ son ramad? Thìba par yòo Uꞌ. Tediba par yòo Moisés. No tediba par yòo Lii.
\p
\v 6 Per por mzyeb yon myenꞌ xinꞌ mtéꞌth Jesús, conꞌa axta neꞌ neꞌ ñee Pedr cón tyoodiꞌs Pedr loo Jesús.
\v 7 Látha, ngulàa beu. Mtauꞌ beu loo ryete xop xaꞌ coꞌteꞌ ngure xaꞌ. Leꞌn beua mbyèn thìb diꞌs coꞌ ndxab:
\p ―Mbiꞌ ndxèꞌ nac xganꞌ daa. Anzeꞌf ngudloon no lezon mbiꞌ coꞌ nac xganꞌ daa ndxèꞌ. Bìn guꞌ ro mbiꞌ.
\p
\v 8 Per texal nguát beu, chàa, mbuiꞌ ndxèꞌ mbuiꞌ baꞌ myenꞌ. Ya yende chó nac. Ya yende chó ñèe myenꞌ nziriꞌ con myenꞌ. Ante Jesús no maste nzo no myenꞌ.
\p
\v 9 Per coꞌseꞌ ngolo mbii Jesús con myenꞌ tya, no láth nde làa tùub Jesús con myenꞌ leꞌn yiia, ndxab Jesús loo myenꞌ yende chó loo gab myenꞌ cón cheꞌn conꞌ coꞌ gunèe myenꞌ. Ndxeꞌlequeꞌ, mnibeꞌ Jesús loo myenꞌ leꞌ myenꞌ taꞌ cuent cón cheꞌn Jesús, Jesús coꞌ mbiꞌth yáal loo izlyoꞌ xalqueꞌ ndxáal chol mèn loo izlyoꞌ, axta coꞌseꞌ yilo ryo xban Jesús làth mèn nguth.
\v 10 Por cona, xexte ngòc myenꞌ. Leꞌn lezoꞌte myenꞌ non myenꞌ cón gunèe myenꞌa. Per mnibdiꞌsqueꞌ myenꞌ loo xtàa myenꞌ. Ndxab myèn:
\p ―¿Cón nee diꞌs diꞌs coꞌ ngolo gunee Jesús loo naꞌ leꞌ Jesús ryo xban làth mèn nguth, àꞌ, cara?
\p
\v 11 Sya, mnibdiꞌs myenꞌ loo Jesús. Ndxab myenꞌ:
\p ―Tad, ¿chónon mbez mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn naquinqueꞌ ner Lii yiꞌth loo izlyoꞌ leque yiꞌth Crist loo izlyoꞌ, àꞌ?
\p
\v 12 Jesús mcàb. Ndxab Jesús loo myenꞌ:
\p ―Lìcqueꞌ leꞌ Lii yiꞌth ner. Per coꞌseꞌ yiꞌth Lii, Lii li nab mèn no teꞌth Lii loo mèn par taꞌ mèn lugar no tyal mèn yilaꞌs mèn loo Crist no yilaꞌs mèn cón cheꞌn Crist yiloa. Per ¿xá nac diꞌs coꞌ ndub loo libr coꞌ nac xtiꞌs Diox cón chenen, daa coꞌ mbal yáal loo izlyoꞌ xalqueꞌ ndxáal chol mèn loo izlyoꞌ ndxèꞌ? Loo libr coꞌ nac xtiꞌs Diox ndub diꞌs coꞌ ndxab leꞌ daa tactìiqueꞌ, no tèꞌb mèn daa thìb lad, no xìis no mèn daa, no yáp xyánꞌ mèn ñèe mèn daa.
\v 13 Per daa nii loo guꞌ leꞌ Lii mbiꞌthleꞌ. No mblileꞌ mèn coꞌ mblyaꞌs mèn con Lii xalqueꞌ ndub diꞌs loo libr coꞌ nac xtiꞌs Diox coꞌ ndluꞌ cón cheꞌn conꞌ coꞌ mquin ngòcqueꞌ loo Lii.
\s Jesús mteyac thìb mbyòo coꞌ mque no thìb xpii yeꞌrsinꞌ.
\r (Mt. 17.14–21; Lc. 9.37–43)
\p
\v 14 Texal mzin Jesús con Pedr no Cob no Juàn loo taamas myenꞌ xinꞌ mtéꞌth Jesús, gunèe Jesús nziriꞌ huax mèn loo myenꞌ xinꞌ mtéꞌth Jesús. No nziriꞌ mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn. Noo noo mnibdiꞌs maistra loo myenꞌ cón cheꞌn Jesús. Nen ngure toodiꞌs maistra con myenꞌ, ne.
\v 15 Per texal gunèe mèna Jesús, ryete mèna ante mbuiꞌ no ante gunaa loo Jesús. Mqueꞌ mèna carre par ngua nii mèna Diox loo Jesús.
\v 16 Sya, mnibdiꞌs Jesús loo myenꞌ xinꞌ mtéꞌth Jesús. Ndxab Jesús loo myenꞌ:
\p ―¿Cón nzi toodiꞌs guꞌ con mèn baꞌ, ey? Susqueꞌ nen ngure toodiꞌs guꞌ. No susqueꞌ noo noo ndyoodiꞌs guꞌ.
\p
\v 17 Sya, mcàb thìb mbiꞌ coꞌ nzo làtha loo Jesús. Ndxab mbiꞌ loo Jesús:
\p ―Maistr, daa ndal no mbyòo daa loo Uꞌ trèꞌ. Mbyòo ngue no thìb loo mbii cheꞌn xpii yeꞌrsinꞌ no ale mbli mbii cheꞌn xpii yeꞌrsinꞌ ngòc mud mbyòo.
\v 18 No pál coꞌteꞌ ngue tee mbyòo ndyen mbii cheꞌn xpii yeꞌrsinꞌ mbyòo no ngobii mbii mbyòo. Látha, ndryoꞌ zib fsinꞌ ro mbyòo. No ndxuhua le mbyòo. Por cona, yende fuerz mbyòo. Daa mnaꞌb loo myenꞌ xinꞌ mtéꞌth Uꞌ baꞌ li myenꞌ favor coꞌ myenꞌ xpii yeꞌrsinꞌ loo mbyòo. Per neꞌngácte myenꞌ ngli myenꞌa.
\p
\v 19 Jesús ndxab loo ryete mèn coꞌ nziriꞌ loo Jesús:
\p ―Aa que guꞌ mèn izlyoꞌ, pápeꞌ ya guꞌ gòn guꞌ diꞌs no yilaꞌs guꞌ. Thidtene nac guꞌ mèn coꞌ indxelaꞌste loon no loo conꞌ ndlin. ¿Axta pól tolo naquin go non guꞌ? No ¿axta pól tolo naquinqueꞌ xec daa con guꞌ, yey?
\p Ngoloa, ndxab Jesús loo mbiꞌa:
\p ―Huàa xi mbyòo. Yiꞌth mbyòo ndxèꞌ. Ñeeneꞌ.
\p
\v 20 Sya, nde no mèn mbyòo. Coꞌseꞌ gunèe xpii yeꞌrsinꞌ coꞌ ngo loo mbyòoa Jesús, mquée mbii xpiia mbyòo. No mbli mbii par ngobii mbyòo loo yòo. Ale mbixyath mcotloo mbyòo nax mbyòo. No ndryoꞌ zib fsinꞌ ro mbyòo.
\v 21 Sya, mnibdiꞌs Jesús loo xud mbyòo. Ndxab Jesús:
\p ―¿Pól mtlo ndxàc mxen mbii mbyòo, àꞌ?
\p Xud mbyòo ndxab loo Jesús:
\p ―Anon ndoo xèn mbyòo ngulen yíiz baꞌ loo mbyòo, Tad.
\v 22 Huax vez coꞌseꞌ ndyen mbii cheꞌn xpii yeꞌrsinꞌ baꞌ mbyòo, ngobii mbii mbyòo loo quìi no leꞌn nít par guth mbii mbyòo. Cona, ndlyazen cheleꞌ Uꞌ, lìcqueꞌ, ndxác ngoꞌ xpii yeꞌrsinꞌ loo mèn, bli Uꞌ favor. Bloꞌ Uꞌ xpii yeꞌrsinꞌ coꞌ nzo loo mbyòo daa ndxèꞌ. Blat lezoꞌ Uꞌ gunèe Uꞌ daa con mbyòo daa. No blyath no Uꞌ nuꞌ, Tad.
\p
\v 23 Jesús ndxab loo mbiꞌ:
\p ―Cheleꞌ lùu yilaꞌspeꞌ loon leꞌ daa ndxác teyac mbyòo, sya, lina. Tac ryethe conꞌ nzoqueꞌ mod gàc loo mèn, mèn coꞌ ndxelaꞌs loon no coꞌ ndxelaꞌs loo conꞌ ndlin.
\p
\v 24 Sya, ngrozèe xud mbyòo. Ndxab xud mbyòo loo Jesús:
\p ―Ndxelazquen loo Uꞌ no ndxelazquen loo conꞌ ndli Uꞌ. Blyath no Uꞌ daa par toloqueꞌ yilazen loo Uꞌ xal ndxàala.
\p
\v 25 Coꞌseꞌ gunèe Jesús anzeꞌf thìb mèn mqueltàa loo Jesús, Jesús mbyoo mbii cheꞌn xpii yeꞌrsinꞌa. Ndxab Jesús loo mbii cheꞌn xpii yeꞌrsinꞌa:
\p ―Xpii mud no xpii cueꞌ, na ñibeꞌ lool: Groꞌ loo mbyòo ndxèꞌ. No ya neꞌberedel yòol loo mbyòo ndxèꞌ tedib vez.
\p
\v 26 Sya, mbli xpii yeꞌrsinꞌa par ngrozèe yii ngrozèe den mbyòo. No mbli xpii par mquée mbii mbyòo. Ngoloa, ngro xpii loo mbyòo. Per coꞌseꞌ mquée mbii cheꞌn xpii yeꞌrsinꞌa loo mbyòo, casqueꞌ nguth mbyòo. No coꞌseꞌ ñèe mèn coꞌ nziriꞌ conꞌ ngòc loo mbyòo, ndxab mèna loo xtàa mèn:
\p ―Nguth mbyòo, cara.
\p
\v 27 Per ndxeꞌlequeꞌ, Jesús mxen yaꞌ mbyòo. Mxít che Jesús mbyòo. No ngo too mbyòo loo rye mèna. Ale mbyac mbyòo.
\p
\v 28 Ngoloa, ngòo Jesús liz thìb mbiꞌ con myenꞌ xinꞌ mtéꞌth Jesús. Sya, xexte mbeꞌ myenꞌ Jesús thìb lad par mnibdiꞌs myenꞌ loo Jesús. Ndxab myenꞌ:
\p ―Tad, ¿xá nee uꞌ? ¿Chonon neꞌngácte nuꞌ ngoꞌ nuꞌ xpii yeꞌrsinꞌa loo mbyòoa, àꞌ?
\p
\v 29 Jesús ndxab loo myenꞌ:
\p ―Thìb loo xpii yeꞌrsinꞌ coꞌ nac xal xpii yeꞌrsinꞌa, neꞌryoꞌde tuaꞌte loo mèn. Naquin cuez mèn Diox no cue xlat mèn. Sya, tataa mod ryo xpii yeꞌrsinꞌa.
\s Jesús mbere ngue taꞌ cuent loo myenꞌ xinꞌ mtéꞌth Jesús leꞌ Jesús gathqueꞌ.
\r (Mt. 17.22–23; Lc. 9.43–45)
\p
\v 30 Coꞌseꞌ mbii Jesús liz mbiꞌa con myenꞌ xinꞌ mtéꞌth Jesús, ngua riid Jesús leꞌn huax yèezyaꞌ cheꞌn làaz mèn galile. No indlyaꞌste Jesús gòn nec thìb mèn leꞌ Jesús ngue tee par neda.
\v 31 Tac Jesús ngue luꞌ myenꞌ xinꞌ mtéꞌth Jesús no ngue taꞌ Jesús cuent leꞌ Jesús, coꞌ mbiꞌth yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ, Jesús yigaaqueꞌ yaꞌ mèn yeꞌrsinꞌ. No guth mèna Jesús. Per coꞌseꞌ yilo son huiz mbeth mèna Jesús, Jesús ryo xban.
\v 32 Per myenꞌ xinꞌ mtéꞌth Jesús neꞌndaꞌde cuent cón cheꞌn diꞌs coꞌ ngue bez Jesús loo myenꞌ. Neꞌ neꞌ indxòn myenꞌ cón nee diꞌsa. No más de cona, ale mzyeb myenꞌ ñibdiꞌs myenꞌ cón cheꞌn diꞌsa loo Jesús.
\s Myenꞌ xinꞌ mtéꞌth Jesús mdoodiꞌs cón cheꞌn chó myenꞌ gàc myenꞌ coꞌ más ñibeꞌ loo xtàa myenꞌ yiloa.
\r (Mt. 18.1–5; Lc. 9.46–48)
\p
\v 33 Ngoloa, nda Jesús con myenꞌ xinꞌ mtéꞌth Jesús par yèez Capernaum. Coꞌseꞌ mzin Jesús tya, ngòo Jesús liz thìb mbiꞌ. Tya, mnibdiꞌs Jesús loo myenꞌ xinꞌ mtéꞌth Jesús. Ndxab Jesús:
\p ―¿Chó cón cheꞌn conꞌ ngue toodiꞌs guꞌ ned nde naꞌ, àꞌ? Susqueꞌ noo noo ndyoodiꞌs guꞌ con xtàa guꞌ, ne.
\p
\v 34 Per myenꞌ yende chó ngabte loo Jesús tac mzyeb myenꞌ no nthyon myenꞌ tac myenꞌ naneequeꞌ leꞌ myenꞌ nde toodiꞌs ned nde myenꞌ cón cheꞌn chó myenꞌ gàc thìb myenꞌ coꞌ más ñibeꞌpeꞌ coꞌseꞌ ñibeꞌpeꞌ Jesús loo mèn.
\v 35 Sya, mdub Jesús loo myenꞌ no ngurez Jesús ryete siꞌ fchop myenꞌ xinꞌ mtéꞌth Jesús. Ndxab Jesús loo myenꞌ:
\p ―Cheleꞌ chol guꞌ ndlyaꞌs gàc mèn coꞌ tyoo ner loo xtàa guꞌ, no coꞌ tyoo naa, no coꞌ ñibeꞌ loo xtàa guꞌ, nquin gàc guꞌa xal thìb moz prob coꞌ nque zinꞌ loo mèn par li guꞌ sirv loo xtàa guꞌ.
\p
\v 36 Ngoloa, mxen Jesús thìb mbedbiꞌ chuꞌth. Mdoo Jesús mbedbiꞌ chuꞌtha loo myenꞌ xinꞌ mtéꞌth Jesús. Mdeꞌs Jesús mbedbiꞌ chuꞌtha. Ndxab Jesús loo myenꞌ:
\p
\v 37 ―Nde niin thìb conꞌ loo guꞌ: Leꞌ mèn coꞌ tyal taꞌ lugar yòo thìb mbedbiꞌ chuꞌth xal mbedbiꞌ ndxèꞌ liz mèn ante por lèen, conꞌa ndluꞌ leꞌ mèna tyal taꞌ lugar gòon làth mèna, ne. Leꞌ mèn coꞌ tyal gòon làth mèna, inacte ante loon ndyal mèna ndaꞌ mèna lugar gòon làth mèna. Ndxeꞌlequeꞌ, conꞌa ndluꞌ leꞌ mèna ndyal ndaꞌ mèna lugar yòo xuden Diox coꞌ mtelꞌ daa làth mèna, ne.
\s Jesús ngue bez loo myenꞌ: Mèn coꞌ inacte ngolo ngolaꞌs loo naꞌ, mèna nzo favor cheꞌn naꞌ no ndaꞌ mèna lad cheꞌn naꞌ.
\r (Lc. 9.49–50; Mt. 10.42)
\p
\v 38 Sya, ndooleꞌ Juàn, ndxab Juàn loo Jesús:
\p ―Maistr, nuꞌ gunèe thìb mbiꞌ. Ante mdeꞌth mbiꞌ lèe Uꞌ, mbloꞌ mbiꞌ mbii cheꞌn xpii yeꞌrsinꞌ loo mèn. Per com leꞌ mbiꞌ inqueltàa node naꞌ, ¿léꞌ?, nuꞌ neꞌndaꞌde lugar loo mbiꞌ tolo li mbiꞌ conꞌa.
\p
\v 39 Per Jesús ndxab loo Juàn:
\p ―Aaꞌa. Blaꞌ guꞌ tolo li mbiꞌ conꞌa. Neꞌcàꞌde guꞌ loo mbiꞌ. Tac yende chó mèn nzo coꞌ li gàc thìb yalguzyeꞌ ante por mbez mèn lèen no yiloa nazab nii yèe nii tìi mèn cón chenen.
\v 40 Tac mèn coꞌ inacte ngolo ngolaꞌs cheꞌn naꞌ, mèna ndaꞌ lad cheꞌn naꞌ.
\v 41 No chol mèn coꞌ taꞌ mase thìb taz nít gu guꞌ ante por cón cheꞌn lèen, no por nzo guꞌ loo cón chenen, daa coꞌ nac Crist, lìcpeꞌ baꞌi, na nii loo guꞌ, ngue cón cheꞌn conꞌ mbli mèn loo guꞌa loo Diox.
\s Jesús ngue taꞌ cuent loo mèn cón cheꞌn conꞌ coꞌ ndli ndxàc ryes loo mèn par cuaꞌn mèn xquin mèn no xtol mèn.
\r (Mt. 18.6–9; Lc. 17.1–2)
\p
\v 42 Tolo ndxab Jesús loo mèn:
\p ―Chol mèn coꞌ asendli par cuaꞌn mèn coꞌ nauꞌ loo nauꞌ yéc xtol mèn, mèn coꞌ sete ndxelaꞌs loon, más huen gàca loo mèna queꞌ mèn thìb quèe yees yen mèna no cobii mèn mèna leꞌn níttóꞌ par tataa mod lyux mèna leque tolo li mèna conꞌ yeꞌrsinꞌ loo mèn coꞌ ndxelaꞌs loon.
\v 43 Cona, ngue niin loo guꞌ: Cheleꞌ guꞌ ndli cuent no ndenꞌ guꞌ leꞌn lezoꞌ guꞌ leꞌ yaꞌ guꞌ, lìcqueꞌ, ndli par ncuaꞌn guꞌ xtol guꞌ no xquin guꞌ por mdyub yoꞌf lezoꞌ guꞌ loo conꞌ ngue no guꞌ, más huen gàca loo guꞌ choꞌ guꞌ yaꞌ guꞌ par cobii mèn yaꞌ guꞌ thìb lad tith loo guꞌ. Tac más huen ngàca loo guꞌ yòo guꞌ coꞌteꞌ yòo ban no guꞌ Diox thidtene con sate yaꞌ guꞌ leque lyàa guꞌ leꞌn yeꞌrbìil, coꞌteꞌ nzo quìi no bèel coꞌ thidtene neꞌyuꞌde, con ryop yaꞌ guꞌ.
\v 44 Tya, neꞌgathte mbey no neꞌgathte mbyeꞌth. No neꞌyuꞌde quìi no bèel thidtene.
\v 45 No cheleꞌ guꞌ ndli cuent no ndenꞌ guꞌ leꞌn lezoꞌ guꞌ, lìcqueꞌ, ndli nii guꞌ par cuaꞌn guꞌ xtol guꞌ no xquin guꞌ por mdyub yoꞌf lezoꞌ guꞌ ngua guꞌ coꞌteꞌ ngua guꞌ, más huen gàca loo guꞌ choꞌ guꞌ nii guꞌ par cobii mèn nii guꞌ thìb lad tith loo guꞌ. Tac más huen gàca loo guꞌ yòo guꞌ coꞌteꞌ yòo ban no guꞌ Diox thidtene con sate nii guꞌ leque lyàa guꞌ leꞌn yeꞌrbìil, coꞌteꞌ neꞌyuꞌde quìi no bèel thidtene, con ryop nii guꞌ.
\v 46 Tya, neꞌgathte mbey no neꞌgathte mbyeꞌth. No neꞌyuꞌde quìi no bèel thidtene.
\v 47 No cheleꞌ guꞌ ndli cuent leꞌ ngudloo guꞌ, lìcqueꞌ, ndli par ncuaꞌn guꞌ xquin guꞌ no xtol guꞌ no par tyub yoꞌf coꞌ nac conꞌ yeꞌrsinꞌ leꞌn lezoꞌ guꞌ loo conꞌ ngüiꞌ guꞌ, más huen bloꞌ guꞌ ngudloo guꞌ no blobii guꞌ ngudloo guꞌ thìb lad tith loo guꞌ. Tac más huen gàca loo guꞌ cheleꞌ guꞌ yòo coꞌteꞌ yòo ban no guꞌ Diox thidtene con sate ngudloo guꞌ leque lyàa guꞌ leꞌn yeꞌrbìil coꞌteꞌ ndxetoo quìi no bèel no coꞌteꞌ neꞌyuꞌde quìi no bèel thidtene.
\v 48 Tya, neꞌgathte mbey no neꞌgathte mbyeꞌth. No neꞌyuꞌde quìi no bèel thidtene.
\p
\v 49 Tac coꞌseꞌ gàc huiza, ryete mèn coꞌ lyàa leꞌn yeꞌrbìil yidinꞌ bèel lad mèn xal coꞌseꞌ nxob mèn ted yol loo bélꞌ máꞌ coꞌ mbeth mèn póla par mbec mèn bélꞌ máꞌa loo mes xal thìb ofrend loo Diox.
\v 50 Huenqueꞌ nac ted tac nazi ted, ¿léꞌ? Per cheleꞌ ted inazide, ¿xá mod tezi mèn conꞌ hua mèn con ted coꞌ inazide, sya? Yende mod gàca tataa, ¿léꞌ? Gòp guꞌ lezoꞌ guꞌ no fquenap guꞌ guꞌ loo cón cheꞌn Diox, par neꞌyizaꞌde guꞌ loo cón cheꞌn Diox no par neꞌcàbte conꞌ yeꞌrsinꞌ loo guꞌ loo cón cheꞌn Diox. Tataa bli guꞌ xal coꞌseꞌ ndli mèn coꞌ ndxuth máꞌ coꞌseꞌ ntoxcuaꞌ mèn bélꞌ con ted. Ntezi mèn bélꞌ par neꞌyizaꞌde bélꞌ. Lomisqueꞌ ne, ngue niin loo guꞌ: Tataa bli guꞌ par que tee ban guꞌ rye nda guꞌ no rye ndyeꞌth guꞌ làth xtàa guꞌ, ne, ndee guꞌ.
\c 10
\s Jesús ngue luꞌ loo mèn cón cheꞌn xá mod ndláꞌ thìb mènbiꞌ saꞌl mènbiꞌ coꞌ indxàalte li mèn.
\r (Mt. 19.1–12; Lc. 16.18)
\p
\v 1 Ngolo mbluꞌ Jesús diꞌsa loo mèn no mdoodiꞌs no Jesús mèn, ngroꞌ Jesús leꞌn yèez Capernaum con myenꞌ xinꞌ mtéꞌth Jesús. Nda que tee Jesús leꞌn rye yèezyaꞌ coꞌ nac làaz mèn jude. No ngua que tee Jesús leꞌn rye yèezyaꞌ coꞌ nac loo xyòn mèn coꞌ naban par ned lad ndlyen huiz coꞌ nziriꞌ ned ro yóꞌbeꞌ Jordán. Tya, mbere mèn, mqueltàa mèn loo Jesús coꞌteꞌ ngo Jesús. Mbere Jesús, mbluꞌ Jesús mèna xalqueꞌ ngòc mod coꞌ ngòp Jesús.
\v 2 Sya, ngua gax ndxep mèn xleyꞌ farise loo Jesús par asembli mèn ngua gàal diꞌs mèna Jesús par ñee mèna ñeeneꞌ chéꞌ tagaa Jesús loo mèna con diꞌs coꞌ gàal diꞌs mèna Jesús xal coꞌseꞌ ndxegaa chol máꞌ bix loo tramp. Mnibdiꞌs mèna loo Jesús par gòn mèn no ñee mèn ñeeneꞌ chéꞌ huen naca, ndyac Jesús, láꞌ thìb mbiꞌ saꞌl mbiꞌ.
\v 3 Jesús mcàb loo mèna. Ndxab Jesús:
\p ―¿Cón mnibeꞌ Moisés loo guꞌ coꞌ nac ley coꞌ mxoꞌf Moisés loo guꞌ, àꞌ?
\p
\v 4 Mèna ndxab loo Jesús:
\p ―Moisés mdaꞌ lugar loo nuꞌ toxcuaꞌ nuꞌ thìb yeꞌs coꞌ lèe thìb act. Sya, taꞌ nuꞌ acta loo xaꞌgot nuꞌ. Sya, tataa mod con huen diꞌs no con huen cuent láꞌ nuꞌ xaꞌgot nuꞌ. ¿Xá neel, Jesús? ¿Chéꞌ huen naca o chéꞌ ihuente nac coꞌ mbli Moisés?
\p
\v 5 Jesús ndxab loo mèna:
\p ―Tataa mnibeꞌ Moisés loo guꞌ li guꞌ tac Moisés naneequeꞌ no mdaꞌqueꞌ Moisés cuent leꞌ guꞌ anzeꞌf naad lezoꞌ no anzeꞌf nguud lezoꞌ guꞌ.
\v 6 Per daa nde nii thìb conꞌ loo guꞌ: Nerlequeꞌ coꞌseꞌ mtlo Diox, mblec Diox no mxènꞌ Diox ryethe conꞌ loo izlyoꞌ, Diox mtoxcuaꞌ mènbiꞌ no mèngot coꞌ nac mèn.
\v 7 Por cona, thìb xaꞌbiꞌ ryo xàꞌ loo xud xaꞌ no loo xnaꞌ xaꞌ par thidte queltàa xaꞌ con xaꞌgot coꞌ gàc xinꞌ saꞌl xaꞌ par tyub ban no xaꞌ xaꞌgota.
\v 8 No coꞌseꞌ ngolo mqueltàa ryop xaꞌ, xaꞌbiꞌa no xaꞌgota, thidte nac ryop saꞌl xaꞌ loo Diox. Leꞌ sya, tataa mod ya inacte xaꞌ chop mèn loo Diox. Ndxeꞌlequeꞌ, thidte ngòc ryop xaꞌ loo Diox.
\v 9 Por cona, indxàalte li chol mèn par láꞌ mèn xtàa mèn coꞌ nac xinꞌ saꞌl mèn tac Diox mbli thidte mqueltàa mènbiꞌ con mèngot par gàc xaꞌ xinꞌ saꞌl.
\p
\v 10 Coꞌseꞌ ngo myenꞌ xinꞌ mtéꞌth Jesús con Jesús liz thìb mbiꞌ, mbere myenꞌ, mnibdiꞌs myenꞌ loo Jesús cón cheꞌn diꞌs coꞌ mdoodiꞌs no Jesús mèn xleyꞌ farisea.
\v 11 Sya, ndxab Jesús loo myenꞌ xinꞌ mtéꞌth Jesús:
\p ―Mènbiꞌ coꞌ láꞌ xaꞌgot coꞌ nac saꞌl mènbiꞌa, no selyaꞌ mènbiꞌa con tedib xaꞌgot, mènbiꞌa ngue cuaꞌn xtol coꞌ nac yalburrid loo ner xaꞌgot coꞌ nac saꞌlpeꞌ mènbiꞌa.
\v 12 No cheleꞌ thìb xaꞌgot láꞌ saꞌl xaꞌgota no selyaꞌ xaꞌgota con tedib xaꞌbiꞌ, xaꞌgota, ne, ngue li yalburrid.
\s Tad Jesús mbez loo myenꞌ bix: Ngue lin gàc conꞌ ndac loo guꞌ, ey.
\r (Mt. 19.13–15; Lc. 18.15–17)
\p
\v 13 Látha, nde no mèn coꞌ nac xnaꞌ myenꞌ bix ndxep myenꞌ bix loo Jesús par ante gàal Jesús lad myenꞌ bixa par gàc conꞌ ndac loo myenꞌ bixa. Per ndxeꞌlequeꞌ, myenꞌ xinꞌ mtéꞌth Jesús ale mtlo myenꞌ, mbyoo myenꞌ mèn coꞌ nde no myenꞌ bix par neꞌtolode yiꞌth no mèn myenꞌ bix loo Jesús.
\v 14 Coꞌseꞌ gunèe Jesús ngue yoo myenꞌ mèna, ngocloo Jesús loo myenꞌ. Ndxab Jesús loo myenꞌ:
\p ―Blaꞌ guꞌ yiꞌth myenꞌ bix baꞌ loon. Neꞌcàde guꞌ loo myenꞌ. Tac mèn coꞌ ndxòo loo cón cheꞌn Diox par ñibeꞌpeꞌ Diox loo mèn, mèna ndxàc xal nac myenꞌ bix baꞌ.
\v 15 Lìcpeꞌ baꞌi, na nii loo guꞌ: Mèn coꞌ neꞌtyalte yòo loo cón cheꞌn Diox par ñibeꞌpeꞌ Diox loo mèn no gàp mèna yalxlaꞌs loo Diox xalqueꞌ ndxàp myenꞌ bix yalxlaꞌs loo Diox con dib nzo yéc myenꞌ no con dib nzo lezoꞌ myenꞌ, thidtene neꞌyòode mèna loo cón cheꞌn Diox par ñibeꞌpeꞌ Diox loo mèna.
\p
\v 16 Sya, mdeꞌs mcàa Jesús myenꞌ bixa. No mxoꞌf Jesús yaꞌ Jesús loo myenꞌ. No ndxab Jesús loo myenꞌ:
\p ―Daa ngue li gàc conꞌ ndac loo guꞌ no ngue lin par tyac lezoꞌ guꞌ, ne, ndee.
\s Thìb mbyòo ric mdoodiꞌs no Jesús.
\r (Mt. 19.16–30; Lc. 18.18–30)
\p
\v 17 Leꞌpeꞌ tyen Jesús ned par tolo ya que tee Jesús par neda, carre mbii gax thìb mbiꞌ loo Jesús. No sangmdub xib mbiꞌ loo Jesús. Mnibdiꞌs mbiꞌ loo Jesús. Ndxab mbiꞌ:
\p ―Maistr Ndac, ¿cón lin no xá mod lin par que non no gàpen yalnaban thidtene coꞌteꞌ nzo Diox, àꞌ?
\p
\v 18 Jesús mcàb loo mbiꞌ. Ndxab Jesús:
\p ―¿Chonon mbezl loon anzeꞌf maistr ndac nac daa, àꞌ? Yende chó mèn coꞌ, lìcqueꞌ, nac xaꞌ ndac. Angoluxte yub Diox nac xaꞌ ndac. Cheleꞌ lùu indlide cuent no indenꞌte lezoꞌl nac daa Diox, axta neꞌ neꞌ ñeel loon nac daa maistr ndac.
\v 19 Lùu ndaꞌqueꞌ cuent no naneequeꞌl xal ñibeꞌ diꞌs coꞌ ndub loo libr coꞌ nac xtiꞌs Diox coꞌ ndxab:
\pi1 Neꞌlidel yalburrid. Neꞌguthtel mèn. Neꞌli huanꞌtel. Neꞌtyèꞌdel loo nec thìb mèn. Neꞌquedìidel nec thìb mèn. Gòp mod gunèe xudl no gunèe xnaꞌl.
\p
\v 20 Mbiꞌ mcàb loo Jesús. Ndxab mbiꞌ:
\p ―Maistr, ryete conꞌa mbliquen anon ndoo xènen no beꞌ ngue lin conꞌa axta nalleꞌ.
\p
\v 21 Jesús mbuiꞌ loo mbiꞌ. No mqueꞌ lezoꞌ Jesús gunèe Jesús mbiꞌ. Ndxab Jesús loo mbiꞌ:
\p ―Nzo thidte conꞌ coꞌ beꞌ ndxàc falt lil, ey. Huàa thoꞌ ryete conꞌ ndxàpl par coꞌl tmi loo conꞌ ndxàpla. Yiloa, taꞌl tmia càa mèn prob. Leꞌ sya, tataa mod que nol taamas conꞌ ndac loo béꞌ. Yiloa, sya, ndel. Nda naꞌ ned ga que teeꞌen. No xecl ryethe conꞌ gàc lool coꞌ li no mèn lùu par tethon mèn lùu ante por cón chenen, ndee.
\p
\v 22 Per coꞌseꞌ mbìn mbiꞌ tataa ndxab Jesús loo mbiꞌ, anzeꞌf mxi lezoꞌ mbiꞌ no nalyat mdeꞌb ro mbiꞌ. Ndyàa mbiꞌ tac anzeꞌf thìb yalgonꞌ ngòp mbiꞌ.
\p
\v 23 Sya, mbuiꞌ Jesús dib vuelt loo mèn coꞌ nziriꞌ loo Jesús. No ndxab Jesús loo myenꞌ xinꞌ mtéꞌth Jesús:
\p ―Myenꞌ, anzeꞌf nagàn tínꞌ naca, cara, par tyal mèn ric yòo mèn ric loo cón cheꞌn Diox par ñibeꞌpeꞌ Diox loo mèn ric.
\p
\v 24 Per myenꞌ xinꞌ mtéꞌth Jesús ante mbuiꞌ no ante gunaa myenꞌ loo Jesús por cón cheꞌn diꞌs coꞌ ndxab Jesús cón cheꞌn mbiꞌa. Sya, mbere Jesús. Ndxab Jesús loo myenꞌ xinꞌ mtéꞌth Jesús tedib vez:
\p ―Xinꞌa, susqueꞌ nagàn tínꞌ naca par yòo mèn ric loo cón cheꞌn Diox par ñibeꞌpeꞌ Diox loo mèn ric coꞌseꞌ más ndxàp mèn yalxlaꞌs loo ryethe yalgonꞌ coꞌ ndxàp mèn ric. Tac mèn ric ndli cuent ante por yalgonꞌ coꞌ ndxàp mèn ric no maste gàc ryethe conꞌ ndac loo mèn ric.
\v 25 Lìcpeꞌ baꞌi, na nii loo guꞌ: Más inagànte gàca loo thìb máꞌ coꞌ lèe camell par riid máꞌ coꞌ lèe camell yeꞌr ngudloo thìb aguj leque yòo mèn coꞌ ndxàp huax yalgonꞌ loo cón cheꞌn Diox par ñibeꞌpeꞌ Diox loo mèn.
\p
\v 26 Coꞌseꞌ mbìn myenꞌ xinꞌ mtéꞌth Jesús tataa ndxab Jesús, ante mbuiꞌ myenꞌ no ante gunaa myenꞌ. No mnibdiꞌs myenꞌ loo xtàa myenꞌ. Ndxab myenꞌ:
\p ―Cheleꞌi tatuaꞌ nac, ¿chó mèn gác lyáꞌ loo conꞌ ryes, sya?
\p
\v 27 Jesús xèe mbuiꞌ loo myenꞌ xinꞌ mtéꞌth Jesús. Ndxab Jesús loo myenꞌ:
\p ―Neꞌgácte chol mèn li chol mèn par lyáꞌ mèn coꞌ ndxàp xtol loo conꞌ ryes. Per Diox ndxácqueꞌ. Tac ryethe conꞌ coꞌ ndlyaꞌs Diox li Diox, ndxácqueꞌ Diox li Diox conꞌa.
\p
\v 28 Sya, ngroꞌ nxonꞌ Pedr, ndxab Pedr loo Jesús:
\p ―Tad, nuꞌ mbláꞌyaꞌ ryete conꞌ mque no nuꞌ. Nuꞌ ngue que tee noqueꞌ Uꞌ ned nque tee Uꞌ.
\p
\v 29 Jesús mcàb loo Pedr. Ndxab Jesús:
\p ―Lìcpeꞌ baꞌi, na nii loo guꞌ: Chol mèn coꞌ láꞌyaꞌ liz, no hues, no ftaꞌn, no xud, no xnaꞌ, no saꞌl, no xinꞌ, no xyòn ante por cón chenen no maste, no ante por cón cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes,
\v 30 gàc cheꞌn mèna nalleꞌ thìb ayo tant conꞌ loo conꞌ coꞌ mbláꞌyaꞌ mèna loo izlyoꞌ ndxèꞌ xal liz mèn, no hues mèn, no ftaꞌn mèn, no xnaꞌ mèn, no xinꞌ mèn, no xyòn mèn. Gàca loo mèna tataa mastaleꞌ gàc tub nguꞌs mèn mèna. Per coꞌseꞌ cue tedib cuaꞌ izlyoꞌ coꞌ cue yiloa, que no mèna yalnaban thidtene par ban no mèna Diox thidtene.
\v 31 Nalleꞌ loo izlyoꞌ ndxèꞌ nzo huax guꞌ coꞌ nac mèn nación Israel. Guꞌ nzi li xtùuz anzeꞌf ntac guꞌ loo Diox. No nzi li guꞌ xtùuz anzeꞌf mèn roo no mèn xèn nac guꞌ loo Diox por nac guꞌ mèn nación Israel. Per ndxeꞌlequeꞌ, Diox li leꞌ guꞌ gàc mèn beꞌthe loo Diox tac Diox ndxecloo ñèe Diox guꞌ. Per part cón cheꞌn Diox, mèn coꞌ guꞌ ingode cuent ntac mèn loo Diox, mèn coꞌ inacte mèn nación Israel, Diox li par gàc huax mèna mèn coꞌ más ntac loo Diox leque guꞌ. No gàc mèna mèn coꞌ más ndyac lezoꞌ Diox ñèe Diox por mbli mèna cas loo cón cheꞌn Diox.
\s Jesús mbere ngue teꞌth loo myenꞌ xinꞌ mtéꞌth Jesús leꞌ Jesús gathqueꞌ.
\r (Mt. 20.17–19; Lc. 18.31–34)
\p
\v 32 Leꞌpeꞌ leꞌn huiza, mnibeꞌ Jesús loo lezoꞌ Jesús ya Jesús ciuda Jerusalén. Láth nda quée Jesús con myenꞌ xinꞌ mtéꞌth Jesús, nda Jesús par ned ciuda Jerusalén no ndoo ner Jesús loo myenꞌ. Leꞌ myenꞌ na, ante ngüiꞌ no ante ñaa xá nzo Jesús ned nda Jesús par ciuda Jerusalén. No mzyeb myenꞌ nda nque myenꞌ xís Jesús. Leꞌ sya, ale mbere Jesús, mbeꞌ Jesús rye siꞌ fchop myenꞌ xinꞌ mtéꞌth Jesús thìb lad. Mtlo Jesús, mdaꞌ Jesús cuent loo myenꞌ cón cheꞌn xá mod tyactìi Jesús leꞌn huiza.
\v 33 Ndxab Jesús loo myenꞌ xinꞌ mtéꞌth Jesús:
\p ―Guꞌ naneequeꞌ no ndaꞌqueꞌ guꞌ cuent leꞌ naꞌ ndooleꞌ ned. Nda quée naꞌ par ned ciuda Jerusalén coꞌteꞌ tyenxùꞌ mèn daa, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ. Mèn coꞌ nac jef loo rye nguleyꞌ coꞌ más ñibeꞌ no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn, mèna quexùꞌ queꞌ fals daa par taꞌxùꞌ mèna daa loo mèn coꞌ inacte mèn nación Israel.
\v 34 Xìis xyánꞌ mèn coꞌ inacte mèn nación Israel ñèe mèna daa. No taꞌ mèna golp daa. Suc mèna rloon. No yiloa, guth mèna daa. Per yilo son huiz coꞌ mbeth mèn daa, daa ryo xban làth mèn nguth.
\s Cob no Juàn ngue yab loo Jesús li Jesús thìb favor loo myenꞌ.
\r (Mt. 20.20–28)
\p
\v 35 Sya, látha ngua gax ryop hues Cob Juàn coꞌ ngòc xganꞌ Zebede loo Jesús. Ndxab ryop hues myenꞌ loo Jesús:
\p ―Maistr, nuꞌ ndlyaꞌs li Uꞌ thìb favor coꞌ ñaꞌb nuꞌ loo Uꞌ.
\p
\v 36 Jesús mnibdiꞌs loo myenꞌ. Ndxab Jesús:
\p ―¿Chó favor ndlyaꞌs guꞌ lin loo guꞌ, àꞌ, ey?
\p
\v 37 Sya, ndxab myenꞌ loo Jesús:
\p ―Tad, favor coꞌ ndlyaꞌs nuꞌ li Uꞌ nac conꞌ ndxèꞌ: Coꞌseꞌ gàc hor coꞌ ñibeꞌ Uꞌ loo mèn nación Israel, ftaꞌ Uꞌ lugar gàc thìb nuꞌ síndico cheꞌn Uꞌ no gàc tedib nuꞌ juez cheꞌn Uꞌ par thidte ñibeꞌ no nuꞌ Uꞌ loo mèn nación Israel tiempa.
\p
\v 38 Sya, ndxab Jesús loo myenꞌ:
\p ―Axta neꞌ neꞌ ñee guꞌ cón ngue naꞌb guꞌ loon. No axta neꞌ neꞌ taꞌ guꞌ cuent cón ngue naꞌb guꞌ loon, ey. Nibdizen thìb conꞌ loo guꞌ. ¿Xá nee guꞌ? ¿Chéꞌ tác guꞌ no chéꞌ xec guꞌ tyactìi guꞌ xalqueꞌ gàc yaltìi coꞌ xec daa gàc loon leꞌn huiz ndxèꞌ coꞌ nac xalqueꞌ coꞌseꞌ gu mèn thìb taz nít cuanꞌ huan nalà, càꞌ? No ¿chéꞌ tác guꞌ no chéꞌ xec guꞌ guth yèe mèn guꞌ xal guthyèe mèn daa leꞌn huiz ndxèꞌ, càꞌ?
\p
\v 39 Myenꞌ mcàb loo Jesús. Ndxab myenꞌ:
\p ―Xec nuꞌi, Tad.
\p Jesús mcàb loo myenꞌ. Ndxab Jesús:
\p ―Lìcpeꞌ baꞌi, gàca loo guꞌ leꞌ guꞌ tyactìi tínꞌ xalqueꞌ gàc yaltìi tínꞌ loon yéꞌ huizeꞌ axtaqueꞌ gath guꞌ xalqueꞌ gath daa.
\v 40 Per conꞌ coꞌ ndlyaꞌs guꞌ par gàc thìb guꞌ síndico cheꞌn daa, no tedib guꞌ gàc juez cheꞌn daa coꞌseꞌ ñibeꞌen loo mèn nación Israel, inacte conꞌa cón chenen par tan lugara loo guꞌ par gàca tataa loo guꞌ, cara. Ndxeꞌlequeꞌ, Diox mbli nab no mbli nèe Diox lezoꞌ Diox chó nac mèn coꞌ gàc síndico cheꞌn daa, no chó mèn coꞌ gàc juez cheꞌn daa coꞌseꞌ gàc huiz coꞌseꞌ ñibeꞌpeꞌen loo mèn nación Israel yiloa.
\p
\v 41 Coꞌseꞌ mbìn taasiꞌ myenꞌ xinꞌ mtéꞌth Jesús tataa ndxab ryop hues Cob Juàn no tataa ndxab Jesús, ale ngocloo myenꞌ gunèe myenꞌ Cob no Juàn.
\v 42 Sya, ngurez Jesús myenꞌ. No ndxab Jesús loo myenꞌ:
\p ―Guꞌ ndaꞌqueꞌ cuent no nonqueꞌ guꞌ leꞌ mèn coꞌ nac gobiern loo chol nación dib athu loo izlyoꞌ, gobierna ñibeꞌ yèe loo mèn rye naciona. Leꞌ mèn coꞌ nac mèn roo no mèn xèn coꞌ naqueltàa loo gobierna, mèna, ne, nqueltàa con gobierna par tolo nquilꞌ mèna gobiern par sate más ñibeꞌ gobiern loo mèn naciona axta neꞌ neꞌ xec prob mèna loo conꞌa.
\v 43 Per ndxeꞌlequeꞌ, Diox indlyaꞌste gàca tataa làth guꞌ. Leꞌ guꞌ coꞌ ndlyaꞌs gàc más mèn roo no mèn xèn làth guꞌ, guꞌa li mandad loo taamas xtàa guꞌ.
\v 44 No chol guꞌ coꞌ ndlyaꞌs ñibeꞌ loo xtàa guꞌ, guꞌa ndxàal gàc xal moz loo rye guꞌ.
\v 45 Tac daa coꞌ mbal yáal loo izlyoꞌ xalqueꞌ ndxáal chol mèn loo izlyoꞌ ndxèꞌ, neꞌngalten par li mèn mandad loon. Ndxeꞌlequeꞌ, daa mbal par lin sirv loo mèn no par tan yalnaban daa loo yalguth xal thìb conꞌ coꞌ anzeꞌf ntac par tataa mod gàca leꞌ rye mèn coꞌ yilaꞌs loon, mèna que no yalnaban thidtene no lyáꞌ mèna loo conꞌ ryes.
\s Jesús mdub xnìi ngudloo thìb mbiꞌ sieu coꞌ lèe Bartime.
\r (Mt. 20.29–34; Lc. 18.35–43)
\p
\v 46 Sya, mzin Jesús ciuda Jericó. Láth coꞌseꞌ nda riid Jesús leꞌn ciuda Jericó con myenꞌ xinꞌ mtéꞌth Jesús, thìb mbiꞌ sieu coꞌ ngroꞌ lèe Bartime ndub naꞌb gòn loo mèn coꞌ ndriꞌth par neda. Mbiꞌa ngòc xganꞌ thìb mbiꞌ coꞌ ngroꞌ lèe Tim.
\v 47 Per coꞌseꞌ ndxòn mbiꞌ mbez mèn leꞌ Jesús coꞌ nac mèn yèez Nazaret nde riid coꞌteꞌ ndub mbiꞌ, mtlo mbiꞌ sieua, mbez yèe mbiꞌ. Mbez mbiꞌ:
\p ―Jesús, Uꞌ coꞌ nde bin David coꞌ ngòc rey póla, gulat lezoꞌ Uꞌ gunèe Uꞌ daa, yey.
\p
\v 48 Ale huax mèn ale mtlo mbyoo mbiꞌ par yauꞌ ro mbiꞌ. Per ndxeꞌlequeꞌ, sate más cabii mbez yèe mbiꞌ. Mbez mbiꞌ:
\p ―Uꞌ coꞌ nde bin David coꞌ ngòc rey póla, gulat lezoꞌ Uꞌ gunèe Uꞌ daa, niin.
\p
\v 49 Sya, nguled Jesús. Ndxab Jesús loo mèn coꞌ nda no Jesús:
\p Huàa rez guꞌ mbiꞌ sieu baꞌ.
\p Sya, ngua mèn coꞌteꞌ ndub mbiꞌ. Ndxab mèna loo mbiꞌ:
\p ―Huen blo lezoꞌl no ftegán lezoꞌl. Jer, goo too. Jesús ngue bezl.
\p
\v 50 Sya, ndxeclequeꞌ sab coꞌ mcap mbiꞌ mblobii mbiꞌ. Ngoloa, thìdte nguát mbiꞌ par setilte mzin gax mbiꞌ loo Jesús.
\v 51 Sya, mnibdiꞌs Jesús loo mbiꞌ. Ndxab Jesús:
\p ―¿Cón ndlyaꞌsl li nonl, àꞌ, ey?
\p Mbiꞌ sieu mcàb. Ndxab mbiꞌ:
\p ―Maistr, daa ndlyaz tub Uꞌ xnìi ngudloon par ndxeꞌslequeꞌ huiꞌen.
\p
\v 52 Jesús ndxab loo mbiꞌ:
\p ―Nzoleꞌ mod biil, ey. Ngudlool mdyubleꞌ xnìi tac ngolaꞌsqueꞌl loon.
\p Leque hora ndxeꞌslequeꞌ mbuiꞌ mbiꞌ sieua. Ngoloa, mdoo nque mbiꞌ xís Jesús. Nda no mbiꞌ Jesús ned nda Jesús.
\c 11
\s Jesús nzoleꞌ ned nda par ciuda Jerusalén.
\r (Mt. 21.1–11; Lc. 19.28–40; Jn. 12.12–19)
\p
\v 1 Coꞌseꞌ nda zin gax Jesús con myenꞌ xinꞌ mtéꞌth Jesús ciuda Jerusalén, gaxte tya nziriꞌ chop yèez bix coꞌ lèe Betfagé no Betañ. Ryop yèeza nziriꞌ loo thìb yii coꞌ lèe yii cheꞌn yaa oliv. Tya, mnibeꞌ Jesús loo chop myenꞌ xinꞌ mtéꞌth Jesús.
\v 2 Ndxab Jesús loo myenꞌ:
\p ―Huàa guꞌ lèꞌn yèez coꞌ nziriꞌ loo naꞌ baꞌ. Coꞌseꞌ yamerleꞌ zin guꞌ leꞌn yèez baꞌ, guꞌ huiꞌ ndoo quedóꞌ thìb burr. Burra nec thìb mèn tarte tyub. Fxac guꞌ burra. No yeꞌth no guꞌ burr loon trèꞌ.
\v 3 Cheleꞌ chó mèn nibdiꞌs loo guꞌ chonon ngue xac guꞌ burr, gab guꞌ loo mèna: Tad nuꞌ naquin burr. No yiloa, luega telꞌ Tad nuꞌ par yiláꞌ nuꞌ burr.
\p
\v 4 Mxen myenꞌ ned. Nda myenꞌ. No gunèequeꞌ myenꞌ ndoo quedóꞌ burr. Ndoo quedóꞌ burr gax cuat thìb puert thìb lad ro ned. Mxac myenꞌ burr. Ndyeꞌth no myenꞌ burr loo Jesús.
\v 5 Sya, ndxab ndxep mèn coꞌ ngure coꞌteꞌ ndoo quedóꞌ burra loo myenꞌ:
\p ―¿Cón ngue li no guꞌ burr baꞌ, ngue xac guꞌ burr baꞌ, àꞌ?
\p
\v 6 Sya, mcàb myenꞌ loo mèna xalqueꞌ ndxab Jesús loo myenꞌ. Sya, mblaꞌ mèna. Ndyeꞌth no myenꞌ burr loo Jesús.
\v 7 Mbeꞌ myenꞌ burr loo Jesús. No mxoꞌf myenꞌ xab myenꞌ xís burr. Ngoloa, mdub Jesús burr taate burr.
\v 8 Làth xtauꞌa, huax mèn msil xab mèn xtauꞌ ned. Leꞌ taamas mèn na, mchoꞌ laa yin no ram yaa no yíi. Mdoo mèn rye làaa ro ryop lad ro ned coꞌteꞌ nda riid Jesús par ned ciuda Jerusalén.
\p
\v 9 Sya, mèn coꞌ nda ner loo Jesús delant, no mèn coꞌ nde nque par ned xís Jesús, mtlo mèna, mbez yèe mèna. Mbez mèna:
\p ―¡Ay, Dioꞌs! Anzeꞌf ndyac lezoꞌ mbiꞌ baꞌ no anzeꞌf mbiꞌ ndac nac mbiꞌ baꞌ. Mbiꞌ baꞌ nde por lèe Tad Diox.
\v 10 Anzeꞌf conꞌ ndac gàc loo mèn coꞌ yòo loo cón cheꞌn Diox par ñibeꞌpeꞌ Diox loo mèna, tac Diox ñibeꞌpeꞌ loo mèn por cón cheꞌn thìb mbiꞌ coꞌ nac bin David coꞌ ngòc rey póla. Por cona, mbez naꞌ: ―Anzeꞌf Diox roo Diox xèn nac Diox, ne.
\p
\v 11 Ngoloa, ngòo Jesús ciuda Jerusalén. No ngòo Jesús leꞌn templ. Ngolo huen huen mbuiꞌ Jesús rye lad leꞌn templ, mxen Jesús ned. Nda Jesús par yèez Betañ con ryete siꞌ fchop myenꞌ xinꞌ mtéꞌth Jesús tac mzyèleꞌ izlyoꞌ huiza.
\s Ante gunii Jesús diꞌs loo thìb xanꞌ yaa ngudyuug. Ale setilte mbiiz yaa ngudyuug.
\r (Mt. 21.18–19)
\p
\v 12 Ngonìi izlyoꞌ tedib huiz coꞌ nde nquea. Coꞌseꞌ ngroꞌ Jesús leꞌn yèez Betañ, mtlo mblyanꞌ Jesús.
\v 13 Sya, tithreꞌ nde Jesús gunèe Jesús ndoo thìb xanꞌ yaa ngudyuug coꞌ ante nayèe ñaa ndoo laa. Jesús ngua tee huiꞌ loo yaa ñeeneꞌ chéꞌ ndoo ngud loo yaaa par hua Jesús. Per yende chó ngud ndoo loo yaaa tac inacta tiemp coꞌ tyoo ngud loo yaa.
\v 14 Sya, gunii Jesús loo yaa ngudyuug. Ndxab Jesús:
\p ―Nase biizl. Ya yende chó más mèn hua ngud coꞌ taꞌl.
\p Myenꞌ xinꞌ mtéꞌth Jesús mbìn diꞌs coꞌ gunii Jesús.
\s Jesús mbloꞌ rye máꞌ, no mèn, no mes leꞌn templ.
\r (Mt. 21.12–17; Lc. 19.45–48; Jn. 2.13–22)
\p
\v 15 Ngoloa, mbere Jesús, mzin Jesús ciuda Jerusalén con myenꞌ xinꞌ mtéꞌth Jesús. No coꞌseꞌ ngòo Jesús leꞌn templ, mtlo Jesús, mbloꞌ Jesús rye mèn coꞌ nthoꞌ no mèn coꞌ ndiꞌ leꞌn templ. Ndxeclequeꞌ rye conꞌ mblobii Jesús par fuer. Mtexyath Jesús mes cheꞌn mèn coꞌ nsilꞌ tmi. No mtexyath Jesús asient cheꞌn mèn coꞌ nthoꞌ palomxtilꞌ. Ndxec ndxec rye asient coꞌ mdyub mèna mblobii Jesús par fuer, ne.
\v 16 Neꞌndaꞌde Jesús lugar loo nec thìb mèn, mbere mèn, ngòo mèn cheꞌn mèn leꞌn templ tedib vez.
\v 17 Mbluꞌ Jesús diꞌs loo mèn leꞌn templ. Ndxab Jesús loo mèn:
\p ―Loo libr coꞌ nac xtiꞌs Diox ndub diꞌs coꞌ mbez: Lizen nac coꞌteꞌ cuez mèn rye nación lèen. Per guꞌ, ale ndxeꞌlequeꞌ, mbli leꞌ lizen nac xal thìb quèe lyoꞌ coꞌteꞌ ndxòo ban huanꞌ no coꞌteꞌ ndxòo casloo huanꞌ.
\p
\v 18 Per mèn coꞌ nac jef coꞌ más ñibeꞌ loo rye nguleyꞌ no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn, mèna mbìn diꞌs coꞌ ndxab Jesús. Sya, mtlo mèna, mcuaꞌn mèna mod guth mèna Jesús tant mzyeb mèna ñèe mèna Jesús. Más de cona, ryete mèn coꞌ nziriꞌ no Jesús ante ngüiꞌ no ante ñaa loo conꞌ ndluꞌ Jesús.
\v 19 Per coꞌseꞌ ngulàa yálꞌ izlyoꞌ huiza, Jesús mbii leꞌn ciuda Jerusalén tedib vez.
\s Trèꞌ ndluꞌ leꞌ yaa ngudyuug mbiizxùꞌ.
\r (Mt. 21.20–22)
\p
\v 20 Coꞌseꞌ ngonìi izlyoꞌ tedib huiz coꞌ nde nquea, xtilꞌlequeꞌ nguriꞌth Jesús con myenꞌ xinꞌ mtéꞌth Jesús par ned ndoo yaa ngudyuuga. Gunèe myenꞌ mbiizleꞌ yaa ngudyuug axta lox yaa ngudyuug no axta loo punt yaa ngudyuug.
\v 21 Sya, chàa, mteꞌ lezoꞌ Pedr máa yaa ngudyuuga. Ndxab Pedr loo Jesús:
\p ―Maistr huiꞌ Uꞌ nexa. Yaa ngudyuug coꞌ gunii yèe Uꞌ no coꞌ mquedèe Uꞌ loo náꞌa mbiizleꞌ.
\p
\v 22 Jesús mcàb. Ndxab Jesús loo myenꞌ:
\p ―Golaꞌs guꞌ loo Diox. No gòp guꞌ yalxlaꞌs loo Diox.
\v 23 Tac lìcpeꞌ baꞌi, na nii loo guꞌ: Leꞌ chol mèn coꞌ, lìcqueꞌ, ndxelaꞌs loo Diox, ante gab mèna no ante ñii mèna loo yii ndxèꞌ biiche yii ndxèꞌ trèꞌ no ya tub yii ndxèꞌ leꞌn níttóꞌ, cheleꞌ mèna por derech, lìcqueꞌ, ndxelaꞌs no inacte mèna chop loo chop laꞌs mèn loo Diox, leꞌ sya, Diox liqueꞌ gàc conꞌ ñaꞌb mèna loo Diox.
\v 24 Cona, ngue niin loo guꞌ: Ryete conꞌ coꞌ ñaꞌb guꞌ loo Diox coꞌseꞌ mbez guꞌ Diox, cheleꞌ guꞌ ndxelaꞌs leꞌ conꞌ coꞌ ñaꞌb guꞌ loo Diox li Diox par que no guꞌ coꞌ ñaꞌb guꞌ loo Diox, leꞌ sya, ryete conꞌ coꞌ ñaꞌb guꞌ loo Diox gàcqueꞌ loo guꞌ.
\v 25 No cheleꞌ chó guꞌ ngocloo gunèe xtàa guꞌ, no cheleꞌ chó guꞌ beꞌ ndxecloo ñèe guꞌ xtàa guꞌ coꞌseꞌ tlo cuez guꞌ Diox, fteriꞌth ftecanꞌ guꞌ conꞌ coꞌ mbli xtàa guꞌ loo guꞌa. Leꞌ sya, tataa mod, ne, xud guꞌ coꞌ nzo loo béꞌ tonꞌ xtol guꞌ no xquin guꞌ coꞌ mcuaꞌn guꞌ.
\v 26 Per cheleꞌ guꞌ neꞌtalte yéc guꞌ no lezoꞌ guꞌ par teriꞌth guꞌ no tecanꞌ guꞌ xtol chol mèn coꞌ ndli mèn loo guꞌ, leꞌ sya, neꞌ xud guꞌ Diox coꞌ nzo loo béꞌ neꞌtonꞌte xtol guꞌ no xquin guꞌ coꞌ mcuaꞌn guꞌ con mèn.
\s Jesús, lìcqueꞌ, ndxàp conꞌ laꞌs nii Jesús no conꞌ laꞌs yaꞌ Jesús par li Jesús conꞌ roo no conꞌ xèn.
\r (Mt. 21.23–27; Lc. 20.1–8)
\p
\v 27 Ngoloa, mbere Jesús con myenꞌ xinꞌ mtéꞌth Jesús. Ndyeꞌth Jesús con myenꞌ par ciuda Jerusalén tedib vez. Per coꞌseꞌ ñèe mèn coꞌ nac jef coꞌ más ñibeꞌ loo rye nguleyꞌ, no mèn coꞌ ndluꞌ cón cheꞌn ley coꞌ mxoꞌf Moisés loo mèn, no mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nacionpeꞌ Israel leꞌ Jesús ngue que tee leꞌn templ, ngua gax mèna loo Jesús.
\v 28 Mnibdiꞌs mèna loo Jesús. Ndxab mèna:
\p ―Gunee loo nuꞌ, ¿chó yalñibeꞌ ndxàpl no chó mnibeꞌ lool mblil conꞌ coꞌ mblil náꞌa, àꞌ?
\p
\v 29 Jesús mcàb loo mèna. Ndxab Jesús:
\p ―Na, ne, nibdiꞌs thìb conꞌ loo guꞌ. Cheleꞌ guꞌ càb loon, sya, na nii loo guꞌ con chó yalñibeꞌ mblin conꞌ mblin loo guꞌa.
\v 30 ¿Xá nee guꞌ? ¿Chó mtelꞌ Juàn Bautist par mbiꞌth li Juàn bautizar mèn? ¿Chéꞌ Diox mtelꞌ Juàn mbiꞌth Juàn o chéꞌ chol mèn mtelꞌ Juàn mbiꞌth Juàn par mbli Juàn bautizar mèn, àꞌ? Fcàb guꞌ loon.
\p
\v 31 Sya, leque mèna mtlo, noo noo mdoodiꞌs no mèna xtàa mèna cón cheꞌn diꞌs coꞌ ndxab Jesús loo mèna. Ndxab mèna loo xtàa mèna:
\p ―Cheleꞌ naꞌ gab: Diox mtelꞌ Juàn, leꞌ sya, càb mbiꞌ baꞌ loo naꞌ. Ñee mbiꞌ: ¿Chonon neꞌngalaꞌste guꞌ loo Juàn, sya?
\v 32 O ¿chéꞌ tab naꞌ loo mbiꞌ baꞌ: Chol mèn izlyoꞌ mtelꞌ Juàn, càꞌ? Axta neꞌ neꞌ ñee mèna cón gab mèna tac mèna mzyeb ñèe rye mèn coꞌ nziriꞌ loo Jesús.
\p Tataa mbez mèna tac mèna naneequeꞌ no mdaꞌqueꞌ mèna cuent leꞌ rye mèn coꞌ nziriꞌa ngolaꞌs loo Juàn leꞌ Juàn mdoodiꞌs part cón cheꞌn Diox.
\v 33 No por mzyeb mèna, mcàb mèna loo Jesús. Ndxab mèna:
\p ―Neꞌñeede nuꞌ chó mtelꞌ Juàn, cara.
\p Sya, ndxab Jesús loo mèna:
\p ―Neꞌ daa neꞌniide loo guꞌ con chó yalñibeꞌ mblin conꞌ coꞌ mblin náꞌa.
\c 12
\s Jesús mtetac cón cheꞌn mèn yeꞌrsinꞌ coꞌ mque zinꞌ.
\r (Mt. 21.33–46; Lc. 20.9–19)
\p
\v 1 Sya, mtlo Jesús, mdoodiꞌs Jesús loo mèn. No mtetac Jesús diꞌs. Ndxab Jesús loo mèn:
\p ―Nde niin thìb conꞌ loo guꞌ, ey: Ngo thìb mbiꞌ coꞌ mdoo ampurte lus uv loo xyòn mbiꞌ. Ngoloa, mblo mbiꞌ yaaloo dib vuelt ro yòo coꞌteꞌ mdoo mbiꞌ lus uv. Mtoxcuaꞌ mbiꞌ thìb tanc coꞌteꞌ tíꞌ moz uv par ryoꞌ nít uv. No mbli mbiꞌ mandad mdyoxcuaꞌ thìb cuart coꞌ mdub axta arid gáp par gápleꞌqueꞌ laꞌs moz loo zinꞌ no loo yòo coꞌteꞌ nzoꞌf lus uva.
\p Ngoloa, mdaꞌ mbiꞌ xyòn mbiꞌ loo tedib mèn par li mèn zinꞌ cuent rol loo xyòn mbiꞌ. Ngoloa, mxen mbiꞌ ned. Nda mbiꞌ thìb viaj tith.
\v 2 Coꞌseꞌ mzin tiemp gàc rol uv, mbiꞌa mtelꞌ thìb moz mbiꞌ par yiꞌth càayaꞌ moz uv coꞌ li rol mèn coꞌ ngue li zinꞌ cuent rol par gàc cheꞌn mbiꞌ uv.
\v 3 Per mèn coꞌ mbli zinꞌ loo yòo coꞌteꞌ mxyoꞌf lus uv, mèna mxen moz no mdin mèna moz. No mtelꞌ mèna moz nagueꞌs yaꞌ moz ndyàa moz. Neꞌndaꞌde mèna uv nghueꞌ moz.
\v 4 Sya, mbiꞌ coꞌ nac xuanꞌ yòoa mbere mtelꞌ tedib moz. Per mèn coꞌ mbli zinꞌ loo yòoa, mbuaaꞌd quèe moz. Mbléꞌ mèna yéc moz. No mxìis no mèna moz axta plóthe. Ngoloa, taate moz ndyàa moz.
\v 5 Mbere mbiꞌ coꞌ nac xuanꞌ yòoa. Mtelꞌ mbiꞌ tedib moz par mbiꞌth moz loo mèna. Per mèna mxen moz. Mbeth mèna moz. Ngoloa, mtelꞌ mbiꞌ coꞌ nac xuanꞌ yòoa huax moz loo mèna. Lomisqueꞌ mbli mèn. Chó moz mbuaaꞌd quèe mèn. Chó moz mbeth mèn.
\p
\v 6 Per mbiꞌ coꞌ nac xuanꞌ yòo lus uv ngue no thìb xganꞌ coꞌ nac angoluxte xganꞌ mbiꞌ. Xganꞌ mbiꞌa anzeꞌf ngudloo mbiꞌ no anzeꞌf lezoꞌ mbiꞌ. Por lult mtelꞌ mbiꞌ xganꞌ mbiꞌ loo mèna. Ndxab mbiꞌ loo lezoꞌ mbiꞌ: Telꞌen xganꞌ daa ndxèꞌ. Daa ngobeꞌ li mèna cas no gàp mèna mod ñèe mèna xganꞌ daa ndxèꞌ.
\v 7 Per coꞌseꞌ gunèe mèn coꞌ ndli zinꞌ loo lus uv nde mbyòo loo mèna, ndxab mèna loo xtàa mèna:
\p ―Mbyòo baꞌ yanꞌ no yòo lus uv ndxèꞌ. ¿Xá nee guꞌ? Nda yuth naꞌ mbyòo. Sya, gàc cheꞌn naꞌ yòo lus uv ndxèꞌ.
\p
\v 8 Ale mxen mèna xganꞌ mbiꞌa. Mbeth mèna xganꞌ mbiꞌ. Ngoloa, mbloꞌ mèna thebol xganꞌ mbiꞌ thìb lad ro yòo coꞌteꞌ nzoꞌf lus uv.
\p
\v 9 Sya, mnibdiꞌs Jesús loo mèna. Ndxab Jesús loo mèna:
\p ―¿Xá nee guꞌ? ¿Cón li mbiꞌ coꞌ nac xuanꞌ xyòn lus uva con mèna, àꞌ? Na nii loo guꞌ cón li mbiꞌ. Mbiꞌ yiꞌth. No guth mbiꞌ mèna. No taꞌ mbiꞌ xyòn mbiꞌ coꞌteꞌ nzoꞌf lus uva loo tedib cuaꞌ mèn coꞌ ndli leque zinꞌa, ¿léꞌ?
\p
\v 10 Chéꞌ tarte lab guꞌ loo libr coꞌ nac xtiꞌs Diox par taꞌ guꞌ cuent xal mbez diꞌsa, càꞌ? Diꞌs coꞌ ndub loo libr coꞌ nac xtiꞌs Diox mbez taandxèꞌ:
\pi1 Leꞌ quèe coꞌ mbli mèn coꞌ nac albañil cuent neꞌli zinꞌte albañil, leque quèea ngòc quèe ngua lit Tad, Tad coꞌ ngòc xal thìb albañil par ngòc quèea ner quèe coꞌ mbli sirv loo zinꞌ coꞌ mbli Tad.
\pi1
\v 11 No conꞌ coꞌ ngòca mbli yub Tad Diox. Por cona, por part cón cheꞌn naꞌ, ante ngüiꞌ naꞌ no ante ñaa naꞌ xá mod nac conꞌ coꞌ mbli Tad Diox.
\p
\v 12 Coꞌseꞌ mbìn mèna tataa ndxab Jesús, capas mèna, ale ndyac mèna mxenleꞌ mèna Jesús xal ndyen mèn thìb pres tac mèna mdaꞌ cuent no mdenꞌ mèna diꞌs coꞌ ndxab Jesús tac por cón cheꞌn mèna mtetac Jesús diꞌsa. Per com leꞌ mèna mzyeb ñèe mèn coꞌ nziriꞌ loo Jesús, ¿léꞌ?, xexte mbláꞌ mèna Jesús. Ndyàa mèna.
\s Jesús ngue luꞌ loo mèn cón cheꞌn tmi coꞌ ndxàal quix mèn cón cheꞌn contribución.
\r (Mt. 22.15–22; Lc. 20.20–26)
\p
\v 13 Ngoloa, mtelꞌ mèn coꞌ nac jef coꞌ más ñibeꞌ loo nguleyꞌ, no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn, no mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel ndxep mèn xleyꞌ farise no ndxep mèn coꞌ nac partid cheꞌn Herod loo Jesús par aseli mèna yecloo Jesús no gab Jesús ngòc nguàal diꞌs loo mèna par tataa mod quexùꞌ queꞌ fals mèna Jesús.
\v 14 Sya, ngua mèna loo Jesús. Ndxab mèna loo Jesús:
\p ―Maistr, nuꞌ nanee lìcqueꞌ nac coꞌ mbez Uꞌ. No neꞌ neꞌ indli Uꞌ cas coꞌ ndli mèn no coꞌ mbez mèn. Tac indlaꞌste Uꞌ xal nac mod coꞌ ndxàp mèn. Ndxeꞌlequeꞌ, ndluꞌ Uꞌ coꞌ nac lìcpeꞌ xá mod yòo mèn loo cón cheꞌn Diox. Per nalleꞌ, ndlyaꞌs nuꞌ ñee Uꞌ loo nuꞌ: ¿Xá nee Uꞌ? ¿Chéꞌ ndxàal quix nuꞌ cón cheꞌn contribución loo gobiern federal cheꞌn mèn ciuda Rom o chéꞌ indxàalte quix nuꞌi?
\p
\v 15 Per Jesús mdaꞌqueꞌ cuent no nonqueꞌ Jesús xá nac mod coꞌ ndxàp mèna coꞌseꞌ ntembìi ro mèna no ntembìi xtiꞌs mèna loo Jesús. Sya, ndxab Jesús loo mèna:
\p ―¿Chonon ncuaꞌn guꞌ mod asendli guꞌ par yigaa daa loo guꞌ xal coꞌseꞌ ndxegaa mèn loo tramp, àꞌ? Huàa xi guꞌ thìb pes guꞌ par huiꞌen ñeeneꞌ xá ñaai.
\p
\v 16 Sya, ngua xi mèna thìb pes pchò. Coꞌseꞌ gunèe Jesús pesa, mnibdiꞌs Jesús loo mèna. Ndxab Jesús:
\p ―¿Chó cheꞌn gunab coꞌ ngue loo pes ndxèꞌ? no ¿chó cheꞌn lèe coꞌ ngue loo pes ndxèꞌ, ne, àꞌ?
\p Sya, ncàb mèna loo Jesús. Ndxab mèna:
\p ―Gunab baꞌ no lèe baꞌ nac cheꞌn gobiern coꞌ ndub ciuda Rom.
\p
\v 17 Sya, ndxab Jesús loo mèna:
\p ―Pues, ftaꞌ guꞌ coꞌ nac cheꞌnpeꞌ gobiern coꞌ ndub ciuda Rom càa gobiern. No ftaꞌ guꞌ coꞌ nac cheꞌnpeꞌ Diox càa Diox.
\p Ngoloa, ante mbuiꞌ mèna no ante gunaa mèna loo Jesús xal nac diꞌs coꞌ mcàb Jesús loo mèna.
\s Mèn mnibdiꞌs loo Jesús: ¿Chéꞌ, lìcqueꞌ, ryo xban mèn?
\r (Mt. 22.23–33; Lc. 20.27–40)
\p
\v 18 Ngoloa, ngua ndxep mèn xleyꞌ saduce coꞌ mbez no coꞌ ndxelaꞌs leꞌ mèn nguth neꞌryo xbante thidtene loo Jesús. No por cona, asembli mèna, mnibdiꞌs mèna thìb conꞌ loo Jesús.
\v 19 Ndxab mèna loo Jesús:
\p ―Maistr, Moisés mtanꞌ yeꞌs coꞌ ndluꞌ loo nuꞌ cheleꞌ thìb mbiꞌ gath no yanꞌ saꞌl mbiꞌ, yende xinꞌ saꞌl mbiꞌ, leꞌ sya, hues mbiꞌ coꞌ ngutha selyaꞌ con xaꞌgot viud coꞌ mbyanꞌa par que no hues mbiꞌ coꞌ ngutha xinꞌ hues mbiꞌ coꞌ ngutha con xaꞌgot viud coꞌ mbyanꞌ coꞌ nac saꞌl thebol par gàc xinꞌ hues thebol xinꞌ thebol coꞌ nguth.
\v 20 Tolo ndxab mèna loo Jesús:
\p ―Pues ngo gaz hues myenꞌ. Mzin huiz mselyaꞌ mbyòo ndlyoa. Per pente ndxàc chop o son línꞌ mselyaꞌ mbyòo ndlyoa, nguth mbyòo ndlyoa. Neꞌndante xaꞌgot coꞌ ngòc saꞌl mbyòo xinꞌ mbyòo.
\v 21 Ngoloa, mselyaꞌ mbyòo coꞌ nde nque xís mbyòo ndlyoa con xaꞌgot viuda. Nguth mbyòo ropa, ne. No neꞌndante xaꞌgot viuda xinꞌ mbyòo. Lomisqueꞌ ngòca loo tedib mbyòo coꞌ nde nque xís mbyòo ropa, ne.
\v 22 Por lult ryete gaz hues myenꞌ mselyaꞌ con xaꞌgot viuda. Ale neꞌndante xinꞌ xaꞌgot viuda con nec thìb rye myenꞌ hues thebol coꞌ ngòc saꞌlpeꞌ xaꞌgota. Por lult, guneei loo xaꞌgot viuda, ne.
\v 23 Cona ngue nibdiꞌs nuꞌ loo Uꞌ: Coꞌseꞌ gàc huiz coꞌseꞌ ryo xban mèn coꞌseꞌ cue ban mèn tedib vez, de loo rye gaz hues myenꞌ coꞌ mselyaꞌ con xaꞌgota, ¿chó myenꞌ gàc saꞌlpeꞌ xaꞌgot viuda, àꞌ?
\p
\v 24 Sya, mcàb Jesús loo mèna. Ndxab Jesús:
\p ―Susqueꞌ ndxos xtùuz guꞌ no susqueꞌ yéc brèl guꞌ. Ndxàc conꞌ baꞌ loo guꞌ tac neꞌtaꞌde guꞌ cuent cón mbez diꞌs coꞌ ndub loo libr coꞌ nac xtiꞌs Diox. No neꞌ neꞌ taꞌ guꞌ cuent conꞌ coꞌ nac conꞌ roo no conꞌ xèn coꞌ nzo laꞌs nii Diox no coꞌ nzo laꞌs yaꞌ Diox.
\v 25 Tac coꞌseꞌ ryo xban mèn nguth, mèn coꞌ ngòo loo cón cheꞌn Diox, neꞌselyaꞌde mèna. Neꞌ neꞌ ya naꞌb mèna xìix mèna. Ndxeꞌlequeꞌ, mèna gàc xal angl coꞌ nzo loo béꞌ huiza, coꞌ nee diꞌs, neꞌselyaꞌde mèn huiza.
\v 26 Per cón cheꞌn mèn coꞌ nguth coꞌ ryo xban, ¿chéꞌ tarte lab guꞌ loo libr coꞌ nac xtiꞌs Diox coꞌ mqueꞌ Moisés yeꞌs xal ngòc diꞌs coꞌ mdoodiꞌs Diox loo Moisés leꞌn yaa zars coꞌseꞌ xèe ngue huiꞌ Moisés ndxolꞌ yaa zars? Taandxèꞌ ndxab Diox loo Moisés:
\p ―Daa nac Diox cheꞌn Abraham. Nac daa Diox cheꞌn Isaac. No nac daa Diox cheꞌn Cob.
\p
\v 27 Diox inacte Diox loo mèn nguth. Ndxeꞌlequeꞌ, nac Diox Diox loo mèn coꞌ beꞌ naban. Por cona, ngue niin loo guꞌ: Axta neꞌ neꞌ ñee guꞌ cón mbez guꞌ loon no cón ñibdiꞌs guꞌ loon por nac guꞌ mèn coꞌ ndxos xtùuz.
\s Jesús ngue luꞌ mèn chó diꞌs nac diꞌs coꞌ más ñibeꞌ Diox loo mèn par li mèn.
\r (Mt. 22.34–40)
\p
\v 28 Látha, mzin thìb mbiꞌ coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn. Mbiꞌa noo noo mqueꞌ nza diꞌs coꞌ mdoodiꞌs Jesús con mèn xleyꞌ saduce. Mbiꞌ mdaꞌ cuent huenqueꞌ mcàb Jesús loo mèna. Mnibdiꞌs mbiꞌ loo Jesús. Ndxab mbiꞌ:
\p ―De loo rye siꞌ diꞌs coꞌ mnibeꞌ Diox loo naꞌ, no coꞌ mtanꞌ Moisés loo naꞌ, ¿chó diꞌs nzo làtha coꞌ más ñibeꞌ Diox loo naꞌ par tyubdiꞌs naꞌ loo Diox, àꞌ?
\p
\v 29 Jesús mcàb loo mbiꞌa. Ndxab Jesús:
\p ―Ner diꞌs coꞌ más ñibeꞌ Diox loo mèn par tyubdiꞌs mèn loo Diox cón li mèn nac diꞌs ndxèꞌ coꞌ mbez taandxèꞌ: Bìn guꞌ diꞌs ndxèꞌ, mèn nación Israel, leꞌ Tad coꞌ nac Diox naꞌ, Tada nac thidte Diox.
\v 30 Fqueꞌ lezoꞌ guꞌ Tad Diox guꞌ, tá, dib nzo yéc guꞌ no dib nzo lezoꞌ guꞌ. Diꞌs ndxèꞌ nac ner diꞌs coꞌ mnibeꞌ Diox loo naꞌ par li naꞌ. No nac diꞌs ndxèꞌ coꞌ más ntac loo rye taamas yalñibeꞌ par li naꞌ xal ñibeꞌ Diox.
\v 31 No casqueꞌ lal nac tedib diꞌs xal ner diꞌs ndxèꞌ. Mbryop diꞌsa ñibeꞌ loo naꞌ taandxèꞌ. Mbez diꞌsa: Fqueꞌ lezoꞌ guꞌ gunèe guꞌ hues xtàa guꞌ xalqueꞌ ngue lezoꞌ guꞌ ñèe guꞌ guꞌ. Ya yende tedib diꞌs coꞌ más mnibeꞌ Diox loo naꞌ coꞌ ndxàal li naꞌ coꞌ nac xal diꞌs coꞌ ñibeꞌ diꞌs ndxèꞌ loo naꞌ par li naꞌi.
\p
\v 32 Sya, ndxab maistr coꞌ ndluꞌ cón cheꞌn ley coꞌ mxoꞌf Moisés loo mèn loo Jesús:
\p ―Huenqueꞌ gunee Uꞌ, Maistr. Lìcqueꞌ naca xal ngolo gunee Uꞌi baꞌ. Thidte Diox nzo no yende tedib Diox coꞌ nzo.
\v 33 No queꞌ lezoꞌ mèn Diox dib nzo yéc mèn no dib nzo lezoꞌ mèn, no queꞌ lezoꞌ mèn ñèe mèn hues xtàa mèn xalqueꞌ ngue lezoꞌ mèn ñèe mèn mèn. Lìca, masqueꞌ ntac li mèn xal ngolo gunee Uꞌ leque li mèn xal coꞌseꞌ ndaꞌ mèn cheꞌn izlyoꞌ ncàa izlyoꞌ, coꞌ nee diꞌs, coꞌseꞌ ndxuth mèn ngon yènꞌ no mbacxilꞌ yènꞌ par nxo mèn ren máꞌa loo izlyoꞌ. No, lìcqueꞌ, más ntac li mèn xal ngolo gunee Uꞌ baꞌ leque li mèn xal coꞌseꞌ ndaꞌ mèn ofrend o gòn coꞌ mbec mèn loo Diox no coꞌ mtec mèn bélꞌ máꞌ coꞌ mbeth mèn loo mes coꞌ nac loo còoꞌ par nquée zen cheꞌn bélꞌ máꞌa loo Diox.
\p
\v 34 Leꞌ sya, coꞌseꞌ gunee Jesús huenqueꞌ mcàb mbiꞌ loo Jesús, ndxab Jesús loo mbiꞌ:
\p ―Itithte nzol loo cón cheꞌn Diox par yòol loo cón cheꞌn Diox, ey, par ñibeꞌpeꞌ Diox lool.
\p Ngoloa, ya yende chó mèn tolo ngli ryes ngnibdiꞌs taamas conꞌ loo Jesús.
\s Jesús mnibdiꞌs loo mèn: ¿Chó xin mbez mèn nac Crist?
\r (Mt. 22.41–46; Lc. 20.41–44)
\p
\v 35 Jesús ngue luꞌ mèn leꞌn templ thìb vez. No mbez Jesús loo mèn:
\p ―¿Xá nee guꞌ? ¿Xá mod chonon mbez mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn leꞌ Crist nac xganꞌ David coꞌ ngòc rey póla, àꞌ?
\v 36 Tac Xpii Natúꞌ mbli leꞌ yub David gunii no mdeꞌth David cón cheꞌn Crist. Ndxab David:
\pi1 Tad Diox ndxab loo Tad daa: Ftub cuaten axta lin leꞌ rye mèn coꞌ nac ngolo ngolaꞌs cheꞌn lùu gàc nadoꞌ loo lùu.
\m
\v 37 Cona, ngue niin loo guꞌ: ¿Xá mod gàc Crist xganꞌ David coꞌseꞌ leque David mbez loo Crist: Tad daa, àꞌ?
\p Per yende cón mcàb mèna.
\p Rye mèn coꞌ ngòc huax mèn coꞌ nziriꞌa, axta gust mdaꞌ lezoꞌ mèna coꞌseꞌ mbìn mèna tataa ndxab Jesús loo mèna.
\s Jesús mzib quìi mèn coꞌ ngòc maistr coꞌ ndluꞌ cón cheꞌn ley coꞌ mxoꞌf Moisés loo mèn.
\r (Mt. 23.1–36; Lc. 11.37–54; 20.45–47)
\p
\v 38 Coꞌseꞌ ngue luꞌ Jesús mèn, mbez Jesús loo mèn:
\p ―Nee guꞌ nee guꞌ xá que tee guꞌ loo mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn. Mèna ndyublaꞌs goc xab larꞌ nolꞌ, no anzeꞌf ndublaꞌs mèna ñii chol mèn Diox loo mèna pál coꞌteꞌ nzyálꞌ mèn mèna par tyuꞌ mèna loo mèn.
\v 39 Mèna anzeꞌf ndxòo lezoꞌ cuaꞌn mèna lugar coꞌteꞌ tyub mèna leꞌn sinagog par gàc conꞌ guryath no conꞌ guryèn loo mèna no par más tyuꞌ mèna loo mèn leꞌn sinagog. No ndxòo lezoꞌ mèna tyub mèna coꞌteꞌ más tyuꞌ mèna loo mes par hua mèna coꞌseꞌ ndxàc chol yalhua.
\v 40 Ale nde yath mèna ndyenxùꞌ mèna no ncàaxùꞌ mèna liz prob mèngot viud por pláte pes no maste. No par ndli mèna xalqueꞌ mèn coꞌ neꞌñeede, ale asendli mèna, nteyolꞌ mèna diꞌs coꞌseꞌ mbez mèna Diox. Per, lìcpeꞌ baꞌi, na nii loo guꞌ: Por conꞌ ndli mèna gàc más yaltìi tínꞌ loo mèna coꞌseꞌ gàc huiz tub rez Diox cón cheꞌn mèna loo mèna.
\s Thìb xaꞌgot viud ngue go ofrend leꞌn caj mastaleꞌ prob xaꞌ.
\r (Lc. 21.1–4)
\p
\v 41 Thìb vez mdub Jesús leꞌn templ gaxte coꞌteꞌ nzoꞌf caj coꞌ ngo mèn ofrend o gòn. Xèe ngue huiꞌ Jesús xá ndxàc mèn ngo mèn gòn leꞌn caj no xá ndxàc rye mèn ric ngo mèn ric gòn leꞌn caj.
\v 42 Látha, mzin thìb xaꞌgot viud. Xaꞌgot viuda pente mblo chop centav coꞌ ngue no xaꞌ coꞌ beꞌte ntac leꞌn caj coꞌ nzoꞌf tya.
\v 43 Sya, ngurez Jesús myenꞌ xinꞌ mtéꞌth Jesús. Ndxab Jesús loo myenꞌ:
\p ―Lìcpeꞌ baꞌi, na nii loo guꞌ: Leꞌ Diox más ngo cuent cón cheꞌn gòn coꞌ mblo prob xaꞌgot viud baꞌ leꞌn caj leque gòn coꞌ mblo mèn ric leꞌn caj.
\v 44 Tac ryete mèn baꞌ mblo huax tmi coꞌ nac gòn leꞌn caj tac mbyanꞌ xoꞌf tmi loo mèn baꞌ. Per prob xaꞌgot viud baꞌ, ale tyanꞌ hualequeꞌ xaꞌ, mblo xaꞌ gòn chop centav leꞌn caj coꞌ nac coꞌ beꞌte ngue no xaꞌ par tiꞌ xaꞌ conꞌ hua xaꞌ.
\c 13
\s Jesús ngue taꞌ cuent loo myenꞌ xinꞌ mtéꞌth Jesús leꞌ mèn làareꞌ templ.
\r (Mt. 24.1–2; Lc. 21.5–6)
\p
\v 1 Ngoloa, coꞌseꞌ nda ro Jesús leꞌn templ, thìb myenꞌ coꞌ nac xinꞌ mtéꞌth Jesús ndxab loo Jesús:
\p ―Maistr, huiꞌ Uꞌ nexa. Susqueꞌ nabeꞌs ñaa quèe coꞌ natoxcuaꞌ templ no quetal nabeꞌs ñaa templ baꞌ, ne, ¿léꞌ?
\p
\v 2 Per ale mcàb Jesús loo myenꞌ. Ndxab Jesús:
\p ―Ale xèe ndoo yotl, ngüiꞌl loo templ baꞌ, ¿léꞌ? Lùu ndli cuent anzeꞌf nabeꞌs ñaa ftoo coꞌ natoxcuaꞌ templ baꞌ, ¿léꞌ? Per na nii lool: Ya neꞌyanꞌte nec thìb quèe loo xtàa quèe coꞌ nacsuaꞌ ftoo baꞌ. Thidtene telux mèn ryethe conꞌ coꞌ ngüiꞌl coꞌ natoxcuaꞌ templ baꞌ yéꞌ huizeꞌ.
\s Jesús ngue taꞌ cuent loo myenꞌ xinꞌ mtéꞌth Jesús cón gàc ndooreꞌ lith no izlyoꞌ.
\r (Mt. 24.3–28; Lc. 21.7–24; 17.22–24)
\p
\v 3 Sya, ngua no Jesús myenꞌ xinꞌ mtéꞌth Jesús loo thìb yii coꞌ lèe yii cheꞌn yaa oliv. Yiia ndub thìb lì loo templ. No coꞌseꞌ mdub Jesús tya, Pedr, Cob, Juàn, no Ndech, xexte ndxab myenꞌ loo Jesús:
\p
\v 4 ―Tad, nuꞌ ndlyaꞌs ñee Uꞌ loo nuꞌ pól gàc coꞌ gunee Uꞌ loo nuꞌ gozea cón cheꞌn templ no chó conꞌ tlo yúꞌ loo mèn no coꞌ tlo gàc coꞌseꞌ tlo gàc coꞌ gunee Uꞌ gàca, àꞌ?
\p
\v 5 Jesús mcàb loo myenꞌ. Ndxab Jesús loo myenꞌ:
\p ―Anderhuen guꞌ. Chó Diox chó nee guꞌ. Nee guꞌ nee guꞌ xá nzi tee guꞌ. Neꞌtaꞌde guꞌ lugar quedìi chol mèn guꞌ cón cheꞌn conꞌ coꞌ tlo gàc coꞌseꞌ gàc tiemp coꞌ tlo gàc conꞌ xal nac diꞌs coꞌ guniin loo guꞌ cón cheꞌn templ no cón cheꞌn xá mod lith no izlyoꞌ.
\v 6 Tac coꞌseꞌ gàc tiempa, anzeꞌf huax mèn ryoꞌ tee no yiꞌth que tee mèna yèez por yèez mèn no liz por liz mèn. Mèna ñee leꞌ daa mtelꞌ mèna. No ñee mèna leꞌ mèna nac Crist. Tataa mod anzeꞌf huax mèn quedìi mèna.
\p
\v 7 Lomisqueꞌ ne, coꞌseꞌ gòn guꞌ ndeꞌth mèn ndxàc xóꞌ, no anzeꞌf ryes naca par tlo xóꞌ leꞌn tiempa, neꞌzyebte guꞌ coꞌseꞌ gòn guꞌ teꞌth mèn tataa tac tataaqueꞌ naquin tlo gàca. Per mastaleꞌ tataa gàca leꞌn tiempa, neꞌgàcte tiempa lult huiz coꞌ lyux izlyoꞌ no lith no izlyoꞌ.
\v 8 Tac leꞌn tiemp coꞌ tlo gàc coꞌ guniin loo guꞌa, mèn thìb nación tlo yecloo no tlo yòo xyàn lezoꞌ mèn ñèe mèn tedib nación. No tlo mèn thìb nación, por derech, cuaꞌn xóꞌ mèna thìb xóꞌ loo mèn tedib nación. Leꞌn tiempa huin xòo huax lugar. No lyàa huin huax lugar. No tlo yátbèe mèn. Tlo mèn, li mèn thìb revuelt. No conꞌ coꞌ tlo gàca nac thìb yalnaxi no thìb yalnè coꞌ pente tlo par tlo tyactìi tínꞌ mèn loo izlyoꞌ ndxèꞌ.
\p
\v 9 Anderhuen guꞌ. Chó Diox chó nee guꞌ. Leque guꞌ quenap guꞌ coꞌseꞌ tlo gàc conꞌa leꞌn tiempa. Leꞌn tiempa, ale taꞌxùꞌ mèn guꞌ loo mèn nac zinꞌ yòolau chol lugar. No taꞌ mèn cheꞌn guꞌ coꞌteꞌ nac sinagog mèn. Guꞌ tyooxùꞌ loo mèn coꞌ nac gobernador no loo mèn coꞌ nac rey por cón chenen no maste. Tataa mod más gác guꞌ no taꞌi thìb lugar loo guꞌ par taꞌ guꞌ cuent loo mèn cón chenen.
\v 10 Cona, ngue niin loo guꞌ: Ndooreꞌ coꞌseꞌ lyux izlyoꞌ no lith no izlyoꞌ, naquinqueꞌ yath yèn cón cheꞌn diꞌs ndac cheꞌn Diox coꞌ ndluꞌ xá mod lyáꞌ mèn loo conꞌ ryes. No naquinqueꞌ co mèn yalbàn cón cheꞌn diꞌs ndac loo mèn, mèn coꞌ nac mèn chol nación coꞌ nziriꞌ dib athu loo izlyoꞌ.
\v 11 No coꞌseꞌ hueꞌ mèn guꞌ par taꞌ mèn guꞌ loo mèn nac zinꞌ yòolau chol lugar, neꞌtyóode guꞌ, no neꞌzyebte guꞌ, no neꞌ neꞌ gab guꞌ loo lezoꞌ guꞌ cón gab guꞌ loo mèna. Guuz guꞌ diꞌs coꞌ luꞌ Diox loo guꞌ loo mèna hora. Tac inacte ante guꞌ coꞌ ñii loo mèna. Ndxeꞌlequeꞌ, Xpii Natúꞌ nac xaꞌ coꞌ ñii no coꞌ tyoodiꞌs por ro guꞌ, coꞌ nee diꞌs, coꞌ nac diꞌs coꞌ ryoꞌ ro guꞌ hora.
\v 12 Leque mèn coꞌ ndxàc huespeꞌ cuaꞌn mod par taꞌxùꞌ mèna hues mèn par guth mèn hues mèn. No leque mèn coꞌ nac gundan loo mèn cuaꞌn mod par taꞌxùꞌ gundan xinꞌ gundan loo mèn par guth mèn xinꞌ gundan. Leꞌ myenꞌ coꞌ nac xganꞌ gundan na, myenꞌ cuaꞌn mod par bixyath myenꞌ contra xud myenꞌ par taꞌxùꞌ myenꞌ xud myenꞌ loo mèn par guth mèn xud myenꞌ.
\v 13 Ryete mèn coꞌ nac mèn chol nación, mèna yecloo ñèe guꞌ por cón chenen no maste. Per chol guꞌ coꞌ mbli nèequeꞌ guꞌ loo cón chenen par yòo guꞌ loo cón chenen axta gath guꞌ, guꞌa lyáꞌqueꞌ loo conꞌ ryes.
\p
\v 14 Tolo niin loo guꞌ, ne: Leꞌ mbiꞌ coꞌ ngroꞌ lèe Daniel coꞌ mdeꞌth diꞌs coꞌ ndxab Diox, mbiꞌ mqueꞌ yeꞌs loo libr coꞌ nac xtiꞌs Diox cón cheꞌn thìb mbiꞌ coꞌ li par gàc mèn mèn zab loo Diox no coꞌ li par tyuhuan mèn loo Diox par lyux mèn loo cón cheꞌn Diox. Coꞌseꞌ ñèe guꞌ ndoo mbiꞌ zaba coꞌteꞌ indxàalte tyoo mbiꞌ thidtene, syareꞌ taꞌ mèn cuent, mèn coꞌ ndlab yeꞌs, chó mbiꞌ nac mbiꞌa. Leꞌ sya, mèn nación Israel coꞌ nzo leꞌn yèezyaꞌ coꞌ nac làaz mèn jude, mèna ndxàal xyonꞌ par yii no par huan tith ya xonꞌ mèna loo conꞌ ryes coꞌ gàc loo mèna.
\v 15 Leꞌ mèn coꞌ nzi tee yéc zote liz mèn huiza na, más huen neꞌbilàade mèna par coꞌ mèn mase ndxepte cheꞌn mèn leꞌn nyòo. Más huen thìb lìte xyonꞌ mèna tith.
\v 16 Lomisqueꞌ ne, mèn coꞌ ngue zinꞌ huan huiza, más huen neꞌyeꞌthte mèna liz mèna huiza par coꞌ mèna mase xobis mèna liz mèna. Más huen thìb lìte xyonꞌ mèna más tith.
\v 17 Lomisqueꞌ ne, ay, prob rye mèngot izlyoꞌ, mèngot coꞌ nzi nac xinꞌ leꞌn huiza, no rye mèngot coꞌ nacàa mbetoꞌ coꞌ ndxàaz leꞌn huiza, tac yende mod xyonꞌ mèna huiza.
\v 18 Bnaꞌb guꞌ loo Diox par neꞌgàcte tiemp coꞌ xyonꞌ guꞌa tiemp xìlꞌ, ndee guꞌ.
\v 19 Tac tiempa gàc huiz coꞌ más tenꞌ mèn yalnè no huiz coꞌseꞌ más tyac mèn yaltìi. Conꞌ coꞌ gàc tiempa nac coꞌ tarte gàc dib lal naban mèn loo izlyoꞌ. Más de cona, ya neꞌberede gàca loo mèn tedib vez xal gàc conꞌa leꞌn tiempa thidtene.
\v 20 No cheleꞌ Tad Diox neꞌnglide par mdyóp tiemp coꞌseꞌ gàc yaltìia loo mèn, yende chó mèn gác lyáꞌ loo conꞌ ryes. Per por mqueꞌ lezoꞌ Diox ñèe Diox mèn, mèn coꞌ ngòo loo cón cheꞌn Diox, mèn coꞌ Diox mcui, por cona, mtedópqueꞌ Diox tiempa loo mèn.
\p
\v 21 Leꞌ sya, cheleꞌ chol mèn ñee loo guꞌ leꞌn tiempa: Huiꞌ guꞌ nexa. Trèꞌ nzo Crist, o huiꞌ guꞌ nexa, tuaꞌ nzo Crist, neꞌyilaꞌste guꞌi, ndee guꞌ.
\v 22 Tac tiempa yiꞌth huax mèn gutyèꞌ coꞌ ñee loo guꞌ nac mèna Crist xal daa. No ñee mèna loo guꞌ nac mèna mèn coꞌ ndeꞌth diꞌs coꞌ ndxab Diox cón cheꞌn Diox. No li mèna gàc huax yalguzyeꞌ coꞌ gàc xal thìb señ coꞌ huiꞌ mèn loo mèna. No li mèna huax yalguzyeꞌ roo no yalguzyeꞌ xèn par quedìi mèna mèn. No axta li mèna preb, ¿chéꞌ tli mèna gan quedìi mèna mèn coꞌ yub Diox mcui par yilaꞌs mèn coꞌ Diox mcui loo mèna, ne?
\v 23 Per ndxeꞌlequeꞌ, nalas gure guꞌ. Neequeꞌ guꞌ leꞌ daa guniileꞌ conꞌ ndxèꞌ loo guꞌ ndooreꞌ gàc conꞌa loo guꞌ.
\s Jesús ngue luꞌ loo myenꞌ xinꞌ mtéꞌth Jesús cón gàc no xá mod gàc conꞌ coꞌseꞌ yiꞌth Jesús loo izlyoꞌ tedib vez, Jesús coꞌ mbiꞌth yáal loo izlyoꞌ xalqueꞌ ndxáal chol mèn loo izlyoꞌ ndxèꞌ.
\r (Mt. 24.29–35, 42–44; Lc. 21.25–36)
\p
\v 24 Tolo niin conꞌ loo guꞌ: Coꞌseꞌ yilo riid tiemp coꞌseꞌ tenꞌ mèn yalnèa no yaltìia, syareꞌ gàc tiemp coꞌseꞌ cuau loo huiz no cuau loo mbeꞌ par neꞌtenìide huiz no neꞌtenìide mbeꞌ loo izlyoꞌ.
\v 25 Huiza lyàateriꞌ huax mbèelhuiꞌ no huax mbyáz loo izlyoꞌ. No ryete conꞌ coꞌ nac conꞌ roo no conꞌ xèn loo béꞌ tlo huin no xiꞌth leꞌn tiempa.
\v 26 Axta syareꞌ huiꞌ mèn loon, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ, tac tiempa galen loo izlyoꞌ ndxèꞌ tedib vez leꞌn xcuau con ryethe conꞌ coꞌ nac conꞌ roo no conꞌ xèn coꞌ ndxàpen laꞌs niin no coꞌ ndxàpen laꞌs yan. No huiꞌ mèn xal ndxàc conꞌ roo no conꞌ xèn loon tiempa.
\v 27 Leque tiempa, telꞌen angl daa par thidte queltàa angl mèn coꞌ ngòoleꞌ loo cón chenen, mèn coꞌ nac mèn coꞌ mcuin par ned coꞌteꞌ nac dyap lad ro izlyoꞌ coꞌ nac más tith ro izlyoꞌ no coꞌ nac más tith xànꞌ béꞌ.
\p
\v 28 Bìn guꞌ diꞌs coꞌ ngue tetaquen loo guꞌ ndxèꞌ, ne: Ftéꞌth guꞌ no bli guꞌ xtùuz xal ndxàca loo yaa ngudyuug. Coꞌseꞌ ndxàb laa loo yaa ngudyuug, no mbere laa yenꞌ, xiis laa yenꞌ loo yaa ngudyuug tedib vez, guꞌ nonqueꞌ no ndaꞌqueꞌ guꞌ cuent coꞌseꞌ nde xiisleꞌ laa loo yaa ngudyuug nde zinꞌ gaxleꞌ tiemp yùu coꞌseꞌ más nsoꞌ bée loo izlyoꞌ.
\v 29 Lomisqueꞌ mod ne, coꞌseꞌ ñèe guꞌ ndxàcleꞌ ryethe conꞌ loo izlyoꞌ xalqueꞌ ngue niina loo guꞌ ndxèꞌ, ftaꞌ guꞌ cuent no ftenꞌ guꞌ nde zinꞌ gaxleꞌ lyux izlyoꞌ no lith no izlyoꞌ. Nac conꞌa xal thìb mbiꞌ coꞌ ndoo ro ryoꞌ liz mbiꞌ par yòo mbiꞌ liz mbiꞌ.
\v 30 Lìcpeꞌ baꞌi, na nii loo guꞌ: Ryete conꞌ coꞌ ngue niin loo guꞌ ndxèꞌ gàcqueꞌ no tyaaqueꞌ no tyubqueꞌ diꞌsa ndooreꞌ lith no mèn nación Israel no lyux mèn nación Israel.
\v 31 Béꞌ no izlyoꞌ coꞌ nziriꞌ nalleꞌ lyux. Ya neꞌtolode cue béꞌ no izlyoꞌ yéꞌ huizeꞌ. Per diꞌs coꞌ ndyoodizen no conꞌ coꞌ ndluꞌen neꞌriꞌthte tuaꞌte. Leꞌi gàcqueꞌ, no tyaaqueꞌ, no tyubqueꞌ diꞌsa xalqueꞌ ngue toodizen loo guꞌ nalleꞌ.
\p
\v 32 Per huiz coꞌseꞌ gàcpeꞌ conꞌa no hor coꞌseꞌ gàcpeꞌ conꞌa, yende chó mèn nona no yende chó mèn naneei. Neꞌ yub angl coꞌ nzo loo béꞌ inaneede pól gàc conꞌa. Neꞌ neꞌ daa coꞌ nac xganꞌ Diox, inaneeden nalleꞌ coyor gàc conꞌa. Angoluxte Diox xuden nanee pól gàc tiempa.
\p
\v 33 Por cona, ngue niin loo guꞌ: Nalas gure guꞌ. Neꞌgàcte guꞌ xal mèn coꞌ nzi yàt loo cón cheꞌn Diox. Gurez guꞌ Diox. Tac guꞌ indaꞌde cuent pól zin tiemp coꞌseꞌ gàc conꞌ coꞌ ngue niin loo guꞌ ndxèꞌ.
\v 34 Cón cheꞌn tiemp coꞌ nac tiemp ndooreꞌ coꞌseꞌ beren, galen loo izlyoꞌ ndxèꞌ tedib vez, nac xal thìb mbiꞌ coꞌ ngroꞌ tee nda viaj tith. Per ndooreꞌ coꞌseꞌ ryoꞌ mbiꞌ liz mbiꞌ, mtanꞌ mbiꞌ diꞌs loo moz mbiꞌ cón li moz. No mtanꞌ mbiꞌ zinꞌ loo thìb thìb moz par li moz zinꞌ láth yende mbiꞌ. No mnibeꞌ mbiꞌ loo moz coꞌ nquenap puert liz mbiꞌ par altant tyoo moz quenap moz liz mbiꞌ.
\v 35 Cona, ngue niin loo guꞌ: Nalas gure guꞌ. No gure naa guꞌ loo cón cheꞌn Diox. Tac guꞌ neꞌtaꞌde cuent pól zin Tad, coꞌ nee diꞌs nac daa, coꞌ nac cheꞌn liza. ¿Chéꞌ zin daa hor coꞌ nde làa yálꞌ izlyoꞌ o chéꞌ zin daa gulal yálꞌ o chéꞌ zin daa hor coꞌseꞌ léꞌ nguiidtee yálꞌ o chéꞌ zin daa hor coꞌseꞌ nde yinìi izlyoꞌ? Neꞌneede naꞌ coyor gàc conꞌa, ¿léꞌ?
\v 36 Tac thìb descuid, chàa, galen loo izlyoꞌ ndxèꞌ thìb hor coꞌ neꞌñeede guꞌ no thìb hor coꞌ indlide guꞌ xtùuz zin daa. Ale leꞌleꞌ zin daa loo guꞌ hor coꞌseꞌ leꞌpeꞌ nziriꞌ guꞌ loo cón cheꞌn Diox xal mèn coꞌ nzi yàt.
\v 37 Leque diꞌs coꞌ ngue niin loo guꞌ ndxèꞌ nac diꞌs coꞌ tanꞌen loo mèn par taꞌ mèn cuent cón cheꞌn diꞌs ndaca loo alux mèn dib athu loo izlyoꞌ coꞌ naban chol tiemp. Diꞌsa nee diꞌs: Nalas cue mèn loo cón cheꞌn Diox thidtene.
\c 14
\s Mèn coꞌ ngòc ngolo ngolaꞌs cheꞌn Jesús nzi li xtùuz xá mod tyenxùꞌ mèn Jesús.
\r (Mt. 26.1–5; Lc. 22.1–2; Jn. 11.45–53)
\p
\v 1 Leꞌn huiza, chop huiz no maste ndxàc falt par tlo lni pasc no lni coꞌseꞌ ndxuhua mèn nación Israel pan coꞌ ingòode mèn dii levadur. Leꞌ mèn coꞌ nac jef cheꞌn nguleyꞌ coꞌ más ñibeꞌ loo nguleyꞌ, no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn na, mèna mcuaꞌn mod par tyenxùꞌ mèna Jesús con purte diꞌs gutyèꞌ, no con mod gutyèꞌ coꞌ mdoodiꞌs mèn thidte diꞌs coꞌ ngòc par cuaꞌn mèna mod guthxùꞌ mèna Jesús.
\v 2 No mbez mèna loo xtàa mèna:
\p ―Neꞌlide naꞌ conꞌ ndlyaꞌs naꞌ con Jesús leꞌn huiz lni par neꞌxide lezoꞌ mèn no par neꞌyátbèede mèn coꞌ yiꞌth lni contra naꞌ.
\s Thìb xaꞌgot mtà aceit yéc Jesús.
\r (Mt. 26.6–13; Jn. 12.1–8)
\p
\v 3 Leꞌn huiza, ngo Jesús yèez Betañ liz thìb mbiꞌ coꞌ mdub lèe mèn Mon Lepros. Láth ndub Jesús loo mes liz mbiꞌa, mzin thìb xaꞌgot loo Jesús. Nde no xaꞌ thìb frasc coꞌ natoxcuaꞌ con thìb loo quèe coꞌ lèe alabastr. Frasca zyè nzo aceit coꞌ ndlyaꞌ purte xlaꞌ yeꞌ nard. Aceita anzeꞌf náp ntac. Sya, mbléꞌ xaꞌgota frasc par mblath xaꞌgota aceita yéc Jesús.
\v 4 Per ndxep mèn coꞌ ngo tya, mèna ale ngocloo gunèe xaꞌgota. Ndxab mèna loo xtàa mèna:
\p ―¿Chonon ale ngue tezaꞌxùꞌ xaꞌgot baꞌ aceit coꞌ anzeꞌf naziꞌ ndlyaꞌ, yoo?
\v 5 Nzoqueꞌ mod thoꞌ xaꞌgot aceit baꞌ por mil xon ayo pes. No yiloa, liꞌth xaꞌgota tmi par taꞌlaꞌs xaꞌgot tmia càa mèn prob.
\p No ale ngòo xyàn lezoꞌ mèna gunèe mèna xaꞌgota.
\p
\v 6 Per Jesús ndxab loo mèna:
\p ―Blaꞌ guꞌ tee tub xaꞌgot ndxèꞌ. ¿Chonon ngue tethon guꞌ xaꞌ no ngue li xol guꞌ xaꞌ, àꞌ? Tac conꞌ coꞌ ngue li xaꞌgot ndxèꞌ loon anzeꞌf huen naca.
\v 7 Guꞌ thidtenequeꞌ nzo làth mèn prob. No nzo mèn prob làth guꞌ. No nzoqueꞌ mod li guꞌ conꞌ ndac loo mèn prob coꞌseꞌ ndlyaꞌs guꞌ li guꞌi. Per part cón chenen, ya neꞌtolode go non guꞌ.
\v 8 Prob xaꞌgot ndxèꞌ ngue li coꞌ nzote mod li xaꞌ loon. Xaꞌgot ndxèꞌ ngue go xlaꞌ aceit coꞌ anzeꞌf naziꞌ ndlyaꞌ baꞌ laden ndooreꞌ coꞌseꞌ caꞌs mèn daa par neꞌyitoode xlaꞌ laden coꞌseꞌ ya caꞌs mèn daa.
\v 9 Lìcpeꞌ baꞌi, na nii loo guꞌ: Pál coꞌteꞌ co mèn yalbàn no teꞌth mèn cón cheꞌn diꞌs ndac cheꞌn Diox coꞌ ndluꞌ xá mod teláꞌ Diox mèn loo conꞌ ryes dib athu loo izlyoꞌ, taꞌ mèna cuent cón cheꞌn conꞌ mbli no xaꞌgot ndxèꞌ daa par teꞌ lezoꞌ mèn cón cheꞌn xaꞌgot ndxèꞌ.
\s Jud mcuaꞌn thìb mod par mdaꞌxùꞌ Jud Jesús loo mèn coꞌ ngòc ngolo ngolaꞌs cheꞌn Jesús.
\r (Mt. 26.14–16; Lc. 22.3–6)
\p
\v 10 Leꞌ sya, Jud Iscariot, coꞌ nac thìb myenꞌ xinꞌ mtéꞌth Jesús, ngua toodiꞌs no mèn coꞌ nac jef cheꞌn nguleyꞌ coꞌ más ñibeꞌ loo nguleyꞌ par ñeeneꞌ xá mod li Jud par taꞌxùꞌ Jud Jesús loo mèna.
\v 11 Coꞌseꞌ mbìn mèn coꞌ nac jef cheꞌn nguleyꞌ coꞌ más ñibeꞌ loo nguleyꞌ diꞌs coꞌ ndxab Jud loo mèna, anzeꞌf mdyac lezoꞌ mèna. No mcàbgòn mèna loo Jud taꞌ mèna tmi càa Jud coꞌseꞌ yilo taꞌxùꞌ Jud Jesús loo mèna. Leque hora mtlo Jud, mcuaꞌn Jud mod xá mod taꞌxùꞌ Jud Jesús loo mèna.
\s Jesús nduhua rsè no myenꞌ xinꞌ mtéꞌth Jesús thìb xhuin.
\r (Mt. 26.17–29; Lc. 22.7–23; Jn. 13.21–30; 1 Co. 11.23–26)
\p
\v 12 Coꞌseꞌ ngonìi izlyoꞌ coꞌ nac huiz yub lni coꞌseꞌ ndxuhua mèn pan coꞌ ingòode mèn dii levadur no coꞌseꞌ ndxuth mèn mbacxilꞌ coꞌ ndxuth mèn loo Diox coꞌseꞌ ndxáal lni pasc, huiza myenꞌ xinꞌ mtéꞌth Jesús mnibdiꞌs loo Jesús. Ndxab myenꞌ loo Jesús:
\p ―Tad, ¿pá ndlyaꞌs Uꞌ li nab nuꞌ thìb lugar par hua rsè naꞌ rsè coꞌ nac cheꞌn lni pasc, àꞌ?
\p
\v 13 Sya, mtelꞌ Jesús chop myenꞌ xinꞌ mtéꞌth Jesús. Ndxab Jesús loo myenꞌ:
\p ―Huàa guꞌ leꞌn ciuda Jerusalén baꞌ. Tuaꞌ zyálꞌ guꞌ thìb mbiꞌ coꞌ neꞌ thìb rre nít. Ftoo nque guꞌ xís mbiꞌ.
\v 14 No coꞌseꞌ zin mbiꞌ coꞌteꞌ yòo mbiꞌ, yòo guꞌ con mbiꞌ. Sya, gab guꞌ loo mbiꞌ coꞌ nac gundan coꞌ nac cheꞌn liza: Maistr nuꞌ gunee diꞌs ndxèꞌ loo nuꞌ par ñee nuꞌ diꞌs ndxèꞌ lool: ¿Pá ndub cuart coꞌteꞌ gòon par hua rsèꞌen coꞌ nac rsè pasc con myenꞌ xinꞌ mtéꞌth daa, àꞌ?
\v 15 Leꞌ sya, mbiꞌ coꞌ nac gundan coꞌ nac cheꞌn yòoa luꞌ loo guꞌ pá ndub thìb cuart coꞌ más naroo loo pis gáp liz mbiꞌ. Cuarta mblyoꞌfleꞌ no mdyoxcuaꞌleꞌ. Tya toxcuaꞌ guꞌ conꞌ hua rsè naꞌ coꞌ nac nteꞌ lezoꞌ mèn pasc.
\p
\v 16 Sya, mxen myenꞌ xinꞌ mtéꞌth Jesús ned. Nda myenꞌ. Mzin myenꞌ leꞌn ciuda Jerusalén. No ngòcqueꞌ conꞌ loo myenꞌ xalqueꞌ ndxab Jesús loo myenꞌ. Sya, mtoxcuaꞌ myenꞌ nítyèth coꞌ hua rsè no myenꞌ Jesús par teꞌ lezoꞌ myenꞌ cón cheꞌn pasc.
\p
\v 17 Coꞌseꞌ ngulàa yálꞌ izlyoꞌ huiza, mzin Jesús con ryete siꞌ fchop myenꞌ xinꞌ mtéꞌth Jesús loo pis gáp coꞌteꞌ nac cuart liz mbiꞌa par hua rsè no Jesús myenꞌ tya.
\v 18 Coꞌseꞌ ndub yuhua rsè no Jesús myenꞌ xinꞌ mtéꞌth Jesús loo mes, ndxab Jesús loo myenꞌ:
\p ―Lìcpeꞌ baꞌi, na nii loo guꞌ leꞌ thìb guꞌ, coꞌ ngue yuhua no daa, taꞌxùꞌ daa loo mèn coꞌ nac ngolo ngolaꞌs cheꞌn daa.
\p
\v 19 Sya, mxi lezoꞌ myenꞌ xinꞌ mtéꞌth Jesús. No mtlo myenꞌ, mnibdiꞌs myenꞌ loo thìb xtàa myenꞌ no loo tedib xtàa myenꞌ. Mbez myenꞌ:
\p ―Neꞌstolqueꞌ daai, yoo.
\p No mbez tedib myenꞌ loo xtàa myenꞌ:
\p ―Neꞌstolqueꞌ daai, yoo.
\p
\v 20 Jesús mcàb loo myenꞌ. Ndxab Jesús:
\p ―Thìb guꞌ coꞌ nzo làth rye siꞌ fchop guꞌ coꞌ mcuin coꞌ ngue yuhua non thidte plat, guꞌa taꞌxùꞌ daa loo mèn coꞌ nac ngolo ngolaꞌs chenen.
\v 21 Huenqueꞌ naca, ey, leꞌ daa, coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ, gàca loon xalqueꞌ mbez diꞌs coꞌ ndub loo libr coꞌ nac xtiꞌs Diox cón chenen. Per ay, prob mbiꞌ izlyoꞌ, mbiꞌ coꞌ taꞌxùꞌ daa loo mèn coꞌ nac ngolo ngolaꞌs chenen. Más huen ngàca loo mbiꞌa neꞌngáalte mbiꞌ loo izlyoꞌ thidtene leque taꞌxùꞌ mbiꞌa daa loo mèn yeꞌrsinꞌa.
\p
\v 22 Láth ngue yuhua rsè myenꞌ xinꞌ mtéꞌth Jesús con Jesús, mxen Jesús pan. Ndxab Jesús:
\p ―Diox quix Uꞌ, Diox, loo Diox.
\p Ngoloa, mchìꞌx Jesús pan. Mdaꞌ Jesús pan loo myenꞌ xinꞌ mtéꞌth Jesús. Ndxab Jesús loo myenꞌ:
\p ―Dhua guꞌ pan ndxèꞌ, ey. Pan ndxèꞌ nee diꞌs nac cón cheꞌn bélꞌyòo laden coꞌ gath por cón cheꞌn rye mèn.
\p
\v 23 Sya, mxen Jesús thìb vas vin. Ndxab Jesús:
\p ―Diox quix Uꞌ, Diox, loo Diox.
\p Ngoloa, mdaꞌ Jesús vas vin loo myenꞌ xinꞌ mtéꞌth Jesús. Sya, ngu ryete myenꞌ chuꞌth chuꞌth vin.
\p
\v 24 Ngoloa, ndxab Jesús loo myenꞌ:
\p ―Vin coꞌ ngolo ngu guꞌ baꞌ nee diꞌs nac cón cheꞌn ren laden coꞌ xyo loo izlyoꞌ par li nèen tedib conveñ coꞌ gàc thìb conveñ cub yiloa. No xyo ren laden loo izlyoꞌ por cón cheꞌn huax mèn par tataa mod, mèn coꞌ yilaꞌs loo cón chenen, tyonꞌ xtol mèna no tyonꞌ xquin mèna.
\v 25 Per, lìcpeꞌ baꞌi, na ngue nii loo guꞌ: Desde nalleꞌ par delant, neꞌbereden gun vin xal ngue yun vin nalleꞌ con guꞌ loo izlyoꞌ ndxèꞌ. Na gu vin con guꞌ tedib vez axta coꞌseꞌ ñibeꞌpeꞌ xuden Diox loo mèn.
\s Jesús ngue taꞌ cuent loo Pedr leꞌ Pedr cà diꞌs Jesús loo mèn.
\r (Mt. 26.30–35; Lc. 22.31–34; Jn. 13.36–38)
\p
\v 26 Coꞌseꞌ ngolo mbilꞌ ro no Jesús myenꞌ xinꞌ mtéꞌth Jesús thìb himn, nda Jesús con myenꞌ loo thìb yii coꞌ lèe yii cheꞌn yaa oliv.
\v 27 Sya, láth ndoo Jesús ned, ndxab Jesús loo myenꞌ:
\p ―Nase, ryete guꞌ anzeꞌf xi lezoꞌ no tyoo xàꞌ lezoꞌ guꞌ por cón chenen yálꞌ ndxèꞌ, ey. Tac loo libr coꞌ nac xtiꞌs Diox ndub diꞌs coꞌ mbez:
\pi1 Daa guth pastor. Leꞌ mbacxilꞌ pastor na, ryeꞌs pál.
\m
\v 28 Per coꞌseꞌ yilo ryo xban daa, daa ga ner loo guꞌ leꞌn thìb yèezyaꞌ cheꞌn làaz mèn galile.
\p
\v 29 Sya, ndxab Pedr loo Jesús:
\p ―Mastaleꞌ ryete myenꞌ baꞌ xi lezoꞌ no tyoo xàꞌ lezoꞌ myenꞌ baꞌ loo cón cheꞌn Uꞌ, per part cón chenen daa neꞌxide lezoꞌ no neꞌ neꞌ tyoo xàꞌ lezon ñèen cón gàc loo Uꞌ.
\p
\v 30 Per Jesús ndxab loo Pedr:
\p ―Pedr, lìcpe baꞌi, na nii lool: Nal xhuin ndooreꞌ léꞌ nguiidtee yálꞌ no cozèe nguiidtee chop vez, lùu cà diꞌs daa son vez loo mèn.
\p
\v 31 Per Pedr mbli nèe diꞌs. Ndxab Pedr loo Jesús:
\p ―Mastaleꞌ gath daa con Uꞌ, Tad, na neꞌcà diꞌste Uꞌ.
\p No ale ryete myenꞌ xinꞌ mtéꞌth Jesús thidte diꞌs ndxab loo Jesús.
\s Jesús ngurez Diox coꞌteꞌ ngòc thìb huert coꞌ lèe Getsemaní.
\r (Mt. 26.36–46; Lc. 22.39–46)
\p
\v 32 Sya, nda no Jesús myenꞌ xinꞌ mtéꞌth Jesús thìb lugar coꞌ lèe Getsemaní. Tya, ndxab Jesús loo myenꞌ xinꞌ mtéꞌth Jesús:
\p ―Trèꞌte gure tub guꞌ láth nda bezen Diox tachuꞌthte más baꞌleꞌ.
\p
\v 33 Ante mbeꞌ Jesús Pedr, no Cob, no Juàn. Leꞌ Jesús na, naxut naxut gunaa loo. No mxi tínꞌ lezoꞌ Jesús.
\v 34 No ndxab Jesús loo myenꞌ:
\p ―Ndenꞌ lezon axta arid nalyat gàca loon coꞌseꞌ tetìi mèn daa axta gath daa. Trèꞌte byanꞌ guꞌ. Gure naa guꞌ no neꞌgàtte guꞌ, ndee guꞌ.
\p
\v 35 Sya, ngua Jesús tachuꞌthte más delant. Tya, mdub xib Jesús. No mcotloo Jesús loo yòo. Ndxab Jesús loo Diox:
\p ―Tad, cheleꞌ Uꞌ nee lezoꞌ, neꞌtenꞌten arid yalnè coꞌ gàc loon leꞌn huiz ndxèꞌ.
\p
\v 36 Láth ngue bez Jesús Diox, ndxab Jesús loo Diox, ne:
\p ―Pay, yey, ryete conꞌ nzoqueꞌ mod li Uꞌ. Fteláꞌ Uꞌ daa loo yalnè coꞌ gàc coꞌ tenꞌen coꞌseꞌ tyactìi daa. Per, lìcpeꞌ baꞌi, indlyasten gàca loon xal ndlyazen. Ndxeꞌlequeꞌ, ndlyazen gàc loon xal neete lezoꞌpeꞌ Uꞌ no maste.
\p
\v 37 Ngoloa, ndyeꞌth Jesús coꞌteꞌ mbyanꞌ Pedr, no Cob, no Juàn. Per coꞌseꞌ gunèe Jesús myenꞌ, ale nzi yàt myenꞌ. Sya, mbloꞌ Jesús mcalꞌ loo myenꞌ. Ndxab Jesús loo Pedr:
\p ―Mon, ¿chéꞌ nax yàtl, càꞌ? ¿Chéꞌ neꞌnxectel ndub naal mase thìb hor, càꞌ?
\v 38 Gure naa guꞌ mase chuꞌth, yey. No gurez guꞌ Diox par neꞌaselide guꞌ cuaꞌn guꞌ xquin guꞌ nabaꞌ. Lìcpeꞌ baꞌi, xtùuz guꞌ no lezoꞌ guꞌ anzeꞌf ndlyaꞌs leꞌ guꞌ cuez Diox. Per bélꞌyòo lad guꞌ baꞌ ndli ndenꞌ guꞌ ngo zan guꞌ. Cona, ngulàa fuerz guꞌ. Ale mbuuꞌs guꞌ nzi guꞌ.
\p
\v 39 Ngoloa, mbere Jesús, nda bez Jesús Diox mbryop vez. Ndxab Jesús leque diꞌsa loo Diox.
\v 40 Mbere Jesús, ndyeꞌth Jesús coꞌteꞌ mbyanꞌ Pedr, no Cob, no Juàn. Lomisqueꞌ, nzi yàt myenꞌ tac ngudloo myenꞌ neꞌnxecte tant thìb mcalꞌ nzo ngudloo myenꞌ. Per axta neꞌ neꞌ ñee myenꞌ cón gab myenꞌ loo Jesús coꞌseꞌ gunèe myenꞌ ndyeꞌth Jesús.
\v 41 Ngolo mbyon vez ndyeꞌth Jesús coꞌteꞌ mbyanꞌ Pedr, no Cob, no Juàn par ñèe Jesús máa myenꞌ. Ndxab Jesús loo myenꞌ:
\p ―¿Chéꞌ ngue li guꞌ cuent gàt guꞌ nal xhuin, càꞌ? Pà gàt guꞌ. Mzinleꞌ hor coꞌseꞌ taꞌxùꞌ thìb mbiꞌ daa, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ, loo mèn yeꞌrsinꞌ coꞌ ndxàp xquin no coꞌ ndxàp xtol.
\v 42 Goo too guꞌ. Yaꞌ guꞌ ndyàa naꞌ. Ndeleꞌ mbiꞌ coꞌ taꞌxùꞌ daa loo mèn.
\s Mèn coꞌ ngòc ngolo ngolaꞌs cheꞌn Jesús mbeꞌ Jesús xal ndxeꞌ mèn thìb pres.
\r (Mt. 26.47–56; Lc. 22.47–53; Jn. 18.2–11)
\p
\v 43 Tatabeꞌ ngue toodiꞌs no Jesús myenꞌ xinꞌ mtéꞌth Jesús coꞌseꞌ ngro ziꞌf Jud, nde Jud, Jud coꞌ ngòo cuent nac siꞌ fchop myenꞌ xinꞌ mtéꞌth Jesús. Nde no Jud huax mèn. Chó mèn nzo spad yaꞌ. Chó mèn nzo thìb broꞌ yaa yaꞌ. Mèn coꞌ mbiꞌth ngòc mèn coꞌ mtelꞌ jef cheꞌn nguleyꞌ coꞌ más ñibeꞌ loo nguleyꞌ, no mèn coꞌ mtelꞌ mèn coꞌ ngòc maistr coꞌ ndluꞌ cón cheꞌn ley coꞌ mxoꞌf Moisés loo mèn, no mèn coꞌ mtelꞌ rye mèngool coꞌ ndyoo ner, no coꞌ ndyoo naa, no coꞌ ñibeꞌ loo mèn nación Israel.
\v 44 Leꞌ Jud coꞌ mdaꞌxùꞌ Jesús loo mèn yeꞌrsinꞌ na, ndxab loo mèn coꞌ nde no Jud ndooreꞌ ryoꞌ Jud con mèna:
\p ―Neequeꞌ guꞌ mbiꞌ coꞌ tan thìb chit ro, mbiꞌa nac Jesús. Tyen guꞌ mbiꞌ. No neꞌláꞌde guꞌ mbiꞌ.
\p
\v 45 No texal mzin Jud loo Jesús, mbii gax Jud loo Jesús. Ndxab Jud loo Jesús chop vez:
\p ―Maistr, Maistr.
\p Látha, thidte de repent mdaꞌ Jud thìb chit ro Jesús.
\v 46 Sya, mxen mcàa mèna Jesús. Mbeꞌ mèna Jesús xal thìb pres loo rye mèn coꞌ mtelꞌ mèn coꞌ mbeꞌ Jesús.
\p
\v 47 Per thìb myenꞌ xinꞌ mtéꞌth Jesús coꞌ nzo làtha mdob spad leꞌn cubiert. Mblàa myenꞌa thìb yaꞌ spad nza thìb moz cheꞌn jef cheꞌn nguleyꞌ coꞌ más mnibeꞌ loo rye nguleyꞌ. Ale mblo ndeꞌf myenꞌa nza moz.
\v 48 Sya, ndxab Jesús loo rye mèna:
\p ―¿Chéꞌ, lìcqueꞌ, por derech, ngroꞌ guꞌ con spad no con thìb broꞌ yaa yaꞌ guꞌ par tyenxùꞌ guꞌ daa no hueꞌ guꞌ daa xal ndxeꞌ mèn thìb huanꞌ cheleꞌ daa ngàc huanꞌ, càꞌ?
\p
\v 49 Ndxab Jesús loo mèna, ne:
\p ―Atate huiz ngo non guꞌ. No mbluꞌen guꞌ leꞌn templ guꞌ. No leꞌn rye huiza neꞌndenxùꞌde guꞌ daa xal thìb pres, ¿léꞌ? Per ndxàc conꞌ ndxèꞌ loon par tyaaqueꞌ no gàcqueꞌ no tyubqueꞌ diꞌs cón cheꞌn daa xal ndub diꞌs loo libr coꞌ nac xtiꞌs Diox.
\p
\v 50 Látha, ale ryete myenꞌ xinꞌ mtéꞌth Jesús mxonꞌ. Mbláꞌ myenꞌ thidte Jesús.
\s Trèꞌ ndluꞌ cón cheꞌn thìb mbyòo coꞌ mxonꞌ làtha.
\p
\v 51 Per thìb mbyòo coꞌ mdoo nque xís Jesús, mbyòoa mcap thìb sab no maste. Sya, mxen mèna mbyòo par hueꞌ mèna mbyòo, ne.
\v 52 Per mbyòo mcuaꞌn mod ngroꞌ thin mbyòo leꞌn sab. Che mbyòo, mxonꞌ mbyòo, ndyaa mbyòo.
\s Jesús mdooxùꞌ loo rye mèn coꞌ mnibeꞌ, no coꞌ mdyoo ner, no coꞌ mdyoo naa loo mèn nación Israel.
\r (Mt. 26.57–68; Lc. 22.54–55, 63–71; Jn. 18.12–14, 19–24)
\p
\v 53 Sya, mbeꞌ rye mèna Jesús loo ner jef cheꞌn nguleyꞌ coꞌ más ñibeꞌ loo rye nguleyꞌ. No mqueltàa ryete mèn coꞌ nac jef cheꞌn nguleyꞌ, no mqueltàa ryete mèngool coꞌ ndyoo ner, no coꞌ ndyoo naa, no coꞌ ñibeꞌ loo mèn nación Israel, no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn coꞌteꞌ mdoo Jesús.
\v 54 Leꞌ Pedr na, tith tith mdoo nque xís Jesús. Mzin Pedr axta loo lueꞌ liz ner jef coꞌ más ñibeꞌa. Tya, ale note Pedr mdub biiz ro rdii làth mèn coꞌ ngòc polesi coꞌ ngue quenap Jesús par neꞌxonꞌte Jesús loo mèna.
\p
\v 55 Leꞌ rye mèn coꞌ nac jef cheꞌn nguleyꞌ coꞌ más ñibeꞌ, no rye mèn coꞌ ndyoo ner, no coꞌ ndyoo naa, no coꞌ ñibeꞌ loo mèn nación Israel, mèna mcuaꞌn mod xá mod quexùꞌ queꞌ fals mèna Jesús par tataa mod guth yèe mèna Jesús. Per neꞌnglide mèna gan mcuaꞌn mèna mod ngli mèna conꞌa.
\v 56 No anzeꞌf thìb mèna mbez ampurte diꞌs gutyèꞌ cón cheꞌn Jesús axta neꞌ neꞌ ñee mèna chó ro gòn mèna. Ale leque mèna ngue go xoꞌf cón cheꞌn yalgutyèꞌ coꞌ mbez mèna con xtàa mèna.
\v 57 Ndxetoo ndxegaꞌ ndxep mèna. No ndaꞌ mèna cuent gutyèꞌ par quexùꞌ queꞌ fals mèna Jesús. Mbez mèna loo xtàa mèna:
\p
\v 58 ―Nuꞌ mbìn leꞌ mbiꞌ baꞌ ndxab leꞌ mbiꞌ telux templ cheꞌn Diox coꞌ mtoxcuaꞌ mèn póla. No tolo ndxab mbiꞌ leꞌn son huiz no maste xít teꞌf mbiꞌ tedib templ. No templ coꞌ mbez mbiꞌ toxcuaꞌ mbiꞌ neꞌtoxcuaꞌde chol mèn. Neꞌ neꞌ lyath no mèn mbiꞌ toxcuaꞌ mbiꞌ templa.
\p
\v 59 Per mastaleꞌ tataa mdaꞌ mèna cuent, indaꞌde mèna cuent thidte diꞌs cón cheꞌn Jesús.
\p
\v 60 Sya, ngoo too ndeꞌf mbiꞌ coꞌ nac jef cheꞌn nguleyꞌ coꞌ más ñibeꞌ loo rye nguleyꞌ làth rye mèna. Mnibdiꞌs mbiꞌ loo Jesús. Ndxab mbiꞌ:
\p ―¿Chéꞌ yende chó diꞌs ndlyaꞌsl ñeel loon, càꞌ? ¿Xá mod chonon tatuaꞌ mbez mèn baꞌ cón cheꞌnl, cara?
\p
\v 61 Per Jesús yende chó diꞌs ngab. Xèe mdoo Jesús loo mèna. Mbere mbiꞌ coꞌ ngòc jef cheꞌn nguleyꞌa, mnibdiꞌs mbiꞌ loo Jesús tedib vez. Ndxab mbiꞌ loo Jesús:
\p ―¿Chéꞌ, lìcqueꞌ, nac lùu Crist, xganꞌpeꞌ Diox, Diox coꞌ thidtenequeꞌ ndyac lezoꞌ, càꞌ?
\p
\v 62 Jesús ndxab loo jef cheꞌn nguleyꞌa:
\p ―Aa. Nacqueꞌ daa Crist, pues. Na nii lool nalleꞌ leꞌ guꞌ huiꞌ loon, daa coꞌ mbal yáal loo izlyoꞌ xalqueꞌ ndxáal chol mèn loo izlyoꞌ, coꞌseꞌ tuben cuat Diox coꞌ ndxàp rye loothe conꞌ roo no conꞌ xèn laꞌs nii Diox no laꞌs yaꞌ Diox. No huiꞌ guꞌ loon coꞌseꞌ gàc huiz coꞌseꞌ galen loo izlyoꞌ ndxèꞌ tedib vez leꞌn xcuau.
\p
\v 63 Coꞌseꞌ mbìn mbiꞌ coꞌ ngòc jef cheꞌn nguleyꞌ coꞌ más ñibeꞌ tataa ndxab Jesús, ale mched yèe mbiꞌ xab mbiꞌ tac mdenꞌ mbiꞌ leꞌ Jesús gunii yèe gunii tìi cón cheꞌn Diox. Sya, ndxab mbiꞌ loo mèn coꞌ nziriꞌ no mbiꞌa:
\p ―¿Cón li no naꞌ más mèn coꞌ taꞌ cuent cón cheꞌn mbiꞌ baꞌ? Con diꞌs coꞌ ngolo gunee mbiꞌ baꞌ ngogaaleꞌ mbiꞌ loo yalgutyèꞌ mbiꞌ.
\v 64 Guꞌ mbìn no mdaꞌqueꞌ guꞌ cuent xal ngolo gunii yèe gunii tìi mbiꞌ baꞌ cón cheꞌn Diox, ¿léꞌ? ¿Xá nee guꞌ? ¿Cón li no naꞌ mbiꞌ baꞌ?
\p Sya, ryete mèna mquexùꞌ mqueꞌ fals Jesús par guth mèn Jesús.
\p
\v 65 Leꞌ sya, mtlo ndxep mèna, msuc mèna rloo Jesús. No mtauꞌ mèna loo Jesús con thìb leꞌ larꞌ. No ale mdaꞌ mèna cheꞌn Jesús. Ale mbez mèna loo Jesús:
\p ―Bli divin chó ngue taꞌ cheꞌnl.
\p Leꞌ mèn coꞌ ngòc polesi cheꞌn templ coꞌ nquenap templ na, ale nguis mèna rloo Jesús.
\s Pedr mcà diꞌs cón cheꞌn Jesús loo mèn.
\r (Mt. 26.69–75; Lc. 22.56–62; Jn. 18.15–18, 25–29)
\p
\v 66 Láth ngue li no mèn conꞌa loo Jesús, Pedr xexte ndoo par xànꞌ bléꞌ loo lueꞌ. Per láth ndoo Pedr tya, mzin thìb mzaꞌ coꞌ ngòc criad cheꞌn jef cheꞌn nguleyꞌ coꞌteꞌ ndoo Pedr.
\v 67 Texal gunèe criad ndoo biiz Pedr ro dìi, xèe mbuiꞌ criad loo Pedr. Sya, ndxab criad loo Pedr:
\p ―Lùu, ne, naqueltàa no Jesús cheꞌn yèez Nazaret, ¿léꞌ?
\p
\v 68 Per Pedr ale mcàꞌ diꞌs Jesús. Ndxab Pedr:
\p ―Neꞌlibeden chó mbiꞌ nac mbiꞌ baꞌ. No axta neꞌ neꞌ indxònen cón ndyoodiꞌsl.
\p Sya, xexte ngroꞌ Pedr par ned ro puert. Láth nda roꞌ Pedr, chàa, ngrozèe thìb nguiidtee mbléꞌ nguiidtee yálꞌ.
\v 69 Mbere criad, xèe mbuiꞌ criad loo Pedr tedib vez. Mtlo criad, ndxab criad loo mèn coꞌ nziriꞌ tya:
\p ―Mbiꞌ baꞌ, ne, nac thìb mbiꞌ coꞌ naqueltàa no Jesús, ndyaquen.
\p
\v 70 Mbere Pedr, mcàꞌ diꞌs Pedr Jesús tedib vez. Pente ndxàc nguriꞌth conꞌa, mbere mèn coꞌ nziriꞌ tya. Ndxab mèn loo Pedr:
\p ―Lìcpeꞌ baꞌi, lùu, ne, nac thìb myenꞌ coꞌ ngue tee no Jesús. Tac lùu nac mèn gulàaz cheꞌn làaz mèn galile. No mod coꞌ ndyoodiꞌs lùu baꞌ nac coꞌ ndluꞌ xal ndyoodiꞌs mèna.
\p
\v 71 Sya, leque Pedr mtlo gunii ngòc nguàal diꞌs. No mdeꞌth Pedr Diox. Ndxab Pedr loo mèna:
\p ―Neꞌlibeden mbiꞌ coꞌ ñibdiꞌs guꞌ loon, cara.
\p
\v 72 Leque hora, chàa, ngrozèe nguiidtee mbryop vez mbléꞌ nguiidtee yálꞌ. Axta syareꞌ mteꞌ lezoꞌ Pedr diꞌs coꞌ ndxab Jesús loo Pedr: Ndooreꞌ coꞌseꞌ cozèe nguiidtee chop vez, lùu cà diꞌs daa son vez.
\p Coꞌseꞌ mbli Pedr xtùuz cón cheꞌn diꞌs coꞌ ndxab Jesús loo Pedr, neꞌtíꞌ neꞌñee lezoꞌ Pedr mbínꞌ Pedr axta plóthe.
\c 15
\s Jesús mdooxùꞌ loo Pilat coꞌ ngòc gobernador tiempa.
\r (Mt. 27.1–2, 11–14; Lc. 23.1–5; Jn. 18.28–38)
\p
\v 1 Coꞌseꞌ ngonìi izlyoꞌ tedib huiz coꞌ nde nquea, mèn coꞌ ngòc jef cheꞌn nguleyꞌ coꞌ más ñibeꞌ loo nguleyꞌ, no mèngool coꞌ ndyoo ner, no coꞌ ndyoo naa, no coꞌ ñibeꞌ loo mèn nación Israel, no rye mèn coꞌ ngòc maistr coꞌ mbluꞌ cón cheꞌn ley coꞌ mxoꞌf Moisés loo mèn, no rye mèn coꞌ más ñibeꞌ loo mèn nación Israel, ryete mèna thidte mqueltàa par mdub dóꞌ mèna yaꞌ Jesús par mbeꞌ mèna Jesús loo Pilat.
\v 2 Sya, mnibdiꞌs Pilat loo Jesús. Ndxab Pilat:
\p ―¿Chéꞌ nac lùu rey cheꞌn mèn nación Israel, càꞌ?
\p Jesús mcàb. Ndxab Jesús loo Pilat:
\p ―Aa. Nac daa rey, pues, xalqueꞌ ngolo guneela baꞌ.
\p
\v 3 Leꞌ mèn coꞌ ngòc jef cheꞌn nguleyꞌ coꞌ más ñibeꞌ loo nguleyꞌa na, anzeꞌf thìb conꞌ ngue quexùꞌ ngue queꞌ fals Jesús loo Pilat.
\v 4 Leꞌ sya, mbere Pilat, mnibdiꞌs Pilat loo Jesús. Ndxab Pilat:
\p ―¿Chéꞌ yende chó diꞌs lyaꞌsl càbl loo mèn baꞌ, càꞌ? Huiꞌ no maste napló conꞌ ngue quexùꞌ ngue queꞌ fals mèn baꞌ lùu.
\p
\v 5 Per ndxeꞌlequeꞌ, yende chó diꞌs mcàb Jesús loo mèna. Leꞌ Pilat na, axta neꞌ neꞌ ñee Pilat cón li Pilat xtùuz cón cheꞌn Jesús.
\s Por lult mnibeꞌ Pilat loo mèn ya yuth mèn Jesús.
\r (Mt. 27.15–31; Lc. 23.13–25; Jn. 18.38—19.16)
\p
\v 6 Nde nxonꞌ, mque no mèn nación Israel costumbr làa mèn coꞌ ndxàc gobiern thìb pres cad linꞌ coꞌseꞌ ndxáal lni cheꞌn pasc. Pres coꞌ gab mèn lyáꞌ, presa lyáꞌ.
\v 7 Leꞌxqueꞌ leꞌn huiza, thidte mqueꞌ thìb mbiꞌ coꞌ ngroꞌ lèe Barrabás leziꞌf con taamas mèn coꞌ mbeth mèn por thìb huelg coꞌ mbli mèn tiempa.
\v 8 Láth ndooxùꞌ Jesús loo Pilat, ngua mèn nación Israel loo Pilat par mnaꞌb mèn diꞌs loo Pilat làa Pilat thìb pres coꞌ ndlyaꞌs mèn lyáꞌ xalqueꞌ nac costumbr coꞌ ndxàp mèn tiempa.
\v 9 Pilat mcàb loo mèna. Ndxab Pilat:
\p ―¿Chó ndlyaꞌs guꞌ teláꞌen, àꞌ? ¿Chéꞌ ndlyaꞌs guꞌ teláꞌen mbiꞌ coꞌ mbez nac rey cheꞌn mèn nación Israel, càꞌ?
\p
\v 10 Per Pilat nonqueꞌ no ndaꞌqueꞌ Pilat cuent por ndxàn lezoꞌ mèna ñèe mèna Jesús, conꞌa mdaꞌxùꞌ mèn coꞌ nac jef cheꞌn nguleyꞌa Jesús loo Pilat.
\v 11 Per mèn coꞌ ngòc jef cheꞌn nguleyꞌ coꞌ más ñibeꞌ loo rye nguleyꞌ, mbli mèna par a la fuerz gab rye mèn, coꞌ nziriꞌ loo Pilat, más huen coꞌ Pilat Barrabás leziꞌf lugar de láꞌ Pilat Jesús.
\v 12 Sya, mnibdiꞌs Pilat loo rye mèna. Ndxab Pilat:
\p ―¿Cón ndlyaꞌs guꞌ li non mbiꞌ coꞌ mbez mèn nac rey cheꞌn mèn nación Israel, àꞌ?
\p
\v 13 Sya, cabii ndxab mèna:
\p ―Fcàa mbiꞌ baꞌ. Bnibeꞌ quée mbiꞌ loo cruz.
\p
\v 14 Pilat ndxab loo mèna:
\p ―Per ¿chó conꞌ yeꞌrsinꞌ ndyac guꞌ mbli mbiꞌ, àꞌ?
\p Sya, mbere mèna, cabii ndxab mèna:
\p ―Nuꞌ ngue bez lool, bnibeꞌ quée mbiꞌ baꞌ loo cruz.
\p
\v 15 Per com leꞌ Pilat mblyaꞌs yanꞌ bien Pilat con mèn coꞌ nziriꞌa, ¿léꞌ?, mnibeꞌ Pilat ngua loꞌ mèn Barrabás leziꞌf. Leꞌ Jesús na, ngolo mbli Pilat mandad mdaꞌ mèn cheꞌn Jesús, mdaꞌ Pilat Jesús loo mèna par ya queꞌ mèna Jesús loo cruz.
\p
\v 16 Ngoloa, mbeꞌ solndad Jesús loo lueꞌ cheꞌn palas. Tya, mbli mèna mandad mqueltàa ryete solndad par li solndad ngòc nguàal conꞌ loo Jesús par tataa mod xìis no solndad Jesús.
\v 17 Ale asembli solndad mtegoc solndad Jesús thìb xab Jesús color morad. No mdub solndad thìb coron yis coꞌ mtàꞌ solndad yéc Jesús.
\v 18 Ngoloa, mtlo solndad, cabii mbez solndad loo Jesús. Ndxab solndad:
\p ―San, rey cheꞌn mèn nación Israel.
\p
\v 19 No tataa mblàa solndad bar yéc Jesús. No msuc solndad rloo Jesús. No mdyub xib solndad loo Jesús. Mbli solndad loo Jesús xalqueꞌ ndli mèn coꞌseꞌ ñii mèn Diox loo thìb rey par tataa mod más mxìis no solndad Jesús.
\v 20 Ngolo mxìis no solndad Jesús axta plóthe, mteche solndad xab Jesús coꞌ ngòc larꞌ morada lad Jesús. Mtegoc solndad Jesús xabpeꞌ Jesús. Ngoloa, mbeꞌ solndad Jesús par ya queꞌ solndad Jesús loo cruz.
\s Trèꞌ ndluꞌ xá mod mqueꞌ mèn Jesús loo cruz.
\r (Mt. 27.32–44; Lc. 23.26–43; Jn. 19.17–27)
\p
\v 21 Leꞌpeꞌ ndxàc conꞌa, ndyeꞌth thìb mbiꞌ coꞌ ngua zinꞌ huan. Mbiꞌa ngòc mèn gulàaz cheꞌn làaz mèn ciren. Mbiꞌa ngroꞌ lèe Mon. Ngòc mbiꞌ xud Alejandr no Ruf. Láth nde riid mbiꞌ ro ciuda Jerusalén, ngroꞌ no mèna Jesús. Asalꞌ too mbiꞌ mèna, ale mtauꞌ solndad loo mbiꞌ bere mbiꞌ par xyoꞌf yen mbiꞌ cruz coꞌteꞌ queꞌ solndad Jesús.
\p
\v 22 Mbeꞌ mèna Jesús loo thìb den coꞌ lèe Gólgota, coꞌ nee diꞌs, Calaver tac dena ñaa xal thìb quèe yéc mèn.
\v 23 Tya, mdaꞌ solndad thìb loo vin coꞌ nos con thìb loo cuanꞌ coꞌ lee mirr par ngu Jesús. Per neꞌndalte Jesús ngu Jesús vina.
\v 24 Sya, mqueꞌ solndad Jesús loo cruz. Ngoloa, mdith no solndad dad loo xab Jesús par ñee solndad ñeeneꞌ chó solndad hueꞌ thìb leꞌ thìb leꞌ xab Jesús.
\p
\v 25 Hor coꞌ mqueꞌ solndad Jesús loo cruz ngòc hor nquée guyèꞌ xtilꞌ.
\v 26 Nde nxonꞌ, mqueꞌ solndad plá diꞌs loo thìb leꞌ yeꞌs loo cruz yéc Jesús. Diꞌsa mbez taandxèꞌ:
\p ―Rey cheꞌn mèn nación Israel.
\p Tataa mdub solndad diꞌs yéc cruz tac mèn mquexùꞌ mqueꞌ fals Jesús leꞌ Jesús ndxab:
\p ―Daa nac rey cheꞌn mèn nación Israel.
\p
\v 27 Thidte mqueꞌ mèn Jesús loo cruz con chop mbiꞌ coꞌ ngòc huanꞌ. Thìb mbiꞌ mquée loo cruz cuat Jesús ladlì. Tedib mbiꞌ mquée loo cruz cuat Jesús lad rebes.
\v 28 Tataa ngòca par ngòcqueꞌ no mdubqueꞌ diꞌs coꞌ mdeꞌth mèn coꞌ ndub loo libr coꞌ nac xtiꞌs Diox coꞌ mbez:
\p ―Mbli mèn cuent no Crist ngòc mèn yeꞌrsinꞌ con mèn yeꞌrsinꞌ.
\p
\v 29 Leꞌ sya, mèn coꞌ ndriꞌth coꞌteꞌ ngue Jesús loo cruz, asembli mèna, mbez mèna ngòc nguàal diꞌs loo Jesús. No tataa mcuin mèna yéc mèna loo Jesús. Mbez mèna loo Jesús:
\p ―Nase, yixo. Lùu coꞌ mbez cobiil templ no yilo son huiz ngololeꞌ mxít teꞌfl templ tedib vez, mzyalqueꞌla nguel tuaꞌ.
\v 30 Leque lùu bli par lyáꞌl loo conꞌ ryes no bilàa loo cruz coꞌteꞌ nguel baꞌ.
\p
\v 31 Lomisqueꞌ ne, mèn coꞌ ngòc jef cheꞌn nguleyꞌ coꞌ más ñibeꞌ loo nguleyꞌ, no mèn coꞌ ngòc maistr coꞌ ndluꞌ cón cheꞌn ley coꞌ mxoꞌf Moisés loo mèn, ale mxìis no mèna Jesús. No mbez mèna loo xtàa mèna:
\p ―Mbiꞌ baꞌ mteláꞌ mèn loo conꞌ ryes. Per nalleꞌ, ale, neꞌgácte mbiꞌ teláꞌ mbiꞌ mbiꞌ loo conꞌ ryes. Mzyalqueꞌ mbiꞌi.
\v 32 Cheleꞌ naꞌ ñèe leꞌ mbiꞌ coꞌ mbez nac Crist no coꞌ mbez nac rey loo naꞌ bilàa loo cruz nalleꞌ, syase, yilaꞌs naꞌ leꞌ mbiꞌ baꞌ nac Crist, ¿léꞌ?
\p No ale axta ryop mbiꞌ coꞌ mquée loo cruz cuat Jesús ndxab ngòc nguàal diꞌs loo Jesús.
\s Jesús nguth loo cruz.
\r (Mt. 27.45–56; Lc. 23.44–49; Jn. 19.28–30)
\p
\v 33 Dib lal ngue queꞌ mèna Jesús loo cruz, ngóol hor rol huiz. Per coꞌseꞌ ngóol rol huiz axta hor mquée guyon bzyè mbyauꞌ loo huiz dib athu loo izlyoꞌ.
\v 34 Coꞌseꞌ ngòc hor mquée guyon bzyè huiza, ngrozèe yii ngrozèe den Jesús. Ngroꞌ diꞌs ro Jesús. Ndxab Jesús:
\p ―Eloi, Eloi, ¿lama sabactani?
\p Diꞌs ndxèꞌ nee diꞌs: Uꞌ coꞌ nac Diox daa, ¿chonon mbláꞌyaꞌ Uꞌ daa?
\p
\v 35 Per ndxep mèn coꞌ ngure gax loo Jesús hora, mèna mbìn diꞌs coꞌ ndxab Jesús. Mèna ndxab loo xtàa mèna:
\p ―Bìn guꞌ diꞌs coꞌ ngue bez mbiꞌ baꞌ. ¿Chéꞌ ndyac guꞌi mbiꞌ ngue bez Lii coꞌ mdeꞌth diꞌs coꞌ ndxab Diox póla, ¿léꞌ?
\p
\v 36 Sya, thìb mbiꞌ coꞌ nzo làtha mqueꞌ carre. Ngua tegaz mbiꞌ thìb sponj con thìb loo vin nala coꞌ nos con thìb loo cuanꞌ nala. Sya, mdub mbiꞌa sponj loo thìb punt bar no mzi mchep mbiꞌ sponja ro Jesús par gu Jesús vina. No ndxab mbiꞌ:
\p ―Bláꞌ guꞌ teequeꞌ mbiꞌ par ñee naꞌ neeneꞌ chéꞌ tiꞌth Lii par làa Lii mbiꞌ.
\p
\v 37 Leque hora, ngrozèe yii ngrozèe den Jesús. No setilte nguth Jesús.
\v 38 No texal ngolo nguth Jesús, Diox mbli ngòc rol cortin coꞌ ngue leꞌn templ. Desde gáp axta xànꞌ cortin ale mbryed grolthe cortin.
\v 39 Leꞌ capitán coꞌ nac capitán cheꞌn gobiern coꞌ ndub ciuda Rom, coꞌ ndoo naa no coꞌ ndoo huiꞌ xal ngòca loo Jesús loo cruz, coꞌseꞌ gunèe capitán ngrozèe yii ngrozèe den Jesús no coꞌseꞌ gunèe capitán xá mod nguth Jesús, ndxab capitán loo mèn coꞌ ngure tya:
\p ―Lìcpeꞌ baꞌi, cara, mbiꞌ baꞌ ngòc xganꞌpeꞌ Diox, ndyaquen.
\p
\v 40 Lomisqueꞌ ne, ngure ndxep mèngot, coꞌ ngure huiꞌ tith xal ngòca loo Jesús loo cruz. Láth rye mèngota ngo thìb xaꞌgot coꞌ ngroꞌ lèe Mari coꞌ ngòc mèn yèez Magdala. No ngo tedib xaꞌgot coꞌ ngroꞌ lèe Mari coꞌ ngòc xnaꞌ ryop hues myenꞌ coꞌ ngroꞌ lèe Cob no Chè. Coba mdub lèe mèn Cob Chuꞌth. No ngo tedib xaꞌgot tya coꞌ ngroꞌ lèe Salomé.
\v 41 Ryete xaꞌgota mdoo nque xís Jesús. No mbli xaꞌgota mandad loo Jesús coꞌseꞌ mque tee Jesús leꞌn rye yèezyaꞌ coꞌ nac ned làaz mèn galile. Más de cona, taamas mèngot coꞌ mdoo nque xís Jesús, coꞌseꞌ mquée Jesús par ned ciuda Jerusalén leꞌn huiza, ndoo huiꞌ xal ndxàc conꞌ loo Jesús.
\s Trèꞌ ndluꞌ xal ngua lo mèn thebol Jesús leꞌn thìb báꞌ coꞌ ngòc thìb yeꞌr quèe.
\r (Mt. 27.57–61; Lc. 23.50–56; Jn. 19.38–42)
\p
\v 42 Huiz coꞌseꞌ nguth Jesús, huiza ngòc huiz vispr cheꞌn huiz roo coꞌ nac huiz sabd coꞌ ngòc huiz descans tiempa. Casqueꞌ hora nde làaleꞌ yálꞌ izlyoꞌ.
\v 43 Ngoloa, mbiꞌth thìb mbiꞌ coꞌ lèe Chè. Mbiꞌa ngòc mèn yèez Arimate. Ngòc mbiꞌ thìb jef loo mèn coꞌ nqueltàa par ndyoo ner, no ndyoo naa, no ñibeꞌ mbiꞌ loo mèn nación Israel, ne. Mbiꞌa ndub quee lezoꞌ pól gàc tiemp coꞌseꞌ ñibeꞌpeꞌ Diox loo mèn loo izlyoꞌ. Pues ngòo valor loo mbiꞌ. Negadiꞌs ngua mbiꞌ coꞌteꞌ ndub Pilat par ñaꞌb mbiꞌ loo Pilat taꞌ Pilat permis làa mbiꞌ thebol Jesús loo cruz.
\v 44 Coꞌseꞌ mbìn Pilat diꞌs coꞌ ngue taꞌ Chè cuent loo Pilat, ante mbyuꞌ mbyàl Pilat coꞌseꞌ mbìn Pilat leꞌ Jesús nguthleꞌ. Sya, ngurez Pilat capitán par ñibdiꞌs Pilat loo capitán. Ndxab Pilat:
\p ―¿Chéꞌ, lìcqueꞌ, ngololeꞌ nguth Jesús, càꞌ?
\p ―Aa, ndxab capitán.
\p
\v 45 Coꞌseꞌ mcàb capitán, ndxab capitán:
\p ―Aa, ngololeꞌ nguth Jesús, sya, mdaꞌ Pilat permis loo Chè par yilàa Chè thebol Jesús loo cruz.
\p
\v 46 Ngoloa, ngua tiꞌ Chè thìb sab coꞌ anzeꞌf náp ntac. Ndyeꞌth Chè. Mblàa Chè thebol Jesús loo cruz. Mchiꞌx Chè saba lad thebol Jesús. Ngoloa, ngua lo Chè thebol Jesús leꞌn thìb yeꞌr quèe coꞌ nadenꞌ cho thìb quèe. Ngoloa, mtauꞌ Chè ro yeꞌr quèe con tedib quèe laj.
\v 47 Leꞌ Mari, coꞌ ngòc mèn yèez Magdala, no tedib xaꞌgot coꞌ lèe Mari coꞌ ngòc xnaꞌ Chè na, ngua tee huiꞌ coꞌteꞌ mblo Chè, coꞌ ngòc mèn yèez Arimete, thebol Jesús leꞌn yeꞌr quèea.
\c 16
\s Jesús ngro xban.
\r (Mt. 28.1–10; Lc. 24.1–12; Jn. 20.1–10)
\p
\v 1 Coꞌseꞌ nguriꞌth huiz sabd coꞌ ngòc huiz descans tiempa, thìb xaꞌgot coꞌ ngroꞌ lèe Mari coꞌ ngòc mèn yèez Magdala, no tedib xaꞌgot coꞌ ngroꞌ lèe Mari coꞌ ngòc xnaꞌ Cob, no tedib xaꞌgot coꞌ ngroꞌ lèe Salomé, yon xaꞌgota mxiꞌ thìb loo nít perfum par ya tàꞌ xaꞌ nít perfuma lad thebol Jesús.
\v 2 Coꞌseꞌ ngonìi izlyoꞌ huiz doming coꞌ nac ner huiz cheꞌn sman, tatabeꞌ ñaa mbeꞌth izlyoꞌ, nda yon xaꞌgota ro yeꞌr quèe coꞌteꞌ mblo mèn thebol Jesús. No mzin xaꞌ ro yeꞌr quèea leꞌpeꞌ nde len huiz.
\v 3 Per coꞌseꞌ yamerleꞌ zin xaꞌ ro yeꞌr quèea, ndxab xaꞌ loo xtàa xaꞌ:
\p ―Per nalleꞌ na, ¿chó teche quèe ro yeꞌr quèe par yòo naꞌ leꞌn yeꞌr quèe, yey?
\p
\v 4 Per coꞌseꞌ mzinpeꞌ xaꞌ ro yeꞌr quèe, gunèe xaꞌ leꞌ quèe laj roo coꞌ ndoo nauꞌ ro yeꞌr quèea ya indoo nauꞌte ro yeꞌr quèe. Ale ndoo xalꞌleꞌ ro yeꞌr quèe.
\v 5 Per coꞌseꞌ ngòo xaꞌgota leꞌn yeꞌr quèe, gunèe xaꞌ ndub thìb mbyòo ladlì coꞌteꞌ ndoo xaꞌ. Noc mbyòo thìb ned xab mbyòo coꞌ dib ando mbyòo coꞌ ante nagus bèelequeꞌ ñaa. Coꞌseꞌ gunèe xaꞌgota ndub mbyòo, ale mzyeb xaꞌgota.
\v 6 Per mbyòo ndxab loo xaꞌgota:
\p ―Neꞌzyebte guꞌ, ey. Na neequeꞌ leꞌ guꞌ nde cuaꞌn Jesús cheꞌn yèez Nazaret coꞌ mqueꞌ mèn loo cruz. Jesús ngro xbanleꞌ. Yende Jesús trèꞌ. Huen huen huiꞌ guꞌ coꞌteꞌ mdiꞌxsuaꞌ mèn Jesús.
\v 7 Nalleꞌ, huàa li guꞌ avis ndxèꞌ loo myenꞌ xinꞌ mtéꞌth Jesús no loo Pedr. Guuz guꞌ loo myenꞌ leꞌ Jesús ya ner loo myenꞌ leꞌn thìb yèez coꞌ nac gulàaz cheꞌn làaz mèn galile. Tya, tolo huiꞌ myenꞌ loo Jesús xalqueꞌ ndxab Jesús loo myenꞌ pezea.
\p
\v 8 Sya, yende izlyoꞌ, mqueꞌ yon xaꞌgota carre. Mbii xaꞌ ro yeꞌr quèea. Ale nxiꞌth xaꞌ tant nzyeb xaꞌ. No yende chó ngabte xaꞌ loo nec thìb mèn tant nzyeb xaꞌ.
\s Jesús mbluꞌ loo loo Mari coꞌ ngòc mèn yèez Magdala.
\r (Jn. 20.11–18)
\p
\v 9 Coꞌseꞌ ngolo ngro xban Jesús huiz coꞌ ngòc ner huiz cheꞌn sman coꞌ nac huiz doming, nerlequeꞌ loo Mari coꞌ ngòc mèn yèez Magdala, Mari coꞌ mque no gaz xpii meexùꞌ ndooreꞌ, ngroꞌ too Jesús no mbluꞌ loo Jesús Jesús loo Mari.
\v 10 Ngoloa, mxen Mari ned. Ngua li Mari avisa loo rye mèn coꞌ mque tee no Jesús ndooreꞌ. Prob mèna nzi xi lezoꞌ no nzi yónꞌ mèna por cón cheꞌn conꞌ coꞌ ngòc loo Jesús.
\v 11 Coꞌseꞌ mbìn mèna ngue taꞌ Mari cuent leꞌ Jesús ngro xbanleꞌ no gunèeleꞌ Mari Jesús, neꞌngalaꞌste mèna diꞌs coꞌ ngue taꞌ Mari cuent.
\s Jesús ngroꞌ too no mbluꞌ loo Jesús Jesús loo chop myenꞌ xinꞌ mtéꞌth Jesús.
\r (Lc. 24.13–35)
\p
\v 12 Per loo ngroꞌ too Jesús no mbluꞌ loo Jesús loo Mari coꞌ ngòc mèn yèez Magdala, ngroꞌ too Jesús no mbluꞌ loo Jesús tedib mod loo taachop myenꞌ xinꞌ mtéꞌth Jesús coꞌseꞌ ndoo ryop myenꞌa ned ndyàa myenꞌ ned coꞌ nac ned huan.
\v 13 Coꞌseꞌ ngolo gunèe myenꞌ Jesús, mxen myenꞌ ned. Ngua taꞌ myenꞌ cuent loo taamas myenꞌ xinꞌ mtéꞌth Jesús. Lomisqueꞌ ne, neꞌngalaꞌste taamas myenꞌ xinꞌ mtéꞌth Jesús cuent coꞌ mdaꞌ ryop myenꞌa loo myenꞌ.
\s Jesús ngue xoꞌf zinꞌ loo myenꞌ xinꞌ mtéꞌth Jesús par hueꞌ myenꞌ diꞌs cón cheꞌn Jesús loo mèn.
\r (Mt. 28.16–20; Lc. 24.36–49; Jn. 20.19–23)
\p
\v 14 Per más nde tee huiz, por derech, ngroꞌ too Jesús no mbluꞌ loo Jesús loo ryete siꞌ fthib myenꞌ xinꞌ mtéꞌth Jesús láth coꞌseꞌ ndub myenꞌ loo mes liz thìb mbiꞌ. Sya, mbyoo Jesús myenꞌ tac axta arid naad myenꞌ no nguud myenꞌ no por nayez lezoꞌ myenꞌ tac indxelaꞌste myenꞌ cuent coꞌ mbìn myenꞌ cón cheꞌn mèn coꞌ mdaꞌ cuent loo myenꞌ leꞌ mèna gunèe Jesús loo ngro xban Jesús.
\v 15 Sya, ndxab Jesús loo myenꞌ:
\p ―Nase, ndlyazen ya guꞌ dib athu loo izlyoꞌ. Ya taꞌ guꞌ cuent cón cheꞌn diꞌs ndac ndxèꞌ coꞌ ndluꞌ xá mod lyáꞌ mèn loo conꞌ ryes loo rye mèn coꞌ nzi ban dib athu loo izlyoꞌ.
\p
\v 16 No ndxab Jesús:
\p ―Mèn coꞌ tyal yilaꞌs loon no loo cón chenen no yiloa gàc bautizar mèn, mèna lyáꞌqueꞌ. Per ndxeꞌlequeꞌ, mèn coꞌ neꞌtyalte yilaꞌs loon no loo cón chenen, mèna thidtenequeꞌ quexùꞌ Diox par tetìi Diox mèna yiloa.
\v 17 Luꞌen loo guꞌ xal ñaa señ no yalguzyeꞌ coꞌ li Diox loo mèn, mèn coꞌ tyal yilaꞌs loon. Lomisqueꞌ ne, ngue ñibeꞌen loo guꞌ por cón cheꞌn conꞌ roo no conꞌ xèn coꞌ nzo làs niin no coꞌ nzo laꞌs yan, coꞌ guꞌ xpii meexùꞌ loo mèn. Lomisqueꞌ ne, lin par tyoodiꞌs guꞌ tedib diꞌstèe coꞌ inacte diꞌstèe coꞌ ndyoodiꞌs guꞌ loo mèn.
\v 18 No lomisqueꞌ ne, lin coꞌseꞌ tyen guꞌ mbelꞌ, neꞌquelede mbelꞌ guꞌ. Taꞌ mèn nít yèth coꞌ nos cuanꞌ hua guꞌ no neꞌlide cuanꞌa yalquìi loo guꞌ par gath guꞌ. Más de cona, ante gàal guꞌ lad mèn yíiz, yac mèn yíiz loo yíiz coꞌ mque no mèn, ne.
\s Jesús nguáp loo béꞌ.
\r (Lc. 24.50–53)
\p
\v 19 Texal ngolo mdoodiꞌs no Jesús myenꞌ xinꞌ mtéꞌth Jesús, xèe nzi huiꞌ myenꞌ xal nguáp Jesús loo béꞌ. No coꞌseꞌ ngolo mzin Jesús loo béꞌ, mdub Jesús cuat Diox loo béꞌ.
\v 20 Ngoloa, mbii myenꞌ coꞌteꞌ ngo no myenꞌ Jesús. Mxen myenꞌ ned. Nda teꞌth myenꞌ no ngua lo myenꞌ yalbàn coꞌ ndluꞌ xá mod lyáꞌ mèn loo conꞌ ryes loo mèn dib athu loo izlyoꞌ. Yub Tad Jesús mque tee no myenꞌ ned mque tee myenꞌ. No yub Tad Jesús ndli par ndxàc huax señ no huax yalguzyeꞌ loo mèn por cón cheꞌn myenꞌ, par ndluꞌ Tad Jesús loo mèn lìcqueꞌ nac diꞌs coꞌ ngue go myenꞌ yalbàn no coꞌ ndeꞌth myenꞌ loo mèn, no coꞌ ndxàc loo mèn. Taandxèꞌqueꞌ tolo gàca, ndee guꞌ.