\id JHN
\ide UTF8
\h SAN JUAN
\toc1 SAN JUAN
\mt Diꞌs Ndac Cheꞌn Diox Coꞌ Mqueꞌ Juàn Yeꞌs
\c 1
\s Crist coꞌ mblo xoꞌf loo mèn cón cheꞌn conꞌ coꞌ ndli Diox xtùuz, Crist ngòc xal mèn cheꞌn izlyoꞌ loo izlyoꞌ.
\p
\v 1 Ndooreꞌ cuec Diox no toxcuaꞌ Diox chol conꞌ loo béꞌ no loo izlyoꞌ nzoleꞌ Crist coꞌ mblo xoꞌf loo mèn cón cheꞌn conꞌ coꞌ ndli Diox xtùuz. Thidte ngo no Crist Diox. No nac Crist coꞌ mblo xoꞌf loo mèn cón cheꞌn conꞌ coꞌ ndli Diox xtùuz Diox.
\v 2 Crist thidte ngo no Diox ndooreꞌ gacsuaꞌ conꞌ no cuec Diox conꞌ loo béꞌ no loo izlyoꞌ.
\v 3 Mbli Crist par ngure no mbyanꞌ ryethe conꞌ coꞌ nziriꞌ, que naca conꞌ coꞌ nzo loo béꞌ, que naca conꞌ coꞌ nziriꞌ loo izlyoꞌ. No yende chó conꞌ coꞌ nziriꞌ no coꞌ mbyanꞌ neꞌmbede no neꞌngyanꞌte cheleꞌ Crist neꞌnglide par ngurei no par mbyanꞌa.
\v 4 Crist nabanqueꞌ thidtene. No ndxàp Crist conꞌ roo conꞌ xèn laꞌs nii Crist no laꞌs yaꞌ Crist par li Crist leꞌ mèn ban no Diox thidtene yiloa. Yalnaban coꞌ ndaꞌ Crist loo mèn, yalnabana ndli ntenìi yéc mèn no ntenìi lezoꞌ mèn loo cón cheꞌn Diox.
\v 5 Yalnaban coꞌ ndli ndyub xnìi yéc mèn no ndyub xnìi lezoꞌ mèn loo cón cheꞌn Diox, yalnabana ndli par non mèn leꞌ cón cheꞌn xab izlyoꞌ ndli par ndxeziꞌf no ndxegaꞌs mèn loo conꞌ yeꞌrsinꞌ xal mèn coꞌ ndyee yálꞌ coꞌseꞌ nacuau yálꞌ. Per mastaleꞌ anzeꞌf thìb conꞌ nzo coꞌ mbez mèn nac con cheꞌn xab izlyoꞌ, neꞌngácte conꞌ coꞌ nac cón cheꞌn xab izlyoꞌ par tauꞌ conꞌ coꞌ nac cón cheꞌn xab izlyoꞌ loo diꞌs coꞌ ndluꞌ loo mèn xá mod yòo ban no mèn Diox thidtene yiloa. Thìba conꞌ ndxèꞌ.
\p
\v 6 Leꞌ tediba na, loo ngòc conꞌ ndxèꞌ ngo thìb mbiꞌ coꞌ mtelꞌ Diox. Mbiꞌa ngroꞌ lèe Juàn.
\v 7 Juàn ngòc thìb mbiꞌ coꞌ mbiꞌth taꞌ cuent loo mèn nación Israel cón cheꞌn Crist, Crist coꞌ mbli par mdyub xnìi yéc mèn no par mdyub xnìi lezoꞌ mèn par yilaꞌs mèn nación Israel cón cheꞌn diꞌs coꞌ mbiꞌth taꞌ Juàn cuent cón cheꞌn Crist coꞌ mblo xoꞌf loo mèn cón cheꞌn conꞌ ndli Diox xtùuz.
\v 8 Inacte Juàn Crist coꞌ mbiꞌth li par mdyub xnìi yéc mèn no par mdyub xnìi lezoꞌ mèn loo cón cheꞌn Diox. Ndxeꞌlequeꞌ, mbiꞌth Juàn par mbiꞌth taꞌ Juàn cuent cón cheꞌn Crist coꞌ mbiꞌth li par mdyub xnìi yéc mèn no mdyub xnìi lezoꞌ mèn loo cón cheꞌn Diox.
\v 9 Crist coꞌ, lìcqueꞌ, angoluxte nac thidte mbiꞌ coꞌ mbiꞌth li par tyub xnìi yéc mèn no par tyub xnìi lezoꞌ mèn loo cón cheꞌn Diox, Crist mbiꞌth yáal loo izlyoꞌ ndxèꞌ xalqueꞌ ndxáal chol mèn.
\p
\v 10 Loo izlyoꞌ ndxèꞌ mbiꞌth yáal Crist coꞌ mblo xoꞌf loo mèn cón cheꞌn conꞌ ndli Diox xtùuz. Crist mbli par ngure no mbyanꞌ alux conꞌ coꞌ nziriꞌ loo izlyoꞌ. Per ryethe mèn coꞌ nziriꞌ loo izlyoꞌ, neꞌnglibeꞌde mèna chó mbiꞌ nac Crist.
\v 11 Loo izlyoꞌ coꞌ nac cheꞌnpeꞌ Crist mbiꞌth Crist. Per mèn coꞌ ngòc mèn gulàazpeꞌ Crist, mèna mcà diꞌs Crist. No mtèꞌf mèna Crist thìb lad.
\v 12 Per ryete mèn coꞌ mdyalqueꞌ ngolaꞌs loo Crist no loo cón cheꞌn Crist, Diox mblo ro leꞌ mèna ndxàp conꞌ laꞌs nii mèna no laꞌs yaꞌ mèna par gàc mèna xinꞌpeꞌ Diox.
\v 13 Mèna gàc xinꞌpeꞌ Diox tac tataa mnibeꞌ Diox no tataa gunee lezoꞌ Diox. Inacta xal mèn coꞌ ndxáal por xud mèn no xnaꞌ mèn. Neꞌ neꞌ inaca xal nee lezoꞌ thìb mbiꞌ li thìb mbiꞌ con thìb xaꞌgot bin par gàc mèna xinꞌ Diox.
\p
\v 14 Per Crist coꞌ mblo xoꞌf loo mèn cón cheꞌn conꞌ coꞌ ndli Diox xtùuz, Crist mbiꞌth yáal xalqueꞌ ndxáal chol mèn loo izlyoꞌ par ngòc Crist xalqueꞌ chol mèn loo izlyoꞌ. No mque tee ban Crist làth nuꞌ ndxep tiemp. Látha, gunèe nuꞌ conꞌ roo conꞌ xèn coꞌ mbli Crist coꞌ mbluꞌ loo nuꞌ nacpeꞌ Crist angoluxte xganꞌpeꞌ Diox. No gunèe nuꞌ, lìcqueꞌ, anzeꞌf nqueꞌ lezoꞌ Crist ñèe Crist mèn. No gunèe nuꞌ, lìcqueꞌ, inquedìide Crist mèn. Ndxeꞌlequeꞌ, ndliqueꞌ Crist conꞌ coꞌ mcàbgòn Crist li Crist loo mèn. No gunèe nuꞌ leꞌ Crist angndli huax conꞌ ndac loo mèn.
\p
\v 15 Juàn Bautist mdaꞌ cuent cón cheꞌn Crist loo mèn. Cabii ndxab Juàn loo mèn:
\p ―Cón cheꞌn Crist nac coꞌ mdalen cuent loo guꞌ leꞌ Crist coꞌ nareꞌ yiꞌth nque xísen, Crist nac más xaꞌ roo xaꞌ xèn leque daa tac Crist nzoleꞌ ndooreꞌ gal yáal daa loo izlyoꞌ.
\p
\v 16 Lìcqueꞌ, anzeꞌf thìb conꞌ ndac angmbli Crist loo naꞌ par gàc conꞌ ndac loo naꞌ thìb mod tedib mod por cón cheꞌn Crist.
\v 17 Diox mnibeꞌ loo Moisés par mxoꞌf Moisés ley loo naꞌ. Per Jesucrist mbiꞌth par mbluꞌ Jesucrist loo mèn leꞌ Diox, lìcqueꞌ, nqueꞌ lezoꞌ ñèe Diox mèn. No mbluꞌ Jesucrist leꞌ Diox ndlyaꞌs li Diox anggàc conꞌ ndac loo mèn. No mbluꞌ Jesucrist loo mèn leꞌ cón cheꞌn Jesucrist nac conꞌ lìcpeꞌ.
\v 18 Yende chó mèn tarte ñèe xá ñaa loo Diox thidtene. Angoluxte xganꞌpeꞌ Diox coꞌ thidte nac con Diox no coꞌ nzoqueꞌ loo Diox, xganꞌ Dioxa mdaꞌ cuent no mblo ro xganꞌ Diox cón cheꞌn Diox loo mèn.
\s Juàn Bautist mdaꞌ cuent cón cheꞌn Jesús no mblo xoꞌf Juàn Bautist cón cheꞌn Jesús loo mèn.
\r (Mt. 3.11–12; Mr. 1.7–8; Lc. 3.15–17)
\p
\v 19 Mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel, coꞌ nac leque mèn coꞌ ngo ban ciuda Jerusalén, mèna mtelꞌ mèn coꞌ ngòc nguleyꞌ no mèn coꞌ ndlyath no nguleyꞌ leꞌn templ par ngua nibdiꞌs mèna loo Juàn chéꞌ nac Juàn Crist.
\v 20 Juàn mdaꞌ cuent loo mèna no mblo ro Juàn. Ndxab Juàn:
\p ―Tyèꞌ. Inacte daa Crist, yey.
\p
\v 21 Sya, tolo mnibdiꞌs mèna loo Juàn. Ndxab mèna:
\p ―¿Chó nac lùu, sya? ¿Chéꞌ lùu nac Lii coꞌ mbiꞌth teꞌth diꞌs coꞌ ndxab Diox póla, càꞌ?
\p Juàn mcàb. Ndxab Juàn loo mèna:
\p ―Tyèꞌ. Inacte daa Lii.
\p Sya, mbere mèna, mnibdiꞌs mèna tedib vez loo Juàn:
\p ―¿Xá neel, sya? ¿Chéꞌ lùu nac mbiꞌ coꞌ teꞌth diꞌs coꞌ ndxab Diox coꞌ ndxath yiꞌth, càꞌ?
\p Juàn mcàb. Ndxab Juàn:
\p ―Yende xàa. Inacte daa mbiꞌa.
\p
\v 22 Mbere mèna, ndxab mèna loo Juàn:
\p ―¿Chó mèn nac lùu, sya? Gunee loo nuꞌ. Sya, tataa taꞌ nuꞌ cuent loo mèn coꞌ mtelꞌ nuꞌ. ¿Xá neel cón cheꞌnl, yey?
\p
\v 23 Sya, ndxab Juàn loo mèna:
\p ―Daa nac xal thìb mbiꞌ coꞌ ngue bez cabii coꞌteꞌ nagán coꞌ mbez loo mèn: Bli leꞌ mèn gàc nab loo cón cheꞌn Tad Diox xal ntelì mèn thìb ned xalqueꞌ nac diꞌs coꞌ ndxab Sayiꞌ coꞌ mdeꞌth diꞌs coꞌ ndxab Diox póla.
\p
\v 24 Mèn coꞌ ndyoo ner, no coꞌ ndyoo naa, no coꞌ ñibeꞌ loo mèn nación Israel, mèn coꞌ ngòc mèn xleyꞌ farise, mèna nac mèn coꞌ mtelꞌ ndxep mèn coꞌ ngua toodiꞌs no Juàn.
\v 25 Mèna tolo mnibdiꞌs loo Juàn. Ndxab mèna:
\p ―Cheleꞌ lùu inacte Crist, neꞌ neꞌ inacl Lii, no neꞌ neꞌ inacl xaꞌ coꞌ teꞌth diꞌs coꞌ ndxab Diox coꞌ ndxath yiꞌth, ¿chonon ndlil bautizar mèn, sya?
\p
\v 26 Sya, mcàb Juàn loo mèna. Ndxab Juàn:
\p ―Lìcqueꞌ, daa ndli bautizar mèn con nít. Per làth guꞌ nzoqueꞌ thìb mbiꞌ coꞌ tarte taꞌ guꞌ cuent coꞌ huenlequeꞌ chó nac mbiꞌa.
\v 27 Mbiꞌa nac xaꞌ coꞌ nareꞌ yiꞌth nque xísen. No mbiꞌa nac más xaꞌ roo xaꞌ xèn leque daa. Mastaleꞌ ndli guꞌ cuent nac daa xaꞌ roo xaꞌ xèn, ndenꞌ daa no ndyaquen thidtene inzyálꞌte daa que tee non mbiꞌa.
\p
\v 28 Ryete conꞌa ngòc thìb lugar coꞌ ngroꞌ lèe Betábara coꞌ nziriꞌ ned ndlyen huiz gaxte ro yóꞌbeꞌ Jordán coꞌteꞌ ngue li Juàn bautizar mèn tiempa.
\s Juàn Bautist mdaꞌ tedib lèe loo Jesús par ngroꞌ lèe Jesús Mbacxilꞌ cheꞌn Diox.
\p
\v 29 Tedib huiz coꞌ nde nquea, gunèe Juàn leꞌ Jesús nde loo Juàn. Ndxab Juàn loo mèn coꞌ nziriꞌ loo Juàn:
\p ―Huiꞌ guꞌ nexa. Mbiꞌ coꞌ nde goꞌ neꞌ tedib lèe coꞌ nac lèe Mbacxilꞌ cheꞌn Diox, coꞌ nee diꞌs, tyactìi mbiꞌ baꞌ par tyonꞌ xtol cheꞌn mèn loo izlyoꞌ, mèn coꞌ tyal gòn ro mbiꞌ.
\v 30 Cón cheꞌn mbiꞌ baꞌ nac coꞌ mdalen cuent loo guꞌ leꞌ xísen yiꞌth nque tedib mbiꞌ coꞌ nac más mbiꞌ roo mbiꞌ xèn leque daa. Tac ndooreꞌ gal yáal daa loo izlyoꞌ nzoqueꞌ mbiꞌ baꞌ con Diox.
\v 31 Yub daa neꞌnglibeꞌde chó mbiꞌ nac mbiꞌ baꞌ. Neꞌ neꞌ tan cuent chó nac mbiꞌ baꞌ. Ndxeꞌlequeꞌ, mbalen par ndlin bautizar mèn con nít par tataa mod luꞌen mbiꞌ baꞌ loo guꞌ coꞌ nac mèn nación Israel no par tan cuent cón cheꞌn mbiꞌ no chó nac mbiꞌ baꞌ loo guꞌ.
\p
\v 32 Ndxab Juàn loo mèna, ne:
\p ―Daa gunèe ngulàa Xpii Natúꞌ cheꞌn Diox loo béꞌ loo mbiꞌ baꞌ. Gunaa Xpii Natúꞌa xal ñaa thìb palomxtilꞌ hora. No sangngòo Xpii Natúꞌ loo mbiꞌ baꞌ par mbyanꞌ no Xpii Natúꞌ mbiꞌ baꞌ par ñibeꞌpeꞌ Xpii Natúꞌ loo mbiꞌ baꞌ.
\v 33 Per leque hora neꞌ daa tarte libeꞌ mbiꞌ. Neꞌ neꞌ tar tan cuent chó mbiꞌ nac mbiꞌ. Per xaꞌ coꞌ mtelꞌ daa par ndlin bautizar mèn con nít, xaꞌa gunee loon:
\p ―Coꞌseꞌ ñèel lyàa Xpii Natúꞌ loo mbiꞌ no sangyòo Xpii Natúꞌ loo mbiꞌ par yanꞌ no Xpii Natúꞌ mbiꞌ par ñibeꞌpeꞌ Xpii Natúꞌ loo mbiꞌ, axta syareꞌ taꞌl cuent leꞌ mbiꞌa nac mbiꞌ coꞌ li bautizar mèn por cón cheꞌn Xpii Natúꞌ.
\p
\v 34 Tolo ndxab Juàn:
\p ―Daa gunèequeꞌ xal ngulàa Xpii Natúꞌ loo mbiꞌ coꞌ nac Jesús. Cona, ndan cuent no ndethen leꞌ Jesús baꞌ nacqueꞌ xganꞌpeꞌ Diox.
\s Trèꞌ ndluꞌ cón cheꞌn myenꞌ coꞌ ngòc nerlequeꞌ myenꞌ xinꞌ mtéꞌth Jesús.
\p
\v 35 Tedib huiz coꞌ nde nquea, ngue tee Juàn Bautist leque par neda con chop myenꞌ xinꞌ mtéꞌth Juàn.
\v 36 Láth coꞌseꞌ nde riid Jesús par neda, gunèe Juàn Jesús. Ndxab Juàn loo ryop myenꞌ xinꞌ mtéꞌth Juàn:
\p ―Huiꞌ guꞌ nexa. Mbiꞌ baꞌ nac xaꞌ coꞌ mbezen loo mèn nac mbiꞌ coꞌ neꞌ tedib lèe coꞌ nac lèe Mbacxilꞌ cheꞌn Diox. Tac mbiꞌ baꞌ tyactìi no gath mbiꞌ baꞌ por cón cheꞌn xtol mèn xal ndxuth mèn mbacxilꞌ loo Diox nalleꞌ par teriꞌth tecanꞌ Diox cón cheꞌn xtol mèn nalleꞌ.
\p
\v 37 Coꞌseꞌ mbìn ryop myenꞌ xinꞌ mtéꞌth Juàn tataa ndxab Juàn loo myenꞌ, mxen myenꞌ ned. Mdoo nque myenꞌ xís Jesús.
\v 38 Sya, ndxepte mdee myenꞌ, mbere Jesús par ned xís Jesús. Gunèe Jesús leꞌ ryop myenꞌ nde nque xís Jesús. Ndxab Jesús loo myenꞌ:
\p ―¿Cón ncuaꞌn guꞌ, àꞌ, ey?
\p Myenꞌ mcàb loo Jesús. Ndxab myenꞌ:
\p ―Maistr, ¿pá mèn Uꞌ, àꞌ? No ¿chó mèn yèez nac Uꞌ, ne, àꞌ?
\p
\v 39 Jesús mcàb loo myenꞌ. Ndxab Jesús:
\p ―Yaꞌ guꞌ nda naꞌ. Sya, huiꞌ guꞌ pá nzon.
\p Sya, mdoo nque myenꞌ xís Jesús par gunèe myenꞌ coꞌteꞌ nzo ban Jesús. Tya, mbyanꞌ no myenꞌ Jesús yálꞌa tac hora casqueꞌ ngòc hor nquée guthap bzyè.
\p
\v 40 Thìb mbiꞌ coꞌ ngolaꞌs diꞌs coꞌ ndxab Juàn no nda nque mbiꞌ xís Jesús, mbiꞌa ngroꞌ lèe Ndech, hues Mon Pedr.
\v 41 Sya, yende izlyoꞌ, ngua cuaꞌn Ndech Mon, hues Ndech. No ndxab Ndech loo Mon:
\p ―Hues, mzyálꞌleꞌ nuꞌ mbiꞌ coꞌ nac Mesías, xaꞌ coꞌ nee diꞌs nacpeꞌ Crist, ndyaquen.
\p
\v 42 Sya, mbeꞌ Ndech Mon loo Jesús coꞌteꞌ ngo Jesús. No coꞌseꞌ gunèe Jesús Mon, ndxab Jesús loo Mon:
\p ―Mon, lùu nac xganꞌ thìb mbiꞌ coꞌ lèe Jonás, ¿léꞌ? Per nalleꞌ lùu ryoꞌ lèe Cef, coꞌ nee diꞌs, hueꞌl tedib lèe coꞌ lèe Pedr.
\s Trèꞌ ndluꞌ leꞌ Jesús mbrez Lip no Natanael par que tee no myenꞌ Jesús.
\p
\v 43 Tedib huiz coꞌ nde nque, Jesús mblyaꞌs ya par ned leꞌn yèezyaꞌ coꞌ nac làaz mèn galile. Láth ndoo Jesús ned, mzyálꞌ Jesús thìb mbiꞌ coꞌ lèe Lip. Ndxab Jesús loo Lip:
\p ―Yaꞌ nda naꞌ, Lip.
\p
\v 44 Lipa ngòc mèn yèez Betsaid coꞌ nac leque yèez cheꞌn Ndech no Pedr.
\v 45 Sya, ngua cuaꞌn Lip Natanael. Ndxab Lip loo Natanael:
\p ―Mzyálꞌleꞌ nuꞌ mbiꞌ coꞌ lèe Jesús. Cón cheꞌn mbiꞌa nac diꞌs coꞌ mqueꞌ Moisés yeꞌs loo libr coꞌ nac ley. No cón cheꞌn mbiꞌa mqueꞌ mèn coꞌ mdeꞌth diꞌs coꞌ ndxab Diox yeꞌs loo libr. Mbiꞌa nac Jesús, xganꞌ Chè, coꞌ nac mèn yèez Nazaret.
\p
\v 46 Sya, ndxab Natanael loo Lip:
\p ―¿Chéꞌ tác li mèn yèez Nazaret ndxep conꞌ ndac, sya, càꞌ, Lip?
\p Lip mcàb. Ndxab Lip:
\p ―Yaꞌ nda tee huiꞌ naꞌ, nexa. Sya, ñeela no yilaꞌsla.
\p
\v 47 Coꞌseꞌ gunèe Jesús nde zin gax Natanael loo Jesús, ndxab Jesús loo mèn coꞌ nziriꞌ loo Jesús cón cheꞌn Natanael:
\p ―Huiꞌ guꞌ nexa. Mbiꞌ coꞌ nde goꞌ nac mèn cheꞌn nación Israel. No nac mbiꞌ baꞌ thìb mbiꞌ ndac. Tac mbiꞌ baꞌ nac thìb mbiꞌ coꞌ thidtene inquedìide xtàa. No neꞌ neꞌ indyèꞌ mbiꞌ.
\p
\v 48 Sya, ndxab Natanael loo Jesús:
\p ―¿Pá mblibeꞌ Uꞌ daa, àꞌ, Tad?
\p Jesús mcàb loo Natanael. Ndxab Jesús:
\p ―Daa gunèe lùu coꞌseꞌ ndubl xànꞌ yaa ngudyuug coꞌseꞌ ndooreꞌ cuez Lip lùu.
\p
\v 49 Mcàb Natanael loo Jesús. Ndxab Natanael:
\p ―Maistr, Uꞌ nac xganꞌpeꞌ Diox. No nac Uꞌ rey cheꞌn mèn nación Israel, ndyaquen.
\p
\v 50 Sya, mcàb Jesús loo Natanael. Ndxab Jesús:
\p ―¿Chéꞌ tac guniilen lool gunèenl xànꞌ yaa ngudyuuga ndxelaꞌsl, càꞌ, Natanael? Lùu ñèe gàc más conꞌ roo conꞌ xèn loon leque conꞌ ndxèꞌ yiloa, ey.
\p
\v 51 Tolo ndxab Jesús loo Natanael:
\p ―Lìca, na nii lool, no ngue niina loo ryete mèn coꞌ nziriꞌ loon: Desde nalleꞌ par delant, guꞌ huiꞌ ndoo xalꞌ loo béꞌ. No huiꞌ guꞌ xá mod quée no lyàa angl cheꞌn Diox loon, daa coꞌ mbal yáal loo izlyoꞌ xalqueꞌ ndxáal chol mèn loo izlyoꞌ.
\c 2
\s Thìb ned myenꞌ mselyaꞌ yèez Caná.
\p
\v 1 Ngolo nguriꞌth son huiz coꞌseꞌ mdoodiꞌs Jesús diꞌsa, mselyaꞌ thìb ned myenꞌ leꞌn yèez Caná coꞌ nac yèezyaꞌ cheꞌn làaz mèn galile. Nde nxonꞌ, ngo xnaꞌ Jesús tya, ne.
\v 2 Mbli mèn guliza convid Jesús con myenꞌ xinꞌ mtéꞌth Jesús par cue no Jesús myenꞌ coꞌ mselyaꞌa liz myenꞌ.
\v 3 Per coꞌseꞌ gunèe xnaꞌ Jesús mbiiz vin coꞌ ngue guiꞌth mèn loo mèn làtha, xnaꞌ Jesús ndxab loo Jesús:
\p ―Mbiizleꞌ vin mèn guliz ndxèꞌ, cara.
\p
\v 4 Sya, ndxab Jesús loo xnaꞌ Jesús:
\p ―Ngot, ¿chonon leꞌleꞌ lùu más ndyac no ndyóol cón cheꞌn mèn baꞌ, àꞌ? Yende chó cón chenen con lùu con mèn baꞌ. Tarte gáal hor coꞌseꞌ tlo luꞌen conꞌ roo conꞌ xèn coꞌ nac cón chenen loo mèn.
\p
\v 5 Per ndxeꞌlequeꞌ, ndxab xnaꞌ Jesús loo mèn coꞌ nzi li mandad loo mes:
\p ―Bli guꞌ rye conꞌ ñee Jesús loo guꞌ, ndee guꞌ.
\p
\v 6 Nde nxonꞌ, nziriꞌ xop yèt nít tya coꞌ ngòo mèn guliza nít xal nac costumbr coꞌ ndxàp mèn nación Israel par ntech mèn yaꞌ mèn, no par ntech mèn trast coꞌ ndli zinꞌ mèn cusin, no taamas conꞌ coꞌ nac coꞌ ndli zinꞌ mèn. No thìb thìb yèta ndxàalqueꞌ ndxòo chop o son rre nít.
\v 7 Sya, ndxab Jesús loo mèn coꞌ nzi li mandada:
\p ―Fsè guꞌ ryete yèt ndxèꞌ con nít.
\p No msè myenꞌ rye yèta con nít axta mxyoꞌf lal nít loo rye yèta.
\v 8 Ngoloa, ndxab Jesús loo myenꞌ:
\p ―Nalleꞌ, bloꞌ guꞌ ndxep nít leꞌn yèt baꞌ. No huàa láꞌ guꞌi loo mbiꞌ coꞌ ndyoo naa loo mèn loo mes.
\p Sya, mbeꞌ myenꞌ níta loo mbiꞌa.
\v 9 Per texal mbli mbiꞌ coꞌ ndyoo naa loo mèn loo yalhua preb nít coꞌ ngòc vina, ngurez mbiꞌ myenꞌ coꞌ mselyaꞌ. Tac neꞌñeede mbiꞌ coꞌ ndyoo naa loo mèna pá ned nde nít coꞌ ngòc vina. Per myenꞌ coꞌ nzi li mandad coꞌ mbloꞌ nít, myenꞌa nanee xá mod ngòcsuaꞌ níta vin.
\v 10 Sya, ndxab mbiꞌ coꞌ ndyoo naa loo mèna loo mbiꞌ coꞌ mselyaꞌa:
\p ―¿Cón ndxàc, yey? Ryete mèn coꞌ ndli thìb yalhua, ner nguiꞌth mèna thìb yaꞌ vin coꞌ nac vin más huen loo mèn loo mes. No coꞌseꞌ nde teeleꞌ ndxu mèn coꞌ ngòc convid vin axta plóthe ndlyaꞌs mèna, sya, ntlo mèn, nguiꞌth mèn vin coꞌ nac vin más corient. Per lùu, ale ndxeꞌlequeꞌ, nareꞌ ngue guiꞌthl vin coꞌ nac vin más huen. ¿Chonon tatuaꞌ ndlila, ey?
\p
\v 11 Yalguzyeꞌ coꞌ mbli Jesús leꞌn yèez Caná coꞌ nac yèezyaꞌ cheꞌn làaz mèn galile ngòc nerlequeꞌ yalguzyeꞌ coꞌ mbli Jesús. No por yalguzyeꞌ coꞌ mbli Jesús, mtlo Jesús, mbluꞌ Jesús conꞌ roo conꞌ xèn coꞌ ndxàp Jesús laꞌs nii Jesús no laꞌs yaꞌ Jesús. Leꞌ myenꞌ xinꞌ mtéꞌth Jesús na, mtlo ngolaꞌs loo Jesús hora.
\p
\v 12 Ngolo ngòc conꞌa, nda Jesús par yèez Capernaum con xnaꞌ Jesús, no con myenꞌ huespeꞌ Jesús, no con myenꞌ xinꞌ mtéꞌth Jesús. Ngo ban no Jesús xnaꞌ Jesús, no myenꞌ huespeꞌ Jesús, no myenꞌ xinꞌ mtéꞌth Jesús pláte huiz leꞌn yèez Capernaum.
\s Jesús mbloꞌ che ryete conꞌ coꞌ indxàalte ngo leꞌn templ leꞌn templ.
\r (Mt. 21.12–13; Mr. 11.15–18; Lc. 19.45–46)
\p
\v 13 Leꞌn huiza, nde zinꞌ gaxleꞌ huiz lnii pasc coꞌ ndli mèn nación Israel. Sya, mxen Jesús ned. Mbii Jesús yèez Capernaum. Nda Jesús par ciuda Jerusalén.
\v 14 Coꞌseꞌ ngòo Jesús leꞌn templ, gunèe Jesús nziriꞌ mèn coꞌ nthoꞌ ngon, coꞌ nthoꞌ mbacxilꞌ, no coꞌ nthoꞌ palomxtilꞌ. Gunèe Jesús nziriꞌ mèn coꞌ nzi silꞌ tmi cheꞌn mèn, ne.
\v 15 Coꞌseꞌ gunèe Jesús conꞌa, mquiꞌs Jesús thìb dóꞌ par mdaꞌ Jesús cheꞌn mèn con dóꞌ. Tataa mbli Jesús par mbloꞌ Jesús mèna no máꞌa par fuer. Leꞌ tmi cheꞌn mèn coꞌ nzi silꞌ mèn coꞌ nsilꞌ tmia na, ndxeclequeꞌ tmia mblobii Jesús. No mtexyath Jesús rye mes mèna loo yòo.
\v 16 Leꞌ loo mèn coꞌ nzi thoꞌ palom na, ndxab Jesús:
\p ―Fcàa rye máꞌ ba. Bloꞌ guꞌ par fuer. Neꞌcue thoꞌde guꞌ trèꞌ coꞌteꞌ nac coꞌteꞌ mbez mèn lèe xuden Diox xal mèn coꞌ nthoꞌ loo thìb xbiꞌ.
\p
\v 17 Axta syareꞌ mteꞌ lezoꞌ myenꞌ xinꞌ mtéꞌth Jesús diꞌs coꞌ ndub loo libr coꞌ nac xtiꞌs Diox coꞌ nac testamentgool coꞌ mbez:
\pi1 Conꞌ coꞌ ndli más ndyóon no ngue xyàn daa nac ndlyazen leꞌ templ coꞌteꞌ mbez mèn lèe xuden Diox yumbìi no gàca thìb lugar natúꞌ par cuez mèn lèe xuden Diox.
\p
\v 18 Sya, mnibdiꞌs mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo Jesús. Ndxab mèna loo Jesús:
\p ―¿Chó yalguzyeꞌ roo lil loo nuꞌ coꞌ gàc thìb señ par ñee nuꞌ leꞌ lùu, lìcqueꞌ, ndxàp derech mblil conꞌ mblil baꞌ, àꞌ?
\p
\v 19 Sya, mcàb Jesús loo mèna. Ndxab Jesús:
\p ―Guꞌ telux templ ndxèꞌ no yiloa leꞌn son huiz leque daa bere xít teꞌf templ ndxèꞌ tedib vez.
\p
\v 20 Sya, chàa, ngroꞌ diꞌs ro rye mèngoola. Ndxab mèna loo Jesús:
\p ―Jaaa. Leꞌn choꞌ fxop línꞌ mblyenꞌ mèn par mxít teꞌf mèn templ ndxèꞌ. ¿No lùu mbez: Leꞌn son huiz no maste xít teꞌfl templ, càꞌ? Aa, mbiꞌ. ¿Máa yob yéc lùu, na?
\p
\v 21 Per ndxeꞌlequeꞌ, cón cheꞌn templ coꞌ ngue taꞌ Jesús cuent loo mèna nac bélꞌyòo ladpeꞌ Jesús.
\v 22 Cona, coꞌseꞌ ngro xban Jesús làth mèn nguth, axta syareꞌ mteꞌ lezoꞌ myenꞌ xinꞌ mtéꞌth Jesús leꞌ Jesús guniiqueꞌ diꞌsa. No tolo ngolaꞌs myenꞌ diꞌs coꞌ ndub loo libr coꞌ nac xtiꞌs Diox. No tolo ngolaꞌs myenꞌ diꞌs coꞌ guniileꞌ Jesús loo myenꞌ leꞌ Jesús guniiqueꞌ diꞌsa cón cheꞌnpeꞌ Jesús.
\s Jesús nonqueꞌ no naneequeꞌ Jesús xal nac xtùuz ryete mèn.
\p
\v 23 Láth ngo Jesús leꞌn ciuda Jerusalén leꞌn huiz lni cheꞌn pasc, huiza huax mèn ngolaꞌs loo Jesús no loo cón cheꞌn Jesús por gunèe mèn mbli Jesús rye yalguzyeꞌ coꞌ mbli Jesús loo mèn.
\v 24 Per leque yub Jesús neꞌngàpte yalxlaꞌs loo mèna xal nac mod coꞌ ngòp mèna. Tac Jesús naneequeꞌ no nonqueꞌ Jesús xal nac xtùuz rye mèn no xal nac coꞌ nzo leꞌn lezoꞌ rye mèn.
\v 25 Neꞌ neꞌ inquin Jesús taꞌ chol mèn cuent cón cheꞌn xtàa mèn loo Jesús tac Jesús naneequeꞌ no nonqueꞌ Jesús xal nac xtùuz rye mèn no xal nac coꞌ nzo leꞌn lezoꞌ rye mèn.
\c 3
\s Jesús ryop Nicodem mdoodiꞌs.
\p
\v 1 Ngo thìb mbiꞌ coꞌ ngòc mèn cheꞌn xleyꞌ farise. Mbiꞌa ngroꞌ lèe Nicodem. Ngòc mbiꞌ thìb mbiꞌ coꞌ mnibeꞌ, no coꞌ mdyoo ner, no coꞌ mdyoo naa loo mèn nación Israel, ne.
\v 2 Nicodema ngua too naa Jesús thìb yálꞌ. Látha, ndxab Nicodem loo Jesús:
\p ―Maistr, nuꞌ ndaꞌ cuent no nanee nuꞌ leꞌ Diox mtelꞌ Uꞌ par gàc Uꞌ thìb maistr coꞌ luꞌ nuꞌ. Tac yende chó mèn tar gác luꞌ no coꞌ li yalguzyeꞌ roo no yalguzyeꞌ xèn xal ndli Uꞌ cheleꞌ Diox indlyath node mèna par li mèna conꞌa.
\p
\v 3 Sya, ndxab Jesús loo Nicodem:
\p ―Lìcpeꞌ baꞌi, na nii thìb conꞌ lool, Nicodem: Leꞌ mèn coꞌ neꞌtyalte yòo loo cón cheꞌn Diox xal thìb mbetooꞌ coꞌ diz ngóol, yende mod yòo mèna loo cón cheꞌn Diox par ñibeꞌpeꞌ Diox loo mèna.
\p
\v 4 Ndxab Nicodem loo Jesús:
\p ―¿Xá mod gáal thìb mbiꞌ tedib vez coꞌseꞌ ngoxleꞌ mbiꞌ? ¿Chéꞌ tác yòo mbiꞌ leꞌn lezoꞌ xnaꞌ mbiꞌ par gáal mbiꞌ tedib vez, càꞌ? Yende xàa.
\p
\v 5 Jesús mcàb loo Nicodem. Ndxab Jesús:
\p ―Lìca, na nii lool, Nicodem: Leꞌ mèn coꞌ neꞌtyalte gàc mèn men cub loo cón cheꞌn Diox por cón cheꞌn nít no por cón cheꞌn Xpii Natúꞌ, mèna yende mod yòo loo cón cheꞌn Diox par ñibeꞌpeꞌ Diox loo mèna.
\v 6 Mèn coꞌ ante ngóol xal nac bin cheꞌn bélꞌ lad xud mèn no xnaꞌ mèn, mèna alithe nziriꞌ loo cón cheꞌn xab izlyoꞌ ndxèꞌ. Per ndxeꞌlequeꞌ, mèn coꞌ mbli Xpii Natúꞌ leꞌ mèna nac mèn cub loo cón cheꞌn Diox, mèna ndoo lìte nzi que tee ban par li mèna xal nac coꞌ ñibeꞌpeꞌ Xpii Natúꞌ loo mèna par li mèna.
\v 7 Neꞌhuiꞌdel, no neꞌñaadel, no neꞌtyóodel arid cón cheꞌn conꞌ ngue niin lool nalleꞌ. Naquinqueꞌ gáal guꞌ tedib vez xal ngolo guniina lool.
\v 8 Huiꞌ nexa. Mbii nxyoꞌf pál coꞌteꞌ nxyoꞌf mbii. No ndxònl coꞌseꞌ ndxaꞌx nxyoꞌf mbii, ¿léꞌ? Per neꞌñeedel pá ned ndryoꞌ mbii. No neꞌ neꞌ ñeel pá ned ndyàa mbii. Tataa naca, ne, con ryete mèn coꞌ mbli Xpii Natúꞌ par ngòc mèna mèn cub loo cón cheꞌn Diox.
\p
\v 9 Sya, mbere Nicodem, ndxab Nicodem loo Jesús tedib vez:
\p ―¿Xá mod gàc conꞌa, yoo?
\p
\v 10 Jesús mcàb loo Nicodem. Ndxab Jesús:
\p ―¿Chéꞌ ndyaquen lùu nac ner maistr cheꞌn mèn nación Israel no inontel cón cheꞌn conꞌ ndxèꞌ, càꞌ?
\v 11 Lìca, na ngue nii lool: Leꞌ cón cheꞌn conꞌ coꞌ non nuꞌ, ndyoodiꞌs nuꞌ. No cón cheꞌn conꞌ coꞌ gunèeleꞌ nuꞌ, ndaꞌ nuꞌ cuent. No ndxeꞌlequeꞌ, indxònte guꞌ diꞌs no indxelaꞌste guꞌ diꞌs coꞌ ndaꞌ nuꞌ cuent loo guꞌ no coꞌ ndyoodiꞌs nuꞌ loo guꞌ.
\v 12 Cheleꞌ daa tyoodiz no tan cuent cón cheꞌn izlyoꞌ ndxèꞌ loo guꞌ no neꞌyilaꞌste guꞌi, ¿xá mod yilaꞌs guꞌ cheleꞌ daa ta cuent cón cheꞌn béꞌ loo guꞌ, sya?
\p
\v 13 Axta nalleꞌ yende chó mèn tar quée loo béꞌ par téꞌth mèna cón cheꞌn conꞌ coꞌ ngue niin lool trèꞌ, Nicodem. Ndxeꞌlequeꞌ, angolux daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ, thidte daa non cón cheꞌn béꞌ, daa coꞌ ngroꞌ leꞌn béꞌ. Tac leꞌn béꞌ loo béꞌ nac lizpeꞌ daa, no nac làazpeꞌ daa, no nac loo béꞌ xnedpeꞌ daa.
\v 14 Huiꞌ nexa, Nicodem. Nde niin thìb conꞌ lool: Texal mquetal Moisés thìb mbelꞌ loo thìb bro yaa nolꞌ no mdoo Moisés yaaa, ngue tal mbelꞌ loo yaa coꞌteꞌ nagán, tataaqueꞌ naquin queꞌ mèn daa, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ, loo thìb cruz
\v 15 par gàca leꞌ ryete mèn coꞌ tyal yilaꞌs loon, Diox neꞌquexùꞌde mèna par coꞌ xàꞌ Diox mèna loo Diox yiloa. Ndxeꞌlequeꞌ, mèn coꞌ tyal yilaꞌs loon, mèna yòo ban no Diox thidtene.
\s Trèꞌ ndluꞌ Jesús leꞌ Diox anzeꞌf nqueꞌ lezoꞌ ñèe Diox mèn loo izlyoꞌ.
\p
\v 16 Tac Diox axta arid nazinꞌ mèn no nqueꞌ lezoꞌ Diox ñèe Diox mèn loo izlyoꞌ. Por cona, mtelꞌ Diox angoluxte xganꞌ Diox loo izlyoꞌ par gàca leꞌ ryete mèn coꞌ yilaꞌs loo xganꞌ Diox, neꞌquexùꞌde Diox mèna par coꞌ xàꞌ Diox mèna loo Diox yiloa. Ndxeꞌlequeꞌ, yòo ban no mèna Diox thidtene yiloa.
\v 17 Diox neꞌntelꞌte xganꞌ Diox loo izlyoꞌ par quexùꞌ xganꞌ Diox mèn loo izlyoꞌ. Ndxeꞌlequeꞌ, mtelꞌ Diox xganꞌ Diox loo mèn loo izlyoꞌ par lyáꞌ mèn loo conꞌ ryes por cón cheꞌn xganꞌ Diox.
\p
\v 18 Mèn coꞌ ndxelaꞌs loo xganꞌ Diox, Diox neꞌquexùꞌde mèna thidtene. Per mèn coꞌ neꞌtyalte yilaꞌs loo xganꞌ Diox, Diox ngue quexùꞌqueꞌ mèna por neꞌngalaꞌste mèna loo mbiꞌ coꞌ nac angoluxte xganꞌ Diox.
\v 19 Coꞌseꞌ mbiꞌth xaꞌ coꞌ ndli par ndyub xnìi yéc mèn no ndyub xnìi lezoꞌ mèn loo cón cheꞌn Diox, más mdaꞌ gust loo lezoꞌ mèn no más mdublaꞌs mèn cón cheꞌn xab izlyoꞌ leque li mèn cas loo mbiꞌ coꞌ ndli par ndyub xnìi yéc mèn no ndyub xnìi lezoꞌ mèn loo cón cheꞌn Diox. Tac ryethe conꞌ ndli mèn nac conꞌ yeꞌrsinꞌ. No conꞌ coꞌ ndaꞌ gust lezoꞌ mèn ndli ngue quexùꞌ Diox mèn loo izlyoꞌ.
\v 20 Tac ryete mèn coꞌ ndli conꞌ yeꞌrsinꞌ, mèna ndxòo xyàn lezoꞌ ñèe mèna mbiꞌ coꞌ mbiꞌth li par ndyub xnìi yéc mèn no ndyub xnìi lezoꞌ mèn loo cón cheꞌn Diox. No thidtene neꞌndalte mèna yòo mèna loo cón cheꞌn mbiꞌ coꞌ ndli par ndyub xnìi yéc mèn no ndyub xnìi lezoꞌ mèn cón cheꞌn Diox tac indlyaꞌste mèn yeꞌrsinꞌa ryo xoꞌf conꞌ yeꞌrsinꞌ coꞌ ndli mèna loo xnaa.
\v 21 Per ndxeꞌlequeꞌ, mèn coꞌ nzi tee ban xal nac conꞌ lìcpeꞌ, mèna ndyal yòo loo cón cheꞌn mbiꞌ coꞌ ndli ndyub xnìi yéc mèn no ndyub xnìi lezoꞌ mèn loo cón cheꞌn Diox par ndxàc beꞌ mèna leꞌ Diox ndlyath no mèna loo conꞌ ndac coꞌ ngue li mèna.
\s Juàn Bautist mbere ngue taꞌ cuent cón cheꞌn Jesús loo mèn.
\p
\v 22 Ngolo nguriꞌth conꞌa, ngua Jesús con myenꞌ xinꞌ mtéꞌth Jesús par ned yèezyaꞌ cheꞌn làaz mèn jude. Ngo no Jesús myenꞌ tya pláte huiz. Látha, mbli myenꞌ xinꞌ mtéꞌth Jesús bautizar mèn tya.
\v 23 Juàn Bautist, ne, ngue li bautizar mèn coꞌteꞌ ndub len nít thìb lugar coꞌ lèe Enón coꞌ nziriꞌ gaxte coꞌteꞌ nziriꞌ thìb yèez coꞌ lèe Salim tac tya anzeꞌf nalꞌ nít nzo. No huax mèn nde loo Juàn par ndli Juàn bautizar mèn.
\v 24 Beꞌ ndli Juàn bautizar mèn tiempa tac tarte queꞌ mèn Juàn leziꞌf.
\p
\v 25 Leque leꞌn huiza, mque diꞌs myenꞌ xinꞌ mtéꞌth Juàn con plá mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel cón cheꞌn mod coꞌ mbez mèn ndxàc mèn nambìilaꞌs loo xleyꞌ mèna.
\v 26 Sya, ngua myenꞌ xinꞌ mtéꞌth Juàn loo Juàn. Ngua taꞌ myenꞌ cuent loo Juàn. Ndxab myenꞌ:
\p ―Maistr, huiꞌ Uꞌ nexa. Mbiꞌ coꞌ ngo no Uꞌ tedib lad ro yóꞌbeꞌ Jordán par ned ndlyen huiz, mbiꞌ coꞌ mdaꞌ Uꞌ cuent cón cheꞌn loo nuꞌa, mbiꞌ ngue li bautizar mèn. No anzeꞌf thìb mèn ndoo nque xís mbiꞌ.
\p
\v 27 Mcàb Juàn loo myenꞌ. Ndxab Juàn:
\p ―Laꞌ guꞌ. Tac yende cón gác li mèn cheleꞌ Diox neꞌnxoꞌf zinꞌte thìb zinꞌ loo mèn par li mèn zinꞌa.
\v 28 Leque guꞌ ndaꞌ cuent cón chenen coꞌseꞌ nambìite ndxaben loo mèn leꞌ daa inacte Crist. Ndxeꞌlequeꞌ, Diox mtelꞌ daa par ndal neren loo Crist.
\p
\v 29 Tolo ndxab Juàn loo myenꞌ:
\p ―Nde niin thìb conꞌ loo guꞌ: Xaꞌbiꞌ coꞌ nac saꞌl thìb xaꞌgot, xaꞌbiꞌaqueꞌ nac saꞌl xaꞌgota. Per thìb xaꞌbiꞌ coꞌ ndxàc amiu cheꞌn mbiꞌ coꞌ nac saꞌl xaꞌgota, xaꞌa ndoo tya. No ndoo yòn xaꞌ diꞌs coꞌ ndyoodiꞌs mbiꞌ coꞌ nac saꞌl xaꞌgota. No coꞌseꞌ ndoo yòn mbiꞌ diꞌs coꞌ ndyoodiꞌs xaꞌbiꞌa, anzeꞌf ndyac lezoꞌ mbiꞌ ndxòn mbiꞌ diꞌs coꞌ ndyoodiꞌs mbiꞌ coꞌ nac saꞌl xaꞌgota. Cona, daa, ne, anzeꞌf ndyac lezoꞌ ndxònen cuent coꞌ ngue taꞌ guꞌ loon baꞌ cón cheꞌn mbiꞌa.
\v 30 Por part cón cheꞌn mbiꞌa, sate más ndoo yàc mbiꞌ mbiꞌ roo mbiꞌ xèn. No thidtenequeꞌ naquinqueꞌ gàc mbiꞌa thìb mbiꞌ roo thìb mbiꞌ xèn. Per part cón chenen, ale ndxeꞌlequeꞌ, ale xèegà xèegà ya yende cón tolo lin. Ndxeꞌlequeꞌ, gàc daa mèn coꞌ iñaade ntac loo mèn.
\s Trèꞌ ndluꞌ leꞌ Crist ngroꞌ loo béꞌ loo Diox.
\p
\v 31 Ngue niin loo guꞌ: Leꞌ Crist coꞌ ngroꞌ loo béꞌ, Crist ñibeꞌpeꞌ loo ryethe conꞌ. Per mèn coꞌ ndxáal loo izlyoꞌ, cheꞌn izlyoꞌ nac mèna. No cón cheꞌn izlyoꞌ ndyoodiꞌs mèna. Per Crist coꞌ ngroꞌ leꞌn béꞌ loo béꞌ, Crist ngüiꞌ ñaa loo ryethe conꞌ. No ñibeꞌpeꞌ Crist loo ryethe conꞌ.
\v 32 Ndyoodiꞌs Crist cón cheꞌn conꞌ coꞌ gunèe Crist no cón cheꞌn conꞌ coꞌ mbìn Crist. Per casque yende chó mèn nzoꞌ coꞌ ndxelaꞌs cón cheꞌn diꞌs coꞌ mbez Crist no coꞌ ndaꞌ Crist cuent loo mèn.
\v 33 Per cheleꞌ chó mèn yilaꞌs diꞌs coꞌ mbez Crist no diꞌs coꞌ ndaꞌ Crist cuent loo mèn, leque mèna li nèe xtùuz mèn no li nèe mèn lezoꞌ mèn leꞌ Diox ndyoodiꞌs no ndaꞌ Diox cuent ante cón cheꞌn conꞌ coꞌ nac conꞌ lìcpeꞌ.
\v 34 Tac Diox coꞌ mtelꞌ Crist, Diox mtelꞌ Crist par tyoodiꞌs Crist ante diꞌs coꞌ mnibeꞌ Diox tyoodiꞌs Crist no coꞌ taꞌ Crist cuent loo mèn. Lomisqueꞌ ne, Diox neꞌnglàade Xpii Natúꞌ loo Crist xal thìb conꞌ coꞌ nchiꞌx mèn.
\v 35 Diox coꞌ nac xud Crist Jesús, Diox anzeꞌf nqueꞌ lezoꞌ ñèe Diox Crist Jesús coꞌ nac xganꞌpeꞌ Diox. Por cona, mblec Diox ryethe conꞌ no mtanꞌ Diox ryethe conꞌ laꞌs nii Crist Jesús no laꞌs yaꞌ Crist Jesús.
\v 36 Cona, ngue niin: Leꞌ mèn coꞌ ndxelaꞌs loo xganꞌ Diox no loo cón cheꞌn xganꞌ Diox, mèna yòo ban no Diox thidtene. Per mèn coꞌ neꞌtyalte yilaꞌs loo xganꞌ Diox no loo cón cheꞌn xganꞌ Diox, mèna neꞌyòo ban node Diox thidtene. Ndxeꞌlequeꞌ, Diox ndxecloo ñèe mèna nalleꞌ par tetìi Diox mèna thidtene yiloa.
\c 4
\s Jesús ngue toodiꞌs no thìb xaꞌgot coꞌ nac mèn yèezyaꞌ cheꞌn làaz mèn samari.
\p
\v 1 Nde nxonꞌ, mbìn mèn xleyꞌ farise más ndli Jesús bautizar mèn leque Juàn Bautist,
\v 2 mastale indli yubte Jesús bautizar mèn. Ndxeꞌlequeꞌ, myenꞌ xinꞌ mtéꞌth Jesús mbli bautizar mèn.
\v 3 Per coꞌseꞌ mbìn Jesús leꞌ mèn xleyꞌ farise nonleꞌ cón cheꞌn Jesús, ngroꞌ Jesús leꞌn yèezyaꞌ cheꞌn làaz mèn jude par bere Jesús, ya Jesús par ned leꞌn yèezyaꞌ cheꞌn làaz mèn galile tedib vez.
\p
\v 4 Láth ndoo Jesús ned, nda Jesús par ned làaz mèn galile, thìb lì nguriꞌth Jesús par ned leꞌn yèezyaꞌ coꞌ nac làaz mèn samari,
\v 5 axta mzin Jesús thìb yèez coꞌ lèe Sicar coꞌ nac thìb yèezyaꞌ cheꞌn làaz mèn samari. Yèez Sicar nziriꞌ gaxte coꞌteꞌ nax thìb leꞌ xyòn Cob coꞌ mtanꞌ Cob loo Chè coꞌ nac xganꞌ Cob póla.
\v 6 Loo xyòn Coba ndub thìb tóꞌ coꞌ mbez mèn nac tóꞌ cheꞌn Cob. Per com leꞌ Jesús ndoo ned, ¿léꞌ?, mdub Jesús ro tóꞌa tac ngo zan Jesús. Hora casqueꞌ ngòc rol huiz.
\v 7 Láth ndub li Jesús descans ro tóꞌ, nde xi thìb xaꞌgot coꞌ nac thìb xaꞌgot cheꞌn làaz mèn samari nít ro tóꞌ. Ndxab Jesús loo xaꞌgota:
\p ―Ngot, ftaꞌ chuꞌth nít gun, ey.
\p
\v 8 Látha ne, myenꞌ xinꞌ mtéꞌth Jesús yende. Myenꞌ nda leꞌn yèez par nda tiꞌ myenꞌ coꞌ hua no myenꞌ Jesús.
\v 9 Sya, ndxab xaꞌgot coꞌ nac xaꞌgot gulàaz mèn samari loo Jesús:
\p ―¿Xá mod ale ñaꞌb Uꞌ nít loon par gu Uꞌ, Uꞌ coꞌ nac mèn gulàaz cheꞌn mèn nación Israel, no daa coꞌ nac xaꞌgot cheꞌn làaz mèn samaritan, àꞌ?
\p Guꞌ ndaꞌqueꞌ cuent no naneequeꞌ guꞌ leꞌ mèn nación Israel inzyálꞌ diꞌste no inzyálꞌ beꞌde coꞌ huenlequeꞌ con mèn coꞌ nac mèn gulàaz cheꞌn làaz mèn samari.
\p
\v 10 Sya, mcàb Jesús loo xaꞌgota. Ndxab Jesús:
\p ―Cheleꞌ lùu naneeleꞌ no ndaꞌlel cuent cón cheꞌn conꞌ ndac coꞌ angli Diox loo mèn, no cheleꞌl ndaꞌ cuent no nonl chó mbiꞌ nac mbiꞌ coꞌ ngue ñaꞌb nít lool nalleꞌ, lìcpeꞌ baꞌi, lùu ngnaꞌb nít loon par gul, nít coꞌ li par yòo ban nol Diox thidtene.
\p
\v 11 Sya, ndxab xaꞌgota loo Jesús:
\p ―Tad, per neꞌ neꞌ ingue no Uꞌ conꞌ par coꞌ Uꞌ nít leꞌn tóꞌ. Más de cona, anzeꞌf naꞌs tóꞌ. ¿Pá yixi Uꞌ nít coꞌ taꞌ Uꞌ gun, nít coꞌ mbez Uꞌ gun par gòo ban non Diox thidtene, sya?
\v 12 Cob coꞌ ngòc xudgool naꞌ póla mtanꞌ tóꞌ ndxèꞌ coꞌteꞌ mbloꞌ Cob nít par ngu Cob con myenꞌ xinꞌ Cob no par ngu máꞌ coꞌ mxènꞌ Cob. ¿A poc ñee Uꞌ más xaꞌ roo xaꞌ xèn nac Uꞌ leque xudgool naꞌ Cob sya, càꞌ?
\p
\v 13 Jesús mcàb. Ndxab Jesús loo xaꞌgota:
\p ―Ryete mèn coꞌ toloqueꞌ gu nít ndxèꞌ, mèna toloqueꞌ yec lezoꞌ.
\v 14 Per ndxeꞌlequeꞌ, mèn coꞌ tyal no coꞌ taꞌ lugar yòo cón chenen loo mèna xal coꞌseꞌ gu mèn nít, mèna thidtenequeꞌ yo nagàl lezoꞌ loo cón cheꞌn Diox xal mèn coꞌ neꞌyecte lezoꞌ par nquin mèn gu mèn nít tedib vez. Tac conꞌ coꞌ lin loo mèna coꞌ gàc conꞌ coꞌ yòo leꞌn lezoꞌ mèna, conꞌa li loo mèna gàc conꞌ ndac tínꞌ loo mèna xal gàc conꞌ ndac loo mèn coꞌseꞌ ndub zib ndub len nít par li níta conꞌ ndac loo mèna. Conꞌ coꞌ lin loo mèna càb loo mèna yòo ban no mèna Diox thidtene.
\p
\v 15 Sya, ndxab xaꞌgota loo Jesús:
\p ―Tad, ftaꞌ Uꞌ níta gun, tá, par ya neꞌtolode yec lezon no par ya neꞌtolode gal loꞌen nít leꞌn tóꞌ ndxèꞌ.
\p
\v 16 Sya, mcàb Jesús loo xaꞌgota. Ndxab Jesús:
\p ―Huàa xi xaꞌbiꞌ coꞌ nac saꞌll. Yiꞌth ryop guꞌ ndxèꞌ.
\p
\v 17 Xaꞌgota mcàb. Ndxab xaꞌgota loo Jesús:
\p ―Ingue noden saꞌlen.
\p Sya, ndxab Jesús loo xaꞌgota:
\p ―Aa. Lìcqueꞌ nac coꞌ guneel baꞌ: Ingue nodel saꞌl. Yende conꞌ niin lool.
\v 18 Lùu nde teeleꞌ mque no gaꞌy saꞌl. No lomisqueꞌ, xaꞌbiꞌ coꞌ ndub nol nalleꞌ inacte xaꞌ saꞌll. Lìcqueꞌ nac diꞌs coꞌ ngolo guneel baꞌ.
\p
\v 19 Coꞌseꞌ mbìn xaꞌgota tataa ndxab Jesús, ndxab xaꞌgota loo Jesús:
\p ―Tad, ndyaquen leꞌ Uꞌ nac thìb xaꞌ coꞌ ndeꞌth diꞌs coꞌ ndxab Diox.
\v 20 Xudgool nuꞌ, coꞌ ngòc mèn cheꞌn yèezyaꞌ cheꞌn làaz mèn samari, ndyee chez Diox loo yii coꞌ ndub goꞌ. No guꞌ, coꞌ nac mèn cheꞌn yèezyaꞌ cheꞌn làaz mèn jude, ale mbez leꞌn templ coꞌ ndub leꞌn ciuda Jerusalén nac coꞌteꞌ nquin cuez mèn Diox.
\p
\v 21 Jesús mcàb. Ndxab Jesús loo xaꞌgota:
\p ―Golaꞌs loon, ngot, nde zinꞌ gaxleꞌ tiemp no nde zinꞌ gaxleꞌ huiz coꞌseꞌ neꞌ loo yii ndxèꞌ no neꞌ neꞌ leꞌn ciuda Jerusalén gàc coꞌteꞌ cuez guꞌ Diox.
\v 22 Guꞌ coꞌ nac mèn yèezyaꞌ cheꞌn làaz mèn samari, axta neꞌ neꞌ ñee guꞌ chó loo conꞌ mbez guꞌ nac Diox. Per nuꞌ non no naneequeꞌ nuꞌ chó mbez nuꞌ nac Diox. Tac por cón cheꞌn nuꞌ coꞌ nac mèn nación Israel Diox mbli par non mèn xá mod lyáꞌ mèn loo conꞌ ryes.
\v 23 Per nase mzinleꞌ huiz no mzinleꞌ tiemp no nalleꞌqueꞌ ndxàc coꞌseꞌ, lìcqueꞌ, nalìqueꞌ no nambìiqueꞌ que tee ban mèn loo Diox xal ñibeꞌpeꞌ Xpii Natúꞌ loo mèn no xal ndluꞌ xtiꞌs Diox loo mèn cón cheꞌn conꞌ lìcpeꞌ. Tac Diox xud naꞌ ncuaꞌn mèn coꞌ cuezpeꞌ Diox xud naꞌ tataa mod, Diox coꞌ, lìcqueꞌ, nac thidte Diox.
\v 24 Diox nac thìb xpii. No mèn coꞌ lyaꞌs cuez Diox mod coꞌ li par yòo lezoꞌ Diox ñèe Diox mèn, mèna naquinqueꞌ nalìqueꞌ no nambìiqueꞌ que tee ban loo Diox xalqueꞌ ñibeꞌpeꞌ Xpii Natúꞌ loo mèn, no xalqueꞌ ndluꞌ xtiꞌs Diox loo mèn cón cheꞌn conꞌ lìcpeꞌ.
\p
\v 25 Sya, ndxab xaꞌgota loo Jesús:
\p ―Daa nanee leꞌ thìb xaꞌ coꞌ lèe Mesías yiꞌth, xaꞌ coꞌ neꞌ tedib lèe Crist. Coꞌseꞌ yiꞌth xaꞌ, xaꞌ taꞌ cuent no co ro xaꞌ ryete conꞌ cón cheꞌn Diox loo naꞌ.
\p
\v 26 Jesús mcàb loo xaꞌgota. Ndxab Jesús:
\p ―Xaꞌ coꞌ nac Crist nac daa coꞌ ngue toodiꞌs nol, ey.
\p
\v 27 Látha, ndyeꞌth myenꞌ xinꞌ mtéꞌth Jesús loo Jesús. Ante mbuiꞌ myenꞌ no ante gunaa myenꞌ leꞌ Jesús ngue toodiꞌs no xaꞌgota. Per nec thìb myenꞌ neꞌnglide ryes ngnibdiꞌs myenꞌ loo Jesús par ngab myenꞌ:
\p ―¿Cón ndlyaꞌs xaꞌgot baꞌ o chó diꞌs ngue toodiꞌs Uꞌ con xaꞌgot baꞌ?
\p
\v 28 Sya, taate mbláꞌ xaꞌgota rre xaꞌ. Ndyàa xaꞌ làth yèez par ngua taꞌ xaꞌ cuenta loo mèn yèez. Ndxab xaꞌ loo mèn yèeza:
\p
\v 29 ―Yaꞌ guꞌ nda tee huiꞌ naꞌ thìb mbiꞌ. Mbiꞌa guneeleꞌ cón cheꞌn ryethe conꞌ nde teeleꞌ mblin. Neꞌstolqueꞌ mbiꞌa nac Crist, cara.
\p
\v 30 Sya, ryete mèn yèeza ngroꞌ. Ngua no mèna xaꞌgot coꞌteꞌ ndub Jesús.
\p
\v 31 Láth nda xaꞌgota làth yèez, myenꞌ xinꞌ mtéꞌth Jesús nalyat ndxab loo Jesús:
\p ―Maistr, que de Uꞌ. Hua naꞌ mase sa pan, yey.
\p
\v 32 Per ndxeꞌlequeꞌ, Jesús ndxab loo myenꞌ:
\p ―Yende xàa, ey. Neꞌhuaden. Daa ngue no ndxep conꞌ huan. No nít yèth coꞌ huana, guꞌ inonte chó nít yèth nac nít yèth coꞌ huana.
\p
\v 33 Sya, mtlo myenꞌ xinꞌ mtéꞌth Jesús, mnibdiꞌs myenꞌ loo xtàa myenꞌ:
\p ―¿Xá nee guꞌ? ¿Chéꞌ ndyac guꞌ nzo chó mèn mbiꞌth láꞌleꞌ conꞌ nduhua maistr, léꞌ?
\p
\v 34 Ale leꞌleꞌ mcàb Jesús loo myenꞌ:
\p ―Yende xàa. Zinꞌ coꞌ ndlin ndxèꞌ nac rsinꞌ cheꞌn xaꞌ coꞌ mtelꞌ daa par lin coꞌ nee lezoꞌ xaꞌ. Ndlin cuent leꞌ zinꞌa nac xal xíten no xal luan. Leꞌ zinꞌ coꞌ nac rsinꞌ xaꞌa na, na teloqueꞌ zinꞌa.
\v 35 Guꞌ ngue no thìb diꞌs coꞌ mbez guꞌ: Tatabeꞌ ndxàc falt thap mbeꞌ par zin tiemp coꞌseꞌ lyáp, ¿léꞌ? Per nalleꞌ nde tetaquen thìb diꞌs loo guꞌ par taꞌ guꞌ cuent: Lyazen huiꞌ ndxèꞌ huiꞌ baꞌ guꞌ loo xyòn mèn coꞌ ngue lad yii baꞌ. Lìcqueꞌ, huax cosech nzo coꞌ yamerleꞌ dyop. Tatuaꞌ nzo mèn loo izlyoꞌ coꞌ nzi bed gòn no coꞌ ndlyaꞌs gòn cón chenen par yòo mèna loo cón cheꞌn Diox, coꞌ nee diꞌs, nac mèna xal cosech baꞌ.
\v 36 Naneequeꞌ guꞌ leꞌ mèn coꞌ ndli zinꞌ loo cosech, mèna thìb lìte ndxòo ray. Niin tedib diꞌs loo diꞌs ndxèꞌ loo guꞌ, ne: Mèn coꞌ gàc xal cosech loo cón cheꞌn Diox, mèna yòo ban noqueꞌ Diox thidtene. Tataa ndxàca par gàca leꞌ mèn coꞌ ndeꞌth no coꞌ ngo yalbàn cón cheꞌn Diox, no mèn coꞌ ndxòo loo cón cheꞌn Diox xal ndláp mèn, thidte tyac lezoꞌ mèna loo cón cheꞌn Diox no loo Diox.
\v 37 Tac lìcqueꞌ nac conꞌ ndxèꞌ xal ndxab diꞌs coꞌ mbez mèn: Xàꞌqueꞌ nac mèn coꞌ ngo bin. No xàꞌqueꞌ nac mèn coꞌ nthop cosech.
\p
\v 38 Daa mtelꞌ guꞌ liz mèn no làaz mèn par ngua taꞌ guꞌ cuent no par ngua lo guꞌ yalbàn cón chenen loo mèn ned ngua guꞌ par ngolaꞌs mèn loon no ngòo mèn loo cón chenen xal coꞌseꞌ nthop mèn cosech. Neꞌngode guꞌ yalbàn cón chenen arid xal mèn coꞌ ngo bin. Taamas mèn mdeꞌth cón chenen no mblo mèn yalbàn cón chenen xal mèn coꞌ mqueꞌ zinꞌ loo ñaꞌ. No guꞌ pente mbli ndxep zinꞌ loo mèna par ngòo mèn loo cón chenen xal mèn coꞌ inqueꞌde zinꞌ loo ñaꞌ no alithe mthop mèn cosecha par hua mèn cosech coꞌteꞌ neꞌnqueꞌde mèn zinꞌ.
\p
\v 39 Huax mèn yèez cheꞌn yèezyaꞌ cheꞌn làaz mèn samari ngolaꞌs loo Jesús por diꞌs coꞌ mdaꞌ xaꞌgot samaritan cuent loo mèna coꞌseꞌ ndxab xaꞌgota: Jesús mdaꞌ cuent cón cheꞌn ryete conꞌ coꞌ nde teeleꞌ ndlin loon, cara.
\p
\v 40 Por cona, coꞌseꞌ ngua mèn cheꞌn yèezyaꞌ cheꞌn làaz mèn samari loo Jesús, nalyat mdeꞌb ro mèna. Mnaꞌb mèna diꞌs loo Jesús par yanꞌ no Jesús mèna tya. No mbyanꞌ no Jesús mèna tya chop huiz.
\v 41 No ale sate más tolo ngolaꞌs huax mèna loo Jesús por diꞌs coꞌ mdaꞌ yub Jesús cuent loo mèna.
\v 42 Sya, ndxab mèn cheꞌn yèezyaꞌ cheꞌn làaz mèn samari loo xaꞌgota:
\p ―Nase ngolaꞌsqueꞌ nuꞌ cón cheꞌn Jesús. Neꞌngalaꞌste nuꞌ cón cheꞌn Jesús ante por diꞌs coꞌ mdaꞌl cuent loo nuꞌ. Ndxeꞌlequeꞌ, nuꞌ ngolaꞌs loo Jesús por mdaꞌ yub Jesús cuenta loo nuꞌ. No, lìcpeꞌ baꞌi, naneequeꞌ nuꞌ leꞌ mbiꞌ baꞌ nac yubpeꞌ Crist coꞌ mxoꞌf zinꞌ Diox loo par nteláꞌ Crist mèn cheꞌn izlyoꞌ ndxèꞌ loo conꞌ yeꞌrsinꞌ.
\s Jesús mteyac xganꞌ thìb mbiꞌ coꞌ mxoꞌf zinꞌ zinꞌ loo gobiern.
\p
\v 43 Coꞌseꞌ ngolo nguriꞌth chop huiz, mbii Jesús leꞌn yèezyaꞌ cheꞌn làaz mèn samari. Nda Jesús par ned leꞌn yèezyaꞌ coꞌ nac cheꞌn làaz mèn galile.
\v 44 Tac yub Jesús ndxab loo mèn nación Israel:
\p ―Thìb mbiꞌ coꞌ ndeꞌth diꞌs coꞌ ndxab Diox, coꞌ nac mbiꞌ yèezpeꞌ no mbiꞌ gulàazpeꞌ cheꞌn thìb yèez, mèn gulàaz mbiꞌ no mèn yèez mbiꞌ neꞌlide par gàc conꞌ guryath no conꞌ guryèn loo mbiꞌa. Ndxeꞌlequeꞌ, tèꞌb mèna mbiꞌa.
\v 45 Coꞌseꞌ mzin Jesús leꞌn yèezyaꞌ cheꞌn làaz mèn galile, nabeꞌste ngo no mèna Jesús. No nabeꞌste mdoodiꞌs no mèna Jesús tac rye mèna ngua lni Jerusalén. No gunèe mèna rye conꞌ coꞌ mbli Jesús leꞌn huiz lni leꞌn templ ciuda Jerusalén.
\p
\v 46 Làth xtauꞌa, ngua riid Jesús leꞌn yèez Caná, coꞌ nac thìb yèezyaꞌ cheꞌn làaz mèn galile, coꞌteꞌ mbli Jesús ngòc nít vin. Nde nxonꞌ, ngo thìb mbiꞌ cheꞌn yèez Capernaum coꞌ ngòc thìb jef cheꞌn gobiern coꞌ ñibeꞌ rey. Mque no mbiꞌ thìb xganꞌ mbiꞌ coꞌ ndyac len.
\v 47 Coꞌseꞌ mbìn mbiꞌa leꞌ Jesús ngroꞌ leꞌn yèezyaꞌ cheꞌn làaz mèn jude no mzin Jesús par ned leꞌn yèezyaꞌ cheꞌn làaz mèn galile, mbiꞌth nee mbiꞌ loo Jesús. Nalyat mdeꞌb ro mbiꞌ. Mnaꞌb mbiꞌ favor loo Jesús par ya teyac Jesús xganꞌ mbiꞌ liz mbiꞌ tac xganꞌ mbiꞌ nax tinleꞌ liz.
\p
\v 48 Sya, ndxab Jesús loo mbiꞌ:
\p ―Guꞌ neꞌyilaꞌste loon cheleꞌ guꞌ neꞌñèede señ no yalguzyeꞌ coꞌ ndlin, ¿léꞌ?
\p
\v 49 Per mbiꞌ coꞌ mxoꞌf zinꞌ zinꞌ loo gobiern ndxab loo Jesús:
\p ―Lìca, Tad, inacte nuꞌ mèn coꞌ ndxelaꞌs arid. Per jer yaꞌ Uꞌ, nda naꞌ lizen ndooreꞌ gath mbyòo daa, yey.
\p
\v 50 Sya, ndxab Jesús loo mbiꞌ:
\p ―Byàa par lizl. Mbyòo lùu mbyacleꞌ. No nabanqueꞌ mbyòo.
\p Mbiꞌa ngolaꞌs diꞌs coꞌ ndxab Jesús loo mbiꞌ. Mxen mbiꞌ ned, ndyàa mbiꞌ par liz mbiꞌ.
\v 51 Coꞌseꞌ yamerleꞌ zin mbiꞌ liz mbiꞌ, mtelꞌ mèn guliz mbiꞌ moz par ngua càa ned moz mbiꞌ. Sya, ndxab moz loo mbiꞌ:
\p ―Neꞌtyóode Uꞌ. Mbyòo Uꞌ mbyacleꞌ. No nabanqueꞌ mbyòo.
\p
\v 52 Sya, mnibdiꞌs mbiꞌ loo moz. Ndxab mbiꞌ:
\p ―¿Coyor mtlo mbyath ndac mbyòo, àꞌ?
\p Moz ndxab loo mbiꞌ:
\p ―Náꞌa com hor mquée guthìb bzyè ngro xléꞌ mbyòo.
\p
\v 53 Lueg mdaꞌ xud mbyòo cuent leꞌ hora ngòc leque hor coꞌseꞌ ndxab Jesús loo mbiꞌ:
\p ―Mbyòo lùu mbyacleꞌ. No nabanqueꞌ mbyòo lùu.
\p Syase ngolaꞌs mbiꞌ loo Jesús no loo conꞌ ndli Jesús con rye mèn guliz mbiꞌ.
\p
\v 54 Con yalguzyeꞌ coꞌ mbli Jesús loo mbyòo xganꞌ mbiꞌa, ngòc mbryop yalguzyeꞌ coꞌ mbli Jesús loo ngroꞌ Jesús leꞌn yèezyaꞌ cheꞌn làaz mèn jude coꞌseꞌ mbere Jesús, ngòo Jesús leꞌn yèezyaꞌ cheꞌn làaz mèn galile.
\c 5
\s Jesús mteyac thìb mbiꞌ cheꞌn yèez Betesda, mbiꞌ coꞌ mque no thìb yíiz coꞌ nac yíiz bech.
\p
\v 1 Ngolo nguriꞌth conꞌa, mzin huiz lni coꞌ nac huiz lni cheꞌn mèn nación Israel. Làth xtauꞌa, Jesús mbere ngua par ned leꞌn ciuda Jerusalén.
\v 2 Leꞌn ciuda Jerusalén, ndoo thìb puert coꞌ ngroꞌ lèe Puert cheꞌn Mbacxilꞌ. Ngoꞌth thìb tanc nít tya. No tanca ngroꞌ lèe diꞌstèe hebre Betesda. Ro tanca nziriꞌ thìb corredor coꞌ mque no gaꞌy portal coꞌ ngòc gaꞌy arc.
\v 3 Ro portal cheꞌn corredora ngureriꞌ huax mèn yíiz, mèn sieu, mèn renc, no mèn coꞌ mque no yíiz bech. Mèna nzi bed par huin nít.
\v 4 Tac thìb angl ndryoꞌ leꞌn béꞌ no ndlyàa angl loo béꞌ cad pól no ncuin angl nít. No mèn yíiz coꞌ nerlequeꞌ ndlyàa leꞌn níta láth ngüin nít, ndxac mèna loo chol yíiz coꞌ mque no mèna.
\v 5 Ngo thìb mbiꞌ làth rye mèn yíiza tya. Mbiꞌa ndxàcleꞌ gal psiꞌ pxon línꞌ ndyac len.
\v 6 Coꞌseꞌ gunèe Jesús nax mbiꞌa no non Jesús ndxàcleꞌ línꞌ ndyac len mbiꞌa, ndxab Jesús loo mbiꞌ:
\p ―¿Chéꞌ ndlyaꞌsl yacl, càꞌ, ey?
\p
\v 7 Mbiꞌ mcàb loo Jesús. Ndxab mbiꞌ:
\p ―Aa, Tad, per yende chó mèn lyath no daa par làa mèn daa leꞌn tanc coꞌseꞌ ngüin nít. Tac coꞌseꞌ ndlyazen làan leꞌn tanc, no ndooreꞌ zin daa ro tanc, tedib mèn ngulàaleꞌ leꞌn tanc. Cona, ngue niin loo Uꞌ: Neꞌlide thidten gan par làan leꞌn tanc, Tad.
\p
\v 8 Jesús ndxab loo mbiꞌ:
\p ―Goo che. No fthùuz dáal coꞌ ndxàaꞌl. No fxen ned. Byàa par lizl.
\p
\v 9 Leque hora, chàa, mbyac mbiꞌ. Mthùuz mbiꞌ dáa mbiꞌ. Mxen mbiꞌ ned. Ndyàa mbiꞌ par liz mbiꞌ. No leꞌxqueꞌ huiz coꞌ mbyac mbiꞌa ngòc huiz sabd coꞌ ngòc huiz descans tiempa.
\v 10 Sya, ndxab mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo mbiꞌ coꞌ mbyaca:
\p ―Mbiꞌ, nalze nac huiz sabd coꞌ nac huiz descans. Indxàalte hueꞌl dáa baꞌ.
\p
\v 11 Per mbiꞌ coꞌ mbyaca mcàb loo mèna. Ndxab mbiꞌ:
\p ―Xaꞌ coꞌ mteyac daa, yub xaꞌ gunee loon: Fthùuz dáa. No byeꞌ dáa. Byàa par lizl.
\p
\v 12 Sya, mnibdiꞌs mèna loo mbiꞌ. Ndxab mèna:
\p ―¿Chó mbiꞌ nac mbiꞌ coꞌ gunee lool: Fthùuz dáal no byeꞌ dáa no byàa, àꞌ?
\p
\v 13 Per mbiꞌ coꞌ mbyaca neꞌndaꞌde cuent no inonte mbiꞌ chó nac mbiꞌ coꞌ mteyac mbiꞌa tac anzeꞌf thìb mèn ngureriꞌ tya. Nde nxonꞌ, mbiileꞌ Jesús làth mèna, ne.
\v 14 Ngoloa, mzyálꞌ Jesús mbiꞌ leꞌn templ. Ndxab Jesús loo mbiꞌ:
\p ―Huiꞌ nexa. Lùu mbyacleꞌ nalleꞌ. Chó Diox chó neel. Ya neꞌtolode cuaꞌnl xquinl. Tac yiloa más nazab gàca lool.
\p
\v 15 Sya, mxen mbiꞌ ned. Ndyàa mbiꞌ. Ngua taꞌ mbiꞌ cuent loo mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel leꞌ Jesús nac xaꞌ coꞌ mteyac mbiꞌ.
\v 16 Ante por mbli Jesús conꞌa huiz sabd coꞌ ngòc huiz descans tiempa, mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel mtlo mdub nguꞌs Jesús. Anzeꞌf mblyaꞌs mèna guth mèna Jesús.
\v 17 Per com leꞌ Jesús nonqueꞌ xal nac xtùuz mèna, ¿léꞌ?, coꞌseꞌ ngòc nayiꞌ mèna loo Jesús, sya, mcàb Jesús loo mèna. Ndxab Jesús:
\p ―Axta nareꞌ ngue li xuden Diox thìb zinꞌ. Daa, ne, ngue li zinꞌ.
\p
\v 18 Leꞌ sya, por cona sate más mbli mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel fuerz par guthxùꞌ mèna Jesús. Tac iante de indlide Jesús cas huiz sabd xal nac costumbr coꞌ mque no mèn nación Israel huiz sabd coꞌ ngòc huiz descans tiempa, mblyaꞌs mèna guth mèna Jesús. Ndxeꞌlequeꞌ, por mbez Jesús leꞌ xudpeꞌ Jesús nac Diox no por lalqueꞌ ndxàc Jesús con Diox, cona, mblyaꞌs mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel guth mèna Jesús.
\s Jesús coꞌ nac xganꞌ Diox ngue luꞌ leꞌ Jesús ndxàp conꞌ laꞌs nii Jesús no laꞌs yaꞌ Jesús par ñibeꞌpeꞌ Jesús loo mèn loo izlyoꞌ ndxèꞌ.
\p
\v 19 Leꞌ sya, ndxab Jesús loo mèna:
\p ―Lìcpeꞌ baꞌi, na nii loo guꞌ: Leꞌ daa, coꞌ nac xganꞌ Diox, neꞌgácte lin nec thìb conꞌ ante xal nee lezon. Ndxeꞌlequeꞌ, daa coꞌ nac xganꞌ Diox, ndlin conꞌ coꞌ ñèen ndli xuden Diox. Tac ryete conꞌ coꞌ ndli xuden Diox, daa coꞌ nac xganꞌpeꞌ Diox ndlii, ne.
\v 20 Tac Diox coꞌ nac xuden nqueꞌ lezoꞌ xganꞌpeꞌ Diox coꞌ nac daa. No ndluꞌ Diox ryete conꞌ coꞌ ndli Diox loon, daa coꞌ nac xganꞌ Diox. Rsinꞌ Diox coꞌ nac más conꞌ roo conꞌ xèn leque conꞌ ndxèꞌ, Diox luꞌreꞌi loon, daa coꞌ nac xganꞌpeꞌ Diox. No por cón cheꞌn conꞌ coꞌ huiꞌ guꞌ coꞌ li xuden Diox yiloa, conꞌa li par ante huiꞌ guꞌ no ante ñaa guꞌ loon yiloa, ne.
\v 21 Tac texal ngo xban Diox xuden mèn coꞌ nguthleꞌ, no ndaꞌ xuden Diox yalnaban loo mèn coꞌ nguthleꞌa, lomisqueꞌ, daa coꞌ nac xganꞌ Diox ta yalnaban coꞌ nac yalnaban thidtene loo mèn coꞌ ndlyazen que no mèna yalnaban thidtene.
\v 22 Xuden Diox indub rezte cón cheꞌn nec thìb mèn. Ndxeꞌlequeꞌ, mdaꞌ xuden Diox ryete conꞌ roo no ryete conꞌ xèn coꞌ nzo laꞌs nii xuden Diox no coꞌ nzo laꞌs yaꞌ xuden Diox loon, daa coꞌ nac xganꞌ xuden Diox par tub rezen cón cheꞌn ryete mèn loo izlyoꞌ,
\v 23 par tataa mod gàca leꞌ ryete mèn li conꞌ guryath no conꞌ guryèn loon, daa coꞌ nac xganꞌ Diox, xalqueꞌ ndli mèn conꞌ guryath no conꞌ guryèn loo xuden Diox. Tac mèn coꞌ indlide conꞌ guryath no conꞌ guryèn loon, mèna indlide conꞌ guryath no conꞌ guryèn loo Diox xuden coꞌ mtelꞌ daa loo izlyoꞌ ndxèꞌ.
\p
\v 24 Lìcpeꞌ baꞌi, na ngue nii loo guꞌ: Leꞌ mèn coꞌ ndyub nza no mèn coꞌ ndxàaꞌd diꞌs coꞌ ngue bezen loo mèn no mèn coꞌ ndxelaꞌs loo xuden Diox coꞌ mtelꞌ daa, mèna yòo ban noqueꞌ Diox thidtene yiloa. Loo mèna neꞌzib quìide Diox xtol mèn no xquin mèn loo mèna. Ndxeꞌlequeꞌ, ngòc mèna mèn coꞌ neꞌcoꞌ xàꞌde Diox loo Diox ngolo nguth mèna. No thìb lìte yòo ban noqueꞌ mèna Diox thidtene yiloa.
\v 25 Lìcpeꞌ baꞌi, na ngue nii loo guꞌ: Nde zinꞌ gaxleꞌ huiz no nde zinꞌ gaxleꞌ tiemp no nalleꞌqueꞌ ndxàca coꞌseꞌ mèn coꞌ beꞌ naban coꞌ nac xal mèn nguth loo cón cheꞌn Tad Diox, gòn mèna ron, daa coꞌ nac xganꞌ Diox. No mèn coꞌ ndxòn diꞌs no coꞌ ndxàaꞌd diꞌs coꞌ mbezen, yòo ban noqueꞌ mèna Diox thidtene.
\v 26 Tac yub xuden Diox ndxàp conꞌ laꞌs nii xuden Diox no laꞌs yaꞌ xuden Diox par li xuden Diox par yòo ban no mèn xuden Diox thidtene. No lomisqueꞌ, niin: Mdaꞌleꞌ xuden Diox ryethe conꞌ roo no conꞌ xèn coꞌ nzo laꞌs nii xuden Diox no coꞌ nzo laꞌs yaꞌ xuden Diox loon par lin yòo ban no mèn xuden Diox thidtene.
\v 27 No mdaꞌleꞌ xuden Diox ryethe conꞌ roo conꞌ xèn coꞌ nzo laꞌs nii xuden Diox no coꞌ nzo laꞌs yaꞌ xuden Diox loon par tub rezen cón cheꞌn mèn loo izlyoꞌ tac daa mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ.
\v 28 Neꞌhuiꞌde guꞌ no neꞌñaade guꞌ loo conꞌ ndxèꞌ. Tac zin thìb huiz no zin thìb ze coꞌseꞌ ryete mèn nguth coꞌ mbuaꞌsleꞌ gòn diꞌs coꞌ tyoodizen coꞌseꞌ gàc huiza, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ.
\v 29 Lomisqueꞌ niin, ne: Huiza, ryo xban mèn nguth leꞌn báꞌ mèn nguth. Mèn coꞌ mbli conꞌ ndac, mèna ryo xban par yòo ban no mèn Diox thidtene. Per ndxeꞌlequeꞌ, mèn coꞌ mbli conꞌ yeꞌrsinꞌ, mèna ryo xban par zib quìi Diox mèna par coꞌ xàꞌ Diox mèna loo Diox thidtene yiloa.
\s Jesús ngue luꞌ loo mèn thìb mod no tedib mod cón cheꞌn conꞌ roo conꞌ xèn coꞌ nzo laꞌs nii Jesús no coꞌ nzo laꞌs yaꞌ Jesús.
\p
\v 30 Toloqueꞌ ndxab Jesús loo mèn:
\p ―Yende mod lin nec thìb conꞌ xal nee lezon no xal ndlyazen. Ndxeꞌlequeꞌ, daa ndub rez cón cheꞌn mèn xalqueꞌ ñibeꞌ xuden Diox loon. No nalì no nambìi nac mod coꞌ ndub rezen cón cheꞌn mèn. Indoode lezon lin coꞌ neete lezon. Ndxeꞌlequeꞌ, ndlin ante xal ndlyaꞌs xuden Diox no xal nee lezoꞌ xuden Diox coꞌ mtelꞌ daa par lina.
\v 31 Tac cheleꞌ daa ngue ta cuent ante cón cheꞌnpeꞌen, leꞌ sya, nzoqueꞌ mod gab mèn leꞌ cuent coꞌ ngue tan cuent cón cheꞌnpeꞌen, inacte conꞌ lìcpeꞌ.
\v 32 Per daa ngue nii loo guꞌ: Nzoqueꞌ thìb xaꞌ coꞌ ndaꞌ cuent cón cheꞌnpeꞌ daa. No daa nanee leꞌ cuent coꞌ ndaꞌ xaꞌ cón cheꞌnpeꞌena, leꞌi lìcpeꞌ nac.
\v 33 Guꞌ mtelꞌ mèn coꞌ ngua loo Juàn Bautist par ñibdiꞌs mèn cón chenen loo Juàn. No cuent coꞌ mdaꞌ Juàn loo guꞌ cón chenen ngòc lìcqueꞌ.
\v 34 Per part cón chenen, indxòode lezon no yende chó mport nzo lezon coꞌseꞌ ndxònen ndaꞌ mèn cuent cón chenen. Ndxeꞌlequeꞌ, niin diꞌs ndxèꞌ loo guꞌ par lyáꞌ guꞌ loo conꞌ ryes.
\v 35 Juàn ngòc xal thìb manoj yeꞌrbèel coꞌ mbyol no coꞌ mtenìi loo mèn, coꞌ nee diꞌs, par mdaꞌ guꞌ cuent coꞌ nac cón cheꞌn Diox. Per part cón cheꞌn guꞌ, guꞌ mbli xal mèn coꞌ ngòo lezoꞌ no coꞌ mdyac lezoꞌ ndxep tiemp loo cón cheꞌn diꞌs coꞌ mdaꞌ Juàn cuent loo guꞌ, Juàn coꞌ mbli par mdyub xnìi yéc mèn no coꞌ mbli par mdyub xnìi lezoꞌ mèn loo cón cheꞌn Diox.
\v 36 Per part cón chenen, nzoqueꞌ thìb xaꞌ coꞌ más nalì no más nambìi ndaꞌ cuent cón chenen leque diꞌs coꞌ mdyoodiꞌs Juàn cón chenen. Tac conꞌ coꞌ ndlin nac lomisqueꞌ conꞌ coꞌ gunee xuden Diox loon par lin. No conꞌ coꞌ ndlina, leꞌi ndluꞌ leꞌ xuden Diox, lìcqueꞌ, mtelꞌ daa.
\v 37 Xuden Diox coꞌ mtelꞌ daa, leque yub xuden Diox ndluꞌ no ndaꞌ xuden Diox cuent cón chenen. Per part cón cheꞌn guꞌ, axta nalleꞌ tarte gòn guꞌ xal ndyoodiꞌs xuden. Neꞌ neꞌ tar ñee guꞌ xal ñaa xuden Diox no xal nacpeꞌ xuden Diox.
\v 38 Neꞌ neꞌ tar yaaꞌd diꞌs coꞌ mbez xuden Diox loo guꞌ leꞌn lezoꞌ guꞌ no leꞌn xtùuz guꞌ thidtene. Tac tarte yilaꞌs guꞌ loon, daa coꞌ yub xuden Diox mtelꞌ loo izlyoꞌ ndxèꞌ.
\v 39 Guꞌ nteche ntexyath yeꞌs coꞌ nac cheꞌn libr coꞌ nac xtiꞌs Diox. Noo noo ndlab guꞌ libr. Tac guꞌ ndenꞌ no ndyac guꞌ leꞌ loo libra ndluꞌ leꞌ guꞌ nzi quee lezoꞌ yòo ban no guꞌ Diox thidtene. Per mastaleꞌ ndlab guꞌ libr coꞌ nac xtiꞌs Diox, neꞌ neꞌ indaꞌ guꞌ cuent leꞌ cón chenen nac coꞌ ndaꞌ libr cuent no coꞌ ndluꞌ libr loo guꞌ.
\v 40 No ale indlyaꞌste guꞌ taꞌ guꞌ lugar par thidte queltàa no guꞌ daa no yòo guꞌ loo cón chenen par yòo ban no guꞌ Diox thidtene yiloa.
\p
\v 41 Yende chó mport nzo lezon no neꞌ neꞌ indlin cas mèn coꞌ asendli ndxàc daa mèn guryath no mèn guryèn loo mèna.
\v 42 Más de cona, huen huen ndan cuent cón cheꞌn guꞌ. No ndlibeꞌquen guꞌ leꞌ guꞌ inqueꞌde lezoꞌ Diox.
\v 43 Daa ndal por cón cheꞌn xuden Diox. No indlide guꞌ cas daa. Per cheleꞌ tedib mèn yiꞌth por part cón cheꞌn leque mèna, mèna se liqueꞌ guꞌ cas, ¿léꞌ?
\v 44 ¿Xá mod gác guꞌ yilaꞌs guꞌ loon no loo Diox cheleꞌ guꞌ más ndli cas loo conꞌ coꞌ nac conꞌ guryath no conꞌ guryèn cón cheꞌn xtàa guꞌ no indxòode lezoꞌ guꞌ li guꞌ conꞌ guryath no conꞌ guryèn loo xaꞌ coꞌ nde no coꞌ ngroꞌ loo thidte Diox, sya? ¡Pà gác guꞌ li guꞌi!
\v 45 Neꞌtyóode guꞌ no neꞌyilaꞌste guꞌ par gab guꞌ leꞌn lezoꞌ guꞌ leꞌ daa queyèe guꞌ loo xuden Diox yéꞌ huizeꞌ. Xaꞌ coꞌ nqueyèe guꞌa nac yub Moisés, mastaleꞌ nzi quee lezoꞌ guꞌ gàc conꞌ ndac loo guꞌ por mdoo nque guꞌ loo ley coꞌ nac diꞌs coꞌ mxoꞌf Moisés loo guꞌ.
\v 46 Tac cheleꞌ guꞌ, lìcqueꞌ, ngalaꞌs loo diꞌs coꞌ mbez Moisés, ngalaꞌs guꞌ loon, ne. Tac yeꞌs coꞌ mqueꞌ Moisés coꞌ mtanꞌ Moisés diꞌs loo guꞌ, diꞌsa ndaꞌ cuent cón chenen no ndluꞌ diꞌs cón chenen, ne.
\v 47 Cheleꞌ guꞌ neꞌngalaꞌste loo diꞌs coꞌ mqueꞌ Moisés yeꞌs coꞌ mtanꞌ Moisés loo guꞌ, ¿xá mod yilaꞌs guꞌ loo diꞌs coꞌ ndyoodizen loo guꞌ, sya? Yende mod yilaꞌs guꞌ diꞌs, ¿léꞌ?
\c 6
\s Jesús mbli par nduhua gaꞌy mil mènbiꞌ.
\r (Mt. 14.13–21; Mr. 6.30–44; Lc. 9.10–17)
\p
\v 1 Ngolo nguriꞌth ryete conꞌa, mxen Jesús ned. Nda Jesús tedib lad ro lagun coꞌ nziriꞌ loo xyòn mèn yèezyaꞌ cheꞌn làaz mèn galile coꞌ nac leque lagun coꞌ neꞌ tedib lèe lagun cheꞌn mèn ciuda Tiberias.
\v 2 No anzeꞌf thìb mèn nda nque xís Jesús tac gunèe mèna yalguzyeꞌ coꞌ mbli Jesús coꞌseꞌ mteyac Jesús huax mèn yíiz.
\v 3 Sya, mquée Jesús loo thìb yii. Ngua tub Jesús tya con myenꞌ xinꞌ mtéꞌth Jesús.
\v 4 Nde nxonꞌ, leque leꞌn huiza nde zinꞌ gaxleꞌ huiz lni cheꞌn pasc coꞌ ndli mèn nación Israel.
\v 5 Coꞌseꞌ gunèe Jesús nde nque huax mènléyꞌ xís Jesús, Jesús ndxab loo Lip:
\p ―¿Pá ya tiꞌ guꞌ pan par hua rye mèn baꞌ, Lip?
\p
\v 6 Per Jesús asembli tataa ndxab Jesús loo Lip par ñee Jesús ñeeneꞌ cón càb Lip loo Jesús. Tac yub Jesús naneequeꞌ xá mod li Jesús par hua rye mèna.
\v 7 Sya, mcàb Lip loo Jesús. Ndxab Lip:
\p ―Tad, cheleꞌ naꞌ tiꞌ thìb mil chop ayo pes pan par hua rye mèn baꞌ, pà gàala par hua rye mèn baꞌ sa sai.
\p
\v 8 Leꞌ sya, ndxab thìb myenꞌ xinꞌ mtéꞌth Jesús coꞌ lèe Ndech, coꞌ ndxàc hues Mon Pedr, loo Jesús:
\p
\v 9 ―Tad, làth naꞌ ndxèꞌ nzo thìb mbyòo coꞌ ngue no gaꞌy pan nagus no chop mbèel bix. Per pà gàal pana no mbèela par hua ryethe mèn baꞌ thìb leꞌi thìb leꞌi.
\p
\v 10 Sya, ndxab Jesús loo myenꞌ xinꞌ mtéꞌth Jesús:
\p ―Guuz guꞌ loo rye mèn baꞌ tyub mèn loo yixii coꞌ nzoꞌf baꞌ.
\p Tataa ndxab Jesús tac anzeꞌf thìb yixii mxyoꞌf tya. Sya, mdub mèna. Mèn coꞌ nduhua, casqueꞌ ngòc gaꞌy mil mèn, ante mènbiꞌ. Xàꞌ mèngot. No xàꞌ myenꞌ bix. Indxòode cuent mèngot no myenꞌ bix coꞌ nduhua, ne.
\v 11 Sya, mxen Jesús gaꞌy pana. No ndxab Jesús:
\p ―Diox quix Uꞌ, Diox, loo Diox. Ngolo ndxab Jesús: Diox quix Uꞌ, Diox, loo Diox, mbli Jesús par mbyarꞌ pana. Ngoloa, mdaꞌ Jesús pana loo myenꞌ xinꞌ mtéꞌth Jesús. Leꞌ myenꞌ na, mbliꞌth pana loo mèn coꞌ nzi nduba. Lomisqueꞌ mbli Jesús con mbèela. No nduhua mèna pana no mbèela axta plóthe mblyaꞌs mèna.
\p
\v 12 Coꞌseꞌ ngolo nduhua mèna axta plóthe mblyaꞌs mèna pan no mbèel coꞌ mteyarꞌ Jesús, Jesús ndxab loo myenꞌ xinꞌ mtéꞌth Jesús:
\p ―Fthop guꞌ rye leꞌ pan coꞌ mbyanꞌ xoꞌf baꞌ par neꞌyizaꞌde nec thìb leꞌi.
\p
\v 13 Sya, mthop myenꞌ siꞌ fchop cardor leꞌ pan coꞌ mbyanꞌ xoꞌf loo gaꞌy pan coꞌ nduhua mèna.
\p
\v 14 Per coꞌseꞌ gunèe mèna yalguzyeꞌ coꞌ mbli Jesús, syareꞌ, ndxab mèna loo xtàa mèna:
\p ―Lìcpeꞌ baꞌi, mbiꞌ baꞌ nac mbiꞌ coꞌ ndeꞌth diꞌs coꞌ ndxab Diox coꞌ ndxath yiꞌth loo izlyoꞌ, cara.
\p
\v 15 Per com leꞌ Jesús nonqueꞌ no ndaꞌqueꞌ Jesús cuent leꞌ mèna mbli nèeleꞌ lezoꞌ mbiꞌth mèna par hueꞌ yèe mèna Jesús par sanggàc Jesús reypeꞌ mèna, sya, ngroꞌ thidte Jesús thìb lad loo mèna. Mbere Jesús, nda Jesús loo yiia tedib vez.
\s Trèꞌ ndluꞌ leꞌ Jesús mdee nii loo nít loo lagun.
\r (Mt. 14.22–27; Mr. 6.45–52)
\p
\v 16 Coꞌseꞌ mzyèleꞌ izlyoꞌ huiza, mxen myenꞌ xinꞌ mtéꞌth Jesús ned. Ngulàa tùub myenꞌ. Nda myenꞌ anzo anzo ro lagun.
\v 17 Sya, ngòo myenꞌ loo thìb yòoyaa par tlo tetee myenꞌ yòoyaa loo lagun par zin myenꞌ tedib lad ro lagun coꞌteꞌ nziriꞌ yèez Capernaum. Hora, nde làaleꞌ yálꞌ izlyoꞌ. Leꞌ Jesús na, yende pá ñaa bere par thidte ya no Jesús myenꞌ.
\v 18 Per leꞌpeꞌ tlo tetee myenꞌ yòoyaa loo lagun, mtlo ngroꞌ thìb mbiidóꞌ. No mxít too mbii nít loo lagun.
\v 19 Coꞌseꞌ nde teeleꞌ ndyee myenꞌ loo lagun thìb distans coꞌ neꞌ gaꞌy mil metr, gunèe myenꞌ nde tee nii Jesús loo nít loo lagun. Per neꞌñeede myenꞌ chéꞌ Jesús na. Coꞌseꞌ gunèe myenꞌ nde zin gax Jesús loo myenꞌ, ale mzyeb myenꞌ.
\v 20 Jesús ndxab loo myenꞌ:
\p ―Neꞌzyebte guꞌ, ey. Daa na.
\p
\v 21 Leꞌ sya, mdyac lezoꞌ myenꞌ ngo no myenꞌ Jesús loo yòoyaa. No ale setilte mzin myenꞌ con Jesús yèez Capernaum coꞌteꞌ nda myenꞌ.
\s Rye mèn par neda nda cuaꞌn Jesús.
\p
\v 22 Per tedib huiz coꞌ nde nquea, rye mèn coꞌ beꞌ mbyanꞌ tedib lad ro leque laguna, mèna gunèe leꞌ myenꞌ xinꞌ mtéꞌth Jesús ngòo loo thidte yòoyaa coꞌ ndub tya. No yende pá gunèe mèna ngòo no Jesús myenꞌ loo yòoyaa.
\v 23 Per láth nzi li mèna xtùuz no mbez mèna loo xtàa mèna: ¿Pá ned nda Jesús, yey?, sya, mzin ndxep yòoyaa coꞌ ndyeꞌth par ned yèez Tiber, yèez coꞌ nziriꞌ gaxte coꞌteꞌ nduhua mèn pan coꞌseꞌ ngolo ndxab Tad Jesús: Diox quix Uꞌ, Diox, loo Diox.
\v 24 Coꞌseꞌ gunèe mèna yende pá ndyeꞌth Jesús làtha, neꞌ myenꞌ xinꞌ mtéꞌth Jesús, ngòo mèna loo leque yòoyaa coꞌ mzin tya par nda cuaꞌn mèna Jesús par ned leꞌn yèez Capernaum.
\s Trèꞌ ndluꞌ leꞌ Jesús mbez li Jesús par yòo ban no mèn Diox thidtene yiloa xal coꞌseꞌ ndxuhua mèn luaꞌ mèn par nzi ban mèn.
\p
\v 25 Coꞌseꞌ mzin mèna coꞌteꞌ nzo Jesús tedib lad ro lagun, ndxab mèna loo Jesús:
\p ―Maistr, ¿pól mzin Uꞌ par nedrèꞌ, yey?
\p
\v 26 Mcàb Jesús loo mèna. Ndxab Jesús:
\p ―Lìcpeꞌ baꞌi, na ngue nii loo guꞌ: Leꞌ guꞌ mcuaꞌn daa por nduhua guꞌ pan axta plóthe mblyaꞌs guꞌ. Per incuaꞌnte guꞌ daa por ndxòn guꞌ, no por mdenꞌ guꞌ, no por mdaꞌ guꞌ cuent cón cheꞌn yalguzyeꞌ coꞌ gunèe guꞌ mblin.
\v 27 Neꞌgath lyuxte guꞌ por xít guꞌ no luaꞌ guꞌ coꞌ nde che loo guꞌ thìb thìb huiz. Ndxeꞌlequeꞌ, guth blux guꞌ loo xít guꞌ no luaꞌ guꞌ coꞌ neꞌlyuxte no coꞌ neꞌryede loo guꞌ, coꞌ nee diꞌs, conꞌ coꞌ ndlin par yòo ban no guꞌ Diox thidtene. Tac daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ, daa ndli par yòo ban no mèn Diox thidtene xal nac xít mèn no luaꞌ mèn coꞌ ngàal mèn coꞌseꞌ ndxuhua mèn xít mèn no luaꞌ mèn. Tac Diox coꞌ nac xuden mbluꞌ loon no mnibeꞌ Diox loon par lin ryethe conꞌ coꞌ ngue lin loo izlyoꞌ ndxèꞌ no par xoꞌf zinꞌen ryethe conꞌ coꞌ mnibeꞌ xuden Diox loon par lina.
\p
\v 28 Sya, ndxab mèna loo Jesús:
\p ―¿Cón li nuꞌ par tolo li nuꞌ ryethe conꞌ coꞌ ñibeꞌ Diox no coꞌ nee lezoꞌ Diox, sya?
\p
\v 29 Jesús mcàb loo mèna. Ndxab Jesús:
\p ―Conꞌ coꞌ ndlyaꞌs Diox li guꞌ nac ante yilaꞌs guꞌ no gàp guꞌ yalxlaꞌs loo xaꞌ coꞌ mtelꞌ Diox loo guꞌ, coꞌ nac yub daa.
\p
\v 30 Leꞌ sya, ndxab mèna loo Jesús:
\p ―Neeca. Ndxònqueꞌ nuꞌ diꞌs coꞌ mbezl baꞌ. Per nuꞌ ndlyaꞌs ñèe chó yalguzyeꞌ lil loo nuꞌ par ñèe nuꞌ lil yalguzyeꞌ no yilaꞌs nuꞌ lool. ¿Chó conꞌ lil loo nuꞌ coꞌ gàc xal thìb señ par ñèe nuꞌi, àꞌ?
\v 31 Xudgool nuꞌ coꞌ ngo ban póla nduhua thìb loo pan coꞌ ngroꞌ lèe maná coꞌteꞌ nagán, xalqueꞌ nac diꞌs coꞌ ndub loo libr coꞌ nac xtiꞌs Diox coꞌ mbez leꞌ Diox mblàa thìb loo pan loo béꞌ par nduhua mèn tiempa. ¿Chó señ lil par ñèe nuꞌ lila, àꞌ?
\p
\v 32 Mcàb Jesús loo mèna. Ndxab Jesús:
\p ―Lìcpeꞌ baꞌi, na ngue nii loo guꞌ: Neꞌngàcte Moisés xaꞌ coꞌ mdaꞌ pan cheꞌn béꞌ par nduhua mèn coꞌ ngòc xudgool guꞌ. Ndxeꞌlequeꞌ, xuden Diox nac xaꞌ coꞌ ndaꞌ pan coꞌ nac lìcpeꞌ pan cheꞌn béꞌ par hua guꞌ nalleꞌ, coꞌ nee diꞌs, nac yub daa.
\v 33 Tac pan coꞌ ndaꞌ Diox par hua mèn nalleꞌ, pana nac xaꞌ coꞌ ngulàaleꞌ loo béꞌ, coꞌ nee diꞌs, nac daa. No daa li leꞌ mèn coꞌ tyal yòo loo cón chenen, mèna yòo ban noqueꞌ Diox thidtene.
\p
\v 34 Sya, ndxab mèn loo Jesús:
\p ―Tad, ftaꞌ Uꞌ pana par hua nuꞌ, tá.
\p
\v 35 Jesús ndxab loo mèna:
\p ―Daa nac xaꞌ coꞌ ndli par yòo ban no mèn Diox thidtene xal ndli xít mèn no luaꞌ mèn par ban mèn loo izlyoꞌ. Mèn coꞌ tyal yòo loo cón chenen no yilaꞌs mèn loon, mèna gàc xal mèn coꞌ neꞌgath huinte no coꞌ neꞌlyanꞌte thidtene. No mèn coꞌ tyal yòo loo cón chenen no coꞌ yilaꞌs loon, mèna gàc xal mèn coꞌ neꞌyecte lezoꞌ thidtene.
\v 36 Per daa guniileꞌ loo guꞌ: Mastaleꞌ gunèeleꞌ guꞌ daa, indxelaꞌste guꞌ loon no indxelaꞌste guꞌ loo conꞌ ndlin.
\v 37 Per ryete mèn coꞌ ndli Diox xuden tyal par yòo mèna loo cón chenen par yilaꞌs mèna loon, neꞌtèbten mèna no neꞌcoꞌ tooden mèna par biiche mèna thìb lad loon thidtene.
\v 38 Tac daa neꞌngroꞌde loo béꞌ par ngal lin conꞌ coꞌ neete lezon. Ndxeꞌlequeꞌ, ngroꞌen loo béꞌ par ndlin conꞌ coꞌ nee lezoꞌ xuden Diox coꞌ mtelꞌ daa.
\v 39 No conꞌ coꞌ nee lezoꞌ xuden Diox coꞌ mtelꞌ daa par lina nac leꞌ ryete mèn coꞌ mbli Diox mdyal par ngòo mèn loo cón chenen, nec thìb mèna neꞌryoꞌ xàꞌde loo Diox thidtene yiloa. Ndxeꞌlequeꞌ, go xbanen mèna leꞌn huiz coꞌ gàc lult tiemp loo izlyoꞌ ndxèꞌ.
\v 40 Tac conꞌ ndxèꞌ nac coꞌ nee lezoꞌ xuden Diox coꞌ mtelꞌ daa leꞌ ryete mèn coꞌ huen huen tyóo loo cón chenen no yilaꞌs mèn loon, daa coꞌ nac xganꞌ Diox, mèna yòo ban noqueꞌ Diox thidtene. No na go xban mèna leꞌn huiz coꞌ gàc lult tiemp loo izlyoꞌ ndxèꞌ.
\p
\v 41 Coꞌseꞌ mbìn mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel tataa ndxab Jesús, sya, xexte gunii mèna cón cheꞌn Jesús tac ndxab Jesús loo mèna: Daa nac pan coꞌ ngulàaleꞌ loo béꞌ.
\v 42 Tolo mdoodiꞌs mèna. Ndxab mèna:
\p ―¿Chéꞌ inacte Jesús baꞌ xganꞌ Chè, càꞌ? Naꞌ ndlibeꞌqueꞌ xud Jesús no xnaꞌ Jesús. ¿Xá mod ale mbez Jesús leꞌ Jesús ngroꞌleꞌ loo béꞌ no nde Jesús loo izlyoꞌ ndxèꞌ, sya?
\p
\v 43 Sya, mcàb Jesús loo mèna. Ndxab Jesús:
\p ―Cabii ftoodiꞌs guꞌ. Neꞌtyoodiꞌste guꞌ xexte cón chenen.
\v 44 Yende chó mèn gác yòo loo cón chenen cheleꞌ xuden Diox coꞌ mtelꞌ daa neꞌlide par yòo mèn loo cón chenen. No daa go xban mèna leꞌn huiz coꞌ gàc lult tiemp loo izlyoꞌ ndxèꞌ.
\v 45 Loo libr coꞌ mqueꞌ mèn coꞌ mdeꞌth diꞌs coꞌ ndxab Diox yeꞌs coꞌ nac xtiꞌs Diox mbez taandxèꞌ:
\q1 Diox luꞌ loo ryete mèn.
\m Por cona, ryete mèn coꞌ gòn no coꞌ téꞌth cón cheꞌn xuden Diox, mèna yòo loo cón chenen.
\p
\v 46 Tarte yo nec thìb mèn loo izlyoꞌ coꞌ gunèeleꞌ xá ñaa xuden Diox. Angoluxte daa coꞌ ngroꞌ loo Diox, daa gunèeleꞌ xá ñaa xuden Diox.
\v 47 Lìcpeꞌ baꞌi, na ngue nii loo guꞌ: Mèn coꞌ ndxelaꞌs loon no ndxelaꞌs mèn loo cón chenen, mèna yòo ban noqueꞌ xuden Diox thidtene.
\v 48 Daa nac xaꞌ coꞌ ndli par yòo ban noqueꞌ mèn Diox thidtene xal ndli xít mèn no luaꞌ mèn coꞌ ndxuhua mèn par tolo cue ban mèn loo izlyoꞌ ndxèꞌ.
\p
\v 49 Jesús tolo ndxab loo mèna:
\p ―Nde niin thìb conꞌ loo guꞌ, ne, ey: Mèn coꞌ ngòc xudgool guꞌ nduhua thìb loo pan coꞌ ngroꞌ lèe maná coꞌteꞌ nagán. Per mastaleꞌ nduhua mèna pana, nguthqueꞌ mèna.
\v 50 Per daa ngue ta cuent loo guꞌ coꞌ nac cón chenen, daa coꞌ nac xal nac pan coꞌ ngulàa loo béꞌ par gàca leꞌ mèn coꞌ yòo loo cón chenen, xal coꞌseꞌ ndxuhua mèn pan, mèna neꞌcoꞌ xàꞌde Diox loo Diox thidtene coꞌseꞌ ngolo nguth mèn.
\v 51 Yub daa nac xaꞌ coꞌ ngroꞌ loo béꞌ coꞌ ndli par yòo ban no mèn Diox thidtene xal pan coꞌ ndxuhua mèn coꞌ ndli par ban mèn loo izlyoꞌ ndxèꞌ. Cheleꞌ chol mèn hua pana, coꞌ nee diꞌs, yòo mèn loo cón chenen, mèna ban noqueꞌ Diox thidtene. No pan coꞌ angtan par hua mèna, pana nac bélꞌyòo ladpeꞌen coꞌ leque daa li gath par gàca leꞌ chol mèn izlyoꞌ coꞌ tyal yòo loo cón chenen, mèna ban noqueꞌ Diox thidtene.
\p
\v 52 Sya, mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel noo noo ndyoodiꞌs cón cheꞌn Jesús làth xtàa mèn. Mbez mèna loo xtàa mèn:
\p ―¿Xá mod li mbiꞌ baꞌ par taꞌ mbiꞌ bélꞌ lad mbiꞌ par hua mèn, cara?
\p
\v 53 Jesús tolo mtetac diꞌs loo mèna. Ndxab Jesús:
\p ―Lìcpeꞌ baꞌi, na nde nii tedib conꞌ loo guꞌ, ne: Cheleꞌ guꞌ neꞌhuade bélꞌyòo laden no neꞌgude guꞌ ren laden, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ, neꞌyòo ban node guꞌ Diox thidtene yiloa.
\v 54 Mèn coꞌ hua bélꞌyòo laden no gu mèn ren laden, mèna yòo ban noqueꞌ Diox thidtene. No daa go xban mèna coꞌseꞌ gàc huiz coꞌ gàc lult tiemp loo izlyoꞌ ndxèꞌ.
\v 55 Tac, lìcpeꞌ baꞌi, por cón cheꞌn bélꞌyòo laden no por cón cheꞌn ren laden li yòo ban no mèn Diox thidtene xal ndxàca loo mèn coꞌseꞌ ndxuhua mèn xít mèn no luaꞌ mèn par ban mèn loo izlyoꞌ ndxèꞌ.
\v 56 Chol mèn coꞌ yòo loo cón chenen, coꞌ nee diꞌs, nac cón cheꞌn bélꞌyòo laden no cón cheꞌnpeꞌ ren laden, mèna thidte ndxàc con daa thidtene. No go noquen mèna thidtene.
\v 57 Tac xuden Diox coꞌ mtelꞌ daa naban thidtene no ndli xuden Diox naban taamas conꞌ coꞌ naban. No naban daa por cón cheꞌn xuden Diox. Lomisqueꞌ mod ne, mèn coꞌ tyal yaaꞌd diꞌs no tenꞌ mèn diꞌs coꞌ ndyoodizen loo mèn, gàca loo mèna xal coꞌseꞌ nguèꞌ xít mèn no luaꞌ mèn mèn, coꞌ nee diꞌs, nac daa, mèna yòo ban noqueꞌ Diox thidtene por cón chenen.
\v 58 Cón cheꞌn pan coꞌ ngulàaleꞌ loo béꞌ coꞌ ngue niin loo guꞌ ndxèꞌ, nac daa. Cón cheꞌn pan ndxèꞌ inacta xal maná coꞌ nduhua xudgool guꞌ póla. Per mastaleꞌ nduhua xudgool guꞌ manaa, nguthqueꞌ xudgool guꞌ. Per mèn coꞌ tyal hua pan coꞌ ngue tan cuent loo guꞌ ndxèꞌ coꞌ nac cón cheꞌn daa, mèna yòo ban noqueꞌ Diox thidtene.
\p
\v 59 Jesús ndxab diꞌs ndxèꞌ loo mèn coꞌseꞌ mbluꞌ Jesús mèn leꞌn sinagog coꞌ ndub leꞌn yèez Capernaum.
\s Jesús ngue taꞌ cuent no ngue luꞌ Jesús mèn xá mod yòo ban no mèn Diox thidtene.
\p
\v 60 Coꞌseꞌ mbìn mèn diꞌs coꞌ ngue luꞌ Jesús loo mèn, huax mèn coꞌ mdoo nque xís Jesús ndxab loo xtàa mèn:
\p ―Anzeꞌf nagàn naca par taꞌ naꞌ cuent cón nee diꞌs no par yaaꞌd diꞌs leꞌn lezoꞌ naꞌ par li naꞌ xal mbez mbiꞌ. ¿Chó mèn gác gòn diꞌs coꞌ mbez mbiꞌ, cara? Yende chó mèn gác, ¿léꞌ?
\p
\v 61 Sya, mdenꞌ lezoꞌ Jesús leꞌ mèna xexte nzi toodiꞌs cón cheꞌn diꞌs coꞌ mbluꞌ Jesús loo mèn. Ndxab Jesús loo mèna:
\p ―¿Chéꞌ nazab ngulàa diꞌs coꞌ ngue niin loo guꞌ ndxèꞌ leꞌn lezoꞌ guꞌ, càꞌ? ¿Chéꞌ ndenꞌ guꞌ ngue niin ngòc nguàal diꞌs loo guꞌ, ne, càꞌ? Yende xàa.
\v 62 Cheleꞌ guꞌ tataa ngue li xtùuz no ndenꞌ guꞌ leꞌn lezoꞌ guꞌ nè nac diꞌs ndxèꞌ, ¿cón li guꞌ no cón gab guꞌ loo lezoꞌ guꞌ coꞌseꞌ ñèe guꞌ gápen loo béꞌ tedib vez coꞌteꞌ ngon ndooreꞌ galen loo izlyoꞌ ndxèꞌ, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ, sya?
\v 63 Mèn yòo ban no Diox thidtene por cón cheꞌn conꞌ coꞌ ndli Xpii Natúꞌ cheꞌn Diox loo xpii mèn. Yende cón ntac bélꞌyòo ladpeꞌ mèn loo cón cheꞌn Diox par yòo ban no mèn Diox thidtene. Cona, diꞌs coꞌ ngue niin loo guꞌ ndxèꞌ, diꞌsa ndluꞌ loo guꞌ xá mod li guꞌ par yòo ban no guꞌ Diox thidtene. Cheleꞌ guꞌ li xal ngue niin loo guꞌ ndxèꞌ, guꞌ yòo ban noqueꞌ Diox thidtene.
\v 64 Per daa nanee no ndan cuent coꞌ huenlequeꞌ tatabeꞌ nzo ndxep guꞌ coꞌ indxelaꞌste diꞌs coꞌ mbezen loo guꞌ.
\p Tataa ndxab Jesús loo mèna tac anon mtlo Jesús, mque tee luꞌ Jesús mèn, Jesús naneeleꞌ chó mèn nac mèn coꞌ neꞌyilaꞌste loo Jesús no loo cón cheꞌn Jesús. No naneeleꞌ Jesús chó mèn nac mèn coꞌ taꞌxùꞌ Jesús loo mèn coꞌ guth Jesús.
\p
\v 65 Sya, ndxab Jesús loo mèna:
\p ―Por cona, guniilen loo guꞌ nec thìb mèn neꞌgácte yòo loo cón chenen cheleꞌ xuden Diox neꞌlide par yòo mèna loo cón chenen.
\p
\v 66 Desde huiza par delant, huax mèn coꞌ mdoo nque xís Jesús mbláꞌ Jesús. Ya neꞌtolode nque tee no mèna Jesús.
\v 67 Sya, mnibdiꞌs Jesús loo rye siꞌ fchop myenꞌ xinꞌ mtéꞌth Jesús:
\p ―¿Chéꞌ no guꞌ ndlyaꞌs láꞌ guꞌ daa no ya neꞌtolode que tee no guꞌ daa, càꞌ?
\p
\v 68 Per Mon Pedr ndooleꞌ mcàb loo Jesús. Ndxab Mon Pedr:
\p ―Tad, cheleꞌ nuꞌ láꞌ Uꞌ, ¿chó loo ya nuꞌ? Thidte Uꞌ ndluꞌ diꞌs coꞌ nac lìcqueꞌ no coꞌ nac diꞌs coꞌ ndluꞌ xá mod li mèn par yòo ban no mèn Diox thidtene.
\v 69 Nuꞌ ndxelaꞌsqueꞌ no nonqueꞌ nuꞌ leꞌ Uꞌ nac Crist coꞌ nac xganꞌpeꞌ Diox, Diox coꞌ naban thidtene.
\p
\v 70 Mcàb Jesús loo Pedr. Ndxab Jesús:
\p ―Aa. Huenqueꞌ nac coꞌ ngue neel baꞌ, Pedr. Yende cón niin lool. Per huiꞌ nexa. Yub daa mcui siꞌ fchop guꞌ. No thìb guꞌ coꞌ nzo làth guꞌ nac xal Mebizya.
\p
\v 71 Jesús ngue taꞌ cuent loo myenꞌ cón cheꞌn Jud Iscariot, xganꞌ thìb mbiꞌ coꞌ ngroꞌ lèe Mon. Tac Jud mdoo lezoꞌ taꞌxùꞌ Jud Jesús loo mèn mastaleꞌ ngòc Jud thìb myenꞌ xinꞌ mtéꞌtth Jesús coꞌ ndxòo cuent nac siꞌ fchop myenꞌ.
\c 7
\s Myenꞌ coꞌ ngòc huespeꞌ Jesús neꞌngalaꞌste loo Jesús.
\p
\v 1 Ngolo mdoodiꞌs Jesús ryete diꞌs coꞌ mdoodiꞌs Jesús, Jesús ngua que tee par ned leꞌn yèezyaꞌ cheꞌn làaz mèn galile tac ya indlyaꞌste Jesús ya que tee Jesús par ned leꞌn yèezyaꞌ cheꞌn làaz mèn jude. Non Jesús leꞌ mèn coꞌ nac mèn gulàaz cheꞌn làaz mèn jude mblyaꞌs nguthxùꞌ Jesús.
\v 2 Leꞌpeꞌ leꞌn huiza nde zin gax lni coꞌ ngòc thìb lni coꞌ ndli mèn nación Israel. Lnia ngroꞌ lèe lni cheꞌn ramad.
\v 3 Sya, ndxab myenꞌ huespeꞌ Jesús loo Jesús:
\p ―Groꞌ trèꞌ. Más huen huàa par ned leꞌn rye yèezyaꞌ cheꞌn làaz mèn jude par huiꞌ mèn coꞌ nqueltàa con lùu tya loo conꞌ coꞌ ndlil.
\v 4 Tac nec thìb mèn coꞌ ndli thìb conꞌ, neꞌlide mèn conꞌa xexte. Tac coꞌseꞌ ndlyaꞌs mèn libeꞌ taamas mèn mèna, ndxàal li mèn conꞌ coꞌ ndli mèna loo xnaa. Ya que ndlil chol yalguzyeꞌ coꞌ nac yalguzyeꞌ roo yalguzyeꞌ xèn, huàa li yalguzyeꞌ coꞌ ndlil loo xnaa par neda, ne, par ñèe mèna ñeeneꞌ chéꞌ talaꞌs mèn tya loo conꞌ ndlil.
\p
\v 5 Tataa ndxab myenꞌ huespeꞌ Jesús loo Jesús tac axta neꞌ myenꞌa indxelaꞌste loo Jesús no loo conꞌ ndli Jesús.
\v 6 Sya, ndxab Jesús loo myenꞌ huespeꞌ Jesús:
\p ―Tarte zin huiz no tarte zin tiemp coꞌseꞌ luꞌpeꞌen daa chó nac daa loo mèn. Per part cón cheꞌn guꞌ, aa guneei coyora huenqueꞌ naca par guꞌ coꞌseꞌ luꞌ guꞌ mod coꞌ ndxàp guꞌ loo mèn.
\v 7 Part cón cheꞌn guꞌ, yende mod yòo xyàn lezoꞌ mèn izlyoꞌ ñèe mèn izlyoꞌ guꞌ. Per ndxeꞌlequeꞌ, part cón chenen, mèn izlyoꞌ ndxòoqueꞌ xyàn lezoꞌ ñèe mèn izlyoꞌ daa tac daa nda cuent loo mèn izlyoꞌ leꞌ ryete conꞌ ndli mèna nac conꞌ yeꞌrsinꞌ.
\v 8 Huàa guꞌ lni. Per daa neꞌgade lni nalleꞌ tac tarte tyaa huiz no tiemp coꞌseꞌ luꞌpeꞌen daa loo mèn chó nac daa.
\p
\v 9 Ngolo tataa ndxab Jesús diꞌsa loo myenꞌ huespeꞌ Jesús, mbyanꞌ Jesús leꞌn yèezyaꞌ cheꞌn làaz mèn galile.
\s Jesús ngua lni coꞌ ngòc lni cheꞌn ramad, ne.
\p
\v 10 Per coꞌseꞌ ndaleꞌ myenꞌ huespeꞌ Jesús lnia, mxen Jesús ned. Nda Jesús lnia, ne. Per neꞌngluꞌ loode Jesús loo mèn loo xnaa. Ndxeꞌlequeꞌ, xexte mque tee Jesús làth mèn huiz lnia.
\v 11 Leꞌ mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel na, mèna mque tee cuaꞌn Jesús làth mèn huiz lnia. No mbez mèna loo xtàa mèna:
\p ―¿Pá ned ngue tee mbiꞌa, yey? ¿Chonon iñèede naꞌ mbiꞌ?
\p
\v 12 No làth rye mèn coꞌ ngua lnia, anzeꞌf thìb mèn mdoodiꞌs cón cheꞌn Jesús. Ndxep mèn mbez:
\p ―Mbiꞌa nac mbiꞌ ndac.
\p Per taandxep mèn mbez:
\p ―Pà gàc mbiꞌa mbiꞌ ndac. Ndxeꞌlequeꞌ, nquedìi mbiꞌa mèn.
\p
\v 13 Per yende chó mèn ngli ryes ndoodiꞌs cón cheꞌn Jesús loo xnaalequeꞌ tac nzyeb mèna ñèe mèna mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel.
\p
\v 14 Coꞌseꞌ ngrolthe ndxàc lnia, syareꞌ ngòo Jesús leꞌn templ. Mtlo Jesús, mbluꞌ Jesús mèn leꞌn templ.
\v 15 Sya, rye mèngool coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel ante mbuiꞌ no ante gunaa cón cheꞌn diꞌs coꞌ mbluꞌ Jesús loo mèn leꞌn templ. No mbez mèna loo xtàa mèn:
\p ―¿Xá mod ndxác mbiꞌ baꞌ huax conꞌ coꞌ ndluꞌ mbiꞌ baꞌ loo mèn? Non naꞌ leꞌ mbiꞌ baꞌ thidtene neꞌnglide stud. ¿Cón tub yác mbiꞌ baꞌ?
\p
\v 16 Jesús mcàb loo mèna. Ndxab Jesús:
\p ―Cón cheꞌn conꞌ coꞌ ngue luꞌen loo guꞌ ndxèꞌ, inacte conꞌ ndxèꞌ cón chenen. Ndxeꞌlequeꞌ, nac conꞌ ngue luꞌen loo guꞌ ndxèꞌ cón cheꞌn xaꞌ coꞌ mtelꞌ daa loo izlyoꞌ ndxèꞌ.
\v 17 Cheleꞌ chó mèn ndlyaꞌs li xal ndlyaꞌs Diox no xal nee lezoꞌ Diox, leque mèn taꞌ cuent no tenꞌ mèn leꞌn lezoꞌ mèn chéꞌ nac diꞌs coꞌ ngue luꞌen ndxèꞌ cón cheꞌn Diox o chéꞌ naca diꞌs coꞌ ndyoodizen coꞌ alithe ndlin xtùuz xalqueꞌ ndyeꞌth xtùuz yéquen.
\v 18 Leꞌ mèn coꞌ ndyoodiꞌs xal ndyeꞌth xtùuz yéc mèn, mèna tataa ndli par leque xtàa mèn li conꞌ guryath no conꞌ guryèn loo mèna. Per mbiꞌ coꞌ más ndxòo yéc gàc conꞌ guryath no conꞌ guryèn loo Diox coꞌ mtelꞌ mbiꞌ, mbiꞌa ndluꞌ diꞌs coꞌ nac lìcpeꞌ no yende chó yalgutyèꞌ gác mbiꞌ li mbiꞌ.
\p
\v 19 ¿Chéꞌ ilìcte naca leꞌ Moisés mtanꞌ diꞌs coꞌ nac ley loo guꞌ, càꞌ? Mastaleꞌ mtanꞌ Moisés diꞌs coꞌ nac ley loo guꞌ, per nec thìb guꞌ indyubdiꞌste xal mbez diꞌs coꞌ nac ley. Cheleꞌ diꞌs coꞌ ngue bezen loo guꞌ ndxèꞌ ilìcte nac, ¿chonon ncuaꞌn guꞌ mod guthxùꞌ guꞌ daa, sya?
\p
\v 20 Sya, mcàb mèna loo Jesús. Ndxab mèna:
\p ―Aa. Nquée mbii yécl, ndee. ¿Chó mèn ncuaꞌn mod guthxùꞌ mèn lùu, àꞌ?
\p
\v 21 Jesús ndxab loo mèna:
\p ―Por mblin thìb conꞌ huiz sabd coꞌ nac huiz descans, conꞌa ndli ante ngüiꞌ guꞌ no ante ñaa guꞌ loon, ¿léꞌ?
\v 22 Lìcpeꞌ baꞌi, Moisés mdaꞌ yalnibeꞌ cheꞌn circuncisión loo guꞌ mastaleꞌ neꞌngàcte yub Moisés coꞌ mtlo mbli circuncidar mèn. Ndxeꞌlequeꞌ, xudgool Moisés nerlequeꞌ ngòc mèn coꞌ mbli circuncidar mèn. Por cona, guꞌ, ne, ndli circuncidar myenꞌbiꞌ bix. No yende chó mport nzo lezoꞌ guꞌ mastaleꞌ huiz sabd coꞌ nac huiz descans ndli guꞌi.
\v 23 Cona, ngue niin loo guꞌ: Cheleꞌ xtàa guꞌ ndxàc circuncidar huiz sabd coꞌ nac huiz descans par tyubdiꞌs guꞌ loo ley coꞌ mxoꞌf Moisés loo guꞌ, ¿chonon ndxecloo guꞌ ñèe guꞌ daa tac mteyaquen thìb mbiꞌ huiz sabd coꞌ nac huiz descans, sya?
\v 24 Neꞌtub rezte guꞌ cón chenen por cón cheꞌn mbiꞌ coꞌ gunèe guꞌ mteyaquen huiz sabd coꞌ nac huiz descans xal ndub rez guꞌ cón cheꞌn thìb mèn coꞌ ndli conꞌ yeꞌrsinꞌ huiz sabd. Más huen, nalì no nambìi li guꞌ xtùuz no blaꞌs guꞌ loo ley coꞌ mxoꞌf Moisés loo mèn par ñee guꞌ ñeeneꞌ chéꞌ léꞌ nac coꞌ mblin loo mbiꞌ coꞌ mteyaquen par taꞌ guꞌ cuent coꞌ huenlequeꞌ, huenqueꞌ mblin loo mbiꞌ.
\s Jesús ngue taꞌ cuent pá ned ngroꞌ tee ngroꞌ yáal Jesús.
\p
\v 25 Látha ngo ndxep mèn coꞌteꞌ ngo Jesús, mèn coꞌ ngo ban leꞌn ciuda Jerusalén. Mtlo mèna, mnibdiꞌs mèna loo xtàa mèn:
\p ―¿Chéꞌ inacte mbiꞌ baꞌ mbiꞌ coꞌ ngue tee cuaꞌn mèn par guth mèn mbiꞌ, càꞌ?
\v 26 Huiꞌ guꞌ nexa. Mbiꞌ baꞌ alanlequeꞌ ndyoodiꞌs loo xnaa. No yende chó mbezte mèn loo mbiꞌ. Neꞌstolqueꞌ, lìcqueꞌ, no mèn coꞌ ñibeꞌ loo naꞌ, no coꞌ ndyoo ner, no coꞌ ndyoo naa loo naꞌ ndxelaꞌs, ne, leꞌ mbiꞌ baꞌ nac Crist.
\v 27 Per naꞌ nonqueꞌ no nanee naꞌ pá mèn mbiꞌ baꞌ. Per ndxeꞌlequeꞌ, coꞌseꞌ yiꞌth Crist, yende chó mèn ñee pá ned ryoꞌ tee ryoꞌ yáal Crist, ndyac naꞌ, ¿léꞌ?
\p
\v 28 Per coꞌseꞌ mbìn Jesús tataa nzi nii mèna làth ngue luꞌ Jesús mèn leꞌn templ, cabii ndxab Jesús loo mèna:
\p ―Aa. Lìcqueꞌ, ndlibeꞌ guꞌ daa. No ndyac guꞌ naneequeꞌ guꞌ pá mèn daa. Daa neꞌngalte xal nee lezon. Ndxeꞌlequeꞌ, daa ndal loo izlyoꞌ ndxèꞌ xalqueꞌ mtelꞌ thìb xaꞌ daa, xaꞌ coꞌ naban thidtene coꞌ nac yub Diox. Per ¡pà libeꞌ guꞌ xaꞌa!
\v 29 Per daa ndlibeꞌpeꞌ xaꞌ coꞌ mtelꞌ daa tac loo xaꞌ ngroꞌen. No mtelꞌ xaꞌ daa.
\p
\v 30 Sya, mblyaꞌs mèna nghueꞌ mèna Jesús xal ndxeꞌ mèn thìb pres par guth mèn Jesús. Per nec thìb mèna neꞌnglide ryes nden mèna Jesús tac tarte zin tiemp coꞌseꞌ taꞌ Diox lugar tetìi mèn Jesús.
\v 31 Per mastaleꞌ tataa mblyaꞌs mèn li no mèn Jesús, huax mèn ngolaꞌs loo Jesús. Mèna ndxab loo xtàa mèn:
\p ―¿Xá nee guꞌ? Coꞌseꞌ yiꞌth Crist, ¿chéꞌ tli Crist más yalguzyeꞌ leque coꞌ ndli mbiꞌ baꞌ, càꞌ?
\s Mèn xleyꞌ farise mtelꞌ myenꞌ nac zinꞌ cheꞌn yoolau par tyenxùꞌ myenꞌ Jesús xal ndyen mèn thìb xaꞌ yeꞌrsinꞌ.
\p
\v 32 Mèn xleyꞌ farise mbìn xal nac diꞌs coꞌ nzi toodiꞌs mèn xexte cón cheꞌn Jesús. Sya, mqueltàa mèna con mèn coꞌ nac jef cheꞌn nguleyꞌ coꞌ más ñibeꞌ loo nguleyꞌ tiempa par mtelꞌ mèna myenꞌ nac zinꞌ par ya myenꞌ nac zinꞌ leꞌn templ par ya tenxùꞌ myenꞌ Jesús par hueꞌ myenꞌ Jesús loo mèna.
\v 33 Sya, ndxab Jesús loo myenꞌ nac zinꞌ coꞌ nde tenxùꞌ Jesús:
\p ―Beꞌ go non guꞌ taapláte huiz. No yiloa beren, biin loo xaꞌ coꞌ mtelꞌ daa.
\v 34 Guꞌ cuaꞌn daa yiloa. Per ya neꞌzyálꞌte guꞌ daa tac guꞌ neꞌgácte yòo coꞌteꞌ gòon.
\p
\v 35 Leꞌ sya, mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel, mèna mnibdiꞌs loo xtàa mèna:
\p ―¿Pá ned ya mbiꞌ baꞌ? ¿Chonon mbez mbiꞌ neꞌgácte naꞌ zyálꞌ naꞌ mbiꞌ? ¿Chéꞌ ta mbiꞌ loo mèn nación Israel coꞌ nzi tee reꞌs làth mèn nación Grieg par ya luꞌ mbiꞌ mèn nación Israela tya no sangluꞌ mbiꞌ mèn nación Grieg, ne, càꞌ? Pà yilaꞌs naꞌi.
\v 36 Lomisqueꞌ ne, ¿cón nee diꞌs coꞌ ngolo gunee mbiꞌ loo naꞌ baꞌ coꞌ nee mbiꞌ: Guꞌ cuaꞌn daa. Per neꞌzyálꞌte guꞌ daa tac guꞌ neꞌgácte yòo coꞌteꞌ gòon?
\s Jesús ngue taꞌ cuent leꞌ Xpii Natúꞌ li loo mèn leꞌ mèn li conꞌ ndac loo xtàa mèn xal coꞌseꞌ ndli nít coꞌ nzoꞌf thìb yóꞌbeꞌ conꞌ ndac loo mèn.
\p
\v 37 Per huiz coꞌ ngòc huiz merpeꞌ huiz lni, huiza Jesús ngo too loo mèn. No mtetac Jesús thìb diꞌs loo mèn. Cabii ndxab Jesús:
\p ―Cheleꞌ chol guꞌ ndryoꞌ ndlyenꞌ lezoꞌ yòo guꞌ loo cón chenen xal mèn coꞌ ndxec lezoꞌ par gu mèn nít, yiꞌth guꞌ loon no daa li yo nagàl lezoꞌ guꞌ loo cón cheꞌn Diox xal mèn coꞌ mbyec tínꞌ lezoꞌ no ngu mèn nít par nagàl yo lezoꞌ mèn.
\v 38 Mèn coꞌ ndxelaꞌs loon xalqueꞌ mbez diꞌs coꞌ ndub loo libr coꞌ nac xtiꞌs Diox, loo mèna li Xpii Natúꞌ leꞌ mèna li huax conꞌ ndac loo xtàa mèna xal ndxàc conꞌ ndac loo mèn coꞌseꞌ ndli zinꞌ mèn nít coꞌ nzoꞌf thìb yóꞌbeꞌ par gàca leꞌ xtàa mèna yòo ban noqueꞌ Diox thidtene, ne.
\p
\v 39 Tataa ndxab Jesús loo mèna par mdaꞌ Jesús cuent cón cheꞌn Xpii Natúꞌ coꞌ yòo loo mèn coꞌ yilaꞌs loo Jesús. Leꞌn huiza tarte lyàa Xpii Natúꞌ loo mèn tac Jesús tarte yáp loo béꞌ par gàc conꞌ roo no conꞌ xèn loo Jesús loo béꞌ.
\s Ngòc chop ned mèn ante por cón cheꞌn Jesús.
\p
\v 40 Leꞌ sya, ndxep mèn coꞌ ngo làth mèn coꞌ ngure yòn diꞌsa ndxab:
\p ―Lìcpeꞌ baꞌi, mbiꞌ baꞌ nac thìb mbiꞌ coꞌ ndeꞌth diꞌs coꞌ ndxab Diox coꞌ ndxath yiꞌth.
\p
\v 41 Taandxep mèn mbez:
\p ―Mbiꞌ baꞌ nac Crist.
\p Per taandxep mèn mbez:
\p ―¿Xá mod ndlyaꞌs guꞌ leꞌ Crist nac mèn cheꞌn thìb yèezyaꞌ cheꞌn làaz mèn galile, yey?
\v 42 Loo libr coꞌ nac xtiꞌs Diox mbez leꞌ Crist gàc bin cheꞌn David coꞌ ngòc rey póla. No gàc Crist xaꞌ yèezpeꞌ Belén coꞌ nac leque yèez coꞌ ngòc liz no làaz David.
\p
\v 43 No ale por conate ngòc chop ned mèn.
\v 44 Làtha, ngo ndxep mèn coꞌ mblyaꞌs ndenxùꞌ Jesús. Per yende chó mèn coꞌ nzo tya ngli ryes nden Jesús.
\s Mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel neꞌndalte ngalaꞌs loo Jesús.
\p
\v 45 Coꞌseꞌ mbere myenꞌ nac zinꞌ coꞌ nquenap templ, ndyeꞌth myenꞌ ngua myenꞌ loo Jesús, loo mèn xleyꞌ farise, no loo jef cheꞌn nguleyꞌ coꞌ más ñibeꞌ loo nguleyꞌ tiempa, ndxab mèn xleyꞌ farise no mèn coꞌ ngòc jef cheꞌn nguleyꞌ coꞌ más ñibeꞌ loo nguleyꞌ loo myenꞌ:
\p ―¿Chonon neꞌngyeꞌth node guꞌ mbiꞌa, àꞌ?
\p
\v 46 Myenꞌ nac zinꞌ mcàb loo mèna. Ndxab myenꞌ:
\p ―Nuꞌ ndyac thidtenequeꞌ yende chó mèn nzo coꞌ ndyoodiꞌs xal ndyoodiꞌs mbiꞌa, cara.
\p
\v 47 Sya, mcàb mèn coꞌ ngòc mèn xleyꞌ farise loo myenꞌ nac zinꞌa:
\p ―¿Chéꞌ no guꞌ mblaꞌ mquedìi mbiꞌa guꞌ, ne, càꞌ?
\v 48 ¿Chéꞌ yende pá ñee guꞌ neꞌstolqueꞌ ngo ndxep mèn coꞌ nac jef cheꞌn nguleyꞌ no chol mèn coꞌ nac mèn xleyꞌ farise coꞌ ngolaꞌs diꞌs coꞌ ndyoodiꞌs mbiꞌa, àꞌ?
\v 49 Per mèn coꞌ nziriꞌ go coꞌ indaꞌde cuent no coꞌ neꞌñeede coꞌ ndxab diꞌs coꞌ ndub loo ley coꞌ mxoꞌf Moisés loo mèn, mandit mèn baꞌ too ze no too yálꞌ tac ndxelaꞌs mèn baꞌ diꞌs coꞌ ndyoodiꞌs mbiꞌ.
\p
\v 50 Ndooleꞌ Nicodem coꞌ ngua loo Jesús thìb yálꞌ, coꞌ ngòc mèn xleyꞌ farise, ndxab loo mèna:
\p
\v 51 ―Huiꞌ guꞌ nexa. Loo ley naꞌ ndluꞌ indxàalte tetìi naꞌ thìb mbiꞌ coꞌseꞌ tarte ñee naꞌ no non naꞌ xá nac xquin mbiꞌ coꞌ mbli mbiꞌ.
\p
\v 52 Sya, mcàb mèna loo Nicodem. Ndxab mèna:
\p ―¿Chéꞌ no luu nac mèn yèezyaꞌ cheꞌn làaz mèn galile, ne, càꞌ? Bral no blaꞌs coꞌ huen huen loo libr coꞌ nac xtiꞌs Diox. Sya, ñeel no taꞌl cuent leꞌ leꞌn yèezyaꞌ coꞌ nac ned làaz mèn galile, yende pá mbez loo libr ryoꞌ tee ryoꞌ yáal thìb mbiꞌ coꞌ ndeꞌth diꞌs coꞌ ndxab Diox.
\s Mèn mbeꞌ thìb xaꞌgot coꞌ ngogaa loo yalburrid loo Jesús par quexùꞌ mèna xaꞌgota loo Jesús.
\p
\v 53 Ngoloa, thìb thìb mèna mxen ned, ndyàa mèna par liz mèn.
\c 8
\p
\v 1 Leꞌ Jesús na, mxen ned, nda Jesús loo thìb yii coꞌ lèe yii cheꞌn yaa oliv coꞌ ndub gaxte tya.
\v 2 Coꞌseꞌ ngo nìi izlyoꞌ tedib huiz coꞌ nde nquea, mbere Jesús, ngòo Jesús leꞌn templ tedib vez. No ryete mèn ciuda Jerusalén mqueltàa loo Jesús. Mdub Jesús leꞌn templ. Mtlo Jesús, mbluꞌ Jesús mèna.
\v 3 Látha, nde no mèn coꞌ nac maistr coꞌ ndluꞌ cón cheꞌn ley coꞌ mxoꞌf Moisés loo mèn thìb xaꞌgot coꞌ ngogaa loo yalburrid loo mèna. Ale mdoo mèna xaꞌgota xtauꞌthe rye mèn coꞌ nziriꞌ loo Jesús leꞌn templ.
\v 4 Sya, ndxab mèna loo Jesús:
\p ―Maistr, leꞌpeꞌ ngue li xaꞌgot ndxèꞌ yalburrid con thìb mbiꞌ ngogaa xaꞌ loo nuꞌ.
\v 5 ¿Xá nee Uꞌ, Maistr? Ley coꞌ mxoꞌf Moisés loo nuꞌ ñibeꞌ loo nuꞌ guth nuꞌ thìb mèngot, coꞌ ndli yalburrid xal xaꞌgot ndxèꞌ, con quèe. Gunee Uꞌ loo nuꞌ cón ndxàal li nuꞌ.
\p
\v 6 Ale asembli mèna tataa ndxab mèna loo Jesús par ñee mèna ñeeneꞌ chéꞌ tli Jesús conꞌ ndlyaꞌs mèna par tataa mod quexùꞌ queꞌ fals mèna Jesús. Per látha, chàa, mdub còoꞌ Jesús loo yòo. Mqueꞌ Jesús plá diꞌs loo yòo con cuen yaꞌ Jesús.
\v 7 Látha, tolo nzi ñibdiꞌs mèna loo Jesús. Sya, ngo too ndéꞌf Jesús. Ndxab Jesús loo mèna:
\p ―Chol guꞌ coꞌ nziriꞌ trèꞌ coꞌ indxàpte xquin no coꞌ indxàpte xtol, ner guꞌa fxen quèe no bgaꞌth quèe guꞌ xaꞌgot baꞌ no beth guꞌ xaꞌ thidtene.
\p
\v 8 Mbere Jesús, mdub còoꞌ Jesús loo yòo tedib vez. Tolo mqueꞌ Jesús taaplá diꞌs loo yòo con cuen yaꞌ Jesús.
\v 9 Per coꞌseꞌ mbìn mèn coꞌ mquexùꞌ xaꞌgota diꞌs coꞌ ndxab Jesús loo mèna, ale leꞌleꞌ mthyon mèna tac leque mèna mdenꞌ lezoꞌ ihuente nac conꞌ coꞌ ngue li mèna con xaꞌgota. Sya, más quee lezoꞌ mèna thìb thìb mèna ngroꞌ, ndyàa mèna. Ner, mèn gox mtlo ngroꞌ mbii. Xísa mdoo nque rye myenꞌbiꞌ coꞌ mqueltàa no mèna. Rye mèn coꞌ ngroꞌa ngòc mèn coꞌ mquexùꞌ xaꞌgota loo Jesús. Ngoloa, thidte Jesús mbyanꞌ no xaꞌgota con mèn coꞌ ngue luꞌ Jesús leꞌn templ.
\v 10 Sya, ngo too ndéꞌf Jesús. Mbuiꞌ ndxèꞌ, mbuiꞌ baꞌ Jesús par ñèe Jesús máa mèna. Ya yende chó mèn ñèe Jesús nziriꞌ. Ante xaꞌgota no maste ngòc xaꞌgot coꞌ mbyanꞌ. Sya, ndxab Jesús loo xaꞌgota:
\p ―Ngot, ¿máa mèn coꞌ mquexùꞌ mqueꞌ fals lùu, àꞌ? ¿Chéꞌ nec thìb mèna neꞌnquexùꞌde no neꞌnqueꞌ falste lùu, càꞌ?
\p
\v 11 Sya, mcàb xaꞌgota. Ndxab xaꞌgota loo Jesús:
\p ―Yende chó mèn nzo trèꞌ coꞌ mquexùꞌ mqueꞌ fals daa, Tad.
\p Sya, ndxab Jesús loo xaꞌgota:
\p ―Neꞌ daa ingue quexùꞌdel. Fxen ned. Byàa par lizl nalleꞌ. Ya neꞌtolode cuaꞌnl xquinl, ndee.
\s Jesús ngue li par ndyub xnìi yéc mèn no par ndyub xnìi lezoꞌ mèn izlyoꞌ loo cón cheꞌn Diox.
\p
\v 12 Mbere Jesús, ndxab Jesús loo mèn coꞌ beꞌ mbyanꞌa:
\p ―Nde niin tedib conꞌ loo guꞌ, ey: Daa nac xaꞌ coꞌ ndli par ndyub xnìi yéc mèn no par ndyub xnìi lezoꞌ mèn loo izlyoꞌ ndxèꞌ loo cón cheꞌn Diox. Mèn coꞌ tyal yòo loo cón chenen, mèna neꞌque tee bante loo conꞌ coꞌ nac xab izlyoꞌ no loo conꞌ coꞌ nac costumbr. Ndxeꞌlequeꞌ, conꞌ coꞌ ndlin par tyub xnìi yéc mèn no par tyub xnìi lezoꞌ mèn loo cón cheꞌn Diox, conꞌa ndli par ncàb loo mèn yòo ban no mèn Diox thidtene.
\p
\v 13 Sya, ngroꞌ nxonꞌ ndxep mèn xleyꞌ farise coꞌ ndxab loo Jesús:
\p ―Leque lùu ngue taꞌ cuent cón cheꞌn lùu. Per cuent coꞌ ndaꞌl cón cheꞌnl baꞌ yende cón ntac par nuꞌ.
\p
\v 14 Jesús mcàb loo mèna. Ndxab Jesús:
\p ―¿Xá mod? Conꞌ coꞌ niin cón chenen ntacqueꞌ. Mastaleꞌ leque daa nda cuent cón chenen, daa nanee pá ned ngroꞌen no naneen pá ned biin yiloa. Per ndxeꞌlequeꞌ, guꞌ neꞌñeede no indaꞌde guꞌ cuent pá ned ngroꞌen. No neꞌ neꞌ ñee guꞌ no neꞌ neꞌ indaꞌ guꞌ cuent pá ned biin yiloa.
\v 15 Guꞌ más ndlaꞌs loo mèn xal nac mod coꞌ nzi tee ban mèn loo izlyoꞌ par quexùꞌ guꞌ mèn. Per part cón chenen, yende chó loo mèn ndlasen loo izlyoꞌ ndxèꞌ par quexùꞌen mèn.
\v 16 Per cheleꞌ daa ndlas loo mèn loo izlyoꞌ ndxèꞌ, nalì no nambìi ndlasen. Tac inacte daa thidte xaꞌ coꞌ ndlaꞌs loo mèn par tub rezen loo mèn. Ndxeꞌlequeꞌ, xuden Diox coꞌ mtelꞌ daa, thidte ndxàc ryop xud nuꞌ par ndlaꞌs nuꞌ loo mèn no tub rez nuꞌ loo mèn.
\v 17 Loo ley coꞌ mxoꞌf Moisés loo guꞌ ndub diꞌs coꞌ mbez: Coꞌseꞌ chop mèn coꞌ nac testiu ndaꞌ cuent leque cón cheꞌn thìb conꞌ, ndxàal yilaꞌs mèn cuent coꞌ ndaꞌ ryop mèna cuent.
\v 18 Cona, ngue niin loo guꞌ: Leque daa nac mèn coꞌ ndaꞌ cuent cón chenen. Xuden Diox coꞌ mtelꞌ daa nac tedib xaꞌ coꞌ ndaꞌguèꞌ cuent cón chenen, ne.
\p
\v 19 Sya, mnibdiꞌs mèna loo Jesús. Ndxab mèna:
\p ―¿Máa xudl, na? ¿Pá nzo xudl?
\p Jesús mcàb loo mèna:
\p ―Guꞌ indlibeꞌde daa no neꞌ neꞌ ndlibeꞌ guꞌ xuden. Tac cheleꞌ guꞌ ndlibeꞌqueꞌ daa, ndlibeꞌqueꞌ guꞌ xuden, ne.
\p
\v 20 Diꞌs ndxèꞌ ndxab Jesús láth ngue luꞌ Jesús mèn coꞌteꞌ ndxòosuaꞌ caj gòn leꞌn templ. Yende chó mèn ngli ryes ndenxùꞌ Jesús xal thìb pres tac tarte zin hor coꞌseꞌ tyactìipeꞌ Jesús par guthxùꞌ mèn Jesús.
\s Jesús ngue taꞌ cuent loo mèn. Ndxab Jesús: Coꞌteꞌ biin, guꞌ neꞌgácte yòo guꞌ tya.
\p
\v 21 Mbere Jesús, ndxab Jesús loo mèn tedib vez:
\p ―Daa biiqueꞌ coꞌteꞌ ngroꞌen. Guꞌ cuaꞌnqueꞌ daa no gath noqueꞌ guꞌ xtol guꞌ. Cona, ngue niin loo guꞌ: Coꞌteꞌ biin, guꞌ neꞌgácte yòo tya.
\p
\v 22 Sya, ndxab mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo xtàa mèn:
\p ―¿Chéꞌ leque mbiꞌ baꞌ guth mbiꞌ, cona mbez mbiꞌ: Coꞌteꞌ biin, guꞌ neꞌgácte yòo tya, càꞌ?
\p
\v 23 Sya, ndxab Jesús loo mèn tedib vez:
\p ―Lizpeꞌ guꞌ no làazpeꞌ guꞌ no cheꞌnpeꞌ guꞌ nac izlyoꞌ ndxèꞌ. Per part cón chenen, lizpeꞌen no làazpeꞌen no cheꞌnpeꞌen nac loo béꞌ. Guꞌ nac mèn cheꞌnpeꞌ izlyoꞌ ndxèꞌ. Per daa inacte cheꞌnpeꞌ izlyoꞌ ndxèꞌ.
\v 24 Por cona, ngue niin loo guꞌ: Leꞌ guꞌ gath noqueꞌ xtol guꞌ tac cheleꞌ guꞌ neꞌyilaꞌste leꞌ daa nacpeꞌ Crist coꞌ mbez mèn Crist, guꞌ gath noqueꞌ xtol guꞌ.
\p
\v 25 Sya, mnibdiꞌs mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo Jesús. Ndxab mèna loo Jesús:
\p ―¿Chóxeꞌ nac lùu, àꞌ?
\p Sya, ndxab Jesús loo mèna:
\p ―Daa ya guniileꞌ loo guꞌ chó nac daa axta coꞌseꞌ mtlon, mblon yalbàn cón cheꞌn Diox loo guꞌ.
\v 26 Anzeꞌf huax conꞌ ndlyazen niin loo guꞌ. No anzeꞌf huax conꞌ nzo par tub rezen loo guꞌ. Lomisqueꞌ, xaꞌ coꞌ mtelꞌ daa, xaꞌ ndaꞌ cuent coꞌ nac lìcpeꞌ loon. Indyèꞌde xaꞌa. Diꞌs coꞌ mbìnlen coꞌ ndaꞌ xaꞌ cuent loon, cona ndyoodizen loo mèn loo izlyoꞌ ndxèꞌ.
\p
\v 27 Per ndxeꞌlequeꞌ, mèna neꞌtaꞌde cuent no neꞌneede mèn leꞌ Jesús ngue toodiꞌs cón cheꞌn Diox coꞌ nac xudpeꞌ Jesús loo mèn.
\v 28 Cona, tolo ndxab Jesús loo mèna:
\p ―Coꞌseꞌ queꞌ guꞌ daa loo cruz no xít che guꞌ daa, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ, loo thìb cruz no too guꞌ cruz, axta syareꞌ li laꞌs guꞌ leꞌ daa nac Cristpeꞌ. No syareꞌ taꞌ guꞌ cuent yende cón ndlin coꞌ ante guneete lezon. Ndxeꞌlequeꞌ, ante ndyoodizen loo guꞌ xal nac diꞌs coꞌ mbluꞌ xuden Diox loon.
\v 29 Tac Diox coꞌ nac xuden coꞌ mtelꞌ daa, Diox thidtenequeꞌ nzo no daa. Indláꞌyaꞌde xuden Diox daa. Xuden Diox tarte láꞌ daa thidten tac daa thidtenequeꞌ ndli conꞌ coꞌ ndxòo lezoꞌ xuden Diox.
\p
\v 30 Coꞌseꞌ ngolo ndxab Jesús diꞌsa, huax mèn ngolaꞌs loo Jesús.
\s Trèꞌ ndluꞌ cón cheꞌn chop ned mèn. Thìb ned mèn nac xinꞌ Diox. Leꞌ tedib ned mèn na, nac xal moz loo xtol mèn no loo xquin mèn.
\p
\v 31 Sya, ndxab Jesús loo mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel coꞌ ngolaꞌs loo Jesús:
\p ―Cheleꞌ guꞌ thidtenequeꞌ li nèe guꞌ guꞌ loo conꞌ guniin loo guꞌ, lìcpeꞌ baꞌi, leꞌ sya, gàcqueꞌ guꞌ myenꞌ xinꞌ mtéꞌthpeꞌ daa,
\v 32 par tyub xnìi yéc guꞌ no par tyub xnìi lezoꞌ guꞌ loo cón cheꞌn Diox par taꞌ guꞌ cuent cón cheꞌn conꞌ coꞌ nac lìcpeꞌ. Leꞌ sya, diꞌs coꞌ ndyoodizen coꞌ nac lìcpeꞌ li par taꞌ guꞌ cuent inquinte li guꞌ chol costumbr coꞌ ñibeꞌ yèe loo mèn, no li diꞌs coꞌ ndyoodizen coꞌ nac lìcpeꞌ par láꞌ guꞌ ryethe conꞌ coꞌ nac cón cheꞌn xab izlyoꞌ. Tac ryethe conꞌa ndli mbee ncà guꞌ loo cón cheꞌn Diox.
\p
\v 33 Leꞌ sya, mcàb mèna loo Jesús. Ndxab mèna:
\p ―Nuꞌ nac bin cheꞌn Abraham. No, thidtenequeꞌ tarte gàc nuꞌ xal thìb moz coꞌ ndli yèe zinꞌ ze no yálꞌ loo nec thìb mèn. ¿Chonon mbezl: Nzo conꞌ mbee ncà nuꞌ loo cón cheꞌn Diox, sya?
\p
\v 34 Jesús mcàb loo mèna:
\p ―Lìca, na ngue nii loo guꞌ: Ryete mèn coꞌ ncuaꞌn xquin no xtol, mèna nac xal moz yèe loo xquin mèn no loo xtol mèn coꞌ ñibeꞌ loo mèn.
\v 35 Nde niin tedib conꞌ loo guꞌ: Huiꞌ guꞌ nexa. Mèn coꞌ nac moz loo thìb patrón, mèna thidtene yende mod gàc mèna mèn guliz patrón. Per ndxeꞌlequeꞌ, thìb mbyòo coꞌ nac xganꞌ thìb mbiꞌ, mbyòoa thidtenequeꞌ ndxòo cuent nac mèn guliz xud mbyòo.
\v 36 Por cona, ngue niin loo guꞌ: Cheleꞌ daa coꞌ nac xganꞌ Diox ngue li par ryo xàꞌ guꞌ loo chol costumbr no loo cón cheꞌn xab izlyoꞌ, lìcpeꞌ baꞌi, yende chó cón coꞌ nac xab izlyoꞌ coꞌ nac costumbr coꞌ mbed no guꞌ cuee cà guꞌ loo cón cheꞌn Diox.
\v 37 Daa naneequeꞌ no ndaquen cuent leꞌ guꞌ nac bin cheꞌn Abraham coꞌ ngo ban póla. Per ale ndxeꞌlequeꞌ, ndlyaꞌs guꞌ guthxùꞌ guꞌ daa tac indléꞌde ndlyàa diꞌs coꞌ ngue niin loo guꞌ ndxèꞌ leꞌn lezoꞌ guꞌ.
\v 38 Daa ndyoodiz cón cheꞌn conꞌ coꞌ mbluꞌ xuden Diox loon. Leꞌ guꞌ na, más ndxòo lezoꞌ guꞌ li guꞌ conꞌ coꞌ gunee xud guꞌ loo guꞌ par li guꞌ cón mbez xud guꞌ li guꞌ.
\p
\v 39 Mcàb mèna loo Jesús. Ndxab mèna:
\p ―Abraham nac xudgool nuꞌ.
\p Jesús ndxab loo mèna:
\p ―Cheleꞌ guꞌ, lìcqueꞌ, ngàc bin cheꞌn Abraham, ngàp guꞌ mod coꞌ ngòp Abraham, no ngli guꞌ xal mbli Abraham, sya, xàa.
\v 40 Per mastaleꞌ mbez guꞌ nac guꞌ mèn coꞌ nac bin cheꞌn Abraham, ale ndxeꞌlequeꞌ, ndlyaꞌs guꞌ guthxùꞌ guꞌ daa. No, ndxòn guꞌ leꞌ daa ngue taꞌ cuent coꞌ nac lìcpeꞌ coꞌ mbluꞌ Diox loon loo guꞌ. Ftaꞌ guꞌ cuent coꞌ huenlequeꞌ leꞌ Abraham thidtenequeꞌ neꞌnglide xal ndlyaꞌs guꞌ li no guꞌ daa nalleꞌ. Por cona, inacte guꞌ binpeꞌ Abraham.
\v 41 Guꞌ ndliqueꞌ cón ndli xud guꞌ.
\p Sya, mcàb mèna loo Jesús. Ndxab mèna:
\p ―Nuꞌ inacte xinꞌ chop son mbiꞌ, coꞌ nee diꞌs, inacte nuꞌ xinꞌ thìb xnaꞌ nuꞌ. Thidte xud nuꞌ ngue no nuꞌ, coꞌ nac Diox.
\p
\v 42 Sya, mcàb Jesús loo mèna. Ndxab Jesús:
\p ―Cheleꞌ xud guꞌ, lìcqueꞌ, ngàc Diox, guꞌ huen ngàc con daa no queꞌqueꞌ lezoꞌ guꞌ ñèe guꞌ daa tac daa ngroꞌ loo Diox. Cona, ndalen loo izlyoꞌ ndxèꞌ no nzon trèꞌ. Neꞌngàlten por gunee lezon. Ndxeꞌlequeꞌ, Diox mtelꞌ daa. Cona, ndalen loo izlyoꞌ ndxèꞌ.
\v 43 ¿Chonon indaꞌde guꞌ cuent no indxaaꞌdte guꞌ diꞌs coꞌ nde teeleꞌ ndan cuent loo guꞌ, àꞌ? Neequen chonon indlyaꞌste guꞌ tyal guꞌ gòn guꞌ diꞌs coꞌ ngue tan cuent loo guꞌ. Tac guꞌ indlyaꞌste gòn diꞌs cón cheꞌn Diox coꞌ ngue tan cuent loo guꞌ. Conꞌai.
\v 44 Na nii loo guꞌ: Xaꞌ coꞌ nac xud guꞌa nac Mebizya. Leꞌ guꞌ na, nac mèn coꞌ ndli ryethe conꞌ coꞌ ndryoꞌ ndlyenꞌ lezoꞌ xud guꞌ coꞌ nac Mebizya. Mebizya ngòcleꞌ thìb xaꞌ coꞌ ndli par ndxuthxùꞌ mèn xtàa mèn loo izlyoꞌ anon ngure izlyoꞌ. No thidtenequeꞌ indxòode lezoꞌ Mebizya gòn Mebizya conꞌ coꞌ nac lìcpeꞌ. Neꞌ neꞌ indxòo lezoꞌ Mebizya tyoodiꞌs Mebizya conꞌ coꞌ nac lìcpeꞌ. Coꞌseꞌ ndyoodiꞌs Mebizya diꞌs coꞌ nac yalgutyèꞌtúb, ngue luꞌ Mebizya xal nac Mebizya no xal nac mod coꞌ ndxàp Mebizya. Tac Mebizya nacpeꞌ thìb xaꞌ gutyèꞌ. No nac Mebizya thìb xaꞌ coꞌ ndli par ndxàc taamas mèn cheꞌn izlyoꞌ mèn gutyèꞌ.
\v 45 Per com leꞌ daa ndyoodiꞌs diꞌs coꞌ nac lìcpeꞌ cón cheꞌn Diox, cona, neꞌtyalte guꞌ yilaꞌs guꞌ diꞌs coꞌ ndyoodizen.
\v 46 Per nalleꞌ ndlyazen ñeen chó thìb guꞌ ñee loon leꞌ daa ndxàp xtol. Cheleꞌ daa ndyoodiꞌs diꞌs coꞌ nac lìcpeꞌ cón cheꞌn Diox, ¿chonon indxelaꞌste guꞌ loo diꞌs coꞌ ndyoodizen loo guꞌ, sya?
\v 47 Mèn coꞌ ngòo loo cón cheꞌn Diox par nac mèna cheꞌn Diox, mèna ndyal par ndxòn mèna diꞌs coꞌ nac xtiꞌs Diox. Per com leꞌ guꞌ inacte mèn coꞌ nzo loo cón cheꞌn Diox, por cona, indlyaꞌste guꞌ tyal guꞌ par taꞌ guꞌ nza guꞌ par gòn guꞌ diꞌs coꞌ ndyoodizen.
\s Trèꞌ ndluꞌ leꞌ Crist nzoleꞌ ndooreꞌ gáal thìb mbiꞌ coꞌ ngroꞌ lèe Abraham coꞌ ngo ban póla.
\p
\v 48 Sya, mcàb mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo Jesús. Ndxab mèna:
\p ―Nuꞌ ndyac huenqueꞌ nac diꞌs coꞌ ngue bez nuꞌ lool leꞌ lùu nac thìb mbiꞌ yèezyaꞌ cheꞌn làaz mèn samari no nzo thìb xpii yeꞌrsinꞌ lool.
\p
\v 49 Mcàb Jesús loo mèna. Ndxab Jesús:
\p ―Inzode nec thìb xpii yeꞌrsinꞌ loon. Ndxeꞌlequeꞌ, conꞌ coꞌ ndlin ndli leꞌ loo xuden gàc conꞌ guryath no conꞌ guryèn. Per guꞌ, ale ndxeꞌlequeꞌ, indlide par gàc conꞌ guryath no conꞌ guryèn loon.
\v 50 Daa incuaꞌnte mèn coꞌ li par gàc conꞌ guryath no conꞌ guryèn loon. Daa nanee nzoqueꞌ thìb xaꞌ coꞌ ncuaꞌn mod par li xaꞌ gàc conꞌ guryath no conꞌ guryèn loon. Xaꞌa ndub rez loo mèn coꞌ neꞌtyalte li conꞌ guryath no conꞌ guryèn loon.
\v 51 Lìcpeꞌ baꞌi, na ngue nii loo guꞌ: Leꞌ mèn coꞌ ndyub nza no ndaꞌ mèn lugar par ndxòn mèn diꞌs coꞌ ndyoodizen, mèna yòo ban noqueꞌ Diox thidtene. No neꞌcoꞌ xàꞌde Diox mèna. No neꞌcoꞌ toode Diox mèna loo Diox coꞌseꞌ ngolo nguth mèna.
\p
\v 52 Leꞌ sya, mcàb mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo Jesús. Ndxab mèna:
\p ―Nase mbli laꞌs nuꞌ nzoqueꞌ thìb xpii yeꞌrsinꞌ lool. Abraham nguth. Ryete mèn coꞌ mdeꞌth diꞌs coꞌ ndxab Diox nguth, ne. No lùu ale mbez: Mèn coꞌ tyub nza no gòn mèn diꞌs coꞌ mbezen, mèna thidtenequeꞌ neꞌgathte.
\v 53 Tlate ñeel nacl más xaꞌ roo xaꞌ xèn no más mèngool leque xudgool naꞌ Abraham coꞌ nguth. Abraham nguthqueꞌ. No ryete mèn coꞌ mdeꞌth diꞌs coꞌ ndxab Diox nguthqueꞌ. ¿Chóxeꞌ mèn mbezl nacl, sya?
\p
\v 54 Jesús mcàb loo mèna. Ndxab Jesús:
\p ―Cheleꞌ daa yub ndli par ndxàc conꞌ guryath no conꞌ guryèn loon, leꞌ sya, conꞌ guryath no conꞌ guryèn coꞌ nglin ngàc loona yende cón ntaca loo Diox coꞌ mtelꞌ daa. Per xaꞌ coꞌ ndli par ndxàc conꞌ guryath no conꞌ guryèn loon, xaꞌa nac Diox coꞌ nac xudpeꞌen. No nac xaꞌ merpeꞌ xaꞌ coꞌ mbez guꞌ nac Dioxpeꞌ guꞌ.
\v 55 Guꞌ indlibeꞌde xaꞌ coꞌ nac Diox xudpeꞌen. Per daa ndlibeꞌqueꞌ xuden Diox. No cheleꞌ daa nii loo guꞌ indlibeden xuden Diox, sya, lalqueꞌ ndyèꞌ daa xal ndyèꞌ guꞌ. Per ndxeꞌlequeꞌ, daa ndlibequeꞌ Diox coꞌ nac xuden. No ndlin cas xalqueꞌ nac diꞌs coꞌ ndyoodiꞌs Diox coꞌ nac xudpeꞌen loon.
\v 56 Abraham coꞌ ngòc xudgool guꞌ póla, axta gust mbyanꞌ lezoꞌ Abraham láth ndub quee lezoꞌ Abraham huiz coꞌ gàc huiz galen loo izlyoꞌ ndxèꞌ. Gunèequeꞌ Abraham coꞌseꞌ ngòc huiz coꞌ mbalen loo izlyoꞌ ndxèꞌ. No mdyac lezoꞌ Abraham axta plóthe cón cheꞌn huiza.
\p
\v 57 Leꞌ sya, ndxab mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo Jesús:
\p ―Neꞌ neꞌ tar taal choꞌ psiꞌ linꞌ no ¿mbezl gunèelel Abraham coꞌ ngòc xudgool naꞌ, càꞌ?
\p
\v 58 Jesús mcàb loo mèna. Ndxab Jesús:
\p ―Lìca, na nii loo guꞌ: Ndooreꞌ coꞌseꞌ tarte gáal Abraham, nzolen.
\p
\v 59 Per coꞌseꞌ mbìn mèna tataa ndxab Jesús, mxen mèna quèe par gathquèe mèna Jesús. Per ale, chàa, mdyonꞌ Jesús loo mèna. Ale neꞌndaꞌde mèna cuent ngroꞌ Jesús loo mèna leꞌn templ. Mxen Jesús ned, ndyaa Jesús.
\c 9
\s Jesús mteyac thìb mbiꞌ coꞌ ngóol sieu.
\p
\v 1 Láth nda riid Jesús par ned nda Jesús, gunèe Jesús thìb mbiꞌ sieu coꞌ ngóol sieu coꞌ ndub par neda.
\v 2 Myenꞌ xinꞌ mtéꞌth Jesús mnibdiꞌs loo Jesús. Ndxab myenꞌ:
\p ―Maistr, ¿chonon texal ngóol mbiꞌ baꞌ sieu mbiꞌ, àꞌ? ¿Chéꞌ tac ngòp xud mbiꞌ xtol xud mbiꞌ no ngòp xnaꞌ mbiꞌ xtol xnaꞌ mbiꞌ cona ngóol mbiꞌ sieu o chéꞌ naca por xtolpeꞌ mbiꞌ, cona ngóol mbiꞌ sieu, càꞌ?
\p
\v 3 Jesús ndxab loo myenꞌ:
\p ―Aa que tont guꞌ se. Neꞌngáalte mbiꞌ baꞌ sieu por xtolpeꞌ mbiꞌ. Neꞌ neꞌ ngáal mbiꞌ sieu por xtol xud mbiꞌ no por xtol xnaꞌ mbiꞌ. Ndxeꞌlequeꞌ, mbiꞌ baꞌ ngóol sieu par ryo xoꞌf conꞌ ndxác Diox li Diox loo mèn loo xnaa loo mbiꞌ.
\v 4 Ndxàalqueꞌ lin zinꞌ coꞌ nac rsinꞌ xaꞌ coꞌ mtelꞌ daa láth beꞌ ngue teeꞌen loo izlyoꞌ ndxèꞌ xal ndli mèn zinꞌ ndxáal ze coꞌseꞌ ntenìi xnìi huiz. Tac yéꞌ huizeꞌ gàca loon xal coꞌseꞌ nde yálꞌ loo izlyoꞌ no yende chó mèn gác li zinꞌ hora.
\v 5 Cona, niin loo guꞌ: Láth beꞌ nzon loo izlyoꞌ ndxèꞌ nac daa xaꞌ coꞌ ndli par ndyub xnìi yéc mèn no par ndyub xnìi lezoꞌ mèn coꞌ nziriꞌ loo izlyoꞌ ndxèꞌ loo cón cheꞌn Diox.
\p
\v 6 Ngolo gunii Jesús diꞌsa loo myenꞌ xinꞌ mtéꞌth Jesús, msuc Jesús loo yòo. No mcos Jesús chuꞌth ben loo yòo con rsuc Jesús. Ngoloa, mtà Jesús bena ngudloo mbiꞌ sieua.
\v 7 Ngoloa, ndxab Jesús loo mbiꞌa:
\p ―Huàa tech ngudlool ro tanc coꞌ lèe Siloé baꞌ. Diꞌs Siloé nee diꞌs ntelꞌ mèn mèn.
\p Sya, xex xex nda mbiꞌ sieua ro tanc. Ngua tech mbiꞌ ngudloo mbiꞌ. Coꞌseꞌ mbere mbiꞌ, ndyeꞌth mbiꞌ loo Jesús, ndxeꞌslequeꞌ ngüiꞌ mbiꞌ.
\v 8 Sya, rye mèn coꞌ nziꞌf liz gax coꞌteꞌ ndub liz xud mbiꞌ no rye mèn coꞌ gunèe mbiꞌ ndooreꞌ xyalꞌ ngudloo mbiꞌ, mèna ndxab loo xtàa mèn:
\p ―¿Chéꞌ inacte mbiꞌ baꞌ mbiꞌ sieu coꞌ ndyub ñaꞌb gòn, càꞌ?
\p
\v 9 Sya, mbez ndxep mèn loo xtàa mèn:
\p ―Aa. Mbiꞌ baꞌi.
\p Per taandxep mèn mbez:
\p ―Tyèꞌ. Inacte mbiꞌ baꞌ mbiꞌa, yey. ¿Chéꞌ indyacte guꞌ teꞌ ñaa mbiꞌa ñaa mbiꞌ baꞌ, ¿léꞌ?
\p Per yub mbiꞌ sieu mbez loo mèna:
\p ―Daaai. ¿Chéꞌ ngue li guꞌ cuent inacte daa mbiꞌa, càꞌ?
\p
\v 10 Sya, mnibdiꞌs mèna loo mbiꞌ sieua. Ndxab mèna loo mbiꞌ:
\p ―¿Xá mod ngòca lool? ¿Chonon ngüiꞌlel nalleꞌ, sya?
\p
\v 11 Mbiꞌ mcàb loo mèna. Ndxab mbiꞌ:
\p ―Mbiꞌ coꞌ lèe Jesús mcos chuꞌth ben loo yòo. Ngoloa, mtà mbiꞌ ben ngudloon. No gunee mbiꞌ loon: Huàa tech ngudlool ro tanc cheꞌn Siloé baꞌ. Ngua techen ngudloon. No coꞌseꞌ ngolo mtechen ngudloon, chàa, ndxeꞌslequeꞌ mbuiꞌen.
\p
\v 12 Sya, mnibdiꞌs mèna loo mbiꞌ. Ndxab mèna:
\p ―¿Pá nzo mbiꞌ coꞌ lèe Jesús nalleꞌ, àꞌ?
\p Mbiꞌ sieua mcàb:
\p ―Ne no. Neꞌneeden pá nzo mbiꞌ.
\s Mèn xleyꞌ farise noo noo mnibdiꞌs cón cheꞌn Jesús loo mbiꞌ coꞌ ngóol sieu.
\p
\v 13 Sya, mbeꞌ mèna mbiꞌ coꞌ ngóol sieua loo mèn xleyꞌ farise.
\v 14 Huiz coꞌseꞌ mcos Jesús ben no mxalꞌ Jesús ngudloo mbiꞌ sieua, huiza ngòc huiz sabd coꞌ ngòc huiz descans tiempa.
\v 15 Sya, mbere mèn xleyꞌ farise, mnibdiꞌs mèna loo mbiꞌa tedib vez:
\p ―¿Xá mod ngòc mxyalꞌ ngudlool par ngüiꞌl nalleꞌ, àꞌ?
\p Ndxab mbiꞌ loo mèna:
\p ―Mbiꞌ coꞌ lèe Jesús mtà chuꞌth ben ngudloon. Ngoloa, ngua techen ngudloon. Cona, ndxeꞌselqueꞌ ngüiꞌen nalleꞌ.
\p
\v 16 Sya, ndxab ndxep mèn xleyꞌ farisea loo mbiꞌ coꞌ ngóol sieu:
\p ―Mbiꞌ coꞌ mbli conꞌa con lùu, mbiꞌa inacte mèn cheꞌn Diox tac indlide mbiꞌ cas huiz sabd coꞌ nac huiz descans.
\p Per taamas mèn mbez:
\p ―Per ¿xá ngobeꞌ guꞌ xá mod gác thìb mbiꞌ coꞌ ndxàp xtol li mbiꞌ yalguzyeꞌ coꞌ ngòc loo mbiꞌ baꞌ, yey?
\p No ale leque mèn xleyꞌ farise ngro yoo diꞌs làth xtàa mèn.
\v 17 Per indryoꞌde lezoꞌ mèn xleyꞌ farise ngòc conꞌa loo mbiꞌa. Mbere mèn, mnibdiꞌs mèn loo mbiꞌ coꞌ ngóol sieu tedib vez:
\p ―Lùua, ¿cón tolo ñeel loo nuꞌ cón cheꞌn mbiꞌ coꞌ mbli mdyub xnìi ngudlool, àꞌ?
\p Mbiꞌ coꞌ ngòc sieu ndxab:
\p ―Pues part cón chenen, ndyaquen mbiꞌ nac xaꞌ coꞌ ndeꞌth diꞌs coꞌ ndxab Diox, xàa.
\p
\v 18 Nde nxonꞌ, thidtenequeꞌ neꞌndalte mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel ngalaꞌs mèna leꞌ mbiꞌa ngòc sieu no hora ngüiꞌleꞌ mbiꞌ. Neꞌngroꞌde lezoꞌ mèn conꞌa. Mbli mèna par ngua rez mèn xud mbiꞌ no xnaꞌ mbiꞌ coꞌ ngüiꞌleꞌ.
\v 19 Sya, mnibdiꞌs mèna loo xud mbiꞌ no loo xnaꞌ mbiꞌ. Ndxab mèna:
\p ―¿Chéꞌ, lìcqueꞌ, nac mbiꞌ ndxèꞌ xganꞌ guꞌ coꞌ mbez guꞌ ngóol sieu, càꞌ? Cheleꞌi tataa nac, ¿xá mod ngòca loo mbiꞌ ngüiꞌ mbi nalleꞌ, sya?
\p
\v 20 Mcàb xud mbiꞌ no xnaꞌ mbiꞌ loo mèna. Ndxab ryop xaꞌ:
\p ―Nuꞌ nanee leꞌ mbyòo baꞌ nac xganꞌ nuꞌ. No, lìca, anon ngóol mbyòo sieu mbyòo.
\v 21 Per nalleꞌ nuꞌ neꞌñeede no neꞌtaꞌde nuꞌ cuent xá mod mdyub xnìi ngudloo mbyòo par ngüiꞌ mbyòo. Neꞌ neꞌ ñee nuꞌ no neꞌ neꞌ taꞌ nuꞌ cuent chó mbli par mdyub xnìi ngudloo mbyòo par ngüiꞌ mbyòo. Mbyòo ngoxleꞌ. Bnibdiꞌs guꞌ loo mbyòo. Leque mbyòo taꞌ cuent cón cheꞌn mbyòo loo guꞌ.
\p
\v 22 Ale tataa ndxab xud mbiꞌ no xnaꞌ mbiꞌ loo mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel tac nzyeb ryop saꞌl xaꞌ ñee xaꞌ mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel. Tac mèna mbli mandad no mdoodiꞌsleꞌ mèna cheleꞌ chol mèn co ro leꞌ Jesús nacqueꞌ Crist, ale coꞌ chug mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel mèna leꞌn sinagog.
\v 23 Por cona, ndxab xud mbyòo no xnaꞌ mbyòo loo mèna: Bnibdiꞌs guꞌ loo mbyòo cón cheꞌn mbyòo. Mbyòo ngoxleꞌ.
\p
\v 24 Sya, ale mbere mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel, ngurez mèna mbiꞌ coꞌ ngòc sieu tedib vez. Ndxab mèna loo mbiꞌ coꞌ ngòc sieu:
\p ―Fteꞌth Diox loo nuꞌ, ¿chéꞌ, lìcqueꞌ, mbiꞌ coꞌ lèe Jesús mbli par mdyub xnìi ngudlool, càꞌ? Nuꞌ indxelaꞌsta. Tac nuꞌ nanee leꞌ mbiꞌ coꞌ lèe Jesús nac thìb mbiꞌ coꞌ ndxàp xtol.
\p
\v 25 Mcàb mbiꞌ loo mèna. Ndxab mbiꞌ:
\p ―Tyoxca, lìca; baꞌse neꞌneeden chéꞌ nac mbiꞌ thìb mbiꞌ coꞌ ndxàp xtol, o chéꞌ inacte mbiꞌi. Thidte conꞌ naneen. No ndan cuent cón chenen anon coꞌseꞌ ngóol daa, daa sieu. No nalleꞌ ale ngüiꞌlen.
\p
\v 26 Mbere mèna, mnibdiꞌs mèna loo mbiꞌ tedib vez. Ndxab mèna loo mbiꞌ:
\p ―¿Cón mbli no mbiꞌa lùu? ¿Xá mod mbli mbiꞌ par mdub mbiꞌ xnìi ngudlool par ngüiꞌl nalleꞌ, àꞌ?
\p
\v 27 Mbiꞌ coꞌ ngòc sieua mcàb loo mèna. Ndxab mbiꞌ:
\p ―Na ya guniila loo guꞌ no indyub nzade guꞌ neꞌ neꞌ indli guꞌ cas coꞌ guniin loo guꞌ. ¿Chonon lyaꞌs guꞌ beren tan cuent loo guꞌ tedib vez? ¿Chéꞌ ndlyaꞌs guꞌ gàc guꞌ xinꞌ mtéꞌth mbiꞌ, ne, càꞌ?
\p
\v 28 Per coꞌseꞌ mbìn mèn tataa ndxab mbiꞌ coꞌ ngòc sieu loo mèna, ngocloo mèna no ndxab mèna ngòc nguàal diꞌs loo mbiꞌ:
\p ―Lùu nac xinꞌ mtéꞌth mbiꞌa. Per part cón cheꞌn nuꞌ, nuꞌ nac xinꞌ mtéꞌth Moisés.
\v 29 Nuꞌ nanee leꞌ Diox mdoodiꞌs no Moisés. Per mbiꞌa, neꞌneede nuꞌ pá ned ngroꞌ tee ngroꞌ yáal mbiꞌa.
\p
\v 30 Mcàb mbiꞌa loo mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel. Ndxab mbiꞌa:
\p ―Lìcpeꞌ baꞌi, ale xèe ngüiꞌen no xèe ñaan loo guꞌ tatuaꞌ mbez guꞌ loon no neꞌtaꞌde guꞌ cuent pá ned ngroꞌ tee ngroꞌ yáal mbiꞌa. Per mbiꞌa mbli par mdyub xnìi ngudloon par ngüiꞌen. Ngolo cuent.
\v 31 Na,ꞌ ndaꞌ cuent coꞌ huenlequeꞌ leꞌ Diox indyub nzade no indxònte Diox ro mèn coꞌ ndxàp xtol. Ante ndyub nza Diox no ndxòn Diox ro mèn coꞌ mbez Diox no mèn coꞌ ndli coꞌ nee lezoꞌ Diox.
\v 32 Axta huiz coꞌseꞌ mtlo ngure izlyoꞌ no axta huiz nalze tarte yath no yèn loo izlyoꞌ ngo thìb mbiꞌ coꞌ ndli ndyub xnìi ngudloo thìb mèn coꞌ ngóol sieu.
\v 33 Cheleꞌ mbiꞌa neꞌngroꞌde loo Diox nec thìb conꞌ neꞌgácte mbiꞌ li mbiꞌ, ngobeꞌen.
\p
\v 34 Per coꞌseꞌ mbìn mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel tataa ndxab mbiꞌ coꞌ ngóol sieua loo mèna, sya, ndxàb mèna loo mbiꞌ coꞌ ngóol sieu:
\p ―¿Lùu coꞌ anon ngóol no huax xtol lùu ndlyaꞌs luꞌ nuꞌ, càꞌ? Xexte tee càa ned, byàa. Groꞌ trèꞌ.
\p No ale mzii mchep mèna mbiꞌ. Mbloꞌ mèna mbiꞌ leꞌn sinagog.
\s Trèꞌ ndluꞌ cón cheꞌn mèn coꞌ ncuau yéc no coꞌ ncuau lezoꞌ loo cón cheꞌn Diox.
\p
\v 35 Coꞌseꞌ mbìn Jesús leꞌ mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel mbloꞌ mèna mbiꞌ no mzii mchep mèna mbiꞌ leꞌn sinagog, ngua cuaꞌn Jesús mbiꞌ. Coꞌseꞌ mzyálꞌ Jesús mbiꞌ, ndxab Jesús loo mbiꞌ:
\p ―¿Chéꞌ ndxelaꞌs lùu loo mbiꞌ coꞌ nac xganꞌ Diox, àꞌ?
\p
\v 36 Mcàb mbiꞌ loo Jesús. Ndxab mbiꞌ:
\p ―Tad, gunee Uꞌ loon chó xaꞌ nac xganꞌ Diox par yilazen loo xaꞌ.
\p
\v 37 Mcàb Jesús loo mbiꞌ. Ndxab Jesús:
\p ―Lùu gunèeleꞌ xaꞌa. Daa coꞌ ngue toodiꞌs nol, leque yub daa nac xaꞌa.
\p
\v 38 Sya, yende izlyoꞌ mdub xib mbiꞌ coꞌ ngòc sieua loo Jesús. No mcòoꞌ mbiꞌ yéc mbiꞌ. Ndxab mbiꞌ loo Jesús:
\p ―Ndxelazen leꞌ Uꞌ nac xganꞌ Diox, Tad.
\p
\v 39 Ngoloa, chàa, ngroꞌ diꞌs ro Jesús. Ndxab Jesús loo mbiꞌa:
\p ―Daa ndal loo izlyoꞌ ndxèꞌ par tub rezen cón cheꞌn mèn no par taꞌ mèn cuent xal nac mèn loo izlyoꞌ. No ndalen par lin leꞌ loo ryete mèn coꞌ nac xal mèn sieu loo cón cheꞌn Diox, daa li par tolo tyub xnìi yéc mèn no par tolo tyub xnìi lezoꞌ mèn loo cón cheꞌn Diox. No lin leꞌ mèn coꞌ ndeꞌf diꞌs coꞌ ndli cuent anzeꞌf ndxác mèn cón cheꞌn Diox, mèna gàc xal mèn sieu loo cón cheꞌn Diox.
\p
\v 40 Per ndxep mèn farise coꞌ beꞌ mbyanꞌ con Jesús mbìn diꞌs coꞌ ndxab Jesús. Coꞌseꞌ mbìn mèna diꞌs coꞌ ndxab Jesús, ndxab mèna loo Jesús:
\p ―Tlate ñeel no nuꞌ nac xal mèn sieu, ¿léꞌ?
\p
\v 41 Sya, mcàb Jesús loo mèna. Ndxab Jesús:
\p ―Cheleꞌ guꞌ ngàc xal mèn sieu loo cón cheꞌn Diox, neꞌngàpte guꞌ xtol guꞌ loo Diox. Per com leꞌ guꞌ mbez huen huen ndaꞌ guꞌ cuent cón cheꞌn Diox, ¿léꞌ?, cona, ngue bezen loo guꞌ, por derech, ndxàp guꞌ xtol guꞌ loo Diox.
\c 10
\s Jesús mtetac loo mèn cón cheꞌn Diox, no cón cheꞌn Jesús, xal thìb corral coꞌteꞌ ndxòo no ndryoꞌ mbacxilꞌ.
\p
\v 1 Jesús ndxab loo mèn:
\p ―Nde tetaquen thìb diꞌs loo guꞌ coꞌ nac cón chenen xal thìb pastor coꞌ ndyoo ner loo mèn coꞌ ndyal ndxòo loo cón cheꞌn Diox. Guꞌ nonqueꞌ no ndaꞌqueꞌ guꞌ cuent leꞌ mèn coꞌ indxòode thìb lìte ro corral mbacxilꞌ xal thìb pastor, per ndxeꞌlequeꞌ, ndxòo mèna thìb lad xís corral, mèna nac huanꞌ no xexte ndli huanꞌ mèna.
\v 2 Per mbiꞌ coꞌ ndxòo thìb lìte coꞌteꞌ ndxòo no coꞌteꞌ ndryoꞌ mbacxilꞌ corral, mbiꞌa nac pastor coꞌ nquenap no coꞌ nqueno mbacxilꞌ.
\v 3 Nde nxonꞌ, mbiꞌ coꞌ nquenap ro puert corral na, mbiꞌa nxalꞌ ro puert corral par yòo no ryoꞌ pastor. Leꞌ mbacxilꞌ coꞌ nzo corral na, luega ndxòn ro pastor no ndxòn xtiꞌs pastor no ndlibeꞌ mbacxilꞌ pastor. No ndub lèe pastor lèe thìb thìb mbacxilꞌ. No ngoꞌ pastor mbacxilꞌ leꞌn corral.
\v 4 Coꞌseꞌ ndxelo ngoꞌ pastor ryete mbacxilꞌ leꞌn corral, ndyoo ner pastor loo mbacxilꞌ. Leꞌ mbacxilꞌ na, thidte nqueltàa. Ndyoo nque mbacxilꞌ xís pastor tac ndxòn mbacxilꞌ ro pastor.
\v 5 Per cheleꞌ thìb mbiꞌ coꞌ nac mèn coꞌ indlibeꞌde mbacxilꞌ tyoo ner loo mbacxilꞌ, mbacxilꞌ neꞌtyoo nquede xís mbiꞌ. Ndxeꞌlequeꞌ, xyonꞌ mbacxilꞌ loo mbiꞌ tac indxònte mbacxilꞌ ro mbiꞌ.
\p
\v 6 Taandxèꞌ mtetac Jesús diꞌs loo mèn. Per mèna neꞌndaꞌde cuent no axta neꞌ neꞌ ñee mèna cón nee diꞌs coꞌ ndxab Jesús loo mèna.
\s Trè ndluꞌ leꞌ Jesús nac xal thìb pastor ndac.
\p
\v 7 Leꞌ sya, mbere Jesús, ndxab Jesús loo mèna tedib vez:
\p ―Lìcpeꞌ baꞌi, na bere tetac tedib diꞌs loo guꞌ coꞌ nac cón chenen no coꞌ nac cón cheꞌn Diox: Daa nac xal thìb puert cheꞌn thìb corral coꞌteꞌ ndxòo no ndryoꞌ mbacxilꞌ.
\v 8 Ryete mèn coꞌ mbiꞌth luꞌ tedib xleyꞌ coꞌ nac cheꞌn Diox ndooreꞌ galen, mèna ngòc xal huanꞌ loo cón cheꞌn Diox. Mbli mèna loo hues xtàa mèna loo cón cheꞌn Diox xal ndli huanꞌ huanꞌ. Per mèn coꞌ nac xal mbacxilꞌpeꞌ daa, mèna neꞌngònte diꞌs ro mèn coꞌ mbiꞌth nerla par ngli mèna cas loo mèna.
\v 9 Daa nac xal thìb puert cheꞌn thìb corral. Chol mèn coꞌ ndyal yòo loo cón chenen xal ndxòo no ndryoꞌ mbacxilꞌ corral, mèna lyáꞌ loo conꞌ ryes. Loon nac mèna xal mbacxilꞌ coꞌ ndxòo no ndryoꞌ corral. Quenapen mèna xal coꞌseꞌ nqueno no nquenap thìb pastor mbacxilꞌ ned nzi tee yuhua mbacxilꞌ.
\p
\v 10 Mèn coꞌ nac xal huanꞌ loo cón cheꞌn Diox, ante ndxiꞌth mèna par coꞌ xàꞌ mèna mèn loo cón cheꞌn Diox xal coꞌseꞌ ndli huanꞌ huanꞌ cheꞌn mèn no xal coꞌseꞌ ndxuthxùꞌ mèn xtàa mèn no xal coꞌseꞌ ntelux mèn xtàa mèn tant nayiꞌ mèn. Per ndxeꞌlequeꞌ, daa ndal par lin que no mèn thìb yalnaban ndac axta plóthe loo cón cheꞌn Diox.
\v 11 Por cona, ngue niin loo guꞌ: Daa nac xal thìb pastor ndac. Por nac daa xal thìb pastor ndac, ale gath daa por cón cheꞌn mèn coꞌ ndyal yòo loo cón chenen, mèn, coꞌ nee diꞌs, nac xal mbacxilꞌ cheꞌn pastor.
\v 12 Lomisqueꞌ ne, thìb xaꞌ coꞌ ndxax ncàa coꞌ nqueno no coꞌ nquenap mbacxilꞌ, xaꞌa ndxax ncàa por inacte xaꞌ pastorpeꞌ cheꞌn mbacxilꞌ. No inacte mbacxilꞌ mbacxilꞌpeꞌ xaꞌ. Tac coꞌseꞌ ñèe xaꞌ nde mbée, ndxeꞌlequeꞌ, nxyonꞌ xaꞌ no ndláꞌ xaꞌ mbacxilꞌ. Leꞌ sya, ndyac lezoꞌ mbée, ndyen mbée mbacxilꞌ. No ndli mbée par ndryeꞌs mbacxilꞌ pál.
\v 13 Per xaꞌ coꞌ ndoo lìte ndxax ncàa coꞌseꞌ ñèe xaꞌ nde mbée loo mbacxilꞌ, xaꞌa nxyonꞌ tac nac xaꞌ thìb xaꞌ coꞌ alithe ndxax ncàa. Indyóode xaꞌ no neꞌ neꞌ indlyat lezoꞌ xaꞌ ñèe xaꞌ mbacxilꞌ coꞌ mbláꞌ xaꞌ loo mbée.
\p
\v 14–15 Per ndxeꞌlequeꞌ, daa nac xal thìb pastor ndac. Xalqueꞌ ndlibeꞌ xuden daa no ndaꞌ xuden cuent cón chenen, daa, ne, ndlibeꞌ xuden no ndan cuent xal nac xuden. Lomisqueꞌ mod ne, ndliben no ndan cuent cón cheꞌn mèn coꞌ ndyal ndxòo loo cón chenen, mèn coꞌ nac xal mbacxilꞌpeꞌ daa. Por cona, tan yalnaban daa loo yalguth por cón cheꞌn mèn coꞌ nac xal mbacxilꞌpeꞌ daa.
\p
\v 16 Tolo mtetac Jesús diꞌs loo mèn. Ndxab Jesús:
\p ―Ngue non taamas mèn coꞌ nac xal mbacxilꞌ, mèn coꞌ inacte mèn nación Israel, coꞌ nee diꞌs, nac tedib corral mbacxilꞌ. No naquinqueꞌ lin par thidte queltàa mèna loo cón chenen par yòo mèna loo cón chenen. Leꞌ sya, mèn coꞌ nac xal mbacxilꞌ coꞌ inacte cheꞌn corral ndxèꞌ, mèna gòn ron no tyubdiꞌs mèna conꞌ gaben loo mèna. Leꞌ sya, thidte gàc mèn coꞌ nac xal mbacxilꞌ cheꞌn tedib corrala con mèn coꞌ nac xal mbacxilꞌ cheꞌn corral ndxèꞌ con thidte xaꞌ coꞌ nac pastor coꞌ nquenap no coꞌ nqueno mbacxilꞌa.
\p
\v 17 Anzeꞌf nqueꞌ lezoꞌ xuden ñèe xuden daa tac daa ta lugar quée yalguth loon. No yiloa beren, ryo xban daa tedib vez.
\v 18 Yende chó mèn gác guth daa. Ndxeꞌlequeꞌ, leque daa li par quée yalguth loon xal nee lezon. Na ndxàp conꞌ laꞌs niin no ndxàpen conꞌ laꞌs yan par leque daa ñibeꞌ par gath daa. No ndxàpen conꞌ laꞌs niin no laꞌs yan par leque daa ñibeꞌ par beren, ryo xban daa tedib vez. Conꞌa nac coꞌ mnibeꞌ xuden Diox loon par lin.
\p
\v 19 Coꞌseꞌ mbìn mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel tataa ndxab Jesús loo mèn, mbere mèna, ngure yoo diꞌs mèna tedib vez. No ale por conaꞌte mbli ngòc mèna chop ned mèn.
\v 20 No ale huax mèn mbez loo xtàa mèn:
\p ―Cheleꞌ guꞌ ndli cuent thìb xpii yeꞌrsinꞌ nzo loo mbiꞌ no nquée mbii yéc mbiꞌ, ¿chonon ndaꞌ guꞌ lugar ndxòn guꞌ diꞌs coꞌ mbez mbiꞌ loo guꞌ, sya?
\p
\v 21 Per taandxep mèn mbez:
\p ―Yende chó mèn nzo coꞌ nzo xpii yeꞌrsinꞌ loo coꞌ gác tyoodiꞌs tatuaꞌ. ¿Chéꞌ ndli guꞌ cuent leꞌ thìb mèn coꞌ nzo xpii yeꞌrsinꞌ loo li par huiꞌ thìb mèn sieu, càꞌ? Yende xàa.
\s Mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel mcà diꞌs cón cheꞌn Jesús no mtèꞌb mèna Jesús.
\p
\v 22 Coꞌseꞌ mbli mèn ciuda Jerusalén thìb lni, lni coꞌ mbli mèn par mteꞌ lezoꞌ mèn coꞌseꞌ mbli mèna stren templ, leꞌxqueꞌ tiempa ngòc tiemp xìlꞌ.
\v 23 Leꞌ Jesús na, nda ndyeꞌth, ngue tee taꞌ vuelt leꞌn templ coꞌteꞌ ndub portal coꞌ mbez mèn portal Salomón.
\v 24 Láth nda ndyeꞌth Jesús ngue tee go Jesús vuelt leꞌn templ, mtauꞌ mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo Jesús. Ndxab mèna loo Jesús:
\p ―¿Axta pól yilo lil par ya neꞌgànte lezoꞌ nuꞌ cón cheꞌnl no par taꞌ nuꞌ cuent no ñee nuꞌ chéꞌ, lìcqueꞌ, nac lùu Crist o chéꞌ ilìcta? Per nalleꞌ ndlyaꞌs nuꞌ ñeel loo nuꞌ ¿chéꞌ, lìcqueꞌ, nac lùu Crist o chéꞌ antaa nzoꞌf diꞌs, àꞌ? Guneei loo nuꞌ loo xnaa thidtene par yilaꞌs nuꞌ cón cheꞌnl.
\p
\v 25 Jesús mcàb loo mèna. Ndxab Jesús:
\p ―Na guniila loo guꞌ. Neꞌngalaꞌste guꞌ conꞌ guniin loo guꞌ. Ryethe conꞌ coꞌ mblin xal mnibeꞌ xuden Diox par lina, leque conꞌa ndluꞌ cón chenen par ñee guꞌ no taꞌ guꞌ cuent chó nac daa.
\v 26 Per ndxeꞌlequeꞌ, guꞌ indxelaꞌste loo conꞌ ndlin tac inacte guꞌ mèn, coꞌ nee diꞌs, nac mbacxilꞌpeꞌ daa xal guniilena loo guꞌ pezea.
\v 27 Leꞌ mèn coꞌ ndyal yòo loo cón cheꞌn mèn coꞌ nac xal mbacxilꞌpeꞌ daa, mèna ndxòn diꞌs ron. Daa ndlibe mèna. No huen huen ndan cuent cón cheꞌn mèna. Mèna ndliqueꞌ coꞌ ñibeꞌen loo mèna.
\v 28 Leꞌ sya, daa liqueꞌ par yòo ban no mèna Diox thidtene yiloa. No thidtenequeꞌ neꞌcoꞌ xàꞌde Diox mèna no neꞌcoꞌ toode Diox mèna loo Diox yiloa. Yende chó mèn coꞌ mèna loo cón chenen.
\v 29 Xuden Diox coꞌ mbli par mdyal mèn yòo mèn coꞌ nac xal mbacxilꞌpeꞌ daa loo cón chenen, xuden Diox nac más xaꞌ roo xaꞌ xèn loo alux conꞌ. Nec thìb mèn neꞌgácte coꞌ mèn coꞌ nac xal mbacxilꞌpeꞌ daa loo cón cheꞌn xuden Diox.
\v 30 Daa ngue nii loo guꞌ: Ryop nuꞌ xuden Diox thidte nac nuꞌ.
\p
\v 31 Leꞌ sya, mbere mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel, mxen mèna quèe par gath quèe mèna Jesús tedib vez.
\v 32 Láth mblyaꞌs mèna nden mèna quèe par gath quèe mèna Jesús, ndxab Jesús loo mèna:
\p ―Nde teeleꞌ ndlin huax conꞌ ndac loo guꞌ coꞌ nac conꞌ coꞌ mbli xuden Diox par ndxàpen conꞌ laꞌs niin no laꞌs yan par lina. ¿Por chó cón cheꞌn conꞌ ndac coꞌ mblin loo guꞌa ndlyaꞌs guꞌ gath quèe guꞌ daa, sya?
\p
\v 33 Sya, mcàb mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo Jesús. Ndxab mèna:
\p ―Neꞌgath quèede nuꞌ lùu por cón cheꞌn huax conꞌ ndac coꞌ ndlil. Ndxeꞌlequeꞌ, nuꞌ gath quèe lùu tac nazab nac coꞌ ndlil. Ale ñii yèel ñii tìil cón cheꞌn Diox. Nuꞌ ngüiꞌ nacl thìb mbiꞌ xalqueꞌ nuꞌ. No ale, ndxàcl xal Diox loo nuꞌ.
\p
\v 34 Sya, ndxab Jesús loo mèna:
\p ―Loo libr coꞌ nac ley coꞌ ngue no guꞌ ndub diꞌs coꞌ mbez mèn ndxab Diox. Mbez diꞌsa: Ryete guꞌ nac mèn coꞌ ndxàal li chol mèn cas loo xal li mèn cas loo Diox.
\v 35 Cona, daa ngue nii loo guꞌ: Naꞌ nanee leꞌ diꞌs coꞌ ndub loo libr coꞌ nac xtiꞌs Diox yende mod quith no mèn. No yende mod cà diꞌs mèn diꞌsa. Yub Diox mblo lèe ndxèꞌ loo mèn coꞌ ndxòn diꞌs coꞌ ndxab Diox leꞌ mèna nac xalqueꞌ Diox.
\v 36 Cheleꞌ Diox mbloꞌ xàꞌ daa par mtelꞌ Diox daa ndalen loo izlyoꞌ, ¿xá mod gàc ñee guꞌ loon leꞌ daa nazab ñii yèe ñii tìi cón cheꞌn Diox tac guniilen loo guꞌ leꞌ daa nac xganꞌ Diox, sya?
\v 37 Cheleꞌ daa indlide xal ndli xuden Diox, neꞌyilaꞌste guꞌ loon.
\v 38 Per cheleꞌ daa ngue liqueꞌ xal ndli xuden Diox, mastaleꞌ indxelaꞌste guꞌ loon, golaꞌs guꞌ loo zinꞌ coꞌ ndlin par ñee guꞌ no yilaꞌs guꞌ leꞌ xuden Diox nzo loon no nzoquen loo xuden Diox.
\p
\v 39 Leꞌ sya, mbere mèna, mblyaꞌs mèna ndenxùꞌ mèna Jesús tedib vez. Per ale, chàa, mdyonꞌ Jesús loo mèna.
\p
\v 40 Sya, mxen Jesús ned. Mbere Jesús, nda Jesús par ned ro yóꞌbeꞌ Jordán coꞌ nac ned ndlyen huiz. Ngo Jesús pláte huiz coꞌteꞌ mbli Juàn bautizar mèn ndooreꞌ yiꞌth Jesús.
\v 41 Huax mèn nda nque xís Jesús par neda. Mbez mèn no ndyoodiꞌs mèn:
\p ―Lìcpeꞌ baꞌi, cara, mastaleꞌ neꞌngluꞌde Juàn Bautist no neꞌnglide Juàn Bautist nec thìb yalguzyeꞌ loo mèn, per ryete diꞌs coꞌ gunee Juàn cón cheꞌn mbiꞌ baꞌ lìcqueꞌ ngòc diꞌs coꞌ gunii Juàn loo mèn.
\p
\v 42 Por cona, huax mèn ngolaꞌs loo Jesús coꞌteꞌ ngo Jesús.
\c 11
\s Trèꞌ ndluꞌ xá mod nguth thìb mbiꞌ coꞌ ngroꞌ lèe Lars.
\p
\v 1 Leꞌn huiza, mxac len thìb mbiꞌ coꞌ ngroꞌ lèe Lars. Mbiꞌ ngòc mbiꞌ yèez Betañ. Mbiꞌa mque no chop ftaꞌn coꞌ ngroꞌ lèe Mari no Mart coꞌ ngòc leque mèn yèeza.
\v 2 Pues Mari coꞌ ngòc ftaꞌn Lars coꞌ mxac lena, Maria ngòc xaꞌgot coꞌ mblath thìb loo aceit coꞌ anzeꞌf naziꞌ ndlyaꞌ nii Tad Jesús. No ngoloa mtecuiꞌs Mari nii Jesús con yis yéc Mari.
\v 3 Por mxac len Lars, mtelꞌ ryop bél myenꞌ ftaꞌn Lars mèn coꞌ ngua loo Jesús. Ndxab mèn coꞌ ngua mandada loo Jesús:
\p ―Tad, nuꞌ nde li avis loo Uꞌ leꞌ amiu Uꞌ, Lars, ndyac len, cara.
\p
\v 4 Coꞌseꞌ mbìn Jesús diꞌsa, ndxab Jesús loo mèn coꞌ ngua mandada:
\p ―Yilíiz coꞌ ndyac Larsa, inacte yilíiza coꞌ li par gathpeꞌ Lars. Ndxeꞌlequeꞌ, leꞌi nac par yath yèn cón cheꞌn conꞌ roo conꞌ xèn cheꞌn Diox loo mèn no par ryo xoꞌf loo mèn cón cheꞌn conꞌ roo conꞌ xèn coꞌ nac cón chenen loo mèn, daa coꞌ nac xganꞌ Diox.
\p
\v 5 Mastaleꞌ nqueꞌ lezoꞌ Jesús ñèe Jesús Mart no Mari, bél Mart, no Lars,
\v 6 coꞌseꞌ mbìn Jesús diꞌs coꞌ ndxab mèn coꞌ ngua mandad leꞌ Lars ndyac len, asembli Jesús, neꞌngade Jesús luega xal mblyaꞌs ryop bél myenꞌ ftanꞌ Lars. Mbyanꞌ Jesús coꞌteꞌ ngo Jesús taachop huiz.
\v 7 Ngolo nguriꞌth chop huiza, ndxab Jesús loo myenꞌ xinꞌ mtéꞌth Jesús:
\p ―Nda naꞌ par ned leꞌn yèez coꞌ nac yèezyaꞌ cheꞌn làaz mèn jude tedib vez, cara.
\p
\v 8 Per myenꞌ xinꞌ mtéꞌth Jesús ndxab loo Jesús:
\p ―Maistr, pente ndxàc plá huiz mblyaꞌs mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel mcuaꞌn mèna mod nguth mèna Uꞌ con quèe. No ale ¿ndlyaꞌs Uꞌ ya Uꞌ par neda tedib vez, càꞌ?
\p
\v 9 Mtetac Jesús thìb diꞌs loo myenꞌ xinꞌ mtéꞌth Jesús. Ndxab Jesús:
\p ―Nde niin thìb conꞌ loo guꞌ: ¿Chéꞌ ilìcte siꞌ fchop hor nac thìb huiz, càꞌ? Huiꞌ guꞌ nexa. Cheleꞌ thìb mèn ndyee ndxáal ze, mèna indxeziꞌfte no indxegaꞌste mèna ned nda mèna tac xnìi huiz ntenìi loo mèna ned nda mèna.
\v 10 Per mèn coꞌ tyee nii nacuau, mèna ndxeziꞌfqueꞌ no ndxegaꞌsqueꞌ mèn loo conꞌ tac yende xnìi coꞌ ntenìi loo mèna ned nda mèna.
\p
\v 11 Ngolo tataa ndxab Jesús diꞌs loo myenꞌ, ndxab Jesús loo myenꞌ:
\p ―Lars coꞌ ndxàc amiu naꞌ naxyàt. Per nalleꞌ daa ga loꞌ mcalꞌ loo Lars.
\p
\v 12 Sya, ndxab myenꞌ xinꞌ mtéꞌth Jesús loo Jesús:
\p ―Tad, cheleꞌ Lars naxyàt, peser más ndoo yath ndac Lars, ¿léꞌ?
\p
\v 13 Diꞌs coꞌ ndxab Jesús loo myenꞌ nee diꞌs leꞌ Lars nguthleꞌ. Per myenꞌ xinꞌ mtéꞌth Jesús mbli xtùuz leꞌ Jesús ngue yab loo myenꞌ leꞌ Lars naxyàt tac ndoo yath ndac Lars.
\v 14 Leꞌ sya, clar mdaꞌ Jesús cuent loo myenꞌ. Ndxab Jesús:
\p ―Lars nguthleꞌ.
\v 15 Per conꞌ coꞌ más ndyac lezon tac yende daa tya. Más huen tataa ngòca loo Lars por cón cheꞌn guꞌ par huiꞌ guꞌ conꞌ lin loo Lars par tataa mod más yilaꞌs guꞌ loon. Yaꞌ guꞌ nda naꞌ par ñèe naꞌ máa thebol Lars.
\p
\v 16 Sya, ndxab Max, coꞌ mbez mèn Cuach, loo myenꞌ xtàa xinꞌ mtéꞌth Max:
\p ―Nda no naꞌ Jesús, yey, par gath no naꞌ Jesús tya.
\s Trèꞌ ndluꞌ leꞌ Jesús ngo xban mèn. No ndli Jesús par yòo ban no mèn Diox thidtene.
\p
\v 17 Coꞌseꞌ mzin Jesús con myenꞌ liz thebol Lars, ndxàcleꞌ thap huiz ngua caꞌs mèn thebol Lars.
\v 18 Nde nxonꞌ, gaxte tya nziriꞌ yèez Betañꞌ par ciuda Jerusalén. Nziriꞌqueꞌ yèez Betañ com chop mil narol metr, peser, loo ciuda Jerusalén.
\v 19 Leꞌpeꞌ sya, huax mèn yèezyaꞌ cheꞌn làaz mèn jude mbiꞌth too naa no mbiꞌth tegán mèn lezoꞌ Mart no Mari por cón cheꞌn thebol Lars.
\v 20 Coꞌseꞌ mbìn Mart leꞌ Jesús ndeleꞌ, ngroꞌ Mart, ngua càa ned Mart Jesús. Leꞌ Mari na, mbyanꞌ no rye mèna yòo.
\v 21 Lueg ndxab Mart loo Jesús:
\p ―Tad, cheleꞌ Uꞌ ngo no nuꞌ trèꞌ, ngobeꞌen neꞌngathte ftanen.
\v 22 Per nalleꞌ naneequen leꞌ Diox li ryete conꞌ coꞌ ñaꞌb Uꞌ loo Diox.
\p
\v 23 Ndxab Jesús loo Mart:
\p ―Ftaꞌnl ryo xban, ey.
\p
\v 24 Mart ndxab loo Jesús:
\p ―Aa, Tad, daa naneequeꞌ leꞌ ftanen ryo xban. Per axta coꞌseꞌ gàc lult tiemp loo izlyoꞌ coꞌseꞌ ryo xban mèn nguth axta syareꞌ ryo xban ftanen, ndyaquen.
\p
\v 25 Jesús ndxab loo Mart:
\p ―Daa nac xaꞌ coꞌ ngo xban mèn. No nac daa xaꞌ coꞌ ndli par yòo ban no mèn Diox thidtene. Leꞌ mèn coꞌ ndxelaꞌs loon, mastaleꞌ gath mèn, daa li leꞌ mèna yòo ban no Diox thidtene yiloa.
\v 26 Ryete mèn coꞌ naban nalleꞌ no ndxelaꞌs mèn loon, coꞌseꞌ gath mèna, mèna yòo ban no Diox. Neꞌryo xàꞌde mèna loo Diox thidtene. ¿Chéꞌ ndxelaꞌsl diꞌs coꞌ ngue niin lool ndxèꞌ, Mart?
\p
\v 27 Mart ndxab loo Jesús:
\p ―Aa, Tad, ndxelasquen diꞌs coꞌ mbez Uꞌ. No ndxelasquen leꞌ Uꞌ nac Crist coꞌ nac xganꞌpeꞌ Diox coꞌ ndxath yiꞌth loo izlyoꞌ.
\s Trèꞌ ndluꞌ leꞌ Jesús mbínꞌ ro báꞌ cheꞌn thebol Lars.
\p
\v 28 Ngolo ndxab Mart diꞌsa, nda chez Mart Mari, bél Mart. Xexte ndxab Mart loo Mari:
\p ―Maistr mzinleꞌ trèꞌ. No mtelꞌ Maistr daa par ndal xinl. Ya neel cón ndlyaꞌs Maistr.
\p
\v 29 Texal mbìn Mari diꞌs coꞌ ndxab Mart, yende izlyoꞌ, ngo too ndeꞌf Mari. Ngua Mari coꞌteꞌ nzo Jesús.
\v 30 Coꞌseꞌ ngua Mari coꞌteꞌ nzo Jesús, tarte yòo Jesús leꞌn yèez Betañ. Tatabeꞌ nzo Jesús coꞌteꞌ ngua toodiꞌs no Mart Jesús.
\v 31 Coꞌseꞌ gunèe mèn yèezyaꞌ cheꞌn làaz mèn jude coꞌ ngo no Mari no coꞌ nzi tegán lezoꞌ Mari liz Mari yende izlyoꞌ ngo too ndéꞌf Mari no ngroꞌ Mari nda Mari, mdoo nque mèna xís Mari. Tac mbli mèna xtùuz peser nda yónꞌ Mari ro yeꞌr coꞌteꞌ mblo mèn thebol Lars.
\p
\v 32 Per texal mzin Mari coꞌteꞌ nzo Jesús, mdub xib Mari no mcotloo Mari xanꞌ nii Jesús. Ndxab Mari loo Jesús:
\p ―Tad, cheleꞌ Uꞌ ngo trèꞌ, neꞌngathte ftanen, ngobeꞌen.
\p
\v 33 Coꞌseꞌ gunèe Jesús ndxónꞌ Mari no ndxónꞌ rye mèn yèezyaꞌ cheꞌn làaz mèn jude coꞌ mzin no Mari loo Jesús, anzeꞌf mxi yéc no mxi lezoꞌ Jesús. No mbyàa mbyeꞌth lezoꞌ Jesús.
\v 34 Látha, ndxab Jesús loo mèna:
\p ―¿Pá mer mblo guꞌ thebol, àꞌ?
\p Sya, ndxab ryop bél myenꞌ loo Jesús:
\p ―Tad, yaꞌ Uꞌ nda naꞌ. Sya, huiꞌ Uꞌ pá mblo nuꞌ thebol.
\p
\v 35 Sya, ale no Jesús mbínꞌ.
\v 36 Coꞌseꞌ gunèe mèn gulàaz cheꞌn làaz mèn jude mbínꞌ Jesús, ndxab mèna loo xtàa mèna: Huiꞌ guꞌ nexa. Susqueꞌ mqueꞌ lezoꞌ Jesús ñèe Jesús Lars. Ale no Jesús ndxónꞌ.
\p
\v 37 Sya, ndxab plá mèna loo xtàa mèn:
\p ―Mbiꞌ baꞌ mbli par ngüiꞌ mbiꞌ sieua. ¿Xá nee guꞌ? ¿Chéꞌ neꞌngácte mbiꞌ baꞌ ngli mbiꞌ par neꞌngathte Lars cheleꞌ mbiꞌ ngo trèꞌ, càꞌ?
\s Jesús mblo xban thebol Lars loo mèn.
\p
\v 38 Mbere Jesús, mbyàa mbyeꞌth lezoꞌ Jesús. No mxi yéc no mxi lezoꞌ Jesús tedib vez. Mbii gax Jesús ro yeꞌra. Yeꞌra ngòc thìb quèe lyoꞌ. Mtauꞌ mèn ro yeꞌra con thìb quèe laj.
\v 39 Sya, ndxab Jesús loo mèn coꞌ nziriꞌa:
\p ―Fteche guꞌ quèe ro yeꞌr baꞌ.
\p Per Mart coꞌ ngòc ftaꞌn thebol Lars ndooleꞌ ndxab loo Jesús:
\p ―Tad, ya ndlyaꞌleꞌ thebol, ngobeꞌen, tac ndxàcleꞌ thap huiz nguth thebol.
\p
\v 40 Jesús ndxab loo Mart:
\p ―¿Chéꞌ neꞌngniiden lool gozea cheleꞌ lùu yilaꞌs loon no loo conꞌ lin, ñèel conꞌ roo no conꞌ xèn cheꞌn Diox coꞌ lin loo Lars, càꞌ?
\p
\v 41 Sya, mteche mèn quèe coꞌ ndoo nauꞌ ro yeꞌr coꞌteꞌ mblo mèn thebol Lars. Ngoloa, mbuiꞌ Jesús loo béꞌ. Ndxab Jesús:
\p ―Pay, Diox quix Uꞌ tac Uꞌ mbìnqueꞌ diꞌs coꞌ guniin loo Uꞌ.
\v 42 Daa naneequeꞌ leꞌ Uꞌ ndxònqueꞌ coꞌ mbezen loo Uꞌ. Per por cón cheꞌn rye mènléyꞌ coꞌ nziriꞌ dib vuelt loon nalleꞌ, taandxèꞌ ngue niin loo Uꞌ par yilaꞌs mèn leꞌ Uꞌ mtelꞌ daa.
\p
\v 43 Ngolo tataa ndxab Jesús loo Diox xud Jesús, cabii ndxab Jesús:
\p ―Lars, groꞌ coꞌteꞌ nzol baꞌ, ey.
\p
\v 44 Sya, Lars coꞌ nguth ngroꞌ too ro yeꞌra. Ale nabix larꞌ yaꞌ Lars no nii Lars. Nzo thìb panid loo Lars, ne. Jesús ndxab loo mèna:
\p ―Fteche guꞌ larꞌ coꞌ nabix yaꞌ Lars no nii Lars no loo Lars. No blaꞌ guꞌ bii Lars.
\s Mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel thidte ngòc. No mbli nèe mèna lezoꞌ mèna par guth mèna Jesús.
\r (Mt. 26.1–5; Mr. 14.1–2; Lc. 22.1–2)
\p
\v 45 Por cón cheꞌn yalguzyeꞌ coꞌ mbli Jesús loo thebol Lars, anzeꞌf thìb mèn yèezyaꞌ cheꞌn làaz mèn jude coꞌ mbiꞌth too naa Mari ngolaꞌs loo Jesús coꞌseꞌ gunèe mèna conꞌ mbli Jesús loo thebol Lars.
\v 46 Per plá mèn coꞌ nac leque mèn coꞌ ngua too naa Maria ngua taꞌ cuent loo mèn xleyꞌ farise cón cheꞌn conꞌ mbli Jesús loo thebol Lars.
\v 47 Sya, mèn xleyꞌ farise no mèn coꞌ ngòc jef cheꞌn nguleyꞌ coꞌ más ñibeꞌ loo nguleyꞌ, mèna mqueltàa con rye mèn coꞌ ñibeꞌ, no coꞌ ndyoo ner, no coꞌ ndyoo naa loo xleyꞌ cheꞌn mèn nación Israel. Ndxab mèna loo xtàa mèna:
\p ―¿Cón li naꞌ, cara? Naꞌ nanee leꞌ mbiꞌa anzeꞌf thìb yalguzyeꞌ ngue li.
\v 48 Cheleꞌ naꞌ laꞌ tolo li mbiꞌ yalguzyeꞌ coꞌ ngue li mbiꞌ, sya, ryete mèn nación naꞌ yilaꞌs loo mbiꞌ no yòo mèn loo cón cheꞌn mbiꞌ. Neꞌ yiloa mèn coꞌ nac gobiern coꞌ ndub ciuda Rom telꞌ solndad leꞌn nación naꞌ par telux solndad templ naꞌ no nación naꞌ.
\p
\v 49 Per làth rye mèna ngo thìb mbiꞌ coꞌ ngroꞌ lèe Caifás. Caifasa ngòc jef cheꞌn nguleyꞌ coꞌ más mnibeꞌ loo nguleyꞌ línꞌa. Ndxab Caifás loo mèn coꞌ mqueltàaa:
\p ―Yende conꞌ nanee guꞌ no yende conꞌ non guꞌ, yey.
\v 50 Neꞌ neꞌ taꞌ guꞌ cuent cón nac conꞌ más huen par naꞌ. Más huen gàca gath thidte mbiꞌ lugar de lyux ryete mèn nación naꞌ. No por gath thidte mbiꞌa neꞌlyuxte mèn leꞌn dib nación naꞌ.
\p
\v 51 Per diꞌs coꞌ gunii Caifasa neꞌngàcte diꞌs coꞌ angmbyeꞌth yéc Caifás par gunii Caifás diꞌsa. Ndxeꞌlequeꞌ, por ngòc Caifás jef cheꞌn nguleyꞌ coꞌ más mnibeꞌ loo nguleyꞌ línꞌa, conꞌa mbli Diox tataa mdeꞌth Caifás leꞌ Jesús gath lugar de lyux mèn leꞌn dib nación Israel.
\v 52 No iante por mèn nación Israel gath Jesús. Ndxeꞌlequeꞌ, Jesús gath por cón cheꞌn rye mèn coꞌ nac xinꞌ Diox coꞌ nzi tee reꞌs leꞌn chol nación loo izlyoꞌ par thidte queltàa mèna loo cón cheꞌn Jesús.
\v 53 Por cona, desde huiza ryete mèn coꞌ ñibeꞌ, no coꞌ ndyoo ner, no cooꞌ ndyoo naa loo mèn nación Israel thidte ngòc par mblobeꞌ no mtoxcuaꞌ mèna par guthxùꞌ mèna Jesús.
\p
\v 54 Por cona, ya neꞌntolode nque tee Jesús loo xnaa làth mèn yèezyaꞌ cheꞌn làaz mèn jude. Ndxeꞌlequeꞌ, mbii Jesús tya. Nda Jesús thìb lugar coꞌteꞌ nagán coꞌ nziriꞌ gax par ya Jesús thìb yèez coꞌ ngroꞌ lèe Efraín. Tya ngo Jesús con myenꞌ xinꞌ mtéꞌth Jesús ndxep tiemp.
\p
\v 55 Leꞌxqueꞌ leꞌn huiza, pláte huiz ndoo gáal lni pasc cheꞌn mèn nación Israel. Nde nxonꞌ, huax mèn cheꞌn dib nación Israel nde lni leꞌn ciuda Jerusalén par tlo li mèna costumbr coꞌ ndxàp mèna par yòo cuent yumbìi mèna loo xleyꞌ mèna ndooreꞌ gáal lni pasca.
\v 56 Làth xtauꞌa, mtlo chol mèn, mcuaꞌn mèn Jesús. No láth nzo mèn leꞌn templ, mnibdiꞌs mèn loo xtàa mèn:
\p ―¿Chéꞌ ndyac guꞌ chop diꞌs yiꞌth Jesús lni, léꞌ?
\p
\v 57 Per mèn xleyꞌ farise no mèn coꞌ ngòc jef cheꞌn nguleyꞌ coꞌ más ñibeꞌ loo rye nguleyꞌ, mèna mnibeꞌ loo rye mèn coꞌ nde lni cheleꞌ chó mèn non no nanee mèn pá nzo Jesús, taꞌ mèna cuent loo mèn xleyꞌ farise no loo mèn coꞌ nac jef cheꞌn nguleyꞌ coꞌ más ñibeꞌ loo rye nguleyꞌ par ya tenxùꞌ mèna Jesús xal thìb pres.
\c 12
\s Trèꞌ ndluꞌ leꞌ thìb xaꞌgot ngua tà aceit perfum nii Jesús.
\r (Mt. 26.6–13; Mr. 14.3–9)
\p
\v 1 Taaxop huiz ndooreꞌ gáal lni cheꞌn pasc, Jesús ngua yèez Betañ coꞌteꞌ ngòc làaz Lars, Lars coꞌ nguth no coꞌ mblo xban Jesús làth mèn nguth.
\v 2 Mèn guliz Lars mbli nab thìb rsè par hua Jesús, coꞌ nee diꞌs, ngue li mèn conꞌ guryath no conꞌ guryèn loo Jesús. Leꞌ Mart ftaꞌn Lars na, mtlo mbli mandad loo mes. Nde nxonꞌ, note Lars ngòo làth mèn coꞌ ngure loo mes par nduhua rsè no Jesús mèna.
\v 3 Látha, Mari, bél Mart, ngua xi thìb med litr aceit perfum cheꞌn yeꞌ nard coꞌ anzeꞌf náp ntac. Mtlo Mari, mtà Mari aceita nii Jesús. Ngoloa, mtecuiꞌs Mari nii Jesús con yis yéc Mari. Nde nxonꞌ, ante mzyè xlaꞌ aceit cheꞌn perfum yeꞌ nard leꞌn nyòo.
\v 4 Sya, ndooleꞌ Jud Iscariot, xganꞌ Mon, coꞌ ngòc thìb myenꞌ xinꞌ mtéꞌth Jesús coꞌ mdaꞌxùꞌ Jesús loo mèn yiloa, ndxab Jud:
\p
\v 5 ―¿Chonon neꞌnthoꞌde xaꞌgota perfum baꞌ por thìb mil chop ayo pes par taꞌ gòn xaꞌgot tmi loo mèn prob coꞌ ndyac yaltìi, àꞌ?
\p
\v 6 Per neꞌngabte Jud diꞌsa por mdyóo Jud cón cheꞌn mèn coꞌ ndyac yaltìi. Ndxeꞌlequeꞌ, ndxab Jud diꞌsa tac Jud ngo yaꞌ bols coꞌteꞌ ndxòosuaꞌ tmi. No ngòc Jud thìb huanꞌ tac xexte ndyen Jud tmi coꞌ ngòo mèn leꞌn bols.
\v 7 Sya, ndxab Jesús loo Jud:
\p ―Laꞌa. Nee Mari cón ngue li Mari. Mari ngue tà aceit baꞌ laden ndooreꞌ zin huiz ya caꞌs mèn daa xal nac mod coꞌ ndxàp mèn.
\v 8 Part cón cheꞌn guꞌ, guꞌ thidtenequeꞌ nzo làth mèn prob. Per part cón chenen, daa ya neꞌtolode go no guꞌ thidtene.
\s Trèꞌ ndluꞌ leꞌ mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel thidte ngòc. Mbli nèe mèna lezoꞌ mèna par guthxùꞌ mèna Lars, ne.
\p
\v 9 Sya, anzeꞌf thìb mèn cheꞌn yèezyaꞌ cheꞌn làaz mèn jude mbìn leꞌ Jesús nzo leꞌn yèez Betañ. Ngua mèna Betañ. Per neꞌngade mèna ante par ya tee huiꞌ mèna Jesús. Ndxeꞌlequeꞌ, ngua mèna par huiꞌ mèna máa Lars, ne, Lars coꞌ mbli Jesús ngro xban làth mèn nguth.
\v 10 Leꞌ sya, mèn coꞌ ngòc jef cheꞌn nguleyꞌ coꞌ más ñibeꞌ loo rye nguleyꞌ, thidte ngòc làth mèna par guthxùꞌ mèna Lars, ne.
\v 11 Tataa mbli mèna tac por cón cheꞌn Lars anzeꞌf thìb mèn coꞌ nac mèn cheꞌn yèezyaꞌ cheꞌn làaz mèn jude ngro xàꞌ loo xleyꞌ coꞌ ndxàp mèn nación Israel tac ngolaꞌs mèna loo Jesús no ngòo mèna loo cón cheꞌn Jesús.
\s Jesús ngòo leꞌn ciuda Jerusalén.
\r (Mt. 21.1–11; Mr. 11.1–11; Lc. 19.28–40)
\p
\v 12 Leꞌpeꞌ sya, mdoo huax mèn ned. Nda mèn lni cheꞌn pasc ciuda Jerusalén. Tedib huiz coꞌ nde nquea, mbìn mèna leꞌ Jesús nde zinleꞌ ciuda Jerusalén.
\v 13 Sya, mtlo mèna, mchoꞌ mèn yin. No ngroꞌ mèn par ya càa ned mèn Jesús. No mbez yèe mèn cabii xal coꞌseꞌ ndxol ro mèn thìb himn. Mbez mèna:
\p ―Anzeꞌf Diox roo Diox xèn nac Diox. No mbiꞌ ndac nac mbiꞌ coꞌ nde por cón cheꞌn Tad Diox. Mbiꞌ nacqueꞌ rey cheꞌn mèn nación Israel.
\p
\v 14 Látha, gunèe Jesús mdoo thìb burr gaxte par neda. Mdub Jesús burr par ngòcqueꞌ no mdyaaqueꞌ no mdyubqueꞌ diꞌs coꞌ ndub loo libr coꞌ nac xtiꞌs Diox coꞌ mbez taandxèꞌ:
\pi1
\v 15 Neꞌzyebte guꞌ, mèn coꞌ nac mèn ciuda Jerusalén. Huiꞌ guꞌ nexa. Rey guꞌ ndeleꞌ baꞌ. No ndub rey guꞌ thìb burr.
\p
\v 16 Per anon mtlo mqueltàa no myenꞌ xinꞌ mtéꞌth Jesús Jesús, neꞌndaꞌde myenꞌ cuent cón nee diꞌs conꞌ coꞌ mbli Jesús hora. Coꞌseꞌ gunèe myenꞌ ngro xban Jesús no mquée Jesús loo béꞌ par ngòc conꞌ roo conꞌ xèn loo Jesús, axta syareꞌ mteꞌ lezoꞌ myenꞌ no mdaꞌ myenꞌ cuent leꞌ ryete conꞌ coꞌ ngòc loo Jesús, mdyubqueꞌ diꞌsa cón cheꞌn Jesús loo libr coꞌ nac xtiꞌs Diox. No tataaqueꞌ ngòca loo Jesús xalqueꞌ ndub diꞌs loo libr coꞌ nac xtiꞌs Diox.
\p
\v 17 Mèn coꞌ ngure no Jesús coꞌseꞌ ngurez Jesús Lars ro yeꞌr coꞌteꞌ ngua caꞌs mèn thebol Lars no mblo xban Jesús thebol Lars làth mèn nguth, mèna mdaꞌ cuent cón cheꞌn conꞌ gunèe mèn mbli Jesús.
\v 18 Por cona, ngroꞌ rye mèna par ngua càa ned mèna Jesús tac mèna huen huen mdaꞌ cuent no gunèe mèna xal mbli Jesús yalguzyeꞌ roo yalguzyeꞌ xèn loo Lars.
\v 19 Sya, mèn coꞌ ngòc mèn xleyꞌ farise, ndxab mèna loo xtàa mèn:
\p ―Ngolo gunèe guꞌi, na. Yende cón gác naꞌ li no naꞌ mbiꞌ baꞌ. Huiꞌ guꞌ nexa. ¡Napló mèn ndoo nque xís mbiꞌ baꞌ!
\s Ndxep mèn grieg ngue cuaꞌn Jesús.
\p
\v 20 Làth rye mèn coꞌ ngua ciuda Jerusalén par cuez mèn Diox leꞌn huiz lnia, ngo ndxep mèn nación Grieg leꞌn ciuda Jerusalén.
\v 21 Sya, mbii gax mèn nación Griega loo Lip coꞌ nac mèn yèez Betsaid coꞌ nac thìb yèezyaꞌ cheꞌn làaz mèn galile. Nalyat mdèꞌf ro mèna. Ndxab mèna loo Lip:
\p ―Tad Lip, nuꞌ ndlyaꞌs bluꞌ Uꞌ Jesús loo nuꞌ, yey.
\p
\v 22 Sya, ngua taꞌ Lip cuenta loo Ndech. Leꞌ sya, Lip ryop Ndech ngua neei loo Jesús.
\v 23 Sya, ndxab Jesús loo ryop myenꞌa:
\p ―Mzinleꞌ hor coꞌseꞌ gàc conꞌ roo conꞌ xèn loon, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ.
\v 24 Nde niin tedib conꞌ loo guꞌ coꞌ nac thìb conꞌ lìcpeꞌ: Cheleꞌ mèn neꞌteyòode thìb quèe nzob triu loo yòo par gàꞌba no lyena, taate yanꞌ quèe nzoba. No neꞌgàꞌbta par lyena. Per cheleꞌi gàꞌb no lyena, huax nzob bin taꞌi yiloa.
\v 25 Tac mèn coꞌ ante ñee loon loo cón cheꞌnpeꞌ mèn loo izlyoꞌ ndxèꞌ par ante ban mèn loo izlyoꞌ ndxèꞌ, mèna yende mod yòo ban no Diox thidtene. Per mèn coꞌ ndoo lezoꞌ láꞌ rye conꞌ ñee loon mèn loo izlyoꞌ ndxèꞌ, coꞌ nac conꞌ coꞌ nzo mod li mèn gan loo izlyoꞌ ndxè par ban mèn loo izlyoꞌ ndxèꞌ, mèna yòo ban noqueꞌ Diox thidtene yiloa.
\v 26 Cheleꞌ chol mèn lyaꞌs tyubdiꞌs loon xal ñibeꞌen loo mèna, mèna ndxàal tyoo nque xísen par li mèna xal ndlin. No coꞌteꞌ gon, tya go non mèn coꞌ tyubdiꞌs loon xal ñibeꞌen loo mèna. Cheleꞌ chol mèn tyubdiꞌs xal ñibeꞌen loo mèna, leꞌ sya, xuden Diox li par gàc conꞌ guryath no conꞌ guryèn loo mèna.
\s Jesús ngue taꞌ cuent loo mèn xá mod gath Jesús.
\p
\v 27 Tolo ndxab Jesús:
\p ―Per nalleꞌ neꞌneeden coꞌthe conꞌ lin. Imbe see teede lezon. No axta neꞌ neꞌ neen cón gaben. ¿Chéꞌ taben loo xuden Diox: Pay, fteláꞌ Uꞌ daa loo conꞌ gàc loon nalleꞌ, càꞌ? Yende xàa. ¿Cón li gaben tataa? Por cona, ndalen loo izlyoꞌ ndxèꞌ.
\p
\v 28 Más huen mnaꞌb Jesús loo Diox xud Jesús. Ndxab Jesús:
\p ―Pay, bli Uꞌ par gàc conꞌ roo conꞌ xèn loo yub Uꞌ por cón chenen.
\p Sya, leꞌleꞌ mbyèn thìb diꞌs loo béꞌ coꞌ ndxab:
\p ―Na mblileꞌ par ngòc conꞌ roo conꞌ xèn loon por cón cheꞌn lùu. No beren lin par gàc conꞌ roo conꞌ xèn loon por cón cheꞌn lùu tedib vez.
\p
\v 29 Leꞌ sya, mèn coꞌ nziriꞌ no Jesús mxac ngòc thìb conꞌ. Ndxep mèn ndxab:
\p ―Gundii ngulàa.
\p Taandxep mèn ndxab:
\p ―Tyèꞌ. Peser thìb angl gunii loo Jesús.
\p
\v 30 Sya, ndxab Jesús loo mèna:
\p ―Neꞌmbyènte diꞌs coꞌ mbìn guꞌ baꞌ por cón chenen. Ndxeꞌlequeꞌ, mbyèn diꞌs baꞌ por cón cheꞌn guꞌ par yilaꞌs guꞌ loon no loo cón chenen.
\v 31 Tac nalleꞌqueꞌ mzin tiemp coꞌseꞌ tyub rez cón cheꞌn mèn coꞌ naban loo izlyoꞌ ndxèꞌ. No nalleꞌqueꞌ mzin tiemp coꞌseꞌ tyèꞌb jefpeꞌ no ryoꞌ xàꞌ jefpeꞌ cheꞌn izlyoꞌ ndxèꞌ thìb lad loo mèn.
\v 32 No coꞌseꞌ yilo queꞌ mèn daa loo thìb cruz, no xít too mèn cruz nasalꞌ daa, yiloa daa li leꞌ huax mèn tyal yilaꞌs loon par yòo mèn loo cón chenen.
\p
\v 33 Tataa ndxab Jesús loo mèn par non mèn no taꞌ mèn cuent xá mod gath Jesús.
\p
\v 34 Per ale leꞌleꞌ mcàb mèn coꞌ nziriꞌ loo Jesús. Ndxab mèn:
\p ―Coꞌseꞌ ndlab nuꞌ loo libr coꞌ nac ley coꞌ mxoꞌf Moisés loo nuꞌ, libr ndluꞌ loo nuꞌ leꞌ Crist banqueꞌ thidtene. ¿Xá mod mbezl leꞌ lùu coꞌ mbez leque lùu nac mbiꞌ coꞌ mbiꞌth yáal loo izlyoꞌ ndxèꞌ xal ndxáal chol mèn, lùu yiche loo thìb cruz, sya? ¿Chóxeꞌ mbezl nac lùu, lùu coꞌ mbez nac mbiꞌ coꞌ mbiꞌth yáal loo izlyoꞌ xalqueꞌ ndxáal chol mèn loo izlyoꞌ, sya?
\p
\v 35 Sya, ndxab Jesús loo mèna:
\p ―Láth beꞌ nzon làth guꞌ, ngue lin par tyub xnìi yéc guꞌ no par tyub xnìi lezoꞌ guꞌ loo cón cheꞌn Diox. Per taandxepte tiemp beꞌ nzon làth guꞌ. Làth xtauꞌa, fque tee ban ndac guꞌ loo cón chenen xal ngue niin loo guꞌ ndxè, daa coꞌ ndli par ndyub xnìi yéc guꞌ no par ndyub xnìi lezoꞌ guꞌ loo cón cheꞌn Diox. Tac neꞌstreꞌfqueꞌ tlo que tee ban guꞌ loo cón cheꞌn xab izlyoꞌ coꞌ nac xal yálꞌcuau loo guꞌ. Tac mèn coꞌ nque tee ban loo cón cheꞌn xab izlyoꞌ nac xal mèn coꞌ ndyee loo yálꞌcuau. No neꞌñeede mèna pá ned nda mèna.
\v 36 Cona, ngue niin loo guꞌ: Láth beꞌ nzon làth guꞌ, golaꞌs guꞌ loon, daa coꞌ ndli par tyub xnìi yéc guꞌ no par tyub xnìi lezoꞌ guꞌ loo cón cheꞌn Diox.
\p Ngolo tataa ndxab Jesús diꞌs loo mèna, xexte mdyonꞌ Jesús loo mèna. Ndyàa Jesús.
\s Trèꞌ ndluꞌ chonon thidtene neꞌngalaꞌste mèn nación Israel cón cheꞌn diꞌs coꞌ ndyoodiꞌs Jesús loo mèn.
\p
\v 37 Per mastaleꞌ mblileꞌ Jesús huax yalguzyeꞌ loo mèna, neꞌngalaꞌste mèna loo Jesús no loo conꞌ coꞌ mbli Jesús.
\v 38 Thìb mod no tedib mod mquinqueꞌ mdyaa diꞌs, no ngòcqueꞌ diꞌs, no mdyubqueꞌ diꞌs xal mbez diꞌs coꞌ gunii Sayi coꞌ mdeꞌth diꞌs coꞌ ndxab Diox, diꞌs coꞌ mbez:
\pi1 Tad, ¿chó mèn nac mèn coꞌ ngolaꞌsleꞌ diꞌs coꞌ gunee Uꞌ loo nuꞌ coꞌ ndxableꞌ nuꞌ loo mèn, àꞌ? No ¿chó loo mèn mbluꞌleꞌ Tad rye loothe conꞌ coꞌ nzo laꞌs nii Tad no conꞌ coꞌ nzo laꞌs yaꞌ Tad, àꞌ?
\m
\v 39 Por cona, neꞌngácte mèna ngalaꞌs mèna loo Jesús no loo cón cheꞌn Jesús xal mdeꞌth Sayi diꞌs coꞌ ndxab Diox coꞌ mdub loo libr coꞌ nac xtiꞌs Diox coꞌ mbez:
\pi1
\v 40 Diox mbli ngòc mèna xal mèn sieu loo cón cheꞌn Diox. No mbli Diox ngòc mèna mèn naad no mèn nguud par neꞌhuiꞌde mèna con ngudloo mèn no neꞌtenꞌte mèn diꞌs, neꞌ neꞌ yaaꞌd diꞌsa leꞌn lezoꞌ mèna. Neꞌ neꞌ yòo mèna loo cón chenen tedib vez par teyaquen mèna xal thìb mèn yíiz.
\m
\v 41 Diꞌsa gunii Sayi tac gunèe Sayi conꞌ roo conꞌ xèn cón cheꞌn Jesús. Conꞌa, gunii Sayi cón cheꞌn Jesús, ne.
\p
\v 42 Per mastaleꞌ tataa mdeꞌth Sayi cón cheꞌn mèna, anzeꞌf thìb mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel ngolaꞌs loo Jesús no loo cón cheꞌn Jesús. Per indaꞌde mèna cuent loo xnaa loo xtàa mèn tac nzyeb mèna coꞌ chug mèn xleyꞌ farise mèna leꞌn sinagog.
\v 43 Más ndaꞌ gust lezoꞌ mèna ndxàc conꞌ guryath no conꞌ guryèn loo mèna por cón cheꞌn xtàa mèna leque yòo lezoꞌ mèna mod coꞌ li Diox par gàc conꞌ guryath no conꞌ guryèn loo mèna.
\s Trèꞌ ndluꞌ leꞌ diꞌs coꞌ ndyoodiꞌs Jesús li par tyub rez cón cheꞌn mèn loo mèn loo izlyoꞌ ndxèꞌ yiloa.
\p
\v 44 Ngoloa, cabii gunii Jesús loo mèn tedib vez. Ndxab Jesús:
\p ―Mèn coꞌ tyal yilaꞌs loon, iante loon yilaꞌs mèna. Ndxeꞌlequeꞌ, mèna yilaꞌs loo Diox xuden coꞌ mtelꞌ daa loo izlyoꞌ ndxèꞌ.
\v 45 Mèn coꞌ ngue huiꞌ loon nalleꞌ, mèna ngue huiꞌ loo xaꞌ coꞌ mtelꞌ daa, ne, nalleꞌqueꞌ.
\v 46 Daa coꞌ nac xaꞌ coꞌ ndli par ndyub xnìi yéc mèn no par ndyub xnìi lezoꞌ mèn loo cón cheꞌn Diox, daa mbal yáal loo izlyoꞌ ndxèꞌ par gàca loo mèn leꞌ mèn coꞌ tyal yilaꞌs loon, neꞌque tee bante mèna loo coꞌ nac xab izlyoꞌ coꞌ nac xal yálꞌcuautúb.
\v 47 Per cheleꞌ chol mèn ndyal gòn diꞌs coꞌ ndyoodizen, no ale ndriꞌth nza mèn diꞌs coꞌ mbezen, neꞌgàcte daa mèn coꞌ quexùꞌ mèna. Tac daa neꞌngalte loo izlyoꞌ ndxèꞌ par quexùꞌen mèn. Ndxeꞌlequeꞌ, ndalen no nzolen loo izlyoꞌ ndxèꞌ par teláꞌen mèn loo conꞌ ryes.
\v 48 Leꞌ mèn coꞌ mbloꞌ too daa thìb lad no nteriꞌth nza mèn diꞌs coꞌ ndyoodizen, nzoqueꞌ thìb xaꞌ coꞌ tub rez cón cheꞌn mèna. Leque diꞌs coꞌ mdoodizlen loo mèn, leque diꞌsa li par tyub rez cón cheꞌn mèna loo mèna coꞌseꞌ gàc huiz coꞌ gàc lult tiemp loo izlyoꞌ ndxèꞌ.
\v 49 Daa indyoodiꞌste xal neete lezon. Ndxeꞌlequeꞌ, xuden coꞌ mtelꞌ daa, xuden mnibeꞌ loon cón cheꞌn coꞌ ndxàal gaben loo mèn no cón cheꞌn coꞌ ndxàal luꞌen loo mèn.
\v 50 Naneen no ndan cuent leꞌ mèn coꞌ li xal ñibeꞌ xuden Diox loo mèn, mèna yòo ban noqueꞌ xuden Diox thidtene. Cona, ngue niin loo guꞌ: Leꞌ ryete conꞌ coꞌ ndyoodizen loo mèn, ndyoodizena xal ñibeꞌ xuden loon par tyoodizena loo mèn.
\c 13
\s Jesús mtech nii myenꞌ xinꞌ mtéꞌth Jesús.
\p
\v 1 Coꞌseꞌ ngòc huiz coꞌ ngòc huiz vispr cheꞌn lni pasc, Jesús nonleꞌ mzinleꞌ tiemp ryoꞌ Jesús loo izlyoꞌ ndxèꞌ par bii Jesús loo Diox xud Jesús. Jesús mqueꞌqueꞌ lezoꞌ ñèe Jesús myenꞌ xinꞌ mtéꞌth Jesús coꞌ nziriꞌ loo izlyoꞌ. Huiza mbluꞌ Jesús loo myenꞌ, lìcqueꞌ, mqueꞌ lezoꞌ Jesús myenꞌ axta plóthe.
\p
\v 2–4 Látha, Mebizya ndooleꞌ par mbli Mebizya ngulàa xtùuz yeꞌrsinꞌ leꞌn lezoꞌ Jud, xganꞌ Mon Iscariot, par cuaꞌn Jud mod par taꞌxùꞌ Jud Jesús loo mèn. Per Jesús naneequeꞌ leꞌ Jesús ngroꞌ loo Diox. No nonqueꞌ Jesús leꞌ Jesús bere bii loo Diox tedib vez. No nonqueꞌ Jesús leꞌ Diox xud Jesús mnibeꞌ loo Jesús gàp Jesús rye loothe conꞌ laꞌs nii Jesús no laꞌs yaꞌ Jesús yiloa. Conꞌa, láth coꞌseꞌ ngue yuhua rsè Jesús con myenꞌ xinꞌ mtéꞌth Jesús, chàa, ngo too Jesús loo mes. Mteche Jesús thìb cuaꞌ xab Jesús coꞌ noc Jesús. No mtedóꞌ Jesús thìb tuay rlanꞌ Jesús.
\v 5 Ngoloa, mblo Jesús nít leꞌn thìb bandej. Mtlo Jesús, mtech Jesús nii myenꞌ xinꞌ mtéꞌth Jesús. No mtecuiꞌs Jesús nii myenꞌ con tuay coꞌ mtedóꞌ Jesús rlanꞌ Jesús.
\p
\v 6 Per coꞌseꞌ nde tech Jesús nii Mon Pedr, Mon Pedr ndxab loo Jesús:
\p ―Tad, ¿Uꞌ tech niin, à? ¡Pà tan niin tech Uꞌ!
\p
\v 7 Jesús mcàb loo Mon Pedr. Ndxab Jesús:
\p ―Aa, na tech niil pues. Lùu neꞌtaꞌde cuent no neꞌñeedel cón ngue li nonl nalleꞌ. Per axta yiloa syareꞌ taꞌl cuent cón ndli ngue techen niil nalleꞌ.
\p
\v 8 Pedr ndxab loo Jesús:
\p ―Tad, neꞌtaden lugar tech Uꞌ niin thidtene.
\p Jesús mcàb loo Pedr. Ndxab Jesús:
\p ―Cheleꞌ daa neꞌtechte niil, Pedr, neꞌgàcte conꞌ coꞌ nac chenen cheꞌnl.
\p
\v 9 Sya, ndxab Mon Pedr loo Jesús:
\p ―Tad, cheleꞌi tataa nac, neꞌtechte Uꞌ ante niin sya, xàa. Ndxeꞌlequeꞌ, thidtene ftech Uꞌ yan no yéquen más huen.
\p
\v 10 Jesús ndxab loo Pedr:
\p ―Leꞌ xaꞌ coꞌ diz ngod, xaꞌa inquinte gad tedib vez. Ante nii xaꞌ no maste na, nquin yech tac dipte lad xaꞌ nambìiqueꞌ. Guꞌ nambìiqueꞌ mastaleꞌ iryede guꞌ nambìi.
\p
\v 11 Tataa ndxab Jesús loo myenꞌ leꞌ myenꞌ inambìide rye tac Jesús naneequeꞌ chó myenꞌ nac coꞌ taꞌxùꞌ Jesús loo mèn.
\p
\v 12 Ngolo mtech Jesús nii rye myenꞌ, mdoc Jesús xab Jesús tedib vez. Mbere Jesús, mdub Jesús loo mes. Ndxab Jesús loo myenꞌ:
\p ―¿Chéꞌ indaꞌde guꞌ cuent cón ndli mtechen nii guꞌ, àꞌ, ey? Indxòn ndacte guꞌi, ¿léꞌ?
\v 13 Guꞌ mbez loon: Nac daa maistr guꞌ no nac daa Tad guꞌ. No yende cón niin loo guꞌ nacqueꞌ daa maistr guꞌ tac nac daa maistr.
\v 14 Per cheleꞌ daa coꞌ nac Tad no maistr guꞌ mtechen nii guꞌ, guꞌ ne, ndxàal tech nii thìb xtàa guꞌ no nii tedib xtàa guꞌ.
\v 15 Tac conꞌ coꞌ mblin par mtechen nii guꞌ nac coꞌ mbluꞌen loo guꞌ par li guꞌ leque conꞌ loo xtàa guꞌ xal mblin mtechen nii guꞌ.
\v 16 Lìca, na ngue nii thìb conꞌ loo guꞌ: Yende mod más ñibeꞌ thìb moz loo patrón moz. Lomisqueꞌ ne, yende mod más ñibeꞌ thìb xaꞌ coꞌ ndli mandad loo xaꞌ coꞌ ñibeꞌ loo xaꞌ coꞌ ndli mandad.
\v 17 Cheleꞌ guꞌ taꞌ cuent no nonqueꞌ guꞌ conꞌ mblin loo guꞌ no li guꞌ loo xtàa guꞌ xal mblin loo guꞌ, huen nda guꞌ.
\p
\v 18 Ingue toodisten cón cheꞌn ryete guꞌ. Na naneequeꞌ no ndan cuent xá ñaa guꞌ coꞌ mcuin. Per ndxàc conꞌ ndxèꞌ loon par ngòcqueꞌ no mdyubqueꞌ diꞌs coꞌ ndub loo libr coꞌ nac xtiꞌs Diox coꞌ mbez: Leꞌ thìb guꞌ coꞌ ngue yuhua non thidte yenꞌ, no coꞌ ngue yu non thidte yenꞌ, guꞌa nac thìb ngolo ngolaꞌs chenen.
\v 19 Thidtene ngue niin conꞌ ndxèꞌ loo guꞌ nalleꞌ par coꞌseꞌ zin hor gàca loon, guꞌ li laꞌs leꞌ daa nac merpeꞌ Tad guꞌ.
\v 20 Lìca, na ngue nii loo guꞌ: Leꞌ mèn coꞌ tyal yilaꞌs loo myenꞌ coꞌ telꞌen par yòo mèna loo cón chenen, mèna yilaꞌs loon. No mèn coꞌ tyal yilaꞌs loon, mèna tyal yilaꞌs loo xaꞌ coꞌ mtelꞌ daa.
\s Jesús ngue taꞌ cuent loo mèn leꞌ Jud taꞌxuꞌ Jesús loo mèn.
\r (Mt. 26.20–25; Mr. 14.17–21; Lc. 22.21–23)
\p
\v 21 Ngolo tataa mdoodiꞌs Jesús diꞌsa loo myenꞌ xinꞌ mtéꞌth Jesús, neꞌñeede Jesús cón li Jesús. Tac mxonꞌ lezoꞌ Jesús. No nda ndyeꞌth lezoꞌ Jesús. Sya, más nalì mdaꞌ Jesús cuent loo myenꞌ xinꞌ mtéꞌth Jesús. Ndxab Jesús:
\p ―Lìcpeꞌ baꞌi, na nii loo guꞌ: Leꞌ thìb guꞌ coꞌ nzo làth guꞌ ndxèꞌ nalleꞌ taꞌxùꞌ daa loo mèn.
\p
\v 22 Sya, mbuiꞌ myenꞌ xinꞌ mtéꞌth Jesús loo thìb xtàa myenꞌ no loo tedib xtàa myenꞌ tac neꞌndaꞌde myenꞌ cuent chó myenꞌ nac coꞌ taꞌxùꞌ Jesús loo mèn.
\v 23 Per thìb myenꞌ xinꞌ mtéꞌth Jesús coꞌ más mqueꞌ lezoꞌ ñèe Jesús, myenꞌa nzo bdaꞌ lad Jesús coꞌseꞌ ngue yuhua rsè Jesús con myenꞌ.
\v 24 Sya, mbli Mon Pedr señ loo myenꞌa par ñibdiꞌs myenꞌa loo Jesús chó myenꞌ nac myenꞌ coꞌ ndxab Jesús leꞌ myenꞌ taꞌxùꞌ Jesús loo mèn.
\v 25 Sya, sate más mxyoꞌf bdaꞌ gax myenꞌa loo Jesús par ñibdiꞌs myenꞌ loo Jesús. Ndxab myenꞌ:
\p ―Tad, ¿chó nuꞌi, àꞌ?
\p
\v 26 Jesús mcàb loo myenꞌa. Ndxab Jesús:
\p ―Huiꞌ nexa. Daa tegaz thìb leꞌ pan leꞌn cald. No loo xaꞌ coꞌ tan thìb leꞌ pana, xaꞌai.
\p Tataaqueꞌ mbli Jesús. Mtegaz Jesús thìb leꞌ pan leꞌn cald. No mdaꞌ Jesús pana loo Jud Iscariot, xganꞌ Mon.
\v 27 Leꞌ sya, texal nduhua Jud thìb ro pana, ndooleꞌ Mebizya ngulàa Mebizya leꞌn lezoꞌ Jud. Sya, ndxab Jesús loo Jud:
\p ―Conꞌ coꞌ nzo lezoꞌl par lil, lueg lueg blii.
\v 28 Per nec thìb myenꞌ coꞌ nzi yuhua no Jesús loo mes, neꞌñeede myenꞌ no neꞌtaꞌde myenꞌ cuent chonon ale tataa ndxab Jesús loo Jud.
\v 29 Ndxep myenꞌ mbli xtùuz por nzo yaꞌ Jud bols coꞌ ndxòosuaꞌ tmi, por cona mbli myenꞌ xtùuz tataa ndxab Jesús loo Jud: Fxi conꞌ naquin naꞌ coꞌseꞌ gáal lni, o: Ftaꞌ ndxep centav càa mèn prob.
\p
\v 30 Texal ngolo nduhua Jud thìb ro pana, xexte ngroꞌ Jud par fuer. Hor coꞌseꞌ ngroꞌ Jud par fuer, hora nde làaleꞌ yálꞌ izlyoꞌ huiza.
\s Jesús ngue taꞌ cuent loo myenꞌ xinꞌ mtéꞌth Jesús cón cheꞌn yalñibeꞌ cub.
\p
\v 31 Texal ngolo ngroꞌ Jud, Jesús ndxab loo myenꞌ xinꞌ mtéꞌth Jesús:
\p ―Nalleꞌ nac tiemp coꞌseꞌ luꞌen conꞌ roo conꞌ xèn coꞌ nac cón chenen, daa coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ. No li Diox gàc conꞌ roo conꞌ xèn cón cheꞌn Diox loon.
\v 32 No cheleꞌ daa, coꞌ mbal yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ, luꞌ conꞌ roo no conꞌ xèn cón cheꞌn Diox loo mèn nalleꞌ, leꞌ sya, Diox, ne, luꞌ loo mèn conꞌ coꞌ nac conꞌ roo no conꞌ xèn coꞌ nac cón cheꞌnpeꞌ daa coꞌ nac xganꞌpeꞌ Diox. Nabaꞌlequeꞌ luꞌ Diox loo mèn conꞌ coꞌ nac conꞌ roo no conꞌ xèn coꞌ nac cón chenen.
\v 33 Guꞌ coꞌ nac xal xinꞌ bix daa, thidtene niin loo guꞌ nalleꞌ: Ya neꞌtolode go non guꞌ. Guꞌ cuaꞌn daa. Per xalqueꞌ nac diꞌs coꞌ ndxaben loo mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel, leque diꞌsa ngue niin loo guꞌ nalleꞌ: Coꞌteꞌ biin, guꞌ neꞌgácte yòo nalleꞌqueꞌ.
\v 34 Daa ngue tanꞌ tedib diꞌs coꞌ ngue ñibeꞌen loo guꞌ coꞌ nac yalñibeꞌ cub coꞌ ngue ñibeꞌen loo guꞌ par li guꞌi: Fqueꞌ lezoꞌ guꞌ gunèe guꞌ thìb xtàa guꞌ no tedib xtàa guꞌ xalqueꞌ mqueꞌqueꞌ lezon ñèen guꞌ, ndee. Tataaqueꞌ ndlyazen fqueꞌ lezoꞌ guꞌ ñèe guꞌ thìb xtàa guꞌ no tedib xtàa guꞌ xalqueꞌ ngue lezoꞌ guꞌ ñèe guꞌ guꞌ, ndee.
\v 35 Cheleꞌ guꞌ nqueꞌqueꞌ lezoꞌ ñèe guꞌ thìb xtàa guꞌ no tedib xtàa guꞌ, sya, ryete mèn izlyoꞌ taꞌqueꞌ cuent leꞌ guꞌ nac xinꞌ mtéꞌth daa.
\s Jesús ngue teꞌth leꞌ Pedr cà diꞌs cón cheꞌn Jesús loo mèn.
\r (Mt. 26.31–35; Mr. 14.27–31; Lc. 22.31–34)
\p
\v 36 Sya, mnibdiꞌs Mon Pedr loo Jesús. Ndxab Mon:
\p ―Tad, ¿páxeꞌ ya Uꞌ? ¿Chonon tatuaꞌ mbez Uꞌ, àꞌ?
\p Jesús mcàb loo Pedr. Ndxab Jesús:
\p ―Coꞌteꞌ biin, lùu yende mod tyoo nque xísen nalleꞌ. Per yiloa lùu tyoo nquequeꞌ xísen.
\p
\v 37 Sya, ndxab Pedr loo Jesús:
\p ―Tad, ¿chonon ngue li Uꞌ xtùuz neꞌgácte daa too nqueꞌen xís Uꞌ nalleꞌ, àꞌ? Daa ngòc nableꞌ par gath daa por cón cheꞌn Uꞌ cheleꞌi naquin, Tad.
\p
\v 38 Per Jesús leꞌleꞌ mcàb loo Mon Pedr. Ndxab Jesús:
\p ―¿Chéꞌ, lìcqueꞌ, mnibeꞌl loo lezoꞌl gathl por daa, càꞌ, Pedr? Lìcpeꞌ baꞌi, na ngue nii lool: Ndooreꞌ cuezèe nguiidtee léꞌ nguiidtee yálꞌ nal yálꞌ, lùu cà diꞌs daa son vez loo mèn nal yálꞌ.
\c 14
\s Jesús ngue luꞌ loo mèn nac Jesús xal thìb ned par yòo ban no mèn Diox.
\p
\v 1 Neꞌxonꞌte lezoꞌ guꞌ. Blec see tee lezoꞌ guꞌ. Neꞌ neꞌ ya yeꞌth lezoꞌ guꞌ. Cheleꞌ guꞌ ndxelaꞌs loo Diox, golaꞌs guꞌ loon, ne.
\v 2 Tac liz xuden coꞌ ndub loo béꞌ anzeꞌf thìb lugar nzo coꞌteꞌ yòo ban mèn. Cheleꞌi intataade nac, axta neꞌ neꞌ ngniin loo guꞌ xá naca. Cona, ngue niin loo guꞌ: Daa biiqueꞌ par ga li naꞌben coꞌteꞌ yo guꞌ.
\v 3 No coꞌseꞌ yilo biin no yilo li naꞌben coꞌteꞌ yo guꞌ, beren, galen tedib vez par gal xin guꞌ par gàca leꞌ coꞌteꞌ gon, guꞌ, ne, yo no daa.
\v 4 Guꞌ nonqueꞌ coꞌteꞌ biin no non guꞌ ned biin.
\p
\v 5 Ndxab Max loo Jesús:
\p ―Tad, nuꞌ neꞌñeede ned coꞌteꞌ bii Uꞌ. ¿Xá mod ndlyaꞌs Uꞌ taꞌ nuꞌ cuent no ñee nuꞌ neda, sya?
\p
\v 6 Jesús mcàb. Ndxab Jesús loo Max:
\p ―Daa nac xal thìb ned nalìpeꞌ coꞌ ndxòo loo béꞌ coꞌteꞌ nzo Diox. No daa nac xaꞌ coꞌ ndyoodiꞌs diꞌs coꞌ nac lìcpeꞌ. No nac daa xaꞌ coꞌ ndli par yòo ban no mèn Diox thidtene. Tac ante por cón chenen gác mèn yòo mèn coꞌteꞌ nzo xuden Diox.
\v 7 Cheleꞌ guꞌ ndlibeꞌqueꞌ daa coꞌ huen huen no ndaꞌ guꞌ cuent cón chenen, guꞌ ndlibeꞌqueꞌ xuden Diox, ne. Nalleꞌqueꞌ ngue libeꞌ guꞌ xuden Diox. No ngue huiꞌ guꞌ xal ñaa loo xuden Diox.
\p
\v 8 Sya, ndooleꞌ Lip mcàb. Ndxab Lip loo Jesús:
\p ―Tad, bluꞌ Uꞌ xud Uꞌ loo nuꞌ no ftaꞌ Uꞌ lugar huiꞌ nuꞌ loo xud Uꞌ no con conaꞌte neꞌtolode ñee nuꞌ loo Uꞌ bluꞌ Uꞌ xud Uꞌ loo nuꞌ.
\p
\v 9 Jesús mcàb loo Lip. Ndxab Jesús:
\p ―Lip, neꞌ pól ndxàc ngue tee non guꞌ. No ¿axta nalleꞌ tarte libeꞌl daa coꞌ huenlequeꞌ, càꞌ? Mèn coꞌ ngue huiꞌ loon, mèna ngue huiꞌ loo xuden, ne. ¿Chonon mbezl loon: Bluꞌ Uꞌ xud Uꞌ loo nuꞌ, sya?
\v 10 ¿Chéꞌ axta nalleꞌ indxelaꞌstel leꞌ ryop nuꞌ xuden thidte nac no nzon loo xuden no xuden nzo loon, càꞌ? Leꞌ diꞌs coꞌ ndyoodizen loo guꞌ na, indyoodistena loo guꞌ xal nee lezon. Per xuden coꞌ nzo ban no daa no coꞌ nzo loon, xuden ndli par ndlin zinꞌ coꞌ neepeꞌ lezoꞌ xuden par lin.
\v 11 Golaꞌs guꞌ loon leꞌ ryop nuꞌ xuden thidte nac. Nzon loo xuden no xuden nzo loon. Cheleꞌ guꞌ neꞌgácte yilaꞌs cón ngue niin loo guꞌ ndxèꞌ, golaꞌs guꞌ loon por cón cheꞌn leque zinꞌ coꞌ ndlin no por mod coꞌ ndxàpen.
\v 12 Lìcpeꞌ baꞌi, na ngue nii loo guꞌ: Mèn coꞌ ndyal ndxelaꞌs loon, mèna li conꞌ ndlin. No li mèna más conꞌ roo conꞌ xèn leque conꞌ ngue lin tac daa biiqueꞌ coꞌteꞌ nzo xuden par lin leꞌ guꞌ li conꞌa.
\v 13 Ryete conꞌ ñaꞌb guꞌ loo xuden Diox ante por lèen, na liqueꞌ conꞌa par gàca loo guꞌ no par luꞌen loo mèn conꞌ roo conꞌ xèn coꞌ ndlin por cón cheꞌn xuden Diox, daa coꞌ nac xganꞌ Diox.
\v 14 Daa liqueꞌ chol conꞌ coꞌ ñaꞌb guꞌ por cón cheꞌn lèen par gàca loo guꞌ.
\s Jesús mcàbgòn loo mèn leꞌ Jesús telꞌ Xpii Natúꞌ loo mèn loo izlyoꞌ.
\p
\v 15 Cheleꞌ guꞌ, lìcqueꞌ, nqueꞌ lezoꞌ ñèe guꞌ daa, ftubdiꞌs guꞌ no bli guꞌ conꞌ ñibeꞌen loo guꞌ.
\v 16 Leꞌ sya, daa ñaꞌb loo xuden Diox telꞌ xuden Diox tedib xaꞌ coꞌ lyath no guꞌ no coꞌ tegán lezoꞌ guꞌ. Xaꞌ coꞌ xuden telꞌ nac Xpii Natúꞌ coꞌ inquedìide. Xuden telꞌ Xpii Natúꞌ par yo no Xpii Natúꞌ guꞌ thidtene.
\v 17 Per loo mèn coꞌ más ndli par nzi tee ban mèn loo cón cheꞌn xab izlyoꞌ, loo mèna yende mod yòo Xpii Natúꞌ. Tac yende mod huiꞌ mèna no yende mod libeꞌ mèna Xpii Natúꞌ. Per guꞌ ndaꞌleꞌ cuent no ndlibeꞌqueꞌ guꞌ Xpii Natúꞌ tac nzo noleꞌ Xpii Natúꞌ guꞌ. No toloqueꞌ yo no Xpii Natúꞌ guꞌ thidtene.
\v 18 Neꞌláꞌyaꞌden guꞌ no neꞌtanꞌten guꞌ xal thìb ftyàꞌf, ey. Daa bere gal loo guꞌ tedib vez.
\v 19 Taapláte huiz beꞌ ngue huiꞌ mèn coꞌ neꞌndalte ngalaꞌs loon loon. Yiloa ya neꞌhuiꞌde mèna loon. Per guꞌ berequeꞌ huiꞌ loon tac nabanqueꞌ daa. No por cona, guꞌ banqueꞌ, ne.
\v 20 Coꞌseꞌ gàc huiza, guꞌ yilaꞌs no li laꞌs guꞌ leꞌ daa nzoqueꞌ loo xuden no leꞌ guꞌ na, nzoqueꞌ loon no nzoquen loo guꞌ, ne.
\v 21 Leꞌ mèn coꞌ non no ndaꞌ mèn cuent cón nac coꞌ ñibeꞌen loo mèna, no ndyubdiꞌs mèna coꞌ ñibeꞌen loo mèna, mèna nac mèn coꞌ nqueꞌ lezoꞌ ñèe daa. Mèn coꞌ nqueꞌ lezoꞌ ñèe mèn daa, xuden Diox nqueꞌ lezoꞌ ñèe Diox mèna, ne. No daa nqueꞌ lezoꞌ ñèen mèna. Por cón cheꞌn Xpii Natúꞌ, luꞌen cón chenen loo mèn coꞌ nqueꞌ lezoꞌ ñèe daa.
\p
\v 22 Sya, ndooleꞌ Jud coꞌ inacte Iscariot. Ndxab Jud loo Jesús:
\p ―Tad, ¿cón gàc? ¿Chonon ante loo nuꞌ luꞌ Uꞌ cón cheꞌn Uꞌ por cón cheꞌn Xpii Natúꞌ no neꞌluꞌde Uꞌ cón cheꞌn Uꞌ loo mèn coꞌ alithe nzi tee ban loo cón cheꞌn xab izlyoꞌ, àꞌ?
\p
\v 23 Jesús mcàb loo Jud. Ndxab Jesús:
\p ―Mèn coꞌ nqueꞌ lezoꞌ ñèe daa, mèna ndyub nza diꞌs coꞌ mbezen loo mèna, no ndyubdiꞌs mèna diꞌs coꞌ mbezen loo mèn. Lomisqueꞌ, queꞌ lezoꞌ xuden ñèe xuden mèna, ne. Leꞌ sya, ryop xud nuꞌ yòo ban no mèna.
\v 24 Per mèn coꞌ inqueꞌde lezoꞌ ñèe daa, mèna nteriꞌth diꞌs no nteriꞌth nza mèna diꞌs coꞌ ndyoodizen loo mèna no indyubdiꞌste mèna diꞌs coꞌ mbezen loo mèna. Huiꞌ guꞌ nexa. Diꞌs coꞌ ndyoodizen loo guꞌ, leꞌi inacte coꞌ ñibeꞌpeꞌen loo guꞌ cón cheꞌnpeꞌen. Ndxeꞌlequeꞌ, diꞌsa nac coꞌ mnibeꞌ xuden Diox coꞌ mtelꞌ daa par tyoodizena loo guꞌ.
\p
\v 25 Ngue niin ryete diꞌs ndxèꞌ loo guꞌ láth beꞌ nzo non guꞌ nalleꞌ, ey.
\v 26 Per Xpii Natúꞌ coꞌ telꞌ xuden loo guꞌ por cón cheꞌn daa, Xpii Natúꞌa lyath no guꞌ. No tegán Xpii Natúꞌ lezoꞌ guꞌ. No luꞌ Xpii Natúꞌ ryethe cón chenen loo guꞌ. No li Xpii Natúꞌ par teꞌ lezoꞌ guꞌ ryete conꞌ coꞌ guniilen loo guꞌ láth mque tee non guꞌ.
\p
\v 27 Nase ndyàan no ngue niin Diox loo guꞌ. Per mastaleꞌ ndyàan, ndlyazen leꞌ guꞌ cue ban rye nda guꞌ no rye ndyeꞌth guꞌ làth xtàa guꞌ. Lomisqueꞌ, lin par que tee ban guꞌ rye nda guꞌ no rye ndyeꞌth guꞌ làth xtàa guꞌ. Per neꞌlidena loo guꞌ xal ndxàca loo mèn coꞌ alithe nque tee ban loo izlyoꞌ coꞌ pente nxec ñèe xtàa mèn. Neꞌxonꞌte lezoꞌ guꞌ. Blec see tee lezoꞌ guꞌ. Neꞌ neꞌ ya yeꞌth lezoꞌ guꞌ. Neꞌ neꞌ zyeb guꞌ.
\v 28 Guꞌ mbìnleꞌ leꞌ daa guniileꞌ loo guꞌ leꞌ daa biiqueꞌ loo xuden Diox. No yiloa beren, galen tedib vez par go non guꞌ. Cheleꞌ guꞌ, lìcqueꞌ, nqueꞌqueꞌ lezoꞌ ñèe guꞌ daa, leꞌ sya, huen ngyanꞌ lezoꞌ guꞌ no ndac lezoꞌ guꞌ coꞌseꞌ mbìn guꞌ leꞌ daa biiqueꞌ loo xuden Diox tac xuden más ñibeꞌ leque daa.
\v 29 Thidtene ngue niin conꞌ ndxèꞌ loo guꞌ ndoooreꞌ tyactìi daa no gath daa no ryo xban daa par coꞌseꞌ gàca loon, yilaꞌs guꞌi no tolo gàp guꞌ yalxlaꞌs loon yiloa.
\p
\v 30 Per nalleꞌ ya neꞌtolode toodiꞌs non guꞌ arid tac ndeleꞌ xaꞌ coꞌ ñibeꞌ loo mèn coꞌ alithe nzi tee ban loo izlyoꞌ ndxèꞌ. No yende chó derech ndxàp xaꞌ coꞌ ñibeꞌ loo mèn loo izlyoꞌ par ñibeꞌ xaꞌ loon.
\v 31 Per mastaleꞌ yende chó derech ndxàp xaꞌ par ñibeꞌ xaꞌ loon, ndxàalqueꞌ tataa gàca loon par ñee mèn izlyoꞌ no taꞌ mèn izlyoꞌ cuent leꞌ daa nqueꞌqueꞌ lezoꞌ xuden Diox no ñee mèn izlyoꞌ leꞌ daa ndyubdizqueꞌ no ndliquen xal ñibeꞌ xuden loon. Goo too guꞌ. Yaꞌ guꞌ ndyàa naꞌ trèꞌ, ey.
\c 15
\s Jesús mtetac loo mèn cón cheꞌn Jesús xal thìb xanꞌ lus uv.
\p
\v 1 Nde niin thìb conꞌ loo guꞌ, ey: Daa nac xal thìb xanꞌpeꞌ lus uv. Leꞌ xuden na, nac xal mèn coꞌ ndli zinꞌ loo lus uv no xal mèn coꞌ nquenap lus uv.
\v 2 Ryete mèn coꞌ nzo loo cón chenen coꞌ indyubdiꞌste loon no coꞌ indlide conꞌ coꞌ ñibeꞌen, mèna nac xal lus uv coꞌ nxyòod loo coꞌ indaꞌde xlè. Xuden Diox coꞌ xàꞌ mèna loon no coꞌ too xuden Diox mèna loon xal coꞌseꞌ nchoꞌ mèn xòod lus uv coꞌ indaꞌde xlè. Per ryete mèn coꞌ nac xal lus uv coꞌ nxyòod loo coꞌ ndaꞌ xlè, xuden Diox tolo li par gàc mèna mèn coꞌ li xal ñibeꞌ Diox no xal ndlyaꞌs Diox li mèna xal coꞌseꞌ ndli lanꞌ mèn xòod lus uv no ntembìi mèn xòod lus uv par taꞌ lus uv más xlè.
\v 3 Per ndxeꞌlequeꞌ, part cón cheꞌn guꞌ, guꞌ ngro xàꞌleꞌ loo cón cheꞌn xab izlyoꞌ no loo cón cheꞌn coꞌ nac chol costumbr no loo chol conꞌ yeꞌrsinꞌ tac diꞌs coꞌ mdoodizlen loo guꞌa nguaaꞌd nza guꞌ no leꞌn lezoꞌ guꞌ par mdenꞌ guꞌ no li guꞌ coꞌ mnibeꞌen loo guꞌ li guꞌ.
\v 4 Thidtenequeꞌ fque tee ban guꞌ loo cón chenen. Leꞌ daa na, thidtenequeꞌ que tee ban no guꞌ, ne. Tac thìb xòod lus uv yende mod taꞌ xlè cheleꞌ xòod neꞌxyòodte loo lus uv. Lomisqueꞌ mod, yende mod li guꞌ conꞌ ñibeꞌen loo guꞌ no coꞌ ndlyazen li guꞌ cheleꞌ guꞌ thidtenequeꞌ neꞌtolode que tee ban ante loo cón chenen.
\p
\v 5 Daa nac xal thìb xanꞌ lus uv. Leꞌ guꞌ na, nac xal ram lus uv. Mèn coꞌ thidtenequeꞌ tyal par que tee ban mèna ante loo cón chenen no thidte que tee ban non mèna, mèna liqueꞌ coꞌ ñibeꞌen loo mèna. No li mèna conꞌ ndlyazen li mèna xal thìb xòod lus uv coꞌ ndaꞌ huax xlè. Cona, ngue niin loo guꞌ: Yende mod gác guꞌ li guꞌ xal ñibeꞌen loo guꞌ no conꞌ ndlyazen li guꞌ cheleꞌ guꞌ neꞌque tee bante ante loo cón chenen.
\v 6 Mèn coꞌ neꞌtyalte par thidtenequeꞌ que tee ban mèna loo cón chenen, mèna coꞌ xàꞌ Diox no coꞌ too Diox mèna loon no loo cón chenen. No que tee lux mèna loo cón chenen xal thìb xòod lus uv coꞌ mchoꞌ par biiz xòod lus uva. Yiloa, tecuaꞌ mèn xòod lus uva loo quìi par yol xòod loo quìi.
\p
\v 7 Cheleꞌ guꞌ thidtenequeꞌ que tee ban loo cón chenen no neꞌyathlaꞌste guꞌ conꞌ coꞌ mbluꞌen loo guꞌ par li guꞌi, bnaꞌb guꞌ ryete conꞌ ndlyaꞌs guꞌ loo xuden Diox. Sya, xuden Diox li par que no guꞌ conꞌ coꞌ ñaꞌb guꞌ.
\v 8 Loo xuden Diox ndxàc conꞌ guryath no conꞌ guryèn coꞌseꞌ huen huen ndli guꞌ ryethe conꞌ coꞌ ñibeꞌ xuden Diox loo guꞌ par li guꞌi no conꞌ coꞌ ndlyaꞌs xuden Diox li guꞌ. Leꞌ sya, tataa mod ndluꞌ guꞌ leꞌ guꞌ, lìcqueꞌ, nac xinꞌ mtéꞌthpeꞌ daa.
\v 9 Daa anzeꞌf nqueꞌ lezoꞌ ñèen guꞌ xalqueꞌ nqueꞌ lezoꞌ xuden Diox ñèe xuden Diox daa. Texal nqueꞌ lezon ñèen guꞌ, tataa ftubdiꞌs guꞌ loon no bli guꞌ conꞌ ñibeꞌen loo guꞌ, ey.
\v 10 Cheleꞌ guꞌ tyubdiꞌs loo diꞌs coꞌ ñibeꞌen loo guꞌ, tataaqueꞌ thidtene queꞌ lezon ñèen guꞌ. Tac xalqueꞌ ndyubdizen loo diꞌs coꞌ ñibeꞌ xuden loon, tataaqueꞌ xuden thidtenequeꞌ nqueꞌqueꞌ lezoꞌ ñèe xuden daa.
\p
\v 11 Taandxèꞌ ngue toodiz non guꞌ par tyac lezoꞌ guꞌ con daa no loo cón chenen. No tataa mod thidtene xyoꞌf ndeꞌ xyoꞌf ndlaꞌ lezoꞌ guꞌ no yanꞌ gust lezoꞌ guꞌ por cón chenen axta plóthe.
\v 12 Diꞌs coꞌ ngue ñibeꞌen loo guꞌ par li guꞌ nac conꞌ ndxèꞌ: Ndlyazen leꞌ guꞌ queꞌ lezoꞌ ñèe guꞌ thìb xtàa guꞌ no tedib xtàa guꞌ xalqueꞌ nqueꞌ lezon ñèen guꞌ.
\v 13 Yende thìb mbiꞌ loo izlyoꞌ coꞌ nqueꞌ tínꞌ lezoꞌ ñèe xtàa axta gath mbiꞌ por xtàa mbiꞌ. Conꞌa nee diꞌs, lìcqueꞌ, anzeꞌf nqueꞌ lezoꞌ mbiꞌ ñèe mbiꞌ xtàa mbiꞌ cheleꞌ mbiꞌ li tataa.
\v 14 Guꞌ ndxàc amiu daa coꞌ nazinꞌ daa cheleꞌ guꞌ, lìcqueꞌ, li coꞌ ñibeꞌen loo guꞌ.
\v 15 Ya neꞌtolode bezen loo guꞌ xal mbez mèn loo thìb moz tac moz neꞌñeeede cón li patrón moz. Per nalleꞌ más huen bezen loo guꞌ nac guꞌ amiu daa coꞌ anzeꞌf nazinꞌ daa tac daa mdaꞌleꞌ cuent loo guꞌ cón cheꞌn ryete conꞌ xal gunee xuden Diox loon par niina loo guꞌ.
\v 16 Inacta leꞌ guꞌ mcui daa. Ndxeꞌlequeꞌ, daa mcui guꞌ. No mtanꞌen diꞌs loo guꞌ par ya li guꞌ ryethe conꞌ coꞌ mnibeꞌen loo guꞌ. Loo conꞌ coꞌ mnibeꞌen loo guꞌa, gàc guꞌ loon xal thìb yaa xlè coꞌ ndaꞌ xlè ndac. Por cona, mcuilen guꞌ par thidtenequeꞌ li guꞌ conꞌ ndac coꞌ mnibeꞌen loo guꞌ li guꞌ. Cheleꞌ guꞌ tataa li, leꞌ sya, xuden li par que no guꞌ ryethe conꞌ coꞌ ñaꞌb guꞌ loo xuden por lèen.
\v 17 Conꞌ ndxèꞌ nac coꞌ ñibeꞌen loo guꞌ, ey: Ndlyazen leꞌ guꞌ queꞌ lezoꞌ ñèe guꞌ thìb xtàa guꞌ no tedib xtàa guꞌ.
\s Jesús ngue taꞌ cuent loo myenꞌ xinꞌ mtéꞌth Jesús leꞌ mèn izlyoꞌ ndxòo xyàn lezoꞌ ñèe mèn Jesús no ndxòo xyàn lezoꞌ mèn ñèe mèn myenꞌ xinꞌ mtéꞌth Jesús.
\p
\v 18 Cheleꞌ mèn coꞌ alithe nque tee ban loo izlyoꞌ ndxòo xyàn lezoꞌ ñèe mèn guꞌ, guꞌ naneequeꞌ no ndaꞌ guꞌ cuent leꞌ mèna ner ngòo xyàn lezoꞌ gunèe mèna daa ndooreꞌ yòo xyàn lezoꞌ mèna ñèe mèn guꞌ.
\v 19 Cheleꞌ guꞌ beꞌ nac mèn coꞌ nzi tee ban loo cón cheꞌn xab izlyoꞌ, leꞌ sya, mèn coꞌ nzi tee ban loo cón cheꞌn xab izlyoꞌ, queꞌ lezoꞌ ñèe mèna guꞌ xalqueꞌ nqueꞌ lezoꞌ mèna ñèe mèna xtàa mèna. Per com leꞌ daa mcui guꞌ làth mèn coꞌ nzi tee ban loo cón cheꞌn xab izlyoꞌ, ¿léꞌ?, cona, mèn coꞌ alithe nzi tee ban loo cón cheꞌn xab izlyoꞌ ndxòo xyàn lezoꞌ mèna ñèe mèna guꞌ tac guꞌ ya inzi tee bante loo cón cheꞌn xab izlyoꞌ xal mèna.
\v 20 Fteꞌ lezoꞌ guꞌ xal nac diꞌs coꞌ guniilen loo guꞌ: Yende nec thìb moz coꞌ más ñibeꞌ loo patrón. Cona, ngue niin loo guꞌ: Cheleꞌ mèn mdub nguꞌs daa no ndoo nque mèn xísen par guth mèn daa, tub nguꞌs mèn guꞌ no tyoo nque mèn xís guꞌ par guth mèn guꞌ, ne. Lomisqueꞌ ne, cheleꞌ mèna mdyubdiꞌs diꞌs coꞌ mbluꞌen loo mèna, tyubdiꞌs mèna diꞌs coꞌ luꞌ guꞌ loo mèna.
\v 21 Ryete conꞌa li no mèn guꞌ ante por cón chenen no maste tac indlibeꞌde mèna xuden coꞌ mtelꞌ daa loo izlyoꞌ ndxèꞌ.
\p
\v 22 Yende chó dol ngàp mèna loo Diox cheleꞌ daa neꞌngalte loo izlyoꞌ par mdoodiz non mèna. Per nalleꞌ yende mod golꞌ mèna diꞌs loon no quedìi mèn daa leꞌ mèna indxàpte dol.
\v 23 Lomisqueꞌ ne, mèn coꞌ ndxòo xyàn lezoꞌ ñèe mèna daa, mèna ndxòo xyàn lezoꞌ ñèe mèna xuden Diox.
\v 24 Yende chó dol ngàp mèna cheleꞌ mèna ndaꞌ cuent no mdenꞌ mèna cón mblin. Tac conꞌ coꞌ mblin loo mèn tarte li nec thìb mèn coꞌ naban loo izlyoꞌ ndxèꞌ. Per mèna gunèequeꞌ conꞌ coꞌ mblin. Per mastaleꞌ gunèe mèna conꞌ coꞌ mblin, ale leꞌleꞌ ndxòo xyàn lezoꞌ mèna ñèe mèna daa no ndxòo xyàn lezoꞌ mèna ñèe mèna xuden Diox.
\v 25 Per ndxàc conꞌ ndxèꞌ loon par gàcqueꞌ no tyaaqueꞌ no tyubqueꞌ diꞌs xal ndxab diꞌs coꞌ ndub loo libr coꞌ nac ley coꞌ mxoꞌf Moisés loo mèn. Diꞌsa mbez:
\pi1 Ale ngòo xyàn lezoꞌ mèn gunèe mèn daa. No ale yende conꞌ ngue lin loo mèn par yòo xyàn lezoꞌ mèn ñèe mèn daa.
\p
\v 26 Daa telꞌ Xpii Natúꞌ loo guꞌ xal ñibeꞌ xuden Diox loon. Xpii Natúꞌa indyèꞌde. Lyath no Xpii Natúꞌ guꞌ no tegán Xpii Natúꞌ lezoꞌ guꞌ. Coꞌseꞌ yiꞌth Xpii Natúꞌ coꞌ telꞌen loo guꞌ, Xpii Natúꞌ tolo tyoodiꞌs no guꞌ cón chenen. No taꞌ Xpii Natúꞌ cuent loo guꞌ cón chenen.
\v 27 Leꞌ sya, guꞌ taꞌ cuent loo mèn no tyoodiꞌs no guꞌ mèn cón chenen tac guꞌ ngo noqueꞌ daa axta coꞌseꞌ nerlequeꞌ mtlon mque tee tan cuent loo mèn loo izlyoꞌ ndxèꞌ no mdoodizen cón chenen loo mèn loo izlyoꞌ ndxèꞌ.
\c 16
\p
\v 1 Ngue niin conꞌ ndxèꞌ loo guꞌ par neꞌgàc chopte lezoꞌ guꞌ no par neꞌtyoo xàꞌde lezoꞌ guꞌ por cón chenen.
\v 2 Gàca loo guꞌ leꞌ mèn coꞌ chug guꞌ no tèꞌb mèn guꞌ no coꞌ too mèn guꞌ leꞌn sinagog mèn. No axta zin thìb huiz no zin thìb ze gab chol mèn leꞌ mèna ngue li thìb zinꞌ ndac loo Diox por guth mèn guꞌ.
\v 3 No li mèna conꞌ ndlyaꞌs mèna con guꞌ tac mèna thidtenequeꞌ indlibeꞌde xuden Diox. Neꞌ neꞌ indaꞌ mèna cuent cón cheꞌn xuden Diox. No neꞌ neꞌ indlibeꞌ mèna daa.
\v 4 Ngue niin conꞌ ndxèꞌ loo guꞌ par coꞌseꞌ zin hora no zin huiz coꞌseꞌ coꞌ chug mèn guꞌ leꞌn sinagog, teꞌ lezoꞌ guꞌ leꞌ daa guniileꞌ cón cheꞌn coꞌ gàc loo guꞌ.
\s Trèꞌ ndluꞌ cón cheꞌn zinꞌ coꞌ ngue li Xpii Natúꞌ loo mèn loo izlyoꞌ.
\p Neꞌngniiden conꞌ ndxèꞌ loo guꞌ coꞌseꞌ nerlequeꞌ mtlon mdoodizen loo guꞌ tac daa nzo noqueꞌ guꞌ.
\v 5 Per nalleꞌ daa bii par go non xaꞌ coꞌ mtelꞌ daa. No nec thìb guꞌ indyóode chonon niin biin, ndyaquen. No nec thìb guꞌ neꞌnibdiꞌste loon: ¿Pá ya Uꞌ, àꞌ, Tad?
\v 6 Per nalleꞌ ndyaquen tac guniin loo guꞌ leꞌ daa bii loo xaꞌ coꞌ mtelꞌ daa, ndenꞌen leꞌn lezon nxi lezoꞌ guꞌ.
\v 7 Lìcqueꞌ nac coꞌ ngue niin loo guꞌ ndxèꞌ, ey. Por part cón cheꞌn guꞌ, más huen gàca loo guꞌ ndyàan. Tac cheleꞌ daa neꞌbiide, neꞌyiꞌthte Xpii Natúꞌ loo guꞌ par lyath no Xpii Natúꞌ guꞌ no par tegán Xpii Natúꞌ lezoꞌ guꞌ, sya. Per cheleꞌ daa biiqueꞌ, leꞌ sya, na telꞌ Xpii Natúꞌ yiꞌth Xpii Natúꞌ loo guꞌ.
\v 8 Coꞌseꞌ yiꞌth Xpii Natúꞌ loo mèn loo izlyoꞌ, Xpii Natúꞌ li par yilaꞌs mèn leꞌ mèn ndxàp xtol. No li Xpii Natúꞌ thìb conꞌ loo mèn par taꞌ mèn cuent nzo thìb mod coꞌ ndli par que tee ban lì mèn loo Diox. No li Xpii Natúꞌ par non mèn leꞌ Diox tub rez cón cheꞌn mèn loo mèn yiloa.
\v 9 Na ngue nii loo guꞌ leꞌ mèna nac mèn coꞌ ndxàp xtol tac neꞌndalte mèna ngalaꞌs mèna loon no loo cón chenen.
\v 10 Por cón cheꞌn Xpii Natúꞌ taꞌ mèn cuent no non mèn nzoqueꞌ thìb mod que tee ban lì mèn loo Diox. Xpii Natúꞌ luꞌ conꞌa loo mèn tac daa biiqueꞌ loo xuden Diox. Leꞌ guꞌ na, ya neꞌtolode huiꞌ loon.
\v 11 Por cón cheꞌn Xpii Natúꞌ taꞌ mèn cuent no non mèn leꞌ Diox tub rez cón cheꞌn mèn loo mèn tac mquexùꞌleꞌ Diox Mebizya coꞌ ñibeꞌpeꞌ loo izlyoꞌ ndxèꞌ nalleꞌ.
\p
\v 12 Tatabeꞌ nzo huax conꞌ coꞌ ndlyazen toodiz non guꞌ. Per ndenꞌen axta neꞌ neꞌ xec yéc guꞌ par yòo yéc guꞌ diꞌs coꞌ lyazen niin loo guꞌ.
\v 13 Per coꞌseꞌ yiꞌth Xpii Natúꞌ coꞌ indyèꞌde loo guꞌ loo izlyoꞌ ndxèꞌ, Xpii Natúꞌ luꞌ loo guꞌ ryete conꞌ coꞌ nac lìcpeꞌ. Tac Xpii Natúꞌ neꞌtyoodiꞌste ante cón cheꞌn Xpii Natúꞌ. Ndxeꞌlequeꞌ, Xpii Natúꞌ luꞌ loo guꞌ ryete conꞌ coꞌ gòn Xpii Natúꞌ coꞌ gab xuden Diox. No taꞌ Xpii Natúꞌ cuent loo guꞌ cón cheꞌn conꞌ coꞌ gàc yiloa.
\v 14 Xpii Natúꞌ li par gàc conꞌ guryath no conꞌ guryèn loon tac Diox ñibeꞌ loo Xpii Natúꞌ luꞌ Xpii Natúꞌ ryete conꞌ coꞌ nac cón cheꞌn daa loo guꞌ.
\v 15 Ryete conꞌ coꞌ ngue no xuden Diox nac chenen, ne. Cona, guniilen loo guꞌ leꞌ Diox ñibeꞌ loo Xpii Natúꞌ par luꞌ Xpii Natúꞌ no co xoꞌf Xpii Natúꞌ ryethe cón chenen loo guꞌ.
\s Jesús ngue yab loo myenꞌ: Yalnaxi coꞌ ndxàc loo guꞌ, leꞌi càb loo guꞌ leꞌ guꞌ tyac tínꞌ lezoꞌ yiloa.
\p
\v 16 Leꞌn taapláte huiz guꞌ ya neꞌhuiꞌde loon. Per yiloa leꞌn taaplá huiz guꞌ bere huiꞌ loon tedib vez tac daa bii coꞌteꞌ nzo xuden.
\p
\v 17 Leꞌ sya, plá myenꞌ xinꞌ mtéꞌth Jesús mnibdiꞌs loo thìb xtàa myenꞌ no loo tedib xtàa myenꞌ. Ndxab myenꞌ:
\p ―¿Cón nee diꞌs diꞌs coꞌ ngolo gunee Tad loo naꞌ baꞌ, yey? Tad gunee loo naꞌ leꞌ leꞌn taapláte huiz ya neꞌhuiꞌde naꞌ loo Tad no yiloa leꞌn taaplá huiz bere naꞌ huiꞌ naꞌ loo Tad. No ¿cón nee diꞌs coꞌ gunee Tad loo naꞌ leꞌ Tad bii loo Diox xud Tad, yey?
\v 18 ¿Cón nee diꞌs diꞌs coꞌ gunee Tad loo naꞌ leꞌn taapláte huiza, cara? Neꞌtaꞌde naꞌ cuent cón nee diꞌs coꞌ gunee Tad loo naꞌ, ¿léꞌ?
\p
\v 19 Per Jesús mdenꞌ lezoꞌ leꞌ myenꞌ mblyaꞌs ñibdiꞌs loo Jesús. Por cona, ndxab Jesús loo myenꞌ:
\p ―Na ngue nii loo guꞌ leꞌ leꞌn taandxepte huiz guꞌ ya neꞌhuiꞌde loon. Per yiloa leꞌn taandxepte huiz guꞌ bere huiꞌ loon tedib vez. ¿Chéꞌ cón cheꞌn diꞌs ndxèꞌ nzi nibdiꞌs guꞌ loo xtàa guꞌ, càꞌ?
\v 20 Lìca, na nii loo guꞌ leꞌ guꞌ gónꞌ no cue xi lezoꞌ guꞌ por cón chenen. No coꞌseꞌ ñèe mèn izlyoꞌ ndxàca tataa loo guꞌ, tyac lezoꞌ mèna ñèe mèna guꞌ. Mastaleꞌ nzi xi lezoꞌ guꞌ, per coꞌseꞌ yilo xi lezoꞌ guꞌ, ale ndxeꞌlequeꞌ, tyac lezoꞌ guꞌ tedib vez axta plóthe.
\v 21 Nde niin thìb conꞌ loo guꞌ: Coꞌseꞌ yamerleꞌ gáal xinꞌ thìb xaꞌgot, anzeꞌf ndyóo xaꞌ tac yamerleꞌ gáal hor coꞌseꞌ tenꞌ xaꞌ yalnè no tenꞌ xaꞌ yoꞌf coꞌ quée loo xaꞌ. Per coꞌseꞌ ngololeꞌ mxan xaꞌ thìb mbed, ya neꞌtyede lezoꞌ xaꞌ máa yalnè coꞌ mdenꞌ xaꞌa tac anzeꞌf ndyac lezoꞌ xaꞌ leꞌ mbed coꞌ ngóola nac thìb mbedbiꞌ.
\v 22 Tataa nzi xi lezoꞌ guꞌ nalleꞌ. Per neꞌtyóode guꞌ. Daa bere huiꞌ loo guꞌ. Sya, anzeꞌf tyac lezoꞌ guꞌ. No coꞌseꞌ tyac lezoꞌ guꞌa, conꞌa gàc thìb gust coꞌ yende chó mèn teche loo guꞌ.
\p
\v 23 No coꞌseꞌ gàc hora no huiza, nec thìb conꞌ neꞌñibdiꞌste guꞌ loon, ndee guꞌ. Lìca, na nii loo guꞌ leꞌ ryete conꞌ coꞌ ñaꞌb guꞌ loo xuden por lèen, xuden li par que no guꞌi.
\v 24 Anon mtlon mque tee non guꞌ no axta nalleꞌ tarte ñaꞌb guꞌ nec thìb conꞌ loo xuden por lèen. Bnab guꞌi no daa li par que no guꞌi par yanꞌ gust lezoꞌ guꞌ no tyac lezoꞌ guꞌ.
\s Trèꞌ ndluꞌ leꞌ Jesús ngue yab loo mèn: Daa mblileꞌ gan loo mèn yeꞌrsinꞌ loo izlyoꞌ ndxèꞌ.
\p
\v 25 Daa mdoodizleꞌ conꞌ ndxèꞌ loo guꞌ xal ntetac mèn cón cheꞌn thìb conꞌ loo mèn. Per zin thìb hor coꞌseꞌ ya neꞌtetacten diꞌs coꞌ tyoodizen loo guꞌ. Ndxeꞌlequeꞌ, nalìte no nambìite tyoodizen loo guꞌ cón cheꞌn xuden Diox.
\v 26 Huiza no hora ñaꞌb guꞌ conꞌ loo xuden Diox por lèen. No thidtene niin loo guꞌ leꞌ daa neꞌñaꞌbte conꞌ loo xuden Diox por cón cheꞌn guꞌ
\v 27 tac yub xuden Diox nqueꞌ lezoꞌ ñèe Diox guꞌ tac guꞌ nqueꞌ lezoꞌ gunèe guꞌ daa. No ngolaꞌsqueꞌ guꞌ leꞌ daa ngroꞌ loo xuden Diox.
\v 28 Daa ngroꞌleꞌ loo xuden Diox no ndalen loo izlyoꞌ ndxèꞌ. Per nalleꞌ na roꞌ loo izlyoꞌ ndxèꞌ. Beren, ndyàan loo xuden Diox tedib vez.
\p
\v 29 Sya, ndxab myenꞌ xinꞌ mtéꞌth Jesús loo Jesús:
\p ―Nase clarlequeꞌ ngue toodiꞌs Uꞌ loo nuꞌ. No indyoodiꞌste Uꞌ diꞌs coꞌ ntetac Uꞌ thìb conꞌ con tedib conꞌ loo nuꞌ.
\v 30 Nase non nuꞌ leꞌ Uꞌ nanee ryethe conꞌ, Tad. No ya inaquinte ñibdiꞌs mèn nec thìb conꞌ loo Uꞌ. No por cona, ndxelaꞌs nuꞌ leꞌ Uꞌ ngroꞌleꞌ loo Diox.
\p
\v 31 Jesús mcàb loo myenꞌ. Ndxab Jesús:
\p ―¿Chéꞌ nareꞌ, por derech, ngolaꞌs guꞌ loon, càꞌ?
\v 32 Huiꞌ guꞌ nexa. Leꞌ hor mzinleꞌ no leque hor ndxèꞌ nac hor coꞌseꞌ gàc conꞌ ryes loo guꞌ. No xàꞌ xàꞌ tyen thìb thìb guꞌ ned. No thidten láꞌ guꞌ. Per neꞌyanꞌte thidten tac xuden Diox nzo noqueꞌ daa. No neꞌláꞌde xuden daa thidten.
\v 33 Ngue niin ryete conꞌ ndxèꞌ loo guꞌ par cue see tee lezoꞌ guꞌ por ndxelaꞌs guꞌ loon no ndxàp guꞌ yalxlaꞌs loo cón chenen. Láth beꞌ nziriꞌ guꞌ loo izlyoꞌ ndxèꞌ, anzeꞌf tyactìi guꞌ no cue xi lezoꞌ guꞌ. Per gòp guꞌ yalxlaꞌs loon no neꞌtyoo xàꞌde lezoꞌ guꞌ loo cón chenen. Tac nase daa mblileꞌ gan loo rye loothe conꞌ coꞌ nac ngolo ngolaꞌs coꞌ nac xab izlyoꞌ loo izlyoꞌ ndxèꞌ coꞌ ncàb conꞌ yeꞌrsinꞌ loo mèn.
\c 17
\s Jesús ngue bez Diox por myenꞌ xinꞌ mtéꞌth Jesús.
\p
\v 1 Ngolo mdoodiꞌs no Jesús myenꞌ xinꞌ mtéꞌth Jesús, Jesús mbuiꞌ loo béꞌ. No ndxab Jesús:
\p ―Pay, nase mzinleꞌ hor coꞌ gàc yaltii loon. Bli Uꞌ par gàc conꞌ roo conꞌ xèn loon, daa coꞌ nac xganꞌ Uꞌ, par gàca leꞌ daa coꞌ nac xganꞌ Uꞌ li par tolo gàc conꞌ roo conꞌ xèn loo Uꞌ, ne.
\v 2 Uꞌ mnibeꞌ loon, daa coꞌ nac xganꞌ Uꞌ, par ñibeꞌen loo ryete mèn coꞌ nzi ban dib athu loo izlyoꞌ par tataa mod lin par yòo ban no mèn Uꞌ thidtene, ryete mèn coꞌ mbli Uꞌ par mdyal mèna yòo mèna loo cón chenen.
\v 3 Yalnaban coꞌ ndaꞌ Uꞌ loo mèn, coꞌ nee diꞌs, yòo ban no mèn Uꞌ thidtene ndxàc loo mèn por ndlibeꞌ mèn Uꞌ, Uꞌ coꞌ nac thidte Diox lìcpeꞌ, no por mblibeꞌ mèn daa coꞌ nac Jesucrist coꞌ mtelꞌ Uꞌ mbiꞌth loo mèn loo izlyoꞌ ndxèꞌ.
\p
\v 4 Daa mblileꞌ ngòc conꞌ roo conꞌ xèn loo Uꞌ loo izlyoꞌ ndxèꞌ. No nalleꞌ mtelolen ryethe conꞌ coꞌ mnibeꞌ Uꞌ loon par mblina.
\v 5 Per nase, Pay, ñaꞌben loo Uꞌ: Bli Uꞌ par gàc leque conꞌ roo conꞌ xèn loon coꞌ ngòc loon ndooreꞌ coꞌseꞌ mblec Uꞌ izlyoꞌ ndxèꞌ.
\p
\v 6 Ryete mèn coꞌ mcuiꞌ Uꞌ no coꞌ mbloꞌ xàꞌ Uꞌ làth mèn coꞌ ndli cón cheꞌn xab izlyoꞌ coꞌ mbli Uꞌ ngòo loo cón chenen, daa mda cuent loo mèna no mbluꞌen loo mèna chó nac Uꞌ no cón nac cón cheꞌn Uꞌ. Rye mèn coꞌ mcui Uꞌ no coꞌ mbloꞌ xàꞌ Uꞌ loo cón cheꞌn xab izlyoꞌ, mèna ngòc cheꞌnpeꞌ Uꞌ. Ngoloa, mblo Uꞌ mèna loo cón chenen. No mdubdiꞌsqueꞌ mèna no mdub nza mèna loo conꞌ mnibeꞌ Uꞌ loo mèna.
\v 7 Per nase ryete mèna mbli laꞌsleꞌ leꞌ ryete conꞌ coꞌ mblin no coꞌ mbluꞌen loo mèn, yub Uꞌ mbli loon par mblina.
\v 8 Daa mdoodizleꞌ diꞌs coꞌ mnibeꞌ Uꞌ loon toodizen loo mèna. Mdaꞌqueꞌ mèna lugar mbìn mèna diꞌs. No mdenꞌ mèna no mdaꞌ mèna cuent leꞌ daa, lìcqueꞌ, ngroꞌ loo Uꞌ. No ngolaꞌsqueꞌ mèna leꞌ Uꞌ mtelꞌ daa loo izlyoꞌ ndxèꞌ.
\p
\v 9 Pay, daa ñaꞌb loo Uꞌ por cón cheꞌn mèn coꞌ ngòo loo cón chenen. Iñaꞌbten loo Uꞌ por cón cheꞌn mèn coꞌ más ndli cón cheꞌn coꞌ nac xab izlyoꞌ. Ndxeꞌlequeꞌ, ñaꞌben loo Uꞌ por cón cheꞌn mèn coꞌ Uꞌ mbli mdyal par ngòo mèn loo cón chenen tac mèna nac cheꞌnpeꞌ Uꞌ.
\v 10 Ryete mèn coꞌ mbli Uꞌ mdyal par ngòo mèna loo cón chenen no rye loothe conꞌ coꞌ nziriꞌ loo izlyoꞌ coꞌ nac cheꞌnpeꞌ daa nac cheꞌn Uꞌ. Rye loothe conꞌ coꞌ nac cheꞌn Uꞌ nac chenen, ne. No por cón cheꞌn mèn coꞌ mbli Uꞌ mdyal par ngòo mèna loo cón chenen ndxàcqueꞌ conꞌ roo conꞌ xèn loon.
\p
\v 11 Daa ya neꞌtolode go loo izlyoꞌ ndxèꞌ. Per mèn coꞌ ngòo loo cón chenen, mèna toloqueꞌ cue ban loo izlyoꞌ ndxèꞌ. Leꞌ daa na, biiqueꞌ par go non Uꞌ. Pay, Uꞌ coꞌ nac thìb xaꞌ natúꞌ, fquenap Uꞌ mèn coꞌ mbli Uꞌ ngòo loo cón chenen con ryethe conꞌ roo conꞌ xèn coꞌ nzo laꞌs yaꞌ Uꞌ no laꞌs nii Uꞌ par thidtenequeꞌ thidte gàc mèna xalqueꞌ thidte nac ryop naꞌ.
\v 12 Coꞌseꞌ ngo non mèna loo izlyoꞌ ndxèꞌ, daa mquenap mèn coꞌ mbli Uꞌ ngòo loo cón chenen xalqueꞌ nac conꞌ roo conꞌ xèn coꞌ nzo laꞌs nii Uꞌ no coꞌ nzo laꞌs yaꞌ Uꞌ. Daa mquenap mèn coꞌ mbli Uꞌ ngòo loo cón chenen. No yende cón mxac nec thìb mèna loo cón chenen, ante thìb myenꞌ coꞌ mbyanꞌleꞌ diꞌs ryo xàꞌ loo cón chenen, myenꞌa ngro xàꞌ loo cón chenen par ngòcqueꞌ no mdyaaqueꞌ no mdyubqueꞌ diꞌs coꞌ ndub loo libr coꞌ nac xtiꞌs Uꞌ.
\p
\v 13 Per nalleꞌ daa bii coꞌteꞌ nzo Uꞌ, Pay. Daa ngue nii conꞌ ndxèꞌ loo Uꞌ láth beꞌ nzon loo izlyoꞌ ndxèꞌ par gàca xyoꞌf ndeꞌ xyoꞌf ndlaꞌ lezoꞌ myenꞌ no yanꞌ gust lezoꞌ myenꞌ xal nxyoꞌf ndeꞌ nxyoꞌf ndlaꞌ lezon axta plóthe.
\v 14 Daa mbluꞌleꞌ cón cheꞌn Uꞌ loo mèn coꞌ mbli Uꞌ ngòo loo cón chenen xalqueꞌ mnibeꞌ Uꞌ loon. Per mèn cheꞌn izlyoꞌ, aleꞌ leꞌleꞌ ngòo xyàn lezoꞌ mèn izlyoꞌ gunèe mèn izlyoꞌ mèn coꞌ ngòo loo cón chenen. Tac inacte mèn coꞌ ngòo loo cón chenen mèn coꞌ beꞌ ndli cón cheꞌn xab izlyoꞌ xalqueꞌ inacte daa mèn coꞌ ndli cón cheꞌn xab izlyoꞌ.
\v 15 Ingue naꞌbten diꞌs loo Uꞌ par teche Uꞌ mèn coꞌ ngòo loo cón chenen loo izlyoꞌ. Ndxeꞌlequeꞌ, daa ngue naꞌb diꞌs loo Uꞌ leꞌ Uꞌ tíꞌ no làa Uꞌ mèna laꞌs yaꞌ Mebizya.
\v 16 Com leꞌ daa inacte mèn cheꞌnpeꞌ izlyoꞌ ndxèꞌ, ¿léꞌ?, neꞌ mèn coꞌ mbli Uꞌ ngòo loo cón chenen inacte mèn cheꞌnpeꞌ izlyoꞌ ndxèꞌ.
\v 17 Tolo bloꞌ xàꞌ Uꞌ mèn coꞌ ngòo loo cón chenen loo conꞌ yeꞌrsinꞌ coꞌ nac cón cheꞌn xab izlyoꞌ por cón cheꞌn xtiꞌs Uꞌ coꞌ ndluꞌ coꞌ nac lìcpeꞌ.
\v 18 Texal mtelꞌ Uꞌ daa loo mèn loo izlyoꞌ ndxèꞌ, tataaqueꞌ telꞌen myenꞌ coꞌ nac myenꞌpeꞌ daa loo mèn loo izlyoꞌ ndxèꞌ par luꞌ myenꞌ cón chenen loo mèn izlyoꞌ.
\v 19 No por cón cheꞌn myenꞌpeꞌ daa, leque daa mnibeꞌ loo lezon lin ante coꞌ neete lezoꞌ Uꞌ par gàca leꞌ myenꞌpeꞌ daa tolo ryo xàꞌ loo conꞌ yeꞌrsinꞌ loo cón cheꞌn coꞌ nac xab izlyoꞌ por cón cheꞌn xtiꞌs Uꞌ coꞌ ndluꞌ coꞌ nac lìcpeꞌ.
\p
\v 20 Per iñaꞌbten loo Uꞌ ante cón cheꞌn myenꞌ coꞌ nac myenꞌpeꞌ daa. Ndxeꞌlequeꞌ, ñaꞌben loo Uꞌ por cón cheꞌn mèn coꞌ yilaꞌs loon yiloa por diꞌs coꞌ tyoodiꞌs myenꞌ no por diꞌs coꞌ co myenꞌ yalbàn cón chenen loo mèn.
\v 21 Ñaꞌben loo Uꞌ, Pay, leꞌ ryete mèn coꞌ nac myenꞌpeꞌ daa thidte gàc myenꞌ thidtene. No ñaꞌben loo Uꞌ thidte queltàa myenꞌ con naꞌ xalqueꞌ nzon loo Uꞌ no xalqueꞌ nzo Uꞌ loon xalqueꞌ thidte nac ryop naꞌ. No ñaꞌben loo Uꞌ, Pay, bli Uꞌ par thidte gàc myenꞌ loo cón cheꞌn naꞌ thidtene par tataa mod yilaꞌs mèn cheꞌn izlyoꞌ no non mèn cheꞌn izlyoꞌ leꞌ Uꞌ mtelꞌ daa loo izlyoꞌ ndxèꞌ.
\v 22 Pay, daa mbluꞌleꞌ loo mèn no mblin par mdenꞌ mèn cón cheꞌn conꞌ roo conꞌ xèn coꞌ ndxàc loo mèn par thidte gàc mèna loo cón cheꞌn naꞌ xalqueꞌ ndxàc conꞌ roo conꞌ xèn loon por thidte nac naꞌ.
\v 23 Daa nzo noqueꞌ mèn coꞌ ngòo loo cón chenen. No Uꞌ nzo noqueꞌ daa par tataa mod nambìite no nalìte gàc mèna thidte loo cón cheꞌn naꞌ par gàca taꞌ mèn izlyoꞌ cuent leꞌ Uꞌ mtelꞌ daa loo izlyoꞌ ndxèꞌ. No par taꞌ mèn izlyoꞌ cuent leꞌ Uꞌ nqueꞌqueꞌ lezoꞌ ñèe mèn dib athu loo izlyoꞌ ndxèꞌ xalqueꞌ nqueꞌ lezoꞌ Uꞌ ñèe Uꞌ daa.
\p
\v 24 Pay, Uꞌ mbli par ngòo mèn loo cón chenen. Daa ndlyaꞌs leꞌ mèna yòo coꞌteꞌ gon par ñèe mèna conꞌ roo conꞌ xèn coꞌ nac ryethe conꞌ mbli Uꞌ ngòc loon. Tac Uꞌ nqueꞌqueꞌ lezoꞌ ñèe Uꞌ daa axta ndooreꞌ coꞌseꞌ mblec Uꞌ izlyoꞌ no mxenꞌ Uꞌ izlyoꞌ.
\v 25 Pay, Uꞌ coꞌ nac thidte xaꞌ nalì no xaꞌ nambìi, tarte libeꞌ mèn izlyoꞌ Uꞌ. Per daa ndlibequeꞌ Uꞌ. No mèn coꞌ mbli Uꞌ par ngòo mèna loo cón chenen, mèna naneequeꞌ leꞌ Uꞌqueꞌ mtelꞌ daa par mbalen loo izlyoꞌ ndxèꞌ.
\v 26 Daa mbluꞌqueꞌ no mblo xoꞌfquen loo mèn chó nac Uꞌ. No toloqueꞌ luꞌen loo mèn no go xoꞌfen loo mèn chó nac Uꞌ par gàca texalqueꞌ nqueꞌ lezoꞌ Uꞌ ñèe Uꞌ daa, tataaqueꞌ queꞌ lezoꞌ mèn ñèe mèn hues xtàa mèn. No tataaqueꞌ lin par thidtenequeꞌ go non mèna, ne.
\c 18
\s Mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel mxenxùꞌ Jesús xal thìb pres.
\r (Mt. 26.47–56; Mr. 14.43–50; Lc. 22.47–53)
\p
\v 1 Texal ngolo mdoodiꞌs no Jesús Diox xud Jesús no ngurez Jesús Diox, ngroꞌ no Jesús myenꞌ xinꞌ mtéꞌth Jesús par ya no Jesús myenꞌ tedib lad ro thìb ftee coꞌ mbez mèn lèe Cedrón. Tya ngure thìb huert. No coꞌteꞌ ngure huerta ngòo no Jesús myenꞌ xinꞌ mtéꞌth Jesús huax vez.
\v 2 Nde nxonꞌ, no Jud coꞌ mdaꞌxùꞌ Jesús loo mèn nanee lugara. Tac huax vez ndyee Jesús con myenꞌ xinꞌ mtéꞌth Jesús par nqueltàa Jesús con myenꞌ tya.
\v 3 Látha, mzin no Jud thìb partid solndad, no ndxep mèn coꞌ nxoꞌf zinꞌ zinꞌ leꞌn templ coꞌ mtelꞌ jef cheꞌn nguleyꞌ coꞌ más ñibeꞌ loo rye nguleyꞌ, no mèn cheꞌn xleyꞌ farise. Nde no Jud mèna. Nzo spad yaꞌ mèna no nzo mached no cuchi yaꞌ mèna. No nde no mèna lintern no yeꞌrbèel par mtenìi mèna ned nde mèna.
\v 4 Per com leꞌ Jesús nonqueꞌ no naneequeꞌ Jesús ryethe conꞌ tyactìi Jesús, ¿léꞌ?, ngroꞌ Jesús par ngua sálꞌ Jesús mèna. Ndxab Jesús loo mèna:
\p ―¿Chó nde cuaꞌn guꞌ, àꞌ?
\p
\v 5 Mcàb mèna loo Jesús. Ndxab mèna:
\p ―Nuꞌ nde cuaꞌn mbiꞌ coꞌ lèe Jesús coꞌ nac mèn yèez Nazaret.
\p Jesús mcàb. Ndxab Jesús loo mèna:
\p ―Daa nac Jesús.
\p Làth mèna nde Jud coꞌ taꞌxùꞌ Jesús loo mèna, ne.
\p
\v 6 Texal ndxab Jesús loo mèna:
\p ―Daa nac Jesús,
\m ale yub mèna ngulàateriꞌ loo yòo par ned xís mèna.
\v 7 Ngoloa, mbere Jesús, mnibdiꞌs Jesús loo mèna tedib vez:
\p ―¿Chó nde cuaꞌn guꞌ, àꞌ?
\p Mèna mcàb. Ndxab mèna loo Jesús:
\p ―Nuꞌ nde cuaꞌn mbiꞌ coꞌ lèe Jesús coꞌ nac mèn yèez Nazaret.
\p
\v 8 Jesús mcàb loo mèna. Ndxab Jesús:
\p ―Na guniileꞌ loo guꞌ. Daa nac Jesús. Cheleꞌ guꞌ nde cuaꞌn daa, blaꞌ guꞌ bii myenꞌ ndxèꞌ.
\p
\v 9 Tataa ngòca loo Jesús par ngòcqueꞌ no mdyaaqueꞌ no mdyubqueꞌ diꞌs coꞌ ndxab Jesús loo Diox xud Jesús coꞌseꞌ ndxab Jesús:
\p ―Myenꞌ coꞌ mcui Uꞌ, coꞌ ngòo loo cón chenen, yende cón ngòc loo myenꞌ.
\p
\v 10 Látha nzo Mon Pedr. Nde nxonꞌ, ngue spad cho Mon Pedr. Thidte ngua yaꞌ Mon Pedr rlanꞌ Mon Pedr. Mdob Mon Pedr spad leꞌn vayin. Mblàa Mon thìb yaꞌ spad nza thìb moz coꞌ nac ladlì cheꞌn moz. Moza ngroꞌ lèe Malc. Ngòc moza moz cheꞌn jef cheꞌn nguleyꞌ coꞌ más mnibeꞌ loo rye nguleyꞌ tiempa.
\v 11 Sya, ndxab Jesús loo Pedr:
\p ―Pedr, blosuaꞌ spad leꞌn vayin. ¿Chéꞌ ndxelaꞌsl no ndlil cuent indxàalte tyactìi daa loo thìb preb coꞌ mbli nee lezoꞌ xuden Diox tyactìi daa, càꞌ? Yende xàa. Preb ndxèꞌ gàcqueꞌ loon.
\s Jesús mdooxùꞌ loo mbiꞌ coꞌ ngòc jef cheꞌn nguleyꞌ coꞌ más mnibeꞌ loo rye nguleyꞌ tiempa.
\r (Mt. 26.57–58; Mr. 14.53–54; Lc. 22.54)
\p
\v 12 Leꞌ sya, rye mèn coꞌ ngòc solndad, no xaꞌ coꞌ ngòc capitán, no mèn coꞌ ngòc myenꞌ nac zinꞌ cheꞌn mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel, rye mèna mxenxùꞌ Jesús. Mdub dóꞌ mèna yaꞌ Jesús. Mbeꞌ mèna Jesús xal thìb pres.
\v 13 Mbeꞌ mèna Jesús nerlequeꞌ loo Anás tac Anás ngòc xudzap Caifás. Caifasa ngòc jef cheꞌn nguleyꞌ coꞌ más mnibeꞌ loo rye nguleyꞌ línꞌa.
\v 14 Leque Caifasa ngòc Caifás coꞌ mdeꞌth no coꞌ ndxab loo mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel ndxàalqueꞌ gath thìb mbiꞌ lugar de lyux rye mèn nación Israel.
\s Pedr mcà diꞌs cón cheꞌn Jesús loo mèn.
\r (Mt. 26.69–70; Mr. 14.66–68; Lc. 22.55–57)
\p
\v 15 Per látha, mdoo nque Mon Pedr con tedib myenꞌ coꞌ ndxàc xtàa Mon Pedr coꞌ nac leque xinꞌ mtéꞌth Jesús xís Jesús. Mbiꞌ coꞌ nac jef cheꞌn nguleyꞌ coꞌ más ñibeꞌ loo rye nguleyꞌ mblibeꞌ mbiꞌ coꞌ ndxàc xtàa Mon Pedr. Sya, mdoo nque leque thìb myenꞌ coꞌ ndxàc xtàa Mon Pedr xís Jesús axta loo lueꞌ coꞌteꞌ ngòc liz jef cheꞌn nguleyꞌ coꞌ más mnibeꞌ loo rye nguleyꞌ línꞌa.
\v 16 Leꞌ Pedr na, mbyanꞌ par ro ned ro puert. Cona mbli ngroꞌ mbiꞌ coꞌ ngòc myenꞌ xinꞌ mtéꞌth Jesús coꞌ nac xtàa Pedr coꞌ mblibeꞌ jef cheꞌn nguleyꞌa par mdoodiꞌs no mbiꞌ mozgot coꞌ ngue quenap puert par mblo mozgota Pedr par leꞌn loo lueꞌ liz nguleyꞌa.
\v 17 Sya, mnibdiꞌs mozgota loo Pedr. Ndxab mozgota:
\p ―¿Chéꞌ inode lùu nac thìb myenꞌ xinꞌ mtéꞌth mbiꞌ baꞌ, ne, càꞌ?
\p Pedr mcàb. Ndxab Pedr:
\p ―Yende xàa. Inacte daa xinꞌ mtéꞌth mbiꞌ baꞌ.
\p
\v 18 Leꞌpeꞌ yálꞌa anzeꞌf ngòc nàl. Leꞌ sya, ryete moz cheꞌn nguleyꞌ no myenꞌ coꞌ nac myenꞌ nac zinꞌ coꞌ nquenap templ, mtlo myenꞌ, mtolꞌ myenꞌ quìi. No mtoocuaꞌ myenꞌ yaa loo quìi par ngure biiz myenꞌ ro rdii. Nde nxonꞌ, note Pedr ngo làth myenꞌ par mdoo biiz Pedr ro dii.
\s Anás noo noo ngue nibdiꞌs loo Jesús cón cheꞌn Jesús.
\r (Mt. 26.59–66; Mr. 14.55–64; Lc. 22.66–71)
\p
\v 19 Látha, jef cheꞌn nguleyꞌ coꞌ más ñibeꞌ loo rye nguleyꞌ mtlo mnibdiꞌs loo Jesús chópeꞌ myenꞌ nac myenꞌ xinꞌ mtéꞌth Jesús no cón nac coꞌ ngue luꞌ Jesús loo mèn.
\v 20 Jesús mcàb loo mbiꞌ coꞌ nac jef cheꞌn nguleyꞌa. Ndxab Jesús:
\p ―Na mdoodizqueꞌ loo mèn loo xnaa. No mbluꞌquen cón chenen loo mèn leꞌn sinagog no leꞌn templ coꞌteꞌ nqueltàa ryete mèn coꞌ nac mèn nación Israel. Cona, ngue niin lool: Yende cón tarte toodizen xexte loo mèn.
\v 21 ¿Chonon ngue ñibdiꞌsl loon, àꞌ? Bnibdiꞌs loo mèn coꞌ mbìnleꞌ diꞌs coꞌ mdoodizlen. Mèna taꞌ cuent cón chenen lool xal nac diꞌs coꞌ mdoodizlen loo mèn.
\p
\v 22 Coꞌseꞌ ngolo tataa ndxab Jesús diꞌsa, thìb mbiꞌ coꞌ ngòc myenꞌ nac zinꞌ coꞌ nquenap templ coꞌ ngo tya, thidte ngua mbiꞌ mdiꞌs mbiꞌ rloo Jesús. No ndxab mbiꞌ loo Jesús:
\p ―¿Chéꞌ tatuaꞌ mod ncàbl loo jefpeꞌ cheꞌn rye nguleyꞌ, càꞌ?
\p
\v 23 Jesús mcàb loo mbiꞌ. Ndxab Jesús:
\p ―Cheleꞌ daa mdoodiz chol diꞌs yeꞌrsinꞌ, gunee ñeeneꞌ xá mod nac diꞌsa. Per cheleꞌ daa mdoodiz diꞌs coꞌ nac diꞌs ndac, ¿chonon mdiꞌsl rloon, sya?
\p
\v 24 Ngoloa, mtelꞌ Anás Jesús natedóꞌ yaꞌ Jesús loo tedib mbiꞌ coꞌ lèe Caifás coꞌ ngòc jef cheꞌn nguleyꞌ coꞌ más ñibeꞌ loo rye nguleyꞌ línꞌa.
\s Pedr mbere mcà diꞌs cón cheꞌn Jesús loo mèn tedib vez.
\r (Mt. 26.71–75; Mr. 14.69–72; Lc. 22.58–62)
\p
\v 25 Látha, Pedr ndoo biizqueꞌ ro rdii làth mèna. Sya, ndxab mèna loo Pedr:
\p ―¿Chéꞌ inode lùu nac thìb myenꞌ xinꞌ mtéꞌth mbiꞌ baꞌ, càꞌ?
\p Sya, mcà diꞌs Pedr. Ndxab Pedr:
\p ―Inacte daa xinꞌ mtéꞌth mbiꞌ baꞌ, cara.
\p
\v 26 Sya, ndxab thìb mbiꞌ coꞌ ngòc moz jef cheꞌn nguleyꞌ coꞌ más ñibeꞌ loo rye nguleyꞌ no coꞌ ndxàcguèꞌ mèn guliz mbiꞌ coꞌ mchoꞌ Pedr nzaa loo Pedr:
\p ―Ale mbezl: Inacte daa xinꞌ mtéꞌth mbiꞌ baꞌ. ¿Chéꞌ ndlil cuent neꞌngnèeden lùu con mbiꞌ baꞌ leꞌn huert, ne, càꞌ?
\p
\v 27 Mbere Pedr, mcà diꞌs Pedr Jesús tedib vez. Leque hora, chàa, ngrozèe nguiidtee. Mbléꞌ nguiidtee yálꞌ.
\s Jesús mdooxùꞌ loo thìb mbiꞌ coꞌ ngroꞌ lèe Pilat.
\r (Mt. 27.1–2, 11–14; Mr. 15.1–5; Lc. 23.1–5)
\p
\v 28 Sya, xtilꞌlequeꞌ mbloꞌ mèna Jesús liz Caifás. Mbeꞌ mèna Jesús loo Pilat coꞌteꞌ nac palas cheꞌn Pilat. Mèn coꞌ mbeꞌ Jesús loo Pilat ngòc mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel. Mèna neꞌngòode leꞌn palas cheꞌn Pilat par neꞌgàc zabte mèna loo costumbr coꞌ ndxàp mèna cón cheꞌn xleyꞌ mèna. Tac cheleꞌ mèn gàc mèn zab loo por thìb conꞌ coꞌ iñaade, leꞌ sya, conaꞌte li neꞌyòode mèna loo mes par hua mèna coꞌ nac yalhua cheꞌn lni pasc.
\v 29 Sya, ngroꞌ Pilat par fuer. Ngua toodiꞌs no Pilat mèna. Ndxab Pilat:
\p ―¿Cón ndli nqueyèe guꞌ mbiꞌ ndxèꞌ loon, àꞌ?
\p
\v 30 Mcàb mèna loo Pilat. Ndxab mèna:
\p ―Cheleꞌ mbiꞌ baꞌ neꞌngàcte thìb mbiꞌ yeꞌrsinꞌ, neꞌnguiꞌth node nuꞌ mbiꞌ lool.
\p
\v 31 Sya, ndxab Pilat loo mèna:
\p ―Beꞌ guꞌ mbiꞌ. No ftub rez guꞌ cón cheꞌn mbiꞌ xal ñibeꞌ ley guꞌ loo guꞌ par li guꞌ conꞌ con mbiꞌ.
\p Per mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel mcàb loo Pilat. Ndxab mèna:
\p ―Per nuꞌ coꞌ nac mèn nación Israel, ley coꞌ ngue no nuꞌ indaꞌde lugar loo nuꞌ par guth nuꞌ nec thìb mèn.
\p
\v 32 Tataa mod ngòca par mdyaaqueꞌ no ngòcqueꞌ no mdyubqueꞌ diꞌs coꞌ gunii Jesús cón cheꞌn xá mod gath Jesús.
\v 33 Leꞌ sya, mbere Pilat, ngòo Pilat leꞌn palas tedib vez. Ngurez Pilat Jesús. No mnibdiꞌs Pilat loo Jesús. Ndxab Pilat:
\p ―¿Chéꞌ, lìcqueꞌ, lùu nac rey cheꞌn mèn nación Israel, càꞌ?
\p
\v 34 Jesús mcàb loo Pilat. Ndxab Jesús:
\p ―¿Chéꞌ ngue ñibdiꞌsl cón chenen ante por iñeedel cón chenen o chéꞌ alithe ngue ñibdiꞌsl cón chenen tac mdaꞌleꞌ tedib mèn cuent cón chenen lool, càꞌ?
\p
\v 35 Pilat mcàb loo Jesús. Ndxab Pilat:
\p ―¿A poc ñeel no daa nac mèn nación Israel, càꞌ? Yende xàa. Mèn coꞌ nac mèn nación lùu no mèn coꞌ nac jef cheꞌn nguleyꞌ coꞌ más ñibeꞌ loo rye nguleyꞌ cheꞌn nación lùu nac mèn coꞌ nde no lùu loon trèꞌ. ¿Cóxeꞌ ngue tee lil, àꞌ?
\p
\v 36 Jesús mcàb. Ndxab Jesús loo Pilat:
\p ―Coꞌteꞌ nac nacionpeꞌ daa no coꞌteꞌ ñibeꞌen inacte loo izlyoꞌ ndxèꞌ, ey. Cheleꞌ coꞌteꞌ ñibeꞌen ngàc cheꞌn izlyoꞌ ndxèꞌ, leꞌ sya, mèn coꞌ mque tee no daa neꞌnglaꞌde par nden mèn nación Israel daa. Per izlyoꞌ ndxèꞌ inacte coꞌteꞌ ñibeꞌen nalleꞌ. Por cona, ngue li mèn conꞌ ndlyaꞌs mèn con daa.
\p
\v 37 Sya, ndxab Pilat loo Jesús:
\p ―¿Lìcqueꞌ nacl rey, sya, càꞌ?
\p Mcàb Jesús. Ndxab Jesús loo Pilat:
\p ―Aa. Lìcqueꞌ nac daa rey, pues, xalqueꞌ ngolo guneela baꞌ. Daa ngóol loo izlyoꞌ ndxèꞌ no mbalen loo izlyoꞌ ndxèꞌ par mdan cuent no mdoodizen cón chenen coꞌ nac lìcpeꞌ. Ryete mèn coꞌ ndub nza no coꞌ ndyubdiꞌs loo cón chenen coꞌ nac lìcpeꞌ, mèna ndxòn no nqueꞌ nza mèna diꞌs coꞌ ndyoodizen.
\p
\v 38 Pilat ndxab loo Jesús:
\p ―¿Cón nac coꞌ mbezl nac lìcpeꞌ, àꞌ?
\s Trèꞌ ndluꞌ leꞌ mèn ngololeꞌ mdub rez cón cheꞌn Jesús par guth mèn Jesús.
\r (Mt. 27.15–31; Mr. 15.6–20; Lc. 23.13–25)
\p Ngolo mnibdiꞌs Pilat diꞌsa loo Jesús, ngroꞌ Pilat par fuer par mdoodiꞌs no Pilat mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel tedib vez. Ndxab Pilat loo mèna:
\p ―Yende chó xquin mbiꞌ no xtol mbiꞌ ndryo xoꞌf loon, cara.
\v 39 ¿Xá nee guꞌ? Guꞌ ngue no costumbr leꞌ daa ngoꞌ thìb mbiꞌ coꞌ ngue leziꞌf loo guꞌ coꞌseꞌ ndli guꞌ lni pasc. ¿Chéꞌ ndlyaꞌs guꞌ laꞌen bii mbiꞌ coꞌ mbez men nac rey cheꞌn mèn nación Israel loo guꞌ o chéꞌ neꞌlaꞌden bii mbiꞌ loo guꞌ?
\p
\v 40 Sya, ryete mèna cabii mcàb tedib vez. Ndxab mèna:
\p ―Neꞌteláꞌde Uꞌ mbiꞌ baꞌ. Más huen bloꞌ Uꞌ Barabás leziꞌf loo nuꞌ.
\p Per mbiꞌ coꞌ lèe Barabás ngòc thìb huanꞌ tiempa.
\c 19
\p
\v 1 Ngolo tataa ndxab ryete mèna loo Pilat, mnibeꞌ Pilat loo solndad par ya taꞌ solndad cheꞌn Jesús.
\v 2 Látha, mdub solndad thìb coron yis coꞌ nayàꞌ yéc Jesús. No mtegoc solndad Jesús thìb cap coꞌ ngòc larꞌ morad.
\v 3 Ngoloa, mbez solndad loo Jesús:
\p ―San, Rey cheꞌn mèn nación Israel.
\p No beꞌ taa nguis solndad rloo Jesús.
\p
\v 4 Leꞌ sya, mbere Pilat. Ngroꞌ Pilat par fuer tedib vez. Ndxab Pilat loo mèna:
\p ―Huiꞌ guꞌ nexa. Trèꞌ ndal non mbiꞌ loo guꞌ par taꞌ guꞌ cuent no ñee guꞌ yende chó xquin mbiꞌ coꞌ ndxàp mbiꞌ ndryo xoꞌf loon.
\p
\v 5 Sya, ngroꞌ no Pilat Jesús par fuer. Ndub coron yis yéc Jesús. No noc Jesús thìb cap coꞌ nac larꞌ color morad. Ndxab Pilat loo mèna:
\p ―Aa guꞌ mbiꞌ ndxèꞌ.
\p
\v 6 Per coꞌseꞌ gunèe jef cheꞌn nguleyꞌ coꞌ más ñibeꞌ loo rye nguleyꞌ no mèn nac zinꞌ coꞌ nquenap templ nde no Pilat Jesús, mtlo mèna, ngrozèe mèna cabii. Ndxab mèna loo Pilat:
\p ―Fqueꞌ mbiꞌ baꞌ loo cruz. Fqueꞌ mbiꞌ baꞌ loo cruz.
\p Per Pilat ndxab loo mèna:
\p ―Beꞌ guꞌ mbiꞌ. Fqueꞌ yub guꞌ mbiꞌ loo cruz tac part cón chenen yende chó xquin mbiꞌ ngro xoꞌf loon.
\p
\v 7 Sya, mcàb mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel loo Pilat. Ndxab mèna:
\p ―Nuꞌ ngue no thìb ley. No texal ñibeꞌ ley nuꞌ, ndxàalqueꞌ gath mbiꞌ baꞌ. Tac ale leque mbiꞌ mbez nac mbiꞌ xganꞌpeꞌ Diox.
\p
\v 8 Per coꞌseꞌ mbìn Pilat diꞌsa, sate más mzyeb Pilat.
\v 9 Mbere Pilat, ngòo Pilat leꞌn palas con Jesús tedib vez. Mnibdiꞌs Pilat loo Jesús. Ndxab Pilat:
\p ―¿Páxeꞌ mèn lùu, àꞌ?
\p Per Jesús yende cón mcàb loo Pilat.
\p
\v 10 Leꞌ sya, ndxab Pilat loo Jesús:
\p ―¿Chonon indlyaꞌstel càbl loon, àꞌ? ¿Chéꞌ iñeedel leꞌ daa ndxàp conꞌ laꞌs niin no laꞌs yan par ñibeꞌen loo mèn queꞌ mèn lùu loo cruz? No ndxàpen conꞌ laꞌs niin no laꞌs yan par ñibeꞌen laꞌ mèn biil. Neꞌqueꞌde mèn lùu loo cruz.
\p
\v 11 Jesús mcàb loo Pilat. Ndxab Jesús:
\p ―Nec thìb mod no nec tedib mod neꞌñibeꞌdel cón chenen cheleꞌ Diox neꞌndaꞌde lugar lool ñibeꞌl loon. Por cona, mbiꞌ coꞌ mdaꞌxùꞌ daa lool másqueꞌ thìb xquin mbiꞌ ndxàp mbiꞌ no másqueꞌ thìb xtol mbiꞌ ndxàp mbiꞌ leque lùu.
\p
\v 12 No leque hora mcuaꞌn Pilat mod xá mod laꞌ Pilat bii Jesús. Per mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel, sate más cabii mbez yèe mèna loo Pilat. Mbez mèna:
\p ―Cheleꞌ lùu láꞌ mbiꞌ baꞌ, indxàcte amiu lùu gobiern coꞌ ñibeꞌ loo mèn gulàaz mèn ciuda Rom. Tac chol mèn coꞌ ndxàc xal thìb rey xal mbiꞌ baꞌ, mèna ndxàc ngolo ngolaꞌs loo gobiern coꞌ ñibeꞌ loo mèn gulàaz mèn ciuda Rom.
\p
\v 13 Coꞌseꞌ mbìn Pilat tataa ndxab mèna loo Pilat, mnibeꞌ Pilat loo Jesús ryoꞌ Jesús par fuer. Leꞌ Pilat na, mdub loo asi Pilat thìb lugar leꞌn palas coꞌteꞌ natoxcuaꞌ pis con thìb loo quèe huen, coꞌ nee diꞌs, diꞌstèe cheꞌn mèn ciuda Rom. No diꞌstèe cheꞌn mèn nación Israel lèe quèea Gabata.
\v 14 Huiza ngòc huiz vispr cheꞌn huiz lni pasc. No coꞌseꞌ ndxab Pilat loo mèn nación Israel:
\p ―Huiꞌ guꞌ nexa, Rey guꞌ ndxèꞌ,
\m hora casqueꞌ ngòc rol huiz.
\p
\v 15 Per mèna tolo ngrozèe. Cabii mbez mèna loo Pilat:
\p ―Fcàa mbiꞌ baꞌ. Beth. Fqueꞌ mbiꞌ loo cruz.
\p Per Pilat ndxab loo mèna:
\p ―¡Cóna! ¿Rey guꞌ queꞌen loo thìb cruz, àꞌ? Yende xàa.
\p Per mèn coꞌ ngòc jef cheꞌn nguleyꞌ coꞌ más ñibeꞌ loo rye nguleyꞌ mcàb. Ndxab mèna loo Pilat:
\p ―Ingue node nuꞌ más rey, ey. Angoluxte jef coꞌ ñibeꞌ loo mèn gulàaz mèn ciuda Rom nac rey nuꞌ. Ngolo cuent.
\p
\v 16 Ngoloa, mnibeꞌ Pilat loo solndad par mbeꞌ solndad Jesús par ya queꞌ solndad Jesús loo cruz. Leꞌ rye mèna na, mdoo nque xís solndad par laꞌs mèna xal queꞌ solndad Jesús loo cruz.
\s Trèꞌ ndluꞌ mqueꞌ mèn Jesús loo cruz.
\r (Mt. 27.32–44; Mr. 15.21–32; Lc. 23.26–43)
\p
\v 17 Sya, ngroꞌ no mèna Jesús. No ale mnibeꞌ mèna loo Jesús par leque Jesús mxoꞌf yen cruz Jesús par mbeꞌ Jesús cruz Jesús axta loo den coꞌ mbez mèn lèe Den Calaver tiempa. Leꞌ diꞌstèe mèn nación Israel na, mbez mèn loo dena Golgot tiempa.
\v 18 Loo dena mqueꞌ mèn Jesús loo cruzpeꞌ Jesús. Lomisqueꞌ ne, mqueꞌ mèn taachop mbiꞌ loo cruz coꞌ ngòc cruzpeꞌ mbiꞌ, thìb thìb mbiꞌ mquée loo cruz thìbgàꞌ lad cuat Jesús. Leꞌ cruz Jesús na, mdoo xtauꞌ ryop mbiꞌa.
\v 19 Látha, mbli Pilat mandad mqueꞌ mèn plá diꞌs loo yéc cruz coꞌ ndxab: Jesús, mèn yèez Nazaret, rey cheꞌn mèn nación Israel.
\v 20 Huax mèn nación Israel mblab diꞌsa tac coꞌteꞌ mqueꞌ mèn Jesús loo cruz nzi gax ro ciuda Jerusalén. Diꞌsa nac son loo diꞌstèe coꞌ nac xtiꞌs mèn hebre, no diꞌs coꞌ nac xtiꞌs mèn grieg, no diꞌs coꞌ nac xtiꞌs mèn italia.
\v 21 Ndxab jef cheꞌn nguleyꞌ coꞌ más ñibeꞌ loo rye nguleyꞌ cheꞌn mèn nación Israel loo Pilat. Ndxab jef:
\p ―Más huen neꞌndubtel diꞌs baꞌ tatuaꞌ coꞌ ndxab: Rey cheꞌn mèn nación Israel. Más huen ndubl diꞌs leꞌ mbiꞌ baꞌ ndxab: Daa nac rey cheꞌn mèn nación Israel.
\p
\v 22 Mcàb Pilat loo mèna. Ndxab Pilat:
\p ―Yende cóna. Diꞌs coꞌ mblin mandad mdub loo cruz baꞌ, yende chó techei. Leꞌi ndubleꞌ. Ngolo cuent.
\p
\v 23 Coꞌseꞌ ngolo mqueꞌ solndad Jesús loo cruz, mxen solndad xab Jesús. Mblec xàꞌ solndad thìb thìb xab Jesús par ngòc cheꞌn thìb thìb solndad xab Jesús. No mxen solndad cap coꞌ ngòc xab dib andoo Jesús coꞌ ngòc thìb larꞌ dib nolꞌ no dib naxèn.
\v 24 Ndxab solndada loo xtàa solndad:
\p ―Neꞌli rolte naꞌ cap ndxèꞌ. Más huen quith no naꞌ dad loo cap ndxèꞌ par ñee naꞌ ñeeneꞌ chó naꞌ gàc cheꞌna.
\p No tataa ngòca par mdyaa diꞌs coꞌ ndub loo libr coꞌ nac xtiꞌs Diox coꞌ mbez:
\pi1 Mcàa mèn thìb ned xaben par ngòc xaben cheꞌn mèn. No loo xaben coꞌ ngòc cap daa mdiꞌth no mèn dad par ñee mèna ñeeneꞌ chó gàc cheꞌna.
\m No tataaqueꞌ mbli solndad conꞌa.
\p
\v 25 Gaxte coꞌteꞌ ndoo cruz Jesús ngure no xnaꞌ Jesús bél xnaꞌ Jesús, no Mari saꞌl Cleof, no Mari coꞌ nac mèn yèez Magdala.
\v 26 Coꞌseꞌ gunèe Jesús ndoo xnaꞌ Jesús loo Jesús con thìb myenꞌ xinꞌ mtéꞌth Jesús coꞌ más mqueꞌ lezoꞌ Jesús ñèe Jesús, Jesús ndxab loo xnaꞌ Jesús:
\p ―Ngot, huiꞌ loo mbiꞌ coꞌ ndoo lool baꞌ. Mbiꞌ baꞌ lil cuent nac xganꞌl, ndee.
\p
\v 27 Ngoloa, ndxab Jesús loo mbiꞌ xinꞌ mtéꞌth Jesús coꞌ más mqueꞌ lezoꞌ Jesús ñèe Jesús:
\p ―Mbiꞌ, xaꞌgot baꞌ gàc xal xnaꞌl, ndee.
\p Leque hora, mbyeꞌ mbiꞌ coꞌ nac xinꞌ mtéꞌth Jesús xnaꞌ Jesús par liz mbiꞌ xal xnaꞌpeꞌ mbiꞌ xinꞌ mtéꞌth Jesús.
\s Trèꞌ ndluꞌ nguth Jesús.
\r (Mt. 27.45–56; Mr. 15.33–41; Lc. 23.44–49)
\p
\v 28 Ngolo ngòc rye conꞌa, no com leꞌ Jesús nanee leꞌ ryete conꞌ coꞌ naquin gàc loo Jesús ngòcleꞌ no mdyaaleꞌ no par tolo gàcqueꞌ no tyaaqueꞌ diꞌs coꞌ ndub loo libr coꞌ nac xtiꞌs Diox, Jesús ndxab láth ngue Jesús loo cruz:
\p ―Ndxec lezon, yey.
\p
\v 29 No leꞌpeꞌ ndoo thìb bote vin coꞌ nac nítguy. Yende izlyoꞌ, ngua tegaz thìb xaꞌ thìb sponj con vina. No mdub xaꞌa sponja loo thìb bar cheꞌn thìb loo yaa coꞌ lèe hisop par mdaꞌi mod mzii xaꞌ sponja ro Jesús loo cruz.
\v 30 Ngolo ngu Jesús vina, ndxab Jesús:
\p ―Nase ngololeꞌ mdyaa no ngòcqueꞌ no mdubqueꞌ diꞌs ryethe conꞌ naquin gàc loon.
\p No ngoloa, site mbiꞌs yen Jesús. Nguth Jesús.
\s Thìb solndad cheꞌn gobiern coꞌ ndub ciuda Rom mdid lans cho Jesús.
\p
\v 31 Huiz coꞌ mqueꞌ mèna Jesús loo cruz ngòc huiz vispr cheꞌn lni pasc. Indlyaꞌste mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel yanꞌ yon xaꞌ loo cruz huiz sabd coꞌ nde nquea tac huiza nac huiz coꞌ nac más huiz roo huiz xèn cheꞌn lnia. Por cona, ngua naꞌb mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel diꞌs loo Pilat par ñibeꞌ Pilat ya léꞌ solndad zith cor nii yon xaꞌ coꞌ ngue loo cruz par gath xaꞌ. No yiloa làa mèn yon theboola loo cruz.
\v 32 Sya, ngua thiꞌs solndad zith cor nii thìb xaꞌ. Ngoloa, ngua thiꞌs solndad zith cor nii tedib xaꞌ coꞌ mquée no Jesús loo cruz.
\v 33 Per coꞌseꞌ mbii gax solndad loo Jesús par quiꞌs solndad zith cor nii Jesús, gunèe solndad leꞌ Jesús nguthleꞌ. Neꞌnguiꞌste solndad zith cor nii Jesús.
\p
\v 34 Per mastaleꞌ nguthleꞌ Jesús, thìb solndad coꞌ nzo làtha ngua thid lans ro costi Jesús. Coꞌseꞌ mbloꞌ solndad lans ro costi Jesús, ante nde bèe nde yax loo ren no loo nít coꞌ ngroꞌ ro costi Jesús.
\v 35 Mbiꞌ coꞌ ndaꞌ cuent conꞌ ngòc loo Jesús ngòc thìb mbiꞌ coꞌ gunèepeꞌ ngòc conꞌa loo Jesús. No ndaꞌ mbiꞌ cuent coꞌ nac lìcpeꞌ. Mbiꞌa nanee leꞌ mbiꞌ ngue taꞌ cuent coꞌ nac lìcpeꞌ par yilaꞌs guꞌ cuenta.
\v 36 Tac ngòc conꞌa loo Jesús par ngòcqueꞌ no par mdyubqueꞌ diꞌs coꞌ ndub loo libr coꞌ nac xtiꞌs Diox coꞌ mbez:
\pi1 Neꞌléꞌde mèn no neꞌquiꞌste mèn nec thìb zith coꞌ nac zith lad mbiꞌ.
\m
\v 37 Lomisqueꞌ, ndub diꞌs loo libr coꞌ nac xtiꞌs Diox tedib lugar coꞌ mbez:
\pi1 Leꞌ mèn huiꞌ loo mbiꞌ, mbiꞌ coꞌ mdid mèn lans no clav lad yiloa.
\s Chop mbiꞌ ngua caꞌs thebol Jesús leꞌn thìb yeꞌr quèe.
\r (Mt. 27.57–61; Mr. 15.42–47; Lc. 23.50–56)
\p
\v 38 Ngolo ngòc ryethe conꞌa loo Jesús, ngo thìb mbiꞌ coꞌ lèe Chè. Chèa ngòc mèn thìb yèez coꞌ lèe yèez Arimate. Chèa, ne, mque tee no Jesús. Per xexte mque tee no Chè Jesús tac mzyeb Chè gunèe Chè mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel. Ngua nee Chè loo Pilat taꞌ Pilat lugar làa Chè thebol Jesús loo cruz. Pilat mdyalqueꞌ par làa Chè thebol Jesús loo cruz. Sya, nda Chè. Ngua làa Chè thebol Jesús loo cruz. Mbyeꞌ Chè thebol Jesús.
\v 39 Làth xtauꞌa, mzin Nicodem, ne, coꞌ ngua toodiꞌs no Jesús thìb yálꞌ ndooreꞌ. Nde no Nicodem gal psiꞌ kil dii coꞌ nos thìb loo dii coꞌ lèe mirr no tedib loo dii coꞌ lèe áloes coꞌteꞌ nzo no Chè thebol Jesús.
\v 40 Sya, mxen Chè ryop Nicodem thebol Jesús. No mxob Chè ryop Nicodem dii perfuma loo thìb leꞌ sab. No mchìꞌx Chè ryop Nicodem saba lad thebol Jesús xal nac costumbr cheꞌn mèn nación Israel coꞌseꞌ ncaꞌs mèna xtàa mèn.
\v 41 No gaxte coꞌteꞌ mqueꞌ solndad Jesús loo cruz nziriꞌ thìb huert. No leꞌn huerta ndub thìb quèe rhueꞌ. Lad quèe rhueꞌa ndub thìb yeꞌr coꞌteꞌ tarte yòo gaꞌs nec thìb thebol.
\v 42 Ale tyate mcaꞌs Chè ryop Nicodem thebol Jesús tac gaxte coꞌteꞌ mqueꞌ solndad Jesús loo cruz mdub yeꞌr quèea. No nde nxonꞌ, mdub bixleꞌ huiz huiza no ngulàaleꞌ yálꞌ huiza no mtloleꞌ huiz coꞌ ngòc huiz descans cheꞌn mèn nación Israel tiempa.
\c 20
\s Trèꞌ ndluꞌ ngro xban Jesús làth mèn nguth.
\r (Mt. 28.1–10; Mr. 16.1–8; Lc. 24.1–12)
\p
\v 1 Coꞌseꞌ nde yinìi izlyoꞌ doming coꞌ nac ner huiz sman coꞌ nde nquea, tatabeꞌ cuar ngua Mari coꞌ ngòc mèn yèez Magdala ro yeꞌr quèe coꞌteꞌ ngua lo mèn thebol Jesús. Gunèe Mari mbiicheleꞌ quèe ro yeꞌr quèe.
\v 2 Sya, mqueꞌ Mari carre axta coꞌteꞌ nzo Mon Pedr no tedib myenꞌ xinꞌ mtéꞌth Jesús coꞌ más mqueꞌ lezoꞌ Jesús ñèe Jesús. Ndxab Mari loo myenꞌ:
\p ―Mbloꞌleꞌ mèn Tad naꞌ leꞌn yeꞌr quèe, cara. No nalleꞌ neꞌñeede nuꞌ pá ngua láꞌ mèn Tad.
\p
\v 3 Sya, ngroꞌ Pedr con tedib myenꞌ xinꞌ mtéꞌth Jesús. Ngua tee huiꞌ myenꞌ ro yeꞌr quèe. No mdoo nque Mari coꞌ ngòc mèn yèez Magdala xís myenꞌ tedib vez.
\v 4 Thidte junt mqueꞌ ryop myenꞌ carre. Per tedib myenꞌ coꞌ ngòc xtàa Pedr más mqueꞌ carre leque Pedr. No ner myenꞌa mzin ro yeꞌr quèe.
\v 5 Mcòoꞌ mbiꞌ yéc mbiꞌ. Mbuiꞌ mbiꞌ leꞌn yeꞌr quèe per neꞌngòode mbiꞌ leꞌn yeꞌr quèe. Ante gunèe mbiꞌ nax sab coꞌ mbix thebol Jesús leꞌn yeꞌr quèe.
\v 6 Látha, mzin Mon Pedr ro yeꞌr quèe. Per Mon Pedr se ngòo leꞌn yeꞌr quèe. Gunèe Mon Pedr ante sab nax leꞌn yeꞌr quèe.
\v 7 Más de cona, gunèe Mon Pedr panid coꞌ mblo mèn loo thebol Jesús, inaxte panid con sab. Nadùuz panid. Nax panid thìb lad.
\v 8 Leꞌ sya, ngòo mbiꞌ coꞌ ndxàc xtàa xinꞌ mtéꞌth Pedr, coꞌ mzin ner ro yeꞌr quèe, leꞌn yeꞌr quèe, ne. Gunèe mbiꞌ ante sab nax no nadùuz panid nzoꞌf panid tya. No gunèe mbiꞌ tataa ngòca.
\v 9 Tac hora tarte taꞌ myenꞌa cuent no tarte li laꞌs ryop myenꞌa cón nee diꞌs coꞌ ndub loo libr coꞌ nac xtiꞌs Diox coꞌ mbez leꞌ Jesús naquinqueꞌ ryo xban làth mèn nguth.
\v 10 Sya, mbere ryop myenꞌ, ndyàa myenꞌ par liz myenꞌ.
\s Jesús ngroꞌ too loo Mari coꞌ ngòc mèn yèez Magdala.
\r (Mr. 16.9–11)
\p
\v 11 Per láth ndyàa ryop myenꞌ par liz myenꞌ, Mari mbyanꞌ ro yeꞌr quèe. Ndoo yónꞌ Mari. No láth ndoo yónꞌ Mari, mcòoꞌ Mari yéc Mari. Mbuiꞌ Mari leꞌn yeꞌr quèe.
\v 12 Láth mdoo huiꞌ Mari ro yeꞌr quèe, gunèe Mari chop angl coꞌ noc larꞌ nagus. Ndub angl leꞌn yeꞌr quèe. Thìb angl ndub coꞌteꞌ ngoꞌth yéc thebol Jesús. Tedib angl na, ndub coꞌteꞌ ngoꞌth nii thebol Jesús.
\v 13 Angla mnibdiꞌs loo Mari. Ndxab angl:
\p ―Ngot, ¿chonon ndxónꞌl, àꞌ?
\p Mari ndxab loo angl:
\p ―Daa ndxón tac mèn xexte mbeꞌ thebol Tad daa. No neꞌñeeden pá ned ngua láꞌ mèn thebol Tad daa.
\p
\v 14 Ngolo xec ndxab Mari diꞌsa loo angl, mxac Mari ale thìb xaꞌ ndxab loo Mari: Mari, huiꞌ ned xísl. Coꞌseꞌ mbere Mari mbuiꞌ Mari ned xís Mari, gunèe Mari leꞌ Jesús ngue tee tya. Per neꞌtaꞌde Mari cuent chéꞌ Jesús na.
\v 15 Sya, mnibdiꞌs Jesús loo Mari. Ndxab Jesús:
\p ―Ngot, ¿chonon ndxónꞌl, àꞌ, ey? ¿Chó ngue cuaꞌnl, àꞌ, ey?
\p Per Mari mbli xtùuz. Ndxab Mari loo lezoꞌ Mari peser mbiꞌ coꞌ nquenap huert na. Sya ndxab Mari loo mbiꞌa:
\p ―Tad, cheleꞌ lùu mbeꞌ Tad daa, gunee loon pá ned ngua láꞌl Tad daa par ga xin Tad daa.
\p
\v 16 Sya, ndxab Jesús loo Mari: Mari.
\p Chàa, mbere Mari par xís Mari. Gunii Mari diꞌs coꞌ ndyoodiꞌs mèn hebre loo Jesús. Ndxab Mari:
\p ―Raboni, coꞌ nee diꞌs diꞌs coꞌ ndyoodiꞌs mèn hebre, Maistr.
\p
\v 17 Jesús ndxab loo Mari:
\p ―Mari, neꞌgàaltel daa tac daa tarte bii loo béꞌ coꞌteꞌ nzo xuden Diox. Ndlyazen ya neel loo myenꞌ coꞌ ndxàc huesen. No gabl loo myenꞌ leꞌ daa bii loo béꞌ coꞌteꞌ nzo xuden Diox coꞌ nac xud myenꞌ no coꞌ nac Diox myenꞌ, ne.
\p
\v 18 Sya, ngua taꞌ Mari, coꞌ ngòc mèn yèez Magdala, cuenta loo myenꞌ xinꞌ mtéꞌth Jesús leꞌ Mari gunèe Tad Jesús no ndxab Tad Jesús diꞌsa loo Mari par tataa taꞌ Mari cuent loo myenꞌ.
\s Ngoloa mbluꞌ loo Jesús loo myenꞌ xinꞌ mtéꞌth Jesús.
\r (Mt. 28.16–20; Mr. 16.14–18; Lc. 24.36–49)
\p
\v 19 No coꞌseꞌ mzyèleꞌ izlyoꞌ leque huiz coꞌ ngòc ner huiz smana no ngulàaleꞌ yálꞌ izlyoꞌ huiza, leque hora thidte mqueltàa myenꞌ xinꞌ mtéꞌth Jesús xhuina liz thìb mèn. No quej nauꞌ puert nzo gòo myenꞌ leꞌn nyòo tac nzyeb myenꞌ ñèe myenꞌ mèn coꞌ ñibeꞌ, no coꞌ ndyoo ner, no coꞌ ndyoo naa loo mèn nación Israel. Látha, chàa, ngroꞌ too Jesús loo myenꞌ. Mbluꞌ loo Jesús Jesús loo myenꞌ. Gunii Jesús Diox loo myenꞌ. Ndxab Jesús loo myenꞌ:
\p ―Nabeꞌste blo guꞌ lezoꞌ guꞌ con xtàa guꞌ no blo nagàl lezoꞌ guꞌ loo Diox.
\p
\v 20 Ngolo ndxab Jesús diꞌsa, mbluꞌ Jesús yaꞌ Jesús coꞌteꞌ mdid solndad clav. No mbluꞌ Jesús ro costi Jesús coꞌteꞌ mdid solndad lans loo myenꞌ xinꞌ mtéꞌth Jesús. Leꞌ myenꞌ na, ante mdyac tínꞌ lezoꞌ coꞌseꞌ gunèe myenꞌ Jesús.
\v 21 Mbere Jesús, ndxab Jesús loo myenꞌ tedib vez:
\p ―Nabeꞌste blo guꞌ lezoꞌ guꞌ con xtàa guꞌ. No blo nagàl lezoꞌ guꞌ loo Diox. Texal mtelꞌ xuden Diox daa par mbalen loo izlyoꞌ ndxèꞌ, tataaqueꞌ telꞌen guꞌ ya guꞌ loo mèn loo izlyoꞌ ndxèꞌ.
\p
\v 22 Ngolo ndxab Jesús diꞌsa loo myenꞌ, mbláꞌ Jesús mbii ro Jesús loo myenꞌ. No ndxab Jesús loo myenꞌ:
\p ―Na telꞌ Xpii Natúꞌ loo guꞌ par yo no Xpii Natúꞌ guꞌ thidtene, ndee guꞌ, ey.
\v 23 Ndxab Jesús loo myenꞌ, ne:
\p ―Loo mèn coꞌ mbli guꞌ cuent mdyonꞌ xtol, mtonꞌqueꞌ Diox xtol mèna. Leꞌ mèn coꞌ indlide guꞌ cuent mdyonꞌ xtol, mèna nzi banqueꞌ con xtol mèn tac neꞌntonꞌte Diox xtol mèna.
\s Max gunèe Tad Jesús leꞌ Tad Jesús ngro xbanqueꞌ.
\p
\v 24 Per Max coꞌ mdub lèe mèn Cuach coꞌ ngòc xinꞌ mtéꞌth Jesús, coꞌ ndxòo cuent nac siꞌ fchop myenꞌ, yende Max làth myenꞌ coꞌseꞌ ngroꞌ too Jesús no mbluꞌ loo Jesús Jesús loo myenꞌ yálꞌa.
\v 25 Leꞌ sya, myenꞌ xinꞌ mtéꞌth Jesús mdaꞌ cuent loo Max. Ndxab myenꞌ:
\p ―Nuꞌ gunèeleꞌ Tad, cara.
\p Per Max mcàb loo myenꞌ. Ndxab Max:
\p ―Cheleꞌ daa neꞌhuiꞌde laꞌs yaꞌ Tad Jesús coꞌteꞌ nguaaꞌd clav no tyeen cuen yan coꞌteꞌ nguaaꞌd clav no tyeen cuen yan coꞌteꞌ nguaaꞌd lans ro costi lad Tad Jesús, neꞌyilaꞌsten cuent coꞌ ndaꞌ guꞌ baꞌ.
\p
\v 26 Ngoloo xon huiz ryete myenꞌ xinꞌ mtéꞌth Jesús mqueltàa tedib vez leꞌn nyòo liz thìb mèn. No leꞌpeꞌ ngo no Max myenꞌ sya. Lomisqueꞌ, quej nauꞌ ro puert. Per Jesús, chàa, ngroꞌ too loo myenꞌ. No mbluꞌ loo Jesús Jesús tedib vez. Gunii Jesús Diox loo myenꞌ. No ndxab Jesús loo myenꞌ:
\p ―Nabeꞌste blo guꞌ lezoꞌ guꞌ con xtàa guꞌ, ndee guꞌ. No blo nagàl lezoꞌ guꞌ loo Diox.
\p
\v 27 Ngoloa, ndxab Jesús loo Max:
\p ―Max, ftyee cuen yaꞌl trèꞌ no huiꞌ laꞌs yan. No ftegaꞌ yaꞌl. Ftyee yaꞌl leꞌn costi daa. No neꞌgànte lezoꞌl. Golaꞌs cón chenen, Max.
\p
\v 28 Leꞌ sya, mcàb Max loo Jesús. Ndxab Max:
\p ―Lìcqueꞌ, Uꞌ nac Tad daa no nac Uꞌ Diox daa, Tad.
\p
\v 29 Ndxab Jesús loo Max:
\p ―Max, ¿chéꞌ ngolaꞌsl loo cón chenen nalleꞌ tac gunèel daa, càꞌ? Más huen nda mèn coꞌ tarte ñèe daa per ndxelaꞌs mèn loo cón chenen, ey.
\s Trèꞌ ndluꞌ chó cón cheꞌn mbiꞌ nac coꞌ ndluꞌ libr ndxèꞌ.
\p
\v 30 Jesús tolo mbli no mbluꞌ Jesús huax yalguzyeꞌ roo yalguzyeꞌ xèn loo myenꞌ xinꞌ mtéꞌth Jesús. Per indaꞌde loo libr ndxèꞌ cuent cón cheꞌn rye yalguzyeꞌ coꞌ mbli Jesús.
\v 31 Per diꞌs coꞌ ndub loo libr ndxèꞌ, diꞌs ndxèꞌ ndluꞌ par yilaꞌs guꞌ leꞌ Jesús nac Cristpeꞌ coꞌ nac xganꞌpeꞌ Diox. No cheleꞌ guꞌ yilaꞌs loo Jesús no loo cón cheꞌn Jesús, Jesús li par yòo ban no guꞌ Diox thidtene.
\c 21
\s Jesús mbere ngroꞌ too no mbluꞌ loo Jesús loo gaz myenꞌ xinꞌ mtéꞌth Jesús.
\p
\v 1 Ngolo nguriꞌth plá huiz coꞌseꞌ ngroꞌ too Jesús no mbluꞌ loo Jesús Jesús loo rye siꞌ fthib myenꞌ, Jesús ngroꞌ too no mbluꞌ loo Jesús Jesús loo myenꞌ xinꞌ mtéꞌth Jesús tedib vez ro níttóꞌ coꞌ lèe níttóꞌ cheꞌn Tiberias. No mbluꞌ loo Jesús Jesús mod ndxèꞌ.
\v 2 Thidte ngure no Mon Pedr Max coꞌ mdub lèe mèn Cuach, no Natanael coꞌ ngòc mèn yèez Caná coꞌ nac yèezyaꞌ cheꞌn làaz mèn galile, no ryop hues myenꞌ xganꞌ mbiꞌ coꞌ lèe Zebede, no taachop myenꞌ xinꞌ mtéꞌth Jesús.
\v 3 Ndxab Mon Pedr loo myenꞌ:
\p ―Daa nda ten mbèel, cara.
\p Myenꞌ ndxab loo Mon Pedr:
\p ―Nuꞌ ne tyee. Nda naꞌ.
\p Sya, thidte mqueltàa Mon Pedr con myenꞌ. Ngòo myenꞌ loo thìb yòoyaa. Nda ten myenꞌ mbèel. Per nec thìb mbèel neꞌngagaade loo myenꞌ dib xec yálꞌa.
\v 4 Coꞌseꞌ nde tub xnìi izlyoꞌ xànꞌ béꞌ tedib huiz coꞌ nde nquea, chàa, mbluꞌ too Jesús no mbluꞌ loo Jesús loo myenꞌ ro níttóꞌa. Per myenꞌ xinꞌ mtéꞌth Jesús neꞌnglide cuent Jesús na.
\v 5 Sya, ndxab Jesús loo myenꞌ:
\p ―Myenꞌ, ¿chéꞌ tarte yigaa nec thìb mbèel loo guꞌ nalleꞌ, càꞌ?
\p Myenꞌ mcàb loo Jesús. Ndxab myenꞌ:
\p ―Aa. Tarte yigaa nec thìb máꞌ, cara.
\p
\v 6 Jesús ndxab loo myenꞌ:
\p ―Blobii guꞌ yex guꞌ leꞌn nít ladlì cheꞌn yòoyaa baꞌ. Sya, yigaa mbèel loo guꞌ, ey.
\p Leꞌ sya, tataaqueꞌ mbli myenꞌ. Ngoloa, axta neꞌ neꞌ ngác myenꞌ no axta neꞌ neꞌ ngyèe myenꞌ ngoꞌ myenꞌ yex leꞌn nít tant thìb mbèelléyꞌ ngogaa leꞌn yex.
\v 7 Sya, myenꞌ xinꞌ mtéꞌth Jesús coꞌ más mqueꞌ lezoꞌ ñèe Jesús ndxab loo Pedr:
\p ―Tad na, cara.
\p Per texal mbìn Mon Pedr ndxab myenꞌ: Tad na, mdoc Pedr xab Pedr tac Pedr mbloꞌ xab Pedr por ngue li Pedr zinꞌ.
\p Ngoloa, thidte ngulàa Pedr leꞌn nít. Mxyoꞌf Pedr loo nít axta ngroꞌ Pedr loo yòo biiz.
\v 8 Leꞌ taamas myenꞌ xinꞌ mtéꞌth Jesús na, nzoqueꞌ loo yòoyaa. Ndyeꞌth gop xax myenꞌ yex par ro níttóꞌ tant thìb mbèelléyꞌ ngogaa. No distans coꞌteꞌ ngo myenꞌ loo níttóꞌ par ro nít loo yòo biiz neequeꞌ thìb ayo metr peser.
\v 9 Coꞌseꞌ mbilàa myenꞌ loo yòoyaa loo yòo biiz, gunèe myenꞌ nzi cuaꞌleꞌ yaa loo quìi. No nzoꞌf thìb mbèel loo quìi. No gunèe myenꞌ nzoꞌf sa pan thìb lad loo quìi.
\v 10 Jesús ndxab loo myenꞌ:
\p ―Que de no guꞌ taaplá mbèel coꞌ ngolo mxen guꞌ baꞌ par hua ndren naꞌ, ey.
\p
\v 11 Sya, ngua quée Mon Pedr loo yòoyaa. Ngua thop xax Mon Pedr yex coꞌ nzo mbèela loo yòo biiz tant mzyè yexa con antub mbèel nambìi. Mastaleꞌ nzo thìb ayo nzo choꞌ psiꞌ pson mbèel leꞌn yexa, neꞌngredte yexa.
\v 12 Jesús ndxab loo myenꞌ:
\p ―Que de hua ndren guꞌ, ey.
\p No nec thìb myenꞌ xinꞌ mtéꞌth Jesús neꞌnglide ryes par ngnibdiꞌs myenꞌ loo Jesús chó nac Jesús tac naneequeꞌ myenꞌ Tad Jesús nac mbiꞌa.
\v 13 Ngoloa, mbii gax Jesús loo myenꞌ. Mxen Jesús pan. Mdaꞌ Jesús pan loo myenꞌ. Lomisqueꞌ ne, mxen Jesús mbèel. Mdaꞌ Jesús mbèel loo myenꞌ par hua myenꞌ, ne.
\p
\v 14 Con cona, mbyon vez mbluꞌ loo Jesús Jesús loo myenꞌ xinꞌ mtéꞌth Jesús loo ngro xban Jesús làth mèn nguth.
\s Jesús mdoodiꞌs no Mon Pedr.
\p
\v 15 Coꞌseꞌ ngolo nduhua ndren Jesús con myenꞌ, Jesús mnibdiꞌs loo Mon Pedr. Ndxab Jesús:
\p ―Mon, xganꞌ Jonás, ¿chéꞌ más nqueꞌ lezoꞌl ñèel daa leque nqueꞌ lezoꞌ myenꞌ baꞌ ñèe myenꞌ daa, càꞌ?
\p Pedr ndxab loo Jesús:
\p ―Aa, Tad, Uꞌ naneequeꞌ leꞌ daa nqueꞌqueꞌ lezoꞌ ñèen Uꞌ.
\p Sya, ndxab Jesús loo Mon:
\p ―Cheleꞌ lùu, lìcqueꞌ, nqueꞌ lezoꞌ ñèel daa, gòc xal thìb pastor loo mèn coꞌ yòo loo cón chenen coꞌ nac xal mbacxilꞌ yenꞌ daa, ndee.
\p
\v 16 Mbryop vez mbere Jesús, ndxab Jesús loo Mon Pedr:
\p ―Mon, xganꞌ Jonás, ¿chéꞌ, lìcqueꞌ, nqueꞌ lezoꞌl ñèel daa, cà?
\p Pedr mcàb loo Jesús. Ndxab Pedr:
\p ―Aa, Tad, Uꞌ nanee leꞌ daa nqueꞌ lezoꞌ ñèen Uꞌ.
\p Ndxab Jesús loo Mon:
\p ―Cheleꞌ lùu, lìcqueꞌ, nqueꞌ lezoꞌ ñèel daa, beren niin lool: Fquenap mèn coꞌ yòo loo cón chenen coꞌ nac xal mbacxilꞌ daa, ndee.
\p
\v 17 Mbyon vez ndxab Jesús loo Mon Pedr:
\p ―Mon, xganꞌ Jonás, ¿chéꞌ, lìcqueꞌ, nqueꞌ lezoꞌl ñèel daa, càꞌ, yey?
\p Sya, mxi yéc no mxi lezoꞌ Pedr tac mbyon vez mnibdiꞌs Jesús loo Pedr. Ndxab Jesús:
\p ―¿Chéꞌ, lìcqueꞌ, nqueꞌ lezoꞌl ñèel daa, càꞌ, ey?
\p Ndxab Mon Pedr loo Jesús:
\p ―Tad, Uꞌ naneequeꞌ ryethe conꞌ. No nonqueꞌ Uꞌ ryethe conꞌ. Uꞌ nanee leꞌ daa nqueꞌ lezoꞌ ñèen Uꞌ.
\p Ndxab Jesús loo Mon:
\p ―Cheleꞌi, lìcqueꞌ tataa nac, fquenap mèn coꞌ nac xal mbacxilꞌ daa, tá, ndee.
\v 18 Lìcpeꞌ baꞌi, na nii lool, Pedr, coꞌseꞌ ngòcl myenꞌ bix no coꞌseꞌ ngòcl myenꞌbiꞌ yenꞌ, mdoc xabl no mque teel pál coꞌteꞌ mblyaꞌsl. Per coꞌseꞌ gàcl más mèn gox, lùu sil yaꞌl. No tedib mèn làa xabl yenl. No hueꞌ mèna lùu coꞌteꞌ indlyaꞌstel yal no coꞌteꞌ neꞌyòode lezoꞌl yal.
\p
\v 19 Per diꞌs coꞌ ndxab Jesús loo Pedr, diꞌsa nee diꞌs xá mod gath Pedr par tataa mod li Pedr gàc conꞌ roo conꞌ xèn loo Diox por cón cheꞌn Pedr.
\p Ngoloa, ndxab Jesús loo Pedr:
\p ―Ftoo nque xísen. Yaꞌ nda naꞌ, Pedr.
\s Trèꞌ ndluꞌ cón cheꞌn thìb myenꞌ xinꞌ mtéꞌth Jesús coꞌ más mqueꞌ lezoꞌ Jesús gunèe Jesús.
\p
\v 20 Coꞌseꞌ mbere Pedr par ned xís Pedr, gunèe Pedr nde nque thìb myenꞌ xinꞌ mtéꞌth Jesús coꞌ más mqueꞌ lezoꞌ Jesús gunèe Jesús. Mbiꞌ coꞌ nac xinꞌ mtéꞌth Jesús nac mbiꞌ coꞌ mxoꞌf bdaꞌ loo Jesús coꞌseꞌ nduhua rsè no Jesús myenꞌ. Mbiꞌa ngòc myenꞌ coꞌ mnibdiꞌs loo Jesús coꞌ ndxab loo Jesús:
\p ―Tad, ¿chó nuꞌ taꞌxùꞌ Uꞌ loo mèn, àꞌ?
\p
\v 21 Coꞌseꞌ mbuiꞌ Pedr loo myenꞌ xinꞌ mtéꞌth Jesús, Pedr ndxab loo Jesús:
\p ―Tad, ¿mbiꞌ baꞌ, àꞌ? ¿Cón gàc loo mbiꞌ?
\p
\v 22 Jesús mcàb loo Pedr. Ndxab Jesús:
\p ―Cheleꞌ daa ndlyaz leꞌ mbiꞌ baꞌ ban axta coꞌseꞌ beren galen loo izlyoꞌ ndxèꞌ tedib vez, ¿chó mport nzo lezoꞌl cón cheꞌn mbiꞌ baꞌ, àꞌ? Inacta cón cheꞌnl, ndee. Conseꞌ ftoo nque xísen. Yaꞌ nda naꞌ.
\p
\v 23 Leꞌ sya, ngroꞌ diꞌsa no mbyath mbyèn diꞌsa làth mèn coꞌ ngòo loo cón cheꞌn Jesús leꞌ mbiꞌ xinꞌ mtéꞌth Jesús neꞌgathte. Per Jesús neꞌngabte: Neꞌgathte mbiꞌ. Ndxeꞌlequeꞌ, Jesús ndxab: Cheleꞌ daa lyaz leꞌ mbiꞌ baꞌ ban axta coꞌseꞌ beren galen loo izlyoꞌ ndxèꞌ tedib vez, ¿chó mport nzo lezoꞌl cón cheꞌn mbiꞌ baꞌ? Inacta cón cheꞌnl, ndee.
\p
\v 24 Leque yub daa nac xinꞌ mtéꞌth Jesús coꞌ mbli nèe conꞌ ngòc coꞌ nac diꞌs coꞌ mqueꞌen loo libr ndxèꞌ. No naneequen coꞌ huenlequeꞌ leꞌ diꞌs coꞌ mdan cuent loo libr ndxèꞌ, diꞌs ndxèꞌ nac diꞌs lìcpeꞌ.
\p
\v 25 No taate huax conꞌ coꞌ mbli Jesús indaꞌde loo libr ndxèꞌ cuent coꞌ ngòc coꞌ neꞌnqueꞌden yeꞌs loo libr ndxèꞌ. Tac cheleꞌ mèn noo noo nqueꞌ yeꞌs cón cheꞌn thìb thìb conꞌ coꞌ mbli Jesús xal ngòca, daa ngobeꞌ no ndxelazen axta neꞌ neꞌ ngàal loo izlyoꞌ ngòo libr coꞌ ndaꞌ cuent ryethe conꞌ mbli Jesús cheleꞌ mèn nqueꞌ yeꞌs cón cheꞌn ryethe conꞌ mbli Jesús. Taandxèꞌ gàca.