\id ROM
\ide UTF8
\h ROMANOS
\toc1 ROMANOS
\mt Cart Coꞌ Mqueꞌ Pab Loo Mèn Gulàaz Cheꞌn Ciuda Rom
\c 1
\s Pab ngue queꞌ yeꞌs coꞌ nac cart ndxèꞌ loo mèn coꞌ ndxelaꞌs loo Diox por cón cheꞌn Jesucrist, mèn coꞌ nac mèn gulàaz cheꞌn ciuda Rom.
\p
\v 1 Daa, Pab, nac thìb mbiꞌ coꞌ nxoꞌf zinꞌ cón cheꞌn Tad Jesucrist. Yub Diox mdaꞌ lèe ndxèꞌ loon coꞌ nac lèe mèn coꞌ ndxeꞌ diꞌs ndac cheꞌn Diox loo mèn. Conꞌa nee diꞌs yub Diox mtelꞌ daa no yub Diox mcui daa no yub Diox mblo xàꞌ daa par ga tethen diꞌs con cheꞌn diꞌs ndac cheꞌn Diox loo mèn no par ga tan cuent cón cheꞌn diꞌs ndac cheꞌn Diox par lyáꞌ mèn loo conꞌ ryes.
\p
\v 2 Diox mtanꞌ diꞌs no mcàbgòn Diox diꞌs loo mèn, loo mèn coꞌ mdeꞌth diꞌs coꞌ ndxab Diox ndooreꞌ axta pólleꞌa, coꞌ nac leque diꞌs coꞌ mqueꞌ mèn yeꞌs loo libr coꞌ nac xtiꞌs Diox.
\v 3 Diꞌs ndac ndxèꞌ ngòc diꞌs coꞌ ndaꞌ cuent cón cheꞌn Tad Jesucrist naꞌ, Tad Jesucrist coꞌ nac xganꞌ Diox. Diox mbluꞌ leꞌ xganꞌ Diox nac xal chol mèn coꞌ ndxáal loo izlyoꞌ tac Tad Jesucrist, xganꞌ Diox, mbiꞌth yáal loo izlyoꞌ ndxèꞌ xalqueꞌ ndxáal chol mèn loo izlyoꞌ ndxèꞌ. Ngóol Tad Jesucrist por cón cheꞌn bin cheꞌn thìb mbiꞌ coꞌ ngroꞌ lèe David coꞌ ngòc rey póla.
\v 4 Yub Diox mblo ro no mbluꞌ too Diox Jesucrist leꞌ Jesucrist nac xganꞌpeꞌ Diox no ndxàp Jesucrist rye loothe conꞌ roo conꞌ xèn laꞌs nii Jesucrist no laꞌs yaꞌ Jesucrist. Tataa mbli Diox loo Jesucrist por ngòc Jesucrist thìb mbiꞌ natúꞌpeꞌ loo Diox thidtene láth mque tee ban Jesucrist loo izlyoꞌ. Por cona, yub Diox mblo ro cón cheꞌn Jesucrist coꞌseꞌ mblo xban Diox Jesucrist làth mèn nguth.
\v 5 Por cón cheꞌn Jesucrist, Diox mbli angngòc conꞌ ndac loo nuꞌ. Diox mtelꞌ nuꞌ no mxoꞌf zinꞌ Diox zinꞌ loo nuꞌ por cón cheꞌn Jesucrist par hueꞌ nuꞌ diꞌs cón cheꞌn Jesucrist no par co nuꞌ yalbàn loo mèn coꞌ nac mèn rye nación coꞌ nziriꞌ dib athu loo izlyoꞌ par belꞌqueꞌ nzo ndxep mèn par neda coꞌ yilaꞌs loo cón cheꞌn Jesucrist no coꞌ tyubdiꞌs loo cón cheꞌn Jesucrist.
\v 6 Làth rye mèn naciona nzo guꞌ. Diox ngurez guꞌ no mblec Diox guꞌ par ngòo guꞌ loo cón cheꞌn Jesucrist.
\p
\v 7 Daa, Pab, ngue queꞌ yeꞌs coꞌ nac cart ndxèꞌ loo ryete guꞌ, guꞌ coꞌ nzo ban leꞌn ciuda Rom ndxèꞌ, guꞌ coꞌ anzeꞌf nqueꞌ lezoꞌ Diox ñèe Diox, guꞌ coꞌ Diox ngurez par cue ban guꞌ loo Diox. Nac guꞌ mèn coꞌ ngro xàꞌpeꞌ loo cón cheꞌn xab izlyoꞌ par ngòc guꞌ cheꞌnpeꞌ Diox. Ndlyazen leꞌ Diox xud naꞌ no Tad Jesucrist naꞌ tolo li anggàc conꞌ ndac loo guꞌ. No ndlyazen leꞌ Diox xud naꞌ no Tad Jesucrist naꞌ angli nagàl yo lezoꞌ guꞌ loo Diox no cue ban guꞌ rye nda guꞌ no rye ndyeꞌth guꞌ làth xtàa guꞌ.
\s Pab ndlyaꞌs ya too naa mèn coꞌ nqueltàa loo cón cheꞌn Diox por cón cheꞌn Jesucrist, mèn coꞌ naban ciuda Rom.
\p
\v 8 Nerlequeꞌ conꞌ coꞌ ngue niin loo guꞌ loo cart ndxèꞌ nac conꞌ ndxèꞌ: Coꞌseꞌ mbezen Diox por lèe Jesucrist, mbezen loo Diox daa: Diox quix Uꞌ, Diox, por cón cheꞌn ryete guꞌ coꞌ nzo ban ciuda Rom tac ndxathqueꞌ no ndxènqueꞌ dib athu loo izlyoꞌ cón cheꞌn xá mod ndxelaꞌs ndac guꞌ loo Jesucrist.
\v 9 Loo Diox coꞌ ngue xoꞌf zinꞌen ndlin sirv dib nzo yéquen no dib nzo lezon coꞌseꞌ ndethen cón cheꞌn diꞌs ndac coꞌ nac cón cheꞌn xganꞌpeꞌ Diox. Diox mdaꞌ cuent cón chenen no nanee Diox cón chenen xá mod indxathlasten cón cheꞌn guꞌ coꞌseꞌ mbezen Diox.
\v 10 Ñaꞌben loo Diox coꞌseꞌ mbezen Diox zin thìb huiz no zin thìb ze xyalꞌ ned xyalꞌ yóꞌ loon par gal neen máa guꞌ par nedrèꞌ cheleꞌ Diox nee lezoꞌ tataa gàca loon.
\v 11 Tac anzeꞌf ndryoꞌ ndlyenꞌ lezon, ndlyazen ñeen máa guꞌ par lyath non guꞌ. No luꞌen loo guꞌ ndxep conꞌ coꞌ nac cón cheꞌn Xpii Natúꞌ coꞌ lyaꞌs Xpii Natúꞌ li guꞌ cón cheꞌn Crist par tataa mod toloqueꞌ cue nèe guꞌ no toloqueꞌ xoꞌf zinꞌ guꞌ cón cheꞌn Crist.
\v 12 Conꞌ coꞌ ngue niin loo guꞌ ndxèꞌ nee diꞌs leꞌ guꞌ lyath no daa par tolo yeꞌth lezon. No lin par tolo yéꞌth lezoꞌ guꞌ loo coꞌ nac cón cheꞌn leque yalndxelaꞌs coꞌ ndxàp thìb naꞌ no tedib naꞌ loo Crist.
\p
\v 13 Ndlyazen leꞌ guꞌ non no taꞌ guꞌ cuent, mèn huesen por cón cheꞌn Crist, huax vez mblyazen gal neen máa guꞌ par tolo yilaꞌs mèn làth guꞌ xal nde tee ndlin loo mèn taamas lugar coꞌteꞌ nde tee ndyeeꞌen loo mèn loo izlyoꞌ par gàca leꞌ guꞌ tolo taꞌ cuent cón cheꞌn Diox par tolo li guꞌ coꞌ nee lezoꞌ Diox. Per axta nalleꞌ tarte lin gan gal neen máa guꞌ tac nzo ndxep conꞌ coꞌ ncaꞌ loon.
\v 14 Part cón chenen, ndyaquen, por fuers nquin ga lon yalbán loo rye mèn, que naca loo mèn coꞌ ndaꞌ lau cuent, que naca loo chol mèntèe, que naca loo mèn coꞌ ndxác, que naca loo mèn coꞌ indxácte, mèn coꞌ, por derech, nauꞌ loo nauꞌ yéc.
\v 15 Por cona, altant ndoon no mbli nablen daa par gal lon yalbàn cón cheꞌn diꞌs ndac cheꞌn Diox coꞌ ndluꞌ xá mod lyáꞌ mèn loo conꞌ ryes loo ryete guꞌ coꞌ nac mèn cheꞌn ciuda Rom, ne.
\s Diox ndluꞌ loo diꞌs ndac cheꞌn Diox: Conꞌ roo no conꞌ xèn nac coꞌ ndli Diox loo mèn par ndlyáꞌ mèn loo conꞌ ryes.
\p
\v 16 Nec thìb mod no nec tedib mod inthyonte daa ngon yalbàn cón cheꞌn diꞌs ndac ndxèꞌ loo mèn tac conꞌ coꞌ nac cón cheꞌn diꞌs ndac ndxèꞌ, leꞌi nac coꞌ ndxàp Diox laꞌs nii Diox no laꞌs yaꞌ Diox par láꞌ Diox mèn loo conꞌ ryes, loo ryete mèn coꞌ tyal yilaꞌs loo Crist por cón cheꞌn diꞌs ndac. Mnibeꞌ Diox loo lezoꞌ Diox nerlequeꞌ co mèn yalbàn loo mèn nación Israel no yiloa co mèn yalbàn loo mèn taamas nación coꞌ inacte mèn nación Israel.
\v 17 Tac por cón cheꞌn diꞌs ndac ndxèꞌ Diox ndluꞌ loo naꞌ leꞌ Diox ndyal yòo naꞌ loo cón cheꞌn Diox ante por yilaꞌs naꞌ loo cón cheꞌn Diox por cón cheꞌn Jesucrist. No ndluꞌ diꞌs ndac ndxèꞌ loo naꞌ leꞌ Diox mbez nac mèn mèn nalì no mèn nambìi loo Diox ante por ndxelaꞌs mèn loo diꞌs ndac cheꞌn Diox por cón cheꞌn leque Jesucrist. Tataa ndxab Diox xal ndub diꞌs loo libr coꞌ nac xtiꞌs Diox coꞌ mbez: Mèn coꞌ ngo Diox cuent no mèn coꞌ mdyal Diox yòo mèn loo cón cheꞌn Diox, ante loo Diox yilaꞌs mèn no gàp mèn yalxlaꞌs láth nzi tee ban mèn loo izlyoꞌ ndxèꞌ.
\s Trèꞌ ndluꞌ cón cheꞌn ryete mèn coꞌ ndxàp xquin no coꞌ ndxàp xtol loo Diox dib athu loo izlyoꞌ.
\p
\v 18 Naꞌ nanee no ndaꞌ naꞌ cuent leꞌ Diox coꞌ nzo loo béꞌ ngue go xoꞌf loo mèn, por cón cheꞌn yaltìi coꞌ ndxàc loo mèn, leꞌ Diox ndxecloo ñèe Diox mèn yeꞌrsinꞌ coꞌ indlide conꞌ nalì no conꞌ nambìi loo Diox. Por ryethe conꞌ zab coꞌ ndli mèn, ncaꞌ mèn loo taamas mèn coꞌ ndlyaꞌs taꞌ cuent no coꞌ ndlyaꞌs téꞌth cón cheꞌn Diox coꞌ nac conꞌ lìcpeꞌ.
\v 19 Ryete mèn yeꞌrsinꞌ non no nanee mèna conꞌ coꞌ nzoqueꞌ mod taꞌ mèn cuent cón cheꞌn Diox no conꞌ coꞌ nzote mod non mèn cón cheꞌn Diox. Conꞌa ndryo xoꞌf loo mèn tac yub Diox mblo xoꞌfa loo mèn.
\v 20 Huax conꞌ coꞌ nac cón cheꞌn Diox indxúꞌde loo mèn. Mastaleꞌ indxúꞌda loo mèn, per non mèn no nanee mèn leꞌ Diox ndxàp rye loothe conꞌ laꞌs nii Diox no laꞌs yaꞌ Diox thidtene. No non mèn leꞌ Diox nac thidte Dioxpeꞌ. No non mèn conꞌ ndxèꞌ axta coꞌseꞌ mblec Diox izlyoꞌ no mxènꞌ Diox izlyoꞌ tac ndxòn mèn no nanee mèn leꞌ Diox mxènꞌ ryethe conꞌ coꞌ nacsuaꞌleꞌ. Diꞌs ndxèꞌ nac diꞌs coꞌ ndxòn mèn no ndaꞌ mèn cuent cón cheꞌn Diox. Por cona, yende mod gab mèn loo Diox leꞌ mèn inonte no inaneede mèn mase ndxep conꞌ coꞌ nac cón cheꞌn Diox par neꞌgàpte mèn xquin mèn no xtol mèn.
\v 21 Mastaleꞌ tataa mod mbli Diox par ndaꞌ mèn cuent cón cheꞌn Diox, no ndlibeꞌ mèn Diox por cón cheꞌn conꞌ roo conꞌ xèn coꞌ mbli Diox loo izlyoꞌ, neꞌnglide mèn conꞌ guryath no conꞌ guryèn loo Diox xal ndxàal li mèna loo Diox. Neꞌ neꞌ ngab mèn: Diox quix Uꞌ, Diox, loo Diox. Ndxeꞌlequeꞌ, lugar de ngli mèn conꞌ guryath no conꞌ guryèn loo Diox, ale leꞌleꞌ mcuau yéc mèna no mcuau lezoꞌ mèna loo cón cheꞌn Diox. Yende mod càb conꞌ ndac loo xtùuz coꞌ ndli mèna xtùuz cón cheꞌn Diox.
\v 22 Mastaleꞌ mbez mèn loo xtàa mèn: Anzeꞌf ndxác naꞌ, ¿léꞌ?, per ale ndxeꞌlequeꞌ, ngòc tont mèn.
\v 23 Ale ndxeꞌlequeꞌ, mbláꞌyaꞌ mèn cón cheꞌn Diox, Diox coꞌ neꞌlyuxte no coꞌ neꞌlith node. Neꞌtolode ngli mèna cas loo thidte Diox. Mtlo mèna, mtoxcuaꞌ mèna gunab coꞌ nac mdoꞌ coꞌ ñaa xal mèn coꞌ ndlyux no coꞌ ndlith no. No mtoxcuaꞌ mèna gunab cheꞌn mbin coꞌ ñaa xal mbin. Mtoxcuaꞌ mèna gunab cheꞌn mbelꞌ coꞌ ñaa xal mbelꞌ. No mtoxcuaꞌ mèna gunab cheꞌn chol máꞌ coꞌ nziꞌf chop nii chop yaꞌ. Ngòc conꞌa diox cheꞌnpeꞌ mèna.
\p
\v 24 Por cona, Diox mbláꞌyaꞌ mèna par tolo mbli mèna conꞌ yeꞌrsinꞌ no conꞌ zab no chol xtùuz zab coꞌ ndryoꞌ ndlyenꞌ lezoꞌ mèna par li mèna. Conꞌ coꞌ ndli mèna con thìb xtàa mèna no con tedib xtàa mèna nac conꞌ nathon no conꞌ yeꞌrsinꞌ loo mèn coꞌ indxàalte li mèna.
\v 25 Mèna mseꞌ mod cheꞌn mèna tac neꞌnglide mèna cas loo conꞌ lìcpeꞌ coꞌ nac cón cheꞌnpeꞌ Diox. Ndxeꞌlequeꞌ, asembli mèna par más mbli mèna cas no ngolaꞌs mèna loo conꞌ coꞌ nac yalgutyèꞌ. Mtlo mèna, mbli mèna conꞌ guryath no conꞌ guryèn loo chol conꞌ coꞌ mblec Diox no coꞌ mxènꞌ Diox coꞌ ndxab mèn nac mdoꞌ mèn. No mtlo mèna, mbli mèna sirv loo chol conꞌ coꞌ naban, que naca mèn, que naca máꞌ. Neꞌnglide mèna conꞌ guryath no conꞌ guryèn loo yub Diox. Neꞌ neꞌ ngli mèna sirv loo Dioxpeꞌ coꞌ mxènꞌ izlyoꞌ. Loo Dioxa ndxàal ngab mèn diꞌs ndac no diꞌs natúꞌ. No ndxàal ngab mèn thidte Diox nac Diox roo Diox xèn loo línꞌ coꞌ ntlo, no loo línꞌ coꞌ ndxelo, no loo línꞌ coꞌ neꞌlith node. Tataaqueꞌ gàca.
\p
\v 26 Por conꞌ coꞌ ndli mèna, coꞌ nee diꞌs, nac conꞌ coꞌ ngue niin loo guꞌ ndxèꞌ, Diox mbláꞌyaꞌ mèna loo rye conꞌ coꞌ ncàb nthyon mèn, coꞌ nee diꞌs, axta xaꞌgota mseꞌ mod xal ndli mèngot yalmbiꞌ no yalngot par li xaꞌgota yalmbiꞌ no yalngot con chol mènbiꞌ no con xtàagot xaꞌ, coꞌ indxàalte li xaꞌgot.
\v 27 Lomisqueꞌ mod ne, rye mèn coꞌ nac mènbiꞌa mbláꞌ. Ya neꞌnglide mènbiꞌ yalmbiꞌ coꞌ ndli mèn yalmbiꞌ con saꞌlpeꞌ mènbiꞌ. Ale leꞌleꞌ, mzyo mènbiꞌa con xtàambiꞌ mènbiꞌ par li mènbiꞌ yalmbiꞌ con xtàambiꞌ mènbiꞌa axta mbyac lezoꞌ mènbiꞌ. Per thidtene inthyonte mèna coꞌseꞌ li mèna conꞌa mastaleꞌ naca coꞌ ndli nthyon mèn. Per nzyalqueꞌ mèna tataa mod ndxàc yalquìi loo mèna por conꞌ ndli no mèna lad mèna tac inacte conꞌa conꞌ coꞌ ndxàal li mèna.
\p
\v 28 Texalqueꞌ neꞌngòode lezoꞌ mèna par tolo li mèna cas loo Diox par tolo libeꞌ mèna Diox, ¿léꞌ?, Diox mbláꞌyaꞌ mèna par mbli mèna thìb xtùuz xin no thìb xtùuz cap par li mèna conꞌ coꞌ indxàalte li mèna.
\v 29 Más de cona, ndxàp mèna thìb mod xin no thìb mod cap par li mèna ryethe conꞌ coꞌ inacte conꞌ nalì no conꞌ coꞌ nac conꞌ yeꞌrsinꞌ. Nac mèna mèn nguud no mèn naad loo cón cheꞌn Diox. Nqueliꞌth mèna conꞌ coꞌ nac cheꞌn xtàa mèna. Ncuaꞌn mèna mod li mèna conꞌ yeꞌrsinꞌ loo xtàa mèna. Ndxan tínꞌ lezoꞌ mèna ñèe mèna xtàa mèna. Ncuaꞌn mèna mod guthxùꞌ mèna xtàa mèna. Ncuaꞌn mèna mod yoo tínꞌ mèna con xtàa mèna. Nquedìi mèna xtàa mèna. Anzeꞌf ndxòo lezoꞌ mèna taꞌ mèna cuent yix no nteriꞌth mèna cuent yix. No ncuaꞌn mèna mod li mèna chol conꞌ yeꞌrsinꞌ loo xtàa mèn.
\v 30 Nac mèna mèn coꞌ ñii yèe ñii tìi cón cheꞌn thìb xtàa mèn no cón cheꞌn tedib xtàa mèn. Ndxòo xyàn lezoꞌ mèna coꞌseꞌ ndxòn mèna cón cheꞌn Diox. Nac mèna mèn coꞌ ndxáp nxyanꞌ ñèe xtàa mèn. Nac mèna mèn coꞌ ndyeꞌs no coꞌ nxyalꞌ. Nac mèna mèn coꞌ nziꞌf no ntoxcuaꞌ conꞌ yeꞌrsinꞌ coꞌ ndli mèn. Nac mèna mèn coꞌ indyubdiꞌste loo xud no loo xnaꞌ.
\v 31 Nac mèna mèn naxèn. Ilìcte ndli mèna conꞌ coꞌ mbez mèna li mèna. Nac mèna mèn coꞌ inqueꞌde lezoꞌ ñèe xtàa. Nac mèna mèn coꞌ indlyatte lezoꞌ ñèe xtàa.
\v 32 Mastaleꞌ huen huen non mèna no nanee mèna leꞌ Diox tub rez ryethe conꞌ coꞌ ndli mèn, no ndxàalqueꞌ ryo xàꞌ mèna loo Diox thidtene yiloa por cón cheꞌn conꞌ yeꞌrsinꞌ coꞌ ngue li mèna, per ale ndxeꞌlequeꞌ, sate más tolo ndli mèna conꞌa. No iante conꞌade ndli mèna. Ale ndyac lezoꞌ mèna ñèe mèna taamas mèn coꞌ ndli conꞌa.
\c 2
\s Diox ndub rez cón cheꞌn mèn xal nac conꞌ lìcpeꞌ.
\p
\v 1 Huiꞌ guꞌ nexa. Guꞌ coꞌ ngüiꞌ no coꞌ ñaa loo xtàa guꞌ, no ndyac guꞌ leꞌ xtàa guꞌ ngue tee cuaꞌn xquin xtàa guꞌ no xtol xtàa guꞌ, na nii loo guꞌ: Yende mod gab guꞌ indxàpte guꞌ xquin guꞌ no xtol guꞌ. Tac coꞌseꞌ ngüiꞌ guꞌ no ñaa guꞌ loo conꞌ coꞌ ngue tee li xtàa guꞌ par quexùꞌ guꞌ xtàa guꞌ, neꞌtaꞌde guꞌ cuent ale leque guꞌ ngue tub rez cón cheꞌn guꞌ, ne. Tac leque guꞌ coꞌ ngüiꞌ no coꞌ ñaa loo xtàa guꞌa, leque guꞌ ndli conꞌ ndli xtàa guꞌa.
\v 2 Nanee naꞌ leꞌ Diox nalìqueꞌ ngüiꞌ no nalìqueꞌ ndub rez Diox cón cheꞌn mèn xalqueꞌ nac mod coꞌ, lìcqueꞌ, ndli mèn coꞌseꞌ nquexùꞌ Diox mèn, mèn coꞌ ndli rye loothe conꞌ yeꞌrsinꞌa.
\v 3 Guꞌ coꞌ ngüiꞌ no ñaa loo xtàa guꞌ loo ryethe conꞌ ndli xtàa guꞌ, no nquexùꞌ guꞌ xtàa guꞌ loo conꞌ ndli xtàa guꞌ, no ndli guꞌ leque conꞌ ndli xtàa guꞌ, ¿chéꞌ ndyac guꞌ no chéꞌ ndli guꞌ cuent lyáꞌ guꞌ coꞌseꞌ tub rez Diox cón cheꞌn guꞌ, càꞌ? ¡Pà gàca tataa, ey!
\v 4 ¿Chéꞌ ndyac guꞌ yende cón gàc loo guꞌ por nxìis no guꞌ cón cheꞌn Diox, no ndláꞌ guꞌ ryethe conꞌ ndac coꞌ ndli Diox loo guꞌ, no mod coꞌ nchaꞌlaꞌs Diox ñèe Diox guꞌ thìb lad, càꞌ? No ¿chéꞌ tarte ñee guꞌ no chéꞌ tarte taꞌ guꞌ cuent leꞌ ryethe conꞌ ndac coꞌ ndli Diox loo guꞌ ndluꞌ loo guꞌ xá mod li guꞌ par lyàa yéc guꞌ no par lyàa lezoꞌ guꞌ loo Diox par zyeꞌ mod yeꞌrsinꞌ coꞌ ndxàp guꞌ, càꞌ? ¡Máa yob yéc guꞌ, yey!
\v 5 Anzeꞌf naad guꞌ no anzeꞌf nguud guꞌ. Indlyaꞌste guꞌ láꞌ guꞌ rye conꞌ coꞌ nac xquin guꞌ no coꞌ nac xtol guꞌ coꞌ ndxàp guꞌ. Cona, leque guꞌ sate más ngue li par tolo ziꞌf guꞌ xquin guꞌ no xtol guꞌ loo guꞌ par tolo yecloo tínꞌ Diox ñèe Diox guꞌ coꞌseꞌ zin huiz no zin ze nalì tub rez Diox cón cheꞌn xtol mèn loo mèn.
\v 6 Coꞌseꞌ gàc leque huiz coꞌ yecloo Diox loo mèn coꞌseꞌ yilo tub rez Diox cón cheꞌn conꞌ coꞌ mbli thìb thìb mèn, sya, càba loo thìb thìb mèn xalqueꞌ mbli mèn láth naban mèn loo izlyoꞌ.
\v 7 Mèn coꞌ thidtenequeꞌ mbli nèe mèn par li mèn conꞌ huen, loo mèna li Diox par yòo ban no mèna Diox thidtene tac mèna ncuaꞌn mod gàc conꞌ roo conꞌ xèn cheꞌnpeꞌ Diox loo mèna. No ncuaꞌn mèna mod gàc conꞌ guryath no conꞌ guryèn cheꞌnpeꞌ Diox loo mèna. No ncuaꞌn mèna mod par yòo mèna coꞌteꞌ neꞌgathte mèna thidtene.
\v 8 Per mèn coꞌ ndyeꞌs no mèn coꞌ nxyalꞌ no mèn coꞌ ñee loon cón cheꞌnpeꞌ mèn, no inacte mèna mèn coꞌ yoo lezoꞌ tyubdiꞌs mèna loo coꞌ nac coꞌ lìcpeꞌ, ndxeꞌlequeꞌ, más ndxòo lezoꞌ mèna li mèna chol conꞌ yeꞌrsinꞌ, loo leque mèn coꞌ nac mèn naad no mèn nguud Diox yecloo ñèe Diox mèna. No tetìi Diox mèna axta plóthe.
\v 9 Gàc yalquìi tínꞌ no yalnaxi tínꞌ loo ryete mèn coꞌ ndli chol conꞌ yeꞌrsinꞌ. Nerlequeꞌ gàca loo mèn nación Israel. No yiloa, gàca loo taamas mèn coꞌ inacte mèn nación Israel.
\v 10 Per mastaleꞌ tataa li Diox loo mèn yeꞌrsinꞌ, loo chol mèn coꞌ thidtene mbli nèe loo conꞌ ndac, loo mèna gàc conꞌ roo conꞌ xèn, no conꞌ guryath no conꞌ guryèn. No li Diox loo mèna rye nda rye ndyeꞌth mèna cue ban mèna. Nerlequeꞌ gàca loo mèn nación Israel no yiloa gàca loo mèn coꞌ inacte mèn nación Israel.
\p
\v 11 Tac Diox inacte xal mèn coꞌ ndli más ndyuꞌ thìb mèn leque tedib mèn.
\v 12 Ryete mèn coꞌ neꞌnque node ley coꞌ mxoꞌf Moisés loo mèn, cheleꞌ mèna cuaꞌn xquin mèna no xtol mèna, mèna lyux mastaleꞌ neꞌnque node mèna leya. Lomisqueꞌ ne, ryete mèn coꞌ ncuaꞌn xquin mèn no xtol mèn, mastaleꞌ ñibeꞌ ley coꞌ mxoꞌf Moisés loo mèna, por cón cheꞌn leque ley coꞌ mque no mèna, Diox tub rez loo mèna no quexùꞌ Diox mèna.
\v 13 Mèn coꞌ ante ndxòn cón cheꞌn ley coꞌ mxoꞌf Moisés loo mèn, neꞌtaꞌde Diox lugar no neꞌtyalte Diox yòo mèna loo cón cheꞌn Diox par gàc mèna mèn nalì no mèn nambìi loo Diox. Ndxeꞌlequeꞌ, mèn coꞌ ndyubdiꞌs cón cheꞌn xal ñibeꞌ ley coꞌ mxoꞌf Moisés loo mèn, Diox tyal no taꞌ Diox lugar yòo mèna loo cón cheꞌn Diox par gàc mèna mèn nalì no mèn nambìi loo Diox.
\v 14 Tac mèn tith coꞌ inacte mèn nación Israel, coꞌ neꞌnque node ley coꞌ mxoꞌf Moisés loo mèn, mastaleꞌ neꞌnque node mèna leya, mèna ngure ban liqueꞌ xalqueꞌ ñibeꞌ ley coꞌ mxoꞌf Moisés loo mèn nación Israel. Mèna ndlii tataa tac ndxàp mèna thìb mod coꞌ nac mod cheꞌnpeꞌ mèna. Mastaleꞌ neꞌngàpte mèna ley coꞌ mxoꞌf Moisés loo mèn, leque mèna ndli xal ñibeꞌpeꞌ mod coꞌ ndxàp mèna làth mèna loo mèn. Mod coꞌ ndxàp mèna nac leypeꞌ mèna.
\v 15 Mèn tith coꞌ inacte mèn nación Israel, coꞌ indxàpte ley coꞌ mxoꞌf Moisés loo mèn nación Israel, mèna ndxàp thìb mod coꞌ ndluꞌ leꞌ mèna, lìcqueꞌ, ndxàp thìb ley leꞌn xtùuz mèn no leꞌn lezoꞌ mèn coꞌ ñibeꞌ loo mèn coꞌ nac mod cheꞌn mèna. No conꞌ coꞌ ndenꞌ mèn leꞌn lezoꞌ mèn coꞌseꞌ mbli mèna chol conꞌ, ¿chéꞌ conꞌ ndac mbli mèna o chéꞌ conꞌ yeꞌrsinꞌ mbli mèna? conꞌa ndluꞌ loo mèna nzo thìb ley leꞌn xtùuz mèna no leꞌn lezoꞌ mèna. Lomisqueꞌ ne, xtùuz coꞌ ndxàp mèna ndluꞌ cón cheꞌn ley coꞌ nzo leꞌn lezoꞌ mèn tac ndxep vez xtùuz mèn nquexùꞌ mèn loo conꞌ mbli mèn. No ndxep vez xtùuz mèn ndli ndyub razon cón cheꞌn mèn.
\v 16 Tataaqueꞌ gàca coꞌseꞌ zin thìb huiz no zin thìb ze coꞌseꞌ ñibeꞌ Diox loo Tad Jesucrist par tub rez Tad Jesucrist cón cheꞌn ryete conꞌ coꞌ xexte mbli mèn xal ndluꞌ diꞌs ndac ndxèꞌ coꞌ ngon yalbàn.
\s Trèꞌ ndluꞌ leꞌ mèn nación Israel más mdubdiꞌs loo ley coꞌ mxoꞌf Moisés loo mèn.
\p
\v 17 Huiꞌ guꞌ nexa, mèn nación Israel, guꞌ coꞌ ngue no lèepeꞌ coꞌ nac lèe mèn nación Israel, susqueꞌ anzeꞌf nquenap guꞌ guꞌ loo ley coꞌ mxoꞌf Moisés loo guꞌ. No ndyeꞌs guꞌ no nxyalꞌ guꞌ loo conꞌ coꞌ nac cón cheꞌn Diox. Anzeꞌf ndxác guꞌ, ndli guꞌ cuent, ¿léꞌ?
\v 18 Mbez guꞌ nanee guꞌ no non guꞌ cón cheꞌn ryethe conꞌ coꞌ nee lezoꞌ Diox. No mbez guꞌ ndxòo lezoꞌ guꞌ cui guꞌ conꞌ ndac tac ley coꞌ mxoꞌf Moisés loo guꞌ ndluꞌi loo guꞌ, ¿léꞌ?
\v 19 No ndyac guꞌ anzeꞌf ndxác guꞌ par tyoo ner guꞌ loo mèn coꞌ ndxàc xal mèn sieu loo cón cheꞌn Diox. No ndyac guꞌ ndxác guꞌ tenìi guꞌ yéc mèn no tenìi guꞌ lezoꞌ mèn, mèn coꞌ ncuau loo no mèn coꞌ ncuau yéc loo cón cheꞌn Diox, ¿léꞌ?
\v 20 Ale ndyac guꞌ anzeꞌf ndxác guꞌ par luꞌ guꞌ loo mèn coꞌ nac mèn naxèn coꞌ nauꞌ loo nauꞌ yéc loo cón cheꞌn Diox. No mbez guꞌ nac guꞌ xal thìb maistr cheꞌn mèn coꞌ nac xal myenꞌ bix loo cón cheꞌn Diox. No ndyac guꞌ leꞌ loo ley coꞌ mxoꞌf Moisés loo mèn ndub ryete diꞌs coꞌ nquin taꞌ mèn cuent no non mèn par li mèn ante conꞌ coꞌ nac lìcpeꞌ.
\v 21 Per huiꞌ guꞌ nexa. Guꞌ coꞌ ndluꞌ loo taamas mèn, ¿chonon indluꞌde leque guꞌ guꞌ? No guꞌ coꞌ ngo yalbàn no coꞌ ndeꞌth loo taamas mèn, mbez guꞌ loo mèn indxàalte li huanꞌ mèn, ¿chonon leque guꞌ ndli huanꞌ, sya?
\v 22 Guꞌ coꞌ mbez indxàalte li mèn yalburrid, ¿chonon ndli guꞌ yalburrid, sya? Guꞌ coꞌ ndxecloo ñèe chol mdoꞌ, ¿chonon ndli huanꞌ guꞌ conꞌ coꞌ ndxàp mdoꞌ gudoꞌ mdoꞌ, sya?
\v 23 Guꞌ coꞌ anzeꞌf ndyeꞌs por ngue no guꞌ ley coꞌ mxoꞌf Moisés loo guꞌ, indlide guꞌ conꞌ guryath no conꞌ guryèn loo Diox tac indlide guꞌ xal ñibeꞌ ley coꞌ mxoꞌf Moisés loo guꞌ.
\v 24 Tac loo libr coꞌ nac xtiꞌs Diox ndub diꞌs coꞌ mbez: Leꞌ mèn coꞌ naban dib athu loo izlyoꞌ, mèn coꞌ inacte mèn nación Israel, mèna ñii yèe ñii tìi cón cheꞌn Diox por ndxàp guꞌ dol loo Diox.
\p
\v 25 Lìca, ntac yalndxelaꞌs coꞌ ndxàp guꞌ coꞌ nac circuncisión cheleꞌ guꞌ, lìcqueꞌ, ndyubdiꞌsqueꞌ loo ley coꞌ mxoꞌf Moisés loo guꞌ. Per cheleꞌ guꞌ indyubdiꞌste xal mnibeꞌ ley coꞌ mxoꞌf Moisés loo guꞌ, leꞌ sya, ndxàca loo guꞌ xal mèn coꞌ indxàcte circuncidar loo. Per por part cheꞌn Diox, yende cón ntac ngàc circuncidar guꞌ.
\v 26 Per ndxeꞌlequeꞌ, cheleꞌ thìb mèn coꞌ indxelaꞌste loo yalndxelaꞌsa no ndyubdiꞌs mèna xal ñibeꞌ ley coꞌ mxoꞌf Moisés loo guꞌ, nac mèna xal mèn coꞌ ndxàp yalndxelaꞌs cheꞌn circuncisión, mastaleꞌ indlide mèna cas loo yalndxelaꞌs cheꞌn circuncisión.
\v 27 Per huiꞌ guꞌ nexa. Ndxeꞌlequeꞌ, mèn coꞌ indxàpte yalndxelaꞌs cheꞌn circuncisión no nzi tee li mèna xal ñibeꞌ ley coꞌ mxoꞌf Moisés loo mèn, mèna huiꞌ no ñaa mèna loo guꞌ leꞌ guꞌ indyubdiꞌste xal ndub diꞌs loo ley mastaleꞌ nzoꞌf diꞌs ngòc circuncidar guꞌ. Por cona, mèn coꞌ indxàpte yalndxelaꞌs cheꞌn circuncisión, mèna tub rez cón cheꞌn guꞌ no quexùꞌ mèna guꞌ loo Diox.
\v 28 Inacte mèn mèn nación Israel, mèn coꞌ ndluꞌ loo mèn ngue li mèn xal ñibeꞌ ley coꞌ mxoꞌf Moisés loo mèn nación Israel. Neꞌ neꞌ inac mèn mèn nación Israel, mèn coꞌ ante ngue no yalndxelaꞌs cheꞌn circuncisión, mèn coꞌ ndxàc circuncidar lad.
\v 29 Ndxeꞌlequeꞌ, mèn coꞌ, lìcqueꞌ, nac mèn nación Israel, mèna nac mèn coꞌ ndxòn xtiꞌs Diox no mèn coꞌ ndyubdiꞌs loo ryethe conꞌ ñibeꞌ Diox loo mèn. Leꞌ yalndxelaꞌs coꞌ nac circuncisión coꞌ nac coꞌ lìcpeꞌ na, nac thìb mod coꞌ ndxàp mèn leꞌn lezoꞌ mèn no leꞌn xtùuz mèn par nteche ntexyath mèn leꞌn lezoꞌ mèn no leꞌn xtùuz mèn, coꞌ nee diꞌs, thidtene tyubdiꞌs mèna loo Diox. Inacte conꞌa conꞌ coꞌ ndli mèn xtùuz no coꞌ nteche ntexyath mèn xtùuz mèn xal nac diꞌs coꞌ ndub loo ley coꞌ mxoꞌf Moisés loo mèn. Ndxeꞌlequeꞌ, conꞌ coꞌ ndli mèn xtùuz no conꞌ coꞌ nteche no coꞌ ntexyath leꞌn lezoꞌ mèn nac coꞌ ndluꞌ mèn loo xtàa mèn thidtenequeꞌ ndoo lezoꞌ mèn ndyubdiꞌs mèn loo Diox. Mèn coꞌ, lìcqueꞌ, nac mèn nación Israelpeꞌ no mèn coꞌ, lìcqueꞌ, ngòc circuncidar lad, ndxeꞌlequeꞌ, mèna ndyuꞌ loo Diox. No indyuꞌde mèna loo mèn coꞌ nac xtàa mèn.
\c 3
\p
\v 1 Daa, Pab, nibdiz tedib conꞌ loo guꞌ loo cart ndxèꞌ coꞌ ngue queꞌen yeꞌs loo guꞌ, guꞌ coꞌ nac mèn gulàaz mèn ciuda Rom: ¿Chéꞌ más ndyuꞌ mèn nación Israel por nac mèna mèn nación Israel, càꞌ? ¿Chéꞌ por ndxàc circuncidar mèn nación Israel cona más ntac mèn nación Israel loo Diox, càꞌ?
\v 2 Yende xàa. Conꞌ coꞌ ndli más ndyuꞌ mèn nación Israel nac: Anzeꞌf thìb conꞌ ndac ngòc loo mèn nación Israel huax mod. Nerlequeꞌ conꞌ ndac coꞌ ngòc loo mèn nación Israel ngòc leꞌ Diox ngòp yalxlaꞌs loo mèna par mdaꞌ Diox lugar loo mèna quenap mèna libr coꞌ nac xtiꞌs Diox.
\v 3 Pues, ¿cón ndli? Cheleꞌ ndxep mèn nación Israel neꞌndalte ngalaꞌs loo Diox leꞌ Diox li conꞌ coꞌ mcàbgòn Diox li Diox loo mèn, ¿chéꞌ por cona neꞌlide Diox conꞌ coꞌ mcàbgòn Diox li Diox, sya, càꞌ? Yende xàa.
\v 4 Nec thìb mod no nec tedib mod, ¿léꞌ? Ndxeꞌlequeꞌ, Diox ndliqueꞌ coꞌ mcàbgòn Diox li Diox loo mèn. Diox ndli ante conꞌ coꞌ nac lìcpeꞌ mastaleꞌ chol mèn coꞌ nziriꞌ ndyèꞌ xal ndub diꞌs loo libr coꞌ nac xtiꞌs Diox coꞌ mbez:
\pi1 Mèn yilaꞌs no co ro mèn leꞌ diꞌs coꞌ ñii Uꞌ, Diox, nac lìcpeꞌ. No coꞌseꞌ huiꞌ mèn no laꞌs mèn loo conꞌ ndli Uꞌ, gàca leꞌ mèn gab: Lìcqueꞌ nac mod coꞌ ndli Diox conꞌ no nalì ndli Diox conꞌ.
\p
\v 5 ¿Cón gab naꞌ, sya? Niin conꞌ ndxèꞌ loo guꞌ xal ndyoodiꞌs chol mèn coꞌ alithe ndyoodiꞌs: Cheleꞌ conꞌ yeꞌrsinꞌ coꞌ ndli mèn ndluꞌ loo mèn leꞌ Diox, lìcqueꞌ, nac thìb Diox nalì no thìb Diox nambìi loo conꞌ ndli Diox, ¿chéꞌ nzo mod gab naꞌ leꞌ Diox inacte Diox nalì no Diox nambìi coꞌseꞌ tetìi Diox mèn por conꞌ yeꞌrsinꞌ coꞌ ndli mèn, càꞌ?
\v 6 Nec thìb mod no nec tedib mod neꞌgabte naꞌ leꞌ Diox inacte Diox nalì no Diox nambìi, ¿léꞌ? Tac cheleꞌ Diox, lìcqueꞌ, inacte Diox nalì no Diox nambìi, ¿xá mod nalì no nambìi tub rez Diox cón cheꞌn mèn loo izlyoꞌ, sya?
\p
\v 7 Lomisqueꞌ mod ne, cheleꞌ daa ngue tyèꞌ par tataa mod tolo gàc más conꞌ roo conꞌ xèn loo Diox por ndyèꞌen, sya, ¿chonon ndub rez Diox cón chenen leꞌ daa nac thìb mbiꞌ coꞌ ndxàp xtol, sya? Yende xàa. Nalì no nambìi nac Diox.
\v 8 Niin tedib conꞌ loo guꞌ, ne: Cheleꞌ Diox, lìcqueꞌ, tataa nac, ¿chonon neꞌtolode li naꞌ conꞌ yeꞌrsinꞌ par tolo li Diox conꞌ ndac loo naꞌ, sya? Diꞌs ndxèꞌ nac diꞌs coꞌ asendli mèn taandxèꞌ mbez mèn leꞌ nuꞌ tataa mod ndluꞌ loo mèn. Per rye mèn coꞌ tataa mbeza, nalìqueꞌ no nambìiqueꞌ tub rez Diox cón cheꞌn ryethe conꞌ yeꞌrsinꞌ coꞌ ngue li mèna par tyactìi mèna yiloa xal ndxàal gàca loo mèna.
\s Pab ndluꞌ leꞌ ryete mèn ndxàp xtol.
\p
\v 9 ¿Cón, sya? ¿Chéꞌ ndli guꞌ cuent más mèn ndac nac naꞌ coꞌ nac mèn nación Israel leque chol mèn coꞌ inacte mèn nación Israel, càꞌ? Yende xàa. Nec thìb mod no nec tedib mod gàca tataa, ¿léꞌ? Tac nuꞌ mquexùꞌleꞌ loo mèn nación Israel xal loo taamas mèn coꞌ nziriꞌ loo izlyoꞌ coꞌ inacte mèn nación Israel leꞌ ryete mèn dib athu loo izlyoꞌ mcuaꞌn xquin mèn par ndxàp mèn xtol mèn loo Diox.
\v 10 Cón cheꞌn conꞌ ndxèꞌ nac diꞌs coꞌ ndub loo libr coꞌ nac xtiꞌs Diox coꞌ mbez:
\pi1 Nec thìb mèn coꞌ nzi tee ban loo izlyoꞌ ndxèꞌ, inzi tee ban lìde mèn loo Diox thidtene.
\pi1
\v 11 Yende chó mèn ndaꞌ cuent cón nac más conꞌ ndac. Neꞌ neꞌ yen thìb mèn coꞌ tyal cuaꞌn thidte Diox coꞌ nac merpeꞌ Diox.
\pi1
\v 12 Ryete mèn ngro xàꞌ loo cón cheꞌn Diox. Ndláꞌyaꞌ mèn cón cheꞌn Diox. Nzi tee huan mèna loo cón cheꞌn Diox. Por derech, yende cón ntac mèna loo Diox. Yende chó mèn ndli conꞌ ndac. Per nec thìb mèn ndli par li mèn conꞌ ndac loo Diox.
\pi1
\v 13 Más ndli mèna ndyoodiꞌs mèna diꞌs zab no diꞌs cap. Nac looz mèna no ro mèna coꞌseꞌ ndyoodiꞌs mèn diꞌs xal thìb báꞌ thebol coꞌ ndyenꞌ coꞌteꞌ caꞌs mèn tedib thebol. Con diꞌs coꞌ ndyoodiꞌs mèn nquedìi mèn xtàa mèn. No nac diꞌs coꞌ ndyoodiꞌs mèna xal thìb cuanꞌ cheꞌn mbelꞌ coꞌ lèe huid coꞌ ndli ndenꞌ mèn xal ndxàca loo mèn coꞌseꞌ nquele thìb huid mèn.
\pi1
\v 14 Mèn coꞌ tataa nac nguèe no nsuc. No ante ndoo lezoꞌ mèna ndyoodiꞌs mèna antub diꞌs zab no diꞌs cap coꞌ ndli ndxetoo xyàn lezoꞌ mèn.
\pi1
\v 15 Ndyub quìi ndyub bèel lezoꞌ mèna par cuaꞌn mèna mod guth mèna xtàa mèna.
\pi1
\v 16 Rye ned ngue tee mèna, ngue telux mèna mèn no ngue telux mèna conꞌ coꞌ nac cheꞌn mèn.
\pi1
\v 17 Neꞌ neꞌ incuaꞌn mèna mod que tee ban mèna rye nda mèna no rye ndyeꞌth mèna làth xtàa mèna par cue see tee lezoꞌ mèna.
\pi1
\v 18 Neꞌ neꞌ indli mèna xtùuz cón cheꞌn Diox par zyeb mèna loo cón cheꞌn Diox.
\p
\v 19 Per naꞌ naneeleꞌ leꞌ ryete diꞌs coꞌ ndub loo ley coꞌ mxoꞌf Moisés loo mèn nac diꞌs coꞌ ñibeꞌ loo mèn coꞌ ndoo nque loo leya par yende chó mèn càb ro loo Diox. No mbezqueꞌ diꞌs loo leya leꞌ Diox nalì tub rez cón cheꞌn ryete mèn coꞌseꞌ tub rez Diox cón cheꞌn mèn.
\v 20 Tac mastaleꞌ ndenꞌ mèna huax conꞌ nac coꞌ ndli mèn coꞌ ndyoo nque loo ley coꞌ mxoꞌf Moisés loo mèn, nec thìb mèna neꞌgàcte mèn nalì no mèn nambìi loo Diox por cón cheꞌn leya. Tac por cón cheꞌn ley coꞌ mxoꞌf Moisés loo mèn coꞌ ndluꞌ loo mèn, non mèn no nanee mèn leꞌ mèn ndxàp xtol loo Diox.
\s Pab mbez: Ante por yilaꞌs mèn loo Diox por cón cheꞌn Jesucrist lyáꞌ mèn loo conꞌ ryes.
\p
\v 21 Per nalleꞌ Diox mblileꞌ tedib conꞌ loo naꞌ coꞌ nac thìb conꞌ xàꞌ loo ley coꞌ mxoꞌf Moisés loo mèn. Ndaꞌleꞌ naꞌ cuent no nonleꞌ naꞌ xá mod mdyal Diox yòo mèn loo Diox no loo cón cheꞌn Diox. Per cón cheꞌn mod no conꞌ coꞌ mbli Diox par mdyal Diox par yòo mèn loo cón cheꞌn Diox nac diꞌs coꞌ ndub loo ley coꞌ mxoꞌf Moisés loo mèn no nac diꞌs coꞌ ndub loo libr coꞌ mqueꞌ mèn yeꞌs, mèn coꞌ mdeꞌth diꞌs coꞌ ndxab Diox.
\v 22 Per mod coꞌ mbli Diox par mdyal Diox ngòo mèn coꞌ ndxelaꞌs loo cón cheꞌn Diox, leꞌi nac por ndxelaꞌs mèn loo Tad Jesucrist. Por cona, thidte ndyuꞌ ryete mèn coꞌ ndxelaꞌs loo Diox por cón cheꞌn Tad Jesucrist, que nac mèna mèn nación Israel, que nac mèna mèn coꞌ inacte mèn nación Israel.
\v 23 Ryete mèn mcuaꞌn xquin mèn no mcuaꞌn mèn xtol mèn loo Diox. Yende chó mèn nzo coꞌ ndli conꞌ ndlyaꞌs Diox no conꞌ coꞌ ndxòo lezoꞌ Diox.
\v 24 Per com leꞌ Diox nac Diox ndac, ¿léꞌ?, angmbli Diox par mdyal Diox ngòo mèn loo cón cheꞌn Diox por mteláꞌ Diox mèn loo conꞌ ryes por cón cheꞌn Crist Jesus.
\v 25 Por cona, Diox mbli leꞌleꞌ Crist nguth par leque yub Crist mdix cón cheꞌn xtol mèn coꞌseꞌ mqueꞌ mèn Crist loo cruz. Nguth Crist loo cruz por cón cheꞌn mèn coꞌ ndxàp xtol. No mèn coꞌ ndxelaꞌs loo Crist, mèna neꞌtyactìide por cón cheꞌn xquin mèna por ndxelaꞌs mèna loo Crist. Ngòc conꞌa loo Crist par non mèn no par nanee mèn leꞌ Diox nac Diox nalì loo ryete conꞌ ndli Diox, no thidtenequeꞌ mchaꞌlaꞌs Diox coꞌseꞌ mteriꞌth no mtecanꞌ Diox xquin mèn no xtol mèn coꞌ mcuaꞌn mèn ndooreꞌ telꞌ Diox Crist loo izlyoꞌ.
\v 26 Ngòca, ne, leꞌ Diox mchaꞌlaꞌs loo mèn póla par luꞌ Diox loo mèn tiemp ndxèꞌ leꞌ Diox nac Diox nalì no Diox nambìi no toloqueꞌ nac Diox Diox nalì no Diox nambìi coꞌseꞌ ndyal Diox yòo mèn loo cón cheꞌn Diox, mèn coꞌ ndxelaꞌs loo Jesús.
\p
\v 27 ¿Xá mod, sya? ¿Máa mod coꞌ mdyeꞌs guꞌ coꞌseꞌ mdyeꞌs guꞌ loo cón cheꞌn ley coꞌ mxoꞌf Moisés loo guꞌa, àꞌ? Ya yende mod tolo tyeꞌs guꞌ, nalleꞌ, ndyaquen. Peser nibdiꞌs guꞌ loon: ¿Chonon yende mod tyeꞌs nuꞌ, àꞌ? Pues nguleda loo guꞌ tac guꞌ ya neꞌtolode ngli ryete conꞌ xal mnibeꞌ ley loo guꞌ. Ndxeꞌlequeꞌ, ya indyeꞌste guꞌ nalleꞌ por ngolaꞌs ryete naꞌ loo Diox por cón cheꞌn Jesucrist.
\v 28 Por cona, non naꞌ no nanee naꞌ leꞌ Diox ndyal yòo mèn loo cón cheꞌn Diox ante por ngolaꞌs mèn loo Tad Jesucrist. No yende chó mport nzo lezoꞌ Diox gunee mèn chéꞌ mbli mèn o chéꞌ neꞌnglide mèn xal mnibeꞌ ley coꞌ mxoꞌf Moisés loo mèn.
\b
\p
\v 29 ¿Chéꞌ ngue li guꞌ cuent leꞌ Diox ante nac Diox cheꞌn mèn nación Israel, càꞌ? ¿Chéꞌ indlide guꞌ cuent leꞌ Diox nac Diox cheꞌn taamas mèn coꞌ inacte mèn nación Israel, ne, càꞌ? ¿Xálte mod neꞌ li guꞌ cuent leꞌ Diox nac Diox cheꞌn ryethe mèn dib athu loo izlyoꞌ, mèn coꞌ inacte mèn nación Israel? Nacpeꞌ Diox Diox cheꞌn mèna, ne.
\v 30 Com leꞌ naꞌ nanee ya yende tedib Diox. Thidte Diox nac Diox coꞌ nzo, ¿léꞌ? No por ndxelaꞌs chol mèn loo Jesucrist, Diox ndyal yòo mèna loo cón cheꞌn Diox, que naca mèn coꞌ ngòc circuncidar, que naca mèn coꞌ indxàcte circuncidar.
\v 31 Per nalleꞌ, ndlyazen ñibdizen thìb conꞌ loo guꞌ: ¿Xá nee guꞌ? Chéꞌ ntac ley coꞌ mxoꞌf Moisés loo mèn o chéꞌ intacte leya loo mèn tac ndxelaꞌs naꞌ loo Crist, càꞌ? Yende xàa. Nec thìb mod no nec tedib mod. Yende mod gab naꞌ intacte ley coꞌ mxoꞌf Moisés loo mèn, ¿léꞌ? Ndxeꞌlequeꞌ, ndli nèequeꞌ naꞌ leꞌ ley ntacqueꞌ.
\c 4
\s Trèꞌ ndluꞌ leꞌ conꞌ coꞌ mbli mbiꞌ coꞌ ngroꞌ lèe Abraham nac thìb conꞌ coꞌ ante huiꞌ mèn no thìb conꞌ coꞌ ante ñaa mèn loo.
\p
\v 1 ¿Cón gab naꞌ cón cheꞌn Abraham coꞌ ngòc xudgool naꞌ coꞌ mbloj siꞌ bin póla por mbli Diox ngòc conꞌ ndac loo Abraham, àꞌ?
\v 2 Cheleꞌ Abraham ngòc mbiꞌ nalì no mbiꞌ nambìi loo Diox por cón cheꞌn ndxep conꞌ ndac coꞌ mbli Abraham loo Diox, nzoqueꞌ mod ndeꞌs Abraham. Per loo Diox yende mod ngác Abraham ndeꞌs Abraham.
\v 3 ¿Chéꞌ indaꞌde guꞌ cuent xal mbez diꞌs coꞌ ndub loo libr coꞌ nac xtiꞌs Diox, càꞌ? Diꞌsa mbez: Abraham ngolaꞌs leꞌ Diox liqueꞌ conꞌ coꞌ mcàbgòn Diox li Diox loo Abraham. No mbli Diox cuent leꞌ Abraham nac mbiꞌ nalì no mbiꞌ nambìi loo Diox por ngolaꞌs Abraham loo Diox no maste.
\v 4 Angab naꞌi, cheleꞌ thìb mèn nqueꞌ zinꞌ huiz, mèn neꞌcode ray coꞌ yax càa mèna xal thìb conꞌ coꞌ angtaꞌlaꞌs mèn càa xtàa mèn xal thìb ayud loo mèn coꞌ mqueꞌ zinꞌ huiza. Ndxeꞌlequeꞌ, tmi coꞌ ndxòo ray mèna nac tmi coꞌ ndeb mèn loo mèna.
\v 5 Per cheleꞌ ndxep mèn coꞌ neꞌnglide conꞌ ndac loo Diox ndxelaꞌs loo Diox, mastaleꞌ ngòc mèna mèn coꞌ mcuaꞌn xquin no xtol, Diox ngòo cuent nac mèna mèn nalì no mèn nambìi loo Diox. Ngo Diox cuent nac mèna mèn nalì no mèn nambìi loo Diox ante por ngolaꞌs mèna loo Diox por cón cheꞌn Jesucrist.
\v 6 Tataaguèꞌ ndxab David coꞌ ngòc rey póla coꞌseꞌ ndxab David:
\pi1 Huen nda mèn coꞌ ngo Diox cuent nac mèn nalì no mèn nambìi loo Diox mastaleꞌ yende chó conꞌ ndac ngli mèn par ngàc ngláꞌ mèn loo conꞌ ryes.
\m
\v 7 Lomisqueꞌ ndxab David, ne:
\pi1 Huen nda ryete mèn, mèn coꞌ mtonꞌleꞌ Diox ryete conꞌ zab coꞌ mbli mèn no mèn coꞌ mteriꞌth mtecanꞌ Diox ryete xquin no xtol coꞌ mcuaꞌn mèn.
\pi1
\v 8 Huen nda mèn coꞌ ingode Diox cuent ndxàp mèn xtol mèn.
\p
\v 9 ¿Chéꞌ ngue li guꞌ cuent ante loo mèn coꞌ ngòc circuncidar mdyal Diox ngòo mèna loo cón cheꞌn Diox no ngo Diox cuent nac mèna mèn nalì no mèn nambìi loo Diox por huen ndxàca loo mèn, o chéꞌ ngue li guꞌ cuent ihuente ndxàca loo mèn coꞌ indxàcte circuncidar, ne, càꞌ? Huenqueꞌ nda no huen ndxàca loo ryop ned mèna, ey. Tac daa mdaleꞌ cuent loo guꞌ leꞌ Diox mdyal ngòo mèn loo cón cheꞌn Diox no mbloleꞌ Diox cuent leꞌ Abraham ngòc mbiꞌ nalì no mbiꞌ nambìi loo Diox ante por ngolaꞌs Abraham leꞌ Diox liqueꞌ coꞌ mcàbgòn Diox li Diox loo Abraham.
\v 10 Ndlyazen ñee guꞌ loon: ¿Pól mblo Diox cuent leꞌ Abraham ngòc mbiꞌ nalì no mbiꞌ nambìi loo Diox, àꞌ? ¿Chéꞌ mblo Diox cuent ngòc Abraham mbiꞌ nalì no mbiꞌ nambìi loo ngòc circuncidar Abraham o chéꞌ mblo Diox cuenta ndooreꞌ gàc circuncidar Abraham, càꞌ? Tyèꞌ. Neꞌngode Diox cuent nac Abraham mbiꞌ nalì no mbiꞌ nambìi loo ngòc circuncidar Abraham. Ndxeꞌlequeꞌ, huen huen mblo Diox cuent ngòc Abraham mbiꞌ nalì no mbiꞌ nambìi loo Diox ndooreꞌ gàc circuncidar Abraham.
\v 11 Cona, ngue niin loo guꞌ: Diox mblo cuent nac Abraham mbiꞌ nalì no mbiꞌ nambìi loo Diox ndooreꞌ tlo Abraham li Abraham costumbr cheꞌn circuncisión. Conꞌa ngòc thìb conꞌ coꞌ mbluꞌ loo taamas mèn leꞌ por cón cheꞌn circuncisión coꞌ ngòc loo Abraham, Diox mblo ro loo taamas mèn leꞌ Diox mblo cuent ngòc Abraham thìb mbiꞌ nalì no thìb mbiꞌ nambìi loo Diox ante por ngolaꞌs Abraham leꞌ Diox liqueꞌ conꞌ mcàbgòn Diox li Diox loo Abraham. Ngòc conꞌa loo Abraham par mblo Diox cuent nac Abraham xudgool ryete mèn coꞌ ndxelaꞌs leꞌ Diox liqueꞌ coꞌ mcàbgòn Diox li Diox mastaleꞌ neꞌgàcte circuncidar mèna. Leque moda, ne, Diox ngo cuent cón cheꞌn mèna nac mèna mèn nalì no mèn nambìi loo Diox no mdyal Diox ngòo mèn loo cón cheꞌn Diox ante por ngolaꞌs mèna leꞌ Diox liqueꞌ coꞌ mcàbgòn Diox li Diox loo mèna.
\v 12 Lìca, Abraham nac xudgool mèn coꞌ ngòc circuncidar por nerlequeꞌ ngòc circuncidar Abraham. Per diꞌs coꞌ ngue niin loo guꞌ ndxèꞌ nee diꞌs iante nac Abraham xudgool mèn coꞌ ngòc circuncidar lad. Ndxeꞌlequeꞌ, diꞌs ndxèꞌ nee diꞌs nac Abraham xudgool mèn, ne, mèn coꞌ ante ndxelaꞌs loo Diox leꞌ Diox li coꞌ mcàbgòn Diox li Diox xalqueꞌ ngolaꞌs Abraham loo Diox leꞌ Diox liqueꞌ conꞌ mcàbgòn Diox li Diox loo Abraham ndooreꞌ gàc circuncidar Abraham.
\s Trèꞌ ndluꞌ ngòcqueꞌ no mdyaaqueꞌ no mdubqueꞌ diꞌs coꞌ mcàbgòn Diox li Diox loo mèn ante por ngolaꞌs mèn loo Diox por cón cheꞌn Jesucrist.
\p
\v 13 Diox mcàbgòn loo Abraham no loo bin Abraham yanꞌ no mèna no gàc cheꞌnpeꞌ mèna dib athu loo izlyoꞌ xal xyònpeꞌ mèna. Per cón cheꞌn conꞌ coꞌ mcàbgòn Diox taꞌ Diox loo Abraham, neꞌncàbgònte Diox conꞌa loo Abraham por mdubdiꞌs Abraham no por mbìn Abraham diꞌs coꞌ mnibeꞌ ley coꞌ mxoꞌf Moisés loo mèn. Ndxeꞌlequeꞌ, Diox mcàbgòn diꞌsa loo Abraham ante por ngolaꞌs Abraham loo Diox leꞌ Diox liqueꞌ conꞌ mcàbgòn Diox li Diox loo Abraham.
\v 14 Tac cheleꞌi ngàc ante loo mèn coꞌ ndyubdiꞌs loo diꞌs coꞌ ñibeꞌ ley coꞌ mxoꞌf Moisés loo mèn ngàc mèn coꞌ yanꞌ no no coꞌ gàc cheꞌnpeꞌ dib athu loo izlyoꞌ xal mcàbgòn Diox, leꞌ sya, anxleꞌ ngalaꞌs mèn loo Diox por cón cheꞌn Jesucrist. No lomisqueꞌ, yende cón ntac diꞌs coꞌ mcàbgòn Diox li Diox loo Abraham no loo bin Abraham.
\v 15 Mèn nación Israel coꞌ indyubdiꞌste loo ley coꞌ mxoꞌf Moisés loo mèna, naquin tetìi Diox mèna. Per loo mèn coꞌ inacte mèn nación Israel coꞌ neꞌnque node ley coꞌ nac ley coꞌ mxoꞌf Moisés loo mèn nación Israel, neꞌnquexùꞌde ley mèna. Neꞌ neꞌ ngàp mèna dol loo Diox por cón cheꞌn leya tac yende leya loo mèna.
\p
\v 16 Por cona, ngue niin conꞌ ndxèꞌ loo guꞌ: Diox mcàbgòn conꞌa loo Abraham no loo bin Abraham por ngolaꞌsqueꞌ mèna leꞌ Diox liqueꞌ conꞌ mcàbgòn Diox li Diox loo mèna. Tataa mbli Diox loo Abraham no loo bin Abraham par ngòc conꞌ mcàbgòn Diox thìb conꞌ anxleꞌ loo Abraham no loo bin Abraham no par ngòc nèe conꞌ mcàbgòn Dioxa loo mèna. Conꞌa nee diꞌs, neꞌncàbgònte Diox conꞌa ante loo mèn coꞌ mdubdiꞌs loo ley coꞌ mxoꞌf Moisés loo mèn. Ndxeꞌlequeꞌ, mcàbgòn Diox conꞌa loo mèn coꞌ ante ngolaꞌs leꞌ Diox li conꞌ coꞌ mcàbgòn Diox li Diox loo mèn xal ngolaꞌs Abraham leꞌ Diox li conꞌ coꞌ mcàbgòn Diox li Diox loo Abraham. Por cona, Diox mblo cuent nac Abraham xudgool ryete naꞌ coꞌ ndxelaꞌs loo Diox por cón cheꞌn Jesucrist xalqueꞌ ngolaꞌs Abraham loo Diox.
\v 17 Ngòca loo Abraham xalqueꞌ ndub diꞌs loo libr coꞌ nac xtiꞌs Diox coꞌ ndxab Diox coꞌ mbez taandxèꞌ:
\pi1 Daa mbli leꞌ lùu gàc ner xudgool cheꞌn huax mèn.
\m Loo yub Diox coꞌ ngolaꞌs Abraham, yub Diox nac xaꞌ coꞌ ndaꞌ yalnaban loo mèn nguth. No li Diox cue chol conꞌ coꞌ tarte cuec Diox.
\p
\v 18 Abraham nonqueꞌ no nanee Abraham leꞌ Diox ndxác li coꞌ nee lezoꞌ Diox li Diox loo Abraham. Por cona, ngolaꞌsqueꞌ Abraham que no Abraham xinꞌ Abraham mastaleꞌ ngoxleꞌ Abraham. Axta syareꞌ, ngòc Abraham xudgool huax mèn xalqueꞌ ndxab Diox loo Abraham gàca loo Abraham xal mbez diꞌs coꞌ ndub:
\pi1 Gàc mèn coꞌ gàc bin lùua mènléyꞌ loo izlyoꞌ, Abraham.
\m
\v 19 Coꞌseꞌ yamerleꞌ taa Abraham thìb ayo línꞌ, beꞌ ndxelaꞌs Abraham coꞌ gunii Diox loo Abraham li Diox loo Abraham. Làth xtauꞌa, nonqueꞌ Abraham leꞌ Abraham ryop Sar tyan xinꞌ mastaleꞌ ngoxleꞌ Abraham ryop Sar, coꞌ nee diꞌs, mbriꞌthleꞌ tiemp que no ryop saꞌl xaꞌ xinꞌ xaꞌ.
\v 20 Neꞌngàcte chop loo chop laꞌs Abraham. Neꞌ neꞌ ndoo xàꞌ lezoꞌ Abraham loo diꞌs coꞌ mcàbgòn Diox li Diox loo Abraham. Ndxeꞌlequeꞌ, sate más ngolaꞌs Abraham no ngòp Abraham yalxlaꞌs cón cheꞌn diꞌs coꞌ mcàbgòn Diox li Diox loo Abraham. Toloqueꞌ ndxab Abraham diꞌs ndac no diꞌs natúꞌ cón cheꞌn Diox loo mèn leꞌ Diox nac Diox roo no Diox xèn.
\v 21 Thidtenequeꞌ mbli nèe Abraham lezoꞌ Abraham no ngobeꞌqueꞌ Abraham lezoꞌ Abraham leꞌ Diox ndxàp conꞌ laꞌs nii Diox no laꞌs yaꞌ Diox par liqueꞌ Diox ryete conꞌ mcàbgòn Diox li Diox loo Abraham.
\v 22 Por cona, Diox mblo cuent nac Abraham mbiꞌ nalì no mbiꞌ nambìi loo Diox tac ngolaꞌs Abraham leꞌ Diox li conꞌ mcàbgòn Diox li Diox loo Abraham. No mdyal Diox ngòo Abraham loo cón cheꞌn Diox.
\p
\v 23 No por cón cheꞌn Abraham coꞌ mblo Diox cuent nac Abraham mèn nalì no mèn nambìi, no mdyal Diox ngòo Abraham loo cón cheꞌn Diox tac ngolaꞌs Abraham loo Diox, inacte ante cón cheꞌn Abraham ndub diꞌsa loo xtiꞌs Diox.
\v 24 Ndxeꞌlequeꞌ, ndub diꞌsa loo libr coꞌ nac xtiꞌs Diox por cón cheꞌn naꞌ, ne. Diox mdyal ngòo naꞌ loo cón cheꞌn Diox no mbloleꞌ Diox cuent no naꞌ nac mèn nalì no mèn nambìi, naꞌ coꞌ ndxelaꞌs loo Diox coꞌ nac yub Diox coꞌ mblo xban Tad Jesucrist naꞌ làth mèn nguth.
\v 25 Nguth Tad Jesús loo cruz por cón cheꞌn xquin naꞌ no xtol naꞌ. Mblo xban Diox Tad Jesús par tataa mod, por cón cheꞌn Tad Jesús, ndyal Diox ndxòo mèn loo cón cheꞌn Diox. No por cón cheꞌn Tad Jesús ndxàc mèn mèn nalì no mèn nambìi loo Diox.
\c 5
\s Trèꞌ ndluꞌ cón cheꞌn conꞌ ndac coꞌ ndxàc loo mèn coꞌ indxàpte xtol loo Diox.
\p
\v 1 Por cona, ngue niin loo guꞌ: Yub Diox mbloleꞌ cuent nac naꞌ mèn nalì no mèn nambìi loo Diox por ngolaꞌs naꞌ loo Tad Jesucrist. No mtuꞌ mtàlleꞌ Diox lezoꞌ Diox ñèe Diox naꞌ por cón cheꞌn Tad Jesucrist naꞌ.
\v 2 Por cón cheꞌn Tad Jesucrist, mxyalꞌ ned mxyalꞌ yóꞌ loo naꞌ par ngòo naꞌ loo cón cheꞌn Diox par, lìcqueꞌ, li Diox anggàc conꞌ ndac loo naꞌ tac ngolaꞌs naꞌ loo Diox por cón cheꞌn Jesucrist. Mbli nèe naꞌ naꞌ loo conꞌ ndac coꞌ ndli Diox angndxàc loo naꞌ. No ndyac lezoꞌ naꞌ loo conꞌ nzi quee lezoꞌ naꞌ coꞌ gàc cheꞌnpeꞌ naꞌ coꞌseꞌ yòo naꞌ coꞌteꞌ gàc conꞌ roo conꞌ xèn loo naꞌ xal ndxàc conꞌ roo conꞌ xèn loo Diox.
\v 3 No iante ndyac lezoꞌ naꞌ loo coꞌ nzi quee lezoꞌ naꞌa. Ndxeꞌlequeꞌ, ndyac lezoꞌ naꞌ coꞌseꞌ ndxàc chol yaltìi loo naꞌ no coꞌseꞌ ndxàc chol yalquìi loo naꞌ tac nanee naꞌ no non naꞌ leꞌ coꞌseꞌ ndxàc chol yaltìi o yalquìi loo naꞌ, conꞌa ndli tolo chaꞌlaꞌs naꞌ loo chol conꞌ coꞌ ndxàc loo naꞌ.
\v 4 No coꞌseꞌ nxec naꞌ no nchaꞌlaꞌs naꞌ ndxàc yaltìi no yalquìi loo naꞌ, ndxàca loo naꞌ par tolo ndli nèe naꞌ naꞌ loo cón cheꞌn Crist. No coꞌseꞌ nxec naꞌ ndxàc conꞌa loo naꞌ, ndluꞌ naꞌ loo mèn leꞌ naꞌ, lìcqueꞌ, ndxelaꞌsqueꞌ loo Crist. Leꞌ sya, tataa mod huen huen nzi quee lezoꞌ naꞌ loo conꞌ ndac coꞌ gàc loo naꞌ coꞌ li Diox loo naꞌ yiloa.
\v 5 Coꞌseꞌ, lìcqueꞌ, nzi quee lezoꞌ naꞌ loo conꞌ ndac coꞌ gàc loo naꞌ yiloa, indxàcte chop loo chop laꞌs naꞌ loo cón cheꞌn Diox par tyoo xàꞌ lezoꞌ naꞌ loo Diox. Tac Diox mblàa Xpii Natúꞌ cheꞌn Diox loo naꞌ coꞌ ndli ndenꞌ naꞌ leꞌ Diox axta arid nqueꞌ lezoꞌ ñèe Diox naꞌ. No tataa mod más nqueꞌ lezoꞌ naꞌ Diox.
\p
\v 6 Per coꞌseꞌ beꞌ ngòc naꞌ mèn coꞌ neꞌngácte ngli par nteláꞌ naꞌ naꞌ loo conꞌ ryes nec thìb mod no nec tedib mod, leꞌxqueꞌ sya, ngòc tiemp par gath Crist. No ale, yiꞌf yèe Crist nguth Crist por cón cheꞌn mèn yeꞌrsinꞌ.
\v 7 Imbiizte thìb mbiꞌ par anggath mbiꞌ por cón cheꞌn tedib mèn. Neꞌ neꞌ gath mbiꞌa por cón cheꞌn thìb mèn coꞌ nac mbiꞌ ndac. Mastaleꞌ más mèn ndac nac thìb mbiꞌ, neꞌgathte thìb mbiꞌ por cón cheꞌn mèn.
\v 8 Per Diox mbluꞌ loo naꞌ xá mod anzeꞌf nqueꞌ lezoꞌ Diox ñèe Diox naꞌ por yiꞌf yèe Crist nguth Crist por cón cheꞌn naꞌ mastaleꞌ beꞌ nac naꞌ mèn coꞌ ncuaꞌn xquin naꞌ no beꞌ nac naꞌ mèn coꞌ ncuaꞌn xtol naꞌ tiempa.
\v 9 Per nalleꞌ Diox mdyalleꞌ ngòo naꞌ loo cón cheꞌn Diox par gàc naꞌ mèn nalì no mèn nambìi loo Diox por cón cheꞌn ren Crist coꞌ mxyo. Por cona, ndlii más ndxàp naꞌ yalxlaꞌs leꞌ Diox teláꞌ naꞌ loo yaltìi no yalquìi huiz coꞌseꞌ gàc lult huiz coꞌseꞌ gàc yalquìi no yaltìi loo mèn. Tataa li Diox loo naꞌ por cón cheꞌn Crist.
\v 10 Tac coꞌseꞌ beꞌ ngòc naꞌ mèn coꞌ ngòc ngolo ngolaꞌs loo Diox thìb cuaꞌa, Diox mbli leꞌ naꞌ mbyuꞌ mbyàl lezoꞌ loo Diox por cón cheꞌn yalguth coꞌ mquée loo xganꞌ Diox. No por cona, más ndxàp naꞌ yalxlaꞌs nalleꞌ par gàca loo naꞌ lyáꞌ naꞌ loo conꞌ ryes por yalnaban coꞌ ndxàp Tad Jesús tac mbyuꞌ mbyàlleꞌ lezoꞌ naꞌ loo Diox nalleꞌ.
\v 11 Iante mbli Diox par mbyuꞌ mbyàlleꞌ lezoꞌ naꞌ no ndyac lezoꞌ naꞌ loo Diox. Ndxeꞌlequeꞌ, ndenꞌ naꞌ leꞌn lezoꞌ naꞌ Diox roo Diox xèn nac Diox por cón cheꞌn Tad Jesucrist naꞌ tac por cón cheꞌn Tad Jesucrist ngòc naꞌ mèn coꞌ mbyuꞌ mbyàlleꞌ lezoꞌ loo Diox.
\s Trèꞌ ndluꞌ cón cheꞌn Adán no cón cheꞌn Crist.
\p
\v 12 Cona, ngue niin loo guꞌ: Texal mcuaꞌn thidte mbiꞌ, coꞌ ngòc ner mbiꞌ loo izlyoꞌ, xquin mbiꞌ no xtol mbiꞌ, por cón cheꞌn mbiꞌa mtlo chol mèn, mcuaꞌn chol mèn xquin mèn no xtol mèn. Por cona, nquée yalguth loo mèn por xquin cheꞌn yalxtol coꞌ mcuaꞌn ner mbiꞌa. No por cona, ncàba yalguth loo ryete mèn tac ryete mèn mcuaꞌn xquin mèn no xtol mèn.
\v 13 Ndooreꞌ coꞌseꞌ xoꞌf Moisés ley coꞌ mnibeꞌ Diox loo Moisés xoꞌf Moisés loo mèn cón cheꞌn Diox, mcuaꞌnleꞌ mèn xquin mèn no xtol mèn loo izlyoꞌ. Per mastaleꞌ mcuaꞌn mèn xquin mèn no xtol mèn loo izlyoꞌ, Diox neꞌngode cuent cón cheꞌn xtol mèn no xquin mèn coꞌ mcuaꞌn mèn ndooreꞌ coꞌseꞌ tarte xoꞌf Moisés ley loo mèn.
\v 14 Cona, ngue niin loo guꞌ: Mastaleꞌ neꞌngode Diox cuent cón cheꞌn xtol mèn tiempa, mquée yalguth loo mèn anon ngòc tiemp coꞌ ngo ban Adán axta ngòc tiemp coꞌseꞌ ngo ban Moisés, mèn coꞌ mcuaꞌn xtol. Mquée yalguth loo ryete mèna, mastaleꞌ neꞌncuaꞌnte mèn xtol mèn xal mcuaꞌn Adán xtol Adán coꞌseꞌ neꞌndubdiꞌste Adán loo conꞌ coꞌ mnibeꞌ Diox loo Adán li Adán. Adán mbluꞌ ndxep conꞌ loo naꞌ coꞌ nac xal xin no xnaa cón cheꞌn thìb mbiꞌ coꞌ nac diꞌs yiꞌth yiloa, coꞌ nee diꞌs, nac Crist.
\p
\v 15 Mastaleꞌ naroo ngòc xquin no xtol Adán coꞌ ngòp Adán, per pà taꞌ xquin no xtol Adán coꞌ ngòp Adán con conꞌ ndac coꞌ nac conꞌ roo conꞌ xèn coꞌ mbli Diox angndxàc loo naꞌ. Tac por xquin no xtol coꞌ ngòp thidte mbiꞌ coꞌ ngòc Adán, mcàba loo mèn mquée yalguth loo huax mèn. Per coꞌseꞌ mbli Diox par mblyáꞌ mèn loo conꞌ ryes, anxleꞌ mbli Diox conꞌ ndaca loo mèn por cón cheꞌn thidte mbiꞌ coꞌ nac Jesucrist. Conꞌ ndac coꞌ mbli Diox angndxàc loo mèna, más conꞌ roo conꞌ xèn nac conꞌ ndaca leque xquin Adán. No ndxeꞌlequeꞌ, ncàba más conꞌ ndac loo huax mèn por cón cheꞌn Jesucrist.
\v 16 Mastaleꞌ xquin no xtol coꞌ mcuaꞌn thidte mbiꞌ coꞌ ngòc Adán ngòc conꞌ xin no conꞌ cap loo Diox, per pà taꞌ xquin no xtol coꞌ mcuaꞌn Adán con conꞌ ndac coꞌ nac conꞌ roo conꞌ xèn coꞌ mbli Diox par ndlyáꞌ mèn loo conꞌ ryes. Tac por cón cheꞌn xquin no xtol coꞌ mcuaꞌn thidte mbiꞌ coꞌ ngòc Adán, conꞌa ndli mquexùꞌ Diox ryete mèn. Per cón cheꞌn conꞌ ndac coꞌ mbli Diox par ndlyáꞌ mèn loo conꞌ ryes por cón cheꞌn Jesucrist coꞌseꞌ ngolo mque tee cuaꞌn mèn xquin mèn no xtol mèn, ale leꞌleꞌ mcàba loo mèn yub Diox mdyal ngòo mèn loo cón cheꞌn Diox par gàc mèn mèn nalì no mèn nambìi loo Diox, mèn coꞌ ngolaꞌs loo Jesucrist.
\v 17 Por xquin no xtol cheꞌn thidte mbiꞌ coꞌ mcuaꞌn xquin no coꞌ ngòp xtol mtlo mquée yalguth loo mèn. Conꞌa ndli sate más gàc conꞌ ndac loo mèn, mèn coꞌ Diox mdyal ngòo mèna loo cón cheꞌn Diox par gàc mèna mèn nalì no mèn nambìi loo Diox. Ban no mèna Diox thidtene par ñibeꞌ no mèna Diox coꞌseꞌ gàc huiz coꞌ ñibeꞌ Diox loo izlyoꞌ. Li Diox tataa gàca loo mèna por cón cheꞌn thidte mbiꞌ coꞌ nac Jesucrist.
\p
\v 18 Cona, ngue niin loo guꞌ: Por cón cheꞌn xquin no xtol coꞌ mcuaꞌn thidte mbiꞌ coꞌ ngòc Adán, mquexùꞌ Diox ryete mèn. Tataaguèꞌ ne, por cón cheꞌn thidte mbiꞌ coꞌ nac Jesucrist, Diox mdyal ngòo mèn loo cón cheꞌn Diox par ngòc mèn mèn nalì no mèn nambìi, mèn coꞌ ndxelaꞌspeꞌ loo Jesucrist no loo cón cheꞌn Jesucrist.
\v 19 Conꞌ ndxèꞌ nee diꞌs: Por cón cheꞌn de neꞌndubdiꞌste thìb mbiꞌ loo conꞌ mnibeꞌ Diox loo mbiꞌ li mbiꞌ, conꞌa mcàb huax mèn mcuaꞌn xquin mèn no mcuaꞌn mèn xtol mèn. Lomisqueꞌ mod ne, por cón cheꞌn de mdubdiꞌsqueꞌ thìb mbiꞌ coꞌ nac Jesucrist loo Diox, mdyal Diox anzeꞌf huax mèn gàc mèn nalì no mèn nambìi loo Diox.
\p
\v 20 Coꞌseꞌ mxoꞌf Moisés ley loo mèn nación Israel xalqueꞌ mnibeꞌ Diox loo Moisés, diꞌs coꞌ ndub loo leya mbluꞌ loo mèn leꞌ mèn anzeꞌf ncuaꞌn xtol mèn no anzeꞌf ncuaꞌn mèn xquin mèn loo Diox. Per ndxeꞌlequeꞌ, láth más ncuaꞌn mèn xquin mèn no xtol mèn, sate más conꞌ roo conꞌ xèn ngòc conꞌ ndac coꞌ angmbli Diox loo mèn.
\v 21 Ngòc conꞌa loo mèn par de que texal mcuaꞌn mèn xquin mèn no xtol mèn par tataaguèꞌ mquée yalguth loo mèn, tataaqueꞌ mod, ne, conꞌ ndac coꞌ angmbli Diox loo mèn sate más mbli par mcàba loo mèn leꞌ yub Diox mdyal ngòo mèn loo cón cheꞌn Diox par tataa mod gàc mèna mèn nalì no mèn nambìi loo Diox no par tataa mod li Diox ban no mèna Diox thidtene por cón cheꞌn Tad Jesucrist naꞌ.
\c 6
\s Ndxáca loo mèn coꞌ nzo loo cón cheꞌn Crist xal thìb mèn nguth coꞌ yende conꞌ ndenꞌ.
\p
\v 1 ¿Xá nee guꞌ, ey? ¿Chéꞌ tolo cuaꞌn naꞌ xquin naꞌ no xtol naꞌ par de que tataa mod sate más li Diox gàc conꞌ ndac cheꞌn Diox loo naꞌ, càꞌ?
\v 2 Nec thìb mod no nec tedib mod neꞌlide naꞌ tataa, ¿léꞌ? Tac naꞌ coꞌ nac xal mèn nguth loo xquin naꞌ no loo xtol naꞌ, coꞌ nee diꞌs, incuaꞌnte naꞌ xquin naꞌ, ¿xá mod ale ndlyaꞌs guꞌ bere naꞌ, que tee cuaꞌn naꞌ xquin naꞌ no xtol naꞌ tedib vez, sya?
\v 3 ¿Chéꞌ iñeede guꞌ coꞌseꞌ ngòc bautizar ryete naꞌ loo ngolaꞌs naꞌ no ngòo naꞌ loo cón cheꞌn Crist Jesús, thidte ngòc no naꞌ Crist Jesús par de que texal mquée yalguth loo Crist Jesús par guneei loo Crist Jesús loo cón cheꞌn yalnaban cheꞌn izlyoꞌ ndxèꞌ, tataaguèꞌ naꞌ, ne, ya incuaꞌnte naꞌ xquin naꞌ no xtol naꞌ más. Tataaqueꞌ ngòca loo naꞌ, ¿léꞌ?
\v 4 Cona, ngue niin loo guꞌ: Por cón cheꞌn ngulàa yéc naꞌ no ngulàa lezoꞌ naꞌ, ngòc bautizar naꞌ loo ngolaꞌs naꞌ no ngòo naꞌ loo cón cheꞌn Diox, coꞌ nee diꞌs, thidte mbuaꞌs naꞌ con Crist coꞌseꞌ ngòc naꞌ xal mèn nguth loo cón cheꞌn xquin naꞌ no xtol naꞌ par nque tee ban ndac naꞌ loo Diox. No más ndoo lezoꞌ naꞌ li naꞌ conꞌ ndac loo Diox coꞌ nac thìb yalnaban cub. Cona nee diꞌs, nguth no naꞌ Crist no ngro xban no naꞌ Crist por cón cheꞌn conꞌ roo conꞌ xèn coꞌ nzo laꞌs nii xud naꞌ Diox no coꞌ nzo laꞌs yaꞌ xud naꞌ Diox coꞌ mbli xud naꞌ Diox loo Crist.
\p
\v 5 Tac cheleꞌ Diox ngo cuent thidte ngòc no naꞌ Crist coꞌseꞌ nguth Crist por ngòo naꞌ loo cón cheꞌn Crist, tataaguèꞌ gàca loo naꞌ ryo xban naꞌ xalqueꞌ ngro xban Crist làth mèn nguth coꞌseꞌ gàcpeꞌ huiza.
\v 6 Non naꞌ no nanee naꞌ no ndaꞌ naꞌ cuent leꞌ ryete mod yeꞌrsinꞌ coꞌ mque tee li naꞌ coꞌ mque no naꞌ ndooreꞌ yilaꞌs naꞌ loo Crist mblyuxleꞌ loo naꞌ tac Diox ngo cuent mblyuxa loo naꞌ por mquée Crist loo cruz por cón cheꞌn naꞌ. Tataa ngòca loo naꞌ par nguled mbli naꞌ ryethe conꞌ yeꞌrsinꞌ coꞌ mque tee li naꞌ xal nduhua nee lezoꞌ naꞌ li naꞌi. Leꞌi mblyuxleꞌ loo naꞌ par ya neꞌtolode gàc naꞌ xal thìb moz par li naꞌ rye conꞌ yeꞌrsinꞌ coꞌ ndlyaꞌs naꞌ li naꞌ coꞌ nac xtol naꞌ no xquin naꞌ xal coꞌseꞌ ndli thìb moz sirv loo thìb patrón moz par li yèe moz coꞌ ndlyaꞌs patrón li moz.
\v 7 Huiꞌ guꞌ nexa. Thìb mèn coꞌ nguth ya indenꞌte chol conꞌ xal mdenꞌ mèn ndooreꞌ gath mèn. Tataaguèꞌ ndxàca, ne, leꞌ chol mèn coꞌ nac xal thìb thebol loo cón cheꞌn xquin mèn no loo cón cheꞌn xtol mèn coꞌ ncuaꞌn mèn, mèna ya inquinte tolo cuaꞌn xquin mèna no xtol mèna par tolo li mèna conꞌ yeꞌrsinꞌ.
\v 8 Cheleꞌ naꞌ, lìcqueꞌ, ngo cuent nguth noleꞌ naꞌ Crist, thidtenequeꞌ ndxàp naꞌ yalxlaꞌs nalleꞌ yo ban no naꞌ Crist thidtene yiloa.
\v 9 Naneequeꞌ naꞌ no nonqueꞌ naꞌ coꞌseꞌ ngro xban Crist làth mèn nguth, ya neꞌberede Crist gath Crist tedib vez. Ya yende chó cón cheꞌn yalguth par quée yalguth loo Crist tedib vez.
\v 10 Coꞌseꞌ nguth Crist loo cruz, thidte vez nguth Crist por cón cheꞌn xquin mèn no xtol mèn. Coꞌseꞌ ngro xban Crist, ngro xban Crist par thidte yòo ban no Crist Diox.
\v 11 Cona, ngue niin loo guꞌ: Bli guꞌ xtùuz no bli guꞌ cuent, lìcqueꞌ, nac guꞌ xal mèn coꞌ nguth loo cón cheꞌn xquin guꞌ no loo cón cheꞌn xtol guꞌ. Lomisqueꞌ ne, bli guꞌ cuent ante naban guꞌ par thidte ban no guꞌ Tad Crist Jesús naꞌ loo Diox tac guꞌ nac cheꞌnpeꞌ Crist.
\p
\v 12 Ngue niin loo guꞌ, ne: Por nac guꞌ cheꞌn Crist, ¿léꞌ?, ya neꞌtaꞌde guꞌ lugar ñibeꞌ xtùuz guꞌ no lezoꞌ guꞌ loo guꞌ par ndryoꞌ ndlyenꞌ lezoꞌ guꞌ li guꞌ coꞌ tyub yoꞌf lezoꞌ guꞌ par cuaꞌn guꞌ xquin guꞌ par tenꞌ guꞌ nquin li yèe guꞌ conꞌ coꞌ ndyub yoꞌf lezoꞌ guꞌ par li guꞌi.
\v 13 Neꞌtaꞌde guꞌ lugar ñibeꞌ xtùuz guꞌ no lezoꞌ guꞌ loo guꞌ par tyub yoꞌf lezoꞌ guꞌ cuaꞌn guꞌ xquin guꞌ no xtol guꞌ par li guꞌ conꞌ yeꞌrsinꞌ. Ndxeꞌlequeꞌ, thìb lìte ftaꞌ guꞌ lugar ñibeꞌpeꞌ Diox loo guꞌ par thidtenequeꞌ li guꞌ sirv ante loo Diox xal mèn coꞌ nguthleꞌ, no mbere mèn ngro xban mèn, coꞌ nee diꞌs, neꞌtolode li guꞌ conꞌ yeꞌrsinꞌ par cuaꞌn guꞌ xquin guꞌ no xtol guꞌ. Ndxeꞌlequeꞌ, ante ban guꞌ loo cón cheꞌn Diox thìb yalnaban cub, coꞌ nee diꞌs, li guꞌ conꞌ huen xalqueꞌ nee lezoꞌ Diox par li guꞌ conꞌ ndac loo Diox xalqueꞌ nee lezoꞌ Diox.
\v 14 Tac nalleꞌ ya inquinte tolo taꞌ guꞌ lugar ñibeꞌ xtùuz yeꞌrsinꞌ coꞌ ndli guꞌ loo guꞌ par cuaꞌn guꞌ xquin guꞌ no xtol guꞌ. Tac nase ya iñibeꞌde ley coꞌ mxoꞌf Moisés loo naꞌ más. Ndxeꞌlequeꞌ, nque tee ban naꞌ loo conꞌ ndac coꞌ ndli Diox angndxàc loo naꞌ.
\s Pab ngue tetac diꞌs loo mèn cón cheꞌn xtol mèn leꞌ mèn nac xal thìb moz loo xtol mèn no loo xquin mèn.
\p
\v 15 Nde niin tedib conꞌ loo guꞌ, ne: ¿Chéꞌ tbere naꞌ, tolo cuaꞌn naꞌ xquin naꞌ no xtol naꞌ por ya indlide naꞌ xal ñibeꞌ ley coꞌ mxoꞌf Moisés loo naꞌ, o chéꞌ tolo cuaꞌn naꞌ xquin naꞌ tac nque tee ban naꞌ loo conꞌ ndac coꞌ angmbli Diox loo naꞌ, càꞌ? Nec thìb mod no nec tedib mod neꞌcuaꞌnte naꞌ xquin naꞌ no xtol naꞌ, ¿léꞌ?
\v 16 Huiꞌ guꞌ nexa. Guꞌ huen huen nanee no ndaꞌ guꞌ cuent xal coꞌseꞌ ndlyaꞌs thìb mbiꞌ nqueꞌ mbiꞌ zinꞌ con thìb patrón. No tyubdiꞌs yèe mbiꞌ loo patrón. Sya, nac mbiꞌa móz yèe loo patrona. Látha, que nzo neꞌñee lezoꞌ mbiꞌ, tyubdiꞌs yèe mbiꞌ loo patrón. Tataaguèꞌ ndxàca loo guꞌ coꞌseꞌ ndaꞌ guꞌ lugar ndli guꞌ coꞌ ndryoꞌ ndlyenꞌ lezoꞌ guꞌ no ndli guꞌ conꞌ yeꞌrsinꞌ coꞌ nac xtol guꞌ no xquin guꞌ. Per cón cheꞌn xquin guꞌ no xtol guꞌ coꞌ ncuaꞌn guꞌa, conꞌa ncàb nquin coꞌ xàꞌ Diox guꞌ loo Diox thidtene yiloa. Nacqueleꞌ guꞌ tyubdiꞌs loo Diox na, Diox li leꞌ guꞌ que tee ban lì loo Diox no que tee ban ndac guꞌ loo Diox.
\v 17 Per Diox quix Diox por cón cheꞌn guꞌ leꞌ guꞌ ya inacte xal thìb moz loo xquin guꞌ no loo xtol guꞌ par li guꞌ conꞌ coꞌ ndryoꞌ ndlyenꞌ lezoꞌ guꞌ xal ngòc guꞌ thìb cuaꞌa. Per nase, dib nzo yéc guꞌ no dib nzo lezoꞌ guꞌ nzi téꞌth guꞌ xal nac loo coꞌ nzo guꞌ coꞌ nac cón cheꞌn Jesucrist coꞌ mtéꞌth guꞌ coꞌseꞌ ngolaꞌs guꞌ.
\v 18 Per nalleꞌ, guꞌ mblyáꞌleꞌ no ya yende cón mbee ncaꞌ guꞌ loo coꞌ nac xtol guꞌ no xquin guꞌ. Guꞌ nzi xoꞌf zinꞌ loo Diox por mbli Diox nzi tee ban lì guꞌ no nzi tee ban ndac guꞌ loo Diox.
\v 19 Conꞌ ndxèꞌ ngue niin loo guꞌ xal ndyoodiꞌs chol mèn coꞌ alithe ndyoodiꞌs par taꞌ guꞌ cuent no par non guꞌ no nanee guꞌ coꞌ ngue niin loo guꞌ tac guꞌ indxònte diꞌs no neꞌ neꞌ indxàaꞌd guꞌ diꞌs coꞌ ngue niin loo guꞌ coꞌ huenlequeꞌ: Texal ngòca loo guꞌ coꞌseꞌ mque tee ban guꞌ par mdaꞌ guꞌ lugar mnibeꞌ conꞌ yeꞌrsinꞌ no vis loo guꞌ par xoꞌf zinꞌ guꞌ conꞌ zab no chol conꞌ yeꞌrsinꞌ na, tataaguèꞌ mod gòc guꞌ mèn coꞌ tyoo lezoꞌ ante taꞌ guꞌ lugar ñibeꞌ Diox loo guꞌ par xoꞌf zinꞌ guꞌ thìb zinꞌ ndac loo Diox par tataa mod thidte vez ryo xàꞌ guꞌ loo cón cheꞌn xab izlyoꞌ par que tee ban lì guꞌ loo Diox nalleꞌ.
\p
\v 20 Coꞌseꞌ beꞌ ngòc guꞌ xal thìb moz loo rye conꞌ coꞌ nac conꞌ yeꞌrsinꞌ coꞌ ngòc xquin guꞌ no xtol guꞌ, neꞌnque tee ban lìde guꞌ no neꞌnque tee ban ndacte guꞌ loo Diox.
\v 21 Per nalleꞌ ndlyazen ñee guꞌ loon: ¿Chó conꞌ ndac mbli guꞌ gan coꞌseꞌ mque tee li guꞌ conꞌ coꞌ ndli nthyon guꞌ nalleꞌ, àꞌ? Yende chó conꞌ ndac mcàb conꞌa loo guꞌ, ¿léꞌ? Tac conꞌ coꞌ mbli guꞌa, ale leꞌleꞌ mcàba leꞌ Diox coꞌ xàꞌ guꞌ loo Diox thidtene yiloa, ¿léꞌ?
\v 22 Per nase ya yende chó conꞌ cuee càꞌ guꞌ par tolo gàc guꞌ xal moz loo conꞌ yeꞌrsinꞌ coꞌ ndyub yoꞌf lezoꞌ guꞌ par tolo cuaꞌn guꞌ xquin guꞌ no xtol guꞌ. Nalleꞌ guꞌ ndoo lìte nzi xoꞌf zinꞌ thìb zinꞌ coꞌ nac cón cheꞌn Diox loo Diox. Conꞌa ndli ncàb conꞌ ndac loo guꞌ tac nzi ro xàꞌ guꞌ loo cón cheꞌn xab izlyoꞌ por ngòc guꞌ cheꞌnpeꞌ Diox. Más de cona, li Diox leꞌ guꞌ ban no Diox thidtene yiloa, ne.
\v 23 Tac rye mèn coꞌ thidtene mdoo lezoꞌ tolo cuaꞌn mèn xquin mèn no xtol mèn, loo mèna ncàb thìb conꞌ: ryo xàꞌ mèna loo Diox thidtene coꞌseꞌ yilo gath bélꞌyòo lad mèna. Per cón cheꞌn conꞌ ndac coꞌ angli Diox loo mèn coꞌ ndxelaꞌs loo Tad Jesucrist naꞌ nac yòo ban no mèn Diox thidtene tac thidte nac mèna con Tad Crist Jesús naꞌ.
\c 7
\s Pab ngue tetac diꞌs xal nac cón cheꞌn thìb ned mèn coꞌ nselyaꞌ.
\p
\v 1 Guꞌ coꞌ nac mèn huesen por cón cheꞌn Jesucrist, guꞌ ndaꞌleꞌ cuent coꞌ huenlequeꞌ cón cheꞌn ley coꞌ mxoꞌf Moisés loo mèn. Leya ante ñibeꞌ loo mèn láth beꞌ naban mèn, ¿léꞌ?
\v 2 Angab naꞌi, thìb xaꞌgot coꞌ mselyaꞌ con thìb xaꞌbiꞌ, xaꞌgota thidtenequeꞌ natedóꞌ con saꞌl xaꞌgota láth naban xaꞌbiꞌ coꞌ nac saꞌl xaꞌgota, coꞌ nee diꞌs, thidtenequeꞌ naban no xaꞌgota saꞌlbiꞌ xaꞌgota leꞌn huiz coꞌ naban saꞌlbiꞌpeꞌ xaꞌgota. Per cheleꞌ xaꞌbiꞌ coꞌ nac saꞌlbiꞌpeꞌ xaꞌgota nguth, xaꞌgota mbyanꞌ thìb. Ya yende chó cuee no caꞌ xaꞌgota xal ñibeꞌ ley loo ryop saꞌl xaꞌ láth naban saꞌlbiꞌ xaꞌgota.
\v 3 Per cheleꞌ xaꞌgota queltàa con tedib xaꞌbiꞌ láth naban saꞌlbiꞌpeꞌ xaꞌgota, xaꞌgota mbix yéc no ngue li xaꞌgota yalburrid loo saꞌlbiꞌpeꞌ xaꞌ. Per cheleꞌ saꞌlbiꞌ xaꞌgota nguth, xaꞌgota mbyanꞌ thìb no yende chó cuee no càꞌ xaꞌgota xal mnibeꞌ ley coꞌ mxoꞌf Moisés loo mèn. Sya, nzoqueꞌ mod selyaꞌ xaꞌgota con tedib mbiꞌ. Sya, tataa mod neꞌlide xaꞌgota yalburrid loo ner xaꞌbiꞌ coꞌ ngòc saꞌlbiꞌ xaꞌgot, mbiꞌ coꞌ nguth.
\p
\v 4 Por cona, ngue niin loo guꞌ, mèn huesen: Guꞌ coꞌ ya ngòoleꞌ loo cón cheꞌn Crist, nac guꞌ xal thìb cuen yaꞌ Crist no xal thìb cuen nii Crist. Guꞌ ngroꞌ loo cón cheꞌn ley coꞌ mxoꞌf Moisés loo guꞌ xal thìb xaꞌ coꞌ nguthleꞌ par tataa mod ngòc guꞌ cheꞌnpeꞌ Crist xal ndxàca loo thìb xaꞌgot coꞌseꞌ mselyaꞌ thìb xaꞌgot con saꞌl xaꞌ. Nalleꞌ nac guꞌ mèn coꞌ nac cheꞌnpeꞌ Crist, Crist coꞌ mbli Diox ngro xban làth mèn nguth, par tataa mod li guꞌ conꞌ ndac coꞌ ndxòo lezoꞌ Diox.
\v 5 Tac láth beꞌ mque tee ban naꞌ loo cón cheꞌn coꞌ nac xab izlyoꞌ, ndooreꞌ yilaꞌs naꞌ loo Crist, mbli naꞌ xal nduhua nee lezoꞌ naꞌ loo cón cheꞌn coꞌ nac xab izlyoꞌ. Látha, ley coꞌ mxoꞌf Moisés loo naꞌa mbli par mdyub xnìi yéc naꞌ no mdyub xnìi lezoꞌ naꞌ par mdub yoꞌf lezoꞌ naꞌ mbli naꞌ conꞌ yeꞌrsinꞌ. Conꞌ yeꞌrsinꞌ coꞌ mbli naꞌa, conꞌ yeꞌrsinꞌa mcàb loo naꞌ coꞌ xàꞌ Diox naꞌ loo Diox thidtene yiloa.
\v 6 Per nalleꞌ, ngroꞌleꞌ naꞌ loo cón cheꞌn coꞌ ñibeꞌ ley coꞌ mxoꞌf Moisés loo naꞌ par inquinte tolo li yèe naꞌ xal mnibeꞌ ley coꞌ mxoꞌf Moisés loo naꞌ. Tac loo cón cheꞌn ley coꞌ mxoꞌf Moisés loo mèn, nac naꞌ xal mèn coꞌ nguthleꞌ par xoꞌf zinꞌ naꞌ thìb zinꞌ coꞌ nac cón cheꞌn Diox xal ñibeꞌpeꞌ Xpii Natúꞌ loo naꞌ coꞌ nac thìb mod cub. Inacte mod cub coꞌ ndxàp naꞌa nalleꞌ xal nac diꞌsgool coꞌ ndub loo ley coꞌ mxoꞌf Moisés loo mèn.
\s Pab ngue taꞌ cuent cón cheꞌn xquin Pab no xtol Pab coꞌ ngòp Pab.
\p
\v 7 Per nalleꞌ ndlyazen ñee guꞌ loon: ¿Xá mod gab naꞌ? ¿Chéꞌ tab naꞌ leꞌ ley coꞌ mxoꞌf Moisés loo mèn nac thìb conꞌ coꞌ ncàb ncuaꞌn mèn xtol mèn no xquin mèn, càꞌ? Yende xàa. Nec thìb mod no nec tedib mod neꞌgabte naꞌ tataa, ¿léꞌ? Per, lìca, daa inonte leꞌ daa ndxàp xquin daa no xtol daa cheleꞌ ley coꞌ mxoꞌf Moisés loo naꞌ neꞌngluꞌde leꞌ daa nac mèn coꞌ ndxàp xtol. Angab naꞌi, cheleꞌ diꞌs coꞌ ndub loo ley coꞌ mxoꞌf Moisés loo mèn neꞌtaade ngluꞌ loon, daa neꞌndade cuent cón nac nqueliꞌth mèn cón cheꞌn xtàa mèn.
\v 8 Per mastaleꞌ mbluꞌ ley loon indxàalte queliꞌthen cón cheꞌn xtàan, ale ndxeꞌlequeꞌ, más mcuanen xquinen no xtolen. Tataa mblin mastaleꞌ más mdyub xnìi yéquen no mdyub xnìi lezon cón cheꞌn xquin daa no xtol daa. Ale leꞌleꞌ mdyub yoꞌf lezon sate más tolo lin ryethe conꞌ yeꞌrsinꞌ. Tac coꞌteꞌ yende ley coꞌ mxoꞌf Moisés loo naꞌ, neꞌ neꞌ taꞌ mèn cuent cón nac xquin mèn no xtol mèn. Alithe nzi cuaꞌn mèn xquin mèn no xtol mèn.
\v 9 Ngo thìb tiemp coꞌseꞌ tarte tan cuent no tarte tenꞌen cón nac coꞌ ñibeꞌ ley coꞌ mxoꞌf Moisés loo mèn. Làth xtauꞌa, mdenꞌen axta arid mbiꞌ ndac ngòc daa no huen ngo lezon loo Diox, mdyaquen. Per coꞌseꞌ mtlon mdan cuent no mdenꞌen xá mod, lìcqueꞌ, nquin tyubdiꞌs mèn loo coꞌ ñibeꞌ ley coꞌ mxoꞌf Moisés loo mèn, axta syareꞌ mdan cuent ngòpen xquinen no ngòpen xtolen. Syareꞌ, mdenꞌen ngòc daa thìb mèn coꞌ mquexùꞌ Diox par coꞌ xàꞌ Diox daa loo Diox thidtene yiloa.
\v 10 Syareꞌ, mdan cuent leꞌ ley coꞌ mxoꞌf Moisés loo mèn ngue luꞌ xá mod gàp mèn, coꞌ nee diꞌs, càb loo naꞌ yòo ban no naꞌ Diox yiloa. Per ndxeꞌlequeꞌ, leꞌleꞌ mbli leya par mquexùꞌ Diox daa, coꞌ nee diꞌs, coꞌ xàꞌ Diox daa loo Diox yiloa.
\v 11 Tac axta coꞌseꞌ mdapeꞌen cuent cón cheꞌn conꞌ coꞌ mnibeꞌ ley coꞌ mxoꞌf Moisés loo mèn no mblyazen ndyubdizen loo leya, per ale sate más mdub xnìi yéquen no mdub xnìi lezon loo cón cheꞌn Diox por cón cheꞌn leya, per ndxeꞌlequeꞌ, conꞌ yeꞌrsinꞌ no vis coꞌ nde teeleꞌ mblin mcàb loon par tolo tyub yoꞌf lezon par lin conꞌ yeꞌrsinꞌ. No por cona, mzyalqueꞌ daai tac por mod coꞌ mque tee ban daa loo conꞌ yeꞌrsinꞌ leque ley mbli mcàb loon mquexùꞌ Diox daa par coꞌ xàꞌ Diox daa loo Diox thidtene yiloa.
\p
\v 12 Cona, ngue niin loo guꞌ: Thìb mod no tedib mod, natúꞌ nac diꞌs coꞌ ndub loo ley coꞌ mxoꞌf Moisés loo mèn. Nalì nac diꞌsa no ndac nac diꞌsa. Tac diꞌsa nac diꞌs coꞌ ñibeꞌ Diox loo mèn par li mèn.
\v 13 ¿Xá nee guꞌ? ¿Chéꞌ tác li coꞌ mbez naꞌ nac conꞌ ndac par càba ryo xàꞌen loo Diox thidtene yiloa, càꞌ? Yende xàa. Nec thìb mod no nec tedib mod neꞌgàcta tataa, ¿léꞌ? Ndxeꞌlequeꞌ, xquin daa no xtol daa coꞌ mque tee cuanen mbli leꞌ daa ngro xàꞌ loo Diox thìb cuaꞌa. Por cón cheꞌn ley coꞌ mxoꞌf Moisés loo naꞌ, ndan cuent leꞌ mod coꞌ mque tee banen ngòc mod yeꞌrsinꞌtúb coꞌ nac xtol daa. Por cona, por cón cheꞌn leya nonen no naneen mcuanen xquin daa no xtol daa loo Diox coꞌseꞌ mblin conꞌ yeꞌrsinꞌ.
\p
\v 14 Naꞌ nanee no non naꞌ leꞌ ley coꞌ mxoꞌf Moisés loo naꞌ nac thìb mod ndac coꞌ ndlyaꞌspeꞌ Diox li naꞌ. Per ndxeꞌlequeꞌ, part cón cheꞌnpeꞌ daa, daa nac thìb mbiꞌ coꞌ ndli yèe conꞌ yeꞌrsinꞌ coꞌ nac xquin daa no xtol daa xal ndyub yoꞌf lezon lin conꞌ yeꞌrsinꞌ.
\v 15 Tac ndxep vez axta neꞌ neꞌ indan cuent xal nac coꞌ ngue lin no coꞌ ndlyàa yéquen coꞌseꞌ ndlin conꞌ yeꞌrsinꞌ. Axta neꞌ neꞌ ñeen cón mdub yéquen cón mdub lezon mblin conꞌ yeꞌrsinꞌ. Ndyaquen, ale indliden conꞌ ndlyazen lin. Ndxeꞌlequeꞌ, conꞌ coꞌ indlyasten lin, conꞌa nac coꞌ ndli yèen.
\v 16 Per cheleꞌ daa más ndli conꞌ yeꞌrsinꞌ coꞌ indlyasten lin, syase, más ndan cuent leꞌ diꞌs coꞌ ndub loo ley coꞌ mxoꞌf Moisés loo mèn ndluꞌ conꞌ ndac loo mèn.
\v 17 Por cona, inacta daa coꞌ ngue li conꞌa. Ndxeꞌlequeꞌ, ryete conꞌ coꞌ nzo leꞌn lezon nac coꞌ ndli ndyub yoꞌf lezon par ndli yèen conꞌ yeꞌrsinꞌ. No ale que nzo neꞌñee lezon, tataa ndli yèen par ndlin conꞌ yeꞌrsinꞌ.
\v 18 Tac daa nanee, part cón cheꞌnpeꞌen, yende chó conꞌ ndac ndlin. Anzeꞌf ndlyazen lin conꞌ ndac. Per indaden lugar par lin conꞌ ndac.
\v 19 Indliden conꞌ ndac xal ndlyazen. Ndxeꞌlequeꞌ, ale más ndlin conꞌ yeꞌrsinꞌ coꞌ ndyub yoꞌf lezon ndlin mastaleꞌ indlyasten lina.
\v 20 Leꞌ sya, cheleꞌ daa ndli conꞌ coꞌ indlyasten lin, inacta ante daa coꞌ ngue lii. Ndxeꞌlequeꞌ, ryethe conꞌ coꞌ ndyub yoꞌf lezon coꞌ nac xquin daa no xtol daa, conꞌa ñibeꞌ yèe loon par ndli yèen conꞌ yeꞌrsinꞌ coꞌ indlyasten lin.
\p
\v 21 Cona, ngue niin loo guꞌ: Ndxàc conꞌ ndxèꞌ loon: Coꞌseꞌ ndlyazen lin thìb loote conꞌ ndac, ale leꞌleꞌ más ndlin conꞌ yeꞌrsin.
\v 22 Per nalleꞌ ndxàplen thìb mod cub par más ndlin xal ñibeꞌ Diox loon por cón cheꞌn Tad Jesucrist.
\v 23 Per naneen no nonen leꞌ leꞌn lezon no leꞌn xtùuzen nzo thìb conꞌ coꞌ ntauꞌ no coꞌ ncaꞌ no coꞌ ncà loon par neꞌliden coꞌ nac coꞌ nee lezon. Conꞌa nac mod coꞌ mbli mdyub yoꞌf lezon lin conꞌ yeꞌrsinꞌ ndooreꞌ yilazen loo Tad Jesucrist. Conꞌa ndlyaꞌs ñibeꞌpeꞌ loon par tolo lin conꞌ yeꞌrsinꞌ nalleꞌ, ne.
\p
\v 24 ¡Ay! Prob daa izlyoꞌ. Nalyat ñaa daa. ¿Chó mèn nac mèn coꞌ lyat lezoꞌ ñèe daa nalleꞌ par teláꞌ mèna daa loo mod yeꞌrsinꞌ coꞌ ndxàpen coꞌ ñibeꞌ yèe leꞌn lezon no coꞌ ndli par ryo xàꞌen loo Diox, àꞌ?
\v 25 Diox quix Diox mbezen loo Diox tac nonen no naneen ante Diox teláꞌ daa loo conꞌa por cón cheꞌn Tad Jesucrist naꞌ. Por cona, dib nzo yéquen no dib nzo lezon ndyubdizen loo conꞌ coꞌ ñibeꞌ Diox loon par lin. Per làth xtauꞌa, beꞌ ndyub yoꞌf lezon par li yèen conꞌ coꞌ nac conꞌ yeꞌrsinꞌ coꞌ nac xquin daa no xtol daa.
\c 8
\s Pab ndluꞌ xá mod yòo ban no mèn Diox thidtene yiloa por cón cheꞌn Xpii Natúꞌ cheꞌn Diox.
\p
\v 1 Nalleꞌ nde niin tedib conꞌ loo guꞌ: Nase ya yende chó conꞌ nquexùꞌ mèn loo Diox, mèn coꞌ thidte mqueltàa loo cón cheꞌn Crist Jesús. Mèna nac mèn coꞌ ya inzi tee bante xal ngòc mod coꞌ ngroꞌ mblyenꞌ leꞌn lezoꞌ mèn coꞌ nac cón cheꞌn xab izlyoꞌ. Ndxeꞌlequeꞌ, mèna nzi tee ban nalleꞌ xal nac coꞌ ñibeꞌ Xpii Natúꞌ cheꞌn Diox loo mèna.
\v 2 Xpii Natúꞌ ndli leꞌ mèn ndxàp yalnaban thidtene, mèn coꞌ ngòo loo cón cheꞌn Crist Jesús. Por cón cheꞌn conꞌ coꞌ ñibeꞌ Xpii Natúꞌ loo mèn, conꞌa ndli ngue tee ban ndac mèn loo Diox, ne. Más de cona, mbli Xpii Natúꞌ ngroꞌen loo ryethe conꞌ yeꞌrsinꞌ coꞌ ndyub yoꞌf lezon par mcuanen xtol daa coꞌ ndli par ryo xàꞌen loo Diox thidtene yiloa.
\v 3 Yende mod gác li mèn conꞌ coꞌ mnibeꞌ ley coꞌ mxoꞌf Moisés loo mèn, mèn coꞌ mblyaꞌs li preb par ndubdiꞌs mèn xal ñibeꞌ ley. Mastaleꞌ mnibeꞌ ley loo mèn par li mèn conꞌ par que no mèn yalnaban cub, per neꞌngácte mèn no neꞌngàpte lezoꞌ mèn ndubdiꞌs mèn xal mnibeꞌ ley loo mèn por cón cheꞌn xtùuz yeꞌrsinꞌ coꞌ ndli mèn par mdyub yoꞌf lezoꞌ mèn li mèn conꞌ yeꞌrsinꞌ. Làth xtauꞌa, mbli Diox thìb conꞌ. Mtelꞌ Diox xganꞌ Diox coꞌ nac thidte xganꞌpeꞌ Diox loo izlyoꞌ. Ngòc xganꞌ Diox xal thìb mbiꞌ coꞌ ngóol loo izlyoꞌ xal ndxáal chol mèn loo izlyoꞌ, mèn coꞌ ncuaꞌn xquin. Mbiꞌth xganꞌ Diox loo izlyoꞌ ndxèꞌ par mbli Diox nguth xganꞌ Diox par tyactìi xganꞌ Diox por cón cheꞌn xquin mèn no par tonꞌ xganꞌ Diox xtol mèn loo mèn. Coꞌseꞌ tataa ngòca loo xganꞌ Diox loo cruz, ngòca loo mèn coꞌ ndxelaꞌs loo xganꞌ Diox inquinte tolo li mèna chol conꞌ yeꞌrsinꞌ coꞌ ndyub yoꞌf lezoꞌ mèn par li mèn conꞌ yeꞌrsinꞌ coꞌ nac cón cheꞌn xab izlyoꞌ ndxèꞌ.
\v 4 Tataa mbli Diox ngòc conꞌa loo xganꞌ Diox par gác mèn no gàp lezoꞌ mèn coꞌ ndxelaꞌs loo xganꞌ Diox li mèn conꞌ xal ñibeꞌ ley coꞌ mxoꞌf Moisés loo mèn. Tac nalleꞌ inzi tee bante naꞌ xal nac ryethe conꞌ coꞌ mbli mdyub yoꞌf lezoꞌ naꞌ ndooreꞌ yilaꞌs naꞌ loo Crist. Ndxeꞌlequeꞌ, nzi tee ban li naꞌ xal ñibeꞌpeꞌ Xpii Natúꞌ loo naꞌ.
\p
\v 5 Naꞌ nanee no nonleꞌ naꞌ leꞌ mèn coꞌ ante nzi tee ban li xalqueꞌ nac conꞌ yeꞌrsinꞌ coꞌ ndli ndyub yoꞌf lezoꞌ mèn ndli mèn, conꞌa nacpeꞌ coꞌ ndli mèn xal ndryoꞌ ndlyenꞌ lezoꞌ mèn. Per mèn coꞌ ndoo lezoꞌ nzi tee ban xal ñibeꞌ Xpii Natúꞌ loo mèn, mèna ndlipeꞌ ante conꞌ coꞌ ñibeꞌ Xpii Natúꞌ loo mèn li mèn.
\v 6 Tac cheleꞌ mèn más yeꞌth lezoꞌ li mèn conꞌ ndyub yoꞌf lezoꞌ mèn coꞌ nac cón cheꞌn xab izlyoꞌ, conꞌa càb loo mèn par tith coꞌ xàꞌ Diox mèn loo Diox coꞌseꞌ yilo gath mèn. Per cheleꞌ mèn más yeꞌth lezoꞌ li mèn xal ñibeꞌ Xpii Natúꞌ loo mèn par li mèn, leꞌ sya, conꞌa li càb loo mèn leꞌ mèn yòo ban no Diox thidtene coꞌse gath mèn no càba loo mèn, ne, cue ban mèn rye nda mèn no rye ndyeꞌth mèn làth xtàa mèn no càba loo mèn yuꞌ yàl lezoꞌ mèn loo Diox.
\v 7 Mèn coꞌ ante ndoo lezoꞌ li mèn conꞌ coꞌ ndyub yoꞌf lezoꞌ mèn li mèn coꞌ nac cón cheꞌn xab izlyoꞌ, mèna nac ngolo ngolaꞌs cheꞌn Diox. No ndxòo xyàn lezoꞌ mèna ñèe mèna cón cheꞌn Diox coꞌseꞌ ndxòn mèna cón cheꞌn Diox. Tac neꞌ neꞌ indlyaꞌs mèna tyal mèna tyubdiꞌs mèna loo Diox. No neꞌ neꞌ gác mèna taꞌ mèna lugar ñibeꞌ Diox loo mèna.
\v 8 Cona, ngue niin loo guꞌ: Mèn coꞌ más ndaꞌ gust lezoꞌ coꞌseꞌ ndli mèn conꞌ coꞌ ndyub yoꞌf lezoꞌ mèn coꞌ nac cón cheꞌn xab izlyoꞌ, mèna neꞌgácte li conꞌ ndac coꞌ li par yòo lezoꞌ Diox ñèe Diox mèn.
\p
\v 9 Per nalleꞌ, guꞌ ya inzi tee ban lide xal nac conꞌ coꞌ nac cón cheꞌn xab izlyoꞌ coꞌ ndli par ndyub yoꞌf lezoꞌ guꞌ par li guꞌ chol conꞌ yeꞌrsinꞌ. Ndxeꞌlequeꞌ, nzi tee ban guꞌ xalqueꞌ nac coꞌ ñibeꞌ Xpii Natúꞌ loo guꞌ por mdaꞌ guꞌ lugar no mdyal guꞌ nzo Xpii Natúꞌ cheꞌn Diox loo guꞌ nalleꞌ. Na nii loo guꞌ: Loo mèn coꞌ inzode Xpii Natúꞌ cheꞌn Crist, mèna inacte cheꞌnpeꞌ Crist.
\v 10 Cheleꞌ Crist nzoqueꞌ loo guꞌ por cón cheꞌn Xpii Natúꞌ, lìcpeꞌ baꞌi, mastaleꞌ nquin gath bélꞌyòo ladpeꞌ guꞌ por cón cheꞌn xquin no xtol coꞌ ngòo loo ryete mèn, thidtenequeꞌ yòo ban xpii guꞌ no alm guꞌ loo Diox tac Diox mdyal no mdaꞌ Diox lugar ngòo guꞌ loo cón cheꞌn Diox. No nac guꞌ mèn nalì no mèn nambìi loo Diox.
\v 11 Cheleꞌ Xpii Natúꞌ cheꞌn Diox coꞌ mblo xban Jesús làth mèn nguth nzo loo guꞌ par ñibeꞌ Xpii Natúꞌ loo guꞌ, leꞌ sya, yub Diox coꞌ mblo xban Crist Jesús làth mèn nguth, Diox li par ryo xban bélꞌyòo ladpeꞌ guꞌ coꞌ non guꞌ gathqueꞌ. Li Diox gàc conꞌa loo guꞌ por cón cheꞌn Xpii Natúꞌ cheꞌn Diox coꞌ naban leꞌn lezoꞌ guꞌ.
\p
\v 12 Per nalleꞌ, ngue niin loo guꞌ, mèn huesen por cón cheꞌn Jesucrist: Nzo thìb conꞌ coꞌ anzeꞌf nquin li naꞌ. Conꞌa nee diꞌs: Neꞌtolode que tee ban naꞌ par tyub yoꞌf lezoꞌ naꞌ loo cón cheꞌn coꞌ nac xab izlyoꞌ.
\v 13 Tac cheleꞌ guꞌ beꞌ nzi tee ban li xalqueꞌ nac cón cheꞌn coꞌ nac xab izlyoꞌ coꞌ ndyub yoꞌf lezoꞌ guꞌ, sya, tith coꞌ xàꞌ Diox guꞌ loo Diox coꞌseꞌ gath guꞌ. Per ndxeꞌlequeꞌ, cheleꞌ guꞌ li ante coꞌ ñibeꞌ Xpii Natúꞌ loo guꞌ par neꞌtyubte yoꞌf lezoꞌ guꞌ loo cón cheꞌn coꞌ nac xab izlyoꞌ, sya, yòo ban noqueꞌ guꞌ Diox thidtene.
\p
\v 14 Ryete mèn coꞌ nzi tee ban liqueꞌ xal ñibeꞌpeꞌ Xpii Natúꞌ cheꞌn Diox loo mèn par li mèn, mèna nac xinꞌpeꞌ Diox.
\v 15 Xpii Natúꞌ coꞌ ngulàaleꞌ loo guꞌa, neꞌnglide Xpii Natúꞌ par tolo zyeb guꞌ leꞌ Diox tetìi guꞌ yiloa xal mbli chol xpii yeꞌrsinꞌ loo guꞌ par mzyeb guꞌ ndooreꞌ yilaꞌs guꞌ loo cón cheꞌn Diox. Ndxeꞌlequeꞌ, Xpii Natúꞌ coꞌ ngulàaleꞌ loo guꞌa mbli leꞌ guꞌ nac xinꞌpeꞌ Diox. No por cón cheꞌn Xpii Natúꞌa, mbez naꞌ loo Diox: Pay, coꞌseꞌ mbez naꞌ Diox.
\v 16 Leque yub Xpii Natúꞌ ndluꞌ loo naꞌ no ndaꞌ Xpii Natúꞌ cuent loo naꞌ cón cheꞌn leque conꞌ coꞌ ndenꞌ naꞌ leꞌn lezoꞌ naꞌ leꞌ naꞌ nac xinꞌpeꞌ Diox.
\v 17 Por nac naꞌ xinꞌpeꞌ Diox, gàc cheꞌnpeꞌ naꞌ ryethe conꞌ coꞌ mxènꞌ Diox no ryethe conꞌ coꞌ nac cheꞌnpeꞌ Diox, conꞌ coꞌ mcàbgòn Diox gàc cheꞌnpeꞌ naꞌ. Thidte gàc cheꞌnpeꞌ naꞌ con yub Tad Crist ryethe conꞌ coꞌ mxènꞌ Diox no coꞌ nac cheꞌnpeꞌ Diox. Cheleꞌ loo naꞌ gàc ngòc nguàal conꞌ por cón cheꞌn Crist nalleꞌ xal mbli mèn ngòc nguàal conꞌ loo Crist, loo naꞌ, ne, gàc conꞌ roo conꞌ xèn yiloa xal ndxàc conꞌ roo conꞌ xèn loo Crist nalleꞌ.
\p
\v 18 Per nalleꞌ, ndyaquen leꞌ cón cheꞌn conꞌ coꞌ ndyactìi naꞌ leꞌn tiemp ndxèꞌ neꞌ por chuꞌth neꞌtaꞌde coꞌ ndyactìi naꞌ por conꞌ roo conꞌ xèn coꞌ yúꞌ loo naꞌ yiloa no coꞌ gàc loo naꞌ yiloa.
\v 19 Ryete conꞌ coꞌ mxènꞌ Diox loo izlyoꞌ nzi bed no nzi quee lezoꞌ axta coꞌseꞌ zin huiz no zin ze luꞌ Diox mèn coꞌ nac xinꞌ Diox loo taamas mèn, lìcqueꞌ, nac mèna xinꞌpeꞌ Diox.
\v 20 Tac ryete conꞌ coꞌ mxènꞌ Diox mquedèe Diox no ngozaꞌ conꞌ mblec Diox no ngòc conꞌ coꞌ mblec Diox thìb conꞌ coꞌ yende cón ntac. Per neꞌngàcte conꞌa loo conꞌ coꞌ mxènꞌ Diox xal conꞌ coꞌ angngòc. Ndxeꞌlequeꞌ, ngòc conꞌa loo conꞌ coꞌ mxènꞌ Diox xal mnibeꞌpeꞌ lezoꞌ Diox. Per mastaleꞌ tataa mbli Diox ngòc conꞌa loo conꞌ mblec Diox, Diox mbli leꞌ mèn ngure quee lezoꞌ bere gàc conꞌ ndac loo ryethe conꞌ coꞌ mxènꞌ Diox yiloa.
\v 21 Diox mxènꞌ ryethe conꞌ no mblec Diox ryethe conꞌ. Per zin thìb huiz no zin thìb ze li Diox par lyáꞌ ryethe conꞌ mblec Diox loo conꞌ coꞌ nac conꞌ xin no conꞌ coꞌ nac conꞌ cap no conꞌ coꞌ nac conꞌ yeꞌrsinꞌ coꞌ ndli xol no coꞌ ntezaꞌ loo conꞌ coꞌ mxènꞌ Diox no coꞌ mblec Diox loo izlyoꞌ. Syareꞌ, gàc conꞌ roo no conꞌ xèn loo conꞌ mxènꞌ Diox tac tiempa ya neꞌtolode gàc más conꞌ yeꞌrsinꞌ no ya neꞌtolode tyactìi conꞌ coꞌ mxènꞌ Diox. Gàc conꞌa loo conꞌ mxènꞌ Diox no loo conꞌ mblec Diox xalqueꞌ gàc conꞌ roo no conꞌ xèn loo mèn coꞌseꞌ yende chó conꞌ yeꞌrsinꞌ nzo coꞌ li par cuaꞌn mèn xquin mèn no xtol mèn, mèn coꞌ nac xinꞌpeꞌ Diox, coꞌseꞌ gàc huiza no tiempa.
\v 22 Naꞌ nanee no non naꞌ axta nalleꞌ beꞌ ndyactìi rye loothe conꞌ coꞌ mblec Diox no coꞌ mxènꞌ Diox xal ndxàca loo thìb xaꞌgot coꞌ ndenꞌ yalnè coꞌseꞌ ndub tan xinꞌ xaꞌgot.
\v 23 Iante ndxàca ndyactìi rye loothe conꞌ coꞌ mxènꞌ Diox xal ndxàc loo thìb xaꞌgot coꞌ ndub tan xinꞌ. Ndxeꞌlequeꞌ, ndenꞌ naꞌ ndxàca tataa loo naꞌ, ne, ¿léꞌ?, mastaleꞌ nzo Xpii Natúꞌ loo naꞌ. Mastaleꞌ nac Xpii Natúꞌ nerlequeꞌ thìb conꞌ coꞌ làa Diox loo naꞌ, yiloa tolo taꞌ Diox más conꞌ ndac loo naꞌ por cón cheꞌn Xpii Natúꞌ. Per nalleꞌ, ndenꞌ naꞌ thìb yalnè axta leꞌn lezoꞌ naꞌ cón cheꞌn yaltìi coꞌ ndxàc loo naꞌ. Per mastaleꞌ ndxàc conꞌa loo naꞌ, nzi quee lezoꞌ naꞌ axta coꞌseꞌ gàc hor huiꞌ ñaa mèn loo naꞌ, lìcqueꞌ, nac naꞌ xinꞌpeꞌ Diox. Axta syareꞌ, gàc tiemp coꞌseꞌ zyeꞌ loo loo bélꞌyòo ladpeꞌ naꞌ par ya neꞌtolode tyactìi naꞌ no ya neꞌtolode gàc yalnè loo naꞌ no ya neꞌtolode gàc yalquìi loo naꞌ.
\v 24 Tac coꞌseꞌ ngolo ngolaꞌs naꞌ loo Crist no loo cón cheꞌn Crist, mcàba loo naꞌ ngure quee lezoꞌ naꞌ leꞌ naꞌ lyáꞌ loo rye yaltìi no yalquìi no yalnè coꞌ ndxàc loo naꞌ nalleꞌ. Per cheleꞌ mèn ngüiꞌpeꞌ loo conꞌ coꞌ nzi quee lezoꞌ mèn, leꞌ sya, ya inzi queede lezoꞌ mèn más loo conꞌ coꞌ nzi quee lezoꞌ mèn. Tac coꞌseꞌ ngüiꞌ mèn loo conꞌ coꞌ mbez mèn nzi quee lezoꞌ mèn, ya neꞌtolode cue quee lezoꞌ mèn loo conꞌa, ¿léꞌ?
\v 25 Per cheleꞌ naꞌ nzi quee lezoꞌ loo conꞌ coꞌ tarte yúꞌ loo naꞌ, nquin tolo chaꞌlaꞌs naꞌ par tolo cue quee lezoꞌ naꞌ loo conꞌ coꞌ gàc loo naꞌ yiloa.
\p
\v 26 Lomisqueꞌ mod ne, leque yub Xpii Natúꞌ ndlyath no naꞌ loo conꞌ coꞌ nzi quee lezoꞌ naꞌ par neꞌtolode gàc naꞌ xal mbíiz coꞌ mbuuꞌs lezoꞌ loo cón cheꞌn Diox. Más de conꞌa, axta neꞌ neꞌ gác naꞌ cuez naꞌ Diox xal ndxàala. Per ndxeꞌlequeꞌ, yub Xpii Natúꞌ mbez Diox cón cheꞌn naꞌ. Anzeꞌf ndenꞌ Xpii Natúꞌ cón cheꞌn mèn coꞌseꞌ mbez Xpii Natúꞌ Diox cón cheꞌn mèn. Tac huax vez yende mod gab naꞌ loo Diox conꞌ coꞌ ndenꞌ naꞌ tant ndenꞌ naꞌ conꞌ. Por cona, Xpii Natúꞌ nteriꞌth conꞌ coꞌ ndenꞌ naꞌ no conꞌ coꞌ nquin naꞌ loo Diox xalqueꞌ non Xpii Natúꞌ nquin naꞌ conꞌ. Diꞌs coꞌ nteriꞌth Xpii Natúꞌ loo Diox por cón cheꞌn mèn, yende chó mèn gác taꞌ cuenta no tyoodiꞌs mèn cón cheꞌn diꞌsa.
\v 27 Diox nteche ntexyath lezoꞌ mèn no xtùuz mèn. Diox nanee no non Diox cón cheꞌn conꞌ coꞌ ngue li Xpii Natúꞌ xtùuz coꞌseꞌ mbez Xpii Natúꞌ Diox cón cheꞌn mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox, tac Xpii Natúꞌ mbez Diox ante xal nee lezoꞌ Diox.
\s Mèn coꞌ ngòo loo cón cheꞌn Crist, mèna mbli gan ngro xàꞌ mèna loo cón cheꞌn xab izlyoꞌ.
\p
\v 28 Nanee naꞌ no non naꞌ leꞌ Diox ndli nab ryethe conꞌ par càba conꞌ ndac loo mèn coꞌ nqueꞌ lezoꞌ Diox, mèn coꞌ Diox mcui xal mblo xnee Diox mcui Diox mèn par yòo mèn loo cón cheꞌn Diox.
\v 29 Ndooreꞌ xènꞌ Diox no cuec Diox izlyoꞌ, non Diox no nanee Diox cón cheꞌn mèn coꞌ yòopeꞌ loo cón cheꞌn Diox. Mèna ngòc mèn coꞌ mcui Diox par yòo mèna loo cón cheꞌn Diox. Diox mnibeꞌ lezoꞌ Diox cui Diox mèna par gàc mèna xalqueꞌ nac Jesucrist coꞌ nac xganꞌpeꞌ Diox. Tataa mbli Diox loo mèna par leque Jesucrist gàc xal hues ndlyo mèn loo rye mèn coꞌ gàc xal huespeꞌ xganꞌ Diox.
\v 30 No loo mèn coꞌ mnibeꞌ lezoꞌ Diox mcui Diox mèna ndooreꞌ xènꞌ Diox izlyoꞌ par gàc mèna xalqueꞌ nac xganꞌpeꞌ Diox, Diox mblec mèna par nac mèna xalqueꞌ nac xganꞌpeꞌ Diox. No mèn coꞌ mblec Dioxa, mbli Diox par nac mèna mèn nalì no mèn nambìi loo Diox. No leque mèn coꞌ mbli Diox nac mèn nalì no mèn nambìi loo Dioxa, loo mèna ndli Diox ndxàc conꞌ roo no conꞌ xèn.
\p
\v 31 ¿Cón más nquin gab naꞌ cón cheꞌn conꞌ ndli Diox, sya? Cheleꞌ Diox thidtenequeꞌ indláꞌyaꞌde naꞌ, ¿chó mèn coꞌ nac ngolo ngolaꞌs cheꞌn naꞌ gác li gan par neꞌryo loode gàc conꞌ ndac loo naꞌ por nzo naꞌ loo cón cheꞌn Diox por cón cheꞌn Crist? Yende chó mèn gác li gan gàca tataa loo naꞌ, ¿léꞌ?
\v 32 Huiꞌ guꞌ nexa. Neꞌ neꞌ mcà Diox mquée yalguth loo xganꞌpeꞌ Diox por cón cheꞌn naꞌ. Ndxeꞌlequeꞌ, Diox mdaꞌ lugar mquée yalguth loo xganꞌ Diox por cón cheꞌn xquin ryete naꞌ no xtol ryete naꞌ. Cheleꞌi tataa ngòc, ¿xalte mod neꞌli Diox par que no naꞌ ryete conꞌ coꞌ naquin naꞌ nalleꞌ por cón cheꞌn Crist, àꞌ? Liqueꞌ Diox par gàca loo naꞌ, yey.
\v 33 ¿Chó mèn, lìcqueꞌ, gác tec mèn coꞌ Diox mcui loo Diox, àꞌ? Yende chó cón cheꞌn mèn li mèn conꞌa, ¿léꞌ? Ndxeꞌlequeꞌ, Diox nac xaꞌ coꞌ mdyal par ngòo mèn loo cón cheꞌn Diox par gàc mèna mèn nalì no mèn nambìi loo Diox.
\v 34 ¿Chó cón cheꞌn mèn quexùꞌ queꞌ fals mèna mèn coꞌ Diox mcuia, àꞌ? Yende chó cón cheꞌn mèna, ¿léꞌ? Tac Crist nac xaꞌ coꞌ nguth por cón cheꞌn rye mèn. Más de cona, ngro xban Crist. No ndub Crist cuat Diox nalleꞌ. Ngue bez Crist Diox no ngue naꞌb Crist loo Diox cón cheꞌn naꞌ.
\v 35 ¿Chéꞌ nzo chó mèn gác li par neꞌtolode queꞌ lezoꞌ Crist naꞌ par ryo xàꞌ naꞌ loo cón cheꞌn Crist, àꞌ? Yende chó gác lii, ¿léꞌ? Lomisqueꞌ ne, coꞌseꞌ ndxàc chol yaltìi loo naꞌ no coꞌseꞌ ndxàc ngòc nguàal conꞌ loo naꞌ par nxi lezoꞌ naꞌ no coꞌseꞌ ndub nguꞌs mèn naꞌ no coꞌseꞌ nsyon hua naꞌ no nsyon gu naꞌ coꞌseꞌ yende conꞌ hua naꞌ; no coꞌseꞌ nzi tee che naꞌ, yende xab naꞌ par goc naꞌ; no coꞌseꞌ ndxàc chol conꞌ ryes loo naꞌ; no coꞌseꞌ ndlyáꞌ ndlyáꞌ guth mèn naꞌ, ¿chéꞌ ndyac guꞌ leꞌ rye coꞌ ndxàc loo naꞌa ndluꞌ ya neꞌtolode queꞌ lezoꞌ Crist ñèe Crist naꞌ, càꞌ? Yende xàa.
\v 36 Ndxàc ryete conꞌa loo naꞌ xal ndub diꞌs loo libr coꞌ nac xtiꞌs Diox coꞌ mbez:
\pi1 Por cón cheꞌn U, Tad, ndlyáꞌ ndlyáꞌ guth mèn nuꞌ atate huiz. Ndoo lezoꞌ mèn guth mèn nuꞌ xal ndxuth mèn mbacxilꞌ.
\m
\v 37 Mastaleꞌ tataa ndxàc loo naꞌ, loo ryete conꞌ ndxèꞌ ndli naꞌ gan par neꞌryo xàꞌde naꞌ loo cón cheꞌn Crist. Tac non naꞌ no naneequeꞌ naꞌ leꞌ Crist nqueꞌqueꞌ lezoꞌ ñèe Crist naꞌ. No ndlyath no Crist naꞌ loo ryethe conꞌ coꞌ ndxàc loo naꞌ ned nque tee naꞌ.
\v 38 Cona, ngue niin loo guꞌ: nonquen no ngobeꞌen yende nec thìb conꞌ coꞌ nzo coꞌ gác li par neꞌtolode queꞌ lezoꞌ Diox ñèe Diox naꞌ par ryo xàꞌ naꞌ loo Diox yiloa. Tac thidte ngòc naꞌ con Tad Jesucrist. Que naca gath naꞌ, que naca ban naꞌ, toloqueꞌ queꞌ lezoꞌ Diox ñèe Diox naꞌ. Neꞌ angl; neꞌ mèn coꞌ ñibeꞌ loo xtàa mèn loo izlyoꞌ ndxèꞌ; neꞌ chol xpii coꞌ ndxàp conꞌ roo no conꞌ xèn, xpii coꞌ nac xpii roo no xpii xèn, gác li par neꞌtolode queꞌ lezoꞌ Diox ñèe Diox naꞌ par ryo xàꞌ naꞌ loo Diox yiloa. Neꞌ conꞌ coꞌ ndxàc loo mèn tiemppeꞌ ndxèꞌ; neꞌ conꞌ coꞌ gàc loo mèn leꞌn tiemp coꞌ yiꞌth nque; yende chó conꞌa gác li par neꞌtolode queꞌ lezoꞌ Diox ñèe Diox naꞌ par ryo xàꞌ naꞌ loo Diox thidtene yiloa.
\v 39 Neꞌ conꞌ coꞌ nzo gáp loo béꞌ; neꞌ conꞌ coꞌ nzo gaꞌs xanꞌ leꞌn izlyoꞌ; neꞌ neꞌ chol taamas conꞌ coꞌ mxènꞌ Diox no coꞌ mblec Diox loo izlyoꞌ gác li par neꞌtolode queꞌ lezoꞌ Diox ñèe Diox naꞌ xal nac mod coꞌ mbluꞌ Diox loo naꞌ nqueꞌqueꞌ lezoꞌ Diox ñèe Diox naꞌ por thidte ngòc naꞌ loo cón cheꞌn Crist Jesús coꞌ nac Tad naꞌ.
\c 9
\s Diox mcui mèn cheꞌn nación Israel par yòo mèna loo cón cheꞌn Diox, ne.
\p
\v 1 Com leꞌ daa ndxelaꞌsqueꞌ loo Crist, ¿léꞌ?, ngue tan cuent coꞌ nac lìcpeꞌ loo guꞌ. Ingue quedìiden guꞌ. Tac Xpii Natúꞌ coꞌ nzo loon no coꞌ nzo leꞌn lezon, Xpii Natúꞌ ndli par ndenꞌen leꞌn lezon lìcqueꞌ nac diꞌs coꞌ ngue toodizen loo guꞌ nalleꞌ.
\v 2 Anzeꞌf nxi lezon. No ndxetub thìb yalnè tínꞌ leꞌn lezon por cón cheꞌn mèn nación Israel.
\v 3 Por tant nqueꞌ lezon ñèen mèn coꞌ nac mèn nacionpeꞌ daa, coꞌ nac mèn nación Israel, mèn coꞌ nac mèn gulàaz daa, más quee lezon ngàc daa mèndèe loo Diox, coꞌ nee diꞌs, mèn yeꞌrsinꞌ loo Diox par ryo xàꞌen loo cón cheꞌn Crist par tetìi Diox daa thidtene par belꞌqueꞌ tataa mod lyáꞌ mèn nacionpeꞌ daa loo conꞌ ryes.
\v 4 Mèna nac bin cheꞌn thìb mbiꞌ coꞌ ngroꞌ lèe Israel coꞌ ngòc mbiꞌ coꞌ mbloj msiꞌ biz no bin coꞌ nac mèn nación Israel nalleꞌ. Mèn coꞌ ngòc bin mbiꞌa, Diox mblo cuent ngòc mèna xal xinꞌpeꞌ Diox. Ngòo Diox làth mèna. Gunèe mèna conꞌ roo no conꞌ xèn coꞌ nac Diox. Mbli Diox par mbyanꞌ no mèna thìb conveñ. Mnibeꞌ Diox loo Moisés xoꞌf Moisés thìb ley loo mèna. Mnibeꞌ Diox loo mèna xá mod li mèna sirv loo Diox leꞌn templ mèn. No mtanꞌ Diox diꞌs coꞌ mcàbgòn Diox li Diox coꞌ nac conꞌ ndac loo mèna.
\v 5 Nac mèn nación Israel nalleꞌ bin cheꞌn mbiꞌ coꞌ ngroꞌ lèe Israel coꞌ mbloj msiꞌ bin coꞌ nac xudgool naꞌ, bin coꞌ ngòc mèn nación Israel yiloa. Làth bin mèna ngóol Crist xal ndxáal chol mèn. Crista nac yubpeꞌ Diox loo ryethe conꞌ. Por cona, gab naꞌ diꞌs roo no diꞌs xèn no diꞌs natúꞌ cón cheꞌn Crist loo mèn leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node. Taandxèꞌ gàca.
\p
\v 6 Inacta leꞌ conꞌ coꞌ mcàbgòn Diox li Diox loo mbiꞌ coꞌ ngroꞌ lèe Israel neꞌgàcte. Ndxeꞌlequeꞌ, más huen gab naꞌ iryede mèn coꞌ nac bin mbiꞌ coꞌ ngroꞌ lèe Israel, lìcqueꞌ, nacpeꞌ mèn nación Israel.
\v 7 Lomisqueꞌ ne, iryede bin Abraham ngo Diox cuent nac binpeꞌ Abraham. Ndxeꞌlequeꞌ, Diox ndxab loo Abraham: Por cón cheꞌn bin Isaac daa go cuent leꞌ lùu mbli bin.
\v 8 Conꞌa nee diꞌs leꞌ mèn coꞌ nac chol bin mbiꞌ coꞌ lèe Israel ndxèꞌ, inpor conꞌade ngo Diox cuent nac mèn coꞌ nac bin cheꞌn mbiꞌ coꞌ ngroꞌ lèe Israel xinꞌ Diox. Ndxeꞌlequeꞌ, Diox ngo cuent nac mèn nación Israel xinꞌpeꞌ Diox, mèn coꞌ ngóol xalqueꞌ mcàbgòn Diox loo Abraham li Diox loo Abraham par que no Abraham bin.
\v 9 Tac diꞌs coꞌ mcàbgòn Diox loo Abraham li Diox loo Abraham taandxèꞌ mbez:
\pi1 Coꞌseꞌ gàc huiz coꞌ mnibeꞌen loo lezon, axta syareꞌ, zin huiz gal neen máa guꞌ. Huiza, lin par hueꞌ xinꞌ Sar par tyan Sar thìb xganꞌ Sar.
\p
\v 10 Iante xal ngòca loo Abraham no loo Sar ngue tan cuenta loo guꞌ. Ndxeꞌlequeꞌ, ryop xganꞌ Rebec coꞌ ngòc cuach, thidte Isaac ngòc xud myenꞌ. Ngòc Isaac xudgool naꞌ, ne.
\v 11–13 Per coꞌseꞌ neꞌ neꞌ tar gáal ryop hues myenꞌ xganꞌ Isaac, neꞌ neꞌ tar li myenꞌ conꞌ ndac no neꞌ neꞌ tar li myenꞌ conꞌ yeꞌrsinꞌ, Diox ndxab loo Rebec:
\pi1 Yéꞌ huizeꞌ, mbed ndlyo gàc moz coꞌ li sirv loo mbed coꞌ nac mbed bluz.
\m Thidte nac diꞌs coꞌ ngue niin loo guꞌ ndxèꞌ xalqueꞌ mbez diꞌs coꞌ ndub loo libr coꞌ nac xtiꞌs Diox tedib lugar coꞌteꞌ ndub diꞌs coꞌ ndxab Diox:
\pi1 Anzeꞌf nqueꞌ lezon Cob. Ngudloon no lezon Cob. Per por part cón cheꞌn Esaú, nzo xyàn lezon ñèen Esaú.
\m Por cona, non naꞌ leꞌ Diox ndxàp derech cui Diox mèn xal neete lezoꞌ Diox par yòo mèn loo cón cheꞌn Diox. Yende chó mport nzo lezoꞌ Diox conꞌ ndli mèn, aa guneei ¿chéꞌ nac mèn mèn huen o chéꞌ nac mèn mèn yeꞌrsinꞌ? coꞌseꞌ cui Diox mèn par yòo mèn loo cón cheꞌn Diox.
\p
\v 14 ¿Cón gab naꞌ cón cheꞌn conꞌ mbli Diox, sya? ¿Chéꞌ tab naꞌ no chéꞌ ndli naꞌ cuent nac Diox thìb Diox coꞌ indlide conꞌ nalì no conꞌ nambìi coꞌseꞌ mbli Diox conꞌa, càꞌ? Yende xàa. Nec thìb mod no nec tedib mod neꞌgabte naꞌ tataa, ¿léꞌ?
\v 15 Tac Diox ndxab loo Moisés tedib vez:
\pi1 Lyat lezon ñèen mèn coꞌ lyazen lyat lezon ñèen. No anzeꞌf nazínꞌ gàc mèn coꞌ lyazen gàc nazínꞌ mèna loon.
\m
\v 16 Por cona, yende mod gab mèn leꞌ Diox ndlyat lezoꞌ ñèe Diox mèn ante xal neete lezoꞌ mèn. Neꞌ neꞌ gab mèn ante ndlyat lezoꞌ Diox ñèe Diox mèn por conꞌ ndac coꞌ ndli mèn. Ndxeꞌlequeꞌ, Diox ndlyat lezoꞌ ñèe Diox mèn ante xalte ñibeꞌ lezoꞌ Diox lyat lezoꞌ Diox ñèe Diox mèn.
\v 17 Ndub diꞌs loo libr coꞌ nac xtiꞌs Diox coꞌ mbez leꞌ Diox ndxab loo Faraón coꞌ ngòc rey loo mèn nación Egipt:
\pi1 Na mbli ngòc lùu rey par luꞌen loo mèn cón cheꞌn ryethe conꞌ roo no conꞌ xèn coꞌ nzo laꞌs niin no conꞌ coꞌ nzo laꞌs yan por cón cheꞌn conꞌ coꞌ mblin lool. No mblin ngòc conꞌa lool par tataa mod mxyoꞌf lèe mxyoꞌf xtiꞌs daa loo mèn dib athu loo izlyoꞌ por cón cheꞌn conꞌ mblin lool.
\m
\v 18 Por cona, non naꞌ no nanee naꞌ leꞌ loo mèn coꞌ ndlyaꞌs Diox lyat lezoꞌ Diox ñèe Diox, loo mèna ndlyatqueꞌ lezoꞌ Diox ñèe Diox. No loo mèn coꞌ ndlyaꞌs Diox teyez Diox lezoꞌ mèn, loo mèna nteyezqueꞌ Diox lezoꞌ mèna par ndxàc mèna mèn naad no mèn nguud.
\p
\v 19 Per thìb descuid ñee guꞌ loon: Cheleꞌi tataa nac loo cón cheꞌn Diox, ¿chonon nque dol Diox mèn cón cheꞌn xtol mèn, sya? Mastaleꞌ lyaꞌs guꞌ ñèe guꞌ conꞌ loon: per ¿chó gác cà diꞌs cón cheꞌn coꞌ nee lezoꞌ Diox li Diox, àꞌ? Yende xàa, ey. Bìn guꞌ diꞌs coꞌ ngue niin loo guꞌ ndxèꞌ:
\v 20 ¡Aa mèn izlyoꞌ! ¿Máa yob yéc guꞌ, na? ¿Chó nac guꞌ par golꞌ diꞌs guꞌ con Diox, àꞌ? ¿Chéꞌ tab thìb yàat yòo loo thìb mbiꞌ coꞌ ntoxcuaꞌ yàat yòo: ¿Chonon taandxèꞌ mtoxcuaꞌ lùu daa, àꞌ? Yende xàa.
\v 21 ¿Chó ñibeꞌ loo Diox par li Diox conꞌ ndlyaꞌs mèn, àꞌ? Bli guꞌ xtùuz cón cheꞌn thìb mbiꞌ coꞌ ntoxcuaꞌ yàat con ben. ¿Chéꞌ yende mod toxcuaꞌ mbiꞌ thìb yàat coꞌ li zinꞌ mbiꞌ cusin xal nee lezoꞌ mbiꞌ? No ¿chéꞌ yende mod toxcuaꞌ mbiꞌ thìb yàat coꞌ li sirv loo mbiꞌ xal thìb vacin? Nzoqueꞌ mod toxcuaꞌ mbiꞌi xal lyaꞌs mbiꞌi, ¿léꞌ? Aleꞌqueꞌ Diox con mèn, ¿léꞌ? ¿Chó ñibeꞌ loo Diox?
\p
\v 22 ¿Chéꞌ tác naꞌ ñii yèe ñii tìi naꞌ cón cheꞌn Diox coꞌseꞌ leque yub Diox mchaꞌlaꞌs gunèe Diox mèn, mèn coꞌ ndlyaꞌs Diox tyactìi no gàc yalquìi loo mèn? Mastaleꞌ mblyaꞌs Diox ngli Diox ngàc conꞌa loo mèn par ngluꞌ Diox cón cheꞌn conꞌ roo conꞌ xèn coꞌ nzo laꞌs yaꞌ Diox no coꞌ nzo laꞌs nii Diox, per ndxeꞌlequeꞌ, lugar de ngli Diox conꞌa, leꞌleꞌ mxec yèe Diox gunèe Diox mèn. Neꞌngàcte yalquìi loo mèna par ntelux Diox mèn nalleꞌ. Thìba conꞌa.
\p Leꞌ tediba na, lìcqueꞌ, teluxqueꞌ Diox mèna yiloa. Por cona, yende mod ñii yèe ñii tìi naꞌ cón cheꞌn conꞌ ngue li Diox, ¿léꞌ?
\v 23 Mbli Diox neꞌngàcte yalquìi loo mèn. Ndxeꞌlequeꞌ, mblyat lezoꞌ Diox gunèe Diox taamas mèn, coꞌ nee diꞌs nac naꞌ, par luꞌ Diox loo naꞌ cón cheꞌn conꞌ roo conꞌ xèn coꞌ nzo laꞌs nii Diox no conꞌ coꞌ nzo laꞌs yaꞌ Diox. Más de cona, Diox mbloꞌ xàꞌ naꞌ loo cón cheꞌn xab izlyoꞌ par mbli nableꞌ Diox naꞌ par gàca loo naꞌ yòo ban no naꞌ Diox par gàc conꞌ roo conꞌ xèn loo naꞌ coꞌteꞌ nzo Diox loo béꞌ.
\v 24 Guꞌ nonqueꞌ no ndaꞌqueꞌ guꞌ cuent leꞌ Diox mcui ndxep naꞌ no mbloꞌ xàꞌ Diox ndxep naꞌ, coꞌ nee diꞌs, ndxep mèn coꞌ nac mèn nación Israel, no ndxep mèn coꞌ inacte mèn nación Israel, par ngòo naꞌ loo cón cheꞌn Diox por cón cheꞌn Crist.
\v 25 Ndxàca loo mèn nalleꞌ xal ndub diꞌs loo libr coꞌ mqueꞌ Ose yeꞌs coꞌ nac xtiꞌs Diox. Diꞌsa mbez taandxèꞌ:
\pi1 Mèn coꞌ inacte mèn nacionpeꞌ daa, mèna mcuin no mbloꞌ xàꞌen mèna par gàc mèna mèn nacionpeꞌ daa. No mèn coꞌ yende chó nqueꞌ lezoꞌ ñèe xal thìb xaꞌgot coꞌ yende chó nqueꞌ lezoꞌ ñèe, mèna nqueꞌ lezon ñèen.
\pi1
\v 26 Leque loo libr coꞌ nac libr cheꞌn Ose coꞌ mqueꞌ Ose yeꞌs, libr coꞌ nac xtiꞌs Diox, loo libra ndub diꞌs coꞌ guniiqueꞌ Diox cón cheꞌn mèn coꞌ inacte mèn nación Israel. Ndxab Diox: Guꞌ coꞌ inacte mèn nacionpeꞌ daa, per mastaleꞌ inacte guꞌ mèn nacionpeꞌ daa, yiloa gàc guꞌ xinꞌpeꞌ daa, daa coꞌ nac Diox coꞌ naban thidtene.
\m
\v 27 Per cón cheꞌn mèn nación Israel, Sayi coꞌ mdeꞌth diꞌs coꞌ ndxab Diox, Sayi mdeꞌth diꞌs cón cheꞌn mèna taandxèꞌ:
\pi1 Mastaleꞌ mèn coꞌ nac bin mbiꞌ coꞌ ngroꞌ lèe Israel yas yàl xal yux coꞌ nziriꞌ ro níttóꞌ, ante ndxep bin mbiꞌa gàc mèn coꞌ lyáꞌ loo conꞌ ryes.
\m
\v 28 Tad Diox liqueꞌ ryethe conꞌ mcàbgòn Tad Diox li Tad Diox loo mèn loo izlyoꞌ no, chàa, li Tad Diox conꞌa loo mèn.
\v 29 Ngòca loo mèn nación Israel xal mdeꞌth Sayi diꞌs coꞌ ndxab Diox ndooreꞌ. Ndxab Sayi:
\pi1 Cheleꞌ Tad coꞌ nac Tad cheꞌn angl coꞌ nzo loo béꞌ coꞌ nac solndad cheꞌn Tad neꞌndaꞌde lugar li naꞌ bin, ngàc naꞌ xal mèn ciuda Sodom no ngàc naꞌ xal mèn ciuda Gomor coꞌ mtelux Diox póla.
\s Mèn nación Israel neꞌndalte ngolaꞌs cón cheꞌn diꞌs ndac cheꞌn Diox.
\p
\v 30 Lomisqueꞌ ne, ndlyazen niin thìb conꞌ loo guꞌ: ¿Xá nee guꞌ? ¿Cón gab naꞌ cón cheꞌn conꞌ coꞌ mbli Diox loo mèn coꞌ inacte mèn nación Israel, mèn coꞌ nac mèn coꞌ neꞌñeede no mèn coꞌ neꞌgònte xá mod ndyal Diox par yòo mèn loo cón cheꞌn Diox par gàc mèn mèn nalì no mèn nambìi loo Diox? Per ndxeꞌlequeꞌ, mèna ngòc mèn nalì no mèn nambìi loo Diox ante por ngolaꞌs mèna loo Diox por cón cheꞌn Tad Jesucrist.
\v 31 Per ndxeꞌlequeꞌ, cón cheꞌn mèn nación Israel coꞌ mdoo lezoꞌ tolo li preb ndubdiꞌs xal ñibeꞌ ley coꞌ mxoꞌf Moisés loo mèn, mèna neꞌngácte ndubdiꞌs conꞌ coꞌ mnibeꞌ ley coꞌ mxoꞌf Moisés loo mèna par gàc mèna mèn nalì no mèn nambìi loo Diox.
\v 32 ¿Chonon tataa ngòca loo mèn nación Israel, àꞌ? Ngòca tataa loo mèn nación Israel tac neꞌncuaꞌnte mèna mod gàc mèna mèn nalì no mèn nambìi loo Diox por cón cheꞌn Tad Jesucrist. Ndxeꞌlequeꞌ, mblyaꞌs mèn nación Israel gàc mèna mèn nalì no mèn nambìi loo Diox ante por mbli mèna preb ndubdiꞌs mèna loo ley coꞌ mxoꞌf Moisés loo mèna. Por neꞌnglide mèn nación Israel cas loo Tad Jesucrist, por cona, ngòca loo mèn nación Israel xal mèn coꞌ ndxeziꞌf ndxegaꞌs loo thìb quèe coꞌ ncaꞌ no coꞌ ncà loo mèn ned nda mèn por ngòc mèn nación Israel mèn naxèn loo cón cheꞌn Diox.
\v 33 Peser nibdiꞌs guꞌ loon ¿Chonon tataa ngòca loo mèn nación Israel? Tataa ngòca loo mèn nación Israel xal ndub diꞌs loo libr coꞌ nac xtiꞌs Diox coꞌ mbez taandxèꞌ:
\pi1 Huiꞌ guꞌ nexa. Daa telꞌ thìb mbiꞌ loo mèn ciuda Jerusalén coꞌ gàc loo mèna xal thìb quèe coꞌ ncaꞌ ned ndyee mèn loo mèn ciuda Jerusalén. Mèn coꞌ ante yilaꞌs loo mbiꞌ coꞌ ngòc xal quèea, mèna neꞌyitacte lezoꞌ loo cón cheꞌn Diox. Neꞌ neꞌ xi lezoꞌ mèn cón cheꞌn mbiꞌa yiloa.
\c 10
\p
\v 1 Guꞌ coꞌ ndxàc mèn huesen por cón cheꞌn Jesucrist, conꞌ ndxèꞌ nac coꞌ ndryoꞌ ndlyenꞌ lezon no coꞌ nac diꞌs coꞌ mbezen Diox cón cheꞌn mèn nación Israel, ndlyazen leꞌ mèna lyáꞌ loo conꞌ ryes.
\v 2 Ndan cuent loo guꞌ cón cheꞌn conꞌ ndac coꞌ nac cón cheꞌn mèn nación Israel leꞌ mèna anzeꞌf mènleyꞌ nac loo Diox. Per ndxeꞌlequeꞌ, indxác ndacte mèna cón cheꞌn Diox xal ñibeꞌ Diox.
\v 3 ¡Prob mèn nación Israel! Indaꞌde mèna cuent xá mod ndyal Diox par yòo chol mèn loo cón cheꞌn Diox par gàc mèna mèn nalì no mèn nambìi loo Diox. Ndxeꞌlequeꞌ, más ndxòo lezoꞌ mèn nación Israel li mèna mod cheꞌn mèna par tataa mod li mèn nación Israel cuent nac mèna mèn nalì no mèn nambìi loo Diox por mod coꞌ mbli mèna cuent nzi tee ban nalì no nambìi mèna loo Diox. Ndxeꞌlequeꞌ, nac mèna mèn naad no mèn nguud loo Diox, coꞌ nee diꞌs, neꞌndalte mèna gàc mèna mèn nalì no mèn nambìi loo Diox xal nac mod coꞌ mbli Diox par mdyal Diox yòo mèn loo cón cheꞌn Diox par gàc mèna mèn nalì no mèn nambìi loo Diox.
\v 4 Tac coꞌseꞌ mbiꞌth Crist, Crist mbli ya inquinte tolo li mèn cas loo ley no tolo tyubdiꞌs mèn loo ley coꞌ mxoꞌf Moisés loo mèn nación Israel. No mbliguèꞌ Crist leꞌ mèn coꞌ ante yilaꞌs loo Crist, Diox mdyal yòo mèna loo cón cheꞌn Diox par gàc mèna mèn nalì no mèn nambìi loo Diox.
\p
\v 5 Moisés mbluꞌ loo mèn nación Israel cón cheꞌn xá mod gàc mèna mèn nalì no mèn nambìi loo Diox por cón cheꞌn ley coꞌ mxoꞌf Moisés loo mèn. Ndxab Moisés: Cheleꞌ mèn que tee ban xalqueꞌ ñibeꞌ ley loo mèn, mèna toloqueꞌ gàc mèn nalì no mèn nambìi loo Diox cheleꞌ mèna, lìcqueꞌ, tyubdiꞌsqueꞌ loo conꞌ ñibeꞌ ley loo mèna.
\v 6 Per cón cheꞌn xá mod tyal Diox gàc chol mèn mèn nalì no mèn nambìi loo Diox ante por ndxelaꞌs mèn loo Diox por cón cheꞌn Jesucrist, diꞌs coꞌ ndub loo libr coꞌ nac xtiꞌs Diox mbez taandxèꞌ:
\pi1 Neꞌgabte guꞌ loo lezoꞌ guꞌ: Chéꞌ nzo chó mbiꞌ coꞌ quée loo béꞌ, coꞌ nee diꞌs, par ya xi thìb mbiꞌ Crist loo béꞌ? Conꞌa nee diꞌs ndenꞌ mèn ya xi thìb mèn Crist loo béꞌ tac tarte yiꞌth Crist loo izlyoꞌ, ndyac mèn. Thìba conꞌa.
\m
\v 7 Leꞌ tediba na, neꞌ neꞌ gab guꞌ loo lezoꞌ guꞌ: ¿Chó mèn nzo coꞌ lyàa coꞌteꞌ nac lugar coꞌteꞌ nzo alm mèn no xpii mèn coꞌ nguth loo izlyoꞌ ndxèꞌ, coꞌ nee diꞌs, coꞌ mèna Crist làth mèn nguth tya tac ndenꞌ mèn leꞌ Crist tarte ryo xban làth mèn nguth?
\v 8 Per huiꞌ guꞌ nexa. ¿Chéꞌ indaꞌde guꞌ cuent xal mbez diꞌs coꞌ ndub loo libr coꞌ nac xtiꞌs Diox? Diꞌsa mbez: Diꞌs coꞌ nac xtiꞌs Diox mzinleꞌ xànꞌ nza guꞌ no tlate tyoodiꞌs guꞌ cón nee diꞌsa. Mtéꞌth guꞌ cón cheꞌn diꞌsa no ndxanꞌ cón cheꞌn diꞌsa leꞌn lezoꞌ guꞌ. Diꞌs ndxèꞌ nac cón cheꞌn diꞌs ndac coꞌ ndluꞌ loo mèn xá mod tyal Diox yòo mèn loo cón cheꞌn Diox por cón cheꞌn Crist. Cón cheꞌn diꞌs ndaca ngo nuꞌ yalbàn nalleꞌ.
\v 9 Tac cheleꞌ thìb thìb guꞌ taꞌ cuent no co ro guꞌ leꞌ Jesús nac Tad loo ryethe conꞌ, no cheleꞌ guꞌ yilaꞌs dib nzo yéc guꞌ no dib nzo lezoꞌ guꞌ leꞌ Diox mblo xban Tad Jesús làth mèn nguth, lyáꞌ guꞌ loo conꞌ ryes.
\v 10 Mèn coꞌ dib nzo yéc no mèn coꞌ dib nzo lezoꞌ ndxelaꞌs loo Tad Jesús, ndyal Diox yòo mèna loo cón cheꞌn Crist par gàc mèna mèn nalì no mèn nambìi loo Diox. Lomisqueꞌ ne, mèn coꞌ ndaꞌ cuent no ngo ro mèn leꞌ Jesús nac Tad loo ryethe conꞌ, mèna nac mèn coꞌ mblyáꞌleꞌ loo conꞌ ryes.
\p
\v 11 Loo libr coꞌ nac xtiꞌs Diox ndub diꞌs coꞌ mbez:
\pi1 Ryete mèn coꞌ ndxelaꞌs loo mbiꞌa, mèna neꞌtyóode yiloa par ya yeꞌth lezoꞌ mèna no par tyoo xàꞌ lezoꞌ mèna. Neꞌ neꞌ xi lezoꞌ mèna yiloa por cón cheꞌn mbiꞌa.
\m
\v 12 Cona, ngue niin loo guꞌ: Indyuꞌde mèn nación Israel más loo Diox leque taamas mèn coꞌ inacte mèn nación Israel. Leque yub Diox nac Diox coꞌ ñibeꞌ loo rye mèn. No ndaꞌ Diox rye loothe conꞌ ndac loo mèn coꞌ mbez lèe Tad Diox.
\v 13 Por cona, ryete mèn coꞌ cuez lèe Tad Jesús, mèna lyáꞌ loo conꞌ ryes.
\v 14 Huiꞌ guꞌ nexa. ¿Xá mod cuez mèn lèe Tad Jesús coꞌseꞌ tarte yilaꞌs mèn loo Tad Jesús, àꞌ? No ¿xá mod yilaꞌs mèn loo Tad Jesús coꞌseꞌ tarte gòn mèn cón cheꞌn Tad Jesús, àꞌ? No ¿xá mod gòn mèna cón cheꞌn Tad Jesús coꞌseꞌ yende chó mèn tarte co yalbàn cón cheꞌn Tad Jesús loo mèn, àꞌ? Yende moda, ¿léꞌ?
\v 15 No ¿xá mod co mèn yalbàn loo xtàa mèn coꞌseꞌ yende chó mèn nzo coꞌ telꞌ xtàa mèn par ya lo mèna yalbàn loo mèn? Yende moda, ¿léꞌ? Ndxàca loo mèn coꞌ nda lo yalbàn xal ndub diꞌs loo libr coꞌ nac xtiꞌs Diox coꞌ mbez taandxèꞌ:
\pi1 Susqueꞌ mèn ndac nac mèn loo Diox, mèn coꞌ ngo yalbàn cón cheꞌn diꞌs ndac. No anzeꞌf huen nda mèna.
\p
\v 16 Per fteꞌ lezoꞌ guꞌ iryede mèn nación Israel ndyubdiꞌs loo diꞌs ndac coꞌ ndluꞌ cón cheꞌn Crist. Ndxàca loo mèn nación Israel xal ndub diꞌs loo libr coꞌ nac xtiꞌs Diox coꞌteꞌ mqueꞌ Sayi yeꞌs. Sayi ndxab:
\pi1 Yende chó mèn ngolaꞌs diꞌs coꞌ mdeꞌth nuꞌ loo mèn, Tad.
\m
\v 17 Per nase nzoqueꞌ mod yilaꞌs mèn no gàp mèn yalxlaꞌs cón cheꞌn Crist coꞌseꞌ gòn mèn cón cheꞌn diꞌs ndac coꞌ co mèn yalbàn cón cheꞌn Crist.
\p
\v 18 Ñibdizen thìb conꞌ loo guꞌ: ¿Chéꞌ ndli guꞌ cuent tarte gòn mèn nación Israel cón cheꞌn diꞌs ndac ndxèꞌ, càꞌ? ¿Xá mod neꞌ tar gòn mèn nación Israel cón cheꞌn diꞌs ndac ndxèꞌ, àꞌ? Loo libr coꞌ nac xtiꞌs Diox ndub diꞌs coꞌ mbez:
\pi1 Dib athu loo izlyoꞌ ndxathleꞌ no ndxènleꞌ cón cheꞌn diꞌs ndac cheꞌn Diox coꞌ mdeꞌthleꞌ mèn no coꞌ mbloleꞌ mèn yalbàn. Axta dib vuelt ro izlyoꞌ mbyath mbyèn diꞌs coꞌ mdeꞌth mèna, ne.
\m Aa. Nonqueꞌ mèn nación Israel cón cheꞌn diꞌsa, ¿léꞌ?
\v 19 Beren, ñibdizen loo guꞌ tedib vez: ¿Chéꞌ ndyac guꞌ tarte taꞌ mèn nación Israel cuent cón cheꞌn diꞌs ndac ndxèꞌ, càꞌ? Yende xàa. Nonqueꞌ mèn nación Israel cón cheꞌn diꞌs ndac ndxèꞌ. Con que nerlequeꞌ cón cheꞌn diꞌs ndac ndxèꞌ nac diꞌs coꞌ mdaꞌ Moisés cuent loo mèn nación Israel coꞌseꞌ mdeꞌth Moisés diꞌs coꞌ ndxab Diox coꞌ mbez taandxèꞌ:
\pi1 Daa li gàc conꞌ ndac loo mèn cheꞌn tedib nación coꞌ inacte mèn nación Israel coꞌ ndyac guꞌ yende cón ntac loo Diox. Leꞌ guꞌ na, angnziriꞌ guꞌ, yan lezoꞌ guꞌ ñèe guꞌ mèn naciona por cón cheꞌn conꞌ ndac coꞌ lin loo mèna. No lin conꞌ ndac loo mèn thìb nación coꞌ ndyac guꞌ nac mèn nguud no mèn naad. Conꞌ ndac coꞌ lin loo mèn naciona, leꞌi càb leꞌ guꞌ yecloo tínꞌ ñèe guꞌ mèn naciona.
\m
\v 20 Nde nxonꞌ, mbli Sayi ryes. Ndxab Sayi cón cheꞌn diꞌs coꞌ ndxab Diox loo mèn nación Israel. Ndxab Sayi:
\pi1 Mèn coꞌ alithe mque tee ban no neꞌncuaꞌnte mèna daa tac mèna tarte ñee no tarte gòn mèna leꞌ conꞌ coꞌ nac cón chenen ngro xoꞌf loo mèna. Mblin par ngòca loo mèna, ne, xal mèn coꞌ mbluꞌ loo loo mèna, loo mèn coꞌ iñibdiꞌste cón chenen.
\m
\v 21 Lomisqueꞌ ndxab Sayi cón cheꞌn mèn nación Israel xal ndxab Diox:
\pi1 Ryete huiz msilen yan no nalyat mbezen loo mèn coꞌ nac mèn nacionpeꞌ daa, mèn coꞌ ngòc mèn coꞌ indyubdiꞌste no mèn coꞌ ngòc mèn naad no mèn nguud par ngòo mèna loo cón chenen tedib vez. Per neꞌnglide mèna cas conꞌ ndxaben. Thìba conꞌ ndxèꞌ.
\c 11
\s Trèꞌ ndluꞌ cón cheꞌn mèn nación Israel coꞌ mblyáꞌ loo conꞌ ryes.
\p
\v 1 Leꞌ tediba na, beren, nibdizen loo guꞌ tedib vez: ¿Chéꞌ ngue li guꞌ cuent leꞌ Diox mtèꞌb no mbloꞌ too Diox mèn nación Israel thìb lad thidtene, càꞌ? Yende xàa. Nec thìb mod no nec tedib mod neꞌnglide Diox tataa tac leque daa ngue taꞌ cuent nac daa thìb mbiꞌ nación Israel, ne. Nac daa bin cheꞌn thìb mbiꞌ coꞌ ngroꞌ lèe Abraham coꞌ mbloj msiꞌ bin coꞌ ngòc mèn nación Israel yiloa. No nacguèꞌ daa mbiꞌ cheꞌn tedib ned mèn coꞌ mblec thìb mbiꞌ coꞌ ngroꞌ lèe Ming.
\v 2 Axta pólleꞌa Diox mbli cuent leꞌ mèn nación Israel ngòc cheꞌnpeꞌ Diox. No desde huiza no axta huiz nalze tarte choblaꞌ Diox no coꞌ too Diox mèna no tarte tèꞌb Diox mèna thìb lad loo Diox. ¿Chéꞌ tarte taꞌ guꞌ cuent xal ndub diꞌs loo libr coꞌ nac xtiꞌs Diox coꞌ mqueꞌ Lii, coꞌ mdeꞌth diꞌs coꞌ ndxab Diox, yeꞌs cón cheꞌn mèn nación Israel xal ngòca coꞌseꞌ mziꞌf quìi Lii mèn nación Israel loo Diox láth ngue bez Lii Diox, càꞌ? Ndxab Lii loo Diox:
\pi1
\v 3 Tad, mbeth mèna mèn coꞌ mdeꞌth diꞌs cón cheꞌn Uꞌ. No mtelux mèna còoꞌ Uꞌ. Angoluxte daa mbyanꞌ. No nzi quilꞌ mèna xtàa mèn par guth mèna daa, ndyaquen.
\m
\v 4 Per huiꞌ guꞌ nexa. Diox mcàb loo Lii. Ndxab Diox loo Lii:
\pi1 Daa mbloꞌ xàꞌleꞌ gaz mil mèn antub mènbiꞌ làth mèn nación Israel coꞌ tarte tyub xib no coꞌ tarte còoꞌ yéc loo tatool coꞌ nac diox mèna, tatool coꞌ lèe Baal.
\m
\v 5 Tataaguèꞌ mod ne, beꞌ mbyanꞌ ndxep mèn nación Israel nalleꞌ coꞌ beꞌ ndli cas loo Diox, mèn coꞌ mcui Diox xal nac mod coꞌ mbli Diox angndxàc conꞌ ndac loo mèn par lyáꞌ mèn loo conꞌ ryes.
\v 6 Per cheleꞌ Diox angndli ndxàc conꞌ ndac loo mèn par lyáꞌ mèn loo conꞌ ryes, leꞌ sya, ya inacte conꞌ coꞌ ndlipeꞌ mèn coꞌ li par lyáꞌ mèn loo conꞌ ryes. Tac cheleꞌ conꞌ coꞌ ndli mèn ngli par ngláꞌ mèn loo conꞌ ryes, leꞌ sya, anxleꞌ ngòc conꞌ ndac coꞌ mbli Diox angndxàc loo mèn par lyáꞌ mèn loo conꞌ ryes, sya, xàa.
\p
\v 7 ¿Xá nee guꞌ cón cheꞌn conꞌ coꞌ ngòc loo mèn nación Israel, àꞌ? Pues loo thìb ned mèn nación Israel coꞌ Diox mcuia, Diox mbli ngòc mèna mèn nalì no mèn nambìi loo Diox tac mèna ngolaꞌs loo Jesucrist. Per ngòca loo tedib ned mèn nación Israel, mèna neꞌngácte ngli par ngàc mèna mèn nalì no mèn nambìi loo Diox tac mèna neꞌndalte ngalaꞌs loo Jesucrist. Ale ndxeꞌlequeꞌ, ngòc mèna mèn naad no mèn nguud.
\v 8 Ngòca loo mèn nación Israela xal ndub diꞌs loo libr coꞌ nac xtiꞌs Diox coꞌ mbez:
\pi1 Diox mbli ngòc mèna mèn naad no mèn nguud. Mcuau yéc mèna no mcuau lezoꞌ mèna par neꞌyaaꞌdte cón cheꞌn Diox yéc mèna no lezoꞌ mèna. Diox mbli ngòc mèna loo cón cheꞌn Diox xal mèn coꞌ ingüiꞌde conꞌ no xal mèn coꞌ indxònte conꞌ coꞌ mbez tedib mèn loo mèna. Tataa ndxàca loo huax mèn nación Israel axta huiza no axta huiz nalze.
\m
\v 9 Lomisqueꞌ, ndxabguèꞌ David coꞌ ngòc rey póla cón cheꞌn mèn nación Israel:
\pi1 Leꞌ mod coꞌ ngòp mèn nación Israel loo cón cheꞌn Diox coꞌseꞌ mbli mèna sirv loo Diox póla, leque moda mbli par ngogàa mèn. Ngue li mèn conꞌ yeꞌrsinꞌ loo Diox. Ale mcàb conꞌ mbli mèna par ngro xàꞌ mèna loo Diox no par tetìi Diox mèna yiloa.
\p
\v 10 Mdeꞌth David, coꞌ ngòc rey póla, tedib lugar, ne:
\pi1 Diox li neꞌtyubte xnìi yéc mèna no neꞌtyubte xnìi lezoꞌ mèna loo cón cheꞌn Diox par gàc mèna mèn coꞌ ncuau loo no mèn coꞌ ncuau yéc. No li Diox, por derech, neꞌxecte mèna loo conꞌ yeꞌrsin coꞌ ngòc mod coꞌ mque tee ban mèna xal thìb mbiꞌ coꞌ ndxeꞌ yóꞌ axta mblyeng xís mbiꞌ.
\s Pab ngue luꞌ leꞌ mèn coꞌ inacte mèn nación Israel lyáꞌ loo conꞌ ryes, ne.
\p
\v 11 Nalleꞌ nde niin tedib conꞌ loo guꞌ, mèn ciuda Rom: ¿Xá nee guꞌ? ¿Chéꞌ ndyac guꞌ por neꞌndubdiꞌste mèn nación Israel no por asembli mèn nación Israel conꞌ yeꞌrsinꞌ coꞌ mcàb par mtèꞌb Diox mèna no mbloꞌ too Diox mèna loo cón cheꞌn Diox, chéꞌ por cona thidtene ya ingode Diox cuent nac mèn nación Israel mèn cheꞌnpeꞌ Diox, càꞌ? Yende xàa. Nec thìb mod no nec tedib mod ngàca tataa. Diox taꞌ lugar yòo mèna loo cón cheꞌn Diox tedib vez yiloa. Ndxeꞌlequeꞌ, por neꞌndubdiꞌste mèn nación Israel loo Diox, conꞌa mbli leꞌleꞌ mèn coꞌ inacte mèn nación Israel mblyáꞌ loo conꞌ ryes, coꞌ nee diꞌs, mèn coꞌ ngolaꞌs loo Jesucrist. Tataa mbli Diox loo mèn coꞌ inacte mèn nación Israel par, belꞌqueꞌ, tataa mod yéꞌth lezoꞌ mèn nación Israel par yòo mèn nación Israel loo cón cheꞌn Diox tedib vez.
\v 12 Cona, ngue niin loo guꞌ, ne: Cheleꞌ xquin mèn nación Israel no xtol mèn nación Israel coꞌ mcuaꞌn mèna mbli mcàb más conꞌ ndac loo mèn dib athu loo izlyoꞌ, mèn coꞌ inacte mèn nación Israel, aleꞌqueꞌ neꞌ càb más conꞌ ndac loo mèn dib athu loo izlyoꞌ coꞌseꞌ bere mèn nación Israel yòo mèn nación Israel loo cón cheꞌn Diox tedib vez. Thìba conꞌ ndxèꞌ.
\p
\v 13 Leꞌ tediba na, tolo queꞌen taaplá diꞌs loo cart ndxèꞌ coꞌ tolo lyazen tyoodiz non guꞌ, guꞌ coꞌ inacte mèn nación Israel, par nonqueꞌ guꞌ no taꞌ guꞌ cuent leꞌ Diox mbli ngòc daa thìb mbiꞌ coꞌ mtelꞌ Diox coꞌ ndxeꞌ diꞌs loo mèn coꞌ inacte mèn nación Israel. No por cona, axta arid naquin lin zinꞌ coꞌ mxoꞌf zinꞌ Diox loon, ndyaquen, par luꞌen loo guꞌ cón cheꞌn diꞌs ndac cheꞌn Diox.
\v 14 Taandxèꞌ ngue lin tac ndlyazen belꞌqueꞌ taandxèꞌ mod tyal mèn coꞌ nac mèn nacionpeꞌ daa li mèn par gàc conꞌ ndac loo mèna xal ndxàca loo guꞌ par, belꞌqueꞌ, lyáꞌ mèna loo conꞌ ryes.
\v 15 Cheleꞌi ngòc por mtèꞌb Diox mèn nación Israel ngòca leꞌ taamas mèn izlyoꞌ mbyuꞌ mbyàl lezoꞌ loo Diox por cón cheꞌn Jesucrist, ¿cón gàc coꞌseꞌ tyal Diox yòo mèn nación Israel loo cón cheꞌn Diox por cón cheꞌn Jesucrist tedib vez par gàc mèn nación Israel mèn nalì no mèn nambìi loo Diox, àꞌ? Ndxeꞌlequeꞌ, leꞌi gàc más conꞌ ndac loo taamas mèn dib athu loo izlyoꞌ par gàp mèna tedib yalnaban cub coꞌ gàc tedib yalnaban más ndac. Thìba conꞌ ndxèꞌ.
\p
\v 16 Leꞌ tediba na, nde tetaquen thìb diꞌs loo guꞌ. Guꞌ ndaꞌqueꞌ cuent xal nac costumbr cheꞌn mèn nación Israel: Angab naꞌi, cheleꞌ ner pan coꞌ mtoxcuaꞌ mèn loo thìb tant coꞌf harin nac pan natúꞌ loo Diox, xalte mod neꞌ gàc natúꞌ taamas coꞌf coꞌ tolo toxcuaꞌ mèn pan loo Diox, ne, ¿léꞌ? Lomisqueꞌ mod ne, xal nac costumbr cheꞌn mèn nación Israel, cheleꞌ lox cheꞌn thìb xanꞌ yaa oliv natúꞌ nac loo Diox, xalte mod neꞌ gàc natúꞌ dibte xanꞌ yaaa loo Diox, ne, ¿léꞌ? Conꞌa nee diꞌs, cheleꞌ mèn coꞌ mbloj msiꞌ bin coꞌ ngòc mèn nación Israel ngòc mèn cheꞌnpeꞌ Diox, leꞌ sya, rye mèn coꞌ nac mèn nación Israel nac cheꞌnpeꞌ Diox, ne.
\p
\v 17 Tolo tetaquen diꞌs cón cheꞌn mèn nación Israel loo guꞌ: Cheleꞌ ndxep ram yaaa ngòc lanꞌ, coꞌ nee diꞌs, mblyux ndxep mèn nación Israel loo Diox thidtene, no cheleꞌ guꞌ coꞌ inacte mèn nación Israel, guꞌ coꞌ nac xal thìb yaa oliv huan coꞌ yende cón ntac, ngòc thidte con mèn nación Israel loo Diox xal coꞌseꞌ nqueꞌ mèn thìb xòod yaa lad tedib yaa par gàcpeꞌ rama cheꞌn yaa ndaca, no gàc cheꞌnpeꞌ rama conꞌ ndac cheꞌn yaa ndaca, ne.
\v 18 Per neꞌtyeꞌste guꞌ cón cheꞌn guꞌ par xìis no guꞌ mèn nación Israel coꞌ nac xal rampeꞌ yaa oliva coꞌ ngue niin loo guꞌ ndxèꞌ tac por mèn nación Israel ndxàc conꞌ ndac ndxèꞌ loo guꞌ. Cheleꞌ guꞌ tyeꞌs cón cheꞌn guꞌ par xìis no guꞌ mèn nación Israel, fteꞌ lezoꞌ guꞌ xalqueꞌ ndxàc conꞌ ndac loo thìb ram yaa por cón cheꞌn lox yaaa, coꞌ nee diꞌs, lox yaaa ngue xènꞌ yaaa. No inacte leꞌ ram yaaa ngue xènꞌ lox yaaa. Conꞌa nee diꞌs, ndxàc conꞌ ndac loo guꞌ por cón cheꞌn mèn nación Israel.
\p
\v 19 Thìb descuid gab guꞌ loo lezoꞌ guꞌ: Tataa mbli Diox ngòca loo mèn nación Israel loo cón cheꞌn Diox xal thìb ram yaa coꞌ mblyaad par ngòc loo nuꞌ coꞌ inacte mèn nación Israel loo cón cheꞌn Diox xal thìb xòod coꞌ mqueꞌ mèn lad yaaa coꞌteꞌ mblyaad rama.
\v 20 Huenqueꞌ ngòca tataa. Per mastaleꞌ ngòca tataa loo mèn nación Israel, fteꞌ lezoꞌ guꞌ leꞌ Diox mtèꞌb mèn nación Israel no mbloꞌ too Diox mèn nación Israel xal ram yaa coꞌ mblyaad tac mèn nación Israel neꞌndalte ngalaꞌs loo cón cheꞌn Jesucrist. No guꞌ mbyanꞌ lugar cheꞌn mèn nación Israel loo Diox ante por ndxelaꞌs guꞌ loo Diox por cón cheꞌn Tad Jesucrist. Cona, ngue niin loo guꞌ: Chó Diox chó nee guꞌ. Neꞌtyeꞌste guꞌ. Ndxeꞌlequeꞌ, nee guꞌ xal nzi tee ban guꞌ. Neꞌstreꞌfqueꞌ, tataa gàca loo guꞌ, ne, cheleꞌ guꞌ neꞌlide cas xá mod nzi tee ban ndac guꞌ loo Diox.
\v 21 Tac cheleꞌ Diox neꞌndalte ntonꞌ Diox xtol mèn nación Israel no xquin mèn nación Israel coꞌseꞌ mbyecloo Diox loo mèn nación Israel coꞌ nac xal ram yaapeꞌ, lomisqueꞌ ne, neꞌ cón cheꞌn xtol guꞌ no xquin guꞌ neꞌtonꞌte Diox cheleꞌ guꞌ neꞌlide cas xá mod ndxàal que tee ban ndac guꞌ loo Diox.
\v 22 Huen huen bli guꞌ xtùuz xal nac Diox. Diox nac xal thìb gundan yinꞌ gundan ted. Tac coꞌseꞌ huen huen ndyubdiꞌs myenꞌ loo gundana, sya, sa lad yaꞌ gundan ndaꞌ gundan pan no bélꞌ loo myenꞌ. Per coꞌseꞌ indyubdiꞌste myenꞌ, sya, taasa lad yaꞌ gundan nxoꞌf gundan yid lad myenꞌ. Tataa mod ngòc nayiꞌ Diox loo mèn nación Israel coꞌ neꞌndalte ndubdiꞌs loo conꞌ mnibeꞌ Diox loo mèna li mèna. Ndxeꞌlequeꞌ, loo guꞌ anzeꞌf thìb conꞌ ndac tolo li Diox cheleꞌ guꞌ tolo li conꞌ ndac xal ñibeꞌ Diox loo guꞌ par li guꞌi. Per cheleꞌ guꞌ neꞌtyalte tyubdiꞌs ndac loo conꞌ ñibeꞌ Diox loo guꞌ na, gàca loo guꞌ, ne, xal loo thìb ram yaa coꞌ ngòc lanꞌ, coꞌ nee diꞌs, tèꞌb Diox guꞌ no coꞌ too Diox guꞌ loo cón cheꞌn Diox, ne. Thìba conꞌ ndxèꞌ.
\p
\v 23 Nde niin tedib conꞌ loo guꞌ: Leꞌ tediba na, gàc loo mèn nación Israel xal thìb xòod coꞌ bere quée lad yaa coꞌteꞌ mblyaad ram cheleꞌ mèn nación Israel tlo yilaꞌs loo Jesucrist. Tac susqueꞌ conꞌ roo conꞌ xèn nzo laꞌs nii Diox no laꞌs yaꞌ Diox par bere Diox li Diox yòo mèn nación Israel loo cón cheꞌn Diox tedib vez xal thìb xòod ram coꞌ mblyaadleꞌ no bere mèn queꞌ mèn xòod rama lad yaa tedib vez par tyen xòod lad ram coꞌteꞌ mblyaad rama.
\v 24 Tac cheleꞌ guꞌ coꞌ inacte mèn nación Israel ngòc loo cón cheꞌn Diox xal coꞌseꞌ nchoꞌ mèn thìb xòod ram yaa oliv huan par queꞌ mèn xòod lad yaa oliv gulàaz, mastaleꞌ ngue niina loo guꞌ taandxèꞌ, per indlide mèna xalqueꞌ ngue niipeꞌen loo guꞌ, aleꞌqueꞌ más conꞌ ndac neꞌ gàc loo mèn nación Israel cheleꞌ mèna gàc xal thìb xòod coꞌ mchoꞌ mèn loo thìb ram yaa oliv gulàaz par bere mèn, queꞌ mèn leque xòoda lad leque yaapeꞌ oliv gulàaz coꞌteꞌ mchoꞌ mèn xòoda ndooreꞌ, coꞌ nee diꞌs, bere mèn nación Israel yòo mèn nación Israel loo cón cheꞌn Diox tedib vez.
\s Trèꞌ ndluꞌ cón cheꞌn coꞌseꞌ gàc tiemp coꞌseꞌ yòopeꞌ mèn nación Israel loo cón cheꞌn Diox tedib vez par lyáꞌ mèn nación Israel loo conꞌ ryes thidtene.
\p
\v 25 Nde niin tedib conꞌ loo guꞌ, mèn huesen por cón cheꞌn Jesucrist: Ndlyazen leꞌ guꞌ taꞌ cuent no non guꞌ coꞌ huenlequeꞌ cón cheꞌn conꞌ ndxèꞌ coꞌ beꞌ nacasloo loo mèn izlyoꞌ par neꞌtenꞌte guꞌ leꞌ guꞌ nac mèn coꞌ anzeꞌf ndxác loo cón cheꞌn Diox. Por cona, ngue niin loo guꞌ: Leꞌ mèn nación Israel ngòc mèn naad no mèn nguud loo cón cheꞌn Diox leꞌn tiemp ndxèꞌ. Ngòc mèn nación Israel mèn naad no mèn nguud axtaqueꞌ yilaꞌs taamas mèn dib athu loo izlyoꞌ coꞌ inacte mèn nación Israel loo Diox, rye mèn coꞌ, lìcqueꞌ, tyal yilaꞌs loo cón cheꞌn Diox por cón cheꞌn Jesucrist. Axta syareꞌ tlo mèn nación Israel, bere mèn nación Israel, yilaꞌs mèn nación Israel loo Jesucrist, ne.
\v 26 Coꞌseꞌ tataa gàca, axta syareꞌ lyáꞌ ryete mèn nación Israel loo conꞌ ryes. Tac loo libr coꞌ nac xtiꞌs Diox ndub diꞌs coꞌ mbez:
\pi1 Xaꞌ coꞌ yiꞌth tíꞌ yiꞌth làa mèn loo conꞌ ryes, xaꞌa yiꞌth yáal par ned leꞌn nación Israel. No li xaꞌ neꞌtolode gàc mèn bin thìb mbiꞌ coꞌ ngroꞌ lèe Cob mèn yeꞌrsinꞌ.
\m
\v 27 Tolo mbez loo libr coꞌ nac xtiꞌs Diox xal nac diꞌs ndxèꞌ:
\pi1 Conꞌ coꞌ lin gàc loo mèn nación Israel gàc li nèen conveñ coꞌ mblin con mèn nación Israel, póla, coꞌseꞌ lin tyonꞌ xtol mèna.
\p
\v 28 Leꞌ loo cón cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes na, nac mèn nación Israel ngolo ngolaꞌs loo Diox par mcàba thìb conꞌ ndac loo guꞌ par xyalꞌ ned xyalꞌ yóꞌ loo guꞌ par yòo guꞌ loo cón cheꞌn Diox por cón cheꞌn Jesucrist. Per mastaleꞌ nac mèn nación Israel ngolo ngolaꞌs loo Diox, beꞌ nqueꞌqueꞌ lezoꞌ Diox ñèe Diox mèn nación Israel por cón cheꞌn xudgool mèn nación Israel coꞌ mcui Diox póla.
\v 29 Coꞌseꞌ ngolo mcàbgòn Diox li Diox chol conꞌ ndac loo xudgool mèn nación Israel, thidtene mbloꞌ yéc Diox no lezoꞌ Diox conꞌa loo mèn. No coꞌseꞌ mcui Diox mèna par gàc conꞌ ndac loo mèna, neꞌláꞌyaꞌde Diox mèna thidtene.
\v 30 Guꞌ ngòc mèn coꞌ neꞌndubdiꞌste loo Diox thìb cuaꞌa. Per nalleꞌ, Diox ndlyat lezoꞌ ñèe Diox guꞌ tac mèn nación Israel neꞌndalte ndubdiꞌs loo Diox leꞌn tiemp ndxèꞌ.
\v 31 Lomisqueꞌ mod ne, mèn nación Israel neꞌndalte ndubdiꞌs loo Diox tiemp ndxèꞌ xalqueꞌ ngòca loo guꞌ coꞌseꞌ neꞌndalte guꞌ ndubdiꞌs guꞌ loo Diox thìb cuaꞌa. Mastaleꞌ mbli guꞌ tataa póla, Diox mblyat lezoꞌ gunèe Diox guꞌ por cón cheꞌn Crist láth ngòc guꞌ mèn coꞌ neꞌndubdiꞌste loo Diox tiempa. Lomisqueꞌ mod ne, Diox lyat lezoꞌ ñèe Diox mèn nación Israel yiloa mastaleꞌ axta nalleꞌ tarte tyal mèn nación Israel tyubdiꞌs mèn nación Israel loo Diox.
\v 32 Tac coꞌseꞌ mnibeꞌ mèn loo lezoꞌ mèn no mdoo lezoꞌ mèn dib athu loo izlyoꞌ más li mèn conꞌ yeꞌrsinꞌ leque tyubdiꞌs mèn loo Diox, sya, Dioxqueꞌ mbli par thidte ngòc mèn, mèn dib athu loo izlyoꞌ, mèn naad no mèn nguud par tolo li mèn conꞌ yeꞌrsinꞌ. Tataa mod mbli Diox par lalqueꞌ lyat lezoꞌ Diox ñèe Diox ryete mèn dib athu loo izlyoꞌ yiloa.
\p
\v 33 Susqueꞌ ndxác Diox no susqueꞌ nanee Diox ryethe conꞌ. Por cona, mbli Diox ngòcqueꞌ no ndyaaqueꞌ no ndubqueꞌ diꞌs cón cheꞌn diꞌs ndac cheꞌn Diox loo rye mèn dib athu loo izlyoꞌ. Axta neꞌ neꞌ gác mèn tyoodiꞌs mèn cón cheꞌn conꞌ coꞌ ñibeꞌ Diox lezoꞌ Diox li Diox làth mèn. No axta neꞌ neꞌ ñèe mèn xá mod ndli Diox conꞌ.
\v 34 Cona, ngue niin loo guꞌ: ¿Xá ñaa thìb mèn coꞌ non xal nac conꞌ coꞌ ndli Tad Diox xtùuz? Lomisqueꞌ ne, ¿chó mèn mbluꞌ Tad Diox par mbli Tad Diox mbiꞌth Crist par tataaqueꞌ mod nzo diꞌs ndac cheꞌn Diox loo mèn dib athu loo izlyoꞌ, àꞌ? Yende chó mèn mbli tataa, ¿léꞌ?
\v 35 Lomisqueꞌ ne, ngue niin tedib conꞌ loo guꞌ: ¿Xá ñaa thìb mèn coꞌ nzo loo izlyoꞌ coꞌ ngóc mdaꞌ chol conꞌ loo Diox par tataa mod li mèn cuent nquin li Diox conꞌ ndac loo mèna par tataa mod quix Diox cón cheꞌn conꞌ coꞌ mbli mèna coꞌ mquin Diox, àꞌ? Yende chó mèn gác li tataa loo Diox, ¿léꞌ?
\v 36 Ryethe conꞌ coꞌ mblec Diox no mxènꞌ Diox nac cheꞌn Diox. No ryete conꞌa mblec Diox no mxènꞌ Diox par li zinꞌ Dioxa. Por cona, lyazen gab mèn Diox roo Diox xèn nac Diox no conꞌ roo conꞌ xèn ndli Diox leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node. Taandxèꞌ gàca.
\c 12
\s Trèꞌ ndluꞌ cón cheꞌn mèn coꞌ mdyal mbembìi loo Diox no coꞌ ngro xàꞌ loo cón cheꞌn xab izlyoꞌ par ngòc mèna cheꞌnpeꞌ Diox.
\p
\v 1 Por cona, ngue niin loo guꞌ, mèn huesen por cón cheꞌn Crist: Xalqueꞌ ndlyat lezoꞌ Diox ñèe Diox guꞌ, ndlyazen taandxèꞌ mod li guꞌ sirv no li guꞌ conꞌ ndac loo Diox. Conꞌ ndxèꞌ nac conꞌ coꞌ ndyaquen ndxàal li guꞌ. Ndlyazen leꞌ guꞌ ante que tee ban loo Diox no maste par li guꞌ ante conꞌ coꞌ ñibeꞌ Diox li guꞌ. No ndlyazen leꞌ guꞌ thidtenequeꞌ ryo xàꞌqueꞌ loo cón cheꞌn xab izlyoꞌ par, lìcqueꞌ, gàc guꞌ cheꞌnpeꞌ Diox. Cheleꞌ guꞌ tataa li, naneequeꞌ guꞌ no nonqueꞌ guꞌ ndxòo lezoꞌ Diox conꞌ ndli guꞌ.
\v 2 Ndlyazen neꞌtolode tyoo lezoꞌ guꞌ no gab guꞌ loo lezoꞌ guꞌ li guꞌ cón cheꞌn coꞌ nac xab izlyoꞌ. Ndxeꞌlequeꞌ, fseꞌ guꞌ xtùuz guꞌ par que tee ban guꞌ tedib mod coꞌ nac coꞌ neete lezoꞌ Diox. Tataa mod taꞌ guꞌ cuent cón nac coꞌ nee lezoꞌ Diox li guꞌ, coꞌ nee diꞌs, nac conꞌ ndac, no conꞌ coꞌ ndxòo lezoꞌ Diox, no conꞌ coꞌ nac conꞌ nalì no conꞌ nambìi loo Diox.
\p
\v 3 Por cón cheꞌn zinꞌ coꞌ nac thìb conꞌ ndac coꞌ mxoꞌf zinꞌ Diox loon, ngue niin loo ryete guꞌ: Indlyasten leꞌ nec thìb guꞌ li masreꞌ xtùuz cón cheꞌn guꞌ leque coꞌ ndxàal li guꞌ xtùuz cón cheꞌn guꞌ par neꞌtyeꞌste guꞌ. Ndxeꞌlequeꞌ, bli thìb thìb guꞌ xtùuz cón cheꞌn leque guꞌ no cón cheꞌn hues xtàa guꞌ par ñèe guꞌ ñeeneꞌ ¿chéꞌ nac guꞌ mèn roo mèn xèn loo Diox o chéꞌ nac guꞌ mèn beꞌthe loo Diox? xal nac mod coꞌ ndxàp guꞌ no coꞌ ndxelaꞌs guꞌ loo Diox xalte nac mod coꞌ mblyath no Diox guꞌ par ndxàp guꞌ yalxlaꞌs loo Diox.
\v 4 Guꞌ naneequeꞌ no nonqueꞌ guꞌ xal nac lad chol naꞌ. Xàꞌ nac yaꞌ naꞌ. Xàꞌ nac nii naꞌ. No xàꞌ nac taamas conꞌ. Nii naꞌ no yaꞌ naꞌ no taamas conꞌ indlide sirv loo naꞌ par lii thìb loote conꞌ.
\v 5 Tataaqueꞌ nac naꞌ, ne, naꞌ coꞌ ndxelaꞌs loo Crist. Mastaleꞌ huax mèn nac naꞌ, nac naꞌ xal thidte lad Crist. Tataaqueꞌ mod nac ryete naꞌ, naꞌ coꞌ thidte ngòc loo Crist, thidte nac thìb naꞌ no tedib naꞌ loo cón cheꞌn Crist xal nac ladpeꞌ mèn.
\p
\v 6 Diox ndli loo naꞌ coꞌ ndxelaꞌs loo Diox por cón cheꞌn Crist xàꞌ xàꞌ nac coꞌ ndxác naꞌ li naꞌ loo cón cheꞌn Diox xal ndlyaꞌs Diox li thìb thìb naꞌ. Ndxàal xoꞌf zinꞌ naꞌ zinꞌ coꞌ ndluꞌ Diox loo thìb thìb naꞌ xal ndlyaꞌs Diox li thìb thìb naꞌ zinꞌ. Cheleꞌ Diox mbli ndxác ndxep naꞌ co naꞌ yalbàn cón cheꞌn Diox, ndxàal co naꞌ yalbàn cón cheꞌn Diox xalqueꞌ nac mod coꞌ ndxàp naꞌ yalxlaꞌs loo Diox.
\v 7 Lomisqueꞌ, ngue niin loo guꞌ, ne: Cheleꞌ Diox mbli nac naꞌ mèn coꞌ xoꞌf zinꞌ ndac thìb zinꞌ coꞌ nac par lyath no naꞌ xtàa naꞌ, ndxàal lyath no ndac naꞌ xtàa naꞌ. Lomisqueꞌ ne, cheleꞌ Diox mblec ndxep naꞌ par luꞌ naꞌ loo hues xtàa naꞌ, ndxàal luꞌ ndac naꞌ loo hues xtàa naꞌ cón cheꞌn Tad Diox.
\v 8 Lomisqueꞌ, ngue niin loo guꞌ, ne: Naꞌ coꞌ mblec Diox no mbli Diox par ndxác naꞌ li naꞌ par yeꞌth lezoꞌ mèn, no tegán naꞌ lezoꞌ mèn loo cón cheꞌn Diox, ndxàal li naꞌi xal ndxàala. Leꞌ mèn coꞌ ndryoꞌ lezoꞌ angtaꞌ mèn conꞌ coꞌ ndryoꞌ lezoꞌ mèn taꞌ mèn càa mèn coꞌ nde che conꞌ loo, taꞌ mèna con gust no con dib nzo yéc mèn no con dib nzo lezoꞌ mèn. Neꞌcuez nguixte mèn cón cheꞌna yiloa. Leꞌ mèn coꞌ ndyoo ner no coꞌ ndyoo naa loo xtàa na, leque mèna huiꞌ loo mèn xá mod ndyoo ner mèn no xá mod ndyoo naa mèn loo xtàa mèn par ryoꞌ loo conꞌ ndac cón cheꞌn Diox por conꞌ ndli mèna. Leꞌ mèn coꞌ ndryoꞌ lezoꞌ lyath no mèn coꞌ naquin conꞌ no mèn coꞌ ndyac yaltìi, lyath no mèn mèna con gust no con guyith guxìis.
\s Pab ngue luꞌ xá mod ndxàal que tee ban ndac mèn, mèn coꞌ ndxelaꞌs loo Crist no coꞌ nzo loo cón cheꞌn Crist, làth hues xtàa mèn.
\p
\v 9 Thìb lì yéc guꞌ no thìb lì lezoꞌ guꞌ fqueꞌ lezoꞌ guꞌ gunèe guꞌ thìb xtàa guꞌ no tedib xtàa guꞌ. Bláꞌ guꞌ. Neꞌtolode li guꞌ chol conꞌ yeꞌrsinꞌ. Más huen, ftoo lezoꞌ guꞌ li guꞌ conꞌ ndac.
\v 10 Fqueꞌ lezoꞌ guꞌ gunèe guꞌ thìb xtàa guꞌ no tedib xtàa guꞌ xalqueꞌ nqueꞌ lezoꞌ guꞌ ñèe guꞌ huespeꞌ guꞌ. Bli guꞌ conꞌ guryath no conꞌ guryèn no bli guꞌ cas thìb xtàa guꞌ no tedib xtàa guꞌ xal ndxàala.
\p
\v 11 Bli guꞌ purad loo zinꞌ coꞌ nac chol zinꞌ coꞌ ngue li guꞌ. Neꞌgàcte guꞌ mèn zaꞌf loo zinꞌ. Gòc guꞌ mèn nayen loo zinꞌ coꞌ mxoꞌf zinꞌ Tad Diox loo guꞌ par li guꞌi.
\p
\v 12 Gure guꞌ guyith guxìis loo cón cheꞌn conꞌ coꞌ nzi quee lezoꞌ guꞌ coꞌ gàc loo guꞌ yiloa. Gòc guꞌ mèn coꞌ nchaꞌlaꞌs no coꞌ xec yèe coꞌseꞌ ndxàc ngòc nguàal conꞌ yeꞌrsinꞌ loo guꞌ. No ndlyazen neꞌyathlaꞌste guꞌ toloqueꞌ gurez guꞌ Diox.
\p
\v 13 Blyath no guꞌ mèn coꞌ ngroꞌ xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox, coꞌ nee diꞌs, blyath no guꞌ mèn coꞌ ndxelaꞌs loo Crist loo conꞌ nde che loo mèna. Con gust ftaꞌ guꞌ liz guꞌ cued mèn coꞌseꞌ ñaꞌb mèn loo guꞌ cued mèn liz guꞌ.
\p
\v 14 Con huen diꞌs con huen cuent ftoodiꞌs guꞌ cón cheꞌn mèn coꞌ ndli ngòc nguàal conꞌ loo guꞌ. Gurez guꞌ no bnaꞌb guꞌ loo Diox par li Diox anggàc conꞌ ndac loo mèn coꞌ ndli ngòc nguàal conꞌ loo guꞌ. No neꞌnii yèede guꞌ no neꞌnii tìide guꞌ cón cheꞌn mèna.
\p
\v 15 Thidte gòc guꞌ con hues xtàa guꞌ coꞌ nziriꞌ con guyith guxìis par tolo tyac lezoꞌ guꞌ con hues xtàa guꞌ. No lomisqueꞌ ne, thidte gòc guꞌ con mèn coꞌ nzi xi lezoꞌ.
\p
\v 16 Ndlyazen thidte gàc xtùuz guꞌ no lezoꞌ guꞌ coꞌseꞌ li guꞌ chol conꞌ nde li guꞌ. Neꞌgàcte guꞌ mèn nateꞌs no mèn naxalꞌ. Ndxeꞌlequeꞌ, gòc guꞌ mèn nadoꞌ. Neꞌgabte guꞌ loo lezoꞌ guꞌ leꞌ guꞌ anzeꞌf ndxác.
\p
\v 17 Neꞌco xtàade guꞌ conꞌ loo xtàa guꞌ xal nac leque conꞌ yeꞌrsinꞌ coꞌ ndli no xtàa guꞌ guꞌ. Más huen, fcuaꞌn guꞌ mod li guꞌ conꞌ ndac loo ryete mèn.
\v 18 Bli guꞌ conꞌ ndac coꞌ nzote mod li guꞌ par tataa mod nabeꞌste cue ban guꞌ rye nda guꞌ no rye ndyeꞌth guꞌ làth hues xtàa guꞌ.
\v 19 Mèn huesen por cón cheꞌn Crist, guꞌ coꞌ nqueꞌ lezon ñèen, neꞌco xtàade guꞌ leque conꞌ yeꞌrsinꞌ coꞌ ndli xtàa guꞌ loo guꞌ loo xtàa guꞌ. Ndxeꞌlequeꞌ, ftanꞌ guꞌi part cheꞌn Diox par yub Diox coꞌ xtàa cón cheꞌn guꞌ loo mèna. Tac loo libr coꞌ nac xtiꞌs Diox ndub diꞌs coꞌ mbez:
\pi1 Cón chenen nac coꞌ tetìin mèn coꞌ nac coꞌ go xtàan loo mèn. ¡Láꞌa! Tazanqueꞌ daa no yigaa mèna loon, ndxab Tad Diox.
\m
\v 20 Lomisqueꞌ ndxab Tad Diox:
\pi1 Cheleꞌ mèn coꞌ nac ngolo ngolaꞌs cheꞌn guꞌ, coꞌ ndxecloo ñèe guꞌ, ngue tee lanꞌ, ftaꞌ guꞌ conꞌ hua mèna. Cheleꞌ mèna ngue tee yec lezoꞌ, ftaꞌ guꞌ xít guꞌ gu mèna. Tac coꞌseꞌ ngue li guꞌ conꞌa loo mèna, tenꞌ mèna leꞌ guꞌ ngue li conꞌ ndac loo mèna. No tataa mod nthyon tínꞌ mèna por ngue li guꞌ conꞌ ndac loo mèna.
\m
\v 21 Neꞌtaꞌde guꞌ lugar lyàa xyàn lezoꞌ guꞌ par setilte zyoꞌ yéc guꞌ coꞌseꞌ li mèn ngòc nguàal conꞌ loo guꞌ. Ndxeꞌlequeꞌ, más huen ftoo lezoꞌ guꞌ bli guꞌ conꞌ ndac par neꞌlide guꞌ conꞌ yeꞌrsinꞌ loo mèn coꞌ mbli ngòc nguàal conꞌ loo guꞌ.
\c 13
\p
\v 1 Ndlyazen niin tedib conꞌ loo guꞌ, ne: Ryete guꞌ ndxàal tyubdiꞌs loo mèn nac zinꞌ, loo mèn coꞌ nxoꞌf zinꞌ gobiern thìb zinꞌ. Tac ryete mèn coꞌ ndxàc mèn nac zinꞌ cheꞌn gobiern, Diox mbli ngure mèna no nziriꞌ mèna par tyubdiꞌs mèn loo mèn nac zinꞌa, que nac mèna gobiernpeꞌ, que nac mèna mèn nac zinꞌ bix.
\v 2 Por cona, ngue niin loo guꞌ: Mèn coꞌ ncà diꞌs loo mèn nac zinꞌ, mèna nac ngolo ngolaꞌs loo conꞌ coꞌ mnibeꞌ Diox. Leꞌ sya, mèn coꞌ tataa ncà diꞌs loo mèn nac zinꞌ, leque mèna ncuaꞌn xquin mèn loo Diox. Diox li tetìi mèn nac zinꞌ mèna por cón cheꞌn conꞌ yeꞌrsinꞌ coꞌ mbli mèna.
\v 3 Tac mèn coꞌ nac mèn nac zinꞌ, inziriꞌde mèna par li mèna zyeb mèn coꞌ ndli conꞌ ndac. Ndxeꞌlequeꞌ, nziriꞌ mèn nac zinꞌa par li mèn nac zinꞌ zyeb mèn coꞌ ndli conꞌ yeꞌrsinꞌ. ¿Chéꞌ ndlyaꞌs guꞌ que tee ban li guꞌ xal ndlyaꞌs guꞌ par neꞌlide mèn nac zinꞌ par zyeb guꞌ, càꞌ? Yende xàa. Nacqueleꞌ guꞌ indlyaꞌste gàca tataa loo guꞌ, nabeꞌste fque tee ban guꞌ, sya, par tataa mod huiꞌ ñaa mèn nac zinꞌ loo guꞌ leꞌ guꞌ nac mèn ndac. No neꞌlide mèn nac zinꞌ par zyeb guꞌ.
\v 4 Tac mèn nac zinꞌ nac mèn coꞌ Diox mblec no mbli Diox nziriꞌ mèn nac zinꞌ par xoꞌf zinꞌ mèn nac zinꞌ thìb zinꞌ loo Diox par li mèn nac zinꞌ gàc conꞌ ndac loo guꞌ. Per cheleꞌ guꞌ nzi tee ban li conꞌ yeꞌrsinꞌ, leꞌ sya, ndxàal zyeb guꞌ ñèe guꞌ mèn nac zinꞌ. Tac ianxleꞌde ndxàp mèn nac zinꞌ conꞌ laꞌs nii mèn nac zinꞌ no laꞌs yaꞌ mèn nac zinꞌ par tetìi mèn nac zinꞌ guꞌ. Tac por cona mblec Diox mèn nac zinꞌ par xoꞌf zinꞌ mèn nac zinꞌ thìb zinꞌ loo Diox par tetìi mèn nac zinꞌ mèn coꞌ nzi tee ban li conꞌ yeꞌrsinꞌ.
\v 5 Por cona, naquinqueꞌ tyubdiꞌs guꞌ loo mèn nac zinꞌ. Iante tyubdiꞌs guꞌ loo mèn nac zinꞌ par neꞌtetìide mèn nac zinꞌ guꞌ. Ndxeꞌlequeꞌ, tyubdiꞌs guꞌ loo mèn nac zinꞌ tac ndenꞌ guꞌ leꞌn lezoꞌ guꞌ leꞌ Diox ngue ñibeꞌ loo guꞌ coꞌseꞌ ñibeꞌ mèn nac zinꞌ loo guꞌ li guꞌ chol conꞌ ndac.
\v 6 Por cón cheꞌn cona, guꞌ nguixqueꞌ cón cheꞌn contribución no ndaꞌ guꞌ chol ayud coꞌ nquin mèn nac zinꞌ tac Diox mblec mèn nac zinꞌ par thop mèn nac zinꞌ tmi coꞌ nquin gobiern no coꞌ nquin mèn nac zinꞌ.
\p
\v 7 Lomisqueꞌ, ngue niin loo guꞌ, ne: Bdix guꞌ loo rye mèn coꞌ ndeb guꞌ. Cheleꞌ chol guꞌ ndeb cón cheꞌn contribución, bdix guꞌ cón cheꞌn contribución. Lomisqueꞌ ne, cheleꞌ chol guꞌ ndeb cón cheꞌn tmi coꞌ mbli mèn nac zinꞌ mandad tub mèn, ftub guꞌ tmi coꞌ ñaꞌb mèn nac zinꞌ. Lomisqueꞌ ne, loo mèn coꞌ ndli guꞌ cuent gàp guꞌ mod, gòp guꞌ mod loo mèna. Mèn coꞌ ndli guꞌ cuent ndxàal tyuꞌ mèna, bli guꞌ par tyuꞌ mèna.
\v 8 Neꞌryoꞌ teꞌbte guꞌ loo nec thìb mèn. Ndxeꞌlequeꞌ, fcuaꞌn guꞌ mod fqueꞌ lezoꞌ guꞌ gunèe guꞌ thìb xtàa guꞌ no tedib xtàa guꞌ tac mèn coꞌ nqueꞌ lezoꞌ ñèe xtàa mèn, mèna ngue liqueꞌ xal ñibeꞌ Diox loo mèn par li mèn.
\v 9 ¿Chéꞌ inonte guꞌ xal mbez diꞌs coꞌ mnibeꞌ Diox loo Moisés coꞌ ngòc ley coꞌ mxoꞌf Moisés loo mèn nación Israel coꞌ mbez:
\pi1 Neꞌlide guꞌ yalburrid. Neꞌguthte guꞌ mèn. Neꞌli huanꞌte guꞌ. Neꞌtoxcuaꞌde guꞌ yalgutyèꞌ cón cheꞌn nec thìb mèn. Neꞌqueliꞌthte guꞌ cón cheꞌn hues xtàa guꞌ.
\m Diꞌs ndxèꞌ, no taamas diꞌs coꞌ ñibeꞌ ley coꞌ mxoꞌf Moisés loo mèn, thidte nac no thidte mbez no ndluꞌ diꞌsa loo guꞌ par queꞌ lezoꞌ guꞌ ñèe guꞌ hues xtàa guꞌ xalqueꞌ ngue lezoꞌ guꞌ ñèe guꞌ guꞌ no xalqueꞌ nquenap leque guꞌ guꞌ.
\v 10 Coꞌseꞌ nqueꞌ lezoꞌ mèn ñèe mèn hues xtàa mèn, incuaꞌnte mèn mod li mèn conꞌ yeꞌrsinꞌ loo hues xtàa mèn. Cona, ngue niin loo guꞌ: Coꞌseꞌ nqueꞌ lezoꞌ mèn ñèe mèn hues xtàa mèn, mèna ndliqueꞌ xal ñibeꞌ Diox loo mèn li mèn.
\p
\v 11 Por cón cheꞌn conꞌ coꞌ ngolo mdoodizen loo guꞌ ndxèꞌ, cón cheꞌn tiemp coꞌseꞌ gàc lyáꞌ naꞌ loo conꞌ ryes thidtene, ndoo riꞌth tiempa xal coꞌseꞌ ndoo riꞌth yálꞌ no ndxenìileꞌ izlyoꞌ tedib huiz. Por cona, gòc guꞌ mèn coꞌ tolo tyub xnìi yéc no coꞌ tolo tyub xnìi lezoꞌ loo tiemp coꞌ nzi ban naꞌ nalleꞌ. Nalas gure guꞌ loo cón cheꞌn Diox xal mèn coꞌ inzi yàtte. Tac tiemp coꞌseꞌ yiꞌth xi Jesucrist naꞌ, tiempa más nde zinꞌ gaxleꞌ loo naꞌ nalleꞌ leque coꞌseꞌ nerlequeꞌ ngolaꞌs naꞌ cón cheꞌn diꞌs ndac cheꞌn Diox.
\v 12 Lomisqueꞌ, ngue niin loo guꞌ, ne: Ndoo riꞌth tiemp thìb línꞌ tedib línꞌ coꞌseꞌ toloqueꞌ ñibeꞌ conꞌ yeꞌrsinꞌ loo mèn loo izlyoꞌ ndxèꞌ coꞌ ndli ncuau yéc mèn no ncuau lezoꞌ mèn xal coꞌseꞌ nzi tee mèn loo yálꞌcuau. Per làth xtauꞌa, nde zinꞌleꞌ tiemp, ne, coꞌseꞌ yiꞌth xi Tad Jesucrist mèn par bii no mèn Tad Jesucrist, mèn coꞌ ngòo loo cón cheꞌn Tad Jesucrist. Por cona, ngue niin loo guꞌ: Ndxàal láꞌ naꞌ ryethe conꞌ coꞌ nac coꞌ ncàb ndxauꞌ yéc naꞌ no ndxauꞌ lezoꞌ naꞌ loo cón cheꞌn Diox. Más huen, naquin li naꞌ xal solndad coꞌseꞌ ntauꞌ solndad lad solndad con yiꞌf par neꞌgàcte conꞌ ryes loo solndad, coꞌ nee diꞌs, que tee ban ndac naꞌ loo Crist coꞌ ndli ndyub xnìi yéc naꞌ no coꞌ ndli ndyub xnìi lezoꞌ naꞌ loo cón cheꞌn Diox.
\v 13 Ndxàal que tee ban li naꞌ conꞌ ndac, coꞌ nee diꞌs, nac conꞌ coꞌ ndxàal li mèn loo xnaa ndxáal ze, conꞌ coꞌ ndli neꞌthyonte mèn loo xtàa mèn. Indxàalte que tee ban guyꞌ naꞌ. Indxàalte yòo naꞌ loo thìb yalhua coꞌ ndli ndxetoo diꞌs làth mèn. Neꞌ neꞌ indxàal que tee ban bix yéc naꞌ par li naꞌ yalburrid. Neꞌ neꞌ indxàal yoo naꞌ loo chol conꞌ coꞌ ndryoꞌ ndlyenꞌ lezoꞌ naꞌ no leꞌn xtùuz naꞌ par tataa mod neꞌcue yoo node naꞌ chol mèn coꞌ ndxàc hues no xtàa naꞌ làth naꞌ. Neꞌ neꞌ indxàal li naꞌ par yan lezoꞌ naꞌ ñèe naꞌ chol xtàa naꞌ.
\v 14 Ndxeꞌlequeꞌ, naquin ante que tee ban naꞌ loo cón cheꞌn yub Jesucrist coꞌ nquenap naꞌ par neꞌlide naꞌ chol conꞌ yeꞌrsinꞌ. No lomisqueꞌ, lyazen ya neꞌtolode tyóo naꞌ par tyac lezoꞌ naꞌ li naꞌ ryethe conꞌ coꞌ ndyub yoꞌf lezoꞌ naꞌ li naꞌ coꞌ nac cón cheꞌn xab izlyoꞌ ndxèꞌ.
\c 14
\s Pab ngue bez: Neꞌniide guꞌ ngòc nguàal conꞌ cón cheꞌn hues xtàa guꞌ coꞌ nzo loo cón cheꞌn Crist.
\p
\v 1 Cheleꞌ chó mèn diiz ngòo loo cón cheꞌn Jesucrist, no tarte yilaꞌs mèna loo cón cheꞌn Jesucrist coꞌ huen huen xal ndxelaꞌs naꞌ, ftaꞌ guꞌ lugar tolo yòo mèna làth guꞌ. Per látha, más huen neꞌtyoodiꞌste guꞌ con mèna no neꞌnibdiꞌste guꞌ loo mèna cón cheꞌn xleyꞌ cheꞌn Crist coꞌ tarte taꞌ ndac mèna cuent par neꞌgolꞌ diꞌste guꞌ arid con mèna.
\v 2 Angab naꞌi, nzo ndxep mèn coꞌ diiz ngolaꞌs. Mèna yende chó mport nzo lezoꞌ, ndenꞌ mèna nzoque mod hua mèna chol conꞌ ndlyaꞌs mèna. Per làth xtauꞌa, nzo taandxep mèn coꞌ nac leque mèn coꞌ diiz ngolaꞌs. Mèna beꞌ ndxàc chop loo chop laꞌs loo cón cheꞌn Crist. Beꞌ nde no lezoꞌ mèna loo costumbr coꞌ mque no mèna ndooreꞌ yilaꞌs mèna. Cona, ndyac mèna más huen hua mèna conꞌ nayèe coꞌ inacte chol bélꞌ coꞌ ndxuhua mèn.
\v 3 Cona, ngue niin loo guꞌ: Guꞌ coꞌ ndxuhua chol conꞌ coꞌ nac xít guꞌ no luaꞌ guꞌ, indxàalte xìis no guꞌ mèn no indxàalte coꞌ too guꞌ mèn coꞌ indxuhuade chol conꞌ coꞌ nac xít mèn no coꞌ nac luaꞌ mèn thìb lad xal nac mod coꞌ ndxuhua guꞌ chol conꞌ coꞌ nac xít guꞌ no luaꞌ guꞌ. No guꞌ coꞌ indxuhuade chol conꞌ coꞌ nac xít mèn no luaꞌ mèn, indxàalte ñii guꞌ ngòc nguàal diꞌs cón cheꞌn hues xtàa guꞌ coꞌ ndxuhua xít no luaꞌ coꞌ nac chol conꞌ coꞌ ndxuhua mèn. Tac yende chó mport nzo lezoꞌ Diox loo conꞌa. Leque yub Diox nac xaꞌ coꞌ mdyal no coꞌ mdaꞌ lugar ngòo mèna loo cón cheꞌn Diox por cón cheꞌn Crist.
\v 4 ¡Aa que naxèn guꞌ se, mèn ciuda Rom! ¿Chó cón cheꞌn guꞌ par leꞌleꞌ guꞌ ñii ngòc nguàal diꞌs cón cheꞌn mèn coꞌ ndli sirv loo tedib mèn, àꞌ? Nee mèna cón ngue li mèna. ¿Chéꞌ ngue li mèna conꞌ ndac o chéꞌ ngue li mèna conꞌ yeꞌrsinꞌ loo Diox?, loo Diox coꞌ nee diꞌs, nac xal patrón loo mèna cón cheꞌn coꞌ nac luaꞌ no xít mèn. Conꞌa nac cón cheꞌn Diox coꞌ nac xal patronpeꞌ mèna. No huenqueꞌ gàc cón cheꞌn mèna loo Diox coꞌ nac xal patrón mèna tac yub Diox ndxác par tolo li Diox gàc conꞌ ndac loo mèna.
\p
\v 5 Nde niiguèꞌen tedib conꞌ loo guꞌ, ne, cón cheꞌn coꞌ nac tedib ned mèn coꞌ nzo làth guꞌ: Nzoqueꞌ ndxep mèn làth guꞌ coꞌ mbez másqueꞌ huiz roo nac thìb huiz coꞌ nac huiz lni leque taamas huiz. No nzo tedib ned mèn làth guꞌ coꞌ ndxelaꞌs leꞌ ryete huiz lalqueꞌ nac. Cona, ngue niin loo guꞌ: Leque mèna ndxàal cuec lezoꞌ mèn li mèn xtùuz xá mod nac cón cheꞌn thìb huiz no xá mod nac cón cheꞌn tedib huiz par ñee mèna ¿chéꞌ ndxàal li mèna cas huiza o chéꞌ indxàalte li mèn cas huiza?
\v 6 Nde niin conꞌ ndxèꞌ loo guꞌ ante cón cheꞌn mèn coꞌ ndxelaꞌs loo Diox por cón cheꞌn Tad Jesucrist: Mèn coꞌ nquenap mèn thìb huiz coꞌ ndlyaꞌs mèn, mèna ngue li conꞌ guryath no conꞌ guryèn loo Tad Diox. Lomisqueꞌ ne, mèn coꞌ inquenapte mèn thìb huiz coꞌ ndlyaꞌs mèn, mèna, ne, ngue liguèꞌ conꞌa par gàc conꞌ guryath no conꞌ guryèn loo Diox por inquenapte mèn chol huiz lni xal ndli taamas mèn. Lomisqueꞌ ne, mèn coꞌ ndxuhua xít mèn no luaꞌ mèn coꞌ nac chol conꞌ coꞌ ndxuhua mèn, ndxuhua mèn xít mèn no luaꞌ mèn par gàc conꞌ guryath no conꞌ guryèn loo Diox tac mbez mèna Diox quix Uꞌ, Diox, loo Diox coꞌseꞌ hua mèn. Lomisqueꞌ ne, mèn coꞌ ndxàp lezoꞌ mèn par neꞌhuade mèn xít mèn no hua mèn coꞌ nac chol conꞌ coꞌ ndxuhua mèn, mèna, ne, ngue liguèꞌ conꞌ guryath no conꞌ guryèn loo Diox tac mbez mèna Diox quix Uꞌ, Diox, loo Diox ndooreꞌ hua mèn.
\p
\v 7 Tac nec thìb naꞌ inzi bante xal neepeꞌ lezoꞌ naꞌ. No nec thìb naꞌ yende mod gath xal neepeꞌ lezoꞌ naꞌ.
\v 8 Per cheleꞌ naꞌ nzi ban, láth nzi ban naꞌ, ante nzi ban naꞌ xal neepeꞌ lezoꞌ Tad Crist. No que naca gath naꞌ, gath naꞌ xal neepeꞌ lezoꞌ Tad Crist. Leꞌ sya, lomisqueꞌ naca, que naca ban naꞌ, o que naca gath naꞌ, nacqueꞌ naꞌ mèn cheꞌnpeꞌ Tad Crist.
\v 9 Por cona, nguth Crist no ngro xban Crist no naban Crist tedib vez par ñibeꞌpeꞌ Crist loo ryethe mèn yiloa, que naca mèn coꞌ nguth, que naca mèn coꞌ beꞌ naban, que naca mèn coꞌ ngòo loo cón cheꞌn Crist, no que naca mèn coꞌ neꞌtyalteꞌ yòo loo cón cheꞌn Crist nalleꞌ.
\p
\v 10 Per guꞌ, mèn ciuda Rom, yende chó cón cheꞌn guꞌ par tub rez guꞌ cón cheꞌn hues xtàa guꞌ por cón cheꞌn Crist. Lomisqueꞌ ne, yende chó cón cheꞌn guꞌ par xìis no guꞌ hues xtàa guꞌ no coꞌ too guꞌ hues xtàa guꞌ. Tac gàca leꞌ ryethe naꞌ tyoo loo Crist par tub rez Crist cón cheꞌn thìb thìb naꞌ.
\v 11 Tac loo libr coꞌ nac xtiꞌs Diox ndub diꞌs coꞌ ndxab Tad Diox. Diꞌsa mbez:
\pi1 Com leꞌ daa, lìcqueꞌ, naban, ndxab Tad, gàcqueꞌ leꞌ ryete mèn coꞌ nziriꞌ dib athu loo izlyoꞌ tyub xib loon. No loo xnaa tyoodiꞌs ryete mèn loo xtàa mèn diꞌs roo diꞌs xèn cón chenen. No gab ryete mèn diꞌs natúꞌ loon, daa coꞌ nac merpeꞌ Diox.
\m
\v 12 Cona, ngue niin loo guꞌ, par non naꞌ: Leꞌ thìb thìb naꞌ taꞌ cuent loo Diox no gab naꞌ loo Diox cón cheꞌnpeꞌ conꞌ mbli naꞌ no xá mod mque tee ban naꞌ loo izlyoꞌ ndxèꞌ coꞌseꞌ gàc huiza.
\s Neꞌaselide guꞌ par angcuaꞌn hues xtàa guꞌ xtol hues xtàa guꞌ no xquin hues xtàa guꞌ.
\p
\v 13 Por cona, indxàalte tyoodiꞌs guꞌ ngòc nguàal conꞌ cón cheꞌn hues xtàa guꞌ. Ndxeꞌlequeꞌ, leque guꞌ bli par ñibeꞌ guꞌ loo lezoꞌ guꞌ par neꞌlide guꞌ ngòc nguàal conꞌ loo mèn coꞌ nac hues xtàa guꞌ por cón cheꞌn Jesús. Lomisqueꞌ ne, neꞌlide guꞌ nec thìb conꞌ coꞌ nac iléꞌde conꞌ par càba loo hues xtàa guꞌ yitac lezoꞌ hues xtàa guꞌ no cuaꞌn hues xtàa guꞌ xquin hues xtàa guꞌ no xtol hues xtàa guꞌ. Thìba conꞌ ndxèꞌ.
\p
\v 14 Leꞌ tediba na, part cón chenen, daa nanee no ndxàpen yalxlaꞌs leꞌ ryethe conꞌ coꞌ ndxuhua mèn nambìiqueꞌ naca loo Diox. Ndxelazen conꞌ ndxèꞌ tac ndxàpen yalxlaꞌs loo Tad Jesucrist no loo cón cheꞌn Tad Jesucrist. Per por part cheꞌn chol mèn coꞌ ndxàc hues xtàa naꞌ, mèn coꞌ nzo chol lugar coꞌ ndli cuent inambìide nac ndxep conꞌ hua mèn ndyac mèn, pues inambìide nac conꞌa ndyac mèn par hua mèna.
\v 15 Cheleꞌ chol hues xtàa naꞌ ndenꞌ leꞌn lezoꞌ hues xtàa naꞌ iléꞌde nac conꞌ ngue li guꞌ coꞌseꞌ huiꞌ hues xtàa guꞌ loo guꞌ nzi yuhua guꞌ xít guꞌ no luaꞌ guꞌ, coꞌ nee diꞌs, ndyac hues xtàa guꞌ leꞌ guꞌ ngue yuhua conꞌ coꞌ indxàalte hua guꞌ, conꞌa ndli ncàb leꞌ hues xtàa guꞌ ndyac leꞌ guꞌ inqueꞌde lezoꞌ ñèe guꞌ hues xtàa guꞌ. No lomisqueꞌ tenꞌ hues xtàa guꞌ inzi tee ban ndacte guꞌ xal ndxàala loo hues xtàa guꞌ loo cón cheꞌn Jesucrist. Cona, ngue niin loo guꞌ: Neꞌlide guꞌ tataa loo mèn hues xtàa guꞌ par neꞌtyoo xàꞌde lezoꞌ mèn hues xtàa guꞌ loo cón cheꞌn Crist ante por ndlyaꞌs guꞌ hua guꞌ conꞌ coꞌ ndublaꞌs guꞌ hua guꞌ loo mèn coꞌ ndxàc hues xtàa guꞌ. Tac por cón cheꞌn mèna nguth Crist, ne.
\v 16 Neꞌlide guꞌ ngòc nguàal conꞌ par li mèn xtùuz no ñii yèe ñii tìi mèn cón cheꞌn guꞌ loo conꞌ coꞌ ndyac guꞌ nac conꞌ ndac coꞌ ndli guꞌ.
\v 17 Tac mod coꞌ ngue ñibeꞌ Diox loo guꞌ nalleꞌ, yende chó mport nzo lezoꞌ Diox loo conꞌ coꞌ nac xít guꞌ no luaꞌ guꞌ. Ndxeꞌlequeꞌ, conꞌ coꞌ ñibeꞌ Diox loo guꞌ par li guꞌ nac: Fque tee ban lì guꞌ loo Diox no cue ban guꞌ rye nda guꞌ no rye ndyeꞌth guꞌ làth hues xtàa guꞌ, no cue guꞌ guyith guxìis làth xtàa guꞌ. Tataa ndxàal li guꞌ tac Xpii Natúꞌ coꞌ nzo loo guꞌ ngue lyath no guꞌ par tataa que tee ban guꞌ.
\v 18 Mèn coꞌ tataa nzi tee ban loo cón cheꞌn Crist xal ngue niin loo guꞌ ndxèꞌ, mèna ndxòo lezoꞌ Diox ñèe Diox conꞌ ndli mèna. No mèn coꞌ nac hues xtàa mèna ngüiꞌ no ndaꞌqueꞌ mèna cuent huenqueꞌ nac coꞌ ndli mèna.
\p
\v 19 Cona, ngue niin loo guꞌ: Tolo fque tee ban ndac guꞌ loo mèna par tataa mod cue ban guꞌ rye nda guꞌ no rye ndyeꞌth guꞌ làth mèna. Leꞌ sya, cheleꞌ guꞌ tataa ngue li, tataa mod ngue li guꞌ par ndlyath no guꞌ thìb xtàa guꞌ no tedib xtàa guꞌ par tolo téꞌth mèn no tolo tyubdiꞌs mèn loo Crist.
\v 20 Más huen, neꞌhuade guꞌ chol conꞌ coꞌ nac xít guꞌ no luaꞌ guꞌ loo mèn coꞌ nac hues xtàa guꞌ par tyoo xàꞌ lezoꞌ mèna loo cón cheꞌn Diox por ante ñèe mèna ndxuhua guꞌ conꞌ coꞌ nac xít guꞌ no luaꞌ guꞌ. Lìca, ryete conꞌ coꞌ nac xít mèn no luaꞌ mèn coꞌ ndxuhua mèn nambìiqueꞌ nac conꞌa par hua mèna. Per part cón cheꞌn mèn coꞌ nac hues xtàa guꞌ coꞌ ngue huiꞌ loo guꞌ coꞌseꞌ ngue yuhua guꞌ thìb conꞌ coꞌ nac xít guꞌ no luaꞌ guꞌ, loo mèna gàc ngòc nguàal conꞌ no axta cuaꞌn mèna xquin mèna no xtol mèna por ñèe mèna ndxuhua guꞌ conꞌ coꞌ nac xít guꞌ no luaꞌ guꞌa.
\v 21 Huenqueꞌ naca cheleꞌ guꞌ neꞌhuade chol bélꞌ, neꞌ neꞌ gàal ro guꞌ vin, no neꞌ neꞌ li guꞌ chol taamas conꞌ coꞌ nac ngòc nguàal conꞌ loo mèn coꞌ nac hues xtàa guꞌ por cón cheꞌn Jesucrist. Neꞌ neꞌ aseli guꞌ chol conꞌ coꞌ càb loo hues xtàa guꞌ cuaꞌn hues xtàa guꞌa xquin no xtol hues xtàa guꞌ por cón cheꞌn guꞌ. Lomisqueꞌ ne, neꞌaselide guꞌ tyoo xàꞌ lezoꞌ mèn xal nac mod coꞌ ndxelaꞌs mèn loo cón cheꞌn Crist.
\v 22 Leꞌ por part cón cheꞌn guꞌ na, mod coꞌ ndxelaꞌs guꞌ loo Diox por cón cheꞌn Crist, ante leꞌn lezoꞌ guꞌ non guꞌ xá mod ndxelaꞌs guꞌ loo Diox par tataa mod neꞌluꞌde guꞌ loo mèn ndli guꞌ cuent anzeꞌf ndxác guꞌ ndyoo naa guꞌ loo mèn loo cón cheꞌn Diox. Tac huen nda thìb mèn coꞌ ndxàp yalxlaꞌs loo Diox coꞌseꞌ leque mèna ngue luꞌ mèna loo hues xtàa mèna huen nzo lezoꞌ mèna ngue tee ban mèna loo Diox no coꞌseꞌ indenꞌte mèna leꞌn lezoꞌ mèna leꞌ mèna ngue li conꞌ yeꞌrsinꞌ loo Diox.
\v 23 Per mèn coꞌ ndxuhua chol conꞌ coꞌ nac xít mèn no luaꞌ mèn no ndxàc chop loo chop laꞌs mèn no ngan lezoꞌ mèn, ¿chéꞌ thua mèna o chéꞌ neꞌhuade mèna?, leꞌ sya, leque conꞌ coꞌ ndli mèn xtùuz leꞌn lezoꞌ mèn ngue quexùꞌ mèn coꞌseꞌ hua mèn xít mèn no luaꞌ mèn tac indxuhuade mèn conꞌa dib nzo yéc mèn no dib nzo lezoꞌ mèn. Leꞌ sya, ryete conꞌ ndli mèn coꞌ nzo loo cón cheꞌn Diox por cón cheꞌn Crist, mèna ncuaꞌn xquin mèn no xtol mèn tac indlide mèna conꞌ ndli mèn dib nzo yéc mèn no dib nzo lezoꞌ mèn. Ndxeꞌlequeꞌ, ndli mèn conꞌa chop loo chop laꞌs mèn. Thìba conꞌ ndxèꞌ.
\c 15
\s Pab mbez: Fcuaꞌn guꞌ mod li guꞌ coꞌ yòo lezoꞌ xtàa guꞌ. No neꞌcuaꞌnte guꞌ mod li guꞌ ante conꞌ coꞌ yòo lezoꞌ guꞌ.
\p
\v 1 Leꞌ tediba na, naꞌ coꞌ más nzi nèe loo conꞌ ndxelaꞌs naꞌ loo Crist, ndxàalqueꞌ xec naꞌ no lyath no naꞌ mèn coꞌ tatabeꞌ nac mèn chop loo chop laꞌs loo coꞌ ndxelaꞌs mèna loo Crist. No neꞌlide naꞌ par leque naꞌ li par ante más tyac lezoꞌ naꞌ loo cón cheꞌn coꞌ ndxelaꞌs naꞌ loo Crist.
\v 2 Thìb thìb naꞌ ndxàal cuaꞌn mod li naꞌ conꞌ ndac loo hues xtàa naꞌ por cón cheꞌn Crist par càba conꞌ coꞌ, lìcqueꞌ, nac conꞌ ndac loo hues xtàa naꞌ par tataa mod tolo téꞌth no tolo tyubdiꞌs hues xtàa naꞌ loo cón cheꞌn Jesucrist no par tataa mod tolo tyac lezoꞌ hues xtàa naꞌ loo coꞌ ndxelaꞌs hues xtàa naꞌ.
\v 3 Tac leque yub Crist neꞌncuaꞌnte mod par ngli Crist ndac lezoꞌ Crist por cón cheꞌn Crist. Ndxeꞌlequeꞌ, ngòcqueꞌ conꞌ loo Crist xalqueꞌ ngòc diꞌs coꞌ ndub loo libr coꞌ nac xtiꞌs Diox coꞌ gunii Crist loo Tad Diox, coꞌseꞌ ndxab Crist:
\pi1 Ndalen par tyactìin por cón cheꞌn mèn coꞌ nac ngolo ngolaꞌs cheꞌn Uꞌ. Mèna mdèe msuc rloon. No mbli mèna ngòc nguàal conꞌ loon axta plóthe mblyaꞌs mèna.
\m Loo conꞌ ngòc loo Crista, neꞌndaꞌde Crist gust lezoꞌ Crist nec thìb mod no nec tedib mod par ngoꞌ xyàn lezoꞌ Crist con mèna.
\v 4 Cona, ngue niin loo guꞌ: Mdubqueꞌ diꞌs coꞌ ndub loo libr coꞌ nac xtiꞌs Diox ndooreꞌ coꞌ nac testamentgool nalleꞌ. Diꞌsa ndub loo libr coꞌ nac xtiꞌs Diox par téꞌth naꞌ no par taꞌ naꞌ cuent cón cheꞌn Diox. Tataa ndluꞌ xtiꞌs Diox loo naꞌ par nchaꞌlaꞌs naꞌ no par tegán naꞌ lezoꞌ naꞌ loo cón cheꞌn Diox xal ndub diꞌs loo libr coꞌ nac xtiꞌs Diox. Tataa mod tolo cue quee lezoꞌ naꞌ loo cón cheꞌn Crist.
\v 5 Ndlyazen leꞌ Diox coꞌ angndli par nchaꞌlaꞌs mèn no Diox coꞌ ndli par ntegán mèn lezoꞌ mèn angli thidte gàc lezoꞌ guꞌ no xtùuz guꞌ loo thìb xtàa guꞌ no loo tedib xtàa guꞌ xalqueꞌ ngòc mod coꞌ ngòp Crist Jesús loo mèn
\v 6 par tataa mod thidte gàc ryete guꞌ par thidte gab guꞌ diꞌs natúꞌ no diꞌs roo diꞌs xèn cón cheꞌn Diox loo xtàa guꞌ cón cheꞌn Diox coꞌ nac xud Tad Jesucrist naꞌ.
\s Pab mblo yalbàn loo mèn tith coꞌ inacte mèn nación Israel.
\p
\v 7 Cona, ngue niin loo guꞌ: Ftaꞌ guꞌ lugar yòo chol mèn làth guꞌ, mèn coꞌ ndxelaꞌs xal mdaꞌ Crist lugar ngòo guꞌ loo cón cheꞌn Crist par tataa mod gàc conꞌ roo conꞌ xèn loo Diox por cón cheꞌn guꞌ.
\v 8 Tac conꞌ coꞌ ngue niin loo guꞌ ndxèꞌ nac leꞌ Crist mbiꞌth yáal loo izlyoꞌ par li Crist sirv loo mèn coꞌ nac mèn nación Israel par li laꞌs mèna leꞌ Diox indyèꞌde no par mdubqueꞌ diꞌs xal nac diꞌs coꞌ mcàbgòn Diox loo xudgool naꞌ coꞌ ngo ban pólleꞌa. Tataa mbli Diox par mbluꞌ Diox loo mèn leꞌ Diox ndliqueꞌ coꞌ mcàbgòn Diox li Diox loo mèn.
\v 9 Mbiꞌth yáal Jesucrist loo izlyoꞌ ndxèꞌ, ne, par lyat lezoꞌ Jesucrist ñèe Jesucrist mèn coꞌ inacte mèn nación Israel. Tataa mbli Jesucrist par gàca leꞌ mèn coꞌ inacte mèn nación Israel tlo, ñii mèna diꞌs roo diꞌs xèn cón cheꞌn Diox loo mèn xal ndub diꞌs loo libr coꞌ nac xtiꞌs Diox coꞌ mdeꞌth mèn. Diꞌsa mbez:
\pi1 Por cona, daa gab conꞌ roo conꞌ xèn cón cheꞌn Uꞌ, Tad, loo mèn coꞌ inacte mèn nación Israel. No gol ron diꞌs natúꞌ cón cheꞌn lèe Uꞌ, Tad, loo mèn coꞌ inacte mèn nación Israel par gàc conꞌ guryath no conꞌ guryèn loo Uꞌ.
\m
\v 10 Tedib lugar leꞌn libr coꞌ nac xtiꞌs Diox ndub diꞌs coꞌ gunii Moisés, coꞌ mbezguèꞌ, ne:
\pi1 Fxoꞌf ndeꞌ fxoꞌf ndlaꞌ lezoꞌ guꞌ, mèn nación coꞌ nziriꞌ dib athu loo izlyoꞌ, con mèn coꞌ nac mèn nacionpeꞌ Diox coꞌ nzo loo cón cheꞌn Diox.
\m
\v 11 Tedib lugar leꞌn libr coꞌ nac xtiꞌs Diox gunii David coꞌ ngòc rey póla, ne:
\pi1 Gab mèn coꞌ nac mèn chol nación coꞌ nziriꞌ dib athu loo izlyoꞌ diꞌs guryath no diꞌs guryèn cón cheꞌn Tad Diox. No lomisqueꞌ, tyoodiꞌs ryethe mèn coꞌ nziriꞌ dib athu loo izlyoꞌ cón cheꞌn conꞌ roo conꞌ xèn coꞌ mbli Tad Diox no coꞌ nac Tad Diox.
\m
\v 12 Tedib lugar loo libr coꞌ nac xtiꞌs Diox ndub diꞌs coꞌ gunii Sayi, ne, diꞌs coꞌ mbez:
\pi1 Gáal thìb mbiꞌ coꞌ nde bin Isaí coꞌ ngòc xud David coꞌ ngòc rey póla. Gáal mbiꞌa coꞌseꞌ ihuaxte bin Isaí nzo no coꞌseꞌ ndenꞌ mèn yende cón ntac bin Isaí. Mbiꞌa gàc mbiꞌ coꞌ ñibeꞌ loo mèn nación coꞌ inacte mèn nación Israel. Leꞌ sya, mèn coꞌ inacte mèn nación Israel cue quee lezoꞌ loo mbiꞌ coꞌ nac bin Isaí.
\m No ngóolqueꞌ mbiꞌa. Mbiꞌa nac Tad Jesucrist.
\p
\v 13 Ndlyazen leꞌ Diox, coꞌ ndli toloqueꞌ cue quee lezoꞌ mèn loo cón cheꞌn Crist, tolo li par xyoꞌf ndeꞌ xyoꞌf ndlaꞌ lezoꞌ guꞌ loo conꞌ coꞌ ndxelaꞌs guꞌ loo Crist. No ndlyazen leꞌ Diox li tolo que tee ban guꞌ rye nda guꞌ no rye ndyeꞌth guꞌ làth xtàa guꞌ loo conꞌ coꞌ ndxelaꞌs guꞌ loo Crist par tataa mod cue quee lezoꞌ guꞌ axta plóthe loo cón cheꞌn Crist por cón cheꞌn ryethe conꞌ coꞌ nac conꞌ roo no conꞌ xèn coꞌ nzo laꞌs nii Xpii Natúꞌ no coꞌ nzo laꞌs yaꞌ Xpii Natúꞌ coꞌ ndlyath no guꞌ.
\p
\v 14 Daa ngobeꞌ, mèn huesen por cón cheꞌn Crist, leꞌ guꞌ mbli nèeleꞌ lezoꞌ guꞌ par li guꞌ conꞌ ndac thidtene. Lomisqueꞌ ne, ndyaquen, huen huen mtéꞌth guꞌ cón cheꞌn ryethe conꞌ coꞌ nac conꞌ ndac cón cheꞌn Diox. Por cona, ndxác guꞌ coꞌx guꞌ loo thìb hues xtàa guꞌ no loo tedib hues xtàa guꞌ.
\v 15 Loo cart coꞌ mzin loo guꞌ ndxèꞌ mblin ryes mqueꞌen yeꞌs loo guꞌ clarlequeꞌ cón cheꞌn ndxep conꞌ coꞌ huen huen non guꞌ no nanee guꞌ par teꞌ lezoꞌ guꞌ coꞌ huen huen cón cheꞌn diꞌs ndac. Ngue niin conꞌ ndxèꞌ loo guꞌ tac Diox mbli angngòc conꞌ ndac ndxèꞌ loon par xoꞌf zinꞌen zinꞌ ndxèꞌ mastaleꞌ indxàalte daa par lina, ndyaquen.
\v 16 Tataa mxoꞌf zinꞌ Diox loon par ga xoꞌf zinꞌen loo mèn coꞌ inacte mèn nación Israel, coꞌ nee diꞌs, gon yalbàn cón cheꞌn diꞌs ndac cheꞌn Diox loo mèna par tataa mod taꞌ mèn cuent xá mod ndlyaꞌs Diox lyáꞌ mèn loo conꞌ ryes. Tataa mod gàc mèn coꞌ inacte mèn nación Israel mèn cheꞌnpeꞌ Diox por cón cheꞌn Xpii Natúꞌ. Ndxòo lezoꞌ Diox ñèe Diox mèna. No mdyal Diox ngòo mèna loo cón cheꞌn Diox tac ndxelaꞌs mèna loo cón cheꞌn Jesucrist, ¿léꞌ?
\p
\v 17 Per com leꞌ daa nac thìb mbiꞌ coꞌ ndxelaꞌs loo Crist Jesús, ¿léꞌ?, ndyaquen huenqueꞌ ndxàca loon ndyac lezon por ngue tee xoꞌf zinꞌen thìb zinꞌ coꞌ nac cón cheꞌn Diox.
\v 18 Tac daa ndliqueꞌ ryes ndyoodizen ante cón cheꞌn conꞌ coꞌ ndli Crist loo mèn coꞌ inacte mèn nación Israel por cón chenen. Tataa ndlin par tyubdiꞌs mèn loo Diox, mèn coꞌ inacte mèn nación Israel. No ndxàcqueꞌ conꞌ coꞌ ngue tee lin loo mèna xalte nac diꞌs coꞌ ngon yalbàn no conꞌ coꞌ ndlin.
\v 19 Mèna ngolaꞌsqueꞌ loo Crist por cón cheꞌn yalguzyeꞌ coꞌ ngòc loo mèn no por cón cheꞌn ryethe conꞌ coꞌ nzo laꞌs nii Xpii Natúꞌ no coꞌ nzo laꞌs yaꞌ Xpii Natúꞌ. Tataa mod mtaan zinꞌ coꞌ mxoꞌf zinꞌ Diox loon coꞌ nac nque tee gon yalbàn cón cheꞌn diꞌs ndac cheꞌn Crist coꞌ ndluꞌ xá mod lyáꞌ mèn loo conꞌ ryes por cón cheꞌn Crist. Mtlon, mque teeꞌen par ned ciuda Jerusalén. No ngua que teeꞌen leꞌn rye yèezyaꞌ coꞌ nac par ned làaz mèn ilírico.
\v 20 Tataa mod mnibeꞌen loo lezon no mdoo lezon ngua lon yalbàn cón cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes loo mèn coꞌ tarte gòn cón cheꞌn Crist ryethe lugar tac imblyasten ngon yalbàn loo mèn coꞌteꞌ ngua loleꞌ tedib mèn yalbàn.
\v 21 Ndxeꞌlequeꞌ, ngòca xal ndub diꞌs loo libr coꞌ nac xtiꞌs Diox coꞌ gunii Sayi, diꞌs coꞌ mbez:
\pi1 Loo mèn coꞌ inacte mèn nación Israel coꞌ tarte yath yèn cón cheꞌn diꞌs ndac, coꞌ nac cón cheꞌn Jesucrist, mèna huiꞌ loo Jesucrist. No gòn mèna diꞌs no taꞌ mèna cuent cón cheꞌn Jesucrist, mèn coꞌ thidtene tarte gòn no coꞌ tarte taꞌ cuent cón cheꞌn Jesucrist.
\s Pab ngue li xtùuz ya too naa Pab mèn coꞌ ndxelaꞌs loo cón cheꞌn Tad Jesucrist, mèn coꞌ ngo ban ciuda Rom.
\p
\v 22 Por ngua que teeꞌen huax lugar, yende mod ndaꞌi lugar loon par ngal neen máa guꞌ par nedrèꞌ.
\v 23 Per nalleꞌ ya ngololeꞌ mxoꞌf zinꞌen zinꞌ coꞌ mxoꞌf zinꞌen coꞌteꞌ nzon ndxèꞌ. Ndxàcleꞌ huax línꞌ ndryoꞌ ndlyenꞌ lezon ndlyazen go non guꞌ par nedrèꞌ.
\v 24 Por cona, coꞌseꞌ ryoꞌen trèꞌ, ndan par ned làaz mèn nación Españ, sangriiden par gal neen máa guꞌ tac ndub quee lezon ñeen máa guꞌ. Leꞌ sya, coꞌseꞌ ngolo mdan gust lezon guneen máa guꞌ par nedrèꞌ, sya, ndub quee lezon lyath no guꞌ daa con ndxep conꞌ coꞌ naquin daa coꞌ nde che loon par ned ga que teeꞌen.
\v 25 No nalleꞌ ndoo beꞌleꞌ gan par ciuda Jerusalén. No sanghuen tmi coꞌ mthop mèn yèezyaꞌ cheꞌn làaz mèn macedon no mèn yèezyaꞌ cheꞌn làaz mèn acay, mèn coꞌ mdoo lezoꞌ lyath no hues xtàa coꞌ nac mèn coꞌ ndxelaꞌs coꞌ nde che conꞌ loo, mèn coꞌ nac mèn cheꞌn ciuda Jerusalén.
\v 26 Tac mèn yèezyaꞌ cheꞌn làaz mèn macedon no mèn yèezyaꞌ cheꞌn làaz mèn acay coꞌ ndxelaꞌs mbli xtùuz thìb conꞌ ndac par mthop mèna tmi par taꞌ gòn mèna tmia loo prob mèn coꞌ ndxàc hues xtàa mèna por cón cheꞌn Crist coꞌ ndyac yaltìi, mèn coꞌ nzo ban ciuda Jerusalén.
\v 27 Mxac mèn yèezyaꞌ cheꞌn làaz mèn macedon no mèn yèezyaꞌ cheꞌn làaz mèn acay huenqueꞌ nac coꞌ mbli mèna. Tac mèna ndenꞌ ndxàalqueꞌ lyath no mèna mèn coꞌ nac mèn nación Israel coꞌ ndxelaꞌs loo cón cheꞌn Jesucrist, mèn coꞌ nzo ban ciuda Jerusalén. Tataa mdenꞌ mèna tac por cón cheꞌn mèn nación Israel coꞌ ndxelaꞌs ngòc conꞌ ndac cheꞌn Diox loo mèn coꞌ inacte mèn nación Israel. Tac texal mbli mèn coꞌ ndxelaꞌs, mèn coꞌ nac mèn nación Israel, par mblyath no mèna mèn coꞌ inacte mèn nación Israel con cón cheꞌn Diox coꞌ non mèn nación Israel no coꞌ ndaꞌ mèn nación Israel cuent, por cona, ndxàalqueꞌ lyath no mèn coꞌ inacte mèn nación Israel mèn coꞌ nac mèn nación Israel con conꞌ coꞌ nac cheꞌnpeꞌ mèn coꞌ inacte mèn nación Israel coꞌseꞌ nde che conꞌ loo mèn coꞌ ndxelaꞌs, mèn coꞌ nac mèn nación Israel.
\v 28 Por cona, coꞌseꞌ yilo tan tmia loo mèn nación Israel coꞌ ndxelaꞌs, coꞌ nzo ban ciuda Jerusalén, tmi coꞌ mthop mèn yèezyaꞌ cheꞌn làaz mèn macedon no mèn yèezyaꞌ cheꞌn làaz mèn acay coꞌ ndxelaꞌs loo cón cheꞌn Jesucrist, sya, non mèn nación Israela, lìcqueꞌ ngolaꞌs guꞌ, ne, guꞌ coꞌ nac mèn coꞌ inacte mèn nación Israel loo Jesucrist por cón cheꞌn mèn nación Israel. Syareꞌ, tenen ned par ñeen máa guꞌ. Yiloa, tenen ned ndan par ned leꞌn yèezyaꞌ cheꞌn làaz mèn españ.
\v 29 Ngobeꞌen loo lezon, coꞌseꞌ gal neen máa guꞌ par nedrèꞌ, anzeꞌf thìb conꞌ ndac li Diox loon par gon yalbàn cón cheꞌn diꞌs ndac cheꞌn Crist loo guꞌ.
\p
\v 30 Lyazen tedib conꞌ, ne, mèn huesen por cón cheꞌn Crist, guꞌ coꞌ nac mèn gulàaz mèn ciuda Rom, ñaꞌben loo guꞌ por lèe cheꞌn Tad Jesucrist, no por mod coꞌ ndli Xpii Natúꞌ par nqueꞌ lezoꞌ naꞌ Diox no nqueꞌ lezoꞌ naꞌ ñèe naꞌ hues xtàa naꞌ, ñaꞌben loo guꞌ thidte queltàa no guꞌ daa loo zinꞌ coꞌ mxoꞌf zinꞌ no guꞌ daa, loo zinꞌ coꞌ mxoꞌf zinꞌ Diox loon loo cón cheꞌn diꞌs ndac cheꞌn Crist, ned nque teeꞌen par cuez guꞌ Diox por daa, ne.
\v 31 Bnaꞌb guꞌ loo Diox leꞌ Diox quenap daa loo mèn coꞌ tarte yilaꞌs coꞌ nac mèn naad no mèn nguud, mèn coꞌ nac mèn yèezyaꞌ cheꞌn làaz mèn jude. No tolo gurez guꞌ Diox leꞌ mèn coꞌ ndxelaꞌs coꞌ nzo ban ciuda Jerusalén, tyal mèna càayaꞌ mèna tmi coꞌ mtelꞌ mèna loon con huen diꞌs no con huen cuent
\v 32 par tataa mod cheleꞌ Diox nee lezoꞌ, con huen diꞌs no con huen cuent càayaꞌ mèna tmi. Cheleꞌ mèn tataa mcàayaꞌ tmia, leꞌ sya, huen nzo lezon gal neen máa guꞌ par nedrèꞌ, no axta nagàl yo lezon gal neen máa guꞌ.
\v 33 No ndlyazen leꞌ Diox, coꞌ ntuꞌ no coꞌ ntàl lezoꞌ mèn, no Diox coꞌ ndli par nagàl yo lezoꞌ mèn, Diox li cue ban guꞌ rye nda guꞌ no rye ndyeꞌth guꞌ làth xtàa guꞌ. Taandxèꞌ gàca loo guꞌ, ey. Thìba conꞌ ndxèꞌ.
\c 16
\s Pab ngue nii Diox loo mèn loo cart ndxèꞌ.
\p
\v 1 Leꞌ tediba na, ngue telꞌen diꞌs no ngue tanꞌen diꞌs loo cart ndxèꞌ loo guꞌ, bli guꞌ cas no nabeꞌste go no guꞌ xaꞌgot coꞌ lèe Febe coꞌ ndxàc ftaꞌn naꞌ por cón cheꞌn Crist. Tac xaꞌgota nxoꞌf zinꞌ zinꞌ leꞌn templ coꞌ ndub leꞌn yèez Cencr.
\v 2 Ftaꞌ guꞌ lugar yòo gunaꞌ làth guꞌ no nabeꞌste yo no guꞌ gunaꞌ por lèe cheꞌn Tad Crist. Bli guꞌ conꞌ ndxèꞌ xalqueꞌ ndxàal li mèn coꞌ ndxàc hues xtàa por cón cheꞌn Crist. No blyath no guꞌ gunaꞌ loo chol conꞌ coꞌ nde che loo gunaꞌ. Tac gunaꞌa nde teeleꞌ ndlyath no huax mèn coꞌ nde che conꞌ loo. No ndlyath no gunaꞌ yub daa huax vez.
\p
\v 3 Gunii guꞌ Diox loo Priscil coꞌ nac saꞌl Aquil, no gunii guꞌ Diox loo Aquil. Ryop saꞌl xaꞌa thidte mxoꞌf zinꞌ no daa loo zinꞌ cheꞌn Crist Jesús.
\v 4 Ryop saꞌl xaꞌ mdaꞌ guth yalnaban xaꞌ par gath xaꞌ par mteláꞌ xaꞌ daa coꞌseꞌ mblyáꞌ mblyáꞌ nguth mèn daa. Por cona, indxathlasten mbezen Diox quix guꞌ loo xaꞌ. No iante daa mbez Diox quix guꞌ loo xaꞌ. Ndxeꞌlequeꞌ, ryete mèn hues naꞌ coꞌ ndxelaꞌs loo Diox coꞌ inacte mèn nación Israel, ryete liz Diox leꞌn ryete yèezyaꞌ cheꞌn làaz mèna, ne, mbez Diox quix guꞌ loo xaꞌ por mteláꞌ ryop saꞌl xaꞌ daa loo conꞌ ryes.
\v 5 Ndlyazen ne, gunii guꞌ Diox loo rye mèn coꞌ ndxàc hues xtàa naꞌ por cón cheꞌn Crist, mèn coꞌ nqueltàa liz ryop saꞌl Priscil no Aquil. Gunii guꞌ Diox loo amiu daa, Epenet, coꞌ anzeꞌf nqueꞌ lezon ñèen. Epenet nac thìb mbiꞌ coꞌ nerlequeꞌ ngolaꞌs loo cón cheꞌn Crist coꞌ nac mèn yèezyaꞌ cheꞌn làaz mèn acay.
\v 6 Gunii guꞌ Diox loo Mari coꞌ más ndli nxoꞌf zinꞌ zinꞌ cón cheꞌn Crist làth guꞌ, ne.
\v 7 Gunii guꞌ Diox loo Andron no loo Jun coꞌ nac mèn gulàaz daa. Ryop mbiꞌa thidte mqueꞌ leziꞌf con daa. Ingaꞌste ryop mbiꞌa làth myenꞌ coꞌ mtelꞌ Crist coꞌ ndxeꞌ diꞌs cheꞌn Crist loo mèn. Ryop mbiꞌa nac xaꞌ coꞌ ngolaꞌs loo Crist no loo cón cheꞌn Crist ndoore yilazen loo Crist.
\p
\v 8 Ndlyazen ne, gunii guꞌ Diox loo Ampl, coꞌ nac amiu daa, coꞌ anzeꞌf nqueꞌ lezon ñèen loo cón cheꞌn Tad Crist.
\v 9 Gunii guꞌ Diox loo Urban coꞌ ndlyath no nuꞌ loo zinꞌ coꞌ nxoꞌf zinꞌ nuꞌ loo Crist Jesús. Gunii guꞌ Diox loo Estac coꞌ nqueꞌ lezon ñèen, ne.
\v 10 Gunii guꞌ Diox loo Apel. Apel nde teeleꞌ ndluꞌ thìb mod no tedib mod xal, lìcqueꞌ, ndxelaꞌs Apel loo Crist no loo cón cheꞌn Crist. No ndlyazen gunii guꞌ Diox loo rye mèn guliz Aristob.
\v 11 Gunii guꞌ Diox loo Herodión coꞌ nac mèn gulàaz daa. Gunii guꞌ Diox loo mèn guliz Narcis coꞌ ndxelaꞌsqueꞌ loo Tad Crist, ne.
\v 12 Gunii guꞌ Diox loo Trifen no loo Trifos tac ryop gunaꞌa thidtenequeꞌ nxoꞌf zinꞌ zinꞌ cón cheꞌn Tad Crist. Gunii guꞌ Diox loo Persid, coꞌ ndxàc ftaꞌn naꞌ por cón cheꞌn Crist, coꞌ anzeꞌf nqueꞌ lezon ñèen. Tac gunaꞌa anzeꞌf mbli zinꞌ cón cheꞌn Tad Crist, ne.
\v 13 Gunii guꞌ Diox loo Ruf coꞌ ndxelaꞌs, coꞌ ingaꞌste loo cón cheꞌn Tad Crist làth mèn no loo xnaꞌ Ruf coꞌ ndlin cuent nac xal xnan.
\v 14 Gunii guꞌ Diox loo Asincret no loo Flegont no loo Herm no loo Patrob no loo Hermes no loo taamas hues xtàa naꞌ por cón cheꞌn Crist coꞌ nzo no rye mèna.
\v 15 Ndlyazen nii guꞌ Diox, ne, loo Filog no loo thìb xaꞌgot coꞌ lèe Jul no loo Nereꞌ no loo ftaꞌn Nereꞌ no loo xaꞌgot coꞌ lèe Olimp no loo ryete taamas mèn coꞌ ndxàc hues naꞌ coꞌ nzo làth mèna, ne.
\p
\v 16 Gunii guꞌ Diox loo thìb xtàa guꞌ no loo tedib xtàa guꞌ xalqueꞌ nac mod coꞌ ngueꞌs ncàa guꞌ yen xtàa guꞌ. Ryete mèn coꞌ nqueltàa loo cón cheꞌn Crist coꞌteꞌ nzon ndxèꞌ ngue nii Diox loo guꞌ.
\p
\v 17 Naꞌben loo guꞌ, mèn huesen por cón cheꞌn Crist, huiꞌ guꞌ no blaꞌs guꞌ loo mèn coꞌ ndli par ndxàc chop ned mèn loo hues xtàa mèn. Ndxàc mèna mèn coꞌ ncaꞌ no mèn coꞌ ntauꞌ loo xtàa mèn loo cón cheꞌn Crist. Conꞌ coꞌ ndli mèna ntauꞌ no ncaꞌ loo diꞌs ndac coꞌ nac coꞌ mtéꞌth guꞌ coꞌ ndluꞌ mod coꞌ nzo ban guꞌ. Más huen, groꞌ xàꞌ guꞌ loo mèna.
\v 18 Tac ryete mèna indlide sirv loo Tad Jesucrist naꞌ. Ndxeꞌlequeꞌ, ndli mèna sirv ante loo conꞌ ndryoꞌ ndlyenꞌ lezoꞌpeꞌ mèna. Nadoꞌ diꞌs nadoꞌ cuent ndli mèna par yòo lezoꞌ mèn coꞌ nac mèn naxèn no mèn nacholꞌ par tataa mod quedìi mèna prob mèn coꞌ nac mèn naxèn no mèn nacholꞌ.
\p
\v 19 Ndxath ndxèn loo ryete mèn xá mod ndyubdiꞌs guꞌ loo Tad. Por cona, ndyac lezon ñèen guꞌ. No sate más ndlyazen tyub xnìi yéc guꞌ no tyub xnìi lezoꞌ guꞌ no altant cue guꞌ par li guꞌ conꞌ coꞌ nac conꞌ ndac. Ndxeꞌlequeꞌ, indlyasten gàc guꞌ mèn coꞌ ndli conꞌ yeꞌrsinꞌ.
\v 20 Diox coꞌ ntuꞌ ntàl lezoꞌ mèn no coꞌ ndli par nagàl yo lezoꞌ mèn, Dioxa tolo tonꞌ rye conꞌ yeꞌrsinꞌ coꞌ ngue li Mebizya làth guꞌ par neꞌlide Mebizya gan gàc guꞌ chop ned mèn loo conꞌ coꞌ ngue niin loo guꞌ ndxèꞌ. Lyazen leꞌ Tad Jesucrist naꞌ tolo li anggàc conꞌ ndac loo guꞌ.
\p
\v 21 Timote coꞌ anzeꞌf ndlyath no daa loo zinꞌ coꞌ nxoꞌf zinꞌen loo Crist ngue nii Diox loo guꞌ. Lus no Jasón no Sosipat, ne, coꞌ nac mèn gulàaz daa ngue nii Diox loo guꞌ.
\p
\v 22 Daa, coꞌ lèe Ters, coꞌ nac secretar loo Pab, coꞌ mqueꞌ yeꞌs coꞌ nac cart ndxèꞌ loo guꞌ, daa ngue nii Diox loo guꞌ loo cón cheꞌn Tad Crist, ne.
\p
\v 23 Ngue nii mbiꞌ coꞌ lèe Gay Diox loo guꞌ. Liz Gay nac posad daa nalleꞌ. Liz Gay nqueltàa mèn coꞌ ndxelaꞌs coꞌseꞌ mbez mèn Diox. Erast, coꞌ nac tesorer cheꞌn mèn ciuda Rom, ngue nii Diox loo guꞌ, ne. Mbiꞌ coꞌ lèe Cuart, coꞌ nac hues naꞌ por lèe Tad Crist, ngue nii Diox loo guꞌ, ne.
\p
\v 24 Lyazen leꞌ Tad Jesucrist tolo li par anggàc conꞌ ndac loo guꞌ. Taandxèꞌ gàca loo guꞌ, ndèe guꞌ.
\s Pab ngue nii lult diꞌs coꞌ nac diꞌs natúꞌ cón cheꞌn Diox loo mèn.
\p
\v 25 Tolo ndlyazen gab naꞌ loo hues xtàa naꞌ: Diox roo Diox xèn nac Diox, Diox coꞌ ndli par tolo cue nèe guꞌ loo cón cheꞌn Crist por cón cheꞌn diꞌs ndac coꞌ ngon yalbàn no cón cheꞌn Crist coꞌ ndluꞌen loo guꞌ. Conꞌ coꞌ nac cón cheꞌn Crist coꞌ ndluꞌen loo guꞌ ndxèꞌ thidte nac no thidte ndyee xalqueꞌ mbli Diox par mblo xoꞌf Diox conꞌ coꞌ ngo casloo loo Diox axta coꞌseꞌ mtlo mblec Diox no mxènꞌ Diox izlyoꞌ.
\v 26 Per nalleꞌ ryethe conꞌ mbli Diox póla ndryo xoꞌf loo mèn por cón cheꞌn libr coꞌ nac xtiꞌs Diox coꞌ ngòc libr coꞌ mqueꞌ mèn coꞌ mdeꞌth diꞌs coꞌ ndxab Diox yeꞌs. Mqueꞌ mèn coꞌ mdeꞌth diꞌs yeꞌs xalqueꞌ ngòc diꞌs coꞌ mnibeꞌ Diox, Diox coꞌ nac Diox thidtene. Ryethe conꞌ coꞌ ngo casloo loo Diox póla cón cheꞌn diꞌs ndac, leꞌi ndryo xoꞌf loo mèn rye nación dib athu loo izlyoꞌ leꞌn tiemp ndxèꞌ par yilaꞌs mèn cón cheꞌn diꞌs ndac no tyubdiꞌs mèn loo Diox xal mbez diꞌs ndac.
\p
\v 27 Lyazen leꞌ loo Diox coꞌ nac thidte Diox, no Diox coꞌ ndxácpeꞌ alux conꞌ, loo Diox gab mèn leꞌ Diox nac Diox roo Diox xèn thidtene por cón cheꞌn Tad Jesucrist. Taandxèꞌ gàca, ndee guꞌ.