\id 1CO
\ide UTF8
\h 1 CORINTIOS
\toc1 1 CORINTIOS
\mt Ner Cart Coꞌ Mqueꞌ Pab Yeꞌs Loo Mèn Coꞌ Nqueltàa Loo Cón Cheꞌn Diox Leꞌn Ciuda Corint
\c 1
\s Trèꞌ ndluꞌ leꞌ Pab ngue queꞌ yeꞌs loo mèn coꞌ nqueltàa loo cón cheꞌn Diox leꞌn ciuda Corint.
\p
\v 1 Daa, Pab, nac thìb mbiꞌ coꞌ mblo lèe Diox no coꞌ mcui Diox par gàc daa thìb mbiꞌ coꞌ hueꞌ diꞌs cheꞌn Jesucrist. Mtelꞌ Diox daa xal gunee lezoꞌ Diox. Ryop nuꞌ Sost coꞌ ndxàc hues naꞌ por cón cheꞌn Crist, nuꞌ ngue nii Diox loo guꞌ par nedrèꞌ loo yeꞌs coꞌ mzin loo guꞌ ndxèꞌ.
\v 2 Ngue queꞌen yeꞌs ndxèꞌ loo guꞌ, guꞌ coꞌ thidte nqueltàa par mbez guꞌ Diox, guꞌ coꞌ nzo ban leꞌn ciuda Corint. Ngue niin loo guꞌ: Guꞌ nac mèn coꞌ nac cheꞌnpeꞌ Diox por thidte nqueltàa guꞌ loo Crist Jesús. Por cón cheꞌn Crist, conꞌa ngurez Diox guꞌ no mblo lèe Diox guꞌ leꞌ guꞌ ante cue ban loo Diox por ngòc guꞌ mèn coꞌ ngro xàꞌpeꞌ loo ryethe conꞌ coꞌ nac cón cheꞌn xab izlyoꞌ con ryete mèn coꞌ nzo ban dib athu loo izlyoꞌ, mèn coꞌ mbez Diox por lèe cheꞌn Tad Jesucrist naꞌ. Tad Jesucrist nac Tad naꞌ. No nac Tad Jesucrist Tad mèna, ne.
\v 3 Ndlyazen leꞌ Diox xud naꞌ no Tad Jesucrist naꞌ tolo li anggàc conꞌ ndac loo guꞌ. Ndlyazen, ne, angli Diox no Tad Jesucrist naꞌ leꞌ guꞌ nagàl yo lezoꞌ loo Diox no cue ban guꞌ rye nda guꞌ no rye ndyeꞌth guꞌ làth xtàa guꞌ.
\s Trèꞌ ndluꞌ cón cheꞌn conꞌ ndac coꞌ ndxàc loo mèn por cón cheꞌn Jesucrist.
\p
\v 4 Toloqueꞌ mbezen loo Diox: Diox quix Uꞌ, Diox, por cón cheꞌn guꞌ tac Diox ndli angndxàc conꞌ ndac loo guꞌ. Conꞌ ndac coꞌ ndxàc loo guꞌa, ndxàca por cón cheꞌn Crist Jesús.
\v 5 Diox mbli leyꞌ guꞌ axta plóthe tac thidte nac guꞌ con Jesucrist par non guꞌ no nanee guꞌ conꞌ coꞌ nac conꞌ lìcpeꞌ no par ndxác guꞌ luꞌ guꞌ loo mèn no taꞌ guꞌ cuent cón cheꞌn coꞌ nac lìcpeꞌ loo mèn.
\v 6 Cona, ngue niin loo guꞌ loo yeꞌs ndxèꞌ: Diꞌs coꞌ nde teeleꞌ ndaꞌ mèn cuent loo guꞌ no ndeꞌth mèn diꞌsa loo guꞌ cón cheꞌn Jesucrist, ngolaꞌs guꞌ diꞌsa por mbli guꞌ cuent lìcpeꞌ nac diꞌsa.
\v 7 No por ngolaꞌspeꞌ guꞌ loo Crist, yende chó conꞌ ndxàc falt loo guꞌ cón cheꞌn conꞌ coꞌ angngroꞌ lezoꞌ Diox angndli Diox loo mèn coꞌ ndxelaꞌs láth nzi bed guꞌ no láth nzi quee lezoꞌ guꞌ zin huiz no gàc huiz coꞌseꞌ yiꞌth xi Tad Jesucrist naꞌ.
\v 8 Tad Jesucrist naꞌ tolo li nèe guꞌ loo cón cheꞌn Tad Jesucrist axta coꞌseꞌ gàc huiz yúꞌ loo Tad Jesucrist naꞌ loo mèn par gàca loo guꞌ yende chó mèn quexùꞌ queꞌ fals loo guꞌ huiza.
\v 9 Diox liqueꞌ ryethe conꞌ mcàbgòn Diox li Diox loo mèn. Por cona, yub Diox mblo lèe guꞌ no mcui Diox guꞌ par thidte gàc cheꞌn guꞌ ryethe coꞌ nac cheꞌn Tad Jesucrist naꞌ coꞌ nac xganꞌpeꞌ Diox.
\s Mèn coꞌ nqueltàa loo cón cheꞌn Diox ngòc chop ned mèn.
\p
\v 10 Per nalleꞌ ñaꞌben loo guꞌ no coꞌxen loo guꞌ, mèn huesen por lèe Tad Jesucrist naꞌ: Ndlyazen thidte gàc guꞌ, no thidte li guꞌ xtùuz, no thidte yòo lezoꞌ guꞌ par tenꞌ guꞌ cón cheꞌn Tad Jesucrist naꞌ. No indlyasten gàc rol guꞌ loo cón cheꞌn Tad Jesucrist naꞌ. Ndxeꞌlequeꞌ, ndlyazen thidte queltàa guꞌ no thidte gàc yéc guꞌ no thidte gàc lezoꞌ guꞌ par tenꞌ guꞌ thidte conꞌ leꞌn lezoꞌ guꞌ loo cón cheꞌn Tad Jesucrist naꞌ.
\v 11 Taandxèꞌ ngue niin loo guꞌ, mèn huesen, tac mèn coꞌ nac mèn guliz Cloé mdaꞌ cuent loon leꞌ guꞌ ngyoo làth xtàa guꞌ.
\v 12 Diꞌs coꞌ mdaꞌ mèn guliz Cloé cuent loon cón cheꞌn guꞌ nac leꞌ guꞌ mbez loo xtàa guꞌ: Thìb ned guꞌ ndaꞌ lad cheꞌn Pab, coꞌ nac daa. Tedib ned guꞌ na, mbez loo xtàa guꞌ leꞌ guꞌ ndaꞌ lad cheꞌn Apol. Tedib ned guꞌ na, mbez loo xtàa guꞌ leꞌ guꞌ ndaꞌ lad cheꞌn Pedr. Tedib ned guꞌ na, mbez loo xtàa guꞌ leꞌ guꞌ ndaꞌ lad cheꞌn Crist.
\v 13 ¿Xá mod nac cona? ¿Chéꞌ ngue li guꞌ cuent leꞌ Crist ñibeꞌ loo ndxepte guꞌ no maste, càꞌ? Yende xàa. Yende mod gàca tataa loo Crist, ey. ¿Chéꞌ ngue li guꞌ cuent leꞌ daa, coꞌ nac Pab, mquée loo cruz por cón cheꞌn guꞌ, càꞌ? Yende mod gàca tataa, ne. O ¿chéꞌ ngue li guꞌ cuent ngòc bautizar guꞌ por lèe daa, coꞌ nac Pab, càꞌ? Neꞌ neꞌ yen mod gàca tataa, ne. ¡Máa yob yéc guꞌ na, mèn Corint!
\v 14 Mbezen Diox quix Uꞌ, Diox, loo Diox leꞌ daa neꞌnglide bautizar nec thìb guꞌ. Ante mblin bautizar chopte mèn no maste, coꞌ nac Crisp no Gay.
\v 15 No por cona, nec thìb guꞌ ñee loon leꞌ guꞌ ngòc bautizar por daa, coꞌ nac Pab.
\v 16 Ante nteꞌ lezon leꞌ daa mbli bautizar mèn guliz Estef, ne. Per neꞌtyede lezon chéꞌ nzoreꞌ chó más mèn coꞌ mblin bautizar.
\v 17 Neꞌntelꞌte Crist daa par mxoꞌf zinꞌen zinꞌ par lin bautizar mèn. Ndxeꞌlequeꞌ, mtelꞌ Crist daa par gon yalbàn cón cheꞌn diꞌs ndac coꞌ nac cheꞌn Diox par lyáꞌ mèn loo conꞌ ryes thidtene. Per neꞌndaden cuent cón cheꞌn diꞌs ndac xal nac diꞌs coꞌ ndeꞌf diꞌs ndxác tínꞌ mèn par neꞌgabte mèn anxleꞌ nac ryethe conꞌ no yende cón ntac ryethe conꞌ coꞌ ngòc loo Crist coꞌseꞌ mqueꞌ mèn Crist loo cruz.
\s Crist ndxàp ryethe conꞌ roo conꞌ xèn coꞌ nac cheꞌnpeꞌ yub Diox laꞌs nii Crist no laꞌs yaꞌ Crist. No ndxác Crist ryethe conꞌ coꞌ ndxác Diox.
\p
\v 18 Per mèn coꞌ nauꞌ yéc no mèn coꞌ nauꞌ loo coꞌ nac leque mèn coꞌ nzi tee lux loo Diox, coꞌ nee diꞌs, mèn coꞌ tith ryo xàꞌ loo cón cheꞌn Diox par tyactìi mèna thidtene yiloa, mèna mbez leꞌ mèn coꞌ ngo yalbàn cón cheꞌn xá mod no cón cheꞌn chonon mqueꞌ mèn Crist loo cruz nquée mbii yéc. Per loo mèn coꞌ mblyáꞌleꞌ loo conꞌ ryes, coꞌ nee diꞌs nac naꞌ, loo mèna cón cheꞌn yalbàna nac coꞌ ndaꞌ cuent cón cheꞌn conꞌ roo conꞌ xèn coꞌ nzo laꞌs nii Diox no coꞌ nzo laꞌs yaꞌ Diox.
\v 19 Tac diꞌs coꞌ ndub loo libr coꞌ nac xtiꞌs Diox mbez:
\pi1 Daa li leꞌ mèn coꞌ ndeꞌf diꞌs ndxác yende cón ntac coꞌ ndxác mèna. No lin yende cón ntac xtùuz mèn coꞌ ndli mèna xtùuz.
\p
\v 20 ¿Chó sirv ndli mbez mèn coꞌ ndxác, no mèn coꞌ nac maistr, no mèn coꞌ noo noo ncàa cuent cón cheꞌn chol diꞌs coꞌ nac cheꞌn izlyoꞌ ndxèꞌ, àꞌ? Pues, rye coꞌ ndxác mèn cheꞌn izlyoꞌ ndxèꞌ, Diox mbli ngòc rye coꞌ ndxác mèna xal conꞌ coꞌ yende chó juis. No mbli Diox ngòc mèna xal mèn coꞌ nquée mbii yéc loo cón cheꞌn Diox.
\v 21 Diox coꞌ thidte ndxác nanee cón ndli Diox, Diox mbli no neꞌndaꞌde Diox lugar leꞌ mèn cheꞌn izlyoꞌ taꞌ cuent cón cheꞌn Diox ante por conꞌ coꞌ ngo mèn cuent ndxác mèn no mtéꞌth mèn coꞌ nac conꞌ cheꞌnpeꞌ izlyoꞌ ndxèꞌ. Más quee lezoꞌ Diox nteláꞌ Diox mèn coꞌ ngòp yalxlaꞌs loo Diox loo conꞌ ryes ante por mbìn mèn cón cheꞌn diꞌs ndac cheꞌn Diox, mastaleꞌ mdenꞌ mèn coꞌ ndeꞌf diꞌs ndxác cón cheꞌn izlyoꞌ ndxèꞌ leꞌ mèn coꞌ ngo yalbàn cón cheꞌn diꞌs ndac cheꞌn Crist nquée mbii yéc coꞌseꞌ ngo mèna yalbàn.
\p
\v 22 Naneequeꞌ naꞌ no ndaꞌqueꞌ naꞌ cuent leꞌ mèn nación Israel ndlyaꞌs a la fuerz li nuꞌ chol yalguzyeꞌ par alithe huiꞌ mèna ndxàc yalguzyeꞌ loo mèna. No naneequeꞌ naꞌ no ndaꞌqueꞌ naꞌ cuent leꞌ mèn nación Grieg na, ndlyaꞌsqueꞌ mèna gòn mèna no tolo ñee mèna cón cheꞌn chol conꞌ cub coꞌ nac coꞌ ndli mèn xtùuz par más tolo gác mèn nación Grieg.
\v 23 Per ndxeꞌlequeꞌ, nuꞌ ngo yalbàn cón cheꞌn diꞌs ndac cón cheꞌn xá mod no cón cheꞌn chonon mqueꞌ mèn Crist loo cruz. No coꞌseꞌ ndxòn mèn nación Israel cón cheꞌn diꞌs ndac ndxèꞌ, ale ndenꞌ mèna ngòc nguàal conꞌ nac diꞌsa ndyac mèna. Leꞌ loo mèn coꞌ inacte mèn nación Israel na, ndyac mèna leꞌ cón cheꞌn Crist coꞌ ndxo yalbàn loo mèn nac xal diꞌs coꞌ ndyoodiꞌs thìb mèn coꞌ nquée mbii yéc.
\v 24 Per loo mèn coꞌ mbrez Diox no coꞌ mblec Diox no coꞌ mblo lèe Diox par yilaꞌs mèna loo Diox por cón cheꞌn Jesucrist, que nac mèna mèn nación Israel, que nac mèna mèn coꞌ inacte mèn nación Israel, loo mèna Crist nac xaꞌ coꞌ ñibeꞌpeꞌ loo ryethe conꞌ por cón cheꞌn conꞌ roo conꞌ xèn coꞌ nzo laꞌs nii Diox no coꞌ nzo laꞌs yaꞌ Diox. No mbli Diox thidtene ndxác Crist ryethe conꞌ coꞌ ndxácpeꞌ Diox.
\v 25 Tac ryethe conꞌ coꞌ mbez mèn nac cón cheꞌn Diox coꞌ mxoꞌf zinꞌ Diox loo Crist, mèn coꞌ nziriꞌ loo izlyoꞌ ndli cuent yende chó juis conꞌa. Per ndxeꞌlequeꞌ, zinꞌ coꞌ mxoꞌf zinꞌ Diox loo Crist nac coꞌ ndluꞌ loo mèn leꞌ Diox axta arid ndxác tínꞌ. No coꞌseꞌ ndli zinꞌ Diox thìb conꞌ coꞌ iñaade li zinꞌ Diox, ncàba thìb conꞌ más conꞌ roo conꞌ xèn leque chol conꞌ coꞌ ndxác chol mèn li mèn.
\v 26 Per huiꞌ guꞌ nexa, mèn huesen por cón cheꞌn Crist: Ftaꞌ guꞌ cuent coꞌ huenlequeꞌ leꞌ Diox ngurez guꞌ no mblo xàꞌleꞌ Diox guꞌ mastaleꞌ ndxepte guꞌ nac mèn coꞌ ndxác xal ndli mèn coꞌ nac cheꞌn izlyoꞌ ndxèꞌ cuent ndxác mèn. Neꞌ neꞌ inac guꞌ mèn coꞌ ndxàp huax conꞌ roo conꞌ xèn laꞌs nii guꞌ no laꞌs yaꞌ guꞌ. Neꞌ neꞌ inac guꞌ mèn coꞌ nde bin coꞌ nxyoꞌf lèe nxyoꞌf xtiꞌs làth guꞌ.
\v 27 Ndxeꞌlequeꞌ, Diox ngue cui mèn coꞌ nac mèn lad yox, coꞌ nac mèn prob, coꞌ nac mèn coꞌ thidtene yende cón mtéꞌth coꞌseꞌ ngua mèna scuel, par yòo mèna loo cón cheꞌn Diox. Leꞌ sya, tataa mod tethon Diox mèn cheꞌn izlyoꞌ coꞌ ndeꞌf diꞌs ndxác. No ngue cui Diox mèn coꞌ iñaade nzo fuerz par tethon Diox mèn cheꞌn izlyoꞌ coꞌ ndli cuent anzeꞌf ntac mèna tac ndxàp mèna fuerz.
\v 28 Diox ngue cui mèn coꞌ yende cón ntac, mèn coꞌ nauꞌ loo nauꞌ yéc no mèn coꞌ ale leque xtàa mèn mtèꞌb par xoꞌf zinꞌ Diox thìb zinꞌ loo mèna par li Diox leꞌ mèn coꞌ nauꞌ loo nauꞌ yéca tethon mèn coꞌ ndeꞌf diꞌs ndxác. No gàc mèn coꞌ ndeꞌf diꞌs ndxác mèn coꞌ yende cón ntac loo xtàa mèn.
\v 29 Tataa ngue li Diox loo mèna par nec thìb mèna neꞌtyeꞌste loo Diox coꞌseꞌ tub rez Diox cón cheꞌn mèn.
\v 30 Yub Diox mbli thidte ngòc guꞌ con Crist Jesús. Por conꞌ coꞌ mbli Diox loo Crist Jesús, nac Crist Jesús xaꞌ coꞌ ndluꞌ loo naꞌ cón cheꞌn coꞌ nac lìcpeꞌ yalndxác cheꞌn Diox. Por conꞌ coꞌ mbli Diox, nac Crist Jesús xaꞌ coꞌ mtelì naꞌ no coꞌ mtembìi naꞌ par nac naꞌ mèn nalì no nac naꞌ mèn nambìi loo Diox. No por conꞌ mbli Diox, nac Crist Jesús xaꞌ coꞌ mbloꞌ xàꞌ naꞌ loo cón cheꞌn xab izlyoꞌ par nac naꞌ mèn cheꞌnpeꞌ Diox. No mbli Diox nac Crist Jesús xaꞌ coꞌ mdix cón cheꞌn xquin naꞌ no xtol naꞌ par tataa mod mbli Crist Jesús loo naꞌ neꞌquexùꞌde Diox naꞌ por cón cheꞌn xquin naꞌ no xtol naꞌ.
\v 31 Tataa mbli Diox no Tad Jesucrist naꞌ loo naꞌ par ngòca xal ndub diꞌs loo libr coꞌ nac xtiꞌs Diox coꞌ mbez:
\pi1 Cheleꞌ chol mèn lyaꞌs taꞌ gust lezoꞌ mèn coꞌseꞌ tyoodiꞌs mèn cón cheꞌn chol conꞌ, más huen xexte gàc mèna cón cheꞌnpeꞌ mèna. Más huen taꞌ mèna gust lezoꞌ mèn cón cheꞌn conꞌ roo conꞌ xèn coꞌ mbli no Diox mèna.
\c 2
\s Pab ngue go yalbàn cón cheꞌn Crist coꞌ mqueé loo cruz.
\p
\v 1 Per ndxeꞌlequeꞌ, mèn huesen por cón cheꞌn Crist, coꞌseꞌ mbalen loo guꞌ ner vez, no coꞌseꞌ mdoodiz non guꞌ, no coꞌseꞌ mblon yalbàn loo guꞌ, no coꞌseꞌ mdethen cón cheꞌn Diox loo guꞌ, neꞌndoodisten gáp gáp diꞌs loo guꞌ. Neꞌ neꞌ ngòon làth guꞌ xal mèn coꞌ ndeꞌf diꞌs arid ndxác.
\v 2 Coꞌseꞌ ngòon làth guꞌa, neꞌndoode lezon ngluꞌen daa loo guꞌ xal thìb mèn coꞌ anzeꞌf ndxác cón cheꞌn chol conꞌ. Ndxeꞌlequeꞌ, mdoo lezon mbluꞌen loo guꞌ ante cón cheꞌn Jesucrist coꞌ nac diꞌs cón cheꞌn xá mod no cón cheꞌn chonon nguth yub Jesucrist loo cruz.
\v 3 Coꞌseꞌ ngòon làth guꞌ, nonqueꞌ guꞌ no naneequeꞌ guꞌ ngòc daa mèn coꞌ neꞌngode valor loo. Ngo no lezon no ale mxiꞌth daa coꞌseꞌ mdoon loo guꞌ.
\v 4 Neꞌ neꞌ ndoodizen, neꞌ neꞌ ngon yalbàn loo guꞌ con diꞌs xal ndyoodiꞌs mèn coꞌ ndli cuent axta arid ndxác par mdub yéc guꞌ no par ngòo yéc guꞌ loo cón cheꞌn Crist. Ndxeꞌlequeꞌ, Diox mblyath no daa par mbuàal Xpii Natúꞌ yéc guꞌ no lezoꞌ guꞌ par nguaaꞌd diꞌsa loo guꞌ. No ngolaꞌs guꞌ diꞌs ndac coꞌ mblon yalbàn loo guꞌ.
\v 5 Tataa mblin par gàca loo guꞌ leꞌ mod coꞌ ndxelaꞌs guꞌ loo Diox por cón cheꞌn Jesucrist ngòc loo guꞌ ante por cón cheꞌn conꞌ roo conꞌ xèn cheꞌn Diox. Mod coꞌ ndxelaꞌs guꞌ loo Diox por cón cheꞌn Jesucrist neꞌngàcte loo guꞌ por cón cheꞌn diꞌs coꞌ mdoodiꞌs mèn coꞌ ndeꞌf diꞌs ndxác loo izlyoꞌ ndxèꞌ.
\s Diox mbluꞌ cón nac cón cheꞌn Diox por cón cheꞌn Xpii Natúꞌ cheꞌn Diox.
\p
\v 6 Per mèn coꞌ huen huen ndxòn cón cheꞌn Crist no coꞌ huen huen mtéꞌth cón cheꞌn Crist par ndyubdiꞌsqueꞌ mèna loo cón cheꞌn Crist coꞌ ndxelaꞌs mèn, loo mèna ndyoodiꞌs nuꞌ cón cheꞌn Crist xalqueꞌ ndlyath no Crist nuꞌ par ndxác nuꞌ. Per inacte conꞌ coꞌ ndxác nuꞌ ndxèꞌ xal nac conꞌ coꞌ ndxác mèn coꞌ alithe naban leꞌn tiemp ndxèꞌ. Neꞌ neꞌ inaca xal nac yalndxác cheꞌn mèn coꞌ ñibeꞌ loo xtàa mèn loo izlyoꞌ ndxèꞌ. Per cón cheꞌn mèn coꞌ ñibeꞌ loo xtàa mèn loo izlyoꞌ ndxèꞌ, mèna lyux no lith no mèna loo yalndxác coꞌ ndxác mèna.
\v 7 Ndxeꞌlequeꞌ, diꞌs coꞌ ndyoodiꞌs nuꞌ nac cón cheꞌn yalndxác cheꞌn Diox. Con cheꞌn yalndxác coꞌ ndyoodiꞌs nuꞌ ndxèꞌ, leꞌi beꞌ nzo casloo loo huax mèn axta nalleꞌ. Leꞌi ngo casloo loo rye mèn ndooreꞌ yiꞌth Tad Jesucrist loo izlyoꞌ. Cón cheꞌn yalndxác cheꞌn Diox ndxèꞌ, Diox mxoꞌf zinꞌa loo nuꞌ xal mdoo lezoꞌ Diox par gàc yalndxác ndxèꞌ thìb conꞌ roo no thìb conꞌ xèn loo ryete naꞌ coꞌ ndxelaꞌs thidtene.
\v 8 Cón cheꞌn yalndxác coꞌ ngo casloo ndxèꞌ, casqueꞌ nec thìb mèn coꞌ ñibeꞌ loo xtàa mèn loo izlyoꞌ tiemp ndxèꞌ, yende chó mèna nanee no ndaꞌ mèna cuent cón cheꞌn yalndxáca. Tac cheleꞌ mèna ngnon no ngnee mèn cón cheꞌn xá mod susqueꞌ ndxác Diox, ngobeꞌen neꞌnqueꞌde mèna Tad Crist, coꞌ ñibeꞌ loo alux conꞌ no coꞌ nquée xnìi tínꞌ, loo cruz.
\v 9 Per ndxeꞌlequeꞌ, ndub diꞌs loo libr coꞌ nac xtiꞌs Diox coꞌ mbez:
\pi1 Cón cheꞌn coꞌ ndxab diꞌs ndxèꞌ tarte ryo xoꞌf loo mèn. Neꞌ neꞌ tar gòn mèn cón cheꞌn diꞌs ndxèꞌ. Neꞌ neꞌ tar li mèn xtùuz cón cheꞌn diꞌs ndxèꞌ. Per ndxeꞌlequeꞌ, conꞌ ndxèꞌ ndaꞌ cuent cón cheꞌn ryethe conꞌ roo conꞌ xèn coꞌ mbli nab Diox par gàca loo mèn, mèn coꞌ nqueꞌ lezoꞌ Diox.
\m
\v 10 Per Diox mblo xoꞌf conꞌ ndxèꞌ loo naꞌ por cón cheꞌn Xpii Natúꞌ. Tac Xpii Natúꞌ ndlaꞌs ayéc axànꞌ loo rye loothe conꞌ. Xpii Natúꞌ nteche ntexyath ryethe conꞌ coꞌ ndli Diox xtùuz leꞌn lezoꞌ Diox, ne.
\p
\v 11 Tac ¿chó nac thìb mèn coꞌ nzo làth xtàa mèn coꞌ non cón cheꞌn xtùuz coꞌ ndli tedib mèn, àꞌ? Yende chó mèn nona, ¿léꞌ? Ndxeꞌlequeꞌ, leque mèn coꞌ ngue li xtùuz non cón cheꞌn coꞌ ngue li mèna xtùuz. Lomisqueꞌ mod ne, yende chó mèn non cón cheꞌn conꞌ coꞌ ndli Diox xtùuz. Ndxeꞌlequeꞌ, ante Xpii Natúꞌ cheꞌnpeꞌ Diox non cón cheꞌn conꞌ ndli Diox xtùuz.
\v 12 Coꞌseꞌ ngolaꞌs naꞌ loo Tad Jesucrist, neꞌntolode mnibeꞌ chol xpii cheꞌn izlyoꞌ loo naꞌ. Ndxeꞌlequeꞌ, mtlo mnibeꞌ Xpii Natúꞌ coꞌ ngroꞌ loo Diox coꞌ ngulàa loo naꞌ par taꞌ naꞌ cuent no par non naꞌ cón cheꞌn conꞌ ndac coꞌ angndli Diox loo naꞌ.
\v 13 Cón cheꞌn conꞌ ndac ndxèꞌ coꞌ angmbli Diox loo naꞌ ndyoodiꞌs nuꞌ. Per indyoodiꞌste nuꞌ cón cheꞌn conꞌ ndac ndxèꞌ xal mèn coꞌ ñaalequeꞌ loo ndxác. Ndxeꞌlequeꞌ, nuꞌ ndluꞌ loo mèn xalqueꞌ nac xleyꞌ coꞌ ndluꞌ Xpii Natúꞌ loo nuꞌ, coꞌ nee diꞌs, ndluꞌ nuꞌ leyꞌ coꞌ nac xleyꞌ cheꞌn Crist loo mèn coꞌ ndxònqueꞌ cón cheꞌn Crist no mèn coꞌ mtéꞌthqueꞌ cón cheꞌn Crist par ndubdiꞌsqueꞌ mèna loo Crist.
\p
\v 14 Per mèn coꞌ alithe nzi ban loo cón cheꞌn izlyoꞌ ndxèꞌ, mèna indxònte cón cheꞌn conꞌ coꞌ ndluꞌ Xpii Natúꞌ cheꞌn Diox loo mèna. Mèna ndenꞌ leꞌ cón cheꞌn Xpii Natúꞌ nac coꞌ ncàb loo mèn nquée mbii yéc mèn. Cón cheꞌn conꞌa yende mod taꞌ mèna cuent cón nee diꞌsa tac ante loo mèn coꞌ ñibeꞌ Xpii Natúꞌ ndryo xoꞌf cón cheꞌn Xpii Natúꞌ.
\v 15 Per loo mèn coꞌ ñibeꞌqueꞌ Xpii Natúꞌ, Xpii Natúꞌ ndli par leque mèna li xtùuz coꞌ huenlequeꞌ no tub rez mèna cón cheꞌn ryethe conꞌ. Per ndxeꞌlequeꞌ, mèn coꞌ alithe nzi ban loo cón cheꞌn izlyoꞌ ndxèꞌ, yende chó cón cheꞌn mèna par ryal no tub rez mèna cón cheꞌn mèn coꞌ ñibeꞌ Xpii Natúꞌ loo.
\v 16 Loo libr coꞌ nac xtiꞌs Diox ndub diꞌs coꞌ mbez: ¿Xá ñaa thìb mèn coꞌ nzo loo izlyoꞌ coꞌ taꞌ cuent no coꞌ non xal nac xtùuz coꞌ ndli Diox xtùuz, àꞌ? Yende chó mèn nona, ¿léꞌ? Lomisqueꞌ ne, ndub diꞌs loo libr coꞌ nac xtiꞌs Diox, ne, coꞌ mbez: ¿Xá ñaa thìb mèn coꞌ nzo loo izlyoꞌ coꞌ luꞌ loo Diox cón cheꞌn conꞌ li Diox, àꞌ? Yende xàa. Mastaleꞌ tataa ndub diꞌs loo libr coꞌ nac xtiꞌs Diox, naꞌ nonqueꞌ no naneequeꞌ naꞌ leꞌ naꞌ ndli xtùuz xal ndli Crist xtùuz.
\c 3
\s Pab ngue taꞌ cuent cón cheꞌn mèn coꞌ ndlyath no Pab loo zinꞌ cheꞌn Diox.
\p
\v 1 Per nalleꞌ, mèn huesen por cón cheꞌn Crist, daa neꞌngácte ndoodiz non guꞌ xal loo mèn coꞌ ñibeꞌpeꞌ Xpii Natúꞌ loo. Ndxeꞌlequeꞌ, beꞌ nquin tyoodiz non guꞌ xal ndyoodiz non mèn coꞌ beꞌ nzi tee ban loo cón cheꞌn xab izlyoꞌ. No ngue tyoodiz non guꞌ xal coꞌseꞌ ndyoodiz non myenꞌ bix cón cheꞌn Crist.
\v 2 Daa ndluꞌqueꞌ guꞌ rye conꞌ coꞌ nac cón cheꞌn Crist thìb mod coꞌ inagànte no ndlina loo guꞌ xal mèn coꞌ ndaꞌ lech ndxu myenꞌ bix. Tac axta nalleꞌ tarte gác guꞌ gòn guꞌ no téꞌth guꞌ diꞌs coꞌ nac más nagàn cón cheꞌn Crist xal myenꞌ bix coꞌ tarte gác hua ndac luaꞌ no xít xal mèn gox.
\v 3 Taandxèꞌ ngue cuanen mod tyoodiz non guꞌ tac guꞌ beꞌ nzi tee ban xalqueꞌ mèn coꞌ alithe nzi tee ban loo cón cheꞌn izlyoꞌ xal ndxuhua nee lezoꞌ mèna. Tac, lìcqueꞌ, làth guꞌ nzo mèn coꞌ ndxàn lezoꞌ ñèe xtàa. No taamas mèn ngyoo no xtàa. No taamas mèn nque diꞌs. ¿Chéꞌ inacte guꞌ xal mèn coꞌ alithe nzi tee ban loo cón cheꞌn xab izlyoꞌ coꞌseꞌ ndli guꞌ conꞌa? No ¿chéꞌ inzi tee bante guꞌ xal chol mèna, càꞌ? Lìcqueꞌ beꞌ taaqueꞌ nac guꞌ, ¿léꞌ?
\v 4 Tac nzo ndxep guꞌ làth guꞌ coꞌ mbez: Leꞌ nuꞌ nac thìb ned mèn cheꞌn Pab. No nzo taandxep guꞌ làth guꞌ coꞌ mbez: Leꞌ nuꞌ nac tedib ned mèn cheꞌn Apol. ¿Chéꞌ indenꞌte guꞌ leꞌ guꞌ nacqueꞌ xal chol mèn coꞌ alithe nzi tee ban loo cón cheꞌn izlyoꞌ ndxèꞌ, càꞌ? Lìcqueꞌ nac coꞌ ngue niin loo guꞌ trèꞌ, ¿léꞌ?
\p
\v 5 ¿Cón nac daa, coꞌ lèe Pab, ndyac guꞌ, àꞌ? No ¿cón nac Apol, àꞌ? Yende cón nac nuꞌ, ey. Ndxeꞌlequeꞌ, nac nuꞌ mèn coꞌ nxoꞌf zinꞌ zinꞌ cón cheꞌn Diox. Guꞌ ngolaꞌs loo cón cheꞌn diꞌs ndac coꞌ mblo nuꞌ yalbàn. Ryop nuꞌ Apol mxoꞌf zinꞌ zinꞌ cheꞌn Diox xalqueꞌ mnibeꞌ Diox loo thìb thìb nuꞌ par li nuꞌ zinꞌa.
\v 6 Loo cón cheꞌn Crist no loo guꞌ, ante nac daa xal thìb mbiꞌ coꞌ ngo bin. Loo cón cheꞌn Crist no loo guꞌ, nac Apol xal thìb mbiꞌ coꞌ ndóꞌ bin coꞌ mblon. Per ndxeꞌlequeꞌ, làth xtauꞌa, lìcqueꞌ, Diox nac xaꞌ coꞌ ndli ndxas ndxàl bina, coꞌ nee diꞌs, nac guꞌ coꞌ ngolaꞌs loo cón cheꞌn Diox por cón cheꞌn Crist.
\v 7 Por cona, niin loo guꞌ: Yende cón ntac daa, ndyaquen, daa coꞌ nac xal mbiꞌ coꞌ mblo bin. Neꞌ neꞌ yen cón ntac Apol, ndyac Apol, coꞌ nac xal mbiꞌ coꞌ ndóꞌ bina. Ndxeꞌlequeꞌ, ante Diox, coꞌ ndli ndxas ndxàl bina, nac xaꞌ coꞌ nac xaꞌ roo xaꞌ xèn.
\v 8 ¿Chéꞌ tarte taꞌ guꞌ cuent lalqueꞌ nac mèn coꞌ ngo bin con mèn coꞌ ndóꞌ bin? Mastaleꞌ, ngo Diox ray mèn xal nac zinꞌ coꞌ ndli thìb thìb mèn. Tataa mod ndxàca loo ryop nuꞌ Apol.
\v 9 Ryop nuꞌ Apol thidte ngòc nuꞌ par nxoꞌf zinꞌ nuꞌ zinꞌ coꞌ nac rsinꞌ Diox loo Diox. Leꞌ guꞌ na, nac loo Diox xal thìb leꞌ yòo coꞌteꞌ nzoꞌf ñaꞌ.
\p No nac guꞌ loo Diox xal thìb yòobéꞌ coꞌ ngue xítteꞌf Diox.
\v 10 Texal nac conꞌ ndac coꞌ angndli Diox loon, Diox mbli nac daa xal thìb maistr albañil coꞌ ndxác tínꞌ. Loo cón cheꞌn Crist ndlin xal maistr albañil coꞌ nguiꞌx béꞌ no coꞌ nsè cimient. Per yiloa, loo cón cheꞌn Crist nde tedib maistr coꞌ ntlo xítteꞌf ftoo loo cimient. Per ndxeꞌlequeꞌ, mèn coꞌ ndli zinꞌ loo cón cheꞌn Crista noo noo ndlaꞌs mèn loo zinꞌ coꞌ ndli mèna xalqueꞌ ndlaꞌs maistr albañil loo mèn coꞌ nxítteꞌf ftoo par gác ndac mèna par li mèna zinꞌ loo cón cheꞌn Crist.
\v 11 Loo cón cheꞌn xá mod lyáꞌ mèn loo conꞌ ryes, Diox mdoo Jesucrist no mtanꞌ Diox Jesucrist par xoꞌf zinꞌ Jesucrist zinꞌa. Cona nee diꞌs yub Jesucrist nac xal thìb cimient coꞌteꞌ xítteꞌf mèn yòo. No yende chó tedib mèn nzo coꞌ ngác ngàc xal cimienta par lyáꞌ mèn loo conꞌ ryes por cón cheꞌn mèna xal nacpeꞌ Jesucrist xal mblon yalbàn loo guꞌ.
\v 12 Chol mèn coꞌ que tee ban loo zinꞌ coꞌ mxoꞌf zinꞌ Crist, coꞌ nee diꞌs, par lyáꞌ mèn loo conꞌ ryes, leque mèna ñee xá mod que tee ban mèna, ¿chéꞌ que tee ban ndac mèna loo cón cheꞌn Crist xal coꞌseꞌ xítteꞌf mèn thìb ftoo con or, no con plat, no con quèe coꞌ huen natoxcuaꞌ o chéꞌ ingue tee ban ndacte mèn loo cón cheꞌn Crist? Sya, ndxàc loo mèna xalqueꞌ coꞌseꞌ ndli mèn thìb zinꞌ cap coꞌ iléꞌde nac, coꞌ nee diꞌs, nac xal coꞌseꞌ xítteꞌf mèn thìb ftoo con material coꞌ iléꞌde ngos xal coꞌseꞌ ncos mèn cement con yuux yòo no con quèe yòo.
\v 13 Tac zinꞌ coꞌ nxoꞌf zinꞌ thìb thìb mèn ryo xoꞌf loo xnaa coꞌseꞌ gàc huiz coꞌ tub rez Diox ryethe conꞌ. Tac huiza luꞌ Diox loo mèn xá mod mque tee ban mèn loo cón cheꞌn Crist, ¿chéꞌ mque tee ban ndac mèna o chéꞌ nazab mque tee ban mèna loo cón cheꞌn Crist? Huiza gàc huiz coꞌseꞌ tub rez Diox no li Diox preb loo conꞌ mbli mèn par ñee Diox ñeeneꞌ chéꞌ huenqueꞌ mbli mèna o chéꞌ nazab mbli mèna. Xal coꞌseꞌ ngo mèn conꞌ loo quìi no loo bèel par ñee mèna ñeeneꞌ ¿chéꞌ xeca loo quìi no loo bèel o chéꞌ tluxa?
\v 14 Cheleꞌ conꞌ coꞌ mbli ndxep mèn loo cón cheꞌn Crist nxec coꞌseꞌ tub rez Diox zinꞌa loo mèna xal nxec ftoo coꞌ huen natoxcuaꞌ, leꞌ sya, loo mèna càb conꞌ ndac xal yalndxax cón cheꞌn conꞌ mbli mèna.
\v 15 Per ndxeꞌlequeꞌ, cheleꞌ conꞌ coꞌ ndli ndxep mèn loo cón cheꞌn Crist neꞌngroꞌ ndacte coꞌseꞌ tub rez Diox loo conꞌa xal ndlyux ndxep conꞌ loo quìi, sya, ngòc conꞌ coꞌ mbli mèna conꞌ coꞌ yende conꞌ ntac loo Diox. Lìcqueꞌ, ante mèna lyáꞌ loo conꞌ ryes xal conꞌ coꞌ mbyanꞌ coꞌ neꞌngyolte no xal conꞌ coꞌ mxec loo quìi.
\p
\v 16 ¿Chéꞌ tarte ñee guꞌ leꞌ guꞌ coꞌ ndxelaꞌs loo Crist, nac guꞌ loo Diox xal thìb templ coꞌteꞌ nzo ban Diox? No ¿chéꞌ tarte ñee guꞌ leꞌ Xpii Natúꞌ cheꞌn Diox nzo ban loo guꞌ, àꞌ? Nonqueꞌ guꞌi, ¿léꞌ?
\v 17 Cheleꞌ chol mèn cuaꞌn xquin no dol par ryo xàꞌ lezoꞌ taamas mèn làth xtàa mèn coꞌ ndxelaꞌs, coꞌ nee diꞌs, nac thìb templ cheꞌn Diox, Diox tetìi mèna axta plóthe. Tac guꞌ coꞌ ndxelaꞌs loo cón cheꞌn Diox por cón cheꞌn Crist, nac guꞌ templ cheꞌn Diox. No conꞌa nac thìb conꞌ natúꞌ loo Diox.
\p
\v 18 Neꞌtaꞌde guꞌ lugar loo guꞌ quedìi leque guꞌ guꞌ. Cheleꞌ chol guꞌ coꞌ nzo làth guꞌ ngue li xtùuz no ndenꞌ guꞌ leꞌ guꞌ anzeꞌf ndxác xal nac yalndxác cheꞌn mèn izlyoꞌ ndxèꞌ, bnibeꞌ guꞌ loo mèna láꞌ mèna coꞌ nac yalndxác cheꞌn mèn izlyoꞌ par tataa mod sate más gác mèna no taꞌ mèna cuent cón cheꞌn coꞌ nac lìcpeꞌ yalndxác.
\v 19 Mèn coꞌ ndenꞌ anzeꞌf ndxác mèn loo izlyoꞌ, loo Diox mèna nac xal mèn coꞌ nquée mbii yéc. Tac loo libr coꞌ nac xtiꞌs Diox ndub diꞌs coꞌ mbez:
\pi1 Mèn coꞌ ndenꞌ axta arid ndxác mèn loo izlyoꞌ ndxèꞌ, ale ndxeꞌlequeꞌ, ndxezan Diox ndxegàa mèna loo mod coꞌ nac mod coꞌ ndxàp mèna par mtetìi Diox mèna.
\m
\v 20 Tedib lugar ndub diꞌs loo libr coꞌ nac xtiꞌs Diox coꞌ mbez:
\pi1 Tad Diox nanee ryethe xtùuz mèn coꞌ mbez anzeꞌf ndxác mèn. No naneeguèꞌ Tad Diox yende cón ntac coꞌ ndli mèna xtùuz loo Tad Diox.
\m
\v 21 Cona, ngue niin loo guꞌ: Nec thìb mod no nec tedib mod indxàalte tyeꞌs guꞌ par tyoo nque guꞌ xís nec thìb mèn loo izlyoꞌ ndxèꞌ. Fteꞌ lezoꞌ guꞌ leꞌ ryethe conꞌ coꞌ nzo loo béꞌ no coꞌ nziriꞌ loo izlyoꞌ ndxèꞌ, Diox mbli leꞌ càba conꞌ ndac loo guꞌ no gàca cheꞌnpeꞌ guꞌ yiloa,
\v 22 que naca daa, Pab, que naca Apol, que naca Pedr, que naca izlyoꞌ ndxèꞌ, que naca cón cheꞌn yalnaban, que naca cón cheꞌn yalguth, que naca cón cheꞌn conꞌ coꞌ nzo nalleꞌ, que naca cón cheꞌn conꞌ coꞌ yiꞌth nque yiloa. Ryethe conꞌa gàcqueꞌ loo guꞌ par càba conꞌ ndac loo guꞌ no gàca cheꞌnpeꞌ guꞌ yiloa.
\v 23 Más de cona, no guꞌ nac cheꞌnpeꞌ Crist. Leꞌ Crist na, nac cheꞌnpeꞌ Diox.
\c 4
\s Trèꞌ ndluꞌ cón cheꞌn zinꞌ coꞌ nxoꞌf zinꞌ mèn coꞌ nac mèn coꞌ mtelꞌ Crist, mèn coꞌ ndxeꞌ diꞌs cheꞌn Crist.
\p
\v 1 Cona, ngue niin loo guꞌ: Bli guꞌ cuent nac nuꞌ loo guꞌ xal thìb mèn coꞌ nxoꞌf zinꞌ cón cheꞌn Crist tac por conꞌa mblec Diox nuꞌ. No mxoꞌf zinꞌ Diox loo nuꞌ par luꞌ nuꞌ no ngo xoꞌf nuꞌ ryethe conꞌ coꞌ nac cón cheꞌn Diox coꞌ yub Diox mbli ngo casloo loo mèn póla par taꞌ guꞌ cuent cón cheꞌn Crist coꞌ huenlequeꞌ.
\v 2 Más de cona, guꞌ ndaꞌqueꞌ cuent leꞌ mèn coꞌ nxoꞌf zinꞌ zinꞌ, naquin tyoo mèna altant loo zinꞌa. Tataa ndxàca loon loo zinꞌ ndxèꞌ.
\v 3 Cona, ngue niin loo guꞌ: Part cón chenen, yende chó mport nzo lezon cheleꞌ guꞌ lyaꞌs tub rez cón cheꞌn xá mod ndyubdizen loo Diox. Neꞌ neꞌ indyóon cheleꞌ chol mèn nac zinꞌ lyaꞌs tub rez cón chenen, ne. Neꞌ neꞌ indub rezen cón chenen loo mèn.
\v 4 Part cón chenen, mastaleꞌ ndyaquen leꞌ ryethe conꞌ coꞌ ndenꞌen leꞌn lezon ingue zib quìide loon nec thìb conꞌ, inacte por conade indxàpten dol. Ndxeꞌlequeꞌ, Tad Crist nac xaꞌ coꞌ ngue tub rez cón chenen.
\v 5 Por cona, neꞌtub rezte guꞌ cón cheꞌn chol mèn ndooreꞌ coꞌseꞌ gàc huiz coꞌ yiꞌth tub rez Tad Crist cón cheꞌn mèn. Huiza, co xoꞌf Tad Crist ryethe conꞌ yeꞌrsinꞌ coꞌ mbli thìb thìb mèn loo xnaa coꞌ nzo casloo leꞌn tiemp ndxèꞌ. No luꞌ Tad Crist loo xnaa ryete conꞌ coꞌ ndoo lezoꞌ mèn li mèn. Axta syareꞌ, li Diox par tyuꞌ guꞌ loo mèn.
\p
\v 6 Diꞌs coꞌ ntetaquen cón cheꞌn ryop nuꞌ Apol loo guꞌ, mèn huesen por cón cheꞌn Crist, nac diꞌs coꞌ ndluꞌ cón cheꞌn mod coꞌ ndxàp nuꞌ par càba thìb conꞌ ndac loo guꞌ. Tataa mblina loo guꞌ par gàca leꞌ guꞌ téꞌth no non guꞌ xal ndxàal que tee ban guꞌ, no par neꞌtéꞌthte guꞌ no neꞌtaꞌde guꞌ lugar tyub nza guꞌ loo diꞌs coꞌ ndluꞌ tedib mèn coꞌ inacte xal diꞌs coꞌ ndub loo libr coꞌ nac xtiꞌs Diox coꞌ mbez: Neꞌtyeꞌste thìb thìb guꞌ par ya thìb thìb guꞌ favor cheꞌn thìb xtàa guꞌ no tedib xtàa guꞌ par gàc ndxep guꞌ thìb ned mèn no gàc taandxep guꞌ tedib ned mèn par gàca loo guꞌ tèꞌb guꞌ thìb xtàa guꞌ no tedib xtàa guꞌ làth guꞌ.
\v 7 Neꞌtyóode guꞌ. Nde niin thìb conꞌ loo guꞌ: ¿Chó mbli nac guꞌ más mèn ndac no mèn coꞌ más ndyuꞌ loo taamas hues xtàa guꞌ xal ndli guꞌ cuent nalleꞌ, àꞌ? Thìba conꞌ ndxèꞌ.
\p Leꞌ tediba na, ¿xá ñaa thìb conꞌ ndxàp guꞌ liz guꞌ coꞌ nac conꞌ coꞌ neꞌnglide Diox ndxàp guꞌ conꞌa, àꞌ? No cheleꞌ Diox mbli ndxàp guꞌ conꞌ liz guꞌ, ¿chonon susqueꞌ ndyeꞌs guꞌ no ndli guꞌ cuent ale leque guꞌ ngue xènꞌ conꞌa par ndxàp guꞌi liz guꞌ, àꞌ?
\p
\v 8 Nase yixo. Ale ndyac guꞌ nacleꞌ guꞌ mèn coꞌ mtéꞌth axta plóthe cón cheꞌn Diox. No ndyac guꞌ ya inquinte tolo téꞌth guꞌ no gòn guꞌ más conꞌ cón cheꞌn Tad Crist, ¿léꞌ? No ale ndyac guꞌ mcàayaꞌleꞌ guꞌ ryethe conꞌ cón cheꞌn Crist. No ale, ndyac guꞌ axta ngue ñibeꞌ guꞌ loo cón cheꞌn Diox xal ngue ñibeꞌ Crist loo cón cheꞌn Diox, ne, ¿léꞌ? Mastaleꞌ neꞌngluꞌde nuꞌi loo guꞌ, ale ndxeꞌlequeꞌ, ndyac guꞌ nac guꞌ xal chol rey coꞌ yende chó mèn ñibeꞌ loo. No por ngro xàꞌ guꞌ loo nuꞌ no por mtèꞌf guꞌ nuꞌ thìb lad, ndli guꞌ conꞌa. Oj chéꞌ coꞌ, lìcqueꞌ, ngue ñibeꞌ noleꞌ guꞌ Crist, huen. Leꞌ sya, thidte ñibeꞌ no guꞌ nuꞌ loo cón cheꞌn Crist, ne.
\v 9 Conꞌ coꞌ ngue lin xtùuz no conꞌ coꞌ ndyaquen nac: Leꞌ Diox mblec nuꞌ coꞌ ndxeꞌ diꞌs cheꞌn Crist xal mèn coꞌ nac más beꞌthe coꞌ yende cón ntac loo chol taamas mèn coꞌ mxoꞌf zinꞌ zinꞌ cheꞌn Diox. Nac nuꞌ mèn coꞌ nabaꞌlequeꞌ gathxùꞌ xalqueꞌ mèn coꞌ nac mèn yeꞌrsinꞌtúb. Tac, lìcpeꞌ baꞌi, loo mèna nac nuꞌ mèn coꞌ ndli sirv loo mèn xal thìb conꞌ coꞌ ndaꞌ xquith lezoꞌ mèn. Tataa ndxàca loo nuꞌ par huiꞌ ryete mèn cheꞌn izlyoꞌ ndxèꞌ loo nuꞌ, que naca loo angl coꞌ nzo loo béꞌ, que naca loo chol mèn coꞌ nziriꞌ loo izlyoꞌ par xìis no mèna no xìis no angl nuꞌ, ndyaquen.
\v 10 Mèn izlyoꞌ ndli cuent leꞌ nuꞌ nquée mbii yéc tac ngo nuꞌ yalbàn cón cheꞌn Crist. Leꞌ part cón cheꞌn guꞌ na, leque guꞌ mbez leꞌ guꞌ angndxác loo cón cheꞌn Crist, ¿léꞌ? Naneequeꞌ nuꞌ leꞌ nuꞌ nac xal mèn coꞌ mbuuꞌsleꞌ. Per por part cón cheꞌn guꞌ, ale ndyac guꞌ axta arid mbiꞌ tínꞌ guꞌ. Rye mèn gulàaz guꞌ nxoꞌf lèe nxoꞌf xtiꞌs guꞌ. No ndli mèn gulàaz guꞌ conꞌ guryath no conꞌ guryèn loo guꞌ. Per por part cón cheꞌn nuꞌ, ale ndxeꞌlequeꞌ, nxìis no mèn prob nuꞌ no ntèꞌb mèn nuꞌ, ne.
\v 11 Axta huiz coꞌseꞌ mtlo mxoꞌf zinꞌ nuꞌ zinꞌ ndxèꞌ no axta huiz nalze nzi tee lanꞌ nuꞌ no nzi tee yath huin nuꞌ. Nzi tee yec lezoꞌ nuꞌ, ne. Ale mbiiz mbuuꞌs ro nuꞌ. Nde teeleꞌ nzi tee che nuꞌ. Yende xab nuꞌ. Ale ngox mdyal nuꞌ nzi tee nuꞌ. Nde nxonꞌ, ndli mèn ngòc nguàal conꞌ loo nuꞌ. Ndeꞌb bit ndeꞌb mingue lad nuꞌ. ¡Prob nuꞌ izlyoꞌ! Axta neꞌ neꞌ yen liz nuꞌ par yòo ban nuꞌ. Nzi tee nuꞌ làaz mèn tith xal mbin béꞌ. Yende liz nuꞌ ned ngue tee nuꞌ.
\v 12 Ndli nuꞌ zinꞌ con yaꞌpeꞌ nuꞌ axta ndxezan nuꞌ axta plóthe. Nde nxonꞌ, nde mèn. Ndaꞌ mèn xyàn lezoꞌ nuꞌ. Por part cón cheꞌn nuꞌ, nadoꞌ diꞌs nadoꞌ cuent ncàb nuꞌ loo mèn no mbez nuꞌ loo mèna: Diox quix guꞌ, ndee. Ale ndub nguꞌs mèn nuꞌ, ne. Per nxec yèe nuꞌi.
\v 13 Ale ñii yèe ñii tìi mèn nuꞌ. Per mastaleꞌ, nadoꞌ diꞌs nadoꞌ cuent ncàb nuꞌ loo mèna. Ndli mèn cuent nac nuꞌ xal yix coꞌ ndxeꞌ mbii loo mèna no yende cón ntac nuꞌ loo mèna. No nac nuꞌ xal mbeꞌth coꞌ ndoo lad mèn loo mèna axta huiza no axta huiz nalze.
\p
\v 14 Ingue queꞌden yeꞌs loo guꞌ par tethonen guꞌ, ey. Ndxeꞌlequeꞌ, ngue queꞌen yeꞌs loo guꞌ coꞌ nac xal xinꞌen par coꞌxen loo guꞌ.
\v 15 Tac mastaleꞌ ngòca loo guꞌ ngue no guꞌ siꞌ mil mèn coꞌ ngòc xal maistr coꞌ ndluꞌ guꞌ, yende chó mèna ngòc xal xud guꞌ. Ndxeꞌlequeꞌ, loo cón cheꞌn Crist Jesús nac daa xal xud guꞌ tac daa mblo yalbàn loo guꞌ coꞌ ndluꞌ xá mod lyáꞌ mèn loo conꞌ ryes. No por cón chenen ngolaꞌs guꞌ loo Crist.
\v 16 Por cona, ñaꞌben loo guꞌ, ey, fque tee ban guꞌ xalqueꞌ nque tee banen.
\p
\v 17 No por cona, mtelꞌen Timote loo guꞌ. Timote nac xal xganꞌ daa coꞌ anzeꞌf nqueꞌ lezon ñèen. Anzeꞌf altant ndoo Timote loo cón cheꞌn Tad Crist. Timote taꞌ cuent loo guꞌ xá mod ngue tee banen loo cón cheꞌn Crist. Timote luꞌ loo guꞌ xá mod nque tee luꞌen mèn rye lugar coꞌteꞌ nqueltàa mèn liz Diox, ne.
\v 18 Nzo ndxep mèn làth guꞌ coꞌ ndyeꞌs no naxalꞌ ndyoodiꞌs mèna tac ndenꞌ mèna peser neꞌgal needen máa guꞌ par nedrèꞌ thidtene.
\v 19 Per cheleꞌ Tad nee lezoꞌ, chàa, gal neen máa guꞌ par nedrèꞌ par ñee nuꞌ ñeeneꞌ chéꞌ, lìcqueꞌ, anzeꞌf ndxác mèna, mèn coꞌ ndyeꞌs làth guꞌ xal nac mod coꞌ ndyoodiꞌs mèna con diꞌs coꞌ nxyalꞌ mèna.
\v 20 Tac coꞌteꞌ ñibeꞌ Diox inacte diꞌs coꞌ angndyoodiꞌs mèn. Ndxeꞌlequeꞌ, coꞌteꞌ ñibeꞌ Diox, ñibeꞌ Diox con ryethe conꞌ coꞌ nzo laꞌs nii Diox no conꞌ coꞌ nzo laꞌs yaꞌ Diox loo mèn coꞌ ngòoleꞌ loo cón cheꞌn Diox.
\v 21 ¿Xá nee guꞌ? ¿Chéꞌ más huen yo lezoꞌ guꞌ leꞌ daa gal loo guꞌ par gàc nayiꞌen no yoon guꞌ con gáp diꞌs con gáp cuent, càꞌ, o chéꞌ más huen yo lezoꞌ guꞌ gal neen máa guꞌ no nadoꞌ diꞌs nadoꞌ cuent tyoodiꞌs non guꞌ xalqueꞌ mèn coꞌ anzeꞌf nqueꞌ lezoꞌ ñèe guꞌ, càꞌ?
\c 5
\s Pab ngue tub rez cón cheꞌn thìb mbiꞌ coꞌ mque no xnaꞌ byanꞌ xaꞌ xal saꞌlgotpeꞌ mbiꞌ.
\p
\v 1 Nde niin tedib conꞌ loo guꞌ, ne: Lìcpeꞌ baꞌi, ndxath no ndxèn par ned nzon ndxèꞌ leꞌ thìb guꞌ coꞌ nzo làth guꞌ par nedrèꞌ, guꞌ ngue no xnaꞌ byanꞌ guꞌ xal xaꞌgotpeꞌ guꞌ. Conꞌ coꞌ ndxath ngue li mbiꞌ làth guꞌa, axta neꞌ neꞌ indxath ndli mèn conꞌa làth chol taamas mèn coꞌ indaꞌde cuent cón cheꞌn Diox por cón cheꞌn Jesucrist. Nac conꞌ coꞌ ndli guꞌa conꞌ zab loo Diox.
\v 2 Be taa ngue li guꞌ conꞌa làth xtàa guꞌ. No anzeꞌf ndyeꞌs guꞌ, ne. Más huen thyon guꞌ no xi lezoꞌ guꞌ. Per lugar de thyon guꞌ no xi lezoꞌ guꞌ, ale ndyaquen, más ndyeꞌs guꞌ no nxyalꞌ guꞌ. No anzeꞌf naxalꞌ ndyoodiꞌs guꞌ cón cheꞌn mod coꞌ ndxàp guꞌ làth xtàa guꞌ. Leꞌ mbiꞌ coꞌ ngue no xnaꞌ byanꞌ mbiꞌ xal xaꞌgotꞌpeꞌ mbiꞌ na, càa mbiꞌa. Bloꞌ guꞌ làth guꞌ.
\v 3 Lìcpeꞌ baꞌi, mastaleꞌ yende daa làth guꞌ, per ndyóon no ndenꞌ lezon cón cheꞌn guꞌ. Ale ndyaquen, nzoquen làth guꞌ. Por cona, mdub rezen cón cheꞌn mbiꞌ coꞌ ncuaꞌn xquin làth guꞌa. Mblasen rye conꞌa mastaleꞌ ndli guꞌ cuent yende daa làth guꞌ.
\v 4 Ñibeꞌen loo guꞌ por lèe Tad Jesucrist naꞌ, thidte queltàa rye guꞌ no bli guꞌ cuent leꞌ daa nzo noqueꞌ guꞌ. Tac ndyóon no ndenꞌen leꞌn lezon leꞌ daa nzo noqueꞌ guꞌ, làtha. No bli guꞌ cuent nzo noqueꞌ Tad Jesucrist guꞌ, ne, xalqueꞌ nac ryethe conꞌ coꞌ nzo laꞌs nii Tad Jesucrist no laꞌs yaꞌ Tad Jesucrist naꞌ.
\v 5 Leꞌ mbiꞌ coꞌ mbli conꞌ yeꞌrsinꞌa na, daa ñibeꞌ loo guꞌ, càa mbiꞌa. Bloꞌ guꞌ làth guꞌ, guꞌ coꞌ ngòo loo cón cheꞌn Diox por cón cheꞌn Crist. Ftanꞌ guꞌ mbiꞌa cón cheꞌn Mebizya par gath mbiꞌ. Leꞌ sya, coꞌseꞌ yiꞌth Tad Jesucrist tedib vez, sya, lyáꞌ xpii mbiꞌa loo conꞌ ryes.
\p
\v 6 Indxàalte tyeꞌs guꞌ loo xtàa guꞌ por conꞌ ngue li guꞌ. ¿Chéꞌ tarte gòn guꞌ no chéꞌ tarte taꞌ guꞌ cuent xal nac diꞌs coꞌ mbez: Con chuꞌte dii levadur ndli par ndyoo bes huax coꞌf harin coꞌseꞌ ntoxcuaꞌ mèn pan, càꞌ? Tataa ndxàca làth guꞌ, ne: Por cón cheꞌn thìb mbiꞌ ndxàc perdid rye guꞌ, ¿léꞌ?
\v 7 Bloꞌ xàꞌ guꞌ mbiꞌ coꞌ ndli conꞌ yeꞌrsinꞌa làth guꞌ, tá, par tataa mod gàca loo guꞌ xal coꞌseꞌ ntembìi mèn mes no taamas conꞌ ndli zinꞌ mèn coꞌseꞌ ntoxcuaꞌ mèn pan par tataa mod neꞌyòode levadur loo coꞌf coꞌ tyoxcuaꞌ pan. Por cón cheꞌn Crist, no loo cón cheꞌn Crist, ngro xàꞌ guꞌ loo rye loothe conꞌ yeꞌrsinꞌ xal coꞌseꞌ ntoxcuaꞌ mèn pan coꞌ ingòode mèn coꞌ ndli zinꞌ pan levadur par gàc pana pan coꞌ, lìcqueꞌ, indyoo beste. Tac Crist coꞌ mbyanꞌ lugar cón cheꞌn ryethe cón cheꞌn lni pasc cheꞌn mèn nación Israel loo naꞌ, mèn mqueꞌ Crist loo cruz par mxactìi Crist por cón cheꞌn naꞌ. No mdix Crist cón cheꞌn xtol naꞌ loo Diox. Crist mbyanꞌ loo naꞌ xal mbyanꞌ mbacxilꞌ loo mèna loo huiz lni pasc.
\v 8 Por cona, ngue niin loo guꞌ: Que tee ban naꞌ loo cón cheꞌn Crist xal coꞌseꞌ li mèn thìb lni coꞌteꞌ ndxuhua mèn pan coꞌ indxòode levadur. Tac levadura nee diꞌs nac rye loothe conꞌ yeꞌrsinꞌ no rye loothe conꞌ zab par naꞌ. Ndxeꞌlequeꞌ, que tee ban lì naꞌ loo Crist con dib nzo yéc naꞌ no dib nzo lezoꞌ naꞌ tac coꞌ ndli naꞌa nac thìb conꞌ coꞌ, lìcqueꞌ, mnibeꞌ Diox loo naꞌ par li naꞌi.
\p
\v 9 Loo ner cart coꞌ mqueꞌen yeꞌs loo guꞌa, mtelꞌen diꞌs loo guꞌ par neꞌqueltàa node guꞌ mèn coꞌ ncuaꞌn xinꞌ huan.
\v 10 Neꞌnqueꞌden yeꞌs loo cart coꞌ mtelꞌen loo guꞌa par niin loo guꞌ neꞌsálꞌte guꞌ rye mèn coꞌ alithe nzi tee ban loo izlyoꞌ ndxèꞌ, mèn coꞌ tarte yilaꞌs loo Crist, mèn coꞌ ndli yalburrid; no mèn coꞌ ndxath nquìi ñèe yalgonꞌ loo izlyoꞌ ndxèꞌ; no mèn coꞌ ncuaꞌn mod par li huanꞌ mèn loo xtàa mèn; no mèn coꞌ ndyub xib no nsalꞌ yaꞌ loo chol mdoꞌ, no loo chol gunab, no loo chol tatol, no loo chol naxnax. Nacqueleꞌ guꞌ indlyaꞌste queltàa no guꞌ mèna na, más huen gath guꞌ, ey.
\v 11 Per ndxeꞌlequeꞌ, ngue niin loo guꞌ loo mbryop cart coꞌ ndyeꞌth loo guꞌ ndxèꞌ par neꞌqueltàa node guꞌ mèn coꞌ mbez nac mèna hues xtàa guꞌ por cón cheꞌn Crist cheleꞌ mèna, lìcqueꞌ, nac mèn coꞌ ncuaꞌn xinꞌ huan; cheleꞌ mèna nac mèn coꞌ ndxath nquìi par tolo que no mèna cheꞌnpeꞌ mèna; cheleꞌ mèna nac mèn coꞌ ndyub xib no nsálꞌ yaꞌ loo chol mdoꞌ, no gunab, no tatol, no naxnax; cheleꞌ mèna nac mèn coꞌ ñii yèe ñii tìi cón cheꞌn xtàa mèn; cheleꞌ mèna nac mènguy; cheleꞌ mèna nac mèn huanꞌ. ¡Anderhuen guꞌ! Neꞌqueltàa node guꞌ rye mèna. Neꞌ neꞌ hua no guꞌ mèna, ne.
\v 12 Yende chó cón chenen par tub rezen cón cheꞌn mèn coꞌ tarte yilaꞌs loo Crist. Per ndxeꞌlequeꞌ, ¿chéꞌ inacte conꞌ ndxèꞌ cón cheꞌnpeꞌ guꞌ par tub rez guꞌ loo mèn coꞌ ndxelaꞌs coꞌ nzo làth guꞌ, coꞌseꞌ ñèe guꞌ nzi tee li mèna conꞌ yeꞌrsinꞌa, càꞌ? Conꞌ ndxèꞌ nacqueꞌ cón cheꞌnpeꞌ guꞌ, cara.
\v 13 Diox tub rez loo mèn coꞌ neꞌtyalte yilaꞌs loo Jesucrist. Por cona, beren. Niin loo guꞌ tedib vez: Bloꞌ xàꞌ guꞌ mbiꞌ coꞌ ngue li conꞌ yeꞌrsinꞌa làth guꞌ, ndee guꞌ.
\c 6
\s Pab ngue taꞌ cuent loo mèn cón cheꞌn mèn coꞌ ngyoo diꞌs loo juez coꞌ indxelaꞌste loo Diox por cón cheꞌn Tad Jesucrist.
\p
\v 1 Leꞌtreꞌ beꞌ ndyoodizen loo guꞌ cón cheꞌn conꞌa loo cart ndxèꞌ, lyazen nibdizen thìb conꞌ loo guꞌ. Coꞌseꞌ ndxàc thìb yalgyoo làth guꞌ no nco ñee mèn làth guꞌ, ¿chéꞌ tli guꞌ ryes li guꞌ thìb conꞌ coꞌ indxàalte li guꞌ par hueꞌ guꞌ xtàa guꞌ coꞌ ndxelaꞌs loo Diox por cón cheꞌn Crist loo mèn nac zinꞌ coꞌ indxelaꞌste par tub rez mèn nac zinꞌ cón cheꞌn diꞌs coꞌ ndxetoo làth guꞌ coꞌ ndxelaꞌs leque hueꞌ guꞌ xtàa guꞌa loo mèn coꞌ ndxelaꞌs loo Crist par tub rez mèn coꞌ ndxelaꞌs cón cheꞌn diꞌs coꞌ ndxetoo làth xtàa guꞌa, càꞌ?
\v 2 Lomisqueꞌ ne, ¿chéꞌ tarte ñee guꞌ no chéꞌ tarte taꞌ guꞌ cuent leꞌ mèn coꞌ ngro xàꞌleꞌ loo cón cheꞌn xab izlyoꞌ par ngòc mèna cheꞌnpeꞌ Diox, coꞌ nee diꞌs nac naꞌ, tub rez mèna cón cheꞌn ryethe mèn loo izlyoꞌ, càꞌ? No cheleꞌ guꞌ tub rez cón cheꞌn rye mèn loo izlyoꞌ, ¿chéꞌ indxàalte guꞌ tub rez guꞌ chol cuent bix coꞌ ndxetoo làth guꞌ, sya, càꞌ? Ndxàalqueꞌ li guꞌ tataa, ¿léꞌ?
\v 3 ¿Chéꞌ indaꞌde guꞌ cuent no chéꞌ inonte guꞌ leꞌ naꞌ tub rez axta cón cheꞌn conꞌ yeꞌrsinꞌ coꞌ mbli angl loo angl, càꞌ? Cheleꞌ naꞌ, lìcqueꞌ, tub rez cón cheꞌn angl loo angl, aleꞌqueꞌ cón cheꞌn mèn coꞌ nzo loo izlyoꞌ ndxèꞌ neꞌ tub rez naꞌ, ¿léꞌ?
\p
\v 4 Anggab naꞌi, cheleꞌ guꞌ nzi yoo làth guꞌ por chol conꞌ, ¿chéꞌ tqueltàa guꞌ loo thìb hues xtàa guꞌ coꞌ ndxelaꞌs coꞌ nac más beꞌthe par tyub rez xtàa guꞌa cón cheꞌn guꞌ, càꞌ? Yende moda, ¿léꞌ?
\v 5 Ngue niin conꞌ ndxèꞌ loo guꞌ par thyon guꞌ loo coꞌ ngue li guꞌ, ey. ¿Chéꞌ yende chó mèn nzo coꞌ ndxác làth guꞌ, càꞌ? ¿Chéꞌ yende chó mèn nzo làth guꞌ coꞌ ndxác coꞌ gác tub rez cón cheꞌn guꞌ coꞌ nac huespeꞌ loo Crist, càꞌ?
\v 6 Bli guꞌ xtùuz coꞌ huen huen, ¿chéꞌ, lìcqueꞌ, ndxàal hueꞌ guꞌ thìb hues guꞌ coꞌ ndxelaꞌs loo mèn nac zinꞌ coꞌ indxelaꞌste par tub rez guꞌ cón cheꞌn guꞌ làth guꞌ? Ihuente li guꞌ conꞌa, ey.
\p
\v 7 Lìcpeꞌ baꞌi, anzeꞌf thìb falt tínꞌ ndxàp guꞌ tac nzi yoo no guꞌ hues xtàa guꞌ coꞌ ndxelaꞌs. No ndxeꞌ guꞌ hues xtàa guꞌ loo mèn nac zinꞌ coꞌ indxelaꞌste par tub rez mèn nac zinꞌ cón cheꞌn guꞌ. ¿Chonon neꞌteriꞌthte guꞌ no neꞌntecanꞌte guꞌ yalgyooa no xec yèe guꞌ cón cheꞌn conꞌ coꞌ ndxàc làth guꞌa, àꞌ? Más quee lezoꞌ guꞌ laꞌ guꞌ li huanꞌ hues xtàa guꞌ cón cheꞌn guꞌ leque yoo guꞌ por cón cheꞌn conꞌa.
\v 8 Per ndxeꞌlequeꞌ, ale leque guꞌ ngue li coꞌ indxàalte li guꞌ. Ale, axta conꞌ coꞌ nac cheꞌn huespeꞌ guꞌ ndyen guꞌ no ndli huanꞌ guꞌ.
\p
\v 9 ¿Chéꞌ tarte ñee guꞌ no chéꞌ tarte gòn guꞌ leꞌ mèn coꞌ inacte mèn nalì no mèn nambìi, mèna neꞌyòode loo cón cheꞌn Diox par ñibeꞌ Diox loo mèna, càꞌ? Gàcqueꞌ conꞌa, ¿léꞌ? Neꞌquedìide guꞌ leque guꞌ. Tac Diox neꞌtyalte yòo mèn loo cón cheꞌn Diox par ñibeꞌ Diox loo mèn, mèn coꞌ ncuaꞌn xinꞌ huan; mèn coꞌ ndyub xib no nsálꞌ yaꞌ loo mdoꞌ no loo gunab; mèn coꞌ nchiꞌx yéc xinꞌ saꞌl mèn par que no mèna xtòo mèna, que naca mèngot o que naca mènbiꞌ; mènbiꞌ coꞌ ndli yalmbiꞌ con leque xtàambiꞌ mèn, no taamas xaꞌbiꞌ coꞌ ndaꞌ lugar loo xtàambiꞌ li leque xtàambiꞌ yalmbiꞌ con leque xtàambiꞌ mbiꞌ xal ndli mbiꞌ yalmbiꞌ con mèngot.
\v 10 Mèn coꞌ ndli huanꞌ; mèn coꞌ ndxath nquìi ñèe tmi; mènguy; mèn coꞌ ñii yèe ñii tìi xtàa; mèn coꞌ ncuaꞌn mod li huanꞌ mèn loo xtàa mèn. Ryete mèna neꞌyòode loo cón cheꞌn Diox par ñibeꞌ Diox loo mèna.
\v 11 Tataa ngòc ndxep guꞌ, guꞌ coꞌ mque tee ban loo cón cheꞌn xab izlyoꞌ póla. Per nalleꞌ mbembìileꞌ xtùuz guꞌ no lezoꞌ guꞌ. No ngro xàꞌleꞌ guꞌ loo cón cheꞌn xab izlyoꞌ par ngòc guꞌ mèn cheꞌnpeꞌ Diox. Ngòc guꞌ mèn nalì no mèn nambìi loo Diox por cón cheꞌn Tad Jesucrist. Diox mbli conꞌ ndxèꞌ loo guꞌ por cón cheꞌn Xpii Natúꞌ cheꞌn Diox.
\s Pab ngue taꞌ cuent cón cheꞌn mèn coꞌ ndxàp lezoꞌ no mèn coꞌ, por derech, ngro xàꞌ loo cón cheꞌn xab izlyoꞌ.
\p
\v 12 Nase ngolo guneen lìcqueꞌ nac diꞌs coꞌ mbez mèn: Yende chó mèn ñii loo mèn par li mèn rye conꞌ ndlyaꞌs mèn, conꞌ coꞌ neꞌcàbte conꞌ yeꞌrsinꞌ loo mèn loo Tad Diox. Per iryede conꞌ ndlyaꞌs mèn li mèn ncàb conꞌ ndac loo mèn. Aa. Lìcqueꞌ nac diꞌs coꞌ mbez mèn: Yende chó mèn ñii loo mèn par li yèe mèn chol conꞌ ndlyaꞌs taamas mèn li mèn. Per neꞌlaꞌde mèn ñibeꞌ nec thìb conꞌ ndli mèna loo mèn par más huen tyubdiꞌs mèn loo Diox.
\v 13 Lomisqueꞌ, lìcqueꞌ nac diꞌs coꞌ mbez mèn, ne: Leꞌ xít mèn no luaꞌ mèn nac coꞌ zyè lezoꞌ mèn coꞌseꞌ ndlyanꞌ mèn. Leꞌ leꞌn lezoꞌ mèn na, ndxòo coꞌ ndxuhua mèn par ndxeyꞌ coꞌ ndxuhua mèn. Per zin thìb huiz no zin thìb ze coꞌseꞌ li Diox ya neꞌhuade mèn no ya neꞌgude mèn tac gath mèn. Diox neꞌntoxcuaꞌde bélꞌyòo coꞌ nac lad mèn par cuaꞌn mèn xinꞌ huan mèn no par li mèn yalburrid. Ndxeꞌlequeꞌ, Diox mtoxcuaꞌ bélꞌyòo coꞌ nac lad mèn par xyoꞌf lèe xyoꞌf xtiꞌs Crist por cón cheꞌn conꞌ ndac coꞌ ndli bélꞌyòo lad mèn láth naban mèn. Leꞌ sya, Tad Diox li gàc más conꞌ ndac loo bélꞌyòo coꞌ nac ladpeꞌ mèna loo mèn.
\v 14 Texal leque yub Diox coꞌ mblo xban Tad Jesús làth mèn nguth, leque yub Tad Diox co xban naꞌ làth mèn nguth, ne, por cón cheꞌn conꞌ roo conꞌ xèn coꞌ nzo laꞌs nii Diox no coꞌ nzo laꞌs yaꞌ Diox.
\p
\v 15 ¿Chéꞌ inonte guꞌ no chéꞌ indaꞌde guꞌ cuent leꞌ bélꞌyòo coꞌ nac ladpeꞌ guꞌ nac thìb conꞌ coꞌ nac cón cheꞌn Crist, ne, càꞌ? ¿Chéꞌ nzo mod gàc thìb cuen nii Crist no thìb cuen yaꞌ Crist, coꞌ nac naꞌ, par gàc naꞌ xal thìb cuen nii no xal thìb cuen yaꞌ coꞌ nac lad cheꞌn thìb xaꞌgot coꞌ ndli yalburrid, càꞌ? Yende xaa. Nec thìb mod no nec tedib mod neꞌgàcta tataa, ¿léꞌ?
\v 16 No ¿chéꞌ tarte ñee guꞌ no chéꞌ tarte non guꞌ leꞌ thìb xaꞌbiꞌ coꞌ ngue li yalburrid con thìb xaꞌgot coꞌ ndli yalburrid, thidte ndxàc bélꞌyòo lad xaꞌbiꞌa con bélꞌyòo lad xaꞌgota coꞌseꞌ ndli ryop xaꞌ yalburrid, càꞌ? Tataaqueꞌ naca, ey. Tac diꞌs ndub loo libr coꞌ nac xtiꞌs Diox coꞌ mbez: Coꞌseꞌ nselyaꞌ thìb ned mèn, thidte ndxàc ryop bélꞌyòo lad mèna loo Diox.
\v 17 Per ndxeꞌlequeꞌ, coꞌseꞌ ngolaꞌsqueꞌ mèna loo Diox par ngòc mèna cheꞌnpeꞌ Diox, leꞌ sya, thidte ndxàc xpii mèna con Diox.
\p
\v 18 Fxonꞌ guꞌ no biiche xàꞌ guꞌ loo mèn coꞌ nchoo guꞌ par cuaꞌn guꞌ xinꞌ huan guꞌ no par chiꞌx guꞌ yéc xinꞌ saꞌl mèn par gàc guꞌ xtòo mèna, que nac guꞌ mènbiꞌ, que nac guꞌ mèngot. Chol taamas xquin coꞌ ncuaꞌn mèn, conꞌa indlide par leque mèn tezaꞌ mèn. Per ndxeꞌlequeꞌ, chol mèn coꞌ ncuaꞌn xinꞌ huan no mèn coꞌ nchiꞌx yéc xinꞌ saꞌl mèn par que no mèn xtòo mèn, leque mèna ntezaꞌ bélꞌyòo lad mèna.
\v 19 ¿Chéꞌ inonte guꞌ no chéꞌ indaꞌde guꞌ cuent leꞌ bélꞌyòo lad guꞌ nac xal thìb templ coꞌteꞌ nzo ban Xpii Natúꞌ cheꞌn Diox, càꞌ? Tataaqueꞌ naca. Xpii Natúꞌ nque tee noqueꞌ guꞌ. Diox mtelꞌ Xpii Natúꞌa loo guꞌ par yòo ban no Xpii Natúꞌ guꞌ. ¿Chéꞌ indxònte guꞌ leꞌ Diox neꞌndaꞌde bélꞌyòo lad, coꞌ nac guꞌ, par ñibeꞌ guꞌ loo bélꞌyòo lad guꞌ xal nee lezoꞌ guꞌ, càꞌ?
\v 20 Por cón cheꞌn Crist coꞌ anzeꞌf ntac, nac guꞌ mèn coꞌ mdyuꞌ. Por cona, bli guꞌ par xyoꞌf lèe xyoꞌf xtiꞌs Diox no par gàc conꞌ roo conꞌ xèn loo Diox por cón cheꞌn bélꞌyòo lad guꞌ, guꞌ coꞌ nac xpii no coꞌ nac bélꞌyòo lad guꞌ tac ryop conꞌa nac cheꞌnpeꞌ Diox.
\c 7
\s Pab ngue coꞌx loo mèn, que nac mèn mènbiꞌ, que nac mèn mèngot, más huen selyaꞌ mèn leque que tee thìb mèn par ndxèꞌ par baꞌ.
\p
\v 1 Cón cheꞌn diꞌs coꞌ mqueꞌ guꞌ yeꞌs loon coꞌ mnibdiꞌs guꞌ loon, trèꞌ ngue telꞌen yeꞌs loo guꞌ, ne: Huenqueꞌ naca loo thìb myenꞌbiꞌ o thìb myenꞌgot coꞌ nac myenꞌ thìb cheleꞌ myenꞌ li xtùuz neꞌlide myenꞌ yalmbiꞌ con chol xaꞌgot.
\v 2 Per por part cón chenen, par neꞌcuaꞌnte myenꞌbiꞌ o myenꞌgot xinꞌ huan myenꞌ, ndxàalqueꞌ selyaꞌ myenꞌbiꞌ no myenꞌgot. No lomisqueꞌ, ndxàal selyaꞌ myenꞌbiꞌ con myenꞌgot par que no myenꞌbiꞌ saꞌlpeꞌ myenꞌbiꞌ no par que no myenꞌgot saꞌlpeꞌ myenꞌgot, ne.
\v 3 Lomisqueꞌ, lyazen toodiz non ryete guꞌ coꞌ mselyaꞌleꞌ, guꞌ coꞌ ndub noleꞌ xinꞌ saꞌl guꞌ, loo cart ndxèꞌ. Guꞌ coꞌ nac saꞌlbiꞌ, altant gure guꞌ no gòp guꞌ mod loo coꞌ nac obligación cheꞌn guꞌ por nac guꞌ xinꞌ saꞌlpeꞌ xaꞌgot guꞌ. Lomisqueꞌ guꞌ ne, myenꞌgot coꞌ nac xinꞌ saꞌl xaꞌbiꞌ guꞌ, altant gure guꞌ no gòp guꞌ mod no bli guꞌ coꞌ nac obligación cheꞌn guꞌ con xinꞌ saꞌlpeꞌ guꞌ, ne.
\v 4 Yende chó derech ndxàp xaꞌgot coꞌ mselyaꞌ par ñibeꞌ xaꞌ ante coꞌ neete lezoꞌ xaꞌ cón cheꞌn yalmbiꞌ no yalngot. Neꞌ neꞌ yen chó derech ndxàp xaꞌbiꞌ ñibeꞌ xaꞌbiꞌ ante coꞌ neete lezoꞌ xaꞌbiꞌ cón cheꞌn yalmbiꞌ no yalngot. Ndxeꞌlequeꞌ, natubdóꞌ ryop saꞌl xaꞌ par li ryop saꞌl xaꞌ ante coꞌ nee lezoꞌ ryop saꞌl xaꞌ li xaꞌ.
\v 5 Mèngot, neꞌcàade guꞌ guꞌ coꞌseꞌ lyaꞌs xinꞌ saꞌlpeꞌ guꞌ gàal xinꞌ saꞌlpeꞌ guꞌ guꞌ. Guꞌ ne, mènbiꞌ, coꞌ nac xinꞌ saꞌl xaꞌgot guꞌ, neꞌcàade guꞌ guꞌ coꞌseꞌ lyaꞌs xinꞌ saꞌl guꞌ gàal xinꞌ saꞌlpeꞌ guꞌ guꞌ, ne. Ngue niin loo guꞌ: Neꞌgàalte guꞌ xtàa guꞌ coꞌseꞌ ndoo lezoꞌ ryop saꞌl guꞌ cuez guꞌ Diox ndxep huiz. Leꞌ sya, yiloa ndxàalqueꞌ guꞌ bere guꞌ, gàal guꞌ xinꞌ saꞌlpeꞌ guꞌ tedib vez. Cheleꞌ guꞌ tataa li, neꞌcobyaꞌde Mebizya guꞌ láth ingàalte guꞌ xtàa guꞌ coꞌ nac xinꞌ saꞌl guꞌ.
\v 6 Conꞌ coꞌ ngue niin loo guꞌ ndxèꞌ inacte coꞌ mnibeꞌ Diox loon par niina loo guꞌ. Ndxeꞌlequeꞌ, ngue niina loo guꞌ xal ndyeꞌth xtùuz ndxèꞌ yéquen.
\v 7 Tublazen no tyac lezon cheleꞌ ryete mènbiꞌ gàp mod xal daa. Tac daa neꞌndubte yoꞌf lezon nglin yalmbiꞌ con mèngot, cona neꞌnselyaden. Per daa naneequeꞌ leꞌ Diox mdaꞌ thìb mod loo thìb thìb mèn. Leꞌ taandxep mèna ndxàp thìb mod xal daa coꞌ indenꞌte nquin selyan. Leꞌ taamas mèn na, ndxàp tedib mod coꞌ naquin selyaꞌ.
\v 8 Lomisqueꞌ, niin loo myenꞌbiꞌ thìb no loo myenꞌgot thìb no loo mèngot viud: Guꞌ coꞌ ndxelaꞌs, huen gàca loo guꞌ cheleꞌ guꞌ thidtenequeꞌ nziriꞌ xal ndxàca loon, coꞌ nee diꞌs, neꞌselyaꞌde guꞌ.
\v 9 Per cheleꞌ guꞌ neꞌgàpte lezoꞌ par neꞌlide guꞌ yalmbiꞌ no yalngot, más huen selyaꞌ guꞌ con thidte mbiꞌ no con thidte ngot par tataa mod neꞌzyoꞌde guꞌ loo yalmbiꞌ no loo yalngot.
\p
\v 10 Per loo mèn coꞌ mselyaꞌleꞌ, ñibeꞌen conꞌ ndxèꞌ loo mèna: Neꞌláꞌyaꞌde saꞌlgot saꞌlbiꞌpeꞌ saꞌlgota; saꞌlgot neꞌláꞌyaꞌde saꞌlbiꞌ saꞌlgotpeꞌ thidtene. Inacte daa coꞌ ñibeꞌ conꞌ ndxèꞌ loo guꞌ xal nee lezon. Ndxeꞌlequeꞌ, Tad Crist mnibeꞌi loon par niina loo guꞌ.
\v 11 Per angtaꞌ leꞌi, cheleꞌ saꞌlgot láꞌyaꞌ saꞌlbiꞌpeꞌ saꞌlgota, ñibeꞌen loo xaꞌgota neꞌselyaꞌde saꞌlgot con tedib mbiꞌ. Más huen leque ryop saꞌl xaꞌgota tuꞌ tàl loo diꞌs par bere xaꞌ, tyub no xaꞌ saꞌlbiꞌpeꞌ xaꞌ tedib vez. Ñibeꞌen, ne, leꞌ saꞌlbiꞌ neꞌláꞌyaꞌde saꞌlgot thidtene.
\p
\v 12 No por cón cheꞌn taamas mèn ngue niin conꞌ ndxèꞌ loo guꞌ: Ingue niidena xal conꞌ coꞌ ñibeꞌ Tad Crist loo naꞌ. Ngue niina loo guꞌ xal ndyeꞌth xtùuz yéquen cón cheꞌna loo guꞌ. Cheleꞌ thìb guꞌ coꞌ ndxàc hues naꞌ por Crist ndyub no thìb xaꞌgot coꞌ indxelaꞌste, no ndyac lezoꞌ xaꞌgota ndub ban no xaꞌgota xaꞌbiꞌ coꞌ ndxàc hues naꞌa, neꞌláꞌyaꞌde xaꞌbiꞌ coꞌ ndxàc hues naꞌ xaꞌgota.
\v 13 Lomisqueꞌ ne, cheleꞌ thìb xaꞌgot coꞌ ndxàc ftaꞌn naꞌ por cón cheꞌn Crist tyub ban no xaꞌ thìb saꞌlbiꞌ coꞌ indxelaꞌste, no cheleꞌ saꞌlbiꞌa ndyac lezoꞌ ndyub ban no saꞌlbiꞌa saꞌlgot coꞌ ndxàc ftaꞌn naꞌ loo Crist, neꞌláꞌyaꞌde xaꞌgota xinꞌ saꞌlbiꞌpeꞌ xaꞌgota, ne.
\v 14 Lomisqueꞌ ne, chol mbiꞌ coꞌ indxelaꞌste coꞌ nac saꞌlbiꞌ cheꞌn thìb xaꞌgot coꞌ ndxelaꞌs, por cón cheꞌn xaꞌgot coꞌ ndxelaꞌsa ndxàc loo mbiꞌ par neꞌtolode li mbiꞌ conꞌ yeꞌrsinꞌ. No ndoo xalꞌ ned ndoo xalꞌ yóꞌ par ñee mbiꞌ no non mbiꞌ cón cheꞌn Diox par yilaꞌs mbiꞌ, ne. Lomisqueꞌ ne, chol xaꞌgot coꞌ indxelaꞌste coꞌ nac saꞌlgot cheꞌn thìb xaꞌbiꞌ coꞌ ndxelaꞌs, leꞌ sya, por cón cheꞌn saꞌlbiꞌ coꞌ ndxelaꞌsa ndxàc loo xaꞌgota ncaꞌ no ncà thìb conꞌ par neꞌtolode li xaꞌgota conꞌ yeꞌrsinꞌ. No ndoo xalꞌ ned ndoo xalꞌ yóꞌ loo xaꞌgota par ñee xaꞌgota no non xaꞌgota cón cheꞌn Diox par yilaꞌs xaꞌgota, ne. Tataa mod ne, neꞌyòode myenꞌ coꞌ gàc xinꞌ ryop saꞌl xaꞌa arid loo conꞌ yeꞌrsinꞌ. Ndxeꞌlequeꞌ, téꞌthgà myenꞌ par ryo xàꞌ myenꞌ loo conꞌ yeꞌrsinꞌ par gàcguèꞌ myenꞌ cheꞌnpeꞌ Diox.
\v 15 Per cheleꞌ chol mèn coꞌ nac saꞌlbiꞌ o saꞌlgot coꞌ nac mèn coꞌ indxelaꞌste loo Diox por cón cheꞌn Crist, yende cón ndxòn mèna láꞌ mèna xinꞌ saꞌl mèna, pues, blaꞌ guꞌ láꞌ mèna xinꞌ saꞌl mèna. Cheleꞌi tataa mod nac, másqueꞌ huen nziriꞌ thìb guꞌ, guꞌ coꞌ nac hues xtàa por cón cheꞌn Crist, que nac guꞌ mèngot, que nac guꞌ mènbiꞌ, yende chó cuee caꞌ guꞌ par ñibeꞌ guꞌ loo xtàa guꞌ xal ndxàca loo thìb moz coꞌseꞌ ñibeꞌ yèe patrón loo moz. Diox indlyaꞌste gàca tataa loo naꞌ. Diox ndlyaꞌs cue ban naꞌ rye nda naꞌ no rye ndyeꞌth naꞌ con hues xtàa naꞌ.
\v 16 Tataa mod laꞌ guꞌ bii saꞌlbiꞌ guꞌ o saꞌlgot guꞌ tac ¿xá mod naneel, lùu coꞌ nac saꞌlgot, chéꞌ tlil gan par lyáꞌ xinꞌ saꞌl lùu loo conꞌ ryes cheleꞌ lùu li yèe par tolo tyub no xinꞌ saꞌl lùu lùu? No ¿xá mod naneel, lùu coꞌ nac saꞌlbiꞌ, chéꞌ tlil gan par lyáꞌ xinꞌ saꞌl lùu loo conꞌ ryes cheleꞌ lùu li yèe par tolo tyub no xinꞌ saꞌl lùu lùu? Pà non guꞌ chéꞌ tàca o chéꞌ neꞌgàcta, ¿léꞌ?
\v 17 Per xalqueꞌ ngolo niin loo guꞌ nalleꞌ: Naquin que tee ban thìb thìb guꞌ xalqueꞌ mblec Diox guꞌ loo mod no loo zinꞌ coꞌ mque no guꞌ coꞌseꞌ ngòo guꞌ loo cón cheꞌn Diox. Ftac lezoꞌ guꞌ no blec lezoꞌ guꞌ, cheleꞌ guꞌ ndub no xinꞌ saꞌl guꞌ. No ftac lezoꞌ guꞌ no blec lezoꞌ guꞌ, cheleꞌ guꞌ nac mèn thìb, coꞌ nee diꞌs, indub node guꞌ saꞌl guꞌ. Conꞌ ndxèꞌ mnibeꞌ Diox loon par luꞌen loo mèn coꞌ nqueltàa loo Diox no loo cón cheꞌn Diox rye ned ngue teeꞌen.
\v 18 Cheleꞌ Diox ngurez chol guꞌ par ngòo guꞌ loo cón cheꞌn Diox, guꞌ coꞌ ngòcleꞌ circuncidar ndooreꞌ yilaꞌs guꞌ loo cón cheꞌn Jesucrist, taate yanꞌ guꞌ xalte ngòc circuncidar guꞌ. Neꞌtyóode guꞌ cón cheꞌn conꞌa. No guꞌ coꞌ Diox ngurez par ngòo guꞌ loo cón cheꞌn Diox, guꞌ coꞌ tarte gàc circuncidar coꞌseꞌ ngolaꞌs guꞌ, taate yanꞌ guꞌa, ne. Inquinte gàc circuncidar guꞌ.
\v 19 Part cheꞌn naꞌ coꞌ ngolaꞌsleꞌ loo Diox, ya yende cón ntac par gàc circuncidar naꞌ. No yende cón ntaca loo naꞌ par neꞌgàcte circuncidar naꞌ. Thìb conꞌ no maste más ntac loo naꞌ, tyubdiꞌs naꞌ loo conꞌ coꞌ ñibeꞌ Diox loo naꞌ par li naꞌi xal nee lezoꞌ Diox.
\v 20 Lomisqueꞌ, ngue niin loo guꞌ, ne: Ftolo bli thìb thìb guꞌ zinꞌ coꞌ ndli guꞌ coꞌseꞌ ngurez Diox guꞌ no mblec Diox guꞌ par ngolaꞌs guꞌ loo cón cheꞌn Jesucrist no loo Jesucrist xal ngue niin loo guꞌ ndxèꞌ:
\v 21 Cheleꞌ guꞌ nac xal moz yèe loo patrón coꞌ ñibeꞌ loo guꞌ coꞌseꞌ ngurez Diox no mblec Diox guꞌ loo cón cheꞌn Jesucrist no loo Jesucrist, yende chó mport nzo lezoꞌ guꞌ conꞌa. Neꞌtyóode guꞌ por conꞌa. Per cheleꞌ Diox taꞌ lugar loo guꞌ par gàc guꞌ mèn coꞌ yende chó ñii loo no mèn coꞌ yende chó mbee ncaꞌ, bli guꞌ coꞌ nzote mod li guꞌ par gàca tataa loo guꞌ.
\v 22 Per yende chó mport nzo lezoꞌ guꞌ xal ndxàca loo guꞌ coꞌseꞌ ngòo guꞌ loo cón cheꞌn Diox. Tac mèn coꞌ ngurez Diox par yilaꞌs mèna loo Crist, cheleꞌ mèna nac moz yèe loo thìb patrón, nac mèna loo Diox mèn coꞌ yende chó mbee ncaꞌ. No nacqueleꞌ mèn coꞌ ngurez Diox mèn coꞌ yende chó mbee ncaꞌ, ne, lìcqueꞌ, nac mèna moz cheꞌnpeꞌ Diox, ne.
\v 23 Diox mbli par mdix Diox thìb conꞌ coꞌ anzeꞌf ntac por cón cheꞌn guꞌ par ngòc guꞌ cheꞌnpeꞌ Diox, ey. Por cona, ngue niin loo guꞌ: Neꞌlaꞌde guꞌ ñibeꞌ yèe mèn izlyoꞌ ndxèꞌ loo guꞌ par gàc guꞌ xal moz yèe loo mèna.
\v 24 Cona, ngue niin loo guꞌ: Tolo gure li thìb thìb guꞌ zinꞌ coꞌ ndli guꞌ coꞌseꞌ ngurez Diox guꞌ par ngolaꞌs guꞌ par tataa mod que tee ban ndac guꞌ loo Diox.
\p
\v 25 Per cón cheꞌn myenꞌgot coꞌ beꞌ nzi tee thìb, yende chó conꞌ mnibeꞌ Diox loon par tyoodiz non guꞌ cón cheꞌn myenꞌgota. Per niin loo guꞌ conꞌ coꞌ ndyeꞌth yéquen no coꞌ ndyaquen cón cheꞌn myenꞌgota, daa coꞌ mblyat lezoꞌ Diox gunèe Diox par ngòc daa mèn coꞌ ndliqueꞌ coꞌ ñibeꞌ Diox.
\v 26 Ndyaquen huenqueꞌ gàca loo myenꞌgot no loo myenꞌbiꞌ, ne, tolo cue ban thìb myenꞌa por cón cheꞌn yalndyub nguꞌs coꞌ ndxàc loo naꞌ leꞌn huiz ndxèꞌ.
\v 27 Per cheleꞌ guꞌ mselyaꞌqueꞌ, neꞌlide guꞌ xtùuz láꞌyaꞌ guꞌ xinꞌ saꞌl guꞌ. Cheleꞌ guꞌ tarte selyaꞌ, más huen li guꞌ xtùuz neꞌcuaꞌnte guꞌ xaꞌgot par selyaꞌ no guꞌ xaꞌgota leꞌn huiz ndxèꞌ.
\v 28 Per cheleꞌ chol guꞌ ndlyaꞌs selyaꞌ, inacte conꞌa coꞌ ngue cuaꞌn guꞌ xquin guꞌ. No cheleꞌ chol myenꞌgot yènꞌ ndlyaꞌs selyaꞌ, inacta conꞌa coꞌ ngue cuaꞌn myenꞌgot xquin myenꞌgot, ne. Per coꞌseꞌ selyaꞌ myenꞌgot, gàca loo myenꞌgota axta neꞌ neꞌ yèe myenꞌ li myenꞌ rsinꞌ myenꞌ liz myenꞌ. Per part cón chenen, oj neꞌtyactìide myenꞌ tataa. Huen.
\p
\v 29 Per conꞌ ndxèꞌ nac coꞌ ngue tan cuent loo guꞌ, mèn huesen, ndoo dópleꞌ tiemp coꞌ beꞌ ndxanꞌ coꞌseꞌ gàc huiz yiꞌth xi Crist naꞌ. Cón cheꞌn tiemp coꞌ yiꞌth nquea, guꞌ coꞌ ngue no xinꞌ saꞌl, neꞌtyóode guꞌ ante cón cheꞌn famil guꞌ. Ndxeꞌlequeꞌ, ftyóo guꞌ cón cheꞌn zinꞌ cheꞌn Diox, ne.
\v 30 Guꞌ coꞌ nzi nxi lezoꞌ, neꞌtaꞌde guꞌ lugar xi lezoꞌ guꞌ axta plóthe. Guꞌ coꞌ alithe nzoꞌf ndeꞌ nzoꞌf ndlaꞌ lezoꞌ loo izlyoꞌ ndxèꞌ, neꞌque tee bante guꞌ arid tataa. Coꞌseꞌ ndiꞌ guꞌ ndxep conꞌ, neꞌlide guꞌ xtùuz thidtenequeꞌ que no guꞌi.
\v 31 Neꞌgath yeyꞌte lezoꞌ guꞌ ñèe guꞌ yalgonꞌ cheꞌn izlyoꞌ ndxèꞌ xal ndxath ndxeyꞌ lezoꞌ taamas mèn loo yalgonꞌ cheꞌn izlyoꞌ ndxèꞌ. Tac quèe no yaa ndlyux yii den. Aleꞌqueꞌ loo conꞌ coꞌ ndxath nquìi mèn ñèe mèn loo izlyoꞌ ndxèꞌ neꞌ lyux loo izlyoꞌ ndxèꞌ.
\p
\v 32 Per part cón chenen, lyazen neꞌgath lyuxte guꞌ loo nec thìb conꞌ. Leꞌ mbyòobiꞌ coꞌ nac mbyòobiꞌ thìb na, más tyóo mbyòo no más li mbyòo xtùuz loo cón cheꞌn Tad Diox par yòo lezoꞌ Diox cón cheꞌn mbyòoa.
\v 33 Per ndxeꞌlequeꞌ, thìb mbyòo coꞌ mselyaꞌleꞌ, mbyòoa más ndyóo cón cheꞌn yalgonꞌ cheꞌn izlyoꞌ ndxèꞌ par tataa mod más tyac lezoꞌ xinꞌ saꞌl mbyòoa leque cón li mbyòoa par yoo lezoꞌ Diox cón cheꞌn mbyòoa.
\v 34 No xàꞌ nac mod cheꞌn thìb xaꞌgot coꞌ mselyaꞌ loo mod cheꞌn thìb myenꞌgot yènꞌ coꞌ tarte selyaꞌ. Myenꞌgot yènꞌ coꞌ tarte selyaꞌa, más ndxath ndlyux myenꞌgota loo cón cheꞌn Tad Diox par ryo xàꞌ myenꞌgot yènꞌa loo rye conꞌ coꞌ nac cheꞌn xab izlyoꞌ, que naca cón cheꞌn bélꞌyòo lad myenꞌgota, que naca cón cheꞌn conꞌ coꞌ ndli myenꞌgot xtùuz no coꞌ ndenꞌ myenꞌgot leꞌn lezoꞌ myenꞌgota. Per ndxeꞌlequeꞌ, xaꞌgot coꞌ mselyaꞌ más ndxath ndlyux xaꞌgota loo cón cheꞌn izlyoꞌ ndxèꞌ par li xaꞌgota xtùuz cón li xaꞌgota par tyac lezoꞌ xinꞌ saꞌl xaꞌgota.
\p
\v 35 Ingue niiden conꞌ ndxèꞌ loo guꞌ par tedóꞌen guꞌ loo conꞌ coꞌ ñibeꞌen loo guꞌ. Ndxeꞌlequeꞌ, ante ndlyazen leꞌ conꞌ coꞌ ngue niin loo guꞌ gàc conꞌ ndac loo guꞌ no par que tee ban li guꞌ conꞌ ndac no par gàp guꞌ huen mod par gàca loo guꞌ yende cón caꞌ loo guꞌ par tolo li guꞌ cas loo Diox; no par li guꞌ sirv loo Diox.
\p
\v 36 Per cheleꞌ chol guꞌ coꞌ nzo làth guꞌ coꞌ nac gundan ngue li xtùuz iléꞌde nac conꞌ coꞌ ngue li guꞌ loo rsap guꞌ coꞌ ndoo riꞌth tiemp selyaꞌ, bli guꞌ coꞌ ndenꞌ guꞌ nac más conꞌ huen par selyaꞌ rsap guꞌ. Cheleꞌ rsap guꞌ selyaꞌ, inacte conꞌa conꞌ coꞌ ngue cuaꞌn rsap guꞌ xquin rsap guꞌ.
\v 37 Per cheleꞌ gundan coꞌ ngue no rsap làth guꞌ mbli nee lezoꞌ gundana leꞌ gundana inquinte li par selyaꞌ rsap gundana, no cheleꞌ gundana ndenꞌ inquinte selyaꞌ rsap gundan, leꞌ sya, huenqueꞌ nac conꞌ coꞌ ngue li gundana cheleꞌ rsap gundana neꞌselyaꞌde. Tataa gundana tolo xènꞌ rsap gundana.
\v 38 Cona, cheleꞌ chol guꞌ taꞌ lugar loo rsap guꞌ par selyaꞌ rsap guꞌ, huenqueꞌ ngue li guꞌ. No cheleꞌ chol guꞌ neꞌtaꞌde lugar selyaꞌ rsap guꞌ coꞌseꞌ inquinta, más huen ngue li guꞌ ndxàca tataa loo guꞌ ndyaquen, ne.
\p
\v 39 Leꞌ xaꞌgot coꞌ ndub xinꞌ ndub saꞌl na, thidtenequeꞌ natedóꞌ xaꞌ con saꞌl xaꞌ xal ñibeꞌ ley láth beꞌ naban saꞌlbiꞌpeꞌ xaꞌ. Per cheleꞌ saꞌlbiꞌ xaꞌgota nguth, yende cón cue yende cón caꞌ xaꞌgota par selyaꞌ xaꞌgota con tedib mbiꞌ conseꞌ selyaꞌ no xaꞌgota thìb xaꞌbiꞌ coꞌ ndxelaꞌs loo Tad Crist no maste.
\v 40 Per más huen nda xaꞌgota, ndyaquen, cheleꞌ xaꞌgota thidtenequeꞌ neꞌselyaꞌde. No ndyaquen leꞌ Xpii Natúꞌ cheꞌn Diox nque tee noqueꞌ daa ned nque teeꞌen. Thìba conꞌ ndxèꞌ.
\c 8
\s Pab ngue taꞌ cuent loo mèn ihuente nac hua mèn bélꞌ máꞌ coꞌ mbec mèn loo mdoꞌ xal xít mèn no luaꞌ mèn.
\p
\v 1 Leꞌ tediba na, nalleꞌ ndlyazen tyoodiz non guꞌ cón cheꞌn xít guꞌ no luaꞌ guꞌ coꞌ mbec mèn loo mdoꞌ no loo gunab. Lìcqueꞌ, ryete naꞌ coꞌ ndxelaꞌs, ndaꞌ naꞌ cuent cón cheꞌn conꞌ ndxèꞌ. Per mèn coꞌ ante ndxòn cón cheꞌn conꞌ ndxèꞌ, ale ndyeꞌs mèna. Per ndxeꞌlequeꞌ, mèn coꞌ, lìcqueꞌ, nqueꞌ lezoꞌ ñèe thìb xtàa mèn no tedib xtàa mèn, mèna ndlyath no taamas mèn par tolo téꞌth mèn no tolo taꞌ mèn cuent cón cheꞌn Diox par tyubdiꞌs ndac mèn loo cón cheꞌn Diox.
\v 2 Cheleꞌ chó mèn ndyac anzeꞌf ndxác mèna cón cheꞌn chol conꞌ, yende chó conꞌ tar gác mèna xal ndxàal gác mèna.
\v 3 Per cheleꞌ chó mèn nzo coꞌ, lìcqueꞌ, nqueꞌ lezoꞌ Diox, Diox ngüiꞌ no ñaa Diox loo mèna, no ngo Diox cuent cón cheꞌn mèna.
\v 4 Nde tan cuent loo guꞌ cón cheꞌn xít mèn no luaꞌ mèn coꞌ mbec mèn loo mdoꞌ no yiloa ndxuhua mèna. Naꞌ naneequeꞌ leꞌ thìb mdoꞌ inabante xal naban yub Tad Diox. No yende más Diox loo thidte Tad Diox coꞌ nzo.
\v 5 Nzo huax conꞌ coꞌ ndyac mèn no mbez mèn nac Diox loo izlyoꞌ no loo béꞌ. Coꞌseꞌ tataa mbez mèn, ndenꞌ mèn anzeꞌf huax Tad coꞌ nac patrón coꞌ ñibeꞌ loo mèn nzo, ne.
\v 6 Per ndxeꞌlequeꞌ, part cón cheꞌn naꞌ, nanee naꞌ no non naꞌ thidte Diox nac Diox coꞌ nzo. Dioxa nac xud Tad Jesucrist. Diox coꞌ nac xud Tad Jesucrist mblec no mxènꞌ alux conꞌ coꞌ nziriꞌ no coꞌ nzi ban par leque naꞌ li yath yèn cón cheꞌn Diox loo mèn no gàc conꞌ roo conꞌ xèn loo Diox por cón cheꞌn naꞌ. No lomisqueꞌ ne, angoluxte Tad Jesucrist nzo. Por cón cheꞌn Tad Jesucrist mxènꞌ Diox alux conꞌ no ngue tènꞌ Tad Jesucrist ryethe conꞌ, ne. Por cón cheꞌn Tad Jesucrist nziriꞌ naꞌ no nzi huin naꞌ loo izlyoꞌ, ne.
\p
\v 7 Iryede mèn coꞌ ndxelaꞌs non no nanee leꞌ loo Diox yende cón ntac thìb mdoꞌ. Tac axta nalleꞌ beꞌ nzo ndxep mèn coꞌ ngòo loo cón cheꞌn Diox por cón cheꞌn Jesucrist coꞌ anzeꞌf mbyen no coꞌ anzeꞌf ngo lezoꞌ loo cón cheꞌn costumbr par ndyub xib mèn loo mdoꞌ no loo gunab. No ndenꞌ mèna coꞌseꞌ mbec mèn xít mèna no luaꞌ mèna loo mdoꞌ. Ndli mèna cuent ngue bec mèn conꞌa loo Diox. No coꞌseꞌ hua mèn bélꞌ coꞌ mbec mèn loo mdoꞌ, ndenꞌ mèna arid ntac conꞌa par mèna. Tataa ndli mèna xtùuz tac tarte téꞌth ndac mèna leꞌ Diox yende chó mport nzo lezoꞌ Diox cón cheꞌn conꞌ coꞌ mbec mèn loo mdoꞌ. Por cona, por ihuente nzo lezoꞌ mèna loo cón cheꞌn Diox, ndxàc chop loo chop laꞌs mèna loo cón cheꞌn Crist.
\v 8 Lìcqueꞌ nac diꞌs coꞌ ngue niin loo guꞌ ndxèꞌ: Inacta por coꞌ ndxuhua naꞌ li par tyal Diox yòo naꞌ loo cón cheꞌn Diox. No neꞌ neꞌ por indxuhuade naꞌ ndli ndyal Diox yòo naꞌ loo cón cheꞌn Diox. Yende chó mport nzo lezoꞌ Diox cón cheꞌn coꞌ mbec mèn loo mdoꞌ. No cheleꞌ mèn ndenꞌ iléꞌde nac hua mèn bélꞌ coꞌ mbec mèn loo mdoꞌ, inacte por conꞌa nac mèn mèn yeꞌrsinꞌ loo Diox. Lomisqueꞌ ne, yende chó mport nzo lezoꞌ Diox cheleꞌ mèn hua bélꞌ coꞌ mbec mèn loo mdoꞌ. Inacte por conꞌa nac naꞌ mèn ndac loo Diox, ne.
\v 9 Per anderhuen guꞌ nee guꞌ xá ngue tee guꞌ, guꞌ coꞌ ya yende chó mbee ncaꞌ loo costumbr coꞌ ngue no mèn cón cheꞌn mdoꞌ. Tac neꞌstolqueꞌ taamas mèn coꞌ beꞌ ndxelaꞌs, coꞌ tarte taꞌ cuent coꞌ huenlequeꞌ cón cheꞌn conꞌ ngue li mèn, no ñèe mèna conꞌ ndli guꞌa. Leꞌ sya, leꞌleꞌ li guꞌ par yiziꞌf yigaꞌs mèna loo conꞌ yeꞌrsinꞌ ante por ñèe mèna conꞌ ndli guꞌa.
\v 10 Angab naꞌi, cheleꞌ chol mèn coꞌ ndxelaꞌs ñèe guꞌ coꞌ mbez ndxác no non guꞌ cón cheꞌn Crist, no nzi yuhua guꞌ conꞌ coꞌ mbec mèn loo mdoꞌ leꞌn nyòo liz mdoꞌ, sya, mèn coꞌ tarte yilaꞌs ndaca li xtùuz no gab mèna leꞌn lezoꞌ mèna: Jaa. ¿Chéꞌ ndyac guꞌi, nzoqueꞌ mod hua naꞌ xít naꞌ no luaꞌ naꞌ coꞌ mbec mèn loo mdoꞌ, ¿léꞌ? Leꞌ sya, tataa mod téꞌth mèna loo guꞌ par tlo mèna ryo xàꞌ lezoꞌ mèna loo coꞌ ndxelaꞌs mèna loo Crist.
\v 11 Por cona, yanꞌ cón cheꞌn coꞌ ndli guꞌ cheleꞌ guꞌ li leꞌ chol mèn coꞌ indxelaꞌs ndacte, tlo mèna hua mèna xít mèn no luaꞌ mèn coꞌ mbec mèn loo mdoꞌ láth beꞌ ndenꞌ mèna iléꞌde nac conꞌ ngue li mèna. Fteꞌ lezoꞌ guꞌ leꞌ por cón cheꞌn mèna, ne, nguth Crist.
\v 12 Coꞌseꞌ ngue li guꞌ conꞌa, cona nee diꞌs, ngue cuaꞌn guꞌ xquin guꞌ loo mèn coꞌ ndxàc hues guꞌ por Crist. Tataa mod ndli guꞌ nzyeꞌ xtùuz mèn no ncos guꞌ xtùuz mèn coꞌ ndenꞌ mèn leꞌn lezoꞌ mèn. Per ingue lide guꞌi ante loo mèna. Ndxeꞌlequeꞌ, ngue cuaꞌn guꞌ xquin guꞌ loo Crist, ne.
\v 13 Por cona, niin loo guꞌ: Part cón chenen, coꞌseꞌ ndxuhuan chol nítyèth coꞌ nac xíten no luan, cheleꞌ conꞌ ndxuhuan ndli par ndenꞌ mèn coꞌ ndxàc huesen por cón cheꞌn Crist ngòc nguàal conꞌ por ndxàc mèna chop loo chop laꞌs loo cón cheꞌn Crist, más quee lezon neꞌtolode huana thidtene.
\c 9
\s Pab ngue bez loo mèn: Ndxàpen derech ñaꞌben conꞌ loo guꞌ por nac daa thìb mbiꞌ coꞌ mtelꞌ Crist loo guꞌ.
\p
\v 1 ¿Chéꞌ inacte daa mbiꞌ coꞌ mtelꞌ Tad Crist par ndxen diꞌs cheꞌn Tad Crist loo mèn, càꞌ? Nacqueꞌ daa mbiꞌa, ¿léꞌ? ¿Chéꞌ ndyac guꞌ nzo ndxep conꞌ coꞌ mbee ncaꞌ daa loo zinꞌ coꞌ ndlin, càꞌ? Yende chó conꞌ nzo coꞌ ncàꞌ loon. ¿Chéꞌ ndyac guꞌ leꞌ daa tarte ñèe Tad Jesucrist naꞌ, càꞌ? Aa. Gunèelen Tad Jesucrist. ¿Chéꞌ inacte guꞌ mèn coꞌ ngolaꞌs por cón cheꞌn zinꞌ coꞌ mxoꞌf zinꞌen cón cheꞌn Tad Crist, càꞌ? Nacqueꞌ guꞌ mèna, ¿léꞌ?
\v 2 Peser taamas mèn indenꞌte nac daa mbiꞌ coꞌ ndxeꞌ diꞌs coꞌ mtelꞌ Tad Crist. Per, lìcpeꞌ baꞌi, guꞌ ndenꞌqueꞌ no ndaꞌqueꞌ guꞌ cuent nacqueꞌ daa mbiꞌa, ¿léꞌ? Tac por nac guꞌ mèn coꞌ ndxelaꞌs loo Tad, non mèn no nanee mèn leꞌ daa nacqueꞌ thìb mbiꞌ coꞌ mtelꞌ Tad Crist no ndxen diꞌs cheꞌn Tad Jesucrist loo mèn.
\p
\v 3 Conꞌa nac coꞌ nduben razon cón chenen loo chol mèn coꞌ ndryal no cón chenen par ñee mèna ñeeneꞌ ¿chéꞌ, lìcqueꞌ, nac daa xaꞌ coꞌ ndxeꞌ diꞌs xal mtelꞌ Tad Crist daa?
\v 4 ¿Chéꞌ ndyac guꞌ leꞌ nuꞌ indxàpte derech hua nuꞌ no gu nuꞌ chol conꞌ, càꞌ? Ndxàpqueꞌ nuꞌ derecha.
\v 5 ¿Chéꞌ ngue li guꞌ cuent indxàpte nuꞌ derech hueꞌ nuꞌ thìb xaꞌgot coꞌ ndxelaꞌs coꞌ nac saꞌlpeꞌ nuꞌ coꞌseꞌ tyoo nuꞌ ned par ya nuꞌ viaj xal ndli taamas myenꞌ coꞌ mtelꞌ Tad Crist no myenꞌ coꞌ ndxàc huespeꞌ Tad Crist por xnaꞌ Tad Crist no xal ndli Pedr, ne, càꞌ? Ndxàppeꞌ nuꞌ derecha, ey.
\v 6 No ¿chéꞌ ngue li guꞌ cuent tropte nuꞌ Mbèlꞌ nquin que zinꞌ huiz par li nuꞌ gan thìb leꞌ rol luaꞌ nuꞌ par hua nuꞌ leque ya xoꞌf zinꞌ nuꞌ zinꞌ coꞌ mxoꞌf zinꞌ Tad loo nuꞌ par li nuꞌi, càꞌ? Inquinta.
\v 7 Nibdizen tedib conꞌ loo guꞌ: ¿Chéꞌ nzo chó solndad coꞌ nac solndad coꞌ neꞌyaxte càa, càꞌ? No chó thìb mèn nzo coꞌ mdoo lus uv no yiloa neꞌhuade mèna xlè coꞌ taꞌ lus uva, càꞌ? Lomisqueꞌ ne, ¿chéꞌ nzo chó thìb mbiꞌ coꞌ ngue xènꞌ thìb partid mbacxilꞌ coꞌ neꞌgude lech cheꞌn mbacxilꞌa, ¿càꞌ? Yende mod gàca tataa, ¿léꞌ?
\v 8 Conꞌ coꞌ ngue nibdizen loo guꞌ ndxèꞌ, ¿chéꞌ ngue li guꞌ cuent naca thìb diꞌs coꞌ angndyoodiꞌs mèna, càꞌ? ¿Chéꞌ intaandxèꞌde mbez cón cheꞌn diꞌs ndxèꞌ loo ley cheꞌn Moisés coꞌ mxoꞌf Moisés loo mèn nación Israel, càꞌ? Mbezqueꞌ cón cheꞌn diꞌs ndxèꞌ loo ley cheꞌn Moisés, ne, ¿léꞌ?
\v 9 Tac, lìcpeꞌ baꞌi, loo ley coꞌ mxoꞌf Moisés loo mèn ndub diꞌs coꞌ mbez:
\pi1 Neꞌcode guꞌ yex ro ngon coꞌ ndloo ndub loo nzob triu.
\m ¿Chéꞌ ndyac guꞌ ante par quenap Diox ngon gunii Diox conꞌ ndxèꞌ, càꞌ? Yende xàa.
\v 10 Ndxeꞌlequeꞌ, Diox gunii diꞌs ndxèꞌ por cón cheꞌn naꞌ, ne, par gàc conꞌ ndac loo naꞌ. Por cón cheꞌn naꞌ ndub diꞌs loo libr coꞌ nac xtiꞌs Diox tedib lugar, coꞌ mbez taandxèꞌ, ne: Thìb mbiꞌ coꞌ nganꞌ yòo con yaarad, mbiꞌa ndub queequeꞌ lezoꞌ thop mbiꞌ cosech loo zinꞌ coꞌ ngue li mbiꞌ. Leꞌ mbiꞌ coꞌ ngue guis nzob triu na, ndxàal tyub queequeꞌ lezoꞌ mbiꞌ gàc cheꞌn mbiꞌ triu coꞌ ngue guis mbiꞌ.
\v 11 Cheleꞌ nuꞌ mbluꞌ loo guꞌ coꞌ nac cón cheꞌn Diox xal ngo mèn thìb quèe bin loo yòo, ¿chéꞌ ndyac guꞌ indxàalte lyath no guꞌ nuꞌ par taꞌ guꞌ conꞌ hua nuꞌ no taamas conꞌ coꞌ nquin nuꞌ coꞌ nde che loo nuꞌ, càꞌ? Ndxàalqueꞌ li guꞌ conꞌa, ey.
\v 12 Cheleꞌ taamas mèn ndxàp derech yax càa mèn loo zinꞌ coꞌ ndli mèna loo guꞌ cón cheꞌn Tad Crist, más ndxàp nuꞌ derech yax càa nuꞌ, ¿léꞌ? Per mastaleꞌ tataa ndxàp nuꞌ derech, ale tarte ñibeꞌ nuꞌ loo guꞌ quix guꞌ càa nuꞌ. Ndxeꞌlequeꞌ, nxec yèe nuꞌ loo conꞌ coꞌ nde che loo nuꞌ par nec thìb mod no nec tedib mod yende cón ncaꞌ loo cón cheꞌn diꞌs ndac cheꞌn Crist loo mèn por cón cheꞌn nuꞌ.
\v 13 Non guꞌ no nanee guꞌ leꞌ mèn coꞌ nxoꞌf zinꞌ zinꞌ leꞌn templ, mèna ndxuhua bélꞌ coꞌ mbec mèn loo còoꞌ coꞌ ndli mèn cuent ncàa Diox. No non guꞌ no nanee guꞌ leꞌ mèn coꞌ ndli mandad loo còoꞌ, mèna ndxàc cheꞌn conꞌ coꞌ mbec mèn loo còoꞌ coꞌ ndli mèn cuent ncàa Diox, ¿léꞌ?
\v 14 Lomisqueꞌ mod ne, mnibeꞌ Tad Crist leꞌ mèn coꞌ ngo yalbàn cón cheꞌn diꞌs ndac, hua mèna conꞌ li mèna gan cón cheꞌn zinꞌ coꞌ nxoꞌf zinꞌ mèna.
\v 15 Per huiꞌ guꞌ nexa. Part cón chenen, tarte ñaꞌben nec thìb conꞌ loo guꞌ par huan. Neꞌ neꞌ ntelꞌen diꞌs loo yeꞌs coꞌ mtelꞌen loo guꞌ par non guꞌ nquin daa conꞌ par ntelꞌ guꞌ conꞌ huan. Tac más quee lezon neꞌcàaden conꞌ taꞌ guꞌ càan mastaleꞌ gath huin daa, leque neꞌtaden gust lezon cón cheꞌn zinꞌ coꞌ mxoꞌf zinꞌ Diox loon coꞌ ngue lin loo guꞌ anxleꞌ.
\p
\v 16 Mastaleꞌ ngon yalbàn cón cheꞌn diꞌs ndac, indlidena par càba conꞌ ndac loon. Ndxeꞌlequeꞌ, naquinqueꞌ gon yalbàn. Tac cheleꞌ daa neꞌlida, ¡prob daa izlyoꞌ!, Diox tetìi daa axta plóthe.
\v 17 Cheleꞌ daa ngo yalbàn xal neete lezon, lìcpeꞌ baꞌi, ndxàal yax càan. Per cheleꞌ daa lii tac nquinqueꞌ lina, sya, non guꞌ, lìcqueꞌ, Diox nac xaꞌ coꞌ mxoꞌf zinꞌ zinꞌ ndxèꞌ loon par lina.
\v 18 Cona, ngue niin loo guꞌ: Conꞌ coꞌ angngue lin gan por ngon yalbàn coꞌ nac cón cheꞌn diꞌs ndac cheꞌn Crist, coꞌ ndluꞌ xá mod lyáꞌ mèn loo conꞌ ryes, nac leꞌ daa ndyac lezoꞌ leꞌ daa imbezte quix mèn càan, coꞌ nee diꞌs, yende cón ndxuhuan no yende cón gun por zinꞌ coꞌ nxoꞌf zinꞌen por cón cheꞌn diꞌs ndac coꞌ ngon yalbàn.
\p
\v 19 Mastaleꞌ yende chó mèn ndxàp derech par ñibeꞌ yèe mèn loon loo chol conꞌ, ndxeꞌlequeꞌ, ale ndlin ndxàc daa xal thìb moz loo rye mèn par gàca tyal mèn gòn mèn diꞌs coꞌ tan cuent cón cheꞌn Crist par yilaꞌs mèn loo Crist.
\v 20 Coꞌseꞌ ndyoodiz non mèn nación Israel cón cheꞌn Crist, ncuanen mod ndxàc daa xal mèn nación Israel, coꞌ nee diꞌs, mèn coꞌ nzo ban xanꞌ yalnibeꞌ cheꞌn ley coꞌ mxoꞌf Moisés loo mèna mastaleꞌ inzoden xanꞌ yalnibeꞌ cheꞌn leya par beꞌqueꞌ tataa mod gàca tyal mèna gòn mèna diꞌs coꞌ tan cuent cón cheꞌn Crist loo mèna. Thìba conꞌ ndxèꞌ.
\p
\v 21 Leꞌ tediba na, coꞌseꞌ ndyoodiz non mèn coꞌ inzode loo cón cheꞌn ley coꞌ mxoꞌf Moisés loo mèn, coꞌ nee diꞌs, mèn coꞌ inacte mèn nación Israel, ale lalqueꞌ ndxàc daa xalqueꞌ nac mèna. No ndluꞌen daa loo mèn xalqueꞌ nac mod cheꞌn mèna par beꞌqueꞌ gàca tyal mèna gòn mèna diꞌs coꞌ tan cuent cón cheꞌn Crist loo mèna. Nacqueꞌ daa mèn coꞌ nzo xanꞌ yalnibeꞌ cheꞌn ley cheꞌn Diox tac nzoquen xanꞌ yalnibeꞌ cheꞌn ley cheꞌn Crist.
\v 22 Leꞌ loo mèn coꞌ nac xal mèn yíiz coꞌ ndxàc chop loo chop laꞌs loo cón cheꞌn Crist na, ndxàc daa xalqueꞌ mèna par beꞌqueꞌ tataa mod gàca tyal mèna gòn mèna diꞌs coꞌ tan cuent loo mèna no yilaꞌs mèna loo Crist, ne. Cona nee diꞌs, ndlin par lalqueꞌ ndxàc daa loo rye mèn chol lugar par beꞌqueꞌ lin gan tyal ndxep mèna par yilaꞌs mèna loo Crist.
\v 23 Ryete conꞌ ndxèꞌ ndlin por cón cheꞌn diꞌs ndac cheꞌn Crist par sate más gàc conꞌ ndac loon por cón cheꞌn diꞌs ndac xal ncàba conꞌ ndac loo taamas mèn por cón cheꞌn diꞌs ndac, ne.
\p
\v 24 Nonqueꞌ guꞌ, ¿léꞌ?, leꞌ coꞌteꞌ nac thìb loo lueꞌ coꞌteꞌ nqueꞌ mèn carre, mèn nqueꞌ thìb señ loo lueꞌ par ñee mèn chó mèn ner zin loo señ coꞌseꞌ nqueꞌ thap gaꞌy mèn carre, tya nqueꞌ huax mèn carre no ndli mèn puest. Per coꞌseꞌ ndxelo nqueꞌ rye mèn coꞌ nqueꞌ carre carre, thidte mbiꞌ no maste mbli gan. Leꞌ sya, mbiꞌ coꞌ mbli gana, angtaꞌlaꞌs mèn thìb conꞌ càa mbiꞌ por mqueꞌ mbiꞌ carre. Cona, ngue niin loo guꞌ: Gòc guꞌ xal mèn coꞌ nqueꞌ carrea par gác guꞌ li guꞌ gan ryethe conꞌ ndac coꞌ angtaꞌ Crist loo guꞌ yiloa por mbli guꞌ fuerz ndluꞌ ndac guꞌ loo mèn cón cheꞌn Crist.
\v 25 Ryete mèn coꞌ nguith loo chol yalguyith par li mèn gan loo xtàa mèn, mèna ndxàp lezoꞌ loo chol conꞌ coꞌ li mal loo mèna. Lìcpeꞌ baꞌi, mèna tataa ndli par li mèn gan conꞌ coꞌ angtaꞌ mèn càa mèna. Per conꞌ coꞌ càa mèna lyux yéꞌ huize. Per ndxeꞌlequeꞌ, conꞌ coꞌ càa naꞌ nac thìb conꞌ coꞌ neꞌyizaꞌde thidtene, cheleꞌ naꞌ tyoo nque loo cón cheꞌn Tad Crist xal ndxàca loo mèn coꞌ nqueꞌ carre.
\v 26 Part cón chenen, daa nac xal thìb mbiꞌ coꞌ nqueꞌ carre par lin thìb puest. Tataa nque tee lin loo cón cheꞌn Crist. Inacte daa thìb mbiꞌ coꞌ alithe ndxeziꞌf ndxegaꞌs coꞌseꞌ nqueꞌ mbiꞌ carre. Ndxeꞌlequeꞌ, nac daa xal thìb mbiꞌ coꞌ, lìcqueꞌ, ngue li gan loo thìb yalguyith cheꞌn box, coꞌ nee diꞌs, nqueꞌ mèn punyed ro xtàa mèn. Neꞌnglidena loo yalguyitha xal thìb mbiꞌ coꞌ alithe ngyoo coꞌ angndub ndlàa puñed loo mes no loo yòo. Tataaqueꞌ ngue tee lin zinꞌ loo cón cheꞌn Diox.
\v 27 No loo cón cheꞌn Tad Crist coꞌ nxoꞌf zinꞌen, leque daa nquenap daa no ndxàp lezon no ñibeꞌen loo ladpeꞌen xal thìb patrón coꞌ ñibeꞌ loo thìb moz. Tataa ndlin loo cón cheꞌn Crist par neꞌgàcte loon leꞌ coꞌseꞌ ngolo mblon yalbàn no mtethen loo taamas mèn, chàa, yigaa daa loo Crist xal thìb mbiꞌ coꞌ ngogaa coꞌ ngue li conꞌ yeꞌrsinꞌ. Leꞌ sya, tyuhuanen conꞌ coꞌ angcàayan yiloa.
\c 10
\s Pab ngue coꞌx loo mèn iléꞌde nac cón ndli mèn coꞌseꞌ ncòoꞌ mèn yéc mèn no nsálꞌ mèn yaꞌ mèn loo chol mdoꞌ no loo chol gunab.
\p
\v 1 Ndlyazen leꞌ guꞌ non no ñee guꞌ, mèn huesen, leꞌ Diox ngo no xudgool naꞌ leꞌn xcuau coꞌ gunaa xal thìb pilar. No nguriꞌth ryete xudgool naꞌ tedib lad ro níttóꞌ coꞌ lèe Níttóꞌ Nanee por cón cheꞌn Diox, ne.
\v 2 Ryete mèn nación Israel thidte mqueltàa con Moisés coꞌseꞌ thidte ngo no Moisés mèna xanꞌ xcuau coꞌ gunaa xal thìb pilar no coꞌseꞌ nguriꞌth no Moisés mèna tedib lad ro níttóꞌa. Conꞌa ngòc loo mèna xal coꞌseꞌ ndxàc bautizar mèn.
\v 3 Látha, ryete mèn coꞌ mqueltàa no Moisés nduhua thìb loo xít no thìb loo luaꞌ coꞌ mdaꞌ Diox loo mèna par hua mèna.
\v 4 Ryete mèn coꞌ nda no Moisés ngu nít coꞌ mdaꞌ Diox loo mèna, ne, par gu mèn nít. Níta mziꞌf loo thìb quèe coꞌ mbluꞌ Diox loo mèna. Quèe coꞌ mbyúꞌ loo mèna ngòc thìb conꞌ bzyeꞌ, coꞌ nee diꞌs, yub Crist ngòc quèea tiempa. Crist ngo no mèna.
\v 5 Mastaleꞌ tataa mbli Diox loo mèna par nduhua mèna luaꞌ mèna no ngu mèna xít mèna, huax mèna neꞌngòode lezoꞌ ngnèe mèna Diox. Por cona, mbeth Diox mèna coꞌteꞌ nagán.
\p
\v 6 Loo conꞌ coꞌ mbli Diox loo mèna, téꞌth naꞌ thìb conꞌ. Nec thìb mod no nec tedib mod neꞌtyubte yoꞌf lezoꞌ naꞌ par li naꞌ conꞌ yeꞌrsinꞌ xal mdyub yoꞌf lezoꞌ mèna mbli mèna conꞌ yeꞌrsinꞌ.
\v 7 Neꞌ neꞌ gàc guꞌ mèn coꞌ ndyub xib loo chol mdoꞌ no nsálꞌ guꞌ yaꞌ guꞌ loo chol mdoꞌ no loo chol gunab xal mbli mèna. Tac cón cheꞌn mèna ndub loo libr coꞌ nac xtiꞌs Diox, coꞌ mbez: Ryete mèn nación Israel mqueltàa. Mbli nab mèna thìb lni. Làth xtauꞌa, nduhua mèna. Ngu mèna. Ngoloa, mbilꞌ nii mèna loo thìb mdoꞌ coꞌ mtoxcuaꞌ mèna.
\v 8 Niin loo guꞌ, ne: Indxàalte li naꞌ yalburrid. Neꞌ neꞌ indxàal cuaꞌn naꞌ xinꞌ huan naꞌ xal mbli ndxep mèn nación Israel coꞌseꞌ mcuaꞌn mèna xinꞌ huan mèna. Leque huiza, mnibeꞌ Diox loo Moisés par guth mèn nación Israel gal bson mil xtàa mèn nación Israel coꞌ mcuaꞌn xinꞌ huana.
\v 9 Neꞌ neꞌ aseli naꞌ cuaꞌn naꞌ xquin naꞌ loo Tad Diox par ñee naꞌ ñeeneꞌ chéꞌ tetìi Tad Diox naꞌ xal mbli mèn nación Israel coꞌseꞌ asembli mèna mcuaꞌn mèna xquin mèna par ñee mèna ñeeneꞌ chéꞌ tetìi Diox mèna por cón cheꞌn conꞌ yeꞌrsinꞌ coꞌ mbli mèna. No ale mbli Diox mtelꞌ Diox huax mbelꞌ par mquele mbelꞌ mèna par nguth huax mèna, ne.
\v 10 Neꞌ neꞌ gàc guꞌ mèn coꞌ ñii yèe ñii tìi xexte cón cheꞌn Diox xal mbli ndxep mèn nación Israel tiempa. No mbeth Diox mèna coꞌseꞌ ngua angl, coꞌ mtelꞌ Diox loo mèna, par mbeth angl mèna.
\p
\v 11 Ryete conꞌa ngòc loo xudgool naꞌ tiempa, coꞌ nee diꞌs, loo mèn nación Israel ngòc conꞌa par téꞌth naꞌ xá mod ndxàal que tee ban naꞌ loo Diox, naꞌ coꞌ nziriꞌ leꞌn tiemp ndxèꞌ, coꞌ nee diꞌs, nde zinꞌ gaxleꞌ lith no izlyoꞌ.
\v 12 Por cona, cheleꞌ chol guꞌ ndenꞌ mbli nèeleꞌ guꞌ guꞌ loo cón cheꞌn Crist thidtene, nee guꞌ xá ngue tee ban guꞌ loo cón cheꞌn Crist. Neꞌstreꞌfqueꞌ guꞌ, ne, cuaꞌn xquin guꞌ no xtol guꞌ loo Crist.
\v 13 Ryethe conꞌ coꞌ ndyactìi guꞌ coꞌ lyaꞌs li leꞌ guꞌ ryo xàꞌ loo cón cheꞌn Crist lalqueꞌ nac xal ndyactìi taamas mèn. Per na nii loo guꞌ: Más huen gàp guꞌ yalxlaꞌs loo Diox. Diox neꞌtolode laꞌ par gàc más conꞌ ryes no más conꞌ naxi loo guꞌ coꞌ nac coꞌ xec guꞌ láth gàc conꞌa loo guꞌ. Ndxeꞌlequeꞌ, coꞌseꞌ gàc chol conꞌ ryes no conꞌ coꞌ li xi lezoꞌ guꞌ, Diox lyath no guꞌ par riid conꞌa loo guꞌ; no par neꞌxide lezoꞌ guꞌ arid; no par xec guꞌ riid conꞌa loo guꞌ.
\p
\v 14 Por cona, ngue niin loo guꞌ, mèn huesen por cón cheꞌn Crist, guꞌ coꞌ nqueꞌ lezon ñèen: Bláꞌ guꞌ ya neꞌtolode tyub xib guꞌ no sálꞌ guꞌ yaꞌ guꞌ loo chol mdoꞌ no loo chol gunab thidtene.
\v 15 Ndyoodiz non guꞌ xal loo mèn coꞌ ndenꞌ diꞌs no mèn coꞌ ndxàaꞌd diꞌs. Leque yub guꞌ tub rez cón cheꞌn conꞌ ngue niin loo guꞌ ndxèꞌ par ñee guꞌ ñeeneꞌ chéꞌ léꞌ nac diꞌs coꞌ ndyoodiz non guꞌ o chéꞌ iléꞌde nac diꞌs coꞌ ndyoodiz non guꞌ.
\v 16 Coꞌseꞌ nqueltàa naꞌ templ par li naꞌ coꞌ nac “Cena Santa”, coꞌseꞌ ndxuhua thìb thìb naꞌ thìb leꞌ chuꞌth pan no coꞌseꞌ ndxu naꞌ chuꞌth vin no ñaꞌb naꞌ loo Diox li leyꞌ Diox conꞌa, cop coꞌ ndxòo vin coꞌ nac vin cheꞌn uv, vina no pana ndaꞌ cuent loo naꞌ thidte nac thìb naꞌ no tedib naꞌ loo Diox no loo cón cheꞌn Diox por cón cheꞌn ren Crist no por cón cheꞌn ladpeꞌ Crist. ¿Chéꞌ indlide naꞌ conꞌa tac thidte nac naꞌ loo Crist xal bélꞌyòo ladpeꞌ leque Crist, càꞌ? Cona ndli naꞌi, ¿léꞌ?
\v 17 Cona nee diꞌs, coꞌseꞌ ndxuhua thìb thìb naꞌ thìb leꞌ chuꞌth pana, ndluꞌi loo naꞌ cón cheꞌn Crist leꞌ Crist nac xal sate pana. Per mastaleꞌ huax mèn nac naꞌ, nac naꞌ mèn cheꞌn sate pana, coꞌ nee diꞌs, nac Crist. No coꞌseꞌ ndxuhua naꞌ thìb leꞌ pana, ndluꞌi loo naꞌ cón cheꞌn xá mod nac naꞌ cheꞌnpeꞌ Crist.
\p
\v 18 Huiꞌ guꞌ no bli guꞌ xtùuz cón cheꞌn mèn nación Israel. Coꞌseꞌ ndxuhua nguleyꞌ cheꞌn mèn nación Israel bélꞌ coꞌ mbec nguleyꞌ loo còoꞌ cheꞌn Diox, ¿chéꞌ indxàcta loo nguleyꞌa thidte ndxàc nguleyꞌa con Diox, càꞌ? Lìcqueꞌ, ndxàca tataa loo mèna, ¿léꞌ?
\v 19 ¿Xá nee guꞌ cón cheꞌn diꞌs coꞌ ngue go ron loo guꞌ ndxèꞌ? ¿Chéꞌ ndli guꞌ cuent anzeꞌf ntac conꞌ coꞌ mbec guꞌ loo mdoꞌ, càꞌ? Yende xàa. No ¿chéꞌ ndli guꞌ cuent anzeꞌf ntac mdoꞌ, càꞌ? Yende xàa. Ndxeꞌlequeꞌ, yende cón ntac mdoꞌ, ey.
\v 20 Per ndxeꞌlequeꞌ, ngue niin conꞌ ndxèꞌ loo guꞌ: Leꞌ bélꞌ máꞌ coꞌ ndxuth mèn coꞌ inacte mèn nación Israel, coꞌ mbec mèn loo mdoꞌ, ingue becte mèna bélꞌ máꞌ loo mdoꞌ. No inacte coꞌ, lìcqueꞌ, ngue bec mèn bélꞌ máꞌa loo Diox. Ndxeꞌlequeꞌ, mbec mèna bélꞌ máꞌ loo xpii coꞌ nac cheꞌn meexùꞌ. Cona, ngue niin loo guꞌ: Indlyasten leꞌ guꞌ thidte gàc loo cón cheꞌn meexùꞌ.
\v 21 Yende mod gu guꞌ bin coꞌ nac cop cheꞌn “Cena Santa” cheꞌn Tad Crist cheleꞌ guꞌ más ndli cas xal nac costumbr coꞌ mbed no guꞌ no coꞌ nac mbec guꞌ conꞌ ndxuhua guꞌ loo mes loo xpii cheꞌn meexùꞌ. Neꞌ neꞌ yen mod hua guꞌ thìb leꞌ chuꞌth pan coꞌ nac “Cena Santa” cheꞌn Tad Crist cheleꞌ guꞌ más ndli cas costumbr coꞌ mbed no guꞌ coꞌseꞌ mbec guꞌ conꞌ ndxuhua guꞌ loo mes loo xpii meexùꞌ. Cona nee diꞌs, yende mod thidte gàc guꞌ con Crist cheleꞌ guꞌ leque tiemp beꞌ ndli cas loo costumbr coꞌ nguled no guꞌ coꞌ mbli guꞌ coꞌ nac cón cheꞌn xpii cheꞌn meexùꞌ.
\v 22 ¿Chéꞌ iñeede guꞌ coꞌseꞌ tataa ndli mèn, ngue cuaꞌn mèn mod par yecloo Diox loo mèna, càꞌ? ¿Chéꞌ ndenꞌ guꞌ no chéꞌ ndli guꞌ cuent axta arid mbiꞌ guꞌ par neꞌzyebte guꞌ coꞌseꞌ yecloo Diox loo guꞌ, càꞌ? ¡Pà yilazen conꞌa!
\s Pab ngue taꞌ cuent loo mèn ya yende chó costumbr cuee no càꞌ mèn loo cón cheꞌn Crist coꞌseꞌ nzoleꞌ mèn loo cón cheꞌn Crist. No nqueꞌ lezoꞌ mèn ñèe mèn xtàa mèn cheleꞌ mèn, lìcqueꞌ, nzo loo cón cheꞌn Crist.
\p
\v 23 Lìcpeꞌ baꞌi, ryete conꞌ coꞌ ndlyaꞌs naꞌ li naꞌ, nzoqueꞌ mod li naꞌi conseꞌ gàca conꞌ coꞌ neꞌcàbte cuaꞌn naꞌ xquin naꞌ loo Tad. Per iryede conꞌa càb conꞌ ndac loo mèn coꞌ ndxàc hues naꞌ no xtàa naꞌ, mèn coꞌ ndxelaꞌs par tolo téꞌth mèn no taꞌ mèn cuent par tyubdiꞌs ndac mèna loo Tad Crist.
\v 24 Neꞌlide guꞌ xtùuz cuaꞌn guꞌ mod par càb conꞌ ndac ante loo guꞌ. Ndxeꞌlequeꞌ, fcuaꞌn guꞌ mod par gàc conꞌ ndac loo hues xtàa guꞌ por cón cheꞌn guꞌ.
\p
\v 25 Rye clas bélꞌ coꞌ nthoꞌ mèn coꞌteꞌ ndyoꞌ bélꞌ, neꞌtyóode guꞌ. Fxiꞌ guꞌ bélꞌa par hua guꞌ. Neꞌnibdiꞌste guꞌ loo mèna: ¿Chéꞌ nac bélꞌ ndxèꞌ coꞌ mblec mèn loo mes loo mdoꞌ, càꞌ? Yende chó mport nzo lezoꞌ guꞌ cón cheꞌn conꞌa.
\v 26 Tac izlyoꞌ ndxèꞌ no ryethe conꞌ coꞌ nziriꞌ loo izlyoꞌ nac cheꞌnpeꞌ Tad Diox.
\p
\v 27 Cheleꞌ chol mèn coꞌ inacte mèn coꞌ ndxelaꞌs loo cón cheꞌn Diox por cón cheꞌn Crist li convid guꞌ coꞌseꞌ nzo thìb yalhua liz mèna, no cheleꞌ guꞌ lyaꞌs ya thuhua guꞌ rye nítyèth coꞌ cuec mèna loo guꞌ no yende chó mport nzo lezoꞌ guꞌ nibdiꞌs guꞌ loo mèna: ¿Chéꞌ nac nítyèth ndxèꞌ coꞌ mblec guꞌ loo mdoꞌ, càꞌ? par neꞌtenꞌte guꞌ leꞌn lezoꞌ guꞌ no gab guꞌ loo lezoꞌ guꞌ iléꞌde nac coꞌ ngue li guꞌ.
\v 28 Per cheleꞌ chó mèn coꞌ ndxelaꞌs loo cón cheꞌn Diox por cón cheꞌn Crist nzo làtha, no gab mèna loo mèn coꞌ nzi yuhua nítyètha: Bélꞌ coꞌ natoxcuaꞌ coꞌ nac nítyèth coꞌ nzi yuhua guꞌ baꞌ nac bélꞌ máꞌ coꞌ mblec mèn guliz ndxèꞌ loo mdoꞌ, cara, leꞌ sya, más huen neꞌhuade mèna nítyèth bélꞌ máꞌa. Por cón cheꞌn diꞌs coꞌ mdaꞌ mèna cuent loo guꞌ no por cón cheꞌn xtùuz coꞌ mbli mèna leꞌn lezoꞌ mèna por ñèe mèna nzi yuhua guꞌ nítyètha, más huen neꞌhuade guꞌ nítyètha loo mèna par neꞌcàbte thìb yalquìi loo mèna.
\v 29 Conꞌ ndxèꞌ ngue niin loo guꞌ por cón cheꞌn xtùuz mèna no por cón cheꞌn conꞌ ndenꞌ mèn coꞌ indxelaꞌs ndacte leꞌn lezoꞌ mèna. Per ndxeꞌlequeꞌ, ingue niiden conꞌ ndxèꞌ loo guꞌ por cón cheꞌn conꞌ coꞌ ndenꞌ guꞌ leꞌn lezoꞌ guꞌ.
\p Peser nzo ndxep mèn coꞌ ngòo loo cón cheꞌn Diox por cón cheꞌn Crist coꞌ gab: ¿Chó nac mèn coꞌ ndxàp derech par tub rez mèn no laꞌs mèn no quexùꞌ mèn daa por cón cheꞌn xtùuz coꞌ ndenꞌ daa leꞌn lezon ante tac tedib mèn ndenꞌ leꞌn lezoꞌ nzoqueꞌ mod hua mèna conꞌ o yende mod hua mèna conꞌ. Yende chó cón cheꞌn mèna par tataa li mèna xtùuz, ¿léꞌ?
\v 30 Cona, ngue niin loo guꞌ: Cheleꞌ daa mbez loo Diox: Diox quix Uꞌ, Diox, coꞌseꞌ ndxuhuan no coꞌseꞌ ndxun xíten no luan, ¿chonon leꞌleꞌ tedib mèn ñii ngòc nguàal conꞌ cón chenen loo conꞌ coꞌ mbezen loo Diox: Diox quix Uꞌ, Diox, por ndxhuan xíten no luaꞌen, sya? Yende chó cón cheꞌn mèna conꞌa, ¿léꞌ?
\v 31 Por cona, ngue niin loo guꞌ: Que naca ndxuhua guꞌ luaꞌ guꞌ, que naca ndxu guꞌ xít guꞌ, o que naca ndli guꞌ chol conꞌ coꞌ ngue tee li guꞌ, bli guꞌ conꞌa par gàc conꞌ roo conꞌ xèn loo Diox, ndee guꞌ.
\v 32 Neꞌlide guꞌ par cuaꞌn mèn xquin mèn no xtol mèn, que nàca mèn nación Israel, que naca mèn coꞌ inacte mèn nación Israel, o que naca mèn coꞌ nac hues xtàa guꞌ coꞌ nqueltàa loo cón cheꞌn Diox.
\v 33 Bli guꞌ xal ncuanen mod huen ndxàc daa con mèn loo ryete conꞌ. Tac ncuanen mod huen ndxàc daa loo ryete mèn. Tac coꞌseꞌ ncuanen mod par huen ndxàc daa con ryete men, ingue cuanten conꞌ coꞌ càb conꞌ ndac ante loon. Ndxeꞌlequeꞌ, ndlina par càba conꞌ ndac loo huax mèn par gàca lyáꞌ mèn loo conꞌ ryes.
\c 11
\p
\v 1 Gure li guꞌ xal ndlin loo conꞌ mbli Crist no loo conꞌ coꞌ mbluꞌ Crist.
\s Pab ngue taꞌ cuent loo mèn xá mod ndxàal yòo mèngot loo cult o servis.
\p
\v 2 Daa ndli leꞌ guꞌ ndyuꞌ loon, mèn huesen por cón cheꞌn Crist, tac guꞌ nteꞌqueꞌ lezoꞌ ryethe conꞌ cón chenen, no nzi liqueꞌ guꞌ ryete conꞌ xal mnibeꞌen loo guꞌ no xalqueꞌ mtéꞌth guꞌ loon.
\v 3 Lyazen leꞌ guꞌ gòn no ñee guꞌ conꞌ ndxèꞌ: Leꞌ Diox mdoo lezoꞌ gàc conꞌ ndxèꞌ loo ryethe conꞌ: Leꞌ Diox ñibeꞌ loo Crist. Leꞌ Crist na, ñibeꞌ loo rye mènbiꞌ. Leꞌ mènbiꞌ na, ñibeꞌ loo mèngot.
\v 4 Tac cheleꞌ thìb mbiꞌ ndub sombrel yèc coꞌseꞌ cuez mbiꞌ Diox loo servis coꞌ nac cult no coꞌseꞌ co mbiꞌ yalbàn coꞌ ñibeꞌ Diox co mbiꞌ, naca thìb conꞌ par thyon mbiꞌ cheleꞌ mbiꞌ ndub sombrel yéc látha.
\v 5 Per ndxeꞌlequeꞌ, coꞌseꞌ mbez chol xaꞌgot Diox no coꞌseꞌ xaꞌgota ndeꞌth cón cheꞌn Diox loo mèn, cheleꞌ xaꞌgota intauꞌte yéc, leque xaꞌgota ngue tethon xaꞌgota loo conꞌ ngue li xaꞌ por intauꞌte xaꞌ yéc xaꞌ. Tac cheleꞌ xaꞌgota neꞌtauꞌte yéc xaꞌgota, cona nee diꞌs, lalqueꞌ nac xaꞌgota xal thìb xaꞌbiꞌ coꞌ nchub yéc.
\v 6 Per cheleꞌ mèngota neꞌtyalte tauꞌ yéc con larꞌbay, más huen leque mèngota ndxàal ñibeꞌ loo xtàa mèngota par choꞌ mèngota yis yéc mèngota axta ñaalequeꞌ yéc mèngota xal yéc thìb mènbiꞌ coꞌseꞌ nchoꞌ mènbiꞌ yis yec mènbiꞌ. Per cheleꞌ conꞌ co li mèngota li par thyon mèngota, masqueꞌ huen tauꞌ mèngota yéc mèngota con larꞌbay.
\v 7 Leꞌ por part cheꞌn mènbiꞌ na, indxàalte tub mènbiꞌ sombrel yéc mènbiꞌ coꞌseꞌ mbez mènbiꞌ Diox no coꞌseꞌ ngo mènbiꞌ yalbàn tac mènbiꞌ nac xin no xnaa cheꞌn Diox. No nac mènbiꞌ conꞌ roo conꞌ xèn loo Diox.
\v 8 Tac coꞌseꞌ mtoxcuaꞌ Diox nerlequeꞌ mèn, mèna nerlequeꞌ ngòc thìb mbiꞌ coꞌ mtoxcuaꞌ Diox. Ngoloa, cheꞌn leque bélꞌ lad mbiꞌa mbli Diox par mtoxcuaꞌ Diox thìb xaꞌgot coꞌ ngòc ner xaꞌgot.
\v 9 Lìcpeꞌ baꞌi, ner mbiꞌa neꞌnguiꞌth yáalte por cón cheꞌn thìb xaꞌgot. Ndxeꞌlequeꞌ, Diox mtoxcuaꞌ ner xaꞌgot por cón cheꞌn ner mbiꞌa.
\v 10 Por cona, ndxàal tauꞌ mèngot yéc mèngot par luꞌ mèngot leꞌ mèngot ndubdiꞌsqueꞌ loo Diox no ndxàp mèngot mod loo saꞌl mèngot. Tataa ndxàal li mèngot, ne, par tyac lezoꞌ angl ñèe angl ndyubdiꞌsqueꞌ mèngot loo saꞌl mèngot.
\v 11 Loo cón cheꞌn Tad Diox, Tad Diox mblo xnee leꞌ thìb xaꞌbiꞌ naquin tyub no xaꞌbiꞌ thìdte xaꞌgot no leꞌ thìb xaꞌgot na, naquinqueꞌ tyub no thìdte xaꞌbiꞌ coꞌ gàc saꞌl xaꞌ, ne.
\v 12 Xalqueꞌ ngocsuaꞌ ner xaꞌgot con bélꞌ lad thìb mbiꞌ no con sith lad thìb mbiꞌ, tataa mod, ne, ryete mènbiꞌ ndxáal loo thìb xaꞌgot. Per ryete conꞌa ngòc por cón cheꞌn Diox.
\p
\v 13 Leque guꞌ bnibeꞌ no blobeꞌ loo lezoꞌ guꞌ, ¿chéꞌ huen naca leꞌ thìb xaꞌgot cuez Diox coꞌseꞌ intauꞌte xaꞌgota yéc xaꞌgota con larꞌbay, càꞌ? Ihuente naca tataa, ¿léꞌ?
\v 14 ¿Chéꞌ indenꞌte guꞌ leque thìb xaꞌbiꞌ ndluꞌ nazab ñaa thìb xaꞌbiꞌ coꞌseꞌ nolꞌ yis yéc xaꞌbiꞌa, càꞌ?
\v 15 Ndxeꞌlequeꞌ, cheleꞌ yis yéc thìb xaꞌgot nolꞌ, ndxàc conꞌ guryath no conꞌ guryèn loo xaꞌgota por nolꞌ yis yéc xaꞌgota. Tac Diox mbli nolꞌ yis yéc xaꞌ par yauꞌ yéc xaꞌgota xal ntauꞌ thìb larꞌbay yéc xaꞌgota.
\v 16 Per cón cheꞌn diꞌs coꞌ ngue telꞌen loo guꞌ ndxèꞌ, ndxep mèn lyaꞌs cuaꞌn diꞌs cón cheꞌn mod coꞌ ngue niin loo guꞌ ndxèꞌ. Lyazen non mèna ya yende chó tedib costumbr ngue no mèn coꞌ ndxelaꞌs coꞌ nqueltàa chol lugar. Thìba conꞌ ndxèꞌ.
\s Pab ngue taꞌ cuent loo mèn cón cheꞌn coꞌseꞌ ndxuhua mèn pan no ndxu mèn vin coꞌ nee diꞌs nac “Cena Santa”.
\p
\v 17 Leꞌ tediba na, ñibeꞌen loo guꞌ xá mod ndxàal li guꞌ coꞌseꞌ queltàa guꞌ par thidte hua guꞌ. Yende mod lin par tyuꞌ nec thìb guꞌ làtha. Tac lugar de gàc conꞌ ndac làth guꞌ coꞌseꞌ nqueltàa guꞌ, ale ndxeꞌlequeꞌ, ndxàc conꞌ yeꞌrsinꞌ làth guꞌ.
\v 18 Nerlequeꞌ conꞌ coꞌ mbìnen cón cheꞌn guꞌ nac: Coꞌseꞌ nqueltàa guꞌ, ale ndxàc rol guꞌ làth xtàa guꞌ loo conꞌ coꞌ indxòode lezoꞌ guꞌ. Thìb part ndxelazena. No tedib part na, indxelastena.
\v 19 Ndyac guꞌ naquinqueꞌ càb guꞌ diꞌs no tyoodiꞌs guꞌ par li laꞌs guꞌ conꞌ no tub rez guꞌ conꞌ coꞌ li guꞌ no par yúꞌ ñeeneꞌ chó guꞌ coꞌ nzo làth guꞌ coꞌ, lìcqueꞌ, mbli nèequeꞌ guꞌ guꞌ loo cón cheꞌn Crist.
\v 20 Cona, ngue niin loo guꞌ: Coꞌseꞌ thidte nqueltàa guꞌ par hua guꞌ coꞌ mbez naꞌ nac “Cena Santa”, láth coꞌseꞌ ndxàc rol guꞌ loo conꞌ coꞌ indxòode lezoꞌ guꞌa, cona inacte leꞌ guꞌ, lìcqueꞌ, ngue yuhua “Cena Santa”.
\v 21 Conꞌ ndxèꞌ ndxàc loo guꞌ coꞌseꞌ thidte nqueltàa guꞌ par hua rsè guꞌ xalqueꞌ ndxuhua rsè mèn liz mèn ndooreꞌ queltàa ryete guꞌ par thidte yòo guꞌ par li guꞌ “Cena Santa”. Per ndxep guꞌ coꞌ nzo làtha, ale ndxuhuagàa guꞌ loo xtàa guꞌ. No indaꞌde guꞌ thìb ro conꞌ coꞌ ndxuhua guꞌa hua xtàa guꞌ. Leꞌ taamas guꞌ na, nzi lanꞌ. No taamas guꞌ na, ndxuhua no xtàa guꞌ axta plóthe axta mduuz guꞌ.
\v 22 ¿Cón nac coꞌ ngue li guꞌa, àꞌ? ¿Chéꞌ ingue node guꞌ liz guꞌ coꞌteꞌ ya thuhua guꞌ no gu guꞌ, càꞌ? Ngue no guꞌ liz guꞌ, ¿léꞌ? Coꞌseꞌ ngue li guꞌ conꞌa, ngue xìis no guꞌ mèn coꞌ nqueltàa leꞌn templ cheꞌn Diox. No ngue tethon guꞌ hues xtàa guꞌ coꞌ neꞌnguiꞌth node conꞌ hua. ¿Cón lyaꞌs guꞌ tolo niin loo guꞌ, àꞌ? ¿Chéꞌ tlin par tyuꞌ guꞌ loo mèn, càꞌ? Neꞌliden leꞌ guꞌ tyuꞌ loo mèn, cara.
\s Trèꞌ ndluꞌ cón cheꞌn diꞌs coꞌ gunii Tad Jesús coꞌseꞌ nduhua Tad Jesús con myenꞌ xinꞌ mtéꞌth Tad Jesús.
\r (Mt. 26.26–29; Mr. 14.22–25; Lc. 22.14–20)
\p
\v 23 Diꞌs coꞌ ngue niin loo guꞌ ndxèꞌ nac coꞌ mbluꞌ yub Tad Crist loon cón cheꞌn “Cena Santa”. Cón cheꞌn conꞌa mblolen yalbàn loo guꞌ no mbluꞌlena loo guꞌ. Conꞌ ndxèꞌ nac diꞌs coꞌ mbluꞌ Tad Crist loon: Leque yálꞌa, ndooreꞌ coꞌseꞌ mdaꞌxùꞌ Jud Iscariot Tad Jesús loo mèn, láth ndub yuhua no rsè Tad Jesús myenꞌ xinꞌ mtéꞌth Tad Jesús loo mes, mxen Tad Jesús pan.
\v 24 Coꞌseꞌ ngolo ndxab Tad Jesús: Diox quix Uꞌ, Diox, loo Diox cón cheꞌn pana, mchìꞌx Tad Jesús pana, no ndxab Tad Jesús loo myenꞌ xinꞌ mtéꞌth Tad Jesús: Fxen guꞌ thìb leꞌ thìb leꞌ pan ndxèꞌ no dhua guꞌ pan ndxèꞌ. Conꞌ ndxèꞌ nac coꞌ ngue luꞌen loo guꞌ cón cheꞌn bélꞌyòo laden coꞌ tyactìi por cón cheꞌn guꞌ. Taandxèꞌ hua guꞌ pan ndxèꞌ par teꞌ lezoꞌ guꞌ cón chenen.
\v 25 Lomisqueꞌ mod ne, coꞌseꞌ ngolo nduhua mèna pan, mxen Tad Jesús thìb cop vin. Ngolo ndxab Tad Jesús: Diox quix Uꞌ, Diox, loo Diox, tolo ndxab Tad Jesús loo myenꞌ:
\p Vin coꞌ nzo leꞌn cop ndxèꞌ ndluꞌ cón cheꞌn conveñ cub coꞌ gàc nèe coꞌseꞌ gath daa. Ryete vez coꞌseꞌ taandxèꞌ gu guꞌ vin ndxèꞌ, teꞌ lezoꞌ guꞌ cón chenen.
\p Ngoloa, ngu thìb thìb myenꞌa thìb ro thìb ro vina.
\p
\v 26 Tac coꞌseꞌ cadqueꞌ hua guꞌ pan ndxèꞌ no gu guꞌ vin ndxèꞌ, coꞌ nee diꞌs, nac “Cena Santa”, hora ngue taꞌ guꞌ cuent cón cheꞌn xá mod nguth Tad Jesús. No toloqueꞌ hua guꞌ pan ndxèꞌ no gu guꞌ vin ndxèꞌ xalqueꞌ ngue niina loo guꞌ axta coꞌseꞌ gàc huiz coꞌseꞌ bere Tad Jesús, yiꞌth Tad Jesús loo izlyoꞌ tedib vez.
\s Pab ngue luꞌ xá mod ndxàal más huen li mèn rsè coꞌ ngòc rsè coꞌseꞌ nduhua rsè Tad Jesús pan no coꞌseꞌ ngu Tad Jesús vin con myenꞌ xinꞌ mtéꞌth Jesús.
\p
\v 27 Por cona, ngue niin loo guꞌ cón cheꞌn coꞌseꞌ indxàalte li mèn conꞌa: Mèn coꞌ huaxùꞌ pan no mèn coꞌ guxùꞌ vin coꞌseꞌ li mèn “Cena Santa”, mèna ngue cuaꞌn xquin mèn no xtol mèn loo Diox xalqueꞌ mèn coꞌ mbeth Crist. Tataa gàca loo mèna coꞌseꞌ indxàalte hua mèn pana no gu mèn vina coꞌ nac “Cena Santa”.
\v 28 Por cona, lyazen ner teche texyath thìb thìb guꞌ xtùuz guꞌ no lezoꞌ guꞌ par ñee guꞌ ñeeneꞌ chéꞌ nzo chó xèn chó xyàn nzo lezoꞌ guꞌ ndooreꞌ li guꞌ rsè coꞌ nac “Cena Santa”. Cheleꞌ guꞌ yende cón ndenꞌ leꞌn lezoꞌ guꞌ, nzoqueꞌ mod hua guꞌ pan no gu guꞌ vin coꞌ nac rsè coꞌ nac “Cena Santa”.
\v 29 Tac cheleꞌ mèn ndxuhua pan no ndxu mèn vin coꞌ nac “Cena Santa” coꞌseꞌ indxàalte li mèna conꞌa, ncàba loo mèn quexùꞌ Diox mèn tac indenꞌte mèn leꞌ cón cheꞌn “Cena Santa” nac cón cheꞌnpeꞌ lad Crist.
\v 30 Tac por ndxuhua ndxep guꞌ pan no ndxu ndxep guꞌ vin cheꞌn “Cena Santa” coꞌseꞌ indxàalte li guꞌ tataa, por cona, leque guꞌ ncuaꞌn xquíiz guꞌ no ndxeloa ndxàc guꞌ xal thìb mèn yíiz coꞌ mbuuꞌs. No ale axta mcàba yalguth loo huax xtàa guꞌ.
\v 31 Per cheleꞌ naꞌ laꞌs loo leque naꞌ no teche texyath leque naꞌ xtùuz naꞌ no lezoꞌ naꞌ par ñee naꞌ ñeeneꞌ ¿chéꞌ nzo chó xyàn nzo leꞌn lezoꞌ naꞌ ndooreꞌ li naꞌ rsè coꞌ nac “Cena Santa”? más huen neꞌyòode naꞌ loo rsè coꞌ nac “Cena Santa”. Leꞌ sya, tataa mod ya inquinte tub rez Diox cón cheꞌn naꞌ.
\v 32 Coꞌseꞌ ngolo mdub rez Diox cón cheꞌn conꞌ yeꞌrsinꞌ coꞌ mbli ndxep naꞌa, que nzo neꞌ ñee lezoꞌ naꞌ, Diox tetìipeꞌ naꞌ par neꞌgàcte loo naꞌ quexùꞌ Diox naꞌ xal quexùꞌ Diox taamas mèn loo izlyoꞌ.
\p
\v 33 Por cona, ngue niin loo guꞌ, mèn huesen: Coꞌseꞌ thidte queltàa ryete guꞌ par yòo guꞌ loo “Cena Santa” leꞌn templ, cued guꞌ par tolo queltàa no guꞌ xtàa guꞌ xal ndxàala. Leꞌ yiloa na, li guꞌ “Cena Santa”.
\v 34 Cheleꞌ chol guꞌ nzi lanꞌ tac nzi bed guꞌ, ndxàal ner ya thuhua rsè guꞌ liz guꞌ ndooreꞌ yiꞌth guꞌ templ par neꞌquexùꞌde Diox guꞌ por conꞌ ngue li guꞌ leꞌn templ. Leꞌ coꞌseꞌ beren, gal neen máa guꞌ xá nziriꞌ guꞌ tedib vez na, tolo ñibeꞌen cón cheꞌn taamas conꞌ coꞌ tolo li guꞌ, ndee guꞌ.
\c 12
\s Pab ngue luꞌ mèn xal nac thìb thìb zinꞌ coꞌ ndli Xpii Natúꞌ cheꞌn Diox par nxoꞌf zinꞌ Xpii Natúꞌ zinꞌa loo mèn par li mèn zinꞌa.
\p
\v 1 Nalleꞌ lyazen toodiz non guꞌ, mèn huesen por cón cheꞌn Crist, cón cheꞌn xal ndli Xpii Natúꞌ zinꞌ loo thìb thìb mèn par gác li mèna sirv no par gác li mèna zinꞌ thìb mod no tedib mod loo mèn coꞌ ndxelaꞌs loo Diox por cón cheꞌn Jesucrist. Lyazen leꞌ guꞌ gòn cón cheꞌn conꞌ ndxèꞌ no taꞌ guꞌ cuent cón cheꞌn conꞌ ndxèꞌ.
\p
\v 2 Guꞌ naneequeꞌ no ndaꞌqueꞌ guꞌ cuent coꞌseꞌ tarte gàc guꞌ mèn coꞌ ndxelaꞌs loo Diox por cón cheꞌn Crist, guꞌ mdaꞌ lugar loo rye mèn coꞌ ngòc hues xtàa guꞌ par mzi mchep mèna guꞌ par mdub xib guꞌ loo chol mdoꞌ coꞌ indxácte ndyoodiꞌs. No que nzo neꞌ ñee lezoꞌ guꞌ, mbli guꞌi.
\v 3 Por cona, lyazen leꞌ guꞌ huen huen taꞌ cuent yende chó mèn nzo coꞌ nzo Xpii Natúꞌ loo par gab mèna mbiꞌ yeꞌrsinꞌtúb nac Jesús. Lomisqueꞌ ne, yende chó nzo Xpii Natúꞌ cheꞌn Diox loo coꞌ neꞌcàbte leꞌ Jesús nac Tad loo ryethe conꞌ. Tabqueꞌ mèna leꞌ Jesús nac Tad no Jef loo ryethe conꞌ.
\p
\v 4 Nzo huax conꞌ coꞌ angmbli Xpii Natúꞌ loo mèn par ndxác mèn li mèn sirv loo Diox thìb mod tedib mod. Per leque yub Xpii Natúꞌ nac coꞌ ndli leꞌ mèn gác li sirv loo Diox thìb mod tedib mod.
\v 5 Huax loo zinꞌ nzo coꞌ nxoꞌf zinꞌ mèn cón cheꞌn Diox. Per loo zinꞌa thidte Diox ñibeꞌ par li mèn zinꞌa.
\v 6 Anzeꞌf huax mod nzo par xoꞌf zinꞌ mèn zinꞌ loo xtàa mèn cón cheꞌn Diox. Per leque yub Diox nac xaꞌ coꞌ ndli par ryoꞌ loo zinꞌ coꞌ ndli mèna.
\v 7 Per leque yub Diox mxoꞌf zinꞌ thìb zinꞌ loo thìb thìb mèn par ryo xoꞌf loo mèna leꞌ Xpii Natúꞌ nzo no mèna. Leꞌ yiloa na, càb conꞌ ndac loo rye mèn coꞌ ndxelaꞌs por conꞌ coꞌ ndli Xpii Natúꞌ loo mèna.
\v 8 Tac, lìcqueꞌ, loo thìb ned mèn ndli Xpii Natúꞌ zinꞌ par ndxác mèna luꞌ mèna loo xtàa mèna cón cheꞌn Diox. Loo tedib ned mèn ndli Xpii Natúꞌ zinꞌ par nanee mèn no non mèn cón cheꞌn xtiꞌs Diox par luꞌ mèn cón cheꞌn xtiꞌs Diox loo chol mèn coꞌ nac xtàa mèn. Ndxàc conꞌa loo mèn por cón cheꞌn leque yub Xpii Natúꞌa.
\v 9 Leꞌ loo tedib ned mèn na, ndli Xpii Natúꞌ leꞌ mèna ndxàp yalxlaꞌs loo Diox axta plóthe. Leꞌ loo taamas mèn na, Xpii Natúꞌ ndli par ndxác mèna teyac mèna mbíiz.
\v 10 Leꞌ loo taamas mèn na, ndli Xpii Natúꞌ leꞌ mèna ndli chol yalguzyeꞌ. Leꞌ loo taamas mèn na, ndli Xpii Natúꞌ leꞌ mèna ndxác co yalbàn no luꞌ mèna loo xtàa mèna cón cheꞌn Crist. Leꞌ loo taamas mèn na, ndli Xpii Natúꞌ par non mèna, ¿chéꞌ lìcqueꞌ nac diꞌs coꞌ ngo mèn yalbàn cheꞌnpeꞌ Diox o chéꞌ ilìcte nac diꞌsa? Leꞌ loo taamas mèn na, ndli Xpii Natúꞌ leꞌ mèna gác tyoodiꞌs chol diꞌstèe coꞌ indxònte nec thìb mèn. Leꞌ loo taamas mèn na, ndli Xpii Natúꞌ leꞌ mèna gác coxcan diꞌstèe cheꞌn mèn coꞌ ndyoodiꞌs chol diꞌstèe coꞌ indxònte mèn.
\v 11 Ryete zinꞌ ndxèꞌ nxoꞌf zinꞌ leque yub Xpii Natúꞌ loo mèn. No ndli Xpii Natúꞌ loo mèn thìb thìb mèn li xàꞌ xàꞌ zinꞌ xal nee lezoꞌ Xpii Natúꞌ li Xpii Natúꞌ loo mèn.
\s Pab ngue taꞌ cuent loo mèn leꞌ ngudloo mèn no nza mèn no yaꞌ mèn no nii mèn nac cheꞌn thidte lad mèn.
\p
\v 12 Loo cón cheꞌn Diox nac Crist, con ryete mèn coꞌ ngòo loo cón cheꞌn Crist, thidte conꞌ xal nac bélꞌyòo lad mèn thìb conꞌ coꞌ nac thidte conꞌ. Thìb lad mèn nac huax part, ¿léꞌ? Mastaleꞌ huax part naca, per ndxeꞌlequeꞌ, cheꞌn thidte lad nac rye parta. Lomisqueꞌ naꞌ ne, mastaleꞌ huax mèn nac naꞌ coꞌ ndxelaꞌs loo Crist no loo cón cheꞌn Crist, nac naꞌ cheꞌnpeꞌ Crist xal nac rye part cheꞌn lad naꞌ loo naꞌ loo Crist.
\v 13 Tac por cón cheꞌn leque Xpii Natúꞌ ngòo naꞌ loo cón cheꞌn Crist xal ndxàca loo mèn coꞌseꞌ ndxàc bautizar mèn leꞌn nít par ndxàc ryete naꞌ cheꞌn Crist xal nac thìb thìb part cheꞌn lad mèn loo mèn, que naca nac naꞌ mèn nación Israel, que naca nac naꞌ taamas mèn cheꞌn chol nación, que naca nac naꞌ moz yèe loo patrón, que naca nac naꞌ mèn coꞌ yende chó ñii loo no coꞌ yende chó ñibeꞌ loo. Ngulàa Xpii Natúꞌ loo rye naꞌ. Ngòo Xpii Natúꞌ loo rye naꞌ par ñibeꞌ Xpii Natúꞌ loo naꞌ.
\p
\v 14 Beren, niin loo guꞌ tedib vez: Bélꞌyòo lad mèn huax part nac.
\v 15 Angab naꞌi. Cheleꞌ nii mèn gác gab loo mèn: Leꞌ daa inacte yaꞌ lùu, por cona, inacte daa cheꞌn lùu, ¿chéꞌ por cona inacte nii mèna cheꞌn lad mèna, càꞌ? Yende xàa. Naca, ¿léꞌ? Thìba conꞌa.
\p
\v 16 Leꞌ tediba na, cheleꞌ nza mèn gác gab loo mèn: Leꞌ daa inacte ngudlool, por cona, inacte daa cheꞌn lùu, ¿chéꞌ por cona inacte nza mèn cheꞌn lad mèn, càꞌ? Tyèꞌ. Naca, ¿léꞌ?
\v 17 Cheleꞌ dipte lad mèn nac ngudloo mèn, ¿xá mod gòn mèn conꞌ, sya? No cheleꞌ dipte lad mèn nac nza mèn, ¿xá mod tub xi mèn conꞌ, syaꞌ? Yende mod gàca tataa, ¿léꞌ?
\v 18 Diox mziꞌf thìb thìb part coꞌ nac lad mèn xalqueꞌ mblobeꞌ lezoꞌ Diox mbli Dioxa.
\v 19 Cheleꞌ ryete part cheꞌn lad mèn nac thidte part, ¿máa lad mèn, sya? Naquinqueꞌ que no mèn rye part coꞌ nac lad mèn coꞌ nziꞌf lad mèn.
\v 20 Mastaleꞌ huax part nac lad mèn, lìcpeꞌ baꞌi, thidte lad mèn nac lad mèn.
\p
\v 21 Cheleꞌ ngudloo mèn gác tyoodiꞌs, yende mod gab ngudloo mèn loo yaꞌ mèn: Inquinte daa lùu, cara. No cheleꞌ quèe yéc mèn gác tyoodiꞌs, yende mod gab quèe yéc mèn loo nii mèn: Inquinte daa lùu.
\v 22 Ndxeꞌlequeꞌ, más naquin que no mèn part cheꞌn lad mèn coꞌ indlide mèn cuent ntac loo mèn.
\v 23 Part cheꞌn lad mèn coꞌ ndenꞌ mèn ndli más nthyon mèn cheleꞌi yúꞌ loo mèn, parta más nabeꞌs ntauꞌ mèn. Cheleꞌ part coꞌ nac lad mèn ndxúꞌ loo mèn coꞌ indxàalte yúꞌ loo mèn, part cón cheꞌn mèn más nabeꞌs ntauꞌ mèn lad mèn no nquenap mèn part lad mèn par neꞌlúꞌde mèn part lad mèn loo xtàa mèn, ¿léꞌ?
\v 24 Ndxeꞌlequeꞌ, part cheꞌn lad mèn coꞌ ndxúꞌ loo mèn, parta inquinte tolo quenap mèn nabeꞌste. Per yub Diox mziꞌf thìb thìb part coꞌ nac lad mèn. No ndli Diox leꞌ mèn más nquenap part cheꞌn lad mèn coꞌ ndenꞌ mèn xhuite ntac loo mèn.
\v 25 Tataa mbli Diox par más ntac part cheꞌn lad mèn coꞌ iñaade ntac par lalqueꞌ gàc thìb thìb part lad mèn. Tataa mod mèna li par gàca quenap mèn no tauꞌ mèn thìb thìb part lad mèn xalqueꞌ nquenap no ntauꞌ mèn taamas part lad mèn.
\v 26 Lomisqueꞌ mod ne, cheleꞌ thìb part lad mèn ndenꞌ yalnè, leꞌ sya, dib lad mèn ngueꞌs yalnè. No cheleꞌ thìb part lad cheꞌn thìb mbiꞌ nac coꞌ más ndli mbiꞌ cas ó más ngue lezoꞌ mbiꞌ ñèe mbiꞌ, dibte lad mbiꞌ ndenꞌ huenqueꞌ nzo mbiꞌ por cón cheꞌn conꞌa.
\p
\v 27 Lomisqueꞌ mod ne, ryete guꞌ coꞌ nac mèn coꞌ ngòoleꞌ loo cón cheꞌn Crist, nac guꞌ, coꞌ nee diꞌs, part cheꞌn lad Crist. No thìb thìb guꞌ nac cheꞌnpeꞌ Crist xalqueꞌ nac thìb thìb part lad mèn loo mèn.
\v 28 Cona, ngue niin loo guꞌ: Diox mxoꞌf zinꞌ thìb thìb zinꞌ loo ndxep mèn par xoꞌf zinꞌ mèn zinꞌ ndxèꞌ loo mèn coꞌ nqueltàa loo cón cheꞌn Crist chol lugar. Ner mblec Diox ndxep mèn coꞌ mtelꞌ Crist coꞌ ndxeꞌ diꞌs cheꞌn Crist. Leꞌ ngoloa na, mblec Diox tedib cuaꞌ mèn coꞌ ngo yalbàn cón cheꞌn Crist. Ngoloa na, mblec Diox tedib cuaꞌ mèn coꞌ ndluꞌ loo mèn cón cheꞌn Crist. Ngoloa na, mblec Diox tedib cuaꞌ mèn coꞌ ndxác ndli chol yalguzyeꞌ. Ngoloa na, mblec Diox tedib cuaꞌ mèn coꞌ ndxác ndli par ndxac mèn yíiz. Ngoloa na, mblec Diox tedib cuaꞌ mèn coꞌ ndlyath no xtàa no mèn coꞌ ndyoo ner no coꞌ ndyoo naa loo mèn coꞌ nqueltàa loo cón cheꞌn Jesucrist. No mblec Diox tedib cuaꞌ mèn coꞌ gác tyoodiꞌs tedib diꞌstèe coꞌ yende chó mèn ndxòn.
\v 29 ¿Chéꞌ por cona nac rye mèna mèn coꞌ mtelꞌ Crist, mèn coꞌ ndxeꞌ diꞌs, càꞌ? ¿Chéꞌ por cona ngo rye mèna yalbàn, càꞌ? ¿Chéꞌ por cona nac rye mèna maistr coꞌ ndluꞌ cón cheꞌn Crist loo mèn, càꞌ? ¿Chéꞌ por cona ndli rye mèna yalguzyeꞌ, càꞌ? Yende xàa.
\v 30 ¿Chéꞌ por cona ndxác rye mèna teyac rye mèna xtàa mèn, càꞌ? ¿Chéꞌ por cona ndxác rye mèn tyoodiꞌs rye mèna chol diꞌstèe coꞌ indxònte xtàa mèn, càꞌ? ¿Chéꞌ por cona ndxác rye mèna coxcan mèna diꞌstèe coꞌ ndyoodiꞌs mèn coꞌ indxònte taamas mèn, càꞌ? Yende xàa.
\v 31 Fcuaꞌn guꞌ mod, yey, leꞌ Xpii Natúꞌ angli leꞌ guꞌ tolo gác par li guꞌ xal nac ner conꞌ coꞌ ngolo guniin loo guꞌ coꞌ nac más conꞌ ndac. Per nalleꞌ, trèꞌ par delant loo cart ndxèꞌ daa tolo luꞌ loo guꞌ xá mod más que tee ban ndac guꞌ loo Diox loo taamas conꞌ coꞌ guniilen loo guꞌ.
\c 13
\s Pab ngue luꞌ loo mèn xá mod ndxàal queꞌ lezoꞌ mèn ñèe mèn xtàa mèn no xá mod ndxàal gàc mèn mèn coꞌ non carida ñèe xtàa mèn.
\p
\v 1 Huiꞌ guꞌ nexa. Cheleꞌ daa ndyoodiꞌs huax diꞌstèe coꞌ ndyoodiꞌs chol mèn no ndyoodizguèꞌen chol diꞌstèe coꞌ ndyoodiꞌs angl cheꞌn Diox coꞌ neꞌgònte mèn no coꞌ neꞌtaꞌde mèn cuent no làth xtauꞌa inqueꞌde lezon ñèen chol mèn coꞌ ndxàc huesen no xtàan, nac daa xal thìb tambor coꞌ alithe ndyez. No nac daa xal thìb leꞌ yiꞌf coꞌ nteꞌs mèn coꞌ alithe ndyez, coꞌ nee diꞌs, anxleꞌ ndyoodizen no yende cón ntac daa loo Diox.
\v 2 Cheleꞌ daa nac mèn coꞌ mbli Diox ngo yalbàn cón cheꞌn Crist loo mèn, no cheleꞌ Diox mbli par nonen no tan cuent cón cheꞌn ryethe conꞌ coꞌ nzo casloo loo Diox cón cheꞌn coꞌ mblo xnee Diox par li Diox, no cheleꞌ Diox mbli pan nonen no tan cuent cón cheꞌn ryethe conꞌ, no cheleꞌ Diox mbli par ndxàpen yalxlaꞌs loo Diox axtaqueꞌ lin gan techeen thìb yii coꞌteꞌ ndub yii no làth xtauꞌa inqueꞌde lezon ñèen mèn huesen no mèn xtàan, yende cón ntac daa loo Diox.
\v 3 Lomisqueꞌ ne, cheleꞌ daa liꞌth ryete xyònen no yalgonꞌ coꞌ ngue non par tana càa mèn coꞌ ndyac yaltìi no cheleꞌ daa gath loo quìi no loo bèel por cón cheꞌn diꞌs ndac no làth xtauꞌa inqueꞌde lezon ñèen huesen no xtàan, yende cón ntac daa loo Diox.
\p
\v 4 Mèn coꞌ, lìcqueꞌ, nqueꞌ lezoꞌ ñèe hues xtàa, mèna nxec yèe no nchaꞌlaꞌs mèna loo ryethe conꞌ coꞌ ndxàc loo mèn. Mèn coꞌ, lìcqueꞌ, nqueꞌ lezoꞌ ñèe hues xtàa, mèna nac mèn nadoꞌ loo rye mèn. Mèn coꞌ, lìcqueꞌ, nqueꞌ lezoꞌ ñèe hues xtàa, mèna indxànte lezoꞌ ñèe yalgonꞌ cheꞌn xtàa mèn. Mèn coꞌ, lìcqueꞌ, nqueꞌ lezoꞌ ñèe hues xtàa, mèna indyeꞌste no inxyalꞌte loo xtàa mèn. Neꞌ neꞌ inac mèn coꞌ nqueꞌ lezoꞌ ñèe hues xtàa mèn mèn coꞌ ndxoc xab coꞌ ñaa nít nayèe par huiꞌ taamas mèn loo mèna xal ndryec nxyub mèna.
\v 5 Mèn coꞌ, lìcqueꞌ, nqueꞌ lezoꞌ ñèe hues xtàa, mèna ndxàp mod ñèe hues xtàa. Incuaꞌnte mèna mod ante gàc conꞌ ndac loo cón cheꞌnpeꞌ mèna. Neꞌ neꞌ indaꞌ mèna lugar nzyo yéc mèna setilte. Neꞌ neꞌ inac mèna mèn coꞌ ngosuaꞌ xyàn leꞌn lezoꞌ cón cheꞌn chol conꞌ yeꞌrsinꞌ coꞌ ndli taamas mèn loo mèna.
\v 6 Mèn coꞌ, lìcqueꞌ, nqueꞌ lezoꞌ ñèe hues xtàa, mèna indyacte lezoꞌ ñèe chol mèn coꞌ ndli conꞌ coꞌ inacte conꞌ nalì no conꞌ nambìi loo xtàa mèn. Ndxeꞌlequeꞌ, mèn coꞌ nqueꞌ lezoꞌ ñèe hues xtàa, mèna ante ndyac lezoꞌ coꞌseꞌ nque tee ban mèn ante loo coꞌ nac conꞌ lìcpeꞌ.
\v 7 Mèn coꞌ, lìcqueꞌ, nqueꞌ lezoꞌ ñèe hues xtàa, mèna ntauꞌ loo cón cheꞌn xtàa mèn par neꞌgònte taamas mèn cón cheꞌn xtàa mèna. Mèna ndxàp yalxlaꞌs loo hues xtàa mèna. Mèna, ne, nzi quee lezoꞌ par càb ryethe conꞌ ndac loo mèna. Mèna, ne, nxec yèe loo ryethe conꞌ ndxàc loo mèna.
\p
\v 8 Neꞌryede mèn coꞌ nqueꞌ lezoꞌ ñèe hues xtàa. Per zin thìb huiz no zin thìb ze coꞌseꞌ neꞌtolode teꞌth mèn diꞌs coꞌ ndxab Diox coꞌ gàc. Tac mbyathleꞌ no mbyènleꞌ ryethe conꞌ ndxab Diox. No zin thìb huiz no zin thìb ze ya neꞌtolode tyoodiꞌs mèn chol diꞌstèe coꞌ yende chó mèn gòn. No zin thìb huiz no zin thìb ze coꞌseꞌ ya inquinte luꞌ mèn loo hues xtàa mèn cón cheꞌn ryethe conꞌ coꞌ nzo casloo loo Diox no coꞌ mblo xnee Diox par li Diox.
\v 9 Láth naban nuꞌ, lìcqueꞌ, neꞌtaꞌde nuꞌ cuent cón cheꞌn ryethe conꞌ. Lomisqueꞌ ne, ante coꞌ ndxácte nuꞌ ngo nuꞌ yalbàn cón cheꞌn Diox.
\v 10 Per ndxeꞌlequeꞌ, coꞌseꞌ ngolo mdyaa ryethe conꞌ coꞌ gàc loo nuꞌ, axta syareꞌ tolo taꞌ nuꞌ cuent no más clarlequeꞌ non nuꞌ cón cheꞌn ryethe conꞌ.
\p
\v 11 Coꞌseꞌ ngòc daa myenꞌ bix, alithe ndyoodizen xal ndyoodiꞌs myenꞌ bix. Alithe mblin xtùuz xal ndli myenꞌ bix xtùuz. Per coꞌseꞌ ngòcleꞌ daa thìb mbiꞌ, mbláꞌen ryethe conꞌ coꞌ nac mod coꞌ alithe ndli myenꞌ bix.
\v 12 Lomisqueꞌ mod ne, láth beꞌ naban naꞌ, loo ryethe cón cheꞌn Diox ndxos xtùuz naꞌ no neꞌñeeꞌde naꞌ cón ngue li naꞌ. Ndxàca loo naꞌ xal mèn coꞌ nathath ngüiꞌ loo thìb spej loo conꞌ coꞌ nac cón cheꞌn Diox nalleꞌ. Per coꞌseꞌ gàc huiz coꞌ tyaa ryethe conꞌ coꞌ gàc loo naꞌ, syareꞌ clarlequeꞌ huiꞌ naꞌ no tenꞌ naꞌ no li laꞌs naꞌ ryethe conꞌ xal thìb mbiꞌ coꞌ ndxeꞌslequeꞌ ngüiꞌ conꞌ. Per nalleꞌ axta neꞌ neꞌ indan cuent no neꞌ neꞌ iñeen coꞌ huenlequeꞌ cón cheꞌn ryethe conꞌ. Per huiza, syase tan cuent no ñeen ryethe conꞌ xalqueꞌ non Diox no nanee Diox ryethe conꞌ cón chenen nalleꞌ.
\v 13 Por cona, ngue niin loo guꞌ nalleꞌ: Nzo son conꞌ coꞌ ndxàalqueꞌ tolo li mèn thidtene. Conꞌa nac conꞌ ndxèꞌ: Thìba: tolo gàp mèn yalxlaꞌs loo Diox thidtene. Leꞌ tediba na, nac: toloqueꞌ cue quee lezoꞌ mèn loo conꞌ coꞌ gàc loo mèn thidtene. Leꞌ tediba na, nac: tolo queꞌ lezoꞌ mèn Diox, no queꞌ lezoꞌ mèn ñèe mèn hues xtàa mèn thidtene. Per conꞌ coꞌ nac más conꞌ roo conꞌ xèn coꞌ ndxàal li mèn loo yon conꞌ ndxèꞌ nac: queꞌ lezoꞌ mèn Diox, no queꞌ lezoꞌ mèn ñèe mèn hues xtàa mèn thidtene.
\c 14
\s Pab ngue bez loo mèn cuaꞌn mèn mod par co mèn yalbàn xal ndlyath no Xpii Natúꞌ cheꞌn Diox mèn.
\p
\v 1 Cona, ngue niin loo guꞌ: Bli guꞌ coꞌ nzote mod li guꞌ par tolo queꞌ lezoꞌ guꞌ Diox no queꞌ lezoꞌ guꞌ ñèe guꞌ hues xtàa guꞌ axta plóthe. Làth xtauꞌa, cuaꞌn guꞌ mod angli Xpii Natúꞌ loo guꞌ leꞌ guꞌ gác li guꞌ ryethe conꞌ coꞌ ñibeꞌ Xpii Natúꞌ li guꞌ xal guniilena loo guꞌ. Per más ndlyazen leꞌ guꞌ cuaꞌn mod angli Xpii Natúꞌ loo guꞌ leꞌ guꞌ co yalbàn cón cheꞌn Crist coꞌ ndlyaꞌs Xpii Natúꞌ xoꞌf zinꞌ Xpii Natúꞌ loo guꞌ.
\v 2 Mèn coꞌ ndyoodiꞌs tedib diꞌstèe coꞌ nec thìb mèn neꞌgácte gòn, mèna indyoodiꞌs node xtàa mèn. Ndxeꞌlequeꞌ, mèna ndyoodiꞌs no Diox. No diꞌs coꞌ ndyoodiꞌs mèna yende chó mèn gác gòn diꞌs coꞌ ndyoodiꞌs mèna. Mastaleꞌ, conꞌ coꞌ ndli mèna xtùuz no conꞌ coꞌ nzo leꞌn lezoꞌ mèna coꞌ ndyoodiꞌs mèna nac diꞌs coꞌ nac cheꞌn Xpii Natúꞌ, no nac diꞌsa thìb diꞌs coꞌ yende chó mèn taꞌ cuent no coꞌ yende chó mèn gác gòn.
\v 3 Per ndxeꞌlequeꞌ, mèn coꞌ ndeꞌth no coꞌ ngo yalbàn loo xnaa loo taamas mèn, mèna ndeꞌth no ngo mèna yalbàn par tolo téꞌth mèn no tolo taꞌ mèn cuent par tyubdiꞌs ndac mèn loo cón cheꞌn Crist. No ncoꞌx mèna loo mèn. No ntegán mèna lezoꞌ mèn loo cón cheꞌn Crist par tolo yeꞌth lezoꞌ mèn loo cón cheꞌn Crist.
\v 4 Mèn coꞌ ndyoodiꞌs tedib diꞌstèe coꞌ yende chó mèn gác gòn, mèna ndli par tolo ntéꞌth leque mèna cón cheꞌn Crist. Per mèn coꞌ ndeꞌth no coꞌ ngo yalbàn cón cheꞌn Diox, mèna ndli par tolo téꞌth no taꞌ taamas mèn cuent, mèn coꞌ nqueltàa loo Diox no loo cón cheꞌn Diox.
\p
\v 5 Ndlyazen leꞌ ryete guꞌ tyoodiꞌs diꞌstèe coꞌ yende chó mèn gác tyoodiꞌs. Per más ndlyazen teꞌth guꞌ no co guꞌ yalbàn cón cheꞌn Diox loo mèn. Tac más ntac loo Diox cón cheꞌn mèn coꞌ ndeꞌth no coꞌ ngo yalbàn leque mèn coꞌ ndyoodiꞌs chol diꞌstèe coꞌ nec thìb mèn neꞌgácte tyoodiꞌs no coꞌ nec thìb mèn neꞌgácte taꞌ cuent cón cheꞌn diꞌstèe coꞌ ndyoodiꞌs tedib mèn. Huen gàca cheleꞌ thìb mèn coꞌ nzo làtha gác coxcan diꞌsa loo mèn. Leꞌ sya, mèn coꞌ ngoxcan diꞌs ngue li par tolo téꞌth no taꞌ mèn cuent cón cheꞌn Diox, mèn coꞌ nqueltàa loo Diox loo cón cheꞌn Diox.
\v 6 Per nalleꞌ, mèn huesen por cón cheꞌn Crist, ngue niin conꞌ ndxèꞌ loo guꞌ: Cheleꞌ daa gal nee máa guꞌ par nedrèꞌ no alithe tyoodizen diꞌs coꞌ nac tedib diꞌs coꞌ neꞌgácte guꞌ gòn, ¿chó conꞌ ndac lii loo guꞌ cheleꞌ daa lii tataa, àꞌ? Yende chó conꞌ ndac lii loo guꞌ, ¿léꞌ? Per cheleꞌ daa go xoꞌf conꞌ loo guꞌ, no cheleꞌ daa luꞌ loo guꞌ conꞌ coꞌ ndxác daa cón cheꞌn Diox, no cheleꞌ daa teꞌth conꞌ loo guꞌ coꞌ ñibeꞌ Diox tan cuent loo guꞌ, no cheleꞌ daa luꞌ chol leyꞌ loo guꞌ coꞌ nac leyꞌ ndac, leꞌ sya, huen càba no huen gàca loo guꞌ, ¿léꞌ?
\v 7 Huiꞌ guꞌ nexa. Angab naꞌi: Cheleꞌ chol instrument coꞌ ndxolꞌ myenꞌ musc coꞌ nac xal flaut no arpa coꞌ nac conꞌ coꞌ inabante no coꞌ indyoodiꞌste, cheleꞌ mèna neꞌgolꞌ ndacte dìi coꞌ ndxolꞌ mèna xal nda solf, ¿xá mod gòn mèn dìi coꞌ ndxolꞌ thìb thìb instrumenta cheleꞌ mèna tataa ndxolꞌ instrumenta, sya? Neꞌyen ndacte dìi, ¿léꞌ?
\v 8 Lomisqueꞌ mod ne, cheleꞌ thìb solndad coꞌ nqueꞌ toc loo trompet na, incuez ndacte solndada toc loo trompet, ¿xá mod gàc nab taamas solndad ya solndad loo xóꞌ, sya? Yende moda, ¿léꞌ?
\v 9 Tataa ndxàca loo guꞌ, ne, tac cheleꞌ guꞌ tyoodiꞌs diꞌs coꞌ yende mod gòn mèn no coꞌ yende mod tenꞌ mèn cón nee diꞌs, ¿xá mod gòn mèn no tenꞌ mèn cón nee diꞌs diꞌs, sya? Yende moda, ¿léꞌ? Tac diꞌs coꞌ ndyoodiꞌs guꞌa nac diꞌs coꞌ alithe ndyoodiꞌs guꞌ loo mbii.
\v 10 Naꞌ ndaꞌqueꞌ cuent no non naꞌ nzo huax diꞌstèe dib athu loo izlyoꞌ. Thìb thìb diꞌstèea xàꞌ xàꞌ ndxèn. Lomisqueꞌ, ryete mèn coꞌ ndyoodiꞌs diꞌstèea, thìb thìb mèna ndxòn no ndaꞌ mèna cuent xal nac diꞌstèepeꞌ coꞌ ndyoodiꞌs mèna.
\v 11 Per cheleꞌ daa indxònte cón ngue tyoodiꞌs mèna loon, gàc daa loo mèna xal mèn tith coꞌ indxònte cón ngue toodiꞌs mèna loon. No lomisqueꞌ, gàc mèna xal mèn tith loon tac indxònte mèna diꞌs coꞌ ngue toodiz non mèna.
\v 12 Cona, ngue niin loo guꞌ: Ya que ndlyaꞌs guꞌ no sate más ndryoꞌ ndlyenꞌ lezoꞌ guꞌ leꞌ Xpii Natúꞌ angli par tolo gác guꞌ li guꞌ huax conꞌ coꞌ nac mod ndac, bli guꞌ coꞌ nzote mod gác li guꞌ loo mèn coꞌ nqueltàa loo Diox par tolo téꞌth mèn no taꞌ mèn cuent par tyubdiꞌs ndac mèn loo cón cheꞌn Diox.
\v 13 Por cona, ngue niin loo guꞌ: Cheleꞌ chol mèn coꞌ nzo làth guꞌ ndyoodiꞌs thìb diꞌstèe coꞌ yende chó guꞌ gác gòn no coꞌ yende chó guꞌ gác taꞌ cuent, guuz guꞌ loo mèna leque mèna cuez Diox par gác mèna coxcan mèna diꞌs loo guꞌ.
\v 14 Tac cheleꞌ daa ngue bez Diox con thìb diꞌs cheꞌn tedib diꞌstèe coꞌ tyoodizen coꞌ yende chó mèn gòn no coꞌ yende chó mèn taꞌ cuent, sya, leꞌn lezon ngue bezen Diox. Per axta neꞌ daa neꞌñeede cón ngue toodizen leꞌn lezon. Por cona, ngue niin loo guꞌ: Por part cón chenen, yende cón ntac conꞌa par lina.
\v 15 ¿Cón lin, sya? Ndxep vez mbezen Diox con diꞌstèe coꞌ yende chó mèn ndxòn. Per más mbezen Diox xal ndlin xtùuz con diꞌstèepeꞌ daa par gòn mèn cón ndyoodizen no par tenꞌ mèn cón ngue toodizen. Lomisqueꞌ ne, ndxol ron ndxep con diꞌstèe coꞌ indxònte mèn. Per más ndxol ron con diꞌstèepeꞌ naꞌ par gòn mèn cón ngue yol ron no par tenꞌ mèn cón ngue yol ron.
\v 16 Lomisqueꞌ mod ne, cheleꞌ guꞌ ngue bez diꞌs ro diꞌs xèn loo mèn cón cheꞌn Diox no mbez guꞌ Diox quix Uꞌ, Diox, loo Diox con diꞌstèe coꞌ yende chó mèn gác gòn no coꞌ yende chó mèn gác tenꞌ, yende mod cuez mèn coꞌ nzo làth guꞌ Diox, mèn coꞌ tarte téꞌth ndac cón cheꞌn Crist xal nac diꞌstèe coꞌ mbez guꞌ Diox coꞌseꞌ indxònte mèna diꞌstèe coꞌ ngue bez guꞌ Diox, ¿léꞌ?
\v 17 Lìcqueꞌ, huenqueꞌ nac coꞌ ndli guꞌ coꞌseꞌ mbez guꞌ Diox con diꞌs coꞌ indxònte mèn. Per por part cón cheꞌn mèn coꞌ indxònte diꞌs coꞌ mbez guꞌ, yende mod li guꞌ par tolo téꞌth mèn no taꞌ mèn cuent par tyubdiꞌs ndac mèn loo cón cheꞌn Diox por diꞌstèe coꞌ mbez guꞌ coꞌ indxònte mèna.
\v 18 Daa mbez Diox quix Uꞌ, Diox, loo Diox làth mèn coꞌ ndxelaꞌs loo Diox por cón cheꞌn Tad Crist por más ndxác daa ndyoodizen tedib diꞌstèe coꞌ indxònte mèn leque rye guꞌ.
\v 19 Per por part cón chenen, coꞌseꞌ nqueltàa non mèn coꞌ nqueltàa loo cón cheꞌn Diox, más huen naca, ndyaquen, tyoodizen gaꞌyte diꞌs loo mèn xal ndlin xtùuz par gàca leꞌ con diꞌs coꞌ ryoꞌ ron coꞌ nac diꞌstèepeꞌ naꞌ na, diꞌsa li par más téꞌth tedib mèn leque tyoodizen siꞌ mil diꞌs coꞌ nac tedib diꞌstèe coꞌ inacte diꞌstèepeꞌ naꞌ coꞌ yende chó mèn gòn no coꞌ yende chó mèn ndaꞌ cuent no coꞌ yende chó mèn tenꞌ.
\p
\v 20 Mèn huesen por cón cheꞌn Crist, neꞌgàcte guꞌ xal myenꞌ bix loo conꞌ coꞌ ndli guꞌ xtùuz. Ndxeꞌlequeꞌ, gòc guꞌ xal myenꞌ bix coꞌ tarte téꞌth li arid coꞌ nac chol conꞌ yeꞌrsinꞌ. No bli guꞌ xtùuz no ftyóo guꞌ xal mèn coꞌ, lìcqueꞌ, mtéꞌthqueꞌ no coꞌ huen huen ndaꞌ cuent par tyubdiꞌs ndac guꞌ loo cón cheꞌn Diox.
\v 21 Guꞌ ndaꞌqueꞌ cuent no nonqueꞌ guꞌ leꞌ loo libr coꞌ nac xtiꞌs Diox ndub diꞌs coꞌ mbez: Con xtiꞌs cheꞌn mèn tith coꞌ ndyoodiꞌs tedib diꞌstèe coꞌ nac xàꞌ diꞌstèe tyoodiz non mèn ndxèꞌ. No neꞌ por tataa lin neꞌtyalte mèna gòn mèna ron, ndxab Tad Diox.
\v 22 Por cona, ngue niin loo guꞌ: Diꞌstèe coꞌ ngue toodiꞌs mèn coꞌ yende chó mèn ndxòn no coꞌ yende chó mèn taꞌ cuent nac xal thìb xin no thìb xnaa coꞌ ndluꞌ xal thìb señ loo mèn coꞌ tarte yilaꞌs loo Diox por cón cheꞌn Tad Crist. Neꞌnglide Diox par ngàc conꞌa loo mèn coꞌ ndxelaꞌs loo Diox por cón cheꞌn Tad Crist. Ndxeꞌlequeꞌ, mbli Diox par ngure mèn coꞌ ngo yalbàn loo mèn coꞌ ngolaꞌs loo Diox por cón cheꞌn Tad Crist. Neꞌntelꞌte Diox mèn coꞌ ngo yalbàn par gàc mèna thìb señ loo mèn coꞌ tarte yilaꞌs loo Diox por cón cheꞌn Tad Crist.
\v 23 Coꞌseꞌ ryete mèn coꞌ ndxelaꞌs queltàa thidte lugar, no tlo rye mèna tyoodiꞌs mèna thìb diꞌstèe coꞌ yende chó mèn gác gòn no coꞌ yende chó mèn gác tenꞌ, no cheleꞌ chol mèn coꞌ indxelaꞌste, mèn coꞌ tarte téꞌth ndac cón cheꞌn Crist, yòo xiꞌth guꞌ coꞌ ndxelaꞌs láth ndyoodiꞌs guꞌ tedib diꞌstèe, ¿chéꞌ ngue li guꞌ cuent neꞌgabte mèna loo xtàa mèna leꞌ guꞌ nquée mbii yéc, càꞌ? Tab mèna tataa, ¿léꞌ?
\v 24 Per coꞌseꞌ queltàa ryete guꞌ thìb lugar loo cón cheꞌn Diox, cheleꞌ guꞌ clarlequeꞌ teꞌth no co guꞌ yalbàn cón cheꞌn Crist loo mèn hora, no cheleꞌ thìb mèn coꞌ tarte yilaꞌs no coꞌ tarte téꞌth cón cheꞌn Crist yòo xiꞌth guꞌ, leꞌ sya, mèna gàc nadoꞌ no tenꞌ mèna lìcqueꞌ nac diꞌs coꞌ ngue teꞌth guꞌ no coꞌ ngo guꞌ yalbàn. Leꞌ sya, leque mèna teche texyath xtùuz mèn no lezoꞌ mèn loo conꞌ yeꞌrsinꞌ coꞌ mbli mèn. No thyon mèn coꞌseꞌ gòn mèn diꞌs coꞌ ngue go guꞌ yalbàn.
\v 25 Leꞌ sya, tataa mod, chàa, teꞌ lezoꞌ mèna cón cheꞌn ryethe conꞌ yeꞌrsinꞌ coꞌ mbli mèna xtùuz leꞌn lezoꞌ mèna. Látha ne, chàa, tyub xib mèna no cotloo mèna loo izlyoꞌ loo Diox par ñaꞌb mèna loo Diox tonꞌ Diox xtol mèna. No tlo mèna, li mèna cas loo Diox. No gab mèna: Lìcpeꞌ baꞌi, nzo no Diox guꞌ trèꞌ, ndee.
\s Pab ngue bez loo mèn: Nabeꞌste ftoodiꞌs guꞌ thìb thìb conꞌ xalqueꞌ nac coꞌ ndluꞌ diꞌs coꞌ nac xtiꞌs Diox loo mèn par li mèn xal ñibeꞌ diꞌs cheꞌn Diox.
\p
\v 26 Ya yende cón más tolo niin loo guꞌ nalleꞌ, mèn huesen por cón cheꞌn Crist. Conꞌ ndxèꞌ nac coꞌ ndxàal li guꞌ: Coꞌseꞌ queltàa ryete guꞌ thidte lugar loo cón cheꞌn Diox, thìb guꞌ lab thìb part loo libr cheꞌn Salmos. Leꞌ tedib guꞌ na, luꞌ cón cheꞌn xleyꞌ cheꞌn Crist loo mèn. Leꞌ tedib guꞌ na, luꞌ cón cheꞌn conꞌ mxoꞌf loo Diox loo guꞌ. Leꞌ tedib guꞌ na, tyoodiꞌs diꞌstèe coꞌ yende chó mèn gác gòn. Leꞌ tedib guꞌ na, coxcan diꞌs cheꞌn diꞌstèe coꞌ indxònte mèn coꞌ ngolo mdoodiꞌs tedib mèn. Ante conꞌ ndxèꞌ ndlyazen gác guꞌ li guꞌ par tolo téꞌth mèn no tolo taꞌ mèn cuent par tyubdiꞌs ndac mèn loo cón cheꞌn Crist.
\v 27 Cheleꞌ ndxep guꞌ nzo làtha coꞌ ndyoodiꞌs thìb diꞌstèe coꞌ yende chó mèn gác gòn no coꞌ yende chó mèn càb, ante taꞌ guꞌ lugar tyoodiꞌs chop o son mèna no maste loo cult. Neꞌtaꞌde guꞌ lugar tyoodiꞌs rye mèna thidte junt. Ndxeꞌlequeꞌ, tyoodiꞌs thìb guꞌ. Yiloa, tyoodiꞌs tedib guꞌ. Yiloa, tyoodiꞌs tedib guꞌ. No ñibeꞌ guꞌ yo thìb mèn coꞌ coxcan diꞌsa, ne, làtha.
\v 28 Per cheleꞌ yende chó mèn nzo coꞌ coxcan diꞌsa làth guꞌ, más huen neꞌtyoodiꞌste mèna diꞌstèe coꞌ yende chó guꞌ gòn no coꞌ yende chó guꞌ càb làth queltàa mèn loo cón cheꞌn Diox. Bnibeꞌ guꞌ loo mèna tataa li mèna liz mèna par ndoo lìte cuez mèna Diox liz mèna.
\v 29 Lomisqueꞌ mod ne, cheleꞌ ndxep mèn lyaꞌs teꞌth coꞌ ndxab Diox no co mèna yalbàn, guꞌ coꞌ ndyoo ner no coꞌ ndyoo naa loo mèna, bnibeꞌ guꞌ ner teꞌth thìb mèna no ner co thìb mèna yalbàn. Yiloa, teꞌth tedib mèn o co tedib mèn yalbàn. Yiloa, teꞌth tedib mèn o co tedib mèn yalbàn. No bnibeꞌ guꞌ leꞌ taandxep mèn coꞌ ngo yalbàn huen huen tub nza xal ngo mèn coꞌ ngo yalbàn yalbàn par ñee mèna ñeeneꞌ chéꞌ clar nteꞌth mèna no ngo mèna yalbàn xal ndxàala.
\v 30 Per cheleꞌ Diox xoꞌf loo no luꞌ Diox ndxep conꞌ loo thìb xtàa mèn coꞌ nac dyap mèna coꞌ ngue teꞌth no coꞌ ngue go yalbàna, gab guꞌ loo ner mbiꞌ coꞌ ngo too nteꞌth no coꞌ ngo yalbàn, tyub ner mbiꞌ ndxep par teꞌth mbiꞌ coꞌ nac dyap mbiꞌ conꞌ coꞌ mxoꞌf loo Diox ndxep conꞌ loo par co mbiꞌa yalbàn, ne.
\v 31 Leꞌ sya, tataa mod más nabeꞌste co thìb thìb guꞌ yalbàn, guꞌ coꞌ mblec Diox par co guꞌ yalbàn cón cheꞌn Crist. Tataa mod sate más li guꞌ par téꞌth ryete guꞌ cón cheꞌn Crist no gàc yeꞌth lezoꞌ thìb xtàa guꞌ no tedib xtàa guꞌ loo cón cheꞌn Crist.
\v 32 Mèn coꞌ ndeꞌth no coꞌ ngo yalbàn cón cheꞌn Crist, mèna naquin gàp lezoꞌ no nadoꞌ diꞌs nadoꞌ cuent teꞌth mèna, no co mèna yalbàn xal guneepeꞌ lezoꞌ Diox.
\v 33 Naꞌ ndaꞌqueꞌ cuent leꞌ Diox inacte Diox coꞌ ndli par ndxetoo diꞌs ndxetoo cuent làth mèn. Ndxeꞌlequeꞌ, ndli Diox par ndxo nagàl lezoꞌ mèn loo Diox no par cue ban mèn rye nda mèn no rye ndyeꞌth mèn làth xtàa mèn.
\p Guꞌ ndaꞌqueꞌ cuent xal ñibeꞌen loo mèn hues naꞌ coꞌ nqueltàa rye lugar coꞌteꞌ nzo mèn coꞌ ndxelaꞌs loo Diox por cón cheꞌn Tad Crist, mèn coꞌ ngro xàꞌ loo cón cheꞌn xab izlyoꞌ par ngòc mèna cheꞌnpeꞌ Diox, tataa ngue ñibeꞌen loo guꞌ nalleꞌ, ne.
\v 34 Ndlyazen ryete mèngot xèe cue làth ryete mèn coꞌ nqueltàa loo cón cheꞌn Diox leꞌn templ tac Diox neꞌndaꞌde lugar par teꞌth mèngot no co mèngot yalbàn. Ndxeꞌlequeꞌ, ñibeꞌ Diox tyubdiꞌs mèngot xal ñibeꞌ mèn coꞌ ndyoo naa xal mnibeꞌ ley coꞌ mxoꞌf Diox loo mèn.
\v 35 Cheleꞌ chol mèngot coꞌ thidte mqueltàa no guꞌ loo cón cheꞌn Diox ndlyaꞌs gòn ndxep conꞌ, ñibdiꞌs mèngota loo saꞌl mèngota coꞌseꞌ nzo ryop saꞌl mèngota liz ryop saꞌl mèngotaꞌ. Tac iléꞌde nac ñibdiꞌs mèngot chol conꞌ láth coꞌseꞌ nzo mèn loo cult leꞌn templ.
\p
\v 36 ¡Jaa! ¿Chéꞌ ndyac guꞌ por part cón cheꞌn guꞌ mdyoxcuaꞌ diꞌs coꞌ nac xtiꞌs Diox no nzo diꞌs coꞌ nac xtiꞌs Diox par ngue no mèn diꞌs, càꞌ? ¡Aa que naxèn guꞌ se! Yende mod gàca tataa. O ¿chéꞌ ndyac guꞌ ante loo guꞌ mzin xtiꞌs Diox, càꞌ? ¿Chó yilaꞌs tataa naca? Yende, ¿léꞌ?
\v 37 Cheleꞌ làth guꞌ nzo ndxep guꞌ coꞌ non mèn nac guꞌ mèn coꞌ mcui Diox par teꞌth guꞌ diꞌs coꞌ ndxab Diox no nac guꞌ mèn coꞌ mbluꞌ Xpii Natúꞌ loo par ndxác guꞌ li guꞌ ndxep conꞌ xal guniilena loo guꞌ loo cart ndxèꞌ, ftenꞌ guꞌ diꞌs ndxèꞌ no ftaꞌ guꞌ lugar yaaꞌd diꞌs ndxèꞌ leꞌn lezoꞌ guꞌ no co ro guꞌ leꞌ diꞌs coꞌ ngue queꞌen yeꞌs loo guꞌ ndxèꞌ nac diꞌs coꞌ ñibeꞌ Tad Crist loo guꞌ par que tee li guꞌi xal ñibeꞌ Tad Crist loo guꞌ.
\v 38 Per cheleꞌ chol guꞌ coꞌ nziriꞌ trèꞌ neꞌyilaꞌste no neꞌtyalte guꞌ yaaꞌd diꞌs coꞌ ngue telꞌen loo guꞌ loo yeꞌs ndxèꞌ leꞌn lezoꞌ guꞌ, neꞌ neꞌ indaꞌ guꞌ lugar ndxelaꞌs guꞌ loo Crist.
\p
\v 39 Por cona, ngue niin loo guꞌ, mèn huesen por cón cheꞌn Crist: Blo yéc guꞌ par li guꞌ coꞌ nzote mod gác teꞌth guꞌ no co guꞌ yalbàn cón cheꞌn Diox. No leque tiempa, neꞌcaꞌde guꞌ loo mèn coꞌ lyaꞌs tyoodiꞌs chol diꞌstèe coꞌ yende chó gòn no coꞌ yende chó càb làth guꞌ.
\v 40 Per ndlyazen no ñibeꞌen loo guꞌ, ryete conꞌ coꞌ ngue ñibeꞌen coꞌ ndxàal li guꞌ loo cult coꞌseꞌ nqueltàa guꞌ loo cón cheꞌn Diox, nabeꞌste bli guꞌi no xèe cue guꞌ.
\c 15
\s Pab ngue taꞌ cuent loo mèn xá mod ngro xban Tad Crist.
\p
\v 1 Per nalleꞌ, mèn huesen por cón cheꞌn Crist, lyazen leꞌ guꞌ teꞌqueꞌ lezoꞌ cón cheꞌn diꞌs ndac coꞌ mblolen yalbàn no coꞌ mdethlen loo guꞌ. Cón cheꞌn diꞌs ndac coꞌ mbìn guꞌa, guꞌ mdyalqueꞌ mbìn guꞌi no nguaaꞌd diꞌsa leꞌn lezoꞌ guꞌ no leꞌn xtùuz guꞌ. No loo cón cheꞌn diꞌs ndaca, guꞌ nzi nèequeꞌ thidtene.
\v 2 Por cón cheꞌn diꞌs ndac coꞌ mblon yalbàn loo guꞌa, guꞌ mblyáꞌleꞌ loo conꞌ ryes. Huen nda guꞌ cheleꞌ guꞌ tolo li nèe guꞌ guꞌ no tolo teꞌ lezoꞌ guꞌ xal nac diꞌs ndaca xal mblon yalbàn loo guꞌ. Per cheleꞌ guꞌ ndxàc guyith lezoꞌ loo conꞌa, leꞌ sya, ndxàc diꞌs ndac ndxèꞌ xal thìb conꞌ anxleꞌ loo guꞌ tac neꞌngalaꞌste guꞌ loo conꞌ coꞌ nac lìcpeꞌ.
\p
\v 3 Nerlequeꞌ conꞌ coꞌ mblin, mbluꞌen loo guꞌ xalqueꞌ mbluꞌ Tad Crist loon leꞌ Tad Crist nguth por cón cheꞌn xquin naꞌ no xtol naꞌ xalqueꞌ ndub diꞌs loo libr coꞌ nac xtiꞌs Diox.
\v 4 Mcaꞌs mèn Tad Crist. Ngoloa, ngolo son huiz ngro xban Tad Crist xalqueꞌ ndub diꞌs loo libr coꞌ nac xtiꞌs Diox, ne.
\v 5 Ngolo ngro xban Tad Crist, mbluꞌ too Tad Crist loo Pedr. Ngoloa, mbluꞌ too Tad Crist loo rye siꞌ fchop myenꞌ coꞌ mtelꞌ Tad Crist coꞌ ndxeꞌ diꞌs ndac cheꞌn Tad Crist.
\v 6 Ngoloa, mbluꞌ too Tad Crist loo masreꞌ gaꞌy ayo mèn coꞌ ndxàc hues naꞌ no xtàa naꞌ por cón cheꞌn Tad Crist. Axta nalleꞌ casqueꞌ rye mèna beꞌ naban, mastaleꞌ nguth ndxep mèna.
\v 7 Ngoloa, mbluꞌ too Tad Crist loo Cob. Ngoloa, mbluꞌ too Tad Crist loo ryete siꞌ fchop myenꞌ coꞌ mtelꞌ Tad Crist, myenꞌ coꞌ ndxeꞌ diꞌs cheꞌn Tad Crist loo mèn pál nalleꞌ.
\p
\v 8 Coꞌseꞌ ngolo mbluꞌ too Tad Crist loo rye mèna, lultlequeꞌ mbluꞌ too Tad Crist loon, ne. Ale ngòc daa xal thìb mbetoꞌ coꞌ ngóol yèe loo cón cheꞌn Tad Crist coꞌseꞌ ngolazen loo Tad Crist.
\v 9 Per mastaleꞌ tataa mbli Tad Crist loon, ndenꞌen leꞌn lezon no ndyaquen leꞌ daa nac thìb mbiꞌ coꞌ más intacte loo taamas myenꞌ coꞌ mtelꞌ Tad Crist coꞌ nac mèn coꞌ ndxeꞌ diꞌs cheꞌn Tad Crist loo cón cheꞌn Tad Crist. Tataa ndyaquen no tataa ndlin cuent cón chenen tac daa mque tee mdub nguꞌs mèn coꞌ ngolaꞌs loo Diox por cón cheꞌn Tad Crist.
\v 10 Per nase nac daa thìb mbiꞌ coꞌ ndxeꞌ diꞌs cón cheꞌn Tad Crist nalleꞌ por cón cheꞌn conꞌ ndac coꞌ angmbli Diox loon. Neꞌngàcta thìb conꞌ anxleꞌ loon. Tac, ndxeꞌlequeꞌ, daa más ndxath ndxeyꞌ lezoꞌ loo cón cheꞌn zinꞌ coꞌ mxoꞌf zinꞌ Crist loon leque rye myenꞌa. Per ingue niiden naca conꞌ angmblin. Ndxeꞌlequeꞌ, conꞌ coꞌ ngue lin, ingue lidena ante por cón chenen. Ante ndlina tac Diox indláꞌyaꞌde daa ned ngue teeꞌen. Diox ndlyath noqueꞌ daa. No ndli Diox ndxàc conꞌ ndac loon ned ngue teeꞌen.
\v 11 Per yende chó mport nzo lezon cona, que naca daa, o que naca myenꞌ coꞌ mtelꞌ Tad Crist coꞌ ndxeꞌ diꞌs cheꞌn Tad Crist coꞌ ngo yalbàn. Por yalbàn coꞌ mblo nuꞌ loo guꞌ, leque yalbàna mbli par ngolaꞌs guꞌ, ne.
\s Pab ngue taꞌ cuent loo mèn leꞌ mèn coꞌ ngolaꞌs loo Crist no loo cón cheꞌn Crist, mèna ryo xban làth mèn coꞌ nguth.
\p
\v 12 No nalleꞌ ndlyazen niin tedib conꞌ loo guꞌ: Cheleꞌ nuꞌ ngo yalbàn cón cheꞌn Tad Crist leꞌ Tad Crist ngro xbanleꞌ làth mèn nguth, ¿xá mod mbez ndxep guꞌ làth guꞌ neꞌryo xbante mèn coꞌ nguth, sya?
\v 13 Cona, ngue niin loo guꞌ: Cheleꞌ mèn nguth neꞌryo xbante, leꞌ sya, neꞌ Tad Crist coꞌ nac yub Tad Crist neꞌngro xbante, sya, xàa.
\v 14 Lomisqueꞌ ne, cheleꞌ Tad Crist tarte ryo xban, leꞌ sya, anxleꞌ ngo nuꞌ yalbàn. No lomisqueꞌ, yende cón ntaca ndxàp guꞌ yalxlaꞌs loo Diox.
\v 15 No cheleꞌ Tad Crist, lìcqueꞌ, tarte ryo xban làth mèn nguth, leꞌ sya, nuꞌ, ne, nac mèn gutyèꞌ tac nuꞌ mdeꞌth cón cheꞌn Diox leꞌ Diox mblo xban Tad Crist làth mèn nguth. Cheleꞌ mèn nguth, lìcqueꞌ, neꞌryo xbante, leꞌ sya, neꞌ neꞌ tar co xban Tad Diox Tad Crist làth mèn nguth, ne, ¿léꞌ?
\v 16 Tac cheleꞌ mèn nguth neꞌryo xbante, neꞌ neꞌ tar ryo xban Tad Crist axta nalleꞌ, ne, sya, xàa.
\v 17 Lomisqueꞌ ne, cheleꞌ Tad Crist axta nalleꞌ tarte ryo xban, leꞌ sya, anxleꞌ ndxàp guꞌ yalxlaꞌs loo Diox. Tatabeꞌ ngue cuaꞌn guꞌ xquin guꞌ no tatabeꞌ ndxàp guꞌ xtol guꞌ loo Diox, ne.
\v 18 Lomisqueꞌ mod ne, cheleꞌ Tad Crist tarte ryo xban, leꞌ sya, rye mèn coꞌ nguth, mèn coꞌ ngolaꞌs loo Diox por cón cheꞌn Tad Crist, mèna thidtenequeꞌ tith ngro xàꞌ loo Diox thidtene.
\v 19 Cheleꞌ naꞌ ante nzi quee lezoꞌ loo cón cheꞌn Tad Crist par gàc conꞌ ndac loo naꞌ láth nzi ban naꞌ loo izlyoꞌ ndxèꞌ no maste, leꞌ sya, más nalyat no nayónꞌ ndxàca loo naꞌ axta plóthe loo rye mèn no yende cón ndli nzi quee lezoꞌ naꞌ loo Crist loo izlyoꞌ ndxèꞌ, sya, xàa.
\p
\v 20 Per inacta tataa. Ndxeꞌlequeꞌ, lìcpeꞌ baꞌi, Tad Crist ngro xbanleꞌ làth mèn nguth. Diox mbli leꞌ Tad Crist ngòc ner mbiꞌ coꞌ ngro xban loo rye mèn coꞌ nguth coꞌ ryo xban yiloa.
\v 21 Tac xalqueꞌ ngòca por cón cheꞌn Adán ndxath rye mèn, tataaqueꞌ ndxàca nalleꞌ, ne, leꞌ por cón cheꞌn Crist ryo xban rye mèn coꞌ nguth.
\v 22 Texal mtlo nguth mèn por cón cheꞌn Adán, tataa càba loo mèn coꞌ nzo loo cón cheꞌn Tad Crist leꞌ mèna cue ban tedib vez por cón cheꞌn Tad Crist, ne.
\v 23 Gàc conꞌ ndxèꞌ loo thìb thìb mèn coꞌ ndxelaꞌs loo Diox por cón cheꞌn Tad Crist coꞌseꞌ gàc tiemppeꞌ cheꞌn thìb thìb mèn xalqueꞌ ngòca loo Tad Crist coꞌ ngòc nerlequeꞌ mbiꞌ coꞌ ngro xban làth mèn nguth. Leꞌ yiloa na, ryo xban mèn coꞌ nac cheꞌnpeꞌ Tad Crist coꞌseꞌ gàc huiz coꞌseꞌ yiꞌth xi Tad Crist naꞌ.
\p
\v 24 Axta syareꞌ, gàc lult tiemp coꞌseꞌ telux Tad Crist ryethe mod coꞌ ñibeꞌ mèn coꞌ ndxàc gobiern, no chol mèn nac zinꞌ yoolau, mèn coꞌ ndli cuent ñibeꞌ, no mèn coꞌ ndli cuent ndxàp conꞌ laꞌs nii no laꞌs yaꞌ par li Tad Diox naꞌ ya neꞌtolode ñibeꞌ mèna loo izlyoꞌ ndxèꞌ, coꞌ nee diꞌs, Tad Crist taꞌ lugar ñibeꞌ Tad Diox coꞌ nac xudpeꞌ Tad Crist loo ryethe mèn no loo ryethe conꞌ xalqueꞌ mnibeꞌ Tad Crist loo ryethe conꞌ.
\v 25 Tac naquinqueꞌ ñibeꞌ Tad Crist loo rye mèn axtaqueꞌ yilo li Diox leꞌ ryete mèn coꞌ nac ngolo ngolaꞌs cheꞌn Tad Crist gàc nadoꞌ loo Tad Crist thidtene.
\v 26 Lult conꞌ coꞌ nac conꞌ yeꞌrsinꞌ coꞌ nquée loo mèn, coꞌ nee diꞌs, nac yalguth, Diox li cued. Ya neꞌtolode quée yalguth loo mèn.
\v 27 Diox mbli par gàc nadoꞌ rye loothe conꞌ loo Tad Crist. Per coꞌseꞌ mbez diꞌs coꞌ ndub loo libr coꞌ nac xtiꞌs Diox coꞌ ndxab: Rye loothe conꞌ mblileꞌ Diox par ngòc nadoꞌ conꞌa loo Tad Crist, clarlequeꞌ ndaꞌ diꞌs ndxèꞌ cuent loo naꞌ. Per part cón cheꞌn Diox, ¿léꞌ?, yende mod li Diox par tyubdiꞌs Diox loo mèn tac yub Diox mbli par ngòc nadoꞌ rye loothe conꞌ loo Tad Crist.
\v 28 No coꞌseꞌ ngolo mbli Diox ngòc nadoꞌ rye loothe conꞌ no mdubdiꞌs ryethe conꞌ loo Tad Crist coꞌ nac xganꞌpeꞌ Diox, syareꞌ, yub tad Crist taꞌ lugar leꞌ Diox ñibeꞌ loo alux conꞌ coꞌ ngòc nadoꞌ loo Crist. Axta syareꞌ, leque yub Crist li ñibeꞌ Diox loo Crist, ne, xal mnibeꞌ Diox no mbli Diox leꞌ Crist mnibeꞌ loo alux conꞌ. Tataa li Crist par gàca leꞌ rye loothe conꞌ gàc cheꞌnpeꞌ Diox no gàc conꞌ roo conꞌ xèn loo Diox por cón cheꞌn rye loothe conꞌ. Thìba conꞌ ndxèꞌ.
\p
\v 29 Leꞌ tediba na, nac conꞌ ndxèꞌ. Guꞌ naneequeꞌ no nonqueꞌ guꞌ nzo ndxep mèn coꞌ ngue no costumbr ndxàc bautizar mèna por cón cheꞌn mèn coꞌ nguth. Per ¿chonon tataa ndli mèna cheleꞌ mèn coꞌ nguth, lìcqueꞌ, neꞌryo xbante, àꞌ? ¿Chonon ndxàc bautizar mèna por cón cheꞌn mèn nguth cheleꞌ mèn neꞌryo xbante, sya?
\p
\v 30 No ¿chonon tolo nzi tee li nuꞌ conꞌ par gàc conꞌ ryes loo nuꞌ cheleꞌi, lìcqueꞌ, nac neꞌryo xbante mèn nguth, sya? Indxàalte li nuꞌi cheleꞌi tataa nac, ¿léꞌ?
\v 31 Cona, ngue niin loo guꞌ, mèn huesen por cón cheꞌn Crist: Atate huiz ncàb conꞌ ryes loon ned nque teeꞌen. Ndlyáꞌ ndlyáꞌ guth mèn daa. Lìcqueꞌ nac coꞌ ndxàc loon, mèn huesen por cón cheꞌn Crist, por cón cheꞌn guꞌ ndan gust lezon loo cón cheꞌn Tad Crist naꞌ tac ngolaꞌsqueꞌ guꞌ loo Diox por cón cheꞌn Tad Crist.
\v 32 Cona, ngue niin loo guꞌ taandxèꞌ: Por cón cheꞌn zinꞌ coꞌ nxoꞌf zinꞌen cón cheꞌn diꞌs ndac cheꞌn Crist ngro yoo non mèn leꞌn ciuda Efes, mèn coꞌ ngroꞌ nayiꞌ loon xal máꞌ nayiꞌ. Per ¿cón lin gan, sya, cheleꞌi anxleꞌ ngàc loon no cheleꞌ mèn coꞌ nguth, lìcqueꞌ, neꞌryo xbante? Syase, nzoqueꞌ mod gab naꞌ xal mbez diꞌs coꞌ mbez mèn: Hua naꞌ no gu naꞌ tac yéꞌ huizeꞌ gath naꞌ, coꞌ nee diꞌs, taathe guneei loo mèn, ¿léꞌ? Pà gàca tataa, yey.
\p
\v 33 Neꞌtaꞌde guꞌ lugar quedìi chol mèn guꞌ xal nac diꞌs coꞌ mbez mèn tataa. Tac cheleꞌ guꞌ taꞌ lugar sálꞌ guꞌ con chol mèn yeꞌrsinꞌ, mèna tezaꞌ guꞌ loo mod ndac coꞌ nzi tee ban guꞌ loo Tad Crist.
\v 34 Ftub guꞌ xnìi yéc guꞌ no ftub guꞌ xnìi lezoꞌ guꞌ xal ndxàal li guꞌ par ndxeꞌslequeꞌ que tee ban lì guꞌ loo Diox par tataa mod neꞌcuaꞌnte guꞌ xquin guꞌ. Tac nzo ndxep mèn làth guꞌ coꞌ inon ndacte no coꞌ inanee ndacte cón cheꞌn Diox, ndyaquen. Conꞌa, ngue niin conꞌ ndxèꞌ loo guꞌ par thyon guꞌ ndxep. Thìba conꞌ ndxèꞌ.
\s Pab ndyoodiꞌs loo mèn cón cheꞌn xá mod ryo xban mèn coꞌ ngolaꞌs loo Crist làth mèn coꞌ nguth.
\p
\v 35 Leꞌ tediba na, neꞌstolqueꞌ nzo ndxep mèn coꞌ ñibdiꞌs loo guꞌ: ¿Xá mod ryo xban mèn nguth, àꞌ? No ¿xá mod gàc cheꞌnpeꞌ mèn ladpeꞌ mèn tedib vez, àꞌ?
\v 36 Aa que tont guꞌ coꞌseꞌ tataa ñibdiꞌs guꞌ loo xtàa guꞌ no mbez guꞌ: ¿Xá mod ryo xban mèn nguth, yoo? ¿Xá nac lad mèn coꞌ que no mèn tedib vez, ne, yoo?
\p Chéꞌ tarte taꞌ guꞌ cuent coꞌseꞌ ngo guꞌ biz bin loo yòo, ner ndxàꞌb biz bina, ndxeloa, ndlyen biz bina, ¿léꞌ?
\v 37 Coꞌseꞌ ngo guꞌ biz bin loo yòo, indoode guꞌ thìb xanꞌ ñaꞌ. Ndxeꞌlequeꞌ, guꞌ teyòo thìb quèe biz bin no maste, que naca nzob triu, que naca chol tedib loo biz bin.
\v 38 Ndxelo ngo mèn biz bin loo yòo, Diox ndli ndryoo nxyèn biz bina xal ndlyaꞌs Diox. No ndli Diox ndlyen biz bina xalqueꞌ nac thìb loo thìb loo biz bin coꞌ ngo mèn loo yòo.
\v 39 ¿Chéꞌ tarte ñee guꞌ rye loo bélꞌyòo coꞌ naban coꞌ nzo loo izlyoꞌ, ilalte nac, léꞌ? Ndxeꞌlequeꞌ, nzo thìb loo bélꞌ coꞌ nac bélꞌyòo ladpeꞌ mèn. Leꞌ tedib loo bélꞌ na, nac bélꞌ chol máꞌ huan. Leꞌ tedib loo bélꞌ na, nac cheꞌn chol loo mbin. Leꞌ tedib loo bélꞌ na, nac cheꞌn chol loo mbèel.
\v 40 Loo béꞌ nzo mbeꞌ no huiz no mbèelhuiꞌ no taamas mbyáaz. Per xàꞌ ñaa thìb thìb conꞌa. No nzo huax loo conꞌ loo izlyoꞌ ndxèꞌ. No xàꞌ nac thìb thìb conꞌa. No xàꞌqueꞌ nac mod coꞌ nque xnìi chol conꞌ coꞌ nzo loo béꞌ. No xàꞌqueꞌ nac mod coꞌ ndxúꞌ loo loo chol conꞌ coꞌ nzo loo izlyoꞌ ndxèꞌ.
\v 41 Lìcqueꞌ, xàꞌleꞌ ñaa xnìi huiz coꞌ ntenìi loo béꞌ loo izlyoꞌ. No xàꞌguèꞌ ñaa xnìi mbeꞌ loo béꞌ coꞌ ntenìi loo izlyoꞌ. No xàꞌguèꞌ ñaa xnìi mbyáaz. Xàꞌguèꞌ ñaa xnìi coꞌ ntenìi thìb loo mbyáaz no tedib loo mbyáaz.
\v 42 Tataa gàca loo mèn, mèn coꞌ ngolaꞌs loo Diox por cón cheꞌn Tad Crist ndooreꞌ gath mèna, coꞌseꞌ ryo xban mèna tedib vez, ne. Tac coꞌseꞌ ndxath mèn coꞌ ndxelaꞌs loo Diox por cón cheꞌn Tad Crist, ndxezaꞌ bélꞌyòo lad mèn. Per coꞌseꞌ ryo xban mèna làth mèn nguth, que no mèna thìb lad cub coꞌ neꞌyizaꞌde thidtene no coꞌ ya neꞌquéede yalguth loo thidtene.
\v 43 Coꞌseꞌ gath chol mèn, ncaꞌs mèn xtàa mèn xal thìb conꞌ coꞌ yende cón ntac. Per coꞌseꞌ ryo xban thebola, bélꞌyòo lad thebol coꞌ ryo xban quée xnìi xal thìb conꞌ coꞌ ndxaꞌx bèel. Lomisqueꞌ mod ne, coꞌseꞌ nax tin liz thìb mbíiz naneeleꞌ naꞌ ya yende fuerz mbíiz. Nax bed mbíiz ante gath mbíiz. Per coꞌseꞌ ryo xban mbíiz coꞌ mbuuꞌs coꞌseꞌ ndooreꞌ gath mbíiz, anzeꞌf thìb fuerz gàp mbíiz coꞌseꞌ ryo xban mbíiz.
\v 44 Coꞌseꞌ ncaꞌs mèn thìb thebol coꞌ ngolaꞌs loo Tad Crist, ncaꞌs mèn thebola xalqueꞌ nac bélꞌyòo ladpeꞌ thebol. Per coꞌseꞌ ryo xban thebol coꞌ ngolaꞌs loo Diox por cón cheꞌn Tad Crista, bélꞌyòo lad thebola gàc cheꞌnpeꞌ béꞌ. Texal nzo bélꞌyòo lad mèn coꞌ nac cheꞌnpeꞌ izlyoꞌ ndxèꞌ, tataaguèꞌ nzo bélꞌyòo lad mèn coꞌ gàc cheꞌnpeꞌ béꞌ, ne.
\p
\v 45 Taandxèꞌ ndub diꞌs loo libr coꞌ nac xtiꞌs Diox: Ner mbiꞌ coꞌ ngo coꞌ ngroꞌ lèe Adán, loo mbiꞌa mdaꞌ Diox yalnaban. Per Tad Crist coꞌ neꞌ tedib lèe coꞌ nac Lult Adán, Crista nac Xpii coꞌ nac Diox coꞌ ndaꞌ yalnaban loo mèn thidtene.
\v 46 Mèn coꞌ mblec no mxènꞌ Diox, neꞌngàcte mèna mèn coꞌ ngue no yalnaban xal naban Crist. Ndxeꞌlequeꞌ, nac mèna cheꞌnpeꞌ izlyoꞌ ndxèꞌ. Yiloa, gàca loo mèn coꞌ ndxelaꞌs loo Diox por cón cheꞌn Tad Crist, ban mèna xalqueꞌ naban Tad Crist nalleꞌ por cón cheꞌn Diox coꞌ nac Xpii.
\v 47 Ner mbiꞌ coꞌ mxènꞌ Diox, coꞌ nee diꞌs, nac Adán, Diox mtoxcuaꞌ mbiꞌa con yòo cheꞌn izlyoꞌ, coꞌ nee diꞌs, ngòc Adán cheꞌnpeꞌ izlyoꞌ ndxèꞌ. Per Tad Crist coꞌ mbiꞌth yiloa, Crist coꞌ neꞌ tedib lèe Mbryop Mbiꞌ, Tad Crist nac cheꞌnpeꞌ béꞌ.
\v 48 Xalqueꞌ ngòc Adán coꞌ ngòc cheꞌnpeꞌ izlyoꞌ, tataaguèꞌ nac mèn coꞌ nac cheꞌnpeꞌ izlyoꞌ, ne. No xalqueꞌ nac Tad Crist coꞌ nac cheꞌnpeꞌ béꞌ, tataaguèꞌ nac mèn coꞌ ndxelaꞌs loo Tad Crist, nac mèna cheꞌnpeꞌ béꞌ.
\v 49 Texal nac naꞌ cheꞌnpeꞌ izlyoꞌ nalleꞌ, tataaguèꞌ gàca loo naꞌ lalqueꞌ gàc naꞌ xal Crist coꞌ nac cheꞌnpeꞌ béꞌ.
\p
\v 50 Lyazen niin thìb conꞌ loo guꞌ, mèn huesen por cón cheꞌn Crist: Mèn coꞌ nac ante bélꞌ no ren, coꞌ nee diꞌs, nac cheꞌnpeꞌ izlyoꞌ ndxèꞌ no maste, mèna yende mod yòo loo cón cheꞌn Diox par ñibeꞌ Diox loo mèna. Niin loo guꞌ, ne: Mèn coꞌ alithe ndxath coꞌ ngòc ante cón cheꞌnpeꞌ izlyoꞌ ndxèꞌ, yende mod yòo mèna loo cón cheꞌn Diox par ñibeꞌ Diox par neꞌgathte mèna más.
\v 51 Huiꞌ guꞌ nexa. Daa ndlyaz non guꞌ no taꞌ guꞌ cuent cón cheꞌn thìb conꞌ coꞌ yende chó mèn tarte ñee: Iryede naꞌ coꞌ ndxelaꞌs loo Diox por cón cheꞌn Tad Crist gath. Ndxeꞌlequeꞌ, ryete naꞌ chàa, zyeꞌ loo.
\v 52 Huiza, chàa, thìb atilte gàca loo naꞌ xal coꞌseꞌ ntuꞌ mèn no nxalꞌ mèn ngudloo mèn. Gàca loo mèn coꞌseꞌ gàc lult vez queꞌ angl toc con trompet. Tac, lìcqueꞌ, angl queꞌ toc con trompet. Leꞌ sya, mèn coꞌ ngolaꞌs loo Diox por cón cheꞌn Tad Crist, mèn coꞌ nguth, ryo xban mèna con thìb lad mèn coꞌ thidtene neꞌquéede yalguth loo tedib vez. Leꞌ naꞌ coꞌ beꞌ naban hora na, chàa, zyeꞌ loo, naꞌ coꞌ ndxelaꞌs loo Diox por cón cheꞌn Tad Crist.
\v 53 Tac naquinqueꞌ tataa gàca loo naꞌ, naꞌ coꞌ ndxelaꞌs loo Diox por cón cheꞌn Tad Crist, leꞌ ladpeꞌ naꞌ coꞌ yizaꞌ ndxèꞌ gàc thìb ladpeꞌ naꞌ coꞌ neꞌyizaꞌde thidtene. Lomisqueꞌ ne, naquinqueꞌ gàc leꞌ ladpeꞌ naꞌ ndxèꞌ coꞌ ndxath gàc thìb ladpeꞌ naꞌ coꞌ ya neꞌquéede yalguth loo tedib vez thidtene.
\v 54 Coꞌseꞌ bélꞌyòo ladpeꞌ naꞌ ndxèꞌ coꞌ ndxezaꞌ zyeꞌ loo par ya neꞌyizaꞌda thidtene, no coꞌseꞌ gàca loo bélꞌyòo ladpeꞌ naꞌ ndxèꞌ coꞌ ndxath zyeꞌ loo par ya neꞌtolode quée yalguth loo bélꞌyòo ladpeꞌ naꞌ tedib vez, syareꞌ gàca xal ndub diꞌs loo libr coꞌ nac xtiꞌs Diox xal nac diꞌs coꞌ ndxab: Diox mbli gan par ya neꞌtolode gath mèn.
\v 55 Axta syareꞌ gab naꞌ loo Diox: Diox quix Uꞌ, Diox, tac neꞌgathte nuꞌ tedib vez par tolo tyactìi nuꞌ loo conꞌa más. No gab naꞌ loo Diox: Diox quix, Uꞌ, Diox, ya yende chó mèn tolo gath par caꞌs mèn xtàa mèn panteón.
\v 56 Tac por cón cheꞌn xquin mèn coꞌ mbluꞌ ley coꞌ mxoꞌf Moisés loo mèn ndyactìi mèn coꞌseꞌ nquée yalguth loo mèn. Leya mquexùꞌ mèn.
\v 57 Per Diox quix Diox gab naꞌ loo Diox leꞌ Diox mbli par neꞌlide yalguth gan par ryo xàꞌ naꞌ loo Diox par tith yo naꞌ loo Diox. Tataa mbli Diox ndxàca loo naꞌ por cón cheꞌn Tad Jesucrist naꞌ.
\p
\v 58 Por cona, mèn huesen por cón cheꞌn Crist, guꞌ coꞌ nqueꞌ lezon ñèen, toloqueꞌ gure nèe guꞌ loo cón cheꞌn Tad Crist. Thidte bli guꞌ yéc guꞌ no thidte bli guꞌ lezoꞌ guꞌ loo cón cheꞌn Tad Crist, ne. No tolo téꞌth guꞌ no taꞌ guꞌ cuent par tyubdiꞌs ndac guꞌ loo cón cheꞌn zinꞌ coꞌ mxoꞌf zinꞌ Tad Crist loo guꞌ. Guꞌ nonqueꞌ no naneequeꞌ guꞌ leꞌ zinꞌ coꞌ ngue xoꞌf zinꞌ guꞌ loo Tad Crist, inacte conꞌa thìb zinꞌ anxleꞌ, ndee guꞌ.
\c 16
\s Pab ngue taꞌ cuent loo mèn thop mèn centav coꞌ gàc ayud par càa mèn coꞌ ndxelaꞌs xal mnibeꞌ Pab loo mèn li mèn.
\p
\v 1 Leꞌ cón cheꞌn ayud coꞌ thop guꞌ par lyath no guꞌ mèn coꞌ ndxelaꞌs, coꞌ ngro xàꞌ loo cón cheꞌn xab izlyoꞌ no coꞌ ngòc cheꞌnpeꞌ Diox, mèn coꞌ ndyactìi ciuda Jerusalén na, ndlyazen li guꞌi xal mbluꞌen no xal mnibeꞌen loo mèn coꞌ nqueltàa loo cón cheꞌn Diox coꞌ nqueltàa chol lugar par ned leꞌn yèezyaꞌ cheꞌn làaz mèn galas. Tataa lyazen li guꞌ, ne.
\v 2 Ndlyazen coꞌseꞌ gàc ner huiz sman, thìb thìb guꞌ tanꞌqueꞌ pla centav xal ndaꞌi lugar loo guꞌ no xal nzo guꞌ. Leꞌ sya, coꞌseꞌ gal neen máa guꞌ par nedrèꞌ, ya inquinte quée lyàa guꞌ hora par thop guꞌ ayud coꞌ naquin naꞌ huiza.
\v 3 No coꞌseꞌ zin daa loo guꞌ, telꞌ na plá mèn coꞌ cui guꞌ. No leque tiempa telꞌen cart loo mèna par tan cuent loo cart loo mèn ciuda Jerusalén leꞌ mèn coꞌ nde láꞌ tmi coꞌ nac ayud coꞌ nac conꞌ ndac coꞌ mbli guꞌ, mèn coꞌ nac mèn coꞌ hueꞌ carta nac mèn coꞌ ndoo lìte mtelꞌ guꞌ.
\v 4 No cheleꞌ guꞌ ndyac naquin gan con mèna ciuda Jerusalén par yiláꞌ nuꞌ tmi, gan, xàa. Yende cón lii. Thiba conꞌ ndxèꞌ.
\s Pab mdaꞌ cuent loo mèn chópeꞌ yèez ya riid Pab.
\p
\v 5 Leꞌ tediba na, tan cuent loo guꞌ, coꞌseꞌ tenen ned par ga neen máa guꞌ par nedrèꞌ, nerlequeꞌ conꞌ lin, ga riꞌthen par ned leꞌn yèezyaꞌ coꞌ nac ned làaz mèn macedon. Leꞌ yiloa na, zin daa loo guꞌ leꞌn ciuda Corint.
\v 6 No thìb descuid go non guꞌ ndxep tiemp. O peser go non guꞌ par riꞌthen tiemp xìlꞌ leꞌn ciuda guꞌ. Leꞌ yiloa, coꞌseꞌ riꞌth tiemp xìlꞌ, nee guꞌ xal li guꞌ, ya lyath no guꞌ daa ned ga que teeꞌen.
\v 7 Taandxèꞌ ngue niin loo guꞌ tac indlyasten ante gal riꞌthen loo guꞌ par gal neen máa guꞌ par nedrèꞌ no maste. Ndxeꞌlequeꞌ, ndlyazen gal too naan guꞌ no go non guꞌ ndxep huiz cheleꞌ Tad Diox taꞌ lugar tataa gàca loon.
\v 8 Lomisqueꞌ, ngue niin loo guꞌ, ne: Daa beꞌ lyenꞌ ndxep huiz leꞌn ciuda Efes axta riid lni cheꞌn Pentecostés.
\v 9 Tac ndenꞌen leꞌn huiz ndxèꞌ Diox mbli par huax mod mxyalꞌ ned mxyalꞌ yóꞌ loon par gon yalbàn par càba thìb conꞌ ndac loo mèn coꞌ ndxòn ron. Per mèn coꞌ nac ngolo ngolaꞌs, anzeꞌf huax nzo. No ndxecloo mèna ñèe mèna daa.
\p
\v 10 Cheleꞌ Timote zin loo guꞌ, cuaꞌn guꞌ mod nabeꞌste go no guꞌ Timote par tyac lezoꞌ Timote. Tac Timote nxoꞌf zinꞌ zinꞌ cón cheꞌn Tad Crist, ne, xalqueꞌ nxoꞌf zinꞌen zinꞌ.
\v 11 Cona, ngue niin loo guꞌ: Nec thìb guꞌ no nec tedib guꞌ neꞌxìis node guꞌ Timote. No neꞌxyánꞌte guꞌ ñèe guꞌ Timote. Ndxeꞌlequeꞌ, ya tee ned guꞌ Timote coꞌseꞌ bii Timote par yende cón tyactìi Timote ned coꞌseꞌ yiꞌth Timote loon. Tac daa ngue bed con mèn coꞌ ndxàc hues naꞌ par zin Timote.
\p
\v 12 Leꞌ cón cheꞌn hues naꞌ Apol na, tan cuent loo guꞌ. Huax vez mnaꞌben loo hues naꞌ Apol con taamas mèn coꞌ ndxàc hues naꞌ par nguiꞌth nee hues naꞌ Apol máa guꞌ par nedrèꞌ. Per nec thìb mod no nec tedib mod tarte taꞌ Diox lugar yiꞌth hues naꞌ Apol loo guꞌ nalleꞌ. Per yiꞌth hues naꞌ Apol loo guꞌ coꞌseꞌ taꞌ lugara loo hues naꞌ Apol.
\s Trèꞌ ndub lultlequeꞌ diꞌs coꞌ gunii Pab Diox loo mèn coꞌ ngòo loo cón cheꞌn Diox, mèn coꞌ ngo ban leꞌn ciuda Corint.
\p
\v 13 Lomisqueꞌ ndlyazen, nalas gure guꞌ loo ryethe conꞌ. No gure nèe guꞌ loo conꞌ coꞌ ndxelaꞌs naꞌ loo Tad Crist. Fque tee ban guꞌ xalqueꞌ mèn coꞌ, lìcqueꞌ, mtéꞌthqueꞌ no coꞌ ndaꞌqueꞌ cuent cón cheꞌn Crist par tyubdiꞌs ndac guꞌ loo cón cheꞌn Crist. Blo guꞌ valor loo guꞌ. No neꞌzyebte guꞌ loo conꞌ ndxelaꞌs guꞌ loo Tad Crist.
\v 14 Lomisqueꞌ ne, ndlyazen leꞌ ryete conꞌ coꞌ ndli guꞌ loo hues xtàa guꞌ, bli guꞌi dib nzo yéc guꞌ no dib nzo lezoꞌ guꞌ xalqueꞌ mèn coꞌ, lìcqueꞌ, nqueꞌ lezoꞌ ñèe hues xtàa.
\p
\v 15 Nalleꞌ ne, mèn huesen por cón cheꞌn Crist, guꞌ nonqueꞌ leꞌ mèn guliz Stef ngòc nerlequeꞌ mèn coꞌ ngolaꞌs diꞌs ndac cón cheꞌn Tad Crist coꞌ nac ned leꞌn yèezyaꞌ coꞌ nac làaz mèn acay. No non guꞌ leꞌ mèna mblo yécqueꞌ par nxoꞌf zinꞌ mèna thìb zinꞌ par lyath no mèna chol mèn coꞌ ndxelaꞌs, mèn coꞌ ngro xàꞌ loo cón cheꞌn xab izlyoꞌ par ngòc mèna cheꞌnpeꞌ Diox, loo chol gast no loo chol conꞌ coꞌ nde che loo mèna.
\v 16 Lomisqueꞌ ne, ndlyazen leꞌ thìb thìb guꞌ lyath no mèna. No ndlyazen lyath no guꞌ mèn coꞌ nxoꞌf zinꞌ con nuꞌ no taamas mèn coꞌ nque zinꞌ loo cón cheꞌn Tad Crist.
\v 17 Anzeꞌf ndyac lezon tac mzinleꞌ Stef no Fortunat no Acaic. Tac mèn ndxèꞌ ndlyath no nuꞌ loo ryethe conꞌ coꞌ nde che loo nuꞌ coꞌ ngòc diꞌs ngàc por cón cheꞌn guꞌ tac guꞌ yende coꞌseꞌ ngòc diꞌs ngli guꞌi.
\v 18 Mèn ndxèꞌ mbli leꞌ daa ngo nagàl lezoꞌ no tataa mod mbli mèna par ngo nagàl lezoꞌ guꞌ. Bluꞌ guꞌ mèn ndxèꞌ loo hues xtàa guꞌ coꞌ ndxelaꞌs par nedrèꞌ no taꞌ guꞌ cuent cón cheꞌn mèn ndxèꞌ loo hues xtàa guꞌ par nedrèꞌ.
\p
\v 19 Mèn coꞌ ndxelaꞌs coꞌ nqueltàa par ned leꞌn yèezyaꞌ coꞌ nac cheꞌn làaz mèn asia ngue nii Diox loo guꞌ. Aquil no Priscil, no mèn coꞌ ndxelaꞌs coꞌ nqueltàa liz Aquil no Priscil, rye mèna ngue nii Diox loo guꞌ, ne, por lèe Tad Crist.
\v 20 Ryete mèn coꞌ ndxàc hues naꞌ por lèe Tad Crist ngue nii Diox loo guꞌ. Coꞌseꞌ nii thìb thìb guꞌ Diox loo xtàa guꞌ, bdeꞌs guꞌ yen xtàa guꞌ xal nac mod coꞌ ndxàp guꞌ no xal nac mod coꞌ ndli guꞌi làth xtàa guꞌ.
\p
\v 21 Loo yeꞌs coꞌ mqueꞌen yeꞌs con yaꞌpeꞌen loo yeꞌs ndxèꞌ, daa Pab ngue nii Diox loo guꞌ.
\p
\v 22 Cheleꞌ chol mèn nzo coꞌ neꞌtyalte queꞌ lezoꞌ Tad Jesucrist, mandit mèna, coꞌ nee diꞌs, mèndèe gàc mèna too zee too yálꞌ par tetìi tínꞌ Diox mèna, yiloa. Maranatha, diꞌs coꞌ nee diꞌs, Tad, Uꞌ coꞌ nac Tad nuꞌ, de Uꞌ.
\p
\v 23 Ndlyazen leꞌ Tad Jesucrist naꞌ tolo li anggàc más conꞌ ndac loo guꞌ.
\v 24 Ndlyazen leꞌ guꞌ non no nanee guꞌ leꞌ daa nqueꞌqueꞌ lezoꞌ ñèen ryete guꞌ por cón cheꞌn Tad Crist Jesús naꞌ, ndee guꞌ. Taandxèꞌ gàca.