\id 2CO
\ide UTF8
\h 2 CORINTIOS
\toc1 2 CORINTIOS
\mt Mbryop Cart Coꞌ Mqueꞌ Pab Yeꞌs Loo Mèn Coꞌ Nqueltàa Loo Cón Cheꞌn Diox Leꞌn Ciuda Corint
\c 1
\s Pab mqueꞌ yeꞌs loo mèn coꞌ nqueltàa loo cón cheꞌn Diox leꞌn ciuda Corint.
\p
\v 1 Daa, Pab, nac thìb mbiꞌ coꞌ mtelꞌ Jesucrist par ndxen diꞌs cheꞌn Jesucrist xal gunee lezoꞌ Diox. Ngue queꞌen yeꞌs coꞌ nac cart ndxèꞌ loo guꞌ coꞌ ndxelaꞌs loo Diox por cón cheꞌn Crist coꞌ nqueltàa leꞌn templ leꞌn ciuda Corint no loo mèn coꞌ ndxelaꞌs loo Diox por cón cheꞌn Jesucrist dib anax par ned leꞌn yèezyaꞌ ned làaz mèn acay. Ryete guꞌ nac cheꞌnpeꞌ Diox. Leque tiempa, ryop nuꞌ Timote coꞌ nzo non trèꞌ ngue nii nuꞌ Diox loo ryete guꞌ.
\v 2 Ndlyazen leꞌ Diox xud naꞌ no Tad Jesucrist naꞌ tolo li anggàc conꞌ ndac loo guꞌ. No ndlyazen leꞌ Diox xud naꞌ no Tad Jesucrist naꞌ tolo li yo nagàl lezoꞌ guꞌ loo Diox no loo mèn no cue ban guꞌ rye nda guꞌ no rye ndyeꞌth guꞌ làth hues xtàa guꞌ.
\s Trèꞌ ndluꞌ xá mod mxactìi Pab.
\p
\v 3 Por cona, ndlyazen leꞌ naꞌ gab loo mèn: Anzeꞌf ndac no natúꞌ nac Diox no Diox roo Diox xèn nac Diox. Diox coꞌ nac xudpeꞌ Tad Jesucrist naꞌ, leque Dioxa nac xud naꞌ coꞌ ndlyat lezoꞌ ñèe mèn axta plóthe. No ntegán Diox lezoꞌ mèn. No ndli Diox par ndyac lezoꞌ mèn axta plóthe.
\v 4 Diox ntegán lezoꞌ naꞌ loo ryethe conꞌ coꞌ ndli par nxi lezoꞌ naꞌ, conꞌ coꞌ ndxàc loo naꞌ par leque naꞌ, ne, tegán lezoꞌ chol mèn coꞌ nzi yàc yaltìi loo xalqueꞌ ntegán Diox lezoꞌ naꞌ.
\v 5 Texal ndyactìi naꞌ huax conꞌ por cón cheꞌn Crist, lomisqueꞌ mod, ntegán Crist lezoꞌ naꞌ axta plóthe, ne, loo ryethe yaltìi coꞌ ndxàc loo naꞌ.
\v 6 Por cona, coꞌseꞌ daa ndyactìi chol conꞌ, ndxàc yaltìia loon par gàca loo guꞌ leꞌ Diox tegán lezoꞌ guꞌ no tolo lyath no Diox guꞌ coꞌseꞌ ndlyáꞌ ndlyáꞌ guth mèn guꞌ. No coꞌseꞌ Diox ntegán lezon, ndxàca loon par tolo tegán Diox lezoꞌ guꞌ coꞌseꞌ ndlyáꞌ ndlyáꞌ guth mèn guꞌ. Coꞌseꞌ tataa ndxàc loo guꞌ, sya, ngue xec yèe guꞌ no nchaꞌlaꞌs guꞌ loo leque yaltìi coꞌ ndxàc loona.
\v 7 Leque daa mbli nèen loo coꞌ ndub quee lezon cón cheꞌn guꞌ tac texal ndyactìi no guꞌ daa, no ngue xec yèe guꞌ cón cheꞌn yaltìi coꞌ ndxàc loo guꞌ, tataa gàca loo guꞌ leꞌ Diox tegánqueꞌ lezoꞌ guꞌ.
\p
\v 8 Mèn huesen, ndlyazen leꞌ guꞌ non no taꞌ guꞌ cuent cón cheꞌn huax yaltìi coꞌ ngòc loon láth coꞌseꞌ mque teeꞌen leꞌn rye yèezyaꞌ coꞌ nac làaz mèn asia. Casqueꞌ mblyáꞌ daa loo yalguth tya tant thìb conꞌ mbli no mèn daa axta mblin cuent ¿chéꞌ xec daa tolo que teeꞌen o chéꞌ tya ñeei loon?
\v 9 Lìcpeꞌ baꞌi, mdenꞌen leꞌn lezon no ndxaben loo lezon: Nase guth mèn daa. Ngòc conꞌa loon par neꞌngàpten yalxlaꞌs lyáꞌ daa por cón cheꞌnpeꞌen. Ndxeꞌlequeꞌ, ngòca par gàpen yalxlaꞌs loo Diox coꞌ ngo xban mèn làth mèn nguth leꞌ Diox láꞌ daa cheleꞌ Diox nee lezoꞌ li Diox conꞌa loon.
\v 10 Diox mteláꞌ daa laꞌs yaꞌ mèn coꞌseꞌ yamerleꞌ nguthxùꞌ mèn daa. No axta nalleꞌ tatabeꞌ ngue lyath no Diox daa par neꞌguthte mèn daa coꞌteꞌ nzon ndxèꞌ. No loo Dioxa ndxàpen yalxlaꞌs leꞌ Diox tolo láꞌ daa no tolo lyath no Diox daa par neꞌguthte mèn daa no ndub queequeꞌ lezon leꞌ Diox teláꞌ daa ned ga que teeꞌen.
\v 11 Tataaqueꞌ gàca loon cheleꞌ guꞌ lyath no daa por mbez guꞌ Diox por daa par yende cón li no mèn daa. Por cón cheꞌn huax mèn coꞌ cuez no guꞌ Diox por daa par tolo lyáꞌ daa loo yalguth coꞌ ndlyaꞌs mèn li no mèn daa, huax mèn gab: Diox quix non Uꞌ, Diox, por conꞌ ndac coꞌ ngòc loo prob Pab.
\s Trèꞌ ndluꞌ chonon mblyenꞌ Pab. Neꞌngagàde Pab ciuda Corint.
\p
\v 12 Nzo thìb conꞌ coꞌ ndli par ndan gust lezon no par ndyac lezon. Loo conꞌ ndxèꞌ, ndenꞌen leꞌn lezon cón cheꞌn conꞌ ngue lin, ndyaquen, huenqueꞌ ngue lin. Tac leque daa ngue taꞌ cuent no non daa leꞌn lezon leꞌ daa ngue tee ban ndac loo Diox làth mèn loo izlyoꞌ por mbláꞌen ryethe conꞌ coꞌ nac cón cheꞌn xab izlyoꞌ. No inquedìiden loo hues xtàan. Más de cona, masreꞌ ndlina làth guꞌ. Ingue tee bante daa làth mèn xal mèn coꞌ ndeꞌf diꞌs ndxác. Ndxeꞌlequeꞌ, Diox ndli leꞌ daa ngue tee ban ndac loo guꞌ no loo taamas mèn loo izlyoꞌ.
\v 13 Diꞌs coꞌ ngue queꞌen yeꞌs loo guꞌ coꞌ nac cart ndxèꞌ, ante ntelꞌen diꞌs loo guꞌ coꞌ inagànte nac par lab guꞌ par gòn guꞌ no taꞌ guꞌ cuent cón nee diꞌs ndxèꞌ. No ndub quee lezon yaaꞌd diꞌs ndxèꞌ leꞌn quèe yéc guꞌ, no tenꞌ guꞌ cón nee diꞌs ndxèꞌ coꞌ huen huen,
\v 14 xal mdenꞌ guꞌ no mdaꞌ guꞌ cuent mase ndxep cón chenen thìb mod no tedib mod. Tac coꞌseꞌ gàc huiz coꞌ yiꞌth Tad Jesús naꞌ, anzeꞌf tyac lezoꞌ guꞌ huiza xal ndenꞌen ndyac lezon por cón cheꞌn guꞌ nalle.
\p
\v 15 No por yalxlaꞌs coꞌ ndxàpen loo guꞌ xal mqueꞌen yeꞌs loo cart coꞌ mtelꞌen loo guꞌ, niin conꞌ ndxèꞌ loo guꞌ: Mblin xtùuz no mnibeꞌen loo lezon ner galen loo guꞌ par gal neen máa guꞌ par nedrèꞌ par tataa mod ndac lezoꞌ guꞌ mbal neen máa guꞌ chop vez.
\v 16 Lìcqueꞌ, mblin xtùuz gal too naan guꞌ coꞌseꞌ mxenen ned nguan par ned yèezyaꞌ coꞌ nac làaz mèn macedon. No coꞌseꞌ biin leꞌn yèezyaꞌ coꞌ nac làaz mèn macedon, mblyazen beren, gal neen máa guꞌ tedib vez láth ndoon ned par làaz mèn jude. No lomisqueꞌ, mblyazen ya tee ned guꞌ daa ndxep coꞌseꞌ biin loo guꞌ par ga que teeꞌen par ned leꞌn yèezyaꞌ cheꞌn làaz mèn jude. Tataa nac coꞌ mblyazen lin mastaleꞌ neꞌngàcte gan nglina.
\v 17 Coꞌseꞌ mnibeꞌen lezon gal neen máa guꞌ par nedrèꞌ, ¿chéꞌ mbli guꞌ cuent ante guniina loo guꞌ no angmblin xtùuz tataa lin, càꞌ? O ¿chéꞌ ndli guꞌ xtùuz leꞌ daa ngo xnee conꞌ ndlin xal ngo xnee mèn coꞌ nac mèn coꞌ beꞌ ndli cas loo cón cheꞌn xab izlyoꞌ coꞌseꞌ mbez mèna li mèna thìb conꞌ no yiloa neꞌlide mèna conꞌa, càꞌ? Yende xàa.
\v 18 Per Diox coꞌ ndliqueꞌ coꞌ mcàbgòn Diox li Diox loo mèn, Diox non no ndaꞌ Diox cuent, lìcqueꞌ, liquen coꞌ mbezen loo guꞌ. Neꞌquedìiden mèn.
\v 19 Cón cheꞌn Jesucrist coꞌ nac xganꞌ Diox mdeꞌth nuꞌ no mblo nuꞌ yalbàn loo guꞌ, coꞌ nee diꞌs, yon nuꞌ coꞌ nac Silvan no Timote no daa, Pab. Thidtene neꞌntoxcuaꞌde Tad Jesucrist yalgutyèꞌ. Ndxeꞌlequeꞌ, lìcpeꞌ ngòc diꞌs coꞌ gunii Tad Jesucrist thidtene.
\v 20 Tac por cón cheꞌn Jesucrist ndxàc ryethe conꞌ coꞌ mcàbgòn Diox li Diox. Por cona, coꞌseꞌ mbez naꞌ cón cheꞌn Diox loo mèn leꞌ Diox nac thìb Diox roo Diox xèn, mbez naꞌ tataaqueꞌ gàca por cón cheꞌn Tad Jesucrist.
\v 21 Leque yub Diox nac xaꞌ coꞌ ndli par leque nuꞌ ndli nèe nuꞌ loo cón cheꞌn Crist, no par leque guꞌ ndli nèe guꞌ, ne, loo cón cheꞌn Crist. No leque yub Diox nac xaꞌ coꞌ ndli leꞌ naꞌ ngro xàꞌ loo cón cheꞌn xab izlyoꞌ par ngòc naꞌ cheꞌnpeꞌ Diox.
\v 22 Por cón cheꞌn Xpii Natúꞌ cheꞌn Diox, Diox mblec xàꞌ naꞌ loo cón cheꞌn xab izlyoꞌ xal ndli mèn coꞌseꞌ nqueꞌ mèn thìb sell loo thìb xqueꞌs par gàc nèe xqueꞌsa. Tataa mbli Diox loo naꞌ coꞌseꞌ mblàa Diox Xpii Natúꞌ loo naꞌ par yòo Xpii Natúꞌ loo naꞌ no ñibeꞌ Xpii Natúꞌ loo naꞌ. Xpii Natúꞌ ndluꞌ loo naꞌ no por cón cheꞌn Xpii Natúꞌ non naꞌ, lìcqueꞌ, taꞌ Diox conꞌ coꞌ mcàbgòn Diox taꞌ Diox loo naꞌ yiloa coꞌ gàc cheꞌnpeꞌ naꞌ.
\p
\v 23 Per cheleꞌ daa axta nalleꞌ tarte gal nee máa guꞌ par ned ciuda Corint ndxèꞌ xal mblin xtùuza, mèn ciuda Corint, Diox nonqueꞌ no naneequeꞌ Diox leque daa mbli par neꞌgal needen máa guꞌ por cón cheꞌn guꞌ par neꞌngaclooden loo guꞌ no par neꞌngàc nayiꞌden loo guꞌ. No cheleꞌi ilìcte nac, ñaꞌben loo Diox más huen guth Diox daa.
\v 24 Inacte leꞌ daa ngue nibeꞌ loo guꞌ xal nac mod coꞌ ndxàal yilaꞌs guꞌ loo Crist. Ndxeꞌlequeꞌ, daa ngue xoꞌf zinꞌ coꞌ mxoꞌf zinꞌ Diox loon par lyath non guꞌ par tolo tyac lezoꞌ guꞌ. Tac, lìcpeꞌ baꞌi, leque guꞌ ngue li nèe guꞌ loo conꞌ coꞌ ndxelaꞌs guꞌ loo Diox, ndyaquen.
\c 2
\p
\v 1 Conꞌ ndxèꞌ nac conꞌ coꞌ mnibeꞌen loo lezon. Mblin xtùuz más huen ya neꞌbereden ga neen máa guꞌ par neꞌtolode xi lezoꞌ guꞌ.
\v 2 Tac cheleꞌ daa tolo texi lezoꞌ guꞌ, ¿chó mèn gác li par tyac lezon, sya? Guꞌ, no maste, nac mèn coꞌ ndlin cuent ntegán lezon coꞌteꞌ nzon ndxèꞌ. No cheleꞌ daa texi lezoꞌ guꞌ arid, ¿chéꞌ nzo mod leque guꞌ li par tyac lezon sya, càꞌ? Yende moda, ¿léꞌ?
\v 3 Cona, tataa mqueꞌen yeꞌs cón cheꞌn conꞌ ndxèꞌ loo guꞌ loo ner cart coꞌ mtelꞌen loo guꞌ tac indlyasten galen loo guꞌ par neꞌxi tínꞌte lezon por cón cheꞌn guꞌ, guꞌ coꞌ ndxàal li par tyac tínꞌ lezon. No daa ngobeꞌ no ndxàpen yalxlaꞌs loo ryete guꞌ cheleꞌ daa tyac lezoꞌ coꞌseꞌ gal neen máa guꞌ par nedrèꞌ, guꞌ, ne, tyac lezoꞌ coꞌseꞌ ñee guꞌ zin daa loo guꞌ.
\v 4 Anzeꞌf ndenꞌen coꞌ mblin no anzeꞌf nxi lezon axta mbínen cón cheꞌn ner cart coꞌ mqueꞌen yeꞌs loo guꞌa. Per cart coꞌ mqueꞌen yeꞌs loo guꞌa, neꞌntelꞌten carta loo guꞌ par mtexin lezoꞌ guꞌ. Ndxeꞌlequeꞌ, mqueꞌen carta loo guꞌ par non guꞌ no par taꞌ guꞌ cuent leꞌ daa, lìcqueꞌ, nqueꞌqueꞌ lezoꞌ ñèen ryete guꞌ axta plóthe.
\s Pab ngue taꞌ cuent loo mèn teriꞌth tecanꞌ mèn xquin no xtol xtàa mèn coꞌ nac conꞌ yeꞌrsinꞌ coꞌ ndli mèn loo xtàa mèn.
\p
\v 5 Per cheleꞌ chó thìb guꞌ coꞌ nzo làth guꞌ mbli mzyálꞌ diꞌs no mzyálꞌ cuent par ndxàc yalnaxi loon, ingue cuaꞌnte mbiꞌa diꞌs no cuent par ante daa nxi lezoꞌ. Ndxeꞌlequeꞌ, ncuaꞌn mbiꞌa diꞌs no cuent par nxi lezoꞌ guꞌ, ne. Niin leꞌ mbiꞌ mbli par nxi lezoꞌ ndxep guꞌ par neꞌgabten leꞌ guꞌ inthyonte no inxide lezoꞌ guꞌ por conꞌ coꞌ mbli mbiꞌa. Tataa niin par ndenꞌ guꞌ arid leꞌn lezoꞌ guꞌ por cón cheꞌn conꞌ coꞌ ndxàc làth guꞌ no par neꞌtetìiden guꞌ arid cón cheꞌn conꞌ coꞌ ngòc por cón cheꞌn mbiꞌa làth guꞌ.
\v 6 Ya ngololeꞌ no ya guneeleꞌ conꞌ coꞌ ngòc mod coꞌ mtetìi guꞌ mbiꞌa coꞌseꞌ mqueltàa guꞌ: No con thidte diꞌs mnibeꞌ guꞌ gàca loo mbiꞌ par mxactìi mbiꞌ, mbiꞌ coꞌ ndxàc hues xtàa guꞌ coꞌ mbli conꞌ yeꞌrsinꞌa làth guꞌ. Na nii loo guꞌ: Neꞌtolode tetìi guꞌ mbiꞌ.
\v 7 Per nalleꞌ, más huen fteriꞌth ftecanꞌ guꞌ conꞌ coꞌ nzo lezoꞌ guꞌ ñèe guꞌ mbiꞌ coꞌ nac hues xtàa guꞌa. Ndxeꞌlequeꞌ, más huen fcuaꞌn guꞌ mod tegán guꞌ lezoꞌ mbiꞌ. Tac neꞌstolqueꞌ neꞌtolode xec mbiꞌ loo conꞌ ngue li no guꞌ mbiꞌ, tant nxi yéc mbiꞌ no tant nxi lezoꞌ mbiꞌ loo conꞌ mbli mbiꞌ. No yiloa leꞌleꞌ tyub yéc mbiꞌ ryo xàꞌ mbiꞌ làth guꞌ thidtene.
\v 8 Cona, ngue niin loo guꞌ: Bli guꞌ favor. Ndlyazen bere guꞌ, cuaꞌn guꞌ mod luꞌ guꞌ loo mbiꞌ leꞌ guꞌ, lìcqueꞌ, nqueꞌqueꞌ lezoꞌ ñèe guꞌ mbiꞌ.
\v 9 Daa mqueꞌleꞌ thìb cart loo guꞌ ndooreꞌ cón cheꞌn coꞌ ndyac guꞌ baꞌ. Mqueꞌen ner carta loo guꞌ par ñeen ñeeneꞌ chéꞌ, lìcqueꞌ, tyubdiꞌs guꞌ loo ryethe conꞌ coꞌ ñibeꞌ Diox loon par luꞌen loo guꞌ.
\v 10 Nalleꞌ loo mèn coꞌ guꞌ teriꞌth tecanꞌ xèn xyàn coꞌ nzo lezoꞌ guꞌ coꞌseꞌ ñèe guꞌ mèn por cón cheꞌn chol conꞌ mbli no mèn guꞌ, daa, ne, teriꞌth tecanꞌ xèn xyàn coꞌ nzo lezon cón cheꞌn conꞌ coꞌ mbli no mèn daa. Tac cheleꞌ daa mteriꞌth mtecanen xèn xyàn coꞌ ngòo lezon coꞌ mbli no mèn daa por ndlyat lezon ñèen guꞌ, mteriꞌthen mtecanen xèn xyàna loo Crist.
\v 11 Tataa li naꞌ par neꞌlide Mebizya gan loo naꞌ nec thìb mod no nec tedib mod tac naꞌ naneequeꞌ coꞌ huen huen xá nac mañ cheꞌn Mebizya par li Mebizya gan loo mèn.
\s Imbe see teede lezoꞌ Pab leꞌn ciuda Tro.
\p
\v 12 Tan cuent loo guꞌ loo cart ndxèꞌ. Coꞌseꞌ mzin daa ciuda Tro, ngua tethen no ngua lon yalbàn cón cheꞌn diꞌs ndac cheꞌn Crist. Mxaquen mxalꞌ Diox ned no mxalꞌ Diox yóꞌ loon par ngue lin zinꞌ coꞌ mxoꞌf zinꞌ Tad loon cón cheꞌn Tad.
\v 13 Per láth coꞌseꞌ ngon leꞌn ciuda Tro, neꞌmbe see teede lezon no yende chó gust ngon leꞌn ciuda Tro tac neꞌngzálꞌten Tit coꞌ ndxàc hues naꞌ por cón cheꞌn Crist tya. Ale por cona, mbli guniin Diox loo mèn coꞌ ngòo loo cón cheꞌn Diox por cón cheꞌn Crist leꞌn ciuda Tro. Mxenen ned. Nguan par ned leꞌn yèezyaꞌ cheꞌn làaz mèn macedon.
\s Pab ndyoodiꞌs cón cheꞌn mèn coꞌ mbli gan ngro xàꞌ loo cón cheꞌn xab izlyoꞌ par ngòc mèna cheꞌnpeꞌ Crist.
\p
\v 14 Per Diox quix Diox tac Diox nzo noqueꞌ nuꞌ. Ndli nuꞌ gan nxoꞌf zinꞌ nuꞌ zinꞌ coꞌ nac zinꞌ cón cheꞌn Crist Jesús. No ndli Diox par ndaꞌ mèn cuent cón cheꞌn diꞌs ndac coꞌseꞌ ngo nuꞌ yalbàn axta ndenꞌ mèn nac cón cheꞌn diꞌs ndac cheꞌn Diox xal thìb xlaꞌ coꞌ ndryeꞌs loo mbii coꞌ anzeꞌf nix ndlyaꞌ. Tataa ncàba loo cón cheꞌn diꞌs ndac rye lugar coꞌteꞌ ngo nuꞌ yalbàn cón cheꞌn diꞌs ndac.
\v 15 Coꞌseꞌ ndeꞌth nuꞌ no ngo nuꞌ yalbàn cón cheꞌn Crist pál ned nzo mèn, ndxòo lezoꞌ Diox cón cheꞌn conꞌ coꞌ ngue li nuꞌ xal thìb zen yalꞌ coꞌ ngo Crist loo Diox, que naca tyal mèn gòn mèna diꞌs par lyáꞌ mèna loo conꞌ ryes, que naca neꞌtyalte mèna gòn mèna diꞌs par càba loo mèna lyux mèna.
\v 16 Loo ndxep mèn nac nuꞌ mèn coꞌ ndaꞌ cuent cón cheꞌn conꞌ coꞌ càb ryo xàꞌ mèn loo Diox thidtene, coꞌ nee diꞌs, lyux mèn, ndyac mèn. Leꞌ loo taamas mèn na, nac nuꞌ mèn coꞌ ndaꞌ cuent cón cheꞌn conꞌ coꞌ càb yòo ban no mèn Diox thidtene, ndyac mèn. Yende chó mèn nzo coꞌ gác no coꞌ xec thidte mèna li zinꞌ ndxèꞌ. Ante ndxác nuꞌ tolo li nuꞌ zinꞌ ndxèꞌ coꞌseꞌ tolo ndlyath no Diox nuꞌ.
\v 17 Ingue lide nuꞌ zinꞌ cón cheꞌn diꞌs ndac coꞌ nac cheꞌn Diox par li nuꞌ gan coꞌ hua nuꞌ xal ndli huax mèn coꞌ nseꞌ loo diꞌs ndac cheꞌn Diox par li mèna gan huax tmi. Ndxeꞌlequeꞌ, coꞌseꞌ ngo nuꞌ yalbàn cón cheꞌn diꞌs ndac cheꞌn Diox loo mèn, dib nzo yéc nuꞌ no dib nzo lezoꞌ nuꞌ ngo nuꞌ yalbàn. Ingode nuꞌ yalbàn xal mèn coꞌ ndoo guyith lezoꞌ. Ndenꞌ nuꞌ, lìcqueꞌ, mtelꞌ Diox nuꞌ no non nuꞌ leꞌ loo Diox ngo nuꞌ yalbàn loo mèn. No non nuꞌ nac nuꞌ cheꞌnpeꞌ Crist. Yende mod li nuꞌ conꞌ coꞌ neete lezoꞌ nuꞌ li nuꞌ.
\c 3
\s Trèꞌ ndluꞌ Pab leꞌ diꞌs ndac cheꞌn Diox nac thìb conveñ cub.
\p
\v 1 Coꞌseꞌ ndlab guꞌ diꞌs coꞌ ngue bezen loo guꞌ loo cart coꞌ mtelꞌen loo guꞌ ndxèꞌ, ¿chéꞌ ndenꞌ guꞌ no chéꞌ ndyac guꞌ beren, tlon, tyoodizen no tan cuent conꞌ ndac cón chenen loo guꞌ tedib vez, càꞌ? o ¿Chéꞌ ndyac guꞌ naquin queꞌ tedib mèn yeꞌs coꞌ nac cart par taꞌ mèna cuent ndac cón chenen loo guꞌ, càꞌ? o ¿Chéꞌ ndyac guꞌ ndxàal ñaꞌben loo guꞌ queꞌ guꞌ yeꞌs cón cheꞌn nuꞌ coꞌ hueꞌ nuꞌ loo taamas mèn par tataa mod taꞌ ndac guꞌ cuent cón cheꞌn nuꞌ loo mèn xal ndli ndxep mèn, càꞌ? Yende xàa.
\v 2 Nac yub guꞌ xal thìb cart coꞌ mqueꞌ Crist yeꞌs loo mèn coꞌ tan càa mèn. Non mèn cón chenen por cón cheꞌn guꞌ xal non mèn cón cheꞌn tedib mèn por cón cheꞌn thìb cart coꞌ mqueꞌ mèn loo xtàa mèn. Inquinte daa chol cart coꞌ taꞌ cuent cón chenen. Ante, ndyaquen, nquin non mèn cón cheꞌn nuꞌ por cón cheꞌn guꞌ. Conꞌa no maste nquin nuꞌ. Lezon no ngudloon nac guꞌ loon tant ndyac non guꞌ axta neꞌ neꞌ yathlazen cón cheꞌn guꞌ. Non mèn no nanee mèn cón chenen xal nac daa por cón cheꞌn conꞌ coꞌ ndxàc loo guꞌ por cón cheꞌn daa tac non mèn leꞌ guꞌ mzyeꞌ mod coꞌ nque tee ban guꞌ loo Diox thìb cuaꞌa.
\v 3 Mèn ciuda Corint coꞌ ndxàc huesen por cón cheꞌn Crist, tetaquen thìb diꞌs cón cheꞌn naꞌ no cón cheꞌn Crist loo guꞌ, coꞌ nee diꞌs, guꞌ nac xal thìb cart coꞌ mqueꞌ leque yub Crist loo taamas mèn no mdaꞌ Crist lugar huen carta loo mèna, coꞌ nee diꞌs, guꞌ ndluꞌ xal nac daa no xal nac Crist loo mèn. Cón cheꞌn conꞌ ndxèꞌ inacte xal thìb cart coꞌ mqueꞌ mèn yeꞌs con tint. Ndxeꞌlequeꞌ, guꞌ mzyeꞌ mod coꞌ mque tee ban guꞌ thìb cuaꞌa por cón cheꞌn Xpii Natúꞌ cheꞌn Diox, coꞌ thidtene naban, coꞌ mbli thìb zinꞌ loo guꞌ. Conꞌ ndxèꞌ ndluꞌ guꞌ loo mèn xal ndluꞌ thìb cart conꞌ loo mèn. Neꞌngàcte conꞌ ndxèꞌ xal ngòc diꞌs coꞌ mqueꞌ Diox loo quèe coꞌ mtoxcuaꞌ Moisés póla, coꞌ mcàayaꞌ mèn nación Israel. Ndxeꞌlequeꞌ, cón cheꞌn zinꞌ coꞌ mbli Xpii Natúꞌ loo guꞌa, ngüaaꞌd leꞌn lezoꞌ mèn no ngüaaꞌd leꞌn xtùuz mèn, ne, par taꞌ mèn cuent xá nac cón cheꞌn Diox no xá nac daa por cón cheꞌn guꞌ.
\p
\v 4 Por cón cheꞌn Crist, anzeꞌf thìb yalxlaꞌs ndxàpen loo Diox no ndxelazen loo Diox leꞌ Diox lyath no daa par xoꞌf zinꞌ ndaquen zinꞌ coꞌ mxoꞌf zinꞌ Diox loon par lin coꞌ nac cón cheꞌn diꞌs ndac cheꞌn Diox.
\v 5 Inacte por cón cheꞌn yub nuꞌ ndli par ndxác nuꞌ ndli nuꞌ ndxep conꞌ coꞌ ndxácte nuꞌ ndli nuꞌ cón cheꞌn diꞌs ndac coꞌ nac cón cheꞌn Diox. Ndxeꞌlequeꞌ, conꞌ coꞌ ndxácte daa ndlin coꞌ nac cón cheꞌn diꞌs ndac cheꞌn Diox, ndlina ante por cón cheꞌnpeꞌ Diox no ndlina xalte ndlyath no Diox daa.
\v 6 Yub Diox nac xaꞌ coꞌ mbli loon par xoꞌf zinꞌ ndaquen thìb zinꞌ cón cheꞌn conveñ cub coꞌ mbli Diox loo mèn coꞌ nac cón cheꞌn diꞌs ndac cheꞌn Diox. Ley coꞌ mnibeꞌ Diox loo Moisés par mxoꞌf Moisés leya loo mèn nación Israel, leya mnibeꞌ leꞌ mèn tyubdiꞌs loo ryethe conꞌ ñibeꞌ leya loo mèn. No mèn coꞌ indyubdiꞌs ndacte loo ryethe conꞌ mnibeꞌ leya loo mèna, loo mèna càb quexùꞌ Diox loo mèna par ryo xàꞌ mèna loo Diox thidtene yiloa. Xpii Natúꞌ nac xaꞌ coꞌ ñibeꞌ loo mèn coꞌ nzo loo conveñ cub coꞌ mbli Diox loo mèn. Mèn coꞌ nzo loo conveñ cub, mèna ban no Diox thidtene yiloa.
\p
\v 7 Cón cheꞌn diꞌs coꞌ ngòc ley coꞌ mxoꞌf Moisés loo mèn nación Israel póla, ner mqueꞌ leque yub Diox diꞌs coꞌ ngòc nerlequeꞌ diꞌs coꞌ ndxab Diox cón cheꞌn leya loo quèe. Láth ngo no Moisés Diox loo yii Sinaí tiempa, mquée xnìi cheꞌnpeꞌ Diox loo Moisés. Texal ngulàa tùub Moisés loo yii Sinaí loo Diox loo mèn nación Israel, neꞌnxecte mèn nación Israel mbuiꞌ mèn loo Moisés tant mquée xnìi cheꞌnpeꞌ Diox loo Moisés. Per mastaleꞌ tataa mquée xnìi tínꞌ loo Moisés leꞌn huiza, xnìia xèegà xèegà mbyuꞌ. No xèegà xèegà mdyonꞌ xnìi coꞌ mquée loo Moisés. No mastaleꞌ cón cheꞌn coꞌseꞌ mtlo mxoꞌf Moisés leya loo mèn nación Israel ngòc thìb conꞌ roo no thìb conꞌ xèn axta mquée xnìi cheꞌnpeꞌ Diox loo Moisés, conꞌ coꞌ ncàb loo mèn coꞌ neꞌtyalte tyubdiꞌs ndac loo leya, mzib quìi Diox mèna par tyoo xàꞌ mèna loo Diox thidtene yiloa.
\v 8 Aleꞌqueꞌ neꞌ gàc más conꞌ roo conꞌ xèn cón cheꞌn conveñ cub coꞌ nac diꞌs ndac cheꞌn Diox loo mèn coꞌseꞌ ñibeꞌ Diox loo mèn por cón cheꞌn Xpii Natúꞌ leque conꞌ roo conꞌ xèn cón cheꞌn ley coꞌ mxoꞌf Moisés loo mèn póla. Tataa ndxàca, ¿léꞌ?
\v 9 Cona nee diꞌs, cheleꞌ ley coꞌ mxoꞌf Moisés loo mèn mcàb loo mèna leꞌ Diox mquexùꞌ mèn tac neꞌndalte mèn ndubdiꞌs ndac mèn loo Diox xal ngòc yalnibeꞌ cheꞌn leya, pues cheleꞌ leya ngòc thìb conꞌ roo conꞌ xèn loo mèna, aleꞌqueꞌ neꞌ gàc conꞌ roo conꞌ xèn diꞌs ndac cheꞌn Diox. Tac por cona mbli Diox leꞌ naꞌ coꞌ ndxelaꞌs loo Crist nac mèn nalì no mèn nambìi loo Diox. No mdyal Diox ngòo naꞌ loo cón cheꞌn Diox por cón cheꞌn diꞌs ndac.
\v 10 Mastaleꞌ ngòc conꞌ roo conꞌ xèn loo mèn por cón cheꞌn ley coꞌ mxoꞌf Moisés loo mèn, no ngòc leya thìb conꞌ roo conꞌ xèn tiempa, per nalleꞌ pà taꞌ cón cheꞌn leya con conveñ cub coꞌ nac mod cub coꞌ ñibeꞌ Diox loo mèn nalleꞌ, ¿léꞌ?
\v 11 Cona, ngue niin loo guꞌ, mèn ciuda Corint: Cheleꞌ ley coꞌ mxoꞌf Moisés loo mèn, coꞌ ngòc thìb ley coꞌ mnibeꞌ loo mèn ndxepte tiemp, ngòc thìb conꞌ roo conꞌ xèn, aleꞌqueꞌ más conveñ cub coꞌ ñibeꞌ loo mèn thidtene neꞌ gàc más conꞌ roo conꞌ xèn, ¿léꞌ?
\p
\v 12 No nalleꞌ con dibaxlaꞌs ndyoodiz non mèn cón cheꞌn conveñ cub coꞌ nac diꞌs ndac cheꞌn Diox. Tac ndub quee lezon cón cheꞌn conꞌ roo conꞌ xèn coꞌ gàc loon por cón cheꞌn conveñ cuba.
\v 13 Indxàcta loon xal ngòca loo Moisés coꞌseꞌ mtauꞌ Moisés loo Moisés con thìb leꞌ vel par neꞌhuiꞌde mèn nación Israel loo Moisés. Tataa mbli Moisés tiempa par neꞌhuiꞌde mèn nación Israel xá mod xèegà mdyonꞌ xnìi no mbyuꞌ xnìi coꞌ mquée loo Moisés coꞌ neꞌ neꞌ nxec mèn nghuiꞌ mèn loo Moisés tiempa.
\v 14 Per ngòc mèn nación Israela mèn coꞌ nauꞌ yéc nauꞌ loo. Neꞌndaꞌde mèn nación Israel cuent. No neꞌngaaꞌdte diꞌsa leꞌn lezoꞌ mèn nación Israel tiempa. Tac axta huiza no axta huiz nalze coꞌseꞌ ndlab mèn nación Israel diꞌs coꞌ ndub loo libr coꞌ nac xtiꞌs Diox coꞌ nac testamentgool, tatabeꞌ nauꞌ loo mèna no nauꞌ yéc mèna. Indxònte mèna diꞌsa. Per coꞌseꞌ yilaꞌs mèn nación Israel loo Crist, axta syareꞌ tyub xnìi yéc mèna no tyub xnìi lezoꞌ mèna loo cón cheꞌn Diox par taꞌ mèna cuent cón nee diꞌs, diꞌs coꞌ ndub loo libr coꞌ nac xtiꞌs Diox coꞌ nac testamentgool.
\v 15 Axta huiza no axta huiz nalze coꞌseꞌ ndlab mèn nación Israel coꞌ nac diꞌs cheꞌn ley coꞌ mxoꞌf Moisés loo mèna, tatabeꞌ nauꞌ loo nauꞌ yéc mèna xal thìb conꞌ coꞌ nauꞌ thìb leꞌ larꞌ loo par neꞌyaaꞌdte diꞌsa leꞌn lezoꞌ mèn coꞌ nac mèn nación Israel.
\v 16 Per coꞌseꞌ tlo zyeꞌ xtùuz cheꞌn chol mèn par yòo mèna loo cón cheꞌn Diox por cón cheꞌn Crist, que nac mèna mèn nación Israel, que nac mèna mèn coꞌ inacte mèn nación Israel, axta syareꞌ tyub xnìi yéc mèn no tyub xnìi lezoꞌ mèn loo cón cheꞌn Diox par taꞌ mèna cuent cón cheꞌn xtiꞌs Diox no cón cheꞌn Diox.
\v 17 Yub Diox nac Xpii Natúꞌ no loo mèn coꞌteꞌ nzo Xpii Natúꞌ cheꞌn Diox, loo mèna yende cón cuee no yende cón ncaꞌ loo conꞌ coꞌ nac cón cheꞌn Crist.
\v 18 Per ryete naꞌ coꞌ ndxelaꞌs loo cón cheꞌn Crist, ndubleꞌ xnìi yéc naꞌ no ndubleꞌ xnìi lezoꞌ naꞌ loo cón cheꞌn Diox, coꞌ nee diꞌs, inacte naꞌ xal mèn coꞌ nauꞌ rloo con thìb leꞌ larꞌ. No ndxàca loo naꞌ coꞌseꞌ huiꞌ mèn loo naꞌ, ndenꞌ mèna ngue huiꞌ mèn loo Crist xal ngüiꞌ mèn loo thìb spej. Tataa ndxàca tac ndyac naꞌ ngue huiꞌ naꞌ loo Crist láth ngue lab naꞌ xtiꞌs Diox coꞌ ndluꞌ cón cheꞌn Crist loo naꞌ xal ñaa loo naꞌ coꞌseꞌ ngüiꞌ naꞌ loo thìb spej. Làth xtauꞌa, nzyeꞌ mod coꞌ nque tee ban naꞌ par xèegà xèegà que tee ban naꞌ xal nac Crist no tataa mod xèegà xèegà ndxàc naꞌ xal nac Crist. Conꞌ ndxèꞌ ndxàc loo naꞌ por cón cheꞌn Diox coꞌ nac thìb Xpii.
\c 4
\p
\v 1 Cona, ngue niin loo guꞌ: Thidtene indyoo xàꞌde lezon loo zinꞌ coꞌ mxoꞌf Diox loon ndxèꞌ. Tac por anzeꞌf mblyat lezoꞌ Diox gunèe Diox daa, mxoꞌf zinꞌ Diox zinꞌ ndxèꞌ loon par nxoꞌf zinꞌen zinꞌ ndxèꞌ loo Diox.
\v 2 Part cón chenen, mbláꞌlen ryethe conꞌ coꞌ xexte ndli mèn coꞌ ncàb nthyon mèn cheleꞌ chol taamas mèn ñèe ngue tee lin conꞌa. Neꞌ neꞌ inquedìin chol mèn xal nac mod coꞌ ndxác daa ndlin loo cón cheꞌn Crist. Neꞌ neꞌ indluꞌen loo mèn cón cheꞌn diꞌs coꞌ ndub loo libr coꞌ nac xtiꞌs Diox leꞌ diꞌsa nac xàꞌleꞌ diꞌs no xàꞌguèꞌ cuent coꞌ ndluꞌ loo libr coꞌ nac xtiꞌs Diox. Ndxeꞌlequeꞌ, loo Diox ndluꞌen ante conꞌ coꞌ nac conꞌ lìcpeꞌ coꞌ ndub loo libr coꞌ nac xtiꞌs Diox cón cheꞌn Diox loo mèn. Tataa mod taꞌ mèn cuent no tenꞌ mèn leꞌn lezoꞌ mèn lìcqueꞌ nac conꞌ coꞌ ndluꞌen loo mèn cón cheꞌn Diox ned ngue teeꞌen.
\v 3 Cheleꞌ diꞌs coꞌ nac cón cheꞌn diꞌs ndac coꞌ ndaꞌ cuent no coꞌ ndluꞌ cón cheꞌn Crist, coꞌ ndethen no coꞌ ngon yalbàn loo mèn, indxaaꞌd ndacte yéc mèn no lezoꞌ mèn, ndxàca tataa loo mèna tac nauꞌ yéc no nauꞌ loo mèn, mèn coꞌ nzi tee huan loo Diox, mèn coꞌ coꞌ too Diox loo Diox yiloa.
\v 4 Per com leꞌ mèna indxelaꞌste loo Crist, ¿léꞌ?, Mebizya coꞌ nac xal thìb diox cheꞌn mèn loo izlyoꞌ ndxèꞌ leꞌn ndxep tiemp coꞌ nzi ban mèn loo izlyoꞌ ndxèꞌ, Mebizya mtauꞌ loo no mtauꞌ yéc no mtauꞌ Mebizya lezoꞌ mèn coꞌ neꞌndalte ngalaꞌs. Tataa mod mbli Mebizya par neꞌtyubte xnìi yéc mèn no par neꞌtyubte xnìi lezoꞌ mèn loo cón cheꞌn Diox par neꞌgònte mèna no neꞌtaꞌde mèna cuent cón cheꞌn diꞌs ndac coꞌ nac xal xnìi coꞌ ntenìi yéc mèn no coꞌ ntenìi lezoꞌ mèn loo cón cheꞌn Diox par non mèn no taꞌ mèn cuent cón cheꞌn conꞌ roo conꞌ xèn cheꞌn Crist coꞌ nac xalqueꞌ nac Diox, Diox coꞌ indxúꞌde loo mèn.
\v 5 Coꞌseꞌ ngo nuꞌ yalbàn, ingode nuꞌ yalbàn cón cheꞌn nuꞌ. Ndxeꞌlequeꞌ, ngo nuꞌ yalbàn cón cheꞌnpeꞌ Crist Jesús leꞌ Crist Jesús nac Tad coꞌ ñibeꞌ loo ryethe conꞌ. Leꞌ cón cheꞌn nuꞌ na, nac nuꞌ xal thìb moz loo guꞌ tac nuꞌ nac moz cheꞌn Jesús coꞌ anzeꞌf nqueꞌ lezoꞌ Jesús ñèe Jesús.
\v 6 Coꞌseꞌ mblec Diox izlyoꞌ no coꞌseꞌ mxènꞌ Diox izlyoꞌ, Diox mnibeꞌ: Yo xnìi coꞌ tenìi loo yalꞌcuau loo izlyoꞌ. No, chàa, ngòca. Tataa ndxàca loo naꞌ nalleꞌ, ne. Leque yub Diox nac xaꞌ coꞌ mbli par mdyub xnìi yéc naꞌ. No mbli Diox par mdyub xnìi lezoꞌ naꞌ loo cón cheꞌn Diox par tataa mod gác naꞌ taꞌ naꞌ cuent cón cheꞌn conꞌ roo conꞌ xèn cheꞌn Diox xalqueꞌ mbluꞌ Jesucrist cón cheꞌn conꞌ roo conꞌ xèn cheꞌn Diox loo naꞌ.
\s Trèꞌ ndluꞌ cón cheꞌn cón nee diꞌs ndxàp mèn yalxlaꞌs loo Crist no loo cón cheꞌn Crist.
\p
\v 7 Per nalleꞌ, tetaquen thìb diꞌs loo guꞌ par taꞌ guꞌ cuent no par non guꞌ cón cheꞌn diꞌs coꞌ nde niin loo guꞌ ndxèꞌ: Conꞌ ndac coꞌ nac cón cheꞌn Diox coꞌ ndxàp naꞌ por cón cheꞌn Crist, leꞌi nac xal thìb tesor coꞌ axta arid náp ntac coꞌ nzosuaꞌ leꞌn thìb yàat yòo. Loo cón cheꞌn tesora nac naꞌ xal yàat yòo coꞌteꞌ ndxòosuaꞌ tesor par non mèn conꞌ roo conꞌ xèn coꞌ ndxàc loo naꞌ inacte por cón cheꞌnpeꞌ naꞌ. Ndxeꞌlequeꞌ, leꞌi ndxàc loo naꞌ por cón cheꞌn conꞌ roo conꞌ xèn coꞌ nzo laꞌs nii Diox no coꞌ nzo laꞌs yaꞌ Diox.
\v 8 Por cona, ngue niin loo guꞌ: Mastaleꞌ rye ned coꞌteꞌ ngue que teeꞌen nzoqueꞌ conꞌ coꞌ ncaꞌ loon loo cón cheꞌn Crist no ndxàc ngòc nguàal conꞌ loon, per inpor conaꞌde ndxetac lezon. Ndoo xalꞌqueꞌ ned ndoo xalꞌqueꞌ yóꞌ loon. Chop ndxàc lezon huax vez loo conꞌ coꞌ ndxàal lin. Per ndxeꞌlequeꞌ, thidtene neꞌgabten loo lezon láꞌen zinꞌ. Per ndxeꞌlequeꞌ, ndub queequeꞌ lezon toloqueꞌ que tee xoꞌf zinꞌen zinꞌ loo cón cheꞌn Diox.
\v 9 Mastaleꞌ ndub nguꞌs mèn daa, Diox neꞌngláꞌyaꞌde daa. Mastaleꞌ mtetìi mèn daa axta plóthe, mbli mèna cuent nguth daa. Per neꞌnguthte mèna daa.
\v 10 Loo zinꞌ coꞌ nxoꞌf zinꞌen loo cón cheꞌn Crist, atate huiz ndriꞌthen loo yalguth. No ndyactìin xalqueꞌ ngòca loo Jesús coꞌseꞌ mqueꞌ mèn Jesús loo cruz. Coꞌseꞌ tataa ndxàca loon, ngue luꞌen loo mèn leꞌ Jesús ndlyath no daa par ban daa xalqueꞌ mque tee ban Jesús làth mèn, ne.
\v 11 Per láth beꞌ ngue tee banen loo izlyoꞌ ndxèꞌ, nzoqueꞌ ryes loon ryete huiz par guth mèn daa por cón cheꞌn Jesús. Por conꞌ coꞌ nde teeleꞌ ndxàc loon, ndxúꞌ loo mèn no ndaꞌ mèn cuent leꞌ Crist ngue tee noqueꞌ daa por mod coꞌ ngue teeꞌen loo zinꞌ coꞌ nxoꞌf zinꞌen loo cón cheꞌn Crist.
\v 12 Cona, ndyaquen thìb mod no tedib mod neꞌlyáꞌde daa loo yalguth por cón cheꞌn zinꞌ coꞌ nxoꞌf zinꞌen cón cheꞌn Jesús. Per part cón cheꞌn guꞌ, ndxeꞌlequeꞌ, por cón cheꞌn ryete conꞌ ndyactìin ncàba loo guꞌ leꞌ guꞌ ngue tee ban xalqueꞌ ñibeꞌ Diox loo guꞌ.
\p
\v 13 Thidte mod ndxelazen loo Diox xal ngolaꞌs mèn coꞌ mqueꞌ yeꞌs coꞌ nac libr cheꞌn Salmos coꞌ nac xtiꞌs Diox xal mbez diꞌs coꞌ ndub loo libr cheꞌn Salmos:
\pi1 Por ngolazen, cona ndyoodizen cón cheꞌn Tad.
\m Daa, ne, ndxelaz loo Tad Diox. Por cona, ndyoodizen cón cheꞌn Tad Jesús.
\v 14 Nonqueꞌ naꞌ no naneequeꞌ naꞌ leꞌ Diox coꞌ mblo xban Tad Jesús, Diox co xban naꞌ, ne, par bii no naꞌ Diox coꞌ hueꞌ naꞌ loo Jesús coꞌteꞌ nzo Jesús.
\v 15 Ryete yaltìi coꞌ ndxàc loon, leꞌi ndxàc loon par càba conꞌ ndac loo guꞌ, coꞌ nee diꞌs, li Diox anggàc conꞌ ndac loo huax mèn coꞌ yilaꞌs loo Jesucrist par gab mèna loo Diox: Diox quix Uꞌ, Tad Diox, por ryethe conꞌ ndac coꞌ ndli no Uꞌ nuꞌ. Leꞌ sya, diꞌs coꞌ gab mèn loo Diox li par càba loo Diox xyoꞌf lèe xyoꞌf xtiꞌs Diox loo taamas mèn.
\p
\v 16 Por cona, indxetacte lezon loo cón cheꞌn Diox. Mastaleꞌ bélꞌyòo ladpeꞌen ndoo yàc coꞌ gox par gatha yéꞌ huizeꞌ, per ndxeꞌlequeꞌ, thìb huiz tedib huiz sate más ncàba conꞌ ndac loon leꞌn lezon no leꞌn xtùuzen loo conꞌ ndub quee lezon.
\v 17 Tac ryethe yalnaxi coꞌ ndxàc loon nalleꞌ loo izlyoꞌ ndxèꞌ, leꞌi nac coꞌ setilte ndriꞌth loon ndxepte tiemp no maste. Per pà taꞌ conꞌ coꞌ ndxàc loon ndxèꞌ loo conꞌ roo conꞌ xèn tínꞌ coꞌ thidtene gàc loon yiloa.
\v 18 Part cón chenen, indliden xtùuz no ingüiꞌden loo conꞌ coꞌ ndxúꞌ loo mèn. Per ndxeꞌlequeꞌ, ndlin xtùuz no ndyóon cón cheꞌn conꞌ coꞌ indxúꞌde loo mèn. Tac conꞌ coꞌ ndxúꞌ loo mèn, coꞌ ngüiꞌ mèn loo, nac conꞌ coꞌ nxec ndxepte tiemp no maste. Per conꞌ coꞌ indxúꞌde loo mèn, conꞌa nxec thidtene. No neꞌtyonꞌte no neꞌlyuxte conꞌa thidtene.
\c 5
\p
\v 1 Naꞌ naneequeꞌ cheleꞌ bélꞌyòo lad naꞌ ndxèꞌ coꞌ nac xal thìb yòocal coꞌ neꞌxecte nen coꞌteꞌ nzo ban naꞌ nalleꞌ gath no lyux, Diox toxcuaꞌ no que no Diox thìb ladpeꞌ naꞌ coꞌ gàc xal thìb yòocal cub coꞌteꞌ yòo ban naꞌ loo béꞌ. No ladpeꞌ naꞌ coꞌ mbli nableꞌ Dioxa, ladpeꞌ naꞌ neꞌtyoxcuaꞌde por mèn cheꞌn izlyoꞌ ndxèꞌ. Ladpeꞌ naꞌ coꞌ mbli nableꞌ Diox coꞌ gàc cheꞌnpeꞌ béꞌa xec thidtene.
\v 2 Lìcqueꞌ naca, láth naban naꞌ loo izlyoꞌ ndxèꞌ ndli naꞌ sient. No ndenꞌ naꞌ ryethe yaltìi no ryethe yalnè coꞌ ndxàc loo bélꞌyòo ladpeꞌ naꞌ ndxèꞌ nalleꞌ, ¿léꞌ? Por cona, ndlyaꞌs naꞌ gath bélꞌyòo ladpeꞌ naꞌ ndxèꞌ par que no naꞌ tedib lad cub coꞌ nac cheꞌnpeꞌ béꞌ.
\v 3 No lad cub naꞌ, coꞌ que no naꞌa, gàc xal thìb ned xab cub naꞌ coꞌ goc naꞌ par neꞌgàc chede naꞌ, coꞌ nee diꞌs, par neꞌyòode alm naꞌ no xpii naꞌ tuaꞌte loo béꞌ.
\v 4 Cona, ngue niin loo gu: Láth beꞌ naban naꞌ leꞌn coꞌ nac bélꞌyòo ladpeꞌ naꞌ ndxèꞌ, anzeꞌf nalyat ndenꞌ naꞌ conꞌ. No ya neꞌxecte naꞌ ndenꞌ naꞌ conꞌ coꞌ ndxàc loo naꞌ. Inacta ndlyaꞌs naꞌ anggath naꞌ par alithe ryo xpii naꞌ no alm naꞌ loo ladpeꞌ naꞌ par neꞌque node naꞌ thìb ladpeꞌ naꞌ. Ndxeꞌlequeꞌ, ndlyaꞌs naꞌ gath naꞌ par que no naꞌ tedib ladpeꞌ naꞌ coꞌ gàc thìb lad cub coꞌ neꞌgathte thidtene no coꞌ gàc thìb ladpeꞌ naꞌ coꞌ banqueꞌ thidtene.
\v 5 Yub Diox nac xaꞌ coꞌ mbli par que no naꞌ thìb lad cubpeꞌ naꞌ coꞌseꞌ gath bélꞌyòo ladpeꞌ naꞌ ndxèꞌ. No mblàa Diox Xpii Natúꞌ loo naꞌ par li laꞌs naꞌ que noqueꞌ naꞌ thìb lad cubpeꞌ naꞌ yiloa.
\p
\v 6 Por cona, ngue niin loo guꞌ: Láth beꞌ naban naꞌ loo izlyoꞌ ndxèꞌ, thidtenequeꞌ ndxàp naꞌ yalxlaꞌs loo Diox leꞌ Diox li conꞌa loo naꞌ. Naneequeꞌ naꞌ, ne, láth beꞌ naban naꞌ leꞌn bélꞌyòo ladpeꞌ naꞌ ndxèꞌ loo izlyoꞌ ndxèꞌ, beꞌ nzi tee xàꞌ naꞌ loo Diox loo béꞌ. Tarte yòo ban no naꞌ Diox loo béꞌ.
\v 7 Láth beꞌ nzi tee ban naꞌ loo izlyoꞌ ndxèꞌ, ndxàp naꞌ yalxlaꞌs leꞌ Diox li ryethe conꞌ mcàbgòn Diox li Diox loo naꞌ. Imbedte naꞌ no indub queede lezoꞌ naꞌ cón cheꞌn conꞌ coꞌ ndxúꞌ loo naꞌ loo izlyoꞌ ndxèꞌ par gàc conꞌ ndac loo naꞌ por cón cheꞌn izlyoꞌ ndxèꞌ.
\v 8 Conꞌa ndli sate más ndxàp naꞌ yalxlaꞌs loo Diox. No sate más ndlyaꞌs naꞌ no nguen lezoꞌ naꞌ gath bélꞌyòo lad naꞌ par yòo ban no naꞌ Diox.
\v 9 Por cona, que naca inzo node naꞌ Diox, que naca nzo no naꞌ Diox, ngue li naꞌ conꞌ coꞌ nzote mod gác naꞌ li naꞌ par tataa mod más yòo lezoꞌ Diox ñèe Diox naꞌ.
\v 10 Tac ryete naꞌ, naquinqueꞌ yo naꞌ loo Crist par tyoo naꞌ loo Crist coꞌteꞌ ndub ñibeꞌ Crist par tub rez Crist cón cheꞌn ryethe conꞌ mbli naꞌ láth mque tee ban naꞌ loo izlyoꞌ ndxèꞌ par càayaꞌ naꞌ cón cheꞌn coꞌ gàc loo naꞌ por conꞌ coꞌ mbli naꞌ, que naca mbli naꞌ conꞌ ndac, o que naca mbli naꞌ conꞌ yeꞌrsinꞌ.
\s Diꞌs ndac cheꞌn Diox ndluꞌ yo nagàl lezoꞌ mèn loo Diox no cue ban mèn rye nda mèn no rye ndyeꞌth mèn loo Diox.
\p
\v 11 Pues, com leꞌ naꞌ naneeleꞌ no nonqueꞌ naꞌ xá mod ndxàal zyeb ryete naꞌ loo Diox, ¿léꞌ?, tac Diox tub rez cón cheꞌn naꞌ, por cona, ngue lin conꞌ coꞌ nzote mod lin par yilaꞌs taamas mèn coꞌ ndxelaꞌs loo Diox leꞌ diꞌs coꞌ ndethen loo guꞌ nac lìcpeꞌ. Diox non no naneequeꞌ Diox cón chenen leꞌ daa, lìcqueꞌ, ngue que tee ban lìqueꞌ loo Diox. No ndlyazen leꞌ guꞌ, ne, tenꞌ leꞌn lezoꞌ guꞌ no mbeden leꞌ guꞌ taꞌ cuent leꞌ daa, lìcqueꞌ, nque tee ban lìqueꞌ loo Diox.
\v 12 Inacta coꞌ beren, ngue niin diꞌs ndxèꞌ loo guꞌ tedib vez par li guꞌ cuent leꞌ daa ngue taꞌ cuent ndac loo guꞌ cón chenen tedib vez. Ndxeꞌlequeꞌ, ngue toodiz non guꞌ loo cart ndxèꞌ par ngue tan lugar loo guꞌ par tyac lezoꞌ guꞌ ndxep no huen yo lezoꞌ guꞌ por cón chenen. Tataa mod gàca loo guꞌ gác guꞌ càb guꞌ loo mèn coꞌ ndyeꞌs con costumbr no con mod coꞌ ndxúꞌ loo mèn. Leque mèna indlide cas xal nac xtùuz mèn no lezoꞌ mèn coꞌ, lìcqueꞌ, ndluꞌ xá nac mèn loo Diox.
\v 13 Cheleꞌ guꞌ ndenꞌ nquée mbii yéquen por asendli guthen zinꞌ loo zinꞌ coꞌ mxoꞌf zinꞌ Diox loon por anzeꞌf ndyoodizen loo guꞌ, pues nquée mbii yéquen por naca zinꞌ coꞌ mxoꞌf zinꞌ Diox loon. Per cheleꞌ guꞌ ndli cuent leꞌ daa ndxeꞌslequeꞌ ngue teeꞌen loo guꞌ no inquéede mbii yéquen, tataa ndlina por cón cheꞌn guꞌ par gàc conꞌ ndac loo guꞌ.
\v 14 Com leꞌ Crist nqueꞌ lezoꞌ ñèe Crist mèn, cona sate más, ndyaquen, nquin lin sirv loo Crist no loo mèn. Por cona, ngo ron coꞌseꞌ nguth angoluxte Crist loo cruz por cón cheꞌn ryete mèn, sya, por part cheꞌn Diox, Diox mbli cuent ryete mèn, ne, nguthleꞌ, coꞌ nee diꞌs, part cheꞌn Diox nguth no Crist ryete mèn loo cruz.
\v 15 Lìcqueꞌ, nguth Crist por cón cheꞌn ryete mèn. Tataa mbli Crist par gàca nalleꞌ leꞌ part cón cheꞌn Diox, mèn coꞌ nzi ban, coꞌ nee diꞌs, mèn coꞌ ndxelaꞌs loo Crist, neꞌtolode que tee ban mèna más xal neepeꞌ lezoꞌ mèna no xal ndryoꞌ ndlyenꞌ lezoꞌ mèna li mèna. Ndxeꞌlequeꞌ, Diox ndlyaꞌs ban mèna par li mèna conꞌ coꞌ neepeꞌ lezoꞌ Crist, Crist coꞌ nguth no coꞌ ngro xban por cón cheꞌn mèna.
\v 16 Por cona, axta huiz nalze par delant indliden cas loo taamas mèn. Neꞌ neꞌ indlasen cón cheꞌn taamas mèn xal nac mod cheꞌn mèn xal ndli mèn coꞌ alithe nzi tee ban loo cón cheꞌn xab izlyoꞌ. Mastaleꞌ ndooreꞌ coꞌseꞌ yilaꞌspeꞌen loo Crist axta daa mblas cón cheꞌn Crist xal ndlaꞌs mèna nalleꞌ. No neꞌngliden cas loo Crist tiempa. Per nalleꞌ xàꞌ nac mod coꞌ ndliben Crist no xàꞌ nac mod coꞌ ndlin cas loo Crist. Nalleꞌ indliben Crist xal mbliben Crist tiempa.
\v 17 Por cona, cheleꞌ chol mèn coꞌ yòo loo cón cheꞌn Crist dib nzo yéc mèn no dib nzo lezoꞌ mèn, mèna nac mèn cub xal thìb mbetoꞌ coꞌ diz ngóol. Ryete mod coꞌ mque no mèn póla nguriꞌthleꞌ. Per nalleꞌ mèna ngue tee ban con thìb mod cub coꞌ nac thìb yalnaban cub.
\p
\v 18 Diox nac xaꞌ coꞌ ngue li conꞌ coꞌ ndxàc loo naꞌ. No leque yub Diox nac xaꞌ coꞌ mtuꞌ mtàl xèn xyàn coꞌ ngòo lezoꞌ naꞌ gunèe naꞌ Diox. Por cón cheꞌn Crist, mbli Diox ryethe conꞌa par gàc naꞌ cheꞌnpeꞌ Diox. No mxoꞌf zinꞌ Diox zinꞌ ndxèꞌ loo naꞌ par gác naꞌ taꞌ naꞌ cuent coꞌ nzote mod li naꞌ par yuꞌ yàl lezoꞌ mèn loo Diox.
\v 19 Cona nee diꞌs, leque yub Diox mtuꞌ mtàl lezoꞌ mèn loo Diox por cón cheꞌn Crist. No mbli Diox ya neꞌtolode cuiꞌf cón cheꞌn xquin mèn no cón cheꞌn xtol mèn laꞌs nii mèn no laꞌs yaꞌ mèn. Leꞌ loo nuꞌ na, mbli Diox par xoꞌf zinꞌ nuꞌ zinꞌ ndxèꞌ par luꞌ nuꞌ loo mèn no par taꞌ nuꞌ cuent cón cheꞌn diꞌs ndac cheꞌn Diox loo mèn par cue nagàl lezoꞌ mèn loo Diox.
\v 20 Cona, ngue tan cuent loo guꞌ leꞌ nuꞌ nde loo guꞌ con diꞌs coꞌ nac xtiꞌs Crist xal mnibeꞌ Crist loo nuꞌ par taꞌ nuꞌ cuent cón cheꞌn diꞌs ndac cheꞌn Diox loo guꞌ. Cona nee diꞌs nde nuꞌ xal yub Diox par naꞌb nuꞌ loo guꞌ gòn guꞌ diꞌs coꞌ taꞌ nuꞌ cuent loo guꞌ. Por cona, nalyat ñaꞌb nuꞌ loo guꞌ por cón cheꞌn Crist: Gure nagàl lezoꞌ guꞌ loo Diox.
\v 21 Crist neꞌncuaꞌnte xquin Crist no xtol Crist thidtene. Per ndxeꞌlequeꞌ, Diox mbli cuent leꞌ Crist mcuaꞌn xquin Crist no xtol Crist par nguth Crist loo cruz por cón cheꞌn naꞌ. Tataa mbli Diox par, coꞌseꞌ yòo naꞌ loo Crist no loo cón cheꞌn Crist, que no naꞌ thìb yalnaban nalì loo Diox xalqueꞌ ndlyaꞌs Diox que tee ban lì naꞌ loo Diox.
\c 6
\p
\v 1 No por ndxàc xtàa naꞌ loo zinꞌ coꞌ mxoꞌf zinꞌ Diox loo naꞌ, por cona, ngue niin loo guꞌ no ngue naꞌben diꞌs ndxèꞌ loo guꞌ: Neꞌlaꞌde guꞌ gàc perdid conꞌ ndac coꞌ ngue luꞌ Diox loo guꞌ no coꞌ ngue li Diox loo guꞌ.
\v 2 Tac loo libr coꞌ nac xtiꞌs Diox ndub diꞌs coꞌ ndxab Diox loo mèn nación Israel, diꞌs coꞌ mbez:
\pi1 Coꞌseꞌ ngòc thìb tiemp ndac, mbìnen diꞌs coꞌ ngurez guꞌ loon. No coꞌseꞌ ngòc huiz par mblyáꞌ guꞌ loo conꞌ ryes, daa mblyath no guꞌ.
\m Ngue niin loo guꞌ, ne, mèn Corint: Huiꞌ guꞌ nexa. Nalleꞌ nac thìb tiemp coꞌ nac thìb tiemp ndac par lyàa yéc guꞌ no lyàa lezoꞌ guꞌ loo Diox par zyeꞌ mod coꞌ ndxàp guꞌ loo Diox. Leꞌn huiz ndxèꞌ no leꞌn tiemp ndxèꞌ nac huiz no tiemp coꞌseꞌ nzoqueꞌ mod lyáꞌ guꞌ loo conꞌ ryes.
\p
\v 3 Nec thìb mod no nec tedib mod incuanten mod loo mèn par lin ngòc nguàal conꞌ loo mèn par tataa mod neꞌñii yèede no neꞌñii tìide mèn cón cheꞌn zinꞌ coꞌ nxoꞌf zinꞌen cón cheꞌn diꞌs ndac.
\v 4 Ndxeꞌlequeꞌ, leque daa nquenap daa par luꞌen daa loo mèn leꞌ daa, lìcqueꞌ, nxoꞌf zinꞌ cón cheꞌn Diox no ndlin sirv loo Diox. Tataa ndluꞌen loo mèn coꞌseꞌ nxec yèen par nchaꞌlazen, no coꞌseꞌ nxec yèen coꞌseꞌ ndli mèn ngòc nguàal conꞌ loon, no coꞌseꞌ nxec yèen coꞌseꞌ nde che conꞌ loon, no coꞌseꞌ nxec yèen coꞌseꞌ ndxàc yaltìi loon.
\v 5 Nxec yèen coꞌseꞌ tin mèn daa. Nxec yèen coꞌseꞌ nqueꞌ mèn daa leziꞌf. Nxec yèen coꞌseꞌ ndxetoo xyàn no ndxetoo diꞌs lezoꞌ mèn cón chenen. Nxec yèen coꞌseꞌ ndli guthen zinꞌ. Nxec yèen coꞌseꞌ ngoꞌen mcalꞌ loon por cón cheꞌn zinꞌ coꞌ nxoꞌf zinꞌen. Nxec yèen coꞌseꞌ xlat daa ngue teeꞌen.
\v 6 Nque tee ban lìquen no nque tee ban nambìiquen. Lìcpeꞌ baꞌi, nonquen no naneequen cón nac coꞌ lìcpeꞌ. Nxec yèen no nchaꞌlazen loo mèn. Ndlyatqueꞌ lezon ñèen mèn par lyath non mèn. Ñibeꞌqueꞌ Xpii Natúꞌ loon. Lìcpeꞌ baꞌi, nqueꞌqueꞌ lezon ñèen rye mèn dib nzo yéquen no dib nzo lezon.
\v 7 Coꞌseꞌ ndyoodizen, ante ndyoodizen diꞌs coꞌ nac diꞌs lìcpeꞌ loo mèn. No ndxàcqueꞌ ryethe conꞌ roo conꞌ xèn coꞌ nzo laꞌs nii Diox no conꞌ coꞌ nzo laꞌs yaꞌ Diox loon. Diox coꞌ nac Diox nalì no Diox nambìi ndlyath no daa par que tee ban lì daa par neꞌlide mèn yeꞌrsinꞌ gan quexùꞌ queꞌ fals mèn yeꞌrsinꞌ daa loo conꞌ coꞌ inacte conꞌ lìcpeꞌ.
\v 8 Tataaqueꞌ ndlin, que naca li mèn cas loon no li mèn conꞌ guryath conꞌ guryèn loon, que naca neꞌlide mèn cas loon no neꞌlide mèn conꞌ guryath no conꞌ guryèn loon, que naca ndxath ndxèn conꞌ yeꞌrsinꞌ cón chenen làth mèn, que naca ndxath ndxèn conꞌ ndac coꞌ ndlin làth mèn, que naca mbez mèn nac daa mbiꞌ gutyèꞌ. Per mastaleꞌ mbez mèn tataa, ndlin conꞌ lìcpeꞌ.
\v 9 Mastaleꞌ ayéc axànꞌ ndlibeꞌ mèn daa, per ndxeꞌlequeꞌ, ndli mèn cuent nac daa xal mèn tith. Huax vez mbriꞌthen loo yalguth. Daa ndoo ndxèꞌ. Beꞌ naban daa. ¿Chéꞌ nguth daa ndlyaꞌs guꞌ, càꞌ? Yende xàa. Mtetìi mèn daa axta mdyac lezoꞌ mèn. Per neꞌnguthte mèn daa. Mzyalqueꞌ daai tataa mod mtetìi Diox daa tac tataaqueꞌ mquin daai. Per neꞌngathte daa.
\v 10 Mastaleꞌ nxi yéquen no nxi lezon loo conꞌ ndxàc loon, per ndxeꞌlequeꞌ, ale leque daa ndli ndyac lezon thidtene. Mastaleꞌ yende chó yalgonꞌ ndxàpen loo izlyoꞌ, ndxeꞌlequeꞌ, ndlin par gàp taamas mèn huax conꞌ ndac loo cón cheꞌn Crist. Nac daa mèn coꞌ yende chó yalgonꞌ ndxàp. Per mastaleꞌ, ingüiꞌden loo chol yalgonꞌ nalleꞌ. Cheꞌnpeꞌen nac ryethe conꞌ.
\p
\v 11 ¡Aa mèn Corint coꞌ ndxàc huesen por cón cheꞌn Crist! Nase alanleque mbloꞌen ryethe conꞌ coꞌ nzo leꞌn lezon loo guꞌ. Alanleque mdoodiz non guꞌ ryethe conꞌ coꞌ nac cón cheꞌn Crist loo cart coꞌ ngue telꞌen loo guꞌ ndxèꞌ.
\v 12 Yende cón ndenꞌen leꞌn lezon cón cheꞌn guꞌ coꞌ nzosuaꞌ leꞌn lezon par ñeen cón cheꞌn guꞌ par tataa mod neꞌqueꞌde lezon ñèen guꞌ. Ndxeꞌlequeꞌ, nzo conꞌ ñee guꞌ no conꞌ coꞌ ndenꞌ guꞌ leꞌn lezoꞌ guꞌ cón chenen. Por cona, iaridte nqueꞌ lezoꞌ guꞌ ñèe guꞌ daa, ndyaquen.
\v 13 Huiꞌ guꞌ nexa. Daa ngue toodiz noqueꞌ guꞌ xal loo myenꞌ coꞌ nac xinꞌpeꞌen. Bli guꞌ coꞌ nzote mod li guꞌ par tolo gác guꞌ queꞌ lezoꞌ guꞌ ñèe guꞌ daa xalqueꞌ nqueꞌ lezon ñèen guꞌ, ndee guꞌ.
\s Pab ngue taꞌ cuent loo mèn leꞌ naꞌ coꞌ ndxelaꞌs loo Diox por cón cheꞌn Jesucrist, lìcqueꞌ, nac naꞌ templ coꞌteꞌ nzo ban Diox, Diox coꞌ thidtene naban.
\p
\v 14 Neꞌtaꞌde guꞌ lugar queltàa no guꞌ mèn no thidte gàc guꞌ con mèn coꞌ indxelaꞌste loo conꞌ coꞌ nac cón cheꞌn Crist loo chol conꞌ. Tac ¿xá mod tyal mèn yòo mèn coꞌ nac mèn nalì no mèn nambìi loo conꞌ ndli mèn coꞌ inacte mèn nalì no mèn nambìi, àꞌ? Yende moda, ¿léꞌ? Lomisqueꞌ ne, coꞌseꞌ ntenìi xnìi thìb lugar coꞌteꞌ nacuau, yende mod cuau lugara leque tiempa, ¿léꞌ?
\v 15 No ¿chéꞌ ndli guꞌ cuent nzoqueꞌ mod thidte gàc Crist con Mebizya, càꞌ? ¡Yende mod gàca tataa, ey! No ¿xá mod tyal mèn coꞌ ndxelaꞌs thidte gàc mèna par yòo mèna loo cón cheꞌn mèn coꞌ indxelaꞌste, ne, àꞌ? ¡Yende mod gàca tataa, ey!
\v 16 No ¿xá mod gàca loo naꞌ, naꞌ coꞌ nac xal thìb templ coꞌteꞌ nzo ban Diox par tyal naꞌ no taꞌ naꞌ lugar li naꞌ cas loo chol mdoꞌ, àꞌ? Yende mod gàca tataa loo naꞌ, ¿léꞌ? Tac, lìcpeꞌ baꞌi, Diox nzo ban loo naꞌ xal leꞌn thìb templ xal nac diꞌs coꞌ ndxab Diox cón cheꞌn conꞌ ndxèꞌ. Ndxab Diox:
\pi1 Daa go ban làth mèna. No que tee noquen mèna. No gàc daa Dioxpeꞌ mèna. Leꞌ mèna na, gàc mènpeꞌ daa.
\m
\v 17 Por cón cheꞌn ryethe conꞌa, ndxab Diox, ne:
\pi1 Neꞌqueltàa node guꞌ arid con mèn loo mod coꞌ ndxàp mèna loo cón cheꞌn xab izlyoꞌ. Neꞌ neꞌ indlyazen yiziꞌf yigaꞌs guꞌ loo chol conꞌ coꞌ nac conꞌ zab coꞌ ndli mèna. Leꞌ sya, tataa mod yòo lezon cón cheꞌn guꞌ. No ndoo lìte gàc guꞌ mènpeꞌ daa.
\pi1
\v 18 Leꞌ sya, gàc daa xal xudpeꞌ guꞌ. Leꞌ guꞌ na, gàc xal xganꞌpeꞌ daa no xal rsappeꞌ daa.
\m Tataa ndxab Diox, Diox coꞌ ndxàp ryethe conꞌ laꞌs nii Diox no laꞌs yaꞌ Diox. Thìba conꞌ ndxèꞌ.
\c 7
\p
\v 1 Tolo mqueꞌ Pab yeꞌs. Ndxab Pab: Leꞌ tediba na, cheleꞌ Diox, lìcqueꞌ, mcàbgònleꞌ ryethe conꞌ ndxèꞌ loo naꞌ, guꞌ coꞌ nqueꞌ lezon ñèen, cona tolo ngue niin loo guꞌ nalleꞌ: Ndxàalqueꞌ li naꞌ fuerz par que tee ban xàꞌ naꞌ loo ryethe conꞌ coꞌ nac conꞌ zab coꞌ ndxuhua nee lezoꞌ mèn coꞌ nac cheꞌnpeꞌ izlyoꞌ ndxèꞌ, no coꞌ ndryoꞌ ndlyenꞌ lezoꞌ mèn li mèn, no cón cheꞌn xtùuz mèn coꞌ ndlipeꞌ mèn leꞌn lezoꞌ mèn. Ndxeꞌlequeꞌ, zyeb naꞌ loo Diox par gàc naꞌ mèn coꞌ, lìcqueꞌ, ngro xàꞌ loo cón cheꞌn xab izlyoꞌ par que tee ban lì naꞌ loo Diox.
\s Pab ngue luꞌ leꞌ mèn ciuda Corint coꞌ ndxelaꞌs loo Diox por cón cheꞌn Jesucrist ngulàa yéc no ngulàa lezoꞌ loo Diox no mzyeꞌ mod coꞌ ngòp mèna loo Diox.
\p
\v 2 Por cona, ngue niin loo guꞌ: Ftaꞌ guꞌ lugar yiꞌth nuꞌ loo guꞌ. Neꞌtolode yitac lezoꞌ guꞌ ñèe guꞌ daa. Tac tarte lin nec thìb conꞌ yeꞌrsinꞌ loo nec thìb mèn. Tarte téꞌth nec thìb mèn loon par li mèna conꞌ yeꞌrsinꞌ. Tarte quedìin nec thìb mèn, ne.
\v 3 Ingue niiden conꞌ ndxèꞌ loo guꞌ par ngue quexùꞌen guꞌ. Guꞌ nonqueꞌ leꞌ daa nqueꞌqueꞌ lezoꞌ ñèen guꞌ xalqueꞌ guniilena loo guꞌa, que naca ban naꞌ, que naca gath naꞌ, conseꞌ thidte tyoo lezoꞌ naꞌ ban naꞌ loo thidte conꞌ coꞌ nac cón cheꞌn Crist.
\v 4 Anzeꞌf ndxàpen yalxlaꞌs loo cón cheꞌn guꞌ xal nac mod coꞌ nzi tee ban lì guꞌ loo Diox. Anzeꞌf thìb gust ndan lezon coꞌseꞌ ndyoodizen cón cheꞌn guꞌ loo taamas mèn axta coꞌseꞌ mdoodiz non Tit cón cheꞌn guꞌ leque daa ntegán lezon, ne. No por cón cheꞌn guꞌ ndyac tínꞌ lezon axta plóthe láth ndli mèn ngòc nguàal conꞌ loon.
\p
\v 5 Tac anon mzin daa leꞌn yèezyaꞌ cheꞌn laaz mèn macedon, yende mod mbe see tee lezon. No yende mod ngo nagàl lezon por cón cheꞌn zinꞌ coꞌ nxoꞌf zinꞌen. Ndxeꞌlequeꞌ, thìb mod no tedib mod ngòcqueꞌ yaltìi no yalndyub nguꞌs loon. Thìb mod no tedib mod, ncuaꞌn xóꞌqueꞌ mèn cón chenen. No mbli mèn ngòc nguàal conꞌ loon. Ale mzyeb daa no ngo noqueꞌ lezon.
\v 6 Per mastaleꞌ ngòca tataa loon, Diox coꞌ ntegán lezoꞌ mèn no coꞌ ndli par yeꞌth lezoꞌ mèn coꞌ nzi tee xi lezoꞌ, Diox mtegán lezon por mzin Tit loon.
\v 7 Iante mtegán Diox lezon por mzin Tit loon. Ndxeꞌlequeꞌ, masreꞌ mtegán Diox lezon coꞌseꞌ mdaꞌ Tit cuent loon cón cheꞌn xá mod mtegán guꞌ lezo Tit coꞌseꞌ mdaꞌ guꞌ cuent loo Tit leꞌ guꞌ anzeꞌf nguen lezoꞌ lyath no guꞌ daa tant mxi lezoꞌ guꞌ por cón chenen no tant ndyóo guꞌ cón chenen. Por ryethe conꞌ mbli guꞌa, thìb mod no tedib mod sate más ndyac lezon.
\p
\v 8 Tac mastaleꞌ mdenꞌ lezon anzeꞌf mxi lezoꞌ guꞌ por diꞌs coꞌ mqueꞌen loo cart coꞌ mzin loo guꞌa coꞌseꞌ mblab guꞌ diꞌsa, no neꞌneeden cón ngulàa yéquen no cón ngulàa lezon ale tataa mtelꞌen carta loo guꞌ. Per nase, inxide lezon tac mtelꞌen carta loo guꞌ. Tac thìb part huenqueꞌ mblin, ndyaquen. Tac cart coꞌ mtelꞌen loo guꞌa mbli mxi yéc guꞌ no mxi lezoꞌ guꞌ ndxep tiemp par ngulàa yéc guꞌ no ngulàa lezoꞌ guꞌ par xàꞌ mseꞌ guꞌ mod coꞌ ndluꞌ nque tee ban ndac guꞌ nalleꞌ loo cón cheꞌn Crist.
\v 9 Per nalleꞌ ndyac lezon. Per indyacte lezon por ante mxi yéc guꞌ no mxi lezoꞌ guꞌ por diꞌs coꞌ mtelꞌen loo guꞌa. Ndxeꞌlequeꞌ, ndyac lezon tac mxi yéc guꞌ no mxi lezoꞌ guꞌ xal nee lezoꞌ Diox. No ndyac lezon tac, mastaleꞌ mxactìi guꞌ por cón chenen, nec thìb mod no nec tedib mod yende chó yalquìi ngòc loo guꞌ loo cón cheꞌn Crist por part cón chenen.
\v 10 Tac yalnaxi coꞌ ndxàc loo mèn xal nac coꞌ nee lezoꞌ Diox, leꞌi ndli par lyàa yéc mèn no lyàa lezoꞌ mèn par zyeꞌ mod coꞌ ndxàp mèn par lyáꞌ mèn loo conꞌ ryes. Loo cona inquinte xi lezoꞌ mèn por ngulàa yéc mèn no por ngulàa lezoꞌ mèn par lyáꞌ mèn loo conꞌ ryes. Per ndxeꞌlequeꞌ, yalnaxi coꞌ ndxàc loo mèn coꞌ alithe nque tee ban loo cón cheꞌn izlyoꞌ ndxèꞌ, yalnaxia ncàb ryo xàꞌ mèna loo Diox thidtene yiloa.
\v 11 Per huiꞌ guꞌ nexa. Loo cón cheꞌn leque conꞌ ndxèꞌ, leꞌi ngòc loo guꞌ mxi lezoꞌ guꞌ xal gunee lezoꞌ Diox, ¿léꞌ? Napló conꞌ ndac ngòca loo guꞌ cón cheꞌn conꞌ coꞌ mxi lezoꞌ guꞌa leꞌ guꞌ mbli nèe leque guꞌ par tyubdiꞌs guꞌ loo Diox. Coꞌseꞌ mxi lezoꞌ guꞌa, mdenꞌ guꞌ cón cheꞌn conꞌ yeꞌrsinꞌ coꞌ mbli mbiꞌa leꞌn lezoꞌ guꞌ. No leque guꞌ mdub razon cón cheꞌn guꞌ loo chol mèn. No axta ndlyàa xyàn lezoꞌ guꞌ coꞌseꞌ leque guꞌ ngüiꞌ loo xtàa guꞌ, ¿léꞌ? No axta mzyeb guꞌ gunèe guꞌ daa, ne, ¿léꞌ? No axta arid mblyaꞌs guꞌ thidte gàc guꞌ con daa. Anzeꞌf mdyóo guꞌ xá mod tyubdiꞌs guꞌ loon. No axtaqueꞌ mbli guꞌ gan mbli rez guꞌ loo mbiꞌ coꞌ mbli conꞌ yeꞌrsinꞌ làth guꞌa. Loo ryethe conꞌ mbli guꞌa, mbluꞌ guꞌ loo mèn nac guꞌ mèn nalì no mèn nambìi loo Diox. Conꞌ mbli guꞌ ndluꞌ yende chó dol ndxàp guꞌ cón cheꞌn mbiꞌa.
\v 12 Cona, ndlyazen non guꞌ no taꞌ guꞌ cuent, mastaleꞌ tataa mqueꞌen yeꞌs loo guꞌ, neꞌnqueꞌden yeꞌs loo guꞌ loo cart por cón cheꞌn mbiꞌ coꞌ mcuaꞌn xóꞌ loo guꞌ. Neꞌ neꞌ mqueꞌen yeꞌs loo guꞌ por cón cheꞌn mèn coꞌ ngo sálꞌ yaltìi por cón cheꞌn mbiꞌ coꞌ mcuaꞌn xóꞌ làth guꞌa, ne. Ndxeꞌlequeꞌ, mqueꞌen yeꞌsa loo guꞌ par non ryete guꞌ no taꞌ ryete guꞌ cuent susqueꞌ altant ngure guꞌ loo Diox par mblyath no guꞌ daa por mxoꞌf zinꞌ guꞌ thìb zinꞌ cón chenen, tant nqueꞌ lezoꞌ guꞌ ñèe guꞌ daa.
\v 13 Coꞌseꞌ guneen leque guꞌ mtegán lezoꞌ guꞌ, ale leque daa mtegán lezon, ne.
\p No sate más mtegánen lezon coꞌseꞌ guneen ndyac lezoꞌ Tit loo cón cheꞌn guꞌ xá mod mbli guꞌ par mbyeꞌth lezoꞌ Tit làth guꞌ.
\v 14 Tac cheleꞌ daa mdaꞌ ndxep gust lezon coꞌseꞌ mdoodiz non Tit cón cheꞌn guꞌ, neꞌnthonte daa coꞌseꞌ mdoodiz non Tit cón cheꞌn guꞌ tataa. Ndxeꞌlequeꞌ, lìcqueꞌ ngòc diꞌs coꞌ mdoodiz non guꞌ. Lomisqueꞌ ne, lìcpeꞌ nac diꞌs coꞌ mdoodiz non Tit cón cheꞌn guꞌ leꞌ daa ndxòoqueꞌ lezoꞌ cón cheꞌn guꞌ.
\v 15 No axta gust mbyanꞌ lezoꞌ Tit axta plóthe cón cheꞌn guꞌ coꞌseꞌ nteꞌ lezoꞌ Tit xá mod mdubdiꞌs guꞌ loo diꞌs coꞌ gunii Tit loo guꞌ. No axta gust mbyanꞌ lezoꞌ Tit cón cheꞌn guꞌ coꞌseꞌ mbli guꞌ cas Tit coꞌseꞌ mzin Tit loo guꞌ axta ale mxac Tit mzyeb guꞌ no mxiꞌth guꞌ loo Tit. Por cona, masreꞌ nqueꞌ lezoꞌ Tit ñèe Tit guꞌ.
\v 16 Per nase, ndyac lezon tac sate más tolo gàpen yalxlaꞌs loo guꞌ thidtene, ey. Thìba conꞌ ndxèꞌ.
\c 8
\s Pab ngue taꞌ cuent loo mèn ciuda Corint leꞌ mèn yèezyaꞌ cheꞌn làaz mèn macedon ngòc mèn coꞌ ndoo xalꞌ lezoꞌ no mèn coꞌ non carida coꞌ ndaꞌ gòn dib nzo yéc mèn no dib nzo lezoꞌ mèn.
\p
\v 1 Leꞌ tediba na, guꞌ coꞌ nac mèn huesen por cón cheꞌn Crist, ngue tan cuent loo guꞌ loo cart ndxèꞌ par non guꞌ xá mod mbli Diox angngòc conꞌ ndac loo mèn coꞌ nqueltàa loo cón cheꞌn Diox leꞌn chol yèezyaꞌ coꞌ nac cheꞌn làaz mèn macedon.
\v 2 Ndxeꞌlequeꞌ, ale ngòca loo mèna láth mxec yèe mèna loo rye yaltìi no rye yalndyub nguꞌs coꞌ ngòc loo mèna, lugar de tenꞌ mèna cón cheꞌn yaltìi no yalndyub nguꞌs coꞌ ngòc loo mèna, no mastaleꞌ ngòc mèna mèn prob tínꞌ, ale leꞌleꞌ ngòo yéc mèna leꞌ mèna taꞌlaꞌs tmi loo cón cheꞌn Diox.
\v 3 Daa ndaꞌ cuent leꞌ mèna angmdaꞌlaꞌs tmia coꞌ nzote mod ngóc mèna mdaꞌ mèna. Mastaleꞌ beꞌthe ndoo riꞌth mèna, ale mxen mèna tmi coꞌ nquin mèna par taꞌlaꞌs mèna tmi loo Diox.
\v 4 Nalyat mnaꞌb mèna loon par tan lugar càayan tmi coꞌ mdaꞌ gòn mèna loo cón cheꞌn Diox par telꞌen tmia loo mèn coꞌ ngro xàꞌ loo cón cheꞌn xab izlyoꞌ coꞌ ndyac yaltìi, mèn coꞌ nzo ban ciuda Jerusalén.
\v 5 Neꞌndaꞌde mèna tmi xal mblin xtùuz taꞌ mèna. Ale ndxeꞌlequeꞌ, ner conꞌ mbli mèna, mnibeꞌ mèna loo lezoꞌ mèna. No mblo ro mèna loo Diox ante li mèna coꞌ neete lezoꞌ Diox li mèna. Leꞌ sya, mbiꞌth nee mèna loon. Gunee mèna: ¿Xá nee Uꞌ, Tad Pab? Leꞌ nuꞌ li coꞌ neete lezoꞌ Diox. Bluꞌ Uꞌ loo nuꞌ xá mod li nuꞌ thop nuꞌ tmi coꞌ nquin mèn coꞌ ndxàc hues xtàa naꞌ ciuda Jerusalén.
\v 6 Por cona, texal mtlo Tit, mbluꞌ Tit loo guꞌ xá mod ndxàal lyath no naꞌ xtàa naꞌ coꞌ ndyac yaltìi, daa mcoꞌx loo Tit yiꞌth nee Tit máa guꞌ par nedrèꞌ tedib vez par lyath no Tit guꞌ telo guꞌ zinꞌ ndac ndxèꞌ coꞌ ngue li guꞌ.
\v 7 Guꞌ nzi téꞌthqueꞌ no nzi tubdiꞌsqueꞌ guꞌ loo cón cheꞌn Diox, coꞌ nee diꞌs, ndxàp guꞌ huax yalxlaꞌs loo Diox. No ndxác guꞌ ndluꞌ ndac guꞌ cón cheꞌn diꞌs ndac. No mtéꞌth ndac guꞌ cón cheꞌn Diox. No mbli nèe guꞌ leque guꞌ par tyubdiꞌs guꞌ loo Diox thidtene. No nqueꞌqueꞌ lezoꞌ guꞌ ñèe guꞌ daa. No dib nzo lezoꞌ guꞌ nqueꞌ lezoꞌ guꞌ ñèe guꞌ xtàa guꞌ. Bli nèe guꞌ guꞌ loo conꞌ ndac coꞌ ngue li guꞌ ndxèꞌ, ne, par tolo lyath no guꞌ hues xtàa naꞌ coꞌseꞌ nde che conꞌ loo hues xtàa naꞌ.
\p
\v 8 Ingue niiden conꞌ ndxèꞌ loo guꞌ par li guꞌ coꞌ ngue li guꞌa xal thìb costumbr coꞌ ngue no mèn. Ante ndlyazen leꞌ mèna taꞌ cuent no yeꞌth lezoꞌ mèna par li mèna xtùuz leꞌn lezoꞌ mèna par taꞌ mèna cuent coꞌ huenlequeꞌ ñeeneꞌ chéꞌ, lìcqueꞌ, nqueꞌ lezoꞌ guꞌ ñèe guꞌ xtàa guꞌ o chéꞌ inqueꞌde lezoꞌ guꞌ ñèe guꞌ xtàa guꞌ.
\v 9 Guꞌ nonqueꞌ no naneequeꞌ guꞌ cón cheꞌn conꞌ ndac coꞌ angmbli Tad Jesucrist loo guꞌ. Mastaleꞌ nac Tad Jesucrist xaꞌ ric, ale ndxeꞌlequeꞌ, ngòc Tad Jesucrist mèn prob por tant mqueꞌ lezoꞌ Tad Jesucrist ñèe Tad Jesucrist guꞌ. Mbli Tad Jesucrist loo guꞌ par ngòc guꞌ mèn ric loo cón cheꞌn Tad Jesucrist.
\p
\v 10 Cón cheꞌn tmi coꞌ thop guꞌa, lyazen niin loo guꞌ xal ndyeꞌth xtùuz yéquen par tolo gàc conꞌ ndac loo guꞌ cón cheꞌn conꞌa: Ndyaquen, ale ndxàalqueꞌ li guꞌ conꞌ ndxèꞌ: Ftolo thop guꞌ tmia xalqueꞌ mnibeꞌ lezoꞌ guꞌ mbli guꞌ par mthop guꞌ tmi línꞌ nguriꞌtha par mèn coꞌ nquina. No ndlyazen xyoꞌf ndeꞌ xyoꞌf ndlaꞌ lezoꞌ guꞌ coꞌseꞌ ndli guꞌ conꞌa.
\v 11 Pues nalleꞌ, tá, ftolo thop guꞌ tmi xal nibeꞌ guꞌ loo lezoꞌ guꞌ li guꞌ par gàca xalqueꞌ mnibeꞌ guꞌ lezoꞌ guꞌ thop guꞌ tmi no tub guꞌ tmia. Tataa mod xas xas thop guꞌi xalqueꞌ nzo guꞌ no xalqueꞌ ndxàp guꞌ cheꞌn guꞌ. Tataa taꞌ guꞌ tmia.
\v 12 Tac cheleꞌ thìb mèn, lìcqueꞌ, ndlyaꞌs tub tmi no taꞌ mèn gòn loo cón cheꞌn Diox, Diox ndyal ndaꞌ mèn gòn coꞌ nac tmi coꞌ ndub mèna xalqueꞌ nzo mèn no xalqueꞌ ndxàp mèn cheꞌn mèn. Diox imbezte taꞌ yèe mèn tmi o tub yèe mèn tmi coꞌseꞌ indxàpte mèn huax tmi.
\p
\v 13 Ingue niiden loo guꞌ por fuerz taꞌ guꞌ ayud loo mèn ciuda Jerusalén coꞌ ndyac yaltìi par que no mèna tant conꞌ axta ndyac tínꞌ lezoꞌ mèna no part cón cheꞌn guꞌ na, coꞌseꞌ li guꞌ conꞌ ndxèꞌ, gàca loo guꞌ leꞌ guꞌ tenꞌ ndyactìi guꞌ loo conꞌa por nde che conꞌ loo guꞌ tant mdaꞌ guꞌ gòn càa mèna. Yende xàa. Leque guꞌ nee xá mod li guꞌ xal nee lezoꞌ guꞌ cón cheꞌn tmi coꞌ mthop naꞌ.
\v 14 Ndxeꞌlequeꞌ, ndlyazen leꞌ tiemp ndxèꞌ lalqueꞌ gàca loo naꞌ con mèn hues naꞌ coꞌ ndxelaꞌs chol lugar. Conꞌ ndxèꞌ nac coꞌ ngue niin loo guꞌ: Ndlyazen thidte gàc guꞌ con mèn coꞌ ndxàc hues xtàa guꞌ por cón cheꞌn Crist chol lugar. Nalleꞌ guꞌ ngue taꞌ gòn coꞌ naquin mèn. Leꞌ coꞌseꞌ gàc huiz coꞌ naquin guꞌ conꞌ coꞌ nde tub loo guꞌ na, lomisqueꞌ, mèna lyath no guꞌ, ne. Tataa mod thidte ndxàc guꞌ con mèn coꞌ ndxàc hues xtàa guꞌ loo cón cheꞌn Diox no loo cón cheꞌn Crist.
\v 15 Leꞌ sya, gàca loo guꞌ xal mbez diꞌs coꞌ ndub loo libr coꞌ nac xtiꞌs Diox coꞌ mbez: Leꞌ mèn coꞌ mque no huax cheꞌn, neꞌnque node men cheꞌn mèn, coꞌ nee diꞌs, neꞌngyan xoꞌfte cheꞌn mèn coꞌ mque no mèn. Leꞌ mèn coꞌ beꞌthe mque no cheꞌn na, neꞌ neꞌ nga tub cheꞌn mèn coꞌ mque no mèn.
\s Pab ngue taꞌ cuent cón cheꞌn Tit con mèn coꞌ mblyath no Tit.
\p
\v 16 Per Diox quix Diox leꞌ Diox mbli mbyeꞌth lezoꞌ Tit par mxoꞌf zinꞌ Tit thìb zinꞌ cón cheꞌn guꞌ. No altant mdoo Tit loo guꞌ xalqueꞌ mxoꞌf zinꞌen thìb zinꞌ loo guꞌ.
\v 17 Lìcpeꞌ baꞌi, mbìn Tit diꞌs coꞌ mnaꞌben loo Tit par yiꞌth too naa Tit guꞌ. Látha, anzeꞌf altant mdoo Tit gunèe Tit guꞌ. No anzeꞌf mblyaꞌs Tit ñee Tit máa guꞌ. Por cona, leque Tit mnibeꞌ lezoꞌ Tit yiꞌth nee Tit máa guꞌ tac tataa gunee lezoꞌ Tit.
\p
\v 18 Ngue telꞌen Tit con thìb mbiꞌ coꞌ ndxàc hues naꞌ por cón cheꞌn Jesucrist. Mbiꞌa ndxác ngo yalbàn loo mèn coꞌ nqueltàa loo cón cheꞌn Diox axta mxyoꞌf lèe mxyoꞌf xtiꞌs mbiꞌ no ndxath no ndxèn cón cheꞌn mbiꞌ loo mèn coꞌ nqueltàa loo cón cheꞌn Diox rye lugar.
\v 19 Iante conꞌ ndxèꞌde ndxàc loo mbiꞌ. Ndxeꞌlequeꞌ, mèn hues naꞌ coꞌ nqueltàa loo cón cheꞌn Diox par ned làaz mèn macedon mcui yub mbiꞌ coꞌ ndxàc hues naꞌ por cón cheꞌn Crist par nque tee no mbiꞌ nuꞌ no lyath no mbiꞌ nuꞌ coꞌ nac thop nuꞌ tmi coꞌ mthop mèn coꞌ nqueltàa loo cón cheꞌn Diox yèezyaꞌ cheꞌn làaz mèn macedon par lyath no guꞌ mèn coꞌ ndyactìi ciuda Jerusalén. No nque tee nxoꞌf zinꞌ nuꞌ zinꞌa cón cheꞌn zinꞌ ndac ndxèꞌ par tolo non mèn cón cheꞌn conꞌ roo conꞌ xèn cheꞌn Diox no par tataa mod luꞌ nuꞌ loo taamas mèn leꞌ naꞌ ndyeꞌth lezoꞌ par lyath no naꞌ mèn coꞌ ndxàc hues xtàa naꞌ por cón cheꞌn Jesucrist coꞌ ndyac yaltìi chol lugar, coꞌ nde che conꞌ loo, tac nqueꞌ lezoꞌ naꞌ ñèe naꞌ mèna.
\v 20 Tataa ngue li nuꞌ par de que yende chó mèn laꞌs loo nuꞌ par quexùꞌ queꞌ fals mèna nuꞌ cón cheꞌn zinꞌ coꞌ ngue xoꞌf zinꞌ nuꞌ cón cheꞌn tmi coꞌ ngue thop nuꞌ ndxèꞌ par neꞌñii yèede no neꞌñii tìide mèn ngòc nguàal conꞌ loo naꞌ cón cheꞌn tmi coꞌ mthop naꞌ par lyath no naꞌ mèn hues naꞌ por cón cheꞌn Jesucrist coꞌ ndyac yaltìia.
\v 21 Ngue cuaꞌn nuꞌ mod par gàc conꞌ ndxèꞌ nabeꞌste no par nambìi loote gàca. Iante ngue cuaꞌn nuꞌ mod gàc conꞌ ndxèꞌ nabeꞌste no nambìi loote loo Tad Diox. Ndxeꞌlequeꞌ, ngue cuaꞌn nuꞌ mod gàca conꞌ nabeꞌste loo chol mèn, ne.
\p
\v 22 Ngue telꞌ nuꞌ tedib mbiꞌ coꞌ ndxàc hues naꞌ por cón cheꞌn Jesucrist con Tit no con ner mbiꞌ coꞌ nac ner mbiꞌ coꞌ ndxàc hues naꞌ por cón cheꞌn Jesucrist coꞌ nque tee no Tit. Nuꞌ mblaꞌs loo mbiꞌ coꞌ huen huen. No ndyac nuꞌ leꞌ mbiꞌ altantqueꞌ ndyoo, thìb mod no tedib mod, loo zinꞌ coꞌ mxoꞌf zinꞌ mbiꞌ. Per nalleꞌ, sate más ndyeꞌth yéc mbiꞌ no ndyeꞌth lezoꞌ mbiꞌ altant ndoo mbiꞌ loo cón cheꞌn zinꞌ coꞌ ngue xoꞌf zinꞌ mbiꞌ tac mbiꞌ ndxàp huax yalxlaꞌs loo guꞌ.
\v 23 Cheleꞌ chó mèn ñibdiꞌs loo guꞌ cón cheꞌn Tit, ftaꞌ guꞌ cuent loo mèna leꞌ Tit ndlyath no daa. No thidte nxoꞌf zinꞌ ryop nuꞌ Tit zinꞌ coꞌ nac cón cheꞌn Tad Crist par li ryop nuꞌ Tit sirv loo guꞌ. No cheleꞌ chó mèn ñibdiꞌs loo guꞌ por cón cheꞌn ryop mèn coꞌ nque tee no Tita, ftaꞌ guꞌ cuent loo mèna leꞌ ryop mbiꞌ nde loo guꞌ por mtelꞌ mèn coꞌ ndxàc hues xtàa naꞌ por cón cheꞌn Jesucrist par xoꞌf zinꞌ mèna thìb zinꞌ loo guꞌ. No ndli mèna par gàc conꞌ roo conꞌ xèn loo Crist. No ndli mèna par xyoꞌf lèe xyoꞌf xtiꞌs Crist, ne.
\v 24 Cona, ngue niin loo guꞌ: Fcuaꞌn guꞌ mod bluꞌ guꞌ guꞌ loo mèn coꞌ nqueltàa loo cón cheꞌn Diox chol lugar par non mèn, lìcqueꞌ, nqueꞌqueꞌ lezoꞌ guꞌ ñèe guꞌ yon mèna, coꞌ nee diꞌs, nac Tit con tachop mèn hues naꞌ por cón cheꞌn Jesucrist coꞌ nde loo guꞌ nalleꞌ. No bluꞌ guꞌ guꞌ loo mèn coꞌ nde loo guꞌ leꞌ ianxleꞌde nac coꞌ ndaꞌ nuꞌ gust lezoꞌ nuꞌ ñee nuꞌ cón cheꞌn guꞌ. No ndxòo lezoꞌ nuꞌ cón cheꞌn guꞌ por ndli guꞌ conꞌ coꞌ ngue niin loo guꞌ ndxèꞌ.
\c 9
\s Mèn yèezyaꞌ cheꞌn làaz mèn macedon mdub tmi par mdaꞌ gòn mèna tmi loo mèn coꞌ ndxàc hues xtàa mèna por cón cheꞌn Jesucrist.
\p
\v 1 Cón cheꞌn zinꞌ coꞌ nxoꞌf zinꞌ guꞌ par tub guꞌ tmi coꞌ taꞌ gòn guꞌ loo mèn hues xtàa naꞌ coꞌ ndxelaꞌs loo Crist no loo cón cheꞌn Crist, mèn coꞌ mdyal ngro xàꞌ loo cón cheꞌn xab izlyoꞌ par ngòc mèna cheꞌnpeꞌ Diox, lìcpeꞌ baꞌi, inquinte queꞌen yeꞌs cón cheꞌn zinꞌa loo guꞌ, ndyaquen.
\v 2 Neequen no ndaquen cuent leꞌ guꞌ ndyeꞌthqueꞌ lezoꞌ lyath no guꞌ mèn hues naꞌ por cón cheꞌn Jesucrist coꞌ nde che conꞌ loo. Por cona, axta gust ndaꞌ lezon ñeen cón cheꞌn conꞌ mbli guꞌ loo mèn coꞌ nqueltàa par ned leꞌn yèezyaꞌ cheꞌn làaz mèn macedon. No mdan cuent loo mèn yèezyaꞌ cheꞌn làaz mèn macedon leꞌ mèn cheꞌn làaz mèn acay coꞌ nac mèn gulàaz guꞌ, mèna mtloleꞌ mthop tmia línꞌ nguriꞌtha. Conꞌ coꞌ mbli guꞌ par mthop guꞌ tmia ngòc thìb muestr loo taamas mèn. Tataa mod mbyeꞌth lezoꞌ huax mèn par mthop mèna tmia, ne, xal mbli guꞌ.
\v 3 Per mastaleꞌ nonen no ndaquen cuent ndlyaꞌs guꞌ lyath no guꞌ hues xtàa guꞌ loo cón cheꞌn Crist, ngue telꞌen yon hues naꞌa loo guꞌ par neꞌgàcte thìb yalgutyèꞌ coꞌ mdan cuent loo taamas mèn cón cheꞌn guꞌ cón cheꞌn tmia, no par gàc loo guꞌ cón cheꞌn tmi, coꞌseꞌ ngololeꞌ mthop guꞌ tmi, ngòc nableꞌ guꞌ con tmi coꞌseꞌ nquin mèn tmi.
\v 4 Tac, neꞌstolqueꞌ, gal non ndxep mèn coꞌ nac mèn yèezyaꞌ cheꞌn làaz mèn macedon coꞌ ndxàc hues naꞌ por cón cheꞌn Jesucrist loo guꞌ. No cheleꞌ nuꞌ ñee leꞌ guꞌ tarte yilo thop tmi, thyon nuꞌ por gust coꞌ mdaꞌ nuꞌ lezoꞌ nuꞌ loo cón cheꞌn guꞌ. Leꞌ guꞌ na, ¿xá lyàai leꞌn lezoꞌ guꞌ cheleꞌi tataa gàca loo guꞌ, àꞌ?
\v 5 Por cona, leque daa mbli xtùuz naquinqueꞌ coꞌxen loo mèn hues xtàa naꞌ coꞌ ngue telꞌen loo guꞌa par yiꞌth ner mèna loo guꞌ par chal mèna guꞌ cón cheꞌn tmi coꞌ mcàbgòn guꞌ taꞌ guꞌ par ngòc nableꞌ tmia ndooreꞌ galen loo guꞌ. No tmia gàc coꞌ angtaꞌlaꞌs guꞌ loo hues xtàa naꞌ coꞌ nde che conꞌ loo. Ndlyazen leꞌ guꞌ taꞌ tmia dib nzo yéc guꞌ no dib nzo lezoꞌ guꞌ par neꞌgàcta loo guꞌ leꞌ guꞌ li sient cón cheꞌn tmi coꞌ taꞌ guꞌ loo mèna.
\p
\v 6 Per nalleꞌ, ndlyazen niin thìb diꞌs loo guꞌ, mèn ciuda Corint: Huiꞌ guꞌ nexa. Leꞌ mèn coꞌ ngo ndxepte bin, ndxepte cosech thop mèna. Leꞌ mèn coꞌ ngo huax bin na, mèna nthopqueꞌ huax cosech ne, ¿léꞌ?
\v 7 Thìb thìb guꞌ taꞌ tmi xal ñibeꞌ lezoꞌ guꞌ taꞌ guꞌ tmi. Neꞌtaꞌde guꞌ tmia xal mèn coꞌ ndli sienta coꞌseꞌ mtuhuan mèn tmi. Neꞌ neꞌ taꞌ yèe guꞌ tmia. Per ndxeꞌlequeꞌ, naꞌ nanee leꞌ Diox anzeꞌf nqueꞌ lezoꞌ ñèe mèn coꞌseꞌ ndaꞌ mèn tmi con dib nzo yéc mèn no dib nzo lezoꞌ mèn.
\v 8 Tad Diox ndxàp huax conꞌ laꞌs nii Tad Diox no laꞌs yaꞌ Tad Diox par angli Tad Diox tolo yas yàl huax conꞌ ndac loo guꞌ. Tataa ndli Diox par gàca inquinte ya too dóꞌ guꞌ loo hues xtàa guꞌ por conꞌ coꞌ nde che loo guꞌ. Tataa mod Diox lyath no guꞌ par tolo lyath no guꞌ taamas mèn coꞌ nde che conꞌ loo.
\v 9 Loo libr coꞌ nac xtiꞌs Diox ndub diꞌs coꞌ mbez taandxèꞌ:
\pi1 Leꞌ mèn coꞌ nac mèn nalì no mèn coꞌ nac mèn nambìi na, mèna mdaꞌ gòn dib nzo yéc mèn no dib nzo lezoꞌ mèn coꞌ ndxàp mèna par càa mèn prob. No angmdaꞌlaꞌs mèna conꞌ ndxàp mèna loo mèn coꞌ ndyac yaltìi. Sya, conꞌ ndac coꞌ mbli mèna nac thìb conꞌ ndac coꞌ neꞌlyuxte loo mèn thidtene. No teꞌqueꞌ lezoꞌ Diox cón cheꞌn mèna.
\m
\v 10 Lomisqueꞌ ne, Diox coꞌ ndli ndxas ndxàl biz bin coꞌ ngo mèn, Diox ndli leꞌ mèn que no conꞌ hua mèn. No li Diox leꞌ bin coꞌ ngo guꞌ tolo yas yàl loo guꞌ. Lomisqueꞌ ne, Diox angli leꞌ loo guꞌ coꞌ nac mèn nalì no mèn nambìi tolo yas no tolo yàl conꞌ loo guꞌ par tolo lyath no guꞌ mèn prob no tolo lyat lezoꞌ guꞌ ñèe guꞌ mèn prob coꞌ nquin conꞌ par li guꞌ conꞌ ndac loo mèna.
\v 11 Angndli Diox conꞌa loo guꞌ par tataa mod mbyas mbyàl conꞌ ndac loo guꞌ no par que no guꞌ cheꞌnpeꞌ guꞌ. Diox tataa ndli loo guꞌ par tolo lyath no guꞌ mèn no lyat lezoꞌ guꞌ ñèe guꞌ mèn axta plóthe. Leꞌ sya, cheleꞌ guꞌ li xal ngue niin loo guꞌ ndxèꞌ, sya, huax mèn coꞌ ndxàc hues xtàa naꞌ gab: Diox quix Uꞌ, Diox, loo Diox tac guꞌ ngue lyath no mèna con tmi coꞌ mdub guꞌ par taꞌ guꞌ gòn loo mèna xal mcoꞌx nuꞌ loo guꞌ par li guꞌi.
\v 12 Tac zinꞌ coꞌ ngue xoꞌf zinꞌ guꞌ coꞌ nac ngue thop guꞌ tmi, iante ncàb zinꞌ coꞌ ngue li guꞌ ndxèꞌ par ngue lyath no guꞌ taamas mèn coꞌ ngro xàꞌ loo cón cheꞌn xab izlyoꞌ coꞌ ngòc cheꞌnpeꞌ Diox loo conꞌ nquin mèna. Ndxeꞌlequeꞌ, zinꞌa ncàb leꞌ huax mèn gab: Diox quix Uꞌ, Diox, loo Diox por zinꞌ coꞌ ngue xoꞌf zinꞌ guꞌ ndxèꞌ.
\v 13 Per coꞌseꞌ ñèe mèn ciuda Jerusalén cón cheꞌn huax tmi coꞌ telꞌ guꞌ par lyath no guꞌ mèna, mèna gab Diox roo Diox xèn nac Diox coꞌ mbli leꞌ guꞌ ngue tubdiꞌsqueꞌ loo diꞌs ndac cheꞌn Crist. No gab mèn ciuda Jerusalén conꞌ roo conꞌ xèn nac Diox tac coꞌseꞌ ngue lyath no guꞌ mèna no ngue luꞌ guꞌ loo mèna thidte nac guꞌ loo cón cheꞌn Crist con mèna xal ndluꞌ guꞌ conꞌ coꞌ ngue li guꞌ loo taamas mèn.
\v 14 Más de cona, mèn ngue bez Diox por cón cheꞌn guꞌ tac Diox angmbli leꞌ guꞌ mbyeꞌth yéc no mbyeꞌth lezoꞌ guꞌ par mtelꞌ guꞌ tmi loo mèna. Làth xtauꞌa, ndryoꞌ ndlyenꞌ lezoꞌ mèn libeꞌ mèn guꞌ no tolo cuez mèn Diox por cón cheꞌn guꞌ, tant mblyat lezoꞌ guꞌ gunèe guꞌ mèna.
\v 15 Por cona, gab naꞌ loo Diox: Diox quix Uꞌ, Diox, loo Diox por cón cheꞌn ryethe conꞌ ndac coꞌ ndli Diox anggàc loo naꞌ por cón cheꞌn Crist. No axta neꞌ neꞌ gác naꞌ taꞌ naꞌ cuent no tyoodiꞌs naꞌ cón cheꞌn conꞌ coꞌ angmbli Diox loo naꞌ. Thìba conꞌ ndxèꞌ.
\c 10
\s Pab ñibeꞌ loo mèn coꞌ nqueltàa loo cón cheꞌn Diox por nac Pab mèn coꞌ Diox mtelꞌ loo mèn por cón cheꞌn diꞌs ndac.
\p
\v 1 Leꞌ tediba na, naneequeꞌ guꞌ no nonqueꞌ guꞌ leꞌ Crist anzeꞌf nadoꞌ nac no anzeꞌf ndac nac Crist no anzeꞌf ñee rsiꞌ ñee rso Crist mèn, ¿léꞌ? Por cona, yub daa coꞌ nac Pab ngue nii conꞌ ndxèꞌ loo guꞌ xal nac mod coꞌ ndxàp Crist. Naneequen no nonquen ndxath no ndxèn leꞌ ndxep guꞌ mbez làth hues xtàa guꞌ: Ndxàc Pab xal thìb mbiꞌ coꞌ anzeꞌf nadoꞌ xal nac mod coꞌ ndxàp Crist coꞌseꞌ nzo Pab làth naꞌ. Per ale, ndyac naꞌ, nayiꞌ Pab loo naꞌ coꞌseꞌ inzo node Pab na, ¿léꞌ?
\v 2 Por cona, ñaꞌben diꞌs loo guꞌ: Bli guꞌ cuent leꞌ yub Crist nalyat ñaꞌb diꞌs loo guꞌ loo cart coꞌ ngue queꞌen yeꞌs loo guꞌ ndxèꞌ. Tataa bli guꞌ par gàp guꞌ mod coꞌseꞌ zin daa làth guꞌ par neꞌgàcte loo guꞌ xal mèn coꞌ nteriꞌth nza par neꞌlide guꞌ cas loo diꞌs coꞌ niin loo guꞌ. Leꞌ sya, tataa mod tenꞌen nquin gàc nayiꞌ daa loo ndxep guꞌ, guꞌ coꞌ nque yèe daa, no guꞌ coꞌ ndenꞌ no ndli guꞌ cuent leꞌ daa ante nxoꞌf zinꞌ cón cheꞌn Crist xal ndryoꞌ ndlyenꞌ lezon no ñibeꞌen loo guꞌ coꞌ neete lezon no maste tac, por derech, ndoo lezon ndlyazen gàc nayiꞌen loo mèna.
\v 3 Lìcqueꞌ, nac naꞌ mèn cheꞌn izlyoꞌ ndxèꞌ. Per loo cón cheꞌn Crist ingyoo node naꞌ con mèn loo izlyoꞌ ndxèꞌ xal ngyoo mèn coꞌ beꞌ nac cheꞌn izlyoꞌ con xtàa mèn loo ixlyoꞌ ndxèꞌ.
\v 4 Huiꞌ guꞌ nexa. Nac daa xal thìb solndad coꞌ ndyee loo xóꞌ. Mod coꞌ ndlin conꞌ par lin gan loo ngolo ngolaꞌs coꞌ ncaꞌ loo cón cheꞌn Crist inacte xal coꞌseꞌ ngyoo mèn con pistol no chol yiꞌf loo izlyoꞌ ndxèꞌ. Ndxeꞌlequeꞌ, por cón cheꞌn Crist, Diox ndlyath no daa par tauꞌen ro mèn coꞌ ndluꞌ loo xtàa mèn chol xtùuz coꞌ nac ngolo ngolaꞌs loo cón cheꞌn Crist. No Diox ndlyath no daa par tauꞌen ro no tauꞌen xtiꞌs chol mèn coꞌ ndluꞌ chol xtùuz coꞌ ncaꞌ loo mèn coꞌ tyal no coꞌ ndlyaꞌs yòo loo cón cheꞌn Diox.
\v 5 Per xóꞌ coꞌ ndlin loo mèn coꞌ nac ngolo ngolaꞌsa, leꞌi nac coꞌ ndlin par yende cón ntac conꞌ coꞌ ndluꞌ mèn coꞌ ante ndxác cón cheꞌn xab izlyoꞌ loo xtàa mèn. No ndlin leꞌ ryete mèn no ryete conꞌ coꞌ ndeꞌf diꞌs nac conꞌ roo conꞌ xèn coꞌ ndli mèn xtùuz coꞌ ncaꞌ loo mèn par neꞌyòode mèn loo cón cheꞌn Diox, gàc loo conꞌa xal thìb conꞌ coꞌ yende chó mèn li cas. Lomisqueꞌ ne, ndlin leꞌ xtùuz chol mèn no conꞌ coꞌ ndoo lezoꞌ mèn càb loo mèn gàc nadoꞌ mèna par tyubdiꞌs mèna ante loo Crist.
\v 6 Ngue beden par tolo tyubdiꞌs guꞌ coꞌ huen huen loo ryethe conꞌ coꞌ mnibeꞌen loo guꞌ li guꞌ. Leꞌ sya, làth xtauꞌa, nalasqueꞌ ndoon par tetìin mèn coꞌ neꞌtyalte no coꞌ neꞌcàbte tyubdiꞌs loo cón cheꞌn Crist xal mnibeꞌen loo mèna.
\p
\v 7 Huiꞌ guꞌ coꞌ huenlequeꞌ xal nac mod cheꞌn thìb mèn no xal nac mod cheꞌn tedib mèn làth guꞌ, ey. Cheleꞌ chol mèn coꞌ nzo làth guꞌ ndxàp yalxlaꞌs leꞌn lezoꞌ mèna no ngobeꞌ mèna nac mèna cheꞌn Crist, leque mèna ndxàal li xtùuz tedib vez leꞌ xalqueꞌ ngòo mèna loo cón cheꞌn Crist, daa, ne, tataaguèꞌ ngòon loo cón cheꞌn Crist.
\v 8 Crist mnibeꞌ loon par mnibeꞌen loo guꞌ par li guꞌ coꞌ ngue niin loo guꞌ. Lìcqueꞌ, anzeꞌf ngue toodiz non guꞌ cón cheꞌn conꞌ coꞌ mnibeꞌ Crist loon par niina loo guꞌ. Peser ndyóo guꞌ no ngue taꞌ guꞌ cuent axta arid ngue toodiz non guꞌ cón cheꞌn conꞌa. Nonen no naneequen leꞌ daa neꞌthyonte tac daa axta arid mdoodiz no guꞌ cón cheꞌn conꞌ coꞌ mnibeꞌ Crist loo naꞌ par li naꞌ. Tataa ngue toodiz non guꞌ par tolo téꞌth guꞌ par tyubdiꞌs guꞌ loo cón cheꞌn Crist. Inacte leꞌ daa ngue lii par yizaꞌ xtùuz guꞌ par ryo xàꞌ guꞌ no yitac lezoꞌ guꞌ loo cón cheꞌn Crist.
\v 9–11 Nzo ndxep guꞌ coꞌ nzo làth hues xtàa guꞌ coꞌ ngue xìis no daa, no mbez guꞌ: Lìcpeꞌ baꞌi, axta arid nè nac diꞌs coꞌ mqueꞌ Pab yeꞌs loo cart ndxèꞌ, ndee. Per coꞌseꞌ ngüiꞌ naꞌ loo Pab, iñaade tyoodiꞌs Pab taandxèꞌ. No coꞌseꞌ ndyoodiꞌs Pab, neꞌ neꞌ indenꞌ naꞌ diꞌs coꞌ ñii Pab, ¿léꞌ?
\p Per daa indlyaste leꞌ guꞌ gab loo lezoꞌ guꞌ leꞌ daa ngue li par zyeb guꞌ por cón cheꞌn cart coꞌ mqueꞌen yeꞌs loo guꞌ. Per ndxàal li mèna xtùuz no tenꞌ mèna leꞌn lezoꞌ mèna xalqueꞌ nac daa coꞌseꞌ nqueꞌen yeꞌs loo guꞌ, tataaqueꞌ gàc daa coꞌseꞌ galen loo guꞌ par tyoodiz non guꞌ.
\p
\v 12 Neꞌliden ryes par lalqueꞌ gàc daa con mèna o lin par thidte gàc daa con ndxep mèn coꞌ ndyoodiꞌs anzeꞌf nateꞌs leque cón cheꞌn mèna. Prob mèna ndli conꞌ natont tac leque mèna ndli cuent axta arid huen mèna coꞌseꞌ leque mèna ngüiꞌ xá nac mèna. No ndli mèna ñeeneꞌ chéꞌ taꞌ mèna con xtàa mèna. Aa. Tataa nac mèna.
\v 13 Per part cón chenen, indxàalte tan gust lezon loo conꞌ coꞌ indxàalte lin coꞌ inacte cón chenen. Ndxeꞌlequeꞌ, ndan gust lezon xalte nxoꞌf zinꞌ Diox zinꞌ loon par lina. Diox mxoꞌf zinꞌ loon par nxoꞌf zinꞌen cón cheꞌn guꞌ. Por cona, axta gust ndxanꞌ lezon ñèen cón cheꞌn guꞌ, mèn ciuda Corint.
\v 14 Ingue zibten loo zinꞌ coꞌ mxoꞌf zinꞌ Diox loon par lina xalqueꞌ gàca cheleꞌ Diox neꞌnxoꞌf zinꞌte zinꞌa loon ndooreꞌ par ndyeeꞌen loo guꞌ. Per ndxeꞌlequeꞌ, Diox mxoꞌfqueꞌ zinꞌ coꞌ mxoꞌf zinꞌen loo guꞌ. Pues daa ngòc mèn coꞌ nerlequeꞌ mzin loo guꞌ axta trèꞌ, mèn ciuda Corint, par mblon yalbàn loo guꞌ cón cheꞌn diꞌs ndac cón cheꞌn Crist, ¿léꞌ?
\v 15 Indaden gust lezon no indyeꞌste daa loo zinꞌ coꞌ mxoꞌf zinꞌ tedib mèn. Ndxeꞌlequeꞌ, ndub quee lezon láth tolo téꞌth guꞌ no tyubdiꞌs guꞌ loo cón cheꞌn Diox no tolo gàp guꞌ más yalxlaꞌs loo Diox, leque tiemp tolo yilaꞌs guꞌ loon no tolo tyubdiꞌs guꞌ loo conꞌ mnibeꞌ Diox loon par ñibeꞌen loo guꞌ.
\v 16 Por cona, ndub quee lezon par ga lon yalbàn cón cheꞌn diꞌs ndac, coꞌ ndluꞌ loo mèn xá mod lyáꞌ mèn loo conꞌ ryes, loo mèn yèezyaꞌ cheꞌn làaz mèn coꞌ nziriꞌ más tith loo guꞌ, mèn ciuda Corint. Tataa mod neꞌgòoden loo mèn coꞌteꞌ ngue xoꞌf zinꞌleꞌ tedib mèn cón cheꞌn diꞌs ndac par tataa mod neꞌtaden gust lezon cón cheꞌn zinꞌ coꞌ mxoꞌf zinꞌ taamas mèn xalqueꞌ ndlin zinꞌ ndxèꞌ.
\p
\v 17 Cona, ngue niin loo guꞌ: Mèn coꞌ lyaꞌs taꞌ gust lezoꞌ loo chol conꞌ no mèn coꞌ lyaꞌs tyeꞌs loo chol conꞌ, bnibeꞌ guꞌ loo mèna leꞌ mèna taꞌ gust lezoꞌ mèna no tyeꞌs mèna ante loo cón cheꞌn Tad Diox.
\v 18 Tac thìb mbiꞌ coꞌ ante ndaꞌ gust lezoꞌ cón cheꞌnpeꞌ mbiꞌa, no thìb mbiꞌ coꞌ ante ñii conꞌ cón cheꞌnpeꞌ mbiꞌa leꞌ mbiꞌa nac mbiꞌ ndac no mbiꞌ coꞌ ndeꞌf diꞌs ndxác, neꞌyòode lezoꞌ Diox ñèe Diox mbiꞌa. Ndxeꞌlequeꞌ, loo mbiꞌ coꞌ ñii Diox conꞌ ndac cón cheꞌn mbiꞌa, loo mbiꞌa ndxòo lezoꞌ Diox ñèe Diox.
\c 11
\s Pab ndyoodiꞌs cón cheꞌn Pab no cón cheꞌn mèn gutyèꞌ coꞌ mbez ndeꞌth mèn gutyèꞌa cón cheꞌn Crist.
\p
\v 1 Ñaꞌben loo guꞌ, mèn huesen por cón cheꞌn Crist, guꞌ coꞌ naban ciuda Corint, oj chéꞌ coꞌ xec guꞌ ndxep con daa, mastaleꞌ ndenꞌen naquin tan ndxep gust lezon por cón cheꞌnpeꞌ daa. Ndenꞌen tont daa no mbíiz daa coꞌseꞌ lina. Per, lìcpeꞌ baꞌi, fxec guꞌ con daa taandxep, yey.
\v 2 Loo cón cheꞌn Crist anzeꞌf nazínꞌ daa guꞌ. Por cona, part cón chenen nac guꞌ loo Crist, coꞌ nee diꞌs, xal thìb mzaꞌyòn coꞌ selyaꞌ no Crist. No ndlyazen luꞌen guꞌ loo Crist xal thìb mzaꞌyòn, coꞌ nee diꞌs, nac thìb mzaꞌyòn nambìi coꞌ tarte gàal nec thìb mbiꞌ. Tataa ngue lin loo guꞌ, ne, tac loo cón cheꞌn Crist mblin loo guꞌ xal thìb mzaꞌyòn coꞌ mcàbgòn tyub no mzaꞌ thìb mbyòo no par luꞌ toon guꞌ loo Crist xal thìb mzaꞌyòn coꞌ beꞌ nac thìb mzaꞌ nambìi coꞌ gàc xinꞌ saꞌl thidte mbyòo, coꞌ nee diꞌs, gàc guꞌ cheꞌnpeꞌ Crist.
\v 3 Per anzeꞌf nde no lezon cón cheꞌn guꞌ tac neꞌ yiloa gàca loo guꞌ xal ngòca loo Ev coꞌseꞌ mquedìi Mebizya Ev con mod yeꞌrsinꞌ coꞌ ngòp Mebizya coꞌseꞌ mbix loo Mebizya, no ngòc Mebizya loo Ev xal thìb mbelꞌ, loo Ev coꞌ ngòc ner xaꞌgot loo izlyoꞌ ndxèꞌ. Leꞌ sya, tataa mod gàc zab xtùuz guꞌ no tyoo xàꞌ lezoꞌ guꞌ loo mod coꞌ mbli guꞌ sirv loo Crist dib nzo yéc guꞌ no dib nzo lezoꞌ guꞌ, no loo mod coꞌ mbluꞌ guꞌ loo mèn, lìcqueꞌ, más mqueꞌ lezoꞌ guꞌ Crist leque queꞌ lezoꞌ guꞌ chol taamas conꞌ.
\v 4 Per nalleꞌ, ndyaquen, lìcqueꞌ ndxàc loo guꞌ nquedii mèn guꞌ no ndryo xàꞌ guꞌ loo cón cheꞌn Crist coꞌseꞌ yiꞌth tedib mèn loo guꞌ coꞌ ngo yalbàn cón cheꞌn tedib Jesús coꞌ inacte leque yub Tad Jesucrist coꞌ ngo nuꞌ yalbàn. No ale tyac lezoꞌ guꞌ yòo mèna làth guꞌ. No cheleꞌ thìb xpii lyàa loo guꞌ coꞌ inacte Xpii Natúꞌ coꞌ ngulàa loo guꞌ coꞌseꞌ ngolaꞌs guꞌ loo Crist, ale taꞌ guꞌ lugar yòo xpiia loo guꞌ. No ale más tyac lezoꞌ guꞌ, ndyaquen. No cheleꞌ tedib mèn, coꞌ nac chol mèn, yiꞌth lo yalbàn cón cheꞌn tedib diꞌs ndac coꞌ inacte diꞌs ndac cón cheꞌnpeꞌ Jesucrist coꞌ ngolaꞌs guꞌ ndooreꞌ, ale más li guꞌ tyub nza guꞌ diꞌs coꞌ ryoꞌ ro mèna leque tyub nza guꞌ diꞌs coꞌ ndryoꞌ ron, ndyaquen. ¿Xá nee guꞌ? ¿Chéꞌ inquedìide mèn guꞌ tataa, ndyac guꞌ, càꞌ? Yende xàa. Tataaqueꞌ mod nquedìi mèn guꞌ tataa, yey.
\v 5 Per led guꞌ cuante. Ftolo xec guꞌ con daa tac ndyaquen, lìcqueꞌ, masqueꞌ ntac tínꞌ daa loo zinꞌ coꞌ nxoꞌf zinꞌen loo cón cheꞌn Crist leque zinꞌ coꞌ ngue xoꞌf zinꞌ mèn coꞌ nzo lath guꞌ coꞌ mbez guꞌ nac mer apostl roo apostl xèn.
\v 6 Mastaleꞌ inacte daa mèn coꞌ anzeꞌf huen ndxác ndyoodiꞌs loo guꞌ, ndyac guꞌ, per ndxeꞌlequeꞌ, loo cón cheꞌn Crist naneequen no ndaquen cuent ndxácqueꞌ daa xoꞌf zinꞌen zinꞌ ndxèꞌ xal ndxàala. No nonqueꞌ guꞌ no ndaꞌqueꞌ guꞌ cuent cón chenen. No nonqueꞌ guꞌ xal nac mod coꞌ ndxàpen làth guꞌ. Tac mbluꞌ nuꞌ loo guꞌ xá nac nuꞌ no mbluꞌ nuꞌ loo guꞌ xá mod ndli nuꞌ conꞌ loo guꞌ.
\p
\v 7 O ¿chéꞌ ndyac guꞌ nac daa mèn coꞌ mcuaꞌn xquin tac asemblin ngòc daa mèn nadoꞌ làth guꞌ, càꞌ? O ¿chéꞌ ndyac guꞌ iléꞌde nac coꞌ mblin tac mblon yalbàn cón cheꞌn diꞌs ndac cheꞌn Diox loo guꞌ anxleꞌ, càꞌ? Cona angmblin loo guꞌ par tolo téꞌth guꞌ par tyubdiꞌs ndac guꞌ loo cón cheꞌn Crist, ey.
\v 8 ¿Chéꞌ ndyac guꞌ mxenxùꞌen tmi cheꞌn mèn coꞌ nqueltàa loo cón cheꞌn Diox taamas lugar por mcàayan tmi, coꞌ nee diꞌs, mdix mèn mcàan por mblin gast tmia leꞌn huiz coꞌ mblin mandad loo guꞌ, càꞌ? Yende xàa.
\v 9 Guꞌ naneequeꞌ coꞌseꞌ ngo non guꞌa, mquin daa tmi par gast daa. Per mastaleꞌ mquin daa conꞌ naquin daa, neꞌngnaꞌb yèeden tmi loo nec thìb guꞌ par lyath no guꞌ daa. Ndxeꞌlequeꞌ, coꞌseꞌ ngòc falt tmi loon, mèn coꞌ ndxàc hues naꞌ coꞌ mbiꞌth par ned leꞌn yèezyaꞌ cheꞌn làaz mèn macedon mdub tmi coꞌ nde che loon coꞌseꞌ mtelꞌ mèna tmi loon. Tataa mod, leque daa mbli par neꞌndoo zinꞌten loo guꞌ par ndub guꞌ tmi coꞌ nde che loon tiempa. Tataaqueꞌ mod, tolo gàpen lezon par neꞌtolode li xolen guꞌ par delant.
\v 10 No com leꞌ daa nanee coꞌ huenlequeꞌ leꞌ cón cheꞌn Crist nac conꞌ lìcpeꞌ, ¿léꞌ? por cona, ngue niin loo guꞌ: Yende chó mèn yèezyaꞌ cheꞌn làaz mèn acay tethon daa no li mèna par neꞌtyacte lezon cón cheꞌn mod coꞌ anxleꞌ ngon yalbàn cón cheꞌn Crist loo guꞌ.
\v 11 ¿Chéꞌ ndyac guꞌ no chéꞌ ngue bez guꞌ loo hues xtàa guꞌ: Chonon tatuaꞌ mbez Pab loo naꞌ, yòo? No ¿chonon ndyóo guꞌ no mbez guꞌ loo xtàa guꞌ leꞌ daa inqueꞌde lezon ñèen guꞌ tac indaden lugar loo guꞌ par lyath no guꞌ daa, àꞌ? Yende xàa. Naneequeꞌ Diox no nonqueꞌ Diox leꞌ daa nqueꞌqueꞌ lezoꞌ ñèen guꞌ axta plóthe.
\p
\v 12 Per mod coꞌ ndxàpen no conꞌ coꞌ ndlin loo guꞌ, coꞌ nee diꞌs, neꞌndaden lugar loo guꞌ par lyath no guꞌ daa, conꞌa toloqueꞌ lin làth guꞌ, mèn ciuda Corint, par tauꞌen loo conꞌ yeꞌrsinꞌ coꞌ ndli ndxep mèn làth guꞌ coꞌ ngue cuaꞌn mod tauꞌ mèn loo cón cheꞌn diꞌs ndac cheꞌn Crist coꞌ ngon yalbàn no coꞌ ndethen loo guꞌ. Tataa lin par neꞌtolode taꞌ mèna gust lezoꞌ mèna más con mod yeꞌrsinꞌ coꞌ ndxàp mèna no par luꞌ mèna loo taamas mèna lalqueꞌ nac mèna xal daa.
\v 13 Pues, ryete mèn yeꞌrsinꞌ coꞌ nzo làth guꞌa nac mèn coꞌ ndyee teꞌth diꞌs coꞌ nac diꞌs gutyèꞌ mastaleꞌ mbez mèna nac mèna mèn coꞌ ndxeꞌ diꞌs cheꞌn Crist. Nac mèna mèn gutyèꞌtúb loo zinꞌ coꞌ nxoꞌf zinꞌ mèna. Ale nseꞌ loo mèna par ndxàc mèna mèn coꞌ ndyee teꞌth diꞌs cheꞌn Crist no xal mèn coꞌ ndxeꞌ diꞌs cheꞌn Crist. Per yalgutyèꞌ nac coꞌ ndluꞌ mèna.
\v 14 Per part cón cheꞌn naꞌ coꞌ ndxelaꞌspeꞌ loo Crist, conꞌ coꞌ ndlipeꞌ mèna inacte thìb conꞌ coꞌ ngüiꞌ mèn no ñaa mèn loo. Tac axta yub Mebizya ndluꞌ Mebizya loo mèn xal thìb xaꞌ ndac tínꞌ, no xal thìb angl coꞌ nzo loo béꞌ, par tataa mod quedìi Mebizya mèn.
\v 15 Cheleꞌ Mebizya tataa ndli, neꞌgàcta arid nagàn loo mèn coꞌ nac moz cheꞌn Mebizya par seꞌ loo mèna loo mèn leꞌ mèna nac mèn coꞌ ndli conꞌ ndac no coꞌ ndli conꞌ nalì. Per neꞌtyóode guꞌ. Diox tub rezqueꞌ cón cheꞌn zinꞌ yeꞌrsinꞌ coꞌ ndli mèna làth guꞌ par tyactìi mèna cón cheꞌn conꞌ coꞌ ndli mèna.
\s Pab ngue taꞌ cuent cón cheꞌn ryethe yaltìi coꞌ mxactìi Pab por ndxeꞌ Pab diꞌs cón cheꞌn Crist loo mèn huax lugar.
\p
\v 16 Ngue niin loo guꞌ tedib vez: Yende chó guꞌ li xtùuz no gab guꞌ loo lezoꞌ guꞌ leꞌ daa nquée mbii yéc. Nacqueleꞌ guꞌ ndli cuent nquée mbii yéquen, blaꞌ guꞌ tolo toodizen taandxepte loo guꞌ. No taꞌ guꞌ lugar loon par toodizen loo guꞌ xal thìb mbiꞌ coꞌ nquée mbii yéc par tyeꞌs daa chuꞌth loo zinꞌ coꞌ ngue xoꞌf zinꞌen ndxèꞌ.
\v 17 Conꞌ coꞌ ngue niin loo guꞌ ndxèꞌ, indyoodiztena xal diꞌs coꞌ ñibeꞌ Tad Crist loon par niina loo guꞌ. Ndxeꞌlequeꞌ, ndyoodizena xal thìb mbiꞌ coꞌ ndyac guꞌ nquée mbii yéc. Tataa ndlin par tan gust lezon cón cheꞌn zinꞌ coꞌ nxoꞌf zinꞌen loo Crist.
\v 18 Texal nzo huax mèn coꞌ ndyeꞌs xalqueꞌ nac mod coꞌ ndyeꞌs huax mèn loo cón cheꞌn izlyoꞌ, tataaqueꞌ tan gust lezon cón cheꞌnpeꞌ daa, ne.
\v 19 Tac texal ndli guꞌ cuent anzeꞌf ndxác guꞌ, ¿léꞌ?, tataaqueꞌ fxec guꞌ con mèn coꞌ nquée mbii yéc, dib nzo yéc guꞌ no dib nzo lezoꞌ guꞌ.
\v 20 Tac, ale nxec guꞌ tataa ndli no mèna guꞌ par ndli yèe guꞌ mandad loo mèna. No ndaꞌ guꞌ lugar ngòc mèna jef loo guꞌ par ñibeꞌ yèe mèna loo guꞌ loo conꞌ coꞌ inacte cheꞌnpeꞌ mèna. No ndaꞌ guꞌ lugar nxìis no mèna guꞌ. No más de cona, ale ndaꞌ guꞌ lugar nguis mèna rloo guꞌ coꞌseꞌ indyubdiꞌs ndacte guꞌ no coꞌseꞌ indxònte guꞌ ro mèna mastaleꞌ yende chó derech ndxàp mèna ñibeꞌ yèe mèna loo guꞌ.
\v 21 Lìcpeꞌ baꞌi, axta nthyon daa no nde no lezon niin loo guꞌ xal ndli no mèn coꞌ nzo làth guꞌa guꞌ, mèn coꞌ anzeꞌf ndxàc nayiꞌ loo guꞌ. Por derech, nzyeb daa lin tataa loo guꞌ xal ndli mèna loo guꞌ, cara.
\p Per com leꞌ mèna mbli ryes ndaꞌ mèna gust lezoꞌ mèna por cón cheꞌn guꞌ, nalleꞌ daa, ne, li ryes tan gust lezon con guꞌ xal thìb mbiꞌ coꞌ nquée mbii yéc. Por cona, bìn guꞌ diꞌs coꞌ niin loo guꞌ ndxèꞌ:
\v 22 Nac mèna mèn bin mèn hebre, ¿léꞌ? Daa, ne, nac mèn bin hebre. Nac mèna mèn nación Israel, ne, ¿léꞌ? Daa, ne, nac mèn nación Israel. Nac mèna bin mbiꞌ coꞌ ngroꞌ lèe Abraham, ¿léꞌ? ¿Cón ndyac guꞌ, àꞌ? Daa, ne, nac bin Abraham.
\v 23 ¿Chéꞌ nac mèn coꞌ nzo làth guꞌa mèn coꞌ nxoꞌf zinꞌ cón cheꞌn Crist, càꞌ? Lìcqueꞌ, tataa mbez mèna, ¿léꞌ? Huiꞌ guꞌ nexa. Niin thìb conꞌ loo guꞌ nalleꞌ xal mèn coꞌ nquée mbii yéc: Daa más ngue tee xoꞌf zinꞌ cón cheꞌn Crist leque mèna. Tac más nde teeleꞌ ndaꞌ mèn chenen ned ngue teeꞌen leque mèna. Huax vez nde teeleꞌ más mqueꞌ mèn daa leziꞌf por cón cheꞌn Crist leque mèna. No axta neꞌ neꞌ tan cuent plá vez mblyaꞌs mèn guth mèn daa por cón cheꞌn Crist. Huax vez mblyáꞌ mblyáꞌ daa loo yalguth.
\v 24 Gaꞌy vez mdaꞌ mèn nación Israel chenen con cuart axta mblàa mèna gal psiꞌ byèꞌ yaꞌ cuart laden.
\v 25 Son vez mbuaaꞌd yaa mèn daa con yaa. Thìb vez mbuaaꞌd quèe mèn daa. Son vez mdyep yooyaa leꞌn níttóꞌ coꞌteꞌ ngon coꞌseꞌ mdoon loo níttóꞌ par ngua que tee xoꞌf zinꞌen cón cheꞌn Tad Jesucrist. Thìb vez, thìb huiz no thìb yálꞌ mque tee xoꞌfen loo níttóꞌ coꞌteꞌ nac más tith ro níttóꞌ tac mdyuhuanen loo níttóꞌ.
\v 26 Huax vez mque teeꞌen làaz mèn tith. Huax vez ngòc conꞌ ryes loon huax mod. Ngòc conꞌ ryes loon coꞌseꞌ ndriꞌthen yóꞌbeꞌ. Ngòc conꞌ ryes loon coꞌteꞌ ndryoꞌ huanꞌ loon. Ngòc conꞌ ryes loon làth leque mèn coꞌ nac mèn gulàazen. Ngòc conꞌ ryes loon, ne, coꞌseꞌ mque teeꞌen làaz mèn tith. Ngòc conꞌ ryes loon coꞌseꞌ mque teeꞌen leꞌn chol ciuda. Ngòc conꞌ ryes loon huax vez coꞌseꞌ nguriꞌthen ned huan ned yii den. Ned mque teeꞌen ngòc conꞌ ryes loon loo yòoyaa loo níttóꞌ. Ned mque teeꞌen ngòc conꞌ ryes loon làth mèn gutyèꞌ coꞌ mbez ndxàc hues xtàa naꞌ loo cón cheꞌn Crist, mèn coꞌ nseꞌ loo diꞌs coꞌ nac diꞌs ndac.
\v 27 Anzeꞌf nalyat ndxàca loon. No ndxàc ngòc nguàal conꞌ loon. Huax vez ndxàca loon, yende mod gàten. No ndxath nít daa. Huax vez xlat daa. Yende conꞌ huan. Huax vez mbyanꞌ daa ned yóꞌ. Mdin xìl daa axta plóthe. Mque teeꞌen yende xaben. No yende xobisen par capen.
\p
\v 28 Más de cona, conꞌ coꞌ más ñibeꞌ loon par lin atate huiz nac: Naquin too neren no lasen loo mèn coꞌ ndxelaꞌs coꞌ nqueltàa chol lugar.
\v 29 ¿Chó mèn ndoo xàꞌ lezoꞌ no nguuꞌs lezoꞌ mèna loo cón cheꞌn Crist no neꞌtenꞌten cón cheꞌn mèna, àꞌ? ¿Chó mèn hues naꞌ nzo coꞌ ndli mèn ngòc nguàal conꞌ loo, no daa, chéꞌ ngue li guꞌ cuent neꞌndenꞌten cón cheꞌn mèn hues naꞌ coꞌ ngoziꞌf no coꞌ ngogaꞌs ngòc nguàal conꞌ loo, càꞌ? Ndenꞌqueꞌ daai.
\v 30 Cheleꞌi naquin tan gust lezon no cheleꞌ daa ndlyaꞌs tyeꞌs ndxep, leꞌ sya, tyeꞌs daa por conꞌ coꞌ ndluꞌ cón cheꞌn daa xal thìb mbíiz coꞌ yende conꞌ ntac coꞌ mbuuꞌs coꞌ yende fuerz. No tyeꞌs daa loo conꞌ cón chenen coꞌ ndyaquen yende conꞌ ntac.
\v 31 Pues Diox coꞌ nac xud Tad Jesucrist naꞌ coꞌ ndxàal gab naꞌ Diox roo Diox xèn no Diox natúꞌ nac Diox leꞌn línꞌ coꞌ ntlo, no leꞌn línꞌ coꞌ ndxeloo, no leꞌn línꞌ coꞌ neꞌlith node thidtene, Diox nanee lìcqueꞌ nac diꞌs coꞌ ngue niin loo guꞌ.
\v 32 Coꞌseꞌ ngon leꞌn ciuda Damasc, gobernador coꞌ mbli ryethe conꞌ mnibeꞌ Rey Aret, gobernadora mbli mandad mtauꞌ solndad rye lad loon ro ciudaa par tataa mod tyenxùꞌ solndad daa.
\v 33 Per ndxeꞌlequeꞌ, mèn ciuda Damasc coꞌ nqueltàa loo cón cheꞌn Diox neꞌngláꞌde daa. Mblo mèna daa leꞌn thìb cardor ryal. Mtelàa mèna daa loo yoo ro ftoo ro thìb ventan coꞌ ndub lad ftoo cheꞌn ciudaa. Tataa mod mblyáꞌ daa yaꞌ solndad cheꞌn gobernador.
\c 12
\s Diox mxoꞌf loo cón cheꞌn Diox loo Pab no mbluꞌ loo Diox cón cheꞌn Diox loo Pab.
\p
\v 1 Yende chó quix càan no yende cón lin gan par leque daa ndyoodiꞌs cón chenen. Más huen tyoodiz non guꞌ cón cheꞌn conꞌ coꞌ mxyoꞌf loo loon cón cheꞌn Diox no cón cheꞌn conꞌ coꞌ mbuiꞌ loo loon cón cheꞌn Diox coꞌ mbli Diox mbuiꞌ loon.
\v 2 Ndxàcleꞌ sida línꞌ ngòc thìb conꞌ loo thìb mbiꞌ coꞌ ndliben, coꞌ nee diꞌs, nac leque daa. Mbiꞌa ngòp yalxlaꞌs loo Crist. Diox mbli nguáp mbiꞌ loo béꞌ coꞌteꞌ nac son cuaꞌ béꞌ. Per baꞌ seꞌ neꞌneeden chéꞌ nguáp mbiꞌ loo béꞌ xal nac mbiꞌ o chéꞌ ante xpii mbiꞌ ngroꞌ loo mbiꞌ par nguáp xpii mbiꞌ loo béꞌ. Neꞌneeden xá mod ngòca loo mbiꞌa, cara. Ndan cuent ante Diox nanee conꞌa.
\v 3 Ndlibeꞌquen mbiꞌa, coꞌ nee diꞌs, daa nac mbiꞌ coꞌ ngua loo béꞌ. Per baꞌ seꞌ neꞌneeden chéꞌ nguáp mbiꞌ xal nacpeꞌ mbiꞌ o chéꞌ ante xpii mbiꞌ nguáp loo son cuaꞌ béꞌ. Ante Diox nanee xá ngua mbiꞌ.
\v 4 Ante ndan cuent nguáp mbiꞌ loo béꞌ coꞌteꞌ nac son cuaꞌ béꞌ coꞌ lèe parais. Tya mbìn mbiꞌ diꞌs coꞌ mdoodiꞌs no Diox mbiꞌ. Diꞌs coꞌ mbìn mbiꞌa, yende chó gác co xoꞌf coꞌ mdaꞌ Diox cuent loo mbiꞌ. No indlyaꞌste Diox gòn nec thìb mèn cón cheꞌn diꞌsa.
\v 5 Loo cón cheꞌn conꞌ coꞌ mxyoꞌf loo loo mbiꞌa no coꞌ mbuiꞌ loo loo mbiꞌa coꞌ nac daa, cón cheꞌn conꞌa ndli par tyeꞌs daa ndxep. Per cón cheꞌnpeꞌ daa, yende mod tyeꞌs daa neꞌ por chuꞌth. Ndxeꞌlequeꞌ, tyeꞌs daa cón cheꞌn prob laden coꞌ nac xal lad thìb mbíiz coꞌ mbuuꞌs coꞌ ngulàa fuerz coꞌ yende cón ntac.
\v 6 Por cona, ngue niin: Mastaleꞌ leque daa ndlyaz tyoodizen cón chenen par tyeꞌs daa ndxep, inacte conꞌa ndli par gàc daa xal mèn natont coꞌ nquée mbii yéc. Tac por part cón chenen, daa ante ndyoodiꞌs diꞌs coꞌ nac lìcpeꞌ cón chenen loo mèn. Ndxeꞌlequeꞌ, ndxàp lezon par neꞌtaden cuent coꞌ nac cón cheꞌnpeꞌen loo mèn. Tac indlyasten li ndxep mèn xtùuz o gab mèna loo lezoꞌ mèna: Masreꞌ conꞌ ndan cuent cón chenen. Ante ndlyazen li mèna xtùuz cón chenen xal ngue huiꞌ mèn loon no xal ndxòn mèn cón chenen coꞌseꞌ ndyoodiz non mèn.
\v 7 Conꞌ coꞌ mbli Diox mxyoꞌf loo loona, mbli ante mbuiꞌen no ante gunaan. Per par neꞌgàcte daa mèn coꞌ anzeꞌf tyeꞌs por cón cheꞌn conꞌa, mbli Diox ale, ndxeꞌlequeꞌ, mdenꞌen thìb yalnè laden xal thìb yis coꞌ nguaaꞌd laden. Diox mbli mdenꞌen yalnèa laden xal thìb herramient coꞌ ndli Mebizya us par ndenꞌen yalnèa laden par tetìi Mebizya daa.
\v 8 Nde teeleꞌ son vez mnaꞌben loo Tad Diox leꞌ Tad Diox teche yalnè coꞌ ndenꞌen laden ndxèꞌ.
\v 9 Per ale ndxeꞌlequeꞌ, taandxèꞌ gunee Tad Diox loon: Fxec, Pab, tac yende cón más nquin li nonl. Tuaꞌthe nac conꞌ coꞌ angndlin lool. Ndxeꞌlequeꞌ, ante nquin nonl leꞌ daa axta arid nqueꞌ lezon ñèenl. Más ndxúꞌ loo mèn ryethe conꞌ roo conꞌ xèn coꞌ nzo laꞌs niin no conꞌ coꞌ nzoꞌ laꞌs yan coꞌseꞌ ndlyath non mèn coꞌ yende chó fuerz ndxàp no loo mèn coꞌ mbuuꞌs coꞌ yende cón ntac.
\p Por cona, dib nzo lezon tolo tyeꞌs daa no tolo ndan gust lezon, mèn ciuda Corint, cón cheꞌn prob laden por nac daa mèn coꞌ nguuꞌs coꞌ ngulàa fuerz coꞌ yende cón ntac, par tataa mod yúꞌ leꞌ Tad Crist ndli ndxàc conꞌ roo conꞌ xèn loo Tad Crist por cón cheꞌn zinꞌ coꞌ nxoꞌf zinꞌen.
\v 10 Por cona, por cón cheꞌn ryethe conꞌ coꞌ ndxàc loon nalleꞌ, ale ndyac lezon por cón cheꞌn laden coꞌ nac xal thìb mbíiz. Tataa ndlin mastaleꞌ ntetìi mèn daa no ndxàc loon ndxetub conꞌ nquin daa, no mastaleꞌ ndyub nguꞌs mèn daa, no mastaleꞌ ndxàc huax yaltìi loon por cón cheꞌn Crist. Tac coꞌseꞌ ndxàca loon xal thìb mbíiz coꞌ nguuꞌs coꞌ ngulàa fuerz, sya, ndenꞌen ale sate más ndxòo fuerz no valor cheꞌn Diox loon.
\s Trèꞌ ndluꞌ leꞌ Pab anzeꞌf ndyóo cón cheꞌn mèn coꞌ nqueltàa loo cón cheꞌn Diox, mèn coꞌ nzo ban ciuda Corint.
\p
\v 11 Per nalleꞌ, mèn Corint, coꞌseꞌ ngue queꞌen yeꞌs coꞌ nac cart ndxèꞌ loo guꞌ no ndyoodiz non guꞌ loo cart ndxèꞌ, ale leque daa mbli par ngòc daa xal thìb mèn coꞌ nquée mbii yéc, ndyaquen. Per blaꞌ guꞌ conꞌa tac guꞌ mzi mchep daa loo conꞌa. Más huen ngàca cheleꞌ guꞌ ngli par ngduꞌ daa loo guꞌ, ndyaquen. Tac thìb mod tedib mod, lalqueꞌ nac daa con taamas mèn coꞌ nzo làth guꞌ, mèn coꞌ mbezpeꞌ guꞌ nac mèn coꞌ ndxeꞌ diꞌs cheꞌn Crist, mèn coꞌ ndyac guꞌ nac más mèn roo mèn xèn làth guꞌ, mastaleꞌ ndyaquen, no ndyac guꞌ, yende cón ntac daa làth guꞌ, ¿léꞌ?
\v 12 Más de cona, Diox mbluꞌ no beꞌ ngue luꞌ Diox daa loo guꞌ leꞌ daa, lìcqueꞌ, nac mèn coꞌ ndxeꞌ diꞌs cheꞌn Crist. Non guꞌ leꞌ daa nchaꞌlaꞌsqueꞌ loo guꞌ. No non guꞌ leꞌ daa mbluꞌ loo guꞌ cón cheꞌn zinꞌ coꞌ mxoꞌf zinꞌ Diox loon tac Diox mbli huax señ no huax yalguzyeꞌ coꞌ nac conꞌ roo conꞌ xèn loo guꞌ por cón chenen.
\v 13 ¿Cón ndyac guꞌ no cón ndenꞌ guꞌ leꞌ ndyac guꞌ ingoden cuent guꞌ no indyuꞌde guꞌ loon xal ndyuꞌ taamas mèn coꞌ nqueltàa templ taamas lugar, yey? ¿Chéꞌ ndenꞌ guꞌ leꞌ daa neꞌnglide cas loo guꞌ por neꞌngniiden loo guꞌ nglyath no guꞌ daa, càꞌ? Cheleꞌ guꞌ ndli cuent tataa mbli non guꞌ, bli guꞌ favor, fteriꞌth ftecanꞌ guꞌ conꞌ mdenꞌ guꞌ mblin loo guꞌ ndxèꞌ por neꞌngnaꞌbten ayud loo guꞌ par lyath no guꞌ daa.
\p
\v 14 Huiꞌ guꞌ nexa. Nalleꞌ mbyon vez ngue li naben daa par gal neen máa guꞌ. Coꞌseꞌ galen loo guꞌ, neꞌli xolten guꞌ. Tac neꞌgal cuanten cón cheꞌnpeꞌ guꞌ coꞌ ndxàp guꞌ par gàca chenen. Ndxeꞌlequeꞌ, ndlyazen gàc guꞌ mèn coꞌ tyal par ñibeꞌpeꞌ Diox loo guꞌ. Tac guꞌ nonqueꞌ leꞌ thìb gundan coꞌ nziriꞌ xinꞌ, xinꞌ gundana indxàalte coꞌ centav par huàa gundan xinꞌ gundan. Ndxeꞌlequeꞌ, gundan huàa xinꞌ gundan.
\v 15 Part cón chenen, dib nzo yèquen no dib nzo lezon tolo lin gast cón chenen par tataa mod càba conꞌ ndac loo guꞌ. Coꞌseꞌ ndluꞌen loo guꞌ leꞌ daa nqueꞌqueꞌ lezoꞌ ñèen guꞌ, no ale más nazab nac coꞌ ndli no guꞌ daa, ¿xá nee guꞌ? ¿Chéꞌ huen nac conꞌ coꞌ ngue li no guꞌ daa, ndyac guꞌ, càꞌ? Ale inqueꞌde lezoꞌ guꞌ ñèe guꞌ daa, ¿léꞌ?
\p
\v 16 Per mastaleꞌ tataa ndli guꞌ cuent, guꞌ nonqueꞌ no naneequeꞌ guꞌ leꞌ daa thidtenequeꞌ neꞌngli xolten guꞌ. Na naneequeꞌ leꞌ ndxep guꞌ mbez: ¡Aa que nalas mbiꞌ baꞌ, cara! Ncuaꞌn mbiꞌ mod nquedìi mbiꞌ naꞌ par yòo naꞌ lad cheꞌn mbiꞌ, ¿léꞌ?
\v 17 ¿Chéꞌ mbli guꞌ cuent mquedìin guꞌ por mtelꞌen plá mèn coꞌ mbiꞌth nee máa guꞌ, càꞌ? Yende xàa.
\v 18 Daa mnaꞌb loo Tit yiꞌth nee Tit máa guꞌ par nedrèꞌ. No thidte junt mtelꞌen Tit con tedib mbiꞌ coꞌ ndxàc hues naꞌ par mblyath no mbiꞌ Tit mbiꞌth Tit. Coꞌseꞌ mbiꞌth Tit loo guꞌ, ¿chéꞌ mquedìi Tit guꞌ coꞌseꞌ mbiꞌth nee Tit guꞌ pezea, càꞌ? ¿Chéꞌ ndli guꞌ cuent ilìcte thidte ndli ryop nuꞌ Tit xtùuz par thidte nxoꞌf zinꞌ nuꞌ zinꞌ ndxèꞌ, càꞌ? Thidte ndxeꞌ nuꞌ zinꞌ ndxèꞌ, ey.
\p
\v 19 ¿Chéꞌ ngue li guꞌ cuent axta nalleꞌ beꞌ ngue tuben razon cón chenen loo guꞌ, càꞌ? Tyèꞌ. Loo Diox nduben razon cón chenen loo guꞌ tac daa nac thìb mbiꞌ coꞌ ndyoodiz no guꞌ xal ñibeꞌ Crist loon. Tac ryete conꞌ coꞌ ndlin loo guꞌ, guꞌ coꞌ anzeꞌf nqueꞌ lezon ñèen, tataa ndlina loo guꞌ par tataa mod ryoo xyèn guꞌ no par tolo taꞌ guꞌ cuent no tolo téꞌth guꞌ cón cheꞌn Crist.
\v 20 Tac láth ngue queꞌen yeꞌs coꞌ nac cart ndxèꞌ loo guꞌ, anzeꞌf ndyóon no ndenꞌen leꞌn lezon, no nda no lezon coꞌseꞌ gal neen máa guꞌ, neꞌyòode lezon loo conꞌ coꞌ ngue li guꞌ. No neꞌ neꞌ yòo lezoꞌ guꞌ loo mod coꞌ lin conꞌ coꞌseꞌ gal lina loo guꞌ. Ndenꞌen leꞌn lezon thìb descuid zyal yalgyoo làth guꞌ coꞌseꞌ zin daa làth guꞌ. Nda no lezon, thìb descuid, leꞌpeꞌ sya, ndxep guꞌ yàn lezoꞌ. Taandxep guꞌ na, yecloo ñèe guꞌ xtàa guꞌ. Taandxep guꞌ na, anzeꞌf ndxàc mèn coꞌ nde yath par càb conꞌ ndac loo guꞌ. Neꞌgàpte guꞌ mod ñèe guꞌ xtàa guꞌ. Taandxep guꞌ na, gàc mèn coꞌ ñii yèe ñii tìi cón cheꞌn xtàa guꞌ. Taandxep guꞌ na, gàc mèn coꞌ chiꞌx loo cuent yix no mèn coꞌ nseꞌ loo cuent yix. Laꞌs guꞌ loo thìb xtàa guꞌ no loo tedib xtàa guꞌ. Taandxep guꞌ na, gàc mèn coꞌ anzeꞌf ndyeꞌs loo xtàa guꞌ. Taandxep guꞌ na, gàc mèn coꞌ ndoote li ngòc nguàal conꞌ con xtàa guꞌ.
\v 21 Lomisqueꞌ, nde no lezon, thìb descuid, coꞌseꞌ gal neen máa guꞌ par nedrèꞌ, neꞌstreꞌfqueꞌ Diox daa li loon thyon daa tedib vez por cón cheꞌn ndxep guꞌ. Làth xtauꞌa, lyàa nít ngudloon tant xi lezon cón cheꞌn huax guꞌ, guꞌ coꞌ ndxàcleꞌ línꞌ mcuaꞌn xquin no xtol guꞌ. Más de cona, mcuaꞌn mèna xinꞌ huan mèna. No indxàpte mèna mod. Per ndli mèna chol conꞌ yeꞌrsinꞌ coꞌ ndryoꞌ ndlyenꞌ lezoꞌ mèna li mèna. No axta nalleꞌ tarte lyàa yéc mèna no tarte lyàa lezoꞌ mèna par zyeꞌ mod yeꞌrsinꞌ coꞌ mque no mèna loo ryethe conꞌ zab coꞌ mbli mèna.
\c 13
\s Trèꞌ ndluꞌ leꞌ Pab mtanꞌ diꞌs loo mèn ciuda Corint coꞌ nqueltàa loo cón cheꞌn Diox neꞌyathlaꞌste mèn diꞌs coꞌ ndxab Pab. No ndluꞌ trèꞌ leꞌ Pab ngue nii Diox lult vez loo mèn.
\p
\v 1 Con conꞌ ndxèꞌ, mbyon vez nde teeleꞌ ndal neen máa guꞌ par nedrèꞌ. Coꞌseꞌ gal neen máa guꞌ nalleꞌ tub rezen cón cheꞌn guꞌ loo chop mèn o son mèn coꞌ taꞌ cuent nalì cón cheꞌn conꞌ coꞌ ndxàc làth guꞌ. Leꞌ sya, tataa mod ryo xoꞌf conꞌ coꞌ ndxàc loo guꞌ no yumbìi loo diꞌs no loo cuent coꞌ ndxetoo làth guꞌ.
\v 2 Daa guniileꞌ cón cheꞌn conꞌ ndxèꞌ loo guꞌ coꞌseꞌ mbryop vez mbal neen máa guꞌ. No nalleꞌ beren ngue niina loo guꞌ tedib vez loo cart ndxèꞌ xalqueꞌ thìb mbiꞌ coꞌ nzo làth guꞌ, mastaleꞌ yende daa loo guꞌ nalleꞌ. Per ndxàc conꞌ ndxèꞌ loo guꞌ tac inzoden làth guꞌ. Por cona, ngue queꞌen yeꞌs loo guꞌ nalleꞌ coꞌ nac cart ndxèꞌ, loo guꞌ coꞌ ndxàcleꞌ línꞌ mcuaꞌn xquin guꞌ no xtol guꞌ, no loo taamas guꞌ, cheleꞌ daa bere gal loo guꞌ tedib vez, syase, ya neꞌteriꞌthen no neꞌtecanꞌten cón cheꞌn conꞌ yeꞌrsinꞌ coꞌ nzi li guꞌ.
\v 3 Coꞌseꞌ ñee guꞌ tataa lin loo guꞌ, axta syareꞌ taꞌ guꞌ cuent coꞌ huenlequeꞌ, lìcqueꞌ, nzo no Crist daa no nac Crist xaꞌ coꞌ ndyoodiz no guꞌ. Per, lìcpeꞌ baꞌi, nee guꞌ no tenꞌ guꞌ inzode Crist loo guꞌ xal thìb mbíiz coꞌ nguuꞌs coꞌ ngulàa fuerz. Per ndxeꞌlequeꞌ, tenꞌ guꞌ ndxàp Crist ryethe conꞌ laꞌs nii Crist no laꞌs yaꞌ Crist par lyath no Crist guꞌ cheleꞌ guꞌ tyal taꞌ guꞌ diꞌs par lyath no Crist guꞌ xal naquin guꞌ.
\v 4 Lìca, coꞌseꞌ mqueꞌ mèn Crist loo cruz, ngòca loo Crist xal loo thìb mbíiz coꞌ mbuuꞌs tac tataa mod mnibeꞌ lezoꞌ Diox no tataa mod mnibeꞌ lezoꞌ Crist ngòca loo Crist. Per nalleꞌ naban Crist por cón cheꞌn ryethe conꞌ roo no conꞌ xèn coꞌ nzo laꞌs nii Diox no coꞌ nzo laꞌs yaꞌ Diox. Lomisqueꞌ mod ne, Diox indláꞌyaꞌde daa mastaleꞌ ñaalequeꞌ daa xal mbíiz coꞌ mbuuꞌs xalqueꞌ ngòca loo Crist. Per ndxeꞌlequeꞌ, daa luꞌ loo guꞌ por cón cheꞌn conꞌ coꞌ ndxàc làth guꞌa, lìcqueꞌ, ndxàpen conꞌ laꞌs niin no laꞌs yan xalqueꞌ ndxàp Crist conꞌ laꞌs nii Crist no laꞌs yaꞌ Crist tac ndlyath no Diox daa par tolo lin sirv loo guꞌ.
\p
\v 5 Fteche ftexyath guꞌ xtùuz guꞌ no lezoꞌ guꞌ par ñee guꞌ ñeeneꞌ chéꞌ, lìcqueꞌ, ndxelaꞌs guꞌ loo Tad Jesucrist naꞌ. Làth xtauꞌa ne, leque guꞌ tub rez cón cheꞌn guꞌ par ñee guꞌ ñeeneꞌ chéꞌ, lìcqueꞌ, ndxelaꞌs guꞌ loo Jesucrist. ¿Chéꞌ indaꞌde guꞌ cuent cón cheꞌnpeꞌ guꞌ leꞌ Jesucrist nzo noqueꞌ guꞌ, càꞌ? Neꞌstreꞌfqueꞌ, coꞌseꞌ teche texyath guꞌ xtùuz guꞌ no tub rez guꞌ cón cheꞌn guꞌ no ryo xoꞌfa loo guꞌ, lìcqueꞌ, tarte yilaꞌs guꞌ loo Jesucrist.
\v 6 Per daa ndub queequeꞌ lezoꞌ leꞌ guꞌ non no taꞌ guꞌ cuent leꞌ daa thidtenequeꞌ ndxelaꞌsqueꞌ loo Crist.
\v 7 Nalyat mbezen loo Diox por cón cheꞌn guꞌ par neꞌlide guꞌ nec thìb conꞌ yeꞌrsinꞌ. Imbezten Diox cón cheꞌn guꞌ par tyuꞌ daa loo guꞌ neꞌ neꞌ par yòo lezoꞌ guꞌ cón chenen. Ndxeꞌlequeꞌ, mbezen Diox ante par tolo li guꞌ conꞌ ndac mastaleꞌ ndenꞌ guꞌ indxòode lezoꞌ Diox loo cón chenen. Yende chó mport nzo lezon conꞌa.
\v 8 Yende mod lin nec thìb conꞌ coꞌ ntauꞌ no conꞌ coꞌ ncà loo diꞌs ndac coꞌ nac lìcpeꞌ. Ndxeꞌlequeꞌ, ante ndlin xalqueꞌ ñibeꞌ diꞌs ndac coꞌ nac lìcpeꞌ loon.
\v 9 Por cona, ndyac lezon coꞌseꞌ ante ndxúꞌ daa loo guꞌ xal thìb mbíiz coꞌ nguuꞌs no coꞌ ngulàa fuerz. No tyac lezon coꞌseꞌ gàc guꞌ mèn coꞌ ndxàp valor no fuerz loo cón cheꞌn Crist. No, lìcqueꞌ, ndlyazen leꞌ guꞌ tolo ryoo xyèn loo cón cheꞌn Crist par téꞌth guꞌ no tyubdiꞌs ndac guꞌ loo Crist axta plóthe.
\v 10 Por cona, ngue queꞌen cart ndxèꞌ loo guꞌ mastaleꞌ yende daa làth guꞌ par gàca, coꞌseꞌ gal neen máa guꞌ, nec thìb mod no nec tedib mod neꞌgàc nayiꞌden no neꞌyáp diꞌsten loo guꞌ. Lìcqueꞌ, ndxàpen conꞌ laꞌs niin no conꞌ laꞌs yan par lina tataa xal mnibeꞌ Diox loon par lina. Mbli Diox conꞌa loon ante par lin leꞌ mèn ryoo xyèn loo cón cheꞌn Crist par téꞌth mèn no tyubdiꞌs ndac mèn loo Diox. Neꞌnglide Diox conꞌa loon par too xàꞌen lezoꞌ mèn loo cón cheꞌn Crist.
\p
\v 11 Per nalleꞌ, conꞌ ndxèꞌ nac lult diꞌs coꞌ ngue queꞌen yeꞌs loo cart ndxèꞌ loo guꞌ, mèn huesen por cón cheꞌn Jesucrist. Ndlyazen Diox huen nda guꞌ, ndee guꞌ. Ndlyazen leꞌ guꞌ que tee ban lì loo Diox par gàc guꞌ mèn nalì no mèn nambìi loo Diox. Fcuaꞌn guꞌ mod tegán guꞌ lezoꞌ thìb xtàa guꞌ no tedib xtàa guꞌ. Ndlyazen thidte li guꞌ xtùuz loo cón cheꞌn Diox. Ndlyazen nagàl yo lezoꞌ guꞌ loo Diox no thidte cue ban guꞌ rye nda guꞌ no rye ndyeꞌth guꞌ làth xtàa guꞌ. Cheleꞌ guꞌ tataa li, leꞌ sya, Diox coꞌ ndli par ndxuꞌ ndxàl lezoꞌ mèn loo Diox, no Diox coꞌ nqueꞌ lezoꞌ ñee rye mèn, Diox nzo noqueꞌ guꞌ thidtene.
\v 12 Nabeꞌste gunii guꞌ Diox loo thìb xtàa guꞌ no loo tedib xtàa guꞌ xalqueꞌ nac mod ndac coꞌ ndxàp guꞌ coꞌseꞌ ñii guꞌ Diox loo xtàa guꞌ.
\v 13 Ryete mèn coꞌ ndxàc hues xtàa naꞌ coꞌ ngro xàꞌ loo cón cheꞌn xab izlyoꞌ coꞌ ngòc cheꞌnpeꞌ Diox, mèn coꞌ nzo non trèꞌ coꞌ ndxàc hues naꞌ por cón cheꞌn Crist, ngue nii Diox loo guꞌ loo cart ndxéꞌ, ne.
\p
\v 14 Ndlyazen leꞌ Tad Jesucrist tolo li anggàc conꞌ ndac loo guꞌ. No ndlyazen tolo téꞌth guꞌ no non guꞌ susqueꞌ nqueꞌ lezoꞌ Diox ñee Diox ryete guꞌ. No ndlyazen leꞌ Xpii Natúꞌ toloqueꞌ lyath no guꞌ par thidte gàc xtùuz guꞌ no thidte gàc lezoꞌ guꞌ loo cón cheꞌn Crist. Conꞌ ndxèꞌ nac coꞌ ndlyazen gàc loo guꞌ, mèn cuida Corint. Taandxèꞌ gàca loo guꞌ, ndee guꞌ.