\id GAL
\ide UTF8
\h GÁLATAS
\toc1 GÁLATAS
\mt Cart Coꞌ Mqueꞌ Pab Yeꞌs Loo Mèn Yèezyaꞌ Cheꞌn Làaz Mèn Galas
\c 1
\s Pab ngue queꞌ yeꞌs coꞌ nac cart ndxèꞌ loo mèn coꞌ nqueltàa loo cón cheꞌn Diox, men coꞌ naban leꞌn yèezyaꞌ coꞌ nac yèezyaꞌ cheꞌn làaz mèn galas.
\p
\v 1 Daa, Pab, nac thìb mbiꞌ coꞌ ndxeꞌ diꞌs cheꞌn Tad Jesucrist. Tad Jesucrist mtelꞌ daa loo mèn loo izlyoꞌ. Inacte daa thìb mbiꞌ coꞌ mtelꞌ chol mèn cheꞌn izlyoꞌ par ndxen diꞌs cheꞌn Tad Jesucrist loo mèn. Neꞌ neꞌ mdoo chol mèn daa no mcui chol mèn daa par ndxen diꞌsa loo mèn. Ndxeꞌlequeꞌ, yub Jesucrist mblo lèe daa nac daa thìb mbiꞌ coꞌ ndxeꞌ diꞌs no mcui Jesucrist daa par xoꞌf zinꞌen zinꞌa. No yub Diox xud naꞌ coꞌ mblo xban Jesucrist làth mèn nguth mblo lèe daa nac daa mbiꞌ coꞌ ndxeꞌ diꞌs cheꞌn Jesucrist. No mcui Diox daa par xoꞌf zinꞌen zinꞌ ndxèꞌ loo mèn.
\v 2 Daa, Pab, ngue queꞌen yeꞌs coꞌ nac cart ndxèꞌ loo guꞌ. Ryete mèn coꞌ ndxàc hues naꞌ por cón cheꞌn Jesucrist coꞌ nzo non trèꞌ, ngue nii mèna Diox loo guꞌ loo cart coꞌ ngue queꞌen yeꞌs loo guꞌ ndxèꞌ, loo rye guꞌ coꞌ nqueltàa loo cón cheꞌn Diox leꞌn chol yèezyaꞌ cheꞌn làaz mèn galas.
\v 3 Ndlyazen leꞌ Diox xud naꞌ no Tad Jesucrist naꞌ tolo li anggàc conꞌ ndac loo guꞌ no tolo li huen gàca loo guꞌ loo cón cheꞌn Jesucrist. No ndlyazen leꞌ Diox xud naꞌ no Tad Jesucrist tolo li par nagàl yo lezoꞌ guꞌ loo Diox no cue ban guꞌ rye nda guꞌ no rye ndyeꞌth guꞌ làth hues xtàa guꞌ.
\v 4 Tad Jesucrist naꞌ yub mdaꞌ lugar par mquée yalguth loo Tad Jesucrist por cón cheꞌn xquin naꞌ no xtol naꞌ par tataa mod mblyáꞌ naꞌ loo ryethe conꞌ coꞌ nac conꞌ yeꞌrsinꞌ coꞌ nac cheꞌn xab izlyoꞌ yeꞌrsinꞌ ndxèꞌ. Ngòc conꞌa loo Tad naꞌ xal guneepeꞌ lezoꞌ Diox coꞌ nac xud naꞌ.
\v 5 Por cona, ndlyazen tolo gab naꞌ diꞌs guryath no diꞌs guryèn no diꞌs natúꞌ cón cheꞌn Diox loo mèn no loo Diox leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node. Tataaqueꞌ gàca.
\s Diꞌs ndxèꞌ ndluꞌ thidte diꞌs ndac nzo coꞌ ndluꞌ loo mèn xá mod lyáꞌ mèn loo conꞌ ryes.
\p
\v 6 Ante ngüiꞌen no ante ñaan loo guꞌ, cara, ale setilte mdoo xàꞌ lezoꞌ guꞌ loo diꞌs ndac coꞌ ndaꞌ cuent no coꞌ ndluꞌ cón cheꞌn Diox loo guꞌ. Loo conꞌ coꞌ nac cón cheꞌn Diox, Diox mbli par mbyeꞌth lezoꞌ guꞌ ngòo guꞌ loo cón cheꞌn Diox. Tataa mbli Diox loo guꞌ, no loo nuꞌ, por anzeꞌf mqueꞌqueꞌ lezoꞌ Crist ñèe Crist ryete naꞌ. No nalleꞌ, ale ndxeꞌlequeꞌ, más ndli guꞌ par ndyoo nque guꞌ no nqueꞌ nza guꞌ loo tedib diꞌs coꞌ ndli guꞌ cuent nac diꞌs ndac cheꞌn Diox, coꞌ ndli guꞌ cuent teláꞌ guꞌ loo conꞌ ryes. Per diꞌsa xàꞌ nac loo cón cheꞌn diꞌs ndacpeꞌ cheꞌn Diox.
\v 7 Ilìcte naca par gab mèn nzo tedib diꞌs coꞌ nac xalpeꞌ nac diꞌs ndac cheꞌnpeꞌ Diox coꞌ ndluꞌ xá mod lyáꞌ mèn loo conꞌ ryes. Ndxeꞌlequeꞌ, conꞌ coꞌ ndxàc loo guꞌ baꞌ nac: Nzo ndxep mèn coꞌ ngue li xol loo guꞌ. Ndlyaꞌs mèna zyeꞌ diꞌs ndac, coꞌ nac diꞌs ndac cheꞌn Crist, par yilaꞌs mèn no tenꞌ mèn tedib mod lyáꞌ mèn loo conꞌ ryes.
\v 8 Per cheleꞌ chó mèn xàꞌguèꞌ ngo yalbàn cón cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes xal ngo nuꞌ yalbàn, no xal mdaꞌleꞌ nuꞌ cuent loo guꞌa, ¿léꞌ?, thidtenequeꞌ mèndèe mèna loo Diox too ze too yálꞌ. No yende chó mport nzo lezoꞌ Diox chó nac mèna, que naca yub daa, que naca thìb angl coꞌ yiꞌth coꞌ lyàa loo béꞌ coꞌ co yalbàn no coꞌ teꞌth cón cheꞌn diꞌs ndac coꞌ inacte leque diꞌs ndac cheꞌnpeꞌ Diox xalqueꞌ ngue niin loo guꞌ ndxèꞌ, thidtenequeꞌ mèndèe mèna loo Diox too ze too yálꞌ.
\v 9 Na guniileꞌ leque diꞌs ndxèꞌ loo guꞌ ndooreꞌ coꞌseꞌ ngon làth guꞌ thìb cuaꞌa. No nalleꞌ beren, ngue niin loo guꞌ tedib vez: Cheleꞌ chó mèn xàꞌguèꞌ co yalbàn cón cheꞌn diꞌs ndac loo guꞌ xal nac diꞌs coꞌ mbìnleꞌ guꞌ, no coꞌ mdenꞌleꞌ guꞌ, no coꞌ ngulàaleꞌ leꞌn lezoꞌ guꞌ coꞌ mbloleꞌ nuꞌ yalbàn loo guꞌ, thidtenequeꞌ mèndèe nac mèna loo Diox too ze too yálꞌ.
\p
\v 10 No nalleꞌ conꞌ coꞌ ngue niin loo guꞌ ndxèꞌ ndxàal niin loo guꞌ: ¿Chéꞌ ngue li guꞌ cuent ngue niin conꞌ ndxèꞌ loo guꞌ par yòo lezoꞌ taamas mèn cón chenen, càꞌ? Yende xàa. O ¿chéꞌ ngue niin conꞌ ndxèꞌ loo guꞌ par yòo lezoꞌ Diox ñèe Diox daa loo conꞌ coꞌ ngue lin, càꞌ? Aa. Ngue niin conꞌ ndxèꞌ loo guꞌ ante par yòo lezoꞌ Diox loo conꞌ ngue niin loo guꞌ, ey. O ¿chéꞌ ngue li guꞌ cuent ngue tan gust lezoꞌ chol mèn par tyac lezoꞌ mèna con daa loo cón cheꞌn diꞌs ndac cheꞌn Diox, càꞌ? ¡Máa yob yéc guꞌ, na! Yende xàa. Tac cheleꞌ daa beꞌ ngue ta gust lezoꞌ chol mèn cón cheꞌn diꞌs ndac cheꞌn Diox, ya inacte daa mbiꞌ coꞌ nxoꞌf zinꞌ zinꞌ cheꞌn Crist, sya, xàa.
\s Pab ngue taꞌ cuent loo mèn chó mcui Pab, no chó mtelꞌ Pab, no chó mdoo Pab par ndxeꞌ Pab diꞌs cón cheꞌn Crist loo mèn.
\p
\v 11 Guꞌ coꞌ nac mèn huesen por cón cheꞌn Crist, ftaꞌ guꞌ cuent coꞌ huenlequeꞌ cón cheꞌn diꞌs ndac coꞌ nac diꞌs ndac cheꞌnpeꞌ Diox coꞌ ndethen no coꞌ ngon yalbàn loo guꞌ coꞌ ndluꞌ loo mèn xá mod lyáꞌ mèn loo conꞌ ryes. Inacte diꞌs ndaca thìb diꞌs ndac coꞌ mblobeꞌ no coꞌ mtoxcuaꞌ chol mèn cheꞌn izlyoꞌ ndxèꞌ.
\v 12 Inacte chol mèn coꞌ mbluꞌ cón cheꞌn diꞌs ndac ndxèꞌ loon. No nec thìb mèn coꞌ nac chol mèn mbluꞌ cón cheꞌn diꞌs ndac ndxèꞌ loon. Ndxeꞌlequeꞌ, yub Tad Jesucrist mblo xoꞌf cón cheꞌn diꞌs ndac ndxèꞌ loon.
\p
\v 13 Guꞌ mbìnqueꞌ xá mod ngòc daa póla no xá mod mque tee banen póla coꞌseꞌ ngòc daa mèn xleyꞌpeꞌ cheꞌn mèn nación Israel. No nonqueꞌ guꞌ no naneequeꞌ guꞌ, ale, ngulàa xyàn lezon no ngòc nayiꞌen gunèen mèn coꞌ mqueltàa loo cón cheꞌn Diox chol lugar. Ale mque tee queꞌen xís mèna pál coꞌteꞌ ngo mèna par guthen mèna no par cheꞌen mèna thidtene.
\v 14 Coꞌseꞌ ngòc daa mèn xleyꞌ cheꞌn mèn nación Israel, más altant mdoon no más mtéꞌthen cón cheꞌn xleyꞌ daa leque loo rye mèn gulàaz daa coꞌ ngòc mèn coꞌ thidte mxyèn con daa, coꞌ nee diꞌs, mèn coꞌ thidte línꞌ ndoo xèn non. Más de cona, anzeꞌf ngòc nayiꞌen loo mèn par mblin leꞌ mèn mbli yèe costumbr coꞌ ngòc costumbr cheꞌn xudgool nuꞌ.
\v 15 Per mastaleꞌ tataa ngòc daa, Diox mblo xàꞌleꞌ daa ndooreꞌ gáal daa par co Diox daa loo zinꞌ ndxèꞌ. No por anzeꞌf nqueꞌ lezoꞌ Diox gunèe Diox daa, ale tataaqueꞌ mbli Diox ngòca loon par xoꞌf zinꞌen cón cheꞌn diꞌs ndac ndxèꞌ. Leꞌ sya, coꞌseꞌ ngòc tiemp ngóol daa no mbryoo daa, Diox mbli conꞌ mblyaꞌs Diox no conꞌ coꞌ gunee lezoꞌ Diox li Diox loon.
\v 16 Mbli Diox par mbliben xganꞌ Diox par gàca loon yiloa ga tethen no gon yalbàn cón cheꞌn diꞌs ndac loo mèn, mèn coꞌ inacte mèn nación Israel. Coꞌseꞌ ngolo ngòc conꞌa loon, yende chó ngabten loo nec thìb mèn. Neꞌ neꞌ mdoodizen loo nec thìb mèn cón cheꞌn conꞌ coꞌ mbli Diox loon no cón cheꞌn conꞌ coꞌ mnibeꞌ Diox loon.
\v 17 Neꞌ neꞌ ngan ciuda Jerusalén par nga tan cuenta loo myenꞌ coꞌ ngòc xinꞌ mtéꞌth Jesús, myenꞌ coꞌ ndxeꞌ diꞌs ndxèꞌ ndooreꞌ coꞌseꞌ mbli Diox conꞌ ndxèꞌ loon. Ndxeꞌlequeꞌ, luega mxenen ned. Nguan leꞌn nación Arab coꞌteꞌ mbyanꞌ daa nen tiemp. Ngoloa, mberen, ndyalen par ned ciuda Damasc tedib vez.
\p
\v 18 Neꞌngaden ciuda Jerusalén luega. Axta ngolo son línꞌ, syareꞌ nguan. Ale axta syareꞌ mbliben Pedr. Ngo non Pedr siꞌn huiz leꞌn ciuda Jerusalén leꞌn tiempa.
\v 19 Per neꞌngnèeden taamas myenꞌ xinꞌ mtéꞌth Tad Jesús coꞌ ndxeꞌ diꞌs cón cheꞌn diꞌs ndac ndxèꞌ. Ante Cob coꞌ ndxàc hues Tad Jesús por xnaꞌ Tad Jesús gunèen.
\v 20 Cón cheꞌn diꞌs coꞌ ngue queꞌen yeꞌs loo guꞌ ndxèꞌ, Diox naneequeꞌ inquedìiden guꞌ, cara. Lìcpeꞌ nac diꞌs ndxèꞌ.
\p
\v 21 Ngolo nguriꞌth conꞌa, mxenen ned. Nguan par ned leꞌn yèezyaꞌ cheꞌn làaz mèn sir no leꞌn yèezyaꞌ cheꞌn làaz mèn cilis.
\v 22 Leꞌ rye mèn hues naꞌ coꞌ nqueltàa loo cón cheꞌn Crist, mèn coꞌ nzo ban par ned leꞌn yèezyaꞌ cheꞌn làaz mèn jude, mèna tarte libeꞌ daa, coꞌ nee diꞌs, tarte huiꞌ mèna loon tiempa.
\v 23 Ante ndxòn mèna no ndyoodiꞌs mèna cón chenen. Mbez mèna: Mbiꞌ coꞌ mque tee mdub nguꞌs naꞌ no mblyaꞌs mbiꞌ mtelux mbiꞌ naꞌ thìb cuaꞌa, mbiꞌa ngue tee teꞌth no ngo mbiꞌ yalbàn cón cheꞌn diꞌs ndac par yilaꞌs mèn xal ndluꞌ diꞌs ndac.
\v 24 No gunii mèna diꞌs roo no diꞌs xèn no diꞌs natúꞌ loo xtàa mèn cón cheꞌn Diox por cón chenen.
\c 2
\s Taamas mèn coꞌ ndxeꞌ diꞌs ndac mblo cuent nac Pab mèn coꞌ ndxeꞌ diꞌs ndac cheꞌn Crist loo mèn.
\p
\v 1 No coꞌseꞌ ngolo nguriꞌth sida línꞌ coꞌ ndxàc nguan ciuda Jerusalén nera, mberen nguan par ned leꞌn ciuda Jerusalén tedib vez con thìb mbiꞌ coꞌ lèe Mbèlꞌ. Mbeen Tit par ngua non Tit, ne.
\v 2 Nguan ciuda Jerusalén tac Diox mblo xoꞌf loon leꞌ daa naquinqueꞌ ga par ciuda Jerusalén. Leꞌn ciuda Jerusalena ngo thìb ned mèn coꞌ mdyoo ner no coꞌ mdyoo naa loo mèn coꞌ nqueltàa loo cón cheꞌn Crist chol lugar. Xexte mdan cuent loo mèna, thìb lad, cón cheꞌn diꞌs ndac coꞌ nac cheꞌnpeꞌ Diox coꞌ ndluꞌ loo mèn xá mod lyáꞌ mèn loo conꞌ ryes, coꞌ ndethen no coꞌ ngon yalbàn loo mèn, mèn coꞌ inacte mèn nación Israel. Tataa mblin conꞌa par de que neꞌgàcte conꞌ coꞌ ngue tee lin thìb conꞌ anxleꞌ coꞌ yende cón ntac loo mèn.
\v 3 Per mastaleꞌ ngua no Tit daa, neꞌ neꞌ ngab mèna loo Tit no neꞌ neꞌ ngli mèna fuerz Tit par ngàc circuncidar Tit xalqueꞌ nac costumbr cheꞌn mèna mastaleꞌ inacte Tit mèn nación Israel.
\v 4 No, lìcpeꞌ baꞌi, xexte ngo ndxep mèn gutyèꞌ xiꞌtha, mèn coꞌ mbez ndxàc hues naꞌ por cón cheꞌn Crist, per ilìcta. Mèna mblyaꞌs ngàc circuncidar Tit. Per mèna ante ngo làtha par ante mblaꞌs mèna par ngüiꞌ mèna coꞌ huenlequeꞌ xal nac mod cub coꞌ ndxàp naꞌ, naꞌ coꞌ nqueltàa loo cón cheꞌn Crist, tac yende chó nzi nchep naꞌ loo costumbr gox. No ale mblyaꞌs mèna bere naꞌ, li yèe naꞌ costumbr coꞌ nac costumbr cheꞌn mèn nación Israel tedib vez.
\v 5 Per neꞌ por chuꞌth neꞌnglaꞌde nuꞌ ngnibeꞌ mèna loo nuꞌ. Tac mblyaꞌs nuꞌ leꞌ guꞌ toloqueꞌ taꞌ cuent cón cheꞌn diꞌs ndac coꞌ nac diꞌs ndac cheꞌnpeꞌ Diox coꞌ nac lìcqueꞌ, diꞌs ndac coꞌ ndluꞌ xá mod lyáꞌ mèn loo conꞌ ryes.
\p
\v 6 Mèn coꞌ ndyoo ner no coꞌ ndyoo naa loo chol mèn coꞌ nqueltàa loo cón cheꞌn Crist chol lugar, mèna neꞌngluꞌde daa no neꞌntanꞌte mèna nec thìb diꞌs cub o cuent cub loon coꞌ ndluꞌ cón cheꞌn Crist. Mastaleꞌ ndeꞌf diꞌs ndxác mèna, neꞌngluꞌde mèna loon ndxep conꞌ coꞌ nac cón cheꞌn Crist. Neꞌ neꞌ yende chó mport nzo lezon, que nac mèna mèn coꞌ ndeꞌf diꞌs ndxác, que nac mèna mèn beꞌthe. Gunee mèna cón nac mèna. Diox indubte par tub rez Diox cón cheꞌn mèn loo mèn por mod coꞌ más ndyuꞌ thìb mèn leque tedib mèn loo xtàa mèn.
\v 7 Lugar de luꞌ mèna daa ndxep diꞌs coꞌ nac cón cheꞌn Crist, ndxeꞌlequeꞌ, más mdaꞌ mèna cuent no mdenꞌ lezoꞌ mèna leꞌ Diox mxoꞌf zinꞌ zinꞌ ndxèꞌ loon par tethen no gon yalbàn cón cheꞌn diꞌs ndac, coꞌ nac diꞌs ndac cheꞌnpeꞌ Diox, loo mèn coꞌ inacte mèn nación Israel xalqueꞌ mxoꞌf zinꞌ Diox zinꞌ ndxèꞌ loo Pedr par co Pedr yalbàn no teꞌth Pedr cón cheꞌn leque diꞌs ndac cheꞌnpeꞌ Diox loo mèn nación Israel.
\v 8 Pues leque yub Diox coꞌ mtelꞌ Pedr par ndxeꞌ Pedr diꞌs ndac cheꞌnpeꞌ Diox loo mèn coꞌ nac mèn nación Israel, leque yub Diox mtelꞌ daa, ne, par ndxen diꞌs ndac cheꞌnpeꞌ Diox loo mèn coꞌ inacte mèn nación Israel.
\p
\v 9 Por cona, Cob no Pedr no Juàn coꞌ nac nerlequeꞌ myenꞌ coꞌ ndyoo más altant loo cón cheꞌn Crist, myenꞌ mdaꞌ cuent coꞌ huenlequeꞌ leꞌ Diox mbli mxoꞌf zinꞌen zinꞌ ndxèꞌ. No mbli Diox mxyalꞌ ned mxyalꞌ yóꞌ loon par mxoꞌf zinꞌen zinꞌ ndxèꞌ. Látha, mxen myenꞌ yaꞌ ryop nuꞌ Mbèlꞌ par mbli myenꞌ cuent thidte ngòc ryop nuꞌ Mbèlꞌ con myenꞌ loo zinꞌ coꞌ ngue xoꞌf zinꞌ myenꞌ cón cheꞌn Crist no par mbli myenꞌ cuent ndxàc hues no ndxàc xtàa ryop nuꞌ Mbèlꞌ con myenꞌ loo cón cheꞌn Crist. Thidte mdoodiꞌs myenꞌ leꞌ ryop nuꞌ Mbèlꞌ ya xoꞌf zinꞌ cón cheꞌn Crist làth mèn coꞌ inacte mèn nación Israel láth nda xoꞌf zinꞌ myenꞌa leque zinꞌ làth mèn nación Israel.
\v 10 Thidte conꞌ nac coꞌ mbli myenꞌ par xoꞌf ndelequeꞌ lezoꞌ nuꞌ li nuꞌ. Conꞌa ngòc diꞌs coꞌ ngòc plá diꞌs gunee myenꞌ loo nuꞌ par más teꞌ lezoꞌ nuꞌ cón cheꞌn prob mèn coꞌ ndxelaꞌs par lyath no nuꞌ mèna loo conꞌ nde che loo mèna. Conꞌa nac thìb conꞌ coꞌ más ndlin purad ndli nuꞌ leque tedib conꞌ. Thìba conꞌ ndxèꞌ.
\s Pab mbyoo Pedr leꞌn ciuda Antioqui.
\p
\v 11 Leꞌ tediba na, coꞌseꞌ ngua Pedr ciuda Antioqui, que nzo neꞌ ñee lezoꞌ Pedr mbyoon Pedr, tac, por derech, iléꞌde nac conꞌ ngue tee li Pedr loo mèn ciuda Antioqui tiempa.
\v 12 Coꞌseꞌ nerlequeꞌ mtlo mèn cheꞌn yèezyaꞌ cheꞌn làaz mèn ciuda Antioqui, ngolaꞌs mèna loo cón cheꞌn Crist, ngòc thìb conꞌ. Pedr ndxuhua no mèna, mèn coꞌ inacte mèn nación Israel. Tolo mbli Pedr conꞌa axtaqueꞌ mzin ndxep amiu Cob, mèn coꞌ nqueltàa no Cob leꞌn ciuda Jerusalén, leꞌn ciuda Antioqui. Per coꞌseꞌ gunèe Pedr thìb ned mèn coꞌ ngue no costumbr cheꞌn circuncisión, mèn coꞌ ngòc amiu Cob, ale mzyeb Pedr gunèe Pedr mèna. Axta syareꞌ, xèegà xèegà mbláꞌ Pedr. Ya neꞌtolode nduhua no Pedr mèn coꞌ nac mèn yèezyaꞌ cheꞌn làaz mèn ciuda Antioqui, mèn coꞌ inacte mèn nación Israel.
\v 13 Leꞌ sya, ndxep mèn nación Israel coꞌ ngolaꞌs coꞌ nzo làth mèna, mèna, ne, mbli xal mèn coꞌ neꞌñeede láth mtembìi Pedr ro Pedr no mtembìi Pedr xtiꞌs Pedr loo taamas mèna cón cheꞌn conꞌa. No ale axta no Mbèlꞌ mblaꞌ par tolo mbli Pedr cón ndlyaꞌs Pedr con mèna.
\v 14 Per coꞌseꞌ gunèen tataa mbli Pedr con taamas mèn coꞌ thidte ndxàc con Pedr, mdan cuent ingue tee ban ndacte Pedr xal ñibeꞌ diꞌs ndac coꞌ nac lìcpeꞌ coꞌ ndluꞌ xá mod lyáꞌ mèn loo conꞌ ryes. Sya, ndxaben loo Pedr loo ryete mèn coꞌ nqueltàa no Pedr: Pedr, lùu coꞌ nac mèn nación Israel, leque lùu ndluꞌ nque tee banl xal nzi tee ban mèn coꞌ inacte mèn nación Israel. No ¿ndlil xal ndli mèn coꞌ inacte mèn nación Israel, càꞌ? ¿No nalleꞌ a la fuerz ndlyaꞌsl leꞌ mèn coꞌ inacte mèn nación Israel que tee ban xal nzi que tee ban mèn coꞌ nac mèn nación Israel, càꞌ? ¡Pà ñee conax!
\s Xalqueꞌ ndlyáꞌ mèn chol nación coꞌ inacte mèn nación Israel loo conꞌ ryes, tataaqueꞌ ndlyáꞌ mèn nación Israel loo conꞌ ryes.
\p
\v 15 Huiꞌ nexa, Pedr. Naꞌ nac mèn nacionpeꞌ Israel tac ngóol naꞌ leꞌn nación Israel, ¿léꞌ? No ndli mèn nación Israel cuent más ncuaꞌn mèn coꞌ inacte mèn nación Israel xtol mèn leque naꞌ, ¿léꞌ? Per ilìcta, ¿léꞌ?, Pedr.
\v 16 Más de cona, naꞌ ndaꞌ cuent no nanee naꞌ nec thìb mèn neꞌtaꞌde Diox lugar no neꞌtyalte Diox yòo mèn loo cón cheꞌn Diox par gàc mèna mèn nalì no mèn nambìi loo Diox por mbli mèn preb li mèn xal ñibeꞌ ley coꞌ mxoꞌf Moisés loo mèn. Ndxeꞌlequeꞌ, ndaꞌ naꞌ cuent no nanee naꞌ ndyalqueꞌ Diox no ndaꞌqueꞌ Diox lugar ngòo mèn loo cón cheꞌn Diox par gàc mèn mèn nalì no mèn nambìi loo Diox ante por yilaꞌs mèn loo Jesucrist. Por cona, naꞌ, ne, ngolaꞌs loo Jesucrist por mdyal Diox no mdaꞌ Diox lugar ngòo naꞌ loo cón cheꞌn Diox par ngòc naꞌ mèn nalì no mèn nambìi loo Diox. Ngòca tataa loo naꞌ ante por ngolaꞌs naꞌ loo Jesucrist. Naꞌ nanee no ndaꞌ naꞌ cuent leꞌ Diox neꞌtyalte taꞌ Diox lugar yòo mèn nación Israel loo cón cheꞌn Diox par gàc mèn nación Israel mèn nalì no mèn nambìi loo Diox por mbli mèn nación Israel preb li mèn nación Israel xal ñibeꞌ ley coꞌ mxoꞌf Moisés loo mèn.
\p
\v 17 No nalleꞌ, nde niin thìb conꞌ lool, Pedr: Cheleꞌ naꞌ mdaꞌ lugar no mdyal naꞌ ngòo naꞌ loo cón cheꞌn Diox par ngòc naꞌ mèn nalì no mèn nambìi loo Diox por cón cheꞌn Crist, no nalleꞌ cheleꞌ naꞌ ngue li par ngue huiꞌ no ñaa mèn loo naꞌ, leque naꞌ ngue cuaꞌn xquin naꞌ no xtol naꞌ por ngue li naꞌ ndxàc naꞌ xal mèn coꞌ inacte mèn nación Israel por cón cheꞌn Jesucrist. Cheleꞌ naꞌ, lìcqueꞌ, por cona ngue cuaꞌn naꞌ xquin naꞌ no xtol naꞌ, ¿chéꞌ nee diꞌs coꞌ ngue li naꞌa ncàb leꞌ Crist ngue li par ncuaꞌn naꞌ xquin naꞌ no ncuaꞌn naꞌ xtol naꞌ, càꞌ, Pedr? Yende xàa. Nec thìb mod no nec tedib mod gàca tataa, ¿léꞌ?
\v 18 Tac cheleꞌ naꞌ mbyathlaꞌs xal mnibeꞌ ley coꞌ mxoꞌf Moisés loo mèn no mbláꞌ naꞌ rye mod coꞌ ngòp naꞌ loo leya, no nalleꞌ bere naꞌ, teꞌ lezoꞌ naꞌ xal nac diꞌs coꞌ ndub loo ley par li naꞌ preb tyubdiꞌs naꞌ loo leya tedib vez no li naꞌ xal mbli naꞌ póla, leque naꞌ nque dol naꞌ loo Diox, ¿léꞌ?
\v 19 Per part cón chenen, daa ngòcleꞌ xal mèn coꞌ nguthleꞌ loo conꞌ coꞌ mnibeꞌ loo ley coꞌ mblin, coꞌ nee diꞌs, neꞌtoloden lin rye conꞌa, tac mtéꞌthen yende mod gàc daa mèn nalì no mèn nambìi loo Diox por mblin preb lin conꞌ coꞌ mnibeꞌ ley coꞌ mxoꞌf Moisés loo naꞌ par li naꞌ. Per nase ndan cuent ante loo cón cheꞌn Diox ndxàal que tee ban daa tac ngro xàꞌlen loo conꞌ coꞌ mnibeꞌ leya loon par mblina ndooreꞌ yilazen loo Diox por cón cheꞌn Crist.
\v 20 Por part cón cheꞌn Diox, Diox mbloleꞌ cuent ngòc daa mèn coꞌ nguthleꞌ, coꞌ nee diꞌs, Diox mbloleꞌ cuent thidte mqueꞌen loo cruz con Crist. Cona, ngue niin lool, Pedr: Ithidte daa nac mèn coꞌ naban coꞌ ndoo lool trèꞌ. Leque yub Crist nac xaꞌ coꞌ nzo ban no daa por cón cheꞌn Xpii Natúꞌ. No láth beꞌ naban daa, daa coꞌ nac bélꞌyòo, daa ngue tee ban ante por ndxàpen yalxlaꞌs no ndxelazen loo Crist coꞌ nac xganꞌpeꞌ Diox. Xganꞌpeꞌ Diox nqueꞌ lezoꞌ ñèe daa. No axta mdaꞌ xganꞌpeꞌ Diox lugar mquée yalguth loo xganꞌpeꞌ Diox por cón chenen.
\v 21 Por cona, Pedr, indlyasten cà dizen no tèꞌben conꞌ coꞌ nac ryethe conꞌ ndac cheꞌn Diox coꞌ angmbli Diox loo mèn par ngaben leꞌ Diox tyal yòo mèn loo cón cheꞌn Diox par gàc mèn mèn nalì no gàc mèn mèn nambìi loo Diox ante por mbli mèn preb ndubdiꞌs mèn xal mbez diꞌs coꞌ ñibeꞌ ley coꞌ mxoꞌf Moisés loo mèn. Tac cheleꞌ daa tataa gab, leꞌ sya, yende cón ntac nguth Crist por cón cheꞌn mèn, ¿léꞌ?
\p Ale tataa mod mbyoo non Pedr tiempa. Thìba conꞌ ndxèꞌ.
\c 3
\s Pab ngue toodiꞌs no mèna cón cheꞌn ley coꞌ mxoꞌf Moisés loo mèn nación Israel no cón cheꞌn mod coꞌ ndxàp taamas mèn yalxlaꞌs loo Jesús par lyáꞌ mèn loo conꞌ ryes.
\p
\v 1 Leꞌ tediba na, guꞌ coꞌ nac mèn gulàaz cheꞌn làaz mèn galas, susqueꞌ tont guꞌ no susqueꞌ naad guꞌ no nguud guꞌ, ndyaquen. ¿Chó conꞌ mbluꞌ mèn loo guꞌ par ndoo xàꞌ lezoꞌ guꞌ par neꞌtolode ndubdiꞌs guꞌ loo diꞌs ndac coꞌ nac diꞌs ndac cheꞌn Diox coꞌ nac lìcqueꞌ, àꞌ? Coꞌseꞌ mblon yalbàn loo guꞌ, nambìi mdan cuent loo guꞌ no mbluꞌen loo guꞌ cón cheꞌn xá mod yub Jesucrist mquée loo cruz por cón cheꞌn mèn.
\v 2 Ndlyazen niin thìb conꞌ loo guꞌ, mèn coꞌ nac mèn gulàaz cheꞌn làaz mèn galas no lyazen càb guꞌ loon: ¿Chéꞌ ngulàa Xpii Natúꞌ cheꞌn Diox loo guꞌ por mbli guꞌ preb li guꞌ conꞌ xal mnibeꞌ ley coꞌ mxoꞌf Moisés loo mèn o chéꞌ ngulàa Xpii Natúꞌ loo guꞌ por ngolaꞌs guꞌ diꞌs coꞌ mdan cuent cón cheꞌn Crist loo guꞌ, càꞌ?
\v 3 ¿Xá mod susqueꞌ mblaꞌ guꞌ ngòc tont guꞌ, yey? Con que guꞌ ngòoleꞌ loo cón cheꞌn Diox por cón cheꞌn conꞌ coꞌ mnibeꞌ Xpii Natúꞌ loo guꞌ, ¿léꞌ? no nalleꞌ, ¿chéꞌ ngue li guꞌ cuent no chéꞌ ndenꞌ guꞌ huen naca tolo li guꞌ ryethe conꞌ coꞌ ndlyaꞌs Diox li guꞌ, no chéꞌ, lìcqueꞌ, taꞌ guꞌ cuent no téꞌth guꞌ par ndyubdiꞌs guꞌ coꞌ huenlequeꞌ loo Diox ante por ndxòn guꞌ ro tedib mèn coꞌ ñibeꞌ loo guꞌ par gàc circuncidar guꞌ no li guꞌ taamas conꞌ coꞌ ñibeꞌ mèn li guꞌ, càꞌ? Yende xàa.
\v 4 ¿Chéꞌ ngue li guꞌ cuent anxleꞌ ngòc rye conꞌ ryes coꞌ mxactìi guꞌ por cón cheꞌn Crist, càꞌ? ¿Chéꞌ yende cón mxac guꞌ mtéꞌth guꞌ cón cheꞌn Diox par ngòc conꞌ ndac loo guꞌ láth mxactìi guꞌ, càꞌ? Oj, chéꞌ coꞌ càb coꞌ mxactìi guꞌa tolo téꞌth guꞌ no tolo tyubdiꞌs guꞌ loo cón cheꞌn Crist taandxep. Huen.
\v 5 Coꞌseꞌ mblàa Diox Xpii Natúꞌ cheꞌn Diox loo guꞌ no mbli Diox huax yalguzyeꞌ làth guꞌ, ¿chonon mbli Diox conꞌa, àꞌ? Neꞌnglide Diox conꞌa loo guꞌ tac mbli guꞌ preb mbli guꞌ conꞌ xal ñibeꞌ diꞌs coꞌ ndub loo ley coꞌ mxoꞌf Moisés loo mèn póla, ¿léꞌ? Ndxeꞌlequeꞌ, Diox mbli conꞌa loo guꞌ tac ngolaꞌs guꞌ loo diꞌs ndac coꞌ mbìnleꞌ guꞌ cón cheꞌn Crist par ngolaꞌs guꞌ loo Crist.
\p
\v 6 Abraham, coꞌ mbloj msiꞌ bin póla, Abraham ngolaꞌsqueꞌ diꞌs coꞌ ndxab Diox li Diox loo Abraham yiloa. Por cona, Diox mteche mtexyath xtùuz Diox no lezoꞌ Diox. No mblo Diox cuent tyalqueꞌ Diox no taꞌqueꞌ Diox lugar yòo Abraham loo cón cheꞌn Diox par gàc Abraham mèn nalì no mèn nambìi loo Diox ante por ngolaꞌs Abraham loo Diox tataa.
\v 7 Por cona, ndxàalqueꞌ taꞌ guꞌ cuent no nonqueꞌ guꞌ leꞌ mèn coꞌ, lìcqueꞌ, nac binpeꞌ Abraham, mèna nac mèn coꞌ ndxelaꞌs loo Crist no loo cón cheꞌn Crist.
\v 8 Lomisqueꞌ ne, loo libr coꞌ nac xtiꞌs Diox ndub diꞌs coꞌ mbluꞌ loo mèn póla leꞌ Diox tyalqueꞌ no taꞌqueꞌ Diox lugar yòo mèn coꞌ inacte mèn nación Israel loo cón cheꞌn Diox. No gàc mèn coꞌ inacte mèn nación Israel mèn nalì no mèn nambìi loo Diox ante por yilaꞌs mèna loo conꞌ coꞌ ndxab Diox loo mèna. Por cona, mdaꞌ Diox cuent loo Abraham cón cheꞌn diꞌs ndac ndxèꞌ ndooreꞌ. Ndxab Diox loo Abraham: Daa li huen ya mèn cheꞌn rye nación por cón cheꞌn lùu, Abraham.
\v 9 Por cona, ngue niin loo guꞌ: Leꞌ ryete mèn coꞌ ndxelaꞌs loo Diox por cón cheꞌn Jesucrist leꞌn tiemp ndxèꞌ, loo ryete mèna Diox ndli huen nda mèna no ndxàc conꞌ ndac loo mèna. No lalqueꞌ ndxàca loo mèna nalleꞌ xalqueꞌ ngòca loo Abraham tac Abraham ngolaꞌsqueꞌ diꞌs coꞌ mcàbgòn Diox li Diox loo Abraham.
\p
\v 10 Ngue niin conꞌ ndxèꞌ loo guꞌ, ne: Mèn coꞌ más ndxàp yalxlaꞌs nac mèna mèn nalì no mèn nambìi loo Diox por ante mbli mèna preb li mèna xal mnibeꞌ ley coꞌ mxoꞌf Moisés loo mèn, no neꞌngácte mèna ngli mèna no neꞌngdubdiꞌste mèna xal ñibeꞌ ley coꞌ mxoꞌf Moisés loo mèn, ale ndxeꞌlequeꞌ, thidtenequeꞌ mèndèe mèna loo Diox tac nec thìb mod no nec tedib mod yende mod li mèn conꞌa. Tac loo libr coꞌ nac xtiꞌs Diox ndub diꞌs coꞌ mbez taandxèꞌ: Ryete mèn coꞌ indlide no coꞌ indubdiꞌste loo ryethe conꞌ xal nac rye diꞌs coꞌ ndub loo libr coꞌ nac ley coꞌ mxoꞌf Moisés loo mèn, thidtenequeꞌ mèndèe mèna loo Diox par ryo xaꞌ mèna loo Diox thidtene yiloa.
\v 11 Ndaꞌqueꞌ naꞌ cuent no nonqueꞌ naꞌ leꞌ Diox neꞌtaꞌde lugar no neꞌtyalte Diox yòo mèn loo cón cheꞌn Diox par gàc mèn mèn nalì no mèn nambìi loo Diox ante por mbli mèna preb li mèna xal nac diꞌs coꞌ ñibeꞌ ley coꞌ mxoꞌf Moisés loo mèn. Tac loo libr coꞌ nac xtiꞌs Diox ndub diꞌs coꞌ mbez: Leꞌ mèn coꞌ tyal Diox no coꞌ taꞌ Diox lugar yòo mèna loo cón cheꞌn Diox par gàc mèna mèn nalì no mèn nambìi loo Diox, mèna ban no Diox thidtene yiloa ante por ngolaꞌs mèna loo cón cheꞌn Jesucrist no loo Jesucrist.
\v 12 Per cheleꞌ mèn ndyubdiꞌs diꞌs coꞌ ndluꞌ ley coꞌ mxoꞌf Moisés loo mèn, cón cheꞌn leya incàbte leꞌ mèn yilaꞌs loo Diox. No neꞌ neꞌ inac leya coꞌ ndli par ndxàp mèn yalxlaꞌs loo Diox. Ndxeꞌlequeꞌ, diꞌs coꞌ ndub loo libr coꞌ nac xtiꞌs Diox, diꞌsa mbez: Mèn coꞌ ndli no mèn coꞌ ntaa ryethe conꞌ xal ñibeꞌ diꞌs coꞌ ndub loo ley coꞌ mxoꞌf Moisés loo mèn, mèna yòo ban no Diox thidtene cheleꞌ mèn, lìcqueꞌ, li conꞌa. Per ¡pà li mèn tataa!
\p
\v 13 Per nalleꞌ, Crist mteláꞌleꞌ naꞌ loo ryethe conꞌ yeꞌrsinꞌ coꞌ ncàb loo mèn por neꞌndubdiꞌste mèn loo ryethe conꞌ coꞌ ñibeꞌ diꞌs coꞌ nac leya par li mèna, diꞌs coꞌ neꞌgácte mèn li mèn, por derech. Huiꞌ guꞌ nexa. Ngòcla tataa loo naꞌ tac leꞌleꞌ mbli Diox ngòc Crist thìb mbiꞌdèe no thìb mbiꞌ yeꞌrsinꞌtúb coꞌseꞌ nguth Crist loo cruz por cón cheꞌn xquin naꞌ no xtol naꞌ. Tac loo libr coꞌ nac xtiꞌs Diox ndub diꞌs coꞌ mbez taandxèꞌ: Mbiꞌdèe no thìb mbiꞌ yeꞌrsinꞌtúb nac chol mbiꞌ coꞌ nquée loo thìb yaa coꞌ nac thìb cruz coꞌteꞌ ndxuth mèn xtàa mèn por conꞌ yeꞌrsinꞌ coꞌ mbli mbiꞌ.
\v 14 Ngòcqueꞌ yaltìia loo Crist par mdubqueꞌ diꞌs ngòc conꞌ ndac coꞌ mcàbgòn Diox angli Diox loo mèn dib athu loo izlyoꞌ, mèn coꞌ inacte mèn nación Israel, por cón cheꞌn Abraham coꞌ mbloj msiꞌ bin loo izlyoꞌ póla. Mbli Diox conꞌa loo mèna por cón cheꞌn Crist Jesús. Ngòc conꞌa loo Crist, ne, par mdubqueꞌ diꞌs coꞌ ndxab Diox leꞌ Diox làa Xpii Natúꞌ loo rye mèn coꞌ gàp yalxlaꞌs loo Diox no coꞌ yilaꞌs loo Diox por cón cheꞌn Crist.
\s Cón cheꞌn ley coꞌ mxoꞌf Moisés loo mèn nación Israel no cón cheꞌn conꞌ coꞌ mcàbgòn Diox loo Abraham li Diox loo Abraham.
\p
\v 15 Mèn huesen por cón cheꞌn Crist, nde niin thìb conꞌ loo guꞌ xal ndxàca loo mèn loo izlyoꞌ ndxèꞌ: Coꞌseꞌ ndli thìb mbiꞌ thìb conveñ o coꞌseꞌ ndli thìb mbiꞌ testar no ngo mbiꞌ firm yeꞌsa, leꞌ sya, nec thìb mod no nec tedib mod yende chó mèn gác tonꞌ diꞌsa no yende chó mèn gác tolo ziꞌf taamas diꞌs loo yeꞌsa.
\v 16 No nalleꞌ tolo niin conꞌ ndxèꞌ loo guꞌ, ne: Ngòcleꞌ no mdyaaleꞌ conꞌ coꞌ mcàbgòn Diox loo Abraham gàc loo Abraham no loo bin cheꞌn Abraham coꞌ ngòc thìb mbiꞌ coꞌ mbiꞌth yáal loo izlyoꞌ. Imbezte loo libr coꞌ nac xtiꞌs Diox cón cheꞌn ryete mèn coꞌ nac bin cheꞌn Abraham, coꞌ nee diꞌs, coꞌ nac huax bin Abraham. Ndxeꞌlequeꞌ, diꞌs mbez loo mèn no ndluꞌ diꞌs loo mèn cón cheꞌn thidte mbiꞌ coꞌ nac bin Abraham. Pues diꞌs ndxèꞌ nee diꞌs xaꞌ coꞌ nac bin Abrahama nac Crist.
\v 17 Conꞌ coꞌ ngue niin loo guꞌ nac conꞌ ndxèꞌ: Diox mbli thìb conveñ con Abraham. No mbli nèe Diox conveña xalqueꞌ ndli nèe mèn thìb conveñ. Ngolo nguriꞌth thap ayo nzo gal psiꞌ línꞌ ngòc conꞌa, mxoꞌf Moisés ley loo mèn. Por cona, leya neꞌngácte ngtonꞌ cón cheꞌn conveñ coꞌ mbli Diox con Abraham. Neꞌ neꞌ ngác ley li ley leꞌ conꞌ coꞌ mcàbgòn Diox loo Abraham li Diox loo Abraham ngàc thìb conꞌ coꞌ yende cón ntac.
\v 18 No cheleꞌi ngo mod ngàc leꞌ Diox teláꞌ mèn loo conꞌ ryes ante por cón cheꞌn ley coꞌ mxoꞌf Moisés loo mèn, coꞌ nee diꞌs, ante por mbli mèn preb li mèn conꞌa, leꞌ sya, yende mod ngàc leꞌ Diox teláꞌ mèn anxleꞌ loo conꞌ ryes xalqueꞌ mcàbgòn Diox li Diox thìb conꞌ anxleꞌ loo Abraham. Per Diox, lìcqueꞌ, nteláꞌ mèn anxleꞌ loo conꞌ ryes xal mcàbgòn Diox loo Abraham li Diox.
\p
\v 19 ¿Par cón mbli sirv ley coꞌ mxoꞌf Moisés loo mèn, sya? Pues mxoꞌf Moisés leya loo mèn par luꞌ ley loo mèn no par taꞌ mèn cuent no par non mèn leꞌ mèn ncuaꞌn xquin mèn no ncuaꞌn mèn xtol mèn. No maste mnibeꞌ leya loo mèn leꞌn ndxep tiemp axtaqueꞌ mbiꞌth Crist coꞌ nde bin cheꞌn mbiꞌ coꞌ lèe Abraham coꞌ ngue tan cuent loo guꞌ ndxèꞌ. Cón cheꞌn Crist ngòc conꞌ coꞌ mcàbgòn Diox loo Abraham li Diox loo Abraham no loo Crist coꞌ ngòc bin Abraham. Pues ley coꞌ mxoꞌf Moisés loo mèn tiempa, diꞌs coꞌ ndub loo leya ngòc diꞌs coꞌ gunii thìb angl loo Moisés. Leꞌ Moisés na, ngòc thìb mbiꞌ coꞌ mdoodiꞌs no Diox por cón cheꞌn mèn nación Israel. Mdoodiꞌs no Moisés mèn nación Israel xal gunii Diox loo Moisés, ne.
\v 20 Mèn coꞌ nteriꞌth diꞌs, nteriꞌth mèn diꞌsa loo chop ned mèn xal mbli Moisés loo Diox no loo mèn nación Israel. Per ndxeꞌlequeꞌ, coꞌseꞌ mcàbgòn Diox li Diox thìb conꞌ loo Abraham, neꞌncuaꞌnte Diox mèn coꞌ mteriꞌth diꞌs loo Abraham. Leque yub Diox coꞌ nac thidte Diox, Diox mcàbgòn loo Abraham liqueꞌ Diox gàc conꞌa loo Abraham.
\s Diꞌs ndxèꞌ ndluꞌ chonon mtanꞌ Diox diꞌs coꞌ nac ley coꞌ mxoꞌf Moisés loo mèn par li mèna.
\p
\v 21 ¡Aa mèn coꞌ nac mèn gulàaz cheꞌn làaz mèn galas! ¿Chéꞌ ngue li guꞌ cuent ilalte nac conꞌ coꞌ mblyaꞌs Diox ngàc loo mèn por cón cheꞌn ley coꞌ mxoꞌf Moisés loo mèn no conꞌ coꞌ gàc loo mèn ante por ngolaꞌs mèn loo conꞌ coꞌ mcàbgòn Diox li Diox loo mèn, càꞌ? Tyèꞌ. Lalqueꞌ naca, yey. Per huiꞌ guꞌ nexa. Chele Diox mxoꞌf thìb ley loo mèn xal ndli guꞌ cuent, thìb ley coꞌ ndli par yòo ban no mèn Diox thidtene ante por ndubdiꞌs mèn loo ryethe conꞌ coꞌ ñibeꞌ leya loo mèn, sya, cheleꞌ mèn ndli conꞌ coꞌ mnibeꞌ ley par ngli mèna ngàc mèna mèn nalì no mèn nambìi loo Diox ante por mbli mèna conꞌ coꞌ mnibeꞌ ley loo mèna par li mèna, huen ngàca loo guꞌ, sya, xàa.
\v 22 Per huiꞌ guꞌ xal ndub diꞌs loo libr coꞌ nac xtiꞌs Diox. Diꞌsa mbez loo naꞌ taandxèꞌ:
\p ―Diox mbluꞌ por cón cheꞌn leya leꞌ ryete mèn coꞌ nziriꞌ loo izlyoꞌ, mèna natedóꞌ loo conꞌ yeꞌrsinꞌ por mod no costumbr coꞌ ndxàp mèna coꞌ ncàb ncuaꞌn mèn xquin mèn no xtol mèn. No mbluꞌ Diox loo mèn por cón cheꞌn leya nac mèn mèn yeꞌrsinꞌ no nac mèn mèn coꞌ ndxàp xquin no xtol loo Diox par tataa mod gàca leꞌ mèn coꞌ tyal yilaꞌs loo Jesucrist no gàp mèn yalxlaꞌs loo Jesucrist, gàc mèna mèn nalì no mèn nambìi loo Diox xal mcàbgòn Diox li Diox loo mèn.
\p
\v 23 Ndooreꞌ coꞌseꞌ yiꞌth Jesucrist par taꞌ mèn cuent no par non mèn nzoqueꞌ mod yòo mèn loo cón cheꞌn Diox ante por yilaꞌs mèn no gàp mèn yalxlaꞌs loo Jesucrist, tiempa axta arid nèe ngòc conꞌdèe cón cheꞌn ley coꞌ mxoꞌf Moisés loo mèn. Tac natedóꞌ naꞌ loo leya tiempa xal thìb pres coꞌ yende mod xonꞌ leziꞌf. Tiempa, ngure bed naꞌ axta zin tiemp coꞌseꞌ ryo xoꞌf xá mod yilaꞌs mèn no gàp mèn yalxlaꞌs loo Jesucrist par lyáꞌ mèn loo conꞌ ryes por cón cheꞌn Jesucrist par tataa mod yòo mèn loo cón cheꞌn Diox.
\v 24 Por cona, ngue niin loo guꞌ: Leya ngòc xal thìb criadgot coꞌ nquenap no coꞌ nqueno myenꞌ bix par gàp myenꞌ mod. Mquenap leya naꞌ xal mquenap criadgot myenꞌ bix par neꞌncuaꞌnte naꞌ xquin naꞌ no xtol naꞌ xal mcuaꞌn naꞌ xquin naꞌ no xtol naꞌ coꞌ ngòc thìb mod coꞌ ngòp naꞌ tiempa axta coꞌseꞌ ngòc tiemp coꞌseꞌ mbiꞌth Crist. Crist mbli par mzyeꞌ mod cheꞌn naꞌ par neꞌncuaꞌnte naꞌ xquin naꞌ no xtol naꞌ par gàca coꞌseꞌ beꞌ ngòc naꞌ ngolo ngolaꞌs loo Crist, sya, mdyal Diox no mdaꞌ Diox lugar yòo mèn loo cón cheꞌn Diox par gàc mèn mèn nalì no mèn nambìi loo Diox por cón cheꞌn Crist.
\v 25 Per nalleꞌ, mzinleꞌ tiempa coꞌseꞌ tlo mèn yòo mèn loo cón cheꞌn Diox par gàc mèn mèn nalì no mèn nambìi loo Diox ante por yilaꞌs mèn loo Jesucrist. Conꞌa ndli ya inzode naꞌ xànꞌ yalnibeꞌ cheꞌn ley coꞌ mxoꞌf Moisés loo mèn coꞌ ngòc xal myenꞌ bix coꞌ ngue quenap no ngue queno criadgot.
\p
\v 26 Por thidte ngòc guꞌ con Crist Jesús nac guꞌ xinꞌpeꞌ Diox. Ngòc conꞌa loo guꞌ tac ngolaꞌsqueꞌ guꞌ loo Diox por cón cheꞌn Crist.
\v 27 Ryete guꞌ coꞌ thidte ngòc loo Crist, ngòca loo guꞌ xal coꞌseꞌ ndxàc bautizar mèn leꞌn nít. Conꞌa nee diꞌs Diox mbli leꞌ guꞌ ndaꞌqueꞌ lugar leꞌ thidte Crist ñibeꞌpeꞌ loo guꞌ. No ndli guꞌ ante coꞌ nee lezoꞌ Crist.
\v 28 No nalleꞌ por cón cheꞌn Crist, yende chó mport nzo lezoꞌ Diox aa guneei chó mèn nación nac guꞌ. Loo cón cheꞌn Diox ya inacte guꞌ loo Crist xal mèn nación Israel ó xal mèn chol nación coꞌ inacte mèn nación Israel. Neꞌ neꞌ nac guꞌ xal moz yèe loo thìb patrón ó xal mèn coꞌ yende chó ñii loo. Neꞌ neꞌ nac guꞌ xal mènbiꞌ o xal mèngot. Tac mèn coꞌ nqueltàa loo Crist thidte ndxàc ryete mèna loo Crist.
\v 29 No cheleꞌ guꞌ, lìcqueꞌ, nac mèn coꞌ nqueltàapeꞌ loo cón cheꞌn Crist no ngòoqueꞌ guꞌ loo cón cheꞌn Crist, leꞌ sya, Diox ngo cuent leꞌ guꞌ nacpeꞌ mèn bin Abraham. Tataa mod gàc cheꞌn guꞌ no gàc loo guꞌ ryethe conꞌ ndac por nzo guꞌ loo cón cheꞌn Crist, coꞌ mcàbgòn Diox loo Abraham no loo bin Abraham li Diox loo Abraham no loo bin Abraham.
\c 4
\p
\v 1 Conꞌ coꞌ mblyazen niin loo guꞌ con diꞌs coꞌ ngolo guniin loo guꞌa nac conꞌ ndxèꞌ: Thìb mbed coꞌ nac xganꞌ thìb gundan coꞌ ndxàp cheꞌn, mbeda yanꞌ no herens cheꞌn xud mbed, ¿léꞌ? Per láth ndoo xèn mbed, lalqueꞌ nac mbed xal thìb moz liz xud mbed.
\v 2 No láth ndoo roo mbed no ndoo xèn mbed, nzo thìb criadgot coꞌ nquenap mbed. No ndxanꞌ mbed cón cheꞌn criada axta ryoo mbed axta zin huiz taꞌ xud mbed herens coꞌ gac cheꞌn mbed càa mbed.
\v 3 Tataa ndxàc conꞌ loo naꞌ, ne, dib lal coꞌseꞌ ngòc naꞌ xal myenꞌ bix, coꞌ nee diꞌs, ndooreꞌ yilaꞌs naꞌ loo Crist. Conꞌ coꞌ ngue niin loo guꞌ ndxèꞌ nac conꞌ coꞌ mbli naꞌ tiempa: Mbli naꞌ coꞌ nac cón cheꞌn xab izlyoꞌ. No mbli naꞌ xal ngòc mod yeꞌrsinꞌ cheꞌn mèn. No mbli naꞌi xalqueꞌ mnibeꞌ mèn loo naꞌ par li naꞌi, tac mbez mèna conꞌ coꞌ ndli naꞌa nac cón cheꞌn Diox.
\v 4 Per coꞌseꞌ mdyaa huiz no tiempa, Diox mtelꞌ xganꞌ Diox loo izlyoꞌ. No coꞌseꞌ mbiꞌth xganꞌ Diox loo izlyoꞌ, mbli Diox leꞌ thìb mzaꞌyòn mxan xganꞌ Diox. No ale ngòc xganꞌ Diox mèn bin cheꞌn mèn nación Israel. Loo mèna mxoꞌf Moisés ley. No mastaleꞌ nac Jesucrist xganꞌ Diox, mdubdiꞌsqueꞌ Jesucrist xalqueꞌ mnibeꞌ ley coꞌ mxoꞌf Moisés loo mèn nación Israel.
\v 5 Tataa mod mbiꞌth Crist loo izlyoꞌ par teláꞌ Crist naꞌ loo conꞌ ryes, naꞌ coꞌ ngòo xànꞌ yalnibeꞌ cheꞌn ley coꞌ mxoꞌf Moisés loo mèn par tataa mod mdyal Diox no mdaꞌ Diox lugar loo naꞌ yòo naꞌ loo cón cheꞌn Diox xal xinꞌ Diox.
\p
\v 6 Por nac guꞌ, lìcqueꞌ, xinꞌ Diox, Diox mbli ngulàa Xpii Natúꞌ cheꞌn Diox leꞌn lezoꞌ guꞌ no leꞌn xtùuz guꞌ. Xpiia ndli mbez guꞌ loo Diox: Diox, Uꞌ coꞌ nac xud nuꞌ, coꞌseꞌ mbez guꞌ Diox.
\v 7 Por cona, guꞌ nacpeꞌ xinꞌ Diox. No ya inacte guꞌ xal moz loo cón cheꞌn xab izlyoꞌ ndxèꞌ. No por nac guꞌ xinꞌ Diox, Diox taꞌ lugar no tyal Diox yanꞌ no guꞌ ryethe conꞌ ndac cheꞌn Diox por cón cheꞌn Crist.
\s Pab ndyóo por cón cheꞌn mèn coꞌ ndxelaꞌs loo Jesucrist no loo cón cheꞌn Jesucrist.
\p
\v 8 Póla, ndooreꞌ coꞌseꞌ tarte yilaꞌs guꞌ no coꞌseꞌ tarte taꞌ guꞌ cuent cón cheꞌn Diox por cón cheꞌn Crist, ngòc guꞌ xal moz par mbli guꞌ sirv loo chol conꞌ coꞌ mbez mèn nac diox. Per inacte conꞌa merpeꞌ, lìcpeꞌ Diox.
\v 9 Per com leꞌ guꞌ más ndaꞌleꞌ cuent cón cheꞌn Diox nalleꞌ, ¿léꞌ?, no ndlibeꞌ guꞌ Diox, o más huen niin loo guꞌ leꞌ Diox ngoleꞌ cuent nac guꞌ mèn coꞌ nzoleꞌ loo cón cheꞌn Diox, ¿xá mod ndlyaꞌs guꞌ ale bere guꞌ, li guꞌ xalqueꞌ ngòc mod coꞌ yende cón ntac no coꞌ yende cón li guꞌ gan? Ale, mbere guꞌ, ngue li guꞌ conꞌa. No ale ndxàc guꞌ xal moz loo conꞌa.
\v 10 Cona nee diꞌs ale tatabeꞌ nquenap guꞌ guꞌ loo huiz coꞌ mbez guꞌ nac huiz roo coꞌseꞌ ndxáal lni cheꞌn chol mdoꞌ. Ale nxyoꞌf ndelequeꞌ lezoꞌ guꞌ ndxeꞌ guꞌ cuent cón cheꞌn chol huiz, cón cheꞌn mbeꞌ, no cón cheꞌn línꞌ, ne.
\v 11 Anzeꞌf nde no lezon tac zinꞌ coꞌ ngue xoꞌf zinꞌen loo guꞌ cón cheꞌn diꞌs ndac cheꞌn Diox, ale ndyaquen anxleꞌ mxoꞌf zinꞌen zinꞌa loo guꞌ.
\p
\v 12 Guꞌ coꞌ nac mèn huesen por cón cheꞌn Jesucrist, ñaꞌben loo guꞌ: Gòc guꞌ xal nac daa, yey, coꞌ nee diꞌs, daa indlide cas no neꞌ neꞌ indyóon lin chol costumbr, no loo nec thìb conꞌ coꞌ nac cón cheꞌn ley coꞌ mxoꞌf Moisés loo mèn coꞌ ndli ncà daa loo cón cheꞌn Diox. Más de cona, guꞌ ndaꞌqueꞌ cuent xal ngòc daa thìb cuaꞌa; xá mod mque teeꞌen loo mèn gulàaz daa coꞌ ngòc mèn nación Israel, ¿léꞌ? Per nase mbláꞌyan ryethe conꞌa. No ngòc daa xalqueꞌ nac guꞌ coꞌ inacte mèn nación Israel coꞌ indxòode loo chol costumbr nalleꞌ. Lìcqueꞌ, mdenꞌen leꞌ guꞌ yende cón mbli loon coꞌseꞌ mbalen. Ngon làth guꞌ ndooreꞌ.
\v 13 Guꞌ ndaꞌqueꞌ cuent coꞌ huenlequeꞌ, coꞌseꞌ nerlequeꞌ vez mblon yalbàn cón cheꞌn diꞌs ndac cheꞌn Diox coꞌ ndluꞌ xá mod lyáꞌ mèn loo conꞌ ryes loo guꞌ, mblina tac mquin mbyanꞌ daa làth guꞌ tac nayíiz daa hora.
\v 14 No yíiz coꞌ mque nona ngòc thìb preb loo guꞌ par ñeeneꞌ chéꞌ tli guꞌ cas daa no ñeeneꞌ chéꞌ xec guꞌ con daa. Per ¿chéꞌ por nayíiz daa, neꞌnglide guꞌ cas daa, càꞌ? Yende xàa. Guꞌ mbliqueꞌ cas daa. Neꞌngoꞌ toode guꞌ daa thìb lad. Mbliqueꞌ guꞌ cas daa. Más de cona, coꞌseꞌ mzin daa loo guꞌ, anzeꞌf mdyuꞌ daa loo guꞌ xalqueꞌ thìb angl cheꞌn Diox. No ale mdenꞌ guꞌ no mxac guꞌ casqueꞌ ngòc daa xal yub Jesucrist loo guꞌ.
\v 15 ¿Máa gust coꞌ ngòp guꞌ con daa nalleꞌ, sya? Tac coꞌseꞌ mbalen loo guꞌa, daa mdaꞌ cuent cón cheꞌn guꞌ leꞌ guꞌ ndxab loo xtàa guꞌ: Ngàc ngudloo naꞌ ¿cón ngàc ngudloo naꞌ? Taꞌ naꞌ ngudloo naꞌ càa prob mbiꞌ baꞌ, cara.
\v 16 Per nalleꞌ, ¿chéꞌ ngue li guꞌ cuent leꞌ daa ngòc thìb ngolo ngolaꞌs cheꞌn guꞌ loo guꞌ ante por ngue niin conꞌ coꞌ nac conꞌ lìcpeꞌ loo guꞌ xal nac mod coꞌ nzi tee ban guꞌ nalleꞌ, càꞌ? Yende xàa.
\p
\v 17 Mèn coꞌ ngue cuaꞌn mod, coꞌ nac mèn coꞌ ndlyaꞌs coꞌ xàꞌ guꞌ loo cón cheꞌn Jesucrist, mèna ndluꞌ loo guꞌ leꞌ mèna ndlyaꞌs gàc conꞌ ndac loo guꞌ. Per indlide mèna conꞌa con thidte yéc mèna no con thidte lezoꞌ mèna par, lìcqueꞌ, càba conꞌ ndac loo guꞌ. Ndxeꞌlequeꞌ, conꞌ coꞌ ngue li mèna nac: Ale ndlyaꞌs mèna coꞌ xàꞌ mèna guꞌ loo nuꞌ par más yòo yéc guꞌ loo cón cheꞌn mèna no yòo guꞌ lad cheꞌn mèna.
\v 18 Huenqueꞌ naca yòo yéc mèn loo cón cheꞌn tedib mèn. Per, oj, chéꞌ coꞌ càba conꞌ ndac loo thìb mèn no loo tedib mèn. No, oj, chéꞌ coꞌ li mèna dib nzo yéc mèn no dib nzo lezoꞌ mèna con xtàa mèn, huen. No ndlyazen tolo li mèna conꞌ ndac loo guꞌ thidtene, que nzo non guꞌ, que yende daa loo guꞌ.
\v 19 ¡Aa, mèn gulàaz coꞌ nac cheꞌn làaz mèn galas coꞌ nac xal xinꞌen! Axta leꞌn lezon ndlyàa thìb yalnè coꞌ ndenꞌen por cón cheꞌn guꞌ xal coꞌseꞌ nquée yoꞌf lezoꞌ thìb xaꞌgot coꞌ ndub tan xinꞌ. No ndenꞌen toloqueꞌ gàc yaltìi ndxèꞌ loon por cón cheꞌn guꞌ axtaqueꞌ ñeen huen huen nzi taꞌ guꞌ cuent no nzi téꞌth guꞌ no nzi ndubdiꞌs guꞌ loo cón cheꞌn Crist no axtaqueꞌ gàc guꞌ mèn coꞌ nac xalqueꞌ nac Crist.
\v 20 Oj, chéꞌ coꞌ nzo mod nzo non guꞌ par nedrèꞌ, huen, par gác daa tyoodiz non guꞌ tedib mod coꞌ inacte mod xal ngue queꞌen yeꞌs ndxèꞌ loo guꞌ. Tac axta neꞌ neꞌ neen xá mod tolo lin xtùuz cón cheꞌn guꞌ.
\s Pab mbez leꞌ chop xaꞌgot coꞌ lèe Agar no Sar nac xal thìb muestr coꞌ ndluꞌ cón cheꞌn mod xàꞌ coꞌ ndxelaꞌs chop ned mèn cón cheꞌn Diox.
\p
\v 21 Guꞌ coꞌ mbere ndlyaꞌs li xal ñibeꞌ ley coꞌ mxoꞌf Moisés loo mèn, ndlyazen ñee guꞌ loon: ¿Chéꞌ tarte gòn guꞌ no tenꞌ guꞌ cón mbez diꞌs coꞌ ndub loo ley coꞌ mxoꞌf Moisés loo mèna, càꞌ? Diꞌsdèe nac coꞌ ñibeꞌ leya loo mèn. ¿Xá mod gác guꞌ li guꞌ conꞌa? ¡Pà gác guꞌ li guꞌ conꞌa!
\v 22 Pues diꞌs coꞌ ndub loo libr coꞌ nac xtiꞌs Diox coꞌ nac Testament Gox mbez leꞌ Abraham mque no chop xganꞌ. Thìb mbed ngòc xinꞌ huan Abraham con leque xaꞌgot coꞌ ngòc criad loo Abraham. Leꞌ tedib mbed na, ngòc xinꞌ Abraham por xaꞌgot coꞌ ngòc xinꞌ saꞌlpeꞌ Abraham. No ngòc xinꞌ saꞌl Abraham thìb xaꞌgot coꞌ yende chó mèn ngo coꞌ ngnii loo xaꞌgot Abraham par ñibeꞌ mèn loo xaꞌgot Abraham por ngòc xaꞌ xinꞌ saꞌlpeꞌ Abraham tiempa.
\v 23 Leꞌ mbed coꞌ ngòc xinꞌ xaꞌgot coꞌ ngòc criada ngóol xal nac bin coꞌ ndli bélꞌyòo lad mèn coꞌseꞌ ndxáal mèn loo izlyoꞌ. Per ndxeꞌlequeꞌ, mbed coꞌ ngòc xinꞌ xaꞌgot coꞌ ngòc xinꞌ saꞌlpeꞌ Abraham coꞌ ngòc xaꞌgot rnith no coꞌ ngòc xaꞌgot coꞌ yende chó mèn mbee ncà, mbeda ngóol par ngòcqueꞌ no mdyaaqueꞌ no mdubqueꞌ diꞌs coꞌ mcàbgòn Diox li Diox loo ryop xinꞌ saꞌl Abraham.
\v 24 Conꞌa ngòc thìb muestr o mod coꞌ ndluꞌ cón cheꞌn mod coꞌ ndxelaꞌs mèn loo Diox. Leꞌ ryop xaꞌgota na, ndluꞌ cón cheꞌn chop conveñ. Cón cheꞌn chop conveñ ndxèꞌ nac: Ner conveñ coꞌ mnibeꞌ Diox loo Moisés coꞌ ngòc thìb ley coꞌ mxoꞌf Moisés loo mèn nación Israel. Mèn coꞌ ndlyaꞌs li xal ñibeꞌ ley cheꞌn ner conveñ, mèna nquin tyubdiꞌs xal ñibeꞌ ner conveña xal ndyubdiꞌs thìb moz loo patrón moz. Xaꞌgot coꞌ ngroꞌ lèe Agar ndluꞌ cón cheꞌn ner conveñ tac ngòc xaꞌ criad Abraham no mquin tyubdiꞌs yèe Agar loo mèn guliz Abraham.
\v 25 Diꞌs coꞌ nac diꞌs Agar coꞌ nac lèe xaꞌgota, leque diꞌsa nac diꞌs coꞌ nac diꞌstèe cheꞌn mèn grieg. Diꞌsa nac leque diꞌs coꞌ nac lèe yii Sinaí coꞌ ndub leꞌn nación Arab. Diꞌs coꞌ nac lèe cheꞌn xaꞌgot coꞌ lèe Agar coꞌ ngue niin loo guꞌ ndxèꞌ nee diꞌs nac mèn nación Israel nalleꞌ. Tac nalleꞌ ryethe mèn nación Israel nac xal moz coꞌ, por fuerz, naquinqueꞌ tyubdiꞌs xal ñibeꞌ ley coꞌ mxoꞌf Moisés loo mèn.
\v 26 Mèn nación Israel mbez leꞌ ciuda Jerusalén nac ciudapeꞌ mèna. Per naꞌ mbez leꞌ loo béꞌ nac lizpeꞌ naꞌ no làazpeꞌ naꞌ no xnedpeꞌ naꞌ, coꞌ nee diꞌs, nac xal tedib ciuda Jerusalén coꞌ nac ciudapeꞌ cheꞌn naꞌ. No inquinte li naꞌ huax conꞌ xal ñibeꞌ ley coꞌ mxoꞌf Moisés loo mèn nación Israel par li mèna.
\v 27 Loo libr coꞌ nac xtiꞌs Diox ndub diꞌs coꞌ mbez:
\pi1 Ftaꞌ gust lezoꞌl, xaꞌgot rnith, lùu coꞌ neꞌndante xinꞌ. De gust fxìis yèe, lùu coꞌ thidtene neꞌndante xinꞌ. No neꞌndenꞌtel yalnè par ndan xinꞌl.
\pi1 Tac xaꞌgot coꞌ mbláꞌyaꞌ saꞌl, xaꞌgota que no más xinꞌ coꞌseꞌ bere saꞌl xaꞌ, queltàa saꞌl xaꞌ con xaꞌgota tedib vez. Más que no xaꞌgota xinꞌ xaꞌgota leque xaꞌgot coꞌ thidtenequeꞌ ndyub no saꞌl.
\m Conꞌ ndxèꞌ nee diꞌs más yòo mèn nación Israel loo cón cheꞌn Diox por cón cheꞌn Jesucrist leque ngòo mèn coꞌ nac mèn nación Israel loo cón cheꞌn Diox por mbli mèna preb ndubdiꞌs mèn loo diꞌs coꞌ mnibeꞌ ley coꞌ mxoꞌf Moisés loo mèn par li mèn.
\p
\v 28 Guꞌ coꞌ nac mèn huesen por cón cheꞌn Crist, ngue niin loo guꞌ: Naꞌ nac xal Isaac. Nac naꞌ xinꞌ Diox tac ngolaꞌs naꞌ loo Crist xalqueꞌ ngolaꞌs Abraham loo Diox leꞌ Diox liqueꞌ conꞌ mcàbgòn Diox li Diox loo Abraham.
\v 29 Xalqueꞌ ngòca póla, leꞌ mbed xinꞌ Abraham coꞌ lèe Ismael, coꞌ ngóol xalqueꞌ nac mod coꞌ ndxáal bin mèn coꞌ ndli mèn loo izlyoꞌ, mbed mdub nguꞌs tedib mbed coꞌ lèe Isaac coꞌ ngòc xganpeꞌ Abraham, mbed coꞌ ngóol ante por cón cheꞌn Xpii Natúꞌ. Tataa ndxàca loo naꞌ nalleꞌ leꞌ mèn coꞌ ngue li preb ndubdiꞌs mèna xal ñibeꞌ ley coꞌ mxoꞌf Moisés loo mèn ngue tub nguꞌs naꞌ, ne.
\v 30 Per mastaleꞌ tataa ngòca loo ryop hues xganꞌ Abraham, ¿cón mbez loo libr coꞌ nac xtiꞌs Diox, àꞌ? Leꞌ loo libra mbez:
\pi1 Bloꞌ criadgot coꞌ ngue nol lizl baꞌ con xganꞌ criadgot. Tac mbed coꞌ nac xganꞌ criadgota, yende mod gàc cheꞌn mbed herens con mbed coꞌ nac xganꞌ meegot coꞌ yende chó mèn ñii loo no coꞌ yende chó mèn mbee ncà.
\m
\v 31 Por cona, ngue niin loo guꞌ, mèn coꞌ ndxàc huesen por cón cheꞌn Crist: Ya inacte naꞌ xal xganꞌ meegot coꞌ ngòc criadgot, coꞌ nee diꞌs, nquin li mèn conꞌ coꞌ ñibeꞌ ley coꞌ mxoꞌf Moisés loo mèn. Ndxeꞌlequeꞌ, nac naꞌ xal xganꞌ meegot coꞌ yende chó mèn ñii loo, no coꞌ yende chó mèn mbee mcà, coꞌ nee diꞌs, inquinte li naꞌ conꞌ coꞌ mnibeꞌ ley coꞌ mxoꞌf Moisés loo mèn par li mèna par lyáꞌ naꞌ loo conꞌ ryes.
\c 5
\s Bli nèe guꞌ guꞌ loo cón cheꞌn Crist par gàca loo guꞌ yende chó ñii loo guꞌ no yende chó cuee càꞌ loo guꞌ loo cón cheꞌn Crist.
\p
\v 1 Crist mbli par ya yende chó conꞌ cuee no càꞌ naꞌ par nquin li naꞌ ryethe conꞌ coꞌ ñibeꞌ ley coꞌ mxoꞌf Moisés loo mèn nación Israel. Bli nèe guꞌ guꞌ, tá, loo cón cheꞌn Crist. No ya neꞌtolode bere guꞌ, gàc guꞌ xal moz coꞌ ñibeꞌ patrón loo loo cón cheꞌn leya par li yèe guꞌ ryethe conꞌ coꞌ ñibeꞌ ley.
\p
\v 2 Daa coꞌ lèe Pab, daa ngue nii diꞌs ndxèꞌ loo guꞌ loo cart ndxèꞌ. Bìn guꞌ diꞌs coꞌ ngue niin loo guꞌ ndxèꞌ: Cheleꞌ guꞌ yòo loo yalndxelaꞌs cheꞌn mèn coꞌ ndli circuncisión, leꞌ sya, ya yende cón ntac Crist par guꞌ loo cón cheꞌn Diox.
\v 3 Beren niin loo guꞌ tedib vez: Chol guꞌ coꞌ nac mènbiꞌ coꞌ ndlyaꞌs gàc circuncidar, guꞌ coꞌ ndlyaꞌs gàc circuncidara, naquinqueꞌ li yèe guꞌ ryethe conꞌ xal ñibeꞌ diꞌs coꞌ ndub loo ley coꞌ mxoꞌf Moisés loo mèn par lyáꞌ guꞌ loo conꞌ ryes.
\v 4 Guꞌ coꞌ ndxelaꞌs leꞌ Diox mdyal no mdaꞌ Diox lugar yòo guꞌ loo cón cheꞌn Diox par gàc guꞌ mèn nalì no mèn nambìi loo Diox por ngue li guꞌ xalqueꞌ ñibeꞌ diꞌs coꞌ ndub loo ley coꞌ mxoꞌf Moisés loo mèn, guꞌa mbláꞌyaꞌleꞌ cón cheꞌn Crist. No ngro xàꞌleꞌ guꞌ loo Crist. No indaꞌde guꞌ lugar loo Diox teláꞌ Diox guꞌ loo conꞌ ryes ante por cón cheꞌn Jesucrist.
\v 5 Per por part cón cheꞌn naꞌ, por cón cheꞌn Xpii Natúꞌ no por ngolaꞌs naꞌ loo Crist, nzi queequeꞌ lezoꞌ naꞌ leꞌ Diox tyal yòo ban no naꞌ Diox loo béꞌ yiloa.
\v 6 No nalleꞌ cheleꞌ naꞌ, lìcqueꞌ, thidte ndxàc con Crist Jesús, yende cón ntac no yende cón lii gàc circuncidar naꞌ o neꞌgàcte circuncidar naꞌ. Thidte conꞌ coꞌ más ntac loo naꞌ nac leꞌ naꞌ ndxelaꞌs loo Crist. No cón cheꞌn conꞌ coꞌ ndxelaꞌs naꞌ loo Crist ndli leꞌ naꞌ nqueꞌ lezoꞌ ñèe naꞌ hues xtàa naꞌ.
\p
\v 7 Con que guꞌ huenqueꞌ ngureriꞌ loo cón cheꞌn Crist, ndyaquen, ¿cóxe mbli ya neꞌtolode ndyubdiꞌs guꞌ cón cheꞌn diꞌs ndac coꞌ nac lìcpeꞌ, àꞌ, yey?
\v 8 ¿Chéꞌ ngue li guꞌ cuent leꞌ diꞌs coꞌ mbìn guꞌ por ro mèn coꞌ mbluꞌ guꞌ par ngro xàꞌ guꞌ loo cón cheꞌn Crist nac diꞌs coꞌ, lìcqueꞌ, ngue ñibeꞌ Diox loo guꞌ par li guꞌ, càꞌ? Tyèꞌ. Ndxeꞌlequeꞌ, diꞌs coꞌ mbìn guꞌ nac coꞌ mbli ngroꞌ guꞌ loo cón cheꞌn Diox. Tad Diox nacpeꞌ xaꞌ coꞌ mbrez guꞌ, no coꞌ mblec guꞌ, no coꞌ mblo guꞌ loo cón cheꞌn Crist.
\v 9 Neꞌtaꞌde guꞌ lugar quedìi mèn guꞌ neꞌ por chuꞌth. ¿Chéꞌ indaꞌde guꞌ cuent xal mbez diꞌs coꞌ mbez: Con ndxepte dii levadur ndli ndyoo bes huax coꞌf harin, càꞌ?
\v 10 Daa ndxàp yalxlaꞌs loo Tad Diox por cón cheꞌn guꞌ, ey, leꞌ guꞌ neꞌtolode li xtùuz tedib mod loo xtùuz coꞌ ngue lin xtùuz loo cón cheꞌn Crist. Per na ngue nii loo guꞌ: Leꞌ Diox tetìi mèn coꞌ ndli par ncàba imbee see teede lezoꞌ guꞌ. No yende chó mport nzo lezoꞌ Diox aa guneei chó mèn nac mèna.
\p
\v 11 Leꞌ part cón chenen na, mèn coꞌ nac mèn huesen por cón cheꞌn Crist, cheleꞌ daa beꞌ ngue ñibeꞌ loo mèn par gàc circuncidar chol mèn, neꞌtub nguꞌste mèna daa. Tac cheleꞌ daa tataa ñibeꞌ loo mèn, neꞌtenꞌte mèna diꞌs no axta neꞌ neꞌ yòo xyàn lezoꞌ mèna ñèe mèna daa par tolo tub nguꞌs mèna daa. Per ndxeꞌlequeꞌ, daa mbez loo mèn naquinqueꞌ yilaꞌs mèn loo Crist no loo cón cheꞌn Crist par lyáꞌ mèn loo conꞌ ryes.
\v 12 Per nde niin thìb conꞌ loo guꞌ cón cheꞌn mèn coꞌ ngue li xol loo guꞌ tac mèna ndlyaꞌs gàc circuncidar guꞌ: Oj, chéꞌ coꞌ leque yub mèna choꞌ xlanꞌ mèna thidtene, huen, par thidtene ryo xàꞌ mèna loo cón cheꞌn Diox thidtene.
\p
\v 13 Per guꞌ, mèn gulàaz cheꞌn làaz mèn galas coꞌ nac mèn huesen por cón cheꞌn Crist, Diox mcui guꞌ no mblec Diox guꞌ par yende chó mèn gác cuee cà guꞌ loo cón cheꞌn Diox. Ante nzo thìb conꞌ coꞌ ñibeꞌen loo guꞌ par neꞌlide guꞌi. Indlyasten leꞌ guꞌ ñibeꞌ yéc guꞌ no ñibeꞌ guꞌ lezoꞌ guꞌ par gab guꞌ loo lezoꞌ guꞌ nee guꞌ cón li guꞌ. Leꞌ sya, tataa mod tlo guꞌ li guꞌ chol conꞌ coꞌ neete lezoꞌ guꞌ coꞌ ndryoꞌ ndlyenꞌ lezoꞌ guꞌ par li guꞌ coꞌ gàc conꞌ yeꞌrsinꞌ loo Diox. Más huen, ndlyazen gàc guꞌ mèn coꞌ queꞌ lezoꞌ ñèe hues xtàa guꞌ par tataa mod li guꞌ sirv loo hues xtàa guꞌ chol mod.
\v 14 Cheleꞌ guꞌ li conꞌ coꞌ ngue niin loo guꞌ ndxèꞌ, sya, ngue li guꞌ ryethe conꞌ coꞌ ñibeꞌ ley coꞌ mxoꞌf Moisés loo mèn par li mèn conꞌ ndac. Conꞌa nac: Fqueꞌ lezoꞌ guꞌ gunèe guꞌ hues xtàa guꞌ xalqueꞌ ngue lezoꞌ guꞌ ñèe guꞌ guꞌ.
\v 15 Per ndxeꞌlequeꞌ, cheleꞌ guꞌ ndxàc yinꞌ no ndxàc guꞌ ted, coꞌ nee diꞌs, ndxecloo guꞌ no ndxòo xyàn lezoꞌ guꞌ ñèe guꞌ thìb xtàa guꞌ no tedib xtàa guꞌ, anderhuen guꞌ con xtàa guꞌ, neꞌ yiloa leque guꞌ tezaꞌ guꞌ loo cón cheꞌn Crist.
\s Pab ngue luꞌ loo mèn cón cheꞌn conꞌ coꞌ ndryoꞌ ndlyenꞌ lezoꞌ mèn par li mèn conꞌ yeꞌrsinꞌ no cón cheꞌn mod coꞌ nque tee ban mèn, mèn coꞌ ñibeꞌ Xpii Natúꞌ loo.
\p
\v 16 Conꞌ coꞌ niin loo guꞌ ndxèꞌ, mèn huesen por cón cheꞌn Crist, nac conꞌ ndxèꞌ: Gure ban guꞌ xalqueꞌ ñibeꞌ Xpii Natúꞌ loo guꞌ. Leꞌ sya, tataa mod neꞌtolode li guꞌ xal nac rye conꞌ ndyub yoꞌf lezoꞌ guꞌ coꞌ ndryoꞌ ndlyenꞌ lezoꞌ guꞌ par li guꞌi.
\v 17 Tac rye conꞌ coꞌ ndli par ndyub yoꞌf lezoꞌ mèn par li mèn conꞌ yeꞌrsinꞌ, conꞌa inacte conꞌ coꞌ ñibeꞌ Xpii Natúꞌ cheꞌn Diox loo mèn par li mèn. Lomisqueꞌ ne, conꞌ coꞌ ñibeꞌ Xpii Natúꞌ cheꞌn Diox loo mèn par li mèna, inacte conꞌa conꞌ coꞌ ndli ndyub yoꞌf lezoꞌ mèn par li mèn coꞌ neete lezoꞌ mèn li mèn. Cheleꞌ thìb mèn alithe ndli conꞌ ndryoꞌ ndlyenꞌ lezoꞌ mèn par li mèn conꞌ yeꞌrsinꞌ coꞌ nac coꞌ neete lezoꞌ mèn, leꞌ sya, yende mod li mèna conꞌ coꞌ ñibeꞌ Xpii Natúꞌ cheꞌn Diox loo mèn par li mèn. Per cheleꞌ mèn ndyubdiꞌs loo conꞌ ñibeꞌ Xpii Natúꞌ loo mèn, neꞌlide mèn conꞌ coꞌ ndryoꞌ ndlyenꞌ lezoꞌ mèn li mèn par tataa mod li mèn coꞌ neete lezoꞌ mèn. Por cona, ngue niin loo guꞌ: Yende mod li guꞌ chol conꞌ ndlyaꞌs guꞌ li guꞌ xal coꞌ ndryoꞌ ndlyenꞌ lezoꞌ guꞌ cheleꞌ guꞌ, lìcqueꞌ, ndlyaꞌs tyubdiꞌs guꞌ loo Diox.
\v 18 Per cheleꞌ Xpii Natúꞌ cheꞌn Diox nac xaꞌ coꞌ nzo no guꞌ no, cheleꞌ Xpii Natúꞌ tyoo ner loo guꞌ no tyoo naa Xpii Natúꞌ loo guꞌ, leꞌ sya, ya inquinte tolo li guꞌ conꞌ coꞌ ñibeꞌ diꞌs coꞌ ndub loo ley coꞌ mxoꞌf Moisés loo mèn.
\p
\v 19 Inagànte naca par huiꞌ mèn no par ñaa mèn no par non mèn conꞌ coꞌ ndli mèn, mèn coꞌ nzi tee loo rye loothe conꞌ coꞌ nac cheꞌn xab izlyoꞌ. Mèna ndli yalburrid no ncuaꞌn mèna xinꞌ huan mèn. No ndli mèna xtùuz conꞌ xin no conꞌ cap cón cheꞌn conꞌa axta ale capas mèna ndlyaꞌs mèna li mèna rye loothe conꞌ yeꞌrsinꞌ coꞌ nac huax mod yeꞌrsinꞌ coꞌ ndli ndyub yoꞌf lezoꞌ mèn par li mèn conꞌa.
\v 20 Ndyub xib mèn no nsálꞌ mèn yaꞌ mèn no ncòoꞌ mèn yéc mèn loo chol mdoꞌ coꞌ nac chol gunab. Ndli mèn yalbruj. Ndxòo xyàn lezoꞌ mèn ñèe mèn chol xtàa mèn. Ngyoo mèn con xtàa mèn. No nqueliꞌth mèn cón cheꞌn xtàa mèn. Ndxep vez thìb conꞌ coꞌ iñaade ndli ndxecloo mèn ñèe mèn xtàa mèn. Asendli mèn ndlyath no mèn xtàa mèn ante par ñèe loon mèn que no mèn cheꞌnpeꞌ taamas mèn. Más de cona, ndxàc mèn chop son ned loo chol conꞌ.
\v 21 Ndxàn lezoꞌ mèn ñèe mèn xtàa mèn. Nac mèn mènguth mèn. Nac mèn mènguy. Ndxuhuachoꞌ mèn no ndxuhuaxleꞌ mèn axta plóthe cón cheꞌn xtàa mèn coꞌseꞌ ndxàc chol lni. No ndli mèn taamas conꞌ coꞌ lalqueꞌ nac xal conꞌ ndxèꞌ. Ngue coꞌxen ryete conꞌ ndxèꞌ loo guꞌ nalleꞌ xalqueꞌ mcoꞌxena loo guꞌ ndooreꞌ. Leꞌ rye mèn coꞌ ndli chol conꞌa, neꞌgácte mèna yòo mèna loo cón cheꞌn Diox par ñibeꞌpeꞌ Diox loo mèna.
\p
\v 22 Per ndxeꞌlequeꞌ, rye conꞌ coꞌ ndli Xpii Natúꞌ cheꞌn Diox loo mèn par li mèn nac: Queꞌ lezoꞌ mèn ñèe mèn chol xtàa mèn. Con gust cue mèn no xoꞌf ndeꞌ nxoꞌf ndlaꞌ lezoꞌ mèn. No cue ban mèn rye nda mèn no rye ndyeꞌth mèn làth hues xtàa mèn. Nxec mèn con xtàa mèn no nchaꞌlaꞌs mèn con xtàa mèn. Naziꞌ cue mèn con xtàa mèn. Li mèna conꞌ ndac loo xtàa mèn. Li mèn cumplir conꞌ mbez mèn li mèn loo xtàa mèn no loo Diox.
\v 23 Gàc mèn mèn nadoꞌ, mèn coꞌ indyeꞌste. Gàc mèn mèn coꞌ ndxàp lezoꞌ, no gàc mèn mèn coꞌ ñibeꞌpeꞌ loo lezoꞌ loo ryethe conꞌ ndli mèn. Ryete gobiern coꞌ ñibeꞌ loo rye nación loo dib athu izlyoꞌ ndxòo lezoꞌ ñèe mèn, mèn coꞌ ndli conꞌ ndac ndxèꞌ.
\v 24 Leꞌ rye mèn coꞌ, lìcqueꞌ, nzo loo cón cheꞌn Crist, coꞌ ngolaꞌsqueꞌ loo Crist, conꞌ coꞌ mbli mèn ndooreꞌ coꞌ ngòc conꞌ yeꞌrsinꞌ coꞌ mdyub yoꞌf lezoꞌ mèn mbli mèn xal guneete lezoꞌ mèn, conꞌ yeꞌrsinꞌa ngòc xal thìb conꞌ nguth coꞌ ya neꞌtolode ñibeꞌ loo mèna. Tataa mod ya neꞌtolode li mèna conꞌ yeꞌrsinꞌ.
\v 25 Texal nzi tee ban naꞌ loo cón cheꞌn Xpii Natúꞌ cheꞌn Diox, lomisqueꞌ tataaguèꞌ ndxàal taꞌ naꞌ lugar leꞌ Xpii Natúꞌa tyoo ner no tyoo naa loo naꞌ loo ryethe conꞌ ngue tee li naꞌ, par ante li naꞌ conꞌ coꞌ neete lezoꞌ Xpii Natúꞌ.
\p
\v 26 Indxàalte gàc naꞌ mèn nateꞌs no mèn naxalꞌ. Tac coꞌseꞌ ndxàc naꞌ xal mèna, conꞌa ndli ndxecloo thìb xtàa naꞌ no tedib xtàa naꞌ ñèe xtàa naꞌ naꞌ. Neꞌ neꞌ gàc naꞌ mèn coꞌ ndxàn lezoꞌ par ñèe naꞌ hues xtàa naꞌ, ndee guꞌ.
\c 6
\s Pab mnibeꞌ loo mèna lyath no mèna chol hues xtàa mèna.
\p
\v 1 Mèn huesen por cón cheꞌn Crist, cheleꞌ guꞌ ñèe chol mèn coꞌ ndxàc hues xtàa naꞌ ngue tee cuaꞌn xquin no xtol, guꞌ coꞌ más ndaꞌleꞌ cuent no guꞌ coꞌ más mtéꞌthleꞌ par ndyubdiꞌsqueꞌ guꞌ loo cón cheꞌn Tad Crist, blyath no guꞌ mèna no gunii guꞌ loo mèna par bere mèna, tlo mèna, que tee ban ndac mèna loo cón cheꞌn Tad Crist tedib vez xal ndxàala. Per nadoꞌ diꞌs nadoꞌ cuent tyoodiꞌs no guꞌ mèna. No anderhuen guꞌ chó Diox chó nee guꞌ gunee guꞌ xal nzi tee guꞌ. No blaꞌs guꞌ loo leque guꞌ huiꞌ xal nzi tee ban guꞌ loo cón cheꞌn Diox. Tac thìb descuid, chàa, li Mebizya gan loo guꞌ no tlo guꞌ, li guꞌ chol conꞌ yeꞌrsinꞌ.
\v 2 Blyath no guꞌ thìb hues xtàa guꞌ no tedib hues xtàa guꞌ par neꞌlide hues xtàa guꞌ conꞌ coꞌ ndyub yoꞌf lezoꞌ hues xtàa guꞌ par li hues xtàa guꞌ conꞌ yeꞌrsinꞌ. Cheleꞌ guꞌ tataa ndli loo chol hues xtàa guꞌ, leꞌ sya, tataa mod ngue liqueꞌ guꞌ xalqueꞌ ñibeꞌ Crist loo guꞌ par li guꞌ.
\p
\v 3 Cheleꞌ ndxep guꞌ coꞌ ndxàc hues por cón cheꞌn Jesucrist ndyac no ndli guꞌ cuent anzeꞌf mèn roo no mèn xèn nac guꞌ coꞌseꞌ yende cón ntac guꞌ, leque conꞌa ndluꞌ no tataa mod leque guꞌ ngue quedìi guꞌ loo conꞌ nac guꞌ.
\v 4 Thìb thìb guꞌ blaꞌs no huiꞌ guꞌ loo leque guꞌ xá mod nzi tee ban guꞌ loo cón cheꞌn Diox par ñee guꞌ ñeeneꞌ chéꞌ ngue li guꞌ ndxep conꞌ yeꞌrsinꞌ. Leꞌ sya, cheleꞌ guꞌ ndaꞌ cuent huenqueꞌ nzi tee ban guꞌ no ndyac lezoꞌ guꞌ loo mod coꞌ nzi tee ban guꞌ loo cón cheꞌn Diox, leꞌ sya, ndyac lezoꞌ guꞌ por cón cheꞌnpeꞌ guꞌ. Per neꞌtyacte lezoꞌ guꞌ por más ndaꞌ guꞌ cuent no más ntéꞌth guꞌ par tyubdiꞌs guꞌ loo Diox leque taamas hues xtàa guꞌ.
\v 5 Per nalleꞌ thìb thìb guꞌ gunaa loo guꞌ no blaꞌs guꞌ loo leque guꞌ xá nzi tee ban guꞌ loo cón cheꞌn Diox. Thìba conꞌ ndxèꞌ.
\p
\v 6 Leꞌ tediba na, niin thìb conꞌ loo guꞌ: Mèn coꞌ ngue téꞌth cón cheꞌn xtiꞌs Diox por cón cheꞌn mèn coꞌ nac maistr coꞌ ngue luꞌ mèna, mèn coꞌ ngue téꞌtha ndxàalqueꞌ lyath no mena maistr coꞌ ngue luꞌ loo mèn loo conꞌ coꞌ nde che loo mèn coꞌ nac maistr.
\p
\v 7 Huiꞌ guꞌ nexa. Neꞌtaꞌde guꞌ lugar quedìi guꞌ leque guꞌ. Yende chó mèn nzo coꞌ gác xìis no Diox. Tac Diox tub rezqueꞌ cón cheꞌn rye mèn. Gàcpeꞌi loo guꞌ xal mbez mèn: Leꞌ bin coꞌ co mèn loo yòo, leque biz bina gàc cosech coꞌ thop mèna, coꞌ nee diꞌs, fsuc paráp. Leque lool lyàa rsucl.
\v 8 Cheleꞌ chol mèn ndxàp mod coꞌ nac mèn par ndli mèn chol conꞌ yeꞌrsinꞌ coꞌ ndryoꞌ ndlyenꞌ lezoꞌ mèn, leꞌ sya, leque conꞌ yeꞌrsinꞌ coꞌ ndli mèna ncàba loo mèna ryo xàꞌ mèn thìb lad loo Diox thidtene yilo gath bélꞌyòo lad mèn. Nacqueleꞌ chol mèn gàp thìb mod par li mèn conꞌ ndac coꞌ yòo lezoꞌ Xpii Natúꞌ, leꞌ sya, Xpii Natúꞌ li par gàca loo mèn ban no mèn Diox thidtene yilo gath bélꞌyòo lad mèn.
\v 9 Cona, ngue niin loo guꞌ: Indxàalte yizan naꞌ par neꞌtolode li naꞌ conꞌ ndac loo hues xtàa naꞌ. Tac cheleꞌ naꞌ neꞌtaꞌde lugar yizan naꞌ no yitac lezoꞌ naꞌ loo conꞌ ndac coꞌ ngue li naꞌ loo hues xtàa naꞌ, leꞌ sya, por derech, Diox li par gàc huax conꞌ ndac loo naꞌ yiloa.
\v 10 Cona, coꞌseꞌ taꞌi lugar loo naꞌ no coꞌseꞌ nzoqueꞌ mod li naꞌi, li naꞌ conꞌ ndac loo chol mèn. No más ndxàal li naꞌ conꞌ ndac loo mèn coꞌ ndxàc hues xtàa naꞌ por cón cheꞌn Crist.
\s Lult diꞌs coꞌ mqueꞌ Pab yeꞌs loo mèn loo cart ndxèꞌ.
\p
\v 11 Ryete diꞌs coꞌ nac diꞌs coꞌ nde loo guꞌ loo cart ndxèꞌ nac diꞌs coꞌ ndxaben loo tedib xaꞌ coꞌ ndxàc xtàa daa par mqueꞌ xaꞌ yeꞌs coꞌ nac diꞌs loo cart ndxèꞌ. Per nalleꞌ huiꞌ guꞌ nexa: Napló nambìi ñaa letr coꞌ mqueꞌ yuben diꞌs coꞌ nac lult diꞌs loo cart ndxèꞌ loo guꞌ par tolo toodiz non guꞌ.
\v 12 Mèn coꞌ ndlyaꞌs li fuerz par bere guꞌ, li yèe guꞌ xal nac costumbr cheꞌn circuncisión, mèna ndli tataa ante par ndxanꞌ bien mèna loo chol mèn no par neꞌtub nguꞌste chol mèn mèna por cón cheꞌn diꞌs ndac coꞌ ndluꞌ ante gàp mèn yalxlaꞌs loo cón ngòc loo Crist loo cruz. No inquinte li mèn cas loo taamas costumbr gox cón cheꞌn conꞌ ngolaꞌs mèn ndooreꞌ par lyáꞌ mèn loo conꞌ ryes.
\v 13 Per fteꞌ lezoꞌ guꞌ, ey, neꞌ mèn coꞌ ndli costumbr cheꞌn circuncisión, indlide prob mèna ryete conꞌ coꞌ ñibeꞌ ley coꞌ mxoꞌf Moisés loo mèn. Per mastaleꞌ indlide mèn xal ñibeꞌ ley coꞌ mxoꞌf Moisés loo mèna, ale ndlyaꞌs mèna leꞌ guꞌ gàc circuncidar par tataa tyeꞌs mèna loo xtàa mèna leꞌ mèna mbli fuerz guꞌ par mbli guꞌ mquée fthiꞌf lad xlanꞌ guꞌ par ngòc fthiꞌfa xal thìb señ.
\v 14 Per part cón chenen, indliden cuent no neꞌyilasten leꞌ chol conꞌ coꞌ nzo loo izlyoꞌ ndxèꞌ o chol xleyꞌ li par lyáꞌ daa loo conꞌ ryes. Ndxeꞌlequeꞌ, ante ndxàpen yalxlaꞌs loo Diox por cón cheꞌn Tad Jesucrist naꞌ coꞌ nguth loo cruz no maste par lyáꞌ daa loo conꞌ ryes. Tac por cón cheꞌn conꞌ coꞌ mxac Tad Crist loo cruz, rye mod coꞌ ngòc cón cheꞌn xab izlyoꞌ mdyonꞌleꞌ loon no mblyuxla loon loo izlyoꞌ ndxèꞌ. Nalleꞌ nac daa xal mèn coꞌ nguth loo cón cheꞌn xab izlyoꞌ.
\v 15 Tac cheleꞌ naꞌ thidte ndxàc con Crist Jesús, leꞌ sya, yende cón ndli gàc circuncidar naꞌ o neꞌgàcte circuncidar naꞌ. Per thidte conꞌ coꞌ más ntac loo Diox nac leꞌ mèn nacleꞌ mèn cub loo Diox.
\v 16 Ndlyazen leꞌ Diox li leꞌ guꞌ cue nagàl lezoꞌ loo Diox no loo Jesucrist no cue ban guꞌ rye nda guꞌ no rye ndyeꞌth guꞌ làth xtàa guꞌ. No ndlyazen leꞌ Diox thidtene lyat lezoꞌ ñèe Diox guꞌ, ryete guꞌ coꞌ nque tee ban ndac loo cón cheꞌn Crist xal nac diꞌs coꞌ mbluꞌen loo guꞌ loo cart ndxèꞌ. No ndlyazen gàca tataa loo ryete mèn coꞌ nqueltàa loo cón cheꞌn Diox chol lugar, mèn coꞌ, lìcqueꞌ, ngòo loo cón cheꞌn Crist.
\p
\v 17 Lomisqueꞌ, ndlyazen nalleꞌ par delant nec thìb mèn indlyasten cuaꞌn xóꞌ daa no neꞌ neꞌ li xol mèn loon por cón cheꞌn zinꞌ coꞌ ndlin cón cheꞌn Crist, zinꞌ coꞌ mxoꞌf zinꞌ Diox cón cheꞌn Crist loon. Tac fthiꞌf coꞌ neꞌen laden ndxèꞌ ndluꞌ leꞌ daa, lìcqueꞌ, nac thìb mbiꞌ coꞌ nxoꞌf zinꞌ cheꞌn Crist.
\p
\v 18 Lomisqueꞌ ndlyazen, mèn huesen por cón cheꞌn Tad Jesucrist, leꞌ Tad Jesucrist angryoꞌ lezoꞌ li Tad Jesucrist anggàc conꞌ ndac loo guꞌ, no li Tad Jesucrist huen nda guꞌ ned que tee guꞌ. Taandxèꞌqueꞌ gàca loo guꞌ, ndee guꞌ.