\id EPH
\ide UTF8
\h EFESIOS
\toc1 EFESIOS
\mt Cart Coꞌ Mqueꞌ Pab Yeꞌs Loo Mèn Coꞌ Ngo Ban Leꞌn Ciuda Efes
\c 1
\s Pab ngue queꞌ yeꞌs loo mèn coꞌ ngolaꞌs loo Crist no loo cón cheꞌn Crist, mèn coꞌ mqueltàa loo cón cheꞌn Diox leꞌn ciuda Efes.
\p
\v 1 Daa, Pab, ndxeꞌ diꞌs cheꞌn Jesucrist xal nee lezoꞌ Diox. Ngue queꞌen yeꞌs loo guꞌ coꞌ nac mèn ciuda Efes, guꞌ coꞌ ngro xàꞌ loo cón cheꞌn xab izlyoꞌ par ngòc guꞌ cheꞌnpeꞌ Diox. Ngolaꞌs guꞌ loo Crist Jesús, ne.
\v 2 Ndlyazen leꞌ Diox tolo li anggàc conꞌ ndac loo guꞌ. No ndlyazen leꞌ guꞌ cue nagàl lezoꞌ loo Diox no loo Jesucrist. No ndlyazen cue ban guꞌ rye nda guꞌ no rye ndyeꞌth guꞌ làth xtàa guꞌ.
\s Pab ndyoodiꞌs cón cheꞌn conꞌ ndac coꞌ ndxàc loo mèn por cón cheꞌn Tad Crist.
\p
\v 3 Li naꞌ leꞌ mèn gab nac Diox Diox roo no Diox xèn no Diox natúꞌ thidtene, Diox coꞌ nac xud Tad Jesucrist naꞌ. Por thidte ndxàc naꞌ no thidte nqueltàa naꞌ loo cón cheꞌn Crist, Diox anzeꞌf thìb conꞌ ndac angmbli loo naꞌ no rye loothe conꞌ coꞌ nac conꞌ ndac. Conꞌ natúꞌ coꞌ nac cheꞌn béꞌ nac cheꞌnpeꞌ naꞌ, ne.
\v 4 Diox mcui naꞌ por cón cheꞌn Crist ndooreꞌ cuec Diox izlyoꞌ. Tataa mbli Diox par gàc naꞌ mèn coꞌ ngro xàꞌ loo cón cheꞌn xab izlyoꞌ, no mèn coꞌ ngòc cheꞌnpeꞌ Diox, no mèn coꞌ neꞌtolode cuaꞌn xquin, no mèn coꞌ neꞌtolode gàp xtol loo Diox.
\v 5 Mcui Diox naꞌ xalqueꞌ mnibeꞌ Diox lezoꞌ Diox no xal gunee lezoꞌ Diox par ngòc naꞌ xinꞌpeꞌ yub Diox por cón cheꞌn Jesucrist. Tataa mbli Diox tac anzeꞌf nqueꞌ lezoꞌ Diox ñèe Diox naꞌ.
\v 6 Por cón cheꞌn conꞌ coꞌ angmbli Diox loo naꞌa, li naꞌ leꞌ mèn gab diꞌs guryath no diꞌs guryèn cón cheꞌn Diox loo Diox no loo mèn. Diox mbli angngòc conꞌ ndac ndxèꞌ loo naꞌ por thidte nqueltàa naꞌ loo Crist no loo cón cheꞌn Crist, Crist coꞌ nac lezoꞌ no ngudloo Diox.
\v 7 Por tant nqueꞌ lezoꞌ Diox ñèe Diox naꞌ, mbli Diox par leꞌleꞌ Crist mteláꞌ naꞌ loo conꞌ ryes por cón cheꞌn renpeꞌ Crist coꞌseꞌ mquée yalguth loo Crist, coꞌ nee diꞌs, mtonꞌ Diox xtol naꞌ por cón cheꞌn conꞌ coꞌ ngòc loo Crist.
\v 8 Tataa mbli Diox par mbluꞌ Diox leꞌ Diox nqueꞌ lezoꞌ ñèe Diox mèn axta plóthe, coꞌ nee diꞌs, coꞌseꞌ ndli Diox par ndxác mèn no coꞌseꞌ ndli Diox ndxòn mèn coꞌ huen huen cón cheꞌn Diox.
\v 9 No mbli Diox par mbluꞌ Diox cón cheꞌn conꞌ ndlyaꞌs Diox li Diox coꞌ nac conꞌ coꞌ beꞌ nzo casloo loo Diox no coꞌ nac coꞌ mblo xnee Diox liqueꞌ Diox yiloa, conꞌ coꞌ gàcqueꞌ.
\v 10 No com leꞌ Diox mblobeꞌleꞌ lezoꞌ liqueꞌ Diox par sin falt gàcqueꞌ no tyubqueꞌ diꞌs coꞌseꞌ zinpeꞌ huiz li Diox par thidte ñibeꞌ Crist loo ryete conꞌ, que naca conꞌ coꞌ nzo loo béꞌ, que naca conꞌ coꞌ nziriꞌ loo izlyoꞌ.
\v 11 No par mbli Diox thidte mqueltàa naꞌ loo cón cheꞌn Diox, mcui Diox naꞌ más póla par càayaꞌ naꞌ conꞌ coꞌ gàc cheꞌnpeꞌ naꞌ yiloa, conꞌ coꞌ taꞌ Diox par càayaꞌ naꞌ. No ryete conꞌ coꞌ li Dioxa thidte nac xalqueꞌ mblobeꞌ Diox no mblo xnee Diox lezoꞌ Diox li Diox conꞌa tac Diox ndli ryete conꞌ xal gunee lezoꞌ Diox li Dioxa.
\v 12 Tataa mbli Diox loo naꞌ par de que, nuꞌ coꞌ nac nerlequeꞌ mèn coꞌ ndxàp yalxlaꞌs loo Crist, cue ban nuꞌ par li nuꞌ leꞌ lèe Diox gàc thìb conꞌ guryath no thìb conꞌ guryèn por cón cheꞌn conꞌ roo conꞌ xèn coꞌ nzo laꞌs nii Diox no coꞌ nzo laꞌs yaꞌ Diox.
\v 13 Guꞌ ne, coꞌseꞌ mbìn guꞌ cón cheꞌn diꞌs ndac coꞌ nac lìcqueꞌ, diꞌs ndac coꞌ ndluꞌ xá mod lyáꞌ mèn loo conꞌ ryes, guꞌ ngolaꞌsqueꞌ loo Crist no loo cón cheꞌn Crist. No thidte ngòc guꞌ loo cón cheꞌn Crist no ngòc guꞌ cheꞌnpeꞌ Diox por ngulàa Xpii Natúꞌ loo guꞌ. Ngulàa Xpii Natúꞌ loo guꞌ no mbyanꞌ Xpii Natúꞌ loo guꞌ xal thìb señ coꞌ ndaꞌ cuent leꞌ guꞌ nac cheꞌnpeꞌ Diox.
\v 14 Xpii Natúꞌ nac xal thìb prend coꞌ ngue ten naꞌ. Xpii Natúꞌ ndluꞌ loo naꞌ nac naꞌ cheꞌnpeꞌ Diox axta coꞌseꞌ zin huiz coꞌseꞌ gàc cheꞌn naꞌ conꞌ coꞌ angtaꞌ Diox càa naꞌ coꞌseꞌ ngolo gunèe Diox mdyalleꞌ mèn coꞌ mdyal ngòo loo cón cheꞌn Diox, mèn coꞌ gàc cheꞌnpeꞌ Diox, par tolo gàc conꞌ guryath no conꞌ guryèn loo Diox por cón cheꞌn conꞌ roo conꞌ xèn coꞌ nzo laꞌs yaꞌ Diox no coꞌ nzo laꞌs nii Diox.
\s Pab ngue naꞌb loo Diox par li Diox tolo gác mèn coꞌ ngolaꞌs loo Crist no loo cón cheꞌn Crist.
\p
\v 15 Por cona, coꞌseꞌ mbìnlen xá mod ndxelaꞌs guꞌ loo Tad Jesús no xá mod nqueꞌ lezoꞌ guꞌ ñèe guꞌ ryete mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox,
\v 16 indxathlasten mbezen Diox quix Diox loo Diox cón cheꞌn guꞌ coꞌseꞌ nteꞌ lezon guꞌ coꞌseꞌ mbezen Diox.
\v 17 Ñaꞌben loo Diox leꞌ Diox xud Tad Jesucrist naꞌ, Diox coꞌ nquée xnìi tínꞌ, tolo li leꞌ guꞌ tolo gác tínꞌ cón cheꞌn Diox. Mbezen Diox leꞌ Diox li par tolo tyub xnìi yéc guꞌ no par tolo tyub xnìi lezoꞌ guꞌ loo cón cheꞌn Diox láth ngue téꞌth guꞌ cón cheꞌn Diox.
\v 18 Ñaꞌben loo Diox leꞌ Diox li par tyub xnìi yéc guꞌ no par tyub xnìi lezoꞌ guꞌ loo cón cheꞌn Diox par ñee guꞌ no par non guꞌ cón cheꞌn conꞌ coꞌ yanꞌ no guꞌ yiloa, coꞌ nac coꞌ nzi quee lezoꞌ guꞌ, tac ndxelaꞌs guꞌ loo Diox xal mblyaꞌs Diox. Ñaꞌben loo Diox leꞌ guꞌ ñee no non guꞌ cón cheꞌn conꞌ roo conꞌ xèn tínꞌ coꞌ mtanꞌ Diox loo mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox.
\v 19 Ñaꞌben loo Diox leꞌ Diox li leꞌ guꞌ ñee no non guꞌ rye loothe conꞌ coꞌ nac conꞌ roo conꞌ xèn coꞌ nzo laꞌs nii Diox no coꞌ nzo laꞌs yaꞌ Diox coꞌ ndli Diox loo ryete naꞌ coꞌ ndxelaꞌs. Ryete conꞌ ndxèꞌ nzo laꞌs nii Diox no laꞌs yaꞌ Diox.
\v 20 Coꞌseꞌ mbli Diox ngro xban Crist làth mèn nguth, mbli Diox mdub Crist cuat Diox loo béꞌ.
\v 21 Ngoloa, mdoo Diox Crist loo ryethe coꞌ ndeꞌf diꞌs ñibeꞌ, que naca leque yub angl, que naca xpii yeꞌrsinꞌ coꞌ ñibeꞌ loo izlyoꞌ ndxèꞌ, par ñibeꞌ Crist loo angl no loo xpii yeꞌrsinꞌa xal ñibeꞌ chol gobiern loo mèn. Mdoo Diox Crist loo ryete mèn coꞌ ñibeꞌ, no loo ryete mèn coꞌ ndxàp conꞌ laꞌs nii no laꞌs yaꞌ, no loo mèn coꞌ nac gobiern, no loo ryete mèn guryath no mèn guryèn coꞌ nxoꞌf zinꞌ zinꞌ roo. Iante loo mèn coꞌ nziriꞌ leꞌn tiemp ndxèꞌ ñibeꞌ Crist. Ndxeꞌlequeꞌ, ñibeꞌ Crist loo mèn leꞌn tiemp coꞌ nde nque ndxèꞌ, ne.
\v 22 Mbli Diox ngòc nadoꞌ rye loothe conꞌ loo Crist coꞌseꞌ mblec Diox rye loothe conꞌ laꞌs nii Crist no laꞌs yaꞌ Crist par ñibeꞌ Crist loo ryethe conꞌa. Mnibeꞌ Diox loo Jesús par gàc Jesús xaꞌ coꞌ ñibeꞌ loo ryethe mèn coꞌ ndxelaꞌs loo Jesús, mèn coꞌ nqueltàa loo cón cheꞌn Diox chol lugar.
\v 23 Sya, mèn coꞌ ndxelaꞌs loo Crist Jesús coꞌ nac mèn coꞌ nqueltàa loo cón cheꞌn Diox, mèna nac xal nac bélꞌyòo lad mèn coꞌ ñibeꞌ yéc mèn, coꞌ nee diꞌs, Crist nac xaꞌ coꞌ ñibeꞌ loo mèna. Mèn coꞌ nac mèn coꞌ ndxelaꞌs loo Crist, mèna ngue li par tolo tyaa no tolo tyubqueꞌ diꞌs cón cheꞌn conꞌ roo conꞌ xèn cheꞌn Crist loo Crist. Leque Crist nac xaꞌ coꞌ ñibeꞌ loo ryethe conꞌ.
\c 2
\s Diꞌs ndxèꞌ ndluꞌ anzeꞌf nqueꞌ lezoꞌ Diox ñèe Diox mèn. Por cona, mbli Diox lyáꞌ mèn loo conꞌ ryes.
\p
\v 1 Crist mbli yòo ban no guꞌ Diox thidtene yiloa, guꞌ coꞌ ngòc xal mèn nguth loo cón cheꞌn Diox, coꞌ nee diꞌs, ncuaꞌn guꞌ xquin guꞌ no xtol guꞌ ndooreꞌ yilaꞌs guꞌ loo Crist,
\v 2 coꞌseꞌ mque tee ban li guꞌ ryethe conꞌ coꞌ nac mod coꞌ nac cheꞌn mèn loo izyloꞌ. No mbli guꞌ conꞌ coꞌ nac coꞌ gunee lezoꞌ Mebizya, coꞌ nac thìb xpii coꞌ naban loo mbii no coꞌ ñibeꞌ loo mèn loo izlyoꞌ. No ndli Mebizya par angndyeꞌth lezoꞌ mèn par neꞌtyubdiꞌste mèn loo Diox.
\v 3 Làth mèna mque tee ban ryete naꞌ póla. Mbli naꞌi xal ngroꞌ mblyenꞌ lezoꞌ naꞌ. Mbli naꞌ conꞌ yeꞌrsinꞌ xal gunee lezoꞌ naꞌ xal mnibeꞌ xtùuz naꞌ loo naꞌ. Ale ngòc naꞌ xalqueꞌ mèn coꞌ ndli cón cheꞌn coꞌ nac xab izlyoꞌ. Por cona, mzyalqueꞌ naꞌi ngocloo Diox loo naꞌ par tetìi Diox naꞌ axta plóthe xalqueꞌ ndxecloo Diox loo taamas mèn coꞌseꞌ tub rez Diox cón cheꞌn mèna yiloa.
\v 4 Anzeꞌf ndlyat tínꞌ lezoꞌ Diox ñèe Diox mèn. Mastaleꞌ ngocloo Diox loo naꞌ póla, ale ndxeꞌlequeꞌ, nqueꞌ lezoꞌ Diox ñèe Diox naꞌ nalleꞌ.
\v 5 Per mastaleꞌ ngòc naꞌ mèn coꞌ mque tee ban xal mèn coꞌ nguth loo cón cheꞌn Diox tac mcuaꞌn naꞌ xquin naꞌ no xtol naꞌ, Diox mdaꞌ yalnaban cub loo naꞌ par ban no naꞌ Crist. Por angmbli Diox conꞌa loo naꞌ, mblyáꞌ naꞌ loo conꞌ ryes.
\v 6 Por cón cheꞌn Crist, Diox mbli leꞌ naꞌ ngue no yalnaban cub xal mdaꞌ Diox yalnaban cub loo Crist coꞌseꞌ ngro xban Crist. Diox ngue li conꞌ guryath no conꞌ guryèn loo naꞌ trèꞌ xal ngue li Diox conꞌ guryath no conꞌ guryèn loo Crist coꞌ ndub loo béꞌ.
\v 7 Tataa mbli Diox par luꞌ Diox loo mèn loo tiemp coꞌ nde nque cón cheꞌn conꞌ ndac coꞌ nac anxleꞌ coꞌ li Diox anggàc loo mèn coꞌseꞌ tolo li Diox conꞌ ndac loo naꞌ por cón cheꞌn Crist Jesús.
\v 8 Diox mteláꞌ guꞌ loo conꞌ ryes coꞌseꞌ ngolaꞌs guꞌ loo Crist. Diox mbli angngòc conꞌ ndaca loo guꞌ. Conꞌa inacte cón cheꞌnpeꞌ guꞌ. Ndxeꞌlequeꞌ, naca conꞌ ndac coꞌ angmbli Diox loo guꞌ.
\v 9 Neꞌ neꞌ ngli guꞌ ndxep conꞌ ndac par mteláꞌ Diox guꞌ loo conꞌ ryes. Tac cheleꞌ guꞌ tataa ngli, ndeꞌs guꞌ no ngxalꞌ guꞌ.
\v 10 Diox mbli leꞌ naꞌ nacleꞌ mèn cub por cón cheꞌn Crist Jesús par xoꞌf zinꞌ naꞌ zinꞌ ndac. Mbli nab Diox zinꞌa par que tee li naꞌ zinꞌa.
\s Diꞌs ndxèꞌ ndluꞌ loo mèn xá mod cue nagàl lezoꞌ mèn loo Diox no xá mod cue mèn rye nda mèn no rye ndyeꞌth mèn làth xtàa mèn por cón cheꞌn Tad Crist.
\p
\v 11 Por cona, fteꞌ lezoꞌ guꞌ xá mod mque tee ban guꞌ ndooreꞌ yilaꞌs guꞌ loo Crist no loo cón cheꞌn Crist. Neꞌngàcte guꞌ mèn bin mèn nación Israel coꞌ ndli circuncidar xtàa. Por cona, mbez mèn nación Israel nac mèn nación Israel mèn coꞌ ndxelaꞌs loo yalndxelaꞌs cheꞌn circuncisión. Leꞌ loo guꞌ na, mbez mèn nación Israel inacte guꞌ mèn coꞌ ndxelaꞌs loo yalndxelaꞌs cheꞌn circuncisión xal ndxelaꞌs mèna.
\v 12 Thìb cuaꞌa, guꞌ, ne, neꞌnque tee bante loo cón cheꞌn Crist. Tith tith mque tee ban guꞌ loo cón cheꞌn mèn nación Israel. Ngòc guꞌ mèn coꞌ indaꞌde cuent cón cheꞌn conveñ cheꞌn Diox coꞌ mbluꞌ Diox loo mèn nación Israel, conꞌ coꞌ mcàbgòn Diox li Diox loo nuꞌ. Neꞌ neꞌ ngàc guꞌ mèn coꞌ mbe quee lezoꞌ loo Diox. Ndxeꞌlequeꞌ, mque tee xàꞌ guꞌ loo Diox loo izlyoꞌ.
\v 13 Per guꞌ coꞌ tith tith mque tee ban loo cón cheꞌn Diox thìb cuaꞌa, Diox mbli leꞌ guꞌ nzi tee ban gax loo Diox nalleꞌ por cón cheꞌn renpeꞌ Crist. Nalleꞌ nac naꞌ cheꞌnpeꞌ Crist.
\v 14 Crist ndli nagàl yo lezoꞌ naꞌ loo Diox no cue ban naꞌ rye nda naꞌ no rye ndyeꞌth naꞌ làth xtàa naꞌ. Leque Crist mbli par thidte ngòc xtùuz naꞌ no lezoꞌ naꞌ, naꞌ coꞌ nac mèn nación Israel no naꞌ coꞌ inacte mèn nación Israel. Xal mteche mèn thìb ftoo coꞌ ntauꞌ loo mèn, Diox mteche ryete conꞌ coꞌ ngòc xèn no xyàn leꞌn lezoꞌ mèn nación Israel ñèe mèn nación Israel mèn coꞌ inacte mèn nación Israel. Tataa mbli Diox par mbyuꞌ mbyàlleꞌ lezoꞌ ryete mèna loo cón cheꞌn Diox.
\v 15 Coꞌseꞌ mqueꞌ mèna Crist loo cruz, leque hora mtonꞌ Crist yalgyoo no ngolo ngolaꞌs coꞌ nac cheꞌn ley coꞌ mxoꞌf Moisés loo mèn coꞌ mnibeꞌ loo mèna no cheꞌn xleyꞌ coꞌ mnibeꞌ loo mèna. No mbli Crist thidte ngòc ryop ned mèna, coꞌ nee diꞌs, ngòc mèna xal thìb conꞌ cub loo Crist. Tataa mbli Diox par mbyuꞌ mbyàl lezoꞌ ryop ned mèna.
\v 16 Tataa mod mbyuꞌ mbyàl lezoꞌ ryop ned mèna loo Diox por cón cheꞌn conꞌ coꞌ ngòc loo Crist loo cruz. Tataa mod mbli Diox par ngòp ryop ned mèna thidte xtùuz no thidte lezoꞌ, coꞌ nee diꞌs, ngòc mèna thìb nedte mèn xal nac lad mèn thidte conꞌ.
\v 17 Mbiꞌth luꞌ Crist diꞌs coꞌ nac diꞌs ndac loo guꞌ par cue ban guꞌ rye nda guꞌ no rye ndyeꞌth guꞌ, guꞌ coꞌ ngure ban tith loo Diox thìb cuaꞌa no loo mèn nación Israel coꞌ más gax ngure loo cón cheꞌn Diox thìb cuaꞌa.
\v 18 Por cón cheꞌn ryethe conꞌ coꞌ ngòc loo Crist, ngue no thìb naꞌ no tedib naꞌ mod par bii gax naꞌ, naꞌ coꞌ ngòc ryop ned mèna, loo Diox xud naꞌ por cón cheꞌn thidte Xpii Natúꞌ cheꞌn xud naꞌ Diox.
\v 19 Tataa mod inacte guꞌ mèn tith. Neꞌ neꞌ inac guꞌ xal mèn coꞌ nzi tee chol làaz mèn. Ndxeꞌlequeꞌ, nac guꞌ mèn gulàaz con mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox. Nac guꞌ mèn guliz cheꞌnpeꞌ Diox.
\v 20 Nac guꞌ mèn coꞌ mbryoo mxyèn loo diꞌs ndac cheꞌn Crist coꞌ mbluꞌ myenꞌ xinꞌ mtéꞌth Crist coꞌ mtelꞌ Crist no mèn coꞌ mdeꞌth diꞌs coꞌ ndxab Diox loo guꞌ. Leque yub Jesucrist nac cón cheꞌn conꞌ ndxèꞌ xal thìb quèe scuadr coꞌ ndyub squin ftoo liz mèn.
\v 21 Por cón cheꞌn Crist coꞌ nac xal quèe scuadra, ryete naꞌ coꞌ ndxelaꞌs loo Crist, nac naꞌ xal thìb yòocal coꞌ ngue xít téꞌf ndac mèn, coꞌ nee diꞌs, nac naꞌ xal thìb liz Diox natúꞌ loo Tad Crist.
\v 22 Por cón cheꞌn Crist, guꞌ nzi roo nzi xèn loo Diox xal thìb yòocal coꞌ ngue xít téꞌf mèn par gàc guꞌ xal thìb lizpeꞌ Diox coꞌteꞌ yòo ban Xpii cheꞌn Diox coꞌ nac yub Diox.
\c 3
\s Pab ngue luꞌ loo mèn leꞌ Diox mxoꞌf zinꞌ cón cheꞌn diꞌs ndac loo Pab par luꞌ Pab no teꞌth Pab cón cheꞌn diꞌs ndac ndxèꞌ loo alux mèn coꞌ inacte mèn nación Israel.
\p
\v 1 Por cón cheꞌn Jesucrist no por cón cheꞌn diꞌs ndac coꞌ ngon yalban loo guꞌ mèn Efes, guꞌ coꞌ inacte mèn nación Israel, daa, Pab ngue leziꞌf. Mbezen Diox cón cheꞌn guꞌ par gàc conꞌ ndac loo guꞌ.
\v 2 Naquin leꞌ guꞌ non leꞌ por nac Diox thìb Diox ndac, mtanꞌ Diox diꞌs loon no mxoꞌf zinꞌ Diox thìb zinꞌ loon. Pues zinꞌ coꞌ mxoꞌf zinꞌ Diox loon ndxèꞌ nac leꞌ daa go yalbàn cón cheꞌn diꞌs ndac loo guꞌ.
\v 3 Huiꞌ guꞌ nexa. Diox mxoꞌf loo cón cheꞌn Diox coꞌ nzo casloo loo Diox loon no mbluꞌ Diox cón cheꞌn Diox loon coꞌ nac diꞌs coꞌ xax xax ngue tan cuent loo guꞌ loo cart ndxèꞌ.
\v 4 Láth ngue lab guꞌ cart ndxèꞌ coꞌteꞌ mtlon mqueꞌen yeꞌs no axta trèꞌ, taꞌ guꞌ cuent coꞌ huenlequeꞌ leꞌ daa naneequeꞌ no ndxác daa ndan cuent cón cheꞌn Crist coꞌ nzo casloo loo mèn.
\v 5 Cón cheꞌn Crist coꞌ ngo casloo póla, neꞌndaꞌde Diox lugar ngro xoꞌfa loo mèn póla xal mxyoꞌf looi loo mèn nalleꞌ. Per leꞌn tiemp ndxèꞌ mxoꞌf loo Xpii Natúꞌ cheꞌn Diox conꞌa loo mèn coꞌ ngro xàꞌ loo cón cheꞌn xab izlyoꞌ, mèn coꞌ mtelꞌ Diox, mèn coꞌ ndxeꞌ diꞌs cón cheꞌn Crist no mèn coꞌ mdeꞌth diꞌs coꞌ ndxab Diox.
\v 6 Conꞌ ndxèꞌ nac coꞌ mcasloo Diox loo mèn ndooreꞌ: Leꞌ mèn coꞌ inacte mèn nación Israel thidte nac con mèn nación Israel loo Crist no loo cón cheꞌn Crist. Càayaꞌqueꞌ mèn coꞌ inacte mèn nación Israel conꞌ coꞌ mcàbgòn Diox taꞌ laꞌs Diox par càa mèn nación Israel por cón cheꞌn Crist xal ndluꞌ diꞌs ndac loo naꞌ.
\v 7 Mastaleꞌ indxàalte daa ñibeꞌ Diox loon, Diox mdoo daa loo zinꞌ ndxèꞌ par gon yalbàn cón cheꞌn Diox. Por cón cheꞌn thìb conꞌ coꞌ mbli Diox coꞌ ngòc conꞌ roo conꞌ xèn coꞌ angmbli Diox ngòc loon coꞌseꞌ mnibeꞌ Diox loon, lin zinꞌ ndxèꞌ.
\v 8 Daa, Pab, ndyaquen nac daa thìb mbiꞌ coꞌ yende cón ntac làth rye mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox. Ale leꞌleꞌ loon angmbli Diox conꞌ ndxèꞌ par ga luꞌen no par ga tethen cón cheꞌn diꞌs ndac loo mèn coꞌ inacte mèn nación Israel. Mnibeꞌ Diox loon ga luꞌen loo mèna cón cheꞌn ryethe conꞌ ndac tínꞌ coꞌ ndli Crist loo mèn, coꞌ nee diꞌs, nec thìb mod no nec tedib mod neꞌtaꞌde mèn cuent cón cheꞌn ryethe conꞌ ndac coꞌ ndli Crist loo mèn.
\v 9 Diox coꞌ mtoxcuaꞌ ryethe conꞌ coꞌ nzi loo izlyoꞌ, Diox mxoꞌf zinꞌ zinꞌ loon. No ndoo Diox daa loo mèn par luꞌen loo ryete mèn ryete conꞌ coꞌ nac cón cheꞌn Crist. Nalleꞌ ngue go xoꞌf Diox xtùuz coꞌ mbli Diox xtùuz cón cheꞌn ryop ned mèn, mèn coꞌ nac mèn nación Israel no mèn coꞌ inacte mèn nación Israel, cón cheꞌn conꞌ coꞌ ngo casloo loo Diox axta pólleꞌa.
\v 10 Tataa mbli Diox por cón cheꞌn mèn coꞌ ndxelaꞌs par luꞌ Diox ryethe conꞌ coꞌ ndxác Diox loo angl coꞌ nzo loo béꞌ. Angla ndxàp conꞌ laꞌs nii angl no laꞌs yaꞌ angl par non angl leꞌ Diox ndxác li rye loothe conꞌ.
\v 11 Diox mbli conꞌ ndxèꞌ loo Crist xalqueꞌ mblo xnee Diox no mblobeꞌ lezoꞌ Diox ndooreꞌ cuec Diox chol conꞌ coꞌ mtoxcuaꞌ Diox par ngòca loo Tad Crist Jesús naꞌ xalqueꞌ gunee lezoꞌ Diox.
\v 12 Por cón cheꞌn Crist, yende cón cuee caꞌ loo naꞌ. Con dibaxlaꞌs yòo naꞌ loo cón cheꞌn Diox tac ndxelaꞌs naꞌ loo Crist.
\v 13 Por cona, ngue niin loo guꞌ loo cart ndxèꞌ no ñaꞌben loo guꞌ: Neꞌtyoo xàꞌde lezoꞌ guꞌ por cón cheꞌn yalndyub nguꞌs coꞌ ndxàc loon. Tac por cón cheꞌn conꞌ coꞌ ndxàc loon ndxèꞌ, leꞌi ndxàc loon par gàc conꞌ guryath no conꞌ guryèn loo guꞌ par nedrèꞌ.
\s Diꞌs ndxèꞌ ngue luꞌ loo mèn xá mod susqueꞌ nqueꞌ lezoꞌ Crist ñèe Crist mèn.
\p
\v 14 Por cón cheꞌn conꞌ coꞌ ndxàc loon ndxèꞌ, ndyub xiben loo Diox coꞌ nac xud Tad Jesucrist naꞌ par mbezen Diox.
\v 15 Dioxa mdaꞌ lèe loo ryete nación, no famil, no loo ryethe conꞌ coꞌ nzo loo béꞌ, no loo ryethe conꞌ coꞌ nziriꞌ loo izlyoꞌ.
\v 16 Mbezen Diox por cón cheꞌn ryethe conꞌ roo conꞌ xèn cheꞌn Diox leꞌ Diox li conꞌ loo guꞌ par gàc guꞌ mèn coꞌ ndxòo valor tínꞌ loo por cón cheꞌn Xpii Natúꞌ cheꞌn Diox.
\v 17 Crist nzo ban leꞌn lezoꞌ guꞌ no leꞌn xtùuz guꞌ tac ndxelaꞌs guꞌ loo Crist. Por cona, mbezen Diox leꞌ guꞌ thidtene li nèe lezoꞌ guꞌ no xtùuz guꞌ par gàc guꞌ mèn coꞌ anzeꞌf nqueꞌ lezoꞌ Diox.
\v 18 Leꞌ sya, gàc guꞌ mèn coꞌ taꞌ cuent no mèn coꞌ ndxòn con ryete mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox, par ñee guꞌ no taꞌ guꞌ cuent susqueꞌ arid nqueꞌ lezoꞌ Crist ñèe Crist alux mèn loo izlyoꞌ.
\v 19 Mbezen Diox leꞌ guꞌ taꞌ cuent no ñee guꞌ xal nac mod roo mod xèn coꞌ anzeꞌf nqueꞌ lezoꞌ Crist ñèe Crist mèn. Mod coꞌ nqueꞌ lezoꞌ Crist ñèe Crist naꞌ, axta neꞌ neꞌ indaꞌ mèn cuent cón cheꞌn moda. Mbezen Diox tolo gàc guꞌ mèn ndac xalqueꞌ nac Diox Diox ndac.
\p
\v 20 No nalleꞌ, gab naꞌ Diox roo Diox xèn nac Diox tac ante Diox ndxàp conꞌ laꞌs nii Diox no laꞌs yaꞌ Diox par li Diox gàc ryethe conꞌ coꞌ ñaꞌb naꞌ no coꞌ ndli naꞌ xtùuz. Gàca loo naꞌ por cón cheꞌn conꞌ coꞌ nzo laꞌs nii Diox no laꞌs yaꞌ Diox coꞌ ndli Diox zinꞌ loo naꞌ.
\v 21 Ndlyazen leꞌ loo Tad Diox gàc conꞌ roo no conꞌ xèn por cón cheꞌn mèn coꞌ ndxelaꞌs, mèn coꞌ nqueltàa loo Diox chol lugar, no por cón cheꞌn Crist Jesús, ne. Gàca leꞌn línꞌ coꞌ ntlo, no leꞌn línꞌ coꞌ ndxeloo, no leꞌn línꞌ coꞌ neꞌlith node. Taandxèꞌ gàca.
\c 4
\s Diꞌs ndxèꞌ ndluꞌ xá mod thidte ndxàc mèn coꞌ ndxelaꞌs loo Crist por cón cheꞌn Xpii Natúꞌ.
\p
\v 1 Daa Pab coꞌ ngue leziꞌf por cón cheꞌn Tad Crist, ñaꞌben loo guꞌ: Fque tee ban guꞌ xal ndxàal li mèn, mèn coꞌ Diox mblec loo cón cheꞌn Diox xalqueꞌ mcui Diox guꞌ.
\v 2 Gòc guꞌ mèn nadoꞌ coꞌ indyeꞌste. Fqueꞌ lezoꞌ guꞌ gunèe guꞌ hues xtàa guꞌ. Gòc guꞌ mèn coꞌ nchaꞌlaꞌs. No gòp guꞌ mod con mèn coꞌ nac hues xtàa guꞌ xalqueꞌ mèn coꞌ nqueꞌ lezoꞌ ñèe hues xtàa mèn.
\v 3 Bli guꞌ fuerz par thidte que tee ban guꞌ xal ñibeꞌ Xpii Natúꞌ cheꞌn Diox loo guꞌ. Fque tee ban guꞌ rye nda guꞌ no rye ndyeꞌth guꞌ no par thidte gàc guꞌ loo Diox.
\v 4 Tac mèn coꞌ ndxelaꞌs loo Crist no loo cón cheꞌn Crist, mèna thidte ngòc loo Diox xal thidte ladpeꞌ Crist. Thidte Xpii Natúꞌ cheꞌnpeꞌ Diox nzo. Lomisqueꞌ ne, loo thidte conꞌ nzi quee lezoꞌ naꞌ, conꞌ coꞌ li Diox loo naꞌ, coꞌ nee diꞌs, conꞌ coꞌ mbli nableꞌ Diox gàc loo naꞌ yiloa.
\v 5 Thidte Tad Diox nzo. Thidte yalndxelaꞌs nzo. Thidte bautism nzo.
\v 6 Lomisqueꞌ, nzo thidte Diox coꞌ nac xud naꞌ coꞌ ñibeꞌ loo alux conꞌ coꞌ nziriꞌ. Ndli Diox zinꞌ loo ryethe conꞌa. Nzoqueꞌ Diox leꞌn lezoꞌ ryete naꞌ, ne.
\p
\v 7 Mbli Diox loo thìb thìb naꞌ ndxác naꞌ li naꞌ conꞌ xal ndlyaꞌs Diox gác naꞌ par taꞌ naꞌ cuent loo xtàa naꞌ cón cheꞌn diꞌs ndac xal mblyaꞌs Crist.
\v 8 Por cona, mbez loo libr coꞌ nac xtiꞌs Diox cón cheꞌn Crist:
\pi1 Coꞌseꞌ mquée Crist gáp loo béꞌ, mbeꞌ Crist thìb baan mèn coꞌ ngòc xal pres. No angmdaꞌlaꞌs Crist conꞌ ndac loo mèna.
\p
\v 9 ¿Cón nee diꞌs nguáp Crist loo béꞌ, àꞌ? Conꞌa nee diꞌs ner ngulàa Crist leꞌn thìb yeꞌr coꞌ anzeꞌf naꞌs coꞌ nac axta xànꞌ leꞌn izlyoꞌ.
\v 10 Crist coꞌ ngulàa leꞌn izlyoꞌ, leque yub Crist nac xaꞌ coꞌ mquée gáp loo béꞌ yiloa par huiꞌ loo Crist ryethe conꞌ coꞌ ñibeꞌ Crist loo béꞌ.
\v 11 Leque yub Crist mbli angngòc conꞌ ndac loo mèn. Crist angmbli leꞌ ndxep mèn ngòc mèn coꞌ mtelꞌ Crist, coꞌ ndxeꞌ diꞌs cón cheꞌn Crist. Angmbli Crist leꞌ taamas mèn ngòc mèn coꞌ ndeꞌth diꞌs coꞌ ndxab Diox. Angmbli Crist leꞌ taamas mèn mblo yalbàn cheꞌn diꞌs ndac. Angmbli Crist leꞌ taamas mèn ngòc pastor loo mèn. Angmbli Crist leꞌ taamas mèn ngòc maistr coꞌ ndluꞌ cón cheꞌn Crist loo mèn.
\v 12 Tataa mod mbli Diox leꞌ mèna luꞌ loo ryete mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox. Tataa mbli Diox par xoꞌf zinꞌ mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox, zinꞌ coꞌ nac rsinꞌpeꞌ Diox. Mèna mxoꞌf zinꞌ zinꞌa par tolo téꞌth mèn par tyubdiꞌs ndac mèn loo Crist, coꞌ nee diꞌs, mèn coꞌ nac loo Crist xal ladpeꞌ Crist.
\v 13 Mèna toloqueꞌ luꞌ loo mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox, axtaqueꞌ thidte gàc naꞌ loo yalxlaꞌs coꞌ ndxàp naꞌ loo Crist no axtaqueꞌ ñee naꞌ no non naꞌ ryethe conꞌ cón cheꞌn Crist coꞌ nac xganꞌpeꞌ Diox. No tolo téꞌth naꞌ cón cheꞌn Diox par tyubdiꞌs naꞌ loo cón cheꞌn Crist axtaqueꞌ gàc naꞌ mèn coꞌ nac xalqueꞌ nac Crist.
\v 14 Cheleꞌi taandxèꞌ mod ndxàc loo naꞌ, neꞌgàcte naꞌ xal myenꞌ bix coꞌ ndli xtùuz chol conꞌ. Neꞌ neꞌ gàc naꞌ xal yix coꞌ ndxeꞌ mbii pál coꞌteꞌ nxyoꞌf mbii loo cón cheꞌn chol xleyꞌ mèn. Ndxàca loo ndxep mèn por xquin cheꞌn chol mèn coꞌ mcuaꞌn mod, par nquedìi mèn mèna no nabeꞌs ntoxcuaꞌ mèna yalgutyèꞌ par quedìi mèn mèna.
\v 15 Más huen gàca tyoodiꞌs naꞌ ante conꞌ coꞌ nac lìcpeꞌ láth tolo queꞌ lezoꞌ naꞌ ñèe naꞌ hues xtàa naꞌ. Tolo téꞌth ndac naꞌ par tolo tyubdiꞌs ndac naꞌ loo ryete conꞌ cheꞌnpeꞌ Crist coꞌ ñibeꞌ loo naꞌ. Ñibeꞌpeꞌ Crist loo naꞌ xal ñibeꞌ yécpeꞌ naꞌ loo naꞌ.
\v 16 Loo cón cheꞌn Crist nac naꞌ, coꞌ nee diꞌs, nac naꞌ xal ladpeꞌ Crist. Lada natoxcuaꞌ. Nac lada xal thìb conꞌ coꞌ huen natedóꞌ, coꞌ nee diꞌs, nayalꞌ lada. Tac ryete lugar coꞌteꞌ nayalꞌ lad mèn ndaꞌ fuerz loo lad mèn. No thìb thìb lugar cheꞌn lada ndli thìb zinꞌ coꞌ ndlyath no loo dib lad par li lada zinꞌ. Tataa mod, ne, lyath no naꞌ hues xtàa naꞌ no queꞌ lezoꞌ naꞌ ñèe naꞌ hues xtàa naꞌ par tolo téꞌth naꞌ par tyubdiꞌs naꞌ loo cón cheꞌn Crist.
\s Pab ngue teꞌth no ngue luꞌ Pab cón cheꞌn yalnaban cub coꞌ ndxàc loo mèn coꞌ ndxelaꞌs loo Crist.
\p
\v 17 Conꞌ ndxèꞌ niin loo guꞌ, tá, no tolo ñibeꞌen loo guꞌ por lèe cheꞌn Tad: Ya neꞌtolode que tee ban guꞌ xal taamas mèn coꞌ indlibeꞌde Diox. Tac ngue que tee ban mèna xal nee lezoꞌ mèna loo coꞌ nac xtùuz mèn coꞌ intacte.
\v 18 ¡Prob mèna izlyoꞌ! tac nacuau yéc mèna no nacuau lezoꞌ mèna. No indxàpte mèna yalnaban coꞌ nac yalnaban coꞌ ndli Diox que no mèn tac anzeꞌf naxèn mèna no anzeꞌf nacholꞌ mèna tac naad no nguud lezoꞌ mèna.
\v 19 ¡Prob mèna izlyoꞌ! tac leque mèna mbli par mdyuhuan yob yéc mèna por inthyonte mèna. No leque mèna ngulàa loo chol conꞌ yeꞌrsinꞌ coꞌ ndyub yoꞌf lezoꞌ mèna li mèna. No axta con gust ndli mèna ryethe conꞌ yeꞌrsinꞌ no conꞌ zab tac tataa mblyaꞌs mèna li mèna.
\v 20 Per ndxeꞌlequeꞌ, guꞌ neꞌntéꞌthte cón cheꞌn Crist tataa, ¿léꞌ?
\v 21 Cheleꞌ guꞌ, lìcqueꞌ, mbìn diꞌs cón cheꞌn Crist, mtéꞌthqueꞌ guꞌ coꞌ nac cón cheꞌn Crist xal nac Crist lìcpeꞌ no coꞌ nac conꞌ lìcpeꞌ coꞌ nzo loo Crist, ¿léꞌ?
\v 22 Leꞌ cón cheꞌn mod yeꞌrsinꞌ coꞌ ngòc mod coꞌ mque tee ban guꞌ thìb cuaꞌa na, bláꞌ guꞌ ryete mod gox yeꞌrsinꞌ coꞌ nac mod cap coꞌ mquedìi guꞌ thìb cuaꞌa loo cón cheꞌn xab izlyoꞌ. Loo yalnaban coꞌ mban guꞌ coꞌ ngòc coꞌ nduhua nee lezoꞌ guꞌ, nac coꞌ angnquedìi mèn loo izlyoꞌ ndxèꞌ.
\v 23 Per nalleꞌ naquin gàc guꞌ xal mèn cub loo conꞌ coꞌ ndli guꞌ xtùuz no loo conꞌ coꞌ ndenꞌ guꞌ leꞌn lezoꞌ guꞌ.
\v 24 Gòc guꞌ xal mèn cub loo mod coꞌ nzi ban guꞌ nalleꞌ leꞌ guꞌ nac mèn cub tac Diox mbli nacqueꞌ guꞌ mèn cub. Por cona, fque tee ban luꞌ guꞌ loo mèn leꞌ guꞌ, lìcqueꞌ, nzi tee ban lìqueꞌ no nambìiqueꞌ nzi tee ban guꞌ loo Diox.
\p
\v 25 Por cona, ngue niin loo guꞌ: Neꞌtoxcuaꞌde guꞌ yalgutyèꞌ. Ndxeꞌlequeꞌ, ftoodiꞌs thìb thìb guꞌ con hues xtàa guꞌ ante coꞌ nac conꞌ lìcpeꞌ tac ryete naꞌ thidte nac loo Crist no loo cón cheꞌn Crist xal thidte ladpeꞌ Crist.
\p
\v 26 Cheleꞌ guꞌ yecloo, neꞌtaꞌde guꞌ lugar cuaꞌn guꞌ xtol guꞌ látha. Neꞌ neꞌ co guꞌ xyàn lezoꞌ guꞌ nen tiemp ñèe guꞌ hues xtàa guꞌ.
\v 27 Neꞌ neꞌ taꞌ guꞌ lugar cobyaꞌ Mebizya guꞌ thidtene.
\p
\v 28 Guꞌ coꞌ mbli huanꞌ thìb cuaꞌa, ya neꞌtolode li huanꞌ guꞌ. Ndxeꞌlequeꞌ, bli guꞌ zinꞌ con yaꞌpeꞌ guꞌ coꞌ nac zinꞌ ndac par que no guꞌ conꞌ taꞌ guꞌ anxleꞌ loo hues xtàa guꞌ coꞌ naquin conꞌ.
\p
\v 29 Neꞌtyoodiꞌste guꞌ nec thìb diꞌs zab. Ndxeꞌlequeꞌ, ftoodiꞌs guꞌ diꞌs ndac par tataa mod lyath no guꞌ hues xtàa guꞌ no par li nèe hues xtàa guꞌ lezoꞌ hues xtàa guꞌ loo cón cheꞌn Diox coꞌseꞌ ndxòn hues xtàa guꞌ diꞌs coꞌ ndyoodiꞌs guꞌ.
\v 30 Neꞌtexide guꞌ lezoꞌ Xpii Natúꞌ cheꞌn Diox. Xpii Natúꞌ ngue ten guꞌ par nac guꞌ xal mèn coꞌ ngue sell lad guꞌ par ndxàc beꞌ guꞌ axta zin huiz coꞌ gàc huiz coꞌseꞌ, sin falt, teláꞌ Diox naꞌ loo ryethe conꞌ ryes thidtene.
\p
\v 31 Biiche xàꞌ guꞌ loo ryethe conꞌ coꞌ nac xèn xyàn, no loo ryethe conꞌ coꞌ nac ayen diꞌs ayen cuent coꞌseꞌ ngyoo guꞌ, no cón cheꞌn coꞌseꞌ ndxòo xyàn lezoꞌ mèn, no ryethe conꞌ coꞌ nac conꞌ yeꞌrsinꞌ. Ryethe conꞌ ndxèꞌ nac coꞌ ndli ndyoo xàꞌ lezoꞌ guꞌ ñèe guꞌ hues xtàa guꞌ.
\v 32 Ndxeꞌlequeꞌ, gòc guꞌ mèn ndac coꞌ ndlyat lezoꞌ ñèe thìb hues xtàa guꞌ no tedib hues xtàa guꞌ. Fteriꞌth ftecanꞌ guꞌ xtol thìb hues xtàa guꞌ no tedib hues xtàa guꞌ coꞌ mbli hues xtàa guꞌ loo guꞌ xal mtonꞌ Diox xtol guꞌ por cón cheꞌn Crist.
\c 5
\s Diꞌs ndxèꞌ ngue luꞌ cón cheꞌn xá mod ndxàal que tee ban mèn coꞌ nac xinꞌpeꞌ Diox.
\p
\v 1 Guꞌ coꞌ nac xinꞌpeꞌ Diox coꞌ anzeꞌf nqueꞌ lezoꞌ Diox ñèe Diox, bli guꞌ conꞌ ndac loo hues xtàa guꞌ xal ndli Diox conꞌ ndac loo mèn.
\v 2 Tolo gòc guꞌ mèn coꞌ nqueꞌqueꞌ lezoꞌ ñèe hues xtàa xalqueꞌ nqueꞌ lezoꞌ Crist ñèe Crist naꞌ. Crist mdaꞌ lugar loo mèn par mbeth mèn Crist. Tataa mbli Crist por cón cheꞌn naꞌ. Tataa mod mbli Crist coꞌ mblyaꞌs Diox. Mdyac lezoꞌ Diox loo cón cheꞌn Crist coꞌseꞌ nguth Crist.
\p
\v 3 Neꞌgàcte guꞌ xal mèn coꞌ ncuaꞌn xinꞌ huan. Neꞌ neꞌ gàc guꞌ mèn coꞌ nqueliꞌth no coꞌ ndxàn lezoꞌ ñèe hues xtàa. Neꞌ neꞌ yath yèn conꞌ yeꞌrsinꞌ ndxèꞌ làth guꞌ. Ndxeꞌlequeꞌ, fque tee ban guꞌ xalqueꞌ ndxàal que tee ban mèn coꞌ ngro xàꞌ loo cón cheꞌn xab izlyoꞌ coꞌ ngòc cheꞌnpeꞌ Diox.
\v 4 Neꞌtyoodiꞌste guꞌ diꞌs zab. Neꞌ neꞌ tyoodiꞌs guꞌ diꞌs coꞌ ndyoodiꞌs mèn naad. Neꞌ neꞌ tyoodiꞌs guꞌ diꞌs cap coꞌ nac yalguyith coꞌ indxàalte. Ndxeꞌlequeꞌ, guuz guꞌ loo Diox: Diox quix Uꞌ, Diox.
\v 5 Guꞌ nanee lìcpeꞌ nac conꞌ ndxèꞌ tac nec thìb mèn coꞌ ncuaꞌn xinꞌ huan, nec thìb mèn coꞌ nac mèn xin no mèn cap, nec thìb mèn coꞌ nqueliꞌth cón cheꞌn hues xtàa mèn, coꞌ nee diꞌs, mèn coꞌ lalqueꞌ nac xal mèn coꞌ ndyub xib no coꞌ ncòoꞌ yéc no coꞌ nsálꞌ yaꞌ loo mdoꞌ no loo chol gunab, nec thìb mèna neꞌgàc cheꞌnte conꞌ coꞌ taꞌ Diox loo mèn coꞌteꞌ ñibeꞌ Crist no Diox.
\v 6 Neꞌtaꞌde guꞌ lugar quedìi chol mèn guꞌ con diꞌs coꞌ yende cón ntac tac por cón cheꞌn ryete conꞌ yeꞌrsinꞌ ndxèꞌ ndxecloo Diox ñèe Diox mèn coꞌ indyubdiꞌste loo Diox.
\v 7 Neꞌqueltàa node guꞌ mèna par li guꞌ xal ndli mèna.
\p
\v 8 Thìb cuaꞌa ngòc guꞌ mèn coꞌ nauꞌ loo no coꞌ nauꞌ yéc. Per nalleꞌ nac guꞌ mèn coꞌ ndubleꞌ xnìi yéc no coꞌ ndubleꞌ xnìi lezoꞌ loo Tad Crist. Fque tee ban guꞌ xal mèn coꞌ mbyàꞌxleꞌ xnìi yéc no coꞌ mbyàꞌxleꞌ xnìi lezoꞌ, ndee guꞌ.
\v 9 Tac conꞌ coꞌ ndli Xpii Natúꞌ cheꞌn Diox loo naꞌ ncàb ndxàc conꞌ ndac, no conꞌ nalì, no conꞌ lìcpeꞌ loo naꞌ.
\v 10 Ftéꞌth guꞌ li guꞌ ryete conꞌ ndac coꞌ ndxòo lezoꞌ Tad Crist li guꞌ.
\v 11 Neꞌ neꞌ yeꞌth lezoꞌ guꞌ li guꞌ chol conꞌ coꞌ yende cón ntac xal ndli mèn coꞌ alithe nzi que tee ban loo izlyoꞌ, mèn coꞌ nauꞌ loo no mèn coꞌ nauꞌ yéc. Ndxeꞌlequeꞌ, más huen ftaꞌ guꞌ cuent loo mèn chó conꞌ nac conꞌ anxleꞌ par non mèn cón cheꞌn conꞌa.
\v 12 Tac ryethe conꞌ coꞌ xexte ndli mèna, coꞌseꞌ gòn taamas mèn conꞌ ndli mèna, neꞌlyàa huente conꞌ ndli mèna lezoꞌ mèna. Ale thyon mèna.
\v 13 Per coꞌseꞌ mcoꞌxleꞌ mèn loo hues xtàa mèn cón cheꞌn ryete conꞌ yeꞌrsinꞌ coꞌ ndli mèna, ya ngro xoꞌfla loo xnaa por mdaꞌ mèna lugar mdubleꞌ xnìi yéc mèna no mdubleꞌ xnìi lezoꞌ mèna. Tac cón cheꞌn diꞌs ndac ndli ndryo xoꞌf cón cheꞌn conꞌ yeꞌrsinꞌ coꞌ ndli mèn loo xnaa.
\v 14 Por cona, mbez mèn póla:
\pi1 Bloꞌ guꞌ mcalꞌ loo guꞌ, guꞌ coꞌ ndxàt. Goo che guꞌ làth mèn nguth. Crist li par tyub xnìi yéc guꞌ no par tyub xnìi lezoꞌ guꞌ loo cón cheꞌn Diox, ey.
\p
\v 15 Anderhuen guꞌ. Leque guꞌ blaꞌs loo guꞌ, tá, xá mod nzi tee ban guꞌ. Neꞌque tee bante guꞌ xal mèn naad no xal mèn nguud. Ndxeꞌlequeꞌ, fque tee ban guꞌ xal mèn coꞌ ndxác.
\v 16 Neꞌcuedte guꞌ no neꞌláꞌde guꞌ par neꞌtolode li guꞌ conꞌ ndac coꞌ ngue li guꞌ tac tiemp ndxèꞌ nac tiemp yeꞌrsinꞌ.
\v 17 Por cona, neꞌgàcte guꞌ arid mèn naxèn. Ndxeꞌlequeꞌ, gòc guꞌ mèn coꞌ ndaꞌ cuent no mèn coꞌ non coꞌ nac coꞌ nee lezoꞌ Tad Crist.
\v 18 Neꞌ neꞌ que tee tuuz guꞌ tac loo conꞌa ndxezaꞌ mèn no ndlyux mèn. Ndxeꞌlequeꞌ, gòc guꞌ mèn coꞌ taꞌ lugar ante ñibeꞌ Xpii Natúꞌ loo guꞌ xal nee lezoꞌ Xpii Natúꞌ.
\v 19 Ftoodiꞌs guꞌ loo thìb xtàa guꞌ no loo tedib xtàa guꞌ xal ndluꞌ diꞌs coꞌ nac xtiꞌs Diox coꞌ nac libr cheꞌn salmos no con himn coꞌ ndxolꞌ ro guꞌ coꞌ nac cón cheꞌn coꞌ ndluꞌ Xpii Natúꞌ loo guꞌ. Golꞌ ro guꞌ conꞌ roo no conꞌ xèn no conꞌ guryath no conꞌ guryèn loo mèn cón cheꞌn Tad Diox dib nzo yéc guꞌ no dib nzo lezoꞌ guꞌ.
\v 20 Por lèe cheꞌn Tad Jesucrist naꞌ, tolo gab guꞌ Diox quix Uꞌ, Tad Diox, cón cheꞌn ryete conꞌ loo Tad Diox xud naꞌ.
\s Diꞌs ndxèꞌ ngue luꞌ xá mod gàp mèn mod loo mèn guliz mèn, mèn coꞌ ndxelaꞌs loo Crist.
\p
\v 21 Gòc guꞌ mèn coꞌ ndyubdiꞌs no mèn coꞌ ndxòn ro thìb hues xtàa guꞌ no ro tedib hues xtàa guꞌ por cón cheꞌn Diox tac guꞌ ndxònqueꞌ ro Diox no ndxàp guꞌ mod loo Diox.
\p
\v 22 Mèngot, guꞌ coꞌ ngue no xinꞌ saꞌl, bìn guꞌ ro xinꞌ saꞌlpeꞌ guꞌ xal ndxòn guꞌ ro Tad Crist.
\v 23 Tac xinꞌ saꞌl guꞌ nac gundan loo guꞌ xalqueꞌ nac Crist gundan coꞌ ñibeꞌ loo mèn coꞌ ndxelaꞌs, mèn coꞌ nqueltàa loo cón cheꞌn Diox. Crist nteláꞌ mèn coꞌ ndxelaꞌs loo cón cheꞌn Diox por cón cheꞌn Crist loo conꞌ ryes. Mèna nac xal ladpeꞌ Crist.
\v 24 Texal naquin ndyubdiꞌs mèn no ndxòn mèn diꞌs cheꞌn Crist, mèn coꞌ ndxelaꞌs loo cón cheꞌn Diox por cón cheꞌn Crist, tataaguèꞌ ne, ryete mèngot coꞌ nac xinꞌ saꞌl ndxàal tyubdiꞌs loo xinꞌ saꞌl coꞌ nac saꞌlbiꞌ cheꞌn saꞌlgota loo ryete conꞌ coꞌ ñibeꞌ saꞌlbiꞌ loo saꞌlgot. Li saꞌlgota xal ñibeꞌ saꞌlbiꞌi.
\p
\v 25 Lomisqueꞌ, ngue niin loo guꞌ, ne, guꞌ coꞌ nac mènbiꞌ coꞌ nac xinꞌ saꞌl saꞌlgot: Fqueꞌ lezoꞌ guꞌ gunèe guꞌ xinꞌ saꞌlgot guꞌ. No bli guꞌ cas xinꞌ saꞌl guꞌ xalqueꞌ nqueꞌ lezoꞌ Crist ñèe Crist ryete mèn coꞌ ndxelaꞌs loo Crist no coꞌ thidte nqueltàa loo cón cheꞌn Crist. Fteꞌ lezoꞌ guꞌ leꞌ Crist nqueꞌqueꞌ lezoꞌ ñèe Crist mèn axta mdaꞌ Crist lugar mquée yalguth loo Crist por cón cheꞌn mèn coꞌ ndxelaꞌs loo Crist.
\v 26 Coꞌseꞌ ngolo mbìn mèn cón cheꞌn diꞌs ndac no ngolaꞌs mèn diꞌs coꞌ nac diꞌs ndaca, coꞌ nee diꞌs, ngolaꞌs mèna loo Crist, sya, ngòc bautizar mèn leꞌn nít. Tataa mod mtembìi Crist mèna xal ntech mèn trast zab par coꞌ xàꞌ Crist mèn coꞌ ndxelaꞌs coꞌ nqueltàa loo cón cheꞌn Diox loo cón cheꞌn xab izlyoꞌ par gàc mèna cheꞌnpeꞌ Diox.
\v 27 Conꞌa mbli Crist par leque yub Crist luꞌ mèn coꞌ ndxelaꞌs loo Diox por cón cheꞌn Crist xal thìb conꞌ coꞌ nquée xnìi loo Diox por cón cheꞌn Crist. Lyaꞌs Crist leꞌ mèn coꞌ ndxelaꞌs, coꞌ ngòo loo cón cheꞌn Diox, neꞌgàpte nec thìb conꞌ coꞌ nac conꞌ xin no conꞌ cap no nec thìb conꞌ coꞌ lal nac xal conꞌ xin no conꞌ cap. Ndxeꞌlequeꞌ, lyaꞌs Crist gàc mèn coꞌ ndxelaꞌs loo cón cheꞌn Diox por cón cheꞌn Crist, mèn coꞌ, lìcqueꞌ, ngro xàꞌ loo cón cheꞌn xab izlyoꞌ coꞌ ngòc cheꞌnpeꞌ Diox, mèn coꞌ ngòcqueꞌ mèn nambìi no mèn nalì loo Diox.
\v 28 Tataaguèꞌ ne, saꞌlbiꞌ ndxàal quenap saꞌlgotpeꞌ saꞌlbiꞌ xalqueꞌ ngue lezoꞌ saꞌlbiꞌ ñèe saꞌlbiꞌ leque ladpeꞌ saꞌlbiꞌ. Coꞌseꞌ nquenap mèn xinꞌ saꞌlgot, naca xal coꞌseꞌ leque mèn ngue lezoꞌ ñèe mèn mèn.
\v 29 Yende chó mèn nzo coꞌ alithe ndxecloo ñèe lad no coꞌ indyóode cón cheꞌn ladpeꞌ mèn, ¿léꞌ? Ndxeꞌlequeꞌ, leque mèna ndli par nquenap mèna leque mèn. No nguàa leque mèn mèn. Crist, ne, nquenap mèn coꞌ ndxelaꞌs loo Diox por cón cheꞌn Crist.
\v 30 Nac naꞌ coꞌ ndxelaꞌs loo Diox por cón cheꞌn Crist loo cón cheꞌn Crist xal ladpeꞌ Crist, coꞌ nee diꞌs, coꞌ nacpeꞌ bélꞌ ladpeꞌ Crist no sith ladpeꞌ Crist no ren ladpeꞌ Crist.
\v 31 Por cona, ndláꞌ thìb mbyòo xud mbyòo no xnaꞌ mbyòo par tyub no mbyòo thìb mzaꞌ. Leꞌ sya, ryop mbyòo mzaꞌa ngòc thidte xtàa coꞌ mdyoo dóꞌ.
\v 32 Conꞌ ndxèꞌ nac thìb conꞌ roo no thìb conꞌ xèn coꞌ nzo casloo coꞌ tarte ryo xoꞌf loo mèn. No cón cheꞌn conꞌ ndxèꞌ nac cón cheꞌn Crist coꞌ ngue toodizen loo guꞌ. Lomisqueꞌ ne, naca cón cheꞌn mèn coꞌ nqueltàa loo cón cheꞌn Crist chol lugar.
\v 33 Per thìb thìb guꞌ coꞌ nac xinꞌ saꞌlbiꞌ, leque guꞌ quenap xinꞌ saꞌlgot guꞌ xalqueꞌ ngue lezoꞌ guꞌ ñèe guꞌ guꞌ. Xinꞌ saꞌlgot, gòp guꞌ mod loo xinꞌ saꞌlbiꞌpeꞌ coꞌ nac saꞌl saꞌlgota, ne.
\c 6
\p
\v 1 Lomisqueꞌ, niin loo guꞌ, myenꞌ, guꞌ coꞌ nac xinꞌ xud guꞌ no xinꞌ xnaꞌ guꞌ: Ftubdiꞌs guꞌ loo xud guꞌ no loo xnaꞌ guꞌ tac guꞌ nac myenꞌ coꞌ nzo loo cón cheꞌn Crist. Nalì no nambìi nac conꞌ ndxèꞌ loo Diox.
\v 2 Bli guꞌ conꞌ guryath no conꞌ guryèn loo xud guꞌ no loo xnaꞌ guꞌ. Tac cheleꞌ guꞌ li conꞌ ndxèꞌ coꞌ nac ner yalnibeꞌ coꞌ mnibeꞌ Moisés loo mèn coꞌ mcàbgòn Diox càba conꞌ ndac loo mèn, cona nee diꞌs,
\v 3 xyalꞌ ned xyalꞌ yóꞌ loo guꞌ par cuaꞌn guꞌ coꞌ hua guꞌ no coꞌ gu guꞌ no tyac lezoꞌ guꞌ láth ban guꞌ huax línꞌ loo izlyoꞌ ndxèꞌ.
\v 4 Leꞌ guꞌ coꞌ nac gundan ted gundan yínꞌ loo xinꞌ guꞌ na, neꞌtaꞌde guꞌ xyàn lezoꞌ xinꞌ guꞌ par yecloo xinꞌ guꞌ no par tyoo xàꞌ lezoꞌ xinꞌ guꞌ loo mod coꞌ ndxelaꞌs guꞌ loo Diox. Ndxeꞌlequeꞌ, no no ftoodiꞌs no guꞌ xinꞌ guꞌ nadoꞌ diꞌs no nadoꞌ cuent par téꞌth xinꞌ guꞌ ñibeꞌ xinꞌ guꞌ loo lezoꞌ xinꞌ guꞌ no loo xtùuz xinꞌ guꞌ. Bluꞌ guꞌ xinꞌ guꞌ par tyubdiꞌs xinꞌ guꞌ loo cón cheꞌn Tad Crist, ne.
\p
\v 5 Guꞌ coꞌ nac moz, ne, ftubdiꞌs guꞌ loo patrón guꞌ no bìn guꞌ ro patrón guꞌ coꞌ ñibeꞌ patrón loo guꞌ loo izlyoꞌ ndxèꞌ. Bli guꞌ cas patrón guꞌ. No gòp guꞌ mod gunèe guꞌ patrón guꞌ dib nzo yéc guꞌ no dib nzo lezoꞌ guꞌ xalqueꞌ ndyubdiꞌs guꞌ loo Crist.
\v 6 Neꞌgàcte guꞌ xal moz coꞌ ndli zinꞌ ante coꞌseꞌ ndoo naa patrón loo moz par tataa mod güin moz loo zinꞌ. Ndxeꞌlequeꞌ, gòc guꞌ xal moz coꞌ nxoꞌf zinꞌ cón cheꞌn Crist. Bli guꞌ zinꞌ dib nzo yéc guꞌ no dib nzo lezoꞌ guꞌ xal mèn coꞌ ndyéꞌth lezoꞌ loo coꞌ ñibeꞌ Diox.
\v 7 Guꞌ coꞌ nac moz, bli guꞌ zinꞌ dib nzo yéc guꞌ no dib nzo lezoꞌ guꞌ xalqueꞌ ndli mèn sirv loo Tad Crist. Neꞌlide guꞌ sirv loo xtàa guꞌ xal ndli chol mèn sirv loo xtàa mèn.
\v 8 Tac guꞌ naneequeꞌ leꞌ ryete conꞌ ndac coꞌ ndli thìb thìb naꞌ, càayaꞌ naꞌ yalndxax cón cheꞌn conꞌ ndac coꞌ ndli naꞌ coꞌ taꞌ Tad Crist, que nac naꞌ moz, que nac naꞌ mèn coꞌ yende chó ñibeꞌ loo.
\p
\v 9 Lomisqueꞌ, guꞌ coꞌ nac patrón, ne, tataaqueꞌ bli guꞌ con moz guꞌ. Neꞌtetìixùꞌde guꞌ moz guꞌ. Fteꞌ lezoꞌ guꞌ leꞌ guꞌ nonqueꞌ leꞌ Tad Diox, coꞌ nzo loo béꞌ, nac patrón cheꞌn ryete naꞌ, que nac naꞌ patrón, que nac naꞌ moz. Indlide Tad Diox tyuꞌ thìb mèn más leque tedib mèn loo Tad Diox.
\s Pab ngue luꞌ leꞌ xtiꞌs Diox coꞌ nac diꞌs natúꞌ nac xal nac chol yiꞌf coꞌ ntauꞌ solndad lad solndad loo xóꞌ loo mèn coꞌ ndxelaꞌs loo Crist.
\p
\v 10 Per nalleꞌ conꞌ ndxèꞌ nac lult diꞌs coꞌ ngue niin loo guꞌ, mèn coꞌ nac xal huesen por cón cheꞌn Crist: Leque guꞌ blo valor loo guꞌ no bli guꞌ par yeꞌth lezoꞌ guꞌ par tolo queltàa guꞌ loo Tad Crist no loo cón cheꞌn Tad Crist por cón cheꞌn ryethe conꞌ coꞌ nzo laꞌs nii Tad Crist no laꞌs yaꞌ Tad Crist.
\v 11 Fquenap guꞌ guꞌ loo ryethe conꞌ yeꞌrsinꞌ cheꞌn Mebizya coꞌ ngyoo no mèn. Xal coꞌseꞌ ntauꞌ solndad lad solndad con thìb bloo yiꞌf loo conꞌ ryes, tataaqueꞌ ndlàa Diox naꞌ no ntauꞌ Diox naꞌ loo conꞌ ryes no loo conꞌ yeꞌrsinꞌ coꞌ ndxàc loo naꞌ.
\v 12 Tac ingyoode naꞌ con mèn loo izlyoꞌ ndxèꞌ. Ndxeꞌlequeꞌ, naꞌ ngyoo con ryete xpii yeꞌrsinꞌ coꞌ nzi tee ban loo mbii. Xpii yeꞌrsinꞌa ndxàp conꞌ roo conꞌ xèn laꞌs nii xpii yeꞌrsinꞌa no laꞌs yaꞌ xpii yeꞌrsinꞌa. Ñibeꞌ xpiia loo izlyoꞌ ndxèꞌ, coꞌ nee diꞌs, loo mèn coꞌ nac jef roo jef xèn coꞌ ñibeꞌ loo mèn loo izlyoꞌ ndxèꞌ.
\v 13 Por cona, gure nèe guꞌ no blo guꞌ valor loo guꞌ loo cón cheꞌn ryethe conꞌ coꞌ nzo laꞌs nii Diox no conꞌ coꞌ nzo laꞌs yaꞌ Diox xal thìb solndad coꞌ ndxoc xab coꞌ nacsuaꞌ con yiꞌf par tauꞌ solndad lad solndad par lyáꞌ solndad loo conꞌ ryes. Tataa bli guꞌ par neꞌtyoo xàꞌde lezoꞌ guꞌ no neꞌzyebte guꞌ coꞌseꞌ cobyaꞌ Mebizya guꞌ par li Mebizya tyub yoꞌf lezoꞌ guꞌ par li guꞌ conꞌ yeꞌrsinꞌ leꞌn huiz coꞌ gàc huiz yeꞌrsinꞌ. Leꞌ coꞌseꞌ yilo riꞌth conꞌ yeꞌrsinꞌa loo guꞌ na, bli guꞌ par tolo cue nèe guꞌ loo cón cheꞌn Diox.
\v 14 Tolo bli guꞌ par cue nèe guꞌ, tá, loo coꞌ nac cón cheꞌn Diox. No que tee ban li guꞌ conꞌ coꞌ nac lìcpeꞌ. Tataa gàp guꞌ fuerz no yòo valor loo guꞌ coꞌseꞌ cobyaꞌ Mebizya guꞌ hora xal ndli thìb solndad coꞌseꞌ ntíꞌ solndad thìb cinch leꞌn solndad par gàp solndad fuerz. Bli nèe guꞌ guꞌ loo cón cheꞌn Diox par nalì no nambìi que tee ban guꞌ loo cón cheꞌn Crist par neꞌlide Mebizya gan loo guꞌ xal coꞌseꞌ ndxoc thìb solndad xab solndad coꞌ nacsuaꞌ con yiꞌf par neꞌtehuíꞌde ngolo ngolaꞌs solndad solndad coꞌseꞌ ndyee solndad loo xóꞌ.
\v 15 Nalas gure guꞌ no bli nab guꞌ guꞌ par taꞌ guꞌ cuent no co guꞌ yalbàn loo mèn cón cheꞌn diꞌs ndac coꞌ li par yo nagàl lezoꞌ mèn que tee ban mèn loo Diox. Tataa bli guꞌ, coꞌ nee diꞌs, nac xal ndli solndad coꞌseꞌ quej nqueꞌ solndad zapat nii solndad par yátbèe solndad ya solndad loo xóꞌ.
\v 16 Más de cona, golaꞌs guꞌ no gòp guꞌ yalxlaꞌs loo Diox xal ngue niin loo guꞌ par neꞌlide Mebizya gan loo guꞌ. Tataa bli guꞌ, coꞌ nee diꞌs, nac xal ndli thìb solndad coꞌseꞌ ntauꞌ solndad lad solndad con thìb leꞌ yiꞌf coꞌ lèe scud láth coꞌseꞌ ndoo mèn coꞌ nac ngolo ngolaꞌs cheꞌn solndad loo solndad con flech, coꞌ ndub quìi bèel punt, par lyáꞌ solndad loo conꞌ ryesa. Tataa bli guꞌ par neꞌyiziꞌfte no neꞌyigaꞌste conꞌ yeꞌrsinꞌ loo guꞌ coꞌ nac conꞌ ndlyaꞌs Mebizya gàc loo guꞌ.
\v 17 Bli guꞌ xtùuz loo ryethe conꞌ cón cheꞌn xá mod mblyáꞌ guꞌ loo conꞌ ryes par quenap guꞌ xtùuz guꞌ xal nquenap solndad yéc solndad con sombrel coꞌ nacsuaꞌ con yiꞌf. Bluꞌ guꞌ cón cheꞌn xtiꞌs Diox loo xtàa guꞌ xal ndlyath no Xpii Natúꞌ cheꞌn Diox guꞌ. Tataa mod li guꞌ gan loo Mebizya xal ndli solndad us thìb cuchi par li solndad gan loo mèn coꞌ nac ngolo ngolaꞌs cheꞌn solndad.
\v 18 Ftoloqueꞌ gurez guꞌ Diox no bnab guꞌ ryethe conꞌ naquin guꞌ loo Diox por cón cheꞌn Xpii Natúꞌ. Ftolo bnab guꞌ conꞌ loo Diox xal mèn coꞌ nalas nziriꞌ coꞌ nac mèn coꞌ inzode mcalꞌ loo. Ftoloqueꞌ gurez guꞌ Diox por cón cheꞌn ryete mèn coꞌ ngro xàꞌ loo cón cheꞌn xab izlyoꞌ coꞌ ngòc cheꞌnpeꞌ Diox.
\v 19 Gurez guꞌ Diox por daa, ne, par tolo taꞌ Diox lugar loon par tyoodizen con dibaxlaꞌs no lin par yath yèn cón cheꞌn diꞌs ndac coꞌ ngo casloo loo mèn axta póla.
\v 20 Diox mtelꞌ daa par ndalen xal mnibeꞌ Diox loon par tethen cón cheꞌn diꞌs ndac cheꞌn Diox loo mèn. Nalleꞌ por mdethen cón cheꞌn diꞌs ndaca, mqueꞌ mèn daa leziꞌf. Gurez guꞌ Diox par daa par yòo valor loon xal ndxàala par gon yalbàn loo mèn con dibaxlaꞌs cón cheꞌn diꞌs ndaca.
\s Pab ngue nii Diox loo mèn coꞌ ndxelaꞌs loo Crist no loo cón cheꞌn Crist.
\p
\v 21 Tiquic coꞌ ndxàc hues naꞌ por cón cheꞌn Crist, coꞌ nac mbiꞌ coꞌ anzeꞌf nqueꞌ lezoꞌ ñèe naꞌ, Tiquic taꞌ cuent loo guꞌ par ñee guꞌ no taꞌ guꞌ cuent cón cheꞌn zinꞌ coꞌ mxoꞌf zinꞌ Diox loon no xal ndxàc ryete conꞌ ndxèꞌ loon. Anzeꞌf altant ndoo Tiquic loo mèn láth nxoꞌf zinꞌ Tiquic zinꞌ loo mèn cón cheꞌn Tad Crist.
\v 22 Por cón cheꞌn conꞌ ndxèꞌ mtelꞌen Tiquic loo guꞌ par taꞌ Tiquic cuent loo guꞌ xá nzo nuꞌ par nedrèꞌ no par tegán Tiquic lezoꞌ guꞌ.
\p
\v 23 Mbezen Diox no Tad Jesucrist leꞌ Diox li par cue guꞌ rye nda guꞌ no rye ndyeꞌth guꞌ. Gòp guꞌ yalxlaꞌs loo Diox xud naꞌ. Fqueꞌ lezoꞌ guꞌ gunèe guꞌ xtàa guꞌ coꞌ nac xal huespeꞌ guꞌ làth xtàa guꞌ.
\v 24 Mbezen Diox leꞌ Diox li anggàc conꞌ ndac loo ryete mèn coꞌ nqueꞌ lezoꞌ Tad Jesucrist naꞌ con dib nzo yéc mèn no con dib nzo lezoꞌ mèn thidtene. Taandxèꞌ gàca.