\id PHP
\ide UTF8
\h FILIPENSES
\toc1 FILIPENSES
\mt Cart Coꞌ Mqueꞌ Pab Yeꞌs Loo Mèn Coꞌ Ngo Ban Leꞌn Ciuda Filip
\c 1
\s Pab ngue queꞌ yeꞌs loo mèn láth mqueꞌ Pab leziꞌf, loo mèn coꞌ ndxelaꞌs loo Diox por cón cheꞌn Jesucrist, mèn coꞌ ngo ban leꞌn ciuda Filip.
\p
\v 1 Daa, Pab, ngue queꞌ yeꞌs loo guꞌ, mèn cheꞌn ciuda Filip, guꞌ coꞌ ndxelaꞌs loo Diox por cón cheꞌn Tad Crist. Ryop nuꞌ Timote ngue nii Diox loo guꞌ, guꞌ coꞌ ngro xàꞌ loo cón cheꞌn xab izlyoꞌ par ngòc guꞌ cheꞌnpeꞌ Diox no cheꞌnpeꞌ Crist Jesús. Lomisqueꞌ tiemp, ngue queꞌen yeꞌs loo guꞌ mèngool, guꞌ coꞌ ndyoo ner no coꞌ ndyoo naa loo mèn coꞌ ndxelaꞌs loo cón cheꞌn Diox. Lomisqueꞌ, thidte ngue queꞌen yeꞌs loo guꞌ, guꞌ coꞌ ndlyath no no coꞌ ndli sirv loo mèn coꞌ ndxelaꞌs loo cón cheꞌn Diox por cón cheꞌn Crist Jesús.
\v 2 Ndlyazen leꞌ Diox xud naꞌ no Tad Jesucrist naꞌ tolo li anggàc conꞌ ndac loo guꞌ. Ndlyazen, ne, leꞌ Diox no Tad Jesucrist naꞌ angli nagàl yo lezoꞌ guꞌ loo Diox no cue ban guꞌ rye nda guꞌ no rye ndyeꞌth guꞌ làth xtàa guꞌ.
\s Pab ngue naꞌb loo Diox cón cheꞌn mèn coꞌ ndxelaꞌs loo Diox por cón cheꞌn Tad Crist.
\p
\v 3 Ryete vez coꞌseꞌ nteꞌ lezon guꞌ láth coꞌseꞌ mbezen Diox, mbezquen Diox quix Diox loo Diox por cón cheꞌn guꞌ.
\v 4 Ndyac lezon coꞌseꞌ toloqueꞌ mbezen no ñaꞌben cón cheꞌn ryete guꞌ loo Diox coꞌseꞌ mbezen Diox.
\v 5 Naneequeꞌ guꞌ thidte ngue xoꞌf zinꞌ naꞌ zinꞌ cón cheꞌn diꞌs ndac. Ndlyath noqueꞌ guꞌ daa axta coꞌseꞌ ngòc ner huiz coꞌseꞌ mbìn guꞌ diꞌs coꞌ nac diꞌs ndac. Axta huiza no axta huiz nalze ngue lyath noqueꞌ guꞌ daa.
\v 6 Ndxàpen yalxlaꞌs loo Diox leꞌ Diox coꞌ mtlo mxoꞌf zinꞌ cón cheꞌn zinꞌ ndac ndxèꞌ loo guꞌ, Diox tolo li zinꞌ ndac ndxèꞌ loo guꞌ axta huiz coꞌseꞌ gàc huiz bere Jesucrist, yiꞌth xi Jesucrist mèn coꞌ ndxelaꞌs loo Jesucrist. Axta syareꞌ, ngolo mdyaa zinꞌ ndxèꞌ loo guꞌ.
\v 7 Ndxàalqueꞌ taandxèꞌ lin xtùuz cón cheꞌn ryete guꞌ. Tac anzeꞌf lezon ngudloon ryete guꞌ. Diox angngue li conꞌ ndac loo guꞌ xal ndxàca loon láth ngueꞌen leziꞌf nalleꞌ, ne, tac guꞌ ndlyath no daa loo zinꞌ ndxèꞌ. Que naca ngueꞌen leziꞌf, o que naca toon loo mèn nac zinꞌ coꞌ ñibeꞌ, o que naca pál coꞌteꞌ nzon, tubquen razon cón cheꞌn diꞌs ndac. No li nèen cón cheꞌn diꞌs ndac ndxèꞌ loo mèn leꞌ cón cheꞌn diꞌs ndac ndxèꞌ nac lìcpeꞌ.
\v 8 Tac Diox nonqueꞌ no naneequeꞌ Diox leꞌ daa nqueꞌ lezoꞌ ñèen guꞌ axta plóthe xalqueꞌ nqueꞌ lezoꞌ Jesucrist ñèe Jesucrist mèn axta plóthe.
\v 9 Coꞌseꞌ mbezen Diox, ñaꞌben cón cheꞌn guꞌ loo Diox leꞌ guꞌ tolo queꞌqueꞌ lezoꞌ cón cheꞌn Diox no sate más tolo gác guꞌ coꞌ nac cón cheꞌn Diox láth ngue téꞌth guꞌ cón cheꞌn Diox. Láth ngue téꞌth guꞌa, fteche ftexyath guꞌ xtùuz guꞌ cón cheꞌn conꞌ ndac no cón cheꞌn conꞌ yeꞌrsinꞌ. Làth xtauꞌa, sate más tolo queꞌ lezoꞌ guꞌ Diox no queꞌ lezoꞌ guꞌ ñèe guꞌ hues xtàa guꞌ.
\v 10 Mbezen Diox leꞌ guꞌ tolo gác cui coꞌ nac más conꞌ ndac. Gòc guꞌ mèn coꞌ dib nzo yéc no mèn coꞌ dib nzo lezoꞌ loo cón cheꞌn Diox. Gòc guꞌ mèn coꞌ neꞌtaꞌde xyàn lezoꞌ hues xtàa guꞌ axta coꞌseꞌ gàc huiz coꞌseꞌ yiꞌth xi Crist naꞌ, naꞌ coꞌ ndxelaꞌs loo Crist.
\v 11 Mbezen Diox leꞌ Jesucrist lyath no guꞌ par que tee ban lì guꞌ par càba yalnaban loo guꞌ xal thìb conꞌ coꞌ ndxas ndxàl loo Diox. Tataa bli guꞌ par càba xyoꞌf lèe no xyoꞌf xtiꞌs lèe Diox par gàc conꞌ guryath no conꞌ guryèn loo Diox por cón cheꞌn guꞌ.
\s Pab ngue taꞌ cuent loo mèn ante loo cón cheꞌn Crist ndxòo lezoꞌ Pab naban Pab.
\p
\v 12 Guꞌ coꞌ nac huesen por cón cheꞌn Jesucrist, ndlyasquen leꞌ guꞌ non no nanee guꞌ leꞌ cón cheꞌn conꞌ coꞌ ngòc loon, ale ndxeꞌlequeꞌ, lìcqueꞌ, mcàba más conꞌ ndac loo cón cheꞌn diꞌs ndac par alanlequeꞌ tolo yath yèn diꞌs ndaca loo mèn.
\v 13 Ale leꞌleꞌ más huen ngòca loon par non ryete mèn no mbli laꞌs ryete mèn coꞌ naban palas cheꞌn gobiern no taamas mèn coꞌ naban coꞌteꞌ nzon ndxèꞌ leꞌ por cón cheꞌn Crist ngueꞌen leziꞌf.
\v 14 Huax mèn coꞌ naban ciuda Rom coꞌteꞌ ngueꞌen leziꞌf, mèn coꞌ nac hues naꞌ por cón cheꞌn Tad Crist, ale sate más ngòo valor loo mèna coꞌseꞌ mbìn mèna leꞌ daa ngueꞌ leziꞌf. Ale neꞌ neꞌ ngzeb mèna. Alanlequeꞌ ngòp mèna yalxlaꞌs loo Diox. Ngo mèna yalbàn, ne.
\p
\v 15 Lìcpeꞌ baꞌi, nzo thìb ned mèn coꞌ ngo yalbàn con xèn con xyàn. Mèna ndxàn lezoꞌ ñèe mèna daa por cón cheꞌn Crist. Per tedib ned mèn coꞌ nac tedib ned mèn, mèna ngo yalbàn dib nzo yéc mèna no dib nzo lezoꞌ mèna coꞌ nac cón cheꞌn Crist.
\v 16–17 Mbryop ned mèna ndeꞌth cón cheꞌn Crist tac nqueꞌ lezoꞌ mèna Diox. Naneequeꞌ mèna no nonqueꞌ mèna leꞌ daa ngueꞌ leziꞌf tac ncàben loo mèn no nduben razon cón cheꞌn diꞌs ndac. No nalì ndan cuent cón cheꞌn diꞌs ndac loo mèn. Per ndxeꞌlequeꞌ, ner ned mèna ndeꞌth cón cheꞌn Crist con xèn con xyàn coꞌ nzo lezoꞌ mèna ñèe mèna daa. Indlide mèna conꞌa xal mèn coꞌ nambìi no nalì ndoo. Ndxeꞌlequeꞌ, ndli mèna xtùuz no ncuaꞌn mèna mod par tolo tec mèna daa tac ñèe mèna ngueꞌen leziꞌf.
\v 18 Per ¿chó mport nzo lezon cona? Gunee mèna cón tyoodiꞌs mèna cón cheꞌn Crist. Gunee mèna chéꞌ ndyoodiꞌs mèna nalì o chéꞌ ñii yèe ñii tìi mèna cón cheꞌn Crist. Conseꞌ ndxath no ndxèn cón cheꞌn Crist làth mèn, ndyac lezon cón cheꞌn mèna.
\p Toloqueꞌ tyac lezon, ne.
\v 19 Tac daa naneequeꞌ no nonqueꞌ daa leꞌ conꞌ ndxàc loon ndxèꞌ, leꞌi càb loon leꞌ daa ryoꞌ ndac. Tataa gàca tac guꞌ mbez Diox cón chenen. Làth xtauꞌa, Xpii Natúꞌ cheꞌn Jesucrist ngue lyath no daa, ne.
\v 20 Pues conꞌ coꞌ lyazen no conꞌ coꞌ nquee lezon nac: Nec thìb mod neꞌthyonte daa. Ndxeꞌlequeꞌ, lyazen gàca loon leꞌ daa tyoodiz no mèn con dibaxlaꞌs cón cheꞌn Crist, que naca càb conꞌ ndac loon, que naca càb conꞌ ryes loon, que naca ban daa, o que naca gath daa, conseꞌ gàc conꞌ roo conꞌ xèn loo Crist por cón chenen.
\v 21 Per láth naban daa, ante ndoo lezon nxoꞌf zinꞌen cón cheꞌn Crist. Cheleꞌ daa gath, ale leꞌleꞌ más huen gan.
\v 22 Per cheleꞌ bélꞌyòo coꞌ nac laden ndxèꞌ tolo banqueꞌ loon, leꞌ sya, toloqueꞌ lin zinꞌ cón cheꞌn Crist coꞌ càb loon coꞌ gàc conꞌ yas yàl loon. Lìcpeꞌ baꞌi, axta neꞌ neꞌ ñeen cón ndxàal lin.
\v 23 Per nalleꞌ, huiꞌ guꞌ nexa. Sa niin ndooqueꞌ loo guꞌ. Taasa niin nzoleꞌ loo béꞌ. Thìb ndyub yoꞌf lezon gath bélꞌyòo laden ndxèꞌ par bii ban non Crist. Cona, gàc más conꞌ ndac par daa.
\v 24 Per tediba na, lyazen tolo banqueꞌ bélꞌyòo laden tac ndyaquen naquinqueꞌ go non guꞌ taandxep.
\v 25 No ndxàpen yalxlaꞌs loo Diox ndxàalqueꞌ yanꞌ non guꞌ. Por cona, naneequen no nonquen leꞌ daa yanꞌ noqueꞌ guꞌ par tolo téꞌth guꞌ no tyub xnìi yéc guꞌ no tyub xnìi lezoꞌ guꞌ loo cón cheꞌn Diox no tyac lezoꞌ guꞌ loo conꞌ coꞌ ndxelaꞌs guꞌ.
\v 26 Leꞌ sya, coꞌseꞌ galen loo guꞌ tedib vez, gab guꞌ diꞌs roo no diꞌs xèn no diꞌs natúꞌ loo Crist Jesús por cón chenen.
\p
\v 27 Thìb conꞌ no maste ñaꞌben loo guꞌ: Nabeꞌste fque tee ban guꞌ xal ñibeꞌ xtiꞌs Crist loo guꞌ no xal ndluꞌ diꞌs ndac cheꞌn Crist loo guꞌ. Fque tee ban lì guꞌ par que naca go non guꞌ, que naca tith nzon loo guꞌ, gònquen cón cheꞌn guꞌ leꞌ guꞌ thidtenequeꞌ mbli nèe lezoꞌ guꞌ no xtùuz guꞌ loo thidte coꞌ nac cón cheꞌn Crist. Blo guꞌ valor loo guꞌ con thidte xtùuz guꞌ no con thidte lezoꞌ guꞌ par li nèe guꞌ guꞌ xal ñibeꞌ Diox loo diꞌs ndac coꞌ ndluꞌ xá mod lyáꞌ mèn loo conꞌ ryes coꞌ ndxelaꞌs naꞌ.
\v 28 Neꞌ neꞌ laꞌ guꞌ zeꞌb chol conꞌ coꞌ nac ngolo ngolaꞌs cheꞌn guꞌ guꞌ. Tac cheleꞌ guꞌ inzyebte, leꞌi ndluꞌ loo mèn coꞌ nac ngolo ngolaꞌsa leꞌ mèna tyuhuan no lyux mèna. Per ndxeꞌlequeꞌ, guꞌ non leꞌi ndluꞌ loo naꞌ leꞌ naꞌ mblyáꞌleꞌ loo conꞌ ryes. Huiꞌ guꞌ nexa. Diox mbli par neꞌzyebte guꞌ.
\v 29 Por cón cheꞌn Crist, Diox angmbli leꞌ guꞌ ngolaꞌs loo Crist. Non Diox leꞌ coꞌseꞌ ngolaꞌs guꞌ loo Crist, càba loo guꞌ leꞌ guꞌ tyactìi por cón cheꞌn Crist, ne.
\v 30 Loo cón cheꞌn Crist nac naꞌ xal solndad coꞌ ndxátbèe par cue yoo no solndad mèn coꞌ nac ngolo ngolaꞌs cheꞌn solndad. Cón cheꞌn conꞌa, ndaꞌqueꞌ guꞌ cuent xá mod mque tee ban daa loo diꞌs ndac xal ndxàca loo solndada. Nalleꞌ guꞌ nonqueꞌ xal ndxàca loon. Ndxàca loon xalqueꞌ ndxàca loo solndad coꞌseꞌ ndxátbèe solndad, nda solndad loo xóꞌ. Tataa ndxàca loon nalleꞌ loo cón cheꞌn diꞌs ndac ndxèꞌ.
\c 2
\s Diꞌs ndxèꞌ ndaꞌ cuent leꞌ Crist ngòc thìb mèn beꞌthe no thìb mèn nadoꞌ. Ngoloa, ngòc conꞌ roo conꞌ xèn loo Crist par ngòp Crist rye loothe conꞌ laꞌs nii Crist no laꞌs yaꞌ Crist.
\p
\v 1 Por cón cheꞌn ryete conꞌa, niin tedib conꞌ loo guꞌ: Cheleꞌ Crist ntegánqueꞌ lezoꞌ guꞌ ndxep, no cheleꞌ guꞌ nagàlqueꞌ nzo lezoꞌ tac non guꞌ leꞌ Diox nqueꞌ lezoꞌ ñee Diox guꞌ, no cheleꞌ guꞌ indláꞌyaꞌde xtàa guꞌ loo conꞌ coꞌ nde che loo xtàa guꞌ, no ndaꞌ guꞌ yaꞌ guꞌ loo xtàa guꞌ loo chol zinꞌ coꞌ ndxòo xtàa guꞌ tac Xpii Natúꞌ nzo no guꞌ, no cheleꞌ guꞌ ndenꞌqueꞌ lezoꞌ susqueꞌ ndlyat lezoꞌ Diox ñèe Diox guꞌ por cón cheꞌn Crist,
\v 2 tataa bli guꞌ xal ngue niin loo guꞌ nalleꞌ par tolo tyac tínꞌ lezon, coꞌ nee diꞌs, thidte ndyeꞌth lezoꞌ naꞌ no thidte ndxàc naꞌ coꞌseꞌ thidte queꞌ lezoꞌ naꞌ ñèe naꞌ hues xtàa naꞌ loo cón cheꞌn Crist. Lomisqueꞌ, fqueꞌ lezoꞌ guꞌ Diox no fqueꞌ lezoꞌ guꞌ ñèe guꞌ hues xtàa guꞌ. Thidte bli guꞌ yéc guꞌ no thidte bli guꞌ lezoꞌ guꞌ. Thidte ftenꞌ guꞌ cón nac conꞌ ndac làth xtàa guꞌ, ne.
\v 3 Yende cón li guꞌ par tyeꞌs guꞌ cón cheꞌn guꞌ. Neꞌ neꞌ li guꞌ chol conꞌ par li guꞌ gan loo xtàa guꞌ. Ndxeꞌlequeꞌ, gòc guꞌ mèn nadoꞌ. Bli thìb thìb guꞌ cas loo hues xtàa guꞌ axta plóthe xal ndli mèn cas loo thìb mbiꞌ coꞌ ndli mèn cuent anzeꞌf ntac.
\v 4 Neꞌtyoode lezoꞌ nec thìb guꞌ par quenap guꞌ ante coꞌ nac cheꞌnpeꞌ guꞌ par gàca conꞌ ndac loo guꞌ. Ndxeꞌlequeꞌ, ftoo lezoꞌ guꞌ quenap guꞌ conꞌ coꞌ nac cheꞌn thìb hues xtàa guꞌ no conꞌ coꞌ nac cheꞌn tedib hues xtàa guꞌ par lyath no guꞌ hues xtàa guꞌa par gàca más conꞌ ndac loo hues xtàa guꞌa.
\p
\v 5 Thidte bli ryete guꞌ xtùuz xalqueꞌ mbli Crist Jesús xtùuz coꞌseꞌ ndlab guꞌ xtiꞌs Diox no coꞌseꞌ mbez guꞌ Diox. Tataaqueꞌ bli guꞌ xtùuz cón cheꞌn thìb hues xtàa guꞌ no cón cheꞌn tedib hues xtàa guꞌ.
\v 6 Huiꞌ guꞌ nexa. Por part cón cheꞌn Crist, mastaleꞌ dib xoo xá ñaa Diox ñaa Crist, no nac Crist xalqueꞌ yub Diox ndooreꞌ mbiꞌth Crist loo izlyoꞌ, no mastaleꞌ ngòp Crist conꞌ laꞌs nii Crist no laꞌs yaꞌ Crist par yanꞌ no Crist cón cheꞌnpeꞌ Crist loo béꞌ, neꞌngòode lezoꞌ Crist par tolo lalqueꞌ ngàc Crist xal yub Diox par ngyanꞌ Crist xal Diox loo béꞌ.
\v 7 Ale leꞌleꞌ mbláꞌ Crist conꞌ coꞌ ngòc cheꞌnpeꞌ Crist thìb lad loo béꞌ. Ale mbiꞌth yáal Crist loo izlyoꞌ xal ndxáal chol mbetoꞌ par ngòc Crist xal thìb moz coꞌ ndli sirv loo mèn no loo Diox.
\v 8 Coꞌseꞌ ngòc Crist xal chol mèn coꞌ mbiꞌth yáal loo izlyoꞌ ndxèꞌ, mque tee gueꞌs yaꞌ Crist loo mèn. Neꞌndeꞌste Crist loo mèn. No por ngòc Crist thìb mbiꞌ nadoꞌ, leque Crist angmblaꞌ par mqueꞌ mèn Crist loo cruz mastaleꞌ ngòc conꞌa conꞌ par thyon Crist coꞌseꞌ nguth Crist loo cruz.
\v 9 Por cona, mbli Diox ngòc más conꞌ guryath no conꞌ guryèn loo Crist. No mbli Diox par mbeꞌ Crist thìb lèe, coꞌ nee diꞌs, nac Crist más mbiꞌ roo mbiꞌ xèn leque chol taamas mèn, no angl, no chol conꞌ coꞌ nzo loo béꞌ, no coꞌ nzo loo izlyoꞌ.
\v 10 Tataa mbli Diox par coꞌseꞌ gòn mèn lèe Crist, tyub xib mèn loo Crist, que naca mèn coꞌ nzo loo béꞌ, que naca angl coꞌ nzo loo béꞌ, que naca mèn coꞌ naban loo izlyoꞌ, que naca chol xpii yeꞌrsinꞌ coꞌ nzo loo izlyoꞌ, que naca xpii mèn coꞌ nzo yeꞌrbìil, que naca chol xpii yeꞌrsinꞌ coꞌ nzo yeꞌrbìil.
\v 11 Conꞌa mbli Diox loo Jesucrist par taꞌ mèn cuent, no yilaꞌs mèn, no gab mèn leꞌ Jesucrist nac yub Tad Diox par tataa mod gàc conꞌ guryath no conꞌ guryèn loo Diox no tolo xyoꞌf lèe xyoꞌf xtiꞌs Dios coꞌ nac xudpeꞌ Jesucrist loo mèn.
\s Diꞌs ndxèꞌ ngue taꞌ cuent leꞌ ryete mèn coꞌ ndxelaꞌs loo Crist nac xal thìb xnìi coꞌ ntenìi loo yálꞌcuau.
\p
\v 12 Por cona, guꞌ coꞌ nac mèn huesen por cón cheꞌn Jesucrist, guꞌ coꞌ nqueꞌ lezon ñèen, xalqueꞌ ndyubdiꞌs guꞌa, no iante ndyubdiꞌs guꞌ loon coꞌseꞌ ngo non guꞌa, per ale ndxeꞌlequeꞌ, más ndyubdiꞌs guꞌ loon nalleꞌ coꞌseꞌ yende daa loo guꞌ, bli guꞌ cas loo Diox xal mèn coꞌ nzyeb no xal mèn coꞌ nxiꞌth lezoꞌ loo Diox. Tolo fxoꞌf zinꞌ guꞌ loo cón cheꞌn Diox tac guꞌ mblyáꞌleꞌ loo conꞌ ryes.
\v 13 Tac Diox ndli loo guꞌ leꞌ guꞌ ndlyaꞌsqueꞌ li conꞌ ndac xal nee lezoꞌ Diox. Ndlyath no Diox guꞌ par li guꞌi, ne.
\p
\v 14 Láth ngue li guꞌ conꞌ ndac coꞌ nee lezoꞌ Diox, neꞌco ñeede guꞌ cón cheꞌn hues xtàa guꞌ no neꞌyoode guꞌ con hues xtàa guꞌ.
\v 15 Ndxeꞌlequeꞌ, fque tee ban ndac guꞌ par neꞌquexùꞌde mèn guꞌ. Neꞌcuaꞌnte guꞌ xquin guꞌ làth mèna. Guꞌ nac xinꞌ Diox. Nonqueꞌ guꞌ leꞌ guꞌ nzo ban làth bin mèn yeꞌrsinꞌ. Làth xtauꞌa, gòc guꞌ mèn coꞌ ntenìi yéc mèna no coꞌ ntenìi lezoꞌ mèna xal ntenìi huiz no mbeꞌ loo izlyoꞌ.
\v 16 Ndlyazen leꞌ guꞌ que tee taꞌ cuent cón cheꞌn diꞌs ndac coꞌ ndluꞌ loo mèn xá mod lyáꞌ mèn loo conꞌ ryes no gàp mèn yalnaban thidtene. Leꞌ sya, coꞌseꞌ yiꞌth xi Crist naꞌ, naꞌ coꞌ ndxelaꞌs loo Crist, anzeꞌf tyac lezon tac guꞌ ngure nèe loo cón cheꞌn diꞌs ndac. Sya, mbli lazen neꞌnque teeden loo guꞌ anxleꞌ. Neꞌ neꞌ nxoꞌf zinꞌen zinꞌ ndxèꞌ loo guꞌ anxleꞌ.
\v 17 Mastaleꞌ gàca loon yiꞌf yèe daa gath daa, cheleꞌ guꞌ tolo gàp yalxlaꞌs loo Diox no tolo li guꞌ par cue nèe guꞌ guꞌ loo cón cheꞌn diꞌs ndac, loo conꞌa tyac lezon no xyoꞌf ndeꞌ xyoꞌf ndlaꞌ lezon con ryete guꞌ.
\v 18 Cona, ndlyazen tyac tínꞌ lezoꞌ guꞌ par thidte xyoꞌf ndeꞌ no xyoꞌf ndlaꞌ lezoꞌ guꞌ con daa. Thìba conꞌ ndxèꞌ.
\s Diꞌs ndxèꞌ ngue taꞌ cuent cón cheꞌn Timote no Epafrodit.
\p
\v 19 Leꞌ tediba na, daa ngue bedqueꞌ ñeeneꞌ xá nac coꞌ nee lezoꞌ Crist cón chenen par, chàa, telꞌen Timote loo guꞌ par yeꞌth lezon no par tolo tyac lezon coꞌseꞌ li lazen no non daa máa guꞌ par nedrèꞌ.
\v 20 Tac yende chó tedib myenꞌ ngue non coꞌ nac xal daa coꞌ nac Timote coꞌ nac thidte lezoꞌ no thidte xtùuz con daa coꞌ ndyóoqueꞌ xal daa no coꞌ ndlyaꞌsqueꞌ ñee máa guꞌ par nedrèꞌ, xá nzo guꞌ par nedrèꞌ.
\v 21 Tac taamas mèn coꞌ nqueltàa no daa, ale más ndyóo mèna loo yalgonꞌpeꞌ mèna leque tyóo mèna loo cón cheꞌn Crist Jesús.
\v 22 Per guꞌ naneequeꞌ cón cheꞌn Timote, leꞌ Timote anzeꞌf ntac loon xal thìb xganꞌ gundan coꞌ altant ndyoo loo xud par li xganꞌ gundan sirv loo gundan. Tataa ngue xoꞌf zinꞌ Timote con daa loo cón cheꞌn diꞌs ndac.
\v 23 Por cona, ngue beden xaste telꞌen Timote loo guꞌ coꞌseꞌ gònen xá nde tee cón chenen par ned nzon ndxèꞌ.
\v 24 Ndxàpen yalxlaꞌs loo Crist, chàa, gal neen máa guꞌ par nedrèꞌ, ne.
\p
\v 25 Per ndyaquen ale, más naquin telꞌgàn Epafrodit, coꞌ ndxàc xal hues daa loo cón cheꞌn Crist loo guꞌ. Epafrodit ndlyath no daa xal thìb solndad loo zinꞌ coꞌ ndxàpen. Epafrodit ndxèꞌ nac mbiꞌ coꞌ yub guꞌ mtelꞌ loon coꞌ ngue li mandad loon leꞌn leziꞌf coꞌteꞌ nzon.
\v 26 Tac anzeꞌf ndyub yoꞌf lezoꞌ Epafrodit ñee Epafrodit máa guꞌ. Anzeꞌf mxi tínꞌ lezoꞌ Epafrodit tac mbìn Epafrodit leꞌ guꞌ mbìn leꞌ Epafrodit ngulen liz par ned nzon ndxèꞌ.
\v 27 Lìcpeꞌ baꞌi, Epafrodit ngulen lizqueꞌ axta yamerleꞌ mtín liz Epafrodit. Per Diox mblyat lezoꞌ gunèe Diox Epafrodit. No iante loo Epafrodit mblyat lezoꞌ Diox gunèe Diox. Ndxeꞌlequeꞌ, mblyat lezoꞌ Diox gunèe Diox daa, ne, par neꞌtolode ngxi tínꞌ lezon loo cón cheꞌn Epafrodit xal nxi lezon loo taamas conꞌ coꞌ nqueltàa ndxàc loon.
\v 28 Por cona, axta arid nguen lezon telꞌen Epafrodit loo guꞌ par tyac lezoꞌ guꞌ ñèe guꞌ Epafrodit. Leꞌ sya, xite tyóon cón cheꞌn guꞌ, ne.
\v 29 Bli guꞌ cas loo Epafrodit coꞌseꞌ zin Epafrodit loo guꞌ. Go no guꞌ Epafrodit con yalguyith yalguxìis loo Tad Crist. Bli guꞌ cas loo taamas mèn, ne, coꞌ nac xalqueꞌ nac Epafrodit.
\v 30 Tac por cón cheꞌn zinꞌ coꞌ mxoꞌf zinꞌ ryop nuꞌ Epafrodit cón cheꞌn Crist ale yamerleꞌ mcàba yalguth loo Epafrodit. Tac mblo Epafrodit valor loo Epafrodit. Ngòc conꞌ ryes loo Epafrodit par mblyath no Epafrodit daa loo coꞌ mblyaꞌs guꞌ lyath no guꞌ daa per neꞌnglide guꞌ gan ngli guꞌi loon.
\c 3
\s Diꞌs ndxèꞌ ndaꞌ cuent xá mod ndxàal que tee ban mèn coꞌ ndxelaꞌs loo Crist par tataa mod li mèna gan ryethe conꞌ coꞌ angtaꞌlaꞌs Crist càa mèna yiloa.
\p
\v 1 Per nalleꞌ, mèn huesen por cón cheꞌn Crist, lyazen leꞌ guꞌ tyac lezoꞌ loo cón cheꞌn Tad Crist. Lìcpeꞌ baꞌi, inacta arid naxol part cón chenen par daa par queꞌen lomisqueꞌ yeꞌs loo guꞌ tedib vez coꞌ nac mbryop cart coꞌ ngue queꞌen yeꞌs loo guꞌ ndxèꞌ. Diꞌs ndxèꞌ càb gàc conꞌ ndac loo guꞌ, ne.
\v 2 Fquenap guꞌ guꞌ loo mèn coꞌ ndxàc nayiꞌ xal mbac. Fquenap guꞌ guꞌ loo leque mèna tac mèna más ndxòo lezoꞌ ndli conꞌ yeꞌrsinꞌ. Fquenap guꞌ guꞌ loo leque mèna tac mèna ngue no costumbr ale angnchoꞌxùꞌ mèna xlanꞌ mèna no angntehuíꞌ mèna ladpeꞌ mèna.
\v 3 Tac loo naꞌ ngòc coꞌ nac lìcpeꞌ circuncisión, coꞌ nee diꞌs, naꞌ coꞌ ndyub xib no naꞌ coꞌ ncòoꞌ yéc loo Diox xal ndluꞌ Xpii Natúꞌ cheꞌn Diox loo naꞌ. Anzeꞌf ndyac lezoꞌ naꞌ tac naꞌ nac cheꞌn Crist Jesús. Indxàpte naꞌ yalxlaꞌs loo cón cheꞌn xtùuzpeꞌ naꞌ coꞌ ndli naꞌ xtùuz loo cón cheꞌn coꞌ ndxelaꞌs naꞌ.
\v 4 Mastaleꞌ tataaqueꞌ naca, cheleꞌ daa ndlyasqueꞌ ngàpen yalxlaꞌs loo xtùuzpeꞌ daa par lin xal nee lezon, ¿chó ñiii loon, àꞌ? Cheleꞌ chó mèn ndli cuent ndxàp mèna yalxlaꞌs loo cón cheꞌnpeꞌ mèna, aleꞌqueꞌ daa más neꞌ gàp yalxlaꞌs par lin conꞌ coꞌ ndlyazen no conꞌ coꞌ neepeꞌ lezon.
\v 5 Tac coꞌseꞌ ngolo xon huiz ngóol daa, mbli mèn circuncidar daa. Nac daa bin cheꞌn mèn tèe hebre, coꞌ nee diꞌs, mèn nación Israel nalleꞌ. No nac daa mèn cheꞌn thìb cuaꞌ mèn coꞌ nac bin thìb mbiꞌ coꞌ ngroꞌ lèe mèn coꞌ nac cheꞌn thìb ned mèn nación Israel. Loo cón cheꞌn ley coꞌ mxoꞌf Moisés loo mèn, ngòc daa mèn cheꞌn xleyꞌ coꞌ lèe farise, ne.
\v 6 Ale axta arid ngòc daa mènleyꞌ axta mdub ngusen mèn loo coꞌ ndxelaꞌs mèn loo Diox por cón cheꞌn Jesucrist. Coꞌseꞌ mblin conꞌa, mxaquen axta nambìi no nalì mdoon loo ley cheꞌn Moisés. Mxaquen axta arid nalì no nambìi mque tee banen loo Diox axta neꞌ neꞌ yen mod ñii mèn loon no axta neꞌ neꞌ yen mod quedèe mèn daa cón cheꞌn xleyꞌ daa no cón chenen.
\v 7 Ryete conꞌ coꞌ mblin loo xleyꞌ daa coꞌ mblin cuent ngòc daa anzeꞌf mèn guryath no mèn guryèn, nalleꞌ ale ndxeꞌlequeꞌ, ndlin cuent thidtene yende cón ntac conꞌa par daa por cón cheꞌn Crist.
\v 8 Lìcpeꞌ baꞌi, ryete conꞌ coꞌ ngòc cheꞌnpeꞌ daa no conꞌ coꞌ mblin, ne, leꞌi ngòc loon xal thìb conꞌ coꞌ mtèꞌben par gòon loo cón cheꞌn Jesucrist. No non daa cón cheꞌn Tad Crist Jesús daa coꞌ nac más conꞌ roo conꞌ xèn leque chol conꞌ loo izlyoꞌ ndxèꞌ. Por cón cheꞌn Crist Jesús, thidtene mblin perdid ryethe conꞌ coꞌ ngòpen, que naca xleyꞌ daa, que naca yalgonꞌ daa. Mblin cuent ngòc ryete conꞌa xal yix, coꞌ nee diꞌs, ale ndxeꞌlequeꞌ, mbláꞌyan ryete conꞌa par thidtene ante que tee banen loo alux conꞌ coꞌ nac cón cheꞌn Crist par gàc daa mèn cheꞌnpeꞌ Crist.
\v 9 Tataa mblin par thidte ngòc daa con Crist. Per neꞌnglidena par que tee ban lin xal ñibeꞌ ley coꞌ mxoꞌf Moisés loo naꞌ póla. Ndxeꞌlequeꞌ, mque tee ban lina por ngòon loo Diox no loo cón cheꞌn Diox por yalxlaꞌs coꞌ ngòpen loo Crist. Cona, ngue niin leꞌ Diox ndyal ngòo mèn loo cón cheꞌn Diox no loo Diox ante por ndxelaꞌs mèn loo Crist.
\v 10 Conꞌ coꞌ ndlyazen más tyub yoꞌf lezon par tolo tan cuent coꞌ huenlequeꞌ nac ryethe conꞌ cón cheꞌn coꞌ ngòc loo Crist. Tolo lyasquen tethen no tan cuent cón cheꞌn conꞌ coꞌ nzo laꞌs nii Crist no laꞌs yaꞌ Crist nalleꞌ tac ngro xban Crist làth mèn nguth. Más de cona, ale ndlyasquen tyactìi daa por cón cheꞌn diꞌs ndac xal mxactìi Crist cheleꞌi naquin. Ndlyazen que tee ban daa xal mque tee ban Crist mastaleꞌ càba loon ryete conꞌ coꞌ ngòc loo Crist xal ngòca axta mcàba yalguth loo Crist.
\v 11 Que naca gàc conꞌ ndac loon, que naca gàc conꞌ yeꞌrsinꞌ loon, conseꞌ ryo xban daa làth mèn nguth coꞌseꞌ zin huiz ryo xban mèn làth mèn nguth. Aa. Tataa gàca.
\s Trèꞌ ndluꞌ cón ndxàal li mèn par tataa mod yòo lezoꞌ Diox loo conꞌ coꞌ ngue li mèn.
\p
\v 12 Indlyasten niin loo guꞌ ya ndxàcleꞌ ryete conꞌ ndxèꞌ loon. Axta neꞌ neꞌ tar lin gan gàc daa thìb mèn nalì no thìb mèn nambìi loo Diox, ndyaquen. Per conꞌ ndxèꞌ ngòc loon coꞌseꞌ alithe mque tee lin coꞌ mblyazen. Làth xtauꞌa, ale ngogàa daa loo Crist. Por lult ngolazen loo Crist. Mxoꞌf zinꞌ Crist thìb zinꞌ loon. Nalleꞌ dib nzo yéquen no dib nzo lezon ndub yoꞌf lezon telon zinꞌ coꞌ mxoꞌf zinꞌ Crist loon ndxèꞌ.
\v 13 Guꞌ coꞌ nac huesen por cón cheꞌn Jesucrist, indliden cuent ya ngòcleꞌ conꞌ ndxèꞌ loon. Per ndxeꞌlequeꞌ, thidte conꞌ ndlin. Lìcpeꞌ baꞌi, mbyathlazen ryete conꞌ coꞌ mbriꞌthleꞌ loon. Nalleꞌ, ale ndxeꞌlequeꞌ, ndlin xtùuz no ndyóon xá mod lin conꞌ coꞌ ngue li nab Diox par lin no xá mod tolo gàca loon yéꞌ huizeꞌ, ne.
\v 14 Daa ngue li conꞌ ndxèꞌ xal mèn coꞌ ndli puest. Nac daa xal mèn coꞌ nqueꞌ carre par ñeeneꞌ chó li gan. Coꞌseꞌ telon zinꞌ coꞌ mxoꞌf zinꞌ Diox loon, axta syareꞌ taꞌ Diox conꞌ coꞌ anzeꞌf ntac loon xal ndaꞌ mèn conꞌ loo xtàa mèn coꞌ mbli gan thìb puest. Conꞌ coꞌ mxoꞌf zinꞌ Diox loon ndxèꞌ nac cón cheꞌn Crist Jesús.
\p
\v 15 Por cona, ngue niin loo guꞌ: Guꞌ coꞌ huen huen ndaꞌ cuent no coꞌ huen huen ndxelaꞌs loo cón cheꞌn Crist, ndxàal li guꞌ xtùuz xal ngue niin loo guꞌ cón cheꞌn puest coꞌ nac mod coꞌ ndlin xtùuz, ne. Cheleꞌ guꞌ neꞌyòode lezoꞌ li guꞌ xtùuz xal ndlin xtùuz loo conꞌa per ndli guꞌ xtùuz tedib mod, leque Diox li par taꞌ guꞌ cuent coꞌ huenlequeꞌ cón cheꞌn conꞌ coꞌ ndli guꞌ xtùuz.
\v 16 Per loo cón cheꞌn Crist coꞌ mtéꞌthleꞌ naꞌ, thidte gàc naꞌ par li nèe naꞌ xtùuz naꞌ no lezoꞌ naꞌ loo cón cheꞌn conꞌa par thidte que tee ban lì naꞌ loo conꞌa.
\p
\v 17 Guꞌ coꞌ nac huesen por cón cheꞌn Jesucrist, bli guꞌ xalqueꞌ ndlin. Blaꞌs guꞌ no huiꞌ guꞌ loo mèn coꞌ nzi tee ban xal mtéꞌth mèna loo nuꞌ par téꞌth guꞌ que tee ban ndac guꞌ, ne.
\v 18 Tac anzeꞌf huax mèn coꞌ nde teeleꞌ ndan cuent loo guꞌ nzo. No nalleꞌ beren, ngue tan cuent cón cheꞌn mèna loo guꞌ con nít ngudloon coꞌ ndxónen tac mèna nac ngolo ngolaꞌs loo cón cheꞌn Crist. Indlyaꞌste mèna gòn mèna cón cheꞌn Crist.
\v 19 Por lult, gàca loo mèna ale lyuxxùꞌ mèna. Tac ryete conꞌ coꞌ ndli ndyub yoꞌf lezoꞌ mèna coꞌ nqueꞌ lezoꞌ mèna nac diox mèna. Lugar de thyon mèna loo conꞌ ndyub yoꞌf lezoꞌ mèna, ale leꞌleꞌ ndyeꞌs nxyalꞌ mèna loo conꞌ ndli mèna. Ale más ndyóo mèna loo cón cheꞌn izlyoꞌ ndxèꞌ.
\v 20 Per ndxeꞌlequeꞌ, lizpeꞌ naꞌ, no làazpeꞌ naꞌ, no xnedpeꞌ naꞌ nac loo béꞌ. Por cona, nzi quee lezoꞌ naꞌ no nzi bed naꞌ axta coꞌseꞌ yiꞌth Crist loo béꞌ loo mbii. Yiꞌth xi Crist naꞌ, Tad Crist coꞌ mteláꞌ naꞌ loo conꞌ ryes.
\v 21 Huiza, chàa, seꞌ loo Crist prob bélꞌyòo lad naꞌ coꞌ nac cheꞌnpeꞌ izlyoꞌ ndxèꞌ. Syareꞌ, gàc lad naꞌ xal nac ladpeꞌ Crist coꞌ anzeꞌf ndxáꞌth bèel. Tataa li Crist loo naꞌ por cón cheꞌn conꞌ roo conꞌ xèn coꞌ nzo laꞌs nii Crist no coꞌ nzo laꞌs yaꞌ Crist. Leque conꞌ roo conꞌ xèn coꞌ nzo laꞌs nii Crist no laꞌs yaꞌ Crist li zinꞌ Crist par ñibeꞌ Crist loo alux conꞌ.
\c 4
\s Pab ngue taꞌ cuent loo mèn coꞌ ndxelaꞌs loo Tad Crist xá mod tyac lezoꞌ mèna loo Tad Crist.
\p
\v 1 Por cona, mèn huesen por cón cheꞌn Crist, guꞌ coꞌ anzeꞌf nqueꞌ lezon ñèen, guꞌ coꞌ anzeꞌf ndyub yoꞌf lezon ñèen máa guꞌ par nedrèꞌ, cón cheꞌn guꞌ ndli anzeꞌf ndyac lezon. Tac loo cón chenen, nac guꞌ xal thìb listón coꞌ mbli thìb mbiꞌ gan loo thìb yalguyith. Por cona, leque guꞌ tolo bli par cue nèe guꞌ loo cón cheꞌn Tad Jesucrist, guꞌ coꞌ anzeꞌf nqueꞌ lezon ñèen.
\p
\v 2 Ñaꞌben no ngue tanꞌen diꞌs ndxèꞌ loo Evodia no loo Síntique. Thidte gàc xtùuz no lezoꞌ ryop xaꞌgota xalqueꞌ mèn coꞌ ndxàc bél por cón cheꞌn Tad Crist.
\v 3 Lomisqueꞌ, ñaꞌben diꞌs lool, ne, hues, lùu coꞌ ndlyath no daa, blyath no Evodia no Síntique. Ryop xaꞌgota ndxàc ftaꞌn naꞌ por cón cheꞌn Crist. Tac ryop xaꞌa nguth ngueyꞌ par mblyath no xaꞌ daa loo zinꞌ coꞌ nac cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes. Thidte mblyath no ryop xaꞌgota daa con mbiꞌ coꞌ lèe Ment, no con taamas mèn coꞌ nxoꞌf zinꞌ zinꞌ ndxèꞌ con daa. Lèe rye mèna ndub loo yeꞌs loo libr coꞌteꞌ ndub lèe taamas mèn coꞌ ndxàp yalnaban thidtene, mèn coꞌ yòo ban no Diox thidtene yiloa.
\p
\v 4 Ftolo fxoꞌf ndeꞌ fxoꞌf ndlaꞌ lezoꞌ guꞌ loo Crist thidtene. Beren, niin loo guꞌ tedib vez: Ftoloqueꞌ fxoꞌf ndeꞌ fxoꞌf ndlaꞌ lezoꞌ guꞌ loo Crist.
\v 5 No oj chéꞌ coꞌ luꞌ guꞌ guꞌ loo mèn, huen, leꞌ guꞌ nacqueꞌ mèn nadoꞌ no mèn ndac. Leꞌ Tad Jesucrist ngue tee noqueꞌ guꞌ. Indláꞌyaꞌde Tad Jesucrist guꞌ ned nzi tee guꞌ.
\p
\v 6 Neꞌgath lyuxte guꞌ no neꞌtyóode guꞌ arid cón cheꞌn chol conꞌ coꞌ ingue node guꞌ coꞌ nac coꞌ naquin guꞌ. Ndxeꞌlequeꞌ, guuz guꞌ loo Diox cón cheꞌn ryete conꞌ coꞌ naquin guꞌ láth coꞌseꞌ mbez guꞌ Diox. Bnaꞌb guꞌi loo Diox no guuz gu: Diox quix Uꞌ, Diox, loo Diox.
\v 7 Leꞌ sya, tataa mod li Diox par yo nagàl lezoꞌ guꞌ loo ryete conꞌ axta neꞌ neꞌ ñee taamas mèn no axta neꞌ neꞌ gòn taamas mèn xá mod ndxàca loo guꞌ. Cheleꞌ guꞌ li conꞌa, Diox coꞌ ndli par nagàl yo lezoꞌ guꞌ, Dioxa quenap lezoꞌ guꞌ no xtùuz guꞌ por ngòo guꞌ loo cón cheꞌn Crist Jesús no por thidte nzo no guꞌ Crist Jesús.
\s Pab ngue ñibeꞌ loo mèn coꞌ ndxelaꞌs loo Tad Crist ante tyoo lezoꞌ mèna li mèna conꞌ ndac.
\p
\v 8 Más de cona, mèn huesen por cón cheꞌn Jesucrist, bli guꞌ xtùuz loo conꞌ coꞌ nac conꞌ lìcpeꞌ. Bli guꞌ xtùuz par gàp guꞌ mod loo mèn coꞌ ndxàal li guꞌ cas. Bli guꞌ xtùuz loo ryete conꞌ coꞌ nac conꞌ nalì no conꞌ nambìi. Bli guꞌ xtùuz loo conꞌ coꞌ inacte cheꞌn coꞌ nac xab izlyoꞌ. Bli guꞌ xtùuz xá mod lyath no guꞌ xtàa guꞌ. Bli guꞌ xtùuz loo ryete conꞌ ndac coꞌ nxoꞌf ndeꞌ no coꞌ nxoꞌf ndlaꞌ lezoꞌ guꞌ. Bli guꞌ xtùuz loo ryete conꞌ ndac coꞌ nac conꞌ guryath no conꞌ guryèn. Cheleꞌ chol conꞌ nzo coꞌ ndxàal li mèn conꞌ guryath no conꞌ guryèn no loo coꞌ ndxàal xoꞌf lèe xoꞌf xtiꞌs mèn, cón cheꞌn ryethe conꞌa bli guꞌ xtùuz.
\p
\v 9 Ryete conꞌ coꞌ mtéꞌthen guꞌ, no ryete conꞌ coꞌ mbluꞌen loo guꞌ par li guꞌi, no ryete conꞌ coꞌ mbìn guꞌ xal ndyoodiz non guꞌ, no ryete conꞌ coꞌ gunèe guꞌ mblin, cón cheꞌn conꞌa bli guꞌ xtùuz. Diox coꞌ ndli par nagàl yo lezoꞌ guꞌ loo Diox no par cue guꞌ rye nda guꞌ no rye ndyeꞌth guꞌ loo xtàa guꞌ, Diox nzo noqueꞌ guꞌ.
\s Diꞌs ndxèꞌ ndaꞌ cuent leꞌ mèn coꞌ ndxelaꞌs loo cón cheꞌn Diox por cón cheꞌn Jesucrist mthop gòn coꞌ mquin Pab coꞌseꞌ mqueꞌ Pab leziꞌf.
\p
\v 10 Anzeꞌf ndyac tínꞌ lezon por cón cheꞌn Tad Crist leꞌ guꞌ mbere mteꞌqueꞌ lezoꞌ máa daa no mbli guꞌ xtùuz cón chenen tedib vez par mblyath no guꞌ daa. Indlyasten niin loo guꞌ leꞌ guꞌ mbyathlaꞌs daa. Ndxeꞌlequeꞌ, naneen no ndan cuent nec thìb mod no nec tedib mod neꞌnglide guꞌ gan nglyath no guꞌ daa ndooreꞌ.
\v 11 Ingue niiden conꞌ ndxèꞌ loo guꞌ por naquin daa conꞌ. Ndxeꞌlequeꞌ, mtéthen par ndyac lezon con ndxepte conꞌ coꞌ ngue non no xalte ndoo riiden thìb huiz tedib huiz.
\v 12 Ndaquen cuent xal ndxàca loo mèn coꞌseꞌ prob mèn. No ndaquen cuent xal ndxàca loo mèn coꞌseꞌ nzi reꞌs nzi xo conꞌ hua mèn liz mèn. Ryei mtéthquen par xec yèen xal ndriꞌthen thìb huiz tedib huiz. Que naca ndxuhuan axta plóthe ndlyazen, que naca yende cón nac par huan, ndyacqueꞌ lezon mastaleꞌ ndxàca tataa loon.
\v 13 Nxec daa ndlin no ndxác daa ndlin ryete conꞌ coꞌ ndxàal lin tac Crist indláꞌyaꞌde daa. Ndlyath noqueꞌ Crist daa.
\v 14 Per mastaleꞌ nxec daa ndxàc conꞌa loon, huenqueꞌ mbli guꞌ mblyath no guꞌ daa láth ndxàc yalndyub nguꞌs ndxèꞌ loon.
\p
\v 15 Guꞌ naneequeꞌ no nonqueꞌ guꞌ, mèn ciuda Filip, coꞌseꞌ nerlequeꞌ mtlo mbryeꞌs diꞌs cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes coꞌseꞌ mxenen ned ngroꞌen leꞌn yèezyaꞌ cheꞌn làaz mèn macedon, nec thìb mèn coꞌ ndxelaꞌs loo Crist coꞌ nqueltàa tya neꞌngyeꞌthte lezoꞌ mèna nglyath no mèna daa mastaleꞌ Diox mbli angngòc conꞌ ndac loo mèna. Ndxeꞌlequeꞌ, ante guꞌ no maste mbyeꞌth yéc no mbyeꞌth lezoꞌ mdub guꞌ tmi coꞌ mtelꞌ guꞌ loon.
\v 16 Tac coꞌseꞌ beꞌ nzon leꞌn ciuda Tesalónica, mtelꞌ guꞌ centav coꞌ ngòc gòn cheꞌn guꞌ loon pláreꞌ vez par mxin conꞌ mquin daa coꞌ nde che loon.
\v 17 Inacte ngue queꞌen yeꞌs ndxèꞌ loo guꞌ por ndyac lezon mcàayan tmi coꞌ mtelꞌ guꞌ loon. Ndxeꞌlequeꞌ, conꞌ coꞌ más ndlyazen nac leꞌ Diox li tolo yas yàl conꞌ ndxàp guꞌ loo guꞌ. No ndlyazen tolo dii conꞌ ndxàp guꞌ loo Diox.
\v 18 Ryete tmi coꞌ nde teeleꞌ ntelꞌ guꞌ loon, mcàayaquena. No axta por de más nde teeleꞌ ntelꞌ guꞌ tmi loon. Per nalleꞌ, tmi coꞌ mtelꞌ guꞌ loon con Epafrodit, axta por de más ngue non tmi nalleꞌ. Neꞌtyóode guꞌ arid cón chenen, cara. Huiꞌ guꞌ nexa. Tmi coꞌ mtelꞌ guꞌ loon ngòc xal thìb xlaꞌ duꞌr zen yalꞌ coꞌ ngo mèn loo Diox coꞌ ndxòo lezoꞌ Diox xal ndlyaꞌs Diox.
\v 19 Diox coꞌ nac Diox daa tolo li par gàp guꞌ ryethe conꞌ coꞌ nde che loo guꞌ. Diox lii loo guꞌ xalqueꞌ nac ryethe conꞌ roo conꞌ xèn coꞌ ndxàp Crist Jesús laꞌs nii Crist Jesús no laꞌs yaꞌ Crist Jesús.
\v 20 Ndlyazen leꞌ mèn tolo xoꞌf lèe xoꞌf xtiꞌs lèe Diox xud naꞌ no tolo teꞌth mèn diꞌs roo diꞌs xèn cón cheꞌn Diox xud naꞌ loo mèn leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node. Tataaqueꞌ gàca.
\s Diꞌs ndxèꞌ ndaꞌ cuent leꞌ Pab ngue nii Diox loo mèn coꞌ ndxelaꞌs loo Tad Crist, mèn coꞌ naban leꞌn ciuda Filip.
\p
\v 21 Gunii guꞌ Diox cón chenen loo ryete mèn coꞌ ngòo loo cón cheꞌn Diox, mèn coꞌ ngòc cheꞌnpeꞌ Diox coꞌ nzo no guꞌ. Lomisqueꞌ, mèn coꞌ ndxàc hues naꞌ por cón cheꞌn Crist coꞌ nzo no daa, mèna ngue nii Diox loo guꞌ.
\v 22 Ryete mèn coꞌ ngro xàꞌ loo cón cheꞌn xab izlyoꞌ coꞌ ngòc mèn cheꞌnpeꞌ Diox coꞌ nzo non trèꞌ, mèna ngue nii Diox loo guꞌ, ne. Per más ndyac mèn coꞌ nac mèn guliz cheꞌn rey César, nteꞌ lezoꞌ mèna ngue nii mèna Diox loo guꞌ.
\p
\v 23 Ndlyazen leꞌ Tad Jesucrist naꞌ tolo li anggàc conꞌ ndac loo ryete guꞌ. Tataaqueꞌ gàca.