\id COL
\ide UTF8
\h COLOSENSES
\toc1 COLOSENSES
\mt Cart Coꞌ Mqueꞌ Pab Yeꞌs Loo Mèn Coꞌ Ngo Ban Leꞌn Ciuda Colos
\c 1
\s Pab ngue queꞌ yeꞌs loo mèn coꞌ ngolaꞌs loo cón cheꞌn Jesucrist no loo Jesucrist, mèn coꞌ mqueltàa loo cón cheꞌn Diox, mèn coꞌ ngo ban ciuda Colos.
\p
\v 1 Daa, Pab, nac thìb mbiꞌ coꞌ ndxeꞌ diꞌs cheꞌn Jesucrist xal gunee lezoꞌ Diox. Jesucrist mtelꞌ daa. Ryop nuꞌ Timote coꞌ nac hues naꞌ por cón cheꞌn Jesucrist
\v 2 ngue nii Diox loo guꞌ coꞌ nzo ban ciuda Colos. Mèn huesen por cón cheꞌn Jesucrist, guꞌ ngro xàꞌ loo cón cheꞌn xab izlyoꞌ no ngòc guꞌ mèn cheꞌnpeꞌ Diox. Mbli nèequeꞌ guꞌ guꞌ loo cón cheꞌn Crist, ne. Ndlyazen leꞌ Diox xud naꞌ no Tad Jesucrist naꞌ tolo angli leꞌ guꞌ nagàl yo lezoꞌ loo Diox no cue ban guꞌ rye nda guꞌ no rye ndyeꞌth guꞌ làth xtàa guꞌ.
\s Diꞌs ndxèꞌ ndaꞌ cuent xá mod ngurez Pab Diox cón cheꞌn mèn coꞌ ngolaꞌs loo Crist, mèn coꞌ ngo ban ciuda Colos.
\p
\v 3 Nuꞌ mbez Diox quix Diox loo Diox coꞌ nac xud Tad Jesucrist naꞌ ryete vez coꞌseꞌ mbez nuꞌ Diox cón cheꞌn guꞌ.
\v 4 Nuꞌ mbìnleꞌ leꞌ guꞌ ndxelaꞌs loo Crist Jesús. Mbìnleꞌ nuꞌ leꞌ guꞌ nqueꞌ lezoꞌ ñèe guꞌ ryete mèn coꞌ ngro xàꞌ loo cón cheꞌn xab izlyoꞌ coꞌ ngòc cheꞌnpeꞌ Diox.
\v 5 Tolo mbez nuꞌ Diox quix Diox loo Diox por ryethe conꞌ coꞌ nac coꞌ nzi quee lezoꞌ guꞌ loo cón gàc cheꞌnpeꞌ guꞌ yiloa coꞌ ngue gosuaꞌ Diox loo béꞌ par gàca cheꞌn guꞌ yiloa. Cón cheꞌn conꞌa nde teeleꞌ ndxòn guꞌ no mtéꞌth guꞌ por cón cheꞌn diꞌs ndac coꞌ nac diꞌs lìcpeꞌ coꞌ ndluꞌ xá mod lyáꞌ mèn loo conꞌ ryes.
\v 6 Diꞌs ndac coꞌ ngo nuꞌ yalbàn loo guꞌ, leque diꞌs ndaca ndoo yath no ndoo yèn loo mèn dib athu loo izlyoꞌ. Ncàb cón cheꞌn diꞌs ndac loo mèn leꞌ huax mèn ngòo loo cón cheꞌn Diox por cón cheꞌn Crist xal thìb cosech ndac coꞌ nthop mèn. Tataa mod, ne, ndxàca loo guꞌ cón cheꞌn diꞌs ndac axta huiz coꞌ mbìn guꞌi no gunee guꞌ, lìcqueꞌ, ndli Diox anggàc conꞌ ndac loo mèn.
\v 7 Cón cheꞌn conꞌ ndxèꞌ mbluꞌ Epafr loo guꞌ. Epafr anzeꞌf lezon ngudloon. Epafr thidte ndli zinꞌ coꞌ nac cón cheꞌn diꞌs ndac coꞌ ndluꞌ cón cheꞌn Crist con nuꞌ. Altant ndyoo Epafr loo zinꞌ cheꞌn Crist par ndluꞌ Epafr zinꞌ xal thìb moz ndac cheꞌn guꞌ.
\v 8 Epafr mdaꞌ cuent loo nuꞌ xá mod ngue lyath no Xpii Natúꞌ guꞌ par nqueꞌ lezoꞌ guꞌ ñèe guꞌ xtàa guꞌ par ndxèꞌ, ne.
\p
\v 9 Por cona, axta huiz coꞌseꞌ mbìn nuꞌ nabeꞌste nziriꞌ guꞌ loo cón cheꞌn Diox no axta huiz nalze imbedte nuꞌ no indxathlaꞌste nuꞌ mbez nuꞌ Diox por cón cheꞌn guꞌ. Ñaꞌb nuꞌ loo Diox leꞌ guꞌ ñee no taꞌ guꞌ cuent ryethe conꞌ coꞌ nee lezoꞌ Diox. Ñaꞌb nuꞌ loo Diox leꞌ Xpii Natúꞌ lyath no guꞌ par gác guꞌ no tenꞌ guꞌ no taꞌ guꞌ cuent xá nac xtùuz cheꞌn Diox.
\v 10 Mbez nuꞌ Diox leꞌ guꞌ que tee ban xalqueꞌ ndxàal que tee ban mèn coꞌ nac cheꞌn Tad Crist par que tee li guꞌ coꞌ yòo lezoꞌ Crist par càba loo guꞌ tolo luꞌ guꞌ ryete conꞌ ndac loo xtàa guꞌ no par tolo téꞌth guꞌ más cón cheꞌn Diox no xá nac Diox.
\v 11 Ñaꞌb nuꞌ loo Diox leꞌ guꞌ xec yèe por cón cheꞌn rye loothe conꞌ coꞌ nzo laꞌs nii Diox no coꞌ nzo laꞌs yaꞌ Diox xal nac ryethe conꞌ roo conꞌ xèn coꞌ nzo laꞌs nii Diox no laꞌs yaꞌ Diox. Mbez nuꞌ Diox leꞌ guꞌ chaꞌlaꞌs no xoꞌf ndeꞌ xoꞌf ndlaꞌ lezoꞌ guꞌ làth xtauꞌa.
\v 12 Guuz guꞌ: Diox quix Uꞌ, Diox, loo Diox xud naꞌ tac Diox mbliqueꞌ ndxàp naꞌ conꞌ laꞌs nii naꞌ no laꞌs yaꞌ naꞌ par yanꞌ no naꞌ no gàc cheꞌnpeꞌ naꞌ conꞌ coꞌ càayaꞌ naꞌ con mèn coꞌ ngro xàꞌ loo cón cheꞌn xab izlyoꞌ no coꞌ ngòc cheꞌnpeꞌ Diox, coꞌ nee diꞌs,
\v 13 Diox mteláꞌ naꞌ loo ryethe conꞌ coꞌ nzo laꞌs nii Mebizya no laꞌs yaꞌ Mebizya coꞌ ñibeꞌ loo yálꞌcuau coꞌ nac cón cheꞌn xab izlyoꞌ. Ngoloa, mbli Diox par ñibeꞌ xganꞌ Diox coꞌ nac lezoꞌ Diox no coꞌ nac ngudloo Diox loo naꞌ.
\v 14 Diox mtecue cón cheꞌn xtol naꞌ lad Crist coꞌseꞌ mxyo ren Crist loo cruz, coꞌ nee diꞌs, tataa mod mtonꞌ Diox xtol naꞌ.
\s Diꞌs ndxèꞌ ndaꞌ cuent loo mèn leꞌ Diox mtuꞌ mtàl lezoꞌ Diox loo mèn coꞌ ndxelaꞌs loo Tad Crist por cón cheꞌn yalguth coꞌ mquée loo Tad Crist coꞌseꞌ mqueꞌ mèn Tad Crist loo cruz.
\p
\v 15 Diox coꞌ yende mod yúꞌ loo mèn, Diox mbiꞌth luꞌ loo loo mèn coꞌseꞌ mbiꞌth Crist Jesús, xganꞌ Diox, loo izlyoꞌ ndxèꞌ. Crist nac yub Diox coꞌ mbiꞌth no nzoleꞌ Crist ndooreꞌ cuec Diox alux conꞌ coꞌ mtoxcuaꞌ Diox.
\v 16 Diox mnibeꞌ loo Crist toxcuaꞌ Crist alux conꞌ, sya, mtoxcuaꞌ Crist alux conꞌ coꞌ nzo loo béꞌ no conꞌ coꞌ nziriꞌ loo izlyoꞌ, que naca conꞌ coꞌ ndxúꞌ, que naca conꞌ coꞌ indxúꞌde, que naca angl coꞌ ñibeꞌ, que naca taamas angl coꞌ ndxàp conꞌ laꞌs nii angl no laꞌs yaꞌ angl, que naca chol xpii coꞌ ndxàp conꞌ roo no conꞌ xèn laꞌs nii xpii no laꞌs yaꞌ xpii. Alux conꞌa mtoxcuaꞌ Crist. Crist ngue tèn conꞌa no ngue xènꞌ Crist Jesús conꞌa. Ngòcsuaꞌ alux conꞌa par li zinꞌ Crist.
\v 17 Nzoqueꞌ Crist ndooreꞌ ngureriꞌ chol conꞌ. Crist ngue tèn alux conꞌ coꞌ nziriꞌ par neꞌtyonꞌte no par neꞌlith node conꞌa.
\v 18 Más de cona, Crist ñibeꞌ loo mèn coꞌ ndxelaꞌs, mèn coꞌ nqueltàa loo cón cheꞌn Diox por cón cheꞌn Crist xalqueꞌ ñibeꞌ yéc mèn loo mèn. Tataa nac Crist tac ndooreꞌ nzoleꞌ Crist loo alux conꞌ. Crist ngòc nerlequeꞌ mèn coꞌ ngro xban làth mèn nguth, ne. Ngòc conꞌ ndxèꞌ par gàca leꞌ thidte Crist tyoo ner no tyoo naa no ñibeꞌ Crist loo alux conꞌ.
\v 19 Cona, mbli Diox loo Crist tac Diox mblyaꞌs ngòc Crist thìb xooqueꞌ xalqueꞌ Diox no ngòc Crist lalqueꞌ con Diox. Anzeꞌf ngòo lezoꞌ Diox mbyanꞌqueꞌ Crist lugar cheꞌn Diox loo alux conꞌ coꞌ mteyas mteyàl Diox, coꞌ nee diꞌs, loo ryethe conꞌ.
\v 20 Ngòo lezoꞌ Diox, por cón cheꞌn Jesucrist, yuꞌ yàl ryete conꞌ loo Diox tedib vez. Ngue li Diox leꞌ mèn nagàl yo lezoꞌ loo Diox no cue ban mèn rye nda mèn no rye ndyeꞌth mèn loo xtàa mèn por cón cheꞌn renpeꞌ Crist coꞌ mxyo loo cruz. Tataa ngòca loo Crist par yuꞌ yàl ryete conꞌ loo Diox, que naca conꞌ coꞌ nziriꞌ loo izlyoꞌ, que naca conꞌ coꞌ nzo loo béꞌ.
\p
\v 21 Póla guꞌ, ne, mque tee ban loo cón cheꞌn Crist xal mèn tith. Ngòc guꞌ mèn ngolo ngolaꞌs loo Diox por cón cheꞌn conꞌ yeꞌrsinꞌ coꞌ ngo leꞌn lezoꞌ guꞌ por mbli guꞌ chol conꞌ yeꞌrsinꞌ. Ale más mdaꞌ gust lezoꞌ guꞌ mbli guꞌ chol conꞌ yeꞌrsinꞌ. Per nalleꞌ, mbli Diox ngo nagàl lezoꞌ guꞌ loo yub Diox.
\v 22 Mbli Crist conꞌ ndxèꞌ coꞌseꞌ mqueꞌ mèn Crist loo cruz par mxactìi Crist no nguth Crist. Tataa mbli Crist par luꞌ too Crist guꞌ xal mèn coꞌ, lìcqueꞌ, ngro xàꞌ loo cón cheꞌn xab izlyoꞌ no ngòc guꞌ mèn cheꞌnpeꞌ Diox. Ngòc guꞌ mèn coꞌ yende chó mèn quexùꞌ loo Diox.
\v 23 Gàc conꞌ ndxèꞌ loo guꞌ cheleꞌ guꞌ, lìcqueꞌ, toloqueꞌ cue nèe loo coꞌ ndxelaꞌs guꞌ, no cheleꞌ guꞌ neꞌgàcte chop loo chop laꞌs no neꞌyitacte lezoꞌ guꞌ loo coꞌ nzi quee lezoꞌ guꞌ cón cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes coꞌ mbìnleꞌ guꞌ. Cón cheꞌn diꞌs ndac ndxèꞌ nac coꞌ ndxath no coꞌ ndxèn rye ned coꞌ nac dib athu loo izlyoꞌ. Daa, Pab, ngue lyath no mèn coꞌ ngo yalbàn cón cheꞌn diꞌs ndac loo mèn.
\s Diꞌs ndxèꞌ ndaꞌ cuent loo mèn leꞌ Pab mxoꞌf zinꞌ cón cheꞌn diꞌs ndac par ya luꞌ Pab no ya teꞌth Pab diꞌs ndac loo alux mèn cheꞌn chol nación.
\p
\v 24 Per nalleꞌ, ale ndxeꞌlequeꞌ, ndyac lezon ndxàc yaltìi loon por cón cheꞌn guꞌ. Tac xalqueꞌ ndxàc yaltìi ndxèꞌ loon, conꞌa nee diꞌs tolo ngue taan ryete yaltìi xal ngòca loo Crist laden coꞌ beꞌ ndxàc falt loo conꞌ coꞌ ndyac no tìi daa Crist por cón cheꞌn mèn coꞌ ndxelaꞌs loo cón cheꞌn Diox por cón cheꞌn Crist, mèn coꞌ nqueltàa loo cón cheꞌn Diox, coꞌ nee diꞌs, mèn coꞌ thidte nac loo Crist xal ladpeꞌ Crist.
\v 25 Ngue tan cuent loo guꞌ, daa nac thìb mbiꞌ coꞌ nxoꞌf zinꞌ zinꞌ ndxèꞌ loo guꞌ, guꞌ coꞌ nqueltàa loo cón cheꞌn Diox. Diox mdoo daa no mtanꞌ Diox diꞌs ndxèꞌ loon par xoꞌf zinꞌen zinꞌ par gàc conꞌ ndac loo guꞌ no par luꞌen loo mèn no tethen loo mèn ryethe conꞌ coꞌ nac cón cheꞌn diꞌs ndac loo mèn.
\v 26 Ndalen par luꞌen no go xoꞌfen cón cheꞌn Diox coꞌ ngo casloo axta pólleꞌa coꞌ nac rye línꞌ coꞌ nde teeleꞌ ndriꞌth. Per ndxeꞌlequeꞌ, nalleꞌ ngue li Diox par ngue ryo xoꞌf cón cheꞌn diꞌs ndac ndxèꞌ loo xnaa loo mèn coꞌ ngro xàꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox.
\v 27 Pues loo mèn coꞌ inacte mèn nación Israel, mblyaꞌs Diox luꞌ Diox ryethe conꞌ coꞌ nac cón cheꞌn conꞌ roo conꞌ xèn coꞌ nac cón cheꞌn diꞌs ndac coꞌ ngo casloo póla. Cona nee diꞌs, nac Crist coꞌ naban leꞌn xpii guꞌ. Por cón cheꞌn Crist nzi quee lezoꞌ naꞌ cón cheꞌn conꞌ coꞌ gàc loo naꞌ yiloa coꞌ gàc conꞌ roo conꞌ xèn coꞌ li Diox loo naꞌ.
\p
\v 28 Cón cheꞌn Crist ngo nuꞌ yalbàn. Ncoꞌx nuꞌ loo rye mèn coꞌ ndyal ndxòn cón cheꞌn Crist, ne. Cón cheꞌn Crist ndluꞌ nuꞌ loo mèn xal mbli Diox ndxác nuꞌ par tenꞌ mèn cón cheꞌn Diox coꞌ huenlequeꞌ. Tataa ndli nuꞌ par huen huen téꞌth mèn, no nalì no nambìi téꞌth mèn cón cheꞌn Crist par thidte gàc mèn loo cón cheꞌn Crist.
\v 29 Par gàca tataa loo guꞌ, tolo nxoꞌf zinꞌen zinꞌ ndxèꞌ cón cheꞌn diꞌs ndac. Con dib fuerz chenen nxoꞌf zinꞌen zinꞌ ndxèꞌ xalqueꞌ ndlyath no Crist daa axta plóthe xal nac conꞌ roo conꞌ xèn coꞌ nzo laꞌs nii Crist no laꞌs yaꞌ Crist.
\c 2
\p
\v 1 Ndlyazen leꞌ guꞌ taꞌ cuent no non guꞌ susqueꞌ mxoꞌf zinꞌen no ndyóon no mbrezen Diox cón cheꞌn guꞌ no cón cheꞌn mèn yèez Laodice no cón cheꞌn mèn coꞌ tarte libeꞌ ayéc axànꞌ daa.
\v 2 Ndlyazen gàc loo mèn coꞌ tarte libeꞌ ayéc axànꞌ daa leꞌ mèna yeꞌth lezoꞌ loo cón cheꞌn Crist. Lyazen gàca loo guꞌ tolo téꞌth guꞌ par queꞌ lezoꞌ guꞌ ñèe guꞌ thìb xtàa guꞌ no tedib xtàa guꞌ. No ndlyazen tolo téꞌth guꞌ cón cheꞌn Diox par huen huen gòn guꞌ cón cheꞌn Diox no tataa mod gàp guꞌ yalxlaꞌs loo Diox axta plóthe. Cheleꞌ guꞌ tataa li, Diox li par taꞌ guꞌ cuent cón cheꞌn conꞌ coꞌ ngo casloo loo Diox ndooreꞌ, coꞌ nee diꞌs, nac cón cheꞌn Crist.
\v 3 Loo Crist nzo casloo rye loothe yalndxác roo yalndxác xèn cheꞌnpeꞌ Diox. Ndxòn Crist ryethe conꞌ no ndaꞌ Crist cuent cón cheꞌn ryethe conꞌ.
\v 4 Ngue niin conꞌ ndxèꞌ loo guꞌ par yende chó mèn li par yilaꞌs guꞌ diꞌs coꞌ nac diꞌs gutyèꞌ.
\v 5 Mastaleꞌ ndyac guꞌ yende daa loo guꞌ, per ndyaquen nzon loo guꞌ xalqueꞌ nac xtùuz daa coꞌ ndryoꞌ leꞌn lezon. No axta gust ndaꞌ lezon ñèen guꞌ leꞌ guꞌ nziriꞌ li nèequeꞌ guꞌ loo cón cheꞌn Crist no thidte ndxàc xtùuz guꞌ no lezoꞌ guꞌ loo yalxlaꞌs coꞌ ndxàp guꞌ loo Crist.
\p
\v 6 Por cona, texal mbìn guꞌ no mtéꞌth guꞌ no ngolaꞌs guꞌ leꞌ Crist Jesús nac xaꞌ coꞌ ñibeꞌ loo ryethe conꞌ, tataaqueꞌ tolo fque tee ban guꞌ loo Crist.
\v 7 Thidtene bli nèe guꞌ guꞌ loo cón cheꞌn Crist par que tee ban ndac guꞌ loo cón cheꞌn Crist, coꞌ nee diꞌs, nac xal thìb yaa coꞌ neꞌhuinte tac naꞌs ndlyàa lox yaaa loo yòo. Gure nèe guꞌ guꞌ par thidtenequeꞌ cue nèe guꞌ loo cón cheꞌn Crist Jesús xalqueꞌ nac mod coꞌ mtéꞌth guꞌ. Lomisqueꞌ ne, tolo guuz guꞌ loo Diox: Diox quix Uꞌ, Diox. Tataaqueꞌ ndxàal li guꞌ.
\s Diꞌs ndxèꞌ ndaꞌ cuent xá nac yalnaban cub coꞌ ndxàc loo mèn coꞌseꞌ ndxelaꞌs mèn loo Tad Crist.
\p
\v 8 ¡Anderhuen guꞌ! Neꞌtaꞌde guꞌ lugar loo chol mèn quedìi mèna guꞌ. Mèna mbez ndxác mèna per pà gác mèna. Tac conꞌ coꞌ ndxác mèna nac leque xtùuz coꞌ ndli mèna xtùuz coꞌ nac thìb conꞌ coꞌ yende cón ntac. Cona, beꞌ ndyoo nque mèna xís costumbr coꞌ ngue no mèna. Ndli mèna xtùuz toloqueꞌ li mèna cón cheꞌn xab izlyoꞌ ndxèꞌ. Per prob mèna, yende cón nanee mèna cón cheꞌn Crist.
\p
\v 9 Tac thìb xoo xalqueꞌ ñaa Diox ñaa Crist no xalqueꞌ nac Diox nac Crist.
\v 10 No nalleꞌ ryethe conꞌ coꞌ nac cón cheꞌn Diox ndxàp guꞌ tac thidte nqueltàa guꞌ loo cón cheꞌn Crist. Crist ñibeꞌ loo ryete conꞌ coꞌ ndeꞌf diꞌs ñibeꞌ no loo ryethe xpii coꞌ ndxàp conꞌ laꞌs nii no laꞌs yaꞌ.
\v 11 Lomisqueꞌ ne, por thidte ngòc guꞌ loo cón cheꞌn Crist, ngòc circuncidar guꞌ. Per neꞌngàcte circuncisión coꞌ ngòc loo guꞌ xal ndxàc circuncidar xlanꞌ mèn. Ndxeꞌlequeꞌ, circuncisión coꞌ ngòc loo guꞌ nac ngulàa yéc guꞌ no ngulàa lezoꞌ guꞌ par mblyáꞌ guꞌ loo xtol guꞌ coꞌ nac alux xab izlyoꞌ coꞌ nduhua nee lezoꞌ guꞌ mbli guꞌ ndooreꞌ yilaꞌs guꞌ loo cón cheꞌn Crist.
\v 12 Coꞌseꞌ ngòc bautizar guꞌ, coꞌ nee diꞌs, ngolaꞌs guꞌ loo Crist, hora loo cón cheꞌn xquin guꞌ ngòc guꞌ xal mèn coꞌ mbuaꞌs no Crist leꞌn yeꞌr lyoꞌ. Hor coꞌseꞌ ngòc bautizar guꞌa, hora Diox mbli ngòp guꞌ yalnaban cub xal mèn coꞌ ngro xban no Crist. Ngòc conꞌ ndxèꞌ loo guꞌ tac guꞌ ngolaꞌs leꞌ Diox ndxàp conꞌ roo conꞌ xèn laꞌs nii Diox no laꞌs yaꞌ Diox axtaqueꞌ mblo xban Diox Crist làth mèn nguth.
\v 13 Guꞌ ngòc xal mèn nguth loo cón cheꞌn Diox póla tac mcuaꞌn guꞌ xquin guꞌ tiempa no tarte gàc circuncidar guꞌ póla. Per nalleꞌ Diox mbli leꞌ guꞌ ndxàp leque yalnaban cub coꞌ ndxàp Crist. No lomisqueꞌ tiemp, mtonꞌ Diox ryete xtol guꞌ.
\v 14 Lìcpeꞌ baꞌi, Diox mtonꞌleꞌ ryete diꞌs coꞌ ndub loo ley coꞌ mnibeꞌ Moisés coꞌ ngòc diꞌs coꞌ mzib quìi naꞌ xalqueꞌ mnibeꞌ ley loo naꞌ. Tac leya mbluꞌ loo naꞌ ndli naꞌ conꞌ yeꞌrsinꞌ. Sate más nquexùꞌ leya loo naꞌ tac neꞌgácte naꞌ li naꞌ xal ñibeꞌ ley loo naꞌ. Cona, Diox mteche naꞌ loo coꞌ mnibeꞌ ley loo naꞌ coꞌseꞌ mqueꞌ mèn Crist loo cruz. Conꞌa mbli Diox par neꞌtolode li naꞌ cas loo ley coꞌ mxoꞌf Moisés loo naꞌ.
\v 15 Coꞌseꞌ nguth Crist loo cruz, tataa mod mbli Crist gan loo chol meexùꞌ no loo chol xpii yeꞌrsinꞌ coꞌ ñibeꞌ loo izlyoꞌ ndxèꞌ coꞌ ngòp conꞌ roo no conꞌ xèn laꞌs nii no laꞌs yaꞌ. No loo xnaa mbli Crist par mdeꞌs yaꞌ no mdeꞌs nii rye xpii yeꞌrsinꞌ coꞌ mnibeꞌ Crist loo. Mbli Crist leꞌ rye xpii no meexùꞌ mdoo ner loo Crist xal coꞌseꞌ mdyub dóꞌ yaꞌ pres, ya pres leziꞌf.
\s Trèꞌ ndluꞌ ndxàal téꞌth naꞌ cón cheꞌn Crist no cón cheꞌn conꞌ coꞌ nac cón cheꞌn béꞌ.
\p
\v 16 Por cona, cheleꞌ chol mèn nzo coꞌ lyaꞌs quexùꞌ guꞌ loo cón cheꞌn xit guꞌ no luaꞌ guꞌ, no cón cheꞌn chol huiz lni coꞌ mbez mèn yende mod queꞌ mèn zinꞌ no mbez mèn ndxàal quenap mèn mèn huiza, no cón cheꞌn mbeꞌ coꞌseꞌ ndryoꞌ quée mbeꞌ no cón cheꞌn huiz sabd, neꞌlide guꞌ cas loo rye conꞌa. Neꞌ neꞌ gòn guꞌ diꞌs coꞌ mbez mèn cón cheꞌn rye conꞌa.
\v 17 Per cón cheꞌn ryete conꞌ coꞌ ndaꞌ trèꞌ cuent coꞌ ngòc conꞌ mbli mèna póla, ryete conꞌa ngòc thìb conꞌ anxleꞌ xal thìb xin no xnaa coꞌ yende cón ntac. Per cón cheꞌn mbiꞌ coꞌ nde nquea, coꞌ nee diꞌs, cón cheꞌn Crist nac conꞌ lìcpeꞌ.
\v 18 Neꞌlaꞌde guꞌ par teche mèn conꞌ coꞌ mbli guꞌ gan mtéꞌth guꞌ cón cheꞌn Diox. Mèna asendli par ndxàc mèna mèn nadoꞌ. Mèna ale más ndli ndyub xib mèn loo angl, ne. Ale mbez mèna nquin li mèn xtùuz cón cheꞌn conꞌ coꞌ indxúꞌde loo mèn no loo conꞌ coꞌ yende mod huiꞌ mèn loo. Ale ndoote conꞌ ndli mèna. Asendli mèn ndyeꞌs mèn axta plóthe por xtùuz coꞌ ndli mèna coꞌ ndyub yoꞌf lezoꞌ mèn coꞌ nac cón cheꞌn xab izlyoꞌ.
\v 19 Mèna inacte mèn coꞌ thidte nqueltàa loo Crist neꞌ neꞌ loo cón cheꞌn Crist. Crist ñibeꞌ loo mèn coꞌ ndxelaꞌs, mèn coꞌ nqueltàa loo cón cheꞌn Diox, xal ñibeꞌ yéc mèn loo mèn. Tataa ndli Crist loo naꞌ par ryoo xyèn naꞌ loo cón cheꞌn Crist xal ñibeꞌ Diox no xal ndlyaꞌs Crist. Tataa ndxàca xal ndxàca loo lad mèn leꞌ thìb thìb part cheꞌn lad mèn nqueꞌ zinꞌ par ryoo xyèn lada xal ndxàala.
\p
\v 20 Fteꞌ lezoꞌ guꞌ leꞌ guꞌ nguth noleꞌ Crist, coꞌ nee diꞌs, ngro xàꞌ guꞌ loo ryete conꞌ coꞌ nac cheꞌn xab izlyoꞌ no ngòc guꞌ cheꞌnpeꞌ Diox xal thìb mèn coꞌ nguth coꞌ indyóode cón cheꞌn xal mque tee ban mèna ndooreꞌ coꞌ nac mod coꞌ alithe ndryoꞌ ndlyenꞌ lezoꞌ mèn par li mèn. No ¿nalleꞌ, àꞌ? ¿Chonon beꞌ nzi tee ban guꞌ loo cón cheꞌn xab izlyoꞌ xal mèn coꞌ ndyoo nque loo costumbr coꞌ nac cón cheꞌn xab izlyoꞌ, sya?
\v 21 Angab naꞌi, xal ndli guꞌ no mbez guꞌ: Neꞌgàaltel conꞌ baꞌ. Neꞌhuadel conꞌ baꞌ. Neꞌ neꞌ tyenl conꞌ baꞌ con yaꞌl.
\v 22 Ryete conꞌ coꞌ ngue li guꞌ baꞌ nac mod coꞌ lyux xal ndlyux conꞌ coꞌ ndli mèn zinꞌ. No ryete mod coꞌ ndxàp guꞌ baꞌ alithe nac costumbr no mod cheꞌn mèn coꞌ alithe nzi ban loo izlyoꞌ ndxèꞌ.
\v 23 Lìcpeꞌ baꞌi, mèna ndli cuent anzeꞌf ndxác mèna tac ndli mèna ryete conꞌa. Ñibeꞌ yèe mèna loo mèn li mèn xalqueꞌ nac xleyꞌ mèn par gueꞌs nii mèn no gueꞌs yaꞌ mèn loo chol conꞌ. Ñibeꞌ yèe mèna gàc mèn mèn nadoꞌ. Per, ale ndxeꞌlequeꞌ, conꞌ coꞌ ndluꞌ mèna no mod coꞌ ndluꞌ mèna loo mèn yalguyith naca no yalgutyèꞌ naca. Ale ntetìixùꞌ mèna leque lad mèna par ndluꞌ mèna leꞌ mèna nac mènleyꞌ. Per yende cón li conꞌ ndli prob mèna par teche mèna mod yeꞌrsinꞌ coꞌ ndli ndyub yoꞌf lezoꞌ mèna loo cón cheꞌn xab izlyoꞌ ndxèꞌ par ndli mèna conꞌ yeꞌrsinꞌ.
\c 3
\p
\v 1 Per nalleꞌ ngue niin loo guꞌ: Cheleꞌ guꞌ, lìcqueꞌ, ngue no yalnaban cub xal mèn coꞌ ngro xban noqueꞌ Crist, ftéꞌth guꞌ no bli guꞌ ryete conꞌ coꞌ nac cheꞌnpeꞌ béꞌ coꞌteꞌ ndub Crist cuat Diox leꞌn béꞌ loo béꞌ.
\v 2 Bli guꞌ xtùuz cón cheꞌn conꞌ coꞌ nac cón cheꞌnpeꞌ béꞌ, ne. Neꞌlide guꞌ xtùuz loo coꞌ nac cón cheꞌn xab izlyoꞌ no cón cheꞌn yalgonꞌ cheꞌn izlyoꞌ.
\v 3 Tac loo cón cheꞌn xab izlyoꞌ nac guꞌ xal mèn coꞌ nguthleꞌ loo conꞌa. Yalnaban cub coꞌ ndxàp guꞌ, Crist ngue quenapa loo Diox.
\v 4 Crist mdaꞌ lugar no mbli Crist leꞌ guꞌ yòo ban no Diox thidtene yiloa. Coꞌseꞌ yúꞌ loo Crist loo mèn tedib vez, sya, loo guꞌ, ne, gàc conꞌ guryath no conꞌ guryèn coꞌ gàc loo Crist coꞌseꞌ yúꞌ loo guꞌ loo béꞌ con Crist.
\s Pab ngue taꞌ cuent xá nac yalnaban mèn, mèn coꞌ tarte yilaꞌs loo Crist, no xal nac yalnaban mèn, mèn coꞌ ndxelaꞌs loo Crist.
\p
\v 5 Cona, ngue niin loo guꞌ: Ryete conꞌ coꞌ ndyub yoꞌf lezoꞌ guꞌ coꞌ nac cón cheꞌn xab izlyoꞌ, ya neꞌtolode li guꞌi. Ndxeꞌlequeꞌ, gòc guꞌ xal mèn nguth loo ryete conꞌa. Ryete conꞌa nee diꞌs: Neꞌcuaꞌnte guꞌ xinꞌ huan guꞌ. Neꞌlide guꞌ conꞌ coꞌ nac conꞌ xin no conꞌ cap. Neꞌ neꞌ tyub yoꞌf lezoꞌ guꞌ loo chol conꞌ yeꞌrsinꞌ coꞌ ngroꞌ mblyenꞌ lezoꞌ guꞌ mbli guꞌ póla. Neꞌ neꞌ queliꞌth guꞌ cón nac cheꞌn hues xtàa guꞌ tac mèn coꞌ nqueliꞌth cón nac cheꞌn hues xtàa mèn, lalqueꞌ nac mèna con mèn coꞌ ndyub xib no coꞌ nsálꞌ yaꞌ loo mdoꞌ no loo gunab.
\v 6 Leꞌ sya, cón cheꞌn ryethe conꞌ ndli mèna ncàb huax conꞌ yeꞌrsinꞌ loo mèn. Por conꞌ ndli mèna, ndxecloo Diox ñèe Diox ryete mèna tac indyubdiꞌste mèna loo Diox.
\v 7 Ryethe conꞌ ndxèꞌ mque tee ban li guꞌ ndooreꞌ yilaꞌs guꞌ loo cón cheꞌn Crist no loo Crist.
\v 8 Per nalleꞌ, más huen bláꞌ guꞌ rye conꞌ coꞌ niin loo guꞌ ndxèꞌ thìb lad: Conꞌ coꞌ ndli ndxecloo mèn no ndxòo xyàn lezoꞌ mèn; mod coꞌ ndxàp mèn coꞌseꞌ asendli mèn par ndli mèn ryete conꞌ yeꞌrsinꞌ; mod coꞌ ndxàp mèn coꞌ ñii yèe ñii tìi xtàa mèn no coꞌ nquedèe mèn xtàa mèn; no mod coꞌ ndxàp mèn coꞌ ndyoodiꞌs chol diꞌs xin no diꞌs cap.
\v 9 Neꞌtyèꞌde guꞌ loo nec thìb xtàa guꞌ. Tac guꞌ mbláꞌyaꞌleꞌ ryethe mod yeꞌrsinꞌ coꞌ nac cón cheꞌn xab izlyoꞌ coꞌ mque tee ban mbli guꞌ póla. Por cona, niin loo guꞌ: Neꞌtolode que tee ban li guꞌ ryete conꞌ yeꞌrsinꞌa.
\v 10 Nalleꞌ mseꞌleꞌ guꞌ mod coꞌ ngòp guꞌ póla. Nac guꞌ mèn coꞌ nque tee ban loo tedib mod cub coꞌ ndxàp guꞌ nalleꞌ. Mod coꞌ ndxàp guꞌ nalleꞌ thidte nac xal nac mod coꞌ ndlyaꞌs Diox gàp guꞌ no que tee ban guꞌ par tataa mod más taꞌ guꞌ cuent cón cheꞌn Diox.
\v 11 Loo yalnaban cub coꞌ nac cón cheꞌn Crist, yende chó mèn gab loo xtàa mèn: Daa nac mèn nación Grieg o daa nac mèn nación Israel. Neꞌ neꞌ gab mèn: Daa ngòc circuncidar o daa neꞌngàcte circuncidar. Neꞌ neꞌ gab mèn loo xtàa mèn: Daa nac mèn tèe o daa nac mèn tith. Neꞌ neꞌ gab mèn: Daa nac moz yèe o daa nac mèn coꞌ yende chó cuee caꞌ. Ndxeꞌlequeꞌ, loo Diox ante cón cheꞌn Crist nac coꞌ ntac. Alux conꞌ nac cheꞌnpeꞌ Crist, no loo ryethe conꞌ ñibeꞌ Crist, par li zinꞌ Crist alux conꞌ nalleꞌ.
\p
\v 12 Guꞌ nac mèn coꞌ Diox mcui. Ngro xàꞌ guꞌ loo cón cheꞌn xab izlyoꞌ no ngòc guꞌ cheꞌnpeꞌ Diox. Nqueꞌ lezoꞌ Diox ñèe Diox guꞌ. Por cona, fque tee ban lì guꞌ loo coꞌ ngue niin loo guꞌ ndxèꞌ, coꞌ nee diꞌs, gòc guꞌ mèn coꞌ ndlyat lezoꞌ ñèe hues xtàa. Gòc guꞌ mèn coꞌ ndli conꞌ ndac loo hues xtàa. Gòc guꞌ mèn nadoꞌ coꞌ ngueꞌs nii ngueꞌs yaꞌ loo chol hues xtàa guꞌ. Gòc guꞌ mèn coꞌ ndxàp mod loo hues xtàa. Gòc guꞌ mèn coꞌ nchaꞌlaꞌs ñèe hues xtàa.
\v 13 Fxec yèe guꞌ loo thìb hues xtàa guꞌ no loo tedib hues xtàa guꞌ. Fteriꞌth ftecanꞌ guꞌ xtol cheꞌn thìb hues xtàa guꞌ no tedib hues xtàa guꞌ cheleꞌ hues xtàa guꞌ nco ñee loo guꞌ cón cheꞌn coꞌ ndxàc loo hues xtàa guꞌ. Xalqueꞌ mtonꞌ Crist xtol guꞌ, tataaguèꞌ fteriꞌth ftecanꞌ guꞌ xtol thìb hues xtàa guꞌ no xtol tedib hues xtàa guꞌ.
\v 14 Más de cona, fqueꞌ lezoꞌ guꞌ gunèe guꞌ hues xtàa guꞌ. Tac cheleꞌ guꞌ tataa li, leꞌ sya, thidte gàc guꞌ no thidte cue guꞌ loo cón cheꞌn Crist par tyubdiꞌs ndac guꞌ loo Crist.
\v 15 Fcuaꞌn guꞌ mod par cue ban guꞌ rye nda guꞌ no rye ndyeꞌth guꞌ con hues xtàa guꞌ xal nee lezoꞌ Diox. Leꞌ sya, làth xtauꞌa, teche texyath guꞌ xtùuz guꞌ par thidte li guꞌ conꞌ xal ñibeꞌ Diox, coꞌ nee diꞌs, gàc guꞌ xal thidte lad mèn loo cón cheꞌn Diox. Tac por conꞌa mcui Diox guꞌ. No conꞌa nac coꞌ gunee lezoꞌ Diox gàc loo guꞌ. Guuz guꞌ loo Diox: Diox quix Uꞌ, Diox, láth mbez guꞌ Diox por ryethe conꞌ coꞌ ndxàc loo guꞌ.
\p
\v 16 Bli guꞌ xtùuz cón cheꞌn diꞌs ndac cheꞌn Crist axtaqueꞌ huen huen téꞌth guꞌ no axtaqueꞌ huen huen yaaꞌd cón cheꞌn diꞌs ndac cheꞌn Crist yéc guꞌ. Bli guꞌ par yeꞌth lezoꞌ thìb xtàa guꞌ no tedib xtàa guꞌ loo cón cheꞌn Diox. Bluꞌ guꞌ loo thìb xtàa guꞌ no loo tedib xtàa guꞌ cón cheꞌn Crist. Blab guꞌ diꞌs loo libr cheꞌn Salmos coꞌ nac xtiꞌs Diox. Bilꞌ ro guꞌ himn coꞌ nac labans coꞌ nac diꞌs natúꞌ loo Diox. Neꞌyathlaꞌste guꞌ guuz guꞌ loo Diox: Diox quix Uꞌ, Diox látha.
\v 17 Ryete conꞌ ndli guꞌ, que naca diꞌs coꞌ tyoodiꞌs guꞌ, que naca zinꞌ coꞌ ndli guꞌ, bli guꞌ ryethe conꞌa por lèe Tad Jesús loo Diox tac tataa nac coꞌ ñibeꞌ Tad Jesús. Por lèe Tad Jesús guuz guꞌ Diox quix Uꞌ, Diox, loo Diox xud naꞌ coꞌseꞌ mbez guꞌ Diox, ne.
\s Diꞌs ndxèꞌ ndaꞌ cuent loo ryete mèn coꞌ ndxelaꞌs loo cón cheꞌn Diox por cón cheꞌn Jesucrist xá mod ndxàal que tee ban ndac mèn làth xtàa mèna.
\p
\v 18 Mèngot coꞌ nac xinꞌ saꞌl, ftubdiꞌs guꞌ loo xinꞌ saꞌlbiꞌpeꞌ guꞌ tac tataaqueꞌ ndxàal li guꞌ xal mèn coꞌ ndxelaꞌspeꞌ loo Crist.
\v 19 Mènbiꞌ coꞌ nac xinꞌ saꞌl, fqueꞌ lezoꞌ guꞌ gunèe guꞌ xinꞌ saꞌlgotpeꞌ guꞌ. No neꞌtyoo xàꞌde lezoꞌ guꞌ con xinꞌ saꞌlgotpeꞌ guꞌ par yitac lezoꞌ guꞌ con xinꞌ saꞌlpeꞌ guꞌ.
\v 20 Guꞌ, ne, coꞌ nac xinꞌ xud guꞌ no xinꞌ xnaꞌ guꞌ, ftubdiꞌs guꞌ diꞌs coꞌ mbez xud guꞌ no xnaꞌ guꞌ loo guꞌ. Tac conꞌ ndxèꞌ nac coꞌ ndxòo lezoꞌ Tad Crist.
\v 21 Guꞌ coꞌ nac gundan yínꞌ gundan ted, neꞌtaꞌde guꞌ xyàn lezoꞌ xinꞌ guꞌ, guꞌ coꞌ nac mèn coꞌ angndxàc nayiꞌ par neꞌtyoo xàꞌde lezoꞌ myenꞌ guꞌ loo cón cheꞌn Tad Crist.
\v 22 Guꞌ coꞌ nac moz, ftubdiꞌs guꞌ loo patrón guꞌ loo rye conꞌ ñibeꞌ patrón guꞌ loo guꞌ. Neꞌlide guꞌi xal ndli mèn coꞌ ngüiꞌ ndxèꞌ no ngüiꞌ baꞌ par neꞌyigàade mèna loo patrón mèna. Ndxeꞌlequeꞌ, bli guꞌi dib nzo yéc guꞌ no dib nzo lezoꞌ guꞌ xal mèn coꞌ, lìcqueꞌ, ndxàp mod loo Diox.
\v 23 Chol zinꞌ coꞌ ndli guꞌ, bli guꞌ zinꞌ dib nzo yéc guꞌ no dib nzo lezoꞌ tac guꞌ nac mèn coꞌ, lìcqueꞌ, ngue li sirv loo Crist. Neꞌlide guꞌ zinꞌ xal ndli mèn sirv loo xtàa mèn loo izlyoꞌ
\v 24 tac guꞌ naneequeꞌ no nonqueꞌ guꞌ leꞌ guꞌ càayaꞌ yalndxax coꞌ taꞌ Tad Crist loo guꞌ coꞌ nac conꞌ coꞌ yanꞌ no guꞌ no coꞌ gàc cheꞌnpeꞌ guꞌ yiloa tac guꞌ, lìcqueꞌ, ngue li sirv loo Tad Crist.
\v 25 Chol mèn coꞌ ndli conꞌ yeꞌrsinꞌ, mèna càayaꞌ yalndxax cón cheꞌn conꞌ yeꞌrsinꞌ coꞌ ndli mèna. Diox indlide par más tyuꞌ thìb mèn leque tedib mèn loo Diox.
\c 4
\p
\v 1 Leꞌ guꞌ coꞌ nac patrón na, ndxàal gàc guꞌ mèn nalì no mèn nambìi loo moz guꞌ. Bli guꞌ thidte tyuꞌ chol moz guꞌ loo guꞌ. Fteꞌ lezoꞌ guꞌ leꞌ guꞌ, ne, ngue no thìb patrón no Tad loo béꞌ.
\p
\v 2 Thidtenequeꞌ gure rez guꞌ Diox. Nalas gure guꞌ loo cón cheꞌn Diox por tyubdiꞌs ndac guꞌ loo Diox. Guuz guꞌ loo Diox: Diox quix Uꞌ, Tad Diox, coꞌseꞌ mbez guꞌ Diox por ryethe conꞌ.
\v 3 Gurez guꞌ Diox por nuꞌ, ne, leꞌ Diox xalꞌ ned xalꞌ yóꞌ loo nuꞌ par co nuꞌ yalbàn no tyoodiꞌs nuꞌ cón cheꞌn Crist coꞌ ngo casloo póla. Por cón cheꞌn Crist coꞌ ngo casloo loo mèn póla, por conꞌa ngueꞌen leziꞌf ned nzon ndxèꞌ nalleꞌ.
\v 4 Tolo gurez guꞌ Diox leꞌ Diox lyath no daa par luꞌen loo mèn cón cheꞌn Crist coꞌ ngo casloo ndooreꞌ no tyoodizen xalqueꞌ ndxàala loo mèn.
\p
\v 5 Fque tee ban ndac guꞌ loo mèn coꞌ tarte yilaꞌs loo Crist. Fcuaꞌn guꞌ mod toodiꞌs no guꞌ mèna láth beꞌ ndaꞌi mod loo mèna par ñeeneꞌ neꞌstolqueꞌ yilaꞌs mèna loo Crist.
\v 6 Coꞌseꞌ tyoodiꞌs guꞌ con chol mèn, nabeꞌste ftoodiꞌs no guꞌ mèna ante con diꞌs coꞌ nac diꞌs ndac par taꞌ gust lezoꞌ mèn xal ndyoodiꞌs guꞌ. Más de cona, ndxàal téꞌth guꞌ coꞌ huenlequeꞌ par ñee guꞌ no taꞌ guꞌ cuent xá mod càb guꞌ loo mèna cón cheꞌn xal ndxelaꞌs guꞌ.
\s Diꞌs ndxèꞌ ndaꞌ cuent leꞌ Pab ngue nii Diox loo mèn ciuda Colos, mèn coꞌ ndxelaꞌs loo cón cheꞌn Crist.
\p
\v 7 Tiquic coꞌ ndxàc hues daa por cón cheꞌn Crist, Tiquic coꞌ anzeꞌf nqueꞌ lezon coꞌ indláꞌyaꞌde daa no coꞌ altantlequeꞌ ndyoo loo zinꞌ cheꞌn Tad Crist, Tiquic taꞌ cuent loo guꞌ cón cheꞌn zinꞌ coꞌ ngue xoꞌf zinꞌen par ned nzon ndxèꞌ.
\v 8 Por cona, ngue telꞌen Tiquic loo guꞌ par ñee Tiquic loo guꞌ xá nzo nuꞌ ned nzo nuꞌ ndxèꞌ. Tegán Tiquic lezoꞌ guꞌ loo cón cheꞌn nuꞌ, ne.
\v 9 Coꞌseꞌ yiꞌth Tiquic loo guꞌ, telꞌen Ones con Tiquic loo guꞌ. Ryop myenꞌ ndxàc hues naꞌ por cón cheꞌn Crist. Mbli nèe lezoꞌ myenꞌ loo cón cheꞌn Crist coꞌ nqueꞌ lezon. Nac ryop myenꞌ mèn gulàazpeꞌ guꞌ, ne, par nedrèꞌ. Ryete conꞌ coꞌ ndxàc loo nuꞌ par ned nzo nuꞌ ndxèꞌ ryop myenꞌ taꞌ cuenta loo guꞌ trèꞌ.
\p
\v 10 Aristarc coꞌ nzo non leꞌn leziꞌf ngue nii Diox loo guꞌ. Marc coꞌ ndxàc hues yenꞌ Mbèlꞌ ngue nii Diox loo guꞌ, ne. Guꞌ nonleꞌ no ndaꞌqueꞌ guꞌ cuent xal mnibeꞌlen loo guꞌ cón cheꞌn Marc. Cheleꞌ Marc yiꞌth nee máa guꞌ par nedrèꞌ, nabeꞌste go no guꞌ Marc, ndee guꞌ.
\v 11 Chuch coꞌ neꞌ tedib lèe Just ngue nii Diox loo guꞌ, ne. Làth mèn cheꞌn nación Israel coꞌ naban trèꞌ, ante ryop myenꞌ ndxèꞌ coꞌ nac Marc no Just, myenꞌ ndxèꞌ ngue lyath no daa loo cón cheꞌn Diox par tolo ñibeꞌpeꞌ Diox loo mèn. Ante ryop myenꞌ ndxèꞌ ntegán lezon loo zinꞌ ndxèꞌ.
\v 12 Epafr coꞌ nac thìb mbiꞌ coꞌ nac mèn gulàaz guꞌ, coꞌ nxoꞌf zinꞌ cón cheꞌn Crist, ngue nii Diox loo guꞌ. Epafr ñaꞌbqueꞌ loo Diox por cón cheꞌn guꞌ par thidtene cue guꞌ nalì, no par cue nèe guꞌ loo cón cheꞌn Crist, no par gàc guꞌ mèn nalì no mèn nambìi loo Diox par li guꞌ ryete conꞌ coꞌ nee lezoꞌ Diox li guꞌ.
\v 13 Tac daa nda cuent coꞌ huenlequeꞌ leꞌ Epafr nguen tínꞌ lezoꞌ no anzeꞌf ndyóo Epafr cón cheꞌn guꞌ, no altantlequeꞌ ndoo Epafr loo zinꞌ cón cheꞌn guꞌ, no cón cheꞌn mèn coꞌ ndxàc hues naꞌ por cón cheꞌn Crist yèez Laodice, no cón cheꞌn mèn coꞌ ndxàc hues naꞌ por cón cheꞌn Crist yèez Hierápolis.
\v 14 Luc coꞌ nac doctor coꞌ anzeꞌf nqueꞌ lezon ñèen ngue nii Diox loo guꞌ. Dem, ne, ngue nii Diox loo guꞌ.
\p
\v 15 Gunii guꞌ Diox loo mèn coꞌ ndxàc hues naꞌ por cón cheꞌn Crist leꞌn yèez Laodice. Gunii guꞌ Diox loo Nimf no loo mèn coꞌ ndxelaꞌs loo Crist no loo cón cheꞌn Crist, mèn coꞌ nac mèn coꞌ nqueltàa liz Nimf.
\v 16 Coꞌseꞌ yilo lab guꞌ cart ndxèꞌ, ftelꞌ guꞌ cart ndxèꞌ loo mèn coꞌ nqueltàa loo cón cheꞌn Diox leꞌn yèez Laodice par lab mèna cart ndxèꞌ tya, ne. Cart coꞌ mtelꞌen loo mèn coꞌ nqueltàa loo cón cheꞌn Diox leꞌn yèez Laodice, coꞌseꞌ yilo lab mèn yèez Laodice cart coꞌ mtelꞌen loo mèna, ñaꞌb guꞌ carta par lab guꞌi, ne.
\v 17 Guuz guꞌ loo Arquip: Huiꞌ, Arquip, thidtene blo yéc bli zinꞌ cón cheꞌn Diox coꞌ mxoꞌf zinꞌ Tad Crist lool par lila.
\p
\v 18 Nalleꞌ, yub daa coꞌ nac Pab mqueꞌ cart ndxèꞌ loo guꞌ par ngue niin Diox loo guꞌ. Fteꞌ lezoꞌ guꞌ leꞌ daa tatabeꞌ ngueꞌqueꞌ leziꞌf. Ndlyazen leꞌ Diox tolo li anggàc conꞌ ndac loo guꞌ par nedrèꞌ, ndee guꞌ. Taandxèꞌ gàca.