\id 1TH
\ide UTF8
\h 1 TESALONICENSES
\toc1 1 TESALONICENSES
\mt Ner Cart Coꞌ Mqueꞌ Pab Yeꞌs Loo Mèn Ciuda Tesalónica
\c 1
\s Mèn coꞌ mblyath no Pab loo zinꞌ coꞌ mxoꞌf zinꞌ Pab ngo no Pab coꞌseꞌ mqueꞌ Pab yeꞌs loo mèn coꞌ ndxelaꞌs loo Diox por cón cheꞌn Crist, mèn coꞌ nqueltàa loo cón cheꞌn Diox leꞌn ciuda Tesalónica.
\p
\v 1 Daa, coꞌ nac Pab, ngue queꞌen yeꞌs coꞌ nac ner cart ndxèꞌ loo guꞌ, guꞌ coꞌ ngòo loo cón cheꞌn Diox por cón cheꞌn Crist, guꞌ coꞌ nqueltàa loo cón cheꞌn Diox leꞌn ciuda Tesalónica. Leque tiemp, Silvan no Timote no daa, nuꞌ ngue nii Diox loo guꞌ. Diox xud naꞌ no Tad Jesucrist naꞌ mcui guꞌ par nac guꞌ cheꞌnpeꞌ Diox no cheꞌnpeꞌ Tad Jesucrist naꞌ. Ndlyazen leꞌ Diox xud naꞌ no Tad Jesucrist naꞌ ryoꞌ lezoꞌ li anggàc conꞌ ndac loo guꞌ. Ndlyazen leꞌ Diox xud naꞌ no Tad Jesucrist naꞌ tolo li par yo nagàl lezoꞌ guꞌ loo Diox no cue ban guꞌ rye nda guꞌ no rye ndyeꞌth guꞌ làth xtàa guꞌ.
\s Mèn ciuda Tesalónica coꞌ ngòo loo cón cheꞌn Diox mbluꞌ loo taamas mèn xá mod ngolaꞌs mèn ciuda Tesalónica no xá mod ndyubdiꞌs mèna loo Crist.
\p
\v 2 Mbezen Diox quix Uꞌ, Diox, loo Diox por cón cheꞌn ryete guꞌ. Nteꞌqueꞌ lezon ñaꞌben cón cheꞌn guꞌ coꞌseꞌ mbezen Diox, ne.
\v 3 Thidtenequeꞌ indxathlasten mbezen Diox quix Uꞌ, Diox, loo Diox, por cón cheꞌn guꞌ coꞌseꞌ mbezen loo Diox xud naꞌ xá mod mxoꞌf zinꞌ guꞌ zinꞌ cón cheꞌn Crist tac ndxelaꞌs guꞌ loo Crist. No mbezen Diox quix Uꞌ, Diox, loo Diox, cón cheꞌn guꞌ coꞌseꞌ mbezen Diox. Tac naneequen xá mod anzeꞌf mbliguth guꞌ zinꞌ tac nqueꞌqueꞌ lezoꞌ guꞌ Diox no nqueꞌqueꞌ lezoꞌ guꞌ ñèe guꞌ hues xtàa guꞌ. Mbezen Diox quix Uꞌ, Diox, loo Diox por cón cheꞌn guꞌ, ne, tac non daa xá mod nchaꞌlaꞌs guꞌ tac guꞌ nzi queequeꞌ lezoꞌ loo conꞌ coꞌ gàc loo guꞌ no conꞌ coꞌ gàc cheꞌnpeꞌ guꞌ por cón cheꞌn Tad Jesucrist naꞌ.
\v 4 Guꞌ coꞌ ndxàc mèn huesen por cón cheꞌn Crist, Diox nqueꞌ lezoꞌ ñèe Diox guꞌ. Daa naneequeꞌ leꞌ Diox mcui guꞌ par yòo guꞌ loo cón cheꞌn Diox no par que tee li guꞌ sirv loo Diox.
\v 5 Tac coꞌseꞌ mbluꞌen loo guꞌ cón cheꞌn diꞌs ndac, neꞌngluꞌdena loo guꞌ xal nac mod coꞌ angndyoodiꞌs mèn. Ndxeꞌlequeꞌ, Xpii Natúꞌ mblyath no daa coꞌseꞌ mblon yalbàn loo guꞌ. Mblyath no Xpii Natúꞌ guꞌ, ne, axtaqueꞌ ngòp guꞌ yalxlaꞌs lìcqueꞌ nac diꞌs cón cheꞌn diꞌs ndac ndxèꞌ. Guꞌ non no naneequeꞌ guꞌ xá mod mque tee ban daa làth guꞌ par mcàba conꞌ ndac loo guꞌ.
\p
\v 6 Leꞌ por part cón cheꞌn guꞌ na, guꞌ mbliqueꞌ xal mbluꞌ nuꞌ loo guꞌ. No mbliqueꞌ guꞌ xalqueꞌ ngòc mod coꞌ mbluꞌ Tad Jesucrist loo guꞌ par li guꞌ xal ndyee diꞌs coꞌ mbluꞌ Jesucrist loo mèn. No ndyalqueꞌ guꞌ mbìn guꞌ diꞌs coꞌ nac diꞌs ndac, con gust, xalqueꞌ mbli Xpii Natúꞌ ngòca tataa loo guꞌ mastaleꞌ mxactìi guꞌ axta plóthe.
\v 7 Tataa mod leque guꞌ mbluꞌ guꞌ xal thìb muestr loo mèn coꞌ ndxelaꞌs loo cón cheꞌn Diox por cón cheꞌn Crist par ned leꞌn rye yèezyaꞌ cheꞌn làaz mèn macedon no rye yèezyaꞌ cheꞌn làaz mèn acay xá mod mque tee ban ndac guꞌ par tataa mod que tee ban ndac mèna, ne.
\v 8 Por cona, por cón cheꞌn guꞌ mbyath mbyèn cón cheꞌn diꞌs ndac cheꞌn Diox loo mèn huax lugar. Neꞌngyathte no neꞌngyènte cón cheꞌn diꞌs ndac ante loo mèn yèezyaꞌ cheꞌn làaz mèn macedon no mèn yèezyaꞌ cheꞌn làaz mèn acay. Ndxeꞌlequeꞌ, mbyath diꞌs ndac ndxèꞌ loo mèn ryete lugar coꞌteꞌ mbìn mèn xal ndxelaꞌs guꞌ loo Diox. Por cona, ya inquinte tolo taꞌ nuꞌ cuent cón cheꞌn xá mod ndxelaꞌsqueꞌ guꞌ loo Diox no loo cón cheꞌn Diox loo taamas mèn.
\v 9 Ndxeꞌlequeꞌ, ale yub mèna ndaꞌ cuent no ndyoodiꞌs mèna cón cheꞌn xal mcàba loo guꞌ coꞌseꞌ mbiꞌth too naa nuꞌ guꞌ no mbluꞌen cón cheꞌn diꞌs ndac ndxèꞌ loo guꞌ. Leꞌ guꞌ na, nabeꞌste mblo guꞌ lezoꞌ guꞌ coꞌseꞌ ngo nuꞌ làth guꞌ. Ndaꞌ mèna cuent cón cheꞌn guꞌ, ne, xá mod mbláꞌ guꞌ, ya neꞌtolode ngue li guꞌ cas loo rye tatol no rye naxnax no rye mdoꞌ no rye gunab coꞌ mbez guꞌ ngòc diox guꞌ ndooreꞌ yilaꞌs guꞌ loo cón cheꞌn Crist. Tataa mbli guꞌ par ngòo guꞌ loo cón cheꞌn Diox no par tlo guꞌ, li guꞌ sirv loo angoluxte Diox coꞌ naban coꞌ nac lìcpeꞌ Diox coꞌ inquedìide mèn.
\v 10 Leque mèn yèezyaꞌ cheꞌn làaz mèn macedon no mèn yèezyaꞌ cheꞌn làaz mèn acay ndaꞌ cuent cón cheꞌn guꞌ loon xá mod nzi quee lezoꞌ guꞌ loo conꞌ coꞌ gàc loo guꞌ no coꞌ gàc cheꞌnpeꞌ guꞌ axta coꞌseꞌ gàc huiz bere Jesús coꞌ nac xganꞌ Diox, yiꞌth Jesús xganꞌ Diox loo béꞌ, Jesús coꞌ mbli Diox ngro xban làth mèn nguth. Jesùs nac xaꞌ coꞌ mteláꞌ naꞌ loo conꞌ ryes par neꞌtetìide Diox naꞌ no neꞌzib quìide Diox naꞌ coꞌseꞌ gàc huiz coꞌ yilo laꞌs Diox loo mèn no coꞌ yilo tub rez Diox cón cheꞌn mèn.
\c 2
\s Trèꞌ ngue luꞌ cón cheꞌn zinꞌ coꞌ mxoꞌf zinꞌ Diox loo Pab.
\p
\v 1 Pues leque guꞌ coꞌ nac mèn huesen por cón cheꞌn Crist, guꞌ ndaꞌ cuent coꞌseꞌ mbal lon yalbàn loo guꞌ, diꞌs coꞌ mblon yalbàn loo guꞌa, guꞌ ngolaꞌsqueꞌ diꞌsa no ndyubdiꞌsqueꞌ guꞌ diꞌsa. Neꞌnguiꞌthte nuꞌ anxleꞌ loo guꞌ.
\v 2 Mastaleꞌ mbiꞌth nuꞌ loo guꞌ loo mtin mèn cuida Filip nuꞌ axta plóthe mblyaꞌs mèn cuida Filip, no mxec nuꞌ ngòc ngòc nguàal conꞌ coꞌ mbli no mèn cuida Filip nuꞌ, no guꞌ ndaꞌqueꞌ cuent coꞌ mbli no mèna nuꞌ coꞌ huenlequeꞌ, per Diox neꞌngláꞌyaꞌde nuꞌ. Ndxeꞌlequeꞌ, mbli Diox par mbiꞌth nuꞌ, mblo nuꞌ yalbàn loo guꞌ coꞌ ndluꞌ xá mod lyáꞌ mèn loo conꞌ ryes. No con dib axlaꞌs mbli nuꞌ conꞌa, mastaleꞌ ngòc nayiꞌ mèn gulàaz guꞌ ñèe mèn gulàaz guꞌ nuꞌ.
\v 3 Tac coꞌseꞌ mblo nuꞌ yalbàn loo guꞌ, thìb lìte nac diꞌs coꞌ mblo nuꞌ yalbàn. Inacte diꞌsa diꞌs coꞌ alithe ngo nuꞌ yalbàn. Neꞌ neꞌ inac diꞌs coꞌ ngo nuꞌ yalbàn diꞌs zab coꞌ ndli par quedìi nuꞌ guꞌ.
\v 4 Ndxeꞌlequeꞌ, ner mbli Diox huax conꞌ loon par ñee Diox ñeeneꞌ chéꞌ tyubdizen loo Diox. Ngoloa, ngòoqueꞌ lezoꞌ Diox ndlin sirv loo Diox. Por cona, mxoꞌf zinꞌ Diox zinꞌ cón cheꞌn diꞌs ndac ndxèꞌ loon. Por cona, ngon yalbàn loo mèn tac ngòo lezoꞌ Diox gunèe Diox daa. Ndxeꞌlequeꞌ, ingoden yalbàn par yòo lezoꞌ mèn diꞌs coꞌ mbezen loo yalbàn coꞌ ngon. Diox ndli conꞌ loo ryete naꞌ par ñee Diox ñeeneꞌ chéꞌ too lezoꞌ naꞌ loo cón cheꞌn Diox.
\v 5 Tac guꞌ naneequeꞌ nec thìb vez neꞌngliden par asemblin par mdan gust lezoꞌ guꞌ no par ndaꞌ nuꞌ xquith lezoꞌ guꞌ par lyath no guꞌ daa loo conꞌ naquin daa. Neꞌ neꞌ ndub rez nuꞌ chol diꞌs loo guꞌ par tataa mod li nuꞌ gan tmi loo guꞌ. Conꞌ ndxèꞌ nonqueꞌ guꞌ no naneequeꞌ guꞌ. Yende cón más niin. Diox ngüiꞌqueꞌ loo conꞌ coꞌ nde teeleꞌ ndli nuꞌ.
\v 6 Neꞌ neꞌ tar cuaꞌn nuꞌ mod par li nuꞌ leꞌ mèn li conꞌ guryath no conꞌ guryèn loo nuꞌ, que naca guꞌ, o que naca tedib cuaꞌ mèn coꞌ nac mèn tedib yèez coꞌ nzo loo cón cheꞌn Crist. Mastaleꞌ, ngácpeꞌ nuꞌ ngli nuꞌ leꞌ guꞌ taꞌ cuent cón cheꞌn nuꞌ leꞌ nuꞌ nacqueꞌ mèn coꞌ ndxeꞌ diꞌs cheꞌn Crist no taꞌ guꞌ cuent, ne, leꞌ Diox mblec nuꞌ par xoꞌf zinꞌ nuꞌ zinꞌ ndxèꞌ loo mèn.
\v 7 Ndxeꞌlequeꞌ, ngòc nuꞌ mèn nadoꞌ coꞌ ngòp mod làth guꞌ xal thìb xaꞌgot coꞌ nac gundan coꞌ ñee rsiꞌ ñee rso xinꞌ loo guꞌ.
\v 8 Anzeꞌf nqueꞌ lezoꞌ nuꞌ ñèe nuꞌ guꞌ axta mblyaꞌs nuꞌ li nuꞌ conꞌ ndac loo guꞌ axta mblyaꞌs nuꞌ taꞌ nuꞌ cuent cón cheꞌn diꞌs ndac loo guꞌ. No iante cón cheꞌn diꞌs ndac mblyaꞌs nuꞌ taꞌ nuꞌ cuent loo guꞌ. Ndxeꞌlequeꞌ, mblyaꞌs nuꞌ gàc nuꞌ xal mozpeꞌ guꞌ coꞌ li sirv loo guꞌ no tyactìi nuꞌ por cón cheꞌn guꞌ axta gath nuꞌ cheleꞌi naquin tac arid nazinꞌ guꞌ nuꞌ.
\v 9 Nteꞌ lezoꞌ guꞌ, mèn huesen por cón cheꞌn Crist, xá mod nguth ngüiꞌ lezoꞌ nuꞌ par mbli nuꞌ zinꞌ ze no yálꞌ par mbli nuꞌ gan thìb leꞌ rol luaꞌ par hua nuꞌ. Mbli nuꞌ zinꞌ par neꞌndoo dóꞌde nuꞌ loo nec thìb guꞌ. Làth xtauꞌa, mblon yalbàn cón cheꞌn diꞌs ndac cheꞌn Diox loo guꞌ.
\p
\v 10 Guꞌ nac mèn coꞌ ndaꞌ cuent cón cheꞌn nuꞌ. No ndub huiꞌ Diox loo nuꞌ, ne, leꞌ nuꞌ, lìcqueꞌ, mque tee ban nalìqueꞌ làth guꞌ coꞌ ngolaꞌs no coꞌ nzo loo cón cheꞌn Diox, no nambìi mque tee ban nuꞌ làth guꞌ coꞌ nac mèn coꞌ ndxelaꞌs loo Diox por cón cheꞌn Crist. Mod coꞌ mque tee ban nuꞌ làth guꞌ neꞌndade nuꞌ lugar loo yende chó mèn quexùꞌ queꞌ fals mèna nuꞌ làth guꞌ, ¿léꞌ?
\v 11 Lomisqueꞌ, nanee guꞌ, ne, xá mod mcoꞌx nuꞌ loo guꞌ no mtegán nuꞌ lezoꞌ thìb thìb guꞌ xal ndli thìb gundan yínꞌ gundan ted loo xinꞌ gundana, ¿léꞌ?
\v 12 Mnibeꞌ nuꞌ loo guꞌ no mtanꞌ nuꞌ diꞌs loo guꞌ, nabeꞌste cue ban guꞌ xalqueꞌ ndxàal cue ban mèn coꞌ ngòo loo cón cheꞌn Diox no mèn coꞌ nac cheꞌnpeꞌ Diox. Tac Diox ngurez guꞌ par yòo guꞌ coꞌteꞌ ñibeꞌ Diox no coꞌteꞌ ndxàꞌx xnìi cheꞌn Diox loo ryethe conꞌ par gàc cheꞌnpeꞌ guꞌ conꞌ roo conꞌ xèn cheꞌnpeꞌ Diox, ne.
\p
\v 13 Por cona, nuꞌ ne, thidtenequeꞌ mbez nuꞌ Diox quix Diox loo Diox tac coꞌseꞌ mbìn guꞌ diꞌs cón cheꞌn diꞌs ndac cheꞌn Diox coꞌ mblo nuꞌ yalbàn loo guꞌ, guꞌ mdyal mbìn cón cheꞌn diꞌs ndac no ngolaꞌs guꞌ cón cheꞌn diꞌs ndac. Tac neꞌngònte guꞌ diꞌsa no neꞌ neꞌ ngalaꞌs guꞌ diꞌsa xalqueꞌ nac diꞌs coꞌ ndyoodiꞌs chol mèn. Ndxeꞌlequeꞌ, ngolaꞌs guꞌ loo cón cheꞌn diꞌs ndac cheꞌn Diox xal nac diꞌs coꞌ, lìcqueꞌ, mtelꞌ Diox loo mèn. Diꞌsa ndluꞌ loo guꞌ xá mod ndxàal que tee ban guꞌ no xá mod ndxàal li nèe guꞌ guꞌ, guꞌ coꞌ ndxelaꞌs loo Crist, loo cón cheꞌn Diox.
\v 14 Guꞌ coꞌ nac mèn huesen por cón cheꞌn Crist, coꞌseꞌ mdub nguꞌs mèn gulàaz guꞌ guꞌ no mtetìi mèn gulàaz guꞌ guꞌ axta plóthe, lalqueꞌ mxac guꞌ xal ngòca loo mèn nación Israel coꞌ ndxelaꞌs loo Jesucrist, mèn coꞌ naban leꞌn yèezyaꞌ cheꞌn làaz mèn jude. Tac guꞌ, ne, mxactìi lomisqueꞌ yalndyub nguꞌs coꞌ mbli no mèn nación guꞌ guꞌ xal mxactìi mèn nación Israel coꞌ ndxelaꞌs loo Jesucrist cón cheꞌn mèn gulàazpeꞌ mèn nación Israel.
\v 15 Mèn nación Israela mbeth Tad Jesús xalqueꞌ mbeth mèn nación Israel mèn gulàazpeꞌ mèn nación Israel, mèn coꞌ mdeꞌth diꞌs coꞌ ndxab Diox cón cheꞌn Tad Jesús. Per iante mbeth mèna Jesús, no mèn coꞌ mdeꞌth diꞌs coꞌ ndxab Diox. Lomisqueꞌ ne, mchoblaꞌ mèna nuꞌ làaz mèna. Indlide mèna conꞌ coꞌ ndxòo lezoꞌ Diox. Ndxeꞌlequeꞌ, ale leꞌleꞌ ndxàc nayiꞌ mèna ñèe mèna chol xtàa mèn.
\v 16 Coꞌseꞌ ndlyaꞌs nuꞌ tyoodiꞌs no nuꞌ mèn coꞌ inacte mèn nación Israel cón cheꞌn diꞌs ndac par belꞌqueꞌ lyáꞌ mèna loo conꞌ ryes, ne, ale indaꞌde mèn nación Israel lugar tyoodiꞌs no nuꞌ mèna. Tataa mod, sate más ncuaꞌn mèna xquin mèna no xtol mèna. Por lult, ngocloo tínꞌ Diox loo rye mèn dib anax nación Israel par mtetìi Diox mèna. Cona, mcàb loo mèn nación Israel leꞌ Diox mzib quìi loo mèn nación Israel par mxactìi mèna.
\s Anzeꞌf nguen lezoꞌ Pab ya too naa Pab mèn coꞌ ngolaꞌs loo cón cheꞌn Crist, mèn coꞌ ngo ban leꞌn ciuda Tesalónica.
\p
\v 17 Guꞌ coꞌ nac mèn huesen por cón cheꞌn Crist, coꞌseꞌ mbii nuꞌ loo guꞌ ndxep tiemp, mastaleꞌ yende mod huiꞌ nuꞌ loo guꞌ, nteꞌqueꞌ lezoꞌ nuꞌ máa guꞌ no anzeꞌf ndlyaꞌs nuꞌ yiꞌth nee nuꞌ máa guꞌ par nedrèꞌ.
\v 18 Anzeꞌf mblyaꞌs nuꞌ yiꞌth nee nuꞌ guꞌ par nedrèꞌ. Per más mblyazen gal neen guꞌ, daa coꞌ nac yub Pab. Huax vez mblyazen gal neen máa guꞌ. Per cadqueꞌ mblyaꞌs nuꞌ yiꞌth nuꞌ, chàa, ndxòo Mebizyaꞌ xiꞌtha. Ncàꞌ ya yende mod yiꞌth nuꞌ par nee nuꞌ máa guꞌ.
\v 19 Tac ¿xá nee guꞌ? ¿Cón nac coꞌ nzi quee lezoꞌ nuꞌ, àꞌ? No ¿cón nac coꞌ ndli ndyac lezoꞌ nuꞌ, ne, àꞌ? No ¿cón nac coꞌ ndli nxyoꞌf ndeꞌ nxyoꞌf ndlaꞌ lezoꞌ nuꞌ coꞌseꞌ yiꞌth xi Tad Jesucrist naꞌ, àꞌ? Pues, guꞌ nac coꞌ li tyac lezoꞌ nuꞌ coꞌseꞌ yiꞌth Tad Jesucrist naꞌ tedib vez.
\v 20 Aa. Lìcpeꞌ baꞌi, guꞌqueꞌ nac coꞌ li par tyac lezoꞌ nuꞌ coꞌse gàc huiz yiꞌth xi Tad Jesucrist naꞌ.
\c 3
\p
\v 1 Por cona, coꞌseꞌ guneen ya neꞌxecte daa tolo que tee xàꞌen loo guꞌ, mblin xtùuz no mdoo lezon mbyanꞌ ante daa leꞌn ciuda Aten
\v 2 par telꞌen Timote, coꞌ ndxàc huesen por cón cheꞌn Crist, par nee Timote máa guꞌ par nedrèꞌ tac Timote nac thìb mbiꞌ coꞌ nxoꞌf zinꞌ zinꞌ coꞌ nac cheꞌn Diox. Timote ndli zinꞌ con daa ned ngue tee gon yalbàn cón cheꞌn diꞌs ndac cón cheꞌn Crist coꞌ ndluꞌ xá mod lyáꞌ mèn loo conꞌ ryes. Mtelꞌen Timote loo guꞌ par yiꞌth li nèe Timote guꞌ no par coꞌx Timote loo guꞌ no li Timote par yeꞌth lezoꞌ guꞌ loo cón cheꞌn conꞌ coꞌ ndxelaꞌs guꞌ loo Crist.
\v 3 Tataa taꞌ Timote cuent loo guꞌ par neꞌtyoo xàꞌde lezoꞌ nec thìb guꞌ loo cón cheꞌn Crist por cón cheꞌn yalndyub nguꞌs no ngòc nguàal conꞌ coꞌ ndxàc loo guꞌ. Leque yub guꞌ ndaꞌleꞌ cuent coꞌ huenlequeꞌ leꞌ Diox mdoo naꞌ par càba loo naꞌ tyactìi naꞌ por cón cheꞌn Crist.
\v 4 Más de cona, coꞌseꞌ beꞌ ngo non guꞌa, mdan cuent loo guꞌ leꞌ naꞌ tyactìiqueꞌ. Tataaqueꞌ ndxàca loo naꞌ nalleꞌ xalqueꞌ mdan cuenta loo guꞌa.
\v 5 Por cona, daa ne, coꞌseꞌ neꞌtolode nxec daa mque tee xàꞌen loo guꞌ no inonte daa máa guꞌ, cona mtelꞌen Timote par li lazen xá mod tolo nque tee ban guꞌ loo conꞌ coꞌ ndxelaꞌs guꞌ loo Crist. Tac anzeꞌf ndyóon no nda noqueꞌ lezon neꞌstolqueꞌ pá, chàa, mbiꞌth Mebizya, mbiꞌth mdobyaꞌ Mebizya guꞌ. No thìb descuid càba loo guꞌ anxleꞌ gàc zinꞌ coꞌ mbiꞌth xoꞌf zinꞌen loo guꞌ.
\p
\v 6 Per nalleꞌ Timote ndyeꞌthleꞌ, ngua Timote loo guꞌ leꞌn ciuda Tesalónica. No nabeꞌste mdaꞌ Timote cuent loo nuꞌ leꞌ guꞌ huenqueꞌ nziriꞌ no toloqueꞌ ndxelaꞌs guꞌ loo Crist no loo cón cheꞌn Crist. Mdaꞌ Timote cuent, ne, nzi queꞌqueꞌ lezoꞌ guꞌ ñèe guꞌ hues xtàa guꞌ. Mdaꞌ Timote cuent loo nuꞌ leꞌ guꞌ nteꞌqueꞌ lezoꞌ cón cheꞌn nuꞌ, ne. No mdaꞌ Timote cuent loo nuꞌ anzeꞌf ndlyaꞌs guꞌ ñee guꞌ máa nuꞌ xalqueꞌ ndlyaꞌs nuꞌ ñee nuꞌ máa guꞌ, ne.
\v 7 Por cona, xalqueꞌ mèn coꞌ ndxàc huesen por cón cheꞌn Crist, mastaleꞌ ndyactìi nuꞌ no ndub nguꞌs mèn nuꞌ, coꞌseꞌ mbìn nuꞌ cón cheꞌn cuent coꞌ mdaꞌ Timote loo nuꞌ cón cheꞌn guꞌ, ryete nuꞌ mdyac lezoꞌ no mbyeꞌth lezoꞌ nuꞌ axta plóthe. No ndyac lezoꞌ nuꞌ cón cheꞌn guꞌ tac, lìcqueꞌ, mbli nèe guꞌ guꞌ loo conꞌ coꞌ ndxelaꞌs guꞌ loo Diox no loo cón cheꞌn Diox.
\v 8 Conꞌ coꞌ ndxàc loo guꞌ baꞌ ndli ndenꞌ nuꞌ xal mèn coꞌ ngro xban tac guꞌ nzi li nèequeꞌ guꞌ loo cón cheꞌn Tad Crist.
\v 9 Por cona, axta neꞌ neꞌ gác gab nuꞌ Diox quix non Uꞌ, Diox, loo Diox coꞌseꞌ mbez nuꞌ Diox por cón cheꞌn guꞌ tant ndyac lezoꞌ nuꞌ por cón cheꞌn guꞌ coꞌ ndli guꞌ ndxàc loo nuꞌ loo Diox.
\v 10 Imbedte nuꞌ no indxathlaste nuꞌ mbez nuꞌ Diox ze no yálꞌ par taꞌ Diox lugar loo nuꞌ yiꞌth nèe nuꞌ máa guꞌ no par tolo taꞌ nuꞌ cuent cón cheꞌn diꞌs ndac coꞌ beꞌ ndxàc falt téꞌth guꞌ, par tolo li nèe guꞌ guꞌ loo conꞌ coꞌ ndxelaꞌs guꞌ loo Crist no loo cón cheꞌn Crist.
\p
\v 11 Anzeꞌf ndlyaꞌs nuꞌ leꞌ yub Diox xud naꞌ no Tad Jesucrist naꞌ xalꞌ ned xalꞌ yóꞌ loo nuꞌ no lyath no Diox no Tad Jesucrist nuꞌ par yiꞌth nee nuꞌ máa guꞌ par nedrèꞌ.
\v 12 No ndlyaꞌs nuꞌ leꞌ Diox li par tolo téꞌth guꞌ cón cheꞌn Diox no tolo queꞌ lezoꞌ guꞌ ñèe guꞌ thìb xtàa guꞌ no tedib xtàa guꞌ no queꞌ lezoꞌ guꞌ ñèe guꞌ rye mèn xalqueꞌ nqueꞌ lezon ñèen guꞌ.
\v 13 No ndlyazen leꞌ Diox li nèe xtùuz guꞌ no lezoꞌ guꞌ loo cón cheꞌn Crist. Ndlyazen leꞌ guꞌ gàc mèn coꞌ thidtenequeꞌ ngro xàꞌ loo cón cheꞌn xab izlyoꞌ par gàc guꞌ cheꞌnpeꞌ Diox. Leꞌ sya, coꞌseꞌ gàc huiz coꞌ yiꞌth no Tad Jesús ryethe mèn coꞌ nguth, mèn coꞌ ryo xban ladpeꞌ huiza, mèn coꞌ ngro xàꞌ loo cón cheꞌn xab izlyoꞌ coꞌ ngòc cheꞌnpeꞌ Dioxa, nec thìb mod no nec tedib mod neꞌgàpte guꞌ nec thìb dol loo Diox.
\c 4
\s Trèꞌ ndaꞌ cuent xá mod ndxàal que tee ban mèn par tataa mod yòo lezoꞌ Diox loo mod coꞌ nzi tee ban mèn.
\p
\v 1 Nalleꞌ, mèn huesen por cón cheꞌn Crist, ñaꞌben loo guꞌ no tanꞌen diꞌs loo guꞌ xalqueꞌ ñibeꞌ Tad Jesús no xalqueꞌ mbluꞌen loo guꞌ xá mod ndxàalqueꞌ que tee ban guꞌ no li guꞌ coꞌ yòo lezoꞌ Diox, tataaqueꞌ tolo bli guꞌ coꞌ yòo lezoꞌ Diox ñèe Diox guꞌ.
\p
\v 2 Guꞌ non no naneequeꞌ guꞌ xal nac diꞌs coꞌ mnibeꞌen loo guꞌ par li guꞌi. Por lèe cheꞌn Jesucrist, ñibeꞌen loo guꞌ par li guꞌi.
\v 3 Conꞌ coꞌ ndlyaꞌs Diox li guꞌ nac leꞌ guꞌ, lìcqueꞌ, ryo xàꞌ loo cón cheꞌn xab izlyoꞌ par gàc guꞌ mèn cheꞌnpeꞌ Diox par ñibeꞌ Diox loo guꞌ. No gunee lezoꞌ Diox neꞌlide guꞌ yalburrid no neꞌcuaꞌnte guꞌ xinꞌ huan guꞌ.
\v 4 Diox ndlyaꞌs leꞌ thìb thìb guꞌ téꞌth no taꞌ guꞌ cuent xá mod ndxàal li guꞌ par tyub ban ndac guꞌ con thìb xinꞌ saꞌl guꞌ par que tee ban lì ryop saꞌl guꞌ no par li ryop saꞌl guꞌ conꞌ guryath no conꞌ guryèn loo xinꞌ saꞌl guꞌ.
\v 5 Neꞌcue ban node guꞌ xinꞌ saꞌl guꞌ xal ndli mèn coꞌ ndyub chol conꞌ yeꞌrsinꞌ lezoꞌ par ndyub yoꞌf lezoꞌ mèn par li mèn chol conꞌ yeꞌrsinꞌ xal ndli mèn coꞌ indlibeꞌde Diox no mèn coꞌ indxònte cón cheꞌn Diox.
\v 6 No neꞌlide nec thìb guꞌ ryes par quedìi guꞌ hues xtàa guꞌ nec thìb mod par li guꞌ yalburrid no cuaꞌn guꞌ xinꞌ huan guꞌ làth xtàa guꞌ. Tac Tad Diox anzeꞌf nè tetìi rye mèna xalqueꞌ mdalen cuenta loo guꞌ no xal mcoꞌxen loo guꞌ cón cheꞌn ryete conꞌ ndxèꞌ ndooreꞌ.
\v 7 Diox mcui naꞌ par cue ban naꞌ xalqueꞌ mèn coꞌ ngro xàꞌpeꞌ loo cón cheꞌn xab izlyoꞌ, mèn coꞌ ngòc cheꞌnpeꞌ Diox. Indlyaꞌste Diox cue ban naꞌ loo conꞌ xin no loo conꞌ cap.
\v 8 Por cona, ngue niin loo guꞌ: Mèn coꞌ ntèꞌb diꞌs coꞌ ngue luꞌen loo mèna, inacte leꞌ mèna ante ngue tèꞌb diꞌs coꞌ mbez chol mèn loo mèna. Ndxeꞌlequeꞌ, ngue tèꞌb mèna yub Diox coꞌ mblàa Xpii Natúꞌ loo naꞌ.
\p
\v 9 Per cón cheꞌn xá mod ndxàal queꞌ lezoꞌ guꞌ ñèe guꞌ mèn coꞌ ndxàc hues xtàa guꞌ, ya inquinte queꞌen yeꞌs loo guꞌ cón cheꞌn conꞌa. Tac yub Diox mbluꞌ loo guꞌ xá mod queꞌ lezoꞌ guꞌ ñèe guꞌ thìb xtàa guꞌ no tedib xtàa guꞌ.
\v 10 Tac, lìcpeꞌ baꞌi, tataaqueꞌ nqueꞌ lezoꞌ guꞌ ñèe guꞌ mèn coꞌ ndxàc mèn hues xtàa naꞌ par ned leꞌn rye yèezyaꞌ cheꞌn làaz mèn macedon. Per daa ñaꞌb loo guꞌ, mèn huesen por cón cheꞌn Crist, sate más toloqueꞌ bli guꞌ par queꞌ tínꞌ lezoꞌ guꞌ ñèe guꞌ thìb hues xtàa guꞌ no tedib hues xtàa guꞌ.
\v 11 Fcuaꞌn guꞌ mod más nagàl gure ban guꞌ. Con gust bli guꞌ zinꞌ coꞌ nac zinꞌ coꞌ ndxác guꞌ ndli guꞌ con nít loon loo guꞌ no con nít loon yéc guꞌ xalqueꞌ mnibeꞌen loo guꞌ no xalqueꞌ mtanꞌ diꞌs loo guꞌ par li guꞌ.
\v 12 Tataa bli guꞌ par li mèn coꞌ inzode loo cón cheꞌn Crist conꞌ guryath no conꞌ guryèn loo guꞌ no par neꞌgàc faltte conꞌ coꞌ naquin guꞌ loo guꞌ.
\s Trèꞌ ndluꞌ xá mod yiꞌth Tad Jesucrist loo béꞌ loo mbii tedib vez.
\p
\v 13 Ndlyazen niin tedib conꞌ loo guꞌ, ne, mèn huesen por cón cheꞌn Crist: Indlyasten leꞌ guꞌ tuaꞌte cue par neꞌtaꞌde guꞌ cuent cón cheꞌn mèn coꞌ ngolaꞌs loo Crist no loo cón cheꞌn Crist, coꞌ nee diꞌs, mèn coꞌ nguth. Ndxeꞌlequeꞌ, ndlyazen leꞌ guꞌ taꞌ cuent coꞌ huenlequeꞌ cón cheꞌn mèna par neꞌxide yéc guꞌ no neꞌxide lezoꞌ guꞌ arid por cón cheꞌn mèna xal nzi xi yéc mèn no nzi nxi lezoꞌ mèn, mèn coꞌ inzi queede lezoꞌ loo cón cheꞌn Diox.
\v 14 Tac texal ndxelaꞌs naꞌ leꞌ Jesús nguth no ngro xban Jesús, tataaguèꞌ ndxelaꞌs naꞌ leꞌ Diox li thidte yiꞌth no Jesús xpii no alm rye mèn coꞌ nguth, mèn coꞌ ngolaꞌsqueꞌ loo Jesús no loo cón cheꞌn Jesús. Gàc conꞌ ndxèꞌ coꞌseꞌ yiꞌth xi Jesús mèn coꞌ ndxelaꞌs loo cón cheꞌn Diox por cón cheꞌn Jesús.
\p
\v 15 Por cona, ngue taꞌ nuꞌ cuent cón cheꞌn conꞌ ndxèꞌ loo guꞌ xal mbluꞌ Tad Crist loo guꞌ leꞌ naꞌ coꞌ beꞌ nzi ban coꞌseꞌ gàc huiz yiꞌth xi Tad Crist mèn coꞌ ndxelaꞌs, neꞌgàcte naꞌ mèn coꞌ ya sálꞌ ner Tad Jesús mèn coꞌ nguth, mèn coꞌ ngolaꞌs loo Tad Crist no loo cón cheꞌn Tad Crist.
\v 16 Tac leque yub Tad Crist Jesús yiꞌth loo béꞌ loo mbii. Cabii gab Tad Crist Jesús: ¡Yaꞌ guꞌ ndyàa naꞌ, ey! Leꞌ sya, thìb angl coꞌ ñibeꞌ loo taamas angl cabii gab angla: ¡Yaꞌ guꞌ ndyàa naꞌ, ey! Làth xtauꞌa, thìb angl cabii cuez trompet cheꞌn Diox. Leꞌ sya, mèn coꞌ nguth, coꞌ nac mèn coꞌ ngolaꞌs loo Crist Jesús, nerlequeꞌ mèna ryo xban.
\v 17 Leꞌ yiloa na, naꞌ coꞌ beꞌ nabanqueꞌ, chàa, yáp no naꞌ mèn coꞌ nguth coꞌ ngolaꞌsqueꞌ loo Crist Jesús, coꞌ ngro xbana. Bii no naꞌ mèna loo mbii loo béꞌ leꞌn xcuau par ya sálꞌ no naꞌ mèna Tad Crist Jesús loo mbii loo béꞌ. Tataa mod bii no naꞌ Tad Crist Jesús thidtenequeꞌ.
\v 18 Por cona, ngue niin loo guꞌ: Ftegán guꞌ lezoꞌ thìb hues xtàa guꞌ no lezoꞌ tedib hues xtàa guꞌ xal ndluꞌ diꞌs ndxèꞌ loo naꞌ.
\c 5
\p
\v 1 Per cón cheꞌn tiemp, coꞌ nee diꞌs, línꞌ no mbeꞌ no huiz coꞌ gàc coꞌseꞌ yiꞌth Tad Crist, inquinte arid par queꞌen yeꞌs cón cheꞌn línꞌ no tiemp loo guꞌ, ndyaquen, mèn huesen por cón cheꞌn Crist.
\v 2 Guꞌ nonqueꞌ no ndaꞌqueꞌ guꞌ cuent coꞌ huenlequeꞌ cón cheꞌn huiz coꞌseꞌ yiꞌth Tad Crist gàc huiza thìb huiz coꞌ yende chó mèn taꞌ cuent no coꞌ yende chó mèn mbed. Huiza gàc xal coꞌseꞌ ndlyàa huanꞌ liz mèn thìb tiemp coꞌseꞌ yende chó mèn non yiꞌth huanꞌ.
\v 3 Tac coꞌseꞌ gab mèn loo xtàa mèn coꞌ neꞌtyalte yilaꞌs loo Tad Crist: Nase nagàl nziriꞌ mèn, ¿léꞌ? Yende cón ndyac mèn no yende cón ndli xol loo mèn, ¿léꞌ? Sya, látha, chàa, gàc conꞌ ryes loo mèn. Lyux mèn no gàc yalnè coꞌ tenꞌ mèn xal coꞌseꞌ, chàa, nde thìb yalnè loo thìb xaꞌgot coꞌ ndoo nac xinꞌ par gáal mbed. Neꞌlyáꞌde mèn loo yaltìi coꞌ gàc loo mèn huiz coꞌ tetìi Diox no zib quìi Diox mèn.
\v 4 Per guꞌ, mèn huesen por cón cheꞌn Crist, inacte guꞌ mèn coꞌ ncuau loo no coꞌ ncuau yéc par cue cuau lezoꞌ guꞌ par, chàa, gàc huiz coꞌ yiꞌth Tad Crist loo guꞌ xal coꞌseꞌ, chàa, ndlyàa huanꞌ liz mèn.
\v 5 Tac ryete guꞌ nacqueꞌ mèn coꞌ ndyub xnìi yéc no mèn coꞌ ndyub xnìi lezoꞌ loo cón cheꞌn Diox coꞌ nac conꞌ lìcpeꞌ. Inacte guꞌ mèn coꞌ ncuau yéc no mèn coꞌ ncuac loo coꞌ nzi tee ban loo yálꞌcuau.
\v 6 Por cona, neꞌgàcte naꞌ mèn coꞌ nzi cuau lezoꞌ xal mèn coꞌ indxelaꞌste coꞌ nac xal mèn coꞌ nzi yàt, coꞌ nee diꞌs, nzi tee ban mèn loo yálꞌcuau. Ndxeꞌlequeꞌ, nalas cue naꞌ no ndxeꞌslequeꞌ cue naꞌ tac nde zinꞌ gaxleꞌ tiemp yiꞌth xi Crist naꞌ.
\v 7 Tac guꞌ naneequeꞌ, mèn huesen por cón cheꞌn Crist, lìcqueꞌ, mèn ndxàt yálꞌ. No mèn coꞌ nac mènguy, ndyuuz mèna yálꞌ.
\v 8 Per por part cón cheꞌn naꞌ, naꞌ nacqueꞌ mèn coꞌ nzi tee banqueꞌ loo cón cheꞌn Tad Crist xal mèn coꞌ nzi tee ndxáal ze. No ndxeꞌslequeꞌ ndxàal cue ban naꞌ. Neꞌgàcte naꞌ xal mèn coꞌ ndyuuz yálꞌ. Ndxeꞌlequeꞌ, ñibeꞌ naꞌ loo lezoꞌ naꞌ ante que tee ban naꞌ loo conꞌ ndac. Lìcqueꞌ, ndxàal gàp naꞌ yalxlaꞌs tínꞌ loo Diox no queꞌqueꞌ lezoꞌ naꞌ Diox no queꞌqueꞌ lezoꞌ naꞌ ñèe naꞌ hues xtàa naꞌ par neꞌyizaꞌde naꞌ naꞌ loo cón cheꞌn Diox xal ndli thìb solndad coꞌseꞌ ntauꞌ solndad pech solndad con camis yiꞌf solndad par neꞌyaaꞌdte cuchi lad solndad no par neꞌyidinꞌte bal lad solndad. Tataa mod, ne, cue quee lezoꞌ naꞌ loo conꞌ ndac coꞌ gàc loo naꞌ coꞌseꞌ yiꞌth xi Crist naꞌ tac naꞌ yòo ban no Diox thidtene yiloa. Tataa li naꞌ par gàca loo naꞌ loo cón cheꞌn Tad Crist xal ndli thìb solndad coꞌseꞌ ndub solndad thìb sombrel yiꞌf yéc solndad par tauꞌ sombrel yéc solndad loo conꞌ ryes.
\v 9 Tac Diox neꞌmbecte naꞌ loo cón cheꞌn Crist par tetìi Diox naꞌ coꞌseꞌ tub rez Diox cón cheꞌn rye mèn. Ndxeꞌlequeꞌ, mbli Diox mblyáꞌ naꞌ loo conꞌ ryes por cón cheꞌn Tad Jesucrist naꞌ.
\v 10 Tad Jesucrist nguth por cón cheꞌn naꞌ par gàca loo naꞌ coꞌseꞌ zin huiza, que naca naban naꞌ, que naca nguth naꞌ, thidtenequeꞌ yòo ban no naꞌ Tad Jesucrist.
\v 11 Por cona, ngue bez nuꞌ loo guꞌ: Toloqueꞌ bli guꞌ par yeꞌth lezoꞌ thìb hues xtàa guꞌ no tedib hues xtàa guꞌ. No bli guꞌ par tolo téꞌth no tolo tyubdiꞌs thìb hues xtàa guꞌ no tedib hues xtàa guꞌ loo cón cheꞌn Tad Jesucrist xalqueꞌ ndli guꞌ.
\s Pab mcoꞌx loo mèn coꞌ ngolaꞌs loo Tad Crist, mèn coꞌ ngòo loo cón cheꞌn Tad Crist.
\p
\v 12 Ñaꞌben loo guꞌ, ne, mèn huesen por cón cheꞌn Crist: Bli guꞌ cas no gòp guꞌ mod loo mèn coꞌ ndxàc hues naꞌ coꞌ nxoꞌf zinꞌ cón cheꞌn Tad Crist làth guꞌ, mèn coꞌ ndyoo ner no coꞌ ndyoo naa loo guꞌ, mèn coꞌ ncoꞌx cón cheꞌn Tad Crist loo guꞌ.
\v 13 Ndlyazen bli guꞌ cas loo mèna no toloqueꞌ queꞌ lezoꞌ guꞌ ñèe guꞌ mèna axta plóthe por cón cheꞌn zinꞌ coꞌ ngue xoꞌf zinꞌ mèna loo guꞌ coꞌ nac cón cheꞌn Crist. No nabeꞌste gure ban ndac guꞌ làth xtàa guꞌ no toloqueꞌ gure ban guꞌ rye nda guꞌ no rye ndyeꞌth guꞌ làth xtàa guꞌ.
\p
\v 14 Lomisqueꞌ ne, mèn huesen por cón cheꞌn Crist, ñibeꞌen no tanꞌen diꞌs ndxèꞌ loo guꞌ: Fcoꞌx guꞌ ndxep loo mèn no gunii guꞌ ndxep loo mèn nadoꞌ diꞌs nadoꞌ cuent, loo mèn coꞌ nzi tee zaꞌf. Ftegán guꞌ lezoꞌ mèn no bli guꞌ par yeꞌth lezoꞌ mèn coꞌ nzi tee ndoo xàꞌ lezoꞌ loo cón cheꞌn Crist. Blyath no guꞌ mèn coꞌ nguuꞌs xtùuz no coꞌ nguuꞌs lezoꞌ loo cón cheꞌn Crist. Ale, fxec yèe guꞌ no fchaꞌlaꞌs guꞌ gunèe guꞌ ryete xtàa guꞌ.
\p
\v 15 Anderhuen guꞌ no chó Diox chó nee guꞌ. Neꞌtaꞌde guꞌ lugar co xtàa leque guꞌ conꞌ yeꞌrsinꞌ coꞌ ndli no xtàa guꞌ guꞌ xal ngo xtàa xtàa guꞌ conꞌ yeꞌrsinꞌ coꞌ ndli taamas mèn loo xtàa mèn. Ndxeꞌlequeꞌ, fcuaꞌn guꞌ mod tolo li guꞌ conꞌ ndac loo thìb xtàa guꞌ no loo tedib xtàa guꞌ no loo ryete mèn dib athu loo izlyoꞌ.
\p
\v 16 Fxoꞌf ndeꞌ fxoꞌf ndlaꞌ lezoꞌ guꞌ loo ryethe conꞌ coꞌ ndli nxi lezoꞌ guꞌ.
\v 17 Neꞌcuedte guꞌ no neꞌláꞌde guꞌ toloqueꞌ gurez guꞌ Diox cón cheꞌn ryethe conꞌ.
\v 18 Guuz guꞌ: Diox quix Uꞌ, Diox, loo Diox cón cheꞌn ryethe conꞌ ndxàc loo guꞌ. Tac conꞌaqueꞌ nac coꞌ nee lezoꞌ Diox no coꞌ ndlyaꞌs Diox li guꞌ tac guꞌ nac cheꞌnpeꞌ Crist Jesús.
\p
\v 19 Neꞌtauꞌte guꞌ no neꞌcàde guꞌ loo Xpii Natúꞌ no loo conꞌ ndlyaꞌs Xpii Natúꞌ li Xpii Natúꞌ loo guꞌ par yeꞌth lezoꞌ guꞌ loo cón cheꞌn Tad Diox.
\v 20 Neꞌtèꞌbte guꞌ no neꞌxìis node guꞌ diꞌs coꞌ ngo mèn yalbàn xal ñibeꞌ Xpii Natúꞌ cheꞌn Diox loo mèn par co mèna yalbàn loo guꞌ.
\v 21 Fteche ftexyath guꞌ xtùuz guꞌ no lezoꞌ guꞌ loo ryethe conꞌ. No bli guꞌ preb loo ryethe conꞌ par ñee guꞌ ñeeneꞌ chéꞌ huen naca o chéꞌ ihuente naca. Làth xtauꞌa, fcui guꞌ conꞌ ndac par li guꞌ conꞌ ndac.
\v 22 Fque tee xàꞌ guꞌ loo ryethe conꞌ yeꞌrsinꞌ.
\p
\v 23 Diox coꞌ ndli leꞌ naꞌ nagàl yo lezoꞌ loo Diox par cue ban naꞌ rye nda naꞌ no rye ndyeꞌth naꞌ loo xtàa naꞌ, Diox li leꞌ guꞌ gàc mèn coꞌ, lìcqueꞌ, ngro xàꞌ loo cón cheꞌn xab izlyoꞌ, coꞌ ngòc cheꞌnpeꞌ Diox. Tataa quenap Diox xpii guꞌ no alm guꞌ no lad guꞌ par yende chó conꞌ yiziꞌf no yigaꞌs loo guꞌ no yende chó quexùꞌ guꞌ coꞌseꞌ gàc huiz yiꞌth xi Tad Jesucrist naꞌ naꞌ.
\v 24 Diox coꞌ mcui guꞌ, Diox liqueꞌ leꞌ ryete conꞌ ndxèꞌ gàcqueꞌ loo guꞌ. Loo Diox ndxàp naꞌ yalxlaꞌs no ndxelaꞌs naꞌ thidtene.
\s Pab ngue toodiꞌs lult diꞌs cheꞌn cart ndxèꞌ. No ngue nii Pab Diox loo mèna.
\p
\v 25 Mèn huesen por cón cheꞌn Crist, gurez guꞌ Diox por cón cheꞌn nuꞌ.
\p
\v 26 Gunii guꞌ Diox loo ryete mèn hues naꞌ por cón cheꞌn Crist xalqueꞌ nac mod coꞌ nii guꞌ Diox loo xtàa guꞌ.
\p
\v 27 Daa ngue ñibeꞌ conꞌ ndxèꞌ loo guꞌ xal ñibeꞌ Crist loon par niina loo guꞌ. Blab guꞌ cart ndxèꞌ loo taamas mèn coꞌ nac hues naꞌ por cón cheꞌn Crist coꞌteꞌ nzo guꞌ, ndee guꞌ.
\p
\v 28 Ndlyazen leꞌ Tad Jesucrist toloqueꞌ li anggàc conꞌ ndac loo guꞌ. Taandxèꞌ gàca.