\id 2TH
\ide UTF8
\h 2 TESALONICENSES
\toc1 2 TESALONICENSES
\mt Mbryop Cart Coꞌ Mqueꞌ Pab Yeꞌs Loo Mèn Ciuda Tesalónica
\c 1
\s Pab mqueꞌ yeꞌs loo mèn coꞌ ngolaꞌs loo cón cheꞌn Crist, mèn coꞌ mqueltàa loo cón cheꞌn Diox leꞌn ciuda Tesalónica.
\p
\v 1 Daa, Pab, ngue telꞌen tedib cart coꞌ nac mbryop cart loo guꞌ, guꞌ coꞌ ndxàc mèn hues nuꞌ por cón cheꞌn Crist, guꞌ coꞌ nqueltàa loo cón cheꞌn Crist leꞌn ciuda Tesalónica, guꞌ coꞌ thidte ndxàc loo cón cheꞌn Diox coꞌ nac xud naꞌ no guꞌ coꞌ thidte ndxàc loo cón cheꞌn Tad Jesucrist. No leque tiemp, ngue nii Silvan no Timote Diox loo guꞌ.
\v 2 Ndlyazen leꞌ Diox xud naꞌ no Tad Jesucrist naꞌ ryoꞌ lezoꞌ li anggàc conꞌ ndac loo guꞌ. Ndlyazen leꞌ Diox xud naꞌ no Tad Jesucrist naꞌ li par yo nagàl lezoꞌ guꞌ loo Diox no par cue ban guꞌ rye nda guꞌ no rye ndyeꞌth guꞌ làth hues xtàa guꞌ.
\s Trèꞌ ngue luꞌ leꞌ Diox tub rez cón cheꞌn mèn coꞌseꞌ bere Tad Jesucrist, yiꞌth Tad Jesucrist loo béꞌ loo izlyoꞌ.
\p
\v 3 Guꞌ coꞌ nac mèn huesen por cón cheꞌn Tad Crist, ngue niin loo guꞌ: Toloqueꞌ gab nuꞌ Diox quix Uꞌ, Diox, loo Diox, por cón cheꞌn guꞌ tac nuꞌ ñee no non nuꞌ leꞌ guꞌ sate más ndxelaꞌs loo Diox no loo cón cheꞌn Diox. No ñee nuꞌ no non nuꞌ leꞌ guꞌ sate más nqueꞌqueꞌ lezoꞌ ñèe guꞌ thìb xtàa guꞌ no tedib xtàa guꞌ. Tataa mbez nuꞌ loo Diox tac ndxàalqueꞌ li nuꞌ tataa.
\v 4 Por cona, axta nuꞌ ndyoodiꞌs cón cheꞌn guꞌ loo mèn coꞌ nqueltàa loo cón cheꞌn Diox. No axta ndaꞌ gust lezoꞌ nuꞌ coꞌseꞌ ndyoodiꞌs nuꞌ cón cheꞌn guꞌ loo mèn coꞌ ndxelaꞌs por nchaꞌlaꞌs guꞌ no nxec yèe guꞌ, no ndxàp guꞌ yalxlaꞌs loo Diox mastaleꞌ ndxàc ryethe conꞌ coꞌ nac ngòc nguàal conꞌ coꞌ ndxàc loo guꞌ coꞌ ndli nxi lezoꞌ guꞌ, coꞌ nac coꞌ ndub nguꞌs mèn guꞌ.
\v 5 Pues conꞌ coꞌ nac ngòc nguàal conꞌ coꞌ ndxàc loo guꞌa ndluꞌ leꞌ Diox nac Diox nalì no Diox nambìi por mod coꞌ ndub rez Diox cón cheꞌn guꞌ par ndxàalqueꞌ ngòo guꞌ loo cón cheꞌn Diox par ñibeꞌpeꞌ Diox loo guꞌ por ndyactìi guꞌ huax conꞌ nalleꞌ.
\p
\v 6 Nalì nac Diox par tetìi Diox mèn xalqueꞌ ngue tetìi mèn guꞌ nalleꞌ.
\v 7 Nalì nac Diox tac coꞌseꞌ yiꞌth Tad Jesús loo béꞌ loo izlyoꞌ con angl coꞌ luꞌ cón cheꞌn conꞌ roo conꞌ xèn cheꞌn Jesús loo mèn, sya, li Diox leꞌ guꞌ coꞌ ndyactìi nalleꞌ, guꞌ li descans, ne, xalqueꞌ li nuꞌ descans. Huiza lyàa quìi bèel cheꞌnpeꞌ Diox loo izlyoꞌ.
\v 8 Sya, yiꞌth Tad Crist par nalì tetìi Tad Crist mèn no zib quìi Tad Crist mèn por cón cheꞌn ryete conꞌ yeꞌrsinꞌ coꞌ mbli mèna, mèn coꞌ neꞌndalte ngòn diꞌs cón cheꞌn Diox par taꞌ mèn cuent cón cheꞌn Diox, mèn coꞌ nac mèn coꞌ neꞌndalte ngòo loo cón cheꞌn Diox, mèn coꞌ neꞌndalte ndubdiꞌs loo diꞌs ndac cón cheꞌn Tad Jesucrist naꞌ, diꞌs coꞌ ndluꞌ xá mod lyáꞌ mèn loo conꞌ ryes.
\v 9 Mèna tyactìi no tyuhuan mèna thidtene, coꞌ nee diꞌs, anzeꞌf tith coꞌ xàꞌ Tad Crist mèna loo Tad Crist yiloa, Tad Crist coꞌ ndxàp rye loothe conꞌ roo conꞌ xèn cheꞌn Diox laꞌs nii Tad Crist no laꞌs yaꞌ Tad Crist.
\v 10 Gàc conꞌ ndxèꞌ coꞌseꞌ gàc huiz yiꞌth Tad Crist par gàc conꞌ roo conꞌ xèn loo Tad Crist por cón cheꞌn ryethe mèn coꞌ ngro xàꞌ loo cón cheꞌn xab izlyoꞌ coꞌ ngòc cheꞌnpeꞌ Diox, mèn coꞌ ngòo loo cón cheꞌn Diox por cón cheꞌn Tad Crist. Tataaqueꞌ gàca loo guꞌ, ne, tac ngolaꞌs guꞌ loo cón cheꞌn Tad Crist por cón cheꞌn diꞌs coꞌ mblon yalbàn loo guꞌ. Huiza, ryete naꞌ coꞌ ndxelaꞌs loo Tad Crist li par xyoꞌf lèe xyoꞌf xtiꞌs Tad Crist.
\p
\v 11 Por cón cheꞌn ryete conꞌ ndxèꞌ, toloqueꞌ mbez nuꞌ Diox por cón cheꞌn guꞌ leꞌ Diox li leꞌ guꞌ que tee ban lì xalqueꞌ ndxàal que tee ban lì guꞌ tac Diox mcui guꞌ par gàc guꞌ cheꞌnpeꞌ Diox. No mbez nuꞌ Diox leꞌ Diox li, por cón cheꞌn ryethe conꞌ coꞌ nzo laꞌs nii Diox no coꞌ nzo laꞌs yaꞌ Diox, par gàc ryete conꞌ ndac loo guꞌ coꞌ nee lezoꞌ Diox li Diox loo guꞌ. No mbez nuꞌ Diox leꞌ Diox lyath no guꞌ axta plóthe par xoꞌf zinꞌ guꞌ zinꞌ cón cheꞌn Crist tac guꞌ ndxàpqueꞌ yalxlaꞌs loo Crist.
\v 12 Cona, mbezen Diox par gàca leꞌ loo Tad Jesucrist naꞌ gàc más conꞌ roo no conꞌ xèn por cón cheꞌn mod coꞌ ndluꞌ leꞌ guꞌ nque tee ban lìqueꞌ làth xtàa guꞌ. Làth xtauꞌa, gàc loo guꞌ, ne, más conꞌ roo no conꞌ xèn por thidte ndxàc guꞌ loo Crist. Gàc conꞌa loo guꞌ xalqueꞌ nac conꞌ ndac coꞌ angndli Diox naꞌ no Tad Jesucrist naꞌ loo guꞌ.
\c 2
\s Trèꞌ ndaꞌ cuent cón cheꞌn thìb mbiꞌ coꞌ gàp xtol tínꞌ, mbiꞌ coꞌ ryo xoꞌf loo mèn loo izlyoꞌ.
\p
\v 1 Per nalleꞌ ngue niin tedib conꞌ loo guꞌ, mèn huesen por cón cheꞌn Tad Jesucrist, cón cheꞌn xá mod yiꞌth Tad Jesucrist naꞌ no xá mod thidte queltàa naꞌ loo Tad Jesucrist naꞌ:
\v 2 Anderhuen guꞌ. Ñaꞌben diꞌs loo guꞌ neꞌtaꞌde guꞌ lugar ya yeꞌth lezoꞌ guꞌ cheleꞌ guꞌ gòn mbiꞌthleꞌ Tad Crist no mbiileꞌ Tad Crist tedib vez. Lomisqueꞌ ne, neꞌtyóode guꞌ no neꞌzyebte guꞌ cheleꞌ chol mèn ñee loo guꞌ leꞌ nuꞌ mdaꞌleꞌ cuent loo mèn leꞌ Diox mdoodiꞌs no nuꞌ cón cheꞌn xá mod mbiꞌthleꞌ Tad Crist no mbiileꞌ Tad Crist tedib vez. Neꞌ neꞌ tyóo guꞌ cheleꞌ chol mèn mbez leꞌ nuꞌ mdeꞌthleꞌ diꞌs cón cheꞌn xá mod mbiꞌthleꞌ Tad Crist no mbiileꞌ Tac Crist tedib vez loo mèn. Neꞌ neꞌ tyóo guꞌ cheleꞌ chol mèn ñee loo guꞌ leꞌ daa, coꞌ nac Pab, mqueꞌ cart cón cheꞌn conꞌ ndxèꞌ loo guꞌ.
\v 3 Neꞌtaꞌde guꞌ lugar quedìi mèn guꞌ nec thìb mod. Tac neꞌgàcte huiza no neꞌzinte huiza ndooreꞌ coꞌseꞌ zin tiemp coꞌseꞌ tyoo xàꞌ lezoꞌ huax mèn loo Diox. Làth xtauꞌa, ryo xoꞌf thìb mbiꞌ. Mbiꞌa aseli cuaꞌn mbiꞌ xquin mbiꞌ no xtol mbiꞌ làth mèn axta plóthe. Diox telux mbiꞌa thidtene yiloa.
\v 4 Mbiꞌa ndoote li conꞌ yeꞌrsinꞌ par leque mbiꞌ xoꞌf lèe xoꞌf xtiꞌs mbiꞌ no par gàc mbiꞌ ngolo ngolaꞌs loo merpeꞌ Diox no loo ryethe conꞌ coꞌ mbez mèn nac Diox xal tatol, no naxnax, no taamas mdoꞌ, no gunab loo coꞌ ndyub xib mèn no loo coꞌ nsálꞌ mèn yaꞌ mèn. Sate más tolo li mbiꞌa conꞌ axtaqueꞌ li mbiꞌ gan tyub mbiꞌ leꞌn templ coꞌ nac cheꞌnpeꞌ Diox par gab mbiꞌ loo mèn: Daa nac merpeꞌ Diox.
\p
\v 5 ¿Chéꞌ neꞌtyede lezoꞌ guꞌ coꞌseꞌ ngo non guꞌ, mdan cuent cón cheꞌn conꞌ ndxèꞌ loo guꞌ, càꞌ?
\v 6 Per nalleꞌ guꞌ naneequeꞌ cón nac coꞌ ncaꞌ loo mbiꞌa par neꞌyúꞌ loode mbiꞌ loo mèn axta coꞌseꞌ gàc tiemppeꞌ cheꞌn mbiꞌa.
\v 7 Per nalleꞌ cón cheꞌn conꞌ roo no conꞌ xèn coꞌ nacasloo cón cheꞌn conꞌ yeꞌrsinꞌa, mtloleꞌ ngue xoꞌf zinꞌ conꞌ yeꞌrsinꞌ làth mèn. Ante ndxàc falt biiche xaꞌ no ryoꞌ xàꞌ xaꞌ coꞌ ngue tauꞌ loo no coꞌ ncaꞌ loo conꞌ zaba par ryo xoꞌf mbiꞌ yeꞌrsinꞌa loo xnaa.
\v 8 Axta syareꞌ ryo xoꞌf mbiꞌ yeꞌrsinꞌa. No loo xnaa que tee ban mbiꞌ yeꞌrsinꞌa. Per coꞌseꞌ yiꞌth Tad Crist, guth Tad Crist mbiꞌa ante con mbii cheꞌn lad Tad Crist coꞌ yidinꞌ lad mbiꞌa. Telux Tad Crist rye loothe conꞌ coꞌ nzo laꞌs nii mbiꞌa no laꞌs yaꞌ mbiꞌa por cón cheꞌn xnìi coꞌ nquée lad Tad Crist coꞌseꞌ yiꞌth Tad Crist.
\v 9 Coꞌseꞌ gàc huiz yiꞌth que tee mbiꞌ yeꞌrsinꞌa loo izlyoꞌ, yiꞌth mbiꞌa loo izlyoꞌ por cón cheꞌn Mebizya. Mebizya lyath no mbiꞌa por huax conꞌ coꞌ nzo laꞌs nii Mebizya no laꞌs yaꞌ Mebizya. Li mbiꞌ yeꞌrsinꞌa huax conꞌ roo no conꞌ xèn coꞌ nac conꞌxùꞌ. No li mbiꞌ yeꞌrsinꞌa huax conꞌxùꞌ coꞌ ryo xoꞌfxùꞌ loo mèn par huiꞌ mèna. Per ndxeꞌlequeꞌ, ryete conꞌa nac yalgutyèꞌtúb tínꞌ.
\v 10 Tataa mod li mbiꞌ yeꞌrsinꞌa huax conꞌ roo no conꞌ xèn coꞌ nac conꞌ yeꞌrsinꞌ par quedìi mbiꞌ yeꞌrsinꞌa ryete mèn coꞌ anglyux yiloa. Gàc conꞌa loo mèn coꞌ lyuxa tac neꞌndalte mèna ngalaꞌs mèna loo diꞌs coꞌ nac lìcpeꞌ par ngác ngláꞌ mèna loo conꞌ ryes.
\v 11 Por cona, sate más mbli Diox tolo mquedìi leque mèna mèna loo coꞌ nac yalgutyèꞌtúba.
\v 12 Tataa mbli Diox loo ryete mèna par tolo zib quìi Diox ryete mèna tac thidtenequeꞌ neꞌndalte mèna ngalaꞌs mèna loo diꞌs coꞌ nac lìcpeꞌ. Ale ndxeꞌlequeꞌ, más mdyac lezoꞌ mèna li mèna conꞌ coꞌ nac conꞌ yeꞌrsinꞌ loo Diox.
\s Diꞌs ndxèꞌ ndluꞌ xá mod ncui Diox mèn par yoo ban no mèn Diox thidtene yiloa.
\p
\v 13 Per part cón chenen, daa thidtenequeꞌ mbez: Diox quix Uꞌ, Diox, loo Diox por cón cheꞌn guꞌ coꞌ nac mèn huesen por cón cheꞌn Crist, guꞌ coꞌ anzeꞌf nqueꞌ lezon ñèen por cón cheꞌn Tad Crist. Tac Diox mcui guꞌ ndooreꞌ cuec Diox izlyoꞌ no xènꞌ Diox izlyoꞌ par lyáꞌ guꞌ loo conꞌ ryes. Diox mteláꞌ guꞌ loo conꞌ ryes. Por cón cheꞌn Xpii Natúꞌ mbli Diox conꞌa loo guꞌ par nzi tee xàꞌ guꞌ loo cón cheꞌn xab izlyoꞌ par ngòc guꞌ mèn cheꞌnpeꞌ Diox tac guꞌ ndxelaꞌsqueꞌ diꞌs coꞌ nac lìcpeꞌ.
\v 14 Por cón cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes coꞌ mdan cuent no coꞌ mblon yalbàn loo guꞌa, Diox mcui guꞌ par yanꞌ no guꞌ conꞌ roo no conꞌ xèn cheꞌn Tad Jesucrist naꞌ no par ya guꞌ coꞌteꞌ ñibeꞌ Tad Jesucrist loo ryethe conꞌ yiloa.
\p
\v 15 Por cona, guꞌ coꞌ nac mèn huesen por cón cheꞌn Crist, leque guꞌ tolo bli nèe guꞌ loo cón cheꞌn Crist. Neꞌyathlaꞌste guꞌ no neꞌláꞌyaꞌde guꞌ conꞌ coꞌ mbluꞌ nuꞌ loo guꞌ cón cheꞌn coꞌ ndxelaꞌs guꞌ cón cheꞌn Diox, que naca por diꞌs coꞌ mdyoodiz non guꞌ, que naca por cart coꞌ mqueꞌen yeꞌs loo guꞌ.
\v 16 Ndlyasquen, ne, leꞌ yub Tad Jesucrist naꞌ no Diox xud naꞌ coꞌ angngroꞌ lezoꞌ nqueꞌ lezoꞌ ñèe Diox naꞌ no coꞌ thidtenequeꞌ ntegán lezoꞌ naꞌ, angli Tad Jesucrist naꞌ no Diox xud naꞌ par cue quee lezoꞌ naꞌ loo ryete conꞌ ndac coꞌ gàc loo naꞌ yiloa.
\v 17 Ndlyazen leꞌ Tad Jesucrist naꞌ no Diox xud naꞌ tolo li par yeꞌth lezoꞌ guꞌ par li nèe guꞌ guꞌ loo cón cheꞌn Diox thidtene no tolo li Tad Jesucrist no Diox xud naꞌ par tolo tyoodiꞌs guꞌ no taꞌ guꞌ cuent cón cheꞌn diꞌs ndac loo chol mèn no tolo li guꞌ ryethe conꞌ ndac coꞌ ndxàal li guꞌ.
\c 3
\s Pab ngue bez loo mèn ciuda Tesalónica coꞌ ngolaꞌs loo cón cheꞌn Diox: Guuz guꞌ Diox por nuꞌ.
\p
\v 1 Per nalleꞌ, guꞌ coꞌ nac mèn huesen por cón cheꞌn Crist, lult conꞌ coꞌ ndlyazen li guꞌ nac: Gurez guꞌ Diox por cón cheꞌn nuꞌ leꞌ diꞌs ndac coꞌ ndluꞌ cón cheꞌn Tad Crist tolo yath no tolo yèn pál coꞌteꞌ nzo mèn. No gurez guꞌ Diox dib nzo yéc mèn no dib nzo lezoꞌ mèn tyal mèn par gòn mèn cón cheꞌn diꞌs ndac par yòo lezoꞌ mèn cón cheꞌn diꞌs ndac xalqueꞌ ngòca làth guꞌ par nedrèꞌ, ne.
\v 2 Láth ngue bez guꞌ Diox, bnaꞌb guꞌ loo Diox par lyáꞌ nuꞌ laꞌs yaꞌ mèn yeꞌrsinꞌ coꞌ nac mèn nayiꞌ no mèn nalas. Tac iryede mèn nac mèn coꞌ ndxelaꞌs loo Crist no loo cón cheꞌn Crist.
\v 3 Lìcpeꞌ baꞌi, Diox ndliqueꞌ xalqueꞌ mcàbgòn Diox li Diox loo naꞌ. Diox li nèe guꞌ loo cón cheꞌn Crist. No quenap Diox guꞌ loo ryethe conꞌ yeꞌrsinꞌ.
\v 4 Ndxàpen yalxlaꞌs cón cheꞌn guꞌ loo Tad Crist leꞌ guꞌ liqueꞌ conꞌ mnibeꞌen loo guꞌ no toloqueꞌ li guꞌ coꞌ ñibeꞌen loo guꞌ.
\v 5 Ndlyazen leꞌ Tad Crist lyath no guꞌ par sate más tenꞌ guꞌ leꞌn lezoꞌ guꞌ susqueꞌ arid nqueꞌ lezoꞌ Diox ñèe Diox mèn par sate más chaꞌlaꞌs guꞌ ñèe guꞌ hues xtaa guꞌ xal mchaꞌlaꞌs Crist ñèe Crist mèn.
\s Trèꞌ ndaꞌ cuent xá mod ndxàal que tee bàn mèn loo cón cheꞌn diꞌs ndac.
\p
\v 6 Per nalleꞌ ngue ñibeꞌen loo guꞌ, guꞌ coꞌ nac mèn huesen por cón cheꞌn Tad Jesucrist naꞌ: Gro xàꞌ guꞌ loo mèn coꞌ ndxàc hues naꞌ por cón cheꞌn Crist cheleꞌ chol mèna ngue tee zaꞌf no coꞌ indyaꞌste queꞌ zinꞌ, no mèn coꞌ ingue tee ban lìde loo diꞌs ndac xal mbluꞌen loo guꞌ.
\v 7 Leque guꞌ huiꞌ xá mod ndxàal que tee ban guꞌ xalqueꞌ ngue tee banen no xalqueꞌ nac mod coꞌ ndxàp nuꞌ. Tac guꞌ neequeꞌ neꞌmque tee ban zaꞌfte nuꞌ làth guꞌ. Nuꞌ mqueꞌqueꞌ zinꞌ.
\v 8 Neꞌ neꞌ nghua xleꞌ nuꞌ xít no luaꞌ nec thìb guꞌ. Cheleꞌ guꞌ mdaꞌ xít guꞌ no luaꞌ guꞌ nduhua nuꞌ, mdix nuꞌi mcàa guꞌ. Ndxeꞌlequeꞌ, mblin zinꞌ ze no yálꞌ con nít loon yéquen no con nít loon lechuzen par neꞌli xolten nec thìb guꞌ par anxleꞌ ndaꞌ guꞌ conꞌ nduhuan, ¿léꞌ?
\v 9 Mastaleꞌ ngòpen derech ngnaꞌben conꞌ nghuan loo guꞌ, per ndxeꞌlequeꞌ, mblin zinꞌ par huiꞌ guꞌ xal ndlin par li guꞌ xalqueꞌ ndlin. Leꞌ sya, tataa li guꞌ, ne.
\v 10 Tac coꞌseꞌ beꞌ ngo no nuꞌ guꞌ, plá diꞌs gunee nuꞌ loo guꞌ leꞌ chol guꞌ coꞌ nzo làth guꞌ coꞌ indlyaꞌste queꞌ zinꞌ, neꞌtaꞌ xleꞌde guꞌ conꞌ hua hues xtàa guꞌa.
\v 11 Tac nzo mèn coꞌ ndaꞌ cuent loo nuꞌ cón cheꞌn ndxep mèn làth guꞌ coꞌ alithe nzi tee ban zaꞌf làth guꞌ xal mèn coꞌ yende cho nesidad nde che loo. Thidtene ngue tee zaꞌf mèna. Ndxeꞌlequeꞌ, nac mèna mèn coꞌ ndyoo ndxèꞌ no mèn coꞌ ndyoo baꞌ, no mèn coꞌ alithe ngue que tee laꞌs loo zinꞌ coꞌ ndli taamas mèn coꞌteꞌ ngue mèn zinꞌ.
\v 12 Cón cheꞌn mèn coꞌ tataa naca, ñibeꞌen loo mèn no ncoꞌxen loo mèn xalqueꞌ ñibeꞌ Tad Jesucrist, li mèna zinꞌ dib nzo yéc mèna no dib nzo lezoꞌ mèna par li mèna gan luaꞌ mèna no xít mèna coꞌ hua mèna.
\v 13 Per guꞌ coꞌ nac mèn huesen por cón cheꞌn Tad Crist, ftolo li guꞌ conꞌ ndac. No neꞌyitacte lezoꞌ guꞌ loo conꞌ ndac coꞌ ndli guꞌ, ndee.
\v 14 Lomisqueꞌ ne, cheleꞌ chó guꞌ nzo coꞌ nteriꞌth nza no thìb lad nqueꞌ guꞌ diꞌs coꞌ ngue bezen loo guꞌ loo cart ndxèꞌ, huen huen huiꞌ guꞌ chó guꞌ nac mèna. Neꞌtaꞌde guꞌ lugar queltàa no guꞌ mèna par tataa mod thyon mèna làth guꞌ.
\v 15 Per mastaleꞌ tataa ngue ñibeꞌen loo guꞌ, indlyasten huiꞌ yac huiꞌ yèe guꞌ loo mèna. Ndxeꞌlequeꞌ, bcoꞌx guꞌ loo mèna xal mèn coꞌ ndxàc huespeꞌ loo cón cheꞌn Crist, ndee guꞌ.
\s Lult diꞌs coꞌ mqueꞌ Pab yeꞌs loo cart ndxèꞌ.
\p
\v 16 Ndlyazen leque yub Tad Crist coꞌ ndli leꞌ mèn cue nagàl lezoꞌ loo Diox, no cue ban mèn rye nda mèn no rye ndyeꞌth mèn làth xtàa mèn, tolo li par tolo cue guꞌ rye nda guꞌ no rye ndyeꞌth guꞌ loo ryethe conꞌ. Thidtenequeꞌ ngue tee noqueꞌ Tad Crist ryete guꞌ thidtene, ndee guꞌ.
\p
\v 17 Yub daa coꞌ nac Pab, daa mqueꞌ pla diꞌs loo cart ndxèꞌ coꞌ nac diꞌs coꞌ ngue niin Diox loo guꞌ coꞌ mqueꞌen yeꞌs con yapeꞌen. Taandxèꞌqueꞌ ngon firm loo rye cart coꞌ ntelꞌen loo mèn. Huiꞌ guꞌ nexa. Taandxèꞌ mod nqueꞌen yeꞌs.
\v 18 Ndlyasquen leꞌ Tad Jesucrist naꞌ tolo li anggàc conꞌ ndac loo ryete guꞌ. Taandxèꞌ gàca.