\id 1TI
\ide UTF8
\h 1 TIMOTEO
\toc1 1 TIMOTEO
\mt Nerlequeꞌ Cart Coꞌ Mqueꞌ Pab Yeꞌs Loo Thìb Mybòo Coꞌ Ngroꞌ Lèe Timote
\c 1
\s Pab ngue queꞌ yeꞌs loo Timote.
\p
\v 1 Daa, Pab, nac thìb mbiꞌ coꞌ ndxeꞌ diꞌs cón cheꞌn Jesucrist ned ndyeen loo mèn rye ned xalqueꞌ mnibeꞌ Diox loon, Diox coꞌ nteláꞌ mèn loo conꞌ ryes, no xalqueꞌ ñibeꞌ Tad Jesucrist loon. Por cón cheꞌn Jesucrist nzi quee lezoꞌ naꞌ cón cheꞌn conꞌ coꞌ gàc loo naꞌ yiloa.
\v 2 Ngue queꞌen yeꞌs ndxèꞌ lool, Timote, lùu coꞌ nac xal xganꞌpeꞌ daa loo cón cheꞌn coꞌ ndxelaꞌs naꞌ cón cheꞌn Jesucrist. Anzeꞌf ndlyazen leꞌ Diox xud naꞌ no Tad Jesucrist naꞌ li anggàc conꞌ ndac lool. Ndlyazen lyat lezoꞌ xud naꞌ Diox no Tad Jesucrist naꞌ ñèe xud naꞌ Diox no Tad Jesucrist naꞌ lùu. No ndlyazen leꞌ Diox xud naꞌ no Tad Jesucrist naꞌ li nagàl yo lezoꞌl loo ryethe conꞌ no que tee banl rye ndal no rye ndyeꞌthl làth xtàal.
\s Trèꞌ ngue luꞌ Pab cón cheꞌn xleyꞌ coꞌ nac xleyꞌ gutyèꞌ coꞌ ndluꞌ ndxep mèn loo xtàa mèn.
\p
\v 3 Fteꞌ lezoꞌl xalqueꞌ guniin lool ndooreꞌ coꞌseꞌ tenen ned gan par ned leꞌn yèezyaꞌ cheꞌn làaz mèn macedon par tolo yanꞌl leꞌn ciuda Efes par laꞌsl no ñibeꞌl loo ndxep mèn coꞌ ndxelaꞌs loo cón cheꞌn Diox por cón cheꞌn Jesucrist, mèn coꞌ nqueltàa tya, par neꞌluꞌde mèna chol diꞌs coꞌ nac tedib xleyꞌ loo taamas mèn tya. Tataa bli xal guniina lool.
\v 4 Neꞌtaꞌdel lugar loo mèna tyub nza mèna loo chol cuent coꞌ nac cuentgool no diꞌs coꞌ ndluꞌ cón cheꞌn mèn nación Israel coꞌ ndaꞌ mèn cuent loo xtàa mèn coꞌ nac cón cheꞌn bin mèn coꞌ mban póla póla. Thidtene neꞌláꞌde mèna no neꞌcuedte mèna cheleꞌ lùu neꞌtauꞌte loo diꞌs coꞌ ndyoodiꞌs mèna. Cuenta nac thìb cuent coꞌ angndyoodiꞌs mèn no angndxòn mèn. Nec thìb mod ndlyath no diꞌsa no cuenta mèn loo cón cheꞌn coꞌ ndluꞌ Diox loo naꞌ cón cheꞌn coꞌ ndxelaꞌs naꞌ cón cheꞌn Crist par altantlequeꞌ cue mèn loo cón cheꞌn Diox no xal ndxàal tyubdiꞌs naꞌ loo Diox. Cona, beren, ngue ñibeꞌen lool, Timote: Tolo bluꞌ cón cheꞌn Crist loo mèna.
\p
\v 5 Tac conꞌ ndxèꞌ nac coꞌ ñibeꞌpeꞌen lool leꞌ lùu luꞌ loo mèn gàp mèn thidte xtùuz no gàp mèn thidte lezoꞌ mèn loo cón cheꞌn Diox coꞌ ndxelaꞌs mèn par tolo queꞌ lezoꞌ mèn Diox no Crist, no queꞌ lezoꞌ mèn ñèe mèn xtàa mèn thìb lì yéc mèn no thìb lì lezoꞌ mèn. No ñibeꞌl leꞌ ryethe xtùuz coꞌ ndyroꞌ lezoꞌ mèn gàc thìb xtùuz ndac. No ñibeꞌ loo mèn leꞌ mèn, lìcqueꞌ, yilaꞌs loo cón cheꞌn Crist coꞌ nac lìcpeꞌ.
\v 6 Ngue niin lool, ne, Timote: Nzo ndxep mèn coꞌ neꞌndalte li coꞌ ñibeꞌ Diox. Mèna mdoo xàꞌ lezoꞌ loo cón cheꞌn Tad Crist no ngro xàꞌ mèna loo cón cheꞌn Diox. Mèna mdyuhuan loo cón cheꞌn Diox por nzi tee yòn mèna no nzi tee toodiꞌs mèna ante diꞌs coꞌ yende cón ntac.
\v 7 Mèna ndlyaꞌs gàc maistr par luꞌ mèna cón cheꞌn chol xleyꞌ loo mèn. Per prob mèna, axta neꞌ neꞌ indaꞌ mèna cuent cón ndluꞌ mèna no cón ndyoodiꞌs mèna. No axta neꞌ neꞌ ñee mèna cón nac coꞌ ngue li nèe mèna loo xtàa mèna con dibaxlaꞌs par ñee mèna ñeeneꞌ chéꞌ, lìcqueꞌ, nac conꞌa no diꞌsa xal ñibeꞌ Diox loo ley cheꞌn Moisés par luꞌ mèna loo xtàa mèna.
\p
\v 8 Per ndxeꞌlequeꞌ, naꞌ naneequeꞌ huenqueꞌ nac yalnibeꞌ cheꞌn ley coꞌ mxoꞌf Moisés loo mèn póla cheleꞌ mèn tyubdiꞌs loo rye conꞌ no ndluꞌ mèn loo xtàa mèn, conꞌ coꞌ, lìcqueꞌ, ñibeꞌpeꞌ ley coꞌ mxoꞌf Moisés loo mèn xal ndxàal li mèn xal ñibeꞌ Diox.
\v 9 Per naneequeꞌ naꞌ no nonqueꞌ naꞌ leꞌ Moisés neꞌntanꞌte leya par ñibeꞌ leya loo mèn nalì no loo mèn nambìi. Ndxeꞌlequeꞌ, leya mxyoꞌf par ñibeꞌ leya loo mèn brut; par ñibeꞌ leya loo mèn naad no loo mèn nguud; par ñibeꞌ leya loo mèn coꞌ indlide cas loo Diox; par ñibeꞌ leya loo mèn coꞌ ndxàp xtol; par ñibeꞌ leya loo mèn yeꞌrsinꞌ; par ñibeꞌ leya loo mèn coꞌ indlide cas loo cón cheꞌn Diox; par ñibeꞌ leya loo mèn coꞌ ndxuth xud no loo mèn coꞌ ndxuth xnaꞌ; par ñibeꞌ leya loo mèn coꞌ ndxuth xtàa;
\v 10 par ñibeꞌ leya loo mèn coꞌ ncuaꞌn xinꞌ huan; par ñibeꞌ leya loo mènbiꞌ coꞌ ndli yalmbiꞌ con xtàabiꞌ mènbiꞌ; par ñibeꞌ leya loo mèn coꞌ ndli huanꞌ myenꞌ bix coꞌ nac xinꞌ chol mèn; par ñibeꞌ leya loo mèn coꞌ ngosuaꞌ yalgutyèꞌ; par ñibeꞌ leya loo mèn coꞌ ndeꞌthxùꞌ lèe Diox; par ñibeꞌ leya loo taamas mèn xal nac mèn ndxèꞌ coꞌ nac ngolo ngolaꞌs loo xleyꞌ ndac ndxèꞌ.
\v 11 Cón cheꞌn diꞌs ndac coꞌ ngue luꞌen lool ndxèꞌ, Timote, thidtene ndyeei xalqueꞌ ndluꞌ diꞌs ndac cheꞌn Diox coꞌ ndluꞌ xá mod lyáꞌ mèn loo conꞌ ryes, Diox coꞌ ndyac lezoꞌ thidtene. Cón cheꞌn diꞌs ndac ndxèꞌ ngòc zinꞌ coꞌ mxoꞌf zinꞌ Diox loon.
\s Pab ngurez: Diox quix Uꞌ, Diox, tac Uꞌ anzeꞌf mblyat lezoꞌ ñèe Uꞌ daa.
\p
\v 12 Mbezen Diox quix Uꞌ, Tad, loo Tad Jesucrist naꞌ tac Tad Jesucrist mbli par ngòpen fuerz xal nquin daai. Tad Jesucrist naneequeꞌ leꞌ daa ndyooqueꞌ altant no ndyubdisquen loo ryethe conꞌ coꞌ ñibeꞌ Tad Jesucrist loon. Por cona, mdoo Tad Jesucrist daa par xoꞌf zinꞌen zinꞌ ndxèꞌ.
\v 13 Per coꞌseꞌ ndooreꞌ gàc conꞌ ndxèꞌ loon, ngòc daa mèn coꞌ gunii yèe gunii tìi cón cheꞌn Diox. Ngòc daa mèn coꞌ mque tee mdub nguꞌs mèn coꞌ ngòo loo cón cheꞌn Diox por cón cheꞌn Crist. Ngòc daa mèn nayiꞌ axta plóthe. Per ale mastaleꞌ mblin ryethe conꞌa, ale ndxeꞌlequeꞌ, mblyat lezoꞌ Diox gunèe Diox daa tac mblin ryete conꞌa xal mèn coꞌ nauꞌ loo no xal mèn coꞌ nauꞌ yéc loo cón cheꞌn Diox. Neꞌneeden cón ngulàa yéquen no cón ngulàa lezon mblin conꞌa. Mblina tac tarte yilazen loo Tad Crist.
\v 14 Per mastaleꞌ ale tataa ngòc daa, ale leꞌleꞌ sate más mbli Tad Diox angngòc huax conꞌ ndac loon. Crist mbli leꞌ daa ndxàp yalxlaꞌs loo Diox. Leꞌ sya, Crist angmbli loon par nqueꞌ lezon Diox. No nqueꞌ lezon ñèen mèn coꞌ ndxàc hues xtàa daa, ne, tac ndxàpen yalxlaꞌs loo Diox tataa mbli Diox loon por thidte mqueltàa non Jesucrist nalleꞌ.
\p
\v 15 Diꞌs coꞌ ngue queꞌen yeꞌs lool ndxèꞌ nac thìb conꞌ lìcpeꞌ, Timote. Ndxàal taꞌ ryete mèn lugar no yilaꞌs ryete mèn cón cheꞌn diꞌs ndac ndxèꞌ coꞌ ndluꞌ leꞌ Crist Jesús mbiꞌth loo izlyoꞌ par tíꞌ no làa Crist Jesús mèn coꞌ ndxàp xtol loo conꞌ ryes. No ale ndyaquen, daa nac nerlequeꞌ thìb mèn làth rye mèn coꞌ ndxàp xtol.
\v 16 Por cón cheꞌn conꞌ mblin láth ngòc daa mèn coꞌ nauꞌ loo no mèn coꞌ nauꞌ yéc coꞌseꞌ ngòc daa nerlequeꞌ mèn yeꞌrsinꞌa, ale mblyat lezoꞌ Diox gunèe Diox daa. Tataa mbli Jesucrist par mbluꞌ Jesucrist daa loo mèn por cón cheꞌn conꞌ coꞌ ngòc loon leꞌ Diox anzeꞌf nchaꞌlaꞌs tínꞌ loo mèn. Ryete mèn nanee looqueꞌ xal mque tee lin. Por cona, Diox mbli ngòc daa thìb mbiꞌ coꞌ mbluꞌ cón cheꞌn xá mod susqueꞌ nchaꞌlaꞌs Diox ñèe Diox mèn, mèn coꞌ yilaꞌs loo Crist par yòo ban no mèna Diox thidtene yìloa.
\v 17 Por cona, li naꞌ par gàc conꞌ guryath no conꞌ guryèn ante loo Diox coꞌ nac thìb rey coꞌ ñibeꞌ thidtene, Diox coꞌ neꞌgathte thidtene, Diox coꞌ indxúꞌde loo mèn, Diox coꞌ angolux coꞌ thidte ndxác. Loo Dioxa ndlyazen gab mèn conꞌ roo no conꞌ xèn leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node thidtene. Thidtene taandxèꞌ gàca.
\p
\v 18 Timote, lùu coꞌ nac xal xganꞌpeꞌ daa loo cón cheꞌn Diox, ngue ñibeꞌen lool par lil conꞌ ndxèꞌ xalqueꞌ ndyubdiꞌs ndac thìb solndad coꞌ ndyee loo xóꞌ. Bli conꞌ ndxèꞌ xal nac conꞌ ndac coꞌ nac xtùuz coꞌ nzo leꞌn lezoꞌl coꞌ nac cón cheꞌn coꞌ gunii no coꞌ mdeꞌth mèn coꞌ ngòc hues naꞌ loo cón cheꞌn Diox cón cheꞌn lùu. Mèna gunii cón cheꞌn lùu por lèe Diox.
\v 19 Fquenap xtùuzl par que nol xtùuz ndac no par neꞌtyoo xàꞌde lezoꞌl loo coꞌ ndxelaꞌsl. Tac nzo ndxep mèn coꞌ inquenapte xtùuz coꞌ ndli mèn. Leque mèna mbláꞌyaꞌ mèna loo xtùuz ndac mèna. Mèna ngro xàꞌ loo coꞌ ndxelaꞌs naꞌ. Leque mèna ngue tezaꞌ xtùuz mèna par neꞌyilaꞌste mèna más loo coꞌ ndxelaꞌs naꞌ. Mèna mdyuhuan loo conꞌ ngolaꞌs mèna loo cón cheꞌn Diox.
\v 20 Làth mèna ngo thìb mbiꞌ coꞌ ngroꞌ lèe Himene no tedib mbiꞌ coꞌ ngroꞌ lèe Alejandr. Ryop mbiꞌa mblàan cón cheꞌn mebizya par li Mebizya loo ryop mbiꞌa xal nee lezoꞌ Mebizya no par téꞌth mèna ya neꞌtolode ñii yèe ñii tìi mèna cón cheꞌn Diox par texi mèna lezoꞌ Diox.
\c 2
\s Pab ngue luꞌ xá mod ndxàal cuez mèn Diox.
\p
\v 1 Nerlequeꞌ conꞌ coꞌ más ndlyazen lil, Timote, bnibeꞌ loo mèn coꞌ ndxelaꞌs coꞌ nqueltàa loo cón cheꞌn Diox por cón cheꞌn Crist trèꞌ, ñaꞌb mèna loo Diox, no cuez mèna Diox, no teriꞌth mèna diꞌs loo Diox, no gab mèna: Diox quix Uꞌ, Diox, loo Diox por cón cheꞌn ryete mèn.
\v 2 Ndxàal cuez mèna Diox por cón cheꞌn ryethe mèn coꞌ ndxàc gobiern chol nación no chol estad par taꞌ mèna lugar nagàl que tee ban naꞌ no cue naꞌ rye nda naꞌ no rye ndyeꞌth naꞌ no par li mèn cas loo Diox xal ñibeꞌ Diox loo mèn, no thidte que tee ban ndac mèna loo xtàa mèna.
\v 3 Tac conꞌ coꞌ ngue niin loo guꞌ par li guꞌ nac thìb conꞌ ndac. No naca thìb conꞌ coꞌ ndxòo lezoꞌ Diox, Diox coꞌ nac xaꞌ coꞌ nteláꞌ naꞌ loo conꞌ ryes.
\v 4 Diox ndlyaꞌs ryete mèn lyáꞌ loo conꞌ ryes. No ndlyaꞌs Diox taꞌ mèn cuent no téꞌth mèn cón cheꞌn diꞌs ndac coꞌ nac lìcpeꞌ.
\v 5 Tac thidte Diox nzo. No thidte mbiꞌ coꞌ nteriꞌth diꞌs cón cheꞌn mèn loo Diox nzo. Mbiꞌa nac Jesucrist coꞌ mbiꞌth yáal xalqueꞌ ndxáal chol mèn loo izlyoꞌ.
\v 6 Leque yub Jesucrist mdaꞌ lugar mquée yalguth loo Jesucrist par tataa mod mdix Jesucrist cón cheꞌn xtol mèn loo Diox. Cón cheꞌn xá mod leꞌleꞌ Jesucrist mdix cón cheꞌn xtol mèn mdeꞌth mèn coꞌ ngòc xinꞌ mtéꞌth Jesucrist coꞌ mtelꞌ Jesucrist coꞌseꞌ ngolo ngòc yaltìi loo Tad Jesucrist.
\v 7 Par gon yalbàn cón cheꞌn ryete conꞌ coꞌ ngòc loo Jesucrist, Diox mdoo daa no mblec Diox daa par gon yalbàn no par huen diꞌs cón cheꞌn diꞌs ndac cheꞌn Jesucrist loo mèn. Lìcqueꞌ nac diꞌs coꞌ niin lool ndxèꞌ, Timote. Inquedìiden lùu. Diox mcui daa par nac daa maistr coꞌ ndluꞌ loo mèn coꞌ nac mèn chol nación cón cheꞌn xá mod ndxelaꞌs naꞌ loo cón cheꞌn Diox por cón cheꞌn diꞌs ndac coꞌ nac lìcpeꞌ. Ante ndyoodizen conꞌ lìcpeꞌ ned ngue teeꞌen tac ndxelasquen loo Crist no loo cón cheꞌn Crist. Indyèꞌden.
\p
\v 8 Cona, ndlyazen leꞌ mèn coꞌ ndxelaꞌs loo cón cheꞌn Diox, mèn coꞌ nqueltàa ryete lugar, cuez mèna Diox. Ndlyazen leꞌ mèna, lìcqueꞌ, gàc mèn nambìi no mèn nalì loo Diox par gòn Diox diꞌs coꞌ cuez mèna loo Diox. Ndlyazen leꞌ mèna neꞌgàcte mèn nayiꞌ. Neꞌ neꞌ gàc mèna mèn coꞌ ngyoo no xtàa.
\v 9 Lomisqueꞌ, ndlyazen ñiil loo mèngot neꞌgocte mèngot vestid arid bunch coꞌ nac xab mèngot. Goc mèngot xab mèngot coꞌ beꞌthe. Neꞌ neꞌ arid bunch no neꞌ neꞌ arid nolꞌ. Nabeꞌste goc xab mèngot par gàp mèngot mod loo mèn, coꞌ nee diꞌs, neꞌtyeꞌste mèngot arid. Neꞌtoxcuaꞌde mèngot arid yéc mèngot. Neꞌ neꞌ queꞌ mèngot yiꞌf or nza mèngot. Neꞌ neꞌ co mèngot coral coꞌ anzeꞌf nabeꞌs ñaa yen mèngot. Neꞌ neꞌ goc mèngot vestid coꞌ anzeꞌf náp ntac tac ihuente nac conꞌa par mèngot coꞌ nzo loo cón cheꞌn Tad Jesucrist.
\v 10 Ndxeꞌlequeꞌ, lugar de tataa goc mèngot, más huen li mèngota conꞌ coꞌ nac conꞌ ndac, coꞌ nee diꞌs, gàc mèngot mèn coꞌ non carida ñèe xtàa xalqueꞌ mèn coꞌ ndluꞌ, lìcpeꞌ, ndxelaꞌs mèngota loo Diox no ngro xàꞌ mèna loo cón cheꞌn xab izlyoꞌ.
\v 11 Lomisqueꞌ ne, ñibeꞌl coꞌseꞌ nqueltàa mèn leꞌn templ, xèe cue mèngota par gòn mèngota coꞌseꞌ nzi téꞌth mèngota cón cheꞌn Diox. Nadoꞌ gàc mèngota coꞌseꞌ xèe cue mèngota.
\v 12 Tedib conꞌ ñibeꞌen lool, ne, Timote: Neꞌtaꞌdel lugar gàc thìb mèngot maistr par luꞌ mèngot loo mènbiꞌ coꞌseꞌ queltàa mèn leꞌn templ loo xnaa. Neꞌ neꞌ taꞌl lugar ñibeꞌ mèngot loo mènbiꞌ. Ndxeꞌlequeꞌ, xèe cue mèngota coꞌseꞌ queltàa mèn leꞌn templ. Neꞌcàb rode mèngota loo mènbiꞌ.
\v 13 Tac coꞌseꞌ mbli Diox ngo ner mbiꞌ loo izlyoꞌ, ner Adán ngòcsuaꞌ. Ngoloa, mdyoxcuaꞌ Ev.
\v 14 Mebizya neꞌnquedìide Adán. Ndxeꞌlequeꞌ, mquedìi Mebizya Ev. Por cona, ale ner Ev mcuaꞌn xquin Ev no xtol Ev loo Diox.
\v 15 Per mastaleꞌ tataa ngòca loo Ev, myenꞌgot lyáꞌ cheleꞌ mèngot, lìcqueꞌ, ngolaꞌsleꞌ loo Diox. Tataa gàca cheleꞌ mèngot tyan xinꞌ, no cheleꞌ mèngota toloqueꞌ queꞌ lezoꞌ ñèe xtàa mèngot, no cheleꞌ mèngot tolo ryo xàꞌqueꞌ loo cón cheꞌn xab izlyoꞌ par gàc mèngota cheꞌnpeꞌ Diox. Tataa gàca cheleꞌ mèngota huenqueꞌ ñibeꞌ loo xtùuz no lezoꞌ mèngota.
\c 3
\s Pab ngue luꞌ xá mod li mèn coꞌ tyoo ner loo mèn coꞌ ndxelaꞌs, mèn coꞌ nqueltàa loo cón cheꞌn Diox.
\p
\v 1 Diꞌs coꞌ ngue niin lool ndxèꞌ nac lìcpeꞌ, Timote. Cheleꞌ chol mèn ndryoꞌ ndlyenꞌ lezoꞌ xoꞌf zinꞌ mèna zinꞌ par tyoo ner no tyoo naa mèna loo mèn coꞌ ndxelaꞌs coꞌseꞌ queltàa mèn leꞌn templ, lìcqueꞌ, conꞌ ndac nac zinꞌ coꞌ ndryoꞌ ndlyenꞌ lezoꞌ mèna li mèna.
\v 2 Por cona, ngue niin lool, Timote: Mèn coꞌ ndyoo ner no coꞌ ndyoo naa loo mèn coꞌ nqueltàa loo cón cheꞌn Diox, mèn coꞌ nxoꞌf zinꞌ zinꞌ cón cheꞌn Crist loo mèn coꞌ nqueltàa loo cón cheꞌn Diox, ndxàalqueꞌ que tee ban mèna thìb mod ndac coꞌ yende chó mèn yoo mèna. Gàc mèna mèn coꞌ ndyub no thidte xaꞌgot coꞌ nac xinꞌ saꞌl. Gàc mèna mèn coꞌ nagàl yòo lezoꞌ ñèe xtàa. Gàc mèna mèn coꞌ altant ndyoo loo zinꞌ coꞌ ndli mèna liz mèna. No ndxeꞌslequeꞌ li mèna xtùuz coꞌ nac xtùuz coꞌ ndli mèna. Gàc mèna mèn coꞌ gàp mod par gab taamas mèn leꞌ mèna nac mèn guryath no mèn guryèn. No naquinqueꞌ tyoo lezoꞌ mèna taꞌ mèn posad loo chol mèn tith coꞌ nde too naa chop son huiz. Gàc mèna mèn ndac coꞌ nalas nac par luꞌ mèna loo taamas mèn cón cheꞌn Crist.
\v 3 Neꞌgàcte mèna mènguy coꞌ ndxu chol nítguy. Neꞌ neꞌ gàc mèna mèn coꞌ yáp diꞌs no mèn coꞌ ncuaꞌn diꞌs. Ndxeꞌlequeꞌ, gàc mèna mèn nadoꞌ no mèn coꞌ neꞌyòode lezoꞌ yoo diꞌs. Neꞌ neꞌ gàc mèna mèn coꞌ nde yath ñèe tmi coꞌ ndlixùꞌ mèn gan. Ndxeꞌlequeꞌ, naquin gàc mèna mèn ndacpeꞌ, mèn coꞌ cue no xtàa rye nda mèn no rye ndyeꞌth mèn. Gàc mèna mèn coꞌ neꞌgath lyuxte par ñèe mèna tmi.
\v 4 Naquinqueꞌ gàc mèna thìb gundan ndac coꞌ ñibeꞌ ndac loo mèn guliz mèna. No li mèna leꞌ xinꞌ mèna gàc myenꞌ nadoꞌ no gàp myenꞌ mod loo rye mèn.
\v 5 Tac cheleꞌ mèn coꞌ gàc mèn coꞌ tyoo ner no coꞌ tyoo naa loo mèn coꞌ nqueltàa loo cón cheꞌn Diox neꞌgácte ñibeꞌ loo mèn gulizpeꞌ mèn, ¿xá mod gác mèna quenap mèna no ñibeꞌ mèna no tyoo ner no tyoo naa mèna loo mèn coꞌ nqueltàa loo cón cheꞌn Diox, sya? Yende mod ñibeꞌ mèna cheleꞌ mèna tataa nac, ¿léꞌ?
\v 6 Mèn coꞌ gàc mèn coꞌ tyoo ner no coꞌ tyoo naa loo mèn coꞌ nqueltàa loo cón cheꞌn Diox, indxàalte gàc mèna mèn coꞌ diz ngolaꞌs loo cón cheꞌn Diox no coꞌ diz ngòo loo cón cheꞌn Diox. Tac neꞌstolqueꞌ, làth xtauꞌa aseli mèna tyeꞌs mèna xalqueꞌ mdyeꞌs Mebizya. No yiloa, quexùꞌ Diox mèna xal mquexùꞌ Diox Mebizyaꞌ par tyactìi mèna yiloa xalqueꞌ tyactìi Mebizya yiloa.
\v 7 Lomisqueꞌ ne, nquinqueꞌ gàc leꞌ mèn coꞌ tyoo ner no coꞌ tyoo naa loo mèn coꞌ nqueltàa loo cón cheꞌn Diox gàp mod loo mèn coꞌ tarte yòo loo cón cheꞌn Diox par gàp mèn yalxlaꞌs loo Diox par nec thìb mod no nec tedib mod yende mod quexùꞌ mèn coꞌ tarte yilaꞌs mèn coꞌ tyoo ner no coꞌ tyoo naa loo mèn coꞌ nqueltàa loo cón cheꞌn Diox. Cheleꞌ mèn coꞌ tyoo ner no coꞌ tyoo naa li tataa mod, leꞌ sya, càba loo mèna neꞌthyonte mèna no neꞌyigàade mèna loo Mebizya xal coꞌseꞌ ndlyàa máꞌ guli quìi loo thìb tramp.
\s Pabl ngue luꞌ trèꞌ xá mod li mèn coꞌ nquenap templ no mèn coꞌ ndlyath no taamas mèn leꞌn templ.
\p
\v 8 Lomisqueꞌ ne, cón cheꞌn mèn coꞌ li sirv loo mèn coꞌ nqueltàa loo cón cheꞌn Diox, mèna ndxàal gàc mèn coꞌ ndxàp mod par gab taamas mèn leꞌ mèna nac mèn guryath no mèn guryèn. No neꞌgàcte mèna mèn yeꞌrsinꞌ xal nac mod coꞌ ndyoodiꞌs mèn. Neꞌgàcte mèna mèn coꞌ ndyuuz. Neꞌgàcte mèna mèn coꞌ ndli huanꞌ loo xnaa coꞌseꞌ ndiꞌ mèn no nthoꞌ mèn, coꞌ nee diꞌs, ngo mèn máꞌ xiꞌtha par xexte li mèn gan tmi loo xtàa mèn.
\v 9 Ndxàalqueꞌ gàc mèna mèn coꞌ ndaꞌ cuent coꞌ huenlequeꞌ cón cheꞌn conꞌ coꞌ indxòn ndacte mèn loo cón cheꞌn Crist coꞌ ndxelaꞌs naꞌ. No ndxàal que tee ban ndac mèna thìb mod coꞌ yende conꞌ tenꞌ mèna leꞌn lezoꞌ mèna cón cheꞌn xtùuz coꞌ ngue no mèna cón cheꞌn Crist.
\v 10 Nerlequeꞌ naquin gàc preb mèna ñeeneꞌ xal nac mèn coꞌ li sirv loo mèn coꞌ nqueltàa loo cón cheꞌn Diox, ñeeneꞌ chéꞌ nzo chó falt ndxàp mèna. Cheleꞌ mèna yende chó falt no mod ndxàp, nzoqueꞌ mod xoꞌf zinꞌ mèna zinꞌ coꞌ nac cón cheꞌn Crist.
\v 11 Lomisqueꞌ ne, leꞌ xaꞌgot coꞌ nac saꞌl mèn coꞌ li sirv loo mèn coꞌ nqueltàa loo cón cheꞌn Diox, gàc xaꞌgota mèn nadoꞌ coꞌ neꞌyòode loo cuent yix. Ndxeꞌlequeꞌ, gàp mèngota mod no li nèe mèngota mèngota loo cón cheꞌn Crist coꞌ ndxelaꞌs naꞌ. No gàc mèngota mèn ndacpeꞌ coꞌ ndyoo altant loo ryethe conꞌ.
\v 12 Bnibeꞌ loo mèn coꞌ li sirv loo mèn coꞌ nqueltàa loo cón cheꞌn Diox gàc mèna mèn coꞌ ndyub no thidte xaꞌgot coꞌ nac xinꞌ saꞌl mèna. No gàc mèna gundan coꞌ ñibeꞌ ndac loo mèn gulizpeꞌ mèna.
\v 13 Tac mèn coꞌ ndlyath no mèn coꞌ nqueltàa loo cón cheꞌn Diox coꞌ nabeꞌste ndyoo naa loo zinꞌ coꞌ ndli mèna, mèna ndli gan ndxàc conꞌ guryath no conꞌ guryèn loo mèna. No sate más con dibaxlaꞌs tyoodiꞌs mèna cón cheꞌn xá mod ndxelaꞌs mèna loo Crist no loo cón cheꞌn Crist.
\s Trèꞌ ngue luꞌ Pab cón cheꞌn coꞌ ndxelaꞌs naꞌ, conꞌ coꞌ inonte huax mèn no conꞌ coꞌ indaꞌde huax mèn cuent.
\p
\v 14 Ngue queꞌen yeꞌs ndxèꞌ lool, Timote, mastaleꞌ ndub quee lezon xaste gal neen máal par nedrèꞌ.
\v 15 Tac antaleꞌi, cheleꞌ daa lyenꞌ no neꞌyilode gal neen máal, cona ngue telꞌen cart ndxèꞌ lool par ñeel xá mod ndxàal tyoo naal no tyoo nerl loo mèn coꞌ nac mèn gulizpeꞌ Diox. Fteꞌ lezoꞌl mèna nac mèn cheꞌn Diox coꞌ lìcpeꞌ naban. Mèn coꞌ nqueltàa loo cón cheꞌn Diox chol lugar, mèna ngue taꞌ fuerz par ndaꞌ mèna cuent cón cheꞌn Crist coꞌ nac conꞌ lìcpeꞌ loo taamas mèn coꞌ tarte yilaꞌs, coꞌ nee diꞌs, nac mèna xal thìb cimient no thìb pílar coꞌ ndaꞌ fuerz loo thìb yòobéꞌ.
\p
\v 16 Lìcpeꞌ baꞌi, conꞌ roo no conꞌ xèn nac alux conꞌ coꞌ nac cón cheꞌn conꞌ coꞌ beꞌ nacasloo loo huax mèn coꞌ nac xleyꞌ coꞌ ndxelaꞌs naꞌ loo Diox no loo cón cheꞌn Diox, coꞌ nee diꞌs:
\pi1 Leque Diox mbluꞌ Diox loo mèn coꞌseꞌ mbiꞌth yáal Crist loo izlyoꞌ ndxèꞌ xal ndxáal chol mèn loo izlyoꞌ ndxèꞌ. Diox mblo ro no mbluꞌ Diox loo mèn nalì no nambìi nac Crist tac yub Diox mblo xban Crist. Mbyúꞌ loo Crist loo angl. Mbyath no mbyèn cón cheꞌn Crist loo mèn leꞌn chol nación dib athu loo izlyoꞌ. Ngolaꞌs mèn coꞌ nziri loo izlyoꞌ loo Crist. Ngoloa, nguáp Crist loo béꞌ coꞌteꞌ nac yòobaꞌ.
\c 4
\s Diꞌs ndxèꞌ ndluꞌ loo naꞌ cón cheꞌn mèn coꞌ ndryo xàꞌ loo cón cheꞌn Crist xal nac mod coꞌ ndxelaꞌs naꞌ loo Diox por cón cheꞌn Crist.
\p
\v 1 Per nambìite diꞌs no nambìite cuent ndluꞌ Xpii Natúꞌ loo naꞌ leꞌ leꞌn lult tiemp coꞌ yiꞌth nque nzo ndxep mèn coꞌ ryo xàꞌ loo coꞌ ndxelaꞌs mèn xal ndxelaꞌs naꞌ cón cheꞌn Tad Crist. Mèna más ndxòo lezoꞌ ndaꞌ mèna lugar ndxòn mèna ro chol xpii coꞌ nquedìi mèn par quedìi xpiia mèna. No yilaꞌs mèna loo xleyꞌ coꞌ nac xleyꞌ meexùꞌ.
\v 2 Más tyub nza mèn gòn mèn ro mèn coꞌ ntembìi ro no coꞌ ntembìi xtiꞌs coꞌ nac mèn gutyèꞌ. Indenꞌte mèna leꞌn lezoꞌ mèna cón ngue li mèna xtùuz cheꞌn cón ngue li mèna chéꞌ naca conꞌ huen o chéꞌ naca conꞌ mal.
\v 3 Mèn yeꞌrsinꞌ coꞌ tataa nac, indaꞌde mèna lugar loo xtàa mèn coꞌ ndlyaꞌs selyaꞌ. No lomisqueꞌ, indaꞌde mèna lugar hua mèn chol conꞌ coꞌ nac xít mèn no luaꞌ mèn. Tataa ndli mèna par neꞌhuade chol mèn bélꞌ mastaleꞌ yub Diox mtanꞌ xít mèn no luaꞌ mèn coꞌ ndxuhua mèn, mèn coꞌ ndxelaꞌs loo Diox no loo cón cheꞌn Diox, no mèn coꞌ ndaꞌ cuent coꞌ nac lìcpeꞌ cón cheꞌn Diox tac coꞌseꞌ ndxuhua mèna xít mèna no luaꞌ mèna mèna mbez: Diox quix Uꞌ, Diox, loo Diox.
\v 4 Tac rye loothe conꞌ coꞌ mxènꞌ Diox no coꞌ mtoxcuaꞌ Diox, huenqueꞌ naca. Nec thìb conꞌa indxàalte tèꞌb mèn loo xtàa mèn cheleꞌ mèn lyaꞌs huai. No cheleꞌ mèn gab: Diox quix Uꞌ, Diox, loo Diox, yende cón lii.
\v 5 Tac xtiꞌs Diox coꞌ ndlab mèna no diꞌs coꞌ mbez mèna Diox coꞌseꞌ mbez mèna Diox, diꞌsa ndli loo mèn ryete conꞌ ndxuhua mèn conꞌ ndac naca loo mèn par hua mèn.
\s Pab ngue luꞌ loo Timote xá mod ndxàal que tee ban Timote par tolo gàc Timote thìb moz ndac cheꞌn Tad Jesucrist.
\p
\v 6 Cheleꞌ luꞌ lùu ryete conꞌ ndxèꞌ loo mèn coꞌ nac hues xtàa naꞌ por cón cheꞌn Crist, Timote, gàc lùu thìb moz ndac coꞌ nxoꞌf zinꞌ zinꞌ cón cheꞌn Jesucrist loo mèn. Sya, tataa mod leque lùu que tee ban loo diꞌs cheꞌn diꞌs ndac coꞌ ndxelaꞌs naꞌ coꞌ gàc lool xal xítl no luaꞌl coꞌ li par gàl lezoꞌl, diꞌs coꞌ ndxelaꞌsl loo no coꞌ nac thìb xleyꞌ ndac xalqueꞌ nac coꞌ nda nquel xís coꞌ nac cón cheꞌn Crist coꞌ mtéꞌthl.
\v 7 Lomisqueꞌ ne, niin lool, Timote: Neꞌtyub nzadel arid loo chol cuent gox coꞌ nac cuent natont cheꞌn izlyoꞌ ndxèꞌ. Más huen, ñibeꞌ loo lezoꞌl no ftoo lezoꞌl par tolo que tee lil cas loo cón cheꞌn Diox xal ndxàala no maste.
\v 8 Per niin thìb conꞌ lool, Timote: Ejercis coꞌ ndli naꞌ par ryo xcuen lad naꞌ, ndxepte conꞌ ndac ndlii loo lad naꞌ. Per cheleꞌ naꞌ ngue que tee liqueꞌ cas loo cón cheꞌn Diox xal thìb myenꞌ coꞌ nguith par tolo xec myenꞌa loo yalguyith, thìb mod tedib mod ncàba conꞌ ndac loo naꞌ, que naca cón cheꞌn yalnaban ndxèꞌ, que naca cón cheꞌn yalnaban coꞌ yiꞌth nquea.
\v 9 Lìcqueꞌ nac diꞌs coꞌ ngue niin lool ndxèꞌ, Timote: Indyèꞌde diꞌs coꞌ nac cón cheꞌn diꞌs ndac ndxèꞌ. Ndxàalqueꞌ gòn ryete mèn diꞌs ndxèꞌ no yilaꞌs ryete mèn cón cheꞌn diꞌs ndac ndxèꞌ.
\v 10 Tac por cona ndli naꞌ zinꞌ no nxec yèe naꞌ loo ngòc nguàal conꞌ coꞌ ndli mèn loo naꞌ axta plóthe. Leꞌi càb yilaꞌs huax mèn loo Crist no loo cón cheꞌn Crist tac naꞌ nzi quee lezoꞌ loo Diox cón cheꞌn conꞌ coꞌ gàc loo naꞌ yiloa, Diox coꞌ naban thidtene. Diox ngue xènꞌ izlyoꞌ no ngue quenap Diox ryete mèn loo izlyoꞌ. Per ale ndxeꞌlequeꞌ, loo naꞌ coꞌ ndxelaꞌs loo Diox, Diox mteláꞌ naꞌ loo conꞌ ryes.
\p
\v 11 Ryete diꞌs coꞌ ngue queꞌen yeꞌs lool ndxèꞌ, Timote, ndlyazen ñibeꞌl loo mèn li mèna no luꞌl cón cheꞌn diꞌs ndac loo mèn par nedrèꞌ.
\v 12 Lomisqueꞌ ne, leque lùu huiꞌ xá nque teel. Gòp lezoꞌl par neꞌtaꞌdel lugar xìis no mèn lùu por nacl myenꞌbiꞌ. Ndxeꞌlequeꞌ, tolo bli conꞌ ndac par huiꞌ mèn coꞌ ndxelaꞌs lool xá nac mod ndyoodiꞌsl, no xá nac mod nque tee banl coꞌ nac mod nqueꞌ lezoꞌl ñèel mèn, no xá nac mod coꞌ ndyubdiꞌsl loo Xpii Natúꞌ coꞌ ñibeꞌ lool, no xá mod nquenap lùu lùu par tolo gàcl thìb mbyòo coꞌ nque tee ban lì no coꞌ nque tee ban nambìi loo mèn.
\v 13 Láth beꞌ tarte zin daa par nedrèꞌ loo guꞌ, loo xnaa blab libr coꞌ nac xtiꞌs Diox loo mèn coꞌ nqueltàa loo cón cheꞌn Diox. Ftolo coꞌx loo mèn no bluꞌ loo mèn par yeꞌth lezoꞌ mèn loo cón cheꞌn Diox. No ftolo luꞌ loo mèn cón cheꞌn Diox axtaqueꞌ galen lool.
\v 14 Neꞌláꞌyaꞌdel lùu loo conꞌ ndac coꞌ mbli Diox angngòc lool coꞌseꞌ mxoꞌf mèngool yaꞌ mèngool coꞌ ndyoo ner no coꞌ ndyoo naa loo mèn coꞌ nqueltàa loo cón cheꞌn Diox ladl. Tac conꞌa nac conꞌ coꞌ mnibeꞌ lezoꞌ Diox no conꞌ coꞌ angngroꞌ lezoꞌ Diox gàc lool.
\p
\v 15 Por derech, bli xtùuz cón cheꞌn coꞌ ngue niin lool ndxèꞌ. Fxoꞌf zinꞌ cón cheꞌn conꞌ ndxèꞌ par luꞌla loo ryete mèn leꞌ zinꞌ coꞌ nxoꞌf zinꞌl loo cón cheꞌn Crist ndli leque lùu ngue téꞌth no ngue tyubdiꞌs ndacl loo cón cheꞌn Crist, ne.
\v 16 Anderhuenl. Leque lùu fquenapl loo cón cheꞌn Crist. Bli nèe leque lùu loo xleyꞌ coꞌ ndluꞌl coꞌ nac xleyꞌ cheꞌn Diox. Altant ftoo loo xleyꞌ coꞌ ndluꞌl. Tac cheleꞌ lùu tataaqueꞌ ngue li, sya, ryete mèn non, lìcqueꞌ, ndxelaꞌsl loo cón cheꞌn Crist no loo Crist. Lomisqueꞌ mod, cheleꞌ lùu tatuaꞌqueꞌ lyath no taamas mèn li mèna xal ndlil, leꞌ sya, ryete mèn gòn rol no yilaꞌs mèn xal ndxelaꞌsl, ne.
\c 5
\s Trèꞌ ngue luꞌ xá mod ndxàal que tee ban no naꞌ taamas mèn coꞌ ndxelaꞌs.
\p
\v 1 Timote, neꞌyoodel nec thìb mèngool. Ndxeꞌlequeꞌ, fcoꞌx loo mèngool xal loo xudpeꞌl. Fcoꞌx loo myenꞌbiꞌ xal loo huespeꞌl, ne.
\v 2 Fcoꞌx loo xaꞌgotgool xal loo xnaꞌpeꞌl. Fcoꞌx loo myenꞌgot xal loo ftaꞌnpeꞌl. Thìb lì yécl thìb lì lezoꞌl bli ryete conꞌ ndxèꞌ.
\p
\v 3 Blyath no xaꞌgot viud coꞌ, lìcpeꞌ, nac xaꞌgot viud par que no xaꞌ conꞌ naquin xaꞌ coꞌ nac conꞌ coꞌ nde che loo xaꞌ, xaꞌ coꞌ, lìcqueꞌ, naquin conꞌ.
\v 4 No cheleꞌ chó xaꞌgot viud ngue no xinꞌ o ngue no xaꞌ xot xaꞌ, naquin ner luꞌl myenꞌ par gàp myenꞌ mod loo mèn coꞌ nac gundan loo myenꞌ li myenꞌ leque mod xal mqueꞌ lezoꞌ xud myenꞌ gunèe xud myenꞌ myenꞌ. Tataaguèꞌ queꞌ lezoꞌ myenꞌ ñèe myenꞌ xud myenꞌ. Tac conꞌ coꞌ ndli myenꞌ loo mèn guliz myenꞌa, naca thìb conꞌ ndac no ndxòo lezoꞌ Diox mod coꞌ tataa nqueꞌ lezoꞌ mèn ñèe mèn xud mèn no xnaꞌ mèn no mèn guliz mèn.
\v 5 Xaꞌgot coꞌ, lìcqueꞌ, nac xaꞌgot viud no mbyanꞌ thìb xaꞌgot, bnibeꞌ loo xaꞌ ante tyub quee lezoꞌ xaꞌgot viuda loo Diox no thidtene cuez xaꞌgot viuda Diox ze no yálꞌ.
\v 6 Per xaꞌgot viud coꞌ nzo làth guꞌ coꞌ ante ndoo lezoꞌ más ndaꞌ xaꞌ gust lezoꞌ xaꞌ, xaꞌgot viuda nac xal thìb xaꞌ coꞌ nguth loo cón cheꞌn Diox.
\v 7 Bnibeꞌ loo mèngot viuda li mèngot viuda ryete conꞌ xal ngue niin lool ndxèꞌ, Timote, par yende chó mèn yoo mèna por neꞌnglide mèngot viuda conꞌ ndac, ne.
\v 8 Tac cheleꞌ chol mèn coꞌ mbez ndxelaꞌs mèna loo Diox no iñibeꞌ ndacte mèna loo mèn guliz mèna xal gundanpeꞌ, mèna ncà diꞌs cón cheꞌn coꞌ ndxelaꞌs naꞌ. Más nazab ndxàc mèna loo mèn coꞌ indxelaꞌste cón cheꞌn Diox.
\p
\v 9 Lomisqueꞌ ne, loo list coꞌteꞌ nzib lèe mèngot viud, ndxàal tyub ante lèe mèngot viud coꞌ nzo masreꞌ ayon línꞌ. No ante tyub lèe mèngot viud, mèngot coꞌ mque no thidte xaꞌbiꞌ coꞌ ngòc saꞌl mèngota, loo list, ne.
\v 10 Blaꞌs loo xaꞌgot viuda ñeeneꞌ ¿chéꞌ ngue taꞌ mèn cuent leꞌ xaꞌgota nxoꞌf zinꞌqueꞌ zinꞌ ndac? Ñeeneꞌ ¿chéꞌ mxàn xinꞌ xaꞌ? Ñeeneꞌ ¿chéꞌ mdaꞌ xaꞌ posad loo mèn tith coꞌ mnaꞌb posad? Ñeeneꞌ ¿chéꞌ mbli xaꞌ sirv no chéꞌ mbli xaꞌ cas loo mèn coꞌ ngro xàꞌ loo cón cheꞌn xab izlyoꞌ coꞌ ngòc cheꞌnpeꞌ Diox? Ñeeneꞌ ¿chéꞌ mdaꞌlaꞌs xaꞌ ndxep conꞌ loo mèn coꞌ mxac yaltìi? Ñeeneꞌ ¿chéꞌ nzoreꞌ chó más zinꞌ ndac mbli xaꞌgot viuda loo rye loote zinꞌ ndxèꞌ? Tataa ndxàal gàca ndooreꞌ yòo lèe xaꞌgota loo list, ndee.
\p
\v 11 Tedib conꞌ ndlyazen niin lool ne, Timote: Neꞌtubtel lèe chol xaꞌgot viud coꞌ beꞌ nzo ndxepte línꞌ. Tac coꞌseꞌ tlo tyub yoꞌf lezoꞌ mèngot viuda loo coꞌ nac cón cheꞌn xab izlyoꞌ, sya, tyoo xàꞌ lezoꞌ mèngot viuda loo cón cheꞌn Crist. No yiloa bere mèngot viud, selyaꞌ mèngot viuda tedib vez.
\v 12 Leꞌ sya, leque mèngot viud yenꞌa ngue zib quìi mèngot viud loo cón cheꞌn Crist por conꞌ coꞌ mcàbgòn mèngota li mèngota loo cón cheꞌn Crist no neꞌtolode xaꞌ li xaꞌi.
\v 13 Más de cona, cheleꞌ mèngot viuda que tee liz por liz mèn, gàc mèngota mèn zaꞌf. No iante gàc mèngota mèn zaꞌf. Ndxeꞌlequeꞌ, gàc mèngota mèn coꞌ taꞌ cuent yix, ne. No li mèngota ngòc nguàal conꞌ. No tyoodiꞌs mèngota conꞌ coꞌ indxàalte tyoodiꞌs nec thìb mèn.
\v 14 Por cona, ndlyazen más huen selyaꞌ myenꞌgot viud yènꞌa par tyan xinꞌ myenꞌ no gàc myenꞌ gundanpeꞌ liz myenꞌ par tataa mod neꞌtaꞌde myenꞌgot viuda arid lugar par yecloo mèn coꞌ nayiꞌ ñèe guꞌ par ñii yèe ñii tìi chol mèn coꞌ nac ngolo ngolaꞌs cón cheꞌn mèn coꞌ ndxelaꞌs loo cón cheꞌn Diox por cón cheꞌn Crist.
\v 15 Tac nzoqueꞌ ndxep xaꞌgot viud coꞌ ngro xàꞌleꞌ loo cón cheꞌn Crist no nalleꞌ ngue li mèngot viud xal nac coꞌ ndlyaꞌs Mebizya.
\p
\v 16 Lomisqueꞌ ne, cheleꞌ chó mènbiꞌ o mèngot coꞌ ndxelaꞌs ndxàc mèn guliz mèngot viud, ndxàal lyath no mèn guliza mèngot viuda par neꞌñaꞌbte mèn guliza gast loo mèn coꞌ ndxelaꞌs coꞌ nqueltàa par lyath no mèn guliza mèngot viuda. Tataa gàca tolo que no mèn coꞌ ndxelaꞌs coꞌ nqueltàa gast par lyath no mèn coꞌ nqueltàa mèngot coꞌ nac lìcpeꞌ viud coꞌ nde che conꞌ loo coꞌ naquin conꞌ.
\p
\v 17 Leꞌ loo mèngool coꞌ nabeꞌste ñibeꞌ no coꞌ nabeꞌste ndyoo ner no coꞌ nabeꞌste ndyoo naa loo mèn coꞌ nqueltàa loo cón cheꞌn Diox na, sate más li mèn coꞌ nqueltàa loo cón cheꞌn Diox conꞌ guryath no conꞌ guryèn loo mèngoola. Masreꞌ naquin li mèn coꞌ nqueltàa loo cón cheꞌn Diox conꞌ guryath no conꞌ guryèn loo mèn coꞌ ngo yalban no loo mèn coꞌ ndluꞌ cón cheꞌn Diox loo mèn.
\v 18 Tac loo libr coꞌ nac xtiꞌs Diox ndub diꞌs coꞌ mbez: Neꞌcodel yex ro burr coꞌ ndloo ndub loo bacdoꞌ nzob triu par gaꞌs nzob triu. Conꞌa nee diꞌs, mèn coꞌ nxoꞌf zinꞌ zinꞌ coꞌ nac cón cheꞌn Diox naquinqueꞌ yo ray mèna por zinꞌ coꞌ nxoꞌf zinꞌ mèna par hua mèna.
\p
\v 19 Lomisqueꞌ niin lool, ne, Timote: Neꞌgòntel chol cuent coꞌ ñii yèe ñii tìi mèn cón cheꞌn mèngool. Ndxeꞌlequeꞌ, gònl cuenta ante coꞌseꞌ nzo nol chop o son mèn coꞌ taꞌ cuent cón cheꞌn mèngoola ñee mèna ñeeneꞌ chéꞌ lìca o chéꞌ ilìcta par neꞌqueyèexùꞌde mèn mèngoola.
\v 20 Per loo mèngool coꞌ toloqueꞌ ngue tee cuaꞌn xquin no ncuaꞌn xtol na, naquinqueꞌ yool mèngoola loo rye mèn coꞌ nqueltàa par tataa mod zyeb taamas mèn coꞌ nqueltàa loo cón cheꞌn Diox, ne.
\v 21 Daa ñibeꞌ lool, Timote, no ngue tanꞌen diꞌs ndxèꞌ lool loo Diox no loo Tad Jesucrist no loo rye angl coꞌ Diox mcui par li angl thìb zinꞌ cheꞌn Diox: Ftolo liqueꞌl xal ngue ñibeꞌen lool ndxèꞌ. Neꞌlidel par más huiꞌl loo thìb mèn làth xtàa mèn. Neꞌlidel par más tyuꞌ thìb mèn loo xtàa mèn.
\v 22 Neꞌxoꞌf zinꞌgàdel zinꞌ loo mèn coꞌ nac mèngool coꞌ nqueltàa loo cón cheꞌn Diox par ñibeꞌl loo mèna par tyoo ner mèna loo mèn coꞌ nqueltàa loo cón cheꞌn Diox ndooreꞌ coꞌseꞌ ñeel xá mod nque tee ban mèna. Tac neꞌstolqueꞌ tataa mod leꞌleꞌ lùu cuaꞌn xquinl no xtoll xal ndli taamas mèn. Neꞌtaꞌdel lugar li leque lùu chol conꞌ yeꞌrsinꞌ. Más huen nambìi no nalì fque teel loo cón cheꞌn Diox.
\p
\v 23 Más de cona, com leꞌ lùu ndyac yíiz lezoꞌ, ¿léꞌ?, neꞌgudel ante nít dòp coꞌ nac nít yèe. Yende cón lii gul chuꞌth vin làtha par yac yíiz coꞌ ndenꞌ lezoꞌl.
\p
\v 24 Lomisqueꞌ ne, loo xnaa ndxúꞌ xtol cheꞌn ndxep mèn ndooreꞌ coꞌseꞌ tub rez Diox cón cheꞌn xtol mèn loo mèn. Leꞌ taamas mèn coꞌ ncuaꞌn xquin no xtol na, xtol mèna indxúꞌde loo xtàa mèn nalleꞌ. Per yúꞌ xtol mèna axta coꞌseꞌ zin huiz tub rez Diox cón cheꞌn mèn loo mèn.
\v 25 Lomisqueꞌ ne, ryete zinꞌ coꞌ nac zinꞌ ndac coꞌ ndli mèn loo xtàa men, leꞌi ndxúꞌqueꞌ loo xnaa loo mèn. Per mastaleꞌ nzoqueꞌ ndxep conꞌ ndac coꞌ ndli mèn loo xtàa coꞌ indxúꞌde loo mèn, conꞌ ndaca ryo xoꞌfqueꞌ loo xnaa tac Diox li leꞌ conꞌ ndaca ryo xoꞌfqueꞌ loo xnaa coꞌseꞌ tub rez Diox cón cheꞌn mèn loo mèn.
\c 6
\p
\v 1 Niin tedib conꞌ lool ne, Timote, por part cón cheꞌn mèn coꞌ ndxelaꞌs, mèn coꞌ nac moz coꞌ nque zinꞌ huiz loo patrón: Naquin gàp mèn coꞌ nac moz mod loo patrón mèn par tataa mod neꞌñii yèede no neꞌñii tìide mèn lèe Diox no neꞌñii yèede no neꞌñii tìide mèn cón cheꞌn xleyꞌ naꞌ.
\v 2 Lomisqueꞌ ne, chele moz nque zinꞌ con patrón coꞌ ndxelaꞌs loo cón cheꞌn Crist, ihuente naca tèꞌb moz patrona thìb lad o gàc moz moz zaꞌf loo patrón por ndxàc hues moz patrón por cón cheꞌn Crist. Ndxeꞌlequeꞌ, naquin más altant tyoo moz loo zinꞌ cheꞌn patrón xal ndxàala. Tataa ndxàal li thìb moz tac patrón moz ndxelaꞌs loo cón cheꞌn Crist no nac xaꞌ mèn coꞌ ndxàc hues coꞌ nqueꞌ lezoꞌ ñèe xtàa xaꞌ por cón cheꞌn Crist. Conꞌ ndxèꞌ ndlyazen luꞌl loo mèn no col yalbàn cón cheꞌna loo mèn, Timote.
\s Pab ngue luꞌ trèꞌ xá mod yo nagàl lezoꞌ mèn coꞌ ndxelaꞌs loo Diox por cón cheꞌn Crist.
\p
\v 3 Cheleꞌ chol mèn ndluꞌ tedib conꞌ no neꞌyòode lezoꞌ mèna loo diꞌs ndac cheꞌn Tad Jesucrist naꞌ, no neꞌyòode lezoꞌ mèna cón cheꞌn diꞌs coꞌ nac xleyꞌ naꞌ coꞌ ndluꞌ cón cheꞌn xal ndxàal li mèn cas loo Diox,
\v 4 mèna nac mèn nateꞌs no mèn naxalꞌ coꞌ yende cón ndxác. Nac mèna xal thìb mèn yíiz con ryethe coꞌ nac coꞌ ndyub yoꞌf lezoꞌ mèna. No conꞌ coꞌ ndyub yoꞌf lezoꞌ mèna ndli par noo noo ndyoodiꞌs mèna cón cheꞌn chol diꞌs no chol xleyꞌ cheꞌn mèn loo izlyoꞌ. Mod coꞌ ndxap mèna no xal ndli mèna, conꞌa ndli ndxàn lezoꞌ mèna ñèe mèna xtàa mèna. Nzyálꞌ diꞌs nzyálꞌ cuent làth xtàa mèn ngyoo mèn con xtàa mèn. Asendli mèna ndaꞌ mèna xyàn lezoꞌ taamas mèn. Thidtene indxapte mèna yalxlaꞌs loo xtàa mèna.
\v 5 Mod coꞌ ndxàp mèna ndli thidtene ngyoo mèna làth xtàa mèna, mèn coꞌ ngue no xtùuz zab coꞌ nac leque mèn coꞌ ndli nzyeꞌ xtùuz mèn no lezoꞌ mèn par gàc mèna mèn yeꞌrsinꞌ. Mèna indlibeꞌde cón cheꞌn Diox coꞌ nac conꞌ lìcpeꞌ. No ndli mèna xtùuz leꞌ loo xleyꞌ cheꞌn Crist no loo cón cheꞌn Diox nzo mod aseli mèna cuaꞌn mèna mod par alithe gàc ric mèna por mod yeꞌrsinꞌ cheꞌn mèna. Ñaꞌben lool, Timote, bláꞌ mèn coꞌ tataa nac. Neꞌqueltàa nodel mèna.
\v 6 Per, lìcpeꞌ baꞌi, anzeꞌf thìb conꞌ ndac nac conꞌ coꞌ ndluꞌ xleyꞌ naꞌ loo naꞌ, naꞌ coꞌ ndlec lezoꞌ no naꞌ coꞌ ndyac lezoꞌ loo conꞌ coꞌ ngue note naꞌ.
\v 7 Tac coꞌseꞌ ngóol naꞌ yende cón ngòp naꞌ loo izlyoꞌ ndxèꞌ. Lìcpeꞌ baꞌi, neꞌ neꞌ yen cón yeꞌ naꞌ coꞌseꞌ gath naꞌ.
\v 8 Per cheleꞌ naꞌ ngue no conꞌ coꞌ hua naꞌ atate huiz, no cheleꞌ naꞌ bete ndoo riꞌth no bete nda centav par ndiꞌ naꞌ xab naꞌ coꞌ ndxoc naꞌ xal ndxàala, con conate ndxàal tyac lezoꞌ naꞌ no cuec lezoꞌ naꞌ loo yalnaban naꞌ.
\v 9 Per ndxeꞌlequeꞌ, por part cón cheꞌn mèn coꞌ ndlyaꞌs gàc ric, mèna neꞌxecte par gàc preb mèna loo ryethe conꞌ ndyub yoꞌf lezoꞌ mèn. Ale ndxeꞌlequeꞌ, yiziꞌf yigaꞌs mèna loo chol conꞌ yeꞌrsinꞌ no loo chol mod yeꞌrsinꞌ coꞌ nac xab izlyoꞌ coꞌ ndyub yoꞌf lezoꞌ mèn par li mèn huax conꞌ tont coꞌ li gàc conꞌ ryes loo mèna no por lult yizaꞌ yalnaban mèna loo mèna no lyux mèna par ryo xàꞌ mèna loo Diox thidtene yiloa.
\v 10 Tac conꞌ coꞌ nac anzeꞌf nde yath mèn ñèe mèn nac tmi no mod coꞌ ndli mèn par que no mèn tmi, conꞌa nac coꞌ ncàb loo mèna rye loothe conꞌ yeꞌrsinꞌ. Lìca, nzoqueꞌ ndxep mèn coꞌ ndxath ndlyux ñèe tmi. Mèna ngro xàꞌleꞌ loo coꞌ ngolaꞌs mèna loo Crist. Por cona, ndxàc loo mèna ndyactìi mèna no ngulàa yaltìi loo mèna axta plóthe dib naban mèn por mod yeꞌrsinꞌ coꞌ ndxàp mèn.
\s Trèꞌ ngue luꞌ loo naꞌ coꞌ ndxelaꞌs xá mod li naꞌ gan par ryoo xyèn naꞌ loo cón cheꞌn conꞌ coꞌ ndxelaꞌs naꞌ.
\p
\v 11 Per lùu, Timote, coꞌ nac thìb mbiꞌ cheꞌn Diox, neꞌlidel ryethe conꞌ ndxèꞌ. Bláꞌ ryethe conꞌ yeꞌrsinꞌa. Nalì no nambìi fque tee banl loo Diox. Thìb lì yécl no thìb lì lezoꞌl bli cas Diox no ftoloqueꞌ gòp yalxlaꞌs loo Diox. Fqueꞌqueꞌ lezoꞌ Diox no fqueꞌ lezoꞌ ñèel hues xtàal. Gòp yalnchaꞌlaꞌs loo mèn no fxec yèe con mèn. Gòc mèn nadoꞌ loo mèn, ne, coꞌ nee diꞌs, gòc mèn coꞌ queꞌs yaꞌ loo xtàa. No neꞌtyeꞌstel loo mèn.
\v 12 Dib nzo yécl dib nzo lezoꞌl fxoꞌf zinꞌ zinꞌ coꞌ mxoꞌf zinꞌ Diox lool cón cheꞌn conꞌ coꞌ ndxelaꞌs naꞌ par lila. Bli nèe xtùuzl loo yalnaban coꞌ nac yalnaban thidtene coꞌ ndxàpl xal thìb conꞌ coꞌ quej ndyenl par neꞌláꞌdela. Loo cona mcui Diox lùu coꞌseꞌ mblo rol no mdaꞌl cuent ndac cón cheꞌn xal ndxelaꞌsl loo Crist loo huax mèn coꞌ ndaꞌ cuent cón cheꞌnl.
\v 13 Loo Diox coꞌ ndaꞌ yalnaban loo ryethe conꞌ no loo Jesucrist coꞌ nalì mdub razon loo Pons Pilat, ñibeꞌen lool, Timote:
\v 14 Lyazen leꞌ lùu tyubdiꞌs loo ryete conꞌ xal ngue ñibeꞌen lool loo cart ndxèꞌ. Neꞌseꞌdel loo mod coꞌ ngue ñibeꞌen lool ndxèꞌ par nec thìb mod no nec tedib mod yende cón lii par yoonl leꞌn dib tiemp axta coꞌseꞌ gàc huiz coꞌseꞌ yiꞌth Tad Jesucrist naꞌ loo izlyoꞌ tedib vez.
\v 15 Coꞌseꞌ gàc huizpeꞌ no tiemppeꞌ coꞌ yiꞌth xi Tad Jesucrist naꞌ, Diox liqueꞌ par gàc ryo xoꞌf Jesucrist xal ndxàala. Tataa li Diox tac thidte Diox nac Diox. Thidte Diox nac Diox coꞌ ndxàp rye loothe conꞌ laꞌs nii no laꞌs yaꞌ. No nac Diox thidte Diox coꞌ ñibeꞌ loo ryethe conꞌ no loo ryethe mèn coꞌ ndeꞌf diꞌs ñibeꞌ, no mèn coꞌ nac chol jef, no loo rye jef bix coꞌ ndeꞌf diꞌs ñibeꞌ.
\v 16 Dioxa nac angoluxte xaꞌ coꞌ neꞌgathte thidtene. No nzo ban Diox loo xnìi coꞌ ndxàꞌx bèel tant axta yende chó mèn li gan bii gax loo xnìi coꞌteꞌ nzo Diox. Nec thìb mèn tarte huiꞌ xá ñaa Diox loo izlyoꞌ ndxèꞌ. Neꞌ neꞌ gác mèn huiꞌ mèn loo Diox loo izlyoꞌ ndxèꞌ. Ndlyazen gab mèn diꞌs guryath no diꞌs guryèn cón cheꞌn Diox loo xtàa mèn. Dioxa ñibeꞌ loo rye loothe conꞌ leꞌn línꞌ coꞌ ntlo no leꞌn línꞌ coꞌ ndxelo no leꞌn línꞌ coꞌ neꞌlith node. Taandxèꞌ gàca.
\p
\v 17 Bnibeꞌ loo chol mèn ric coꞌ naban leꞌn tiemp ndxèꞌ, Timote, par neꞌgàcte mèna arid mèn nateꞌs no mèn naxalꞌ. Neꞌ neꞌ cue quee lezoꞌ mèna loo yalgonꞌ coꞌ lyux loo mèna. Ndxeꞌlequeꞌ, bnibeꞌ loo mèn ric cue quee lezoꞌ mèna loo Diox coꞌ naban thidtene. Tac Diox nac xaꞌ coꞌ ndaꞌ rye loothe conꞌ ndac axta plóthe càa mèn. Diox ndaꞌi loo mèn par tyac lezoꞌ mèn loo conꞌa no par càba conꞌ ndac loo mèn, ne.
\v 18 Bnibeꞌ loo mèn rica leꞌ mèn ric li conꞌ ndac. Más huen gàc mèn rica mèn ric loo conꞌ ndac coꞌ angli mèn rica no angtaꞌlaꞌs mèn ric conꞌ càa mèn prob. No quiꞌth mèn rica cheꞌn mèn rica càa mèn prob.
\v 19 Tataa mod cue nèe mèn rica loo yalnaban ndac coꞌ ndxàal ban mèn par càba conꞌ ndac leꞌn huiz coꞌ nde nque. Tataa mod gàp mèn rica yalnaban thidtene, cheleꞌ mèn rica, lìcqueꞌ, tolo li xal ngue niina lool nalleꞌ.
\s Trèꞌ ngue taꞌ cuent cón cheꞌn lult conꞌ coꞌ ngue ñibeꞌ Pab li Timote.
\p
\v 20 Anderhuenl, Timote, loo ryete conꞌ coꞌ ngue ñibeꞌen lool cón cheꞌn zinꞌ coꞌ mxoꞌf zinꞌ Diox lool ndxèꞌ. Neꞌtaꞌdel lugar par arid tub nzal diꞌs coꞌ yende cón ntac coꞌ nac diꞌs coꞌ nac cón cheꞌn xab izlyoꞌ. Neꞌ neꞌ gàcl mèn coꞌ li cas loo diꞌs coꞌ mbez mèn coꞌ ndeꞌf diꞌs ndxác, per ndxeꞌlequeꞌ, pà gác mèna.
\v 21 Pues, lùu ndaꞌqueꞌ cuent nzo ndxep mèn coꞌ ndoo nque xís mèn gutyèꞌa coꞌ ndeꞌf diꞌs ndxác. No por cona, ngro xàꞌ mèna loo cón cheꞌn Crist coꞌ ndxelaꞌs naꞌ.
\p Ndlyazen leꞌ Diox tolo li anggàc conꞌ ndac lool, Timote. Taandxèꞌ gàca, ndee.