\id 2TI
\ide UTF8
\h 2 TIMOTEO
\toc1 2 TIMOTEO
\mt Mbryop Cart Coꞌ Mqueꞌ Pab Yeꞌs Loo Timote
\c 1
\s Pab ngue queꞌ yeꞌs loo Timote.
\p
\v 1 Daa, Pab, ndxeꞌ diꞌs cheꞌn Jesucrist xal nee lezoꞌ Diox no xalqueꞌ nac conꞌ coꞌ mcàbgòn Diox par yòo ban no mèn Diox thidtene por thidte nqueltàa mèn loo cón cheꞌn Jesucrist.
\v 2 Ngue queꞌen cart ndxèꞌ lool, Timote, lùu coꞌ nac xal xganꞌ daa coꞌ nqueꞌ lezon ñèen. Ndlyazen leꞌ Diox xud naꞌ no Tad Jesucrist naꞌ tolo li anggàc conꞌ ndac lool. Ndlyazen leꞌ Diox xud naꞌ no Tad Jesucrist naꞌ tolo lyat lezoꞌ ñèel. Ndlyazen leꞌ Diox xud naꞌ no Tad Jesucrist naꞌ li par nagàl yo lezoꞌl loo Diox no cue banl rye ndal no rye ndyeꞌthl làth mèn coꞌ ndxàc hues xtàal.
\s Pab ngue luꞌ loo Timote xá mod luꞌ Timote loo mèn cón cheꞌn Crist.
\p
\v 3 Timote, coꞌseꞌ mbezen Diox ze no yálꞌ, siemprqueꞌ nteꞌ lezonl mbezen Diox cón cheꞌnl. No mbezen loo Diox coꞌ ndlin sirv loo xal ndryo yéquen no xal ndryoꞌ lezon coꞌ nac thìb xtùuz nambìi no thìb xtùuz nalì tac yende conꞌ ndenꞌen leꞌn lezon xal mèn coꞌ ndli conꞌ yeꞌrsinꞌ. Ndlin xalqueꞌ ngòc mod coꞌ ngòp xudgool daa póla, ne.
\v 4 Nteꞌqueꞌ lezon xal mbínꞌl láth nxoꞌf zinꞌl cón cheꞌn Jesucrist. No nalleꞌ anzeꞌf nguen lezon ndlyazen ñeen máal par tyac lezon coꞌseꞌ ñèenl.
\v 5 Nteꞌqueꞌ lezonl leꞌ lùu, lìcqueꞌ, ndxelaꞌs loo Crist. Yalndxelaꞌs ndxèꞌ nerlequeꞌ xot lùu, Loida, ngolaꞌs. Ngoloa, ngolaꞌs xnaꞌl, Eunis, ne.
\p
\v 6 Cona, ngue niin lool loo cart ndxèꞌ, Timote: Bli par yeꞌth lezoꞌl no leque lùu ftegán lezoꞌ lùu loo cón cheꞌn zinꞌ coꞌ mxoꞌf zinꞌ Diox lool par lil zinꞌ ndxèꞌ. Diox mbli ndxàca lool anzeꞌf lijer luu par lil zinꞌ coꞌ mxoꞌf zinꞌ Diox lool. Ngòc conꞌa lool coꞌseꞌ ngurezen Diox por lùu no coꞌseꞌ mxoꞌfen yan lool, ne.
\v 7 Huiꞌ, Timote, Diox neꞌnglàade thìb xpii loo naꞌ coꞌseꞌ ngolaꞌs naꞌ par nzyeb naꞌ coꞌseꞌ ndub nguꞌs mèn naꞌ. Ndxeꞌlequeꞌ, Diox mblàa Xpii Natúꞌ loo naꞌ par lyath no Xpii Natúꞌ naꞌ par yòo valor loo naꞌ no par gác naꞌ li naꞌ zinꞌ coꞌ mxoꞌf Diox loo naꞌ par li naꞌ zinꞌa, no par queꞌ lezoꞌ naꞌ ñèe naꞌ xtàa naꞌ, no par gàc naꞌ mèn coꞌ tyoo altant loo zinꞌ coꞌ mxoꞌf zinꞌ Diox loo naꞌ par li naꞌi, no par gàc naꞌ mèn coꞌ ndxàp lezoꞌ thidtene.
\v 8 Por cona, neꞌthyontel taꞌl cuent cón cheꞌn Tad Crist loo mèn. Neꞌ neꞌ thyonl taꞌl cuent cón chenen, ne, xal ngueꞌen leziꞌf trèꞌ por cón cheꞌn Tad Crist. Ndxeꞌlequeꞌ, ftolo fxec yèe loo yaltìi coꞌ ndxàc lool láth ngue taꞌl cuent cón cheꞌn diꞌs ndac coꞌ ndluꞌ cón cheꞌn xá mod lyáꞌ mèn loo conꞌ ryes xalqueꞌ ndli Diox ndxàpl fuerz no valor. Tataa lila xal nac ryethe conꞌ coꞌ mblec Diox laꞌs niil no laꞌs yaꞌl.
\v 9 Diox mteláꞌ naꞌ loo conꞌ ryes. Mdoo Diox naꞌ par xoꞌf zinꞌ naꞌ zinꞌ ndxèꞌ coꞌ inacte cón cheꞌn xab izlyoꞌ. Ndxeꞌlequeꞌ, nac zinꞌ ndxèꞌ cheꞌnpeꞌ Diox. Neꞌ neꞌ inaca por nac naꞌ mèn coꞌ nac anzeꞌf mèn ndac por cona mxoꞌf zinꞌ Diox zinꞌ ndxèꞌ loo naꞌ. Ndxeꞌlequeꞌ, mxoꞌf zinꞌ Diox zinꞌ ndxèꞌ loo naꞌ xal mnibeꞌ Diox lezoꞌ Diox no por tant nqueꞌ lezoꞌ Diox ñèe Diox naꞌ por thidte nqueltàa naꞌ loo cón cheꞌn Crist Jesús. Diox nqueꞌ lezoꞌ ñèe Diox naꞌ axta ndooreꞌ cuec no xènꞌ Diox izlyoꞌ.
\v 10 Per nalleꞌ alanlequeꞌ ndryo xoꞌf loo mèn xá mod ndli Diox anggàc conꞌ ndac loo mèn tac mbiꞌth Tad Jesucrist naꞌ loo izlyoꞌ ndxèꞌ, Jesucrist coꞌ nteláꞌ mèn loo conꞌ ryes. Tad Jesucrist mbli leꞌ coꞌseꞌ gath mèn, mèn coꞌ ndxelaꞌs loo Tad Jesucrist, yende chó conꞌ yeꞌrsinꞌ gàc loo mèna. Más de cona, mblo xoꞌf Crist yalnaban coꞌ nac yalnaban thidtene loo mèn. Mbluꞌ Crist loo naꞌ por cón cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes, mastaleꞌ ndxàc bélꞌyòo lad mèn xluaꞌ mbey no xluaꞌ yòo, mèn coꞌ ndxelaꞌs loo Crist, bélꞌyòo lad mèna neꞌyizaꞌde thidtene. Ndxeꞌlequeꞌ, yiche bélꞌyòo lad mèna par yòo ban no mèna Diox thidtene. Neꞌryo xàꞌde mèn loo Diox thidtene.
\p
\v 11 Por cón cheꞌn diꞌs ndac ndxèꞌ, Diox mdoo daa par tan cuent no tethen cón cheꞌn diꞌs ndac, no par huen diꞌs cheꞌn Crist, no par gàc daa maistr loo chol mèn coꞌ inacte mèn nación Israel cón cheꞌn diꞌs ndac.
\v 12 No por ngon yalbàn cón cheꞌn diꞌs ndac ndxèꞌ ndxàc yaltìi loon. Per mastaleꞌ ndxàc yaltìi loon, thidtene inthyonte daa. Tac daa naneequeꞌ chó loo ndxelazen. No, por derech, naneequen leꞌ Tad Crist ndxàp conꞌ laꞌs nii Tad Crist no laꞌs yaꞌ Tad Crist par quenap Tad Crist daa ned ngue tee xoꞌf zinꞌen zinꞌ ndxèꞌ axta gàc huiz coꞌseꞌ yiꞌth xi Jesucrist mèn coꞌ ndxelaꞌs loo Jesucrist loo izlyoꞌ.
\p
\v 13 Fxoꞌf ndelequeꞌ lezoꞌl no bli xalqueꞌ mbluꞌen lool loo diꞌs coꞌ nac xleyꞌ ndac, Timote. No ftoloqueꞌ que tee ban ndac loo cón cheꞌn Crist Jesús coꞌ ndxelaꞌsl. No ftoloqueꞌ gòc mèn coꞌ nqueꞌ lezoꞌ Diox no fqueꞌqueꞌ lezoꞌ ñèel hues xtàal por thidte nqueltàa guꞌ loo cón cheꞌn Crist.
\v 14 Loo cón cheꞌn diꞌs ndac coꞌ mxoꞌf zinꞌ Diox lool par lila, leque lùu quenap lùu. No nabeꞌste fque tee li xal ñibeꞌ diꞌs ndac ndxèꞌ loo naꞌ no xalqueꞌ ndlyath no Xpii Natúꞌ coꞌ nzo loo ryete naꞌ naꞌ.
\p
\v 15 Lùu naneequeꞌ yende chó mèn coꞌ nac mèn yèezyaꞌ cheꞌn làaz mèn asia nga favor chenen. Ndxeꞌlequeꞌ, làth mèna ngo Figel no ngo Hermog coꞌ más ngocloo gunèe daa.
\v 16 Ndlyazen leꞌ Diox lyat lezoꞌ ñèe Diox mèn guliz Onesifr tac huax vez mbiꞌth tegàl Onesifr lezon par ngo nagàl lezon. No neꞌnthonte Onesifr ngnèe Onesifr mèn por ngueꞌen leziꞌf.
\v 17 Ndxeꞌlequeꞌ, coꞌseꞌ ngo Onesifr ciuda Rom, añenti mcuaꞌn Onesifr daa no mzyal daa loo Onesifr.
\v 18 Timote, lùu nonqueꞌ anzeꞌf mblyath no Onesifr naꞌ coꞌseꞌ ngo naꞌ ciuda Efes. Por cona, ndlyazen lyat lezoꞌ Diox ñèe Diox Onesifr coꞌseꞌ zin huiz coꞌseꞌ tub rez Diox cón cheꞌn mèn.
\c 2
\p
\v 1 Per lùu, Timote, coꞌ nac xal xganꞌpeꞌ daa loon, ftolo bliqueꞌ fuerz par tolo téꞌthl, no taꞌl cuent, no tyubdiꞌsl loo conꞌ coꞌ nac conꞌ ndac coꞌ ngue no naꞌ ante por nzo naꞌ loo Crist Jesús no loo cón cheꞌn Crist Jesús.
\v 2 Ryete conꞌ coꞌ mbìnl cón cheꞌn diꞌs ndac coꞌ mbluꞌen lool no coꞌ mbluꞌen loo huax mèn coꞌ ndaꞌ cuent cón cheꞌn diꞌs ndaca, bluꞌl loo taamas mèn, mèn coꞌ mbli nèe lezoꞌ loo cón cheꞌn Tad Crist par tolo luꞌ mèna cón cheꞌn diꞌsa loo tedib cuaꞌ mèn coꞌ tarte gòn cón cheꞌn diꞌs ndaca.
\p
\v 3 Cona, ngue niin lool, Timote: Fxec yèe fxoꞌf zinꞌ zinꞌ ndxèꞌ con daa loo cón cheꞌn diꞌs ndac cheꞌn Jesucrist xal nxec yèe thìb solndad coꞌ nac thìb solndad ndac coꞌseꞌ nda solndad loo thìb xóꞌ.
\v 4 Nec thìb mèn coꞌ ndxàc solndad yende mod que no mèn coꞌ nac solndad tedib zinꞌ xàꞌ. No neꞌgácte yòo solndad loo chol zinꞌ coꞌ ndli mèn loo izlyoꞌ ndxèꞌ. Ndxeꞌlequeꞌ, solndada naquinqueꞌ tyubdiꞌs loo jef solndad coꞌ ñibeꞌ jef solndad loo solndad.
\v 5 Lomisqueꞌ ne, myenꞌ coꞌ nac myenꞌ deportist, neꞌlide myenꞌ gan cheleꞌ myenꞌ neꞌquithte xal ñibeꞌ librꞌ coꞌ ndluꞌ cón cheꞌn yalguyith loo mèn.
\v 6 Lomisqueꞌ ne, mèn coꞌ ngo bin par thop mèn cosech, mèna nerlequeꞌ hua ndèe no yéth coꞌ taꞌ loo zinꞌ coꞌ mbli mèn loo xyòn mèn.
\v 7 Bìn diꞌs coꞌ ngue niin lool, Timote: Tad Crist xalꞌ xtùuzl no lezoꞌl par tolo taꞌl cuent cón cheꞌn ryete conꞌ coꞌ naquinqueꞌ taꞌl cuent.
\v 8 Fteꞌ lezoꞌ cón cheꞌn Jesucrist coꞌ ngro xban làth mèn nguth, Jesucrist coꞌ nde bin David coꞌ ngòc rey póla. Cón cheꞌn Jesucrist nac diꞌs coꞌ ngon yalbàn loo mèn par non mèn no taꞌ mèn cuent xá mod li mèn par lyáꞌ mèn loo conꞌ ryes.
\v 9 No por cón cheꞌn diꞌs ndac ndxèꞌ nxec yèe daa ndxàc yaltìi loon axta ndub dóꞌ caden niin xal ndub dóꞌ mèn caden nii thìb mbiꞌ coꞌ ndxuth mèn. Per diꞌs ndac coꞌ nac xtiꞌs Diox yende chó mèn gác caꞌ.
\v 10 Cona, ale nxec yèe daa ryete conꞌ coꞌ ndxàc loon por cón cheꞌn mèn coꞌ mcui Diox. Tataa ndlin par gàc lyáꞌ mèn loo conꞌ ryes par yòo ban no mèn Diox thidtene coꞌteꞌ ndxàꞌx xnìi cheꞌn Diox thidtene. Tataa gàc loo mèn por thidte nqueltàa mèn loo cón cheꞌn Crist Jesús.
\v 11 No lìcqueꞌ nac diꞌs coꞌ ngue niin lool ndxèꞌ, Timote:
\pi1 Cheleꞌ naꞌ, lìcqueꞌ, nguth no Crist, coꞌ nee diꞌs, mbláꞌ xàꞌ naꞌ ryethe conꞌ coꞌ nac cón cheꞌn xab izlyoꞌ, leꞌ sya, ban noqueꞌ naꞌ Crist, ne.
\pi1
\v 12 Cheleꞌ naꞌ tyactìi por cón cheꞌn Crist, leꞌ sya, tataaguèꞌ ñibeꞌ no naꞌ Crist, ne. Per cheleꞌ naꞌ cà diꞌs cón cheꞌn Crist, cà diꞌs Crist cón cheꞌn naꞌ, ne.
\pi1
\v 13 Mastaleꞌ neꞌtyalte naꞌ li nèe naꞌ naꞌ loo cón cheꞌn Crist par li naꞌ conꞌ coꞌ ñibeꞌ Crist loo naꞌ, ndxeꞌlequeꞌ, leque Crist li coꞌ mcàbgòn Crist li Crist loo mèn.
\m Per Diox thidtene inquedìide. Neꞌ neꞌ yen mod gab Diox: Neꞌliden con ndxablen lin. Ndxeꞌlequeꞌ, Diox liqueꞌ conꞌ mcàbgòn Diox li Diox loo mèn.
\s Trèꞌ ndluꞌ loo naꞌ cón cheꞌn chó nac thìb xaꞌ coꞌ nqueꞌ zinꞌ ndac loo cón cheꞌn Tad Crist.
\p
\v 14 Bliqueꞌ par teꞌ lezoꞌ mèn xal nac diꞌs coꞌ ngue niin lool ndxèꞌ. Bnibeꞌ loo mèn loo Tad Diox ya neꞌtolode yoo diꞌs mèn cón cheꞌn conꞌ coꞌ yende cón ntac par mèna par tataa mod tolo yòo yéc mèna loo cón cheꞌn Tad Crist. Tac ale leꞌleꞌ ndli diꞌsa no cuenta par ndxos xtùuz mèn no ndyoo xàꞌ lezoꞌ mèn coꞌseꞌ ndxòn mèn cón cheꞌn diꞌs ndac cheꞌn Crist.
\v 15 Bli coꞌ nzote mod lil par luꞌl loo Diox xalqueꞌ thìb mbiꞌ zinꞌ coꞌ indxetoode loo zinꞌ coꞌ ndxác mbiꞌ ndli mbiꞌ coꞌ nac xal thìb mbiꞌ coꞌ inthyonte loo zinꞌ coꞌ ndli mbiꞌ, coꞌ nee diꞌs, nambìiqueꞌ no nalìqueꞌ blo yalbàn no luꞌ cón cheꞌn diꞌs ndac cón cheꞌn Crist coꞌ nac lìcpeꞌ loo mèn. Yende chó mport nzo lezoꞌl ñèel mèna, ndee, Timote.
\v 16 Nee xá ngue teel, Timote. Neꞌtaꞌdel lugar tyoodiꞌsl diꞌs zab no diꞌs cap xal ndyoodiꞌs mèn coꞌ alithe nzi ban loo cón cheꞌn xab izlyoꞌ, diꞌs coꞌ yende cón ntac. Tac mèn coꞌ tataa ndyoodiꞌs, mèna ndli xal mèn coꞌ ndxeziꞌf loo conꞌ ryes par tolo li mèna más conꞌ yeꞌrsinꞌ.
\v 17 Diꞌs coꞌ ndyoodiꞌs mèna anzeꞌf nazab ndyoodiꞌs mèna par ntezaꞌ mèna xtùuz xtàa mèna xal nac thìb yóꞌf coꞌ ndub yas lad mèn. Làth mèn coꞌ tataa ndyoodiꞌs nzo Mene no Filet.
\v 18 Mene ryop Filet mdoo xàꞌ lezoꞌ loo conꞌ coꞌ nac lìcpeꞌ. Mbez Mene ryop Filet ale nguriꞌthleꞌ tiemp coꞌ nac tiemp coꞌseꞌ ryo xban mèn. Tataa mod ntesèn Mene ryop Filet no ntezaꞌ Mene no Filet xtùuz ndxep mèn coꞌ ndxelaꞌs loo Crist.
\v 19 Per mastaleꞌ tataa mbez ryop mbiꞌa, mèn coꞌ nzo loo cón cheꞌn Diox por cón cheꞌn Crist, mèn coꞌ nqueltàa chol lugar, mèna nzi nèe loo cón cheꞌn Diox xal thìb cimient coꞌ mblec Diox coꞌ yende chó cuin no coꞌ yende chó coꞌ. Diox gunii chop diꞌs cón cheꞌn mèn coꞌ ndxelaꞌsa. Diꞌsa nac xal thìb sell coꞌ ndluꞌ cón cheꞌn mèna. Diꞌsa nee diꞌs Tad Diox ndlibeꞌqueꞌ mèn coꞌ nac cheꞌnpeꞌ Tad Diox. Thìba conꞌ ndxèꞌ.
\p Leꞌ tediba naꞌ, diꞌsa mbez, ne: Ryete mèn coꞌ mbez lèe Crist no coꞌ nacpeꞌ cheꞌn Crist nquin ryo xàꞌ mèna loo rye loothe conꞌ yeꞌrsinꞌ.
\v 20 Coꞌteꞌ nac thìb liz roo mèn nzo chop ned trast coꞌ ndli zinꞌ mèn. Thìb neda nacsuaꞌ con or no con plat. Leꞌ tedib neda na, nacsuaꞌ con yaa no con yòo cuanꞌ. Ner ned trast coꞌ nacsuaꞌ con or no con plat ndli zinꞌ mèn loo zinꞌ coꞌ nac zinꞌ nambìilaꞌs. Leꞌ tedib ned trast coꞌ nacsuaꞌ con yaa no con yòo cuanꞌ, trasta ndli zinꞌ mèna loo zinꞌ coꞌ nac zinꞌ nazablaꞌs.
\v 21 Diꞌs ndxèꞌ ndaꞌ cuent loo mèn cheleꞌ chol mèn ryo xàꞌ loo chol mèn yeꞌrsinꞌa no loo chol conꞌ yeꞌrsinꞌ, gàc mèna loo Crist xal trast coꞌ li zinꞌ gundan coꞌ ñibeꞌ yòo rooa loo conꞌ guryath no loo conꞌ guryèn cón cheꞌn gundana. No gàc mèna xal thìb trast coꞌ ngro xàꞌ loo chol zinꞌ coꞌ nac zinꞌ nazablaꞌs par ngòc nab mèna loo chol zinꞌ ndac cón cheꞌn Crist.
\p
\v 22 Neꞌsálꞌtel cón chol myenꞌbiꞌ coꞌseꞌ lyaꞌs myenꞌbiꞌa chòo myenꞌbiꞌa lùu par ya nol myenꞌ par li myenꞌ chol conꞌ yeꞌrsinꞌ. Fque tee ban nalì no nambìi. Gòp yalxlaꞌs loo Crist. Fqueꞌ lezoꞌ loo Diox no fqueꞌ lezoꞌ gunèe hues xtàal. Blo nagàl lezoꞌl con rye mèn coꞌ dib nzo yéc no con rye mèn coꞌ dib nzo lezoꞌ mbez lèe Crist.
\v 23 Neꞌqueltàadel no neꞌ neꞌ gònl cón cheꞌn mèn coꞌ nque diꞌs cón cheꞌn conꞌ coꞌ intacte. Tac lùu nanee leꞌi ncàb yalgyoo loo mèn.
\v 24 Mèn coꞌ nac mèn coꞌ nxoꞌf zinꞌ zinꞌ cheꞌn Tad Crist, mèna indxàalte que diꞌs con xtàa mèn. Ndxeꞌlequeꞌ, gàc mèna mèn nadoꞌ loo rye mèn. Gàc mèna mèn nalas no gàc mèna mèn coꞌ nchaꞌlaꞌs par luꞌ mèna xtàa mèn.
\v 25 Nadoꞌ diꞌs nadoꞌ cuent bcoꞌx no gunii loo mèn coꞌ gápleꞌqueꞌ ncàb lool. Neꞌstolqueꞌ, Diox taꞌ lugar lyàa yéc mèna no lyàa lezoꞌ mèna par libeꞌ mèna coꞌ nac coꞌ lìcpeꞌ cón cheꞌn Crist.
\v 26 Leꞌ sya, tataa mod neꞌstolqueꞌ lyáꞌ mèna loo rye loote conꞌ coꞌ nac cheꞌn Mebizya coꞌ nac xal thìb las coꞌteꞌ ndxegàa mèn par ndxeꞌslequeꞌ que tee mèna. Mèna ngòc mèn coꞌ mdyoo dóꞌ nii no coꞌ mdyoo dóꞌ yaꞌ loo Mebizya par mbli mèna xal gunee lezoꞌ Mebizya.
\c 3
\s Trèꞌ ndluꞌ loo naꞌ xá mod gàc mèn leꞌn lult huiz coꞌ nde nque.
\p
\v 1 Ndlyazen nonl conꞌ ndxèꞌ ne, Timote, leꞌ leꞌn tiemp coꞌ gàc lult tiemp loo izlyoꞌ ndxèꞌ, gàc tiemp coꞌ gàc conꞌ ryes loo mèn.
\v 2 Tac tiempa ban mèn coꞌ anzeꞌf tyeꞌs tínꞌ con mod coꞌ ndxàp mèn. Gàc mèna mèn coꞌ nde yath ñèe tmi. Gàc mèna mèn nateꞌs. Gàc mèna mèn nalaꞌs no leque mèna gab nac mèna mèn tínꞌ. Gàc mèna mèn coꞌ ñii yèe ñii tìi cón cheꞌn Diox loo xtàa mèn. Neꞌtyubdiꞌste mèn loo xud mèn no loo xnaꞌ mèn. Gàc mèna mèn naxin loo xtàa mèn. Gàc mèna mèn coꞌ thidtene neꞌlide cas loo Diox.
\v 3 Gàc mèna mèn coꞌ neꞌqueꞌde lezoꞌ ñèe xtàa. Gàc mèna mèn coꞌ thidtene ngue tee nayiꞌ lezoꞌ. Gàc mèna mèn coꞌ yáp diꞌs no mèn coꞌ ncuaꞌn diꞌs loo xtàa mèn. Gàc mèna mèn coꞌ thidtene indyóode cón cheꞌnpeꞌ mèn. Gàc mèna mèn brut thidtene. No gàc mèna ngolo ngolaꞌs loo ryethe conꞌ coꞌ nac conꞌ ndac.
\v 4 Gàc mèna mèn coꞌ taꞌxùꞌ xtàa loo mèn. Gàc mèna mèn coꞌ indyóode loo conꞌ nateꞌs coꞌ ngue li mèna. Gàc mèna mèn coꞌ anzeꞌf ndyeꞌs loo xtùuz coꞌ ndli mèn. Más ndxòo yéc mèna ncuaꞌn mèna coꞌ ndryoꞌ ndlyenꞌ lezoꞌ mèna coꞌ nac yalgonꞌ cón cheꞌn xab izlyoꞌ par tataa mod tyac lezoꞌ mèna leque yòo yéc mèna cuaꞌn mèna conꞌ coꞌ nac cón cheꞌn Diox.
\v 5 Mèna mbez loo taamas mèn leꞌ mèna ndyubdiꞌs loo Diox no nac mèna mèn coꞌ ndli cas loo Diox. Per ale ndxeꞌlequeꞌ, indxelaꞌste mèna loo Diox. Por cona, indlyath node Diox mèna. Neꞌ neꞌ indluꞌ mèna leꞌ mèna, lìcqueꞌ, nac mèn coꞌ ndxelaꞌs loo Diox. Yende chó mport nzo lezoꞌl ñèel mèna, Timote.
\v 6 Tac làth mèna nzo mèn coꞌ ndxòo liz mèn coꞌteꞌ nzo myenꞌgot naxèn coꞌ ncuaꞌn xquin. Thidte ndxàc mèna con myenꞌgota par thidte ncuaꞌn ryop ned mèna xquin mèna xal ndryoꞌ ndlyenꞌ lezoꞌ mèna li mèna.
\v 7 Myenꞌgota más ndyub nza loo chol conꞌ cub coꞌ ndluꞌ chol mèn loo myenꞌgota par téꞌth myenꞌgota chol conꞌ yeꞌrsinꞌ. No tolo ndxàc loo myenꞌgota thidtenequeꞌ neꞌgácte myenꞌgota taꞌ myenꞌgota cuent cón nac conꞌ lìcpeꞌ coꞌ nac cón cheꞌn Diox.
\v 8 Lomisqueꞌ, xal mbli Janes no Jambres coꞌ mcà diꞌs loo Moisés, tataaqueꞌ ndli mèna par cà diꞌs mèna loo ryethe conꞌ coꞌ nac lìcpeꞌ. Nac mèna mèn coꞌ ngue no xtùuz xin no xtùuz cap. No nac mèna mèn naad no mèn nguud. Yende chó juis mèna loo cón cheꞌn coꞌ ndxelaꞌs naꞌ loo Crist.
\v 9 Per neꞌyade mèna arid tith loo conꞌ yeꞌrsinꞌ coꞌ ngue li mèna tac ryete conꞌ naxèn no conꞌ nacholꞌ coꞌ ndli mèna xtùuz, leꞌi ryo xoꞌf loo rye mèn xal ngro xoꞌf ryete conꞌ xin no conꞌ cap coꞌ mbli Janes no coꞌ mbli Jambres.
\s Trèꞌ ngue taꞌ cuent cón cheꞌn lult conꞌ coꞌ ngue ñibeꞌ Pab par li Timote.
\p
\v 10 Per ndxeꞌlequeꞌ, lùu ngue tee liqueꞌ conꞌ ndac coꞌ nac coꞌ mbluꞌen lool loo xleyꞌ daa. No ngue tee ban lùu xal nque tee ban daa. No ndlil ryete conꞌ coꞌ ndoo lezon ndlin loo cón cheꞌn Crist. Naneequeꞌl xal ndxelazen loo Crist. Nxec yèel xal nxec yèen loo zinꞌ coꞌ mxoꞌf zinꞌ Diox loon par lina. Nqueꞌqueꞌ lezoꞌl Diox no nqueꞌqueꞌ lezoꞌl ñèel mèn xal nqueꞌ lezon Diox no xal nqueꞌ lezon ñèen mèn, ne. Nchaꞌlaꞌsl loo mèn no nxecl loo conꞌ ndxàc lool xal nchaꞌlazen no nxec yèen loo conꞌ ndxàc loon.
\v 11 Lùu nonqueꞌ ryete yalndyub nguꞌs no ryete yaltìi coꞌ ngòc loon leꞌn yèez Antioqui, no leꞌn yèez Icon, no leꞌn yèez Listr. Lùu mbìnleꞌ cón cheꞌn ryethe conꞌ coꞌ mxec yèen huax lugar. Loo ryete conꞌa mteláꞌ Tad Crist daa.
\v 12 Lìcqueꞌ naca leꞌ ryete mèn coꞌ lyaꞌs ryo xàꞌ loo cón cheꞌn xab izlyoꞌ no coꞌ lyaꞌs que tee ban li cas loo Crist Jesús no loo cón cheꞌn Crist Jesús, mèna tub nguꞌsqueꞌ mèn.
\v 13 Per mèn coꞌ nac mèn yeꞌrsinꞌtúb sate más tolo li mèna conꞌ xin no conꞌ cap. Leꞌleꞌ quedìi mèna taamas mèn. No leꞌleꞌ quedìi taamas mèn mèna.
\p
\v 14 Per nalleꞌ ngue niin lool, Timote: Leque lùu bli nèe lùu loo conꞌ coꞌ mtéꞌthl no loo conꞌ mdyall ngòpl yalxlaꞌs lìcpeꞌ naca. Lùu naneequeꞌ no nonqueꞌl chó loo mtéꞌthl conꞌ ndxèꞌ, ¿léꞌ?
\v 15 Tac axta chuꞌthl no axta huiz coꞌseꞌ mtlo mdoo rool no ndoo xènl mtéꞌthl no ngócl ndlabl libr coꞌ nac xtiꞌs Diox. Loo libr coꞌ nac xtiꞌs Diox mtéꞌthl no mdaꞌl cuent xá mod lyáꞌ mèn loo conꞌ ryes par gàc mèna mèn coꞌ ndxác cón cheꞌn xá mod ndxelaꞌs naꞌ, coꞌ nee diꞌs, ndlyáꞌ mèn loo conꞌ yeꞌrsinꞌ coꞌseꞌ ndxelaꞌs mèn loo Crist Jesús.
\v 16 Xpii Natúꞌ ndlyath no mèn coꞌseꞌ mqueꞌ mèna yeꞌs xal mblobeꞌ no mtoxcuaꞌ Diox no xal mnibeꞌ Diox loo lezoꞌ Diox par mbyanꞌ libr coꞌ nac xtiꞌspeꞌ Diox. Anzeꞌf ntac libr coꞌ nac xtiꞌs Diox ndxèꞌ par luꞌ naꞌ cón cheꞌn Diox loo mèn, no par yoo Diox mèn loo xtiꞌs Diox, no par gàca leꞌ coꞌseꞌ lab mèn xtiꞌs Diox, telì Diox xtùuz mèn no par gàca luꞌ Diox xá mod que tee ban lì mèn loo Diox.
\v 17 Cheleꞌ mèn li xal ñibeꞌ xtiꞌs Diox, sya, gàc mèn mèn coꞌ ndxác tínꞌ. No li mèn rye conꞌ ndac coꞌ neete lezoꞌ Diox.
\c 4
\p
\v 1 Loo Diox, no loo Tad Jesucrist naꞌ coꞌ yiꞌth ñibeꞌ xal rey loo izlyoꞌ loo mèn no coꞌ tub rez loo mèn coꞌ nzi naban, no loo mèn coꞌ nguth coꞌseꞌ yúꞌ loo Jesucrist loo mèn, tolo ndlyazen no ñibeꞌen lool, Timote:
\v 2 Leꞌ lùu taꞌ cuent no col yalbàn cón cheꞌn diꞌs ndac cheꞌn Diox loo mèn. Altant tyool par col yalbàn loo mèn, que naca ndyaqueꞌl tyal mèn taꞌ mèn nza mèn par gòn mèn cón cheꞌn diꞌs ndac cheꞌn Diox, que naca ndyaqueꞌl neꞌtyalte mèn taꞌ mèn nza mèn par gòn mèn cón cheꞌn diꞌs ndac cheꞌn Diox. Nadoꞌ diꞌs nadoꞌ cuent gunii loo mèn xal ñibeꞌ xtiꞌs Diox. Fcoꞌx loo mèn xal mbez diꞌs ndac. Fchaꞌlaꞌs loo mèn. Làth xtauꞌa, fteꞌth no bluꞌ loo mèn cón cheꞌn Crist xal nac diꞌs ndac cheꞌn Diox.
\v 3 Tac zin thìb huiz no zin thìb ze coꞌseꞌ, por derech, neꞌtyalte mèna gòn mèn no neꞌxecte mèn diꞌs coꞌseꞌ lyaꞌs mèn luꞌ mèn xleyꞌ ndac cheꞌn xtiꞌs Diox loo mèna. Ndxeꞌlequeꞌ, làth xtauꞌa, con mod yeꞌrsinꞌ coꞌ nac mèn, tlo mèna, nalas cuaꞌn mèna mèn coꞌ luꞌ chol xleyꞌ cub loo mèna xal ndlyaꞌs mèna gòn mèna.
\v 4 Lìcpeꞌ baꞌi, ndxeꞌlequeꞌ, tyoo xàꞌ lezoꞌ mèna loo coꞌ nac lìcpeꞌ. Neꞌlide mèn cas loo conꞌ lìcpeꞌ. Sya, bere mèna, más tyub nza mèna loo chol diꞌs coꞌ nac chol cuent coꞌ intacte par yilaꞌs mèna cuenta.
\v 5 Per lùu, Timote, ndxeꞌlequeꞌ, nalas no ndxeꞌslequeꞌ fque tee ban loo ryete conꞌ. Fxec yèe coꞌseꞌ gàc chol yaltìi lool. Thidtenequeꞌ fxoꞌf zinꞌ zinꞌ coꞌ col yalbàn cón cheꞌn diꞌs ndac coꞌ ndluꞌ xá mod lyáꞌ mèn loo conꞌ ryes. Ftoo altant loo zinꞌ coꞌ mxoꞌf zinꞌ Diox lool par telo lùu zinꞌ coꞌ mxoꞌf zinꞌ Diox lool.
\p
\v 6 Yamerleꞌ zin huiz coꞌseꞌ xyo ren daa, coꞌ nee diꞌs, yamerleꞌ zin huiz coꞌseꞌ angndoon guth mèn daa xal nee lezoꞌ Diox.
\v 7 Tac loo zinꞌ coꞌ mxoꞌf zinꞌ Diox loon par lina, ngòc daa xal thìb solndad coꞌ huenlequeꞌ mque tee loo xóꞌ. Mtelolen zinꞌ coꞌ mxoꞌf zinꞌ Diox loon xal thìb mbiꞌ coꞌ mbli gan loo carre loo thìb puest. Thidtenequeꞌ ngòpen yalxlaꞌs loo cón cheꞌn Crist.
\v 8 Más de cona, daa ndub queequeꞌ lezoꞌ gòon loo Diox coꞌteꞌ taꞌ Diox thìb conꞌ ndac loon coꞌ gàc cheꞌnpeꞌ daa tac daa mque tee ban nalì no nambìi loo Diox. Per iante loon taꞌ Diox conꞌ ndaca huiza. Ndxeꞌlequeꞌ, Diox taꞌ conꞌ ndac loo ryete mèn coꞌ anzeꞌf nguen lezoꞌ yiꞌth Crist tedib vez loo izlyoꞌ ndxèꞌ, ne. Coꞌseꞌ yiꞌth Tad Crist, nalì tub rez Tad Crist loo ryete mèn coꞌseꞌ gàc huiza.
\s Lult mod coꞌ lyath no Timote Pab.
\p
\v 9 Bli purad par setilte yiꞌth neel máa daa, Timote.
\v 10 Dem thidtene mbláꞌyaꞌ daa. Más ndxòo lezoꞌ Dem conꞌ coꞌ nac cón cheꞌn xab izlyoꞌ leꞌn tiemp ndxèꞌ leque cón cheꞌn Crist. No nalleꞌ mxenleꞌ Dem ned, nda Dem par ciuda Tesalónica. Leꞌ Cresent na, mtelꞌen nda thìb mandad par leꞌn yèezyaꞌ cheꞌn làaz mèn galacia. Leꞌ Tit na, mtelꞌen nda tedib mandad par ned leꞌn yèezyaꞌ cheꞌn làaz mèn dalmacia.
\v 11 Thidte Luc nzo no daa trèꞌ. Fcuaꞌn Marc par yiꞌth nol Marc coꞌteꞌ nzon. Marc ndlyath no daa loo zinꞌ coꞌ mxoꞌf zinꞌ Diox loon.
\v 12 Daa mtelꞌ Tiquic par ciuda Efes.
\v 13 Coꞌseꞌ yiꞌthl, lil favor, yiꞌth nol capot daa coꞌ mtanꞌen liz Carp yèez Tro. Yiꞌth nol libr daa, ne. Per conꞌ coꞌ más naquin daa nac yeꞌs coꞌ nac xqueꞌspeꞌ daa. Bli favor, teꞌ lezoꞌl yeꞌth nol yeꞌs daa, ndee, Timote.
\p
\v 14 Alejandr coꞌ nac xaꞌ guziꞌf mbli huax conꞌ yeꞌrsinꞌ loon. Per Diox quix loo Alejandr rye conꞌ mbli no Alejandr daa.
\v 15 Nee nee xá ngue teel loo Alejandr. Tac Alejandr axta arid mcuaꞌn mod par mcaꞌ Alejandr loon coꞌseꞌ ngue tan cuent no ngue toodizen cón cheꞌn diꞌs ndac loo mèn.
\p
\v 16 Ner vez coꞌseꞌ mduben razon daa loo mèn, nalì mdan cuent cón cheꞌn diꞌs ndac loo mèn. No yende chó mèn mblyath no daa tiempa. Ndxeꞌlequeꞌ, mbláꞌyaꞌ ryete mèna daa. ¡Oj neꞌqueꞌ dolte Diox loo mèna por conꞌ coꞌ mbli no mèna daa, huen!
\v 17 Per ndxeꞌlequeꞌ, Crist ndlyath no daa. Mblo Crist valor loon par taan zinꞌ coꞌ mxoꞌf zinꞌ Diox loon coꞌ mblon yalbàn. No ryete mèn coꞌ inacte mèn nación Israel mbìn cón cheꞌn diꞌs ndac cheꞌn Diox ned mque teeꞌen. Por cona, naneen no nonen mteláꞌ Diox daa loo conꞌ ryes làth xtauꞌa.
\v 18 Naneen no nonen leꞌ Crist teláꞌqueꞌ daa loo ryete conꞌ ryes coꞌ lyaꞌs mèn li no mèn daa. Neequen no nonen leꞌ Crist nquenap daa axta zin huiz coꞌseꞌ tlo Crist, ñibeꞌ Crist loo béꞌ no loo izlyoꞌ. Loo Crist gàc conꞌ roo no conꞌ xèn leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node thidtene. Taandxèꞌ gàca.
\s Lult diꞌs coꞌ mqueꞌ Pab yeꞌs loo cart ndxèꞌ.
\p
\v 19 Timote, gunii Diox loo Prisc no loo Aquil no loo mèn guliz Onesifr.
\v 20 Erast mtanꞌen ciuda Corint. Leꞌ Trofim na, mtanꞌen yèez Milet tac ale ngulen liz Trofim.
\v 21 Bli purad yiꞌth neel máa daa ndooreꞌ yòo naꞌ tiemp xìlꞌ. Ebul ngue nii Diox lool. Pudent, no Lin, no xaꞌgot coꞌ lèe Claud, no ryete taamas mèn coꞌ ndxàc hues naꞌ por cón cheꞌn Crist coꞌ nzo trèꞌ coꞌteꞌ nzon ngue nii Diox lool, ne.
\v 22 Tad Jesucrist nque tee noqueꞌl, Timote. Ndlyazen leꞌ Tad Jesucrist tolo li anggàc conꞌ ndac loo ryete guꞌ coꞌteꞌ nzo guꞌ nedrèꞌ. Taandxèꞌ gàca.