\id TIT
\ide UTF8
\h TITO
\toc1 TITO
\mt Cart Coꞌ Mqueꞌ Pab Yeꞌs Loo Tit
\c 1
\s Pab ngue queꞌ yeꞌs loo Tit.
\p
\v 1 Daa, Pab, nac thìb mbiꞌ coꞌ nxoꞌf zinꞌ cón cheꞌn Diox par ndxen diꞌs cheꞌn Jesucrist coꞌ ngon yalbàn loo mèn par tolo leque mèn li nèe mèn no tolo téꞌth mèn cón cheꞌn Jesucrist, mèn coꞌ ndxelaꞌs loo cón cheꞌn Diox, mèn coꞌ Diox mcui, coꞌ nee diꞌs, mtelꞌ Diox daa par non mèn no nanee mèn lìcqueꞌ nac coꞌ ndxelaꞌs naꞌ loo Crist tac naꞌ nzi tee liqueꞌ cas loo Diox.
\v 2 Nzi tee liqueꞌ naꞌ cas loo Diox tac nzi quee lezoꞌ naꞌ yòo ban no naꞌ Diox loo béꞌ coꞌ gàc loo naꞌ. Cón cheꞌn yalnabana, Diox mcàbgòna loo Jesucrist par taꞌ Diox yalnabana thidtene loo mèn ndooreꞌ tlo línꞌ coꞌ ntlo, no línꞌ coꞌ ndxelo, no línꞌ coꞌ neꞌlith node. Yende mod tyèꞌ Diox cón cheꞌn diꞌs coꞌ gunii Diox.
\v 3 Coꞌseꞌ ngòc tiemp coꞌ mblobeꞌ no mtoxcuaꞌ Diox par co xoꞌf Diox cón cheꞌn diꞌs ndac, mbli Diox par non mèn no nanee mèn cón cheꞌn diꞌs ndaca. Diox coꞌ nteláꞌ mèn loo conꞌ ryes, Diox mxoꞌf zinꞌ zinꞌ ndxèꞌ loon par tan cuent no gon yalbàn loo mèn xal mnibeꞌ Diox loon.
\v 4 Daa, Pab, ngue queꞌen yeꞌs ndxèꞌ lool, Tit, lùu coꞌ nac xal xganꞌpeꞌ daa loo coꞌ ndxelaꞌs naꞌ. Ndlyazen leꞌ Diox xud naꞌ no Tad Jesucrist naꞌ coꞌ mteláꞌ naꞌ loo conꞌ ryes li anggàc conꞌ ndac lool. Ndlyazen, ne, nagàl yo lezoꞌl loo Diox no que tee banl rye ndal no rye ndyeꞌthl làth xtàal.
\s Trèꞌ ngue luꞌ xá mod mxoꞌf zinꞌ Tit zinꞌ cón cheꞌn Crist loo mèn leꞌn thìb yòo biiz leꞌn níttóꞌ coꞌ lèe Cret.
\p
\v 5 Lùu ndaꞌqueꞌ cuent cón cheꞌn conꞌ coꞌ ngue ñibeꞌen lool ndxèꞌ, Tit. Mtanꞌen lùu leꞌn yòo biiz coꞌ lèe Cret par luꞌl loo mèna xá mod ndxàal li mèna no par cuecl thìb ned mèngool loo mèn coꞌ nqueltàa loo cón cheꞌn Diox por cón cheꞌn Crist leꞌn rye ciuda cheꞌn yòo biiz Cret.
\v 6 Bnibeꞌ leꞌ mèngoola gàc mèn coꞌ yende chó mèn quexùꞌ. Gàc mèngoola saꞌl thidte xaꞌgot. Gàc mèngoola mèn coꞌ ngue no xinꞌ coꞌ ndxelaꞌs loo Tad Crist, myenꞌ coꞌ nzi tee nalì, coꞌ inacte mèn coꞌ indyóode cón cheꞌnpeꞌ mèna, no coꞌ inacte mèn naad no mèn nguud.
\v 7 Tac ndxàal gàca leꞌ mèngool coꞌ tyoo ner no coꞌ tyoo naa loo mèn coꞌ nqueltàa loo cón cheꞌn Diox por cón cheꞌn Crist gàc mèna mèn coꞌ yende chó mèn quexùꞌ tac mèngoola, lìcqueꞌ, tyoo ner no tyoo naa loo cón cheꞌnpeꞌ Diox. Neꞌgàcte mèngoola mèn coꞌ li coꞌ neete lezoꞌ mèna. Neꞌgàcte mèngoola mèn coꞌ setilte nsoꞌ yéc. Gàc mèngoola mèn coꞌ indxòode lezoꞌ arid nítguy. Gàc mèngoola mèn coꞌ neꞌyáp diꞌste no mèn coꞌ neꞌncuaꞌnte diꞌs. Gàc mèngoola mèn coꞌ indli huanꞌte loo xnaa coꞌseꞌ ndiꞌ mèn no coꞌseꞌ nthoꞌ mèn, coꞌ nee diꞌs, ngo mèn máꞌ xiꞌtha par xexte li mèn gan tmi loo xtàa mèn.
\v 8 Ndxeꞌlequeꞌ, gàc mèngoola mèn coꞌ taꞌ posad loo chol mèn tith. Gàc mèngoola mèn coꞌ queꞌ lezoꞌ ante loo conꞌ ndac. Gàc mèngoola mèn coꞌ altant ndyoo loo cón cheꞌn zinꞌ coꞌ ndli mèna. Gàc mèna mèn nambìi no mèn nalì loo Diox. Gàc mèna mèn coꞌ yòo lezoꞌ Diox ñèe Diox. Gàc mèna mèn coꞌ mtéꞌth coꞌ huenlequeꞌ par ante ndoo lezoꞌ mèna li mèna conꞌ ndac.
\v 9 Gàc mèngoola mèn coꞌ ndluꞌ no coꞌ nquenap diꞌs coꞌ nac diꞌs lìcpeꞌ coꞌ nac xal ñibeꞌ xleyꞌ cheꞌn Diox par gác mèngoola coꞌx mèngoola con diꞌs coꞌ nac xleyꞌ ndac cheꞌn Diox. Tataa mod li mèngoola gan loo mèn coꞌ ñii yèe ñii tìi cón cheꞌn Diox.
\v 10 Tac huax mèn nzo coꞌ nac mèn naad no mèn nguud coꞌ ñii yèe ñii tìi loo cón cheꞌn Diox no mèn coꞌ alithe ndyoodiꞌs chol diꞌs no mèn gutyèꞌ coꞌ nquedìi xtàa. Mèna nac mèn coꞌ ngue no yalndxelaꞌs cheꞌn circuncisión, coꞌ nee diꞌs, nac mèna mèn nación Israel.
\v 11 Bnibeꞌ loo mèngoola par tauꞌ mèngoola ro mèna no neꞌtyoodiꞌste mèna más xal nac mod coꞌ ndyoodiꞌs mèna xal niin lool ndxèꞌ. Tac mèn coꞌ ndxelaꞌs loo yalndxelaꞌs cheꞌn circuncisión ante ngue tee tezaꞌ loo mèn huax liz mèn loo coꞌ nac coꞌ ndxelaꞌs mèn. Ndluꞌ mèn cheꞌn yalndxelaꞌs cheꞌn circuncisión conꞌ coꞌ indxàalte luꞌ mèn. Mastaleꞌ ndxàal thyon mèna, per ndxeꞌlequeꞌ, thidtene inthyonte mèna ngue li mèna gan tmi tataa mod.
\v 12 Tac ndxàca xal ndxab thìb mbiꞌ coꞌ nac leque mèn yòo biiz Cret coꞌ mdeꞌth diꞌs cón cheꞌn mèn yòo biiz Cret. Ndxab mbiꞌ: Mèn yòo biiz Cret nac mèn gutyèꞌ. Nac mèna mèn brut xal máꞌ. Ante ndoo lezoꞌ mèna ndxuhuachoꞌ mèna no ndxàc yíizhuach loo mèna, coꞌ nee diꞌs, mèn zaꞌf mèna.
\v 13 Diꞌs coꞌ mdeꞌth mbiꞌ coꞌ nac mèn yòo biiz Cret cón cheꞌn xtàa mbiꞌa nac lìcpeꞌ. Por cona, negadiꞌs byoo mèna, por derech, par gàc mèna mèn coꞌ nque tee ndac no coꞌ nque tee nalì loo conꞌ coꞌ ndxelaꞌs naꞌ loo Crist.
\v 14 Tataa bli par neꞌtyub nzade mèna loo chol cuentgox cheꞌn mèn coꞌ ncà diꞌs no coꞌ nchep diꞌs loo conꞌ coꞌ nac lìcpeꞌ.
\v 15 Ryete conꞌ nambìi no nalì nac loo mèn coꞌ nac mèn nalì no mèn nambìi loo Diox. Per loo mèn zab no loo mèn coꞌ indxelaꞌste loo cón cheꞌn Diox por cón cheꞌn Crist, yende chó conꞌ nambìi nac nambìi loo mèna. Ndxeꞌlequeꞌ, xtùuz mèna no coꞌ ndenꞌ mèna leꞌn lezoꞌ mèna coꞌseꞌ ndli mèn xtùuz nac conꞌ zab.
\p
\v 16 Mbez mèna, lìcqueꞌ, ndlibeꞌ mèna merpeꞌ Diox. Per ndxeꞌlequeꞌ, rye conꞌ zab coꞌ ndli mèna ngue luꞌ leꞌ mèna ncà diꞌs no chep diꞌs mèna cón cheꞌn Diox. Nac mèna mèn xin no mèn cap, mèn naad no mèn nguud. Yende chó juis mèna par li mèna chol conꞌ ndac.
\c 2
\s Trèꞌ ndluꞌ cón cheꞌn xleyꞌ ndac.
\p
\v 1 Per ndxeꞌlequeꞌ, lùu, Tit, bluꞌ no ftoodiꞌs cón cheꞌn xleyꞌ ndac coꞌseꞌ tyoodiꞌs nol mèn.
\v 2 Bnibeꞌ yo nagàl lezoꞌ mènbiꞌgoola loo xtàa mènbiꞌgoola no gàp mènbiꞌgoola mod. Gàc mènbiꞌgoola mèn coꞌ quix xnìi lezoꞌ no coꞌ tyoo altant loo zinꞌ coꞌ ngue li mènbiꞌgoola. Gàc mènbiꞌgoola mèn coꞌ, lìcqueꞌ, ndxelaꞌs loo Crist. Gàc mènbiꞌgoola mèn coꞌ nqueꞌ lezoꞌ Diox no coꞌ nqueꞌ lezoꞌ ñèe xtàa mènbiꞌgoola. Gàc mènbiꞌgoola mèn coꞌ nchaꞌlaꞌs no mèn coꞌ nxec yèe loo cón cheꞌn xtàa mènbiꞌgoola.
\v 3 Lomisqueꞌ, bnibeꞌ loo mèngotgool que tee gàp mèngotgoola mod loo xtàa mèngotgool axta gab mèn cón cheꞌn mèngotgoola: Lìcqueꞌ, ndli mèngotgool baꞌ cas loo Diox, ndee. Neꞌgàcte mèngotgoola mèn coꞌ yáp diꞌs no mèn coꞌ ncuaꞌn diꞌs làth chol mèn. Neꞌgàcte mèngotgoola arid mènguy loo nítguy. Ndxeꞌlequeꞌ, gàc mèngotgoola mèngot coꞌ ndluꞌ ryethe conꞌ coꞌ nac conꞌ ndac loo mèn.
\v 4 Bnibeꞌ leꞌ mèngotgoola luꞌ mèngotgoola loo xaꞌgot coꞌ ngrolthe ndxàp linꞌ par gàp xaꞌgota mod no queꞌ lezoꞌ xaꞌgota ñèe xaꞌgota xinꞌ saꞌlbiꞌpeꞌ xaꞌ. No queꞌ lezoꞌ xaꞌgota ñèe xaꞌgota xinꞌ xaꞌgota.
\v 5 Bnibeꞌ leꞌ mèngotgoola luꞌ loo xaꞌgot coꞌ grolthe ndxàp linꞌ par gàp xaꞌgota mod loo rye conꞌ no gàc xaꞌgota mèn coꞌ nambìi nac no mèn coꞌ nalì nac loo Diox. Bnibeꞌ ñee rsiꞌ ñee rso xaꞌgota liz xaꞌgota, ne. Gàc xaꞌgota mèn coꞌ angndxòo lezoꞌ li conꞌ ndac. Gòn xaꞌgota ro saꞌlbiꞌpeꞌ xaꞌgota. Tataa ndlyazen li ryop ned xaꞌgota par yende chó mèn gàp razon ñii yèe ñii tìi cón cheꞌn diꞌs cheꞌn diꞌs ndac cheꞌn Diox coꞌ mtanꞌ Diox loo naꞌ.
\p
\v 6 Lomisqueꞌ ne, Tit, fcoꞌx loo myenꞌbiꞌ par gàp myenꞌbiꞌ mod no gàc myenꞌbiꞌ amiu ndac loo xtàa myenꞌbiꞌa.
\v 7 Loo ryete conꞌ, bluꞌ loo mèn no gòc thìb muestr cón cheꞌn ryete conꞌ ndac. Ftoo lezoꞌ bluꞌ ante conꞌ coꞌ nac lìcpeꞌ xleyꞌ cheꞌnpeꞌ Diox. Láth ngue luꞌl loo mèn, neꞌtyoo yugithte lezoꞌl loo conꞌ ngue lil no conꞌ coꞌ ngue luꞌl.
\v 8 Leque lùu laꞌs lool no nadoꞌ diꞌs nadoꞌ cuent ftoodiꞌs no mèn par yende chó mèn coꞌ nac ngolo ngolaꞌs quexùꞌl no zib quìi mèna lùu, Tit, láth coꞌseꞌ ndyoodiꞌsl con mèn pál coꞌteꞌ nque teel.
\p
\v 9 Bnibeꞌ no fcoꞌx leꞌ mèn coꞌ nac moz tyubdiꞌs loo patrón moz. No li moz par tyac lezoꞌ patrón loo rye zinꞌ coꞌ ndli moz. No neꞌcàb rode moz loo patrón moz.
\v 10 Bnibeꞌ loo moz neꞌgàcte moz mèn coꞌ arid naxex yaꞌ par hueꞌ moz cheꞌn patrón moz xexte. Ndxeꞌlequeꞌ, li moz conꞌ guryath no conꞌ guryèn loo patrón moz par gàca leꞌ, por cón cheꞌn moz, mèn ñii diꞌs natúꞌ cón cheꞌn diꞌs ndac cheꞌn Diox, Diox coꞌ mteláꞌ naꞌ loo conꞌ ryes.
\p
\v 11 Diox mbluꞌleꞌ loo mèn leꞌ Diox ndlyaꞌs li Diox anggàc conꞌ ndac loo mèn tac Diox ndlyaꞌs leꞌ mèn lyáꞌ loo conꞌ ryes.
\v 12 Tataa mod ngue luꞌ Diox loo naꞌ, naꞌ coꞌ ndli cas Diox, par cà diꞌs naꞌ rye conꞌ coꞌ intacte no coꞌ nac conꞌ coꞌ ndryoꞌ ndlyenꞌ lezoꞌ mèn coꞌ nac cón cheꞌn xab izlyoꞌ. Tataa mod ban naꞌ par gàp naꞌ mod no par gàc naꞌ amiu ndac loo xtàa naꞌ. Gàc naꞌ mèn nalì no mèn nambìi loo Diox coꞌ, lìcqueꞌ, ndli cas loo cón cheꞌn Diox loo izlyoꞌ ndxèꞌ leꞌn tiemp ndxèꞌ.
\v 13 Ndluꞌ conꞌ ndac cheꞌn Diox loo naꞌ, ne, par cue ban bed naꞌ axta coꞌseꞌ yiꞌth xaꞌ coꞌ nzi quee lezoꞌ naꞌ coꞌseꞌ tyaa no tyubqueꞌ diꞌs no gàc conꞌ mcàbgòn Diox par cued naꞌ coꞌseꞌ gàc huiz yiꞌth Tad Diox coꞌ nac merpeꞌ Diox roo no Diox xèn coꞌ mteláꞌ naꞌ loo conꞌ ryes. Diox nac yub Tad Crist Jesús.
\v 14 Leque yub Tad Crist Jesús mdaꞌ lugar mquée yalguth loo Tad Crist Jesús loo cruz par tataa mod mdix Crist Jesús cón cheꞌn ryethe xquin naꞌ no xtol naꞌ no cón cheꞌn ryethe conꞌ yeꞌrsinꞌ coꞌ mbli naꞌ. Tataa mbli Crist Jesús par mtembìi Crist Jesús naꞌ no par ngòc naꞌ mèn cheꞌn Crist Jesús no mèn coꞌ ndryoꞌ ndlyenꞌ lezoꞌ ndli conꞌ ndac.
\p
\v 15 Conꞌ ndxèꞌ nac coꞌ ngue ñibeꞌen lool, Tit: Bluꞌ loo mèn par yeꞌth lezoꞌ mèn loo cón cheꞌn Diox. No nadoꞌ diꞌs nadoꞌ cuent fcoꞌx mèn xal ñii Tad Jesús. No nabeꞌste fque tee ban. No nabeꞌste gòc par yende chó zib quìi lùu par tèꞌb mèn lùu thìb lad.
\c 3
\s Trèꞌ ndluꞌ loo mèn cón ndxàal li mèn, mèn coꞌ ndxelaꞌs loo cón cheꞌn Crist Jesús no loo Crist Jesús.
\p
\v 1 Bnibeꞌ loo mèn coꞌ ndxelaꞌs par xyoꞌf ndelequeꞌ lezoꞌ mèna que tee ban ndac mèna coꞌteꞌ nzol baꞌ par tyubdiꞌs mèna no gòn mèna ro mèn coꞌ ñibeꞌ, mèn coꞌ nxoꞌf zinꞌ zinꞌ cheꞌn gobiern. Bnibeꞌ nalas cue mèn, mèn coꞌ ndxelaꞌs loo cón cheꞌn Diox por cón cheꞌn Crist par li mèn ryethe conꞌ coꞌ nac conꞌ ndac coꞌ ndxàal li mèn.
\v 2 Bnibeꞌ loo mèna neꞌñii yèede no neꞌñii tìide mèn coꞌ ndxelaꞌs cón cheꞌn nec thìb mèn. Ndxeꞌlequeꞌ, gàc mèna mèn coꞌ nque tee ban rye nda mèna no rye ndyeꞌth mèna làth xtàa mèna. Gàc mèna mèn nadoꞌ par, tataa mod, lìcqueꞌ, luꞌ mèna loo rye mèn, por cón cheꞌn conꞌ coꞌ ndli mèna, leꞌ mèna nacqueꞌ mèn ndac.
\p
\v 3 Tac naꞌ, ne, ngòc mèn naad no mèn nguud thìb cuaꞌa. Ngòc naꞌ mèn coꞌ neꞌndubdiꞌste loo Diox, coꞌ nee diꞌs, tith mque tee ban naꞌ loo Diox. Ngòc naꞌ xal moz loo ryethe conꞌ coꞌ mdub yoꞌf lezoꞌ naꞌ no conꞌ coꞌ mbli mdyac lezoꞌ naꞌ. Ngure ban naꞌ loo ryethe conꞌ coꞌ nac conꞌ yeꞌrsinꞌ. Ale mbyàn lezoꞌ naꞌ gunèe naꞌ xtàa naꞌ. Ngòc naꞌ mèn coꞌ ngòo xyàn lezoꞌ no ngòo xyàn lezoꞌ naꞌ gunèe naꞌ thìb xtàa naꞌ no tedib xtàa naꞌ.
\v 4 Per ndxeꞌlequeꞌ, Diox mblo xoꞌf loo ryete mèn, Diox coꞌ nteláꞌ mèn loo conꞌ ryes, leꞌ Diox ndlyaꞌs li Diox anggàc conꞌ ndac loo mèn no, lìcqueꞌ, nqueꞌ lezoꞌ Diox ñèe Diox mèn.
\v 5 Diox mteláꞌ naꞌ loo conꞌ ryes. Conꞌa neꞌngàcte por cón cheꞌn chol zinꞌ ndac coꞌ mbli naꞌ. Ndxeꞌlequeꞌ, ngòca tac mblyat lezoꞌ Diox gunèe Diox naꞌ. Coꞌseꞌ ngòc naꞌ mèn cub, coꞌ nee diꞌs, ngolaꞌs naꞌ loo Crist, ngòca loo naꞌ leꞌ naꞌ nac mèn nalì no mèn nambìi loo Diox xal coꞌseꞌ ntech mèn trast zab no ndxanꞌ trasta nambìilaꞌs. Ngòc naꞌ mèn cub por cón cheꞌn Xpii Natúꞌ.
\v 6 Diox mblàa Xpii Natúꞌ loo naꞌ por cón cheꞌn conꞌ coꞌ nzo laꞌs nii Jesucrist no por conꞌ coꞌ nzo laꞌs yaꞌ Jesucrist par gàc huax conꞌ ndac loo naꞌ, naꞌ coꞌ mteláꞌ Jesucrist loo conꞌ ryes.
\v 7 Diox angmbli nac naꞌ, naꞌ coꞌ ndxelaꞌs loo Crist, mèn nalì no mèn nambìi loo Diox. Nac naꞌ mèn coꞌ yanꞌ no conꞌ coꞌ angtaꞌ Jesucrist loo naꞌ coꞌseꞌ yilo yiꞌth xi Jesucrist naꞌ, naꞌ coꞌ nzi quee lezoꞌ loo Jesucrist coꞌ mbli par yòo ban no naꞌ Diox thidtene yiloa.
\p
\v 8 Lìcqueꞌ nac diꞌs coꞌ nac diꞌs ndac ndxèꞌ. Ndlyazen tolo li nèel cón cheꞌn diꞌs ndac ndxèꞌ loo mèn coꞌseꞌ taꞌl cuent cón cheꞌn diꞌs ndac loo mèn par gàca leꞌ mèn coꞌ ngolaꞌs loo Diox, cuaꞌn mèna mod tolo li mèna conꞌ ndac thidtene. Conꞌ ndxèꞌ nac conꞌ ndac coꞌ càb conꞌ ndac loo mèn cheleꞌ mèn yòo yéc no yòo lezoꞌ mèn li mèn conꞌ ndac.
\v 9 Per ndxeꞌlequeꞌ, neꞌsálꞌtel con mèn coꞌ nac mèn naad coꞌ alithe no no nibdiꞌs conꞌ coꞌ intacte no neꞌsalꞌtel con mèn coꞌ ndaꞌ cuent cón cheꞌn bin mèn coꞌ ngure ban póla póla. Neꞌ neꞌ sálꞌ con mèn coꞌ nque diꞌs no mèn coꞌ ncuaꞌn diꞌs. Neꞌ neꞌ sálꞌ con mèn coꞌ ngyoo diꞌs cón cheꞌn ley coꞌ mxoꞌf Moisés loo mèn. Tac ryete conꞌ ndli mèna nac conꞌ anxleꞌ coꞌ yende cón ntac.
\p
\v 10 Cheleꞌ ndxep mèn coꞌ asendli par ndyoo xàꞌ lezoꞌ mèn coꞌ ndxelaꞌs nzo làth guꞌ, no nteriꞌth nza mèna diꞌs coꞌ ncoꞌxl loo mèna thìb vez no tedib vez, ftèꞌb no bloꞌ chug mèna làth guꞌ coꞌ ndxelaꞌs.
\v 11 Tac lùu naneequeꞌ no nonqueꞌl leꞌ mèna mbos xtùuz no mbixyath xtùuz mèna. Ngue cuaꞌn mèna xquin mèna. Leque mèna nquexùꞌ mèna con xtùuzpeꞌ mèna.
\s Trèꞌ ngue luꞌ Pab loo Tit rye mandad coꞌ li Tit loo Pab.
\p
\v 12 Coꞌseꞌ telꞌen Artem o Tiquic lool, bli fuerz yiꞌth neel máa daa leꞌn yèez Nicópolis tac tya mblin xtùuz riꞌthen tiemp xìlꞌ.
\p
\v 13 Ndlyazen lyath nol Zen coꞌ nac licenciad no lyath nol Apol loo conꞌ naquin mèna par yiꞌth mèna loon. Bli par yende cón nde che loo mèna no yende cón gàc falt loo mèna láth ndoo mèna ned coꞌseꞌ nde mèna coꞌteꞌ nzon.
\v 14 Bli par li mèn yòo biiz Cret, coꞌ thidte ndxelaꞌs loo cón cheꞌn Diox xalqueꞌ ndxelaꞌs naꞌ loo cón cheꞌn Diox, par téꞌth mèna par ñibeꞌ mèna loo lezoꞌ mèna li mèna conꞌ ndac par que no mèna conꞌ coꞌ li zinꞌ mèna coꞌseꞌ nquin mèna par neꞌgàcte loo mèna xal thìb yaa xlè coꞌ ingue taꞌ ndacte xlè.
\s Trèꞌ ngue nii mèn Diox loo xtàa mèn. No Pab ngue bez Diox par li Diox anggàc conꞌ ndac loo mèn tya.
\p
\v 15 Ryete mèn coꞌ nzo non ngue nii Diox lool, Tit. Gunii Diox loo mèn coꞌ naban yòo biiz Cret coꞌ ndxelaꞌs loo cón cheꞌn Jesucrist, mèn coꞌ nqueꞌ lezoꞌ ñèe naꞌ. Ndlyazen leꞌ Diox tolo li anggàc conꞌ ndac loo ryete guꞌ coꞌ ndxelaꞌs, guꞌ coꞌ nqueltàa loo cón cheꞌn Diox leꞌn yòo biiz Cret, ndee guꞌ. Taandxèꞌ gàca.