\id PHM
\ide UTF8
\h FILEMÓN
\toc1 FILEMÓN
\mt Cart Coꞌ Mqueꞌ Pab Yeꞌs Loo Thìb Mbiꞌ Coꞌ Ngroꞌ Lèe Filemón
\c 1
\s Pab ngue queꞌ yeꞌs loo Filemón.
\p
\v 1 Filemón, daa Pab coꞌ ngue leziꞌf por cón cheꞌn Crist Jesús, daa ngue queꞌ yeꞌs ndxèꞌ lool. No leque tiemp coꞌseꞌ ngue queꞌen yeꞌs coꞌ nac cart ndxèꞌ lool, ngo no Timote daa. Filemón, anzeꞌf nqueꞌ lezon ñèen lùu, lùu coꞌ ndlyath no daa loo zinꞌ coꞌ nxoꞌf zinꞌen loo cón cheꞌn Tad Jesucrist.
\v 2 No leque tiemp ndxèꞌ nqueꞌen yeꞌs ndxèꞌ loo mèn coꞌ nqueltàa loo cón cheꞌn Diox lizl. No ngue queꞌen yeꞌs ndxèꞌ loo xaꞌgot coꞌ lèe Ap coꞌ ndxàc ftaꞌn naꞌ loo cón cheꞌn Crist, no ngue queꞌen yeꞌs ndxèꞌ loo Arquip coꞌ mblyath no naꞌ loo zinꞌ coꞌ mxoꞌf zinꞌ Crist loo naꞌ coꞌ ngote mod mbli naꞌ.
\v 3 Ndlyazen leꞌ Tad Diox xud naꞌ no Tad Jesucrist naꞌ li par anggàc conꞌ ndac loo guꞌ. No ndlyazen leꞌ Tad Diox no Tad Jesucrist naꞌ li par yo nagàl lezoꞌl loo Diox no par cue banl rye ndal no rye ndyeꞌthl làth xtàal coꞌteꞌ nzol par nedrèꞌ.
\s Trèꞌ ndluꞌ leꞌ Diox nqueꞌ lezoꞌ ñèe Diox Filemón no nqueꞌ lezoꞌ Filemón nèe Filemón mèn hues xtàa Filemón loo cón cheꞌn Jesucrist. No ndluꞌ trèꞌ leꞌ Filemón ndxàp yalxlaꞌs loo Diox.
\p
\v 4 Na mbezqueꞌ loo Diox: Diox quix Uꞌ, Diox, coꞌseꞌ nteꞌ lezon cón cheꞌnl coꞌseꞌ mbezen Diox, Filemón.
\p
\v 5 Tac daa ndxònqueꞌ leꞌ lùu nqueꞌqueꞌ lezoꞌ Diox no ndxelaꞌsqueꞌl no ndxàpl yalxlaꞌs loo Tad Jesús. No nqueꞌqueꞌ lezoꞌl ñèel mèn no ndxàpqueꞌl yalxlaꞌs ñèel mèn, mèn coꞌ nac cheꞌnpeꞌ Diox no mèn coꞌ nzo loo cón cheꞌn Diox.
\v 6 Mbezen Diox no ñaꞌben loo Diox leꞌ ryete mèn coꞌ ndxelaꞌs loo Jesucrist no loo cón cheꞌn Jesucrist par nedrèꞌ taꞌ cuent coꞌ huenlequeꞌ cón cheꞌn ryethe conꞌ ndac coꞌ ndxàc loo naꞌ coꞌ mbli Jesucrist loo naꞌ. Ndlyazen leꞌ mèna taꞌ cuenta por ndaꞌ mèna cuent cón cheꞌn xá mod nque tee ban lùu no xá mod ndluꞌ lùu no ndaꞌ lùu cuent loo mèn cón cheꞌn Jesucrist.
\v 7 Nalleꞌ anzeꞌf ndyac lezon no anzeꞌf ndyeꞌth lezon por nonen no ndan cuent arid nqueꞌ lezoꞌl ñèel mèn coꞌ nac hues xtàal por cón cheꞌn Jesucrist. No non daa leꞌ por cón cheꞌnl ryete mèn coꞌ ndxelaꞌs coꞌ nzo par nedrèꞌ ngure nagàl lezoꞌ loo cón cheꞌn Crist Jesús. Thìba conꞌ ndxèꞌ.
\s Pab ngue naꞌb loo Filemón par li Filemón thìb favor loo Ones coꞌ ngòc mozpeꞌ Filemón.
\p
\v 8 Leꞌ tediba na, mastaleꞌ ndlil cuent nac daa thìb mbiꞌ coꞌ ndxeꞌ diꞌs cheꞌn Crist, no por cona ndxàpen derech ñibeꞌen lool conꞌ coꞌ ndxàal lil, Filemón,
\v 9 ndyaquen taandxèꞌ mod nadoꞌ diꞌs nadoꞌ cuent ñaꞌben thìb conꞌ lool por cón cheꞌn nqueꞌ lezon ñèen lùu no por nqueꞌ lezoꞌl ñèel daa. Daa, Pab coꞌ nacleꞌ thìb mèngool, ngueꞌen leziꞌf nalleꞌ por cón cheꞌn Crist Jesús.
\v 10 Filemón, ñaꞌben thìb favor lool por cón cheꞌn Ones. Ones ngòc xal thìb xganꞌ daa tac ngolaꞌs Ones loo Jesucrist no loo cón cheꞌn Jesucrist por cón cheꞌn daa láth nzon trèꞌ coꞌteꞌ nac leziꞌf.
\p
\v 11 Nonquen no ndaquen cuent leꞌ Ones ngòc thìb moz coꞌ yende chó juis lool thìb cuaꞌa. Per nalleꞌ ndyaquen leꞌ Ones nac thìb moz ndac par gàc Ones moz lùu tedib vez xalqueꞌ ndxàc Ones thìb moz ndac loon coꞌteꞌ nzon par ndxèꞌ.
\v 12 Na telꞌ Ones lool tedib vez. Nabeꞌste fque no Ones. Fque no Ones xalqueꞌ lezoꞌpeꞌen no ngudloopeꞌen.
\v 13 Na mblyaz ngyanꞌ Ones trèꞌ con daa par li Ones mandad loon cón cheꞌnl láth ngueꞌen leziꞌf por cón cheꞌn diꞌs ndac cheꞌn Diox.
\v 14 Per indlyasten lin nec thìb conꞌ xal ndlyazen no xal nee lezon. Ndlyazen gònl conꞌ ndxèꞌ ñeeneꞌ cón ñeel loon, Filemón. Sya, cheleꞌ lùu li favor loon telꞌl Ones loon tedib vez, neꞌgabtel loo lezoꞌl leꞌ daa ngue ñibeꞌ yèe lool par lil favor ndxèꞌ loon. Ndxeꞌlequeꞌ, lila ante xal nee lezoꞌl.
\v 15 Peser mbláꞌ Ones lùu plá mbeꞌ par gàca thidtene que nol Ones.
\v 16 Indlyasten que nol Ones xal thìb moz coꞌ ñibeꞌ yèe mèn loo. Ndxeꞌlequeꞌ, ndlyazen que nol Ones xal thìb huespeꞌl coꞌ, lìcqueꞌ, nqueꞌ lezoꞌl ñèel. Lìca, daa anzeꞌf ndyac no Ones. Per ndlyazen leꞌ lùu ndxàal más tyac no Ones. Indlyasten ante tyac nol Ones xal ndyac no mèn xtàa mèn loo izlyoꞌ ndxèꞌ. Ndxeꞌlequeꞌ, ndlyazen tyac nol Ones xal thìb huespeꞌl loo cón cheꞌn Tad Crist.
\p
\v 17 Cona, ngue niin lool, Filemón: Cheleꞌ lùu ndli cuent nac daa mèn coꞌ ndxàc huesl no xtàal loo cón cheꞌn Diox, fque no Ones xal yub daa, ndee.
\v 18 Cheleꞌ Ones mtezaꞌ chol conꞌ coꞌ nac cón cheꞌnl no cheleꞌ Ones ngroꞌ teꞌb ndxep tmi lool, ftaꞌ cuent loon. Bnaꞌba loon. Na guix coꞌ ntac conꞌa. Guixen coꞌ ndeꞌb Ones lool, ne.
\v 19 Daa, Pab, ngue queꞌ yeꞌs ndxèꞌ lool, Filemón. Lìcqueꞌ, na guix coꞌ ndeꞌb Ones lool. No nase ngue gon valor loon. Ndlyazen lil favor ndxèꞌ loon tac neequeꞌl daa mbli par ngolaꞌs lùu loo cón cheꞌn Jesucrist no loo Jesucrist.
\v 20 Bli favor ndxèꞌ loon, hues por cón cheꞌn Jesucrist, xalqueꞌ thìb mbiꞌ coꞌ, lìcqueꞌ, ndxelaꞌs loo Tad Crist. Ftegán lezon xalqueꞌ mèn coꞌ ndxàc hues loo cón cheꞌn Crist, ndee.
\v 21 Ngue queꞌen yeꞌs ndxèꞌ lool tac daa naneequeꞌ leꞌ lùu ndyubdiꞌsqueꞌ coꞌ mbezen lool. No naneen leꞌ lùu li masreꞌ conꞌ loon loo favor coꞌ ngue naꞌben lool ndxèꞌ.
\v 22 Lomisqueꞌ ndlyazen ne, fcuaꞌn lugar liz mèn coꞌteꞌ gòon plá huiz. Tac daa mbed leꞌ Diox li par gàca loon xalqueꞌ nac diꞌs coꞌ mbez guꞌ loo Diox coꞌseꞌ mbez guꞌ Diox leꞌ Diox li gàca loo guꞌ par nedrèꞌ leꞌ daa gal nee máa guꞌ par nedrèꞌ.
\s Pab ngue nii Diox loo Filemón. No lult vez ndxab Pab gàc conꞌ ndac loo Filemón.
\p
\v 23 Loo cart ndxèꞌ ngue nii Epafr coꞌ thidte ngue non leziꞌf por cón cheꞌn Crist Jesús, Diox lool, Filemón.
\v 24 Ngue nii Marc no Aristarc no Dem no Luc coꞌ nac myenꞌ coꞌ ndlyath no daa loo zinꞌ cón cheꞌn Crist Diox lool, ne.
\p
\v 25 Ndlyazen leꞌ Tad Jesucrist naꞌ li anggàc conꞌ ndac loo ryete guꞌ par nedrèꞌ, Filemón. Taandxèꞌ gàca, ndee.