\id JAS
\ide UTF8
\h SANTIAGO
\toc1 SANTIAGO
\mt Cart Coꞌ Mqueꞌ Santiau Yeꞌs Loo Mèn
\c 1
\s Cart coꞌ mqueꞌ Santiau yeꞌs loo mèn coꞌ ngolaꞌs loo cón cheꞌn Crist, mèn coꞌ mque tee reꞌs pál.
\p
\v 1 Daa coꞌ lèe Santiau, nac daa mbiꞌ coꞌ nxoꞌf zinꞌ zinꞌ cheꞌn Diox. No nac daa mbiꞌ coꞌ nxoꞌf zinꞌ zinꞌ cón cheꞌn Tad Jesucrist. Daa ngue nii Diox loo guꞌ coꞌ nac mèn cheꞌn siꞌ fchop ned mèn coꞌ nac mèn nación Israel coꞌ nzi tee reꞌs dib athu loo izlyoꞌ leꞌn rye nación.
\s Trèꞌ ndluꞌ ryethe conꞌ ndxác Diox par li Diox anggàc conꞌ ndac loo mèn.
\p
\v 2 Guꞌ coꞌ nac mèn huesen por cón cheꞌn Jesucrist, ndxàal tyac lezoꞌ guꞌ coꞌseꞌ ndxàc chol yalndyub nguꞌs no chol yaltìi loo guꞌ.
\v 3 Tac guꞌ nonqueꞌ no naneequeꞌ guꞌ coꞌseꞌ ndxelaꞌs mèn no ndxàp mèn yalxlaꞌs loo Diox no loo cón cheꞌn Diox, látha ndxàc chol yaltìi loo guꞌ par ndxàc preb guꞌ par ñee Diox ñeeneꞌ chéꞌ tyubdiꞌs guꞌ loo Diox. Leꞌ sya, tataa mod téꞌth guꞌ par gàc guꞌ mèn coꞌ nchaꞌlaꞌs no mèn coꞌ nxec yèe yilo riid ryethe conꞌa loo guꞌ.
\v 4 Neꞌsode guꞌ yéc guꞌ setilte. Neꞌ neꞌ taꞌ guꞌ lugar lyàa xyàn lezoꞌ guꞌ setilte. Ndxeꞌlequeꞌ, tolo gàc guꞌ mèn coꞌ nchaꞌlaꞌs axta gàca loo guꞌ, lìcqueꞌ, nac guꞌ mèn ndac loo Diox coꞌ mtéꞌth, no coꞌ mdaꞌ cuent, no coꞌ ndyubdiꞌs ndac loo cón cheꞌn Diox.
\p
\v 5 Cheleꞌ chó guꞌ ndenꞌ neꞌgácte guꞌ li guꞌ conꞌ ndac loo coꞌ nac cón cheꞌn Diox, gurez guꞌ Diox no bnaꞌb guꞌi loo Diox. Leꞌ sya, Diox li par gác guꞌ li guꞌ conꞌ ndac coꞌ ndlyaꞌs guꞌ. No coꞌseꞌ Diox li par gác guꞌ li guꞌ conꞌ ndaca, neꞌlide Diox conꞌa xal mèn coꞌ pente ndaꞌ ndxep conꞌ loo xtàa mèn. No neꞌlide Diox loo guꞌ xal mèn coꞌ asendli mbez nguix conꞌ loo xtàa mèn.
\v 6 Per cheleꞌ guꞌ ñaꞌb no cuez guꞌ chol conꞌ loo Diox par gàca loo guꞌ, naquinqueꞌ yilaꞌs guꞌ loo Diox no gàp guꞌ yalxlaꞌs loo Diox leꞌ Diox li par gàca loo guꞌ. No neꞌgànte lezoꞌ guꞌ leꞌ Diox neꞌlide nec thìb conꞌ coꞌ ñaꞌb guꞌ loo Diox. Diox liqueꞌ par gàca loo guꞌ. Tac mèn coꞌ ngàn lezoꞌ no coꞌ ndxàc chop lezoꞌ loo cón cheꞌn Diox, xtùuz mèna nac xal ol cheꞌn níttóꞌ coꞌ nxít too mbii thìb lad tedib lad loo níttóꞌ, coꞌ nee diꞌs, indli nèede mèn xtùuz mèn no lezoꞌ mèn loo cón cheꞌn Diox.
\v 7 Mèn coꞌ tataa nac xtùuz loo cón cheꞌn Diox, indxàalte li mèna xtùuz leꞌ Tad Diox li par gàc chol conꞌ ndac loo mèna tac Diox neꞌlide conꞌa loo mèna.
\v 8 Tac thìb mbiꞌ coꞌ thidtene imbe see teede lezoꞌ no indlecte lezoꞌ mbiꞌ cón li mbiꞌ, no axta neꞌñeede mbiꞌ cón li mbiꞌ thìb huiz no tedib huiz, mbiꞌa yende mod li nèe lezoꞌ mbiꞌ no xtùuz mbiꞌ cón cheꞌn conꞌ li mbiꞌ thìb huiz no tedib huiz.
\p
\v 9 Leꞌ mèn hues naꞌ coꞌ nac mèn prob no coꞌ iñaade nac mèn roo mèn xèn, ndxàal tyac lezoꞌ mèna tac Diox ngo cuent nac mèna mèn coꞌ más ntac loo Diox. No nac mèna mèn roo mèn xèn loo Diox por cón cheꞌn Jesucrist.
\v 10 Leꞌ mèn hues naꞌ coꞌ nac mèn ric na, ndxàal tenꞌ mèna ndxàal tyac lezoꞌ mèna tac yende cón ntac mèna loo Diox por nac mèna mèn ric. Tac yalgonꞌ coꞌ ndxàp mèn ric nac xal yeꞌ huan coꞌ neꞌxecte nen tiemp.
\v 11 Tac coꞌseꞌ ndlyen huiz no anzeꞌf ntec nsoꞌ huiz loo izlyoꞌ, leꞌ sya, tataa mod mbiiz huan. Leꞌ yeꞌ coꞌ nzoꞌf loo huana na, ndxàꞌb. Tataa mod ndlyux yeꞌ huan coꞌseꞌ ndxelo nabeꞌs ñaa yeꞌ huan nxyoꞌf yeꞌ huan. Tataa ndxàca loo mèn ric, ne, coꞌseꞌ xèegà xèegà ndlyux rsinꞌ mèn ric coꞌ nac delgens coꞌ ndli mèn ric.
\s Trèꞌ ndluꞌ cón cheꞌn cón li mèn coꞌseꞌ cobyaꞌ Mebizya mèn.
\p
\v 12 Huen nda mèn coꞌ nxec no mèn coꞌ nchaꞌlaꞌs coꞌseꞌ ndxàc yalndyub nguꞌs no yaltìi loo mèn. Diox ndxòo lezoꞌ conꞌ ndac coꞌ ndli mèna. No li Diox thìb conꞌ ndac loo mèna xalqueꞌ mcàbgòn Diox li Diox loo mèna par yòo ban noqueꞌ mèna Diox thidtene, mèn coꞌ, lìcqueꞌ, nqueꞌ lezoꞌ Diox.
\v 13 Coꞌseꞌ chol mèn lyaꞌs aseli mèn conꞌ yeꞌrsinꞌ, indxàalte li mèna xtùuz leꞌ Diox asendli par li mèna conꞌ yeꞌrsinꞌa. Yende xàa. Tac por part cheꞌn Diox, yende chó thìb conꞌ nzo coꞌ ndli par li Diox conꞌ yeꞌrsinꞌ. Neꞌ neꞌ aseli Diox par li chol mèn conꞌ yeꞌrsinꞌ.
\v 14 Ndxeꞌlequeꞌ, coꞌseꞌ mbee ncà conꞌ yeꞌrsinꞌ mèn par cuaꞌn mèn xquin mèn no xtol mèn xal ndryoꞌ ndlyenꞌ lezoꞌpeꞌ mèn no xal ndyub yoꞌf lezoꞌ mèn par li mèn conꞌ yeꞌrsinꞌ, hora nac hor coꞌseꞌ li mèn conꞌ yeꞌrsinꞌ.
\v 15 Leꞌ sya, ryete conꞌ yeꞌrsinꞌ coꞌ ndryoꞌ ndlyenꞌ leꞌn lezoꞌ mèn par li mèn, conꞌa ncàb xquin mèn no xtol mèn coꞌ ndli mèn. No cheleꞌ mèn tolo cuaꞌn xquin mèn no xtol mèn, leꞌ sya, tataa mod càba loo mèna par ndryo xàꞌ mèn thìb lad loo Diox thidtene coꞌseꞌ ndxelo tub rez Diox cón cheꞌn mèna.
\p
\v 16 Mèn huesen coꞌ nqueꞌ lezon ñèen, guꞌ coꞌ ngòoleꞌ loo cón cheꞌn Crist, nee guꞌ nee guꞌ. Cheleꞌ guꞌ li xal ndli mèna, sya, tataa mod quedìi guꞌ leque guꞌ.
\v 17 Guꞌ naneequeꞌ leꞌ ryethe conꞌ coꞌ nac conꞌ ndac coꞌ angndxàc loo naꞌ, Diox ndlii par angndxàca loo naꞌ. Diox coꞌ mbli ngòcsuaꞌ huiz no mbeꞌ no mbyáz coꞌ nac xnìi béꞌ, Diox thidtene neꞌzyeꞌde. Neꞌ neꞌ seꞌ Diox mod coꞌ ndli Diox conꞌ loo mèn no mod coꞌ ndxàp Diox loo mèn.
\v 18 Diox mdaꞌ lugar yòo ban no naꞌ Diox thidtene por cón cheꞌn xtiꞌs Diox coꞌ nac diꞌs ndac coꞌ nac lìcpeꞌ par gàc naꞌ nerlequeꞌ mèn coꞌ yòo loo cón cheꞌn Diox, coꞌ gàc huax mèn coꞌ yòo ban no Diox thidtene yiloa. Tataa ndxàca tac tataa mblyaꞌs Diox no ngroꞌ mblyenꞌ lezoꞌ Diox li Diox conꞌa.
\s Trèꞌ ndluꞌ cón ndli mèn, mèn coꞌ, lìcqueꞌ, ndxelaꞌs loo cón cheꞌn Jesucrist.
\p
\v 19 Por cona, mèn huesen por cón cheꞌn Jesucrist, guꞌ coꞌ anzeꞌf nqueꞌ lezon ñèen, ngue niin loo guꞌ: Nalas gure thìb thìb guꞌ. No lijer gure guꞌ par gòn guꞌ diꞌs no par taꞌ guꞌ cuent coꞌ huenlequeꞌ coꞌseꞌ ndyoodiꞌs no mèn guꞌ. Per neꞌgàcte guꞌ mèn coꞌ ndli cuent anzeꞌf ndxác. Neꞌ neꞌ gàc guꞌ mèn coꞌ ngolꞌ diꞌs. Neꞌ neꞌ gàc guꞌ mèn coꞌ setilte nsoꞌ yéc par yecloo guꞌ con mèn cón cheꞌn chol conꞌ.
\v 20 Tac mèn coꞌ setilte ndxàc nayiꞌ no mèn coꞌ setilte nsoꞌ yéc, mèna thidtene indlide conꞌ coꞌ ndxòo lezoꞌ Diox.
\v 21 Cona, ngue niin loo guꞌ: Thidtenequeꞌ neꞌtolode li guꞌ chol conꞌ zab. Neꞌ neꞌ li guꞌ chol conꞌ yeꞌrsinꞌ coꞌ más ndxòo lezoꞌ mèn li mèn loo izlyoꞌ ndxèꞌ. Ndlyazen nadoꞌ diꞌs nadoꞌ cuent taꞌ guꞌ lugar gòn guꞌ diꞌs par tyubdiꞌs guꞌ loo diꞌs coꞌ mbìnleꞌ guꞌ no coꞌ nguaaꞌdleꞌ leꞌn lezoꞌ guꞌ. Tac diꞌs coꞌ mbìn guꞌa, cón cheꞌn diꞌsa nac coꞌ ndluꞌ xá mod ndlyáꞌ alm mèn loo conꞌ ryes coꞌseꞌ ndxelaꞌs mèn cón cheꞌn diꞌsa.
\p
\v 22 Per ndlyazen bli guꞌ xal ndluꞌ dis coꞌ nac diꞌs ndac ndxèꞌ. Indlyasten ante gòn guꞌ cón cheꞌn diꞌs ndac ndxèꞌ. Tac cheleꞌ guꞌ ante ndxòn cón cheꞌn diꞌs ndac ndxèꞌ, no indlide guꞌ no indyubdiꞌste guꞌ xal mbez diꞌs ndac ndxèꞌ, leꞌ sya, leque guꞌ nquedìi guꞌ.
\v 23 Tac mèn coꞌ ante ndxòn diꞌs ndac no indyubdiꞌste mèna xal mbez diꞌsa, mèna nac xal thìb mbiꞌ coꞌ ngüiꞌ loo loo thìb spej.
\v 24 Ngüiꞌ mbiꞌa loo spej xá ñaa mbiꞌ. No ndxelo ngüiꞌ mbiꞌ loo spej xá ñaa mbiꞌ, ale setilte ndxathlaꞌs mbiꞌ xá ñaa mbiꞌ.
\v 25 Loo libr coꞌ nac xtiꞌs Diox ndub diꞌs coꞌ ndluꞌ leꞌ Diox mnibeꞌ loo mèn par li mèn conꞌ ndac. Conꞌ coꞌ ñibeꞌ Diox loo mèn por cón cheꞌn diꞌs ndac ndli par yende chó cuee caꞌ loo mèn loo cón cheꞌn Diox. Mèn coꞌ thidtene indxathlaꞌste conꞌ coꞌ ndxòn mèn cón cheꞌn diꞌs ndac, no mèn coꞌ thidtenequeꞌ ndli nèe mèn par li mèna xal ñibeꞌ Diox por cón cheꞌn diꞌs coꞌ nac xtiꞌs Diox loo mèn par li mèn, huen nda mèna loo ryethe conꞌ ndli mèna.
\p
\v 26 Cheleꞌ chol mèn ndli xtùuz no ndenꞌ mèn ndli mèn cas loo Diox no neꞌgácte mèn tecueꞌd mèn looz mèn no cued yauꞌ ro mèn coꞌ nque diꞌs mèn con xtàa mèn, leꞌ sya, leque mèna nquedìi mèna. Sya, tataa mod ndluꞌ mèna indlide mèna cas loo Diox.
\v 27 Ngue niin loo guꞌ: Leꞌ mèn coꞌ Diox mbez nac mèn coꞌ, lìcqueꞌ, ndli cas loo Diox xud naꞌ no coꞌ ndli coꞌ ndxòo lezoꞌ Diox, mèna ndli xal ngue niin loo guꞌ ndxèꞌ: Ndlyath no mèn myenꞌ ftyàꞌf, no xaꞌgot viud, thìb mod tedib mod coꞌseꞌ nxi lezoꞌ mèna loo chol yaltìi coꞌ ndxàc loo mèna. No neꞌlide mèn coꞌ, lìcqueꞌ, ndli cas loo Diox nec thìb conꞌ yeꞌrsinꞌ coꞌ nac cón cheꞌn xab izlyoꞌ.
\c 2
\s Trèꞌ ndluꞌ indxàalte más li mèn cas loo thìb xtàa mèn leque loo tedib xtàa mèn par más tyuꞌ mèn loo thìb xtàa mèn leque tedib xtàa mèn.
\p
\v 1 Mèn huesen, guꞌ coꞌ ndxelaꞌs loo Tad Jesucrist naꞌ coꞌ nac Tad roo no Tad xèn, ndlyazen neꞌgàcte guꞌ mèn coꞌ más ndli cas thìb mèn no coꞌ más ndli ndyuꞌ thìb mèn loo tedib mèn làth guꞌ.
\v 2 Angab naꞌi, cheleꞌ thìb mbiꞌ coꞌ nzo thìb ani or cuen yaꞌ no noc xab mbiꞌ larꞌ huen, yòo mbiꞌ làth guꞌ coꞌseꞌ nqueltàa guꞌ loo servis, no yòo thìb mbiꞌ prob ladyox no ladreꞌ mbeꞌth làth guꞌ leque tiempa,
\v 3 no más ngue li guꞌ par ndyuꞌ mbiꞌ coꞌ noc xab larꞌ huena, no más ngue li guꞌ cas mbiꞌ no gab guꞌ loo mbiꞌ: Ftub trèꞌ coꞌteꞌ más huen nac ndxèꞌ. No ndxeꞌlequeꞌ, gab guꞌ loo prob mbiꞌ ladyoxa: Leꞌ lùu na, huàa too xquin baꞌ. O tuaꞌte ftub loo yòo.
\v 4 Leꞌ sya, tataa mod leque guꞌ ndli par más ndyuꞌ thìb mèn leque tedib mèn làth guꞌ. No leque guꞌ ndluꞌ ndxàp guꞌ thìb mod yeꞌrsinꞌ coꞌseꞌ más ndli guꞌ ndyuꞌ thìb mèn loo tedib mèn làth guꞌ.
\p
\v 5 Mèn huesen por cón cheꞌn Jesucrist, guꞌ coꞌ anzeꞌf nqueꞌ lezon ñèen, bìn guꞌ diꞌs coꞌ nde niin loo guꞌ ndxèꞌ: Diox mcui mèn prob coꞌ nac mèn ladyox loo izlyoꞌ ndxèꞌ par yilaꞌs mèna loo cón cheꞌn Diox no par gàp mèna yalxlaꞌs loo Diox no loo cón cheꞌn Diox par tataa mod ñibeꞌpeꞌ Diox loo mèna xal mcàbgòn Diox loo mèn li Diox loo men, mèn coꞌ nqueꞌ lezoꞌ Diox no coꞌ ndxàp yalxlaꞌs loo Diox.
\v 6 Per ndxeꞌlequeꞌ, ale leꞌleꞌ ntethon guꞌ mèn prob ladyox. ¿Chéꞌ ndyac guꞌ inacte mèn rica mèn coꞌ ndxanꞌ bien con guꞌ no ndli mèna provech guꞌ; no ndxeꞌ mèn rica guꞌ loo mèn nac zinꞌ yòolau par tyub rez cón cheꞌn guꞌ loo mèn nac zinꞌ yòolau, càꞌ? Yende xàa. Nacqueꞌ mèn rica mèn coꞌ ndli tataa, ¿léꞌ?
\v 7 ¿Chéꞌ ndyac guꞌ inacte mèn rica mèn coꞌ más ñii yèe ñii tìi cón cheꞌn lèe Crist, Crist coꞌ nac xaꞌ roo xaꞌ xèn? No por cón cheꞌn Crist, mdub lèe mèn guꞌ mèn coꞌ ngòoleꞌ loo cón cheꞌn Crist no nac guꞌ cheꞌnpeꞌ Crist.
\p
\v 8 Cheleꞌ guꞌ, lìcqueꞌ, ndyubdiꞌs loo diꞌs coꞌ nac thìb yalnibeꞌ más conꞌ roo conꞌ xèn coꞌ mtanꞌ Tad Diox diꞌs loo naꞌ xal mbez diꞌs coꞌ ndub loo libr coꞌ nac xtiꞌs Diox coꞌ mbez: Fqueꞌ lezoꞌ guꞌ gunèe guꞌ mèn coꞌ ndxàc hues xtàa guꞌ xalqueꞌ ngue lezoꞌ guꞌ ñèe guꞌ guꞌ. Cheleꞌ guꞌ tataa ngue li, ngue li guꞌ conꞌ ndac.
\v 9 Per cheleꞌ guꞌ más ndli par ndyuꞌ thìb mèn loo tedib mèn no cheleꞌ guꞌ más ndli cas loo thìb mèn leque tedib mèn, sya, ngue cuaꞌnqueꞌ guꞌ xquin guꞌ no ndxàp guꞌ dol loo Tad Diox coꞌ mtanꞌ diꞌs loo mèn par li mèn xal mnibeꞌ Diox loo mèn.
\v 10 Cheleꞌ chol guꞌ nzo coꞌ mbez ndyubdiꞌs guꞌ loo ryethe conꞌ mnibeꞌ Tad Diox loo naꞌ par li naꞌ no indlide guꞌ thìb conꞌ coꞌ mnibeꞌ Tad Diox loo naꞌ par li naꞌi, ncàba loo guꞌ leꞌ Diox ngo cuent indyubdiꞌste guꞌ loo nec thìb conꞌ mnibeꞌ Tad Diox loo naꞌ par li naꞌi.
\v 11 Tac leque yub Diox coꞌ mnibeꞌ loo mèn: Neꞌlide guꞌ yalburrid, leque yub Diox mnibeꞌ loo mèn, ne: Neꞌguthte guꞌ mèn. No por cona, cheleꞌ mèn indlide yalburrid per ndxuth mèn xtàa mèn, Diox ngo cuent leꞌ mèna ya indyubdiꞌste loo nec thìb conꞌ coꞌ mnibeꞌ Diox loo mèn par li mèn.
\v 12 Ndxàal nabeꞌste tyoodiꞌs guꞌ no nabeꞌste gòp guꞌ mod par que tee ban ndac guꞌ loo izlyoꞌ. Fteꞌ lezoꞌ guꞌ leꞌ Diox tub rez cón cheꞌn naꞌ xalqueꞌ mnibeꞌ Diox loo naꞌ par tyubdiꞌs naꞌ loo Diox. Conꞌ coꞌ mnibeꞌ Diox loo naꞌ par li naꞌ ncàb loo naꞌ yende chó cuee càꞌ naꞌ loo cón cheꞌn Diox.
\v 13 Mèn coꞌ indlyatte lezoꞌ ñèe hues xtàa mèn, lomisqueꞌ ne, Diox neꞌlyatte lezoꞌ ñèe Diox mèna coꞌseꞌ tub rez Diox cón cheꞌn mèna. Per mèn coꞌ ndlyatqueꞌ lezoꞌ ñèe hues xtàa mèn, mèna yanꞌ bien no gàc conꞌ ndac loo mèna coꞌseꞌ gàc hor tub rez Diox cón cheꞌn mèn loo mèna.
\s Trèꞌ ndluꞌ cón cheꞌn chop ned mèn. Thìb ned mèn alithe mbez ndxelaꞌs mèn loo Diox per indyubdiꞌste mèn no indlide mèn conꞌ coꞌ ñibeꞌ Diox loo mèn li mèn. Tedib ned mèn imbezte ndxelaꞌs mèna arid loo Diox per ndliqueꞌ mèna xalqueꞌ ñibeꞌ Diox loo mèn par li mèn.
\p
\v 14 Mèn coꞌ nac mèn huesen por cón cheꞌn Tad Jesucrist, nde niin thìb conꞌ loo guꞌ: ¿Chéꞌ ndli guꞌ cuent conꞌ ndac ngue li mèn loo Diox cheleꞌ mèna mbez ndxelaꞌs mèna loo Diox no yende chó conꞌ ndac ngue li mèna loo hues xtàa mèna, càꞌ? Yende xàa. Ingode Diox cuent conꞌ ndac nac coꞌ ngue li mèna tataa. ¿Xá nee guꞌ? ¿Chéꞌ ndyac guꞌ ante por mbez mèna ndxelaꞌs mèna no indlide mèna conꞌ ndac loo hues xtàa mèna lyáꞌ mèna loo conꞌ ryes, càꞌ? Yende xàa. Pà gàca tataa.
\v 15 Angab naꞌi, cheleꞌ thìb xaꞌbiꞌ o thìb xaꞌgot coꞌ ndxàc hues xtàa naꞌ ndyac yende xab xaꞌ par goc xaꞌ, no lomisqueꞌ, ndyac xaꞌ yende conꞌ hua xaꞌ no yende conꞌ naquin xaꞌ coꞌseꞌ nac huiz coꞌ naquinpeꞌ xaꞌ conꞌa,
\v 16 no cheleꞌ thìb guꞌ gab loo mèna: Fxen ned. Byàa, ndee. Diox lyath nol ned ndal par zyal coꞌ hual no zyal thìb leꞌ larꞌ par tauꞌl ladl. Cheleꞌ guꞌ tataa li no neꞌtaꞌde guꞌ conꞌ nquin mèna, ¿chéꞌ ndyac guꞌ ngue li guꞌ conꞌ ndac, càꞌ? Yende xàa. Diox ingode cuent ngue li guꞌ conꞌ ndac coꞌseꞌ ngue li guꞌ tataa.
\v 17 Tataa ndxàca loo mèn coꞌ alithe mbez ndxelaꞌs mèna loo Diox. Diox ingode cuent, lìcqueꞌ, ndxelaꞌs mèn loo Diox coꞌseꞌ alithe mbez mèn ndxelaꞌs mèn loo Diox no indlide mèna conꞌ ndac loo hues xtàa mèn coꞌ naquin conꞌ.
\p
\v 18 Per peser nzo ndxep mèn coꞌ gab loo xtàa: Lùu mbez leꞌ lùu ndxelaꞌs loo Diox. Per nalleꞌ ndlyazen bluꞌ loon xá mod non taamas mèn leꞌ lùu ndxelaꞌs loo Diox coꞌseꞌ yende chó conꞌ ndac ndlil loo mèn coꞌ ndxàc hues xtàal. Yende mod lila, ¿léꞌ? Part cón chenen, ndyaquen leꞌ daa, ne, ndxelaꞌs loo Diox. Per ndxeꞌlequeꞌ, daa luꞌ lool leꞌ daa, lìcqueꞌ, ndxelaꞌs loo Diox por conꞌ ndac coꞌ ndlin loo mèn coꞌ ndxàc hues xtàa daa coꞌ naquin conꞌ.
\v 19 Mbezl ndxelaꞌsl nzo thidte Diox no maste. No huenqueꞌ ndlil coꞌseꞌ tataa mbezl. Per ¿chéꞌ ndyacl por ante mbezl ndxelaꞌsqueꞌl, lyáꞌl loo conꞌ ryes, càꞌ? Yende xàa. Tac meexùꞌ ndxelaꞌs nzo thidte Diox, ne. No axta nxiꞌth meexùꞌ tant nzyeb meexùꞌ cón gàc loo meexùꞌ coꞌseꞌ tub rez Diox cón cheꞌn meexùꞌ yiloa.
\v 20 ¡Aa mèn naxèn! ¿Chéꞌ indaꞌde guꞌ cuent no chéꞌ tarte ñee guꞌ coꞌseꞌ mbez mèn ndxelaꞌs mèn loo Diox no ingue luꞌde mèna ngue li mèna conꞌ ndac loo hues xtàa mèn, sya, mod coꞌ ndxelaꞌs mèna loo Diox ingode Diox cuent leꞌ mèna ndxelaꞌs loo Diox?
\v 21 ¿Chéꞌ indaꞌde guꞌ cuent, ne, leque yub Diox mblo ro no mdaꞌ Diox cuent leꞌ Abraham ngolaꞌs loo conꞌ coꞌ ndxab Diox loo Abraham? Por cona, mbeꞌ Abraham Isaac coꞌ ngòc xganꞌ Abraham par ya yuth Abraham Isaac xal coꞌseꞌ ndxuth mèn thìb máꞌ loo Diox tiempa, càꞌ?
\v 22 Guꞌ nonqueꞌ no ndaꞌqueꞌ guꞌ cuent cón cheꞌn conꞌ nda li Abraham, tataa mod mbluꞌ Abraham leꞌ Abraham ngolaꞌsqueꞌ diꞌs coꞌ ndxab Diox loo Abraham li Diox loo Abraham. No tataa mod Abraham mbli nèe lezoꞌ Abraham loo Diox xal ngòc diꞌs coꞌ ndxab Diox loo Abraham par li Abraham conꞌ mnibeꞌ Diox loo Abraham li Abraham.
\v 23 No por conꞌ coꞌ mbli Abrahama, ngòcqueꞌ no mdyaaqueꞌ no mdubqueꞌ diꞌs coꞌ ndub loo libr coꞌ nac xtiꞌs Diox coꞌ mbez: Abraham ngolaꞌs diꞌs coꞌ ndxab Diox loo Abraham li Diox. Leꞌ Diox na, mbloqueꞌ cuent conꞌ coꞌ mbli Abrahama mbluꞌ leꞌ Abraham ngolaꞌsqueꞌ loo Diox. Tataa mod mdyal Diox ngòo Abraham loo cón cheꞌn Diox. Ngoloa, leque yub Diox mblo ro ngòc Abraham amiu cheꞌn Diox.
\p
\v 24 Cona, ngue niin loo guꞌ: Diox ngoqueꞌ cuent no ndyalqueꞌ Diox yòo mèn loo cón cheꞌn Diox por cón cheꞌn conꞌ coꞌ ndluꞌ leꞌ mèna ndxelaꞌsqueꞌ loo Diox. Ingode Diox cuent, lìcqueꞌ, ndxelaꞌs mèn loo Diox por ante mbez mèn ndxelaꞌs mèn loo Diox.
\v 25 Lomisqueꞌ, ngòc loo thìb xaꞌgot coꞌ ngroꞌ lèe Rahab coꞌ ngòc thìb xaꞌgot burrid ndooreꞌ. Por mdaꞌ Rahab posad loo mèn coꞌ mtelꞌ Josué, coꞌ ngua ciuda coꞌ ngòc làaz Rahab, no mblyath no Rahab mèna par ngroꞌ mèna ciudaa tedib ned, Diox mdyal ngòo Rahab loo cón cheꞌn Diox, ne, tac Rahab ngolaꞌs leꞌ mèna mbiꞌth mandad cheꞌnpeꞌ Diox.
\v 26 Por cona, ngue niin loo guꞌ: Coꞌseꞌ ñèe guꞌ nax thìb thebol non guꞌ por ngro xpii thebol loo thebol, conꞌa nguth thebol. Lomisqueꞌ ne, mèn coꞌ alithe mbez ndxelaꞌs mèn loo Diox no indluꞌde mèn conꞌ ndac coꞌ ndli mèn loo hues xtàa mèn, inacte mèna mèn coꞌ, lìcqueꞌ, ndxelaꞌs loo Diox.
\c 3
\s Trèꞌ ndluꞌ cón cheꞌn mod coꞌ ndyoodiꞌs mèn.
\p
\v 1 Mèn coꞌ nac mèn huesen por cón cheꞌn Jesucrist, indxàalte yo arid mèn coꞌ mbez guꞌ nac maistr làth guꞌ. Tac guꞌ nanee no ndaꞌqueꞌ guꞌ cuent leꞌ naꞌ coꞌ ndluꞌ loo xtàa naꞌ cón cheꞌn Diox, más nayiꞌ gàc Diox loo naꞌ coꞌseꞌ tub rez Diox cón cheꞌn naꞌ loo naꞌ.
\v 2 Ryete naꞌ ndxàp falt no ndxàp naꞌ thìb mod yeꞌrsinꞌ loo huax conꞌ. Cheleꞌ thìb naꞌ indxàpte falt no indxàpte naꞌ mod yeꞌrsinꞌ xal ndyoodiꞌs naꞌ, leꞌ sya, tataa ndluꞌ naꞌ nac naꞌ mèn nalì no mèn nambìi loo Diox. No naꞌ coꞌ tataa ndlia, ndxàp lezoꞌ naꞌ loo ryethe conꞌ ndli naꞌ.
\v 3 Guꞌ ndaꞌqueꞌ cuent coꞌseꞌ ngòo naꞌ fren ro thìb huay, ngòo naꞌ fren ro huay par tataa mod ndxàc nadoꞌ huay par sere seyeth mèn huay ned ndlyaꞌs mèn ya no mèn huay coꞌseꞌ ndyub mèn huay.
\v 4 Lomisqueꞌ ne, guꞌ nonqueꞌ no ndaꞌqueꞌ guꞌ cuent xal ndli mèn zinꞌ loo thìb yòoyaa. Mastaleꞌ naroo yòoyaaa, leꞌ mbii coꞌ nxyoꞌf loo níttóꞌ na, ntetee yòoyaa con fuerz coꞌ ndxàp mbii. Lomisqueꞌ ne, neꞌ yòoyaa thìb leꞌ yaa coꞌ lèe timón. Con yaaa no maste ntec pilot yòoyaa par ntetee pilot yòoyaa ned ndlyaꞌs pilot loo nít.
\v 5 Tataa ndxàca loo mèn con thìb leꞌ bélꞌ coꞌ nac looz mèn. Guꞌ nonqueꞌ looz naꞌ nac thìb leꞌ bélꞌ lad naꞌ coꞌ iñaade arid naroo. Per ndenꞌ naꞌ, lìcqueꞌ, anzeꞌf conꞌ roo no conꞌ tínꞌ ndxàc loo naꞌ por cón cheꞌn looz naꞌ coꞌseꞌ ndyoodiꞌs naꞌ no coꞌseꞌ nque diꞌs naꞌ. Nde niin thìb conꞌ loo guꞌ: Guꞌ ndaꞌqueꞌ cuent con thìb leꞌ quìi coꞌ nac thìb yéc cerri chuꞌth no maste nxyonꞌ bèel leꞌn yii leꞌn den ndxep vez.
\p
\v 6 Mod coꞌ ndyoodiꞌs mèn ndluꞌ loo mèn leꞌ xtùuz mèn no lezoꞌ mèn nac xal thìb quìi no thìb bèel coꞌ ndli yalquìi loo mèn. Por mod coꞌ ndryoꞌ ndlyenꞌ lezoꞌ mèn no xtùuz mèn ndyoodiꞌs mèn ngòc nguàal conꞌ par ndxàc huax yalquìi loo mèn coꞌ, por derech, ntezaꞌ loo mèn. Tataa mod ndluꞌ mèn ñaalequeꞌ loo mèn no ndxàca loo mèn leꞌ ryethe conꞌ coꞌ nac conꞌ yeꞌrsinꞌ cheꞌn yeꞌrbiil ngue ñibeꞌ loo mèn coꞌseꞌ ndyoodiꞌs mèn ngòc nguàal diꞌsa. No coꞌseꞌ tataa ndli mèn, ndoo lìte ndxezaꞌ mèn no ndlyux yalnaban mèn loo izlyoꞌ ndxèꞌ.
\v 7 Ndxác mèn ndli mèn gan par ndxàc nadoꞌ rye loo máꞌ xal mbeeꞌs, no xal mbin, mbelꞌ, no rye loo máꞌ coꞌ naban leꞌn níttóꞌ. Ndli mèn gan ndxàc nadoꞌ máꞌa loo mèn.
\v 8 Per yende chó mèn coꞌ thidte mèna gác li gan par gàc nadoꞌ mèn loo mod coꞌ ndyoodiꞌs mèn loo xtàa mèn. No yende mod gàp lezoꞌ mèn loo mod coꞌ ndyoodiꞌs mèn no loo mod coꞌ nac mèn. Mod coꞌ ndxàp mèn no mod coꞌ ndryoꞌ ndlyenꞌ leꞌn lezoꞌ mèn ndluꞌ loo mèn por mod coꞌ ndyoodiꞌs mèn yende mod leque mèn gàp lezoꞌ mèn loo conꞌ ndli mèn xtùuz par gàc nadoꞌ mèn no par zyeꞌ mod coꞌ ndxàp mèn. No conꞌ coꞌ ndryoꞌ ndlyenꞌ leꞌn lezoꞌ mèn no leꞌn xtùuz mèn coꞌ ndyoodiꞌs mèn ndli par ndxezaꞌ mèn no ndlyux mèn xal coꞌseꞌ ndxuhua thìb máꞌ cuanꞌ par gath máꞌ.
\v 9 Con looz naꞌ coꞌ tataa ndli ndyoodiꞌs naꞌ, mbez naꞌ leꞌ Diox xud naꞌ nac thìb Diox roo no thìb Diox xèn. No mbez naꞌ leꞌ Diox nac Diox natúꞌ. No con leque looz naꞌa ñii yèe ñii tìi naꞌ. No nquedèe naꞌ mèn coꞌ nac hues xtàa naꞌ, mèn coꞌ nac xin no xnaa Diox coꞌ yub Diox mtoxcuaꞌ xal nac Diox.
\v 10 Ngue niin loo guꞌ: Lìcqueꞌ, con leque looz mèn coꞌ mbez mèn leꞌ Diox nac Diox roo Diox xèn no Diox natúꞌ, con leque looz mèna ñii yèe ñii tìi mèn no nquedèe mèn hues xtàa mèn. Mèn huesen por cón cheꞌn Crist, por derech, indxàalte gàca tataa làth naꞌ.
\v 11 ¿Xá nee guꞌ? ¿Chéꞌ nzo mod leque coꞌteꞌ ndub zib nít coꞌ ndxu mèn, leque tya lyen nít nala, ne, àꞌ? Yende xàa.
\v 12 Mèn huesen por cón cheꞌn Crist, niin loo guꞌ tedib vez, ne: ¿Chéꞌ nzo mod leque yaa ngudyuug coꞌ ndaꞌ ngudyuug taꞌ yaa ngudyuug xlè coꞌ lèe aceitun? Lomisqueꞌ ne, ¿chéꞌ nzo mod taꞌ thìb xanꞌ lus uv coꞌ ndaꞌ xlè uv xlè yaa ngudyuug, àꞌ? Yende moda, ¿léꞌ? Lomisqueꞌ ne, ngue niin loo guꞌ: Yende mod zib nít nazii coꞌteꞌ ndub zib nít coꞌ ndxu mèn, ¿léꞌ? Cona nee diꞌs, mèn yeꞌrsinꞌ ndli conꞌ yeꞌrsinꞌ. No mèn coꞌ nac cheꞌnpeꞌ Diox ndli conꞌ ndac loo hues xtàa mèn.
\s Trèꞌ ndluꞌ coꞌ nac lìcpeꞌ coꞌ ndxác mèn.
\p
\v 13 Cheleꞌ làth guꞌ nzo ndxep mèn coꞌ ndli guꞌ cuent ndxác no coꞌ ndli guꞌ cuent ndxaaꞌd diꞌs, ndxàal luꞌ mèna conꞌ coꞌ ndxác mèna por mod coꞌ nque tee ban ndac mèna no por mod coꞌ nac mèna mèn nadoꞌ loo hues xtàa mèn.
\v 14 Per cheleꞌ ndxep guꞌ ndxòo xyàn lezoꞌ no ndxàn lezoꞌ guꞌ ñèe guꞌ xtàa guꞌ no ndoo lezoꞌ guꞌ li guꞌ conꞌ par ante ñèe loon guꞌ que no guꞌ conꞌ, leꞌ sya, cheleꞌ guꞌ tataa ngue li, indxàalte tyeꞌs guꞌ loo conꞌ ndxác guꞌ. Tac conꞌ ndxác guꞌa, leꞌi ndli par leque guꞌ nquedìi guꞌ no ncà guꞌ loo conꞌ coꞌ nac conꞌ lìcpeꞌ.
\v 15 Tac conꞌ coꞌ ndli guꞌ cuent ndxác guꞌ, inacte conꞌ ngue lyath no Diox guꞌ par ndxác guꞌ li guꞌ tataa. Ndxeꞌlequeꞌ, conꞌ coꞌ ndli guꞌ cuent ndxác guꞌa nac conꞌ coꞌ alithe ndyeꞌth xtùuz yéc mèn loo izlyoꞌ ndxèꞌ. No naca conꞌ ndli yub Mebizya loo guꞌ par li guꞌ cuent ndxác guꞌ.
\v 16 Tac coꞌteꞌ nzo mèn coꞌ ndxàn lezoꞌ ñèe xtàa no coꞌteꞌ nzo mèn coꞌ ante ñèe loon que no mèn cheꞌn mèn, tya mbe yoo mèn no ndxàc rye loothe conꞌ yeꞌrsinꞌ làth mèn.
\v 17 Men coꞌ ndlyath no Diox par ndxác mèna, mèna indxòode lezoꞌ loo chol conꞌ yeꞌrsinꞌ coꞌ nac cón cheꞌn xab izlyoꞌ. Nac mèna mèn nadoꞌ coꞌ mbe ban rye nda mèn no rye ndyeꞌth mèn làth xtàa mèn. No ndoo lezoꞌ mèna li mèna ante conꞌ ndac. Mèna nac mèn coꞌ indlide par más ndyuꞌ thìb xtàa mèn loo tedib xtàa mèn. Nac mèna mèn coꞌ intembìide ro no coꞌ intembìide xtiꞌs loo mèn.
\v 18 Leꞌ mèn coꞌ ncuaꞌn mod par tuꞌ tàl mèna lezoꞌ taamas mèn loo chol conꞌ yeꞌrsinꞌ na, gàca loo mèna nambìi no nalì que tee ban mèna loo Diox.
\c 4
\s Trèꞌ ndluꞌ cón cheꞌn mèn coꞌ anzeꞌf ndxòo lezoꞌ que tee ban loo cón cheꞌn xab izlyoꞌ.
\p
\v 1 Nde niin thìb conꞌ loo guꞌ: ¿Pá ned nde diꞌs no cuent no yalgyoo coꞌ ndxàc làth guꞌ baꞌ, àꞌ? Na nii loo guꞌ: Leꞌi nde no leꞌi ndxàc loo guꞌ por ryethe conꞌ yeꞌrsinꞌ coꞌ ndryoꞌ ndlyenꞌ leꞌn lezoꞌ guꞌ coꞌ toloqueꞌ ndli nzi yoo guꞌ làth xtàa guꞌ.
\v 2 Guꞌ ndlyaꞌs que no guꞌ ndxep conꞌ. No coꞌseꞌ yende mod que no guꞌi, ndxàn lezoꞌ guꞌ ñèe guꞌ xtàa guꞌ axta ndxuth guꞌ xtàa guꞌ. Ndxàn lezoꞌ guꞌ ñèe guꞌ xtàa guꞌ por cón cheꞌn conꞌ coꞌ iñaade arid ntac coꞌ ngue no xtàa guꞌ. No coꞌseꞌ yende mod que no guꞌi, sya, ntlo guꞌ, ncuaꞌn guꞌ xóꞌ no ngyoo guꞌ con xtàa guꞌ. Yende mod que no guꞌ coꞌ ndlyaꞌs guꞌ que no guꞌ tac imbezte guꞌi no iñaꞌbte guꞌi loo Diox coꞌseꞌ mbez guꞌ Diox.
\v 3 Per mastaleꞌ ñaꞌb guꞌi loo Diox, Diox neꞌlide par que no guꞌi. Tac coꞌseꞌ ñaꞌb guꞌ conꞌ loo Diox, Diox nonleꞌ xal nac xtùuz yeꞌrsinꞌ coꞌ ngue li guꞌ cón cheꞌn conꞌ ngue naꞌb guꞌ loo Diox. Ale ñaꞌb guꞌ conꞌ loo Diox ante par taꞌ guꞌ gust lezoꞌ guꞌ no maste.
\v 4 ¡Aa mèn coꞌ ndlyaꞌs yòo loo cón cheꞌn Diox no coꞌ ndlyaꞌs que tee loo cón cheꞌn xab izlyoꞌ loo izlyoꞌ leque tiemp! ¿Chéꞌ neꞌtaꞌde guꞌ cuent no chéꞌ inonte guꞌ leꞌ mèn coꞌ más ndxòo lezoꞌ ndli coꞌ nac cón cheꞌn xab izlyoꞌ, mèna nac ngolo ngolaꞌs loo cón cheꞌn Diox no loo Diox, àꞌ? Aa. Tataaqueꞌ naca. Chol mèn coꞌ más ndxòo lezoꞌ ndli conꞌ coꞌ nac cón cheꞌn xab izlyoꞌ, lìcqueꞌ, mèna ndxàc ngolo ngolaꞌs loo cón cheꞌn Diox no loo Diox.
\v 5 ¿Chéꞌ ndyac guꞌ no chéꞌ ndli guꞌ cuent angndub diꞌs loo libr coꞌ nac xtiꞌs Diox coꞌ mbez:
\pi1 Leꞌ Xpii Natúꞌ cheꞌn Diox coꞌ Diox mtelꞌ par yòo Xpii Natúꞌ loo naꞌ par ban no Xpii Natúꞌ naꞌ por tant nqueꞌ lezoꞌ Xpii Natúꞌ naꞌ, indláꞌde Xpii Natúꞌ naꞌ par li naꞌ conꞌ yeꞌrsinꞌ par cuaꞌn naꞌ xquin naꞌ no xtol naꞌ loo Diox, càꞌ?
\m Tyèꞌ. Inacte diꞌsa diꞌs coꞌ angndub loo libr coꞌ nac xtiꞌs Diox. Lìcqueꞌ nac diꞌsa.
\p
\v 6 Per ndxeꞌlequeꞌ, Diox ndlyath no naꞌ con conꞌ ndac coꞌ ndli Diox anggàc loo naꞌ. Loo libr coꞌ nac xtiꞌs Diox ndub diꞌs coꞌ mbez:
\pi1 Leꞌ Diox ndxecloo no ndxàc Diox ngolo ngolaꞌs loo mèn coꞌ ndyeꞌs. Per ndlyath no Diox mèn coꞌ nac mèn nadoꞌ con conꞌ ndac coꞌ nac cheꞌn Diox coꞌ ndli Diox angndxàc loo mèna.
\m
\v 7 Ftaꞌ guꞌ lugar, tá, ftubdiꞌs guꞌ loo ryethe conꞌ coꞌ ñibeꞌ Diox loo guꞌ par li guꞌi. Neꞌtaꞌde guꞌ lugar ñibeꞌ Mebizya loo guꞌ nec thìb mod no nec tedib mod loo coꞌ nac cón cheꞌn Mebizya. Leꞌ sya, tataa mod neꞌbii gaxte Mebizya loo guꞌ. Láꞌ Mebizya guꞌ coꞌteꞌ nziriꞌ guꞌ loo Diox.
\v 8 Ftolo gòo guꞌ loo cón cheꞌn Diox par tolo taꞌ guꞌ cuent cón nac cón cheꞌn Diox no par tolo li nèe guꞌ guꞌ loo cón cheꞌn Diox. Cheleꞌ guꞌ tataa li, Diox altant tyoo par tolo li Diox anggàc más conꞌ ndac loo guꞌ. Mèn coꞌ ndxàp xtol, gòc guꞌ mèn coꞌ lyàa yéc no coꞌ lyàa lezoꞌ loo Diox par yumbìi xtùuz guꞌ no par yumbìi lezoꞌ guꞌ loo cón cheꞌn Diox xal coꞌseꞌ tech mèn yaꞌ mèn par nambìi yanꞌ yaꞌ mèn. Leꞌ guꞌ coꞌ nac chop loo chop laꞌs coꞌ lyaꞌs queꞌ lezoꞌ Diox no coꞌ ndlyaꞌs leque tiemp li coꞌ nac cón cheꞌn xab izlyoꞌ na, blàa yéc guꞌ no blàa lezoꞌ guꞌ loo Diox par zyeꞌ mod coꞌ ndxàp guꞌ baꞌ par thìb lìte yéc guꞌ no thìb lìte lezoꞌ guꞌ yòo guꞌ loo cón cheꞌn Diox.
\v 9 Lomisqueꞌ, ngue niin loo guꞌ, ne, mèn coꞌ ndxàp xtol no mèn coꞌ nac chop loo chop laꞌs loo cón cheꞌn Diox: Fxi yéc guꞌ no fxi lezoꞌ guꞌ. Bínꞌ guꞌ no grozèe yath guꞌ. No neꞌtolode taꞌ guꞌ gust lezoꞌ guꞌ loo ryethe conꞌ yeꞌrsinꞌ coꞌ ndli guꞌ. Lugar de xìis guꞌ, más quee lezoꞌ guꞌ bínꞌ guꞌ. No lugar de nzoꞌf ndeꞌ nzoꞌf ndlaꞌ lezoꞌ guꞌ, más quee lezoꞌ guꞌ bínꞌ guꞌ.
\v 10 Gòc guꞌ mèn coꞌ, lìcqueꞌ, ngòc mèn nadoꞌ loo Diox. Leꞌ Diox na, li gàc guꞌ mèn roo mèn xèn loo Diox yiloa.
\s Mèn coꞌ ndub rez cón cheꞌn hues xtàa mèn.
\p
\v 11 Mèn huesen por cón cheꞌn Jesucrist, neꞌñii yèede guꞌ no neꞌñii tìide guꞌ cón cheꞌn thìb hues xtàa guꞌ no cón cheꞌn tedib hues xtàa guꞌ. Tac mèn coꞌ ñii yèe ñii tìi cón cheꞌn thìb mèn coꞌ ndxàc hues mèn por cón cheꞌn Crist, o cheleꞌ mèn nii ngòc nguàal conꞌ cón cheꞌn mèn coꞌ ndxàc hues xtàa mèna, mèna nxìis no diꞌs coꞌ nac yalnibeꞌ coꞌ nac más conꞌ roo conꞌ xèn coꞌ mnibeꞌ Tad loo naꞌ par li naꞌ. Leꞌ sya, tataa mod ndub rez mèn cón cheꞌn conꞌ coꞌ mnibeꞌ Tad loo naꞌ li naꞌ par ñee mèn inquinte tyubdiꞌs mèn xal mnibeꞌ Tad loo mèn li mèn. No cheleꞌ guꞌ ndub rez cón cheꞌn coꞌ mnibeꞌ Tad loo naꞌ li naꞌ, leꞌ sya, lugar de tyubdiꞌs guꞌ loo conꞌ mnibeꞌ Diox loo naꞌ li naꞌ, ale ndxàc guꞌ mèn coꞌ ndub rez cón cheꞌn conꞌ coꞌ mnibeꞌ Diox loo naꞌ li naꞌ.
\v 12 Per nalleꞌ ngue niin loo guꞌ: Thidte xaꞌ coꞌ nac Diox nac xaꞌ coꞌ nzo coꞌ ñibeꞌ loo mèn loo izlyoꞌ ndxèꞌ par li mèn conꞌ coꞌ ñibeꞌ thidte Diox. No lomisqueꞌ ne, leque yub xaꞌ coꞌ nac Diox coꞌ ñibeꞌ loo mèn, nac xaꞌ coꞌ ndub rez cón cheꞌn mèn loo mèn. No leque Diox nac xaꞌ coꞌ nteláꞌ mèn loo conꞌ ryes. No nac Diox xaꞌ coꞌ coꞌ xàꞌ mèn loo Diox thidtene yilo gath mèn. ¿Per guꞌ, àꞌ? ¿Cón nac guꞌ par ñii yèe guꞌ no ñii tìi guꞌ ngòc nguàal conꞌ cón cheꞌn hues xtàa guꞌ, àꞌ? Yende cón nac guꞌ par li guꞌ tataa, ¿léꞌ?
\s Yende chó mèn non cón gàc loo mèn thìb huiz no tedib huiz.
\p
\v 13 Nalleꞌ, bìn guꞌ tedib conꞌ ngue niin loo guꞌ: Guꞌ coꞌ mbez: Yéꞌ o huizeꞌ nda li naꞌ delgens naꞌ loo thìb ciuda o chó cuida. Más huen ya naꞌ no yo naꞌ tya thìb línꞌ par li naꞌ delgens no li naꞌ gan huax tmi.
\v 14 No neꞌñeede guꞌ cón gàc thìb huiz tedib huiz. ¿Xá nee guꞌ? ¿Cón nac yalnaban mèn? Yalnaban mèn nac xal thìb beu coꞌ setilte ndxetoo. No yiloa, setilte ndyonꞌ beu.
\v 15 Conꞌ coꞌ más huen ndxàal gab guꞌ nac diꞌs ndxèꞌ: Cheleꞌ Tad Diox ndlyaꞌs no cheleꞌ Tad Diox nee lezoꞌ, tolo ban naꞌ taandxep tiemp. Sya, li naꞌ thìb conꞌ no li naꞌ tedib conꞌ xal nee lezoꞌ Tad Diox.
\v 16 Per nalleꞌ, ale ndxeꞌlequeꞌ, ale más ndyac lezoꞌ guꞌ por gust coꞌ ndaꞌ guꞌ lezoꞌ guꞌ, ndyoodiꞌs guꞌ diꞌs naxalꞌ no diꞌs nateꞌs. No rye mod coꞌ ndyoodiꞌs guꞌa nac conꞌ yeꞌrsinꞌtúb.
\v 17 Mèn coꞌ nanee no ndxác mèn li mèn conꞌ ndac no indlide mèn conꞌ ndaca, mèna ncuaꞌn xquin mèn no ncuaꞌn mèna xtol mèn loo Diox.
\c 5
\s Trèꞌ ndluꞌ loo mèn ric xá mod ndxàal que tee ban mèn ric loo izlyoꞌ ndxèꞌ.
\p
\v 1 Bìn guꞌ diꞌs coꞌ nde niin loo guꞌ ndxèꞌ, mèn ric: Más quee lezoꞌ guꞌ bínꞌ guꞌ no grozèe yath guꞌ por yaltìi no nesida coꞌ gàc loo guꞌ yiloa.
\v 2 Ryete yalgonꞌ coꞌ ndxàp guꞌ, leꞌi nzi yàꞌbleꞌ. No ryete xab guꞌ coꞌ ndxàp guꞌ, leꞌi ngue yuhualeꞌ mbèd.
\v 3 Lomisqueꞌ ne, tmi or no tmi plat coꞌ ndxàp guꞌ, leꞌi ndoo quée beuleꞌ. No ngue yuhualeꞌ yòoi. Lomisqueꞌ ne, xalqueꞌ nzi yizaꞌ tmi or no tmi plat coꞌ ndxàp guꞌ, leꞌi ndluꞌ loo guꞌ coꞌ gàc loo guꞌ. No tiempa tenꞌ guꞌ huax yalnè tínꞌ no anzeꞌf xi lezoꞌ guꞌ xal coꞌseꞌ ntec nsoꞌ quìi bèel lad mèn. Tataa gàca loo guꞌ tac guꞌ mque no thìb bàan yalgonꞌ leꞌn tiemp coꞌ nac lult tiemp ndxèꞌ.
\v 4 Centav coꞌ mdix guꞌ loo mèn coꞌ mque zinꞌ coꞌ mthop cosech guꞌ, centav coꞌ neꞌnguixte guꞌ complet loo mèna, por centava no maste càba loo guꞌ leꞌ Diox li tyactìi guꞌ coꞌseꞌ tub rez Diox cón cheꞌn guꞌ. Lomisqueꞌ ne, Tad Diox, coꞌ ñibeꞌ loo ryethe angl coꞌ nac solndad loo Tad Diox, mbìnqueꞌ diꞌs coꞌ mco ñee mèn coꞌ mque rsinꞌ guꞌ coꞌ neꞌnguixte guꞌ complet mcàa mèn coꞌ mque rsinꞌ guꞌ.
\v 5 Loo izlyoꞌ ndxèꞌ anzeꞌf mque tee taꞌ guꞌ gust lezoꞌ guꞌ loo ryethe conꞌ coꞌ mque tee li guꞌ. Alithe mque tee yuhua guꞌ axtaqueꞌ mchaꞌ guꞌ xal thìb laa ngon coꞌ ndoosuaꞌ par guth mèn ngon yiloa.
\v 6 Mquexùꞌ mqueꞌ fals guꞌ mèn no mbeth guꞌ mèn coꞌ yende chó xquin ngòp mastaleꞌ mbral mèna par ngláꞌ mèna laꞌs yaꞌ guꞌ. Per neꞌngàcte ngli mèna gan ngláꞌ mèna laꞌs yaꞌ guꞌ.
\s Diꞌs coꞌ ndluꞌ cón cheꞌn mèn coꞌ nchaꞌlaꞌs loo mèn coꞌ mbez Diox.
\p
\v 7 Cona, ngue niin loo guꞌ coꞌ nac mèn huesen por cón cheꞌn Crist: Fxec guꞌ no fchaꞌlaꞌs guꞌ axta coꞌseꞌ zin huiz no zin ze coꞌseꞌ yiꞌth Tad Jesucrist loo izlyoꞌ tedib vez. Guꞌ nonqueꞌ leꞌ mèn coꞌ nque zinꞌ loo xyòn mèn, mèna nxec no mbed no nchaꞌlaꞌs mèna no nzi quee lezoꞌ mèna axta coꞌseꞌ lyàa yuu ndlyo. No mbed mèn axta riꞌth tiemp yuu coꞌ nac yuu bluz par tlo thop mèn cosech coꞌ anzeꞌf ntac coꞌ nac coꞌ mbli mèn zinꞌ loo xyòn mèn.
\v 8 Ngue niin loo guꞌ, ne: Fchaꞌlaꞌs guꞌ no neꞌtyoo xàꞌde lezoꞌ guꞌ por conꞌ coꞌ ndxàc loo guꞌ por cón cheꞌn Diox tac huiz, coꞌ gàc huiz coꞌseꞌ yiꞌth Tad Jesus loo izlyoꞌ ndxèꞌ tedib vez, nde zinꞌ gaxleꞌ.
\v 9 Guꞌ coꞌ nac mèn huesen por cón cheꞌn Jesucrist, neꞌco ñeede guꞌ cón cheꞌn hues xtàa guꞌ par neꞌtub rezte Diox cón cheꞌn guꞌ. Jesucrist coꞌ tub rez cón cheꞌn ryethe mèn loo mèna, yamerleꞌ yiꞌth Tad Jesucrist loo izlyoꞌ ndxèꞌ tedib vez.
\v 10 Mèn huesen por cón cheꞌn Jesucrist, gòc guꞌ xal mèn coꞌ mxec no coꞌ mxactìi no coꞌ mchaꞌlaꞌs, mèn coꞌ mdeꞌth diꞌs coꞌ ndxab Diox xal mnibeꞌ Diox li mèn tiempa.
\v 11 Nuꞌ ndenꞌ no ndyac nuꞌ huen nda mèn no ndyac lezoꞌ mèn, mèn coꞌ nxec no coꞌ nchaꞌlaꞌs coꞌseꞌ ndyactìi mèn por cón cheꞌn Tad Jesús. Guꞌ mbìnqueꞌ no ndaꞌqueꞌ guꞌ cuent quetal mxec Job no mchaꞌlaꞌs Job coꞌseꞌ mxactìi Job no coꞌseꞌ ngòc yaltìi no yalquìi loo Job. Nonqueꞌ guꞌ no ndaꞌqueꞌ guꞌ cuent xá mod mblyath no Tad Diox Job coꞌseꞌ ngolo mxactìi Job par mblo xtàa Tad Diox ryethe conꞌ coꞌ mblyux loo Job. No ngoloa, masreꞌ conꞌ mque no Job. Cona, non naꞌ axta arid ndlyat lezoꞌ Diox ñèe Diox mèn.
\p
\v 12 Per thìb conꞌ más ndlyazen niin loo guꞌ, mèn huesen por cón cheꞌn Crist: Coꞌseꞌ lyaꞌs guꞌ li nèe guꞌ diꞌs coꞌ gab guꞌ, neꞌ por chuꞌth neꞌteꞌthte guꞌ lèe béꞌ. Neꞌ neꞌ teꞌth guꞌ lèe izlyoꞌ. Neꞌ neꞌ teꞌth guꞌ lèe tedib conꞌ. Más huen gab guꞌ: Aa, tataa gàca, xàa. No más huen gab guꞌ: Neꞌñeeda. Neꞌñeeda, xàa, par tataa mod neꞌzib quìide Diox guꞌ.
\p
\v 13 Cheleꞌ chol hues xtàa guꞌ coꞌ nzi xi lezoꞌ por ndxàc yaltìi loo hues xtàa guꞌa, ndxàal cuez hues xtàa guꞌa loo Diox por cón cheꞌn coꞌ ndxàc loo hues xtàa guꞌa. Lomisqueꞌ ne, cheleꞌ chol hues xtàa guꞌ ndyac lezoꞌ por ndxàc conꞌ ndac loo hues xtàa guꞌa, ndxàal gol ro hues xtàa guꞌ himn loo Diox xal ndyeꞌth diꞌs coꞌ nzo mod gab hues xtàa guꞌ loo Diox por conꞌ roo conꞌ xèn coꞌ ndli Diox loo hues xtàa guꞌ.
\v 14 Lomisqueꞌ, ngue niin loo guꞌ, ne: Cheleꞌ chol hues xtàa guꞌ ndyac nen, ndxàal cuez hues xtàa guꞌa rye mèngool coꞌ nqueltàa loo cón cheꞌn Diox par cuez mèngoola lèe Diox por cón cheꞌn mèn yíiza. No ndxàal tà mèngoola aceit lad mèn yíiza por lèe Tad Jesús.
\v 15 No coꞌseꞌ mbez mèn Diox no ndxelaꞌs mèn dib nzo yéc mèn no dib nzo lezoꞌ mèn, mèna yiche no yiteꞌf loo yíiza. No mèna yac no yiche no yiteꞌf mèna tac Diox teyac mèna. No lomisqueꞌ, cheleꞌ mèn yíiza mcuaꞌn xtol, xtol mèn yíiza mdyonꞌ leque hora cheleꞌ mèn yíiza mnaꞌb loo Diox tonꞌ Diox xtol mèn yíiza.
\v 16 Por cona, ngue niin loo guꞌ: Xop dol guꞌ cón cheꞌn xtol guꞌ loo Diox láth mbez guꞌ Diox con hues xtàa guꞌ. Lomisqueꞌ, ndlyazen gurez guꞌ Diox thìb guꞌ no tedib guꞌ, guꞌ coꞌ nac hues xtàa, par tataa mod teyac Diox mèn yíiz coꞌ ndyac nen làth guꞌ. No yiche no yiteꞌf mèna làth guꞌ. No coꞌseꞌ mbez mèn Diox coꞌseꞌ, lìcqueꞌ, nac mèn mèn ndac loo Diox, Diox ndxòn diꞌs coꞌ mbez mèna loo Diox no tataa mod li Diox cas diꞌs coꞌ mbez mèna loo Diox.
\v 17 Guꞌ ndaꞌqueꞌ cuent leꞌ Lii coꞌ ngòc mbiꞌ coꞌ mdeꞌth diꞌs coꞌ ndxab Diox, Lii ngòc thìb mbiꞌ lalqueꞌ xal naꞌ. Coꞌseꞌ mbrez Lii Diox no mnaꞌb Lii loo Diox coꞌteꞌ ngo Lii tiempa par neꞌlyàade yuu, mbìn Diox ro Lii no neꞌnglàade yuu leꞌn son linꞌ narol tya.
\v 18 Ngoloa, coꞌseꞌ mbere Lii, mbrez Lii Diox no mnaꞌb Lii loo Diox tedib vez par lyàa yuu, mbere yuu, ngulàa yuu tedib vez coꞌteꞌ ngo Liia. No mèn coꞌ ngo ban tya mthop cosech.
\p
\v 19 Guꞌ coꞌ nac mèn huesen por cón cheꞌn Jesucrist, cheleꞌ chol guꞌ ndyoo xàꞌ lezoꞌ loo cón cheꞌn Diox coꞌ nac lìcpeꞌ no ngo tac lezoꞌ guꞌ loo cón cheꞌn Diox, no làth xtauꞌa nzo thìb mèn coꞌ ndyoodiꞌs no guꞌ no coꞌ ncoꞌx loo guꞌ par bere guꞌ, yòo guꞌ loo cón cheꞌn Diox tedib vez, bìn guꞌ ro mèna.
\v 20 Ndlyazen taꞌ guꞌ cuent coꞌ huenlequeꞌ, leꞌ chol mèn coꞌ ndyoodiꞌs no mèn no coꞌ ncoꞌx loo mèn coꞌ mcuaꞌn xtol no coꞌ nzi tee thìb ned coꞌ nac ned yeꞌrsinꞌ par bere mèn coꞌ mcuaꞌn xtola, yòo mèn coꞌ mcuaꞌn xtola loo cón cheꞌn Diox tedib vez, mèna li par lyáꞌ alm mèn no xpii mèn coꞌ ngòp xtola loo quìi no loo bèel coꞌteꞌ tyactìi mèn yiloa. No lomisqueꞌ, li mèna leꞌ rye xtol coꞌ mcuaꞌn mèn coꞌ ngro xàꞌ loo cón cheꞌn Diox tyonꞌ coꞌseꞌ bere mèna, yòo mèna loo cón cheꞌn Diox tedib vez.