\id 1PE
\ide UTF8
\h 1 PEDRO
\toc1 1 PEDRO
\mt Ner Cart Coꞌ Mqueꞌ Pedr Yeꞌs Loo Mèn
\c 1
\s Pedr mqueꞌ yeꞌs loo mèn coꞌ ngolaꞌsleꞌ loo cón cheꞌn Diox por cón cheꞌn Jesucrist, mèn coꞌ mque tee reꞌs pál.
\p
\v 1 Daa, Pedr, nac thìb mbiꞌ coꞌ ndxeꞌ diꞌs cón cheꞌn Jesucrist loo mèn, coꞌ nee diꞌs, leque yub Jesucrist mtelꞌ daa loo mèn. Ngue queꞌen yeꞌs ndxèꞌ loo rye guꞌ, guꞌ coꞌ ngolaꞌsleꞌ loo Jesús no loo cón cheꞌn Jesús, guꞌ coꞌ ngroꞌ nacionpeꞌ guꞌ, guꞌ coꞌ nzo ban yèezyaꞌ cheꞌn làaz mèn ponto, guꞌ coꞌ nzo ban yèezyaꞌ cheꞌn làaz mèn galacia, guꞌ coꞌ nzo ban yèezyaꞌ cheꞌn làaz mèn capadocia, guꞌ coꞌ nzo ban yèezyaꞌ cheꞌn làaz mèn asia, no guꞌ coꞌ nzo ban yèezyaꞌ cheꞌn làaz mèn bitiñ.
\v 2 Diox xud naꞌ mcui guꞌ xalqueꞌ mnibeꞌ Diox loo lezoꞌ Diox li Diox xal nac coꞌ gunee lezoꞌ Diox li Diox axta más pólleꞌa. Por cón cheꞌn Xpii Natúꞌ cheꞌn Diox, Diox mbloꞌ xàꞌ guꞌ loo ryethe conꞌ yeꞌrsinꞌ coꞌ nac cón cheꞌn xab izlyoꞌ par ante tyubdiꞌs guꞌ loo Diox no par gàc guꞌ mèn nalì no mèn nambìi loo Diox por cón cheꞌn renpeꞌ Jesucrist. Ndlyazen leꞌ Diox li anggàc huax conꞌ ndac loo guꞌ. No ndlyazen yo nagàl lezoꞌ guꞌ loo Diox no cue ban guꞌ rye nda guꞌ no rye ndyeꞌth guꞌ làth xtàa guꞌ.
\s Yalnaban cub ndxèꞌ nac thìb yalnaban coꞌ ngure quee lezoꞌ mèn gàc loo mèn póla.
\p
\v 3 Ndlyazen gab naꞌ leꞌ Diox coꞌ nac xud Tad Jesucrist naꞌ nac Diox roo no Diox xèn. Por anzeꞌf mblyat lezoꞌ Diox gunèe Diox naꞌ, mbli Diox ngòc naꞌ mèn coꞌ ngue no tedib yalnaban cub xal coꞌseꞌ ndxàca loo thìb mbetoꞌ coꞌ ndxáal loo izlyoꞌ. Tataa ngòc loo naꞌ por mbli Diox leꞌ Jesucrist ngro xban làth mèn nguth. No por ngro xban Jesucrist làth mèn nguth, ndxàca loo naꞌ leꞌ naꞌ nzi quee lezoꞌ gàc loo naꞌ tedib yalnaban coꞌ gàc thìb yalnaban más ndac yiloa.
\v 4 No li Diox leꞌ guꞌ gàc cheꞌn no yanꞌ no guꞌ conꞌ coꞌ nac xal thìb herens coꞌ ngue quenap Diox loo béꞌ coꞌ gàc cheꞌnpeꞌ guꞌ yiloa. No conꞌ coꞌ gàc cheꞌn guꞌa no conꞌ coꞌ yanꞌ no guꞌa neꞌlyuxte thidtene. No neꞌ neꞌ yen mod gàc conꞌa conꞌ zab. No neꞌ neꞌ yen mod gàc conꞌa xal conꞌ ngolꞌ xal ndxolꞌ chol laa nayèe coꞌ ngolꞌ.
\v 5 No com leꞌ guꞌ ndxelaꞌsqueꞌ loo Diox, ¿léꞌ?, Diox nquenap guꞌ por cón cheꞌn conꞌ roo no conꞌ xèn coꞌ ndxàp Diox laꞌs nii Diox no laꞌs yaꞌ Diox axta coꞌseꞌ gàc huiz yòo guꞌ loo béꞌ par ban no guꞌ Diox thidtene tya. No luꞌ Diox conꞌ coꞌ yanꞌ no guꞌ no coꞌ gàc cheꞌnpeꞌ guꞌ leꞌn huiz coꞌ gàc lult tiemp loo izlyoꞌ ndxèꞌ.
\p
\v 6 No por cón cheꞌn ryethe conꞌa, ndenꞌen no naneen ndyac lezoꞌ guꞌ mastaleꞌ nquin gàc huax yaltìi loo guꞌ no tenꞌ guꞌ huax yaltìi ndxep tiemp.
\v 7 Axta arid ntaca loo Diox leꞌ guꞌ ndxelaꞌs loo Diox no ndxàp guꞌ yalxlaꞌs loo Diox. Diox non nquin gàc loo guꞌ tyactìi guꞌ par ñee Diox ñeeneꞌ chéꞌ xec guꞌ que tee ban guꞌ loo cón cheꞌn Diox. Coꞌseꞌ ndxàc conꞌa loo guꞌ, naca xal coꞌseꞌ nsunꞌ mèn or con quìi par taꞌ mèn cuent ñeeneꞌ chéꞌ nac ora orpeꞌ. Coꞌseꞌ nxec mèn ndxàc chol yaltìi coꞌ ndxàc loo mèn, leꞌ sya, cón cheꞌn mèna axta arid ntac loo Diox más leque or coꞌ ndxezaꞌ no coꞌ ndlyux. Por cona, ngue niin loo guꞌ: Cheleꞌ guꞌ, lìcqueꞌ, tolo gàp yalxlaꞌs loo Diox no tolo yilaꞌs guꞌ loo Diox láth ndxàc chol yaltìi loo guꞌ, syase co Diox cuent nac guꞌ mèn ndac. No li Diox gàc conꞌ roo no conꞌ xèn loo guꞌ. No li Diox gàc guꞌ mèn guryath no mèn guryèn loo taamas mèn coꞌseꞌ yiꞌth Jesucrist loo izlyoꞌ ndxèꞌ tedib vez.
\p
\v 8 Nonquen leꞌ guꞌ anzeꞌf nqueꞌ lezoꞌ Jesucrist mastaleꞌ tarte ñèe guꞌ xá ñaa Jesucrist. No por ndxàp guꞌ yalxlaꞌs loo Jesucrist, mastaleꞌ tarte ñèe guꞌ xá ñaa Jesucrist, ndyac tínꞌ lezoꞌ guꞌ no thidtene nxoꞌf ndeꞌ nxoꞌf ndlaꞌ lezoꞌ guꞌ. No por anzeꞌf ndyac lezoꞌ guꞌa, nonquen naca thìb conꞌ roo no thìb conꞌ xèn loo guꞌ no axta neꞌ neꞌ gác guꞌ taꞌ guꞌ cuent coꞌ ndxàc loo guꞌ loo cón cheꞌn Jesucrist loo mèn.
\v 9 No por mbli guꞌ no mxec yèe guꞌ ngolaꞌs guꞌ loo cón cheꞌn Jesucrist, mblyáꞌ alm guꞌ no xpii guꞌ loo ryethe conꞌ ryes tac ngolaꞌs guꞌ loo Jesucrist par mblyáꞌ guꞌ loo ryethe conꞌ ryes.
\p
\v 10 No axta más póla mèn coꞌ mdeꞌth diꞌs coꞌ ndxab Diox huen huen mbral no mdub rez mèna loo libr coꞌ nac xtiꞌs Diox coꞌ nac testament gox no mdoodiꞌs mèna cón cheꞌn xá mod lyáꞌ mèn loo ryethe conꞌ ryes. No conꞌa nac conꞌ ndac coꞌ mbli nèe Diox angli Diox loo guꞌ leꞌn tiemp ndxèꞌ.
\v 11 Leque yub Xpii cheꞌn Crist coꞌ nac Xpii Natúꞌ mbli par ngro xoꞌf loo mèn coꞌ mdeꞌth diꞌs. No mdaꞌ mèna cuent conꞌ coꞌ tyactìi Crist no xá mod gàc ryethe conꞌ roo no ryethe conꞌ xèn loo Crist coꞌ gàc loo Crist yiloa. Mèna mblyaꞌs ngo xoꞌf chó nac mbiꞌ coꞌ gàc Crist no pól gàc tiemp coꞌseꞌ yiꞌth Crist loo izlyoꞌ ndxèꞌ xal mblo xoꞌf Xpii Natúꞌi loo mèna, Xpii Natúꞌ coꞌ ngo no mèna.
\v 12 Per leque yub Diox mbli ngro xoꞌf cón cheꞌn conꞌ coꞌ mbli mèna xtùuz no conꞌ coꞌ mdoodiꞌs mèna inacte conꞌa conꞌ coꞌ gàc loo leque yub mèna. Ndxeꞌlequeꞌ, Diox mbluꞌ loo mèna leꞌ cón cheꞌn conꞌa nac coꞌ ndxàc loo naꞌ nalleꞌ. No nalleꞌ leque cón cheꞌn conꞌ coꞌ mbli mèn xtùuz pólleꞌa nac leque conꞌ coꞌ ndxath no coꞌ ndxèn loo guꞌ. No ndxath no ndxèn conꞌ ndxèꞌ loo guꞌ por cón cheꞌn mèn coꞌ ngo yalbàn cón cheꞌn xá mod lyáꞌ mèn loo conꞌ ryes. Ngo mèna yalbàn por cón cheꞌn conꞌ roo no conꞌ xèn coꞌ ndli Xpii Natúꞌ loo naꞌ. Xpii Natúꞌ coꞌ mtelꞌ Diox coꞌ ngroꞌ loo béꞌ loo naꞌ. No leque cón cheꞌn conꞌ ndxèꞌ nac conꞌ coꞌ mbli angl xtùuz par ñee angl no taꞌ angl cuent cón conꞌa no xá mod gàc conꞌa.
\s Diox mblec naꞌ no mcui Diox naꞌ par ryo xàꞌ naꞌ loo ryethe conꞌ yeꞌrsinꞌ coꞌ nac cón cheꞌn xab izlyoꞌ par que tee ban ndac naꞌ loo Diox.
\p
\v 13 Cona, ndlyazen huen huen li guꞌ xtùuz cón cheꞌn conꞌ coꞌ ndli guꞌ. No ndlyazen nabeꞌste que tee ban guꞌ no neꞌziꞌfte guꞌ arid conꞌ yeꞌrsinꞌ laꞌs nii guꞌ no laꞌs yaꞌ guꞌ ned nzi tee guꞌ. Ante bli guꞌ xtùuz loo ryethe conꞌ ndac coꞌ li Diox loo guꞌ no coꞌ taꞌ Diox loo guꞌ coꞌ nzi quee lezoꞌ guꞌ gàc loo guꞌ coꞌseꞌ yúꞌ loo Jesucrist loo mèn loo izlyoꞌ ndxèꞌ tedib vez.
\v 14 Fque tee ban guꞌ làth xtàa guꞌ xal myenꞌ bix coꞌ ndyubdiꞌsqueꞌ loo xud myenꞌ. Neꞌque tee bante guꞌ xal ngòc yalnaban coꞌ mque tee ban guꞌ póla ndooreꞌ coꞌseꞌ tarte taꞌ guꞌ cuent cón cheꞌn Diox no coꞌseꞌ tarte libeꞌ guꞌ Diox por cón cheꞌn Jesucrist.
\v 15 Ndxeꞌlequeꞌ, fque tee banqueꞌ guꞌ loo cón cheꞌn Diox xal mèn coꞌ thidtenequeꞌ ngro xàꞌ loo ryethe conꞌ yeꞌrsinꞌ coꞌ nac cón cheꞌn xab izlyoꞌ. Tataa mod bli guꞌ tac Diox coꞌ mblec guꞌ no Diox coꞌ mcui guꞌ par ngòo guꞌ loo cón cheꞌn Diox, Diox nac thìb Diox nalì no thìb Diox nambìi no thìb Diox natúꞌ.
\v 16 Loo libr coꞌ nac xtiꞌs Diox ndub diꞌs coꞌ mbez taandxèꞌ:
\pi1 Gòc guꞌ mèn coꞌ ngro xàꞌqueꞌ loo ryethe conꞌ yeꞌrsinꞌ coꞌ nac cón cheꞌn xab izlyoꞌ tac daa nac thìb Diox nalì no thìb Diox nambìi no thìb Diox natúꞌ.
\p
\v 17 Yende chó mèn nzo coꞌ más ndyuꞌ loo Diox leque taamas mèn. Cheleꞌ guꞌ mbez: ―Pay― loo Diox, Diox coꞌ ndlaꞌs loo thìb thìb mèn xá mod nzi tee ban mèn par tub rez Diox cón cheꞌn mèn yiloa, ndxàal zyeb guꞌ ñèe guꞌ Diox leꞌn ryethe huiz coꞌ naban guꞌ.
\v 18 Diox mbli par mblyáꞌ guꞌ loo thìb yalnaban coꞌ yende cón ntac coꞌ ngòc thìb yalnaban coꞌ mque tee ban guꞌ póla, coꞌ ngòc coꞌ mtéꞌth guꞌ loo xudgool guꞌ. No guꞌ ndaꞌqueꞌ cuent coꞌ huenlequeꞌ leꞌ coꞌseꞌ mteláꞌ Diox guꞌ loo conꞌ ryes por mdyonꞌ xtol guꞌ coꞌ angngòc loo guꞌ nalleꞌ, cón cheꞌn conꞌ coꞌ angmbli Diox loo guꞌ neꞌndiꞌde guꞌ conꞌa por cón cheꞌn conꞌ coꞌ ndlyux no conꞌ coꞌ ndxezaꞌ xal ndxezaꞌ or no plat.
\v 19 Ndxeꞌlequeꞌ, mteláꞌ Diox guꞌ loo conꞌ ryes por cón cheꞌn ren cheꞌn ladpeꞌ Crist, ren coꞌ anzeꞌf ntac loo Diox. Leque yub Crist mdaꞌ yalnaban Crist loo yalguth por cón cheꞌn xtol mèn xal coꞌseꞌ ndxuth mèn thìb mbacxilꞌ yenꞌ coꞌ beꞌ nac thìb mbacxilꞌ nambìi no coꞌ tarte gàc nec thìb conꞌ zab no nec thìb yalquìi loo par guth mèn mbacxilꞌa par xo mèn rena loo Diox loo izlyoꞌ.
\v 20 Diox mdoo Crist no mnibeꞌ Diox loo Crist par gàc conꞌ coꞌ ngòcleꞌ loo Crist. Tataa mbli Diox loo Crist ndooreꞌ cuec Diox no mxènꞌ Diox izlyoꞌ. Per neꞌngàcte conꞌa loo Crist póla. Ndxeꞌlequeꞌ, ngòca loo Crist leꞌn lult tiemp coꞌ nac tiemp ndxèꞌ ale mbyúꞌ Crist loo mèn no mbiꞌth Crist loo mèn loo izlyoꞌ ndxèꞌ par ngòc conꞌ ndac loo guꞌ nalleꞌ.
\v 21 No por cón cheꞌn Crist guꞌ ngolaꞌsqueꞌ loo Diox, Diox coꞌ mblo xban Crist làth mèn nguth. No mbli Diox ngòc conꞌ guryath no conꞌ guryèn loo Crist. No por cón cheꞌn conꞌ coꞌ mbli Diox loo Crist, thidtene mbli nèe guꞌ guꞌ leꞌ guꞌ ndxelaꞌsqueꞌ no nzi queequeꞌ lezoꞌ guꞌ loo cón cheꞌn Diox.
\v 22 No nalleꞌ por mdubdiꞌsqueꞌ guꞌ loo diꞌs ndac coꞌ mbìn guꞌ coꞌ nac lìcpeꞌ cón cheꞌn Diox xalqueꞌ mblyath no Xpii Natúꞌ guꞌ par mbìn guꞌ diꞌs cón cheꞌn diꞌs ndaca, mbli guꞌ par ngòc guꞌ mèn nalì no mèn nambìi loo Diox par tataa mod, lìcqueꞌ, nqueꞌ lezoꞌ guꞌ ñèe guꞌ hues xtàa guꞌ coꞌ ngòo loo cón cheꞌn Diox. No ndxàal tataaqueꞌ tolo queꞌ lezoꞌ guꞌ ñèe guꞌ thìb xtàa guꞌ no tedib xtàa guꞌ dib nzo yéc guꞌ no dib nzo lezoꞌ guꞌ.
\v 23 Xalqueꞌ niin loo guꞌ, guꞌ ngòcleꞌ mèn cub xal thìb mbetoꞌ coꞌ ndxáal loo izlyoꞌ. Per neꞌngàcte conꞌ ndxèꞌ loo guꞌ xal coꞌseꞌ ndxáal mèn por ren cheꞌn xud mèn no ren cheꞌn xnaꞌ mèn coꞌ ndxath no coꞌ ndlyux. Ndxeꞌlequeꞌ, ngòca loo guꞌ ante por cón cheꞌn xtiꞌs Diox. Nè nac diꞌs cheꞌn xtiꞌs Diox tac ndli xtiꞌs Diox ndenꞌ mèn diꞌs xá nac mod coꞌ nque tee ban mèn coꞌseꞌ ndlab mèn xtiꞌs Diox o coꞌseꞌ ndxòn mèn xtiꞌs Diox.
\v 24 Tac loo libr coꞌ nac xtiꞌs Diox ndub diꞌs coꞌ mbez taandxèꞌ:
\pi1 Rye bin mèn coꞌ naban loo izlyoꞌ ndxèꞌ nac xal huan nayèe. No ryethe conꞌ roo no conꞌ xèn coꞌ mbez mèn nac mèn no coꞌ ndli mèn nac xal nac yeꞌ huan coꞌ nxec thìb huiz no thìb ze no maste. Huana mbiiz. Leꞌ yeꞌ coꞌ nxyoꞌf loo huana ndxàb loo izlyoꞌ.
\v 25 Per ndxeꞌlequeꞌ, diꞌs coꞌ nac xtiꞌs Tad Diox thidtenequeꞌ nzo. Neꞌlyuxte xtiꞌs Diox. Tyubqueꞌ diꞌsa xal mbez diꞌs loo libr coꞌ nac xtiꞌs Diox.
\m Pues diꞌs coꞌ nac xtiꞌs Diox ndxèꞌ nac diꞌs coꞌ ngo mèn yalbàn loo guꞌ coꞌ ndluꞌ xá mod lyáꞌ mèn loo conꞌ ryes.
\c 2
\p
\v 1 Por cona, ngue niin loo guꞌ: Bláꞌ guꞌ ryethe conꞌ coꞌ nac conꞌ yeꞌrsinꞌ thìb lad, coꞌ nac ryethe mod coꞌ nquedìi mèn xtàa mèn, no coꞌ nac mod coꞌ ntembìi mèn ro mèn no ntembìi mèn xtiꞌs mèn loo xtàa mèn, no coꞌ nac mod coꞌ ndxàn lezoꞌ mèn ñèe mèn xtàa mèn, no coꞌ nac ryethe mod coꞌ ndaꞌ mèn cuentyix loo xtàa mèn, no coꞌ nac mod coꞌ nteriꞌth mèn cuentyix loo xtàa mèn.
\v 2 Neequeꞌ guꞌ xal ndxàca loo myenꞌ bix coꞌ diz ngóol coꞌ ndxàaz niiz coꞌ nac xiiz xnaꞌ myenꞌ, ¿léꞌ? Lomisqueꞌ, cuaꞌn guꞌ mod loo cón cheꞌn xtiꞌs Diox par tolo téꞌth guꞌ no taꞌ guꞌ cuent cón cheꞌn Diox no tyubdiꞌs guꞌ loo Diox por cón cheꞌn xtiꞌs Diox xalqueꞌ ndryoo no nxyèn myenꞌ bix coꞌ ndàaz xiiz xnaꞌ. Cheleꞌ guꞌ tataa li, leꞌ sya, tataa mod tolo téꞌth guꞌ no taꞌ guꞌ cuent loo cón cheꞌn Diox par tyubdiꞌsqueꞌ guꞌ loo Diox no, lìcqueꞌ, lyáꞌ guꞌ loo conꞌ ryes thidtene.
\v 3 Tataa gàcpeꞌi loo guꞌ cheleꞌ guꞌ, lìcqueꞌ, mbli laꞌs leꞌ Tad Crist nac thìb Tad ndac.
\s Trèꞌ ndluꞌ leꞌ Crist coꞌ naban thidtene nac xal thìb quèe coꞌ yub ngóol coꞌ yende chó cuin.
\p
\v 4 Cona, niin loo guꞌ: Ftolo gòc guꞌ mèn nadoꞌ. Ftolo téꞌth guꞌ no ftaꞌ guꞌ cuent no ftubdiꞌs guꞌ cón cheꞌn Tad Crist coꞌ thidtene naban. Tad Crist nac loo Diox xal thìb quèe coꞌ ndli mèn us par gàc quèea quèe scuadr cheꞌn liz mèn. Mèn mtèꞌb Tad Crist no mchoblaꞌ mèn Tad Crist. Per loo Diox axta arid ntac Crist. Por cona, mcui Diox Tad Crist par gàc Tad Crist xal thìb quèe scuadr coꞌ tyub squin yòo, coꞌ nee diꞌs, nac thìb conꞌ coꞌ naban coꞌ ngue toxcuaꞌ Diox.
\v 5 Guꞌ, ne, nac xal quèe coꞌ nxoꞌf o coꞌ ndub albañil loo quèe scuadr coꞌ nac quèe cimient. Ftaꞌ guꞌ lugar loo Diox par li zinꞌ Diox guꞌ par thidte gàc guꞌ loo Diox, coꞌ nee diꞌs, nac xal thìb templ coꞌteꞌ nzo ban Diox. No ftaꞌ guꞌ lugar loo Diox li zinꞌ Diox guꞌ par gàc ryete guꞌ coꞌ ndxelaꞌs loo Jesucrist xal nguleyꞌ coꞌ ngro xàꞌ loo ryethe conꞌ yeꞌrsinꞌ coꞌ nac xab izlyoꞌ par ante li guꞌ sirv loo Diox. No ante por cón cheꞌn Jesucrist ngue li guꞌ conꞌ coꞌ nac conꞌ ndac no coꞌ nac conꞌ coꞌ yòo lezoꞌ Diox.
\v 6 Por cona, ndub diꞌs loo libr coꞌ nac xtiꞌs Diox coꞌ mbez taandxèꞌ, ne:
\pi1 Daa mdoo thìb mbiꞌ loo mèn ciuda Jerusalén. Mbiꞌa nac xal ner quèe coꞌ mxen albañil coꞌ mdub albañil squin yòo liz mèn. Mcuin mbiꞌa xal thìb quèea. No anzeꞌf ntac mbiꞌa par daa. Leꞌ mèn coꞌ yilaꞌs loo mbiꞌa na, mèna neꞌtyoo xàꞌde lezoꞌ no neꞌyitacte lezoꞌ mèna loo cón chenen por còn cheꞌn mbiꞌa.
\v 7 Por part cón cheꞌn guꞌ coꞌ ndxelaꞌsleꞌ loo Diox por cón cheꞌn mbiꞌ coꞌ nac Crist coꞌ nac xal quèe squadr, arid ntac Crist coꞌ nac xal quèea loo guꞌ, ne. Per part cón cheꞌn mèn coꞌ neꞌtyalte yilaꞌs loo Crist, loo mèna tyaaqueꞌ diꞌs no tyubqueꞌ diꞌs coꞌ ndub loo libr coꞌ nac xtiꞌs Diox coꞌ mbez taandxèꞌ:
\pi1 Leꞌ quèe coꞌ mtèꞌb mèn coꞌ nac xal maistr albañil, quèea ngòc ner quèe scuadr coꞌ ndyub squin yòo.
\m
\v 8 Lomisqueꞌ, tyaaqueꞌ diꞌs no tyubqueꞌ diꞌsa no gàcqueꞌ diꞌs xal mbez diꞌs ndxèꞌ, ne:
\pi1 Crist ngòc xal thìb quèe coꞌ ndxeziꞌf no coꞌ ndxegaꞌs nii mèn, coꞌ nee diꞌs, coꞌseꞌ nque quèe nii mèn no axta ndxexud mèn loo quèea.
\m Pues part cón cheꞌn mèna, mèna ngoziꞌfqueꞌ no ngogaꞌsqueꞌ mèna loo cón cheꞌn Crist coꞌ nac xal quèea por neꞌnglide mèna cas no neꞌndub nzade mèna diꞌs coꞌ ndluꞌ cón cheꞌn Crist. Tac Diox mnibeꞌ lezoꞌ no mdoo lezoꞌ Diox leꞌ ryete mèn coꞌ neꞌlide cas no coꞌ neꞌndub nzade loo diꞌs coꞌ ndluꞌ cón cheꞌn Jesucrist, mèna ryo xàꞌ loo mod coꞌ mnibeꞌ Diox loo mèn par li mèn par yòo ban no mèn Diox loo béꞌ. No tataa mod tyactìi mèna yiloa por conꞌ mbli mèna.
\s Trèꞌ ndluꞌ cón cheꞌn mèn coꞌ nzo loo cón cheꞌn Diox no coꞌ nac cheꞌnpeꞌ Diox.
\p
\v 9 Per part cón cheꞌn guꞌ coꞌ ngolaꞌsleꞌ loo Crist, guꞌ nac thìb bin mèn coꞌ mcui Diox par gàc guꞌ cheꞌnpeꞌ Diox. No nac guꞌ thìb ned mèn coꞌ nac xal nguleyꞌ coꞌ ante li sirv loo Diox coꞌ ñibeꞌpeꞌ loo ryethe conꞌ. No nac guꞌ loo Diox xal thìb nación mèn coꞌ ngro xàꞌ loo ryethe conꞌ yeꞌrsinꞌ coꞌ nac xab izlyoꞌ par ante li guꞌ sirv loo Diox. No nac guꞌ mèn coꞌ nac cheꞌnpeꞌ Diox. Tataa mbli Diox ngòca loo guꞌ par ya teꞌth guꞌ no luꞌ guꞌ loo mèn cón cheꞌn zinꞌ roo no zinꞌ xèn coꞌ mbli Diox loo mèn. Yub Diox mblec guꞌ no mcui Diox guꞌ par ryoꞌ guꞌ loo ryethe conꞌ coꞌ ndli ntecuau yéc mèn no coꞌ ndli ntecuau lezoꞌ mèn loo cón cheꞌn Diox. Tataa mbli Diox par mdyub xnìi yéc guꞌ no par mdyub xnìi lezoꞌ guꞌ loo cón cheꞌn Diox coꞌ nac thìb conꞌ roo no thìb conꞌ xèn cón cheꞌn Diox par non guꞌ no taꞌ guꞌ cuent cón cheꞌn Diox.
\v 10 Guꞌ thidtenequeꞌ neꞌngàcte mèn coꞌ ngòc mèn nacionpeꞌ Diox ndooreꞌ yilaꞌs guꞌ loo Crist. Per nalleꞌ, nac guꞌ mèn cheꞌnpeꞌ Diox. Thìb cuaꞌa yende chó nglat lezoꞌ gunèe guꞌ. Per nalleꞌ Diox ndlyatqueꞌ lezoꞌ ñèe Diox guꞌ.
\s Guree ban guꞌ ante par li guꞌ sirv loo Diox.
\p
\v 11 Guꞌ coꞌ nac mèn huesen por cón cheꞌn Crist, guꞌ coꞌ anzeꞌf nqueꞌ lezon ñèen, ñaꞌben loo guꞌ xal loo mèn tith coꞌ ngroꞌ liz no coꞌ ngroꞌ làaz, coꞌ nzi tee tith coꞌteꞌ nac liz no coꞌteꞌ nac làaz, neꞌtaꞌde guꞌ lugar tyub chol yoꞌf yeꞌrsinꞌ coꞌ ndryoꞌ ndlyenꞌ lezoꞌ guꞌ par li guꞌi. Tac ryethe conꞌa nac conꞌ coꞌ ndli thìb part ndoo lezoꞌ mèn li mèn conꞌ ndac. No tedib part ndoo lezoꞌ mèn par li mèn conꞌ yeꞌrsinꞌ. Conꞌa nac xal thìb xóꞌ coꞌ ndli conꞌ yeꞌrsinꞌ loo xpii mèn no loo alm mèn.
\v 12 Nabeꞌste fque tee ban ndac guꞌ làth mèn coꞌ tarte libeꞌ Diox no coꞌ tarte taꞌ cuent cón cheꞌn Diox. Tataa mod, mastaleꞌ nalleꞌ ñii yèe ñii tìi mèna cón cheꞌn guꞌ axta mbez mèn nac guꞌ mèn yeꞌrsinꞌtúb, per yiloa mèna huiꞌ xal nac conꞌ ndac coꞌ ndli guꞌ. No tataa mod mèna gab quetal naroo xèn nac Diox coꞌ mbli nzi tee ban ndac guꞌ nalleꞌ. Tataa gab mèna coꞌseꞌ gàc huiz coꞌseꞌ taꞌ mèn cuent loo Diox cón cheꞌnpeꞌ mèn.
\p
\v 13 No por cón cheꞌn Tad Crist, ftub nza guꞌ no ftubdiꞌs guꞌ conꞌ coꞌ ñibeꞌ ley coꞌ mxoꞌf gobiern loo mèn, que naca conꞌ coꞌ ñibeꞌ thìb president por nac president thìb xaꞌ coꞌ más ñibeꞌ,
\v 14 que naca conꞌ coꞌ ñibeꞌ mèn coꞌ nac gobernador coꞌ nac mèn coꞌ mtelꞌ thìb president par tetìi mèn coꞌ nac gobernador mèn coꞌ ndli conꞌ yeꞌrsinꞌ no par li mèn coꞌ nac gobernador conꞌ coꞌ nac conꞌ guryath no conꞌ guryèn loo mèn coꞌ ndli conꞌ ndac.
\v 15 Tac Diox, ne, ndlyaꞌs leꞌ guꞌ thidtenequeꞌ li conꞌ ndac par tataa mod li guꞌ par yauꞌ ro mèn naxèn no ro mèn tont par neꞌtolode tyoodiꞌs mèna cón cheꞌn guꞌ.
\p
\v 16 Fque tee ban ndac guꞌ làth chol mèn xal mèn coꞌ yende chó mbee ncaꞌ par li guꞌ chol conꞌ yeꞌrsinꞌ coꞌ nac cón cheꞌn xab izlyoꞌ. Per mastaleꞌ ndli guꞌ cuent yende chò mbee ncaꞌ guꞌ par li guꞌ conꞌ yeꞌrsinꞌ por nzo guꞌ loo cón cheꞌn Diox, neꞌlide guꞌ xtùuz por nzo guꞌ loo cón cheꞌn Diox nzoqueꞌ mod li guꞌ chol conꞌ yeꞌrsinꞌ. Yende xàa, ey. Más huen fque tee ban guꞌ xalqueꞌ mèn coꞌ, lìcqueꞌ, nac mèn coꞌ nxoꞌf zinꞌ zinꞌ cheꞌn Diox.
\v 17 Gòp guꞌ mod coꞌ nac thìb mod ndac loo rye mèn xal ndxàalpeꞌ li guꞌi. Fqueꞌ lezoꞌ guꞌ gunèe guꞌ mèn coꞌ nac hues xtàa guꞌ por cón cheꞌn Jesucrist. Bzeb guꞌ loo Diox no bli guꞌ conꞌ guryath no conꞌ guryèn loo Diox. Gòp guꞌ mod loo mèn coꞌ nac gobiern coꞌ ñibeꞌ loo guꞌ.
\s Trèꞌ ndluꞌ xá mod mxactìi Crist par tataa mod téꞌth mèn xá mod ndxàal que tee ban mèn.
\p
\v 18 Nalleꞌ guꞌ coꞌ nac moz, ftubdiꞌs guꞌ no gòp guꞌ mod gunèe guꞌ mèn coꞌ nac patrón guꞌ. Iante tyubdiꞌs guꞌ no gàp guꞌ mod loo mèn coꞌ nac patrón ndac no coꞌ nac patrón nadoꞌ. Ndxeꞌlequeꞌ, ftubdiꞌs guꞌ no gòp guꞌ mod loo mèn coꞌ nac patrón nayiꞌ, ne.
\v 19 Coꞌseꞌ nxec yèe guꞌ no coꞌseꞌ nchaꞌlaꞌs guꞌ coꞌseꞌ ndxecloo patrón guꞌ loo guꞌ por thìb conꞌ coꞌ indxàalte li patrón guꞌ loo guꞌ no nxec guꞌ tac guꞌ ndaꞌqueꞌ cuent no non guꞌ tataa ndlyaꞌs Diox li guꞌ loo patrón guꞌ, ndxòo lezoꞌ Diox conꞌ ndli guꞌa no nac conꞌ coꞌ ndli guꞌa thìb conꞌ ndac loo Diox cheleꞌ guꞌ tataa ndli.
\v 20 Per cheleꞌ guꞌ li ndxep conꞌ yeꞌrsinꞌ coꞌ iléꞌde nac, no conaꞌte ndli tetìi patrón gu, ¿chéꞌ ndyac guꞌ naca thìb conꞌ roo loo Diox cheleꞌ guꞌ nquin xec yèe cheleꞌ patrón tetìi guꞌ por conꞌ mbli guꞌ coꞌ iléꞌde nac, càꞌ? Yende xàa. Per ndxeꞌlequeꞌ, cheleꞌ patrón guꞌ ndxecloo loo guꞌ por ndxep conꞌ ndac coꞌ mbli guꞌ no nchaꞌlaꞌs guꞌ no nxec yèe guꞌ par nabeꞌste ngue li guꞌ zinꞌ loo patrón guꞌ, conꞌa nac conꞌ ndac loo Diox no conꞌ coꞌ ndxòo lezoꞌ Diox.
\v 21 Por mxec yèe guꞌ no por ngòp guꞌ mod, Diox mcui guꞌ no mdoo Diox guꞌ no mblec Diox guꞌ loo cón cheꞌn Diox. Más de cona, guꞌ nonqueꞌ no ndaꞌqueꞌ guꞌ cuent por cona mxactìi Crist por cón cheꞌn guꞌ par tataa mod mbluꞌ Crist loo guꞌ xá mod ndxàal que tee ban guꞌ xal mque tee ban Crist loo izlyoꞌ ndxèꞌ.
\v 22 Coꞌseꞌ mque tee Crist loo izlyoꞌ ndxèꞌ nec thìb mod no nec tedib mod neꞌncuaꞌnte Crist xquin Crist no xtol Crist no neꞌ neꞌ nquedìi Crist nec thìb mèn.
\v 23 Coꞌseꞌ gunii yèe gunii tìi mèn cón cheꞌn Crist, neꞌncàbte Crist nec thìb diꞌs, coꞌ nee diꞌs, ngàc nayiꞌ Crist. Coꞌseꞌ asembli mèn mtetìi mèn Crist, neꞌngabte Crist sere Crist yaꞌ Crist par ntin Crist mèn yiloa. Ndxeꞌlequeꞌ, mtanꞌ Crist ryethe conꞌ mbli no mèn Crist part cheꞌn Diox par li Diox coꞌ nee lezoꞌ Diox loo mèna, Diox coꞌ nalì no nambìi ndub rez no ngo xtàa cón cheꞌn conꞌ coꞌ ndli mèn loo xtàa mèn.
\v 24 Yub Crist mxactìi no mdenꞌ Crist yalnè lad Crist por cón cheꞌn xtol mèn coꞌseꞌ mqueꞌ mèn Crist loo cruz. Tataa mod ngòca loo Crist par gàc naꞌ mèn coꞌ thidtene yathlaꞌs no ryoꞌ yéc naꞌ no ryoꞌ lezoꞌ naꞌ loo ryethe conꞌ coꞌ nac xtol naꞌ no leque tiempa que tee ban ndac naꞌ coꞌ nac thìb yalnaban nalì no thìb yalnaban nambìi loo Diox. Crist mxactìi ryethe conꞌa par gaca loo guꞌ neꞌtyactìide guꞌ por cón cheꞌn xquin guꞌ no por cón cheꞌn xtol guꞌ.
\v 25 Guꞌ ndaꞌqueꞌ cuent no nonqueꞌ guꞌ leꞌ guꞌ mque tee huan loo Diox póla loo ryethe conꞌ coꞌ nac xtol guꞌ xal thìb partid mbacxilꞌ coꞌ mdyuhuan. Per nalleꞌ, guꞌ ngòo loo cón cheꞌn Crist, Crist coꞌ nquenap guꞌ xal nquenap thìb pastor mbacxilꞌ. No nquenap Crist alm guꞌ no xpii guꞌ.
\c 3
\s Trèꞌ ndluꞌ xá mod ndxàal cue ban mèn, mèn coꞌ mselyaꞌ.
\p
\v 1 Guꞌ ne, mèngot coꞌ ngue no xinꞌ saꞌl, ftubdiꞌs guꞌ diꞌs coꞌ ñee xinꞌ saꞌl guꞌ loo guꞌ no coꞌ ñibeꞌ xinꞌ saꞌlpeꞌ guꞌ loo guꞌ no conꞌ ndlyaꞌs xinꞌ saꞌl guꞌ li guꞌ. Tataa mod cheleꞌ ndxep xinꞌ saꞌlpeꞌ guꞌ tarte yilaꞌs xal ndluꞌ diꞌs ndac, nzoqueꞌ mod yilaꞌs xinꞌ saꞌl guꞌ no li laꞌs xinꞌ salꞌ guꞌ lìcqueꞌ nac cón cheꞌn Tad Jesucrist por ngüiꞌ xinꞌ saꞌl guꞌ mod coꞌ nque tee ban no guꞌ xinꞌ saꞌl guꞌ. Tataa mod inquinte tyoodiꞌs no guꞌ xinꞌ saꞌl guꞌ cón cheꞌn diꞌs ndac no cón cheꞌn Jesucrist.
\v 2 Leꞌ sya, tataa mod li laꞌs no yilaꞌs xinꞌ saꞌlpeꞌ guꞌ loo cón cheꞌn Jesucrist coꞌseꞌ huiꞌ xinꞌ saꞌlpeꞌ guꞌ loo mod coꞌ nac thìb mod ndacpeꞌ coꞌ ndxàp guꞌ loo xinꞌ saꞌlpeꞌ guꞌ.
\v 3 Lomisqueꞌ ne, guꞌ coꞌ nac mèngot, indlyasten leꞌ guꞌ arid tyoxcuaꞌ guꞌ par nabeꞌste ñaa guꞌ no par nít nayèe ñaa guꞌ coꞌseꞌ ndxoc xab guꞌ. Angab naꞌi, coꞌseꞌ ante nít nayèe ñaa yéc guꞌ ndee guꞌ bèu yéc guꞌ no coꞌseꞌ ndxòo corral or yen guꞌ no nque yiꞌf or nza guꞌ coꞌ arid ntac no coꞌseꞌ ndxoc xab guꞌ larꞌ coꞌ anzeꞌf nabeꞌs ñaa no coꞌ arid náp ntaca.
\v 4 Ndxeꞌlequeꞌ, ndlyazen luꞌ guꞌ mod ndac coꞌ, lìcpeꞌ, ndxàp guꞌ leꞌn lezoꞌ guꞌ no leꞌn xtùuz guꞌ. Moda neꞌlyuxte loo mèn. Thidtene ndxòo lezoꞌ mèn moda. Thidtenequeꞌ naziꞌ nziriꞌ mèn con xtàa mèn. No nagàl nziriꞌ mèn no rye nda rye ndyeꞌth nziriꞌ mèn làth xtàa mèn. Conꞌ coꞌ ndli guꞌa no mod coꞌ cue ban guꞌa anzeꞌf ntac loo Diox, ey.
\v 5 Póla, tataa mdyoxcuaꞌ mèngot, mèngot coꞌ, lìcqueꞌ, ngro xàꞌ loo ryethe conꞌ yeꞌrsinꞌ coꞌ nac cón cheꞌn xab izlyoꞌ no coꞌ ngòc cheꞌnpeꞌ Diox. Ngòp mèngota yalxlaꞌs loo Diox no mdubdiꞌs mèngota diꞌs coꞌ mnibeꞌ xinꞌ saꞌl mèngota loo mèngota no mdub nza mèngota loo conꞌ gunee xinꞌ saꞌl mèngota loo mèngota.
\v 6 Tataa mbli Sar, ne. Mdubdiꞌs Sar loo Abraham. Guꞌ, ne, gàc xal ngòc Sar cheleꞌ guꞌ toloque li conꞌ ndac no cheleꞌ guꞌ neꞌtolode zyeb loo nec thìb conꞌ.
\p
\v 7 Guꞌ, ne, mènbiꞌ coꞌ nac xinꞌ saꞌl mèngot guꞌ, gòc guꞌ mèn coꞌ huen huen mtéꞌth xá mod ban no guꞌ xaꞌgot guꞌ no xá mod quenap guꞌ xaꞌgot guꞌ. Bli guꞌ conꞌ guryath no conꞌ guryèn coꞌ ndxàal li guꞌ loo xaꞌgot guꞌ. Iante por nac mèngot mèn delicad li guꞌ conꞌa. Ndxeꞌlequeꞌ, bli guꞌ conꞌ guryath no conꞌ guryèn loo mèngot coꞌ nac xinꞌ saꞌl guꞌ tac mèngota, ne, ngue no leque yalnaban coꞌ mdaꞌ Diox loo mèngota xalqueꞌ nac yalnaban coꞌ mdaꞌ Diox ngue no guꞌ nalleꞌ. Tataaqueꞌ bli guꞌ loo mèngotpeꞌ guꞌ par de que yende cón ncaꞌ no yende cón ncà loo guꞌ par thidte cuez no guꞌ xaꞌgot guꞌ Diox.
\s Trèꞌ ndluꞌ cón cheꞌn mèn coꞌ ndyactìi ante por mbli mèn conꞌ ndac.
\p
\v 8 Por lult, ndlyazen thidte cue ban guꞌ. Thidte gàc xtùuz guꞌ no thidte gàc lezoꞌ guꞌ. No thidte lyat lezoꞌ guꞌ ñèe guꞌ thìb xtàa guꞌ no tedib xtàa guꞌ. Ndlyazen queꞌ lezoꞌ guꞌ ñèe guꞌ hues xtàa guꞌ por cón cheꞌn Jesucrist xalqueꞌ mèn coꞌ ndxàc hues. Gòc guꞌ mèn coꞌ ndyac no xtàa. Gòc guꞌ mèn coꞌ indluꞌde ndyeꞌs.
\v 9 Neꞌco xtàade guꞌ loo nec thìb mèn leque conꞌ yeꞌrsinꞌ coꞌ ndli mèn loo guꞌ. Neꞌ neꞌ li guꞌ par taꞌ guꞌ xyàn lezoꞌ mèn xal ndaꞌ mèn xyàn lezoꞌ guꞌ. Ndxeꞌlequeꞌ, más huen bli guꞌ conꞌ ndac loo mèn coꞌ mbli conꞌ yeꞌrsinꞌ loo gu. Tac Diox ngurez guꞌ no mblec Diox guꞌ par angli Diox conꞌ ndac loo guꞌ.
\v 10 Tac loo libr coꞌ nac xtiꞌs Diox ndub diꞌs coꞌ mbez:
\pi1 Leꞌ mèn coꞌ lyaꞌs ban nen tiemp no coꞌ lyaꞌs gàc conꞌ ndac loo loo izlyoꞌ, ndxàal gàp lezoꞌ mèna par neꞌtyoodiꞌste mèna chol diꞌs yeꞌrsinꞌ. Neꞌ neꞌ gàc mèna mèn gutyèꞌ.
\v 11 Neꞌtaꞌde guꞌ lugar tyoo nii guꞌ no tyoo yaꞌ guꞌ xal ndli mèn coꞌ ndli conꞌ yeꞌrsinꞌ. Ndxeꞌlequeꞌ, bli guꞌ conꞌ ndac loo hues xtàa guꞌ. Ftuꞌ ftàl guꞌ coꞌ nac xèn xyàn coꞌ ndxàc loo guꞌ. Bli guꞌ coꞌ nzote mod li guꞌ par yo nagàl lezoꞌ guꞌ no gure ban guꞌ rye nda guꞌ no rye ndyeꞌth guꞌ làth xtàa guꞌ.
\v 12 Tac Tad Diox nquenap no indláꞌyaꞌde Tad Diox mèn coꞌ nac mèn nalì no mèn nambìi. No ndxòn Tad Diox ro mèna coꞌseꞌ mbez mèna Diox par li Diox conꞌ coꞌ ñaꞌb mèna. Per ndxeꞌlequeꞌ, Diox thidtene ingüiꞌde loo mèn coꞌ ndli conꞌ yeꞌrsinꞌ. No ndxezan Diox ndxegaa mèna loo conꞌ yeꞌrsinꞌ coꞌ ndli mèna.
\p
\v 13 ¿Chó mèn li conꞌ yeꞌrsinꞌ loo guꞌ cheleꞌ guꞌ thidtenequeꞌ mbli nèe guꞌ par li guꞌ conꞌ ndac, àꞌ? Yende chò mèn gác li conꞌ yeꞌrsinꞌ loo guꞌ tataa, ¿léꞌ?
\v 14 Per mastaleꞌ ndxàc yaltìi loo guꞌ por nzi tee ban lì guꞌ no por nzi tee ban ndac guꞌ, huen ndxàca loo guꞌ no huen nda guꞌ loo cón cheꞌn Diox. Neꞌzyebte guꞌ loo nec thìb conꞌ. No neꞌ neꞌ ya yeꞌth lezoꞌ guꞌ nec thìb mod no nec tedib mod par tyoo xàꞌ lezoꞌ guꞌ loo cón cheꞌn Crist.
\v 15 Ndxeꞌlequeꞌ, bli guꞌ par gàc conꞌ guryath no conꞌ guryèn loo Crist xalqueꞌ Tad guꞌ leꞌn xtùuz guꞌ no leꞌn lezoꞌ guꞌ. No bli guꞌ cas loo Crist. Nalas gure guꞌ par gác guꞌ càb guꞌ loo chol mèn, mèn coꞌ ñaꞌb thìb razon o thìb consej loo guꞌ coꞌ nac cón cheꞌn coꞌ ndxelaꞌs guꞌ loo Diox no coꞌ nzi quee lezoꞌ guꞌ loo Diox. Bli guꞌi xal mèn coꞌ indyeꞌste. Nadoꞌ diꞌs no nadoꞌ cuent bli guꞌ cas loo mèn no gòp guꞌ mod loo mèn coꞌseꞌ ñaꞌb mèn loo guꞌ par tyoodiꞌs no guꞌ mèn.
\v 16 Nabeꞌste fque tee ban ndac guꞌ no nabeꞌste fque tee ban lì guꞌ par neꞌtenꞌte guꞌ leꞌn lezoꞌ guꞌ leꞌ guꞌ ngue li conꞌ yeꞌrsinꞌ. Leꞌ sya, mèn coꞌ nazab ndyoodiꞌs cón cheꞌn xá mod nque tee ban guꞌ mastaleꞌ nabeꞌste nque tee ban ndac guꞌ xal mèn coꞌ ndxelaꞌs loo Crist, ndxeꞌlequeꞌ, mèna tenꞌ leꞌn lezoꞌ mèna no thyon mèna cón cheꞌn xtiꞌspeꞌ mèn coꞌseꞌ ndyoodiꞌs mèna cón cheꞌn guꞌ.
\v 17 Más huen gàc yaltìi loo mèn por ndli mèn conꞌ ndac, cheleꞌ Diox ndlyaꞌs tataa gàca loo mèn, leque gàc yaltìi loo mèn por ndli mèn conꞌ yeꞌrsinꞌ.
\v 18 Tac yub Crist mdenꞌ yalnè no mxactìi Crist axta nguth Crist por cón cheꞌn xquin naꞌ no xtol naꞌ. Thidte vez ngòca loo Crist por cón cheꞌn xquin no xtol cheꞌn ryete mèn. Crist ngòc thìb mbiꞌ ndac. Per ndxeꞌlequeꞌ, leꞌleꞌ Crist mxactìi por naꞌ, naꞌ coꞌ nac mèn yeꞌrsinꞌ, par tataa mod yòo naꞌ loo cón cheꞌn Diox por cón cheꞌn Crist. Bélꞌyòo lad Crist nguth per xpii Crist no alm Crist neꞌngathte. Ndxeꞌlequeꞌ, nzo ban Crist por cón cheꞌn conꞌ roo conꞌ xèn coꞌ nzo laꞌs nii no coꞌ nzo laꞌs yaꞌ Xpii Natúꞌ cheꞌn Diox.
\v 19 Láth nzo gaꞌs bélꞌyòo lad Crist coꞌ ngòc thebol leꞌn yeꞌr quèe coꞌ ngòc báꞌ coꞌteꞌ mcaꞌs mèn Crist leꞌn izlyoꞌ, ngua luꞌ xpii Crist no alm Crist loo taamas alm no taamas xpii coꞌ nzo gòo leꞌn thìb lugar coꞌ ngòc xal thìb leziꞌf leꞌ Crist na, mbli gan loo conꞌ yeꞌrsinꞌ coꞌ nac cón cheꞌn Mebizya.
\v 20 Almaa no xpiia neꞌndubdiꞌste loo Diox coꞌseꞌ ngòc tiemp pólleꞌa pólleꞌa leꞌn huiz no leꞌn tiemp coꞌseꞌ mque tee ban thìb mbiꞌ coꞌ ngroꞌ lèe Noé. Leꞌn tiempa Diox mdub bed no mchaꞌlaꞌs Diox con mèna láth mdyoxcuaꞌ yòoyaa coꞌ mtoxcuaꞌ Noé. Leꞌn yòoyaaa nagabte mèn ngòc coꞌ ngòo leꞌn yòoyaaa, coꞌ nee diꞌs, xon mèn. Mèna ngòc mèn coꞌ mblyáꞌ loo nít no loo yuuloo coꞌ ngulàa tiempa.
\v 21 Nít cheꞌn yuuloo coꞌ ngure loo izlyoꞌ tiempa ndluꞌ loo naꞌ no ndaꞌ cuent loo naꞌ cón cheꞌn bautism coꞌ ngòc loo naꞌ. No por cón cheꞌn bautisma nanee naꞌ leꞌ naꞌ mblyáꞌleꞌ loo conꞌ ryes nalleꞌ. Per bautism coꞌ ngòc loo naꞌ inacte bautisma par gab naꞌ mtembìi bautism lad naꞌ no maste. Ndxeꞌlequeꞌ, naca leꞌ por cón cheꞌn bautism coꞌ ngòc loo naꞌ mnaꞌb naꞌ loo Diox li Diox par neꞌtolode tenꞌ naꞌ leꞌn lezoꞌ naꞌ cón cheꞌn xquin naꞌ no xtol naꞌ coꞌ mtonꞌ Diox loo naꞌ. Más de cona, bautism coꞌ ngòc loo naꞌ ndluꞌ loo naꞌ mblyáꞌ naꞌ loo conꞌ ryes por cón cheꞌn coꞌseꞌ ngro xban Jesucrist làth mèn nguth.
\v 22 Ngoloa, nguáp Jesucrist loo béꞌ. Ndub Jesucrist cuat Diox loo béꞌ. No ryete angl, no ryete xaꞌ coꞌ ñibeꞌ, no ryete xaꞌ coꞌ ndxàp conꞌ laꞌs nii no laꞌs yaꞌ, ryete xaꞌa mdeꞌs nii no mdeꞌs yaꞌ loo Jesucrist par ñibeꞌ Jesucrist loo ryethe conꞌ.
\c 4
\s Trèꞌ ndluꞌ xá mod ndxàal li mèn sirv thìb mod no tedib mod coꞌ gác mèn loo Diox.
\p
\v 1 Cona, ngue niin loo guꞌ: Texal mxactìi Crist no mdenꞌ Crist yalnè lad Crist, guꞌ, ne, ndxàal cuec lezoꞌ par tyactìi guꞌ cheleꞌi nquin gàc loo guꞌ. Guꞌ ndaꞌqueꞌ cuent leꞌ chol mèn coꞌ mxactìileꞌ lad por cón cheꞌn Crist, mèna ndluꞌ, lìcqueꞌ, ya intolode cuaꞌn mèna xquin mèna no xtol mèna loo Diox.
\v 2 Tataa mbli mèna par ban mèna taandxep tiemp loo izlyoꞌ ndxèꞌ ante xal nee lezoꞌ Diox. No làtha, ya neꞌtyubte yoꞌf lezoꞌ mèn loo ryethe conꞌ coꞌ ndxuhua nèe lezoꞌ mèn coꞌ nac cón cheꞌn xab izlyoꞌ ndxèꞌ.
\v 3 Ya mbyaaleꞌ mdaꞌ guꞌ gust lezoꞌ guꞌ loo huax conꞌ coꞌseꞌ tarte yilaꞌs guꞌ loo Diox tiemp coꞌ ngòc póla xal ndli mèn coꞌ indlibeꞌde Diox. Tiempa, guꞌ mque tee ban loo chol conꞌ yeꞌrsinꞌ coꞌ mdub yoꞌf lezoꞌ guꞌ par li guꞌ. Angab naꞌi, ngòc guꞌ mènguy. Mque tee yuhua xleꞌ guꞌ coꞌseꞌ ndli guꞌ chol lni. Mque tee yu xleꞌ guꞌ cheꞌn mèn hor coꞌ ndlyaꞌs guꞌ axta plóthe. Ayen yii ayen den ndxèn mbez yèe guꞌ. Mque tee tuuz guꞌ axta plóthe, ne. Mbli guꞌ chol lni loo chol mdoꞌ no loo chol gunab coꞌ ndxab Diox indxàalte còoꞌ mèn yéc mèn loo no indxàalte tyub xib mèn loo.
\v 4 Nalleꞌ mèna mbez loo xtàa mèn no loo lezoꞌ mèn chonon inqueltàade guꞌ con mèna loo ryethe conꞌ yeꞌrsinꞌ coꞌ ndub yoꞌf lezoꞌ mèna loo mod coꞌ nque tee ban mèna. No por cona, nazab ñii yèe ñii tìi mèna no mbez mèna ngòc nguàal conꞌ cón cheꞌn guꞌ.
\v 5 Per prob mèna naquinqueꞌ taꞌ cuent loo xaꞌ coꞌ ngòc nableꞌ par tub rez xaꞌ cón cheꞌn mèn loo mèn coꞌ beꞌ naban no loo mèn coꞌ nguthleꞌ.
\v 6 Por cona, ngue niin loo guꞌ: Loo mèn coꞌ nguthleꞌ nalleꞌ, mblo mèn yalbàn no mdeꞌth mèn cón cheꞌn xá mod lyáꞌ mèn loo conꞌ ryes láth beꞌ ngure ban mèna par gàc loo mèna coꞌseꞌ gath bélꞌyòo lad mèna, yòo ban no xpii mèna no alm mèna Diox xalqueꞌ naban Diox. Tataa ngòca loo mèna mastaleꞌ yub Diox gunee lezoꞌ cón cheꞌn mèna nquin gath bélꞌyòo lad mèna xalqueꞌ ndxath rye mèn.
\p
\v 7 Nase ya nde zinꞌ gaxleꞌ tiemp coꞌseꞌ tlo lyux tiemp yeꞌrsinꞌ coꞌ naban naꞌ loo izlyoꞌ ndxèꞌ. Cona, ngue niin loo guꞌ: Ndxeꞌslequeꞌ fque tee ban guꞌ no nalas fque tee ban guꞌ loo izlyoꞌ ndxèꞌ. No neꞌyathlaꞌste guꞌ par tolo cuez guꞌ Diox ze no yálꞌ.
\v 8 Más de cona, loo ryethe conꞌ coꞌ ngue niin loo guꞌ ndxèꞌ, ndlyazen queꞌ lezoꞌ guꞌ gunèe guꞌ hues xtàa guꞌ axta plóthe. Tac mèn coꞌ, lìcqueꞌ, nqueꞌ lezoꞌ ñèe hues xtàa mèn axta plóthe, mèna ingòode xyàn lezoꞌ ñèe mèna hues xtàa mèna arid. Luega nteriꞌth ntecanꞌ mèna xyen xyàn coꞌ ndxòo lezoꞌ mèn ñèe mèn hues xtàa mèn.
\v 9 Ftaꞌ guꞌ liz guꞌ cued mèn coꞌ ñaꞌb loo guꞌ par cued mèn liz guꞌ. Per neꞌcuez nguixte guꞌi loo mèn por mdaꞌ guꞌ liz guꞌ nguled mèn.
\v 10 Lomisqueꞌ ne, li thìb thìb guꞌ sirv loo chol xtàa guꞌ par lyath no guꞌ xtàa guꞌ xal nzote mod coꞌ nac coꞌ mdaꞌ Diox lugar gác guꞌ li guꞌ sirv loo mèn. Tataa bli guꞌ xal mèn coꞌ nxoꞌf zinꞌ ndac coꞌ nac thìb zinꞌ coꞌ angmbli Diox loo guꞌ par li guꞌ sirv loo mèn.
\v 11 Mèn coꞌ mdaꞌ Diox lugar gác mèna par tyoodiꞌs no mèna mèn cón cheꞌn Diox, tyoodiꞌs no mèna mèn xalqueꞌ ndyoodiꞌs no Diox mèn. No cheleꞌ chol guꞌ lyaꞌs taꞌ thìb huiz zinꞌ anxleꞌ loo xtàa guꞌ, neꞌcuaꞌnte guꞌ mod guth guꞌ máꞌ xiꞌtha. Bli guꞌ zinꞌa xal ndxàal li guꞌ zinꞌ xal mdaꞌ Diox fuerz loo guꞌ par li guꞌi. Bli guꞌ leꞌ ryete conꞌ coꞌ li guꞌa càba gab mèn conꞌ roo no conꞌ xèn cón cheꞌn Diox no gab mèn natúꞌ nac Diox, ne, por cón cheꞌn Jesucrist. Ndlyazen gàc conꞌ roo no conꞌ xèn loo Jesucrist no ndlyazen yanꞌ ryethe conꞌ roo no ryethe conꞌ xèn laꞌs nii Jesucrist no laꞌs yaꞌ Jesucrist leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node. Taandxèꞌ gàca.
\s Trèꞌ ndluꞌ xal ndxàal que tee ban mèn coꞌseꞌ ndxàc yaltìi loo mèn, mèn coꞌ ndxelaꞌs loo cón cheꞌn Diox.
\p
\v 12 Mèn huesen por cón cheꞌn Crist, guꞌ coꞌ anzeꞌf nqueꞌ lezon ñèen, neꞌgàcte guꞌ mèn coꞌ arid neꞌñeede cón, chàa, gàc loo guꞌ coꞌseꞌ ndxàc chol yaltìi tínꞌ loo guꞌ. Neꞌtenꞌte guꞌ leꞌn lezoꞌ guꞌ conꞌ coꞌ ndxàc loo guꞌ nac thìb conꞌ coꞌ tarte ñèe mèn gàc loo izlyoꞌ ndxèꞌ.
\v 13 Ndxeꞌlequeꞌ, ftac lezoꞌ guꞌ coꞌseꞌ gàca loo guꞌ leꞌ guꞌ tyactìi no Crist ndxep par gàca loo guꞌ tyac tínꞌ lezoꞌ guꞌ coꞌseꞌ ñèe guꞌ gàc conꞌ roo no conꞌ xèn loo Crist coꞌseꞌ yiꞌth Crist loo izlyoꞌ ndxèꞌ tedib vez.
\v 14 Cheleꞌ mèn ñii ngòc nguàal conꞌ loo guꞌ por cón cheꞌn Crist, huen gàca loo guꞌ no huen nda guꞌ loo cón cheꞌn Crist. Coꞌseꞌ gàca tataa loo guꞌ, ñee guꞌ no taꞌ guꞌ cuent leꞌ Xpii cheꞌn Diox, Xpii coꞌ nac Xpii roo no Xpii xèn, nzo loo guꞌ. Mèna ñii yèe ñii tìi cón cheꞌn Crist. Per ndxeꞌlequeꞌ, guꞌ ndli ndxàc conꞌ guryath no conꞌ guryèn loo Crist.
\v 15 Thìb descuid nquin tyactìi guꞌ ndxep. Cheleꞌ guꞌ nquin tyactìi ndxep, blaꞌs guꞌ no huen huen quenap guꞌ guꞌ par neꞌtyactìide guꞌ por mbeth guꞌ mèn; por mbli huanꞌ guꞌ; o por mbli guꞌ conꞌ yeꞌrsinꞌ; o por mblaꞌs roꞌ guꞌ diꞌs cón cheꞌn tedib mèn coꞌ inacte cón cheꞌn guꞌ.
\v 16 Ndxeꞌlequeꞌ, cheleꞌ chol guꞌ ndyactìi ndxep ante por nzo guꞌ loo cón cheꞌn Crist no maste, inquinte thyon guꞌ. Ndxeꞌlequeꞌ, ndxàal gab guꞌ leꞌ Diox nac Diox roo no Diox xèn por mdaꞌ Diox lugar loo guꞌ neꞌ guꞌ lèe mèn coꞌ nac cheꞌn Crist por nac guꞌ mèn coꞌ nzo loo cón cheꞌn Crist.
\p
\v 17 Nase mzinleꞌ huiz no mzinleꞌ tiemp coꞌseꞌ tlo tub rez Diox cón cheꞌn conꞌ coꞌ ndli mèn coꞌ nac mèn guliz Diox, coꞌ nee diꞌs, naꞌ coꞌ ndxelaꞌs loo Diox por cón cheꞌn Jesucrist. Cheleꞌ Diox ya tataaleꞌ mtlo ngue tub rez cón cheꞌn naꞌ par tetìi Diox naꞌ, ¿xá nee guꞌ? aleꞌqueꞌ neꞌ gàc más conꞌ yeꞌrsinꞌ tínꞌ loo mèn coꞌ, por derech, neꞌndubdiꞌste loo diꞌs ndac cheꞌn Diox coꞌ ndluꞌ xá mod ndlyáꞌ mèn loo conꞌ ryes, ¿léꞌ?
\v 18 Lomisqueꞌ ne, cheleꞌ mèn coꞌ nac mèn ndac no mèn nalì loo Diox añenti mdyal par ngulàa yéc mèn no ngulàa lezoꞌ mèn par mblyáꞌ mèna loo conꞌ ryes, aleꞌqueꞌ loo mèn yeꞌrsinꞌ coꞌ ndxàp xtol, pà yilaꞌs mèn lyáꞌ mèna loo conꞌ ryes, ¿léꞌ? Yende xàa.
\v 19 Por cona, ngue niin loo guꞌ: Mèn coꞌ ndxelaꞌs loo Diox no coꞌ ndyactìi xal nac coꞌ gunee lezoꞌ Diox, mèna ndxàalqueꞌ tolo li conꞌ ndac loo hues xtàa mèna. No ndxàalqueꞌ toloqueꞌ naꞌb mèna quenap Diox alm mèna no xpii mèna laꞌs yaꞌ Diox no leque tiempa gàp mèna yalxlaꞌs loo Diox leꞌ Diox lii loo mèna. Yub Diox nac Diox coꞌ mbli par nzo naꞌ. No yub Diox ndliqueꞌ coꞌ mcàbgòn Diox li Diox loo mèn.
\c 5
\s Pedr ngue coꞌx loo mèn coꞌ ndxelaꞌs loo Diox.
\p
\v 1 Daa, Pedr nac thìb xaꞌ gox nalleꞌ coꞌ lalqueꞌ ngox xal ngox ndxep mèngool coꞌ nzo làth guꞌ coꞌ nqueltàa no guꞌ. Gunèen coꞌseꞌ mxactìi Crist. No ndan cuent cón cheꞌna loo mèn no ndluꞌen loo mèn xá mod mxactìi Crist. Thidte gàc conꞌ roo no conꞌ xèn loo ryete naꞌ, yiloa. Por cona, ngue coꞌxen loo mèngoola nalleꞌ.
\v 2 Ndlyazen leꞌ mèngoola quenap mèn coꞌ ngòo loo cón cheꞌn Diox coꞌteꞌ nqueltàa guꞌ par nedrèꞌ, mèn, coꞌ nee diꞌs, nac xal mbacxilꞌpeꞌ Diox. Ndlyazen li mèngoola conꞌ coꞌ ngue coꞌxen loo mèngoola loo diꞌs ndxèꞌ dib nzo yéc mèngoola no dib nzo lezoꞌ mèngoola xal mèn coꞌ huen nzo lezoꞌ xal neete lezoꞌ Diox. Indlyasten a la fuerz li mèngool conꞌ coꞌ ngue coꞌxen loo mèngool ndxèꞌ. Neꞌ neꞌ indlyazen li mèngoola xal mèn coꞌ ante nde yath ñèe tmi.
\v 3 Neꞌ ne indlyazen xoꞌf zinꞌ guꞌ zinꞌ ndxèꞌ, mèngool, xal mèn coꞌ ndxàc cheꞌn thìb conꞌ no xal mèn coꞌ ñibeꞌ loo xtàa mèn, loo mèn coꞌ ndyoo ner guꞌ loo no mèn coꞌ ndyoo naa guꞌ loo. Ndxeꞌlequeꞌ, cuaꞌn guꞌ mod bluꞌ guꞌ guꞌ loo mèn coꞌ nac xal mbacxilꞌ leꞌ guꞌ, lìcqueꞌ, nque tee ban ndac no nque tee ban lì guꞌ loo cón cheꞌn Diox.
\v 4 Tataa lyazen li guꞌ. Leꞌ sya, coꞌseꞌ yúꞌloo Tad Jesucrist coꞌ nac merpeꞌ pastor coꞌ ndyoo ner no coꞌ ndyoo naa loo mèn coꞌ nzo loo cón cheꞌn Diox, xal nquenap thìb pastor mbacxilꞌ, huiza guꞌ gàc cheꞌn no yanꞌ no guꞌ thìb conꞌ roo no thìb conꞌ xèn coꞌ inacte xal thìb coron coꞌ natoxcuaꞌ con laa nayèe coꞌ lueg ngolꞌ.
\p
\v 5 Lomisqueꞌ lyazen ne, guꞌ coꞌ nac myenꞌbiꞌ no guꞌ coꞌ nac myenꞌgot, ftubdiꞌs guꞌ loo conꞌ ñibeꞌ mèngool loo guꞌ. Lomisqueꞌ, ndlyazen leꞌ ryete guꞌ gàc nadoꞌ loo thìb guꞌ no loo tedib guꞌ no gòc guꞌ mèn coꞌ ncuaꞌn mod gàc conꞌ ndac loo hues xtàa guꞌ por cón cheꞌn guꞌ. No neꞌgàcte guꞌ mèn nayiꞌ.
\pi1 Tac Diox ndxecloo no ndxàc Diox ngolo ngolaꞌs loo mèn coꞌ ndyeꞌs no loo mèn coꞌ nxyalꞌ. Per ndxeꞌlequeꞌ, Diox ndlyath no mèn nadoꞌ coꞌ indyeꞌste no mèn coꞌ inxyalꞌte loo ryethe conꞌ ndac cón cheꞌn Diox.
\p
\v 6 Cona, ngue niin loo guꞌ: Gòc guꞌ mèn nadoꞌ loo ryethe mod coꞌ ndxàp guꞌ tac Diox ndxàp rye loothe conꞌ laꞌs nii Diox no laꞌs yaꞌ Diox. Cheleꞌ guꞌ tataa li, leꞌ sya, Diox li par gàc guꞌ mèn roo mèn xèn coꞌseꞌ gàcpeꞌ huiz coꞌ nanee Diox ndxàal gàc guꞌ mèn roo mèn xèn.
\v 7 Yende chó mport nzo lezoꞌ Diox por ndxath ndlyux guꞌ loo cón cheꞌn guꞌ. Más huen gurez guꞌ Diox por cón cheꞌn ryethe conꞌ coꞌ nde che loo guꞌ no conꞌ coꞌ ndenꞌ guꞌ no conꞌ coꞌ ndli nxi lezoꞌ guꞌ. Tac ndxeꞌlequeꞌ, leꞌleꞌ loo Diox ndxàca thìb zinꞌ cón cheꞌn guꞌ.
\v 8 Lomisqueꞌ, ndlyazen gòc guꞌ mèn nalas no mèn lijer xal mèn coꞌ nquenap liz thìb mèn coꞌ ndxàp cheꞌn. Tac Mebizya coꞌ nac ngolo ngolaꞌs cheꞌn guꞌ ngue tee cuaꞌn mod par telux Mebizya guꞌ xal thìb mbeeꞌs coꞌ mbez yèe coꞌseꞌ ngue tee lanꞌ mbeeꞌs, ncuaꞌn mbeeꞌs coꞌ hua mbeeꞌs.
\v 9 Gòp lezoꞌ guꞌ par nec thìb mod no nec tedib mod neꞌlide guꞌ nec thìb conꞌ coꞌ nee lezoꞌ Mebizya li guꞌ. Más huen bli nèe guꞌ guꞌ loo cón cheꞌn Crist coꞌ ndxelaꞌs guꞌ. Tac guꞌ naneequeꞌ no ndaꞌqueꞌ guꞌ cuent leꞌ ryete mèn coꞌ ndxàc hues guꞌ por cón cheꞌn Crist coꞌ nzo dib athu loo izlyoꞌ nzi tac leque yaltìi coꞌ ndyac guꞌ par nedrèꞌ.
\v 10 Per coꞌseꞌ riid yaltìia loo guꞌ coꞌ ndxàc ndxep tiemp loo guꞌ, Diox li par gàc guꞌ mèn coꞌ, lìcqueꞌ, mtéth no mèn coꞌ ndaꞌqueꞌ cuent no mèn coꞌ ndyubdiꞌsqueꞌ loo cón cheꞌn Diox. No Diox li par leque guꞌ li nèe guꞌ loo cón cheꞌn Crist. No li Diox par neꞌtolode gàc guꞌ mèn coꞌ nac chop loo chop laꞌs loo cón cheꞌn Diox. Leque yub Diox angndli ndxàc rye loothe conꞌ ndac loo naꞌ. No leque yub Diox nac Diox coꞌ ngurez naꞌ no mblec Diox naꞌ par gàc cheꞌn naꞌ no par yanꞌ no naꞌ rye loothe coꞌ nac conꞌ roo conꞌ xèn cheꞌnpeꞌ Diox tac thidte ndxàc naꞌ con Crist no ngòo naꞌ loo cón cheꞌn Crist thidtene.
\v 11 Ndlyazen tolo gàc conꞌ roo no conꞌ xèn loo Crist no ndlyazen yanꞌ ryethe conꞌ roo no ryethe conꞌ xèn laꞌs nii Jesucrist no laꞌs yaꞌ Jesucrist leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node. Taandxèꞌ gàca.
\s Conꞌ ndxèꞌ nac lult diꞌs coꞌ mqueꞌ Pedr yeꞌs loo mèn.
\p
\v 12 Mtelꞌen cart ndxèꞌ loo guꞌ con Silvan coꞌ ndlin cuent nac thìb hues naꞌ coꞌ altant ndoo loo cón cheꞌn Crist. Loo cart ndxèꞌ mcoꞌxen loo guꞌ no mblin leꞌ guꞌ ndaꞌ cuent coꞌ huenlequeꞌ leꞌ ryethe yalndac coꞌ angndli Diox loo guꞌ ndluꞌ loo guꞌ leꞌ Diox, lìcqueꞌ, nqueꞌ lezoꞌ ñèe Diox guꞌ. Por cona, ftolo gure nèe guꞌ loo cón cheꞌn Diox.
\v 13 Mèn coꞌ nqueltàa loo cón cheꞌn Diox yèez Babiloñ, mèn coꞌ Diox mcui xalqueꞌ mcui Diox guꞌ, mèna ngue nii Diox loo guꞌ loo cart ndxèꞌ. Ngue nii Marc, coꞌ nac xal xganꞌ daa, Diox loo guꞌ, ne.
\v 14 Coꞌseꞌ ngue nii guꞌ Diox loo hues xtàa guꞌ loo cón cheꞌn Crist, fxen guꞌ yaꞌ xtàa guꞌ xalqueꞌ nac mod coꞌ ndxàp guꞌ, guꞌ coꞌ nqueltàa loo cón cheꞌn Diox.
\p No ndlyazen yo nagàl lezoꞌ ryete guꞌ loo Diox no cue ban guꞌ rye nda guꞌ no rye ndyeꞌth guꞌ con xtàa guꞌ, guꞌ coꞌ nac cheꞌnpeꞌ Jesucrist. Taandxèꞌ gàca loo guꞌ, ndee guꞌ.