\id 2PE
\ide UTF8
\h 2 PEDRO
\toc1 2 PEDRO
\mt Mbryop Cart Coꞌ Mqueꞌ Pedr Yeꞌs Loo Mèn
\c 1
\s Pedr ngue queꞌ yeꞌs coꞌ nac cart ndxèꞌ loo mèn coꞌ ndxelaꞌs loo cón cheꞌn Crist.
\p
\v 1 Yub daa coꞌ nac Mon Pedr, daa nac thìb mbiꞌ coꞌ nxoꞌf zinꞌ zinꞌ cón cheꞌn Jesucrist. No nac daa thìb mbiꞌ coꞌ ndxeꞌ diꞌs cón cheꞌn Jesucrist, coꞌ nee diꞌs, nac daa mbiꞌ coꞌ mtelꞌ yub Jesucrist loo mèn. Ngue queꞌen yeꞌs coꞌ nac cart ndxèꞌ loo guꞌ, guꞌ coꞌ nac mèn coꞌ mtéꞌth no coꞌ ngolaꞌsleꞌ loo cón cheꞌn Diox xalqueꞌ ndxelaꞌs nuꞌ. No mod coꞌ ndxelaꞌs naꞌ ndxèꞌ anzeꞌf ntac loo guꞌ xalqueꞌ ntaca loo nuꞌ. Naca thìb conꞌ roo no thìb conꞌ xèn leꞌ Diox mdaꞌ lugar yilaꞌs naꞌ loo Diox, ne. Mbli Diox ngolaꞌs naꞌ loo cón cheꞌn Jesucrist tac Diox naꞌ no Tad Jesucrist naꞌ coꞌ mteláꞌ naꞌ loo conꞌ ryes nac Diox nalì no Diox nambìi.
\v 2 Ndlyazen tolo li Diox anggàc huax conꞌ ndac loo guꞌ axta plóthe. No ndlyazen yo nagàl lezoꞌ guꞌ loo Diox no cue ban guꞌ rye nda guꞌ no rye ndyeꞌth guꞌ làth xtàa guꞌ por mdaꞌ guꞌ cuent no por mdyub xnìi yéc guꞌ no por mdyub xnìi lezoꞌ guꞌ loo cón cheꞌn Diox no loo cón cheꞌn Jesús coꞌ nac Tad naꞌ.
\s Trèꞌ ndluꞌ cón cheꞌn mèn coꞌ ngòoleꞌ loo cón cheꞌn Crist leꞌ mèna ndxàal tolo téꞌth no taꞌ mèn cuent no tyubdiꞌs mèn loo cón cheꞌn Crist.
\p
\v 3 Diox mbli ngue no naꞌ ryethe conꞌ coꞌ nquin naꞌ par que tee ban ndac naꞌ loo cón cheꞌn Jesucrist no par li naꞌ cas loo Diox dib nzo yéc naꞌ no dib nzo lezoꞌ naꞌ. Tataa mbli Diox por cón cheꞌn ryethe conꞌ roo no conꞌ xèn coꞌ nzo laꞌs nii Diox no coꞌ nzo laꞌs yaꞌ Diox. Tataa mbli Diox coꞌseꞌ mbli Diox mblibeꞌ naꞌ Tad Jesucrist. Tad Jesucrist mcui naꞌ no mblec Tad Jesucrist naꞌ loo cón cheꞌn Tad Jesucrist por cón cheꞌn conꞌ roo no conꞌ xèn coꞌ ndxàp Tad Jesucrist laꞌs nii Tad Jesucrist no laꞌs yaꞌ Tad Jesucrist no por cón cheꞌn ryethe conꞌ roo conꞌ xèn coꞌ ngòc thìb zinꞌ coꞌ mxoꞌf zinꞌ Tad Jesucrist loo mèn.
\v 4 No por ryethe conꞌ roo no conꞌ xèn coꞌ ngòc thìb zinꞌ coꞌ mxoꞌf zinꞌ Tad Jesucrist loo mèna, mcàbgòn Tad Jesucrist gàc huax conꞌ roo conꞌ xèn loo naꞌ. Conꞌ coꞌ mcàbgòn Tad Jesucrist loo naꞌa, anzeꞌf ntac loo naꞌ. Por cón cheꞌn conꞌ coꞌ mcàbgòn Tad Jesucrist loo naꞌa, ndxàca loo guꞌ nac guꞌ mase ndxep xal nac Diox. Leꞌ sya, tataa mod lyáꞌ guꞌ loo ryethe conꞌ zab coꞌ ndli ndyub yoꞌf lezoꞌ mèn coꞌ alithe naban loo cón cheꞌn xab izlyoꞌ loo izlyoꞌ ndxèꞌ.
\v 5 Por cona, ngue niin loo guꞌ: Ndxàal li guꞌ coꞌ nzote mod li guꞌ par que tee ban ndac guꞌ loo conꞌ coꞌ ndxelaꞌs guꞌ loo cón cheꞌn Diox. Más de cona, ndxàal tolo téꞌth guꞌ cón cheꞌn Diox láth nque tee ban ndac guꞌ loo conꞌ ndxelaꞌs guꞌ loo cón cheꞌn Diox.
\v 6 Lomisqueꞌ ne, ndxàal tolo téꞌth guꞌ par ñibeꞌ guꞌ loo lezoꞌ guꞌ no par gàp guꞌ lezoꞌ guꞌ láth ngue téꞌth guꞌ cón cheꞌn Diox. Lomisqueꞌ ne, lyazen gàc guꞌ mèn coꞌ nchaꞌlaꞌs loo ryethe conꞌ coꞌ ndxàc loo guꞌ láth ngue téꞌth guꞌ par ñibeꞌ guꞌ loo lezoꞌ guꞌ no par gàp guꞌ lezoꞌ guꞌ. No ndlyazen leꞌ guꞌ thìb lì yéc guꞌ no thìb lì lezoꞌ guꞌ li guꞌ cas loo Diox láth nchaꞌlaꞌs guꞌ loo ryethe conꞌ coꞌ ndxàc loo guꞌ.
\v 7 Más de cona, ndlyazen leꞌ guꞌ gàc mèn coꞌ anzeꞌf nazinꞌ ñèe hues xtàa guꞌ láth thìb lì yéc guꞌ no thìb lì lezoꞌ guꞌ ngue li guꞌ cas loo Diox. Por lult, loo ryethe conꞌ ndxèꞌ, ndlyazen gàc guꞌ mèn coꞌ, por derech, mtéꞌth par queꞌ lezoꞌ guꞌ ñèe guꞌ chol mèn láth nac guꞌ mèn coꞌ anzeꞌf nazinꞌ ñèe hues xtàa guꞌ.
\p
\v 8 Cheleꞌ guꞌ, lìcqueꞌ, li ryethe conꞌ coꞌ ngue niin loo guꞌ ndxèꞌ no ndxàcpeꞌi loo guꞌ, leꞌ sya, axta arid ntac mod coꞌ nque tee ban guꞌ loo Diox. No ndxàc loo guꞌ inacte thìb conꞌ anxleꞌ ndlibeꞌ guꞌ Tad Jesucrist naꞌ por ndaꞌ guꞌ cuent coꞌ huenlequeꞌ cón cheꞌn Tad Jesucrist naꞌ.
\v 9 Per mèn coꞌ indlide cas loo cón cheꞌn Diox no cón cheꞌn Jesucrist xal nac ryethe conꞌ coꞌ ngue niin loo guꞌ ndxèꞌ, mèna nac xal thìb mbiꞌ sieu o nac mèna xal thìb mbiꞌ coꞌ nathath ngüiꞌ. Tataa ndxàca loo mèna por ndxathlaꞌs mèna leꞌ Diox mtonꞌ ryethe xtol mèna coꞌ mcuaꞌn mèna, póla.
\v 10 Por cona, guꞌ coꞌ nac mèn huesen por cón cheꞌn Crist, ryete guꞌ bli coꞌ nzote mod li guꞌ no bluꞌ ryete guꞌ coꞌ nzote mod gác téꞌth guꞌ no non guꞌ no bli nèe guꞌ leꞌ, lìcque, Diox mblec guꞌ no mcui Diox guꞌ loo cón cheꞌn Crist. Leꞌ sya, cheleꞌ guꞌ ngue li xal ngue niina loo guꞌ ndxèꞌ, neꞌryo xàꞌde guꞌ no neꞌyitacte lezoꞌ guꞌ loo cón cheꞌn Crist axta gath guꞌ.
\v 11 Leꞌ sya, tataa li Diox par thìb lìte yòo guꞌ loo béꞌ coꞌteꞌ nzo Tad Jesucrist naꞌ coꞌ mteláꞌ naꞌ loo conꞌ ryes. Ñibeꞌ Tad Jesucrist naꞌ loo ryethe conꞌ thidtene.
\p
\v 12 Cona, nxyoꞌf ndelequeꞌ lezon par ndlin leꞌ guꞌ teꞌqueꞌ lezoꞌ conꞌ ndxèꞌ mastaleꞌ huen huen non guꞌ no ndaꞌ guꞌ cuent cón cheꞌna, no mastaleꞌ ndli guꞌ par nzi li nèe guꞌ guꞌ loo conꞌ ndxèꞌ coꞌ nac lìcpeꞌ nalleꞌ.
\v 13 Ndyaquen huen nac coꞌ ngue lin ndxèꞌ no nalì naca par tolo luꞌen loo guꞌ cón cheꞌn conꞌ ndxèꞌ, no coꞌxen loo guꞌ par teꞌ lezoꞌ guꞌ no par tolo yeꞌth lezoꞌ guꞌ cón cheꞌn conꞌ ndxèꞌ láth beꞌ naban daa.
\v 14 Tac Tad Jesucrist naꞌ mbluꞌleꞌ loon nde zinꞌ gaxleꞌ huiz coꞌ gath daa.
\v 15 Per nalleꞌ láth beꞌ naban daa, tolo lin coꞌ nzote mod lin no tolo coꞌxen loo guꞌ par gàca loo guꞌ coꞌseꞌ ngolo nguth daa, tolo teꞌ lezoꞌ guꞌ ryethe cón cheꞌn conꞌ coꞌ mcoꞌxen loo guꞌ ndxèꞌ.
\s Trèꞌ ndluꞌ cón cheꞌn mèn coꞌ gunèe conꞌ roo conꞌ xèn cheꞌnpeꞌ Crist láth mque tee no mèn Crist loo izlyoꞌ ndxèꞌ.
\p
\v 16 Mbluꞌ nuꞌ ryethe conꞌ loo guꞌ cón cheꞌn Tad Jesucrist naꞌ leꞌ Tad Jesucrist naꞌ nac xaꞌ roo no xaꞌ xèn no leꞌ Jesucrist bere yiꞌth loo izlyoꞌ tedib vez. Coꞌseꞌ mdoodizen cón cheꞌn conꞌa loo guꞌ, neꞌndoodistena loo guꞌ xal mèn coꞌ neꞌñeede cuent cón ngue toodiꞌs mèna. Neꞌ neꞌ mziꞌfen loo diꞌs par mquedìin guꞌ. Yende xàa. Nuꞌ gunèepeꞌ Tad Jesucrist con ngudloopeꞌ nuꞌ coꞌseꞌ ngòc conꞌ roo no conꞌ xèn loo Jesucrist no coꞌseꞌ mzyeꞌ loo loo Tad Jesucrist.
\v 17 Gunèe nuꞌ coꞌseꞌ Diox xud naꞌ mbli ngòc conꞌ guryath no conꞌ guryèn no conꞌ roo conꞌ xèn loo Jesús no coꞌseꞌ mquée xnìi lad Jesús no mbyàꞌx bèel lad Jesús. No mbìn nuꞌ diꞌs coꞌseꞌ gunii Diox diꞌs coꞌ ngòc diꞌs roo no diꞌs xèn coꞌ ndxab Diox: Mbiꞌ ndxèꞌ nac xganꞌpeꞌ daa. Anzeꞌf nqueꞌ lezon mbiꞌ no anzeꞌf ngudloon no lezon mbiꞌ. No anzeꞌf ndyac lezon loo conꞌ coꞌ ngue li mbiꞌ ndxèꞌ.
\v 18 Yub nuꞌ mbìn diꞌs coꞌ mbyèn loo béꞌa. No thidte ngure no nuꞌ Tad Jesús loo yii coꞌ ngòc yii natúꞌ loo Diox coꞌseꞌ ngòca.
\p
\v 19 Per nalleꞌ ngue no naꞌ tedib conꞌ coꞌ más ngo xoꞌf diꞌs loo naꞌ cón cheꞌn Jesucrist, coꞌ nee diꞌs, nac yeꞌs coꞌ mqueꞌ mèn coꞌ mdeꞌth diꞌs coꞌ ndxab Diox. Huenqueꞌ ndli guꞌ cheleꞌ guꞌ ngue liqueꞌ cas cón cheꞌn diꞌs coꞌ mqueꞌ mèna yeꞌs. No tataa mod ndxàca loo guꞌ xal thìb conꞌ coꞌ nquée xnìi yéc guꞌ no coꞌ nquée xnìi lezoꞌ guꞌ cón cheꞌn Crist xal coꞌseꞌ ntenìi thìb lampr loo mèn ned nque tee mèn. Tataa ngue taꞌ guꞌ cuent no huen huen ngue téꞌth guꞌ nde zinꞌ gaxleꞌ tiemp coꞌseꞌ bere yiꞌth Jesucrist loo izlyoꞌ ndxèꞌ tedib vez. Leꞌ sya, huen huen quée xnìi yéc guꞌ no quée xnìi lezoꞌ guꞌ xal coꞌseꞌ nde quée mbèelhuiꞌ ndxáal coyor xtilꞌ par ndaꞌ mèn cuent nde yinìi izlyoꞌ tedib huiz.
\v 20 Per ner fteꞌ lezoꞌ guꞌ no taꞌ guꞌ cuent coꞌ huenlequeꞌ cón cheꞌn conꞌ ndxèꞌ: Nec thìb diꞌs coꞌ ngòc diꞌs coꞌ mqueꞌ mèn coꞌ mdeꞌth diꞌs coꞌ ndxab Diox yeꞌs ngòc diꞌs coꞌ alithe mbyeꞌth xtùuz mèna par mqueꞌ mèna yeꞌs.
\v 21 Naꞌ ndaꞌqueꞌ cuent no nonqueꞌ naꞌ leꞌ mèn coꞌ mdeꞌth diꞌs coꞌ ndxab Diox póla, neꞌndoodiꞌste mèna diꞌs no neꞌndeꞌthte mèna diꞌs coꞌ ngòc diꞌs coꞌ angndyeꞌth yéc mèn par ndyoodiꞌs mèn diꞌs coꞌ ngòc diꞌs coꞌ angmbyeꞌth yéc mèna. Neꞌ neꞌ ngàc diꞌsa diꞌs coꞌ angmdub yoꞌf lezoꞌ mèn par ngdeꞌth mèna diꞌsa. Ndxeꞌlequeꞌ, mèn coꞌ mdeꞌth diꞌs coꞌ ndxab Dioxa, mèna ngòc mèn coꞌ, lìcqueꞌ, ngro xàꞌ loo cón cheꞌn xab izlyoꞌ par ngòc mèna mèn coꞌ mdeꞌth diꞌsa xal mblyath no Xpii Natúꞌ mèna. Diꞌs coꞌ mdeꞌth mèna ngòc diꞌs coꞌ, lìcqueꞌ, mnibeꞌ Diox loo mèna par teꞌth mèna diꞌs.
\c 2
\s Pedr ndluꞌ cón cheꞌn mèn coꞌ ndyèꞌ.
\r (Judas 4–13)
\p
\v 1 Fteꞌ lezoꞌ guꞌ póla ngo mèn coꞌ mbez mdeꞌth mèna diꞌs coꞌ ndxab Diox làth mèn nación Israel. Per mèna ngòc mèn gutyèꞌ. No lomisqueꞌ ne, tataa mod yòo mèn coꞌ ñee nac maistr coꞌ ndluꞌ cón cheꞌn Diox làth guꞌ. Per mèna gàc maistr gutyèꞌ loo guꞌ. Mèna xexte luꞌ mod coꞌ nac mod fals coꞌ ncàb yalquìi. No luꞌ mèna loo guꞌ cón cheꞌn thìb leyꞌ coꞌ nac leyꞌ gutyèꞌ. Coꞌseꞌ luꞌ mèna loo guꞌ tataa mod, ale negadiꞌs cà diꞌs mèna cón cheꞌn yub Tad Jesucrist coꞌ mteláꞌ mèna loo conꞌ ryes. Per conꞌ coꞌ li mèna li par setilte càb loo leque mèna lyux mèna.
\v 2 No anzeꞌf thìb mèn yòo loo cón cheꞌn mèna no queltàa huax mèn con mèna par li mèn conꞌ yeꞌrsinꞌ xal ndli mèna. No por cón cheꞌn mèna anzeꞌf thìb mèn ñii yèe ñii tìi cón cheꞌn diꞌs ndac cheꞌn Diox coꞌ ndluꞌ xá mod thìb lìte ndxòo mèn loo Diox.
\v 3 Por mod coꞌ ndxath nquìi mèna ñèe mèna tmi, asendli mèna ndli mèna provech guꞌ axta plóthe con mod gutyèꞌ coꞌ ndluꞌ mèna guꞌ con xleyꞌ fals mèn coꞌ ndluꞌ mèna loo guꞌ. Per nzyalqueꞌ prob mèna tyactìi mèna coꞌseꞌ zin huiz ryo xàꞌ mèna loo Diox thidtene. Thidtene ya yende mod lyáꞌ mèna hora. Thidtene guneei loo mèna. Tac ndxàcleꞌ tiemp mziꞌf quìi Diox loo mèna leꞌ chol mèn gutyèꞌ coꞌ nac xal mèna thidtene ndyub quìi ndyub bèel lezoꞌ mèna par càb yaltìia loo mèna.
\p
\v 4 Diox neꞌntonꞌte xtol angl no xquin angl coꞌ mcuaꞌn angl loo Diox póla. Ndxeꞌlequeꞌ, mbli Diox leꞌ angla thìb lìte ngulàa leꞌn yeꞌrbìil. No sangmbli Diox mbyanꞌ angla tya xal thìb mèn coꞌ natedóꞌ con caden coꞌteꞌ nac thìb lugar nacuau thidtene axta gàc huiz coꞌ tub rez Diox cón cheꞌn angla par tetìi Diox angla yiloa.
\v 5 Neꞌ neꞌ ntonꞌ Diox xtol mèn no xquin mèn coꞌ mcuaꞌn mèn loo Diox, mèn coꞌ ngure ban más pólleꞌa. Ndxeꞌlequeꞌ, mbli Diox ngulàa thìb yuuloo tínꞌ rloo mèn yeꞌrsinꞌa. No ante mbli Diox mblyáꞌ thìb mbiꞌ coꞌ ngroꞌ lèe Noé con gaz mèn coꞌ ngòc famil Noé por mblo Noé yalbàn cón cheꞌn xá mod ndxàal que tee ban lì mèn loo Diox tiempa.
\v 6 Mbli Diox, ne, par mblyux mèn ciuda Sodom no mèn ciuda Gomor. Ante dii mbyanꞌ coꞌteꞌ ngure ciuda Sodom no ciuda Gomor. Tataa mbli Diox conꞌa loo mèna par huiꞌ no ñaa taamas mèn yeꞌrsinꞌ coꞌ ngo ban chol lugar loo mblyux ryop ciudaa.
\v 7 Per mbli Diox mblyáꞌ thìb mbiꞌ coꞌ ngroꞌ lèe Lot ndooreꞌ telux Diox ryop ciudaa. Lot ngòc thìb mbiꞌ ndac. No anzeꞌf nxi lezoꞌ Lot por ñèe Lot mod yeꞌrsinꞌ coꞌ mque tee ban mèn yeꞌrsinꞌ cheꞌn ciuda Sodom no ciuda Gomor.
\v 8 Lot ngo ban leꞌn ryop ciudaa. No mxec yèe Lot no mxi tínꞌ lezoꞌ Lot, coꞌ ngòc mbiꞌ nalì no mbiꞌ nambìi, axta plóthe coꞌseꞌ ñèe Lot xal ndli mèna conꞌ yeꞌrsinꞌtúb no coꞌseꞌ ndxòn Lot cón cheꞌn conꞌ yeꞌrsinꞌ coꞌ ndli mèna.
\v 9 Por cona, non naꞌ no ndaꞌqueꞌ naꞌ cuent leꞌ Tad Diox ndxác par teláꞌ Tad Diox mèn, mèn coꞌ ante nque tee ban loo cón cheꞌn Diox. Lomisqueꞌ ne, ndxác Diox li Diox par tolo ndyub quìi ndyub bèel lezoꞌ mèn yeꞌrsinꞌ axta zin huiz tub rez Diox cón cheꞌn mèna par tetìi Diox mèna thidtene.
\p
\v 10 Más tetìi Diox ryethe mèn coꞌ más ndli ryete yoꞌf coꞌ ndyub lezoꞌ mèn coꞌ nac conꞌ zab no conꞌ yeꞌrsinꞌ. No ndxeꞌlequeꞌ, ale leꞌleꞌ nxìis no mèna conꞌ coꞌ ñibeꞌ Diox li mèna loo Diox. Mèna indyóode cón ngue li mèna. No anzeꞌf naxin nac mèna. No axta neꞌ neꞌ inzyeb mèna ñii yèe ñii tìi mèna cón cheꞌn chol angl roo angl xèn coꞌ ñibeꞌ loo béꞌ.
\v 11 Per neꞌ angl coꞌ nac angl roo no angl xèn neꞌlide ryes par ñii yèe ñii tìi angl cón cheꞌn angl coꞌ nzo yeꞌrbìil loo Diox xal ñii yèe ñii tìi mèn yeꞌrsinꞌ cón cheꞌn angl roo angl xèn coꞌ ñibeꞌ loo béꞌ.
\v 12 Per ryete mèn yeꞌrsinꞌa thidtene indxònte diꞌs no indxaaꞌdte mèn diꞌs. Axta arid máꞌ mèna loo Diox. Guꞌ naneequeꞌ leꞌ máꞌ nac máꞌ por nac thìb thìb máꞌ xal nac máꞌ, ¿léꞌ? Neꞌñeede máꞌ cón ndli máꞌ. Tataa nac mèn yeꞌrsinꞌa, ne. Tac alithe ndyoodiꞌs mèna thìb conꞌ yeꞌrsinꞌ no tedib conꞌ yeꞌrsinꞌ coꞌ neꞌtaꞌde mèn cuent cón ndyoodiꞌs mèn. No leque mod yeꞌrsinꞌ coꞌ nac mèna càb loo mèna par lyux mèna.
\v 13 Masreꞌ tyactìi mèna xal nac conꞌ yeꞌrsinꞌ coꞌ mbli mèna láth naban mèna. Alithe nque tee ban mèn yeꞌrsinꞌa par ndli mèna ante conꞌ coꞌ ndyub yoꞌf lezoꞌ mèn li mèn. No conꞌ yeꞌrsinꞌ coꞌ ndli mèna leꞌleꞌ ncàb ndyac lezoꞌ mèna thìb huiz no tedib huiz. Mèna nac mèn xin no mèn cap coꞌ ntezab guꞌ coꞌseꞌ ndxòo mèna làth guꞌ par hua no mèna guꞌ. Láth ndxòo no mèna guꞌ ndluꞌ mèna nac mèna xal mèn huen no mèn ndac. Per neꞌndaꞌde guꞌ cuent, por derech, ngue quedìi mèna guꞌ. Ale leꞌleꞌ, ndxanꞌ bien mèna con guꞌ. No leque tiempa, ndyac lezoꞌ mèna por cón cheꞌn chol conꞌ yeꞌrsinꞌ coꞌ ngue li mèna xal ndyub yoꞌf lezoꞌ mèna par li mèna.
\v 14 Coꞌseꞌ ngüiꞌ mèna loo chol xaꞌgot, luega ndyub yoꞌf lezoꞌ mèna no ndlyàa nít yen mèna capas ndyac mèna ngue li mèna yalmbiꞌ con xaꞌgota. Thidtene incuaꞌnte mèna mod par neꞌtolode cuaꞌn mèna xtol mèna. No nac mèna mèn yeꞌrsinꞌa coꞌ ncuaꞌn chol myenꞌgot coꞌ indxàpte lezoꞌ no coꞌ luega ndaꞌ diꞌs coꞌ ndlyaꞌs mèn yeꞌrsinꞌa. Nac mèna mèn coꞌ anzeꞌf nde yath ñèe tmi. Thidtene mèn yeꞌrsinꞌ mèna too ze too yálꞌ.
\v 15 Por derech, nzi tee huan mèna loo cón cheꞌn Diox tac mbláꞌ mèna conꞌ coꞌ ndxab Diox li mèna par thìb lìte yòo mèna loo béꞌ. Ale más ndli mèna xalqueꞌ mbli thìb mbiꞌ coꞌ ngroꞌ lèe Balaam coꞌ ngòc thìb mbiꞌ coꞌ mdeꞌth diꞌs coꞌ ndxab Diox, póla. Balaam ngòc xganꞌ thìb mbiꞌ coꞌ ngroꞌ lèe Beor. Balaama mblyaꞌs li gan huax tmi por mbli Balaam conꞌ yeꞌrsinꞌ.
\v 16 No mzin thìb huiz no mzin thìb ze ale mbli Diox gunii thìb burrgol loo Balaam par mbyoo burr Balaam. Tataa mod más quee lezoꞌ Balaam mbláꞌ Balaam conꞌ yeꞌrsinꞌ coꞌ mblyaꞌs Balaam li Balaam hora.
\p
\v 17 Ryete mèn yeꞌrsinꞌa nac xal thìb tóꞌ biiz coꞌ yende nít. No nac mèna xal thìb xcuau biiz coꞌ alithe ndxeꞌ mbii, coꞌ nee diꞌs, yende cón ntac mèna. Mbli Diox tolo ndyub quìi ndyub bèel lezoꞌ mèna par ryo xàꞌ mèna loo Diox yilo gath mèna par lyàa mèna yeꞌrbìil no sangyanꞌ mèna tya coꞌteꞌ nac thìb lugar coꞌ más nacuau thidtene.
\v 18 Tataa gàca loo mèna tac coꞌseꞌ ndyoodiꞌs mèna, ndyoodiꞌs mèna antub diꞌs nateꞌs no antub diꞌs naxalꞌ, diꞌs coꞌ yende cón ntac. Asendli mèna nquedìi mèna mèn coꞌ ngro xàꞌleꞌ loo cón cheꞌn xab izlyoꞌ con mod yeꞌrsinꞌ coꞌ ndyub yoꞌf lezoꞌ mèna par bere mèn coꞌ ngro xàꞌleꞌ loo cón cheꞌn xab izlyoꞌ, tlo mèna, li mèna conꞌ yeꞌrsinꞌ tedib vez.
\v 19 Asendli mèna. Mbez mèn yeꞌrsinꞌa loo mèn coꞌ ngro xàꞌleꞌ loo cón cheꞌn xab izlyoꞌ cheleꞌ mèna que tee no mèn yeꞌrsinꞌa, leꞌ sya, càba que no mèna thìb yalnaban coꞌ yende chó mèn cuee cà. Per yalgutyèꞌtúb nac coꞌ mbez mèna. Tac leque mèn yeꞌrsinꞌa nac xal thìb moz coꞌ ndli yèe conꞌ yeꞌrsinꞌ coꞌ ndli mbee ncà mèna. No ndli mèna anab conꞌ zab. Tac thìb thìb mèn yeꞌrsinꞌa ndxàc moz loo conꞌ zab coꞌ ndyub yoꞌf lezoꞌ mèna par li mèna conꞌ zab.
\v 20 Per, lìcpeꞌ baꞌi, nde niin thìb conꞌ loo guꞌ cón cheꞌn ryete mèn coꞌ ngòoleꞌ loo cón cheꞌn Tad Jesucrist coꞌ mteláꞌ naꞌ loo conꞌ ryes, mèn coꞌ mtéꞌthleꞌ cón cheꞌn Tad Jesucrist: Nonqueꞌ guꞌ leꞌ por mdaꞌ mèna cuent cón cheꞌn Tad Jesucrist ngro xàꞌleꞌ mèna loo conꞌ zab coꞌ nac cón cheꞌn xab izlyoꞌ. Cheleꞌ mèna bere bix yéc par yòo mèna loo ryethe conꞌ yeꞌrsinꞌa tedib vez, no cheleꞌ mèna mdaꞌ lugar ñibeꞌ conꞌ yeꞌrsinꞌ loo mèna tedib vez, ale más nazab tínꞌ gàca no càba loo mèna yiloa.
\v 21 Per nalleꞌ, por cón cheꞌn conꞌ yeꞌrsinꞌ coꞌ gàc loo mèna coꞌseꞌ tyactìi mèna, más huen ngàca loo mèna thidtenequeꞌ neꞌngòode mèna loo cón cheꞌn Tad Jesucrist par non mèn no taꞌ mèn cuent xá mod thìb lìte yòo mèn loo béꞌ leque gàca loo mèn coꞌseꞌ ya nonleꞌ mèn no ndaꞌleꞌ mèn cuent xá nac cón cheꞌn Jesucrist no ale bere mèna, láꞌ mèna par neꞌlide mèna conꞌ coꞌ mnibeꞌ Diox loo mèna li mèna coꞌ nac conꞌ natúꞌ coꞌ mnibeꞌ Diox par li mèn.
\v 22 Per nase ndxàcleꞌ no mdyaaleꞌ loo mèna xal nac diꞌs coꞌ nac thìb diꞌs lìcpeꞌ coꞌ mbez mèn: Ale mbere mbac, nduhua mbac conꞌ coꞌ mberepeꞌ lezoꞌ mbac. Leꞌ nguch coꞌ diiz ngood coꞌ lillequeꞌ mbembìi, ale mbere ngood leꞌn ben yaꞌs tedib vez, ne. Lìcqueꞌ nac diꞌsa, ¿léꞌ?
\c 3
\s Pedr ndluꞌ trèꞌ xá mod gàc coꞌseꞌ yiꞌth Tad Jesucrist.
\p
\v 1 Mèn huesen por cón cheꞌn Tad Jesucrist, guꞌ coꞌ anzeꞌf nqueꞌ lezon ñèen, con cart ndxèꞌ nac mbryop cart coꞌ mqueꞌen yeꞌs loo guꞌ. Loo ryop cart coꞌ mtelꞌen loo guꞌ ndlyazen li guꞌ xtùuz dib nzo yéc guꞌ no dib nzo lezoꞌ guꞌ par taꞌ guꞌ cuent cón cheꞌn diꞌs coꞌ ngòc diꞌs coꞌ mcoꞌxen loo guꞌ.
\v 2 Fteꞌ lezoꞌ guꞌ cón cheꞌn diꞌs coꞌ mdeꞌth mèn, mèn coꞌ ngro xàꞌ loo conꞌ yeꞌrsinꞌ coꞌ nac cón cheꞌn xab izlyoꞌ, mèn coꞌ mdeꞌth diꞌs coꞌ ndxab Diox póla. No fteꞌ lezoꞌ guꞌ cón cheꞌn diꞌs coꞌ mtanꞌ Tad Jesucrist diꞌs par tyubdiꞌs naꞌ diꞌsa, Tad Jesucrist coꞌ mteláꞌ naꞌ loo conꞌ ryes. Diꞌsa ngòc diꞌs coꞌ mbluꞌ mèn coꞌ ndxeꞌ diꞌs cheꞌn Tad Jesucrist loo guꞌ.
\p
\v 3 Conꞌ ndxèꞌ nac coꞌ ndlyazen xoꞌf ndelequeꞌ lezoꞌ guꞌ par tolo taꞌ guꞌ cuent cón cheꞌn diꞌsa. Ndlyazen leꞌ guꞌ nonqueꞌ leꞌ leꞌn lult huiz no lult tiemp ndooreꞌ lith no izlyoꞌ ndxèꞌ ryo xoꞌf mèn no tlo yo mèn coꞌ tèꞌb no mèn coꞌ xìis no cón cheꞌn conꞌ coꞌ nac cheꞌn Diox. No alithe que tee ban mèna xal nac mod coꞌ ndryoꞌ ndlyenꞌ lezoꞌ mèn no conꞌ coꞌ ndyub yoꞌf lezoꞌ mèn coꞌ nac conꞌ yeꞌrsinꞌ coꞌ ndli mèna.
\v 4 Ale, angnzi tee mèna nibdiꞌs mèna. Gab mèna: ¿Máa cón cheꞌn Jesucrist coꞌ mcàbgòn Jesucrist leꞌ Jesucrist yiꞌth, yoo? Tolo ñii mèna, ne: Anon nguth xudgool naꞌ coꞌ mban pólleꞌa, lomisqueꞌ ndxàca xal mtlo ngòca desde coꞌseꞌ mblec Diox izlyoꞌ.
\v 5 Mèna tataa mbez tac indlyaꞌste mèna taꞌ mèna cuent coꞌ huenlequeꞌ no indlyaꞌste mèna li mèna xtùuz leꞌ desde tiemp más póla mdyoxcuaꞌleꞌ béꞌ no nziriꞌleꞌ izlyoꞌ coꞌ mnibeꞌ Diox ngòc yòo biiz coꞌseꞌ mnibeꞌ Diox dyoppeꞌ nít coꞌ ngure dib athu loo izlyoꞌ. Diox ngue tèn izlyoꞌ no ngue xènꞌ Diox izlyoꞌ por cón cheꞌn yuu coꞌ ndli Diox ndlyàa loo izlyoꞌ no por nít coꞌ nzo loo izlyoꞌ.
\v 6 No neꞌ neꞌ indlyaꞌs mèna li mèna xtùuz no taꞌ mèna cuent leꞌ izlyoꞌ coꞌ ngòc izlyoꞌ gox tiempa, no ryethe conꞌ coꞌ ngure loo izlyoꞌ mblyuxleꞌ coꞌseꞌ ngulàa yuuloo loo izlyoꞌ tiempa coꞌ ngòc tiemp cheꞌn diluv.
\v 7 Per béꞌ no izlyoꞌ coꞌ nziriꞌ nalleꞌ, leꞌi nziriꞌ par yeca no yola con quìi no con bèel coꞌseꞌ ñibeꞌ Diox yeca. Quìia no bèela tec izlyoꞌ no béꞌ leque huiz no leque tiemp coꞌseꞌ Diox tub rez cón cheꞌn rye mèn yeꞌrsinꞌ coꞌ lyux leque tiempa.
\p
\v 8 Diox indlabte huiz no mbeꞌ no línꞌ xal ndli naꞌ coꞌseꞌ noo noo ndli naꞌ xtùuz cón cheꞌn huiz no tiemp coꞌ ndriꞌth loo naꞌ. Por part cheꞌn Diox, thìb huiz nac xal thìb mil línꞌ. No thìb mil línꞌ nac xal thìb huiz loo Diox.
\v 9 Inacte leꞌ Tad Jesucrist anzeꞌf ndlyenꞌ par yiꞌth Tad Jesucrist loo izlyoꞌ tedib vez par gàc coꞌ mcàbgòn Jesucrist li Jesucrist loo naꞌ xal ndli ndxep mèn xtùuz. Ndxeꞌlequeꞌ, nchaꞌlaꞌs Tad Jesucrist ñèe Tad Jesucrist mèn par ñee Tad Jesucrist ñeeneꞌ chéꞌ nzoreꞌ ndxep mèn coꞌ tyal yòo loo cón cheꞌn Tad Jesucrist ndooreꞌ yiꞌth Tad Jesucrist loo izlyoꞌ tedib vez. Tad Jesucrist indlyaꞌste nec thìb mèn ryo xàꞌ loo Diox coꞌseꞌ ngolo nguth bélꞌyòo lad mèn. Ndxeꞌlequeꞌ, lyaꞌs Tad Jesucrist lyàa yéc rye mèn loo Diox no lyàa lezoꞌ rye mèn par tataa mod zyeꞌ mod yeꞌrsinꞌ coꞌ ndxàp mèn loo Diox no lyáꞌ mèn loo conꞌ ryes.
\p
\v 10 Per coꞌseꞌ gàc huiz coꞌseꞌ yiꞌth Tad Jesucrist, huiza gàc huiz coꞌseꞌ indyóode mèna cón cheꞌn huiza no coꞌseꞌ inzi bedte mèna yiꞌth Tad Jesucrist no coꞌseꞌ inzi queede lezoꞌ mèna yiꞌth Tad Jesucrist loo izlyoꞌ ndxèꞌ tedib vez. Tad Jesucrist yiꞌth no ryo xoꞌf Tad Jesucrist loo mèn xal coꞌseꞌ ndlyàa huanꞌ liz mèn ndxáal yálꞌ coꞌseꞌ neꞌtenꞌte mèn ndlyàa huanꞌ. Tiempa, ryethe conꞌ coꞌ nziꞌf loo béꞌ lyux no lith no. No leque tiempa yèn thìb ruid tínꞌ. No ryethe conꞌ coꞌ nziriꞌ loo izlyoꞌ yol con quìi no con bèel par lyuxa. No tataa mod lyux no lith no rye loothe conꞌ coꞌ nziꞌf loo béꞌ no coꞌ nziriꞌ loo izlyoꞌ.
\p
\v 11 Cheleꞌ ryethe conꞌa, lìcqueꞌ, tataa lyux no lith no, xalte mod neꞌ que tee ban ndac naꞌ loo Diox xal mèn coꞌ, lìcqueꞌ, ngro xàꞌleꞌ loo cón cheꞌn xab izlyoꞌ no xal mèn coꞌ, lìcqueꞌ, ndliqueꞌ cas loo cón cheꞌn Diox. Naquinqueꞌ tataa que tee ban naꞌ, ¿léꞌ?
\v 12 Gure bed guꞌ huiz coꞌ gàc huiz coꞌseꞌ li Diox ryethe conꞌa. Gurez guꞌ Diox par gàc ryethe conꞌ coꞌ nquin gàc ndooreꞌ yiꞌth Jesucrist par yiꞌthgà Jesucrist loo izlyoꞌ tedib vez. Huiza béꞌ lyux con quìi no con bèel. No ryethe conꞌ coꞌ nziriꞌ loo izlyoꞌ lyux no lith no no zyunꞌ con quìi no con bèel.
\v 13 Per part cón cheꞌn naꞌ, naꞌ nzi quee lezoꞌ cue tedib béꞌ cub no tedib izlyoꞌ cub coꞌ mcàbgòn Diox loo naꞌ li Diox par ban naꞌ loo béꞌ cub no loo izlyoꞌ cub. Loo béꞌ cuba no loo izlyoꞌ cuba ryethe conꞌ gàc nalì no nambìi no gàc ryethe conꞌ conꞌ ndac huiza.
\v 14 Cona, ngue niin loo guꞌ, mèn huesen por cón cheꞌn Tad Jesucrist, guꞌ coꞌ anzeꞌf nqueꞌ lezon ñèen: Láth nzi bed guꞌ gàc ryethe conꞌa, gure li guꞌ coꞌ nzote mod li guꞌ par huiꞌ Diox loo guꞌ leꞌ guꞌ nziriꞌ nagàl lezoꞌ loo Diox no nac guꞌ mèn coꞌ nzi ban rye nda guꞌ no rye ndyeꞌth guꞌ làth xtàa guꞌ. No gàc guꞌ mèn nambìi no mèn nalì coꞌ indxàpte nec thìb xtol loo Diox.
\v 15 Gòp guꞌ cuent no fteꞌ lezoꞌ guꞌ leꞌ por nchaꞌlaꞌs Tad Crist naꞌ loo mèn, conꞌa ndli par tolo lyáꞌ taamas mèn loo conꞌ ryes. Xalqueꞌ ngue niin loo guꞌ ndxèꞌ, taandxèꞌ mqueꞌ Pab coꞌ ndxàc hues naꞌ coꞌ anzeꞌf nqueꞌ lezoꞌ naꞌ ñèe naꞌ yeꞌs loo guꞌ cón cheꞌn conꞌ ndxèꞌ. Mqueꞌ Pab yeꞌs loo guꞌ xal nac mod coꞌ mbli Diox ngóc Pab no coꞌ mbluꞌ Diox loo Pab.
\v 16 Loo ryethe cart coꞌ nde teeleꞌ mtelꞌ Pab loo guꞌ, leque cón cheꞌn conꞌ ndxèꞌ mqueꞌ Pab yeꞌs loo guꞌ mastaleꞌ ndyac guꞌ no ndenꞌ guꞌ nagàn nac cart coꞌ mqueꞌ Pab loo guꞌ par taꞌ guꞌ cuent cón ngue toodiꞌs Pab loo guꞌ. Per mèn naxèn no mèn coꞌ nauꞌ loo no coꞌ nauꞌ yéc coꞌ pente ndxelaꞌs, mèna xàꞌleꞌ mod no tedib mod ndenꞌ no ndaꞌ mèna cuent cón cheꞌn cart coꞌ mqueꞌ Pab yeꞌs loo mèn. Por cona, mbez mèna leꞌ cart coꞌ mqueꞌ Pab loo mèna, tedib mod mqueꞌ Pab yeꞌs loo mèna. Tataaguèꞌ ngue li mèna con taamas yeꞌs coꞌ nac xtiꞌs Diox. Ale, tataa ndli mèna par leque mèna telux mèna loo Diox thidtene.
\p
\v 17 Por cona, ngue niin loo guꞌ, mèn huesen por cón cheꞌn Tad Jesucrist, guꞌ coꞌ nqueꞌ lezon ñèen: Com leꞌ guꞌ nonleꞌ conꞌ ndxèꞌ nalleꞌqueꞌ, ¿léꞌ?, leque guꞌ fquenap guꞌ par neꞌcuee càde mèn guꞌ par quedìi mèn guꞌ, mèn coꞌ nac mèn yeꞌrsinꞌ, no tataa mod tyoo xàꞌ lezoꞌ guꞌ loo cón cheꞌn Diox coꞌ mbli nèe guꞌ guꞌ.
\v 18 Más huen ndlyazen leꞌ guꞌ tolo téꞌth no tolo taꞌ guꞌ cuent cón cheꞌn Tad Jesucrist coꞌ mteláꞌ naꞌ loo conꞌ ryes. No tolo thidte gàc guꞌ par tolo queꞌ lezoꞌ guꞌ Tad Jesucrist. Ndlyazen tolo gàc conꞌ roo no conꞌ xèn loo Tad Jesucrist nalleꞌ no thidtenequeꞌ. Taandxèꞌ gàca, ndee guꞌ.