\id 1JN
\ide UTF8
\h 1 JUAN
\toc1 1 JUAN
\mt Ner Cart Coꞌ Mqueꞌ Juàn Yeꞌs Loo Mèn
\c 1
\s Trèꞌ ndluꞌ cón cheꞌn xá mod yòo ban no mèn Diox thidtene.
\p
\v 1 Ngue queꞌen yeꞌs ndxèꞌ loo guꞌ coꞌ nac cón cheꞌn diꞌs ndac coꞌ ndluꞌ loo mèn cón cheꞌn xá mod li mèn par yòo ban no mèn Diox thidtene. Cón cheꞌn diꞌs ndacpeꞌ ndxèꞌ nac yub Jesucrist coꞌ nzoleꞌ ndooreꞌ coꞌseꞌ mbli Diox ngure ryethe conꞌ coꞌ nziriꞌ nalleꞌ. Mbìnpeꞌ nuꞌ ryethe conꞌ gunii Jesucrist loo mèn. Gunèepeꞌ nuꞌ con ngudloopeꞌ nuꞌ conꞌ coꞌ mbli Jesucrist, ne. Huen huen mbuiꞌ nuꞌ loo Jesucrist axta mbuàal nuꞌ lad Jesucrist con yaꞌpeꞌ nuꞌ. Por cona, ndaꞌ nuꞌ cuent loo guꞌ leꞌ Jesucrist nac angoluxte xaꞌ coꞌ ndluꞌ loo mèn cón cheꞌn xá mod li mèn par yòo ban no mèn Diox thidtene.
\v 2 Diox mbli par gunèe loopeꞌ nuꞌ Jesucrist coꞌ mbluꞌ loo nuꞌ cón cheꞌn xá mod yòo ban no mèn Diox thidtene. No ndaꞌqueꞌ nuꞌ cuent loo mèn cón cheꞌn xá mod yòo ban no mèn Diox thidtene. No cona, ngue teꞌth nuꞌ no ngue luꞌ nuꞌ loo guꞌ coꞌ nac cón cheꞌn xá mod yòo ban no mèn Diox thidtene. Póla, ante Diox non xá mod li Diox par yòo ban no mèn Diox thidtene. Per nalleꞌ, mbluꞌ Diox cón cheꞌn xá mod yòo ban no mèn Diox, mod coꞌ ndxàc loo mèn por cón cheꞌn Jesucrist.
\v 3 Cona, ngue taꞌ nuꞌ cuent no ngue go xoꞌf nuꞌ loo guꞌ coꞌ gunèeleꞌ nuꞌ no coꞌ mbìnleꞌ nuꞌ cón cheꞌn Jesucrist par thidte gàc guꞌ con nuꞌ nalleꞌ loo cón cheꞌn Diox xal, lìcqueꞌ, thidte ndxàc nuꞌ con Diox coꞌ nac xud naꞌ no con Jesucrist coꞌ nac xganꞌ Diox.
\v 4 Cona, taandxèꞌ ngue queꞌ nuꞌ yeꞌs ndxèꞌ loo guꞌ par thidtenequeꞌ tyac lezoꞌ guꞌ por thidte ndxàc guꞌ con Crist.
\s Juàn ngue taꞌ cuent cón cheꞌn Diox leꞌ Diox nac xal thìb xnìi, coꞌ nee diꞌs, coꞌ ndluꞌ nac Diox Diox ndacpeꞌ.
\p
\v 5 Conꞌ ndxèꞌ nac cón cheꞌn diꞌs coꞌ mbluꞌ Jesucrist loo nuꞌ no ngue luꞌ nuꞌi no ngue teꞌth nuꞌi loo guꞌ, ne, leꞌ Diox nquée xnìi, coꞌ nee diꞌs, nac Diox Diox ndacpeꞌ no nec thìb conꞌ xin no conꞌ cap no coꞌ nac rye loothe conꞌ yeꞌrsinꞌ gác yòo loo Diox.
\v 6 Cheleꞌ naꞌ mbez thidte ndxàc naꞌ loo Diox por cón cheꞌn Jesucrist no, làth xtauꞌa, nzi tee li naꞌ conꞌ yeꞌrsinꞌ, leꞌ sya, leque naꞌ ngue gosuaꞌ yalgutyèꞌ cón cheꞌn coꞌ ndxàc naꞌ loo Diox no cón cheꞌn conꞌ coꞌ nzi tee ban li naꞌ loo cón cheꞌn Diox.
\v 7 Per cheleꞌ naꞌ que tee ban loo conꞌ coꞌ nac conꞌ ndac xalqueꞌ nac Diox thìb Diox coꞌ ndli ante conꞌ ndacpeꞌ, sya, lìcqueꞌ, thidte ndxàc naꞌ con thìb xtàa naꞌ no con tedib xtàa naꞌ. No tataa mod rye xquin naꞌ no xtol naꞌ coꞌ nde teeleꞌ ncuaꞌn naꞌ, Diox ntonꞌa loo naꞌ por cón cheꞌn ren Tad Jesucrist coꞌ mxyo.
\p
\v 8 Cheleꞌ naꞌ gab indxàpte naꞌ xquin naꞌ no xtol naꞌ, leque naꞌ ngue li par nquedìi naꞌ naꞌ. Leꞌ sya, leque naꞌ ndli ndxàc naꞌ mèn coꞌ indlide conꞌ coꞌ nac conꞌ lìcpeꞌ.
\v 9 Per cheleꞌ naꞌ xop dol cón cheꞌn xtol naꞌ loo Diox, nzoqueꞌ mod gàp naꞌ yalxlaꞌs loo Diox leꞌ Diox li conꞌ coꞌ nac conꞌ nalì no conꞌ nambìi loo naꞌ coꞌ nac tonꞌ Diox xtol naꞌ no li Diox gàc naꞌ mèn nambìi no mèn nalì loo Diox por mbembìi naꞌ loo ryethe conꞌ yeꞌrsinꞌ coꞌ mbli naꞌ.
\v 10 Per cheleꞌ naꞌ gab thidtene tarte cuaꞌn naꞌ xquin naꞌ par gàp naꞌ xtol naꞌ, sya, tataa mod ndluꞌ naꞌ no mbez naꞌ leꞌ Diox ndyèꞌ. Leꞌ sya, cheleꞌ naꞌ tataa ndli, lìcpeꞌ baꞌi, inacte naꞌ mèn coꞌ mdyalleꞌ no coꞌ ngolaꞌsleꞌ cón cheꞌn diꞌs ndac coꞌ nac lìcpeꞌ.
\c 2
\s Juàn ngue luꞌ loo mèn leꞌ Crist nac xaꞌ coꞌ nteriꞌth cón cheꞌn xtiꞌs naꞌ loo Diox.
\p
\v 1 Guꞌ coꞌ nac xal xganꞌ bix daa loon, ngue queꞌen yeꞌs coꞌ nac cart ndxèꞌ loo guꞌ par neꞌcuaꞌnte guꞌ xquin guꞌ no xtol guꞌ. Cheleꞌ chol guꞌ ndoote ncuaꞌn ndxep xquin guꞌ thìb mod o tedib mod, nzoqueꞌ thìb mbiꞌ coꞌ nzo loo xud naꞌ Diox coꞌ nteriꞌth cón cheꞌn xtiꞌs naꞌ loo Diox. Mbiꞌa nac Jesucrist. Nac Jesucrist thìb mbiꞌ nalì no thìb mbiꞌ nambìi.
\v 2 Jesucrist nac xaꞌ coꞌ yub mdaꞌ yalnaban loo yalguth loo cruz par tataa mod mbli Diox mxactìi Jesucrist por cón cheꞌn xquin naꞌ no xtol naꞌ par tataa mod mtonꞌ Diox xtol naꞌ loo naꞌ. Iante por cón cheꞌn xquin naꞌ no xtol naꞌ nguth Jesucrist. Ndxeꞌlequeꞌ, nguth Jesucrist por cón cheꞌn xquin no xtol cheꞌn ryete mèn dib athu izlyoꞌ, mèn coꞌ tyal yilaꞌs loo Jesucrist no loo cón cheꞌn Jesucrist.
\p
\v 3 Cheleꞌ naꞌ ndyubdiꞌsqueꞌ xal nac diꞌs coꞌ mnibeꞌ Diox loo naꞌ par li naꞌ, sya, nanee naꞌ no non naꞌ leꞌ naꞌ ndaꞌqueꞌ cuent cón cheꞌn Diox.
\v 4 Per cheleꞌ chó naꞌ mbez ndaꞌqueꞌ naꞌ cuent cón cheꞌn Diox no indyubdiꞌste naꞌ diꞌs coꞌ mnibeꞌ Diox loo naꞌ par tyubdiꞌs naꞌ diꞌs, ndyèꞌ naꞌ no ndli naꞌ ndxàc naꞌ mèn coꞌ indlide conꞌ coꞌ nac conꞌ lìcpeꞌ.
\v 5 Per ndxeꞌlequeꞌ, mèn coꞌ ndlipeꞌ conꞌ coꞌ ñibeꞌ Diox loo mèn par li mèna, mèna, por derech, nqueꞌ lezoꞌ Diox. Leꞌ sya, cheleꞌ naꞌ ngue liqueꞌ xal ngolo guniin ndxèꞌ, nanee naꞌ thidte ndxàc naꞌ con Diox.
\v 6 Mèn coꞌ mbez thidte ndxàc mèn con Diox, no mèn coꞌ mbez thidtene neꞌryo xàꞌde mèn loo cón cheꞌn Diox, mèna ndxàalqueꞌ tolo que tee ban li xal mque tee ban li Jesucrist.
\s Conꞌ ndxèꞌ nac tedib diꞌs cub coꞌ mnibeꞌ Diox loo naꞌ par li naꞌ.
\p
\v 7 Guꞌ coꞌ nac huesen por cón cheꞌn Jesucrist, ingue queꞌden diꞌs coꞌ nac thìb yalnibeꞌ cub loo guꞌ loo cart ndxèꞌ. Diꞌs coꞌ ngue queꞌen loo cart ndxèꞌ nac diꞌs coꞌ mnibeꞌ Tad Jesucrist loo guꞌ par li guꞌ coꞌseꞌ nerlequeꞌ ngòo guꞌ loo cón cheꞌn Tad Jesucrist. Pues leque diꞌs coꞌ nac yalnibeꞌgoola, leque diꞌsa nac diꞌs coꞌ ngue tanꞌen loo guꞌ loo cart ndxèꞌ xalqueꞌ mbìn guꞌ diꞌs ndxèꞌ thìb cuaꞌa.
\v 8 Mastaleꞌ nac diꞌs coꞌ ngue queꞌen loo guꞌ loo cart ndxèꞌ leque diꞌs cheꞌn yalñibeꞌgoola, per ngue queꞌen diꞌs ndxèꞌ loo guꞌ nalleꞌ xal thìb diꞌs coꞌ nac yalñibeꞌ cub par tyubdiꞌs guꞌ diꞌs coꞌ ñibeꞌ Crist. Crist mbiꞌth queꞌ lezoꞌ ñèe Crist mèn loo izlyoꞌ. No leque moda mbluꞌ Crist loo nuꞌ queꞌ lezoꞌ nuꞌ ñèe nuꞌ hues xtàa nuꞌ. Ndxàca loo guꞌ nqueꞌ lezoꞌ guꞌ ñèe guꞌ hues xtàa guꞌ, ne. Nzi queꞌ lezoꞌ naꞌ ñèe naꞌ hues xtàa naꞌ tac ryethe conꞌ coꞌ ndli ntauꞌ yéc mèn no coꞌ ndli ntauꞌ lezoꞌ mèn loo cón cheꞌn Diox xèegà xèegà ndoo tonꞌleꞌ loo mèn. No nalleꞌ diꞌs coꞌ ndluꞌ coꞌ nac lìcpeꞌ cón cheꞌn Diox ndoo tloleꞌ ndxaaꞌd nza mèn no ndli diꞌsa par ndyub xnìi yéc mèn no par ndyub xnìi lezoꞌ mèn loo cón cheꞌn Diox.
\p
\v 9 Cheleꞌ chó guꞌ mbez, lìcqueꞌ, nzi tee ban ndac guꞌ loo Diox no mbez guꞌ yende chó conꞌ yeꞌrsinꞌ nzi li guꞌ, no leque tiemp ndxecloo guꞌ no ndxòo xyàn lezoꞌ guꞌ ñèe guꞌ hues xtàa guꞌ, leꞌ sya, conꞌ ndli guꞌa ndluꞌ beꞌ nzi tee liqueꞌ guꞌ conꞌ yeꞌrsinꞌ no tarte yilaꞌs guꞌ coꞌ lìcpeꞌ loo Crist no loo cón cheꞌn Crist.
\v 10 Mèn coꞌ nqueꞌpeꞌ lezoꞌ ñèe mèn hues xtàa mèn, mèna, lìcqueꞌ, nzi tee ban ndacqueꞌ loo cón cheꞌn Diox no mdyub xnìi yéc mèna no mdyub xnìi lezoꞌ mèna loo cón cheꞌn Diox. No yende cón ndli par cuaꞌn mèna xtol mèna.
\v 11 Per mèn coꞌ ndxecloo no coꞌ ndxòo xyàn lezoꞌ ñèe hues xtàa mèn, mèna ngue tee ban lipeꞌ conꞌ yeꞌrsinꞌ no ncuau yéc mèna no ncuau lezoꞌ mèna loo conꞌ cheꞌn Diox. Neꞌ neꞌ indaꞌ mèna cuent cón gàc loo mèna tac ndxàca loo mèna nac mèna xal mèn sieu loo cón cheꞌn Diox por ngue tee ban mèna loo conꞌ yeꞌrsinꞌ.
\p
\v 12 Guꞌ coꞌ nac xal xganꞌ bix daa loon, ngue queꞌen cart ndxèꞌ loo guꞌ tac Diox mtonꞌleꞌ xtol guꞌ no xquin guꞌ por cón cheꞌn Jesucrist.
\v 13 Guꞌ coꞌ nac mèngool coꞌ ndxàcleꞌ tiemp ngòoleꞌ loo cón cheꞌn Jesucrist, ngue queꞌen cart ndxèꞌ loo guꞌ, ne, tac guꞌ huen huen ndaꞌqueꞌ cuent cón cheꞌn Jesucrist coꞌ nzoleꞌ ndooreꞌ cuec Diox ryethe conꞌ coꞌ nziriꞌ nalleꞌ. Ngue queꞌen diꞌs coꞌ nac cart ndxèꞌ loo guꞌ, guꞌ coꞌ nac xal myenꞌbiꞌ bix no xal myenꞌgot bix coꞌ ngolaꞌs per coꞌ pente ngue téꞌth cón cheꞌn Jesucrist tac guꞌ mblileꞌ gan par ngro xàꞌ guꞌ loo ryethe conꞌ yeꞌrsinꞌ coꞌ nac cón cheꞌn Mebizyaꞌ.
\p Ngolo mqueꞌen yeꞌs loo guꞌ loo cart ndxèꞌ, guꞌ coꞌ nac xal xganꞌ bix daa loon, tac guꞌ mtéꞌthqueꞌ no ndaꞌqueꞌ guꞌ cuent coꞌ huen huen cón cheꞌn Diox coꞌ nac xud naꞌ.
\v 14 Mèngool coꞌ ndxàcle tiemp ngòoleꞌ loo cón cheꞌn Jesucrist, ngolo mqueꞌen yeꞌs loo guꞌ, ne, loo cart ndxèꞌ. Tataa mblin tac guꞌ huen huen ndaꞌqueꞌ cuent cón cheꞌn Jesucrist coꞌ nzoleꞌ ndooreꞌ coꞌseꞌ cuec Diox ryethe conꞌ coꞌ nziriꞌ nalleꞌ. No mqueꞌlen yeꞌs loo guꞌ, guꞌ coꞌ nac xal myenꞌbiꞌ no xal myenꞌgot coꞌ ngolaꞌs, guꞌ coꞌ pente ngue téꞌth cón cheꞌn Jesucrist. Tataa mblin loo guꞌ tac guꞌ mbli nèe guꞌ loo cón cheꞌn Jesucrist no inacte guꞌ mèn coꞌ nac chop loo chop laꞌs loo cón cheꞌn Jesucrist. No mdaꞌqueꞌ guꞌ lugar ndxòn guꞌ cón cheꞌn diꞌs ndac cheꞌn Diox. No ndxaaꞌd diꞌsa leꞌn lezoꞌ guꞌ. Mqueꞌlen cart ndxèꞌ loo guꞌ tac mbli guꞌ gan ngro xàꞌleꞌ guꞌ loo cón cheꞌn Mebizya, ne.
\p
\v 15 Neꞌtaꞌde guꞌ lugar arid tyub yoꞌf lezoꞌ guꞌ loo cón cheꞌn chol conꞌ yeꞌrsinꞌ coꞌ nac cheꞌn xab izlyoꞌ. No neꞌgàcte guꞌ mèn coꞌ arid nde yath nde lux ñèe conꞌ coꞌ nziriꞌ no conꞌ coꞌ nzo loo izlyoꞌ. Tac cheleꞌ guꞌ anzeꞌf ndyac loo cón cheꞌn coꞌ nac xab izlyoꞌ no coꞌ beꞌ nde yath nde lux guꞌ ñèe guꞌ conꞌ coꞌ nziriꞌ no conꞌ coꞌ nzo loo izlyoꞌ, guꞌ por derech, inqueꞌde lezoꞌ Diox coꞌ nac xud naꞌ.
\v 16 Conꞌ yeꞌrsinꞌ coꞌ ndyub yoꞌf lezoꞌ mèn par li mèn, conꞌa nac conꞌ ndxèꞌ: Mèn coꞌ alithe nque tee ban loo izlyoꞌ ndxèꞌ ndaꞌ lugar par ndyub yoꞌf lezoꞌ mèna loo ryethe conꞌ coꞌ nac cón cheꞌn xab izlyoꞌ coꞌ ñibeꞌ loo mèna par li mèna conꞌ yeꞌrsinꞌ; conꞌ coꞌ ngüiꞌ mèn par ndyub yoꞌf lezoꞌ mèn que no mèn conꞌa; no conꞌ coꞌ ndxàp mèn coꞌ ncàb loo mèn ndyeꞌs mèn loo xtàa mèn. Ryethe conꞌ yeꞌrsinꞌ ndxèꞌ nac cón cheꞌn xab izlyoꞌ coꞌ ndli ndyub yoꞌf lezoꞌ mèn par ndli mèn conꞌ yeꞌrsinꞌa. Indlide Diox nec thìb conꞌ coꞌ ndli ncàb ndli mèn chol conꞌ yeꞌrsin. Ndxeꞌlequeꞌ, Diox ndli par ndli mèn conꞌ ndac.
\v 17 No zin thìb huiz no zin thìb ze coꞌseꞌ lyux no lith no rye mod yeꞌrsinꞌ coꞌ ndxàp mèn, mod yeꞌrsinꞌ coꞌ inacte cheꞌn Diox. No lyux no lith no ryethe conꞌ yeꞌrsinꞌ coꞌ ndyub yoꞌf lezoꞌ mèn par li mèn conꞌ yeꞌrsinꞌa. Per mèn coꞌ nzi tee ban xal neepeꞌ lezoꞌ Diox, mèna yòo ban noqueꞌ Diox thidtene.
\s Trèꞌ ndluꞌ cón cheꞌn coꞌ nac conꞌ lìcpeꞌ no cón cheꞌn coꞌ nac yalgutyèꞌ.
\p
\v 18 Guꞌ coꞌ nac xal xganꞌ bix daa loon, ya mzinleꞌ tiemp coꞌ nac lult tiemp loo izlyoꞌ ndxèꞌ. Guꞌ mbìnleꞌ yiꞌth thìb mbiꞌ coꞌ gàc merpeꞌ ngolo ngolaꞌs cheꞌn Crist. Nzo huax mèn coꞌ nac ngolo ngolaꞌs cheꞌn Crist loo izlyoꞌ nalleꞌ. Cona, nanee naꞌ no ndaꞌ naꞌ cuent nzoleꞌ naꞌ leꞌn tiemp coꞌ nac lult tiemp loo izlyoꞌ ndxèꞌ.
\v 19 Mèn coꞌ nac ngolo ngolaꞌs cheꞌn Crista ngroꞌ làth naꞌ. Per, lìcpeꞌ baꞌi, inacte mèna mèn coꞌ ngolaꞌspeꞌ loo cón cheꞌn Crist xal naꞌ. Tac cheleꞌ mèna ngalaꞌs xal naꞌ, thidtenequeꞌ ngyanꞌ mèna con naꞌ. Per tataa ngòca loo mèna par gunèe mèn leꞌ mèna inacte mèn coꞌ ngolaꞌspeꞌ loo cón cheꞌn Crist xal naꞌ.
\p
\v 20 Per por part cón cheꞌn guꞌ, Crist mbli par ngulàa Xpii Natúꞌ loo guꞌ par sangmbyanꞌ Xpii Natúꞌ loo guꞌ. No por cón cheꞌn Xpii Natúꞌa, ryete naꞌ non no ndaꞌqueꞌ naꞌ cuent cón cheꞌn Diox.
\v 21 Cona, ngue queꞌen yeꞌs ndxèꞌ loo guꞌ tac guꞌ naneequeꞌ cón cheꞌn conꞌ coꞌ nac lìcpeꞌ. Neꞌnqueꞌden yeꞌs ndxèꞌ loo guꞌ por nac guꞌ mèn coꞌ indaꞌde cuent cón cheꞌn coꞌ nac lìcpeꞌ. Guꞌ naneequeꞌ leꞌ mèn coꞌ, lìcqueꞌ, nque tee ban loo cón cheꞌn coꞌ nac lìcpeꞌ, mèna indyèꞌde.
\p
\v 22 ¿Chó nac mèn coꞌ, lìcqueꞌ, ndyèꞌ, àꞌ? Mèna nac mèn coꞌ mbez leꞌ Jesús inacte Crist. Leque mèna nac merpeꞌ mèn coꞌ nac ngolo ngolaꞌs cheꞌn Crist tac mèna ncà no ntèꞌb mèna cón cheꞌn Diox thìb lad xalqueꞌ ncà mèna no ntèꞌb mèna cón cheꞌn Crist thìb lad.
\v 23 Ryete mèn coꞌ ncà no coꞌ ntèꞌb cón cheꞌn xganꞌ Diox, mèna inzode loo cón cheꞌn Diox xud naꞌ. Per mèn coꞌ ndaꞌ lad cheꞌn Crist, mèna nzoqueꞌ loo cón cheꞌn Diox xud naꞌ. Por cona, thidtenequeꞌ nzo no xud naꞌ Diox mèna.
\p
\v 24 Cona, ngue niin loo guꞌ: Ftubdiꞌs guꞌ loo diꞌs no ftenꞌ guꞌ diꞌs leꞌn lezoꞌ guꞌ, diꞌs coꞌ nac diꞌs ndac cheꞌn Diox coꞌ mbìnleꞌ guꞌ anon mtlo ngolaꞌs guꞌ loo Jesucrist no loo cón cheꞌn Jesucrist. No cheleꞌ diꞌs coꞌ mbìn guꞌ anon ngolaꞌs guꞌ ndxaaꞌdqueꞌ leꞌn lezoꞌ guꞌ no nteꞌ lezoꞌ guꞌ cón cheꞌn diꞌsa, leꞌ sya, thidte gàc guꞌ con Crist coꞌ nac xganꞌ Diox no thidte gàc guꞌ con Diox xud naꞌ.
\v 25 Más de cona, Crist mcàbgònqueꞌ li Crist par yòo ban noqueꞌ naꞌ Diox thidtene.
\p
\v 26 Ngue queꞌen yeꞌs loo cart ndxèꞌ cón cheꞌn mèn coꞌ nzo làth guꞌ coꞌ ndlyaꞌs quedìi guꞌ.
\v 27 Per loo guꞌ nzoqueꞌ Xpii Natúꞌ coꞌ mbli Jesucrist ngulàa loo guꞌ. No por cona, inquinte guꞌ tolo luꞌ mèn guꞌ cón cheꞌn Diox. Tac leque yub Xpii Natúꞌ ndli ndaꞌ guꞌ cuent no non guꞌ ryethe conꞌ coꞌ nzote mod non naꞌ cón cheꞌn Diox. No conꞌ coꞌ ndluꞌ Xpii Natúꞌ loo naꞌ nac conꞌ lìcpeꞌ. Indyèꞌde Xpii Natúꞌ loo naꞌ. Neꞌ neꞌ nquedìi Xpii Natúꞌ naꞌ. Por cona, ngue niin loo guꞌ: Thidtenequeꞌ bli nèe guꞌ guꞌ loo cón cheꞌn Crist xalqueꞌ ndluꞌ Xpii Natúꞌ cón cheꞌn Crist loo guꞌ.
\p
\v 28 Beren, niin loo guꞌ: Bli nèe guꞌ guꞌ loo cón cheꞌn Crist par tolo gàp guꞌ más yalxlaꞌs no gàp guꞌ más fuerz par neꞌzyebte guꞌ no neꞌthyonte guꞌ loo Crist coꞌseꞌ yiꞌth Crist loo izlyoꞌ ndxèꞌ tedib vez.
\v 29 Guꞌ coꞌ naneeleꞌ coꞌ huen huen leꞌ Jesucrist nac thìb mbiꞌ nalì no thìb mbiꞌ nambìi, ndxàal taꞌ guꞌ cuent no non guꞌ leꞌ ryete mèn coꞌ nzi tee ban lì no coꞌ nzi tee ban nambìi, mèna nac xinꞌ Diox.
\c 3
\s Trèꞌ ndluꞌ cón cheꞌn mèn coꞌ ngo Diox cuent nac xinꞌpeꞌ Diox.
\p
\v 1 Bli guꞌ xtùuz coꞌ huenlequeꞌ supeꞌ nqueꞌ lezoꞌ Diox xud naꞌ ñèe Diox xud naꞌ naꞌ. Por cona, ngo Diox xud naꞌ cuent nac naꞌ xinꞌ Diox. No nacpeꞌ naꞌ xinꞌ Diox. Por cona, mèn coꞌ alithe nzi tee ban loo izlyoꞌ ndxèꞌ, mèna inonte xá mod nac mod coꞌ nzi tee ban naꞌ loo cón cheꞌn Diox. Tataa ndxàca loo mèna tac tarte nee mèna no tarte taꞌ mèna cuent cón cheꞌn Diox.
\v 2 Mèn coꞌ nac huesen por cón cheꞌn Jesucrist, ya nacleꞌ naꞌ xinꞌ Diox. No tarte ñee naꞌ chó conꞌ ndac gàc loo naꞌ coꞌseꞌ yòo ban no naꞌ Diox thidtene. Per nanee naꞌ no non naꞌ leꞌ coꞌseꞌ yiꞌth Jesucrist loo izlyoꞌ ndxèꞌ tedib vez no ryo xoꞌf Jesucrist tedib vez, gàc naꞌ xalqueꞌ nac Jesucrist nalleꞌ tac huiza huiꞌ naꞌ xal ñàa Jesucrist.
\v 3 No ryete mèn coꞌ nzi quee lezoꞌ no coꞌ nzi bed yiꞌth Jesucrist no coꞌ nzi quee lezoꞌ no coꞌ nzi bed huiꞌ mèn loo Jesucrist no gàc mèna xal nac Jesucrist, leque mèna ndli par ndxàc mèna mèn nambìi no mèn nalì xalqueꞌ nac Jesucrist thìb mbiꞌ nambìi no thìb mbiꞌ nalì. Thìba conꞌ ndxèꞌ.
\p
\v 4 Leꞌ tediba na, part cón cheꞌn rye mèn coꞌ asendli ncuaꞌn xtol, tataa ndli mèna tac indlide mèna xal ñibeꞌ Diox par li mèna. Tac mèn coꞌ ncuaꞌn xquin no coꞌ ncuaꞌn xtol, mèna nac mèn coꞌ indlide xal ñibeꞌ Diox loo mèna par li mèna.
\v 5 Guꞌ naneequeꞌ leꞌ Jesucrist mbiꞌthleꞌ loo izlyoꞌ ndxèꞌ par mtonꞌ Jesucrist xtol naꞌ. No naneequeꞌ guꞌ leꞌ Jesucrist thidtenequeꞌ neꞌncuaꞌnte xquin no xtol.
\v 6 Cona, ngue niin loo guꞌ: Rye mèn coꞌ thidte ndxàc con Jesucrist loo cón cheꞌn Diox, mèna inzi tee cuaꞌnte xquin no xtol. Per ryete mèn coꞌ asendli nzi tee cuaꞌn xquin no xtol, mèna tar huiꞌ loo Jesucrist. No neꞌ neꞌ tar taꞌ mèna cuent cón cheꞌn Jesucrist.
\v 7 Guꞌ coꞌ nac xal xganꞌ bix daa loon, nec thìb mod no nec tedib mod neꞌtaꞌde guꞌ lugar loo chol mèn quedìi mèna guꞌ. Mèn coꞌ ndli conꞌ nalì no coꞌ ndli conꞌ nambìi, mèna nac mèn nalì no mèn nambìi xalqueꞌ nac Crist xaꞌ nalì no xaꞌ nambìi.
\v 8 Per mèn coꞌ asendli ncuaꞌn xquin no xtol, mèna nac mèn cheꞌnpeꞌ Mebizya tac Mebizya nac xaꞌ coꞌ nerlequeꞌ mcuaꞌn xquin no xtol. Sandante mcuaꞌn Mebizya xquin Mebizya no xtol Mebizya axta huiza no axta huiz nalze. No por cona, mbiꞌthleꞌ xganꞌ Diox loo izlyoꞌ par telux xganꞌ Diox ryethe conꞌ coꞌ mblileꞌ Mebizya.
\p
\v 9 Nec thìb mèn coꞌ nac xinꞌ Diox incuaꞌnte mod par asendli mèna ncuaꞌn mèna xquin no xtol tac mèna ngue noleꞌ yalnaban coꞌ Diox mdaꞌleꞌ loo mèna. No yende mod tolo aseli mèna cuaꞌn mèna xquin mèna no xtol mèna tac mèna nacpeꞌ xinꞌ Diox.
\v 10 Ndxàc beꞌ mèna no ndxúꞌqueꞌ chó mèn nacpeꞌ xinꞌ Diox no ndxàc béꞌ no ndxúꞌqueꞌ chó mèn nacpeꞌ cheꞌn Mebizya. Tac chol mèn coꞌ indlide conꞌ coꞌ nac conꞌ nalì no conꞌ nambìi no cheleꞌ chol mèn inqueꞌde lezoꞌ ñèe hues xtàa mèn, mèna inacte mèn coꞌ nac cheꞌnpeꞌ Diox. Ndxeꞌlequeꞌ, nac mèna cheꞌnpeꞌ Mebizya.
\s Trèꞌ ndluꞌ leꞌ Diox ndlyaꞌs queꞌ lezoꞌ naꞌ ñèe naꞌ hues xtàa naꞌ.
\p
\v 11 Diꞌs coꞌ mbìnleꞌ guꞌ anon ngolaꞌs guꞌ loo Crist no loo cón cheꞌn Crist nac coꞌ taandxèꞌ ndluꞌ loo naꞌ: Diox ndlyaꞌs queꞌ lezoꞌ naꞌ ñèe naꞌ hues xtàa naꞌ.
\v 12 No indxàalte gàc naꞌ xal Caín. Neꞌ neꞌ indxàal li naꞌ xal mbli Caín. Caín ngòcqueꞌ cheꞌn Mebizya no ale mbeth Caín hues Caín. ¿Cón mbli hues Caín? ¿Chonon mbeth Caín hues Caín, àꞌ? Caín mbeth hues Caín tac conꞌ coꞌ mbli Caín ngòc conꞌ yeꞌrsinꞌ no conꞌ coꞌ mbli hues Caín ngòc conꞌ nalì no conꞌ nambìi loo Diox. Conꞌa mbli mbeth Caín hues Caín.
\p
\v 13 Guꞌ coꞌ nac mèn huesen por cón cheꞌn Jesucrist, neꞌgàcte guꞌ xal mèn coꞌ neꞌñeede cón ndxàc loo mèna cheleꞌ mèna ndxecloo no ndxòo xyàn lezoꞌ mèna ñèe mèna naꞌ, mèn coꞌ nque tee loo cón cheꞌn xab izlyoꞌ, yey.
\v 14 Neꞌryo xàꞌde naꞌ loo Diox coꞌseꞌ gath bélꞌyòo ladpeꞌ naꞌ. Ndxeꞌlequeꞌ, yòo ban noqueꞌ naꞌ Diox thidtene. No nanee naꞌi tac nqueꞌ lezoꞌ naꞌ ñèe naꞌ hues xtàa naꞌ. Mèn coꞌ inqueꞌde lezoꞌ ñèe hues xtàa, mèna nac xal mèn nguth loo Diox no loo cón cheꞌn Diox.
\v 15 Ryete mèn coꞌ ndxecloo no coꞌ ndxòo xyàn lezoꞌ ñèe hues xtàa, ngòo Diox cuent nac mèna thìb mèn coꞌ ndxuth mèn. Ndaꞌqueꞌ guꞌ cuent, ne, nec thìb mèn coꞌ ndxuth xtàa nac mèn coꞌ yòo ban no Diox thidtene yiloa.
\v 16 Nanee naꞌ no nonqueꞌ naꞌ xal nac coꞌ ngòc loo Jesucrist por tant nqueꞌ lezoꞌ Jesucrist ñèe Jesucrist naꞌ. Ale leque Jesucrist mdaꞌ yalnaban Jesucrist par mquée yalguth loo Jesucrist por cón cheꞌn naꞌ. No por cona, naꞌ, ne, ndxàalqueꞌ taꞌ naꞌ yalnaban naꞌ par gath naꞌ por cón cheꞌn hues xtàa naꞌ cheleꞌi nquin tataa gàca loo naꞌ.
\v 17 Lomisqueꞌ ne, cheleꞌ chó naꞌ nzo coꞌ ndxàp cheꞌn no ñèe naꞌa ndyac tedib hues xtàa naꞌ yaltìi nde che conꞌ loo hues xtàa naꞌ, no neꞌlyatte lezoꞌ naꞌ ñèe naꞌ hues xtàa naꞌa, ¿xá mod luꞌ naꞌ naꞌ loo mèn leꞌ naꞌ, lìcqueꞌ, nqueꞌ lezoꞌ Diox dib nzo yéc naꞌ no dib nzo lezoꞌ naꞌ, sya? Pà nqueꞌ lezoꞌ naꞌ Diox cheleꞌ naꞌ tataa ndli, ¿léꞌ?
\v 18 Guꞌ coꞌ nac xal xganꞌ bix daa loon, ndlyazen iante gab guꞌ leꞌ guꞌ, lìcqueꞌ, nqueꞌ lezoꞌ ñèe guꞌ hues xtàa guꞌ. Más hues gàca loo guꞌ, lìcqueꞌ, ngue lyath no guꞌ hues xtàa guꞌ loo conꞌ nde che loo hues xtàa guꞌ.
\s Trèꞌ ndluꞌ xá mod gàp mèn yalxlaꞌs loo Diox no neꞌzyebte mèn loo Diox.
\p
\v 19 No cheleꞌ naꞌ tataaqueꞌ ndli, sya, naneequeꞌ naꞌ no nonqueꞌ naꞌ nac naꞌ mèn coꞌ, lìcqueꞌ, ndli coꞌ nac lìcpeꞌ. No lomisqueꞌ mod, nec thìb mod no nec tedib mod neꞌzyebte naꞌ loo Diox.
\v 20 Tac cheleꞌ xtùuz naꞌ no lezoꞌ naꞌ ndli par nteche ntexyath naꞌ loo lezoꞌ naꞌ por ndxep conꞌ yeꞌrsinꞌ coꞌ ndenꞌ naꞌ mbli naꞌ, nanee naꞌ leꞌ Diox nac más Diox roo Diox xèn leque naꞌ par ñee Diox no ndlaꞌs Diox cón cheꞌn ryethe conꞌ mbli naꞌa. Diox non nqueꞌ lezoꞌ naꞌ Diox mastaleꞌ ndenꞌ lezoꞌ naꞌ ndxep vez inacte conꞌ huen conꞌ coꞌ ngue li naꞌ.
\v 21 Cona, ngue niin loo guꞌ, mèn huesen: Cheleꞌ naꞌ ndenꞌ leꞌn lezoꞌ naꞌ ingue lide naꞌ chol conꞌ yeꞌrsinꞌ, más gàp naꞌ yalxlaꞌs no neꞌtolode zyeb naꞌ loo Diox coꞌ ngüiꞌ loo naꞌ thidtene.
\v 22 Leꞌ sya, Diox li par que no naꞌ ryete conꞌ ñaꞌb naꞌ loo Diox por ndyubdiꞌs naꞌ no ndli naꞌ coꞌ ñibeꞌ Diox loo naꞌ par li naꞌ. No ndli naꞌ conꞌ coꞌ ndxòo lezoꞌ Diox.
\v 23 No conꞌ coꞌ ñibeꞌ Diox loo naꞌ par li naꞌ no par tyubdiꞌs naꞌ nac leꞌ naꞌ yilaꞌs no gàp naꞌ yalxlaꞌs loo xganꞌ Diox coꞌ nac Jesucrist no queꞌ lezoꞌ naꞌ ñèe naꞌ thìb hues xtàa no tedib hues xtàa naꞌ xalqueꞌ mnibeꞌ Diox loo naꞌ par queꞌ lezoꞌ naꞌ ñèe naꞌ hues xtàa naꞌ.
\v 24 Mèn coꞌ ndyubdiꞌs diꞌs coꞌ ñibeꞌ Diox li mèn, mèna nzo ban noqueꞌ Diox no nzo ban noqueꞌ Diox mèna. Naꞌ nanee leꞌ Diox nzo banqueꞌ loo naꞌ por cón cheꞌn Xpii Natúꞌ coꞌ mbli Diox nzo loo naꞌ.
\c 4
\s Trèꞌ ndluꞌ xá mod non mèn cón cheꞌn Xpii Natúꞌ cheꞌn Diox no xá mod non mèn cón cheꞌn xpii yeꞌrsinꞌ coꞌ ndli ndxàc mèn ngolo ngolaꞌs cheꞌn Crist.
\p
\v 1 Mèn huesen por cón cheꞌn Jesucrist, guꞌ coꞌ anzeꞌf nqueꞌ lezon ñèen, neꞌyilaꞌste guꞌ diꞌs coꞌ ndyoodiꞌs chol mèn, mèn coꞌ mbez leꞌ Diox mtelꞌ mèn par nde luꞌ mèna mèn coꞌ mbez mèn nac cón cheꞌn Diox. Ndxèꞌlequeꞌ, huen huen blaꞌs guꞌ no noo noo ftoodiꞌs no guꞌ mèna par ñee guꞌ no taꞌ guꞌ cuent coꞌ huenlequeꞌ ñeeneꞌ chéꞌ, lìcqueꞌ, nde mèna loo guꞌ par ndyoodiꞌs mèna cón cheꞌnpe Diox o chéꞌ ndyoodiꞌs mèna cón cheꞌnpe mèna no maste. Tac loo izlyoꞌ ndxèꞌ ampurte mèn gutyèꞌ nzo coꞌ mbez no coꞌ ndyoodiꞌs leꞌ mèna nac cheꞌnpeꞌ Diox no ndyoodiꞌs mèna cón cheꞌnpeꞌ Diox. Per yalgutyèꞌtúb nac coꞌ ndyoodiꞌs mèna no coꞌ mbez mèna.
\v 2 Per led guꞌ cuante. Nareꞌ tan cuent loo guꞌ no luꞌen loo guꞌ xá mod más taꞌ guꞌ cuent no xá mod más libeꞌ guꞌ mèn coꞌ, lìcqueꞌ, nzo Xpii Natúꞌ cheꞌn Diox loo. Mod ndxèꞌ non guꞌi no taꞌ guꞌ cuent cón cheꞌn mèna. Ryete mèn coꞌ ndaꞌ cuent no mèn coꞌ ngo ro loo taamas mèn leꞌ Jesucrist mbiꞌth yáal loo izlyoꞌ xalqueꞌ ndxáal chol mèn, coꞌ nee diꞌs, ngòc Jesucrist thìb mbiꞌ xal naꞌ, loo mèna nzo Xpii Natúꞌ cheꞌn Diox, ne.
\v 3 Per mèn coꞌ indxelaꞌste leꞌ Jesús ngòc thìb mbiꞌ xalqueꞌ naꞌ no mbez mèna loo taamas mèn leꞌ Jesús neꞌngàcte thìb mbiꞌ xalqueꞌ naꞌ, loo mèna inzode Xpii Natúꞌ cheꞌn Diox. Ndxeꞌlequeꞌ, loo mèna nzo thìb xpii yeꞌrsinꞌ coꞌ ndli ndxàc mèna ngolo ngolaꞌs cheꞌn Crist. No mbìnqueꞌ guꞌ leꞌ xpii yeꞌrsinꞌ coꞌ ndli ndxàc mèn ngolo ngolaꞌs cheꞌn Crist yiꞌth loo izlyoꞌ. No nalleꞌ nzoleꞌ xpii yeꞌrsinꞌa loo mèn loo izlyoꞌ.
\p
\v 4 Guꞌ coꞌ nac xal xganꞌ bix daa loon, guꞌ nac cheꞌnpeꞌ Diox. No neꞌndaꞌde guꞌ lugar li mèna gan loo guꞌ par nquedìi mèna guꞌ loo conꞌ coꞌ ndxelaꞌs guꞌ cón cheꞌn Diox. Tac Diox coꞌ nzo no guꞌ, más Diox roo Diox xèn nac Diox leque xpii yeꞌrsinꞌ coꞌ nzo loo mèn coꞌ alithe nzi tee ban loo izlyoꞌ.
\v 5 Mèna nac mèn cheꞌnpeꞌ izlyoꞌ ndxèꞌ no maste. Por cona, alithe ndyoodiꞌs mèna cón cheꞌn coꞌ nac cón cheꞌn izlyoꞌ ndxèꞌ. Cona, mèn coꞌ nac cheꞌnpeꞌ izlyoꞌ ndxèꞌ más ndyub nza diꞌs coꞌ ndyoodiꞌs mèna.
\v 6 Per naꞌ nacqueꞌ cheꞌnpeꞌ Diox, ey. Mèn coꞌ nanee cón cheꞌn Diox, mèna ndxòn no ndyub nza mèna diꞌs coꞌ ndyoodiꞌs naꞌ loo mèna. Per mèn coꞌ tarte non cón cheꞌn Diox, mèna indaꞌde lugar par gòn mèn no tyub nza mèn diꞌs coꞌ mbez naꞌ loo mèna. Cona, ngue niin loo guꞌ: Tataa mod ndxàc béꞌ mèn chó mèn, lìcqueꞌ, nzo Xpii Natúꞌ loo, Xpii Natúꞌ coꞌ ndluꞌ conꞌ coꞌ nac lìcpeꞌ loo mèn, no chó mèn nzo xpii yeꞌrsinꞌ loo coꞌ ndli par nquedìi mèn loo xtàa mèn.
\s Trèꞌ ndluꞌ leꞌ Diox nac thìb Diox coꞌ anzeꞌf nqueꞌ lezoꞌ ñèe mèn.
\p
\v 7 Mèn huesen por cón cheꞌn Jesucrist, guꞌ coꞌ anzeꞌf nqueꞌ lezon ñèen, ndxàalqueꞌ queꞌ lezoꞌ naꞌ thìb xtàa naꞌ no tedib xtàa naꞌ tac yub Diox ndli nqueꞌ lezoꞌ mèn ñèe mèn hues xtàa mèn. Ryete mèn coꞌ, lìcqueꞌ, ndxàp mod par nqueꞌ lezoꞌ mèn ñèe mèn hues xtàa mèn, mèna nac xinꞌ Diox no ndaꞌ mèna cuent cón cheꞌn Diox.
\v 8 Per mèn coꞌ indxàpte mod par queꞌ lezoꞌ mèn ñèe mèn hues xtàa mèn, mèna tarte taꞌ cuent cón cheꞌn Diox. Tac Diox nac thìb Diox coꞌ nqueꞌqueꞌ lezoꞌ ñèe mèn.
\v 9 Diox mbluꞌ xá mod susqueꞌ nqueꞌ lezoꞌ Diox ñèe Diox naꞌ coꞌseꞌ mtelꞌ Diox angoluxte xganꞌ Diox loo izlyoꞌ ndxèꞌ par gàca loo naꞌ yòo ban no naꞌ Diox thidtene por cón cheꞌn Jesucrist, xganꞌ Diox.
\v 10 Yende mod gab naꞌ, lìcqueꞌ, axta arid nqueꞌ lezoꞌ naꞌ Diox tac ndluꞌ naꞌ inqueꞌde lezoꞌ naꞌ arid ñèe naꞌ hues xtàa naꞌ. Per Diox mbluꞌpeꞌ loo naꞌ xá mod, lìcqueꞌ, nqueꞌ lezoꞌ Diox ñèe Diox naꞌ no ndyac no Diox naꞌ. Non naꞌ, lìcqueꞌ, nqueꞌ lezoꞌ Diox ñèe Diox naꞌ tac axta Jesucrist coꞌ nac xganꞌ Diox mtelꞌ Diox par leque yub Jesucrist mdaꞌ yalnaban Jesucrist par nguth Jesucrist loo cruz por cón cheꞌn xquin naꞌ no xtol naꞌ. Tataa mbli Diox mxactìi Jesucrist par tataa mod mtonꞌ Diox xquin naꞌ no xtol naꞌ.
\p
\v 11 Cona, ngue niin loo guꞌ coꞌ nac mèn huesen por cón cheꞌn Jesucrist, guꞌ coꞌ anzeꞌf nqueꞌ lezon nèen: Cheleꞌ Diox mbluꞌ loo naꞌ tataa mod anzeꞌf nqueꞌ lezoꞌ Diox ñèe Diox naꞌ no ndyac no Diox naꞌ, no non naꞌ tataa mbli Diox, leꞌ sya, naꞌ, ne, ndxàalqueꞌ queꞌ lezoꞌ naꞌ ñèe naꞌ thìb xtàa naꞌ no tedib xtàa naꞌ.
\v 12 Yende chó mèn thidtenequeꞌ tarte ñèe xá ñaa Diox. Per cheleꞌ naꞌ nqueꞌqueꞌ lezoꞌ ñèe naꞌ thìb xtàa naꞌ no tedib xtàa naꞌ, Diox nzo ban no naꞌ. No tataa mod nanee naꞌ nqueꞌqueꞌ lezoꞌ naꞌ ñèe naꞌ thìb xtàa naꞌ no tedib xtàa naꞌ xalqueꞌ nqueꞌ lezoꞌ Diox ñèe Diox naꞌ.
\v 13 Conꞌ coꞌ ndluꞌ loo naꞌ leꞌ Diox nzo loo naꞌ no nzo naꞌ loo Diox nac leꞌ Diox mbli ngulàa Xpii Natúꞌ loo naꞌ par thidtene yanꞌ no Xpii Natúꞌ naꞌ par ñibeꞌ Xpii Natúꞌ loo naꞌ.
\v 14 Nuꞌ coꞌ nac mèn coꞌ ndxeꞌ diꞌs cheꞌn Jesucrist, yub nuꞌ mbuiꞌpeꞌ loo Tad Jesucrist. No ndaꞌ nuꞌ cuent no ndyoodiꞌs nuꞌ loo guꞌ leꞌ Diox xud naꞌ mtelꞌ Jesucrist coꞌ nac xganꞌ Diox par mbiꞌth teláꞌ xganꞌ Diox mèn loo izlyoꞌ loo conꞌ ryes, mèn coꞌ ndyal yilaꞌs loo Jesucrist.
\v 15 Chol mèn coꞌ ndaꞌ cuent no coꞌ ndeꞌth leꞌ Jesús nac xganꞌ Diox, mèna nzo ban no Diox no nzo ban no Diox mèna.
\p
\v 16 Cona, non naꞌ no nanee naꞌ no ndxelaꞌs naꞌ leꞌ Diox nqueꞌqueꞌ lezoꞌ ñèe Diox naꞌ. Diox nqueꞌqueꞌ lezoꞌ ñèe Diox mèn. Mèn coꞌ nqueꞌ lezoꞌ ñèe thìb xtàa no tedib xtàa, mèna nzo ban no Diox no nzo ban no Diox mèna.
\v 17 Conꞌ coꞌ nac lult conꞌ coꞌ gàc loo naꞌ por nqueꞌ lezoꞌ naꞌ ñèe naꞌ Diox loo izlyoꞌ ndxèꞌ nac leꞌ naꞌ gàp yalxlaꞌs loo Diox no neꞌzyebte naꞌ coꞌseꞌ tyoo naꞌ loo Diox par tub rez Diox cón cheꞌn naꞌ. Tac naꞌ non no nanee naꞌ xal nqueꞌ lezoꞌ Jesucrist ñèe Jesucrist mèn, tataaqueꞌ tolo queꞌ lezoꞌ naꞌ ñèe naꞌ hues xtàa naꞌ láth naban naꞌ loo izlyoꞌ ndxèꞌ.
\v 18 Lomisqueꞌ ne, mèn coꞌ, lìcqueꞌ, nqueꞌ lezoꞌ Diox, yende por cón zyeb mèna loo Diox par gab mèna loo lezoꞌ mèna tetìi Diox mèna por thìb conꞌ coꞌ iñaade li mèn. Ndxeꞌlequeꞌ, mèn coꞌ nalì no nambìi nqueꞌ lezoꞌ Diox, nec thìb mod no nec tedib mod neꞌzyebte mèna loo Diox. Tac mèn coꞌ nzyeb ñèe chol conꞌ, leque mèna ncuaꞌn mod ndxàc yalquìi loo mèna. Cona, mèn coꞌ nzyeb ñèe chol conꞌ, mèna yende mod thìb lìte queꞌ lezoꞌ mèna Diox.
\p
\v 19 Nqueꞌ lezoꞌ naꞌ Diox tac Diox ner mqueꞌ lezoꞌ gunèe Diox naꞌ.
\v 20 Per cheleꞌ chol mèn mbez nqueꞌ lezoꞌ mèn ñèe mèna Diox, no leque làth xtauꞌa, ndxecloo mèna no ndxòo xyàn lezoꞌ mèna ñèe mèna xtàa mèna, mèna nac mèn gutyèꞌ. Tac cheleꞌ chol mèn inqueꞌde lezoꞌ ñèe mèn hues xtàa mèn coꞌ nzi ban no mèn, neꞌ neꞌ inqueꞌ lezoꞌ mèn Diox coꞌ indxúꞌde loo mèn.
\v 21 Diox mtanꞌ diꞌs loo naꞌ no mnibeꞌ Diox loo naꞌ li naꞌ xal ngue niin loo guꞌ ndxèꞌ leꞌ mèn coꞌ mbez nqueꞌ lezoꞌ mèn Diox, mèna ndxàalqueꞌ queꞌ lezoꞌ ñèe hues xtàa mèna.
\c 5
\s Trèꞌ ndluꞌ xá mod leque mèn li par ya neꞌtolode li mèn ryethe conꞌ ndyub yoꞌf lezoꞌ mèn li mèn, conꞌ coꞌ nac cón cheꞌn xab izlyoꞌ.
\p
\v 1 Ryete mèn coꞌ ndxelaꞌspeꞌ leꞌ Jesús nac Crist, mèna nac xinꞌ Diox. No cheleꞌ mèn, lìcqueꞌ, nqueꞌ lezoꞌ Diox coꞌ nac xud naꞌ, queꞌ lezoꞌ mèn ñèe mèn hues xtàa mèn coꞌ nac xinꞌ Diox, ne.
\v 2 Coꞌseꞌ nqueꞌ lezoꞌ naꞌ Diox no ndli naꞌ conꞌ coꞌ ñibeꞌ Diox loo naꞌ li naꞌ, sya, ndaꞌ naꞌ cuent leꞌ naꞌ nqueꞌqueꞌ lezoꞌ ñèe naꞌ hues xtàa naꞌ coꞌ nac xinꞌ Diox, ne.
\v 3 Coꞌseꞌ nqueꞌ lezoꞌ mèn Diox, ndyubdiꞌs mèn loo conꞌ ñibeꞌ Diox loo mèn li mèn. No conꞌ coꞌ ñibeꞌ Diox loo mèn li mèna inacta arid nè no neꞌ neꞌ inaca conꞌ arid nagàn.
\v 4 Tac ryete mèn coꞌ nzopeꞌ loo cón cheꞌn Diox no coꞌ, lìcqueꞌ, nac xinꞌ Diox, leque mèna indaꞌde lugar par ñibeꞌ conꞌ coꞌ nac cón cheꞌn xab izlyoꞌ par li mèn conꞌ yeꞌrsinꞌ. No por ndxàp mèn yalxlaꞌs no ndxelaꞌs mèn loo Diox conꞌa ndli indaꞌde mèn lugar par ñibeꞌ conꞌ coꞌ nac cón cheꞌn xab izlyoꞌ par li mèn conꞌ yeꞌrsinꞌ.
\v 5 Mèn coꞌ indaꞌde lugar par ñibeꞌ conꞌ coꞌ nac cón cheꞌn xab izlyoꞌ par li mèn conꞌ yeꞌrsinꞌ, mèna nac angoluxte mèn coꞌ ndxelaꞌspeꞌ leꞌ Jesús nacpeꞌ xganꞌ Diox.
\s Trèꞌ ndluꞌ cón cheꞌn coꞌ ndluꞌ no coꞌ ndaꞌ cuent cón cheꞌn Jesucrist.
\p
\v 6 Conꞌ coꞌ ndluꞌ leꞌ Jesucrist nac xganꞌpeꞌ Diox coꞌ ngroꞌ loo béꞌ no mbiꞌth Jesucrist loo izlyoꞌ, conꞌa nac coꞌ ngòc bautizar Jesucrist leꞌn nít no coꞌ nac nguth Jesucrist loo cruz. Iante naca coꞌ ndluꞌ ngòc bautizar Jesucrist leꞌn nít no maste. Ndxeꞌlequeꞌ, ngòc bautizar Jesucrist leꞌn nít no nguth Jesucrist loo cruz. Leque yub Xpii Natúꞌ ndluꞌ cón cheꞌn coꞌ ngòc loo Jesucrist loo naꞌ. Inquedìide Xpii Natúꞌ mèn coꞌ nac cón cheꞌn conꞌ coꞌ ndluꞌ Xpii Natúꞌ loo mèn.
\v 7 Nzo son xaꞌ coꞌ ndaꞌ cuent loo béꞌ no coꞌ ndluꞌ loo naꞌ cón cheꞌn conꞌ ndxèꞌ, ne: Diox xud naꞌ, leque yub Jesucrist coꞌ nzoleꞌ, no Xpii Natúꞌ. No loo yon xaꞌ ndxèꞌ, thidte ndluꞌ xaꞌ cón cheꞌn conꞌ ndxèꞌ.
\v 8 No lomisqueꞌ, nzo son conꞌ loo izlyoꞌ ndxèꞌ coꞌ ndluꞌ cón cheꞌn Jesucrist. Son conꞌa nac Xpii Natúꞌ, no coꞌ nac ngòc bautizar Jesucrist leꞌn nít, no coꞌ nac nguth Jesucrist loo cruz. No thidte ndluꞌ yon conꞌ ndxèꞌ leꞌ Jesucrist nac xganꞌ Diox.
\v 9 Cheleꞌ naꞌ ndxelaꞌs diꞌs no cuent coꞌ ndluꞌ no coꞌ ndeꞌth mèn loo izlyoꞌ ndxèꞌ, más ndxàal yilaꞌs naꞌ diꞌs coꞌ ndluꞌ no coꞌ ndeꞌth Diox tac masreꞌ ntac diꞌs coꞌ mbez Diox. No leque yub Diox nac xaꞌ coꞌ mbluꞌ no coꞌ mdeꞌth cón cheꞌn xganꞌpeꞌ Diox.
\v 10 Mèn coꞌ ndxelaꞌs loo xganꞌ Diox no loo cón cheꞌn xganꞌ Diox, mèna non no nteꞌqueꞌ lezoꞌ mèna no ndxelaꞌsqueꞌ mèna leꞌ Jesucrist nac xganꞌpeꞌ Diox. Per mèn coꞌ indxelaꞌste loo Diox no loo cón cheꞌn Diox, mèna ndli ndxàc Diox Diox gutyèꞌ tac neꞌngalaꞌste mèna diꞌs coꞌ gunii Diox cón cheꞌn xganꞌ Diox.
\v 11 Conꞌ coꞌ gunii Diox loo naꞌ cón cheꞌn Jesucrist nac coꞌ ndluꞌ Diox loo naꞌ leꞌ naꞌ yòo ban no Diox thidtene por cón cheꞌn Jesucrist.
\v 12 Mèn coꞌ nzo loo xganꞌ Diox no coꞌ ndxelaꞌs loo xganꞌ Diox, mèna yòo ban noqueꞌ Diox thidtene. Per mèn coꞌ inzode loo cón cheꞌn xganꞌ Diox no mèn coꞌ indxelaꞌste loo xganꞌ Diox, mèna neꞌyòo ban node Diox thidtene.
\s Juàn tolo ndyoodiꞌs loo cart ndxèꞌ coꞌ nac lult diꞌs coꞌ ngue coꞌx Juàn loo mèn.
\p
\v 13 Ngue queꞌen yeꞌs coꞌ nac cart ndxèꞌ loo guꞌ, guꞌ coꞌ ndxelaꞌs loo xganꞌ Diox no loo cón cheꞌn xganꞌ Diox, par non guꞌ no par taꞌ guꞌ cuent leꞌ guꞌ yòo ban noqueꞌ Diox thidtene yiloa.
\p
\v 14 Ndxàp naꞌ yalxlaꞌs loo Diox no ndxelaꞌs naꞌ loo Diox tac naꞌ nanee cheleꞌ naꞌ ñaꞌb ndxep conꞌ loo Diox, conꞌ coꞌ nac coꞌ neepeꞌ lezoꞌ Diox, Diox ndxònqueꞌ coꞌ mbez naꞌ.
\v 15 Texal nanee naꞌ leꞌ Diox ndxònqueꞌ coꞌ mbez naꞌ loo Diox, nanee naꞌ, ne, leꞌ Diox ndliqueꞌ par que no naꞌ conꞌ no gàc cheꞌnpeꞌ naꞌ conꞌ coꞌ ñaꞌb naꞌ loo Diox.
\p
\v 16 Cheleꞌ guꞌ ñèe chol hues guꞌ o thìb amiu guꞌ ngue cuaꞌn xquin no ngue cuaꞌn xtol coꞌ inacte coꞌ ncàb ryo xàꞌ hues guꞌa loo Diox thidtene coꞌseꞌ gath hues guꞌa o amiu guꞌ, ndxàal cuez guꞌ Diox por hues guꞌ o amiu guꞌ par taꞌ Diox lugar yòo ban no hues o amiu guꞌa Diox thidtene, cheleꞌ hues guꞌ o amiu guꞌ, lìcqueꞌ, incuaꞌnte xquin no xtol coꞌ ncàb ryo xàꞌ hues guꞌ loo Diox thidtene coꞌseꞌ gath hues guꞌ. Nzoqueꞌ mèn coꞌ ncuaꞌn xquin no xtol par ncàba loo mèna ryo xàꞌ mèna loo Diox thidtene coꞌseꞌ gath mèna. Per ingue bezten loo guꞌ cuez guꞌ Diox por cón cheꞌn mèn coꞌ tataa ngue cuaꞌn xquin no coꞌ tataa ngue cuaꞌn xtol. Nee mèna cón cheꞌn mèna.
\v 17 Ryethe conꞌ yeꞌrsinꞌ coꞌ ncuaꞌn mèn loo Diox ncàb xtol mèn no xquin mèn. Per nzoqueꞌ xquin mèn no xtol mèn coꞌ ndli mèn coꞌ incàbte ryo xàꞌ mèn loo Diox thidtene coꞌseꞌ gath mèn par tyactìi mèn yiloa.
\p
\v 18 Nanee naꞌ leꞌ mèn coꞌ ngo cuent Diox nac xud mèna, mèna iasendlide par ncuaꞌn mèna xtol no ncuaꞌn mèna xquin mèna tac xganꞌ Diox nquenap mèna par neꞌgaàlte no neꞌcobyaꞌde Mebizya mèna arid.
\p
\v 19 Nanee naꞌ leꞌ naꞌ nac cheꞌnpeꞌ Diox. No nanee naꞌ leꞌ mèn dib athu loo izlyoꞌ ndli coꞌ ndlyaꞌs Mebizya no ndli mèna coꞌ nee lezoꞌ Mebizya.
\p
\v 20 Nanee naꞌ, ne, leꞌ xganꞌ Diox mbiꞌthleꞌ loo izlyoꞌ ndxèꞌ. No mbli xganꞌ Diox ndxác naꞌ no ndaꞌ naꞌ cuent cón cheꞌn Diox coꞌ nac lìcpeꞌ. No thidte nzo ban no naꞌ Jesucrist coꞌ nac xganꞌ Diox. Jesucrist inquedìide mèn no indyèꞌde Jesucrist. Jesucrist nac merpeꞌ Diox. No ndli Jesucrist ngue no naꞌ yalnaban, coꞌ nee diꞌs, yòo ban no naꞌ Diox thidtene.
\v 21 Guꞌ coꞌ nac xal xganꞌ bix daa loon, ey, bláꞌ guꞌ. Ya neꞌtolode li guꞌ cas chol mdoꞌ bix coꞌ inacte Diox, coꞌ yende cón ntac, ndee guꞌ. Taandxèꞌ gàca loo guꞌ.