\id 3JN
\ide UTF8
\h 3 JUAN
\toc1 3 JUAN
\mt Cart Coꞌ Mqueꞌ Juàn Yeꞌs Loo Thìb Mbiꞌ Coꞌ Ngroꞌ Lèe Gay
\c 1
\s Mèn mdaꞌ cuent loo Juàn leꞌ mbiꞌ coꞌ lèe Gay, huen nac mbiꞌ no huen nque tee ban mbiꞌ loo cón cheꞌn Tad Diox.
\p
\v 1 Daa, Juàn, coꞌ ndyoo ner no coꞌ ndyoo naa loo mèn loo cón cheꞌn Diox, daa ngue queꞌ yeꞌs coꞌ nac cart ndxèꞌ lool, Gay, lùu coꞌ ndxàc amiu daa coꞌ, lìcqueꞌ, nqueꞌ lezon ñèen.
\p
\v 2 Gay, lùu coꞌ nqueꞌ lezon ñèen, coꞌseꞌ mbezen Diox ñaꞌben loo Diox anzeꞌf conꞌ ndac gàc lool no yende chó yíiz tyacl par nedrèꞌ. No ñaꞌben loo Diox par li Diox gàc conꞌ ndac loo lùu loo izlyoꞌ ndxèꞌ xalqueꞌ huen nzo lezoꞌl no ndyac lezoꞌl loo coꞌ nac cón cheꞌn Diox, ndee.
\v 3 Anzeꞌf thìb gust mbyanꞌ lezon coꞌseꞌ mbiꞌth ndxep mèn hues naꞌ loo cón cheꞌn Crist par nedrèꞌ. Mèna mdaꞌ cuent cón cheꞌn lùu loon. Coꞌseꞌ mbere mèna ndyeꞌth mèna, mdaꞌ mèna cuent loon leꞌ lùu altantqueꞌ ndyoo loo cón cheꞌn Diox. No mdaꞌ mèna cuent loon leꞌ lùu thidtenequeꞌ ngue tee ban loo conꞌ coꞌ nac conꞌ lìcpeꞌ.
\v 4 Gay, yende tedib conꞌ coꞌ mbli coꞌ ndaꞌ más gust lezon xal coꞌseꞌ ndxònen leꞌ lùu coꞌ nac xal xinꞌ bix daa loon ngue tee, lìcqueꞌ, xalqueꞌ nac coꞌ nac conꞌ lìcpeꞌ.
\p
\v 5 Gay, lùu coꞌ nqueꞌ lezon ñèen, altantqueꞌ ndool loo zinꞌ coꞌ ngue xoꞌf zinꞌl cón cheꞌn Diox loo mèn coꞌ nac mèn hues xtàa naꞌ. Más de cona, nxoꞌf zinꞌl zinꞌa loo mèn coꞌ nac mèn tith coꞌ nde lool par nedrèꞌ, ne.
\v 6 Mèna mdaꞌ cuent loo rye mèn coꞌ nqueltàa loo cón cheꞌn Diox làaz mèn xá mod nqueꞌqueꞌ lezoꞌl ñèel mèna. Bli favor, ftolo taꞌ conꞌ nquin mèna par que no mèna conꞌ naquin mèna coꞌseꞌ tyen mèna ned bii mèna loo guꞌ. No maste blii loo mèna xal ndxòo lezoꞌ Diox, ndee.
\v 7 Tac mèna mxenleꞌ ned, nde mèn par nedrèꞌ par tolo xoꞌf zinꞌ mèna cón cheꞌn Jesucrist. No axta nalleꞌ yende valor loo mèna ñaꞌb mèna ayud loo mèn coꞌ tarte yilaꞌs loo cón cheꞌn Jesucrist no cón cheꞌn Diox.
\v 8 Por cona, ngue niin lool, Gay: Ndxàalqueꞌ xyoꞌf yéc naꞌ cón cheꞌn mèna par tataa mod lyath no naꞌ mèna por nda lo mèna yalbàn coꞌ nac lìcpeꞌ cheꞌn Diox loo mèn.
\s Juàn mqueꞌ yeꞌs loo mèn leꞌ Diotr inque tee ban ndacte loo cón cheꞌn Diox.
\p
\v 9 Daa mqueꞌ thìb cart loo mèn coꞌ nqueltàa loo cón cheꞌn Diox par nedrèꞌ pezea, Gay. Per coꞌseꞌ mqueꞌen cart loo mèna, daa mbìn leꞌ mbiꞌ coꞌ lèe Diotr neꞌndalte li xal ndxaben no xal mnibeꞌen loo carta. Tataa mbli Diotr tac más mdyublaꞌs Diotr ñibeꞌ Diotr làth guꞌ coꞌ nqueltàa par nedrèꞌ.
\v 10 Por cona, cheleꞌ daa gal nee máa guꞌ par nedrèꞌ, cuanen mod gaben loo Diotr loo xnaa loo rye mèn coꞌ nqueltàa par nedrèꞌ chonon ngue tee nii Diotr no ngue tee taꞌ Diotr cuentyix coꞌ nac conꞌ gutyèꞌ cón chenen. No iante conꞌade nac coꞌ ngue li Diotr. Ndxeꞌlequeꞌ, neꞌndubdiꞌste no neꞌnglide Diotr cas diꞌs coꞌ mtelꞌen loo cart par taꞌ mèna lugar yòo mèn coꞌ mtelꞌen loo guꞌ làth guꞌ. No más de cona, mcà Diotr loo guꞌ. Indaꞌde Diotr lugar par taꞌ guꞌ lugar yòo mèna làth guꞌ, ne. Ale ndli Diotr par ngoꞌ guꞌ mèn coꞌ mtelꞌena làth guꞌ.
\p
\v 11 Gay, lùu coꞌ nqueꞌ lezon ñèen, neꞌlidel conꞌ yeꞌrsinꞌ. Más huen, bli conꞌ ndac. Tac mèn coꞌ ndli conꞌ ndac, mèna nac cheꞌnpeꞌ Diox. Per mèn coꞌ ndli conꞌ yeꞌrsinꞌ, mèna thidtenequeꞌ tarte taꞌ cuent cón cheꞌn Diox.
\s Juàn ngue taꞌ cuent loo mèn loo cart ndxèꞌ cón cheꞌn mod ndac coꞌ ngòp thìb mbiꞌ coꞌ lèe Demetr.
\p
\v 12 Tan cuent lool, Gay, ryete mèn nabeꞌste ndyoodiꞌs cón cheꞌn Demetr. No conꞌ coꞌ nde teeleꞌ ndli Demetr, leque conꞌa ndluꞌ leꞌ Demetr nacqueꞌ thìb mbiꞌ ndac no nque tee ban ndac Demetr loo conꞌ coꞌ nac lìcpeꞌ. Nuꞌ, ne, ndaꞌ cuent cón cheꞌn Demetr leꞌ Demetr nac thìb mbiꞌ ndac. Guꞌ neequeꞌ leꞌ nuꞌ ndyoodiꞌsqueꞌ ante coꞌ nac conꞌ lìcpeꞌ.
\s Conꞌ ndxèꞌ nac lult diꞌs coꞌ ndyoodiꞌs Juàn loo Gay.
\p
\v 13 Anzeꞌf huax diꞌs mque non par mblyazen ndan cuent lool, Gay, per neꞌngòode lezon ntelꞌen diꞌsa lool loo cart ndxèꞌ.
\v 14 Tac daa mbedqueꞌ, chàa, gal neenl par nedrèꞌ, coꞌ nee diꞌs, huiꞌen lool no huiꞌl loon par tataa mod tyoodiꞌs yub naꞌ.
\p
\v 15 Ndlyazen yo nagàl lezoꞌl loo Diox no que tee banl rye ndal no rye ndyeꞌthl con mèn coꞌ nac mèn hues xtàal. Lomisqueꞌ ne, mèn coꞌ ndxàc amiu naꞌ par ned nzon ndxèꞌ ngue nii Diox lool loo cart ndxèꞌ. Bli favor, gunii Diox loo thìb thìb mèn coꞌ ndxàc amiu naꞌ par nedrèꞌ, ndee. Fteꞌ lezoꞌla no maste. Taandxèꞌ gàca.