\id JUD
\ide UTF8
\h JUDAS
\toc1 JUDAS
\mt Cart Coꞌ Mqueꞌ Jud Yeꞌs Loo Mèn
\c 1
\s Jud mqueꞌ yeꞌs coꞌ nac cart ndxèꞌ loo mèn coꞌ Diox mcui no mèn coꞌ Diox mblec loo cón cheꞌn Diox.
\p
\v 1 Daa, Jud coꞌ nac thìb mbiꞌ coꞌ nxoꞌf zinꞌ cón cheꞌn Jesucrist, daa ndxàc hues Cob. Ngue queꞌen cart ndxèꞌ loo guꞌ, guꞌ coꞌ Diox mblec loo cón cheꞌn Jesucrist, Diox coꞌ nac xud naꞌ. Diox mbloꞌ xàꞌ guꞌ loo conꞌ coꞌ nac cón cheꞌn xab izlyoꞌ par ngòc guꞌ mèn cheꞌnpeꞌ Diox. Guꞌ nac mèn coꞌ Diox nquenap por thidte ndxàc guꞌ con Jesucrist.
\v 2 Ndlyazen lyat lezoꞌ Diox ñèe Diox guꞌ. No ndlyazen yo nagàl lezoꞌ guꞌ loo Diox no cue ban guꞌ rye nda guꞌ no rye ndyeꞌth guꞌ làth xtàa guꞌ. No ndlyazen tolo luꞌ Diox loo guꞌ leꞌ Diox nqueꞌqueꞌ lezoꞌ ñèe Diox guꞌ.
\s Trèꞌ ndluꞌ cón cheꞌn mèn gutyèꞌ.
\r (2 Pedro 2.1–17)
\p
\v 3 Mèn huesen por cón cheꞌn Jesucrist, guꞌ coꞌ anzeꞌf nqueꞌ lezon, anzeꞌf ndenꞌen leꞌn lezon no ndlyazen queꞌen thìb yeꞌs coꞌ nac cart ndxèꞌ loo guꞌ coꞌ ndluꞌ cón cheꞌn xá mod lyáꞌ mèn loo conꞌ ryes tac ryete naꞌ mblyáꞌleꞌ loo conꞌ ryes no loo conꞌ yeꞌrsinꞌ. Per nalleꞌ, ndenꞌ lezon nquin queꞌen yeꞌs loo guꞌ par coꞌxen loo guꞌ no ñaꞌben loo guꞌ nalas gure guꞌ loo cón cheꞌn Crist coꞌ ndxelaꞌs guꞌ par gác guꞌ càb ndac guꞌ loo mèn yeꞌrsinꞌ coꞌ nzote mod gác càb guꞌ par gàca loo mèn làth guꞌ neꞌtyoo xàꞌde lezoꞌ mèn loo cón cheꞌn Diox. Ndxeꞌlequeꞌ, tolo téꞌth mèn no tyubdiꞌs mèn loo cón cheꞌn Diox. No mbli Diox thidte vez ngòc thìb conꞌ loo Jesucrist par gàca leꞌ ryete mèn coꞌ ndlyaꞌs no coꞌ ndyal yilaꞌs loo cón cheꞌn Jesucrist, mèna lyáꞌ loo conꞌ ryes. No ndxàc conꞌa loo rye mèn coꞌ nac cheꞌnpeꞌ Diox.
\v 4 Tac ndxep mèn ngòo làth guꞌ con mod gutyèꞌ coꞌ ndxàp mèna. Cón cheꞌn mèna ndluꞌ loo libr coꞌ nac xtiꞌs Diox leꞌ Diox mbluꞌleꞌ más pólleꞌa cón cheꞌn mèna leꞌ mèna tyactìi thìb conꞌ coꞌ nquin li Diox loo mèna. Nac conꞌa thìb conꞌ coꞌ nzyalqueꞌ mèna gàca loo mèna. Mèna nac mèn yeꞌrsinꞌtúb. Mèna indlide cas loo conꞌ coꞌ nac cón cheꞌn Diox. Ndli mèna cuent leꞌ conꞌ coꞌ nac cón cheꞌn Diox nac par gàc cón cheꞌn Diox loo mèn no leꞌ Diox alithe ndaꞌ lugar li mèn conꞌ yeꞌrsinꞌ par que tee ban mèn xalqueꞌ ndlyaꞌs mèn. Ale ncà mèna cón cheꞌn Diox, Diox coꞌ nac thidte Diox coꞌ ñibeꞌ loo naꞌ. No ncà mèna loo cón cheꞌn Tad Jesucrist naꞌ.
\p
\v 5 Mastaleꞌ nonleꞌ guꞌ cón cheꞌn conꞌ ndxèꞌ, ndlyazen teꞌ lezoꞌ guꞌ coꞌ huenlequeꞌ conꞌ mbli Tad Diox. Mastaleꞌ mbli Tad thìb conꞌ, coꞌ nee diꞌs, mbli Tad Diox ngroꞌ mèn coꞌ ngòc mèn coꞌ ngua lec nación Israel leꞌn nación Egipt, ngoloa, mtelux Diox mèn coꞌ ngo làtha, mèn coꞌ neꞌngalaꞌste loo Diox.
\v 6 Tataaguèꞌ mbli Tad Diox con angl coꞌ neꞌngxecte nquenap loo conꞌ ndxàal ngli angl loo Tad Diox. Ndxeꞌlequeꞌ, ngroꞌ angl loo béꞌ coꞌteꞌ ngòc liz angl no làaz angl coꞌteꞌ mxoꞌf zinꞌ angl cón cheꞌn Diox loo Diox. Nalleꞌ Diox mbli nzo angl pres par tyub rez cón cheꞌn angl coꞌseꞌ gàc lult huiz coꞌ gàc huiz yaad huiz lyen coꞌseꞌ tub rez Diox cón cheꞌn ryethe conꞌ. Nzo angla thìb lugar coꞌteꞌ nacuau xal mèn coꞌ natedóꞌ con caden thidtene.
\v 7 No fteꞌ lezoꞌ guꞌ cón cheꞌn conꞌ coꞌ mbli Tad Diox loo mèn ciuda Sodom no loo mèn ciuda Gomor no loo taamas mèn coꞌ ngureriꞌ gax par neda. Xalqueꞌ mbli angla chol conꞌ yeꞌrsinꞌ par tetìi Diox angla, tataa mod mbli mèn ciuda Sodom no mèn ciuda Gomor rye loothe conꞌ yeꞌrsinꞌ axta mbli mèna yalmbiꞌ con xtàabiꞌ mènbiꞌa. No thìb mod tedib mod mbli mèna rye loothe conꞌ yeꞌrsinꞌ coꞌ indxàalte li mèna. Por cona, Diox mtelux mèna thìb mod coꞌ ndluꞌ loo taamas mèn loo izlyoꞌ leꞌ mèn coꞌ neꞌtyalte li cas loo cón cheꞌn Diox no neꞌtyalte mèn yòo mèn loo cón cheꞌn Diox, mèna tyactìi thidtene loo quìi no loo bèel xal mxactìi mèn ciudaa loo quìi no loo bèel.
\p
\v 8 Per mastaleꞌ tataa ngòca loo mèn ciuda Sodóm no loo mèn ciuda Gomor, ale lomisqueꞌ mod, ne, tataaguèꞌ mbli mèn yeꞌrsinꞌ coꞌ nac cón cheꞌn mèn coꞌ ngue queꞌen yeꞌs loo guꞌ ndxèꞌ. Nsaꞌ lezoꞌ mèna cón cheꞌn conꞌ yeꞌrsinꞌ coꞌ tolo ndlyaꞌs mèna li mèna. Ale leque mèna ntezab mèna. Ale thìb lad nqueꞌ mèna yalñibeꞌ cheꞌn Diox par xìis no mèna Diox. No nazab mbez mèna cón cheꞌn angl coꞌ ñibeꞌ Diox loo loo béꞌ.
\v 9 Fteꞌ lezoꞌ guꞌ, ne, xal nac conꞌ coꞌ ngòc loo thebol Moisés coꞌseꞌ ngure mcà angl coꞌ lèe Miguel bélꞌyòo lad thebol Moisés loo Mebizya. No mbree mcà Mebizya bélꞌyòo lad thebol Moisés loo Miguel coꞌ nac angl coꞌ ñaareꞌ más no coꞌ ñibeꞌ tachuꞌth más loo rye taamas angl. Neꞌnglide Miguel ryes quexùꞌ no queyèe Miguel Mebizya no neꞌngniide Miguel ngòc nguàal conꞌ loo Mebizya coꞌseꞌ ngue toodiꞌs no Miguel Mebizya cón cheꞌn bélꞌyòo lad thebol Moisés. Ndxeꞌlequeꞌ, nadoꞌ diꞌs nadoꞌ cuent ndxab Miguel loo Mebizya: Yende conꞌ niin lool. Yanꞌ cón cheꞌn conꞌ ngue lil cón cheꞌn Diox. Yub Diox yool.
\v 10 Per ngue niin loo guꞌ tedib vez cón cheꞌn mèn yeꞌrsinꞌ ndxèꞌ: Mèna ñii yèe ñii tìi cón cheꞌn conꞌ coꞌ neꞌñeede mèn no coꞌ neꞌtaꞌde mèn cuent. Neequeꞌ naꞌ leꞌ chol máꞌ ndli xalqueꞌ mbli Diox par ndli máꞌ, ¿léꞌ? Per mèn yeꞌrsinꞌ masreꞌ conꞌ ndli leque máꞌ tac, mastaleꞌ non mèn yeꞌrsinꞌa xá mod ndxàal li mèn loo costumbr coꞌ nac conꞌ ndac coꞌ ndli mèn loo izlyoꞌ ndxèꞌ, per ndxeꞌlequeꞌ, leꞌleꞌ ndli mèna par ntezab mèna mèna por mod yeꞌrsinꞌ coꞌ ngue no mèna loo costumbr coꞌ ndli mènꞌ. No tataa mod ntezab mèna leque mèna por conꞌ yeꞌrsinꞌ coꞌ ndli mèna. No tataa mod ncàb loo mèna lyux mèna.
\p
\v 11 Prob mèn yeꞌrsinꞌa izlyoꞌ. Tac ngue liqueꞌ mèna xalqueꞌ ngòc coꞌ mbli Caín. Mèna ndxath nquìi ñèe tmi no nzi tee huanpeꞌ mèna loo cón cheꞌn Diox xalqueꞌ ngòca loo Balaam. No gàc yaltìi loo mèna no lyux mèna xalqueꞌ ngòca loo mbiꞌ coꞌ ngroꞌ lèe Coré coꞌ mblyux por mbli mbiꞌ ngòc nguàal conꞌ loo Moisés. Tataa gàc loo mèn yeꞌrsinꞌa, ne.
\v 12 Mèna ndxàp thìb mod yeꞌrsinꞌ. Coꞌseꞌ ndli guꞌ thìb lni chuꞌth par nqueltàa guꞌ par hua guꞌ sa luaꞌ guꞌ con xtàa guꞌ coꞌ ndxelaꞌs loo Tad Diox tac nqueꞌ lezoꞌ guꞌ ñèe guꞌ hues xtàa guꞌ, negadiꞌs ndxòo mèna làth guꞌ par hua xleꞌ mèna con guꞌ. No conꞌ coꞌ ndli mèna ndli nthyon taamas mèn. Ndxòo mèna xiꞌth guꞌ. Ndyac lezoꞌ mèna axta plóthe coꞌseꞌ ndxuhua mèn no ndxu mèn. No axta neꞌ neꞌ indxàp mèna mod loo coꞌ ndli mèna làth guꞌ. No nac mèna xal myenꞌ bix coꞌ nqueno máꞌ no coꞌ nquenap máꞌ coꞌ ndláꞌyaꞌ máꞌ por nguith myenꞌ, no por nazinꞌ myenꞌ, no por ndli myenꞌ ante coꞌ neete lezoꞌ myenꞌ. Nac mèna xal xcuau biiz coꞌ alithe ndriꞌth loo béꞌ coꞌ ndxeꞌ mbii, coꞌ yende cón ntac tac indlàade xcuau yuu. Nac mèna xal yaa xlè coꞌ indaꞌde xlè coꞌseꞌ nac tiemp cheꞌn xlè. Leꞌleꞌ mbiiz yaa xlèa. No ale nguꞌb yaa xlèa. No ale mquib mèn yaaa por tataa ngòca loo yaaa. Tataa gàca loo mèn yeꞌrsinꞌa, ne.
\v 13 Nac mèna xal ol coꞌ alithe ndxetoo loo níttóꞌ. Nac conꞌ coꞌ ndli mèna xal fsinꞌ coꞌ ngoꞌ ol níttóꞌ ro níttóꞌ. Fsinꞌa nac conꞌ zab. No lomisqueꞌ, tataaguèꞌ nac coꞌ ndli mèna tac conꞌ ndli mèna nac conꞌ zab. No nac conꞌ coꞌ ndli mèna par nthyon taamas mèn. Nac mèna xal mbèel cuet coꞌ ndryo xyoꞌf thìb ned tedib ned loo béꞌ coꞌ alithe nque tee huan. Diox thidtene mbli ndyub quìi ndyub bèel lezoꞌ mèna par yòo ban mèna thidtene lugar coꞌteꞌ nacuau tínꞌ par tyactìi mèna thidtene.
\p
\v 14 Enoc coꞌ ngòc gaz bin coꞌ nde nque xís Adán, Enoc, ne, gunii no mdeꞌth Enoc xal mnibeꞌ Diox loo Enoc cón cheꞌn mèn yeꞌrsinꞌ coꞌ ngue niin loo guꞌ ndxèꞌ coꞌseꞌ ndxab Enoc: Gunèen coꞌseꞌ nde Tad Diox con anzeꞌf thìb mènléyꞌ coꞌ nac angl natúꞌ cheꞌn Tad.
\v 15 Nde Tad Diox par tub rez Tad Diox cón cheꞌn rye mèn no par tetìi Diox ryete mèn yeꞌrsinꞌtúba thidtene por cón cheꞌn ryethe conꞌ yeꞌrsinꞌ coꞌ ngòc conꞌ yeꞌrsinꞌ coꞌ mbli mèn yeꞌrsinꞌa. Tetìi Diox mèn yeꞌrsinꞌa no zib quìi Diox cón cheꞌn mèn yeꞌrsinꞌa por cón cheꞌn diꞌs nazab coꞌ gunii yèe gunii tìi mèn yeꞌrsinꞌ coꞌ ngòp xtol cón cheꞌn Tad Diox.
\v 16 Mèn yeꞌrsinꞌa nco ñee cón cheꞌn chol conꞌ coꞌ iñaade loo xtàa mèn. No anzeꞌf ndxòo lezoꞌ mèna xexte ndyoodiꞌs mèna cón cheꞌn tedib mèn. Ante nque tee cuaꞌn mèna mod par tyac lezoꞌ mèna loo mod coꞌ ndyub yoꞌf lezoꞌ mèna coꞌ ndlyaꞌs mèna li mèna coꞌ nac coꞌ neete lezoꞌ mèna. Ndxòo lezoꞌ mèna tyoodiꞌs mèn antúb diꞌs naxalꞌ no diꞌs nateꞌs. No ndyublaꞌs mèna tyoodóꞌ mèna loo mèn par tolo gaaꞌd yaꞌ mèna mèn no par queꞌ mèna quèe yéc mèn par gàc cheꞌn mèna conꞌ coꞌ nac cheꞌn taamas mèn.
\s Trèꞌ ndluꞌ leꞌ Jud ngue coꞌx mèn coꞌ ndxelaꞌs loo cón cheꞌn Jesucrist.
\p
\v 17 Per part cón cheꞌn guꞌ, mèn huesen coꞌ nzo loo cón cheꞌn Jesucrist, guꞌ coꞌ anzeꞌf nqueꞌ lezon ñèen: Fteꞌ lezoꞌ guꞌ leꞌ myenꞌ coꞌ ngòc mèn coꞌ mbeꞌ diꞌs cheꞌn Jesucrist más pólleꞌa,
\v 18 mèna mdaꞌ cuent ndxèꞌ loo guꞌ: Coꞌseꞌ gàc huiz coꞌ nac lult tiemp ndooreꞌ lith no izlyoꞌ, yo huax mèn coꞌ tèꞌb no coꞌ xìis no conꞌ coꞌ nac cón cheꞌn Diox. No que tee ban li mèn ante xal nac mod coꞌ ndyub yoꞌf lezoꞌ mèn li mèn coꞌ nac thìb mod xin no thìb mod cap.
\v 19 No tolo niin loo guꞌ leꞌ mèna li par tyoo xàꞌ lezoꞌ mèn loo cón cheꞌn Diox. No li mèna par gàc mèn coꞌ ngòoleꞌ loo cón cheꞌn Diox chop ned mèn. Mèna nac mèn coꞌ nzi tee ban li ante coꞌ nac cón cheꞌn xab izlyoꞌ. Inzode Xpii Natúꞌ cheꞌn Diox loo mèna.
\p
\v 20 Per part cón cheꞌn guꞌ, mèn huesen por cón cheꞌn Jesucrist, guꞌ coꞌ anzeꞌf nqueꞌ lezon ñèen, más bli nèe guꞌ guꞌ loo coꞌ nac coꞌ ndxelaꞌs guꞌ tac conꞌ coꞌ ndxelaꞌs guꞌa nac thìb conꞌ más natúꞌ loo Diox. Coꞌseꞌ cuez guꞌ Diox, gurez guꞌ Diox xal nzote mod ndxác guꞌ par cuez guꞌ Diox xal ndlyath no Xpii Natúꞌ guꞌ.
\v 21 Leque guꞌ huiꞌ xal nzi tee ban lì guꞌ par tataa mod tolo queꞌ lezoꞌ Diox ñèe Diox guꞌ. Nonqueꞌ guꞌ leꞌ Tad Jesucrist ndlyat lezoꞌ ñèe Tad Jesucrist guꞌ. Por cona, dib nzo yéc guꞌ no dib nzo lezoꞌ guꞌ nzi quee lezoꞌ guꞌ coꞌseꞌ zin huiz li Tad Jesucrist yòo ban noqueꞌ naꞌ Diox thidtene.
\p
\v 22 Nadoꞌ diꞌs nadoꞌ cuent ftoodiꞌs no guꞌ mèn cón cheꞌn Diox, mèn coꞌ beꞌ ndxàc chop loo chop laꞌs par belꞌqueꞌ tenꞌ mèna leꞌn lezoꞌ mèna lìcqueꞌ nac cón cheꞌn Tad Jesucrist coꞌ mbez guꞌ no, belꞌqueꞌ, tataa mod li nèe mèna mèna loo cón cheꞌn Tad Jesucrist.
\v 23 Ndlyazen leꞌ guꞌ li coꞌ nzote mod gác guꞌ li guꞌ par lyáꞌ ndxep mèn loo conꞌ ryes, mèn coꞌ nzi tee huan loo Diox, mèn coꞌ alithe nzi ban axta gath mèn coꞌseꞌ li Diox par yòo mèna yeꞌrbìil par tyactìi mèna thidtene. Tac mèna nac xal thìb bro yaa coꞌ nax bed coꞌ co mèn leꞌn gor yeyꞌ yiloa. No ndlyazen lyatqueꞌ lezoꞌ guꞌ ñèe guꞌ taamas mèn par lyath no guꞌ mèn par lyáꞌ mèna loo conꞌ ryes. Per nee guꞌ nee guꞌ xal ndyoodiꞌs no guꞌ mèna par neꞌgàcte loo guꞌ tlo guꞌ li guꞌ ndxep conꞌ zab no ndxep conꞌ yeꞌrsinꞌ xal ndli mèna láth ndyoodiꞌs no guꞌ mèna. Tac neꞌ yiloa li guꞌ conꞌ zab xal nzi tee ban li mèna, ne.
\s Trèꞌ ndluꞌ lult diꞌs coꞌ gunii Jud loo cart cón cheꞌn conꞌ roo conꞌ xèn cheꞌn Diox.
\p
\v 24–25 Diox coꞌ nac thidte Diox coꞌ ndxácpeꞌ no coꞌ nanee ryethe conꞌ, Diox coꞌ nac Diox coꞌ mteláꞌ naꞌ loo conꞌ ryes, thidte Diox nac coꞌ ndxàp conꞌ roo no conꞌ xèn laꞌs yaꞌ Diox no laꞌs nii Diox par quenap Diox guꞌ par neꞌtyoo xàꞌde lezoꞌ guꞌ loo cón cheꞌn Diox no par neꞌyitacte lezoꞌ guꞌ loo cón cheꞌn Diox. No ndxác Diox li Diox par coꞌseꞌ gàc huiz coꞌ tyoo guꞌ loo Diox gàc guꞌ mèn nambìi no mèn nalì coꞌ inacte mèn zab loo Diox. No li Diox par xyoꞌf ndeꞌ xyoꞌf ndlaꞌ lezoꞌ guꞌ coꞌseꞌ gàc huiz coꞌ tyoo guꞌ loo Diox. Ndlyazen leꞌ loo thidte Diox gàc conꞌ roo conꞌ xèn. No ndlyazen leꞌ ryethe mèn no ryethe angl gàc nadoꞌ no tyubdiꞌs angl loo Diox por cón cheꞌn Tad Jesucrist. No ndlyazen tataa gàca xal ngòca pólleꞌa no tolo gàca leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node. Taandxèꞌ gàca, ndee guꞌ.