\id REV
\ide UTF8
\h APOCALIPSIS
\toc1 APOCALIPSIS
\mt Diꞌs Coꞌ Mblo Xoꞌf Jesucrist Loo Juàn Coꞌ Mqueꞌ Juàn Yeꞌs Loo Mèn
\c 1
\s Trèꞌ ndluꞌ cón cheꞌn conꞌ coꞌ mblo xoꞌf Jesucrist loo Juàn.
\p
\v 1 Libr ndxèꞌ ndluꞌ cón cheꞌn coꞌ mblo xoꞌf Diox loo Jesucrist par taꞌ Jesucrist cuent cón cheꞌn conꞌa loo mèn coꞌ mxoꞌf zinꞌ cón cheꞌn Jesucrist cón cheꞌn conꞌ coꞌ gàc loo izlyoꞌ yiloa. Jesucrist mbli par ngro xoꞌf conꞌ ndxèꞌ loon, daa coꞌ nac Juàn coꞌ mxoꞌf zinꞌ thìb zinꞌ cheꞌn Jesucrist, por angl cheꞌn Jesucrist coꞌ mtelꞌ Jesucrist mbiꞌth loon.
\v 2 Loo libr ndxèꞌ ndan cuent cón cheꞌn coꞌ, lìcpeꞌ, gunèen. Nac daa mbiꞌ coꞌ ndaꞌ cuent no coꞌ ndyoodiꞌs cón cheꞌn Diox. Ndan cuent no ndyoodizen cón cheꞌn conꞌ coꞌ mblo xoꞌf Jesucrist loon, ne.
\p
\v 3 Huen nda mèn coꞌ ndlab diꞌs ndxèꞌ. No huen nda mèn coꞌ ndyal ndxòn diꞌs ndxèꞌ coꞌseꞌ ndlab mèn diꞌs ndxèꞌ, diꞌs coꞌ mbluꞌ Diox loon par tan cuent loo mèn. No huen nda mèn coꞌ ndli cas no coꞌ ndyubdiꞌs xal mbez diꞌs coꞌ ndub loo libr ndxèꞌ. Tac nde zinꞌ gaxleꞌ tiemp gàca xal mblo xoꞌf Jesucrist cón cheꞌn conꞌ coꞌ gàc loo izlyoꞌ yiloa loon.
\s Juàn ngue queꞌ yeꞌs loo mèn coꞌ nqueltàa loo cón cheꞌn Diox, mèn coꞌ nzo ban leꞌn gaz yèezyaꞌ cheꞌn làaz mèn asia.
\p
\v 4 Daa coꞌ nac yub Juàn ngue queꞌen yeꞌs loo guꞌ coꞌ nqueltàa loo cón cheꞌn Diox, guꞌ coꞌ nzo ban leꞌn yèezyaꞌ cheꞌn làaz mèn asia. Ndlyazen leꞌ Diox coꞌ thidtenequeꞌ nzo, no Xpii Natúꞌ cheꞌn Diox coꞌ nzo loo Diox coꞌteꞌ ndub Diox loo béꞌ, no Tad Jesucrist, li loo guꞌ anggàc huax conꞌ ndac loo guꞌ par nedrèꞌ. No ndlyazen leꞌ por cón cheꞌn Diox, no por cón cheꞌn Xpii Natúꞌ cheꞌn Diox, no por cón cheꞌn Tad Jesucrist, gàc loo guꞌ nagàl yo lezoꞌ guꞌ loo Diox no cue ban guꞌ rye nda guꞌ no rye ndyeꞌth guꞌ làth xtàa guꞌ.
\v 5 Jesucrist mdaꞌ cuent cón cheꞌn Diox loo mèn. No altant mdoo Jesucrist loo zinꞌ coꞌ mxoꞌf zinꞌ Diox loo Jesucrist li Jesucrist loo mèn. Jesucrist ngòc ner mbiꞌ coꞌ ngro xban làth mèn nguth. No nac Jesucrist xaꞌ coꞌ ñibeꞌqueꞌ loo mèn dib athu loo izlyoꞌ yiloa. Más de cona, Crist nqueꞌqueꞌ lezoꞌ ñèe Crist naꞌ. No mtonꞌ Crist xquin naꞌ no xtol naꞌ coꞌseꞌ nguth Crist loo cruz par ngòc naꞌ mèn nalì no mèn nambìi loo Diox.
\v 6 Mbli Crist par gàca leꞌ ryethe mèn coꞌ nzo loo cón cheꞌn Crist, mèn coꞌ ndxelaꞌs loo Crist leꞌn rye nación coꞌ nziriꞌ dib athu loo izlyoꞌ, thidte queltàa mèna no thidte gàc mèna loo cón cheꞌn Crist no loo Crist par ñibeꞌ Crist loo mèna. No mbli Crist ngòc naꞌ mèn no nac naꞌ mèn coꞌ mbez conꞌ roo no conꞌ xèn no conꞌ natúꞌ loo mèn cón cheꞌn Diox no coꞌ mbez conꞌ roo no conꞌ xèn no conꞌ natúꞌ loo Diox, ne. Tataa mod ndli naꞌ sirv loo Diox coꞌ nac xud naꞌ. Ndlyazen thidtenequeꞌ gàc conꞌ roo no conꞌ xèn loo Crist. No ndlyazen gàc rye loothe conꞌ roo no conꞌ xèn laꞌs nii Crist no laꞌs yaꞌ Crist thidtene. Taandxèꞌ gàca.
\p
\v 7 Huiꞌ guꞌ nexa. Coꞌseꞌ yiꞌth Crist, Crist yiꞌth leꞌn xcuau. Huiza ryete mèn huiꞌ loo Crist axta mèn coꞌ ngòc leque mèn coꞌ mtehuíꞌ Crist, mèna huiꞌ loo Crist huiza. No ryete mèn coꞌ nzi ban dib athu loo izlyoꞌ gónꞌ coꞌseꞌ huiꞌ mèna loo Crist huiza. Aa. Tataaqueꞌ gàca.
\p
\v 8 Gunee Diox diꞌs ndxèꞌ loon, ne:
\p ―Daa nzoleꞌ ndooreꞌ cue alux conꞌ. No nzoquen coꞌseꞌ yilo lyux alux conꞌ. Cona nee diꞌs, nac daa xal letr “a” coꞌ nac letr coꞌ ntlo loo alfabet. No nac daa xal letr “z” coꞌ nac lult letr loo alfabet.
\p Tataa gunee Tad Diox loon, Tad Diox coꞌ ndxàp rye loothe conꞌ roo no conꞌ xèn laꞌs nii Tad Diox no laꞌs yaꞌ Tad Diox, Tad Diox coꞌ nzoqueꞌ thidtene.
\s Tad Crist coꞌ nac Tad roo no Tad xèn mxyoꞌf loo loo Juàn.
\p
\v 9 Daa coꞌ nac Juàn coꞌ ngue queꞌ yeꞌs loo guꞌ trèꞌ, daa nac hues guꞌ, ne, por cón cheꞌn Crist. Thidte ndyactìi naꞌ loo cón cheꞌn Crist. No thidte ngòo naꞌ loo cón cheꞌn Diox par ñibeꞌpeꞌ Diox loo naꞌ. No thidte nchaꞌlaꞌs naꞌ no nxec yèe naꞌ xalqueꞌ ndlyath no Crist naꞌ. Per nalleꞌ láth nzon trèꞌ leꞌn thìb yòo biiz leꞌn níttóꞌ coꞌ lèe Patmos coꞌteꞌ mqueꞌ mèn daa xal pres por mblon yalbàn cón cheꞌn diꞌs ndac cheꞌn Diox no por mdoodizen loo mèn cón cheꞌn Jesucrist, nde tan cuent loo guꞌ.
\v 10 Ngòc thìb conꞌ loon thìb huiz doming láth ngue ñibeꞌ Xpii Natúꞌ loon. Mdenꞌen leꞌ Xpii Natúꞌ cheꞌn Diox mbli ngòc thìb conꞌ loon hora. Mxaquen cabii gunii thìb mbiꞌ par ned xísen xal ruid cheꞌn thìb trompet coꞌseꞌ ncuez mèn trompet.
\v 11 Mxaquen gunee mbiꞌ loon:
\p ―Juàn, daa nzoleꞌ ndooreꞌ cue alux conꞌ. No nzoquen coꞌseꞌ yilo lyux alux conꞌ. Cona nee diꞌs, nac daa xal letr “a” coꞌ nac letr coꞌ ntlo loo alfabet. No nac daa xal letr “z” coꞌ nac lult letr loo alfabet. Ndlyazen queꞌl yeꞌs loo thìb libr cón cheꞌn conꞌ coꞌ ñèel no conꞌ coꞌ ngue huiꞌl. Yiloa, ftelꞌ libr loo mèn coꞌ nqueltàa loo cón cheꞌn Diox coꞌ nzo ban leꞌn gaz yèez coꞌ nac yèezyaꞌ cheꞌn làaz mèn asia. Rye gaz yèeza lèe taandxèꞌ: Efes, Smirn, Perg, Tiatir, Sard, Filadelf, no Laodice.
\p
\v 12 Ngoloa, mberen par ned xísen par huiꞌen chó ngue nii loon. No coꞌseꞌ mberen, gunèen nziriꞌ gaz candiler or loon.
\v 13 No xtauꞌthe gaz candilera, gunèen ndoo thìb mbiꞌ coꞌ dib xoo ñaa xal ñaa Jesucrist coꞌ mbiꞌth yáal loo izlyoꞌ xalqueꞌ ndxáal chol mèn loo izlyoꞌ ndxèꞌ. No noc xab Jesucrist thìb xab Jesucrist coꞌ nac dib andoo coꞌ nolꞌ axta nii Jesucrist. No nabix thìb cint or xal nde ro pech Jesucrist.
\v 14 Leꞌ yis yéc Jesucrist na, ante nagus bèellequeꞌ ñaa xal ñaa xilꞌ mbacxilꞌ coꞌ ndxech. No ante nagus bèellequeꞌ ñaa yis yéc Jesucrist xal yeꞌ coꞌ ante nagus bèellequeꞌ ñaa. Nde ngudloo Jesucrist na, gunaa xal xnìi bèel coꞌ ndxetoo.
\v 15 Lomisqueꞌ, nquée xnìi nii Jesucrist xal thìb leꞌ yiꞌf coꞌ ntembìi mèn coꞌ nsunꞌ mèn leꞌn gorn. Lomisqueꞌ, coꞌseꞌ ndxèn diꞌs coꞌ ndyoodiꞌs Jesucrist, ndxèn diꞌs xal coꞌseꞌ ndxàꞌx no nquebii nxyoꞌf nít thìb yóꞌbeꞌ.
\v 16 Lomisqueꞌ ne, mxaquen, nden Jesucrist gaz conꞌ coꞌ ñaa xal mbèelhuiꞌ yaꞌ Jesucrist coꞌ nac ladlì. No ñèen ndryoꞌ thìb spad coꞌ nalen ryop loo ro Jesucrist. Nde nxonꞌ, nquée xnìi loo Jesucrist xal coꞌseꞌ nde yáal rol huiz coꞌseꞌ neꞌxecte ngudloo mèn huiꞌ mèn loo huiz.
\p
\v 17 Coꞌseꞌ gunèen loo Jesucrist, ale ngulàan xànꞌ nii Jesucrist. Ngulàa yálꞌ lezon no mcuau daa xal thìb mèn coꞌ nguth. Sya, mxoꞌf Jesucrist yaꞌ Jesucrist coꞌ nac ladlì laden. No gunee Jesucrist loon:
\p ―Neꞌzyebtel, Juàn. Daa nzoleꞌ ndooreꞌ cue alux conꞌ. No nzoquen coꞌseꞌ yilo lyux alux conꞌ.
\v 18 Nabanqueꞌ daa, Juàn. Lìcqueꞌ, nguth daa. Per nalleꞌ naban daa thidtene. Nac daa xaꞌ coꞌ ndli nquée yalguth loo mèn. No nac daa xaꞌ coꞌ ndli par ryo xban mèn làth mèn nguth yiloa.
\v 19 Cona, ngue niin lool, Juàn: Fqueꞌ yeꞌs coꞌ gàc xal thìb thìb libr cón cheꞌn conꞌ coꞌ gunèelel, no cón cheꞌn conꞌ coꞌ ndxàc nalleꞌ, no cón cheꞌn conꞌ coꞌ gàc yiloa.
\v 20 Trèꞌ luꞌen lool cón cheꞌn cón nee diꞌs gaz conꞌ coꞌ ñaa xal ñaa mbèelhuiꞌ coꞌ ñèel ndenen con yan ladlì. Lomisqueꞌ ne, luꞌen lool cón cheꞌn cón nee diꞌs gaz candiler or. Pues cón cheꞌn conꞌ coꞌ ñaa xal gaz mbèelhuiꞌ ndluꞌ cón cheꞌn gaz mèn coꞌ ndyoo ner no coꞌ ndyoo naa loo mèn coꞌ nqueltàa loon leꞌn gaz yèez coꞌ nac yèezyaꞌ cheꞌn làaz mèn asia. Leꞌ cón cheꞌn gaz candiler na, nac coꞌ ndluꞌ cón cheꞌn mèn coꞌ nqueltàa loo cón chenen leꞌn gaz yèez coꞌ nacguèꞌ yèezyaꞌ cheꞌn làaz mèn asia.
\c 2
\s Diꞌs coꞌ mnibeꞌ Crist loo Juàn par queꞌ Juàn yeꞌs loo mèn coꞌ nqueltàa loo cón cheꞌn Crist leꞌn gaz yèeza: Mtelꞌ Juàn yeꞌs coꞌ nac ner cart loo mèn coꞌ nqueltàa loo cón cheꞌn Diox leꞌn ciuda Efes.
\p
\v 1 Gunee Jesucrist loon, ne: Fqueꞌ yeꞌs cón cheꞌn conꞌ ndxèꞌ loo mbiꞌ coꞌ ndyoo ner no coꞌ ndyoo naa loo mèn coꞌ nqueltàa loon leꞌn ciuda Efes par lab mbiꞌa cart ndxèꞌ loo mèn coꞌ nqueltàa loon leꞌn ciuda Efes. Guuz no bluꞌ loo mèna loo yeꞌs ndxèꞌ: Taandxèꞌ gunee Jesucrist loon, Jesucrist coꞌ nden gaz conꞌ coꞌ ñaa xal mbèelhuiꞌ con yaꞌ Jesucrist coꞌ nac ladlì. Gunèen ngue tee Jesucrist xtauꞌ gaz candiler or, ne. Gunee Jesucrist loon:
\p
\v 2 ―Naneequen xal nzi tee ban guꞌ. No naneen axta arid nagàn ndxàca loo guꞌ no nxec yèe guꞌ no nchaꞌlaꞌs guꞌ coꞌseꞌ ndxàc chol yaltìi loo guꞌ. No naneen leꞌ guꞌ neꞌndaꞌde lugar ngòo mèn yeꞌrsinꞌ làth guꞌ. No naneen huen huen mblaꞌs guꞌ no mbli laꞌs guꞌ ñeeneꞌ chéꞌ, lìcqueꞌ, nac mèn coꞌ mbez nde xoꞌf zinꞌ mèn xal mèn coꞌ ndxeꞌ diꞌs cheꞌn Jesucrist. No mtéꞌth guꞌ no mdaꞌ guꞌ cuent leꞌ mèna nac mèn gutyèꞌ.
\v 3 Naneen leꞌ guꞌ nchaꞌlaꞌsqueꞌ no naneen leꞌ guꞌ ndyactìiqueꞌ no anzeꞌf ngue xoꞌf zinꞌ guꞌ cón chenen. No axta nalleꞌ tarte tyoo xàꞌ lezoꞌ guꞌ no tarte yitac lezoꞌ guꞌ loo cón chenen.
\v 4 Per nzo thìb conꞌ coꞌ indyublasten no coꞌ indxòode lezon ngue li guꞌ làth guꞌ coꞌ nac leꞌ guꞌ ya inqueꞌde lezoꞌ ñèe guꞌ hues xtàa guꞌ xal mqueꞌ lezoꞌ guꞌ ñèe guꞌ hues xtàa guꞌ coꞌseꞌ mtlo guꞌ, mqueltàa guꞌ loo cón chenen.
\v 5 Cona, ngue niin loo guꞌ: Fteꞌ yéc guꞌ no fteꞌ lezoꞌ guꞌ xá mod mqueꞌqueꞌ lezoꞌ guꞌ gunèe guꞌ mèn coꞌ ndxac hues xtàa guꞌ loo cón cheꞌn Jesucrist coꞌ mtlo mbli guꞌ coꞌseꞌ mtlo guꞌ ngòo guꞌ loo cón chenen. Per nalleꞌ blàa yéc guꞌ no blàa lezoꞌ guꞌ no fseꞌ guꞌ mod coꞌ ndxàp guꞌ loo Diox. Gure li guꞌ xalqueꞌ nac coꞌ mtlo mbli guꞌ loo cón chenen coꞌseꞌ mtlo guꞌ, ngòo guꞌ loo cón chenen. Tac neꞌ yiloa, chàa, galen no gacloon ñèen guꞌ par techeen candiler, coꞌ nee diꞌs, nac guꞌ loon par, por derech, techeen guꞌ par más huen neꞌtolode yilaꞌs mèn loon leꞌn ciuda Efes. Tataa li non guꞌ cheleꞌ guꞌ neꞌseꞌde mod yeꞌrsinꞌ coꞌ ndxàp guꞌ loo Diox nalleꞌ xal ngue niin loo guꞌ ndxèꞌ.
\v 6 Per mastaleꞌ tataa ngue li guꞌ, nzo thìb conꞌ coꞌ ngue li guꞌ coꞌ nzo favor cheꞌn guꞌ no coꞌ ndli par ndxòo lezon cón cheꞌn guꞌ. Conꞌa nac leꞌ guꞌ ndxeclooqueꞌ ñèe mèn coꞌ nqueltàa con guꞌ coꞌ neꞌ lèe nicolait. Na, ne, ndxecloo ñèen mèna.
\v 7 Guꞌ coꞌ nqueltàa loo cón cheꞌn Diox coꞌ ndub nza no coꞌ ndxaaꞌd diꞌs, bìn guꞌ diꞌs coꞌ ndluꞌ Xpii Natúꞌ cheꞌn Diox loo mèn coꞌ nqueltàa loon chol lugar. Mbluꞌ Xpii Natúꞌ cheꞌn Diox loo mèn taandxèꞌ:
\p ―Ryete guꞌ coꞌ li gan ryo xàꞌ loo cón cheꞌn xab izlyoꞌ, loo guꞌa tan lugar par yòo ban no guꞌ daa thidtene coꞌteꞌ nzo non Diox.
\s Diꞌs coꞌ mnibeꞌ Jesucrist loo Juàn par queꞌ Juàn yeꞌs loo mèn coꞌ nqueltàa loo cón cheꞌn Diox leꞌn yèez Smirn.
\p
\v 8 Tolo gunee Jesucrist loon, ne: Juàn, fqueꞌ yeꞌs loo mbiꞌ coꞌ ndyoo ner no coꞌ ndyoo naa loo mèn coꞌ nqueltàa loo cón chenen leꞌn yèez Smirn par lab mbiꞌ cart ndxèꞌ loo mèn coꞌ nqueltàa loon leꞌn yèez Smirn. Guuz no bluꞌ loo mèna loo yeꞌs coꞌ queꞌl loo mèna taandxèꞌ: Taandxè gunee Jesucrist loon par tan cuent loo guꞌ loo yeꞌs ndxèꞌ. Jesucrist gunee loon nzoleꞌ Jesucrist ndooreꞌ cue alux conꞌ no nzoqueꞌ Jesucrist coꞌseꞌ yilo lyux alux conꞌ, Jesucrist coꞌ nguthqueꞌ no mbere Jesucrist, ngro xban Jesucrist tedib vez.
\v 9 No gunee Jesucrist loon: Daa naneequeꞌ xal nzi tee ban guꞌ. Naneen coꞌ huen huen leꞌ guꞌ ngue xecpeꞌ loo cón chenen no nzi tyactìi guꞌ. No nonen nagueꞌs yaꞌ guꞌ no nagueꞌs nii guꞌ nzi tee guꞌ loo izlyoꞌ ndxèꞌ. Per naneen ndxàp guꞌ huax conꞌ ndac loo béꞌ. Naneen leꞌ mèn coꞌ mbez nac mèna bin mèn nación Israel, ñii yèe ñii tìi mèna cón cheꞌn guꞌ. Per indluꞌde mèna nac mèna mèn nación Israel por conꞌ yeꞌrsinꞌ coꞌ ndli mèna. Ndxeꞌlequeꞌ, naneequen nacpeꞌ mèna mèn coꞌ ndli conꞌ ndlyaꞌs Mebizya.
\v 10 Neꞌzyebte guꞌ loo conꞌ coꞌ tyactìi guꞌ leꞌn tiemp ndxèꞌ. Tac Mebizya li par co mèn ndxep guꞌ leziꞌf par ñee Mebizya ñeeneꞌ chéꞌ tli Mebizya gan par láꞌ guꞌ cón cheꞌn Crist no par bixyath guꞌ par gàc guꞌ mèn yeꞌrsinꞌ tedib vez. Gàc conꞌa loo guꞌ nagabte huiz. Per guꞌ coꞌ toloqueꞌ cue nèe loo cón cheꞌn Diox no coꞌ neꞌyitacte lezoꞌ loo cón cheꞌn Diox axta gath guꞌ, loo guꞌa daa taꞌ lugar yòo ban no guꞌ Diox coꞌ gàc loo guꞌ xal thìb conꞌ ndac coꞌ mbli guꞌ gan.
\v 11 Guꞌ coꞌ nqueltàa loo cón cheꞌn Diox, guꞌ coꞌ ndub nza no coꞌ ndxaaꞌd diꞌs, bìn guꞌ diꞌs coꞌ ndluꞌ Xpii Natúꞌ loo mèn coꞌ nqueltàa loon chol lugar. Mbluꞌ Xpii Natúꞌ cheꞌn Diox loo mèna taandxèꞌ:
\p ―Ryete guꞌ coꞌ li gan ryo xàꞌ loo cón cheꞌn xab izlyoꞌ, loo guꞌa yende chó yalquìi gàc par ryo xàꞌ guꞌ loo Diox thidtene par tyactìi guꞌ coꞌseꞌ gath guꞌ.
\s Diꞌs coꞌ mnibeꞌ Crist loo Juàn par queꞌ Juàn yeꞌs loo mèn coꞌ nqueltàa loo cón cheꞌn Diox leꞌn yèez Perg.
\p
\v 12 Tolo gunee Crist loon, ne: Juàn, fqueꞌ yeꞌs loo mbiꞌ coꞌ ndyoo ner no coꞌ ndyoo naa loo mèn coꞌ nqueltàa loo cón chenen leꞌn yèez Perg. Guuz loo mèna loo yeꞌs coꞌ queꞌl xal ngue niin lool ndxèꞌ:
\p ―Taandxèꞌ gunee Jesucrist coꞌ ngue no thìb spad coꞌ nalen loo ryop lad par queꞌen yeꞌs ndxèꞌ loo guꞌ.
\v 13 Gunee Jesucrist loon: Daa naneequeꞌ xal nzi tee ban guꞌ. Naneen leꞌ guꞌ naban leꞌn thìb yèez coꞌteꞌ thidtenequeꞌ ndli mèna conꞌ coꞌ ndlyaꞌs Mebizya no conꞌ coꞌ nee lezoꞌ Mebizya. Per mastaleꞌ tataa ndli mèna, guꞌ ndli nèequeꞌ guꞌ loo cón chenen. No thidtenequeꞌ ndxelaꞌs guꞌ no ndxàp guꞌ yalxlaꞌs loon. Neꞌ neꞌ ngyathlaꞌs guꞌ cón chenen no neꞌ neꞌ ngláꞌ guꞌ cón chenen coꞌseꞌ ngòc huiz coꞌseꞌ mbeth mèn Antip coꞌ altant ndyoo nxoꞌf zinꞌ cón chenen coꞌ mdaꞌ cuent cón chenen. Mèn mbeth Antip làth guꞌ par nedrèꞌ leꞌn yèez Perg coꞌteꞌ ndli Mebizya coꞌ ndlyaꞌs Mebizya loo mèn.
\v 14 Per nzoqueꞌ ndxep conꞌ coꞌ indxòode lezon ngue li guꞌ par nedrèꞌ. Daa nanee leꞌ guꞌ nqueltàa no ndxep mèn coꞌ nac mèn xleyꞌ Balaam leꞌn yèez Perg. No indlyaꞌste mèna láꞌ mèna xleyꞌ Balaam. Balaam mquilꞌ thìb mbiꞌ coꞌ ngroꞌ lèe Balac póla par aseli Balac leꞌ mèn nación Israel angcue cuaꞌn xtol coꞌseꞌ hua mèna xít mèn no luaꞌ mèn coꞌ mbec mèn xal thìb gòn o ofrend loo chol mdoꞌ. No làth xtauꞌa, asembli Balac par li mèn nación Israel yalburrid no cuaꞌn mèna xinꞌ huan mèna.
\v 15 Lomisqueꞌ ne, naneen leꞌ guꞌ nqueltàa no mèn coꞌ neꞌyilode láꞌ xleyꞌ cheꞌn mèn xleyꞌ nicolait. Xleyꞌ mèna anzeꞌf ndxecloon ñèen.
\v 16 Por cona, ngue niin loo guꞌ: Fseꞌ guꞌ mod coꞌ ndxàp guꞌ. Blàa yéc guꞌ no blàa lezoꞌ guꞌ loo conꞌ yeꞌrsinꞌ coꞌ nzi tee li guꞌ. Tac neꞌ yiloa, chàa, gal neen máa guꞌ par nedrèꞌ no yoon con mèn xleyꞌ Balaam no con mèn xleyꞌ nicolait par tenꞌ mèna coꞌ lin loo mèna xal coꞌseꞌ ndenꞌ mèn yalnè coꞌseꞌ ndxaaꞌd spad lad mèn.
\v 17 Guꞌ coꞌ nqueltàa loo cón chenen, guꞌ coꞌ ndub nza no coꞌ ndxaaꞌd diꞌs, bìn guꞌ diꞌs coꞌ ndluꞌ Xpii Natúꞌ loo mèn coꞌ nqueltàa loon chol lugar. Mbez Xpii Natúꞌ:
\p ―Ryete guꞌ coꞌ li gan ryo xàꞌ loo cón cheꞌn xab izlyoꞌ, na li par que no guꞌ ryethe conꞌ ndac loo béꞌ par yende cón gàc coꞌ nde che loo guꞌ loo béꞌ. No lin par que no mèn coꞌ ryo xàꞌ loo cón cheꞌn xab izlyoꞌ thìb conꞌ coꞌ angtan coꞌ ante daa nanee cóna par que no mèna. Tataa lin loo mèna xal coꞌseꞌ ndaꞌ mèn thìb quèe nagus bèellequeꞌ loo thìb mèn. Loo quèea ndub thìb lèe mbiꞌ coꞌ yende chó non. Ante mèn coꞌ càayaꞌ quèea non chó mbiꞌ nac cheꞌn lèe coꞌ ndub loo quèea.
\s Diꞌs coꞌ mnibeꞌ Jesucrist loo Juàn par queꞌ Juàn yeꞌs loo mèn coꞌ nqueltàa loo cón cheꞌn Diox leꞌn yèez Tiatir.
\p
\v 18 Tolo gunee Jesucrist loon, ne: Juàn, fqueꞌ yeꞌs loo mbiꞌ coꞌ ndyoo ner no coꞌ ndyoo naa loo mèn coꞌ nqueltàa loo cón chenen leꞌn yèez Tiatir par lab mèn cart coꞌ queꞌl loo mèn coꞌ nqueltàa loon leꞌn yèez Tiatir. Guuz loo mèn loo yeꞌs ndxèꞌ coꞌ queꞌl loo mèn xal ngue niin lool ndxèꞌ:
\p ―Taandxèꞌ gunee Xganꞌ Diox loon, Xganꞌ Diox coꞌ ñaa ngudloo xal bèel coꞌ ndxetoo no coꞌ nquée xnìi nii xal nquée xnìi yiꞌf coꞌ mtembìi mèn.
\v 19 Daa naneequeꞌ xal nzi tee ban guꞌ. Naneen xá mod nqueꞌqueꞌ lezoꞌ guꞌ ñèe guꞌ hues xtàa guꞌ par nedrèꞌ no xá mod ndxàp guꞌ yalxlaꞌs no ndxelaꞌs guꞌ loo cón chenen. No naneen xá mod nxoꞌf zinꞌ guꞌ zinꞌ cón chenen loo mèn no xá mod nchaꞌlaꞌs guꞌ loo yaltìi coꞌ ndyactìi guꞌ por cón chenen. No naneen más ndxòo yéc guꞌ nalleꞌ par ndli guꞌ ryethe conꞌ ndxèꞌ leque coꞌseꞌ mtlo ngòo guꞌ loo cón chenen.
\v 20 Per nzo thìb conꞌ coꞌ indxòode lezon ngue li guꞌ por ndaꞌ guꞌ lugar nzo thìb xaꞌgot làth guꞌ, mastaleꞌ non guꞌ no nanee guꞌ iléꞌde nac conꞌ ngue li xaꞌgota làth guꞌ. Lalqueꞌ nac xaꞌgota xal thìb xaꞌgot coꞌ ngroꞌ lèe Jezabel coꞌ angngo ban póla. Xaꞌgot coꞌ ngo ban póla ngòc thìb xaꞌgot yeꞌrsinꞌtúb xalqueꞌ nac xaꞌgot coꞌ nzo làth guꞌ nalleꞌ. Tac xaꞌgot coꞌ nzo làth guꞌ ndxèꞌ mbez leꞌ xaꞌ ndeꞌth cón cheꞌn Diox. Per nquedìi xaꞌ mèn coꞌ nxoꞌf zinꞌ zinꞌ cón chenen por cón cheꞌn xleyꞌ coꞌ ndluꞌ xaꞌ. No ndli xaꞌ par mtlo mbix yéc mèn par li mèn yalburrid no cuaꞌn mèn xinꞌ huan mèn por cón cheꞌn xaꞌgota. No ndluꞌ xaꞌ loo mèn hua mèn xít mèn no luaꞌ mèn coꞌ mbec mèn xal thìb ofrend o gòn loo chol mdoꞌ. No tataa mod ncuaꞌn mèn xquin mèn no xtol mèn.
\v 21 Daa mda lugar loo xaꞌgota par belꞌqueꞌ lyàa yéc xaꞌ no belꞌqueꞌ lyàa lezoꞌ xaꞌ no seꞌ xaꞌ mod yeꞌrsinꞌ coꞌ ndxàp xaꞌ. Per indlyaꞌste xaꞌ lyàa yéc xaꞌ no lyàa lezoꞌ xaꞌ par seꞌ xaꞌ mod coꞌ ndxàp xaꞌ. Neꞌ neꞌ indlyaꞌs xaꞌ láꞌ xaꞌ par neꞌtolode li xaꞌ conꞌ zab coꞌ ndli xaꞌ.
\v 22 Per nalleꞌ lin par lyen thìb yíiz loo xaꞌgota par gaasuaꞌ xaꞌ loo lúnꞌ. No lomisqueꞌ, lin par tyactìi mèn coꞌ mbli yalburrid con xaꞌgota cheleꞌ mèna neꞌlyàade yéc no cheleꞌ mèna neꞌlyàade lezoꞌ loo conꞌ yeꞌrsinꞌ coꞌ ndli mèna no cheleꞌ mèna neꞌcuedte li xal ndli xaꞌgota.
\v 23 No guthen rye mèn coꞌ mdaꞌ lugar thìb lìte ngòo mèna loo xleyꞌ cheꞌn xaꞌgota par tataa mod ryete mèn coꞌ nqueltàa loo cón chenen, taꞌ mèna cuent leꞌ daa nanee no nonen conꞌ coꞌ ndli mèna xtùuz leꞌn lezoꞌ mèn. No lin par tetìin rye guꞌ coꞌ ngue li conꞌ yeꞌrsinꞌ. No lin par tolo gàc conꞌ ndac loo guꞌ, guꞌ coꞌ ngue li conꞌ ndac.
\v 24 Per loo tedib ned guꞌ coꞌ nqueltàa loon coꞌ nzo yèez Tiatir, coꞌ indyoo nquede loo xleyꞌ xaꞌgota no coꞌ tarte taꞌ cuent no coꞌ tarte ñee cón cheꞌn coꞌ mbez mèn coꞌ ngòo loo cón cheꞌn xaꞌgota coꞌ nac cón cheꞌnpeꞌ Mebizya coꞌ beꞌ nacasloo loo chol mèn, groꞌ xàꞌ guꞌ loo xaꞌgota con mèn coꞌ ngòo loo cón cheꞌn xleyꞌ xaꞌgota làth guꞌ. Conaꞌte no más ñibeꞌen loo guꞌ par li guꞌ.
\v 25 No maste ndlyazen leque guꞌ fquenap guꞌ loo conꞌ coꞌ nzi li guꞌ. No leque guꞌ fquenap guꞌ loo mod coꞌ nzi tee ban guꞌ loo cón chenen axta coꞌseꞌ gàc huiz coꞌseꞌ gal xin guꞌ.
\v 26 Ryete guꞌ coꞌ li gan ryo xàꞌ loo cón cheꞌn xab izlyoꞌ no guꞌ coꞌ ngue liqueꞌ conꞌ coꞌ ndxòo lezon no coꞌ ñibeꞌen loo guꞌ axta gath guꞌ, na ñibeꞌ leꞌ guꞌ ñibeꞌ loo mèn chol nación huiza
\v 27 xalqueꞌ mnibeꞌ xuden Diox loon par ñibeꞌen loo mèn chol nación dib athu loo izlyoꞌ. Tataa ñibeꞌen loo guꞌ par ñibeꞌ guꞌ loo mèn chol nación dib athu loo izlyoꞌ. No ñibeꞌen loo guꞌ ñibeꞌ yèepeꞌ guꞌ loo mèn chol nación dib athu loo izlyoꞌ par gàca coꞌseꞌ mèna neꞌtyalte tyubdiꞌs loo guꞌ, telux guꞌ mèna xal coꞌseꞌ ndléꞌ mèn thìb yàt coꞌseꞌ ndlàa mèn thìb ro var yiꞌf lad yàt.
\v 28 No lin par gàc conꞌ roo conꞌ xèn loo mèna. No lin quée xnìi mèna xal nquée xnìi mbèelhuiꞌ coꞌ ndlyen ndxáal xtilꞌ huiza coꞌseꞌ gal xin mèna.
\v 29 Guꞌ coꞌ nqueltàa loo cón cheꞌn Diox, coꞌ ndub nza no coꞌ ndxaaꞌd diꞌs, bìn guꞌ diꞌs coꞌ ndluꞌ Xpii Natúꞌ cheꞌn Diox loo mèn coꞌ nqueltàa loon chol lugar.
\c 3
\s Diꞌs coꞌ mnibeꞌ Jesucrist loo Juàn par queꞌ Juàn yeꞌs loo mèn coꞌ nqueltàa loo cón cheꞌn Diox leꞌn yèez Sard.
\p
\v 1 Tolo gunee Jesucrist loon, ne: Juàn, fqueꞌ yeꞌs loo mbiꞌ coꞌ ndyoo ner no coꞌ ndyoo naa loo mèn coꞌ nqueltàa loo cón chenen leꞌn yèez Sard par gab mbiꞌ loo mèna xal ngue niin lool ndxèꞌ:
\p ―Taandxèꞌ gunee Jesucrist coꞌ nzo Xpii Natúꞌ loo no coꞌ nden gaz conꞌ coꞌ ñaa xal mbèelhuiꞌ. Daa naneequeꞌ xal nzi tee ban guꞌ. Daa nanee leꞌ guꞌ pente ndxelaꞌs loon no pente non guꞌ no ndaꞌ guꞌ cuent cón chenen mastaleꞌ mbez guꞌ, no mbez taamas mèn, altant nzi guꞌ loo cón chenen.
\v 2 Nalas gure guꞌ no bdiꞌx xnìi yéc guꞌ no bdiꞌx xnìi lezoꞌ guꞌ. No bli nèe guꞌ guꞌ loo conꞌ coꞌ beꞌ ndxelaꞌs guꞌ loon. Tac casqueꞌ mbláꞌleꞌ guꞌ no mbyathlaꞌsleꞌ guꞌ xal mtlo mbli guꞌ coꞌseꞌ mtlo guꞌ, ngolaꞌs guꞌ loon. Ñeen leꞌ conꞌ coꞌ ngue li guꞌ inacte conꞌ nalì no conꞌ nambìi loo Diox coꞌ nac Diox daa.
\v 3 Fteꞌ lezoꞌ guꞌ xal nac coꞌ mtéꞌth guꞌ no coꞌ mbluꞌen loo guꞌ. Ftolo que tee li guꞌ conꞌa. No bli guꞌ par lyàa yéc guꞌ no lyàa lezoꞌ guꞌ par seꞌ guꞌ mod coꞌ ndxàp guꞌ. Cheleꞌ guꞌ neꞌgàcte mèn coꞌ yàꞌx xnìi yéc no coꞌ yàꞌx xnìi lezoꞌ par gàc guꞌ mèn nalas loon no loo cón chenen, nee guꞌ nee guꞌ. Tac neꞌ yiloa, chàa, gal neen máa guꞌ par nedrèꞌ xal coꞌseꞌ neꞌtaꞌde mèn cuent ndlyàa huanꞌ no xal coꞌseꞌ neꞌñeede mèn coyor lyàa huanꞌ liz mèn. Sya, ñee guꞌ xá ñaa cón gàc loo guꞌ.
\v 4 Mastaleꞌ tataa ndxàca loo guꞌ, nzoqueꞌ ndxep mèn leꞌn yèez Sard coꞌ nqueltàa no guꞌ. Mèna incuaꞌnte xquin no xtol par gàc mèna xal thìb conꞌ xin no thìb conꞌ cap loo Diox. Mèna que tee con daa loo béꞌ por nac mèna mèn nalì no mèn mambìi loon no loo Diox tac tataaqueꞌ ndxàal gàca loo mèna.
\v 5 Mèn coꞌ li gan ryo xàꞌ loo cón cheꞌn xab izlyoꞌ, mèna thidtene gàcqueꞌ mèn nalì no mèn nambìi loo béꞌ. No neꞌtonꞌten lèe mèna loo libr coꞌteꞌ ndub lèe mèn, mèn coꞌ yòo ban no Diox thidtene. Ndxeꞌlequeꞌ, daa taꞌ cuent loo Diox no loo angl cheꞌn Diox leꞌ mèna nac mèn cheꞌnpeꞌ daa.
\v 6 Guꞌ coꞌ nqueltàa loo cón cheꞌn Diox, guꞌ coꞌ ndub nza no coꞌ ndxaaꞌd diꞌs, bìn guꞌ diꞌs coꞌ ndluꞌ Xpii Natúꞌ loo mèn coꞌ nqueltàa loo cón cheꞌn Diox chol lugar.
\s Diꞌs coꞌ mnibeꞌ Jesucrist loo Juàn par queꞌ Juàn yeꞌs loo mèn coꞌ nqueltàa loo cón cheꞌn Diox leꞌn yèez Filadelf.
\p
\v 7 Tolo gunee Jesucrist loon: Juàn, fqueꞌ yeꞌs loo mbiꞌ coꞌ ndyoo ner no coꞌ ndyoo naa loo mèn coꞌ nqueltàa loo cón chenen leꞌn yèez Filadelf par lab mbiꞌ cart ndxèꞌ loo mèn coꞌ nqueltàa loon leꞌn yèez Filadelf. Guuz loo mèna xal ngue niin lool ndxèꞌ:
\p ―Taandxèꞌ gunee Jesucrist loon, Jesucrist coꞌ nac xaꞌ natúꞌ no coꞌ nac lìcpeꞌ Jesucrist coꞌ ndxàp rye loothe conꞌ roo no conꞌ xèn laꞌs nii Jesucrist no laꞌs yaꞌ Jesucrist par ñibeꞌ Jesucrist loo ryethe conꞌ loo béꞌ no loo izlyoꞌ, Jesucrist coꞌ nac thidte xaꞌ coꞌ ñibeꞌ loo mèn par thìb lìte yòo mèn loo béꞌ loo Diox no coꞌ ñibeꞌ loo taamas mèn par neꞌyòo ban node mèna Diox loo béꞌ:
\v 8 Daa naneequeꞌ xal nzi tee ban guꞌ. Daa mbli mxyalꞌ ned mxyalꞌ yóꞌ loo guꞌ par ya lo guꞌ yalbàn no teꞌth guꞌ loo taamas mèn cón chenen. No mblin par yende chó mèn tauꞌ ned tauꞌ yóꞌ loo guꞌ par caꞌ mèna loo guꞌ par neꞌtolode co guꞌ yalbàn cón chenen. Mastaleꞌ beꞌteꞌ ndxàp guꞌ fuerz no beꞌteꞌ ndxác guꞌ co guꞌ yalbàn no teꞌth guꞌ loo mèn cón chenen, naneen leꞌ guꞌ ndliqueꞌ cas diꞌs ndac coꞌ mtanꞌen diꞌs loo guꞌ no neꞌ neꞌ tar càꞌ diꞌs guꞌ lèen, coꞌ nac daa.
\v 9 Por cona, lin thìb conꞌ. Lin leꞌ mèn coꞌ nqueltàa loo cón cheꞌn Mebizya, coꞌ nac mèn gutyèꞌ, coꞌ mbez leꞌ mèna nac mèn nación Israel per ilìcte nac mèna mèn nación Israel, loo mèna na li leꞌ mèna tyub xib loo guꞌ par ñee mèna no taꞌ mèna cuent leꞌ daa nqueꞌqueꞌ lezoꞌ ñèen guꞌ.
\v 10 Guꞌ mchaꞌlaꞌs no mxec yèe guꞌ loo chol yalquìi xal mnibeꞌen loo guꞌ. Por cona, daa neꞌláꞌyaꞌde guꞌ. Quenapen guꞌ coꞌseꞌ gàc tiemp li Diox conꞌ ryes loo mèn no tetìi Diox mèn axta plóthe, mèn coꞌ naban dib athu loo izlyoꞌ, mèn coꞌ neꞌngalaꞌste loo Diox no loo cón cheꞌn Diox.
\v 11 Huiꞌ guꞌ nexa. Daa neꞌlyenꞌte par gal xin guꞌ. Ftolo que tee ban ndac guꞌ loo cón chenen xal mtéꞌth guꞌ no xal non guꞌ cón chenen par gàca loo guꞌ yende chó mèn cuee càꞌ guꞌ par li mèna gan neꞌyòo ban node guꞌ Diox thidtene coꞌseꞌ gath guꞌ.
\v 12 Mèn coꞌ li gan ryo xàꞌ loo cón cheꞌn xab izlyoꞌ, na li leꞌ mèna yòo loo Diox loo béꞌ par thidtene yo no mèna Diox. No lin leꞌ mèna yanꞌ loo Diox xal thìb pilar o nac mèna xal nii arc cheꞌn thìb yòobéꞌ coꞌ yende chó cuin no coꞌ yende chó cobii. No lin par tyub lèe mèna leꞌ mèna nac mèn cheꞌnpeꞌ Diox. No lin leꞌ mèna gàc mènpeꞌ ciuda Jerusalén coꞌ cue yiloa coꞌ li Diox ryoꞌ loo béꞌ par lyàa ciudaa loo izlyoꞌ. No lin leꞌ mèna yo no daa thidtene par thidtenequeꞌ gàc conꞌ roo conꞌ xèn loon con mèna.
\v 13 Guꞌ coꞌ nqueltàa loo cón cheꞌn Diox, guꞌ coꞌ ndub nza no coꞌ ndxaaꞌd diꞌs, bìn guꞌ diꞌs coꞌ ndluꞌ Xpii Natúꞌ loo mèn coꞌ nqueltàa loon chol lugar.
\s Diꞌs coꞌ mtelꞌ Jesucrist loo mèn coꞌ nqueltàa loo cón cheꞌn Diox leꞌn yèez Laodice.
\p
\v 14 Tolo gunee Jesucrist loon, ne: Juàn, fqueꞌ yeꞌs loo mbiꞌ coꞌ ndyoo ner no coꞌ ndyoo naa loo mèn coꞌ nqueltàa loo cón chenen leꞌn yèez Laodice par lab mbiꞌ cart ndxèꞌ loo mèn coꞌ nqueltàa loon leꞌn yèez Laodice. Guuz loo mèna cón cheꞌn diꞌs ndxèꞌ xal ngue niina lool ndxèꞌ:
\p ―Taandxèꞌ gunee Jesucrist loon, Jesucrist coꞌ nac mbiꞌ nalì no mbiꞌ nambìi coꞌ inquedìide. Jesucrist nacpeꞌ thìb xaꞌ coꞌ nalì ndaꞌ cuent. No diꞌs coꞌ ndaꞌ Jesucrist cuenta nac diꞌs lìcpeꞌ. Por cón cheꞌn Jesucrist mblec Diox no mtoxcuaꞌ Diox ryethe conꞌ coꞌ nzo loo béꞌ no ryethe conꞌ coꞌ nziriꞌ loo izlyoꞌ.
\v 15 Daa naneequeꞌ xal nzi tee ban guꞌ. Naneen leꞌ guꞌ indxelaꞌs ndacte loon coꞌ huenlequeꞌ. No naneen imbede guꞌ altant loo cón chenen par luꞌ guꞌ cón chenen loo mèn. Alithe nziriꞌ guꞌ loo cón chenen. Indyóode guꞌ cón chenen. ¡Oj, chéꞌ coꞌ gàc guꞌ mèn coꞌ altant cue loo cón chenen, huen! O más huen ndoo lìte ryoꞌ guꞌ loo cón chenen thidtene. Nee teeca.
\v 16 Per com leꞌ guꞌ alithe nziriꞌ loo cón chenen, no indlide guꞌ cas loo cón chenen, neꞌ neꞌ inac guꞌ mèn coꞌ gab thidtene láꞌ guꞌ cón chenen, no neꞌ neꞌ inac guꞌ mèn coꞌ gab altant tyoo guꞌ loo cón chenen, leque daa li thidtene goꞌen guꞌ làth mèn coꞌ nzo loo cón chenen xal coꞌseꞌ ndli mal conꞌ nduhua mèn lezoꞌ mèn no mbere lezoꞌ mèn conꞌ nduhua mèn. Tataa lin par goꞌen guꞌ loo cón chenen thidtene.
\v 17 Guꞌ mbez anzeꞌf ndxác guꞌ non guꞌ cón chenen. No mbez guꞌ huen huen mtéꞌth guꞌ cón chenen. No mbez guꞌ anzeꞌf huen nziriꞌ guꞌ loo cón chenen. No mbez guꞌ yende chó loo conꞌ ndxetoo guꞌ loo cón chenen. Per neꞌtaꞌde guꞌ cuent leꞌ loo cón chenen nac guꞌ xal mèn coꞌ nzi tee yilo yilux, no xal mèn coꞌ nalyat ñaa coꞌ ndyac yaltìi, no xal mèn sieu, no xal mèn coꞌ nquée mbii yéc coꞌ nzi tee che.
\v 18 Por cona, ngue coꞌxen loo guꞌ thìb lìte yòo guꞌ loo cón chenen par huen téꞌth guꞌ. No tyubdiꞌs guꞌ coꞌ niin loo guꞌ par gàc guꞌ mèn nalì no mèn nambìi loon xal mèn coꞌ ndxoc xab larꞌ nagus bèellequeꞌ par neꞌcuede guꞌ loon xal mèn coꞌ nzi tee che par tataa mod luꞌ guꞌ nthyonqueꞌ guꞌ ñèe guꞌ daa. No bnaꞌb guꞌ loon par lin par tyub xnìi yéc guꞌ no tyub xnìi lezoꞌ guꞌ loo cón chenen.
\v 19 Daa ngyoo mèn no ncoꞌxen mèn, mèn coꞌ nqueꞌ lezon ñèen. Cóna, ndlyazen ndxàal gàc guꞌ mèn coꞌ tyoo altant loo cón chenen no mèn coꞌ tenꞌ cón chenen no mèn coꞌ taꞌ cuent cón chenen. No ndlyazen, por derech, blàa yéc guꞌ no blàa lezoꞌ guꞌ par zyeꞌ mod yeꞌrsinꞌ coꞌ ndxàp guꞌ loo cón chenen par ned nzo guꞌ ndxèꞌ.
\v 20 Huiꞌ guꞌ nexa. Daa nac xal mèn coꞌ ngue bez mèn ro puert liz mèn. Ngue beden par gòn guꞌ ron par tataa mod xalꞌ guꞌ lezoꞌ guꞌ no xalꞌ guꞌ xtùuz guꞌ par tyal guꞌ ñibeꞌen loo guꞌ xal ndxàal gàca. No cheleꞌ guꞌ ndxòn diꞌs coꞌ ngue niin loo guꞌ ndxèꞌ, leꞌ sya, thidte gàc naꞌ loo cón chenen.
\v 21 Mèn coꞌ li gan ryo xàꞌ loo cón cheꞌn xab izlyoꞌ, daa li gàc loo mèna thidte yo no mèna daa coꞌseꞌ gàc huiz ñibeꞌen loo alux conꞌ. Ndlyazen tataa gàca loo mèna xalqueꞌ coꞌseꞌ ngolo mblin gan loo Mebizya coꞌseꞌ mque teeꞌen loo izlyoꞌ. Por cona, nalleꞌ thidte nac daa con xuden Diox loo alux conꞌ coꞌ ñibeꞌ xuden Diox.
\v 22 Guꞌ coꞌ nqueltàa loon coꞌ ndxòn diꞌs no coꞌ ndxaaꞌd diꞌs, bìn guꞌ diꞌs coꞌ ñii Xpii Natúꞌ cheꞌn Diox loo guꞌ.
\c 4
\s Juàn ngue luꞌ leꞌ alux mèn coꞌ nzo loo béꞌ loo Diox, mèna ndyub xib loo Diox no ncòoꞌ mèna yéc mèna loo Diox.
\p
\v 1 Ngolo mbluꞌ Jesucrist loon par mqueꞌen yeꞌs loo mèna, ale mxaquen mdoo xalꞌ thìb puert loon loo béꞌ par mbuiꞌen leꞌn béꞌ. No, chàa, mbìnen thìb diꞌs coꞌ mxaquen mbyèn xal coꞌseꞌ cabii ncuez mèn thìb trompet. Mbìnen gunee thìb mbiꞌ loon coꞌ ngòc leque mbiꞌ coꞌ nerlequeꞌ gunii loon. Gunee mbiꞌ loon:
\p ―Fquée trèꞌ, Juàn, par luꞌen ryethe conꞌ coꞌ gàc loo mèn loo izlyoꞌ leꞌn tiemp coꞌ yiꞌth nque.
\p
\v 2 Leque hora, mbli Xpii Natúꞌ cheꞌn Diox par, chàa, nguan leꞌn loo béꞌ. No mbli Xpii Natúꞌ cheꞌn Diox mbuiꞌen thìb asient coꞌteꞌ ndyub Diox coꞌteꞌ ñibeꞌ Diox leꞌn loo béꞌ. No gunèen ndub thìb mbiꞌ loo asienta.
\v 3 Mbiꞌ coꞌ ndub loo asienta, ante ndxaaꞌd xnìi mbiꞌa no ndxaaꞌd bèel mbiꞌa xal ndxaaꞌd xnìi no ndxaaꞌd bèel thìb loo quèe coꞌ lèe quèe jasp no xal tedib loo quèe coꞌ nquéeguèꞌ xnìi coꞌ lèe quèe cornalin. Dib vuelt loo asient coꞌteꞌ ndub Diox gunèen ndoo thìb arc mbèel quiꞌth. Arc coꞌ nac mbèel quiꞌtha ndxaaꞌd xnìi no ndxaaꞌd bèel xal ndxaaꞌd bèel no xal ndxaaꞌd xnìi loo thìb loo quèe coꞌ lèe quèe esmerald.
\v 4 Gunèen nziriꞌ taagal fthap asient dib vuelt loo asient coꞌteꞌ ndub Diox. Loo asienta ndub thìb thìb mèngool coꞌ ngòc gal fthap mèngool. Mèngoola noc xab ampurte larꞌ nagus bèellequeꞌ. No gunèen nziꞌf anabte coron or yéc rye mèngoola.
\v 5 No gunèen ndxàꞌx bèel gundi coꞌteꞌ ndub mbiꞌ loo asient coꞌ ndoo xtauꞌ taamas asient. Mbìnen ngulàa gundi no ndxas ndlyaꞌb gundii. No gunèen nziꞌf yol gaz manoj yeꞌrbèel loo asient coꞌ ndoo xtauꞌ taamas asient. Gaz manoj yeꞌrbèel coꞌ nziꞌf yola ndluꞌ cón cheꞌn Xpii Natúꞌ cheꞌn Diox.
\v 6 Gunèen, ne, coꞌteꞌ ndoo asienta nziriꞌ thìb conꞌ coꞌ ñaa xal ñaa níttóꞌ coꞌ xèe nziriꞌ coꞌ ndriꞌth xnìi par xís xal vidr.
\p Xtauꞌthe conꞌ coꞌ ñaa xal ñaa níttóꞌa no dib vuelt coꞌteꞌ ndoo asient coꞌ mbuiꞌen nera mxaquen nziriꞌ thap conꞌ coꞌ ñaa xal thap loo máꞌ coꞌ naban. Máꞌa nzib ngudloo ned loo máꞌ no ned xís máꞌ. Dib lad máꞌa nzib ngudloo máꞌ.
\v 7 Ner máꞌ ñaa loo xal ñaa thìb mbeeꞌs coꞌ ndoo yis lox yen. Leꞌ mbryop máꞌ na, ñaa loo xal ñaa thìb laa ngon. Leꞌ mbyon máꞌ na, ñaa loo xal ñaa loo thìb mbiꞌ. Leꞌ dyap máꞌ na, ñaa loo xal ñaa thìb mtii coꞌ nxobii.
\v 8 Dyap loo conꞌ coꞌ ñaa xal máꞌ coꞌ nabana, thìb thìb máꞌa mque no xop xílꞌ. Par leꞌn xílꞌ máꞌ no par xís xílꞌ máꞌ gunèen nzib ngudloo máꞌ. No ze no yálꞌ thidtene mbez máꞌ:
\pi1 Anzeꞌf natúꞌ nac Uꞌ, Tad Diox, Uꞌ coꞌ ndxàp rye loothe conꞌ roo no conꞌ xèn laꞌs nii Uꞌ no laꞌs yaꞌ Uꞌ, Uꞌ coꞌ thidtenequeꞌ nzo.
\p
\v 9 No cadqueꞌ coꞌseꞌ mbez dyap máꞌ coꞌ nabana, mbez máꞌ: Conꞌ roo conꞌ xèn nac Uꞌ, Tad. No beꞌ taaguèꞌ mbez máꞌ:
\pi1 Ante loo Uꞌ tolo gàc conꞌ guryath no conꞌ guryèn.
\m Mbez máꞌ, ne:
\pi1 Diox quix non Uꞌ
\m loo Diox coꞌ ndub loo asient coꞌ ndoo xtauꞌ loo rye asient, Diox coꞌ thidtenequeꞌ naban.
\v 10 Lomisqueꞌ tiemp, ne, ryete gal fthap mèngool coꞌ ndub loo gal fthap asient coꞌ ndoo dib vuelt loo asient coꞌ ndoo xtauꞌa, ndyub xib loo Diox coꞌ ndub loo asient coꞌ ndoo xtauꞌa, Diox coꞌ thidtene naban. No mbec mèngoola coron coꞌ ndub yéc mèngoola xànꞌ nii Diox coꞌ ndub loo asienta. No mbez mèngoola loo Diox:
\pi1
\v 11 Tad, Uꞌ coꞌ nac Diox nuꞌ, thidte Uꞌ nac Diox coꞌ ndxàal ñee mèn loo leꞌ Uꞌ nac Diox roo no Diox xèn. No loo Uꞌ ndxàal ñee mèn diꞌs coꞌ nac diꞌs guryath no diꞌs guryèn. No thidte Uꞌ nac Diox coꞌ ndxàalpeꞌ ñibeꞌ loo alux conꞌ coꞌ mblec Uꞌ xalqueꞌ ndli Uꞌ. Tac Uꞌ mbli par mblec Uꞌ no mxènꞌ Uꞌ izlyoꞌ no ryethe conꞌ coꞌ nziriꞌ loo izlyoꞌ no coꞌ ndxúꞌ loo béꞌ. No mbli Uꞌ ryethe conꞌ coꞌ nac izlyoꞌ no ryethe conꞌ coꞌ nac béꞌ xal gunee lezoꞌ Uꞌ.
\c 5
\s Juàn ngue taꞌ cuent mxyoꞌf loo thìb libr no mxyoꞌf loo thìb mbacxilꞌ yenꞌ loo Juàn.
\p
\v 1 Lomisqueꞌ mxaquen ne, ale mxyoꞌf loo loon leꞌ mbiꞌ coꞌ mdub loo asienta nzo thìb roll yeꞌs coꞌ nadùuz yaꞌ mbiꞌ coꞌ nac ladlì. Loo yeꞌsa ndub diꞌs par xís yeꞌs no ndub diꞌs par leꞌn yeꞌs. No natedóꞌ yeꞌs coꞌ nadùuza con gaz leꞌ cint coꞌ lèe flej.
\v 2 No gunèen thìb angl coꞌ nac thìb angl roo angl xèn. Angla mnibdiꞌs loo rye mèn coꞌ nzi tya. Cabii mnibdiꞌs angl:
\p ―¿Chó thìb guꞌ ndxàal xac cint coꞌ natedóꞌ lad yeꞌs coꞌ nadùuz coꞌ nzo yaꞌ xaꞌ coꞌ ndub loo asient baꞌ, yey?
\p
\v 3 Per neꞌ loo béꞌ, no neꞌ loo izlyoꞌ, no neꞌ leꞌn yeꞌrbìil neꞌngode mèn coꞌ ngác nxac cint coꞌ natedóꞌ lad yeꞌs coꞌ nadùuza. No neꞌ neꞌ ngác mèn huiꞌ mèn loo yeꞌsa, ne, tant mzyeb mèn cón cheꞌn conꞌa.
\v 4 Leꞌ daa na, neꞌ tíꞌ yéquen no neꞌ tíꞌ lezon mbínen tac yende chó ngác nxac cint lad yeꞌs coꞌ nadùuza. Neꞌ neꞌ yen chó gác lab yeꞌsa. Neꞌ neꞌ yen chó gác huiꞌ loo yeꞌsa.
\v 5 Sya, thìb mèngool coꞌ nzo làtha gunee loon:
\p ―Neꞌtolode gónꞌl, Juàn. Mbiꞌ coꞌ neꞌ tedib lèe xal lèe Mbeeꞌs, mbiꞌ coꞌ nac bin cheꞌn thìb mbiꞌ coꞌ ngroꞌ lèe Judá coꞌ mbloj msiꞌ bin coꞌ nac thìb ned mèn coꞌ nac cheꞌn mèn nación Israel, mbiꞌa nac bin cheꞌn thìb mbiꞌ coꞌ ngroꞌ lèe David coꞌ ngòc rey póla. No nac mbiꞌ thìb mbiꞌ roo no thìb mbiꞌ xèn. Mbiꞌa mblileꞌ gan par mbli Diox ndxàp mbiꞌ conꞌ laꞌs nii mbiꞌ no laꞌs yaꞌ mbiꞌ par gác mbiꞌ choꞌ mbiꞌ gaz leꞌ cint coꞌ lèe flej coꞌ natedóꞌ yeꞌs coꞌ nadùuz baꞌ. No yiloa xalꞌ mbiꞌ loo yeꞌs baꞌ par tlo li mbiꞌ gàc yaltìi loo mèn loo izlyoꞌ.
\p
\v 6 Látha, mxaquen gunèen ndoo thìb mbacxilꞌ yenꞌ loo asient coꞌ ndoo xtauꞌthe loo rye mèngoola no loo dyap máꞌ coꞌ nabana. Mbacxilꞌa nee diꞌs nac Jesucrist. Mxaquen ale ñaa mbacxilꞌa xal ñaa mbacxilꞌ coꞌ mbeth mèn no coꞌ ngro xban tedib vez. Mxaquen leꞌ yéc mbacxilꞌa ndub gaz cach. No mxaquen nziꞌf gaz ngudloo mbacxilꞌ lad yéc mbacxilꞌ. Per rye gaz ngudloo mbacxilꞌa, coꞌ nac Jesucrist coꞌ mbyúꞌ loo loon, nee diꞌs ndluꞌ cón cheꞌn Xpii Natúꞌ cheꞌn Diox coꞌ mtelꞌ Diox loo izlyoꞌ.
\v 7 Gunèen ngo che mbacxilꞌ coꞌ nac yub Jesucrist. Ngua mbacxilꞌ, coꞌ nac Jesucrist, coꞌteꞌ ndub Diox coꞌ ndub loo asient coꞌ ndoo xtauꞌthe loo rye mèna. Mxen Jesucrist yeꞌs coꞌ nadùuz coꞌ nzo yaꞌ Diox ladli.
\v 8 Coꞌseꞌ ngolo mxen Jesucrist yeꞌs coꞌ nadùuza, dyap máꞌ coꞌ naban coꞌ nziriꞌa no ryete gal fthap mèngool coꞌ nziriꞌa mdub xib loo Jesucrist. Nde nxonꞌ, thìb thìb mèngool nden arp. No ngue no thìb thìb mèngoola thìb loo cop or yaꞌ mèngoola. Leꞌn cop ora mzyè duꞌr yalꞌ, coꞌ nee diꞌs, nac diꞌs coꞌ mbez mèn loo Diox coꞌseꞌ mbez mèn Diox, mèn coꞌ nzo loo cón cheꞌn Diox.
\v 9 No mbilꞌ ro rye mèna thìb himn cub coꞌ nac diꞌs ndxèꞌ:
\pi1 Thidte Uꞌ coꞌ nac Tad Jesucrist nac xaꞌ coꞌ ndxàal tyen yeꞌs coꞌ nadùuz ndxèꞌ no xac Uꞌ rye gaz leꞌ cint coꞌ natedóꞌ yeꞌsa. Tac mèn mbeth Uꞌ. No con ren ladpeꞌ Uꞌ coꞌ mxyo coꞌseꞌ mbeth mèn Uꞌ, con rena mxiꞌ Uꞌ nuꞌ loo conꞌ ryes no mbláꞌ Uꞌ nuꞌ par ngòc nuꞌ mèn coꞌ ngòoleꞌ loo cón cheꞌn Diox, nuꞌ co nac mèn chol bin, no coꞌ nac mèn coꞌ ndyoodiꞌs chol diꞌstèe, no coꞌ nac mèn chol nación.
\pi1
\v 10 Mbli Uꞌ par nac nuꞌ mèn nacionpeꞌ Uꞌ par ñibeꞌ Uꞌ loo nuꞌ. No mbli Uꞌ nac nuꞌ mèn coꞌ mbez conꞌ roo no conꞌ xèn no conꞌ natúꞌ nac Diox loo mèn. Nac nuꞌ mèn coꞌ mbez conꞌ roo no conꞌ xèn no conꞌ natúꞌ loo Diox, ne. Tataa mod nxoꞌf zinꞌ nuꞌ zinꞌ coꞌ mxoꞌf zinꞌ Uꞌ loo nuꞌ. Ndli nuꞌ sirv loo Uꞌ, Tad. No ñibeꞌ no nuꞌ Uꞌ loo izlyoꞌ yiloa.
\p
\v 11 Ngoloa, chàa, gunèen huax angl. No mbìnen diꞌs coꞌ gunii rye angla. Angla ngureriꞌ gax coꞌteꞌ ndoo ner asient coꞌteꞌ ndub Diox, coꞌ nee diꞌs, dib vuelt ned xís rye gal fthap mèngool coꞌ nzi ndub no ned xís dyap máꞌ coꞌ nabana. Angl coꞌ ngureriꞌa ngòc anglléyꞌ coꞌ yende chó mèn ngác ndlab.
\v 12 Cabii mbez rye angla, ne:
\pi1 Loo Jesucrist coꞌ ngòc xal mbacxilꞌ coꞌ mbeth mèn, loo Jesucrist ndxàal ñibeꞌ Diox par ñibeꞌ Jesucrist loo alux conꞌ. No ndxàal gàc cheꞌnpeꞌ Jesucrist ryethe conꞌ coꞌ nziriꞌ. No ndxàal gàc cheꞌnpeꞌ Jesucrist ryethe conꞌ coꞌ ndxác Diox no ryethe conꞌ coꞌ ndxác Diox ndli Diox. No loo mbacxilꞌ coꞌ nac Jesucrist ndxàal li ryethe mèn, no ryethe angl, no ryethe taamas conꞌ coꞌ nzo loo béꞌ no coꞌ nziriꞌ loo izlyoꞌ par gàc conꞌ guryath no conꞌ guryèn loo Jesucrist. No ndxàal gàc leꞌ ryethe mèn, no ryethe angl, no taamas conꞌ tolo li par gàc Jesucrist xaꞌ roo no xaꞌ xèn loo ryethe conꞌ. No ndxàal gab mèn, no angl, no taamas conꞌ conꞌ roo no conꞌ xèn cón cheꞌn Jesucrist loo taamas mèn.
\p
\v 13 No mbìnen gunii ryethe conꞌ coꞌ mxènꞌ Diox no coꞌ mblec Diox, que naca conꞌ coꞌ nzo loo béꞌ, que naca conꞌ coꞌ nziriꞌ loo izlyoꞌ, que naca conꞌ coꞌ nzo xànꞌ leꞌn izlyoꞌ, coꞌ nee diꞌs, yeꞌrbìil, que naca conꞌ coꞌ nzo loo níttóꞌ no leꞌn níttóꞌ loo Diox coꞌ ndub loo asient no loo Jesucrist coꞌ ndoo loo Diox. Mbez ryethe conꞌa:
\pi1 Diox roo no Diox xèn nac Diox no conꞌ roo no conꞌ xèn mbli Diox. Diox guryath no Diox guryèn nac Diox. Gàc conꞌ roo no conꞌ xèn loo Diox thidtene. No taꞌ naꞌ lugar gàc nadoꞌ naꞌ loo Diox thidtene, loo Diox coꞌ ndub loo asient. No loo Jesucrist coꞌ ndoo loo Diox mbez naꞌ rye conꞌa. Ndlyaꞌs naꞌ gàc conꞌa loo Diox no loo Jesucrist thidtene.
\p
\v 14 Leꞌ dyap máꞌ coꞌ naban coꞌ nziriꞌa mbez taandxèꞌ, ne:
\p ―Aa. Tataaqueꞌ gàca.
\p Lomisqueꞌ ne, ryete gal fthap mèngool mdub xib loo Diox coꞌ ndub loo asient. No mcòoꞌ mèngoola yéc mèngoola loo Diox, Diox coꞌ naban thidtene.
\c 6
\s Trèꞌ ndluꞌ cón cheꞌn gaz cint coꞌ nac flej.
\p
\v 1 Láth beꞌ ndyaquen beꞌ ndoon loo béꞌ, mxaquen gunèen leꞌ mbacxilꞌ coꞌ ngòc Jesucrist mchoꞌ ner cint coꞌ nac gaz cint coꞌ nac flej. Ngoloa, mbìnen gunii thìb máꞌ coꞌ nac dyap máꞌ coꞌ naban con thìb bii coꞌ mbyèn xal coꞌseꞌ ndlyàa gundii. Gunee máꞌ loon:
\p ―Que de par ndxèꞌ, Juàn, sya, huiꞌl cón gàc.
\p
\v 2 Sya, nguan coꞌteꞌ nzi máꞌ. Gunèen ndoo thìb huay color nagus tya. Ndub thìb mbiꞌ huay. No nzo thìb huad yaꞌ mbiꞌ. No mxaquen gunèen mdub thìb xaꞌ thìb coron yéc mbiꞌ tac mbli mbiꞌ gan loo huax xóꞌ loo mèn loo izlyoꞌ. Ngoloa, nda mbiꞌ tedib vez par tolo li mbiꞌ gan huax xóꞌ loo mèn loo izlyoꞌ.
\p
\v 3 Coꞌseꞌ mchoꞌ Jesucrist mbryop cint coꞌ nac flej, mbìnen gunee mbryop máꞌ coꞌ naban loon:
\p ―Que de par ndxèꞌ, Juàn, sya, huiꞌl cón gàc.
\p
\v 4 Sya, nguan coꞌteꞌ nzi máꞌa. Mberen, mxaquen gunèen ndoo tedib huay color nane. Leꞌ mbiꞌ coꞌ ndub huay na, loo mbiꞌa mbli Diox par gàp mbiꞌ huax conꞌ laꞌs nii mbiꞌ no laꞌs yaꞌ mbiꞌ par gàc mbiꞌ yis yaa loo mèn loo izlyoꞌ. No li mbiꞌ leꞌ mèna guth thìb xtàa mèn no tedib xtàa mèn. No mdaꞌ thìb mbiꞌ thìb spad roo mcàa mbiꞌ par li mbiꞌ conꞌ coꞌ li mbiꞌ.
\p
\v 5 Coꞌseꞌ mchoꞌ Crist mbyon cint coꞌ nac flej, mbìnen gunii mbyon máꞌ coꞌ naban. Gunee máꞌ loon:
\p ―Que de par ndxèꞌ, Juàn, sya, huiꞌl cón gàc.
\p Sya, nguan coꞌteꞌ nzi máꞌa. Mberen, mxaquen gunèen ndoo thìb huay color nagat. Leꞌ mbiꞌ coꞌ ndub huay na, nzo thìb balans yaꞌ.
\v 6 Mbìnen, ne, mbyèn thìb diꞌs làth dyap máꞌ coꞌ nabana coꞌ mbez:
\p ―Ante dyoꞌ thìb kil triu por xop pes coꞌ ndli mèn gan thìb huiz zinꞌ. No dyoꞌ son kil nzob triu, coꞌ lèe sabad, por xop pes coꞌ ndli mèn gan thìb huiz zinꞌ. Per indlyasten teluxl aceit ya guy no vin.
\p
\v 7 Coꞌseꞌ mchoꞌ Jesucrist dyap cint coꞌ nac flej, mbìnen gunii dyap máꞌ coꞌ naban. Gunee máꞌa loon:
\p ―Que de par ndxèꞌ, Juàn, sya, huiꞌl cón gàc.
\p
\v 8 Nguan coꞌteꞌ nzi máꞌa. Sya, mxaquen mbuiꞌen ndoo thìb huay color guuꞌs loo máꞌa. Leꞌ mbiꞌ coꞌ ndub huay na, lèe yalguth. Xís mbiꞌ tolo nde nque taamas conꞌ coꞌ tolo tyactìi mèn. No leque yub Diox mdaꞌ lugar par ngòp mbiꞌ conꞌ laꞌs nii mbiꞌ no conꞌ laꞌs yaꞌ mbiꞌ par li mbiꞌ gath thìb part mèn coꞌ nac thap part mèn coꞌ nzo dib athu loo izlyoꞌ. Li mbiꞌ par gath mèn loo xóꞌ. Li mbiꞌ par gath huin mèn. Li mbiꞌ par gath mèn loo yilíiz. Li mbiꞌ par guth máꞌ huan coꞌ nzo yii den loo izlyoꞌ mèn. No gunèen ngue dóꞌ yeꞌrbìil par ned xís huay, coꞌ nee diꞌs, leꞌn yeꞌrbìil lyàa rye mèn yeꞌrsinꞌ ndxèꞌ coꞌ li mbiꞌ gath.
\p
\v 9 Coꞌseꞌ mchoꞌ Crist gaꞌy cint coꞌ nac flej, gunèen alm no xpii mèn coꞌ nguth por cón cheꞌn diꞌs ndac cheꞌn Diox no por ngo mèn yalbàn no mdaꞌ mèn cuent cón cheꞌn Diox loo xtàa mèn no maste. Alma no xpiia nzo xànꞌ mes, coꞌ nee diꞌs, nac loo còoꞌ loo Diox.
\v 10 Cabii mbez alma no xpiia loo Diox:
\p ―Tad, Uꞌ coꞌ nac Tad natúꞌ no Uꞌ coꞌ nac lìcpeꞌ Tad coꞌ ndliqueꞌ xal ncàbgòn Uꞌ li Uꞌ loo mèn, ¿axta pól tub rez Uꞌ no co xtàa Uꞌ loo mèn xalqueꞌ mbli no mèn nuꞌ coꞌseꞌ mbeth mèn nuꞌ loo izlyoꞌ, àꞌ, Tad?
\p
\v 11 Leque sya, gunèen mdoc thìb thìb alma no xpiia xab alm no xpii coꞌ nac larꞌ nagus. No mbìnen diꞌs coꞌ gunii Diox loo alma no loo xpiia:
\p ―Bli guꞌ descans taandxepte tiemp axta tyaa tant mèn coꞌ gath xal nguth guꞌ por mxoꞌf zinꞌ mèna cón cheꞌn Jesucrist. Mèna gàc mèn hues xtàa guꞌ por cón cheꞌn Jesucrist coꞌ guth yèe mèn loo izlyoꞌ.
\p
\v 12 Coꞌseꞌ mchoꞌ Crist xop cint coꞌ nac flej coꞌ nde nque, láth ndoo huiꞌen loo conꞌa, chàa, mbuin thìb xòo brut. Nde nxonꞌ, ale mcuau loo huiz. Gunaa loo huiz xal ñaa thìb leꞌ larꞌ nagat, coꞌ nee diꞌs, thidtene mcuau xin no mcuau yat loo izlyoꞌ. Lomisqueꞌ ne, dib loo mbeꞌ gunaa xal ñaa ren.
\v 13 No gunèen ngòb huax mbèelhuiꞌ coꞌ nziꞌf loo béꞌ loo izlyoꞌ. Ngòb mbèela loo izlyoꞌ xal coꞌseꞌ ngolꞌ mbii yaa ngud yaa ngueꞌs no ndxàb angslyo rye nguud yenꞌ loo yòo.
\v 14 Nde nxonꞌ, chàa, mdyonꞌ loo béꞌ. Mxaquen mdyùuz loo béꞌ xal coꞌseꞌ nthùuz mèn thìb leꞌ yeꞌs. Leꞌ rye yii no rye den na, mbuin no mzyeꞌ yii den coꞌteꞌ mdub yii den. Lomisqueꞌ ne, mbuin rye yòo biiz coꞌ ngureriꞌ leꞌn níttóꞌ. No mzyeꞌ yòo biiz coꞌteꞌ nziriꞌ yòo biiz leꞌn níttóꞌ.
\v 15 Leꞌ rye mèn coꞌ mnibeꞌ dib athu loo izlyoꞌ na, mèn coꞌ ngòc rey, mèn coꞌ ngòc gobiern, mèn coꞌ ngòc mèn nac zinꞌ, ryete mèna mcasloo leꞌn yeꞌr quèe coꞌ ndub leꞌn yii no coꞌ ndub leꞌn den. Thidte mcasloo mèna con rye mèn roo no rye mèn xèn, con rye mèn ric, con rye mèn coꞌ ñibeꞌ loo solndad, con rye mèn coꞌ ngòp conꞌ laꞌs nii no laꞌs yaꞌ, no con rye mèn coꞌ ngòc moz yèe, no con rye mèn coꞌ ngòc mèn coꞌ yende chó mèn ñii loo coꞌ yende chó mèn nguree ncà, ne.
\v 16 Ryete mèna ngure rez loo yii no loo quèe rhueꞌ:
\p ―Ngàc guꞌ cón ngàc guꞌ. Huen gulàa guꞌ loo nuꞌ. No casloo guꞌ nuꞌ loo Diox coꞌ ndub loo asient par lyáꞌ nuꞌ loo yaltìi tínꞌ coꞌ li Mbacxilꞌ coꞌ nac Jesucrist loo nuꞌ yiloa.
\p
\v 17 ¡Ay, Dioꞌs!, nase mzinleꞌ huiz coꞌseꞌ tetìi Uꞌ nuꞌ, por derech, no ¿chó nuꞌ xec loo yaltìi coꞌ li Uꞌ loo nuꞌ? Yende mod xec nuꞌ, yey.
\c 7
\s Trèꞌ ndluꞌ cón cheꞌn mèn coꞌ nac siꞌ fchop bin mèn nación Israel.
\p
\v 1 Coꞌseꞌ ngolo gunèen ryethe conꞌa, mxaquen gunèen thap angl coꞌ ndoo dyap lad ro izlyoꞌ. Angla ngue tauꞌ loo mbii dyap lad ro izlyoꞌ par neꞌxyoꞌfte mbii thidtene chol lugar loo izlyoꞌ no neꞌxyoꞌfte mbii loo níttóꞌ, ne. No ngure xee mbii axta nec thìb laa neꞌngüinte loo yaa loo izlyoꞌ no axta nec thìb leꞌ yix neꞌngüinte loo izlyoꞌ.
\v 2 No gunèen tedib angl coꞌ nde par ned ndlyen huiz. Angla ngo thìb sell cheꞌn Diox yaꞌ, Diox coꞌ naban thidtene. Angla cabii ngrozèe loo dyap angl coꞌ nziriꞌ dyap lad ro izlyoꞌ coꞌ mbli Diox par ngòp angl conꞌ laꞌs nii angl no conꞌ laꞌs yaꞌ angl par li angl yalquìi loo izlyoꞌ no loo níttóꞌ. Ndxab angla loo dyap angl:
\p
\v 3 ―Neꞌlide guꞌ yalquìi loo izlyoꞌ, neꞌ loo níttóꞌ, neꞌ loo chol yaa nayèe coꞌseꞌ tarte queꞌ nuꞌ sell lechuz mèn coꞌ nxoꞌf zinꞌ zinꞌ cón cheꞌn Diox naꞌ.
\p
\v 4 Ngoloa, mbìnen plópeꞌ mèn ngòc mèn coꞌ mquée sell lechuz tiempa. Loo rye mèna ngòc thìb ayo nzo choꞌ fthap mil mèn, mèn coꞌ nac ante bin mèn coꞌ nac siꞌ fchop ned mèn coꞌ nac mèn nación Israel.
\v 5 Mquée sell lechuz siꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Judá. Mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Rubén.
\v 6 Mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Gad. Mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Aser. Mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Neftalí. Mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Manasés.
\v 7 Mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Simeón. Mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Leví. Mquée sell lechuz taasiꞌ fchop mil mèn coꞌ ngòc bin thìb mbiꞌ coꞌ ngroꞌ lèe Isacar.
\v 8 Mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Zabulón. Mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe José. No mquée sell lechuz taasiꞌ fchop mil mèn coꞌ ngòc bin cheꞌn thìb mbiꞌ coꞌ ngroꞌ lèe Benjamín.
\s Trèꞌ ndluꞌ leꞌ Juàn gunèe mènléyꞌ coꞌ noc xab anabte larꞌ nagus.
\p
\v 9 Ngolo gunèen mquée sell lechuz rye mèna, chàa, mxaquen gunèen nziriꞌ huax mèn coꞌ nac cheꞌn ryethe nación no coꞌ nac cheꞌn ryethe bin mèn coꞌ ndyoodiꞌs chol diꞌstèe, coꞌ nee diꞌs, nac mèn dib athu loo izlyoꞌ. Nziriꞌ mèna. Nzi ndoo gaꞌ mèna dib vuelt loo Diox no loo Mbacxilꞌ coꞌ nac leque Jesucrist coꞌteꞌ ndub Diox loo asient. No nec thìb mèn neꞌngácte ndlab mèna tant thìb mèna nziriꞌ. No noc xab mèna anabte larꞌ nagus. No ryete mèna nzo thìb thìb yin yaꞌ.
\v 10 Ryete mèna cabii mbez yèe. Mbez mèna:
\pi1 Diox naꞌ coꞌ ndub ñibeꞌ loo asient nac xaꞌ coꞌ mteláꞌ naꞌ loo conꞌ ryes. Diox mbli conꞌa loo naꞌ por cón cheꞌn mbacxilꞌ coꞌ nac leque Jesucrist.
\m
\v 11 Nde nxonꞌ, ryete angl nzi ndoo gaꞌ dib vuelt loo Diox coꞌ ndub loo asient no dib vuelt loo rye mèngool no loo thap máꞌ coꞌ ñèen naban. Coꞌseꞌ ngolo tataa ngurez ryete mèna, ryete angla mcotloo loo yòo loo Diox coꞌ ndub loo asient. No mcòoꞌ angl yéc angl loo Diox.
\v 12 Mbez angl:
\pi1 Tatuaꞌ gàca. Gab naꞌ diꞌs roo no diꞌs xèn no diꞌs natúꞌ cón cheꞌn Diox loo mèn. No lomisqueꞌ, ndlyaꞌs naꞌ ante loo Diox tolo gàc conꞌ roo no conꞌ xèn thidtene. Lomisqueꞌ ne, gab naꞌ ante Diox nac xaꞌ coꞌ ndxác alux conꞌ. No ante loo Diox gab naꞌ: Diox quix non Uꞌ, Tad Diox, por ryethe conꞌ ndac coꞌ mbli Uꞌ loo nuꞌ. Ante loo Uꞌ gàc ryethe conꞌ guryath no conꞌ guryèn por cón cheꞌn ryethe conꞌ roo no conꞌ xèn coꞌ ndxàp Uꞌ laꞌs yaꞌ Uꞌ no coꞌ ndxàp Uꞌ laꞌs nii Uꞌ, Tad Diox. Loo Uꞌ coꞌ nac Diox nuꞌ gàc ryethe conꞌ ndxèꞌ leꞌn rye línꞌ coꞌ ntlo, no leꞌn rye línꞌ coꞌ ndxelo, no leꞌn rye línꞌ coꞌ neꞌlith node. Taandxèꞌ gàca.
\p
\v 13 Ngoloa, asembli thìb mèngool coꞌ nziriꞌa, mnibdiꞌs mèngool loon:
\p ―Juàn, ¿chó mèn nac mèn coꞌ noc anabte larꞌ nagus no chéꞌ yende pá ñeel pá ned nde mèna, ne, àꞌ?
\p
\v 14 Daa ndxab loo mèngoola:
\p ―Tad, Uꞌ non cón cheꞌn mèna. Per daa yende cón naneen cón cheꞌn mèn baꞌ.
\p Sya, gunee mèngoola loon:
\p ―Mèna nac mèn coꞌ anzeꞌf thìb conꞌ mxactìi por cón cheꞌn yaltìi tínꞌ coꞌ ngòc loo mèna por ngòo mèna loo cón cheꞌn Diox. Mèna ngòc mèn nambìi no mèn nalì loo Diox por cón cheꞌn ren Jesucrist coꞌseꞌ nguth Jesucrist loo cruz.
\v 15 Por cona, nzo mèna loo Diox thidtene coꞌteꞌ ndub Diox loo asient cheꞌn Diox par ndli mèna mandad loo Diox coꞌ ndub ñibeꞌ loo asient ze no yálꞌ. Leꞌ Diox na, Diox yo ban no mèna par quenap Diox mèna loo Diox.
\v 16 Mèna ya neꞌgath huinte no ya neꞌgath nítte. Neꞌ neꞌ soꞌ béꞌ mèna. Neꞌ neꞌ guin rsoꞌ cheꞌn huiz mèna tya.
\v 17 Tataa gàca loo mèna tac Mbacxilꞌ coꞌ nac leque Jesucrist coꞌ ndoo loo Diox coꞌteꞌ nzo Diox, Jesucrist thidtene nzo no mèna par li Jesucrist conꞌ ndac loo mèna xal ndli thìb pastor conꞌ ndac loo mbacxilꞌ pastor. No li Jesucrist par thidtene gàc thìb yalnaban ndac tínꞌ loo béꞌ loo mèna. No leque hora, li Diox ya neꞌtolode gón mèna thidtene.
\c 8
\s Trèꞌ ndluꞌ leꞌ Crist mchoꞌ lult cint coꞌ nac flej no cón cheꞌn thìb incensar coꞌ nacsuaꞌ ampurte or.
\p
\v 1 Coꞌseꞌ mchoꞌ Crist lult cint coꞌ nac flej coꞌ natedóꞌ lad yeꞌs coꞌ nadùuza, xèe nguled ruid loo béꞌ leꞌn med hor.
\v 2 Chàa, mberen, mxaquen gunèen nzi ndoo gaz angl loo Diox. Loo gaz angla mdaꞌ Diox thìb thìb trompet.
\v 3 Ngoloa, chàa, mxaquen gunèen nde tedib angl coꞌ nzo thìb incensar coꞌ nacsuaꞌ con ampurte or yaꞌ angl. Mdoo angla loo mes, coꞌ nee diꞌs, nac loo còoꞌ loo Diox. No mdaꞌ Crist huax duꞌr yalꞌ loo angl par co angl huax duꞌr yalꞌ loo incensar par yitoo huax zen yalꞌ coꞌteꞌ nzo Diox loo asienta. Leque tiempa, mxaquen mbìn Diox diꞌs coꞌ mbez mèn Diox, mèn coꞌ ngòc cheꞌnpeꞌ Diox láth naban mèna loo izlyoꞌ.
\v 4 Sya, mbli angla par mquée zen yalꞌ loo Diox. No leque tiempa, mbli angl leꞌ zen yalꞌa ndluꞌ cón cheꞌn diꞌs coꞌ ngurez mèn coꞌ ndxelaꞌs loo Crist loo Diox, mèn coꞌ mbez Diox láth nzi ban mèna loo izlyoꞌ.
\v 5 Ngoloa, mbeꞌ angla incensar. Ngua lo angl quìi loo incensar loo mes coꞌ nac còoꞌ coꞌteꞌ nzo Diox. Ngoloa, mblobii angl quìia loo izlyoꞌ. No coꞌseꞌ ngulàa quìia loo izlyoꞌ, ngos mblyaꞌb gundii. Mbyèn huax ruid. Mtlo ngulàa bèel gundii loo izlyoꞌ. No mbuin thìb xòo brut loo izlyoꞌ.
\s Trèꞌ ndluꞌ cón cheꞌn trompet coꞌ mdaꞌ Diox loo angl.
\p
\v 6 Ngoloa, ryete gaz angl coꞌ mcàayaꞌ gaz trompet, mtlo angl, mbli nab angl angl par cuez angl trompet.
\p
\v 7 Ner angl mcuez trompet angl. Leque hora, mbli Diox ngulàa thìb loo yuu quèe brut loo izlyoꞌ. No ngulàa quìi coꞌ nos con ren leque hora loo izlyoꞌ. Mbyec thìb tant conꞌ loo izlyoꞌ, coꞌ nee diꞌs, nac son tant conꞌ loo izlyoꞌ. No axta mbyec thìb tant yaa nayèe no thìb tant huan coꞌ nac son tant yaa no huan loo izlyoꞌ.
\p
\v 8 Mbryop angl coꞌ nde nque mcuez trompet. Leque hora, Diox mbli ngulàa thìb conꞌ coꞌ gunaa xal thìb gundith loo níttóꞌ. Conꞌa gunaa xal thìb yii roo coꞌ ndub yol. Leꞌ sya, thìb part coꞌ nac son part níttóꞌ ngòc nít ren.
\v 9 No nguth thìb part rye conꞌ coꞌ naban leꞌn níttóꞌ coꞌ nac son part conꞌ coꞌ nzo naban leꞌn níttóꞌ. No mtelux Diox thìb part yòoyaa coꞌ nac son part yòoyaa coꞌ nzo loo níttóꞌ por cón cheꞌn conꞌa, ne.
\p
\v 10 Tedib angl coꞌ nac mbyon angl coꞌ nde nque, mcuez trompet. Leque hora, mbli Diox ngulàa thìb mbèelhuiꞌ coꞌ ndoo yol loo béꞌ loo izlyoꞌ. Ñaa mbèelhuiꞌa xal thìb quèe roo no xal thìb yii roo coꞌ ndoo yol. Ngulàa mbèelhuiꞌa loo thìb part yóꞌbeꞌ coꞌ nac son part yóꞌbeꞌ coꞌ nzo dib athu loo izlyoꞌ. No ngulàa mbèelhuiꞌa loo thìb part xlen nít coꞌteꞌ ndub len nít coꞌ nac son part coꞌteꞌ ndub len nít dib athu loo izlyoꞌ.
\v 11 Mbèelhuiꞌa ngroꞌ lèe Ajenj coꞌ lalqueꞌ nalà xal cuanꞌ coꞌ mbez mèn lèe tilà coꞌ anzeꞌf nalà. No ngòc nalà tínꞌ thìb part nít coꞌ nzib len no thìb part yóꞌbeꞌ coꞌ nac son part coꞌteꞌ nzib len nít no coꞌ nac son part yóꞌbeꞌ dib athu loo izlyoꞌ. No tataa mod anzeꞌf thìb mèn nguth por ngu mèn nít coꞌ ngòc nít nalà.
\p
\v 12 Be taa be taa mcuez angl coꞌ nac thap angl coꞌ nde nque trompet angl. Mxaquen mcuau loo izlyoꞌ coꞌ nac thìb part cheꞌn son part cheꞌn thìb thìb huiz coꞌ nac thìb huiz. No mcuau loo mbeꞌ no loo mbyáz. Neꞌntenìide mbeꞌ no mbyáz thìb part cheꞌn son part cheꞌn thìb thìb yálꞌ coꞌ nac thìb part cheꞌn thìb thìb yálꞌ par tataa mod mbli Diox mcuau thìb part cheꞌn thìb thìb huiz no thìb part cheꞌn thìb thìb yálꞌ. Tataa mbli Diox leꞌn rye huiza par mtetìi Diox mèn axta mtlo Diox, mtetìi Diox mèn tedib mod yiloa.
\p
\v 13 Ngoloa, chàa, mbyúꞌ loo loon no mxaquen gunèen no mbìnen ngue tee xobii thìb angl xtauꞌthe loo béꞌ. No be taa cabii mbez angl:
\p ―Ay, prob mèn coꞌ naban loo izlyoꞌ coꞌseꞌ yèn cuez taason angl trompet angl.
\c 9
\p
\v 1 Ngoloa, mcuez angl coꞌ nac gaꞌy angl coꞌ nde nque trompet angl. Leque hora gunèen ngulàa thìb mbèelhuiꞌ loo béꞌ loo izlyoꞌ. Ngòc mbèelhuiꞌa thìb angl. Mdaꞌ Crist lyab cheꞌn puert yeꞌrbìil loo angl par xalꞌ angl puert yeꞌrbìil.
\v 2 Mxalꞌ angl puert yeꞌrbìil. No ngo too thìb zen brut más leque xal coꞌseꞌ mbe zendóꞌ coꞌ ndxetoo no coꞌ mbe loo izlyoꞌ leꞌn mbeꞌ marz no leꞌn mbeꞌ abril. Zen cheꞌn yeꞌrbìila mbli mbyauꞌ loo huiz par mcuau loo huiz no axta yende mod huiꞌ ndxèꞌ huiꞌ baꞌ mèn loo izlyoꞌ.
\v 3 Leꞌn zena Diox mbli ngos mdyàl mbiistóꞌléyꞌ. Mbiistóꞌa mque tee xobii dib athu loo izlyoꞌ. No mbli Diox par ngòc nayiꞌ mbiistóꞌa xal nayiꞌ mbacxub coꞌ nzo loo izlyoꞌ.
\v 4 Mbli Diox par neꞌnglide mbiistóꞌ yalquìi loo nec thìb huan nayèe no loo nec thìb yaa nayèe. Ndxeꞌlequeꞌ, mbli Diox mbli mbiistóꞌ yalquìi loo mèn coꞌ inguede señ lechuz coꞌ nac señ cheꞌn Diox.
\v 5 Per neꞌndaꞌde Diox lugar nguth mbiistóꞌ mèna. Ndxeꞌlequeꞌ, mbli Diox par mbli mbiistóꞌ yalquìi loo mèna par mdenꞌ mèna yalnè leꞌn gaꞌy mbeꞌ. Yalnè coꞌ mdenꞌ mèna ngòc xal yalnè coꞌ ndenꞌ mèn coꞌseꞌ nquele mbacxub mèn.
\v 6 Coꞌseꞌ gàc huiz coꞌ ngue niin loo guꞌ ndxèꞌ, mèn aseli par leque mèn guth mèn. Per Diox neꞌtaꞌde lugar guth leque mèn mèn. Mastaleꞌ lyaꞌs mèn gath mèn, neꞌtaꞌde Diox lugar gath mèn leꞌn rye huiz coꞌseꞌ gàc conꞌa loo mèn.
\p
\v 7 Leꞌ mbiistóꞌa na, gunaa xal thìb huay coꞌ ngololeꞌ ngo xab par tyub solndad huay par ya huay loo xóꞌ. Mxaquen ndub thìb conꞌ coꞌ ñaa xal thìb coron or yéc mbiistóꞌ. Leꞌ loo mbiistóꞌ na, ñaa xal ñaa loo thìb mbiꞌ.
\v 8 Ale, mxaquen ndoo yis yéc mbiistóꞌ coꞌ lalqueꞌ nolꞌ xal nolꞌ yis coꞌ ndoo yéc thìb xaꞌgot. Mxaquen ñaa quele mbiistóꞌ xal quele thìb mbeeꞌs coꞌ ndoo yis lox yen.
\v 9 Leꞌ loo lad mbiistóꞌ na, mzoꞌf thìb fcho coꞌ ñaa xal conch coꞌ nayez xal yiꞌf. Leꞌ ruid coꞌ ndxèn coꞌseꞌ nxobii mbiistóꞌ na, ndxèn xal ruid cheꞌn huax carret coꞌ ngobxax huay coꞌseꞌ nqueꞌ huay carre con carret loo xóꞌ.
\v 10 Mque no mbiistóꞌa xuanꞌ mbiistóꞌ xalqueꞌ mque no mbacxub xuanꞌ mbacxub. Con xuanꞌ mbiistóꞌa mbli mbiistóꞌ yalquìi loo mèn leꞌn gaꞌy mbeꞌ.
\v 11 Mbiistóꞌa mque no thìb xaꞌ coꞌ ngòc jef coꞌ mnibeꞌ loo mbiistóꞌ. Xaꞌa nac thìb angl coꞌ nquenap yeꞌrbìil. Angla ngroꞌ lèe diꞌstèe cheꞌn mèn hebre Abadón. Leꞌ diꞌstèe mèn grieg na, ngroꞌ lèe angla Apolión, coꞌ nee diꞌs, nac xaꞌ coꞌ ntelux conꞌ.
\p
\v 12 Cóna ngòc ner yalquìi no ner yaltìi coꞌ nguriꞌthleꞌ loo mèn. Per tatabeꞌ ndxàc falt riid taachop yaltìi no yalnè loo mèn.
\p
\v 13 Ngoloa, angl coꞌ nac xop angl coꞌ nde nque, angl mcuez trompet angl. Leque hora, mxaquen mbìnen thìb diꞌs coꞌ ngroꞌ leꞌn thap conꞌ coꞌ ñaa xal ñaa cach ngon coꞌ nziꞌf dyap squin cheꞌn loo còoꞌ coꞌ nacsuaꞌ con or coꞌteꞌ nzo Diox.
\v 14 Diꞌsa gunii loo angl coꞌ nac xop angl coꞌ nde nque coꞌ nzo trompet yaꞌ:
\p ―Fteláꞌ thap angl coꞌ nzi quedóꞌ gax ro yóꞌbeꞌ Eufrat coꞌ nac thìb yóꞌbeꞌ roo.
\p
\v 15 Tataa mod mblyáꞌ dyap angla par mbli angl nguth thìb part mèn coꞌ nac son part mèn coꞌ naban dib athu loo izlyoꞌ. Angla thidtene mquedóꞌ tee tya par mbli angl nguth mèn hor coꞌseꞌ mnibeꞌ Diox loo angl li angl conꞌa. Hora ngòc huiz no ngòc tiemp coꞌ ndxab Diox gàc conꞌa loo mèn.
\v 16 No mbìnen napló tant nac solndad coꞌ nac solndad cheꞌn dyap angla. Solndad ngòc anab solndad coꞌ ndub huay. No por loo rye solndada, ngòc solndada chop ayo millón mèn.
\p
\v 17 Tataa mod mdan cuent no gunèen cón cheꞌn solndad coꞌ ndub huay coꞌ mxyoꞌf loo loon. Leꞌ rye solndad co ndub huaya na, ryete solndada neꞌ thìb leꞌ yiꞌf coꞌ ntauꞌ pech solndad. Yiꞌfa, mxaquen, ale nanee ren gunaa no ale azul gunaa no ale guus gunaa. Nde nxonꞌ, mxaquen gunèen leꞌ huaya mque no yéc xal yéc thìb mbeeꞌs coꞌ ndoo yis lox yen. No gunèen ndryoꞌ quìi no zen no xlaꞌ asufr ro huay.
\v 18 Tataa mod nguth thìb part mèn coꞌ nac son part mèn coꞌ naban loo izlyoꞌ con yon loo conꞌ coꞌ ngroꞌ ro huay coꞌ ngòc quìi no zen no xlaꞌ asufr.
\v 19 Tac Diox mbli leꞌ huaya li yalquìi loo mèn con ro huay no con xuanꞌ huay tac xuanꞌ huay ngòc xal mbelꞌ. No con xuanꞌ huay coꞌ ngòc xal mbelꞌ mbli huay yalquìi loo mèn.
\p
\v 20 Per rye mèn coꞌ beꞌ mbyanꞌ loo izlyoꞌ, mèn coꞌ neꞌngàcte yalquìia loo, neꞌ por gunèe mèna ngòc yalquìi loo mèn coꞌ ngòc yalquìi neꞌnglàade yéc mèna no neꞌnglàade lezoꞌ mèna par belꞌqueꞌ tataa mod nseꞌ mèna mod coꞌ ndxàp mèna loo izlyoꞌ par ngláꞌ mèna loo conꞌ yeꞌrsinꞌ coꞌ ngue li mèna. Neꞌ neꞌ ngláꞌ mèna par neꞌtlode li mèna cas loo rye xpii yeꞌrsinꞌ, no rye gunab no rye mdoꞌ coꞌ nacsuaꞌ con or, no coꞌ nacsuaꞌ con plat, no coꞌ nacsuaꞌ con brons, no coꞌ nacsuaꞌ con chol loo yaa. Mdoꞌa yende mod huiꞌ. Neꞌ neꞌ indxòn mdoꞌa coꞌseꞌ ndyoodiꞌs no mèn mdoꞌa. No neꞌ neꞌ indyee mdoꞌa.
\v 21 Neꞌ neꞌ nseꞌ mèna mod coꞌ ndxàp mèna par ya neꞌtolode guth mèna xtàa mèna. Neꞌngláꞌde mèna mod coꞌ ngòp mèna par neꞌtolode li mèna yalbruj. Neꞌngláꞌde mèna mod coꞌ ndxàp mèna par ya neꞌtolode li mèna yalburrid no par neꞌtolode ncuaꞌn mèna xinꞌ huan mèna. Lomisqueꞌ ne, neꞌngláꞌde mèna mod coꞌ ngòp mèna par ya neꞌtolode li huanꞌ mèna cheꞌn xtàa mèna.
\c 10
\s Thìb angl nzo thìb libr chuꞌth yaꞌ.
\p
\v 1 Be taa be taa mxaquen mbyúꞌ loo loon. Gunèen tedib angl. Loo angla mbli Diox ngòp angl huax conꞌ laꞌs nii angl no huax conꞌ laꞌs yaꞌ angl. Angla nde làa loo béꞌ leꞌn xcuau. No mxaquen neꞌ angl thìb mbèel quiꞌth yéc angl. Rloo angl ante nquée xnìi xal coꞌseꞌ nguin huiz. Leꞌ nii angl na, gunaa xal bèel coꞌ ndxetoo.
\v 2 Gunèen nzo thìb libr chuꞌth yaꞌ angl. Ndoo xalꞌ loo libr. No gunèen ndoo sa nii angl coꞌ nac ladlì loo níttóꞌ. Leꞌ taasa nii angl coꞌ nac ladrebes na, ndoo loo yòo biiz.
\v 3 Ngoloa, cabii ngrozèe angl xal coꞌseꞌ mbez yèe yii mbez yèe den thìb mbeeꞌs. No coꞌseꞌ ngrozèe angl, leque tiempa ngos mblyaꞌb gundii gaz vez. Mbyèn bii gundiia axta plóthe.
\v 4 Coꞌseꞌ ngolo ngos mblyaꞌb gundii gaz vez no mbyèn bii gundii axta plóthe, daa coꞌ nac Juàn mblyazen ntlon, nqueꞌen yeꞌs cón cheꞌn conꞌ mbìnen. Per látha, mbìnen thìb diꞌs coꞌ mbyèn loo béꞌ coꞌ gunee loon:
\p ―Juàn, ante leꞌn lezoꞌl blosuaꞌ cón nee diꞌs gundii coꞌ ngos mblyaꞌb gaz veza. No indlyasten queꞌl yeꞌs cón cheꞌna.
\p
\v 5 Ngoloa, chàa, gunèen angl coꞌ mdoo nii loo níttóꞌ no loo yòo biiz. Mdeꞌf angl yaꞌ angl coꞌ nac ladlì loo béꞌ.
\v 6 Mdeꞌth angl lèe Diox, Diox coꞌ nabanqueꞌ thidtene, Diox coꞌ mblec no coꞌ mxènꞌ béꞌ no izlyoꞌ no níttóꞌ no ryethe taamas conꞌ coꞌ mblec Diox no coꞌ mxènꞌ Diox. Ndxab angl:
\p ―Nase, por lèe Diox niin loo guꞌ: Mzinleꞌ hor coꞌseꞌ li Diox conꞌ coꞌ mnibeꞌ Diox loo lezoꞌ Diox li Diox loo mèn. Ya neꞌlyenꞌte Diox más.
\v 7 Tac coꞌseꞌ gal hor cuez angl coꞌ nac gaz angl coꞌ nde nque trompet angl, ya mdyaaleꞌ tiemp coꞌ ngòcleꞌ tiemp coꞌseꞌ li Diox ryethe conꞌ coꞌ mnibeꞌ Diox loo lezoꞌ Diox li Diox loo mèn loo izlyoꞌ ndxèꞌ ndooreꞌ lith no izlyoꞌ ndxèꞌ xalqueꞌ mbluꞌ Diox loo mèn coꞌ ngo ban póla, mèn coꞌ mdeꞌth diꞌs coꞌ ndxab Diox, mèn coꞌ mxoꞌf zinꞌ zinꞌ cheꞌn Diox. Conꞌa nac conꞌ coꞌ mbli Diox coꞌ ngo casloo loo mèn leꞌn dib lal tiempa axta nalleꞌ.
\p
\v 8 Diꞌs coꞌ mbìnen gunii loon loo béꞌ, guniii loon tedib vez. Gunee diꞌs loon:
\p ―Juàn, huàa coꞌteꞌ ndoo angl baꞌ. No fxen libr chuꞌth coꞌ ndoo xalꞌ coꞌ nzo yaꞌ angl, angl coꞌ ndoo sa nii loo níttóꞌ no coꞌ ndoo taasa nii loo yòo biiz.
\p
\v 9 Sya, nguan coꞌteꞌ ndoo angl. No mnaꞌben loo angl taꞌ angl libr chuꞌtha càan. Angl gunee loon:
\p ―Aa libr ndxèꞌ. Dhua libr. Coꞌseꞌ ngue yuhual libr ndxèꞌ tenꞌl naziꞌ nac libr xal mzin leꞌn roꞌl. Per coꞌseꞌ ngolo nduhual libr, tenꞌl nalà ngòc libr leꞌn lezoꞌl.
\p
\v 10 Sya, mxenen libr chuꞌth coꞌ nzo yaꞌ angla. No ale nduhuan libr. No, lìcqueꞌ, mxaquen ale naziꞌ ngòc libr chuꞌtha xal mzin leꞌn roꞌen coꞌseꞌ ngue yuhuan libr. Per coꞌseꞌ ngolo nduhuan libr, mdenꞌen ngòc nalà libr leꞌn lezon.
\v 11 Luega gunee angl loon:
\p ―Lùu nquin bere tyoodiꞌs no taꞌl cuent xal ñibeꞌ Diox lool loo mèn huax yèez, no loo mèn huax nación, no loo mèn coꞌ ndyoodiꞌs chol diꞌstèe, no loo mèn coꞌ ñibeꞌ loo chol nación, ndee.
\c 11
\s Trèꞌ ndluꞌ cón cheꞌn chop mbiꞌ coꞌ mdaꞌ cuent cón cheꞌn Diox.
\p
\v 1 Ngoloa, mxaquen mdaꞌ Jesucrist thìb bro yíi loon. Yíia ñaa xal thìb bro var coꞌ ndli mèn us par nchiꞌx mèn conꞌ. Gunee Jesucrist loon:
\p ―Juàn, huàa chiꞌx templ cheꞌn Diox. No fchiꞌx mes coꞌ nac loo còoꞌ coꞌ ndoo leꞌn templ. No blab mèn coꞌ ndyub xib no coꞌ ncòoꞌ yéc loon leꞌn templ.
\v 2 Per neꞌchiꞌxtel loo lueꞌ coꞌ nac xís templ no coꞌ nac loo templ. Tac loo lueꞌa ngòcleꞌ cheꞌn mèn tith. Mèn tith yiꞌth ñibeꞌ yèe no cobéꞌ no toxcuaꞌ mèn tith no gàc cheꞌnpeꞌ mèn tith ciuda natúꞌ leꞌn son línꞌ narol. Pues, mchiꞌxen templ no loo còoꞌ xal mnibeꞌ Jesucrist loon.
\v 3 Tolo gunee Jesucrist loon, ne:
\p ―Na telꞌ chop mbiꞌ coꞌ taꞌ cuent cón chenen loo mèn coꞌ naban leꞌn ciuda natúꞌ. Ryop mbiꞌa taꞌ cuent cón chenen leꞌn son línꞌ narol. Ryop mbiꞌa goc xab larꞌ nagat, coꞌ nee diꞌs, ndluꞌ nxi tínꞌ lezoꞌ ryop mbiꞌ.
\p
\v 4 Ngolo mdoodiꞌs no Jesucrist daa conꞌa, gunèen ndoo chop yaa oliv. No gunèen ndoo chop candiler coꞌ nziriꞌ loo Diox baꞌ, Diox coꞌ ñibeꞌ loo izlyoꞌ. Chop yaa oliv no chop candiler coꞌ nzo loo Diox nee diꞌs ngòc ryop mbiꞌ coꞌ mtelꞌen loo mèn ciuda natúꞌ.
\v 5 Cheleꞌ chol mèna mblyaꞌs li yalquìi loo ryop mbiꞌa, Diox mbli ngroꞌ quìi ro ryop mbiꞌa. Quìia, por derech, mtec mèn coꞌ ngòc ngolo ngolaꞌs cheꞌn ryop mbiꞌ. Tataa mod mbli Diox par nguth chol mèn coꞌ mblyaꞌs ngli yalquìi loo ryop mbiꞌa.
\v 6 Ryop mbiꞌ coꞌ mdaꞌ cuent cón cheꞌn Crist, mbli Diox ngòp ryop mbiꞌa conꞌ roo no conꞌ xèn laꞌs nii mbiꞌ no laꞌs yaꞌ mbiꞌ par mbli ryop mbiꞌ par neꞌnglàade yuu leꞌn dib lal huiz coꞌ mdoodiꞌs ryop mbiꞌ cón cheꞌn Diox. Lomisqueꞌ mbli Jesucrist ne, ngòp ryop mbiꞌa conꞌ roo no conꞌ xèn laꞌs nii mbiꞌ no laꞌs yaꞌ mbiꞌ par mseꞌ loo mbiꞌ nít dib athu loo izlyoꞌ par ngòc nít ren dib athu loo izlyoꞌ. No mbli ryop mbiꞌa mdenꞌ mèn yalnè con rye loothe yíiz no rye loothe conꞌ ryes loo mèn dib athu loo izlyoꞌ. Mbli ryop mbiꞌa conꞌa huax vez xal gunee lezoꞌ ryop mbiꞌ.
\v 7 Per coꞌseꞌ ngolo mtelo ryop mbiꞌ zinꞌ coꞌ mxoꞌf zinꞌ ryop mbiꞌa, sya, ngro xoꞌf thìb mbiꞌ máꞌ thidtene. Ngroꞌ mbiꞌ leꞌn yeꞌrbìil. Mbiꞌa, Diox mdaꞌ lugar loo mbiꞌ máꞌa mcuaꞌn xóꞌ mbiꞌ con ryop mbiꞌ coꞌ mdaꞌ cuent cón chenen axta mbli mbiꞌ gan mbeth mbiꞌ máꞌa ryop mbiꞌa. No mbethqueꞌ mbiꞌ máꞌa ryop mbiꞌ.
\v 8 No coꞌseꞌ ngolo mbeth mbiꞌ máꞌa ryop mbiꞌa, tyate mbyanꞌ nax ryop thebola ned coꞌ nac ned leꞌn ciuda Jerusalén coꞌteꞌ mqueꞌ mèn Tad Jesucrist loo cruz. No neꞌ ciuda Jerusalén tedib lèe coꞌ nac lèe ciuda Sodom, coꞌ nee diꞌs, por ngòc mèn ciuda Jerusalén mèn yeꞌrsinꞌtúb xalqueꞌ ngòc mèn ciuda Sodom mèn yeꞌrsinꞌ no xal ngòc mèn nación Egipt mèn yeꞌrsinꞌ, ne.
\v 9 No leꞌn son huiz coꞌ nax ndeꞌf ryop thebola loo ned leꞌn ciuda Jerusalén, rye mèn rye nación mbuiꞌ loo thebola no neꞌnglaꞌde mèna ya caꞌs mèn thebola.
\v 10 Rye mèn coꞌ naban dib athu loo izlyoꞌ, rye mèna mdyac lezoꞌ por nguth ryop mbiꞌa. No axta huen mbyanꞌ lezoꞌ mèn coꞌ naban dib athu loo izlyoꞌ axta mtelꞌ mèn conꞌ loo xtàa mèn par ya too naa mèna xtàa mèn, tant mdyac lezoꞌ mèna nguth ryop mbiꞌa. Tataa mbli mèna tac ryop mbiꞌ coꞌ gunii cón cheꞌn Diox, ndyac mèna leꞌ ryop mbiꞌa ngòc thìb yis thìb yaa loo mèna.
\v 11 Per coꞌseꞌ ngolo nguriꞌth son huiz narol, Diox mbli par ngro xban ryop mbiꞌa. No mbere ryop mbiꞌa, ngo che ryop mbiꞌa tedib vez. Leꞌ rye mèn coꞌ gunèe ryop mbiꞌa na, mzyeb mèna axta plóthe.
\v 12 Ngoloa, ryop mbiꞌ coꞌ ngro xbana mbìn thìb diꞌs coꞌ mbyèn loo béꞌ coꞌ ndxab loo ryop mbiꞌ:
\p ―Quée guꞌ gáp trèꞌ, ey.
\p Sya, mxaquen mquée ryop mbiꞌa loo béꞌ leꞌn thìb leꞌ xcuau. Leꞌ rye mèn coꞌ ngòc ngolo ngolaꞌs cheꞌn ryop mbiꞌa na, gunèe xal nda quée ryop mbiꞌa loo béꞌ.
\v 13 Leque hora ne, mxaquen mbuin thìb xòo brut. No ngulàareꞌ thìb part coꞌ nac siꞌ part cheꞌn ryethe conꞌ coꞌ nac ciuda Jerusalén. No leque tiempa, nguth gaz mil mèn por xòo brut coꞌ mbuina. Leꞌ mèn coꞌ beꞌ mbyanꞌa na, anzeꞌf mzyeb. Mbez mèna:
\p ―¡Ay, Dioꞌs! ¿Cón conꞌ ndxèꞌ, Tad Diox? Conꞌ roo conꞌ xèn ngue li Uꞌ, Uꞌ coꞌ nzo loo béꞌ.
\p
\v 14 Con ryethe conꞌ ryes coꞌ ngòca, mbryop yalnazeꞌf no yalnaxi coꞌ nde teeleꞌ ndriꞌth.
\s Trèꞌ ndluꞌ cón cheꞌn lult angl coꞌ nac gaz angl coꞌ mcuez trompet.
\p
\v 15 Sya, mcuez angl coꞌ nac gaz angl trompet angl. Látha, beꞌ mxaquen cabii mbyèn diꞌs loo béꞌ coꞌ mbez huax mèn:
\pi1 Nase mzinleꞌ hor leꞌ ryethe mèn coꞌ ñibeꞌ loo izlyoꞌ ndxèꞌ, mèna gàc nadoꞌ loo Diox par ñibeꞌpeꞌ Diox no Tad Crist loo ryethe nación dib athu loo izlyoꞌ. No ñibeꞌ Diox loo alux conꞌ leꞌn línꞌ coꞌ ntlo, no leꞌn línꞌ coꞌ ndxelo, no leꞌn línꞌ coꞌ neꞌlith node.
\m
\v 16 Sya, ryete gal fthap mèngool coꞌ ndub loo asient coꞌteꞌ nzo Diox, rye mèna mcotloo loo izlyoꞌ. No msalꞌ mèna yaꞌ mèna loo Diox.
\v 17 No mbez mèngoola:
\pi1 Diox quix Uꞌ, Tad Diox, Uꞌ coꞌ ndxàp ryethe conꞌ roo no conꞌ xèn laꞌs nii Uꞌ no laꞌs yaꞌ Uꞌ. Nac Uꞌ Diox coꞌ thidtene nzo. Nase leque Uꞌ mbli mnibeꞌ yéc Uꞌ no mnibeꞌ lezoꞌ Uꞌ par tlo ñibeꞌ Uꞌ loo alux conꞌ por cón cheꞌn conꞌ roo no conꞌ xèn coꞌ nzo laꞌs nii Uꞌ no coꞌ nzo laꞌs yaꞌ Uꞌ.
\pi1
\v 18 Mèn rye nación ngòc nayiꞌ por mtetìi Uꞌ mèna. Per ni mod tac nase mzinleꞌ huiz coꞌ gàc huiz coꞌ tetìi Uꞌ mèn, por derech. No lomisqueꞌ, mzinleꞌ huiz coꞌseꞌ tub rez Uꞌ cón cheꞌn mèn nguth coꞌ neꞌndalte ngalaꞌs loo Uꞌ no loo Crist. Leꞌ loo mèn coꞌ mxoꞌf zinꞌ zinꞌ cón cheꞌn Uꞌ na, mèn coꞌ mdoodiꞌs cón cheꞌn Uꞌ, Uꞌ taꞌ conꞌ gàc cheꞌn mèna. No taꞌ Uꞌ conꞌ gàc cheꞌnpeꞌ mèn, mèn coꞌ ngro xàꞌleꞌ loo conꞌ yeꞌrsinꞌ coꞌ nac cón cheꞌn xab izlyoꞌ. No taꞌ Uꞌ conꞌ gàc cheꞌnpeꞌ mèn, mèn coꞌ ndli ndxàc conꞌ guryath no conꞌ guryèn cón cheꞌn lèe Uꞌ, que nac mèna mèn coꞌ ndeꞌf diꞌs nac mèn roo no mèn xèn, que nac mèna mèn coꞌ ndeꞌf diꞌs nac mèn beꞌthe. No lomisqueꞌ, mzinleꞌ hor coꞌseꞌ telux Uꞌ mèn coꞌ ntezaꞌ no coꞌ ntezab loo mèn no loo conꞌ coꞌ nzo loo izlyoꞌ.
\p
\v 19 Be taa be taa mxaquen gunèen mxyalꞌ puert cheꞌn templ cheꞌn Diox coꞌ ndub loo béꞌ. Látha, gunèen nax caj coꞌteꞌ nzo yeꞌs coꞌ nac conveñ leꞌn templa. No lomisqueꞌ, leque hora mxaquen ngulàa bèel gundii. Mbyèn huax ruid. Ngos mblyaꞌb gundii. Mbuin thìb xòo brut. No ngulàa thìb yuu quèe brut loo izlyoꞌ.
\c 12
\s Trèꞌ ndluꞌ cón cheꞌn thìb xaꞌgot no cón cheꞌn thìb máꞌ coꞌ lèe dragón.
\p
\v 1 Láth rye conꞌ ngòc ndxèꞌ, mxaquen mbyúꞌ thìb señ roo no thìb señ xèn coꞌ mbli Diox loon loo béꞌ. Gunèen thìb xaꞌgot coꞌ noc xab. Per larꞌ coꞌ ngòc xab xaꞌgota anzeꞌf nquée xnìi xal nquée xnìi huiz. No mxaquen nax mbeꞌ coꞌ ntenìi loo béꞌ xànꞌ nii xaꞌgota xal thìb banc. No mxaquen mdub thìb coron yéc xaꞌgota. Lad corona gunèen mquée siꞌ fchop mbèelhuiꞌ.
\v 2 Xaꞌgota mdoo nac xinꞌ. No mbez yèe yii mbez yèe den xaꞌgot. Mquée yalnè xaꞌ par tyan xinꞌ xaꞌ.
\v 3 Leque hora, chàa, mxaquen gunèen ngòc tedib señ loo béꞌ. Ale ngroꞌ too thìb máꞌ coꞌ lèe dragón, coꞌ nee diꞌs, nac Mebizya. Máꞌa gunaa xal ñaa thìb cocodril coꞌ anzeꞌf naroo tínꞌ. Ale mxaquen nane gunaa dragón no, nde nxonꞌ, nziꞌf gaz yéc dragón. Mxaquen nziꞌf siꞌ cach dragón, ne. No gunèen ndub thìb thìb coron yéc dragón.
\v 4 Mxaquen ne, con xuanꞌ dragón nguree dragón thìb part mbèel coꞌ nac son part mbèel coꞌ nziꞌf loo béꞌ. No mbli dragón par ngòb che rye mbèela loo izlyoꞌ. Ngoloa, xèe mdoo dragón loo xaꞌgot coꞌ tyan xinꞌa par hua dragón mbetoꞌ coꞌseꞌ yilo gáal mbetoꞌ.
\v 5 Xaꞌgota mxan thìb mbedbiꞌ. Mbed ngòc mbiꞌ coꞌ ñibeꞌ no coꞌ toxcuaꞌ loo rye nación dib athu loo izlyoꞌ. No nayiꞌ gàc mbed coꞌseꞌ ñibeꞌ yèe mbed coꞌseꞌ gàc mbed mbiꞌ loo mèn nación dib athu loo izlyoꞌ. Texal ngolo ngóol mbeda, mbli Diox par ndyàa mbed loo béꞌ coꞌteꞌ nzo Diox.
\v 6 Leꞌ xaꞌgota na, luega mxonꞌ. Ndyàa xaꞌ thìb lugar coꞌteꞌ nagán coꞌteꞌ mbli nab Diox thìb lugar par yòo xaꞌ. Tya mdaꞌ mèn coꞌ nduhua xaꞌgota leꞌn thìb mil nzo chop ayo nzo ayon huiz.
\p
\v 7 Coꞌseꞌ ngolo mbli Diox par mcasloo xaꞌgota, mxaquen ngòc thìb xóꞌ brut loo béꞌ. Láth xóꞌa, ngo thìb angl coꞌ lèe Miguel, coꞌ más mnibeꞌ loo angl loo beꞌ xal ñibeꞌ thìb general loo huax solndad, con huax taamas angl coꞌ ngòc solndad Miguel par ngro yoo Miguel con Mebizya. Sya, ngro yoo Mebizya no angl coꞌ nac solndad cheꞌn Mebizya con Miguel no angl cheꞌn Miguel.
\v 8 Per neꞌnglide Mebizya gan con angl coꞌ nac solndad cheꞌn Mebizya loo Miguel con angl coꞌ ngòc solndad cheꞌn Miguel. Ngoloa, ya neꞌntolode nglaꞌ Miguel ngo Mebizya loo béꞌ con angl cheꞌn Mebizya.
\p
\v 9 Tataa mod sandante mbloꞌ Diox Mebizya no angl cheꞌn Mebizya loo béꞌ, Mebizya coꞌ neꞌ tedib lèe coꞌ nac Dragón Tínꞌ, no coꞌ neꞌ tedib lèe coꞌ nac Mbelꞌ Gox. Diꞌs coꞌ nac Mbelꞌa, por derech, nac tedib lèe cheꞌn Mebizya. No neꞌ Mbelꞌa tedib lèe coꞌ lèe Satanás. Mebizya nac xaꞌ coꞌ ndli zinꞌ loo mèn par nquedìi Mebizya mèn dib athu loo izlyo. Per ngoloa, mbli Diox par ngulàa Mebizya no angl cheꞌn Mebizya loo izlyoꞌ.
\p
\v 10 Ngolo ngòc ryethe conꞌa, cabii mbyèn thìb diꞌs loo béꞌ coꞌ ndxab:
\p ―Nase mzinleꞌ huiz coꞌseꞌ lyáꞌ mèn loo conꞌ ryes thidtene. No mzinleꞌ huiz coꞌseꞌ ñibeꞌpeꞌ Diox loo alux conꞌ por cón cheꞌn conꞌ roo no conꞌ xèn coꞌ nzo laꞌs nii Diox no coꞌ nzo laꞌs yaꞌ Diox. No mzinleꞌ huiz coꞌseꞌ ndxàp Crist rye loothe conꞌ laꞌs nii Crist no laꞌs yaꞌ Crist. Tataa gàca tac mbli Diox no Crist gan par ngroꞌ Mebizya loo béꞌ thidtene, Mebizya coꞌ ngòc xaꞌ coꞌ ntecxùꞌ mèn coꞌ nac hues xtàa naꞌ por cón cheꞌn Crist loo Diox ze no yálꞌ.
\v 11 Lomisqueꞌ ne, mèn coꞌ ngòo loo cón cheꞌn Diox, coꞌ ngòc mèn coꞌ nguth por cón cheꞌn Diox no por cón cheꞌn Jesucrist, mèna mbli gan ngro xàꞌ loo cón cheꞌn Mebizya por cón cheꞌn ren cheꞌn Jesucrist coꞌseꞌ nguth Jesucrist loo cruz no por cón cheꞌn cuent coꞌ mdaꞌ mèna cón cheꞌn Jesucrist. Mèna neꞌngzebte gath por cón cheꞌn Jesucrist. Ndxeꞌlequeꞌ, mdoo lezoꞌ mèna gath mèna por cón cheꞌn Jesucrist.
\v 12 Per nalleꞌ, ryete guꞌ coꞌ nzo loo béꞌ, fxoꞌf ndeꞌ fxoꞌf ndlaꞌ lezoꞌ guꞌ tac ngòcleꞌ gan mbloꞌ Diox Mebizya loo béꞌ thidtene. Per ¡ay prob guꞌ izlyo!, mèn coꞌ nzi ban loo izlyoꞌ, no mèn coꞌ nzi ban loo yòo biiz leꞌn níttóꞌ, no mèn coꞌ nzi ban loo níttóꞌ tac Mebizya ngroꞌ loo béꞌ par ngulàa Mebizya loo guꞌ. Anzeꞌf nayiꞌ ngroꞌ Mebizya loo béꞌ no ndxecloo tínꞌ Mebizya tac non Mebizya taandxepte tiemp nac tiemp coꞌ que tee Mebizya loo izlyoꞌ ndooreꞌ cobii Diox Mebizya leꞌn yeꞌrbìil thidtene.
\p
\v 13 Daa, Juàn, mxyoꞌf loo loon no mxaquen conꞌ ndxèꞌ, ne: Coꞌseꞌ gunee Mebizya no mdenꞌ Mebizya leꞌ Mebizya ngroꞌleꞌ loo béꞌ, no ngulàa Mebizya loo izlyoꞌ par yanꞌ Mebizya ante loo izlyoꞌ thidtene, ngocloo tínꞌ Mebizya axta plóthe. No mdub nguꞌs Mebizya xaꞌgot coꞌ mxanleꞌ xinꞌa.
\v 14 Per Diox mbli mdub chop xílꞌ xaꞌgota lad xaꞌgota no ngòc xílꞌ xaꞌgota xal xílꞌ mtii par ngóc mxobii xaꞌgota coꞌteꞌ nac thìb lugar nagán coꞌteꞌ tith yòo ban xaꞌ loo mbelꞌ coꞌ nac Mebizya. No mbli Diox par taꞌ mèn conꞌ hua xaꞌgota tya leꞌn son línꞌ narol.
\v 15 Per Mebizya ndooleꞌ mbli xtùuz li Mebizya thìb conꞌ. Ale mbli Mebizya ngroꞌ nít ro Mebizya par ngòc níta thìb yóꞌbeꞌ coꞌ riid coꞌteꞌ nzo xaꞌgota par tataa mod lyau xaꞌgota leꞌn yóꞌbeꞌa.
\v 16 Per Diox mbli thìb conꞌ, ne. Mbli Diox leꞌ izlyoꞌ mblyath no xaꞌgota. Ale ngos mbryed loo izlyoꞌ par mdèe nít loo izlyoꞌ leque ngàc nít coꞌ ngroꞌ ro Mebizya thìb yóꞌbeꞌ.
\v 17 Per coꞌseꞌ gunèe Mebizya neꞌngroꞌ loode coꞌ mbli Mebizya loo xaꞌgota, sate más ngocloo Mebizya gunèe Mebizya xaꞌgota. Sya, mxen Mebizya ned, ngua cuaꞌn Mebizya xóꞌ con mèn coꞌ beꞌ mbyanꞌ, mèn coꞌ ngòc bin xaꞌgota. Mèna ngòc mèn coꞌ mdubdiꞌs loo conꞌ coꞌ mnibeꞌ Diox. No ngòc mèna mèn coꞌ altantqueꞌ ngure loo cón cheꞌn diꞌs ndac coꞌ ngòc cheꞌnpeꞌ Jesucrist.
\c 13
\s Trèꞌ ndluꞌ cón cheꞌn chop máꞌ tínꞌ coꞌ lèe monstru.
\p
\v 1 Ngoloa, chàa, mxaquen mdoon ro play ro níttóꞌ loo izlyoꞌ ndxèꞌ. Látha, gunèen ngro xoꞌf thìb máꞌ tínꞌ loo níttóꞌ. Ale mxaquen mque no máꞌ gaz yéc máꞌ no mque no máꞌ siꞌ cach yéc máꞌ. Mxaquen mdub thìb coron loo thìb thìb cach máꞌ. Leꞌ loo ryete gaz yéc máꞌ na, gunèen mdub thìb diꞌs coꞌ nazab mbez cón cheꞌn Diox.
\v 2 Máꞌ tínꞌ coꞌ gunèena ñaa xal thìb mbeeꞌs yèe. No ngue no máꞌa nii máꞌ xal nii os. Leꞌ ro máꞌa na, ñaa xal ñaa ro mbeeꞌs coꞌ ndoo yis lox yen. Leꞌ Mebizya na, ndooleꞌ mbli par ngòp máꞌ huax conꞌ laꞌs nii máꞌ no laꞌs yaꞌ máꞌ.
\v 3 No mxaquen leꞌ thìb yéc máꞌ coꞌ ngòc rye gaz yéc máꞌ gunaa xal thìb conꞌ coꞌ mbuíꞌ coꞌ li par gath máꞌ. Per ndxeꞌlequeꞌ, yéc máꞌ coꞌ tataa gunaa nahuíꞌa no coꞌ li par gath máꞌ, ale mbyac yéc máꞌ. Coꞌseꞌ gunèe mèn dib athu loo izlyoꞌ conꞌa, ante mbuiꞌ mèn no ante gunaa mèn mbuiꞌ mèn conꞌa. No mdyac lezoꞌ mèn dib athu loo izlyoꞌ cón cheꞌn máꞌ no ngòo mèna loo cón cheꞌn máꞌ.
\v 4 No ryete mèn dib athu loo izlyoꞌ mcòoꞌ yéc loo Mebizya no mdub xib mèn loo Mebizya tac non mèn leꞌ Mebizya mbli ngòp máꞌa conꞌ roo no conꞌ xèn laꞌs nii máꞌ no laꞌs yaꞌ máꞌ. No ale mcòoꞌ mèn yéc mèn no mdub xib mèn loo máꞌ. No ale ndxab mèn:
\p ―¿Xá ñaa thìb mbiꞌ coꞌ taꞌ par máꞌ ndxèꞌ? No ¿chó mèn gác cuaꞌn xóꞌ par li mèn xóꞌ con máꞌ? Yende chó mèn nzo coꞌ li tataa, ¿léꞌ?
\p
\v 5 Per leque Diox mdaꞌ lugar loo máꞌa par gunii yèe gunii tìi máꞌ ngòc nguàal diꞌs zab cón cheꞌn Diox. No mdaꞌ Diox lugar ñibeꞌ máꞌ loo mèn dib athu loo izlyoꞌ leꞌn choꞌ fchop mbeꞌ.
\v 6 No tataaqueꞌ mbli máꞌ. Gunii máꞌ ngòc nguàal diꞌs contra Diox. No nazab gunii yèe gunii tìi máꞌ cón cheꞌn lèe Diox no cón cheꞌn templ cheꞌn Diox coꞌ nac lugar natúꞌ coꞌteꞌ nzo Diox. No nazab gunii yèe gunii tìi máꞌ cón cheꞌn mèn coꞌ nzo loo béꞌ.
\v 7 No mdaꞌ Diox lugar loo máꞌ par li máꞌ xóꞌ contra mèn coꞌ nac mèn cheꞌnpeꞌ Diox axtaqueꞌ li máꞌ gan guth máꞌ huax mèn. No mdaꞌ Diox lugar loo máꞌ ñibeꞌ máꞌ loo ryethe bin mèn no loo ryethe nación dib athu loo izlyoꞌ.
\v 8 Loo máꞌa mcòoꞌ yéc ryete mèn. No mdub xib ryete mèn coꞌ naban loo izlyoꞌ loo máꞌ. Mèna nac mèn coꞌ indubte lèe loo libr coꞌteꞌ ndub lèe mèn coꞌ yòo ban no Diox thidtene. Libra ngue noleꞌ Crist anon mblec Diox izlyoꞌ no mxènꞌ Diox izlyoꞌ, Crist coꞌ ngòc xal thìb mbacxilꞌ coꞌ nguth loo cruz.
\p
\v 9 Guꞌ coꞌ ndub nza no coꞌ ndxaaꞌd diꞌs, bìn guꞌ diꞌs ndxèꞌ no ftenꞌ guꞌ cón nee diꞌs coꞌ ngue niin loo guꞌ ndxèꞌ:
\v 10 Mèn coꞌ ndxeꞌ xtaa mèn xal thìb pres, leque mèna gàc pres yiloa. Leꞌ mèn coꞌ ndxuth xtàa con cuchi na, mèna gath loo cuchi, ne. Por cona, ngue niin leꞌ mèn coꞌ nzo loo cón cheꞌn Diox coꞌ nac cheꞌnpeꞌ Diox, mèna nquin xec loo yaltìi no loo yalquìi coꞌ ndxàc loo mèn. No nquin tolo yilaꞌs mèn loo Diox no tolo gàp mèn yalxlaꞌs loo Diox láth ndxàc conꞌa loo mèn.
\p
\v 11 Ngolo gunèen ngòc conꞌa, mberen, gunèen tedib máꞌ coꞌ ngroꞌ leꞌn thìb yeꞌr yòo loo izlyoꞌ coꞌ xàꞌqueꞌ ñaa. Máꞌa mque no chop cach máꞌ coꞌ ñaa xal cach coꞌ nziꞌf yéc mbacxilꞌ. No ndluꞌ máꞌa loo mèn nac máꞌ xal thìb mbacxilꞌ coꞌ nac máꞌ nadoꞌ. Per coꞌseꞌ ndyoodiꞌs máꞌ, ndyoodiꞌs máꞌ xal thìb dragón, coꞌ nee diꞌs, nac yub Mebizya.
\v 12 No lomisqueꞌ, mdaꞌ Diox lugar ñibeꞌ máꞌ xalqueꞌ mnibeꞌ ner máꞌ par lyath no mbryop máꞌa ner máꞌ. No mbli mbryop máꞌ ndxèꞌ leꞌ ryete mèn coꞌ naban dib athu loo izlyoꞌ mcòoꞌ yéc no mdub xib mèn loo ner máꞌ coꞌ mbyac yéc coꞌ nahuíꞌ.
\v 13 Mbli mbryop máꞌa huax yalguzyeꞌ axta mbli máꞌ ngulàa quìi no bèel loo béꞌ loo izlyoꞌ loo mèn par mbuiꞌ mèn yalguzyeꞌ coꞌ mbli máꞌ.
\v 14 No por yalguzyeꞌ coꞌ mdaꞌ Diox lugar mbli mbryop máꞌa, mbli máꞌ yalguzyeꞌ loo ner máꞌ. Látha, mbli mbryop máꞌ huax yalguzyeꞌ par mquedìi mbryop máꞌ huax mèn coꞌ naban loo izlyoꞌ. No mnibeꞌ máꞌ loo mèn toxcuaꞌ mèn thìb gunab cheꞌn ner máꞌ coꞌ mbuíꞌ par gath máꞌ, per ngoloa, ale leꞌleꞌ mbyac yéc máꞌ coꞌ mxaquen mbuíꞌa. Ya neꞌngathte máꞌ.
\v 15 Lomisqueꞌ, mdaꞌ Mebizya lugar mque no máꞌ coꞌ nac mbryop máꞌ conꞌ laꞌs nii máꞌ no laꞌs yaꞌ máꞌ par li mbryop máꞌ ryo too ban gunab, gunab coꞌ nac gunab cheꞌn ner máꞌ coꞌ nahuíꞌ yéc par gác tyoodiꞌs gunaba no par gác li gunaba par gath rye mèn coꞌ neꞌtyub xibte no coꞌ neꞌcòoꞌde yéc loo gunab.
\v 16 Más de cona, mbli mbryop máꞌ leꞌ rye myenꞌ bix, no rye mèngool, no rye mèn ric, no rye mèn prob, no rye mèn coꞌ yende chó mèn gác ñii loo no coꞌ yende chó mèn mbee ncà, no rye mèn coꞌ nac moz, par mquée thìb señ yaꞌ rye mèna coꞌ nac ladlì o mquée señ lechuz mèn.
\v 17 Tataa mod mbli máꞌ par yende chó mèn coꞌ inguede señ lad neꞌtiꞌde mèna loo xtàa mèn no neꞌthoꞌde mèna loo xtàa mèn. Seña nac lèe ner máꞌ o naca numbr cheꞌn lèe ner máꞌ.
\v 18 No cón cheꞌn diꞌs coꞌ ngue niin loo guꞌ ndxèꞌ, naquin gác mèn coꞌ huenlequeꞌ par tataa mod gác taꞌ mèn cuent no cobéꞌ mèn axta chó numbr nac numbr cheꞌn máꞌ tínꞌa. Numbra nac numbr coꞌ ndluꞌ cón cheꞌn thìb mbiꞌ. Numbra nac numbr xop ayo nzo ayon xop.
\c 14
\s Thìb tant mènléyꞌ mbilꞌ ro thìb himn.
\p
\v 1 Ngolo nguriꞌth ryethe conꞌa, be taa be taa mberen, mxaquen mbuiꞌen leꞌ Mbacxilꞌ coꞌ nac leque Jesucrist mdoo loo yii coꞌteꞌ nziriꞌ ciuda Jerusalén. Ngure no Jesucrist thìb ayo nzo choꞌ fthap mil mèn. Mèna ngòc mèn coꞌ mquéeleꞌ lèe Jesucrist no lèe cheꞌn Diox xud Jesucrist lechuz.
\v 2 Látha, chàa, mbìnen thìb bii coꞌ mbyèn loo béꞌ. Biia mbyèn xal thìb ruid coꞌ ndli huax yóꞌbeꞌ. No mbyèn biia xal coꞌseꞌ aguin izlyoꞌ ndlyàa gundii. Lomis, mbyèn biia xal coꞌseꞌ ndxolꞌ huax mèn arp.
\v 3 No mbìnen ndxolꞌ ro mèna thìb himn cub loo Diox coꞌteꞌ nzo Diox no coꞌteꞌ nzo rye dyap máꞌ coꞌ naban no coꞌteꞌ nzo rye mèngool coꞌ nziriꞌ coꞌteꞌ nzo Diox. Nec thìb mèn neꞌngácte ntéꞌth himna. Ndxeꞌlequeꞌ, ante mèn coꞌ nac thìb ayo nzo choꞌ fthap mil mèn coꞌ mblyáꞌ loo conꞌ ryes loo izlyoꞌ, mèna ngóc mbilꞌ ro himna.
\v 4 Rye mèna ngòc mèn coꞌ neꞌngàalte mèngot thidtene, coꞌ nee diꞌs, neꞌnglide mèna yalmbiꞌ no yalngot. Mèna ngòc mèn nambìi no mèn nalì loo Diox. Thidtenequeꞌ ngòo mèna loo cón cheꞌn Mbacxilꞌ coꞌ nac leque yub Jesucrist. No thidtenequeꞌ ngo no mèna Jesucrist pál coꞌteꞌ mque tee Jesucrist. Ryete mènléyꞌa mblyáꞌ loo ryethe conꞌ ryes par mxoꞌf zinꞌ mèna thìb zinꞌ ndac cón cheꞌn Diox no cón cheꞌn Mbacxilꞌ coꞌ nac leque yub Jesucrist.
\v 5 Thidtenequeꞌ neꞌngroꞌde nec thìb diꞌs gutyèꞌ ro mèna. Ngòc mèna mèn nalì no mèn nambìi thidtene loo Diox coꞌteꞌ nzo Diox.
\s Son angl mbluꞌ cón cheꞌn diꞌs ndac cheꞌn Diox loo mèn.
\p
\v 6 Látha, chàa, gunèen tedib angl coꞌ ngue xobii loo béꞌ. Ngòc nableꞌ angla par teꞌth angl no co angl yalbàn cón cheꞌn diꞌs ndac cheꞌn Diox coꞌ ndluꞌ xá mod lyáꞌ mèn loo conꞌ ryes thidtene. Angl mdeꞌth no mblo angl yalbàn loo mèn rye nación coꞌteꞌ naban mèn dib athu loo izlyoꞌ, mèn coꞌ nac chol bin no mèn coꞌ ndyoodiꞌs chol diꞌstèe.
\v 7 Cabii mbez angl loo mèn dib athu loo izlyoꞌ:
\p ―Fzeb guꞌ gunèe guꞌ Diox. No fzeb guꞌ loo conꞌ ngue li Diox. No guuz guꞌ loo xtàa guꞌ cón cheꞌn conꞌ roo no conꞌ xèn coꞌ ngue li Diox no coꞌ nac Diox tac mzinleꞌ tiemp coꞌseꞌ tub rez Diox cón cheꞌn mèn. Ftub xib guꞌ no fcòoꞌ guꞌ yéc guꞌ loo Diox, Diox coꞌ mblec béꞌ, no coꞌ mblec izlyoꞌ, no coꞌ mblec níttóꞌ, no coꞌ mblec rye coꞌteꞌ ndub len nít.
\p
\v 8 Gunèen mdoo nque tedib angl xís angla. Mbryop angla ndxab:
\p ―Nase ngozanleꞌ Diox no ya mzinleꞌ tiemp coꞌseꞌ li Diox lyux mèn coꞌ nac mèn ciuda, coꞌ nac ciuda más naroo, coꞌ nac ciuda coꞌ neꞌ tedib lèe coꞌ nac lèe ciuda Babiloñ. Diox mbli tataa ngroꞌ lèe ciudaa tac mèn dib athu loo izlyoꞌ mbliqueꞌ no mtéꞌthqueꞌ ryethe conꞌ coꞌ nac conꞌ yeꞌrsinꞌtúb par mbli mèn ryethe conꞌa, coꞌ nac coꞌ mbluꞌ mèn ciudaa loo mèn loo izlyoꞌ, no axta ngòc loc mèn izlyoꞌ xal mènguy por conꞌ yeꞌrsinꞌtúb coꞌ mbli mèna.
\p
\v 9 Gunèen mdoo nque tedib angl coꞌ ngòc mbyon angl xís angla. Mbyon angla cabii mbez loo mèn loo izlyoꞌ, ne:
\p ―Cheleꞌ chol guꞌ còoꞌ yéc guꞌ no tyub xib guꞌ loo máꞌ coꞌ nac máꞌ tínꞌ no loo gunab máꞌa, no laꞌ guꞌ queꞌ mèn señ cheꞌn máꞌ no cheꞌn gunab máꞌ lechuz guꞌ o laꞌs yaꞌ guꞌ,
\v 10 leꞌ sya, ryete guꞌ tyactìi tínꞌ coꞌ nac ryethe conꞌ coꞌ li Diox par tetìi Diox guꞌ, coꞌ nac thìb conꞌ coꞌ mblobeꞌ lezoꞌ Diox li Diox loo guꞌ por ndxecloo tínꞌ Diox ñèe Diox guꞌ. No tyactìi guꞌ axta plóthe. No tenꞌ guꞌ yalnè axta plóthe con coꞌ nac quìi, no bèel, no asufr coꞌ li Diox yol. Gàc conꞌa loo guꞌ loo angl cheꞌn Diox no loo Mbacxilꞌ cheꞌn Diox coꞌ nac leque yub Jesucrist, coꞌ nee diꞌs, loo yub Jesucrist gàc conꞌa loo guꞌ.
\v 11 Zen coꞌ yitoo, coꞌ nac zen cheꞌn quìi no bèel coꞌ nac coꞌ li Diox par tetìi Diox mèn, yitoo zena thidtene. Leꞌn dib tiempa, yende mod tíꞌ lezoꞌ mèna ze no yálꞌ, neꞌ por chuꞌth, mèn coꞌ nac mèn coꞌ tyub xib no coꞌ còoꞌ yéc loo máꞌ no loo gunab máꞌ, o que naca laꞌ mèna quée señ cheꞌn lèe máꞌ no gunab máꞌ lechuz mèn o laꞌs yaꞌ mèn.
\v 12 Cona, ngue niin conꞌ ndxèꞌ loo guꞌ: Leꞌ mèn coꞌ nzo loo cón cheꞌn Diox, no nac mèna mèn cheꞌnpeꞌ Diox, no ndyubdiꞌs mèna diꞌs coꞌ mbez Diox, no altant nziriꞌ mèna loo cón cheꞌn Jesús, mèna naquin xec no chaꞌlaꞌs mèna cón cheꞌn ryethe conꞌ ryes coꞌ gàc loo mèna.
\p
\v 13 Ngolo nguriꞌth ryethe conꞌa, mbìnen thìb diꞌs coꞌ mbyèn loo béꞌ. Gunee diꞌsa loon:
\p ―Juàn, fqueꞌ yeꞌs cón cheꞌn diꞌs coꞌ nde niin lool ndxèꞌ. Desde nalleꞌ par delant, huen nda mèn coꞌ gath, mèn coꞌ ndxelaꞌs loo Tad Jesucrist. Lomisqueꞌ ndxab Xpii Natúꞌ cheꞌn Diox: Aa. Tataaqueꞌ gàca loo mèn tac mèn li descans loo zinꞌ coꞌ mxoꞌf zinꞌ Diox loo mèn cón cheꞌn Diox. No làth xtauꞌa, yo mèn coꞌ taꞌ cuent loo mèn coꞌ nzo loo béꞌ cón cheꞌn zinꞌ coꞌ mxoꞌf zinꞌ mèn, mèn coꞌ gath por cón cheꞌn Tad Jesucrist.
\s Juàn ngue tetac cón cheꞌn xá mod tetìi Diox mèn.
\p
\v 14 Leꞌ sya, be taa be taa mxaquen gunèen thìb leꞌ xcuau nagus loo béꞌ. Loo xcuaua mxaquen mdub thìb mbiꞌ coꞌ ñaa xal ñaa Crist coꞌ mbiꞌth yáal loo izlyoꞌ ndxèꞌ xalqueꞌ ndxáal chol mèn. Mxaquen mdub thìb coron coꞌ nacsuaꞌ con or yéc mbiꞌ. No nzo thìb hoz coꞌ anzeꞌf nalen yaꞌ mbiꞌ.
\v 15 No leque hora, gunèen ngroꞌ tedib angl leꞌn templ cheꞌn Diox coꞌ nzo loo béꞌ. Angla cabii mbez yèe loo mbiꞌ coꞌ ndub loo xcuau. Ndxab angl loo mbiꞌ:
\p ―Ftlo choꞌ yix coꞌ nac cosech tac ya mzinleꞌ hor choꞌ yix coꞌ nac cosech tac mtloleꞌ ndoo yas yix coꞌ nac cosech coꞌ dyop loo izlyoꞌ, coꞌ nee diꞌs, nac mèn coꞌ tetìi Diox loo izlyoꞌ.
\p
\v 16 Ngoloa, xaste mtlo mbiꞌ coꞌ ndub loo xcuaua. Xax xax mchoꞌ mbiꞌ yix coꞌ nac cosech loo izlyoꞌ. No mthop mbiꞌ cosech coꞌ nziriꞌ loo izlyoꞌ thidte lugar, coꞌ nee diꞌs, nac mèn coꞌ tetìi Diox.
\p
\v 17 Mbere tedib angl, ngroꞌ tedib angl leꞌn templ cheꞌn Diox coꞌ nzo loo béꞌ. Mxaquen neꞌ angla thìb hoz coꞌ anzeꞌf nalen yaꞌ angl.
\v 18 No mbere tedib angl. Ngroꞌ tedib angl coꞌ nden hoz coꞌ anzeꞌf nalen, coꞌ nde nque xís angla, leꞌn templ. Angla mbli Diox par mque no angl conꞌ roo no conꞌ xèn laꞌs nii angl no laꞌs yaꞌ angl par ñibeꞌ angl gàc conꞌ ryes loo mèn con quìi. Látha, cabii ngurez angla angl coꞌ ngroꞌ ner, coꞌ nzo hoz yaꞌ coꞌ anzeꞌf nalen. Ndxab mbryop angla loo ner angl:
\p ―Fchoꞌ racim uv con hoz coꞌ nzo yaꞌl baꞌ tac mzinleꞌ tiemp dyop cosech uv coꞌ nac cosech coꞌ nzo loo izlyoꞌ tac uv nguyꞌleꞌ par dyop uv.
\p
\v 19 Leꞌ sya, xax xax mchoꞌ angl racim uv coꞌ nac cosech uv coꞌ nzo loo izlyoꞌ con hoz coꞌ nzo yaꞌ angl. Ngoloa, mthop taa angl uva thidte lugar. Mblo angl uva leꞌn thìb tanc par loo tub mèn loo uv con thìb maz yaa par ryoꞌ nít uv. Conꞌ coꞌ mbli angl loo uva nee diꞌs tataa mod tetìi Diox mèn axta plóthe.
\v 20 Loo uva mblo mdub mèn con thìb maz leꞌn tanc thìb lad ro ciuda coꞌ neꞌ tedib lèe coꞌ nac lèe ciuda Babiloñ. Conꞌ ndxèꞌ nee diꞌs leꞌn tanca ngroꞌ ren cheꞌn rye mèn, coꞌ nee diꞌs, uv ndaꞌ cuent cón cheꞌn mèna. Nguáp rena loo izlyoꞌ axta xal nde ro huay coꞌ ndxòo fren. Cona nee diꞌs, tataa gàca loo mèn coꞌseꞌ tetìi Diox mèn no coꞌseꞌ xyo ren mèn loo izlyoꞌ.
\c 15
\s Trè ndluꞌ leꞌ angl neꞌ gaz loo conꞌ coꞌ nac conꞌ yeꞌrsinꞌ, coꞌ nee diꞌs, nac gaz mod coꞌ tetìi Diox mèn loo izlyoꞌ.
\p
\v 1 Be taa be taa gunèen ngòc tedib señ loo béꞌ coꞌ ngòc thìb señ roo no thìb señ xèn coꞌ ngòc gaz angl. Thìb thìb angla neꞌ thìb cop. Leꞌn copa ngo gaz loo conꞌ coꞌ nac lult conꞌ coꞌ li Diox làa angl loo izlyoꞌ loo mèn. Conꞌa ngòc lult conꞌ no lult yaltìi coꞌ li Diox loo mèn por ndxecloo Diox ñèe Diox mèn.
\p
\v 2 Leque hora ne, mxaquen gunèen thìb conꞌ loo béꞌ coꞌ gunaa xal ñaa thìb lagun nít. Mxaquen ndxetoo bèel loo conꞌ coꞌ ñaa xal ñaa lagun. No ñaa laguna xal thìb vidr coꞌ nax coꞌ ndxetoo bèel loo. Leꞌ mèn coꞌ neꞌnglide cas, no coꞌ neꞌncòoꞌde yéc no coꞌ neꞌndub xibte loo máꞌ tínꞌa no loo gunab máꞌ, no neꞌndalte mèna par mqueꞌ mèn señ cheꞌn máꞌ no numbr cheꞌn máꞌa lechuz mèn o laꞌs yaꞌ mèn, mèna nziriꞌ loo conꞌ coꞌ ñaa xal ñaa thìb lagun no coꞌ ñaa xal vidr. Nzo arp coꞌ mdaꞌ Diox loo mèna yaꞌ mèna.
\v 3 No mbilꞌ ro mèna xal mbilꞌ ro Moisés coꞌ mxoꞌf zinꞌ cón cheꞌn Diox. No mbilꞌ ro mèna xal mbilꞌ ro Mbacxilꞌ cheꞌn Diox coꞌ nac leque yub Jesucrist. Mbez mèna:
\pi1 Conꞌ roo no conꞌ xèn ngüiꞌ mèn no ñaa mèn loo conꞌ ndli Uꞌ, Tad Diox, Uꞌ coꞌ ndxàp rye loothe conꞌ roo no conꞌ xèn laꞌs nii Uꞌ no laꞌs yaꞌ Uꞌ. Nalì no nambìi no lìcpeꞌ nac coꞌ ndluꞌ Uꞌ no coꞌ ndli Uꞌ, Tad Diox, Uꞌ coꞌ nac rey coꞌ ñibeꞌpeꞌ loo ryethe nación.
\pi1
\v 4 ¿Chó mèn nac mèn coꞌ nziriꞌ loo izlyoꞌ coꞌ neꞌzyebte ñèe Uꞌ? No ¿chó mèn nac mèn coꞌ nziriꞌ loo izlyoꞌ coꞌ neꞌgabte loo xtàa leꞌ Uꞌ nac Diox roo no Diox xèn, Tad? Ryete mèn nzyeb ñèe mèna Uꞌ, ¿léꞌ? No ryete mèn gab leꞌ Uꞌ nac Diox roo no Diox xèn, ne, ¿léꞌ?, Tad. Tataa gàca. Tad, angoluxte Uꞌ nac Diox natúꞌ. Ndxeꞌlequeꞌ, rye mèn coꞌ nac mèn rye nación còoꞌ yéc loo Uꞌ no tyub xib mèn loo Uꞌ. Tac mèn mbuiꞌqueꞌ no gunaaqueꞌ mèn ryethe conꞌ mbli Uꞌ ngòc conꞌ nalì no conꞌ nambìi.
\p
\v 5 Ngolo ngòc ryete conꞌa, mxaquen gunèen mxyalꞌ loo béꞌ. No mxyalꞌ ner puert cheꞌn templ coꞌ ndub loo béꞌ. No mxyalꞌ puert coꞌ nauꞌ coꞌteꞌ nac más natúꞌ leꞌn templ coꞌteꞌ nzosuaꞌ quèe tabl coꞌ ngòc quèe coꞌ mtanꞌ Diox diꞌs coꞌ ngòc ley coꞌ mxoꞌf Moisés loo mèn nación Israel.
\v 6 Nerlequeꞌ conꞌ gunèen. Rye gaz angl ngroꞌ leꞌn templ coꞌteꞌ nac lugar más natúꞌ par hueꞌ angl gaz loo conꞌ coꞌ nac gaz yaltìi par tetìi angl mèn xal mnibeꞌ Diox loo angl. No gunèen noc xab thìb thìb angl thìb loo larꞌ coꞌ lèe lin coꞌ ante nambìi gunaa no coꞌ ante mquée xnìi. No natedóꞌ thìb cint or xal nde ro pech thìb thìb angl.
\v 7 Ngoloa, xaste mdaꞌ thìb máꞌ coꞌ nac dyap máꞌ coꞌ naban thìb thìb cop coꞌ nacsuaꞌ con or loo thìb thìb angl coꞌ nac rye gaz angla. Leꞌn copa nzo gaz loo conꞌ coꞌ ngòc gaz yaltìi yeꞌrsinꞌ coꞌ nac mod coꞌ tetìi Diox mèn tant ndxecloo Diox con mèn, Diox coꞌ thidtene nzo.
\v 8 Leꞌ leꞌn templ coꞌ nac más natúꞌ na, ale ngo too zen coꞌ ngòc por conꞌ roo no conꞌ xèn cheꞌn Diox no coꞌ ngòc por cón cheꞌn conꞌ roo no conꞌ xèn coꞌ nzo laꞌs nii Diox no coꞌ nzo laꞌs yaꞌ Diox. No yende chó mèn ngác ngòo leꞌn templa axta ngolo nguriꞌth no axta ngolo ngòc rye gaz loo yaltìi coꞌ ngòc conꞌ yeꞌrsinꞌ coꞌ mbli Diox, coꞌ ngòc coꞌ gunèen, coꞌ ngroꞌ no angl par tetìi Diox mèn.
\c 16
\s Trèꞌ ndluꞌ cón cheꞌn gaz loo conꞌ coꞌ ndluꞌ mod coꞌ tetìi Diox mèn.
\p
\v 1 Be taa be taa mxaquen mbìnen mbyèn thìb diꞌs coꞌ mbyèn leꞌn templ coꞌteꞌ nac más natúꞌ. Diꞌsa ndxab loo rye gaz angl:
\p ―Huaa lath guꞌ gaz loo conꞌ coꞌ nzo leꞌn cop guꞌ coꞌ nac conꞌ coꞌ li Diox par tetìi Diox mèn.
\p
\v 2 Sya, ngua angl coꞌ nac ner angl. Ngua lath angl conꞌ coꞌ ngòc ner loo yaltìi coꞌ ngòc conꞌ yeꞌrsinꞌ loo izlyoꞌ. Leꞌ sya, ryete mèn coꞌ mque no señ cheꞌn máꞌ tínꞌ no mèn coꞌ mcòoꞌ yéc no coꞌ mdub xib loo gunab cheꞌn máꞌ, ale ngroꞌ thìb loo yéꞌs yeꞌrsinꞌ no thìb loo yéꞌs zab lad mèn coꞌ mbli par mdenꞌ mèn yalnè tínꞌ.
\p
\v 3 Ngua lath tedib angl coꞌ nac mbryop angl coꞌ nde nque tedib loo yaltìi coꞌ ngòc conꞌ yeꞌrsinꞌ coꞌ ngo leꞌn cop angl loo níttóꞌ. Leꞌ sya, níttóꞌa ngòc ren xal ren cheꞌn thìb mèn nguth. No mbli nít coꞌ ngòc rena par nguth rye loothe máꞌ coꞌ naban leꞌn níttóꞌ.
\p
\v 4 Ngoloa, ngua lath angl coꞌ nac mbyon angl coꞌ nde nque tedib loo yaltìi coꞌ ngòc conꞌ yeꞌrsinꞌ coꞌ ngo leꞌn cop angl loo rye yóꞌbeꞌ no loo rye lugar coꞌteꞌ ndub len nít. No ngòc nít yóꞌbeꞌ ren no ngòc nít coꞌteꞌ ndub len nít ren.
\v 5 Látha, chàa, mbìnen gunii angl coꞌ ñibeꞌ loo nít dib athu loo izlyoꞌ. Ndxab angl loo Diox:
\p ―Tad Diox, Uꞌ nac Diox nalì no Diox nambìi por tataa mbli Uꞌ no mdub rez Uꞌ cón cheꞌn mèn baꞌ, Uꞌ coꞌ nac Diox natúꞌ coꞌ thidtenequeꞌ nzo.
\v 6 Tataa mbli Uꞌ loo mèna tac mèna mbeth mèn coꞌ ngòc mèn coꞌ ngro xàꞌ loo cón cheꞌn xab izlyoꞌ par ngòc mèna cheꞌnpeꞌ Uꞌ. No lomisqueꞌ, mbeth mèna mèn coꞌ mdeꞌth diꞌs coꞌ ndxab Uꞌ no mèn coꞌ mblo yalbàn cón cheꞌn Uꞌ loo mèn loo izlyoꞌ. No nalleꞌ, Uꞌ mnibeꞌ yèe loo mèna par gu mèna nít ren cheleꞌ mèn ndlyaꞌs gu nít. Aa. Nzyalqueꞌ mèna, tataa gàca loo mèna.
\p
\v 7 Mbìnen, ne, gunii thìb xaꞌ axta loo còoꞌ coꞌ ndoo gaxte coꞌteꞌ ndub Diox. Mbez xaꞌ:
\p ―Lìca, Tad Diox, Uꞌ coꞌ ndxàp rye loothe conꞌ roo no conꞌ xèn laꞌs nii Uꞌ no laꞌs yaꞌ Uꞌ, nalìqueꞌ nac Uꞌ no nambìiqueꞌ nac Uꞌ. No nalìcpeꞌ nac coꞌ ndub rez Uꞌ cón cheꞌn mèna.
\p
\v 8 Ngoloa, ngua lath tedib angl coꞌ nac dyap angl coꞌ nde nque tedib loo yaltìi coꞌ ngòc conꞌ yeꞌrsinꞌ coꞌ ngo leꞌn cop angl loo huiz. No mbli Diox par ngòc conꞌ roo no conꞌ xèn loo huiz par mtec msoꞌ huiz mèn loo izlyoꞌ.
\v 9 No ryete mèna mbyec mzyoꞌ axta plóthe. Per neꞌ por ngòc conꞌa loo mèna neꞌnglàade yéc mèna no neꞌnglàade lezoꞌ mèna par nseꞌ mèna mod coꞌ ngòp mèna loo Diox. Neꞌ neꞌ ngab mèna loo xtàa mèna leꞌ Diox nac Diox roo no Diox xèn. Ndxeꞌlequeꞌ, nazab gunii yèe gunii tìi mèna cón cheꞌn Diox, Diox coꞌ ndxàp rye loothe conꞌ roo no conꞌ xèn laꞌs nii Diox no laꞌs yaꞌ Diox par ñibeꞌ Diox gàc yaltìi loo mèn axta plóthe.
\p
\v 10 Ngoloa, ngua lath angl coꞌ nac gaꞌy angl coꞌ nde nque tedib loo yaltìi coꞌ ngòc conꞌ yeꞌrsinꞌ coꞌ ngo leꞌn cop angl loo asient coꞌteꞌ ndub máꞌ tínꞌa. No ryete lugar coꞌteꞌ mnibeꞌ máꞌ tínꞌa ngulàa yálꞌcuau loo mèn loo izlyoꞌ loo ryete conꞌ, que naca loo máꞌ, que naca loo mèn. Nde nxonꞌ, mèna ndxuhua loz ndxuhua tin por ya neꞌnxecte mèn ngòc yaltìi no yalnèa loo mèn.
\v 11 Per neꞌ por ndxàc conꞌa loo mèna neꞌnglàade yéc mèna no neꞌnglàade lezoꞌ mèna par nseꞌ mèna mod coꞌ ndxàp mèna loo Diox. Ndxeꞌlequeꞌ, nazab gunii mèna cón cheꞌn Diox, Diox coꞌ nzo loo béꞌ, por mbli Diox ndxàc yalnèa loo mèna no por mbli Diox ngro xoꞌf yeꞌs yeꞌrsinꞌa lad mèn.
\p
\v 12 Ngoloa, ngua lath angl coꞌ nac xop angl coꞌ nde nquea tedib loo yaltìi coꞌ ngòc conꞌ yeꞌrsinꞌ coꞌ ngo leꞌn cop angl loo yóꞌbeꞌ coꞌ nac más yóꞌbeꞌ roo, coꞌ lèe yóꞌ Eufrat. Sya, nít coꞌ nzoꞌf yóꞌbeꞌa ale mbiiz nít par tataa mod mxyalꞌ thìb ned coꞌteꞌ ndriꞌth yóꞌbeꞌa par mbriꞌth mèn coꞌ nac rey con solndad rey coꞌ nac mèn coꞌ ñibeꞌ nación par ned ndlyen huiz.
\p
\v 13 Be taa be taa gunèen ngroꞌ thìb xpii yeꞌrsinꞌ ro dragón, no ngroꞌ thìb xpii yeꞌrsinꞌ ro máꞌ coꞌ ngòc máꞌ tínꞌ, no ngroꞌ thìb xpii yeꞌrsinꞌ ro xaꞌ coꞌ mbez mdeꞌth cón cheꞌn Diox per ndeꞌth xaꞌ diꞌs coꞌ inacte conꞌ lìcpeꞌ. Xpii yeꞌrsinꞌa ñaa xal ñaa mbich.
\v 14 Mbich coꞌ ngroꞌ ro yon xaꞌa, mbicha ngòc xpii meexùꞌ. Xpiia mbli ngòc huax yalguzyeꞌ coꞌ nac yalguzyeꞌ roo no yalguzyeꞌ xèn. Ngro xpiia loo izlyoꞌ par mbli xpiia mqueltàa rye rey coꞌ nzo dib athu loo izlyoꞌ con solndad rey par thidte mqueltàa rye rey con solndad rey par li rye rey xóꞌ con solndad rey loo Diox coꞌseꞌ gàc huiz coꞌseꞌ tub rez Diox cón cheꞌn rye mèn yeꞌrsinꞌ par telux Diox rye mèn yeꞌrsinꞌa coꞌseꞌ li Diox xóꞌ con mèna huiza, Diox coꞌ ndxàp rye loothe conꞌ roo no conꞌ xèn laꞌs nii Diox no laꞌs yaꞌ Diox.
\v 15–16 Sya, mqueltàa xpii yeꞌrsinꞌa rye rey con mèn coꞌ nac solndad rey thìb lugar coꞌ lèe Armagedón coꞌ nac lèe thìb laꞌs coꞌ nziriꞌ loo xyòn mèn nación Israel. Láth ngue huiꞌen conꞌa, mbìnen diꞌs coꞌ gunee Jesucrist loon. Gunee Jesucrist loon:
\p ―Juàn, huiꞌ nexa. Na gal thìb huiz coꞌ yende chó mèn ngue bed daa no thìb huiz coꞌ yende chó mèn nzi quee lezoꞌ galen. Galen loo izlyoꞌ xal coꞌseꞌ ndlyàa huanꞌ liz mèn. Huen gàca loo mèn, mèn coꞌ nzi quee lezoꞌ, no mèn coꞌ altant nzi loo cón chenen, no mèn coꞌ nalì no nambìi nzi que tee ban lì loo cón chenen. Mèna yende chó tethon no yende chó coꞌ too mèna thìb lad loo mèn coꞌ nzo loo cón chenen par taꞌ mèn gust lezoꞌ mèn con mèna coꞌseꞌ gàc huiz coꞌ galen.
\p
\v 17 Ngoloa, ngua lath angl coꞌ nac gaz angl coꞌ nde nquea tedib loo yaltìi coꞌ ngòc conꞌ yeꞌrsinꞌ coꞌ ngo leꞌn cop angl loo mbii loo izlyoꞌ. Sya, cabii mbyèn thìb diꞌs axta coꞌteꞌ nac leꞌn templ coꞌteꞌ nac lugar más natúꞌ loo béꞌ coꞌteꞌ nzo Diox. Diꞌsa mbez:
\p ―Nase guneela. Conꞌ ndxèꞌ nac lult conꞌ coꞌ lin par tataa mod tetìin mèn loo izlyoꞌ.
\p
\v 18 Sya, ngulàa bèel gundii. Mbyèn huax ruid. Ngos mblyaꞌb gundii. No mbuin thìb xòo brut más fuert coꞌ tarte huin dib lal nziriꞌ mèn loo izlyoꞌ.
\v 19 Lomisqueꞌ ne, mxaquen ale ngulàa bes son part ciuda Jerusalén coꞌ nac ciuda roo ciuda xèn. Leꞌ rye liz mèn coꞌ nac chol ciuda coꞌ nziriꞌ loo izlyoꞌ na, ngulàareꞌ no ngulàateriꞌ ciuda loo izlyoꞌ. Làth xtauꞌa, Diox mteꞌ lezoꞌ cón cheꞌn ciuda coꞌ neꞌ tedib lèe ciuda Babiloñ par li Diox gàc más yaltìi no yalnè loo mèn ciudaa por tant ndxecloo Diox ñèe Diox mèna por mod yeꞌrsinꞌ coꞌ ngòp mèna loo Diox.
\v 20 Lomisqueꞌ ne, rye yòo biiz coꞌ nziriꞌ leꞌn níttóꞌ chol lugar no rye yii den mdyep leꞌn níttóꞌ no mdyonꞌ rye yii den.
\v 21 Lomisqueꞌ ne, ngulàa yuu quèe brut coꞌ néꞌ axta choꞌ kil rloo mèn loo izlyoꞌ. Per mastaleꞌ ngulàa yuu quèea rloo mèn coꞌ nziriꞌ loo izlyoꞌ, ale leꞌleꞌ gunii yèequeꞌ no gunii tìiqueꞌ mèna cón cheꞌn Diox por yuu quèe coꞌ ngulàa rloo mèna tac yuu quèea mbli ngòc thìb yaltìi tínꞌ loo mèn.
\c 17
\s Trèꞌ ndluꞌ leꞌ Diox mquexùꞌ cón cheꞌn thìb xaꞌgot coꞌ ngòc thìb xaꞌgot burrid.
\p
\v 1 Ngolo nguriꞌth conꞌa, mbiꞌth thìb angl coꞌ ngòc gaz angl coꞌ mque no tedib loo yaltìi coꞌ ngòc conꞌ yeꞌrsinꞌ leꞌn cop coꞌ ngòc gaz cop. Gunee angla loon:
\p ―Juàn, que de ndxèꞌ par luꞌen lool cón cheꞌn yaltìi coꞌ tyactìi thìb xaꞌgot coꞌ nac xaꞌgot roo xaꞌgot xèn coꞌ ndli yalburrid. Xaꞌgota ñibeꞌ loo mèn dib athu loo izlyoꞌ par yòo mèn loo mod yeꞌrsinꞌ coꞌ nac xaꞌgota.
\v 2 Ryethe mèn coꞌ ngòc rey coꞌ mnibeꞌ loo mèn loo izlyoꞌ, mèna ngure ban liqueꞌ xalqueꞌ ngòc mod yeꞌrsinꞌtúb coꞌ ngòp xaꞌgota. Lomisqueꞌ ne, mxaquen leꞌ rye mèn coꞌ ngure ban dib athu loo izlyoꞌ, ale angngureriꞌ mèn, mbli mèn ngòc nguàal conꞌ coꞌ ngòc conꞌ yeꞌrsinꞌ. Ngòc mèn xal mènguy por mbli mèn ryethe conꞌ yeꞌrsinꞌ coꞌ ngòc lomisqueꞌ mod yeꞌrsinꞌ coꞌ ngòp xaꞌgota.
\p
\v 3 Leque hora, Xpii Natúꞌ mbli par mxaquen gunèen leꞌ angl mbeꞌ daa thìb lugar coꞌteꞌ nagán. Tya, gunèen thìb xaꞌgot coꞌ ndub thìb máꞌ tínꞌ. Máꞌa gunaa nane ren. No dib lad máꞌa ndub diꞌs coꞌ ngòc diꞌs zab coꞌ ñii yèe ñii tìi máꞌ cón cheꞌn Diox. No mxaquen leꞌ máꞌa mque no gaz yéc. No lomisqueꞌ ne, mxaquen ndub siꞌ cach yéc máꞌ.
\v 4 Xaꞌgot coꞌ ndub máꞌa noc xab larꞌ morad no larꞌ nane ren. No nabeꞌste natoxcuaꞌ xaꞌ con anab corral or no con anab yiꞌf or. No natoxcuaꞌ xaꞌ con thìb loo quèe coꞌ anzeꞌf náp ntac no con thìb loo perl coꞌ anzeꞌf náp ntac. Mxaquen nzo thìb cop coꞌ nacsuaꞌ con anab or yaꞌ xaꞌgota. Leꞌn copa ngo ampurte conꞌ zab coꞌ anzeꞌf naxin ndlyaꞌ coꞌ nacpeꞌ conꞌ xin no conꞌ cap, coꞌ nee diꞌs, nac mod coꞌ ndxàp xaꞌgota.
\v 5 Nde nxonꞌ, mdub diꞌs lechuz xaꞌgota. Diꞌsa yende chó mèn taꞌ cuent cón nee diꞌs diꞌsa. Diꞌsa mbez taandxèꞌ: Ciuda roo no ciuda xèn coꞌ lèe Babiloñ nac xnaꞌ chol xaꞌgot coꞌ ndli yalburrid tínꞌ. No nac ciuda Babilón xal xnaꞌ rye mèn coꞌ nzi ban dib athu loo izlyoꞌ, mèn coꞌ ndli conꞌ xin no conꞌ cap xalqueꞌ ngòc mod coꞌ ngòp xaꞌgota.
\v 6 Látha, chàa, mdub xnìi lezon. Mdan cuent no mdenꞌen leꞌ xaꞌgota mquée mbii yéc no ngòc xaꞌgota xal thìb xaꞌguy por cón cheꞌn ren coꞌ ngòc ren cheꞌn mèn coꞌ mxyo, mèn coꞌ ngòoleꞌ loo cón cheꞌn Diox coꞌ ngòc cheꞌnpeꞌ Diox no mèn coꞌ nguthxùꞌ por mdaꞌ mèna cuent cón cheꞌn Tad Jesús loo mèn. No coꞌseꞌ gunèen conꞌa, ante mbyuꞌ mbyàl daa no ante mbuiꞌen no ante gunaan loo conꞌ gunèena.
\v 7 Láth ndxàc conꞌa loon, gunee angl loon:
\p ―Juàn, ¿chonon susqueꞌ ngüiꞌ ñaal loo conꞌ ndxàc baꞌ, àꞌ? Neꞌhuiꞌdel no neꞌñaadel loo conꞌ ndxàc baꞌ. Na luꞌ lool cón nee diꞌs cón cheꞌn xaꞌgot baꞌ tac cón cheꞌn xaꞌgot baꞌ no cón cheꞌn máꞌ coꞌ ndub xaꞌgot baꞌ coꞌ nac máꞌ coꞌ ngue no gaz yéc no coꞌ nac leque máꞌ coꞌ ndub siꞌ cach yéc, yende chó mèn gác taꞌ cuent cón cheꞌn máꞌ baꞌ lool.
\v 8 Máꞌ tínꞌ coꞌ gunèela, máꞌa nac thìb mbiꞌ coꞌ nzo banleꞌ ndooreꞌ. Per mastaleꞌ ngo ban mbiꞌ, nalleꞌ nguthleꞌ mbiꞌ. No mastaleꞌ nguthleꞌ mbiꞌ, per ale bere mbiꞌ, ryoꞌ mbiꞌ leꞌn yeꞌrbiil par ban mbiꞌ tedib vez ndooreꞌ gath mbiꞌ thidtene yiloa. Lomisqueꞌ ne, mèn coꞌ nzi ban loo izlyoꞌ, mèna nac mèn coꞌ indubte lèe loo libr coꞌteꞌ ndub lèe mèn coꞌ yòo ban no Diox thidtene. Libr coꞌ ngue no Dioxa, libra ngue noleꞌ Diox axta coꞌseꞌ anon mblec Diox izlyoꞌ. No más de cona, ante huiꞌ mèna no ante ñaa mèna coꞌseꞌ ñèe mèn ryo xban máꞌ tínꞌ coꞌ nac mbiꞌ coꞌ ngo ban no ngoloa nguth mbiꞌ. Per nalleꞌ, ale mbere mbiꞌ, ngro xban mbiꞌ tedib vez. Por cona, huiꞌ mèn no ñaa mèn loo mbiꞌ tedib vez.
\p
\v 9 Trèꞌ ngue niin plá diꞌs ndxèꞌ lool, Juàn, par queꞌl diꞌs ndxèꞌ loo yeꞌs par li mèn coꞌ ndxác xtùuz cón cheꞌn diꞌs ndxèꞌ no taꞌ mèn cuent cón cheꞌn diꞌs ndxèꞌ cón nee diꞌs ndxèꞌ. Pues gaz yéc máꞌ coꞌ gunèel ndluꞌ nac no nee diꞌs nac gaz yii coꞌ nac yii coꞌteꞌ ndub xaꞌgota.
\v 10 Lomisqueꞌ ne, gaz yéc máꞌ coꞌ gunèela ndluꞌ cón cheꞌn gaz mbiꞌ coꞌ ngòcleꞌ rey. Per de loo gaz mbiꞌ coꞌ ngòcleꞌ reya, ngololeꞌ gunee cón cheꞌn gaꞌy mbiꞌ. Per beꞌ mbyanꞌ taachop mbiꞌ. Thìb mbiꞌ nac gobiern coꞌ ñibeꞌ nalleꞌ. Per tedib mbiꞌ tarte yiꞌth, coꞌ nee diꞌs, tarte tlo mbiꞌ, ñibeꞌ mbiꞌ. Per coꞌseꞌ yiꞌth mbiꞌ coꞌ nac lult mbiꞌ coꞌ ñibeꞌa, neꞌtyub ñibeꞌde mbiꞌ arid nen, coꞌ nee diꞌs, huax línꞌ. Luega ñeei loo mbiꞌ.
\v 11 Per leque thìb máꞌ tínꞌ coꞌ ngòc mbiꞌ coꞌ thidte ngòc rey con rye gaz rey ndooreꞌ no ngoloa nguth mbiꞌ, leque mbiꞌa bere ryo xban par gàc mbiꞌ rey coꞌ ñibeꞌ coꞌ gàc xon rey coꞌ ñibeꞌ. Coꞌseꞌ ñibeꞌ rey coꞌ gàc xon rey ndxep tiemp coꞌ gàc leque mbiꞌa, syareꞌ, ñeei loo mbiꞌ thidtene, coꞌ nee diꞌs, Diox li par lyàa mbiꞌ thìb lìte leꞌn yeꞌrbiil thidtene.
\p
\v 12 Leꞌ ryete siꞌ cach coꞌ gunèel mdub yéc máꞌa na, siꞌ cach máꞌa nee diꞌs nac siꞌ rey coꞌ tarte tlo ñibeꞌ. Diox taꞌ lugar gàp reya conꞌ laꞌs nii reya no conꞌ laꞌs yaꞌ reya par ñibeꞌ reya ndxepte tiemp coꞌ gàc leque tiemp coꞌ ñibeꞌ máꞌ tínꞌ coꞌ nac thìb mbiꞌ loo izlyoꞌ.
\v 13 Ryete siꞌ reya thidte diꞌs que no. No taꞌ ryete reya lugar par ñibeꞌ máꞌ tínꞌ coꞌ nac mbiꞌa loo reya.
\v 14 Leꞌn ndxep tiempa, cuaꞌn xóꞌ ryete siꞌ reya con máꞌ tínꞌ coꞌ nac mbiꞌa con solndad rey no solndad mbiꞌa contra Mbacxilꞌ coꞌ nac leque yub Jesucrist. Per Mbacxilꞌ coꞌ nac leque yub Jesucrist li gan loo rye reya no loo máꞌ coꞌ nac mbiꞌa tac Jesucrist nac Tad coꞌ ñibeꞌ loo chol mèn, coꞌ nee diꞌs, nac Tad loo izlyoꞌ. No nac Tad Jesucrist rey cheꞌn mèn, coꞌ nee diꞌs, nac rey coꞌ ñibeꞌ loo mèn loo izlyoꞌ. Leꞌ rye mèn coꞌ mqueltàa con Tad Jesucrist na, mèna nac mèn coꞌ Diox mcui no coꞌ mblec Diox loo cón cheꞌn Diox. No thidtenequeꞌ altant nzi mèna loo cón cheꞌn Diox.
\p
\v 15 Tolo gunee angl loon:
\p ―Juàn, níttóꞌ coꞌ mxacl gunèel coꞌteꞌ ndub xaꞌgot coꞌ ndli yalburrid, níttóꞌa nee diꞌs nac mèn rye nación coꞌ nziriꞌ dib athu loo izlyoꞌ no nac níttóꞌa mèn rye nación coꞌ ndyoodiꞌs chol diꞌstèe.
\v 16 Leꞌ siꞌ cach coꞌ gunèel ndub yéc máꞌ tínꞌa na, conꞌa nee diꞌs leꞌ mèn coꞌ nziriꞌ loo izlyoꞌ yòo xyàn lezoꞌ mèn ñèe mèn xaꞌgota. No láꞌyaꞌ mèn cón cheꞌn xaꞌgota. No li mèn gàc loo xaꞌgota xal thìb mèn coꞌ yende xab coꞌ ngue tee che. Ale tlate hua mèna bélꞌ lad xaꞌgota. No tec mèn xaꞌgota loo quìi no loo bèel.
\v 17 Yub Diox mbli par mbli mèn coꞌ ngòc reya xal mblyaꞌs Diox par thidte ngòc mèna no par thidte mdoodiꞌs mèna par mbli mèna ngòc máꞌ tínꞌa xaꞌ coꞌ ñibeꞌ dib athu loo izlyoꞌ xal thìb rey axta zin huiz no tyaa huiz coꞌ ndxab Diox cued, ya neꞌtolode ban máꞌ tínꞌa loo izlyoꞌ.
\v 18 Leꞌ xaꞌgot coꞌ gunèela na, xaꞌgota nac ciuda roo no ciuda xèn coꞌ ñibeꞌ no coꞌ li gàc nadoꞌ rye mèn coꞌ ñibeꞌ loo mèn dib athu loo izlyoꞌ par ñibeꞌpeꞌ ciudaa loo mèn dib athu loo izlyoꞌ.
\c 18
\s Ciuda coꞌ neꞌ lèe ciuda Babiloñ lyux thidtene.
\p
\v 1 Ngolo ngòc ryethe conꞌa, mxaquen gunèen tedib angl coꞌ nde làa loo béꞌ loo izlyoꞌ. Angla ndxàp conꞌ roo no conꞌ xèn laꞌs nii angl no laꞌs yaꞌ angl. Leꞌ loo izlyoꞌ na, mbyàꞌx xnìi coꞌ nquée lad angl.
\v 2 Mbìnen ngrozèe angl cabii. Mbez angl loo mèn loo izlyoꞌ:
\p ―Nase ya mblyuxleꞌ ciuda roo no ciuda xèn coꞌ neꞌ lèe ciuda Babiloñ. No ngòc ciuda roo ciuda xèna liz no làaz cheꞌn chol xpii yeꞌrsinꞌ. Lomisqueꞌ ne, ngòc ciudaa ciuda coꞌteꞌ ngos ngóol chol mbin coꞌ indxòode lezoꞌ mèn huiꞌ mèn no chol mbin coꞌ ndxòo xyàn lezoꞌ mèn ñèe mèn.
\v 3 Tataaqueꞌ gàca loo mèn ciuda roo ciuda xèna tac mèn ryete nación coꞌ nziriꞌ dib athu loo izlyoꞌ nzi li xalqueꞌ nac mod coꞌ ndxàp mèn ciuda roo ciuda xèna. Tac mod coꞌ ndxàp mèn ciudaa ndli inthyonte mèn loo chol conꞌ yeꞌrsinꞌ coꞌ ndli mèn. Nac mèna xal mènguy coꞌ nquée mbii yéc coꞌseꞌ ndli mènguy chol conꞌ yeꞌrsinꞌ. No axta rye mèn coꞌ nac rey, coꞌ nee diꞌs, chol mèn coꞌ ñibeꞌ loo xtàa mèn nzi ban li mèna chol conꞌ yeꞌrsinꞌ xalqueꞌ nac mod coꞌ ndli mèn ciudaa. Lomisqueꞌ ne, rye mèn coꞌ nac comerciant loo izlyoꞌ ndxèꞌ ndxàc ric por mod coꞌ ndxàp mèn ciudaa por nthoꞌ comerciant ryethe conꞌ coꞌ ndyoxcuaꞌ mèn ciudaa coꞌ nac thìb mod yeꞌrsinꞌtúb coꞌ ndxàp mèn ciudaa.
\p
\v 4 Leque hora, mbìnen tedib diꞌs coꞌ mbyèn loo béꞌ. Diꞌsa mbez:
\p ―Groꞌ guꞌ leꞌn ciuda baꞌ, guꞌ coꞌ nzo loo cón chenen no guꞌ coꞌ nac chenen, par neꞌgàcte guꞌ thidte con mèn coꞌ ndxàp xtol baꞌ no par neꞌcuaꞌnte guꞌ xquin guꞌ xal ncuaꞌn mèna baꞌ xquin mèna baꞌ, no par neꞌyidinꞌte yaltìi coꞌ nac conꞌ yeꞌrsinꞌ coꞌ ndxàc loo mèn baꞌ loo guꞌ, ne.
\v 5 Tac mèn baꞌ anzeꞌf thìb xtol mcuaꞌn loo Diox. Por cona, indxathlaꞌste Diox ryethe conꞌ yeꞌrsinꞌ coꞌ mbli mèn baꞌ.
\v 6 Leꞌ sya, leque hora mnibeꞌ angl loo taamas angl coꞌ mtelꞌ Diox par tetìi angl mèn cheꞌn ciuda coꞌ neꞌ lèe ciuda Babiloñ. Ndxab angla loo taamas angl:
\p ―Bli guꞌ lomisqueꞌ conꞌ loo mèn ciuda baꞌ xal mbli mèn ciuda baꞌ loo chol mèn. Lomisqueꞌ ne, blo xtàa guꞌ chop vez loo mèn ciuda baꞌ xalqueꞌ mbli mèn baꞌ loo chol mèn. Fcuaꞌn guꞌ mod tetìi guꞌ mèn baꞌ chop vez por ryethe conꞌ yeꞌrsinꞌ coꞌ nde teeleꞌ ndli mèn baꞌ loo taamas mèn.
\v 7 Bli guꞌ par tyactìi mèn ciuda baꞌ axta plóthe no par tenꞌ mèna yalnè axta plóthe xalqueꞌ coꞌseꞌ mque tee teꞌs mèn, no mque tee xalꞌ mèn, no mdyoxcuaꞌ mèn con ampurte conꞌ huen axta plóthe. Tataa bli guꞌ tac mèn ciuda baꞌ mbez loo lezoꞌ mèn: Trèꞌ nduben. Yende chó ñibeꞌ loon no yende chó ñii loon. Nac daa xal thìb xaꞌgot coꞌ nac rein. Inacte daa xal thìb xaꞌgot viud. No dib lal naban daa yende chó mèn gác li par texi mèna lezon. Anzeꞌf huen nzon. No huen ndan par delant.
\p
\v 8 Por cona, thidte huiz gàc ryethe conꞌ yeꞌrsinꞌ ndxèꞌ loo mèn ciudaa: Gath mèna. Xi lezoꞌ mèn por yaltìi coꞌ gàc loo mèn. Lyàa huin loo mèn. Lyàa quìi no bèel loo mèn par yec mèn. Tataa li Diox loo mèn tac Diox nac Diox coꞌ ndxàp rye loothe conꞌ roo no conꞌ xèn laꞌs nii Diox no laꞌs yaꞌ Diox. No nac Diox Tad coꞌ mquexùꞌ mèna par tataa gàca loo mèna.
\p
\v 9 Leꞌ rye mèn coꞌ ngòc rey no coꞌ ngòc mèn nac zinꞌ coꞌ mnibeꞌ loo xtàa dib athu loo izlyoꞌ, mèn coꞌ mque tee li xal nac mod yeꞌrsinꞌ cheꞌn mèn ciudaa no mèn coꞌ mbli xal ndyoxcuaꞌ mèn ciudaa, mèna gónꞌ no cozèe yath mèna coꞌseꞌ ñèe mèna yitoo zen ndxec ciuda roo ciuda xèna, ne.
\v 10 Mèn coꞌ ngüiꞌ xal ndxetoo zen ndxec ciudaa, mèna nziriꞌ tith por mzyeb mèna ndxàc yaltìi loo mèn ciudaa. Mèna mbez loo mbii loo mèn ciuda roo ciuda xèna:
\p ―¡Ay, prob guꞌ izlyoꞌ, mèn ciuda Babiloñ, guꞌ coꞌ ngòc mèn ciuda roo ciuda xèn. Ale setilte ngòc conꞌ tínꞌ baꞌ loo guꞌ, yoo, par tatuaꞌ mod mtetìi Diox guꞌ. Mzyalqueꞌ guꞌi.
\p
\v 11 Lomisqueꞌ ne, ale mbínꞌ mèn coꞌ ngòc comerciant coꞌ mbli delgens dib athu loo izlyoꞌ por cón cheꞌn mèn ciudaa coꞌ ngòc yaltìi looa tac ya yende chó mèn tolo ndiꞌ ryethe conꞌ coꞌ ndyee thoꞌ mèn loo mèn ciudaa.
\v 12 Ryethe conꞌ coꞌ nac coꞌ ndyee thoꞌ mèn coꞌ ndli delgens par neda nac chol conꞌ coꞌ nacsuaꞌ con or, no conꞌ coꞌ nacsuaꞌ con plat, no coꞌ nacsuaꞌ con chol loo quèe coꞌ anzeꞌf ntac. Nthoꞌ mèna chol loo perl, larꞌ fin coꞌ anzeꞌf náp ntac, no larꞌ sed coꞌ nac color morad no coꞌ nac color nane ren. No nthoꞌ mèna rye loo yaa huen coꞌ nix ndlyaꞌ. No nthoꞌ mèna huax loo conꞌ coꞌ nacsuaꞌ con thìb loo quèe coꞌ lèe marfil. Nthoꞌ mèna thìb loo yaa huen coꞌ anzeꞌf náp ntac. Nthoꞌ mèna yiꞌf coꞌ lèe brons no chol taamas yiꞌf. No nthoꞌ mèna quèe coꞌ lèe marm.
\v 13 Nthoꞌ mèna canel no rye loothe taamas conꞌ coꞌ nix ndlyaꞌ xal duꞌr yalꞌ no tedib loo conꞌ coꞌ lèe mirr no nít perfum coꞌ anzeꞌf nix ndlyaꞌ. Nthoꞌ mèn mbacxilꞌ, huay, carret coꞌ ngoꞌf huay, no axta ndxeꞌ mèna mèn coꞌ nthoꞌ mèna par ndxàc mèn moz coꞌ ndyoꞌ par ñibeꞌ yèe mèna loo prob mèn coꞌ ndxàc moz.
\v 14 Per coꞌseꞌ ñèe mèn coꞌ nthoꞌa tataa ndxàc loo mèn ciuda coꞌ nac ciuda roo ciuda xèn coꞌ neꞌ tedib lèe ciuda Babiloñ, mèna ndxab loo mèn ciudaa:
\p ―Nase mblyux rye loothe conꞌ ndac coꞌ ngòp guꞌ. No axta arid mdaꞌ guꞌ gust lezoꞌ guꞌ con conꞌ coꞌ ngòp guꞌa. No, por derech, mblyux ryethe conꞌ ndac, no yalgonꞌ, no ryethe mod coꞌ nabeꞌs mdyoxcuaꞌ guꞌ.
\p
\v 15 Ryete mèn coꞌ nthoꞌ coꞌ ndli delgens loo ryethe conꞌ nthoꞌ mèn no ryethe mèn coꞌ ngòc ric por conꞌ coꞌ mthoꞌ mèn loo mèn ciudaa, rye mèna ngure tith loo ciuda roo ciuda xèn coꞌ mdoo yol no coꞌ mdoo lux por tant mzyeb mèna ngüiꞌ mèna xal ndxàc yaltìi loo ciudaa. Ndxónꞌ mèna no mbez yèe mèna.
\v 16 No ndxab mèna loo mbii loo mèn ciudaa:
\p ―¡Ay, prob mèn ciuda roo ciuda xèn baꞌ! Mèn ciuda baꞌ ngòc xal thìb xaꞌgot coꞌ nabeꞌs gunaa coꞌseꞌ ndxoc xaꞌ larꞌ coꞌ nac larꞌ fin, no coꞌseꞌ ndxoc xaꞌ larꞌ coꞌ nac larꞌ color morad no larꞌ color nane ren, no coꞌseꞌ ndyoxcuaꞌ xaꞌgota con anabte or no con anabte quèe coꞌ anzeꞌf náp ntac no con perl.
\p
\v 17 Lomisqueꞌ, mbez mèna loo mèn ciudaa:
\p ―Ale setilte mblyux guꞌ no mblyux yalgonꞌ coꞌ ngòp guꞌ.
\p Lomisqueꞌ ne, ryete mèn coꞌ ngòc capitán coꞌ ñibeꞌ loo mèn coꞌ ndli zinꞌ loo yòoyaa, no rye mèn coꞌ nzo leꞌn yòoyaa, no rye mèn coꞌ ntetee yòoyaa, no ryete mèn coꞌ ndli zinꞌ loo níttóꞌ, rye mèna ngure tith par ngüiꞌ mèna xal ndxol ciudaa no par huiꞌ mèna xal ndlyux ciudaa.
\v 18 No coꞌseꞌ ñèe mèna ndxetoo zen ndxol ciudaa, ngrozèe yii no ngrozèe den mèna. Mbez mèna loo mbii:
\p ―¿Chó mèn ciuda lalqueꞌ gàc xal ngòc mèn ciuda roo ciuda xèn baꞌ, yey? Yende chó mèn ciuda coꞌ lalqueꞌ gàc xal ngòc mèn ciuda baꞌ, ¿léꞌ?, cara.
\p
\v 19 Látha, ndyen mèna yòo. Nxob mèna yòo yéc mèna tant nxi tínꞌ lezoꞌ mèna. Ndxónꞌ mèna no mdub mingoꞌr yen mèna. No mbez yèe yath mèna. No mbez mèna loo mbii loo mèn ciudaa:
\p ―¡Ay, prob mèn ciuda roo mèn ciuda xèn baꞌ! Con yalgonꞌ coꞌ ngòp mèn baꞌ ngòc ric rye mèn coꞌ mque no barc loo níttóꞌ. No nalleꞌ ale setilte mblyux yalgonꞌ mèn baꞌ. No mblyux mèn baꞌ.
\p
\v 20 Mberen, mbìnen diꞌs coꞌ mbyèn loo béꞌ tedib vez coꞌ mbez:
\p ―Ndxeꞌlequeꞌ, ftac lezoꞌ guꞌ no fxoꞌf ndeꞌ fxoꞌf ndlaꞌ lezoꞌ guꞌ cón cheꞌn conꞌ coꞌ ngòc loo ciuda baꞌ, ryete guꞌ coꞌ nzo loo béꞌ, no ryete guꞌ coꞌ nac apostl coꞌ mtelꞌ Jesucrist par ndxeꞌ guꞌ diꞌs ndac loo mèn, no ryete guꞌ coꞌ mdeꞌth diꞌs coꞌ ndxab Diox, no ryete guꞌ coꞌ nzo loo cón cheꞌn Diox no coꞌ nac cheꞌnpeꞌ Diox. Tac texal ngolo mquexùꞌ Diox mèn baꞌ par mtetìi Diox mèn baꞌ, tatuaꞌ mod mbli Diox mblo xtàa Diox loo mèn baꞌ por cón cheꞌn guꞌ. No mbli Diox conꞌ nalì no conꞌ nambìi loo guꞌ por cón cheꞌn mèn baꞌ.
\p
\v 21 No coꞌseꞌ ngolo mbìnen diꞌsa, chàa, gunèen mblít thìb angl thìb quèe roo coꞌ néꞌ xal thìb quèe yees. Mxen angl quèea. Mblobii angl quèea leꞌn níttóꞌ. Ndxab angl loo mbii:
\p ―Texal mblobiin quèe ndxèꞌ leꞌn níttóꞌ, tatuaꞌ lyux mèn coꞌ nac mèn ciuda roo ciuda xèn coꞌ neꞌ lèe ciuda Babiloñ. No thidtene ya neꞌberede mèn, huiꞌ mèn ciuda roo ciuda xèn coꞌ neꞌ lèe Babiloñ tedib vez.
\p
\v 22 Ndxab angl cón cheꞌn mèna, ne:
\p ―Thidtene ya neꞌgònte mèn golꞌ mèn musc ned coꞌ nac ned guꞌ, musc coꞌ nac arp, no coꞌ nac flaut, no coꞌ nac trompet. Neꞌ neꞌ yòo mèn coꞌ ndxác ndli chol zinꞌ. Neꞌ neꞌ yèn tyez molin coꞌseꞌ ndli molin zinꞌ leꞌn ciudaa.
\v 23 Ya neꞌyúꞌde loo mèn coꞌ nac chol xnìi lampr coꞌ tenìi ciudaa thidtene. No thidtene ya neꞌyènte gàc ruid leꞌn ciuda coꞌseꞌ selyaꞌ mèn leꞌn ciudaa. Tataa gàca loo mèn ciudaa mastaleꞌ ngòc mèn coꞌ nthoꞌ chol conꞌ loo mèn ciudaa mèn coꞌ ngòc mèn más mèn roo no mèn xèn loo taamas mèn dib athu loo izlyoꞌ. Lomisqueꞌ ne, tataa gàca loo mèn ciudaa tac mquedìi mèn ciudaa mèn chol nación dib athu loo izlyoꞌ con mod yeꞌrsinꞌ coꞌ ngòp mèna coꞌ nac ngòc mèna mèn bruj.
\p
\v 24 Tolo ndxab angl:
\p ―Tataa mod mtetìi Diox mèn ciuda roo ciuda xèna axta plóthe tac leꞌn ciudaa mbeth mèna mèn coꞌ mdeꞌth diꞌs coꞌ ndxab Diox. No mbeth mèna mèn coꞌ ngòo loo cón cheꞌn Diox, mèn coꞌ ngòc cheꞌnpeꞌ Diox. No mbeth mèn ciudaa huax mèn coꞌ ngo ban dib athu loo izlyoꞌ.
\c 19
\p
\v 1 Ngolo mbìnen gunii angl rye coꞌ ngòca, mbìnen mbyèn diꞌs cheꞌn huax mèn loo béꞌ coꞌ mbez cabii:
\pi1 ¡Ay, Dioꞌs! Gab naꞌ leꞌ Diox nac Diox roo no Diox xèn, Diox naꞌ coꞌ mbli par ndlyáꞌ mèn loo conꞌ ryes. Nac Diox naꞌ Diox roo no Diox xèn loo ryethe conꞌ. No ndxàp Diox naꞌ rye loothe conꞌ roo conꞌ xèn laꞌs nii Diox no laꞌs yaꞌ Diox.
\pi1
\v 2 Diox roo no Diox xèn nac Diox tac nalì no nambìi ndub rez Diox con mod coꞌ ndxàp Diox coꞌ nac mod lìcpeꞌ. Mquexùꞌleꞌ Diox xaꞌgot coꞌ nac xaꞌgot roo xaꞌgot xèn coꞌ nacguèꞌ xaꞌgot burrid coꞌ mbli leꞌ mèn coꞌ ngo ban dib athu loo izlyoꞌ mbli ngòc nguàal conꞌ zab coꞌ nac conꞌ yeꞌrsinꞌ coꞌ nac mod coꞌ ndxàp xaꞌgota. Por cona, mblo xtàa Diox conꞌ yeꞌrsinꞌ coꞌ mbli xaꞌgota coꞌseꞌ mbli xaꞌgota mbeth mèn prob mèn coꞌ mxoꞌf zinꞌ cón cheꞌn Diox.
\p
\v 3 Mbere mèna, ndxab mèna tedib vez:
\p ―¡Ay, Dioꞌs! Gab naꞌ Diox roo no Diox xèn nac Diox tac Diox mbli ndxetoo zen leꞌn ciuda mèn baꞌ. Thidtenequeꞌ yitoo zen ze no yálꞌ. No neꞌyúꞌde quìi coꞌ ndli ndxetoo zen baꞌ thidtene.
\p
\v 4 Leꞌ ryete gal fthap mèngool no dyap máꞌ coꞌ nabana na, mdub xib no mcòoꞌ mèngoola no máꞌ coꞌ nabana yéc máꞌ no mèngoola loo Diox coꞌ ndub loo asient coꞌ nzo loo béꞌ. Mbez mèngoola no dyap máꞌ coꞌ nabana:
\p ―Tataaqueꞌ ndxàal ngòca. No nalleꞌ gab naꞌ Diox roo no Diox xèn nac Diox coꞌ mbli ngòc conꞌa.
\p
\v 5 Mberen, mbìnen tedib diꞌs coꞌ mbyèn loo béꞌ coꞌteꞌ ndub Diox loo asient. Diꞌsa mbez:
\pi1 ―Bli guꞌ no fteꞌth guꞌ cón cheꞌn conꞌ roo no conꞌ xèn coꞌ mbli Diox, ryete guꞌ coꞌ nxoꞌf zinꞌ cheꞌn Diox no ryete guꞌ coꞌ nzyeb ñèe Diox, que nac guꞌ mèn coꞌ nac mèn beꞌthe, no que nac guꞌ mèn coꞌ ndeꞌf diꞌs nac mèn roo no mèn xèn.
\s Trèꞌ ndluꞌ cón cheꞌn Mbacxilꞌ coꞌ nac Crist no cón cheꞌn mèn coꞌ nzoleꞌ loo cón cheꞌn Crist coꞌ queltàa no Crist loo béꞌ.
\p
\v 6 Daa, Juàn mberen, mbìnen ruid coꞌ mbyèn coꞌ nac diꞌs coꞌ mbez huax mèn. Ruida mbyèn xal coꞌseꞌ nxyoꞌf nít huax yóꞌbeꞌ. No mbyèn ruida xal coꞌseꞌ ndxas ndlyaꞌb gundii. Mxaquen mbez mèna:
\pi1 Gab naꞌ conꞌ roo no conꞌ xèn ndli Diox tac nalleꞌ, por derech, tlo Diox, ñibeꞌ Diox loo ryethe conꞌ thidtene, Tad Diox naꞌ coꞌ ndxàp rye loothe conꞌ roo no conꞌ xèn laꞌs nii Diox no laꞌs yaꞌ Diox.
\pi1
\v 7 Leque naꞌ li par tyac lezoꞌ naꞌ axta plóthe. No leque naꞌ li par xyoꞌf ndeꞌ xyoꞌf ndlaꞌ lezoꞌ naꞌ axta plóthe. No gab naꞌ conꞌ roo no conꞌ xèn cón cheꞌn conꞌ mbli Diox loo mèn tac nase mzinleꞌ tiemp no mzinleꞌ hor coꞌseꞌ queltàa no naꞌ Mbacxilꞌ cheꞌn Diox coꞌ nac leque yub Jesucrist par yo no naꞌ Jesucrist thidtene xal coꞌseꞌ ndxàc nab thìb mzaꞌ par selyaꞌ mzaꞌ con thìb mbyòo coꞌ gàc saꞌl mzaꞌ par tyub no mzaꞌ mbyòo thidtene.
\pi1
\v 8 Lomisqueꞌ ne, gàca loo naꞌ xal coꞌseꞌ ndyoxcuaꞌ mzaꞌ coꞌ selyaꞌ coꞌseꞌ ndxoc xab mzaꞌ larꞌ huen coꞌ ante nagus bèellequeꞌ ñaa no coꞌ nquée xnìi.
\m Lomisqueꞌ ne, mbìnen ndxab mèna leꞌ larꞌ huen, coꞌ nee diꞌs, xab mzaꞌ coꞌ goc mzaꞌ par selyaꞌ mza, larꞌ huena nee diꞌs nac mod nalì no mod nambìi cheꞌn naꞌ tac naꞌ mbluꞌqueꞌ xá mod mque tee ban nalì naꞌ no xá mod mque tee ban nambìi naꞌ loo Diox, naꞌ coꞌ ngòo loo cón cheꞌn Diox, naꞌ coꞌ ngòc cheꞌnpeꞌ Diox.
\p
\v 9 Sya, gunee angl loon:
\p ―Juàn, taandxèꞌ fqueꞌ diꞌs loo yeꞌs xal niina lool nalleꞌ: Huen nda mèn coꞌ ngòc convid par ya mèn loo yalhua coꞌ gàc cheꞌn Mbacxilꞌ coꞌ nac leque yub Jesucrist.
\p Gunee angl loon, ne:
\p ―Diꞌs coꞌ ngue niin lool ndxèꞌ nac diꞌs coꞌ nac lìcpeꞌ cheꞌn Diox coꞌ gunee Diox loon par niina lool.
\p
\v 10 Láth ndyoodiꞌs angl loon, mdub xiben loo angl no mcòoꞌen yéquen loo angl. Per ale ndxeꞌleque, gunee angl loon:
\p ―Neꞌlidel tatuaꞌ loon, ey. Tac daa nxoꞌf zinꞌ cón cheꞌn Diox xalqueꞌ nxoꞌf zinꞌl cón cheꞌn Diox no xalqueꞌ nxoꞌf zinꞌ mèn coꞌ ndxàc hues lùu por cón cheꞌn Jesucrist, mèn coꞌ altant ndyoo par ngo mèn yalbàn cón cheꞌn Tad Jesús. Más huen ftub xibl no fcòoꞌ yécl loo Diox.
\p Rye mèn coꞌ ndeꞌth diꞌs coꞌ ndxab Diox, mèna nac mèn coꞌ ngo xoꞌf no coꞌ ndaꞌ cuent cón cheꞌn Jesús.
\s Trèꞌ ndluꞌ cón cheꞌn thìb mbiꞌ coꞌ mdub huay nagus.
\p
\v 11 Be taa be taa ndoon ale gunèen mxaquen mxyalꞌ loo béꞌ. No mxaquen ale, chàa, ngroꞌ too thìb huay nagus. No mdub thìb mbiꞌ huay. Mbiꞌ coꞌ ndub huaya lèe, xal ndxòn mèn diꞌs, Anzeꞌf Altant. No lèe mbiꞌ, xal ndxòn mèn diꞌs, Lìcpeꞌ. Tataa lèe mbiꞌ tac coꞌseꞌ ñibeꞌ mbiꞌ, nalì no nambìi ñibeꞌ mbiꞌ loo mèn. No li mbiꞌ xóꞌ xal ndxàalpeꞌi loo mèn loo izlyoꞌ par co xtàa mbiꞌ ryethe conꞌ yeꞌrsinꞌ coꞌ mbli mèn yeꞌrsinꞌ loo chol mèn.
\v 12 Mxaquen ndxaaꞌd bèel ngudloo mbiꞌ xal coꞌseꞌ ndxetoo bèel. No mxaquen ndub huax coron yéc mbiꞌ. No ndub thìb diꞌs coꞌ nac tedib lèe mbiꞌ lechuz mbiꞌ. No ante mbiꞌ nanee no non mbiꞌ cón nee diꞌs diꞌs coꞌ nacguèꞌ lèea.
\v 13 Noc xab mbiꞌ thìb ned xab mbiꞌ coꞌ nagoꞌ con renpeꞌ mèn. No lèeguèꞌ mbiꞌ, xal ndxòn mèn diꞌs, nac Xtiꞌs cheꞌn Diox.
\v 14 No ndoo nque huax angl coꞌ nac solndad coꞌ nzo loo béꞌ xís mbiꞌ. Angla gunèen noc xab anabte larꞌ nagus bèellequeꞌ coꞌ ngòc larꞌ coꞌ anzeꞌf nambìi, coꞌ ngòcqueꞌ thìb larꞌ huen coꞌ lèe lin. No ndub angla anabte huay nagus.
\v 15 No mxaquen ndryoꞌ thìb spad coꞌ nalen tínꞌ ryop loo ro mbiꞌ. Spada làa mbiꞌ rloo mèn coꞌ nac mèn rye nación dib athu loo izlyoꞌ. No ñibeꞌ yèe mbiꞌ loo mèn rye nación dib athu loo izlyoꞌ. No noo noo tub rez mbiꞌ cón cheꞌn rye mèn dib athu loo izlyoꞌ xalqueꞌ ndxàal gàca loo mèn. Neꞌlyatte lezoꞌ mbiꞌ ñèe mbiꞌ mèn huiza. Ale ndxeꞌlequeꞌ, tetìi tínꞌ mbiꞌ mèn dib athu loo izlyoꞌ axta plóthe por ndxecloo Diox ñèe Diox mèn, Diox coꞌ ndxàp rye loothe conꞌ roo no conꞌ xèn laꞌs nii Diox no laꞌs yaꞌ Diox.
\v 16 No neꞌ mbiꞌ diꞌs coꞌ mbez taandxèꞌ: Rey coꞌ ñibeꞌ loo rye rey loo izlyoꞌ, no loo mèn nac zinꞌ coꞌ ñibeꞌ loo xtàa loo izlyoꞌ, no loo Tad coꞌ ñibeꞌ loo mèn coꞌ ndeꞌf diꞌs nac Tad loo izlyoꞌ. Diꞌsa ndub lad xab mbiꞌ coꞌteꞌ nac pech mbiꞌ no coꞌteꞌ nac bélꞌ fchaꞌ corꞌ mbiꞌ.
\p
\v 17 Chàa, ngua loon gunèen thìb angl coꞌ ndoo loo huiz xal coꞌseꞌ ndyoo mèn loo thìb banc. Angla cabii ngrozèe loo rye mbin coꞌ nxobii loo mbii. Ndxab angl loo mbin:
\p ―Que de guꞌ, no thidte queltàa guꞌ par hua rsè guꞌ thìb rsè coꞌ mbli nab Diox hua guꞌ.
\v 18 Guꞌ hua bélꞌ coꞌ nac bélꞌ mèn coꞌ ngòc rey. No hua guꞌ bélꞌ cheꞌn mèn coꞌ ngòc mèn nac zinꞌ coꞌ mnibeꞌ loo xtàa mèn dib athu loo izlyoꞌ. No hua guꞌ bélꞌ mèn coꞌ ñibeꞌ loo solndad. No hua guꞌ bélꞌ mèn coꞌ ndli cuent anzeꞌf mbiꞌ. No hua guꞌ bélꞌ huay. No hua guꞌ bélꞌ mèn coꞌ ndyub huay. No hua guꞌ bélꞌ ryethe mèn, que nac mèna mèn coꞌ yende chó taamas mèn ñii loo coꞌ nacguèꞌ mèn coꞌ yende chó mèn mbee ncaꞌ, que nac mèna moz coꞌ nac moz yèe loo patrón, que nac mèna mèn beꞌthe, que nac mèna mèn coꞌ ndeꞌf diꞌs nac mèn roo no mèn xèn. Hua guꞌ bélꞌ mèna.
\p
\v 19 Sya, gunèen máꞌ tínꞌa, no rye mèn coꞌ ngòc rey coꞌ nac mèn nac zinꞌ coꞌ ñibeꞌ loo xtàa mèn dib athu loo izlyoꞌ con rye solndad mèna. Ryete mèna mqueltàa par li mèna xóꞌ con mbiꞌ coꞌ ndub huay nagus no con solndad mbiꞌ.
\v 20 Per solndad mbiꞌ thidte mxen máꞌ tínꞌa xal thìb pres con mbiꞌ coꞌ mbez ndeꞌth diꞌs coꞌ ndxab Diox. Per diꞌs coꞌ ndeꞌth mbiꞌa nac diꞌs gutyèꞌtúb, mbiꞌ coꞌ mbli huax yalguzyeꞌ loo máꞌ tínꞌ. No por mbli mbiꞌa huax yalguzyeꞌ coꞌ nac yalguzyeꞌ gutyèꞌ loo mèn, mbli mbiꞌ par mquedìi mbiꞌ huax mèn par mblaꞌ mèn mquée señ cheꞌn máꞌ tínꞌa lechuz o laꞌs yaꞌ mèn. No mbli mbiꞌa par mdub xib rye mèna loo gunab cheꞌn máꞌ tínꞌa. Leque hora, mblo mbiꞌ coꞌ mdub huay nagus máꞌ tínꞌ no mbiꞌ coꞌ mdeꞌth diꞌs gutyèꞌ, ndoo lì ndoo gaꞌ máꞌ, ndoo lì ndoo gaꞌ mbiꞌ, ngulàa mbiꞌ leꞌn yeꞌrbìil coꞌteꞌ ndxetoo bèel coꞌ ndxol con asufr.
\v 21 Leꞌ taamas solndad cheꞌn máꞌa no mèn coꞌ ngòc rey coꞌ ngòc mèn coꞌ mnibeꞌ loo xtàa dib athu loo izlyoꞌa na, nguth con spad coꞌ mdub ro mbiꞌ coꞌ mdub huay nagus. No leque hora nduhua mbin béꞌ bélꞌ rye mèna axta plóthe.
\c 20
\s Mebizya gàc xal thìb pres leꞌn yeꞌrbìil leꞌn thìb mil línꞌ.
\p
\v 1 Ngolo nguriꞌth ryethe conꞌa, gunèen thìb angl coꞌ nde làa loo béꞌ loo izlyoꞌ. Neꞌ angl lyab cheꞌn puert yeꞌrbìil. No neꞌ angl thìb caden fchaꞌ yaꞌ angl.
\v 2 Angla mxen máꞌ coꞌ lèe Dragón, máꞌ coꞌ neꞌ tedib lèe Mbelꞌ Gox, máꞌ coꞌ nac merpeꞌ Mebizya, máꞌ coꞌ neꞌ tedib lèe coꞌ nac lèe Satanás. Mquedóꞌ angla Mebizya.
\v 3 Ngoloa, mblobii angl Mebizya leꞌn yeꞌrbìil. Tya, mtegòo angl Mebizya no mqueꞌ angl thìb señ loo puert par tataa mod ya neꞌryoꞌde Mebizya par tolo quedìi Mebizya mèn rye nación coꞌ naban dib athu loo izlyoꞌ. Per coꞌseꞌ ngolo thìb mil línꞌ coꞌ nzo máꞌ leꞌn yeꞌrbìil, Diox mnibeꞌ par ngroꞌ Mebizya leꞌn yeꞌrbìil leꞌn ndxep tiemp xal non Diox naquin gàca.
\p
\v 4 No gunèen nzi belꞌ plá asient thìb lugar loo izlyoꞌ. Loo asienta nzi ndub mèn coꞌ mbli Diox par ngòp mèna conꞌ laꞌs nii mèna no laꞌs yaꞌ mèna par tub rez mèna cón cheꞌn taamas mèn. Lomisqueꞌ ne, gunèen alm no xpii mèn coꞌ mchoꞌ mèn yéc por mdaꞌ mèna cuent cón cheꞌn Jesús loo mèn no por cón cheꞌn diꞌs ndac cheꞌn Diox coꞌ mblo mèna yalbàn loo mèn. Mèna ngòc mèn coꞌ neꞌndub xibte no coꞌ neꞌncòoꞌde yéc loo máꞌ tínꞌ no loo gunab máꞌ tínꞌ. No neꞌ neꞌ nglaꞌ mèna nquée señ cheꞌn máꞌ tínꞌ no cheꞌn gunab máꞌ tínꞌ lechuz o laꞌs yaꞌ mèna. Gunèen, ne, leꞌ mèna ngro xban. No mnibeꞌ no mèna Crist leꞌn thìb mil línꞌ.
\v 5 Per taamas mèn coꞌ nguth coꞌ neꞌndalte ngalaꞌs loo Jesucrist no loo cón cheꞌn Jesucrist, neꞌngro xbante mèna hora. Mèna ryo xban axta coꞌseꞌ tyaa thìb mil línꞌ. Coꞌseꞌ ngro xban mèn coꞌ mnibeꞌ no Crist thìb mil línꞌa, leque hora, ngòc tiemp coꞌ nerlequeꞌ ngro xban mèn coꞌ ngro xban làth mèn nguth, mèn coꞌ ngolaꞌs loo Jesucrist.
\v 6 Huen nda mèn, no ndyac lezoꞌ mèn, no ngòc mèna mèn coꞌ ngro xàꞌleꞌ loo ryethe conꞌ yeꞌrsinꞌ par ngòc mèna cheꞌnpeꞌ Diox, mèn coꞌ ngro xban leque tiemp coꞌseꞌ ngro xban mèn coꞌ mnibeꞌ no Crist thìb mil línꞌ. Mèna neꞌcoꞌ xàꞌde Diox loo Diox coꞌteꞌ nzo Diox par tetìi Diox mèna thidtene. Ndxeꞌlequeꞌ, gàc mèna mèn coꞌ mbez no coꞌ gab conꞌ roo no conꞌ xèn no conꞌ natúꞌ loo mèn cón cheꞌn Diox. No gab mèna conꞌ roo no conꞌ xèn no conꞌ natúꞌ loo Diox. Tataa mod li mèna sirv loo Diox no loo Jesucrist. No ñibeꞌ no mèna Crist thìb mil línꞌ.
\p
\v 7 Coꞌseꞌ ngolo nguriꞌth thìb mil línꞌa, Diox mnibeꞌ par ngroꞌ Mebizya leꞌn yeꞌrbìil coꞌteꞌ ngòc leziꞌf coꞌteꞌ ngòo Mebizya.
\v 8 Mebizya ngroꞌ leꞌn yeꞌrbìil par mquedìi Mebizya mèn rye nación coꞌ nzi ban dib athu loo izlyoꞌ. No mquedìi Mebizya mbiꞌ coꞌ lèe Gog. No mquedìi Mebizya mèn cheꞌn nación Magog coꞌteꞌ ñibeꞌ mbiꞌ coꞌ lèe Gog. No mbli Mebizya par queltàa rye solndad cheꞌn nación Magog. Solndad cheꞌn nación Magoga axta neꞌ neꞌ ñee mèn plá solndad tac nac solndada mènléyꞌ xal yux coꞌ nziriꞌ ro níttóꞌ.
\v 9 Ryete solndada queltàa coꞌteꞌ nac ciuda Jerusalén par tauꞌ solndad dib vuelt ro ciuda Jerusalén coꞌ nac ciuda coꞌ anzeꞌf nqueꞌ lezoꞌ Diox. No tauꞌ solndad loo mèn coꞌ mbláꞌ cón cheꞌn xab izlyoꞌ, mèn coꞌ nzo loo cón cheꞌn Diox, mèn coꞌ mqueltàa thìb lad gaxte ro ciuda Jerusalén par li solndad xóꞌ con rye mèna. Per ndooreꞌ li solndad xóꞌ loo mèna, Diox mbli ngulàa quìi loo béꞌ par thidtene mbyec solndada.
\v 10 Leꞌ Mebizya coꞌ mquedìi solndada na, thìb lìte mbli Diox par ngulàa Mebizya leꞌn thìb lugar roo tínꞌ coꞌ ñaa xal thìb lagun coꞌteꞌ ndxetoo bèel coꞌ ndxol con asufr, no coꞌteꞌ ngulàa máꞌ coꞌ ngòc máꞌ tínꞌ no coꞌteꞌ ngulàa mbiꞌ gutyèꞌ coꞌ mbez ndeꞌth diꞌs coꞌ ndxab Diox. Mèna tyactìi tya thidtene ze no yálꞌ.
\s Diox tub rez cón cheꞌn ryethe mèn coꞌteꞌ ndub Diox loo thìb asient nagus.
\p
\v 11 Ngoloa, chàa, mberen, mxaquen gunèen ndoo thìb asient nagus coꞌ anzeꞌf naroo. Nde nxonꞌ, gunèen ndub Diox loo asient. Be taa ndoon, chàa, setilte mdyonꞌ béꞌ no izlyoꞌ loo Diox. Ya yende pá mbyanꞌ beꞌ no izlyoꞌ thidtene.
\v 12 No gunèen ryete mèn coꞌ nguthleꞌ, coꞌ mbli Diox ngro xban hora ante par cue mèna loo Diox cuante, mèn coꞌ ndeꞌf diꞌs nac mèn roo no mèn xèn, no mèn coꞌ nac mèn beꞌthe. Thidte ngure rye mèna loo Diox. Gunèen mxyalꞌ loo huax libr. No gunèen mxyalꞌ loo thìb libr coꞌ nac tedib libr xàꞌ. No loo libr coꞌ nac thidte libr, loo libra ndub lèe ryete mèn coꞌ yòo ban no Diox thidtene. Leꞌ mèn nguth coꞌ mbli Diox ngro xbana na, Diox mdub rez cón cheꞌn mèna xalqueꞌ nac coꞌ mbli mèn xal ndub cón cheꞌn thìb thìb mèn loo libr coꞌteꞌ ndub lèe mèn.
\v 13 Leque hora mxaquen ryete mèn coꞌ nguth leꞌn níttóꞌ, mèna ngro xban loo níttóꞌ. Lomisqueꞌ ne, mxaquen ryete mèn coꞌ nguth coꞌ ngòo leꞌn yeꞌrbìil ngroꞌ che leꞌn yeꞌrbìil. Ryethe mèna ngroꞌ che leꞌn yeꞌrbìil. Ngure be mèna loo Diox par mdub rez Diox cón cheꞌn mèna xalte nac coꞌ mbli mèna loo izlyoꞌ no xalte ngòc mod coꞌ ngòp mèna loo izlyoꞌ.
\v 14 Ngoloa, mxaquen gunèen mbli Diox thìb conꞌ loo conꞌ coꞌ ndxòn mèn lèe yalguth coꞌ ndli par ntin liz mèn. No mxaquen mbli Diox ngulàa conꞌ coꞌ ndxòn mèn ngroꞌ lèe yeꞌrbìil leꞌn quìi no bèel coꞌ nac thìb lugar coꞌ nziriꞌ xal thìb lagun brut coꞌteꞌ ndxetoo bèel coꞌ ndxol con thìb loo dii coꞌ lèe asufr. Loo quìi no loo bèel coꞌ ñaa xal thìb lagun brut nac coꞌteꞌ bii ryethe mèn, mèn coꞌ coꞌ xàꞌ Diox loo Diox par tyactìi mèn tya thidtene par thidtene yilo cuent cheꞌn mèn.
\v 15 Loo quìi coꞌteꞌ ñaa xal ñaa lagun brut, tya ñibeꞌ Diox lyàa mèn, mèn coꞌ indubte lèe loo libr coꞌteꞌ ndub lèe mèn coꞌ yòo ban no Diox thidtene. Aa. Tataaqueꞌ mbyúꞌ loo conꞌa loon, daa coꞌ lèe Juàn.
\c 21
\s Trèꞌ ndluꞌ cón cheꞌn tedib béꞌ cub coꞌ cue no cón cheꞌn tedib izlyoꞌ cub coꞌ cue yiloa. No ya neꞌtolode cue níttóꞌ.
\p
\v 1 Ngoloa, gunèen thìb béꞌ cub coꞌ cue yiloa. Gunèen thìb izlyoꞌ cub coꞌ cue yiloa, ne. Tac ner béꞌ coꞌ nziriꞌ no ner izlyoꞌ coꞌ nziriꞌ mdyonꞌ no mblith no. No ya neꞌtolode cue níttóꞌ.
\v 2 Daa coꞌ nac Juàn coꞌ mqueꞌ yeꞌs ndxèꞌ loo guꞌ, daa gunèe thìb ciuda natúꞌ coꞌ nac tedib ciuda cub coꞌ neꞌ leque lèe ciuda Jerusalén. Ciudaa nde làa loo béꞌ loo Diox. Ante nabeꞌs natoxcuaꞌ ciudaa xal coꞌseꞌ ndyoxcuaꞌ thìb mzaꞌ coꞌseꞌ ndxoc xab mzaꞌ par selyaꞌ mzaꞌ con mbyòo coꞌ gàc saꞌl mzaꞌ.
\v 3 Lomisqueꞌ ne, mbìnen diꞌs coꞌ mbyèn loo béꞌ coꞌ mbez:
\p ―Juàn, huiꞌ nexa. Thidtenequeꞌ yo ban no mèna Diox leꞌn ciuda baꞌ. Gàc mèna cheꞌnpeꞌ Diox, ne. No yub Diox yo ban no mèna leꞌn ciuda baꞌ par gàc Diox Diox cheꞌnpeꞌ mèna thidtene.
\v 4 No li Diox ya neꞌgónte mèna thidtene. No li Diox ya neꞌquéede yalguth loo mèn. No li Diox ya neꞌcozèe yathte mèn. No li Diox ya neꞌtenꞌte mèn yalnè no yalnaxi. Tac ryete mod coꞌ ngòc mod coꞌ mque tee ban mèn loo izlyoꞌ coꞌ ngòc ner izlyoꞌ coꞌ ngurea mdyonꞌleꞌ no mblith noleꞌ.
\p
\v 5 Mbìnen gunee xaꞌ coꞌ ndub loo asienta loon, ne:
\p ―Juàn, huiꞌ nexa. Na li gàc cub ryethe conꞌ.
\p Mbìnen gunee xaꞌ loon, ne:
\p ―Fqueꞌ yeꞌs cón cheꞌn conꞌ ngue niin lool ndxèꞌ, Juàn. Tac diꞌs coꞌ ngue niin lool nalleꞌ nac lìcpeꞌ. No nzoqueꞌ mod yilaꞌs mèn no gàp mèn yalxlaꞌs cón cheꞌn diꞌs coꞌ ngue niin ndxèꞌ.
\p
\v 6 Ngoloa, gunee xaꞌ loon:
\p ―Ya ngololeꞌ mblin ryethe conꞌ coꞌ mcàbgònen lin loo mèn. Daa nzoqueꞌ thidtene. Nac daa xal letr “a” coꞌ ntlo loo alfabet. No nac daa xal letr “z” coꞌ nac lult letr loo alfabet. Mèn coꞌ lyaꞌs yòo ban no daa thidtene, na ta yalnaban loo mèna par yòo ban no mèna daa thidtene xal coꞌseꞌ axta ngàl lezoꞌ mèn ndxu mèn thìb xi nít coꞌseꞌ ndxec lezoꞌ mèn coꞌteꞌ ndub len nít. No yalnaban coꞌ tan loo mèn neꞌtiꞌde mèn yalnabana con nec thìb centav.
\v 7 Cona, ngue niin lool, Juàn: Mèn coꞌ thidtenequeꞌ ngro xàꞌ loo cón cheꞌn xab izlyoꞌ par neꞌtaꞌde mèn lugar li Mebizya gan loo mèn, mèna gàc cheꞌn coꞌ nac chenen. No gàc daa Diox cheꞌnpeꞌ mèna. Leꞌ mèna na, gàc xinꞌen loon.
\v 8 Per por part cón cheꞌn mèn coꞌ nzyeb par li mèn ryes yòo mèn loo cón chenen, no mèn coꞌ neꞌtyalte yilaꞌs loon, no mèn coꞌ ndxòo xyàn lezoꞌ ñèe mèn daa, no mèn coꞌ ndxuth xtàa, no mèn coꞌ ndxòo lezoꞌ ndli yalburrid, no mèn coꞌ ndli yalbruj coꞌ ndxòo lezoꞌ tetìi xtàa, no mèn coꞌ ndyub xib no ncòoꞌ mèn yéc mèn loo chol mdoꞌ no loo chol gunab, no chol mèn coꞌ nac mèn gutyèꞌ, ryete mèna goꞌ cheen loon par goꞌ xàꞌen mèna loon par yòo mèna coꞌteꞌ nac thìb lugar roo coꞌ ñaa xal thìb lagun roo coꞌteꞌ ndxetoo bèel coꞌ ndxol con asufr. Tya, ndoo lì ndoo gaꞌ mèna, ya rye mèna par tyactìi mèna thidtene.
\s Juàn gunèe xal ñaa ciuda Jerusalén cub coꞌ cuec Diox yiloa.
\p
\v 9 Ngoloa, mbiꞌth thìb angl coꞌ ngòc cheꞌn rye gaz angl coꞌ mque no thìb thìb cop coꞌ ngòo gaz loo yaltìi coꞌ ngòc conꞌ yeꞌrsinꞌ coꞌ ngòc lult conꞌ coꞌ mbli Diox loo mèn par mtetìi Diox mèn. Gunee angla loon:
\p ―Juàn, que de ndxèꞌ. Daa luꞌ lool cón cheꞌn ciuda cub baꞌ. Ciuda baꞌ hueꞌ leque lèe ciuda Jerusalén. Ciuda baꞌ nac loo Jesucrist xal thìb mzaꞌ coꞌ ndyoxcuaꞌ par selyaꞌ mzaꞌ con thìb mbyòo.
\p
\v 10 No láth mxyoꞌf loo conꞌ coꞌ mxoꞌf loo Xpii Natúꞌ loona, mxaquen mbeꞌ angl daa loo thìb yii roo coꞌ ndub axta arid gáp. Tya mbluꞌ angl ciuda roo ciuda xèn loon, ciuda natúꞌ coꞌ neꞌ leque lèe ciuda Jerusalén. Ciudaa nde làa loo béꞌ loo Diox loo izlyoꞌ.
\v 11 Ciudaa mquée xnìi con xnìi coꞌ nac xnìi cheꞌnpeꞌ Diox. Xnìi coꞌ mquée lad ciudaa ngòc xal xnìi coꞌ nquée loo thìb loo quèe coꞌ anzeꞌf náp ntac xalqueꞌ nquée xnìi loo tedib loo quèe coꞌ lèe jasp coꞌ ngüiꞌ mèn par xís xal ngüiꞌ mèn loo vidr cristal.
\v 12 Dib vuelt xís ciuda ngure thìb ftoo. Ftooa ngòc thìb ftoo roo. No anzeꞌf gáp ndeꞌf ftooa. Nziꞌf siꞌ fchop puert lad ftooa. No ndoo angl thìb thìb ro puerta. No ndub lèe thìb thìb mèn, mèn coꞌ nac cheꞌn rye siꞌ fchop mèn coꞌ ngòc mèn coꞌ mbloj msiꞌ bin cheꞌn mèn nación Israel loo thìb thìb puerta.
\v 13 No gunèen ndub son puert lad ftooa par ned lad ndlyen huiz. No ndub taason puert lad ftooa par ned lad nort. No ndub taason puert lad ftooa par ned lad sur. No ndub taason puert lad ftooa par ned lad mbix huiz.
\v 14 No quèe coꞌ ngòc nii ftoo, coꞌ nee diꞌs, nac cimient cheꞌn ciudaa ngòc siꞌ fchop quèe. Coꞌseꞌ gunèen nde làa dib zyaa ciudaa loo béꞌ loo izlyoꞌ, gunèen mdub lèe ryete siꞌ fchop myenꞌ coꞌ ngòc xinꞌ mtéꞌth Jesucrist coꞌ mtelꞌ Jesucrist loo mèn par mbeꞌ myenꞌ diꞌs cheꞌn Jesucrist loo mèn loo izlyoꞌ lad quèea, Jesucrist coꞌ neꞌ tedib lèe Mbacxilꞌ cheꞌn Diox.
\p
\v 15 Leꞌ angl coꞌ mdoodiꞌs nona na, gunèen nzo thìb bro yaa coꞌ ñaa xal yíi coꞌ ñaa xal or yaꞌ angl coꞌ nac par chiꞌx angl ciuda no par chiꞌx angl puert cheꞌn ciuda no par chiꞌx angl ftoo cheꞌn ciuda.
\v 16 Ciudaa thidte nac dyap lad. Thidte nolꞌa. Thidte naxèna. Angla mchiꞌx ciudaa con bro yaa coꞌ ñaa xal yíi coꞌ ñaa xal or coꞌ mque no angl. Coꞌseꞌ ngolo mchiꞌx angl ciudaa, mbix ciudaa chop mil nzo chop ayo kilometros de nolꞌ ciuda, no de gáp, no de naxèn ciuda. Thidte béꞌ ó thidte medid neꞌ yon lad ciuda.
\v 17 Ngoloa, sangmchiꞌx angl ftoo coꞌ nziriꞌ xís ciudaa con metr. Coꞌseꞌ ngolo mchiꞌx angl ftooa con metr coꞌ nac leque metr coꞌ nchiꞌx mèn loo izlyoꞌ, naxèn loo ftooa ayon fthap metr.
\p
\v 18 Leꞌ ftoo coꞌ nziriꞌ par xís ciudaa na, natoxcuaꞌ con thìb loo quèe coꞌ anzeꞌf náp ntac coꞌ lèe jasp. Leꞌ dib lad ciuda na, natoxcuaꞌ con ampurte or coꞌ ñaa xal vidr coꞌ anzeꞌf nambìi ñaa loo.
\v 19 Leꞌ siꞌ fchop quèe coꞌ nac quèe nii ciuda coꞌ nac quèe cimient natoxcuaꞌ con rye loo quèe coꞌ anzeꞌf náp ntac. Ner quèea natoxcuaꞌ con thìb loo quèe coꞌ lèe jasp. Leꞌ mbryop quèe na, natoxcuaꞌ con thìb loo quèe coꞌ lèe zafir. Leꞌ mbyon quèe na, natoxcuaꞌ con thìb loo quèe coꞌ lèe agat. Leꞌ dyap quèe na, natoxcuaꞌ con thìb loo quèe coꞌ lèe esmerald.
\v 20 Leꞌ quèe coꞌ nac gaꞌy quèea na, natoxcuaꞌ con thìb loo quèe coꞌ lèe onis. Leꞌ quèe coꞌ nac xop quèea na, natoxcuaꞌ con thìb loo quèe coꞌ lèe cornalin. Leꞌ quèe coꞌ nac gaz quèea na, natoxcuaꞌ con thìb loo quèe coꞌ lèe crisolit. Leꞌ quèe coꞌ nac xon quèea na, natoxcuaꞌ con thìb loo quèe coꞌ lèe beril. Leꞌ quèe coꞌ nac yèꞌ quèea na, natoxcuaꞌ con thìb loo quèe coꞌ lèe topas. Leꞌ quèe coꞌ nac siꞌ quèea na, natoxcuaꞌ con thìb loo quèe coꞌ lèe crisopras. Leꞌ quèe coꞌ nac siꞌ fthib quèea na, natoxcuaꞌ con thìb loo quèe coꞌ lèe jacint. Leꞌ quèe coꞌ nac siꞌ fchop quèea na, natoxcuaꞌ con thìb loo quèe coꞌ lèe amatist.
\v 21 Ryete siꞌ fchop puerta ngòc siꞌ fchop quèe perl. Thìb thìb puerta natoxcuaꞌ con thìb loo quèe coꞌ lèe quèe perl. Leꞌ ned coꞌ nac más ned roo cheꞌn ciudaa na, natoxcuaꞌ con ampurte or coꞌ ñaa xal vidr coꞌ ngüiꞌ mèn par xís, no par loo, coꞌ nee diꞌs, ndxúꞌ mèn par leꞌn no par fuer.
\p
\v 22 Neꞌnghuiꞌden nec thìb templ leꞌn ciudaa. Tac yub Tad Diox coꞌ ndxàp rye loothe conꞌ laꞌs nii Tad Diox no coꞌ ndxàp rye loothe conꞌ laꞌs yaꞌ Tad Diox, no yub Tad Jesucrist coꞌ neꞌ tedib lèe coꞌ lèe Mbacxilꞌ cheꞌnpeꞌ Diox, nac templ cheꞌn ciudaa.
\v 23 Ciudaa ya inquinte tenìi huiz. Neꞌ neꞌ inquin tenìi mbeꞌ leꞌn ciudaa. Tac leque xnìi coꞌ nquée xnìi Diox tenìi leꞌn ciudaa. No leque bèel coꞌ ndxaꞌx lad Jesucrist nac xnìi coꞌ ntenìi leꞌn ciudaa.
\v 24 Leꞌ mèn rye nación coꞌ nziriꞌ dib athu loo izlyoꞌ coꞌ mblyáꞌleꞌ loo conꞌ ryes na, mèna quée lyàa no que tee mèna loo xnìi coꞌ ndxàꞌx leꞌn ciudaa. Leꞌ rye mèn coꞌ ngòc rey coꞌ ñibeꞌ loo xtàa loo izlyoꞌ ndxèꞌ tiempa, mèna li conꞌ roo no conꞌ xèn loo Diox leꞌn ciudaa. Li mèna conꞌ guryath no conꞌ guryèn loo Diox leꞌn ciudaa, ne.
\v 25 Puert cheꞌn ciudaa thidtene neꞌyauꞌte ryete huiz. Coꞌseꞌ gàc tiempa, neꞌlyàade yálꞌ izlyoꞌ.
\v 26 Coꞌseꞌ gàc tiempa mèn cheꞌn ryete nación dib athu loo izlyoꞌ, mèna li par gàc conꞌ roo no conꞌ xèn loo Diox no li mèna par gàc conꞌ guryath no conꞌ guryèn loo Diox.
\v 27 Coꞌseꞌ cue ciudaa, nec thìb conꞌ zab no nec thìb mèn zab neꞌyòode leꞌn ciudaa. No nec thìb mèn coꞌ ndxòo xyàn lezoꞌ ñèe hues xtàa no nec thìb mèn coꞌ nquedìi xtàa neꞌyòode leꞌn ciudaa. Mèn coꞌ yòo leꞌn ciudaa, mèna gàc mèn coꞌ ndub lèe loo libr coꞌteꞌ ndub lèe mèn coꞌ yòo ban no Diox thidtene. Libra ngue no mbiꞌ coꞌ lèe Mbacxilꞌ coꞌ nac leque yub Tad Jesucrist.
\c 22
\p
\v 1 Be taa be taa ndoon, chàa, mxaquen mbluꞌ angl thìb yóꞌbeꞌ coꞌteꞌ nzoꞌf nít coꞌ ndaꞌ yalnaban loo mèn. Níta ante nambìi ñaa. Ñaa níta xal vidr cristal. Mxaquen leꞌ coꞌteꞌ ndub Diox loo asient no coꞌteꞌ ndub Mbacxilꞌ coꞌ nac leque yub Jesucrist ngroꞌ yóꞌbeꞌa, ndyaquen.
\v 2 Yóꞌbeꞌa nguriꞌth xtauꞌthe ned coꞌ nac más ned roo leꞌn ciudaa. Lomisqueꞌ ne, ryop lad ro yóꞌbeꞌa mbryoo mxyèn thìb loo yaa nayèe coꞌ nac yaa coꞌ ndaꞌ yalnaban loo mèn. Yaaa ndaꞌ xlè siꞌ fchop vez leꞌn línꞌ. Cad mbeꞌ ndaꞌ yaaa xlè. Leꞌ laa cheꞌn yaa nayèea na, ndli sirv par nteyac mèn cheꞌn rye nación coꞌ ndyac len leꞌn rye nación.
\v 3 No nec thìb conꞌ coꞌ yo leꞌn ciudaa gàc conꞌ yeꞌrsinꞌtúb loo Diox. Huiza no tiempa, asient coꞌteꞌ tyub Diox no coꞌteꞌ tyub mbiꞌ coꞌ lèe Mbacxilꞌ cheꞌn Diox coꞌ nac leque Jesucrist tyoo leꞌn ciudaa. Leꞌ ryete mèn coꞌ mxoꞌf zinꞌ zinꞌ cón cheꞌn Diox loo Diox na, ryete mèna còoꞌ yéc loo Diox no tyub xib mèna loo Diox.
\v 4 Huiza no tiempa huiꞌ mèna loo Diox xal ñaa Diox. No hueꞌ mèna lèe Diox lechuz mèna.
\v 5 Leꞌn ciudaa ya neꞌlyàade yálꞌ izlyoꞌ thidtene. Leꞌ mèn coꞌ nzo ban leꞌn ciudaa na, neꞌ neꞌ inquin mèna xnìi cheꞌn nec thìb lampr. Neꞌ neꞌ inquin mèna xnìi huiz. Tac yub Tad Diox tenìi loo mèna. Huiza ryete mèna ñibeꞌ no Diox thidtene loo conꞌ ñibeꞌ Diox.
\s Trèꞌ ndluꞌ leꞌ tiemp coꞌ gàc tiemp coꞌseꞌ yiꞌth xi Jesucrist naꞌ nde zinꞌ gaxleꞌ.
\p
\v 6 Tolo gunee angla loon:
\p ―Diꞌs coꞌ ngue niin lool ndxèꞌ nac lìcpeꞌ, Juàn. Nzoqueꞌ mod gàp mèn yalxlaꞌs xal nac diꞌs coꞌ ngue niin ndxeꞌ no yilaꞌs mèn diꞌs ndxèꞌ. Yub Tad coꞌ nac Tad Diox ndli par non mèn coꞌ ndeꞌth diꞌs coꞌ ndxab Diox cón cheꞌn coꞌ ndxab Diox. Diox mtelꞌ angl cheꞌn Diox loo mèna par mbluꞌ angl loo mèn coꞌ mdeꞌth diꞌs coꞌ ndxab Diox no par mdaꞌ angl cuent loo mèn cón cheꞌn Diox par taꞌ mèna cuent loo mèn cón cheꞌn coꞌ li Diox gàc loo mèn yiloa.
\p
\v 7 Gunee Tad Jesucrist loon leꞌ ya neꞌlyenꞌte Tad Jesucrist. Chàa, yiꞌth Tad Jesucrist. No gunee Tad Jesucrist loon:
\p ―Huen nda mèn coꞌ ndub nza no coꞌ ndli cas cón cheꞌn conꞌ coꞌ ndxab Diox li Diox loo mèn xal nac diꞌs coꞌ ndub loo libr ndxèꞌ.
\p
\v 8 Yub daa coꞌ nac Juàn mbìn rye diꞌsa. No gunèen ngòc ryethe conꞌa. Per coꞌseꞌ ngolo mbìnen diꞌsa no ngolo gunèen ngòc ryethe conꞌa, mdub xiben xànꞌ nii angl coꞌ mbluꞌ rye conꞌa loon par còoꞌen yéquen loo angl.
\v 9 Per leꞌleꞌ gunee angl loon:
\p ―Neꞌlidel tatuaꞌ loon, Juàn. Daa, ne, nac mèn coꞌ nxoꞌf zinꞌ coꞌ nac zinꞌ cón cheꞌn Diox xalqueꞌ nxoꞌf zinꞌ lùu cón cheꞌn Diox con mèn coꞌ ndxàc huesl por cón cheꞌn Jesucrist, guꞌ coꞌ nac mèn coꞌ ndeꞌth conꞌ coꞌ ndxab Diox, no guꞌ coꞌ nac ryete mèn coꞌ ndub nza no coꞌ ndli cas diꞌs coꞌ ndub loo libr ndxèꞌ. Más huen ftub xib loo Diox no fcòoꞌ yécl loo Diox, ndee.
\p
\v 10 Gunee angla loon, ne:
\p ―Neꞌcaꞌstel cón cheꞌn coꞌ ndluꞌ diꞌs coꞌ nac diꞌs coꞌ ndxab Diox xal nac diꞌs coꞌ ndub loo libr ndxèꞌ. Ndxeꞌlequeꞌ, ftaꞌ cuent cón cheꞌn diꞌs ndac ndxèꞌ loo mèn loo xnaa. Tac nde zinꞌleꞌ tiemp no nde zinꞌleꞌ huiz coꞌseꞌ gàc conꞌ xal nac diꞌs coꞌ ndluꞌ loo libr ndxèꞌ.
\p
\v 11 Gunee angla loon, ne:
\p ―Laꞌa tolo li mèn yeꞌrsinꞌ conꞌ coꞌ nac conꞌ yeꞌrsinꞌ coꞌ más ndxòo lezoꞌ mèn yeꞌrsinꞌ li mèn yeꞌrsinꞌ. No laꞌa tolo li mèn zab conꞌ coꞌ nac conꞌ zab coꞌ más ndxòo lezoꞌ mèn zab li mèn zab. Leꞌ por part cón cheꞌn mèn ndac na, laꞌa tolo li mèn ndac conꞌ coꞌ nac más conꞌ ndac. Lomisqueꞌ ne, mèn coꞌ ngro xàꞌ loo cón cheꞌn xab izlyoꞌ par li mèna conꞌ ndac loo Diox, laꞌa tolo li mèna conꞌ ndac loo Diox no tyoo mèna más altant loo cón cheꞌn Diox.
\p
\v 12 Látha, ndyaquen mbìnen gunee Tad Jesús loon:
\p ―Aa. Neꞌlyenꞌte daa, Juàn. Chàa, galen. No lin par gàc conꞌ loo mèn xalqueꞌ nac conꞌ coꞌ mbli thìb thìb mèn.
\v 13 Daa nzoqueꞌ thidtene. No nzolen ndooreꞌ coꞌseꞌ mblequen izlyoꞌ no ngue xènꞌen izlyoꞌ. Nac daa xal letr “a” coꞌ ntlo loo letr alfabet. No nac daa xal letr “z” coꞌ nac lult letr loo alfabet.
\p
\v 14 Huen gàca loo rye mèn, mèn coꞌ ndli par mbiiche mèn loo ryethe coꞌ nac xab izlyoꞌ coꞌ nac conꞌ xin no conꞌ cap coꞌ ndli ncuaꞌn mèn xtol mèn par gàc mèna mèn nalì no mèn nambìi loo Diox por cón cheꞌn Jesucrist. Tataa mod thìb lìte yòo mèn leꞌn ciuda coꞌteꞌ ndoo yaa nayèe par taꞌ Diox xlè cheꞌn yaaa par hua mèn par ban no mèn Diox thidtene. Leꞌ sya, tataa mod taꞌ Diox lugar quée no lyàa mèna no yòo mèna no ryoꞌ mèna ciudaa.
\v 15 Per ryete mèn coꞌ neꞌndalte ngalaꞌs loon, no ryete mèn coꞌ ndli yalbruj coꞌ ndxòo lezoꞌ ntetìi xtàa, no ryete mèn coꞌ ndxòo lezoꞌ ndli yalburrid, no ryete mèn coꞌ ndxuth xtàa, no ryete mèn coꞌ ndyub xib loo chol mdoꞌ no loo chol gunab, no ryete mèn coꞌ anzeꞌf ndxòo lezoꞌ ncuaꞌn mod par nquedìi mèn hues xtàa mèn, ryete mèna thidtene yanꞌ par fuer no cue mèna par fuer coꞌteꞌ nziriꞌ ciudaa.
\p
\v 16 Gunee Jesús loon, ne:
\p ―Daa coꞌ nac Jesús, daa mtelꞌ angl daa loo mèn coꞌ nzo loo cón chenen, mèn coꞌ nqueltàa rye lugar par gab angl no taꞌ angl cuent loo mèna cón cheꞌn ryethe conꞌ ndxèꞌ. Daa coꞌ nac yub Jesús, daa nac bin cheꞌn David coꞌ ngòc rey póla. Daa li par neꞌlyuxte bin David. No daa li par bere bin David, cue bin David no yarꞌ bin David loo izlyoꞌ tedib vez. Daa coꞌ nac Jesús, yub daa nac mbiꞌ, coꞌ nee diꞌs, nac xal mbèelhuiꞌ coꞌ lèe mbèel zaꞌf coꞌ ndlyen coyor yálꞌ coꞌseꞌ nde yinìi izlyoꞌ tedib vez. Tataa mod ndluꞌen loo guꞌ nde zinꞌ gaxleꞌ tiemp coꞌ cue yiloa.
\p
\v 17 Xpii Natúꞌ no mèn coꞌ nzo loo cón cheꞌn Mbacxilꞌ coꞌ nac leque yub Jesucrist, mèn coꞌ thidte ndxàc con Crist xal thìb xinꞌ saꞌl, Xpii Natúꞌa no mèna mbez:
\p ―De Uꞌ, Tad Jesús.
\p No ryete guꞌ coꞌ mbìn cón cheꞌn diꞌs coꞌ ndub loo libr ndxèꞌ, guuz guꞌ loo Tad Jesús:
\p ―De Uꞌ, Tad Jesús.
\p No leque daa, Juàn, mbez loo chol mèn coꞌ tyal gòn ron:
\p ―Mèn coꞌ ndlyaꞌs no coꞌ nguen lezoꞌ par yòo mèn loo cón cheꞌn Tad Jesús no ndxàc loo mèna xal coꞌseꞌ ndxec lezoꞌ mèn no capas ndlyaꞌs mèn gu mèn nít, cheleꞌ mèn, lìcqueꞌ, lyaꞌs yòo mèn loo cón cheꞌn Tad Jesucrist, yòo mèn loo cón cheꞌn Tad Jesucrist par ban no mèn Diox thidtene xal coꞌseꞌ ndxu mèn nít. Yalnabana neꞌtiꞌde mèn con nec thìb centav.
\p
\v 18 Lomisqueꞌ ne, ryete mèn coꞌ ndxòn diꞌs coꞌ nac diꞌs coꞌ ndxab Diox coꞌ ndub loo libr ndxèꞌ, ndlyazen xyoꞌf ndelequeꞌ lezoꞌ mèn teꞌ lezoꞌ mèn xal nac diꞌs coꞌ ndub loo libr ndxèꞌ coꞌ nac diꞌs ndxèꞌ: Cheleꞌ chol mèn nziꞌf diꞌs coꞌ ndub loo libr ndxèꞌ, Diox ne ziꞌf coꞌ nac conꞌ yeꞌrsinꞌ laꞌs nii mèna no laꞌs yaꞌ mèna xalqueꞌ nac diꞌs coꞌ ndluꞌ loo librꞌ ndxèꞌ.
\v 19 No lomisqueꞌ ne, cheleꞌ chol mèn teche o tonꞌ mèn ndxep diꞌs coꞌ nac diꞌs coꞌ ndxab Diox coꞌ ndub loo libr ndxèꞌ, Diox, ne, tonꞌ lèe mèn coꞌ ndub loo libr coꞌteꞌ ndub lèe mèn coꞌ yòo ban no Diox thidtene. No neꞌtaꞌde Diox lugar yòo mèna leꞌn ciuda coꞌ nac ciuda natúꞌ cheꞌn Diox. Cón cheꞌn mèna nac diꞌs coꞌ ndluꞌ loo libr ndxèꞌ.
\p
\v 20 Daa coꞌ nac Jesucrist coꞌ ngue ta cuent ndxèꞌ lool, Juàn, daa, ne, mbez:
\p ―Aa, neꞌlyenꞌte daa. Chàa, galen loo izlyoꞌ ndxèꞌ.
\p Sya, chàa, mcàben. Ndxaben loo Tad Jesucrist:
\p ―Aa, Tad Jesús, tataa gàca. De Uꞌ loo izlyoꞌ ndxèꞌ.
\p
\v 21 Daa, Juàn, ndlyazen leꞌ Tad Jesucrist li anggàc conꞌ ndac loo rye guꞌ par nedrèꞌ. Taandxèꞌ gàca.