\id 2PE
\h 2 Pedro
\toc1 2 Pedro
\mt DÍDZAʼDOʼ BUROPI BUZÚAJËʼ PEDRO
\c 1
\s Pedro rugapëʼ Dios nupa taʼdáʼ Cristo
\p
\v 1 Nedaʼ, Simón Pedro, nacaʼ huen dxin queëʼ Jesucristo,
en gubáz nasö́l-lëʼë Lëʼ. Rugapaʼ Dios libíʼiliʼ, réajlëʼëliʼ-nëʼ
Jesús. Lë́bisö ca nazácaʼgaca yöl-laʼ réajlëʼ queë́liʼ
Lëʼ, en yöl-laʼ réajlëʼ queë́tuʼ Lëʼ. Dios benëʼ ga réajlëʼëliʼ
Lëʼ tuʼ naca cazëʼ tsahuiʼ, en tuʼ náquiëʼ caʼ Xanruʼ
Jesucristo, Nu naʼ rusölá rëʼu, tsahuiʼ.
\v 2 Rinábidaʼ-nëʼ Dios gunëʼ ga gataʼ queë́liʼ idútë
le ruzáʼ ládxëʼë queë́ruʼ, en gunëʼ ga soa dxi icja ládxiʼdoʼoliʼ
tuʼ núnbëʼëliʼ-nëʼ Dios, encaʼ Xanruʼ Jesús.
\s Le nácagaca nupa taʼyéajlëʼ Cristo
\p
\v 3 Lu yöl-laʼ huáca zxön queëʼ, Dios chibennëʼ queë́ruʼ
yúguʼtë le riquíniruʼ para gataʼ queë́ruʼ yöl-laʼ naʼbán
idú, en para gácaruʼ baʼa ladxiʼ, tuʼ núnbëʼëruʼ Nu naʼ
bulidza rëʼu para gataʼ queë́ruʼ yöl-laʼ zxön queëʼ, en
le naca tsahuiʼ queëʼ.
\v 4 Tuʼ runëʼ caní, benëʼ ga gaca uzíʼiruʼ xibé yuguʼ
le zxön, en le naca tsahuiʼ guzxíʼ lu nëʼë gunnëʼ queë́ruʼ,
ateʼ tuʼ naca caní nuláruʼ lu le ruáʼ döʼ raca yödzölió
ni tuʼ taʼzë́ ládxiʼgaca bönachi le cabí naca tsahuiʼ.
Nuláruʼ para gácaruʼ ca náquiëʼ Lë cazëʼ Dios.
\v 5 Que lë ni naʼ:
\q Channö réajlëʼëliʼ Cristo,
\q2 guliʼgüíʼ ládxiʼliʼ gácaliʼ dxiʼi ladxiʼ.
\q Channö chinácaliʼ dxiʼi ladxiʼ,
\q2 guliʼgüíʼ ládxiʼliʼ gataʼ caʼ queë́liʼ yöl-laʼ rácadaʼ.
\q
\v 6 Channö nápaliʼ yöl-laʼ rácadaʼ,
\q2 guliʼgüíʼ ládxiʼliʼ inná beʼe cuinliʼ.
\q Channö rinná beʼe cuinliʼ,
\q2 guliʼcöza zxön ladxiʼ.
\q Channö ribö́zaliʼ zxön ladxiʼ,
\q2 guliʼsóa baʼa ladxiʼ.
\q
\v 7 Channö zóaliʼ baʼa ladxiʼ,
\q2 guliʼdxíʼi luzáʼaliʼ.
\q Channö nadxíʼiliʼ luzáʼaliʼ,
\q2 guliʼdxíʼi caʼ yúguʼtë bönachi.
\p
\v 8 Channö caní runliʼ, en zeaj rácarö idú ca runliʼ
caní, lë ni gun ga bitiʼ gaca nítisö yöl-laʼ réajlëʼ queë́liʼ
Lëʼ, ateʼ tseaj gácarö idú ca núnbëʼëliʼ-nëʼ Xanruʼ Jesucristo.
\v 9 Nu bönniʼ bitiʼ ruíʼi ládxëʼë gunëʼ caní, náquiëʼ
ca tu bönniʼ nachul-la nanítiëʼ, tuʼ chizáʼ ral-la ládxëʼë
bunëʼ Cristo lëʼ tsahuiʼ, en bugǘëʼ yuguʼ dul-laʼ gubáguëʼë
zíʼatëlö.
\v 10 Que lë ni naʼ, böchiʼ luzáʼadoʼ, ral-laʼ güíʼitërö
ládxiʼliʼ guéquibeʼeliʼ bulidzëʼ Dios libíʼiliʼ, en gurö́
cazëʼ libíʼiliʼ. Channö gunliʼ caní, bitiʼ caʼ ichixi
iníguiliʼ.
\v 11 Caní gaca, idú ládxëʼë Dios gúnnasëʼ queë́liʼ lataj
tsázaliʼ ga inná bë́ʼticaʼsëʼ Xanruʼ Jesucristo, Nu rusölá
rëʼu.
\p
\v 12 Que lë ni naʼ gúnticaʼsaʼ ga tsöjnéliʼ yuguʼ lë
ni sal-laʼ chinö́z quéziliʼ le, en rugunliʼ dxin le naca
idútë li naʼ chiguzxíʼ lu náʼaliʼ.
\v 13 Runi nedaʼ ral-laʼ usubanaʼ ládxiʼliʼ ca nácagaca
lë ni tsanni ni zoaʼ nabanaʼ.
\v 14 Ral-laʼ gunaʼ caní tuʼ nözdaʼ siʼ gátiaʼ. Xanruʼ
Jesucristo chigudxi cazëʼ nedaʼ gaca caní quiaʼ.
\v 15 Que lë ni naʼ ruíʼidaʼ ládxaʼa gunaʼ ga tsöjnéticaʼsiliʼ
yuguʼ lë ni tödi gátiaʼ.
\s Nupa bilaʼléʼe yöl-laʼ zxön queëʼ Cristo
\p
\v 16 Bitiʼ bë́ʼlentuʼ libíʼiliʼ tu didzaʼ ridasö lu
yöl-laʼ sinaʼ queë́tuʼ, cateʼ buzéajniʼituʼ libíʼiliʼ ca
ral-laʼ idxín dza huödëʼ Xanruʼ Jesucristo, napëʼ yöl-laʼ
unná bëʼ zxön. Netuʼ biléʼe quézituʼ yöl-laʼ zxön queëʼ.
\v 17 Biléʼetuʼ Lëʼ cateʼ Xúziruʼ Dios benëʼ Lëʼ bal,
en bëʼë Lëʼ yöl-laʼ zxön, ateʼ biyö́n chiʼë Dios, le birúaj
lataj beníʼ queëʼ, cateʼ gunnë́ʼ: “Bönniʼ ni náquiëʼ Zxíʼinaʼ.
Nadxíʼidaʼ Lëʼ, en raza ládxaʼa Lëʼ.”
\v 18 Netuʼ biyö́n quézituʼ chiʼë naʼ le birúaj yehuaʼ
yubá cateʼ niʼ guzóalentuʼ-nëʼ Xanruʼ lu guíʼa láʼayi
naʼ.
\p
\v 19 Lë naʼ guca, naca bëʼdaʼ zeaj nácatë didzaʼ guluʼë
yuguʼ bönniʼ uláz queëʼ Dios, ateʼ ral-laʼ güíʼi ládxiʼliʼ
didzaʼ naʼ, tuʼ naca ca tu guíʼ ruzeníʼ tu ga naca chul-la
ga idxintë dza uzeníʼ lu icja ládxiʼdoʼoliʼ Nu naʼ naca
ca bölaj hui sila queë́ruʼ.
\v 20 Lë ni rundaʼ bayudxi tséajniʼiliʼ: Cuntu nu bönniʼ,
rácasö queëʼ bitiʼ gaca tséajniʼinëʼ didzaʼ bëʼë tu
bönniʼ uláz queëʼ Dios.
\v 21 Yuguʼ didzaʼ guluʼë yuguʼ bönniʼ uláz queëʼ Dios
bitiʼ caʼ guluʼë tuʼ gulë́ʼëni quézinëʼ, pero guluʼë didzaʼ
uláz queëʼ Dios le guchíziëʼ Dios Böʼ Láʼayi icja ládxiʼdoʼgaquiëʼ.
\c 2
\s Ca nácagaca nupa tuʼsédinëʼ le cabí nácatë
\p
\v 1 Yuguʼ bönniʼ taʼzíʼ yëʼë gulaʼcuáʼlenëʼ bönachi
Israel, en gulaʼnnë́ʼ nácagaquiëʼ bönniʼ tuʼë didzaʼ uláz
queëʼ Dios. Lëscaʼ caní yuguʼ bönniʼ ilaʼzíʼ yëʼë ilaʼcuáʼlenëʼ
libíʼiliʼ, en uluʼsédinëʼ libíʼiliʼ le cabí nácatë. Lu
yöl-laʼ sinaʼ quégaquiëʼ uluʼsédinëʼ libíʼiliʼ xibá quégacasëʼ
le gun ga soa bönadxi queë́liʼ ucáʼanaliʼ le naca idútë
li. Ilaʼdáʼbaguëʼë caʼ Xanruʼ, Nu busölá rëʼu. Le ilunëʼ
gun ga usunítiëʼ Dios légaquiëʼ.
\v 2 Zianliʼ libíʼiliʼ gunliʼ légaquiëʼ tsözxö́n lu le
ruáʼ döʼ ilunëʼ, ateʼ tuʼ gunliʼ bál-laliʼ caní ilaʼnnë́
xihuiʼ bönachi que didzaʼ dxiʼa le naca idútë li.
\v 3 Lu yöl-laʼ ruhuidiʼ quégaquiëʼ uluʼsédinëʼ libíʼiliʼ
le cabí nácatë, para gataʼ quégaquiëʼ dumí queë́liʼ. Chinarugu
quégaquiëʼ bönniʼ ni, ateʼ naca löza ilaʼnítiëʼ tsaz.
\p
\v 4 Dios bitiʼ buniti lahuëʼ yuguʼ gubáz láʼayi queëʼ
naʼ gulunëʼ dul-laʼ, pero gurúʼunëʼ légaquiëʼ lataj chul-la.
Nágaʼgaquiëʼ du guíë ga naca chul-la naʼ, ga naʼ taʼbözëʼ
dza usiúdxëʼ Dios légaquiëʼ.
\v 5 Lëscaʼ caní, bitiʼ buniti lahuëʼ bönachi gulaʼcuáʼ
dza niʼte cateʼ gusö́l-lëʼë nisa guiö́j le busuniti yödzölió
le beti bönachi nácagaca xihuiʼ, pero busölë́ʼ Noé lu
nisa naʼ, bönniʼ niʼ benëʼ libán que le naca tsahuiʼ.
Dios busölë́ʼ caʼ iaʼgadxi diʼa dza queëʼ Noé naʼ lu
nisa.
\v 6 Lëscaʼ caní, Dios guchúguiëʼ quégaca bönachi gulaʼcuáʼ
yödzö Sodoma, en yödzö Gomorra. Busunítiëʼ léguequi lu
guíʼ, ateʼ buluʼhuöáca dö. Le guca quéguequi naca tu
le ruluíʼi le run gadxi nupa tuaʼ döʼ.
\v 7 Cateʼ busunítiëʼ yuguʼ yödzö naʼ, Dios busölë́ʼ Lot,
tu bönniʼ tsahuiʼ, lu guíʼ naʼ. Buíʼinidaʼ ládxëʼë Lot
cateʼ biléʼenëʼ le xihuiʼ gulún bönachi tuáʼ döʼ naʼ.
\v 8 Caní guca, tuʼ guzóalenëʼ bönniʼ tsahuiʼ naʼ léguequi,
ateʼ biléʼenëʼ, en biyönnëʼ le ruáʼ döʼ naʼ gulúngaca,
ateʼ tuʼ gúquiëʼ tsahuiʼ gusëbi ládxëʼë yúguʼtë dza
niʼa que yuguʼ le cabí naca tsahuiʼ gulúngaca.
\v 9 Caní naca, Xanruʼ nö́zinëʼ usölë́ʼ nupa naʼ tadxi
Lëʼ lu naʼ nu run ga tsázagaca bönachi nöza dul-laʼ, pero
nucö́zëʼ xíguiaʼ gunëʼ nupa bitiʼ nácagaca tsahuiʼ ga
idxinrö dza ichúguiëʼ quéguequi ilaʼniti tsaz.
\p
\v 10 Ichúgudaʼarö quégaquiëʼ bönniʼ ni tunëʼ yuguʼ
le taʼzë́ ládxëʼë le ruáʼ döʼ, en taʼdáʼbaguiëʼ yöl-laʼ
unná bëʼ queëʼ Xanruʼ. Nácagaquiëʼ rugu ladxiʼ, en zidi
ladxiʼ. Bitiʼ tádxinëʼ tuʼlidza ditjëʼ gubáz láʼayi
taʼdë́ʼ lu beníʼ.
\v 11 Gubáz láʼayi naʼ nápagacatërëʼ yöl-laʼ unná bëʼ,
en yöl-laʼ huáca ca yuguʼ bönniʼ naʼ, pero gubáz láʼayi
naʼ bitiʼ tuʼhuázxjanëʼ nu uluʼzéguiëʼ didzaʼ lahuëʼ
Xanruʼ.
\p
\v 12 Yuguʼ bönniʼ ni nácagaquiëʼ ca böaʼ guixiʼ, bitiʼ
bi taʼyéajniʼibaʼ, pero náljagacabaʼ para nu sön légacabaʼ,
en guti légacabaʼ. Taʼnnë́ xihuëʼë que le cabí taʼyéajniʼinëʼ,
ateʼ ilaʼnítiëʼ tsaz ca raca quégacabaʼ böaʼ guixiʼ
naʼ.
\v 13 Dios ubiʼë quégaquiëʼ le ilaʼguíʼi ilaʼzáquëʼë,
tuʼ buluʼsacaʼ ziʼë bönachi. Téquinëʼ naca xibágaquiëʼ
tuʼziʼë xibé le raca naʼa dza. Nácagaquiëʼ ca tu huëʼ
nudzuʼ, en tu le run ditaj cateʼ niʼ tahuëʼ tsözxö́n len
libíʼiliʼ, ateʼ tuʼdzéjanëʼ tuʼ taʼzíʼ yéʼenëʼ libíʼiliʼ.
\p
\v 14 Lu yöl-laʼ rizë́ ladxiʼ quégaquiëʼ le ruáʼ döʼ tuʼyúëʼ-nu
yuguʼ nigula. Bitiʼ nacuʼë dxisö túngaquiëʼ dul-laʼ.
Túngaquiëʼ ga taʼchixi taʼnigui nupa bitiʼ nácagaca
tsutsu ca taʼyéajlëʼ Cristo. Taʼguíljaticaʼsëʼ yuguʼ
le tuʼhuídiʼnëʼ. Dios chinuchúguiëʼ quégaquiëʼ ilátigaquiëʼ.
\v 15 Buluʼcáʼanëʼ le naca idútë li, ateʼ nachul-la nanítigaquiëʼ.
Tunëʼ ca benëʼ Balaam, zxíʼinëʼ Beor, bönniʼ niʼ bidxíʼinëʼ
dumí, ateʼ benëʼ le ruáʼ döʼ tuʼ nazxjëʼ.
\v 16 Dios buzenëʼ le bach Balaam naʼ tuʼ benëʼ le ruáʼ
döʼ naʼ. Tubaʼ búrrodoʼ bë́ʼlenbaʼ lëʼ didzaʼ ca naʼ
tuíʼi didzaʼ bönachi, ateʼ buzágaʼbaʼ xinözëʼ Balaam
ga naʼ saʼyéajëʼ lu yöl-laʼ ridáʼbagaʼ queëʼ.
\p
\v 17 Nácagaquiëʼ bönniʼ ni ca tu buduáʼ chibuíʼi nisa
que, encaʼ ca tu böaj le richë́ʼ böʼ budunuʼ. Chinabáʼa
xilátjagaquiëʼ lataj chul-la.
\v 18 Caní nácagaquiëʼ tuʼ tuʼë didzaʼ yuguʼ le zxön
lu yöl-laʼ bitiʼ bi nözi quégaquiëʼ, en tuʼgunëʼ dxin
yuguʼ le taʼzë́ ládxiʼgaca bönachi le ruáʼ döʼ, en tunëʼ
ga taʼchixi taʼnigui nupa siʼ buluʼlá ladaj nupa nácagaca
chul-la niti.
\v 19 Tëʼ bönachi ilaʼdeliʼ yöl-laʼ rusölá, pero légaca
cazëʼ nadzúngaquiëʼ, en tunëʼ bayudxi le ruáʼ döʼ. Nadzúngaquiëʼ
yúguʼtë bönniʼ lu naʼ bi rinná beʼe icja ládxiʼdoʼgaquiëʼ.
\v 20 Channö buluʼlë́ʼ lu le cabí naca tsahuiʼ nacuáʼ
yödzölió ni tuʼ gulúnbëʼë Xanruʼ Jesucristo, Nu rusölá
rëʼu, ateʼ níʼirö taʼröli le cabí naca tsahuiʼ naʼ légaquiëʼ
leyúbölö, en taʼnná beʼe légaquiëʼ, le nácatë nabágaʼgacatërëʼ
xíguiaʼ ga röjsetë ca le gulaʼbáguëʼë zíʼalö.
\v 21 Dxíʼarö gaca quégaquiëʼ laʼtuʼ catu caz ilúnbëʼë
Nu ruzóa rëʼu nöza tsahuiʼ ca le gaca quégaquiëʼ channö
gulúnbëʼë Lëʼ, ateʼ níʼirö buluʼcáʼanëʼ xibá láʼayi bëʼë
Dios quégaquiëʼ.
\v 22 Chibudxín quégaquiëʼ didzaʼ naʼ rnna:
\q Ruhuécjabaʼ böʼcuʼ, ruhuöágubaʼ le siʼ gúbabaʼ.
\q Ruyázabaʼ cuchi naʼ siʼ gudíbiruʼ-baʼ lu gunaʼ.
\c 3
\s Naca löza huödëʼ Xanruʼ
\p
\v 1 Didzaʼ ni naca le buropi ruzúajaʼ queë́liʼ lu guichi,
böchiʼ luzáʼadoʼ. Lu irópatë guichi naʼ ruíʼi ládxaʼa
usubanaʼ ládxiʼliʼ ca nácagaca lë ni.
\v 2 Guliʼtsöjné yuguʼ didzaʼ guluʼë bönniʼ queëʼ Dios
zíʼatëlö, ca guluʼë didzaʼ uláz queëʼ. Guliʼtsöjné caʼ
xibá naʼ Xanruʼ, Nu rusölá rëʼu, gunná béʼenëʼ rëʼu, lë
naʼ buluʼsédinëʼ bönniʼ gubáz nasö́l-lëʼë Lëʼ libíʼiliʼ.
\p
\v 3 Ral-laʼ tsöjnéliʼ lë ni naca lo. Dza tsöjsétëgaca
uluʼluíʼi lahuëʼ bönniʼ ilunëʼ le taʼzë́ ládxëʼë le ruáʼ
döʼ.
\v 4 Uluʼtitjëʼ, ilaʼnnë́ʼ: “¿Gazxi caz lë naʼ guzxíʼ
lu nëʼë Cristo? Gunnë́ʼ: Huödaʼ leyúbölö. Dza niʼte cateʼ
gulátiëʼ xuz xtóʼoruʼ, yúguʼtë raca tuz ca guca cateʼ
gusí lo rataʼ yödzölió ga ridxintë naʼa dza.”
\v 5 Tuʼzóëʼ tsöláʼalö le guca dza niʼte. Bëʼë didzaʼ
Dios, ateʼ gulataʼ lúzxiba, en luyú. Birúaj luyú naʼ lu
nisa ateʼ zoa gatsaj láhuiʼlö nisa.
\v 6 Len nisa caʼ busunítiëʼ Dios yödzölió dza niʼte
cateʼ niʼ gusö́l-lëʼë nisa guiö́j le beti yuguʼ bönachi
dul-laʼ.
\v 7 Lúzxiba, en yödzölió ni le nacuáʼ naʼa dza, Dios
nucuʼë léguequi ga idxinrö dza usunítiëʼ léguequi lu
guíʼ. Caní gaca tuʼ gunnë́ʼ caní Dios caz. Uzéguiʼë léguequi
dza niʼ ichúguiëʼ quégaca bönachi bitiʼ nácagaca tsahuiʼ
gátigaca.
\p
\v 8 Bitiʼ gal-la ládxiʼliʼ lë ni, böchiʼ luzáʼadoʼ. Tu
dza naca queëʼ Xanruʼ ca zián gayuáʼ iz, ateʼ zián gayuáʼ
iz nácagaca queëʼ ca tu dza.
\v 9 Bitiʼ ridzenëʼ Xanruʼ gunëʼ le guzxíʼ lu nëʼë gunëʼ.
Téquiguequi bal-la bönachi ridzenëʼ, pero ribözëʼ zxön
ladxiʼ, en ruáʼ rilenëʼ rëʼu tuʼ cabí rë́ʼënëʼ initi nitú
bönachi, pero rë́ʼënëʼ uluʼbíʼi ládxiʼgaca yúguʼtë bönachi.
\p
\v 10 Tsálidoʼos idxín dza huödëʼ Xanruʼ ca ridxinëʼ
tu bönniʼ gubán chiʼi dzö́ʼölö. Lu dza naʼ huadödi que
lúzxiba len tu bö zxön. Ilaʼniti yúguʼtë le nacuáʼ lu
guíʼ zxön. Ilaʼyegui yödzölió ni, en le nacuáʼ yödzölió
ni.
\p
\v 11 Channö caní gaca, ilaʼniti yúguʼtë lë ni, ¿bizxi
caz ral-laʼ gunliʼ? Ral-laʼ gácaliʼ baʼa ladxiʼ, en udödi
cuinliʼ lu nëʼë Dios.
\v 12 Ral-laʼ cö́zaliʼ dza huödëʼ Xanruʼ, en güíʼi ládxiʼliʼ
gunliʼ ga idxinrö bayö́n dza niʼ cateʼ initi lúzxiba,
ateʼ ilaʼniti yúguʼtë le nacuáʼ ni lu guíʼ.
\v 13 Caní gaca, pero rëʼu ribö́zaruʼ le guzxíʼ lu nëʼë
Dios. Gunëʼ tu lúzxiba cubi, en tu luyú cubi ga niʼ soa
le naca tsahuiʼ.
\p
\v 14 Que lë ni naʼ, böchiʼ luzáʼadoʼ, tsanni ni ribö́zaliʼ
yuguʼ lë ni, guliʼgüíʼ ládxiʼliʼ gácaliʼ idú tsahuiʼ
lahuëʼ Dios, ateʼ gunliʼ ga cuntu nu bi gaca innë́ queë́liʼ,
en cö́zaliʼ dxíʼadoʼ cateʼ idxinrö dza niʼ.
\v 15 Ral-laʼ inö́ziliʼ ribözëʼ Dios zxön ladxiʼ para
gataʼ quégaca bönachi lataj uluʼlágaca, ca naʼ gunnë́ʼ
caʼ bö́chiʼruʼ Pablo. Buzúajëʼ queë́liʼ lu guichi, zóalen
lëʼ yöl-laʼ réajniʼi naʼ bëʼë Xanruʼ queëʼ.
\v 16 Yúguʼtë lu guichi ruzúajëʼ, ruʼë didzaʼ ca nácagaca
lë ni, sal-laʼ nútsaʼgaca caʼ léguequi yuguʼ didzaʼ nácagaca
böniga tséajniʼiruʼ. Yuguʼ didzaʼ caní tuʼchíxinëʼ bönniʼ
bitiʼ nö́zguequinëʼ, en bönniʼ bitiʼ naca idú ládxiʼgaquiëʼ.
Lëscaʼ caní tunëʼ quégaca iaʼbal-la didzaʼ nazúajgaca
lu guichi láʼayi, le gun ga usunítiëʼ Dios légaquiëʼ.
\p
\v 17 Chinö́z quéziliʼ lë ni, böchiʼ luzáʼadoʼ. Que lë
ni naʼ guliʼgún chiʼi cuinliʼ, para cabí ilaʼzíʼ yeʼe
bönachi bitiʼ nácagaca tsahuiʼ libíʼiliʼ, en para cabí
ilún ga tseaj böʼ icja ládxiʼdoʼoliʼ ca réajlëʼëliʼ
Cristo.
\v 18 Guliʼgüíʼ ládxiʼliʼ gácarö idú ca núnbëʼëliʼ-nëʼ
Xanruʼ Jesucristo, Nu rusölá rëʼu, ateʼ ruzíʼiliʼ xibë́ʼ.
¡Yöl-laʼ ba Lëʼ naʼa dza, en yúguʼtë dza záʼgaca! ¡Caʼ
gaca!