\id JHN
\h San Juan
\mt DIZRAꞌ CHAWEꞌ CA NACA CHEE̱ JESUCRISTO DA BZUAJ SAN JUAN
\c 1
\s Bénneaꞌ le̱ꞌ Xrtizraꞌ Dios dxaque̱ꞌ bénneache
\p
\v 1 Gate guzú lau zua xúgute̱ da de̱, ba zúaqueze Bénneaꞌ le̱ꞌ Xrtizraꞌ Dios, da zéaje̱ na Benneꞌ naque̱ꞌ dute̱ da nácaqueze Dios, naꞌ Bénneaꞌ le̱ꞌ Xrtizraꞌ Dios zúale̱ne̱ꞌ Dios, ne nácaqueze̱ꞌ Dios.
\v 2 Nédxudaute̱ Benneꞌ nigá zúale̱ne̱ꞌ Dios.
\v 3 Lu naꞌ Benneꞌ nigá be̱n Dios xúgute̱ da de̱. Quebe bi de̱ da quebe nun Le̱ꞌ.
\v 4 Nácaqueze Le̱ꞌ xel-laꞌ nabán, naꞌ xel-laꞌ nabán nigá naca na da dxusení na lu xichaj lázrdau bénneache chee̱ xelaca bane̱ꞌ.
\v 5 Xel-laꞌ naxaníꞌ nigá dxusení na lu da chul-la chee̱ dul-la da zaj nabaga bénneache, naꞌ da chul-la nigá quebe dxezeque na xusula na xel-laꞌ naxaníꞌ nigá.
\p
\v 6 Guzúa tu benneꞌ le̱ꞌ Juan, gusel-la Dios benneaꞌ.
\v 7 Benneꞌ nigá ble̱ꞌe̱ chee̱ bchálaje̱ꞌ ca naca chee̱ Bénneaꞌ naque̱ꞌ xel-laꞌ naxaníꞌ nigá, chee̱ xeléajle̱ xúgute̱ bénneache chee̱ Bénneaꞌ ne̱ chee̱ da dxenné̱ꞌ.
\v 8 Juan nigá quebe naque̱ꞌ xel-laꞌ naxaníꞌ naꞌ. Ble̱ꞌe̱ chee̱ bchálaje̱ꞌ ca naca chee̱ Bénneaꞌ naque̱ꞌ xel-laꞌ naxaníꞌ nigá.
\v 9 Xel-laꞌ naxaníꞌ li, da dxusení na lu xichaj lázrdau xúgute̱ bénneache ba zaꞌ laꞌ na lu xe̱zr la xu nigá.
\p
\v 10 Bénneaꞌ naque̱ꞌ Xrtizraꞌ Dios zue̱ꞌ lu xe̱zr la xu nigá, naꞌ lácala be̱n Dios xe̱zr la xu lu naꞌ Bénneaꞌ, bénneache zaj zre̱ꞌe̱ lu xe̱zr la xu quebe belexexúnbeꞌe̱ Le̱ꞌ.
\v 11 Ble̱ꞌe̱ naga zua da naca chee̱ꞌ, naꞌ benneꞌ lazrie̱ꞌ caꞌ quebe gulezíꞌ lu ne̱ꞌe̱ Le̱ꞌ.
\v 12 Benneꞌ caꞌ gulezíꞌ lu ne̱ꞌe̱ Le̱ꞌ, ne guléajle̱ꞌe̱ chee̱ꞌ, be̱ꞌe benneꞌ caní lataj xelaque̱ꞌ bi caꞌ chee̱ Dios.
\v 13 Benneꞌ caní québedxa zaj naque̱ꞌ ca zriꞌine bénneacheze, bi caꞌ dxelálajbeꞌ ne̱ chee̱ bénneache, u ne̱ chee̱ da dxezá lazreꞌ tu benneꞌ. Benneꞌ caní zaj naque̱ꞌ bi caꞌ chee̱ Dios náꞌqueze.
\p
\v 14 Bénneaꞌ naque̱ꞌ Xrtizraꞌ Dios gúlaje̱ꞌ ca tu bénneache, naꞌ guzúe̱ꞌ ládujla dxiꞌu, zaj zúale̱ xel-laꞌ zriꞌi lazreꞌ, ne da li Le̱ꞌ. Bléꞌentuꞌ ca naca xel-laꞌ szren chee̱ꞌ, tu xel-laꞌ szren da nunezruj Xradxu Dios chee̱ Zríꞌine̱ꞌ tu lichaꞌ.
\v 15 Juan bchálaje̱ꞌ ca naca chee̱ Bénneaꞌ, gunné̱ꞌ:
\p ―Benneꞌ nigá naque̱ꞌ Bénneaꞌ bchálajaꞌ nedaꞌ chee̱ꞌ gate gunnéaꞌ Bénneaꞌ ze̱ꞌe̱ te chiaꞌ nedaꞌ naque̱ꞌ szrendxa ca nedaꞌ laweꞌ da zúaqueze̱ꞌ nédxute̱ ca nedaꞌ.
\p
\v 16 Xúgute̱dxu ba guzidxu xel-laꞌ zriꞌi lazreꞌ chee̱ꞌ da dxúnnaqueze Le̱ꞌ.
\v 17 Blaꞌ da nadxixruj bea Dios ládujla dxiꞌu lu naꞌ Moisés, naꞌ xel-laꞌ zriꞌi lazreꞌ, ne da li beleláꞌ na lu naꞌ Jesucristo.
\v 18 Netú benneꞌ quebe ne léꞌene̱ꞌ Dios. Zríꞌine̱ꞌ tu lichaꞌ, bi nazríꞌite̱ lazre̱ꞌ, benneꞌ nigá guque̱ꞌ tuz ca nácaqueze Xre̱ꞌ.
\s Juan, benneꞌ bchue̱ꞌ bénneache nisa, dxexeche̱be̱ꞌ chee̱ Jesús
\r (Mt. 3.11-12; Mr. 1.7-8; Lc. 3.15-17)
\p
\v 19 Benneꞌ xíchaje̱ caꞌ chee̱ judío caꞌ, benneꞌ zaj zre̱ꞌe̱ Jerusalén, gulesel-le̱ꞌ bxruze caꞌ, ne xrtia Leví, benneꞌ caꞌ dxelune̱ꞌ zrin chee̱ xudauꞌ, naꞌ belezrine̱ꞌ lau Juan chee̱ xuluche̱be xánnie̱ꞌ le̱ꞌ nu naque̱ꞌ.
\v 20 Beche̱be Juan du lazre̱ꞌ, gunné̱ꞌ:
\p ―Quebe nacaꞌ nedaꞌ Cristo. (Dizraꞌ nigá zéaje̱ na Benneꞌ guche̱be lazreꞌ Dios sel-le̱ꞌ.)
\p
\v 21 Nadxa buluche̱be̱ꞌ le̱ꞌ:
\p ―¿Nuzra nacuꞌ? ¿Nacuꞌ Elías, bénneaꞌ bchálaje̱ꞌ waláz chee̱ Dios?
\p Beche̱be Juan:
\p ―Cabí.
\p Naꞌ buluché̱bequeze̱ꞌ le̱ꞌ:
\p ―¿Nacuꞌ bénneaꞌ dxal-laꞌ le̱ꞌe̱, ne guchalaje̱ꞌ waláz chee̱ Dios, ca da gunná Moisés dxal-laꞌ gaca na?
\p Le̱ꞌ beche̱be̱ꞌ:
\p ―Cabí.
\p
\v 22 Nadxa buluché̱bedxaqueze̱ꞌ le̱ꞌ:
\p ―¿Nuzra nacuꞌ? Dxun na ba xen gataꞌ bi xeché̱bentuꞌ chee̱ benneꞌ gulesel-le̱ꞌ netuꞌ. ¿Bi dxennáquezuꞌ nu nacuꞌ?
\p
\v 23 Juan beche̱be̱ꞌ:
\p ―Nedaꞌ nacaꞌ bénneaꞌ naxúaj na ca naca chee̱ꞌ lu xiche chee̱ Dios, da dxenná: Wen chiꞌi tu benneꞌ dxebezre xe̱ꞌe̱ le̱ꞌe̱ xixreꞌ laweꞌ lataj, dxenné̱ꞌ: “Le salaj tu neza li naga te Xránadxu.” Naquen cáte̱ze gunná Isaías, bénneaꞌ bchalaje̱ꞌ waláz chee̱ Dios.
\p
\v 24 Benneꞌ xudauꞌ fariseo caꞌ gulesel-le̱ꞌ benneꞌ caní chee̱ cheajlechálajle̱ne̱ꞌ Juan.
\v 25 Le̱ꞌ buluche̱be̱ꞌ le̱ꞌ:
\p ―Che lueꞌ quebe nacuꞌ Cristo, ne Elías, ne bénneaꞌ dxal-laꞌ xedajchalaje̱ꞌ waláz chee̱ Dios, ¿bi xel-laꞌ dxenná bea napuꞌ dxuchúꞌ bénneache nisa?
\p
\v 26 Juan guzre̱ꞌ benneꞌ caꞌ:
\p ―Nedaꞌ dxuchúaꞌ bénneache nisa lu nísaze. Zua tu benneꞌ ládujla leꞌe quebe nézele ca szren naque̱ꞌ.
\v 27 Benneꞌ nigá ze̱ꞌe̱ ca te chiaꞌ nedaꞌ, naꞌ zúaqueze̱ꞌ nédxudxa ca nedaꞌ. Quebe zacaꞌ nedaꞌ cuéajaꞌ zrele̱ꞌ da xuꞌu niꞌe̱.
\p
\v 28 Xúgute̱ da caní guca na lu xe̱zr la xu chee̱ xe̱zre Betábara, da zua na chaláꞌa xe̱gu Jordán naga dxalaj gubizra, naga zua Juan dxuchúe̱ꞌ bénneache nisa.
\s Jesús naque̱ꞌ Zrílaꞌdauꞌ chee̱ Dios, be̱ dxelutie̱ꞌ lau Dios ne̱ chee̱ xtul-leꞌ
\p
\v 29 Zra xula bleꞌe Juan dxezrín Jesús naga zue̱ꞌ, naꞌ gunné̱ꞌ:
\p ―¡Le nnaꞌxque! Benneꞌ nigá naque̱ꞌ Zrílaꞌdauꞌ chee̱ Dios, cue̱ꞌ dul-la zaj nabaga bénneache.
\v 30 Nedaꞌ bchálajaꞌ ca naca chee̱ꞌ gate gunnéaꞌ: Te chiaꞌ nedaꞌ za tu benneꞌ naque̱ꞌ szrendxa ca nedaꞌ laweꞌ da zúaqueze̱ꞌ nédxudaute̱ ca nedaꞌ.
\v 31 Nédaꞌquezaꞌ quebe gunezdaꞌ nu naque̱ꞌ. Blaꞌa dxuchúaꞌ bénneache nisa chee̱ xeleneze xe̱zre Israel nu Benneꞌ naca Le̱ꞌ.
\p
\v 32 Cáꞌanqueze gunná Juan:
\p ―Nedaꞌ bleꞌedaꞌ Beꞌ Láꞌazxa bétaje̱ꞌ xabáa ca tu bgugu chíchedauꞌ, ne begáꞌanale̱ne̱ꞌ Benneꞌ nigá.
\v 33 Nedaꞌ quebe ne nezdaꞌ nu naque̱ꞌ. Dios naꞌ nasel-le̱ꞌ nedaꞌ chee̱ guchúaꞌ bénneache nisa, Le̱ꞌ guzre̱ꞌ nedaꞌ: “Gate leꞌenuꞌ Beꞌ Láꞌazxa xétaje̱ꞌ xegáꞌanale̱ne̱ꞌ tu benneꞌ, Benneꞌ nigá gune̱ꞌ da zéaje̱ xel-laꞌ dxedxúa nisa, guzúe̱ꞌ Beꞌ Láꞌazxa lu xichaj lázrdaule.”
\v 34 Naꞌa ba bleꞌedaꞌ guca da nigá, ne dxexeche̱baꞌ nácaqueze Benneꞌ nigá Zriꞌine Dios.
\s Benneꞌ nedxu caꞌ dxuse̱de Jesús
\p
\v 35 Zra xula zúaqueze naꞌ Juan nen chupa benneꞌ caꞌ dxusé̱dene̱ꞌ.
\v 36 Gate bléꞌene̱ꞌ dxedé naꞌ Jesús, naꞌ gunná Juan:
\p ―¡Le nnaꞌxque! ¡Benneꞌ nigá naque̱ꞌ Zrílaꞌdauꞌ chee̱ Dios, bia gátebaꞌ ne̱ chee̱ dul-la nabágadxu!
\p
\v 37 Dxúpate̱ benneꞌ caꞌ dxuse̱de Juan belenne̱ꞌ ca da gunné̱ꞌ, naꞌ xjácale̱ne̱ꞌ Jesús.
\v 38 Nadxa bexechaj Jesús, gunné̱ꞌe̱ cúzrule̱ꞌ, ne bléꞌene̱ꞌ benneꞌ caꞌ záꞌaque̱ꞌ cúzrule̱ꞌ, naꞌ guzre̱ꞌ le̱ꞌ:
\p ―¿Bi dxexílajle?
\p Benneꞌ caní gulé̱ꞌe̱ Jesús:
\p ―Benneꞌ Wese̱de, ¿gazra zuꞌ?
\p
\v 39 Jesús beche̱be̱ꞌ:
\p ―Le da nnaꞌle.
\p Nadxa xjácale̱ne̱ꞌ Jesús, ne beleléꞌene̱ꞌ naga zue̱ꞌ, naꞌ belexegáꞌanale̱ne̱ꞌ Le̱ꞌ zra naꞌ laweꞌ da bache zeaj du dxedáꞌ tapa.
\p
\v 40 Tu benneꞌ chupa caꞌ, benneꞌ belenne̱ꞌ ca da gunná Juan, ne xjácale̱ne̱ꞌ Jesús, naque̱ꞌ Andrés, benneꞌ biche Simón Pedro.
\v 41 Andrés nigá la guxíajte̱ꞌ xeajdílaje̱ꞌ bi biche̱ꞌ Simón, naꞌ guzre̱ꞌ le̱ꞌ:
\p ―Ba bezrélentuꞌ Mesías. (Dizraꞌ nigá zéaje̱ na Cristo, Bénneaꞌ guche̱be lazreꞌ Dios sel-le̱ꞌ.)
\p
\v 42 Nadxa Andrés guché̱ꞌe̱ Simón naga zua Jesús, naꞌ gate bleꞌe Jesús Simón naꞌ, naꞌ guzre̱ꞌ le̱ꞌ:
\p ―Lueꞌ nacuꞌ Simón, zriꞌine Jonás. Siꞌ lauꞌ Cefas. (Dizraꞌ hebreo nigá zéaje̱ na: Pedro, da zeaje̱ na: Xiaj.)
\s Jesús dxenné̱ꞌ Felipe ne Natanael
\p
\v 43 Zra xula guca lazreꞌ Jesús chéaje̱ꞌ naga nababa Galilea, naꞌ bezrague̱ꞌ Felipe, ne guzre̱ꞌ le̱ꞌ:
\p ―Be̱n nedaꞌ tuze.
\p
\v 44 Felipe nigá naque̱ꞌ benneꞌ xe̱zre Betsaida, da naca na lazre Andrés, ne Pedro.
\v 45 Felipe guxíaje̱ꞌ xeajdílaje̱ꞌ Natanael, naꞌ guzre̱ꞌ le̱ꞌ:
\p ―Ba bezrélentuꞌ Bénneaꞌ bzuaj Moisés chee̱ꞌ lu xiche naga zaj naxúaj da nadxixruj bea na, ne cáꞌanqueze chee̱ Benneꞌ nigá buluzúaj benneꞌ caꞌ buluchálaje̱ꞌ waláz chee̱ Dios. Benneꞌ nigá naque̱ꞌ Jesús, zriꞌine José, tu benneꞌ xe̱zre Nazaret.
\p
\v 46 Naꞌ gunná Natanael:
\p ―¿Waca dxuaj tu da chaweꞌ Nazaret?
\p Felipe beche̱be̱ꞌ:
\p ―Gudá leꞌenuꞌ.
\p
\v 47 Gate bleꞌe Jesús za Natanael naga zue̱ꞌ, gunné̱ꞌ:
\p ―Nigá zaꞌ tu benneꞌ naca xánnie̱ꞌ benneꞌ Israel, benneꞌ dxenné̱queze̱ꞌ da dxéquene̱ꞌ.
\p
\v 48 Nadxa Natanael bche̱be̱ꞌ Jesús:
\p ―¿Ájazra naca núnbeꞌu nedaꞌ?
\p Jesús guzre̱ꞌ le̱ꞌ:
\p ―Bleꞌedaꞌ lueꞌ nédxudxa gate za nne̱ Felipe lueꞌ, gate zeꞌu zran xaga higo.
\p
\v 49 Nadxa Natanael guzre̱ꞌ Jesús:
\p ―Benneꞌ Wese̱de, Lueꞌ nacuꞌ Zriꞌine Dios. Lueꞌ nacuꞌ Wenná Bea chee̱ntuꞌ, benneꞌ Israel.
\p
\v 50 Beche̱be Jesús:
\p ―¿Dxéajle̱ꞌu chiaꞌ laweꞌ da guchaꞌ lueꞌ bleꞌedaꞌ lueꞌ zran xaga higo? Waléꞌenuꞌ da zaj naca na da szrendxa ca da nigá.
\v 51 Da li dxapaꞌ leꞌe, waléꞌequezle leꞌe naxalaj xabáa, naꞌ gubáz chee̱ xabáa caꞌ chee̱ Dios dxelétaje̱ꞌ, ne dxelexegüene̱ꞌ naga zua nedaꞌ, Benneꞌ Gulje̱ꞌ Bénneache.
\c 2
\s Dxaca laní chee̱ wechaga naꞌ lu xe̱zre Caná
\p
\v 1 Zra guxunne zra, naꞌ guca laní chee̱ wechaga naꞌ lu xe̱zre Caná da nababa Galilea. Xrna Jesús zue̱ꞌ naꞌ,
\v 2 naꞌ zua nu gunné̱ Jesús, ne benneꞌ caꞌ dxusé̱dene̱ꞌ lu laní naꞌ.
\v 3 Bebizre xrise uva wal-la, naꞌ xrna Jesús guzre̱ꞌ Le̱ꞌ:
\p ―Québedxa bi de̱ xrise uva wal-la xeléꞌaje̱ꞌ.
\p
\v 4 Jesús beche̱be̱ꞌ:
\p ―Núꞌuladauꞌ, ¿bizr chee̱ naꞌ dxuꞌu nedaꞌ caní? Quebe ne zrin zra guléꞌe lau da nacaꞌ.
\p
\v 5 Xrne̱ꞌe̱ guzre̱ꞌ benneꞌ we̱n zrin caꞌ:
\p ―Le gun ca naca da xe̱ꞌe̱ leꞌe.
\p
\v 6 Zaj nnita xrupa xesuꞌ xiaj naꞌ, da dxuluchine judío caꞌ gate dxelibe niꞌa ne̱ꞌe̱ ca naca da zjácale̱ne̱ꞌ. Tu tu xesuꞌ xiaj caꞌ dxeluzru na chupa u chunna dxeꞌe nisa.
\v 7 Jesús guzre̱ꞌ benneꞌ we̱n zrin caꞌ:
\p ―Le gusezrá nisa xesuꞌ xiaj caní.
\p Gulegué̱ꞌe̱ nisa na, ne bulusuzrate̱ꞌ tu tu xesuꞌ xiaj caꞌ.
\v 8 Nadxa Jesús guzre̱ꞌ benneꞌ caꞌ:
\p ―Le caꞌa na, naꞌa, ne le gua na lau benneꞌ ze̱ꞌ dxuꞌa ga dxelawe̱ꞌ.
\p Caꞌan belune̱ꞌ.
\v 9 Bénneaꞌ zue̱ꞌ dxuꞌa ga dxelawe̱ꞌ bxue̱ꞌ nisa naꞌ da bexaca na xrise uva wal-la, ne quebe nézene̱ꞌ ga za na. Benneꞌ we̱n zrin caꞌ zaj nézene̱ꞌ ga za na laweꞌ da gulegué̱ꞌe̱ nisa naꞌ. Nadxa bénneaꞌ zue̱ꞌ dxuꞌa ga dxelawe̱ꞌ gunné̱ꞌ benneꞌ wechaga naꞌ,
\v 10 naꞌ guzre̱ꞌ le̱ꞌ:
\p ―Xúgute̱ benneꞌ dxelebéaje̱ꞌ nedxu xrise uva wal-la nácadxa chaweꞌ, naꞌ gate ba guléꞌajle̱ꞌe̱ benneꞌ caꞌ zaj zre̱ꞌe̱ laní, nadxa dxelebéaje̱ꞌ xrise uva wal-la quebe zúateca chaweꞌ. Lueꞌ bcuézaquezuꞌ xrise uva wal-la chaweꞌ naꞌ, ne guléajuꞌ na naꞌa.
\p
\v 11 Da nigá da be̱n Jesús lu xe̱zre Caná da nababa Galilea naca na tu xel-laꞌ waca zrente̱ da be̱ne̱ꞌ nedxu, da bleꞌe na xel-laꞌ szren chee̱ꞌ, naꞌ benneꞌ caꞌ dxusé̱dene̱ꞌ guléajle̱ꞌe̱ chee̱ꞌ.
\p
\v 12 Gudé naꞌ Jesús bezé̱ꞌe̱ zexíaje̱ꞌ xe̱zre Capernaum, zéajle̱ xrne̱ꞌe̱ Le̱ꞌ nen benneꞌ biche̱ꞌ caꞌ, ne benneꞌ caꞌ dxusé̱dene̱ꞌ. Naꞌ gulezúe̱ꞌ naꞌ zaneꞌ zra.
\s Jesús dxucáꞌana chawe̱ꞌ chaleꞌaj xudauꞌ
\r (Mt. 21.12-13; Mr. 11.15-18; Lc. 19.45-46)
\p
\v 13 Naꞌ Jesús guxíaje̱ꞌ xe̱zre Jerusalén laweꞌ da ba za Laní Pascua gate benneꞌ judío caꞌ dxulusá lazre̱ꞌ ca be̱n Dios, bebéaje̱ꞌ xra xrtawe̱ꞌ caꞌ lu xe̱zr la xu Egipto.
\v 14 Lu xe̱zre Jerusalén bléꞌene̱ꞌ lu chaleꞌaj xudauꞌ naꞌ zaj zraꞌ benneꞌ dxelexutie̱ꞌ be̱zre caꞌ, ne zrilaꞌ caꞌ, ne bgúgudu caꞌ, béadu caꞌ dxelutie̱ꞌ lau Dios. Cáꞌanqueze bléꞌene̱ꞌ naꞌ benneꞌ dxuluxuché̱ꞌe̱ dumí chee̱ xe̱zr zituꞌ caꞌ.
\v 15 Gate bleꞌe Jesús da caní, naꞌ bguꞌe̱ du caꞌ da güe̱ꞌe̱ benneꞌ caꞌ, naꞌ bebéaje̱ꞌ ca naca benneꞌ caꞌ tu zrente̱ nen be̱zre chee̱ꞌ caꞌ, ne zrilaꞌ chee̱ꞌ caꞌ. Naꞌ gudxúꞌune̱ꞌ lu xula dumí chee̱ benneꞌ caꞌ dxuluxuché̱ꞌe̱ dumí, ne bdxixre̱ꞌ blagaꞌ caꞌ chee̱ benneꞌ caꞌ.
\v 16 Naꞌ guzre̱ꞌ benneꞌ caꞌ dxelexutie̱ꞌ bgúgudu caꞌ:
\p ―¡Le xebéaj da caní! Quebe gunle lizre Xraꞌ ca tu laweꞌ xiꞌa.
\p
\v 17 Nadxa benneꞌ caꞌ dxuse̱de Jesús xeajlesá lazre̱ꞌ da naxúaj na lu xiche chee̱ Dios, da dxenná na: Dxácate̱ ziꞌ lázrdawaꞌ laweꞌ da dxéꞌle̱ꞌa gunne xue chee̱ lizruꞌ.
\p
\v 18 Nadxa judío blau caꞌ buluche̱be̱ꞌ Jesús:
\p ―¿Bi xel-laꞌ waca da za xabáa guléꞌenuꞌ netuꞌ da guléꞌe na napuꞌ xel-laꞌ dxenná bea dxunuꞌ da caní?
\p
\v 19 Beche̱be Jesús:
\p ―Le guzría xiꞌ xudauꞌ nigá, naꞌ nedaꞌ, te chunna zra xechisaꞌ na.
\p
\v 20 Nadxa judío caꞌ gulé̱ꞌe̱ Le̱ꞌ:
\p ―Xrupe xun iza ba zeaj dxelune̱ꞌ xudauꞌ nigá, naꞌ Lueꞌ, ¿xechisuꞌ na chunna zraze?
\p
\v 21 Bchalaj Jesús chee̱ xudauꞌ naꞌ da naca na be̱l-laꞌ dxen chee̱ꞌ.
\v 22 Chee̱ le̱ naꞌ, gate bebán Jesús ládujla benneꞌ gate, naꞌ benneꞌ caꞌ bsé̱dene̱ꞌ xeajlesá lazre̱ꞌ ca da gunné̱ꞌ, naꞌ guléajle̱ꞌe̱ chee̱ da naxúaj na lu xiche chee̱ Dios ca naca chee̱ Jesús, ne chee̱ da guzre Jesús le̱ꞌ.
\s Jesús núnbeꞌe̱ xúgute̱ bénneache
\p
\v 23 Gate zua Jesús xe̱zre Jerusalén lu Laní Pascua chee̱ judío caꞌ, naꞌ benneꞌ zan guléajle̱ꞌe̱ chee̱ꞌ gate beleléꞌene̱ꞌ ca naca xel-laꞌ waca zren caꞌ da dxune̱ꞌ.
\v 24 Jesús quebe bde cuine̱ꞌ lu naꞌ benneꞌ caꞌ laweꞌ da nézquezne̱ꞌ quegá xúgute̱ benneꞌ caꞌ dxeléajle̱ꞌe̱ chee̱ꞌ.
\v 25 Quebe guchínene̱ꞌ nu benneꞌ xe̱ꞌe̱ Le̱ꞌ ca zaj naca bénneache laweꞌ da nézquezne̱ꞌ ca da zaj xuꞌu xichaj lázxdau bénneache.
\c 3
\s Jesús dxuchálajle̱ne̱ꞌ Nicodemo
\p
\v 1 Zua tu benneꞌ xudauꞌ fariseo le̱ꞌ Nicodemo. Naque̱ꞌ benneꞌ blau láwela benneꞌ judío caꞌ.
\v 2 Benneꞌ nigá guxíaje̱ꞌ xeajnné̱ꞌe̱ Jesús chizrela, naꞌ guzre̱ꞌ Le̱ꞌ:
\p ―Benneꞌ Wese̱de, nézentuꞌ Dios nasel-le̱ꞌ Lueꞌ chee̱ gusé̱denuꞌ netuꞌ laweꞌ da quebe nu benneꞌ gaca gune̱ꞌ ca zaj naca xel-laꞌ waca zrente̱ da dxunuꞌ Lueꞌ che quebe zúale̱ Dios le̱ꞌ.
\p
\v 3 Nadxa Jesús guzre̱ꞌ le̱ꞌ:
\p ―Da li dxapaꞌ lueꞌ, nu benneꞌ quebe gálaje̱ꞌ xecha lasa quebe gaca gaque̱ꞌ tuze benneꞌ caꞌ dxenná beꞌe Dios.
\p
\v 4 Nicodemo bche̱be̱ꞌ Jesús:
\p ―¿Ájazra gaca xexalaj tu benneꞌ ba naque̱ꞌ gula? ¿Waca xexuꞌe̱ le̱ꞌe xrne̱ꞌe̱ chee̱ gálaje̱ꞌ xetú?
\p
\v 5 Jesús beche̱be̱ꞌ:
\p ―Da li dxapaꞌ lueꞌ, nu benneꞌ quebe gálaje̱ꞌ ne̱ chee̱ nisa chee̱ xrtizraꞌ Dios, ne ne̱ chee̱ Beꞌ Láꞌazxa, quebe gaca chuꞌe̱ naga dxenná bea Dios.
\v 6 Benneꞌ nálaje̱ꞌ lu niꞌa lu naꞌ bénneache, naque̱ꞌ bénneacheze. Nu benneꞌ nálaje̱ꞌ ne̱ chee̱ Beꞌ Láꞌazxa, naca ban bénneaꞌ ne̱ chee̱ Beꞌ Láꞌazxa.
\v 7 Quebe xebánenuꞌ laweꞌ da dxapaꞌ lueꞌ, dxun na ba xen gálajuꞌ xecha lasa.
\v 8 Gátete̱ze dxaca beꞌ. Dxennuꞌ ca schaga da dxun na, naꞌ quebe nézenuꞌ gala za na, ne gala zeaj na. Cáꞌanqueze naca chee̱ benneꞌ zaj nálaje̱ꞌ ne̱ chee̱ Beꞌ Láꞌazxa. Gaca leꞌenuꞌ da ba nun Beꞌ naꞌ lu xichaj lázxdau bénneaꞌ, naꞌ quebe dxeléꞌenuꞌ ájala dxun Beꞌ naꞌ.
\p
\v 9 Nadxa Nicodemo bche̱be̱ꞌ Jesús:
\p ―¿Ájazra gaca da caní?
\p
\v 10 Beche̱be Jesús:
\p ―Lueꞌ nacuꞌ tu benneꞌ wesé̱de blau ládujla benneꞌ Israel caꞌ, naꞌ ¿quebe nézenuꞌ da caní?
\v 11 Da li dxapaꞌ lueꞌ, netuꞌ dxuchálajntuꞌ ca naca da nézentuꞌ, ne dxexeché̱bentuꞌ ca da bléꞌentuꞌ, naꞌ leꞌe quebe dxéajle̱le da dxe̱ntuꞌ leꞌe.
\v 12 Che quebe dxéajle̱le chiaꞌ gate dxuchálajle̱naꞌ leꞌe ca naca chee̱ da dxaca lu xe̱zr la xu nigá, ¿ájazra gaca chéajle̱le chiaꞌ che guchálajle̱naꞌ leꞌe chee̱ da dxaca xabáa?
\p
\v 13 ’Quebe ne cuen tu benneꞌ xabáa chee̱ léꞌene̱ꞌ ca dxaca naꞌ. Tuze Bénneaꞌ bétaje̱ꞌ xabáa, Bénneaꞌ nacaꞌ nedaꞌ, Benneꞌ Gulje̱ꞌ Bénneache, nacaꞌ Bénneaꞌ zúaqueze̱ꞌ xabáa.
\v 14 Ca be̱n Moisés, bde̱ꞌe̱ tu be̱laꞌ xia le̱ꞌe̱ xaga naga zua le̱ꞌe̱ xixreꞌ laweꞌ lataj, cáꞌanqueze nedaꞌ, Benneꞌ Gulje̱ꞌ Bénneache, wuludáꞌqueze̱ꞌ nedaꞌ tu le̱ꞌe̱ xaga,
\v 15 chee̱ quebe xelebía xiꞌ nu benneꞌ xeléajle̱ꞌe̱ chiaꞌ. Zruéꞌe bénneaꞌ xel-laꞌ nabán da zeajlí canna.
\s Dios dxezríꞌi lazre̱ꞌ bénneache
\p
\v 16 Dios dxezríꞌi lázrele̱ꞌe̱ne̱ꞌ bénneache, naꞌ chee̱ le̱ naꞌ bdee̱ꞌ Zríꞌine̱ꞌ tu lichaꞌ chee̱ quebe xelebía xiꞌ nu benneꞌ dxeléajle̱ꞌe̱ chee̱ꞌ. Zruéꞌe bénneaꞌ xel-laꞌ nabán da zeajlí canna.
\v 17 Dios gusél-le̱ꞌ Zríꞌine̱ꞌ lu xe̱zr la xu nigá, quegá chee̱ guzría xiꞌe̱ bénneache, san chee̱ guselé̱ꞌ bénneache.
\p
\v 18 Bénneaꞌ dxéajle̱ꞌe̱ chee̱ Zriꞌine Dios quebe naca chee̱ꞌ cuía xiꞌe̱, san nu benneꞌ quebe dxéajle̱ꞌe̱ chee̱ꞌ ba naca chee̱ꞌ cuía xiꞌe̱ laweꞌ da quebe dxéajle̱ꞌe̱ chee̱ Zriꞌine Dios, bi tu lichaꞌ chee̱ꞌ.
\v 19 Benneꞌ caꞌ quebe dxeléajle̱ꞌe̱ chee̱ꞌ ba zaj naca chee̱ꞌ cuía xiꞌe̱ laweꞌ da gate blaꞌ xel-laꞌ naxaníꞌ lu xe̱zr la xu nigá, beledánedxene̱ꞌ da chul-la ca xel-laꞌ naxaníꞌ, laweꞌ da dxelune̱ꞌ da cale̱la.
\v 20 Xúgute̱ benneꞌ dxelune̱ꞌ da cale̱la dxelecuídene̱ꞌ xel-laꞌ naxaníꞌ, ne quebe dxelebigue̱ꞌ lu xel-laꞌ naxaníꞌ, chee̱ quebe gaca bea da cale̱la da dxelune̱ꞌ.
\v 21 Benneꞌ caꞌ dxelune̱ꞌ ca naca da li dxelebigue̱ꞌ lu xel-laꞌ naxaníꞌ chee̱ gaca bea naca na chee̱ Dios da dxelune̱ꞌ.
\s Da gunná Juan, bénneaꞌ bchue̱ꞌ bénneache nisa
\p
\v 22 Gudé naꞌ guxíaj Jesús naga nababa Judea nen benneꞌ caꞌ dxusé̱dene̱ꞌ, naꞌ guzúe̱ꞌ naꞌ zaneꞌ zra nen benneꞌ caꞌ, dxuluchúe̱ꞌ bénneache nisa.
\v 23 Cáꞌanqueze zua Juan lu xe̱zr la xu chee̱ xe̱zre Enón da zua gáguze naga dxeꞌ xe̱zre Salím, dxuchúe̱ꞌ bénneache nisa lataj naꞌ laweꞌ da dé̱le̱ꞌe̱ naꞌ nisa zila, naꞌ belezrín benneꞌ zan naga zua Juan, naꞌ beledxúe̱ꞌ nisa.
\v 24 Da nigá guca na nédxudxa gate quebe ne xelegúꞌe̱ Juan lizre xia.
\p
\v 25 Nadxa bal-la benneꞌ zaj de̱ꞌe̱ Juan gulezú lawe̱ꞌ dxulutil-le̱ꞌ judío caꞌ dizraꞌ ca naca chee̱ da dxucáꞌana chawe na bénneache lau Dios.
\v 26 Nadxa xeajlegue̱zre̱ꞌ Juan:
\p ―Benneꞌ wese̱de, bénneaꞌ ble̱ꞌe̱ naga zuꞌ chaláꞌa xe̱gu Jordán naga dxalaj gubizra, bénneaꞌ bchálajle̱nuꞌ netuꞌ chee̱ꞌ, naꞌa dxuchúe̱ꞌ bénneache nisa, naꞌ xúgute̱ bénneache zjácale̱ne̱ꞌ Le̱ꞌ.
\p
\v 27 Nadxa Juan guzre̱ꞌ benneꞌ caꞌ:
\p ―Quegá nu benneꞌ gaca bi gape̱ꞌ che quebe gunezruj Dios na chee̱ꞌ.
\v 28 Leꞌe bénquezle gunníaꞌ nedaꞌ quebe nácaquezaꞌ nedaꞌ Cristo, Bénneaꞌ guche̱be lazreꞌ Dios sel-le̱ꞌ. Nacaꞌ tu benneꞌ nasel-la Dios chee̱ quia lawaꞌ lau Le̱ꞌ.
\v 29 Lu laní chee̱ wechaga naꞌ, bénneaꞌ siꞌe̱ nuꞌula wechaga naꞌ naque̱ꞌ benneꞌ wechaga naꞌ, naꞌ benneꞌ ljwezre benneꞌ wechaga naꞌ, bénneaꞌ zue̱ꞌ naꞌ, ne dxenne̱ꞌ chee̱ꞌ, dxebéle̱ꞌe̱ne̱ꞌ gate dxenne̱ꞌ da dxuchalaj benneꞌ wechaga naꞌ. Cáꞌanqueze nedaꞌ dxebéle̱ꞌe̱daꞌ laweꞌ da caní nacaꞌ ljwezre Cristo.
\v 30 Le̱ꞌ dxal-laꞌ gácadxe̱ꞌ szren, naꞌ nedaꞌ dxal-laꞌ gácadxaꞌ cáꞌaze.
\s Ca naca chee̱ Bénneaꞌ zaꞌ xabáa
\p
\v 31 Naꞌ gunná Juan:
\p ―Bénneaꞌ zaꞌ xabáa nácadxe̱ꞌ blau ca xúgute̱ bénneache. Benneꞌ naque̱ꞌ chee̱ xe̱zr la xu nigá naque̱ꞌ bénneacheze, ne dxuchálaje̱ꞌ ca naca chee̱ da dxaca lu xe̱zr la xu nigáze. Bénneaꞌ ze̱ꞌe̱ xabáa nácadxe̱ꞌ szren ca xúgute̱ bénneache.
\v 32 Le̱ꞌ dxuchálaje̱ꞌ ca naca chee̱ da ba bléꞌene̱ꞌ, ne da ba benne̱ꞌ xabaala, naꞌ quebe dxéajle̱ꞌ nu benneꞌ chee̱ da dxenné̱ꞌ.
\v 33 Che nu benneꞌ dxéajle̱ꞌe̱ chee̱ꞌ, benneꞌ nigá dxuléꞌene̱ꞌ naca li ca da dxenná Dios.
\v 34 Bénneaꞌ nasel-la Dios dxuchálaje̱ꞌ xrtizraꞌ Dios laweꞌ da dxunna Dios Le̱ꞌ Beꞌ Láꞌazxa chee̱ꞌ dute̱ ca naque̱ꞌ.
\v 35 Xradxu Dios nazríꞌine̱ꞌ Zríꞌinequeze̱ꞌ, ne ba bdee̱ꞌ lu ne̱ꞌe̱ xúgute̱ da de̱.
\v 36 Nu benneꞌ dxéajle̱ꞌe̱ chee̱ Zriꞌine Dios nape̱ꞌ xel-laꞌ nabán da zeajlí canna, naꞌ benneꞌ quebe dxuzúe̱ꞌ dizraꞌ chee̱ Zriꞌine Dios quebe gape̱ꞌ xel-laꞌ nabán caní. Wadée̱ꞌ lu da ba xaꞌ da gun Dios.
\c 4
\s Dxuchálajle̱ Jesús tu nuꞌula chee̱ tu xe̱zre nababa na Samaria
\p
\v 1 Benneꞌ fariseo caꞌ belenne̱ꞌ zjácale̱ benneꞌ zandxa Jesús ca benneꞌ zjácale̱ne̱ꞌ Juan, naꞌ dxuchúa Jesús benneꞌ zandxa nisa ca benneꞌ dxuchúa Juan nisa.
\v 2 Quebe dxuchúaqueze Jesús bénneache nisa. Benneꞌ caꞌ dxusé̱dene̱ꞌ dxuluchúe̱ꞌ bénneache nisa.
\v 3 Gate guque beꞌe Jesús da nigá, naꞌ bezé̱ꞌe̱ naga nababa Judea, xexíaje̱ꞌ naga nababa Galilea.
\p
\v 4 Ca xuꞌu Jesús neza, be̱n na ba xen tée̱ꞌ naga nababa Samaria.
\v 5 Caꞌan guca, bzrine̱ꞌ tu xe̱zre naga nababa Samaria nazí le na Sicar, da dxeꞌ gáguze naga zua xe̱zr la xu naꞌ bnezruj Jacob chee̱ zríꞌine̱ꞌ, bi le̱beꞌ José.
\v 6 Lu xe̱zr la xu naꞌ gudé̱n Jacob, zre sua Abraham, tu beaj situj. Ba dxeajxreque Jesús xuꞌe̱ neza, naꞌ gudxéꞌe̱ dxuꞌa beaj naꞌ. Naca na zran wagubizra.
\v 7-8 Benneꞌ caꞌ dxuse̱de Jesús xjaque̱ꞌ lu xe̱zre Sicar, xeajlegáꞌawe̱ꞌ da xelawe̱ꞌ. Dxácate̱ naꞌ bzrin tu nuꞌula Samaria dxuꞌa beaj naꞌ zeajxriꞌe̱ nisa, naꞌ Jesús guzre̱ꞌ le̱ꞌ:
\p ―Be̱nna nisa xíꞌajaꞌ.
\p
\v 9 Nadxa nuꞌula naꞌ beche̱be̱ꞌ:
\p ―¿Ájazra naca, lueꞌ, benneꞌ judío, dxenabuꞌ nedaꞌ nisa, nacaꞌ nuꞌula Samaria?
\p Caní gunné̱ꞌ laweꞌ da quebe zaj zraꞌ chaweꞌ benneꞌ judío caꞌ nen benneꞌ Samaria caꞌ.
\v 10 Nadxa beche̱be Jesús:
\p ―Chela nézenuꞌ da dxunna Dios, ne nuaꞌ dxenabe̱ꞌ lueꞌ nisa xíꞌaje̱ꞌ, lueꞌ nábenuꞌ nedaꞌ, naꞌ nedaꞌ gunnaꞌ lueꞌ nisa da gunna na lueꞌ xel-laꞌ nabán.
\p
\v 11 Naꞌ nuꞌula naꞌ guzre̱ꞌ Le̱ꞌ:
\p ―Benneꞌ, quebe bi nuxruꞌ cuéajuꞌ nisa, naꞌ beaj nigá nácale̱ꞌe̱ na situj. ¿Ájazra naꞌ gunuꞌ gunnuꞌ nedaꞌ nisa chee̱ xel-laꞌ nabán?
\v 12 Xra xrtáuntuꞌ, Jacob, be̱nne̱ꞌ netuꞌ beaj nigá, naga güéꞌequeze le̱ꞌ nisa, ne naga guléꞌajqueze zríꞌine̱ꞌ, ne be̱ xixreꞌ chee̱ꞌ. ¿Nácadxuꞌ szrendxa ca le̱ꞌ?
\p
\v 13 Jesús beche̱be̱ꞌ:
\p ―Xúgute̱ benneꞌ dxeléꞌaje̱ꞌ nisa chee̱ beaj nigá welexebílequezne̱ꞌ nisa.
\v 14 Nu benneꞌ xíꞌaje̱ꞌ nisa da gunézrujaꞌ nedaꞌ, québedxa bílene̱ꞌ na, laweꞌ da nisa naꞌ dxunézrujaꞌ nedaꞌ galaj na lu xichaj lázrdawe̱ꞌ ca tu beaj nisa da gunna na le̱ꞌ xel-laꞌ nabán da zeajlí canna.
\p
\v 15 Nadxa nuꞌula naꞌ guzre̱ꞌ Le̱ꞌ:
\p ―Benneꞌ, be̱nna nedaꞌ nisa naꞌ, chee̱ québedxa gun na ba xen xidaꞌ nigá xedajxríꞌa nisa.
\p
\v 16 Naꞌ Jesús guzre̱ꞌ nuꞌula naꞌ:
\p ―Guxíaj xeajnné̱ benneꞌ chiuꞌ, naꞌ xídale nigá.
\p
\v 17 Naꞌ beche̱be nuꞌula naꞌ:
\p ―Quebe nu chiláꞌ benneꞌ chiaꞌ.
\p Nadxa Jesús guzre̱ꞌ le̱ꞌ:
\p ―Da li dxennáuꞌ quebe nu chiláꞌ benneꞌ chiuꞌ,
\v 18 laweꞌ da ba guzúale̱nuꞌ gazxuꞌ benneꞌ, naꞌ bénneaꞌ zúale̱nuꞌ naꞌa quebe naque̱ꞌ benneꞌ chiuꞌ. Ca naca da nigá gunnáuꞌ da li.
\p
\v 19 Gate nuꞌulaꞌ benne̱ꞌ da nigá, naꞌ gunné̱ꞌ:
\p ―Xran, dxéquedaꞌ nacuꞌ lueꞌ benneꞌ dxuchalaje̱ꞌ waláz chee̱ Dios.
\v 20 Xra xrtáuntuꞌ caꞌ bulucáꞌana szrene̱ꞌ Dios lu xiꞌa nigá, naꞌ leꞌe, benneꞌ judío, dxennale dxun na ba xen gucáꞌana szrendxu Dios xe̱zre Jerusalén.
\p
\v 21 Naꞌ beche̱be Jesús:
\p ―Guxéajle̱ chiaꞌ, nuꞌula. Ba za zra gate leꞌe gucáꞌana szrenle Xradxu Dios, ne quebe gun na ba xen xídale lu xiꞌa nigá, ne quebe gun na ba xen chéajle Jerusalén.
\v 22 Leꞌe, benneꞌ Samaria, quebe núnbeale nuaꞌ dxucáꞌana szrenle. Netuꞌ núnbeantuꞌ Nuaꞌ dxucáꞌana szrentuꞌ, laweꞌ da zaꞌ benneꞌ weselá ládujla benneꞌ judío caꞌ.
\v 23 Wazrín zra, ne ba dxezrín zra naꞌ, gate benneꞌ caꞌ da li dxulucáꞌana szrene̱ꞌ Xradxu Dios, xelune̱ꞌ na ne̱ chee̱ Beꞌ Láꞌazxa, ne ne̱ chee̱ da li, laweꞌ da dxaca lazreꞌ Xradxu Dios xulucáꞌana szren bénneache Le̱ꞌ caní.
\v 24 Dios naque̱ꞌ Beꞌ, naꞌ benneꞌ dxulucáꞌana szrene̱ꞌ Le̱ꞌ, dxun na ba xen xulucáꞌana szrene̱ꞌ Le̱ꞌ ne̱ chee̱ Beꞌ Láꞌazxa, ne ne̱ chee̱ da li.
\p
\v 25 Naꞌ nuꞌula naꞌ guzre̱ꞌ Le̱ꞌ:
\p ―Nedaꞌ nezdaꞌ waláꞌ benneꞌ Mesías (da zéaje̱ na Cristo), naꞌ gate laꞌ Le̱ꞌ, naꞌ guzéajniꞌine̱ꞌ dxiꞌu ca naca xúgute̱.
\p
\v 26 Jesús guzre̱ꞌ le̱ꞌ:
\p ―Nedaꞌ nacaꞌ Bénneaꞌ, dxuchálajle̱naꞌ lueꞌ.
\p
\v 27 Ca gunné̱ꞌ caꞌ, naꞌ belexezrín benneꞌ caꞌ dxuse̱dene̱ꞌ, naꞌ belexebánene̱ꞌ laweꞌ da dxuchálajle̱ Jesús tu nuꞌula Netúe̱ꞌ quebe bexázrjene̱ꞌ guche̱be̱ꞌ Le̱ꞌ bi da dxaca lazre̱ꞌ, u bizra chee̱n dxuchálajle̱ne̱ꞌ nuꞌula naꞌ.
\v 28 Nadxa nuꞌula naꞌ bcaꞌane̱ꞌ dxeꞌe chee̱ꞌ dxuꞌa beaj naꞌ, naꞌ bezé̱ꞌe̱ zexíaje̱ꞌ xe̱zre naꞌ naga xeaje̱zre̱ꞌ benneꞌ caꞌ:
\p
\v 29 ―Le da léꞌele tu benneꞌ guzre̱ꞌ nedaꞌ xúgute̱ da ba be̱naꞌ. ¿Quegá benneꞌ nigá Cristo, Bénneaꞌ sel-la Dios?
\p
\v 30 Nadxa beledxúaj benneꞌ caꞌ xe̱zre naꞌ, zjaque̱ꞌ naga zua Jesús.
\v 31 Dxácate̱ naꞌ, benneꞌ caꞌ dxuse̱de Jesús gulataꞌ xuene̱ꞌ Le̱ꞌ, gulenné̱ꞌ:
\p ―Benneꞌ Wese̱de, gudagu lateꞌ.
\p
\v 32 Jesús guzre̱ꞌ benneꞌ caꞌ:
\p ―De̱ da dxawaꞌ, da quebe núnbeale leꞌe.
\p
\v 33 Nadxa benneꞌ caꞌ dxuse̱de Jesús gulezú lawe̱ꞌ dxuluche̱be ljwezre̱ꞌ, dxelenné̱ꞌ:
\p ―¿Núteca bedajgúꞌe̱ da gudawe̱ꞌ?
\p
\v 34 Jesús guzre̱ꞌ le̱ꞌ:
\p ―Xela wagu chiaꞌ naca na chee̱ gunaꞌ da dxaca lazreꞌ Xraꞌ, Bénneaꞌ nasel-le̱ꞌ nedaꞌ, ne chee̱ gusexuzraꞌ gunaꞌ zrin chee̱ꞌ.
\v 35 Leꞌe dxennale: “Xetapa beuꞌ xelápadxu.” Nedaꞌ dxapaꞌ leꞌe, le nnaꞌ bénneache zaj naque̱ꞌ ca tu lina, da bache naca na xelápadxu.
\v 36 Benneꞌ dxelape̱ꞌ dxeziꞌe̱ lazruj chee̱ꞌ, naꞌ da dxelape̱ꞌ naca na chee̱ xelapa bénneache xel-laꞌ nabán da zeajlí canna, chee̱ sua xel-laꞌ dxebé benneꞌ dxaza tu zren nen benneꞌ caꞌ dxelelape̱ꞌ.
\v 37 Da li naca ca da dxelenná bénneache: Tu benneꞌ dxaze̱ꞌ, naꞌ xetúe̱ꞌ dxelape̱ꞌ.
\v 38 Nedaꞌ gusel-laꞌ leꞌe xelápale naga quebe gúzale. Caꞌ naca na, benneꞌ xula belune̱ꞌ zrin gulaze̱ꞌ, naꞌ leꞌe dxezile ba neza zrin da belún benneꞌ caꞌ.
\p
\v 39 Benneꞌ zan, benneꞌ xe̱zre naꞌ naga nababa Samaria, guléajle̱ꞌe̱ chee̱ Jesús ne̱ chee̱ xrtizraꞌ nuꞌula naꞌ, gunné̱ꞌ: “Guzre̱ꞌ nedaꞌ xúgute̱ da ba be̱naꞌ.”
\v 40 Gate beleláꞌ benneꞌ Samaria caꞌ naga zua Jesús, naꞌ gulataꞌ xuene̱ꞌ Le̱ꞌ xegáꞌane̱ꞌ nen le̱ꞌ, naꞌ begáꞌane̱ꞌ naꞌ chupa zra.
\v 41 Benneꞌ zandxa guléajle̱ꞌe̱ chee̱ Jesús gate belenne̱ꞌ ca da dxenná Le̱ꞌ.
\v 42 Nadxa gulé̱ꞌe̱ nuꞌula naꞌ:
\p ―Naꞌa dxéajle̱ntuꞌ chee̱ꞌ quegá tuze ne̱ chee̱ da guzruꞌ lueꞌ netuꞌ, naꞌ cáꞌanqueze laweꞌ da bénquezentuꞌ netuꞌ chee̱ꞌ, naꞌ nézentuꞌ da li naque̱ꞌ Cristo, Bénneaꞌ guselé̱ꞌ ca naca bénneache.
\s Jesús dxexune̱ꞌ zriꞌine tu benneꞌ we̱n zrin blau chee̱ xuꞌu laweꞌ
\p
\v 43 Gudé chupa zra bezáꞌ Jesús xe̱zre caꞌ zaj nababa Samaria, naꞌ guzé̱ꞌe̱ zéaje̱ꞌ naga nababa Galilea.
\v 44 Guxíaje̱ꞌ naꞌ laweꞌ da gunnáqueze Jesús, gunné̱ꞌ: “Tu benneꞌ dxuchalaje̱ꞌ waláz chee̱ Dios, quebe dxelapa benneꞌ lazrie̱ꞌ le̱ꞌ ba láꞌana.”
\v 45 Gate bezrine̱ꞌ naga nababa Galilea, benneꞌ zaj zre̱ꞌe̱ naꞌ belezíꞌ lu ne̱ꞌe̱ Le̱ꞌ du lazre̱ꞌ, laweꞌ da xjácaqueze le̱ꞌ Laní Pascua da guca na Jerusalén, naꞌ beleléꞌene̱ꞌ xúgute̱ da be̱n Jesús lu laní naꞌ.
\p
\v 46 Nadxa bezrín Jesús xe̱zre Caná naga nababa Galilea naga be̱ne̱ꞌ bexaca nisa xrise uva wal-la. Zua lu xe̱zre Capernaum tu benneꞌ we̱n zrin blau chee̱ xuꞌu laweꞌ, zua tu zríꞌine̱ꞌ bi biu quebe chaweꞌ zúabeꞌ.
\v 47 Gate ben benneꞌ we̱n zrin blau nigá ba bezáꞌ Jesús naga nababa Judea, ne ba bezrine̱ꞌ naga nababa Galilea, naꞌ guxíaje̱ꞌ xeajnné̱ꞌe̱ Jesús, naꞌ gutáꞌ xuene̱ꞌ Le̱ꞌ chéaje̱ꞌ lizre̱ꞌ xexune̱ꞌ bi biu chee̱ꞌ, bi naꞌ ba zua gátebeꞌ.
\v 48 Nadxa Jesús guzre̱ꞌ le̱ꞌ:
\p ―Leꞌe quebe chéajle̱le chiaꞌ che quebe léꞌele xel-laꞌ waca chee̱ xabáa da dxuléꞌedaꞌ.
\p
\v 49 Benneꞌ we̱n zrin blau naꞌ gunné̱ꞌ:
\p ―Xran, gudázega naꞌa quebe ne gate zriꞌinaꞌ.
\p
\v 50 Nadxa guzre Jesús le̱ꞌ:
\p ―Bexíaj lizruꞌ. Naca ban bi chiuꞌ.
\p Benneꞌ we̱n zrin blau naꞌ guxéajle̱ꞌe̱ chee̱ da guzre Jesús lé̱ꞌ, naꞌ bezé̱ꞌe̱ zexíaje̱ꞌ.
\v 51 Gate ba zua xezrine̱ꞌ lizre̱ꞌ, naꞌ benneꞌ we̱n zrin chee̱ꞌ xeajlexezrígale̱ꞌ le̱ꞌ, naꞌ gulé̱ꞌe̱ le̱ꞌ:
\p ―Naca ban zriꞌinuꞌ.
\p
\v 52 Nadxa bche̱be̱ꞌ benneꞌ caꞌ bátala guzú lau bexácabeꞌ, naꞌ gulé̱ꞌe̱ le̱ꞌ:
\p ―Náꞌaqueze dxedé wagubizra bedxúaj da la da xuꞌubeꞌ.
\p
\v 53 Nadxa benneꞌ we̱n zrin blau naꞌ bexúnene̱ꞌ guca na laꞌ náꞌqueze gate guzre Jesús le̱ꞌ: “Naca ban zriꞌinuꞌ.” Caꞌan guca, le̱ꞌ, ne xúgute̱ benneꞌ zaj zraꞌ lizre̱ꞌ guléajle̱ꞌe̱ chee̱ Jesús.
\p
\v 54 Da nigá naca na xel-laꞌ waca zren da gudxupeꞌ da be̱n Jesús gate bezrine̱ꞌ naga nababa Galilea.
\c 5
\s Jesús dxexune̱ꞌ tu benneꞌ biu naga nazí le na Betesda
\p
\v 1 Ca gudé naꞌ guxúꞌu tu laní chee̱ judío caꞌ, naꞌ bezrín Jesús xe̱zre Jerusalén.
\v 2 Lu xe̱zre naꞌ, gáguze naga zua dxa xuꞌu chee̱ xe̱zre da nazí le na Dxa Xuꞌu Chee̱ Zrilaꞌ Caꞌ, dxeꞌ tu cueꞌla nisa nazí le na Betesda lu dizraꞌ hebreo, naꞌ dxuꞌa nisa naꞌ zaj nnita gazxuꞌ lachila.
\v 3 Lachila caꞌ zaj de̱ benneꞌ zan zaj xuꞌe̱ we̱ꞌ, benneꞌ la chul-la caꞌ, ne benneꞌ zaj zua zri niꞌa ne̱ꞌe̱, ne benneꞌ zrinnaj caꞌ. Dxelebeze̱ꞌ ca bixre nisa naꞌ.
\v 4 Caꞌan naca laweꞌ da dxetaj tu gubáz chee̱ xabáa bata gala, ne dxunibe̱ꞌ nisa naꞌ, naꞌ benneꞌ nedxu dxeajchuꞌe̱ lu nisa naꞌ ca dxedé dxunibe̱ꞌ na, dxexaque̱ꞌ chee̱ bítete̱ze xel-laꞌ we̱ꞌ xuꞌe̱.
\v 5 Zua tu benneꞌ naꞌ ba guca chinu chunne dxua iza xuꞌe̱ we̱ꞌ.
\v 6 Gate bleꞌe Jesús benneꞌ nigá, ne dxeque béꞌene̱ꞌ ba guca zaneꞌ iza xuꞌe̱ we̱ꞌ naꞌ, naꞌ bche̱be̱ꞌ le̱ꞌ:
\p ―¿Dxaca lazruꞌ xexacuꞌ?
\p
\v 7 Benneꞌ we̱ꞌ naꞌ beche̱be̱ꞌ:
\p ―Benneꞌ, quebe nu chiláꞌ benneꞌ cuꞌe̱ nedaꞌ lu nisa naꞌ ca dxedé dxebixre na. Tu tu lasa gate dxaca lazraꞌ chuꞌa, benneꞌ xula dxuꞌe̱ nédxudxa.
\p
\v 8 Jesús guzre̱ꞌ le̱ꞌ:
\p ―¡Guxasa! Becáꞌa daꞌa chiuꞌ, ne bexíaj.
\p
\v 9 Laꞌ náꞌqueze bexaca benneꞌ we̱ꞌ naꞌ, naꞌ bequé̱ꞌe̱ daꞌa chee̱ꞌ, ne guzú lawe̱ꞌ dxedé̱ꞌ. Zra naꞌ naca zra dxulupáꞌana judío caꞌ,
\v 10 naꞌ benneꞌ judío caꞌ gulé̱ꞌe̱ bénneaꞌ bexaque̱ꞌ:
\p ―Naꞌa naca na zra dxupáꞌanadxu. Quebe naca na guꞌu daꞌa chiuꞌ.
\p
\v 11 Naꞌ benneꞌ naꞌ beche̱be̱ꞌ:
\p ―Bénneaꞌ bexune̱ꞌ nedaꞌ guzre̱ꞌ nedaꞌ: “Becáꞌa daꞌa chiuꞌ, ne bexíaj.”
\p
\v 12 Nadxa buluche̱be̱ꞌ le̱ꞌ:
\p ―¿Nuzra naꞌ guzre̱ꞌ lueꞌ: Becáꞌa daꞌa chiuꞌ, ne bexiaj?
\p
\v 13 Benneꞌ naꞌ quebe nézene̱ꞌ nu bénneaꞌ bexune̱ꞌ le̱ꞌ laweꞌ da ba zexíaj Jesús láwela benneꞌ zan caꞌ zaj zre̱ꞌe̱ naꞌ.
\v 14 Ca gudé naꞌ Jesús bezrague̱ꞌ bénneaꞌ, dxedé̱ꞌ chaleꞌaj xudauꞌ, naꞌ guzre̱ꞌ le̱ꞌ:
\p ―¡Gunnáꞌxque! Ba bexacuꞌ naꞌa. Québedxa gunuꞌ dul-la, chee̱ quebe bi sacuꞌ xetú da wál-ladxa.
\p
\v 15 Nadxa benneꞌ naꞌ bezé̱ꞌe̱ zexíaje̱ꞌ, naꞌ bzenne̱ꞌ judío caꞌ bexún Jesús le̱ꞌ.
\v 16 Chee̱ le̱ naꞌ benneꞌ judío caꞌ guláu ziꞌ xuzre̱ꞌ Jesús, ne gulaca lazre̱ꞌ xelútie̱ꞌ Le̱ꞌ laweꞌ da dxune̱ꞌ da caní lu zra dxulupáꞌane̱ꞌ.
\v 17 Jesús guzre̱ꞌ benneꞌ caꞌ:
\p ―Dios, Xraꞌ, tu dxúnzqueze̱ꞌ zrin, naꞌ nedaꞌ dxunaꞌ zrin.
\p
\v 18 Chee̱ le̱ naꞌ benneꞌ judío caꞌ gulaca lázredxe̱ꞌ xelútie̱ꞌ Jesús laweꞌ da quegá tuze dxuzúe̱ꞌ chaláꞌala da nadxixruj bea na chee̱ zra dxulupáꞌane̱ꞌ, naꞌ cáꞌanqueze dxun cuine̱ꞌ ca Dios gate gunné̱ꞌ Dios nácaqueze̱ꞌ Xre̱ꞌ.
\s Xel-laꞌ dxenná bea da napa Zriꞌine Dios
\p
\v 19 Nadxa Jesús guzre̱ꞌ benneꞌ judío caꞌ:
\p ―Da li dxapaꞌ leꞌe, nedaꞌ, Zriꞌine Dios, quebe gaca bi gunaꞌ cheé̱zquezaꞌ. Tuze dxunaꞌ da dxeléꞌedaꞌ dxun Xraꞌ. Xúgute̱ da dxun Xraꞌ, cáꞌanqueze dxunaꞌ nedaꞌ, Zríꞌine̱ꞌ.
\v 20 Dios, Xraꞌ, nazríꞌine̱ꞌ nedaꞌ, Zríꞌine̱ꞌ, ne dxuléꞌene̱ꞌ nedaꞌ xúgute̱ da dxúnqueze̱ꞌ Le̱ꞌ, naꞌ guléꞌene̱ꞌ nedaꞌ da zaj nácadxa szren ca da caꞌ dxunaꞌ, naꞌ xebánequezle leꞌe ca xelaca na.
\v 21 Ca dxun Xradxu Dios, dxusebane̱ꞌ benneꞌ gate, ne dxuxunézruje̱ꞌ xel-laꞌ nabán chee̱ꞌ, cáꞌanqueze nedaꞌ, Zríꞌine̱ꞌ, dxuxunézrujaꞌ xel-laꞌ nabán chee̱ benneꞌ caꞌ dxaca lazraꞌ xunézrujaꞌ na.
\v 22 Xradxu Dios quebe dxuchiꞌe̱ nu benneꞌ, san ba be̱nne̱ꞌ nedaꞌ, Zríꞌine̱ꞌ, xel-laꞌ dxenná bea guchiꞌa da dxelún tu tu bénneache,
\v 23 chee̱ xelapa xúgute̱ benneꞌ nedaꞌ, Zríꞌine̱ꞌ, ba láꞌana, cáte̱ze naꞌ dxelape̱ꞌ ba láꞌana Dios, Xraꞌ. Nu benneꞌ quebe dxape̱ꞌ ba láꞌana nedaꞌ, Zríꞌine̱ꞌ, cáꞌanqueze quebe dxape̱ꞌ ba láꞌana Xradxu Dios nasel-le̱ꞌ nedaꞌ.
\p
\v 24 ’Da li dxapaꞌ leꞌe, benneꞌ dxenne̱ꞌ da dxennéaꞌ nedaꞌ, ne dxéajle̱ꞌe̱ chee̱ Dios nasel-le̱ꞌ nedaꞌ, benneꞌ nigá nape̱ꞌ xel-laꞌ nabán da zeajlí canna, naꞌ quebe cuía xiꞌe̱ laweꞌ da ba bedxúaje̱ꞌ lu naꞌ xel-laꞌ gute, ne ba zue̱ꞌ lu xel-laꞌ nabán.
\v 25 Da li dxapaꞌ leꞌe, wazrín zra, ne ba dxezrín zra naꞌ gate benneꞌ gate caꞌ xelenne̱ꞌ chiꞌa nedaꞌ, Zriꞌine Dios, naꞌ benneꞌ xuluzúa xrtizraꞌ welaca bánqueze̱ꞌ.
\v 26 Xráquezaꞌ nape̱ꞌ xel-laꞌ dxenná bea xunézruje̱ꞌ xel-laꞌ nabán da naca na li lazreꞌ chee̱ bénneache, ne cáꞌanqueze ba be̱nne̱ꞌ nedaꞌ, Zríꞌine̱ꞌ, xel-laꞌ dxenná bea xunézrujaꞌ bénneache xel-laꞌ nabán caní,
\v 27 ne ba be̱nne̱ꞌ nedaꞌ xel-laꞌ dxenná bea guchiꞌa chee̱ bénneache laweꞌ da nacaꞌ Benneꞌ Gulje̱ꞌ Bénneache.
\v 28 Quebe xebánele chee̱ da nigá laweꞌ da zrin zra gate xúgute̱ benneꞌ gate xelenne̱ꞌ chiꞌa
\v 29 xelexedxúaje̱ꞌ lu xe̱dxu ba. Benneꞌ caꞌ belune̱ꞌ da xrlátaje xelexebane̱ꞌ chee̱ xelape̱ꞌ xel-laꞌ nabán da zeajlí canna. Benneꞌ caꞌ belune̱ꞌ da cale̱la xelexebane̱ꞌ chee̱ xelebía xiꞌe̱.
\s Da dxelunna bea na napa Jesús xel-laꞌ dxenná bea
\p
\v 30 Naꞌ gunná Jesús:
\p ―Nedaꞌ quebe bi gaca gunaꞌ cheé̱zquezaꞌ. Nedaꞌ dxuchiꞌa chee̱ bénneache ca gunná bea Dios, Xraꞌ, nedaꞌ, naꞌ ca dxuchiꞌa naca na xrlátaje laweꞌ da quebe dxunaꞌ ca da dxaca lázrequezaꞌ nedaꞌ. Dxunaꞌ ca da dxaca lazreꞌ Xraꞌ, nasel-le̱ꞌ nedaꞌ.
\v 31 Che nedaꞌ dxexeche̱baꞌ da nácaze cheé̱quezaꞌ, da dxennéaꞌ quebe naca na da dxunna bea na.
\v 32 Zua tu benneꞌ xula dxexeche̱be̱ꞌ da nácaqueze chiaꞌ, naꞌ da dxenné̱ꞌ naca na da dxunna bea na.
\v 33 Leꞌe gusél-lale benneꞌ xeajleche̱be̱ꞌ Juan, naꞌ ca da beche̱be̱ꞌ naca na da li.
\v 34 Da dxunna bea na da dxuxrén lazraꞌ nedaꞌ quebe naca na chee̱ bénneacheze. Dxapaꞌ leꞌe da nigá chee̱ lale leꞌe.
\v 35 Juan naꞌ guque̱ꞌ ca tu xiꞌ da gula na, ne bsení na, naꞌ leꞌe bezaca ba lázrele lu xiꞌ naꞌ tu chíꞌidauꞌ.
\v 36 Zua tu da dxunna bea na chiaꞌ nedaꞌ, da nácadxa szren ca da bchalaj Juan. Da caꞌ dxunaꞌ nedaꞌ, da bsebaga Xraꞌ nedaꞌ dxunaꞌ. Da caní dxelunna bea na da li Dios, Xraꞌ, gusél-le̱ꞌ nedaꞌ.
\v 37 Cáꞌanqueze Xraꞌ nasel-le̱ꞌ nedaꞌ dxexeche̱be̱ꞌ chiaꞌ. Lácala ba bchalaj Le̱ꞌ, leꞌe quebe ne xénele chiꞌe̱, ne quebe ne léꞌele Le̱ꞌ,
\v 38 ne quebe nuzúale dizraꞌ chee̱ꞌ xichaj lázrdaule laweꞌ da quebe dxéajle̱le chiaꞌ nedaꞌ, nasel-la Xraꞌ nedaꞌ.
\v 39 Leꞌe dxusé̱dele du lázrele da naxúaj na lu xiche chee̱ Dios laweꞌ da dxéquele xezrélele xel-laꞌ nabán da zeajlí canna lu xiche naꞌ, naꞌ da naxúaj na lu xiche chee̱ Dios dxuchalaj na ca naca chiaꞌ nedaꞌ.
\v 40 Leꞌe quebe dxaca lázrele xídale naga zuaꞌ nedaꞌ chee̱ gápale xel-laꞌ nabán naꞌ.
\p
\v 41 ’Nedaꞌ quebe dxeziꞌa xel-laꞌ ba láꞌana ca da dxelunna bénneache, da quebe naca na li lazreꞌ.
\v 42 Nedaꞌ núnbeꞌa leꞌe, ne nezdaꞌ quebe nazríꞌile Dios.
\v 43 Blaꞌa nedaꞌ waláz chee̱ Dios, Xraꞌ, naꞌ leꞌe quebe dxezíꞌ lu naꞌle nedaꞌ. Che zaꞌ tu benneꞌ lu da naca cheé̱zqueze̱ꞌ, benneꞌ naꞌ wazíꞌ lu naꞌle.
\v 44 ¿Ájazra gaca chéajle̱le leꞌe chiaꞌ che dxunle zrin chee̱ xelapa ljwézrele leꞌe ba láꞌana, ne quebe dxue lázrele sile xel-laꞌ ba láꞌana da dxunna Dios tu lichaꞌ?
\v 45 Quebe guéquele nédaꞌquezaꞌ gusebagaꞌ leꞌe zria lau Dios, Xraꞌ. Da gusebaga leꞌe zria naca na da ba gunná Moisésqueze, da naꞌ dxuxrén lázrele guselá na leꞌe.
\v 46 Che da li guxéajle̱le leꞌe chee̱ da gunná Moisés, cáꞌanqueze chéajle̱le chiaꞌ nedaꞌ laweꞌ da bzuaj Moisés ca naca chiaꞌ nedaꞌ.
\v 47 Naꞌa, che quebe dxéajle̱le chee̱ da bzuaj le̱ꞌ, ¿ájazra gaca chéajle̱le chee̱ da dxapaꞌ leꞌe?
\c 6
\s Jesús dxugawe̱ꞌ chi xun gaxúa benneꞌ biu
\r (Mt. 14.13-21; Mr. 6.30-44; Lc. 9.10-17)
\p
\v 1 Ca gudé naꞌ guxíaj Jesús xecha laꞌa dxuꞌa nísadauꞌ chee̱ Galilea, da nazíqueze le na nísadauꞌ chee̱ Tiberias.
\v 2 Benneꞌ zante̱ zjácale̱ne̱ꞌ Jesús laweꞌ da ba beleléꞌene̱ꞌ xel-laꞌ waca zren caꞌ da dxun Le̱ꞌ, dxexune̱ꞌ benneꞌ we̱ꞌ caꞌ.
\v 3 Nadxa Jesús guluéne̱ꞌ tu lu xiꞌa, naꞌ gudxéꞌe̱ naꞌ nen benneꞌ caꞌ dxusé̱dene̱ꞌ.
\v 4 Ba zua gagu Laní Pascua chee̱ judío caꞌ.
\v 5 Gate bleꞌe Jesús benneꞌ zan caꞌ záꞌaque̱ꞌ zeaj nawe̱ꞌ Le̱ꞌ, naꞌ guzre̱ꞌ Felipe:
\p ―¿Gazra cheajxridxu da xelagu benneꞌ zan caní?
\p
\v 6 Gunná caní Jesús chee̱ laꞌ bi nna Felipe, laweꞌ da ba neze Jesús ca da gune̱ꞌ.
\v 7 Nadxa beche̱be Felipe:
\p ―Che sidxu xeta xtila lazruj da sidxu chee̱ chupa gaxúa zra, quebe gueque na xelezíꞌ benneꞌ caní lateꞌ weaj.
\p
\v 8 Nadxa Andrés, xetú benneꞌ caꞌ dxuse̱de Jesús, ne naque̱ꞌ bi biche Simón Pedro, guzre̱ꞌ Jesús:
\p
\v 9 ―Ze̱ tu bi cuideꞌ nigá nápabeꞌ gazxuꞌ xeta xtila zruaꞌ cebada, ne chupa bela. ¿Ájazra gun da nigá gueque na chee̱ xúgute̱ benneꞌ caní?
\p
\v 10 Nadxa gunná Jesús:
\p ―Le xe̱ xúgute̱ꞌ xelebéꞌe̱.
\p Naca lu daca lataj naꞌ, naꞌ gulebéꞌ ca du chi xun gaxúa benneꞌ biu.
\v 11 Nadxa gucáꞌa Jesús xeta xtila caꞌ, naꞌ ca gudé guzre̱ꞌ Dios “Xcalenuꞌ”, bnézruje̱ꞌ na benneꞌ caꞌ dxusé̱dene̱ꞌ, naꞌ benneꞌ caní gulísie̱ꞌ na láwele benneꞌ zan caꞌ zaj dxeꞌe̱ naꞌ. Cáꞌanqueze be̱n Jesús chee̱ bela caꞌ, naꞌ bnézruje̱ꞌ ca da gulaca lazreꞌ benneꞌ caꞌ.
\v 12 Gate gulélaje benneꞌ caꞌ, naꞌ Jesús guzre̱ꞌ benneꞌ caꞌ dxusé̱dene̱ꞌ:
\p ―Le xutupa da bízrujdu caꞌ da dxelexegáꞌana na, chee̱ quebe bi gaca dítaje.
\p
\v 13 Belexequé̱ꞌe̱ na, naꞌ buluzré̱ꞌe̱ chazrinnu xcuite da bizruj caꞌ zaj nagáꞌana na chee̱ da gazxuꞌ xeta xtila zruaꞌ cebada caꞌ.
\v 14 Nadxa benneꞌ zan caꞌ, gate beleléꞌene̱ꞌ xel-laꞌ waca zren nigá da be̱n Jesús, gulenné̱ꞌ:
\p ―Da li benneꞌ nigá naque̱ꞌ bénneaꞌ guchálaje̱ꞌ waláz chee̱ Dios, bénneaꞌ dxal-laꞌ le̱ꞌe̱.
\p
\v 15 Guque béꞌene̱ꞌ Jesús dxelaca lazre̱ꞌ xeleché̱ꞌe̱ Le̱ꞌ xadía chee̱ xuluzúe̱ꞌ Le̱ꞌ ca benneꞌ wenná bea, naꞌ bezé̱ꞌe̱ naꞌ, ne begüéne̱ꞌ lu xiꞌa sibe naꞌ chee̱ sue̱ꞌ le̱ze̱ꞌ.
\s Jesús dxedé̱ꞌ laweꞌ nísadauꞌ
\r (Mt. 14.22-27; Mr. 6.45-52)
\p
\v 16 Gate ba za xrinne, benneꞌ caꞌ dxuse̱de Jesús belétaje̱ꞌ dxuꞌa nísadauꞌ,
\v 17 naꞌ guluꞌe̱ lu da dxedá laweꞌ nísadauꞌ, ne gulezú lawe̱ꞌ zjaque̱ꞌ xeledée̱ꞌ xechaláꞌa nísadauꞌ chee̱ xelezrine̱ꞌ xe̱zre Capernaum. Ca guxrinne, quebe ne xezrín Jesús naꞌ.
\v 18 Nadxa guzú lau dxaca tu beꞌ bdunuꞌ laweꞌ nísadauꞌ naꞌ, naꞌ xeajxruza chee̱ nísadauꞌ naꞌ guxásale̱ꞌe̱ na.
\v 19 Gate ba guledée̱ꞌ lu nísadauꞌ naꞌ catite sadxu tu chiꞌi zren, naꞌ beleléꞌene̱ꞌ Jesús ba dxezrine̱ꞌ naga ziaj da dxedá laweꞌ nísadauꞌ, dxezé̱ꞌe̱ laweꞌ nísadauꞌ, naꞌ belezrebe̱ꞌ.
\v 20 Nadxa Jesús guzre̱ꞌ benneꞌ caꞌ:
\p ―Nedaꞌ naꞌ. Quebe zrébele.
\p
\v 21 Nadxa lu dute̱ xel-laꞌ dxelebé gulezíꞌ lu ne̱ꞌe̱ Le̱ꞌ lu da dxedá laweꞌ nísadauꞌ naꞌ, naꞌ chadite̱ belezrine̱ꞌ lu xe̱zr la xu naga zjaque̱ꞌ.
\s Benneꞌ zan caꞌ dxelexílaje̱ꞌ Jesús
\p
\v 22 Zra xula benneꞌ zan caꞌ, benneꞌ belexegáꞌana xecha laꞌa nísadauꞌ, guleque béꞌene̱ꞌ ba zeajxaca benneꞌ caꞌ dxuse̱de Jesús lu da dxedá laweꞌ nísadauꞌ tu lichaꞌ da dxeꞌ chaláꞌa naꞌ, naꞌ Jesús quebe guxíajle̱ne̱ꞌ benneꞌ caꞌ.
\v 23 Dxácate̱ naꞌ xezícala da dxeledá laweꞌ nísadauꞌ, da caꞌ beledxúaj na xe̱zre Tiberias, belezrín na tu lataj da zua gáguze naga gulawe̱ꞌ xeta xtila naꞌ ca gudé guzre Xránadxu Dios: “Xcalenuꞌ.”
\v 24 Chee̱ le̱ naꞌ gate benneꞌ zan caꞌ guleque béꞌene̱ꞌ québedxa zua Jesús naꞌ, ne cáꞌanqueze benneꞌ caꞌ dxusé̱dene̱ꞌ, naꞌ guluꞌe̱ lu da dxeledá laweꞌ nísadauꞌ, ne xjaque̱ꞌ xe̱zre Capernaum zeajlexedílaje̱ꞌ Jesús.
\s Jesús naque̱ꞌ xeta xtila da dxunna na xel-laꞌ nabán li lazreꞌ
\p
\v 25 Gate benneꞌ zan caꞌ belezrine̱ꞌ xecha laꞌa dxuꞌa nísadauꞌ, naꞌ belexezrague̱ꞌ Jesús, ne buluche̱be̱ꞌ Le̱ꞌ:
\p ―Benneꞌ Wese̱de, ¿bata blaꞌu nigá?
\p
\v 26 Jesús guzre̱ꞌ benneꞌ caꞌ:
\p ―Da li dxapaꞌ leꞌe, dxexílajle leꞌe nedaꞌ laweꞌ da gudágule, ne béljele, ne quegá laweꞌ da bleꞌele xel-laꞌ waca caꞌ da bleꞌedaꞌ leꞌe.
\v 27 Quebe cueꞌle gunne xue sile da gágule da te chee̱ na. Le cueꞌ gunne xue sile da gágule da zeajlí canna, da naꞌ gunna na leꞌe xel-laꞌ nabán da zeajlí canna. Da nigá naca na xel-laꞌ wagu da gunnaꞌ nedaꞌ, Benneꞌ Gulje̱ꞌ Bénneache, leꞌe, laweꞌ da bzua Xraꞌ Dios nen nedaꞌ da dxunna bea na nacaꞌ Zríꞌine̱ꞌ.
\p
\v 28 Nadxa buluche̱be̱ꞌ Le̱ꞌ:
\p ―¿Bi dxal-laꞌ guntuꞌ chee̱ gaca ca da dxaca lazreꞌ Dios guntuꞌ?
\p
\v 29 Jesús beche̱be̱ꞌ:
\p ―Da dxaca lazreꞌ Dios gunle naca na chéajle̱le chiaꞌ nedaꞌ, nacaꞌ Bénneaꞌ gusel-la Dios.
\p
\v 30 Nadxa buluche̱be̱ꞌ Le̱ꞌ:
\p ―¿Bizra xel-laꞌ waca gunuꞌ chee̱ leꞌentuꞌ na, naꞌ chéajle̱ntu chiuꞌ? ¿Bizra dxunuꞌ?
\v 31 Xra xrtauntuꞌ caꞌ gulawe̱ꞌ xeta maná le̱ꞌe̱ xixreꞌ laweꞌ lataj, ca naxúaj na lu xiche chee̱ Dios, dxenná na: Dios bgawe̱ꞌ benneꞌ caꞌ xeta xtila da za xabáa.
\p
\v 32 Beche̱be Jesús:
\p ―Da li dxapaꞌ leꞌe, quegá Moisés naꞌ bnézruje̱ꞌ benneꞌ caꞌ xeta xtila da za xabáa. Dios, Xraꞌ, dxunne̱ꞌ leꞌe xeta xtila da za xabáa da naca na li lazreꞌ.
\v 33 Xeta xtila naꞌ da dxunna Dios leꞌe naca na Bénneaꞌ bétaje̱ꞌ xabáa, ne dxunézruje̱ꞌ chee̱ bénneache xel-laꞌ nabán li lazreꞌ.
\p
\v 34 Nadxa benneꞌ caꞌ gulé̱ꞌe̱ Le̱ꞌ:
\p ―Xran, tu bé̱nnazqueze chee̱ntuꞌ xeta xtila caní.
\p
\v 35 Jesús guzre̱ꞌ benneꞌ caꞌ:
\p ―Nedaꞌ nacaꞌ xeta xtila da dxunna na xel-laꞌ nabán li lazreꞌ. Benneꞌ xide̱ꞌ naga zuaꞌ nedaꞌ cabátadxa tune̱ꞌ, naꞌ benneꞌ chéajle̱ꞌe̱ chiaꞌ cabátadxa bílene̱ꞌ.
\v 36 Naca na ca ba guchaꞌ leꞌe. Leꞌe naꞌ quebe dxéajle̱le chiaꞌ, lácala ba bleꞌele nedaꞌ.
\v 37 Xúgute̱ benneꞌ caꞌ dxunna Xraꞌ nedaꞌ, xelelé̱ꞌe̱ lawaꞌ, naꞌ benneꞌ caꞌ xelelé̱ꞌe̱ naga zuaꞌ, quebe guzúaꞌ benneꞌ caꞌ chaláꞌala.
\v 38 Nedaꞌ guzáꞌa xabáa, quegá chee̱ gunaꞌ ca dxaca lázrequezaꞌ nedaꞌ. Blaꞌa chee̱ gunaꞌ ca da dxaca lazreꞌ Xraꞌ, gusel-le̱ꞌ nedaꞌ.
\v 39 Da dxaca lazreꞌ Xraꞌ, nasel-le̱ꞌ nedaꞌ, naca na chee̱ quebe gunitiaꞌ netú benneꞌ caꞌ ba be̱nne̱ꞌ chiaꞌ. Nacan chee̱ gusebanaꞌ benneꞌ caꞌ lu zra bze̱be.
\v 40 Da dxaca lazreꞌ Xraꞌ, nasel-le̱ꞌ nedaꞌ, naca na chee̱ xelapa bénneache xel-laꞌ nabán da zeajlí canna, xúgute̱ benneꞌ caꞌ xelenné̱ꞌe̱ nedaꞌ, Zriꞌine Dios, ne xeléajle̱ꞌe̱ chiaꞌ nedaꞌ, naꞌ chee̱ gusebanaꞌ nedaꞌ benneꞌ caꞌ lu zra bze̱be naꞌ.
\p
\v 41 Gate belenne̱ꞌ da nigá, naꞌ judío caꞌ gulezú lawe̱ꞌ dxelezí tizre̱ꞌ Jesús laweꞌ da gunné̱ꞌ: “Nedaꞌ nacaꞌ xeta xtila da betaj xabáa.”
\v 42 Nadxa gulenné̱ꞌ:
\p ―¿Quegá benneꞌ nigá zriꞌine José? Dxiꞌu núnbeadxu xra xrne̱ꞌe̱. ¿Bizr chee̱ naꞌ dxenné̱ꞌ bétaje̱ꞌ xabáa?
\p
\v 43 Nadxa Jesús guzre̱ꞌ benneꞌ caꞌ:
\p ―Québedxa si tízrale.
\v 44 Quebe nu benneꞌ gaca xide̱ꞌ naga zuaꞌ nedaꞌ, che quebe xedajgúa Xraꞌ nasel-le̱ꞌ nedaꞌ bénneaꞌ, naꞌ nedaꞌ gusebanaꞌ bénneaꞌ lu zra bze̱be naꞌ.
\v 45 Lu xiche caꞌ naga naxúaj da gulenná benneꞌ caꞌ buluchalaje̱ꞌ waláz chee̱ Dios, dxenná na: Dios gusé̱dene̱ꞌ xúgute̱ bénneache. Caꞌ gaca na, xúgute̱ benneꞌ caꞌ dxuluzé̱ nague̱ꞌ ca da dxuse̱de Xraꞌ, dxelelé̱ꞌe̱ naga zuaꞌ.
\p
\v 46 ’Quebe ne leꞌe nu benneꞌ Xraꞌ. Benneꞌ tu lichaꞌ, bénneaꞌ bléꞌene̱ꞌ Le̱ꞌ, naca bénneaꞌ guzé̱ꞌe̱ naga zua Dios.
\v 47 Da li dxapaꞌ leꞌe, nu benneꞌ dxéajle̱ꞌe̱ chiaꞌ nedaꞌ nape̱ꞌ xel-laꞌ nabán da zeajlí canna.
\v 48 Nedaꞌ nacaꞌ xeta xtila da dxunna na xel-laꞌ nabán li lazreꞌ.
\v 49 Xra xrtáule caꞌ gulawe̱ꞌ xeta maná le̱ꞌe̱ xixreꞌ laweꞌ lataj, naꞌ gudé naꞌ xúgute̱ benneꞌ caꞌ gulatie̱ꞌ.
\v 50 Xeta xtila nigá naca na da za xabáa, naꞌ che nu benneꞌ gawe̱ꞌ na, quebe gatie̱ꞌ tu chiꞌize.
\v 51 Nédaꞌquezaꞌ nacaꞌ xeta xtila da dxunna na xel-laꞌ nabán da za xabáa. Benneꞌ gawe̱ꞌ xeta xtila nigá waca bánqueze̱ꞌ chadía chacanna. Xeta xtila naꞌ da dxunnaꞌ nedaꞌ naca na be̱laꞌ dxen cheé̱zquezaꞌ, da gunnaꞌ chee̱ xelaca bánqueze bénneache.
\p
\v 52 Nadxa benneꞌ judío caꞌ gulezú lawe̱ꞌ dxuluche̱be ljwezre̱ꞌ, dxelenné̱ꞌ:
\p ―¿Ájazra gun benneꞌ nigá, gunne̱ꞌ dxiꞌu be̱laꞌ dxen cheé̱zqueze̱ꞌ chee̱ gágudxu na?
\p
\v 53 Jesús guzre̱ꞌ benneꞌ caꞌ:
\p ―Da li dxapaꞌ leꞌe, che leꞌe quebe gágule be̱laꞌ dxen chiaꞌ nedaꞌ, Benneꞌ Gulje̱ꞌ Bénneache, ne che quebe xíꞌajle dxen chiaꞌ, quebe gápale xel-laꞌ nabán li lazreꞌ.
\v 54 Benneꞌ dxawe̱ꞌ be̱laꞌ dxen chiaꞌ, ne dxíꞌaje̱ꞌ dxen chiaꞌ nape̱ꞌ xel-laꞌ nabán da zeajlí canna, naꞌ nedaꞌ gusebanaꞌ bénneaꞌ lu zra bze̱be naꞌ.
\v 55 Be̱laꞌ dxen chiaꞌ naca na xel-laꞌ wagu li lazreꞌ chee̱ bénneꞌdu xuꞌule, naꞌ dxen chiaꞌ naca na da xeleꞌaj bénneache da naca na li lazreꞌ.
\v 56 Benneꞌ dxawe̱ꞌ be̱laꞌ dxen chiaꞌ, ne dxíꞌaje̱ꞌ dxen chiaꞌ, naque̱ꞌ nedaꞌ tuze, naꞌ nédaꞌquezaꞌ nacaꞌ bénneaꞌ tuze.
\v 57 Xraꞌ nasel-le̱ꞌ nedaꞌ xuꞌu lu ne̱ꞌe̱ xel-laꞌ nabán li lazreꞌ, naꞌ nedaꞌ naca banaꞌ ne̱ chee̱ Le̱ꞌ. Cáꞌanqueze bénneaꞌ dxawe̱ꞌ da naca chiaꞌ nedaꞌ gaca bánqueze̱ꞌ ne̱ chiaꞌ nedaꞌ.
\v 58 Da nigá naca na xeta xtila da za xabáa. Xeta xtila nigá quebe naca na ca xeta maná da gulagu xra xrtáule caꞌ, naꞌ gudé naꞌ gulate xúgute̱ꞌ. Benneꞌ dxawe̱ꞌ xeta xtila nigá waca bánqueze̱ꞌ chadía chacanna.
\p
\v 59 Bse̱de Jesús ca naca da caní naga zaj zraꞌ benneꞌ zan caꞌ lu xuꞌu naga dxelezraga bénneache chee̱ xe̱zre Capernaum.
\s Ca naca dizraꞌ naꞌ da dxunna na xel-laꞌ nabán da zeajlí canna
\p
\v 60 Gate belén benneꞌ zan caꞌ da nigá dxuse̱de Jesús, naꞌ benneꞌ caꞌ zjácale̱ Jesús gulenné̱ꞌ:
\p ―Dizraꞌ caní dxenná Jesús zaj nácale̱ꞌe̱ na ste̱be sidxu. ¿Nuzra gaca gun caní?
\p
\v 61 Guque béꞌene̱ꞌ Jesús dxelenné̱ꞌ chee̱ xrtizre̱ꞌ, naꞌ bche̱be̱ꞌ benneꞌ caꞌ:
\p ―¿Dxuzúa dizraꞌ nigá leꞌe ste̱be?
\v 62 ¿Ájazra gunle checaꞌ léꞌele nedaꞌ, Benneꞌ Gulje̱ꞌ Bénneache, xegüénaꞌ xabáa naga zuaꞌ nédxute̱?
\v 63 Beꞌ naca na da dxunna xel-laꞌ nabán li lazreꞌ. Da naca na be̱laꞌ dxen quebe bi zaca na. Dizraꞌ caꞌ da ba guchaꞌ leꞌe zaj naca na chee̱ Beꞌ, ne zaj naca na da dxelunna na xel-laꞌ nabán li lazreꞌ.
\v 64 Bál-lale leꞌe quebe dxéajle̱le chiaꞌ.
\p Caní gunná Jesús laweꞌ da nézene̱ꞌ nédxudaute̱ nu benneꞌ caꞌ quebe dxeléajle̱ꞌe̱ chee̱ꞌ, ne nuaꞌ gudé Le̱ꞌ lu naꞌ benneꞌ guledábague̱ꞌ Le̱ꞌ.
\v 65 Nadxa gunná Jesús:
\p ―Chee̱ le̱ naꞌ guchaꞌ leꞌe, quebe nu benneꞌ gaca xide̱ꞌ naga zuaꞌ nedaꞌ che quebe xedajgúa Xraꞌ bénneaꞌ.
\p
\v 66 Lu zra náꞌqueze benneꞌ zan caꞌ, benneꞌ xjácale̱ne̱ꞌ Jesús, québedxa xjácale̱ne̱ꞌ Le̱ꞌ.
\v 67 Nadxa Jesús bche̱be̱ꞌ benneꞌ chazrinnu caꞌ dxusé̱dene̱ꞌ, gunné̱ꞌ:
\p ―¿Cáꞌanqueze leꞌe dxaca lázrele xexíajle?
\p
\v 68 Beche̱be Simón Pedro:
\p ―Xran, ¿nuzra chéajle̱ntuꞌ? Dizraꞌ chiuꞌ naca na da dxunna na xel-laꞌ nabán da zeajlí canna.
\v 69 Netuꞌ dxéajle̱ntuꞌ chiuꞌ, ne nézentuꞌ nacuꞌ Cristo, Zriꞌine Dios ban.
\p
\v 70 Jesús beche̱be̱ꞌ:
\p ―Nedaꞌ gucáꞌa leꞌe, benneꞌ chazrinnu, naꞌ tu benneꞌ ládujla leꞌe xuꞌe̱ da xriwe̱ꞌ.
\p
\v 71 Da nigá gunná Jesús, bchálaje̱ꞌ ca naca chee̱ Judas Iscariote, zriꞌine tu benneꞌ le̱ꞌ Simón, laweꞌ da gudé Judas nigá Jesús lu naꞌ benneꞌ guledábague̱ꞌ Le̱ꞌ. Naque̱ꞌ tu benneꞌ chazrinnu caꞌ dxuse̱de Jesús.
\c 7
\s Benneꞌ biche Jesús quebe dxeléajle̱ꞌe̱ chee̱ꞌ
\p
\v 1 Gudé naꞌ gudé Jesús naga nababa Galilea. Quebe guca lazre̱ꞌ tee̱ꞌ naga nababa Judea laweꞌ da dxelaca lazreꞌ judío blau zaj zre̱ꞌe̱ naꞌ xelútie̱ꞌ Le̱ꞌ.
\v 2 Ba za laní gate judío caꞌ dxelezúe̱ꞌ lu xuꞌu lagaꞌ caꞌ.
\v 3 Chee̱ le̱ naꞌ bi biche Jesús gulé̱ꞌe̱ Le̱ꞌ:
\p ―Quebe xegáꞌanuꞌ nigáze. Bexíaj Judea, chee̱ cáꞌanqueze benneꞌ caꞌ dxeléajle̱ chiuꞌ zaj zre̱ꞌe̱ naꞌ gaca xeleléꞌene̱ꞌ ca da dxunuꞌ.
\v 4 Che nu benneꞌ dxaca lazre̱ꞌ xelúnbeꞌe bénneache le̱ꞌ, quebe dxune̱ꞌ da caꞌ bagácheze. Laweꞌ da dxunuꞌ Lueꞌ da caní, be̱n na lau xúgute̱ bénneache.
\p
\v 5 Caní gulenné̱ꞌ laweꞌ da quebe dxeléajle̱ benneꞌ biche̱ꞌ caꞌ chee̱ Jesús.
\v 6 Nadxa Jesús guzre̱ꞌ benneꞌ caꞌ:
\p ―Quebe ne zrin zra chaꞌa naꞌ. Chee̱le leꞌe bítete̱ze zra waca chéajle.
\v 7 Benneꞌ caꞌ zaj naca chee̱ xe̱zr la xu nigá quebe gaca xelecuídene̱ꞌ leꞌe. Dxelecuídene̱ꞌ nedaꞌ laweꞌ da dxuléꞌedaꞌ nedaꞌ naca da cale̱la da dxelún benneꞌ caꞌ.
\v 8 Le chjaca leꞌe laní naꞌ. Quebe saꞌa nedaꞌ naꞌa laweꞌ da quebe ne zrin zra chaꞌa.
\p
\v 9 Ca gudé guzre Jesús benneꞌ caꞌ da nigá, naꞌ begáꞌane̱ꞌ naga nababa Galilea naꞌ.
\s Jesús dxezrine̱ꞌ laní gate judío caꞌ dxelezúe̱ꞌ xuꞌu lagaꞌ caꞌ
\p
\v 10 Ca gudé besiáꞌaca benneꞌ biche Jesús, naꞌ cáꞌanqueze Le̱ꞌ guxíaje̱ꞌ laní naꞌ. Bagácheze guxíaje̱ꞌ chee̱ quebe nu leꞌe Le̱ꞌ.
\v 11 Benneꞌ xíchaje̱ chee̱ judío caꞌ belexílaje̱ꞌ Jesús lu laní naꞌ. Dxelenné̱ꞌ:
\p ―¿Gazra zua bénneaꞌ?
\p
\v 12 Ládujla benneꞌ zan caꞌ, benneꞌ zan buluchálaje̱ꞌ ca naca chee̱ Jesús. Bal-le̱ꞌ gulenné̱ꞌ: “Naque̱ꞌ benneꞌ xrlátaje.” Xebal-le̱ꞌ gulenné̱ꞌ: “Quebe naque̱ꞌ xrlátaje laweꞌ da dxezí xe̱ꞌe̱ bénneache.”
\p
\v 13 Quebe nu benneꞌ bchálaje̱ꞌ caníqueze ca naca chee̱ꞌ laweꞌ da dxelezrebe̱ꞌ da xelún benneꞌ xíchaje̱ caꞌ chee̱ judío caꞌ.
\p
\v 14 Ba zeaj gachaj laní naꞌ gate guxúꞌu Jesús lu chaleꞌaj xudauꞌ, naꞌ guzú lawe̱ꞌ dxusé̱dene̱ꞌ benneꞌ zaj zre̱ꞌe̱ naꞌ.
\v 15 Belexebane benneꞌ judío caꞌ, dxelenné̱ꞌ:
\p ―¿Ájazra naꞌ benneꞌ nigá da zante̱ nézene̱ꞌ, ne quebe bsé̱die̱ꞌ chee̱ xudauꞌ?
\p
\v 16 Beche̱be Jesús:
\p ―Da dxusé̱dedaꞌ nedaꞌ leꞌe quebe naca na cheé̱zquezaꞌ. Naca na chee̱ Xraꞌ nasel-le̱ꞌ nedaꞌ.
\v 17 Che nu benneꞌ dxaca lazre̱ꞌ gune̱ꞌ ca da dxaca lazreꞌ Dios, naꞌ wanézene̱ꞌ che da dxusé̱dedaꞌ naca na chee̱ Dios, u che dxennéaꞌ ca da naca cheé̱zquezaꞌ.
\v 18 Benneꞌ dxuchálaje̱ꞌ da naca cheé̱zqueze̱ꞌ dxune̱ꞌ na chee̱ xelapa bénneache le̱ꞌ ba láꞌana. Bénneaꞌ dxue lazre̱ꞌ xelapa bénneache ba láꞌana bénneaꞌ gusel-le̱ꞌ le̱ꞌ, benneꞌ nigá dxenné̱ꞌ da li, ne quebe bi dxenné̱ꞌ da naca na da we̱n lazreꞌ.
\p
\v 19 ’Moisésqueze be̱nne̱ꞌ leꞌe da nadxixruj bea na, naꞌ netule leꞌe quebe dxuzúale dizraꞌ chee̱ da nadxixruj bea na naꞌ. ¿Bizr chee̱ naꞌ dxaca lázrele gútele nedaꞌ?
\p
\v 20 Belexeche̱be benneꞌ zan caꞌ:
\p ―Xuꞌu lueꞌ beꞌ xriwe̱ꞌ. ¿Núzraqueze dxaca lazreꞌ gutie̱ꞌ lueꞌ?
\p
\v 21 Jesús guzre̱ꞌ benneꞌ caꞌ:
\p ―Tu xel-laꞌ waca be̱naꞌ lu zra dxupáꞌanale, naꞌ xúgute̱le leꞌe dxebánele.
\v 22 Moisés be̱nne̱ꞌ da zéajle̱le, dxechúgule lateꞌ weaj be̱laꞌ chee̱ be̱l-laꞌ dxen chee̱ zríꞌinele bi biudu caꞌ chee̱ xelexegáꞌanabeꞌ xrlátaje lau Dios. Da nigá da dxunle quebe guzú lau na gate naꞌ zua Moisés. Guzú lau na gate zaj zraꞌ xra xrtau Moisés cáꞌante̱. Chee̱ le̱ naꞌ leꞌe dxechúgule lateꞌ be̱laꞌ chee̱ be̱l-laꞌ dxen chee̱ tu bi biúdauꞌ chee̱ xegáꞌanabeꞌ xrlátaje lau Dios lácala naca zra dxupáꞌanale.
\v 23 Che caní dxunle lu zra dxupáꞌanale chee̱ quebe gusanle ca naca da bdxixruj beꞌe Moisés, ¿bizr chee̱ naꞌ dxezráꞌale nedaꞌ laweꞌ da bexunaꞌ dute̱ be̱l-laꞌ dxen chee̱ tu benneꞌ gate naca zra dxupáꞌanale?
\v 24 Quebe guchíꞌale leꞌe chee̱ tu da dxun benneꞌ ca naca da dxeléꞌezele. Gate bi da guchíꞌale, le gun na lu da naca xrlátaje.
\s Jesús dxuchálaje̱ꞌ chee̱ naga ze̱ꞌe̱
\p
\v 25 Nadxa bal-la benneꞌ caꞌ zaj zre̱ꞌe̱ Jerusalén gulezú lawe̱ꞌ dxuluche̱be ljwezre̱ꞌ:
\p ―¿Quegá benneꞌ nigá bénneaꞌ dxelexílaje̱ꞌ chee̱ xelútie̱ꞌ le̱ꞌ?
\v 26 Nigá zue̱ꞌ dxuchálaje̱ꞌ láwela bénneache, naꞌ quebe nu bi dxe̱ Le̱ꞌ. ¿Zaj neze benneꞌ xíchaje̱ caꞌ da li naca benneꞌ nigá Cristo, Bénneaꞌ nasel-la Dios?
\v 27 Netuꞌ nézentuꞌ ga zaꞌ benneꞌ nigá. Gate xida Cristo, quegá nu neze ga ze̱ꞌe̱.
\p
\v 28 Jesús zue̱ꞌ dxusé̱dene̱ꞌ benneꞌ caꞌ chaleꞌaj xudauꞌ, naꞌ gate benne̱ꞌ da nigá, naꞌ gunné̱ꞌ zizraj:
\p ―Dxennale núnbeale nedaꞌ, ne dxennale nézele ga zaꞌa. Blaꞌa nigá, quegá cheé̱zquezaꞌ. Bénneaꞌ nasel-le̱ꞌ nedaꞌ naque̱ꞌ li lazreꞌ, naꞌ Bénneaꞌ quebe núnbeale leꞌe.
\v 29 Nedaꞌ núnbeꞌa Le̱ꞌ laweꞌ da zaꞌa naga zua Le̱ꞌ, naꞌ Le̱ꞌ gusél-le̱ꞌ nedaꞌ.
\p
\v 30 Nadxa gulaca lazre̱ꞌ xele̱l-le̱ꞌ Jesús. Quebe nu gude̱la Le̱ꞌ laweꞌ da quebe ne zrin zra chee̱ xelútie̱ꞌ Le̱ꞌ.
\v 31 Benneꞌ zan guléajle̱ꞌe̱ chee̱ Jesús, naꞌ gulenné̱ꞌ:
\p ―Gate xida Cristo, ¿gúnljadxe̱ꞌ xel-laꞌ waca zrente̱ ca da dxun benneꞌ nigá?
\s Benneꞌ fariseo caꞌ dxelesel-le̱ꞌ xraꞌaga we̱n zrin chee̱ꞌ
 chee̱ xele̱l-le̱ꞌ Jesús
\p
\v 32 Benneꞌ fariseo caꞌ belenne̱ꞌ ca da dxelenná bénneache ca naca chee̱ Jesús, naꞌ le̱ꞌ, ne benneꞌ xíchaje̱ caꞌ chee̱ bxruze caꞌ gulesel-le̱ꞌ xraꞌaga we̱n zrin chee̱ xudauꞌ chee̱ xele̱l-le̱ꞌ Jesús.
\v 33 Nadxa gunná Jesús:
\p ―Wazúale̱naꞌ leꞌe xetú chíꞌidauꞌ, naꞌ xezrínquezaꞌ naga zua Bénneaꞌ gusél-le̱ꞌ nedaꞌ.
\v 34 Leꞌe wexílajle nedaꞌ, naꞌ quebe xezrélele nedaꞌ, laweꞌ da quebe gaca saꞌle naga suaꞌ nedaꞌ.
\p
\v 35 Nadxa benneꞌ judío caꞌ gulezú lawe̱ꞌ dxuluche̱be ljwezre̱ꞌ:
\p ―¿Gazra cheaj benneꞌ nigá, naga quebe gaca xezreldxu Le̱ꞌ? ¿Waxíaje̱ꞌ naga zaj zraꞌ benneꞌ judío caꞌ zaj nase dínnaje̱ꞌ ládujla benneꞌ xe̱zr la xu caꞌ chee̱ gusé̱dene̱ꞌ benneꞌ quebe zaj naque̱ꞌ judío?
\v 36 ¿Bizra zéaje̱ da nigá guzre̱ꞌ dxiꞌu: Wexílajle nedaꞌ, naꞌ quebe xezrélele nedaꞌ laweꞌ da quebe gaca saꞌle naga suaꞌ nedaꞌ?
\s Jesús dxuchálaje̱ꞌ chee̱ xe̱gu nisa
 da dxunna xel-laꞌ nabán li lazreꞌ
\p
\v 37 Zra bze̱be chee̱ laní naꞌ naca na zra blaudxa. Lu zra naꞌ guzé̱ Jesús, naꞌ gunné̱ꞌ zizraj:
\p ―Che nu benneꞌ dxebílene̱ꞌ, dxal-laꞌ xide̱ꞌ naga zuaꞌ nedaꞌ, naꞌ xíꞌaje̱ꞌ.
\v 38 Naca na ca naxúaj na lu xiche chee̱ Dios, dxenné̱ꞌ: “Benneꞌ dxéajle̱ꞌe̱ chiaꞌ, lu lázrdawe̱ꞌ galaj xe̱gu nisa da gunna na xel-laꞌ nabán.”
\p
\v 39 Da nigá gunná Jesús ca naca chee̱ Beꞌ Láꞌazxa, Bénneaꞌ xelezíꞌ benneꞌ caꞌ xeléajle̱ꞌe̱ chee̱ Jesús, laweꞌ da quebe ne laꞌ Beꞌ Láꞌazxa laweꞌ da quebe ne xegáꞌana szren Jesús naga zua Xre̱ꞌ.
\s Bénneache dxelaque̱ꞌ chupa laꞌa
\p
\v 40 Bal-la bénneache, gate belenne̱ꞌ da nigá, gulenné̱ꞌ:
\p ―Da li benneꞌ nigá naque̱ꞌ Bénneaꞌ guchalaje̱ꞌ waláz chee̱ Dios, Bénneaꞌ dxal-laꞌ xide̱ꞌ.
\p
\v 41 Xebal-le̱ꞌ gulenné̱ꞌ:
\p ―Benneꞌ nigá naque̱ꞌ Cristo, Benneꞌ guche̱be lazreꞌ Dios sel-le̱ꞌ.
\p Xebal-le̱ꞌ gulenné̱ꞌ:
\p ―¿Waca Cristo benneꞌ Galilea?
\v 42 Lu da naxúaj na lu xiche chee̱ Dios dxenná na gaca Cristo zriꞌine zre sua David, ne gaque̱ꞌ benneꞌ xe̱zre Belén, xe̱zre naꞌ naga gulaj David.
\p
\v 43 Caꞌan guca, gulaca benneꞌ caꞌ chupa laꞌa ne̱ chee̱ Jesús.
\v 44 Bal-le̱ꞌ gulaca lazre̱ꞌ xele̱l-le̱ꞌ Jesús, naꞌ quebe nu bexazre gune̱ꞌ na.
\s Benneꞌ xíchaje̱ caꞌ chee̱ judío caꞌ quebe dxeléajle̱ꞌe̱ chee̱ Jesús
\p
\v 45 Xraꞌaga we̱n zrin caꞌ chee̱ xudauꞌ belexezrine̱ꞌ naga zaj zraꞌ fariseo caꞌ, ne benneꞌ xíchaje̱ caꞌ chee̱ bxruze caꞌ, naꞌ benneꞌ caní buluche̱be̱ꞌ xraꞌaga we̱n zrin caꞌ:
\p ―¿Bizr chee̱ naꞌ quebe guche̱le bénneaꞌ?
\p
\v 46 Belexeche̱be xraꞌaga we̱n zrin caꞌ:
\p ―Quebe ne guchalaj nu bénneache ca dxuchalaj benneꞌ nigá.
\p
\v 47 Nadxa fariseo caꞌ gulé̱ꞌe̱ xraꞌaga we̱n zrin caꞌ:
\p ―¿Cáꞌanqueze leꞌe be̱le lataj guzí xe̱ꞌe̱ leꞌe?
\v 48 Quebe nu ne chéajle̱ chee̱ bénneaꞌ, benneꞌ xíchaje̱ caní, ne cáꞌanqueze benneꞌ fariseo caꞌ.
\v 49 Benneꞌ caꞌ dxeléajle̱ꞌe̱ chee̱ bénneaꞌ quebe zaj núnbeꞌe̱ da nadxixruj bea na, ne zaj nabía xiꞌe̱.
\p
\v 50 Nicodemo, bénneaꞌ guxíaje̱ꞌ xeajnné̱ꞌe̱ Jesús chizrela naque̱ꞌ tu benneꞌ fariseo caꞌ, naꞌ guzre̱ꞌ benneꞌ caꞌ:
\p
\v 51 ―Cate̱ze dxenná da nadxixruj bea chee̱dxu quebe gaca guzría xidxu tu benneꞌ che quebe ne xénedxu xeche̱be̱ꞌ chee̱ nézedxu che bi da nabague̱ꞌe̱.
\p
\v 52 Nadxa belexeche̱be benneꞌ caꞌ:
\p ―¿Nácaquezuꞌ lueꞌ benneꞌ Galilea? Gunnáꞌ xanneꞌ da naxúaj na lu xiche chee̱ Dios, naꞌ leꞌenuꞌ netú benneꞌ dxuchalaje̱ꞌ waláz chee̱ Dios quebe ne gálaje̱ꞌ naga nababa Galilea, naga zaj zraꞌ bénneache quebe zaj naca xánnie̱ꞌ judío.
\p
\v 53 Nadxa tu tu benneꞌ caꞌ xeajxaque̱ꞌ lizre̱ꞌ.
\c 8
\p
\v 1 Naꞌ Jesús guzé̱ꞌe̱ zéaje̱ꞌ lu Xiꞌa Xaga Olivo.
\s Jesús dxuchálajle̱ne̱ꞌ tu nuꞌula dxune̱ꞌ dul-la dxíchaje̱ꞌ xrba chee̱ xel-laꞌ nuchaga naꞌ
\p
\v 2 Zra xula, gate guxaníꞌ, naꞌ bezrín Jesús chaleꞌaj xudauꞌ naꞌ. Xúgute̱ benneꞌ caꞌ gulebigue̱ꞌ naga zua Jesús, naꞌ Le̱ꞌ gudxéꞌe̱, ne guzú lawe̱ꞌ dxusé̱dene̱ꞌ benneꞌ caꞌ.
\v 3 Nadxa benneꞌ caꞌ dxuluxuzájle̱ꞌe̱ da nadxixruj bea Dios, ne benneꞌ fariseo caꞌ guleché̱ꞌe̱ tu nuꞌula naga zua Jesús, beleléꞌene̱ꞌ le̱ꞌ dxune̱ꞌ dul-la dxíchaje̱ꞌ xrba chee̱ xel-laꞌ nuchaga naꞌ. Buluzé̱ꞌ nuꞌula naꞌ laduj benneꞌ zaj zre̱ꞌe̱ naꞌ,
\v 4 naꞌ gulé̱ꞌe̱ Jesús:
\p ―Benneꞌ Wese̱de, nuꞌula nigá bléꞌentuꞌ le̱ꞌ dxune̱ꞌ dul-la dxíchaje̱ꞌ xrba chee̱ xel-laꞌ nuchaga naꞌ.
\v 5 Da bdxixruj beꞌe Moisés dxenná beꞌe netuꞌ gútentuꞌ nuꞌula caní, güentuꞌ le̱ꞌ xiaj. ¿Bizra dxennáuꞌ Lueꞌ?
\p
\v 6 Caní gulenná benneꞌ caꞌ chee̱ xuludxixre̱ꞌ Jesús chee̱ xelezéquene̱ꞌ xelagu zria Le̱ꞌ. Nadxa gudxéꞌ luche Jesús, ne guzú lawe̱ꞌ dxuzúaje̱ꞌ lu xu nen zrube ne̱ꞌe̱.
\v 7 Benneꞌ caꞌ buluché̱bequeze̱ꞌ Jesús, naꞌ Le̱ꞌ bezé̱ꞌ dxe̱ꞌe̱ benneꞌ caꞌ:
\p ―Nútete̱zlale leꞌe quebe nabágale dul-la, waca su laule güele nuꞌula nigá xiaj.
\p
\v 8 Naꞌ bebéꞌ luche Jesús, ne bzúajqueze̱ꞌ lu xu.
\v 9 Benneꞌ caꞌ, gate belenne̱ꞌ da nigá, quebe bzua xichaj lázrdawe̱ꞌ le̱ꞌ zrize, naꞌ belexedxúaje̱ꞌ tu weaje̱ꞌ. Belexedxúaj zaꞌa benneꞌ gúladxa, naꞌ ca belexedxúaj xúgute̱ benneꞌ caꞌ dxelagu zrie̱ꞌ nuꞌulaꞌ, naꞌ begáꞌana Jesús tuze̱ꞌ nen nuꞌula naꞌ, ze̱ꞌ laduj benneꞌ caꞌ dxuluzé̱ nague̱ꞌ chee̱ꞌ.
\v 10 Nadxa bezé̱ꞌ Jesús, ne gate québedxa nu benneꞌ caꞌ bleꞌe Jesús, benneꞌ dxulagu zrie̱ꞌ nuꞌula naꞌ, nadxa guzre̱ꞌ le̱ꞌ:
\p ―Nuꞌula, ¿gazra naꞌ benneꞌ caꞌ gulagu zrie̱ꞌ lueꞌ? ¿Quebe nu chiláꞌ benneꞌ guzría xiꞌe̱ lueꞌ?
\p
\v 11 Nuꞌula naꞌ gunné̱ꞌ:
\p ―Quebe nu chiláꞌ, Xran.
\p Nadxa Jesús guzre̱ꞌ nuꞌula naꞌ:
\p ―Cáꞌanqueze nedaꞌ, quebe guzría xiꞌa lueꞌ. Bexíaj, ne québedxa gunuꞌ dul-la.
\s Jesús dxuseníꞌe̱ lu xichaj lázxdau bénneache
\p
\v 12 Bchálajle̱ Jesús benneꞌ caꞌ xecha lasa, gunné̱ꞌ:
\p ―Nedaꞌ nacaꞌ xel-laꞌ naxaníꞌ chee̱ lu xichaj lázxdau bénneache. Benneꞌ dxedále̱ne̱ꞌ nedaꞌ gape̱ꞌ xel-laꞌ naxaníꞌ nigá da gunezruj na le̱ꞌ xel-laꞌ nabán li lazreꞌ, naꞌ cabataꞌ tadxe̱ꞌ lu da chul-la chee̱ dul-la da zaj nabague̱ꞌ.
\p
\v 13 Nadxa benneꞌ fariseo caꞌ gulé̱ꞌe̱ Le̱ꞌ:
\p ―Lueꞌ dxexeche̱buꞌ cheé̱zquezuꞌ, naꞌ da dxexeche̱buꞌ quebe bi zaca na.
\p
\v 14 Beche̱be Jesús:
\p ―Da dxexeche̱baꞌ zaca na lácala nédaꞌquezaꞌ dxexeche̱baꞌ cheé̱zquezaꞌ. Nedaꞌ nezdaꞌ gala zaꞌa, ne gala chaꞌa. Leꞌe quebe nézele gala zaꞌa, ne gala chaꞌa.
\v 15 Leꞌe dxuchíꞌale cáte̱ze dxenná xichaj lázrdaule. Blaꞌa nedaꞌ, quegá chee̱ guchiꞌa ca da dxun nu benneꞌ.
\v 16 Che dxuchiꞌa, dxuchiꞌa cáte̱ze naca na, laweꞌ da quebe dxuchiꞌa nédaꞌzaꞌ. Xraꞌ nasel-le̱ꞌ nedaꞌ dxuchiꞌe̱ tu zren nen nedaꞌ ca naca da dxelún bénneache.
\v 17 Lu da nadxixruj bea chee̱le leꞌe naxúaj gate zaj zraꞌ chupa benneꞌ dxelexeche̱be̱ꞌ tuz ca dxelenné̱ꞌ, naca da li xrtizraꞌ benneꞌ caꞌ.
\v 18 Nédaꞌquezaꞌ dxexeche̱baꞌ da naca cheé̱zquezaꞌ, naꞌ Xraꞌ nasel-le̱ꞌ nedaꞌ, cáꞌanqueze dxexeche̱be̱ꞌ chiaꞌ.
\p
\v 19 Nadxa benneꞌ caꞌ buluche̱be̱ꞌ Jesús:
\p ―¿Ga naꞌ Xrauꞌ?
\p Jesús beche̱be̱ꞌ:
\p ―Leꞌe quebe núnbeale da nácaquezaꞌ nedaꞌ, ne quebe núnbeaquezle Xraꞌ. Chela da li núnbeale nedaꞌ, cáꞌanqueze núnbeale Xraꞌ.
\p
\v 20 Da caní bchalaj Jesús dxácate̱ naꞌ dxusé̱dene̱ꞌ bénneache chaleꞌaj xudauꞌ naga zaj nnita xiꞌina dumí chee̱ xudauꞌ. Quebe nu gude̱la Le̱ꞌ laweꞌ da quebe ne zrin zra chee̱ꞌ.
\s Dxenná Jesús: “Naga chaꞌa nedaꞌ quebe gaca saꞌle leꞌe”
\p
\v 21 Nadxa Jesús guzre̱ꞌ benneꞌ caꞌ:
\p ―Wexáꞌa nedaꞌ, naꞌ leꞌe xexílajle nedaꞌ, naꞌ wátele lu dul-la nabágale, laweꞌ da naga chaꞌa nedaꞌ, leꞌe quebe gaca saꞌle.
\p
\v 22 Nadxa benneꞌ judío caꞌ gulé̱ ljwezre̱ꞌ:
\p ―¿Gute cuine̱ꞌ, ne chee̱ le̱ naꞌ dxenné̱ꞌ quebe gaca chéajdxu naga cheaj Le̱ꞌ?
\p
\v 23 Nadxa Jesús guzre̱ꞌ benneꞌ caꞌ:
\p ―Leꞌe nácale chee̱ zran xabáa nigá. Nedaꞌ nacaꞌ chee̱ xabáa naꞌla. Leꞌe nácale chee̱ xe̱zr la xu nigá. Nedaꞌ quebe nacaꞌ chee̱ xe̱zr la xu nigá.
\v 24 Chee̱ le̱ naꞌ guchaꞌ leꞌe wátele lu dul-la nabágale, laweꞌ da che quebe dxéajle̱le zúaquezaꞌ nedaꞌ, wátele lu dul-la nabágale.
\p
\v 25 Nadxa benneꞌ caꞌ buluche̱be̱ꞌ Jesús:
\p ―¿Nuzra nacuꞌ Lueꞌ?
\p Beche̱be Jesús:
\p ―Nácaquezaꞌ ca ba guchaꞌ leꞌe nédxudaute̱.
\v 26 Dé̱le̱ꞌe̱ da dxal-laꞌ nniaꞌ chee̱le, ne da dxal-laꞌ guchiꞌa ca naca da dxunle. Bénneaꞌ gusél-le̱ꞌ nedaꞌ dxenné̱ꞌ da li, naꞌ da dxapaꞌ bénneache naca na da ba bendaꞌ gunné̱ Le̱ꞌ, lácala quebe dxezaca ba lázrele̱nle na.
\p
\v 27 Benneꞌ caꞌ quebe guléajniꞌine̱ꞌ dxuchálajle̱ Jesús le̱ꞌ ca naca chee̱ Dios, Xre̱ꞌ.
\v 28 Nadxa Jesús guzre̱ꞌ benneꞌ caꞌ:
\p ―Gate leꞌe chísale sibe nedaꞌ, Benneꞌ Gulje̱ꞌ Bénneache, nadxa xúnbeale zúaquezaꞌ nedaꞌ, ne quebe bi dxunaꞌ da naca cheé̱zquezaꞌ. Tuze dxennéaꞌ ca da ba bleꞌe Xraꞌ nedaꞌ.
\v 29 Bénneaꞌ gusél-le̱ꞌ nedaꞌ zúale̱queze̱ꞌ nedaꞌ. Xraꞌ quebe nucáꞌane̱ꞌ nedaꞌ tuzaꞌ laweꞌ da tu dxúnzquezaꞌ ca da dxezaca ba lazreꞌ Le̱ꞌ.
\p
\v 30 Ca gunná Jesús da caní, guléajle̱ benneꞌ zan chee̱ꞌ.
\s Benneꞌ zaj naque̱ꞌ chee̱ Dios, ne benneꞌ caꞌ nuxru dul-la le̱ꞌ
\p
\v 31 Nadxa Jesús guzre̱ꞌ benneꞌ judío caꞌ, benneꞌ dxeléajle̱ꞌe̱ chee̱ꞌ:
\p ―Che leꞌe se̱ típale lu da dxapaꞌ leꞌe, da li nácale nedaꞌ tuze.
\v 32 Gúnbeale da li, naꞌ da li naꞌ guselá na leꞌe.
\p
\v 33 Belexeche̱be benneꞌ zan caꞌ:
\p ―Netuꞌ nácantuꞌ xrtia Abraham, ne quebe ne chúꞌuntuꞌ lu naꞌ nu benneꞌ ca benneꞌ zaj nadaꞌu. ¿Bizr chee̱ naꞌ dxennáuꞌ Lueꞌ lantuꞌ?
\p
\v 34 Jesús guzre̱ꞌ benneꞌ caꞌ:
\p ―Da li dxapaꞌ leꞌe, xúgute̱ benneꞌ dxelúnqueze̱ꞌ dul-la, dúl-laqueze naꞌ nuxru na benneꞌ caꞌ.
\v 35 Nu benneꞌ xuꞌe̱ lu naꞌ tu benneꞌ ca benneꞌ nadaꞌu quebe tu súazqueze̱ꞌ xuꞌu naꞌ. Zríꞌinequeze bénneaꞌ wazúatequezebeꞌ.
\v 36 Chee̱ le̱ naꞌ, che nedaꞌ, Zriꞌine Xraꞌ, guseláꞌ leꞌe, da li láquezle leꞌe.
\v 37 Nezdaꞌ nácale leꞌe xrtia Abraham. Naꞌa dxaca lázrele gútele nedaꞌ laweꞌ da quebe dxezíꞌ lu naꞌle da dxapaꞌ leꞌe.
\v 38 Nedaꞌ dxuchálajaꞌ ca naca da bleꞌe Xraꞌ nedaꞌ, naꞌ leꞌe dxunle ca da guzre xráquezle leꞌe.
\p
\v 39 Belexeche̱be benneꞌ caꞌ:
\p ―Xra xrtauntuꞌ naca Abraham.
\p Naꞌ Jesús guzre̱ꞌ benneꞌ caꞌ:
\p ―Chela nácale da li xrtia Abraham, naꞌ gunle ca da be̱n Abraham.
\v 40 Lácala guchaꞌ leꞌe da li da bleꞌe Xraꞌ nedaꞌ, leꞌe dxaca lázrele gútele nedaꞌ. Abraham cabataꞌ be̱ne̱ꞌ da caní.
\v 41 Leꞌe dxúnquezle ca da dxun xráquezle.
\p Nadxa benneꞌ caꞌ gulé̱ꞌe̱ Jesús:
\p ―Netuꞌ quebe nácantuꞌ bi lan. Zua tuze Xrantuꞌ, Dios.
\p
\v 42 Nadxa Jesús guzre̱ꞌ benneꞌ caꞌ:
\p ―Chela naca Dios da li Xrale, leꞌe wazríꞌile nedaꞌ laweꞌ da zaꞌa nedaꞌ naga zua Dios, ne zúaquezaꞌ nigá. Quebe zaꞌa da naca cheé̱zquezaꞌ. Dios nasel-le̱ꞌ nedaꞌ.
\v 43 ¿Bizr chee̱ naꞌ quebe dxezéquele chéajniꞌile da dxennéaꞌ? Naca na laweꞌ da quebe dxaca lázrele xénele dizraꞌ chiaꞌ.
\v 44 Xráquezle leꞌe naca da xriwe̱ꞌ. Leꞌe nácale chee̱ da naꞌ, ne dxaca lázrele gunle ca da dxaca lazreꞌ le̱ na. Da xriwe̱ꞌ naꞌ naca na we̱te benneꞌ nédxudaute̱. Cabataꞌ dxenné̱ na da li laweꞌ da quebe bi zua da li nen le̱ na. Gate dxun lazreꞌ na, dxenné̱ na cáte̱ze naca na, laweꞌ da tu dxun lázrezqueze na, ne naca na da guzú lau na be̱n lazreꞌ na.
\v 45 Lácala dxapaꞌ leꞌe da li, leꞌe quebe dxéajle̱le chiaꞌ.
\v 46 ¿Núlale leꞌe séquele guléꞌele nabaga nedaꞌ tu dul-la? Che dxennéaꞌ da li, ¿bizr chee̱ naꞌ quebe dxéajle̱le chiaꞌ?
\v 47 Benneꞌ naque̱ꞌ chee̱ Dios dxenne̱ꞌ dizraꞌ chee̱ Dios. Leꞌe quebe nácale chee̱ Dios. Chee̱ le̱ naꞌ quebe dxaca lázrele xénele chee̱ Dios.
\s Cristo ba zúaqueze̱ꞌ nédxudxa ca Abraham
\p
\v 48 Nadxa benneꞌ judío caꞌ gulé̱ꞌe̱ Jesús:
\p ―Da li dxennantuꞌ gate dxennantuꞌ nacuꞌ benneꞌ Samaria, ne xuꞌu beꞌ xriwe̱ꞌ.
\p
\v 49 Jesús beche̱be̱ꞌ:
\p ―Quebe xuꞌa beꞌ xriwe̱ꞌ. Nedaꞌ dxapaꞌ ba láꞌana Xraꞌ Dios, naꞌ leꞌe dxuzúale nedaꞌ chaláꞌala.
\v 50 Quebe dxeꞌa gunne xue chee̱ gápale nedaꞌ ba láꞌana, ne siꞌ lu naꞌle nedaꞌ. Zua Benneꞌ xabáa dxezá lazre̱ꞌ gápale nedaꞌ ba láꞌana, ne Le̱ꞌ dxuchiꞌe̱ ca da dxunle.
\v 51 Da li dxapaꞌ leꞌe: Benneꞌ dxune̱ꞌ ca naca dizraꞌ chiaꞌ, cabataꞌ gátequeze bénneaꞌ.
\p
\v 52 Nadxa benneꞌ judío caꞌ belexeche̱be̱ꞌ:
\p ―Naꞌa nézquezentuꞌ xuꞌu beꞌ xriwe̱ꞌ. Ba gulátequeze Abraham, ne xúgute̱ benneꞌ caꞌ buluchálaje̱ꞌ waláz chee̱ Dios, naꞌ lueꞌ dxennáuꞌ benneꞌ gune̱ꞌ ca naca dizraꞌ chiuꞌ cabataꞌ gátequeze̱ꞌ.
\v 53 ¿Nácadxuꞌ szrendxa ca xra xrtáudxu Abraham? Gútequeze Le̱ꞌ, ne cáꞌanqueze gulate benneꞌ caꞌ buluchálaje̱ꞌ waláz chee̱ Dios. ¿Bízraqueze dxugune cuinuꞌ?
\p
\v 54 Beche̱be Jesús:
\p ―Che nedaꞌ dxucáꞌana cuinaꞌ ba láꞌana, quebe bi zaca na. Benneꞌ dxape̱ꞌ nedaꞌ ba láꞌana naque̱ꞌ Xraꞌ, Bénneaꞌ dxennale leꞌe naque̱ꞌ Xrale.
\v 55 Leꞌe quebe núnbeale Le̱ꞌ. Nedaꞌ núnbeaquezaꞌ Le̱ꞌ. Chela dxennéaꞌ quebe núnbeꞌa Le̱ꞌ, nacaꞌ we̱n lazreꞌ ca nácale leꞌe. Nedaꞌ da li núnbeꞌa Le̱ꞌ, ne dxunaꞌ ca da dxenné̱ꞌ.
\v 56 Xra xrtáule Abraham, bénneaꞌ gutie̱ꞌ nédxudaute̱, gubéle̱ꞌe̱ne̱ꞌ laweꞌ da dxal-laꞌ léꞌene̱ꞌ zra zua nedaꞌ. Bléꞌene̱ꞌ na, naꞌ gubéle̱ꞌe̱ne̱ꞌ.
\p
\v 57 Nadxa benneꞌ judío caꞌ gulé̱ꞌe̱ Jesús:
\p ―Québequeze ne suꞌ chi xun iza, naꞌ ¿dxennáuꞌ bléꞌenuꞌ Abraham?
\p
\v 58 Jesús beche̱be̱ꞌ:
\p ―Da li dxapaꞌ leꞌe, nédxudaute̱ gate quebe ne sua Abraham, báchequeze zuaꞌ nedaꞌ.
\p
\v 59 Nadxa gulequé̱ꞌe̱ xiaj chee̱ xeluꞌe̱ Jesús, naꞌ Le̱ꞌ bcache cuine̱ꞌ. Bdee̱ꞌ ládujla benneꞌ caꞌ, naꞌ bedxúaje̱ꞌ chaleꞌaj xudauꞌ, ne bezé̱ꞌe̱.
\c 9
\s Jesús dxexune̱ꞌ tu benneꞌ gúlaje̱ꞌ la chul-la
\p
\v 1 Gate gudé Jesús tu lataj, naꞌ bléꞌene̱ꞌ tu benneꞌ gúlaje̱ꞌ la chul-la.
\v 2 Benneꞌ caꞌ dxuse̱de Jesús buluche̱be̱ꞌ Le̱ꞌ:
\p ―Benneꞌ Wese̱de, ¿bizr chee̱ naꞌ gulaj benneꞌ nigá la chul-la? ¿Naca na laweꞌ da belún xra xrne̱ꞌe̱ dul-la, che laweꞌ da be̱n lé̱queze̱ꞌ dul-la?
\p
\v 3 Jesús guzre̱ꞌ benneꞌ caꞌ:
\p ―Quebe naca na laweꞌ da be̱n le̱ꞌ dul-la, ne quebe naca na laweꞌ da belún xra xrne̱ꞌe̱ dul-la. Naca na chee̱ guléꞌe lau xel-laꞌ szren chee̱ Dios ne̱ chee̱ benneꞌ nigá.
\v 4 Dxácate̱ naca te zra dxal-laꞌ gunaꞌ zrin chee̱ Bénneaꞌ nasel-le̱ꞌ nedaꞌ laweꞌ da ba za da chul-la gate netú benneꞌ quebe sequeꞌ gune̱ꞌ zrin.
\v 5 Dxácate̱ ne zuaꞌ nedaꞌ xe̱zr la xu nigá, nacaꞌ xel-laꞌ naxaníꞌ chee̱ bénneache.
\p
\v 6 Ca gudé gunná Jesús da nigá, naꞌ bzre̱ꞌe̱ zrene̱ꞌ lu xu, ne be̱ne̱ꞌ gunaꞌ nen zrene̱ꞌ naꞌ, naꞌ btupe̱ꞌ na xiaj lau benneꞌ la chul-la naꞌ.
\v 7 Nadxa guzre̱ꞌ le̱ꞌ:
\p ―Guxíaj xeajtibe lauꞌ lu beaj nisa nazí le na Siloé. (Dizraꞌ nigá zéaje̱ na: Da Nasel-la Na.)
\p Benneꞌ la chul-la naꞌ guxíaje̱ꞌ xeajtibe lawe̱ꞌ, naꞌ gate bezrine̱ꞌ ba dxeléꞌene̱ꞌ.
\v 8 Nadxa benneꞌ walízr chee̱ꞌ caꞌ, ne benneꞌ caꞌ beleléꞌene̱ꞌ le̱ꞌ nédxula, naque̱ꞌ la chul-la, gulenné̱ꞌ:
\p ―¿Quegá benneꞌ nigá bénneaꞌ dxebéꞌe̱ dxenabe̱ꞌ gunaꞌ?
\p
\v 9 Bal-le̱ꞌ gulenné̱ꞌ:
\p ―Le̱ꞌ naꞌ.
\p Xebal-le̱ꞌ gulenné̱ꞌ:
\p ―Quegá le̱ꞌ naꞌ, naꞌ caꞌan ca dxenné̱ꞌe̱.
\p Benneꞌ náꞌqueze gunné̱ꞌ:
\p ―Nedaꞌ naꞌ.
\p
\v 10 Nadxa buluche̱be̱ꞌ le̱ꞌ:
\p ―¿Ájazra naꞌ ba dxeléꞌenuꞌ?
\p
\v 11 Beche̱be bénneaꞌ:
\p ―Bénneaꞌ le̱ꞌ Jesús be̱ne̱ꞌ gunaꞌ, ne btupe̱ꞌ na xiaj lawaꞌ, naꞌ gunné̱ꞌ: “Guxíaj beaj nisa nazí le na Siloé, xeajtibe lauꞌ.” Guxáꞌa naꞌ, naꞌ gate gudibaꞌ lawaꞌ, guca bleꞌedaꞌ.
\p
\v 12 Nadxa buluche̱be̱ꞌ le̱ꞌ:
\p ―¿Ga naꞌ zua bénneaꞌ?
\p Le̱ꞌ guzre̱ꞌ benneꞌ caꞌ:
\p ―Quebe nezdaꞌ.
\s Benneꞌ fariseo caꞌ dxuluche̱be̱ꞌ bénneaꞌ guque̱ꞌ la chul-la
\p
\v 13 Nadxa benneꞌ caꞌ guleché̱ꞌe̱ bénneaꞌ guque̱ꞌ la chul-la lau benneꞌ fariseo caꞌ.
\v 14 Naca na zra dxulupáꞌana judío caꞌ gate be̱n Jesús gunaꞌ, ne btupe̱ꞌ na xiaj lau benneꞌ la chul-la naꞌ.
\v 15 Chee̱ le̱ naꞌ benneꞌ fariseo caꞌ buluche̱be̱ꞌ bénneaꞌ guque̱ꞌ la chul-la ájazra guca dxeléꞌene̱ꞌ. Le̱ꞌ guzre̱ꞌ benneꞌ caꞌ:
\p ―Bzrie̱ꞌ gunaꞌ xiaj lawaꞌ, naꞌ bexibaꞌ na, ne dxeléꞌedaꞌ.
\p
\v 16 Nadxa bal-la benneꞌ judío caꞌ gulenné̱ꞌ:
\p ―Bénneaꞌ be̱ne̱ꞌ da nigá quebe naque̱ꞌ chee̱ Dios laweꞌ da quebe dxape̱ꞌ ba láꞌana zra dxupáꞌanadxu.
\p Naꞌ xebal-le̱ꞌ gulenné̱ꞌ:
\p ―¿Ájazra naꞌ dxune̱ꞌ xel-laꞌ waca zrente̱ caní che naque̱ꞌ benneꞌ dul-la?
\p Caꞌan guca, gulaca chupa laꞌa benneꞌ fariseo caꞌ.
\v 17 Xecha lasa buluche̱be̱ꞌ bénneaꞌ guque̱ꞌ la chul-la:
\p ―¿Bi dxennáuꞌ lueꞌ chee̱ bénneaꞌ bexune̱ꞌ lueꞌ?
\p Le̱ꞌ gunné̱ꞌ:
\p ―Nedaꞌ dxennéaꞌ naque̱ꞌ benneꞌ dxuchalaje̱ꞌ waláz chee̱ Dios.
\p
\v 18 Benneꞌ judío caꞌ quebe guléajle̱ꞌe̱ guque̱ꞌ la chul-la, ne naꞌa dxeléꞌene̱ꞌ, naꞌ gulenné̱ꞌ xra xrna bénneaꞌ bexaque̱ꞌ.
\v 19 Naꞌ buluche̱be̱ꞌ xra xrna bénneaꞌ:
\p ―¿Nácaqueze benneꞌ nigá zríꞌinele, dxennale leꞌe gúlaje̱ꞌ la chul-la? ¿Ájazra naꞌ dxaca dxeléꞌene̱ꞌ?
\p
\v 20 Belexeche̱be xra xrne̱ꞌe̱:
\p ―Nézentuꞌ benneꞌ nigá naque̱ꞌ zríꞌinentuꞌ, ne gúlaje̱ꞌ la chul-la.
\v 21 Quebe nézentuꞌ aja guca dxeléꞌene̱ꞌ naꞌa, ne quebe nézentuꞌ nu bexún xiaj lawe̱ꞌ. Le guche̱be le̱ꞌ. Ba nápaqueze̱ꞌ iza, ne waca xeché̱bequeze̱ꞌ.
\p
\v 22 Caní gulenná xra xrne̱ꞌe̱ lu xel-laꞌ dxelezrebe laweꞌ da ba zaj nun benneꞌ xíchaje̱ chee̱ judío caꞌ tuze dizraꞌ xelexebéaje̱ꞌ xuꞌu naꞌ nútete̱ze benneꞌ xeche̱be̱ꞌ Jesús naque̱ꞌ Cristo.
\v 23 Chee̱ le̱ naꞌ gulenná xra xrne̱ꞌe̱: “Le guche̱be le̱ꞌ. Ba nápaqueze̱ꞌ iza.”
\p
\v 24 Nadxa benneꞌ judío caꞌ belenné̱ꞌ bénneaꞌ guque̱ꞌ la chul-la, naꞌ gulé̱ꞌe̱ le̱ꞌ:
\p ―¡Gunné̱ da li lau Dios! Nézentuꞌ naca benneꞌ nigá benneꞌ dul-la.
\p
\v 25 Le̱ꞌ beche̱be̱ꞌ:
\p ―Quebe nezdaꞌ che naque̱ꞌ benneꞌ dul-la, che cabí. Tuze da nezdaꞌ. Nedaꞌ gucaꞌ la chul-la, naꞌ naꞌa dxeléꞌedaꞌ.
\p
\v 26 Naꞌ buluché̱bequeze̱ꞌ le̱ꞌ:
\p ―¿Bizra be̱ne̱ꞌ chiuꞌ? ¿Ájazra be̱ne̱ꞌ chee̱ bexune̱ꞌ xiaj lauꞌ?
\p
\v 27 Naꞌ beche̱be bénneaꞌ:
\p ―Ba guchaꞌ leꞌe, ne quebe dxénele chiaꞌ. ¿Bizr chee̱ naꞌ dxaca lázrele nniaꞌ xetú? ¿Cáꞌanqueze leꞌe dxaca lázrele gácale Le̱ꞌ tuze?
\p
\v 28 Nadxa benneꞌ judío caꞌ gulenné̱ꞌ schanniꞌ chee̱ bénneaꞌ guque̱ꞌ la chul-la, dxelenné̱ꞌ:
\p ―Lueꞌ daꞌu bénneaꞌ, naꞌ netuꞌ daꞌntuꞌ Moisés.
\v 29 Netuꞌ nézentuꞌ Dios bchálajle̱ne̱ꞌ Moisés. Quebe nézentuꞌ ga benneꞌ benneꞌ nigá.
\p
\v 30 Nadxa bénneaꞌ beche̱be̱ꞌ:
\p ―Da nigá naca na da dxebánedaꞌ. Leꞌe quebe nézele ga bénneaꞌ, naꞌ bexune̱ꞌ xiaj lawaꞌ.
\v 31 Nézquezdxu Dios quebe dxenne̱ꞌ chee̱ benneꞌ dul-la. Tuze dxenne̱ꞌ chee̱ benneꞌ caꞌ dxulucáꞌana szrene̱ꞌ Le̱ꞌ, ne dxelune̱ꞌ ca da dxaca lazreꞌ Le̱ꞌ.
\v 32 Quebe ne xendxu che nu benneꞌ xexune̱ꞌ tu benneꞌ gúlaje̱ꞌ la chul-la.
\v 33 Chela benneꞌ nigá quebe naque̱ꞌ chee̱ Dios, quebe gaca bi gune̱ꞌ.
\p
\v 34 Nadxa gulé̱ꞌe̱ le̱ꞌ:
\p ―Ca gúlajquezuꞌ dxuléꞌe na nabaguꞌ dul-la. Naꞌa, ¿dxaca lazruꞌ guzéajniꞌinuꞌ netuꞌ?
\p Nadxa belexebéaje̱ꞌ le̱ꞌ lu xuꞌu naꞌ.
\s Benneꞌ zaj naque̱ꞌ la chul-la lu xichaj lázrdawe̱ꞌ
\p
\v 35 Jesús benne̱ꞌ belexebéaje̱ꞌ bénneaꞌ guque̱ꞌ la chul-la, naꞌ gate bezrague̱ꞌ le̱ꞌ, guzre̱ꞌ le̱ꞌ:
\p ―¿Dxéajle̱ꞌu lueꞌ chee̱ Zriꞌine Dios?
\p
\v 36 Benneꞌ naꞌ guzre̱ꞌ Jesús:
\p ―Xran, guzre nedaꞌ Nu naꞌ, chee̱ chéajle̱ꞌa chee̱ꞌ.
\p
\v 37 Beche̱be Jesús:
\p ―Ba bléꞌequeznuꞌ Le̱ꞌ. Nedaꞌ, dxuchálajle̱naꞌ lueꞌ nacaꞌ Bénneaꞌ.
\p
\v 38 Nadxa benneꞌ naꞌ bzu zribe̱ꞌ lau Jesús, naꞌ gunné̱ꞌ:
\p ―Dxéajle̱ꞌa chiuꞌ, Xran.
\p
\v 39 Nadxa gunná Jesús:
\p ―Nedaꞌ blaꞌa lu xe̱zr la xu nigá chee̱ guchiꞌa ca da dxelún bénneache, chee̱ xeleléꞌe la chul-la caꞌ, ne chee̱ xelexaca ca la chul-la benneꞌ caꞌ dxelenné̱ꞌ dxeleléꞌene̱ꞌ.
\p
\v 40 Nadxa bal-la benneꞌ fariseo caꞌ, benneꞌ zaj zre̱ꞌe̱ nen Jesús, gate belenne̱ꞌ da nigá gunná Jesús, buluche̱be̱ꞌ Le̱ꞌ:
\p ―¿Cáꞌanqueze netuꞌ nácantuꞌ la chul-la?
\p
\v 41 Jesús beche̱be̱ꞌ:
\p ―Chela nácale leꞌe la chul-la quebe nabágale ca naca dul-la da be̱nle. Dxennale dxeléꞌele, naꞌ chee̱ le̱ naꞌ nabágale dul-la.
\c 10
\s Dxuchalaj Jesús da dxuléꞌe na ca naca chee̱ leꞌaj chee̱ zrilaꞌ caꞌ
\p
\v 1 Naꞌ gunná Jesús:
\p ―Da li dxapaꞌ leꞌe, bénneaꞌ quebe dxuꞌe̱ dxuꞌa dxa xuꞌu chee̱ leꞌaj chee̱ zrilaꞌ caꞌ, naꞌ dxuꞌe̱ naga xula, naque̱ꞌ gubán, ne tu dxebánzqueze̱ꞌ.
\v 2 Bénneaꞌ dxuꞌe̱ dxuꞌa dxa xuꞌu naꞌ naque̱ꞌ benneꞌ dxuxúequeze̱ꞌ zrilaꞌ caꞌ.
\v 3 Bénneaꞌ zue̱ꞌ dxuꞌa dxa xuꞌu dxesálaje̱ꞌ chee̱ chuꞌu bénneaꞌ dxuxúequeze̱ꞌ-baꞌ, naꞌ zrilaꞌ caꞌ dxelexúnbeabaꞌ chiꞌe̱. Benneꞌ nigá dxuꞌe̱ la tu tu zrilaꞌ caꞌ, ne dxebéaje̱ꞌ-baꞌ lu leꞌaj chee̱baꞌ.
\v 4 Ca dxedé dxebéaje̱ꞌ xúgute̱baꞌ, naꞌ dxebía lawe̱ꞌ laubaꞌ, naꞌ zrilaꞌ caꞌ zjácale̱baꞌ Le̱ꞌ, laweꞌ da dxelexúnbeabaꞌ chiꞌe̱.
\v 5 Quebe zjácale̱baꞌ tu benneꞌ quebe zaj núnbeabaꞌ. Dxuluzrúnnujbaꞌ lau benneꞌ naꞌ laweꞌ da quebe dxelexúnbeabaꞌ chiꞌi benneꞌ quebe zaj núnbeabaꞌ.
\p
\v 6 Bchálajle̱ Jesús benneꞌ caꞌ da dxuléꞌe nigá, naꞌ benneꞌ caꞌ quebe guléajniꞌine̱ꞌ bi zéaje̱ da guzre Jesús le̱ꞌ.
\s Jesús naque̱ꞌ benneꞌ chaweꞌ dxuxúe̱ꞌ zrilaꞌ caꞌ
\p
\v 7 Nadxa Jesús guzre̱ꞌ benneꞌ caꞌ da xula:
\p ―Da li dxapaꞌ leꞌe, nedaꞌ nacaꞌ dxa xuꞌu naga dxelúꞌu bénneache zaj naque̱ꞌ ca zrilaꞌ chiaꞌ caꞌ.
\v 8 Xúgute̱ benneꞌ dxuluxúe̱ꞌ zrilaꞌ, benneꞌ belelé̱ꞌe̱ nédxudxa ca nedaꞌ, gulaque̱ꞌ gubán, ne tu gulebánzqueze̱ꞌ. Zrilaꞌ caꞌ quebe belénebaꞌ chee̱ benneꞌ caꞌ.
\v 9 Nedaꞌ nacaꞌ dxa xuꞌu. Bénneaꞌ chuꞌe̱ ne̱ chiaꞌ nedaꞌ, láqueze bénneaꞌ. Gaque̱ꞌ ca tu zrilaꞌ dxuꞌubaꞌ, ne dxuajbaꞌ leꞌaj chee̱baꞌ, naꞌ dxezrélebaꞌ zríe̱du dxágubaꞌ.
\p
\v 10 ’Benneꞌ gubán ze̱ꞌe̱ tuze chee̱ cuane̱ꞌ-baꞌ, ne chee̱ gútete̱ꞌ-ba, ne chee̱ guzría xiꞌte̱ꞌ-baꞌ. Nedaꞌ blaꞌa chee̱ gápale xel-laꞌ nabán, ne chee̱ gapa xánnele na.
\v 11 Nedaꞌ nacaꞌ benneꞌ chaweꞌ dxuxúaꞌ zrilaꞌ caꞌ. Benneꞌ chaweꞌ dxuxúe̱ꞌ zrilaꞌ caꞌ dxuzúe̱ꞌ xel-laꞌ nabán chee̱ꞌ chee̱ guselé̱ꞌ zrilaꞌ caꞌ.
\v 12 Benneꞌ dxuxúe̱ꞌ-baꞌ laweꞌ da dxeziꞌe̱ lazruj, gate dxeléꞌene̱ꞌ za becuꞌ xiꞌa, naꞌ dxusane̱ꞌ zrilaꞌ caꞌ, ne dxuzrúnnuje̱ꞌ, laweꞌ da quebe nácaqueze̱ꞌ benneꞌ dxuxúe̱ꞌ le̱baꞌ, naꞌ zrilaꞌ caꞌ quebe zaj nácabaꞌ be̱ cheé̱zqueze̱ꞌ.
\v 13 Benneꞌ nigá dxuzrúnnuje̱ꞌ laweꞌ da dxunze̱ꞌ zrin chee̱ siꞌe̱ lázruje̱ꞌ, naꞌ quebe dxeꞌe̱ gunne xue chee̱baꞌ.
\p
\v 14-15 ’Nedaꞌ nacaꞌ benneꞌ chaweꞌ dxuxúaꞌ zrilaꞌ caꞌ. Cáte̱ze núnbea Xraꞌ nedaꞌ, naꞌ nedaꞌ núnbeꞌa Xraꞌ, cáꞌanqueze nedaꞌ núnbeꞌa zrilaꞌ chiaꞌ caꞌ, naꞌ le̱baꞌ zaj núnbeabaꞌ nedaꞌ. Nedaꞌ dxuzúaꞌ xel-laꞌ nabán chiaꞌ chee̱ guseláꞌ zrilaꞌ caꞌ.
\v 16 Cáꞌanqueze zaj zraꞌ zrilaꞌ chiaꞌ quebe zaj zrabaꞌ lu leꞌaj nigá. Dxal-laꞌ cheajxexriꞌa-baꞌ. Zrilaꞌ caꞌ xelunbaꞌ ca dxenná xrtizraꞌ, ne xelácabaꞌ tu cueze, naꞌ tuze benneꞌ guxúe̱ꞌ le̱baꞌ.
\p
\v 17 ’Xraꞌ nazríꞌine̱ꞌ nedaꞌ laweꞌ da dxuzúaꞌ xel-laꞌ nabán chiaꞌ, naꞌ xecáꞌa na.
\v 18 Quebe nu sequeꞌ cua xel-laꞌ nabán chiaꞌ. Nedaꞌ xuzúaꞌ na cáte̱ze dxaca lázrequezaꞌ nedaꞌ. Napaꞌ xel-laꞌ dxenná bea guzúaꞌ na, ne chee̱ xecáꞌa na. Da nigá naca na da gunná beꞌe Xraꞌ nedaꞌ gunaꞌ.
\p
\v 19 Gate benneꞌ judío caꞌ belenne̱ꞌ dizraꞌ caní, naꞌ gulaque̱ꞌ chupa laꞌa xetú.
\v 20 Benneꞌ zan benneꞌ caꞌ gulenné̱ꞌ:
\p ―¿Bizr chee̱ naꞌ dxuzé̱ nágale chee̱ benneꞌ nigá? Xuꞌe̱ beꞌ xriwe̱ꞌ, ne nadá xichaj lázrdawe̱ꞌ.
\p
\v 21 Xebal-le̱ꞌ gulenné̱ꞌ:
\p ―Tu benneꞌ xuꞌe̱ beꞌ xriwe̱ꞌ quebe séquene̱ꞌ guchálaje̱ꞌ caní. ¿Waca tu beꞌ xriwe̱ꞌ xexún na xiaj lau tu benneꞌ la chul-la?
\s Dxuluzúa benneꞌ judío caꞌ Jesús chaláꞌala
\p
\v 22 Naca na beuꞌ zaga, naꞌ lu xe̱zre Jerusalén zaj zue̱ꞌ laní gate dxulusá lazre̱ꞌ ca guca gate gulegúꞌe̱ xudauꞌ naꞌ lu naꞌ Dios.
\v 23 Jesús dxedé̱ꞌ chaleꞌaj xudauꞌ naꞌ naga naca lachila chee̱ Salomón.
\v 24 Nadxa benneꞌ judío caꞌ guléchaje̱ꞌ Le̱ꞌ, ne gulé̱ꞌe̱ Le̱ꞌ:
\p ―¿Bátalaqueze québedxa gunuꞌ lueꞌ chupa lázrentuꞌ? Che lueꞌ nacuꞌ Cristo, Bénneaꞌ sel-la Dios, gunnáte̱gala.
\p
\v 25 Beche̱be Jesús:
\p ―Ba guchaꞌ leꞌe, naꞌ quebe guxéajle̱le chiaꞌ. Ca naca da dxunaꞌ nedaꞌ, ne dxuchínedaꞌ xel-laꞌ dxenná bea chee̱ Xraꞌ, dxululéꞌe na nu nacaꞌ nedaꞌ.
\v 26 Leꞌe quebe dxéajle̱le chiaꞌ laweꞌ da quebe nácale zrilaꞌ chiaꞌ, ca ba guchaꞌ leꞌe nédxula.
\v 27 Zrilaꞌ chiaꞌ dxelexúnbeabaꞌ chiꞌa, naꞌ nedaꞌ núnbeꞌa-baꞌ, naꞌ le̱baꞌ dxelaubaꞌ nedaꞌ.
\v 28 Benneꞌ zaj naque̱ꞌ zrilaꞌ chiaꞌ, dxunézrujaꞌ chee̱ benneꞌ caꞌ xel-laꞌ nabán da zeajlí canna, ne cabátaꞌquezdxa xelebía xiꞌe̱, naꞌ quebe nu sequeꞌ xecáꞌa le̱ꞌ lu naꞌa nedaꞌ.
\v 29 Xraꞌ be̱nne̱ꞌ nedaꞌ benneꞌ caní, naꞌ Le̱ꞌ nácadxe̱ꞌ szren ca xúgute̱ bénneache, naꞌ quebe nu sequeꞌ xecáꞌa benneꞌ caꞌ lu naꞌ Xraꞌ.
\v 30 Nedaꞌ, ne Xraꞌ tuze nácantuꞌ.
\p
\v 31 Nadxa benneꞌ judío caꞌ gulequé̱ꞌe̱ xiaj xetú chee̱ xelútie̱ꞌ Jesús.
\v 32 Nadxa Jesús guzre̱ꞌ benneꞌ caꞌ:
\p ―Ba bé̱nquezaꞌ da zan da chaweꞌ laule leꞌe, dxuchínedaꞌ xel-laꞌ waca chee̱ Xraꞌ. ¿Nula chee̱ da chaweꞌ caní güele nedaꞌ xiaj?
\p
\v 33 Belexeche̱be benneꞌ judío caꞌ:
\p ―Quebe güentuꞌ lueꞌ xiaj laweꞌ da nunuꞌ da chaweꞌ. Dxuntuꞌ na laweꞌ da gunnéuꞌ schanniꞌ chee̱ Dios. Lueꞌ nacuꞌ bénneache, naꞌ dxun cuinuꞌ Dios.
\p
\v 34 Nadxa Jesús guzre̱ꞌ benneꞌ caꞌ:
\p ―Lu da nadxixruj bea chee̱le leꞌe naxúaj xrtizraꞌ Dios, dxenná na: Leꞌe nácale dios caꞌ.
\v 35 Quebe gaca tábagadxu ca da naxúaj na lu xiche chee̱ Dios, naꞌ Diósqueze̱ꞌ gunné̱ꞌ chee̱ benneꞌ caꞌ gulezíꞌe̱ xrtizre̱ꞌ zaj naque̱ꞌ dios caꞌ.
\v 36 Che Dios bzue̱ꞌ nedaꞌ, ne gusél-le̱ꞌ nedaꞌ lu xe̱zr la xu nigá, ¿bizr chee̱ naꞌ dxennale leꞌe gunnéaꞌ schanniꞌ chee̱ Dios laweꞌ da gunnéaꞌ nacaꞌ Zriꞌine Dios?
\v 37 Che quebe dxunaꞌ ca naca da dxun Xraꞌ, quebe chéajle̱le chiaꞌ.
\v 38 Che dxunaꞌ na, lácala quebe dxéajle̱le chiaꞌ ne̱ chee̱ da dxennéaꞌ, le chéajle̱ chiaꞌ ne̱ chee̱ da caꞌ dxunaꞌ, chee̱ nézele Xraꞌ zúale̱ne̱ꞌ nedaꞌ, naꞌ nedaꞌ zúale̱naꞌ Xraꞌ.
\p
\v 39 Xetú lasa gulaca lazre̱ꞌ xele̱l-le̱ꞌ Jesús, naꞌ Le̱ꞌ gulé̱ꞌ lu naꞌ benneꞌ caꞌ.
\p
\v 40 Nadxa bezrín Jesús dxuꞌa xe̱gu Jordán chaláꞌa naga dxalaj gubizra, naꞌ begáꞌane̱ꞌ naꞌ, naga guzúa Juan nédxute̱ dxuchúe̱ꞌ bénneache nisa.
\v 41 Benneꞌ zan xjaque̱ꞌ xeajlenné̱ꞌe̱ Jesús, naꞌ gulenné̱ꞌ:
\p ―Juan, da li quebe bi xel-laꞌ waca zren be̱ne̱ꞌ, naꞌ xúgute̱ da gunné̱ꞌ ca naca chee̱ benneꞌ nigá naca na da li.
\p
\v 42 Benneꞌ zan guléajle̱ꞌe̱ chee̱ Jesús lataj naꞌ.
\c 11
\s Ca guca gate gute Lázaro
\p
\v 1 Zua tu benneꞌ dxéꞌene̱ꞌ le̱ꞌ Lázaro, benneꞌ xe̱zre Betania, da naca na lazre María, ne bi bile̱ꞌ le̱ꞌ Marta.
\v 2 María nigá, bi zan Lázaro, benneꞌ dxéꞌene̱ꞌ naꞌ, naque̱ꞌ nuꞌula naꞌ guluꞌe̱ niꞌa Jesús da naꞌ dxelále̱ꞌe̱ zixre, ne bsebizre̱ꞌ na nen xicha xíchaje̱ꞌ.
\v 3 Dxúpate̱ nuꞌula caní gulesel-le̱ꞌ benneꞌ xeaje̱zre̱ꞌ Jesús:
\p ―Xran, bénneaꞌ nazríꞌinuꞌ quebe chaweꞌ zue̱ꞌ.
\p
\v 4 Ca ben Jesús da nigá, naꞌ gunné̱ꞌ:
\p ―Da dxéꞌene̱ꞌ quebe naca na da gútete̱ na le̱ꞌ. Naca na chee̱ guléꞌe lau na xel-laꞌ szren chee̱ Dios, ne cáꞌanqueze chee̱ guléꞌe lau na xel-laꞌ szren chiaꞌ nedaꞌ, Zriꞌine Dios, ne̱ chee̱ xel-laꞌ we̱ꞌ naꞌ.
\p
\v 5 Lácala nazríꞌi Jesús Marta, ne bi bile̱ꞌ, ne Lázaro,
\v 6 gate benne̱ꞌ quebe chaweꞌ zua Lázaro naꞌ, begáꞌane̱ꞌ naga zue̱ꞌ xechupa zra.
\v 7 Ca gudé naꞌ guzre̱ꞌ benneꞌ caꞌ dxusé̱dene̱ꞌ:
\p ―Le chuꞌu naga nababa Judea xetú.
\p
\v 8 Nadxa benneꞌ caꞌ gulé̱ꞌe̱ Le̱ꞌ:
\p ―Benneꞌ Wese̱de, náꞌasca benneꞌ judío caꞌ zaj zre̱ꞌe̱ naꞌ gulaca lazre̱ꞌ xelútie̱ꞌ Lueꞌ nen xiaj. ¿Dxaca lazruꞌ chéajuꞌ naꞌ xetú?
\p
\v 9 Jesús guzre̱ꞌ benneꞌ caꞌ:
\p ―¿Quebe nun Dios dute̱ te zra gate dxelún bénneache zrin? Che nu benneꞌ dxedé̱ꞌ te zra, quebe cheajchazie̱ꞌ lu da ste̱be laweꞌ da dxeléꞌene̱ꞌ xel-laꞌ naxaníꞌ da nuzúa Dios lu xe̱zr la xu nigá.
\v 10 Che nu benneꞌ dxedé̱ꞌ chizrela, dxechégüe̱ꞌ laweꞌ da quebe zúale̱ xel-laꞌ naxaníꞌ le̱ꞌ.
\p
\v 11 Ca gudé naꞌ guzre Jesús benneꞌ caꞌ:
\p ―Benneꞌ ljwézredxu Lázaro ba dxásie̱ꞌ. Chaꞌa nedaꞌ cheajsebanaꞌ le̱ꞌ.
\p
\v 12 Nadxa benneꞌ caꞌ gulé̱ꞌe̱ Jesús:
\p ―Xran, che dxásie̱ꞌ, wexaque̱ꞌ.
\p
\v 13 Da nigá da gunná Jesús zéaje̱ na ba gute Lázaro. Benneꞌ caꞌ dxusé̱dene̱ꞌ guléquene̱ꞌ gunná Jesús dxáseze̱ꞌ.
\v 14 Nadxa Jesús bzéajniꞌine̱ꞌ benneꞌ caꞌ, gunné̱ꞌ:
\p ―Ba gútequeze Lázaro.
\v 15 Dxebedaꞌ laweꞌ da quebe zuaꞌ naꞌ. Caní gácadxa chaweꞌ chee̱le leꞌe, chee̱ chéajle̱le chiaꞌ. Le chuꞌu cheajnnadxu Lázaro.
\p
\v 16 Nadxa Tomás, bénneaꞌ lé̱queze̱ꞌ bilideꞌ, guzre̱ꞌ xezícala benneꞌ caꞌ:
\p ―Le chúꞌuqueze dxiꞌu chee̱ gátedxu tu zren nen Jesús.
\s Jesús naque̱ꞌ benneꞌ dxusebane̱ꞌ benneꞌ gate caꞌ, ne benneꞌ dxunne̱ꞌ dxiꞌu xel-laꞌ nabán li lazreꞌ
\p
\v 17 Gate belezrine̱ꞌ xe̱zre Betania, naꞌ bene Jesús gudapa zra bulucache̱ꞌ Lázaro.
\v 18 Betania dxeꞌ na gáguze naga dxeꞌ Jerusalén, ca cadite sadxu tu chíꞌidauꞌze zrindxu naꞌ,
\v 19 naꞌ benneꞌ zan benneꞌ judío caꞌ xjaque̱ꞌ xeajlenné̱ꞌe̱ Marta ne María, naꞌ xulunézruje̱ꞌ le̱ꞌ xel-laꞌ zren lazreꞌ laweꞌ da gute bi zane̱ꞌ.
\v 20 Gate ben Marta ba zaꞌ Jesús, naꞌ guzé̱ꞌe̱ zeajxrígale̱ꞌ Le̱ꞌ, naꞌ María begáꞌane̱ꞌ xuꞌu.
\v 21 Marta guzre̱ꞌ Jesús:
\p ―Xran, chela zuꞌ nigá, quebe gute bi zanaꞌ.
\v 22 Nedaꞌ nezdaꞌ Dios gunne̱ꞌ Lueꞌ bítete̱ze da nabuꞌ.
\p
\v 23 Jesús gunné̱ꞌ:
\p ―Webán bi zanuꞌ.
\p
\v 24 Nadxa Marta guzre̱ꞌ Le̱ꞌ:
\p ―Nezdaꞌ webane̱ꞌ lu zra xelexebán benneꞌ gate caꞌ, zra bze̱be naꞌ.
\p
\v 25 Nadxa gunná Jesús:
\p ―Nedaꞌ nacaꞌ benneꞌ dxusebáne̱ꞌ benneꞌ gate caꞌ, ne benneꞌ dxunne̱ꞌ xel-laꞌ nabán li lazreꞌ. Nu benneꞌ dxéajle̱ꞌe̱ chiaꞌ, lácala gatie̱ꞌ, webane̱ꞌ,
\v 26 naꞌ xúgute̱ benneꞌ zaj naca bane̱ꞌ, ne dxeléajle̱ꞌe̱ chiaꞌ, québequeze xelatie̱ꞌ tu chiꞌize. ¿Dxéajle̱ꞌu da nigá?
\p
\v 27 Marta guzre̱ꞌ Jesús:
\p ―Aweꞌ, Xran. Nedaꞌ dxéajle̱ꞌa nacuꞌ Cristo, Zriꞌine Dios, Bénneaꞌ guche̱be lazreꞌ Dios sel-le̱ꞌ.
\s Jesús dxebezre̱ꞌ laweꞌ da zaj zua baxacheꞌ nuꞌula caꞌ
\p
\v 28 Ca gudé gunná Marta da nigá, naꞌ guxíaje̱ꞌ xeajzenne̱ꞌ bi bile̱ꞌ María, naꞌ guzre̱ꞌ le̱ꞌ zrize:
\p ―Ba blaꞌ Benneꞌ dxuse̱de, ne dxenné̱ꞌ lueꞌ.
\p
\v 29 Ca ben María da nigá, naꞌ guxase̱ꞌ guzé̱ꞌe̱, xeajnné̱ꞌe̱ Jesús.
\v 30 Jesús quebe ne chuꞌe̱ xe̱zre naꞌ, naꞌ zue̱ꞌ naga bezraga Marta Le̱ꞌ.
\v 31 Benneꞌ judío caꞌ zaj zraꞌ xuꞌu naꞌ dxulunézruje̱ꞌ María xel-laꞌ zren lazreꞌ, gate beleléꞌene̱ꞌ guxasa María, ne chadí bdxúaje̱ꞌ, naꞌ xjácale̱ benneꞌ caní le̱ꞌ, dxeléquene̱ꞌ zéaje̱ꞌ dxuꞌa ba zeajchezre̱ꞌ naꞌ.
\p
\v 32 Gate bzrin María naga zua Jesús, naꞌ bzu zribe̱ꞌ zran niꞌa Jesús, gunné̱ꞌ:
\p ―Xran, chela zuꞌ nigá, quebe gute bi zanaꞌ.
\p
\v 33 Gate bleꞌe Jesús dxebezre María, ne cáꞌanqueze dxelebezre judío caꞌ, benneꞌ zjácale̱ne̱ꞌ María, naꞌ bexíajele̱ꞌe̱ne̱ꞌ, ne guzúe̱ꞌ ste̱be lu lázrdawe̱ꞌ.
\v 34 Naꞌ bche̱be̱ꞌ benneꞌ caꞌ:
\p ―¿Ga bcáchele bénneaꞌ?
\p Naꞌ gulé̱ꞌe̱ Le̱ꞌ:
\p ―Xran, gudá leꞌenuꞌ.
\p
\v 35 Naꞌ gudxezre Jesús.
\v 36 Nadxa gulenná benneꞌ judío caꞌ:
\p ―Le nnaꞌxque cátite̱ nazríꞌine̱ꞌ le̱ꞌ.
\p
\v 37 Bal-la benneꞌ caꞌ gulenné̱ꞌ:
\p ―Benneꞌ nigá bexune̱ꞌ benneꞌ la chul-la. La zue̱ꞌ nigá, ¿quebe guzéquene̱ꞌ ájala gune̱ꞌ chee̱ quebe gute Lázaro?
\s Jesús dxusebane̱ꞌ Lázaro
\p
\v 38 Jesús guzúe̱ꞌ ste̱be xetú, naꞌ bzrine̱ꞌ dxuꞌa ba. Ba naꞌ naca na tu bluaj, naꞌ daꞌ tu xiaj taꞌa dxuꞌe na.
\v 39 Gunná Jesús:
\p ―Le xecáꞌa xiaj nigá.
\p Marta, bi zan benneꞌ gate naꞌ guzre̱ꞌ Jesús:
\p ―Xran, ba dxelá bénneaꞌ tula, laweꞌ da ba guca tapa zra naꞌa gutie̱ꞌ.
\p
\v 40 Naꞌ Jesús gunné̱ꞌ:
\p ―¿Quebe guchaꞌ lueꞌ che chéajle̱ꞌu chiaꞌ, waléꞌenuꞌ xel-laꞌ szren chee̱ Dios?
\p
\v 41 Nadxa belexequé̱ꞌe̱ xiaj taꞌa naꞌ. Jesús guné̱ꞌe̱ xabáa, gunné̱ꞌ:
\p ―Xrae, dxapaꞌ Lueꞌ: “Xcalenuꞌ” laweꞌ da ba bennuꞌ chiaꞌ.
\v 42 Nedaꞌ nezdaꞌ tu dxénzquezenuꞌ chiaꞌ. Dxennéaꞌ da nigá chee̱ gaca tu da ba neza chee̱ benneꞌ caní, chee̱ xeléajle̱ꞌe̱ chiuꞌ nasel-luꞌ nedaꞌ.
\p
\v 43 Ca gudé gunné̱ꞌ da nigá, naꞌ gunné̱ꞌ zizraj:
\p ―¡Lázaro, bedxúaj nigá!
\p
\v 44 Bedxúaj benneꞌ gate naꞌ, nadxéaj niꞌa ne̱ꞌe̱ nen ládxeꞌdauꞌ da buluchele̱ꞌ niꞌa ne̱ꞌe̱, naꞌ lawe̱ꞌ dxela na ladxeꞌ. Jesús guzre̱ꞌ benneꞌ caꞌ:
\p ―Le xese̱zre̱ꞌ, ne le gusane̱ꞌ xexíaje̱ꞌ.
\s Benneꞌ dxeledábague̱ꞌ Jesús dxelune̱ꞌ tuze dizraꞌ xele̱l-le̱ꞌ Le̱ꞌ
\r (Mt. 26.1-5; Mr. 14.1-2; Lc. 22.1-2)
\p
\v 45 Nadxa guléajle̱ benneꞌ zan chee̱ Jesús, benneꞌ judío caꞌ xjácale̱ María, ne beleléꞌene̱ꞌ ca da be̱n Jesús.
\v 46 Bal-la benneꞌ caꞌ xjaque̱ꞌ xeajlechálajle̱ne̱ꞌ benneꞌ fariseo caꞌ, naꞌ buluzenne̱ꞌ le̱ꞌ ca da be̱n Jesús.
\v 47 Nadxa fariseo caꞌ, ne benneꞌ xíchaje̱ caꞌ chee̱ bxruze caꞌ belezrague̱ꞌ nen benneꞌ xuꞌu laweꞌ blau chee̱ judío caꞌ, naꞌ gulenné̱ꞌ:
\p ―¿Ájazra gundxu? Benneꞌ nigá dxúnle̱ꞌe̱ xel-laꞌ waca da za xabáa.
\v 48 Che caꞌ güedxu Le̱ꞌ lataj, xúgute̱ bénneache xeleajlé̱ꞌe̱ chee̱ꞌ chee̱ xuluzúe̱ꞌ Le̱ꞌ ca wenná bea, naꞌ xeleláꞌ benneꞌ Roma caꞌ, benneꞌ zjaque̱ꞌ wedil-la, naꞌ xuluzría xiꞌe̱ xudauꞌ chee̱dxu, ne xe̱zr la xu chee̱dxu.
\p
\v 49 Nadxa tu benneꞌ le̱ꞌ Caifás, bxruze blau iza naꞌ, guzre̱ꞌ benneꞌ caꞌ:
\p ―Leꞌe québequeze bi nézele,
\v 50 ne quebe dxeque beꞌele gácadxa chaweꞌ chee̱dxu gateꞌ tuze benneꞌ ne̱ chee̱ xe̱zre nigá, ne quegala ca naca xe̱zr la xu nigá cuía xi na.
\p
\v 51 (Quegá gunná Caifás da nigá cheé̱zqueze̱ꞌ. Laweꞌ da naque̱ꞌ bxruze blau iza naꞌ, bchálaje̱ꞌ waláz chee̱ Dios, gunné̱ꞌ gateꞌ Jesús ne̱ chee̱ xe̱zr la xu judío.
\v 52 Quegá gatie̱ꞌ tuze ne̱ chee̱ xe̱zr la xu naze. Cáꞌanqueze chee̱ xutupe̱ꞌ lu naꞌ Dios xúgute̱ benneꞌ zaj naque̱ꞌ chee̱ Dios, benneꞌ zaj nase dínnaje̱ꞌ, benneꞌ caꞌ zaj nababe̱ꞌ xúgute̱ cueꞌ xe̱zr la xu.)
\v 53 Caꞌan guca, ca lu zra naꞌte̱ benneꞌ judío wenná bea caꞌ belune̱ꞌ tuze dizraꞌ xelútie̱ꞌ Jesús.
\p
\v 54 Chee̱ le̱ naꞌ Jesús québedxa gudé̱ꞌ naga zaj zraꞌ benneꞌ wenná bea caꞌ chee̱ judío caꞌ, naꞌ guzé̱ꞌe̱ naga nababa Judea, naꞌ guxíaje̱ꞌ xe̱zre Efraín naga zua gáguze tu le̱ꞌe̱ xixreꞌ laweꞌ lataj. Begáꞌane̱ꞌ xe̱zre naꞌ nen benneꞌ caꞌ dxusé̱dene̱ꞌ.
\p
\v 55 Ba zua gáguze zrin Laní Pascua chee̱ judío caꞌ, naꞌ benneꞌ zan chee̱ xe̱zre caꞌ xjaque̱ꞌ Jerusalén chee̱ xulucáꞌana chaweꞌ cuine̱ꞌ nédxudxa ca zrin Laní Pascua.
\v 56 Guledé̱ꞌ dxelexílaje̱ꞌ Jesús, naꞌ gate zaj zre̱ꞌe̱ chaleꞌaj xudauꞌ naꞌ, buluche̱be ljwezre̱ꞌ:
\p ―¿ꞌAjazra dxéquele? ¿Wide̱ꞌ laní, che quebe xide̱ꞌ?
\p
\v 57 Benneꞌ fariseo caꞌ, ne benneꞌ xíchaje̱ caꞌ chee̱ bxruze caꞌ ba gulebéaje̱ꞌ dizraꞌ che nu benneꞌ caꞌ nézene̱ꞌ ga zua Jesús, naꞌ xelé̱ꞌe̱ benneꞌ caꞌ chee̱ gaca xele̱l-le̱ꞌ Le̱ꞌ.
\c 12
\s María dxuguꞌe̱ da dxelá zixre niꞌa Jesús
\r (Mt. 26.6-13; Mr. 14.3-9)
\p
\v 1 Xrupa zra nédxudxa gate za chuꞌu Laní Pascua chee̱ judío caꞌ, guxíaj Jesús xe̱zre Betania naga zua Lázaro, bénneaꞌ bsebán Jesús ládujla benneꞌ gateꞌ.
\v 2 Lu xe̱zre naꞌ belune̱ꞌ tu xrcheꞌ, chee̱ gulape̱ꞌ ba láꞌana Jesús. Marta bdee̱ꞌ xel-laꞌ wagu, naꞌ Lázaro dxéꞌle̱ne̱ꞌ benneꞌ caꞌ dxelágule̱ne̱ꞌ Jesús.
\v 3 Nadxa María guqué̱ꞌe̱ tu xia da za da dxelále̱ꞌe̱ zixre, da naca na chee̱ dusén lase, da zácale̱ꞌe̱ na, naꞌ guluꞌe̱ da za naꞌ niꞌa Jesús, ne bsebizre̱ꞌ na nen xicha xíchaje̱ꞌ. Ca naca benneꞌ zaj zraꞌ xuꞌu naꞌ guleléꞌene̱ꞌ ca dxelá da zixre naꞌ.
\v 4 Nadxa Judas Iscariote, zriꞌine Simón, tu benneꞌ caꞌ dxuse̱de Jesús, ne naque̱ꞌ bénneaꞌ gudée̱ꞌ Jesús lu naꞌ benneꞌ guledábague̱ꞌ Le̱ꞌ, gunné̱ꞌ:
\p
\v 5 ―¿Bizr chee̱ naꞌ quebe gudáꞌu da zixre naꞌ, naꞌ sidxu na dumí lazruj chee̱ chunna gaxúa zra chee̱ gácale̱dxu benneꞌ xacheꞌ caꞌ?
\p
\v 6 Quebe gunná Judas da nigá laweꞌ da dxeꞌe̱ gunne xue chee̱ benneꞌ xacheꞌ caꞌ. Naque̱ꞌ gubán, ne nuꞌe̱ bzude dumí chee̱ benneꞌ caꞌ dxuse̱de Jesús, ne dxebane̱ꞌ lateꞌ weaj dumí naꞌ da dxuluzré̱ꞌe̱ lu bzude naꞌ.
\v 7 Nadxa Jesús guzre̱ꞌ Judas naꞌ:
\p ―Be̱ lataj nuꞌula nigá laweꞌ da be̱ne̱ꞌ da nigá chee̱ dxucáꞌana chawe̱ꞌ nedaꞌ chee̱ gate xulucache̱ꞌ nedaꞌ lu xe̱dxu ba.
\v 8 Benneꞌ xacheꞌ caꞌ tu zrázqueze̱ꞌ ládujla leꞌe. Nedaꞌ quebe tu súazquezaꞌ nen leꞌe.
\s Dxelune̱ꞌ tuze dizraꞌ xelútie̱ꞌ Lázaro
\p
\v 9 Zaneꞌ benneꞌ judío caꞌ belenne̱ꞌ zua Jesús xe̱zre Betania, naꞌ xjaque̱ꞌ naꞌ, quegá tuze zeajlenné̱ꞌe̱ Jesús. Cáꞌanqueze zeajlenné̱ꞌe̱ Lázaro, bénneaꞌ bsebán Jesús ládujla benneꞌ gate caꞌ.
\v 10 Nadxa benneꞌ xíchaje̱ caꞌ chee̱ bxruze caꞌ belune̱ꞌ tuze dizraꞌ cáꞌanqueze xelútie̱ꞌ Lázaro,
\v 11 laweꞌ da ne̱ chee̱ Lázaro benneꞌ zan benneꞌ judío caꞌ dxelebéaj xíchaje̱ꞌ bxruze caꞌ chee̱ xeleajlé̱ꞌe̱ chee̱ Jesús.
\s Dxexúꞌu Jesús Jerusalén
\r (Mt. 21.1-11; Mr. 11.1-11; Lc. 19.28-40)
\p
\v 12 Benneꞌ zan ba zjaca Jerusalén, zjaque̱ꞌ Laní Pascua naꞌ, naꞌ zra xula belenne̱ꞌ ba zaꞌ Jesús lu xe̱zre naꞌ.
\v 13 Nadxa gulechugue̱ꞌ zinaꞌ, naꞌ xjaque̱ꞌ xeajlexrígale̱ꞌ Jesús, ne dxelenné̱ꞌ zizraj:
\p ―¡Gaca ba láꞌazxa Dios! ¡Ba neza zrente̱ naca na chee̱ Benneꞌ ze̱ꞌe̱ waláz chee̱ Xránadxu Dios! ¡Ba neza zrente̱ naca na chee̱ Wenná Bea chee̱ xe̱zre Israel!
\p
\v 14 Jesús xeajxraque̱ꞌ tu burro, naꞌ guzríe̱ꞌ-baꞌ, ca naxúaj na lu xiche chee̱ Dios, dxenná na:
\q
\v 15 Quebe zrébele leꞌe, benneꞌ zre̱ꞌe̱ xe̱zre Sión.
\q Le nnaꞌxque, ba zaꞌ Wenná Bea chee̱le.
\q Zrie̱ꞌ tu burro.
\p
\v 16 Nédxute̱ benneꞌ caꞌ dxuse̱de Jesús quebe guléajniꞌine̱ꞌ da naꞌ dxaca na. Ca gudé naꞌ, gate begáꞌana szren Jesús lau Dios, naꞌ xeajlesá lazre̱ꞌ xúgute̱ da caní zaj naxúaj na lu xiche chee̱ Dios ca naca chee̱ Jesús, naꞌ caꞌan guca chee̱ꞌ.
\p
\v 17 Benneꞌ caꞌ zaj zre̱ꞌe̱ nen Jesús gate gunné̱ꞌ Lázaro lu xe̱dxu ba, ne bsebane̱ꞌ le̱ꞌ ládujla benneꞌ gate, buluzenne̱ꞌ bénneache Jerusalén ca da guca naꞌ.
\v 18 Chee̱ le̱ naꞌ benneꞌ caní xeajlexrígale̱ꞌ Jesús laweꞌ da belenne̱ꞌ ca naca xel-laꞌ waca zrente̱ da be̱ne̱ꞌ.
\v 19 Nadxa benneꞌ fariseo caꞌ gulé̱ ljwezre̱ꞌ:
\p ―Ba dxeléꞌele quebe séquedxu bi gundxu. Ca naca bénneache dxelune̱ꞌ Le̱ꞌ tuze.
\s Dxelexilaj benneꞌ griego caꞌ Jesús
\p
\v 20 Zaj zraꞌ bal-la benneꞌ griego caꞌ ládujla benneꞌ caꞌ belezrine̱ꞌ Jerusalén chee̱ xulucáꞌana szrene̱ꞌ Dios lu laní naꞌ.
\v 21 Benneꞌ caní belezrine̱ꞌ lau Felipe, benneꞌ Betsaida chee̱ ga nababa Galilea, ne naque̱ꞌ Jesús tuze, naꞌ gulataꞌ xuene̱ꞌ le̱ꞌ, dxelenné̱ꞌ:
\p ―Benneꞌ, dxaca lázrentuꞌ leꞌentuꞌ Jesús.
\p
\v 22 Felipe guxíaje̱ꞌ xeaje̱zre̱ꞌ Andrés caní, naꞌ xjaca dxupe̱ꞌ xeajlegue̱zre̱ꞌ Jesús caꞌ.
\v 23 Nadxa Jesús guzre̱ꞌ benneꞌ dxupa caꞌ:
\p ―Ba bzrin zra xegáꞌana szrenaꞌ nedaꞌ, Benneꞌ Gulje̱ꞌ Bénneache.
\v 24 Da li dxapaꞌ leꞌe, tu binne zruaꞌ xtila wegáꞌana na tuze na che quebe xexruj na lu xu, ne gacu na xu. Che gacu na xu, naꞌ gunna na lina. Caní dxal-laꞌ gaca chiaꞌ nedaꞌ.
\v 25 Benneꞌ dxeꞌe̱ gunne xue gapa chiꞌe̱ xel-laꞌ nabán chee̱ꞌ gunitie̱ꞌ na. Bénneaꞌ dxuzúe̱ꞌ chaláꞌala xel-laꞌ nabán chee̱ꞌ lu xe̱zr la xu nigá, gapa chiꞌe̱ na, ne zruéꞌene̱ꞌ xel-laꞌ nabán da zeajlí canna.
\v 26 Che nu benneꞌ dxaca lazre̱ꞌ gune̱ꞌ zrin chiaꞌ, dxal-laꞌ gaque̱ꞌ nedaꞌ tuze, naꞌ gátete̱ze suaꞌ nedaꞌ, naꞌ súaqueze benneꞌ dxune̱ꞌ zrin chiaꞌ. Che nu benneꞌ dxune̱ꞌ zrin chiaꞌ, Xraꞌ gape̱ꞌ le̱ꞌ ba láꞌana.
\s Jesús dxuchálaje̱ꞌ ca gaca gate gatie̱ꞌ
\p
\v 27 Gunná Jesús:
\p ―Naꞌa sté̱bele̱ꞌe̱ zuaꞌ. ¿Bizra nniaꞌ? ¿Nniaꞌ: Xrae, bselá nedaꞌ lu da dxal-laꞌ gaca chiaꞌ naꞌa? Belájquezaꞌ chee̱ gaca chiaꞌ da caní.
\v 28 Xrae, bcaꞌana szren lauꞌ.
\p Nadxa ben tu chiꞌi benneꞌ dxenné̱ꞌ xabáa:
\p ―Ba bcaꞌana szrenaꞌ na, ne gucáꞌana szrenaꞌ na xetú.
\p
\v 29 Benneꞌ caꞌ zre̱ꞌe̱ naꞌ dxelenne̱ꞌ gulenné̱ꞌ guziuꞌ gunné̱. Xebal-le̱ꞌ gulenné̱ꞌ:
\p ―Tu gubáz chee̱ xabáa bchálajle̱ne̱ꞌ Le̱ꞌ.
\p
\v 30 Nadxa Jesús guzre̱ꞌ benneꞌ caꞌ:
\p ―Quegá gunné̱ chiꞌe̱ naꞌ ne̱ chiaꞌ nedaꞌ. Gunné̱ na ne̱ chee̱le leꞌe.
\v 31 Naꞌa ba bzrin zra guchiꞌa Dios chee̱ bénneache zre̱ꞌe̱ xe̱zr la xu nigá, naꞌ naꞌa cueaj Dios chaláꞌala da xriwe̱ꞌ, da naꞌ dxenná bea na lu xe̱zr la xu nigá, chee̱ québedxa nna bea na.
\v 32 Gate xelechise̱ꞌ nedaꞌ lu xe̱zr la xu nigá le̱ꞌe̱ xaga béguaj, naꞌ nedaꞌ nniaꞌ xúgute̱ bénneache chee̱ xelaque̱ꞌ nedaꞌ tuze.
\p
\v 33 Gate gunné̱ꞌ caní, bleꞌe Jesús ca gatie̱ꞌ.
\v 34 Nadxa benneꞌ zan caꞌ gulé̱ꞌe̱ Jesús:
\p ―Netuꞌ bénentuꞌ ca da naxúaj na lu xiche chee̱ da nadxixruj bea na da dxenná na waca bánqueze Cristo chadía chacanna. ¿Bizr chee̱ naꞌ dxennáuꞌ Benneꞌ Gulje̱ꞌ Bénneache xelechise̱ꞌ Le̱ꞌ? ¿Nuzra naꞌ Benneꞌ Gulje̱ꞌ Bénneache?
\p
\v 35 Nadxa Jesús guzre̱ꞌ benneꞌ caꞌ:
\p ―Xetú chíꞌidauze xel-laꞌ naxaníꞌ sua na ládujla leꞌe. Le ta naꞌa dxácate̱ ne zua xel-laꞌ naxaníꞌ nen leꞌe, chee̱ quebe xrínnele, laweꞌ da benneꞌ dxedé̱ꞌ lu da chul-la quebe nézene̱ꞌ ga zéaje̱ꞌ.
\v 36 Le cheajlé̱ chee̱ xel-laꞌ naxaníꞌ da nacaꞌ nedaꞌ dxácate̱ zua xel-laꞌ naxaníꞌ nen leꞌe, chee̱ gácale tuze xel-laꞌ naxaníꞌ naꞌ.
\p Ca gudé gunná Jesús da nigá, naꞌ bezé̱ꞌe̱ bcache cuine̱ꞌ lau benneꞌ caꞌ.
\s Benneꞌ judío caꞌ quebe dxeleajlé̱ꞌe̱ chee̱ Jesús
\p
\v 37 Lácala bleꞌe Jesús zaneꞌ xel-laꞌ waca zrente̱ lau benneꞌ judío caꞌ, quegá xúgute̱ꞌ guleajlé̱ꞌe̱ chee̱ꞌ,
\v 38 laweꞌ da be̱n na ba xen guca ca da gunná Isaías, benneꞌ bchálaje̱ꞌ waláz chee̱ Dios, gunné̱ꞌ:
\q Xran, ¿nuzra guxeajlé̱ chee̱ dizraꞌ chee̱dxu?
\q ¿Nuzra naꞌ bleꞌe Xránadxu xel-laꞌ waca chee̱ꞌ?
\m
\v 39 Caꞌan guca, quebe guca xeleajlé̱ꞌe̱ chee̱ꞌ laweꞌ da caní gunnáqueze Isaías naꞌ:
\q
\v 40 Dios be̱ne̱ꞌ benneꞌ caꞌ la chul-la, ne be̱ne̱ꞌ zideꞌ lázrdawe̱ꞌ,
\q chee̱ quebe xeleléꞌene̱ꞌ nen xiaj lawe̱ꞌ,
\q ne quebe xeléajniꞌine̱ꞌ lu xichaj lázrdawe̱ꞌ,
\q ne quebe xelelé̱ꞌe̱ lawaꞌ nedaꞌ chee̱ xexunaꞌ le̱ꞌ.
\m
\v 41 Isaías naꞌ gunné̱ꞌ da nigá laweꞌ da bléꞌene̱ꞌ xel-laꞌ szren chee̱ Jesús, ne bchálaje̱ꞌ ca naca chee̱ꞌ.
\p
\v 42 Zaneꞌ benneꞌ judío caꞌ guléajle̱ꞌe̱ chee̱ Jesús, ne cáꞌanqueze bal-la benneꞌ xíchaje̱ caꞌ. Quebe belexeche̱be̱ꞌ láwela bénneache laweꞌ da belezrebe̱ꞌ da xelún benneꞌ fariseo caꞌ, chee̱ quebe xelexebéaje̱ꞌ le̱ꞌ xuꞌu naga dxelezrague̱ꞌ.
\v 43 Caní belune̱ꞌ laweꞌ da beledánedxene̱ꞌ xel-laꞌ ba láꞌana da dxelúe bénneache le̱ꞌ ca xel-laꞌ ba láꞌana da dxue Dios le̱ꞌ.
\s Dizraꞌ chee̱ Jesús guchiꞌa na chee̱ da dxelún bénneache
\p
\v 44 Jesús gunné̱ꞌ zizraj:
\p ―Benneꞌ dxéajle̱ꞌe̱ chiaꞌ, quegá chee̱zaꞌ dxéajle̱ꞌe̱, cáꞌanqueze dxéajle̱ꞌe̱ chee̱ Xraꞌ nasel-le̱ꞌ nedaꞌ.
\v 45 Bénneaꞌ dxeléꞌene̱ꞌ nedaꞌ, dxeléꞌequezne̱ꞌ Xraꞌ nasel-le̱ꞌ nedaꞌ.
\v 46 Nedaꞌ, xel-laꞌ naxaníꞌ, blaꞌa lu xe̱zr la xu nigá chee̱ québedxa xelexegáꞌana benneꞌ dxeléajle̱ꞌe̱ chiaꞌ lu da chul-la.
\v 47 Che nu benneꞌ dxenne̱ꞌ dizraꞌ chiaꞌ, ne quebe dxune̱ꞌ ca naca na, quegá nedaꞌ guzría xiꞌa le̱ꞌ, laweꞌ da quebe blaꞌa nedaꞌ chee̱ guzría xiꞌa bénneache. Blaꞌa chee̱ guseláꞌ benneꞌ caꞌ.
\v 48 Benneꞌ dxuzúe̱ꞌ nedaꞌ chaláꞌala, ne quebe dxune̱ꞌ ca naca dizraꞌ chiaꞌ, ba zua da guzría xi na le̱ꞌ. Dizraꞌ da ba gunnéaꞌ naca na da guzría xi na bénneaꞌ lu zra bze̱be naꞌ.
\v 49 Caní gaca na laweꞌ da quebe dxuchálajaꞌ cheé̱zquezaꞌ, laweꞌ da Xraꞌ nasel-le̱ꞌ nedaꞌ ba gunná béꞌene̱ꞌ nedaꞌ bi dxal-laꞌ nniaꞌ, ne bi dxal-laꞌ gusé̱dedaꞌ.
\v 50 Nedaꞌ nezdaꞌ gunná beꞌe Xraꞌ nedaꞌ caní chee̱ xelezeque bénneache xelape̱ꞌ xel-laꞌ nabán da zeajlí canna. Caꞌan naca, da dxennéaꞌ nedaꞌ, dxennéaꞌ na ca gunná beꞌe Xraꞌ nedaꞌ.
\c 13
\s Jesús dxibe̱ꞌ niꞌa benneꞌ caꞌ dxusé̱dene̱ꞌ
\p
\v 1 Naca na zra nedxu gate za chuꞌu Laní Pascua chee̱ judío caꞌ. Jesús ba nézene̱ꞌ ba bzrin zra xezé̱ꞌe̱ lu xe̱zr la xu nigá chee̱ xexíaje̱ꞌ naga zua Xre̱ꞌ. Nazríꞌiquezne̱ꞌ benneꞌ zaj naca chee̱ꞌ, benneꞌ zaj zre̱ꞌe̱ xe̱zr la xu, naꞌ naꞌa ba zua guléꞌene̱ꞌ benneꞌ caꞌ tu da zrendxa da guléꞌe na nazríꞌine̱ꞌ le̱ꞌ.
\p
\v 2-4 Da xriwe̱ꞌ ba nagúꞌu na xichaj lázxdau Judas Iscariote, zriꞌine Simón, ca dxal-laꞌ gune̱ꞌ chee̱ gudée̱ꞌ Jesús lu naꞌ benneꞌ guledábague̱ꞌ Le̱ꞌ. Nézqueze Jesús ze̱ꞌe̱ naga zua Dios, ne dxal-laꞌ xezrine̱ꞌ naga zua Dios, naꞌ Xre̱ꞌ ba bnézruje̱ꞌ Le̱ꞌ dute̱ xel-laꞌ dxenná bea. Chee̱ le̱ naꞌ, gate dxelawe̱ꞌ xrcheꞌ, guxasa Jesús, naꞌ gudúe̱ꞌ ladxeꞌ naxrúa cuzre̱ꞌ, ne bnase̱ꞌ tu ladxeꞌ dxuꞌa le̱ꞌe̱.
\v 5 Nadxa gudé̱ꞌe̱ nisa tu zriga xia zren, ne guzú lawe̱ꞌ dxibe̱ꞌ niꞌa benneꞌ caꞌ dxusé̱dene̱ꞌ, naꞌ bsebizre̱ꞌ niꞌe̱ nen ladxeꞌ naꞌ da nunase̱ꞌ dxuꞌa le̱ꞌe̱.
\p
\v 6 Ca bzrine̱ꞌ chee̱ quibe̱ꞌ niꞌa Simón Pedro, le̱ꞌ guzre̱ꞌ Jesús:
\p ―Xran, ¿Lueꞌ quíbequezuꞌ niꞌa?
\p
\v 7 Jesús beche̱be̱ꞌ:
\p ―Naꞌa quebe dxéajniꞌinuꞌ da dxunaꞌ. Te naꞌa chéajniꞌinuꞌ na.
\p
\v 8 Pedro guzre̱ꞌ Le̱ꞌ:
\p ―Cabataꞌ quibuꞌ niꞌa.
\p Jesús guzre̱ꞌ le̱ꞌ:
\p ―Che quebe quibaꞌ niꞌu, quebe gaca gacuꞌ nedaꞌ tuze.
\p
\v 9 Naꞌ Simón Pedro guzre̱ꞌ Jesús:
\p ―Xran, quegá tuze niꞌa quibuꞌ. Cáꞌanqueze naꞌa, ne xíchajaꞌ.
\p
\v 10 Jesús guzre̱ꞌ le̱ꞌ:
\p ―Benneꞌ ba bexuzrte̱ guzje̱ꞌ, tuze niꞌe̱ dxal-laꞌ chadxe laweꞌ da ba naxádxequeze̱ꞌ. Leꞌe ba naxádxele, san quegá xúgute̱le.
\p
\v 11 Gunná Jesús: “Quegá xúgute̱le”, laweꞌ da nézene̱ꞌ nu naꞌ gudée̱ꞌ Le̱ꞌ lu naꞌ benneꞌ dxeledábague̱ꞌ Le̱ꞌ.
\p
\v 12 Ca gudé gudibe Jesús niꞌa benneꞌ caꞌ, naꞌ bexrúe̱ꞌ ladxeꞌ chee̱ꞌ cuzreꞌ, ne bebeꞌe̱ ga dxelawe̱ꞌ, naꞌ guzre̱ꞌ benneꞌ caꞌ:
\p ―¿Dxéajniꞌile leꞌe da ba be̱naꞌ?
\v 13 Leꞌe dxe̱le nedaꞌ: Benneꞌ Wese̱de, ne: Xran, naꞌ caní dxal-laꞌ nnale laweꞌ da caní nacaꞌ.
\v 14 Che nedaꞌ, Benneꞌ Weséde chee̱le, ne Xránale, ba gudibaꞌ níꞌale, cáꞌanqueze leꞌe dxal-laꞌ quíbele niꞌa ljwézrele tule xetule.
\v 15 Nedaꞌ ba bleꞌedaꞌ leꞌe tu da dxuléꞌe na, chee̱ gunle leꞌe ca da be̱naꞌ nedaꞌ.
\v 16 Da li dxapaꞌ leꞌe, tu benneꞌ we̱n zrin quebe nácadxe̱ꞌ szren ca xrane̱ꞌ, naꞌ tu benneꞌ gubáz quebe nácadxe̱ꞌ szren ca benneꞌ nasel-le̱ꞌ le̱ꞌ.
\v 17 Che dxéajniꞌile da caní, ne dxunle ca zaj naca na, gaca chee̱le tu da ba neza.
\p
\v 18 ’Quebe dxuchálajaꞌ chee̱ xúgute̱le leꞌe. Nedaꞌ núnbeꞌa benneꞌ caꞌ gucáꞌa, san dxal-laꞌ gaca ca naxúaj na lu xiche chee̱ Dios, dxenná na: Benneꞌ dxágule̱ nedaꞌ ba gudábague̱ꞌ nedaꞌ chee̱ gudée̱ꞌ nedaꞌ.
\v 19 Dxapaꞌ leꞌe da nigá naꞌa, nédxula gate quebe ne gaca na, chee̱ gate gaca na, naꞌ chéajle̱le leꞌe zúaquezaꞌ nedaꞌ.
\v 20 Da li dxapaꞌ leꞌe: Benneꞌ dxezíꞌ lu ne̱ꞌe̱ Bénneaꞌ dxusel-le̱ꞌ nedaꞌ, nedaꞌ naꞌ dxezíꞌ lu ne̱ꞌe̱, naꞌ benneꞌ dxezíꞌ lu ne̱ꞌe̱ nedaꞌ, dxezíꞌ lu ne̱ꞌe̱ Xraꞌ nasel-le̱ꞌ nedaꞌ.
\s Dxenná Jesús gudé Judas Le̱ꞌ lu naꞌ benneꞌ dxeledábague̱ꞌ Le̱ꞌ
\r (Mt. 26.20-25; Mr. 14.17-21; Lc. 22.21-23)
\p
\v 21 Ca gudé gunná Jesús da nigá, naꞌ guzúe̱ꞌ ste̱be lu xichaj lázrdawe̱ꞌ, naꞌ bzéajniꞌine̱ꞌ benneꞌ caꞌ, gunné̱ꞌ:
\p ―Da li dxapaꞌ leꞌe, tu benneꞌ ládujla leꞌe gudée̱ꞌ nedaꞌ lu naꞌ benneꞌ caꞌ dxeledábague̱ꞌ nedaꞌ.
\p
\v 22 Nadxa benneꞌ caꞌ dxuse̱de Jesús gulezú lawe̱ꞌ dxelennáꞌ ljwezre̱ꞌ, ne quebe zaj nézene̱ꞌ nu chee̱ naꞌ dxuchalaj Jesús.
\v 23 Tu benneꞌ caꞌ dxuse̱de Jesús, bénneaꞌ nazríꞌile̱ꞌe̱ Jesús le̱ꞌ, zue̱ꞌ cuita Jesús naga dxelawe̱ꞌ xrcheꞌ,
\v 24 naꞌ Simón Pedro be̱ne̱ꞌ tu da dxunna bea lau bénneaꞌ chee̱ guche̱be̱ꞌ Jesús nu chee̱ naꞌ dxenné̱ꞌ caní.
\v 25 Nadxa bénneaꞌ de̱ꞌe̱ cuita Jesús bche̱be̱ꞌ Le̱ꞌ:
\p ―Xran, ¿nuzra naꞌ?
\p
\v 26 Beche̱be Jesús:
\p ―Gusebisaꞌ lateꞌ xeta xtila, naꞌ bénneaꞌ gunézrujaꞌ na, benneꞌ náꞌqueze̱ꞌ.
\p Nadxa Jesús bsebise̱ꞌ lateꞌ xeta xtila, naꞌ bnézruje̱ꞌ na chee̱ Judas Iscariote, zriꞌine Simón.
\v 27 Ca gucáꞌa Judas xeta xtila naꞌ, naꞌ da xriwe̱ꞌ guxúꞌute̱ na lu xichaj lázrdawe̱ꞌ. Nadxa Jesús guzre̱ꞌ le̱ꞌ:
\p ―Da dxal-laꞌ gunuꞌ, bé̱ntega na.
\p
\v 28 Benneꞌ caꞌ zaj zre̱ꞌe̱ dxelawe̱ꞌ naꞌ quebe guléajniꞌine̱ꞌ bizr chee̱ naꞌ guzre̱ꞌ Judas naꞌ caní.
\v 29 Laweꞌ da nua Judas bzudeꞌ dumí, bal-le̱ꞌ guléquene̱ꞌ Jesús guzre̱ꞌ le̱ꞌ bi siꞌe̱ chee̱ laní naꞌ, u bi gunézruje̱ꞌ benneꞌ xacheꞌ caꞌ.
\v 30 Ca gudé gudagu Judas xeta xtila naꞌ, naꞌ bdxúaje̱ꞌ. Ba guxrinne.
\s Da nadxixruj bea cube
\p
\v 31 Ca gudé bdxuaj Judas, gunná Jesús:
\p ―Naꞌa guléꞌe lau xel-laꞌ szren chiaꞌ nedaꞌ, Benneꞌ Gulje̱ꞌ Bénneache, naꞌ xegáꞌana szren Dios ne̱ chiaꞌ nedaꞌ.
\v 32 Che nedaꞌ, Benneꞌ Gulje̱ꞌ Bénneache, dxuléꞌedaꞌ ca naca xel-laꞌ szren chee̱ Dios, naꞌ Dios guléꞌene̱ꞌ ca naca xel-laꞌ szren chiaꞌ nedaꞌ, ne la gúnte̱queze̱ꞌ na.
\v 33 Leꞌe, bidu chiaꞌ caꞌ, québedxa suaꞌ schaꞌ nen leꞌe. Leꞌe wexílajle nedaꞌ, san ca guchaꞌ benneꞌ judío caꞌ, dxapaꞌ leꞌe naꞌa, quebe gaca saꞌle leꞌe naga chaꞌa nedaꞌ.
\v 34 Tu da cube dxixruj beꞌedaꞌ leꞌe. Le zriꞌi le saꞌ ljwézrele tule xetule ca nedaꞌ nazríꞌidaꞌ leꞌe. Caní dxal-laꞌ zriꞌi ljwézrele tule xetule.
\v 35 Che nazríꞌi ljwézrele tule xetule, naꞌ xúgute̱ bénneache xeleque béꞌene̱ꞌ nácale nedaꞌ tuze.
\s Jesús dxenné̱ꞌ nna Pedro quebe núnbeꞌe̱ Le̱ꞌ
\r (Mt. 26.31-35; Mr. 14.27-31; Lc. 22.31-34)
\p
\v 36 Simón Pedro bche̱be̱ꞌ Jesús:
\p ―Xran, ¿gazra chéajuꞌ?
\p Beche̱be Jesús:
\p ―Naga chaꞌa nedaꞌ, quebe gaca sáꞌle̱nuꞌ nedaꞌ naꞌa. Te naꞌa wadéquezuꞌ naga teaꞌ nedaꞌ.
\p
\v 37 Nadxa gunná Pedro:
\p ―Xran, ¿bizr chee̱ naꞌ quebe gaca sáꞌle̱naꞌ Lueꞌ naꞌa? Zúaquezaꞌ guzúaꞌ xel-laꞌ nabán chiaꞌ chee̱ gunaꞌ Lueꞌ tuze.
\p
\v 38 Jesús beche̱be̱ꞌ:
\p ―¿Zúaquezuꞌ guzúꞌ xel-laꞌ nabán chiuꞌ chee̱ gacuꞌ nedaꞌ tuze? Da li dxapaꞌ lueꞌ, nédxudxa ca cuezre xjeaj, lueꞌ wannáquezuꞌ chunna lasa quebe núnbeꞌu nedaꞌ.
\c 14
\s Jesús naque̱ꞌ neza da dxezrín na naga zua Xradxu Dios
\p
\v 1 Gunná Jesús:
\p ―Quebe cuele leꞌe gunne xue. Le guxrén lazreꞌ Dios, ne le guxrén lazreꞌ nedaꞌ.
\v 2 Lizre Xraꞌ dé̱le̱ꞌe̱ lataj naga súale. Chela quebe naca na caní, nedaꞌ ba guchaꞌ leꞌe. Wexáꞌa cheajxecuezaꞌ lataj chee̱le.
\v 3 Ca te xexáꞌa cheajxecuezaꞌ lataj chee̱le, naꞌ wexelájquezaꞌ xetú chee̱ xedajxezriꞌa leꞌe súale̱le nedaꞌ, chee̱ súale leꞌe naga súaquezaꞌ nedaꞌ.
\v 4 Leꞌe nézele naga chaꞌa, ne núnbeale neza naꞌ.
\p
\v 5 Tomás guzre̱ꞌ Jesús:
\p ―Xran, quebe nézentuꞌ ga chéajuꞌ. ¿Ájazra guntuꞌ gúnbeantuꞌ neza naꞌ?
\p
\v 6 Jesús beche̱be̱ꞌ:
\p ―Nedaꞌ nacaꞌ neza naꞌ, ne nacaꞌ da li, ne nacaꞌ xel-laꞌ nabán. Tuze ne̱ chiaꞌ nedaꞌ waca zrinle naga zua Xraꞌ.
\v 7 Chela núnbeale nedaꞌ, cáꞌanqueze núnbeale Xraꞌ. Náꞌate̱la núnbeale Le̱ꞌ laweꞌ da ba dxeléꞌele Le̱ꞌ.
\p
\v 8 Nadxa Felipe guzre̱ꞌ Jesús:
\p ―Xran, bleꞌe netuꞌ Xrauꞌ, xetú da náꞌte̱ze.
\p
\v 9 Beche̱be Jesús:
\p ―Felipe, schaꞌ ba guzúale̱naꞌ leꞌe, naꞌ ¿quebe ne gúnbeꞌu nedaꞌ? Benneꞌ dxeléꞌene̱ꞌ nedaꞌ, dxeléꞌequezene̱ꞌ Xraꞌ. Chee̱ le̱ naꞌ, ¿bizr chee̱ naꞌ dxenabuꞌ nedaꞌ guléꞌedaꞌ leꞌe Xraꞌ?
\v 10 ¿Quebe dxéajle̱ꞌu zúale̱naꞌ Xraꞌ, naꞌ Xraꞌ zúale̱ne̱ꞌ nedaꞌ? Da dxapaꞌ leꞌe, quegá dxennéaꞌ na cheé̱zquezaꞌ. Xraꞌ, Bénneaꞌ zúale̱ne̱ꞌ nedaꞌ, Lé̱queze̱ꞌ naꞌ dxune̱ꞌ zrin chee̱ꞌ lu naꞌa nedaꞌ.
\v 11 Le chéajle̱le zúale̱naꞌ Xraꞌ, naꞌ Xraꞌ zúale̱ne̱ꞌ nedaꞌ, u che cabí dxéajle̱le ca da dxennéaꞌ, le chéajle̱ chiaꞌ ne̱ chee̱ da caꞌ dxunaꞌ.
\v 12 Da li dxapaꞌ leꞌe, benneꞌ dxéajle̱ꞌe̱ chiaꞌ, gúnqueze̱ꞌ ca da dxunaꞌ nedaꞌ, naꞌ gune̱ꞌ da zaj nácadxa zren ca da caní dxunaꞌ laweꞌ da xexáꞌa nedaꞌ naga zua Xraꞌ.
\v 13 Xúgute̱ da nábale leꞌe lu Laꞌ nedaꞌ, nedaꞌ gunaꞌ na, chee̱ guléꞌedaꞌ nedaꞌ xel-laꞌ szren chee̱ Xraꞌ.
\v 14 Nédaꞌquezaꞌ gunaꞌ bítete̱ze da nábale lu Laꞌ nedaꞌ.
\s Jesús dxeche̱be lazre̱ꞌ sel-le̱ꞌ Beꞌ Láꞌazxa
\p
\v 15 Gunná Jesús:
\p ―Che leꞌe nazríꞌile nedaꞌ, le guzúa dizraꞌ ca naca da dxixruj beꞌedaꞌ leꞌe.
\v 16 Nedaꞌ gataꞌ xuedaꞌ Xraꞌ sel-le̱ꞌ chee̱le xetú Benneꞌ gácale̱queze̱ꞌ leꞌe, ne súale̱tecaze̱ꞌ leꞌe.
\v 17 Benneꞌ nigá naque̱ꞌ Beꞌ Láꞌazxa guléꞌene̱ꞌ leꞌe ca naca da li. Benneꞌ zaj naca chee̱ xe̱zr la xu nigá quebe xelezéquene̱ꞌ xelezíꞌ lu ne̱ꞌe̱ Le̱ꞌ laweꞌ da quebe gaca xeleléꞌene̱ꞌ Le̱ꞌ, ne quebe zaj núnbeꞌe̱ Le̱ꞌ. Leꞌe núnbeale Le̱ꞌ laweꞌ da zúale̱ne̱ꞌ leꞌe, ne súaqueze̱ꞌ lu xichaj lázrdaule.
\v 18 Quebe gucáꞌanaꞌ leꞌe ca bi we̱ze̱be caꞌ. Weláꞌquezaꞌ súale̱naꞌ leꞌe.
\v 19 Xetú chíꞌidauꞌ bénneache caꞌ québedxa xeleléꞌene̱ꞌ nedaꞌ, san leꞌe weléꞌele nedaꞌ. Leꞌe tu gaca bánzquezle laweꞌ da tu naca bánzquezaꞌ nedaꞌ.
\v 20 Lu zra naꞌ guéquebeꞌele nedaꞌ zúale̱naꞌ Xraꞌ, naꞌ leꞌe zúale̱le nedaꞌ, naꞌ nedaꞌ zúale̱naꞌ leꞌe.
\v 21 Benneꞌ nézene̱ꞌ ca naca da nadxixruj bea na nunaꞌ nedaꞌ, ne dxune̱ꞌ na, dxuléꞌene̱ꞌ nazríꞌiqueze̱ꞌ nedaꞌ. Xraꞌ zríꞌine̱ꞌ benneꞌ nazríꞌine̱ꞌ nedaꞌ, naꞌ cáꞌanqueze nedaꞌ zriꞌidaꞌ bénneaꞌ, ne guléꞌe lawaꞌ le̱ꞌ.
\p
\v 22 Judas, quegá bénneaꞌ le̱ꞌ Iscariote, guzre̱ꞌ Jesús:
\p ―Xran, ¿bizr chee̱ naꞌ guléꞌe lauꞌ netuꞌ, ne quegá guléꞌe lauꞌ lau bénneache zaj zre̱ꞌe̱ xe̱zr la xu nigá?
\p
\v 23 Jesús beche̱be̱ꞌ:
\p ―Benneꞌ nazríꞌine̱ꞌ nedaꞌ dxune̱ꞌ ca naca da dxennéaꞌ, naꞌ Xraꞌ zríꞌine̱ꞌ bénneaꞌ, naꞌ nedaꞌ ne Xraꞌ xedajsúale̱ntuꞌ le̱ꞌ.
\v 24 Benneꞌ quebe nazríꞌine̱ꞌ nedaꞌ quebe dxune̱ꞌ ca da dxennéaꞌ. Ca naca dizraꞌ da dxénele quebe zaj naca na cheé̱zquezaꞌ. Zaj naca na chee̱ Xraꞌ nasel-le̱ꞌ nedaꞌ.
\p
\v 25 ’Dxapaꞌ leꞌe xúgute̱ da caní dxácate̱ ne zúale̱naꞌ leꞌe,
\v 26 naꞌ Beꞌ Láꞌazxa, Bénneaꞌ sel-la Xraꞌ lu Laꞌ nedaꞌ chee̱ gácale̱ne̱ꞌ leꞌe, Le̱ꞌ guléꞌene̱ꞌ leꞌe xúgute̱, ne gusáꞌqueze̱ꞌ lázrele ca naca xúgute̱ da ba guchaꞌ leꞌe.
\p
\v 27 ’Xel-laꞌ dxebeza zri lazreꞌ dxucaꞌanaꞌ chee̱le. Dxunnaꞌ leꞌe xel-laꞌ dxebeza zri lazreꞌ chiaꞌ. Quebe dxunnaꞌ na ca dxelunna bénneache xel-laꞌ dxebeza zri lazreꞌ. Quebe cuele gunne xue, ne quebe zrébele.
\v 28 Ba bénele gunnéaꞌ wexáꞌa, ne weláꞌa súale̱naꞌ leꞌe xetú. Chela da li nazríꞌile nedaꞌ, suale xel-laꞌ dxebé, laweꞌ da xexáꞌa naga zua Xraꞌ, naꞌ nácadxa Le̱ꞌ szren ca nedaꞌ.
\v 29 Da nigá dxapaꞌ leꞌe naꞌa nédxula gate quebe ne gaca na, chee̱ gate gaca na, naꞌ chéajle̱le chee̱ da dxennéaꞌ.
\p
\v 30 ’Québedxa guchálajle̱tecaꞌ leꞌe da zren laweꞌ da ba zaꞌ da xriwe̱ꞌ, da naꞌ dxenná bea na lu xe̱zr la xu nigá. Da naꞌ quebe seque na bi gune na nedaꞌ.
\v 31 Caní dxal-laꞌ gaca chee̱ xeleneze bénneache nedaꞌ nazríꞌidaꞌ Xraꞌ, ne dxunaꞌ ca da gunná béꞌene̱ꞌ nedaꞌ. ¡Le chasa! ¡Le xebúꞌu nigá!
\c 15
\s Jesús dxuchálaje̱ꞌ chee̱ lba uva ne chee̱ zruze na caꞌ
\p
\v 1 Gunná Jesús:
\p ―Nedaꞌ nacaꞌ ca tu lba uva da naca na li lazreꞌ, naꞌ Xraꞌ naque̱ꞌ ca tu benneꞌ dxáꞌane̱ꞌ na.
\v 2 Le̱ꞌ dxechugue̱ꞌ zruze na caꞌ da quebe dxelebía na da zixre, ne dxun chiꞌe̱ zruze na caꞌ da dxelebía na da zixre chee̱ xelebíadxa na.
\v 3 Leꞌe nácale ca zruze na caꞌ da ba nun chiꞌe̱, ne̱ chee̱ dizraꞌ da ba guchaꞌ leꞌe.
\v 4 Le súaqueze gácale nedaꞌ tuze ca nedaꞌ tu zúale̱zquezaꞌ leꞌe. Tu zruze xaga quebe gaca cuía na da zixre cheé̱zqueze na che quebe súale̱queze na xaga naꞌ. Cáꞌanqueze leꞌe quebe bi gaca gunle che quebe tu gácazquezle nedaꞌ tuze.
\p
\v 5 ’Nedaꞌ nacaꞌ bzrigu lba uva, naꞌ leꞌe nácale zruze na caꞌ. Bénneaꞌ naque̱ꞌ nedaꞌ tuze, naꞌ nedaꞌ nacaꞌ le̱ꞌ tuze, naque̱ꞌ ca tu zruze na da dxebíale̱ꞌe̱ na da zixre, laweꞌ da quebe bi sequeꞌ gunle che quebe gácale nedaꞌ tuze.
\v 6 Benneꞌ quebe súate̱queze̱ꞌ nen nedaꞌ gaque̱ꞌ ca tu zruze na da dxugu na, naꞌ bizre na. Xuluxutupe̱ꞌ zruze na bizre caꞌ, ne xuluzré̱ꞌe̱ na lu xiꞌ.
\p
\v 7 ’Che leꞌe súate̱quezle nedaꞌ tuze, ne quebe gusanle dizraꞌ chiaꞌ, waca nábale ca da dxaca lázrele, naꞌ sile na.
\v 8 Xraꞌ dxegáꞌana szrene̱ꞌ gate nácale ca zruze na caꞌ da dxelebíale̱ꞌe̱ na da zixre, ne caní gaca bea na nácale nedaꞌ tuze.
\v 9 Nedaꞌ nazríꞌidaꞌ leꞌe ca nazríꞌi Xraꞌ nedaꞌ. Chee̱ le̱ naꞌ le súaquezle lu xel-laꞌ zriꞌi lazreꞌ chiaꞌ.
\v 10 Che gunle ca da dxixruj beꞌedaꞌ leꞌe, naꞌ súate̱quezle lu xel-laꞌ zriꞌi lazreꞌ chiaꞌ, ca dxunaꞌ nedaꞌ, dxunaꞌ ca bdxixruj beꞌe Xraꞌ nedaꞌ, ne zúate̱quezaꞌ lu xel-laꞌ zriꞌi lazreꞌ chee̱ꞌ.
\p
\v 11 ’Nedaꞌ dxuchálajle̱naꞌ leꞌe caní chee̱ súale lu xel-laꞌ dxebé chiaꞌ, ne chee̱ gaca du lazreꞌ xel-laꞌ dxebé chee̱le.
\v 12 Cani naca da dxixruj beꞌedaꞌ leꞌe: Le zriꞌi le saꞌ ljwézrele tule xetule ca nedaꞌ nazríꞌidaꞌ leꞌe.
\v 13 Xel-laꞌ zriꞌi lazreꞌ da naca szrendxa naca bea na che tu benneꞌ guzúe̱ꞌ xel-laꞌ nabán chee̱ꞌ chee̱ gácale̱ne̱ꞌ bi ljwezre̱ꞌ caꞌ.
\v 14 Leꞌe nácale bi ljwezraꞌ che dxunle ca da dxixruj beꞌedaꞌ leꞌe.
\v 15 Québedxa xapaꞌ leꞌe nácale bi we̱n zrin chiaꞌ laweꞌ da quebe neze bi we̱n zrin bi da gun xránabeꞌ. Dxapaꞌ leꞌe nácale bi ljwezraꞌ laweꞌ da ba bzendaꞌ leꞌe xúgute̱ da guzre Xraꞌ nedaꞌ.
\v 16 Leꞌe quebe gunné̱le nedaꞌ. Nedaꞌ gunnéaꞌ leꞌe, ne ba nuzúaꞌ leꞌe chee̱ gácale ca zruze lba naꞌ da dxelebíale̱ꞌe̱ na da zixre, naꞌ tu súazqueze da zixre naꞌ. Che gunle caní, naꞌ Xraꞌ gunne̱ꞌ leꞌe xúgute̱ da nábale lu Laꞌ nedaꞌ.
\v 17 Da nigá naca na da dxixruj beꞌedaꞌ leꞌe: Le zriꞌi le saꞌ ljwézrele tule xetule.
\s Bénneache chee̱ xe̱zr la xu nigá dxelecuídene̱ꞌ Jesús,
 ne cáꞌanqueze benneꞌ chee̱ꞌ caꞌ
\p
\v 18 Nadxa gunná Jesús:
\p ―Che bénneache dxelecuídene̱ꞌ leꞌe, dxal-laꞌ cheajsá lázrele belecuídequeze̱ꞌ nedaꞌ nédxute̱.
\v 19 Chela nácale leꞌe chee̱ xe̱zr la xu nigá, naꞌ xelezríꞌi bénneache leꞌe ca zaj nazríꞌine̱ꞌ le saꞌ ljwezre̱ꞌ caꞌ. Nedaꞌ ba gucáꞌa leꞌe ládujla bénneache chee̱ xe̱zr la xu nigá, naꞌ chee̱ le̱ naꞌ dxelecuide bénneache leꞌe laweꞌ da québedxa nácale xe̱zr la xu nigá tuze.
\v 20 Le gusá lázrele da guchaꞌ leꞌe, gunnéaꞌ: Netú benneꞌ we̱n zrin quebe nácadxe̱ꞌ szren ca xrane̱ꞌ. Che guláu ziꞌ xuzre̱ꞌ nedaꞌ, cáꞌanqueze xelau ziꞌ xuzre̱ꞌ leꞌe, naꞌ che belune̱ꞌ ca dxenná dizraꞌ chiaꞌ, cáꞌanqueze xelune̱ꞌ ca dxenná dizraꞌ chee̱le leꞌe.
\v 21 Xúgute̱ da caní xelune̱ꞌ chee̱le laweꞌ da nácale chiaꞌ, ne laweꞌ da quebe zaj núnbeꞌe̱ Xraꞌ nasel-le̱ꞌ nedaꞌ.
\p
\v 22 ’Chela quebe blaꞌa nedaꞌ, ne bchálajle̱naꞌ benneꞌ caꞌ, quebe bi dul-la zaj nabague̱ꞌ. Naꞌa zaj nabágaqueze̱ꞌ dul-la
\v 23 laweꞌ da nu benneꞌ dxecuídene̱ꞌ nedaꞌ, cáꞌanqueze dxecuídene̱ꞌ Xraꞌ.
\v 24 Chela quebe be̱naꞌ nedaꞌ xel-laꞌ waca zren caꞌ láwela benneꞌ caꞌ ca da netú benneꞌ quebe ne gune̱ꞌ, naꞌ quebe bi dul-la xelebágue̱ꞌ. Lácala ba beleléꞌene̱ꞌ da caꞌ, dxelecuídene̱ꞌ nedaꞌ, ne dxelecuídene̱ꞌ Xraꞌ.
\v 25 Da nigá dxaca na chee̱ gaca li ca naxúaj na lu da nadxixruj bea na da zjácale̱ benneꞌ caꞌ. Dxenná na: Belecuídene̱ꞌ nedaꞌ ne quebe bi da cale̱la be̱naꞌ chee̱ benneꞌ caꞌ.
\p
\v 26 ’Gate xida Bénneaꞌ gácale̱ne̱ꞌ leꞌe, Bénneaꞌ naque̱ꞌ Beꞌ Láꞌazxa, ne dxuléꞌene̱ꞌ da li, Bénneaꞌ sel-laꞌ nedaꞌ waláz chee̱ Xraꞌ, Lé̱queze̱ꞌ xeche̱be̱ꞌ ca naca chiaꞌ nedaꞌ.
\v 27 Cáꞌanqueze leꞌe weché̱bequezle ca naca chiaꞌ nedaꞌ laweꞌ da zúale̱le nedaꞌ nédxudaute̱.
\c 16
\p
\v 1 Gunná Jesús:
\p ―Dxapaꞌ leꞌe da caní chee̱ quebe gusán lázrele da naca chiaꞌ.
\v 2 Welexebéaje̱ꞌ leꞌe lu xuꞌu naga dxelezrague̱ꞌ, naꞌ zrin zra gate nútete̱ze benneꞌ gutie̱ꞌ leꞌe guéquene̱ꞌ gune̱ꞌ zrin chee̱ Dios.
\v 3 Caní xelune̱ꞌ laweꞌ da quebe ne xelúnbeꞌe̱ Xraꞌ, ne nedaꞌ.
\v 4 Dxapaꞌ leꞌe da nigá chee̱ gate zrin zra naꞌ, naꞌ cheajsá lázrele ba guchaꞌ leꞌe da nigá.
\s Da dxun Beꞌ Láꞌazxa
\p Nadxa gunná Jesús:
\p ―Quebe guchaꞌ leꞌe da nigá nédxute̱ laweꞌ da zúale̱quezaꞌ leꞌe.
\v 5 Naꞌa wexáꞌa cheajxezúale̱naꞌ Xraꞌ nasel-le̱ꞌ nedaꞌ, naꞌ netule leꞌe quebe dxuché̱bele nedaꞌ ga chaꞌa.
\v 6 Dxewíꞌine lázrele laweꞌ da guchaꞌ leꞌe da caní.
\v 7 Naꞌa dxapaꞌ leꞌe da li: Cháweꞌdxa gaca chee̱le leꞌe che xexáꞌa nedaꞌ laweꞌ da che quebe xexáꞌa, quebe xida Beꞌ Láꞌazxa xedajsúale̱ne̱ꞌ leꞌe, Bénneaꞌ gácale̱ne̱ꞌ leꞌe. Che xexáꞌa nedaꞌ, sel-laꞌ Le̱ꞌ chee̱le.
\v 8 Gate xida Le̱ꞌ, naꞌ guléꞌene̱ꞌ bénneache zaj naque̱ꞌ benneꞌ dul-la, ne quebe dxelune̱ꞌ da xrlátaje, naꞌ Dios guzría xiꞌe̱ benneꞌ caní.
\v 9 Zaj naque̱ꞌ benneꞌ dul-la laweꞌ da quebe dxeléajle̱ꞌe̱ chiaꞌ nedaꞌ.
\v 10 Xeleque béꞌene̱ꞌ quebe dxelune̱ꞌ da xrlátaje laweꞌ da xexáꞌa nedaꞌ naga zua Xraꞌ, naꞌ leꞌe québedxa léꞌele nedaꞌ.
\v 11 Xeleque béꞌene̱ꞌ Dios guzría xiꞌe̱ le̱ꞌ laweꞌ da ba guchugue̱ꞌ chee̱ da xriwe̱ꞌ, da naꞌ dxenná bea na lu xe̱zr la xu nigá.
\p
\v 12 ’Ne dé̱le̱ꞌe̱ da dxal-laꞌ xapaꞌ leꞌe, san leꞌe quebe gaca chéajniꞌile na naꞌa.
\v 13 Gate xida Beꞌ Láꞌazxa, Bénneaꞌ dxuléꞌene̱ꞌ da li, Le̱ꞌ guléꞌene̱ꞌ leꞌe ca naca xúgute̱ da li laweꞌ da quebe guchálaje̱ꞌ cheé̱zqueze̱ꞌ. Wanné̱ꞌ xúgute̱ da xénene̱ꞌ, naꞌ guzéajniꞌine̱ꞌ leꞌe ca da dxal-laꞌ gaca na.
\v 14 Le̱ꞌ gucáꞌana szrene̱ꞌ nedaꞌ laweꞌ da waziꞌe̱ chee̱ da naca chiaꞌ nedaꞌ, naꞌ guzéajniꞌine̱ꞌ na leꞌe.
\v 15 Xúgute̱ da napa Xraꞌ, cheé̱quezaꞌ naca na, naꞌ chee̱ le̱ naꞌ gunnéaꞌ, wazíꞌ Beꞌ Láꞌazxa da naca chiaꞌ, naꞌ guzéajniꞌine̱ꞌ na leꞌe.
\s Xel-laꞌ dxelewíꞌine lazreꞌ chee̱ benneꞌ caꞌ xexaca na xel-laꞌ dxelebé
\p
\v 16 Gunná Jesús:
\p ―Xetú chíꞌidauꞌ, naꞌ leꞌe québedxa léꞌele nedaꞌ, naꞌ xetú chiꞌi, naꞌ xeléꞌele nedaꞌ laweꞌ da xexáꞌa nedaꞌ naga zua Xraꞌ.
\p
\v 17 Nadxa bal-la benneꞌ caꞌ dxuse̱de Jesús buluche̱be ljwezre̱ꞌ:
\p ―¿Bizra zéaje̱ da nigá? Dxe̱ꞌe̱ dxiꞌu, xetú chíꞌidauꞌ québedxa léꞌedxu Le̱ꞌ, naꞌ xetú chiꞌi, naꞌ xeléꞌedxu Le̱ꞌ laweꞌ da xexíaje̱ꞌ naga zua Xre̱ꞌ.
\v 18 ¿Bi zéaje̱ da naꞌ, xetú chíꞌidauꞌ? Quebe dxéajniꞌidxu bi chee̱ dxuchálaje̱ꞌ.
\p
\v 19 Guque beꞌe Jesús dxelaca lazre̱ꞌ xuluche̱be̱ꞌ Le̱ꞌ, naꞌ guzre̱ꞌ benneꞌ caꞌ:
\p ―Nedaꞌ guchaꞌ leꞌe, xetú chíꞌidauꞌ québedxa léꞌele nedaꞌ, naꞌ xetú chiꞌi, naꞌ xeléꞌele nedaꞌ. ¿Da nigá naꞌ dxuche̱be ljwézrele?
\v 20 Da li dxapaꞌ leꞌe, wabézrele leꞌe, ne xewiꞌine lázrele, san bénneache chee̱ xe̱zr la xu nigá xelebene̱ꞌ. Lácala leꞌe xewiꞌine lázrele, xel-laꞌ dxewíꞌine lazreꞌ chee̱le xexaca na xel-laꞌ dxebé.
\v 21 Gate tu nuꞌula zua sane̱ꞌ bidauꞌ zue̱ꞌ ste̱be laweꞌ da ba bzrin zra sua xel-laꞌ dxudía chee̱ꞌ. Gate te galaj bidu naꞌ, naꞌ québedxa dxeajsá lazre̱ꞌ da guzaque̱ꞌ laweꞌ da dxebéle̱ꞌe̱ne̱ꞌ chee̱ bidu naꞌ ba gúlajbeꞌ.
\v 22 Cáꞌanqueze leꞌe zúale ste̱be naꞌa, san nedaꞌ weláꞌquezaꞌ xedajxennáꞌa leꞌe, naꞌ lu xichaj lázrdaule súate̱queze xel-laꞌ dxebé, da naca na tu xel-laꞌ dxebé da quebe nu sequeꞌ cua.
\p
\v 23 ’Lu zra naꞌ québedxa bi guché̱bele nedaꞌ. Da li dxapaꞌ leꞌe, Xraꞌ gunne̱ꞌ leꞌe xúgute̱ da nábale lu Laꞌ nedaꞌ.
\v 24 Nédxula quebe bi gunábale lu Laꞌ nedaꞌ. Naꞌa le naba, naꞌ siꞌle, chee̱ súale̱ꞌe̱le xel-laꞌ dxebé.
\s Jesús guchuchuj guléaje̱ꞌ da dxaca lu xe̱zr la xu nigá
\p
\v 25 Gunná Jesús:
\p ―Ba guchaꞌ leꞌe da caní nen dizraꞌ caꞌ da dxululéꞌe na. Wazrín zra gate québedxa guchálajle̱naꞌ leꞌe da naca da dxuléꞌe na. Guchálajle̱naꞌ leꞌe caníqueze da naca chee̱ Xraꞌ.
\v 26 Lu zra naꞌ nábale Xraꞌ lu Laꞌ nedaꞌ, naꞌ quebe dxennéaꞌ nedaꞌ gataꞌ xuedaꞌ Xraꞌ waláz chee̱le,
\v 27 laweꞌ da Xráꞌqueze nazríꞌine̱ꞌ leꞌe. Nazríꞌine̱ꞌ leꞌe laweꞌ da nazríꞌile leꞌe nedaꞌ, ne dxéajle̱le chiaꞌ zaꞌa naga zua Dios.
\v 28 Guzáꞌa lau Xraꞌ chee̱ blaꞌa lu xe̱zr la xu nigá chee̱ xexáꞌa naga zua Xraꞌ.
\p
\v 29 Nadxa benneꞌ caꞌ dxuse̱de Jesús gulé̱ꞌe̱ Le̱ꞌ:
\p ―Naꞌa dxuchálajle̱nuꞌ netuꞌ caníqueze. Quebe dxuchínenuꞌ dizraꞌ caꞌ da dxululéꞌe na.
\v 30 Naꞌa dxeque béꞌentuꞌ nézenuꞌ xúgute̱ da caꞌ, naꞌ quebe dxal-laꞌ nu guche̱be Lueꞌ. Chee̱ le̱ naꞌ dxéajle̱ntuꞌ chiuꞌ zaꞌu naga zua Dios.
\p
\v 31 Jesús guzre̱ꞌ benneꞌ caꞌ:
\p ―¿Dxéajle̱le chiaꞌ naꞌa?
\v 32 Zaꞌ zra, ne ba naca zra náꞌqueze gate leꞌe gase dínnajle caꞌale xrneza cha chee̱le, naꞌ gucáꞌanale nedaꞌ tuzaꞌ. Quebe zúaquezaꞌ tuzaꞌ laweꞌ da zúale̱ Xraꞌ nedaꞌ.
\v 33 Dxapaꞌ leꞌe da nigá chee̱ gápale xel-laꞌ dxebeza zri lazreꞌ laweꞌ da nácale nedaꞌ tuze. Lu xe̱zr la xu nigá dxun na ba xen si sácale. Le gun chuchu lázrdaule, laweꞌ da ba bchuchuj bléajaꞌ da dxaca lu xe̱zr la xu nigá.
\c 17
\s Jesús dxenabe̱ꞌ Dios xucáꞌana chawe̱ꞌe̱ benneꞌ caꞌ dxeléajle̱ꞌe̱ chee̱ꞌ
\p
\v 1 Ca gudé gunné̱ꞌ da nigá, naꞌ Jesús gunné̱ꞌe̱ xabáa, dxenné̱ꞌ:
\p ―Xrae, ba bzrin zra. Bcaꞌana szren nedaꞌ, Zriꞌinuꞌ, chee̱ cáꞌanqueze nedaꞌ, Zriꞌinuꞌ, gucáꞌana szrenaꞌ Lueꞌ.
\v 2 Lueꞌ ba be̱nnuꞌ nedaꞌ, Zriꞌinuꞌ, xel-laꞌ dxenná bea chee̱ nna beꞌedaꞌ xúgute̱ bénneache, chee̱ gunézrujaꞌ xel-laꞌ nabán da zeajlí canna chee̱ xúgute̱ benneꞌ caꞌ be̱nnuꞌ nedaꞌ.
\v 3 Xel-laꞌ nabán da zeajlí canna naca na chee̱ xelúnbeꞌe̱ Lueꞌ, nacuꞌ Dios tu lichaꞌ, ne li lazreꞌ, naꞌ chee̱ xelúnbeꞌe̱ nedaꞌ, Jesucristo, Bénneaꞌ gusel-luꞌ Lueꞌ.
\p
\v 4 ’Nedaꞌ ba bcaꞌana szrenaꞌ Lueꞌ lu xe̱zr la xu nigá, ne ba bexuzre be̱naꞌ da bdxixruj beꞌenuꞌ nedaꞌ.
\v 5 Naꞌa, Xrae, be̱nna nedaꞌ xel-laꞌ szren lau Lueꞌ, da naca na xel-laꞌ szren naꞌ da guca na chiaꞌ naga zuꞌ Lueꞌ nédxudaute̱ gate za gataꞌ xe̱zr la xu nigá.
\p
\v 6 ’Benneꞌ caꞌ gucaꞌu Lueꞌ ládujla bénneache, benneꞌ caꞌ be̱nnuꞌ nedaꞌ, nedaꞌ ba bzéajniꞌidaꞌ le̱ꞌ Nu nacuꞌ Lueꞌ. Gulaque̱ꞌ chiuꞌ, naꞌ Lueꞌ be̱nnuꞌ nedaꞌ benneꞌ caꞌ, naꞌ ba belune̱ꞌ ca dxenná xrtizruꞌ.
\v 7 Naꞌa zaj nézene̱ꞌ xúgute̱ da be̱nnuꞌ nedaꞌ za na naga zuꞌ Lueꞌ.
\v 8 Ba bnézrujaꞌ chee̱ benneꞌ caní dizraꞌ chiuꞌ da be̱nnuꞌ nedaꞌ, naꞌ benneꞌ caní ba gulezíꞌ lu ne̱ꞌe̱ na. Ba guleque béꞌene̱ꞌ da li nedaꞌ zaꞌa naga zuꞌ Lueꞌ, ne ba guléajle̱ꞌe̱ chiuꞌ, gusel-luꞌ nedaꞌ.
\p
\v 9 ’Nedaꞌ dxataꞌ xuedaꞌ Lueꞌ gaca chaweꞌ chee̱ benneꞌ caní. Quebe dxataꞌ xuedaꞌ Lueꞌ ne̱ chee̱ benneꞌ caꞌ zaj naque̱ꞌ chee̱ xe̱zr la xu nigá. Dxenabaꞌ Lueꞌ ne̱ chee̱ benneꞌ caꞌ be̱nnuꞌ nedaꞌ, laweꞌ da zaj naque̱ꞌ chiuꞌ.
\v 10 Xúgute̱ da naca chiaꞌ naca na chiuꞌ, naꞌ da naca chiuꞌ naca na chiaꞌ nedaꞌ, naꞌ xel-laꞌ szren chiaꞌ dxuléꞌe laweꞌ na ne̱ chee̱ benneꞌ caní.
\p
\v 11 ’Nedaꞌ québedxa suaꞌ lu xe̱zr la xu nigá, san benneꞌ caní xelexegáꞌane̱ꞌ lu xe̱zr la xu nigá, naꞌ nedaꞌ wezáꞌa nigá, ne xedajxezúale̱quezaꞌ Lueꞌ. Xrae Láꞌazxa, lu xel-laꞌ dxenná bea chiuꞌ bxue benneꞌ caní, benneꞌ caꞌ be̱nnuꞌ nedaꞌ, chee̱ xelácaqueze̱ꞌ tuze ca nácadxu dxiꞌu tuze, Lueꞌ ne nedaꞌ.
\v 12 Gate ne zuaꞌ nedaꞌ lu xe̱zr la xu nigá, bxuaꞌ benneꞌ caní nen xel-laꞌ dxenná bea chiuꞌ, benneꞌ caní be̱nnuꞌ nedaꞌ, ne bcache chawaꞌ le̱ꞌ. Netú benneꞌ caní quebe gunite, san tuze bénneaꞌ ba nanítequeze̱ꞌ, naꞌ caní guca na chee̱ guca li ca naxúaj na lu xiche chiuꞌ.
\p
\v 13 ’Naꞌa ba zezáꞌa naga zuꞌ Lueꞌ. Dxácate̱ ne zuaꞌ lu xe̱zr la xu nigá dxennéaꞌ da caní chee̱ xelápale̱ꞌe̱ benneꞌ caní xel-laꞌ dxebé ca da nápaquezaꞌ nedaꞌ.
\v 14 Nedaꞌ bnézrujaꞌ benneꞌ caní dizraꞌ chiuꞌ. Bénneache chee̱ xe̱zr la xu nigá dxelecuídene̱ꞌ benneꞌ caní laweꞌ da québedxa zaj naque̱ꞌ tuze nen benneꞌ caꞌ chee̱ xe̱zr la xu nigá, ca naꞌ nedaꞌ quebe nacaꞌ tuze nen da naca chee̱ xe̱zr la xu nigá.
\v 15 Quebe dxenabaꞌ Lueꞌ xecaꞌu benneꞌ caní lu xe̱zr la xu nigá. Dxenabaꞌ guzrá chawuꞌ benneꞌ caní chee̱ quebe sequeꞌ da xriwe̱ꞌ bi gun na chee̱ꞌ le̱ꞌ.
\v 16 Ca nedaꞌ quebe nacaꞌ chee̱ xe̱zr la xu nigá, cáꞌanqueze benneꞌ caní quebe zaj naque̱ꞌ chee̱ xe̱zr la xu nigá.
\v 17 Bzua benneꞌ caní chee̱ xelaque̱ꞌ cheé̱quezuꞌ Lueꞌ ne̱ chee̱ da li. Dizraꞌ chiuꞌ naca na da li.
\v 18 Ca gusel-luꞌ Lueꞌ nedaꞌ ládujla bénneache zaj naque̱ꞌ chee̱ xe̱zr la xu nigá, cáꞌanqueze nedaꞌ dxusel-le̱ꞌ benneꞌ caní ládujla bénneache zaj naque̱ꞌ chee̱ xe̱zr la xu nigá.
\v 19 Ne̱ chee̱ benneꞌ caní nuzúa cuinaꞌ cheé̱quezuꞌ Lueꞌ, chee̱ cáꞌanqueze benneꞌ caní xelaque̱ꞌ cheé̱quezuꞌ Lueꞌ ne̱ chee̱ da li.
\p
\v 20 ’Dxataꞌ xuedaꞌ Lueꞌ, quegaze chee̱ benneꞌ caní, san cáꞌanqueze chee̱ benneꞌ caꞌ xeléajle̱ꞌe̱ chiaꞌ gate xelenne̱ꞌ da xuluchalaj benneꞌ caní.
\v 21 Dxenabaꞌ Lueꞌ chee̱ xelaca xúgute̱ benneꞌ caní túzqueze, ca Lueꞌ, Xrae, nácaquezuꞌ nedaꞌ tuze, ne nedaꞌ nácaquezaꞌ Lueꞌ tuze, ne chee̱ xelaca benneꞌ caní tuze nen dxiꞌu, chee̱ xeléajle̱ bénneache zaj naca chee̱ xe̱zr la xu nigá Lueꞌ gusel-luꞌ nedaꞌ.
\v 22 Nedaꞌ ba bnézrujaꞌ chee̱ benneꞌ caní xel-laꞌ szren naꞌ da be̱nnuꞌ nedaꞌ chee̱ xelaque̱ꞌ tuze ca nácaquezdxu tuze dxiꞌu.
\v 23 Nedaꞌ súale̱naꞌ benneꞌ caní, naꞌ Lueꞌ súale̱nuꞌ nedaꞌ, chee̱ xelácaqueze benneꞌ caní tuze, naꞌ caní xeleque beꞌe bénneache Lueꞌ gusel-luꞌ nedaꞌ, ne nazríꞌinuꞌ benneꞌ caní cáte̱ze nazríꞌinuꞌ nedaꞌ.
\p
\v 24 ’Xrae, Lueꞌ be̱nnuꞌ nedaꞌ benneꞌ caní, naꞌ dxaca lazraꞌ xelezúale̱ne̱ꞌ nedaꞌ naga suaꞌ nedaꞌ, chee̱ xeleléꞌene̱ꞌ xel-laꞌ szren da ba be̱nnuꞌ nedaꞌ, laweꞌ da nazríꞌinuꞌ nedaꞌ nédxudaute̱ gate quebe ne gunuꞌ xe̱zr la xu nigá.
\v 25 Xrae chaweꞌ, benneꞌ zaj naque̱ꞌ chee̱ xe̱zr la xu nigá quebe zaj núnbeꞌe̱ Lueꞌ, san nedaꞌ núnbeꞌa Lueꞌ, naꞌ benneꞌ caní ba zaj nézene̱ꞌ Lueꞌ gusel-luꞌ nedaꞌ.
\v 26 Nedaꞌ bzéajniꞌidaꞌ benneꞌ caní Nu nacuꞌ Lueꞌ, ne zúaquezaꞌ dxuzéajniꞌidaꞌ le̱ꞌ chee̱ sua xel-laꞌ zriꞌi lazreꞌ dxéquenuꞌ Lueꞌ nedaꞌ lu xichaj lázrdau benneꞌ caní, ne chee̱ súale̱ nédaꞌquezaꞌ le̱ꞌ.
\c 18
\s Dxele̱l-le̱ꞌ Jesús
\r (Mt. 26.47-56; Mr. 14.43-50; Lc. 22.47-53)
\p
\v 1 Ca gudé gunná Jesús da caní, naꞌ bdxúaje̱ꞌ nen benneꞌ caꞌ dxusé̱dene̱ꞌ chee̱ chjaque̱ꞌ xecha laꞌa xe̱gu Cedrón. Lataj naꞌ zé̱le̱ꞌe̱ xaga olivo naga guxúꞌu Jesús nen benneꞌ caꞌ.
\v 2 Cáꞌanqueze Judas, bénneaꞌ dxudée̱ꞌ Jesús lu naꞌ benneꞌ caꞌ dxeledábague̱ꞌ Le̱ꞌ, núnbeꞌe̱ lataj naꞌ laweꞌ da zaneꞌ lasa guxíaj Jesús naꞌ nen benneꞌ caꞌ dxusé̱dene̱ꞌ.
\v 3 Caꞌ guca, bzrin Judas naꞌ nen tu cueꞌ benneꞌ caꞌ dxjaque̱ꞌ wedil-la, ne nen bal-la benneꞌ xraꞌaga we̱n zrin chee̱ xudauꞌ, benneꞌ caꞌ gulesel-la benneꞌ xíchaje̱ caꞌ chee̱ bxruze caꞌ, ne benneꞌ fariseo caꞌ. Zaj nuꞌe̱ xaga, ne xia caꞌ, ne xiꞌ caꞌ, ne xiꞌ xedxe.
\v 4 Jesús ba nézene̱ꞌ ca da gaca chee̱ꞌ, naꞌ chee̱ le̱ naꞌ bdxúaje̱ꞌ lau benneꞌ caꞌ, naꞌ bche̱be̱ꞌ le̱ꞌ:
\p ―¿Nuzra dxexílajle?
\p
\v 5 Belexeche̱be benneꞌ caꞌ:
\p ―Jesús, benneꞌ Nazaret.
\p Jesús beche̱be̱ꞌ:
\p ―Nedaꞌ naꞌ.
\p Judas, bénneaꞌ dxudée̱ꞌ Jesús lu naꞌ benneꞌ caꞌ zúaqueze̱ꞌ ládujla benneꞌ caꞌ.
\v 6 Gate gunná Jesús: Nedaꞌ naꞌ, naꞌ benneꞌ caꞌ belexebigue̱ꞌ lau Jesús, ne xeajlechazte̱ꞌ lu xu.
\v 7 Nadxa Jesús bche̱be̱ꞌ benneꞌ caꞌ da xula:
\p ―¿Nuzra dxexílajle?
\p Gulenná benneꞌ caꞌ:
\p ―Jesús, benneꞌ Nazaret.
\p
\v 8 Nadxa guzre Jesús benneꞌ caꞌ:
\p ―Ba guchaꞌ leꞌe nedaꞌ naꞌ. Che dxexílajle nedaꞌ, le güe benneꞌ caní lataj cheajxaque̱ꞌ.
\p
\v 9 Ca guca da nigá guca li ca gunná Jesús, gunné̱ꞌ: “Benneꞌ caꞌ be̱nna Xraꞌ nedaꞌ, netue̱ꞌ quebe bnitiaꞌ.”
\v 10 Nadxa Simón Pedro, ne nuꞌe̱ xia, guléaje̱ꞌ na, naꞌ guchugue̱ꞌ naga da zua xabe̱la chee̱ Malco, we̱n zrin chee̱ bxruze blau.
\v 11 Jesús guzre̱ꞌ Pedro:
\p ―Begúꞌu xia chiuꞌ lu zre na. Ca da ba nun Xraꞌ siꞌ sacaꞌ nedaꞌ, ¿quebe dxal-laꞌ sacaꞌ na?
\s Jesús dxezrine̱ꞌ lau bxruze blau
\r (Mt. 26.57-58; Mr. 14.53-54; Lc. 22.54)
\p
\v 12 Nadxa benneꞌ dxjaca wedil-la, ne benneꞌ dxenná beꞌene̱ꞌ le̱ꞌ, ne benneꞌ xraꞌaga we̱n zrin chee̱ judío caꞌ gule̱l-le̱ꞌ Jesús, ne buluchéaje̱ꞌ Le̱ꞌ.
\v 13 Nadxa guleché̱ꞌe̱ Jesús lizre Anás. Anás nigá naque̱ꞌ xrtau zriꞌine Caifás, bénneaꞌ naque̱ꞌ bxruze blau iza naꞌ.
\v 14 Caifás nigá naque̱ꞌ bénneaꞌ guzre̱ꞌ judío blau caꞌ gácadxa chaweꞌ gate tuze benneꞌ waláz chee̱ xe̱zr la xu chee̱ꞌ.
\s Pedro dxenné̱ꞌ quebe núnbeꞌe̱ Jesús
\r (Mt. 26.69-70; Mr. 14.66-68; Lc. 22.55-57)
\p
\v 15 Simón Pedro, ne xetú benneꞌ caꞌ dxuse̱de Jesús zjaque̱ꞌ zeajnawe̱ꞌ Jesús. Benneꞌ ljwezre Pedro nigá núnbea bxruze blau le̱ꞌ. Caꞌan guca, benneꞌ nigá guxúꞌule̱ne̱ꞌ Jesús chaleꞌaj lizre bxruze blau naꞌ.
\v 16 Pedro begáꞌane̱ꞌ dxuꞌa dxa xuꞌu da zua chaleꞌaj naꞌ. Chee̱ le̱ naꞌ bdxuaj bénneaꞌ núnbea bxruze blau le̱ꞌ, naꞌ bchálajle̱ne̱ꞌ nuꞌula zua dxuꞌa dxa xuꞌu naꞌ, naꞌ guluꞌe̱ Pedro chaleꞌaj naꞌ.
\v 17 Nadxa nuꞌula naꞌ zua dxuꞌa dxa xuꞌu bche̱be̱ꞌ Pedro:
\p ―¿Quebe nacuꞌ lueꞌ tuze nen benneꞌ Nazaret naꞌ?
\p Pedro beche̱be̱ꞌ:
\p ―Quebe nacaꞌ.
\p
\v 18 Laweꞌ da dxun na zaga, benneꞌ we̱n zrin caꞌ, ne benneꞌ xraꞌaga we̱n zrin chee̱ bxruze caꞌ ba zaj nabeque̱ꞌ xiꞌ, ne zaj ze̱ꞌ dxuꞌa xiꞌ naꞌ dxelexezréꞌene̱ꞌ. Pedro ze̱ꞌ nen benneꞌ caꞌ, dxexezréꞌene̱ꞌ dxuꞌa xiꞌ naꞌ.
\s Bxruze blau dxuche̱be̱ꞌ Jesús
\r (Mt. 26.59-66; Mr. 14.55-64; Lc. 22.66-71)
\p
\v 19 Bxruze blau guzú lawe̱ꞌ dxuche̱be̱ꞌ Jesús nuca benneꞌ caꞌ zaj naque̱ꞌ benneꞌ dxusé̱dene̱ꞌ, ne bi da dxusé̱dene̱ꞌ le̱ꞌ.
\v 20 Jesús guzre̱ꞌ le̱ꞌ:
\p ―Nedaꞌ ba bchálajquezaꞌ láwela xúgute̱ bénneache. Bsé̱dequezaꞌ lu xuꞌu caꞌ, ne lu xuꞌu naga dxelezraga xúgute̱ benneꞌ judío caꞌ. Quebe bi bchálajaꞌ bagácheze.
\v 21 ¿Bizr chee̱ naꞌ dxuche̱buꞌ nedaꞌ? Bche̱be benneꞌ caꞌ ba belenne̱ꞌ chiaꞌ, naꞌ le̱ꞌ xelenné̱ꞌ bi da bchálajle̱naꞌ le̱ꞌ. Benneꞌ caꞌ zaj nézene̱ꞌ da ba gunnéaꞌ.
\p
\v 22 Gate gunná Jesús da nigá, naꞌ tu benneꞌ xraꞌaga we̱n zrin chee̱ xudauꞌ, benneꞌ ze̱ꞌ naꞌ, gudape̱ꞌ xraga Jesús, naꞌ gunné̱ꞌ:
\p ―¿Caní dxexeche̱buꞌ lau bxruze blau nigá?
\p
\v 23 Jesús beche̱be̱ꞌ:
\p ―Che gunnéaꞌ tu da cale̱la, gunná ájala naca na. Che da gunnéaꞌ naca na xrlátaje, ¿bizr chee̱ naꞌ dxuꞌu nedaꞌ?
\p
\v 24 Nadxa Anás gusél-le̱ꞌ Jesús, zaj nadxéaj ne̱ꞌe̱, lau Caifás, bxruze blau.
\s Pedro dxenné̱ꞌ xecha lasa quebe núnbeꞌe̱ Jesús
\r (Mt. 26.71-75; Mr. 14.69-72; Lc. 22.58-62)
\p
\v 25 Dxácate̱ naꞌ ze̱ Pedro dxuꞌa xiꞌ naꞌ dxexezréꞌene̱ꞌ, naꞌ gulé̱ꞌe̱ le̱ꞌ:
\p ―¿Quebe nacuꞌ lueꞌ tu benneꞌ caꞌ zaj naque̱ꞌ tuze nen bénneaꞌ?
\p Naꞌ Pedro gunné̱ꞌ:
\p ―Quebe nacaꞌ.
\p
\v 26 Nadxa tu benneꞌ we̱n zrin chee̱ bxruze blau, benneꞌ naque̱ꞌ xrtia bénneaꞌ guchugu Pedro nague̱ꞌ, bche̱be̱ꞌ le̱ꞌ:
\p ―¿Quegá bleꞌedaꞌ lueꞌ nen bénneaꞌ naga zaj ze̱ xaga olivo caꞌ?
\p
\v 27 Pedro gunné̱ꞌ xecha lasa:
\p ―Quebe núnbeꞌa bénneaꞌ.
\p Laꞌ náꞌqueze gudxezre xjeaj.
\s Jesús dxezrine̱ꞌ lau Pilato
\r (Mt. 27.1-2, 11-14; Mr. 15.1-5; Lc. 23.1-5)
\p
\v 28 Nadxa belexebéaje̱ꞌ Jesús lizre Caifás, naꞌ guleché̱ꞌe̱ Le̱ꞌ xuꞌu lizre benneꞌ xuꞌu lu ne̱ꞌe̱ xe̱zr la xu naꞌ waláz chee̱ Roma. Ba dxezú lau dxaníꞌsise̱ꞌ, naꞌ benneꞌ judío caꞌ quebe guluꞌe̱ xuꞌu naꞌ chee̱ quebe xelexegáꞌane̱ꞌ sban, laweꞌ da che xeluꞌe̱ naꞌ, quebe gaca xelawe̱ꞌ xrcheꞌ chee̱ Laní Pascua.
\v 29 Chee̱ le̱ naꞌ bdxuaj Pilato bchálajle̱ne̱ꞌ benneꞌ caꞌ, naꞌ guzre̱ꞌ le̱ꞌ:
\p ―¿Bizra da zria dxágule benneꞌ nigá?
\p
\v 30 Belexeche̱be benneꞌ caꞌ:
\p ―Chela ca naque̱ꞌ tu benneꞌ we̱n da zrinnaj, quebe gudentuꞌ le̱ꞌ lauꞌ.
\p
\v 31 Nadxa Pilato guzre̱ꞌ benneꞌ caꞌ:
\p ―Le xeché̱ꞌe̱, ne le guchiꞌa chee̱ꞌ cáte̱ze naca da nadxixruj bea chee̱le.
\p Belexeche̱be benneꞌ judío caꞌ:
\p ―Netuꞌ, benneꞌ judío, quebe naca chee̱ntuꞌ nu gútentuꞌ.
\p
\v 32 Caꞌan guca, guca li ca naca da ba gunná Jesús ca gatie̱ꞌ.
\v 33 Pilato bexuꞌe̱ xuꞌu naꞌ, naꞌ gunné̱ꞌ Jesús, ne bche̱be̱ꞌ Le̱ꞌ:
\p ―¿Nacuꞌ Lueꞌ Wenná Bea chee̱ judío caꞌ?
\p
\v 34 Jesús gunné̱ꞌ:
\p ―¿Dxenabuꞌ da nigá lueꞌzqueze, u laweꞌ da nu guzre lueꞌ ca naca chiaꞌ?
\p
\v 35 Pilato beche̱be̱ꞌ:
\p ―¿Nacaꞌ nedaꞌ judío? Benneꞌ xe̱zr la xu chiuꞌ, ne benneꞌ xíchaje̱ caꞌ chee̱ bxruze caꞌ buludée̱ꞌ lueꞌ lawaꞌ nedaꞌ. ¿Bizra be̱nuꞌ?
\p
\v 36 Nadxa beche̱be Jesús:
\p ―Naga dxenná beꞌa quebe naca na chee̱ xe̱zr la xu nigá. Chela naca na chee̱ xe̱zr la xu nigá, naꞌ benneꞌ caꞌ zaj naque̱ꞌ nedaꞌ tuze welásaqueze̱ꞌ chee̱ quebe teaꞌ nedaꞌ lu naꞌ benneꞌ judío caní. Naga dxenná beꞌa quebe naca na nigá.
\p
\v 37 Nadxa guzre Pilato Jesús:
\p ―¿Nacuꞌ Lueꞌ wenná bea?
\p Beche̱be Jesús:
\p ―Nacaꞌ wenná bea, cáte̱ze dxennáuꞌ lueꞌ. Nedaꞌ gúlajaꞌ, ne blaꞌa lu xe̱zr la xu nigá chee̱ nniaꞌ da li. Xúgute̱ benneꞌ caꞌ dxelune̱ꞌ ca dxenná dizraꞌ chee̱ da li dxelenne̱ꞌ da dxennéaꞌ nedaꞌ.
\p
\v 38 Pilato gunné̱ꞌ:
\p ―¿Bizra naꞌ da li?
\s Dxelechugue̱ꞌ chee̱ Jesús gatie̱ꞌ
\r (Mt. 27.15-31; Mr. 15.6-20; Lc. 23.13-25)
\p Ca gudé bche̱be Pilato Jesús caní, naꞌ bdxúaje̱ꞌ xetú. Bchálajle̱ne̱ꞌ benneꞌ judío caꞌ, naꞌ guzre̱ꞌ le̱ꞌ:
\p ―Nedaꞌ quebe bi da cale̱la dxezreldaꞌ nun benneꞌ nigá.
\v 39 Leꞌe zua tu da zéajle̱le. Gusanaꞌ nedaꞌ tu benneꞌ xuꞌu lizre xia lu Laní Pascua nigá. ¿Dxaca lázrele gusanaꞌ wenná bea chee̱ judío caꞌ?
\p
\v 40 Nadxa xúgute̱ꞌ gulenné̱ꞌ zizraj:
\p ―¡Quegá benneꞌ nigá! ¡Bsan Barrabás!
\p Barrabás naꞌ naque̱ꞌ gubán.
\c 19
\p
\v 1 Nadxa Pilato guqué̱ꞌe̱ Jesús, naꞌ bdxixruj béꞌene̱ꞌ xeluꞌe̱ Le̱ꞌ xideꞌ.
\v 2 Benneꞌ dxjaque̱ꞌ wedil-la buluzríe̱ꞌ xichaj Jesús tu daꞌ belune̱ꞌ zruze xaga xecheꞌ, ne bulugácue̱ꞌ Le̱ꞌ tu ladxeꞌ bzawe.
\v 3 Nadxa guléchaje̱ꞌ Le̱ꞌ, dxelenné̱ꞌ:
\p ―¡Gaca ba lueꞌ, wenná bea chee̱ judío caꞌ!
\p Nadxa belúꞌe̱ dxuꞌa lau Jesús.
\p
\v 4 Nadxa bdxuaj Pilato da xula, ne guzre̱ꞌ benneꞌ caꞌ:
\p ―¡Le nnaꞌxque! Dxebéajaꞌ benneꞌ nigá chee̱ nézele quebe dxezreldaꞌ bi da zrinnaj nabague̱ꞌ.
\p
\v 5 Bdxuaj Jesús zria xíchaje̱ꞌ da naca zruze xaga xecheꞌ, ne nacue̱ꞌ ladxeꞌ bzawe naꞌ. Nadxa Pilato guzre̱ꞌ benneꞌ caꞌ:
\p ―Nigá zua bénneaꞌ.
\p
\v 6 Gate benneꞌ xíchaje̱ caꞌ chee̱ bxruze caꞌ, ne xraꞌaga we̱n zrin chee̱ꞌ caꞌ beleléꞌene̱ꞌ Jesús, naꞌ gulezú lawe̱ꞌ dxelenné̱ꞌ zizraj:
\p ―¡Bde̱ꞌe̱ xaga béguaj! ¡Bde̱ꞌe̱ xaga béguaj!
\p Pilato guzre̱ꞌ benneꞌ caꞌ:
\p ―Le che̱ꞌe̱, ne le gudé̱ꞌe̱ xaga béguaj léꞌequeze, laweꞌ da quebe dxezreldaꞌ bi da zrinnaj nabague̱ꞌ.
\p
\v 7 Naꞌ benneꞌ judío caꞌ belexeche̱be̱ꞌ:
\p ―Netuꞌ nápantuꞌ tu da nadxixruj bea na, ne ca dxenná na dxal-laꞌ gatie̱ꞌ laweꞌ da dxun cuine̱ꞌ Zriꞌine Dios.
\p
\v 8 Gate ben Pilato da nigá, naꞌ bezrébedxe̱ꞌ.
\v 9 Bexuꞌe̱ xuꞌu naꞌ, naꞌ bche̱be̱ꞌ Jesús:
\p ―¿Gazra benneꞌ Lueꞌ?
\p Quebe bi beche̱be Jesús.
\p
\v 10 Nadxa guzre Pilato Le̱ꞌ:
\p ―¿Quebe dxexeche̱buꞌ chiaꞌ? ¿Quebe nézenuꞌ Lueꞌ napaꞌ nedaꞌ xel-laꞌ dxenná bea gudáꞌa Lueꞌ xaga béguaj, ne napaꞌ xel-laꞌ dxenná bea gusanaꞌ Lueꞌ?
\p
\v 11 Beche̱be Jesús:
\p ―Quebe bi xel-laꞌ dxenná bea napuꞌ bi gunuꞌ chiaꞌ chela ca be̱nna Dios lueꞌ xel-laꞌ dxenná bea nigá. Chee̱ le̱ naꞌ, bénneaꞌ bdee̱ꞌ nedaꞌ lu naꞌu dul-la zrendxa nabague̱ꞌ ca lueꞌ.
\p
\v 12 Lu zra naꞌte̱ gudilaj lazreꞌ Pilato ájala gune̱ꞌ gusane̱ꞌ Jesús, san benneꞌ judío caꞌ gulenné̱ꞌ zizraj:
\p ―Che gusanuꞌ benneꞌ nigá, quebe nacuꞌ César tuze, bénneaꞌ dxenná bea Roma. Nu benneꞌ dxun cuine̱ꞌ wenná bea dxedábague̱ꞌ César.
\p
\v 13 Nadxa Pilato, gate benne̱ꞌ da nigá, bdxixruj béꞌene̱ꞌ xelexebéaje̱ꞌ Jesús, naꞌ gudxéꞌe̱ lataj blau chee̱ꞌ, da zua lataj naꞌ nazí le na Gabata nen dizraꞌ hebreo, da zéaje̱ na chaleꞌaj xiaj taꞌa.
\v 14 Naca na zra za zrin Laní Pascua, ca du wagubizra. Nadxa Pilato guzre̱ꞌ benneꞌ judío caꞌ:
\p ―Nigá zua wenná bea chee̱le.
\p
\v 15 Naꞌ benneꞌ caꞌ gulenné̱ꞌ zizraj:
\p ―¡Gatie̱ꞌ! ¡Gatie̱ꞌ! ¡Bde̱ꞌe̱ xaga béguaj!
\p Pilato guzre̱ꞌ benneꞌ caꞌ:
\p ―¿Gudáꞌa wenná bea chee̱le xaga béguaj?
\p Belexeche̱be benneꞌ xíchaje̱ caꞌ chee̱ bxruze caꞌ:
\p ―Netuꞌ zua tuze wenná bea chee̱ntuꞌ. ¡César!
\v 16 Nadxa Pilato bdee̱ꞌ Jesús lu naꞌ benneꞌ caꞌ chee̱ te̱ꞌe̱ xaga béguaj, naꞌ guleché̱ꞌe̱ Jesús.
\s Jesús dxedé̱ꞌe̱ xaga béguaj
\r (Mt. 27.32-44; Mr. 15.21-32; Lc. 23.26-43)
\p
\v 17 Naꞌ bdxuaj Jesús nuꞌe̱ xaga béguaj chee̱ chéaje̱ꞌ lataj naꞌ nazí le na Zrita Xichaj Benneꞌ Gate, naꞌ nen dizraꞌ hebreo nazí le na Gólgota.
\v 18 Buludé̱ꞌe̱ Jesús xaga béguaj lataj naꞌ, naꞌ tu zren nen Jesús buludé̱ꞌe̱ xechupa benneꞌ xaga béguaj caꞌ chaláꞌa weaj naga daꞌ Jesús.
\v 19 Pilato bdxixruj béꞌene̱ꞌ buluzúe̱ꞌ le̱ꞌe xaga béguaj xichaj Jesús da dxenná na: Jesús, Benneꞌ Nazaret, Wenná Bea Chee̱ Judío Caꞌ.
\v 20 Zaneꞌ benneꞌ judío caꞌ bululabe̱ꞌ da naꞌ laweꞌ da zua lataj naꞌ naga buludé̱ꞌe̱ Jesús xaga béguaj gáguze naga dxeꞌ xe̱zre naꞌ, naꞌ da naꞌ naxúaj na nen dizraꞌ hebreo, ne nen dizraꞌ griego, ne nen dizraꞌ latín.
\v 21 Chee̱ le̱ naꞌ benneꞌ xíchaje̱ caꞌ chee̱ bxruze chee̱ judío caꞌ gulé̱ꞌe̱ Pilato:
\p ―Quebe guzúajuꞌ na: Wenná Bea Chee̱ Judío Caꞌ. Bzuaj na: Le̱ꞌ Gunné̱ꞌ Naque̱ꞌ Wenná Bea Chee̱ Judío Caꞌ.
\p
\v 22 Beche̱be Pilato:
\p ―Da bzuajaꞌ, ba naxúajqueze na.
\p
\v 23 Ca gudé buludáꞌ benneꞌ dxjaque̱ꞌ wedil-la Jesús xaga béguaj, naꞌ belexequé̱ꞌe̱ zra lane̱ꞌ, ne belebeque̱ꞌ na tapa cueꞌ, tu cueꞌ weaj chee̱ tu tu benneꞌ dxjaque̱ꞌ wedil-la. Belecáꞌaqueze̱ꞌ ladxeꞌ dxexrúa cuzre̱ꞌ da quebe nadía na. Tu ca nácheze na.
\v 24 Chee̱ le̱ naꞌ benneꞌ dxjaque̱ꞌ wedil-la gulé̱ ljwezre̱ꞌ:
\p ―Quebe chézadxu na. Cwéajdxu da gunna bea na chee̱ laꞌ nu xala le̱ na.
\p Caꞌan guca, guca li da naxúaj na lu xiche chee̱ Dios, da dxenná na: Belexelé̱ꞌe̱ zra lanaꞌ, ne guléaje̱ꞌ da gunna bea na chee̱ le̱ na. Caní belún benneꞌ dxjaque̱ꞌ wedil-la.
\p
\v 25 Gáguze naga zua xaga béguaj chee̱ Jesús ze̱ xrna Jesús nen bi bila xrne̱ꞌe̱, ne María, zruꞌula Cleofas, ne María Magdalena.
\v 26 Gate bleꞌe Jesús xrne̱ꞌe̱, ne cuita xrne̱ꞌe̱ naꞌ ze̱ Juan, benneꞌ bse̱de Jesús, bénneaꞌ nazriꞌidxe̱ꞌ, naꞌ guzre̱ꞌ xrne̱ꞌe̱:
\p ―Núꞌuladauꞌ, naꞌ ze̱ zriꞌinuꞌ.
\p
\v 27 Nadxa guzre Jesús bénneaꞌ:
\p ―Naꞌ ze̱ xrnaꞌu.
\p Zra naꞌte̱ benneꞌ nigá beche̱ꞌe̱ nuꞌula naꞌ lizre̱ꞌ.
\s Dxate Jesús
\r (Mt. 27.45-56; Mr. 15.33-41; Lc. 23.44-49)
\p
\v 28 Ca gudé gunná Jesús da nigá, laweꞌ da nézene̱ꞌ xúgute̱ na ba guca li, ne chee̱ guca li ca naxúaj na lu xiche chee̱ Dios, gunné̱ꞌ:
\p ―Dxebíledaꞌ.
\p
\v 29 Zua naꞌ tu dxeꞌe nupe zichaj, naꞌ bulusubise̱ꞌ tu da dxezrupe na nupe zichaj naꞌ, ne buluzúe̱ꞌ na laweꞌ tu xia tunna, naꞌ buluzúe̱ꞌ na dxuꞌa Jesús.
\v 30 Naꞌ Jesús guzrupe̱ꞌ nupe zichaj naꞌ, naꞌ gunné̱ꞌ:
\p ―Ba guca li ca naca na.
\p Nadxa bse dxuꞌa xíchaje̱ꞌ, gutie̱ꞌ.
\s Tu benneꞌ dxeje̱ꞌ wedil-la dxechizie̱ꞌ xia lachúꞌu Jesús
\p
\v 31 Naca na zra za zrin Laní Pascua, naꞌ judío caꞌ quebe gulaca lazre̱ꞌ xelexegáꞌana benneꞌ caꞌ le̱ꞌe̱ xaga béguaj caꞌ lu zra dxulupáꞌane̱ꞌ laweꞌ da naca zra naꞌ tu zra blau. Chee̱ le̱ naꞌ gulenabe̱ꞌ lau Pilato dxixruj béꞌene̱ꞌ xelíchaje̱ꞌ niꞌa benneꞌ caꞌ zaj de̱ꞌe̱ xaga béguaj caꞌ, ne xelexequé̱ꞌe̱ le̱ꞌ le̱ꞌe̱ xaga béguaj caꞌ.
\v 32 Nadxa tu benneꞌ caꞌ dxjaque̱ꞌ wedil-la gudíchaje̱ꞌ niꞌa benneꞌ nedxu naꞌ, ne cáꞌanqueze chee̱ benneꞌ xetú de̱ꞌe̱ cuita Jesús.
\v 33 Gate bzrine̱ꞌ naga daꞌ Jesús, bléꞌene̱ꞌ ba gutie̱ꞌ, naꞌ chee̱ le̱ naꞌ quebe gudíchaje̱ꞌ niꞌe̱.
\p
\v 34 Tu benneꞌ caꞌ dxjaque̱ꞌ wedil-la guchízie̱ꞌ xia chee̱ꞌ lachúꞌu Jesús, naꞌ bdxuaj dxen, ne nisa naꞌ.
\v 35 Benneꞌ dxuchalaj da nigá naque̱ꞌ benneꞌ bléꞌene̱ꞌ na, ne dxuchálaje̱ꞌ da li, ne nézene̱ꞌ dxenné̱ꞌ da li, chee̱ cáꞌanqueze leꞌe chéajle̱le chee̱ Jesús.
\v 36 Da caní guca na chee̱ guca li ca da naxúaj na lu xiche chee̱ Dios, da dxenná na: Quebe gulíchaje̱ꞌ netú zrita chee̱ꞌ.
\v 37 Xetú da naxúaj na lu xiche chee̱ Dios dxenná na: Weleléꞌene̱ꞌ bénneaꞌ belune̱ꞌ we̱ꞌ.
\s Dxulucache̱ꞌ Jesús
\r (Mt. 27.57-61; Mr. 15.42-47; Lc. 23.50-56)
\p
\v 38 Ca gudé naꞌ José, benneꞌ xe̱zre Arimatea, xeajnabe̱ꞌ Pilato guꞌe̱ le̱ꞌ lataj xexuꞌe̱ Jesús. José naque̱ꞌ tu benneꞌ guque̱ꞌ Jesús tuze, san bagácheze laweꞌ da bzrebe̱ꞌ judío blau caꞌ. Pilato be̱ꞌe̱ le̱ꞌ lataj, naꞌ bexuꞌe̱ Jesús.
\v 39 Cáꞌanqueze Nicodemo, bénneaꞌ xeajchálajle̱ne̱ꞌ Jesús chizrela, bzrine̱ꞌ naꞌ, nuꞌe̱ tu gaxúa xiaj nedxe, ne tu da dxelále̱ꞌe̱ zixre.
\v 40 Nadxa José, ne Nicodemo belexequé̱ꞌe̱ Jesús, naꞌ buluchele̱ꞌ Le̱ꞌ ladxeꞌ nen nedxe naꞌ ca naca da zjácale̱ benneꞌ judío caꞌ da dxelune̱ꞌ chee̱ benneꞌ gateꞌ, gate naꞌ dxulucache̱ꞌ le̱ꞌ.
\v 41 Lataj naꞌ naga buludé̱ꞌe̱ Jesús xaga béguaj zua tu lataj naga zaj ze̱ xaga caꞌ, naꞌ láwela lataj naꞌ zua tu ba cube le̱ꞌe̱ xiaj naꞌ, naga quebe nu ne chúꞌuqueze benneꞌ gateꞌ.
\v 42 Lu ba naꞌ beleguꞌe̱ Jesús laweꞌ da zua ba naꞌ gáguze, ne laweꞌ da ba dxebía gubizra, ne ba zua su lau zra dxulupáꞌana judío caꞌ.
\c 20
\s Jesús dxexebane̱ꞌ ládujla benneꞌ gate
\r (Mt. 28.1-10; Mr. 16.1-8; Lc. 24.1-12)
\p
\v 1 Zra nedxu, guxíaj María Magdalena dxuꞌa ba naꞌ dxaníꞌsise̱ꞌ, gate ne nachúl-late̱, naꞌ bléꞌene̱ꞌ québedxa naduse xiaj dxuꞌa ba naꞌ.
\v 2 Nadxa bexíaj chégüe̱ꞌ naga zua Simón Pedro nen xetú benneꞌ bse̱de Jesús, bénneaꞌ bzriꞌidxe̱ꞌ Jesús, naꞌ guzre̱ꞌ benneꞌ caꞌ:
\p ―Ba belequé̱ꞌe̱ Xránadxu lu ba naꞌ, ne quebe nézentuꞌ ga xeajlelúꞌe̱ Le̱ꞌ.
\p
\v 3 Nadxa Pedro, ne bénneaꞌ xetú beledxúaje̱ꞌ zjaque̱ꞌ dxuꞌa ba naꞌ.
\v 4 Dxúpate̱ꞌ zjaca chégüe̱ꞌ tu zren, san bénneaꞌ xetú guzá chégudxe̱ꞌ ca Pedro, ne bzrine̱ꞌ nédxudxa dxuꞌa ba naꞌ.
\v 5 Naꞌ xeajsé̱ꞌ su dxúꞌala xeajnné̱ꞌe̱ lu ba naꞌ, naꞌ bléꞌene̱ꞌ ladxeꞌ da buluchele̱ꞌ Jesús xuꞌu na naꞌ, san quebe guxúꞌe̱ lu ba naꞌ.
\v 6 Ca gudé naꞌ, bzrin Simón Pedro, naꞌ guxúꞌe̱ lu ba naꞌ. Cáꞌanqueze le̱ꞌ bléꞌene̱ꞌ ladxeꞌ naꞌ xuꞌu na naꞌ,
\v 7 ne bléꞌene̱ꞌ ladxeꞌ da buluchele̱ꞌ xichaj Jesús, quebe xuꞌu na tu zren nen ladxeꞌ da bedxela na le̱ꞌ. Nadube na, dxeꞌ na chaláꞌala.
\v 8 Nadxa cáꞌanqueze guxúꞌu bénneaꞌ xetú, bénneaꞌ bzrin nedxu dxuꞌa ba naꞌ, naꞌ bléꞌene̱ꞌ ladxeꞌ caꞌ, ne guxéajle̱ꞌe̱.
\v 9 Quebe ne xeléajniꞌine̱ꞌ da naxúaj na lu xiche chee̱ Dios da dxenná na xebán Jesús ládujla benneꞌ gateꞌ.
\v 10 Nadxa benneꞌ caꞌ bse̱de Jesús belexezrine̱ꞌ xuꞌu naga zaj zre̱ꞌe̱.
\s Jesús dxuléꞌe lawe̱ꞌ María Magdalena
\r (Mr. 16.9-11)
\p
\v 11 María begáꞌane̱ꞌ dxuꞌa ba naꞌ, dxebezre̱ꞌ. Ca dxebezre̱ꞌ naꞌ, naꞌ gulégüe̱ꞌ dxenné̱ꞌe̱ lu ba naꞌ,
\v 12 naꞌ bléꞌene̱ꞌ chupa gubáz chee̱ xabáa zaj nácue̱ꞌ zra lane̱ꞌ chiche, zaj dxeꞌe̱ naga guxúꞌu Jesús. Tue̱ꞌ dxeꞌe̱ naga guzrúa xichaj Jesús, naꞌ xetúe̱ꞌ dxeꞌe̱ zeaj zranle ga guzrúa niꞌa Le̱ꞌ.
\v 13 Naꞌ buluche̱be gubáz chee̱ xabáa caꞌ María naꞌ:
\p ―Nuꞌula, ¿bizr chee̱ naꞌ dxebezruꞌ?
\p Le̱ꞌ guzre̱ꞌ gubáz chee̱ xabáa caꞌ:
\p ―Laweꞌ da belúꞌe̱ Xranaꞌ, ne quebe nezdaꞌ ga xeajlelúꞌe̱ Le̱ꞌ.
\p
\v 14 Caní dxenné̱ꞌ, naꞌ bzéchaj xíchaje̱ꞌ, ne bléꞌene̱ꞌ Jesús ze̱ꞌ caꞌala, san quebe nézene̱ꞌ che Jesús naꞌ.
\v 15 Nadxa Jesús bche̱be̱ꞌ María naꞌ:
\p ―Núꞌuladauꞌ, ¿bizr chee̱ naꞌ dxebezruꞌ? ¿Nu dxexílajuꞌ?
\p María gúquene̱ꞌ naque̱ꞌ benneꞌ dxáꞌane̱ꞌ xaga caꞌ zaj ze̱ naꞌ, naꞌ guzre̱ꞌ Le̱ꞌ:
\p ―Benneꞌ, che lueꞌ biꞌu Le̱ꞌ, gunná ga xeajlúꞌu Le̱ꞌ, chee̱ cheajxezriꞌa Le̱ꞌ.
\p
\v 16 Nadxa Jesús guzre̱ꞌ nuꞌula naꞌ:
\p ―María.
\p María naꞌ bexéchaje̱ꞌ, ne guzre̱ꞌ Le̱ꞌ nen dizraꞌ hebreo:
\p ―¡Raboni!
\p Dizraꞌ nigá zéaje̱ na: Benneꞌ Dxuse̱de.
\p
\v 17 Jesús guzre̱ꞌ María naꞌ:
\p ―Bsan nedaꞌ laweꞌ da quebe ne xegüénaꞌ naga zua Xraꞌ. Bexíaj, xeajxe̱zre bi bíchaꞌdauꞌ caꞌ, benneꞌ caꞌ bsé̱dedaꞌ, xegüénaꞌ naga zua Xraꞌ, ne nácaqueze̱ꞌ Xrale. Naque̱ꞌ Dios chiaꞌ, ne Dios chee̱le.
\p
\v 18 Nadxa bexíaj María Magdalena, xeajzenne̱ꞌ benneꞌ caꞌ bse̱de Jesús ba bléꞌene̱ꞌ Jesús, naꞌ Le̱ꞌ guzre̱ꞌ le̱ꞌ da caní.
\s Jesús dxuléꞌe lawe̱ꞌ benneꞌ caꞌ bsé̱dene̱ꞌ
\r (Mt. 28.16-20; Mr. 16.14-18; Lc. 24.36-49)
\p
\v 19 Lu zra náꞌqueze, da naca na zra nedxu chee̱ da gazre zra, naꞌ chizrela zaj nazraga benneꞌ caꞌ bse̱de Jesús, ne zaj nusézxuje̱ꞌ dxa xuꞌu caꞌ laweꞌ da dxelezrebe̱ꞌ judío blau caꞌ. Naꞌ guxúꞌu Jesús, guzé̱ꞌ laduj benneꞌ caꞌ, naꞌ bgape̱ꞌ benneꞌ caꞌ diuzre, dxenné̱ꞌ:
\p ―Le gapa xel-laꞌ dxebeza zri lazreꞌ.
\p
\v 20 Ca gudé gunná Jesús da nigá, naꞌ bléꞌene̱ꞌ benneꞌ caꞌ ne̱ꞌe̱, ne le̱ꞌe̱ naga gudé xia naꞌ. Benneꞌ caꞌ bse̱de Jesús gulebéle̱ꞌe̱ne̱ꞌ gate beleléꞌene̱ꞌ Xránadxu.
\v 21 Nadxa Jesús guzre̱ꞌ benneꞌ caꞌ xecha lasa:
\p ―Le gapa xel-laꞌ dxebeza zri lazreꞌ. Cáte̱ze gusel-la Xraꞌ nedaꞌ, cáꞌanqueze dxusel-laꞌ nedaꞌ leꞌe.
\p
\v 22 Nadxa blube̱ꞌ lau benneꞌ caꞌ ne guzre̱ꞌ le̱ꞌ:
\p ―Le siꞌ Beꞌ Láꞌazxa chee̱ Dios.
\v 23 Benneꞌ caꞌ dxunite laule leꞌe chee̱ dul-la zaj nabague̱ꞌ ba bnite lau Dios chee̱ꞌ, naꞌ benneꞌ caꞌ quebe dxunite laule leꞌe chee̱ dul-la zaj nabague̱ꞌ, quebe bunite lau Dios chee̱ꞌ.
\s Tomás dxeléꞌene̱ꞌ Xránadxu ba bebane̱ꞌ
\p
\v 24 Tomás, tu benneꞌ chazrinnu caꞌ bse̱de Jesús, bénneaꞌ le̱ꞌ Bi Lideꞌ, quebe zue̱ꞌ nen benneꞌ caꞌ xezícadxa gate bleꞌe lau Jesús.
\v 25 Ca gudé naꞌ gulé̱ꞌe̱ Tomás naꞌ:
\p ―Ba bléꞌentuꞌ Xránadxu.
\p Gunná Tomás:
\p ―Che quebe leꞌedaꞌ ne̱ꞌe̱ naga guledé bdiduj caꞌ, ne gudéaꞌ zrube naꞌa lu xe̱dxu chee̱ bdiduj caꞌ, ne gudéaꞌ naꞌa le̱ꞌe̱ naga gudé xia naꞌ, québequeze chéajle̱ꞌa.
\p
\v 26 Ca guca xrunuꞌ zra, benneꞌ caꞌ bse̱de Jesús zaj nazrágaqueze̱ꞌ lu xuꞌu naꞌ xetú lasa, naꞌ zua Tomás nen benneꞌ caꞌ. Nadxa, lácala zaj naxezxuj dxa xuꞌu caꞌ, bleꞌe lau Jesús lau benneꞌ caꞌ, ne guzé̱ꞌ laduj le̱ꞌ, naꞌ bgape̱ꞌ le̱ꞌ diuzre, gunné̱ꞌ:
\p ―Le gapa xel-laꞌ dxebeza zri lazreꞌ.
\p
\v 27 Nadxa Jesús guzre̱ꞌ Tomás:
\p ―Bde zrube naꞌu nigá, ne gunnáꞌ naꞌa nigá. Be̱nna naꞌu, bde na le̱ꞌa nigá. Québedxa gun chupa lazruꞌ, san guxéajle̱.
\p
\v 28 Nadxa beche̱be Tomás:
\p ―Xranaꞌ, ne Dios chiaꞌ.
\p
\v 29 Jesús guzre̱ꞌ le̱ꞌ:
\p ―Tomás, naꞌa dxéajle̱ꞌu laweꞌ da ba bléꞌenuꞌ nedaꞌ. Ba neza zrente̱ naca na chee̱ benneꞌ caꞌ dxeléajle̱ꞌe̱ chiaꞌ lácala quebe ne xeleléꞌene̱ꞌ nedaꞌ.
\s Da dxaca lazreꞌ Juan gun xiche nigá
\p
\v 30 Jesús be̱ne̱ꞌ da zandxa xel-laꞌ waca zrente̱ lau benneꞌ caꞌ bsé̱dene̱ꞌ da quebe zaj naxúaj na lu xiche nigá.
\v 31 Da caní zaj naxúaj na chee̱ chéajle̱le leꞌe chee̱ Jesús, naque̱ꞌ Cristo nasel-la Dios, ne Zriꞌine Dios, ne chee̱ gápale xel-laꞌ nabán laweꞌ da dxéajle̱le chee̱ꞌ.
\c 21
\s Jesús dxuléꞌe lawe̱ꞌ gazre benneꞌ caꞌ bsé̱dene̱ꞌ
\p
\v 1 Ca gudé naꞌ Jesús bleꞌe lawe̱ꞌ lau benneꞌ caꞌ bsé̱dene̱ꞌ dxuꞌa nísadauꞌ chee̱ Tiberias. Caní guca na.
\v 2 Zaj nazraga Simón Pedro, ne Tomás, bénneaꞌ lé̱queze̱ꞌ Bi Lideꞌ, ne Natanael, benneꞌ xe̱zre Caná da nababa Galilea, ne chupa zriꞌine Zebedeo, ne xechupa benneꞌ caꞌ bse̱de Jesús.
\v 3 Simón Pedro guzre̱ꞌ benneꞌ caꞌ:
\p ―Cheajsendxaꞌ bela.
\p Benneꞌ caꞌ gulenné̱ꞌ:
\p ―Cáꞌanqueze netuꞌ wazáꞌle̱ntuꞌ lueꞌ.
\p Nadxa xjaque̱ꞌ, naꞌ guluꞌe̱ tu lu da dxedá laweꞌ nísadauꞌ. Xe̱la naꞌ quebe nu bela gulezénqueze̱ꞌ.
\v 4 Ca guzú lau dxaníꞌsise̱ꞌ, bleꞌe lau Jesús dxuꞌa nísadauꞌ naꞌ. Benneꞌ caꞌ bsé̱dene̱ꞌ quebe zaj nézene̱ꞌ che Jesús naꞌ.
\v 5 Nadxa Jesús guzre̱ꞌ benneꞌ caꞌ:
\p ―Bénneꞌdauꞌ, ¿quebe nu bela ne senle?
\p Belexeche̱be benneꞌ caꞌ:
\p ―Quebe bi ne sentuꞌ-baꞌ.
\p
\v 6 Nadxa guzre Jesús benneꞌ caꞌ:
\p ―Le guzala xixruj naꞌ chaláꞌa xabe̱la chee̱ da dxedá laweꞌ nísadauꞌ naꞌ, naꞌ senle bela.
\p Caꞌ belune̱ꞌ, naꞌ ca dxelexequé̱ꞌe̱ xixruj naꞌ quebe dxelexeguéꞌene̱ꞌ na laweꞌ da nazrate̱ na bela zan.
\v 7 Nadxa bénneaꞌ nazríꞌidxa Jesús guzre̱ꞌ Pedro:
\p ―Xránadxu naꞌ.
\p Ca ben Simón Pedro naca Xránadxu, naꞌ bexázie̱ꞌ ladxeꞌ dxexrúa cuzre̱ꞌ laweꞌ da nagüe̱ꞌ na, naꞌ bexétaje̱ꞌ lu nisa.
\v 8 Xezícadxa benneꞌ caꞌ belexezrine̱ꞌ dxuꞌa nísadauꞌ naꞌ, zaj zre̱ꞌe̱ lu da dxedá laweꞌ nísadauꞌ, dxelexezrube xue̱ꞌ xixruj naꞌ nazrate̱ na bela caꞌ laweꞌ da dxeꞌ da dxedá laweꞌ nísadauꞌ naꞌ lu nísadauꞌ ca tu le guꞌuna xiaj.
\v 9 Gate belexétaje̱ꞌ lu xu bizre, naꞌ beleléꞌene̱ꞌ ba dxeꞌ xiꞌ, ne ba zrua tu bela laweꞌ xiꞌ naꞌ, naꞌ de̱ naꞌ xeta xtila.
\v 10 Nadxa Jesús guzre̱ꞌ benneꞌ caꞌ:
\p ―Le cheajxríꞌ tu chupa bela caꞌ, be̱ za guzénte̱le.
\p
\v 11 Begüén Simón Pedro lu da dxedá laweꞌ nísadauꞌ naꞌ, ne bezrube xue̱ꞌ xixruj naꞌ dxuꞌa nísadauꞌ naꞌte̱, nazrate̱ na bela zriꞌa, tu gaxúa chiꞌinu xunbaꞌ, naꞌ lácala naca tu cáꞌante̱baꞌ quebe gudxeza xixruj naꞌ.
\v 12 Nadxa guzre Jesús benneꞌ caꞌ:
\p ―Le da gágule xrsila.
\p Netú benneꞌ caꞌ quebe dxelexázrene̱ꞌ xuluche̱be̱ꞌ Le̱ꞌ nu Le̱ꞌ, laweꞌ da zaj nézene̱ꞌ naque̱ꞌ Xránadxu.
\v 13 Nadxa Jesús guqué̱ꞌe̱ xeta xtila naꞌ, naꞌ bnézruje̱ꞌ na benneꞌ caꞌ, ne cáꞌanqueze be̱ne̱ꞌ chee̱ bela caꞌ.
\p
\v 14 Da nigá naca na da guxunneꞌ lasa bleꞌe lau Jesús lau benneꞌ caꞌ bsé̱dene̱ꞌ ca gudé bebane̱ꞌ ládujla benneꞌ gate.
\s Jesús dxuchálajle̱ne̱ꞌ Simón Pedro
\p
\v 15 Ca gudé gulawe̱ꞌ xrsila, naꞌ Jesús bche̱be̱ꞌ Simón Pedro:
\p ―Simón, zriꞌine Jonás, ¿nazríꞌidxenuꞌ nedaꞌ ca benneꞌ caní?
\p Beche̱be Pedro:
\p ―Aweꞌ, Xran, nézenuꞌ dxeléꞌedaꞌ Lueꞌ chaweꞌ.
\p Naꞌ Jesús guzre̱ꞌ le̱ꞌ:
\p ―Bxue zrílaꞌdu chiaꞌ caꞌ.
\p
\v 16 Nadxa Jesús bche̱be̱ꞌ le̱ꞌ da xula:
\p ―Simón, zriꞌine Jonás, ¿nazríꞌinuꞌ nedaꞌ?
\p Pedro beche̱be̱ꞌ:
\p ―Aweꞌ, Xran, Lueꞌ nézenuꞌ dxeléꞌedaꞌ Lueꞌ chaweꞌ.
\p Jesús guzre̱ꞌ le̱ꞌ:
\p ―Bxue zrilaꞌ chiaꞌ caꞌ.
\p
\v 17 Da guxunneꞌ lasa Jesús bche̱be̱ꞌ le̱ꞌ:
\p ―Simón, zriꞌine Jonás, ¿dxeléꞌenuꞌ nedaꞌ chaweꞌ?
\p Pedro bewiꞌine lazre̱ꞌ laweꞌ da bche̱be Jesús le̱ꞌ da guxunneꞌ lasa che dxeléꞌene̱ꞌ Le̱ꞌ chaweꞌ, naꞌ guzre̱ꞌ Jesús:
\p ―Xran, Lueꞌ nézquezenuꞌ xúgute̱. Lueꞌ nézenuꞌ dxeléꞌedaꞌ Lueꞌ chaweꞌ.
\p Naꞌ Jesús guzre̱ꞌ le̱ꞌ:
\p ―Bxue zrilaꞌ chiaꞌ caꞌ.
\v 18 Da li dxapaꞌ lueꞌ, gate ne nacuꞌ benneꞌ cuideꞌ gucuꞌ zra lanuꞌ, ne guxíajuꞌ naga dxaca lazruꞌ. Gate bache nacuꞌ benneꞌ gula, chiljuꞌ naꞌu, naꞌ benneꞌ xula gugácue̱ꞌ lueꞌ, ne che̱ꞌe̱ lueꞌ naga quebe gaca lazruꞌ chéajuꞌ.
\p
\v 19 Gate gunná Jesús da nigá, dxuzéajniꞌine̱ꞌ benneꞌ caꞌ ca dxal-laꞌ gateꞌ Pedro chee̱ gucáꞌana szrene̱ꞌ Dios. Ca gudé naꞌ Jesús guzre̱ꞌ le̱ꞌ:
\p ―Be̱n nedaꞌ tuze.
\s Da gaca chee̱ bénneaꞌ nazríꞌidxa Jesús
\p
\v 20 Gate bexechaj Pedro, bléꞌene̱ꞌ bénneaꞌ nazríꞌidxa Jesús zéaje̱ nawe̱ꞌ le̱ꞌ, naque̱ꞌ bénneaꞌ dxeꞌe̱ cuita Jesús gate naꞌ gulawe̱ꞌ xrcheꞌ naꞌ, ne bche̱be̱ꞌ Jesús: “Xran, ¿nuzra naꞌ gudé Lueꞌ lu naꞌ benneꞌ caꞌ dxeledábague̱ꞌ lueꞌ?”
\v 21 Gate Pedro bléꞌene̱ꞌ bénneaꞌ, naꞌ bche̱be̱ꞌ Jesús:
\p ―Xran, ¿gazra benneꞌ nigá? ¿Aja gaca chee̱ꞌ?
\p
\v 22 Jesús beche̱be̱ꞌ:
\p ―Che nedaꞌ dxaca lazraꞌ xegáꞌane̱ꞌ nigá ca zrindxa zra xeláꞌa nedaꞌ, ¿naca na chiuꞌ lueꞌ nézenuꞌ? Lueꞌ, be̱n nedaꞌ tuze.
\p
\v 23 Belén benneꞌ caꞌ zaj de̱ꞌe̱ Jesús quebe gate benneꞌ naꞌ. Jesús quebe guzre̱ꞌ le̱ꞌ quebe gatie̱ꞌ. Guzre̱ꞌ le̱ꞌ: “Che nedaꞌ dxaca lazraꞌ xegáꞌane̱ꞌ ca zrindxa zra xeláꞌa nedaꞌ, ¿naca na chiuꞌ lueꞌ nézenuꞌ?”
\p
\v 24 Benneꞌ nigá naque̱ꞌ benneꞌ dxexeche̱be̱ꞌ chee̱ da nigá, ne ba nuzúaje̱ꞌ na. Nézentuꞌ dxenné̱ꞌ da li.
\p
\v 25 Cáꞌanqueze ne zaj de̱dxa da zante̱ da be̱n Jesús, naꞌ chela xuaj tu tu na, dxéquedaꞌ quebe gueque lu xe̱zr la xu nigá chaꞌ xiche caꞌ dxal-laꞌ guzúajdxu. Caꞌ naca na.