\id ACT
\h Los Hechos
\mt DA CAꞌ BELÚN BENNEꞌ GUBÁZ CHEE̱ CRISTO
\c 1
\s Dios nache̱be lazre̱ꞌ sel-le̱ꞌ Beꞌ Láꞌazxa
\p
\v 1 Lueꞌ, Teófilo, bzuajaꞌ chiuꞌ lu xiche nedxu ca naca xúgute̱ da guzú lau Jesús dxune̱ꞌ, ne dxusé̱dene̱ꞌ nédxudaute̱,
\v 2 cadxa begüéne̱ꞌ xabáa. Gate za xezé̱ꞌe̱ xexíaje̱ꞌ xabáa guqué̱ꞌe̱ gubáz chee̱ꞌ caꞌ, naꞌ zúale̱ Beꞌ Láꞌazxa Le̱ꞌ guzre̱ꞌ benneꞌ caꞌ ca da dxal-laꞌ xelune̱ꞌ.
\v 3 Ca gudé gutie̱ꞌ, Jesús náꞌqueze bleꞌe lawe̱ꞌ benneꞌ caꞌ, ne laweꞌ chua zra bleꞌe lawe̱ꞌ benneꞌ caꞌ, naꞌ bléꞌene̱ꞌ da zan da dxelunna bea na naca bane̱ꞌ, ne bchálajle̱ne̱ꞌ benneꞌ caꞌ ca dxal-laꞌ nna bea Dios.
\p
\v 4 Gate ne zúale̱ Jesús benneꞌ gubáz caꞌ, gunné̱ xuene̱ꞌ le̱ꞌ quebe xesíꞌaque̱ꞌ xe̱zre Jerusalén. Naꞌ guzre̱ꞌ benneꞌ caꞌ:
\p ―Le cueza ca da guche̱be lazreꞌ Xraꞌ gunne̱ꞌ chee̱le, ca gunníquezaꞌ nedaꞌ.
\v 5 Da li Juan bchue̱ꞌ bénneache nisa, san lu zra caní gaca chee̱le ca da zéaje̱ xel-laꞌ dxedxúa nisa, xida Beꞌ Láꞌazxa xedajsúe̱ꞌ lu xichaj lázrdaule.
\s Jesús dxegüéne̱ꞌ xabáa
\p
\v 6 Gate naꞌ zaj nazrague̱ꞌ nen Jesús, naꞌ buluche̱be̱ꞌ Le̱ꞌ:
\p ―Xran, ¿güe Dios lataj nna béaqueze xe̱zre Israel lu zra caní?
\p
\v 7 Naꞌ beche̱be Jesús:
\p ―Quebe naca chee̱le nézele bátala, u bi zra gun Dios da caꞌ tuze Le̱ꞌ nape̱ꞌ xel-laꞌ waca gune̱ꞌ.
\v 8 Gate xida Beꞌ Láꞌazxa súale̱ne̱ꞌ leꞌe, sile xel-laꞌ waca, naꞌ chéajle cheajchálajle da naca chiaꞌ lu xe̱zre Jerusalén, ne ca naca naga nababa Judea, ne naga nababa Samaria, ne ca nácaqueze xe̱zr la xu nigá.
\p
\v 9 Ca gudé gunné̱ꞌ da nigá, ne dxácate̱ dxelennáꞌ benneꞌ caꞌ Le̱ꞌ, begüén Jesús xabáa, naꞌ ca bexuꞌe̱ tu lu beuj benite Jesús lau benneꞌ caꞌ.
\v 10 Ne zaj zraꞌ benneꞌ caꞌ dxelenné̱ꞌe̱ dxácate̱ dxegüén Jesús, beleláꞌ chupa benneꞌ zaj nácue̱ꞌ ladxeꞌ chiche lau benneꞌ caꞌ,
\v 11 naꞌ gulé̱ꞌe̱ benneꞌ gubáz caꞌ:
\p ―Leꞌe, benneꞌ Galilea, ¿bizr chee̱ naꞌ ze̱le dxennaꞌle xabáa? Jesús nigáqueze begüéne̱ꞌ zexíaje̱ꞌ xabáa, bezé̱ꞌe̱ ládujla leꞌe, welé̱ꞌe̱ xetú cáqueze bleꞌele Le̱ꞌ zexíaje̱ꞌ.
\s Dxelequé̱ꞌe̱ Matías chee̱ xedée̱ꞌ waláz chee̱ Judas
\p
\v 12 Nadxa besíꞌaca benneꞌ gubáz caꞌ lu Xiꞌa Xaga Olivo, ne belexezrine̱ꞌ Jerusalén, da quebe naca na zituꞌ, san dxeꞌ cátite̱ze da dxunna da nadxixruj bea na lataj xesíꞌaque̱ꞌ lu zra dxulupáꞌane̱ꞌ.
\v 13 Gate belexezrine̱ꞌ lu xe̱zre naꞌ, belexegüéne̱ꞌ xuꞌu sibe naga zaj zue̱ꞌ. Benneꞌ caní zaj naque̱ꞌ Pedro, ne Jacobo, ne Juan, ne Andrés, ne Felipe, ne Tomás, ne Bartolomé, ne Mateo, ne Jacobo zriꞌine Alfeo, ne Simón, bénneaꞌ dxedábague̱ꞌ benneꞌ Roma caꞌ, ne Judas, zriꞌine Jacobo.
\v 14 Xúgute̱ benneꞌ caní tu dxelezrágazqueze̱ꞌ nen benneꞌ biche Jesús, ne María xrna Jesús, ne xebal-la nuꞌula caꞌ, chee̱ xuluchálajle̱ne̱ꞌ Dios.
\p
\v 15 Lu zra caꞌ Pedro guzé̱ꞌ laduj bi bíchedxu caꞌ, zaj naque̱ꞌ ca tu gaxúa galaj bénneache, naꞌ guzre̱ꞌ le̱ꞌ:
\p
\v 16 ―Leꞌe, bi bíchaꞌdauꞌ, be̱n na ba xen guca li ca da gunná Beꞌ Láꞌazxa lu xiche chee̱ Dios, da naꞌ gunná David waláz chee̱ Dios ca naca da dxal-laꞌ gaca chee̱ Judas, bénneaꞌ guché̱ꞌe̱ benneꞌ caꞌ gule̱l-le̱ꞌ Jesús.
\v 17 Judas nigá guzúale̱ne̱ꞌ dxiꞌu tu zren, ne guque̱ꞌ dxiꞌu tuze lu zrin nigá.
\v 18 Bxaꞌu tu cueꞌ xe̱zr la xu ca naca lazruj chee̱ Judas, da guzíꞌ lu ne̱ꞌe̱ chee̱ da cale̱la da be̱ne̱ꞌ. Naꞌ benneꞌ nigá xeajcházie̱ꞌ suxíchajla, ne gutín le̱ꞌe̱, naꞌ bdxuaj ca naca zrájlue̱ꞌ.
\v 19 Xúgute̱ benneꞌ zaj zre̱ꞌe̱ Jerusalén belenne̱ꞌ da nigá, naꞌ buluzúe̱ꞌ la xe̱zr la xu naꞌ Acéldama, da zéaje̱ na: Xe̱zr La Xu Chee̱ Dxen.
\v 20 Guca li ca da dxal-laꞌ gaca chee̱ꞌ laweꞌ da naxúaj lu xiche láꞌazxa naga zaj naxúaj salmo caꞌ, da dxenná na:
\q Xegáꞌana cáꞌaze lizre̱ꞌ,
\q ne quebe nu chiláꞌ sua naꞌ.
\m Cáꞌanqueze dxenná na:
\q Xetú benneꞌ tée̱ꞌ waláz chee̱ꞌ.
\p
\v 21 ’Zaj zraꞌ nigá benneꞌ caꞌ gusáꞌacale̱ne̱ꞌ dxiꞌu ca naca dxácate̱ guzúale̱ Jesús dxiꞌu.
\v 22 Guzú lau na gate bchua Juan Jesús nisa, cadxa bzrin zra begüéne̱ꞌ xabáa. Dxun na ba xen tu benneꞌ caní gaque̱ꞌ dxiꞌu tuze chee̱ xeche̱be̱ꞌ ca guca gate bebán Jesús lu xel-laꞌ gute.
\p
\v 23 Nadxa gulebéaje̱ꞌ chupa benneꞌ caꞌ, José ne Matías. José naꞌ lé̱queze̱ꞌ Barsabás ne lé̱queze̱ꞌ Justo.
\v 24 Buluchálajle̱ne̱ꞌ Dios, gulenné̱ꞌ:
\p ―Xran, Lueꞌ nézqueznuꞌ ca naca da xuꞌu lu xichaj lázxdau xúgute̱ bénneache. Bleꞌe netuꞌ nula benneꞌ chupa caní ba nabéajuꞌ Lueꞌ,
\v 25 chee̱ gaque̱ꞌ gubáz chiuꞌ, ne xedée̱ꞌ waláz chee̱ Judas, bénneaꞌ bnitie̱ꞌ da naca chee̱ꞌ laweꞌ da be̱ne̱ꞌ dul-la, naꞌ bexíaje̱ꞌ lataj naga naca chee̱ꞌ.
\p
\v 26 Nadxa gulebéaje̱ꞌ da gaca bea na, naꞌ bexala Matías, naꞌ gúcate̱ꞌ tuze benneꞌ chinéaj gubáz caꞌ.
\c 2
\s Ca guca gate blaꞌ Beꞌ Láꞌazxa
\p
\v 1 Ca bzrin zra Pentecostés, xúgute̱ benneꞌ caꞌ dxeléajle̱ꞌe̱ chee̱ Jesús zaj nazrague̱ꞌ tuze lataj.
\v 2 Caꞌ guca, belenne̱ꞌ tu schaga da zaꞌ lu beꞌ zran xabáa, ca dxun tu beꞌ bdunuꞌ, naꞌ belén na xúgute̱ benneꞌ zaj zre̱ꞌe̱ lu xuꞌu naga zaj dxeꞌe̱.
\v 3 Nadxa beleléꞌene̱ꞌ lu beꞌ xiꞌ caꞌ, da dxelala, naꞌ xeajlezúa na xíchaj tu tu benneꞌ caꞌ.
\v 4 Nadxa guzúale̱tequeze Beꞌ Láꞌazxa xúgute̱ benneꞌ caꞌ, naꞌ tu tue̱ꞌ gulezú lawe̱ꞌ dxuluchálaje̱ꞌ dizraꞌ nazrala cáte̱ze dxuchine Beꞌ Láꞌazxa le̱ꞌ.
\p
\v 5 Ca lu zra caꞌ zaj zraꞌ xe̱zre Jerusalén benneꞌ judío caꞌ dxulucáꞌana szrénqueze̱ꞌ Dios. Benneꞌ caní záꞌaque̱ꞌ xúgute̱ xe̱zr la xu zaj dxeꞌ lu xe̱zr la xu nigá.
\v 6 Ca belenne̱ꞌ bénneache ca naca schaga naꞌ da dxaca na, naꞌ belexezrague̱ꞌ, ne quebe zaj nézene̱ꞌ bi naꞌ, laweꞌ da dxelén tu tu benneꞌ caꞌ dizraꞌ cha chee̱ꞌ da dxuluchalaj benneꞌ caꞌ dxeléajle̱ꞌe̱ chee̱ Jesús.
\v 7 Naꞌ belexebánele̱ꞌe̱ne̱ꞌ, ne belexruse̱ꞌ, ne gulé̱ ljwezre̱ꞌ tue̱ꞌ xetúe̱ꞌ:
\p ―Zaj naca benneꞌ Galilea xúgute̱ benneꞌ caní dxuluchálaje̱ꞌ.
\v 8 ¿Ájazra naꞌ dxendxu dxuluchálaje̱ꞌ dizraꞌ cha chee̱dxu dxiꞌu?
\v 9 Zradxu dxiꞌu nigá, nácadxu benneꞌ xe̱zr la xu Partia, ne benneꞌ xe̱zr la xu Media, ne benneꞌ xe̱zr la xu Elam, ne benneꞌ xe̱zr la xu Mesopotamia, ne benneꞌ chee̱ xe̱zre caꞌ zaj nababa Judea, ne benneꞌ chee̱ naga nababa Capadocia, ne benneꞌ chee̱ naga nababa Ponto, ne benneꞌ chee̱ naga nababa Asia,
\v 10 ne benneꞌ chee̱ naga nababa Frigia, ne benneꞌ chee̱ naga nababa Panfilia, ne benneꞌ xe̱zr la xu Egipto, ne benneꞌ chee̱ xe̱zr la xu Africa da zua dédedxa chee̱ xe̱zre Cirene. Cáꞌanqueze zaj zraꞌ benneꞌ xe̱zr la xu Roma nigá. Bal-la benneꞌ Roma caꞌ zaj naque̱ꞌ benneꞌ judío, benneꞌ gulálaje̱ꞌ caꞌ, ne benneꞌ zaj naziꞌe̱ ca naca da nadxixruj bea chee̱ benneꞌ judío caꞌ.
\v 11 Cáꞌanqueze nácadxu benneꞌ xe̱zr la xu Creta, ne benneꞌ xe̱zr la xu Arabia. Xúgute̱dxu dxendxu lu dizraꞌ cha chee̱dxu dxuluchalaj benneꞌ caní ca naca da zren caꞌ da dxun Dios.
\p
\v 12 Xúgute̱ꞌ belexebánene̱ꞌ, ne quebe zaj nézene̱ꞌ bi da dxaca naꞌ, naꞌ gulenaba ljwezre̱ꞌ tue̱ꞌ xetúe̱ꞌ:
\p ―¿Bizra zéaje̱ da nigá?
\p
\v 13 Benneꞌ xula caꞌ belún le̱ꞌ, gulenné̱ꞌ:
\p ―Dxelezuzre benneꞌ caní.
\s Da bchalaj Pedro lau benneꞌ caꞌ
\p
\v 14 Nadxa guxasa Pedro nen benneꞌ chinéaj gubáz chee̱ Cristo, naꞌ zizraj bchálajle̱ne̱ꞌ bénneache zaj zraꞌ naꞌ. Dxe̱ꞌe̱ le̱ꞌ:
\p ―Leꞌe, benneꞌ Judea, ne xúgute̱le leꞌe nazrágale xe̱zre Jerusalén. Dxal-laꞌ nézele leꞌe da nigá. Le xen xanneꞌ ca naca da xapaꞌ leꞌe.
\v 15 Netuꞌ quebe dxezúzrentuꞌ ca dxéquele leꞌe. Za gudete̱ xrsila naꞌa. Netú benneꞌ quebe dxezúzrene̱ꞌ ca náꞌqueze.
\v 16 Da nigá naca da gunnáqueze Joel, bénneaꞌ bchálaje̱ꞌ waláz chee̱ Dios gate naꞌ gunné̱ꞌ:
\q
\v 17 Caní dxenná Dios: “Lu zra bze̱be wasél-laquezaꞌ
\q Beꞌ Láꞌazxa chiaꞌ chee̱ súale̱ne̱ꞌ xúgute̱ bénneache.
\q Zríꞌinele bi biu ne bi nuꞌula welenné̱quezebeꞌ waláz chiaꞌ nedaꞌ.
\q Bi cuideꞌ caꞌ weleléꞌequezebeꞌ ca da guléꞌedaꞌ-beꞌ.
\q Naꞌ benneꞌ gula caꞌ welennéquezene̱ꞌ xe̱la.
\q
\v 18 Ca lu zra naꞌ guzuáquezaꞌ Beꞌ Láꞌazxa chiaꞌ
\q nen bi we̱n zrin chiaꞌ caꞌ, benneꞌ biu ne nuꞌula caꞌ,
\q naꞌ guchálajquezebeꞌ waláz chiaꞌ nedaꞌ.
\q
\v 19 Lu beꞌ zran xabáa guléꞌequezdaꞌ xel-laꞌ waca chiaꞌ,
\q naꞌ lu xe̱zr la xu dxeꞌela guléꞌedaꞌ da xelunna bea na,
\q dxen, ne xiꞌ, ne zren da naca ca beuj gasaj.”
\q
\v 20 Gubizra xechul-la na,
\q naꞌ beuꞌ xexaca na xrna ca dxen
\q nedxu ca za zrin zra xeláꞌ Xránadxu.
\q Zra naꞌ gaca na tu zra chee̱ da xebánedxu
\q ne zra naꞌ waléꞌequezdxu xel-laꞌ szren chee̱ Dios.
\q
\v 21 Nadxa xelelá xúgute̱ benneꞌ caꞌ
\q xelenné̱ꞌ Xránadxu lu xel-laꞌ dxeleajlí lazreꞌ chee̱ꞌ.
\p
\v 22 ’Chee̱ le̱ naꞌ, leꞌe, benneꞌ Israel, le xen ca da xapaꞌ leꞌe. Jesús, benneꞌ Nazaret, guque̱ꞌ tu benneꞌ bedxúaje̱ꞌ xrlátaje lau xúgute̱le leꞌe ne̱ chee̱ da be̱n Dios laule leꞌe. Lu naꞌ Jesús Dios bléꞌene̱ꞌ da zan da dxebánedxu, ne xel-laꞌ waca caꞌ, ne da dxelunna bea na ca ba nézquezle leꞌe.
\v 23 Gate Dios be̱ꞌe̱ lataj tu benneꞌ bdee̱ꞌ Le̱ꞌ lu naꞌle leꞌe cáte̱ze bache núnqueze̱ꞌ nedxu, nadxa leꞌe gudé̱l-lale Le̱ꞌ, naꞌ bé̱tele Le̱ꞌ gate naꞌ bdele Le̱ꞌ lu naꞌ benneꞌ caꞌ dxelune̱ꞌ da cale̱la, benneꞌ caꞌ buludé̱ꞌe̱ Le̱ꞌ xaga béguaj naga gutie̱ꞌ.
\v 24 Nadxa Dios bsebane̱ꞌ Le̱ꞌ, bebéaje̱ꞌ Le̱ꞌ lu xel-laꞌ gute. Quebe guxúꞌu ájala xegáꞌane̱ꞌ chalásaze lu xel-laꞌ gute naꞌ.
\v 25 Ca naca da nigá bchalaj wenná bea David ca naca chee̱ Jesús naꞌ, gate gunné̱ꞌ:
\q Beléꞌequezdaꞌ Xranaꞌ lawaꞌ nigá.
\q Le̱ꞌ zue̱ꞌ cuitaꞌ xabe̱la, chee̱ quebe bi guchebe na nedaꞌ.
\q
\v 26 Chee̱ le̱ naꞌ gubéle̱ꞌe̱daꞌ, ne bil-laꞌ lu xel-laꞌ dxebé chiaꞌ.
\q Chee̱ le̱ naꞌ guxrén lázrequezaꞌ Le̱ꞌ gate gatiaꞌ,
\q
\v 27 laweꞌ da quebe xucáꞌanaquezuꞌ nedaꞌ lu lataj chee̱ benneꞌ gate.
\q Quebe güéquezuꞌ lataj guzru be̱l-laꞌ dxen chiaꞌ nedaꞌ,
\q nacaꞌ benneꞌ we̱n zrin chiuꞌ, ne benneꞌ nazríꞌinuꞌ.
\q
\v 28 Bléꞌequezenuꞌ nedaꞌ ca dxal-laꞌ gunaꞌ chee̱ zruéꞌedaꞌ xel-laꞌ nabán,
\q naꞌ gúnnale̱ꞌu nedaꞌ xel-laꞌ dxebé laweꞌ da zúale̱nuꞌ nedaꞌ.
\p
\v 29 ’Leꞌe, bi bíchaꞌdauꞌ. Naca bea na gute xra xrtáudxu David, naꞌ bulucache̱ꞌ le̱ꞌ lu xe̱dxu ba chee̱ꞌ da zúaqueze na naꞌa nagá zúadxu.
\v 30 David naꞌ guque̱ꞌ tu benneꞌ bchálaje̱ꞌ waláz chee̱ Dios, ne gunézene̱ꞌ ca da nache̱be lázrequeze Dios gune̱ꞌ. Gunné̱ lie̱ꞌ tu benneꞌ zriꞌine zre sua David naꞌ gaque̱ꞌ Cristo, Bénneaꞌ nna béaqueze̱ꞌ, xequé̱ꞌe̱ lawe̱ꞌ chee̱ David.
\v 31 Caꞌ guca, David nigá beléꞌequezne̱ꞌ nedxu ca naca da dxal-laꞌ gaca chee̱ Cristo, naꞌ bchálaje̱ꞌ ca guca gate bebán Cristo, gunné̱ꞌ: “Benneꞌ nigá quebe xegáꞌanaqueze̱ꞌ lataj chee̱ benneꞌ gate, ne quebe gúzruqueze be̱l-laꞌ dxen chee̱ꞌ.”
\v 32 Caní guca, Dios bsebane̱ꞌ Jesús nigá, naꞌ netuꞌ dxexeché̱bentuꞌ da li ca guca da nigá.
\v 33 Caꞌ guca, Dios bzue̱ꞌ Jesús lu xabáa chee̱ꞌ nen xel-laꞌ waca chee̱ꞌ, naꞌ be̱ꞌe̱ Le̱ꞌ lataj gusel-le̱ꞌ Beꞌ Láꞌazxa chee̱ꞌ nigá ca nache̱be lázrequeze̱ꞌ nedxu gune̱ꞌ, naꞌ xúgute̱ da caní dxeléꞌele leꞌe, ne dxenle zaj naca na da dxun Beꞌ Láꞌazxa naꞌ.
\v 34 David naꞌ quebe begüéne̱ꞌ xabáa, san lé̱queze̱ꞌ gune̱ꞌ:
\q Xránadxu Dios guzre̱ꞌ Xranaꞌ:
\q “Gudxeꞌe cuitaꞌ xabe̱la nigá
\q
\v 35 ca zrindxa zra guzúaꞌ benneꞌ dxedábague̱ꞌ lueꞌ chee̱ nna beꞌenu le̱ꞌ.”
\p
\v 36 ’Xúgute̱le leꞌe, benneꞌ Israel, dxal-laꞌ nézquezle da nigá: Jesús nigá, bénneaꞌ bdaꞌle leꞌe xaga béguaj, Dios ba nune̱ꞌ Le̱ꞌ Xránale ne Cristo chee̱le, Benneꞌ guselé̱ꞌ leꞌe.
\p
\v 37 Gate benneꞌ caꞌ belenne̱ꞌ da nigá, naꞌ belexewíꞌine lazre̱ꞌ, naꞌ buluche̱be̱ꞌ Pedro, ne benneꞌ gubáz caꞌ chee̱ Jesús, dxelé̱ꞌe̱ le̱ꞌ:
\p ―Benneꞌ bíchentuꞌ, ¿ájazra dxal-laꞌ guntuꞌ xcaꞌ?
\p
\v 38 Nadxa gunná Pedro:
\p ―Le xebíꞌi lazreꞌ lau Dios, ne le chua nisa tu tule chee̱ gácale Jesucristo tuze, chee̱ gunite lau Le̱ꞌ chee̱le leꞌe ca naca dul-la da nabágale. Caꞌ gaca, nadxa Dios sél-laqueze̱ꞌ Beꞌ Láꞌazxa chee̱ꞌ chee̱ súale̱ne̱ꞌ leꞌe.
\v 39 Da nigá nache̱be lazreꞌ Dios naca na chee̱le leꞌe, ne chee̱ zríꞌinele, ne chee̱ xúgute̱ benneꞌ zaj zre̱ꞌe̱ zituꞌ, xúgute̱ benneꞌ caꞌ dxaca lazreꞌ Dios nne̱ꞌ.
\p
\v 40 Ca naca dizraꞌ nigá, ne xezícaladxa dizraꞌ da bchalaj Pedro, bzéajniꞌine̱ꞌ benneꞌ caꞌ, naꞌ gunné̱ꞌ:
\p ―Le la ládujla benneꞌ we̱n da cale̱la caní.
\p
\v 41 Caꞌan guca, benneꞌ caꞌ guléajle̱ꞌe̱ chee̱ da bchalaj Pedro belexedxúe̱ꞌ nisa, naꞌ lu zra naꞌ belaca tuze ca chi dxua gaxúa benneꞌ nen benneꞌ caꞌ ba dxeléajle̱ꞌe̱ chee̱ Jesús.
\v 42 Naꞌ xúgute̱ benneꞌ caꞌ gulezúa típaqueze̱ꞌ ca da dxuluse̱de benneꞌ gubáz chee̱ Jesús le̱ꞌ, naꞌ gulezúe̱ꞌ tuze nen le saꞌ ljwezre̱ꞌ chee̱ bululáwizre̱ꞌ Dios, ne buluzrague̱ꞌ chee̱ xelawe̱ꞌ da dxusá lázredxu ca guca gate gute Cristo.
\s Ca belún benneꞌ nedxu caꞌ, benneꞌ guleajlí lazre̱ꞌ Cristo
\p
\v 43 Xúgute̱ benneꞌ caꞌ gulezrebe̱ꞌ gate beleléꞌene̱ꞌ xel-laꞌ waca zante̱, ne da dxelunna bea na da dxelún benneꞌ gubáz chee̱ Jesús.
\v 44 Xúgute̱ benneꞌ caꞌ dxeléajle̱ꞌe̱ chee̱ Jesús gulaque̱ꞌ tuze, ne bulunézruje̱ꞌ da de̱ chee̱ꞌ tue̱ꞌ xetúe̱ꞌ.
\v 45 Belutie̱ꞌ xúgute̱ da zaj nape̱ꞌ, ne bulunézruje̱ꞌ dumí naꞌ chee̱ benneꞌ caꞌ ca da dxelexázrjene̱ꞌ.
\v 46 Xuguꞌ zra belexezrague̱ꞌ lu xudauꞌ, ne cáꞌanqueze lu lizre cha chee̱ꞌ, chee̱ xelawe̱ꞌ da dxusá lázredxu ca guca gate gute Cristo. Gulawe̱ꞌ tu zrente̱ lu xel-laꞌ dxelebé, ne dute̱ xel-laꞌ dxelexruj lazreꞌ chee̱ꞌ.
\v 47 Belúe láꞌane̱ꞌ Dios, naꞌ xúgute̱ bénneache guléquene̱ꞌ benneꞌ caꞌ ba láꞌana. Tu zra tu zra Xránadxu bzane̱ꞌ benneꞌ caꞌ chee̱ Cristo ca dxelezíꞌ lu ne̱ꞌe̱ tu tue̱ꞌ Cristo.
\c 3
\s Dxexaca tu benneꞌ zrinnaj
\p
\v 1 Tu zra xjaque̱ꞌ Pedro ne Juan lu xudauꞌ dxexedáꞌ chunna, da naca na gate dxululáwizraj bénneache Dios lu xudauꞌ.
\v 2 Tu zra tu zra zua tu benneꞌ naꞌ naque̱ꞌ zrinnaj ca nálajte̱ꞌ. Dxeleché̱ꞌ benneꞌ ljwezre̱ꞌ le̱ꞌ xudauꞌ naꞌ, ne dxelebeche̱ꞌ le̱ꞌ dxuꞌa dxa xuꞌu naꞌ nazí le na: Da Xrtante̱, chee̱ nabe̱ꞌ gunaꞌ chee̱ benneꞌ dxeluꞌe̱ naꞌ.
\v 3 Gate benneꞌ zrinnaj nigá bléꞌene̱ꞌ Pedro ne Juan, dxeluꞌe̱ xudauꞌ, naꞌ gunabe̱ꞌ gunaꞌ lau benneꞌ caní.
\v 4 Nadxa Pedro ne Juan gulenné̱ꞌe̱ le̱ꞌ, naꞌ Pedro guzre̱ꞌ benneꞌ naꞌ:
\p ―Gunnáꞌ netuꞌ.
\p
\v 5 Benneꞌ naꞌ gunnáꞌ xánnie̱ꞌ le̱ꞌ laweꞌ da dxéquene̱ꞌ bi xulunezruje̱ꞌ le̱ꞌ.
\v 6 Pedro guzre̱ꞌ le̱ꞌ:
\p ―Quebe bi de̱ chiaꞌ dumí plata ne dumí oro. Da napaꞌ gunnaꞌ lueꞌ. Lu La Jesucristo, benneꞌ Nazaret, guxasa gudá.
\p
\v 7 Nadxa Pedro guqué̱ꞌe̱ naꞌ benneꞌ zrinnaj naꞌ da zua xabe̱la, ne bechise̱ꞌ le̱ꞌ, naꞌ ca be̱ne̱ꞌ caní, belexezúa chacha niꞌe̱, ne béchajdu chee̱ꞌ caꞌ.
\v 8 Nadxa benneꞌ zrinnaj naꞌ guxrítie̱ꞌ tu, naꞌ guzé̱ꞌ, ne guzú lawe̱ꞌ dxedé̱ꞌ. Guxúꞌe̱ nen benneꞌ caꞌ xudauꞌ, dxedé̱ꞌ, dxexrítie̱ꞌ, ne dxue láꞌane̱ꞌ Dios.
\v 9 Xúgute̱ benneꞌ zaj zre̱ꞌe̱ naꞌ beleléꞌene̱ꞌ le̱ꞌ dxedé̱ꞌ, ne dxue láꞌane̱ꞌ Dios.
\v 10 Belexebánene̱ꞌ, ne belezrebe̱ꞌ ca da beleléꞌene̱ꞌ guca na, laweꞌ da zaj núnbeꞌe̱ benneꞌ zrinnaj naꞌ, ne zaj nézene̱ꞌ naque̱ꞌ bénneaꞌ dxebéꞌe̱ dxenabe̱ꞌ gunaꞌ ga dxelexúꞌu bénneache xudauꞌ, da naꞌ nazí le na Da Xrtante̱.
\s Da bchalaj Pedro la chila da nazí le na La Chila Chee̱ Salomón
\p
\v 11 Benneꞌ zrinnaj naꞌ, benneꞌ ba bexaque̱ꞌ, quebe bsane̱ꞌ naꞌ Pedro ne Juan, naꞌ xúgute̱ benneꞌ dxelexebánene̱ꞌ, ne xjaque̱ꞌ naga nazí le na La Chila Chee̱ Salomón, naga zaj zraꞌ Pedro ne Juan.
\v 12 Gate bleꞌe Pedro da nigá, naꞌ guzre̱ꞌ benneꞌ caꞌ:
\p ―Leꞌe, benneꞌ Israel, ¿bizr chee̱ naꞌ dxebánele leꞌe? ¿Bizr chee̱ naꞌ dxennáꞌle netuꞌ caní, ne dxéquele netuꞌ bexuntuꞌ benneꞌ nigá, naꞌ dxexedé̱ꞌ ne̱ chee̱ xel-laꞌ waca chee̱ntuꞌ, u ne̱ chee̱ xel-laꞌ benneꞌ xudauꞌ chee̱ntuꞌ?
\v 13 ¡Cabí! Dios chee̱ xra xrtáudxu Abraham, ne Isaac, ne Jacob bcaꞌana szrene̱ꞌ Zríꞌine̱ꞌ, Jesús, Bénneaꞌ bdele leꞌe lu naꞌ benneꞌ xuꞌu laweꞌ. Gate guca lazreꞌ Pilato gusane̱ꞌ Le̱ꞌ, leꞌe quebe guca lázrele.
\v 14 Bzúale chaláꞌala Benneꞌ naꞌ naque̱ꞌ láꞌazxa ne xrlátaje, naꞌ gunábale la tu benneꞌ we̱n da zrinnaj.
\v 15 Caꞌan guca, bé̱tele leꞌe Bénneaꞌ dxunne̱ꞌ bénneache xel-laꞌ nabán, san Dios bsebane̱ꞌ Le̱ꞌ ládujla benneꞌ gate, naꞌ netuꞌ dxexeché̱bentuꞌ chee̱ da nigá.
\v 16 Guca lu La Jesús nigáqueze, u nnadxu guca na laweꞌ da guxéajle̱ chee̱ La Jesús, chee̱ bezíꞌ le dipa benneꞌ nigá dxeléꞌele, ne núnbeale le̱ꞌ. Laweꞌ da guxéajle̱ꞌe̱ chee̱ Jesús, ba bexácate̱queze̱ꞌ ca dxeléꞌele leꞌe xúgute̱le.
\p
\v 17 ’Leꞌe, Bi bichaꞌ, nezdaꞌ gate leꞌe, ne benneꞌ xíchaje̱ caꞌ chee̱le bé̱tele Jesús, quebe guque beꞌele ca da dxunle.
\v 18 Dios be̱ne̱ꞌ guca caní chee̱ guca li ca da ba gunné̱ꞌ nédxute̱ gate buluchalaj waláz chee̱ꞌ benneꞌ caꞌ, naꞌ gulenné̱ꞌ dxal-laꞌ siꞌ saca Cristo chee̱ Dios.
\v 19 Chee̱ le̱ naꞌ, le xebíꞌi lázrele, ne le xexaca Dios tuze, chee̱ xusule̱ꞌ dul-la nabágale. Nadxa Xránadxu Dios gunne̱ꞌ leꞌe lataj xexaca chaweꞌ xichaj lázrdaule.
\v 20 Sel-le̱ꞌ chee̱le Jesús, Bénneaꞌ guche̱be lazre̱ꞌ sel-le̱ꞌ chee̱le nédxudaute̱.
\v 21 Lu zra caní Jesucristo dxal-laꞌ xegáꞌane̱ꞌ xabáa cadxa gucáꞌana chaweꞌ Dios xúgute̱ da dxaca, ca naꞌ gunné̱ꞌ lu dxuꞌa benneꞌ caꞌ buluchálaje̱ꞌ waláz chee̱ꞌ nédxudaute̱.
\v 22 Caꞌ naca na, laweꞌ da gunná Moisés, guzre̱ꞌ xra xrtáudxu caꞌ: “Sel-la Xránadxu Dios chee̱le tu benneꞌ guchálaje̱ꞌ waláz chee̱ꞌ. Gaque̱ꞌ tu benneꞌ ládujla bi bíchele caꞌ, naꞌ sel-le̱ꞌ le̱ꞌ chee̱le ca gusel-le̱ꞌ nedaꞌ. Le xen xanneꞌ xúgute̱ da xe̱ꞌe̱ leꞌe,
\v 23 laweꞌ da welebía xiꞌ xúgute̱ benneꞌ quebe xelapa Le̱ꞌ ba láꞌana, naꞌ cuase̱ꞌ benneꞌ caꞌ ládujla xe̱zre Israel.”
\p
\v 24 ’Xúgute̱ benneꞌ caꞌ, benneꞌ buluchálaje̱ꞌ waláz chee̱ Dios, guzú lau na gate zua Samuel, ne zeaj na, buluchálaje̱ꞌ chee̱ zra caní.
\v 25 Leꞌe dxezile ca da gulenná benneꞌ caꞌ buluchálaje̱ꞌ waláz chee̱ Dios, ne nácale tuze lu xel-laꞌ wezría da be̱n Dios nen xra xrtáule caꞌ, ca guzre̱ꞌ Abraham: “Lu naꞌ benneꞌ zriꞌine zre suꞌ gaca chaweꞌ chee̱ xúgute̱ bénneache zaj zre̱ꞌe̱ lu xe̱zr la xu.”
\v 26 Gate Dios bsebane̱ꞌ Zríꞌine̱ꞌ, gusel-le̱ꞌ Le̱ꞌ nedxu laule leꞌe chee̱ gaca chaweꞌ chee̱le, chee̱ gusanle tu tule leꞌe da cale̱la da dxunle.
\c 4
\s Pedro ne Juan dxelezrine̱ꞌ lau benneꞌ xuꞌu laweꞌ caꞌ
\p
\v 1 Pedro ne Juan ne dxuluchálajle̱ne̱ꞌ benneꞌ caꞌ gate belezrín naꞌ bxruze caꞌ, ne benneꞌ xuꞌu lu ne̱ꞌe̱ bi xraꞌaga chee̱ xudauꞌ, ne benneꞌ saduceo caꞌ.
\v 2 Dxelezré̱ꞌe̱ laweꞌ da dxuluse̱de Pedro, ne Juan benneꞌ caꞌ, dxelenné̱ꞌ welexebán benneꞌ gate laweꞌ da bebán Jesús.
\v 3 Nadxa gule̱l-le̱ꞌ Pedro ne Juan, naꞌ guleché̱ꞌe̱ le̱ꞌ lizre xia ca zrindxa zra xula laweꞌ da ba dxezréꞌ zra naꞌ.
\v 4 Guléajle̱ꞌ benneꞌ zan ládujla benneꞌ caꞌ belénne̱ꞌ da bchalaj Pedro, naꞌ cátite benneꞌ caꞌ dxeléajle̱ꞌe̱ chee̱ Jesús zaj naque̱ꞌ ca gazxuꞌ cueꞌ chi gaxúa benneꞌ biu.
\p
\v 5 Zra xula naꞌ benneꞌ xíchaje̱ caꞌ chee̱ judío caꞌ, ne benneꞌ gula sina caꞌ, ne benneꞌ caꞌ dxuluxuzájle̱ꞌe̱ da nadxixruj bea na, belezrague̱ꞌ lu xe̱zre Jerusalén
\v 6 nen Anás, bxruze blau, ne Caifás, ne Juan, ne Alejandro, ne xúgute̱ benneꞌ xrtia bxruze blau caꞌ.
\v 7 Nadxa gulenná beꞌe xeajlexríꞌe̱ Pedro ne Juan, naꞌ buluzé̱ꞌ le̱ꞌ laduj naga zaj zre̱ꞌe̱, naꞌ buluche̱be̱ꞌ le̱ꞌ:
\p ―¿Bi xel-laꞌ dxenná bea, u nu lu La dxunle da caní?
\p
\v 8 Nadxa Pedro, zúale̱queze Beꞌ Láꞌazxa le̱ꞌ, guzre̱ꞌ benneꞌ caꞌ:
\p ―Leꞌe, benneꞌ xíchaje̱ caꞌ chee̱ bxruze, ne benneꞌ gula sina caꞌ,
\v 9 leꞌe dxuché̱bele netuꞌ chee̱ tu da chaweꞌ da guca chee̱ tu benneꞌ we̱ꞌ, chee̱ nézele ájala guca bexaca bénneaꞌ.
\v 10 Dxuzentuꞌ xúgute̱le leꞌe chee̱ xeleneze xúgute̱ benneꞌ Israel, benneꞌ nigá ze̱ꞌ lau xúgute̱le leꞌe, ba bexaque̱ꞌ lu La Jesucristo, Benneꞌ Nazaret, Bénneaꞌ bdaꞌle leꞌe le̱ꞌe̱ xaga béguaj, naꞌ Dios bsebane̱ꞌ Le̱ꞌ ládujla benneꞌ gate.
\v 11 Jesús nigá naque̱ꞌ xiaj naꞌ, leꞌe, benneꞌ we̱n xuꞌu bzúale chaláꞌala, san naꞌa Lé̱queze̱ꞌ naque̱ꞌ xiaj blau chee̱ xuꞌu.
\v 12 Quebe nu chiláꞌ bénneache sequeꞌ guselé̱ꞌ dxiꞌu laweꞌ da quebe ne gunna Dios xetú La bénneache lu xe̱zr la xu nigá, benneꞌ séquene̱ꞌ guselé̱ꞌ dxiꞌu.
\p
\v 13 Gate benneꞌ xuꞌu laweꞌ beleléꞌene̱ꞌ Pedro ne Juan dxuluchálaje̱ꞌ du lazre̱ꞌ, ne dxeleque béꞌene̱ꞌ quebe zaj nazé̱die̱ꞌ lu naꞌ bxruze caꞌ, san zaj naque̱ꞌ benneꞌ zre̱ꞌe̱ cáꞌaze, naꞌ belexebáne benneꞌ xíchaje̱ caꞌ, san guleque béꞌene̱ꞌ zaj naque̱ꞌ benneꞌ guledále̱ne̱ꞌ Jesús.
\v 14 Cáꞌanqueze bénneaꞌ bexaque̱ꞌ ze̱ꞌ naꞌ nen Pedro ne Juan, naꞌ chee̱ le̱ naꞌ quebe gulezéquene̱ꞌ bi xelenné̱ꞌ chee̱ꞌ.
\v 15 Nadxa gulenná beꞌe̱ belexedxúaj benneꞌ gubáz caꞌ ládujla le̱ꞌ. Cateꞌ belexegáꞌana le̱ze̱ꞌ buluche̱be ljwezre̱ꞌ,
\v 16 dxelenné̱ꞌ:
\p ―¿Ájazra gundxu chee̱ benneꞌ caní? Xúgute̱ benneꞌ zaj zre̱ꞌe̱ Jerusalén zaj nézene̱ꞌ belune̱ꞌ xel-laꞌ waca zren nigá, naꞌ quebe gaca tábagadxu na.
\v 17 Naꞌa, chee̱ québedxa zriluj da nigá láwela bénneache, guxrúsadxu benneꞌ caní chee̱ québedxa nu xuluchálajle̱ne̱ꞌ lu La Jesús.
\p
\v 18 Nadxa gulenná beꞌe̱ belexezrín Pedro ne Juan, naꞌ gulenná béꞌene̱ꞌ le̱ꞌ québedxa nu xuluchálajle̱ne̱ꞌ, ne quebe nu xulusé̱dene̱ꞌ lu La Jesús.
\v 19 Pedro ne Juan belexeche̱be̱ꞌ:
\p ―Le nnaꞌ leꞌe che naca xrlátaje lau Dios guzúazrantuꞌ xrtízrale leꞌe, quézcala xrtizraꞌ Dios.
\v 20 Netuꞌ quebe gaca gusantuꞌ gucháljantuꞌ ca naca da bléꞌentuꞌ, ne da bénentuꞌ.
\p
\v 21 Nadxa benneꞌ xuꞌu laweꞌ caꞌ buluxruse̱ꞌ Pedro ne Juan, san bulusane̱ꞌ le̱ꞌ. Quebe belezrelne̱ꞌ ájala xelune̱ꞌ xuluzaca ziꞌe̱ le̱ꞌ laweꞌ da dxelúe láꞌana xúgute̱ bénneache Dios ca naca da ba guca.
\v 22 Bénneaꞌ bexaque̱ꞌ ne̱ chee̱ xel-laꞌ waca zren nigá ba gudée̱ꞌ chua iza.
\s Benneꞌ caꞌ dxeléajle̱ꞌe̱ chee̱ Jesús dxelenabe̱ꞌ lau Dios gunézruje̱ꞌ le̱ꞌ xel-laꞌ dxuluxrén lazreꞌ
\p
\v 23 Gate bulusane̱ꞌ Pedro ne Juan, benneꞌ caní xjaque̱ꞌ naga zaj zraꞌ benneꞌ ljwezre̱ꞌ, naꞌ buluzenne̱ꞌ le̱ꞌ ca naca xúgute̱ da gulenná benneꞌ xíchaje̱ caꞌ chee̱ bxruze caꞌ, ne benneꞌ gula sina caꞌ.
\v 24 Gate belenne̱ꞌ da caní, xúgute̱ꞌ buluchálajle̱ne̱ꞌ Dios, gulenné̱ꞌ:
\p ―Xránantuꞌ, Lueꞌ nacuꞌ Dios. Be̱nuꞌ xabáa, ne xe̱zr la xu, ne nísadauꞌ, ne xúgute̱ da zaj nnita lataj caꞌ.
\v 25 Lueꞌ, lu naꞌ Beꞌ Láꞌazxa, ne lu dxuꞌa David, benneꞌ we̱n zrin chiuꞌ, gunnáuꞌ:
\q ¿Bizr chee̱ naꞌ dxelasa bénneache xe̱zr la xu caꞌ,
\q naꞌ bénneache dxelegúꞌu lazre̱ꞌ da quebe bi zaj zaca?
\q
\v 26 Benneꞌ wenná bea caꞌ chee̱ xe̱zr la xu gulune̱ꞌ tuz,
\q naꞌ benneꞌ blau caꞌ chee̱ xe̱zr caꞌ belezrague̱ꞌ
\q chee̱ xeledábague̱ꞌe̱ Xránadxu Dios, ne Cristo chee̱ꞌ.
\p
\v 27 ’Da li, Herodes. ne Poncio Pilato belezrague̱ꞌ lu xe̱zre nigá nen benneꞌ zituꞌ caꞌ, ne nen benneꞌ Israel caꞌ, naꞌ guledábague̱ꞌ Zriꞌinuꞌ Láꞌazxa, Jesús, Bénneaꞌ bzúaquezuꞌ Lueꞌ.
\v 28 Caꞌan guca, benneꞌ caꞌ belune̱ꞌ xúgute̱ ca da ba núnquezuꞌ Lueꞌ dxal-laꞌ gaca na.
\v 29 Naꞌa, Xran, gunnáꞌ ca dxuluxruse̱ꞌ netuꞌ, ne be̱nna netuꞌ, we̱n zrin chiuꞌ caꞌ, xel-laꞌ dxuxrén lazreꞌ chee̱ guchálajntuꞌ xrtizruꞌ, ne quebe zrébentuꞌ,
\v 30 ne be̱nna netuꞌ xel-laꞌ waca chiuꞌ chee̱ gaca xexuntuꞌ benneꞌ we̱ꞌ caꞌ, ne chee̱ guntuꞌ xel-laꞌ waca chee̱ xabáa lu La Zriꞌinuꞌ Láꞌazxa Jesús. ¡Caꞌan gaca!
\p
\v 31 Gate bexuzre buluchálajle̱ne̱ꞌ Dios, lu lataj naga zaj nazrague̱ꞌ guzrúꞌ, naꞌ xúgute̱ꞌ guzúale̱ Beꞌ Láꞌazxa le̱ꞌ, naꞌ buluchálaje̱ꞌ xrtizraꞌ Dios dute̱ xel-laꞌ dxuluxrén lazreꞌ chee̱ꞌ.
\s Xúgute̱ꞌ dxelune̱ꞌ tuze ca naca da zaj nape̱ꞌ
\p
\v 32 Benneꞌ zan caꞌ, benneꞌ dxeléajle̱ꞌe̱ chee̱ Jesús gulaque̱ꞌ tuze lu xichaj lázrdawe̱ꞌ. Netúe̱ꞌ quebe gunné̱ꞌ chee̱ze̱ꞌ naca da nape̱ꞌ. Xúgute̱ da zaj nape̱ꞌ zaj nune̱ꞌ tuze.
\v 33 Benneꞌ gubáz caꞌ chee̱ Jesús, nen dute̱ xel-laꞌ dxelenná bea buluchálajqueze̱ꞌ ca guca gate bebán Xránadxu Jesús, naꞌ Dios be̱ne̱ꞌ guca chaweꞌ chee̱ xúgute̱ benneꞌ caꞌ.
\v 34 Quebe nu guzúa ládujla benneꞌ caꞌ bi bxázrjene̱ꞌ laweꞌ da caní belún xúgute̱ benneꞌ zaj nape̱ꞌ xe̱zr la xu caꞌ u xuꞌu caꞌ. Belutie̱ꞌ na, naꞌ belúꞌe̱ dumí naꞌ,
\v 35 ne xeajlenézruje̱ꞌ na lu naꞌ benneꞌ gubáz caꞌ, chee̱ xelexele̱ꞌe̱ na tu tu benneꞌ caꞌ ca da dxelechínene̱ꞌ.
\v 36 Zua ládujla benneꞌ caꞌ tu benneꞌ xrtia Leví le̱ꞌ José, benneꞌ gúlaje̱ꞌ Chipre da naca tu xe̱zr la xudauꞌ naxechaj nísadauꞌ le̱ na. Benneꞌ nigá, buluzúa gubáz caꞌ le̱ꞌ Bernabé, da zéaje̱ na benneꞌ dxexúe zrene̱ꞌ.
\v 37 Benneꞌ nigá be̱tie̱ꞌ tu xe̱zr la xu da nape̱ꞌ, naꞌ biꞌe̱ dumí naꞌ, ne bnézruje̱ꞌ na lu naꞌ benneꞌ gubáz caꞌ.
\c 5
\s Dul-la da belún Ananías ne Safira
\p
\v 1 Xetú benneꞌ le̱ꞌ Ananías nen zruꞌule̱ꞌ Safira, be̱tie̱ꞌ tu xe̱zr la xu chee̱ꞌ.
\v 2 Benneꞌ nigá bequé̱ꞌe̱ lateꞌ dumí naꞌ, naꞌ da begáꞌanaze biꞌe̱ lau benneꞌ gubáz caꞌ, ne gunné̱ꞌ ca naca naꞌ. Zruꞌule̱ꞌ ca naca na nézene̱ꞌ.
\v 3 Nadxa guzre Pedro le̱ꞌ:
\p ―Ananías, ¿bizr chee̱ naꞌ be̱ꞌu lataj Satanás guxúꞌu na lu xichaj lázrdaꞌu chee̱ si xe̱ꞌu Beꞌ Láꞌazxa, naꞌ becaꞌu lateꞌ chiuꞌ ca naca da guziꞌu chee̱ xe̱zr la xu naꞌ?
\v 4 ¿Quebe guca xe̱zr la xu naꞌ chiuꞌ? Naꞌ gate be̱tiuꞌ na, ¿quebe guca dumí naꞌ chiuꞌ? ¿Ájazra guca be̱nuꞌ da nigá? Dios guzí xe̱ꞌu, quegá bénneache.
\p
\v 5 Ca ben Ananías da nigá, naꞌ guzréꞌe̱ gútete̱ꞌ. Xúgute̱ benneꞌ belén da nigá belezrébele̱ꞌe̱.
\v 6 Nadxa gulebiga bal-la bi cuideꞌ caꞌ, ne buluchélabeꞌ le̱ꞌ tu ladxeꞌ, naꞌ belúabeꞌ le̱ꞌ cheajlecáchebeꞌ le̱ꞌ lu ba.
\p
\v 7 Ca guca chunna hora gudé naꞌ, guxúꞌu zruꞌula Ananías naꞌ, ne quebe nézene̱ꞌ bi ba guca.
\v 8 Pedro bche̱be̱ꞌ le̱ꞌ:
\p ―Gunná, ¿bé̱tele leꞌe xe̱zr la xu naꞌ ca dxennale guzile na?
\p Gunná Safira naꞌ:
\p ―Aweꞌ, ca naca naꞌ.
\p
\v 9 Nadxa Pedro guzre̱ꞌ le̱ꞌ:
\p ―¿Bizr chee̱ naꞌ be̱nle leꞌe tuze dizraꞌ gúquele si xe̱le Beꞌ Láꞌazxa? Chaleꞌaj naꞌ ba zesíꞌaca bi caꞌ xeajlecáchebeꞌ benneꞌ chiuꞌ, naꞌ naꞌa xelúatequezebeꞌ lueꞌ.
\p
\v 10 Laꞌ náꞌqueze nuꞌula naꞌ guzréꞌe̱ gútete̱ꞌ zran niꞌa Pedro. Gate belúꞌu benneꞌ cuideꞌ caꞌ, naꞌ beleléꞌebeꞌ le̱ꞌ ba gutie̱ꞌ, naꞌ belexebéajbeꞌ le̱ꞌ xeajlecáchebeꞌ le̱ꞌ cuita ba chee̱ benneꞌ chee̱ꞌ.
\v 11 Xúgute̱ benneꞌ caꞌ zaj nazrague̱ꞌ naꞌ, ne xúgute̱ bénneache, benneꞌ belén da caní belezrébele̱ꞌe̱.
\s Benneꞌ gubáz caꞌ dxelúnle̱ꞌe̱ xel-laꞌ waca chee̱ xabáa
\p
\v 12 Benneꞌ gubáz caꞌ belúnle̱ꞌe̱ xel-laꞌ waca chee̱ xabáa, ne da dxelunna bea na lau benneꞌ caꞌ, naꞌ xúgute̱ꞌ belezrague̱ꞌ La Chila Chee̱ Salomón, da naca na chee̱ xudauꞌ.
\v 13 Netú benneꞌ caꞌ, benneꞌ quebe dxeléajle̱ꞌe̱ chee̱ Jesús, quebe belexázrene̱ꞌ gune̱ꞌ benneꞌ caꞌ tuze, san xúgute̱ bénneache belape̱ꞌ benneꞌ caní ba láꞌana.
\v 14 Benneꞌ zandxa gulezú lawe̱ꞌ dxeléajle̱ꞌe̱ chee̱ Xránadxu, benneꞌ biu ne nuꞌula caꞌ.
\v 15 Caꞌ guca na, belebéaje̱ꞌ benneꞌ we̱ꞌ caꞌ, zaj de̱ꞌ lu da dxelátaꞌne̱ꞌ, ne daꞌa chee̱ꞌ, naꞌ gulíxrue̱ꞌ le̱ꞌ la neza caꞌ chee̱ gate te Pedro naꞌ, naꞌ te zrula chee̱ꞌ laweꞌ benneꞌ caꞌ.
\v 16 Cáꞌanqueze benneꞌ xe̱zre walizre caꞌ belelé̱ꞌe̱ lu xe̱zre Jerusalén, zaj nuꞌe̱ benneꞌ we̱ꞌ chee̱ꞌ caꞌ, ne benneꞌ caꞌ zaj xuꞌe̱ beꞌ xriwe̱ꞌ caꞌ, naꞌ xúgute̱ꞌ belexexaque̱ꞌ.
\s Benneꞌ gubáz caꞌ dxeluꞌe̱ lizre xia
\p
\v 17 Nadxa bxruze blau, ne benneꞌ saduceo caꞌ zaj zúale̱ne̱ꞌ le̱ꞌ, gulaque̱ꞌ xa lazreꞌ,
\v 18 naꞌ gule̱l-le̱ꞌ benneꞌ gubáz caꞌ, ne buluzré̱ꞌe̱ le̱ꞌ lizre xia.
\v 19 Naꞌ tu gubáz chee̱ xabáa chee̱ Xránadxu gusálaje̱ꞌ dxa xuꞌu chee̱ lizre xia naꞌ chizrela, naꞌ bebéaje̱ꞌ benneꞌ caꞌ, ne dxe̱ꞌe̱ le̱ꞌ:
\p
\v 20 ―Le chjaca, ne le cheajsé̱ lu xudauꞌ, ne le guzén benneꞌ caꞌ ca naca chee̱ xel-laꞌ nabán cube nigá.
\p
\v 21 Ca belenne̱ꞌ da nigá, zra xula belúꞌe̱ chila xudauꞌ che zílala, naꞌ gulezú lawe̱ꞌ dxulusé̱dene̱ꞌ benneꞌ zaj zre̱ꞌe̱ naꞌ.
\p Dxácate̱ naꞌ, bxruze blau naꞌ, ne benneꞌ zrále̱ne̱ꞌ le̱ꞌ, buluchague̱ꞌ benneꞌ caꞌ chee̱ xuꞌu laweꞌ blau, ne benneꞌ gula sina caꞌ chee̱ xe̱zre Israel, naꞌ gulenná beꞌe̱ xelexebéaje̱ꞌ gubáz caꞌ zaj xuꞌe̱ lizre xia.
\v 22 Gate belezrín bi xraꞌaga chee̱ xudauꞌ naꞌ, quebe nu beleléꞌene̱ꞌ lu xuꞌu lizre xia, naꞌ belexezrine̱ꞌ, ne buluzenne̱ꞌ benneꞌ caꞌ,
\v 23 dxelenné̱ꞌ:
\p ―Gate bzrintuꞌ lizre xia naꞌ, naxezxuj tipa na, naꞌ benneꞌ dxjaque̱ꞌ wedil-la zaj zre̱ꞌe̱ dxuꞌa dxa xuꞌu naꞌ, ne dxuluxúe̱ꞌ na, san gate gusálajntuꞌ na, quebe nu bezrélentuꞌ lu xuꞌu naꞌ.
\p
\v 24 Gate bxruze blau, ne benneꞌ xíchaje̱ caꞌ chee̱ bxruze caꞌ, ne xíchaje̱ chee̱ bi xraꞌaga caꞌ, belenne̱ꞌ da nigá, naꞌ buluche̱be ljwezre̱ꞌ ga cheajsé̱ da nigá.
\v 25 Laꞌ náꞌqueze bzrin tu benneꞌ guzre̱ꞌ le̱ꞌ:
\p ―Benneꞌ caꞌ bzraꞌle leꞌe lizre xia zaj zre̱ꞌe̱ lu chila xudauꞌ, dxulusé̱dene̱ꞌ bénneache.
\p
\v 26 Nadxa benneꞌ xíchaje̱ chee̱ bi xraꞌaga chee̱ xudauꞌ guxíajle̱ne̱ꞌ bi xraꞌaga caꞌ, naꞌ xeajlexríꞌe̱ gubáz caꞌ. Quebe bi belúnene̱ꞌ le̱ꞌ laweꞌ da belezrebe̱ꞌ bi xelún benneꞌ caꞌ dxelenne̱ꞌ chee̱ gubáz caꞌ, laweꞌ da dxeléquene̱ꞌ xeluꞌe̱ le̱ꞌ xiaj.
\v 27 Gate xeajlexríꞌe̱ gubáz caꞌ, naꞌ buluzré̱ꞌe̱ le̱ꞌ lau benneꞌ xuꞌu laweꞌ blau, naꞌ gunná bxruze blau naꞌ, dxe̱ꞌe̱ benneꞌ gubáz caꞌ:
\p
\v 28 ―Netuꞌ bzrúnantuꞌ leꞌe quebe guchálajle̱dxale bénneache lu la bénneaꞌ. ¿Bizra naꞌ be̱nle? Ba bzenle ca naca benneꞌ zaj zre̱ꞌe̱ xe̱zre Jerusalén ca naca da dxusé̱dele, ne dxaca lázrele gusebágale netuꞌ xel-laꞌ gute chee̱ benneꞌ naꞌ.
\p
\v 29 Nadxa belexeche̱be Pedro, ne xezícadxa benneꞌ gubáz caꞌ:
\p ―Dxalaꞌ guzúantuꞌ xrtizraꞌ Dios, quegá xrtizraꞌ bénneache.
\v 30 Dios chee̱ xra xrtáudxu caꞌ bsebane̱ꞌ Jesús, Bénneaꞌ bé̱tele leꞌe bdaꞌale Le̱ꞌ xaga béguaj.
\v 31 Dios bcaꞌana szrene̱ꞌ Le̱ꞌ chaláꞌa xabe̱la chee̱ꞌ, ne be̱ne̱ꞌ Le̱ꞌ Benneꞌ Blau, ne Weselá, chee̱ gataꞌ lataj chee̱ benneꞌ Israel xelexebíꞌi lazre̱ꞌ chee̱ gunite lau Dios dul-la chee̱ꞌ.
\v 32 Chee̱ le̱ naꞌ netuꞌ dxexeché̱bentuꞌ, ne cáꞌanqueze dxun Beꞌ Láꞌazxa. Dios dxunézruje̱ꞌ Beꞌ Láꞌazxa benneꞌ dxuluzúe̱ꞌ dizraꞌ chee̱ꞌ.
\p
\v 33 Gate belenne̱ꞌ da nigá, naꞌ belezré̱ꞌe̱, ne gulaca lazre̱ꞌ xelútie̱ꞌ gubáz caꞌ.
\v 34 Ládujla benneꞌ xuꞌu laweꞌ caꞌ zua tu benneꞌ fariseo le̱ꞌ Gamaliel. Naque̱ꞌ benneꞌ dxuxuzájle̱ꞌe̱ da nadxixruj bea na, naꞌ dxelápale̱ꞌe̱ bénneache le̱ꞌ ba láꞌana. Benneꞌ nigá guzé̱ꞌ, naꞌ gunná béꞌene̱ꞌ xelexebéaje̱ꞌ gubáz caꞌ chaléꞌajla tu chíꞌidauꞌ.
\v 35 Nadxa guzre̱ꞌ benneꞌ xuꞌu laweꞌ caꞌ:
\p ―Leꞌe, benneꞌ Israel, le guxúe xanneꞌ ca gunle chee̱ benneꞌ caní.
\v 36 Le gusá lazreꞌ, bache guca zaneꞌ iza, gudábaga Teudas xuꞌu laweꞌ, gunné̱ꞌ naque̱ꞌ tu benneꞌ blau, naꞌ xjácale̱ ca tapa gaxúa benneꞌ biu le̱ꞌ. Naꞌ belutie̱ꞌ le̱ꞌ, naꞌ xúgute̱ benneꞌ caꞌ gulaca le̱ꞌ tuze belexase dinnaje̱ꞌ caꞌ, naꞌ gudé chee̱ da naꞌ.
\v 37 Gudé naꞌ, lu zra gate belúꞌu bénneache xiche, naꞌ blaꞌ Judas, benneꞌ Galilea, naꞌ benneꞌ zan xjácale̱ne̱ꞌ le̱ꞌ. Cáꞌanqueze belutie̱ꞌ bénneaꞌ, naꞌ xúgute̱ benneꞌ gulede̱ꞌe̱ le̱ꞌ belexase dínnaje̱ꞌ.
\v 38 Chee̱ le̱ naꞌ, le gusán benneꞌ caní, ne quebe guchixre chee̱le nen benneꞌ caꞌ. Che da nigá naca na da dxun beneácheze, wadé chee̱ na.
\v 39 Che naca na da dxun Dios, quebe séquele leꞌe guzría xile na. Le guxúe xanneꞌ chee̱ quebe tíl-lale̱le Dios.
\p
\v 40 Xúgute̱ꞌ belexaque̱ꞌ tuze. Nadxa gulenná beꞌe̱ belúꞌu gubáz caꞌ da xula, naꞌ ca belúꞌu benneꞌ caꞌ, naꞌ buluzrune̱ꞌ le̱ꞌ québedxa nu xuluchálajle̱ benneꞌ caꞌ lu La Jesús. Gudé naꞌ bulusane̱ꞌ le̱ꞌ.
\v 41 Naꞌ benneꞌ gubáz caꞌ belexedxúaje̱ꞌ naga zaj zraꞌ benneꞌ xuꞌu laweꞌ caꞌ, dxelebéle̱ꞌe̱ne̱ꞌ laweꞌ da be̱ꞌ Dios lataj guledée̱ꞌ xel-laꞌ ziꞌ laweꞌ da zaj naqueꞌ Jesús tuze.
\v 42 Quebe bulusane̱ꞌ dxuluchálaje̱ꞌ, ne dxulusé̱dene̱ꞌ bénneache ca naca chee̱ Jesucristo xúgute̱ zra, lu chila xudauꞌ, ne lu xuꞌu caꞌ.
\c 6
\s Dxuluzúe̱ꞌ gazre benneꞌ xelune̱ꞌ zrin chee̱ benneꞌ zaj de̱ꞌe̱ Cristo
\p
\v 1 Lu zra caꞌ, gate zaj dxan benneꞌ caꞌ zaj de̱ꞌe̱ Jesús, naꞌ benneꞌ caꞌ dxelenné̱ꞌ dizraꞌ griego gulawe̱ꞌ zria benneꞌ caꞌ dxelenné̱ꞌ dizraꞌ hebreo. Dxelenné̱ꞌ quebe nu dxunezruj xanneꞌ da xeláw nuꞌula ba gulate benneꞌ chee̱ꞌ zaj zre̱ꞌe̱ ládujla le̱ꞌ gate dxelísie̱ꞌ xel-laꞌ wagu tu zra tu zra.
\v 2 Nadxa benneꞌ gubáz caꞌ buluchague̱ꞌ ca naca benneꞌ caꞌ dxeléajle̱ꞌe̱ chee̱ Jesús, naꞌ gulé̱ꞌe̱ le̱ꞌ:
\p ―Quebe naca xrlátaje gusantuꞌ guchálajntuꞌ xrtizraꞌ Dios chee̱ gudentuꞌ xel-laꞌ wagu.
\v 3 Chee̱ le̱ naꞌ, biche ljwézrentuꞌ, le quilaj gazre benneꞌ láwela leꞌe, benneꞌ zaj naque̱ꞌ du lazreꞌ, ne dxeléajniꞌine̱ꞌ, ne zúale̱ Beꞌ Láꞌazxa le̱ꞌ, naꞌ le gusebague̱ꞌ zrin nigá.
\v 4 Netuꞌ tu guchálajle̱zquezentuꞌ Dios, ne gusé̱dentuꞌ bénneache xrtizraꞌ Dios.
\p
\v 5 Xúgute̱ꞌ gulaza lazre̱ꞌ, naꞌ gulequé̱ꞌe̱ Esteban, tu benneꞌ dxéajle̱ꞌe̱ dute̱ lázrdawe̱ꞌ chee̱ Jesús, ne zúale̱ Beꞌ Láꞌazxa le̱ꞌ. Cáꞌanqueze gulequé̱ꞌe̱ Felipe, ne Prócoro, ne Nicanor, ne Timón, ne Parmenas, ne Nicolás, tu benneꞌ xe̱zre Antioquía, benneꞌ nédxute̱ bexaque̱ꞌ tuze benneꞌ judío caꞌ.
\v 6 Naꞌ guleché̱ꞌe̱ benneꞌ caní lau benneꞌ gubáz caꞌ, naꞌ le̱ꞌ bululáwizre̱ꞌ Dios, ne buluzé̱ ne̱ꞌe̱ laweꞌ benneꞌ gazre caní.
\p
\v 7 Xrtizraꞌ Dios zeaj dxezriluj na, naꞌ benneꞌ caꞌ dxeléajle̱ chee̱ Jesús guxánle̱ꞌe̱ lu xe̱zre Jerusalén, naꞌ bxruze zan chee̱ judío caꞌ guléajle̱ꞌe̱ chee̱ꞌ.
\s Dxele̱l-le̱ꞌ Esteban
\p
\v 8 Esteban, tu benneꞌ nápale̱ꞌe̱ xel-laꞌ waca, ne naque̱ꞌ chaweꞌ lau Dios, be̱ne̱ꞌ xel-laꞌ waca caꞌ chee̱ xabáa, ne da dxelunna bea na chee̱ da caꞌ lau bénneache caꞌ.
\v 9 Nadxa bal-la benneꞌ chee̱ xuꞌu naga dxelezraga bénneache caꞌ, nazí le na Xuꞌu Chee̱ Benneꞌ Québedxa Zaj Nadaꞌu, benneꞌ xe̱zre Cirene caꞌ, ne benneꞌ xe̱zre Alejandría caꞌ, ne benneꞌ chee̱ ga nababa Cilicia, ne Asia, gulezú lawe̱ꞌ dxulutíl-lale̱ne̱ꞌ Esteban dizraꞌ.
\v 10 Quebe gulezéquene̱ꞌ bi xelenné̱ꞌ chee̱ xrtizraꞌ Esteban laweꞌ da bchálaje̱ꞌ nen dute̱ xel-laꞌ sina chee̱ Beꞌ Láꞌazxa.
\v 11 Nadxa gulízruje̱ꞌ bal-la benneꞌ caꞌ chee̱ xelenné̱ꞌ belenne̱ꞌ gunné̱ Esteban dizraꞌ schanniꞌ chee̱ Moisés, ne chee̱ Dios.
\v 12 Caní belune̱ꞌ, ne guluꞌe̱ xel-le̱ꞌ bénneache caꞌ, ne benneꞌ gula sina caꞌ, ne benneꞌ dxuluxuzájle̱ꞌe̱ da nadxixruj bea na, naꞌ gulebía diꞌe̱ Esteban. Gule̱l-le̱ꞌ le̱ꞌ, ne guleché̱ꞌe̱ le̱ꞌ lau benneꞌ xuꞌu laweꞌ blau.
\v 13 Cáꞌanqueze gulílaje̱ꞌ benneꞌ we̱n lazreꞌ xelenné̱ꞌ chee̱ Esteban, naꞌ gulenné̱ꞌ:
\p ―Benneꞌ nigá quebe dxusane̱ꞌ dxenné̱ꞌ schanniꞌ chee̱ xudauꞌ láꞌazxa nigá, ne chee̱ da bdxixruj bea Dios.
\v 14 Ba bentuꞌ gunné̱ꞌ ca gun Jesús, benneꞌ Nazaret, dxenné̱ꞌ guzría xiꞌe̱ xudauꞌ nigá, ne guché̱ꞌe̱ ca naca da zéajle̱dxu da bcaꞌana Moisés.
\p
\v 15 Nadxa benneꞌ xuꞌu laweꞌ caꞌ, ne xúgute̱ benneꞌ zaj zre̱ꞌe̱ naꞌ, gate gulenné̱ꞌe̱ Esteban, beleléꞌene̱ꞌ lawe̱ꞌ, naca na ca lau tu gubáz chee̱ xabáa.
\c 7
\s Dxexeche̱be Esteban lau benneꞌ xuꞌu laweꞌ caꞌ
\p
\v 1 Nadxa bxruze blau bche̱be̱ꞌ Esteban:
\p ―¿Zaj naca da li da caní?
\p
\v 2 Naꞌ Esteban beche̱be̱ꞌ:
\p ―Leꞌe, benneꞌ gula, ne leꞌe biche ljwezraꞌ, le xene. Xradxu zue̱ꞌ xabáa bleꞌe lawe̱ꞌ lau xra xrtáudxu Abraham gate ne zue̱ꞌ lu xe̱zr la xu Mesopotamia, nédxudxa gate quebe ne xezé̱ꞌe̱ cheajxezúe̱ xe̱zre Harán.
\v 3 Dios guzre̱ꞌ le̱ꞌ: “Bsan lázriuꞌ ne xúgute̱ xrtia ljwezruꞌ, naꞌ guxíaj lu xe̱zr la xu da guléꞌedaꞌ lueꞌ.”
\v 4 Nadxa Abraham guzé̱ꞌe̱ lu xe̱zr la xu Caldea, xeajsúe̱ꞌ xe̱zre Harán. Ca gudé gute xra Abraham, Dios guché̱ꞌe̱ Abraham lu xe̱zr la xu nigá, naga zrale leꞌe naꞌa.
\v 5 Dios quebe bi bnézruje̱ꞌ chee̱ Abraham naga sue̱ꞌ lu xe̱zr la xu nigá, ne naga gune̱ꞌ lizre̱ꞌ, san guche̱be lazre̱ꞌ gunézruje̱ꞌ le̱ꞌ xe̱zr la xu nigá, naꞌ gate te gate le̱ꞌ, naꞌ gaca na chee̱ zríꞌine̱ꞌ, lácala lu zra naꞌ quebe ne galaj nu zriꞌine Abraham.
\v 6 Cáꞌanqueze Dios guzre̱ꞌ le̱ꞌ xelezúa zriꞌine zre sue̱ꞌ ca benneꞌ zituꞌ tu lu xe̱zr la xu chee̱ benneꞌ xula, ne xelaque̱ꞌ benneꞌ zaj nadaꞌu, naꞌ xuluzálaje̱ꞌ le̱ꞌ tapa gaxúa iza.
\v 7 Cáꞌanqueze guzre Dios le̱ꞌ: “Nedaꞌ chugaꞌ ca gaca chee̱ xe̱zr la xu naꞌ guchine na zriꞌine zre suꞌ, naꞌ te naꞌ xelexedxúaje̱ꞌ ga naꞌ, ne xelúe láꞌane̱ꞌ nedaꞌ lu xe̱zr la xu nigá.”
\v 8 Dios be̱ne̱ꞌ tu xel-laꞌ wezría nen Abraham, naꞌ gunná béꞌene̱ꞌ le̱ꞌ chugu látedu weaj be̱laꞌ chee̱ benneꞌ biu caꞌ lu be̱l-laꞌ dxen chee̱ꞌ, tu da guzúa chuchu na xel-laꞌ wezría naꞌ. Chee̱ le̱ naꞌ gate gulaj Isaac, zriꞌine Abraham, guchugue̱ꞌ látedauꞌ be̱laꞌ chee̱ be̱l-laꞌ dxen chee̱ Isaac gate gúquebeꞌ xrunuꞌ zra, naꞌ cáꞌanqueze be̱n Isaac chee̱ zríꞌine̱ꞌ, Jacob, ne cáꞌanqueze be̱n Jacob chee̱ zríꞌine̱ꞌ caꞌ, benneꞌ caꞌ gulaque̱ꞌ xra chazrinnu cueꞌ benneꞌ Israel.
\p
\v 9 ’Zriꞌine Jacob naꞌ, benneꞌ caꞌ zaj naque̱ꞌ xra xrtáudxu, gulaque̱ꞌ xa lazreꞌ chee̱ bi biche̱ꞌ José, naꞌ belutie̱-beꞌ chee̱ chuꞌubeꞌ lu naꞌ benneꞌ guchínene̱ꞌ-beꞌ lu xe̱zr la xu Egipto. Dios guzúale̱ne̱ꞌ José,
\v 10 naꞌ bselé̱ꞌ-beꞌ lu xúgute̱ da ziꞌ da xaꞌ. Bnézruje̱ꞌ-beꞌ xel-laꞌ dxéajniꞌi, naꞌ be̱n Dios bezaca ba lázrele̱ Faraón José naꞌ. Faraón nigá guque̱ꞌ wenná bea lu xe̱zr la xu Egipto, naꞌ bzue̱ꞌ José gácabeꞌ benneꞌ xuꞌu lu ne̱ꞌe̱ xe̱zr la xu Egipto naꞌ, ne benneꞌ walizre Faraón naꞌ.
\p
\v 11 ’Nadxa guca gubinaꞌ du ca naca xe̱zr la xu Egipto, ne ca naca xe̱zr la xu Canaán, naꞌ xra xrtáudxu caꞌ quebe bi belezrélene̱ꞌ da xelawe̱ꞌ.
\v 12 Gate ben Jacob de̱ zruaꞌ xtila lu xe̱zr la xu Egipto, naꞌ gusel-le̱ꞌ naꞌ zríꞌine̱ꞌ caꞌ, benneꞌ caꞌ zaj naque̱ꞌ xra xrtáudxu. Da nigá guca na da nedxu lasa xjaque̱ꞌ Egipto.
\v 13 Da gudxupeꞌ lasa xjaque̱ꞌ naꞌ, José bleꞌe lawe̱ꞌ benneꞌ biche̱ꞌ caꞌ, naꞌ caꞌan guca guneze wenná bea chee̱ Egipto ga benneꞌ José naꞌ.
\v 14 Nadxa José gunná béꞌene̱ꞌ xeajlexríꞌe̱ xre̱ꞌ, ne ca naca xrtia ljwezre̱ꞌ, zaj naque̱ꞌ ga xun chínue̱ꞌ.
\v 15 Caꞌan guca, Jacob xeajsúe̱ꞌ Egipto naga gutie̱ꞌ, ne naga gulátequeze xra xrtáudxu caꞌ.
\v 16 Ca gudé naꞌ belúꞌe̱ be̱l-laꞌ dxen gate chee̱ benneꞌ caꞌ lu xe̱zre Siquem, naga bulucache̱ꞌ le̱ꞌ lu ba da zua na lu xe̱zr la xu naꞌ da guzíꞌ Abraham nen dumí da gudízruje̱ꞌ bi caꞌ zriꞌine Hamor lu xe̱zre Siquem naꞌ.
\p
\v 17 ’Gate ba zua gagu zra gaca li da guche̱be lazreꞌ Dios da naꞌ be̱n chúchue̱ꞌ lau Abraham, naꞌ benneꞌ Israel zaj zre̱ꞌe̱ xe̱zr la xu Egipto gulánle̱ꞌe̱.
\v 18 Nadxa guzú lau dxenná bea tu wenná bea lu xe̱zr la xu Egipto, benneꞌ quebe núnbeꞌe̱ José.
\v 19 Wenná bea nigá guzí xe̱ꞌe̱ benneꞌ ljwézredxu, ne bzálaje̱ꞌ xra xrtáudxu caꞌ, naꞌ gunná béꞌene̱ꞌ le̱ꞌ cheajlecáꞌane̱ꞌ-beꞌ bidu dxeꞌene chee̱ꞌ caꞌ chee̱ xelátebeꞌ.
\v 20 Lu zra caꞌ gulaj Moisés, ne gúcabeꞌ tu bidauꞌ bezaca ba lazreꞌ Dios chee̱beꞌ, naꞌ xra xrnabeꞌ bulusegule̱ꞌ-beꞌ lizre̱ꞌ chunna beuꞌ.
\v 21 Gate bzrin zra zxal-laꞌ cheajlegaꞌane̱ꞌ-beꞌ, naꞌ bi nuꞌula chee̱ wenná bea naꞌ bequé̱ꞌe̱-beꞌ, ne bsegule̱ꞌ-beꞌ ca zríꞌinequeze̱ꞌ.
\v 22 Chee̱ le̱ naꞌ, Moisés guzé̱debeꞌ ca naca xel-laꞌ sina chee̱ Egipto, naꞌ gúcabeꞌ tu benneꞌ nape̱ꞌ xel-laꞌ dxenná bea ca naca da gunné̱ꞌ, ne da be̱ne̱ꞌ.
\p
\v 23 ’Gate bzrie̱ꞌ chua iza, Moisés guca lazre̱ꞌ cheajnné̱ꞌe̱ benneꞌ ljwezre̱ꞌ, benneꞌ Israel caꞌ.
\v 24 Bléꞌene̱ꞌ tu benneꞌ Egipto dxuꞌe̱ tu benneꞌ Israel. Chee̱ gúcale̱ne̱ꞌ benneꞌ naꞌ, ne chee̱ bebéaj lazre̱ꞌ bénneaꞌ, be̱tie̱ꞌ benneꞌ Egipto naꞌ.
\v 25 Moisés gúquene̱ꞌ benneꞌ lazrie̱ꞌ, benneꞌ Israel caꞌ, xeleque béꞌene̱ꞌ Dios guselé̱ꞌ benneꞌ caꞌ ne̱ chee̱ le̱ꞌ. Benneꞌ caꞌ quebe guleque béꞌene̱ꞌ na.
\v 26 Zra xula Moisés bléꞌene̱ꞌ chupa benneꞌ Israel dxeledil-le̱ꞌ, naꞌ laweꞌ da guca lazre̱ꞌ xelezrá zrie̱ꞌ benneꞌ caꞌ, naꞌ guzre̱ꞌ le̱ꞌ: “Leꞌe nácale biche ljwézrele. ¿Bizr chee̱ naꞌ dxue ljwézrele?”
\v 27 Nadxa benneꞌ naꞌ dxuꞌe̱ benneꞌ ljwezre̱ꞌ bzrigue̱ꞌ Moisés, naꞌ guzre̱ꞌ le̱ꞌ: “¿Nu bzua lueꞌ ca benneꞌ xíchaje̱ chee̱ntuꞌ chee̱ guchiꞌu ca da dxuntuꞌ?
\v 28 ¿Dxaca lazruꞌ gutiuꞌ nedaꞌ ca be̱nuꞌ neaje, be̱tiuꞌ benneꞌ Egipto naꞌ?”
\v 29 Ca ben Moisés da nigá, naꞌ bzrúnnaje̱ꞌ zexíaje̱ꞌ lu xe̱zr la xu chee̱ benneꞌ Madián caꞌ. Naꞌ guzúe̱ꞌ ca tu benneꞌ zituꞌ, naꞌ bchaga náꞌle̱ne̱ꞌ nuꞌula, naꞌ gulaj chupa zríꞌine̱ꞌ.
\p
\v 30 ’Ca gudé chua iza, gate zue̱ꞌ le̱ꞌe̱ xixreꞌ laweꞌ lataj da zua na gagu lu xiꞌa Sinaí, naꞌ bleꞌe lau tu gubáz chee̱ xabáa le̱ꞌ tu lu xiꞌ da dxeꞌ lu xecheꞌ bisigá.
\v 31 Moisés bzrebe̱ꞌ ca naca da bléꞌene̱ꞌ, san gate gubigue̱ꞌ chee̱ leꞌe xánnene̱ꞌ, benne̱ꞌ chiꞌi Xránadxu, dxenné̱ꞌ:
\v 32 “Nedaꞌ nacaꞌ Dios chee̱ xra xrtaꞌu caꞌ, Dios chee̱ Abraham, ne Dios chee̱ Isaac, ne Dios chee̱ Jacob.” Nadxa Moisés guzú lau dxezrízie̱ꞌ lu xel-laꞌ dxezrebe, naꞌ quebe bexázrjene̱ꞌ nne̱ꞌe̱.
\v 33 Xránadxu guzre̱ꞌ le̱ꞌ: “Guleaj zreluꞌ xuꞌu niꞌu laweꞌ da naca láꞌazxa lataj naga dxeléajuꞌ.
\v 34 Nedaꞌ ba bleꞌedaꞌ ca naca da dxelezaca ziꞌ bénneache chiaꞌ zaj zre̱ꞌe̱ lu xe̱zr la xu Egipto. Dxendaꞌ ca dxelebezre xache̱ꞌ, ne ba blaꞌa chee̱ guseláꞌ benneꞌ caꞌ. Gudá lueꞌ, sel-laꞌ lueꞌ lu xe̱zr la xu Egipto.”
\p
\v 35 ’Lácala benneꞌ caꞌ buluzúe̱ꞌ Moisés chaláꞌala, gulé̱ꞌe̱ le̱ꞌ: “¿Nu bzua lueꞌ ca benneꞌ xíchaje̱ chee̱ntuꞌ chee̱ guchiꞌu ca da dxuntuꞌ?” Dios gusel-le̱ꞌ le̱ꞌ ca benneꞌ xíchaje̱, ne benneꞌ guselá le̱ꞌ, ne̱ chee̱ gubáz chee̱ xabáa naꞌ bleꞌe lawe̱ꞌ le̱ꞌ lu xecheꞌ bisigá.
\v 36 Moisés naꞌ bebéaje̱ꞌ xra xrtáudxu caꞌ lu xe̱zr la xu Egipto, ne be̱ne̱ꞌ xel-laꞌ waca caꞌ, ne da gulunna bea na da be̱ne̱ꞌ lu xe̱zr la xu naꞌ, ne lu nísadauꞌ Xrna, ne le̱ꞌe̱ xixreꞌ laweꞌ lataj da chua iza naꞌ.
\v 37 Moisés nigáqueze guzre̱ꞌ benneꞌ Israel caꞌ: “Dios sel-le̱ꞌ tu benneꞌ guchálaje̱ꞌ waláz chee̱ꞌ, benneꞌ gálaje̱ꞌ ládujla xrtia ljwézrele leꞌe, ca gusel-le̱ꞌ nedaꞌ. Chee̱ Le̱ꞌ le xen.”
\v 38 Cáꞌanqueze Moisés nigá, bénneaꞌ guzúale̱ benneꞌ caꞌ le̱ꞌe̱ xixreꞌ laweꞌ lataj, tu zren nen gubáz chee̱ xabáa naꞌ bchálajle̱ le̱ꞌ lu xiꞌa Sinaí, guzúale̱ne̱ꞌ xra xrtáudxu caꞌ, ne guziꞌe̱ dizraꞌ chee̱ xel-laꞌ nabán chee̱ bdee̱ꞌ na chee̱ntuꞌ.
\p
\v 39 ’Xra xrtáudxu caꞌ quebe gulaca lazre̱ꞌ xuluzúa dizraꞌ chee̱ Moisés, san buluzúe̱ꞌ le̱ꞌ chaláꞌala, ne gulaca lazre̱ꞌ xelexezrine̱ꞌ Egipto.
\v 40 Gate cabí zue̱ꞌ Moisés ga naꞌ gulé̱ꞌe̱ Aarón: “Dxaca lázrentuꞌ gunuꞌ dios caꞌ chee̱ xelebía lawe̱ꞌ launtuꞌ, laweꞌ da quebe nézentuꞌ bi guca chee̱ Moisés, bénneaꞌ bebéaje̱ꞌ netuꞌ lu xe̱zr la xu Egipto.”
\v 41 Nadxa belune̱ꞌ tu bedáuꞌ guca na ca tu bé̱zredauꞌ, ne belutie̱ꞌ be̱ xíxreꞌdu caꞌ lau bedáuꞌ naꞌ, ne gulebene̱ꞌ chee̱ da zaj nune̱ꞌ.
\v 42 Nadxa Dios becuase̱ꞌ nen benneꞌ caꞌ, naꞌ be̱ꞌe̱ le̱ꞌ lataj belúe láꞌane̱ꞌ belaj zaj zria zran xabáa. Caꞌan naxúaj na lu xiche chee̱ benneꞌ caꞌ buluchálaje̱ꞌ waláz chee̱ Dios. Dxelenné̱ꞌ:
\q Leꞌe, benneꞌ Israel caꞌ, ¿guzríale-baꞌ chiaꞌ nedaꞌ be̱ xíxreꞌdu caꞌ bé̱tele
\q dute̱ chua iza gate naꞌ guzúale le̱ꞌe̱ xixreꞌ laweꞌ lataj?
\q
\v 43 ¡Cabí! Bíale xudauꞌ xide zra be̱ xixreꞌ chee̱ dios chee̱le, Moloc,
\q ne xudauꞌ chee̱ belaj nazí le na Renfán, dios chee̱le,
\q bedáuꞌ caꞌ bé̱nquezle leꞌe chee̱ be̱ láꞌanale na.
\q Chee̱ le̱ naꞌ cuéajaꞌ leꞌe lu xe̱zr la xu chee̱le,
\q ne sel-laꞌ leꞌe dédedxa ca naga dxeꞌ Babilonia.
\p
\v 44 ’Le̱ꞌe̱ xixreꞌ laweꞌ lataj naꞌ xra xrtáudxu caꞌ belune̱ꞌ tu xudauꞌ xide naga buluzrá chawe̱ꞌ blagaꞌ xiaj naga naxúaj da nadxixruj bea na. Belune̱ꞌ na ca naca da bleꞌe Dios Moisés, gate guzre̱ꞌ le̱ꞌ gune̱ꞌ na ca naca da naꞌ ba bléꞌene̱ꞌ.
\v 45 Zriꞌine xra xrtáudxu caꞌ belexaca lu ne̱ꞌe̱ xudauꞌ xide naꞌ, naꞌ belúꞌe̱ na gate belezrine̱ꞌ lu xe̱zr la xu nigá nen Josué, chee̱ belequé̱ꞌe̱ xe̱zr la xu nigá lu naꞌ benneꞌ xe̱zr la xu caꞌ zaj zre̱ꞌe̱ nigá, benneꞌ caꞌ Dios bebéaje̱ꞌ le̱ꞌ chee̱ bnézruje̱ꞌ xe̱zr la xu nigá chee̱ xra xrtáudxu caꞌ. Caꞌan guca ca bzrinte̱ zra caꞌ zua David.
\v 46 Wenná bea David naꞌ, Dios bezaca ba lazre̱ꞌ chee̱ꞌ, naꞌ guca lazreꞌ David gune̱ꞌ tu xudauꞌ naga sua Dios chee̱ Jacob.
\v 47 Salomón, zriꞌine David, be̱ne̱ꞌ lizre Dios naꞌ.
\v 48 Dios szrente̱ quebe zue̱ꞌ lu xudauꞌ caꞌ da zaj nun bénneache. Caní gunná tu benneꞌ bchálaje̱ꞌ waláz chee̱ Dios, gunné̱ꞌ:
\q
\v 49 Xabáa naca lataj naga dxeꞌa,
\q naꞌ xe̱zr la xu naca na naga nuléaj niꞌa.
\q ¿Ájazra naca xuꞌu gunle leꞌe chiaꞌ? dxenná Xránadxu.
\q ¿Ájazra naca lataj naga dxal-laꞌ xezíꞌ lazraꞌ?
\q
\v 50 ¿Quegá nedaꞌ bé̱nquezaꞌ da caꞌ?
\p
\v 51 Nadxa gunná Esteban:
\p ―Leꞌe nácaquezle lázxdau zideꞌ, ne zria nágale, ne lázrdaule ca zaj naca chee̱ benneꞌ quebe zaj núnbeꞌe̱ Dios, quebe dxezile xrtizre̱ꞌ. Dxedábagaquezle Beꞌ Láꞌazxa. Nácale ca gulaca xra xrtáule caꞌ.
\v 52 Xra xrtáule caꞌ buluzría xiꞌe̱ xúgute̱ benneꞌ caꞌ buluchálaje̱ꞌ waláz chee̱ Dios. Belutie̱ꞌ benneꞌ caꞌ buluchálaje̱ꞌ nédxudaute̱ ca dxal-laꞌ gaca chee̱ benneꞌ xrlátaje nigá, naꞌ gate ble̱ꞌe̱, léꞌequezle bdele Le̱ꞌ lu naꞌ benneꞌ caꞌ guledábague̱ꞌ Le̱ꞌ, ne bé̱tele Le̱ꞌ.
\v 53 Leꞌe guzile da nadxixruj bea na da be̱nna gubáz chee̱ xabáa dxiꞌu, san quebe dxuzúale dizraꞌ chee̱ na.
\s Dxelutie̱ꞌ Esteban
\p
\v 54 Gate belén benneꞌ caꞌ da caní, naꞌ gulagu lazxe̱ꞌ lu xel-laꞌ dxelezráꞌa Esteban.
\v 55 Nadxa Esteban, zúale̱ Beꞌ Láꞌazxa le̱ꞌ, gunné̱ꞌe̱ xabáa, ne bléꞌene̱ꞌ xel-laꞌ szren chee̱ Dios, naꞌ Jesús ze̱ꞌ chaláꞌa xabe̱la chee̱ Dios.
\v 56 Nadxa gunné̱ꞌ:
\p ―Le nnaꞌxque, dxeléꞌedaꞌ naxalaj xabáa, naꞌ Benneꞌ Gulje̱ꞌ Bénneache ze̱ꞌ chaláꞌa xabe̱la chee̱ Dios.
\p
\v 57 Benneꞌ caꞌ bulusézxuje̱ꞌ nague̱ꞌ, naꞌ gulebezre xe̱ꞌe̱, ne xeajlechía che̱ꞌe̱ Esteban naꞌ.
\v 58 Naꞌ belebéaje̱ꞌ le̱ꞌ lu xe̱zre naꞌ, naga belúꞌe̱ le̱ꞌ xiaj. Naꞌ benneꞌ caꞌ gulenné̱ꞌ chee̱ Esteban bulucáꞌane̱ꞌ zra lane̱ꞌ lu naꞌ tu benneꞌ cuideꞌ le̱ꞌ Saulo.
\v 59 Dxácate̱ dxuluzríe̱ꞌ le̱ꞌ xiaj, Esteban naꞌ bláwizre̱ꞌ Dios, gunné̱ꞌ:
\p ―Xranaꞌ Jesús, bezíꞌ lu naꞌu beꞌ nácaquezaꞌ.
\p
\v 60 Gudé naꞌ bzu zribe̱ꞌ, naꞌ gunné̱ꞌ zizraj:
\p ―Xran, quebe gusebaguꞌ benneꞌ caní dul-la nigá.
\p Ca bexuzre gunné̱ꞌ caꞌ, naꞌ gutie̱ꞌ.
\c 8
\s Saulo dxenáu ziꞌ xuzre̱ꞌ benneꞌ caꞌ dxeléajle̱ꞌe̱ chee̱ Jesús
\p
\v 1 Saulo guque̱ꞌ tuze nen benneꞌ caꞌ belutie̱ꞌ Esteban.
\p Lu zra náꞌqueze gulezú lawe̱ꞌ dxelau ziꞌ xuzre̱ꞌ benneꞌ caꞌ dxeléajle̱ꞌe̱ chee̱ Jesús, benneꞌ caꞌ zaj zre̱ꞌe̱ xe̱zre Jerusalén. Xúgute̱ꞌ belexase dínnaje̱ꞌ ca naca xe̱zre caꞌ zaj nababa Judea, ne xe̱zre caꞌ zaj nababa Samaria. Benneꞌ gubáz caꞌ belexegáꞌane̱ꞌ xe̱zre Jerusalén naꞌ.
\v 2 Bal-la benneꞌ caꞌ zaj naque̱ꞌ chee̱ Dios bulucache̱ꞌ Esteban naꞌ, ne gulebézrele̱ꞌe̱ chee̱ꞌ.
\v 3 Dxácate̱ naꞌ Saulo dxenáu ziꞌ xuzre̱ꞌ benneꞌ caꞌ dxeléajle̱ꞌe̱ chee̱ Jesús, naꞌ guxúꞌe̱ tu tu xuꞌu chee̱ cheajxrube xue̱ꞌ benneꞌ caꞌ, ne cheajluꞌe̱ le̱ꞌ lizre xia.
\s Dxuluchálaje̱ꞌ dizraꞌ chaweꞌ chee̱ Jesús naga nababa Samaria
\p
\v 4 Benneꞌ caꞌ chee̱ Cristo, benneꞌ buluzrúnnuje̱ꞌ Jerusalén, buluchálaje̱ꞌ dizraꞌ chaweꞌ chee̱ Jesús gátete̱ze naꞌ zjaque̱ꞌ.
\v 5 Felipe, tue̱ꞌ benneꞌ caꞌ, guxíaje̱ꞌ tu xe̱zre naga nababa Samaria, naꞌ guzú lawe̱ꞌ dxuchálajle̱ne̱ꞌ benneꞌ caꞌ ca naca chee̱ Cristo.
\v 6 Benneꞌ caꞌ zaj nazrague̱ꞌ belén xánnene̱ꞌ ca da dxuchalaj Felipe, ne beleléꞌequezne̱ꞌ ca naca xel-laꞌ waca caꞌ da dxune̱ꞌ.
\v 7 Benneꞌ zan, benneꞌ zaj xuꞌe̱ beꞌ xriwe̱ꞌ belexexaque̱ꞌ, naꞌ beꞌ xriwe̱ꞌ caꞌ belexedxúaj na lu xichaj lázrdau benneꞌ caꞌ, dxelebezre xaꞌa na, naꞌ benneꞌ zan benneꞌ zaj zua zri niꞌa ne̱ꞌe̱, ne benneꞌ zrinnaj caꞌ belexexaque̱ꞌ.
\v 8 Caꞌan guca, gulebéle̱ꞌe̱ xúgute̱ benneꞌ caꞌ lu xe̱zre naꞌ.
\p
\v 9 Zua naꞌ tu benneꞌ le̱ꞌ Simón, nédxute̱ guque̱ꞌ benneꞌ wazráꞌ, ne guzí xe̱ꞌe̱ benneꞌ Samaria caꞌ, dxenné̱ꞌ naque̱ꞌ tu benneꞌ szren.
\v 10 Xúgute̱ꞌ belén xánnene̱ꞌ chee̱ꞌ, benneꞌ cazraze caꞌ, ne benneꞌ blau caꞌ, gulenné̱ꞌ:
\p ―Benneꞌ nigá nape̱ꞌ xel-laꞌ szren chee̱ Dios.
\p
\v 11 Gulape̱ꞌ le̱ꞌ ba láꞌana laweꞌ da lu xel-laꞌ wazráꞌ chee̱ꞌ naꞌ guzí xe̱ꞌe̱ benneꞌ caꞌ zaneꞌ iza.
\v 12 Gate guléajle̱ꞌe̱ chee̱ dizraꞌ chaweꞌ da dxuchalaj Felipe ca dxenná bea Dios, ne ca naca chee̱ La Jesucristo, xúgute̱ꞌ, benneꞌ biu, ne nuꞌula caꞌ, beledxúe̱ꞌ nisa.
\v 13 Cáꞌanqueze Simón naꞌ guxéajle̱ꞌe̱ chee̱ Jesús, ne gudxúe̱ꞌ nisa, naꞌ guzú lawe̱ꞌ zéajle̱ne̱ꞌ Felipe, naꞌ dxexebánene̱ꞌ ca naca xel-laꞌ waca da za xabáa da dxun Felipe.
\p
\v 14 Gate benneꞌ gubáz caꞌ chee̱ Jesús, benneꞌ zaj zre̱ꞌe̱ Jerusalén, belenne̱ꞌ gulezíꞌ lu naꞌ benneꞌ Samaria caꞌ xrtizraꞌ Dios, naꞌ gulesel-le̱ꞌ Pedro ne Juan naꞌ.
\v 15 Gate belezrine̱ꞌ naꞌ, naꞌ belenabe̱ꞌ law Dios chee̱ benneꞌ Samaria caꞌ dxeléajle̱ꞌe̱ chee̱ Jesús chee̱ xelezíꞌe̱ Beꞌ Láꞌazxa.
\v 16 Quebe ne xida Beꞌ Láꞌazxa súale̱ne̱ꞌ netú benneꞌ caꞌ. Tuze beledxúaze̱ꞌ nisa lu La Xránadxu Jesús.
\v 17 Nadxa Pedro ne Juan buluzé̱ ne̱ꞌe̱ laweꞌ benneꞌ caꞌ, naꞌ gulezíꞌe̱ Beꞌ Láꞌazxa.
\p
\v 18 Gate bleꞌe Simón blaꞌ Beꞌ Láꞌazxa gate gubáz caꞌ buluzé̱ ne̱ꞌe̱ benneꞌ caꞌ, naꞌ guca lazre̱ꞌ gunézruje̱ꞌ gubáz caꞌ dumí,
\v 19 gunné̱ꞌ:
\p ―Le gunna nedaꞌ xel-laꞌ waca nigá chee̱ gate guzéaꞌ naꞌa laweꞌ nútete̱ze benneꞌ, naꞌ siꞌe̱ Beꞌ Láꞌazxa.
\p
\v 20 Nadxa guzre Pedro le̱ꞌ:
\p ―Wabía xiꞌ dumí chiuꞌ naꞌ nen lueꞌ laweꞌ da dxéquenuꞌ wazéquenuꞌ gaꞌu nen dumí ca da dxúnnaze Dios.
\v 21 Quebe naca chiuꞌ, ne quebe napuꞌ lataj lu da nigá laweꞌ da quebe naca xrlátaje xichaj lázrdaꞌu lau Dios.
\v 22 Bsan ca naca da cale̱la chiuꞌ nigá, ne gutaꞌ xue Dios chee̱ gunite lawe̱ꞌ chiuꞌ ca da gúquenuꞌ lu xichaj lázrdaꞌu.
\v 23 Dxeque beꞌedaꞌ nazrate̱ xichaj lázrdaꞌu da cale̱la, naꞌ da cale̱la naꞌ nuchéaj na lueꞌ.
\p
\v 24 Naꞌ beche̱be Simón:
\p ―Le gataꞌ xue Xránadxu chiaꞌ nedaꞌ, chee̱ quebe gaca chiaꞌ ca da gunnáuꞌ.
\p
\v 25 Ca gudé belexeche̱be̱ꞌ chee̱ Jesús, ne buluchálaje̱ꞌ dizraꞌ chee̱ Dios, naꞌ benneꞌ gubáz caꞌ buluzenne̱ꞌ bénneache dizraꞌ chaweꞌ chee̱ Jesús lu xé̱zredu caꞌ zaj nababa Samaria, naꞌ ca gudé naꞌ belexezrine̱ꞌ Jerusalén.
\s Felipe dxuchálajle̱ne̱ꞌ tu benneꞌ chee̱ xe̱zr la xu Etiopía
\p
\v 26 Gudé naꞌ guzre tu gubáz chee̱ xabáa chee̱ Xránadxu Felipe:
\p ―Guxasa, guxíaj chaláꞌa naga dxedé gubizra beuꞌ zaga caꞌ, naga zrua neza chee̱ Jerusalén da zeaj xe̱zre Gaza, da dxedé na le̱ꞌe̱ xixreꞌ laweꞌ lataj.
\p
\v 27 Felipe guxase̱ꞌ, naꞌ guzé̱ꞌe̱ zéaje̱ꞌ, naꞌ la neza naꞌ bezrague̱ꞌ tu benneꞌ Etiopía. Benneꞌ nigá naque̱ꞌ wizre, ne naque̱ꞌ benneꞌ szren xuꞌu lu neꞌe̱ xel-laꞌ gunníꞌa chee̱ Candace, nuꞌula naꞌ dxenná béꞌene̱ꞌ xe̱zr la xu Etiopía. Ba guxíaj benneꞌ nigá Jerusalén chee̱ be̱ láꞌane̱ꞌ Dios.
\v 28 Naꞌa zexíaje̱ꞌ Etiopía naꞌ, dxeꞌe̱ lu carreta chee̱ꞌ da dxelecáꞌa bzrinaꞌ, ne dxulabe̱ꞌ xiche naga zaj naxúaj xrtizraꞌ Isaías, benneꞌ bchálaje̱ꞌ waláz chee̱ Dios.
\v 29 Nadxa gunná Beꞌ Láꞌazxa, guzre̱ꞌ Felipe:
\p ―Gubiga gagu cuita carreta naꞌ.
\p
\v 30 Gate gubiga Felipe naꞌ benne̱ꞌ dxulaba bénneaꞌ xiche chee̱ Isaías, naꞌ bche̱be̱ꞌ le̱ꞌ:
\p ―¿Dxéajniꞌinuꞌ ca naca da dxulabuꞌ?
\p
\v 31 Benneꞌ biu naꞌ guzre̱ꞌ le̱ꞌ:
\p ―¿Ájazra gaca chéajniꞌidaꞌ che quebe nu chiláꞌ guzéajniꞌi nedaꞌ?
\p Naꞌ guzre̱ꞌ Felipe cuene̱ꞌ cuéꞌle̱ne̱ꞌ le̱ꞌ.
\p
\v 32 Naga dxulabe̱ꞌ lu xiche chee̱ Dios dxenná na caní:
\q Beleché̱ꞌe̱ Le̱ꞌ naga gatie̱ꞌ ca tu zrílaꞌdauꞌ,
\q naꞌ ca zrilaꞌ naꞌ dxátabaꞌ zrize lau benneꞌ caꞌ dxuluchibe̱ꞌ zrabaꞌ,
\q caꞌ bé̱nqueze Le̱ꞌ, quebe bi gunné̱ꞌ.
\q
\v 33 Bulucáꞌana ditje̱ꞌ Le̱ꞌ, ne quebe belúꞌe̱ lataj nu guchiꞌa chee̱ꞌ,
\q ne quebe nu gaca guchálaje̱ꞌ ca naca chee̱ zriꞌine zre sue̱ꞌ,
\q laweꞌ da belutie̱ꞌ Le̱ꞌ.
\p
\v 34 Naꞌ benneꞌ Etiopía naꞌ bche̱be̱ꞌ Felipe:
\p ―Gunná, ¿nuzra chee̱ dxenná benneꞌ nigá, cheé̱queze̱ꞌ naꞌ, che chee̱ xetú benneꞌ xula?
\p
\v 35 Nadxa guzú lau Felipe bzéajniꞌine̱ꞌ le̱ꞌ ca naca naga dxulabe̱ꞌ, ne bchálajle̱ne̱ꞌ le̱ꞌ dizraꞌ chaweꞌ ca naca chee̱ Jesús.
\v 36 Gate guledée̱ꞌ tu naga de̱ nisa, naꞌ gunná benneꞌ Etiopía naꞌ:
\p ―Nigá de̱ nisa. ¿Quebe gaca chuaꞌ nisa, zra?
\p
\v 37 Felipe guzre̱ꞌ le̱ꞌ:
\p ―Che dxéajle̱ꞌu dute̱ lázrdaꞌu, waca.
\p Benneꞌ naꞌ beche̱be̱ꞌ:
\p ―Dxéajle̱ꞌa naca Jesucristo Zriꞌine Dios.
\p
\v 38 Nadxa gunná béꞌene̱ꞌ guleza carreta naꞌ, naꞌ dxúpate̱ꞌ guluꞌe̱ lu nisa, naꞌ Felipe bchue̱ꞌ le̱ꞌ nisa.
\v 39 Gate belexedxúaje̱ꞌ lu nisa naꞌ, naꞌ Beꞌ chee̱ Xránadxu beche̱ꞌe̱ Felipe naga xula. Benneꞌ Etiopía naꞌ québedxa bléꞌene̱ꞌ le̱ꞌ, naꞌ bexuꞌe̱ neza chee̱ꞌ dute̱ xel-laꞌ dxebé.
\v 40 Felipe naꞌ guque béꞌene̱ꞌ ba zue̱ꞌ xe̱zre Azoto, naꞌ gudée̱ꞌ tu tu xe̱zre dxuchálaje̱ꞌ dizraꞌ chaweꞌ ca naca chee̱ Jesús cadxa bezrine̱ꞌ Cesarea.
\c 9
\s Saulo dxexaque̱ꞌ benneꞌ chee̱ Jesús
\r (Hch. 22.6-16; 26.12-18)
\p
\v 1 Dxácate̱ naꞌ Saulo quebe dxusane̱ꞌ dxune̱ꞌ ba xuzre gutie̱ꞌ benneꞌ caꞌ dxeléajle̱ꞌe̱ chee̱ Xránadxu. Chee̱ gune̱ꞌ caní guxíaje̱ꞌ xeajchálajle̱ne̱ꞌ bxruze blau.
\v 2 Gunabe̱ꞌ xiche da dxuléꞌe na nape̱ꞌ xel-laꞌ dxenná bea da guꞌe̱ chéaje̱ꞌ xudauꞌ caꞌ zaj nnita xe̱zre Damasco, chee̱ séquene̱ꞌ cheajxedílaje̱ꞌ benneꞌ caꞌ dxeléajle̱ꞌe̱ chee̱ dizraꞌ chaweꞌ chee̱ Jesús, ne che̱ꞌe̱ le̱ꞌ, benneꞌ biu, ne nuꞌula caꞌ, chee̱ guzré̱ꞌe̱ le̱ꞌ lizre xia lu xe̱zre Jerusalén.
\v 3 Naꞌ gate ne xuꞌe̱ neza zéaje̱ꞌ, ne ca ba zua zrine̱ꞌ xe̱zre Damasco, naꞌ bsaníꞌ tu xiꞌ naga zéaje̱ꞌ da zaꞌ xabáa.
\v 4 Saulo xeajcházie̱ꞌ lu xu, naꞌ benne̱ꞌ chiꞌi tu benneꞌ dxe̱ꞌe̱ le̱ꞌ:
\p ―Saulo, Saulo, ¿bizr chee̱ naꞌ nau ziꞌ xuzruꞌ nedaꞌ?
\p
\v 5 Nadxa Saulo bche̱be̱ꞌ:
\p ―¿Nuzra Lueꞌ, Xran?
\p Naꞌ bénneaꞌ beche̱be̱ꞌ:
\p ―Nedaꞌ nacaꞌ Jesús, benneꞌ naꞌ nau ziꞌ xuzruꞌ. Lueꞌze dxun ziꞌ cuinuꞌ, ca dxun be̱zre gate dxulíbebaꞌ laweꞌ xágala da dxádue̱ꞌ-baꞌ.
\p
\v 6 Nadxa Saulo dxezrizque̱ꞌ dxezrebe̱ꞌ, gunné̱ꞌ:
\p ―Xran, ¿bi dxaca lazruꞌ gunaꞌ?
\p Naꞌ Xránadxu guzre̱ꞌ le̱ꞌ:
\p ―Guxasa, guxúꞌu lu xe̱zre, naꞌ xelé̱queze̱ꞌ lueꞌ da dxal-laꞌ gunuꞌ.
\p
\v 7 Benneꞌ caꞌ zjácale̱ Saulo belezrébele̱ꞌe̱ laweꞌ da belenne̱ꞌ chiꞌi benneꞌ naꞌ, san quebe nu beleléꞌene̱ꞌ.
\v 8 Nadxa Saulo bexase̱ꞌ lu xu naꞌ, naꞌ gate guxáꞌ lawe̱ꞌ, quebe guca léꞌene̱ꞌ. Caꞌ guca, belequé̱ꞌe̱ ne̱ꞌe̱, ne guleché̱ꞌe̱ le̱ꞌ lu xe̱zre Damasco.
\v 9 Guzúe̱ꞌ naꞌ chunna zra quebe dxeléꞌene̱ꞌ, ne quebe bi güeꞌe gudawe̱ꞌ.
\p
\v 10 Lu xe̱zre Damasco naꞌ zua tu benneꞌ dxéajle̱ꞌe̱ chee̱ Jesús le̱ꞌ Ananías, naꞌ Xránadxu bleꞌe lawe̱ꞌ le̱ꞌ tu lu da bleꞌe le̱ꞌ, naꞌ guzre̱ꞌ le̱ꞌ:
\p ―Ananías.
\p Naꞌ le̱ꞌ beche̱be̱ꞌ:
\p ―Nigá zuaꞌ, Xran.
\p
\v 11 Nadxa gunná Xránadxu, dxe̱ꞌe̱ le̱ꞌ:
\p ―Guxasa, guxíaj neza da nazí le na: Neza Li, naꞌ lizre Judas guche̱buꞌ chee̱ tu benneꞌ Tarso, le̱ꞌ Saulo. Benneꞌ nigá dxuláwizre̱ꞌ Dios.
\v 12 Tu lu da bléꞌene̱ꞌ, ba bléꞌene̱ꞌ tu benneꞌ le̱ꞌ Ananías chuꞌe̱ guzé̱ ne̱ꞌe̱ le̱ꞌ chee̱ xeléꞌene̱ꞌ.
\p
\v 13 Gate benne̱ꞌ da nigá, naꞌ gunná Ananías:
\p ―Xran, benneꞌ zan ba buluzenne̱ꞌ nedaꞌ chee̱ benneꞌ nigá, ne chee̱ xúgute̱ da cale̱la da dxune̱ꞌ chee̱ benneꞌ caꞌ dxeléajle̱ꞌe̱ chiuꞌ Lueꞌ lu xe̱zre Jerusalén.
\v 14 Naꞌa ble̱ꞌe̱ nigá nape̱ꞌ xel-laꞌ dxenná bea chee̱ benneꞌ xíchaje̱ caꞌ chee̱ bxruze caꞌ, chee̱ che̱ꞌe̱ lizre xia xúgute̱ benneꞌ dxelenné̱ꞌ Dios lu Lauꞌ Lueꞌ.
\p
\v 15 Naꞌ Xránadxu guzre̱ꞌ le̱ꞌ:
\p ―Guxíaj. Nedaꞌ ba gucáꞌa benneꞌ naꞌ chee̱ cheajzenne̱ꞌ benneꞌ xe̱zr la xu caꞌ, ne benneꞌ wenná bea caꞌ, ne benneꞌ Israel caꞌ, ca naca chiaꞌ nedaꞌ.
\v 16 Nedaꞌ guléꞌedaꞌ le̱ꞌ ca naca da zante̱ da saque̱ꞌe̱ ne̱ chiaꞌ nedaꞌ.
\p
\v 17 Nadxa Ananías guzé̱ꞌe̱ zéaje̱ꞌ xuꞌu naga zua Saulo. Gate guxúꞌe̱ naꞌ, guxrúa ne̱ꞌe̱ laweꞌ le̱ꞌ, naꞌ guzre̱ꞌ le̱ꞌ:
\p ―Saulo, bichaꞌ. Xránadxu Jesús, Bénneaꞌ bleꞌe lawe̱ꞌ lueꞌ la neza naga zaꞌu, nasel-le̱ꞌ nedaꞌ chee̱ xeléꞌenuꞌ, ne chee̱ súale̱ Beꞌ Láꞌazxa lueꞌ.
\p
\v 18 Caꞌ guca beléxrujte̱ lu xiaj lawe̱ꞌ da zaj naca ca xrlacu bela, naꞌ beléꞌene̱ꞌ. Naꞌ bexasa Saulo, ne gudxúate̱ꞌ nisa.
\v 19 Gudé naꞌ gudawe̱ꞌ, ne bedipe̱ꞌ. Begáꞌane̱ꞌ tu chupa zra nen benneꞌ Damasco caꞌ dxeléajle̱ꞌe̱ chee̱ Jesús.
\s Saulo dxuchálaje̱ꞌ chee̱ Jesús lu xe̱zre Damasco
\p
\v 20 Nadxa guzú lau Saulo dxuchálaje̱ꞌ chee̱ Jesús lu xuꞌu ga dxelezraga judío caꞌ zaj nnite̱ꞌ Damasco, dxenné̱ꞌ Jesús naque̱ꞌ Zriꞌine Dios.
\v 21 Xúgute̱ benneꞌ belénene̱ꞌ chee̱ꞌ belexebánene̱ꞌ, dxelenné̱ꞌ:
\p ―¿Quegá benneꞌ nigá bénneaꞌ gudáu ziꞌ xuzre̱ꞌ benneꞌ caꞌ zaj zre̱ꞌe̱ Jerusalén, benneꞌ caꞌ dxelenné̱ꞌ Dios lu La Jesús? ¿Quegá lé̱queze̱ꞌ naꞌ ble̱ꞌe̱ nigá chee̱ che̱ꞌe̱ benneꞌ caꞌ xe̱zre Jerusalén chee̱ gudée̱ꞌ le̱ꞌ lu naꞌ benneꞌ xíchaje̱ caꞌ chee̱ bxruze caꞌ?
\p
\v 22 Saulo bchálajdxe̱ꞌ du lazre̱ꞌ chee̱ Jesús, ne dxuléꞌene̱ꞌ Jesús naque̱ꞌ Cristo chee̱ Dios, naꞌ bzua zrie̱ꞌ benneꞌ judío caꞌ zaj zre̱ꞌe̱ Damasco.
\s Saulo dxelé̱ꞌ lu naꞌ benneꞌ judío caꞌ
\p
\v 23 Ca gudé zaneꞌ zra, benneꞌ judío caꞌ belune̱ꞌ tuze dizraꞌ xelútie̱ꞌ Saulo.
\v 24 Gunezne̱ꞌ le̱ꞌ da nigá. Te zra ne chizrela gulebeza benneꞌ judío caꞌ dxuꞌa dxa xuꞌu caꞌ naga dxelexedxúaj bénneache xe̱zre naꞌ, chee̱ xelútie̱ꞌ le̱ꞌ.
\v 25 Nadxa benneꞌ caꞌ dxeléajle̱ꞌe̱ chee̱ Jesús gulegúꞌe̱ Saulo tu lu xcuite lba zren, naꞌ buluxulétaje̱ꞌ le̱ꞌ chizrela le̱ꞌe̱ zeꞌe da naxechaj na xe̱zre. Caꞌ guca, gulá Saulo.
\s Saulo dxezrine̱ꞌ Jerusalén
\p
\v 26 Gate bezrín Saulo Jerusalén, guca lazre̱ꞌ gune̱ꞌ tuze benneꞌ caꞌ dxeléajle̱ꞌe̱ chee̱ Jesús, san benneꞌ caꞌ dxelezrebe̱ꞌ le̱ꞌ laweꞌ da quebe dxeléajle̱ꞌe̱ ba dxéajle̱ꞌe̱ Saulo chee̱ Jesús.
\v 27 Bernabé guché̱ꞌe̱ Saulo, ne bze̱ꞌ le̱ꞌ lau benneꞌ gubáz caꞌ chee̱ Jesús. Naꞌ bchálajle̱ Bernabé gubáz caꞌ ca bleꞌe Saulo Xránadxu la neza, ne ca be̱n Xránadxu bchálajle̱ne̱ꞌ Saulo, ne ca bchalaj Saulo du lazre̱ꞌ lu xe̱zre Damasco nen xel-laꞌ dxenná bea chee̱ La Jesús.
\v 28 Nadxa Saulo begáꞌane̱ꞌ Jerusalén, dxedále̱ne̱ꞌ benneꞌ caꞌ.
\v 29 Bchalaj Saulo du lazre̱ꞌ lu La Xránadxu, dxuchálajle̱ne̱ꞌ benneꞌ caꞌ dxelenné̱ꞌ dizraꞌ griego, san benneꞌ caní gulaca lazre̱ꞌ xelútie̱ꞌ le̱ꞌ.
\v 30 Gate guleque beꞌe biche ljwézredxu da caní, naꞌ guleché̱ꞌe̱ Saulo lu xe̱zre Cesarea, naꞌ lu xe̱zre naꞌ gulesel-le̱ꞌ le̱ꞌ xe̱zre Tarso.
\p
\v 31 Nadxa benneꞌ caꞌ dxelezrague̱ꞌ lu La Jesús tu tu xe̱zre zaj nababa Judea, ne Galilea, ne Samaria, gulebeza zri lazre̱ꞌ, ne beledipa lazre̱ꞌ. Xel-laꞌ dxelezrebe gulaque̱ꞌ Xránadxu tuze, naꞌ laweꞌ da gúcale̱ Beꞌ Láꞌazxa le̱ꞌ, gulane̱ꞌ.
\s Pedro dxexune̱ꞌ Eneas
\p
\v 32 Gate dxedá Pedro dxeajnné̱ꞌe̱ biche ljwézredxu caꞌ, naꞌ guxíajqueze̱ꞌ xeajnné̱ꞌe̱ benneꞌ caꞌ dxeléajle̱ꞌe̱ chee̱ Jesús lu xe̱zre Lida.
\v 33 Naꞌ bezrague̱ꞌ tu benneꞌ le̱ꞌ Eneas, bache guca xrunuꞌ iza de̱ꞌ lu daꞌa laweꞌ da naque̱ꞌ benneꞌ zrinnaj.
\v 34 Naꞌ gunná Pedro, dxe̱ꞌe̱ le̱ꞌ:
\p ―Eneas, Jesucristo ba bexune̱ꞌ lueꞌ. Bexasa, ne butube daꞌa chiuꞌ.
\p Naꞌ bexásate̱ Eneas naꞌ.
\v 35 Beleléꞌe xúgute̱ benneꞌ le̱ꞌ, benneꞌ zaj zre̱ꞌe̱ xe̱zre Lida, ne xe̱zre Sarón, naꞌ belexaque̱ꞌ chee̱ Xránadxu.
\s Dorcas dxexebane̱ꞌ ládujla benneꞌ gate
\p
\v 36 Lu zra naꞌ zua tu nuꞌula le̱ꞌ Tabita lu xe̱zre Jope. Dxéajle̱ꞌe̱ chee̱ Jesús. Lu dizraꞌ griego le̱ꞌ Dorcas. Nuꞌula nigá dxúnqueze̱ꞌ da xrlátaje, ne dxácale̱ne̱ꞌ benneꞌ xacheꞌ caꞌ.
\v 37 Lu zra caꞌ guxúꞌu Dorcas xel-laꞌ we̱ꞌ, naꞌ gutie̱ꞌ. Naꞌ bulugazje̱ꞌ le̱ꞌ, ne belexrue̱ꞌ le̱ꞌ tu lu xuꞌu naga zua gudxupeꞌ cuía dxala.
\v 38 Xe̱zre Jope naꞌ zua na gagu naga zua xe̱zre Lida naga zua Pedro, naꞌ laweꞌ da zaj neze benneꞌ Jope caꞌ zue̱ꞌ naꞌ, naꞌ gulesel-le̱ꞌ chupa benneꞌ biu cheajlegue̱zre̱ꞌ le̱ꞌ:
\p ―Gudázega xe̱zre Jope.
\p
\v 39 Nadxa Pedro guxíajle̱ne̱ꞌ benneꞌ caꞌ. Gate bzrine̱ꞌ naꞌ, naꞌ beleché̱ꞌe̱ le̱ꞌ naga zrua Dorcas naꞌ, naꞌ xúgute̱ nuꞌula caꞌ ba zaj nate benneꞌ chie̱ꞌ zaj naxéchaje̱ꞌ Pedro dxelebezre̱ꞌ, ne dxululéꞌene̱ꞌ le̱ꞌ zra nuꞌula, ne zra benneꞌ biu, da caꞌ be̱n Dorcas naꞌ gate ne zue̱ꞌ nen benneꞌ caꞌ.
\v 40 Nadxa guleaj Pedro xúgute̱ benneꞌ caꞌ, naꞌ bzu zribe̱ꞌ bchálajle̱ne̱ꞌ Dios. Naꞌ gunné̱ꞌe̱ nuꞌula gate naꞌ, gunné̱ꞌ:
\p ―Tabita, bexasa.
\p Nadxa nuꞌula naꞌ bexáꞌ lawe̱ꞌ, naꞌ gate bléꞌene̱ꞌ Pedro, bexase̱ꞌ gudxéꞌe̱.
\v 41 Naꞌ Pedro bequé̱ꞌe̱ ne̱ꞌe̱, bechise̱ꞌ le̱ꞌ. Nadxa gunné̱ꞌ biche ljwézredxu caꞌ, ne nuꞌula caꞌ ba gute benneꞌ biu chee̱ꞌ, naꞌ bléꞌene̱ꞌ benneꞌ caꞌ le̱ꞌ naca bane̱ꞌ.
\v 42 Ca guca da nigá belén ca naca benneꞌ zaj zre̱ꞌe̱ xe̱zre Jope, naꞌ benneꞌ zan guléajle̱ꞌe̱ chee̱ Xránadxu.
\v 43 Pedro begáꞌane̱ꞌ zaneꞌ zra lu xe̱zre naꞌ lizre Simón, tu benneꞌ dxucáꞌana chaweꞌ xide zra be̱ xixreꞌ.
\c 10
\s Pedro ne Cornelio
\p
\v 1 Zua lu xe̱zre Cesarea tu benneꞌ le̱ꞌ Cornelio, benneꞌ dxenná beꞌe̱ lu wedil-la tu cueꞌ benneꞌ nazí le na Benneꞌ Italia Zjaque̱ꞌ Wedil-la.
\v 2 Benneꞌ nigá, ne benneꞌ zaj zre̱ꞌe̱ lizre̱ꞌ dxulucáꞌana szrene̱ꞌ Dios, ne dxelezrebe̱ꞌ Le̱ꞌ. Cáꞌanqueze dxunézrujle̱ꞌe̱ dumí dxácale̱ne̱ꞌ benneꞌ judío caꞌ, ne tu dxuchálajle̱zqueze̱ꞌ Dios.
\v 3 Tu zra gate dxexedá chunna bleꞌe Cornelio tu da bleꞌe Dios le̱ꞌ, naꞌ bléꞌene̱ꞌ cáte̱queze guxúꞌu tu gubáz chee̱ xabáa naga zue̱ꞌ, naꞌ guzre̱ꞌ le̱ꞌ:
\p ―Cornelio.
\p
\v 4 Cornelio guzúe̱ꞌ dxenné̱ꞌe̱ gubáz chee̱ xabáa naꞌ dute̱ xel-laꞌ dxezrebe, naꞌ bche̱be̱ꞌ le̱ꞌ:
\p ―¿Bizra naꞌ, Xran?
\p Nadxa gunná gubáz chee̱ xabáa, guzre̱ꞌ le̱ꞌ:
\p ―Dios ba benne̱ꞌ da dxuláwizruꞌ Le̱ꞌ, ne nézene̱ꞌ ca da dxunuꞌ dxácale̱nuꞌ benneꞌ xacheꞌ caꞌ.
\v 5 Gusel-la benneꞌ chjaque̱ꞌ xe̱zre Jope, cheajlenné̱ꞌ Simón, bénneaꞌ lé̱queze̱ꞌ Pedro.
\v 6 Zue̱ꞌ lizre xetú benneꞌ le̱ꞌ Simón, benneꞌ dxucáꞌana chawe̱ꞌ xide zra be̱ xixreꞌ, naꞌ zua lizre̱ꞌ dxuꞌa nísadauꞌ. Pedro naꞌ xe̱ꞌe̱ lueꞌ ca da dxal-laꞌ gunuꞌ.
\p
\v 7 Gate bezáꞌ gubáz chee̱ xabáa naꞌ bchálajle̱ne̱ꞌ le̱ꞌ, naꞌ gunné̱ Cornelio chupa bi we̱n zrin chee̱ꞌ, ne tu benneꞌ dxeje̱ꞌ wedil-la, ne dxape̱ꞌ Dios ba láꞌana, ne zúaqueze̱ꞌ lizre Cornelio naꞌ.
\v 8 Naꞌ bchálajle̱ne̱ꞌ benneꞌ caꞌ ca naca da ba guca, naꞌ ca gudé naꞌ gusel-le̱ꞌ le̱ꞌ chjaque̱ꞌ xe̱zre Jope.
\p
\v 9 Zra xula, dxácate̱ zaj xuꞌe̱ benneꞌ caꞌ neza, ne ba dxezrine̱ꞌ gagu naga dxeꞌ Jope, naꞌ guluén Pedro chjuꞌu sibe du wagubizra chee̱ guchálajle̱ne̱ꞌ Dios.
\v 10 Ba dxedúnle̱ꞌe̱, ne guca lazre̱ꞌ gawe̱ꞌ, naꞌ dxácate̱ ne dxulucueze̱ꞌ da gawe̱ꞌ, bléꞌene̱ꞌ tu da bleꞌe Dios le̱ꞌ.
\v 11 Bléꞌene̱ꞌ naxalaj xabáa, ne dxetaj lu xe̱zr la xu da naca na ca tu ladxeꞌ zren nadxéaj na dápate̱ laꞌa chee̱ na.
\v 12 Laweꞌ ladxeꞌ naꞌ zaj zria xúgute̱ cueꞌ be̱ xixreꞌ, be̱ zria tapa niꞌa naꞌbaꞌ, ne be̱ snia caꞌ, ne be̱ zua xrila caꞌ.
\v 13 Nadxa benne̱ꞌ tu chiꞌi benneꞌ dxe̱ꞌe̱ le̱ꞌ:
\p ―Guxasa, Pedro. Be̱te tu bea caꞌ chee̱ gaguꞌ-baꞌ.
\p
\v 14 Pedro beche̱be̱ꞌ:
\p ―Cabí, Xran. Nedaꞌ cabataꞌ ne gawaꞌ da quebe nun Dios gagu bénneache, ne quegá da naca na sban.
\p
\v 15 Benneꞌ naꞌ bchálaje̱ꞌ da xula, dxe̱ꞌe̱ le̱ꞌ:
\p ―Da ba nucáꞌana chaweꞌ Dios, quebe nnauꞌ lueꞌ naca na sban.
\p
\v 16 Da nigá guca na chunna lasa, naꞌ ladxeꞌ naꞌ begüén na xabáala.
\v 17 Dxácate̱ dxeꞌ Pedro dxulaba lazre̱ꞌ bi zéaje̱ ca naca da bléꞌene̱ꞌ, naꞌ belezrín benneꞌ caꞌ nasel-la Cornelio dxuꞌa dxa xuꞌu, dxuluche̱be̱ꞌ ga zua lizre Simón.
\v 18 Gate belezrine̱ꞌ lizre Simón naꞌ, naꞌ gulenné̱ꞌ zizraj, dxelenabe̱ꞌ che zua xuꞌu naꞌ tu benneꞌ le̱ꞌ Simón, bénneaꞌ lé̱queze̱ꞌ Pedro.
\v 19 Gate Pedro ne dxulaba lazre̱ꞌ ca naca da bléꞌene̱ꞌ, naꞌ Beꞌ Láꞌazxa guzre̱ꞌ le̱ꞌ:
\p ―Gunnáꞌxque, chunna benneꞌ dxelexílaje̱ꞌ lueꞌ.
\v 20 Guxasa, bexetaj. Guxíajle̱ benneꞌ caꞌ, ne quebe gun chupa lazruꞌ laweꞌ da nasel-laꞌ nedaꞌ benneꞌ caꞌ.
\p
\v 21 Nadxa Pedro bexétaje̱ꞌ naga zaj zraꞌ benneꞌ caꞌ nasel-la Cornelio, naꞌ guzre̱ꞌ le̱ꞌ:
\p ―Nedaꞌ naꞌ dxexílajle leꞌe. ¿Bizra chee̱ zaꞌle?
\p
\v 22 Benneꞌ caꞌ belexeche̱be̱ꞌ:
\p ―Zaꞌntuꞌ waláz chee̱ Cornelio, benneꞌ dxenná beꞌe̱ lu wedil-la. Naque̱ꞌ benneꞌ xrlátaje, ne dxezrebe̱ꞌ Dios, naꞌ xúgute̱ benneꞌ judío caꞌ dxelape̱ꞌ le̱ꞌ ba láꞌana, ne zaj nazríꞌine̱ꞌ le̱ꞌ. Tu gubáz chee̱ xabáa chee̱ Dios guzre̱ꞌ le̱ꞌ dxal-laꞌ sel-le̱ꞌ benneꞌ xedajlenné̱ꞌ lueꞌ xiduꞌ lizre̱ꞌ chee̱ xenne̱ꞌ ca da dxal-laꞌ xuꞌu le̱ꞌ.
\p
\v 23 Nadxa Pedro bzre̱ꞌe̱ benneꞌ caꞌ xuꞌu naꞌ, naꞌ belexegáꞌane̱ꞌ nen le̱ꞌ xe̱la naꞌ. Zra xula guxíajle̱ Pedro benneꞌ caꞌ, naꞌ xjácale̱ bal-la biche ljwézredxu le̱ꞌ, benneꞌ zaj zre̱ꞌe̱ Jope.
\p
\v 24 Zra gudxupeꞌ zra belezrine̱ꞌ xe̱zre Cesarea naga zua Cornelio dxebeze̱ꞌ le̱ꞌ, ne zrale̱ bal-la benneꞌ xrtie̱ꞌ le̱ꞌ, ne xezícadxa benneꞌ ljwezre̱ꞌ, benneꞌ caꞌ gunné̱ꞌ.
\v 25 Gate bzrin Pedro chaleꞌaj, bdxuaj Cornelio guzíꞌ lu ne̱ꞌe̱ le̱ꞌ. Bzu zribe̱ꞌ lau Pedro chee̱ gucáꞌana szrene̱ꞌ le̱ꞌ.
\v 26 Pedro bechise̱ꞌ le̱ꞌ, dxenné̱ꞌ:
\p ―Guzé̱. La gázqueze nedaꞌ nacaꞌ bénneache ca lueꞌ.
\p
\v 27 Dxácate̱ dxuchálajle̱ Pedro Cornelio, guluꞌe̱ lu xuꞌula, naꞌ bléꞌene̱ꞌ benneꞌ zan zaj nazrague̱ꞌ naꞌ.
\v 28 Nadxa gunná Pedro, dxe̱ꞌe̱ le̱ꞌ:
\p ―Nézquezle leꞌe quebe dxunna da nadxixruj bea chee̱ judío caꞌ nedaꞌ lataj gacaꞌ tuze nen benneꞌ quebe zaj naque̱ꞌ judío u chuꞌa lizre̱ꞌ. Naꞌa Dios ba bléꞌene̱ꞌ nedaꞌ quebe dxal-laꞌ nniaꞌ chee̱ netú benneꞌ, quebe nniaꞌ naque̱ꞌ sban, u naque̱ꞌ benneꞌ quebe gapaꞌ ba láꞌana.
\v 29 Chee̱ le̱ naꞌ, gate gulenné̱ꞌ nedaꞌ, la guzáꞌteaꞌ, ne quebe be̱n chupa lazraꞌ. Dxaca lazraꞌ nezdaꞌ bi chee̱ naꞌ gunne̱le nedaꞌ.
\p
\v 30 Nadxa beche̱be Cornelio:
\p ―Ba zeaj tapa zra ca zúadxu naꞌa, zuaꞌ lizraꞌ nigá dxunaꞌ gubasa, ne dxuchálajle̱naꞌ Dios, gate bleꞌe lau tu benneꞌ nedaꞌ, nacue̱ꞌ zra lane̱ꞌ da dxácatite na.
\v 31 Benneꞌ naꞌ guzre̱ꞌ nedaꞌ: “Cornelio, Dios ba benne̱ꞌ da dxuchálajle̱nuꞌ Le̱ꞌ, naꞌ nézene̱ꞌ ca da dxunuꞌ dxácale̱nuꞌ benneꞌ xacheꞌ caꞌ.
\v 32 Gusel-la benneꞌ chjaque̱ꞌ xe̱zre Jope, cheajlexriꞌe̱ Simón, bénneaꞌ lé̱queze̱ꞌ Pedro. Zue̱ꞌ lizre xetú benneꞌ le̱ꞌ Simón, benneꞌ dxucáꞌana chawe̱ꞌ xide zra be̱ xixreꞌ caꞌ, naꞌ zua lizre̱ꞌ dxuꞌa nísadauꞌ. Gate xide̱ꞌ nigá, naꞌ guchálajle̱ne̱ꞌ lueꞌ.”
\v 33 Caꞌan guca, gusél-lateaꞌ benneꞌ caꞌ bedajlexedílaje̱ꞌ lueꞌ, naꞌ be̱nuꞌ da chaweꞌ blaꞌu nigá. Naꞌa xúgute̱ntuꞌ zrantuꞌ nigá lau Dios, ne dxaca lázrentuꞌ xénentuꞌ xúgute̱ ca da gunná beꞌe Xránadxu lueꞌ guchálajle̱nuꞌ netuꞌ.
\s Da bchalaj Pedro lizre Cornelio
\p
\v 34 Nadxa guzú lau Pedro dxuchálaje̱ꞌ, dxenné̱ꞌ:
\p ―Naꞌa dxéajniꞌidaꞌ Dios quebe dxebéaje̱ꞌ bál-laze bénneache,
\v 35 Naꞌ xúgute̱ xe̱zr la xu Dios dxezíꞌ lu ne̱ꞌe̱ benneꞌ caꞌ dxelezrebe Le̱ꞌ, ne dxelune̱ꞌ da xrlátaje.
\v 36 Dios bchálajle̱ne̱ꞌ zriꞌine zre sua Israel caꞌ, ne bchálaje̱ꞌ dizraꞌ chaweꞌ chee̱ xel-laꞌ dxebeza zri lazreꞌ, da dxezidxu ne̱ chee̱ Jesucristo, Bénneaꞌ naque̱ꞌ Xrana xúgute̱ bénneache.
\v 37 Leꞌe ba nézquezle ca naca da guca du ca naca lu xe̱zr la xu chee̱ benneꞌ judío caꞌ, da guzú lau na naga nababa Galilea ca gudé bchalaj Juan xrtizraꞌ Dios, ne bchue̱ꞌ bénneache nisa.
\v 38 Nézele ca be̱n Dios, bnézruje̱ꞌ Jesús, benneꞌ Nazaret, xel-laꞌ waca chee̱ Beꞌ Láꞌazxa, ne ca gudá Le̱ꞌ dxune̱ꞌ da chaweꞌ, ne dxexune̱ꞌ xúgute̱ benneꞌ dxelezaca ziꞌe̱ lu naꞌ da xriwe̱ꞌ. Da nigá be̱ne̱ꞌ laweꞌ da guzúale̱ Dios Le̱ꞌ.
\v 39 Netuꞌ dxexeché̱bentuꞌ chee̱ da caní, xúgute̱ da be̱n Jesús naga nababa Galilea, ne da be̱ne̱ꞌ lu xe̱zre Jerusalén. Gudé naꞌ belutie̱ꞌ Le̱ꞌ, gate buludé̱ꞌe̱ Le̱ꞌ xaga béguaj,
\v 40 naꞌ Dios bsebane̱ꞌ Le̱ꞌ gate guca chunna zra, naꞌ be̱ꞌe̱ lataj bleꞌe lau Jesús netuꞌ.
\v 41 Quebe bleꞌe lawe̱ꞌ xúgute̱ bénneache, san launtuꞌ nétuꞌze, nácantuꞌ benneꞌ caꞌ guleaj Dios nédxudaute̱ chee̱ xeché̱bentuꞌ chee̱ da caní. Netuꞌ güeꞌe gudáguntuꞌ nen Le̱ꞌ gate gudé bebane̱ꞌ ládujla benneꞌ gate.
\v 42 Gusel-le̱ꞌ netuꞌ guchálajle̱ntuꞌ bénneache, ne xeché̱bentuꞌ ca da nun Dios, nuzúe̱ꞌ Jesús nigá chee̱ guchiꞌe̱ chee̱ benneꞌ ban caꞌ, ne chee̱ benneꞌ gate caꞌ.
\v 43 La gázqueze nédxudaute̱ gulenná xúgute̱ benneꞌ caꞌ buluchálaje̱ꞌ waláz chee̱ Dios, buluchálaje̱ꞌ ca dxal-laꞌ gaca chee̱ Jesús, gulenné̱ꞌ xúgute̱ benneꞌ xeléajle̱ꞌe̱ chee̱ Jesús, naꞌ ne̱ chee̱ Le̱ꞌ Dios gunite lawe̱ꞌ xtul-la benneꞌ caꞌ.
\s Benneꞌ quebe zaj naque̱ꞌ judío dxeleziꞌe̱ Beꞌ Láꞌazxa
\p
\v 44 Ne dxuchalaj Pedro gate bzrin Beꞌ Láꞌazxa bedajsúale̱ne̱ꞌ xúgute̱ benneꞌ caꞌ dxelenne̱ꞌ da dxuchalaj Pedro.
\v 45 Benneꞌ judío caꞌ dxeléajle̱ꞌe̱ chee̱ Jesús, benneꞌ caꞌ záꞌacale̱ne̱ꞌ Pedro, belexebánene̱ꞌ gate guleque béꞌene̱ꞌ ba zúale̱ Beꞌ Láꞌazxa benneꞌ caꞌ quebe zaj naque̱ꞌ judío.
\v 46 Dxeleque béꞌene̱ꞌ na laweꞌ da belenne̱ꞌ dxuluchalaj benneꞌ caꞌ dizraꞌ chee̱ benneꞌ xula, ne dxelúe láꞌane̱ꞌ Dios.
\v 47 Nadxa gunná Pedro:
\p ―¿Waca nnadxu quebe dxal-laꞌ xeledxúa benneꞌ caní nisa, benneꞌ caꞌ bache gulezíꞌe̱ Beꞌ Láꞌazxa ca be̱ntuꞌ netuꞌ?
\p
\v 48 Nadxa gunná bea Pedro xeledxúa benneꞌ caꞌ nisa lu La Jesucristo. Gudé naꞌ, benneꞌ caꞌ gulataꞌ xuene̱ꞌ Pedro xegáꞌane̱ꞌ nen le̱ꞌ tu chupa zra.
\c 11
\s Pedro dxuzenne̱ꞌ benneꞌ gubáz caꞌ zaj zre̱ꞌe̱ Jerusalén ca naca da be̱ne̱ꞌ
\p
\v 1 Benneꞌ gubáz caꞌ, ne biche ljwézredxu caꞌ zaj zre̱ꞌe̱ Jerusalén belenne̱ꞌ ba gulezíꞌ lu naꞌ benneꞌ quebe zaj naque̱ꞌ judío dizraꞌ chee̱ Dios.
\v 2 Gate bezrín Pedro xe̱zre Jerusalén, gulezíꞌ tizraꞌ benneꞌ caꞌ le̱ꞌ, benneꞌ caꞌ dxelenné̱ꞌ dxal-laꞌ chugu lateꞌ be̱laꞌ chee̱ benneꞌ caꞌ zaj naque̱ꞌ chee̱ Dios.
\v 3 Benneꞌ caní buluche̱be̱ꞌ Pedro:
\p ―¿Bizr chee̱ naꞌ guxíajuꞌ xeajsúale̱nuꞌ benneꞌ caꞌ quebe zaj naque̱ꞌ judío, ne gudágule̱nuꞌ le̱ꞌ?
\p
\v 4 Nadxa Pedro bzenne̱ꞌ benneꞌ caꞌ xúgute̱ da guca cha chee̱ na, gunné̱ꞌ:
\p
\v 5 ―Nedaꞌ zuaꞌ lu xe̱zre Jope, naꞌ gate dxuchálajle̱naꞌ Dios, bleꞌedaꞌ tu da bleꞌe Dios nedaꞌ. Bleꞌedaꞌ tu ladxeꞌ zren nadxéaj dápate̱ laꞌa chee̱ na, da dxetaj na xabáa, ne bedajsé̱ na lawaꞌ.
\v 6 Gate gunnáꞌ xánniaꞌ chee̱ bleꞌedaꞌ bi naꞌ zaj zria na laweꞌ, bleꞌedaꞌ be̱ xixreꞌ, be̱ zria tapa niꞌa naꞌbaꞌ, ne be̱ snia caꞌ, ne bea caꞌ zaj zua xrílabaꞌ.
\v 7 Naꞌ bendaꞌ tu chiꞌi benneꞌ guzre̱ꞌ nedaꞌ: “Guxasa Pedro, be̱te tu bea caꞌ, naꞌ gaguꞌ-baꞌ.”
\v 8 Nedaꞌ gunnéaꞌ: Cabí, Xran, laweꞌ da cabataꞌ ne gawaꞌ nedaꞌ tu da quebe nun Dios gagu bénneache, ne quegá da naca sban.
\v 9 Nadxa bénneaꞌ dxenné̱ꞌ xabáa gunné̱ꞌ nedaꞌ da xula, naꞌ guzre̱ꞌ nedaꞌ: “Da ba nucáꞌana chaweꞌ Dios, quebe nnauꞌ lueꞌ naca na sban.”
\v 10 Da nigá guca na chunna lasa, naꞌ ca gudé naꞌ xúgute̱ da caꞌ belexegüén na xabáa.
\v 11 Lu zra náꞌqueze beleláꞌ chunna benneꞌ lu xuꞌu naga zuaꞌ, benneꞌ caꞌ gusel-la tu benneꞌ zua Cesarea chee̱ zedajlexedilaj nedaꞌ.
\v 12 Beꞌ Láꞌazxa gunná béꞌene̱ꞌ nedaꞌ chéajle̱naꞌ benneꞌ caꞌ, ne quebe gun chupa lazraꞌ. La gázqueze gusiáꞌcale̱ xrupa benneꞌ biche ljwézredxu caní nedaꞌ. Xúgute̱ntuꞌ guxúꞌuntuꞌ lizre tu benneꞌ.
\v 13 Le̱ꞌ bchálajle̱ne̱ꞌ netuꞌ ca bléꞌene̱ꞌ lizre̱ꞌ tu gubáz chee̱ xabáa, ze̱ niꞌe̱, ne guzre̱ꞌ le̱ꞌ: “Gusel-la benneꞌ chjaca xe̱zre Jope chee̱ cheajlenné̱ꞌ Simón, benneꞌ lé̱queze̱ꞌ Pedro.
\v 14 Benneꞌ nigá xe̱ꞌe̱ lueꞌ aja gunuꞌ chee̱ lauꞌ lueꞌ, ne xelelá xúgute̱ benneꞌ zaj zre̱ꞌe̱ lizruꞌ.”
\v 15 Gate guzú lawaꞌ dxuchálajle̱naꞌ benneꞌ caꞌ, naꞌ bzrin Beꞌ Láꞌazxa guzúale̱ne̱ꞌ benneꞌ caꞌ, ca ble̱ꞌe̱ guzúale̱ne̱ꞌ dxiꞌu nédxudaute̱.
\v 16 Nadxa xeajsá lazraꞌ ca gunná Xránadxu, gunné̱ꞌ: “Da li Juan bchue̱ꞌ bénneache nisa, naꞌ gaca chee̱le da zéaje̱ xel-laꞌ dxedxúa nisa, súale̱ Beꞌ Láꞌazxa leꞌe.”
\v 17 Che Dios bnézruje̱ꞌ chee̱ benneꞌ caꞌ ca be̱nne̱ꞌ dxiꞌu, guxéajle̱dxu chee̱ Xránadxu Jesucristo, ¿nuzra nacaꞌ nedaꞌ chee̱ tábagaꞌ Dios?
\p
\v 18 Nadxa gate biche ljwézredxu caꞌ zaj zre̱ꞌe̱ Jerusalén belenne̱ꞌ da caní, naꞌ gulezúa zrie̱ꞌ, ne gulezú lawe̱ꞌ dxelúe láꞌane̱ꞌ Dios, dxelenné̱ꞌ:
\p ―Caꞌ naca, la gázqueze dxunna Dios lataj benneꞌ quebe zaj naque̱ꞌ judío xelexebíꞌi lazre̱ꞌ chee̱ xeleziꞌe̱ xel-laꞌ nabán zeajlí canna.
\s Benneꞌ dxeléajle̱ꞌe̱ chee̱ Jesús zaj zre̱ꞌe̱ xe̱zre Antioquía
\p
\v 19 Gate belutie̱ꞌ Esteban, naꞌ belau ziꞌ xuzre̱ꞌ xezícala benneꞌ dxeléajle̱ꞌe̱ chee̱ Jesús, naꞌ bal-le̱ꞌ buluzrúnnaje̱ꞌ, xjaque̱ꞌ xe̱zre Fenicia, ne lu xu Chipre, ne xe̱zre Antioquía. Gate belezrine̱ꞌ lataj caꞌ, naꞌ buluchálaje̱ꞌ dizraꞌ chee̱ Jesús lau benneꞌ judío cáꞌaze, ne quegá lau benneꞌ quebe zaj naque̱ꞌ judío.
\v 20 Nadxa bal-la benneꞌ dxeléajle̱ꞌe̱ chee̱ Jesús, benneꞌ Chipre, ne benneꞌ Cirene, belelé̱ꞌe̱ xe̱zre Antioquía, naꞌ buluchálajle̱ne̱ꞌ benneꞌ caꞌ quebe zaj naque̱ꞌ judío, ne buluzenne̱ꞌ le̱ꞌ dizraꞌ chaweꞌ ca naca chee̱ Xránadxu Jesús.
\v 21 Xel-laꞌ waca chee̱ Xránadxu guzúale̱ na benneꞌ caꞌ, naꞌ caꞌan guca, benneꞌ zan belexexaque̱ꞌ chee̱ Xránadxu.
\p
\v 22 Gate belén benneꞌ caꞌ da nigá, benneꞌ dxeléajle̱ꞌe̱ chee̱ Jesús zaj zre̱ꞌe̱ Jerusalén, naꞌ gulesel-le̱ꞌ Bernabé xe̱zre Antioquía.
\v 23 Gate bzrin Bernabé naꞌ, bléꞌene̱ꞌ ca da chaweꞌ da dxun Dios chee̱ benneꞌ caꞌ, naꞌ gubéle̱ꞌe̱ne̱ꞌ. Naꞌ bsízrene̱ꞌ xúgute̱ benneꞌ caꞌ chee̱ xelezúa chúchue̱ꞌ lu da naca chee̱ Xránadxu.
\v 24 Bernabé naque̱ꞌ benneꞌ xrlátaje, naꞌ zúale̱ Beꞌ Láꞌazxa le̱ꞌ, ne dute̱ lázrdawe̱ꞌ dxéajle̱ꞌe̱ chee̱ Jesús. Caꞌan guca, ne̱ chee̱ le̱ꞌ guléajle̱ benneꞌ zan chee̱ Xránadxu.
\p
\v 25 Gudé naꞌ guxíaj Bernabé xe̱zre Tarso, zeajxedílaje̱ꞌ Saulo, naꞌ gate bezrelne̱ꞌ le̱ꞌ, beche̱ꞌe̱ le̱ꞌ Antioquía.
\v 26 Gulezúe̱ꞌ naꞌ tu iza naxáꞌ nen benneꞌ caꞌ dxeléajle̱ꞌe̱ chee̱ Jesús, naꞌ bulusé̱dene̱ꞌ benneꞌ zan. Lu xe̱zre Antioquía naꞌ guca na da nedxu gulé̱ꞌe̱ benneꞌ caꞌ dxeléajle̱ꞌe̱ chee̱ Xránadxu, Benneꞌ Cristiano.
\p
\v 27 Ca lu zra caꞌ, bal-la benneꞌ dxelenné̱ꞌ waláz chee̱ Dios besiáꞌque̱ꞌ Jerusalén, xjaque̱ꞌ Antioquía.
\v 28 Tu benneꞌ caꞌ le̱ꞌ Agabo guzé̱ꞌ láwela biche ljwézredxu caꞌ, naꞌ ca da bnezruj Beꞌ Láꞌazxa le̱ꞌ, gunné̱ꞌ waca tu gubinaꞌ zren du ca naca xe̱zr la xu, naꞌ gubinaꞌ nigá guca na gate naca Claudio benneꞌ dxenná béꞌene̱ꞌ ca naca xe̱zr la xu Roma.
\v 29 Nadxa benneꞌ caꞌ dxeléajle̱ꞌe̱ chee̱ Jesús, benneꞌ zaj zre̱ꞌe̱ Antioquía belún ziꞌ lazre̱ꞌ xelesel-le̱ꞌ da gácale̱ na biche ljwézredxu zaj zre̱ꞌe̱ xe̱zre caꞌ zaj nababa Judea, ca da xelezeque̱ꞌ tu tue̱ꞌ xulunézruje̱ꞌ.
\v 30 Caꞌan belune̱ꞌ, naꞌ belesel-le̱ꞌ tu gunaꞌ lau benneꞌ gula caꞌ chee̱ Cristo zaj zre̱ꞌe̱ Judea, naꞌ Bernabé ne Saulo belúꞌe̱ na naꞌ.
\c 12
\s Dxelutie̱ꞌ Jacobo ne dxelegúꞌe̱ Pedro lizre xia
\p
\v 1 Lu zra caꞌ guzú lau wenná bea Herodes nau ziꞌ xuzre̱ꞌ bal-la benneꞌ caꞌ dxeléajle̱ꞌe̱ chee̱ Jesús.
\v 2 Gunná béꞌene̱ꞌ belutie̱ꞌ Jacobo, biche Juan nen xia nalá.
\v 3 Gate bleꞌe Herodes dxelexezaca ba lazreꞌ benneꞌ judío caꞌ ca naca da be̱ne̱ꞌ, naꞌ gude̱l-le̱ꞌ Pedro. Da nigá guca na lu zra laní caꞌ gate dxelawe̱ꞌ xeta xtila da quebe nachixre na cua zichaj chee̱ xeta xtila.
\v 4 Ca gudé gude̱l-le̱ꞌ Pedro, naꞌ guluꞌe̱ le̱ꞌ lizre xia naga buluxúe tapa cueꞌ benneꞌ dxjaca wedil-la le̱ꞌ, zaj naca tapa benneꞌ zeje̱ꞌ wedil-la tu cueꞌ tu cueꞌ. Herodes guca lazre̱ꞌ guzúe̱ꞌ Pedro lau benneꞌ xe̱zre caꞌ te laní.
\v 5 Caꞌan guca xuꞌu Pedro lizre xia naga dxuluxúe xánnie̱ꞌ le̱ꞌ, naꞌ benneꞌ biche ljwézredxu caꞌ buluchálajle̱queze̱ꞌ Dios du lazre̱ꞌ.
\s Dios dxuselé̱ꞌ Pedro lizre xia
\p
\v 6 Dxe̱la xanneꞌ ca za chaníꞌ zra xula gate dxal-laꞌ guzúa Herodes le̱ꞌ lau benneꞌ xe̱zre caꞌ, Pedro de̱ꞌ dxásie̱ꞌ laduj chupa benneꞌ dxjaqueꞌ wedil-la, nadxéaje̱ꞌ chupa du xia, naꞌ xebal-la benneꞌ dxjaca wedil-la zaj zre̱ꞌe̱ dxuꞌa dxa xuꞌu dxuluxúe̱ꞌ lizre xia naꞌ.
\v 7 Nadxa bleꞌe lau tu gubáz chee̱ xabáa chee̱ Xránadxu, naꞌ ca naca lizre xia naꞌ guxaníꞌ. Naꞌ gubáz chee̱ xabáa naꞌ bte̱ꞌ le̱ꞌe̱ Pedro, ne bsebane̱ꞌ le̱ꞌ, naꞌ guzre̱ꞌ le̱ꞌ:
\p ―Guxásache.
\p Caꞌan guca, du xia caꞌ belexexe̱zre na naꞌ Pedro.
\v 8 Naꞌ gunná gubáz chee̱ xabáa naꞌ, guzre̱ꞌ le̱ꞌ:
\p ―Besí le̱ꞌu, ne buléaj zreluꞌ.
\p Gate bexuzre be̱n Pedro da naꞌ, naꞌ guzre gubáz chee̱ xabáa naꞌ le̱ꞌ:
\p ―Guxrúa xicha chiuꞌ cuxruꞌ, ne gudále̱ nedaꞌ.
\p
\v 9 Pedro bedxúaje̱ꞌ cuzru gubáz chee̱ xabáa naꞌ, ne quebe nézene̱ꞌ che naca da li che cabí ca da dxun gubáz chee̱ xabáa naꞌ. Dxéquene̱ꞌ dxeléꞌene̱ꞌ tu da dxuléꞌe Dios le̱ꞌ.
\v 10 Belexedée̱ꞌ naga zaj zraꞌ benneꞌ dxjaque̱ꞌ wedil-la nedxu caꞌ, ne naga zaj zraꞌ benneꞌ gudxupeꞌ benneꞌ dxjaque̱ꞌ wedil-la, naꞌ gate belexezrine̱ꞌ dxuꞌa dxa xuꞌu xia da dxedxuaj zeaj la nézala, dxa xuꞌu naꞌ le̱ze na bxalaj na. Belexedxúaje̱ꞌ, naꞌ ca gudé besiáꞌque̱ꞌ belezrine̱ꞌ xetú neza xula chee̱ xe̱zr naꞌ, naꞌ bcaꞌana gubáz chee̱ xabáa naꞌ le̱ze̱ꞌ.
\v 11 Nadxa guque beꞌe Pedro ba bedxúaje̱ꞌ, naꞌ guzáꞌ lazre̱ꞌ, gunné̱ꞌ: Naꞌa dxeléꞌedaꞌ naca na da li. Xranaꞌ gusel-le̱ꞌ gubáz chee̱ xabáa chee̱ꞌ chee̱ bselé̱ꞌ nedaꞌ lu naꞌ Herodes, ne lu xúgute̱ da gulaca lazreꞌ judío caꞌ xelune̱ꞌ chiaꞌ.
\p
\v 12 Da nigá dxulaba lazreꞌ Pedro gate bzrine̱ꞌ lizre María, xrna Juan, bi naꞌ lé̱quezebeꞌ Marcos, naꞌ lu xuꞌu naꞌ zaj nazraga benneꞌ zan dxelenabe̱ꞌ Dios gácale̱ne̱ꞌ Pedro.
\v 13 Gate gunné̱ Pedro dxuꞌa dxa xuꞌu naꞌ, bzrin naꞌ tu bi nuꞌula le̱beꞌ Rode zeajnabeꞌ nu naꞌ.
\v 14 Gate bexúnbeabeꞌ chiꞌi Pedro, quebe gusálajbeꞌ dxa xuꞌu. Xel-laꞌ dxebé chee̱beꞌ zexíaj chégubeꞌ naga zaj nazraga benneꞌ caꞌ chee̱ zeajé̱zrebeꞌ benneꞌ caꞌ ze̱ Pedro dxuꞌa dxa xuꞌu.
\v 15 Nadxa benneꞌ caꞌ gulé̱ꞌe̱ bi nuꞌula naꞌ:
\p ―Nadá xichaj lázrdaꞌu.
\p Bi nuꞌula naꞌ be̱n chúchubeꞌ xrtízrabeꞌ. Benneꞌ caꞌ gulenné̱ꞌ:
\p ―Quebe le̱ꞌ naꞌ. Beꞌ guxuꞌe̱ naꞌ.
\p
\v 16 Dxácate̱ naꞌ ze̱ Pedro tu dxenné̱zqueze̱ꞌ dxuꞌa dxa xuꞌu. Naꞌ gate gulesálaje̱ꞌ, ne beleléꞌene̱ꞌ Pedro, naꞌ belexebánene̱ꞌ.
\v 17 Pedro guchisa ne̱ꞌe̱ chee̱ xelezúa benneꞌ caꞌ zrize, naꞌ bchálajle̱ne̱ꞌ benneꞌ caꞌ ca be̱n Xránadxu bebéaje̱ꞌ le̱ꞌ lizre xia. Naꞌ guzre̱ꞌ benneꞌ caꞌ:
\p ―Le guzén Jacobo, ne biche ljwézredxu caꞌ ca naca da nigá.
\p Nadxa bezé̱ꞌe̱ zexíaje̱ꞌ naga xula.
\p
\v 18 Gate guxaníꞌ, gulezúale̱ꞌe̱ ste̱be benneꞌ dxjaque̱ꞌ wedil-la caꞌ laweꞌ da quebe zaj nézene̱ꞌ aja guca chee̱ Pedro.
\v 19 Herodes gunná béꞌene̱ꞌ xelexilaj benneꞌ dxjaca wedil-la Pedro, naꞌ laweꞌ da quebe belexezrelne̱ꞌ le̱ꞌ, naꞌ gunáb xánnie̱ꞌ benneꞌ dxjaque̱ꞌ wedil-la bi guca, naꞌ gudé naꞌ gunná béꞌene̱ꞌ xelate benneꞌ caꞌ dxjaque̱ꞌ wedil-la. Ca gudé naꞌ guzáꞌ Herodes xe̱zre caꞌ zaj nababa Judea, guxíaje̱ꞌ xeajsúe̱ꞌ xe̱zre Cesarea.
\s Dxate Herodes
\p
\v 20 Herodes dxezré̱ꞌe̱ benneꞌ caꞌ zaj zre̱ꞌe̱ xe̱zre Tiro, ne xe̱zre Sidón. Benneꞌ chee̱ xe̱zre caꞌ belune̱ꞌ tuze dizraꞌ chee̱ cheajleléꞌe cuine̱ꞌ lau Herodes naꞌ. Belune̱ꞌ Blasto benneꞌ ljwezre̱ꞌ. Naque̱ꞌ tu benneꞌ blau chee̱ wenná bea Herodes, naꞌ gulesel-le̱ꞌ le̱ꞌ lau Herodes naꞌ chee̱ nabe̱ꞌ le̱ꞌ sua zri ca naca da dxaca chee̱ Herodes nen benneꞌ caꞌ. Caní belune̱ꞌ laweꞌ da nédxute̱ dxelagu benneꞌ xe̱zre Tiro, ne Sidón da guzáꞌ xe̱zre Cesarea naga zua Herodes.
\v 21 Nadxa Herodes bzue̱ꞌ tu zra xelezrín benneꞌ caꞌ lawe̱ꞌ. Lu zra naꞌ Herodes gucue̱ꞌ zra lane̱ꞌ da zácale̱ꞌe̱, naꞌ gudxéꞌe̱ lataj blau chee̱ꞌ, ne bchálajle̱ne̱ꞌ benneꞌ zan caꞌ.
\v 22 Nadxa benneꞌ zan caꞌ gulezú lawe̱ꞌ dxelenné̱ꞌ zizraj:
\p ―¡Benneꞌ nigá dxuchálaje̱ꞌ quebe naque̱ꞌ beniácheze! ¡Dios naꞌ!
\p
\v 23 Zra naꞌte̱ tu gubáz chee̱ xabáa chee̱ Xránadxu guluꞌe̱ Herodes tu xízrawe̱ꞌ laweꞌ da guziꞌe̱ xel-laꞌ ba láꞌana da dxal-laꞌ siꞌ Dios, naꞌ guzré̱ꞌe̱ bzugaꞌ, ne gútete̱ꞌ.
\p
\v 24 Bzriluj dizraꞌ chaweꞌ chee̱ Xránadxu, naꞌ benneꞌ caꞌ buluchálaje̱ꞌ ca naca na gátete̱ze naꞌ.
\p
\v 25 Gate belezúe Bernabé, ne Saulo zrin dxelune̱ꞌ lu xe̱zre Jerusalén, besiáꞌque̱ꞌ xe̱zre naꞌ, zaj naché̱ꞌe̱ Juan, bi naꞌ lé̱quezebeꞌ Marcos.
\c 13
\s Bernabé ne Saulo dxelezú lawe̱ꞌ dxeledé̱ꞌ dxuluchálaje̱ꞌ dizraꞌ chee̱ Dios
\p
\v 1 Ládujla benneꞌ caꞌ zaj nazraga chee̱ Cristo lu xe̱zre Antioquía zaj zraꞌ benneꞌ caꞌ dxelenné̱ꞌ waláz chee̱ Dios, ne benneꞌ caꞌ dxulusé̱dene̱ꞌ bénneache xrtizraꞌ Dios. Ládujla benneꞌ caní zaj zua Bernabé, ne Simón, bénneaꞌ lé̱queze̱ꞌ benneꞌ gasaj, ne Lucio, benneꞌ xe̱zre Cirene, ne Manaén, benneꞌ gúlale̱beꞌ Herodes, benneꞌ xuꞌu lu ne̱ꞌe̱ xe̱zr la xu Galilea naꞌ, ne Saulo.
\v 2 Tu zra gate benneꞌ caní zaj zre̱ꞌe̱ dxelúe láꞌane̱ꞌ Dios, ne dxelune̱ꞌ gubasa, Beꞌ Láꞌazxa gunné̱ꞌ:
\p ―Le cueaj Bernabé, ne Saulo chee̱ xelune̱ꞌ zrin naꞌ da gunnéaꞌ le̱ꞌ xelune̱ꞌ.
\p
\v 3 Chee̱ le̱ naꞌ, ca gudé buluchálajle̱ne̱ꞌ Dios, ne belune̱ꞌ gubasa, naꞌ buluzé̱ ne̱ꞌe̱ laweꞌ benneꞌ caꞌ, ne buluzé̱ꞌ le̱ꞌ dizraꞌ.
\s Dxupa benneꞌ gubáz caꞌ dxuluchálaje̱ꞌ dizraꞌ chee̱ Dios lu xe̱zr la xu Chipre
\p
\v 4 Gudé naꞌ, ca gusel-la Beꞌ Láꞌazxa le̱ꞌ, naꞌ Bernabé, ne Saulo xjaque̱ꞌ xe̱zre Seleucia naga guluꞌe̱ tu lu da dxedá laweꞌ nísadauꞌ chee̱ chjaque̱ꞌ lu xe̱zr la xu da naxechaj nísadauꞌ da nazí le na Chipre.
\v 5 Gate belezrine̱ꞌ naꞌ, naꞌ belexedxúaje̱ꞌ lu da dxedá laweꞌ nísadauꞌ naga zua xe̱zre Salamina, naꞌ gulezú lawe̱ꞌ dxuluchálaje̱ꞌ dizraꞌ chee̱ Dios lu xudauꞌ caꞌ chee̱ benneꞌ judío caꞌ. Juan zéajle̱quezebeꞌ gubáz caꞌ chee̱ gácale̱beꞌ le̱ꞌ.
\v 6 Naꞌ guledée̱ꞌ xúgute̱ xé̱zredu caꞌ da zaj nnita lu xe̱zr la xu naꞌ, naꞌ belezrine̱ꞌ xe̱zre Pafos. Naꞌ belexezrague̱ꞌ tu benneꞌ judío le̱ꞌ Barjesús, naque̱ꞌ benneꞌ wazráꞌ. Naque̱ꞌ tu benneꞌ we̱n lazreꞌ dxenné̱ꞌ dxuchálaje̱ꞌ waláz chee̱ Dios.
\v 7 Benneꞌ wazráꞌ nigá zue̱ꞌ nen Sergio Paulo, benneꞌ xuꞌu lu ne̱ꞌe̱ xe̱zr la xu naꞌ, ne naque̱ꞌ benneꞌ sina. Benneꞌ xuꞌu lu ne̱ꞌe̱ xe̱zr la xu naꞌ gusel-le̱ꞌ benneꞌ xeajnné̱ꞌ Bernabé, ne Saulo laweꞌ da dxaca lazre̱ꞌ xenne̱ꞌ dizraꞌ chee̱ Dios.
\v 8 Naꞌ benneꞌ wazráꞌ naꞌ, lé̱queze̱ꞌ Elimas gudábague̱ꞌ gubáz caꞌ laweꞌ da guca lazre̱ꞌ quebe chéajle̱ chee̱ Jesús benneꞌ xuꞌu lu ne̱ꞌe̱ xe̱zr la xu naꞌ.
\v 9 Nadxa Saulo, bénneaꞌ lé̱queze̱ꞌ Pablo, zúale̱ Beꞌ Láꞌazxa le̱ꞌ, gunnáꞌ dxugüe̱ꞌ le̱ꞌ,
\v 10 naꞌ guzre̱ꞌ le̱ꞌ:
\p ―Guzrí xe̱, benneꞌ we̱n da cale̱la. Zriꞌine da xriwe̱ꞌ, ne benneꞌ dxusezxuj xrneza xúgute̱ bénneache. ¿Bizr chee̱ naꞌ quebe dxusanuꞌ dxusézxujuꞌ neza chee̱ benneꞌ caꞌ dxelaca lazre̱ꞌ chjácale̱ne̱ꞌ Xránantuꞌ?
\v 11 Naꞌa, Xránantuꞌ gudée̱ꞌ lueꞌ ba xaꞌ. Xegáꞌanuꞌ la chul-la, naꞌ tu chíꞌiqueze quebe leꞌenuꞌ xel-laꞌ naxaníꞌ chee̱ gubizra.
\p Benneꞌ naꞌ guzúe̱ꞌ lu da chul-la, naꞌ guzú lawe̱ꞌ dxílaje̱ꞌ nu xecáꞌa ne̱ꞌe̱ laweꞌ da québedxa dxeléꞌene̱ꞌ.
\v 12 Gate bleꞌe benneꞌ xuꞌu lu ne̱ꞌe̱ xe̱zr la xu naꞌ da nigá, naꞌ guxéajle̱ꞌe̱ chee̱ Jesús laweꞌ da bebánene̱ꞌ ca naca da dxuse̱de Pablo ca naca chee̱ Xránadxu.
\s Pablo ne Bernabé dxelezrine̱ꞌ xe̱zre Antioquía da nababa xe̱zr la xu Pisidia
\p
\v 13 Pablo ne benneꞌ ljwezre̱ꞌ caꞌ belúꞌe̱ tu lu da dxedá laweꞌ nísadauꞌ lu xe̱zre Pafos naꞌ, naꞌ belezrine̱ꞌ xe̱zre Perge da nababa na xe̱zr la xu Panfilia. Lu xe̱zre naꞌ Juan bsanbeꞌ gubáz caꞌ, naꞌ bexíajbeꞌ xe̱zre Jerusalén.
\v 14 Gudé naꞌ gubáz caꞌ besiáꞌque̱ꞌ Perge, naꞌ belezrine̱ꞌ xe̱zre Antioquía da nababa na xe̱zr la xu Pisidia. Lu xe̱zre naꞌ, gate naca zra dxulupáꞌana judío caꞌ, guluꞌe̱ xudauꞌ chee̱ judío caꞌ, naꞌ gulebéꞌe̱.
\v 15 Nadxa, ca gudé bululabe̱ꞌ lu xiche naga naxúaj da bdxixruj bea Moisés, ne da gulenná benneꞌ caꞌ buluchálaje̱ꞌ waláz chee̱ Dios, naꞌ benneꞌ xíchaje̱ caꞌ chee̱ xudauꞌ naꞌ gulesel-le̱ꞌ benneꞌ xeaje̱zre̱ꞌ Pablo, ne Bernabé:
\p ―Leꞌe, biche ljwézrentuꞌ, che nápale dizraꞌ da guzéajniꞌile netuꞌ, waca nne̱le na naꞌa.
\p
\v 16 Nadxa Pablo guxase̱ꞌ, naꞌ guchisa ne̱ꞌe̱ chee̱ xelezúa zri benneꞌ caꞌ, naꞌ gunné̱ꞌ:
\p ―Le xene leꞌe, benneꞌ Israel, ne leꞌe dxezrébele Dios.
\v 17 Dios chee̱ xe̱zre Israel guqué̱ꞌe̱ xra xrtáudxu caꞌ, naꞌ be̱ne̱ꞌ benneꞌ caꞌ tu cueꞌ benneꞌ zante̱ gate ne zaj zre̱ꞌe̱ ca benneꞌ zituꞌ caꞌ lu xe̱zr la xu Egipto, naꞌ ca gudé naꞌ bebéaje̱ꞌ le̱ꞌ lu xe̱zr la xu naꞌ dute̱ xel-laꞌ waca chee̱ꞌ.
\v 18 Dios bchaga lawe̱ꞌ benneꞌ caꞌ chua iza le̱ꞌe̱ xixreꞌ laweꞌ lataj,
\v 19 naꞌ bzria xiꞌe̱ gazre cueꞌ bénneache gulezúa lu xe̱zr la xu Canaán, chee̱ bnézruje̱ꞌ xra xrtáudxu caꞌ xe̱zr la xu chee̱ benneꞌ caꞌ.
\v 20 Gudé naꞌ, laweꞌ tapa gaxúa xu gachaj iza gunná beꞌe Dios benneꞌ caꞌ lu naꞌ benneꞌ caꞌ buluchiꞌe̱ chee̱ꞌ, cadxa bzrin zra zua Samuel, benneꞌ bchálaje̱ꞌ waláz chee̱ Dios.
\v 21 Nadxa benneꞌ caꞌ gulenabe̱ꞌ Dios sua tu benneꞌ gaque̱ꞌ wenná bea chee̱ꞌ, naꞌ Dios bzue̱ꞌ wenná bea tu benneꞌ le̱ꞌ Saúl, zriꞌine Cis, tu benneꞌ chee̱ tu cueꞌ benneꞌ judío zaj naque̱ꞌ zriꞌine zre sua Benjamín. Saúl nigá guque̱ꞌ wenná bea laweꞌ chua iza.
\v 22 Gudé naꞌ Dios begüe̱ꞌ Saúl lataj chee̱ꞌ, naꞌ bzue̱ꞌ David gaque̱ꞌ wenná bea chee̱ꞌ, naꞌ chee̱ benneꞌ nigá gunné̱ꞌ: “Nezdaꞌ David, zriꞌine Isaí, naque̱ꞌ tu benneꞌ dxune̱ꞌ da dxezaca ba lazraꞌ, ne gune̱ꞌ xúgute̱ da dxaca lazraꞌ.”
\v 23 Tu benneꞌ zriꞌine zre sua David nigá naca Jesús, bénneaꞌ bzua Dios chee̱ guselé̱ꞌ benneꞌ Israel caꞌ, ca ba guche̱be lazre̱ꞌ chee̱ David.
\v 24 Nédxudxa gate za xida Jesús, Juan bchálajle̱ne̱ꞌ ca naca benneꞌ Israel caꞌ, guzre̱ꞌ benneꞌ caꞌ dxal-laꞌ xelexebíꞌi lazre̱ꞌ, ne xelexedxúe̱ꞌ nisa.
\v 25 Naꞌ gate ba za cheajsé̱ chee̱ Juan, naꞌ gunné̱ꞌ: “Nedaꞌ quebe nacaꞌ bénneaꞌ dxéquele nacaꞌ, san ca te chiaꞌ nedaꞌ za xetú benneꞌ quebe naca chiaꞌ nedaꞌ cuéajaꞌ zrele̱ꞌ da xuꞌu niꞌe̱.”
\p
\v 26 ’Leꞌe, biche ljwezraꞌ, zriꞌine zre sua Abraham, ne leꞌe dxezrébele Dios. Dios nasel-le̱ꞌ chee̱le dizraꞌ nigá chee̱ lale.
\v 27 Benneꞌ caꞌ gulezráꞌ Jerusalén, ne benneꞌ blau chee̱ꞌ caꞌ, quebe belexúnbeꞌe̱ nu naꞌ Jesús, ne quebe guléajniꞌine̱ꞌ dizraꞌ da buluchalaj benneꞌ caꞌ buluchálaje̱ꞌ waláz chee̱ Dios da dxelenne̱ꞌ xúgute̱ zra dxulupáꞌane̱ꞌ. Caꞌ guca, benneꞌ caꞌ belún líqueze̱ꞌ ca naca da naxúaj na chee̱ Jesús gate gulechugue̱ꞌ chee̱ꞌ gatie̱ꞌ.
\v 28 Lácala quebe belezrelne̱ꞌ tu da nabaga Jesús chee̱ xelútie̱ꞌ Le̱ꞌ, gulenabe̱ꞌ lau Pilato nna béꞌene̱ꞌ gatieꞌ.
\v 29 Nadxa, gate gudé belune̱ꞌ xúgute̱ da naxúaj na lu xiche chee̱ Dios ca naca da dxal-laꞌ gaca chee̱ Jesús, naꞌ buluxulétaje̱ꞌ Le̱ꞌ xaga béguaj, ne bulucache̱ꞌ Le̱ꞌ.
\v 30 Nadxa Dios bsebane̱ꞌ Le̱ꞌ ládujla benneꞌ gate.
\v 31 Lu zaneꞌ zra Jesús bleꞌe lawe̱ꞌ benneꞌ caꞌ guledále̱ne̱ꞌ Le̱ꞌ gate bezé̱ꞌe̱ Galilea dxeaje̱ꞌ Jerusalén, naꞌ naꞌa, benneꞌ caní dxelexeche̱be̱ꞌ ca naca chee̱ꞌ lau bénneache.
\p
\v 32 ’Cáꞌanqueze netuꞌ dxuzénentuꞌ leꞌe dizraꞌ chaweꞌ ca naca da guche̱be lazreꞌ Dios lau xra xrtáudxu caꞌ.
\v 33 Be̱n lie̱ꞌ ca naca da guche̱be lazre̱ꞌ chee̱dxu dxiꞌu, nácadxu zriꞌine zre sua benneꞌ caꞌ, gate bsebane̱ꞌ Jesús, ca naxúaj gudxupeꞌ salmo, dxenné̱ꞌ: “Lueꞌ nacuꞌ zriꞌinaꞌ. Nedaꞌ bzuaꞌ Lueꞌ naꞌa.”
\v 34 Dios bléꞌene̱ꞌ gusebane̱ꞌ Le̱ꞌ ládujla benneꞌ gate, chee̱ quebe guzru be̱l-laꞌ dxen chee̱ꞌ gate gunné̱ꞌ lu xiche chee̱ꞌ: “Gunnaꞌ leꞌe da chaweꞌ da guche̱be lazraꞌ lau David.”
\v 35 Cáꞌanqueze dxenné̱ꞌ xetú lu salmo: “Quebe guꞌu lataj guzru be̱l-laꞌ dxen chee̱ we̱n zrin chiuꞌ, bi nazriꞌite̱ lazruꞌ.”
\v 36 Da li David be̱ne̱ꞌ zrin chee̱ benneꞌ caꞌ zaj zre̱ꞌe̱ gate zua le̱ꞌ, ca gunná beꞌe Dios le̱ꞌ, san ca gudé naꞌ gutie̱ꞌ, naꞌ bulucache̱ꞌ le̱ꞌ naga belegache xra xrtawe̱ꞌ caꞌ, naꞌ guzru be̱l-laꞌ dxen chee̱ꞌ.
\v 37 Quebe guzru be̱l-laꞌ dxen chee̱ Bénneaꞌ bsebán Dios Le̱ꞌ.
\v 38 Biche ljwezraꞌ, dxuzendaꞌ leꞌe, dxal-laꞌ nézele Dios gunite lawe̱ꞌ chee̱ dul-la chee̱le ne̱ chee̱ Jesús.
\v 39 Ne̱ chee̱ Le̱ꞌ, xúgute̱ benneꞌ dxeleajlí lazre̱ꞌ Le̱ꞌ, Dios dxunite lawe̱ꞌ chee̱ benneꞌ caꞌ ca naca xúgute̱ da quebe guca gunite lawe̱ꞌ chee̱ꞌ lácala belune̱ꞌ ca naca da bdxixruj beꞌe Moisés.
\v 40 Le guxúe xanneꞌ cuínale chee̱ quebe gaca chee̱le ca naca da buluzúaj benneꞌ caꞌ buluchálaje̱ꞌ waláz chee̱ Dios, gate gulenné̱ꞌ:
\q
\v 41 Le nnaꞌ, leꞌe, benneꞌ we̱n la, ne le xebane, ne le xenite,
\q laweꞌ da gunaꞌ nedaꞌ, Dios chee̱le, lu zra chee̱le,
\q tu da naca da zrente̱, da quebe chéajle̱le lácala nu guzén leꞌe.
\p
\v 42 Gate Pablo ne benneꞌ ljwezre̱ꞌ caꞌ belexedxúaje̱ꞌ lu xudauꞌ chee̱ judío caꞌ, naꞌ benneꞌ caꞌ quebe zaj nálaje̱ꞌ judío gulenabe̱ꞌ le̱ꞌ guchálajle̱ne̱ꞌ le̱ꞌ chee̱ da caní gate zrin xetú zra dxulupáꞌane̱ꞌ.
\v 43 Gate belexedxúaje̱ꞌ lu xudauꞌ naꞌ, benneꞌ zan benneꞌ judío caꞌ, ne benneꞌ caꞌ belexaque̱ꞌ judío, ne dxelune̱ꞌ da naca chee̱ Dios, xjácale̱ne̱ꞌ Pablo ne Bernabé. Gubáz caní buluzéajniꞌine̱ꞌ benneꞌ caꞌ dxal-laꞌ xelezúa chache̱ꞌ lu xel-laꞌ zriꞌi lazreꞌ chee̱ Dios.
\p
\v 44 Guledé xrunuꞌ zra gate naca zra dxulupáꞌane̱ꞌ, belezraga ca nácaqueze benneꞌ zaj zre̱ꞌe̱ xe̱zre naꞌ chee̱ xelenne̱ꞌ dizraꞌ chee̱ Dios.
\v 45 Gate benneꞌ judío caꞌ beleléꞌene̱ꞌ benneꞌ zante̱ zaj nazrague̱ꞌ naꞌ, naꞌ belaque̱ꞌ xa lazreꞌ ne gulezú lawe̱ꞌ dxelenné̱ꞌ chee̱ da dxenná Pablo, ne gulenné̱ꞌ schanniꞌ chee̱ꞌ.
\v 46 Nadxa Pablo ne Bernabé gulenné̱ꞌ du lazre̱ꞌ, gulé̱ꞌe̱ benneꞌ judío caꞌ:
\p ―Be̱n na ba xen bzénentuꞌ leꞌe nedxu dizraꞌ chee̱ Dios, leꞌe nácale judío, san laweꞌ da quebe dxaca lázrele xénele, ne da dxunle dxuléꞌe na quebe naca chee̱le gápale xel-laꞌ nabán zeajlí canna, chee̱ le̱ naꞌ chéajntuꞌ naꞌa chálajle̱ntuꞌ benneꞌ quebe zaj naque̱ꞌ judío.
\v 47 Caní guntuꞌ laweꞌ da caní gunná bea Xránadxu gate gunné̱ꞌ:
\q Bzuaꞌ Lueꞌ ca tu xiꞌ da gusení na benneꞌ xe̱zr la xu caꞌ,
\q ne chee̱ gacuꞌ weselá chee̱ bénneache zaj zre̱ꞌe̱ ca naca xe̱zr la xu.
\p
\v 48 Gate belenne̱ꞌ da nigá, benneꞌ quebe zaj naque̱ꞌ judío gulebéle̱ꞌe̱ne̱ꞌ, naꞌ gulezú lawe̱ꞌ dxelenné̱ꞌ xrlátaje naca dizraꞌ chee̱ Xránadxu, naꞌ guléajle̱ xúgute̱ benneꞌ caꞌ ba nabéaj Dios chee̱ xelape̱ꞌ xel-laꞌ nabán zeajlí canna.
\v 49 Caꞌ guca, bzriluj dizraꞌ chee̱ Dios du ca naca lu xe̱zre caꞌ zaj nababa naꞌ.
\v 50 Benneꞌ judío caꞌ buluchálajle̱ne̱ꞌ bal-la nuꞌula blau caꞌ zjácale̱ne̱ꞌ da dxulusé̱dene̱ꞌ chee̱ Dios, ne benneꞌ biu blau caꞌ chee̱ xe̱zre, naꞌ gulegúꞌu xel-le̱ꞌ benneꞌ caꞌ chee̱ xeláu ziꞌ xuzre̱ꞌ Pablo, ne Bernabé, ne chee̱ xuluxulague̱ꞌ le̱ꞌ naga nababa naꞌ.
\v 51 Nadxa gubáz caꞌ belexebibe̱ꞌ bxrte xu da zeajzría na zrele̱ꞌ da dxuléꞌe na zaj nabaga benneꞌ caꞌ zria, naꞌ xjaque̱ꞌ lu xe̱zre Iconio.
\v 52 Gulebéle̱ꞌe̱ benneꞌ zaj zre̱ꞌe̱ Antioquía naꞌ, benneꞌ dxeléajle̱ꞌe̱ chee̱ Jesús, zúale̱ Beꞌ Láꞌazxa le̱ꞌ.
\c 14
\s Da belún Pablo ne Bernabé lu xe̱zre Iconio
\p
\v 1 Gate belezrin Pablo ne Bernabé xe̱zre Iconio, naꞌ belúꞌe̱ tu zrente̱ lu xudauꞌ chee̱ judío caꞌ, naꞌ ca buluchálaje̱ꞌ dizraꞌ chee̱ Dios, benneꞌ zante̱ guléajle̱ꞌe̱ chee̱ Jesús, benneꞌ judío caꞌ, ne benneꞌ quebe zaj naque̱ꞌ judío.
\v 2 Nadxa benneꞌ judío caꞌ, benneꞌ quebe dxeléajle̱ꞌe̱ chee̱ Jesús belegúꞌu xel-le̱ꞌ benneꞌ quebe zaj naque̱ꞌ judío chee̱ xelecuídene̱ꞌ biche ljwézredxu caꞌ.
\v 3 Lácala belune̱ꞌ caní, benneꞌ gubáz caꞌ gulezúaqueze̱ꞌ naꞌ zaneꞌ zra, ne du lazre̱ꞌ buluchálaje̱ꞌ dizraꞌ chee̱ Dios, dxuluxrén lazre̱ꞌ Xránadxu, naꞌ Xránadxu bzua chúchue̱ꞌ ca da dxelenná benneꞌ gubáz caꞌ ca naca xel-laꞌ zriꞌi lazreꞌ chee̱ Dios, naꞌ Le̱ꞌ bnézruje̱ꞌ gubáz caꞌ xel-laꞌ dxenná bea xelune̱ꞌ xel-laꞌ waca caꞌ chee̱ xabáa ne da dxelunna bea na naca da li da dxelenné̱ꞌ.
\v 4 Benneꞌ caꞌ zaj zre̱ꞌe̱ xe̱zre naꞌ gulaque̱ꞌ chupa laꞌa. Bal-le̱ꞌ beledé̱ꞌe̱ judío caꞌ, naꞌ xebal-le̱ꞌ beledé̱ꞌe̱ gubáz caꞌ chee̱ Jesús.
\v 5 Nadxa benneꞌ judío caꞌ, ne benneꞌ quebe zaj naque̱ꞌ judío belune̱ꞌ tuze dizraꞌ nen benneꞌ xuꞌu laweꞌ caꞌ chee̱ gulenné̱ꞌ schanniꞌ chee̱ benneꞌ gubáz caꞌ, naꞌ gulaca lazre̱ꞌ xuluzríe̱ꞌ le̱ꞌ xiaj.
\v 6 Pablo ne Bernabé, gate belenne̱ꞌ caꞌ, buluzrúnnaje̱ꞌ zjaque̱ꞌ naga zaj dxeꞌ xe̱zre Listra, ne xe̱zre Derbe, da zaj nababa Licaonia, naꞌ guledée̱ꞌ ca naca xé̱zredu caꞌ chee̱ xe̱zre caꞌ zaj nababa naꞌ,
\v 7 naꞌ buluchálaje̱ꞌ naꞌ ca naca dizraꞌ chaweꞌ chee̱ Jesús.
\s Dxuluzríe̱ꞌ Pablo xiaj lu xe̱zre Listra
\p
\v 8 Lu xe̱zre Listra zua tu benneꞌ nazrinnaj niꞌe̱. Dxeꞌe̱ naꞌ laweꞌ da gúlaje̱ꞌ nazrinnaj niꞌe̱, ne quebe dxácaqueze se̱ꞌe̱.
\v 9 Benneꞌ nigá dxenne̱ꞌ da dxuchalaj Pablo, naꞌ Pablo gunné̱ꞌe̱ benneꞌ zrinnaj naꞌ, naꞌ guque béꞌene̱ꞌ nape̱ꞌ xel-laꞌ dxeajlí lazreꞌ chee̱ xexaque̱ꞌ.
\v 10 Nadxa Pablo gunné̱ꞌ zizraj:
\p ―Guzé̱ niꞌu.
\p Benneꞌ naꞌ guxase̱ꞌ guze̱te̱ꞌ, naꞌ guzú lawe̱ꞌ dxedé̱ꞌ.
\v 11 Gate beleléꞌe benneꞌ caꞌ da be̱n Pablo, naꞌ gulezú lawe̱ꞌ dxelenné̱ꞌ zizraj nen dizraꞌ walazreꞌ chee̱ benneꞌ Licaonia, dxelenné̱ꞌ:
\p ―Dios caꞌ zaj naca ca bénneache ba belelé̱ꞌe̱ naga zúadxu.
\p
\v 12 Dxelenné̱ꞌ naca Bernabé dios Júpiter, ne naca Pablo dios Mercurio laweꞌ da dxuchálajqueze Pablo.
\v 13 Naꞌ bxruze chee̱ dios Júpiter, zua xudauꞌ chee̱ na ca dxúꞌudxu xe̱zre naꞌ, guché̱ꞌe̱ be̱zre caꞌ ne xiaj zaj nuzé̱ꞌe̱ na du, naꞌ bxruze naꞌ, ne benneꞌ zan caꞌ gulaca lazre̱ꞌ xuluxucáꞌana szrene̱ꞌ benneꞌ gubáz caꞌ, ne xelútie̱ꞌ be̱zr caꞌ lau benneꞌ gubáz caꞌ ca dxelúnqueze benneꞌ xe̱zre Listra naꞌ chee̱ dios chee̱ꞌ.
\v 14 Gate guleque beꞌe Bernabé ne Pablo, benneꞌ gubáz caꞌ, naꞌ gulecheze̱ꞌ zra lane̱ꞌ da dxuléꞌe na dxelezrebe̱ꞌ bi gun Dios, naꞌ guluꞌe̱ láwela benneꞌ caꞌ, dxelenné̱ꞌ zizraj:
\p
\v 15 ―Leꞌe, benneꞌ, ¿bizr chee̱ naꞌ dxunle da nigá? Netuꞌ nácantuꞌ bénneache ca léꞌequeze, ne zaꞌntuꞌ nigá chee̱ xe̱ntuꞌ leꞌe dxal-laꞌ gusanle québedxa gunle da caní da quebe bi zaca na, ne chéajle̱le chee̱ Dios ban, Bénneaꞌ be̱ne̱ꞌ xabáa ne xe̱zr la xu, ne nísadauꞌ, ne xúgute̱ da de̱ luꞌule na.
\v 16 Lu iza da ba guledé Dios be̱ꞌe̱ lataj xúgute̱ bénneache guledé̱ꞌ lu xrneza cha chee̱ꞌ, naꞌ belune̱ꞌ ca da gulaca lazre̱ꞌ,
\v 17 lácala bléꞌequezne̱ꞌ benneꞌ caꞌ nu naca Le̱ꞌ ne̱ chee̱ da chaweꞌ da dxune̱ꞌ chee̱ benneꞌ caꞌ. Le̱ꞌ dxusel-laꞌ xiuj chee̱dxu ne ca naca lina xrtante̱, ne dxunne̱ꞌ da dxechínedxu da gágudxu, ne chee̱ bedxu.
\p
\v 18 Lácala gulenná gubáz caꞌ da nigá, gúcale̱ꞌe̱ na ste̱be buluzague̱ꞌ benneꞌ caꞌ chee̱ quebe xelútie̱ꞌ be̱zr caꞌ lau le̱ꞌ chee̱ xuluxucáꞌana szrene̱ꞌ le̱ꞌ.
\p
\v 19 Gudé naꞌ belezrín bal-la benneꞌ judío, benneꞌ Antioquía, ne benneꞌ Iconio, naꞌ belegúꞌu xel-le̱ꞌ bénneache caꞌ, naꞌ buluzríe̱ꞌ Pablo xiaj. Guléquene̱ꞌ ba belutie̱ꞌ Pablo, naꞌ gulezrube xue̱ꞌ le̱ꞌ belebéaje̱ꞌ le̱ꞌ xe̱zre naꞌ.
\v 20 Gate benneꞌ caꞌ dxeléajle̱ꞌe̱ chee̱ Jesús belezrague̱ꞌ zaj naxéchaje̱ꞌ naga de̱ꞌ Pablo, naꞌ bexasa le̱ꞌ, ne bexuꞌe̱ xe̱zre naꞌ, naꞌ zra xula bezáꞌle̱ne̱ꞌ Bernabé, zjaque̱ꞌ xe̱zre Derbe.
\p
\v 21 Ca gudé bchálaje̱ꞌ dizraꞌ chaweꞌ chee̱ Jesús lu xe̱zre Derbe, naga benneꞌ zante̱ gulezíꞌ lu ne̱ꞌe̱ dizraꞌ chee̱ Dios, naꞌ gubáz caꞌ belexedée̱ꞌ xe̱zre Listra, ne xe̱zre Iconio, ne xe̱zre Antioquía.
\v 22 Lu xe̱zre caní belún chache̱ꞌ lázrdau benneꞌ caꞌ dxeléajle̱ꞌe̱ chee̱ Jesús, ne bulusízrene̱ꞌ le̱ꞌ chjácale̱ne̱ꞌ da naca chee̱ Dios, dxelé̱ꞌe̱ le̱ꞌ:
\p ―Benneꞌ xeluꞌe̱ naga dxenná bea Dios, xel-laꞌ ziꞌ zrente̱ xeledée̱ꞌ.
\p
\v 23 La gázqueze buluzúe̱ꞌ benneꞌ gula caꞌ chee̱ xuluxúe̱ꞌ tu tu cueꞌ benneꞌ caꞌ dxeléajle̱ꞌe̱ chee̱ Jesús, naꞌ ca gudé naꞌ buluzré̱ꞌe̱ benneꞌ caꞌ lu naꞌ Xránadxu, Bénneaꞌ ba guléajle̱ꞌe̱ chee̱ꞌ.
\s Pablo ne Bernabé dxelexezrine̱ꞌ lu xe̱zre Antioquía da nababa Siria
\p
\v 24 Ca gudé naꞌ belexedée̱ꞌ naga nababa Pisidia, naꞌ belezrine̱ꞌ naga nababa Panfilia.
\v 25 Buluchálaje̱ꞌ dizraꞌ chee̱ Dios lu xe̱zre Perge, naꞌ ca gudé naꞌ xjaque̱ꞌ xe̱zre Atalia.
\v 26 Naꞌ belexúꞌe̱ da dxedá laweꞌ nísadauꞌ, naꞌ belexezrine̱ꞌ xe̱zre Antioquía, naga zaj zraꞌ benneꞌ beleguꞌe̱ gubáz caꞌ lu naꞌ Dios chee̱ xelune̱ꞌ zrin naꞌ, da ba belezuene̱ꞌ naꞌa.
\v 27 Gate belezrine̱ꞌ Antioquía naꞌ, naꞌ bulutupe̱ꞌ benneꞌ caꞌ dxeléajle̱ꞌe̱ chee̱ Jesús, ne buluzenne̱ꞌ benneꞌ caꞌ xúgute̱ da ba be̱n Dios, bchínene̱ꞌ gubáz caꞌ, ne ca be̱n Xránadxu, be̱ꞌe̱ benneꞌ quebe zaj naque̱ꞌ judío lataj xeléajle̱ꞌe̱ chee̱ Jesús.
\v 28 Naꞌ Pablo, ne Bernabé belexegáꞌane̱ꞌ naꞌ zaneꞌ beuꞌ nen benneꞌ caꞌ dxeléajle̱ꞌe̱ chee̱ Jesús.
\c 15
\s Gubáz caꞌ chee̱ Jesús dxelexezrague̱ꞌ Jerusalén
\p
\v 1 Ca lu zra caꞌ, bal-la benneꞌ gusiáꞌque̱ꞌ xe̱zre caꞌ zaj nababa Judea, ne belezrine̱ꞌ xe̱zre Antioquía naꞌ, naꞌ gulezú lawe̱ꞌ dxelé̱ꞌe̱ biche ljwézredxu caꞌ dxal-laꞌ chugu lateꞌ weaj be̱laꞌ chee̱ be̱l-laꞌ dxen chee̱ benneꞌ biu caꞌ chee̱ xelelé̱ꞌ, ca gunná bea Moisés.
\v 2 Pablo ne Bernabé bulutíl-lale̱ꞌe̱ le̱ꞌ dizraꞌ, naꞌ naga xeajcheꞌte̱ na, biche ljwézredxu caꞌ buluzúe̱ꞌ Pablo, ne Bernabé, ne xezícala benneꞌ caꞌ chee̱ chjaque̱ꞌ Jerusalén chee̱ cheajlechálaje̱ꞌ chee̱ da nigá nen benneꞌ gubáz caꞌ, ne benneꞌ gula caꞌ chee̱ cueꞌ benneꞌ dxeléajle̱ꞌe̱ chee̱ Jesús zaj zre̱ꞌe̱ Jerusalén.
\p
\v 3 Benneꞌ dxeléajle̱ꞌe̱ chee̱ Jesús, benneꞌ zaj zre̱ꞌe̱ Antioquía, belexeguꞌe̱ benneꞌ caní neza, naꞌ belexedée̱ꞌ xe̱zre caꞌ zaj nababa Fenicia, ne xe̱zre caꞌ zaj nababa Samaria, naꞌ dxuluzenne̱ꞌ benneꞌ xé̱zredu caꞌ ca belún benneꞌ quebe zaj naque̱ꞌ judío, ba belexexaque̱ꞌ chee̱ Dios, naꞌ xúgute̱ biche ljwézredxu belebéle̱ꞌe̱ne̱ꞌ gate belenne̱ꞌ da nigá.
\p
\v 4 Gate Pablo ne Bernabé belexezrine̱ꞌ Jerusalén, naꞌ benneꞌ caꞌ dxeléajle̱ꞌe̱ chee̱ Jesús ne benneꞌ gubáz caꞌ, ne benneꞌ gula caꞌ gulezíꞌ lu ne̱ꞌe̱ le̱ꞌ, naꞌ Pablo ne Bernabé buluzenne̱ꞌ le̱ꞌ ca naca da be̱n Dios lu naꞌ le̱ꞌ.
\v 5 Bal-la benneꞌ fariseo caꞌ, benneꞌ ba guléajle̱ꞌe̱ chee̱ Jesús, gulezé̱ꞌ gulenné̱ꞌ:
\p ―Dxun na ba xen chugu lateꞌ weaj be̱laꞌ chee̱ be̱l-laꞌ dxen chee̱ benneꞌ biu caꞌ, benneꞌ ba guléajle̱ꞌe̱ chee̱ Jesús, benneꞌ quebe zaj naque̱ꞌ judío, ne nna beꞌedxu le̱ꞌ xuluzúe̱ꞌ dizraꞌ da bdxixruj beꞌe Moisés.
\p
\v 6 Nadxa belezraga benneꞌ gubáz caꞌ ne benneꞌ gula caꞌ, benneꞌ dxeléajle̱ꞌe̱ chee̱ Cristo, chee̱ xulucáꞌana chawe̱ꞌ da naꞌ dxaca.
\v 7 Ca gudé buluchálajle̱ ljwezre̱ꞌ chee̱ da nigá, naꞌ Pedro guxase̱ꞌ, ne guzre̱ꞌ benneꞌ caꞌ:
\p ―Biche ljwezraꞌ, nézquezle leꞌe Dios guqué̱ꞌe̱ nedaꞌ nédxute̱ ládujla leꞌe chee̱ guzendaꞌ benneꞌ quebe zaj naque̱ꞌ judío dizraꞌ chaweꞌ ca naca chee̱ Jesús, chee̱ xeléajle̱ benneꞌ caꞌ chee̱ Le̱ꞌ.
\v 8 Dios nézene̱ꞌ ca naca da xuꞌu lu xichaj lázxdau bénneache, naꞌ bléꞌene̱ꞌ dxezíꞌ lu ne̱ꞌe̱ benneꞌ caꞌ, laweꞌ da bnézruje̱ꞌ benneꞌ caꞌ Beꞌ Láꞌazxa ca be̱ne̱ꞌ chee̱dxu dxiꞌu.
\v 9 Dios quebe dxuché̱ꞌe̱ ca zríꞌine̱ꞌ tudxu xetudxu laweꞌ da bcaꞌana cháwequeze̱ꞌ lázxdau benneꞌ caꞌ guleajlí lazre̱ꞌ Jesús.
\v 10 Naꞌa, ¿bizr chee̱ naꞌ dxaca lázrele leꞌe guchale ca da ba be̱n Dios, dxuzúale tu xuaꞌ laweꞌ benneꞌ caꞌ dxeléajle̱ꞌe̱ chee̱ Jesús, da quebe gaca gúadxu dxiꞌu, ne quebe guca xelúa xra xrtáudxu na?
\v 11 Naꞌa, dxéajle̱dxu dxiꞌu bache naladxu ne̱ chee̱ xel-laꞌ zriꞌi lazreꞌ chee̱ Xránadxu Jesús, ne cáꞌanqueze zaj nalá benneꞌ caꞌ.
\p
\v 12 Nadxa xúgute̱ꞌ gulezúa zrie̱ꞌ, ne buluzé̱ nague̱ꞌ dxácate̱ dxuchalaj Pablo ne Bernabé ca naca da be̱n Dios, be̱ne̱ꞌ da zan da dxelunna bea na naca li xrtizre̱ꞌ nen xel-laꞌ waca caꞌ da za xabáa, da caꞌ be̱ne̱ꞌ lu naꞌ Pablo ne Bernabé láwela benneꞌ caꞌ quebe zaj naque̱ꞌ judío.
\v 13 Gate bexuzre buluchálaje̱ꞌ, naꞌ gunná Jacobo:
\p ―Biche ljwezraꞌ, le xene chiaꞌ.
\v 14 Simón Pedro bzenne̱ꞌ dxiꞌu ca be̱n Dios, be̱ꞌe̱ lataj benneꞌ caꞌ quebe zaj naca judío xelexexaque̱ꞌ chee̱ꞌ da nedxu lasa, bequé̱ꞌe̱ ládujla benneꞌ caꞌ bénneache xelexexaque̱ꞌ chee̱ꞌ.
\v 15 Da naꞌ guca naca na tuze nen da buluzúaj benneꞌ caꞌ buluchálaje̱ꞌ waláz chee̱ Dios, da naꞌ naxúaj na lu xiche chee̱ Dios, dxenné̱ꞌ:
\q
\v 16 Te nigá xeláꞌa
\q naꞌ xechisaꞌ ca naca lizre David da nazreꞌe.
\q Gucáꞌana chawaꞌ da nagáꞌana chee̱ na,
\q naꞌ xechísaquezaꞌ na,
\q
\v 17 chee̱ xelexílaj xúgute̱ benneꞌ xezica caꞌ Xrane̱ꞌ Dios,
\q ne cáꞌanqueze xelún xúgute̱ benneꞌ zaj zraꞌ xe̱zr la xu caꞌ,
\q benneꞌ caꞌ xelenne̱ꞌ chee̱ Laꞌ nedaꞌ.
\q
\v 18 Caꞌ dxenná Xránadxu, bléꞌene̱ꞌ da nigá nédxudaute̱.
\p
\v 19 ’Chee̱ le̱ naꞌ dxapaꞌ leꞌe quebe dxal-laꞌ gunle ze̱de benneꞌ quebe zaj naque̱ꞌ judío, benneꞌ caꞌ dxelexexaque̱ꞌ chee̱ Dios.
\v 20 Dxal-laꞌ guzúajntuꞌ chee̱ benneꞌ caꞌ dxal-laꞌ xulusane̱ꞌ da naca chee̱ bedáuꞌ xaga caꞌ u bedáuꞌ xiaj, ne quebe dxal-laꞌ xelune̱ꞌ dul-la chee̱ da dxucáꞌana sban bénneache, ne quebe dxal-laꞌ xelawe̱ꞌ be̱laꞌ chee̱ be̱ xixreꞌ, be̱ quebe bdxuaj dxen, ne quebe dxal-laꞌ xelawe̱ꞌ dxen chee̱baꞌ.
\v 21 Caní dxal-laꞌ xelune̱ꞌ laweꞌ da ca niꞌi zaj zraꞌ benneꞌ tu tu xe̱zre, benneꞌ dxuluzenne̱ꞌ bénneache ca naca da bdxixruj bea Moisés, da naꞌ dxululabe̱ꞌ lu xudauꞌ caꞌ chee̱ benneꞌ judío caꞌ tu tu zra caꞌ dxulupáꞌane̱ꞌ.
\p
\v 22 Nadxa benneꞌ gubáz caꞌ, ne benneꞌ gula caꞌ, ne xúgute̱ benneꞌ dxeléajle̱ꞌe̱ chee̱ Jesús belune̱ꞌ tuze dizraꞌ xelequé̱ꞌe̱ bal-la benneꞌ caꞌ ládujla le̱ꞌ ne xelesel-le̱ꞌ le̱ꞌ xe̱zre Antioquía nen Pablo, ne Bernabé. Belequé̱ꞌe̱ Judas, bénneaꞌ lé̱queze̱ꞌ Barsabás, ne Silas. Chupa benneꞌ caní zaj naque̱ꞌ benneꞌ blau ládujla biche ljwézredxu caꞌ.
\v 23 Bulugüé̱ꞌe̱ benneꞌ caꞌ tu xiche da dxenná na: “Netuꞌ, benneꞌ gubáz zrantuꞌ nigá, ne benneꞌ gula zrantuꞌ nigá, ne biche ljwézrele zrantuꞌ nigá, dxugápantuꞌ leꞌe diuzre, biche ljwézrentuꞌ quebe nácale judío, zrale xe̱zre Antioquía, ne leꞌe zrale xe̱zre caꞌ zaj nababa Siria, ne xe̱zre caꞌ zaj nababa Cilicia.
\v 24 Ba bénentuꞌ bal-la benneꞌ ba besiáꞌque̱ꞌ nigá, ne quebe nasél-lantuꞌ netuꞌ le̱ꞌ, naꞌ belune̱ꞌ leꞌe ze̱de nen dizraꞌ da buluchálaje̱ꞌ, ne belún zréajene̱ꞌ leꞌe, dxelenné̱ꞌ dxal-laꞌ chugu lateꞌ weaj be̱laꞌ chee̱ be̱l-laꞌ dxen chee̱le, benneꞌ biu caꞌ, ne chéajle̱le ca naca da bdxixruj beꞌe Moisés.
\v 25 Chee̱ le̱ naꞌ dxéquentuꞌ naca xrlátaje cáꞌantuꞌ bal-la benneꞌ ládujla netuꞌ chee̱ xelelé̱ꞌe̱ xedajlenné̱ꞌe̱ leꞌe nen biche ljwézredxu Bernabé ne Pablo, benneꞌ caꞌ nazríꞌi lázrele̱ꞌe̱ntuꞌ.
\v 26 Benneꞌ caní belune̱ꞌ zrin chee̱ Xránadxu Jesucristo, xjaque̱ꞌ lu da ste̱be naga gulaca lazreꞌ bénneache xelútie̱ꞌ le̱ꞌ.
\v 27 Caꞌ naca na, dxesél-lantuꞌ naga zúale Judas ne Silas, naꞌ benneꞌ caní xuluchálajle̱ne̱ꞌ leꞌe ca naca chee̱ da nigá.
\v 28 Guque Beꞌ Láꞌazxa xrlátaje, ne cáꞌanqueze netuꞌ gúquentuꞌ xrlátaje quebe bi xuaꞌ guzúantuꞌ laweꞌ leꞌe, san da canize dxun na ba xen gunle.
\v 29 Dxal-laꞌ gusanle da naca chee̱ bedáuꞌ xaga, ne bedáuꞌ xiaj caꞌ, ne quebe dxal-laꞌ gunle dul-la chee̱ da dxucáꞌana sban bénneache, ne quebe dxal-laꞌ gágule be̱laꞌ chee̱ be̱ xixreꞌ, be̱ quebe bdxuaj dxen, ne quebe dxal-laꞌ gágule dxen chee̱baꞌ. Che gunle ca naca da nadxixruj bea caní, gunle xrlátaje. Dxenábantuꞌ lau Dios gaca chaweꞌ chee̱le.”
\p
\v 30 Nadxa benneꞌ caꞌ gulesel-le̱ꞌ xjaque̱ꞌ xe̱zre Antioquía. Naꞌ buluchague̱ꞌ benneꞌ caꞌ zaj naque̱ꞌ chee̱ Dios, ne bulunézruje̱ꞌ le̱ꞌ xiche naꞌ.
\v 31 Gate biche ljwézredxu caꞌ bululabe̱ꞌ na, naꞌ gulebéle̱ꞌe̱ne̱ꞌ laweꞌ da dxue zren na le̱ꞌ.
\v 32 Judas ne Silas zaj naque̱ꞌ benneꞌ dxelenné̱ꞌ waláz chee̱ Dios. Chee̱ le̱ naꞌ buluchálajle̱ne̱ꞌ biche ljwézredxu caꞌ, belúe zrene̱ꞌ le̱ꞌ, ne bulutipe̱ꞌ lazreꞌ le̱ꞌ.
\v 33 Gate gudé guca tu chiꞌi zaj zre̱ꞌe̱ naꞌ, naꞌ benneꞌ bíchedxu caꞌ buluzé̱ꞌ benneꞌ caꞌ dizraꞌ, ne gulenabe̱ꞌ Dios sua xel-laꞌ dxebeza zri lazreꞌ nen benneꞌ caꞌ, chee̱ xesíꞌaque̱ꞌ xelexezrine̱ꞌ naga zaj zraꞌ benneꞌ caꞌ gulesel-le̱ꞌ le̱ꞌ.
\v 34 Silas gúquene̱ꞌ xrlátaje xegáꞌane̱ꞌ naꞌ.
\v 35 Cáꞌanqueze Pablo, ne Bernabé belexegáꞌane̱ꞌ lu xe̱zre Antioquía, naꞌ tu zren nen benneꞌ zandxa gulezúe̱ꞌ dxulusé̱dene̱ꞌ bénneache, ne dxuluchálaje̱ꞌ ca naca dizraꞌ chee̱ Xránadxu.
\s Dxezú lau Pablo zéaje̱ꞌ zituꞌ da gudxupeꞌ lasa guchálaje̱ꞌ chee̱ Jesús
\p
\v 36 Ca gudé naꞌ, Pablo guzre̱ꞌ Bernabé:
\p ―Xuꞌu xecha lasa cheajnnadxu biche ljwézredxu caꞌ zaj zre̱ꞌe̱ xúgute̱ xe̱zre caꞌ naga xeajchálajdxu dizraꞌ chee̱ Xránadxu, chee̱ cheajnnadxu aja dxaca zaj zre̱ꞌe̱.
\p
\v 37 Bernabé guca lazre̱ꞌ che̱ꞌe̱ Juan nen le̱ꞌ, bi naꞌ lé̱quezebeꞌ Marcos,
\v 38 san Pablo quebe guxáza lazre̱ꞌ che̱ꞌe̱-beꞌ laweꞌ da bsanbeꞌ benneꞌ caꞌ gate zaj zre̱ꞌe̱ xe̱zre caꞌ zaj nababa Panfilia, ne québedxa guxíajle̱beꞌ le̱ꞌ lu zrin chee̱ Xránadxu.
\v 39 Naꞌ Pablo, ne Bernabé bulutil-la ljwezre̱ꞌ dizraꞌ. Caꞌan guca, belexelaꞌa cha chee̱ꞌ. Bernabé guché̱ꞌe̱ Marcos, naꞌ guluꞌe̱ tu lu da dxedá laweꞌ nísadauꞌ, naꞌ xjaque̱ꞌ Chipre.
\v 40 Naꞌ Pablo guqué̱ꞌe̱ Silas, naꞌ ca gudé biche ljwézredxu caꞌ belegüe̱ꞌe̱ Pablo ne Silas lu naꞌ Xránadxu chee̱ gune̱ꞌ da chaweꞌ chee̱ benneꞌ caꞌ,
\v 41 naꞌ gusiáꞌque̱ꞌ, ne guledée̱ꞌ xe̱zre caꞌ zaj nababa Siria, ne xe̱zre caꞌ zaj nababa Cilicia, naꞌ bulutipe̱ꞌ lazreꞌ bi bíchedxu caꞌ.
\c 16
\s Timoteo dxéajle̱beꞌ Pablo ne Bernabé
\p
\v 1 Pablo ne Silas belezrine̱ꞌ xe̱zre Derbe, ne xe̱zre Listra naga belexezrague̱ꞌ tu benneꞌ cuideꞌ dxéajle̱beꞌ chee̱ Jesús, le̱beꞌ Timoteo, zriꞌine tu nuꞌula judío dxéajle̱ꞌe̱ chee̱ Jesús, san xrabeꞌ naque̱ꞌ benneꞌ griego.
\v 2 Bi bíchedxu zaj zre̱ꞌe̱ xe̱zre Listra, ne xe̱zre Iconio dxelenné̱ꞌ xrlátaje dxgua dxunbeꞌ.
\v 3 Pablo guca lazre̱ꞌ chéajle̱ Timoteo le̱ꞌ, naꞌ guchugue̱ꞌ lateꞌ be̱laꞌ chee̱ be̱l-laꞌ dxen chee̱beꞌ ca dxenná bea da bdxixruj beꞌe Moisés, chee̱ quebe xelezráꞌa benneꞌ judío caꞌ zaj zre̱ꞌe̱ naga nababa na laweꞌ da zaj neze xúgute̱ benneꞌ caꞌ naca xra Timoteo benneꞌ griego.
\v 4 Lu xúgute̱ xe̱zre naga dxeledée̱ꞌ buluzenne̱ꞌ benneꞌ bíchedxu caꞌ ca naca da zaj nadxixruj bea na belún benneꞌ gubáz caꞌ, ne benneꞌ gula caꞌ zaj zre̱ꞌe̱ Jerusalén.
\v 5 Caꞌan guca bi bíchedxu caꞌ gulezúa chúchue̱ꞌ ca dxeleajlí lazre̱ꞌ Jesús, naꞌ benneꞌ caꞌ dxeléajle̱ꞌe̱ chee̱ꞌ, tu zra tu zra zeajte̱ dxelane̱ꞌ.
\s Dxeleꞌe Pablo tu da bleꞌe Dios le̱ꞌ, dxeléꞌene̱ꞌ tu benneꞌ Macedonia
\p
\v 6 Beꞌ Láꞌazxa quebe be̱ꞌe̱ benneꞌ gubáz caꞌ lataj xuluchálaje̱ꞌ dizraꞌ chee̱ Dios naga nababa Asia. Chee̱ le̱ naꞌ guledée̱ꞌ naga nababa Frigia, ne xe̱zre caꞌ zaj nababa Galacia.
\v 7 Belezrine̱ꞌ naga nazraga xe̱zre caꞌ zaj nababa Misia. Gulaca lazre̱ꞌ chjaque̱ꞌ naga nababa Bitinia, san Beꞌ Láꞌazxa chee̱ Jesús quebe be̱ꞌe̱ le̱ꞌ lataj.
\v 8 Nadxa guledée̱ꞌ naga nababa Misia, naꞌ belezrine̱ꞌ xe̱zre Troas.
\v 9 Lu xe̱zre naꞌ Pablo bléꞌene̱ꞌ tu da ba bleꞌe Dios le̱ꞌ chizrela, bléꞌene̱ꞌ tu benneꞌ biu chee̱ ga nababa Macedonia, ze̱ꞌ dxataꞌ xuene̱ꞌ Pablo, dxenné̱ꞌ: “Gudá Macedonia nigá, gácale̱nuꞌ netuꞌ.”
\v 10 Gate bleꞌe Pablo da nigá, naꞌ benneꞌ caꞌ, ne nedaꞌ, Lucas, la gudílajte̱ntuꞌ ájala guntuꞌ chee̱ chéajntuꞌ ga nababa Macedonia laweꞌ da gúquequezentuꞌ Dios dxenné̱ꞌ netuꞌ chee̱ cheajchálajle̱ntuꞌ benneꞌ caꞌ dizraꞌ chaweꞌ ca naca chee̱ Jesús.
\s Pablo ne Silas dxelezrine̱ꞌ ciudad Filipos
\p
\v 11 Lu xe̱zre Troas naꞌ guxúꞌuntuꞌ tu lu da dxedá laweꞌ nísadauꞌ, naꞌ guxéajntuꞌ tu xe̱zr la xu da naxechaj nísadauꞌ, nazí le na Samotracia, naꞌ zra xula bzrintuꞌ xe̱zre Neápolis.
\v 12 Bezaꞌntuꞌ Neápolis, naꞌ bzrintuꞌ xe̱zre Filipos, da naca tu xe̱zre naga zaj zraꞌ benneꞌ Roma, ne naca xe̱zre blau ga nababa Macedonia. Lu xe̱zre naꞌ guzúantuꞌ tu chupa zra.
\v 13 Gate naca zra dxulupáꞌana judío caꞌ, naꞌ bdxúajntuꞌ dxuꞌa xe̱zre naꞌ, ne bzrintuꞌ dxuꞌa xe̱gu naga zaj nabéaje̱ꞌ dxeajlechálajle̱ne̱ꞌ Dios. Gudxeꞌntuꞌ naꞌ ne bchálajle̱ntuꞌ nuꞌula caꞌ zaj nazrague̱ꞌ naꞌ ca naca dizraꞌ chaweꞌ ca naca chee̱ Jesús.
\v 14 Tu nuꞌula caꞌ le̱ꞌ Lidia, naque̱ꞌ nuꞌula chee̱ xe̱zre Tiatira, nuꞌula dxute̱ꞌ ladxeꞌ zaca da naca bzawe. Nuꞌula nigá zéajle̱ne̱ꞌ da naca chee̱ Dios, naꞌ benne̱ꞌ chee̱ntuꞌ, naꞌ Xránadxu bzaniꞌe̱ lázrdawe̱ꞌ chee̱ guzíꞌ lu ne̱ꞌe̱ da dxuchalaj Pablo.
\v 15 Naꞌ bdxue nisa nuꞌula nigá nen benneꞌ zaj zre̱ꞌe̱ lizre̱ꞌ. Gudé naꞌ gutaꞌ xuene̱ꞌ netuꞌ, gunné̱ꞌ:
\p ―Che leꞌe dxéquele da li dxeajlí lazraꞌ Xránadxu, le da súale lizraꞌ.
\p Naꞌ be̱ne̱ꞌ ba xuzre begáꞌanantuꞌ naꞌ.
\p
\v 16 Tu zra gate zéajntuꞌ naga zeajchálajle̱ntuꞌ Dios, bezrágantuꞌ tu bi nuꞌula cuideꞌ xuꞌubeꞌ beꞌ xriwe̱ꞌ, ne dxenné̱ xaꞌabeꞌ ne̱ chee̱ beꞌ xriwe̱ꞌ naꞌ. Bi nuꞌula nigá xúꞌubeꞌ lu naꞌ benneꞌ caꞌ dxuluchínene̱ꞌ le̱beꞌ xadía, naꞌ xránabeꞌ caꞌ dxelezíle̱ꞌe̱ dumí da dxezibeꞌ, dxenné̱ xaꞌabeꞌ.
\v 17 Bi nuꞌula nigá guzú laubeꞌ zaꞌbeꞌ cuzru Pablo ne netuꞌ, dxennabeꞌ zizraj:
\p ―Benneꞌ caní dxelune̱ꞌ zrin chee̱ Dios szrente̱, ne dxuluzenne̱ꞌ leꞌe ájala gunle lale.
\p
\v 18 Zaneꞌ zra be̱nbeꞌ caní cadxa guque Pablo ze̱de, naꞌ bexéchaje̱ꞌ, ne guzre̱ꞌ beꞌ xriwe̱ꞌ da xuꞌubeꞌ:
\p ―Lu La Jesucristo dxenná beꞌedaꞌ lueꞌ xedxúajuꞌ lu be̱l-laꞌ dxen chee̱ bi nuꞌula nigá.
\p Naꞌ beꞌ xriwe̱ꞌ naꞌ bedxúajte̱ na.
\p
\v 19 Gate benneꞌ caꞌ dxuluchínene̱ꞌ-beꞌ xadía guleque béꞌene̱ꞌ québedxa bi xelexezíꞌe̱ ne̱ chee̱beꞌ, naꞌ gule̱l-le̱ꞌ Pablo ne Silas, naꞌ guleché̱ꞌe̱ benneꞌ caní lau benneꞌ xuꞌu laweꞌ naga zua chaleꞌaj xuꞌu laweꞌ blau.
\v 20 Naꞌ buluzúe̱ꞌ benneꞌ caní lau benneꞌ xuꞌu laweꞌ caꞌ, naꞌ gulenné̱ꞌ:
\p ―Benneꞌ caní zaj naque̱ꞌ judío ne dxelún zréajene̱ꞌ benneꞌ zaj zre̱ꞌe̱ xe̱zre chee̱dxu,
\v 21 ne dxulusé̱dene̱ꞌ ca naca da zjácale̱ne̱ꞌ, da quebe gaca sidxu, ne quebe gaca gundxu na laweꞌ da nábabadxu Roma.
\p
\v 22 Nadxa benneꞌ zaj zre̱ꞌe̱ xe̱zre naꞌ guledábague̱ꞌ Pablo ne Silas, naꞌ benneꞌ xuꞌu laweꞌ naꞌ gulenná beꞌe xeleléchaje̱ꞌ zra lana Pablo ne Silas, ne xeluꞌe̱ le̱ꞌ zrise.
\v 23 Ca gudé belúele̱ꞌe̱ le̱ꞌ, naꞌ buluzré̱ꞌe̱ le̱ꞌ lizre xia, ne gulenná béꞌene̱ꞌ benneꞌ xuꞌu lu ne̱ꞌe̱ lizre xia naꞌ guxúe xánnie̱ꞌ benneꞌ caꞌ.
\v 24 Gate benne̱ꞌ ca gulenná beꞌe̱, naꞌ bzre̱ꞌe̱ le̱ꞌ zaneꞌ lézxudxa ne bzre̱ꞌe̱ niꞌa benneꞌ caꞌ lu xe̱dxu chee̱ cuaga da dxuxru na niꞌe̱.
\p
\v 25 Gate gula dxe̱la Pablo ne Silas dxuluchálajle̱ne̱ꞌ Dios, ne dxelul-le̱ꞌ da dxelúe láꞌane̱ꞌ Dios, naꞌ xezícadxa benneꞌ zaj zre̱ꞌe̱ lizre xia dxuluzé̱ nague̱ꞌ chee̱ꞌ.
\v 26 Laꞌ naꞌte̱ guzrúꞌle̱ꞌe̱ da bxrize na ca naca lizre xia, naꞌ belexalaj xúgute̱ dxa xuꞌu caꞌ, ne belexexe̱zre du xia da zaj nadxéaj niꞌa xúgute̱ benneꞌ caꞌ zaj zre̱ꞌe̱ lizre xia.
\v 27 Naꞌ benneꞌ xuꞌu lu ne̱ꞌe̱ lizre xia naꞌ bebane̱ꞌ, ne gate bléꞌene̱ꞌ zaj naxalaj dxa xuꞌu caꞌ chee̱ lizre xia, gúlaje̱ꞌ xia chee̱ xute cuine̱ꞌ laweꞌ da dxéquene̱ꞌ ba buluxuzrúnnaj benneꞌ caꞌ zaj zre̱ꞌe lizre xia.
\v 28 Pablo gudxezre xe̱ꞌe̱, guzre̱ꞌ le̱ꞌ:
\p ―Quebe bi gune cuinuꞌ. Xúgute̱ntuꞌ zúantuꞌ nigá.
\p
\v 29 Nadxa benneꞌ naꞌ xuꞌu lu ne̱ꞌe̱ lizre xia gunabe̱ꞌ tu xiꞌ, naꞌ guxúꞌu chégüe̱ꞌ, dxezrízequeze̱ꞌ xel-laꞌ dxezrebe, naꞌ bzu zribe̱ꞌ lau Pablo ne Silas.
\v 30 Nadxa guléaje̱ꞌ benneꞌ caꞌ ne bche̱be̱ꞌ le̱ꞌ:
\p ―Leꞌe, benneꞌ, ¿bizra dxal-laꞌ gunaꞌ chee̱ laꞌ?
\p
\v 31 Benneꞌ caꞌ belexeche̱be̱ꞌ:
\p ―Guxéajle̱ chee̱ Xránadxu Jesucristo, naꞌ lauꞌ, ne cáꞌanqueze benneꞌ zaj zre̱ꞌe lizruꞌ.
\p
\v 32 Naꞌ buluchálajle̱ne̱ꞌ le̱ꞌ, ne xúgute̱ benneꞌ zaj zre̱ꞌe̱ lizre̱ꞌ ca naca dizraꞌ chee̱ Xránadxu.
\v 33 Lu xe̱la náꞌqueze benneꞌ naꞌ xuꞌu lu ne̱ꞌe̱ lizre xia gudibe̱ꞌ we̱ꞌ chee̱ Pablo ne Silas, naꞌ ca gudé naꞌ, le̱ꞌ ne xúgute̱ benneꞌ zaj zre̱ꞌe̱ lizre̱ꞌ guledxúe̱ꞌ nisa.
\v 34 Ca gudé naꞌ beche̱ꞌe̱ Pablo ne Silas lizre̱ꞌ, naꞌ bnézruje̱ꞌ da gulawe̱ꞌ, naꞌ le̱ꞌ ne benneꞌ zaj zre̱ꞌe̱ lizre̱ꞌ gulebéle̱ꞌe̱ne̱ꞌ laweꞌ da ba guléajle̱ꞌe̱ chee̱ Dios.
\p
\v 35 Che zílala benneꞌ xuꞌu laweꞌ caꞌ gulesel-le̱ꞌ bi xraꞌaga lau benneꞌ naꞌ xuꞌu lu ne̱ꞌe̱ lizre xia, ne gulenná béꞌene̱ꞌ le̱ꞌ gusane̱ꞌ Pablo ne Silas.
\v 36 Nadxa benneꞌ naꞌ xuꞌu lu ne̱ꞌe̱ lizre xia guzre̱ꞌ Pablo:
\p ―Benneꞌ xuꞌu laweꞌ caꞌ gulenná béꞌene̱ꞌ nedaꞌ gusanaꞌ leꞌe. Naꞌa waca xedxúajle du lázrele.
\p
\v 37 Pablo guzre̱ꞌ bi xraꞌaga caꞌ:
\p ―Netuꞌ nabábantuꞌ Roma, naꞌ belúꞌe̱ netuꞌ láwela benneꞌ xe̱zre caꞌ, ne quebe ne xuluchíꞌe̱ chee̱ntuꞌ, naꞌ buluzré̱ꞌe̱ netuꞌ lizre xia. Naꞌa ¿dxeléquene̱ꞌ xulusane̱ꞌ netuꞌ bagácheze? Quebe gaca. Xelída lé̱queze̱ꞌ xelexebéaje̱ꞌ netuꞌ.
\p
\v 38 Bi xraꞌaga caꞌ xeajlexezénnebeꞌ benneꞌ xuꞌu laweꞌ caꞌ, naꞌ benneꞌ caní belezrebe̱ꞌ gate guleque béꞌene̱ꞌ Pablo ne Silas zaj nababe̱ꞌ Roma.
\v 39 Naꞌ xjaque̱ꞌ lizre xia naꞌ, ne gulenabe̱ꞌ Pablo ne Silas xelezí zrene̱ꞌ chee̱ꞌ. Nadxa belexebéaje̱ꞌ le̱ꞌ, ne gulataꞌ xuene̱ꞌ le̱ꞌ xelexedxúaje̱ꞌ xe̱zre naꞌ.
\v 40 Gate Pablo ne Silas belexedxúaje̱ꞌ lizre xia naꞌ, naꞌ xjaque̱ꞌ lizre Lidia, naꞌ ca gudé buluchálajle̱ne̱ꞌ biche ljwézredxu caꞌ, ne bulutipe̱ꞌ lazre̱ꞌ, naꞌ besiáꞌque̱ꞌ.
\c 17
\s Benneꞌ zaj zre̱ꞌe̱ xe̱zre Tesalónica dxeledábague̱ꞌ Pablo
\p
\v 1 Nadxa Pablo ne Silas guledée̱ꞌ xe̱zre Anfípolis, ne xe̱zre Apolonia, naꞌ belezrine̱ꞌ xe̱zre Tesalónica, naga zua tu xudauꞌ chee̱ judío caꞌ.
\v 2 Pablo guxíaje̱ꞌ xudauꞌ naꞌ, naꞌ ca dxúnqueze̱ꞌ bchálajle̱ne̱ꞌ benneꞌ caꞌ tu tu zra dxulupáꞌane̱ꞌ du chunna da gazre zra.
\v 3 Ca da naxúaj na lu xiche chee̱ Dios, bzéajniꞌine̱ꞌ le̱ꞌ be̱n na ba xen Cristo guzí guzaque̱ꞌ, ne gutie̱ꞌ, naꞌ ca gudé naꞌ be̱n na ba xen bebane̱ꞌ ládujla benneꞌ gate. Naꞌ guzre̱ꞌ benneꞌ caꞌ:
\p ―Jesús nigáqueze, bénneaꞌ dxuzendaꞌ leꞌe chee̱ꞌ, naque̱ꞌ Cristo, Bénneaꞌ guche̱be lazreꞌ Dios sel-le̱ꞌ.
\p
\v 4 Nadxa bal-la benneꞌ judío caꞌ guléajle̱ꞌe̱ chee̱ Jesús, ne gulaque̱ꞌ tuze Pablo ne Silas. La gázqueze guléajle̱ benneꞌ zan benneꞌ griego, ne nuꞌula zan zaj naque̱ꞌ nuꞌula blau.
\v 5 Benneꞌ judío caꞌ, benneꞌ quebe dxeléajle̱ꞌe̱ chee̱ Jesús gulaque̱ꞌ xa lazreꞌ chee̱ Pablo, naꞌ buluchague̱ꞌ bal-la benneꞌ caꞌ dxelune̱ꞌ da cale̱la dxeledaze̱ꞌ, ne bulutupa ljwezre̱ꞌ, naꞌ buluzúe̱ꞌ ste̱be ca naca benneꞌ xe̱zre. Guluꞌe̱ xadía lizre Jasón, dxelexílaje̱ꞌ Pablo ne Silas, chee̱ xelebéaje̱ꞌ le̱ꞌ, ne xuludée̱ꞌ le̱ꞌ lu naꞌ benneꞌ xe̱zre caꞌ.
\v 6 Gate quebe belexezrelne̱ꞌ Pablo ne Silas lu xuꞌu naꞌ, nadxa beleché̱ꞌe̱ xadía Jasón ne xebal-la biche ljwézredxu caꞌ lau benneꞌ xuꞌu laweꞌ caꞌ chee̱ xe̱zre, naꞌ dxelebezre xe̱ꞌe̱, dxelenné̱ꞌ:
\p ―Benneꞌ caꞌ, benneꞌ ba belún zréajene̱ꞌ ca naca benneꞌ zaj zre̱ꞌe̱ xe̱zr la xu, cáꞌanqueze ba belelé̱ꞌe̱ nigá.
\v 7 Jasón nigá ba guluꞌe̱ benneꞌ caꞌ lizre̱ꞌ. Ca naca benneꞌ caꞌ dxeledábague̱ꞌ da bdxixruj bea César laweꞌ da dxelenné̱ꞌ zua xetú wenná bea, tu benneꞌ le̱ꞌ Jesús.
\p
\v 8 Gate belenne̱ꞌ da caní, naꞌ benneꞌ xe̱zre caꞌ, ne benneꞌ xuꞌu laweꞌ caꞌ gulezúe̱ꞌ ste̱be.
\v 9 Jasón, ne biche ljwézredxu caꞌ bulucáꞌane̱ꞌ dumí chee̱ gulezíꞌe̱ lataj, naꞌ benneꞌ xuꞌu laweꞌ caꞌ bulusane̱ꞌ le̱ꞌ.
\s Pablo ne Silas dxelezrine̱ꞌ xe̱zre Berea
\p
\v 10 Nadxa biche ljwézredxu gulé̱ꞌe̱ Pablo ne Silas chee̱ xesíꞌaque̱ꞌ chizrela, chee̱ chjaque̱ꞌ xe̱zre Berea. Gate belezrine̱ꞌ naꞌ, naꞌ belúꞌe̱ lu xudauꞌ chee̱ judío caꞌ.
\v 11 Benneꞌ judío caní zaj nácadxe̱ꞌ zren lazreꞌ ca benneꞌ Tesalónica caꞌ laweꞌ da du lazre̱ꞌ gulezíꞌe̱ dizraꞌ chee̱ Dios, naꞌ tu zra tu zra dxululabe̱ꞌ lu xiche chee̱ Dios chee̱ xuluxúe̱ꞌ che naca da li da dxelé̱ꞌe̱ le̱ꞌ.
\v 12 Caꞌan guca, benneꞌ zan benneꞌ judío caꞌ guléajle̱ꞌe̱ chee̱ Jesús, ne cáꞌanqueze benneꞌ griego. Benneꞌ zan guléajle̱ꞌe̱, nuꞌula blau caꞌ, ne benneꞌ biu caꞌ.
\v 13 Gate benneꞌ judío caꞌ zaj zre̱ꞌe̱ xe̱zre Tesalónica guleque béꞌene̱ꞌ dxuchalaj Pablo dizraꞌ chee̱ Dios lu xe̱zre Berea, naꞌ belezrine̱ꞌ naꞌ, ne gulegúꞌu xel-le̱ꞌ bénneache chee̱ xeledábague̱ꞌ Pablo ne Silas.
\v 14 Biche ljwézredxu caꞌ la gulesél-laꞌte̱ꞌ Pablo chéaje̱ꞌ dxuꞌa nísadauꞌ, naꞌ Silas ne Timoteo belexegáꞌane̱ꞌ lu xe̱zre Berea.
\v 15 Benneꞌ caꞌ zjácale̱ne̱ꞌ Pablo beleché̱ꞌe̱ le̱ꞌ lu xe̱zre Atenas. Nadxa benneꞌ caꞌ belexezrine̱ꞌ lazrie̱ꞌ, ne gulé̱ꞌe̱ Silas, ne Timoteo chjácazegue̱ꞌ naga zua Pablo.
\s Da dxun Pablo lu xe̱zre Atenas
\p
\v 16 Dxácate̱ naꞌ Pablo dxebeze̱ꞌ Silas ne Timoteo naga zue̱ꞌ lu xe̱zre Atenas, naꞌ guzúale̱ꞌe̱ ste̱be gate bléꞌene̱ꞌ ca naca xe̱zre naꞌ, niꞌ naze nítale̱ꞌe̱ bedáuꞌ xiaj.
\v 17 Chee̱ le̱ naꞌ bchálaje̱ꞌ lu xudauꞌ chee̱ judío caꞌ nen benneꞌ judío caꞌ, ne xezícala benneꞌ caꞌ zjácale̱ne̱ꞌ da naca chee̱ Dios, naꞌ tu zra tu zra bchálajle̱ne̱ꞌ benneꞌ caꞌ zaj zre̱ꞌe̱ laweꞌ xiꞌa.
\v 18 Bal-la benneꞌ zjácale̱ne̱ꞌ ca naca da dxuluse̱de benneꞌ caꞌ zaj le̱ꞌ benneꞌ epicureo, ne benneꞌ estoico gulezú lawe̱ꞌ dxuluchálajle̱ne̱ꞌ Pablo. Bal-le̱ꞌ gulenné̱ꞌ:
\p ―¿Bizra xe̱ga benneꞌ wechalaj nigá dxiꞌu?
\p Naꞌ xebal-le̱ꞌ gulenné̱ꞌ:
\p ―Dxéquentuꞌ naque̱ꞌ benneꞌ dxuse dizraꞌ chee̱ dios zituꞌ caꞌ.
\p Caꞌan gulenné̱ꞌ laweꞌ da dxuchalaj Pablo dizraꞌ chaweꞌ ca naca chee̱ Jesús, ne ca naca chee̱ xel-laꞌ dxexebán.
\v 19 Nadxa guleché̱ꞌe̱ Pablo lu lataj nazí le na Areópago, naga dxelezrágaqueze̱ꞌ bi xuluzén ljwezre̱ꞌ. Naꞌ buluche̱be̱ꞌ Pablo:
\p ―¿Waca guzénenuꞌ netuꞌ ca naca da cube nigá da dxusé̱denuꞌ bénneache?
\v 20 Lueꞌ dxuchálajuꞌ dizraꞌ da quebe ne xénentuꞌ, naꞌ dxaca lázrentuꞌ nézentuꞌ bi zéaje̱ ca naca da caní.
\p
\v 21 Caní gulenné̱ꞌ laweꞌ da dxuluzé̱ nágaze, ne dxuluchálajze ca naca tu dizraꞌ cube xúgute̱ benneꞌ Atenas, ne benneꞌ zituꞌ caꞌ zaj zre̱ꞌe̱ xe̱zre naꞌ.
\p
\v 22 Nadxa Pablo guzé̱ꞌ laduj benneꞌ caꞌ zaj zre̱ꞌe̱ Areópago naꞌ, naꞌ guzre̱ꞌ le̱ꞌ:
\p ―Leꞌe, benneꞌ Atenas, ca naca xúgute̱ da dxeléꞌedaꞌ, dxuléꞌe na dxápale̱ꞌe̱le ba láꞌana dios chee̱le caꞌ,
\v 23 laweꞌ da gate gudáꞌ nedaꞌ gunnáꞌa ca zaj naca xudauꞌ caꞌ naga dxue láꞌanale dios chee̱le caꞌ, naꞌ bleꞌedaꞌ tu xudáudauꞌ naga naxúaj dizraꞌ caní: Chee̱ Dios Quebe Nu Núnbea. Naꞌa, Dios naꞌ dxue láꞌanale leꞌe, ne quebe núnbeale Le̱ꞌ, chee̱ Dios naꞌ dxuchálajle̱naꞌ leꞌe.
\p
\v 24 ’Naque̱ꞌ Dios naꞌ be̱ne̱ꞌ xe̱zr la xu nigá, ne xúgute̱ da de̱ lawe na. Naque̱ꞌ Xrane xabáa, ne Xrane xe̱zr la xu nigá. Quebe zue̱ꞌ xudauꞌ da nun niꞌa naꞌ bénneache.
\v 25 Quebe nachínene̱ꞌ bi da gaca xelún bénneache chee̱ Le̱ꞌ laweꞌ da dxunna Dios náꞌqueze xúgute̱dxu xel-laꞌ nabán, ne beꞌ da dxecaꞌadxu, ne xúgute̱ da de̱.
\p
\v 26 ’Tuze benneꞌ be̱ne̱ꞌ naque̱ꞌ xra xúgute̱ cueꞌ xe̱zr la xu caꞌ chee̱ che̱ꞌe̱ du gabíꞌi xe̱zr la xu, naꞌ bléꞌene̱ꞌ zra, ne lataj naga dxal-laꞌ xelezré̱ꞌe̱,
\v 27 chee̱ xelexexílaje̱ꞌ Dios chee̱ ájala xelexezrelne̱ꞌ Le̱ꞌ lácala quebe xelúnbea xánnie̱ꞌ Le̱ꞌ, san da li Dios quebe zue̱ꞌ zituꞌ naga zua tu tudxu dxiꞌu.
\v 28 Ne̱ chee̱ Dios nigá naca bandxu, ne dxedadxu, ne zradxu. Naca ca gulenná bal-la benneꞌ wila chee̱le, gulenné̱ꞌ: “Nácadxu xrtia Dios.”
\v 29 Che nácadxu xrtia Dios, quebe dxal-laꞌ guéquedxu naca Dios ca tu bedáuꞌ oro, u tu bedáuꞌ plata, u tu bedáuꞌ xiaj, da zaj nun bénneache cáte̱ze dxululaba lázrequeze̱ꞌ.
\v 30 Dios bzue̱ꞌ chaláꞌala da belún bénneache ca niꞌte̱ lu xel-laꞌ quebe zaj neze chee̱ꞌ, san naꞌa dxenná béꞌene̱ꞌ xúgute̱ benneꞌ gátete̱ze zaj zre̱ꞌe̱ xelexebíꞌi lazre̱ꞌ.
\v 31 Dios ba nuzúe̱ꞌ tu zra gate guchiꞌe̱ chee̱ xúgute̱ bénneache lu da xrlátaje chee̱ꞌ lu naꞌ tu benneꞌ ba gucáꞌa Le̱ꞌ, naꞌ chee̱ da nigá bzue̱ꞌ tu da dxunna bea na gate bsebane̱ꞌ bénneaꞌ ládujla benneꞌ gate.
\p
\v 32 Gate benneꞌ caꞌ belenne̱ꞌ dizraꞌ nigá ca naca chee̱ tu benneꞌ bebane̱ꞌ ládujla benneꞌ gate, naꞌ bal-le̱ꞌ belún le̱ꞌ chee̱ꞌ, ne xebal-le̱ꞌ gulenné̱ꞌ:
\p ―Waca guchálajle̱nuꞌ netuꞌ ca naca da nigá xetú zra.
\p
\v 33 Nadxa Pablo bezé̱ꞌe̱ naga zaj zraꞌ benneꞌ caꞌ.
\v 34 Bal-la benneꞌ caꞌ guléajle̱ꞌe̱ chee̱ Jesús, naꞌ gulaque̱ꞌ Pablo tuze. Ládujla benneꞌ caní zua Dionisio, benneꞌ naque̱ꞌ tuze nen benneꞌ dxelezrague̱ꞌ Areópago naꞌ, ne tu nuꞌula le̱ꞌ Dámaris, ne xebal-la benneꞌ caꞌ.
\c 18
\s Pablo dxezrine̱ꞌ xe̱zre Corinto
\p
\v 1 Gudé naꞌ bezáꞌ Pablo xe̱zre Atenas, bexíaje̱ꞌ xe̱zre Corinto.
\v 2 Lu xe̱zre naꞌ xeajxraque̱ꞌ tu benneꞌ judío le̱ꞌ Aquilo, naque̱ꞌ benneꞌ nababe̱ꞌ tu xe̱zre nababa Ponto. Láteze ba guca belexezrín Aquilo, ne zruꞌule̱ꞌ Priscila ga naꞌ. Benneꞌ caní besiáꞌque̱ꞌ xe̱zr la xu Italia laweꞌ da gunná bea César Claudio xelexedxúaj xúgute̱ benneꞌ judío caꞌ xe̱zre Roma. Pablo guxíaje̱ꞌ xeajnné̱ꞌe̱ Aquilo ne Priscila,
\v 3 naꞌ laweꞌ da tuze ca naca zrin da dxelún Pablo ne Aquilo, dxelune̱ꞌ xuꞌu xide zra be̱ xixreꞌ da dxelútie̱ꞌ chee̱ benneꞌ dxjaca wedil-la, naꞌ begáꞌana Pablo nen benneꞌ caní chee̱ xelune̱ꞌ tu zren zrin.
\v 4 Tu zra tu zra gate naca zra dxulupáꞌana judío caꞌ, Pablo zéaje̱ꞌ lu xudáudauꞌ chee̱ judío caꞌ naga bchálaje̱ꞌ, ne bléꞌene̱ꞌ benneꞌ caꞌ, benneꞌ judío, ne benneꞌ quebe zaj naque̱ꞌ judío, Jesús naque̱ꞌ Cristo, Bénneaꞌ guche̱be lazreꞌ Dios sel-le̱ꞌ.
\p
\v 5 Gate belezrín Silas, ne Timoteo ga naꞌ, gudé belexesíꞌaque̱ꞌ xe̱zre caꞌ zaj nababa Macedonia, naꞌ Pablo tu dxuchálajzqueze̱ꞌ dizraꞌ chee̱ Dios, ne dxuléꞌene̱ꞌ benneꞌ judío caꞌ da li Jesús naque̱ꞌ Cristo, bénneaꞌ nasel-la Dios, bénneaꞌ dxelebeza judío caꞌ.
\v 6 Benneꞌ judío caꞌ gulezú lawe̱ꞌ dxeledábague̱ꞌ Pablo, ne dxelenné̱ꞌ schanniꞌ chee̱ꞌ. Nadxa Pablo guzribe̱ꞌ gabán chee̱ꞌ da dxuléꞌe na dxebéaj xíchaje̱ꞌ benneꞌ caꞌ, dxenné̱ꞌ:
\p ―Leꞌe nabágale chee̱ xel-laꞌ gute chee̱ bénneꞌdu xuꞌule. Québedxa nabagaꞌ nedaꞌ chee̱ na laweꞌ da ba bzendaꞌ leꞌe dizraꞌ chaweꞌ chee̱ Cristo. Náꞌate̱la guchálajle̱naꞌ benneꞌ quebe zaj naque̱ꞌ judío.
\p
\v 7 Bezé̱ꞌe̱ lu xudáudauꞌ naꞌ, naꞌ bezrine̱ꞌ lizre tu benneꞌ le̱ꞌ Justo, benneꞌ dxucáꞌana szrene̱ꞌ Dios ne zua lizre̱ꞌ cuita xudáudauꞌ chee̱ judío caꞌ.
\v 8 Naꞌ Crispo, benneꞌ xíchaje̱ chee̱ xudáudauꞌ chee̱ judío caꞌ, ne ca naca benneꞌ zaj zre̱ꞌe̱ lizre̱ꞌ guléajle̱ꞌe̱ chee̱ Xránadxu. Cáꞌanqueze benneꞌ zan benneꞌ Corinto, gate belenne̱ꞌ dizraꞌ chee̱ Dios, guléajle̱ꞌe̱ ne guledxúe̱ꞌ nisa.
\v 9 Nadxa Xránadxu bleꞌe lawe̱ꞌ Pablo tu zreꞌ tu lu da bleꞌe Dios le̱ꞌ, ne guzre̱ꞌ le̱ꞌ:
\p ―Quebe zrebuꞌ. Bchálajte̱ze, ne quebe sua zriuꞌ.
\v 10 Nedaꞌ zúale̱naꞌ lueꞌ, naꞌ quebe nu sequeꞌ bi gune lueꞌ laweꞌ da zaj zrále̱ꞌe̱ benneꞌ zaj naque̱ꞌ chiaꞌ lu xe̱zre nigá.
\p
\v 11 Caꞌan guca, begáꞌana Pablo tu iza xugachaj lu xe̱zre Corinto, dxusé̱dene̱ꞌ benneꞌ caꞌ dizraꞌ chee̱ Dios.
\p
\v 12 Lu zra caꞌ gate naca Galión benneꞌ xuꞌu lu ne̱ꞌe̱ xe̱zr la xu naꞌ naga nababa Acaya, waláz chee̱ Roma, naꞌ benneꞌ judío caꞌ guledábague̱ꞌ Pablo. Beleché̱ꞌe̱ le̱ꞌ xuꞌu laweꞌ,
\v 13 ne gulé̱ꞌe̱ benneꞌ xuꞌu lu ne̱ꞌe̱ xe̱zr la xu naꞌ:
\p ―Benneꞌ nigá dxedé̱ꞌ dxegúꞌu xel-le̱ꞌ bénneache chee̱ xelúe láꞌane̱ꞌ Dios, ne xelune̱ꞌ tu da dxedábaga da nadxixruj bea chee̱ntuꞌ.
\p
\v 14 Pablo ba zue̱ꞌ guchálaje̱ꞌ gate Galión guzre̱ꞌ benneꞌ judío caꞌ:
\p ―Chela naca na chee̱ tu da dxuzúa chaláꞌala da bdxixruj bea César u chee̱ tu da zrinnaj zren, naꞌ gun na ba xen xendaꞌ ca da dxennale leꞌe, benneꞌ judío.
\v 15 Laweꞌ da naca na chee̱ dízraꞌze, ne chee̱ la tu benneꞌ, ne chee̱ da nadxixruj bea na cheé̱zele, le gucáꞌana chaweꞌ na léꞌequeze, laweꞌ da quebe dxaca lazraꞌ nedaꞌ guchiꞌe̱ da dxaca chee̱ da caꞌ.
\p
\v 16 Nadxa bebéaje̱ꞌ benneꞌ caꞌ lu xuꞌu laweꞌ naꞌ.
\v 17 Nadxa xúgute̱ benneꞌ griego gule̱l-le̱ꞌ Sóstenes, benneꞌ xíchaje̱ chee̱ xudáudauꞌ chee̱ judío caꞌ, ne belúꞌe̱ le̱ꞌ lau benneꞌ xuꞌu lu ne̱ꞌe̱ xe̱zr la xu naꞌ, le̱ꞌ Galión. Galión naꞌ quebe be̱ꞌ lazreꞌe chee̱ da naꞌ.
\s Pablo dxezrine̱ꞌ xe̱zre Antioquía, naꞌ dxezú lawe̱ꞌ zéaje̱ꞌ
 da guxunneꞌ lasa zéaje̱ꞌ we̱n zrin chee̱ Cristo
\p
\v 18 Pablo begáꞌane̱ꞌ xe̱zre naꞌ xezaneꞌ zra. Gudé naꞌ bze̱ꞌ biche ljwézredxu caꞌ dizraꞌ, naꞌ guxúꞌe̱ tu lu da dxedá laweꞌ nísadauꞌ zéaje̱ꞌ naga nababa Siria tu zren nen Priscila ne Aquilo. Lu xe̱zre Cencrea nédxudxa gate za chuꞌe̱ lu da dxedá laweꞌ nísadauꞌ, Pablo bzuate̱ꞌ xídeze xíchaje̱ꞌ, da dxunna bea na zua tu da nache̱be lazre̱ꞌ gune̱ꞌ lau Dios.
\v 19 Gate belezrine̱ꞌ lu xe̱zre Efeso, Pablo bsane̱ꞌ Priscila ne Aquilo, naꞌ guxíaje̱ꞌ lu xudáudauꞌ chee̱ judío caꞌ, ne bchálajle̱ne̱ꞌ judío caꞌ zaj nazrague̱ꞌ naꞌ.
\v 20 Benneꞌ caꞌ gulataꞌ xuene̱ꞌ le̱ꞌ xegáꞌanadxe̱ꞌ xetú chiꞌi, naꞌ le̱ꞌ quebe guca lazre̱ꞌ.
\v 21 Nadxa Pablo bze̱ꞌ benneꞌ caꞌ dizraꞌ, dxenné̱ꞌ:
\p ―Dxun na ba xen xezrinaꞌ suaꞌ Jerusalén chee̱ súaquezaꞌ lu laní da ba zaꞌ. Weláꞌaquezaꞌ xedajnnáꞌa leꞌe che gunna Dios lataj.
\p Naꞌ guxúꞌe̱ lu da dxedá laweꞌ nísadauꞌ, ne bezé̱ꞌe̱ Efeso naꞌ.
\v 22 Gate bezrine̱ꞌ xe̱zre Cesarea, Pablo guxíaje̱ꞌ Jerusalén xeajape̱ꞌ diuzre benneꞌ caꞌ dxeléajle̱ꞌe̱ chee̱ Jesús, naꞌ gudé naꞌ guxíaje̱ꞌ xe̱zre Antioquía.
\v 23 Ca gudé guzúe̱ꞌ naꞌ tu chiꞌi, naꞌ bezé̱ꞌe̱ naꞌ, gudée̱ꞌ tu tu xé̱zredu caꞌ zaj nababa Galacia, ne xe̱zre caꞌ zaj nababa Frigia, dxutipe̱ꞌ lazreꞌ benneꞌ caꞌ dxeléajle̱ꞌe̱ chee̱ Jesús.
\s Apolos dxuchálaje̱ꞌ dizraꞌ chee̱ Dios lu xe̱zre Efeso
\p
\v 24 Ca lu zra caꞌ tu benneꞌ judío le̱ꞌ Apolos bzrine̱ꞌ lu xe̱zre Efeso, naque̱ꞌ benneꞌ xe̱zre Alejandría, lu xu Egipto. Naque̱ꞌ tu benneꞌ nupáꞌale̱ꞌe̱ xrtizre̱ꞌ, ne núnbeale̱ꞌe̱ da naxúaj na lu xiche chee̱ Dios.
\v 25 Naxéajniꞌile̱ꞌe̱ne̱ꞌ ca naca chee̱ Xránadxu, ne dute̱ lázrdawe̱ꞌ dxuchálaje̱ꞌ, dxusé̱dene̱ꞌ cáte̱ze naca chee̱ Jesús, lácala dxusé̱dezene̱ꞌ xel-laꞌ dxuchúa nisa ca be̱n Juan.
\v 26 Apolos guzú lawe̱ꞌ dxusé̱dene̱ꞌ benneꞌ caꞌ zaj zre̱ꞌe̱ xudáudauꞌ chee̱ judío caꞌ du lazre̱ꞌ. Gate belén Priscila, ne Aquilo chee̱ꞌ, naꞌ guleché̱ꞌe̱ le̱ꞌ chaláꞌala, ne buluzéajniꞌidxene̱ꞌ le̱ꞌ cáte̱ze naca dizraꞌ chee̱ Dios.
\v 27 Ca gudé naꞌ, gate guca lazreꞌ Apolos chéaje̱ꞌ naga nababa Acaya, bi bíchedxu caꞌ bulutipe̱ꞌ lazre̱ꞌ, ne buluzuaje̱ꞌ tu xiche chee̱ benneꞌ caꞌ dxeléajle̱ꞌe̱ chee̱ Jesús zaj zre̱ꞌe̱ xe̱zre caꞌ zaj nababa Acaya naꞌ chee̱ xelezíꞌ lu ne̱ꞌe̱ Apolos naꞌ. Gate bzrin le̱ꞌ naga nababa Acaya, gúcale̱le̱ꞌe̱ne̱ꞌ benneꞌ caꞌ, naꞌ Dios be̱ꞌe̱ le̱ꞌ lataj guléajle̱ꞌe̱ chee̱ Jesús.
\v 28 Apolos bléꞌene̱ꞌ lau xúgute̱ benneꞌ caꞌ ca dxeleque zréaje benneꞌ judío caꞌ, ne bléꞌene̱ꞌ ne̱ chee̱ da naxúaj na lu xiche chee̱ Dios Jesús naqueꞌ Cristo, Bénneaꞌ nasel-la Dios, Bénneaꞌ dxelebeza judío caꞌ.
\c 19
\s Pablo dxezrine̱ꞌ xe̱zre Efeso
\p
\v 1 Dxácate̱ zua Apolos lu xe̱zre Corinto, naꞌ gudé Pablo xé̱zredu caꞌ zaj dxeꞌ laduj xiꞌa caꞌ, naꞌ bzrine̱ꞌ lu xe̱zre Efeso naga xeajxraque̱ꞌ bal-la benneꞌ dxeléajle̱ꞌe̱ chee̱ Jesús.
\v 2 Naꞌ bche̱be̱ꞌ benneꞌ caꞌ:
\p ―¿Guziꞌle leꞌe Beꞌ Láꞌazxa gate guxéajle̱le?
\p Belexeche̱be̱ꞌ:
\p ―Ne quebe xénentuꞌ che zua Beꞌ Láꞌazxa.
\p
\v 3 Nadxa Pablo bche̱be̱ꞌ benneꞌ caꞌ:
\p ―¿Bi xel-laꞌ dxedxúa nisa guziꞌle leꞌe?
\p Benneꞌ caꞌ belexeche̱be̱ꞌ:
\p ―Xela dxuchúa nisa ca be̱n Juan.
\p
\v 4 Naꞌ gunná Pablo, guzre̱ꞌ benneꞌ caꞌ:
\p ―Aweꞌ, Juan bchue̱ꞌ nisa benneꞌ caꞌ belexebíꞌi lazre̱ꞌ, san guzre̱ꞌ benneꞌ caꞌ dxal-laꞌ xeléajle̱ꞌe̱ chee̱ Bénneaꞌ xide̱ꞌ ca te chee̱ le̱ꞌ, da zéaje̱ na, chee̱ Jesús, Bénneaꞌ naque̱ꞌ Cristo, nasel-la Dios.
\p
\v 5 Gate belenne̱ꞌ da nigá, naꞌ beledxúe̱ꞌ nisa lu La Xránadxu Jesús.
\v 6 Gate bze̱ naꞌ Pablo benneꞌ caꞌ, naꞌ guzúale̱ Beꞌ Láꞌazxa le̱ꞌ, naꞌ gulenné̱ꞌ dizraꞌ chee̱ benneꞌ zituꞌ da quebe buluse̱de̱ꞌ, ne buluchálaje̱ꞌ waláz chee̱ Dios.
\v 7 Benneꞌ caní zaj naca chazrínnue̱ꞌ.
\p
\v 8 Laweꞌ chunna beuꞌ dxeaj Pablo lu xuꞌu caꞌ naga buluzraga judío caꞌ naga bchálajle̱ne̱ꞌ benneꞌ caꞌ dizraꞌ chee̱ Dios, ne bléꞌene̱ꞌ benneꞌ caꞌ naca da li da dxuchálaje̱ꞌ ca naca xel-laꞌ dxenná bea chee̱ Dios.
\v 9 Bal-le̱ꞌ belún zideꞌ lázrdawe̱ꞌ, ne quebe gulaca lazre̱ꞌ xeléajle̱ꞌe̱ chee̱ Jesús, naꞌ gulenné̱ꞌ schanniꞌ chee̱ dizraꞌ chaweꞌ ca naca chee̱ Jesús láwela benneꞌ caꞌ. Nadxa Pablo bezé̱ꞌe̱ naga zaj zraꞌ benneꞌ caꞌ, ne guché̱ꞌe̱ benneꞌ caꞌ dxeléajle̱ꞌe̱ chee̱ Jesús lu xuꞌu ga dxuse̱de tu benneꞌ le̱ꞌ Tiranno, naꞌ lu xuꞌu naꞌ bchálajle̱ne̱ꞌ benneꞌ caꞌ tu zra tu zra.
\v 10 Caꞌ be̱ne̱ꞌ laweꞌ chupa iza, naꞌ caꞌan guca xúgute̱ benneꞌ zaj zre̱ꞌe̱ xe̱zre caꞌ zaj nababa Asia belenne̱ꞌ dizraꞌ chee̱ Xránadxu Jesús, benneꞌ judío caꞌ, ne benneꞌ quebe zaj naque̱ꞌ judío.
\v 11 Dios be̱ne̱ꞌ xel-laꞌ waca zriꞌa caꞌ lu naꞌ Pablo lu zra caꞌ.
\v 12 Caꞌan guca, gulequé̱ꞌe̱ ladxeꞌ caꞌ da dxuchéaj xichaj Pablo, ne ladxeꞌ caꞌ da bde̱ꞌe̱ lachuꞌe̱, naꞌ belúꞌe̱ na naga zaj de̱ benneꞌ we̱ꞌ caꞌ, naꞌ benneꞌ caní belexexaque̱ꞌ ca naca xízrawe̱ꞌ da zaj nape̱ꞌ, naꞌ beꞌ xriwe̱ꞌ caꞌ belexedxúaj na lu be̱l-laꞌ dxen chee̱ benneꞌ caꞌ.
\p
\v 13 Bal-la benneꞌ judío caꞌ, benneꞌ dxeledé̱ꞌ dxelexebéaje̱ꞌ beꞌ xriwe̱ꞌ caꞌ lu xichaj lázxdau benneꞌ caꞌ, gulaca lazre̱ꞌ xuluchínene̱ꞌ La Xránadxu Jesús chee̱ xelexebéaje̱ꞌ na, naꞌ gulé̱ꞌe̱ beꞌ xriwe̱ꞌ caꞌ:
\p ―Dxenná béꞌentuꞌ leꞌe xedxúajle lu xichaj lázxdau benneꞌ nigá lu La Jesucristo, Bénneaꞌ dxuchalaj Pablo chee̱ꞌ.
\p
\v 14 Caní belún gazre benneꞌ zaj naque̱ꞌ zriꞌine tu benneꞌ judío le̱ꞌ Esceva, naque̱ꞌ tu benneꞌ xíchaje̱ chee̱ bxruze caꞌ.
\v 15 Gate belune̱ꞌ caní, beꞌ xriwe̱ꞌ naꞌ beche̱be na chee̱ꞌ:
\p ―Núnbeꞌa Jesús, ne nezdaꞌ nuaꞌ Pablo, san leꞌe, ¿nuzra leꞌe?
\p
\v 16 Gate gunná na da nigá, naꞌ benneꞌ biu naꞌ xuꞌe̱ beꞌ xriwe̱ꞌ naꞌ, guxritie̱ꞌ guzría che̱ꞌe̱ benneꞌ caꞌ, naꞌ dute̱ xel-laꞌ wal-la chee̱ꞌ bucule̱ꞌ xúgute̱ benneꞌ caꞌ, naꞌ bé̱ꞌle̱ꞌe̱ benneꞌ caꞌ cadxa buluzrúnnuje̱ꞌ lu xuꞌu naꞌ galaꞌ xídeze, ne dxelaque̱ꞌ dxen.
\v 17 Xúgute̱ benneꞌ zaj zre̱ꞌe̱ xe̱zre Efeso, benneꞌ judío caꞌ, ne benneꞌ quebe zaj naque̱ꞌ judío, belenne̱ꞌ ca guca da nigá, naꞌ chee̱ le̱ naꞌ belezrébele̱ꞌe̱, ne bulucáꞌana szrene̱ꞌ La Xránadxu Jesús.
\p
\v 18 Cáꞌanqueze benneꞌ zan láwela benneꞌ caꞌ dxeléajle̱ꞌe̱ chee̱ Jesús belelé̱ꞌe̱ dxelexrúale̱pe̱ꞌ da cale̱la da belune̱ꞌ,
\v 19 naꞌ benneꞌ zan, benneꞌ belúne̱ꞌ xel-laꞌ wazráꞌ, zaj nuꞌe̱ xiche chee̱ wazráꞌ, naꞌ buluzezxe̱ꞌ na lau xúgute̱ benneꞌ caꞌ. Gate bululabe̱ꞌ ca gulezaca xiche caꞌ, naꞌ gulenézene̱ꞌ gulezaca na ca gazxu gaxúa cueꞌ tu gaxúa dumí plata.
\v 20 Caꞌan guca, guxíaj bzriluj dizraꞌ chee̱ Xránadxu, ne bleꞌe na xel-laꞌ waca chee̱ na.
\p
\v 21 Gudé naꞌ Pablo guca lazre̱ꞌ tée̱ꞌ xé̱zredu caꞌ zaj nababa Macedonia, ne Acaya, naꞌ te naꞌ chéaje̱ꞌ xe̱zre Jerusalén. Gunné̱ꞌ ca te chéaje̱ꞌ Jerusalén, naꞌ dxal-laꞌ cheajte̱ꞌ xe̱zre Roma.
\v 22 Nadxa gusel-le̱ꞌ chupa benneꞌ dxelácale̱ le̱ꞌ, Timoteo ne Erasto, naga nababa Macedonia, dxácate̱ begáꞌana le̱ꞌ xetú chiꞌi naga nababa Asia.
\s Benneꞌ xe̱zre Efeso dxeledábague̱ꞌ Pablo
\p
\v 23 Ca lu zra naꞌ benneꞌ zan guledábague̱ꞌ dizraꞌ chaweꞌ ca naca chee̱ Jesús,
\v 24 da naꞌ guca na ne̱ chee̱ tu benneꞌ le̱ꞌ Demetrio, benneꞌ gubizre plata. Benneꞌ nigá dxune̱ꞌ níchudu caꞌ da zaj naca plata ca xudauꞌ chee̱ dios nuꞌula le̱ꞌ Diana, naꞌ benneꞌ caꞌ dxelúnle̱ne̱ꞌ le̱ꞌ zrin nigá dxelezíꞌle̱ꞌe̱ dumí.
\v 25 Demetrio naꞌ bchague̱ꞌ benneꞌ caní tu zren nen xezica benneꞌ dxelune̱ꞌ zrin caní, naꞌ guzre̱ꞌ benneꞌ caꞌ:
\p ―Leꞌe, benneꞌ, nézquezle lu zrin nigá dxaca chee̱dxu da cháwele̱ꞌe̱,
\v 26 naꞌ ca dxeléꞌequezle leꞌe ne dxenle, Pablo nigá dxedé̱ꞌ dxenné̱ꞌ dios caꞌ da zaj nun bénneache quebe zaj naca na dios, naꞌ caní ba bsé̱dene̱ꞌ benneꞌ zan, quegá Efeso nigáze, san du ca nababa Asia.
\v 27 Da nigá nácale̱ꞌe̱ na ste̱be chee̱dxu, laweꞌ da ca naca zrin chee̱dxu nigá nazruzre cuía xi na, ne la gaze xudauꞌ chee̱ dios nuꞌula Diana nazruzre nite xel-laꞌ nuzé̱ chee̱ na, naꞌ caní xegáꞌana ditaj ca naca xel-laꞌ szren chee̱ dios nuꞌula, bénneaꞌ dxelúe láꞌana ca naca benneꞌ zaj zre̱ꞌe̱ ga nababa Asia, ne du ca naca bénneache zaj zre̱ꞌe̱ xe̱zr la xu.
\p
\v 28 Gate belenne̱ꞌ da nigá, naꞌ belezráꞌale̱ꞌe̱ benneꞌ caꞌ, ne gulebezre xe̱ꞌe̱, dxelenné̱ꞌ:
\p ―¡Gaꞌana szren Diana, dios chee̱dxu, benneꞌ Efeso!
\p
\v 29 Naꞌ ca naca benneꞌ zaj zre̱ꞌe̱ xe̱zre naꞌ guleque zréajene̱ꞌ. Gule̱le̱ꞌ Gayo, ne Aristarco, benneꞌ Macedonia dxeledále̱ne̱ꞌ Pablo, naꞌ gulezrube xue̱ꞌ benneꞌ caní chaleꞌaj xuꞌu laweꞌ.
\v 30 Pablo guca lazre̱ꞌ chuꞌe̱ naꞌ chee̱ guchálajle̱ne̱ꞌ benneꞌ caꞌ, san bi bíchedxu caꞌ quebe gulegúꞌe̱ le̱ꞌ lataj.
\v 31 Cáꞌanqueze bal-la benneꞌ xuꞌu laweꞌ chee̱ xe̱zre caꞌ zaj nababa Asia gulesel-le̱ꞌ benneꞌ xeaje̱zre̱ꞌ Pablo quebe dxal-laꞌ chuꞌe̱ naꞌ.
\v 32 Dxácate̱ naꞌ, naga zaj nazraga benneꞌ caꞌ, bal-le̱ꞌ gulebezre xe̱ꞌe̱, tu da dxelenné̱ꞌ, naꞌ xebal-le̱ꞌ dxelebezre xe̱ꞌe̱, dxelenné̱ꞌ da xula, laweꞌ da beledxéꞌena zraga benneꞌ zan, naꞌ benneꞌ zante̱ quebe zaj nézene̱ꞌ bizr chee̱ naꞌ zaj nazrague̱ꞌ naꞌ.
\v 33 Nadxa benneꞌ judío caꞌ buluzúe̱ꞌ Alejandro lau benneꞌ caꞌ chee̱ guzéajniꞌine̱ꞌ le̱ꞌ ca naca da nigá, naꞌ le̱ꞌ guchisa ne̱ꞌe̱ chee̱ xelezúa zri benneꞌ caꞌ laweꞌ da guca lazre̱ꞌ guchálajle̱ne̱ꞌ benneꞌ zan caꞌ da gácale̱ na judío caꞌ.
\v 34 Gate benneꞌ zan caꞌ guleque béꞌene̱ꞌ naque̱ꞌ benneꞌ judío, naꞌ gulebezre xaꞌa xúgute̱ꞌ ca chupa hora, dxelenné̱ꞌ:
\p ―¡Gaꞌana szren Diana, dios chee̱dxu, benneꞌ Efeso!
\p
\v 35 Nadxa benneꞌ dxuzúaje̱ꞌ ne̱ chee̱ xe̱zre naꞌ, gate ba bzua zrie̱ꞌ benneꞌ zan caꞌ, gunné̱ꞌ:
\p ―Leꞌe, benneꞌ Efeso. Ca naca bénneache zaj zraꞌ xe̱zr la xu nigá zaj nézene̱ꞌ benneꞌ zaj zre̱ꞌe̱ xe̱zre Efeso nigá zaj nabague̱ꞌ xuluxúe̱ꞌ xudauꞌ chee̱ dios nuꞌula Diana, ne bedáuꞌ chee̱ꞌ da bexruj na zran xabáa.
\v 36 Quebe nu sequeꞌ tábagaꞌ da nigá. Chee̱ le̱ naꞌ le sua zrize, ne quebe bi gunle da quebe ne guxúe xánnele.
\v 37 Benneꞌ caní nache̱ꞌle nigá quebe bi da cale̱la ne xelune̱ꞌ, ne quebe bi schanniꞌ ne xelenné̱ꞌ chee̱ dios nuꞌula chee̱le.
\v 38 Che Demetrio, ne benneꞌ caꞌ dxelune̱ꞌ zrin nen le̱ꞌ dxelaca lazre̱ꞌ xelagu zria chee̱ tu benneꞌ, zaj zraꞌ benneꞌ dxuluchiꞌe̱ da dxaca, ne zaj zua xuꞌu laweꞌ caꞌ naga gaca xelawe̱ꞌ zría chee̱ benneꞌ caꞌ.
\v 39 Naꞌ che leꞌe bi xetú da nábale, dxal-laꞌ nábale na naga zaj nazraga benneꞌ xuꞌu laweꞌ ca dxenná bea da bdxixruj bea César.
\v 40 Naꞌa zúadxu ste̱be ga gaze nu gagu zria chee̱dxu ca naca da be̱ndxu, xelenné̱ꞌ dxedábagadxu xuꞌu laweꞌ laweꞌ da quebe sequeꞌ bi xeché̱bedxu che nu gagu zria dxiꞌu ne̱ chee̱ da guca naꞌa.
\p
\v 41 Ca gudé gunné̱ꞌ da nigá, naꞌ bze̱ꞌ benneꞌ zan caꞌ dizraꞌ.
\c 20
\s Pablo dxedée̱ꞌ ga nababa Macedonia ne Grecia
\p
\v 1 Gate gudé guca da ste̱be naꞌ lu xe̱zre Efeso, naꞌ Pablo btupe̱ꞌ benneꞌ caꞌ dxeléajle̱ꞌe̱ chee̱ Jesús chee̱ guzéajniꞌine̱ꞌ le̱ꞌ. Nadxa bze̱ꞌ benneꞌ caꞌ dizraꞌ, ne bnide̱ꞌ le̱ꞌ, naꞌ guzé̱ꞌe̱ zéaje̱ꞌ xe̱zre caꞌ zaj nababa Macedonia.
\v 2 Xeajné̱ꞌe̱ bíchedxu caꞌ zaj zre̱ꞌe̱ xúgute̱ xé̱zredu caꞌ, ne btípale̱ꞌe̱ lazreꞌ benneꞌ caꞌ ne̱ chee̱ dizraꞌ da bchálajle̱ne̱ꞌ le̱ꞌ. Ca gudé naꞌ bezrine̱ꞌ naga nababa Grecia.
\v 3 Begáꞌane̱ꞌ naꞌ chunna beuꞌ, naꞌ gudé naꞌ gate ba zuate̱ꞌ chuꞌe̱ tu lu da dxedá laweꞌ nísadauꞌ chéaje̱ꞌ xe̱zre caꞌ zaj nababa Siria, guque béꞌene̱ꞌ ba zaj nun judío caꞌ ca da xelune̱ꞌ chee̱ꞌ. Chee̱ le̱ naꞌ gulúꞌu biꞌe̱ xezé̱ꞌe̱ niꞌe̱ tée̱ꞌ naga nababa Macedonia.
\v 4 Belún le̱ꞌ tuze Sópater, benneꞌ xe̱zre Berea, ne Aristarco, ne Segundo, benneꞌ xe̱zre Tesalónica naꞌ, ne Gayo, benneꞌ xe̱zre Derbe, ne Timoteo, ne Tíquico, ne Trófimo, benneꞌ caꞌ chee̱ xe̱zre caꞌ zaj nababa Asia.
\v 5 Bi bíchedxu caní gulebía lawe̱ꞌ launtuꞌ, nedaꞌ, Lucas, ne xezícadxa ljwezre Pablo, naꞌ gulebeze̱ꞌ netuꞌ lu xe̱zre Troas.
\v 6 Netuꞌ, gate gudé laní gate dxelagu benneꞌ judío xeta xtila da quebe nachixre cua zichaj chee̱ na, guxúꞌuntuꞌ tu lu da dxedá laweꞌ nísadauꞌ, naꞌ bezaꞌntuꞌ xe̱zre Filipos. Zra gazxuꞌ zra naꞌ xeajzrentuꞌ bi bíchedxu caꞌ lu xe̱zre Troas, naga guzúantuꞌ gazre zra.
\s Da be̱n Pablo lu xe̱zre Troas
\p
\v 7 Zra nedxu chee̱ da gazre zra bezrágantuꞌ chee̱ gáguntuꞌ da dxusá lázredxu ca guca gate gute Xránadxu, naꞌ Pablo bsé̱dene̱ꞌ bi bíchedxu caꞌ. Be̱n na ba xen xezaꞌntuꞌ zra xula, naꞌ chee̱ le̱ naꞌ bchálajqueze Pablo cadxa bzrinte̱ dxe̱la.
\v 8 Nazrágantuꞌ tu xuꞌu da zua chunna cuía sibe, naꞌ zaj zé̱le̱ꞌe̱ xiꞌ da dxulusení na.
\v 9 Tu bi cuideꞌ zríabeꞌ ga dxuꞌu leníꞌ, naꞌ gate Pablo bsetúnnadxe̱ꞌ xrtizre̱ꞌ, naꞌ guca wásele̱ꞌe̱ bi cuideꞌ naꞌ, naꞌ naga xeajchete̱ na, naꞌ dxásete̱beꞌ gubíxrebeꞌ chunna cuía sibe, naꞌ xeajlechise̱ꞌ-beꞌ ba nátebeꞌ.
\v 10 Nadxa betaj Pablo, naꞌ gulégüe̱ꞌ bequé̱ꞌe̱-beꞌ, ne bnide̱ꞌ-beꞌ. Nadxa guzre̱ꞌ bi bíchedxu caꞌ:
\p ―Quebe zrébele. Nabanbeꞌ.
\p
\v 11 Nadxa Pablo begüéne̱ꞌ bezrine̱ꞌ chunna cuía sibe naꞌ. Naꞌ bzúzruje̱ꞌ xeta xtila gudawe̱ꞌ, naꞌ bezú lawe̱ꞌ dxuchálaje̱ꞌ cadxa guxaníꞌte̱. Zra naꞌ bezé̱ꞌe̱ naꞌ.
\v 12 Nadxa bíchedxu caꞌ belexeché̱ꞌe̱ bi naꞌ gubíxrebeꞌ ba bexaca banbeꞌ, naꞌ xúgute̱ꞌ gulezúe̱ꞌ lu xel-laꞌ dxelezrén lazreꞌ.
\s Pablo dxexeze̱ꞌe̱ xe̱zre Troas xezrine̱ꞌ xe̱zre Mileto
\p
\v 13 Netuꞌ guzría launtuꞌ lau Pablo, naꞌ guxuꞌuntuꞌ lu da dxedá laweꞌ nísadauꞌ, naꞌ bzrintuꞌ xe̱zre Asón naga xezrágantuꞌ Pablo ca ba nun le̱ꞌ laweꞌ da guca lazre̱ꞌ zéaje̱ꞌ níꞌaze̱ꞌ.
\v 14 Gate bezrágantuꞌ le̱ꞌ lu xe̱zre Asón, naꞌ guxúꞌe̱ lu da dxedá laweꞌ nísadauꞌ naga xuꞌuntuꞌ, naꞌ guxíajntuꞌ xe̱zre Mitilene.
\v 15 Bezaꞌntuꞌ naꞌ, naꞌ zra xula bedentuꞌ le nnaꞌ xe̱zre Quío, naꞌ xetú zra, zra xula bezrintuꞌ lu xe̱zre Samos. Naꞌ guzúantuꞌ xe̱zre Trogilio naga bezíꞌ lázrentuꞌ, naꞌ zra xula bzrintuꞌ xe̱zre Mileto.
\v 16 Caꞌ be̱ntuꞌ chee̱ quebe guzréꞌte̱cantuꞌ naga nababa Asia. Chee̱ le̱ naꞌ Pablo quebe guca lazre̱ꞌ chéaje̱ꞌ Efeso laweꞌ da guca lazre̱ꞌ xezrinze̱ꞌ lu xe̱zre Jerusalén chee̱ sue̱ꞌ naꞌ lu zra Pentecostés che ba guca.
\s Pablo dxuchálajle̱ne̱ꞌ benneꞌ gula dxeléajle̱ꞌe̱ chee̱ Jesús,
 benneꞌ zaj zre̱ꞌe̱ Efeso
\p
\v 17 Ca zrantuꞌ lu xe̱zre Mileto, Pablo gusel-le̱ꞌ tu benneꞌ cheajnné̱ꞌ benneꞌ gula caꞌ dxeléajle̱ꞌe̱ chee̱ Jesús zaj zre̱ꞌe̱ xe̱zre Efeso.
\v 18 Gate beleláꞌ benneꞌ caꞌ, Pablo guzre̱ꞌ le̱ꞌ:
\p ―Leꞌe nézquezle ca be̱naꞌ nedaꞌ xúgute̱ zra ca gudé blaꞌa ga nababa Asia.
\v 19 Xúgute̱ zra guzúaꞌ láwela leꞌe dxunaꞌ zrin chee̱ Xránadxu dute̱ xel-laꞌ dxexruj lazreꞌ, ne zaneꞌ lasa gudxezraꞌ, naꞌ gudéaꞌ lu zaneꞌ da guzxacaꞌ ca naca da gulaca lazreꞌ benneꞌ judío caꞌ xelune̱ꞌ chiaꞌ.
\v 20 Bchálajle̱naꞌ leꞌe xúgute̱ da naca na xrlátaje, ne bsé̱dedaꞌ leꞌe láwela benneꞌ zan, ne lízrquezle.
\v 21 Benneꞌ zaj naque̱ꞌ judío, ne benneꞌ quebe zaj naca judío, gúchequezaꞌ benneꞌ caꞌ dxal-laꞌ xelexebíꞌi lazre̱ꞌ lau Dios, ne xeléajle̱ꞌe̱ chee̱ Xránadxu Jesucristo.
\v 22 Naꞌa zexáꞌa Jerusalén, ca dxenná beꞌe Beꞌ Láꞌazxa nedaꞌ, ne quebe nezdaꞌ bi gaca chiaꞌ naꞌ.
\v 23 Tuze da nezdaꞌ, lu xúgute̱ xe̱zre caꞌ naga dxedéaꞌ, Beꞌ Láꞌazxa dxe̱ꞌe̱ nedaꞌ dxal-laꞌ chuꞌa lizre xia, ne teaꞌ zaneꞌ xel-laꞌ ziꞌ.
\v 24 Quebe dxebeꞌa gunne xue chee̱ da nigá, ne quebe bi zaca xel-laꞌ nabán chiaꞌ, san tuze che gaca chéajle̱naꞌ ca naca da dxunaꞌ, ne chee̱ gusexúzrquezaꞌ gunaꞌ ca naca da nusebaga Xránadxu Jesús nedaꞌ, guchálajaꞌ dizraꞌ chaweꞌ ca nazríꞌi Dios dxiꞌu.
\p
\v 25 ’Nézquezdaꞌ netule leꞌe, ba bchálajle̱naꞌ leꞌe ca dxenná bea Dios, québedxa léꞌele nedaꞌ.
\v 26 Chee̱ le̱ naꞌ, dxaca lazraꞌ xapaꞌ leꞌe naꞌa, quebe nabagaꞌ zria ne̱ chee̱ tule leꞌe,
\v 27 laweꞌ da ba bzendaꞌ leꞌe ca naca da dxaca lazreꞌ Dios gune̱ꞌ, ne quebe bi bcáꞌanaꞌ da quebe bzéajniꞌidaꞌ leꞌe.
\v 28 Chee̱ le̱ naꞌ, le guxúe cuínale, ne le guxúe ca naca benneꞌ caꞌ nácale tuze, benneꞌ caꞌ Beꞌ Láꞌazxa ba nuzúe̱ꞌ leꞌe ládujla le̱ꞌ chee̱ chuꞌu lu naꞌle guxuele benneꞌ caꞌ zaj nazrague̱ꞌ chee̱ Xránadxu, benneꞌ caꞌ naxáꞌawene̱ꞌ nen dxen cheé̱queze̱ꞌ.
\v 29 Nezdaꞌ gate xezáꞌa nedaꞌ xeleláꞌ bal-la benneꞌ xelaca lazre̱ꞌ guzría xiꞌe̱ benneꞌ zaj nazraga chee̱ Xránadxu ca dxelún becuꞌ xiꞌa, be̱ snia caꞌ dxuluzría xibaꞌ zrilaꞌ caꞌ.
\v 30 Ládujla leꞌe weleláꞌ bal-la benneꞌ xulusé̱dene̱ꞌ da we̱n lazreꞌ, ne quegá da li, chee̱ chjácale̱ benneꞌ caꞌ dxeléajle̱ꞌe̱ chee̱ Jesús le̱ꞌ.
\v 31 Chee̱ le̱ naꞌ, le guxúe cuínale. Le gusáꞌ lázrele ca be̱naꞌ chun iza, te zra ne chizrela quebe bsanaꞌ bzéajniꞌidaꞌ leꞌe tu tule leꞌe, ne gudxézreteaꞌ.
\p
\v 32 ’Naꞌa, biche ljwezraꞌ, dxuzúaꞌ leꞌe lu naꞌ Dios, ne lu dizraꞌ chee̱ xel-laꞌ zriꞌi lazreꞌ chee̱ꞌ, da napa na xel-laꞌ waca chee̱ gun na leꞌe benneꞌ chuchu lazreꞌ, ne chee̱ guzúa na leꞌe láwela xúgute̱ benneꞌ caꞌ ba guleaj Dios cheé̱queze̱ꞌ.
\v 33 Quebe guca lazraꞌ nedaꞌ siꞌa chiaꞌ dumí ne zra lana nu benneꞌ.
\v 34 Nézquezle leꞌe ca be̱naꞌ, be̱naꞌ zrin nen niꞌa náꞌquezaꞌ chee̱ gutaꞌ da guchínnedaꞌ nedaꞌ, ne da gulechinne benneꞌ caꞌ gulaque̱ꞌ nedaꞌ tuze.
\v 35 Bléꞌequezdaꞌ leꞌe, caꞌan dxal-laꞌ gunle zrin chee̱ séquele gácale̱le benneꞌ dxelexazrje. Bsa lázrele xrtizraꞌ Xránadxu Jesús, gate gunné̱ꞌ: “Ba neza zrendxa naca na chee̱ benneꞌ dxunezruj, quézcala chee̱ benneꞌ siꞌ lu ne̱ꞌe̱.”
\p
\v 36 Ca gudé gunná Pablo da nigá, naꞌ bzu zribe̱ꞌ, ne bchálajle̱ne̱ꞌ Dios nen xúgute̱ benneꞌ caꞌ.
\v 37 Xúgute̱ꞌ gulebezre̱ꞌ, naꞌ bulunide̱ꞌ, ne bulunupe̱ꞌ Pablo.
\v 38 Belexewíꞌinele̱ꞌe̱ne̱ꞌ laweꞌ da guzre̱ꞌ le̱ꞌ québedxa xeleléꞌene̱ꞌ le̱ꞌ. Naꞌ xjácale̱ne̱ꞌ le̱ꞌ naga bexuꞌe̱ lu da dxedá laweꞌ nísadauꞌ.
\c 21
\s Pablo dxezrine̱ꞌ xe̱zre Jerusalén
\p
\v 1 Gate bezaꞌntuꞌ naga zaj zraꞌ bi bíchedxu caꞌ, naꞌ bexúꞌuntuꞌ lu da dxedá laweꞌ nísadauꞌ, naꞌ bexíajteczentuꞌ naga dxeꞌ xe̱zre Cos, naꞌ zra xula gudentuꞌ naga dxeꞌ xe̱zre Rodas, naꞌ gudé naꞌ bzrintuꞌ xe̱zre Pátara.
\v 2 Lu xe̱zre Pátara xeajxrácantuꞌ tu da dxedá laweꞌ nísadauꞌ da zeaj na naga nababa Fenicia. Naꞌ guxuꞌuntuꞌ lu da dxedá laweꞌ nísadauꞌ nigá, naꞌ bezaꞌntuꞌ naꞌ.
\v 3 Gate gudentuꞌ naga dxeꞌ xe̱zr la xu Chipre, bléꞌentuꞌ na chaláꞌa xéglala, naꞌ bexíajteczentuꞌ, bzrintuꞌ lu xe̱zre caꞌ zaj nababa Siria. Lu xe̱zre Tiro be̱n na ba xen xuluxulétaje̱ꞌ xuaꞌ da nua da dxedá laweꞌ nísadauꞌ naꞌ, naꞌ chee̱ le̱ naꞌ bzrintuꞌ naꞌ.
\v 4 Naꞌ bezrágantuꞌ benneꞌ caꞌ dxeléajle̱ꞌe̱ chee̱ Jesús, benneꞌ zaj zre̱ꞌe̱ xe̱zre Tiro naꞌ, naꞌ begáꞌanantuꞌ nen benneꞌ caꞌ gazre zra. Benneꞌ caní, laweꞌ da bzéajniꞌi Beꞌ Láꞌazxa le̱ꞌ da gaca, gulé̱ꞌe̱ Pablo quebe dxal-laꞌ chéaje̱ꞌ Jerusalén.
\v 5 Gate gudé guca gazre zra caꞌ, naꞌ zua xezaꞌntuꞌ naꞌ. Xúgute̱ benneꞌ caꞌ dxeléajleꞌe̱ chee̱ Xránadxu, ne zruꞌule̱ꞌ caꞌ, ne bidu chee̱ꞌ caꞌ gusáꞌacale̱ne̱ꞌ netuꞌ bedxúajte̱ntuꞌ xe̱zre naꞌ, naꞌ dxuꞌa nísadauꞌ naꞌ bzu zríbentuꞌ bchálajle̱ntuꞌ Dios.
\v 6 Nadxa bze̱ ljwézrentuꞌ dizraꞌ, ne bnídate̱ ljwézrentuꞌ. Nadxa bexúꞌuntuꞌ lu da dxedá laweꞌ nísadauꞌ, naꞌ bi bíchedxu caꞌ belexezrine̱ꞌ lizre̱ꞌ.
\p
\v 7 Bezaꞌntuꞌ Tiro, gudentuꞌ lu nísadauꞌ, ne bzrínte̱ntuꞌ xe̱zre Tolemaida, naga bgápantuꞌ bi bíchedxu caꞌ diuzre, ne begáꞌanantuꞌ nen benneꞌ caꞌ tu zra.
\v 8 Zra xula Pablo, ne netuꞌ zrále̱ntuꞌ le̱ꞌ bezáꞌntuꞌ naꞌ, naꞌ bzrintuꞌ xe̱zre Cesarea. Naꞌ bzrintuꞌ lizre Felipe, benneꞌ dxedá dxuchálaje̱ꞌ dizraꞌ chee̱ Dios. Naque̱ꞌ tu benneꞌ gazre, benneꞌ caꞌ buluzúa gubáz caꞌ xelune̱ꞌ zrin chee̱ Jesús. Begáꞌanantuꞌ nen benneꞌ nigá.
\v 9 Felipe naꞌ zaj zraꞌ tapa zríꞌine̱ꞌ nuꞌula quebe ne xuluchaga naꞌabeꞌ, ne dxuluchálajbeꞌ waláz chee̱ Dios.
\v 10 Guzúantuꞌ naꞌ zaneꞌ zra gate blaꞌ tu benneꞌ le̱ꞌ Agabo chee̱ xe̱zre caꞌ zaj nababa Judea. Naque̱ꞌ benneꞌ dxuchálaje̱ꞌ waláz chee̱ Dios.
\v 11 Agabo naꞌ bide̱ꞌ bedajnné̱ꞌe̱ netuꞌ. Guqué̱ꞌe̱ bazxu dxuꞌa le̱ꞌe̱ chee̱ Pablo, naꞌ bchéaje̱ꞌ na niꞌa naꞌ cuine̱ꞌ, dxenné̱ꞌ:
\p ―Beꞌ Láꞌazxa dxenné̱ꞌ judío caꞌ lu xe̱zre Jerusalén xuluchéaj caní benneꞌ xrane bazxu dxuꞌa le̱ꞌe̱ nigá, naꞌ xuludée̱ꞌ le̱ꞌ lu naꞌ benneꞌ zituꞌ caꞌ.
\p
\v 12 Gate bentuꞌ netuꞌ, ne benneꞌ Cesarea da nigá, naꞌ gutaꞌ xuentuꞌ Pablo quebe chéaje̱ꞌ Jerusalén.
\v 13 Pablo beche̱be̱ꞌ:
\p ―¿Bizr chee̱ naꞌ dxebézrele, ne dxuzúale nedaꞌ xel-laꞌ dxewíꞌine lazreꞌ? Ba zúaquezaꞌ, quegá tuze xuluchéaje̱ꞌ nedaꞌ, san la gázqueze zuaꞌ chee̱ gatiaꞌ lu xe̱zre Jerusalén ne̱ chee̱ Xránadxu Jesús.
\p
\v 14 Gate guque béꞌentuꞌ quebe séquentuꞌ guzágantuꞌ Pablo, naꞌ québedxa bi gúzrentuꞌ le̱ꞌ, dxennantuꞌ:
\p ―Gaca ca dxaca lazreꞌ Xránadxu.
\p
\v 15 Gudé naꞌ bseníꞌantuꞌ chee̱ntuꞌ, naꞌ guxíajntuꞌ Jerusalén.
\v 16 Naꞌ gusiáꞌacale̱ bal-la benneꞌ netuꞌ, benneꞌ Cesarea dxeléajle̱ꞌe̱ chee̱ Jesús, naꞌ ládujla benneꞌ caꞌ zua tu benneꞌ Chipre le̱ꞌ Mnasón, zaneꞌ iza ba zeaj dxéajle̱ꞌe̱ chee̱ Jesús, naꞌ lizre benneꞌ nigá dxal-laꞌ zrintuꞌ súantuꞌ.
\s Pablo zeajnné̱ꞌe̱ Jacobo
\p
\v 17 Gate bzrintuꞌ Jerusalén, bi bíchedxu caꞌ belezíꞌ lu ne̱ꞌe̱ netuꞌ dute̱ xel-laꞌ dxelebé.
\v 18 Zra xula Pablo guxíajle̱ne̱ꞌ netuꞌ xeajnnáꞌntuꞌ Jacobo, naꞌ zaj zráꞌqueze naꞌ xúgute̱ benneꞌ gula caꞌ dxeléajle̱ꞌe̱ chee̱ Jesús.
\v 19 Pablo bgape̱ꞌ le̱ꞌ diuzre, naꞌ bzenne̱ꞌ benneꞌ caꞌ tu tu da be̱n Dios lu naꞌ le̱ꞌ ládujla benneꞌ quebe zaj naque̱ꞌ judío.
\v 20 Gate belenne̱ꞌ caꞌ, naꞌ belúe láꞌane̱ꞌ Dios. Nadxa gulé̱ꞌe̱ Pablo:
\p ―Chaweꞌ naca na, bi bíchaꞌdauꞌ. Dxeléꞌequezenuꞌ zane gaxúa benneꞌ judío dxeléajle̱ꞌe̱ chee̱ Jesús, naꞌ xúgute̱ꞌ dxelenné̱ꞌ dxun na ba xen chéajle̱dxu da bdxixruj bea Moisés.
\v 21 Zaj zraꞌ benneꞌ ba gulé̱ꞌe̱ benneꞌ judío caní lueꞌ dxusé̱denuꞌ xúgute̱ benneꞌ judío zaj zre̱ꞌe̱ zituꞌ québedxa xelune̱ꞌ ca da gunná beꞌe Moisés, ne quebe xelechugue̱ꞌ lateꞌ bé̱laꞌdauꞌ chee̱ be̱l-laꞌ dxen chee̱ bidu biu chee̱ꞌ caꞌ, ne quebe chjácale̱ne̱ꞌ ca naca da zéajle̱dxu dxiꞌu dxundxu.
\v 22 ¿Ájala dxal-laꞌ gundxu? Benneꞌ judío caní welezrague̱ꞌ gate xelenne̱ꞌ ba blaꞌu.
\v 23 Cháwedxa gunuꞌ da caní: Zaj zraꞌ tapa benneꞌ láwela dxiꞌu dxal-laꞌ xelune̱ꞌ tu da zaj nache̱be lazre̱ꞌ lau Dios.
\v 24 Guché̱ benneꞌ caní chjáꞌacale̱ne̱ꞌ lueꞌ, ne bcaꞌana chaweꞌ cuinuꞌ lau Dios nen benneꞌ caní, naꞌ gudizruj ca naca da dxal-laꞌ xelízruje̱ꞌ benneꞌ guchibe̱ꞌ xicha xichaj benneꞌ caní. Caꞌan gaca, xúgute̱ benneꞌ xeleque béꞌene̱ꞌ quebe naca da li ca da gulenné̱ꞌ chiuꞌ, san la gázqueze lueꞌ dxunuꞌ xúgute̱ ca da dxenná da nadxixruj bea na.
\v 25 Ca naca chee̱ benneꞌ caꞌ quebe zaj naque̱ꞌ judío, ba bzúajntuꞌ chee̱ꞌ quebe dxun na ba xen xelune̱ꞌ da caní, san tuze dxal-laꞌ xulusane̱ꞌ da naca chee̱ bedáuꞌ xiaj xaga caꞌ, ne quebe xelawe̱ꞌ dxen chee̱ be̱ xixreꞌ caꞌ, ne quebe xelawe̱ꞌ be̱laꞌ chee̱ be̱ xixreꞌ, be̱ quebe bdxuaj dxen, ne quebe xelune̱ꞌ dul-la chee̱ da dxucáꞌana sban bénneache.
\s Dxele̱le̱ꞌ Pablo lu xudauꞌ
\p
\v 26 Nadxa Pablo guché̱ꞌe̱ tapa benneꞌ caꞌ, naꞌ zra xula bcaꞌana chaweꞌ cuine̱ꞌ lau Dios nen benneꞌ caꞌ, naꞌ belexúꞌe̱ lu xudauꞌ chee̱ buluzenne̱ꞌ bxruze caꞌ gate xexuzre zra caꞌ chee̱ da dxulucáꞌana chaweꞌ cuine̱ꞌ lau Dios, gate naꞌ tu tue̱ꞌ dxal-laꞌ xelegúꞌe̱ gunaꞌ.
\p
\v 27 Gate ba zua xuzre da gazre zra, naꞌ bal-la judío caꞌ, benneꞌ záꞌaca xe̱zre caꞌ zaj nababa Asia, beleléꞌene̱ꞌ Pablo lu xudauꞌ naꞌ, naꞌ buluchague̱ꞌ ca naca benneꞌ caꞌ zaj zre̱ꞌe̱ naꞌ, naꞌ gulebía che̱ꞌe̱ Pablo.
\v 28 Dxelenné̱ꞌ zizraj:
\p ―Benneꞌ Israel, le gácale̱ netuꞌ. Benneꞌ nigá dxedé̱ꞌ gátete̱ze dxusé̱dene̱ꞌ xúgute̱ bénneache xuluzúe̱ꞌ chaláꞌala xe̱zr la xu chee̱dxu, ne da bdxixruj beꞌe Moisés, ne xudauꞌ nigá, ne ba guzre̱ꞌe̱ lu xudauꞌ nigá bal-la benneꞌ griego. Dxucáꞌana dítaje̱ꞌ lataj láꞌazxa nigá.
\p
\v 29 Caní gulenné̱ꞌ laweꞌ da ba beleléꞌene̱ꞌ Pablo lu xe̱zre naꞌ nen Trófimo, tu benneꞌ xe̱zre Efeso, naꞌ dxeléquene̱ꞌ gulúꞌu Pablo le̱ꞌ lu xudauꞌ.
\p
\v 30 Ca naca benneꞌ zaj zre̱ꞌe̱ xe̱zre naꞌ beledxéꞌena zrague̱ꞌ, ne záꞌaca chégüe̱ꞌ. Nadxa gule̱l-le̱ꞌ Pablo, ne gulezrube xue̱ꞌ le̱ꞌ chaleꞌaj xudauꞌ naꞌ, naꞌ bulusézxuje̱ꞌ dxa xuꞌu chee̱ na.
\v 31 Ba zuate̱ xelútie̱ꞌ Pablo gate benneꞌ Roma dxenná beꞌe̱ lu wedil-la benne̱ꞌ ba dxeledxéꞌena zraga ca naca benneꞌ zaj zre̱ꞌe̱ xe̱zre Jerusalén.
\v 32 Nadxa benneꞌ nigá bchague̱ꞌ benneꞌ dxjaque̱ꞌ wedil-la nen benneꞌ dxenná béꞌene̱ꞌ le̱ꞌ, naꞌ xjaca chégüe̱ꞌ naga zaj nazraga benneꞌ zan caꞌ. Gate benneꞌ caꞌ beleléꞌene̱ꞌ benneꞌ naꞌ dxenná beꞌe̱ lu wedil-la, naꞌ bulusane̱ꞌ québedxa buluzálaje̱ꞌ Pablo.
\v 33 Nadxa gubigaꞌ benneꞌ naꞌ dxenná beꞌe̱ lu wedil-la, naꞌ gude̱l-le̱ꞌ Pablo, ne gunná béꞌene̱ꞌ xuluchéaje̱ꞌ le̱ꞌ chupa du xia. Gudé naꞌ bche̱be̱ꞌ benneꞌ caꞌ nuaꞌ benneꞌ nigá, ne bi ba be̱ne̱ꞌ.
\v 34 Benneꞌ caꞌ gulebezre xe̱ꞌe̱ da zan da gulenné̱ꞌ. Caꞌan guca benneꞌ dxenná beꞌe̱ lu wedil-la quebe bi guxéajniꞌine̱ꞌ laweꞌ da dxelúnle̱ꞌe̱ schagaꞌ. Nadxa gunná béꞌene̱ꞌ xeleché̱ꞌe̱ Pablo xuꞌu naga zaj zraꞌ benneꞌ dxjaque̱ꞌ wedil-la, benneꞌ zan caꞌ.
\v 35 Gate belezrine̱ꞌ dxa xuꞌu naga zaj zraꞌ benneꞌ dxjaque̱ꞌ wedil-la, naꞌ benneꞌ dxjaque̱ꞌ wedil-la belexúꞌe̱ Pablo lu naꞌze̱ꞌ laweꞌ da dxelúele̱ꞌe̱ benneꞌ zan caꞌ Pablo,
\v 36 naꞌ xúgute̱ꞌ záꞌaque̱ꞌ cuzre naꞌ dxelenné̱ꞌ zizraj:
\p ―Gate bénneaꞌ.
\s Pablo dxexeche̱be̱ꞌ lau benneꞌ zan caꞌ
\p
\v 37 Gate dxelegúꞌe̱ Pablo lu xuꞌu naga zaj zraꞌ benneꞌ dxjaque̱ꞌ wedil-la, le̱ꞌ guzre̱ꞌ benneꞌ naꞌ dxenná béꞌene̱ꞌ le̱ꞌ:
\p ―¿Waca bi nniaꞌ?
\p Naꞌ bche̱be bénneaꞌ le̱ꞌ:
\p ―¿Waca nneuꞌ dizraꞌ griego?
\v 38 ¿Quebe nacuꞌ lueꞌ benneꞌ Egipto naꞌ ba zeaj tu chupa iza btupe̱ꞌ benneꞌ caꞌ guledábague̱ꞌ xuꞌu laweꞌ, naꞌ guché̱ꞌe̱ tapa gaxúa benneꞌ dxelutie̱ꞌ benneꞌ, xeajzré̱ꞌe̱ le̱ꞌ le̱ꞌe̱ xixreꞌ laweꞌ lataj?
\p
\v 39 Nadxa Pablo guzre̱ꞌ benneꞌ naꞌ:
\p ―Nedaꞌ nacaꞌ benneꞌ judío, ne nababaꞌ tu xe̱zre blau chee̱ ga nababa Cilicia. Be̱n culuén gunuꞌ nedaꞌ lataj guchálajle̱naꞌ benneꞌ zan caní.
\p
\v 40 Benneꞌ naꞌ be̱ꞌe̱ le̱ꞌ lataj, naꞌ Pablo guzé̱ꞌ lachila chee̱ xuꞌu naꞌ, naꞌ guchisa ne̱ꞌe̱ chee̱ xelezúa zri benneꞌ zan caꞌ. Gate gudxéꞌ zri, naꞌ bchálajle̱ne̱ꞌ le̱ꞌ dizraꞌ hebreo, dxenné̱ꞌ:
\c 22 
\p 
\v 1 ―Leꞌe, benneꞌ gula, ne leꞌe, bi bichaꞌ, le xen ca da xapaꞌ leꞌe da dxexeche̱baꞌ chee̱le. 
\p 
\v 2 Gate belenne̱ꞌ dxuchálajle̱ Pablo le̱ꞌ dizraꞌ hebreo, naꞌ gulezúadxe̱ꞌ zrize, naꞌ Pablo guzre̱ꞌ le̱ꞌ: 
\p 
\v 3 ―Nedaꞌ nacaꞌ judío. Gúlajaꞌ xe̱zre Tarso naga nababa Cilicia, naꞌ bgulaꞌ Jerusalén nigá, naꞌ Gamaliel bsé̱dene̱ꞌ nedaꞌ cáte̱ze naca da nadxixruj bea na chee̱ xra xrtáudxu caꞌ. Tu dxue lázrezquezaꞌ dxunaꞌ da naca chee̱ Dios cáte̱ze dxunle leꞌe naꞌa. 
\v 4 Nédxute̱ gudáu ziꞌ xuzraꞌ benneꞌ caꞌ dxeléajle̱ꞌe̱ chee̱ Jesús, ne bé̱tequezaꞌ bal-le̱ꞌ, ne guche̱ꞌa benneꞌ biu, ne nuꞌula chee̱, naꞌ bzraꞌa le̱ꞌ lizre xia. 
\v 5 Bxruze blau, ne xúgute̱ benneꞌ gula sina waca xelexeché̱bequeze̱ꞌ belunne̱ꞌ nedaꞌ xiche chee̱ biꞌa na lau bi bíchedxu judío caꞌ zaj zre̱ꞌe̱ xe̱zre Damasco. Guxáꞌa naꞌ xeajxediljaꞌ naga zaj zraꞌ benneꞌ caꞌ dxeléajle̱ꞌe̱ chee̱ Jesús chee̱ che̱ꞌa benneꞌ caꞌ Jerusalén nigá, chee̱ xeledée̱ꞌ ba xaꞌ.
\p 
\v 6 ’Gate zexáꞌa xuꞌa neza, ne ba zua zrinaꞌ Damasco, ca du wagubizra gúcatiteꞌ tu xiꞌ naga zexáꞌa da zaꞌ xabáa. 
\v 7 Naꞌ xeajchaziaꞌ lu xu, ne bendaꞌ chiꞌi tu benneꞌ guzre̱ꞌ nedaꞌ: “Saulo, Saulo, ¿bizr chee̱ naꞌ nau ziꞌ xuzruꞌ nedaꞌ?”
\v 8 Nadxa bche̱baꞌ le̱ꞌ: ¿Núzraqueze lueꞌ, Xran? Naꞌ guzre̱ꞌ nedaꞌ: “Nedaꞌ nacaꞌ Jesús, benneꞌ Nazaret, bénneaꞌ nau ziꞌ xuzruꞌ lueꞌ.”
\v 9 Benneꞌ caꞌ zrále̱ne̱ꞌ nedaꞌ beleléꞌene̱ꞌ xiꞌ naꞌ, ne belezrebe̱ꞌ, san quebe belenne̱ꞌ chiꞌi bénneaꞌ gunné̱ꞌ nedaꞌ. 
\v 10 Nadxa gunnéaꞌ: ¿Bi dxal-laꞌ gunaꞌ, Xran? Naꞌ Xránadxu gunné̱ꞌ: “Guxasa, ne guxíajte̱ze Damasco, ga naꞌ zua benneꞌ xelé̱ꞌe̱ lueꞌ ca da dxal-laꞌ gunuꞌ.”
\v 11 Benneꞌ caꞌ zjácale̱ne̱ꞌ nedaꞌ belequé̱ꞌe̱ naꞌa zeajntuꞌ Damasco laweꞌ da bcaꞌana xiꞌ naꞌ nedaꞌ la chul-la.
\p 
\v 12 ’Zua naꞌ tu benneꞌ le̱ꞌ Ananías, benneꞌ dxune̱ꞌ du lazre̱ꞌ ca naca da bdxixruj beꞌe Moisés, naꞌ xúgute̱ benneꞌ judío zaj zre̱ꞌe̱ Damasco dxelenné̱ꞌ cháwele̱ꞌe̱ ca dxune̱ꞌ.
\v 13 Ananías naꞌ ble̱ꞌe̱ naga zuaꞌ nedaꞌ, naꞌ guzre̱ꞌ nedaꞌ: “Bichaꞌ Saulo, naꞌa xeleꞌenuꞌ.” Lu zra náꞌqueze beléꞌete̱daꞌ, ne bleꞌedaꞌ benneꞌ naꞌ. 
\v 14 Nadxa guzre̱ꞌ nedaꞌ: “Dios chee̱ xra xrtáudxu guqué̱ꞌe̱ lueꞌ nédxute̱ chee̱ gúnbeꞌu ca naca da dxaca lazreꞌ Le̱ꞌ, ne chee̱ leꞌenuꞌ Benneꞌ xrlátaje chee̱ Dios, ne xennuꞌ chiꞌi Bénneaꞌ. 
\v 15 Lueꞌ guchálajuꞌ da naca chee̱ Le̱ꞌ lau ca naca bénneache zaj zre̱ꞌe̱ lu xe̱zr la xu, ne guzennuꞌ benneꞌ caꞌ ca naca da bléꞌenuꞌ, ne da bennuꞌ. 
\v 16 Naꞌa, ¿bizr chee̱ naꞌ dxezrenuꞌ? Guxasa, gudxúa nisa, ne bxren lazreꞌ chee̱ Xránuꞌ Dios chee̱ cuee̱ꞌ dul-la chiuꞌ.”
\p 
\v 17 ’Gate bezrinaꞌ Jerusalén, guxáꞌa lu xudauꞌ xeajchálajle̱naꞌ Dios, naꞌ bleꞌedaꞌ tu da bleꞌe Dios nedaꞌ. 
\v 18 Bleꞌedaꞌ Xránadxu, naꞌ guzre̱ꞌ nedaꞌ: “Bdxuajche Jerusalén nigá laweꞌ da quebe xelezíꞌe̱ ca naca da guchálajuꞌ chiaꞌ.”
\v 19 Nadxa guchaꞌ Le̱ꞌ: Xran, zaj nézquezne̱ꞌ guxáꞌa nedaꞌ xúgute̱ xuꞌu naga dxelezraga judío caꞌ, ne xeajxriꞌa benneꞌ caꞌ dxeléajle̱ꞌe̱ chiuꞌ, naꞌ bzraꞌa le̱ꞌ lizre xia, ne bzálajquezaꞌ benneꞌ caꞌ, 
\v 20 naꞌ gate belútie̱ꞌ Esteban, benneꞌ we̱n zrin chiuꞌ, naꞌ zé̱quezaꞌ nedaꞌ nacaꞌ tuze nen benneꞌ caꞌ belútie̱ꞌ le̱ꞌ.
\v 21 Xránadxu guzre̱ꞌ nedaꞌ: “Guxíaj, laweꞌ da sel-laꞌ lueꞌ zituꞌ naga zaj zraꞌ benneꞌ quebe zaj naque̱ꞌ judío.”

\s Da be̱n benneꞌ dxenná beꞌe̱ lu wedil-la
\p
\v 22 Dizraꞌ caní belenne̱ꞌ, san lu dizraꞌ nigá gulezú lawe̱ꞌ dxelebezre xe̱ꞌe̱, dxelenné̱ꞌ: 
\p ―¡Gate benneꞌ nigá! ¡Québedxa dxal-laꞌ gaca bane̱ꞌ!
\p 
\v 23 Naꞌ gulebezre xáꞌaqueze̱ꞌ, ne buluzale̱ꞌ sibe zra lane̱ꞌ, ne belequé̱ꞌe̱ bxrte xu da buluzale̱ꞌ sibe.
\v 24 Chee̱ le̱ naꞌ benneꞌ naꞌ dxenná beꞌe̱ lu wedil-la gunná béꞌene̱ꞌ xelegúꞌe̱ Pablo lu xuꞌula, ne xeluꞌe̱ le̱ꞌ chee̱ nne̱ꞌ da li, bizr chee̱ naꞌ gulebezre xaꞌa benneꞌ zan caꞌ chee̱ le̱ꞌ. 
\v 25 Gate bexuzre buluchéaje̱ꞌ naꞌ Pablo, chee̱ xeluꞌe̱ le̱ꞌ, Pablo guzre̱ꞌ tu benneꞌ dxeaje̱ꞌ wedil-la zue̱ꞌ naꞌ: 
\p ―¿Naca chee̱le leꞌe güele tu benneꞌ nababe̱ꞌ Roma, ne quebe ne guchíꞌale aja naca chee̱ꞌ? 
\p 
\v 26 Gate ben benneꞌ dxeaje̱ꞌ wedil-la da nigá, naꞌ guxíaje̱ꞌ xeaje̱zre̱ꞌ benneꞌ dxenná beꞌe̱ lu wedil-la: 
\p ―Guxúe xánniuꞌ bi naꞌ gunuꞌ, laweꞌ da nababa Roma benneꞌ nigá. 
\p 
\v 27 Nadxa benneꞌ nigá gubigue̱ꞌ naga ze̱ Pablo, naꞌ bche̱be̱ꞌ le̱ꞌ: 
\p ―¿Da li naꞌ nababuꞌ Roma? 
\p Pablo beche̱be̱ꞌ: 
\p ―Aweꞌ. 
\p 
\v 28 Naꞌ benneꞌ dxenná beꞌe̱ lu wedil-la gunné̱ꞌ: 
\p ―Nedaꞌ da zrente̱ gudízrujaꞌ chee̱ gubabaꞌ Roma. 
\p Naꞌ Pablo gunné̱ꞌ: 
\p ―Nedaꞌ nabábaquezaꞌ Roma gate gúlajteaꞌ. 
\p 
\v 29 Gate belenne̱ꞌ da nigá, naꞌ benneꞌ caꞌ ba zaj ze̱ꞌ xeluꞌe̱ Pablo belexecuase̱ꞌ cuita le̱ꞌ, naꞌ la gaze benneꞌ naꞌ dxenná beꞌe̱ lu wedil-la, gate guque béꞌene̱ꞌ nababa Pablo Roma, bzrebe̱ꞌ laweꞌ da nuchéaje̱ꞌ le̱ du xia.

\s Pablo dxezrine̱ꞌ lau benneꞌ xuꞌu laweꞌ blau caꞌ chee̱ judío caꞌ 
\p 
\v 30 Zra xula, benneꞌ naꞌ dxenná beꞌe̱ lu wedil-la guca lazre̱ꞌ nézene̱ꞌ bi chee̱ naꞌ dxelagu zria judío caꞌ Pablo, naꞌ bequé̱ꞌe̱ du xia naꞌ nadxéaj na naꞌ Pablo, naꞌ gunná béꞌene̱ꞌ xelezraga benneꞌ xíchaje̱ caꞌ chee̱ bxruze, ne xúgute̱ benneꞌ xuꞌu laweꞌ blau. Nadxa guléaje̱ꞌ Pablo, naꞌ bze̱ꞌ le̱ꞌ lau benneꞌ caꞌ.

\c 23
\p
\v 1 Pablo gunné̱ꞌe̱ benneꞌ xuꞌu laweꞌ blau caꞌ, naꞌ guzre̱ꞌ le̱ꞌ:
\p ―Leꞌe, bi bichaꞌ, ca naca xúgute̱ da ba be̱naꞌ nedaꞌ, zua zri xichaj lázrdawaꞌ lau Dios.
\p
\v 2 Nadxa Ananías, bxruze blau, gunná béꞌene̱ꞌ benneꞌ zaj ze̱ꞌ naꞌ xelegape̱ꞌ dxuꞌa Pablo.
\v 3 Naꞌ Pablo beche̱be̱ꞌ:
\p ―Dios güe̱ꞌe̱ lueꞌ, benneꞌ dxun láweze da xrlátaje. Dxeꞌu naꞌ chee̱ guchiꞌu chiaꞌ nedaꞌ ca dxenná bea da nadxixruj bea Dios. ¿Bizr chee̱ naꞌ dxunuꞌ da dxedábaga da bdxixruje̱ꞌ, dxenná beꞌenuꞌ xeluꞌe̱ nedaꞌ?
\p
\v 4 Benneꞌ caꞌ zaj zre̱ꞌe̱ naꞌ gulé̱ꞌe̱ Pablo:
\p ―¿Caní schanniꞌ dxennáuꞌ chee̱ bxruze blau chee̱ Dios?
\p
\v 5 Pablo gunné̱ꞌ:
\p ―Leꞌe, bi bichaꞌ, quebe gunezdaꞌ che benneꞌ nigá naque̱ꞌ bxruze blau laweꞌ da dxenná lu xiche chee̱ Dios: Quebe nneuꞌ schanniꞌ chee̱ benneꞌ dxenná beꞌe̱ lázriuꞌ.
\p
\v 6 Nadxa guque béꞌene̱ꞌ Pablo bal-le̱ꞌ benneꞌ xuꞌu laweꞌ zaj naque̱ꞌ benneꞌ saduceo caꞌ, naꞌ xebal-le̱ꞌ zaj naque̱ꞌ benneꞌ fariseo caꞌ, naꞌ gunné̱ꞌ zizraj:
\p ―Leꞌe, bi bichaꞌ, nedaꞌ nacaꞌ fariseo, ne xrtiaꞌ zaj naue̱ꞌ fariseo caꞌ, naꞌ dxuchíꞌale ca naca chiaꞌ laweꞌ da dxebeza lazraꞌ xelexebán benneꞌ gate.
\p
\v 7 Gate gunná Pablo da nigá, naꞌ benneꞌ fariseo caꞌ, ne benneꞌ saduceo caꞌ gulezú lawe̱ꞌ dxulutil-la ljwezre̱ꞌ dizraꞌ, naꞌ gulaca chupa laꞌa ca naca benneꞌ caꞌ.
\v 8 Caꞌan guca laweꞌ da dxelenná saduceo caꞌ quebe xelexebán benneꞌ gate, ne quebe nu chiláꞌ gubáz chee̱ xabáa caꞌ, ne quebe nu chiláꞌ bénneꞌdu xuꞌu bénneache, san benneꞌ fariseo caꞌ dxeléajle̱ꞌe̱ dxataꞌ xúgute̱ da caꞌ.
\v 9 Xúgute̱ꞌ gulebezre xe̱ꞌe̱, naꞌ gulezé̱ bal-la benneꞌ dxuluxuzájle̱ꞌe̱ da nadxixruj bea na, benneꞌ zaj naque̱ꞌ fariseo, naꞌ gulenné̱ꞌ:
\p ―Benneꞌ nigá quebe bi da cale̱la ne gune̱ꞌ. Che nu bénnedu xuꞌu bénneache, u tu gubáz chee̱ xabáa ba gunné̱ꞌ le̱ꞌ, quebe dxal-laꞌ nne̱dxu chee̱ Dios.
\p
\v 10 Naꞌ bulutíl-lale̱ꞌe̱ ljwezre̱ꞌ dizraꞌ, naꞌ benneꞌ naꞌ dxenná beꞌe̱ lu wedil-la bzrebe̱ꞌ xele̱l-le̱ꞌ Pablo xuluzúzruje̱ꞌ le̱ꞌ. Chee̱ le̱ naꞌ gunná béꞌene̱ꞌ benneꞌ dxjaca wedil-la xelexebéaje̱ꞌ le̱ꞌ láwela benneꞌ caꞌ, ne xelexechéꞌe̱ le̱ꞌ lu xuꞌu naꞌ naga zaj zraꞌ benneꞌ dxjaque̱ꞌ wedil-la.
\p
\v 11 Xe̱la xula, Xránadxu bleꞌe lawe̱ꞌ Pablo, naꞌ guzre̱ꞌ le̱ꞌ:
\p ―Be̱n dipa lazruꞌ, Pablo, laweꞌ da ca bchálajquezuꞌ chiaꞌ Jerusalén nigá, caꞌan dxál-laꞌqueze guchálajuꞌ chiaꞌ lu xe̱zre Roma.
\s Zaj nun benneꞌ judío ca xelune̱ꞌ xelútie̱ꞌ Pablo
\p
\v 12 Zra xula bal-la benneꞌ judío caꞌ belune̱ꞌ tuze dizraꞌ xelútie̱ꞌ Pablo. Gulenné̱ꞌ:
\p ―Dios cuꞌe̱ dxiꞌu deꞌ che bi xiꞌaj gágudxu, ne quebe ne gútedxu Pablo.
\p
\v 13 Nadé chua benneꞌ biu caꞌ zaj nache̱be lazre̱ꞌ xelune̱ꞌ da nigá.
\v 14 Benneꞌ caní xjaque̱ꞌ lau benneꞌ xíchaje̱ caꞌ chee̱ bxruze caꞌ, ne benneꞌ gula sina caꞌ, naꞌ gulenné̱ꞌ:
\p ―Netuꞌ ba guche̱be lázrentuꞌ lau Dios cuꞌe̱ netuꞌ deꞌ che bi gáguntuꞌ, ne quebe ne gútentuꞌ Pablo.
\v 15 Naꞌa, leꞌe, ne xezícadxa benneꞌ xuꞌu laweꞌ blau caꞌ dxal-laꞌ nábale benneꞌ dxenná beꞌe̱ lu wedil-la xedajlegüe̱ꞌe̱ Pablo wxre zila laule leꞌe, xe̱le bénneaꞌ dxaca lázrele guché̱be xánnele Pablo, naꞌ netuꞌ se̱ cuásantuꞌ gútentuꞌ le̱ꞌ québela ne xide̱ꞌ nigá.
\p
\v 16 Zriꞌine bi zan Pablo benbeꞌ ca naca da nigá, naꞌ guxíajbeꞌ naga zua Pablo cheajé̱zrebeꞌ le̱ꞌ.
\v 17 Nadxa Pablo gunné̱ꞌ tu benneꞌ xuꞌu lu ne̱ꞌe̱ benneꞌ caꞌ dxjaque̱ꞌ wedil-la, naꞌ guzre̱ꞌ le̱ꞌ:
\p ―Guché̱ꞌ bi cuideꞌ nigá lau benneꞌ xíchaje̱ chiuꞌ laweꞌ da de̱ da dxal-laꞌ xe̱beꞌ le̱ꞌ.
\p
\v 18 Naꞌ benneꞌ naꞌ xuꞌu lu ne̱ꞌe̱ benneꞌ caꞌ dxjaque̱ꞌ wedil-la guché̱ꞌe̱-beꞌ lau xrane̱ꞌ, naꞌ guzre̱ꞌ le̱ꞌ:
\p ―Pablo, bénneaꞌ nadxéaje̱ꞌ gunné̱ꞌ nedaꞌ, naꞌ gunabe̱ꞌ xedajguꞌa bi cuideꞌ nigá naga zuꞌ laweꞌ da de̱ da dxal-laꞌ xe̱beꞌ lueꞌ.
\p
\v 19 Benneꞌ xíchaje̱ naꞌ guqué̱ꞌe̱ naꞌ bi cuideꞌ naꞌ, naꞌ guché̱ꞌe̱-beꞌ chaláꞌala, ne bche̱be̱ꞌ-beꞌ:
\p ―¿Bi dxaca lazruꞌ xuꞌu nedaꞌ?
\p
\v 20 Naꞌ gunná bi cuideꞌ naꞌ, gúzrebeꞌ le̱ꞌ:
\p ―Benneꞌ judío caꞌ ba zaj nune̱ꞌ tuze dizraꞌ xelenabe̱ꞌ lueꞌ che̱ꞌu Pablo wxre zila lau benneꞌ xuꞌu laweꞌ blau caꞌ, xelenné̱ꞌ dxelaca lazre̱ꞌ xuluche̱be xánnie̱ꞌ le̱ꞌ.
\v 21 Quebe chéajle̱ꞌu chee̱ benneꞌ caꞌ laweꞌ da nadé chua benneꞌ caꞌ xelebeze̱ꞌ le̱ꞌ bagácheze, ne ba guleche̱be lazre̱ꞌ lau Dios Le̱ꞌ cuꞌe̱ benneꞌ caꞌ deꞌ che bi xeleꞌaj xelawe̱ꞌ, ne quebe ne xelútie̱ꞌ Pablo. Naꞌa ba zaj zue̱ꞌ dxelebeze̱ꞌ xrtizruꞌ.
\p
\v 22 Nadxa benneꞌ xíchaje̱ naꞌ bze̱ꞌ bi cuideꞌ naꞌ dizraꞌ, naꞌ guzre̱ꞌ-beꞌ quebe nu xe̱beꞌ ba xeajé̱zrebeꞌ le̱ꞌ caní.
\s Dxelesel-le̱ꞌ Pablo lau Félix, benneꞌ xuꞌu lu ne̱ꞌe̱ xe̱zr la xu naꞌ
\p
\v 23 Benneꞌ xíchaje̱ naꞌ gunné̱ꞌ chupa benneꞌ chee̱ꞌ, benneꞌ xuꞌu lu ne̱ꞌe̱ benneꞌ caꞌ dxjaque̱ꞌ wedil-la, naꞌ gunná béꞌene̱ꞌ le̱ꞌ xulucueze̱ꞌ chupa gaxúa benneꞌ dxjaque̱ꞌ wedil-la, benneꞌ saꞌaca niꞌe̱, ne ga xun chi benneꞌ dxjaque̱ꞌ wedil-la, benneꞌ xelebía bzrinaꞌ, ne chupa gaxúa benneꞌ dxjaque̱ꞌ wedil-la, benneꞌ xeluꞌe̱ xia tunna, chee̱ chjaque̱ꞌ lu xe̱zre Cesarea dxedáꞌ ga chizrela.
\v 24 La gázqueze gunná béꞌene̱ꞌ xulucueze̱ꞌ bzrinaꞌ cuía Pablo, ne gunná béꞌene̱ꞌ xeleché̱ꞌe̱ le̱ꞌ cháwedauꞌ lau Félix, benneꞌ xuꞌu lu ne̱ꞌe̱ xe̱zr la xu naꞌ waláz chee̱ Roma.
\v 25 Gusel-le̱ꞌ tu xiche da belúa benneꞌ dxjaque̱ꞌ wedil-la. Caní naxúaj na:
\p
\v 26 Nedaꞌ Claudio, dxugapaꞌ lueꞌ diuzre Félix, benneꞌ xuꞌu lu naꞌu xe̱zr la xu nigá.
\v 27 Benneꞌ judío caꞌ gule̱l-le̱ꞌ benneꞌ nigá náꞌtega naꞌa chee̱ xelútie̱ꞌ le̱ꞌ. Gate gunezdaꞌ nedaꞌ nababe̱ꞌ Roma, naꞌ guxíajle̱naꞌ benneꞌ chiaꞌ caꞌ, benneꞌ dxjaque̱ꞌ wedil-la, xeajseláꞌ le̱ꞌ.
\v 28 Guca lazraꞌ nezdaꞌ bi dxelagu zria le̱ꞌ, naꞌ guche̱ꞌa le̱ꞌ lau benneꞌ xuꞌu laweꞌ caꞌ chee̱ judío caꞌ.
\v 29 Naꞌ gunezdaꞌ dxelagu zria le̱ꞌ da naca chee̱ da nadxixruj bea chee̱ judío caꞌ, san quebe naca na chee̱ xelútie̱ꞌ le̱ꞌ, ne chee̱ chuꞌe̱ lizre xia.
\v 30 Gate bendaꞌ ca ba zaj nun judío caꞌ chee̱ xelútie̱ꞌ le̱ꞌ, naꞌ dxusel-laꞌ le̱ꞌ naga zuꞌ, ne ba guchaꞌ benneꞌ caꞌ dxelagu zria le̱ꞌ waca xelawe̱ꞌ le̱ꞌ zria lau lueꞌ. Gaca xrlátaje chiuꞌ.
\p
\v 31 Nadxa benneꞌ dxjaque̱ꞌ wedil-la belune̱ꞌ ca gunná beꞌe benneꞌ xíchaje̱ chee̱ꞌ, naꞌ beleché̱ꞌe̱ Pablo chizrela, naꞌ belezrine̱ꞌ xe̱zre Antípatris.
\v 32 Zra xula benneꞌ dxjaca wedil-la, benneꞌ caꞌ dxeledáꞌ níꞌaze, belexezrine̱ꞌ Jerusalén, naꞌ benneꞌ dxjaque̱ꞌ wedil-la zaj zrie̱ꞌ bzrinaꞌ beleché̱ꞌe̱ Pablo naga dxal-laꞌ zrine̱ꞌ.
\v 33 Gate belezrine̱ꞌ xe̱zre Cesarea, naꞌ bulunézruje̱ꞌ benneꞌ xuꞌu lu ne̱ꞌe̱ xe̱zr la xu naꞌ xiche naꞌ, ne buludée̱ꞌ Pablo lu ne̱ꞌe̱.
\v 34 Ca bexuzre blabe̱ꞌ xiche naꞌ, naꞌ benneꞌ xuꞌu lu ne̱ꞌe̱ xe̱zr la xu naꞌ bche̱be̱ꞌ ga benneꞌ Pablo. Gate benne̱ꞌ naque̱ꞌ benneꞌ chee̱ xe̱zre nababa Cilicia,
\v 35 naꞌ guzre̱ꞌ le̱ꞌ:
\p ―Guchiꞌa chee̱ da dxaca chiuꞌ gate xeleláꞌ benneꞌ caꞌ dxelagu zria lueꞌ.
\p Nadxa gunná béꞌene̱ꞌ cha benneꞌ dxjaca wedil-la xuluxúe̱ꞌ Pablo naga zua xuꞌu laweꞌ chee̱ Herodes.
\c 24
\s Pablo dxuzriꞌe̱ dizraꞌ da dxácale̱ na le̱ꞌ lau Félix
\p
\v 1 Ca gudé gazxuꞌ zra, Ananías, bxruze blau, bzrine̱ꞌ xe̱zre Cesarea nen bal-la benneꞌ gula sina caꞌ, ne tu benneꞌ dxenné̱ꞌ waláz chee̱ benneꞌ caꞌ, le̱ꞌ Tértulo. Benneꞌ caní belezrine̱ꞌ lau benneꞌ xuꞌu lu ne̱ꞌe̱ xe̱zr la xu naꞌ chee̱ xelagu zria Pablo.
\v 2 Gate xeajlexríꞌe̱ Pablo, naꞌ guzú lau Tértulo dxawe̱ꞌ xria Pablo, dxe̱ꞌe̱ Félix:
\p ―Xcalenuꞌ lueꞌ, benneꞌ xuꞌu lu naꞌu xe̱zr la xu nigá, laweꞌ da zúantuꞌ xel-laꞌ dxebeza zri lazreꞌ, naꞌ da chaweꞌ dxgua dxaca na chee̱ntuꞌ, naꞌ ca dxenná beꞌenuꞌ netuꞌ lu xel-laꞌ sina chiuꞌ dxexedxúaj na chaweꞌ.
\v 3 Xúgute̱ da nigá dxezíꞌqueze lu naꞌntuꞌ gátete̱ze naꞌ, ne dxe̱ntuꞌ lueꞌ xcalén cuinuꞌ, Félix.
\v 4 Chee̱ québedxa guntuꞌ lueꞌ zé̱dete̱, dxataꞌ xuedaꞌ lueꞌ gun zren lazruꞌ xennuꞌ chee̱ntuꞌ tu chíꞌidauꞌ.
\v 5 Dxennáꞌantuꞌ benneꞌ nigá dxúnle̱ꞌe̱ da cale̱la, ne gátete̱ze naꞌ lu xe̱zr la xu nigá dxune̱ꞌ benneꞌ judío chupa laꞌa, ne naque̱ꞌ benneꞌ xíchaje̱ chee̱ benneꞌ caꞌ zaj daꞌ tu benneꞌ Nazaret.
\v 6 Benneꞌ nigá guca lazre̱ꞌ guzúe̱ꞌ chaláꞌala xudauꞌ chee̱ntuꞌ, naꞌ netuꞌ gudé̱l-lantuꞌ le̱ꞌ, ne guca lázrentuꞌ guchíꞌantuꞌ da naca chee̱ꞌ ca nadxixruj bea na chee̱ntuꞌ.
\v 7 Naꞌ Lisias, benneꞌ dxenná beꞌe̱ lu wedil-la, bequé̱ꞌe̱ le̱ꞌ lu naꞌntuꞌ xadía.
\v 8 Naꞌ gunné̱ꞌ che zaj zra benneꞌ xelagu zrie̱ꞌ Le̱ꞌ, dxal-laꞌ xelelé̱ꞌe̱ lau lueꞌ. Lueꞌ gaca guche̱buꞌ benneꞌ nigá, naꞌ nézenuꞌ naca da li zria dxáguntuꞌ le̱ꞌ.
\p
\v 9 Benneꞌ judío caꞌ zaj zre̱ꞌe̱ naꞌ gulenné̱ꞌ naca da li xúgute̱ da caꞌ.
\v 10 Nadxa benneꞌ xuꞌu lu ne̱ꞌe̱ xe̱zr la xu naꞌ guchisa ne̱ꞌe̱ chee̱ guchalaj Pablo, naꞌ gunná Pablo:
\p ―Dxebéle̱ꞌe̱daꞌ dxunuꞌ nedaꞌ lataj xeche̱baꞌ lau lueꞌ, laweꞌ da nezdaꞌ naca xrlátaje ca dxuchiꞌu da dxaca chee̱ xe̱zr la xu chee̱ntuꞌ ba zeaj zaneꞌ iza.
\v 11 Luéꞌqueze waca chéajniꞌinuꞌ ba zeaj chazrinnu zraze blaꞌa Jerusalén chee̱ güe láꞌanaꞌ Dios.
\v 12 Quebe beleléꞌene̱ꞌ nedaꞌ nu gutil-laꞌ dizraꞌ, ne quebe nu benneꞌ guchéꞌenaꞌ zraga lu xudauꞌ blau, ne lu xezícala xuꞌu caꞌ, ne lu neza caꞌ chee̱ xe̱zre naꞌ.
\v 13 Benneꞌ caní quebe xelezéquene̱ꞌ xululéꞌene̱ꞌ naca da li ca zaj naca da dxelawe̱ꞌ nedaꞌ zria.
\v 14 Tu da dxexeche̱baꞌ, dxucáꞌana szrenaꞌ Dios chee̱ xra xrtáudxu caꞌ, dxunaꞌ ca da dxelenná benneꞌ caní naca na da we̱n lazreꞌ, laweꞌ da dxéajle̱ꞌa xúgute̱ da naxúaj na lu xiche chee̱ da nadxixruj bea na, ne chee̱ benneꞌ caꞌ buluchálaje̱ꞌ waláz chee̱ Dios.
\v 15 Nedaꞌ dxebeza lázrquezaꞌ ca da gun Dios, ca dxelebeza lazreꞌ benneꞌ caní, dxebeza lázrentuꞌ Dios gusebane̱ꞌ benneꞌ gate caꞌ, benneꞌ xrlátaje, ne benneꞌ caꞌ dxelune̱ꞌ da cale̱la.
\v 16 Chee̱ le̱ naꞌ dxue lazraꞌ sua zri xichaj lázrdawaꞌ lau Dios, ne lau bénneache caꞌ.
\p
\v 17 ’Ca gudé gudáꞌ xe̱zre xula caꞌ zaneꞌ iza, naꞌ bezrinaꞌ lazriaꞌ chee̱ gunézrujaꞌ da gácale̱ na benneꞌ xacheꞌ caꞌ, ne cuꞌa gunaꞌ lau Dios.
\v 18 Da nigá dxunaꞌ nedaꞌ gate bal-la benneꞌ judío chee̱ xe̱zre caꞌ zaj nababa Asia belexezrague̱ꞌ nedaꞌ lu xudauꞌ ca gudé bcaꞌana chaweꞌ cuinaꞌ cáte̱ze naca da zéajle̱ntuꞌ, san quebe nu benneꞌ bchagaꞌ, ne quebe nu benneꞌ guchéꞌenaꞌ zraga.
\v 19 Benneꞌ caní dxal-laꞌ xelelé̱ꞌe̱ nigá chee̱ xelawe̱ꞌ nedaꞌ zria che bi zua dxelaca chee̱ꞌ nen nedaꞌ,
\v 20 san che quebe bi de̱, naꞌ benneꞌ caní zaj zre̱ꞌe̱ nigá dxal-laꞌ xelenné̱ꞌ che bi belezrélene̱ꞌ da dxebagaꞌ gate zuaꞌ lau benneꞌ xuꞌu laweꞌ blau caꞌ chee̱ judío caꞌ.
\v 21 Tuze da be̱naꞌ gate zuaꞌ lau benneꞌ caꞌ, gunnéaꞌ zizraj: Naꞌa dxuchíꞌale chiaꞌ laweꞌ da dxeajlí lazraꞌ xelexebán benneꞌ gate.
\p
\v 22 Gate Félix benne̱ꞌ da nigá, naꞌ bcaꞌane̱ꞌ na cáꞌaze laweꞌ da neze xanneꞌ le̱ꞌ ca naca chee̱ benneꞌ caꞌ dxeléajle̱ꞌe̱ chee̱ Jesús, naꞌ guzre̱ꞌ benneꞌ caꞌ:
\p ―Gate xida Lisias, benneꞌ dxenná beꞌe̱ lu wedil-la, naꞌ chéajniꞌidxedaꞌ chee̱ da nigá dxaca chee̱le.
\p
\v 23 Nadxa Félix gunná béꞌene̱ꞌ benneꞌ dxenná beꞌe̱ lu wedil-la, ne benneꞌ caꞌ dxenná beꞌene̱ꞌ xelexeguꞌe̱ Pablo lu xuꞌu laweꞌ naꞌ, naꞌ xeluꞌe̱ le̱ꞌ lataj bi gune̱ꞌ, ne xeluꞌe̱ lataj benneꞌ ljwezre Pablo cheajlenné̱ꞌe̱ le̱ꞌ, ne bi xelune̱ꞌ chee̱ꞌ.
\p
\v 24 Gudé tu chupa zra Félix belé̱ꞌe̱ xetú nen zruꞌule̱ꞌ Drusila, nuꞌula judío, naꞌ gunná béꞌene̱ꞌ bzrin Pablo chee̱ guchálajle̱ne̱ꞌ le̱ꞌ ca naca xel-laꞌ dxeajlí lazreꞌ chee̱ꞌ chee̱ Jesucristo.
\v 25 Gate Pablo bchálajle̱ne̱ꞌ le̱ꞌ ca dxal-laꞌ gundxu da xrlátaje, ne nna beꞌe cuínadxu, naꞌ zrin zra guchiꞌa Dios chee̱dxu gate cheajsé̱ chee̱ xe̱zr la xu, naꞌ bzrebe Félix, ne guzre̱ꞌ Pablo:
\p ―Bexíaj naꞌa. Gate nalátajaꞌ, naꞌ nné̱quezaꞌ lueꞌ.
\p
\v 26 La gaze dxaca lazreꞌ Félix gunezruj Pablo le̱ꞌ dumí chee̱ gusane̱ꞌ le̱ꞌ. Chee̱ le̱ naꞌ gunné̱le̱ꞌe̱ Pablo chee̱ guchálajle̱ne̱ꞌ le̱ꞌ.
\v 27 Caꞌ guca, gudé chupa iza, naꞌ Félix bedxúaje̱ꞌ xrlátaje̱ꞌ ga xuꞌu lu ne̱ꞌe̱ xe̱zr la xu naꞌ, naꞌ bedé tu benneꞌ le̱ꞌ Porcio Festo waláz chee̱ Félix. Félix bcaꞌane̱ꞌ Pablo lizre xia laweꞌ da guca lazre̱ꞌ xegáꞌane̱ꞌ chaweꞌ lau judío caꞌ.
\c 25
\s Pablo dxexeche̱be̱ꞌ lau Festo
\p
\v 1 Nadxa Festo bzrine̱ꞌ xe̱zre Cesarea chee̱ siꞌ lu ne̱ꞌe̱ gaque̱ꞌ benneꞌ xuꞌu lu ne̱ꞌe̱ xe̱zr la xu naꞌ, naꞌ gate guca chunna zra, guxíaje̱ꞌ Jerusalén.
\v 2 Lu xe̱zre naꞌ belezrín benneꞌ xíchaje̱ caꞌ chee̱ bxruze caꞌ, ne benneꞌ judío blau caꞌ lau le̱ꞌ, ne gulawe̱ꞌ zria Pablo.
\v 3 Gulataꞌ xuene̱ꞌ benneꞌ xuꞌu lu ne̱ꞌe̱ xe̱zr la xu naꞌ sel-le̱ꞌ benneꞌ cheajlexezriꞌe̱ Pablo chee̱ xezrine̱ꞌ Jerusalén. Benneꞌ judío caꞌ ba zaj nune̱ꞌ xelútie̱ꞌ Pablo la neza gate zezé̱ꞌe̱ naꞌ.
\v 4 Beche̱be Festo ba xuꞌu Pablo lizre xia lu xe̱zre Cesarea, naꞌ lé̱queze̱ꞌ ba nune̱ꞌ chéaje̱ꞌ naꞌ xetú chupa zra.
\v 5 Naꞌ guzre̱ꞌ benneꞌ caꞌ:
\p ―Benneꞌ caꞌ zaj zre̱ꞌe̱ láwela leꞌe, benneꞌ zaj nape̱ꞌ xel-laꞌ dxenná bea, dxal-laꞌ chjácale̱ne̱ꞌ nedaꞌ Cesarea, naꞌ che benneꞌ naꞌ zua bi da cale̱la da be̱ne̱ꞌ, waca gágule le̱ꞌ zria.
\p
\v 6 Festo begáꞌane̱ꞌ Jerusalén ca du xrunuꞌ ga chi zraze, naꞌ bezrine̱ꞌ Cesarea. Zra xula gudxéꞌe̱ lataj blau chee̱ꞌ, ne gunná béꞌene̱ꞌ xeajlexríꞌe̱ Pablo.
\v 7 Gate bzrin Pablo lau benneꞌ xuꞌu lu ne̱ꞌe̱ xe̱zr la xu naꞌ, naꞌ gulebiga judío caꞌ záꞌaca Jerusalén, ne gulágule̱ꞌe̱ zria Pablo, san quebe guca xululéꞌene̱ꞌ naca na da li.
\v 8 Nadxa Pablo beche̱be̱ꞌ waláz chee̱ꞌ, gunné̱ꞌ:
\p ―Nedaꞌ quebe bi da cale̱la ne gunaꞌ, quegá chee̱ da nadxixruj bea chee̱ judío caꞌ, ne quegá chee̱ xudauꞌ chee̱ꞌ, ne quegá chee̱ César.
\p
\v 9 Festo guca lazre̱ꞌ xegáꞌane̱ꞌ xrlátaje lau benneꞌ judío caꞌ, naꞌ bche̱be̱ꞌ Pablo:
\p ―¿Dxaca lazruꞌ chéajuꞌ Jerusalén chee̱ guchiꞌa nedaꞌ ca naca chiuꞌ naꞌ?
\p
\v 10 Pablo beche̱be̱ꞌ:
\p ―Zuaꞌ lau xuꞌu laweꞌ da nuzúa César naga dxal-laꞌ zriꞌa ca naca chiaꞌ. Lueꞌ nézqueznuꞌ quebe bi da zrinnaj ne gunaꞌ chee̱ benneꞌ judío caꞌ.
\v 11 Che ba be̱naꞌ tu da zrinnaj da dxun na gútele nedaꞌ, waca gútele nedaꞌ. Che quebe bi de̱ naca na da li ca naca zria da dxelawe̱ꞌ nedaꞌ, quebe nu napa xel-laꞌ dxenná bea gudée̱ꞌ nedaꞌ lu naꞌ benneꞌ caꞌ. Dxenabaꞌ zriꞌa chiaꞌ lau César.
\p
\v 12 Ca gudé bchálajle̱ne̱ꞌ benneꞌ dxuluzéajniꞌi le̱ꞌ, naꞌ Festo guzre̱ꞌ Pablo:
\p ―Ba gunabuꞌ zriꞌa chiuꞌ lau César. Chéajuꞌ lau César.
\s Pablo dxezrine̱ꞌ lau Agripa, benneꞌ wenná bea
\p
\v 13 Ca gudé zaneꞌ zra Agripa, benneꞌ wenná bea, ne bi zane̱ꞌ belezrine̱ꞌ Cesarea chee̱ xulugape̱ꞌ Festo diuzre.
\v 14 Gulezúe̱ꞌ naꞌ tu chupa zra, naꞌ Festo bzenne̱ꞌ Agripa, benneꞌ wenná bea naꞌ ca naca chee̱ Pablo. Guzre̱ꞌ le̱ꞌ:
\p ―Zua tu benneꞌ nigá, benneꞌ bcaꞌana Félix lizre xia.
\v 15 Gate guzúaꞌ xe̱zre Jerusalén, naꞌ benneꞌ xíchaje̱ caꞌ chee̱ bxruze caꞌ, ne benneꞌ gula sina caꞌ chee̱ judío caꞌ gulenné̱ꞌ chee̱ benneꞌ nigá, ne gulenabe̱ꞌ nedaꞌ chugaꞌ chee̱ꞌ gatie̱ꞌ.
\v 16 Nedaꞌ beche̱baꞌ benneꞌ caꞌ, gunníaꞌ benneꞌ xuꞌu laweꞌ chee̱ Roma quebe nu benneꞌ dxelechugue̱ꞌ chee̱ꞌ gatie̱ꞌ che quebe zrine̱ꞌ lau benneꞌ caꞌ dxelaweꞌ le̱ꞌ zria chee̱ xeche̱be̱ꞌ waláz chee̱ꞌ.
\v 17 Chee̱ le̱ naꞌ, gate beleláꞌ benneꞌ caꞌ nigá, quebe guzredaꞌ, naꞌ zra xula gudxeꞌa lataj blau chiaꞌ, ne gunná beꞌedaꞌ blaꞌ benneꞌ naꞌ.
\v 18 Benneꞌ caꞌ gulawe̱ꞌ le̱ꞌ zria quebe bi gulenné̱ꞌ chee̱ꞌ ca da gúquedaꞌ nedaꞌ.
\v 19 Laze láweze da gulenné̱ꞌ chee̱ꞌ naca na ca naca da dxeléajle̱ꞌe̱ chee̱ Dios, ne chee̱ tu benneꞌ le̱ꞌ Jesús, benneꞌ gute, san dxenná Pablo naca bane̱ꞌ.
\v 20 Quebe bezréledaꞌ ájala gunaꞌ chee̱ da naꞌ, naꞌ bche̱baꞌ Pablo che dxaca lazre̱ꞌ chéaje̱ꞌ Jerusalén chee̱ zriꞌa ca naca chee̱ꞌ naꞌ.
\v 21 Nadxa le̱ꞌ gunabe̱ꞌ zriꞌa chee̱ꞌ lau César Augusto, naꞌ gunná beꞌedaꞌ xegáꞌane̱ꞌ lizre xia cadxa séquedaꞌ sel-laꞌ le̱ꞌ lau César.
\p
\v 22 Nadxa gunná Agripa, dxe̱ꞌe̱ Festo:
\p ―La gaze nedaꞌ dxaca lazraꞌ xendaꞌ chee̱ benneꞌ nigá.
\p Naꞌ beche̱be Festo:
\p ―Wxre xennuꞌ chee̱ꞌ.
\p
\v 23 Zra xula, gate belezrín Agripa, ne Berenice ga naꞌ, belúꞌe̱ lu dute̱ xel-laꞌ szren nen benneꞌ dxenná beꞌe̱ lu wedil-la, ne benneꞌ blau caꞌ chee̱ xe̱zre. Naꞌ Festo gunná béꞌene̱ꞌ xeajlexríꞌe̱ Pablo,
\v 24 naꞌ gunné̱ꞌ:
\p ―Agripa, benneꞌ wenná bea, ne leꞌe, nazrágale nigá nen netuꞌ. Nigá zua benneꞌ naꞌ. Benneꞌ zan, benneꞌ judío zaj zre̱ꞌe̱ Jerusalén, ne benneꞌ zaj zre̱ꞌe̱ Cesarea nigá, gulenné̱ꞌ chee̱ benneꞌ nigá, naꞌ tu gulé̱zqueze̱ꞌ nedaꞌ dxal-laꞌ gatie̱ꞌ.
\v 25 Nedaꞌ dxéquedaꞌ quebe bi be̱ne̱ꞌ da gudé na le̱ꞌ gatie̱ꞌ, san lé̱queze̱ꞌ gunabe̱ꞌ zriꞌa chee̱ꞌ lau César. Chee̱ le̱ naꞌ ba nunaꞌ chee̱ꞌ sel-laꞌ le̱ꞌ lau César.
\v 26 Quebe bi de̱ da guzúajaꞌ chee̱ Xranaꞌ César ca naca chee̱ benneꞌ nigá. Chee̱ le̱ naꞌ dxuzúaꞌ benneꞌ nigá laule leꞌe, ne da naca bláuqueze, dxuzúaꞌ le̱ꞌ lau lueꞌ, wenná bea Agripa, chee̱ guche̱buꞌ le̱ꞌ chee̱ gataꞌ lateꞌ da guzúajaꞌ ca naca chee̱ꞌ.
\v 27 Dxéquedaꞌ quebe naca chaweꞌ sel-laꞌ tu benneꞌ nadxéaje̱ꞌ du xia, ne quebe nniaꞌ bi da zria nape̱ꞌ.
\c 26
\s Pablo dxexeche̱be̱ꞌ lau Agripa, benneꞌ wenná bea
\p
\v 1 Nadxa gunná wenná bea Agripa, guzre̱ꞌ Pablo:
\p ―Waca xeche̱buꞌ.
\p Naꞌ Pablo guchisa ne̱ꞌe̱, ne guzú lawe̱ꞌ dxuchálaje̱ꞌ, dxenné̱ꞌ:
\p
\v 2 ―Dxebéle̱ꞌe̱daꞌ dxunuꞌ nedaꞌ lataj dxuchálajaꞌ lau lueꞌ, wenná bea Agripa, chee̱ xeche̱baꞌ ca da gulenná benneꞌ judío chiaꞌ nedaꞌ,
\v 3 ne da naca blaudxa, laweꞌ da nézqueznuꞌ lueꞌ ca naca da zéajle̱ntuꞌ netuꞌ, benneꞌ judío caꞌ, ne ca naca dizraꞌ dxutil-la ljwézrentuꞌ. Chee̱ le̱ naꞌ dxenabaꞌ lueꞌ xennuꞌ chiaꞌ dute̱ xel-laꞌ zren lazreꞌ chiuꞌ.
\p
\v 4 ’Xúgute̱ benneꞌ judío caꞌ zaj nézene̱ꞌ ca be̱naꞌ lazriaꞌ, ne lu xe̱zre Jerusalén gate nácateaꞌ bidauꞌte̱.
\v 5 Zaj nézqueze benneꞌ caꞌ, ne waca xelexeche̱be̱ꞌ che dxelaca lazre̱ꞌ, ca nácateaꞌ benneꞌ cuídeꞌte̱, nacaꞌ fariseo. Benneꞌ fariseo caꞌ zjácale̱dxe̱ꞌ ca naca chee̱ da dxeléajle̱ judío caꞌ chee̱ Dios.
\v 6 Naꞌa laweꞌ da dxebeza lazraꞌ gusebán Dios benneꞌ gate caꞌ, ca guche̱be lazre̱ꞌ chee̱ xra xrtáuntuꞌ caꞌ, benneꞌ caꞌ buluzúe̱ꞌ nedaꞌ lau xuꞌu laweꞌ.
\v 7 Dxelebeza lazreꞌ chazrinnu cueꞌ zriꞌine zre sua Israel xeleléꞌene̱ꞌ gaca ca naca da nigá guche̱be lazreꞌ Dios, naꞌ chee̱ le̱ naꞌ dxulucáꞌana szrene̱ꞌ Dios, ne dxelune̱ꞌ zrin chee̱ꞌ te zra ne chizrela. Naꞌa, wenná bea Agripa, benneꞌ judío caꞌ dxelawe̱ꞌ nedaꞌ zria laweꞌ da dxebeza lazraꞌ ca naca da caníqueze da nache̱be lazreꞌ Dios.
\v 8 ¿Quebe dxéajle̱ꞌu gusebán Dios benneꞌ gate caꞌ?
\p
\v 9 ’Nédaꞌquezaꞌ nédxute̱ gúquedaꞌ da zan da dxal-laꞌ gunaꞌ chee̱ benneꞌ caꞌ dxeléajle̱ꞌe̱ chee̱ Jesús, benneꞌ Nazaret.
\v 10 Caní be̱naꞌ lu xe̱zre Jerusalén. Lu xel-laꞌ dxenná bea chee̱ benneꞌ xíchaje̱ caꞌ chee̱ bxruze caꞌ, benneꞌ zan bzraꞌa lizre xia, benneꞌ dxeléajle̱ꞌe̱ chee̱ Jesús, naꞌ gate belútie̱ꞌ benneꞌ caꞌ nedaꞌ bé̱nquezaꞌ tuze benneꞌ caꞌ belútie̱ꞌ le̱ꞌ.
\v 11 Zaneꞌ lásate̱ bdeaꞌ benneꞌ caꞌ ba xaꞌ chee̱ xulusane̱ꞌ xel-laꞌ dxeleajlí lazreꞌ chee̱ꞌ. Caní be̱naꞌ xúgute̱ lu xuꞌu caꞌ naga dxelezraga judío caꞌ, naꞌ lu xel-laꞌ dxezráꞌa chiaꞌ benneꞌ caꞌ, gudáu ziꞌ xuzraꞌ benneꞌ caꞌ zaj zre̱ꞌe̱ lu xe̱zre zituꞌ caꞌ.
\p
\v 12 ’Chee̱ gunaꞌ da nigá zexáꞌa xe̱zre Damasco, zaj nasel-la benneꞌ xíchaje̱ caꞌ chee̱ bxruze caꞌ nedaꞌ nen xel-laꞌ dxenná bea chee̱ꞌ.
\v 13 Ca zexáꞌa xuꞌa neza naꞌ, du wagubizra bleꞌedaꞌ tu xiꞌ da zaꞌ xabáa da nácadxa ca xel-laꞌ dxennáꞌ chee̱ gubizra, naꞌ gusení na naga zexáꞌa nedaꞌ nen benneꞌ zjácale̱ne̱ꞌ nedaꞌ.
\v 14 Nadxa xúgute̱ntuꞌ xeajcházentuꞌ lu xu, naꞌ bendaꞌ chiꞌi tu benneꞌ gunné̱ꞌ dizraꞌ hebreo, guzre̱ꞌ nedaꞌ: “Saulo, Saulo, ¿bizr chee̱ naꞌ nau ziꞌ xuzruꞌ nedaꞌ? Lueꞌze dxun ziꞌ cuinuꞌ ca dxun be̱zre gate dxulíbebaꞌ laweꞌ xágala da dxádue̱ꞌ-baꞌ.”
\v 15 Nadxa gunnéaꞌ: ¿Nuzra Lueꞌ, Xran? naꞌ Xránadxu guzre̱ꞌ nedaꞌ: “Nedaꞌ nacaꞌ Jesús, bénneaꞌ nau ziꞌ xuzruꞌ.
\v 16 Bexasa, guzé̱, laweꞌ da bleꞌe lawaꞌ lueꞌ chee̱ gunuꞌ zrin chiaꞌ, ne chee̱ xeche̱buꞌ ca naca da ba bléꞌenuꞌ, ne ca naca da za leꞌenuꞌ gate te naꞌa.
\v 17 Guseláꞌ lueꞌ lu naꞌ benneꞌ judío caꞌ, ne lu naꞌ benneꞌ zituꞌ caꞌ naga dxusel-laꞌ lueꞌ naꞌa.
\v 18 Dxusel-laꞌ lueꞌ lau benneꞌ caꞌ chee̱ sálajuꞌ xiaj lau benneꞌ caꞌ chee̱ xulusane̱ꞌ da naca chee̱ da chul-la, naꞌ xelune̱ꞌ da naca chee̱ xel-laꞌ naxaníꞌ, ne chee̱ xelexedxúaje̱ꞌ lu naꞌ da xriwe̱ꞌ, ne xelexúꞌe̱ lu naꞌ Dios, ne chee̱ xeléajle̱ꞌe̱ chiaꞌ nedaꞌ, naꞌ xunite lau Dios ca naca dul-la chee̱ꞌ, ne gaca chee̱ꞌ tu da xelape̱ꞌ láwela benneꞌ caꞌ ba gucáꞌa Dios.”
\p
\v 19 ’Caꞌ guca, wenná bea Agripa. Bzuaꞌ dizraꞌ ca naca da bleꞌe Dios nedaꞌ da naca chee̱ xabáa.
\v 20 Nedxu bchálajaꞌ dizraꞌ chee̱ Dios lau benneꞌ zaj zre̱ꞌe̱ xe̱zre Damasco, naꞌ gudé naꞌ lau benneꞌ zaj zre̱ꞌe̱ Jerusalén, ne ca naca naga nababa Judea, ne lau benneꞌ caꞌ quebe zaj naque̱ꞌ judío. Guchaꞌ benneꞌ caꞌ dxal-laꞌ xelexebíꞌi lazre̱ꞌ, ne xelexexaque̱ꞌ chee̱ Dios, naꞌ xelune̱ꞌ da xelunna bea na ca da ba zaj naque̱ꞌ.
\v 21 Chee̱ le̱ naꞌ benneꞌ judío caꞌ gule̱l-le̱ꞌ nedaꞌ lu xudauꞌ, ne gulaca lazre̱ꞌ xelútie̱ꞌ nedaꞌ.
\v 22 Dios dxácale̱ne̱ꞌ nedaꞌ, naꞌ ze̱ chúchuquezaꞌ lu zra naꞌa zra, dxuchálajle̱naꞌ xúgute̱ benneꞌ ca naca chee̱ Dios, benneꞌ cáꞌaze caꞌ, ne benneꞌ blau caꞌ. Dxapaꞌ benneꞌ caꞌ tuze ca naca da gulenná benneꞌ caꞌ buluchálaje̱ꞌ waláz chee̱ Dios, ne da gunná Moisés dxal-laꞌ gaca.
\v 23 Gulenné̱ꞌ Cristo dxal-laꞌ siꞌ saque̱ꞌ, naꞌ ca te gatie̱ꞌ dxal-laꞌ xebane̱ꞌ ládujla benneꞌ gate nédxudxa ca xúgute̱ benneꞌ caꞌ, naꞌ gulenné̱ꞌ xelén benneꞌ judío caꞌ, ne benneꞌ quebe zaj naque̱ꞌ judío ca naca chee̱ xel-laꞌ naxaníꞌ chee̱ Dios, da dxuléꞌe na le̱ꞌ ca gaca xelelé̱ꞌ.
\s Pablo dxaca lazre̱ꞌ guzéajniꞌine̱ꞌ Agripa gaque̱ꞌ benneꞌ chee̱ Cristo
\p
\v 24 Gate gunná Pablo da caní, naꞌ gunná zizraj Festo:
\p ―Nadá xichaj lázrdaꞌu, Pablo. Laweꞌ da dxusé̱dele̱ꞌu, naꞌ nadá xichaj lázrdaꞌu.
\p
\v 25 Pablo beche̱be̱ꞌ:
\p ―Quebe nadá xichaj lázrdawaꞌ, dxapaꞌ cuinuꞌ Festo. Da dxennéaꞌ naca na da gaca chéajle̱dxu, ne da li.
\v 26 Nigá zua wenná bea Agripa. Nézele̱ꞌe̱ne̱ꞌ ca naca chee̱ da caní, naꞌ chee̱ le̱ naꞌ dxuchálajaꞌ dute̱ xel-laꞌ dxuxrén lazreꞌ chiaꞌ lawe̱ꞌ. Nézquezdaꞌ le̱ꞌ nézene̱ꞌ ca naca da nigá laweꞌ da dxuchálajaꞌ ca naca chee̱ da quebe guca na bagácheze.
\v 27 ¿Dxéajle̱ꞌu lueꞌ, wenná bea Agripa, ca naca da gulenná benneꞌ caꞌ buluchálaje̱ꞌ waláz chee̱ Dios? Nezdaꞌ dxéajle̱ꞌu.
\p
\v 28 Nadxa gunná Agripa:
\p ―Xeláteze guzéajniꞌinuꞌ nedaꞌ gacaꞌ chee̱ Cristo.
\p
\v 29 Nadxa gunná Pablo:
\p ―Che xeláteze u che da zrendxa dxenabaꞌ gun Dios, quegá lueꞌze, san cáꞌanqueze xúgute̱ benneꞌ dxelenne̱ꞌ chiaꞌ naꞌa, xelaque̱ꞌ ca nédaꞌquezaꞌ, san quebe xeledxéaje̱ꞌ du xia.
\p
\v 30 Ca gudé gunná Pablo da nigá, naꞌ gulexasa wenná bea, ne benneꞌ xuꞌu lu ne̱ꞌe̱ xe̱zr la xu naꞌ tu zren nen Berenice, ne xúgute̱ benneꞌ caꞌ zaj dxeꞌe̱ naꞌ.
\v 31 Belexedxúaje̱ꞌ chee̱ze̱ꞌ chee̱ xuluchálajle̱ ljwezre̱ꞌ ca naca chee̱ da nigá. Naꞌ gulenné̱ꞌ, dxelé̱ ljwezre̱ꞌ:
\p ―Benneꞌ nigá quebe bi da cale̱la ne gune̱ꞌ da gudé na le̱ꞌ gatie̱ꞌ, ne quebe dxal-laꞌ chuꞌe̱ lizre xia.
\p
\v 32 Naꞌ gunná Agripa, guzre̱ꞌ Festo:
\p ―Waca gusandxu benneꞌ nigá chela quebe gunabe̱ꞌ zriꞌa chee̱ꞌ lau César.
\c 27
\s Dxelesel-le̱ꞌ Pablo lu xe̱zre Roma
\p
\v 1 Gate ba zaj nune̱ꞌ xelesel-le̱ꞌ netuꞌ lu xe̱zr la xu Italia, naꞌ Pablo, ne xezícala benneꞌ caꞌ zaj zre̱ꞌe̱ lizre xia, buludée̱ꞌ le̱ꞌ lu naꞌ tu benneꞌ dxenná béꞌene̱ lu wedil-la le̱ꞌ Julio, benneꞌ yuꞌu lu ne̱ꞌe̱ tu cueꞌ benneꞌ dxjaque̱ꞌ wedil-la nazí le na Benneꞌ Chee̱ Augusto Dxjaque̱ꞌ Wedil-la.
\v 2 Naꞌ guxúꞌuntuꞌ tu lu da dxedá laweꞌ nísadauꞌ chee̱ xe̱zre Adramitio, da ba zua te na xé̱zredu caꞌ chee̱ ga nababa Asia. Zúale̱queze Aristarco netuꞌ, tu benneꞌ xe̱zre Tesalónica chee̱ ga nababa Macedonia.
\v 3 Zra xula bzrintuꞌ xe̱zre Sidón, naga Julio bé̱nle̱ꞌe̱ da chaweꞌ chee̱ Pablo, naꞌ be̱ꞌe̱ le̱ꞌ lataj xeajnné̱ꞌe̱ bi bíchedxu caꞌ chee̱ bi belune̱ꞌ chee̱ꞌ.
\v 4 Gate bezaꞌntuꞌ xe̱zre Sidón, naꞌ gudentuꞌ naga dxeꞌ xe̱zr la xu Chipre da naxechaj nísadauꞌ. Bléꞌentuꞌ na chaláꞌa xéglala laweꞌ da dxaca beꞌ da quebe dxue na da dxedá laweꞌ nísadauꞌ lataj cheaj na lizra lidauꞌ.
\v 5 Gudentuꞌ lu nísadauꞌ le nnaꞌ xe̱zre caꞌ zaj nababa Cilicia, ne Panfilia, naꞌ bzrintuꞌ xe̱zre Mira da nababa Licia.
\p
\v 6 Lu xe̱zre naꞌ benneꞌ dxenná beꞌe̱ lu wedil-la bezrague̱ꞌ tu da dxedá laweꞌ nísadauꞌ chee̱ xe̱zre Alejandría da zeaj na xe̱zr la xu Italia, naꞌ bzre̱ꞌe̱ netuꞌ lawle chee̱ zeajntuꞌ Italia naꞌ.
\v 7 Zaneꞌ zra zéajntuꞌ chaweꞌ lazreꞌ, naꞌ sté̱bele̱ꞌe̱ bzrintuꞌ le nnaꞌ xe̱zre Gnido. Laweꞌ da ne za beꞌ naꞌ dxedábaga na da dxedá laweꞌ nísadauꞌ, naꞌ gudentuꞌ le nnaꞌ Salmón, ne guxéchajntuꞌ naga dxeꞌ xe̱zr la xu Creta da naxechaj nísadauꞌ.
\v 8 Sté̱bele̱ꞌe̱ gudentuꞌ chaláꞌala naga dxeꞌ Creta naꞌ, naꞌ bzrintuꞌ tu xé̱zredauꞌ nazí le na Buenos Puertos, da zua gagu naga zua xe̱zre Lasea.
\p
\v 9 Záneꞌte̱ zra bnítentuꞌ xuꞌuntuꞌ da dxedá laweꞌ nísadauꞌ naꞌ, naꞌ ba naca ste̱be zéajntuꞌ lu nísadauꞌ naꞌ laweꞌ da ba dxexúꞌudxu beuꞌ zaga. Chee̱ le̱ naꞌ bzéajniꞌi Pablo benneꞌ caꞌ.
\v 10 Dxenné̱ꞌ:
\p ―Leꞌe, benneꞌ, dxeléꞌedaꞌ wácale̱ꞌe̱ ste̱be naga zéajdxu naꞌa, naꞌ wabía xiꞌ da dxedá laweꞌ nísadauꞌ nigá ne xua da nua na, naꞌ zrúzrete̱ cuía xidxu dxiꞌu.
\p
\v 11 Benneꞌ dxenná beꞌe̱ lu wedil-la guxéajle̱dxe̱ꞌ chee̱ xrane da dxedá laweꞌ nísadauꞌ naꞌ, ne chee̱ benneꞌ xuꞌu na lu ne̱ꞌe̱, ca chee̱ Pablo.
\v 12 Naꞌ laweꞌ da quebe naca lataj naꞌ chaweꞌ súadxu naꞌ beuꞌ zaga caꞌ, naꞌ xúgute̱ꞌ guléquene̱ꞌ nácadxa chaweꞌ xezáꞌ da dxedá laweꞌ nísadauꞌ naꞌ chee̱ xexéaj na Fenice, tu xe̱zre chee̱ Creta naꞌ, da dxeꞌ chaláꞌa chee̱ xe̱zr la xu Creta naga dxebía gubizra, naꞌ xegáꞌanadxu naꞌ beuꞌ zaga caꞌ.
\s Dxaca beꞌ bdunuꞌ lu nísadauꞌ
\p
\v 13 Nadxa guzú lau dxaca lase beꞌ da zaꞌ chaláꞌa naga dxedé gubizra beuꞌ zaga, naꞌ guléquene̱ꞌ waca chéajte̱zentuꞌ lu nísadauꞌ, naꞌ gudentuꞌ gáguze lu xe̱zr la xu Creta naꞌ.
\v 14 Nadxa chíte̱ze guca guzú lau dxácale̱ꞌe̱ beꞌ bdunuꞌ da zaꞌ chaláꞌa ga zaꞌ beꞌ zaga.
\v 15 Beꞌ naꞌ guzú lau dxuzriga na chaláꞌala da dxedá laweꞌ nísadauꞌ naꞌ, naꞌ laweꞌ da québedxa guca chéajdxantuꞌ naga zaꞌ beꞌ naꞌ be̱n na ba xen be̱ntuꞌ lataj bzriga na da dxedá laweꞌ nísadauꞌ naꞌ.
\v 16 Naꞌ gudentuꞌ cúzrela tu xe̱zr la xudauꞌ naxechaj nísadauꞌ da nazí le na Clauda, naga québedxa dxácate̱ na beꞌ naꞌ wal-la, naꞌ sté̱bele̱ꞌe̱ gúquentuꞌ bcuentuꞌ da dauꞌ da dxedá laweꞌ nísadauꞌ da nazrube xu da zren naꞌ xuꞌuntuꞌ, naꞌ bzuantuꞌ na lu da zren da dxedá laweꞌ nísadauꞌ naꞌ.
\v 17 Ca gudé bulucuene̱ꞌ da dauꞌ naꞌ, naꞌ buludée̱ꞌ du zriꞌa caꞌ zran da dxedá laweꞌ nísadauꞌ naꞌ da xeluxru chacha na. Nadxa, laweꞌ da belezrebe̱ꞌ chaze da dxedá laweꞌ nísadauꞌ naꞌ lu xuzreꞌ naga nazí le Sirte, naꞌ bululétaje̱ꞌ ladxeꞌ caꞌ da dxelecáꞌa beꞌ lu da dxedá laweꞌ nísadauꞌ naꞌ, naꞌ belúe lataj beꞌ naꞌ bzriga na le̱n.
\v 18 Zra xula, laweꞌ da ne dxácale̱ꞌe̱ beꞌ bdunuꞌ, gulezú lawe̱ꞌ dxeledxúꞌune̱ꞌ xua caꞌ lu nísadauꞌ, da nua da dxedá laweꞌ nísadauꞌ naꞌ.
\v 19 Zra guxunneꞌ zra nen náꞌquezentuꞌ gudxúꞌunantuꞌ lu nísadauꞌ da dxuluchínene̱ꞌ chee̱ da dxedá laweꞌ nísadauꞌ naꞌ.
\v 20 Zaneꞌ zra quebe bléꞌentuꞌ gubizra ne belaj caꞌ, ne ca naca beꞌ bdunuꞌ zren naꞌ ne dxuzriga na da dxedá laweꞌ nísadauꞌ naꞌ, naꞌ québedxa guleza lázrentuꞌ láquezentuꞌ.
\p
\v 21 Zaneꞌ zra gudentuꞌ quebe náguntuꞌ, naꞌ guzé̱ Pablo láwela benneꞌ caꞌ, ne gunné̱ꞌ:
\p ―Leꞌe, benneꞌ, cháwedxa la guca chee̱dxu la be̱nle da guchaꞌ leꞌe, naꞌ quebe bedxúajdxu lu xe̱zr la xu Creta, ne quebe bi guque da dxedá laweꞌ nísadauꞌ nigá, naꞌ xuaꞌ da nua na quebe guzría xiꞌ.
\v 22 Naꞌa, quebe guchebe lázrele. Netudxu dxiꞌu quebe cuía xidxu, lácala cuía xiꞌ da dxedá laweꞌ nísadauꞌ nigá.
\v 23 Ba dxe̱le bleꞌe lau tu gubáz chee̱ xabáa chee̱ Dios nedaꞌ. Nacaꞌ chee̱ Dios nigá ne dxunaꞌ zrin chee̱ꞌ.
\v 24 Gubáz naꞌ guzre̱ꞌ nedaꞌ: “Quebe zrebuꞌ, Pablo, laweꞌ da dxun na ba xen zrinuꞌ lau César, naꞌ ne̱ chiuꞌ lueꞌ Dios guselé̱ꞌ lu xel-laꞌ gute xúgute̱ benneꞌ zaj zraꞌ nen lueꞌ lu da dxedá laweꞌ nísadauꞌ nigá.”
\v 25 Chee̱ le̱ naꞌ, benneꞌ, le gun dipa lázrele, laweꞌ da dxuxrén lazraꞌ Dios, ne nezdaꞌ waca ca gunná gubáz chee̱ xabáa naꞌ bchálajle̱ne̱ꞌ nedaꞌ.
\v 26 Naꞌa dxun na ba xen cheajchaze da dxedá laweꞌ nísadauꞌ nigá tu lu xe̱zr la xu da naxechaj nísadauꞌ.
\p
\v 27 Ca gudé chinuꞌ zra gate naca chizrela, ne zrantuꞌ lu nísadauꞌ nazí le na Adria, naꞌ beꞌ naꞌ dxaca dxuzriga na da dxedá laweꞌ nísadauꞌ quela caꞌala, naꞌ dxe̱la guleque beꞌe benneꞌ caꞌ dxulusá da dxedá laweꞌ nísadauꞌ naꞌ ba dxezrín na dxuꞌa xu bizre.
\v 28 Naꞌ buludxixre̱ꞌ cátite situj dxeꞌ nisa naꞌ, naꞌ dxeꞌ na galaj esa. Naꞌ xetú chíꞌidauꞌ gudé buludxixre̱ꞌ da xula, naꞌ dxeꞌ na chinuꞌ ésaze.
\v 29 Belezrebe̱ꞌ cheajtá da dxedá laweꞌ nísadauꞌ naꞌ xiaj, naꞌ buluzale̱ꞌ tapa xia da nácale̱ꞌe̱ ziꞌi zran nisa zeaj zranla da dxedá laweꞌ nísadauꞌ naꞌ, naꞌ gulebeze̱ꞌ chaníꞌ dudxuze dxelezrebe̱ꞌ.
\v 30 Nadxa benneꞌ caꞌ dxulusá da dxedá laweꞌ nísadauꞌ naꞌ guléquene̱ꞌ xelexedxúaje̱ꞌ lu da dxedá laweꞌ nísadauꞌ naꞌ, naꞌ gulezú lawe̱ꞌ dxululétaje̱ꞌ da dauꞌ naꞌ zria laweꞌ da zren naꞌ dxedá laweꞌ nísadauꞌ, dxelune̱ꞌ ca benneꞌ xuluzáladxa xia da guxru na da dxedá laweꞌ nísadauꞌ zren naꞌ da zeaj laula na.
\v 31 Pablo bzenne̱ꞌ benneꞌ dxenná beꞌe̱ lu wedil-la, ne benneꞌ dxjaque̱ꞌ wedil-la, dxenné̱ꞌ:
\p ―Che quebe xelegáꞌana benneꞌ caní lu da dxedá laweꞌ nísadauꞌ, quebe lale leꞌe.
\p
\v 32 Nadxa benneꞌ dxjaque̱ꞌ wedil-la gulechugue̱ꞌ du zriꞌa da nadxéaj da dauꞌ naꞌ, naꞌ belúꞌe̱ na lataj bexruj na lu nísadauꞌ.
\p
\v 33 Ca guxaníꞌsise̱ꞌ bzéajniꞌi Pablo xúgute̱ benneꞌ caꞌ dxal-laꞌ xelawe̱ꞌ xeta, gunné̱ꞌ:
\p ―Ba zeaj chinuꞌ zra quebe dxásele ne quebe dxágule.
\v 34 Dxataꞌ xuedaꞌ leꞌe gágule. Da nigá dxun na ba xen chee̱ lale. Netudxu dxiꞌu quebe cuía xiꞌ netú xicha xíchajdxu.
\p
\v 35 Ca gunné̱ꞌ caní, Pablo guqué̱ꞌe̱ tu xeta xtila, naꞌ guzre̱ꞌ Dios: “Xcalenuꞌ”, lau xúgute̱ benneꞌ caꞌ. Nadxa bzúzruje̱ꞌ na, naꞌ guzú lawe̱ꞌ dxawe̱ꞌ.
\v 36 Nadxa xúgute̱ꞌ belún dipa lazre̱ꞌ, naꞌ gulezú lau dxelawe̱ꞌ.
\v 37 Cátite netuꞌ zrantuꞌ lu da dxedá laweꞌ nísadauꞌ naꞌ nácantuꞌ chupa gaxúa ga xun chinu tuntuꞌ.
\v 38 Ca gudé gulawe̱ꞌ cátite guléljene̱ꞌ, naꞌ buluzale̱ꞌ zruaꞌ xtila lu nísadauꞌ chee̱ bezráꞌ da dxedá laweꞌ nísadauꞌ naꞌ.
\s Dxebía xiꞌ da zren da dxedá laweꞌ nísadauꞌ
\p
\v 39 Gate guxaníꞌ, benneꞌ caꞌ dxulusá da dxedá laweꞌ nísadauꞌ naꞌ quebe belexúnbeꞌe̱ xe̱zr la xu naꞌ da zua na le nnaꞌ naga zaj zre̱ꞌe̱. Beleléꞌene̱ꞌ naga dxexúꞌu nísadauꞌ gachaj láwela xe̱zr la xu naꞌ, naꞌ dxuꞌe naꞌ naca lacheꞌ. Naꞌ gulaca lazre̱ꞌ xuluxudée̱ꞌ da dxedá laweꞌ nísadauꞌ laduj naꞌ.
\v 40 Gulechugue̱ꞌ du zriꞌa caꞌ zaj nacáꞌa xia caꞌ, ne bulucáꞌane̱ꞌ xia caꞌ lu nísadauꞌ. Gulese̱zre̱ꞌ du zriꞌa da nadxéaj ne̱ꞌe xaga da dxuzechaj na da dxedá laweꞌ nísadauꞌ. Nadxa gulechise̱ꞌ ladxeꞌ da dxecáꞌa beꞌ da zeaj láwela da dxedá laweꞌ nísadauꞌ, naꞌ da dxedá laweꞌ nísadauꞌ naꞌ guzú lau dxebiga na naga naca lacheꞌ.
\v 41 Bzrin na naga dxezraga nisa naꞌ dxupa laꞌa, naꞌ da dxedá laweꞌ nísadauꞌ naꞌ guxaze na lu xuzreꞌ da dxeꞌ zran nisa naꞌ. Zeaj láwela da dxedá laweꞌ nísadauꞌ, naꞌ begáꞌana na chalásaze lu xuzreꞌ naꞌ, ne québedxa gulezéquene̱ꞌ xuluté̱ꞌ na. Da zeaj zranla guzú lau dxuzruj na laweꞌ da dxeajé̱le̱ꞌe̱ xeajxruza chee̱ nísadauꞌ naꞌ zran da dxedá laweꞌ nísadauꞌ naꞌ.
\v 42 Benneꞌ dxjaque̱ꞌ wedil-la gulaca lazre̱ꞌ xelútie̱ꞌ benneꞌ zaj nadxéaje̱ꞌ chee̱ quebe xuluxuzrúnnuje̱ꞌ xelezrúe̱ꞌ laweꞌ nisa naꞌ.
\v 43 Benneꞌ dxenná beꞌe̱ lu wedil-la guca lazre̱ꞌ guselé̱ꞌ Pablo, naꞌ quebe be̱ꞌe̱ lataj benneꞌ dxjaque̱ꞌ wedil-la xelútie̱ꞌ benneꞌ caꞌ. Naꞌ gunná béꞌene̱ꞌ benneꞌ caꞌ dxelaque̱ꞌ dxelezrúe̱ꞌ nisa cheajlexexrítie̱ꞌ lu nisa naꞌ chee̱ xelexezrine̱ꞌ lu xu bizre.
\v 44 Benneꞌ caꞌ xezícala, bal-le̱ꞌ gulequé̱ꞌe̱ blagaꞌ, ne xebal-le̱ꞌ gulequé̱ꞌe̱ blagaꞌ bizruj chee̱ da dxedá laweꞌ nísadauꞌ naꞌ, naꞌ caní guca, xúgute̱ꞌ belexezrine̱ꞌ lu xu bizre.
\c 28
\s Da be̱n Pablo lu xe̱zr la xu naꞌ nazí le na Malta
\p
\v 1 Ca gulá xúgute̱ntuꞌ, naꞌ gunézentuꞌ xe̱zr la xu naꞌ da naxechaj nísadauꞌ nazí le na Malta.
\v 2 Benneꞌ zaj zre̱ꞌe̱ naꞌ belúnle̱ꞌe̱ netuꞌ cháwedauꞌ. Gulebécheꞌle̱ꞌe̱ xiꞌ laweꞌ da dxúnle̱ꞌe̱ zaga, ne dxaca xiuj, naꞌ gulenné̱ꞌ netuꞌ cheajse̱ntuꞌ dxuꞌa xiꞌ chee̱ xezréꞌentuꞌ.
\v 3 Nadxa Pablo guqué̱ꞌe̱ tu xrunu zruze xaga, naꞌ ca dxuzré̱ꞌe̱ na lu xiꞌ, bedxúaj tu be̱laꞌ da naꞌ dxuzrúnnujbaꞌ lu da la naꞌ, naꞌ gudagu xaꞌabaꞌ naꞌ Pablo.
\v 4 Gate beleléꞌe benneꞌ caꞌ zaj zre̱ꞌe̱ lu xe̱zr la xu naꞌ, nal-laꞌ be̱laꞌ naꞌ naꞌ Pablo, naꞌ gulé̱ ljwezre̱ꞌ:
\p ―Benneꞌ nigá naque̱ꞌ we̱te benneꞌ laweꞌ da lácala gulé̱ꞌ lu nísadauꞌ, quebe dxue lataj dios naꞌ nazíꞌi le̱ꞌ Xrlátaje gaca ban le̱ꞌ.
\p
\v 5 Pablo guzribe̱ꞌ be̱laꞌ naꞌ lu xiꞌ, ne quebe bi gúquene̱ꞌ.
\v 6 Xúgute̱ꞌ gulebeze̱ꞌ chee̱ gataꞌ xiꞌ naꞌ Pablo u cheꞌe̱ gatie̱ꞌ. Ca gudé gulebeze̱ꞌ tu chiꞌi wal-la, ne beleléꞌene̱ꞌ quebe bi gúquene̱ꞌ, naꞌ buluché̱ꞌe̱ ca da dxeléquene̱ꞌ, ne gulezú lawe̱ꞌ dxelenné̱ꞌ naca Pablo tu dios.
\p
\v 7 Gágute̱ naga zrantuꞌ de̱ xe̱zr la xu chee̱ benneꞌ blau chee̱ xe̱zr la xu naꞌ, le̱ꞌ Publio. Benneꞌ nigá guzíꞌ lu ne̱ꞌe̱ netuꞌ, ne bxúele̱ꞌe̱ netuꞌ cháwedauꞌ laweꞌ chunna zra.
\v 8 Xra Publio de̱ze̱ꞌ, quebe chaweꞌ zue̱ꞌ, naꞌ xuꞌe̱ da la, ne dxaque̱ꞌ xízrawe̱ꞌ dxen. Pablo guxíaje̱ꞌ xeajnné̱ꞌe̱ le̱ꞌ, naꞌ ca gudé bchálajle̱ne̱ꞌ Dios, bze̱ ne̱ꞌe̱ laweꞌ le̱ꞌ, naꞌ bexaque̱ꞌ.
\v 9 Gate belenne̱ꞌ da nigá, naꞌ benneꞌ caꞌ xezícadxa, benneꞌ we̱ꞌ caꞌ zaj zre̱ꞌe̱ xe̱zr la xu naꞌ, belezrine̱ꞌ lau Pablo, naꞌ belexaque̱ꞌ.
\v 10 Gulápale̱ꞌe̱ netuꞌ ba láꞌana, naꞌ ca gudé naꞌ, gate ba zua chúꞌuntuꞌ da xula tu lu da dxedá laweꞌ nísadauꞌ, belunne̱ꞌ xúgute̱ da nachínnentuꞌ.
\s Pablo dxezrine̱ꞌ xe̱zre Roma
\p
\v 11 Ca gudé guca chunna beuꞌ zúantuꞌ lu xe̱zr la xu naꞌ, naꞌ bexúꞌuntuꞌ tu lu da dxedá laweꞌ nísadauꞌ da gudxéꞌ na naꞌ dxácate̱ naca beuꞌ zaga caꞌ. Naca na tu da dxedá laweꞌ nísadauꞌ chee̱ xe̱zre Alejandría, naꞌ luzrgue da dxedá laweꞌ nísadauꞌ naꞌ zaj da bedáuꞌ chee̱ dios bi lideꞌ caꞌ zaj le̱ꞌ Cástor ne Pólux.
\v 12 Bzrintuꞌ dxuꞌa xe̱zre Siracusa naga begáꞌanantuꞌ chunna zra.
\v 13 Gate bezaꞌntuꞌ naꞌ, naꞌ gudentuꞌ dxuꞌa xe̱zr la xu naꞌ, ne bzrintuꞌ xe̱zre Regio. Zra xula dxaca beꞌ da zaꞌ chaláꞌa naga dxedé gubizra beuꞌ zaga caꞌ, naꞌ zra gudxupeꞌ zra bzrintuꞌ xe̱zre Puteoli.
\v 14 Lu xe̱zre naꞌ bezrágantuꞌ bal-la bi bíchedxu, benneꞌ gulenné̱ꞌ netuꞌ lizre̱ꞌ xegáꞌanale̱ntuꞌ le̱ꞌ xrunuꞌ zra, naꞌ ca gudé naꞌ guzaꞌntuꞌ níꞌantuꞌ zéajntuꞌ Roma.
\v 15 Bi bíchedxu zaj zraꞌ Roma ba belenne̱ꞌ chee̱ntuꞌ, naꞌ beledxúaje̱ꞌ xe̱zre naꞌ, bedajlechague̱ꞌ netuꞌ tu xé̱zredauꞌ nazí le na Xiꞌa Chee̱ Apio, naꞌ xebal-le̱ꞌ belexezrague̱ꞌ netuꞌ tu lataj nazí le na Chunna Xúꞌudauꞌ. Gate bleꞌe Pablo bi bíchedxu caꞌ, naꞌ guzre̱ꞌ Dios: “Xcalenuꞌ”, ne be̱n dipa lazre̱ꞌ.
\v 16 Gate bzrintuꞌ Roma, benneꞌ dxenná beꞌe̱ lu wedil-la bdee̱ꞌ benneꞌ zaj nadxéaje̱ꞌ lu naꞌ benneꞌ xíchaje̱ chee̱ bi xraꞌaga caꞌ, san be̱ꞌe̱ lataj Pablo sue̱ꞌ chee̱ze̱ꞌ nen tu benneꞌ dxéaje̱ꞌ wedil-la, benneꞌ guxúe̱ꞌ le̱ꞌ chee̱ quebe xuzrúnnuje̱ꞌ.
\s Pablo dxuchálaje̱ꞌ chee̱ Jesús lu xe̱zre Roma
\p
\v 17 Ca gudé chunna zra Pablo gusel-le̱ꞌ benneꞌ xeajnné̱ꞌ benneꞌ judío blau caꞌ zaj zre̱ꞌe̱ Roma, naꞌ gate belezrague̱ꞌ, guzre̱ꞌ benneꞌ caꞌ:
\p ―Leꞌe, bi bichaꞌ. Nedaꞌ quebe gudábagaꞌ judío caꞌ, ne quebe gudábagaꞌ da xjácale̱ xra xrtáudxu caꞌ, san benneꞌ judío caꞌ zaj zre̱ꞌe̱ Jerusalén buludée̱ꞌ nedaꞌ lu naꞌ benneꞌ Roma caꞌ.
\v 18 Gate benneꞌ Roma zaj zre̱ꞌe̱ naꞌ buluche̱be̱ꞌ nedaꞌ, gulaca lazre̱ꞌ xulusane̱ꞌ nedaꞌ laweꞌ da quebe belezrelne̱ꞌ bi da be̱naꞌ da gun na xelechugue̱ꞌ chiaꞌ gatiaꞌ.
\v 19 Judío caꞌ guledábague̱ꞌ, naꞌ be̱n na ba xen gunabaꞌ nedaꞌ zriꞌa chiaꞌ lau César. Quebe nacan chee̱ gawaꞌ zria benneꞌ lázredxu.
\v 20 Chee̱ le̱ naꞌ gunnéaꞌ leꞌe chee̱ leꞌedaꞌ leꞌe, ne guchálajle̱naꞌ leꞌe laweꞌ da naca ne̱ chee̱ da dxebeza lázredxu dxiꞌu, benneꞌ Israel, zuaꞌ nigá nadxéajaꞌ xia.
\p
\v 21 Nadxa gulé̱ꞌe̱ le̱ꞌ:
\p ―Netuꞌ quebe bi xiche ne siꞌ lu naꞌntuꞌ da za na Judea ca naca chiuꞌ lueꞌ, naꞌ netú bi bíchedxu, benneꞌ judío, benneꞌ ba bele̱ꞌe̱ nigá bezé̱ꞌe̱ Judea, quebe bi da cale̱la dxenné̱ꞌ be̱nuꞌ.
\v 22 Dxaca lázrentuꞌ xénentuꞌ ca da dxéquenuꞌ lueꞌ laweꞌ da nézentuꞌ gátete̱ze naꞌ dxelenné̱ꞌ chee̱ benneꞌ caꞌ dxeléajle̱ꞌe̱ dizraꞌ cube nigá.
\p
\v 23 Buluzúe̱ꞌ tu zra gate xelexezrague̱ꞌ, naꞌ lu zra naꞌ benneꞌ zan belezrague̱ꞌ naga zua Pablo. Bchálajle̱ne̱ꞌ benneꞌ caꞌ ca naca xel-laꞌ dxenná bea chee̱ Dios che zílate̱la guxrínnele̱te̱. Be̱ne̱ꞌ ba xuzre guzéajniꞌine̱ꞌ benneꞌ caꞌ ca naca chee̱ Jesús ne̱ chee̱ da bdxixruj beꞌe Moisés, ne ne̱ chee̱ da buluzúaj benneꞌ caꞌ buluchálaje̱ꞌ waláz chee̱ Dios.
\v 24 Bal-le̱ꞌ gulezíꞌe̱ xrtizraꞌ Pablo, san xebal-le̱ꞌ quebe guléajle̱ꞌe̱.
\v 25 Quebe belune̱ꞌ tuze dizraꞌ, naꞌ gulezú lawe̱ꞌ dxelexedxúaje̱ꞌ. Nadxa gunná Pablo:
\p ―Da li naca da gunná Beꞌ Láꞌazxa, guzre̱ꞌ xra xrtáudxu caꞌ lu dxuꞌa Isaías, bénneaꞌ bchalaje̱ꞌ waláz chee̱ Dios, gunné̱ꞌ:
\q
\v 26 Guxíaj, xeaje̱zre benneꞌ caꞌ:
\q Da li wenle leꞌe san quebe chéajniꞌile.
\q Da li waléꞌele, ne quebe gueque beꞌele.
\q
\v 27 Zaj naca zideꞌ lázxdau benneꞌ caní,
\q ne quebe dxelenne̱ꞌ chaweꞌ.
\q Zaj naxezxuj xiaj lawe̱ꞌ
\q chee̱ quebe xeleléꞌene̱ꞌ nen xiaj lawe̱ꞌ,
\q ne quebe xelénene̱ꞌ nen nague̱ꞌ,
\q ne quebe xeléajniꞌine̱ꞌ nen lázrdawe̱ꞌ,
\q ne quebe xelexelé̱ꞌe̱ lawaꞌ nedaꞌ chee̱ xexunaꞌ nedaꞌ le̱ꞌ.
\p
\v 28 ’Dxal-laꞌ nézele leꞌe, naꞌa ne da za zaꞌ xel-laꞌ weselá chee̱ Dios guchálajle̱ntuꞌ benneꞌ quebe zaj naque̱ꞌ judío, naꞌ benneꞌ caꞌ xelezíꞌe̱ na.
\p
\v 29 Gate gunná Pablo da nigá, naꞌ besiáꞌaca judío caꞌ, dxuluché̱bele̱ꞌe̱ ljwezre̱ꞌ.
\p
\v 30 Pablo guzúe̱ꞌ chupa iza lu xuꞌu da dxízruje̱ꞌ, ne dxezíꞌ lu ne̱ꞌe̱ xúgute̱ benneꞌ dxedajlenné̱ꞌe̱ le̱ꞌ.
\v 31 Du lazre̱ꞌ bchálaje̱ꞌ ca naca xel-laꞌ dxenná bea chee̱ Dios, ne bsé̱dene̱ꞌ ca naca chee̱ Xránadxu Jesucristo, naꞌ netú quebe nu blale̱ꞌ le̱ꞌ.