\id ROM
\h Romanos
\mt DA BZUAJ SAN PABLO CHEE̱ BI CHEE̱ CRISTO ZAJ ZRABEꞌ XE̱ZRE ROMA
\c 1
\s Pablo dxugape̱ꞌ diuzre bi chee̱ Cristo zaj zrabeꞌ Roma
\p
\v 1 Nedaꞌ, Pablo, nacaꞌ we̱n zrin chee̱ Jesucristo. Dios bláwizre̱ꞌ nedaꞌ chee̱ gacaꞌ gubáz chee̱ꞌ, ne guqué̱ꞌe̱ nedaꞌ chee̱ guzendaꞌ bénneache dizraꞌ chaweꞌ chee̱ꞌ.
\p
\v 2 Dios guche̱be lazre̱ꞌ sel-le̱ꞌ dizraꞌ chaweꞌ nigá gate nate lu dizraꞌ láꞌazxa chee̱ꞌ lu naꞌ benneꞌ caꞌ buluchálaje̱ꞌ waláz chee̱ꞌ.
\v 3 Dizraꞌ chaweꞌ nigá dxuléꞌe na ca naca chee̱ Xránadxu Jesucristo, Zriꞌine Dios. Lu be̱laꞌ dxen chee̱ꞌ naque̱ꞌ zriꞌine zre sua wenná bea David.
\v 4 Lu beꞌ nácaqueze̱ꞌ da naca na láꞌazxa, naque̱ꞌ Zriꞌine Dios. Dios bléꞌene̱ꞌ naca caní gate bsebane̱ꞌ Le̱ꞌ ládujla benneꞌ gate ne̱ chee̱ xel-la waca chee̱ꞌ.
\v 5 Ne̱ chee̱ Zríꞌine̱ꞌ Dios nunne̱ꞌ netuꞌ lataj nácantuꞌ gubáz chee̱ꞌ chee̱ xelezráꞌ benneꞌ ládujla xúgute̱ cueꞌ xe̱zr la xu, benneꞌ xeleajlí lazre̱ꞌ Cristo, ne xuluzúe̱ꞌ dizraꞌ chee̱ꞌ chee̱ gaca ba La Le̱ꞌ.
\v 6 Ládujla benneꞌ caní zrale leꞌe chee̱ gácale bi chee̱ Jesucristo.
\p
\v 7 Dxuzúajaꞌ chee̱ xúgute̱le leꞌe dxéajle̱le chee̱ Cristo, zrale xe̱zre Roma. Dios nazríꞌine̱ꞌ leꞌe, ne bláwizre̱ꞌ leꞌe chee̱ gácale bi cheé̱queze̱ꞌ. Dxenabaꞌ Xradxu Dios, ne Xránadxu Jesucristo gune̱ꞌ chaweꞌ chee̱le, ne gunne̱ꞌ leꞌe xel-la dxebeza zri lazreꞌ.
\s Pablo dxaca lazre̱ꞌ chéaje̱ꞌ xe̱zre Roma
\p
\v 8 Da naca blaudxa, ne̱ chee̱ Jesucristo dxapaꞌ Dios chiaꞌ xcalene̱ꞌ ca naca chee̱ xúgute̱le laweꞌ da dxezralaj ca dxeajlí lázrele Cristo du gabíꞌi xe̱zr la xu.
\v 9 Duté̱ lázrdawaꞌ dxunaꞌ zrin chee̱ Dios, dxuzendaꞌ bénneache dizraꞌ chaweꞌ chee̱ Zríꞌine̱ꞌ. Le̱ꞌ nézquezne̱ꞌ dxeajsá lázrquezaꞌ leꞌe gate dxuchálajle̱naꞌ Leꞌ.
\v 10 Dxataꞌ xúedaꞌ Dios, che naca da dxaca lazreꞌ Le̱ꞌ, chee̱ ájala gunne̱ꞌ nedaꞌ lataj xedajnnáꞌa leꞌe
\v 11 laweꞌ da dxaca lazraꞌ leꞌedaꞌ leꞌe ne gunnaꞌ leꞌe lataj siꞌle da naca chee̱ Beꞌ Láꞌazxa, chee̱ se̱ cháchadxale.
\v 12 Caní gutipa lázredxu tudxu xetudxu lu xel-la dxeajlí lazreꞌ chee̱dxu.
\p
\v 13 Bi bíchaꞌdauꞌ, dxaca lazraꞌ nézele zaneꞌ lasa guca lazraꞌ xidaꞌ xedajnnáꞌa leꞌe, san dxácate̱ caꞌ dxecuasa na. Dxaca lázrele̱ꞌa xidaꞌ chee̱ gunaꞌ zrin gusé̱dedaꞌ da naca chee̱ Cristo ládujla leꞌe, cáte̱ze ba be̱naꞌ ládujla xezícadxa bénneache zaj zre̱ꞌe̱ lu xe̱zr la xu nigá.
\v 14 Nabagaꞌ gunaꞌ zrin caní ládujla xúgute̱ bénneache, che zaj naque̱ꞌ benneꞌ blau u ca zaj naque̱ꞌ, u che zaj naque̱ꞌ benneꞌ zaj naxéajniꞌi u ca zaj naque̱ꞌ.
\v 15 Chee̱ le̱ naꞌ, nedaꞌ ba zúaquezaꞌ guzendaꞌ leꞌe zrale xe̱zre Roma dizraꞌ chaweꞌ chee̱ Cristo.
\s Xel-la waca chee̱ dizraꞌ chaweꞌ chee̱ Cristo
\p
\v 16 Quebe dxeduéꞌedaꞌ chee̱ dizraꞌ chaweꞌ chee̱ Cristo laweꞌ da napa na xel-la waca chee̱ Dios chee̱ guselá na xúgute̱ benneꞌ dxeleajlí lazre̱ꞌ le̱ na, nédxula benneꞌ judío caꞌ, san cáꞌanqueze benneꞌ quebe zaj naque̱ꞌ judío.
\v 17 Dizraꞌ chaweꞌ nigá dxuléꞌe na dxiꞌu nagáꞌanadxu chaweꞌ lau Dios che dxeajlí lázredxu le̱ na, chee̱ cheajlí lázredxu Le̱ꞌ ca naxúaj na lu dizraꞌ láꞌazxa, da dxenná na: Benneꞌ nagáꞌane̱ꞌ chaweꞌ lau Dios gataꞌ chee̱ꞌ xel-la nabán li lazreꞌ che dxeajlí lazre̱ꞌ Le̱ꞌ.
\s Dul-la da zaj nabaga bénneache
\p
\v 18 Ba bleꞌe Dios lu xabáa chee̱ꞌ ca gune̱ꞌ, gudée̱ꞌ xel-la ziꞌ xúgute̱ benneꞌ dxuluzúe̱ꞌ chaláꞌala Dios, ne benneꞌ we̱n da cale̱la, benneꞌ dxuluzague̱ꞌ da li ne̱ chee̱ da cale̱la da dxelune̱ꞌ.
\v 19 Zaj nézquezne̱ꞌ ca gaca xelúnbea bénneache da naca chee̱ Dios laweꞌ da Lé̱queze Dios naꞌ bache bléꞌene̱ꞌ na zaca ba lau.
\v 20 Da quebe gaca léꞌedxu chee̱ Dios gaca gúnbeadxu na ne̱ chee̱ da caꞌ da be̱n Dios. Gate be̱nte̱ꞌ xe̱zr la xu dxunna bea na nácaqueze Dios, ne nápaqueze̱ꞌ xel-la waca. Chee̱ le̱ naꞌ quebe bi de̱ xuludéꞌene̱ꞌ.
\v 21 Lácala zaj núnbeꞌe̱ ca naca Dios, quebe ne xelape̱ꞌ Le̱ꞌ ba láꞌana ca Dios, ne quebe ne xelé̱ꞌe̱ Le̱ꞌ; Xcalenuꞌ, san dxuludé lazre̱ꞌ da níteze, naꞌ gulechul-la xichaj lázrdawe̱ꞌ laweꞌ da zaj naque̱ꞌ benneꞌ zideꞌ.
\v 22 Lácala dxeléquene̱ꞌ zaj naxéajniꞌine̱ꞌ, da li zaj naque̱ꞌ benneꞌ xala,
\v 23 laweꞌ da buluzúe̱ꞌ chaláꞌala Dios xabáa, Bénneaꞌ quebe dxedé chee̱ꞌ, ne dxelúe láꞌane̱ꞌ bedáuꞌ xiaj xaga zaj naca na luꞌa bénneache dxelate, ne luꞌa bea caꞌ zaj zua xrila, ne luꞌa be̱ snia, ne luꞌa be̱ xixreꞌ be̱ zria tapa niꞌa naꞌbaꞌ.
\p
\v 24 Chee̱ le̱ naꞌ Dios ba guleaj xíchaje̱ꞌ benneꞌ caꞌ chee̱ xelune̱ꞌ xúgute̱ da sban da dxelezá lazre̱ꞌ, naꞌ bulucáꞌana ditaj cuine̱ꞌ tue̱ꞌ xetue̱ꞌ,
\v 25 laweꞌ da buluzúe̱ꞌ chaláꞌala xel-la li chee̱ Dios, naꞌ gulezíꞌ lu ne̱ꞌe̱ da we̱n lazreꞌ, ne belúe láꞌane̱ꞌ, ne belecáꞌana szrene̱ꞌ da caꞌ nun Dios, ne quegá Diosqueze, Bénneaꞌ dxal-laꞌ güe láꞌanaquezdxu. ¡Caꞌan gaca na!
\p
\v 26 Chee̱ le̱ naꞌ Dios ba guleaj xíchaje̱ꞌ benneꞌ caꞌ chee̱ xelune̱ꞌ da dxelezá lazre̱ꞌ da caꞌ xeduéꞌedxu. Cáꞌanqueze nuꞌula buluzúe̱ꞌ chaláꞌala xel-la zúale̱ benneꞌ chee̱ꞌ, ne dxelune̱ꞌ da quebe zaj naca chee̱ꞌ xelune̱ꞌ.
\v 27 Cáꞌanqueze belún benneꞌ biu, buluzúe̱ꞌ chaláꞌala xel-la zúale̱ zruꞌule̱ꞌ, ne dxelune̱ꞌ da sban da dxelezá lazre̱ꞌ tue̱ꞌ xetue̱ꞌ, ne dxelune̱ꞌ da caꞌ xeduéꞌedxu tue̱ꞌ xetue̱ꞌ, naꞌ dxeledée̱ꞌ xel-la ziꞌ lu be̱l-laꞌ dxen chee̱ꞌ ne̱ chee̱ da sban da dxelune̱ꞌ.
\p
\v 28 Laweꞌ da québedxa gulaca lazre̱ꞌ xelexúnbeꞌe̱ Dios, Le̱ꞌ guleaj xíchaje̱ꞌ benneꞌ caꞌ chee̱ xuludé lazre̱ꞌ da cale̱la, ne chee̱ xelune̱ꞌ da quebe dxal-laꞌ xelune̱ꞌ.
\q
\v 29 Dxelune̱ꞌ xúgute̱ da cale̱la.
\q Dxulucáꞌana ditje̱ꞌ bénneache.
\q Dxelune̱ꞌ da quebe naca xrlátaje.
\q Zaj naque̱ꞌ benneꞌ wecudeꞌ.
\q Dxelune̱ꞌ da zrinnaj.
\q Zaj naque̱ꞌ benneꞌ xa lazreꞌ.
\q Dxelutie̱ꞌ benneꞌ.
\q Dxelílaje̱ꞌ da ba xaꞌ.
\q Dxelezí xe̱ꞌe̱.
\q Dxeledanne̱ꞌ da xálaze.
\q Dxuluchálaje̱ꞌ dizraꞌ bizruj.
\q
\v 30 Dxelenné̱ꞌ schanniꞌ chee̱ ljwezre̱ꞌ.
\q Dxelecuídene̱ꞌ Dios.
\q Zaj naque̱ꞌ benneꞌ wenné̱ wal-la.
\q Dxulucáꞌana szren cuine̱ꞌ.
\q Zaj naque̱ꞌ benneꞌ wezé cua.
\q Dxelalaj lazre̱ꞌ bícala da sban.
\q Quebe dxuluzúe̱ꞌ dizraꞌ chee̱ xra xrne̱ꞌe̱.
\q
\v 31 Zaj naque̱ꞌ benneꞌ lázrdau zideꞌ.
\q Dxulunitie̱ꞌ xrtizre̱ꞌ.
\q Quebe zaj naque̱ꞌ zriꞌi lazreꞌ.
\q Quebe dxulunite lawe̱ꞌ chee̱ ljwezre̱ꞌ.
\q Quebe dxelexache lazre̱ꞌ chee̱ ljwezre̱ꞌ.
\q
\v 32 Zaj nézene̱ꞌ Dios guzría xiꞌe̱ bénneache,
\q naꞌ benneꞌ dxelune̱ꞌ da caní dxal-laꞌ xelátie̱ꞌ.
\q Benneꞌ caní tu dxelúnzqueze̱ꞌ na,
\q ne dxelexezaca ba lazre̱ꞌ nen benneꞌ dxelune̱ꞌ da caníqueze.
\c 2
\s Dios dxuchiꞌe̱ chee̱ bénneache cáte̱ze da zaj nune̱ꞌ
\p
\v 1 Chee̱ le̱ naꞌ québedxa bi de̱ da gudéꞌenuꞌ, lueꞌ dxuchiꞌu da dxun benneꞌ xula, nútete̱ze nacuꞌ. Gate dxuchiꞌu da dxun benneꞌ xula, naꞌ dxuleꞌenuꞌ nabaguꞌ zria, laweꞌ da dxuchiꞌu da dxun benneꞌ xula, ne cáꞌanqueze dxunuꞌ lueꞌ.
\v 2 Nézquezdxu dxuchiꞌa Dios cáte̱ze da naca na gate dxenné̱ꞌ zaj nabaga zria benneꞌ caꞌ dxelún da caní.
\v 3 ¿Dxéquenuꞌ lueꞌ wadé gun caꞌaze chiuꞌ gate Dios nne̱ꞌ zaj nabaga zria bénneache, lueꞌ naꞌ dxennáuꞌ zaj nabaga zria benneꞌ dxelún da caní, ne cáꞌanqueze dxunuꞌ lueꞌ?
\v 4 ¿Dxuzúꞌ chaláꞌala xel-la zriꞌi lazreꞌ, ne xel-la zren lazreꞌ zren chee̱ Dios, ne quebe nézenuꞌ lu xel-la zriꞌi lazreꞌ chee̱ꞌ dxunne̱ꞌ lueꞌ lataj xebiꞌi lazruꞌ?
\v 5 Nacuꞌ lázrdau zideꞌ, ne quebe dxexebíꞌi lazruꞌ. Chee̱ le̱ naꞌ dxuzanuꞌ da si sacuꞌ lu zra naꞌ gate Dios nne̱ꞌ zaj nabaga zria benneꞌ caꞌ dxelune̱ꞌ da cale̱la. Naca xrlátaje gune̱ꞌ da caní.
\v 6 Lu zra naꞌ gunne̱ꞌ ca da dxal-laꞌ siꞌ tu tudxu cáte̱ze naca da be̱ndxu.
\v 7 Xel-la nabán zeajlí canna gunna Le̱ꞌ xúgute̱ benneꞌ dxelaca lazre̱ꞌ xelezíꞌe̱ lu naꞌ Dios da xabáa, ne xel-la ba láꞌana, ne da zaj naca na da chadía chacanna ne̱ chee̱ da chaweꞌ da tu dxelúnzqueze̱ꞌ.
\v 8 Lu xel-la dxezráꞌa chee̱ꞌ nne̱ꞌ zaj nabaga zria xúgute̱ benneꞌ zreꞌe lazreꞌ caꞌ, benneꞌ quebe dxuluzúe̱ꞌ dizraꞌ da li, san dxuluzúe̱ꞌ dizraꞌ da we̱n lazreꞌ.
\v 9 Gusaca ziꞌe̱, ne gudée̱ꞌ lu da ba xaꞌ xúgute̱ benneꞌ dxelune̱ꞌ da cale̱la. Ga su lau gune̱ꞌ caní chee̱ benneꞌ judío caꞌ, ne cáꞌanqueze gune̱ꞌ chee̱ benneꞌ quebe zaj naque̱ꞌ judío.
\v 10 Da xabáa, ne da ba láꞌana, ne xel-la dxebeza zri lazreꞌ gunne̱ꞌ xúgute̱ benneꞌ dxelune̱ꞌ da chaweꞌ. Ga su lau gune̱ꞌ caní chee̱ benneꞌ judío caꞌ, ne cáꞌanqueze gune̱ꞌ chee̱ benneꞌ quebe zaj naque̱ꞌ judío.
\p
\v 11 Dios tuze ca dxuchiꞌe̱ da dxelún xúgute̱ bénneache,
\v 12 naꞌ benneꞌ dxelune̱ꞌ dul-la, ne quebe zaj núnbeꞌe̱ da bdxixruj beꞌe Moisés welebía xiꞌe̱ lácala quebe belúnbeꞌe̱ da nadxixruj bea na, naꞌ benneꞌ dxelune̱ꞌ dul-la lácala zaj núnbeꞌe̱ da bdxixruj beꞌe Moisés welebía xiꞌe̱ ne̱ chee̱ da nadxixruj bea na naꞌ.
\v 13 Quebe zaj nagáꞌana chaweꞌ lau Dios benneꞌ dxelénzene̱ꞌ da nadxixruj bea na, san zaj nagáꞌana chaweꞌ lau Dios benneꞌ dxuluzúe̱ꞌ dizraꞌ da nadxixruj bea na.
\v 14 Benneꞌ zituꞌ caꞌ, benneꞌ quebe zaj núnbeꞌe̱ da bdxixruj beꞌe Moisés, gate dxelune̱ꞌ ca dxenná da nadxixruj bea na naꞌ, lácala quebe zaj núnbeꞌe̱ da nadxixruj bea na, naca chee̱ꞌ cáte̱ze zua da nadxixruj bea na lu xichaj lázrdawe̱ꞌ.
\v 15 Caní naquen laweꞌ da ca dxelune̱ꞌ dxuléꞌe na zua xichaj lázrdawe̱ꞌ ca naca da nadxixruj bea na, naꞌ naca na ca naca da bdxixruj beꞌe Moisés. Xichaj lázrdawe̱ꞌ dxunna bea na chee̱ da nigá, naꞌ da dxelegúꞌu lazre̱ꞌ guzría xi na le̱ꞌ, u xecáꞌa na le̱ꞌ
\v 16 lu zra naꞌ gate Dios guchiꞌe̱ xúgute̱ da nagacheꞌ chee̱ xúgute̱ bénneache lu naꞌ Jesucristo cáte̱ze dxenná dizraꞌ chaweꞌ naꞌ da dxuzendaꞌ bénneache.
\s Ca naca chee̱ benneꞌ judío caꞌ ne da bdxixruj beꞌe Moisés
\p
\v 17 Dxennáuꞌ nacuꞌ judío, ne dxenné̱le̱nuꞌ da bdxixruj beꞌe Moisés, ne dxucáꞌana szren cuinuꞌ laweꞌ da núnbeꞌu Dios chiuꞌ.
\v 18 Nézenuꞌ da dxaca lazreꞌ Dios, naꞌ da gunná béꞌene̱ꞌ dxuléꞌe na lueꞌ gunuꞌ da nácadxa chaweꞌ.
\v 19 Dxuxrén lazruꞌ cuinuꞌ waca guléꞌenuꞌ ca da xelún benneꞌ zaj naque̱ꞌ ca lo chul-la, ne guseniꞌu benneꞌ zaj zraꞌ lu da chul-la.
\v 20 Dxéquenuꞌ waca guzéajniꞌinuꞌ benneꞌ quebe zaj naxéajniꞌe̱, ne gusé̱denuꞌ benneꞌ quebe ne cheajniꞌe̱ laweꞌ da naca da nadxixruj bea na da napuꞌ tu da dxuléꞌe na dxiꞌu chee̱ gúnbeadxu da li.
\v 21 Lueꞌ dxusé̱denuꞌ benneꞌ xula. ¿Bizr chee̱ naꞌ quebe dxuse̱de cuinuꞌ? Lueꞌ dxuzennuꞌ benneꞌ quebe dxal-laꞌ cuandxu. ¿Bizr chee̱ naꞌ dxebanuꞌ lueꞌ?
\v 22 Lueꞌ dxennáuꞌ quebe dxal-laꞌ súale̱dxu zruꞌula benneꞌ xula. ¿Bizr chee̱ naꞌ dxunuꞌ lueꞌ caꞌ? Lueꞌ dxecuídenuꞌ bedáuꞌ xiaj xaga. ¿Bizr chee̱ naꞌ dxebanuꞌ lueꞌ da gunníꞌa da de̱ lu xudauꞌ caꞌ chee̱ bedáuꞌ xiaj xaga caꞌ?
\v 23 Dxucáꞌana szren cuinuꞌ laweꞌ da núnbeꞌu da nadxixruj bea na, san dxucáꞌana ditjuꞌ Dios laweꞌ da quebe dxunuꞌ lueꞌ ca da dxenná bea da nadxixruj bea na.
\v 24 Naxúaj lu dizraꞌ láꞌazxa da dxenná na: Benneꞌ quebe zaj naque̱ꞌ judío dxelenné̱ꞌ schanniꞌ chee̱ Dios ne̱ chee̱ da cale̱la da dxunle leꞌe.
\p
\v 25 Da li da nadxugu lu be̱laꞌ chiuꞌ da dxuléꞌe na nacuꞌ bi chee̱ Dios, naca na tu da chaweꞌ che dxunuꞌ ca da dxenná bea da bdxixruj beꞌe Moisés, san che quebe dxunuꞌ ca dxenná na, nacuꞌ ca tu benneꞌ quebe nadxugu lu be̱laꞌ chee̱ꞌ da naꞌ dxuléꞌe na.
\v 26 Che benneꞌ quebe nadxugu lu be̱laꞌ chee̱ꞌ dxune̱ꞌ ca nadxixruj bea na, naque̱ꞌ ca tu benneꞌ nadxúguqueze lu be̱laꞌ chee̱ꞌ da naꞌ, lácala quebe naca caní chee̱ꞌ.
\v 27 Benneꞌ quebe nadxugu lu be̱laꞌ chee̱ꞌ da naꞌ dxuléꞌe na, san dxune̱ꞌ da nadxixruj bea na, da naꞌ dxune̱ꞌ dxuléꞌe na nabaguꞌ zria lueꞌ, laweꞌ da quebe dxunuꞌ da dxenná bea da nadxixruj bea na, lácala zua lu naꞌu da nadxixruj bea na, ne nadxugu lu be̱laꞌ chiuꞌ da naꞌ.
\v 28 Quebe naca xanneꞌ judío bénneaꞌ naque̱ꞌ caní cúzreze, ne quebe naca xanneꞌ da nadxugu na lu be̱laꞌ chee̱ benneꞌ da naca na cúzreze, lu bé̱laꞌze.
\v 29 Benneꞌ naca xánnie̱ꞌ judío naque̱ꞌ bénneaꞌ naque̱ꞌ judío lu xichaj lázrdawe̱ꞌ, ne da naca xanneꞌ da nadxugu lu be̱laꞌ chee̱ benneꞌ naca na da zua na lázrdawe̱ꞌ. Quebe nácaqueze na nen dízraꞌze san naca na chee̱ beꞌ chee̱ꞌ. Benneꞌ caní dxeleziꞌe̱ xel-la ba láꞌana, quegá chee̱ bénneache, san chee̱ Dios.
\c 3
\p
\v 1 ¿Bizra da ba neza naca na chee̱ benneꞌ laweꞌ da nadxugu lu be̱laꞌ chee̱ꞌ da naꞌ dxuléꞌe na?
\v 2 Nácale̱ꞌe̱ na, ne zánete̱ ca naca na. Da nédxute̱, Dios bdee̱ꞌ dizraꞌ chee̱ꞌ lu naꞌ benneꞌ judío caꞌ.
\v 3 ¿Bizra xcaꞌ? Che bal-la benneꞌ judío caꞌ quebe zaj naque̱ꞌ li lazreꞌ, ¿nnadxu chee̱ da naꞌ quebe naca Dios li lazreꞌ?
\v 4 ¡Cabataꞌ! Dios dxúnqueze̱ꞌ ca naca da li lácala xúgute̱ bénneache zaj naque̱ꞌ we̱n lazreꞌ, laweꞌ da naxúaj lu dizraꞌ láꞌazxa da dxenná Dios. Dxenné̱ꞌ:
\q Nacuꞌ xrlátaje ca da dxennáuꞌ,
\q naꞌ wegáꞌanaquezuꞌ xrlátaje gate xuluchíꞌe̱ ca da dxunuꞌ.
\p
\v 5 Che da cale̱la da dxundxu dxuléꞌe na naca Dios xrlátaje, ¿Bízraqueze nnadxu? (Dxuchálajaꞌ ca da dxuluchalaj bénneache.) ¿Naca Dios benneꞌ quebe naca xrlátaje laweꞌ da dxudée̱ꞌ dxiꞌu xel-la ziꞌ?
\v 6 ¡Cabataꞌ! Chela naca Dios Benneꞌ quebe dxun da xrlátaje, ¿ájazra gune̱ꞌ guchiꞌe̱ ca da dxelún bénneache?
\p
\v 7 Che da we̱n lazreꞌ da dxunaꞌ gun na chee̱ xegáꞌana zrendxa da li da dxun Dios, ¿bizr chee̱ naꞌ dxuchiꞌe̱ chiaꞌ nedaꞌ, dxenné̱ꞌ nacaꞌ benneꞌ dul-la?
\v 8 Che naca na caní, ¿bizr chee̱ naꞌ quebe gundxu da cale̱la chee̱ guléꞌe laudxa da xrlátaje? Da nigá naca na da dxelenná bal-la benneꞌ dxundxu, benneꞌ caꞌ dxelún da cale̱la, ne dxelenné̱ꞌ schanniꞌ chee̱dxu. Xrlátaje naca Dios nne̱ꞌ zaj nabaga zria benneꞌ caní.
\s Xúgute̱dxu nabágadxu dul-la
\p
\v 9 ¿Bizra xcaꞌ? Dxiꞌu, benneꞌ judío, ¿nácadxadxu xrlátaje ca xezícadxa benneꞌ caꞌ? ¡Cabataꞌ! Bache bléꞌentuꞌ zaj nabaga dul-la benneꞌ judío, ne cáꞌanqueze xezícadxa benneꞌ caꞌ.
\v 10 Naxúaj lu xiche láꞌazxa da dxenná na:
\q Quebe nu chiláꞌ benneꞌ xrlátaje, netú gue̱ꞌ.
\q
\v 11 Quebe nu chiláꞌ benneꞌ dxéajniꞌine̱ꞌ.
\q Quebe nu chiláꞌ benneꞌ dxexílaje̱ꞌ Dios.
\q
\v 12 Xúgute̱ꞌ dxeledé̱ꞌ cale̱la. Xúgute̱ꞌ zaj nanítie̱ꞌ.
\q Quebe nu chiláꞌ benneꞌ dxune̱ꞌ da xrlátaje, netú gue̱ꞌ.
\q
\v 13 Da dxelenné̱queze̱ꞌ naca na ca tu da sgute, ca tu ba da naxálajze.
\q Nen luzre̱ꞌ caꞌ dxelezí xe̱ꞌe̱.
\q Xrtizre̱ꞌ zaj naca na ca nisa snia chee̱ be̱laꞌ da dxe na zran lázxabaꞌ.
\q
\v 14 Tu dxelenné̱zqueze̱ꞌ dizraꞌ schanniꞌ, ne dizraꞌ ziꞌ.
\q
\v 15 Chadite̱ dxelútie̱ꞌ bénneache.
\q
\v 16 Gátete̱ze dxeledée̱ꞌ dxuluzría xiꞌe̱, ne dxulusaca ziꞌe̱.
\q
\v 17 Quebe zaj nézene̱ꞌ ájala xelebeza zri lazre̱ꞌ.
\q
\v 18 Quebe dxelezrebe̱ꞌ Dios.
\p
\v 19 Nezdxu xúgute̱ ca da dxenná da nadxixruj bea gula naꞌ da bzuaj Moisés, dxe̱ na benneꞌ caꞌ zaj xuꞌe̱ lu naꞌ da nadxixruj bea na naꞌ, chee̱ xelezúa zri xúgute̱ꞌ, ne chee̱ xelexúnbea xúgute̱ bénneache zaj nabague̱ꞌ zria lau Dios.
\v 20 Netú benneꞌ quebe xegáꞌane̱ꞌ xrlátaje lau Dios laweꞌ da nune̱ꞌ da dxenná bea da nadxixruj bea na, laweꞌ da dxuléꞌeze da nadxixruj bea na dxiꞌu nácadxu benneꞌ dul-la.
\s Xelelá bénneache che xeléajle̱ꞌe̱ chee̱ Cristo
\p
\v 21 Naꞌa, dxunna bea na ca gaca xegáꞌanadxu xrlátaje lau Dios, da quebe naca na ne̱ chee̱ da nadxixruj bea na, lácala lu da nadxixruj bea na, ne lu da buluzúaj benneꞌ caꞌ gulenné̱ꞌ waláz chee̱ Dios dxuluchalaj na ca naca chee̱ da nigá.
\v 22 Nagáꞌanadxu xrlátaje lau Dios caní che dxeajlí lázredxu Jesucristo, ne cáꞌanqueze gaca chee̱ xúgute̱ bénneache xeleajlí lazre̱ꞌ Le̱ꞌ. Tuz ca naca chee̱ bénneache
\v 23 laweꞌ da zaj nun xúgute̱ bénneache dul-la, ne quebe zaj naca chee̱ꞌ xelexúꞌe̱ lu xabáa chee̱ Dios.
\v 24 Lu da chaweꞌ chee̱ Dios, cáꞌaze nune̱ꞌ chee̱ xegáꞌanadxu xrlátaje lau Le̱ꞌ laweꞌ da bexaꞌu Jesucristo dxiꞌu lu dul-la da nabágadxu.
\v 25 Dios bzue̱ꞌ Jesucristo gutie̱ꞌ ne̱ chee̱ xtúl-ladxu chee̱ xegáꞌanadxu xrlátaje lau Le̱ꞌ che dxeajlí lázredxu da be̱n Le̱ꞌ. Da nigá guca na chee̱ bleꞌe Dios naque̱ꞌ xrlátaje lácala lu xel-la zren lazreꞌ chee̱ꞌ bdee̱ꞌ cáꞌaze ca naca dul-la da be̱ndxu nédxute̱.
\v 26 Gúcaqueze da nigá chee̱ guléꞌe laweꞌ naca Dios xrlátaje naꞌa, ne gácaqueze̱ꞌ xrlátaje gate gucáꞌane̱ꞌ xrlátaje benneꞌ caꞌ dxeleajlí lazre̱ꞌ Jesús.
\p
\v 27 Naꞌa, ¿waca gucáꞌana szren cuínadxu? ¡Cabataꞌ! ¿Bizr chee̱ naꞌ? Naca na laweꞌ da nagáꞌanadxu xrlátaje, quegá laweꞌ da be̱ndxu ca nadxixruj bea na, san laweꞌ da guxeajlí lázredxu Cristo.
\v 28 Caꞌan naca, dxunna bea na nagáꞌana xrlátaje tu benneꞌ lau Dios laweꞌ da dxeajlí lazre̱ꞌ Cristo, ne quegá laweꞌ da nune̱ꞌ ca da nadxixruj bea na.
\p
\v 29 ¿Naca Dios chee̱ze benneꞌ judío caꞌ? ¿Quegá nácaqueze̱ꞌ Dios chee̱ benneꞌ caꞌ quebe zaj naque̱ꞌ judío? Da li nácaqueze̱ꞌ Dios chee̱ benneꞌ caꞌ
\v 30 laweꞌ da zua tuze Dios, naꞌ Le̱ꞌ gucáꞌane̱ꞌ xrlátaje benneꞌ caꞌ zaj nadxugu lu be̱laꞌ chee̱ꞌ da naꞌ dxunna bea na che dxeleajlí lazre̱ꞌ Cristo, ne cáꞌanqueze gucáꞌane̱ꞌ xrlátaje benneꞌ caꞌ quebe zaj nadxugu lu be̱laꞌ chee̱ꞌ da naꞌ, che dxeleajlí lazre̱ꞌ Cristo.
\v 31 Naꞌa che dxucáꞌana Dios xrlátaje benneꞌ dxeleajlí lázreze̱ꞌ, ¿naca da nadxixruj bea na tu da québedxa zaca? ¡Cabataꞌ! Che dxéajle̱dxu chee̱ Cristo dxúnquezdxu ca dxenná da nadxixruj bea na.
\c 4
\s Da dxuléꞌe da guca chee̱ Abraham
\p
\v 1 ¿Bízraqueze nnadxu chee̱ da ba neza da guca na chee̱ xra xrtáudxu Abraham?
\v 2 Che Abraham begaꞌane̱ꞌ xrlátaje lau Dios ne̱ chee̱ tu da be̱ne̱ꞌ, waca gucáꞌana szren cuine̱ꞌ san quegá lau Dios.
\v 3 ¿Bízraqueze naxúaj na lu dizraꞌ láꞌazxa? Dxenná na: Abraham guxeajlí lazre̱ꞌ Dios, naꞌ Dios guzíꞌ lu ne̱ꞌe̱ le̱ꞌ ca tu benneꞌ xrlátaje.
\v 4 Che nu benneꞌ dxune̱ꞌ zrin, lazruj da siꞌe̱ quebe naca na tu da dxunézrujzedxu, san naca na tu da nabágaquezdxu chee̱ꞌ.
\v 5 Che nu benneꞌ quebe bi nune̱ꞌ, san dxeajlí lázreze̱ꞌ Dios, Bénneaꞌ dxucáꞌane̱ꞌ xrlátaje benneꞌ dul-la, nacan laweꞌ da dxezíꞌ lu naꞌ Dios xel-la dxeajlí lazreꞌ chee̱ꞌ chee̱ xucaꞌane̱ꞌ le̱ꞌ xrlátaje.
\v 6 Cáꞌanqueze bchalaj David ca naca chee̱ benneꞌ naca da ba neza chee̱ꞌ laweꞌ da dxucáꞌana Dios le̱ꞌ xrlátaje lácala quebe bi nune̱ꞌ chee̱ xegáꞌane̱ꞌ xrlátaje.
\v 7 Gunná David:
\q Ba neza zrente̱ naca na chee̱ benneꞌ caꞌ
\q ba bunite lau Dios chee̱ꞌ da zrinnaj da zaj nune̱ꞌ,
\q ne gudée̱ꞌ cáꞌaze dul-la da belún benneꞌ caꞌ.
\q
\v 8 Ba neza zrente̱ naca na chee̱ benneꞌ caꞌ
\q quebe dxusebaga Xránadxu le̱ꞌ dul-la da belune̱ꞌ.
\p
\v 9 ¿Naca ba neza nigá chee̱ze benneꞌ caꞌ zaj nadxugu lu be̱laꞌ chee̱ꞌ da naꞌ dxuléꞌe na, u che nácaqueze na chee̱ benneꞌ caꞌ quebe zaj nadxugu lu be̱laꞌ chee̱ꞌ da naꞌ? Bache bléꞌentuꞌ bcaꞌana Dios Abraham xrlátaje laweꞌ da guxeajlí lazre̱ꞌ Le̱ꞌ.
\v 10 ¿Bátazra bcaꞌane̱ꞌ le̱ꞌ xrlátaje? ¿Guca na ca gudé gudxugu lu be̱laꞌ chee̱ Abraham da naꞌ dxuléꞌe na, u che nédxula? Quebe guca na ca gudé naꞌ, san nédxula guca na.
\v 11 Gudxugu da naꞌ lu be̱laꞌ chee̱ Abraham ca tu da dxunna bea na chee̱ guléꞌe na nagáꞌane̱ꞌ xrlátaje lau Dios laweꞌ da guxeajlí lazre̱ꞌ Dios gate naꞌ quebe ne chugu da naꞌ lu be̱laꞌ chee̱ꞌ. Caꞌan guca, naca Abraham xra xúgute̱ benneꞌ dxeleajlí lazre̱ꞌ Dios, ne quebe zaj nadxugu da naꞌ lu be̱laꞌ chee̱ꞌ. Cáꞌanqueze dxucáꞌana Dios le̱ꞌ xrlátaje laweꞌ da dxeleajlí lazre̱ꞌ Le̱ꞌ.
\v 12 Da li naca Abraham xra benneꞌ caꞌ zaj nadxugu da naꞌ lu be̱laꞌ chee̱ꞌ, naꞌ cáꞌanqueze dxeleajlí lazre̱ꞌ Dios ca be̱n xradxu Abraham gate naꞌ quebe ne chugu lu be̱laꞌ chee̱ꞌ da naꞌ.
\s Dxezidxu da guche̱be lazreꞌ Dios che dxeajlí lázredxu Cristo
\p
\v 13 Dios guche̱be lazre̱ꞌ chee̱ Abraham, ne chee̱ zriꞌine zre sue̱ꞌ gaca chee̱ benneꞌ caꞌ xe̱zr la xu nigá. Quebe guche̱be lazre̱ꞌ na chee̱ꞌ laweꞌ da nune̱ꞌ ca dxenná bea da nadxixruj bea na, san laweꞌ da begaꞌane̱ꞌ xrlátaje lau Dios gate guxeajlí lazre̱ꞌ Le̱ꞌ.
\v 14 Che xe̱zr la xu nigá gaca na tuze chee̱ benneꞌ caꞌ dxelune̱ꞌ ca da dxenná bea da nadxixruj bea na, dácheze nagáꞌana xel-la dxeajlí lazreꞌ, ne québedxa zaca da guche̱be lazreꞌ Dios.
\v 15 Lu da nadxixruj bea na xelebía xiꞌ bénneache, san naga quebe ne zrin da nadxixruj bea na, quebe bi zaj nabaga bénneache chee̱ da nadxixruj bea na naꞌ.
\p
\v 16 Caꞌ naca na, dxezíꞌ lu nnadxu da guche̱be lazreꞌ Dios ne̱ chee̱ xel-la dxeajlí lazreꞌ chee̱dxu Le̱ꞌ, chee̱ gaca na tu da sidxu cáꞌaze, ne chee̱ gaca na tu da súatequeze chee̱ xúgute̱ zriꞌine zre sua Abraham. Caꞌ naca na, quegá naca na chee̱ze benneꞌ caꞌ dxelune̱ꞌ ca da nadxixruj bea na, san cáꞌanqueze naca na chee̱ benneꞌ caꞌ dxeleajlí lazre̱ꞌ Dios ca be̱n Abraham. Caꞌ naca na, le̱ꞌ naque̱ꞌ xra xúgute̱dxu
\v 17 lau Dios, Bénneaꞌ guxeajlí lazreꞌ Abraham Le̱ꞌ. Naca na ca da naxúaj na lu dizraꞌ láꞌazxa, dxenná na:
\q Nunaꞌ lueꞌ xra bénneache zánete̱ cueꞌ xe̱zr la xu.
\m Dios naꞌ dxuꞌe̱ xel-la nabán chee̱ benneꞌ caꞌ zaj nate, ne dxuchálaje̱ꞌ chee̱ da quebe ne sua ca dxuchálaje̱ꞌ chee̱ da ba zua.
\p
\v 18 Abraham guxeajlí lazre̱ꞌ Dios, ne guleza lazre̱ꞌ siꞌe̱ da guche̱be lazreꞌ Dios, lácala ba gudé chee̱ siꞌe̱ da dxebeza lazre̱ꞌ. Caꞌan guca, guque̱ꞌ xra bénneache zánete̱ cueꞌ xe̱zr la xu cáte̱ze ba guzre Dios le̱ꞌ, gunné̱ꞌ: “Canite̱ chan zriꞌine zre suꞌ.”
\v 19 Abraham ba zue̱ꞌ ca tu gaxúa iza, san quebe gute niꞌa ne̱ꞌe̱ lu xel-la dxeajlí lazreꞌ chee̱ꞌ gate xeajsá lazre̱ꞌ zaj naque̱ꞌ ca benneꞌ ba zaj nate, le̱ꞌ ne zruꞌule̱ꞌ Sara, ne naca Sara nuꞌula wizre.
\v 20 Quebe be̱n chupa lazre̱ꞌ, san bxren lazre̱ꞌ da guche̱be lazreꞌ Dios chee̱ꞌ, naꞌ gudápadxe̱ꞌ xel-la dxeajlí lazreꞌ, ne bxren lázredxe̱ꞌ. Bcaꞌana szrene̱ꞌ Dios,
\v 21 ne bé̱ntequeze̱ꞌ neza napa Dios xel-la waca gune̱ꞌ xúgute̱ ca da guche̱be lazre̱ꞌ.
\v 22 Chee̱ le̱ naꞌ Dios guzíꞌ lu ne̱ꞌe̱ xel-la dxeajlí lazreꞌ chee̱ꞌ chee̱ bcaꞌane̱ꞌ le̱ꞌ xrlátaje.
\p
\v 23 Gate dxenná na: “Dios guzíꞌ lu ne̱ꞌe̱ xel-la dxeajlí lazreꞌ chee̱ꞌ”, quebe guxuaj na chee̱ tuze Abraham
\v 24 san cáꞌanqueze chee̱dxu dxiꞌu laweꞌ da siꞌ lu naꞌ Dios xel-la dxeajlí lazreꞌ chee̱dxu che dxeajlí lázredxu Bénneaꞌ bsebane̱ꞌ Xránadxu Jesucristo ládujla benneꞌ gate,
\v 25 naꞌ naca Jesús Bénneaꞌ bde Dios Le̱ꞌ chee̱ gutie̱ꞌ ne̱ chee̱ dul-la da nabágadxu dxiꞌu, ne bsebane̱ꞌ Le̱ꞌ chee̱ xegáꞌanadxu xrlátaje lau Dios.
\c 5
\s Da naca chee̱dxu laweꞌ da nagáꞌanadxu xrlátaje lau Dios
\p
\v 1 Che nagáꞌanadxu xrlátaje lau Dios laweꞌ da dxeajlí lázredxu Cristo zúadxu xrlátaje nen Dios ne̱ chee̱ Xránadxu Jesucristo.
\v 2 Cáꞌanqueze laweꞌ da dxeajlí lázredxu Cristo, ne̱ chee̱ Le̱ꞌ dxezidxu da xrlátaje chee̱ Dios da tu dxeajlé̱zquezdxu, ne dxebéle̱ꞌe̱dxu laweꞌ da dxebeza lázredxu sidxu da xabáa chee̱ Dios.
\v 3 Quegaze da nigá, san cáꞌanqueze dxebéle̱ꞌe̱dxu gate dxededxu xel-la ziꞌ, laweꞌ da nézedxu xel-la ziꞌ da dxededxu dxun na dxiꞌu zren lazreꞌ,
\v 4 naꞌ xel-la zren lazreꞌ dxucáꞌana na dxiꞌu xrlátaje lau Dios, naꞌ gate nagáꞌanadxu xrlátaje dxebeza lázredxu.
\v 5 Quebe naca tu da dácheze da naꞌ dxebeza lázredxu laweꞌ da ba nuzúa Dios lu lázrdaudxu xel-la zriꞌi lazreꞌ chee̱ꞌ ne̱ chee̱ Beꞌ Láꞌazxa, Bénneaꞌ ba nunna Dios dxiꞌu.
\p
\v 6 Gate naꞌ quebe guzéquedxu guselá cuínadxu, lu zra bléꞌequeze Dios, gute Cristo waláz chee̱ benneꞌ we̱n da zrinnaj caꞌ.
\v 7 Sté̱bele̱ꞌe̱ naca che nu benneꞌ gatie̱ꞌ waláz chee̱ tu benneꞌ xrlátaje, lácala wexázrelja tu benneꞌ gatie̱ꞌ waláz chee̱ tu benneꞌ naque̱ꞌ dute̱ li lazreꞌ.
\v 8 Dios dxuléꞌene̱ꞌ dxiꞌu ca nazríꞌile̱ꞌe̱ne̱ꞌ dxiꞌu laweꞌ da gute Cristo waláz chee̱dxu gate ne nácadxu benneꞌ dul-la.
\v 9 Naꞌa nagáꞌanadxu xrlátaje lau Dios laweꞌ da gute Cristo waláz chee̱dxu, ne ba nácaqueze chee̱dxu ladxu ne̱ chee̱ Le̱ꞌ lu da ziꞌ da xaꞌ, da za zaꞌ lu zra niꞌ.
\v 10 Gate naꞌ ne dxecuídedxu Dios, Le̱ꞌ bexune̱ꞌ dxiꞌu tuze nen Le̱ꞌ laweꞌ da gute Cristo waláz chee̱dxu, naꞌ naꞌa laweꞌ da nácadxu tuze nen Dios ba nácaqueze chee̱dxu ladxu ne̱ chee̱ xel-la nabán chee̱ Cristo da zúale̱ na dxiꞌu.
\v 11 Quegá tuze da nigá, san cáꞌanqueze dxebéle̱ꞌe̱dxu lu da naca chee̱ Dios ne̱ chee̱ Xránadxu Jesucristo, ne ne̱ chee̱ Le̱ꞌ nácadxu tuze nen Dios.
\s Da nun Adán, naꞌ da nun Cristo
\p
\v 12 Ca guca, guxúꞌu dul-la lu xe̱zr la xu nigá ne̱ chee̱ da be̱n tuze benneꞌ, naꞌ blaꞌ xel-la gute ne̱ chee̱ dul-la, caꞌan guca gulúꞌu bénneache lu naꞌ xel-la gute laweꞌ da zaj nun xúgute̱ꞌ dul-la.
\v 13 Nédxula ca blaꞌ da nadxixruj bea na, ba zaj nun bénneache dul-la lu xe̱zr la xu nigá, lácala quebe dxusebaga Dios bénneache dul-la gate quebe ne zrin da nadxixruj bea na.
\v 14 Ca guzú lau lu zra zua Adán ca bzrin zra zua Moisés, gulúꞌu bénneache lu naꞌ xel-la gute, benneꞌ caꞌ zaj nune̱ꞌ dul-la, lácala quebe belune̱ꞌ dul-la ca da be̱n Adán, bénneaꞌ gudichje̱ꞌ da gunná beꞌe Dios, naꞌ Adán naꞌ naque̱ꞌ tu da dxuléꞌeze na ca naca Bénneaꞌ dxal-laꞌ xide̱ꞌ, Le̱ꞌ Cristo.
\p
\v 15 Da zrinnaj da be̱n Adán quebe gaca díl-lale̱be na ca da dxunna Dios dxiꞌu. Ne̱ chee̱ da zrinnaj da be̱n tuze benneꞌ, gulate benneꞌ zante̱, san xel-la weselá da nunna Dios dxiꞌu cáꞌaze ne̱ chee̱ xetuze benneꞌ, Jesucristo, naca na da zréndxaqueze, ne naca na da ba neza chee̱ benneꞌ zante̱.
\v 16 Da zrinnaj naꞌ da be̱n tuze benneꞌ quebe gaca díl-lale̱be na ca da dxunna Dios dxiꞌu laweꞌ da ne̱ chee̱ tuze da zrinnaj, zaj nabaga zria bénneache, san da dxunna Dios dxiꞌu naca na chee̱ xelexegáꞌana xrlátaje benneꞌ zante̱ benneꞌ zaj nune̱ꞌ da zrinnaj.
\v 17 Ne̱ chee̱ da zrinnaj da be̱n tuze benneꞌ gulúꞌu bénneache lu naꞌ xel-la gute, naꞌ benneꞌ caꞌ zaj nazíꞌ lu ne̱ꞌe̱ da dxunna Dios cáꞌaze, ne zaj nagáꞌane̱ꞌ xrlátaje lau Le̱ꞌ ba zaj nalé̱ꞌ lu naꞌ dul-la, ne dxelezéquene̱ꞌ xelenná beꞌe cuine̱ꞌ lu xel-la nabán chee̱ꞌ ne̱ chee̱ da nun xetuze benneꞌ, Jesucristo.
\p
\v 18 Ca guca zaj nabaga zria xúgute̱ bénneache ne̱ chee̱ da zrinnaj da be̱n tuze benneꞌ, Adán, cáꞌanqueze ne̱ chee̱ da xrlátaje da be̱n xetuze benneꞌ, Jesucristo, belexexaca bénneache xrlátaje chee̱ xelaca bane̱ꞌ.
\v 19 Ca guca belexexaca bénneache zante̱ benneꞌ dul-la laweꞌ da quebe bzua dizraꞌ tuze benneꞌ, cáꞌanqueze laweꞌ da bzua dizraꞌ xetuze benneꞌ, xelexegáꞌana benneꞌ zante̱ xrlátaje lau Dios.
\p
\v 20 Bzua Dios da nadxixruj bea na chee̱ gunná béadxa na da naca dul-la, naꞌ gate dul-la guxánle̱ꞌe̱ na, caꞌ guzrendxa xel-la zriꞌi lazreꞌ chee̱ Dios.
\v 21 Ca naca zua lu naꞌ dul-la gute na bénneache, cáꞌanqueze zua lu naꞌ xel-la zriꞌi lazreꞌ chee̱ Dios gucáꞌana na dxiꞌu xrlátaje lau Dios chee̱ gaca bandxu chadía chacanna ne̱ chee̱ Xránadxu Jesucristo.
\c 6
\s Nácadxu ca benneꞌ gate caꞌ chee̱ québedxa gundxu dul-la, naꞌ naca bandxu nen Cristo
\p
\v 1 ¿Bízraqueze nnadxu? ¿Gúndxadxu dul-la chee̱ guléꞌe láwedxa xel-la zriꞌi lazreꞌ chee̱ Dios?
\v 2 ¡Cabataꞌ! Ba nácadxu ca benneꞌ gate chee̱ québedxa gundxu dul-la. ¿Ájazra gúndxadxu dul-la?
\v 3 ¿Quebe nézele leꞌe, xúgute̱dxu dxiꞌu ba nadxúadxu nisa chee̱ gácadxu tuze nen Jesucristo, naca na ca ba nátedxu tu zren nen Le̱ꞌ lu da nadxúadxu nisa?
\v 4 Caꞌ naca na, ne̱ chee̱ da nadxúadxu nisa naca ca bgáchedxu tu zren nen Le̱ꞌ, ne nátedxu chee̱ xebandxu, ne súadxu tu lu xel-la nabán cube cáte̱ze guca chee̱ Cristo, bebane̱ꞌ ládujla benneꞌ gate ne̱ chee̱ xel-la waca xabáa chee̱ Xre̱ꞌ.
\p
\v 5 Che gúcadxu tuze nen Cristo lu xel-la gute, cáꞌanqueze gácadxu tuze nen Le̱ꞌ lu xel-la dxexebán chee̱ꞌ.
\v 6 Nezdxu da gúcadxu gate nate ba gudá na le̱ꞌe̱ xaga béguaj tu zren nen Le̱ꞌ chee̱ cuía xiꞌ benneꞌ dul-la da gúcadxu chee̱ québedxa gundxu zrin chee̱ dul-la ca benneꞌ zaj nadaꞌu chee̱n.
\v 7 Tu benneꞌ ba nate, ba bedxúaje̱ꞌ lu naꞌ dul-la.
\v 8 Che ba gútedxu tu zren nen Cristo, dxuxrén lázredxu gaca bánquezdxu tu zren nen Le̱ꞌ
\v 9 laweꞌ da nezdxu quebe gate Cristo da xula laweꞌ da ba bebane̱ꞌ ládujla benneꞌ gate, naꞌ québedxa xuꞌe̱ lu naꞌ xel-la gute.
\v 10 Gate gute Cristo, tu lásaze gutie̱ꞌ ne̱ chee̱ dul-la waláz chee̱ xúgute̱ bénneache, san naꞌa naca bane̱ꞌ, naꞌ lu naꞌ Dios naca bane̱ꞌ.
\v 11 Cáꞌanqueze leꞌe, le gueque nácale benneꞌ gate chee̱ québedxa gunle dul-la, san naca banle lu naꞌ Dios tu zren nen Xránadxu Jesucristo.
\p
\v 12 Chee̱ le̱ naꞌ québedxa güele lataj nna beꞌe dul-la be̱laꞌ dxen chee̱le da dxal-laꞌ gate, chee̱ québedxa gun na gunle da dxezá lazreꞌ be̱laꞌ dxen chee̱le.
\v 13 Quebe guzúa cuínale lu naꞌ dul-la chee̱ guchine na leꞌe lu da cale̱la, san le guzúa cuínale lu naꞌ Dios, gácale ca benneꞌ belexebán ládujla benneꞌ gate, chee̱ guchínene̱ꞌ leꞌe lu da xrlátaje.
\v 14 Québedxa gaca dul-la nna beꞌe na leꞌe laweꞌ da québedxa xuꞌule lu naꞌ da nadxixruj bea na, san xuꞌule lu naꞌ xel-la zriꞌi lazreꞌ chee̱ Dios.
\s Tu da dxuléꞌe na ca naca chee̱ benneꞌ zaj nadaꞌu
\p
\v 15 ¿Bizra xcaꞌ? ¿Gundxu dul-la laweꞌ da québedxa xúꞌudxu lu naꞌ da nadxixruj bea na, san xúꞌudxu lu naꞌ xel-la zriꞌi lazreꞌ chee̱ Dios? ¡Cabataꞌ!
\v 16 Ba nézquezle che guzúa cuínale lu naꞌ tu xránale ca benneꞌ zaj nadaꞌu chee̱ guzúale dizraꞌ chee̱ꞌ, nadxa nácale benneꞌ zaj nadaꞌu chee̱ xránale, ne dxun na ba xen guzúale dizraꞌ chee̱ꞌ. Cáꞌanqueze naca chee̱le leꞌe che guzúale dizraꞌ chee̱ dul-la, da gunna na leꞌe xel-la gute, u che guzúale dizraꞌ chee̱ Dios, chee̱ gácale xrlátaje.
\v 17 Xcalén Dios, lácala gúcale ca benneꞌ zaj nadaꞌu lu naꞌ dul-la, naꞌa du lázrele dxuzúale dizraꞌ chee̱ dizraꞌ li naꞌ, lu da naꞌ bzua cuínale.
\v 18 Gate bedxúajle leꞌe lu naꞌ dul-la, bexácale we̱n zrin chee̱ da xrlátaje.
\v 19 (Dxuchálajle̱naꞌ leꞌe ca dxuluchalaj bénneache laweꞌ da lu be̱laꞌ dxen chee̱le quebe gaca chéajniꞌile ca naca da nigá.) Cáte̱ze be̱nle gate naꞌ bzua cuínale lu naꞌ da sban, ne lu naꞌ da zrinnaj chee̱ gunle da zrinnaj, cáꞌanqueze le gun naꞌa, le guzúa cuínale lu naꞌ da xrlátaje chee̱ gácaquezle bi chee̱ Dios.
\p
\v 20 Gate ne nácale ca benneꞌ zaj nadaꞌu lu naꞌ dul-la, quebe be̱n na ba xen gunle da xrlátaje.
\v 21 Naꞌa ¿bizra da ba neza guca chee̱le da caꞌ dxexeduéꞌele chee̱n naꞌa? Da caꞌ be̱nle nédxute̱ guché̱ na leꞌe lu xel-la gute.
\v 22 Naꞌa nadxúajle lu naꞌ dul-la, ne ba nácale we̱n zrin chee̱ Dios chee̱ gácaquezle bi chee̱ Dios da naché̱ na leꞌe lu xel-la nabán da zeajlí canna.
\v 23 Benneꞌ dxune̱ꞌ dul-la dzeziꞌe̱ lazruj chee̱ꞌ da naca na xel-la gute, san da dxúnnaze Dios dxiꞌu naca na xel-la nabán da zeajlí canna tu zren nen Xránadxu Jesucristo.
\c 7
\s Tu da dxuléꞌe na ca naca chee̱ xel-la wechaga naꞌ
\p
\v 1 Bi bíchaꞌdauꞌ, leꞌe núnbeale da nadxixruj bea na, zaj xuꞌu lu naꞌ da nadxixruj bea na bénneache tuze dxácate̱ ne zaj naca bane̱ꞌ.
\v 2 Ca naca da nigá, tu nuꞌula nuchaga naꞌ xuꞌe̱ lu naꞌ benneꞌ chee̱ꞌ ne̱ chee̱ da nadxixruj bea na dxácate̱ zue̱ꞌ nabane̱ꞌ, san che gate benneꞌ chee̱ꞌ, naꞌ xedxúaj zruꞌule̱ꞌ lu naꞌ da nadxixruj bea na naꞌ.
\v 3 Caꞌ naca na, che nuꞌula naꞌ súale̱ne̱ꞌ benneꞌ xula dxácate̱ ne nabán benneꞌ chee̱ꞌ, gune̱ꞌ dul-la gáchajne̱ꞌ xrba chee̱ xel-la nuchaga naꞌ, san che benneꞌ chee̱ꞌ naꞌ gatie̱ꞌ, xedxúaj zruꞌule̱ꞌ lu naꞌ da nadxixruj bea na naꞌ, naꞌ waca xuchaga náꞌle̱ne̱ꞌ benneꞌ xula, ne quebe gune̱ꞌ dul-la da gáchajne̱ꞌ xrba chee̱ xel-la nuchaga naꞌ.
\p
\v 4 Cáꞌanqueze naca chee̱le leꞌe, bi bíchaꞌdauꞌ, leꞌe zrágale be̱l-laꞌ dxen chee̱ Cristo, ba nácale ca benneꞌ gate, ne québedxa xuꞌule lu naꞌ da bdxixruj beꞌe Moisés, chee̱ gácale ca zruꞌula benneꞌ xula. Naꞌa nácale ca zruꞌula Cristo, Bénneaꞌ bebane̱ꞌ ládujla benneꞌ gate, chee̱ gácadxu bi guchine Dios.
\v 5 Dxácate̱ naꞌ be̱ndxu da naca chee̱ be̱laꞌ dxen chee̱dxu, da nadxixruj bea na bleꞌe na dxiꞌu naca dul-la da be̱ndxu ca da dxezá lazreꞌ be̱laꞌ dxen chee̱dxu, naꞌ da naꞌ guché̱ na dxiꞌu lu xel-la gute.
\v 6 Naꞌa ba nácadxu ca benneꞌ zaj nate, naꞌ ba bedxúajdxu lu naꞌ da nadxixruj bea na da gunná beꞌe na dxiꞌu, chee̱ gaca gundxu zrin chee̱ Dios lu xel-la nabán cube da dxunna Beꞌ Láꞌazxa dxiꞌu, ne quegá gundxu zrin naꞌ lu da nadxixruj bea gula da naxúaj na.
\s Dul-la da zúale̱ nedaꞌ
\p
\v 7 ¿Bizra nnadxu xcaꞌ? ¿Dxun da nadxixruj bea na nácadxu benneꞌ dul-la? ¡Cabataꞌ! Quebe gunezdaꞌ da naca na dul-la chela ca bleꞌe da nadxixruj bea na nedaꞌ. Quebe gunezdaꞌ naca dul-la sa lazraꞌ da naca chee̱ nu benneꞌ chela ca gunná da nadxixruj bea na: Quebe sa lazruꞌ da naca chee̱ nu benneꞌ.
\v 8 Bleꞌe da nadxixruj bea na nedaꞌ da naca dul-la, naꞌ guque beꞌedaꞌ zúale̱ꞌe̱ zánete̱ da cale̱la lu xichaj lázrdawaꞌ da guzá lazraꞌ, laweꞌ da gate quebe ne gúnbeꞌa da nadxixruj bea na, guca dul-la chiaꞌ tu da nagache lawaꞌ nedaꞌ.
\v 9 Guzúa tu zra gate quebe ne laꞌ da nadxixruj bea, naꞌ gúquedaꞌ naca banaꞌ nedaꞌ, san gate bendaꞌ da naꞌ gunná beꞌe na nedaꞌ, bénbeꞌa da naca dul-la, naꞌ guque beꞌedaꞌ nabagaꞌ zria, ne dxal-laꞌ gatiaꞌ.
\v 10 Caꞌan guca, da nadxixruj bea naꞌ naca na chee̱ gunna na nedaꞌ xel-la nabán, san guca na chiaꞌ ca tu da be̱te nedaꞌ
\v 11 laweꞌ da bleꞌe da nadxixruj bea naꞌ nedaꞌ da naca na dul-la, da naꞌ guzí xe̱ na nedaꞌ, naꞌ ne̱ chee̱ da nadxixruj bea naꞌ guque beꞌedaꞌ nabagaꞌ zria, ne dxal-laꞌ gatiaꞌ.
\p
\v 12 Caꞌ naca na, da li naca láꞌazxa da nadxixruj bea na. Da nadxixruj bea naꞌ naca na láꞌazxa, ne xrlátaje, ne chaweꞌ.
\v 13 ¿Ájazra naca da nigá? ¿Be̱te da nadxixruj bea xrlátaje naꞌ nedaꞌ? ¡Cabataꞌ! Dul-la naꞌ be̱te na nedaꞌ, naꞌ caní guque beꞌedaꞌ naca na dul-la. Da nigá guque beꞌedaꞌ ne̱ chee̱ da nadxixruj bea xrlátaje naꞌ, naꞌ caní bleꞌe da nadxixruj bea naꞌ da sbánle̱ꞌe̱ naca dul-la.
\p
\v 14 Nezdxu da nadxixruj bea na naca na da be̱nna Beꞌ Láꞌazxa chee̱ Dios dxiꞌu, san lu be̱laꞌ dxen chiaꞌ nacaꞌ ca tu benneꞌ nadaꞌu, naꞌ da nacaꞌ dxun na gunaꞌ dul-la.
\v 15 Nedaꞌ quebe dxéajniꞌidaꞌ da dxaca chiaꞌ laweꞌ da quebe dxunaꞌ da dxaca lazraꞌ gunaꞌ, san da dxecuídedaꞌ naca na da dxunaꞌ.
\v 16 Che dxunaꞌ da cale̱la da quebe dxaca lazraꞌ gunaꞌ, da naꞌ dxenná da nadxixruj bea na naca na dul-la, naꞌ nezdaꞌ xrlátaje naca da nadxixruj bea na.
\v 17 Caꞌ naca na, quegá nedaꞌ dxunaꞌ da naꞌ, san dul-la da zúale̱ nedaꞌ, le̱ naꞌ dxun na caꞌ.
\v 18 Nezdaꞌ quebe bi zúale̱ be̱laꞌ dxen chiaꞌ da naca xrlátaje, laweꞌ da dxezá lazraꞌ gunaꞌ da xrlátaje, san quebe dxezéquedaꞌ gunaꞌ na.
\v 19 Quebe dxunaꞌ da xrlátaje da dxaca lazraꞌ gunaꞌ, san dxunaꞌ da cale̱la da quebe dxaca lazraꞌ gunaꞌ.
\v 20 Chee̱ le̱ naꞌ, che dxunaꞌ da quebe dxaca lazraꞌ gunaꞌ, quebe naca nedaꞌ dxunaꞌ na, san dul-la da zúale̱ nedaꞌ dxun na caꞌ.
\p
\v 21 Caní naca da dxaca chiaꞌ: Gate dxaca lazraꞌ gunaꞌ da xrlátaje, dxuléꞌe lawe zúale̱ da cale̱la nedaꞌ.
\v 22 Lu xichaj lázrdawaꞌ dxedánedaꞌ da nadxixruj bea Dios,
\v 23 san dxeque beꞌedaꞌ lu be̱laꞌ dxen chiaꞌ zua tu da dxedábaga na ca da dxaca lazraꞌ, da naca da nadxixruj bea dul-la da zúale̱ be̱laꞌ dxen chiaꞌ, naꞌ dxenná beꞌe na nedaꞌ.
\p
\v 24 ¡Edxugúa nedaꞌ! ¿Nu guselá nedaꞌ lu be̱laꞌ dxen chiaꞌ da naché̱ na nedaꞌ lu xel-la gute?
\v 25 Xcalén Dios, Le̱ꞌ gune̱ꞌ na ne̱ chee̱ Xránadxu Jesucristo. Caꞌ naca, lu xichaj lázrdawaꞌ dxuzúa cuinaꞌ lu naꞌ Dios, san lu be̱laꞌ dxen chiaꞌ nacaꞌ ca tu benneꞌ nadaꞌu lu naꞌ da nadxixruj bea dul-la.
\c 8
\s Xel-la nabán da dxunna Beꞌ Láꞌazxa chee̱ Dios dxiꞌu
\p
\v 1 Naꞌa, quebe zaj nabía xiꞌ benneꞌ caꞌ zaj naque̱ꞌ tuze nen Jesucristo, benneꞌ caꞌ québedxa dxelune̱ꞌ da cale̱la cáte̱ze dxenná bea be̱laꞌ dxen chee̱ꞌ, san dxelune̱ꞌ da xrlátaje cáte̱ze dxenná bea Beꞌ Láꞌazxa.
\v 2 Da nadxixruj bea na da dxunna Beꞌ Láꞌazxa, Bénneaꞌ dxunne̱ꞌ dxiꞌu xel-la nabán laweꞌ da nácadxu tuze nen Jesucristo, ba bselá na nedaꞌ lu naꞌ da bdxixruj beꞌe Moisés da dxuléꞌe na nedaꞌ nacaꞌ benneꞌ dul-la, ne nabagaꞌ zria, ne dxal-laꞌ gatiaꞌ.
\v 3 Ba be̱n Dios da quebe guca gun da bdxixruj beꞌe Moisés, ba gudúe̱ꞌ dul-la da zaj nabaga bénneache. Da nadxixruj bea na quebe guca gun na gundxu da xrlátaje laweꞌ da nate niꞌa naꞌ be̱laꞌ dxen chee̱dxu. Chee̱ le̱ naꞌ Dios gusel-le̱ꞌ Zríꞌinequeze̱ꞌ, naꞌ guque̱ꞌ bénneache ca naca be̱laꞌ dxen chee̱dxu da xuꞌu na lu naꞌ dul-la, chee̱ gutie̱ꞌ ne̱ chee̱ dul-la chee̱dxu, laweꞌ da nabágadxu zria gátedxu ne̱ chee̱ dul-la da zúale̱ be̱laꞌ dxen chee̱dxu.
\v 4 Caní be̱ne̱ꞌ chee̱ gaca gundxu da nadxixruj bea na, dxiꞌu québedxa dxundxu ca dxenná bea be̱laꞌ dxen chee̱dxu, san dxundxu ca dxenná bea Beꞌ Láꞌazxa.
\p
\v 5 Benneꞌ dxelune̱ꞌ ca dxenná bea be̱laꞌ dxen chee̱ꞌ zaj dxeꞌe̱ gunne xue da naca chee̱ be̱laꞌ dxen chee̱ꞌ, san benneꞌ dxelune̱ꞌ ca dxenná bea Beꞌ Láꞌazxa zaj dxeꞌe̱ gunne xue da naca chee̱ Beꞌ Láꞌazxa.
\v 6 Benneꞌ zaj dxeꞌe̱ gunne xue da naca chee̱ be̱laꞌ dxen chee̱ꞌ welátequeze̱ꞌ, san benneꞌ caꞌ zaj dxeꞌe̱ gunne xue da naca chee̱ Beꞌ Láꞌazxa xelaca bane̱ꞌ, ne xelebeza zri lazre̱ꞌ.
\v 7 Benneꞌ zaj dxeꞌe̱ gunne xue chee̱ be̱laꞌ dxen chee̱ꞌ dxelecuídene̱ꞌ Dios, laweꞌ da quebe dxelaca lazre̱ꞌ, ne quebe gaca xuluzúa cuine̱ꞌ lu naꞌ da nadxixruj bea Le̱ꞌ.
\v 8 Chee̱ le̱ naꞌ benneꞌ dxelune̱ꞌ ca da dxezá lazreꞌ be̱laꞌ dxen chee̱ꞌ quebe gaca xelune̱ꞌ da dxezaca ba lazreꞌ Dios.
\p
\v 9 Leꞌe quebe dxunle ca dxenná bea be̱laꞌ dxen chee̱le, san dxunle ca dxenná bea Beꞌ Láꞌazxa, laweꞌ da ba zúale̱ Beꞌ Láꞌazxa chee̱ Dios leꞌe. Benneꞌ quebe zúale̱ Beꞌ Láꞌazxa le̱ꞌ, Beꞌ da nasel-la Cristo, quebe naque̱ꞌ bi chee̱ Cristo.
\v 10 Lácala zua Cristo lu xichaj lázrdaule, lu be̱laꞌ dxen chee̱le dxal-laꞌ gátele, san lu xichaj lázrdaule ba xuꞌule tu xel-la nabán cube laweꞌ da bcaꞌana Dios leꞌe xrlátaje.
\v 11 Che zúale̱ Beꞌ Láꞌazxa leꞌe, Beꞌ chee̱ Dios, Bénneaꞌ bsebane̱ꞌ Jesucristo ládujla benneꞌ gate, Lé̱queze Dios naꞌ, Bénneaꞌ bsebane̱ꞌ Le̱ꞌ, gunne̱ꞌ xel-la nabán cube chee̱ be̱laꞌ dxen chee̱le da gátequeze na. Da nigá gune̱ꞌ ne̱ chee̱ Beꞌ Láꞌazxa chee̱ Dios, Bénneaꞌ zue̱ꞌ xichaj lázrdaule.
\p
\v 12 Caꞌ naca na, bi bíchaꞌdauꞌ, nabágadxu tu da gundxu, san quegá chee̱ gundxu ca dxenná bea be̱laꞌ dxen chee̱dxu.
\v 13 Che gundxu ca dxenná bea be̱laꞌ dxen chee̱dxu, gátequezdxu, san che ne̱ chee̱ Beꞌ Láꞌazxa guzúadxu chaláꞌala da dxun be̱laꞌ dxen chee̱dxu, naꞌ gaca bandxu.
\p
\v 14 Xúgute̱ benneꞌ caꞌ dxelún ca dxuléꞌe Beꞌ Láꞌazxa le̱ꞌ, benneꞌ caní zaj naque̱ꞌ bi chee̱ Dios.
\v 15 Beꞌ Láꞌazxa da guzíꞌ lu naꞌle quebe dxuguꞌe̱ leꞌe lu xel-la dxezrebe ca benneꞌ zaj nadaꞌu, san dxune̱ꞌ nácale bi chee̱ Dios. Ne̱ chee̱ Beꞌ Láꞌazxa nigá dxenne̱dxu: “Xrae”, gate dxuláwizredxu Dios.
\v 16 Lé̱queze Beꞌ Láꞌazxa nigá dxexeché̱bele̱ne̱ꞌ beꞌ nácadxu, dxenné̱ꞌ nácadxu bi chee̱ Dios.
\v 17 Che nácadxu bi chee̱ꞌ caꞌ, gácaqueze chee̱dxu da naca chee̱ Dios. Gaca chee̱dxu da dxal-laꞌ gaca chee̱ Cristo che gudedxu xel-la ziꞌ tu zren nen Le̱ꞌ, chee̱ xegáꞌana szrendxu tu zren nen Le̱ꞌ.
\p
\v 18 Dxéquedaꞌ ca xel-la ziꞌ da dxededxu naꞌa quebe gutíl-lele̱be na ca da xabáa da sidxu lu zra da za zaꞌ.
\v 19 Da dxelezá lazreꞌ, ne da dxelebeza xúgute̱ da nun Dios naca na chee̱ guléꞌe Dios bi zaj naca be̱ꞌ bi chee̱ꞌ caꞌ.
\v 20 Ca naca da nun Dios belexaca na dácheze, quegá ca gulaca lazreꞌ le̱ na, san laweꞌ da núnqueze Dios gaca na caꞌ. Be̱ne̱ꞌ zua da dxelebeza lazre na
\v 21 laweꞌ da xeledxúaj ca da nun Dios lu naꞌ da dxuzría xiꞌ le̱ na, chee̱ gaca ba neza chee̱ na tu zren nen bi caꞌ zaj naca bi caꞌ chee̱ Dios lu xel-la weselá chee̱beꞌ da naca xabáa.
\v 22 Nézquezdxu, ca zrin naꞌa zra, xúgute̱ da nun Dios dxelebezre we̱ꞌ na, ne dxeledé na xel-la ziꞌ ca tu nuꞌula zue̱ꞌ xel-la dxudía chee̱ sane̱ꞌ bidauꞌ.
\v 23 Quegá tuze da naꞌ nun Dios dxedé na xel-la ziꞌ, san cáꞌanqueze dxiꞌu dxededxu xel-la ziꞌ, dxiꞌu naꞌ ba zúale̱ Beꞌ Láꞌazxa dxiꞌu, da naca chee̱dxu tu da dxunna bea na da dxal-laꞌ sidxu. Cáꞌanqueze dxiꞌu dxebezre lázredxu dxácate̱ naꞌ dxebézadxu zra guléꞌe Dios nácadxu bi chee̱ꞌ caꞌ, gate naꞌ gunne̱ꞌ cheedxu tu be̱laꞌ dxen cube.
\v 24 Lu da dxebeza lázredxu guládxu, san che gaca léꞌedxu da dxebeza lázredxu, québedxa naca na tu da dxebeza lázredxu. Tu da ba dxeléꞌedxu, québedxa dxun na ba xen cueza lázredxu na.
\v 25 Che da dxebeza lázredxu naca na tu da quebe gaca léꞌedxu, dxun na ba xen cuézadxu na lu dute̱ xel-la zren lazreꞌ chee̱dxu.
\p
\v 26 Cáꞌanqueze Beꞌ Láꞌazxa dxácale̱ne̱ꞌ dxiꞌu lu xel-la nate niꞌa naꞌ chee̱dxu. Quebe nezdxu guchálajle̱dxu Dios ca dxal-laꞌ gundxu, san Lé̱queze Beꞌ Láꞌazxa dxue lazre̱ꞌ lau Dios waláz chee̱dxu, ne dxebezre lazre̱ꞌ ca da quebe dxezequeꞌ nu nne̱.
\v 27 Dios, Bénneaꞌ dxenné̱ꞌe̱ da zua xichaj lázrdaudxu nézene̱ꞌ da dxaca lazreꞌ nne̱ Beꞌ Láꞌazxa laweꞌ da dxue lazreꞌ Beꞌ Láꞌazxa lau Dios cáte̱ze naca da dxaca lazreꞌ Dios waláz chee̱ bi zaj naca be̱ꞌ chee̱ꞌ.
\s Nácadxadxu wal-la ca tu benneꞌ dxezruéꞌene̱ꞌ
\p
\v 28 Nezdxu dxuchine Dios xúgute̱ da dxaca chee̱dxu chee̱ gucáꞌana na dxiꞌu chaweꞌ, dxiꞌu naꞌ nazriꞌidxu Le̱ꞌ, naꞌ Le̱ꞌ bláwizre̱ꞌ dxiꞌu ca naca da nune̱ꞌ gune̱ꞌ.
\v 29 Benneꞌ caꞌ bénbea Dios nédxudaute̱, be̱n Le̱ꞌ nédxudaute̱ xelaque̱ꞌ ca naca Zríꞌinequeze̱ꞌ, chee̱ gaca Zríꞌine̱ꞌ naꞌ Benneꞌ blau ládujla zánete̱ bi biche̱ꞌ.
\v 30 Benneꞌ caꞌ be̱n Dios nédxudaute̱ ca xelaque̱ꞌ, cáꞌanqueze bláwizre̱ꞌ le̱ꞌ, naꞌ benneꞌ caꞌ bláwizre̱ꞌ, cáꞌanqueze bcaꞌane̱ꞌ le̱ꞌ xrlátaje, naꞌ benneꞌ caꞌ bcaꞌane̱ꞌ xrlátaje, cáꞌanqueze bcaꞌana szrénqueze̱ꞌ le̱ꞌ.
\p
\v 31 ¿Bizra nnadxu chee̱ da caní? Che caní dxácale̱ Dios dxiꞌu, ¿nuzra benneꞌ sequeꞌ tábague̱ꞌ dxiꞌu?
\v 32 Dios quebe bezúene̱ꞌ ziꞌ gunne̱ꞌ dxiꞌu Zríꞌinequeze̱ꞌ, san bdee̱ꞌ Le̱ꞌ chee̱ gútie̱ꞌ waláz chee̱dxu. ¿Quebe gunne̱ꞌ chee̱dxu xúgute̱ da caꞌ tu zren nen Zríꞌine̱ꞌ?
\v 33 ¿Nuzra sequeꞌ bi nne̱ chee̱ benneꞌ caꞌ ba gucáꞌa Dios le̱ꞌ? Lé̱queze Dios naꞌ bcaꞌane̱ꞌ benneꞌ caꞌ xrlátaje.
\v 34 ¿Nuzra benneꞌ sequeꞌ nne̱ꞌ zaj nabaga zria benneꞌ caꞌ? Lé̱queze Cristo gutie̱ꞌ waláz chee̱dxu, ne da naca na blaudxa, naque̱ꞌ Bénneaꞌ bebán ládujla benneꞌ gate, naꞌ zue̱ꞌ chaláꞌa xabe̱la chee̱ Dios, ga dxue lazre̱ꞌ lau Le̱ꞌ waláz chee̱dxu.
\v 35 ¿Nuzra sequeꞌ xecáꞌa dxiꞌu lu naꞌ Cristo, Bénneaꞌ nazríꞌine̱ꞌ dxiꞌu? ¿Wazequeꞌ xel-la ziꞌ, u xel-la xacheꞌ, u da nau ziꞌ xuzre na dxiꞌu, u xel-la dxedún, u da dxugúa zra lánadxu, u da ste̱be, u xel-la gute?
\v 36 Naca na ca da naxúaj na lu dizraꞌ láꞌazxa, dxenná na:
\q Laweꞌ da nácantuꞌ bi chiuꞌ zúaquezentuꞌ gátentuꞌ xúgute̱ zra.
\q Dxelune̱ꞌ netuꞌ ca zrílaꞌdauꞌ ba zaj zúabaꞌ chee̱ xelútie̱ꞌ-baꞌ.
\m
\v 37 Lu xúgute̱ da caní nácadxadxu szren ca benneꞌ dxelezruéꞌene̱ꞌ, ne̱ chee̱ Bénneaꞌ bzriꞌine̱ꞌ dxiꞌu.
\v 38 Chee̱ le̱ naꞌ dxuxrén lazraꞌ quebe bi de̱ da sequeꞌ gucuasa na dxiꞌu lu naꞌ Dios, Bénneaꞌ nazríꞌine̱ꞌ dxiꞌu.
\q Ne xel-la gute, ne xel-la nabán,
\q ne gubáz chee̱ xabáa caꞌ, ne beꞌ xriwe̱ꞌ dxelenná bea,
\q ne xel-la waca chee̱ beꞌ xriwe̱ꞌ caꞌ,
\q ne da dxaca naꞌa, ne da za zaꞌ,
\q
\v 39 ne da zua xabáa, ne da zua lu xe̱zr la xu,
\q ne xetú da nun Dios,
\q quebe sequeꞌ xecáꞌa na dxiꞌu lu xel-la zriꞌi lazreꞌ chee̱ Dios,
\q da bléꞌene̱ꞌ dxiꞌu gate bdee̱ꞌ Xránadxu Jesucristo waláz chee̱dxu.
\c 9
\s Dios guqué̱ꞌe̱ benneꞌ Israel caꞌ
\p
\v 1 Dxenníaꞌ da li ca bi chee̱ Cristo, ne quebe dxun lazraꞌ, naꞌ xichaj lázrdawaꞌ ne̱ chee̱ Beꞌ Láꞌazxa dxe̱ na nedaꞌ naca na da li.
\v 2 Dxexíaje lázrele̱ꞌe̱daꞌ, ne tu zúazqueze xel-la dxudía lu lázrdawaꞌ,
\v 3 naꞌ dxezá lázrteaꞌ cuía xiꞌa nedaꞌ, ne xecuasaꞌ nen Cristo, la naca da nigá da gácale̱ na bi bíchaꞌdauꞌ caꞌ, benneꞌ walázr chiaꞌ, benneꞌ judío.
\v 4 Benneꞌ caní zaj naque̱ꞌ zriꞌine zre sua Israel, naꞌ Dios guzíꞌ lu ne̱ꞌe̱ benneꞌ caní ca bi chee̱ꞌ caꞌ. Dios guzúe̱ꞌ ládujla benneꞌ caꞌ lu da xabáa chee̱ꞌ, ne be̱ne̱ꞌ tu xel-la wezría nen benneꞌ caꞌ, ne bnézruje̱ꞌ le̱ꞌ da nadxixruj bea na da bzuaj Moisés, ne xel-la wil-la chee̱ xudauꞌ, ne da nache̱be lazre̱ꞌ.
\v 5 Zaj naque̱ꞌ zriꞌine zre zua xra xrtáudxu caꞌ, naꞌ ládujla benneꞌ walázr chee̱ꞌ caꞌ, lu be̱laꞌ dxen chee̱ꞌ blaꞌ Cristo, Bénneaꞌ naque̱ꞌ Dios laweꞌ xúgute̱ da de̱, ne gaca báqueze̱ꞌ chadía chacanna. ¡Caꞌ gaca na!
\p
\v 6 Quebe nnadxu quebe dxun Dios da dxenná xrtizre̱ꞌ, san da naca na, quegá xúgute̱ zriꞌine zre sua Israel zaj nababa benneꞌ Israel caꞌ chee̱ Dios.
\v 7 Quegá xúgute̱ zriꞌine zre sua Abraham zaj naca xánnie̱ꞌ zríꞌinequeze̱ꞌ, san naca na ca guzre Dios le̱ꞌ, gunné̱ꞌ: “Lu zriꞌine zre sua Isaac xelaca zriꞌine zre suꞌ.”
\v 8 Da nigá dxuléꞌe na dxiꞌu quebe nu naca bi chee̱ Dios cáte̱ze nálajbeꞌ, san zaj naca bi chee̱ꞌ benneꞌ caꞌ zaj nálaje̱ꞌ ca naca da guche̱be lazreꞌ Dios.
\v 9 Ca naca da guche̱be lazreꞌ Dios da gunné̱ꞌ chee̱ Abraham naca na da nigá: Lu zra da ba gunníaꞌ xidaꞌ, naꞌ Sara chiuꞌ sane̱ꞌ tu zríꞌinuꞌ.
\p
\v 10 Quegá tuze da nigá, san cáꞌanqueze gate Rebeca guzráꞌ chupa zríꞌine̱ꞌ naca tuze xrabeꞌ, Isáac, xra xrtáudxu,
\v 11-13 ne gate bi caꞌ quebe ne xelálajbeꞌ, ne quebe ne xelunbeꞌ da xrlátaje u da cale̱la, Dios guzre̱ꞌ Rebeca: “Bi waca chiuꞌ gácabeꞌ we̱n zrin chee̱ bi cuideꞌ.” Da nigá naca na tuze nen da naxúaj lu dizraꞌ láꞌazxa, da dxenná na: Bzriꞌidaꞌ Jacob, ne quegá Esaú. Caꞌ guca na, begáꞌana chaweꞌ da xuꞌu lu naꞌ Dios chee̱ gudxée̱ꞌ ca naca da núnqueze̱ꞌ, benneꞌ caꞌ dxaca lazre̱ꞌ guláwizre̱ꞌ, ne quebe dxuché̱ꞌe̱ ca da zaj nune̱ꞌ.
\p
\v 14 ¿Bízraqueze nnadxu? ¿Naca Dios Benneꞌ quebe dxun da xrlátaje? ¡Cabataꞌ!
\v 15 Guzre̱ꞌ Moisés: “Wezrí lazraꞌ benneꞌ dxaca lazraꞌ, ne wexache lazraꞌ benneꞌ dxaca lazraꞌ.”
\v 16 Caꞌ naca na, quebe naca laweꞌ da dxaca lázredxu, ne quegá laweꞌ da dxun ziꞌ lázredxu, san naca na laweꞌ da dxexache lazreꞌ Dios dxiꞌu.
\v 17 Lu dizraꞌ láꞌazxa Dios dxe̱ꞌe̱ wenná bea chee̱ xe̱zr la xu Egipto: “Be̱naꞌ lueꞌ wenná bea chee̱ guléꞌedaꞌ ne̱ chiuꞌ lueꞌ xel-la waca chiaꞌ, ne chee̱ xelúnbea bénneache La nedaꞌ du gabíꞌi xe̱zr la xu.”
\v 18 Caꞌ naca na, Dios dxexache lazre̱ꞌ benneꞌ dxaca lazre̱ꞌ, ne cáꞌanqueze dxuꞌe̱ lataj gaque̱ꞌ zizraj lazreꞌ benneꞌ dxaca lazre̱ꞌ guꞌe̱ lataj gaque̱ꞌ zizraj lazreꞌ.
\p
\v 19 Naꞌa xiꞌu nedaꞌ: Che caní naca na, ¿bizr chee̱ naꞌ dxugapa Dios bénneache dul-la? ¿Núzraqueze sequeꞌ tábaga ca da dxaca lazreꞌ Le̱ꞌ?
\v 20 Lueꞌ, benneꞌ, ¿nuzra nacuꞌ lueꞌ chee̱ gutil-luꞌ Dios dizraꞌ? ¿Waca tu xesuꞌ xe̱ na benneꞌ be̱ne̱ꞌ le̱ na: ¿Bizr chée̱ naꞌ be̱nuꞌ nedaꞌ caní?
\v 21 Benneꞌ we̱n xesuꞌ zruaga naꞌ wazéquene̱ꞌ gune̱ꞌ chee̱ gunaꞌ naꞌ ca dxaca lazre̱ꞌ. Wazéquene̱ꞌ gune̱ꞌ chee̱ gunaꞌ náꞌqueze tu xesuꞌ da zácadxa, ne tu xesuꞌ da xálaze.
\v 22 ¿Bizra nnáquezdxu che Dios guca lazre̱ꞌ guléꞌene̱ꞌ dxiꞌu ca dxuzría xiꞌe bénneache, ne ca naca xel-la waca chee̱ꞌ, naꞌ lu xel-la zren lazreꞌ chee̱ꞌ bchaga lawe̱ꞌ chee̱ benneꞌ caꞌ lácala dxal-laꞌ xeledée̱ꞌ le̱ꞌ xel-la ziꞌ, naꞌ xelebía xíꞌte̱queze̱ꞌ?
\p
\v 23 Be̱ne̱ꞌ na chee̱ bléꞌene̱ꞌ ca naca xel-la szren chee̱ da xabáa chee̱ꞌ lu da naca chee̱dxu dxiꞌu, nácadxu benneꞌ dxexache lazre̱ꞌ Le̱ꞌ, ne bequé̱ꞌe̱ dxiꞌu nédxute̱ chee̱ gaca chee̱dxu xabáa naꞌ da nucueza Le̱ꞌ.
\v 24 Dios bláwizre̱ꞌ dxiꞌu ládujla benneꞌ judío, ne ládujla benneꞌ quebe zaj naque̱ꞌ judío.
\v 25 Naca na ca naxúaj na lu dizraꞌ láꞌazxa ca gunná Oseas, gunné̱ꞌ:
\q Benneꞌ caꞌ quebe zaj naque̱ꞌ bi chiaꞌ, xapaꞌ le̱ꞌ bi chiaꞌ,
\q naꞌ benneꞌ quebe bzriꞌidaꞌ, xapaꞌ le̱ꞌ bi nazriꞌite̱ lazraꞌ.
\q
\v 26 Lu lataj naga guchaꞌ-beꞌ: Quebe nácale bi chiaꞌ,
\q náꞌqueze xapaꞌ le̱ꞌ bi chee̱ Dios ban.
\m
\v 27 Ca naca chee̱ benneꞌ Israel caꞌ, Isaías dxenné̱ꞌ: “Lácala zaj naxán zriꞌine zre sua Israel ca naxán xuzreꞌ dxeꞌ dxuꞌa tu xe̱gu zren, bábaze benneꞌ caꞌ xelexegáꞌane̱ꞌ chee̱ xelelé̱ꞌ”,
\v 28 laweꞌ da gun Xránadxu ca dxenná xrtizre̱ꞌ, guzría xiꞌe̱ ze̱zr la xu nigá lu da naca xrlátaje, ne chadite.
\v 29 Naca na ca gunná lé̱queze Isaías naꞌ gate nate, gunné̱ꞌ:
\q Chela Xránadxu, Xrana zánete̱ gubáz chee̱ xabáa, quebe bcaꞌane̱ꞌ zriꞌine zre súadxu caꞌ,
\q naꞌ xenítedxu ca guca chee̱ xe̱zre Sodoma, ne chee̱ xe̱zre Gomorra.
\s Benneꞌ judío caꞌ, ne dizraꞌ chaweꞌ
\p
\v 30 ¿Bízraqueze nnadxu? Benneꞌ quebe zaj naque̱ꞌ judío, ne quebe belexexílaj lazre̱ꞌ xelexegáꞌane̱ꞌ xrlátaje lau Dios, zaj naque̱ꞌ benneꞌ belexegáꞌane̱ꞌ xrlátaje lau Dios, da zéaje̱ na, belexegáꞌane̱ꞌ xrlátaje laweꞌ da guleajlí lazre̱ꞌ Cristo.
\v 31 Benneꞌ Israel caꞌ, benneꞌ belune̱ꞌ ca dxenná da nadxixruj bea na da dxal-laꞌ xucáꞌana na le̱ꞌ xrlátaje lau Dios, quebe gulezéquene̱ꞌ xelexegáꞌane̱ꞌ xrlátaje lawe̱ꞌ Le̱ꞌ.
\v 32 ¿Bizr chee̱ naꞌ? Naca na laweꞌ da quebe belune̱ꞌ ba xuzre xelexegáꞌane̱ꞌ xrlátaje ne̱ chee̱ xel-la dxeajlí lazreꞌ chee̱ꞌ, san gulaca lazre̱ꞌ xelexegáꞌane̱ꞌ xrlátaje ne̱ chee̱ da belúnqueze̱ꞌ le̱ꞌ. Chee̱ le̱ naꞌ xeajlecházie̱ꞌ laweꞌ xiaj da dxelechegu bénneache, da naꞌ naca Cristo
\v 33 ca da dxenná Dios lu dizraꞌ láꞌazxa chee̱ꞌ, dxenné̱ꞌ:
\q Nedaꞌ dxuzúaꞌ lu xe̱zre Sión tu benneꞌ naque̱ꞌ xiaj da dxelechegu bénneache.
\q Nu benneꞌ cheajlí lazre̱ꞌ Le̱ꞌ quebe xeduéꞌequezne̱ꞌ.
\c 10
\p
\v 1 Leꞌe, bi bíchaꞌdauꞌ, da dxezá lazraꞌ, ne da dxenabaꞌ Dios gune̱ꞌ chee̱ benneꞌ Israel caꞌ naca na chee̱ xelelé̱ꞌ.
\v 2 Ca naca chee̱ benneꞌ caꞌ, da li dxelebile lazre̱ꞌ da naca chee̱ Dios, san quebe naca na chee̱ xel-la sina li.
\v 3 Quebe zaj nézene̱ꞌ ca xrlátaje dxucáꞌana Dios bénneache, san dxelaca lazre̱ꞌ xulucáꞌana xrlátaje cuine̱ꞌ, ne quebe dxelezíꞌ lu ne̱ꞌe̱ ca xrlátaje dxucáꞌana Dios bénneache.
\v 4 Cristo dxune̱ꞌ da dxaca lazreꞌ Dios gun da nadxixruj bea na, laweꞌ da dxucáꞌana Cristo xrlátaje xúgute̱ bénneache dxeleajlí lazre̱ꞌ Le̱ꞌ.
\p
\v 5 Ca naca chee̱ da dxucáꞌana xrlátaje bénneache lau Dios da naca na ne̱ chee̱ da nadxixruj bea na, bzuaj Moisés caní: Benneꞌ dxune̱ꞌ ca naca da dxenná da nadxixruj bea na gaca bane̱ꞌ ne̱ chee̱ le̱ na.
\v 6 Ca naca chee̱ da dxucáꞌana xrlátaje bénneache lau Dios da naca na ne̱ chee̱ xel-la dxeajlí lazreꞌ dxenná na caní: Quebe nnauꞌ lu lazrdaꞌu: “¿Núzraqueze benneꞌ cuéne̱ꞌ xabáa?” (da naca na chee̱ gulétaje̱ꞌ Cristo),
\v 7 ne quebe nnauꞌ: “¿Núzraqueze benneꞌ xétaje̱ꞌ lataj chul-la chee̱ benneꞌ gate caꞌ?” (da naca na chee̱ xebéaje̱ꞌ Cristo ládujla benneꞌ gate.)
\v 8 ¿Bizra da naꞌ dxenná na: Dizraꞌ naꞌ zua na gágute̱ naga zuꞌ, lu dxuꞌu ne lu lazrdaꞌu? Dizraꞌ nigá naca na dizraꞌ chaweꞌ da dxuzénentuꞌ bénneache chee̱ xeléajle̱ꞌe̱ chee̱ Cristo.
\v 9 Che nen dxuꞌu dxennáuꞌ naca Cristo Xranuꞌ, ne che lu lazrdaꞌu dxeajlí lazruꞌ Dios bsebane̱ꞌ Le̱ꞌ ládujla benneꞌ gate, nadxa lauꞌ.
\v 10 Lu lázrdaudxu dxeajlí lázredxu chee̱ xegáꞌanadxu xrlátaje lau Dios, ne nen dxúꞌadxu dxexeché̱bedxu nácadxu chee̱ Cristo chee̱ ladxu.
\p
\v 11 Lu dizraꞌ láꞌazxa dxenná na: Nu benneꞌ dxeajlí lazre̱ꞌ Le̱ꞌ quebe xeduéꞌene̱ꞌ.
\v 12 Dios quebe dxebée̱ꞌ benneꞌ judío caꞌ, u benneꞌ quebe zaj naque̱ꞌ judío laweꞌ da Lé̱queze Xránadxu naꞌ naque̱ꞌ Xrana xúgute̱ bénneache, naꞌ dxunézrujle̱ꞌe̱ xúgute̱ benneꞌ caꞌ dxululáwizre̱ꞌ Le̱ꞌ.
\v 13 Naca na ca da dxenná na: Xúgute̱ benneꞌ dxululáwizre̱ꞌ La Xránadxu xelelé̱ꞌ.
\v 14 Naꞌa ¿ájazra xululáwizre̱ꞌ Le̱ꞌ che quebe ne xeléajle̱ꞌe̱ chee̱ꞌ? ¿Ájazra xeléajle̱ꞌe̱ chee̱ꞌ che quebe ne xelenne̱ꞌ nu dxuchalaj chee̱ꞌ? ¿Ájazra xelenne̱ꞌ che quebe nu chiláꞌ benneꞌ guzenne̱ꞌ le̱ꞌ?
\v 15 ¿Ájazra xuluzenne̱ꞌ bénneache che quebe nu nasel-la le̱ꞌ? Naca na ca dxenná dizraꞌ láꞌazxa, dxenná na: Xrtante̱ naca lau Dios da dxelún benneꞌ dxeledé̱ꞌ dxuluzenne̱ꞌ bénneache dizraꞌ chee̱ xel-la dxebeza zri lazreꞌ, ne dizraꞌ chaweꞌ.
\p
\v 16 Quegá xúgute̱ bénneache dxelezíꞌ lu ne̱ꞌe̱ dizraꞌ chaweꞌ nigá. Naca na ca gunná Isaías, gunné̱ꞌ: “Xran, ¿zua nu benneꞌ ba guxéajle̱ꞌe̱ ca da dxuchálajntuꞌ?”
\v 17 Caꞌ naca na, dxéajle̱dxu chee̱ꞌ gate dxénedxu, naꞌ da dxal-laꞌ xénedxu naca na da gunná Cristo.
\p
\v 18 Naꞌa dxenabaꞌ: ¿Quebe ne xelenne̱ꞌ? Da li ba belenne̱ꞌ. Lu dizraꞌ láꞌazxa dxenná na:
\q Da dxuluzén benneꞌ caní bache belén bénneache du ca naca
\q2 xe̱zr la xu nigá.
\q Dizraꞌ chee̱ benneꞌ caní bache belén bénneache du gabíꞌi xe̱zr la xu.
\m
\v 19 Xecha lasa dxenabaꞌ: ¿Quebe ne xeleque beꞌe benneꞌ Israel ca da gunná Dios? Zaꞌa Moisés bzuaje̱ꞌ ca gunná Dios, gunné̱ꞌ:
\q Nedaꞌ gunaꞌ gácale benneꞌ se̱ lazreꞌ chee̱ tu xe̱zre benneꞌ
\q2 quebe ne xelaque̱ꞌ tu xe̱zre.
\q Gunaꞌ zráꞌale tu xe̱zre benneꞌ quebe ne xeléajniꞌine̱ꞌ.
\m
\v 20 Gudé naꞌ bzuaj Isaías ca gunná Dios, gunné̱ꞌ:
\q Benneꞌ quebe belexílaje̱ꞌ nedaꞌ belexezrélene̱ꞌ nedaꞌ.
\q Bleꞌe lawaꞌ benneꞌ caꞌ quebe bululáwizre̱ꞌ nedaꞌ.
\m
\v 21 Ca naca chee̱ benneꞌ Israel, gunná Dios: “Tu dxuláwizrazquezaꞌ benneꞌ quebe dxuluzúe̱ꞌ dizraꞌ, ne dxeledábague̱ꞌ xrtizraꞌ.”
\c 11
\s Nu benneꞌ Israel caꞌ zaj nalé̱ꞌ
\p
\v 1 Naꞌa dxenabaꞌ: ¿Ba bzua Dios chaláꞌala xe̱zre chee̱ꞌ, benneꞌ Israel caꞌ, tu chíꞌizqueze? ¡Cabataꞌ! Nédaꞌquezaꞌ nacaꞌ benneꞌ Israel. Nedaꞌ nabábale̱naꞌ zriꞌine zre sua Abraham, ne nabábale̱naꞌ zriꞌine zre sua Benjamín.
\v 2 Gate nate Dios guzíꞌ lu ne̱ꞌe̱ benneꞌ Israel caꞌ, naꞌ naꞌa quebe nuzúe̱ꞌ benneꞌ caꞌ chaláꞌala. ¿Quebe nézele leꞌe da dxenná dizraꞌ láꞌazxa ca naca chee̱ Elías, bénneaꞌ bchálaje̱ꞌ waláz chee̱ Dios, gate naꞌ gudawe̱ꞌ zria benneꞌ Israel caꞌ lau Dios? Gunné̱ꞌ:
\v 3 “Xran, ba belútie̱ꞌ benneꞌ buluchálaje̱ꞌ waláz chiuꞌ, ne buluzría xiꞌe̱ lataj láꞌazxa chiuꞌ caꞌ, naꞌ tuzaꞌ nedaꞌ nagáꞌanaꞌ, naꞌ cáꞌanqueze nedaꞌ dxelaca lazre̱ꞌ xelútie̱ꞌ.”
\v 4 Dios beche̱be̱ꞌ, guzre̱ꞌ Elías: “Ba gucáꞌa chiaꞌ ga xun chi gaxúa benneꞌ quebe ne xuluzúa zribe̱ꞌ lau bedáuꞌ xiaj xaga le̱ na Baal.”
\v 5 Cáꞌanqueze naꞌa ba begáꞌana tu cueꞌ benneꞌ caꞌ, benneꞌ ba gucáꞌa Dios chee̱ꞌ lu xel-la zriꞌi lazreꞌ chee̱ꞌ.
\v 6 Naꞌa, che naca na ne̱ chee̱ xel-la zriꞌi lazreꞌ chee̱ Dios, quebe naca na ne̱ chee̱ da gaca gun nu benneꞌ, laweꞌ da la guca na caꞌ, naꞌ xel-la zriꞌi lazreꞌ chee̱ Dios quebe naca na xel-la zriꞌi lazreꞌ.
\p
\v 7 ¿Bizra xcaꞌ? Benneꞌ Israel caꞌ quebe belezruéꞌene̱ꞌ da dxelexílaje̱ꞌ, san benneꞌ caꞌ gucáꞌa Dios le̱ꞌ belezruéꞌene̱ꞌ na, san xezícadxa benneꞌ caꞌ gulaque̱ꞌ benneꞌ zideꞌ.
\v 8 Naca ca dxenná dizraꞌ láꞌazxa, dxenná na: Dios be̱ꞌe̱ lataj gulaca benneꞌ caꞌ lázrdau zideꞌ. Be̱ꞌe̱ le̱ꞌ lataj gulaque̱ꞌ ca benneꞌ la chul-la, ne ca benneꞌ cwezruꞌ caꞌ, naꞌ caní zaj naque̱ꞌ naꞌa.
\v 9 Cáꞌanqueze gunná Davíd, gunné̱ꞌ:
\q Ca naca laní chee̱ benneꞌ caꞌ be̱n xelaca na ca tu xralaj,
\q2 u ca tu da que̱la na le̱ꞌ
\q chee̱ cheajlecházie̱ꞌ, naꞌ gudé Dios le̱ꞌ lu da ba xaꞌ.
\q
\v 10 Xiaj lawe̱ꞌ xelechul-la na chee̱ québedxa xeleléꞌene̱ꞌ,
\q naꞌ xelelégüe̱ꞌ chadía chacanna zran xua da naca na dul-la chee̱ꞌ.
\s Ca zaj nalá benneꞌ quebe zaj naque̱ꞌ judío
\p
\v 11 Naꞌa dxenabaꞌ: ¿Tu chiꞌize belenite benneꞌ judío caꞌ gate xeajlecházie̱ꞌ? ¡Cabataꞌ! Gate benneꞌ judío caꞌ guledábague̱ꞌ xrtizra Dios, gutaꞌ lataj xelelá benneꞌ quebe zaj naque̱ꞌ judío, chee̱ xelezúa benneꞌ judío caꞌ lu xel-la dxezá lazreꞌ.
\v 12 Naꞌa, che da zrinnaj da belún benneꞌ judío caꞌ be̱n na guca tu da ba neza chee̱ xúgute̱ bénneache, ne che gate belenitie̱ꞌ guca na tu da ba neza chee̱ benneꞌ quebe zaj naque̱ꞌ judío, gaca na tu da ba neza zrendxa gate xelexúꞌu xúgute̱ benneꞌ judío caꞌ lu naꞌ Dios.
\p
\v 13 De̱ tu da dxal-laꞌ xapaꞌ leꞌe, núlale quebe nácale benneꞌ judío. Laweꞌ da gusel-la Dios nedaꞌ chee̱ guzendaꞌ benneꞌ quebe zaj naque̱ꞌ judío xrtizre̱ꞌ, dxéꞌle̱ꞌa gunne xue chee̱ zrin nabagaꞌ gunaꞌ.
\v 14 Dxaca lazraꞌ gunaꞌ xelezúa lu xel-la dxezá lazreꞌ bal-la benneꞌ walázr chiaꞌ chee̱ xelelé̱ꞌ.
\v 15 Che gate bzua Dios chaláꞌala benneꞌ judío caꞌ, belexaca tuze nen Dios benneꞌ quebe zaj naque̱ꞌ judío, ¿ájazra gaca gate xelexaca benneꞌ judío caꞌ tuze nen Dios? Gaca na ca xelexaca bane̱ꞌ ládujla benneꞌ gate.
\v 16 Che guzúadxu lau Dios xeta nedxu chee̱ cua, naꞌ nácaqueze chee̱ꞌ dute̱ cua naꞌ. Naꞌ che naca chee̱ Dios lue xaga, zaj nácaqueze chee̱ꞌ ca naca zruze xaga naꞌ.
\p
\v 17 Benneꞌ judío caꞌ zaj naque̱ꞌ ca zrúzequeze tu xaga olivo, san bal-la zruze guledxugu na, naꞌ lueꞌ bedaꞌu waláz chee̱ zruze caꞌ, ne nacuꞌ ca tu zruze xaga olivo xixreꞌ. Caꞌan guca, gucuꞌ tuze nen lue xaga olivo chaweꞌ naꞌ, ne dxeziꞌu ba neza xel-la nabán chee̱ xaga olivo naꞌ.
\v 18 Quebe gucáꞌana szren cuinuꞌ laweꞌ zrúzequeze xaga olivo naꞌ. Che dxucáꞌana szren cuinuꞌ, naca beꞌe quebe dxugaguꞌ lueꞌ lue xaga naꞌ, san luéqueze naꞌ dxugagu na lueꞌ.
\p
\v 19 Wannáuꞌ: Aweꞌ, guledxugu zruze caꞌ chee̱ cheajxedáꞌa nedaꞌ le̱ꞌe̱ xaga olivo naꞌ.
\v 20 Caꞌan naca, san guledxugu na laweꞌ da quebe guléajle̱ꞌe̱ chee̱ Dios, naꞌ lueꞌ bedáꞌazuꞌ le̱ꞌe̱ xaga naꞌ laweꞌ da dxéajle̱ꞌu. Caꞌan naca, quebe gucáꞌana szren cuinuꞌ, san bxue xanneꞌ cuinuꞌ.
\v 21 Che Dios quebe bnite lawe̱ꞌ chee̱ benneꞌ caꞌ zaj naque̱ꞌ ca zrúzequeze xaga naꞌ, naꞌ bebéaje̱ꞌ le̱ꞌ, cáꞌanqueze quebe gunite lawe̱ꞌ chiuꞌ lueꞌ, naꞌ xebéaje̱ꞌ lueꞌ.
\v 22 Le nnaꞌxque ca xrlátaje naca Dios, naꞌ cáꞌanqueze ca snia naque̱ꞌ. Guque̱ꞌ snia nen benneꞌ caꞌ xeajlecházie̱ꞌ, naꞌ naque̱ꞌ chaweꞌ nen lueꞌ. Dxun na ba xen tu gúnzquezuꞌ ca dxal-laꞌ gunuꞌ chee̱ tu síꞌzquezuꞌ da chaweꞌ chee̱ꞌ, laweꞌ da che quebe gunuꞌ caní, cáꞌanqueze wegüe̱ꞌ lueꞌ.
\v 23 Che benneꞌ judío caꞌ xelexexéaj lazre̱ꞌ, naꞌ xelexaque̱ꞌ tuze nen xaga olivo naꞌ, laweꞌ da napa Dios xel-la waca xune̱ꞌ le̱ꞌ tuze.
\v 24 Lueꞌ quebe nacuꞌ judío, san guchugue̱ꞌ lueꞌ le̱ꞌe̱ tu xaga olivo xixreꞌ, naꞌ bexune̱ꞌ lueꞌ tuze nen xaga olivo chaweꞌ naꞌ, da quebe nu dxun. Benneꞌ judío caꞌ, benneꞌ zaj naque̱ꞌ ca zrúzequeze xaga olivo chaweꞌ naꞌ, gácadxa chaweꞌ xexune̱ꞌ le̱ꞌ tuze nen xaga olivo cheé̱queze̱ꞌ naꞌ.
\s Ca xelexúꞌu benneꞌ judío lu naꞌ Dios
\p
\v 25 Leꞌe, bi bíchaꞌdauꞌ, dxaca lazraꞌ chéajniꞌile chee̱ da nagache nigá, chee̱ quebe guéquele nácale benneꞌ sina. Benneꞌ Israel caꞌ zaj naque̱ꞌ benneꞌ lázrdau zideꞌ tu chíꞌidauze, ca zrin zra xelexúꞌu lu naꞌ Dios xúgute̱ benneꞌ quebe zaj naque̱ꞌ judío.
\v 26 Gate gaca na, nadxa xelelá xúgute̱ benneꞌ Israel caꞌ laweꞌ da naxúaj lu dizraꞌ láꞌazxa da dxenná na:
\q Benneꞌ weselá ze̱ꞌe̱ Sión,
\q naꞌ cue̱ꞌ da cale̱la da zaj nabaga zriꞌine zre sua Jacob.
\q
\v 27 Da nigá gaca xel-la wezría gunaꞌ nen benneꞌ caꞌ,
\q gate nedaꞌ cuaꞌ dul-la chee̱ꞌ.
\p
\v 28 Ca naca chee̱ dizraꞌ chaweꞌ chee̱ Cristo, zaj naca benneꞌ judío caꞌ ca benneꞌ dxelecuídene̱ꞌ Dios chee̱ gaca da ba neza chee̱le leꞌe, san Dios ne nazríꞌine̱ꞌ benneꞌ caꞌ laweꞌ da guqué̱ꞌe̱ xra xrtawe̱ꞌ caꞌ.
\v 29 Ca da dxunna Dios, quebe xequé̱ꞌe̱ na, ne quebe dxuzúe̱ꞌ chaláꞌala nu ba bláwizre̱ꞌ.
\v 30 Leꞌe nédxute̱ gudábagale xrtizra Dios, san naꞌa, laweꞌ da guledábaga benneꞌ judío caꞌ xrtizre̱ꞌ, Dios dxexache lazre̱ꞌ leꞌe.
\v 31 Cáꞌanqueze naꞌa, benneꞌ judío caꞌ dxeledábague̱ꞌ xrtizra Dios, san naca na chee̱ xexache lazreꞌ Dios le̱ꞌ ca dxexache lazre̱ꞌ leꞌe.
\v 32 Dios be̱ꞌ lataj xúgute̱ꞌ guledábague̱ꞌ xrtizre̱ꞌ chee̱ gaca xexache lazre̱ꞌ xúgute̱ꞌ.
\p
\v 33 Szrente̱ naca xel-la gunníꞌa chee̱ xel-la sina, ne xel-la dxéajniꞌi chee̱ Dios. Quebe séquedxu chéajniꞌidxu ca da dxuchiꞌe̱, ne quebe gaca gúnbea xánnedxu da dxune̱ꞌ.
\v 34 ¿Núzraqueze gaca chéajniꞌi ca da xuꞌu xichaj lázrdau Xránadxu? ¿Núzraqueze gaca guzéajniꞌi Le̱ꞌ?
\v 35 ¿Núzraqueze benneꞌ bi bnézruje̱ꞌ chee̱ Xránadxu, chee̱ gun na ba xen bi xuzriꞌe̱ chee̱ bénneaꞌ?
\v 36 Xúgute̱ da dxeléꞌedxu záꞌaca na lu naꞌ Dios, naꞌ Le̱ꞌ be̱ne̱ꞌ da caꞌ, ne zaj naca na chee̱ Lé̱queze̱ꞌ. ¡Gaca ba Dios chadía chacanna! ¡Caꞌan gaca na!
\c 12
\s Da dxal-laꞌ gun benneꞌ naque̱ꞌ bi chee̱ Dios
\p
\v 1 Caꞌan naca, bi bíchaꞌdauꞌ, lu xel-la dxexache lazreꞌ chee̱ Dios, dxataꞌ xúedaꞌ leꞌe guzúa cuínale lu naꞌ Dios ca tu gunaꞌ ban, da naca na láꞌazxa, ne da xezaca ba lazreꞌ Dios. Da nigá naca na tu da gucáꞌana szrene Dios da dxal-laꞌ gunle.
\v 2 Québedxa gunle ca dxelún bénneache chee̱ xe̱zr la xu nigá, san le guchá cuínale chee̱ caní zra dute̱ ca naca lu xichaj lázrdaule. Caꞌan gaca, gúnbeale da dxaca lazreꞌ Dios gunle, da naꞌ naca xrlátaje, ne da dxezaca ba lazreꞌ Dios, ne da naca na li lazreꞌ.
\p
\v 3 Ne̱ chee̱ da nusebaga Dios nedaꞌ lu da chaweꞌ chee̱ꞌ dxapaꞌ xúgute̱le leꞌe quebe nu benneꞌ dxal-laꞌ gucáꞌana cuine̱ꞌ szrendxa ca dxal-laꞌ gune̱ꞌ, san dxal-laꞌ guxúe̱ꞌ ca da naque̱ꞌ lu xel-la dxexruj lazreꞌ, cáte̱ze naca xel-la dxeajlí lazreꞌ da nunezruj Dios le̱ꞌ.
\v 4 Ca naca chee̱ be̱l-laꞌ dxen chee̱dxu, zánete̱ da napa na, naꞌ xúgute̱ da caꞌ quebe dxelún na tuze zrin,
\v 5 cáꞌanqueze dxiꞌu, láqueze naxandxu, nácadxu ca tuze be̱l-laꞌ dxen chee̱ Cristo, ne nácadxu tuze tudxu xetudxu ca zaj naca da caꞌ napa tu be̱l-laꞌ dxen chee̱ nu benneꞌ.
\p
\v 6 Dios nunne̱ꞌ dxiꞌu cha chee̱dxu ca da gaca gundxu ca da dxaca lazre̱ꞌ gunne̱ꞌ tu tudxu. Dxal-laꞌ guchine xánnedxu ca da nunne̱ꞌ dxiꞌu.
\q Che nunne̱ꞌ dxiꞌu chee̱ guchálajdxu waláz chee̱ꞌ,
\q dxal-laꞌ gundxu na dute̱ xel-la dxeajlí lazreꞌ da nápadxu.
\q
\v 7 Che nunne̱ꞌ dxiꞌu chee̱ gundxu zrin chee̱ ljwézredxu,
\q dxal-laꞌ gundxu na cháweꞌdauꞌ.
\q Che nunne̱ꞌ dxiꞌu chee̱ gusé̱dedxu bénneache,
\q dxal-laꞌ guse̱de xánnedxu le̱ꞌ.
\q
\v 8 Che nunne̱ꞌ dxiꞌu chee̱ gutípadxu lazreꞌ bénneache,
\q dxal-laꞌ gutipa xánnedxu lazreꞌ le̱ꞌ.
\q Che nunne̱ꞌ dxiꞌu chee̱ bi gunézrujdxu,
\q dxal-laꞌ gundxu na du lázredxu.
\q Che nunne̱ꞌ dxiꞌu chee̱ nne̱ xuedxu,
\q dxal-laꞌ guxúe xánnedxu ca dxundxu na.
\q Che nunne̱ꞌ dxiꞌu gácale̱dxu benneꞌ xacheꞌ caꞌ,
\q dxal-laꞌ gundxu na dute̱ xel-la dxebé chee̱dxu.
\q
\v 9 Le zriꞌi ljwézrele du lázrele tule xetule.
\q Le guzúa chaláꞌala da cale̱la, ne le gun da xrlátaje.
\q
\v 10 Dxal-laꞌ zriꞌi ljwézrele tule xetule ca nazriꞌile bi bíchequezle.
\q Le gapa ba láꞌana ljwézrele, ne le güe lataj tule xetule.
\q
\v 11 Le gun ziꞌ lázrele, ne quebe gácale zrawe̱de,
\q naꞌ le gun zrin chee̱ Xránadxu dute̱ lázrdaule.
\q
\v 12 Le sua xel-la dxebé lu da dxebeza lázrele.
\q Le gaca dxexruj lazreꞌ gate dxedele xel-la ziꞌ.
\q Le guchálajle̱teze Xránadxu.
\q
\v 13 Le gunezruj da dxelexazrje benneꞌ caꞌ zaj naque̱ꞌ bi chee̱ Dios.
\q Le siꞌ lu naꞌle du lázrele benneꞌ caꞌ záꞌaque̱ꞌ dxelenabe̱ꞌ leꞌe.
\q
\v 14 Le naba da chaweꞌ chee̱ benneꞌ caꞌ zaj nau ziꞌ xuzre̱ꞌ leꞌe.
\q Le naba da xrlátaje chee̱ꞌ, ne quebe nábale da cale̱la chee̱ benneꞌ caꞌ.
\q
\v 15 Le be nen benneꞌ dxelebé,
\q ne le xexache lazreꞌ benneꞌ caꞌ dxelebezre xache̱ꞌ.
\q
\v 16 Le gaca tuze nen ljwézrele tule xetule.
\q Quebe gucáꞌana szren cuínale,
\q san le gaca tuze nen benneꞌ dxexruj lazreꞌ caꞌ.
\q Quebe guéquele ba nápale dute̱ xel-la sina.
\q
\v 17 Quebe xebiꞌile da cale̱la chee̱ benneꞌ nune̱ꞌ chee̱le da cale̱la.
\q Le gun ba xuzre gunle da xrlátaje lau xúgute̱ bénneache.
\p
\v 18 Che naca chee̱le, le gun naga ze̱ lau séquele cueza zri lázrele nen xúgute̱ bénneache.
\v 19 Bi bíchaꞌdauꞌ nazriꞌite̱ lazraꞌ, quebe xebéaj lázrele, san le güe lataj Dios xebéaj lazre̱ꞌ, laweꞌ da naxúaj lu dizraꞌ láꞌazxa da dxenná na: Chiaꞌ nedaꞌ naca xebéaj lazraꞌ. “Nedaꞌ xebiꞌa chee̱ bénneache,” dxenná Xránadxu.
\v 20 Cáꞌanqueze dxenná na: Che dxedún benneꞌ dxecuídene̱ꞌ lueꞌ, bnezruj da gawe̱ꞌ, naꞌ che dxebílene̱ꞌ, bnezruj da xíꞌaje̱ꞌ, laweꞌ da gate dxunle caní, xeduéꞌe bénneaꞌ.
\v 21 Quebe guꞌu lataj da cale̱la nna beꞌe na lueꞌ, san gunná beꞌe da cale̱la ne̱ chee̱ da xrlátaje da dxunuꞌ.
\c 13
\p
\v 1 Xúgute̱dxu dxal-laꞌ guzúadxu dizraꞌ chee̱ benneꞌ xuꞌu laweꞌ, laweꞌ da quebe nu chiláꞌ benneꞌ xuꞌu laweꞌ che quebe nunna Dios le̱ꞌ xel-la dxenná bea chee̱ꞌ. Benneꞌ xuꞌu laweꞌ caꞌ zaj naque̱ꞌ benneꞌ nuzúa Dios.
\v 2 Chee̱ le̱ naꞌ nu benneꞌ dxedábague̱ꞌ benneꞌ xuꞌu laweꞌ dxedábague̱ꞌ ca da nun Dios. Benneꞌ dxeledábague̱ꞌ caní zaj nabague̱ꞌ zria, naꞌ Dios xuzriꞌe̱ chee̱ꞌ da xexal-le̱ꞌ.
\v 3 Benneꞌ caꞌ dxelenná beꞌe̱ quebe nuzúa Dios le̱ꞌ chee̱ xuluchebe̱ꞌ benneꞌ dxelune̱ꞌ da xrlátaje, san chee̱ xuluchebe̱ꞌ benneꞌ dxelune̱ꞌ da cale̱la. ¿Dxaca lazruꞌ quebe zrebuꞌ benneꞌ xuꞌu laweꞌ? Be̱n da xrlátaje, naꞌ benneꞌ xuꞌu laweꞌ caꞌ xelape̱ꞌ ba láꞌana lueꞌ
\v 4 laweꞌ da zaj naque̱ꞌ we̱n zrin chee̱ Dios chee̱ xelune̱ꞌ chiuꞌ da xrlátaje. Che dxunuꞌ da cale̱la, dxal-laꞌ zrebuꞌ laweꞌ da quegá dácheze zaj nape̱ꞌ xel-la dxenná bea xelexebiꞌe̱ chee̱ bénneache laweꞌ da zaj naque̱ꞌ we̱n zrin chee̱ Dios chee̱ xuluzúe̱ꞌ lu da ba xaꞌ benneꞌ caꞌ dxelune̱ꞌ da cale̱la.
\v 5 Chee̱ le̱ naꞌ, dxun na ba xen guzúadxu dizraꞌ chee̱ benneꞌ xuꞌu laweꞌ, quegá tuze chee̱ quebe xuluzúe̱ꞌ dxiꞌu lu da ba xaꞌ, san laweꞌ da nezdxu naca na da nadxixruj bea Dios.
\v 6 Chee̱ le̱ naꞌ dxízrujle da dxebágale chee̱ xuꞌu laweꞌ, laweꞌ da zaj naca benneꞌ xuꞌu laweꞌ we̱n zrin chee̱ Dios, ne dxelún xánnie̱ꞌ zrin chee̱ꞌ naꞌ.
\q
\v 7 Le quizruj xúgute̱ bénneache ca da nabágale chee̱ꞌ.
\q Da nabágale chee̱ benneꞌ wechizruj, le quizruj da nabágale.
\q Da nabágale chee̱ xuꞌu laweꞌ, le quizruj na.
\q Benneꞌ dxal-laꞌ gápale ba láꞌana, le gape̱ꞌ ba láꞌana.
\q Benneꞌ dxal-laꞌ gucáꞌana szrenle, le gucáꞌane̱ꞌ szren.
\p
\v 8 Quebe dxal-laꞌ cue zria chee̱le nen nu benneꞌ san tuze chee̱ zriꞌile le̱ꞌ ca dxal-laꞌ gunle chee̱ le saꞌ ljwézrele tule xetule. Che gunle da nigá, naꞌ gunle da nadxixruj bea na.
\v 9 Naga zaj naxúaj da nadxixruj beꞌe Dios dxenná na:
\q Quebe súale̱nuꞌ zruꞌula benneꞌ xula.
\q Quebe gutiuꞌ benneꞌ.
\q Quebe cuanuꞌ.
\q Quebe gun lazruꞌ chee̱ benneꞌ.
\q Quebe sa lazruꞌ da naca chee̱ benneꞌ.
\m Xúgute̱ da nadxixruj bea caní, ne xúgute̱ da nadxixruj bea xezícadxa dxun bénneaꞌ dxuzúe̱ꞌ dizraꞌ da nadxixruj bea naꞌ dxenná na: Bzriꞌi le saꞌ ljwezruꞌ ca nazríꞌi cuinuꞌ.
\v 10 Bénneaꞌ nazríꞌine̱ꞌ le saꞌ ljwezre̱ꞌ quebe dxune̱ꞌ da cale̱la chee̱ le saꞌ ljwezre̱ꞌ naꞌ. Caꞌan naca, bénneaꞌ nazríꞌine̱ꞌ le saꞌ ljwezre̱ꞌ dxuzúe̱ꞌ dizraꞌ chee̱ da nadxixruj bea na.
\p
\v 11 Ca naca da caní, le guxúe xanneꞌ ca naca zra zúadxu naꞌa laweꞌ da ba bzrin zra xebandxu lu bchigala laweꞌ da ba zua gágudxa zra ladxu lu da nácadxu ca guzúa na gate naꞌ guzú lau dxéajle̱dxu.
\v 12 Ba dxedé chee̱ da chul-la, ne ba za te zra. Chee̱ le̱ naꞌ dxal-laꞌ gusandxu da dxelún bénneache lu da chul-la, naꞌ gácadxu ca tu benneꞌ zeje̱ꞌ wedil-la dxacu zra lane̱ꞌ xia, chee̱ tadxu lu xel-la naxaníꞌ chee̱ Dios.
\q
\v 13 Dxal-laꞌ tadxu li lazreꞌ ca dxal-laꞌ tadxu te zra.
\q Quebe dxal-laꞌ xíꞌajdxu da dxuzuzre na bénneache,
\q ne quebe gagu xrátadxu.
\q Quebe gundxu da sban, ne da cale̱la.
\q Quebe tíl-lale̱dxu le saꞌ ljwézredxu,
\q ne quebe gácadxu xa lazreꞌ.
\p
\v 14 Xránadxu Jesucristo gácaqueze̱ꞌ ca zra lánadxu xia, naꞌ quebe gundxu da dxezá lazreꞌ be̱laꞌ dxen chee̱dxu.
\c 14
\s Quebe si tizruꞌ biche ljwezruꞌ
\p
\v 1 Che tu bi bíchedxu quebe ne se̱ cháchabeꞌ lu xel-la dxeajlí lazreꞌ, le siꞌ lu naꞌle le̱beꞌ, san quegá chee̱ gutíl-lale̱le le̱beꞌ dizraꞌ ca naca da quebe dxun na ba xen.
\v 2 Ca naca na, zaj zraꞌ benneꞌ dxeleajlí lazre̱ꞌ naca chee̱ꞌ xelawe̱ꞌ bal-la bi de̱, san zaj zraꞌ benneꞌ xezícadxa quebe ne xelezé̱ chache̱ꞌ lu xel-la dxeajlí lazreꞌ, naꞌ dxeléquene̱ꞌ waca xelawe̱ꞌ tuze xixreꞌ cuan.
\v 3 Benneꞌ dxawe̱ꞌ xúgute̱ da caꞌ quebe dxal-laꞌ guzúe̱ꞌ chaláꞌala bénneaꞌ nadxúaj nadxeze da dxawe̱ꞌ, naꞌ benneꞌ nadxúaj nadxeze da dxawe̱ꞌ quebe dxal-laꞌ si tizre̱ꞌ bénneaꞌ dxawe̱ꞌ bal-la bi de̱, laweꞌ da nazíꞌ lu naꞌ Dios bénneaꞌ.
\v 4 ¿Nuzra nacuꞌ lueꞌ dxezí tizruꞌ we̱n zrin chee̱ Xránadxu? Che xegáꞌane̱ꞌ xrlátaje, u che quegá, naca na da nabaga Xránadxu. Xegáꞌane̱ꞌ xrlátaje laweꞌ da napa Xránadxu xel-la waca chee̱ gucáꞌane̱ꞌ le̱ꞌ xrlátaje.
\p
\v 5 Caní naca xetú. Zaj zraꞌ benneꞌ dxulupáꞌanadxe̱ꞌ tu zra ca xetú zra, naꞌ zaj zraꞌ benneꞌ dxeléquene̱ꞌ tuz ca zaj naca xúgute̱ zra. Tu tudxu dxal-laꞌ se̱ cháchadxu lu xichaj lázrdaudxu ca naca da caní.
\v 6 Benneꞌ dxupáꞌane̱ꞌ tu zra dxune̱ꞌ na chee̱ gape̱ꞌ ba láꞌana Xránadxu, naꞌ bénneaꞌ quebe dxupáꞌane̱ꞌ zra naꞌ dxune̱ꞌ caꞌ chee̱ gape̱ꞌ ba láꞌana Xránadxu. Benneꞌ dxawe̱ꞌ bal-la bi de̱ dxune̱ꞌ na chee̱ gape̱ꞌ ba láꞌana Xránadxu laweꞌ da dxe̱ꞌe̱ Dios: Xcalenuꞌ, naꞌ bénneaꞌ nadxúaj nadxeze da dxawe̱ꞌ dxune̱ꞌ na chee̱ gape̱ꞌ ba láꞌana Xránadxu, naꞌ cáꞌanqueze dxe̱ꞌe̱ Dios: Xcalenuꞌ.
\p
\v 7 Netudxu dxiꞌu naca bandxu chee̱ gundxu da naca cheé̱zedxu, ne quegá gátedxu lu da naca cheé̱zedxu.
\v 8 Che naca bandxu, naca na chee̱ gaca ba Xránadxu. Caꞌ naca na, che gaca bandxu, u che gátedxu nácadxu bi chee̱ Xránadxu.
\v 9 Cristo gutie̱ꞌ, ne bebane̱ꞌ chee̱ gaque̱ꞌ Xrana benneꞌ gate caꞌ, ne Xrana benneꞌ ban caꞌ.
\p
\v 10 Naꞌa lueꞌ, ¿bizr chee̱ naꞌ quebe dxeléꞌenuꞌ chaweꞌ ca da dxun le saꞌ ljwezruꞌ, bi bíchedxu? ¿Bizr chee̱ naꞌ dxuzúꞌ le̱ꞌ chaláꞌala? Xúgute̱dxu dxal-laꞌ zrindxu lau Cristo chee̱ guchiꞌe̱ ca da nundxu tu tudxu.
\v 11 Naxúaj lu xiche láꞌazxa da dxenná na:
\q Dxenná Xránadxu: “Dxuzetaj cuinaꞌ dxenníaꞌ:
\q Xúgute̱ bénneache xuluzú zribe̱ꞌ lawaꞌ.
\q Xúgute̱ꞌ xelexeche̱be̱ꞌ laweꞌ lau nacaꞌ Dios.”
\m
\v 12 Caꞌan naca, tu tudxu dxiꞌu dxun na ba xen guléꞌedxu ca da nundxu lau Dios.
\p
\v 13 Chee̱ le̱ naꞌ québedxa dxal-laꞌ si tízradxu tudxu xetudxu. Le gun ba xuzre quebe bi gunle da gun na ga chegu bi bíchele, u da gun na cheajcházie̱ꞌ lu dul-la.
\v 14 Dxuxrén lazraꞌ Xránadxu Jesús, ne nezdaꞌ quebe bi da dxágudxu nácaqueze sban, san che tu bi bíchedxu dxéquebeꞌ de̱ tu da dxágudxu da naca na sban, chee̱ le̱beꞌ naca na da sban.
\v 15 Che ne̱ chee̱ da dxaguꞌ lueꞌ, dxunuꞌ dxeajchaze bi bichuꞌ, quebe dxunuꞌ da naca chee̱ xel-la zriꞌi lazreꞌ. Quebe gunuꞌ cuía xiꞌ tu benneꞌ, bénneaꞌ gute Cristo waláz chee̱ꞌ, laweꞌ da dxaca lazruꞌ lueꞌ gaguꞌ bi xel-la wagu.
\v 16 Quebe bi gunle da güe lataj nu nne̱ schanníꞌ chee̱ da dxéquele naca na da xrlátaje.
\v 17 Chee̱ súadxu naga dxenná beꞌe Dios dxiꞌu quebe naca na chee̱ da dxágudxu, u chee̱ da dxíꞌajdxu, san naca na chee̱ xegáꞌanadxu xrlátaje lau Dios, ne chee̱ gápadxu xel-la dxebeza zri lazreꞌ, ne chee̱ súadxu xel-la dxebé, da caꞌ nápadxu ne̱ chee̱ Beꞌ Láꞌazxa.
\v 18 Nu benneꞌ dxune̱ꞌ zrin chee̱ Cristo caní dxune̱ꞌ da dxezaca ba lazreꞌ Dios, naꞌ dxelapa bénneache le̱ꞌ ba láꞌana.
\p
\v 19 Caꞌ naca na, dxal-laꞌ gundxu da dxulusá na xel-la dxebeza zri lazreꞌ, ne da dxuluzúa chacha na dxiꞌu.
\v 20 Quebe guzría xiꞌu da nun Dios lu xichaj lázrdau le saꞌ ljwezruꞌ ne̱ chee̱ da dxaguꞌ. Da li xúgute̱ da dxágudxu zaj naca na xrlátaje, san quebe naca xrlátaje bi gágudxu da gun na cheajchaze benneꞌ xula lu dul-la.
\v 21 Xrlátaje naca quebe gágudxu be̱laꞌ, ne quebe xíꞌajdxu xrise uva wal-la, ne quebe bi gundxu da gun na cheajchaze bi bíchedxu lu dul-la, u da guzría xi na xel-la dxeajlí lazreꞌ chee̱ꞌ.
\v 22 Che napuꞌ xel-la dxeajlí lazreꞌ bi gaca gunuꞌ, dxal-laꞌ gunuꞌ na luéꞌqueze lau Dios. Ba neza naca na chee̱ benneꞌ quebe guzría xiꞌ cuine̱ꞌ ne̱ chee̱ da dxéquene̱ꞌ naca na da xrlátaje gune̱ꞌ.
\v 23 Bénneaꞌ dxawe̱ꞌ da dxéquene̱ꞌ quebe dxal-laꞌ gawe̱ꞌ, nabague̱ꞌ zria gate dxawe̱ꞌ na laweꞌ da dxawe̱ꞌ da quebe dxeajlí lazre̱ꞌ naca chee̱ꞌ gaweꞌ. Xúgute̱ da dxundxu zaj naca dul-la che quebe dxuxrén lázredxu zaj naca na xrlátaje.
\c 15
\s Be̱n da dxezaca ba lazreꞌ bi bichuꞌ, ne quegá da dxezaca ba lázrezuꞌ lueꞌ
\p
\v 1 Dxiꞌu ba ze̱ cháchadxu lu xel-la dxeajlí lazreꞌ dxal-laꞌ gácale̱dxu benneꞌ quebe ne se̱ chache̱ꞌ lu xel-la dxeajlí lazreꞌ, ne quebe gundxu da dxezaca ba lázredxu dxíꞌuze.
\v 2 Tu tudxu dxal-laꞌ gundxu da dxezaca ba lazreꞌ bi bíchedxu lu da gun na chaweꞌ chee̱beꞌ, ne lu da gusegula na le̱beꞌ lu xel-la dxeajlí lazreꞌ chee̱beꞌ.
\v 3 Crístoqueze quebe be̱ne̱ꞌ da dxezaca ba lazreꞌ le̱ze̱ꞌ, san guca chee̱ꞌ ca naxúaj na lu dizraꞌ láꞌazxa, dxenná na: Benneꞌ caꞌ gulenné̱ꞌ schanniꞌ chiuꞌ Lueꞌ, Dios, guca na ca gulenné̱ꞌ schanniꞌ chiaꞌ nedaꞌ.
\v 4 Xúgute̱ da naxúaj nédxudaute̱ lu dizraꞌ láꞌazxa zaj naxúaj na chee̱ guzéajniꞌi na dxiꞌu, chee̱ gápadxu xel-la dxebeza lazreꞌ ne̱ chee̱ xel-la zren lazreꞌ, ne xel-la dxexúe zren, da caꞌ nápadxu ne̱ chee̱ da caꞌ zaj naxúaj na.
\v 5 Dxenabaꞌ lau Dios, Bénneaꞌ dxunne̱ꞌ dxiꞌu xel-la zren lazreꞌ, ne dxexúe zrene̱ꞌ dxiꞌu, chee̱ gácale̱ne̱ꞌ leꞌe chee̱ gácale tuze tule xetule ne̱ chee̱ Jesucristo,
\v 6 chee̱ gunle xúgute̱le tu zren güe láꞌanale Dios, Xra Xránadxu Jesucristo.
\s Dxelén benneꞌ quebe zaj naque̱ꞌ judío dizraꞌ chaweꞌ
\p
\v 7 Caꞌan naca, chee̱ gaca ba Dios, le siꞌ lu naꞌle ljwézrele tule xetule ca be̱n Cristo, guzíꞌ lu ne̱ꞌe̱ dxiꞌu.
\v 8 Ca da dxennéaꞌ nedaꞌ, dxennéaꞌ blaꞌ Cristo, ne be̱ne̱ꞌ zrin chee̱ benneꞌ judío caꞌ, chee̱ be̱ne̱ꞌ ca da guche̱be lazreꞌ Dios lau xra xrtáudxu caꞌ, ne caní bléꞌene̱ꞌ naca Dios li lazreꞌ.
\v 9 Cáꞌanqueze ble̱ꞌe̱ chee̱ xelúe láꞌana Dios benneꞌ caꞌ quebe zaj naque̱ꞌ judío laweꞌ da dxexache lazre̱ꞌ bénneache, ca da naxúaj na caní chee̱ Cristo lu dizraꞌ láꞌazxa, dxenné̱ꞌ:
\q Güe láꞌanaꞌ lueꞌ, Dios, lau benneꞌ xe̱zr la xu caꞌ,
\q ne tu gul-lazquezaꞌ da xelapa ba láꞌana Lueꞌ.
\m
\v 10 Cáꞌanqueze dxenná na:
\q Le be, leꞌe, bénneache dute̱ xe̱zr la xu
\q nen benneꞌ zaj naque̱ꞌ bi chee̱ Dios.
\m
\v 11 Cáꞌanqueze dxenná na:
\q Le güe láꞌana Xránadxu,
\q leꞌe, bénneache chee̱ xúgute̱ xe̱zr la xu,
\q ne le guchalaj chee̱ xel-la szren chee̱ꞌ,
\q leꞌe, xúgute̱ bénneache.
\m
\v 12 Cáꞌanqueze bchalaj Isaías ca naca chee̱ Cristo, gunné̱ꞌ:
\q Weláꞌqueze tu zriꞌine zre sua Isaí,
\q Bénneaꞌ nna béꞌene̱ꞌ xúgute̱ cueꞌ xe̱zr la xu,
\q naꞌ benneꞌ caꞌ xelebeza lazre̱ꞌ Le̱ꞌ.
\p
\v 13 Dxenabaꞌ Dios, Bénneaꞌ dxunne̱ꞌ dxiꞌu xel-la dxebeza lazreꞌ, chee̱ gúnnale̱ꞌe̱ leꞌe xel-la dxebé, ne xel-la dxebeza zri lazreꞌ laweꞌ da dxeajlí lázrele Le̱ꞌ, chee̱ gápale̱ꞌe̱quezle xel-la dxebeza lazreꞌ ne̱ chee̱ xel-la waca chee̱ Beꞌ Láꞌazxa.
\p
\v 14 Leꞌe, bi bíchaꞌdauꞌ, dxuxrén lazraꞌ nápale̱ꞌe̱le da chaweꞌ, ne núnbeale xúgute̱ chee̱ gaca guzéajniꞌile ljwézrele tule xetule.
\v 15 Lu xiche nigá bechugu lazraꞌ guzúajaꞌ chee̱ da caní chee̱ quebe gal-la lázrele na. Dxunaꞌ na ne̱ chee̱ da bsebaga Dios nedaꞌ lu da chaweꞌ chee̱ꞌ.
\v 16 Caní gunaꞌ zrin chee̱ Jesucristo ládujla benneꞌ quebe zaj naque̱ꞌ judío. Zrin dxunaꞌ naca na chee̱ guzendaꞌ bénneache dizraꞌ chaweꞌ chee̱ Dios chee̱ guzráꞌa benneꞌ quebe zaj naque̱ꞌ judío lau Dios ca tu gunaꞌ da dxezaca ba lazreꞌ Le̱ꞌ. Xelaque̱ꞌ benneꞌ láꞌazxa ne̱ chee̱ Beꞌ Láꞌazxa.
\p
\v 17 Lu da nacaꞌ chee̱ Jesucristo waca xezaca ba lazraꞌ lu zrin dxunaꞌ chee̱ Dios
\v 18 laweꞌ da quebe dxedxugu lazraꞌ guchálajaꞌ, san tuze ca naca da nun Cristo ne̱ chiaꞌ nedaꞌ, chee̱ gunaꞌ xuluzúa benneꞌ quebe zaj naque̱ꞌ judío xrtizra Dios. Da nigá be̱naꞌ ne̱ chee̱ da bchálajaꞌ, ne da be̱naꞌ,
\v 19 ne ne̱ chee̱ xel-la waca chee̱ da bleꞌe Dios, nen xel-la waca chee̱ xabáa, ne ne̱ chee̱ xel-la waca chee̱ Beꞌ Láꞌazxa. Caní bchálajaꞌ dizraꞌ chaweꞌ chee̱ Cristo du ca naca xe̱zr la xu. Guzú lawaꞌ dxunaꞌ na xe̱zre Jerusalén, bzrinteaꞌ naga nababa Ilírico.
\v 20 Caní naca, be̱naꞌ ba xuzre bchálajaꞌ dizraꞌ chaweꞌ naga quebe ne xelenne̱ꞌ La Cristo, chee̱ quebe gunaꞌ zrin naga ba zaj nun zrin xezícadxa benneꞌ,
\v 21 naꞌ, ca dxenná dizraꞌ láꞌazxa:
\q Xeleléꞌe benneꞌ caꞌ quebe ne zrin nu benneꞌ guzenne̱ꞌ le̱ꞌ chee̱ Cristo,
\q naꞌ benneꞌ caꞌ quebe ne xelén chee̱ Le̱ꞌ xeléajniꞌine̱ da naca chee̱ꞌ.
\s Pablo dxugúꞌu beꞌe̱ chéaje̱ꞌ xe̱zre Roma
\p
\v 22 Chee̱ guzendaꞌ leꞌe da caní, da zan lasa guca lazraꞌ xedajnnáꞌa leꞌe zrale xe̱zre Roma, san quebe guca chiaꞌ.
\v 23 Naꞌa, ba bexuzre be̱naꞌ zrin nigá, ne laweꞌ da zánete̱ iza ba guca lazraꞌ xidaꞌ súale̱naꞌ leꞌe,
\v 24 dxebeza lazraꞌ teaꞌ xedajnnáꞌa leꞌe gate chaꞌa lu xe̱zr la xu España. Gate te suaꞌ xel-la dxebé nen leꞌe dxebeza lazraꞌ xusiꞌile nedaꞌ neza, naꞌ chaꞌa náꞌala.
\v 25 Naꞌa chaꞌa Jerusalén, guꞌa lateꞌ da gácale̱ na bi bíchedxu zaj zre̱ꞌe̱ naꞌ,
\v 26 laweꞌ da bi bíchedxu zaj zre̱ꞌe̱ xe̱zre caꞌ zaj nababa Macedonia, ne xe̱zre caꞌ zaj nababa Acaya guléquene̱ꞌ naca xrlátaje bulutube̱ꞌ dumí da xelesel-le̱ꞌ chee̱ bi bíchedxu zaj naque̱ꞌ baxacheꞌ, zaj zrabeꞌ Jerusalén.
\v 27 Guléquene̱ꞌ naca xrlátaje xelune̱ꞌ da nigá, naꞌ caní naca na laweꞌ da dxelebague̱ꞌ chee̱ benneꞌ caꞌ, laweꞌ da benneꞌ judío caꞌ, benneꞌ dxeléajle̱ꞌe̱ chee̱ Cristo, bulunézruje̱ꞌ chee̱ benneꞌ quebe zaj naque̱ꞌ judío chee̱ da zaj nape̱ꞌ chee̱ Dios, naꞌ benneꞌ caní dxal-laꞌ xulunézruje̱ꞌ chee̱ benneꞌ judío caꞌ chee̱ da zaj nape̱ꞌ chee̱ xe̱zr la xu nigá.
\v 28 Caní naca, gate xexuzre gunaꞌ da nigá, ne ba bnézrujaꞌ le̱ꞌ dumí nigá, naꞌ chaꞌa lu xe̱zr la xu España, naꞌ ca tezaꞌ xedajnnáꞌa leꞌe.
\v 29 Dxuxrén lazraꞌ gate xidaꞌ naga zrale leꞌe, gúale̱ꞌa da chaweꞌ chee̱ dizraꞌ chaweꞌ chee̱ Cristo.
\p
\v 30 Leꞌe, bi bíchaꞌdauꞌ, dxataꞌ xúedaꞌ leꞌe ne̱ chee̱ Xránadxu Jesucristo, ne ne̱ chee̱ xel-la zriꞌi lazreꞌ da dxunna Beꞌ Láꞌazxa dxiꞌu, chee̱ gácale tuze nen nedaꞌ guchálajle̱dxu Dios chee̱ gácale̱ne̱ꞌ nedaꞌ.
\v 31 Le naba Dios chee̱ guselé̱ꞌ nedaꞌ lu naꞌ benneꞌ quebe dxeléajle̱ꞌe̱ chee̱ Cristo naga nababa Judea, ne chee̱ xelezíꞌ du lazreꞌ bi bíchedxu zaj zre̱ꞌe̱ Jerusalén dumí nigá da nuꞌa,
\v 32 naꞌ che naca da dxaca lazreꞌ Dios, laꞌa lu dute̱ xel-la dxebé xedajnnáꞌa leꞌe, ne chee̱ xezíꞌ lazraꞌ naga zrale leꞌe.
\v 33 Dxenabaꞌ Dios, Bénneaꞌ dxunne̱ꞌ dxiꞌu xel-la dxebeza zri lazreꞌ, súale̱ne̱ꞌ xúgute̱le leꞌe. ¡Caꞌan gaca na!
\c 16
\s Pablo dxugape̱ꞌ diuzre bi bíchedxu caꞌ
\p
\v 1 Dxeguꞌa lu naꞌle nuꞌula zandxu Febe, nuꞌula naꞌ ba be̱ne̱ꞌ zrin chee̱ Cristo ládujla bi bíchedxu zaj zre̱ꞌe̱ xe̱zre Cencrea.
\v 2 Le siꞌ lu naꞌle le̱ꞌ cháwedauꞌ lu La Xránadxu, ca dxal-laꞌ gaca ládujla bi bíchedxu dxeléajle̱ꞌe̱ chee̱ Cristo, naꞌ le gácale̱ne̱ꞌ bítete̱ze da dxexázrjene̱ꞌ, laweꞌ da ba gúcale̱ le̱ꞌ benneꞌ zan, ne nédaꞌquezaꞌ.
\p
\v 3 Le gugapa diuzre Priscila ne Aquilo, benneꞌ belún zrin chee̱ Jesucristo tu zren nen nedaꞌ.
\v 4 Benneꞌ caní buluzúe̱ꞌ xel-la nabán chee̱ꞌ lu da ste̱be chee̱ gúcale̱ne̱ꞌ nedaꞌ. Caꞌ naca na, dxapaꞌ benneꞌ caꞌ xcalenle, ne quegaze nedaꞌ, san cáꞌanqueze dxelún xúgute̱ bi bíchedxu quebe zaj naque̱ꞌ judío.
\v 5 Le gugapa diuzre bi bíchedxu caꞌ dxelezrágabeꞌ lizre Priscila, ne Aquilo. Le gugapa diuzre Epeneto, benneꞌ ljwezraꞌ nazriꞌite̱ lazraꞌ. Le̱ꞌ guque̱ꞌ benneꞌ nedxu naga nababa Acaya guxéajle̱ꞌe̱ chee̱ Cristo.
\v 6 Le gugapa diuzre María, nuꞌula naꞌ ba be̱nle̱ꞌe̱ zrin ládujla leꞌe.
\v 7 Le gugapa diuzre benneꞌ walázr chiaꞌ, Andrónico, ne Junias, benneꞌ caꞌ gulaque̱ꞌ ljwezraꞌ lizre xia. Zaj naque̱ꞌ benneꞌ blau ládujla benneꞌ gubáz caꞌ chee̱ Cristo, naꞌ guléajle̱ꞌe̱ chee̱ Cristo nédxudxa ca nedaꞌ.
\p
\v 8 Le gugapa diuzre Amplias, benneꞌ ljwezraꞌ nazriꞌite̱ lazraꞌ lu La Xránadxu.
\v 9 Le gugapa diuzre Urbano, benneꞌ ljwezraꞌ lu zrin chee̱ Jesucristo, ne le gugapa diuzre Estaquis, benneꞌ nazriꞌite̱ lazraꞌ.
\v 10 Le gugapa diuzre Apeles, benneꞌ bléꞌene̱ꞌ da zan lasa ca dxeajlí lazre̱ꞌ Cristo. Cáꞌanqueze le gugapa diuzre Aristóbulo, benneꞌ xrtiaꞌ.
\v 11 Le gugapa diuzre Herodión, benneꞌ walázr chiaꞌ, ne Narciso, benneꞌ xrtiaꞌ, benneꞌ dxeléajle̱ꞌe̱ chee̱ Xránadxu.
\v 12 Le gugapa diuzre Trifena ne Trifosa, nuꞌula caꞌ dxelune̱ꞌ zrin chee̱ Xránadxu, ne le gugapa diuzre Pérsida, bi zandxu nazriꞌite̱ lazrdxu, nuꞌula naꞌ ba be̱nle̱ꞌe̱ zrin chee̱ Xránadxu.
\v 13 Le gugapa diuzre Rufo, benneꞌ blau dxéajle̱ꞌe̱ chee̱ Xránadxu, ne xrne̱ꞌe̱, nuꞌula naꞌ naque̱ꞌ ca xrnáquezaꞌ.
\v 14 Le gugapa diuzre Asíncrito, ne Flegonte, ne Hermas, ne Patrobas, ne Hermes, ne bi bíchedxu caꞌ zrále̱ne̱ꞌ le̱ꞌ.
\v 15 Cáꞌanqueze le gugapa diuzre Filólogo, ne Julia, ne Nereo, ne nuꞌula zane̱ꞌ, ne Olimpas, ne xúgute̱ bi bíchedxu dxeleajlí lazre̱ꞌ Cristo, benneꞌ zrále̱ne̱ꞌ benneꞌ caní.
\p
\v 16 Le gugapa diuzre ljwézrele tule xetule, gunídate̱ ljwézrele. Xúgute̱ cueꞌ bi bíchedxu dxulugape̱ꞌ leꞌe diuzre.
\p
\v 17 Leꞌe, bi bíchaꞌdauꞌ, dxataꞌ xúedaꞌ leꞌe, nnaꞌ xánnele benneꞌ caꞌ dxelune̱ꞌ chupa laꞌa bi bíchedxu caꞌ, ne dxelune̱ꞌ dxeajlecházie̱ꞌ benneꞌ caꞌ, naꞌ dxulusé̱dene̱ꞌ da dxedábaga na ca da nusé̱dele. Le cuasa naga zaj zraꞌ benneꞌ caꞌ
\v 18 laweꞌ da quebe dxelún benneꞌ caꞌ zrin chee̱ Xránadxu Jesucristo. Dxelune̱ꞌ ca da dxezaca ba lazreꞌ be̱laꞌ dxen chee̱queze̱ꞌ, ne dxelezí xe̱ꞌe̱ benneáchedu caꞌ quebe ne xeleneze xánnie̱ꞌ ca naca dizraꞌ chaweꞌ. Benneꞌ wen lazreꞌ caꞌ cadite zaj nupé̱ꞌe̱, ne zaj nézene̱ꞌ da dxuluchálaje̱ꞌ.
\v 19 Xúgute̱ bénneache zaj nézene̱ꞌ ca ba bzúale xtizraꞌ Dios. Chee̱ le̱ naꞌ dxebedaꞌ, ne dxaca lazraꞌ gácale ban lazreꞌ gunle da xrlátaje, naꞌ quegá gunle da cale̱la.
\v 20 Dios, Bénneaꞌ dxunne̱ꞌ dxiꞌu xel-la dxebeza zri lazreꞌ ba zúaqueze̱ꞌ gácale̱ne̱ꞌ leꞌe, chee̱ guchúchujle Satanás da xriwe̱ꞌ. Dxenabaꞌ lau Xránadxu Jesucristo gune̱ꞌ gaca chaweꞌ chee̱le.
\p
\v 21 Bi bíchedxu Timoteo dxugápabeꞌ leꞌe diuzre. Nácabeꞌ ljwezraꞌ lu zrin chee̱ Cristo. Cáꞌanqueze dxulugape̱ꞌ leꞌe diuzre benneꞌ walázr chiaꞌ Lucio, ne Jasón, ne Sosípater.
\p
\v 22 Nedaꞌ, Tercio, dxuzúajaꞌ xtizraꞌ Pablo caní, dxugapaꞌ leꞌe diuzre lu La Xránadxu.
\p
\v 23 Gayo dxugape̱ꞌ leꞌe diuzre, bénneaꞌ zuaꞌ lizre̱ꞌ, naꞌ dxunne̱ꞌ lizre̱ꞌ naga dxelezraga xúgute̱ benneꞌ bíchedxu caní. Cáꞌanqueze dxulugape̱ꞌ leꞌe diuzre Erasto, benneꞌ xuꞌu lu ne̱ꞌe̱ dumí chee̱ xe̱zre, ne bi bíchedxu Cuarto.
\p
\v 24 Dxenabaꞌ Xránadxu Jesucristo gune̱ꞌ gaca chaweꞌ chee̱ xúgute̱le leꞌe. ¡Caꞌan gaca na!
\s Pablo dxue láꞌane̱ꞌ Dios
\p
\v 25 Naꞌa, dxue láꞌanantuꞌ Dios, Bénneaꞌ séquene̱ꞌ guzé̱ cháchadxe̱ꞌ leꞌe lu dizraꞌ chaweꞌ da dxuzendaꞌ bénneache, ne lu da dxusé̱dedaꞌ ca naca chee̱ Jesucristo. Da nigá naca na tuze nen da bleꞌe Dios chee̱ da nagache da gulúꞌu chawe̱ꞌ bagácheze nédxudaute̱,
\v 26 san naꞌa ba bleꞌe laweꞌ na ne̱ chee̱ dizraꞌ láꞌazxa da buluzúaj benneꞌ caꞌ buluchálaje̱ꞌ waláz chee̱ Dios, ca da bdxixruj beꞌe Dios chadía chacanna. Ba bleꞌe lau dizraꞌ chaweꞌ nigá naꞌa lau benneꞌ xúgute̱ xe̱zr la xu chee̱ xeléajle̱ꞌe̱ chee̱ na, ne xuluzúe̱ꞌ dizraꞌ chee̱ na.
\p
\v 27 Dios, Benneꞌ tu lichaꞌ, ne Benneꞌ sina, gaca ba Le̱ꞌ chadía chacanna ne̱ chee̱ Jesucristo. ¡Caꞌan gaca na!