\id 2CO
\h 2 Corintos
\mt DIZRAꞌ GUDXUPEꞌ DA BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ CORINTO
\c 1
\s Pablo dxuzúaje̱ꞌ chee̱ bi bíchedxu zaj zre̱ꞌe̱ xe̱zre Corinto
\p
\v 1 Nedaꞌ, Pablo, nacaꞌ gubáz chee̱ Jesucristo laweꞌ da naca na da dxaca lazreꞌ Dios. Tu zren nen bíchedxu Timoteo dxuzúajaꞌ da nigá chee̱le leꞌe, bi bíchaꞌdauꞌ, zrágale chee̱ Dios lu xe̱zre Corinto. Cáꞌanqueze dxuzúajaꞌ da nigá chee̱ xúgute̱ bi chee̱ Dios zaj zre̱ꞌe̱ xe̱zre caꞌ zaj nababa xe̱zr la xu Acaya.
\v 2 Dxenabaꞌ Xradxu Dios, ne Xránadxu Jesucristo gun chawe̱ꞌe̱ leꞌe, ne gunne̱ꞌ leꞌe xel-la dxebeza zri lazreꞌ.
\s Da caꞌ guzí guzacaꞌ Pablo
\p
\v 3 Dxue láꞌanantuꞌ Dios, Xra Xránadxu Jesucristo, laweꞌ da naque̱ꞌ Xradxu dxexache lazre̱ꞌ dxiꞌu, ne Dios dxexúe zrene̱ꞌ dxiꞌu.
\v 4 Dios dxexúe zrénqueze̱ꞌ dxiꞌu ca naca xúgute̱ xel-la ziꞌ da dxededxu, chee̱ cáꞌanqueze dxiꞌu gaca xexúe zrendxu benneꞌ caꞌ dxeledée̱ꞌ xel-la ziꞌ, naꞌ xue zrendxu le̱ꞌ cáte̱ze da ba nun Dios chee̱dxu dxiꞌu.
\v 5 Laweꞌ da dxededxu xel-la ziꞌ zren ca da gudé Cristo, cáꞌanqueze ne̱ chee̱ Cristo zua Nu dxexúe zrénqueze dxiꞌu, Lé̱queze Dios.
\v 6 Chee̱ le̱ naꞌ, che dxedentuꞌ netuꞌ xel-la ziꞌ, naca na chee̱ sua Nu xexúe zren leꞌe, ne chee̱ lale, naꞌ caní gaca guchaga laule lu dute̱ xel-la zren lazreꞌ chee̱le xel-la ziꞌ caꞌ da dxededxu dxiꞌu.
\v 7 Dxuxrén lázrele̱ꞌe̱ntuꞌ leꞌe, laweꞌ da nézentuꞌ ca dxedele xel-la ziꞌ tu zren nen netuꞌ, cáꞌanqueze sua Nu xexúe zren leꞌe tu zren nen netuꞌ, Lé̱queze Dios.
\p
\v 8 Bi bichaꞌ, dxaca lázrentuꞌ nézele ca naca xel-la ziꞌ zren da gudentuꞌ naga nababa Asia. Guca na tu xel-la ziꞌ zrendxa ca da gaca guchaga launtuꞌ, naꞌ québedxa guleza lázrentuꞌ lantuꞌ.
\v 9 Gúquentuꞌ ba zua gagu xelute benneꞌ caꞌ netuꞌ. Guca chee̱ntuꞌ da nigá chee̱ bzéajniꞌi na netuꞌ guxrén lázrentuꞌ Dios, ne quegá guxrén lazreꞌ cuínantuꞌ.
\v 10 Dios bselé̱ꞌ netuꞌ, naꞌ ne dxuselé̱ꞌ netuꞌ lu da ste̱be zren nigá chee̱ xel-la gute, naꞌ dxebeza lázrentuꞌ Le̱ꞌ guseláqueze̱ꞌ netuꞌ
\v 11 che leꞌe gácale̱le netuꞌ, nábadxu Dios gácale̱ne̱ꞌ netuꞌ. Che benneꞌ zan xelenabe̱ꞌ Dios gácale̱ne̱ꞌ netuꞌ, naꞌ benneꞌ zan xelé̱ꞌe̱ Dios: Xcalenuꞌ, chee̱ da chaweꞌ caꞌ da gun Dios chee̱ntuꞌ.
\s Bizr chee̱ naꞌ Pablo guzrene̱ꞌ chéaje̱ꞌ Corinto
\p
\v 12 Naca tu da ba neza da nápantuꞌ da zua na laweꞌ da dxe̱ xichaj lázrdauntuꞌ netuꞌ ba gudantuꞌ lu da láꞌazxa, ne du lázrentuꞌ, lu xe̱zr la xu nigá, ne ládujla leꞌe. Dios lu xel-la zriꞌi lazreꞌ chee̱ꞌ gúcale̱ne̱ꞌ netuꞌ chee̱ be̱ntuꞌ caní, ne quebe be̱ntuꞌ na lu xel-la sina cheé̱zquezentuꞌ.
\v 13 Lu da dxuzúajntuꞌ chee̱le quebe bi de̱ da quebe gaca gulábale, ne chéajniꞌile, naꞌ dxaca lazraꞌ chéajniꞌi xánnele
\v 14 ca ba guxéajniꞌile lateꞌ, chee̱ lu zra xeláꞌ Xránadxu Jesús, gácantuꞌ netuꞌ tu da ba neza chee̱le leꞌe, ca leꞌe gácale tu da ba neza chee̱ntuꞌ.
\p
\v 15 Laweꞌ da dxuxrén lazraꞌ gaca caní, bechugu lazraꞌ xidaꞌ nédxula xedajnnáꞌa leꞌe chee̱ gaca tu da ba neza chee̱le, naꞌ xedajnnáꞌa leꞌe chupa lasa,
\v 16 laweꞌ da bechugu lazraꞌ xedajnnáꞌa leꞌe gate teaꞌ chaꞌa xe̱zre caꞌ zaj nababa Macedonia, naꞌ te naꞌ, gate zezáꞌa lu xe̱zre caꞌ zaj nababa Macedonia, xedajnnáꞌa leꞌe xetú. Caꞌ gaca na, leꞌe gaca gácale̱le nedaꞌ chaꞌa xe̱zre caꞌ zaj nababa Judea.
\v 17 ¿Quebe nacaꞌ du lazraꞌ gate dxechugu lazraꞌ caní? ¿Dxéquele leꞌe nacaꞌ ca tu benneꞌ chee̱ xe̱zr la xu nigá, naꞌ dxenníaꞌ: Aweꞌ, cabí, gate dxechugu lazraꞌ da gunaꞌ?
\v 18 Dios nézquezne̱ꞌ nedaꞌ, ne Silvano, ne Timoteo, quebe dxe̱ntuꞌ leꞌe: Aweꞌ, cabí.
\v 19 Naca na caní laweꞌ da Jesucristo, Zriꞌine Dios, Bénneaꞌ bzénentuꞌ leꞌe ca naca chee̱ꞌ, cabataꞌ gunné̱ꞌ: Aweꞌ, cabí. Nen Cristo nácaqueze da li xrtizra Dios,
\v 20 laweꞌ da ne̱ chee̱ Le̱ꞌ dxelaca li xúgute̱ da guche̱be lazreꞌ Dios. Chee̱ le̱ naꞌ, gate dxue láꞌanantuꞌ Dios, dxennantuꞌ: ¡Caꞌan naca na! ne̱ chee̱ Jesucristo.
\v 21 Dios naque̱ꞌ Bénneaꞌ ba nuzé̱ chúchue̱ꞌ netuꞌ, ne leꞌe lu da naca chee̱ Cristo, ne ba guqué̱ꞌe̱ dxiꞌu,
\v 22 ne ba nuzúe̱ꞌ chee̱dxu tu da dxuléꞌe na nácadxu bi chee̱ Le̱ꞌ, laweꞌ da ba nuzúe̱ꞌ Beꞌ Láꞌazxa lu xichaj lázrdaudxu, da dxunna bea na sidxu da naca chee̱ꞌ.
\p
\v 23 Che quebe ne xidaꞌ Corinto ca bechugu lazraꞌ, neze Dios naca na chee̱ gacaꞌ zren lazreꞌ nen leꞌe, ne che quebe naca caní, dxenabaꞌ Dios xequé̱ꞌe̱ xel-la nabán chiaꞌ.
\v 24 Quebe naca na laweꞌ da dxaca lázrentuꞌ nna béꞌentuꞌ leꞌe da dxal-laꞌ chéajle̱le, laweꞌ da ba ze̱ cháchale lu da dxéajle̱le. Dxaca lázrentuꞌ bédxale lu da naca chee̱ Cristo.
\c 2
\p
\v 1 Chee̱ le̱ naꞌ bechugu lazraꞌ quebe xidaꞌ xedajnnáꞌa leꞌe lu da baxacheꞌ.
\v 2 Che nedaꞌ guzúaꞌ leꞌe lu da baxacheꞌ, ¿núzraqueze guzúa nedaꞌ lu xel-la dxebé? Tuze leꞌe, benneꞌ caꞌ ba bzuaꞌ lu da baxacheꞌ.
\v 3 Chee̱ le̱ naꞌ bzuajaꞌ chee̱le ca da be̱naꞌ laweꞌ da quebe guca lazraꞌ xidaꞌ chee̱ guzúale nedaꞌ lu da baxacheꞌ, leꞌe naꞌ dxal-laꞌ guzúale nedaꞌ lu xel-la dxebé. Bxren lazraꞌ che nedaꞌ zuaꞌ lu xel-la dxebé, cáꞌanqueze leꞌe súale lu xel-la dxebé.
\v 4 Gate bzuajaꞌ chee̱le da naꞌ guzé̱le̱ꞌe̱daꞌ gunne xue, ne guzúaꞌ lu da ziꞌ da xaꞌ, ne cáꞌanqueze gudxézrele̱ꞌe̱quezaꞌ, san quebe bzuajaꞌ da naꞌ chee̱ guzúaꞌ leꞌe lu da baxacheꞌ, san chee̱ nézele nazríꞌile̱ꞌe̱daꞌ leꞌe.
\s Ca dxal-laꞌ xulunite lawe̱ꞌ chee̱ bénneaꞌ be̱ne̱ꞌ da cale̱la
\p
\v 5 Che nu benneꞌ ba bzue̱ꞌ nedaꞌ lu da baxacheꞌ, quegá chiaꞌ nédaꞌze be̱ne̱ꞌ na, san cáꞌanqueze waca nnadxu, bzue̱ꞌ xúgute̱le lu da baxacheꞌ. Dxenníaꞌ: Waca nnadxu, chee̱ quebe gácate̱caꞌ snia.
\v 6 Ca xel-la ziꞌ da bdele bénneaꞌ gate naꞌ bzrágale, ba nácale̱ꞌe̱queze da naꞌ.
\v 7 Caꞌ naca na, naꞌa dxal-laꞌ gunite laule chee̱ bénneaꞌ, ne xue zrenle le̱ꞌ, chee̱ quebe gunitie̱ꞌ xel-la dxebeza lazreꞌ chee̱ꞌ ne̱ chee̱ da baxacheꞌ zren da dxedée̱ꞌ.
\v 8 Chee̱ le̱ naꞌ dxataꞌ xuedaꞌ leꞌe guléꞌele le̱ꞌ xecha lasa ca nazríꞌile̱ꞌe̱le le̱ꞌ.
\v 9 Bzuajaꞌ nédxula chee̱le ca naca da nigá chee̱ guléꞌe laweꞌ che nácale wezúe dizraꞌ lu xúgute̱ da dxaca.
\v 10 Naꞌa, nu benneꞌ dxunite laule chee̱ꞌ, cáꞌanqueze nedaꞌ dxunite lawaꞌ chee̱ꞌ. Ca da bnite lawaꞌ nedaꞌ, che naca na tu da dxal-laꞌ gunite lawaꞌ, ba bnite lawaꞌ na ne̱ chee̱le leꞌe lau Cristo
\v 11 chee̱ quebe sequeꞌ Satanás nna beꞌe na dxiꞌu, naꞌ ba nézquezdxu ca da dxun na.
\s Pablo dxezé̱ꞌ gunne xue lu xe̱zre Troas
\p
\v 12 Gate bzrinaꞌ xe̱zre Troas chee̱ guzendaꞌ bénneache dizraꞌ chaweꞌ chee̱ Cristo, gutáꞌle̱ꞌe̱ lataj chiaꞌ gunaꞌ zrin chee̱ Xránadxu.
\v 13 Guzúale̱ꞌa gunne xue laweꞌ da quebe bezreldaꞌ bi bíchedxu Tito ga naꞌ. Chee̱ le̱ naꞌ bzeaꞌ dizraꞌ benneꞌ caꞌ zaj zre̱ꞌe̱ naꞌ, naꞌ guxáꞌa xe̱zr la xu Macedonia.
\s Dxezruéꞌedxu ne̱ chee̱ Cristo
\p
\v 14 Xcalén Dios, Bénneaꞌ dxeché̱ꞌtequeze̱ꞌ dxiꞌu lu neza guxúꞌu Jesucristo lu da bzruéꞌene̱ꞌ, ne dxuléꞌe lawe̱ꞌ ne̱ chee̱dxu dxiꞌu dizraꞌ chee̱ꞌ ca tu da dxelá zixre da dxezriluj gátete̱ze na.
\v 15 Dxiꞌu nácadxu ca da dxelá zixre da dxuzúa Cristo lau Dios, ne dxezriluj na ládujla benneꞌ caꞌ xelelé̱ꞌ, ne ládujla benneꞌ caꞌ xelebía xiꞌe̱.
\v 16 Lau benneꞌ caꞌ xelebía xiꞌe̱ da dxelá nigá naca na ca tu da dxute bénneache, san lau benneꞌ caꞌ xelelé̱ naca na tu da dxunezruj na bénneache xel-la nabán. ¿Nu benneꞌ naca chee̱ꞌ gaque̱ꞌ caní?
\v 17 Netuꞌ quebe dxedantuꞌ dxútentuꞌ dizraꞌ chee̱ Dios, ne quebe dxuchantuꞌ na ca dxelún benneꞌ zante̱. Laweꞌ da dxen Dios, dxuchálajntuꞌ du lázrentuꞌ, ca benneꞌ nasel-la Dios, ne ca we̱n zrin chee̱ Cristo.
\c 3
\s Dizraꞌ chee̱ xel-la wezría cube
\p
\v 1 Gate dxennantuꞌ da nigá, ¿dxéquele dxezú launtuꞌ xecha lasa dxenne̱ntuꞌ chaweꞌ da naca cheé̱zquezentuꞌ? ¿Dxun na ba xen guléꞌentuꞌ leꞌe tu xiche da dxuléꞌe na nácantuꞌ xrlátaje, u nábantuꞌ chee̱le tu xiche caní, ca dxelún bal-la benneꞌ?
\v 2 ¡Cabí! Laweꞌ da nácaquezle leꞌe ca tu xiche da dxuléꞌe na nácantuꞌ xrlátaje, da naxúaj na lu xichaj lázrdauntuꞌ, naꞌ xúgute̱ bénneache gaca xelexúnbeꞌe̱ na, ne xululabe̱ꞌ na.
\v 3 Leꞌe nácale ca tu xiche da nuzúaj Cristo, ne da dxuléꞌe launtuꞌ netuꞌ. Nácale ca tu da naxúaj na da quebe naca na tu lu xiche, san ne̱ chee̱ Beꞌ Láꞌazxa chee̱ Dios ban, tu da quebe naxúaj na lu blaga xiaj, san lu lázrdaudxu.
\p
\v 4 Ne̱ chee̱ Cristo dxuxrén lázrentuꞌ Dios,
\v 5 quegá chee̱ bi gaca guntuꞌ da naca cheé̱zquezentuꞌ, san, ca naca da gaca guntuꞌ naca na chee̱ Dios.
\v 6 Le̱ꞌ ba nunne̱ꞌ netuꞌ guntuꞌ zrin chee̱ꞌ ne̱ chee̱ tu xel-la wezría cube da quebe naca na ne̱ chee̱ tu da naxúaj na, san da naca na ne̱ chee̱ Beꞌ Láꞌazxa chee̱ꞌ. Da nadxixruj bea na da naxúaj na dxuzría xi na dxiꞌu, san Beꞌ Láꞌazxa naꞌ dxunna dxiꞌu xel-la nabán.
\p
\v 7 Da bdxixruj beꞌe Moisés naꞌ bxuaj na le̱ꞌe̱ xiaj blagaꞌ, ne blaꞌ nen tu da bseníꞌle̱ꞌe̱, naꞌ québedxa belezúe benneꞌ Israel caꞌ xelené̱ꞌe̱ lau Moisés, laweꞌ da gúcatite legala le̱ꞌe̱ dxuꞌa lawe̱ꞌ, naꞌ xel-la naxaníꞌ naꞌ bexul-la na chawe lazreꞌ. Che lu xel-la naxaníꞌ zren blaꞌ da nadxixruj bea na, da dxuzría xi na dxiꞌu,
\v 8 da zrénle̱ꞌe̱dxa naca xel-la naxaníꞌ chee̱ dizraꞌ chaweꞌ naꞌ da nusá Beꞌ Láꞌazxa chee̱dxu.
\v 9 Che da nadxixruj bea na da dxuzría xi na dxiꞌu guca na tu da xabáa zrente̱, naꞌ tu da xabáa zrénle̱ꞌe̱dxa naca dizraꞌ chaweꞌ naꞌ da dxucáꞌana na dxiꞌu xrlátaje lau Dios.
\v 10 Lácala che da nadxixruj bea na nédxula guca na tu da xabáa, naꞌa quebe bi naca xabáa chee̱ na lau dizraꞌ chaweꞌ nigá da naca na tu da xabáa zrénle̱ꞌe̱dxa.
\v 11 Che guca tu da xabáa chee̱ da naꞌ guzí bea na tu chíꞌidauze, napa na tu da xabáa zrénle̱ꞌe̱dxa da naꞌ si bea na chadía chacanna.
\p
\v 12 Laweꞌ da dxuxrén lázrentuꞌ naca na caní, du lázrentuꞌ dxuchálajntuꞌ dizraꞌ chaweꞌ naꞌ.
\v 13 Quebe dxuntuꞌ ca be̱n Moisés, bgacu lawe̱ꞌ tu ladxeꞌ chee̱ quebe xeleléꞌe benneꞌ Israel caꞌ xexul-la xel-la naxaníꞌ naꞌ da quebe guzí bea na.
\v 14 Benneꞌ Israel caꞌ quebe guléajniꞌine̱ꞌ. Ne naꞌa zra, gate dxululabe̱ꞌ xel-la wezría gula naꞌ, ladxeꞌ náꞌqueze quebe dxue na le̱ꞌ lataj xeléajniꞌine̱ꞌ, laweꞌ da quebe ne xedúa na, naꞌ gaca xedúa na tuze ne̱ chee̱ Cristo.
\v 15 Naꞌa zra, gate dxululabe̱ꞌ dizraꞌ chee̱ Moisés, zua ca tu ladxeꞌ da dxucache na xichaj lázrdawe̱ꞌ.
\v 16 Gate tu benneꞌ xexaque̱ꞌ chee̱ Xránadxu, xedúa ladxeꞌ naꞌ lu xichaj lázrdawe̱ꞌ,
\v 17 laweꞌ da naca Xránadxu Beꞌ naꞌ, naꞌ naga zua Beꞌ chee̱ Xránadxu, naꞌ de̱ xel-la weselá lu naꞌ da nadxixruj bea na chee̱ Moisés naꞌ.
\v 18 Chee̱ le̱ naꞌ xúgute̱dxu dxiꞌu, laweꞌ da quebe daꞌ laudxu tu ladxeꞌ, nácadxu ca tu wanaꞌ da dxuléꞌe na da xabáa chee̱ Xránadxu, naꞌ dxíꞌuqueze, tu tu lasa gate dxeléꞌedxu da xabáa chee̱ꞌ dxexácadxadxu ca naca Cristo, laweꞌ da tu tu lasa naꞌ nápadxadxu da xabáa chee̱ꞌ. Da nigá dxun Beꞌ chee̱ Xránadxu, na dxuché̱ꞌe̱ dxiꞌu lu xichaj lázrdaudxu.
\c 4
\p
\v 1 Caꞌ naca na, cabataꞌ dxate niꞌa nantuꞌ laweꞌ da lu xel-la dxexache lazreꞌ chee̱ꞌ, Dios ba nusebague̱ꞌ netuꞌ zrin nigá chee̱ Cristo da dxuntuꞌ.
\v 2 Ba nuzúantuꞌ chaláꞌala da dxelún bénneache bagácheze, ne da dxeduéꞌentuꞌ ca zaj naca na. Quebe bi dxuntuꞌ da we̱n lazreꞌ, ne quebe dxuchantuꞌ dizraꞌ chee̱ Dios, san dxenne̱ntuꞌ tuze da li, naꞌ caní dxuzúa cuínantuꞌ lu naꞌ xichaj lázrdau xúgute̱ bénneache lau Dios.
\v 3 Che dizraꞌ chaweꞌ da dxuzénentuꞌ bénneache ne nagache na, naca na caní tuze lau benneꞌ caꞌ xelebía xiꞌe̱.
\v 4 Laweꞌ da quebe dxeléajle̱ꞌe̱ chee̱ Cristo, naꞌ da xriwe̱ꞌ, da naꞌ naca na dios chee̱ xe̱zr la xu nigá ba nun chul-la na xichaj lázrdawe̱ꞌ chee̱ quebe xeleléꞌene̱ꞌ xel-la naxaníꞌ chee̱ dizraꞌ chaweꞌ chee̱ xabáa chee̱ Cristo, Bénneaꞌ naque̱ꞌ luꞌa lesaca Dios.
\v 5 Quebe dxuzénentuꞌ bénneache ca naca cheé̱zquezentuꞌ, san ca naca chee̱ Jesucristo. Dxennantuꞌ naque̱ꞌ Xránadxu, naꞌ ca naca chee̱ntuꞌ dxennantuꞌ nácantuꞌ we̱n zrin chee̱le laweꞌ da nazríꞌintuꞌ Jesús.
\v 6 Dios náꞌqueze, Bénneaꞌ gunná beꞌe̱ guxaníꞌ xiꞌ naꞌ lu da chul-la, naque̱ꞌ Benneꞌ ba be̱ne̱ꞌ guxaníꞌ xiꞌ chee̱ꞌ lu xichaj lázrdaudxu, chee̱ gaca gúnbeadxu da xabáa chee̱ Dios da dxácatite legala na dxuꞌa lau Jesucristo.
\s Dxundxu xúgute̱ ne̱ chee̱ xel-la dxeajlí lazreꞌ chee̱dxu
\p
\v 7 Da xabáa nigá nápantuꞌ lu be̱laꞌ dxen chee̱ntuꞌ, da naca na ca tu xesuꞌ xu, chee̱ gaca bea za xel-la waca zren nigá lu naꞌ Dios, ne quegá cheé̱zquezentuꞌ.
\v 8 Chee̱ le̱ naꞌ:
\q Láqueze zúantuꞌ lu da sté̱bele̱ꞌe̱, quebe dxeze̱ntuꞌ gunne xue.
\q Láqueze dxeze̱ntuꞌ gunne xue, tu dxebeza lázrezquezentuꞌ gácale̱ Dios netuꞌ.
\q
\v 9 Láqueze zaj nau ziꞌ xuzre̱ꞌ netuꞌ, quebe dxusán Dios netuꞌ.
\q Láqueze dxeline̱ꞌ netuꞌ xu, quebe dxebía xintuꞌ.
\m
\v 10 Gátete̱ze dxéajntuꞌ naca tuze be̱laꞌ dxen chee̱ntuꞌ nen xel-la gute chee̱ Jesús chee̱ guléꞌe lau lu be̱laꞌ dxen chee̱ntuꞌ xel-la nabán chee̱ Jesús.
\v 11 Dxácate̱ naca bantuꞌ zúantuꞌ chee̱ gátentuꞌ xúgute̱ zra ne̱ chee̱ Jesús, chee̱ guléꞌe lau xel-la nabán chee̱ Jesús lu be̱laꞌ dxen chee̱ntuꞌ da gate.
\v 12 Caꞌ naca na, lácala tu zúazquezentuꞌ lu da ste̱be chee̱ xel-la gute da nigá, dxun na sua tu xel-la nabán cube chee̱le.
\p
\v 13 Naxúaj lu dizraꞌ láꞌazxa da dxenná na: Guxéajle̱ꞌa, naꞌ chee̱ le̱ naꞌ bchálajaꞌ, naꞌ cáꞌanqueze netuꞌ, lu xel-la dxeajlí lazreꞌ caníqueze, dxéajle̱ꞌe̱ntuꞌ, ne dxuchálajntuꞌ,
\v 14 laweꞌ da nézentuꞌ Dios, Bénneaꞌ bsebane̱ꞌ Xránadxu Jesús ládujla benneꞌ gate, cáꞌanqueze gusebane̱ꞌ dxiꞌu tu zren nen Jesús, naꞌ tu zren nen leꞌe, xeché̱ꞌe̱ dxiꞌu lau Le̱ꞌ.
\v 15 Xúgute̱ da nigá guzaca zintuꞌ chee̱ gaca tu da ba neza chee̱le, chee̱ gaca na, gate xelezíꞌ benneꞌ zante̱ xel-la xrlátaje chee̱ Dios, cáꞌanqueze benneꞌ zante̱ xelé̱ꞌe̱ Le̱ꞌ: Xcalenuꞌ, chee̱ gaca ba chee̱ Dios.
\p
\v 16 Chee̱ le̱ naꞌ, cabataꞌ dxate niꞌa nadxu. Láqueze dxe̱xru be̱laꞌ dxen chee̱dxu, Dios dxuxucube̱ꞌ beꞌ nácaquezdxu tu zra tu zra.
\v 17 Da dxezácadxu lu xe̱zr la xu nigá naca na tu da dauze, da teze chee̱ na, naꞌ nusá na chee̱dxu tu xabáa chadía chacanna da szrente̱, ne da cháwedxa.
\v 18 Quebe nnáꞌadxu ca da dxeléꞌedxu, san nnáꞌadxu da quebe naláꞌ, laweꞌ da quebe dxelezí bea da caꞌ dxeléꞌedxu, san da caꞌ quebe dxeléꞌedxu dxelezí bea na chadía chacanna.
\c 5 
\p 
\v 1 Be̱laꞌ dxen chee̱dxu naca na ca tu xuꞌu lizre beꞌ nácaquezdxu. Be̱laꞌ dxen chee̱dxu naca na ca tu xuꞌu da quebe si bea na, naꞌ gate gátedxu Dios ba nucueze̱ꞌ chee̱dxu xabáa tu xuꞌu da zea jlí canna, da nun Diósqueze, ne quegá bénneache. 
\v 2 Da li dxácate̱ naca bandxu lu be̱laꞌ dxen nigá dxebezre we̱ꞌdxu laweꞌ da dxaca lázredxu cheajchúꞌudxu be̱laꞌ dxen cube naꞌ da gunna Dios dxiꞌu xabáa. 
\v 3 Quebe xegáꞌana cáꞌaze beꞌ nácaquezdxu xabáa. Cheajchúꞌu na be̱laꞌ dxen cube naꞌ. 
\v 4 Dxácate̱ ne naca bandxu lu xuꞌu nigá da naca na be̱laꞌ dxen chee̱dxu, dxebezre we̱ꞌdxu, ne dxededxu xel-la ziꞌ. Quebe nácaze na laweꞌ da dxaca lázredxu gusandxu be̱laꞌ dxen gula chee̱dxu nigá. Dxaca lázredxu cheajchúꞌudxu be̱laꞌ dxen cube, naꞌ caꞌan gaca xenite be̱laꞌ dxen chee̱dxu da dxal-laꞌ gate, naꞌ laꞌ be̱laꞌ dxen cube chee̱dxu da gaca ban na chadía chacanna. 
\v 5 Bénneaꞌ ba nune̱ꞌ dxiꞌu chee̱ gaca chee̱dxu caní naque̱ꞌ Dios, Bénneaꞌ ba nunne̱ꞌ dxiꞌu Beꞌ Láꞌazxa ca tu da dxunna bea na dxal-laꞌ sidxu tu be̱laꞌ dxen cube xabáa.
\p 
\v 6 Caꞌ naca na, dxuxrén lázretequezdxu Dios. Ba nezdxu dxácate̱ naca bandxu lu be̱laꞌ dxen nigá zúadxu zítuꞌla naga zua lízredxu, da naca na, quebe zúale̱dxu Xránadxu,
\v 7 naꞌ dxedadxu ne̱ chee̱ xel-la dxeajlí lazreꞌ chee̱dxu, quegá ne̱ chee̱ da dxeléꞌedxu. 
\v 8 Dxuxrén lázredxu Dios, ne dxaca lázredxadxu gusandxu xel-la nabán chee̱dxu lu be̱laꞌ dxen nigá chee̱ chéajdxu cheajsúale̱dxu Xránadxu. 
\v 9 Chee̱ le̱ naꞌ dxundxu ba xuzre gúnte̱quezdxu da xezaca ba lazreꞌ Xránadxu, che nagáꞌanadxu lu be̱laꞌ dxen chee̱dxu nigá, u che cheajchúꞌudxu be̱laꞌ dxen cube, da zua na xabáa, 
\v 10 laweꞌ da xúgute̱dxu dxun na ba xen xezrindxu lau Cristo chee̱ guchiꞌe̱ ca da nundxu tu tudxu, chee̱ siꞌ lu nadxu ca da xáladxu, cáte̱ze naca da xrlátaje, u da cale̱la da ba be̱ndxu gate ne zúadxu lu be̱laꞌ dxen chee̱dxu nigá. 

\s Dizraꞌ da dxexún dxiꞌu tuze nen Dios 
\p 
\v 11 Chee̱ le̱ naꞌ, laweꞌ da núnbeantuꞌ ca dxal-laꞌ zrébedxu Xránadxu, dxuntuꞌ ba xuzre guntuꞌ xelelá bénneache.  Dios ba nézene̱ꞌ da nácantuꞌ, naꞌ dxebeza lazraꞌ cáꞌanqueze leꞌe nézele na. 
\v 12 Quegá dxenne̱ntuꞌ xrlátaje cheé̱zquezentuꞌ, san dxúnnantuꞌ leꞌe lataj gápale netuꞌ ba láꞌana, chee̱ gaca xeché̱bele chee̱ benneꞌ caꞌ dxulucáꞌana szren cuine̱ꞌ ca naca da zaj naque̱ꞌ cúzreze, ne quegá ca naca da zaj naque̱ꞌ lu xichaj lázrdawe̱ꞌ. 
\v 13 Che dxeleque bénneache nadá xichaj lázrdauntuꞌ naca na chee̱ guntuꞌ zrin chee̱ Dios, naꞌ che quebe nadá xichaj lázrdauntuꞌ naca na chee̱ gaca tu da ba neza chee̱le leꞌe. 
\v 14 Xel-la zriꞌi lazreꞌ chee̱ Cristo dxusebaga na netuꞌ laweꞌ da nézentuꞌ che tu benneꞌ gutie̱ꞌ waláz chee̱ xúgute̱ bénneache, naꞌ ba gulate xúgute̱ꞌ. 
\v 15 Cristo gutie̱ꞌ waláz chee̱ xúgute̱ bénneache, chee̱ benneꞌ caꞌ zaj naca bane̱ꞌ québedxa xelaca bane̱ꞌ cheé̱zqueze̱ꞌ, san chee̱ Le̱ꞌ, Bénneaꞌ gutie̱ꞌ, ne bebane̱ꞌ waláz chee̱ benneꞌ caꞌ. 
\v 16 Chee̱ le̱ naꞌ, québedxa nnaꞌntuꞌ ca naca da nácaqueze tu benneꞌ lu xe̱zr la xu nigá, naꞌ láqueze nédxula gunnaꞌntuꞌ Cristo cáte̱ze gúcaqueze̱ꞌ lu xe̱zr la xu nigá, naꞌa québedxa nnaꞌntuꞌ Le̱ꞌ caní. 
\v 17 Caꞌ naca, che tu benneꞌ naque̱ꞌ tuze nen Cristo, naque̱ꞌ tu benneꞌ cube. Da gula caꞌ chee̱ benneꞌ nigá ba guledé chee̱ na, naꞌ xúgute̱ na zaj naca na cube. 
\p 
\v 18 Xúgute̱ da caní dxun Dios, Bénneaꞌ bexune̱ꞌ dxiꞌu tuze nen Lé̱queze̱ꞌ ne̱ chee̱ Cristo, naꞌ bsebague̱ꞌ dxiꞌu guzendxu bénneache ca gaca xelexaque̱ꞌ tuze nen Dios. 
\v 19 Gate gute Cristo, Dios guzúale̱queze̱ꞌ Le̱ꞌ, ne bexune̱ꞌ bénneache chee̱ xe̱zr la xu nigá tuze nen Le̱ꞌ, ne quebe gunné̱ꞌe̱ ca zaj naca dul-la zaj nabaga bénneache caꞌ, naꞌ bsebague̱ꞌ dxiꞌu guzendxu bénneache dizraꞌ da dxexún dxiꞌu tuze nen Dios. 
\v 20 Caꞌ naca na, nácantuꞌ gubáz chee̱ Dios ne̱ chee̱ Cristo, naꞌ naca na cáte̱ze Diósqueze dxataꞌ xuene̱ꞌ leꞌe lu dxúaꞌantuꞌ, naꞌ dxataꞌ xuentuꞌ leꞌe lu La Cristo, le xexaca tuze nen Dios. 
\v 21 Cristo netú dul-la ca be̱ne̱ꞌ, san ne̱ chee̱dxu dxiꞌu, Dios bdee̱ꞌ Le̱ꞌ chee̱ gutie̱ꞌ le̱ꞌe̱ xaga béguaj ca tu benneꞌ dul-la, chee̱ xexácadxu benneꞌ xrlátaje lau Dios ne̱ chee̱ da be̱n Cristo. 

\c 6
\p
\v 1 Caꞌ naca na, ca we̱n zrin tu zren nen Dios dxataꞌ xuentuꞌ leꞌe chee̱ quebe guzúale chaláꞌala xel-la zriꞌi lazreꞌ chee̱ Dios,
\v 2 laweꞌ da lu dizraꞌ láꞌazxa dxenné̱ꞌ:
\q Tu zra dxezaca ba lazraꞌ bendaꞌ chiuꞌ,
\q naꞌ lu zra chee̱ xel-la weselá gúcale̱naꞌ lueꞌ.
\m Naꞌa naca na zra dxezaca ba lazre̱ꞌ xenne̱ꞌ chee̱le, ne guselé̱ꞌ leꞌe.
\p
\v 3 Quebe bi dxuntuꞌ da gun na quebe xeléajle̱ bénneache chee̱ Cristo, chee̱ quebe nu nne̱ cale̱la chee̱ zrin dxuntuꞌ.
\v 4 Ca naca xúgute̱ da dxuntuꞌ, dxaca lázrentuꞌ guléꞌentuꞌ bénneache nácantuꞌ we̱n zrin chee̱ Dios,
\q ne̱ chee̱ xel-la dxebeza zren lazreꞌ chee̱ntuꞌ gate dxuchaga launtuꞌ da dxezácantuꞌ,
\q ne da dxexázrjentuꞌ, ne da zaj naca ste̱be chee̱ntuꞌ,
\q
\v 5 ca buluzálaje̱ꞌ netuꞌ, ne guleguꞌe̱ netuꞌ lizre xia.
\q Guledábague̱ꞌ netuꞌ san bé̱nle̱ꞌe̱ntuꞌ zrin.
\q Zaneꞌ lasa quebe gúsentuꞌ, ne quebe bi gudáguntuꞌ.
\m
\v 6 Cáꞌanqueze bléꞌentuꞌ da nácantuꞌ
\q ne̱ chee̱ tu xel-la nabán li lazreꞌ chee̱ntuꞌ,
\q ne ne̱ chee̱ da li da núnbeantuꞌ,
\q ne ne̱ chee̱ xel-la zren lazreꞌ chee̱ntuꞌ,
\q ne xel-la zriꞌi lazreꞌ chee̱ntuꞌ,
\q ne ne̱ chee̱ Beꞌ Láꞌazxa, Bénneaꞌ zúale̱ne̱ꞌ netuꞌ,
\q ne ne̱ chee̱ xel-la nazríꞌi chee̱ntuꞌ da naca na du lazreꞌ,
\q
\v 7 ne ne̱ chee̱ dizraꞌ li da dxuzénentuꞌ bénneache,
\q ne ne̱ chee̱ xel-la waca chee̱ Dios da zúale̱ na netuꞌ.
\m Bchínentuꞌ da zaj naca ca xia chee̱ wedil-la chee̱ da xrlátaje chee̱ gudíl-lantuꞌ, ne chee̱ gudentuꞌ chaláꞌala da zaj naca ca xia chee̱ wedil-la chee̱ benneꞌ caꞌ dxeledábagueꞌ netuꞌ.
\q
\v 8 Zua gate dxelape̱ꞌ netuꞌ ba láꞌanaꞌ,
\q ne zua gate dxuluzúe̱ꞌ netuꞌ chaláꞌala.
\q Zua gate dxelenné̱ꞌ chee̱ntuꞌ da xrlátaje,
\q ne zua gate dxelenné̱ꞌ chee̱ntuꞌ da cale̱la.
\q Zua gate dxelenné̱ꞌ nácantuꞌ we̱n lazreꞌ,
\q ne zua gate dxelenné̱ꞌ dxenne̱ntuꞌ da li.
\q
\v 9 Zua gate quebe nu dxuzé̱ naga netuꞌ,
\q ne zua gate dxuluzé̱ naga xánnie̱ꞌ netuꞌ.
\q Zua gate zúantuꞌ lu da ste̱be chee̱ xel-la gute, san ne naca bantuꞌ.
\q Zua gate dxuludée̱ꞌ netuꞌ xel-la ziꞌ, san quebe ne xelutie̱ꞌ netuꞌ.
\q
\v 10 Láqueze zúantuꞌ lu da baxacheꞌ, zúate̱quezentuꞌ lu xel-la dxebé.
\q Lácala nácantuꞌ benneꞌ xacheꞌ, ba nuntuꞌ benneꞌ zan benneꞌ gunníꞌa.
\q Láqueze quebe bi núantuꞌ, xúgute̱ nápantuꞌ.
\p
\v 11 Bi bíchentuꞌ, benneꞌ Corinto, ba bchálajntuꞌ du lázrentuꞌ. Ba bléꞌentuꞌ leꞌe ca nazríꞌi lázrentuꞌ leꞌe.
\v 12 Tu zúazqueze xel-la zriꞌi lazreꞌ chee̱ntuꞌ, naꞌ leꞌe naꞌ quebe nazriꞌile netuꞌ du lázrele.
\v 13 Dxataꞌ xuedaꞌ leꞌe ca dxun tu benneꞌ dxataꞌ xuene̱ꞌ bi cheé̱queze̱ꞌ chee̱ guléꞌele nedaꞌ du lázrele xel-la nazríꞌi da zua na lu xichaj lázrdaule cáte̱ze be̱naꞌ nedaꞌ.
\s Nácadxu xudauꞌ chee̱ Dios ban
\p
\v 14 Quebe gunle tuze nen benneꞌ quebe dxeléajle̱ꞌe̱ chee̱ Cristo, da gaca na ca chacuéꞌ be̱zre guꞌuna, be̱ quebe zaj nadíl-lebaꞌ.
\q ¿Ájazra gun da xrlátaje gaca na tuze nen da cale̱la?
\q ¿Ájazra gun xel-la naxaníꞌ gaca na tuze nen da chul-la?
\q
\v 15 ¿Ájazra gun Cristo gaque̱ꞌ tuze nen Satanás?
\q ¿Ájazra gun benneꞌ dxéajle̱ꞌe̱ chee̱ Cristo gaque̱ꞌ tuze nen benneꞌ
\q2 quebe dxéajle̱ꞌe̱ chee̱ꞌ?
\q
\v 16 ¿Ájazra gun xudauꞌ chee̱ Dios gaca na tuze nen bedáuꞌ xiaj xaga?
\m Léꞌequeze nácale xudauꞌ chee̱ Dios ban cáte̱ze gunná Diósqueze:
\q Súale̱naꞌ le̱ꞌ, ne tále̱naꞌ benneꞌ caꞌ.
\q Gacaꞌ Dios chee̱ benneꞌ caꞌ, naꞌ le̱ꞌ xelaque̱ꞌ benneꞌ xe̱zre chiaꞌ.
\m
\v 17 Chee̱ le̱ naꞌ, cáꞌanqueze gunné̱ꞌ:
\q Le xedxúaj ládujla benneꞌ caꞌ, ne le cuasa naꞌ, dxenná Xránadxu.
\q Quebe gutale da sban.
\q Nadxa siꞌ lu naꞌa leꞌe
\v 18 ne gacaꞌ Xrale leꞌe,
\q naꞌ leꞌe gácale zriꞌinaꞌ bi biu, ne zriꞌinaꞌ bi nuꞌula.
\m Caní dxenná Xránadxu, Bénneaꞌ nape̱ꞌ dute̱ xel-la waca.
\c 7
\p
\v 1 Caꞌ naca na, bi bíchaꞌdauꞌ nazriꞌite̱ lazraꞌ, da caní zaj naca na da guche̱be lazreꞌ Dios chee̱dxu. Chee̱ le̱ naꞌ dxal-laꞌ guxúe xanneꞌ cuínadxu chee̱ quebe güedxu lataj netú da sban gudxén na dxiꞌu lu be̱laꞌ dxen chee̱dxu, ne lu beꞌ nácaquezdxu, naꞌ laweꞌ da dxezrébedxu Dios dxal-laꞌ guzúa cuínadxu lu naꞌ Dios dute̱ ca nácadxu.
\s Ca belexebíꞌi lazreꞌ benneꞌ Corinto
\p
\v 2 Le siꞌ lu naꞌle netuꞌ. Quebe bi da cale̱la ne guntuꞌ chee̱ nu benneꞌ ládujla leꞌe, ne quebe nu ne guchántuꞌ, ne quebe nu ne si xe̱ntuꞌ.
\v 3 Quebe dxenníaꞌ da nigá chee̱ gusebagaꞌ leꞌe zria, san naca na ca ba guchaꞌ leꞌe nédxula, leꞌe zúale lu lázrdawaꞌ che gaca banaꞌ, u che gatiaꞌ tu zrente̱ nen leꞌe.
\v 4 Du lazraꞌ dxuchálajle̱naꞌ leꞌe, ne zuaꞌ lu da ba neza ne̱ chee̱le leꞌe. Lu xúgute̱ da dxezácantuꞌ zua da dxexúe zrénle̱ꞌe̱ nedaꞌ, naꞌ dxebéle̱ꞌe̱daꞌ.
\p
\v 5 Da li, gate bzrintuꞌ naga nababa Macedonia, quebe bezíꞌ lázrentuꞌ. Guzúantuꞌ lu da ste̱be gátete̱ze, laweꞌ da gátete̱ze gudentuꞌ guledábaga bénneache netuꞌ, naꞌ lu lázrdauntuꞌ bezrébentuꞌ.
\v 6 Nadxa Dios, Bénneaꞌ dxexúe zrene̱ꞌ benneꞌ zaj nate niꞌa ne̱ꞌe̱, bexúe zrene̱ꞌ netuꞌ ne̱ chee̱ Tito laweꞌ da bezrinbeꞌ naga zúantuꞌ,
\v 7 ne quegá tuze laweꞌ da blaꞌbeꞌ, san cáꞌanqueze laweꞌ da bexúe zrenle le̱beꞌ. Gúzrebeꞌ netuꞌ ca dxezá lázrele léꞌele netuꞌ, ne bzenbeꞌ netuꞌ ca lu da baxacheꞌ zúale, ne ca gunne xue dxeze̱le nedaꞌ, naꞌ chee̱ le̱ naꞌ gubéle̱ꞌe̱dxedaꞌ.
\p
\v 8 Láqueze da bzuajaꞌ chee̱le bzua na leꞌe lu da baxacheꞌ, quebe dxebezre lazraꞌ chee̱ da naꞌ. Láqueze gudxezre lazraꞌ nédxula gate guque beꞌedaꞌ bzua na leꞌe lu da baxacheꞌ tu chíꞌidauꞌ,
\v 9 naꞌa dxebedaꞌ, quegá laweꞌ da guzúale lu da baxacheꞌ, san laweꞌ da be̱n da baxacheꞌ naꞌ bexíaje lázrele. Leꞌe bchaga laule da baxacheꞌ naꞌ ca da bezaca ba lazreꞌ Dios, naꞌ da bzuajaꞌ chee̱le quebe bi da cale̱la be̱n na chee̱le.
\v 10 Da baxacheꞌ da dxuchaga laudxu ca da dxezaca ba lazreꞌ Dios dxun na dxexebíꞌi lázredxu chee̱ ladxu, naꞌ quebe dxal-laꞌ cuezre lázredxu chee̱ na. Che xegáꞌanadxu lu da baxacheꞌ ca dxelún bénneache chee̱ xe̱zr la xu nigá, naꞌ tu chiꞌize gátedxu.
\v 11 Leꞌe bchaga laule da baxacheꞌ da guca na chee̱le ne̱ chee̱ da bzuajaꞌ, ne be̱nle ca da dxezaca ba lazreꞌ Dios, naꞌ le nnaꞌxque naꞌa:
\q Bzua na leꞌe gunne xue ca naca da guca,
\q ne be̱n na bleꞌele ca da be̱nle.
\q Bchaꞌa na leꞌe, ne bchebe na leꞌe.
\q Nadxa guzé̱ lázrele léꞌele nedaꞌ,
\q ne guzúale gudele xel-la ziꞌ bénneaꞌ be̱n da cale̱la naꞌ.
\m Ca naca xúgute̱ da nigá bleꞌele quebe nabágale zria chee̱ dul-la nigá.
\v 12 Caꞌ naca na, gate bzuajaꞌ chee̱le da naꞌ, quebe guca na laweꞌ da gudxeꞌa gunne xue chee̱ bénneaꞌ be̱ne̱ꞌ da cale̱la naꞌ, ne quegá laweꞌ da gudxeꞌa gunne xue chee̱ bénneaꞌ guca na chee̱ꞌ, san be̱naꞌ na chee̱ gueque beꞌele lau Dios ca dxele gunne xue chee̱ntuꞌ.
\v 13 Chee̱ le̱ naꞌ guca da bexúe zren na netuꞌ.
\p Da naca tu da zrendxa, gubéle̱ꞌe̱ntuꞌ gate bléꞌentuꞌ zúale̱ Tito xel-la dxebé, laweꞌ da xúgute̱le leꞌe bexúe zrenle-beꞌ.
\v 14 Láqueze bcaꞌana szrenaꞌ leꞌe lau Tito, quebe dxeduéꞌedaꞌ, laweꞌ da cáte̱ze naca da li ca naca xúgute̱ da bchálajle̱naꞌ leꞌe, cáꞌanqueze guca da li da be̱naꞌ gate bcaꞌana szrenaꞌ leꞌe lau Tito.
\v 15 Nazríꞌidxabeꞌ leꞌe gate dxajsá lázrebeꞌ ca be̱nle xúgute̱le leꞌe, be̱nle cáte̱ze gunábabeꞌ leꞌe, ne ca guzíꞌ lu naꞌle le̱beꞌ lu dute̱ xel-la dxexruj lazreꞌ, ne lu xel-la dxezrebe.
\v 16 Dxebedaꞌ laweꞌ da dxuxrén lazreꞌ xánniaꞌ leꞌe.
\c 8
\s Da dxunézrujdxu du lázredxu
\p
\v 1 Naꞌa, bi bichaꞌ, dxaca lazraꞌ guzendaꞌ leꞌe ca bleꞌe lau xel-la zriꞌi lazreꞌ chee̱ Dios ne̱ chee̱ xúgute̱ cueꞌ bi chee̱ Cristo zaj nnitaꞌ lu xe̱zr la xu Macedonia.
\v 2 Láqueze guledée̱ꞌ tu xel-la ziꞌ zren gulebéle̱ꞌe̱quezne̱ꞌ, naꞌ láqueze zaj nácale̱ꞌe̱ benneꞌ xacheꞌ, du lazre̱ꞌ bulunézruje̱ꞌ da zaj de̱ chee̱ꞌ, naꞌ belune̱ꞌ ca benneꞌ gunníꞌa caꞌ.
\v 3 Dxexeche̱baꞌ du lazre̱ꞌ bulunézruje̱ꞌ xúgute̱ da gulezéquene̱ꞌ, ne da zrendxa ca da gulezéquene̱ꞌ.
\v 4 Gulataꞌ xuene̱ꞌ netuꞌ güentuꞌ le̱ꞌ lataj xelune̱ꞌ tu zren bénneache dxelácale̱ne̱ꞌ bi bíchedxu caꞌ dxelexázrjene̱ꞌ.
\v 5 Belundxe̱ꞌ ca da guleza lázrentuꞌ, laweꞌ da belunna cuínaqueze̱ꞌ, nédxula chee̱ Xránadxu, naꞌ gudé naꞌ chee̱ntuꞌ netuꞌ, cáte̱ze dxaca lazreꞌ Dios.
\v 6 Caꞌ naca na, gutaꞌ xúentuꞌ Tito gusexuzre̱ꞌ gutupe̱ꞌ da gunézrujle leꞌe, da naꞌ guzú lawe̱ꞌ dxutupe̱ꞌ gate nate.
\v 7 Leꞌe dxúnle̱ꞌe̱le ca naca da dxunle, ca dxeajlí lázrele Dios, ne ca dxusé̱dele bi chee̱ Cristo, ne ca naca da naxéajniꞌile, ne ca du lázrele dxunle xúgute̱, ne ca nazriꞌile netuꞌ. Caꞌ naca na, cáꞌanqueze dxal-laꞌ gúnle̱ꞌe̱le ca gunle zrin chaweꞌ nigá.
\p
\v 8 Quebe dxapaꞌ leꞌe da nigá ca tu da dxenná beꞌedaꞌ leꞌe. Dxaca lazraꞌ nézele ca du lazreꞌ dxelún xezícadxa bénneache zrin nigá, dxulunézruje̱ꞌ dumí, chee̱ gueque beꞌele che naca li lazreꞌ xel-la zriꞌi lazreꞌ chee̱le.
\v 9 Ba nézquezle ca naca xel-la zriꞌi lazreꞌ chee̱ Xránadxu Jesucristo. Naque̱ꞌ benneꞌ gunníꞌa, san be̱n cuine̱ꞌ benneꞌ xacheꞌ laweꞌ da bzriꞌine̱ꞌ leꞌe, chee̱ gácale leꞌe benneꞌ gunníꞌa lu da naca chee̱ Cristo laweꞌ da gudé Le̱ꞌ lu xel-la xacheꞌ.
\p
\v 10 Chee̱ gaca da ba neza chee̱le dxapaꞌ leꞌe da dxéquedaꞌ ca naca da nigá. Gudú iza guzú laule, quegá dxúnzele, san du lázrele dxunle da nigá, dxunézrujle dumí.
\v 11 Naꞌa, le gúnte̱ze na chee̱ xexuzrte̱ gunle na, gunle na du lázrele cáte̱ze guzú laule dxunle nédxute̱, gunézrujle ca da du de̱ chee̱le.
\v 12 Che da li dxaca lazreꞌ tu benneꞌ gunézruje̱ꞌ, Dios xezaca ba lazre̱ꞌ na che gunézruje̱ꞌ ca da nape̱ꞌ, ne quegá dxenabe̱ꞌ da quebe napa bénneaꞌ.
\p
\v 13 Quebe dxenníaꞌ da nigá chee̱ xexácale leꞌe xacheꞌ chee̱ gácale̱le benneꞌ xula.
\v 14 Naca na chee̱ gápale lé̱bete̱. Naꞌa nápale chee̱ gunézrujle ca da dxelexazrje benneꞌ xula caꞌ, naꞌ xetú lasa xelapa benneꞌ caꞌ da xelunne̱ꞌ chee̱le gate bi xázrjele leꞌe. Caní gápale lé̱bete̱
\v 15 cáte̱ze naxúaj na lu dizraꞌ láꞌazxa, dxenná na: Bénneaꞌ nápale̱ꞌe̱ quebe bi begáꞌana chee̱ꞌ, naꞌ bénneaꞌ nape̱ꞌ láteze quebe bi bexázrjene̱ꞌ.
\s Tito ne bi ljwezre̱ꞌ caꞌ
\p
\v 16 Xcalén Dios, Bénneaꞌ bzue̱ꞌ lu lázrdau Tito sue̱ꞌ gunne xue chee̱le leꞌe ca zuaꞌ nedaꞌ.
\v 17 Guzíꞌ lu ne̱ꞌe̱ da bsebagaꞌ le̱ꞌ, naꞌ laweꞌ da zúaqueze̱ꞌ gunne xue chee̱le leꞌe, ba bezé̱ꞌe̱ chee̱ xide̱ꞌ xedajnné̱ꞌe̱ leꞌe laweꞌ da dxaca lázrequeze le̱ꞌ.
\p
\v 18 Tu zren nen Tito nasél-lantuꞌ tu bi bíchedxu, tu benneꞌ dxelenné̱ chaweꞌ chee̱ꞌ xúgute̱ cueꞌ bi chee̱ Cristo, ca naca zrin xrlátaje da nune̱ꞌ chee̱ dizraꞌ chaweꞌ chee̱ Cristo.
\v 19 Quegá tuze da nigá, san xúgute̱ cueꞌ bi chee̱ Cristo gulequé̱ꞌe̱ bi bíchedxu níqueze chee̱ sále̱ne̱ꞌ netuꞌ chee̱ gácale̱ne̱ꞌ netuꞌ lu zrin nigá da dxuntuꞌ dxutúbentuꞌ dumí da gácale̱ na benneꞌ xacheꞌ caꞌ chee̱ gaca ba Xránadxu, ne chee̱ guléꞌe lau du lázrele dxunle zrin chaweꞌ nigá.
\v 20 Caní dxuntuꞌ chee̱ quebe nu benneꞌ si tizre̱ꞌ netuꞌ ca dxuchínentuꞌ dumí zrente̱ nigá da dxulunezruj bi bíchedxu caꞌ.
\v 21 Dxuntuꞌ ba xuzre guntuꞌ zrin nigá lu dute̱ xel-la li lazreꞌ chee̱ntuꞌ, quegá tuze lau Xránadxu, san cáꞌanqueze lau xúgute̱ bénneache.
\p
\v 22 Tu zren nen benneꞌ caní nasél-lantuꞌ xetú bi bíchedxu, tu benneꞌ da zánete̱ lasa ba bléꞌene̱ꞌ netuꞌ du lazre̱ꞌ dxune̱ꞌ zrin chee̱ Cristo, naꞌ naꞌa du lázredxe̱ꞌ dxune̱ꞌ zrin nigá laweꞌ da dxuxrén lazre̱ꞌ leꞌe.
\v 23 Che nu benneꞌ guche̱be leꞌe ca naca chee̱ Tito, le xe̱ꞌe̱ nácabeꞌ bi ljwezraꞌ, ne dxunbeꞌ zrin tu zren nen nedaꞌ chee̱ gunbeꞌ zrin chee̱le. Che nu guche̱be leꞌe ca naca chee̱ xezícadxa bi bíchedxu caꞌ zeajzrague̱ꞌ Tito, le xe̱ꞌe̱ zaj naque̱ꞌ benneꞌ gulesel-la xúgute̱ cueꞌ bi chee̱ Cristo, ne dxelape̱ꞌ ba láꞌana Cristo.
\v 24 Chee̱ le̱ naꞌ, chee̱ xeleneze xúgute̱ cueꞌ bi chee̱ Cristo, le guléꞌe le̱ꞌ nazriꞌile le̱ꞌ, naꞌ naca chee̱ntuꞌ xucáꞌana szrentuꞌ leꞌe.
\c 9
\s Da dxulunézruje̱ꞌ chee̱ bi bíchedxu caꞌ
\p
\v 1 Ca naca chee̱ dumí da gunézrujle chee̱ bi caꞌ chee̱ Cristo, quebe dxun na ba xen guzúajaꞌ chee̱le,
\v 2 laweꞌ da ba nezdaꞌ ca dxaca lázrele gunle na. Dxezaca ba lazraꞌ dxapaꞌ bi bíchedxu zaj zre̱ꞌe̱ xe̱zre caꞌ zaj nababa xe̱zr la xu Macedonia, leꞌe zrale xe̱zre caꞌ zaj nababa Acaya, gudú iza ba zúate̱quezle bi gunézrujle, naꞌ benneꞌ zante̱ benneꞌ Macedonia du lazre̱ꞌ dxulunézruje̱ꞌ laweꞌ da dxunézrujle leꞌe du lázrele.
\v 3 Dxusel-laꞌ bi bíchedxu caní chee̱ quebe gaca tu da we̱n lazreꞌ ca da chaweꞌ da ba gunníaꞌ ca dxunle leꞌe da nigá, ne chee̱ súate̱zle bi gunézrujle, ca ba guchaꞌ benneꞌ caní,
\v 4 ne che saꞌaca bal-la benneꞌ Macedonia tu zren nen nedaꞌ chee̱ quebe xeleléꞌene̱ꞌ quebe zúate̱quezle leꞌe bi gunézrujle. Chela gaca na caní xeduéꞌentuꞌ laweꞌ da bxren lázrentuꞌ leꞌe caní, naꞌ da zrendxa ca dxal-laꞌ xeduéꞌele leꞌe.
\v 5 Chee̱ le̱ naꞌ gúquedaꞌ dxun na ba xen nabaꞌ bi bíchedxu caꞌ xelide̱ꞌ xedajlennabe̱ꞌ leꞌe nédxula, ne chee̱ xelácale̱ne̱ꞌ leꞌe gutúpale da guche̱be lázrele nédxula gunézrujle. Caꞌ gaca na, dumí da gutúpale watáꞌqueze na chee̱ guléꞌe na naca tu da dxaca lázrele gunle, ne quegá tu da gunne xúentuꞌ leꞌe.
\p
\v 6 Le nnaꞌxque da nigá: Bénneaꞌ dxaze̱ꞌ láteze, cáꞌanqueze láteze xeziꞌe̱, naꞌ bénneaꞌ dxázale̱ꞌe̱, cáꞌanqueze xezíꞌile̱ꞌe̱.
\v 7 Tu tu benneꞌ dxal-laꞌ gunézruje̱ꞌ cáte̱ze da ba nune̱ꞌ lu lázrdawe̱ꞌ, quegá ca tu benneꞌ quebe dxezaca ba lazreꞌ, u xadíaze, laweꞌ da nazríꞌi Dios benneꞌ dxunézruje̱ꞌ dute̱ xel-la dxebé.
\v 8 Wazequeꞌ Dios gúnnale̱ꞌe̱ leꞌe ca naca xúgute̱ da chaweꞌ, chee̱ gataꞌ chee̱le xúgute̱ da nachínele, ne gápale bi gunézrujle chee̱ gunle xúgute̱ zrin xrlátaje.
\v 9 Naxúaj lu dizraꞌ láꞌazxa da dxenná na:
\q Du lazre̱ꞌ bnézruje̱ꞌ chee̱ benneꞌ xacheꞌ caꞌ.
\q Ca zaj naca zrin xrlátaje nune̱ꞌ xelegáꞌanatequeze na.
\m
\v 10 Dios, Bénneaꞌ dxunézruje̱ꞌ bínnedu caꞌ da dxázadxu, ne dxunne̱ꞌ da dxiꞌaj dxágudxu, gunne̱ꞌ leꞌe xúgute̱ da nachínele chee̱ gázale, naꞌ gusegule̱ꞌ na chee̱ gúnnale̱ꞌe̱queze na lina chee̱ zrin chaweꞌ da gunle.
\v 11 Caꞌ gaca na, gátaꞌle̱ꞌe̱ chee̱le xel-la gunníꞌa caꞌ chee̱ séquele gunézrujle du lázrele, naꞌ dumí naꞌ sél-lale lu naꞌntuꞌ netuꞌ gun na xelé̱ bi bíchedxu caꞌ Dios: Xcalenuꞌ.
\v 12 Caꞌ naca na, gate gunézrujdxu bi bíchedxu caꞌ dumí nigá da gácale̱ na le̱ꞌ, quegá tuze dxunézrujdxu tu da dxelechínnene̱ꞌ san cáꞌanqueze dxundxu xelé̱ꞌe̱ Dios: Xcalenuꞌ.
\v 13 Xelúe láꞌane̱ꞌ Dios laweꞌ da da nigá dxunézrujle guléꞌe na dxuzúale dizraꞌ chee̱ dizraꞌ chaweꞌ chee̱ Cristo. Cáꞌanqueze xelúe láꞌane̱ꞌ Dios ne̱ chee̱ da gunézrujle du lázrele da gácale̱ na le̱ꞌ, ne xúgute̱ cueꞌ bi chee̱ Cristo.
\v 14 Chee̱ le̱ naꞌ benneꞌ caꞌ xelenabe̱ꞌ chee̱le lau Dios, ne xelezríꞌile̱ꞌe̱ne̱ꞌ leꞌe ne̱ chee̱ xel-la zriꞌi lazreꞌ zren da guléꞌe lau Dios ne̱ chee̱le leꞌe.
\v 15 Xcalén Dios laweꞌ da nunne̱ꞌ dxiꞌu tu da zrente̱ da quebe séquedxu xuzájlaꞌadxu.
\c 10
\s Xel-la dxenná bea napa Pablo laweꞌ da naque̱ꞌ gubáz chee̱ Cristo
\p
\v 1 Nedaꞌ, Pablo, dxuzendaꞌ leꞌe da nigá ne̱ chee̱ xel-la dxexruj lazreꞌ, ne xel-la zriꞌi lazreꞌ chee̱ Cristo. Dxelenné̱ꞌ nacaꞌ benneꞌ zren lazreꞌ gate zúale̱naꞌ leꞌe, naꞌ gate zuaꞌ zituꞌ nácale̱ꞌa benneꞌ snia.
\v 2 Dxataꞌ xuedaꞌ leꞌe quebe gunle, gate xidaꞌ xedajnnáꞌa leꞌe, gacaꞌ benneꞌ snia nen bal-la benneꞌ ládujla leꞌe, benneꞌ caꞌ dxelenné̱ꞌ dxuntuꞌ zrin chee̱ Cristo lu be̱laꞌ dxenze chee̱ntuꞌ, naꞌ zúaquezaꞌ tíl-laquezaꞌ benneꞌ caꞌ.
\v 3 Láqueze nácantuꞌ be̱laꞌ dxen quebe dxedíl-lantuꞌ lu be̱laꞌ dxenze chee̱ntuꞌ,
\v 4 laweꞌ da quebe zaj naca chee̱ be̱laꞌ dxenze da dxuchínentuꞌ lu wedil-la chee̱ntuꞌ, san zaj napa na xel-la waca chee̱ Dios chee̱ séquentuꞌ guzría xintuꞌ da wal-la caꞌ chee̱ nu naꞌ dxedábagaꞌ netuꞌ.
\v 5 Caꞌan naca, dxuzría xintuꞌ da dxusebaga bénneaꞌ dxiꞌu, ne da dxuzúe̱ꞌ lu xel-la dxucáꞌana szren cuina chee̱ quebe xelúnbea bénneache Dios. Xúgute̱ da zaj xuꞌu lu xichaj bénneache dxuzúantuꞌ lu naꞌ Cristo chee̱ xuluzúe̱ꞌ dizraꞌ chee̱ꞌ.
\v 6 Zuáte̱quezentuꞌ gudentuꞌ xel-la ziꞌ xúgute̱ benneꞌ caꞌ quebe dxuluzúe̱ꞌ dizraꞌ chee̱ꞌ gate naꞌ ba dxuzúale dizraꞌ chee̱ꞌ du lázrele.
\p
\v 7 Leꞌe dxennaꞌle benneꞌ caꞌ cáte̱ze da zaj naque̱ꞌ cúzreze. Che nu benneꞌ dxéquene̱ꞌ da li naque̱ꞌ bi chee̱ Cristo, dxal-laꞌ gueque béꞌene̱ꞌ cáte̱ze naꞌ naca le̱ꞌ bi chee̱ Cristo, cáꞌanqueze nácantuꞌ netuꞌ bi chee̱ Cristo.
\v 8 Láqueze dxuchínedxedaꞌ ca dxal-laꞌ gunaꞌ xel-la dxenná bea chee̱ntuꞌ, quebe dxeduéꞌedaꞌ laweꞌ da nunna Cristo netuꞌ xel-la dxenná bea naꞌ chee̱ séquentuꞌ gusegúlantuꞌ leꞌe lu da naca chee̱ Dios, ne quegá chee̱ guzría xintuꞌ leꞌe.
\v 9 Quebe dxaca lazraꞌ guéquele leꞌe dxaca lazraꞌ guchebaꞌ leꞌe ne̱ chee̱ da dxuzúajaꞌ chee̱le.
\v 10 Dxelenné̱ꞌ xiche caꞌ da dxusél-laꞌ zaj naca na snia, ne wal-la, san nédaꞌquezaꞌ nacaꞌ benneꞌ nate niꞌa naꞌ, ne ca dxuchálajaꞌ quebe zácateca.
\v 11 Bénneaꞌ dxenné̱ꞌ da nigá dxal-laꞌ gueque béꞌene̱ꞌ cáte̱ze nacaꞌ lu dizraꞌ dxuzúajaꞌ gate ne zuaꞌ zituꞌ, cáꞌanqueze gacaꞌ lu da gunaꞌ gate naꞌ súale̱naꞌ leꞌe.
\p
\v 12 Quebe dxexázrentuꞌ gutil-le lé̱bentuꞌ, u guléꞌe cuínantuꞌ ca zaj naca bal-la benneꞌ caꞌ dxulucáꞌana szren cuine̱ꞌ. Dxelune̱ꞌ tu da xálaze gate dxelenné̱ꞌe̱ ca da zaj nácaqueze̱ꞌ, ne dxulutil-le le̱be ljwezre̱ꞌ.
\v 13 Quebe gucáꞌana szren cuínantuꞌ lu da quebe naca chee̱ntuꞌ. Dios naque̱ꞌ Bénneaꞌ guléꞌene̱ꞌ netuꞌ naga ze lau guntuꞌ zrin, naꞌ Le̱ꞌ be̱nne̱ꞌ netuꞌ lataj blantuꞌ naga zrale leꞌe lu xe̱zre Corinto.
\v 14 Chee̱ le̱ naꞌ quebe dxedxúajntuꞌ naga ze lau chee̱ntuꞌ, cáte̱ze gaca na che quebe ne zrintuꞌ naga zrale leꞌe nédxute̱. Netuꞌ nácantuꞌ benneꞌ nedxu blantuꞌ naga zrale leꞌe núantuꞌ dizraꞌ chaweꞌ chee̱ Cristo.
\v 15 Quebe dxucáꞌana szren cuínantuꞌ lu zrin da zaj nun benneꞌ xula, san dxebeza lázrentuꞌ cáte̱ze gula xel-la dxeajlí lazreꞌ chee̱le, waca gúndxantuꞌ zrin ládujla leꞌe gusegúlantuꞌ xel-la dxeajlí lazreꞌ chee̱le, san guntuꞌ na luꞌule da naca chee̱ntuꞌ.
\v 16 Te naꞌ dxebeza lázrentuꞌ tédxantuꞌ ca naga zrale chee̱ guzénentuꞌ bénneache zaj zre̱ꞌe̱ ga naꞌ dizraꞌ chaweꞌ chee̱ Cristo, ne quebe chúꞌuntuꞌ naga ba zaj nun zrin xezícadxa benneꞌ caꞌ, chee̱ quebe gucáꞌana szren cuínantuꞌ lu da ba zaj nune̱ꞌ.
\p
\v 17 Che nu benneꞌ dxaca lazre̱ꞌ nu gucáꞌana szrene̱ꞌ, dxal-laꞌ gucáꞌana szrene̱ꞌ Xránadxu.
\v 18 Bénneaꞌ dxexedxúaj xrlátaje, quebe naque̱ꞌ benneꞌ dxucáꞌana szren cuine̱ꞌ, san naque̱ꞌ bénneaꞌ dxucáꞌana szren Xránadxu le̱ꞌ.
\c 11
\s Ca naca chee̱ Pablo, ne benneꞌ gubáz caꞌ quebe nasel-la Cristo le̱ꞌ
\p
\v 1 Le guchaga lau nedaꞌ chee̱ nniaꞌ lateꞌ da ca zeaje na. Ájate̱ze naca na, le guchaga lau nedaꞌ,
\v 2 laweꞌ da dxéꞌle̱ꞌa gunne xue chee̱le leꞌe lu da nusebaga Dios nedaꞌ, ne laweꞌ da ba nache̱be lazraꞌ chee̱le gácale zruꞌula Cristo, dxaca lazraꞌ gudéaꞌ leꞌe lau Le̱ꞌ ca tu nuꞌula cuídeꞌdauꞌ du lazreꞌ súale̱beꞌ benneꞌ chee̱beꞌ.
\v 3 Ca be̱n be̱laꞌ gula naꞌ guzí xe̱baꞌ Eva nen xel-la neze chee̱baꞌ, dxezrebaꞌ güele lataj nu si xe̱ leꞌe, naꞌ cuásale lu xichaj lázrdaule chee̱ québedxa gácale du lázrele chee̱ Cristo.
\v 4 Leꞌe dxuchaga laule benneꞌ caꞌ záꞌaque̱ꞌ dxuluchálaje̱ꞌ chee̱ tu Jesús, benneꞌ nazráꞌ ca Bénneaꞌ bzénentuꞌ leꞌe chee̱ Le̱ꞌ, ne du lázrele dxezíꞌ lu naꞌle tu beꞌ da nazráꞌ ca Beꞌ naꞌ da ba guzíꞌ lu naꞌle, ne dxezíꞌ lu naꞌle tu dizraꞌ da nazráꞌ ca naca dizraꞌ chaweꞌ da ba guzíꞌ lu naꞌle.
\v 5 Dxéquedaꞌ quebe zacaꞌ nedaꞌ látezdxa ca benneꞌ gubáz zren caꞌ, benneꞌ caꞌ zéajle̱le leꞌe.
\v 6 Láqueze quebe gaca guchálajaꞌ xrtándauꞌ, dxéajniꞌidaꞌ da naꞌ dxuchálajaꞌ chee̱ na, naꞌ bléꞌentuꞌ caní naca na lu xúgute̱ da ba be̱ntuꞌ.
\p
\v 7 ¿Be̱naꞌ tu da cale̱la gate bzendaꞌ leꞌe dizraꞌ chaweꞌ chee̱ Cristo, ne quebe bi bchízrujaꞌ leꞌe, naꞌ be̱n cuinaꞌ dxexruj lazreꞌ chee̱ xegáꞌana szrenle leꞌe?
\v 8 Guca na ca gudawaꞌ dumí chee̱ xezícadxa cueꞌ bi chee̱ Cristo gate guziꞌa da belunne̱ꞌ nedaꞌ chee̱ be̱naꞌ zrin ga zúale leꞌe.
\v 9 Gate naꞌ guzúale̱naꞌ leꞌe, ne bxázrjedaꞌ, quebe bi guzíꞌ lu naꞌa da naca chee̱le, san bi bíchedxu záꞌaque̱ꞌ xe̱zr la xu Macedonia belunne̱ꞌ nedaꞌ ca da guchínnedaꞌ. Be̱naꞌ ba xuzre quebe bi gunábedaꞌ leꞌe, naꞌ cáꞌanqueze gunaꞌ.
\v 10 Laweꞌ da núnbeꞌa da li chee̱ Cristo, quebe zua nu benneꞌ naga nababa xe̱zr la xu Acaya gaca guzague̱ꞌ nedaꞌ chee̱ québedxa gucáꞌana szren cuinaꞌ chee̱ da nigá dxunaꞌ.
\v 11 ¿Bizr chee̱ naꞌ dxenníaꞌ caní? ¿Naca na laweꞌ da quebe nazríꞌidaꞌ leꞌe? Nézqueze Dios nazríꞌidaꞌ leꞌe.
\p
\v 12 Gúnquezaꞌ ca dxunaꞌ chee̱ quebe gataꞌ lataj chee̱ benneꞌ caꞌ dxelaca lazre̱ꞌ xulucáꞌana szren cuine̱ꞌ laweꞌ da dxeléquene̱ꞌ dxelune̱ꞌ zrin cáte̱ze dxuntuꞌ netuꞌ.
\v 13 Benneꞌ caní zaj naque̱ꞌ gubáz quebe nasel-la Cristo. Dxelezí xe̱ꞌe̱ bénneache, ne dxululéꞌe cuine̱ꞌ ca gubáz chee̱ Cristo.
\v 14 Quebe naca da nigá da xebánedxu laweꞌ da Satanásqueze dxuléꞌe cuina na ca tu gubáz chee̱ xabáa zue̱ꞌ lu xel-la naxaníꞌ chee̱ Dios,
\v 15 naꞌ chee̱ le̱ naꞌ dxululéꞌe cuine̱ꞌ ca benneꞌ dxelún da xrlátaje. Benneꞌ caní xelebía xiꞌe̱ ca ba naca chee̱ benneꞌ dxelún da caní.
\s Da guzaca Pablo laweꞌ da naque̱ꞌ gubáz chee̱ Cristo
\p
\v 16 Xecha lasa dxapaꞌ leꞌe, quebe nu benneꞌ dxal-laꞌ guéquene̱ꞌ nadá xichaj lázrdawaꞌ. Che caꞌan dxéquele leꞌe, le gunna nedaꞌ lataj guchálajle̱naꞌ leꞌe ca tu benneꞌ nadá xichaj lázrdawe̱ꞌ, chee̱ gaca gucáꞌana szren cuinaꞌ.
\v 17 Quebe dxapaꞌ leꞌe da nigá lu xel-la dxenná bea chee̱ Xránadxu. Guchálajaꞌ ca tu benneꞌ nadá xichaj lázrdawe̱ꞌ, nniaꞌ tu da gucáꞌana szren cuinaꞌ.
\v 18 Laweꞌ da zaj zraꞌ benneꞌ zante̱ dxulucáꞌana szren cuine̱ꞌ lu da zaj naque̱ꞌ chee̱ xe̱zr la xu nigá, cáꞌanqueze nedaꞌ gucáꞌana szren cuinaꞌ.
\v 19 Laweꞌ da nácale̱ꞌe̱le benneꞌ sina dxuchaga laule du lázrele benneꞌ zaj nadá xichaj lázrdawe̱ꞌ.
\v 20 Dxuchaga laule benneꞌ caꞌ dxelexune̱ꞌ leꞌe ca benneꞌ zaj nadaꞌu, ne benneꞌ caꞌ dxuluchínene̱ꞌ leꞌe, ne benneꞌ caꞌ dxelenná béꞌene̱ꞌ leꞌe, ne benneꞌ caꞌ dxuluzúe̱ꞌ leꞌe chaláꞌala, ne benneꞌ caꞌ dxelegape̱ꞌ xraga laule.
\v 21 Láqueze dxeduéꞌedaꞌ dxenníaꞌ da nigá, quebe gucaꞌ benneꞌ dxechugu lazreꞌ chee̱ gunaꞌ ca dxelún xezícadxa benneꞌ. Naꞌa gacaꞌ lazreꞌ dxugu gunaꞌ caní.
\q Ba dxelechugu lazreꞌ benneꞌ xezícadxa dxulucáꞌana szren cuine̱ꞌ.
\q Cáꞌanqueze nedaꞌ xechugu lazraꞌ gunaꞌ na, láqueze naca
\q2 tu da ca zeaje da dxenníaꞌ.
\q
\v 22 ¿Zaj naque̱ꞌ benneꞌ hebreo?
\q Cáꞌanqueze nedaꞌ nacaꞌ benneꞌ hebreo.
\q ¿Zaj naque̱ꞌ benneꞌ Israel? Cáꞌanqueze nedaꞌ.
\q ¿Zaj naque̱ꞌ zriꞌine zre sua Abraham? Cáꞌanqueze nacaꞌ nedaꞌ.
\q
\v 23 ¿Zaj naque̱ꞌ we̱n zrin chee̱ Cristo?
\q Nácadxaꞌ nedaꞌ we̱n zrin chee̱ꞌ ca benneꞌ caꞌ,
\q lácala dxuchálajaꞌ ca tu benneꞌ nadá xichaj lázrdawe̱ꞌ gate
\q2 dxenníaꞌ da nigá.
\q Ba be̱ndxaꞌ zrin ca benneꞌ caꞌ.
\q Ba buluzálajdxa bénneache nedaꞌ ca nu bzálaj benneꞌ caꞌ.
\q Ba guleguꞌudxa bénneache nedaꞌ lizre xia ca belune̱ꞌ chee̱ benneꞌ caꞌ,
\q naꞌ zaneꞌ lásate̱ ba guzúaꞌ lu da ste̱be chee̱ xel-la gute.
\q
\v 24 Gazxuꞌ lasa ba belúe benneꞌ judío caꞌ nedaꞌ xide che̱nnu dxua weaj.
\q
\v 25 Chunna lasa beline̱ꞌ nedaꞌ xaga. Tu lasa belúꞌe̱ nedaꞌ xiaj.
\q Chunna lasa guxaze da dxedá laweꞌ nísadauꞌ da xuꞌa lu nisa.
\q Tu lasa, tu zra tu xe̱la guxuꞌa lu nísadauꞌ.
\q
\v 26 Zaneꞌ lásate̱ guxuꞌa neza, ne guzúaꞌ lu da ste̱be:
\q Chee̱ xe̱gu caꞌ, ne chee̱ gubán caꞌ.
\q Chee̱ benneꞌ walázr chiaꞌ caꞌ, ne chee̱ benneꞌ zituꞌ caꞌ.
\q Guzúaꞌ lu da ste̱be lu xe̱zre, ne le̱ꞌe̱ xixreꞌ, ne lu nísadauꞌ,
\q ne ládujla benneꞌ we̱n lazreꞌ dxelenné̱ꞌ zaj naque̱ꞌ bi bíchedxu.
\q
\v 27 Be̱nle̱ꞌa zrin, ne guzúaꞌ lu da ziꞌ da xaꞌ.
\q Zaneꞌ lásate̱ quebe gusiaꞌ dxe̱la.
\q Gudúnle̱ꞌa, ne gubílele̱ꞌe̱daꞌ, naꞌ zaneꞌ lásate̱ be̱naꞌ gubasa.
\q Catite̱ bexagaꞌ, ne bexázrjedaꞌ zra lanaꞌ gacuaꞌ.
\q
\v 28 Da zrendxa ca da caní, ne xezícadxa da guzracaꞌ.
\q Xúgute̱ zra dxéquedaꞌ ziꞌ laweꞌ da zuaꞌ gunne xue chee̱
\q2 xúgute̱ cueꞌ bi chee̱ Cristo.
\q
\v 29 Che nu benneꞌ nate niꞌa ne̱ꞌe̱ lu xel-la dxeajlí lazreꞌ chee̱ꞌ,
\q cáꞌanqueze nedaꞌ dxéquedaꞌ nate niꞌa náꞌaquezaꞌ.
\q Che nu benneꞌ dxelune̱ꞌ dxeajchaze̱ꞌ, nédaꞌqueze dxacaꞌ tul-la.
\q
\v 30 Che dxun na ba xen gucáꞌana szren cuinaꞌ,
\q gucáꞌana szren cuinaꞌ chee̱ da caꞌ dxululéꞌe na nate niꞌa naꞌa.
\m
\v 31 Dios, Xra Xránadxu Jesucristo, Bénneaꞌ naca chee̱ꞌ güe láꞌanatequezdxu Le̱ꞌ, nézene̱ꞌ dxenníaꞌ da li.
\v 32 Gate guzúaꞌ xe̱zre Damasco, benneꞌ wnná bea naꞌ dxuneꞌ zrin chee̱ wenná bea Aretas bzre̱ꞌe̱ benneꞌ dxuluxúe̱ꞌ dxa xuꞌu chee̱ xe̱zre naꞌ, chee̱ xele̱l-le̱ꞌ nedaꞌ.
\v 33 Naꞌ bi bíchedxu caꞌ bululetje̱ꞌ nedaꞌ tu lu xcuite xia ga dxuꞌu leníꞌ chee̱ xuꞌu lu zeꞌe da naxechaj na xe̱zre naꞌ. Caꞌ guca na, guláꞌ lu naꞌ benneꞌ caꞌ.
\c 12
\s Da caꞌ Dios bléꞌene̱ꞌ Pablo
\p
\v 1 Da li quebe dxal-laꞌ gucáꞌana szren cuinaꞌ, san guchálajaꞌ chee̱ da caꞌ bleꞌe Xránadxu nedaꞌ, ne da caꞌ bleꞌedaꞌ ca naca chee̱ꞌ.
\v 2 Nedaꞌ, ca tu benneꞌ dxéajle̱ chee̱ Cristo, ba zeaj chidáꞌ iza guché̱ Dios nedaꞌ xabáa guxunneꞌ. Quebe nezdaꞌ che guxáꞌa naꞌ dute̱ be̱laꞌ dxen chiaꞌ, u che cabí. Dios nézene̱ꞌ.
\v 3 Nezdaꞌ nédaꞌquezaꞌ, che zuaꞌ lu be̱laꞌ dxen chiaꞌ, u che cabí, quebe nezdaꞌ, tuze Dios nézene̱ꞌ.
\v 4 Guché̱ Dios nedaꞌ tu xabáa chee̱ꞌ, naga bendaꞌ dizraꞌ bagache da quebe naca chee̱ bénneache xelenné̱ꞌ ca zaj naca na.
\v 5 Waca gucáꞌana szrenaꞌ tu benneꞌ caní, san quebe gucáꞌana szren cuínaquezaꞌ, che quebe naca na chee̱ xel-la nate niꞌa naꞌ chiaꞌ.
\v 6 Láqueze che gaca lazraꞌ gucáꞌana szren cuinaꞌ quebe gaca na tu da xálaze, laweꞌ da gaca na tu da li. Quebe gunaꞌ na chee̱ quebe nu guéquene̱ꞌ nácadxaꞌ ca da gaca léꞌene̱ꞌ nacaꞌ, u ca da gaca xenne̱ꞌ da dxenníaꞌ.
\p
\v 7 Da caní bleꞌe Xránadxu nedaꞌ gulaca na da xebánele̱ꞌe̱dxu, naꞌ chee̱ quebe gucáꞌana szren cuinaꞌ, guca chiaꞌ ca tu xecheꞌ naxaze lu be̱laꞌ dxen chiaꞌ da dxuchine Satanás chee̱ guzalaj na nedaꞌ.
\v 8 Chunna lasa gutaꞌ xuedaꞌ Xránadxu gucuase̱ꞌ da dxezacaꞌ.
\v 9 Xránadxu guzre̱ꞌ nedaꞌ: “Xela zriꞌi lazreꞌ chiaꞌ naca na dute̱ da dxechínenuꞌ laweꞌ da dxuléꞌedxa lau xel-la waca chiaꞌ nen benneꞌ nate niꞌa ne̱ꞌe̱.” Caꞌ naca, dxebedaꞌ laweꞌ da nate niꞌa naꞌa chee̱ guléꞌe lau lu be̱laꞌ dxen chiaꞌ xel-la waca chee̱ Cristo.
\v 10 Chee̱ le̱ naꞌ dxebedaꞌ ca naca xel-la nate niꞌa naꞌ chiaꞌ, ne ca naca dizraꞌ schanniꞌ caꞌ dxelenná bénneache chiaꞌ, ne ca naca da caꞌ dxexázrjedaꞌ, ne gate zaj nau ziꞌ xuzreꞌ bénneache nedaꞌ, ne ca naca da ba xaꞌ caꞌ da dxedéaꞌ ne̱ chee̱ Cristo, laweꞌ da gate nátedxa niꞌa naꞌa, dxéquedaꞌ nácadxaꞌ benneꞌ wal-la.
\s Pablo dxeꞌe̱ gunne xue chee̱ bi chee̱ Cristo zaj zre̱ꞌe̱ Corinto
\p
\v 11 Gucaꞌ ca tu benneꞌ nadá xichaj lázrdaweꞌ gate bcaꞌana szren cuinaꞌ caní, san leꞌe be̱nle be̱naꞌ na. Leꞌe naꞌ dxal-laꞌ gucáꞌanale nedaꞌ szren laweꞌ da quebe zacaꞌ látezdxa ca benneꞌ gubáz zren caꞌ, benneꞌ caꞌ dxéajle̱le, láqueze quebe bi zacaꞌ nedaꞌ.
\v 12 Zrin be̱naꞌ ládujla leꞌe lu dute̱ xel-la zren lazreꞌ chiaꞌ bleꞌe na da li nacaꞌ gubáz chee̱ Cristo ne̱ chee̱ da dxelunna bea na, ne xel-la waca caꞌ chee̱ xabáa, ne da caꞌ dxexebánedxu.
\v 13 ¿Dxéquele leꞌe nácale látezdxa blau ca xezícadxa cueꞌ bi chee̱ Cristo laweꞌ da guzíꞌ lu naꞌa da belunne̱ꞌ chiaꞌ, naꞌ quebe guzíꞌ lu naꞌa da zaj naca chee̱le? Le gunite lau nedaꞌ che naca tu da cale̱la quebe be̱nnaꞌ leꞌe lataj bi gúnnale chiaꞌ.
\p
\v 14 Naꞌa ba zuaꞌ xidaꞌ xedajnnáꞌa leꞌe da guxunneꞌ lasa, ne quebe siꞌ lu naꞌa da zaj naca na chee̱le. Quebe dxexílajaꞌ da nápale, san léꞌequeze, laweꞌ da dxal-laꞌ xulucude xruze xrnaꞌ dumí da xulunézruje̱ꞌ zríꞌine̱ꞌ, ne quegá xulucude zríꞌine̱ꞌ da xulunézrujbeꞌ xra xrnabeꞌ.
\v 15 Du lazraꞌ guchínedaꞌ dumí chiaꞌ chee̱ gaca chaweꞌ chee̱ bénneꞌdu xuꞌule, láqueze dxéquedaꞌ gate nazríꞌidxedaꞌ leꞌe, látezdxa nazriꞌile leꞌe nedaꞌ.
\p
\v 16 Bal-la benneꞌ, láqueze zaj nézene̱ꞌ quebe bi guzíꞌ lu naꞌa da zaj naca na chee̱le, dxelenné̱ꞌ gude̱l-laꞌ leꞌe lu da we̱n lazreꞌ.
\v 17 ¿Guzí xe̱ꞌa leꞌe lu naꞌ tu benneꞌ gusel-laꞌ chee̱le?
\v 18 Gutaꞌ xuedaꞌ Tito xídabeꞌ xedajnnáꞌabeꞌ leꞌe, ne gusel-laꞌ nen le̱beꞌ xetú bi bíchedxu. ¿Guzí xe̱ Tito leꞌe? ¿Quebe be̱ntuꞌ tuze ca be̱ntuꞌ ládujla leꞌe nedaꞌ, ne Tito, naꞌ nen tuze Beꞌ Láꞌazxa?
\p
\v 19 Bi bichaꞌ nazriꞌite̱ lazraꞌ, ¿dxéquele dxucáꞌana cuínantuꞌ xrlátaje laule leꞌe? Dxuchálajle̱ntuꞌ leꞌe lau Dios, ne lu La Xránadxu Jesucristo. Xúgute̱ da caní dxennantuꞌ chee̱ gúlale lu da naca chee̱ Dios.
\v 20 Dxezrebaꞌ gate xidaꞌ xedajnnáꞌa leꞌe, waléꞌedaꞌ leꞌe quebe nácale cáte̱ze dxaca lazraꞌ gácale, naꞌ leꞌe waléꞌele nedaꞌ quebe nacaꞌ da dxaca lázrele gacaꞌ. Dxezrebaꞌ dxedíl-lale̱le ljwézrele, ne nácale xa lazreꞌ, ne dxezráꞌale ljwézrele, ne nácale zide lazreꞌ, ne nácale wetupa dizraꞌ bizruj, ne dxezí tízrale ljwézrele, ne dxucáꞌana szren cuínale, ne dxunle da cale̱la.
\v 21 Dxezrebaꞌ gate xidaꞌ xedajnnáꞌa leꞌe, Dios gune̱ꞌ xeduéꞌedaꞌ ne̱ chee̱le leꞌe, da gucuezre na nedaꞌ ne̱ chee̱ zánele leꞌe, benneꞌ caꞌ dxelúntequeze̱ꞌ dul-la, ne quebe dxulusane̱ꞌ dxelune̱ꞌ da sban, ne da dxulucáꞌana sban ljwezre̱ꞌ, ne da cale̱la da tu dxelúnzqueze̱ꞌ.
\c 13
\s Dizraꞌ bze̱be
\p
\v 1 Da nigá naca na da guxunneꞌ lasa xidaꞌ xedajnnáꞌa leꞌe. Xúgute̱ dxuléꞌe lawe na naca na da li ne̱ chee̱ dizraꞌ chee̱ chupa u chunna benneꞌ xelexeche̱be̱ꞌ.
\v 2 Benneꞌ caꞌ belune̱ꞌ dul-la nédxula, ne xúgute̱le leꞌe, dxácate̱ ne zuaꞌ zituꞌ naga zrale, dxuzendaꞌ leꞌe da xula ca da guchaꞌ leꞌe gate bedajnnáꞌa leꞌe da gudxupeꞌ lasa, che xidaꞌ xedajnnáꞌa leꞌe da xula quebe gudéaꞌ cáꞌaze ca da ba nunle.
\v 3 Nadxa léꞌele da guléꞌe na dxenné̱ Cristo lu dxuꞌa nedaꞌ, naꞌ Le̱ꞌ quebe nate niꞌa ne̱ꞌe̱ lu da gune̱ꞌ chee̱le, san naque̱ꞌ benneꞌ wal-la ládujla leꞌe.
\v 4 Da li gudé̱ꞌe̱ xaga béguaj ca tu benneꞌ nate niꞌa ne̱ꞌe̱, san naca bane̱ꞌ ne̱ chee̱ xel-la waca chee̱ Dios. Cáꞌanqueze netuꞌ nate niꞌa nantuꞌ ca da guca chee̱ꞌ, san laweꞌ da nácantuꞌ tuze nen Le̱ꞌ gaca bantuꞌ ne̱ chee̱ xel-la waca chee̱ Dios chee̱ guntuꞌ zrin chee̱le leꞌe.
\p
\v 5 Le guxúe xanneꞌ cuínale chee̱ gueque beꞌele che da li dxeajlí lázrele Cristo. Le guxúequeze cuínale. ¿Quebe dxeque beꞌele zua Jesucristo xichaj lázrdaule, che da li dxeajlí lázrele Le̱ꞌ?
\v 6 Dxebeza lazraꞌ gueque beꞌele quebe nacaꞌ nedaꞌ benneꞌ we̱n lazreꞌ lu da nacaꞌ chee̱ Cristo.
\v 7 Dxenábantuꞌ lau Dios chee̱ quebe bi da cale̱la gunle, quegá chee̱ guléꞌentuꞌ dxennantuꞌ da li, san chee̱ gunle leꞌe da xrlátaje, láqueze dxéquele leꞌe quebe dxennantuꞌ da li.
\v 8 Quebe bi gaca guntuꞌ da dxedábaga na da li, san tuze da dxácale̱ na da li.
\v 9 Chee̱ le̱ naꞌ dxebentuꞌ gate nate niꞌa nantuꞌ, che leꞌe nácale benneꞌ wal-la, naꞌ nábaquezentuꞌ Dios chee̱ gácale dute̱ da dxal-laꞌ xelaca bi chee̱ Dios.
\v 10 Dxuzúajaꞌ chee̱le da nigá nédxula ca xidaꞌ xedajnnáꞌa leꞌe, chee̱ quebe gun na ba xen gate xidaꞌ, gácale̱ꞌa benneꞌ snia ca guchínedaꞌ xel-la dxenná bea chiaꞌ, da be̱nna Xránadxu nedaꞌ chee̱ séquedaꞌ gusegulaꞌ leꞌe lu da naca chee̱ Dios, ne quegá chee̱ guzría xiꞌa leꞌe.
\p
\v 11 Naꞌa, bi bichaꞌ, le sua xel-la dxebé. Le gaca dute̱ da dxal-laꞌ xelaca bi chee̱ Dios. Le xue zren ljwézrele. Le gaca tuze tule xetule, ne le sua xel-la dxebeza zri lazreꞌ, naꞌ Dios, Bénneaꞌ dxunne̱ꞌ dxiꞌu xel-la dxebeza zri lazreꞌ, ne nazríꞌine̱ꞌ dxiꞌu súale̱ne̱ꞌ leꞌe.
\v 12 Le gugapa diuzre ljwézrele tule xetule, ne le gunida ljwézrele.
\v 13 Xúgute̱ bi bíchedxu, bi chee̱ Cristo dxulugape̱ꞌ leꞌe diuzre.
\p
\v 14 Dxaca lazraꞌ gucáꞌana Xránadxu Jesucristo leꞌe chaweꞌ, ne zriꞌi Dios leꞌe, ne sua tuze Beꞌ Láꞌazxa nen leꞌe. ¡Caꞌan gaca na!