\id GAL
\h Gálatas
\mt DIZRAꞌ BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZR LA XU GALACIA
\c 1
\s Dizraꞌ da bzuaj Pablo chee̱ bi chee̱ Cristo zaj zre̱ꞌe̱ xe̱zr la xu Galacia
\p
\v 1 Nedaꞌ, Pablo, nacaꞌ gubáz chee̱ Cristo. Quebe gulesel-la bénneache nedaꞌ, ne quegá buluzúa bénneache nedaꞌ gacaꞌ gubáz. Caní bé̱nqueze Jesucristo chiaꞌ, ne Xradxu Dios, Bénneaꞌ bsebane̱ꞌ Jesús ládujla benneꞌ gate.
\v 2 Xúgute̱ benneꞌ bíchedxu zrále̱ne̱ꞌ nedaꞌ zaj naque̱ꞌ nedaꞌ tuze. Nedaꞌ dxuzúajaꞌ dizraꞌ nigá chee̱ xúgute̱ cueꞌ benneꞌ bíchedxu zaj zre̱ꞌe̱ xe̱zre caꞌ zaj nnitaꞌ xe̱zr la xu Galacia.
\v 3 Dxenabaꞌ lau Xradxu Dios, ne lau Xránadxu Jesucristo gun chawe̱ꞌe̱ leꞌe, ne gunne̱ꞌ leꞌe xel-la dxebeza zri lazreꞌ.
\v 4 Jesucristo bzane cuine̱ꞌ chee̱ gutie̱ꞌ ne̱ chee̱ dul-la da nabágadxu, chee̱ bselé̱ꞌ dxiꞌu lu da naca chee̱ xe̱zr la xu nigá da naca na da cale̱la. Be̱ne̱ꞌ da guca lazreꞌ Xradxu Dios.
\v 5 ¡Gaca báqueze Dios chadía chacanna! ¡Caꞌan gaca na!
\s Quebe de̱ xetú dizraꞌ chaweꞌ chee̱ Dios
\p
\v 6 Dxexebánele̱ꞌe̱daꞌ chee̱le leꞌe laweꞌ da dxebéaj xíchajte̱le Dios, Bénneaꞌ gunné̱ꞌ leꞌe chee̱ siꞌ lu naꞌle da dxunna Cristo, naꞌ dxezíꞌ lu naꞌle tu dizraꞌ nazrala ca naca dizraꞌ chaweꞌ chee̱ Cristo.
\v 7 Da li quebe bi de̱ xetú dizraꞌ chaweꞌ, san zaj zraꞌ bal-la benneꞌ dxelún zréajene̱ꞌ leꞌe, ne dxelaca lazre̱ꞌ xuluchuque̱ꞌ dizraꞌ chaweꞌ chee̱ Cristo.
\v 8 Che nu benneꞌ dxuzenne̱ꞌ leꞌe xetú dizraꞌ da nazrala ca naca dizraꞌ chaweꞌ da ba bzénentuꞌ leꞌe, dxenabaꞌ lau Dios cue̱ꞌe̱ bénneaꞌ deꞌ, lácala naca nedaꞌ, u naca tu gubáz chee̱ xabáa.
\v 9 Báchequeze bzendaꞌ leꞌe, ne dxuzendaꞌ leꞌe da xula, che nu benneꞌ guzenne̱ꞌ leꞌe tu dizraꞌ da nazrala ca naca dizraꞌ chaweꞌ da ba guzíꞌ lu naꞌle, dxenabaꞌ lau Dios cue̱ꞌe̱ bénneaꞌ deꞌ.
\p
\v 10 Gate dxenniaꞌ da nigá, ¿Dxaca lazraꞌ xegáꞌanaꞌ xrlátaje lau bénneache, u che lau Dios? ¿Dxaca lazraꞌ gunaꞌ da xelezaca ba lazreꞌ bénneache? Che caꞌan dxaca lazraꞌ gunaꞌ da dxelezaca ba lazreꞌ bénneache, quebe nacaꞌ we̱n zrin chee̱ Cristo.
\s Ca bexaca Pablo gubáz chee̱ Cristo
\p
\v 11 Dxuzéajniꞌidaꞌ leꞌe, bi bichaꞌ, dizraꞌ chaweꞌ da dxuzendaꞌ bénneache, naꞌ quebe naca na tu da gulaj na lu xichaj lázrdau bénneache.
\v 12 Quebe nu benneꞌ be̱nne̱ꞌ na nedaꞌ, ne quegá nu benneꞌ bsé̱dene̱ꞌ nedaꞌ le̱ na, san Lé̱queze Jesucristo bzenne̱ꞌ na nedaꞌ.
\p
\v 13 Ba bénquezle ca be̱naꞌ nedaꞌ nédxula gate naꞌ nazíꞌ lu naꞌa xel-la benneꞌ xudauꞌ chee̱ judío caꞌ, ca gudáu ziꞌ xuzraꞌ bi chee̱ Dios zaj nácabeꞌ bi chee̱ Cristo, ne be̱n ziꞌ lazraꞌ guzría xiꞌa-beꞌ.
\v 14 Lu xel-la benneꞌ xudauꞌ chee̱ judío caꞌ, nedaꞌ ba bzruéꞌedxedaꞌ ca xúgute̱ bi walázr chiaꞌ, bi ljwezraꞌ caꞌ, laweꞌ da be̱ lázredxaꞌ gapaꞌ ca da xjácale̱ xra xrtawaꞌ caꞌ.
\v 15 Dios guqué̱ꞌe̱ nedaꞌ nédxula gate za gálajaꞌ, naꞌ lu xel-la zriꞌi lazreꞌ chee̱ꞌ gunné̱ꞌ nedaꞌ. Nadxa gate guca lazreꞌ Le̱ꞌ,
\v 16 bléꞌene̱ꞌ nedaꞌ Zríꞌine̱ꞌ, chee̱ guzendaꞌ benneꞌ caꞌ quebe zaj naque̱ꞌ judío ca naca chee̱ Zríꞌine̱ꞌ. Gate guca da nigá, quebe nu benneꞌ gunábedaꞌ,
\v 17 ne quebe guxáꞌa Jerusalén cheajnábedaꞌ benneꞌ zaj naque̱ꞌ gubáz chee̱ Cristo nédxudxa ca nedaꞌ. Guxáꞌa naga nababa xe̱zr la xu Arabia, naꞌ gudé naꞌ bezrinaꞌ xe̱zre Damasco.
\p
\v 18 Gudé chun iza guxáꞌa Jerusalén, chee̱ xeajchálajle̱naꞌ Pedro, naꞌ begáꞌanale̱naꞌ le̱ꞌ xtaꞌ gubizra.
\v 19 Quebe nu bleꞌedaꞌ xetú benneꞌ gubáz chee̱ Cristo, san tuze Jacobo, bi biche Xránadxu.
\v 20 Ne̱ chee̱ La Dios dxapaꞌ leꞌe, da li naca da nigá dxuzúajaꞌ chee̱le leꞌe.
\p
\v 21 Ca gudé naꞌ guxáꞌa xe̱zre caꞌ zaj nababa xe̱zr la xu Siria, ne xe̱zre caꞌ zaj nababa xe̱zr la xu Cilicia.
\v 22 Benneꞌ bíchedxu caꞌ, bi chee̱ Cristo zaj zre̱ꞌe̱ xe̱zr la xu Judea quebe zaj nunbeꞌe̱ nedaꞌ.
\v 23 Belénzene̱ꞌ nu dxenná: “Bénneaꞌ nédxula gudáu ziꞌ xuzre̱ꞌ dxiꞌu, naꞌa dxuchálaje̱ꞌ dizraꞌ chaweꞌ chee̱ xel-la dxeajlí lazreꞌ Cristo, da naꞌ guca lazre̱ꞌ guzría xiꞌe̱ nédxute̱.”
\v 24 Naꞌa dxelúe láꞌane̱ꞌ Dios ca da belenne̱ꞌ ca naca chiaꞌ.
\c 2
\s Benneꞌ gubáz caꞌ dxelezíꞌ lu ne̱ꞌe̱ Pablo
\p
\v 1 Ca gudé chidáꞌ iza guxáꞌa xecha lasa Jerusalén nen Bernabé, naꞌ be̱n bi Tito nedaꞌ tu zren.
\v 2 Guxáꞌa naꞌ laweꞌ da bleꞌe Dios nedaꞌ dxal-laꞌ chaꞌa naꞌ. Naꞌ cheé̱zela bchálajle̱naꞌ benneꞌ caꞌ zaj naque̱ꞌ blau ládujla bi chee̱ Cristo, ne bzendaꞌ le̱ꞌ dizraꞌ chaweꞌ da dxuchálajaꞌ ládujla benneꞌ caꞌ quebe zaj naque̱ꞌ judío. Be̱naꞌ caní chee̱ nezdaꞌ quebe guca dácheze zrin da ba be̱naꞌ, ne da dxunaꞌ.
\v 3 Gulezíꞌ lu ne̱ꞌe̱ zrin nunaꞌ, naꞌ quebe nu gunná beꞌe Tito, bi zále̱beꞌ nedaꞌ, chugu lu be̱laꞌ chee̱beꞌ da guléꞌe na nácabeꞌ bi chee̱ Dios, lácala quebe nácabeꞌ judío.
\v 4 Bal-la benneꞌ quebe zaj naque̱ꞌ du lazreꞌ benneꞌ bíchedxu, benneꞌ guluꞌe̱ ládujla dxiꞌu lu da we̱n lazreꞌ, gulaca lazre̱ꞌ chugu da guléꞌe na lu be̱laꞌ chee̱ Tito. Benneꞌ caní guluꞌe̱ ládujla dxiꞌu chee̱ xelenézene̱ꞌ ájala xelegúe̱ꞌ lataj da nazidxu lu naꞌ Jesucristo, chee̱ xuluxuzúe̱ꞌ dxiꞌu ca benneꞌ zaj nadaꞌu lu da bdxixruj bea Moisés.
\v 5 Ne chite̱ze quebe be̱ntuꞌ le̱ꞌ lataj xelegúꞌu xel-le̱ꞌ netuꞌ laweꞌ da guca lázrentuꞌ xegáꞌanale̱ leꞌe da li dizraꞌ chaweꞌ chee̱ Cristo.
\p
\v 6 Benneꞌ caꞌ zaj naque̱ꞌ blau quebe bi da cube bulusebague̱ꞌ netuꞌ. Da zaj naque̱ꞌ quebe bi naca na chiaꞌ laweꞌ da quebe xuchíꞌa Dios ca da naláꞌ láweze chee̱ bénneache.
\v 7 Quebe bi bulusebague̱ꞌ nedaꞌ, laweꞌ da belexúnbeꞌe̱ Diósqueze bsebague̱ꞌ nedaꞌ guzendaꞌ benneꞌ caꞌ quebe zaj naque̱ꞌ judío dizraꞌ chaweꞌ, cáte̱ze bsebague̱ꞌ Pedro guzenne̱ꞌ benneꞌ judío caꞌ dizraꞌ chaweꞌ.
\v 8 Lé̱queze Dios naꞌ, Bénneaꞌ bzue̱ꞌ Pedro gubáz chee̱ꞌ ládujla benneꞌ judío caꞌ, cáꞌanqueze bzue̱ꞌ nedaꞌ gacaꞌ gubáz chee̱ꞌ ládujla benneꞌ quebe zaj naque̱ꞌ judío.
\p
\v 9 Chee̱ le̱ naꞌ, Jacobo, ne Pedro, ne Juan, benneꞌ zaj naque̱ꞌ blaudxa, belexúnbeꞌe̱ be̱n Dios nedaꞌ culuén nigá, naꞌ gulezíꞌ lu ne̱ꞌe̱ nedaꞌ, ne Bernabé, naꞌ belune̱ꞌ tuze dizraꞌ cheajzentuꞌ netuꞌ benneꞌ caꞌ quebe zaj naque̱ꞌ judío dizraꞌ chaweꞌ, dxácate̱ naꞌ le̱ꞌ xuluzenne̱ꞌ na benneꞌ judío caꞌ.
\v 10 Túte̱ze da gulenábene̱ꞌ netuꞌ xexache lázrentuꞌ benneꞌ xacheꞌ caꞌ, da naꞌ dxue lazraꞌ dxunaꞌ.
\s Pablo dxedil-le̱ꞌ Pedro lu xe̱zre Antioquía
\p
\v 11 Gate blaꞌ Pedro xe̱zre Antioquía gudil-laꞌ le̱ꞌ caníqueze laweꞌ da gunegue lazre̱ꞌ.
\v 12 Nédxute̱ gudágule̱ne̱ꞌ benneꞌ caꞌ quebe zaj naque̱ꞌ judío cadxa beleláꞌ bal-la benneꞌ gusel-la Jacobo. Nadxa bebigue̱ꞌe̱ chaláꞌala, ne bsane̱ꞌ québedxa gudágule̱ne̱ꞌ benneꞌ caꞌ laweꞌ da bzrebe̱ꞌ judió caꞌ, benneꞌ caꞌ zaj nadxugu lu be̱laꞌ chee̱ꞌ da dxuléꞌe na.
\v 13 Nadxa xezícadxa judío caꞌ zaj naque̱ꞌ bi chee̱ Cristo belune̱ꞌ tu zren Pedro lu da dxune̱ꞌ láweze. Caní belune̱ꞌ, naꞌ caꞌ be̱nte̱ Bernabé tu zren benneꞌ caꞌ lu da naꞌ dxelune̱ꞌ láweze.
\v 14 Gate bleꞌedaꞌ nedaꞌ quebe dxelune̱ꞌ cáte̱ze naca chee̱ da li chee̱ dizraꞌ chaweꞌ chee̱ Cristo, naꞌ guchaꞌ Pedro lau xúgute̱ benneꞌ caꞌ: Lueꞌ nacuꞌ judío, naꞌ benuꞌ ca tu benneꞌ quebe naque̱ꞌ judío, ne quebe be̱nuꞌ ca tu benneꞌ judío. ¿Bizr chee̱ naꞌ dxenná beꞌenuꞌ benneꞌ quebe zaj naque̱ꞌ judío xelune̱ꞌ ca dxelún benneꞌ judío?
\s Benneꞌ judío xelelé̱ꞌ che dxeajlí lazre̱ꞌ Cristo ca dxaca chee̱
 xezícadxa benneꞌ
\p
\v 15 Cáꞌanqueze guchaꞌ-ne̱ꞌ: Dxiꞌu nácadxu benneꞌ judío laweꞌ da nálajdxu caꞌ, ne quebe nácadxu benneꞌ dul-la ca benneꞌ zaj nababa xezícadxa xe̱zr la xu caꞌ.
\v 16 Nézedxu netú benneꞌ quebe xegáꞌane̱ꞌ xrlátaje lau Dios laweꞌ da nune̱ꞌ da bdxixruj beꞌe Moisés, san tuze che dxeajlí lazre̱ꞌ Jesucristo. Chee̱ le̱ naꞌ cáꞌanqueze dxiꞌu dxeajlí lázredxu Cristo chee̱ xegáꞌanadxu xrlátaje lau Dios ne̱ chee̱ xel-la dxeajlí lazreꞌ chee̱dxu Cristo, ne quegá laweꞌ da be̱ndxu ca nadxixruj bea na. Netú benneꞌ quebe xegáꞌane̱ꞌ xrlátaje lau Dios laweꞌ da nune̱ꞌ da nadxixruj bea na.
\p
\v 17 Naꞌa, che dxiꞌu dxuxrén lázredxu nagáꞌanadxu xrlátaje lau Dios ne̱ chee̱ Cristo, ne che zua da dxuléꞌe na ne nácadxu benneꞌ dul-la, ¿nnadxu Cristo dxunne̱ꞌ dxiꞌu lataj gundxu dul-la laweꞌ da québedxa dxenná beꞌe da bdxixruj beꞌe Moisés dxiꞌu? ¡Cabataꞌ!
\v 18 Che dxuchínnajaꞌ tu, naꞌ che te naꞌ xexunaꞌ na, naꞌ nabagaꞌ zria.
\v 19 Ba nacaꞌ ca tu benneꞌ gate lu da naca chee̱ da nadxixruj bea na. Da nadxixruj béaqueze bleꞌe na nedaꞌ nacaꞌ ca tu benneꞌ gate, chee̱ gaca banaꞌ ne̱ chee̱ da nun Dios.
\v 20 Ba nacaꞌ ca tu benneꞌ gate laweꞌ da naca chiaꞌ ca naca chee̱ tu benneꞌ gudáꞌ xaga béguaj tu zren nen Cristo. Chee̱ le̱ naꞌ, québedxa naca banaꞌ nedaꞌ. Cristo naca bane̱ꞌ lu xichaj lázrdawaꞌ. Xel-la nabán da napaꞌ lu be̱laꞌ dxen chiaꞌ, napaꞌ na ne̱ chee̱ xel-la dxeajlí lazreꞌ chiaꞌ Zriꞌine Dios, Bénneaꞌ bzriꞌine̱ꞌ nedaꞌ, ne bzane cuine̱ꞌ, gutie̱ꞌ waláz chiaꞌ nedaꞌ.
\v 21 Quebe dxaca lazraꞌ guzúaꞌ chaláꞌala xel-la zriꞌi lazreꞌ chee̱ Dios. Che nu benneꞌ gaca xegáꞌane̱ꞌ xrlátaje lau Dios laweꞌ da nune̱ꞌ da nadxixruj bea na, naꞌ dácheze guca da be̱n Cristo gate gutie̱ꞌ.
\c 3
\s Dxezidxu Beꞌ Láꞌazxa ne̱ chee̱ xel-la dxeajlí lazreꞌ
\p
\v 1 Bi bichaꞌ, zrale Galacia, nácale leꞌe benneꞌ xala caꞌ. ¿Zua nu benneꞌ dxezí xe̱ꞌe̱ leꞌe chee̱ québedxa guzúale dizraꞌ chee̱ da li? Ba bléꞌentuꞌ leꞌe caníqueze Jesucristo, ca gudé̱ꞌe̱ le̱ꞌe̱ xaga béguaj.
\v 2 Le xe̱xque nedaꞌ: ¿Guzile Beꞌ Láꞌazxa laweꞌ da be̱nle da bdxixruj beꞌe Moisés, u laweꞌ da guxéajle̱le chee̱ da bénnele?
\v 3 ¿Ájala chee̱ naꞌ nácale benneꞌ xala? ¿Dxéquele gunle gácale dute̱ da naꞌ guzú laule gácale ne̱ chee̱ Beꞌ Láꞌazxa?
\v 4 ¿Dácheze gudele zánete̱ xel-la ziꞌ caꞌ? Dxaca lazraꞌ quebe guca na níteze.
\v 5 Gate Dios dxunne̱ꞌ leꞌe Beꞌ Láꞌazxa chee̱ꞌ, ne dxune̱ꞌ xel-la waca caꞌ chee̱ xabáa ládujla leꞌe, ¿dxune̱ꞌ na laweꞌ da dxunle ca nadxixruj bea na, u laweꞌ da guxéajle̱le chee̱ dizraꞌ chaweꞌ da bénnele?
\p
\v 6 Abraham guxeajlí lazre̱ꞌ Dios, naꞌ Dios guzíꞌ lu ne̱ꞌe̱ da nigá ca tu da bcaꞌana le̱ꞌ xlátaje̱.
\v 7 Chee̱ le̱ naꞌ dxal-laꞌ nézele, benneꞌ caꞌ da li zaj naque̱ꞌ zriꞌine zre sua Abraham zaj naque̱ꞌ benneꞌ dxeleajlí lazre̱ꞌ Dios.
\v 8 Naxúaj na lu dizraꞌ láꞌazxa ca naca da nigá. Laweꞌ da neze Dios nédxute̱ gucáꞌane̱ꞌ xlátaje̱ benneꞌ quebe zaj naque̱ꞌ judío, benneꞌ xeleajlí lazre̱ꞌ Le̱ꞌ, naꞌ guzre̱ꞌ Abraham nédxute̱ dizraꞌ chaweꞌ nigá, gunné̱ꞌ: “Gaca chaweꞌ chee̱ benneꞌ dute̱ xe̱zr la xu ne̱ chiuꞌ lueꞌ.”
\v 9 Caꞌan naca, dxaca chaweꞌ chee̱ benneꞌ dxeleajlí lazre̱ꞌ Dios tu zren nen Abraham, bénneaꞌ guxeajlí lazre̱ꞌ Dios.
\p
\v 10 Benneꞌ caꞌ dxuluxrén lazre̱ꞌ zaj nagáꞌane̱ꞌ xrlátaje lau Dios laweꞌ da zaj nune̱ꞌ ca da nadxixruj beꞌe Moisés zaj xuꞌe̱ deꞌ laweꞌ da naxúaj lu dizraꞌ láꞌazxa da dxenná na: Zaj xuꞌu deꞌ xúgute̱ benneꞌ quebe dxelúnqueze̱ꞌ xúgute̱ da nadxixruj bea na, da naꞌ naxúaj na lu xiche láꞌazxa.
\v 11 Dxunna bea na netú benneꞌ quebe xegáꞌane̱ꞌ xrlátaje lau Dios laweꞌ da nune̱ꞌ da nadxixruj bea na laweꞌ da naxúaj lu xiche láꞌazxa da dxenná na: Bénneaꞌ nagáꞌane̱ꞌ xrlátaje lau Dios gataꞌ chee̱ꞌ xel-la nabán li lazreꞌ che dxeajlí lazre̱ꞌ Dios.
\v 12 Bénneaꞌ dxune̱ꞌ ca bdxixruj beꞌe Moisés quebe dxune̱ꞌ na ne̱ chee̱ xel-la dxeajlí lazreꞌ chee̱ꞌ laweꞌ da naxúaj da dxenná na: Benneꞌ dxune̱ꞌ xúgute̱ da caní gaca bane̱ꞌ ne̱ chee̱ le̱ na.
\p
\v 13 Cristo bselé̱ꞌ dxiꞌu lu deꞌ da xuꞌu nu quebe dxun da nadxixruj bea na laweꞌ da guxúꞌuqueze̱ꞌ deꞌ waláz chee̱dxu cáte̱ze naxúaj lu dizraꞌ láꞌazxa da dxenná na: Xuꞌu deꞌ bénneaꞌ de̱ꞌe̱ le̱ꞌe̱ xaga.
\v 14 Da nigá guca na chee̱ gaca gun Dios xrlátaje benneꞌ caꞌ quebe zaj naque̱ꞌ benneꞌ judío, da naꞌ guche̱be lazre̱ꞌ gune̱ꞌ lau Abraham ne̱ chee̱ Jesucristo, naꞌ chee̱ siꞌ lu nnadxu xúgute̱dxu Beꞌ Láꞌazxa ne̱ chee̱ xel-la dxeajlí lazreꞌ chee̱dxu ca da guche̱be lazreꞌ Dios.
\s Da naca chee̱ da nadxixruj bea na, ne da naca chee̱
 da guche̱be lazreꞌ Dios
\p
\v 15 Bi bichaꞌ, dxuléꞌedaꞌ leꞌe ca da dxaca chee̱ bénneache. Gate tu benneꞌ dxune̱ꞌ tu xel-la wezría, ne ba bzuajte̱ꞌ láqueze̱ꞌ lawe na, netú benneꞌ quebe gaca guchínnaje̱ꞌ na, ne quebe bi gaca gudé̱ꞌe̱ chee̱ na.
\v 16 Dios guche̱be lazre̱ꞌ da gune̱ꞌ chee̱ Abraham, ne chee̱ zriꞌine zre sue̱ꞌ. Quebe dxenná na: Chee̱ zriꞌine zre sue̱ꞌ caꞌ, da naca na chee̱ benneꞌ zan, san dxenná na: Chee̱ zriꞌine zre suꞌ, da naca na chee̱ tuze benneꞌ, bénneaꞌ naque̱ꞌ Cristo.
\v 17 Da dxenniaꞌ naca na da nigá: Dios be̱ne̱ꞌ tu xel-la wezría nen Abraham, ne bcaꞌana chawe̱ꞌ na. Chee̱ le̱ naꞌ, da bdxixruj beꞌe Moisés da blaꞌ na ca gudé tapa gaxúa chi dxua iza quebe gaca guchinnaj na xel-la wezría naꞌ, u xucáꞌana na dácheze da guche̱be lazreꞌ Dios.
\v 18 Che dxezidxu da dxunna Dios che dxundxu ca da bdxixruj beꞌe Moisés, quebe naca na tu da nache̱be lazreꞌ Dios, san da li Dios guche̱be lazre̱ꞌ gunézruje̱ꞌ na cáꞌaze chee̱ Abraham.
\p
\v 19 Naꞌa xcaꞌ, ¿bizra dxun da bdxixruj beꞌe Moisés? Dios bnézruje̱ꞌ da naꞌ gudé naꞌ chee̱ guléꞌe na ca naca xtul-la bénneache cadxa xeláꞌ zriꞌine zre sua Abraham naꞌ, Bénneaꞌ guche̱be lazreꞌ Dios gune̱ꞌ da xrlátaje chee̱ꞌ. Dios gusel-le̱ꞌ da gunná béꞌene̱ꞌ lu naꞌ gubáz chee̱ xabáa chee̱ꞌ, naꞌ Moisés guque̱ꞌ benneꞌ dxudé dizraꞌ chee̱n.
\v 20 Quebe dxun na ba xen nu benneꞌ gudé dizraꞌ gate naca na chee̱ tuze benneꞌ, naꞌ Dios naque̱ꞌ tuze, Bénneaꞌ guche̱be lazre̱ꞌ chee̱ Abraham ca da gune̱ꞌ.
\s Da dxun da bdxixruj beꞌe Moisés
\p
\v 21 ¿Nnadxu dxedábaga da bdxixruj beꞌe Moisés da naꞌ guche̱be lazreꞌ Dios? ¡Cabataꞌ! Che da nadxixruj bea na da bnezruj Dios gaca gunna na xel-la nabán chee̱ bénneache, naꞌ gaca xegáꞌana xrlátaje lau Dios tu benneꞌ che gune̱ꞌ ca da nadxixruj bea na naꞌ.
\v 22 Dxenná na lu dizraꞌ láꞌazxa, xúgute̱ bénneache zaj nabague̱ꞌ dul-la chee̱ gaca xelezíꞌ lu ne̱ꞌe̱ da guche̱be lazreꞌ Dios gunne̱ꞌ benneꞌ caꞌ xeleajlí lazre̱ꞌ Jesucristo.
\p
\v 23 Nédxudxa ca bzrin zra gaca nu cheajlí lazre̱ꞌ Cristo, ne̱ chee̱ da nadxixruj bea na, xúgute̱dxu, benneꞌ judío, gúcadxu ca benneꞌ zaj xuꞌe̱ lizre xia, laweꞌ da xadíaze be̱ndxu ca dxenná da nadxixruj bea na, naꞌ gulézadxu ca bzrin zra guca cheajlí lázredxu Cristo.
\v 24 Da nadxixruj bea na gunná beꞌe na dxiꞌu, ca dxun tu benneꞌ dxusegule̱ꞌ bidauꞌ chee̱ benneꞌ xula cadxa bzrin zra blaꞌ Cristo, chee̱ xegáꞌanadxu xrlátaje lau Dios gate guxeajlí lázredxu Cristo.
\v 25 Naꞌa laweꞌ da ba bzrin zra gaca cheajlí lázredxu Cristo, québedxa xúꞌudxu lu naꞌ da nadxixruj bea na da naca na chee̱dxu ca tu benneꞌ dxusegule̱ꞌ bidauꞌ.
\p
\v 26 Xúgute̱le naꞌ dxeajlí lázrele Jesucristo nácale tuze nen Le̱ꞌ. Chee̱ le̱ naꞌ nácale bi chee̱ Dios.
\v 27 Xúgute̱le leꞌe naꞌ gudxúale nisa chee̱ gácale tuze nen Cristo, Le̱ꞌ naque̱ꞌ chee̱le ca tu ladxeꞌ nácule.
\v 28 Québedxa dxeléꞌe Dios leꞌe ca benneꞌ judío, u benneꞌ quebe naque̱ꞌ judío, u ca benneꞌ nadaꞌu, u benneꞌ quebe nadaꞌu, u ca benneꞌ biu, u nuꞌula. Dxeléꞌene̱ꞌ leꞌe, naca xúgute̱le ca tuze be̱l-laꞌ dxen laweꞌ da nácale tuze nen Jesucristo.
\v 29 Che nácale bi chee̱ Cristo, da li nácale zre sua Abraham, naꞌ gaca chee̱le da guche̱be lazreꞌ Dios gune̱ꞌ.
\c 4
\p
\v 1 Da dxaca lazraꞌ nniaꞌ naca na da nigá: Dxácate̱ ne naca bidauꞌ bi naꞌ gaca chee̱beꞌ da naca chee̱ xrabeꞌ, nácabeꞌ ca bi nadaꞌu xuꞌubeꞌ lu naꞌ xránabeꞌ, lácala da li gácabeꞌ xrane xúgute̱ da de̱ lizre xrabeꞌ.
\v 2 Xuꞌubeꞌ lu naꞌ benneꞌ dxulusé̱dene̱ꞌ-beꞌ, ne lu naꞌ benneꞌ caꞌ xuꞌu lu ne̱ꞌe̱ da naca chee̱beꞌ, cadxa zrin zra guléꞌe xrabeꞌ da li nácabeꞌ zríꞌine̱ꞌ.
\v 3 Cáꞌanqueze dxaca chee̱dxu. Gate ne nácadxu ca bidauꞌ, xúꞌudxu lu naꞌ xúgute̱ da dxelenná bea na lu xe̱zr la xu nigá.
\v 4 Gate bzrin zra ba bleꞌe lau Dios, naꞌ gusel-le̱ꞌ Zríꞌine̱ꞌ, gúlajbeꞌ ne̱ chee̱ tu nuꞌula, naꞌ guxúꞌe̱ lu naꞌ da bdxixruj beꞌe Moisés.
\v 5 Ble̱ꞌe̱ bselé̱ꞌ benneꞌ zaj xuꞌe̱ lu naꞌ da nadxixruj bea na, chee̱ gaca siꞌ lu naꞌ Dios dxiꞌu ca zríꞌinequeze̱ꞌ.
\p
\v 6 Laweꞌ da ba nácale bi chee̱ Dios, Le̱ꞌ gusel-le̱ꞌ Beꞌ Láꞌazxa chee̱ Zríꞌine̱ꞌ lu xichaj lázrdaule, naꞌ dxenná Beꞌ naꞌ: “Abba”, da zéaje̱ na: Xrae.
\v 7 Caꞌan naca, ba nácadxu bi chee̱ Dios, ne québedxa nácadxu ca benneꞌ zaj nadaꞌu lu naꞌ da bdxixruj beꞌe Moisés. Naꞌ laweꞌ da nácadxu bi chee̱ꞌ, Dios gunne̱ꞌ dxiꞌu da de̱ chee̱nꞌ. Caní naca laweꞌ da nácadxu Cristo tuze.
\s Pablo dxeꞌe̱ gunne xue chee̱ bi caꞌ chee̱ Cristo
\p
\v 8 Da líqueze, gate quebe ne gúnbeale Dios, gúcale benneꞌ zaj nadaꞌu chee̱ dios caꞌ, daꞌ quebe zaj nácaqueze dios.
\v 9 Naꞌa gate ba núnbeale Dios, u nnadxu, Dios naꞌ núnbeꞌe̱ leꞌe, ¿ájazra gunle xexúꞌule xecha lasa lu naꞌ da dxelenná bea na lu xe̱zr la xu nigá, da caꞌ quebe zaj zaca?
\v 10 Leꞌe ne dxapa ba láꞌanale bal-la zra caꞌ, ne bal-la beuꞌ caꞌ, ne tu tu iza caꞌ.
\v 11 Dxezrébele̱ꞌa be̱naꞌ zrin níteze ládujla leꞌe gate bzendaꞌ leꞌe dizraꞌ chaweꞌ chee̱ Cristo.
\p
\v 12 Bi bíchaꞌdauꞌ, dxataꞌ xúedaꞌ leꞌe gácale ca nacaꞌ nedaꞌ, québedxa xuꞌa lu naꞌ da nadxixruj bea na, laweꞌ da gúcaquezaꞌ nedaꞌ ca nácale leꞌe. Quegá bi da cale̱la be̱nle chiaꞌ nedaꞌ.
\v 13 Ba nézquezle gate nédxudauꞌ bzendaꞌ leꞌe dizraꞌ chaweꞌ chee̱ Cristo. Guca na gate naꞌ guxuꞌa tu xízrawe̱ꞌ.
\v 14 Xízrawe̱ꞌ naꞌ guca na da gusegute na leꞌe, san leꞌe quebe begútele nedaꞌ, ne quebe bzúale nedaꞌ chaláꞌala, san guzíꞌ lu naꞌle nedaꞌ ca tu gubáz chee̱ xabáa chee̱ Dios, u ca nácquezaꞌ Jesucristo.
\v 15 ¿Bizra guca chee̱ xel-la dxebé da guzúale? Waca nniaꞌ tu da xecáꞌana leꞌe chaweꞌ, la naca da guzéquele gunle, bebéajte̱le xiaj láuquezle, chee̱ gúnnale na nedaꞌ.
\v 16 Naꞌa, ¿bexacaꞌ ca tu benneꞌ dxecuídene̱ꞌ leꞌe laweꞌ da guchaꞌ leꞌe da li?
\p
\v 17 Benneꞌ caꞌ dxelaca lazre̱ꞌ chugu lu be̱laꞌ chee̱le da naꞌ dxuléꞌe na, dxeꞌe̱ gunne xue chee̱le leꞌe, san quegá chee̱ xegáꞌanale chaweꞌ. Da dxelaca lazre̱ꞌ naca na xulucuase̱ꞌ leꞌe nen netuꞌ chee̱ cuele gunne xue chee̱ le̱ꞌ.
\v 18 Naca chaweꞌ cuedxu gunne xue chee̱ benneꞌ xula chee̱ xegáꞌane̱ꞌ chaweꞌ, ne quegaze gate zúale̱naꞌ leꞌe.
\v 19 Zríꞌinaꞌdauꞌ, naca chiaꞌ ca zuaꞌ lu xel-la dxudía ne̱ chee̱le ca dxaca chee̱ tu nuꞌula ba zua sane̱ꞌ bidauꞌ, ne wabédxequezaꞌ gunne xue chee̱le cadxa guléꞌe lau da li dxenná bea Cristo lu xichaj lázrdaule.
\v 20 Dxezé̱ lazraꞌ súale̱naꞌ leꞌe náꞌaqueze chee̱ gaca guchálajle̱naꞌ leꞌe xezícadxa dizraꞌ laweꞌ da dxezíꞌale̱ꞌa gunne xue.
\s Da dxusede dxiꞌu ca guca chee̱ Sara, ne chee̱ Agar
\p
\v 21 Leꞌe naꞌ, dxaca lázrele chuꞌule lu naꞌ da bdxixruj beꞌe Moisés, le xeché̱bexque da nigá: ¿Quebe ne xénnele ca dxenná da nadxixruj bea na?
\v 22 Dxenná na gulezráꞌ chupa zriꞌine Abraham. Tubeꞌ gúcabeꞌ zriꞌine zrúꞌulaqueze̱ꞌ, nuꞌula quebe nadaꞌu.
\v 23 Zriꞌine nuꞌula nadaꞌu gúlajbeꞌ cáte̱ze dxelalaj xúgute̱ bidauꞌ, naꞌ zriꞌine nuꞌula quebe nadaꞌu gúlajbeꞌ chee̱ guca li ca da guche̱be lazreꞌ Dios.
\v 24 Da nigá naca na ca tu da dxuléꞌe na. Dxúpate̱ nuꞌula caní dxululéꞌene̱ꞌ ca zaj naca chupa xel-la wezría. Tu xel-la wezría nigá naca na da bnezruj Dios Moisés lu xiꞌa Sinaí, da naꞌ dxuléꞌe Agar. Benneꞌ caꞌ zaj xuꞌe̱ lu naꞌ xel-la wezría nigá dxelálaje̱ꞌ ca benneꞌ zaj nadaꞌu.
\v 25 Cáꞌanqueze dxuléꞌe Agar da naca chee̱ xiꞌa Sinaí da zua na ga nababa Arabia, Cáꞌanqueze xiꞌa nigá dxuléꞌe na ca naca Jerusalén lu zra naꞌa zra laweꞌ da zaj naca benneꞌ chee̱ xe̱zre nigá ca benneꞌ zaj nadaꞌu tu zren nen zríꞌine̱ꞌ caꞌ.
\v 26 Benneꞌ zaj nababe̱ꞌ Jerusalén chee̱ xabáa quebe zaj naque̱ꞌ benneꞌ zaj nadaꞌu, naꞌ dxiꞌu nácadxu ca zriꞌine benneꞌ caꞌ.
\v 27 Lu dizraꞌ láꞌazxa, naxúaj na ca naca chee̱ benneꞌ zaj nababa Jerusalén chee̱ xabáa naꞌ, da dxenná na:
\q Gubé lueꞌ, nuꞌula wizre, lueꞌ quebe nu chiláꞌ zriꞌinuꞌ.
\q Gudxezre xaꞌa lu xel-la dxebé, lueꞌ quebe núnbeꞌu xel-la dxudía
\q2 chee̱ xel-la dxezán bidauꞌ.
\q Nuꞌula quebe guzán bidauꞌ gate guque̱ꞌ cuideꞌ waxandxa zríꞌine̱ꞌ
\q quézcala zriꞌine nuꞌula zúale̱ne̱ꞌ benneꞌ chee̱ꞌ.
\p
\v 28 Leꞌe, bi bíchaꞌdauꞌ, nácadxu ca Isaac. Nácadxu zriꞌine Abraham, bi caꞌ guche̱be lazreꞌ Dios gunézruje̱ꞌ le̱ꞌ.
\v 29 Naꞌa ca guca lu zra naꞌ, Ismael, zriꞌine Abraham naꞌ, bi gúlajbeꞌ ca dxelalaj xúgute̱ bidauꞌ, gudáu ziꞌ xúzrebeꞌ Isaac, zriꞌine Abraham naꞌ, bi gúlajbeꞌ ne̱ chee̱ Beꞌ chee̱ Dios, cáꞌanqueze dxaca na naꞌa.
\v 30 Naꞌa ¿bizra dxenná dizraꞌ láꞌazxa? Dxenná na: Bebéaj chaláꞌala nuꞌula nadaꞌu tu zren nen zríꞌine̱ꞌ laweꞌ da quebe gaca chee̱ zriꞌine nuꞌula nadaꞌu sibeꞌ da dxal-laꞌ siꞌ zriꞌine nuꞌula quebe nadaꞌu.
\v 31 Caꞌ naca na, bi bichaꞌ, quebe nácadxu ca Ismael, zriꞌine nuꞌula nadaꞌu, san nácadxu ca Isaac, zriꞌine zruꞌula Abraham, nuꞌula quebe nadaꞌu.
\c 5
\s Le sua chuchu lu xel-la weselá
\p
\v 1 Cristo bselé̱ꞌ dxiꞌu lu naꞌ da nadxixruj bea na chee̱ gácadxu ca benneꞌ quebe zaj nadaꞌu. Le sua chuchu lu xel-la weselá da ba guzile, ne québedxa xexúꞌule lu naꞌ da naꞌ dxun na leꞌe benneꞌ zaj nadaꞌu.
\p
\v 2 Le xene da dxapaꞌ leꞌe. Nedaꞌ, Pablo, dxapaꞌ leꞌe, che güele lataj chugu lu be̱laꞌ chee̱le da naꞌ dxuléꞌe na, quebe bi da ba neza gaca chee̱le da naca chee̱ Cristo.
\v 3 Dxaca lazraꞌ xapaꞌ leꞌe xecha lasa, che nu benneꞌ chugu lu be̱laꞌ chee̱ꞌ da naꞌ dxuléꞌe na, dxun na ba xen gun bénneaꞌ xúgute̱ da bdxixruj beꞌe Moisés.
\v 4 Leꞌe naꞌ dxéquele nagáꞌanale xrlátaje lau Dios laweꞌ da nunle ca nadxixruj bea na, ba bcáꞌanale da naca chee̱ Cristo, ne dxexebéaj cuínale lu xel-la zriꞌi lazreꞌ chee̱ Dios.
\v 5 Dxiꞌu, ne̱ chee̱ Beꞌ Láꞌazxa, ne laweꞌ da dxeajlí lázredxu Cristo, dxuxrén lázredxu nagáꞌanadxu xrlátaje lau Dios.
\v 6 Che nácadxu tuze nen Cristo, quebe bi da ba neza gaca na chee̱dxu che chugu lu be̱laꞌ chee̱dxu da naꞌ dxuléꞌe na, u che quebe chugu na. Da ba neza naca na chee̱dxu che dxeajlí lázredxu Cristo, naꞌ xel-la dxeajlí lazreꞌ chee̱dxu dxuzúa na dxiꞌu lu xel-la zriꞌi lazreꞌ.
\p
\v 7 Da xrlátaje bé̱nquezle. ¿Nuzra gulúꞌu xel-la leꞌe chee̱ québedxa guzúale dizraꞌ da li?
\v 8 Quegá Dios be̱ne̱ꞌ da naꞌ. Nácaqueze Le̱ꞌ Bénneaꞌ bláwizre̱ꞌ leꞌe.
\v 9 Quebe gal-la lázrele da dxenná na: Láteze cua zichaj dxuchazra na ca naca cua.
\v 10 Dxuxrén lazraꞌ Xránadxu ca naca chee̱le leꞌe, quebe guzúale chaláꞌala da nigá dxuchálajaꞌ. Dios gudée̱ꞌ lu da ba xaꞌ bénneaꞌ dxun zréajene̱ꞌ leꞌe, nútete̱ze naque̱ꞌ.
\p
\v 11 Da naca chiaꞌ, bi bichaꞌ, la xapaꞌ nedaꞌ bénneache dxal-laꞌ chugu lu be̱laꞌ chee̱ꞌ da naꞌ dxuléꞌe na, quegá weláu ziꞌ xuzre benneꞌ judío nedaꞌ laweꞌ da che dxunaꞌ da caní quebe xelaque̱ꞌ tula che cuꞌa lban chee̱ xaga béguaj chee̱ Cristo.
\v 12 Naꞌa ca naca chee̱ benneꞌ caꞌ, benneꞌ dxelún zréajene̱ꞌ leꞌe, ne dxelenné̱ꞌ dxal-laꞌ chugu lu be̱laꞌ chee̱le da naꞌ dxuléꞌe na, dxaca lazraꞌ chugu ca da zaj naca benneꞌ caꞌ chee̱ québedxa xelún zréajene̱ꞌ leꞌe.
\p
\v 13 Bi bíchaꞌdauꞌ, Dios bláwizre̱ꞌ leꞌe chee̱ gácale benneꞌ quebe zaj nadaꞌu, ne québedxa xuꞌule lu naꞌ da bdxixruj beꞌe Moisés. Quebe guchínele da nácale chee̱ gunle ca da dxezá lázrele. Le gun cuínale ca benneꞌ zaj nadaꞌu, chee̱ gunle zrin chee̱ le saꞌ ljwézrele tule xetule lu xel-la zriꞌi lazreꞌ chee̱le.
\v 14 Xúgute̱ da nadxixruj bea na dxun bénneaꞌ dxuzúe̱ꞌ dizraꞌ da naꞌ dxenná na: Bzriꞌi le saꞌ ljwezruꞌ cáte̱ze nazríꞌi cuinuꞌ.
\v 15 Che dxunle ca dxelún be̱ xixreꞌ caꞌ, ne dxun ziꞌ ljwézrele, ne dxasa ljwézrele tule xetule, le guxúe ga guzría xiꞌ cuínale.
\s Da dxundxu cáte̱ze dxezá lazreꞌ be̱laꞌ dxen chee̱dxu,
 ne da dxundxu cáte̱ze dxezá lazreꞌ Beꞌ Láꞌazxa
\p
\v 16 Da nigá dxapaꞌ leꞌe: Le gun cáte̱ze dxuléꞌe Beꞌ Láꞌazxa leꞌe, naꞌ quebe gunle cáte̱ze dxezá lazreꞌ be̱laꞌ dxen chee̱le.
\v 17 Da dxezá lazreꞌ be̱laꞌ dxen chee̱dxu dxedíl-lale̱ na da dxezá lazreꞌ Beꞌ Láꞌazxa, naꞌ da dxezá lazreꞌ Beꞌ Láꞌazxa dxedíl-lale̱ na da dxezá lazreꞌ be̱laꞌ dxen chee̱dxu. Dxúpate̱ da caní dxeledíl-lale̱ ljwezre na, naꞌ chee̱ le̱ naꞌ quebe gaca gunle da dxaca lázrele gunle.
\v 18 Che dxunle ca da dxuléꞌe Beꞌ Láꞌazxa leꞌe, québedxa xuꞌule lu naꞌ da nadxixruj bea na.
\p
\v 19 Zaj nuléꞌe láuqueze da dxelún benneꞌ caꞌ dxelune̱ꞌ cáte̱ze da dxezá lazreꞌ be̱laꞌ dxen chee̱ꞌ:
\q Deledále̱ne̱ꞌ nuꞌula xula.
\q Dulucáꞌana dítaje̱ꞌ le saꞌ ljwezre̱ꞌ
\q Dxelune̱ꞌ da sban, ne da schanniꞌ.
\q
\v 20 Dxelúe szrene̱ꞌ bedauꞌ xiaj xaga, ne dxelune̱ꞌ xel-la wazráꞌ.
\q Dxelecuídene̱ꞌ le saꞌ ljwezre̱ꞌ, ne dxelezré̱ꞌe̱.
\q Dxelaque̱ꞌ wideꞌ, ne dxelezráꞌa xíchaje̱ꞌ.
\q Dxelenné̱ꞌ chee̱ ljwezre̱ꞌ.
\q Dxelebéaj xichaj ljwezre̱ꞌ tue̱ꞌ xetue̱ꞌ, ne dxelaque̱ꞌ chupa laꞌa.
\q
\v 21 Dxelaque̱ꞌ xa lazreꞌ, ne dxelutie̱ꞌ benneꞌ.
\q Dxelezúzrene̱ꞌ, ne dxeledanne̱ꞌ da cale̱la da dxelune̱ꞌ lu laní caꞌ.
\m Zánete̱ da dxelundxe̱ꞌ bi chee̱ da caní. Che le̱ naꞌ dxapaꞌ leꞌe ca bé̱nquezaꞌ nédxute̱, benneꞌ dxelune̱ꞌ da caní quebe xelexúꞌe̱ naga dxenná bea Dios.
\p
\v 22 Da dxelún benneꞌ caꞌ dxelune̱ꞌ cáte̱ze da dxuléꞌe Beꞌ Láꞌazxa le̱ꞌ zaj naca na caní:
\q Zaj nazriꞌine̱ꞌ le saꞌ ljwezre̱ꞌ, ne zaj nape̱ꞌ xel-la dxebé.
\q Dxelebeza zri lazre̱ꞌ, ne zaj naque̱ꞌ zren lazreꞌ.
\q Zaj naque̱ꞌ zriꞌi lazreꞌ, ne dxelune̱ꞌ da zriꞌa chaweꞌ.
\q Zaj naque̱ꞌ li lazreꞌ.
\q
\v 23 Zaj naque̱ꞌ dxexruj lazreꞌ, ne dxelenná beꞌe cuine̱ꞌ.
\m Quebe de̱ da nadxixruj bea na da dxe̱ na dxiꞌu quebe gundxu da caní.
\v 24 Benneꞌ caꞌ zaj naque̱ꞌ bi chee̱ Cristo ba buludé̱ꞌe̱ le̱ꞌe̱ xaga béguaj be̱laꞌ dxen chee̱ꞌ nen xúgute̱ da dxezá lazre na.
\v 25 Che naca bandxu ne̱ chee̱ Beꞌ Láꞌazxa, dxal-laꞌ gundxu ca da dxuléꞌe Beꞌ Láꞌazxa dxiꞌu.
\p
\v 26 Quebe dxal-laꞌ gucáꞌana szren cuínadxu, ne quebe gácadxu wideꞌ tudxu xetudxu, ne quebe sua da xa lazreꞌ ládujla dxiꞌu.
\c 6
\s Le gácale̱ le saꞌ ljwézrele tule xetule
\p
\v 1 Bi bíchaꞌdauꞌ, che nu benneꞌ ládujla leꞌe nune̱ꞌ dul-la, leꞌe naꞌ dxedále̱le Beꞌ Láꞌazxa dxal-laꞌ gácale̱le bénneaꞌ chee̱ xezé̱ chúchue̱ꞌ. Dxal-laꞌ gácale dxexruj lazreꞌ gunle da nigá chee̱ quebe güele lataj da xriwe̱ꞌ cuꞌu xel-la na leꞌe.
\v 2 Le gácale̱ le saꞌ ljwézrele tule xetule lu da naca xua chee̱le, naꞌ caní gunle ca nadxixruj beꞌe Cristo.
\p
\v 3 Che nu benneꞌ dxéquene̱ꞌ naque̱ꞌ benneꞌ blau, ne quebe nu naque̱ꞌ, dxezí xé̱zqueze cuine̱ꞌ.
\v 4 Tu tu benneꞌ dxal-laꞌ naꞌ xánnie̱ꞌ da dxúnqueze̱ꞌ, naꞌ che nagáꞌana xrlátaje da dxune̱ꞌ, waca xape̱ꞌ ba láꞌana da dxúnqueze̱ꞌ, ne quegá da be̱n xetú benneꞌ.
\v 5 De̱ tu xua da nabágadxu chee̱ Cristo, da dxal-laꞌ gua tu tu benneꞌ.
\p
\v 6 Benneꞌ zua nu dxuse̱de le̱ꞌ ca naca xrtizra Dios dxal-laꞌ gunézruje̱ꞌ lateꞌ da naca chee̱ꞌ chee̱ bénneaꞌ.
\p
\v 7 Quebe si xe̱ cuínale: Netú benneꞌ gaca quítajle̱ne̱ꞌ Dios. Da dxaza bénneache, lé̱queze na xelape̱ꞌ.
\v 8 Che dxune̱ꞌ da dxezá lazreꞌ be̱laꞌ dxen chee̱ꞌ, da xeziꞌe̱ naca na xel-la gute, naꞌ che dxune̱ꞌ da dxezá lazreꞌ Beꞌ Láꞌazxa, da xeziꞌe̱ naca na xel-la nabán zeajlí canna.
\v 9 Caꞌ nacan xcaꞌ, quebe gusandxu gundxu da xrlátaje laweꞌ da che quebe gate lazrdxu, lu zra naꞌ quizruj Dios dxiꞌu, naꞌ xezidxu lazruj chee̱dxu.
\v 10 Chee̱ le̱ naꞌ, gate nazidxu lataj, dxal-laꞌ gundxu da xrlátaje chee̱ le saꞌ ljwézredxu, ne da dxundxa na ba xen, gundxu da xrlátaje chee̱ le saꞌ ljwézredxu dxeleajlí lazre̱ꞌ Cristo.
\s Da bzuaj Pablo nen náꞌqueze̱ꞌ
\p
\v 11 Le nnaꞌxque cadite da zriꞌa naca da nigá dxuzúajaꞌ chee̱le nen náꞌquezaꞌ.
\v 12 Benneꞌ caꞌ dxelaca lazre̱ꞌ chugu lu be̱laꞌ chee̱le da naꞌ dxuléꞌe na, dxelune̱ꞌ na chee̱ xelexegáꞌane̱ꞌ chaweꞌ lau bénneache, ne chee̱ quebe xeláu ziꞌ xuzre̱ꞌ le̱ꞌ laweꞌ da dxuluchálaje̱ꞌ dizraꞌ chee̱ da be̱n Cristo le̱ꞌe̱ xaga béguaj.
\v 13 Benneꞌ caní, benneꞌ zaj nadxugu lu be̱laꞌ chee̱ꞌ da naꞌ dxuléꞌe na quebe dxelune̱ꞌ xúgute̱ ca da nadxixruj bea na. Dxelaca lazre̱ꞌ chugu lu be̱laꞌ chee̱le da naꞌ dxuléꞌe na chee̱ gaca xulucáꞌana szren cuine̱ꞌ ca naca da belune̱ꞌ chee̱le.
\v 14 Quebe dxaca lazraꞌ xucáꞌana szren cuinaꞌ chee̱ tu da be̱naꞌ, san tuze chee̱ da be̱n Xránadxu Jesucristo le̱ꞌe̱ xaga béguaj. Ne̱ chee̱ Le̱ꞌ naca xe̱zr la xu nigá ca tu da gate chiaꞌ nedaꞌ, naꞌ nedaꞌ nacaꞌ ca tu benneꞌ gate. Québedxa dxezá lazraꞌ da naca chee̱ xe̱zr la xu.
\v 15 Che nácadxu tuze nen Cristo, quebe bi da ba neza gaca na chee̱dxu che nadxugu lu be̱laꞌ chee̱dxu da naꞌ dxuléꞌe na, u che quebe nadxugu na. Da ba neza naca na chee̱dxu che nácadxu benneꞌ cube lu xichaj lázrdaudxu.
\v 16 Dxenabaꞌ lau Dios gunézruje̱ꞌ xel-la dxebeza zri lazreꞌ chee̱ xúgute̱ benneꞌ caꞌ zaj naque̱ꞌ benneꞌ cube caní, ne xexache lazre̱ꞌ benneꞌ caꞌ da li zaj naque̱ꞌ bi chee̱ꞌ.
\p
\v 17 Laweꞌ da zaj zria lu be̱l-laꞌ dxen chiaꞌ xizraꞌ da dxululéꞌe na nacaꞌ we̱n zrin chee̱ Cristo quebe nu benneꞌ dxal-laꞌ gulálene̱ꞌ nedaꞌ naꞌa, ne lu da za zaꞌ.
\p
\v 18 Leꞌe, bi bíchaꞌdauꞌ, dxenabaꞌ lau Xránadxu Jesucristo gune̱ꞌ chaweꞌ chee̱ xúgute̱le. Caꞌan gaca na.