\id EPH
\h Efesios
\mt DIZRAꞌ BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZRE ÉFESO
\c 1
\s Pablo dxugape̱ꞌ diuzre bi chee̱ Cristo zaj zre̱ꞌe̱ xe̱zre Efeso
\p
\v 1 Nedaꞌ, Pablo, nacaꞌ gubáz chee̱ Jesucristo laweꞌ da guca lazreꞌ Dios gacaꞌ caní. Dxuzúajaꞌ da nigá chee̱le leꞌe, nácale bi chee̱ Dios, ne dxeajlí lázrele Jesucristo, naꞌ zrale xe̱zre Éfeso.
\v 2 Dxenabaꞌ lau Xradxu Dios, ne lau Xránadxu Jesucristo gun chawe̱ꞌe̱ leꞌe, ne gunne̱ꞌ leꞌe xel-la dxebeza zri lazreꞌ.
\s Ca naca da chaweꞌ da dxezíꞌ lu nnadxu ne̱ chee̱ Cristo
\p
\v 3 Dxue láꞌanadxu Dios, Xra Xránadxu Jesucristo laweꞌ da ba be̱ne̱ꞌ chee̱dxu ca naca xúgute̱ da chaweꞌ chee̱ Beꞌ Láꞌazxa da záꞌaca xabáa laweꞌ da nácadxu bi chee̱ Cristo.
\v 4 Dios guqué̱ꞌe̱ dxiꞌu chee̱ gácadxu bi chee̱ Cristo gate quebe ne gunte̱ꞌ xe̱zr la xu, chee̱ gácadxu benneꞌ láꞌazxa, ne du lazreꞌ lau Le̱ꞌ.
\v 5 Laweꞌ da bzriꞌine̱ꞌ dxiꞌu, be̱ne̱ꞌ chee̱dxu gate nate siꞌ lu ne̱ꞌe̱ dxiꞌu ca bi cheé̱queze̱ꞌ ne̱ chee̱ Jesucristo, cáte̱ze da guca lazre̱ꞌ gune̱ꞌ.
\v 6 Chee̱ le̱ naꞌ, tu dxue láꞌanazquezdxu Dios ne̱ chee̱ xel-la xrlátaje chee̱ꞌ da naca na szrente̱. Lu xel-la xrlátaje chee̱ꞌ naꞌ gúcale̱ne̱ꞌ dxiꞌu laweꞌ da nácadxu tuze nen Zríꞌine̱ꞌ, bi nazriꞌite̱ lazre̱ꞌ.
\v 7 Ne̱ chee̱ Zríꞌine̱ꞌ naꞌ naxáꞌawene̱ꞌ dxiꞌu nen dxen cheé̱queze̱ꞌ, naꞌ lu xel-la zriꞌi lazreꞌ zren chee̱ꞌ bnite lawe̱ꞌ chee̱dxu dxiꞌu ca naca dul-la da nabágadxu.
\v 8 Dios nazríꞌile̱ꞌe̱ne̱ꞌ dxiꞌu, ne dxunne̱ꞌ dxiꞌu xel-la sina, ne xel-la dxéajniꞌi,
\v 9 naꞌ bzéajniꞌine̱ꞌ dxiꞌu ca naca da dxaca lazre̱ꞌ da bgache na, da naꞌ lu xel-la zriꞌi lazreꞌ chee̱ꞌ ba núnqueze̱ꞌ gune̱ꞌ ne̱ chee̱ Cristo.
\v 10 Nuchague̱ꞌ xúgute̱ da zaj zua na xabáa, ne xe̱zr la xu, chee̱ xelúꞌu na lu naꞌ Cristo, da gusexúzre̱ꞌ gune̱ꞌ gate zrin zra chee̱ na.
\p
\v 11 Ne̱ chee̱ Cristo Dios guqué̱ꞌe̱ dxiꞌu chee̱ꞌ gate nate, chee̱ siꞌ lu nnadxu da xáladxu da gunna Le̱ꞌ, ca da ba núnqueze Dios, Bénneaꞌ dxune̱ꞌ xúgute̱ da dxeque Le̱ꞌ xrlátaje.
\v 12 Caní be̱ne̱ꞌ chee̱ gácadxu tu da gucáꞌana szren na xel-la szren chee̱ꞌ, nácadxu dxiꞌu benneꞌ nedxu dxebeza lázredxu Cristo.
\v 13 Cáꞌanqueze leꞌe, gate benle dizraꞌ li, da naca na dizraꞌ chaweꞌ chee̱ da be̱n Cristo, bselé̱ꞌ leꞌe. Guxeajlí lázrele Le̱ꞌ, naꞌ Dios bzue̱ꞌ Beꞌ Láꞌazxa lu xichaj lázrdaule ca tu da dxunna bea na nácale bi chee̱ꞌ, ca guche̱be lazre̱ꞌ gune̱ꞌ.
\v 14 Beꞌ Láꞌazxa naꞌ naque̱ꞌ da dxunna bea na sidxu da xáladxu da gunna Dios dxiꞌu, gate zrin zra da ba nune̱ꞌ guselé̱ꞌ bi chee̱ꞌ caꞌ, chee̱ güe láꞌanaquezdxu Le̱ꞌ ca naca xel-la szren chee̱ꞌ.
\s Dxenaba Pablo gunezruj Dios xel-la sina chee̱ bi caꞌ chee̱ Cristo
\p
\v 15 Chee̱ le̱ naꞌ gate bendaꞌ ca dxeajlí lázrele Cristo, ne ca nazriꞌile xúgute̱ bi caꞌ chee̱ Dios,
\v 16 dxápaquezaꞌ Dios; Xcalenuꞌ, ca naca chee̱le leꞌe gate dxuchálajle̱naꞌ Dios, ne dxeajsá lázrquezaꞌ leꞌe.
\v 17 Dxenabaꞌ Dios chee̱ Xránadxu Jesucristo, naque̱ꞌ Xradxu zue̱ꞌ xabáa, gunne̱ꞌ leꞌe xel-la sina lu beꞌ nácaquezle da guléꞌe na leꞌe gúnbea xánnele Le̱ꞌ.
\v 18 Dxenabaꞌ lau Dios guzéajniꞌine̱ xichaj lázrdaule leꞌe chee̱ nézele ca naca da dxebeza lázredxu da bláwizre̱ꞌ dxiꞌu sidxu, ne ca naca xel-la gunníꞌa chee̱ xel-la szren da gunezruj Dios bi chee̱ caꞌ,
\v 19 ne ca naca xel-la waca zrente̱ chee̱ꞌ da dxun na zrin lu xichaj lázrdaudxu dxiꞌu dxeajlí lázredxu Le̱ꞌ. Xel-la waca nigá bchine Dios lu dute̱ xel-la dxenná bea zren chee̱ꞌ
\v 20 gate bsebane̱ꞌ Cristo ládujla benneꞌ gate caꞌ, ne guleche̱ꞌ Le̱ꞌ chaláꞌa xabe̱la chee̱ꞌ xabáa,
\v 21 ne bzue̱ꞌ Le̱ꞌ chee̱ nna béꞌene̱ꞌ xúgute̱ benneꞌ blau xabáa, ne xúgute̱ benneꞌ dxelenná bea xabáa, ne xúgute̱ benneꞌ zaj napa xel-la waca, ne xúgute̱ benneꞌ zaj naca xrane, ne xúgute̱ da dxelenná bea na lu zra naꞌa zra, ne lu da za zaꞌ.
\v 22 Bzue̱ꞌ xúgute̱ da zaj zua lu naꞌ Cristo, ne bzue̱ꞌ Le̱ꞌ gaque̱ꞌ benneꞌ xíchaje̱ chee̱ bi chee̱ caꞌ ca naca xúgute̱ da dxelune̱ꞌ.
\v 23 Benneꞌ caní zaj naque̱ꞌ ca be̱laꞌ dxen chee̱ Cristo, da dxuléꞌe na dute̱ ca nácaqueze Le̱ꞌ, Bénneaꞌ dxusexuzre̱ꞌ dxucáꞌana chawe̱ꞌ ca naca xúgute̱ da zaj zua.
\c 2
\s Naca bandxu laweꞌ da nazríꞌi Dios dxiꞌu
\p
\v 1 Gate nate gúcale ca benneꞌ gate lu xichaj lázrdaule ne̱ chee̱ da cale̱la caꞌ, ne dul-la caꞌ
\v 2 da be̱nle gate ne dxunle ca dxelún bénneache zaj zre̱ꞌe xe̱zr la xu nigá, benneꞌ dxelune̱ꞌ ca dxenná da xriwe̱ꞌ, beꞌ naꞌ da dxenná bea na lu beꞌ, ne dxun na zrin lu xichaj lázrdau benneꞌ caꞌ quebe dxuluzúe̱ꞌ dizraꞌ chee̱ Dios.
\v 3 Cáꞌanqueze dxiꞌu, xúgute̱dxu be̱ndxu caní gate nate, gate be̱ndxu cáte̱ze da guzá lázredxu, ne be̱ndxu ca da gunná be̱laꞌ dxen chee̱dxu, ne ca da gunná xichaj lázrdaudxu. Chee̱ le̱ naꞌ guca na chee̱dxu sidxu da ziꞌ da xaꞌ chee̱ Dios ca gune̱ꞌ chee̱ xezícadxa benneꞌ caꞌ,
\v 4 san Dios bexache lázrele̱ꞌe̱ dxiꞌu, ne bzríꞌile̱ꞌe̱ne̱ꞌ dxiꞌu,
\v 5 naꞌ be̱nne̱ꞌ dxiꞌu xel-la nabán tu zren nen Cristo gate ne nátedxu lu xichaj lázrdaudxu ne̱ chee̱ dul-la da nabágadxu. Naladxu ne̱ chee̱ xel-la xrlátaje chee̱ Dios.
\v 6 Cáꞌanqueze bsebán Dios dxiꞌu tu zren nen Jesucristo, ne guleche̱ꞌ dxiꞌu tu zren nen Le̱ꞌ xabáa.
\v 7 Be̱ne̱ꞌ caní chee̱ guléꞌene̱ꞌ lu zra da za zaꞌ ca nazríꞌile̱ꞌe̱ne̱ꞌ dxiꞌu, ne ca naca da cháwele̱ꞌe̱ be̱ne̱ꞌ chee̱dxu ne̱ chee̱ Jesucristo.
\v 8 Lu xel-la xrlátaje chee̱ Dios bselé̱ꞌ leꞌe laweꞌ da guxeajlí lázrele Cristo. Quebe naca na ne̱ chee̱ bi da be̱nle leꞌe, san naca na tu da be̱n Dios cáꞌaze ne̱ chee̱le.
\v 9 Quebe nalá nu benneꞌ ne̱ chee̱ bi da dxúnqueze̱ꞌ, chee̱ quebe nu benneꞌ gucáꞌana szren cuine̱ꞌ.
\v 10 Dios be̱ne̱ꞌ dxiꞌu, naꞌ bexune̱ꞌ dxiꞌu tuze nen Jesucristo chee̱ gundxu da xrlátaje caꞌ da ba nun Le̱ꞌ gundxu gate nate.
\s Nácadxu tuze ne̱ chee̱ Cristo
\p
\v 11 Le gusá lázrele ca gúcale leꞌe gate nate. Quebe nácale benneꞌ judío, benneꞌ caꞌ dxelechugue̱ꞌ lu be̱l-laꞌ dxen chee̱ꞌ da naꞌ dxuléꞌe na zaj nababe̱ꞌ chee̱ Dios, ne zaj nazí le̱ꞌ benneꞌ zaj nadxugu, naꞌ dxelenné̱ꞌ chee̱le nácale benneꞌ quebe zaj nadxugu.
\v 12 Lu zra caꞌ quebe guzúale̱ Cristo leꞌe. Quebe be̱nle tuze benneꞌ Israel caꞌ, ne quebe bé̱nbeale ca naca xel-la wezría da be̱n Dios, ne ca naca da guche̱be lazreꞌ Dios. Guzúale lu xe̱zr la xu nigá, ne quebe bi guleza lázrele, ne quebe bé̱nbeale Dios. Gate nate guzrale zítuꞌla naga zua Dios.
\v 13 Naꞌa ne̱ chee̱ Cristo Dios ba bzue̱ꞌ leꞌe gágute̱ laweꞌ da gute Cristo waláz chee̱le.
\v 14 Lé̱queze Cristo be̱nne̱ꞌ dxiꞌu xel-la dxebeza zri lazreꞌ, ne bexune̱ꞌ dxiꞌu tuze, netuꞌ, benneꞌ judío caꞌ, ne leꞌe, benneꞌ quebe zaj naque̱ꞌ judío, ne bzria xiꞌe̱ xel-la dxezráꞌa da be̱n na dxiꞌu chupa laꞌa, da guca na ca tu zeꞌe.
\v 15 Gate gute Jesús waláz chee̱dxu guchugue̱ꞌ da nadxixruj bea na da naca na da gunná Dios gundxu, ne da caꞌ dxelenná bea na, naꞌ bexune̱ꞌ dxúpate̱ xe̱zre caꞌ tuze xe̱zre cube da nababa na chee̱ꞌ. Caní gudíxruje̱ꞌ xel-la dxebeza zri lazreꞌ chee̱dxu.
\v 16 Caní guca ne̱ chee̱ xel-la gute chee̱ Cristo le̱ꞌe̱ xaga béguaj, guchugue̱ꞌ naze xel-la dxezráꞌa ljwezre chee̱ dxúpate̱ xe̱zr caꞌ, naꞌ bexune̱ꞌ dxúpate̱ tuze be̱l-laꞌ dxen, ne bexune̱ꞌ le̱ꞌ tuze nen Dios.
\p
\v 17 Blaꞌ Cristo, ne bzenne̱ꞌ leꞌe dizraꞌ chaweꞌ chee̱ꞌ, leꞌe quebe nácale judío, naꞌ guzrale zituꞌ naga zua Dios, ne leꞌe nácale judío, naꞌ guzrale gagu naga zua Dios,
\v 18 naꞌ ne̱ chee̱ Cristo, xúgute̱dxu, benneꞌ judío caꞌ, ne benneꞌ quebe zaj naque̱ꞌ judío, dxebígadxu lau Xradxu Dios ne̱ chee̱ Beꞌ Láꞌazxa.
\v 19 Chee̱ le̱ naꞌ leꞌe, benneꞌ quebe nácale judío, québedxa nácale ca benneꞌ zituꞌ tu lu xe̱zr la xu da quebe naca na chee̱le, san nácale benneꞌ walazreꞌ ca xúgute̱ benneꞌ caꞌ zaj nababa chee̱ Dios. Nabábale Zriꞌine Dios.
\v 20 Nácale ca tu xuꞌu zren da zria na laweꞌ lane da gulixruj benneꞌ gubáz caꞌ chee̱ Cristo, ne benneꞌ caꞌ buluchálaje̱ꞌ waláz chee̱ Dios, naꞌ Jesucristo nácaqueze̱ꞌ xiaj blau chee̱ lane xuꞌu naꞌ.
\v 21 Laweꞌ lane nigá da naca Cristo, dute̱ xuꞌu naꞌ dxegula na tu li chee̱ gaca na tu xudauꞌ láꞌazxa chee̱ Xránadxu.
\v 22 Cáꞌanqueze leꞌe, laweꞌ da nácale Cristo tuze, xuꞌule lu xuꞌu naꞌ naga zua Dios ne̱ chee̱ Beꞌ Láꞌazxa chee̱ꞌ.
\c 3
\s Pablo dxuzenne̱ꞌ benneꞌ quebe zaj naque̱ꞌ judío dizraꞌ chaweꞌ
\p
\v 1 Chee̱ le̱ naꞌ nedaꞌ, Pablo, dxuzú zribaꞌ lau Dios. Xuꞌa lizre xia laweꞌ da dxunaꞌ zrin chee̱ Jesucristo chee̱ gaca chaweꞌ chee̱le leꞌe, quebe nácale judío.
\v 2 Ba nézele ca be̱n Dios lu xel-la xrlátaje chee̱ꞌ, bsebague̱ꞌ nedaꞌ guchálajaꞌ dizraꞌ chaweꞌ chee̱ Cristo ládujla leꞌe.
\v 3 Lu da bleꞌe Dios nedaꞌ bzéajniꞌine̱ꞌ nedaꞌ tu da nagache chee̱ꞌ ca da bzuajaꞌ chee̱le nedxu.
\v 4 Gate gulábale na weque béꞌequezle núnbeꞌa da nagache ca naca chee̱ Cristo.
\v 5 Guca na tu da nagache gate nate. Dios quebe bzéajniꞌine̱ꞌ na bénneache, san naꞌa ne̱ chee̱ Beꞌ Láꞌazxa chee̱ꞌ ba bléꞌene̱ꞌ na benneꞌ gubáz láꞌazxa caꞌ, naꞌ benneꞌ caꞌ dxuluchálaje̱ꞌ waláz chee̱ꞌ.
\v 6 Caní naca da nagache naꞌ: Ne̱ chee̱ dizraꞌ chaweꞌ chee̱ Cristo benneꞌ quebe zaj naque̱ꞌ judío welezíꞌqueze̱ꞌ da gunezruj Dios le̱ꞌ ca da xelezíꞌ benneꞌ judío caꞌ, ne zaj naque̱ꞌ tuze be̱l-laꞌ dxen, ne xelezíꞌqueze̱ꞌ tu zren da nache̱be lazreꞌ Dios ne̱ chee̱ Jesucristo.
\p
\v 7 Dios be̱ne̱ꞌ nedaꞌ we̱n zrin chee̱ dizraꞌ chaweꞌ naꞌ ne̱ chee̱ tu da bé̱nnaze̱ꞌ nedaꞌ, bchínene̱ꞌ xel-la waca zren chee̱ꞌ.
\v 8 Nedaꞌ nácadxaꞌ benneꞌ baxáche ca xúgute̱ benneꞌ zaj naca bi chee̱ Dios. Be̱ne̱ꞌ nedaꞌ tu culuén zren chee̱ guzendaꞌ benneꞌ quebe zaj naque̱ꞌ judío dizraꞌ chaweꞌ ca naca xel-la gunníꞌa zrente̱ chee̱ Cristo.
\v 9 Bsebague̱ꞌ nedaꞌ guzéajniꞌidaꞌ xúgute̱ bénneache ca da nun Dios gune̱ꞌ da bgache gate nate, naꞌ naca Dios Bénneaꞌ be̱ne̱ꞌ xúgute̱ da zaj zua,
\v 10 chee̱ xelúnbea naꞌa benneꞌ dxelenná beꞌe̱, ne zaj nape̱ꞌ xel-la szren xabáa ca naca xel-la sina zrente̱ chee̱ Dios. Xelúnbeꞌe̱ na ne̱ chee̱ benneꞌ caꞌ zaj naca bi chee̱ Cristo.
\v 11 Da nigá be̱n Dios ca da nune̱ꞌ gate nate gusexuzre̱ꞌ ne̱ chee̱ Xránadxu Jesucristo.
\v 12 Ne̱ chee̱ Cristo waca bígadxu lau Dios du lázredxu, ne dute̱ xel-la dxuxrén lazreꞌ chee̱dxu laweꞌ da dxeajlí lázredxu Le̱ꞌ.
\v 13 Chee̱ le̱ naꞌ dxataꞌ xúedaꞌ leꞌe quebe gate niꞌa naꞌle laweꞌ da dxedéaꞌ xel-la ziꞌ ne̱ chee̱le leꞌe. Xel-la ziꞌ da dxedéaꞌ nedaꞌ gaca na chee̱le tu da ba neza.
\s Xel-la zriꞌi lazreꞌ chee̱ Cristo
\p
\v 14 Chee̱ le̱ naꞌ dxuzú zribaꞌ lau Xra Xránadxu Jesucristo,
\v 15 Bénneaꞌ dxuzúe̱ꞌ la cha chee̱ benneꞌ zaj zre̱ꞌe̱ xabáa, ne xe̱zr la xu.
\v 16 Dxenabaꞌ lau Xradxu, ca naca xel-la gunníꞌa zrente̱ chee̱ꞌ guzé̱ tipe̱ꞌ leꞌe nen xel-la waca chee̱ꞌ lu xichaj lázrdaule ne̱ chee̱ Beꞌ Láꞌazxa chee̱ꞌ,
\v 17 chee̱ sua Cristo lázrdaule ne̱ chee̱ xel-la dxeajlí lazreꞌ chee̱le, ne se̱ cháchale lu xel-la zriꞌi lazreꞌ, ca tu xaga da nudé lue na sítujla,
\v 18 chee̱ sequeꞌ chéajniꞌile tu zren nen xúgute̱ bi chee̱ꞌ ca nazriluj, ne ca natunna, ne ca nasituj, ne ca nasibe xel-la zriꞌi lazreꞌ chee̱ Cristo.
\v 19 Dxenabaꞌ lau Dios gúnbeale xel-la zriꞌi lazreꞌ naꞌ, lácala cabataꞌ séquedxu gúnbeadxu dute̱ ca naca na. Caní dxenabaꞌ Le̱ꞌ chee̱ suale̱ leꞌe dute̱ da nácaqueze Dios.
\p
\v 20 Naꞌa, gaca báqueze Dios, Bénneaꞌ nape̱ꞌ xel-la waca gúnle̱ꞌe̱queze̱ꞌ da zrendxa ca da dxenábadxu, u ca da dxéquedxu, ne̱ chee̱ xel-la waca chee̱ꞌ da dxun na zrin lu xichaj lázrdaudxu.
\v 21 Gaca ba Dios ládujla benneꞌ zaj naque̱ꞌ bi chee̱ Cristo ne̱ chee̱ Jesucristo xúgute̱ iza chadía chacanna. ¡Caꞌan gaca na!
\c 4
\s Nácadxu tuze ne̱ chee̱ Beꞌ Láꞌazxa
\p
\v 1 Chee̱ le̱ naꞌ dxataꞌ xúedaꞌ leꞌe, nedaꞌ, xuꞌa lizre xia laweꞌ da dxunaꞌ zrin chee̱ Xránadxu, chee̱ gunle da xrlátaje ca dxal-laꞌ xelún bénneache ba gucáꞌa Dios le̱ꞌ, ca gucáꞌaqueze̱ꞌ leꞌe.
\v 2 Le gaca dxexruj lazreꞌ, ne zriꞌi lazreꞌ. Le cueza lazreꞌ, ne le cueꞌ gunne xue chee̱ tule xetule lu xel-la zriꞌi lazreꞌ chee̱le.
\v 3 Le gun ba xuzre gácaquezle tuze, guchínele xel-la waca chee̱ Beꞌ Láꞌazxa lu xel-la dxebeza zri lazreꞌ da naꞌ dxun na leꞌe tuze.
\q
\v 4 Tuze naca be̱laꞌ dxen chee̱ Cristo da nácadxu.
\q Tuze naca Beꞌ Láꞌazxa, Nu naꞌ zúale̱neꞌ tu tudxu.
\q Tuze da dxuxrén lázredxu, da naꞌ sidxu lu naꞌ Dios.
\q
\v 5 Tuze Bénneaꞌ naque̱ꞌ Xránadxu.
\q Tuze da dxeajlí lázredxu.
\q Tuze ca dxedxúadxu nisa.
\q
\v 6 Tuze Bénneaꞌ naque̱ꞌ Dios, ne Xra xúgute̱dxu.
\q Le̱ꞌ naque̱ꞌ Benneꞌ xíchaje̱ xúgute̱dxu.
\q Dxuléꞌe cuine̱ꞌ lu da dxundxu xúgute̱dxu.
\q Zúaqueze̱ꞌ lu xichaj lázrdau xúgute̱dxu.
\q
\v 7 Tu tudxu nasidxu tu xel-la waca cha chee̱dxu
\q2 ca da nunna Cristo dxiꞌu.
\p
\v 8 Naca na ca naxúaj na lu dizraꞌ láꞌazxa, dxenná na:
\q Begüéne̱ꞌ xabáa, gate gudé bzétaje̱ꞌ benneꞌ guledábague̱ꞌ Le̱ꞌ.
\q Naꞌ bnézruje̱ꞌ bénneache xel-la waca caꞌ.
\p
\v 9 ¿Bi zéaje̱ na, dxenná na: Begüene̱ꞌ? Zéaje̱ na nédxula bétaje̱ꞌ lu xe̱zr la xu nigá.
\v 10 Bénneaꞌ bétaje̱ꞌ nácaqueze̱ꞌ Bénneaꞌ begüéne̱ꞌ lu da blaudxa lu xabáa chee̱ gaca bea na xuꞌu lu ne̱ꞌe̱ xúgute̱ da de̱,
\v 11 naꞌ be̱nne̱ꞌ cha chee̱dxu xel-la waca chee̱:
\q Gaca bál-ladxu benneꞌ gubáz chee̱ꞌ.
\q Gaca guzendxu xezícadxu bénneache dizraꞌ chaweꞌ chee̱ꞌ.
\q Gácadxu xezícadxu benneꞌ dxuxúedxu bi chee̱ꞌ caꞌ.
\q Naꞌ gusé̱dedxu-beꞌ xezícadxu.
\m
\v 12 Caꞌan be̱ne̱ꞌ chee̱ bpaꞌadxe̱ꞌ bi chee̱ꞌ caꞌ chee̱ xelunbeꞌ zrin xulucáꞌanabeꞌ xrlátaje bénneache caꞌ zaj naque̱ꞌ zruza niꞌa naꞌ Cristo:
\q
\v 13 Chee̱ gácadxu tuze ca dxéajle̱dxu,
\q ne ca núnbeadxu Zriꞌine Dios,
\q chee̱ gácadxu benneꞌ du lazreꞌ,
\q chee̱ gácadxu cáte̱ze nácaqueze Cristo.
\m
\v 14 Caní nacan chee̱ québedxa gácadxu ca bidu caꞌ, bi caꞌ dxelezibeꞌ bítete̱ze dizraꞌ da zaj naca na ca tu beꞌ da zeaj na nila naꞌla, ne québedxa güedxu lataj xelún zréaje benneꞌ we̱n da zrinnaj caꞌ dxiꞌu, chee̱ quebe xelezí xe̱ꞌe̱ dxiꞌu chee̱ gundxu da cale̱la.
\v 15 Lu xel-la zriꞌi lazreꞌ dxal-laꞌ guchálajdxu da li chee̱ gácadxu cáte̱ze nácaqueze Cristo, Bénneaꞌ naque̱ꞌ xichaj be̱l-laꞌ dxen da nácadxu dxiꞌu.
\v 16 Le̱ꞌ dxune̱ꞌ tuze xúgute̱ niꞌa naꞌ zaj zria be̱l-laꞌ dxen chee̱ꞌ chee̱ gaca na tu be̱l-laꞌ dxen nazáꞌate̱ chee̱ na, ne chee̱ xelún zrin xúgute̱ niꞌa naꞌ caꞌ chee̱ gula be̱l-laꞌ dxen naꞌ, ne gaca na chaweꞌ lu xel-la zriꞌi lazreꞌ.
\s Xel-la nabán cube da dxunna Cristo dxiꞌu
\p
\v 17 Da nigá dxapaꞌ leꞌe, ne dxusebagaꞌ leꞌe waláz chee̱ Xránadxu chee̱ québedxa gunle ca dxelún bénneache quebe zaj núnbeꞌe̱ Dios, benneꞌ caꞌ dxelune̱ꞌ cáte̱ze dxeléquene̱ꞌ xrlátaje,
\v 18 benneꞌ caꞌ zaj nachul-la xichaj lázrdawe̱ꞌ. Benneꞌ caní quebe zaj nape̱ꞌ xel-la nabán li lazreꞌ da dxunna Dios bénneache:
\q Zaj nachul-la nanítene̱ꞌ, ne zaj naca zideꞌ lázrdawe̱ꞌ.
\q
\v 19 Québedxa dxelexeduéꞌene̱ꞌ.
\q Belezanne cuine̱ꞌ dxelune̱ꞌ da schanniꞌ.
\q Du lazre̱ꞌ dxelune̱ꞌ xúgute̱ da sban.
\m
\v 20 Quegá caní nazé̱dele leꞌe chee̱ Cristo,
\v 21 che da li xcaꞌ bénnele da dxuchalaj Le̱ꞌ, ne nusé̱dene̱ꞌ leꞌe ca naca da li da zúale̱ Jesús.
\v 22 Ca naca da be̱nle nédxula, le guzúa chaláꞌala da gúcale laweꞌ da guzrínnajle lu da sban da guzá lázrele.
\q
\v 23 Dxal-laꞌ gácale benneꞌ cube lu xichaj lázrdaule.
\q
\v 24 Dxal-laꞌ gunle da naca chee̱ benneꞌ cube naꞌ da be̱n Dios leꞌe
\q chee̱ gunle da naca na xlátaje̱, ne da li da naca na láꞌazxa.
\q
\v 25 Chee̱ le̱ naꞌ québedxa gun lázrele.
\q Le nne̱ da li tule xetule laweꞌ da nácadxu niꞌa naꞌ tuze
\q2 be̱l-laꞌ dxen chee̱ Cristo.
\q
\v 26 Che dxezráꞌale, quebe dxal-laꞌ gunle dul-la, ne quebe zráꞌale schaꞌ.
\q
\v 27 Quebe güele da xriwe̱ꞌ lataj guchixre chee̱ na leꞌe.
\p
\v 28 Bénneaꞌ guque̱ꞌ gubán québedxa dxal-laꞌ cuane̱ꞌ. Dxal-laꞌ gune̱ꞌ tu zrin chaweꞌ nen niꞌa náꞌqueze̱ꞌ chee̱ gape̱ꞌ da gunézruje̱ꞌ benneꞌ dxelexázrjene̱ꞌ.
\p
\v 29 Quebe nne̱le dizraꞌ cale̱la. Le guchalaj da naca na xrlátaje chee̱ xelezé̱ tipa benneꞌ xelenne̱ꞌ, ne xelezíꞌe̱ na ba neza.
\v 30 Quebe guzúa xáchele Beꞌ Láꞌazxa chee̱ Dios, laweꞌ da zúale̱ Beꞌ leꞌe chee̱ gaca bea na nácale bi chee̱ Dios ca zrindxa zra xezíꞌ lu ne̱ꞌe̱ dxiꞌu.
\p
\v 31 Le guzúa chaláꞌala:
\q Xel-la dxecuideꞌ, ne xel-la dxezráꞌa, ne xel-la xichaj zraꞌa,
\q ne xel-la wetil-la dizraꞌ, ne xel-la wechacha, ne xúgute̱ da zrinnaj.
\q
\v 32 Dxal-laꞌ gácale du lazreꞌ, ne xache lázrele tule xetule,
\q ne gunite laule chee̱ tule xetule ca be̱n Dios,
\q bnite lawe̱ꞌ chee̱le leꞌe laweꞌ da nácale bi chee̱ Cristo.
\c 5
\s Ca dxal-laꞌ xelaca bi caꞌ chee̱ Dios
\p
\v 1 Laweꞌ da nácale bi cheé̱queze Dios, bi nazriꞌine̱ꞌ, le gun ba xuzre gácale cáte̱ze nácaqueze Le̱ꞌ.
\v 2 Le zriꞌi le saꞌ ljwézrele tule xetule cáte̱ze be̱n Cristo, bzriꞌine̱ꞌ dxiꞌu, ne bzanne cuine̱ꞌ waláz chee̱dxu ca tu zrílaꞌdauꞌ, béadu dxelute benneꞌ lau Dios chee̱ xedúa xtul-leꞌ. Gate gute Cristo le̱ꞌe̱ xaga béguaj, guca ca tu da dxelá zixre lau Dios da dxelegúꞌu bénneache lau Le̱ꞌ.
\p
\v 3 Laweꞌ da nácale bi chee̱ Dios, québedxa dxal-laꞌ guchálajle chee̱ da dxucáꞌana ditaj na bénneache, ne chee̱ da sban caꞌ, ne chee̱ xel-la wecudeꞌ da de̱.
\v 4 Quebe guchálajle dizraꞌ schanniꞌ, ne dizraꞌ bize, ne dizraꞌ cale̱la, da quebe dxulucáꞌana na chaweꞌ bénneache, san dxal-laꞌ xé̱quezle Dios: “Xcalenuꞌ.”
\v 5 Ba nézquezle quebe chuꞌu naga dxenná bea Cristo nen Dios netú benneꞌ dxucáꞌana dítaje̱ꞌ bénneache, u tu benneꞌ dxune̱ꞌ da sban, u tu benneꞌ dxucúdie̱ꞌ da de̱, da naca na ca dxucáꞌana szrene̱ꞌ bedauꞌ xiaj xaga.
\v 6 Quebe güele lataj nu si xe̱ leꞌe nen dizraꞌ xala, laweꞌ da ne̱ chee̱ da nigá dxesel-la Dios da dxusaca zi na benneꞌ caꞌ quebe dxuluzúe̱ꞌ dizraꞌ chee̱ꞌ.
\v 7 Quebe gunle tu zren benneꞌ dxelune̱ꞌ da caní.
\p
\v 8 Nédxute̱ guzúale lu da chul-la, naꞌ naꞌa zrágale xel-la naxaníꞌ laweꞌ da nácale bi chee̱ Xránadxu. Chee̱ le̱ naꞌ, le gun da naca na chee̱ xel-la naxaníꞌ,
\v 9 da naꞌ naca xel-la dxucáꞌana chaweꞌ ljwézredxu, ne da xlátaje̱, ne da li.
\v 10 Le gun ziꞌ lázrele nézele gunle da dxezaca ba lazreꞌ Xránadxu.
\v 11 Quebe gunle tu zren benneꞌ dxelune̱ꞌ da cale̱la, da caꞌ naca chee̱ da chul-la, san le til-la da caꞌ
\v 12 laweꞌ da naca na tu da xeduéꞌedxu guchálajzedxu chee̱ da dxelún benneꞌ caꞌ bagácheze.
\v 13 Gate dxeledxúaj da caní lu da chul-la, ne zaj xuꞌu na lu xel-la naxaníꞌ, guléꞌe laweꞌ ca zaj naca xúgute̱ da caní, laweꞌ da dxuléꞌe laweꞌ xel-la naxaníꞌ xúgute̱.
\v 14 Ca naca da caní dxenná na:
\q Bebán, lueꞌ dxásiuꞌ.
\q Bexasa ládujla benneꞌ gate,
\q naꞌ guseníꞌ Cristo lu xichaj lazrdaꞌu.
\p
\v 15 Chee̱ le̱ naꞌ, le guxúe xanneꞌ ca da dxunle. Quebe gunle ca dxelún benneꞌ zaj nachul-la nanítene̱ꞌ, san le gun ca dxelún benneꞌ zaj naxéajniꞌine̱ꞌ.
\v 16 Le guchine chaweꞌ zra caní laweꞌ da dxácale̱ꞌe̱ da zrinnaj lu zra naꞌa zra.
\v 17 Quebe gácale benneꞌ xala, san le gun ziꞌ lázrele chéajniꞌile da dxaca lazreꞌ Xránadxu gundxu.
\v 18 Quebe súzrele, da naꞌ dxuxrinnaj na bénneache, san du lázrele le siꞌ Beꞌ Láꞌazxa.
\v 19 Le guchálajle̱ le saꞌ ljwézrele tule xetule nen Salmo caꞌ, ne nen da dxúl-lale, ne nen da du dxúl-lale da dxunna Beꞌ Láꞌazxa leꞌe. Du lázrele le gul-la, ne le güe láꞌana Xránadxu.
\v 20 Le xé̱queze Xradxu Dios: “Xcalenuꞌ”, chee̱ xúgute̱ lu La Xránadxu Jesucristo.
\s Ca dxal-laꞌ xelún bi chee̱ Cristo nen lwézrebeꞌ
\p
\v 21 Le gaca dxexruj lazreꞌ tule xetule, ne le gapa ba láꞌana Dios.
\p
\v 22 Nuꞌula dxal-laꞌ gaque̱ꞌ dxexruj lazreꞌ lau benneꞌ chee̱ꞌ, cáte̱ze dxal-laꞌ gaque̱ꞌ lau Xránadxu,
\v 23 laweꞌ da naca benneꞌ biu xíchaje̱ chee̱ zruꞌule̱ꞌ, cáte̱ze naca Cristo xíchaje̱ chee̱ bi chee̱ꞌ caꞌ. Cristo naque̱ꞌ Benneꞌ weselá chee̱ bi chee̱ꞌ caꞌ, bi zaj naca be̱ꞌ ca be̱l-laꞌ dxen cheé̱queze̱ꞌ.
\v 24 Cáte̱ze zaj naca dxexruj lazreꞌ bi chee̱ꞌ caꞌ lau Cristo, cáꞌanqueze nuꞌula dxal-laꞌ gaque̱ꞌ dxexruj lazreꞌ lau benneꞌ chee̱ꞌ lu xúgute̱.
\p
\v 25 Benneꞌ biu dxal-laꞌ zríꞌine̱ꞌ zruꞌule̱ꞌ cáte̱ze be̱n Cristo, bzriꞌine̱ꞌ bi chee̱ꞌ caꞌ, ne bzánene̱ꞌ xel-la nabán chee̱ꞌ ne̱ chee̱beꞌ.
\v 26 Caní be̱ne̱ꞌ chee̱ bebéaje̱ꞌ-beꞌ cheé̱queze̱ꞌ, ne be̱n chiꞌe̱-beꞌ ne̱ chee̱ dizraꞌ chee̱ꞌ, da guca na ca dxun benneꞌ dxexibe̱ꞌ bi chee̱ꞌ nen nisa,
\v 27 chee̱ guzúe̱ꞌ-beꞌ lau Le̱ꞌ, xelácabeꞌ bi xabáa, ne quebe bi da sban zaj nápabeꞌ, ne netú da zrinnaj, ne netú da naca na ca da caꞌ, san xelácabeꞌ láꞌazxa, ne du lazreꞌ.
\v 28 Cáꞌanqueze benneꞌ biu dxal-laꞌ zríꞌine̱ꞌ zruꞌule̱ꞌ cáte̱ze nazriꞌine̱ꞌ be̱l-laꞌ dxen cheé̱queze̱ꞌ. Benneꞌ nazriꞌine̱ꞌ zruꞌule̱ꞌ nazríꞌi cuine̱ꞌ.
\v 29 Netú benneꞌ quebe dxecuídene̱ꞌ be̱l-laꞌ dxen cheé̱queze̱ꞌ, san dxugawe̱ꞌ na, ne dxuxúe̱ꞌ na, ca dxúnqueze Cristo chee̱ bi chee̱ꞌ caꞌ
\v 30 laweꞌ da zaj nácabeꞌ ca be̱l-laꞌ dxen cheé̱queze̱ꞌ, naꞌ dxiꞌu nácadxu ca niꞌa naꞌ be̱l-laꞌ dxen chee̱ꞌ, ne nácadxu ca be̱laꞌ dxen chee̱ꞌ, ne zrita chee̱ꞌ.
\v 31 Chee̱ le̱ naꞌ tu benneꞌ biu dxal-laꞌ gusane̱ꞌ xra xrne̱ꞌe̱ chee̱ gaque̱ꞌ tuze nen zruꞌule̱ꞌ, naꞌ dxúpate̱ꞌ xelaque̱ꞌ ca tuze benneꞌ.
\v 32 Da nigá naca na tu da zren da nagache, naꞌ dxenníaꞌ da caní ca naca chee̱ Cristo nen bi chee̱ꞌ caꞌ.
\v 33 Cáꞌanqueze tu tule leꞌe dxal-laꞌ zriꞌile zrúꞌulale cáte̱ze nazríꞌi cuínale, naꞌ nuꞌula dxal-laꞌ gape̱ꞌ ba láꞌana benneꞌ chee̱ꞌ.
\c 6 
\p 
\v 1 Leꞌe, bi cuideꞌ, laweꞌ da nácale bi chee̱ Xránadxu, dxal-laꞌ guzúale dizraꞌ xruze xrna chee̱le, da naca na xlátaje̱. 
\v 2 Da nadxixruj bea nedxu da zraga na tu da guche̱be lazreꞌ Dios naca na da dxenná na: Gudapa ba láꞌana xra xrnaꞌu, 
\v 3 chee̱ gaca chaweꞌ chiuꞌ, ne chee̱ suꞌ schaꞌ lu xe̱zr la xu.
\p 
\v 4 Leꞌe, xruze xrnaꞌ, quebe gucháꞌale zríꞌinele.  Le gusegula-beꞌ lu xel-la dxenná bea chee̱ Xránadxu, ne le gusina-beꞌ da naca chee̱ Le̱ꞌ. 
\p 
\v 5 Leꞌe, benneꞌ nadaꞌu, le guzúa dizraꞌ chee̱ benneꞌ zaj naque̱ꞌ xránale lu xe̱zr la xu nigá, ne le gapa le̱ꞌ ba láꞌana, ne le zrebe le̱ꞌ, ne du lázrele le gaca chee̱ꞌ, cáte̱ze dxuzúale dizraꞌ chee̱ Cristo. 
\v 6 Le gun zrin chee̱ xránale caꞌ, quegaze gate dxelennáꞌte̱ꞌ leꞌe, ca dxelún benneꞌ caꞌ dxelaca lazre̱ꞌ xelezaca ba lazreꞌ bénneache chee̱ꞌ. Le gun zrin naꞌ cáte̱ze dxunle zrin chee̱ Cristo, gunle du lázrele da dxaca lazreꞌ Dios. 
\v 7 Le gun zrin chee̱ xránale du lázrele, cáte̱ze dxunle zrin chee̱ Xránadxu, ne quegaze chee̱ bénneache. 
\v 8 Ba nézquezle tu tu benneꞌ, benneꞌ nadaꞌu, ne benneꞌ quebe nadaꞌu, waziꞌe̱ lu naꞌ Xránadxu ca naca da xrlátaje da nune̱ꞌ. 
\p 
\v 9 Leꞌe, xrana benneꞌ caꞌ, cáꞌanqueze le gun leꞌe nen benneꞌ we̱n zrin chee̱le caꞌ, ne quebe guzálajle le̱ꞌ laweꞌ da nézele zua Bénneaꞌ xabáa naque̱ꞌ Xrana benneꞌ caꞌ, ne Xránale leꞌe, naꞌ Le̱ꞌ quebe dxebéaje̱ꞌ cha chee̱ bénneache. 

\s Zra lana bi chee̱ Cristo da dxácale̱ le̱beꞌ lu wedil-la
\p 
\v 10 Naꞌa, bi bíchaꞌdauꞌ, le gaca chuchu ne̱ chee̱ Xránadxu nen xel-la wala zren chee̱ꞌ. 
\v 11 Le gaca ca benneꞌ zjaque̱ꞌ wedil-la zaj nácue̱ꞌ zra lane̱ꞌ xia da naꞌ dxunna Dios leꞌe, chee̱ gaca se̱ chúchule lau xúgute̱ da dxuzé̱ da xriwe̱ꞌ laule chee̱ si xe̱ na leꞌe. 
\v 12 Quegá dxedíl-lale̱dxu bénneache zaj naque̱ꞌ be̱laꞌ dxen. Dxedíl-lale̱dxu xel-la dxenná bea chee̱ da xriwe̱ꞌ da dxeledá na lu beꞌ, ne dxedíl-lale̱dxu beꞌ xriwe̱ꞌ caꞌ, da dxelenná bea na, ne beꞌ xriwe̱ꞌ caꞌ dxe̱ na ljwezre caꞌ da xelún na, ne beꞌ xriwe̱ꞌ caꞌ xuꞌu lu naꞌ na xe̱zr la xu chul-la nigá. 
\v 13 Chee̱ le̱ naꞌ, le gaca ca benneꞌ zjaque̱ꞌ wedil-la zaj nacue̱ꞌ zra lane̱ꞌ xia da dxunna Dios leꞌe, chee̱ séquele súale wedil-la lu zra che da xriweꞌ, naꞌ ca te naꞌ xegáꞌana chúchule.
\v 14 Le se̱ chuchu xcaꞌ, suale̱ leꞌe da li ca tu bazxu da nacáꞌa na le̱ꞌe̱le, ne suale̱ leꞌe da xlátaje̱ ca tu xia da daꞌ lachuꞌle. 
\v 15 Le gaca sina chee̱ guchálajle dizraꞌ chaweꞌ chee̱ xel-la dxebeza zri lazreꞌ, da gaca na chee̱le ca tu cueꞌ zrélale.
\v 16 Da dxun na ba xen, le gapa xel-la dxeajlí lazreꞌ, da gaca na chee̱le ca tu da xegapa na, da xusula na xúgute̱ da zaj nalá na zaj zua na xiꞌ da dxuzala da xriwe̱ꞌ.
\v 17 Xel-la weselá gaca na chee̱le ca tu lapa xia da gucache xíchajle, naꞌ xrtizra Dios gaca na chee̱le ca tu xia da gunna Beꞌ Láꞌazxa leꞌe. 
\v 18 Gate ne dxunle da caní dxal-laꞌ guchálajle̱le Dios, gataꞌ xúele, ne nábale lau Le̱ꞌ ne̱ chee̱ Beꞌ Láꞌazxa.  Chee̱ gaca gunle da caní dxal-laꞌ súale ban lazreꞌ, ne quebe gate niꞌa naꞌle, naꞌ nábale Dios chee̱ gácale̱ne̱ꞌ xúgute̱ bi chee̱ꞌ caꞌ. 
\v 19 Cáꞌanqueze le naba Le̱ꞌ waláz chiaꞌ nedaꞌ chee̱ gunne̱ꞌ nedaꞌ dizraꞌ da guchálajaꞌ, chee̱ xazrdaꞌ guzendaꞌ bénneache dizraꞌ chaweꞌ chee̱ꞌ. 
\v 20 Dios be̱ne̱ꞌ nedaꞌ gubáz chee̱ dizraꞌ chaweꞌ chee̱ꞌ, naꞌ chee̱ le̱ naꞌ xuꞌa lizre xia naꞌa. Le naba Le̱ꞌ gácale̱ne̱ꞌ nedaꞌ chee̱ xazrdaꞌ guchálajaꞌ dizraꞌ chaweꞌ chee̱ꞌ ca dxal-laꞌ gunaꞌ. 

\s Pablo dxugape̱ꞌ diuzre le saꞌ ljwezre̱ꞌ 
\p 
\v 21 Tíquico, bi bíchedxu nazriꞌite̱ lazrdxu, bi li lazreꞌ lu zrin chee̱ Xránadxu, guzenbeꞌ leꞌe da dxaca chiaꞌ nigá, ne da dxunaꞌ. 
\v 22 Chee̱ le̱ naꞌ dxusel-laꞌ-beꞌ lau leꞌe chee̱ guzenbeꞌ leꞌe ca zúantuꞌ, ne chee̱ gutípabeꞌ lázrele. 
\p 
\v 23 Dxenabaꞌ lau Xradxu Dios, ne lau Xránadxu Jesucristo gunézruje̱ꞌ bi bíchedxu caꞌ zaj zre̱ꞌe̱ naꞌ xel-la dxebeza zri lazreꞌ, ne xel-la zriꞌi lazreꞌ, ne xel-la dxeajlí lazreꞌ,
\v 24 naꞌ gune̱ꞌ chaweꞌ xúgute̱ benneꞌ caꞌ du lazre̱ꞌ zaj nazriꞌine̱ꞌ Xránadxu Jesucristo. Caꞌan gaca na.