\id PHP
\h Filipenses
\mt DIZRAꞌ BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZRE FILIPOS
\c 1
\s Pablo dxugape̱ꞌ diuzre bi bíchedxu caꞌ zaj zre̱ꞌe̱ xe̱zre Filipos
\p
\v 1 Nedaꞌ Pablo, ne Timoteo nácantuꞌ we̱n zrin chee̱ Jesucristo. Dxuzúajaꞌ da nigá chee̱le leꞌe, bi bíchentuꞌ, ne chee̱le leꞌe, dxuxúele bi chee̱ Cristo, ne leꞌe, zaj xuꞌu lu naꞌle bi chee̱ Cristo, ne zrale xe̱zre Filipos. Nabábale chee̱ Dios, ne nácale tuze nen Jesucristo.
\v 2 Dxenábantuꞌ lau Xradxu Dios, ne lau Xránadxu Jesucristo gune̱ꞌ chee̱le da xrlátaje, ne gunne̱ꞌ leꞌe xel-la dxebeza zri lazreꞌ.
\s Da dxenaba Pablo gun Dios chee̱ bi caꞌ chee̱ Cristo
\p
\v 3 Tu tu lasa dxajsá lazraꞌ leꞌe dxapaꞌ Dios chiaꞌ: Xcalenuꞌ.
\v 4 Gate dxuchálajle̱naꞌ Dios, dute̱ xel-la dxebé dxenábaquezaꞌ bi gun Le̱ꞌ chee̱ xúgute̱le leꞌe.
\v 5 Caní dxunaꞌ laweꞌ da dxundxu zrin tu zren chee̱ dizraꞌ chaweꞌ chee̱ Cristo gate guzú lau núnbe̱ꞌtuꞌ na bzrinte̱ lu zra naꞌa zra.
\v 6 Dxuxrén lazraꞌ Dios, Bénneaꞌ guzú lawe̱ꞌ dxune̱ꞌ tu zrin chaweꞌ lu xichaj lázrdaule leꞌe, gúnqueze̱ꞌ na ca zrinte̱ zra xeláꞌ Jesucristo.
\v 7 Naca xrlátaje dxéquedaꞌ nedaꞌ caní chee̱ xúgute̱le leꞌe, laweꞌ da nazríꞌile̱ꞌe̱daꞌ leꞌe, ne dxezidxu tu zren da chaweꞌ caꞌ dxunna Dios dxiꞌu. Dxácate̱ ne xuꞌa lizre xia nigá, ne gate naꞌ gudíl-lale̱naꞌ bénneache caꞌ dizraꞌ, benneꞌ caꞌ guledábague̱ꞌ dizraꞌ chaweꞌ chee̱ Cristo, ba bleꞌedaꞌ benneꞌ caꞌ naca na da li.
\v 8 Dios nézquezene̱ꞌ nazríꞌile̱ꞌe̱daꞌ leꞌe, lu dute̱ xel-la zriꞌi lazreꞌ da dxunna Jesucristo nedaꞌ.
\v 9 Dxenabaꞌ lau Dios gune̱ꞌ zríꞌidxa ljwézrele, ne gápale̱ꞌe̱quezle xel-la sina, ne xel-la dxéajniꞌi lu xúgute̱ da dxunle,
\v 10 chee̱ nézele cuele da cháwedxa, chee̱ gácale du lazreꞌ, ne quebe bi gataꞌ da gagu na zria chee̱le lu zra naꞌ xeláꞌ Cristo.
\v 11 Caní gaca, da caꞌ dxunle xululéꞌe na da xrlátaje da dxun Jesucristo lu xichaj lázrdaule, chee̱ gaca ba láꞌana Dios, ne xegáꞌana szrénqueze̱ꞌ.
\s Dxenná Pablo: Che naca banaꞌ, Cristo dxuchínene̱ꞌ nedaꞌ
\p
\v 12 Leꞌe, bi bíchaꞌdauꞌ, dxaca lazraꞌ nézele ca da caꞌ guzracaꞌ gulácale̱ na nedaꞌ chee̱ bchálajaꞌ dizraꞌ chaweꞌ chee̱ Cristo.
\v 13 Caní guca, xúgute̱ benneꞌ xraꞌaga xuꞌu laweꞌ, ne xezícadxa benneꞌ caꞌ zaj zre̱ꞌe̱ xuꞌu laweꞌ naꞌ zaj nézene̱ꞌ xuꞌa lizre xia laweꞌ da dxunaꞌ zrin chee̱ Cristo.
\v 14 Laweꞌ da xuꞌa nedaꞌ lizre xia nigá, chaze xúgute̱ bi bíchedxu caꞌ dxuluxrén lázredxe̱ꞌ Xránadxu, naꞌ dxuluchálaje̱ꞌ du lazre̱ꞌ dizraꞌ chee̱ Dios, ne quebe dxelezrebe̱ꞌ.
\p
\v 15 Da li bal-la benneꞌ caꞌ dxuluchálaje̱ꞌ ca naca chee̱ Cristo laweꞌ da zaj naque̱ꞌ zreꞌe lazreꞌ, ne zaj naque̱ꞌ wil-la dizraꞌ. Xezícadxa benneꞌ caní dxuluchálaje̱ꞌ na dute̱ xel-la li lazreꞌ chee̱ꞌ.
\v 16 Benneꞌ nedxu caꞌ dxuluchálaje̱ꞌ da naca chee̱ Cristo chee̱ xulucáꞌana szren cuine̱ꞌ, ne quegá du lazre̱ꞌ, laweꞌ da dxelaca lazre̱ꞌ súadxa da guzúa na nedaꞌ ste̱be dxácate̱ xuꞌa lizre xia nigá.
\v 17 Xezícadxa benneꞌ caꞌ dxelune̱ꞌ na dute̱ xel-la zriꞌi lazreꞌ chee̱ꞌ, laweꞌ da zaj nézene̱ꞌ nuzúa cuinaꞌ guzéajniꞌidaꞌ benneꞌ caꞌ dxeledábague̱ꞌ dizraꞌ chaweꞌ chee̱ Cristo.
\v 18 ¿Bizra xcaꞌ? Ájate̱zla dxelune̱ꞌ, che dxuluchálaje̱ꞌ du lazre̱ꞌ, u quebe dxuluchálaje̱ꞌ du lazre̱ꞌ, dxuluchálaje̱ꞌ chee̱ Cristo, naꞌ dxebedaꞌ, ne wabéquezdaꞌ
\v 19 laweꞌ da nezdaꞌ lu xúgute̱ da caní wedxúaj na chaweꞌ chiaꞌ nedaꞌ, laweꞌ da dxenábale leꞌe lau Dios chiaꞌ nedaꞌ, naꞌ gácale̱ Beꞌ Láꞌazxa nedaꞌ, Bénneaꞌ gusel-le̱ꞌ Jesucristo chee̱dxu.
\v 20 Dxaca lazraꞌ, ne dxuxrén lazraꞌ quebe xeduéꞌedaꞌ nedaꞌ, séquedaꞌ guchálajaꞌ du lazraꞌ chee̱ xeleléꞌe bénneache zúale̱dxa xel-la szren chee̱ Cristo nedaꞌ naꞌa, ca zúale̱queze na nedaꞌ, che gaca banaꞌ, u che gatiaꞌ.
\v 21 Chiaꞌ nedaꞌ, che naca banaꞌ, Cristo dxuchínene̱ꞌ nedaꞌ, ne che gatiaꞌ wazrueꞌedaꞌ da cháwedxa.
\v 22 Che xedxúaj na chaweꞌ chee̱ zrin chee̱ Xránadxu che naca banaꞌ, quebe nezdaꞌ bila na caꞌa.
\v 23 Naca na ste̱be chiaꞌ nedaꞌ bila da caní caꞌa. Dxaca lazraꞌ gatiaꞌ chee̱ cheajsúale̱naꞌ Cristo, da gácadxa chaweꞌ chiaꞌ nedaꞌ,
\v 24 san che naca banaꞌ nácadxa chaweꞌ chee̱le leꞌe.
\v 25 Laweꞌ da nuxrén lazraꞌ naca caní, nezdaꞌ wazúale̱dxaꞌ leꞌe chee̱ se̱ cháchadxale lu da naca chee̱ Cristo, ne chee̱ béquezdxale.
\v 26 Chee̱ le̱ naꞌ bédxale lu da naca chee̱ Cristo ne̱ chiaꞌ nedaꞌ gate súale̱naꞌ leꞌe.
\p
\v 27 Dxun na ba xen gunle da dxuzéajniꞌi dizraꞌ chaweꞌ chee̱ Cristo leꞌe, naꞌ che xedajnnáꞌa leꞌe, u che suaꞌ zituꞌ, wendaꞌ ze̱ cháchale, ne nácale tuze, dxunle tu zren zrin chee̱ Cristo chee̱ xeleajlí lazreꞌ bénneache dizraꞌ chaweꞌ chee̱ꞌ.
\v 28 Quebe zrébele benneꞌ caꞌ dxeledábague̱ꞌ leꞌe. Ca dxunle guléꞌe na le̱ꞌ xelebía xiꞌe̱, naꞌ nalale leꞌe laweꞌ da bselá Dios leꞌe.
\v 29 Tu da zrente̱ naca da dxunna Dios leꞌe gate gunle zrin chee̱ Cristo, quegaze chéajle̱le chee̱ꞌ, naꞌ cáꞌanqueze che tele xel-la ziꞌ ne̱ chee̱ Le̱ꞌ.
\v 30 Leꞌe dxunle nedaꞌ tu zren dxedíl-lale̱dxu da zaj naca da cale̱la. Bléꞌequezle gate nate ca gudíl-lale̱naꞌ na, naꞌ naꞌa dxenle ca dxedíl-lale̱naꞌ na.
\c 2
\s Xel-la dxexruj lazreꞌ, ne xel-la szren chee̱ Cristo
\p
\v 1 Cristo dxutipe̱ꞌ lázrele, naꞌ xel-la zriꞌi lazreꞌ chee̱ꞌ dxuzúa na leꞌe lu da ba neza, naꞌ Beꞌ Láꞌazxa chee̱ꞌ zúale̱ne̱ꞌ leꞌe, naꞌ nápale xel-la zriꞌi lazreꞌ, ne xel-la dxexache lazreꞌ chee̱ꞌ.
\v 2 Chee̱ le̱ naꞌ le gun ga béle̱ꞌe̱daꞌ, gaca tuze ca da dxéquele, ne gácale tuze lu xel-la zriꞌi lazreꞌ chee̱le, ne gunle tuze lu xichaj lázrdaule.
\v 3 Quebe bi gunle chee̱ xulucáꞌana szren bénneache leꞌe, ne chee̱ gaca gucáꞌana szren cuínale, san dute̱ xel-la dxexruj lazreꞌ chee̱le dxal-laꞌ guéquele nácadxa blau le saꞌ ljwézrele ca leꞌe.
\v 4 Netule leꞌe quebe dxal-laꞌ gunle ca da gácale̱n leꞌeze. Le gun da gácale̱n na xezícadxa bénneache.
\p
\v 5 Dxal-laꞌ siꞌ lu naꞌle da gaca na chee̱le ca be̱n Jesucristo.
\v 6 Lácala naque̱ꞌ ca nácaqueze Dios, quebe gúquene̱ꞌ dxal-laꞌ gune̱ꞌ ba xuzre xegáꞌanaqueze̱ꞌ ca Dios.
\v 7 Bzue̱ꞌ chaláꞌala da nápaqueze̱ꞌ, ne be̱n cuine̱ꞌ ca tu benneꞌ nadaꞌu, guque̱ꞌ bénneache.
\v 8 Gate ba naque̱ꞌ bénneache, guque̱ꞌ dxexruj lazreꞌ, naꞌ bzue̱ꞌ dizraꞌ chee̱ Dios ca bzrinte̱ gutie̱ꞌ, lácala gutie̱ꞌ ca tu benneꞌ we̱n da cale̱la le̱ꞌe̱ xaga béguaj.
\v 9 Chee̱ le̱ naꞌ Dios bcaꞌana szrénle̱ꞌe̱ Le̱ꞌ, ne bzue̱ꞌ tu Le̱ꞌ da naca szrendxa ca xúgute̱ la xezícadxa,
\v 10 chee̱ gate xelenne̱ꞌ La Jesús, naꞌ xuluzú zribe lau Le̱ꞌ xúgute̱ benneꞌ zaj zre̱ꞌe̱ xabáa, ne xe̱zr la xu nigá, ne zran xe̱zr la xu nigá,
\v 11 ne chee̱ xelexeche̱be xúgute̱ꞌ naca Jesucristo Xránadxu, chee̱ gaca ba láꞌana Xradxu Dios.
\s Bi chee̱ Cristo zaj nácabeꞌ ca xiꞌ da dxulusení na
\p
\v 12 Chee̱ le̱ naꞌ, leꞌe, bi bichaꞌ nazriꞌite̱ lazraꞌ, ca naꞌ be̱nle leꞌe, bzúaquezle dizraꞌ chee̱ Dios gate naꞌ zúale̱naꞌ leꞌe, le guzúadxa dizraꞌ chee̱ Dios naꞌa gate zuaꞌ zituꞌ. Dute̱ xel-la dxexruj lazreꞌ, ne dute̱ xel-la dxezrebe le gun zrin chee̱ zruéꞌele dute̱ ca naca xel-la weselá chee̱le,
\v 13 laweꞌ da dxun Dios zrin lu xichaj lázrdaule chee̱ sa lázrele gunle da xrlátaje da dxaca lazreꞌ Le̱ꞌ, ne chee̱ séquele gunle na.
\p
\v 14 Le gun xúgute̱ da dxunle, ne quebe gáchajele, ne quebe gutil-la dizraꞌ ljwézrele
\v 15 chee̱ gácale li lazreꞌ, ne quebe nu nne̱ chee̱le. Gácale bi chee̱ Dios du lazreꞌ ládujla bénneache zaj naque̱ꞌ benneꞌ dxelún da cale̱la, ne gácale ca belaj caꞌ dxulusení na lu xe̱zr la xu naga nachul-la na,
\v 16 ne guchálajle̱le benneꞌ caꞌ dizraꞌ da nua na xel-la nabán. Che gunle caní, nedaꞌ wezaca ba lazraꞌ chee̱le gate xeláꞌ Cristo, laweꞌ da wanezdaꞌ quebe be̱n ziꞌ lazraꞌ dácheze, ne quebe be̱naꞌ zrin níteze.
\v 17 Béle̱ꞌe̱daꞌ lácala gun na ba xen gatiaꞌ chee̱ gaca li lazreꞌ xel-la dxeajlí lazreꞌ chee̱le lau Dios. Bzua cuínale lu naꞌ Dios ca tu gunaꞌ da gúnnale chee̱ꞌ, naꞌ chee̱ le̱ naꞌ béle̱ꞌe̱quezdaꞌ tu zren nen xúgute̱le leꞌe.
\v 18 Le béquezle leꞌe, ne le gun tuze nedaꞌ lu xel-la dxebé chiaꞌ.
\s Ca naca chee̱ Timoteo, ne Epafrodito
\p
\v 19 Che naca da dxaca lazreꞌ Xránadxu Jesús, dxebeza lazraꞌ sél-laze̱quezaꞌ Timoteo xedajnnáꞌabeꞌ leꞌe, chee̱ bedaꞌ gate xelabeꞌ, ne guzenbeꞌ nedaꞌ chee̱le leꞌe.
\v 20 Quebe nu chiláꞌ xetú benneꞌ guéquene̱ꞌ chee̱le ca da dxéquedaꞌ nedaꞌ. Tuze Timoteo dxeꞌebeꞌ gunne xue chee̱ gaca chaweꞌ chee̱le leꞌe.
\v 21 Xúgute̱ benneꞌ caꞌ xezícala zaj dxeꞌe̱ gunne xue da zaj naca chee̱ze̱ꞌ, ne quebe zaj dxeꞌe̱ gunne xue da naca chee̱ Jesucristo.
\v 22 Leꞌe nézquezle ca da xrlátaje dxun Timoteo, ne ca be̱nbeꞌ zrin tu zren nen nedaꞌ. Dxuchálajntuꞌ dizraꞌ chaweꞌ chee̱ Cristo, naꞌ dxunbeꞌ ca dxun tu bi dxácale̱beꞌ xrabeꞌ.
\v 23 Caní naca, dxebeza lazraꞌ sel-laꞌ-beꞌ gate nezdaꞌ ca gaca chiaꞌ.
\v 24 Dxuxrén lazraꞌ Xránadxu, nédaꞌquezaꞌ xidaꞌ xedajnnáꞌa leꞌe.
\p
\v 25 Cáꞌanqueze dxéquedaꞌ dxun na ba xen sel-laꞌ Epafrodito, bi bíchedxu. Dxunbeꞌ zrin tu zren nen nedaꞌ, dxedíl-lale̱ntuꞌ da cale̱la. Léꞌequezle gusél-lale bi nigá chee̱ gácale̱nbeꞌ nedaꞌ, ne xuꞌa lizre xia nigá.
\v 26 Dxezá lázrele̱ꞌe̱beꞌ xedajnnaꞌabeꞌ leꞌe, ne zúale̱ꞌe̱beꞌ ste̱be laweꞌ da nézebeꞌ bénele quebe chaweꞌ guzúabeꞌ.
\v 27 Da li quebe chaweꞌ guzúabeꞌ, ne bache gátebeꞌ, san Dios bexache lazre̱ꞌ le̱beꞌ, ne quegá tuze le̱beꞌ, cáꞌanqueze nedaꞌ chee̱ quebe xewine lázredxaꞌ ca da dxaca chiaꞌ naꞌa.
\v 28 Chee̱ le̱ naꞌ dxezá lázredxaꞌ sel-laꞌ le̱beꞌ chee̱ bele leꞌe gate xeléꞌele le̱beꞌ, ne chee̱ québedxa xewine lazraꞌ nedaꞌ.
\v 29 Le xezíꞌ lu naꞌle le̱beꞌ dute̱ xel-la dxebé, ca bi bíchele lu da naca chee̱ Xránadxu, ne le gápaqueze ba láꞌana benneꞌ caꞌ zaj naque̱ꞌ ca le̱beꞌ,
\v 30 laweꞌ da guzúa gátebeꞌ dxunbeꞌ zrin chee̱ Cristo. Bzuabeꞌ lu da ste̱be xel-la nabán chee̱beꞌ chee̱ gunbeꞌ zrin chiaꞌ da quebe guzéquele leꞌe gunle.
\c 3
\s Da naca chaweꞌ da naca na du lazreꞌ
\p
\v 1 Naꞌa, bi bichaꞌ, le be lu da naca chee̱ Xránadxu. Quebe naca na ze̱de chiaꞌ nedaꞌ guzúajaꞌ chee̱le xecha lasa ca da ba bzúajquezaꞌ, laweꞌ da dxun na ba xen gunaꞌ da nigá chee̱le.
\v 2 Le guxúe cuínale chee̱ benneꞌ caꞌ dxelune̱ꞌ da cale̱la, ne zaj naque̱ꞌ ca becuꞌ, benneꞌ caꞌ dxelechugue̱ꞌ lu be̱l-laꞌ dxen da naꞌ naca bea na benneꞌ zaj naque̱ꞌ chee̱ Dios.
\v 3 Dxiꞌu nácadxu benneꞌ nápaquezdxu da dxunna bea na nácadxu chee̱ Dios, ne dxue láꞌanadxu Dios ne̱ chee̱ Beꞌ Láꞌazxa, ne dxebedxu laweꞌ da nácadxu bi chee̱ Jesucristo. Quebe dxuxrén lázredxu da dxundxu,
\v 4 lácala nedaꞌ wazéquedaꞌ guxrén lazraꞌ da caꞌ nunaꞌ. Che nu benneꞌ dxéquene̱ꞌ waca guxrén lazre̱ꞌ ca da ba nune̱ꞌ, wazéquedxedaꞌ nedaꞌ.
\v 5 Gate gúquedaꞌ xrunuꞌ zra gulechugue̱ꞌ lu be̱l-laꞌ dxen chiaꞌ da naꞌ dxuléꞌe na nacaꞌ chee̱ Dios laweꞌ da nacaꞌ benneꞌ Israel, ne xrtia Benjamín. Nacaꞌ da li benneꞌ hebreo. Gucaꞌ benneꞌ fariseo ca buzájlaꞌa da bdxixruj beꞌe Moisés.
\v 6 Gudxéle̱ꞌa gunne xue da naca chee̱ Dios ca bzrinte̱ gudáu ziꞌ xuzraꞌ benneꞌ caꞌ zaj nácabe̱ꞌ bi chee̱ Jesús. Ca naca da xlátaje̱ da napa tu benneꞌ dxune̱ꞌ ca dxenná da nadxixruj bea na, quebe nu benneꞌ guzéquene̱ꞌ bi nnie̱ꞌ chiaꞌ.
\v 7 Xúgute̱ da caꞌ gúquedaꞌ gate nate zaj zácale̱ꞌe̱ na, naꞌa dxéquedaꞌ da caꞌ quebe bi zaj zaca na, laweꞌ da nazríꞌidxedaꞌ Cristo.
\v 8 Da li dxéquedaꞌ xúgute̱ da caꞌ ca tu da nite laweꞌ da zácadxa Xranaꞌ Jesucristo. Laweꞌ da nazríꞌidaꞌ Le̱ꞌ ba bzuaꞌ chaláꞌala xúgute̱ da gudapaꞌ, ne dxéquedaꞌ da caꞌ ca tu da níteze chee̱ siꞌa da ba neza da dxunna Cristo,
\v 9 chee̱ gacaꞌ tuze nen Le̱ꞌ, quegá laweꞌ da gucaꞌ xlátaje̱ ne̱ chee̱ da nadxixruj bea na naꞌ, san laweꞌ da bleꞌe Dios nedaꞌ xlátaje̱ laweꞌ da dxeajlí lazraꞌ Cristo, naꞌ Dios dxeléꞌene̱ꞌ xlátaje̱ xúgute̱ benneꞌ dxeleajlí lazre̱ꞌ Cristo.
\v 10 Da dxaca lazraꞌ naca na gúnbeadxaꞌ Cristo, ne súale̱ xel-la waca nedaꞌ da bsebán na Le̱ꞌ, ne teaꞌ xel-la ziꞌ ca da gudée̱ꞌ Le̱ꞌ, ne gudé cuinaꞌ lu naꞌ Dios lácala dxal-laꞌ gatiaꞌ ca gute Cristo,
\v 11 naꞌ dxebeza lazraꞌ xebanaꞌ ládujla benneꞌ gate caꞌ.
\s Pablo dxun ziꞌ lazre̱ꞌ gusexuzre̱ꞌ guneꞌ zrin chee̱ Cristo
\p
\v 12 Quebe dxenníaꞌ ba bzruéꞌedaꞌ xúgute̱ da caní, u ba nacaꞌ dute̱ xlátaje̱, san dxun ziꞌ lazraꞌ chee̱ zruéꞌedaꞌ da naꞌ bláwizra Jesucristo nedaꞌ chee̱ zruéꞌedaꞌ.
\v 13 Leꞌe, bi bichaꞌ, quebe dxenníaꞌ ba bzruéꞌedaꞌ da nigá, san tuze da dxunaꞌ, dxuzúaꞌ chaláꞌala da ba gudé, ne dxun ziꞌ lazraꞌ chee̱ zruéꞌedaꞌ da za zaꞌ,
\v 14 chee̱ gusexuzraꞌ gunaꞌ zrin da dxunaꞌ, chee̱ zruéꞌedaꞌ da naꞌ bláwizra Dios dxiꞌu sidxu lu xabáa chee̱ꞌ laweꞌ da nácadxu bi chee̱ Jesucristo.
\p
\v 15 Caní dxal-laꞌ guéquedxu dxiꞌu, ze̱ cháchadxu ca naca da dxeajlí lázredxu. Che quebe dxéquele caní chee̱ bítete̱ze da caní, Dios guzéajniꞌine̱ꞌ leꞌe ca naca chee̱ na.
\v 16 Tuze ca dxal-laꞌ guéquedxu, ne tuze ca dxal-laꞌ gundxu lu da caꞌ ba bzruéꞌedxu.
\p
\v 17 Leꞌe, bi bíchaꞌdauꞌ, le gun ca dxunaꞌ nedaꞌ, ne le nnaꞌ ca dxelún benneꞌ caꞌ, dxelune̱ꞌ ca da bléꞌentuꞌ leꞌe.
\v 18 Zaneꞌ lasa ba guchaꞌ leꞌe, ne naꞌa dxebézrteaꞌ dxapaꞌ leꞌe, zrále̱ꞌe̱ bi bíchedxu dxelune̱ꞌ ca dxelún benneꞌ dxuluzúe̱ꞌ chaláꞌala da be̱n Cristo le̱ꞌe̱ xaga béguaj.
\v 19 Ca gaca chee̱ benneꞌ caꞌ lu zra bze̱be, xelebía xiꞌe̱. Zaj nune̱ꞌ dios chee̱ da dxeléꞌaj dxelawe̱ꞌ, ne dxulucáꞌana szren cuine̱ꞌ chee̱ da naꞌ dxal-laꞌ xelapa stuꞌe̱. Zaj dxeꞌe̱ gunne xue da naca chee̱ xe̱zr la xu nigaze.
\v 20 Dxiꞌu nácadxu benneꞌ zaj nababe̱ꞌ xabáa, ne dxebézadxu zra xeláꞌ benneꞌ weselá chee̱dxu, Xránadxu Jesucristo, ze̱ꞌe̱ xabáa.
\v 21 Le̱ꞌ xegüe̱ꞌ be̱l-laꞌ dxen chee̱dxu da dxeledé chee̱ na, ne gune̱ꞌ na ca naca be̱l-laꞌ dxen xabáa chee̱ꞌ, guchínene̱ꞌ xel-la waca chee̱ꞌ da nape̱ꞌ chee̱ nna béꞌene̱ꞌ xúgute̱ da zaj zua.
\c 4
\s Dxal-laꞌ béquezdxu lu da naca chee̱ Xránadxu
\p
\v 1 Chee̱ le̱ naꞌ leꞌe, bi nazriꞌite̱ lazraꞌ, le se̱ chacha lu da naca chee̱ Xránadxu. Leꞌe, bi bíchaꞌdauꞌ nazríꞌite lazraꞌ, dxezá lázrele̱ꞌa leꞌedaꞌ leꞌe, laweꞌ da dxebedaꞌ ca nácale leꞌe, naꞌ laweꞌ da be̱naꞌ nedaꞌ nácale bi chee̱ Cristo dxal-laꞌ siꞌa tu da gunna Dios nedaꞌ.
\p
\v 2 Dxataꞌ xuedaꞌ Evodia, ne Síntique xelaque̱ꞌ tuze, laweꞌ da zaj naque̱ꞌ bila ne̱ chee̱ Xránadxu.
\v 3 Naꞌa lueꞌ, bi ljwezraꞌ li lazreꞌ, dxataꞌ xuedaꞌ lueꞌ gácale̱nuꞌ nuꞌula zandxu caní, nuꞌula belúnle̱ne̱ꞌ nedaꞌ zrin chee̱ dizraꞌ chaweꞌ chee̱ Cristo. Belune̱ꞌ zrin naꞌ tu zren nen Clemente, ne xezícadxa benneꞌ caꞌ belúnle̱ne̱ꞌ nedaꞌ zrin. La benneꞌ caní zaj naxúaj na lu xiche chee̱ xel-la nabán zeajlí canna.
\p
\v 4 Le béqueze lu da naca chee̱ Xránadxu. Xecha lasa dxenníaꞌ: Le be.
\v 5 Dxaca lazraꞌ xeleque beꞌe xúgute̱ bénneache nácale zren lazreꞌ. Ba zua bagu zra xeláꞌ Xránadxu.
\p
\v 6 Quebe bi cuele gunne xue, san le guchálajle̱queze Dios ca naca chee̱ da caꞌ. Le naba na lau Dios, naꞌ le xe̱ꞌe̱: Xcalenuꞌ.
\v 7 Nadxa gunna Dios leꞌe xel-la dxebeza zri lazreꞌ, da naca na szrendxa ca da sequeꞌ gúnbea bénneache, naꞌ guzúa chuchu na xichaj lázrdaule ne̱ chee̱ Jesucristo.
\s Le gulaba lazreꞌ ca naca da xrlátaje
\p
\v 8 Naꞌa, bi bichaꞌ, le gulaba lazreꞌ ca naca
\q xúgute̱ da zaj naca li, ne
\q xúgute̱ da zaj napa na ba láꞌana, ne
\q xúgute̱ da zaj naca na li lazreꞌ, ne
\q xúgute̱ da zaj naca na du lazreꞌ, ne
\q xúgute̱ da dxezaca ba lazreꞌ Dios, ne
\q xúgute̱ da dxulucáꞌana na bénneache xrlátaje.
\m Che zua tu da naca xrlátaje, u da dxal-laꞌ gucáꞌana szrendxu, le gulaba lazreꞌ da caní.
\p
\v 9 Le gun ca naca da bsé̱dedaꞌ leꞌe, ne da bzéajniꞌidaꞌ leꞌe, ne da bzendaꞌ leꞌe, ne da bleꞌedaꞌ leꞌe, naꞌ súale̱ Dios leꞌe, Bénneaꞌ dxunne̱ꞌ dxiꞌu xel-la dxebeza zri lazreꞌ.
\s Da gulesel-la benneꞌ Filipos caꞌ chee̱ Pablo
\p
\v 10 Dxebéle̱ꞌe̱daꞌ ne̱ chee̱ Xránadxu, laweꞌ da dxajsá lázrele nedaꞌ. Quebe dxenníaꞌ ba gul-la lázrele nedaꞌ, san quebe gutaꞌ lataj gácale̱le nedaꞌ.
\v 11 Quebe dxenníaꞌ da nigá laweꞌ da bi dxexázrjedaꞌ, laweꞌ da ba bse̱de Xránadxu nedaꞌ suaꞌ xel-la dxebé ájate̱ze dxaca chiaꞌ.
\v 12 Ba gudéaꞌ xel-la xacheꞌ, ne cáꞌanqueze xel-la gunníꞌa. Nazé̱diaꞌ dxuchaga lawaꞌ xúgute̱ da dxaca chiaꞌ, che néljadaꞌ, u che dxedunaꞌ, che nápale̱ꞌa, u che quebe bi napaꞌ.
\v 13 Xúgute̱ wazéquedaꞌ guchaga lawaꞌ laweꞌ da dxuzé̱ tipa Cristo nedaꞌ.
\v 14 Be̱nle da xrlátaje, gúcale̱le nedaꞌ ne̱ chee̱ da gusél-lale chiaꞌ.
\p
\v 15 Ba nézquezle leꞌe, benneꞌ Filipos, ca guca gate guzú lawaꞌ dxuchálajaꞌ dizraꞌ chaweꞌ chee̱ Cristo nigá. Gate bezáꞌa xe̱zre caꞌ zaj nababa xe̱zr la xu Macedonia, leꞌeze gusél-lale chiaꞌ dumí chee̱ da guzíꞌ lu naꞌle.
\v 16 Gate guzúaꞌ xe̱zre Tesalónica, chupa chunna lasa gusél-lale dumí chiaꞌ chee̱ quebe bi xázrjedaꞌ.
\v 17 Quebe dxenníaꞌ da nigá laweꞌ da dxaca lazraꞌ bi gúnnale chiaꞌ, san dxaca lazraꞌ gácadxa da ba neza chee̱le leꞌe lau Dios.
\v 18 Ba guziꞌa xúgute̱ da gusél-lale, naꞌ de̱le̱ꞌe̱ chiaꞌ. Ca naca da gusélal-le chiaꞌ lu naꞌ Epafrodito, da zrendxa guca na ca da bexázrjedaꞌ. Da naꞌ gusél-lale naca na ca tu gunaꞌ da dxelá zixre na lau Dios, u tu da bzúale lau Dios da dxezaca ba lazre̱ꞌ.
\v 19 Dios chiaꞌ gunne̱ꞌ leꞌe xúgute̱ da dxexázrjele, chee̱ xel-la gunníꞌa chee̱ xabáa chee̱ꞌ ne̱ chee̱ Jesucristo.
\v 20 Gaca ba Xradxu Dios chadía chacanna. ¡Caꞌan gaca na!
\s Pablo dxuzé̱ dizraꞌ benneꞌ Filipos caꞌ
\p
\v 21 Waláz chiaꞌ nedaꞌ le gugapa diuzre lu La Jesucristo xúgute̱ benneꞌ zaj nababe̱ꞌ chee̱ Dios. Bi bíchedxu caꞌ zaj zúale̱ nedaꞌ dxulugape̱ꞌ leꞌe diuzre.
\v 22 Xúgute̱ bi bíchedxu zaj zreꞌe nigá, benneꞌ zaj nababe̱ꞌ chee̱ Dios, ne bi bíchedxu zaj zre̱ꞌe̱ lizre bénneaꞌ dxenná béꞌene̱ꞌ xe̱zr la xu Roma, dxulugape̱ꞌ leꞌe diuzre.
\p
\v 23 Dxenabaꞌ lau Xránadxu Jesucristo gune̱ꞌ da chaweꞌ chee̱ xúgute̱le leꞌe. Caꞌan gaca na.