\id COL
\h Colosenses
\mt DIZRAꞌ BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZRE COLOSAS
\c 1
\s Pablo dxugape̱ꞌ diuzre bi bíchedxu zaj zre̱ꞌe̱ xe̱zre Colosas
\p
\v 1 Nedaꞌ, Pablo, nacaꞌ gubáz chee̱ Jesucristo laweꞌ da naca da dxaca lazre Dios, naꞌ zúale̱ bi bíchedxu Timoteo nedaꞌ.
\v 2 Dxuzúajaꞌ da nigá chee̱le leꞌe zrale xe̱zre Colosas, ne nabábale chee̱ Dios, ne dxeajlí lázrele Cristo. Dxenabaꞌ Xradxu Dios gune̱ꞌ da chaweꞌ chee̱le leꞌe, ne gunne̱ꞌ leꞌe xel-la dxebeza zri lazreꞌ.
\s Da dxenaba Pablo lau Dios chee̱ bi bíchedxu caꞌ
\p
\v 3 Dxé̱quezentuꞌ Dios, Xra Xránadxu Jesucristo: Xcalenuꞌ ca naca chee̱le gate dxuchálajle̱ntuꞌ Le̱ꞌ.
\v 4 Ba bénentuꞌ ca dxeajlí lázrele Cristo, ne ca nazriꞌile xúgute̱ bi caꞌ chee̱ Dios.
\v 5 Caní dxunle laweꞌ da dxebeza lázrele da nucueza Dios chee̱le xabáa, naꞌ guzú laule dxunle ca naca da nigá gate guzile dizraꞌ chaweꞌ da naca na da li.
\v 6 Dizraꞌ chaweꞌ nigá bla na ládujla leꞌe ca bla na dute̱ xe̱zr la xu nigá, naꞌ dxezriluj na, ne dxun na zrin dute̱ xe̱zr la xu ca dxun na ládujla leꞌe, gate bénte̱le ca nazríꞌi Dios bénneache, ne gunézele naca na da li.
\v 7 Da nigá bleꞌe Epafras leꞌe. Naque̱ꞌ bi bíchedxu nazríꞌi lázredxu, ne ba bé̱nqueze̱ꞌ zrin nen netuꞌ, ne naque̱ꞌ chee̱le leꞌe tu benneꞌ we̱n zrin li lazreꞌ chee̱ Cristo.
\v 8 Epafras nigá bzenne̱ꞌ netuꞌ ca dxaca chee̱le leꞌe, ne ca nazríꞌi ljwézrele ne̱ chee̱ Beꞌ Láꞌazxa.
\p
\v 9 Chee̱ le̱ naꞌ, zra gunézentuꞌ da nigá, dxuchálajle̱quezentuꞌ Dios chee̱le leꞌe, ne dxenábantuꞌ Le̱ꞌ guzéajniꞌine̱ꞌ leꞌe ca naca da dxaca lazre̱ꞌ, ne gunne̱ꞌ leꞌe dute̱ xel-la sina, ne dute̱ xel-la dxéajniꞌi da dxunna Beꞌ Láꞌazxa dxiꞌu.
\v 10 Caní dxenábantuꞌ Le̱ꞌ chee̱ gaca gunle ca dxal-laꞌ xelún bi caꞌ chee̱ Xránadxu, ne gunle ca da dxezaca ba lazreꞌ Le̱ꞌ, gunle xúgute̱ da naca da xrlátaje, ne gúnbeadxaquezle Dios.
\v 11 Dxenábantuꞌ Le̱ꞌ guzúa chache̱ꞌ leꞌe lu xel-la waca da naca chee̱ xel-la szren chee̱ꞌ chee̱ séquele guchaga laule xúgute̱ da dxaca chee̱le lu dute̱ xel-la zren lazreꞌ chee̱le, ne dute̱ xel-la dxebé.
\v 12 Dxal-laꞌ xe̱le Dios: Xcalenuꞌ, laweꞌ da bzua Dios dxiꞌu chee̱ sidxu da nucueze̱ꞌ chee̱dxu, chee̱ súadxu lu xel-la naxaníꞌ chee̱ꞌ, laweꞌ da nácadxu bi chee̱ Le̱ꞌ.
\v 13 Dios bselé̱ꞌ dxiꞌu lu xel-la dxenná bea chee̱ da chul-la, naꞌ bzue̱ꞌ dxiꞌu naga dxenná bea Zríꞌine̱ꞌ nazriꞌite̱ lazre̱ꞌ.
\v 14 Zríꞌine̱ꞌ nácaqueze̱ꞌ Bénneaꞌ bselé̱ꞌ dxiꞌu gate gutie̱ꞌ waláz chee̱dxu, chee̱ bnite lau Dios dul-la gubágadxu.
\s Bexácadxu tuze nen Dios laweꞌ da gute Cristo
\p
\v 15 Ca naca Jesús, dxuléꞌe na dxiꞌu ca nácaqueze Dios, Bénneaꞌ quebe gaca léꞌedxu, ne naque̱ꞌ chee̱ Dios ca tu bi nedxu chee̱ bénneache, bi nácadxabeꞌ blau ca xúgute̱ da be̱n Dios.
\v 16 Ne̱ chee̱ Le̱ꞌ be̱n Dios xúgute̱ da zaj zua xabáa, ne da zaj zua xe̱zr la xu nigá, da caꞌ dxeléꞌedxu, ne da caꞌ quebe gaca léꞌedxu, che zaj naca na beꞌ caꞌ zaj naca na blau, u beꞌ caꞌ dxelenná bea na, u beꞌ caꞌ zaj napa na xel-la szren, u beꞌ caꞌ zaj napa na xel-la waca, xúgute̱ na be̱n Dios ne̱ chee̱ Le̱ꞌ, naꞌ chee̱ Le̱ꞌ zaj naca na.
\v 17 Cristo ba zúaqueze̱ꞌ nédxute̱ ca xúgute̱ da zaj zua, naꞌ ne̱ chee̱ Le̱ꞌ xúgute̱ da caꞌ dxelún na ca zaj naca chee̱ na.
\v 18 Xúgute̱ benneꞌ zaj naque̱ꞌ bi chee̱ Cristo zaj naque̱ꞌ ca tuze be̱l-laꞌ dxen, naꞌ Crístoqueze naque̱ꞌ xichaj be̱l-laꞌ dxen naꞌ da nácadxu. Le̱ꞌ bzue̱ꞌ be̱l-laꞌ dxen naꞌ, ne Le̱ꞌ naque̱ꞌ Benneꞌ bebán nédxute̱ ládujla benneꞌ gate caꞌ chee̱ gaque̱ꞌ Benneꞌ blau lu xúgute̱ da zaj zua.
\v 19 Caní naca na laweꞌ da guca lazreꞌ Dios súale̱ Cristo dute̱ da nácaqueze Dios.
\v 20 Cáꞌanqueze guca lazreꞌ Dios ne̱ chee̱ Cristo xexune̱ꞌ tuze nen Le̱ꞌ xúgute̱ da zaj zua, ca da zaj zua na lu xe̱zr la xu, ne da zaj zua na xabáa. Bexune̱ꞌ dxiꞌu tuze nen Le̱ꞌ ne̱ chee̱ xel-la gute chee̱ Cristo le̱ꞌe̱ xaga béguaj.
\p
\v 21 Nédxute̱ leꞌe gúcale ca benneꞌ zituꞌ lau Dios, ne bzráꞌale Dios lu xichaj lázrdaule, ne be̱nle xúgute̱ da cale̱la, san naꞌa Dios ba bexune̱ꞌ leꞌe tuze nen Le̱ꞌ,
\v 22 ne̱ chee̱ da be̱n Cristo gate gutie̱ꞌ le̱ꞌe̱ xaga béguaj lu be̱laꞌ dxen chee̱ꞌ. Da nigá be̱n Le̱ꞌ chee̱ gaca guzúe̱ꞌ leꞌe lau Le̱ꞌ, gácale benneꞌ láꞌazxa, ne du lazreꞌ, ne quebe bi nabágale da cale̱la.
\v 23 Chee̱ gaca caní dxal-laꞌ se̱ cháchale, ne sua típale ca dxeajlí lázrele Cristo, ne quebe gusanle ca da dxebeza lázrele, da naꞌ nápale laweꞌ da dxéajle̱le dizraꞌ chaweꞌ chee̱ Cristo. Dizraꞌ chaweꞌ nigá nene na dute̱ xe̱zr la xu, naꞌ nuzúa Dios nedaꞌ, Pablo, benneꞌ we̱n zrin chee̱ꞌ, chee̱ guchálajaꞌ dizraꞌ chaweꞌ nigá.
\s Zrin dxun Pablo chee̱ bi caꞌ chee̱ Cristo
\p
\v 24 Naꞌa dxebedaꞌ lu xel-la ziꞌ da dxedéaꞌ ne̱ chee̱le leꞌe, laweꞌ da dxuzá lawaꞌ lu be̱l-laꞌ dxen chiaꞌ ca da dxezaca Cristo ne̱ chee̱ bi chee̱ꞌ caꞌ, benneꞌ caꞌ zaj naque̱ꞌ ca be̱l-laꞌ dxen cheé̱queze̱ꞌ.
\v 25 Bzua Cristo nedaꞌ ca benneꞌ we̱n zrin chee̱ bi chee̱ꞌ caꞌ, ne̱ chee̱ da bláwizra Dios nedaꞌ gunaꞌ, gácale̱naꞌ leꞌe, naꞌ guchálajaꞌ dúte̱queze da naca dizraꞌ chee̱ Dios,
\v 26 ne chee̱ guzéajniꞌidaꞌ bénneache ca da nagache, da naꞌ nagache nédxute̱, san naꞌa Dios ba bléꞌene̱ꞌ bi chee̱ꞌ caꞌ ca naca na.
\v 27 Guca lazreꞌ Dios guléꞌene̱ꞌ benneꞌ caꞌ ca naca xel-la gunníꞌa zren chee̱ da naꞌ nagache nédxute̱, da gunézruje̱ꞌ benneꞌ caꞌ quebe zaj naque̱ꞌ judío. Da naꞌ nagache nédxute̱ naca na caní: Cristo zue̱ꞌ xichaj lázrdaule, naꞌ chee̱ le̱ naꞌ dxebeza lázredxu súadxu xabáa chee̱ꞌ.
\p
\v 28 Netuꞌ dxuchálajntuꞌ ca naca chee̱ Cristo. Dxuzéajniꞌintuꞌ xúgute̱ bénneache, ne dxusé̱dentuꞌ xúgute̱ꞌ, chee̱ xeleajniꞌi xánnene̱ꞌ chee̱ xelaca xúgute̱ bénneache du lazreꞌ lau Dios ne̱ chee̱ Jesucristo.
\v 29 Chee̱ gaca caní dxunaꞌ nedaꞌ zrin, dxuchínedaꞌ dute̱ xel-la waca chee̱ Cristo, da dxun na zrin lu xichaj lázrdawaꞌ.
\c 2
\p
\v 1 Dxaca lazraꞌ nézele leꞌe dxúnle̱ꞌa zrin, dxeꞌa gunne xue le̱n Dios da naca chee̱le leꞌe, ne da naca chee̱ bi bíchedxu caꞌ caꞌ zaj zre̱ꞌe̱ Laodicea, ne da naca chee̱ xúgute̱ bi bíchedxu caꞌ quebe ne xeleléꞌene̱ꞌ nedaꞌ caníqueze.
\v 2 Dxaca lazraꞌ xeledipa lazre̱ꞌ, ne xelaque̱ꞌ tuze lu xel-la zriꞌi lazreꞌ, ne xelaque̱ꞌ benneꞌ gunníꞌa lu xichaj lázrdawe̱ꞌ, chee̱ xelúnbeꞌe̱ da nagache chee̱ Xradxu Dios da nácaqueze Cristo.
\v 3 Lu naꞌ Le̱ꞌ zaj de̱ ca naca xel-la gunníꞌa chee̱ xel-la sina, ne xel-la dxéajniꞌi.
\v 4 Dxapaꞌ leꞌe da nigá chee̱ quebe xelezí xe̱ leꞌe benneꞌ caꞌ zaj neze xrgúe̱ꞌ ca dxuluchálaje̱ꞌ.
\v 5 Lácala quebe zúale̱teaꞌ leꞌe caníqueze, naca na cáte̱ze zúale̱naꞌ leꞌe lu beꞌ nácaquezaꞌ, naꞌ dxebéle̱ꞌe̱daꞌ dxendaꞌ dxunle da xlátaje̱, ne ze̱ cháchale ca dxeajlí lázrele Cristo.
\p
\v 6 Chee̱ le̱ naꞌ, ca be̱nle, guzíꞌ lu naꞌle Xránadxu Jesucristo, cáꞌanqueze dxal-laꞌ gunle súale̱le Le̱ꞌ.
\v 7 Dxal-laꞌ gácale ca tu xaga da dxudé lue na sítujla lu da naca chee̱ Cristo. Cáꞌanqueze dxal-laꞌ gácale ca tu xuꞌu da dxeꞌ lane lu da naca chee̱ꞌ Le̱ꞌ, chee̱ se̱ cháchale ca dxeajlí lázrele Le̱ꞌ, ca bléꞌentuꞌ leꞌe, naꞌ dxál-laꞌqueze xe̱le Dios: Xcalenuꞌ.
\s Xel-la nabán cube da dxunna Cristo dxiꞌu
\p
\v 8 Le guxúe cuínale. Quebe güele lataj xelezí xe̱ benneꞌ caꞌ leꞌe, xuluchínene̱ꞌ xel-la sina chee̱ bénneache, ne dizraꞌ cale̱la, ca naca da dxulusé̱dequeze bénneache, ne ca zaj naca da caꞌ dxácaqueze lu xe̱zr la xu nigá, ne quegá ca naca chee̱ Cristo.
\q
\v 9 Dute̱ ca naca Dios nácaqueze Cristo.
\q
\v 10 Nápale leꞌe xúgute̱ da naca chee̱ꞌ
\q laweꞌ da nácaquezle be̱l-laꞌ dxen chee̱ Le̱ꞌ.
\q Le̱ꞌ dxenná beꞌene̱ꞌ xúgute̱ beꞌ da dxelenná bea na,
\q ne xúgute̱ beꞌ da zaj napa na xel-la waca.
\m
\v 11 Cáꞌanqueze, laweꞌ da nácale tuze nen Cristo nácale bi chee̱ Dios. Quebe guca chee̱le ca da naꞌ belúnqueze benneꞌ judío caꞌ, gulechugue̱ꞌ lateꞌ be̱l-laꞌ dxen chee̱ bi biu chee̱ꞌ caꞌ, da naꞌ dxuléꞌe na zaj nácabeꞌ chee̱ Dios. Bedúa dute̱ da naca chee̱ be̱laꞌ dxen chee̱le da naca sban, da guca na ne̱ chee̱ da be̱n Cristo lu xichaj lázrdaule. Be̱ne̱ꞌ nácale bi chee̱ Dios.
\v 12 Gate gudxúale nisa guca chee̱le ca guca chee̱ Cristo gate bgache̱ꞌ lu xe̱dxu ba, naꞌ cáꞌanqueze guca chee̱le ca guca chee̱ Le̱ꞌ gate bebane̱ꞌ ládujla benneꞌ gate. Caní guca chee̱le laweꞌ da guxeajlí lázrele xel-la waca chee̱ Dios, Bénneaꞌ bsebane̱ꞌ Cristo ládujla benneꞌ gate caꞌ.
\v 13 Gate nate gúcale leꞌe ca benneꞌ gate lu dul-la da gubágale, ne lu be̱laꞌ dxen sban chee̱le da quebe ne xedúa na. Naꞌa Dios ba nunne̱ꞌ leꞌe xel-la nabán tu zren nen Cristo, ne ba bnite lawe̱ꞌ xúgute̱ dul-la da gubágale.
\v 14 Dios bzria xiꞌe̱ ca naca da nabágadxu chee̱ xúgute̱ da nadxixruj bea na da gula da buluzría xi na dxiꞌu. Bebéaje̱ꞌ na chaláꞌala, ne bde̱ꞌe̱ na le̱ꞌe̱ xaga béguaj ca tu da gubagaꞌ Cristo.
\v 15 Gate gute Cristo le̱ꞌe̱ xaga béguaj begüe̱ꞌ ca naca xel-la dxenná bea, ne xel-la waca chee̱ beꞌ xriwe̱ꞌ caꞌ, naꞌ bléꞌene̱ꞌ da caꞌ láwela gubáz chee̱ xabáa caꞌ laweꞌ da gunná béꞌene̱ꞌ na.
\s Le sa lazreꞌ da caꞌ zaj de̱ na xabáa
\p
\v 16 Chee̱ le̱ naꞌ, quebe nu dxal-laꞌ si tizraꞌ leꞌe ca naca da dxeꞌaj da dxágule, ne ca zaj naca zra laní, ne ca naca laní chee̱ beuꞌ dxeꞌene, ne ca zaj naca zra dxupáꞌanale.
\v 17 Xúgute̱ da caní zaj naca na ca tu zrúl-laze chee̱ da zaj zéaje̱ da caꞌ.
\v 18 Quebe güele lataj nu cua da nucueza Dios chee̱le leꞌe, ne̱ chee̱ da dxululéꞌe benneꞌ caꞌ, benneꞌ dxeléquene̱ꞌ zaj naque̱ꞌ dxexruj lazreꞌ laweꞌ da dxulucáꞌana szrene̱ꞌ gubáz chee̱ xabáa caꞌ, ne dxuluchálaje̱ꞌ chee̱ da quebe ne xeleléꞌene̱ꞌ, ne dxulucáꞌana szren cuine̱ꞌ ca naca xel-la sina chee̱ bénneacheze da zaj nape̱ꞌ.
\v 19 Quebe zaj de̱ꞌe̱ Cristo, Bénneaꞌ naque̱ꞌ xichaj be̱l-laꞌ dxen da nácadxu dxiꞌu, naꞌ Le̱ꞌ dxusegule̱ꞌ dute̱ be̱l-laꞌ dxen naꞌ, ne dxugawe̱ꞌ na, ne dxune̱ꞌ na tuze du ca naca na, chee̱ gaca na ca dxaca lazreꞌ Dios.
\p
\v 20 Naca chee̱le ca naca chee̱ tu benneꞌ ba nate laweꞌ da nácale be̱l-laꞌ dxen chee̱ Cristo, chee̱ québedxa gunle ca zaj naca da caꞌ dxácaqueze lu xe̱zr la xu nigá. Naꞌa, ¿bizr chee̱ naꞌ dxedale ca benneꞌ ne zaj nácaqueze̱ꞌ chee̱ xe̱zr la xu nigá, ne dxunle ca da dxelenná bea bénneache.
\v 21 Dxelenné̱ꞌ: Quebe guchínenuꞌ da nigá. Quebe gaguꞌ da caꞌ. Quebe chajtáuꞌ da naꞌ.
\v 22 Xúgute̱ da nadxixruj bea caní dxuluchalaj na chee̱ da caꞌ dxeledé chee̱ na gate dxuchínedxu na, ne zaj nácaze na da dxelenná bea bénneache, ne da dxuluse̱de bénneache.
\v 23 Da li dxeleque bénneache zaj naca na sina da nadxixruj bea caní, laweꞌ da dxuluse̱de na bénneache xelúe láꞌane̱ꞌ Dios, ne xelaque̱ꞌ dxexruj lazreꞌ, ne xelenná beꞌene̱ꞌ be̱l-laꞌ dxen chee̱ꞌ. Quebe bi culuén zaj napa na chee̱ xelenná beꞌe na xel-la dxezá lazreꞌ sban caꞌ chee̱ bénneache.
\c 3
\p
\v 1 Leꞌe nácale ca benneꞌ ba belexebán tu zren nen Cristo. Chee̱ le̱ naꞌ le sa lazreꞌ da zaj zua xabáa, naga dxeꞌ Cristo chaláꞌa xabe̱la chee̱ Dios.
\v 2 Le gulaba lazreꞌ chee̱ da zaj de̱ xabáa, quegá chee̱ da zaj de̱ lu xe̱zr la xu.
\v 3 Nácale ca benneꞌ ba zaj nate, naꞌ xel-la nabán chee̱le nuzúa chaweꞌ Dios naga zua Cristo.
\v 4 Cristo nácaqueze xel-la nabán chee̱dxu, naꞌ gate xeláꞌ Le̱ꞌ, cáꞌanqueze leꞌe gunle tu zren Le̱ꞌ lu xel-la szren chee̱ꞌ.
\s Xel-la nabán gula ne xel-la nabán cube
\p
\v 5 Chee̱ le̱ naꞌ, le xebéaj ca tu da nate xúgute̱ da zaj zua lu xichaj lázrdaule da zaj naca na chee̱ xe̱zr la xu nigá, ca naca xel-la dxichaj na xrba chee̱ xel-la nuchaga naꞌ, ne da sban, ne xel-la dxezá lazreꞌ da sban ne da cale̱la caꞌ, ne xel-la dxucudeꞌ, laweꞌ da naca da dxucude bénneache ca dios chee̱queze̱ꞌ.
\v 6 Xúgute̱ da caní dxelún benneꞌ quebe dxuluzúe̱ꞌ dizraꞌ chee̱ Dios, naꞌ chee̱ le̱ naꞌ gudé Dios benneꞌ caꞌ lu da ba xaꞌ.
\v 7 Cáꞌanqueze leꞌe be̱nle xúgute̱ da caní gate nate.
\v 8 Naꞌa, québedxa gunle xúgute̱ da caní:
\q Xel-la dxezráꞌa, ne xel-la xichaj zraꞌa, ne xel-la dxecuide ljwezre.
\q Québedxa nne̱le dizraꞌ schanniꞌ.
\q Québedxa gucháchale ljwézrele.
\m
\v 9 Quebe si xe̱ ljwézrele tule xetule, laweꞌ da ba bzúale chaláꞌala da gúcale nédxute̱, ne ca naca da be̱nle.
\v 10 Nácale ca benneꞌ cube, laweꞌ da dxuxucube Dios leꞌe chee̱ gácale ca nácaqueze Dios, Bénneaꞌ be̱ne̱ꞌ leꞌe, ca zrindxa gúnbea xánnele Le̱ꞌ.
\v 11 Lau Dios québedxa bi zaca che nácadxu benneꞌ griego, che benneꞌ judío, u che nácadxu benneꞌ zaj nadxugu lu be̱l-laꞌ dxen chee̱ꞌ da dxuléꞌe na zaj nababe̱ꞌ chee̱ Dios, che benneꞌ quebe zaj nape̱ꞌ da naꞌ dxuléꞌe na, u che nácadxu benneꞌ zituꞌ, che benneꞌ caꞌ zaj zre̱ꞌe̱ xiꞌa xe̱gu caꞌ, u che nácadxu benneꞌ zaj nadaꞌu, che benneꞌ quebe zaj nadaꞌu. Da zaca na naca na che naca Cristo benneꞌ xíchajdxu, ne che zue̱ꞌ lu xichaj lázrdaudxu.
\p
\v 12 Dios nazriꞌine̱ꞌ leꞌe, ne guqué̱ꞌe̱ leꞌe chee̱ gácale bi chee̱ꞌ caꞌ. Chee̱ le̱ naꞌ le gaca:
\q Benneꞌ dxexache lazreꞌ, ne benneꞌ zriꞌi lazreꞌ,
\q ne benneꞌ dxexruj lazreꞌ, ne benneꞌ chaweꞌ lazreꞌ,
\q ne benneꞌ zren lazreꞌ.
\q
\v 13 Le gácale̱ ljwézrele tule xetule,
\q ne le gunite lau chee̱le tule xetule,
\q che núlale dxezráꞌa ljwézrele.
\q Ca be̱n Cristo, bnite lawe̱ꞌ chee̱le,
\q cáꞌanqueze le gun leꞌe chee̱ ljwézrele.
\m
\v 14 Da dxundxa na ba xen, le zriꞌi ljwézrele laweꞌ da naca xel-la zriꞌi lazreꞌ da dxun na dxiꞌu tuze, ne li lazreꞌ.
\v 15 Xel-la dxebeza zri lazreꞌ da dxunna Dios dxiꞌu dxal-laꞌ nna bea na lu xichaj lázrdaudxu, laweꞌ da bláwizra Dios leꞌe chee̱ súale lu xel-la dxebeza zri lazreꞌ chee̱ꞌ, ne gácale ca tuze be̱l-laꞌ dxen. Cáꞌanqueze dxal-laꞌ xe̱le Dios: Xcalenuꞌ.
\p
\v 16 Dizraꞌ chee̱ Cristo dxal-laꞌ guzúa xánnele lu xichaj lázrdaule chee̱ séquele guzéajniꞌile, ne gusízre ljwézrele nen dute̱ xel-la sina chee̱ Dios. Lu dute̱ xel-la dxezaca ba lazreꞌ le gul-la lau Dios salmo caꞌ, ne da dxue láꞌanale Dios, ne da caꞌ dxuzúa Beꞌ Láꞌazxa xichaj lázrdaule.
\v 17 Bítete̱ze da gunle, u da nnale, le gun xúgute̱ na lu La Xránadxu Jesús, ne xe̱le Xradxu Dios: Xcalenuꞌ, ne̱ chee̱ Le̱ꞌ.
\s Ca dxal-laꞌ xelún benneꞌ caꞌ zaj naque̱ꞌ bi chee̱ Cristo
\p
\v 18 Leꞌe, nuꞌula, le guzúa dizraꞌ chee̱ benneꞌ chee̱ chee̱le, laweꞌ da naca na da dxal-laꞌ xelún benneꞌ dxeajlí lazre̱ꞌ Xránadxu.
\p
\v 19 Leꞌe, benneꞌ biu, le zriꞌi zrúꞌulale, ne quebe xexitaj lázrele le̱ꞌ.
\p
\v 20 Leꞌe, bi cuideꞌ, le guzúa dizraꞌ chee̱ xra xrnale lu xúgute̱ da dxelenné̱ꞌ, chee̱ gunle da dxezaca ba lazreꞌ Xránadxu.
\p
\v 21 Leꞌe, xruze xrnaꞌ, quebe téte̱lale xel-la snia nen zríꞌinele, chee̱ quebe xelate niꞌa naꞌbeꞌ.
\p
\v 22 Leꞌe, benneꞌ zaj nadaꞌu, le guzúa dizraꞌ xúgute̱ da xelenná xránale lu xe̱zr la xu nigá, quegaze gate dxelennáꞌtee̱ꞌ, chee̱ xeléquene̱ꞌ leꞌe xrlátaje, san le gun da caꞌ du lázrele, ne le zrebe Dios.
\v 23 Bítete̱ze da gunle, le gun na du lázrele, ca nu benneꞌ dxune̱ꞌ zrin chee̱ Xránadxu, ne quegá zrin chee̱ beniácheze.
\v 24 Lácala dxunle zrin nigá chee̱ bénneache, nézele gunna Xránadxu lazruj chee̱le da dxal-laꞌ sile lu zra naꞌ, laweꞌ da dxunle zrin chee̱ Cristo, Bénneaꞌ nácaqueze̱ꞌ Xránale.
\v 25 Nu benneꞌ dxune̱ꞌ da cale̱la, waziꞌe̱ lazruj chee̱ da cale̱la nune̱ꞌ laweꞌ da quebe dxuchá Dios ca da dxune̱ꞌ chee̱ tu xetú benneꞌ.
\c 4 
\p 
\v 1 Leꞌe, benneꞌ nácale xrane bénneache, dxal-laꞌ gácale xlátaje̱, ne li lazreꞌ ca dxuchínele benneꞌ caꞌ náꞌule. Le gusá lázrele, cáꞌanqueze leꞌe, zua Xránale xabáa. 
\p 
\v 2 Leꞌe, bi bíchaꞌdauꞌ, le guchálajle̱queze Dios, súale ban lazreꞌ, ne xe̱le Dios: Xcalenuꞌ.
\v 3 Cáꞌanqueze, le naba lau Dios waláz chee̱ntuꞌ, chee̱ gácale̱ Xránadxu netuꞌ chee̱ séquentuꞌ guchálajntuꞌ xrtizre̱ꞌ, ne guzéajniꞌintuꞌ bénneache ca naca da nagache ca naca chee̱ Cristo. Laweꞌ da dxunaꞌ da caní ne xuꞌa lizre xia nigá. 
\v 4 Le naba lau Dios chee̱ séquedaꞌ guzéajniꞌi xánnedaꞌ bénneache ca dxal-laꞌ gunaꞌ. 
\p 
\v 5 Le gaca sina ca dxunle chee̱ benneꞌ caꞌ quebe dxeleajlí lazre̱ꞌ Cristo, guchine xánnele zra caꞌ dxunna Dios leꞌe.
\v 6 Dizraꞌ dxuchálajle dxal-laꞌ gaca na xrlátaje, ne da xelexezaca ba lazreꞌ bénneache, naꞌ dxal-laꞌ nézele ca xeché̱bele chee̱ tu tu benneꞌ caꞌ gate bi dxelenábene̱ꞌ leꞌe.

\s Dxulugapa diuzre bi bíchedxu caꞌ ljwezre̱ꞌ 
\p 
\v 7 Tíquico, bi bíchedxu nazríꞌi lázredxu guzenbeꞌ leꞌe ca naca da dxaca chiaꞌ. Nácabeꞌ tu bi li lazreꞌ dxácale̱nbeꞌ nedaꞌ, ne dxunbeꞌ zrin chee̱ Xránadxu tu zren nen nedaꞌ. 
\v 8 Chee̱ le̱ naꞌ, dxusel-laꞌ-beꞌ naga zúale, chee̱ guzenbeꞌ leꞌe ca dxaca chee̱ntuꞌ, ne chee̱ gutípabeꞌ lázrele.
\v 9 Cáꞌanqueze zéajle̱ Onésimo le̱beꞌ, naque̱ꞌ bíchedxu li lazreꞌ, benneꞌ nazríꞌi lázredxu, ne naque̱ꞌ benneꞌ walázr chee̱le. Benneꞌ caní xuluzenne̱ꞌ leꞌe ca naca da dxaca nigá. 
\p 
\v 10 Aristarco, benneꞌ xúꞌule̱ne̱ꞌ nedaꞌ lizre xia, dxugape̱ꞌ leꞌe diuzre, ne cáꞌanqueze dxun Marcos, bi xrtia Bernabé. Ba bzéajniꞌidaꞌ leꞌe ca dxun Marcos. Che wazaꞌbeꞌ xedajnnáꞌabeꞌ leꞌe, le siꞌ lu naꞌle le̱beꞌ cháweꞌdauꞌ. 
\v 11 Cáꞌanqueze bénneaꞌ le̱ꞌ Jesús dxugape̱ꞌ leꞌe diuzre, bénneaꞌ lé̱queze̱ꞌ Justo. Benneꞌ zan benneꞌ judío dxeleajlí lazre̱ꞌ Cristo, san benneꞌ canize ládujla benneꞌ judío caꞌ dxelune̱ꞌ zrin tu zren nen nedaꞌ, naꞌ dxuzénentuꞌ bénneache ca xelezéquene̱ꞌ xeluꞌe̱ naga dxenná bea Dios, naꞌ dxuluzúe̱ꞌ nedaꞌ tu lu da ba neza zrente̱. 
\v 12 Dxugapa Epafras leꞌe diuzre. Naque̱ꞌ we̱n zrin chee̱ Cristo, ne benneꞌ walázr chee̱quezle. Dxenábaqueze̱ꞌ lau Dios chee̱le leꞌe chee̱ se̱ cháchale, ne guzúa cuínale du lázrele chee̱ gunle da dxaca lazreꞌ Dios. 
\v 13 Nedaꞌ dxexeche̱baꞌ chee̱ Epafras, dxeꞌe̱ gunne xue chee̱le leꞌe, ne chee̱ bi bíchedxu zaj zre̱ꞌe̱ xe̱zre Laodicea, ne xe̱zre Hierápolis. 
\v 14 Dxugapa leꞌe diuzre Lucas, bénneaꞌ dxexune̱ꞌ benneꞌ we̱ꞌ caꞌ, ne naque̱ꞌ benneꞌ nazríꞌi lazraꞌ. Cáꞌanqueze dxugapa Demas leꞌe diuzre. 
\p 
\v 15 Le gugapa diuzre bi bíchedxu zaj zre̱ꞌe̱ xe̱zre Laodicea. Cáꞌanqueze le gugapa diuzre Ninfas, ne bi bíchedxu caꞌ dxelezrague̱ꞌ lizre̱ꞌ. 
\v 16 Ca te gulábale leꞌe xiche nigá, le sel-la na chee̱ xululaba bi bíchedxu caꞌ zaj zre̱ꞌe̱ Laodicea na. Cáꞌanqueze le gulaba leꞌe xiche da ze za na Laodicea. 
\v 17 Le xe̱ Arquipo da nigá: Bxue xanneꞌ gunuꞌ cháweꞌdauꞌ ca naca zrin chee̱ Xránadxu da bzue̱ꞌ lu naꞌu. 
\p 
\v 18 Nedaꞌ Pablo dxuzúajaꞌ da nigá nen náꞌaquezaꞌ. Dxugapaꞌ leꞌe diuzre. Le gusá lázrele xuꞌa lizre xia. Dxenabaꞌ lau Dios gune̱ꞌ chee̱le da chaweꞌ. ¡Caꞌan gaca na!