\id 1TH
\h 1 Tesalonicenses
\mt DIZRAꞌ NEDXU BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZRE TESALÓNICA
\c 1
\s Pablo dxugape̱ꞌ diuzre bi bíchedxu caꞌ
\p
\v 1 Nedaꞌ, Pablo, ne Silvano, ne Timoteo dxugápantuꞌ leꞌe diuzre. Dxuzúajaꞌ da nigá chee̱le leꞌe, bi bichaꞌ, nazrágale chee̱ Cristo lu xe̱zre Tesalónica, ne nabábale chee̱ Xradxu Dios, ne chee̱ Xránadxu Jesucristo. Dxenabaꞌ lau Xradxu Dios ne lau Xránadxu Jesucristo gune̱ꞌ chee̱le da xrlátaje, ne gunne̱ꞌ leꞌe xel-la dxebeza zri lazreꞌ.
\s Ca dxeleajlí lazreꞌ benneꞌ Tesalónica Cristo
\p
\v 2 Dxe̱quezentuꞌ Dios xcalenuꞌ ca naca chee̱ xúgute̱le leꞌe, ne dxenábantuꞌ gaca da chaweꞌ chee̱le leꞌe gate dxuchálajle̱ntuꞌ Le̱ꞌ.
\v 3 Lau Xradxu Dios dxeajsá lázrentuꞌ ca be̱nle zrin dute̱ lu xel-la dxeajlí lazreꞌ chee̱le, ne ca be̱nle zrin chee̱ Cristo lu dute̱ xel-la zriꞌi lazreꞌ chee̱le, ne ca ze̱ cháchale ca dxebeza lázrele súale̱le Xránadxu Jesucristo.
\v 4 Leꞌe, bi bichaꞌ, Dios nazriꞌine̱ꞌ leꞌe, naꞌ nézentuꞌ gucáꞌa Le̱ꞌ leꞌe.
\v 5 Gate bchálajntuꞌ dizraꞌ chaweꞌ chee̱ Cristo naga zúale, quebe be̱ntuꞌ na nen dízraꞌze, san nen dute̱ xel-la waca chee̱ Beꞌ Láꞌazxa bchálajntuꞌ, ne lu dute̱ xel-la dxuxrén lazreꞌ chee̱ntuꞌ. Nézquezle ca be̱ntuꞌ zrin nigá ládujla leꞌe laweꞌ da nazríꞌile̱ꞌe̱ntuꞌ leꞌe.
\p
\v 6 Leꞌe bé̱nquezle ca be̱ntuꞌ netuꞌ, ne ca be̱n Xránadxu, naꞌ guzile dizraꞌ naꞌ lu dute̱ xel-la dxebé chee̱le da be̱nna Beꞌ Láꞌazxa leꞌe, lácala gudéle̱ꞌe̱le xel-la ziꞌ.
\v 7 Caní guca, nácale tu da dxuléꞌe na ca dxal-laꞌ xelaca xúgute̱ benneꞌ dxeleajlí lazre̱ꞌ Cristo naga nababa Macedonia, ne naga nababa Acaya.
\v 8 Caní guca, bzenle leꞌe benneꞌ caꞌ dizraꞌ chee̱ Xránadxu. Naꞌa quegá tuze benneꞌ zaj zre̱ꞌe̱ Macedonia, ne Acaya, san cáꞌanqueze benneꞌ caꞌ zaj zre̱ꞌe̱ xúgute̱ xe̱zre zaj nézene̱ꞌ ca dxeajlí lázrele Dios, naꞌ québedxa dxun na ba xen guzénentuꞌ le̱ꞌ.
\v 9 Benneꞌ caníqueze dxuluchálaje̱ꞌ ca guca gate bedajnnáꞌantuꞌ leꞌe ne ca guzíꞌ lu naꞌle netuꞌ, ne ca bsanle bedauꞌ xiaj xaga caꞌ chee̱ bábale chee̱ Dios, naꞌ guzú laule dxunle zrin chee̱ Dios ban, Benneꞌ li.
\v 10 Cáꞌanqueze dxuluchálaje̱ꞌ ca dxebézale zra xeláꞌ Jesús, ze̱ꞌe̱ xabáa. Le̱ꞌ naque̱ꞌ Zriꞌine Dios, naꞌ Dios bsebane̱ꞌ Le̱ꞌ ládujla benneꞌ gate caꞌ. Lé̱queze̱ꞌ guselé̱ꞌ dxiꞌu lu da ba xaꞌ zrente̱ da za zaꞌ da sel-la Dios lu dute̱ xel-la dxezráꞌa chee̱ꞌ.
\c 2
\s Zrin be̱n Pablo lu xe̱zre Tesalónica
\p
\v 1 Leꞌe, bi bichaꞌ, ba nézquezle leꞌe da be̱ntuꞌ gate naꞌ bedajnnáꞌantuꞌ leꞌe quebe guca na zrin nite.
\v 2 Nézquezle ca belún benneꞌ zaj zre̱ꞌe̱ xe̱zre Filipos, bulucháchale̱ne̱ꞌ netuꞌ, ne buluzalje̱ꞌ netuꞌ gate naꞌ za xedajnnáꞌantuꞌ leꞌe, naꞌ Dios be̱xru chache̱ꞌ netuꞌ chee̱ bchálajntuꞌ dizraꞌ chaweꞌ chee̱ Cristo naga zúale, lácala buluzaga benneꞌ zan netuꞌ.
\v 3 Quebe guque zréajentuꞌ ca bchálajntuꞌ, ne quegá bi da cale̱la guca lázrentuꞌ guntuꞌ, ne quegá guca lázrentuꞌ si xe̱ntuꞌ leꞌe.
\v 4 Dxuchálajquezentuꞌ ca dxaca lazreꞌ Dios laweꞌ da bxren lazre̱ꞌ netuꞌ, ne bsebague̱ꞌ netuꞌ guchálajntuꞌ dizraꞌ chaweꞌ chee̱ Cristo. Caní dxuchálajntuꞌ, quegá chee̱ xelexezaca ba lazreꞌ bénneache san chee̱ xezaca ba lazreꞌ Dios, Bénneaꞌ dxennáꞌtee̱ da zua xichaj lázrdaudxu.
\v 5 Nézquezle leꞌe cabataꞌ ne xe̱ntuꞌ leꞌe dizraꞌ gúladauꞌ da gucáꞌana szren na leꞌe, ne quegá bi gunnantuꞌ chee̱ bi gúnnale netuꞌ. Dios nézquezene̱ꞌ naca na da li.
\v 6 Cabataꞌ ne gaca lázrentuꞌ xelapa bénneache netuꞌ ba láꞌana, leꞌe u benneꞌ xula, lácala wazéquentuꞌ nna béꞌentuꞌ leꞌe bi gúnnale netuꞌ laweꞌ da nácantuꞌ gubáz chee̱ Cristo.
\v 7 Be̱ntuꞌ leꞌe xrtandauꞌ ca dxun tu nuꞌula dxusegule̱ꞌ zríꞌine̱ꞌ.
\v 8 Nazríꞌile̱ꞌe̱ntuꞌ leꞌe, la guzrénentuꞌ gúnnate̱ntuꞌ leꞌe, quegaze dizraꞌ chee̱ Dios, san cáꞌanqueze xel-la nabán chee̱ntuꞌ. Caní nazríꞌile̱ꞌe̱ntuꞌ leꞌe.
\v 9 Leꞌe, bi bichaꞌ, nézquezle ca be̱ntuꞌ zrin du lázrentuꞌ chee̱ gataꞌ da xeꞌaj gáguntuꞌ. Be̱ntuꞌ zrin te zra ne chizrela chee̱ quebe bi gusaca ziꞌntuꞌ leꞌe dxácate̱ bchálajle̱ntuꞌ leꞌe dizraꞌ chee̱ Dios.
\p
\v 10 Leꞌe dxexeché̱bequezle, ne cáꞌanqueze Dios nézene̱ꞌ ca be̱ntuꞌ gate naꞌ zúale̱ntuꞌ leꞌe, gúcantuꞌ li lazreꞌ, ne xlátaje̱, naꞌ quebe nu guzequeꞌ nu nne̱ chee̱ntuꞌ.
\v 11 Cáꞌanqueze nézquezle ca be̱ntuꞌ, bsízrentuꞌ tu tule leꞌe, ne btípantuꞌ lázrele ca dxun tu xra bidauꞌ chee̱ zríꞌine̱ꞌ.
\v 12 Gunná béꞌentuꞌ leꞌe gunle ca dxal-laꞌ xelún benneꞌ zaj naque̱ꞌ bi chee̱ Dios, Bénneaꞌ dxuláwizre̱ꞌ leꞌe chee̱ chuꞌule naga dxenná beꞌe̱ lu dute̱ xel-la szren chee̱ꞌ.
\p
\v 13 Chee̱ le̱ naꞌ dxé̱quezentuꞌ Dios xcalenuꞌ laweꞌ da be̱nle ca naca dizraꞌ chee̱ Dios da bchálajntuꞌ, ne guzile na ca dizraꞌ chee̱ Dios, ne quegá ca dizraꞌ chee̱ benneácheze. Da li naca na dizraꞌ chee̱ Dios, ne dxun na zrin lu xichaj lázrdaule leꞌe, naꞌ dxeajlí lázrele Le̱ꞌ chee̱ gácale chee̱ Dios dute̱ ca nácale.
\v 14 Leꞌe, bi bichaꞌ, gate gudele xel-la ziꞌ chee̱ da belún benneꞌ walázr chee̱le, guca chee̱le ca guca chee̱ benneꞌ zaj nababa chee̱ Dios naga nababa Judea, benneꞌ caꞌ zaj naque̱ꞌ bi chee̱ Cristo, laweꞌ da cáꞌanqueze guledée̱ꞌ xel-la ziꞌ chee̱ da belún benneꞌ walázr chee̱ꞌ caꞌ, benneꞌ judío.
\v 15 Benneꞌ judío caní belutie̱ꞌ Xránadxu Jesús, ca belún benneꞌ judío caꞌ gate nate, belutie̱ꞌ benneꞌ caꞌ gulenné̱ꞌ waláz chee̱ Dios, naꞌ benneꞌ caní gulebeaje̱ꞌ netuꞌ lázrentuꞌ. Quebe dxelune̱ꞌ da dxezaca ba lazreꞌ Dios, ne dxeledábague̱ꞌ xúgute̱ bénneache,
\v 16 naꞌ gate dxaca lázrentuꞌ guchálajle̱ntuꞌ benneꞌ quebe zaj naque̱ꞌ judío chee̱ xelelé̱ꞌ, quebe dxelunne̱ꞌ netuꞌ lataj. Caní dxelune̱ꞌ, dxuluzandxe̱ꞌ dul-la da zaj nabague̱ꞌ. Naꞌa, ba be̱ꞌ Dios lataj dxaca da ba xaꞌ zrente̱ chee̱ benneꞌ caꞌ.
\s Pablo dxezá lazre̱ꞌ cheajnné̱ꞌe̱ bíchedxu zaj zre̱ꞌe̱ xe̱zre Tesalónica
\p
\v 17 Leꞌe, bi bichaꞌ, gate becuásentuꞌ naga zúale tu chiꞌi, lácala québedxa bléꞌentuꞌ leꞌe, nuzúaquezentuꞌ leꞌe lu lázrdauntuꞌ, ne guzá lázrele̱ꞌe̱ntuꞌ xedajnnáꞌantuꞌ leꞌe.
\v 18 Guca lázrentuꞌ xídantuꞌ, naꞌ nedaꞌ, Pablo, guca lazraꞌ xidaꞌ tu chupa lasa, naꞌ bzaga Satanás nedaꞌ.
\v 19 ¿Bizra da naꞌ dxunna na netuꞌ xel-la dxebeza lazreꞌ, ne xel-la dxebé, ne da dxuzúa na netuꞌ lu da ba neza, ne da dxunna bea na zua da siꞌntuꞌ lu naꞌ Dios? Léꞌequeze gácale da caní lu zra xeláꞌ Xránadxu Jesucristo.
\v 20 Aweꞌ. Da nácale leꞌe gun na siꞌntuꞌ da xabáa lau Dios, ne súantuꞌ lu da ba neza.
\c 3
\p
\v 1 Nadxa gate québedxa guca guchaga launtuꞌ laweꞌ da quebe bi bénentuꞌ ca dxaca chee̱le, naꞌ gúquentuꞌ xegáꞌana chúpantuꞌ lu xe̱zre Atenas,
\v 2 naꞌ sél-lantuꞌ bi bíchedxu Timoteo xedajnnáꞌabeꞌ leꞌe, laweꞌ da naca le̱beꞌ tu bi we̱n zrin chee̱ Dios, ne ba be̱nbeꞌ zrin tu zren nen netuꞌ, bchálajntuꞌ dizraꞌ chaweꞌ chee̱ Cristo, naꞌ wazéquebeꞌ guzé̱ cháchabeꞌ leꞌe, ne gutípabeꞌ lázrele ca dxeajlí lázrele Cristo,
\v 3 chee̱ quebe gate niꞌa naꞌle laweꞌ da dxedentuꞌ lu da ste̱be caní. Leꞌe nézquezle dxal-laꞌ tedxu xel-la ziꞌ caní.
\v 4 Gate ne zúale̱ntuꞌ leꞌe bzéajniꞌintuꞌ leꞌe wadéquezdxu lu da ziꞌ da xaꞌ, naꞌ caꞌan guca, ca ba nézquezle.
\v 5 Chee̱ le̱ naꞌ, gate québedxa bzúedaꞌ guchaga lawaꞌ laweꞌ da quebe bi bendaꞌ chee̱le, naꞌ gusel-laꞌ nu bedajnaba leꞌe ájala dxaca chee̱le lu xel-la dxeajlí lazreꞌ chee̱le Cristo, laweꞌ da bzrebaꞌ ga gaze xucuasa da xriwe̱ꞌ leꞌe lu neza chee̱ Dios, naꞌ gaca níteze zrin be̱ntuꞌ ga naꞌ.
\p
\v 6 Naꞌa ba beláꞌ Timoteo ga ni zúantuꞌ, ze zabeꞌ Tesalónica, ne ze núabeꞌ dizraꞌ chaweꞌ ca naca xel-la dxeajlí lazreꞌ, ne xel-la zriꞌi lazreꞌ chee̱le. Dxe̱beꞌ netuꞌ dxeajsá lázrquezle leꞌe netuꞌ nen dute̱ xel-la zriꞌi lazreꞌ, ne dxezá lázrele̱ꞌe̱le léꞌele netuꞌ, ca netuꞌ dxaca lázrentuꞌ leꞌentuꞌ leꞌe.
\v 7 Chee̱ le̱ naꞌ, bi bichaꞌ, dxácate̱ dxedentuꞌ lu da ste̱be caní, ne lu da ziꞌ da xaꞌ, zúantuꞌ xel-la dxebé laweꞌ da nézentuꞌ ze̱ cháchale ca dxeajlí lázrele Cristo.
\v 8 Naꞌa naca chee̱ntuꞌ ca naca chee̱ tu benneꞌ bezúatee̱ꞌ chaweꞌ laweꞌ da nézentuꞌ ze̱ cháchale lu da naca chee̱ Xránadxu.
\v 9 ¿Ájazra guntuꞌ xé̱le̱ꞌe̱ntuꞌ Dios: Xcalenuꞌ ca dxal-laꞌ guntuꞌ waláz chee̱le leꞌe, ne ca naca xel-la dxebé nápantuꞌ lau Dios ne̱ chee̱le leꞌe?
\v 10 Te zra, ne chizrela dxataꞌ xúentuꞌ Dios gunne̱ꞌ netuꞌ lataj xedajnnáꞌquezentuꞌ leꞌe, chee̱ gácadxale li lazreꞌ ca dxeajlí lázrele Cristo.
\p
\v 11 Dxenábantuꞌ lau Xradxu Dios, ne lau Xránadxu Jesucristo gácale̱ne̱ꞌ netuꞌ chee̱ séquentuꞌ xedajnnáꞌantuꞌ leꞌe.
\v 12 Dxenábantuꞌ Le̱ꞌ chee̱ zríꞌidxa ljwézrele tule xetule, ne chee̱ zríꞌidxale xúgute̱ bénneache ca nazríꞌintuꞌ netuꞌ leꞌe.
\v 13 Dxenábantuꞌ Le̱ꞌ guzúa chúchue̱ꞌ lázrdaule, chee̱ gácale benneꞌ li lazreꞌ, ne benneꞌ láꞌazxa lau Xradxu Dios lu zra naꞌ gate xeláꞌ Xránadxu Jesús nen xúgute̱ bi chee̱ Le̱ꞌ.
\c 4
\s Dxal-laꞌ gundxu da dxezaca ba lazreꞌ Dios
\p
\v 1 Leꞌe, bi bichaꞌ, dxataꞌ xúentuꞌ leꞌe, ne dxusebágantuꞌ leꞌe da nigá lu La Xránadxu Jesús. Le gúndxaqueze da bléꞌentuꞌ leꞌe gunle, da naꞌ dxezaca ba lazreꞌ Dios.
\p
\v 2 Nézquezle leꞌe da bzéajniꞌintuꞌ leꞌe ne̱ chee̱ Xránadxu Jesús.
\v 3 Da dxaca lazreꞌ Dios naca na guzúa cuínale lu naꞌ Le̱ꞌ, ne québedxa gunle da sban,
\v 4 naꞌ súale̱le zrúꞌulaquezle tu tule leꞌe lu xel-la láꞌazxa chee̱ Xránadxu, ne gápale le̱ꞌ ba láꞌana,
\v 5 ne quebe súale lu xel-la dxezá lazreꞌ chee̱ da sban ca dxelún benneꞌ quebe zaj nunbeꞌe̱ Dios.
\v 6 Ca naca chee̱ da nigá, netule leꞌe quebe dxal-laꞌ si xe̱le bi bíchele, quebe gunle da sban chee̱ꞌ, laweꞌ da xebéaj lazreꞌ Xránadxu chee̱ xúgute̱ benneꞌ dxelune̱ꞌ da caní, ca ba bzéajniꞌintuꞌ leꞌe.
\v 7 Dios bláwizre̱ꞌ dxiꞌu chee̱ gundxu da xrlátaje, ne quegá gundxu da sban.
\v 8 Caní naca, che nu benneꞌ dxuzúe̱ꞌ chaláꞌala ca naca da nigá, quegá tuze bénneache dxuzúe̱ꞌ chaláꞌala, san Diósqueze dxuzúe̱ꞌ chaláꞌala, Bénneaꞌ nunne̱ꞌ dxiꞌu Beꞌ Láꞌazxa.
\p
\v 9 Ca dxal-laꞌ zriꞌi ljwézrele quebe dxun na ba xen guzúajaꞌ chee̱le, laweꞌ da ba bléꞌequeze Dios leꞌe chee̱ zriꞌi ljwézrele tule xetule.
\v 10 Caníqueze dxal-laꞌ zriꞌile xúgute̱ bi bíchedxu zaj zre̱ꞌe̱ xe̱zre caꞌ zaj nababa xe̱zr la xu Macedonia. Dxataꞌ xuentuꞌ leꞌe, bi bichaꞌ, chee̱ zríꞌidxa ljwézrele.
\v 11 Le gun ba xuzre súale lu xel-la dxebeza zri lazreꞌ, ne gunle da naca cheé̱zquezle, ne gunle zrin nen niꞌa naꞌle ca ba guzrentuꞌ leꞌe,
\v 12 chee̱ xelapa benneꞌ xula leꞌe ba láꞌana, ne chee̱ quebe bi xázrjele leꞌe.
\s Ca gaca zra xeláꞌ Xránadxu
\p
\v 13 Leꞌe, bi bichaꞌ, dxaca lázrentuꞌ nézele ca naca chee̱ bi bíchele zaj nate, chee̱ quebe xewine lázrele ca dxelún xezícadxa benneꞌ caꞌ quebe bi dxelebeza lazre̱ꞌ.
\v 14 Dxéajle̱dxu gute Jesús, ne bebane̱ꞌ ládujla benneꞌ gate, ne cáꞌanqueze dxéajle̱dxu Dios gusebane̱ꞌ benneꞌ gate caꞌ guleajlí lazre̱ꞌ Jesús, chee̱ xelezúale̱ne̱ꞌ Le̱ꞌ.
\p
\v 15 Chee̱ le̱ naꞌ dxe̱ntuꞌ leꞌe da naꞌ bleꞌe Xránadxu, gunné̱ꞌ: Dxiꞌu naca bandxu gate xeláꞌ Xránadxu, quebe cheajsúale̱dxu Le̱ꞌ nédxula ca benneꞌ caꞌ zaj nate.
\v 16 Xránaquezdxu ze̱ꞌe̱ xabáa, naꞌ cuezre xe̱ꞌe̱ nen dute̱ xel-la dxenná bea chee̱ꞌ, naꞌ xendxu chiꞌi gubáz blau chee̱ xabáa, ne chiꞌi luzu da dxulucuezre̱ꞌ waláz chee̱ Dios. Nadxa benneꞌ gate caꞌ, benneꞌ guléajle̱ꞌe̱ chee̱ Cristo xelexebánqueze̱ꞌ zaꞌa le̱ꞌ.
\v 17 Te naꞌ, dxiꞌu naꞌ naca bandxu xeché̱ꞌe̱ dxiꞌu tu zren nen benneꞌ caꞌ ládujla beuj chee̱ xezrágadxu Xránadxu lu beꞌ. Caꞌan gaca súale̱dxu Xránadxu chadía chacanna.
\v 18 Chee̱ le̱ naꞌ le gutipa lázrele tule xetule nen dizraꞌ caní.
\c 5 
\p 
\v 1 Naꞌa, ca naca chee̱ bi zra, u bi iza xeláꞌ Xránadxu, quebe dxun na ba xen guzúajaꞌ chee̱le, bi bichaꞌ.
\v 2 Ba nézquezle leꞌe zrin zra xeláꞌ Xránadxu gate québela nu dxebeza Le̱ꞌ, ca za tu benneꞌ gubán chizrela. 
\v 3 Gate dxelenná bénneache: Cháwele̱ꞌe̱ dxaca chee̱dxu, ne quebe bi dxuchixre chee̱, nadxa za da guzría xi na benneꞌ caꞌ, ca za xel-la dxudía chee̱ tu nuꞌula gate zue̱ꞌ ziꞌi, ne quebe xelelé̱ꞌ lu da naꞌ. 
\v 4 Leꞌe, bi bichaꞌ, quebe zúale lu da chul-la, chee̱ quebe gaca chee̱le lu zra naꞌ xeláꞌ Xránadxu ca dxaca chee̱ tu benneꞌ dxuꞌu gubán lizre̱ꞌ. 
\v 5 Xúgute̱le leꞌe dxunle xrlátaje, da naca chee̱ xel-la naxaníꞌ, ne chee̱ te zra. Quebe dxundxu da cale̱la, da naca chee̱ chizrela, ne chee̱ da chul-la. 
\v 6 Chee̱ le̱ naꞌ quebe dxal-laꞌ gácadxu ca benneꞌ la waseꞌ ca dxelún benneꞌ xula, san dxal-laꞌ gácadxu ban lazreꞌ, ne guzéajniꞌi cuínadxu. 
\v 7 Benneꞌ dxelase, chizrela dxelásie̱ꞌ, ne benneꞌ dxelezuzre, chizrela dxelezúzrequeze̱ꞌ. 
\v 8 Nácadxu dxiꞌu chee̱ te zra, naꞌ dxal-laꞌ guzéajniꞌi cuínaquezdxu. Che dxeajlí lázredxu Xránadxu, ne zriꞌidxu Le̱ꞌ, da nigá gaca na chee̱dxu ca tu zra lana benneꞌ zeje̱ꞌ wedil-la da naca na xia. Cáꞌanqueze che dxebeza lázredxu ladxu, da nigá gaca na chee̱dxu ca tu lapa xia ca da dxuzúa tu benneꞌ zeje̱ꞌ wedil-la xíchaje̱ꞌ. 
\v 9 Dios quebe be̱ne̱ꞌ chee̱dxu tedxu lu da ba xaꞌ da sel-le̱ꞌ lu xel-la dxezráꞌa chee̱. Be̱ne̱ꞌ chee̱dxu zruéꞌedxu xel-la weselá ne̱ chee̱ Xránadxu Jesucristo. 
\v 10 Jesucristo gutie̱ꞌ waláz chee̱dxu chee̱ gaca bandxu tu zren nen Le̱ꞌ, che naca bandxu, u che ba nátedxu gate zrin zra naꞌ. 
\v 11 Chee̱ le̱ naꞌ le gutipa lázrele, ne le guzé̱ chacha ljwézrele tule xetule, ca ba dxúnquezle. 

\s Pablo dxuzéajniꞌine̱ꞌ bi bíchedxu caꞌ 
\p 
\v 12 Leꞌe, bi bichaꞌ, dxataꞌ xúentuꞌ leꞌe gápale ba láꞌana benneꞌ dxelune̱ꞌ zrin ládujla leꞌe, benneꞌ caꞌ gucáꞌa Xránadxu chee̱ xelenná beꞌene̱ꞌ leꞌe, ne xulusé̱dene̱ꞌ leꞌe. 
\v 13 Dxal-laꞌ gápale benneꞌ caꞌ ba láꞌana, ne zriꞌile le̱ꞌ laweꞌ da dxelune̱ꞌ zrin chee̱ Dios. Le sua lu xel-la dxebeza zri lazreꞌ tule xetule. 
\p 
\v 14 Cáꞌanqueze dxusebágantuꞌ leꞌe, bi bichaꞌ, gusízrele benneꞌ caꞌ quebe dxelaca lazre̱ꞌ xelune̱ꞌ zrin, ne gutipa lázrele benneꞌ caꞌ dxelate niꞌa ne̱ꞌe̱, ne gácale̱le benneꞌ quebe zaj ze̱ꞌ chacha, ne gácale zren lazreꞌ nen xúgute̱ bénneache. 
\p 
\v 15 Le guxúe xanneꞌ cuínale chee̱ quebe gunle da cale̱la chee̱ nu benneꞌ dxune̱ꞌ chee̱le da cale̱la, san le gun ba xuzre gúnquezle da xrlátaje, tule xetule, ne chee̱ xúgute̱ bénneache.
\q 
\v 16 Le béquezle.
\q
\v 17 Le guchálajle̱quezle Dios. 
\q
\v 18 Le xe̱ Dios: Xcalenuꞌ ca naca xúgute̱ da dxaca chee̱le.
\m Dxal-laꞌ gunle da nigá laweꞌ da naca na da dxaca lázrqueze Dios gunle leꞌe, laweꞌ da nácale bi chee̱ Jesucristo. 
\q 
\v 19 Quebe guzágale da dxun Beꞌ Láꞌazxa. 
\q
\v 20 Quebe guzúale chaláꞌala dizraꞌ da nunezruj Beꞌ Láꞌazxa nu bi bíchedxu caꞌ. 
\q
\v 21 Le guchiꞌa xanneꞌ xúgute̱ da caꞌ, naꞌ le siꞌ da naca na xrlátaje.
\q
\v 22 Le cuasa lu xúgute̱ da quebe naca na xrlátaje. 
\p 
\v 23 Dios dxunne̱ꞌ dxiꞌu xel-la dxebeza zri lazreꞌ. Dxenabaꞌ lau Le̱ꞌ gune̱ꞌ leꞌe benneꞌ láꞌazxaqueze, ne guxúe̱ꞌ beꞌ nácaquezle, ne bénneꞌdu xuꞌule, ne be̱l-laꞌ dxen chee̱le chee̱ gácale du lazreꞌ lu zra naꞌ xeláꞌ Xránadxu Jesucristo.
\v 24 Bénneaꞌ bláwizre̱ꞌ leꞌe naque̱ꞌ li lazreꞌ, naꞌ Le̱ꞌ gune̱ꞌ xúgute̱ da caní. 

\s Pablo dxuzé̱ dizraꞌ bi bíchedxu caꞌ 
\p 
\v 25 Leꞌe, bi bichaꞌ, le naba lau Dios gácal-leneꞌ netuꞌ.
\p 
\v 26 Le gugapa diuzre xúgute̱ bi bíchedxu caꞌ, ne gunídale le̱ꞌ. 
\p 
\v 27 Lau Xránadxu dxusebagaꞌ leꞌe gulábale xiche nigá láwela xúgute̱ bi bíchedxu caꞌ. 
\p 
\v 28 Dxenabaꞌ lau Xránadxu Jesucristo gune̱ꞌ chee̱le da chaweꞌ. ¡Caꞌan gaca na!