\id 2TH
\h 2 Tesalonicenses
\mt DIZRAꞌ GUDXUPEꞌ BZUAJ SAN PABLO CHEE̱ BI CHEE̱ CRISTO ZAJ ZRE̱ꞌE̱ XE̱ZRE TESALÓNICA
\c 1
\s Pablo dxugape̱ꞌ diuzre bi bíchedxu caꞌ
\p
\v 1 Nedaꞌ, Pablo, nen Silvano, ne Timoteo, dxugápantuꞌ leꞌe diuzre. Dxuzúajaꞌ da nigá chee̱le leꞌe, bi bíchaꞌdauꞌ, nazrágale chee̱ Cristo lu xe̱zre Tesalónica, ne nácale bi chee̱ Xradxu Dios, ne chee̱ Xránadxu Jesucristo.
\v 2 Dxenabaꞌ lau Xradxu Dios, ne lau Xránadxu Jesucristo gune̱ꞌ chee̱le da chaweꞌ, ne gunne̱ꞌ leꞌe xel-la dxebeza zri lazreꞌ.
\s Dios guchiꞌe̱ da belún benneꞌ dul-la caꞌ gate xeláꞌ Cristo
\p
\v 3 Leꞌe, bi bíchaꞌdauꞌ, dxal-laꞌ xé̱quezentuꞌ Dios: Xcalenuꞌ ca naca chee̱le, da dxal-laꞌ guntuꞌ laweꞌ da ba dxegula xel-la dxeajlí lazreꞌ chee̱le, ne ba zúadxa xel-la nazríꞌi lazreꞌ le̱n ljwézrele tule xetule.
\v 4 Chee̱ le̱ naꞌ dxuchálajntuꞌ ca naca chee̱le leꞌe láwela bi caꞌ chee̱ Cristo. Dxuchálajntuꞌ ca dxuchaga laule da dxelún benneꞌ caꞌ zaj nau ziꞌ xuzre̱ꞌ leꞌe, ne ca naca xel-la ziꞌ da dxedele, san nácale zren lazreꞌ, ne dxeajlí lázrele Dios.
\v 5 Da nigá dxuléꞌe na xlátaje̱ naca Dios ca dxuchiꞌe̱ da dxelún bénneache, dxenné̱ꞌ naca chee̱le chuꞌule naga dxenná bea Le̱ꞌ laweꞌ da dxedele xel-la ziꞌ chee̱ laꞌ xel-la dxenná bea chee̱ꞌ.
\p
\v 6 Xlátaje̱ naca gudé Dios benneꞌ caꞌ xel-la ziꞌ, benneꞌ caꞌ dxuludée̱ꞌ leꞌe xel-la ziꞌ naꞌa,
\v 7 naꞌ guzúe̱ꞌ leꞌe naga xezíꞌ lázrele chee̱ xel-la ziꞌ da dxedele naꞌa. Xezí lázrele tu zren nen netuꞌ gate xeláꞌ Xránadxu Jesús, ze̱ꞌe̱ xabáa nen gubáz blau caꞌ chee̱ xabáa chee̱ꞌ.
\v 8 Ze̱ꞌe̱ nuꞌe̱ xiꞌ chee̱ gudée̱ꞌ lu da ba xaꞌ benneꞌ caꞌ quebe dxelexúnbeꞌe̱ Dios, ne quebe dxuluzúe̱ꞌ dizraꞌ ca dxenná dizraꞌ chaweꞌ chee̱ Xránadxu Jesucristo.
\v 9 Benneꞌ caní xelecuase̱ꞌ naga zua Xránadxu lu xel-la szren chee̱ꞌ, ne xel-la dxenná bea chee̱ꞌ, naꞌ xeledée̱ꞌ xel-la ziꞌ chee̱ da ba xaꞌ chadía chacanna.
\v 10 Caní gaca gate xeláꞌ Xránadxu lu zra naꞌ chee̱ xulucáꞌana szren benneꞌ chee̱ꞌ caꞌ Le̱ꞌ, naꞌ benneꞌ caꞌ dxeajlí lazre̱ꞌ Le̱ꞌ xelape̱ꞌ Le̱ꞌ ba láꞌana. Leꞌe gunle benneꞌ caꞌ tu zren laweꞌ da guxéajle̱le chee̱ da beché̱bentuꞌ.
\p
\v 11 Chee̱ le̱ naꞌ tu dxuchálajle̱quezentuꞌ Dios ca naca chee̱le, ne dxenábantuꞌ Le̱ꞌ gaca chee̱le sile da naꞌ bláwizre̱ꞌ leꞌe sile. Cáꞌanqueze dxenábantuꞌ lau Dios guchínene̱ꞌ xel-la waca chee̱ꞌ chee̱ gaca gunle ca naca xúgute̱ da xrlátaje da dxezá lázrele, ne xúgute̱ zrin dxunle ne̱ chee̱ xel-la dxeajlí lazreꞌ chee̱le.
\v 12 Caní gunle, gucáꞌana szrenle La Xránadxu Jesucristo, naꞌ Le̱ꞌ gape̱ꞌ leꞌe ba láꞌana ne̱ chee̱ xel-la xrlátaje chee̱ Dios chee̱dxu, ne chee̱ Xránadxu Jesucristo.
\c 2
\s Benneꞌ xriwe̱ꞌ
\p
\v 1 Leꞌe, bi bichaꞌ, ca naca chee̱ zra xeláꞌ Xránadxu Jesucristo chee̱ xutupe̱ꞌ dxiꞌu chee̱ Le̱ꞌ, dxataꞌ xúentuꞌ leꞌe
\v 2 chee̱ quebe guchale ca dxéquele, ne quebe súale ste̱be chee̱ bi dizraꞌ xuluchalaj bénneache lácala xelenné̱ꞌ naca na da dxunezruj Beꞌ Láꞌazxa le̱ꞌ, u chee̱ xetú bila dizraꞌ xénele, u chee̱ bi xiche xelenné̱ꞌ naca na da gusél-lantuꞌ netuꞌ, che dxenná na ba beláꞌ Xránadxu.
\v 3 Quebe güele lataj nu si xe̱ leꞌe, laweꞌ da xeleláꞌ bénneache xelebéaj xíchaje̱ꞌ Dios, ne laꞌ bénneaꞌ dxedábague̱ꞌ Dios nédxula gate zrin zra xeláꞌ Xránadxu. Bénneaꞌ dxedábague̱ꞌ Dios, naꞌ ba naca chee̱ꞌ cuía xíqueze̱ꞌ,
\v 4 naꞌ tábague̱ꞌ xúgute̱ da naca chee̱ Dios, ne xúgute̱ da dxulucáꞌana szren bénneache. Gucáꞌana szren cuine̱ꞌ ca zrinte̱ cheajchéꞌe̱ lu xudauꞌ chee̱ Dios, ne gun cuine̱ꞌ ca Diósqueze.
\p
\v 5 ¿Quebe dxeajsá lázrele gúchequezaꞌ leꞌe da nigá gate naꞌ zúale̱naꞌ leꞌe?
\v 6 Leꞌe ba nézele Nu Benneꞌ nuzague̱ꞌ bénneaꞌ dxedábague̱ꞌ Dios chee̱ quebe le̱ꞌe̱ gate quebe ne zrin zra le̱ꞌe̱.
\v 7 Ba dxun zrin xel-la waca da nagache chee̱ da cale̱la, san zua Nu Benneꞌ nuzague̱ꞌ le̱ na naꞌa, ca zrin zra xecuasa Bénneaꞌ nuzague̱ꞌ le̱ na.
\v 8 Nadxa laꞌ bénneaꞌ dxedábague̱ꞌ Dios, naꞌ Xránadxu Jesús gutie̱ꞌ le̱ꞌ, guchínene̱ꞌ beꞌ da dxuaj na dxuꞌe̱, ne guzría xiꞌe̱ le̱ꞌ, guchínene̱ꞌ xel-la naxaníꞌ chee̱ zra ze̱ꞌe̱.
\v 9 Benneꞌ xriwe̱ꞌ naꞌ ze̱ꞌe̱ ne̱ chee̱ xel-la dxenná bea chee̱ Satanás, naꞌ lu dute̱ xel-la waca chee̱ na gune̱ꞌ da caꞌ xelunna bea na, ne xel-la waca caꞌ da zaj naca na we̱n lazreꞌ,
\v 10 ne guchínene̱ꞌ xúgute̱ da cale̱la caꞌ chee̱ si xe̱ꞌe̱ benneꞌ caꞌ xelebía xiꞌe̱, benneꞌ caꞌ quebe gulaca lazre̱ꞌ xelezíꞌe̱ da li chee̱ xelelé̱ꞌ.
\v 11 Chee̱ le̱ naꞌ Dios dxuꞌe̱ lataj si xe̱ da cale̱la benneꞌ caꞌ chee̱ xeléajle̱ꞌe̱ chee̱ da we̱n lazreꞌ,
\v 12 chee̱ xelebía xiꞌ xúgute̱ benneꞌ caꞌ quebe gulaca lazre̱ꞌ xeléajle̱ꞌe̱ chee̱ da li, san dxeledánedxene̱ꞌ da naca da cale̱la.
\s Dios guqué̱ꞌe̱ dxiꞌu chee̱ ladxu
\p
\v 13 Netuꞌ tu dxál-laꞌqueze xe̱ntuꞌ Dios: Xcalenuꞌ ca naca chee̱le leꞌe, bi bíchaꞌdauꞌ, nazríꞌi Xránadxu leꞌe, laweꞌ da gucáꞌa Dios leꞌe nédxute̱ chee̱ lale. Beꞌ Láꞌazxa ba nune̱ꞌ leꞌe chee̱ Dios laweꞌ da dxéajle̱le chee̱ da li.
\v 14 Chee̱ gaca chee̱le da nigá Dios ba bláwizre̱ꞌ leꞌe ne̱ chee̱ dizraꞌ chaweꞌ da dxuchálajntuꞌ, chee̱ zruéꞌele xel-la szren chee̱ Xránadxu Jesucristo.
\p
\v 15 Chee̱ le̱ naꞌ, bi bíchaꞌdauꞌ, le se̱ chacha, ne quebe gal-la lázrele da caꞌ bzéajniꞌintuꞌ leꞌe caníqueze, ne cáꞌanqueze lu xiche.
\v 16 Dxenabaꞌ lau Xránadxu Jesucristo, ne lau Xradxu Dios, Bénneaꞌ lu dute̱ xel-la xrlátaje chee̱ꞌ bzriꞌine̱ꞌ dxiꞌu, ne ba be̱nne̱ꞌ dxiꞌu xel-la dxexúe zren chee̱ꞌ tu chiꞌi gaze, ne tu xel-la dxebeza lazreꞌ li.
\v 17 Dxenabaꞌ Le̱ꞌ gutipe̱ꞌ lázrele, ne guzé̱ chúchue̱ꞌ leꞌe chee̱ nnale, ne gunle xúgute̱ da xrlátaje.
\c 3
\s Pablo dxenné̱ xúene̱ꞌ bíchedxu caꞌ xelenabe̱ꞌ Dios gácale̱ne̱ꞌ le̱ꞌ
\p
\v 1 Naꞌa, bi bíchaꞌdauꞌ, le naba Dios gácale̱ne̱ꞌ netuꞌ, chee̱ zrínzega dizraꞌ chee̱ Xránadxu xúgute̱ xe̱zre caꞌ, ne chee̱ xelezíꞌe̱ na dute̱ lu xel-la ba láꞌana, ca guca ládujla leꞌe.
\v 2 Le nábaquezle chee̱ ladxu lu naꞌ benneꞌ caꞌ dxelune̱ꞌ da cale̱la, ne lu naꞌ benneꞌ sban caꞌ, laweꞌ da quegá xúgute̱ benneꞌ dxeleajlí lazre̱ꞌ Cristo.
\v 3 Xránadxu naque̱ꞌ li lazreꞌ, naꞌ Le̱ꞌ guzé̱ chache̱ꞌ leꞌe, ne guxúe̱ꞌ leꞌe chee̱ quebe bi da cale̱la gaca na chee̱le.
\v 4 Dxuxrén lázrentuꞌ Xránadxu gácale̱ne̱ꞌ leꞌe chee̱ gunle ca da dxé̱nentuꞌ leꞌe, ca ba dxúnquezle.
\v 5 Dxenábantuꞌ lau Xránadxu gácale̱ne̱ꞌ leꞌe chee̱ gápale xel-la zriꞌi lazreꞌ da gunna Dios leꞌe, ne gápale xel-la zren lazreꞌ da gunna Cristo leꞌe.
\s Dxal-laꞌ gundxu zrin
\p
\v 6 Leꞌe, bi bíchaꞌdauꞌ, lu La Xránadxu Jesucristo dxé̱nentuꞌ leꞌe quebe gunle tuze nútete̱ze bi bíchedxu quebe dxaca lazre̱ꞌ gune̱ꞌ zrin, ne quebe dxune̱ꞌ ca da bsé̱dentuꞌ leꞌe.
\v 7 Ba nézele dxal-laꞌ gunle zrin ca be̱ntuꞌ netuꞌ gate naꞌ zúale̱ntuꞌ leꞌe.
\v 8 Quebe nu chee̱ gudáguntuꞌ cáꞌaze che nadxu quebe gudízrujntuꞌ na. Bé̱nle̱ꞌe̱quezentuꞌ zrin te zra, ne chizrela chee̱ quebe bsaca ziꞌntuꞌ leꞌe da gáguntuꞌ.
\v 9 Nácaqueze chee̱ntuꞌ nábantuꞌ leꞌe da gáguntuꞌ, san be̱ntuꞌ zrin chee̱ bléꞌentuꞌ leꞌe dxal-laꞌ gunle ca bé̱nquezentuꞌ netuꞌ.
\v 10 Gate naꞌ zúale̱ntuꞌ leꞌe, bdentuꞌ lu naꞌle da nadxixruj bea nigá: Benneꞌ quebe dxaca lazre̱ꞌ gune̱ꞌ zrin caꞌan gune̱ꞌ quebe gawe̱ꞌ.
\v 11 Ba bénentuꞌ bál-lale leꞌe quebe dxunle zrin, naꞌ dxedázele dxuchixre chee̱le da dxaca chee̱ benneꞌ xula.
\v 12 Benneꞌ caní dxixruj beꞌentuꞌ, ne dxusebágantuꞌ le̱ꞌ lau Xránadxu Jesucristo chee̱ xelune̱ꞌ zrin du lazre̱ꞌ chee̱ gataꞌ da xeleꞌaj xelawe̱ꞌ.
\p
\v 13 Leꞌe, bi bichaꞌ, le gun da xrlátaje, ne quebe cheajtá lázrele.
\v 14 Che nu benneꞌ quebe dxuzúe̱ꞌ dizraꞌ ca da dxennantuꞌ lu xiche nigá, le nnaꞌ nu bénneaꞌ, ne quebe gunle le̱ꞌ tuze, chee̱ gapa stue̱ꞌ.
\v 15 Quebe zráꞌale le̱ꞌ, san le guzéajniꞌi le̱ꞌ ca bi bíchele.
\s Pablo dxuzé̱ꞌ dizraꞌ bi bíche̱dxu caꞌ
\p
\v 16 Xránadxu naque̱ꞌ Bénneaꞌ dxunne̱ꞌ dxiꞌu xel-la dxebeza zri lazreꞌ. Dxenabaꞌ lau Le̱ꞌ gúnnaqueze̱ꞌ leꞌe xel-la dxebeza zri lazreꞌ lu xúgute̱ da dxunle, ne súale̱ne̱ꞌ xúgute̱le leꞌe.
\p
\v 17 Nedaꞌ, Pablo nen náꞌaquezaꞌ dxuzúajaꞌ chee̱le da nigá. Da nigá dxunna bea na xúgute̱ xiche da dxuzúajquezaꞌ nedaꞌ. Caní dxuzúajaꞌ.
\v 18 Dxenabaꞌ lau Xránadxu Jesucristo gune̱ꞌ da chaweꞌ chee̱ xúgute̱le leꞌe. Caꞌan gaca na.