\id 1TI
\h 1 Timoteo
\mt DIZRAꞌ NEDXU BZUAJ SAN PABLO CHEE̱ TIMOTEO
\c 1
\s Pablo dxugape̱ꞌ diuzre Timoteo
\p
\v 1 Nedaꞌ, Pablo, nacaꞌ gubáz chee̱ Jesucristo laweꞌ da caní bdxixruj bea Dios, Xra Xránadxu Jesucristo, weselá chee̱dxu, Bénneaꞌ dxebeza lázredxu xeláꞌtee̱ꞌ.
\v 2 Dxuzúajaꞌ da nigá chiuꞌ lueꞌ, Timoteo, nacuꞌ ca zríꞌinequezaꞌ laweꞌ da dxeajlí lazruꞌ Cristo. Dxenabaꞌ Xradxu Dios, ne Xránadxu Jesucristo gune̱ꞌ chiuꞌ da chaweꞌ, ne xexache lazre̱ꞌ lueꞌ, ne gunne̱ꞌ lueꞌ xel-la dxebeza zri lazreꞌ.
\s Pablo dxusízrene̱ꞌ Timoteo ca naca chee̱ benneꞌ caꞌ dxulusé̱dene̱ꞌ da we̱n lazreꞌ
\p
\v 3 Ca ba gutaꞌ xúedaꞌ lueꞌ gate naꞌ bezáꞌa naga zuꞌ, ne bexáꞌa naga nababa xe̱zr la xu Macedonia, begáꞌana lu xe̱zre Efeso chee̱ nne̱ xúenuꞌ benneꞌ caꞌ zaj zre̱ꞌe̱ naꞌ québedxa xulusé̱dene̱ꞌ da we̱n lazreꞌ,
\v 4 ne québedxa xululapa ne̱ꞌe̱ dizraꞌ dxuluzaze benneꞌ caꞌ ca zaj naca zánete̱ xra xrtawe̱ꞌ caꞌ. Dizraꞌ caní dxulutil-la na bénneache. Quebe naca na da xelácale̱ na bénneache chee̱ xelezé̱ chache̱ꞌ ca dxeleajlí lazre̱ꞌ Dios. Caní dxenné̱ xúedaꞌ lueꞌ xecha lasa.
\p
\v 5 Dxenné̱ xúedaꞌ lueꞌ gunuꞌ caní chee̱ xelezríꞌi ljwezre̱ꞌ dute̱ lázrdawe̱ꞌ, chee̱ quebe bi sua da gagu na zria lázrdawe̱ꞌ caꞌ, ne gaca du lazreꞌ ca dxeleajlí lazre̱ꞌ Cristo.
\v 6 Bal-la benneꞌ caꞌ belexecuase̱ꞌ lu da caní, naꞌ ba zaj naziꞌe̱ dizraꞌ xálaze.
\v 7 Dxelaca lazre̱ꞌ xuluxuzájle̱ꞌe̱ da nadxixruj bea Dios, ne quebe dxeléajniꞌine̱ꞌ da dxuluchálajqueze̱ꞌ, ne ca naca da caꞌ dxuluxrén lazre̱ꞌ.
\p
\v 8 Nezdxu da nadxixruj bea na naca na xrlátaje che nu benneꞌ dxuchínene̱ꞌ na ca naca chee̱ na.
\v 9 Dxal-laꞌ gusá lázredxu quebe bzua Dios da nadxixruj bea na chee̱ nna beꞌe na benneꞌ xrlátaje caꞌ, san chee̱ nna beꞌe na benneꞌ caꞌ dxelune̱ꞌ da cale̱la, ne benneꞌ caꞌ quebe dxuluzúe̱ꞌ xrtizre̱ꞌe̱, ne benneꞌ caꞌ dxelune̱ꞌ da zrinnaj, ne benneꞌ we̱n dul-la caꞌ, ne benneꞌ caꞌ quebe dxelape̱ꞌ Dios ba láꞌana, ne quebe dxelapa ba láꞌana da naca chee̱ Dios, ne benneꞌ caꞌ dxelute xra xrnaꞌ, ne benneꞌ caꞌ dxelutie̱ꞌ benneꞌ,
\v 10 ne benneꞌ caꞌ dxelune̱ꞌ da sban, ne benneꞌ biu caꞌ, benneꞌ dxulugune̱ꞌ ljwezre biue̱ꞌ ca nuꞌula, ne benneꞌ dxelebane̱ꞌ benneꞌ caꞌ chee̱ xelutie̱ꞌ le̱ꞌ lu naꞌ benneꞌ xula, ne benneꞌ caꞌ dxelún lazre̱ꞌ, ne benneꞌ caꞌ dxelexeche̱be̱ꞌ da we̱n lazreꞌ, ne benneꞌ caꞌ dxuluchuque̱ꞌ da li.
\v 11 Caní naca da dxuléꞌe dizraꞌ chaweꞌ da bsebaga Dios nedaꞌ. Naque̱ꞌ Dios xabáa, Benneꞌ szrente̱.
\s Pablo dxe̱ꞌe̱ Dios: Xcalenuꞌ
\p
\v 12 Dxapaꞌ Xránadxu Jesucristo: Xcalenuꞌ. Naque̱ꞌ Bénneaꞌ be̱nne̱ꞌ nedaꞌ xel-la waca chee̱ gunaꞌ da nigá, laweꞌ da dxeléꞌene̱ꞌ nedaꞌ xlátaje̱, naꞌ nuzúe̱ꞌ nedaꞌ lu zrin chee̱ꞌ.
\v 13 Xúgute̱ da caní ba be̱ne̱ꞌ chiaꞌ lácala gunníaꞌ schanniꞌ chee̱ Cristo gate nate, ne gudáu ziꞌ xuzraꞌ bi chee̱ꞌ caꞌ, ne be̱n laꞌ chee̱ benneꞌ caꞌ. Dios bexache lazre̱ꞌ nedaꞌ laweꞌ da quebe ne cheajlí lazraꞌ Cristo, ne quebe guxéajniꞌidaꞌ da naꞌ be̱naꞌ.
\v 14 Chee̱ le̱ naꞌ Xránadxu, dute̱ lu xel-la zriꞌi lazreꞌ zren chee̱ꞌ bnite lawe̱ꞌ chiaꞌ, ne be̱nne̱ꞌ nedaꞌ xel-la dxeajlí lazreꞌ, ne xel-la zriꞌi lazreꞌ da nápadxu laweꞌ da nácadxu bi chee̱ Jesucristo.
\p
\v 15 Da nigá naca na da li, naꞌ xúgute̱ bénneache dxal-laꞌ xeléajle̱ꞌe̱ chee̱ na. Caní dxenná na: Jesucristo ble̱ꞌe̱ lu xe̱zr la xu nigá chee̱ guselé̱ꞌ benneꞌ dul-la caꞌ, naꞌ nedaꞌ nácadxaꞌ benneꞌ dul-la ca xúgute̱ benneꞌ caꞌ.
\v 16 Chee̱ le̱ naꞌ Dios bexache lazre̱ꞌ nedaꞌ chee̱ guléꞌe Cristo ca szren naca xel-la zren lazreꞌ chee̱ꞌ nen nedaꞌ, nácale̱ꞌa benneꞌ dul-la, chee̱ gacaꞌ nedaꞌ tu da guléꞌe na lau xúgute̱ benneꞌ caꞌ xeleajlí lazre̱ꞌ Cristo, naꞌ xelape̱ꞌ xel-la nabán chadía chacanna.
\v 17 Chee̱ le̱ naꞌ dxal-laꞌ gápadxu ba láꞌana, ne güe láꞌanadxu Bénneaꞌ nna béaqueze̱ꞌ chadía chacanna. ¡Cabataꞌ gatie̱ꞌ, ne quebe gaca léꞌedxu Le̱ꞌ, ne naque̱ꞌ Dios tu lichaꞌ, ne sina! ¡Gaca ba Le̱ꞌ chadía chacanna! ¡Caꞌan gaca na!
\p
\v 18 Lueꞌ, bi chiaꞌ, Timoteo, dxusebagaꞌ lueꞌ suꞌ wedil-la chee̱ tíl-lale̱nuꞌ da naca chee̱ da cale̱la, ca da buluchalaj nédxute̱ benneꞌ caꞌ, benneꞌ gulenné̱ꞌ waláz chee̱ Dios ca dxal-laꞌ gunuꞌ lueꞌ.
\v 19 Be̱xru tipa xel-la dxeajlí lazreꞌ chiuꞌ, chee̱ quebe bi sua da gulale na lu xichaj lazrdaꞌu. Bal-la benneꞌ caꞌ quebe belune̱ꞌ caní, naꞌ buluzúe̱ꞌ chaláꞌala xel-la dxeajlí lazreꞌ chee̱ꞌ.
\v 20 Caní guca chee̱ Himeneo, ne chee̱ Alejandro, benneꞌ caꞌ bdeaꞌ nedaꞌ lu naꞌ Satanás chee̱ xulusé̱die̱ꞌ quebe xelenné̱ꞌ schanniꞌ chee̱ Dios.
\c 2
\s Ca dxal-laꞌ guchálajle̱dxu Dios
\p
\v 1 Da dxundxa na ba xen dxenné̱ xúedaꞌ lueꞌ, dxal-laꞌ nábale lau Dios gácale̱ne̱ꞌ bénneache, ne guchálajle̱le Dios, ne gucáꞌana szrenle Le̱ꞌ, ne nábale Dios gunne̱ꞌ leꞌe da dxexázrjele, ne xe̱le Dios: Xcalenuꞌ. Dxal-laꞌ gunle caní, guchálajle̱le Dios da naca na chee̱ xúgute̱ bénneache.
\v 2 Cáꞌanqueze dxal-laꞌ nábale Le̱ꞌ gácale̱ne̱ꞌ benneꞌ xichje caꞌ, benneꞌ dxelenná beꞌene̱ꞌ bénneache, ne benneꞌ xuꞌu laweꞌ caꞌ chee̱ chadxu chaweꞌ, ne súadxu lu xel-la dxebeza zri lazreꞌ, ne guzúa cuínadxu lu naꞌ Dios du lázredxu, ne gápadxu ba láꞌana bénneache.
\v 3 Da nigá naca na xrlátaje, ne da dxezaca ba lazreꞌ Dios, weselá chee̱dxu,
\v 4 laweꞌ da dxaca lazreꞌ Le̱ꞌ xelelá xúgute̱ bénneache, ne xelúnbeꞌe̱ da li.
\v 5 Zua tuze Dios, ne zua tuze wenaba chee̱ bénneache lau Dios, Bénneaꞌ naque̱ꞌ Jesucristo, ne cáꞌanqueze be̱n cuine̱ꞌ bénneache.
\v 6 Jesucristo bzua cuine̱ꞌ lu xel-la gute chee̱ bexáꞌawe̱ꞌ xúgute̱ bénneache, naꞌ bléꞌene̱ꞌ da naꞌ ca bzrin zra chee̱ na.
\v 7 Chee̱ le̱ naꞌ bzue̱ꞌ nedaꞌ gubáz chee̱ꞌ chee̱ cuꞌa lban, ne guléꞌedaꞌ benneꞌ caꞌ quebe zaj naque̱ꞌ judío dxal-laꞌ xeleajlí lazre̱ꞌ Cristo, ne xelune̱ꞌ ca naca da li. Lau Cristo dxexeche̱baꞌ, ne quebe dxun lazraꞌ.
\p
\v 8 Chee̱ le̱ naꞌ dxaca lazraꞌ xuluchálajle̱ xúgute̱ bénneache Dios gátete̱ze naꞌ, ne xelechisa ne̱ꞌe̱ dute̱ xel-la li lazreꞌ chee̱ꞌ lau Dios, ne quebe xelezré̱ꞌe̱ ljwezre̱ꞌ, ne quebe xeledíl-lale̱ne̱ꞌ ljwezreꞌ caꞌ.
\v 9 Nuꞌula caꞌ dxal-laꞌ xelácue̱ꞌ da naca xlátaje̱, ne ca naca chee̱ da dxelúe lechítaje̱ cuine̱ꞌ dxal-laꞌ gaca na xel-la dxexruj lazreꞌ, ne xel-la du lazreꞌ, ne quegá ca dxulupáꞌa xíchaje̱ꞌ, ne quegá lechítaje̱ da naca na oro, ne quegá bga caꞌ, ne quegá zra lane̱ꞌ da zácale̱ꞌe̱ na.
\v 10 Dxal-laꞌ xelune̱ꞌ da gácale̱ na bénneache, ca dxal-laꞌ xelún nuꞌula caꞌ ba zaj nuzúa cuine̱ꞌ lu naꞌ Dios.
\v 11 Nuꞌula caꞌ dute̱ lu xel-la dxexruj lazreꞌ chee̱ꞌ dxal-laꞌ xuluzé̱ nague̱ꞌ gate nu dxuse̱de xrtizra Dios, ne quebe xelenné̱ꞌ chee̱ na.
\v 12 Quebe dxunnaꞌ lataj nuꞌula gusé̱dene̱ꞌ benneꞌ biu caꞌ, ne quebe nna beꞌene̱ꞌ le̱ꞌ, san dxal-laꞌ sueꞌ zrize.
\v 13 Caní naca na laweꞌ da be̱n Dios teca Adán, naꞌ gudé naꞌ be̱ne̱ꞌ Eva, nuꞌula chee̱ Adán naꞌ.
\v 14 Adán, quebe guzí xe̱ da xriwe̱ꞌ le̱ꞌ, san guzí xe̱ na Eva, nuꞌula naꞌ, naꞌ gudé guzí xe̱ na le̱ꞌ, naꞌ be̱ne̱ꞌ dul-la.
\v 15 Tu nuꞌula gape̱ꞌ xel-la weselá che dxezane̱ꞌ bidu caꞌ, ne cheajlí lazre̱ꞌ Dios, ne nazriꞌine̱ꞌ Le̱ꞌ, ne nuzúa cuine̱ꞌ lu naꞌ Dios, ne gaque̱ꞌ dxexruj lazreꞌ.
\c 3
\s Ca dxal-laꞌ xelaca benneꞌ caꞌ dxulusé̱dene̱ꞌ bi caꞌ chee̱ Cristo
\p
\v 1 Da líqueze naca da nigá: Che nu benneꞌ dxezá lazre̱ꞌ gaque̱ꞌ benneꞌ gusé̱dene̱ꞌ bi caꞌ chee̱ Cristo, tu zrin xrlátaje dxaca lazre̱ꞌ gune̱ꞌ.
\v 2 Tu benneꞌ dxusé̱dene̱ꞌ bi caꞌ chee̱ Cristo:
\q Dxal-laꞌ gaque̱ꞌ benneꞌ quebe bi zua da dxunite na le̱ꞌ.
\q Dxal-laꞌ súale̱ne̱ꞌ tuze nuꞌula.
\q Dxal-laꞌ gaque̱ꞌ benneꞌ dxuzéajniꞌi cuine̱ꞌ,
\q ne benneꞌ dxenná beꞌe cuine̱ꞌ,
\q ne benneꞌ nape̱ꞌ ba láꞌana.
\q Dxal-laꞌ siꞌ lu ne̱ꞌe̱ benneꞌ xelezrine̱ꞌ lizre̱ꞌ.
\q Dxal-laꞌ gaque̱ꞌ benneꞌ dxaca dxusé̱dene̱ꞌ bénneache.
\q
\v 3 Quebe dxal-laꞌ xéꞌaje̱ꞌ da guzuzre na le̱ꞌ,
\q ne quebe gutil-le̱ꞌ nu benneꞌ,
\q ne quebe sa lazre̱ꞌ dumí.
\q Dxal-laꞌ gaque̱ꞌ benneꞌ dxexruj lazreꞌ, ne zren lazreꞌ.
\q
\v 4 Dxal-laꞌ nézene̱ꞌ nna beꞌene̱ꞌ benneꞌ zaj zre̱ꞌe̱ lizre̱ꞌ,
\q ne guléꞌene̱ꞌ zríꞌine̱ꞌ caꞌ xelácabeꞌ wezúa dizraꞌ,
\q ne xelápabeꞌ ba láꞌana xra xrnabeꞌ.
\m
\v 5 Che nu benneꞌ quebe nézene̱ꞌ ájala nna beꞌene̱ꞌ benneꞌ zaj zre̱ꞌe̱ lizre̱ꞌ, ¿ájazra gune̱ꞌ gusé̱dene̱ꞌ bi caꞌ chee̱ Dios?
\v 6 Benneꞌ dxusé̱dene̱ꞌ bi caꞌ chee̱ Cristo quebe dxal-laꞌ gaque̱ꞌ benneꞌ za dxúnbeate̱ dizraꞌ chee̱ Cristo, chee̱ quebe gucáꞌana szren cuine̱ꞌ, chee̱ quebe cuía xiꞌe̱ ca guzría xiꞌ da xriwe̱ꞌ.
\v 7 Cáꞌanqueze dxal-laꞌ gaque̱ꞌ benneꞌ nape̱ꞌ ba láꞌana láwela benneꞌ quebe zaj naque̱ꞌ chee̱ Cristo, chee̱ quebe gataꞌ lataj nu guzúa le̱ꞌ chaláꞌala, naꞌ chee̱ quebe chuꞌe̱ lu naꞌ da xriwe̱ꞌ.
\s Ca dxal-laꞌ xelaca benneꞌ dxelácale̱ne̱ꞌ bi caꞌ chee̱ Cristo
\p
\v 8 Cáꞌanqueze benneꞌ caꞌ dxelácale̱ne̱ꞌ bi caꞌ chee̱ Cristo:
\q Dxal-laꞌ xelaque̱ꞌ benneꞌ zaj nape̱ꞌ ba láꞌana, ne benneꞌ li lazreꞌ.
\q Quebe dxal-laꞌ xeléꞌaje̱ꞌ da guzuzre na le̱ꞌ,
\q ne quebe xelaque̱ꞌ benneꞌ dxulucudee̱ꞌ.
\q
\v 9 Dxal-laꞌ xelapa xánnie̱ꞌ da zácale̱ꞌe̱ chee̱ da dxeajlí lázredxu,
\q ne quebe bi sua da gagu na zría chee̱ꞌ lu xichaj lázrdawe̱ꞌ.
\q
\v 10 Dxal-laꞌ guxúe xánnele ca dxeledé̱ꞌ.
\m Te naꞌ, che quebe bi zua da dxagu na zria chee̱ꞌ, waca xelácale̱ne̱ꞌ bi caꞌ chee̱ Cristo.
\v 11 Zruꞌula benneꞌ caní:
\q Dxal-laꞌ xelaque̱ꞌ benneꞌ zaj nape̱ꞌ ba láꞌana,
\q ne quebe xelaque̱ꞌ wetupa dizraꞌ bizruj.
\q Dxal-laꞌ xelaque̱ꞌ du lazreꞌ, ne li lazreꞌ ca naca xúgute̱ da dxelune̱ꞌ.
\m
\v 12 Tu benneꞌ dxácale̱ne̱ꞌ bi caꞌ chee̱ Cristo dxal-laꞌ súale̱ne̱ꞌ tuze nuꞌula, ne dxal-laꞌ nézene̱ꞌ nna beꞌene̱ꞌ zríꞌine̱ꞌ caꞌ, ne benneꞌ zaj zre̱ꞌe̱ lizre̱ꞌ.
\v 13 Benneꞌ caꞌ dxelácale̱ne̱ꞌ bi caꞌ chee̱ Cristo, che dxelune̱ꞌ cháwedauꞌ zrin chee̱ꞌ, welezruéꞌene̱ꞌ xel-la ba láꞌana, naꞌ xelezéquedxene̱ꞌ xuluchálaje̱ꞌ du lazre̱ꞌ ca dxeajlí lázredxu Jesucristo.
\s Tu da bleꞌe Dios dxiꞌu ca naca da zéajle̱dxu
\p
\v 14 Dxebeza lazraꞌ xídazequezaꞌ xedajnnáꞌa lueꞌ, naꞌ dxuzúajaꞌ chiuꞌ da nigá
\v 15 chee̱ chéajniꞌinuꞌ che dxezredaꞌ, ca dxal-laꞌ gunuꞌ ládujla benneꞌ caꞌ zaj nababe̱ꞌ chee̱ Dios, benneꞌ caꞌ ba bláwizra Dios ban, ne zaj nuxru chache̱ꞌ da li, ne dxuluxúe xánnie̱ꞌ na.
\v 16 Da li tu da zrente̱ naca da nigá bleꞌe Dios dxiꞌu ca naca da zéajle̱dxu:
\q Dios ble̱ꞌe̱ nigá, ne guque̱ꞌ bénneache.
\q Beꞌ Láꞌazxa bléꞌene̱ꞌ naque̱ꞌ xlátaje̱.
\q Beleléꞌe gubáz chee̱ xabáa caꞌ Le̱ꞌ.
\q Benneꞌ dute̱ xe̱zr la xu belenne̱ꞌ ca naca chee̱ꞌ.
\q Guleajlí lazreꞌ benneꞌ zaj zre̱ꞌe̱ dute̱ xe̱zr la xu nigá Le̱ꞌ.
\q Dios beziꞌe̱ Le̱ꞌ xabáa.
\c 4
\s Ca naca chee̱ benneꞌ caꞌ dxuluzúe̱ꞌ chaláꞌala xel-la dxeajlí lazreꞌ chee̱ꞌ
\p
\v 1 Beꞌ Láꞌazxa ba bdxixruj lie̱ꞌ wazrín zra xulusán bal-la benneꞌ xel-la dxeajlí lazreꞌ chee̱ꞌ, naꞌ chjácale̱ne̱ꞌ beꞌ caꞌ xelezí xe̱ na le̱ꞌ, ne xelezíꞌe̱ ca da xululéꞌe beꞌ xriwe̱ꞌ caꞌ.
\v 2 Xuluzé̱ nague̱ꞌ ca da xuluse̱de benneꞌ we̱n lazreꞌ caꞌ, benneꞌ dxelún láweze da xrlátaje, ne québedxa zaj zua xel-la dxeléquebeꞌe xichaj lázrdawe̱ꞌ, ne zaj naque̱ꞌ lázrdau zizraj, naꞌ quebe zaj napeꞌ xel-la stuꞌ gate dxelún lazre̱ꞌ.
\v 3 Benneꞌ caní quebe dxeluꞌe̱ latja nu guchaga naꞌ, ne cáꞌanqueze nu xeꞌaj gagu bal-la da dxágudxu, lácala be̱n Dios da caꞌ chee̱ xelagu benneꞌ caꞌ dxeleajlí lazre̱ꞌ Le̱ꞌ, ne benneꞌ caꞌ zaj núnbeꞌe̱ da li, ne xelé̱ꞌe̱ Le̱ꞌ; Xcalenuꞌ.
\v 4 Xúgute̱ da be̱n Dios naca na chaweꞌ, ne quebe dxal-laꞌ bi guzúadxu chaláꞌala, san dxal-laꞌ sidxu na, ne xe̱dxu Dios; Xcalenuꞌ,
\v 5 laweꞌ da naca chaweꞌ lau Dios bítete̱ze da dxágudxu che dxundxu ca dxenná xrtizre̱ꞌ, ne che nábadxu Le̱ꞌ gune̱ꞌ gaca na da chaweꞌ.
\s Benneꞌ we̱n zrin xrlátaje chee̱ Jesucristo
\p
\v 6 Che dxusé̱denuꞌ bi bíchedxu caꞌ da caní, nacuꞌ bi we̱n zrin chaweꞌ chee̱ Jesucristo, naꞌ nazí lu naꞌu dizraꞌ chee̱ Dios, ne ca naca da dxusé̱dedxu, da naꞌ zéajle̱nuꞌ.
\v 7 Quebe gulapa naꞌu da dxuluzaze bénneache, ne dizraꞌ xálaze. Bzazraj cuinuꞌ lu da naca chee̱ Dios.
\v 8 Che dxuzazraj cuinuꞌ ca naca lu be̱l-laꞌ dxen chiuꞌ wácale̱queze na lueꞌ lateꞌ, san che dxuzazraj cuinuꞌ lu da naca chee̱ Dios, wácale̱ na lueꞌ lu xúgute̱ da dxunuꞌ, naꞌ naca na da sidxu ba neza lu xe̱zr la xu nigá, ne cáꞌanqueze lu xe̱zr la xu da za zaꞌ.
\v 9 Da li naca da nigá, naꞌ xúgute̱ bénneache dxal-laꞌ xeléajle̱ꞌe̱ chee̱ na.
\v 10 Chee̱ le̱ naꞌ dxudé xel-la ziꞌ cuínadxu dxundxu zrin laweꞌ da dxebeza lázredxu Dios ban, Bénneaꞌ naque̱ꞌ weselá chee̱ xúgute̱ bénneache, naꞌ dxuselé̱ꞌ benneꞌ caꞌ dxeajlí lazre̱ꞌ Le̱ꞌ.
\p
\v 11 Da caní dxal-laꞌ gusé̱denuꞌ bénneache, ne nne̱ xuenuꞌ le̱ꞌ xelune̱ꞌ na.
\v 12 Quebe guꞌu lataj nu guzúa lueꞌ chaláꞌala laweꞌ da nacuꞌ benneꞌ cuideꞌ, san dxal-laꞌ gacuꞌ tu da guléꞌe na benneꞌ caꞌ dxeleajlí lazre̱ꞌ Cristo ca dxal-laꞌ xelune̱ꞌ. Guléꞌe na le̱ꞌ:
\q Ne̱ chee̱ da dxuchálajuꞌ,
\q ne ne̱ chee̱ da dxunuꞌ,
\q ne ca nazriꞌinuꞌ le saꞌ ljwezruꞌ,
\q ne ca naca Beꞌ Láꞌazxa zúale̱ne̱ꞌ lueꞌ,
\q ne ca dxeajlí lazruꞌ Cristo,
\q ne ca nacuꞌ du lazreꞌ.
\m
\v 13 Dxácate̱ xidaꞌ nedaꞌ, be̱n ziꞌ lazruꞌ gulabuꞌ xiche láꞌazxa láwela bénneache, ne gutipuꞌ lazreꞌ bi bíchedxu caꞌ, ne guzéajniꞌinuꞌ le̱ꞌ.
\v 14 Quebe gusanuꞌ xel-la waca da be̱nna Dios lueꞌ gate buluzé̱ naꞌ benneꞌ gula caꞌ xichjuꞌ, ne gulenné̱ꞌ ca da bleꞌe Beꞌ Láꞌazxa le̱ꞌ ca naca zrin chee̱ Xránadxu da dxal-laꞌ gunuꞌ.
\p
\v 15 Be̱n da caní du lazruꞌ chee̱ xeleléꞌe xúgute̱ bénneache nápaquezuꞌ da naca chee̱ Dios.
\v 16 Bxue xanneꞌ cuinuꞌ, ne ca da dxusé̱denuꞌ, ne guzé̱ chacha lu zrin chiuꞌ. Che gunuꞌ da caní, naꞌ guseláqueze cuinuꞌ, ne guseláquezuꞌ benneꞌ caꞌ xelenne̱ꞌ da guchálajuꞌ.
\c 5
\s Ca dxal-laꞌ xelaca benneꞌ caꞌ dxeleajlí lazre̱ꞌ Cristo
\p
\v 1 Quebe cun til-luꞌ tu benneꞌ gula, san bzéajniꞌi le̱ꞌ ca xráquezuꞌ. Gúcale̱ benneꞌ cuideꞌ caꞌ ca bi bíchequezuꞌ.
\v 2 Gúcale̱ nuꞌula gula caꞌ ca xrnáquezuꞌ. Gúcale̱ nuꞌula cuideꞌ caꞌ ca bi zánquezuꞌ, dute̱ lu xel-la dxapa ba láꞌana chiuꞌ.
\p
\v 3 Gúcale̱ nuꞌula ba nate benneꞌ chee̱ꞌ, nuꞌulaꞌ quebe nu xrtie̱ꞌ zradxa.
\v 4 Che tu nuꞌula ba gute benneꞌ chee̱ꞌ ne zaj zraꞌ zríꞌine̱ꞌ, u zre sue̱ꞌ, le̱beꞌ dxal-laꞌ xelunbeꞌ ca da zaj nabágabeꞌ chee̱ xelácale̱beꞌ benneꞌ zaj naca xrtíaquezbeꞌ, ne xelunbeꞌ ca da zaj nabágabeꞌ chee̱ xra xrnabeꞌ, laweꞌ da naca na xrlátaje, ne da dxezaca ba lazreꞌ Dios.
\v 5 Nuꞌula da li québedxa nu chiláꞌ chee̱ꞌ dxebeza lazre̱ꞌ Dios, ne dxuchálajle̱ne̱ꞌ Dios te zra, ne chizrela.
\v 6 Nuꞌula caní, che dxune̱ꞌ ca da dxezaca ba lazreꞌ lé̱queze̱ꞌ, naque̱ꞌ ca benneꞌ ba nate.
\v 7 Bdxixruj beꞌe benneꞌ caꞌ xelune̱ꞌ caní, chee̱ quebe gun na ba xen nu til-la le̱ꞌ.
\v 8 Che nu benneꞌ quebe dxebéꞌe̱ gunne xue chee̱ benneꞌ caꞌ zaj naque̱ꞌ tuze, ne da dxun na ba xen che quebe dxácale̱ne̱ꞌ xrtíaqueze̱ꞌ, ba bsane̱ꞌ xel-la dxeajlí lazreꞌ chee̱ꞌ, ne nácadxe̱ꞌ benneꞌ we̱n da zrinnaj ca tu benneꞌ quebe ne chéajle̱ꞌe̱ chee̱ Dios.
\p
\v 9 Lu xiche naga zria la nuꞌula caꞌ quebe nu chiláꞌ chee̱ꞌ, benneꞌ dxácale̱le, dxal-laꞌ guzúajle la nuꞌula caní, nuꞌula naꞌ ba gudée̱ꞌ ga xun iza, ne guzúa tuze benneꞌ chee̱ꞌ.
\v 10 Dxal-laꞌ gaque̱ꞌ nuꞌula ba bé̱nle̱ꞌe̱ da xrlátaje ca da caní:
\q Che ba bsegule̱ꞌ zríꞌine̱ꞌ caꞌ.
\q Che ba guzíꞌ lu ne̱ꞌe̱ benneꞌ bíchedxu belezrín lizre̱ꞌ.
\q Che ba gúcale̱ne̱ꞌ benneꞌ caní dute̱ lu xel-la dxexruj lazreꞌ chee̱ꞌ.
\q Che ba gúcale̱ne̱ꞌ benneꞌ dxedée̱ꞌ xel-la ziꞌ.
\q Che bi xetú da xrlátaje ba be̱ne̱ꞌ.
\p
\v 11 Quebe guzríale lu xiche naꞌ nuꞌula caní che quebe ne xelezríe̱ꞌ ga xun iza laweꞌ da gagaze xucuasa xel-la dxelezá lazreꞌ chee̱ꞌ le̱ꞌ lu da naca chee̱ Cristo, naꞌ xelaca lazre̱ꞌ xuluchaga ne̱ꞌe̱ xecha lasa,
\v 12 naꞌ xelebague̱ꞌ zria laweꞌ da bulusane̱ꞌ ca da guleche̱be lazre̱ꞌ chee̱ Cristo.
\v 13 Cáꞌanqueze che dxeledé̱ꞌ tu tu xuꞌu, xelaque̱ꞌ zrawe̱de, ne quegaze zrawe̱de, san cáꞌanqueze xelaque̱ꞌ wetupa dizraꞌ bizruj, naꞌ xuluchixre chee̱ꞌ lu xúgute̱ da xelenne̱ꞌ, ne xelenné̱ꞌ da quebe dxal-laꞌ xelenné̱ꞌ.
\v 14 Chee̱ le̱ naꞌ dxaca lazraꞌ xuluxuchaga ne̱ꞌe̱ che ne zaj naqueꞌ nuꞌula cuideꞌ, ne xelezrá zríꞌine̱ꞌ, ne xuluxúe̱ꞌ lizre̱ꞌ, chee̱ quebe xelezí lataj xelezí tizra benneꞌ caꞌ dxelezre̱ꞌe̱ dxiꞌu.
\v 15 Bal-la nuꞌula caní ba belexecuase̱ꞌ chee̱ Cristo, ne zjácale̱ne̱ꞌ da xriwe̱ꞌ.
\p
\v 16 Che nu benneꞌ dxeajlí lazre̱ꞌ Cristo, benneꞌ biu, u nuꞌula, che zua xrtie̱ꞌ naque̱ꞌ nuꞌula ba gute benneꞌ chee̱ꞌ, dxal-laꞌ gácale̱ne̱ꞌ le̱ꞌ chee̱ quebe xelebaga bi caꞌ chee̱ Cristo da nigá, naꞌ benneꞌ caní welezequeꞌ xelácale̱ne̱ꞌ nuꞌula caní québedxa nu chiláꞌ chee̱ꞌ.
\p
\v 17 Che zaj zraꞌ benneꞌ gula caꞌ dxulusédene̱ꞌ cháwedauꞌ bi caꞌ chee̱ Cristo, dxal-laꞌ gápale̱ꞌe̱le benneꞌ caꞌ ba láꞌana, naꞌ dxundxa na ba xen gápale ba láꞌana benneꞌ gula caꞌ dxuluchálajle̱queze̱ꞌ leꞌe dizraꞌ chee̱ Dios, ne dxulusé̱dene̱ꞌ leꞌe.
\v 18 Lu xiche láꞌazxa dxenná na: Quebe cuꞌule xixruj dxuꞌa be̱zre, be̱ dxíchujbaꞌ zruaꞌ xtila. Cáꞌanqueze dxenná na: Benneꞌ we̱n zrin dxal-laꞌ siꞌe̱ xrlázruje̱ꞌ.
\p
\v 19 Quebe guzé̱ naguꞌ che nu gagu zria chee̱ tu benneꞌ gula chee̱ xudauꞌ che quebe xeleláꞌ chupa u chunna benneꞌ xelexeche̱be̱ꞌ.
\v 20 Benneꞌ caꞌ dxelúnqueze̱ꞌ dul-la, dxal-laꞌ til-luꞌ benneꞌ caꞌ láwela xúgute̱ bi caꞌ chee̱ Cristo, chee̱ xelezrebe xezícadxa benneꞌ caꞌ.
\v 21 Lau Dios, ne lau Xránadxu Jesucristo, ne lau gubáz blau caꞌ chee̱ xabáa chee̱ꞌ, dxusebagaꞌ lueꞌ chee̱ gunuꞌ da caní. Dxenné̱ xuedaꞌ lueꞌ quebe cueuꞌ ca zaj naca benneꞌ, ne quebe guchaꞌu ca gunuꞌ chee̱ tu tu benneꞌ.
\v 22 Quebe xexúbenuꞌ nu la guzúateuꞌ lu zrin chee̱ Cristo chee̱ quebe baguꞌ dul-la chee̱ benneꞌ xula. Quebe gulapa naꞌu ne tu da cale̱la.
\p
\v 23 Laweꞌ da quebe chaweꞌ zua le̱ꞌu, ne tu lize dxaca na, québedxa xéꞌajuꞌ nísaze, san güeꞌe lateꞌ xrise uva wal-la.
\p
\v 24 Zaj naláꞌ dul-la chee̱ bal-la benneꞌ gate quebe nu ne guchiꞌa ca da zaj nune̱ꞌ, san dul-la da zaj nun xezícadxa benneꞌ caꞌ xululéꞌe lawe na te naꞌ.
\v 25 Cáꞌanqueze zaj naláꞌ da xrlátaje da zaj nun bal-la benneꞌ, ne che zra da xrlátaje da quebe zaj naláꞌ, quebe gaca tu xelegáchequeze na.
\c 6 
\p 
\v 1 Benneꞌ zaj nadaꞌu dxal-laꞌ xelápale̱ꞌe̱ ba láꞌana xrane̱ꞌ caꞌ chee̱ quebe nu nne̱ schanniꞌ chee̱ Dios, ne chee̱ da dxusé̱dedxu. 
\v 2 Che benneꞌ zaj nadaꞌu, zaj zraꞌ xrane̱ꞌ caꞌ dxeleajlí lazre̱ꞌ Cristo, quebe dxal-laꞌ xuluzúe̱ꞌ le̱ꞌ chaláꞌala laweꞌ da zaj naque̱ꞌ benneꞌ biche̱ꞌ, san dxal-laꞌ xelune̱ꞌ zrin da nácadxa xrlátaje chee̱ xrane̱ꞌ caꞌ dxeleziꞌe̱ ba neza zrin naꞌ, laweꞌ da dxeleajlí lazre̱ꞌ Cristo, ne zaj naque̱ꞌ benneꞌ biche̱ꞌ zaj nazriꞌine̱ꞌ. Bzéajniꞌi benneꞌ caꞌ da nigá ne bsizre le̱ꞌ. 

\s Da cale̱la da dxuluse̱de benneꞌ, ne xel-la gunníꞌa li 
\p 
\v 3 Che nu benneꞌ dxusé̱dene̱ꞌ da zaj naca cale̱la da quebe zaj naca na tuze ca da bse̱de Xránadxu Jesucristo, ne ca da dxuse̱de da dxéajle̱dxu chee̱ Dios, 
\v 4 benneꞌ nigá dxucáꞌana szren cuine̱ꞌ, ne quebe bi nézene̱ꞌ. Dxezá lázrele̱ꞌe̱ gutil-le̱ꞌ benneꞌ dizraꞌ ca naca chee̱ tu tu dizraꞌ caꞌ. Benneꞌ dxelún caní:
\q Dxelaque̱ꞌ benneꞌ xre lazreꞌ, ne dxeledil-le̱ꞌ,
\q ne dxulucháchale̱ ljwezre̱ꞌ,
\q ne dxeléquene̱ꞌ dxun le saꞌ ljwezre̱ꞌ da cale̱la, 
\q
\v 5 ne tu lize dxulutil-la dizraꞌ ljwezre̱ꞌ,
\q ne zaj naque̱ꞌ benneꞌ zaj nazrinnaj lu xichaj lázrdawe̱ꞌ,
\q ne quebe zaj nunbeꞌe̱ da li.
\m Dxeléquene̱ꞌ zrin dxundxu chee̱ Cristo naca na tu da waca xuluchínene̱ꞌ chee̱ xelaque̱ꞌ benneꞌ gunníꞌa. Quebe gunuꞌ tuze benneꞌ caní. 
\v 6 Da li da zéajle̱dxu chee̱ Cristo naca na tu da gunníꞌa zren, naꞌ caní nácaqueze chee̱ tuze bénneaꞌ dxezaca ba lazre̱ꞌ ca da nape̱ꞌ. 
\v 7 Quebe bi núadxu gate gúlajdxu lu xe̱zr la xu nigá, ne quebe bi xexúadxu gate xezáꞌadxu nigá, 
\v 8 san che de̱ da gágudxu, ne zra lánadxu, dxal-laꞌ xezaca ba lázredxu nen da caꞌ. 
\v 9 Benneꞌ caꞌ dxelaca lazre̱ꞌ xelaque̱ꞌ gunníꞌa, cheajlecházie̱ꞌ lu naꞌ da xriwe̱ꞌ, naꞌ cheajlechuꞌe̱ lu xralaj chee̱ le̱ na, chee̱ xelezá lazre̱ꞌ da xálaze, da dxulucáꞌana ditaj na bénneache, ne dxelegúꞌu na bénneache lu da ba xaꞌ naga xelebía xiꞌe̱. 
\v 10 Benneꞌ nazriꞌine̱ꞌ dumí dxune̱ꞌ xúgute̱ da cale̱la, naꞌ zaj zraꞌ bal-la benneꞌ gulezá lazre̱ꞌ na, naꞌ bulusane̱ꞌ xel-la dxeleajlí lazreꞌ chee̱ꞌ, naꞌ ba gulezíꞌ lataj xel-la dxudía lu lázrdawe̱ꞌ. 

\s Da dxusizre Pablo Timoteo 
\p 
\v 11 Lueꞌ, we̱n zrin chee̱ Dios, gucuasa lu da caní. Be̱n da naca xlátaje̱, ne bzua cuinuꞌ lu naꞌ Dios, ne guxeajlí lazreꞌ Cristo, ne bzriꞌi Le̱ꞌ, ne guca zren lazreꞌ, ne dxexruj lazreꞌ. 
\v 12 Gudíl-lale̱ da xriwe̱ꞌ, guchínenuꞌ xel-la dxeajlí lazreꞌ chiuꞌ. Be̱xru tipa xel-la nabán da chadía chacanna laweꞌ da bláwizra Dios lueꞌ chee̱ gapuꞌ da nigá, naꞌ ba bléꞌenuꞌ ca dxeajlí lazruꞌ Cristo láwela zaneꞌ benneꞌ dxelexeche̱be̱ꞌ chee̱ na. 
\v 13 Naꞌa, lau Dios, Bénneaꞌ nuzúe̱ꞌ xel-la nabán chee̱ xúgute̱ da naca ban, ne lau Jesucristo, Bénneaꞌ cáꞌanqueze bléꞌene̱ꞌ da naque̱ꞌ, ne beche̱be̱ꞌ chee̱ na lau Poncio Pilato, dxenné̱ xuedaꞌ lueꞌ. 
\v 14 Guzúꞌ dizraꞌ ca da dxapaꞌ lueꞌ, ne quebe guchaꞌu na. Dxal-laꞌ gunuꞌ na chee̱ quebe nu sequeꞌ bi nne̱ chiuꞌ ca zrin zra xeláꞌ Xránadxu Jesucristo. 
\v 15 Ca zrin zra chee̱ na Dios sel-le̱ꞌ Le̱ꞌ. Naque̱ꞌ Dios tu lichaꞌ, naꞌ Benneꞌ Láꞌazxa dxenná beꞌe̱. Naque̱ꞌ Wenná bea, Benneꞌ dxenná beꞌene̱ꞌ wenná bea caꞌ, ne naque̱ꞌ Xrana xúgute̱ benneꞌ zaj naque̱ꞌ xrana bénneache. 
\v 16 Tuze Dios quebe gatie̱ꞌ, ne zue̱ꞌ lu xel-la naxaníꞌ naga quebe nu sequeꞌ cheaj. Netú bénneache quebe ne léꞌene̱ꞌ Le̱ꞌ, ne quebe nu gaca leꞌe Le̱ꞌ. Chee̱ Le̱ꞌ naca xel-la ba láꞌana, ne xel-la dxenná bea chadía chacanna. ¡Caꞌan gaca na!
\p 
\v 17 Gunné̱ xue benneꞌ zaj naque̱ꞌ gunníꞌa lu xe̱zr la xu nigá chee̱ quebe xulucáꞌana szren cuine̱ꞌ, ne quebe xuluxrén lazre̱ꞌ xel-la gunníꞌa chee̱ꞌ, laweꞌ da quebe naca na da chadía chacanna. Dxal-laꞌ xuluxrén lazre̱ꞌ Dios ban, Bénneaꞌ dxúnnale̱ꞌe̱ dxiꞌu xúgute̱ da dxechínedxu chee̱ sidxu da ba neza. 
\v 18  Gunné̱ xue benneꞌ caní xelune̱ꞌ da xrlátaje, ne xelaque̱ꞌ benneꞌ gunníꞌa lu da xrlátaje da xelune̱ꞌ, ne bi xulunézruje̱ꞌ benneꞌ xacheꞌ caꞌ, ne xulunézrujle̱ꞌe̱ na. 
\v 19 Caní gaca, xelezruéꞌene̱ꞌ xel-la gunníꞌa da gaca na tu da guzúa chacha na le̱ꞌ lu zra da za zaꞌ, ne xelape̱ꞌ xel-la nabán da zeajlí canna. 
\p 
\v 20 Lueꞌ, Timoteo, bxue xanne da nuzúa Dios lu naꞌu. Quebe guzé̱ naguꞌ dizraꞌ xálaze chee̱ xe̱zr la xu nigá, da naꞌ dxelenná bal-la benneꞌ naca na xel-la sina. Da nigá naca na da we̱n lazreꞌ.
\v 21 Bal-la benneꞌ gulezíꞌe̱ na, naꞌ bulusane̱ꞌ xel-la dxeleajlí lazreꞌ chee̱ꞌ. Dxenábedaꞌ Dios gune̱ꞌ da chaweꞌ chiuꞌ. ¡Caꞌan gaca na!