\id 2TI
\h 2 Timoteo
\mt DIZRAꞌ GUDXUPEꞌ DA BZUAJ SAN PABLO CHEE̱ TIMOTEO
\c 1
\s Pablo dxugape̱ꞌ diuzre Timoteo
\p
\v 1 Nedaꞌ, Pablo, nacaꞌ gubáz chee̱ Jesucristo laweꞌ da guca lazreꞌ Dios gacaꞌ caní, chee̱ cuꞌa lban ca naca xel-la nabán da guche̱be lazreꞌ Dios gunne̱ꞌ chee̱ benneꞌ caꞌ zaj naque̱ꞌ bi chee̱ Jesucristo.
\v 2 Dxuzúajaꞌ da nigá chiuꞌ lueꞌ Timoteo, bi chiaꞌ nazríꞌi lazraꞌ, naꞌ dxenabaꞌ Xradxu Dios, ne Xránadxu Jesucristo gune̱ꞌ da chaweꞌ chiuꞌ, ne xexache lazre̱ꞌ lueꞌ, ne gunne̱ꞌ chiuꞌ xel-la dxebeza zri lazreꞌ.
\s Pablo dxusízrene̱ꞌ Timoteo chee̱ gunbeꞌ zrin chee̱ Cristo
\p
\v 3 Te zra ne chizrela gate dxuchálajle̱naꞌ Dios, ne dxeajsá lazraꞌ lueꞌ, dxápequezaꞌ Dios: Xcalenuꞌ, Bénneaꞌ dxunaꞌ zrin chee̱ꞌ, ne quebe bi zua da dxagu na zria lu xichaj lázrdawaꞌ. Dxunaꞌ zrin naꞌ ca belúnqueze xra xrtawaꞌ caꞌ.
\v 4 Dxeajsá lázrquezaꞌ ca gudxezruꞌ gate naꞌ bezáꞌa naga zuꞌ, ne dxaca lázrele̱ꞌa xeléꞌedaꞌ lueꞌ chee̱ gápale̱ꞌa xel-la dxebé.
\v 5 Cáꞌanqueze dxeajsá lazraꞌ xel-la dxeajlí lazreꞌ li da napuꞌ. Xrnaꞌu gula, Loida, ne xrnaꞌu, Eunice gulape̱ꞌ xel-la dxeajlí lazreꞌ caní, naꞌ nuxrén lazraꞌ lueꞌ nápaquezuꞌ na.
\p
\v 6 Chee̱ le̱ naꞌ dxuzéajniꞌidaꞌ lueꞌ guchínenuꞌ ca da be̱nna Dios lueꞌ gate naꞌ bzeaꞌ naꞌa xichjuꞌ, ne gunabaꞌ gun Dios da chaweꞌ chiuꞌ.
\v 7 Beꞌ Láꞌazxa be̱nna Dios dxiꞌu quebe dxune̱ꞌ dxiꞌu bi zra chebe, san dxunne̱ꞌ dxiꞌu xel-la wal-la, ne xel-la zriꞌi lazreꞌ, ne dxune̱ꞌ dxiꞌu benneꞌ dxenná beꞌe cuina.
\v 8 Chee̱ le̱ naꞌ quebe gapa stuꞌ ca naca chee̱ Xránadxu, ne cáꞌanqueze ca naca chiaꞌ nedaꞌ, xuꞌa lizre xia nigá laweꞌ da dxunaꞌ zrin chee̱ Cristo, san bchaga lau lueꞌ xel-la ziꞌ da dxeledé benneꞌ caꞌ dxuluchálaje̱ꞌ dizraꞌ chaweꞌ chee̱ Jesús, naꞌ Dios gutípaqueze̱ꞌ lazruꞌ.
\v 9 Dios bselé̱ꞌ dxiꞌu, ne bláwizre̱ꞌ dxiꞌu chee̱ guzúa cuínadxu lu naꞌ Le̱ꞌ, quegá laweꞌ da be̱ndxu tu da xrlátaje, san laweꞌ da guca lázrequeze Le̱ꞌ gaca na caní, ne laweꞌ da bzriꞌine̱ꞌ dxiꞌu, nazrágadxu chee̱ Cristo. Dios bzriꞌine̱ꞌ dxiꞌu gate quebe ne gunte̱ꞌ xe̱zr la xu nigá,
\v 10 naꞌ bléꞌene̱ꞌ xel-la zriꞌi lazreꞌ nigá naꞌa, laweꞌ da gusel-le̱ꞌ Jesucristo, weselá chee̱dxu, naꞌ bzria xiꞌe̱ xel-la dxenná bea chee̱ xel-la gute, ne bléꞌene̱ꞌ bénneache ca gaca xelezíꞌ lu ne̱ꞌe̱ xel-la nabán chadía chacanna, ca dxennáqueze dizraꞌ chaweꞌ da dxuchálajdxu.
\p
\v 11 Dios bzue̱ꞌ nedaꞌ chee̱ guchálajaꞌ ca naca dizraꞌ chaweꞌ nigá, ne be̱ne̱ꞌ nedaꞌ benneꞌ gubáz chee̱ꞌ chee̱ gusé̱dedaꞌ benneꞌ quebe zaj naque̱ꞌ judío.
\v 12 Chee̱ le̱ naꞌ dxedéaꞌ xel-la ziꞌ caní. Quebe dxapa stuꞌa ne̱ chee̱ da nigá, laweꞌ da núnbeꞌa Bénneaꞌ nuxrén lazraꞌ, ne nezdaꞌ nape̱ꞌ xel-la waca cuꞌu chawe̱ꞌ da nuzúaꞌ lu ne̱ꞌe̱ ca zrindxa zra naꞌ.
\p
\v 13 Be̱xru tipa ca naca dizraꞌ da bsé̱dedaꞌ lueꞌ, ne quebe gusanuꞌ xel-la dxeajlí lazreꞌ, ne xel-la zriꞌi lazreꞌ da nápadxu laweꞌ da nácadxu bi chee̱ Jesucristo.
\v 14 Ne̱ chee̱ xel-la waca chee̱ Beꞌ Láꞌazxa, Bénneaꞌ zue̱ꞌ xichaj lázrdaudxu, be̱xru tipa da naꞌ nuzúa Dios lu naꞌu.
\p
\v 15 Ba nézenuꞌ ca belún xúgute̱ bi bíchedxu zaj zre̱ꞌe̱ naga nababa Asia. Gulebéaj xíchaje̱ꞌ nedaꞌ. Cáꞌanqueze Figelo, ne Hermógenes belune̱ꞌ tu zren benneꞌ caꞌ.
\v 16 Dxenabaꞌ Xránadxu xexache lazre̱ꞌ benneꞌ zaj zre̱ꞌe̱ lizre Onesíforo. Gúcale̱ le̱ꞌ nedaꞌ zaneꞌ lásaqueze, ne quebe gudapa stue̱ꞌ chiaꞌ nedaꞌ, xuꞌa lizre xia.
\v 17 Gate ble̱ꞌe̱ xe̱zre Roma, bexílaje̱ꞌ nedaꞌ, naꞌ bezrélene̱ꞌ nedaꞌ.
\v 18 Dxenabaꞌ Xránadxu xexache lazre̱ꞌ le̱ꞌ lu zra náꞌ gate xeláꞌ Le̱ꞌ. Ba nézenuꞌ ca gúcale̱le̱ꞌe̱ne̱ꞌ dxiꞌu lu xe̱zre Efeso.
\c 2
\s Benneꞌ we̱n zrin du lazreꞌ chee̱ Jesucristo
\p
\v 1 Lueꞌ, zriꞌinaꞌ, guzé̱ tipa ne̱ chee̱ da xrlátaje da nápadxu laweꞌ da nácadxu bi chee̱ Jesucristo.
\v 2 Ca da bennuꞌ bchálajaꞌ láwela benneꞌ zan, benneꞌ belexeche̱be̱ꞌ naca na da li, bzua na lu naꞌ benneꞌ zaj naque̱ꞌ li lazreꞌ, benneꞌ xelezéquene̱ꞌ xulusé̱dene̱ꞌ na benneꞌ xula.
\p
\v 3 Lueꞌ dxal-laꞌ gacuꞌ benneꞌ we̱n zrin du lazreꞌ chee̱ Jesucristo, guchaga lauꞌ xel-la ziꞌ ca tu benneꞌ zeje̱ꞌ wedil-la.
\v 4 Netú benneꞌ zeje̱ꞌ wedil-la, benneꞌ xuꞌe̱ lu zrin chee̱ xrane̱ꞌ, quebe dxune̱ꞌ zrin xula, laweꞌ da dxaca lazre̱ꞌ xezaca ba lazreꞌ xrane̱ꞌ chie̱ꞌ.
\v 5 Cáꞌanqueze, benneꞌ xuꞌe̱ lu witaj quebe zrueꞌene̱ꞌ da xexale̱ꞌ che quebe quítaje̱ꞌ ca naca chee̱ na.
\v 6 Cáꞌanqueze benneꞌ dxaza dxaꞌana, benneꞌ dxúnle̱ꞌe̱ zrin, dxal-laꞌ xezíꞌ lu ne̱ꞌe̱ lina chee̱ꞌ.
\v 7 Blaba lazreꞌ ca da dxapaꞌ lueꞌ, naꞌ Xránadxu guzéajniꞌine̱ꞌ lueꞌ xúgute̱ na.
\p
\v 8 Bsa lazreꞌ ca naca chee̱ Jesucristo, guque̱ꞌ xrtia David, ne bebane̱ꞌ ládujla benneꞌ gate, ca dxenná dizraꞌ chaweꞌ da dxuchálajaꞌ nedaꞌ.
\v 9 Ne̱ chee̱ dizraꞌ chaweꞌ nigá dxedéaꞌ xel-la ziꞌ, ne xuꞌa lizre xia nigá ca tu benneꞌ we̱n da zrinnaj, san dizraꞌ chee̱ Dios quebe nu sequeꞌ cuꞌu le̱ na lizre xia.
\v 10 Chee̱ le̱ naꞌ xúgute̱ da caꞌ dxuchaga lawaꞌ ne̱ chee̱ benneꞌ caꞌ ba gucáꞌa Dios le̱ꞌ, chee̱ cáꞌanqueze benneꞌ caꞌ xelelé̱ꞌ ne̱ chee̱ Jesucristo, ne xelexexúꞌe̱ lu xabáa chadía chacanna.
\p
\v 11 Da nigá naca na da li:
\q Che nuzúa cuínadxu gátedxu ca bzua cuina Le̱ꞌ,
\q cáꞌanqueze waca bandxu nen Le̱ꞌ.
\q
\v 12 Che dxededxu xel-la ziꞌ,
\q naꞌ nna béaquezdxu tu zren nen Le̱ꞌ.
\q Che quebe xeché̱bedxu nácadxu bi chee̱ Le̱ꞌ,
\q cáꞌanqueze Le̱ꞌ quebe xeche̱be̱ꞌ nácadxu bi chee̱ꞌ.
\q
\v 13 Che dxiꞌu quebe nácadxu li lazreꞌ,
\q Le̱ꞌ nácaqueze̱ꞌ li lazreꞌ.
\q Dios québequeze guché̱ꞌe̱ ca naque̱ꞌ.
\s Tu benneꞌ we̱n zrin du lazreꞌ
\p
\v 14 Bsa lazreꞌ bi bíchedxu caꞌ, ne bsizre le̱ꞌ lu La Xránadxu québedxa xulutil-la dizraꞌ ljwezre̱ꞌ. Xel-la dxutil-la dizra ljwezre quebe bi culuén napa na, san dxuxrinnaj na xichaj lázrdau benneꞌ caꞌ dxelénne̱ꞌ na.
\v 15 Be̱n ba xuzre gacuꞌ we̱n zrin du lazreꞌ lau Dios, naꞌ quebe gaca xel-la stuꞌ chiuꞌ, laweꞌ da dxuchínenuꞌ xrlátaje dizraꞌ li.
\v 16 Quebe gulapa naꞌu dizraꞌ xálaze, ne dizraꞌ sban da dxuluchálajze bénneache, da caꞌ dxulucuasa na bénneache lu da naca chee̱ Dios.
\v 17 Dizraꞌ sban caní dxuluxrinnaj na xichaj lázrdau bénneache ca dxun tu we̱ꞌ da dxuzru na lu be̱l-laꞌ dxen chee̱dxu. Caní guca chee̱ Himeneo, ne Fileto,
\v 18 benneꞌ caꞌ gulecuase̱ꞌ lu xel-la li, naꞌ dxelenné̱ꞌ ba belexebán benneꞌ gate, naꞌ dxuluxrínnaje̱ꞌ xel-la dxeajlí lazreꞌ chee̱ bal-la benneꞌ.
\v 19 Dios ba gudixruj biꞌe̱ xrtizre̱ꞌ da naca na ca tu lane xuꞌu chee̱ xel-la dxeajlí lazreꞌ chee̱dxu, da dxenná caní: Xránadxu núnbeꞌe̱ bi chie̱ꞌ caꞌ Cáꞌanqueze dxenná na: Xúgute̱ bi caꞌ chee̱ Cristo québedxa dxal-laꞌ xelune̱ꞌ da cale̱la.
\p
\v 20 Tu lu xuꞌu zaca, quegá zraꞌ tuze zriga xéꞌena da zaj naca na oro ne plata, san cáꞌanqueze zaj zraꞌ da zaj naca na xiaj ne xu. Dxuluchínene̱ꞌ da caꞌ zaj zácadxa lu da zaca, naꞌ xezícadxa da caꞌ dxuluchínene̱ꞌ ájate̱ze.
\v 21 Nácadxu ca zriga xéꞌena caꞌ. Che nu benneꞌ dxaca lazre̱ꞌ gaque̱ꞌ ca tu da zaca, chee̱ gaque̱ꞌ benneꞌ guchine Xránadxu lu zrin xrlátaje chee̱ꞌ, dxal-laꞌ xexadxe̱ꞌ ca naca da cale̱la caꞌ.
\p
\v 22 Bxue xanneꞌ cuinuꞌ ca zaj naca da caꞌ dxelezá lazreꞌ benneꞌ cuideꞌ caꞌ, ne quebe gusanuꞌ da xrlátaje da dxunuꞌ, ne ca dxeajlí lazruꞌ Cristo, ne ca nazriꞌinuꞌ Le̱ꞌ, ne ca dxebeza zri lazruꞌ, da caꞌ dxunuꞌ tu zren nen xúgute̱ benneꞌ caꞌ du lazre̱ꞌ dxululáwizre̱ꞌ Xránadxu.
\v 23 Quebe gulapa naꞌu dizraꞌ xálaze, ne dizraꞌ quebe zeaj xrlátaje, laweꞌ da nézenuꞌ dxuluzúa na bénneache lu da ba xaꞌ.
\q
\v 24 Benneꞌ we̱n zrin chee̱ Xránadxu:
\q Quebe dxal-laꞌ tíl-lale̱ne̱ꞌ benneꞌ.
\q Dxal-laꞌ gaque̱ꞌ zriꞌi lazreꞌ nen xúgute̱ bénneache.
\q Dxal-laꞌ gaque̱ꞌ benneꞌ dxezeque̱ꞌ gusé̱dene̱ꞌ bénneache.
\q Dxal-laꞌ gaque̱ꞌ zren lazreꞌ,
\q
\v 25 ne dute̱ xel-la dxexruj lazreꞌ gusízrene̱ꞌ benneꞌ dxelune̱ꞌ da cale̱la.
\m Caní dxal-laꞌ gune̱ꞌ che ba benla Dios xelexexéaje lazre̱ꞌ benneꞌ ca chee̱ xelúnbeꞌe̱ da li,
\v 26 naꞌ xelelé̱ꞌ lu xralaj chee̱ da xriwe̱ꞌ, naga nuzrá na le̱ꞌ, naꞌ dxelune̱ꞌ ca da dxenná le̱ na.
\c 3
\s Ca xelaca bénneache lu zra bze̱be
\p
\v 1 Cáꞌanqueze dxal-laꞌ nézele lu zra bze̱be niꞌ gaca na ste̱be chee̱ bénneache.
\v 2 Bénneache caꞌ xelaque̱ꞌ:
\q Benneꞌ xelezríꞌize cuina, ne xelezríꞌine̱ꞌ dumí.
\q Xulucáꞌana szren cuine̱ꞌ,
\q ne xulucáꞌana cuine̱ꞌ ca benneꞌ blau caꞌ.
\q Xelenné̱ꞌ schanniꞌ chee̱ Dios,
\q ne quebe xuluzúe̱ꞌ dizraꞌ chee̱ xra xrne̱ꞌe̱.
\q Xelaque̱ꞌ benneꞌ quebe dxelezí le̱,
\q ne benneꞌ quebe dxelapa ba láꞌana Dios.
\q
\v 3 Quebe xelaque̱ꞌ zriꞌi lazreꞌ,
\q ne quebe xelexexache lazre̱ꞌ ljwezre̱ꞌ.
\q Xelenné̱ꞌ chee̱ ljwezre̱ꞌ, ne quebe xelenná beꞌe cuine̱ꞌ.
\q Xelaque̱ꞌ benneꞌ snia caꞌ, ne xuluzúe̱ꞌ chaláꞌala da naca xrlátaje.
\q
\v 4 Quebe xelaque̱ꞌ li lazreꞌ nen ljwezre̱ꞌ.
\q Xelaque̱ꞌ benneꞌ dxelexube.
\q Xeléquene̱ꞌ zaj naque̱ꞌ benneꞌ szrente̱.
\q Xelexezaca ba lázredxene̱ꞌ da caꞌ dxeledánene̱ꞌ quézcala da naca chee̱ Dios.
\q
\v 5 Lácala xululéꞌe cuine̱ꞌ ca benneꞌ zaj naque̱ꞌ chee̱ Dios,
\q quebe súale̱ le̱ꞌ xel-la waca chee̱ Dios.
\m Quebe gunuꞌ tu zrén benneꞌ caꞌ.
\v 6 Ca zaj naca benneꞌ caní zaj naca benneꞌ caꞌ zjaque̱ꞌ tu tu xuꞌu, ne dxelezí xe̱ꞌe̱ nuꞌula quebe zaj zie̱ꞌ du lazreꞌ, ne zaj zua da dxagu na zria lázrdawe̱ꞌ da naca chee̱ xtul-leꞌ. Xel-la dxelezá lazreꞌ chee̱ nuꞌula caní nazrube xu na le̱ꞌ.
\v 7 Lácala tu dxulusé̱dezqueze̱ꞌ chee̱ xel-la li, cabataꞌ dxeléajniꞌiquezne̱ꞌ na.
\v 8 Ca belún Janes ne Jambres, benneꞌ wazráꞌ caꞌ, benneꞌ caꞌ guledábague̱ꞌ Moisés, cáꞌanqueze dxelún benneꞌ caní, dxeledábague̱ꞌ xel-la li. Zaj nazrinnaj xichaj lázrdawe̱ꞌ, ne belexecuase̱ꞌ lu xel-la dxeajlí lazreꞌ chee̱ Dios.
\v 9 Quebe bi xelezruéꞌe benneꞌ caní, laweꞌ da xeleque béꞌequeze xúgute̱ bénneache zaj naque̱ꞌ benneꞌ xálaze, ca gulaca benneꞌ chupa caꞌ guledábague̱ꞌ Moisés.
\s Da bze̱be da dxusebaga Pablo Timoteo
\p
\v 10 Ba benuꞌ:
\q Ca da bzéajniꞌidaꞌ bénneache, ne bléꞌequeznuꞌ ca bé̱nquezaꞌ.
\q Nézenuꞌ da dxaca lazraꞌ gunaꞌ, ne ca dxeajlí lazraꞌ Cristo.
\q Bchaga lawaꞌ da guzxacaꞌ, ne nazríꞌidaꞌ xúgute̱ bénneache.
\q Nézenuꞌ ca naca xel-la zren lazreꞌ chiaꞌ.
\q
\v 11 Bléꞌenuꞌ ca guláu ziꞌ xuzre̱ꞌ nedaꞌ, ne ca gudéaꞌ xel-la ziꞌ.
\q Nézenuꞌ xúgute̱ da guzracaꞌ lu xe̱zre Antioquía, ne xe̱zre Iconio, ne xe̱zre Listra.
\q Guláu ziꞌ xuzre benneꞌ caꞌ nedaꞌ, naꞌ Xránadxu bselé̱ꞌ nedaꞌ lu xúgute̱ da caꞌ.
\p
\v 12 Xúgute̱ benneꞌ caꞌ, benneꞌ dxelaca lazre̱ꞌ xelúnqueze̱ꞌ ca da dxenná Jesucristo, weláu ziꞌ xúzrequeze bénneache le̱ꞌ.
\v 13 Benneꞌ caꞌ dxelune̱ꞌ da cale̱la, ne benneꞌ dxelezí xe̱ꞌe̱ welúndxaqueze̱ꞌ da cale̱la. Xelezí xe̱ꞌe̱ bénneache, naꞌ benneꞌ xula xelezí xe̱ꞌe̱ benneꞌ caní.
\p
\v 14 Lueꞌ, guzé̱ chacha ca da ba naxéajniꞌinuꞌ, da naꞌ nuxrén lazruꞌ. Nézqueznuꞌ nu bse̱de lueꞌ,
\v 15 naꞌ ne nácateuꞌ bídauꞌte̱ ba núnbeꞌu da dxenná lu xiche láꞌazxa, da dxezeque na guzéajniꞌi na lueꞌ, chee̱ lauꞌ laweꞌ da dxeajlí lazruꞌ Jesucristo.
\v 16 Xúgute̱ da naxúaj na lu xiche láꞌazxa naca na da bzéajniꞌi Dios benneꞌ caꞌ zaj naque̱ꞌ bi chee̱ Le̱ꞌ, ne naca na da dxuzéajniꞌi na dxiꞌu, ne da dxedil-la na benneꞌ dxelune̱ꞌ da cale̱la, ne da dxusizre na dxiꞌu, ne da dxuléꞌe na dxiꞌu ca dxal-laꞌ gundxu da xrlátaje,
\v 17 chee̱ gaca du lazreꞌ bi chee̱ Dios, naꞌ gácabeꞌ bi naze̱de xanne chee̱ gunbeꞌ xúgute̱ da xrlátaje.
\c 4 
\p 
\v 1 Lau Dios, ne lau Xránadxu Jesucristo, Bénneaꞌ guchiꞌe̱ chee̱ benneꞌ ban caꞌ, ne chee̱ benneꞌ gate caꞌ gate ze̱ꞌe̱ xedajnná beꞌe̱, dxusebagaꞌ lueꞌ 
\v 2 guchálajuꞌ dizraꞌ chee̱ Dios, ne gunuꞌ ba xuzre guchálajuꞌ che xuluzé̱ naga bénneache, ca xuluzé̱ nague̱ꞌ. Bzéajniꞌi benneꞌ caꞌ dute̱ xel-la zren lazreꞌ chiuꞌ, ne bleꞌe le̱ꞌ ca da zaj nabague̱ꞌ. Gudil-la, ne bsizre benneꞌ caꞌ. 
\v 3 Caní dxal-laꞌ gunuꞌ laweꞌ da wazrín zra québedxa xuluzé̱ naga bénneache chee̱ xel-la li da dxusé̱dedxu. Ca dxelezá lázrqueze le̱ꞌ, xulunné̱ꞌ zaneꞌ benneꞌ xulusé̱dene̱ꞌ le̱ꞌ ca da dxelaca lázreze le̱ꞌ xelenne̱ꞌ. 
\v 4 Québedxa xuluzé̱ nague̱ꞌ da li. Wuluzé̱ nague̱ꞌ dizraꞌ da dxuluzaze bénneache. 
\v 5 Naꞌ lueꞌ, bzéajniꞌi cuinuꞌ lu xúgute̱ da caní. Bchaga lau xel-la ziꞌ da teuꞌ. Bzua cuinuꞌ chee̱ guchálajuꞌ dizraꞌ chaweꞌ chee̱ Cristo, ne be̱n zrin da nabaguꞌ chee̱ Cristo.
\p 
\v 6 Ba bzrin zra guzúaꞌ xel-la nabán chiaꞌ lu naꞌ Dios, laweꞌ da ba zua bagu xelutie̱ꞌ nedaꞌ. 
\v 7 Du lazraꞌ gudábagaꞌ benneꞌ caꞌ guledábague̱ꞌ da naca chee̱ Cristo. Tu bé̱nzquezaꞌ ca naca da li chee̱ꞌ, ne ba bexuzre be̱naꞌ da bsebaga Cristo nedaꞌ gunaꞌ.
\v 8 Laweꞌ da be̱naꞌ da xrlátaje, naꞌa ba dxebeza da dxexalaꞌ nedaꞌ, da naꞌ gunna Xránadxu nedaꞌ lu zra naꞌ, ne quegá tuzaꞌ nedaꞌ gunne̱ꞌ na. Cáꞌanqueze gunézruje̱ꞌ na chee̱ benneꞌ caꞌ dute̱ xel-la zriꞌi lazreꞌ chee̱ꞌ dxelebeze̱ꞌ zra xelé̱ꞌe̱. 

\s Pablo dxuléꞌene̱ꞌ Timoteo ca dxal-laꞌ gunbeꞌ 
\p 
\v 9 Be̱n ba xuzre xídazeuꞌ xedajnnáꞌu nedaꞌ. 
\v 10 Ba guleaj xichaj Demas nedaꞌ laweꞌ da dxedánedxabeꞌ da naca chee̱ xe̱zr la xu nigá, ne ba zexíajbeꞌ Tesalónica. Crescente ba gusel-laꞌ-beꞌ zexíajbeꞌ naga nababa Galacia, naꞌ Tito gusel-laꞌ-beꞌ naga nababa Dalmacia. 
\v 11 Tuze Lucas zúale̱beꞌ nedaꞌ. Bexilaj Marcos, naꞌ guché̱ꞌ-beꞌ tu zrén le̱n lueꞌ, laweꞌ da wazéquebeꞌ gácale̱beꞌ nedaꞌ lu zrin chee̱ Cristo. 
\v 12 Tíquico gusel-laꞌ-beꞌ lu xe̱zre Efeso. 
\v 13 Gate xiduꞌ, gúaguꞌ gabán chiaꞌ da nucáꞌanaꞌ xe̱zre Troas lizre Carpo. Cáꞌanqueze guꞌu xiche caꞌ bcáꞌanaꞌ ga naꞌ, ne da dxunte̱ na ba xen guꞌu xiche caꞌ zaj naca na xide. 
\p 
\v 14 Alejandro, benneꞌ gubizre xia bsacaꞌ zíꞌle̱ꞌe̱ nedaꞌ. Xránadxu gunézruje̱ꞌ lazruj chee̱ꞌ ca da be̱ne̱ꞌ. 
\v 15 Bxue xanne cuinuꞌ chee̱ benneꞌ nigá laweꞌ da ba gudábagale̱ꞌe̱ dizraꞌ da dxuchálajdxu. 
\p 
\v 16 Da nedxu lasa gate beche̱baꞌ ca naca chiaꞌ lau benneꞌ xuꞌu laweꞌ caꞌ, netú benneꞌ quebe gúcale̱ne̱ꞌ nedaꞌ. Xúgute̱ꞌ buluzáꞌ xíchaje̱ꞌ nedaꞌ.
\v 17 Gúcale̱ Xránadxu nedaꞌ, ne btipe̱ꞌ lazraꞌ chee̱ guzéquedaꞌ bchálajaꞌ dizraꞌ chaweꞌ lau xúgute̱ benneꞌ caꞌ quebe zaj naque̱ꞌ judío. Caꞌan guca bselá Xránadxu nedaꞌ lu naꞌ benneꞌ caꞌ, ca dxun benneꞌ dxuselé̱ꞌ béadu caꞌ lu dxuꞌa be̱zre xixreꞌ, 
\v 18 naꞌ guseláqueze̱ꞌ nedaꞌ lu xúgute̱ da cale̱la, ne guxúequeze̱ꞌ nedaꞌ ca zrin zra xezrinaꞌ xabáa naga dxenná bea Le̱ꞌ. ¡Gaca báqueze Le̱ꞌ! ¡Caꞌan gaca na!

\s Benneꞌ chee̱ Cristo dxulugapa diuzre ljwezre̱ꞌ 
\p 
\v 19 Dxugapaꞌ diuzre Priscila, ne Aquilo, ne benneꞌ zaj zraꞌ lizre Onesíforo. 
\v 20 Erasto begáꞌanabeꞌ xe̱zre Corinto, naꞌ bcáꞌanaꞌ Trófimo lu xe̱zre Mileto laweꞌ da quebe chaweꞌ zúabeꞌ. 
\v 21 Be̱n ba xuzre xiduꞌ nigá dxácate̱ quebe ne chúꞌudxu beuꞌ zaga. Eubulo, ne Pudente, ne Lino, ne Claudia, ne xúgute̱ bi bíchedxu zaj zre̱ꞌe̱ nigá dxulugape̱ꞌ lueꞌ diuzre. 
\p 
\v 22 Dxenabaꞌ Xránadxu Jesucristo súale̱ne̱ꞌ lueꞌ, ne dxenabaꞌ Dios gune̱ꞌ da chaweꞌ chee̱ xúgute̱le leꞌe. ¡Caꞌan gaca na!