\id TIT
\h Tito
\mt DIZRAꞌ DA BZUAJ SAN PABLO CHEE̱ TITO
\c 1
\s Pablo dxugape̱ꞌ Tito diuzre
\p
\v 1 Nedaꞌ, Pablo, nacaꞌ we̱n zrin chee̱ Dios, ne gubáz chee̱ Jesucristo chee̱ guzéajniꞌidaꞌ benneꞌ caꞌ ba gucáꞌa Dios chee̱ xeleajlí lazre̱ꞌ Cristo, ne xelúnbeꞌe̱ da naca li lazreꞌ chee̱ da naca chee̱ Dios,
\v 2 ne chee̱ xelebeza lazre̱ꞌ xel-la nabán chadía chacanna, da guche̱be lazreꞌ Dios gunne̱ꞌ chee̱dxu gate za gunte̱ꞌ xe̱zr la xu nigá. Dios quebe dxun lazre̱ꞌ,
\v 3 naꞌ naꞌa, ca ba bzrin zra chee̱ na, ba bzéajniꞌine̱ꞌ dxiꞌu ca naca xrtizre̱ꞌ ne̱ chee̱ da bxrizeꞌ Dios nedaꞌ cuꞌa lban chee̱ na. Dios nácaqueze̱ꞌ weselá chee̱dxu.
\v 4 Dxuzúajaꞌ da nigá chiuꞌ, Tito. Nacuꞌ ca zríꞌinequezaꞌ laweꞌ da dxeajlí lázredxu Cristo. Dxenabaꞌ lau Xradxu Dios, ne lau Xránadxu Jesucristo, Benneꞌ weselá chee̱dxu, gune̱ꞌ chiuꞌ da cháwedauꞌ, ne xexache lazre̱ꞌ lueꞌ, ne gunne̱ꞌ lueꞌ xel-la dxebeza zri lazreꞌ.
\s Zrin da dxun Tito lu xe̱zr la xu Creta
\p
\v 5 Bcáꞌanaꞌ lueꞌ lu xe̱zr la xu Creta da naxechaj nisa chee̱ gucáꞌana chawuꞌ da quebe begáꞌana chaweꞌ ládujla bíchedu caꞌ, ne chee̱ gunnituꞌ benneꞌ gula chee̱ xudauꞌ tu tu xé̱zredu caꞌ, cáte̱ze bxrísedaꞌ lueꞌ gunuꞌ.
\v 6 Tu benneꞌ gula chee̱ xudauꞌ:
\q Dxal-laꞌ gaqueꞌ benneꞌ quebe bi zua da gagu na chie̱ꞌ.
\q Dxal-laꞌ súale̱ne̱ꞌ tuze nuꞌula.
\q Zríꞌine̱ꞌ dxal-laꞌ xelácabeꞌ bi ba dxéajlí lázrebeꞌ Cristo.
\q Quebe bi da zrinnaj dxelún zríꞌine̱ꞌ caꞌ,
\q ne quebe gaca nu gagu zria chee̱ da dxelunbeꞌ.
\p
\v 7 Laweꞌ da xuꞌu lu ne̱ꞌe̱ zrin chee̱ Dios, tu benneꞌ dxuxúe̱ꞌ benneꞌ zaj nababe̱ꞌ chee̱ Cristo:
\q Dxal-laꞌ gaque̱ꞌ benneꞌ quebe bi zua da gagu na zria chee̱ꞌ.
\q Quebe dxal-laꞌ gaque̱ꞌ benneꞌ dxucáꞌana szren cuine̱ꞌ.
\q Quebe dxal-laꞌ gaque̱ꞌ benneꞌ xichaj zraꞌa.
\q Quebe dxal-laꞌ gaque̱ꞌ benneꞌ dxéꞌaje̱ꞌ da dxuzuzre na le̱ꞌ.
\q Quebe dxal-laꞌ gaque̱ꞌ benneꞌ dxedíl-lale̱ne̱ꞌ bénneache.
\q Quebe dxal-laꞌ gaque̱ꞌ benneꞌ dxucúdee̱ꞌ.
\q
\v 8 Dxal-laꞌ súate̱ze̱ꞌ siꞌ lu ne̱ꞌe̱ benneꞌ zjaque̱ꞌ lizre̱ꞌ.
\q Dxal-laꞌ gune̱ꞌ da naca cháwedauꞌ.
\q Dxal-laꞌ gaque̱ꞌ benneꞌ nna beꞌe cuine̱ꞌ.
\q Dxal-laꞌ gaque̱ꞌ benneꞌ xrlátaje.
\q Dxal-laꞌ gaque̱ꞌ benneꞌ nuzúa cuine̱ꞌ chee̱ Dios.
\q Dxal-laꞌ gaque̱ꞌ benneꞌ dxuzéajniꞌi cuine̱ꞌ.
\q
\v 9 Dxal-laꞌ gaque̱ꞌ benneꞌ nuzúa cuine̱ꞌ chee̱ dizraꞌ li.
\m Dizraꞌ li naca na da bse̱de nu benneꞌ le̱ꞌ chee̱ séquene̱ꞌ gusízrene̱ꞌ benneꞌ xubla ne̱ chee̱ da li da dxusé̱dene̱ꞌ, ne chee̱ séquene̱ꞌ guzexruje̱ꞌ lazreꞌ benneꞌ caꞌ dxelenné̱ꞌ chee̱ da li naꞌ.
\p
\v 10 Caní dxal-laꞌ gune̱ꞌ laweꞌ da zrále̱ꞌe̱ benneꞌ dxelenné̱ꞌ chee̱ dizraꞌ li, benneꞌ dxelezí xe̱ꞌe̱ benneꞌ xubla lu da xala da dxlenné̱ꞌ. Zaneꞌ benneꞌ Israel dxelune̱ꞌ caní.
\v 11 Dxal-laꞌ guzúa zriuꞌ benneꞌ dxelune̱ꞌ da caní laweꞌ da dxuluxrínnaje̱ꞌ xichaj lázxdau xúgute̱ benneꞌ zaj zraꞌ tu tu xuꞌu naga dxelúꞌe̱ chee̱ xulusé̱dene̱ꞌ da quebe naca xrlátaje. Dxelune̱ꞌ caní chee̱ xelezíꞌ lu ne̱ꞌe̱ dumí. Da nigá da dxelune̱ꞌ naca na da cale̱la.
\p
\v 12 Tu benneꞌ Creta naga zuꞌ, benneꞌ gunné̱ꞌ waláz chee̱ xudauꞌ chee̱ benneꞌ caꞌ, gunné̱ꞌ: “Benneꞌ Creta zaj nácaqueze̱ꞌ we̱n lazreꞌ, ne zaj naque̱ꞌ ca be̱ snia caꞌ, ne zaj naque̱ꞌ benneꞌ wagu xrataꞌ, ne zrawe̱de.”
\v 13 Da li gunné̱ꞌ. Chee̱ le̱ naꞌ gudíl-laqueze benneꞌ caꞌ chee̱ xelaque̱ꞌ li lazreꞌ ca dxeleajlí lazre̱ꞌ Cristo,
\v 14 ne chee̱ quebe xuluzé̱ nague̱ꞌ dizraꞌ da dxuluzaze benneꞌ Israel caꞌ, ne ca naca da nadxixruj bea caꞌ da dxelún benneꞌ caꞌ dxuluzúe̱ꞌ chaláꞌala dizraꞌ li.
\p
\v 15 Xúgute̱ naca na xrlátaje chee̱ benneꞌ caꞌ zaj naca xrlátaje xichaj lázrdawe̱ꞌ, san chee̱ benneꞌ caꞌ dxelune̱ꞌ da sban, ne québedxa dxeléajle̱ꞌe̱ chee̱ Cristo, quebe bi de̱ da naca xrlátaje. Zaj nazrinnaj xichaj lázrdawe̱ꞌ.
\v 16 Benneꞌ caní dxelenné̱ꞌ zaj núnbeꞌene̱ꞌ Dios, san da dxelune̱ꞌ dxuléꞌe na quebe naca da li da dxelenné̱ꞌ. Zaj naque̱ꞌ benneꞌ we̱n da sban, ne benneꞌ we̱n da cale̱la, ne quebe xelezéquene̱ꞌ xelune̱ꞌ tu da xrlátaje.
\c 2
\p
\v 1 Dxal-laꞌ guchálajuꞌ da caꞌ dxuse̱de na dxiꞌu da naca li.
\p
\v 2 Benneꞌ gula chee̱ xudauꞌ:
\q Dxal-laꞌ xelaque̱ꞌ benneꞌ dxelenná béꞌe cuine̱ꞌ.
\q Dxal-laꞌ xelaque̱ꞌ benneꞌ du lazreꞌ.
\q Dxal-laꞌ xelaque̱ꞌ benneꞌ dxuluzéajniꞌi cuine̱ꞌ.
\q Dxal-laꞌ xelaque̱ꞌ li lazreꞌ ca dxleajlí lazre̱ꞌ Cristo,
\q ne ca zaj nazríꞌine̱ꞌ Le̱ꞌ,
\q ne ca naca xel-la zren lazreꞌ chee̱ꞌ.
\p
\v 3 Cáꞌanqueze nuꞌula gula caꞌ chee̱ xudauꞌ:
\q Dxal-laꞌ dxelapa ba láꞌana Dios ca naca xúgute̱ da dxelune̱ꞌ.
\q Quebe dxal-laꞌ xelaque̱ꞌ benneꞌ dxulutupe̱ꞌ dizraꞌ bizruj.
\q Quebe dxal-laꞌ xelaque̱ꞌ benneꞌ dxeléꞌaje̱ꞌ da xuzuzre na le̱ꞌ.
\q Dxal-laꞌ xulusé̱dene̱ꞌ da naca xrlataje̱
\q
\v 4 chee̱ gaca xulusé̱dene̱ꞌ nuꞌula cuideꞌ caꞌ
\q chee̱ xelezríꞌine̱ꞌ benneꞌ chee̱ꞌ caꞌ, ne zríꞌine̱ꞌ caꞌ,
\q
\v 5 ne chee̱ xelenná beꞌe cuine̱ꞌ,
\q ne xelaqueꞌ du lazreꞌ,
\q ne xulupe̱ꞌe̱ lizre̱ꞌ,
\q ne xuluzúe̱ꞌ dizraꞌ chee̱ benneꞌ chee̱ꞌ.
\m Caní dxal-laꞌ xelune̱ꞌ chee̱ quebe nu nne̱ꞌ schanníꞌ chee̱ xrtizraꞌ Dios.
\p
\v 6 Cáꞌanqueze bsizre bi cuideꞌ caꞌ chee̱ xelenná beꞌe cuínabeꞌ.
\v 7 Ca naca da xrlátaje dxunuꞌ lueꞌ dxal-laꞌ guléꞌe na benneꞌ caꞌ ca dxal-laꞌ xelune̱ꞌ. Gate dxusé̱denuꞌ benneꞌ caꞌ dxal-laꞌ gacuꞌ li lazreꞌ, ne du lazreꞌ.
\v 8 Dxal-laꞌ guchálajuꞌ da naca li lazreꞌ chee̱ quebe nu sequeꞌ si tizra le̱ na. Che gunuꞌ caní, naꞌ che nu benneꞌ nnie̱ꞌ chee̱le, weduéꞌequezne̱ꞌ, laweꞌ da quebe sua tu da cale̱la da dxunle.
\p
\v 9 Bzéajniꞌi benneꞌ caꞌ zaj nadaꞌu chee̱ xuluzúe̱ꞌ dizraꞌ chee̱ xrane̱ꞌ ca naca xúgute̱ da xelé̱ xrane̱ꞌ le̱ꞌ. Dxal-laꞌ xelune̱ꞌ da xelexezaca ba lazreꞌ xrane̱ꞌ, ne quebe xelexenné̱ꞌ lau xrane̱ꞌ.
\v 10 Quebe dxal-laꞌ xelebane̱ꞌ da naca chee̱ xrane̱ꞌ, san dxal-laꞌ xelaque̱ꞌ li lazreꞌ, chee̱ xeleléꞌe benneꞌ ca da dxelún benneꞌ caní, naꞌ xelenné̱ꞌ chaweꞌ chee̱ xrtizraꞌ Dios, Benneꞌ weselá chee̱dxu.
\p
\v 11 Dios ba bléꞌene̱ꞌ ca naca da chaweꞌ chee̱ꞌ chee̱ xelelá xúgute̱ bénneache.
\v 12 Da xrlátaje chee̱ Dios dxuse̱de na dxiꞌu chee̱ québedxa gundxu da cale̱la, ne ca naca xel-la dxezá lazreꞌ da cale̱la, san chee̱ nna beꞌe cuínadxu, ne gácadxu du lazreꞌ, ne gápadxu ba láꞌana Dios lu xe̱zr la xu nigá
\v 13 dxácate̱ ne dxebézadxu zra xeláꞌ Dios szren, ne weselá chee̱dxu Jesucristo nen xel-la szren chee̱ꞌ, da naꞌ dxebeza lázredxu.
\v 14 Le̱ꞌ bzua cuine̱ꞌ lu naꞌ benneꞌ caꞌ belútie̱ꞌ Le̱ꞌ waláz chee̱dxu dxiꞌu chee̱ bselé̱ꞌ dxiꞌu lu xúgute̱ da zrinnaj, naꞌ bcaꞌana chawe̱ꞌ dxiꞌu chee̱ gácadxu bi cheé̱queze̱ꞌ, ne chee̱ gundxu da xrlátaje du lázredxu.
\p
\v 15 Da caní dxal-laꞌ gusé̱denuꞌ benneꞌ caꞌ. Gudil-la benneꞌ caꞌ, ne bsizre-ne̱ꞌ dute̱ xel-la dxenná bea chiuꞌ. Quebe bi da cale̱la gunuꞌ chee̱ quebe nu si tizra lueꞌ.
\c 3
\s Da dxal-laꞌ xelún benneꞌ zaj nababe̱ꞌ chee̱ Cristo
\p
\v 1 Bsa lazreꞌ benneꞌ bíchedxu caꞌ chee̱ xelune̱ꞌ ca dxuluchixruj benneꞌ caꞌ dxelenná béꞌene̱ꞌ, ne benneꞌ xuꞌu laweꞌ, ne chee̱ xuluzúe̱ꞌ dizraꞌ chee̱ benneꞌ caꞌ, ne chee̱ xelezúe̱ꞌ xelune̱ꞌ xúgute̱ da xrlátaje.
\v 2 Quebe dxal-laꞌ xelenné̱ chee̱ nu benneꞌ, san dxal-laꞌ xelaque̱ꞌ zren lazreꞌ, ne zriꞌi lazreꞌ, ne dxexruj lazreꞌ lau xúgute̱ bénneache.
\v 3 Cáꞌanqueze dxiꞌu gate nate gúcadxu benneꞌ xala, ne quebe bzúadxu dizraꞌ chee̱ Dios. Gudadxu cale̱la, naꞌ gunná beꞌe be̱laꞌ dxen chee̱dxu dxiꞌu, chee̱ be̱ndxu ca naca xúgute̱ da guzá lázredxu, ne da bezaca ba lázredxu. Be̱ndxu da zrinnaj, ne gúcadxu xa lazreꞌ. Belecuide bénneache dxiꞌu, naꞌ bzráꞌadxu ljwézredxu tudxu xetudxu.
\v 4 Gate Dios, weselá chee̱dxu, bléꞌene̱ꞌ da naca chaweꞌ chee̱ꞌ, ne xel-la zriꞌi lazreꞌ chee̱ꞌ,
\v 5 naꞌ bselé̱ꞌ dxiꞌu, quegá laweꞌ da be̱ndxu dxiꞌu tu da xrlátaje, san laweꞌ da bexache lazre̱ꞌ dxiꞌu. Bselé̱ꞌ dxiꞌu ne̱ chee̱ da gudibe na dxiꞌu gate naꞌ bexálajdxu, naꞌ bucube Beꞌ Láꞌazxa chee̱ꞌ dxiꞌu.
\v 6 Ne̱ chee̱ Jesucristo, weselá chee̱dxu, Dios ba núnnale̱ꞌe̱ dxiꞌu Beꞌ Láꞌazxa chee̱ꞌ,
\v 7 chee̱ ne̱ chee̱ da naca chaweꞌ chee̱ꞌ gácadxu xrlátaje lau Le̱ꞌ, ne zruéꞌedxu xel-la nabán chadía chacanna da dxebeza lázredxu.
\v 8 Da caní zaj naca na da li. Dxaca lazraꞌ gusízrequeznuꞌ benneꞌ caꞌ ca naca da caní chee̱ xelebéꞌ gunne xue xelún benneꞌ caꞌ da chaweꞌ, benneꞌ caꞌ dxeléajle̱ꞌe̱ chee̱ Dios. Da caní zaj naca na da xrlátaje, ne da gaca xuluchine xúgute̱ bénneache.
\v 9 Quebe gulapa naꞌu dizraꞌ xala caꞌ, ne dizraꞌ dxuluzaze bénneache ca naca chee̱ zra xrtawe̱ꞌ, ne dizraꞌ da dxun na bénneache chupa laꞌa, ne da dxulutil-la bénneache da naca chee̱ da bchixruj beꞌe Moisés. Da caní quebe culuén zaj napa na. Dácheze naca na.
\p
\v 10 Che nu benneꞌ dxune̱ꞌ leꞌe chupa laꞌa, bsizre-ne̱ꞌ tu chupa lasa, ne che quebe dxenne̱ꞌ ca dxuꞌu le̱ꞌ, bebéaje̱ꞌ ládujla leꞌe
\v 11 laweꞌ da nézenuꞌ nazrinnaj xichaj lázxdau benneꞌ caní, naꞌ dul-la dxelúnqueze̱ꞌ ba nuzría xi na le̱ꞌ.
\s Da dxal-laꞌ gun Tito
\p
\v 12 Gate sel-laꞌ Artemas u Tíquico naga zuꞌ, be̱n baxuzre xiduꞌ xedajnnaꞌu nedaꞌ lu xe̱zre Nicopolis laweꞌ da bache nunaꞌ suaꞌ nigá beuꞌ zaga caꞌ.
\v 13 Gúcale̱ Zenas, benneꞌ wedé dizraꞌ, ne Apolos, ca da séquenuꞌ. Bnezruj benneꞌ caꞌ ca da zaj nachínene̱ꞌ chee̱ chjaque̱ꞌ lu neza chee̱ꞌ, naꞌ quebe bi xelexázrjene̱ꞌ.
\v 14 Cáꞌanqueze benneꞌ zaj nabábale̱ne̱ꞌ dxiꞌu dxal-laꞌ xulusé̱die̱ꞌ xelune̱ꞌ da chaweꞌ, chee̱ xelácale̱ne̱ꞌ benneꞌ dxelexázrjene̱ꞌ, chee̱ xelaque̱ꞌ benneꞌ guchine Cristo.
\s Pablo dxuzé̱ꞌ Tito dizraꞌ
\p
\v 15 Xúgute̱ benneꞌ zrále̱ne̱ꞌ nedaꞌ dxulugape̱ꞌ lueꞌ diuzre. Bgape diuzre benneꞌ caꞌ zaj nazríꞌine̱ꞌ dxiꞌu lu da naca chee̱ Cristo. Dxenabaꞌ Dios gun chawe̱ꞌe̱ xúgute̱le leꞌe. ¡Caꞌan gaca na!